1

¹ "Saray anak nen Jacob tan saray pamilya ra a kaiba to ran linmad Egipto et saraya:

² "Ruben, Simeon, Levi, Juda,

³ "Isacar, Zabulon, Benjamin,

⁴ "Dan, Neftali, Gad, tan Aser.

⁵ "Pitomplo ya amin iray anak tan apo nen Jacob, a pati si Jose a wadman la ed Egipto.

⁶ "Diad impankurang na panaon si Jose, saramay agagi to, tan amin a totoo ed saman a kailalakan et inaatey ira.

⁷ "Balet amayamay iray anak tan apo na saman a kailalakan, a salanti saray Israelita; dinmakerakel ira tan nagmaliw iran makapanyarin tuloy, kanyan kinmayat iran nanayam ed intiron bansa na Egipto.

⁸ "Sinmabiy panaon a walay balon ari na Egipto ya ag to kabat si Jose.

⁹ "Sayan ari inkuantod saray totoo to, Makapataktakot la ra yan Israelita, ta dakerakel tan makapanyari la ra nen say sikatayo.

¹⁰ Gawaen tayoy kasiliban a pamatonda na idadakel da, ta no walay onsabi-sabin bakal, ag la pigan migampi rad saray kalaban tayo. Onlaban irad satan ed sikatayo, insan da taynan so bansa tayo.

¹¹ Kanyan angipasen iray Egipsio na saray opisyal a mamairap ed saray Israelita. Impankikimey da ra na ambelat diad impamaalagey dad saray siudad na Pitom tan Rameses a panangisempenay abasto na ari.

¹² Balet no panoy impanpapairap na saray Egipsio ed saray Israelita, lalon ondarakel ira tan onaawang so pasen a panaayaman da. Apagaan ed satan iray Egipsio ed saray Israelita,

¹³ kanyan impagmaliw dan masegsegang so bilay da. Pinapasoot da ran inaripen. Impankikimey da rad panagmasa na dalin tan diad panaggawa na laryo; impankikimey da met ni rad kaalogan da. Ag da ran balut kinasian.

¹⁴

¹⁵ Insan say ari na Egipto akisalitad kindi Sifra tan Pua, saray duaran manamianak a Hebrea.

¹⁶ Inkuantod sikara, No mamaanak kayod saray bibiin Hebrea, patey yo so ogaw no laki, balet ag yo papateyen no bii.

¹⁷ Balet sarayan manamianak, lapud walay takot dad Dios, ag da inonur imay ingganggan na ari ed sikara; ag da pinatey iray ogogaw a lalaki.

¹⁸ Impatawag to sirin ira yan manamianak tan tinepet tod sikara, Akin et onyay gagawaen yo? Akin et ag yo papateyen iray ogogaw a lalaki?

¹⁹ Inmebat ira may manamianak, Aliwan singa saray bibiin Egipsia iray bibiin Hebrea, ta mainomay iran mananak; ag ni sinmabiy manamianak et akapananak la ra.

²⁰ Lapud sarayan manamianak et walay takot dad Dios, tinumangan ira na Dios tan initdan to ray anak da. Ag tinmonda so indakel na saray Israelita tan nagmaliw iran makapanyarin tuloy.

²¹

²² Diad satan, say ari angipaakseb na sakey a ganggan ed saray amin a totoo to: Ipaanur yod Ilog na Nilo so balang Hebreon laki a kapangyanak, balet ag yo papateyen iray kapangyanak a bibii.

2

¹ "Diad saman a panaon walay sakey a lakin kabyangay boleg nen Levi ya angasaway biin kabolegan to.

² "Nanlokun yan bii tan nananak na laki. Nen anengneng to a balibalin ogaw so anak to, inyamut ton taloy bulan.

³ "Balet nen ag to la nayarian ya iyamut so anak to, angala na sakey a baskit a papiro; kinapolan to na beket, pian ag naloobay danum. Insan to inlogan ed baskit imay ogaw tan inggaton to ed gilig na ilog a kawalaay atatagey a dika.

⁴ "Say atsi to may ogaw nambantay ed bandad arawi, pian naamtaan to no antoy nagawad samay agi to.

⁵ "Et nibana a say prinsisa ya anak na ari et linmasur ed ilog a manames; balet saray mamarikit a katulong to nanakarakar irad gilig na ilog. Kabebekta anengneng to may baskit ed kawalaay atatagey a dika; ingganggan toy sakey a katulong to a mangalad samay baskit.

⁶ "Nilokasan nen prinsisa imay baskit tan anengneng toy sakey ya ogaw a manakakis. Naabagey to tan inkuanto, Sayan ogaw et anak na sakey ed saray bibiin Hebrea.

⁷ "Insan samay atsi na ogaw inkuanto, Itawagan ta kayo na biin Hebrea, ta komisan to yan ogaw para sikayo?

⁸ "Laka sirin, inkuanen prinsisa. Kanyan nila ton tinawag imay ina na ogaw.

⁹ "Inkuan na prinsisa ed samay ina, Alam yan ogaw tan ikomisan mo ak; upaan ta ka. Inala to sirin imay ogaw tan kinomponi to.

¹⁰ Nen baleg la may ogaw inyakar tod samay prinsisa ya anak na ari. Samay prinsisa inala to may ogaw tan impasen ton anak ton dili. Inkuanto, Diad danum so angaonan ko, kanyan ingaran ko na Moises.

¹¹ Nen baleg lay Moises dinalaw to ray agagi ton Hebreo, et naimatunan toy kakairapan da. Anengneng nen Moises so sakey ya Egipsio a mamapatey ed sakey a Hebreo a kadalaan to.

¹² Nanlingaw-lingaw si Moises; nen anggapoy toon nanengneng to, pinatey to may Egipsio tan intabun tod kabueran.

¹³ Diad ontombuk ya agew pinmaway si Moises tan anengneng to ray duaran Hebreo a manlalaban. Inkuantod samay nankasalanan, Akin et kakabilen moy kaparam a Hebreo?

¹⁴ Inmebat imay too, Siopa so anorod sika a manoley tan manintinsia ed sikami? Labay mo ak a pateyen a singa impamatey mod samay Egipsio? Tinmakot ed satan si Moises tan inkuantod sikaton dili, Akabatan la na totoo imay ginawak.

¹⁵ Nen akabatan na ari so agawa, ingganggan ton pateyen si Moises. Balet batik si Moises ed dalin na Madian tan diman nanayam. Aminsan ya agew a manyodyorung si Moises ed abay na bobun,

¹⁶ nitan la ray pitoran bibii ya anak nen Jetro a pari na Madian, ta onasul iray danum ya iyan dad saray atotung ya inoman na saray karniro tan saray kanding na ama ra.

¹⁷ Balet sinmabi ray pumapastol tan pinapaarawi da ra may bibii. Inmalagey ed satan si Moises, tan inyagel to ra. Pinainom to ni ray ayep da.

¹⁸ Nen sinmempet ira may bibii, si Jetro ya ama ra tinepet tod sikara, Akin et asaksakbay kayon sinmempet natan?

¹⁹ Inmebat ira, Walay sakey a lakin Egipsio ya inyagel to kamid saray pumapastol; inyasulan to kami tan pinainom to ni ray ayep tayo.

²⁰ Tinepet nen ama ra, Iner so kawalaan to tan a too? Akin et tinaynan yo? Tawag yo tan bagaan yon mangan dia.

²¹ Si Moises inmabubon ed panayam tod saman a pamilya, tan impiasawa nen Jetro ed sikato si anak ton Zipora.

²² Nananak si Zipora na ogaw a laki. Nipaakar ed sayan ogaw si Moises inkuanto, Sangkaili ak ed sayan dalin, kanyan Gersom so ngaran na sayan anak ko.

²³ Kalabas na abayag a panaon inatey so ari ed Egipto, balet manngesnges ni ray Israelita ed kairapan na pakakaaripen da, kanyan kinmerew iray tulong ed Dios.

²⁴ Dinengel toy ngesnges da, ta anunotan toy impisipanan tod kindi Abraham, Isaac, tan Jacob.

²⁵ Say Dios anengneng toy pakakaaripen da ray Israelita tan inabagey to ra.

3

¹ "Aminsan ya agew, nen si Moises et mampapastol na saray ayep na katolangan ton Jetro a pari na Madian, imbeltang tod kalawakan iray ayep tan akasabid Sinai, say masanton palandey.

² "Diman pinmanengneng ed sikato so anghil na Katawan ed nengneng na apoy a manlalapud pegley na sakey ya abeban kiew; anengneng nen Moises a mandarlang imay kiew, balet ag napopoolan.

³ "Maya, inkuanen Moises ed sikaton dili, Onasingger ak, ta nengnengen ko no anto yan pakelaw; ag napopoolan so kiew anta mandarlang.

⁴ "Nen anengneng na Katawan a Dios ya onaasingger si Moises, tinmawag ed sikato manlapud pegley na abeban kiew, Moises, Moises! Wadya ak, ebat nen Moises.

⁵ "Ag ka onaasingger dia, inkuan na Dios, ekal mo ray sandalyam, ta masanto so dalin a kawalaan mo.

⁶ "Siak so Dios na saray lalakim, say Dios di Abraham, Isaac, tan Jacob. Sinakuban nen Moises so lupa to, ta tinmakot ya onnengneng ed Dios.

⁷ "Insan say Katawan inkuanto, Anengneng ko so ontan lan kakairapan na saray totook a wadman ed Egipto; nadngel koy tagleey da lapud saray maruksan opisyal da. Amtak so kakairapan da,

⁸ "kanyan linmasur ak, ta iyagel ko rad saray Egipsio, tan itaynan ko ra manlapud saman a dalin; insan ko ra iyakar ed mataba tan maawang a dalin, sakey a dalin a panagagosay gatas tan dilo, a panaayaman natan na saray Cananeo tan Heteo, saray Amorreo tan Perezeo, saray Heveo tan Jebuseo.

⁹ "Nadngel koy tagleey na saray totook tan anengneng kon peteg so pamapairap na saray Egipsio ed sikara.

¹⁰ Natan, ibaki ta ka ed ari na Egipto, pian nipaway mod bansa to iray totook ya Israelita.

¹¹ Balet si Moises inkuantod Dios, Siopa ak ya onarap ed ari tan mangipaway ed Egipto na saray Israelita?

¹² Inmebat so Dios, Say katwaan to, siak so kaibam. Say pakabirbiran ya imbaki ta ka saya: no nipaway mo lad Egipto iray totook, igalang yo ak diad sayan palandey.

¹³ Inkuanen Moises ed Dios, Onla ak ed saray Israelita, ta ibagak ed sikara, Say Dios na saray lalaki yo imbaki to ak ed sikayo; et no tepeten dad siak, Antoy ngaran to? Antoy iyebat kod sikara?

¹⁴ Siak si siak, inkuan na Dios. Ibagam ed sikara, Say natatawag a SIAK ET SIAK, imbaki to ak ed sikayo.

¹⁵ Ibagam ed saray Israelita a siak a Katawan, say Dios na saray lalaki ra, say Dios nen Abraham, Isaac, tan Jacob, so angibakid sika ed sikara. Sikato yay ngaran kod anggad angga; sikato yan ngaran so tawagan na amin a kailalakan.

¹⁶ Laka sirin, ta tipon mo ray pangulo na Israel tan ibagam ed sikara a siak, say Katawan na saray lalaki ra, say Dios di Abraham, Isaac, tan Jacob et pinmanengneng ak ed sika. Ibagam met ed sikara a dinalaw ko ra tan anengneng koy gagawaen na saray Egipsio ed sikara.

¹⁷ Kanyan ginetmak lan ipaway ira ed Egipto a pakapapairapan da, tan iyakar ko ra ed mayaman tan mataba a dalin a panaayaman natan na saray Cananeo, saray Heteo, saray Amorreo, saray Perezeo, saray Heveo, tan saray Jebuseo.

¹⁸ Dengelen day salitaen mod saray totook, insan ka nepeg ya onlad ari na Egipto a kaolup mo ray pangulo na Israel, tan ikuanyod sikato, Pinmanengneng ed sikami so Katawan a Dios min Israelita. Abuloyan mo kami pan onlad kalawakan ed loob na taloy agew, ta mangibagat kamid Katawan a Dios mi.

¹⁹ Amtak ya ag kayo abuloyan na ari na Egipto ya onla, anggad napasoot na biskeg na pakayari.

²⁰ Balet ipakanak so pakayarik ed Egipto tan dusaen ko na saray makapataktakot a pakelaw a gawaen kod man. Kasumpal na sarayan nagawa, abuloyan to kayo lan onla.

²¹ Paabigen koy linawa na saray Egipsio ed sikayo, pian ag kayo ontaynan a kalima-lima.

²² Onkerew so balang biin Israelita ed saray kaabay ton Egipsio, tan diad siopaman a biin Egipsio a manaayam ed abung to, na saray kawes tan saray alahas a balituk tan pilak. Paisolung yo ra yan bengatla ed saray anak yon lalaki tan bibii et, diad ontan, naalaan yo na kayamanan iray Egipsio.

4

¹ "Insan inmebat si Moises ed Katawan, Balet no ag ak bilang sisiaen na saray Israelita, tan ag da dengelen so ibagak, tan supyaten da ak a kuanda, Andi, ag pinmatnag ed sika so Katawan, antoy gawaen ko?

² "Say Katawan tinepet tod kinen Moises, Anto tay sankabembenan mo? Baston, ebat nen Moises.

³ "Ibontuk mod dalin, inkuay Katawan. Imbontuk sirin nen Moises imay baston, et nagmaliw ya oleg, tan imbatikan to.

⁴ "Balet say Katawan inkuantod kinen Moises, Gawat mo tan egnaan mod ikul. Ginawat sirin nen Moises imay oleg tan inegnaan to, et nagmaliw lamet a baston.

⁵ "Imbilin na Katawan ed kinen Moises, Gawam yan pakelaw a pamaneknek mod saray Israelita a say Katawan a Dios na samay lalaki ra, say Dios di Abraham, Isaac, tan Jacob, et pinmanengneng ed sika.

⁶ "Say Katawan kuanto lamet ed kinen Moises, Isoksok moy limam ed dalem na kawes mo. Insoksok nen Moises sirin so lima to, et nen inoyus to akating so lima to tan pinmoti a singa kinapoti na kapes.

⁷ "Inkuan na Katawan lamet ed sikato, Isoksok moy limam ed dalem na kawes mo. Insoksok toy lima to, et nen inoyus to malinis lamet a singa arum a parti na laman to.

⁸ "Inkuan na Katawan, No ag da ka sisiaen tan ag da italtalek so ononan pakelaw, nayarin manisia la ra no nanengneng day kumadwan pakelaw.

⁹ "No ag da ka ni sisiaen ed sarayan duaran pakelaw tan ag da ni dengelen so ibabagam, mangala kay danum ed Ilog na Nilo, insan mo ikalbo ed amagan dalin, et magmaliw a dala.

¹⁰ Balet si Moises inkuanto, Katawan, gendat ya aliwa ak a marunong a mansalita, tan onya ak ni, anggaman ya akitongtong ka lad siak. Makapoy ak a mansalita tan ata-ata ak.

¹¹ Inkuan na Katawan ed sikato, Siopay nanggawa na sangiy too? Siopay nanggagawa a telek tan omel so too? Siopay mangiiter na pakanengneng tan say pakabulag ed too? Aliwa tan siak a Katawan?

¹² Laka la sirin, tulongan ta kan mansalita, tan ibagak ed sika so salitaen mo.

¹³ Balet inmebat si Moises, Aliwan siak, Katawan, so ibakim. Say sananey pa lan too.

¹⁴ Lapud saya akapasnuk so Katawan ed kinen Moises tan kuanto, Anggapo tay kuyam a si Aaron a Levita? Amtak a sikato et marunong a mansalita. Diad tuay tua, si Aaron et abeten to ka tan manliket ed pakanengneng tod sika.

¹⁵ Mitongtong kad sikato tan ibagam so nepeg ton salitaen. Tulongan ta kayo ed pansalita yo tan ibagak ed sikayo so gawaen yo.

¹⁶ Sikatoy mangiyalagey ed sika tan isalitaan to kad saray totoo; singa kad satan Dios ya ibagam ed sikato so salitaen to.

¹⁷ Awit mo tay baston mo, ta ikanam ed panggawa na saray pakelaw.

¹⁸ Sinmempet si Moises tan linmad kinen katolangan ton Jetro tan kuanto, Abuloyan yo ak pa ya ompawil ed saray kakanayon ko man ed Egipto, ta nengnengen ko no mabilay ni ra kasi. Inmabuloy si Jetro tan pinasiput to.

¹⁹ Diman ed Madian say Katawan inkuantod kinen Moises, Pawil ka lad Egipto, ta amin da ra may totoon malabay a mamatey ed sika et inaatey la ra.

²⁰ Inala nen Moises sirin so asawa to tan saray lalakin anak to; impakabayo to rad sakey ya asno, insan ira amaarap ed dalin na Egipto a sankaegnaan to may baston ya imbagay Dios ya awiten to.

²¹ Say Katawan inkuanto lamet ed kinen Moises, No wadman ka lan akaarap ed ari na Egipto, ag mo lilingwanan a gawaen ira may amin a pakelaw, ta inter ko lad sikay pakayarin manggawa. Balet paaweten koy puso to tan ag to ibolus iray totoo.

²² Diad satan ibagam ed ari: Onya so kuan na Katawan ed sika, Si Israel so pangulowan ya anak ko.

²³ Imbagak lad sika ya abuloyan mon ontaynan, pian makapangigalang ed siak, balet ag ka inmabuloy. Natan pateyen koy lakin pangulowan ya anak mo.

²⁴ Diad pasen a panagkampowan nen mamapaarap ed Egipto si Moises, say Katawan inabet to tan papateyen to.

²⁵ Insan angalan tampol si Zipora ya asawa to na matdem a bato tan pinotut toy ngaroy kayaryan na anak ton laki, insan to indiwit imay apotut a laman ed saray sali nen Moises. Lapud sirimonya na panagsegat inkuantod kinen Moises, Sika so asawak ed dala! Lapud saya ag la intuloy na Katawan a pateyen si Moises.

²⁶

²⁷ Legan da ra yan nagagawa, say Katawan inkuantod kinen Aaron, Abet moy Moises diad kalawakan. Linma sirin si Aaron ed masanton palandey, et nen akapanabet ira, inanguban to.

²⁸ Tinongtong nen Moised ed kinen Aaron iray amin a sinalitay Katawan nen ingganggan ton ompawil ed Egipto; imbaga to met ya amin iray pakelaw ya imbilin na Katawan a gawaen to.

²⁹ Insan linmad Egipto ira di Moises tan Aaron, tan tinipon da ray amin a pangulo na saray Israelita.

³⁰ Imbaga nen Aaron ed sikara so amin a sinalitay Katawan ed kinen Moises; insan nanggawa na saray pakelaw si Moises diad imatun da ray katoowan.

³¹ Anisia ra, et nen nadngel dan dinalaw iray Katawan tan anengneng toy ontan lan kakairapan da, tinmuek ira tan angigalang irad Katawan.

5

¹ "Insan di Moises tan Aaron linma rad ari na Egipto tan kuanda, Say Katawan a Dios na Israel kuanto, Abuloyan mo ya onlad kalawakan iray totook, pian makapansilibra ray pista a pamagalang dad siak.

² "Inmebat so ari, Siopa so Katawan? Akin et ondengel ak ed sikato tan abuloyan kon ontaynan iray Israelita? Ag ko kabat itan a Katawan, tan ag ko abuloyan ya ontaynan iray Israelita.

³ "Inmebat ira di Moises tan Aaron, Say Dios na saray Hebreo et impatnag toy sikaton dili ed sikami. Abuloyan mo kami pan onlad kalawakan na taloran agew, ta mangibagat kamid man ed Katawan a Dios mi. No ag mi ya sumpalen a ganggan to, ompatey kamid salot o bakal ya ipadalan to.

⁴ "Inkuan na ari ed kindi Moises tan Aaron, Antoy labay yon ibaga diad pamatonda yo ed saray totoon mankimey? Papawil yon mankimey ira man ya aripen!

⁵ "Dakerakel kayo lan Israelita nen saray Egipsio. Natan balet, labay yo ran patondaen ed saray kimey da!

⁶ "Diad saman met lamlamang ya agew, ingganggan na ari iray opisyal ya Egipsio tan saray kapatas ya Israelita:

⁷ "Itonda yo lay pangiter yod saray totoo na dayami ya ikanad panggaway laryo. Ibaki yo ra, ta sikara lan diliy mananap na dayami.

⁸ "Ag yo babawasan so gendat a bilang na saray laryon gagawaen da. Mangingiras ira, kanyan lawas dan kekerewen ya abuloyan ko ran mangibagat ed Dios da!

⁹ "Itdan yo ray ambebelat a kimey; ag yo ra pampapainawaen, pian anggapoy panaon dan ondengel ed saray salitan tila-tila.

¹⁰ Pinmaway ira may opisyal tan saramay kapatas ya Israelita tan linma rad saray Israelita. Inkuandad saray Israelita, Imbaga na ari ya ag to kayo la itdan na dayamin ikana yo.

¹¹ Ingganggan to a sikayo lan dili so ompaway a mangalay dayami ed inerman a pasen a pakalmoan yo. Balet ag yo babawasan so gendat a bilang na laryo a gagawaen yon inagew-agew.

¹² Kanyan saray Israelita linma ra ed intiron dalin na Egipto a nanaanap na dayami.

¹³ Pinipilit na saramay opisyal iray Israelita a manggaway laryon singa karakel na laryon ginagawa ra nen iitdan da ni ray dayami.

¹⁴ Binabakbak na saramay opisyal iray kapatas ya Israelita ya impasen dan makaoley ed kimey. Et tinepet da, Akin et kulang nen samay gendat a gagawaen yo so ginawa yo natan?

¹⁵ Insan saramay opisyal linma rad ari, ta nandalem ira. Inkuanda, Akin et onyay gagawaen mod sikami, Kagalang ya Ari?

¹⁶ Ag kami nanaitdan na dayami, balet gagangganen da kami nin manggaway laryo. Insan natan leleweten da kami. Saray totoom so nanlapulapwan ed sayan nagagawa.

¹⁷ Inmebat so ari, Mangingiras kayo! Mangingiras kayon talaga! Kampega lan kekerewen yon abuloyan ta kayon onla a mangibagat ed Katawan.

¹⁸ Pawil kayo lad kimey yo! Anggapoy dayamin niiter ed sikayo, balet nepeg a manggawa kayoy singa karakel na gendat a gagawaen yon laryo.

¹⁹ Saramay kapatas abirbir dan mairap so kipapasen da nen niganggan iran manggaway singa karakel na gendat a gagawaen dan laryo.

²⁰ Nen ompapawil la ran nanlapud ari, nabet da ra di Moises tan Aaron a manaalagar ed sikara.

²¹ Inkuandad kindi Moises tan Aaron, Sankanengneng na Katawan yan ginawa yo. Andi-saew a dusaen to kayo, lapud sikayoy makasengeg na pamobosul ed sikami na ari tan saray opisyal to. Initdan yo ray baraan dan mamatey ed sikami.

²² Insan sinmingger lamet ed Katawan si Moises tan kuanto, Katawan, akin et papairapen mo ray totoo? Akin et imbaki mo ak dia?

²³ Nanlapu lad samay insalitaan ta kad ari, pinapairap to met la ra. Et anggapoy ginawam a pangyagel ed sikara!

6

¹ "Insan say Katawan kuantod kinen Moises, Nanengneng mo natan no antoy gawaen kod ari. Pasooten ko ya abuloyan ton ontaynan iray totook. Diad tuay tua, piliten ko a dagdagen to ran taynan day bansa to.

² "Akisalitay Dios ed kinen Moises tan kuanto, Siak so Katawan.

³ "Pinmanengneng ak a Makapanyarin-amin a Dios ed kindi Abraham, Isaac, tan Jacob, balet aliwan diad panamegley na masanton ngaran ko a Yahweh.

⁴ "Akisipanan ak met ed sikara; insipan kon iter ed sikaray dalin na Canaan, say dalin a nanayaman da nen sangkaili rad man.

⁵ "Natan nadngel koy panngesnges na saray Israelita ya aaripenen na saray Egipsio, tan anunotan koy impisipanan ko.

⁶ "Kanyan ibagam ed saray Israelita a sayay kuankod sikara, Siak so Katawan; iyagel ta kayo tan ibolus ta kayo ed pangaaripen na saray Egipsio. Ipakanak so pakapanyarik diad pangiter kod sikara na makapataktakot a dusa, balet iliktar ta kayo.

⁷ "Pagmaliwen ta kayon dilin totook, tan magmaliw a siak so Dios yo. Nakabatan yo a siak so Katawan a Dios yo no ekalen ta kayod maruksan panagoley na saray Egipsio.

⁸ "Iyakar ta kayod dalin a sinambaan ko ya iter ed kindi Abraham, Isaac, tan Jacob; iter kod sikayo a kayaryan yo. Siak so Katawan.

⁹ "Imbaga ya nen Moises ed saray Israelita, balet ag ira dinmengel ed sikato, ta nakalan iray ilalo lapud kakairapan dad pakakaaripen ed sikara.

¹⁰ Insan say Katawan kuantod kinen Moises,

¹¹ Laka, ta ibagam ed ari na Egipto a nepeg ton abuloyan a taynan na saray Israelita so dalin to.

¹² Balet inmebat si Moises, Panoy idengel ed siak na ari, anta ag ak dengelen na anggan saray Israelita? Makapoy ak ni met a mansalita.

¹³ Ingganggan na Katawan si Moises tan si Aaron: Ibaga yod saray Israelita tan diad ari na Egipto ya ingganggan ta kayon mangipangulo ed saray Israelita diad panaynan dad Egipto.

¹⁴ Si Ruben a pangulowan ya anak nen Jacob et apatiray lalakin anak to a di Hanoc, Fallu, Hezron, tan Carmi; sikaray sengeg na saray boleg a natatawag onung ed kangaranan da.

¹⁵ Si Simeon anemiray lalakin anak to a di Jemuel, Jamin, Ohad, Jakin, Zohar, tan Saul ya anak na biin Canamsa; sikaray sengeg na saray boleg a natatawag onung ed kangaranan da.

¹⁶ Si Levi taloray lalakin anak to a di Gerson, Coat, tan Merari; sikaray sengeg na saray boleg a natatawag onung ed kangaranan da. Nambilay na sanlasus tan talomplo tan pitoy taon si Levi.

¹⁷ Duaran lalaki so anak nen Gerson a di Libni tan Simei, tan amayamay so kabyangay boleg da.

¹⁸ Si Coat apatiray lalakin anak to a di Amram, Izar, Hebron, tan Uziel. Nambilay si Coat na sanlasus tan talomplo tan taloy taon.

¹⁹ Si Merari duaray lalakin anak to a di Mali tan Musi. Sikara yay anak nen Levi tan saray kabyangay boleg da.

²⁰ Inasawa nen Amram si Jacobed ya agi nen ama to; saray anak da et di Aaron tan Moises. Nambilay si Amram na sanlasus tan talomplo tan pitoy taon.

²¹ Si Izar taloray lalakin anak to a di Core, Nefeg, tan Zicri.

²² Si Uziel taloray lalakin anak to a di Misael, Elzafan, tan Sitri.

²³ Si Aaron inasawa toy Eliseba ya anak nen Aminadab tan agi nen Naazon; saray anak da et di Nadab, Abiu, Eleazar, tan Itamar.

²⁴ Si Core taloray lalakin anak to a di Asir, Elcana, tan Abiasaf; sikaray sengeg na saray kabyangay boleg nen Core.

²⁵ Si Eleazar a lakin anak nen Aaron inasawa toy anak nen Futiel; say anak da et si Finees. Sikara yay pangulo na saray pamilya tan saray boleg na tribu nen Levi.

²⁶ Di Aaron tan Moises so angibagaan na Katawan, Ipangulo yon ipaway ed Egipto iray tribu na Israel.

²⁷ Sikara so totoon angibagad ari na Egipto ya ibolus to ray Israelita.

²⁸ Nen akisalitay Katawan ed kinen Moises diad dalin na Egipto,

²⁹ inkuanto, siak so Katawan. Salitam ed ari na Egipto iray amin ya ibabagak ed sika.

³⁰ Balet inmebat si Moises, Amtam so kakapoyan kon mansalita. Panoy idengel na ari ed siak?

7

¹ "Say Katawan kuanto, Pagmaliwen ta kan singa Dios ed ari, tan si kuyam ya Aaron so pagmaliwen kon propitam a misalita ed sikato.

² "Ibagam ed Aaron iray amin ya iganggan kod sika, tan ibaga tod ari ya abuloyan to ray Israelita a taynan day bansa to.

³ "Balet paaweten koy puso na ari, tan ag to kayo dengelen, anggan antoy karakel so gawaen kon makapataktakot a bengatla ed Egipto.

⁴ "Insan iter kod Egipto so ambelat a dusa tan iwanwan ko ray boleg na totook diad itaynan da.

⁵ "Naamtaan ed satan na saray Egipsio a siak so Katawan no iyatagey koy taklay ko sumpad sikara tan ipaway kod bansa ra iray Israelita.

⁶ "Sinumpal di Moises tan Aaron so ingganggan na Katawan ed sikara.

⁷ "Mantaon na walomplo si Moises tan walomplo tan talo si Aaron nen akisalita ra ed ari.

⁸ "Say Katawan kuantod kinen Moises tan Aaron,

⁹ "No say ari et kaukolan to kayon manggaway milagro a pakabirbiran na katwaan na ibabaga yo, ibagam ed Aaron ya alaen toy baston to, insan to ibontuk ed arap na ari, et magmaliw ya oleg.

¹⁰ Linma ra sirin di Moises tan Aaron ed ari tan ginawa ra so ingganggan na Katawan. Imbontuk nen Aaron so baston to ed arap na ari tan saray opisyal to, et nagmaliw ya oleg.

¹¹ Insan impaawit na ari iray makabat a totoo to tan saray mangsalamangka to, tan diad dunong dan mansalamangka ginawa ra so singa agawad baston nen Aaron.

¹² Imbontuk da ray baston da, et nagmaliw iran oleg. Balet samay baston nen Aaron inaakmun to ra may baston da.

¹³ Balet nansiansian anawet so puso na ari, tan onung na imbaga na Katawan, ag dinmengel ed kindi Moises tan Aaron so ari.

¹⁴ Insan say Katawan kuantod kinen Moises, Anawet a tuloy so puso na ari tan ag to abuloyan ya ontaynan iray totook.

¹⁵ Kanyan laka, ta abet mo no kabwasan no onlad Ilog na Nilo. Awit mo may baston a nagmaliw ya oleg, tan alagar mod gilig na ilog.

¹⁶ Insan mo ikuan ed ari, Say Katawan a Dios na saray Hebreo et imbaki to ak a mangibagad sika ya abuloyan mo lan onla ray totoo to, pian nigalang da ed kalawakan. Balet anggad natan ag ka a dinmengel.

¹⁷ Natan, Kagalang ya Ari, say Katawan kuanto a naamtaan moy peteg ya inkasikato diad panamegle na gawaen to. Nengneng mo, ibakbak kod tapew na ilog yan baston, et magmaliw a dala so danum.

¹⁸ Ompatey iray sira, tan ombangebanget so ilog tan ag nayarin inomen na saray Egipsio.

¹⁹ Say Katawan kuantod kinen Moises, Ibagam ed kinen Aaron ya awiten to may baston to tan iyatagey ton ipetek ed tapew na amin ya ilog, banawang, tan amin a dipositoway danum ed Egipto. Et say danum magmaliw a dala tan nawalaan na dala so intiron dalin ya anggan diad saray kiew tan baton pananginay danum.

²⁰ Sinumpal sirin di Moises tan Aaron iray ingganggan na Katawan. Diad arap na ari tan saray opisyal to, inyatagey nen Aaron imay baston to tan imbakbak tod tapew na ilog, et nagmaliw a dala so amin a danum to.

²¹ Inatey iray sira ed ilog, tan binmangebanget so ilog, kanyan ag makainom diman iray Egipsio. Walay dala ed amin a pasen ed Egipto.

²² Insan saray managsalamangka na ari inalig da so ginawa nen Aaron lapud dunong dan mansalamangka. Kanyan anawet nin siansia so puso na ari. Onung na imbaga la na Katawan, say ari ag to ra dinengel di Moises tan Aaron.

²³ Pinmoliktar la laingen a pinmawil ed palasio to tan ag to insingansingan so agawa.

²⁴ Amin da ray Egipsio et nankotkot irad gilig na ilog tan dimay nanaalaan day inomen da, ta ag ira makainom ed danum na ilog.

²⁵ Linmabas so pitoran agew nanlapud samay impamakbak na Katawan ed ilog.

8

¹ "Insan inkuan na Katawan ed kinen Moises, Lakad ari, ta ibagam ed sikato a say Katawan kuanto, Abuloyan mon onla ray totook, pian nigalang da ak.

² "No ag mo ra abuloyan, dusaen koy bansam diad panamegley na saray patang ya onkayat ed intiron bansam.

³ "Napano na patang so Ilog na Nilo kanyan onsakbit ira tan onla rad palasiom, diad kuartom, diad katrim, diad kaabungan na saray opisyal mo tan saray totoom, tan anggan diad saray ornowan tan diad saray kawalin panaggawaan moy tinapay.

⁴ "Onluklukso rad laman mo, diad saray totoom, tan diad amin ya opisyal mo.

⁵ "Say Katawan kuantod kinen Moises, Ibagam ed kinen Aaron ya iyatagey ton ipetek ed tapew na saray ilog so baston to, diad saray banawang, tan diad amin a dipositoway danum, ta pasakbiten to ray patang tan pakayaten to rad intiron dalin na Egipto.

⁶ "Kanyan si Aaron inyatagey ton impetek ed amin a tapew na danum so baston to, et sinmakbit iray patang tan kinmayat irad intiron bansa.

⁷ "Balet saramay managsalamangka impakana ray donung dan mansalamangka, tan pinasakbit da met iray patang ed intiron bansa.

⁸ "Say ari impaawit to ra di Moises tan Aaron tan kuanto, Ipikasi yod Katawan a pagiten to ra yay patang, insan ko abuloyan ya onla la ray totoom, pian makapangibagat irad Katawan.

⁹ "Inmebat si Moises, Maliket ak a mangipikasid sika. Ibagam labat so oras a pangipikasik ed sika, saray opisyal mo, tan saray totoom. Diad ontan onandi ray patang, tan anggapoy nakeraan likud ed saray patang a walad Ilog na Nilo.

¹⁰ Inmebat so ari, Ipikasian mo ak nabwas. Inkuanen Moises, Gawaen ko so onung na kerew mo, et diad ontan naamtaan mo ya anggapoy arum a dios a makapiparad Katawan a Dios mi.

¹¹ Saray patang onandi rad sika, saray opisyal mo tan saray totoom, tan anggapoy nakeraan a patang likud ed saray patang a walad Ilog na Nilo.

¹² Insan tinaynan di Moises tan Aaron so ari, tan akikasid Katawan si Moises a paandien to ray patang ya imbaki tod ari.

¹³ Say Katawan sinumpal to so kerew nen Moises, kanyan inaatey iray patang a walad kaabungan, diad saray solar, tan saray walad kaalogan.

¹⁴ Saray Egipsio inlolosbo da ra may inaatey a patang, tan binmanget so intiron dalin.

¹⁵ Nen anengneng na ari ya inaatey la ra may patang, pinaawet to lamet so puso to tan onung na imbaga la na Katawan, ag dinmengel so ari ed kindi Moises tan Aaron.

¹⁶ Say Katawan kuantod kinen Moises, Ibagam ed Aaron a bakbaken to na baston to so dalin, et magmaliw a timel ya amin iray dabuk ed intiron dalin na Egipto.

¹⁷ Kanyan si Aaron binakbak to na baston to so dalin, et nagmaliw a timel ya amin ray dabuk ed Egipto, tan inaambongalan da ray katoowan tan saray ayayep.

¹⁸ Sinali na saramay managsalamangka a palesaen iray timel diad panamegley na panagsalamangka ra, balet ag da nayarian. Kawalaan na timel so amin a pasen,

¹⁹ tan inkuan na saramay managsalamangka ed ari, Say Dios so nanggawad saya! Balet anawet nin siansia so puso na ari tan onung na imbaga lay Katawan, ag dinmengel so ari ed kindi Moises tan Aaron.

²⁰ Say Katawan kuantod kinen Moises, Diad kabkabwasan nabwas, laka ta abet moy ari no mamaarap ed ilog, tan ibagam ed sikato a say Katawan kuanto, Abuloyan mon onla la ray totook, pian nigalang da ak.

²¹ Pasakbayan ta ka a no ag mo ra abuloyan, dusaen ta ka diad pangibakik na amayamay ya apangat ed sika, saray opisyal mo, tan diad saray totoom. Napano na apangat iray kaabungan na saray Egipsio, tan say dalin da.

²² Balet ag ko pibaliy lugar a Gosen a panaayaman na saray totook, pian anggapod may apangat. Gawaen koy onya, pian naamtaan mo a siak a Katawan so panlalapwan na saray nagagawa ed sayan dalin.

²³ Idomak so gawaen kod saray totook ed saray totoom. Nagawa yan milagro nabwas.

²⁴ Say Katawan ginawa to so onung na imbaga to. Imbaki to ray dakerakel ya apangat diad palasio na ari tan diad kaabungan na saray opisyal to. Aderal so intiron dalin na Egipto lapud saramay apangat.

²⁵ Insan impaawit na ari ira di Moises tan Aaron tan kuanto, Laka yo la, ta mangigalang kayod Dios yo diad loob na sayan bansa.

²⁶ Inmebat si Moises, Aliwan manepeg so ontan a gawaen, ta makapasnuk iray Egipsio no nanengneng da ray ayayep ya ibagat mid Katawan a Dios mi. No ikana mi ray ayep a pakapasnukan na saray Egipsio tan ibagat mi rad pasen a nanengneng da kami, tupaken da kami ya anggad ag mi ipatey.

²⁷ Nakaukolan miy manakar na taloy agew diad iyakar mid kalawakan tan diman kami mangibagat ed Katawan a Dios mi, onung na ingganggan tod sikami.

²⁸ Say ari kuanto, Abuloyan ta kayon mangibagat ed Katawan a Dios yo diad kalawakan, dapot ag kayo oonlad arawdawi. Ipikasi mo ak.

²⁹ Inmebat si Moises, Kataynan ko dia, ipikasik ed Katawan a nabwas taynan kayo na saray apangat, sika, saray opisyal mo, tan saray totoom. Balet ag mo kami la papalikdoen, tan ag mo la sesebelan iray totoo ed iyakar dan mangibagat ed Katawan.

³⁰ Tinaynan nen Moises so ari tan akikasid Katawan,

³¹ et say Katawan ginawa to so kerew nen Moises. Tinaynan na saray apangat so ari, saray opisyal to, tan saray totoo to; anggapoy anggan sakey ya atilak.

³² Balet pinaawet ni na ari so puso to, tan ag to lamet inabuloyan ya onla la ray Israelita.

9

¹ "Say Katawan kuantod kinen Moises, Lakad ari, ta ibagam ed sikato a say Katawan a Dios na saray Hebreo et kuanto, Abuloyan mon onla ray totook, pian nigalang da ak.

² "No ag mo ni ra abuloyan ya onla,

³ "dusaen ta ka diad pangipadalan ko na ambelat a salot ed saray amin ya ayayep yosaray kabayo yo, saray asno yo, saray kamilyo yo, saray baka yo, saray karniro yo, tan saray kanding yo.

⁴ "Idomak so gawaen kod saray ayayep na saray Israelita ed saray ayayep na saray Egipsio, et anggapoy ompatey ya ayep a kayaryan na saray Israelita.

⁵ "Siak a Katawan inggetar ko a nabwas so panggawak ed saya!

⁶ "Diad kaimbwasan ginawa na Katawan so imbaga to, tan inaatey ya amin iray ayayep na saray Egipsio, balet anggapoy inatey ya anggan sakey ya ayep na saray Israelita.

⁷ "Impatepet na ari no anto so agawa tan nibagad sikato ya anggapoy inatey ya ayep na saray Israelita. Balet anawet nin siansiay puso to tan ag to inabuloyan ya onla la ray Israelita.

⁸ "Insan say Katawan kuantod kindi Moises tan Aaron, Mangala kayoy sankaakup a dapul ed palbaan; si Moises so mangisibwag ed satan ya dapul ed tagey diad arap na ari.

⁹ "Onkayat ira yan singa pinon dabuk ed intiron dalin na Egipto, tan mangiter ira na mansayon pelsa ed saray katoowan tan diad saray ayayep ed inerman a pasen.

¹⁰ Kanyan angala ray daiset a dapul tan nanalagey ira ed arap na ari; insibwag nen Moises ira may dapul ed tagey tan angiter ira na mansayon pelsa ed saray katoowan tan diad saray ayayep.

¹¹ Ag ayarian na saramay managsalamangka so akiarapan ed kinen Moises, lapud napnoy laman da na pelsa a singa amin da ray arum ya Egipsio.

¹² Balet say Katawan pinaawet toy puso na ari tan onung na imbaga la na Katawan, ag dinmengel ed kindi Moises tan Aaron.

¹³ Inkuan na Katawan ed kinen Moises, Nabwas na kabkabwasan lakad ari, ta ibagam ed sikato a say Katawan a Dios na saray Hebreo kuanto, Abuloyan mon onla la ray totook, pian nigalang da ak.

¹⁴ No ag mo ni ra abuloyan, aliwa labat a saray opisyal mo tan saray totoom so dusaen ko, no ag ingen pati sika, pian naamtaan mo ya anggapoy kaparak diad intiron mundo.

¹⁵ Anggapo kayo la komun ya amin natan, no pinadalan koy salot ed sika tan saray totoom.

¹⁶ Balet inabuloyan ta ka nin mambilay, ta labay kon ipanengneng ed sika so pakapanyarik, et diad ontan nikayat ed intiron mundo so dayew ko.

¹⁷ Balet siansia nin mapaatagey ka tan ag mo ni abuloyan ya ontaynan iray totook.

¹⁸ Diad onyan oras nabwas paoranen ko na kristal; ag ni yan balut agawa diad Egipto anggan kapigan.

¹⁹ Kanyan paonlam ed pasen a walay tarung sirin iray amin ya ayayep yo tan amin a bengatla a walad paway. Napataan ya amin iray totoo tan ayayep a walad paway ya anggapoy tarung, et ompatey ira.

²⁰ Ataktakot iray arum ya opisyal na ari lapud samay imbaga na Katawan, kanyan pinaonla dad pasen a walay tarung iray aripen da tan saray ayayep da.

²¹ Ag insingansingan na saray arum imay pasakbay na Katawan tan pinaolyan dad paway na abung iray aripen da tan saray ayayep da.

²² Insan say Katawan kuantod kinen Moises, Itorom ed tawen so limam, et ompelag ed intiron dalin na Egipto iray kristal tan napataan iray totoo, saray ayayep, tan amin a tanaman ed kaalogan.

²³ Kanyan si Moises intoro tod tawen imay baston to, et pinakarul na Katawan tan pinapelag to ray kristal, tan kinmikirmat ed tapew na dalin. Say Katawan pinapelag to so

²⁴ ankakabaleg a kristal, a katekep day kirmat. Sankaksilan la yan oran na kristal; ag nin balut agaway onya ed dalin na Egipto.

²⁵ Diad intiron dalin na Egipto tinutumba na kristal iray amin a bengatlan walad paway, a pati amin da ray totoo tan saray ayayep. Impalanas da ray amin a tanaman ed kaalogan tan inlulupak da ray amin a kakiewan.

²⁶ Say Gosen labat a panaayaman na saray Israelita so pasen ya anggapoy pinmelag a kristal.

²⁷ Impaawit na ari ira di Moises tan Aaron tan kuanto, Siak natan so nankasalanan; say Katawan so walad katonungan, balet saray totook tan siak so walad kaogsan.

²⁸ Mampikasi kayod Katawan! Ag mi la natepelan so kairapan ya iiter na sarayan karul tan kristal! Abuloyan ta kayo lan ontaynan; ag kayo la dia manaayam.

²⁹ Inkuanen Moises ed sikato, Kapaway kod siudad, iyatagey ko ray limak diad pampikasik ed Katawan. Ontonday karul, tan naandi la ray kristal, pian naamtaan mo a kayaryan na Katawan so mundo.

³⁰ Balet amtak ya ag ni antakot so Katawan a Dios, sika tan saray opisyal mo.

³¹ Aderal iray tanaman a lino tan sibada lapud aaniyen iray sibada, tan ombubuskag la ray rosas na lino.

³² Balet anggapoy aderal a trigo, lapud maeta ni ray bunga ra.

³³ Tinaynan nen Moises so ari, pinmaway ed siudad, tan inyatagey to ray lima to diad impanpikasi tod Katawan. Tinmonday karul, saray kristal, tan say oran.

³⁴ Nen anengneng na ari so agawa, nankasalanan lamet. Pinaawet toy puso to tan ontan met na saray opisyal to.

³⁵ Anawet so puso nen ari, kanyan ag to inabuloyan ya ontaynan iray Israelita, onung na impasakbay la na Katawan diad panamegley nen Moises.

10

¹ "Insan inkuan na Katawan ed kinen Moises, Laka, ta miarapan kad ari. Pinaawet koy puso to tan saray opisyal to, pian nagawaan kod imatun da ira yan milagro.

² "Ontan met ginawak ira yan milagro, pian nayarian yon salitaen ed saray anak yo tan saray apo yo so impamaabebak ed saray Egipsio nen nanggagawa ak na saray milagro. Naamtaan yo a siak so Katawan.

³ "Kanyan di Moises tan Aaron linma rad ari tan kuandad sikato, Say Katawan a Dios na saray Hebreo kuanto, Anggad kapigay ag mo itoluk ed siak? Abuloyan mo lan ontaynan iray totook, pian nigalang da ak.

⁴ "No ag mo ni ran siansia abuloyan, paonlaen ko nabwas ed bansam iray dorun.

⁵ "Dakerakel iran tuloy, kanyan nakayatan day intiron dalin. Kanen day amin a bengatlan ag dineral na saramay kristal, ya anggan saray nakdaan a kakiewan.

⁶ "Panoen da ray palasiom tan saray kaabungan na saray opisyal mo tan amin a totoom. Mapalaloy panderal da; anggan saray lalaki yo et ag ira akanengneng na onyan panagderal da. Insan imbeneg nen Moises so ari tan linma la.

⁷ "Saray opisyal na ari kuandad sikato, Kapigay pangangga na panggunigon na sayan too ed sikatayo? Abuloyan mo la ray Israelitan lalaki ya ontaynan, pian nigalang day Katawan a Dios da. Ag mo ta nanenengneng ya aderal lay Egipto?

⁸ "Kanyan pinapawil da ra di Moises tan Aaron ed ari tan kuantod sikara, Nayarian yo lay onla a mangigalang ed Katawan a Dios yo. Balet siopa ray talagan onla?

⁹ "Inmebat si Moises, Onla kamin amin a pati saray anak mi tan saray mamatakken ed sikami. Awiten mi ray anak min lalaki tan bibii, saray karniro, saray kanding tan saray baka mi, lapud mampista kami a pamagalang mid Katawan.

¹⁰ Say ari kuanto, Sambaan kod Katawan ya ag kon balut paawit ed sikayo ray anak yon bibii tan saray ogogaw! Malinew a mankokomplut kayon onlaban ed sikami.

¹¹ Andi, ag yo ra aawiten! Saray lalaki labat so onlan mangigalang ed Katawan no sikatoy labay yo. Lapud saya, apataynan ira di Moises tan Aaron ed arap na ari.

¹² Insan say Katawan kuantod kinen Moises, Itorom ed intiron dalin na Egipto so limam, pian onla rad man iray dorun. Onsabi ra tan kanen day amin a tanaman ya ag aderal na oran a kristal.

¹³ Kanyan intoro nen Moises so baston to tan sanagew tan sanlabin pinasiplug na Katawan so dagem a nanlapud bokig. Diad kaimbwasan awit na dagem iray dorun.

¹⁴ Mapalet iran sinmabi tan kinayatan day intiron bansa. Sankarakelan la man ya anengneng a dorun, tan anggapo lay mipara ed karakel da anggan kapigan a panaon nen saman tan diad arapen.

¹⁵ Kinobutan day intiron dalin ya anggad andeket so nengneng to; binuag day amin a bengatlan ag aderal na oran a kristal, pati amin a bungay kakiewan. Anggapoy atilak a birdi ed anggan dinan a kiew odino tanaman ed intiron dalin na Egipto.

¹⁶ Insan say ari impaawit ton tampol ira di Moises tan Aaron tan kuanto, Nankasalanan ak ed Katawan a Dios yo tan diad sikayo.

¹⁷ Pirdona yo ak pan maminsan labat ni ed sayan kasalanan ko tan pikasi yod Katawan a Dios yo a paandien to lad siak yan makapatey a dusa.

¹⁸ Tinaynan nen Moises so ari tan akikasid Katawan.

¹⁹ Say Katawan pinasiplug toy mabisbiskeg a dagem a nanlapud sagur; impalir na sayan dagem ira may dorun tan imbantak to ran amin ed Dayat ya Ambalanga. Anggapoy anggan sakey a dorun ya atilak ed intiron Egipto.

²⁰ Balet pinaawet na Katawan so puso na ari, kanyan ag to inabuloyan ya ontaynan iray Israelita.

²¹ Insan inkuan na Katawan ed kinen Moises, Itorom ed tawen so limam, et nakobutan na mapalalon bilonget so intiron dalin na Egipto, a diad kinabilonget to nalikna na katoowan.

²² Si Moises intoro tod tawen so lima to, tan binmilbilonget ed loob na taloran agew so intiron dalin na Egipto.

²³ Ag makapannenengnengan iray Egipsio, kanyan anggapoy anggan sakey a pinmaway ed abung to ed loob na taloy agew. Balet walay liwawa ed pasen a panaayaman na saray Israelita.

²⁴ Impaawit na ari si Moises tan kuanto, Nayarian yo lay onla a mangigalang ed Katawan; nayarian yo lan awiten iray bibii tan saray ogogaw. Balet itilak yo dia ray karniro yo, saray kanding yo, tan saray baka yo.

²⁵ Inmebat si Moises, Ontan sirin, sikay mangiter ed sikami na saray ayayep a para ibagat tan saray bagat a popoolan ya isaklang mi rad Katawan a Dios mi.

²⁶ Andi, awiten mi ray ayayep mi; ag kamin balut mangitilak. Sikamin dili so nepeg a mampili na saray ayayep ya ikana mid pangigalang ed Katawan a Dios mi. No ag kami ni akasabid man, ag mi naamtaan no dinan iran ayep so ibagat mid sikato.

²⁷ Pinaawet na Katawan so puso na ari, kanyan ag to abuloyan ya onla la ray Israelita.

²⁸ Inkuantod kinen Moises Arawi ka diad arap ko! Ag ka la ompapanengneng ed siak! No nanengneng ta ka ni, andi-saew ya ompatey ka!

²⁹ Inmebat si Moises, No sikatoy kuan mo! Ag mo ak lan balut sirin nanengneng.

11

¹ "Insan say Katawan kuantod kinen Moises, Mangiter ak niy sakey a kaonuran a dusa ed ari na Egipto tan diad saray totoo to. Kayari to ya, abuloyan to kayo lan ontaynan. Diad tuay tua, pasooten to kayo lan pataynanen ya amin.

² "Misalita ka natan ed saray Israelita tan ibagam ed sikara a mikerew irad saray kakaabay da na saray pilak tan saray balituk ya alahas.

³ "Say Katawan impagmaliw ton magalang iray Egipsio ed saray Israelita. Impasen na saray opisyal tan amin a katoowan a matalonggaring a tuloy si Moises.

⁴ "Insan si Moises kuantod ari, Say Katawan kuanto, Diad mampegley labi onliber ak ed intiron dalin na Egipto

⁵ "tan ompatey so balang pangolowan a lakin Egipsio, manlapud pangulowan a lakin anak na ari, a sikatoy nepeg ya onsalat a manari, ya anggad lakin anak na aripen a biin mangagiling na trigo. Ompatey met ya amin iray besag ya anak na amin ya ayep.

⁶ "Niwalad satan so ontan lan akisan ed intiron Egipto tan satan ya akis et ag nin balut agawa ed imbeneg a panaon, odino nagawa ed arapen a panaon.

⁷ "Balet anggapoy anggan aso ya ondangul ed saray Israelita, odino anggan diad saray ayayep da. Diad satan naamtaan yo a siak a Katawan idomak so gawaen kod saray Egipsio ed saray Israelita.

⁸ "Insumpal nen Moises so pansasalita to diad impangikuanto, Ondagod siak ya amin iray opisyal mo tan ondakmomo rad siak, tan kerewen dad siak ya itaynan ko la ray amin a totook. Kayari to tan, ontaynan ak la. Insan linma lay Moises a mapalaloy pasnuk to.

⁹ "Say Katawan inkuantod kinen Moises, Ituloy na ari so ag to idengel ed sika, pian nadakelan koy milagron gawaen ko ed Egipto.

¹⁰ Ginawa di Moises tan Aaron ira yan amin a milagro diad arap na ari, balet pinaawet na Katawan so puso na ari, kanyan ag abuloyan na ari ya ontaynan iray Israelita ed bansa to.

12

¹ "Say Katawan akisalitad Moises tan Aaron diad Egipto. Inkuanto,

² "Sayan bulan et ononan bulan na taon para sikayo.

³ "Iter mo ra yan bilin ed amin ya Israelita: diad kumaplon agew na sayan bulan say balang ateng a laki et nepeg a mamili na sakey a kordiro odino sakey a kilaw na kanding a para pamilya to.

⁴ "No lapud kinamelag na pamilya to et ag da naoput so intiron ayep, say pamilya to tan say pamilyan kaabay to so mannanabang a mangan na sakey ya ayep, onung na karakel na kabyangan na saray pamilya ra tan onung na nayarian a kanen na kapag too.

⁵ "Nayarian yon pilien so sakey a karniro odino sakey a kanding, balet nakaukolan a kalakyan a mansakey taon tan anggapoy deral na laman to.

⁶ "Insan diad labi na kumalabinapat ya agew na bulan, say amin a totood Israel et pateyen da ray ayayep a para paskua.

⁷ "Alaen na saray totoo so dala, insan da iporanis ed saray lusek ya akapeketan na puirta tan diad tagey na puirta na abung a panganan ed ayep.

⁸ "Diad satan a labi ikalut so laman na ayep insan ipangan ed ampait a pising tan diad tinapay ya anggapoy libadura.

⁹ "Ag yo kakanen a tariwa odino inlambung, no ag ingen akan yon pinolpugan a pati olo to, sali to, tan saray loob-loob to.

¹⁰ Ag kayo mangikekera ya anggad kabwasan; no walay nakeraan yo, nepeg yon poolan.

¹¹ No kanen yo, nepeg ya akakawes ki la na pambiahi yo, akasandalya kayo la tan sankabembenan yo lay baston yo; ganatan yoy mangan. Sikatoy Pista na Paskua a pamagalang ed siak a Katawan.

¹² Diad satan a labi onliber ak ed intiron dalin na Egipto, pateyen koy balang pangulowan ya anak a laki tan amin a besag ya anak na ayep tan dusaen kon amin iray diriyos na Egipto. Siak so Katawan.

¹³ Say dala ed saray lusek ya akapeketan na puirta et tanda a pakaamtaan ed saray abung a panaayaman yo. No nanengneng koy dala, labsanan ta kayo tan ag ta kayo pasakitan no dusaen ko ray Egipsio.

¹⁴ Nepeg yo yan silibraan ya agew tan sikatoy pakanudnunotan yo ed ginawak, siak a Katawan. Silibraan yo ed anggan kapigan a panaon.

¹⁵ Say Katawan kuanto, Diad loob na pitoran agew ag kayo mamangan na tinapay a pinaalsad libadurasaray tinapay ya anggapoy libadura labat so kanen yo. Diad ononan agew ibantak yoy amin a libaduran narumog yo ed kaabungan yo, ta no walay Israelitan mangan na tinapay a nanlibadura legan na sarayan agew, ag la nibilang a sakey ed saray totook.

¹⁶ Diad ononan agew tan diad kumapiton agew, mantitipon kayo a mangigalang ed siak. Ag kayo mankikimey legan na saratan ya agew, likud ed pangiparaan yo na kanen yo.

¹⁷ Silibraan yo yan pista, ta diad sayan agew impaway kod Egipto iray tribu yo. Diad anggan kapigan a panaon nepeg yon silibraan yan agew a sakey a pista.

¹⁸ Manlapud labi na kumalabinapat ya agew na ononan bulan ya anggad labi na kumaduamplo tan sakey ya agew, ag kayo mamangan na tinapay a pinaalsad libadura.

¹⁹ Diad loob na pitoran agew nepeg ya anggapoy libaduran narumog ed kaabungan yo, ta siopaman ed sikayon Israelita odino sangkailin mangan na tinapay a pinaalsad libadura, ag la nibilang a sakey ed saray totook.

²⁰ Tinawag nen Moises ya amin iray pangulo na Israel tan kuantod sikara, Mamili so balang sakey ed sikayo na sakey a kordiro odino sakey a kilaw na kanding tan pateyen to, pian nasilibraan na saray pamilya yo so Paskua.

²¹

²² Mangala kayoy sangay isopo, isawsaw yod palangganan nankargay dala na ayep, insan yo iporanis ed saray lusek ya akapeketan na puirta tan diad panuksolan ed tagey na puirta na abung yo. Ag kayo ompapaway ed abung yo ya anggad kabwasan.

²³ Ta onliber ed Egipto so Katawan a mamatey ed saray Egipsio, et no nanengneng toy dala ed saray panuksolan tan diad saray lusek ya akapeketan na saray puirta, ag to la palooben ed kaabungan yo so Anghil na Patey tan ag to kayo pateyen.

²⁴ Sikayo tan saray anak yo et nepeg yon onuren ed ando lan ando ira yan bilin.

²⁵ No onloob kayod dalin ya insipan ya iter ed sikayo na Katawan, nepeg yon gawaen yan sirimonya.

²⁶ No tepeten ed sikayo na saray anak yo, Antoy kabaliksan na sayan sirimonya?

²⁷ ebatan yo ra, Sikatoy bagat na Paskua a pamagalang ed Katawan, ta nilabsanan to ray kaabungan na saray Israelita nen wala rad Egipto. Pinatey to ray Egipsio, balet ag to kami pinatey. Tinmuek iray Israelita tan inggalang day Katawan.

²⁸ Insan linma la ra tan sinumpal da may ingganggan na Katawan ed kindi Moises tan Aaron.

²⁹ Diad pegley labi, pinatey na Katawan iray amin a lalakin pangulowan ya anak ed Egipto manlapud lakin pangulowan ya anak na ari, a sikatoy onsalat a manari, ya anggad lakin anak na priso ya akolung ed dalem na ambilbilonget a Prisowan; inatey met ya amin iray besag ya anak na saray ayayep.

³⁰ Diad saman a labi say ari, saray opisyal to, tan amin nin arum ya Egipsio et abangon ira. Walay agawan baleg ya akisan ed intiron Egipto, lapud anggapoy abung ya anggapoy inatey to.

³¹ Diad saman a labi impatawag na ari ira di Moises tan Aaron tan kuantod sikara, Taynan ki la, sikayo ran Israelita! Taynan yo lay bansak; laka yo lan mangigalang ed Katawan onung na kekerewen yo.

³² Awit yo ray karniro yo, saray kanding yo, tan saray baka yo; laki la. Ipikasi yo met a nabindisionan ak.

³³ Pinaganatan a pilit na saray Egipsio a taynan la na saray Israelita so bansa ra; inkuanda, Ompatey kamin amin no ag kayo ontaynan.

³⁴ Kanyan pinano na saray Israelita iray kawali ran panaggawaay tinapay ya anggapoy libaduran masa, pinonggus da rad abel, tan sinasakbat da ra.

³⁵ Ginawa na saray Israelita iray imbaga nen Moises, tan kinmerew irad saray Egipsio na pilak tan balituk ya alahas tan saray kawes.

³⁶ Ginawa na Katawan a galangen na saray Egipsio iray Israelita tan impaiter tod sikara iray kinekerew na saray Israelita. Diad onyan agawa, inaawit na saray Israelita iray kayamanan na saray Egipsio.

³⁷ Manlapud Ramases nanakar ya amaarap ed Sukot iray Israelita. Sakey ya anem a lasus libo ran lalaki, ya andi bali ray bibii tan saray ogogaw.

³⁸ Dakerakel ya arum a totoo tan amayamay a karniro, kanding, tan baka so akilad sikara.

³⁹ Ginawa ran tinapay ira may anggapoy libaduran masa ya inawit da nen tinaynan day Egipto, ta lapud biglan impangibaki rad sikara, anggapoy panaon dan angiparaan na antokaman a kanen da.

⁴⁰ Nanayam ed Egipto ed loob na apat a lasus tan talomplon taon iray Israelita.

⁴¹ Diad agew a mansamput so apat a lasus tan talomplon taon, amin da ray boleg na saray totoo na Katawan et tinaynan day Egipto.

⁴² Sikato yay labin tinalaranan na Katawan a pangipaway tod saray Israelita ed Egipto; sayan labi et nisaklang ya anggad angga ed Katawan tan sakey a labin talaranan na saray Israelita.

⁴³ Say Katawan kuantod kindi Moises tan Aaron, Sikara ya so totontonen no silibraan so Paskua: Anggapoy toon taga arum a bansa a nayarin mangan na kakanen na Paskua,

⁴⁴ balet siopamay aripen a sinaliw yo et nayarin mangan no segaten yo nin onona.

⁴⁵ Anggapoy sangkaili odino uupaan a kumikimey so nayarin mangan na kakanen na Paskua.

⁴⁶ Amin a kakanen nepeg a kanen ed dalem na abung ya angiparaanan; ag yo aawiten ed paway na abung. Sakey ni, ag yo popoteren so antokaman a pokel na ayep.

⁴⁷ Nepeg a silibraan na amin ya Israelita so sayan pista,

⁴⁸ balet ag nayarin mangan so toon ag asegat. No manayam lad bansa so sakey a taga arum a bansa tan labay ton silibraan so Paskua a pamagalang ed Katawan, nepeg yo nin segaten ya amin iray lalaki ed pamilya to. Sikatod satan so nipasen a sakey a nianak ya Israelita tan nayarian toy mibiang ed pista.

⁴⁹ Nampapara ray totontonen a nepeg a tombuken na saray nianak ya Israelita tan saray sangkailin manaayam ed bansa yo."

⁵⁰ Tinmoluk ya amin iray Israelita, tan ginawa ra so ingganggan na Katawan ed kindi Moises tan Aaron.

⁵¹ Diad saman ya agew, say Katawan impaway tod Egipto iray boleg na saray Israelita.

13

¹ "Say Katawan kuantod kinen Moises,

² "Isaklang mod siak ya amin iray lalakin anak a pangulowan, ta kayaryan ko so balang sakey a pangulowan a lakin anak ya Israelita tan balang sakey a kalakyan a besag ya anak na ayep.

³ "Si Moises kuantod saray totoo, Tandaan yo yan agewsay agew ya intaynan yon manlapud dalin na Egipto a dimay inkaaripenan yo. Diad sayan agew say Katawan impaway to kayo diad panamegley na baleg a pakayari to. Ag nepeg a kanen ed sayan agew so tinapay a pinaalsad libadura.

⁴ "Diad sayan agew ed ononan bulan, say bulan na Abib, ontataynan kayo a manlapud Egipto.

⁵ "Sinambaan na Katawan ed saray lalaki yo ya iter tod sikayo so dalin na saray Cananeo, saray Heteo, saray Amorreo, saray Heveo, tan saray Jebuseo. No niakar to kayo lad saman a mayaman tan mataban dalin, silibraan yo yan pista diad ononan bulan na kapag taon.

⁶ "Diad loob na pitoran agew say kanen yon tinapay say ag pinaalsad libadura, tan diad kumapiton agew nepeg a walay pista a pamagalang ed Katawan.

⁷ "Diad loob na pitoran agew ag kayo mamangan na antokaman a tinapay a pinaalsad libadura; nepeg ya anggapoy narumog a libadura odino tinapay a pinaalsad libadura ed inerman a pasen ed dalin yo.

⁸ "No onggapo lay pista, ipaliwawa yod saray anak yo a gawaen yo ya, lapud samay ginawa ed sikayo na Katawan nen tinaynan yo so Egipto.

⁹ "Sayan pista et sakey a pakanudnonotan a singa bengatlan nisinger ed lima yo odino diad muling yo; ipanunot tod sikayo so pangituloy yoy pangibitla tan panaral na Ganggan na Katawan, lapud say Katawan impaway to kayod Egipto diad panamegley na baleg a pakayari to.

¹⁰ Silibraan yo yan pista diad niganan panaon ed kapag taon.

¹¹ Say Katawan iyakar to kayo ed dalin na saray Cananeo, say dalin a sinambaan ton iter ed sikayo tan saray lalaki yo. No niiter to lad sikayo,

¹² nepeg yon isaklang ed Katawan so balang pangulowan ya anak yon laki. Kayaryan na Katawan ya amin iray kalakyan a besag ya anak na ayayep yo,

¹³ balet nepeg yon dondonen ed sikato so balang besag a kalakyan ya anak na asno diad pangibagat yo na sakey a kordiro. No ag yo dondonen so asno, poter yoy beklew to. Nepeg yon dondonen so balang pangulowan a lakin anak yo.

¹⁴ Diad arapen a panaon, no tepeten na saray anak yo so kabaliksan na sayan gawaen yo, onya so iyebat yo; Diad panamegley na baleg a pakayari na Katawan, impaway to kamid Egipto, say pasen ya akaaripenan mi.

¹⁵ Nen anawet so puso na ari na Egipto tan ag to kami pataynanen, say Katawan pinatey toy amin a lakin pangulowan ya anak ed dalin na Egipto, tan amin a besag a kalakyan ya anak na ayayep. Sikato yay makasengeg no akin et ibabagat mid Katawan so balang kalakyan a besag ya anak na ayep tan dodondonen mi ray pangulowan a lakin anak mi.

¹⁶ Sakey a pakanudnunotan yan pista a singa bengatlan nisinger ed saray lima tayo odino diad muling tayo; ipanunot tod sikatayo a say Katawan impaway to tayod Egipto diad panamegley na baleg a pakayari to.

¹⁷ Nen inabuloyan na ari ed Egipto ya ontaynan iray Israelita, ag ira inwanwan na Dios ed dalan a mamaarap ed dalin na Filistia, anggaman ya asingger iman a dalan. Ninunot na Dios, Ag ko labay a mangoman na kanunotan iray totoo tan ompawil irad Egipto no nanengneng dan nepeg da niy mibakal.

¹⁸ Kanyan impasaliberber to ra la laingen ya ombeltang ed kalawakan tan ombaliw ed Dayat ya Ambalanga. Nen tinaynan day Egipto iray Israelita akaarmas ira na para bakal.

¹⁹ Inawit nen Moises iray pokel nen Jose, onung na impamasamba nen Jose a gawaen na saray Israelita. Inkuanen Jose, No agwaten kayo na Dios ed kairapan, nepeg yon awiten manlapud sayan pasen iray pokel ko.

²⁰ Tinaynan na saray Israelita so Sukot tan nankampo ra ed Etam a walad gilig na kalawakan.

²¹ No agew say Katawan manayam ed bandad arap da a sakey a lusek a lorem, pian niwanwan to rad dalan; no labi manayam ed bandad arap da a sakey a lusek ya apoy, pian naliwawaan to ra. Diad onya makapambiahi ra ed agew tan labi.

²² Say lusek a lorem et wala lawas ed bandad arap na saray totoo na agew, say lusek ya apoy no labi.

14

¹ "Say Katawan kuantod kinen Moises,

² "Ibagam ed saray Israelita ya ompoliktar ira tan mankampo ra ed arap na Pihahirot, a nanleetan na Migdol tan Dayat ya Ambalanga, diad abay na Baalzefon.

³ "Nabaloan na ari a saray Israelita et manliliber-liber ira labat ed maawang ya alog tan akolung ira na kalawakan.

⁴ "Paaweten koy puso to, kanyan osilan to kayo, et pakagalangan ko so panalok ed ari tan saray sondalo to. Diad satan naamtaan na saray Egipsio a siak so Katawan. Ginawa na saray Israelita so nibagad sikara.

⁵ "Nen nibagad ari na Egipto a tinmaynan iray Israelita, angoman na kanunotan a pati saray opisyal to tan kuanda, Antoy ginawa tayo? Pinaolyan tayon tinmaynan iray Israelita, et naandi ra la laingen ya ariripen tayo.

⁶ "Impaiparaan na ari iray karwahi to tan impanparaan to ray sondalo to.

⁷ "Pinmikal a kaolup to ray amin a karwahi to, pati saray anem a lasus a sankaabigan iran karwahi to ya impangulo na saray opisyal to.

⁸ "Pinaawet na Katawan so puso na ari, kanyan inosilan to ray Israelita a sipapalabo ran ontataynan.

⁹ "Saray sondalo na Egipto, pati amin a kabayo ra, saray karwahi tan saray kutsiro ra et inmosil irad saray Israelita a nankampo ed abay na Dayat ya Ambalanga ya asingger ed Pihahirot tan Baal-zefon.

¹⁰ Nen anengneng na saray Israelita so ari tan saray sondalo ton onoosil ed sikara, ataktakot iran maung tan kinmerew ira na tulong ed Katawan.

¹¹ Inkuandad kinen Moises, Anggapo ta ray lobuk dimad Egipto? Inawit mo kami dian ompatey ed kalawakan? Nengneng moy ginawam ed impangipaway mod sikamid Egipto?

¹² Ag mi ta la imbagad sika kasakbayan tayon tinmaynan ya onyay nagawa? Imbaga mid sika a paolyan mo kami lan mambukbukor tan akaoley kami lan manlingkur ya ariripen na saray Egipsio. Maung niy kipapasen na aripen nen say ompatey dia ed kalawakan.

¹³ Inmebat si Moises, Ag kayo natatakot! Pakpel yoy linawa yo, et nanengneng yo no antoy gawaen na Katawan a pangilaban tod sikayo ed sayan agew; ag yo la napidwan nanengneng ira yan Egipsio.

¹⁴ Say Katawan so mibakal a para sikayo; mandeen labat so nepeg yon gawaen.

¹⁵ Say Katawan kuantod kinen Moises, Akin et onkekerew kay tulong ed siak? Ibagam ed saray totoo ya ituloy day kurang da.

¹⁶ Iyatagey moy baston mo tan itorom ed dayat. Nabelsay so danum, et saray Israelita makapanakar irad amagan dalin diad ibaliw da.

¹⁷ Paaweten koy kapusoan da ray Egipsio; onosil irad satan, et napagalangan ak diad panalok ed ari, diad saray sondalo to, diad saray karwahi to, tan diad saray kutsiro to.

¹⁸ Diad panalok ed saray Egipsio naamtaan da a siak so Katawan!

¹⁹ Say anghil na Dios a gendat a manaayam ed bandad arap na saray sondalo na Israel et inmalis a nanayam ed bandad beneg da. Samay lusek a lorem et inmalis met

²⁰ tan nanayam ed nanleetan na saray Egipsio tan saray Israelita. Pinabilonget na samay lorem so kawalaan na saray Egipsio, balet pinaliwawa to so kawalaan da ray Israelita, kanyan sanlabin ag akapansinggeran iray sondalo ra.

²¹ Inyonat nen Moises ed dayat so lima to, et say Katawan pinapawil toy agos na dayat diad panamegley na mabiskeg a dagem a nanlapud bokig. Sanlabin sinmiplug so dagem, et nakatan so dayat. Apaldua so danum

²² tan nanakar ed amagan dalin iray Israelita diad imbaliw dad dayat; dinmalan irad nampegleyan na duaran padir a danum.

²³ Inosilan ira na saray Egipsio tan tinombuk da ra ya anggad pegley na dayat, pati saray amin a kabayo ra, saray karwahi ra, tan saray kutsiro ra.

²⁴ Et nen mampalbangon la say Katawan, manlapud lusek ya apoy tan lusek a lorem, inosdungan to ray sondalon Egipsio tan ginegewgew to ra.

²⁵ Inkokotep toy dalig na saray karwahi ra kanyan mapalaloy inkairapan dan nankurang. Saray Egipsio kuanda, Say Katawan ibabakalan to ray Israelita sumpad sikatayo. Ontaynan itayo la!

²⁶ Say Katawan kuantod kinen Moises, Iyonat mod dayat so limam, et tabunan na danum iray Egipsio, saray karwahi ra, tan saray kutsiro ra.

²⁷ Kanyan inyonat nen Moises ed dayat so lima to, et nen maliwawa la pinmawil ed gendat a kaaralem to. Ginawaan na saray Egipsio so anggaay nayarian da ya ombatik, balet say Katawan imbabantak to rad dalem na dayat.

²⁸ Pinmawil so danum tan tinabunan to ra may karwahi, saramay kutsiro, tan amin da ra may Egipsion inmosil ed saray Israelita ya anggad dayat; anggapoy atilak ed sikara anggan sakey.

²⁹ Balet nanakar iray Israelita ed amagan dalin diad imbaliw dad dayat; dinmalan irad nanleetan na duaran padir a danum.

³⁰ Diad saman ya agew inyagel na Katawan iray Israelita ed saray Egipsio, tan anengneng na saray Israelita a kibalatar ya inaatey ed gilig na dayat iray Egipsio.

³¹ Nen anengneng na saray Israelita so baleg a pakayari ya impakana na Katawan diad impanalo tod saray Egipsio, tinakotan da so Katawan. Awalaan ira na pananisia ed Katawan tan diad aripen to a si Moises.

15

¹ "Insan si Moises tan saray Israelita kinanta ra yan kanta ed Katawan: Kantaan ko so Katawan, lapud mapagalang ya impanalo to; imbabantak tod dayat iray kabayo tan saray akakabayod sikaran totoo.

² "Say Katawan so mabiskeg amanangyagel ko; sikato so angilaban ed siak. Sikatoy Dios ko, sikatoy idayew ko, sikatoy Dios di amak, tan ikantak so nipaakar ed inkatalonggaring to.

³ "Sakey a bumabakal so Katawan; Yahweh so ngaran to.

⁴ "Imbabantak tod dalem na dayat iray sondalon Egipsio tan saray karwahi ra; nalner ed Dayat ya Ambalanga iray sankaabigan ya opisyal da.

⁵ "Tinabunan ira na danum; singa ra sakey a baton linmereg ed kaaralman na dayat.

⁶ "Say kawanan a limam, O Katawan, et walaan na makapak ebyew a pakayari; bingbingkasen to ray kalaban.

⁷ "Diad talonggaring na katageyan mo tataloen mo ray kalaban mo; ondadalang so pasnuk mo tan popoolan mo ran singa dayami.

⁸ "Sinibukan mo so dayat, et nilusbo so danum; inmalagey a singa padir; inmawet so kaaraldaleman a dayat.

⁹ "Say kalaban kuanto, Osilan ko ra tan erelen ko ra; apagen koy kayamanan da tan alaen koy amin a labay ko; baguten koy ispadak tan alaen koy amin a kayaryan da.

¹⁰ Balet sakey labat ya ingas mo, O Katawan, et nalner la ray Egipsio; linmereg iran singa ismay ed dalem na mabiskeg a danum.

¹¹ Katawan, siopad saray diriyos so singa sika Siopay singa sikan makapakelaw ed inkasanto? Siopay makapanggawa na saray milagro tan saray makapakelaw a gawa a singa saray ginagawam?

¹² Inyonat moy kawanan a limam, et inakmun na dalin iray kalaban mi.

¹³ Saray totoom ya inyagel mo et inwanwan mo ra lapud ag mangoman a panangarom; diad panamegley na biskeg mo inwanwan mo ran amaarap ya anggad masanton dalin mo.

¹⁴ Nadngelan ya na saray bansa, et manggiwgiw ira; mankebyew iray Pilisteo ed takot da.

¹⁵ Ataktakot iray pangulo na Edom; manggiwgiw iray makapanyarin totoo na Moab; nakalan na biskeg na linawa iray Cananeo.

¹⁶ Takot tan kebyew so niwalad sikara. Nanengneng day biskeg mo, O Katawan, et mampotiy bosaleg dan mantanyareg, anggad makadalan iray totoom ya inagwat mod inkaaripen.

¹⁷ O Katawan, inalam ira tan intanem mo rad palandey mo, say pasen a pinilim a panayaman mo say Timplom a sikan dili so amaalagey.

¹⁸ Sika, Katawan, so manari ed ando lan ando.

¹⁹ Nanakar ed amagan dalin iray Israelita nen ombabaliw irad dayat. Balet nen ombabaliw iray kabayo na saray Egipsio, saray karwahi ra tan saray kutsiro ra, pinapawil na Katawan so danum, tan tinatabunan to ra.

²⁰ Say biin agi nen Aaron, a si propita Miriam, inala toy tamborin to, tinombuk na amin a bibii, nantotogtog iray tamborin tan nansasayaw-sayaw ira.

²¹ Et si Miriam kinantaan to ra: Kantaan yoy Katawan, lapud mapagalang ya impanalo to; imbabantak tod dayat iray kabayo tan saray akakabayod sikaran totoo.

²² Manlapud Dayat ya Ambalanga si Moises inwanwan ton amaarap ed kalawakan na Sur iray Israelita. Taloy agew a nanakar irad kalawakan, balet anggapoy nalmo ran danum.

²³ Insan akasabi rad pasen a tatawagen na Mara, balet ampait diman so danum, kanyan ag nayarin inomen. Sikato yay makasengeg a Mara so ngaran to man a pasen.

²⁴ Nanriklamod kinen Moises iray totoo tan tinepet da, Antoy inomen tayo?

²⁵ Masimoon a nampikasi ed Katawan si Moises, et say Katawan impanengneng tod sikato so sakey a poter na kiew. Imbantak nen Moises ed danum imay poter na kiew, et nagmaliw a nayarin inomen la may danum. Diman so angitdan na Katawan na saray ganggan a nepeg dan tombuken, tan diman so anubokan tod sikara.

²⁶ Inkuanto, No sigput so pangonur yod siak a Katawan a Dios yo, tan gawaen yoy antokaman ya ipapasen kon matonung tan sumpalen yo ray ganggan ko, ag ta kayo dusaen na saray salot ya impadalan kod saray Egipsio. Siak so Katawan a mamapaabig ed sikayo.

²⁷ Insan akasabi ra ed Elim a kawalaan na labinduan sobul tan pitomplon kiew a palmira; nankampo rad man ed abay na danum.

16

¹ "Manlapud Elim pinmikal ya amin iray Israelita, et diad kumalabinliman agew na kumadwan bulan kayari na impanaynan dad Egipto, akasabi rad kalawakan na Sin a nanleetan na Elim tan Sinai.

² "Diman ed kalawakan, nanriklamod kinen Moises tan Aaron iray amin ya Israelita.

³ "Inkuandad sikara, Magmaung ni la laingen komun no say Katawan et pinapatey to kamid man ed Egipto. Nayarian mid may ondongo a mangan na karni tan arum ni ran kakanen ed anggaay nayarian mi. Balet inawit yo kami a pateyen ed eras diad kalawakan.

⁴ "Say Katawan kuantod kinen Moises, Natan paoranen ko a manlapud tawen na kakanen a para sikayon amin. Saray totoo et nepeg ya ompaway iran inagew-agew a manala na kanen dan onduga ed sanagew. Diad onya nasubok ko no onuren da kasi iray bilin ko.

⁵ "Diad kumanem ya agew nepeg a doblien da so alaen da, insan da iparaan.

⁶ "Kanyan si Moises tan si Aaron kuandad saray amin ya Israelita, Diad sayan labi naamtaan yo a say Katawan so angipaway ed sikayo a manlapud Egipto.

⁷ "Diad kabwasan nanengneng yoy kagalangan na Katawan. Nadngel to ray riklamo yo a sumpad sikatoon, sumpad sikato, ta susumpalen mi labat iray bilin to.

⁸ "Insan inkuanen Moises, Diad labi say Katawan so mangiter ed sikayo na karnin kanen yo tan diad kabwasan, say tinapay ya anggan anto lay karakel na labay yo, lapud nadngel to no panoy impanriklamo yo sumpad sikato. Say katwaan to, no manriklamo kayo sumpad sikami manririklamo kayo sumpad Katawan.

⁹ "Si Moises kuantod kinen Aaron, Ibagam ed saray amin a totoo ya ondago ra tan manalagey ira ed arap na Katawan, lapud nadngel to ray riklamo ra.

¹⁰ Nen mansasalitay Aaron ed amin a katoowan linmingaw ira ed kalawakan, et kabebekta pinmatnag ed lorem so kagalangan na Katawan.

¹¹ Say Katawan kuantod kinen Moises,

¹² Nadngel ko ray riklamo da ray Israelita. Ibagam ed sikara ta diad kapansironget nawalaan ira na karnin siraen, tan diad kabwasan nawalaan ira na tinapay ya anggan antoy karakel na labay da. Diad satan, naamtaan da a siak so Katawan a Dios da.

¹³ Diad labi walay olup na amayamay a pugo a mantikyab iran sinmabi tan apanatan day kampo, tan diad kabwasan walay linaew ed kaliber-liber na kampo.

¹⁴ Nen naandipat lay linaew, wala ray atilak ed dalin a bengatlan tirampiak tan maimpis. Singa ra kinmigtel a linaew.

¹⁵ Nen anengneng ira na saray Israelita, ag da amta no anto ra man kanyan nantetepetan ira, Anto ya? Si Moises kuantod sikara, Sikato yay kanen yo ya inter na Katawan.

¹⁶ Say Katawan ingganggan to a manala so balang sakey ed sikayo na dugan nakaukolan to; sakey ya litro so para balang sakey a kabyangan na pamilya to.

¹⁷ Ginawa ya na saray Israelita. Saray arum et masoluk so inala ra tan saray arum, kulang;

¹⁸ balet nen sukaten day inala ra, saray angala na masoluk anggapoy soluk da, tan saray angala na kulang anggapoy kulang da. Nantipon na dugan nakaukolan to so balang sakey ed sikara.

¹⁹ Si Moises kuantod sikara, Nepeg ya anggapod sikayo so mangisinup na natipon to para ontombuk ya agew.

²⁰ Balet wala ray pigaran ag dinmengel ed kinen Moises tan angisinup ira. Balet diad kaimbwasan abigis imay insinup da tan binmanget. Et si Moises akapasnuk ed sikara.

²¹ Kapag kabwasan balang sakey a too nanala na dugan nakaukolan to; tan no ampetang lay agew, natonaw iray atilak ed dalin.

²² Diad kumanem ya agew say alaen da mamidwad karakel na samay aalaen dan kakanen ya inagew-agew; duaran litro so para sakey a too. Amin da ray pangulo na katoowan dinmago rad kinen Moises tan imbaga ray nipaakar ed samay kakanen.

²³ Inkuantod sikara, Say Katawan ingganggan to a nabwas et masanton agew na panagpainawa, say agew a nisaklang ed Katawan. Iyorno yo lan amin natan so labay yon ornoen, tan ilambung yo lay labay yon lambungen. Isinup yoy antokaman ya ikera yon para nabwas.

²⁴ Onung na ingganggan nen Moises, insinup day akeraan ya anggad ontombuk ya agew; ag aboluk odino abigis so insinup da.

²⁵ Inkuanen Moises, Akan yo ya natan, lapud Agew na Panagpainawa natan, say agew a nisaklang ed Katawan. Anggapo natay narumog yon kakanen ed paway na kampo.

²⁶ Nepeg a manala kayo na kakanen ed loob na anemiran agew, balet diad kumapiton agew, say agew na panagpainawa, anggapo so naala yon kakanen.

²⁷ Diad kumapiton agew wala ray pigaran totoon pinmaway a manala na kakanen, balet ag ira akalmo.

²⁸ Insan say Katawan kuantod kinen Moises, Kapigan mangangga so isusumlang na saray totoo ed saray ganggan ko?

²⁹ Ag mo lilingwanan a siak a Katawan et initdan ta kayoy sakey ya agew a panagpainawa, kanyan diad kumanem ya agew itdan ta kayo lawas na kakanen ya ondugad loob na duay agew. Balang sakey nepeg a manayam ed kawalaan to no agew na panagpainawa tan ag to onalis ed abung to.

³⁰ Kanyan nampainawa ed kumapiton agew iray totoo.

³¹ Saray Israelita tinawag da na mana imay kakanen. Sayan mana singa melag ya ampotin bokel na tanaman, tan say taway to singa taway na tirampiak a kanen ya ininay dilo.

³² Inkuanen Moises, Say Katawan ingganggan to a mangisinup itayo na pigaran mana a para saray mantombuk a kabyangay boleg tayo, pian nanengneng da so kakanen ya inter tod sikatayod kalawakan nen impaway to itayod Egipto.

³³ Si Moises kuantod kinen Aaron, Mangala kay sakey a banga, kargaan mo na kapalduay litro a mana, insan mo iyan ed arap na Katawan, ta isinup a para saray mantombuk a kabyangay boleg tayo.

³⁴ Onung na ingganggan na Katawan ed kinen Moises, si Aaron inyan tod arap na Kaban na Sipanan imay mana, pian nisinup.

³⁵ Saray Israelita nantagano ra na mana ed loob na apataploy taon, ya anggad asabi ray dalin na Canaan a dimay nanayaman da. (

³⁶ Say kapalduay litro et kakaplo na panagsukatan nen saman.)

17

¹ "Tinaynan na amin ya Israelita so kalakawan na Sin, tan nansosoblay so pasen a nanaayaman da onung ed ganggan na Katawan. Nankampo ra ed Refidim, balet anggapod may danum a nainom na saray totoo.

² "Nanriklamo ra sirin ed kinen Moises tan kuanda, Itdan mo kamiy danum ya inomen. Inmebat si Moises, Akin et manririklamo kayod siak? Akin et susuboken yoy Katawan?

³ "Balet mapalaloy inkapgaan na saray totoo, kanyan intuloy day nanriklamo ed kinen Moises. Inkuanda, Akin et impaway mo kamid Egipto? Pian napatey mo kamid eras, sikami, saray anak mi, tan saray ayayep mi?

⁴ "Masimoon a nampikasid Katawan si Moises tan kuanto, Anto kasiy nagawaan kod sarayan totoo? Ngalngali da ak la tupaken.

⁵ "Say Katawan kuantod kinen Moises, Mangitagar kay pigaran pangulo na Israel, tan onaan yon manakar iray totoo. Awit mo may baston ya impamakbak mod Ilog na Nilo.

⁶ "Manalagey ak ed arap mo diad tapew na sakey a baton-dampay ed palandey na Sinai. Pekpek mo so baton-dampay, et ompaway diman so danum ya inomen na saray totoo. Ginawa nen Moises imay imbaga na Katawan diad arapan na saramay pangulo na Israel.

⁷ "Samay pasen et atawag na Masa tan Meriba, lapud nanriklamo ray Israelita tan sinubok day Katawan nen tinepet da, Walad sikatayo so Katawan odino andi?

⁸ "Sinmabi ray Amalecita tan dinogpaan da ray Israelita diad Refidim.

⁹ "Si Moises kuantod kinen Josue, Mamili ka na saray lalaki, ta onla ran mibakal nabwas ed saray Amalecita. Manalagey ak ed tapew na pokdul a sankabembenan koy baston ya impaawit ed siak na Dios.

¹⁰ Inonur nen Josue so ganggan nen Moises ed sikato, kanyan linman mibakal ed saray Amalecita, balet linmad toktok na pokdul ira di Moises, Aaron, tan Hur.

¹¹ Legan ya akatagey iray taklay nen Moises, manalo ray Israelita, balet no iyabeba to ra, onggapon manalo ray Amalecita.

¹² Nen naksawan la ray taklay nen Moises, angala ra di Aaron tan Hur na bato tan niyorungan to legan a nanalagey irad diking to tan binembenan dan akaatagey iray taklay to ya anggad inselek na agew.

¹³ Diad onya si Josue sigput ton tinalo ray Amalecita.

¹⁴ Insan say Katawan kuantod kinen Moises, Isulat mo yan impanalo, pian ag nalingwanan. Ibagam ed kinen Josue a sigput kon deralen iray Amalecita.

¹⁵ Amaalagey na altar si Moises tan tinawag to na Say Katawan so Bandirak.

¹⁶ Inkuanto, Iyatagey yoy bandira na Katawan! Say Katawan ituloy toy mibakal a sumpad saray Amalecita ed ando lan ando!

18

¹ "Say katolangan nen Moises a si Jetro a pari na Madian et nadngelan toy amin a ginawa na Dios a Katawan ed kinen Moises tan diad saray Israelita nen impaway to ran manlapud Egipto.

² "Kanyan linmad kinen Moises si Jetro, a kaiba toy intilak nen Moises ya asawa to a si Zipora,

³ "tan saray duaran lalakin anak nen Zipora a di Gersom tan Eliezer. (Si Moises inkuanto, Sangkaili ak ed dalin ya ag ko bansa; kanyan inngaran to na Gersom so sakey ya anak to.

⁴ "Inkuan to met ni, Say Dios na amak et tinulongan to ak tan inyagel to ak ed pamatey ed siak na ari na Egipto; kanyan inngaran to na Eliezer imay sakey nin anak to.)

⁵ "Si Jetro a kaiba toy asawa nen Moises tan saray duaran lalakin anak to et sinmabi rad kalawakan a kawalaay kampo nen Moises diad masanton palandey.

⁶ "Impaona to lan impaibagad kinen Moises ya onsabi ra,

⁷ "kanyan pinmaway si Moises tan inabet to, dinmakmomod arap to, insan to inanguban. Nantepetan ira no antoy kipapasen na bilay na balang sakey ed sikaran dua, insan linmoob ed tulda nen Moises si Jetro.

⁸ "Imbaga nen Moises ed kinen Jetro iray amin a ginagawa na Katawan ed ari tan saray Egipsio diad impangyagel tod saray Israelita. Imbaga to met no panoy impanirap na saray totoo ed dalan tan no panoy impangilaban na Katawan ed sikara.

⁹ "Akaliket si Jetro lapud amin a kaabigan a ginagawa na Katawan ed saray Israelita,

¹⁰ tan kuanto, Nadayew so Katawan ya angyagel ed sikayo ed ari tan diad saray Egipsio. Nadayew so Katawan ya angilaban ed saray totoo to ed impakaaripen.

¹¹ Natan amtak la a matalonggaring so Katawan nen saray amin a diriyos, lapud ginawa to ya nen saray Egipsio et nilemlemew da ray Israelita.

¹² Insan si Jetro angisaklang na bagat a popoolan tan saray arum a bagat ed Dios; et si Aaron tan amin a pangulo na Israel et akila rad sikato ya angan na masanton panangan a pamagalang dad Dios.

¹³ Diad kaimbwasan to man ya agew si Moises inaarigloan to ray kolkolan day totoo, tan ag akatonda manlapud kabwasan ya anggad labi.

¹⁴ Nen anengneng nen Jetro iray amin a ginawa nen Moises, inkuanto, Antoy gagawaen mo? Akin et bukbukor moy manggagawad saya, tan saray totoo et manalalagey ira dia manlapud kabwasan ya anggad labi diad pampanon dad sika?"

¹⁵ Inmebat si Moises, Nepeg ko yan gawaen lapud saray totoo et ondadago rad siak a manepet no antoy linaway Dios.

¹⁶ No walay duaran toon nankolkol, ondago rad siak tan ibagak no siopay walad katonungan. Ibabagak ed sikara iray ganggan tan saray bilin na Dios.

¹⁷ Insan si Jetro kuanto, Aliway panggagawam.

¹⁸ Punawen moy sikan dili tan sarayan totoo. Ambelat yan tuloy a gawaen mon bukor.

¹⁹ Simbawaen ta ka natan; dengel mo ak, et say Dios walad sika. Duga so pangilalaman mod saray totoo ed Dios tan say pangyaapireng mod sikato na saray kolkolan da.

²⁰ Nepeg mon ibangat ed sikara iray ganggan na Dios tan ipaliwawam ed sikara no panoy pambilay da tan no antoy nepeg dan gawaen.

²¹ Balet nepeg a mamili ka met na pigaran lalaki a sarag day mangipangulo, tan ipasen mo ran pangulo na saray totoo; pangulo na tunggal libon totoo, tunggal lasus, tunggal limamplo, tan tunggal pulo. Nepeg a totoo ran walay takot ed Dios, napampiaan ira tan ag da labay so mangawat na pasoksok.

²² Panintinsiam ira ed amiy panaon. Sarayan huis iyakar dad sika iray ambelat a kaso, balet no anlemew a kaso sikara lay makaolay a manintinsia. Mamalemew yad sika, ta misakbatan irad sika.

²³ No onyay gawaen mo, onung na ingganggan na Dios, ag mo punawen so sikan dili, tan amin da ra yan totoo et makasempet iran naarigloan la ray kolkolan da.

²⁴ Dinengel nen Moises so simbawa nen Jetro,

²⁵ kanyan amilid saray Israelita na lalakin sarag day mangipangulo. Impagmaliw to ran pangulo na tunggal libon totoo, tunggal lasus, tunggal limamplo, tan tunggal pulo.

²⁶ Manintinsia ra ed amiy panaon. Inyapireng dad kinen Moises iray ambelat a kaso, balet akaoley la ran anintinsia ed saray anlemew a kaso.

²⁷ Pinasiput nen Moises si Jetro, insan sinmempet lay Jetro.

19

¹ "Saray Israelita tinaynan day Refidim tan diad ononan agew na kumatlon bulan kayari na impanaynan dad Egipto, sinmabi rad kalawakan na Sinai. Nankampo rad man ed alusadsar na Palandey na Sinai.

²

³ "Insan si Moises kinmalab ed sayan palandey, ta banaen tod man so Dios. Manlapud sayan palandey say Katawan tinawag toy Moises tan imbaga tod sikato ya ikuantod saray Israelita a kabyangan iray boleg nen Jacob:

⁴ "Anengneng yo so ginawak ed saray Egipsio, siak a Katawan, tan say impangawit kod sikayo a singa ontitikyab ya agilan sankaawit tod saray payak to so sibong to, insan ta kayo inyakar dia ed siak.

⁵ "Natan, no onuren yo ak tan sumpalen yoy impisipanan ko, magmaliw kayon dilin totook. Kayaryan koy sankamundoan, balet magmaliw kayon pinilik a totook.

⁶ "Magmaliw kayo a totoon nisaklang ed siak labat, tan papari a manlingkur ed siak. Sikara yay imbaga na Dios ed saray Israelita diad panamegley nen Moises.

⁷ "Kanyan si Moises inmakseb tan impantitipon to ray pangulo na saray totoo tan imbaga tod sikara ira may amin ya ingganggan ed sikato na Katawan.

⁸ "Insan amin a katoowan nambabansag iran inmebat, Gawaen miy amin ya imbaga na Katawan. Si Moises imbaga to ya ed Katawan.

⁹ "Say Katawan kuantod kinen Moises, Onla ak ed sika diad panamegley na makapal a lorem, pian narengel na saray totoo so pitongtong kod sika tan manlapud natan sisiaen da ka. Imbaga nen Moises ed Katawan so ebat na saray katoowan,

¹⁰ et say Katawan kuantod sikato, Laka, ta ibagam ed saray totoo a diad sayan agew tan nabwas et mamparaan iran mangigalang ed siak: linisan day sikaran dili tan ipesak da ray kawes da.

¹¹ Nepeg ya akaparaan ira nabwas a sakey. Diad satan ya agew onakseb ak ed Palandey na Sinai, tan diman ak nanengneng na saray totoo.

¹² Diad kaliber-liber na palandey mananda kay ketegan ya ag nepeg a labsanan na saray totoo, tan ibagam ed sikara ya ag da kalaben, odino diwiten so palandey. No walay ondiwit ed palandey, sikatoy nepeg a pateyen;

¹³ nepeg ya anggapoy maniwit ed laman to, tan nepeg a tupaken odino panaen. Say kipaakaran to yan bilin et saray totoo tan saray ayayep; nepeg iran pateyen no nadiwit da. Balet no tinmanul lay trumpita, nepeg ya onkalab ed palandey iray totoo.

¹⁴ Insan linmeksab a nanlapud palandey si Moises tan imbaga tod saray totoo a mamparaan iran mangigalang ed Dios. Kanyan impesak da ray kawes da,

¹⁵ tan si Moises inkuantod sikara, Nabwas a sakey nepeg ya akaparaan kayo la; ag kayo ni miaakdul ed kaasawaan yo.

¹⁶ Diad kabwasan na kumatlon agew walay karul tan kirmat, pinmatnag ed palandey so makapal a lorem, tan nadngel so makmaksil a tanul na trumpita. Amin da ray katoowan ed kampo et manggiwgiw irad takot da.

¹⁷ Si Moises inwanwan to ran impaway ed kampo ta abeten day Dios, tan nanalagey irad alusadsar na palandey.

¹⁸ Akobutan na asewek so Palandey na Sinai, lapud inmakseb diman ed nengneng na apoy so Katawan. Inmatagey so asewek a singa asewek na palbaan, et yinmegyeg na makmaksil so palandey.

¹⁹ Kinmasil lan kinmasil so tanul na trumpita. Nansalitay Moises, et inmebat ed sikato so Dios diad panamegley na karul.

²⁰ Say Katawan inmakseb ed toktok na Palandey na Sinai tan tinawag tod man si Moises. Kinmalab ed toktok na palandey si Moises

²¹ tan say Katawan kuantod sikato, Akseb ka, ta pasakbayan mo ray totoo ya ag da lalabsanan so ketegan diad idago ran onnengneng ed siak; no onlabsan ira, dakel ed sikaray ompatey.

²² Anggan saray paparin onasingger ed siak nepeg ya iparaan day sikaran dili a mangigalang ed siak, ta no andi, dusaen ko ra.

²³ Si Moises kuantod Katawan, Ag nayarin onkalab ed palandey iray totoo, lapud ingganggan mod sikamin ipasen min masanto so palandey tan mananda kami na ketegan ed kaliber-liber to.

²⁴ Say Katawan inmebat, Akseb ka tan itagar mo diay Aaron. Balet saray papari tan saray totoo ag da nepeg a labsanan so ketegan no ondago rad siak; ta no andi, dusaen ko ra.

²⁵ Si Moises inmakseb sirin ed saray totoo tan imbaga tod sikara so impaibaga na Katawan.

20

¹ "Say Dios nansalita a kuanto:

² "Siak so Katawan a Dios yo ya angipaway ed sikayod Egipto ya akaaripenan yo.

³ "Ag mo igagalang iray arum a diriyos; siak labat so igalang mo.

⁴ "Ag mo igagawaay sikan dili na talintao odino antokaman a kaolibay na bengatlan walad tawen odino walad tapew na dalin odino bengatlan walad danum diad dalem na dalin.

⁵ "Ag ka ondadakmomo odino mangigagalang ed saraya, ta siak, say Katawan a Dios mo, et maimon ak. Dusaen ko ray mamosul ed siak tan saray kabyangay boleg da ya anggad kumatlo tan kumapat a kailalakan.

⁶ "Balet aroen ko ray nilibon kailalakan na saray mangarod siak tan mangonur na saray ganggan ko.

⁷ "Ag mo ikakanad maoges iran getma so ngaran ko a Yahweh a Dios mo, ta dusaen koy siopaman a mangikanad ngaran ko diad andi-kakanaan a pamaakaran.

⁸ "Ngilinan moy Agew na Panagpainawa tan ipasen mon masanto.

⁹ "Anem agew a makapankimey ka,

¹⁰ balet say kumapiton agew et agew na panagpainawa a nisaklang ed siak. Diad sayan agew nepeg ya anggapoy toon mankimey: sika, saray anak mo, saray aripen mo, saray ayayep mo, odino saray sangkailin manaayam ed bansam.

¹¹ Diad loob na anemiran agew siak a Katawan et pinalsak so tawen tan dalin, saray dayat tan amin a logan da, balet diad kumapiton agew nampainawa ak. Sikato yay makasengeg a siak a Katawan et binindisionan koy Agew na Panagpainawa tan ginawak a masanto.

¹² Igalang moy amam tan say inam, pian andokey so pambilay mo ed dalin ya iter kod sika.

¹³ Ag ka mamapatey.

¹⁴ Ag ka mikakaloguran.

¹⁵ Ag ka mantatakew.

¹⁶ Ag ka mantitila no mantasi ka sumpad kaparam a too.

¹⁷ Ag mo iibegan so abung na kaparam a too; ag mo iibegan so asawa to, saray aripen to, saray baka to, saray asno to, odino antokaman a kayaryan to.

¹⁸ Nen nadngel na saray totoo so karul tan say tanul na trumpita tan anengneng day kirmat tan manasasewek a palandey, manggiwgiw irad takot da tan nanalagey irad arawdawin pasen.

¹⁹ Inkuandad kinen Moises, No mansalita kad sikami, ondengel kami; balet ag mo pansasalitaen ed sikami so Dios, ta ompan ompatey kami.

²⁰ Inmebat si Moises, Ag kayo natatakot; sinmabi so Dios, ta suboken to kayo tan labay to kayon mangonur lawas ed sikato, pian ag kayo mankasalanan.

²¹ Balet nansiansian nanalagey ed arawdawi a pasen iray katoowan, tan si Moises labat so sinmingger ed abay na makapal a lorem a kawalaan na Dios.

²² Say Katawan ingganggan toy Moises ya ibaga tod saray Israelita: Anengneng yon dili a siak a Katawan et nansalita ed sikayo manlapud tawen.

²³ Ag yo igagawaay sikayon dili na saray diriyos a pilak odino balituk, insan kaibak iran galangen yo.

²⁴ Manggawa kayo na dalin ya altar a para siak tan diad tapew to so pambagatan yo na karniro yo tan baka yo a sikaray bagat a popoolan tan bagat a para kareenan. Diad amin a pasen ya ibiig kon pangigalangan yod siak, onla ak ed sikayo tan bindisionan ta kayo.

²⁵ No manggawa kayoy baton altar a para siak, aliwan saray tinabas a bato so ikana yo, ta no mangikana kayo na sinsil ed saray bato, pagmaliwen yo ran aliwan manepeg ya ikanak.

²⁶ Ag kayo manggagawa na altar a para siak a wala ray balitang to; ta no wala ray balitang to, nanengneng so laman yo no ontakayan kayo.

21

¹ "Iter mod saray Israelita iray onggendan a ganggan:

² "No manaliw kayo na Hebreon aripen, manlingkur ed sikayo ed loob na anem taon. Diad kumapiton taon ibolus yo ya anggapoy nepeg a bayaran to.

³ "No anggapoy asawa to nen nagmaliw ya aripen yo, nepeg ya ag to awiten so asawa to no ontaynan; balet no walay asawa to nen nagmaliw ya aripen yo, nepeg ya awiten toy asawa to.

⁴ "No itdan na amo na asawa tan naanakan to na lalaki odino bibii, say ina tan saray anak to et kayaryan ira na amo tan samay aripen nepeg ya ontaynan a bukor.

⁵ "Balet no ibaga ton malinew ya inaro toy amo to, say asawa to, tan saray anak to tan ag to labay so nawalaan na kawayangan,

⁶ "say amo tod satan awiten tod pasen a panangigalangan. Diman say amo pasaralen to may aripen ed puirta odino diad lusek na puirta, insan to tebengan ed layag. Diad ontan magmaliw lan aripen to ya anggad ag to ipatey.

⁷ "No say sakey a laki et ilako ton aripen so anak ton bii, sayan bii et naitdan na kawayangan ya aliwan singa pangiter na kawayangan ed saray lalakin aripen.

⁸ "No nilakod sakey a lakin getma ton asawaen, balet ta ag to labay lamlamang, nepeg ya ipadondon tod ama na samay bii; ag nayarin ilako tod sangkaili, lapud nilamang to.

⁹ "No say sakey a laki et manaliw na sakey a biin aripen, ta iter tod lakin anak to, nepeg ton ipasen ya anak ton dili.

¹⁰ No say sakey a laki et mangala na kumadwan asawa to, nepeg ton ituloy ya itdan so ononan asawa to na gendat a karakel na kakanen tan kakawesen to tan saray gendat a kanepegan to nen bukor to niy asawa to.

¹¹ No say laki et ag to sumpalen iray nepeg ton gawaen ed inmonan asawa to, nepeg ya itdan to na kawayangan tan nepeg ya ag bayaran imay laki.

¹² Siopamay mangabil na kapara ton too tan apatey to, nepeg a pateyen.

¹³ Balet no ag to tinalaranan tan ag to ginagalan apatey imay too, nayarian toy ombatik ed sakey a pasen a pilien kon para sikayo.

¹⁴ Balet no say sakey a too et akapasnuk tan ginagala ton pinatay so kapara ton too, nepeg ya alaen a pateyen anggan binmatik lad altar ko.

¹⁵ Siopamay mangabil na ama to odino ina to, nepeg a pateyen.

¹⁶ Siopamay mamasoot a mangala na too ya ilako to odino aripenen to, nepeg a pateyen.

¹⁷ Siopamay mangisamba ed ama to odino ina to, nepeg a pateyen.

¹⁸ No wala ray manlalaban tan say sakey et tapalan to na bato so sakey odino ponitien to, balet ta ag to apatey, nepeg ya ag dusaen. No say toon akabil et nepeg a manayam ed dokulan,

¹⁹ insan makabangon lamlamang tan makaakar ed paway ya akabaston, say angabil ed sikato et nepeg a bayaran to so panaon ya ag to pakapankimey tan asikasoen to ya anggad ag to iyabig.

²⁰ No say sakey a too et pekpeken toy aripen ton laki odino bii tan inatey ed samay bektan impamekpek to, nepeg a dusaen.

²¹ Balet no ag ompatey ed loob na sakey odino duaran agew, nepeg ya ag dusaen. Masarag lan dusa to so inkaandi na kayaryan ton aripen.

²² No walay pigaran totoon manlalaban tan apasakitan day sakey a biin malokun, et nakalan, balet ta ag nanliknay arum a kairapan, samay akapasakit ed sikato et nepeg a bayaran toy labay na asawa to may bii, onung na pangabubon na saray huis.

²³ Balet no manliknay arum a kairapan imay ina, saya so dusa: say bilay bayaran na bilay,

²⁴ say mata bayaran na mata, say ngipen bayaran na ngipen, say lima bayaran na lima, say sali bayaran na sali,

²⁵ say apoolan bayaran na apoolan, say sugat bayaran na sugat, tan say biret ed laman bayaran na biret ed laman.

²⁶ No say sakey a too et kabilen tod mata so aripen ton laki odino bii tan aderal so matan nakna to, nepeg ton ibolus imay aripen a pinagkabayar tod pinmultak a mata.

²⁷ No apangpangan to na ngipen, nepeg ton ibolus so aripen a pinagkabayar tod nakal a ngipen.

²⁸ No bonoen na sakey a bakan kalakyan so sakey a too tan inatey, say baka nepeg a tupaken, tan ag kanen so laman to; balet ag nepeg a dusaen so akanbaka.

²⁹ Balet no say bakan kalakyan et kagagawa to lay mambono na too tan apasakbayan la so akanayep et ag to nin siansia ikolung ed koralinsan mamono yan baka tan inatey so binono to, nepeg a tupaken so baka tan nepeg met a pateyen so akanbaka.

³⁰ Balet no naabuloyan a mambayar so akanayep pian ag pateyen, nepeg to ya iter so intiron bayar.

³¹ No ogaw a laki odino bii so apatey na baka, namparan totontonen so tombuken.

³² No laki odino bii ya aripen so apatey na bakan kalakyan, nepeg a say akanbaka bayaran to na talomplon pilak a kuarta so akankayaryan na inatey ya aripen tan nepeg a tupaken so baka ya anggad ompatey.

³³ No ekalen na sakey a too so sakub na aralem ya abut odino mangotkot na aralem ya abut, et ag to sakuban, tan napelag diman so sakey a bakan kalakyan odino asno,

³⁴ nepeg a mambayar imay too. Bayaran to na kuarta so akanayep tan kayaryan to la may inatey ya ayep.

³⁵ No napatey na sakey a bakan kalakyan so sakey a bakan kalakyan na sananey a too, saramay akanayep nepeg da ya ilako so mabilay a baka tan panapagan day panlakoan; panapagan da met so karni to may inatey.

³⁶ Balet no samay baka et kagagawa to lay mambono na too tan apasakbayan la may akanayep, et ag to nin siansia ikolung ed koral, nepeg ton itdan na mabilay a bakan kalakyan imay akanayep na inatey, pian nasalatan so naandi tan kayaryan to la may inatey ya ayep.

22

¹ "No say sakey a too et manakew na sakey a baka odino sakey a karniro tan pateyen to odino ilako to, nepeg to a bayaran na limaran baka so sakey a baka tan apatiran karniro so sakey a karniro.

² "Nepeg ton bayaran so tinakew to. No anggapon balut so kayaryan to, nepeg ya ilako a sakey ya aripen pian nabayaran so tinakew to. No nalmo ed sikato a mabilay so tinakew to a baka odino asno odino karniro, nepeg to a bayaran na duara so sakey. No diad labi et nasiwa so sakey a matakew ya onloloob ed sakey ya abung tan apatey, say akapatey ed sikato et ag mankasalanan na impamatey. Balet no diad agew so kagawa to, mankasalanan na impamatey.

³

⁴

⁵ "No say sakey a too et ipastol to ray ayep to ed alog odino diad kaubasan, et akaarawi ra tan kinan da ray bunga na tanaman ed alog na sakey a too, say akanayep nepeg ton bayaran so kinen na ayep to na saray sankaabigan a bungay tanaman ed kaalogan to odino kaubasan to.

⁶ "No say sakey a too et mamool ed alog to tan onkayamkam so apoy ed alog na arum a too tan napoolan iray ontutubon tanaman diman odino saray pinalot a nisimbun diman, say angigapoy apoy et nepeg a bayaran toy adarak.

⁷ "No say sakey a too et mipaknaan ya isinup toy kuarta odino antokaman a mablin kayaryan na sakey a too, insan natakew ira ed abung to, say nantakew nepeg a dobli so ibayar to no narel.

⁸ "Balet no ag narel so nantakew, say toon angisinup na kayaryan et nepeg ya iyakar ed pasen a panangigalangan tan diman mansamba ya ag to tinakew so kayaryan na toon akipaknaan to.

⁹ "Diad balang kolkolan a nipaakar ed pankayaryan na bengatlan, singa bilang baka, asno, karniro, kawes, odino antokaman ya abalang, saray duaran totoon mangakayaryan et nepeg iran niyakar ed pasen a panangigalangan. Say toon ibawag na Dios a sikatoy nankasalanan et nepeg a mambayar na dobli ed samay sakey a too.

¹⁰ No say sakey a too et mipaknaan ya asikasoen toy asno, baka, karniro odino arum ya ayep na sananey a too, tan samay ayep et inatey odino asugatan odino imbatik na matatakew, tan anggapoy makatasi ed inkagawa,

¹¹ samay too nepeg ya onlad pasen a panangigalangan tan sambaan to ya ag to tinakew imay ayep na sakey a too. No ag atakew, say akanayep nepeg ton akoen a naandi, tan samay sakey a too et ag la nepeg a mambayar;

¹² balet no atakew so ayep, samay too nepeg a bayaran to so akanayep.

¹³ No pinatey na saray ayep ed takel, say toon manaasikaso alaen to so laman na ayep a pamaneknek ed agawa; ag to nepeg a bayaran ed akanayep so pinatey na saray ayep ed takel.

¹⁴ No say sakey a too et ombayes na sakey ya ayep ed sakey a too tan asugatan odino inatey imay ayep nen andid man so akanayep, say toon binmayes et nepeg a bayaran to may binayes to.

¹⁵ Balet no say akanayep et wadman nen abalang so ayep, say binmayes ag nepeg a mambayar. No inabangan ya ayep, say abang et pinagkabayar la.

¹⁶ No say sakey a laki et tuksoen toy sakey a marikit ya ag ni akisipanan a mikasal tan akdulan to, say laki nepeg ya iter toy bayar a para nobia tan asawaen to may bii.

¹⁷ Balet no ag onabuloy so ama ya asawaen day anak to, samay laki nepeg a bayaran to may ama na singa karakel na kuartan ibayar ed nobian marikit.

¹⁸ Nepeg a pateyen so siopaman a biin managsalamangka diad pananulong na maoges ya ispiritu.

¹⁹ Nepeg a pateyen so siopaman a lakin misiping ed ayep.

²⁰ Nepeg a pateyen so siopaman a mangibagat ed anggan anton dios likud ed siak a Katawan.

²¹ Ag yo lulukoen odino papairapen so sangkaili; ag yo lilingwanan a sangkaili kayo met nen saman ed Egipto.

²² Ag yo papairapen so siopaman a balon bii odino siopaman ya olila.

²³ No pairapen yo ra, siak a Katawan ebatan ko ra no onkerew irad siak na tulong,

²⁴ tan mampasnuk ak tan pateyen ta kayo ed bakal. Nabalo ray kaasawaan yo tan naolila ed ama iray anak yo.

²⁵ No mampabayes kayo na kuarta ed siopaman a took a mairap so bilay to, ag yo ipapasey sikayon dili a managpaabang tan ag yo pangaabangen.

²⁶ No alaen yoy kawes na sakey a too a sikatoy kaletan a bayaran to kayo, nepeg yon ipawil kasakbayan ya onselek so agew,

²⁷ lapud sikato labat so nayarian ton ikawes a pamapetang na laman to. Anto niy arum a kawes a nayarian ton iyogip? No onkerew ed siak na tulong, ebatan ko lapud mapangasi ak.

²⁸ Ag kayo mansasalita na maoges sumpad Dios, tan ag yo isasamba so pangulo na saray totoo yo.

²⁹ Iter yod siak, no nasabi lay nigetar a panaon, iray bagat yon trigo, alak, tan saray larak na oliba. Iter yod siak iray pangulowan ya anak yon lalaki.

³⁰ Iter yod siak iray besag ya anak na baka tan karniro yo. Piamung yon pitoran agew ed ina to so besag a kalakyan, insan yo ibagat ed siak no kumawalon agew.

³¹ Sikayo ray totook, kanyan ag yo kakanen so karni na dinanman ya ayep a pinatey na saray ayep ed takel; iter yo lad saray aso.

23

¹ "Ag yo iwawakawak so tila-tilan balita, tan ag yo tutulongan so toon nankasalanan diad pantasi yo na tila.

² "Ag kayo mibibiang ed saray karaklan no maoges so gagawaen da, o no mantasi ra na tila diad pamikewret dad katonungan.

³ "Ag yo kikilingan so mairap-bilay no salaysayen ed korti.

⁴ "No nanengneng yon nablus so baka odino asno na kalaban yo, ipawil yod sikato.

⁵ "No niparokul so asno na mamobosul ed sikayo, lapud belat na awit to, tulongan yon onalagey lamet imay asno; ag kayo ompapaliis.

⁶ "Ag yo pipikeweten so katonungan na mairap-bilay no onapireng ed korti.

⁷ "Ag kayo mantitila ed pandalem yo, tan ag yo papateyen so toon matonung tan anggapoy kasalanan, ta ag ko ipasen a matonung so toon manggawa na ontan a kaogsan.

⁸ "Ag kayo mangaawat na pasoksok, ta say pasoksok bulagen to so too, kanyan ag to la nanengneng so katonungan, tan deralen to so kanepegan da ray anggapoy kasalanan.

⁹ "Ag yo papairapen so sangkaili; amta yo so liknaan na sangkaili lapud sangkaili kayo met nen saman ed Egipto.

¹⁰ Diad loob na anem taon taneman yoy dalin yo tan ani yoy bunga da ray tanaman to.

¹¹ Balet diad kumapiton taon pampainawa yoy dalin yo, tan ag yo aanien so bunga na ontubon tanaman. Nayarin kanen la na saray mairap-bilay so antokaman ya ontubod man, tan nayarin buagen la na saray ayayep ed katakelan so antokaman a natilak. Onya met so gawaen yo ed saray kaubasan yo tan saray kaolibaan yo.

¹² Mankimey kayo na anem agew ed loob na sakey simba, balet ag kayo mankikimey ed kumapiton agew, pian makapampainawa ray aripen tan saray sangkailin kumikimey yo, a pati saray ayayep yo.

¹³ Dengel kayod amin a bengatlan imbagak ed sikayo, siak a Katawan. Ag kayo mampipikasi ed arum a diriyos; ag yo anggan bibitlaen so kangaranan da.

¹⁴ Diad loob na sakey taon mamitlo kayon mampista a pamagalang ed siak.

¹⁵ Diad bulan na Abib, say bulan ya intaynan yod Egipto, silibraan yo so Pista na Tinapay ya Anggapoy Libadura onung na ingganggan kod sikayo. Ag kayo mamangan na tinapay a pinaalsa ed libadura legan na pitoran agew na sayan pista. Ag kayo ondadagon mangigalang ed siak ya anggapoy awit yon bagat.

¹⁶ Silibraan yo so Pista na Panagani no igapo yo lan anien iray bungay tanaman yo. Silibraan yo so Pista na saray Abung-abung diad samput na taon, no borboren yo la ray bunga na kaubasan yo tan arum a tanaman yo.

¹⁷ Kapag taon diad sarayan taloran pista amin da ray lalaki ed sikayo et nepeg ya ondagon mangigalang ed siak a Katawan a Dios yo.

¹⁸ Ag kayo mangisasaklang na tinapay a pinaalsad libadura no mangibagat kayod siak na ayep. Say taba na saray ayep ya imbagat ed siak legan na sarayan pista et ag nepeg ya ikera ya anggad ontombuk a kabwasan.

¹⁹ Iyakar yo ed abung na Katawan a Dios yo so sankaabigan ya onaan a trigon naani yo. Ag yo ilulutod gatas na ina to so kordiro odino kilaw na kanding.

²⁰ Mangibaki ak na sakey ya anghil ya onona nen say sikayo, ta iyagel to kayo legan na pambiahi yo tan iyakar to kayo ed pasen ya imparaan ko.

²¹ Dengel kayod sikato tan onur yo. Ag kayo onsusumlang ed sikato, ta ag to pirdonaen iray onsumlang ed sikato. Sikato so imbakik.

²² Balet no onuren yo tan sumpalen yo ray amin ya ingganggan ko, siak so mibakal ed saray amin a kalaban yo.

²³ Onlan onona nen say sikayo so anghil ko tan iyakar to kayo ed dalin na saray Amorreo, saray Heteo, saray Perezeo, saray Cananeo, saray Heveo, tan saray Jebuseo, tan deralen ko ra.

²⁴ Ag kayo ondadakmomo odino mangigagalang ed saray diriyos da, tan ag yo aaligen iray kagagawa rad panangigalang da. Deral yo ray diriyos da tan igeba yo ray masanton lusek da a bato.

²⁵ No igalang yo ak a Katawan a Dios yo, bindisionan ta kayo na kanen tan inomen tan ekalen ko ray sakisakit yo.

²⁶ Diad dalin yo anggapoy biin naekalan, o biin lepes. Itdan ta kayo na andokey a bilay.

²⁷ Pagmaliwen kon antakot ed siak iray totoon onsumlang ed sikayo; gewgewen ko ray totoon bakalen yo tan papoliktaren kon amin iray kalaban yo tan ibatikan da kayo.

²⁸ Gawaen kon mangamanga ray kalaban yo; pagiten ko ray Heveo, saray Cananeo, tan saray Heteo legan na pankukurang yo.

²⁹ Ag ko ra pagiten ed loob na sakey taon; no pagiten ko rad loob na sakey taon, say dalin magmaliw a begtebegtew tan saray ayayep ed takel et ondakerakel iran onlaban ed sikayo.

³⁰ Ingen, inot-inoten ko ran pagiten ya anggad magenap lay karakel yon mangayaryan na dalin.

³¹ Ipasabik iray ketegan na dalin yo manlapud Dayat ya Akaba ya anggad Ilog na Eufrates, tan manlapud Dayat na Mediteraneo ya anggad kalawakan. Paoleyan kod sikayo ray amin a totoon manaayam ed dalin na Canaan tan pagiten yo ra legan na pankukurang yo.

³² Ag kayo misisipanan ed sikara odino anggan diad saray diriyos da.

³³ Ag yo aabuloyan a manayam ed bansa yo ira man a totoo; no abuloyan yo ra sagyaten da kayon mankasalanan ed siak. No mangigalang kayod saray diriyos da, andi-duaruwan patit ya ed sikayo.

24

¹ "Say Katawan kuantod kinen Moises, Laen yo ak ed palandey, sikayo di Aaron, Nadab, Abiu, tan saray pitomplon pangulo na Israel; no arawi ki ni tuek kayo lan mangigalang ed siak.

² "Sika labat tan anggapo lay arum so onsingger ed siak. Saray totoo et ag ira anggan onkalab a kaibam.

³ "Linmay Moises ed saray totoo tan sinalita tod sikaray amin ya ingganggan tan imbilin na Katawan, et amin da ray totoo nankakasakey iran inmebat, Gawaen mi ray amin ya imbaga na Katawan.

⁴ "Insulat nen Moises ya amin iray ganggan na Katawan. Diad ontombuk a kabkabwasan, si Moises angipaalagey na altar ed alusadsar na palandey tan angilira na labinduan bato, sakey a bato so para kapag sakey ed saray labinduan tribu na Israel.

⁵ "Insan angibaki na saray tobun-balon lalaki tan angisaklang irad Katawan na saray bagat a popoolan tan pigaran baka a bagat a para kareenan.

⁶ "Inala nen Moises so kapaldua na dala na saramay ayep tan inkarga tod saray palanggana, insan to insisibo ed altar.

⁷ "Insan to inala so libro na sipanan, tan maksil ton imbasa ed saray totoo. Inkuanda, Onuren mi so Katawan tan gawaen mi ray amin ya ingganggan to!

⁸ "Insan inala nen Moises imay dala a walad saray palanggana tan insisibo tod saray totoo. Inkuanto, Sikato yay dala a mamaelet na impisipanan na Katawan ed sikayo nen inter tod sikayo ra yan amin a ganggan.

⁹ "Kinmalab ed palandey ira di Moises, Aaron, Nadab, Abiu, tan saray pitomplon pangulo na Israel,

¹⁰ insan anengneng da so Dios na Israel a manalalagey ed pasen a sapiro tan malinew a singa kolur na tawen.

¹¹ Ag pinasakitan na Dios ira yan lalakin pangulo na Israel; anengneng day Dios, insan nantitipon iran angan tan inminom.

¹² Say Katawan kuantod kinen Moises, Laen mo ak diad toktok na palandey tan, no wadman ka la, itdan ta ka na duaran tapyak a bato ya angitatakan ko na saray ganggan ko ya onkanan panaralan na saray totook.

¹³ Namparaan si Moises tan si Josue a katulong to; si Moises ginapwan toy kinmalab ed masanton palandey.

¹⁴ Inkuanen Moises ed saray pangulo, Manalagar kayod kampo ya anggad ipawil mi dia. Wadyan kaiba yo ra di Aaron tan Hur; siopaman a walay problima to onlad sikara.

¹⁵ Linma sirin si Moises ed Palandey na Sinai, et akobutan na lorem imay palandey.

¹⁶ Linmeksab ed palandey so kagalangan na Katawan. Anengneng na saray Israelita imay kagalangan na Katawan a singa apoy a manliub ed toktok na palandey. Say lorem kinobutan to so palandey ed loob na anemiran agew, tan diad kumapiton agew say Katawan manlapud lorem tinawag toy Moises.

¹⁷

¹⁸ Si Moises intuloy toy kinmalab ed palandey ya akobutan na lorem. Nanayam diman ed loob na apataplon agew tan apataplon labi.

25

¹ "Say Katawan kuantod kinen Moises,

² "Ibagam ed saray Israelita a mangibagat irad siak. Awat mo so antokaman a bagat ya iter a mabolbolus ed siak na siopaman a too.

³ "Sarayan bagat et say balituk, pilak, gansa;

⁴ "pinon linen; asul, purpura tan ambalangan tinebey; abel a bagoy kanding;

⁵ "ambalangan pinamagan katat na karniron kalakyan; pinon katat; tablan akasia;

⁶ "larak a para saray lamparaan; saray rikadon onkanad panaglana a larak tan ambalingit ya insinso;

⁷ "kornalina tan arum iran alahas ya ipepeket ed ipod tan diad apis na pagew na Pangulon Pari.

⁸ "Saray totoo et nepeg a manggawa ra na masanton Tuldan para siak, pian makapanayam ak ed kawalaan da.

⁹ "Gawam yan Tulda tan amin iray kagawaan to, onung na planon ipanengneng kod sika.

¹⁰ Manggawa ka na Kaban ya akasia; apataplo tan liman pulgada so karokey to, duamplo tan piton pulgada so kaawang to, tan duamplo tan piton pulgada so kaatagey to.

¹¹ Okupan mod dalem tan paway to na puron balituk tan moldoraan moy balituk iray gilig-gilig to.

¹² Manggawa ka na apatiran balituk a liken na samay Kaban tan ipeket mod apatiran sali to, duaran liken ed kapag diking.

¹³ Manggawa ka na saray tiken ya akasia a panagsakbatan tan okupan mo ra na balituk,

¹⁴ insan mo ra isolung ed saray liken na kapag diking na Kaban.

¹⁵ Nepeg a natilak ed liken iray tiken tan ag ira ekalen.

¹⁶ Insan mo ikargad dalem na Kaban iray duaran baton tapyak ya akaitatakan na saray ganggan.

¹⁷ Manggawa ka na puron balituk a sakub; apataplo tan liman pulgada so karokey to, tan duamplo tan piton pulgada so kaawang to.

¹⁸ Manggawa ka na duaran kirubin a pinitpit a balituk,

¹⁹ sakey so para kapag samput na sakub. Gawam iran akatakep ed sakub.

²⁰ Saray kirubin et manarapan ira tan sakbungan na saray akabuskag a payak da so sakub.

²¹ Ikargam ed dalem na Kaban iray duaran tapyak a bato tan iyan moy sakub ed tapew to.

²² Banaen ta kad man tan diad tagey na sakub, diad nampegleyan na duaran kirubin, iter kod sika ray amin a ganggan kod saray Israelita.

²³ Manggawa ka na lamisaan ya akasia; talomplo tan anem a pulgada so karokey to, labinwalon pulgada so kaawang to tan duamplo tan piton pulgada so kaatagey to.

²⁴ Okupan mod tapew to na puron balituk tan moldoraan mo na balituk iray gilig-gilig to.

²⁵ Igawaan moy pinagkakuadro to a taloran pulgaday kalapar tan diad saray gilig-gilig to moldoraan mo na balituk.

²⁶ Igawaan mo na apatiran panakbatan a balituk a liken tan ipeket mo ed apatiran suyok a kawalaan na saray sali.

²⁷ Saray liken a pangisolungan na saray tiken a panagsakbatan ed lamisaan et ipeket ira ed abay na pinagkakuadro.

²⁸ Akasian kiew so gawaen mon tiken tan okupan mo na balituk.

²⁹ Manggawa ka na saray plato, saray kupa, saray ankelag a pasig, tan saray yaung ya ikanad saray bagat ya alak. Amin da ra ya et balituk.

³⁰ Diad tapew na lamisaan mangyan ka lawas na tinapay a nibagat ed siak.

³¹ Manggawa ka na puron balituk a panangipatoonan na lamparaan. Pinitpit a balituk so dapan to tan say sengeg to. Itekep mod saya iray rosas a pati saray simit tan pital.

³² Anemiran sanga so akaonat ed saray diking to; talora ed balang sakey.

³³ Say balang sakey ed saray anemiran sanga to et nepeg a walay taloran rosas tan singa almindras a pati saray simit tan pital.

³⁴ Say sengeg na panangipatoonan na lamparaan et nepeg a walay apatiran rosas to a singa almindras, a pati saray simit tan pital.

³⁵ Nepeg a walay sakey a simit ed kapag silong na taloran paris a sanga.

³⁶ Saray simit, saray sanga, tan say panangipatoonan na lamparaan et nepeg a nantetekep iran pinitpit a puron balituk.

³⁷ Manggawa ka na pitoran lamparaan tan ipatoon mo rad panangipatoonan, pian onwandag ira ed bandad arap.

³⁸ Manggawa ka na saray puron balituk a panagpotut na pabilo tan saray delsangan.

³⁹ Talomplo tan kapalduan kilo a puron balituk so ikanam ed panggawa na panangipatoonan na lamparaan tan amin da ra yan kagawaan.

⁴⁰ Gawam ira onung ed samay planon impanengneng kod sika dimad tagey na palandey.

26

¹ "Igawaan mo so dalem na Tuldan Ayamay Katawan na samploran kurtina a pinon linen. Asul, purpura, tan ambalanga so tinebey da tan bordaan mo ra na saray kirubin.

² "Gawam a nampapara so kabaleg da; labinapat a yarda so dokey da tan duaran yarda so benlag da.

³ "Pansasaip mon daiten so limara tan ontan met so gawaen mod saray limara.

⁴ "Manggawa kad gilig na samput na kapag saramay impansasaip mo na panagkawitan ya asul ya abel.

⁵ "Peketan mo na limamplon panagkawitan so onaan a kurtina ya impansasaip tan limamplo met so samput a kurtina ed samay sakey; tan pampepetekan mo ra.

⁶ "Manggawa ka na limamplon balituk a panagkawit a sikaray mamakasakey ed saramay duaran impansasaip a kurtina.

⁷ "Labinsakey a kurtina a bagoy kanding so gawaen mo a sakbung na Tulda.

⁸ "Gawam iran nampaparay kabaleg da, labinliman yarda so dokey da tan duaran yarda so benlag da.

⁹ "Pansasaip mon daiten so limara, tan ontan met so gawaen mod saray anemira. Itopim ya idobli so kumanem a kurtina diad tagey na arap na Tulda.

¹⁰ Peketan mo na limamplon panagkawitan so gilig na samput a kurtina ed sakey ya impansasaip tan limamplo met so samput a kurtina ed samay sakey.

¹¹ Manggawa ka na limamplon gansan panagkawit tan ikawit mod saray panagkawitan, pian magmaliw a saksakey a sakbung ira may impansasaip.

¹² Ipaloyloy mo so soluk a kapalduan kurtina diad tagey na beneg na Tulda.

¹³ Say soluk a kapalduay yarda na dokey na samay sakbung et ipaloyloy mod kapag dapag na Tulda, pian nasakbungan to.

¹⁴ Manggawa ka ni na duaran sakbung, sakey so pinabalanga tan pinamagan katat na karniron kalakyan, tan say sakey pinon katat; saraya so sakbung ed tapew.

¹⁵ Manggawa ka na saray tablan akasia a pamaalagey na Tulda.

¹⁶ Limaran mitro so dokey na kapag tabla tan duamplo tan piton pulgada so lapar to.

¹⁷ Nepeg a walay duaran kagur to, pian makapantetekep ira yan tabla. Amin a tabla nepeg a wala ray kagur dan amin.

¹⁸ Manggawa kay duamplon tabla a para bandad abalaten na Tulda,

¹⁹ tan manggawa ka na apataplon pilak a dapan na tabla, duaran dapan ed silong na kapag sakey a tabla a peketan ira na saramay duaran kagur.

²⁰ Manggawa ka na duamplon tablan para bandad baybay na Tulda,

²¹ tan manggawa ka na apataplon pilak a dapan na tabla, duaran dapan ed silong na kapag sakey a tabla.

²² Manggawa kay anemiran tabla ed bandad sagur a beneg na Tulda.

²³ Manggawa ka na duaran tablan para saray sokung.

²⁴ Sarayan tabla ed sokung et asangal ira manlapud leksab ya anggad tagey. Nepeg ya onyay pakagawa na duaran tabla a sikaray duaran sokung.

²⁵ Ontan sirin, walay waloran tabla a walay labinanem a pilak a dapan da, duara ed silong na kapag tabla.

²⁶ Manggawa ka na labinliman balewet ya akasia, limara so para saray tabla ed sakey a diking na Tulda,

²⁷ limara so para saray tabla ed sananey a diking tan limara so para saray tabla ed bandad sagur na Tulda diad beneg to.

²⁸ Nepeg a say karokey na pegley a balewet ya ilira ed pegley da ray tabla et manlapud sakey a samput ya anggad sakey a samput na Tulda.

²⁹ Okupan mo na balituk iray tabla tan peketan mo ra na saray balituk a liken a mangegnad saray balewet a naokupan met na balituk.

³⁰ Ipaalagey moy Tulda onung na samay planon impanengneng kod sika ed tagey na palandey.

³¹ Manggawa ka na kurtina a pinon linen. Asul, purpura, tan ambalanga so tinebey da tan bordaan mo na saray kirubin.

³² Ibitin mo rad apatiran lusek ya akasia a naokupan na balituk, apeketan ira na saray panagkawit, tan nilira ra ed apatiran dapan a pilak.

³³ Sayan kurtina so ibitin mod saray panagkawit a nipeket ya arasig ed tarung na Tulda, tan iliram ed sanib to so Kaban na Sipanan a nankarga na duaran tapyak a bato. Say kurtina so ketegan na Masanton Pasen tan say Sankasantosan a Pasen.

³⁴ Iliram ed tapew na Kaban na Sipanan so sakub to.

³⁵ Diad paway na Sankasantosan a Pasen iliram ed pireg na baybay a dapag na Tulda so lamisaan tan iliram ed pireg na abalaten a dapag na Tulda so panangipatoonan na lamparaan.

³⁶ Say lolooban na Tulda et igawaan mo na sakey a kurtina a pinon linen; asul, purpura, tan ambalanga so tinebey da tan bordaan mo.

³⁷ Para sayan kurtina manggawa ka na limaran lusek ya akasia ya inokupan na balituk tan wala ray nipeket a balituk a panagkawit; manggawa ka met na limaran gansan dapan a toonan na sarayan lusek.

27

¹ "Manggawa ka na altar ya akasia. Nepeg a kuadrado; duara tan kapalduan mitro so karokey to tan duara tan kapalduan mitro so kaawang to, tan sakey tan kapalduan mitro so kaatagey to.

² "Manggawa ka na saray pinagkasaklur ed toktok na apatiran suyok to. Mitekep ira ed altar tan naokupan na gansa.

³ "Manggawa ka na saray palangganan pananginay dapul, tan manggawa ka na saray karyo, saray yaung, saray tinidor, tan saray palangganan pananginay ngalab. Gansa ra yan amin a kagawaan.

⁴ "Manggawa ka na gansan parilya tan peketan mo na apatiran gansan liken iray suyok to.

⁵ "Iliram ed silong na pinagkakuadro na altar so parilya, pian nasabi to so kapaldua na altar.

⁶ "Manggawa ka na saray akasian tiken a panagsakbatan, okupan mo ra na gansa,

⁷ "tan no sakbaten so altar, isolung mod saray liken a nipeket ed saray diking to.

⁸ "Saray tabla so ikanam ed panggawam ed altar, tan gawam a longugan, onung na planon impanengneng kod sika diad tagey na palandey.

⁹ "Say Tuldan Ayaman na Katawan et igawaan mo na saray pinon linen a kurtina a pinagkaalar to. Diad dapag ya abalaten say karokey na kurtina et limamplon yarda,

¹⁰ isabit ira ed duamplon gansan lusek a nipatoon ed duamplon dapan a gansa, tan wala ray pilak a panagkawit tan sangal da.

¹¹ Gawam met so onya ed baybay a dapag na pinagkaalar.

¹² Diad dapag a sagur say benlag na saray kurtina et duamplo tan liman yarda; wala ray samploran lusek tan samploran dapan.

¹³ Diad dapag a bokig a kawalaay lolooban, say benlag na pinagkaalar to et duamplo tan liman yarda met.

¹⁴ Diad kapag diking na lolooban say benlag na saray kurtina et pitora tan kapalduan yarda; wala ray taloran lusek tan taloran dapan.

¹⁵

¹⁶ Diad lolooban say karokey na kurtina to et samploran yarda a pinon linen; asul, purpura, tan ambalanga so tinebey to tan bordaan mo. Apatiray lusek to a nipatoon ed apatiran dapan.

¹⁷ Amin da ray lusek na pinagkaalar et nepeg ya atoop ira na saray sangal a pilak, say panagkawit da et pilak, tan saray dapan da et gansa.

¹⁸ Say pinagkaalar et limamplon yarda so karokey to, duamplo tan liman yarda so kaawang to, duara tan kapalduay yarda so kaatagey to. Saray kurtina et nepeg a pino ran linen tan gansa ray dapan na lusek.

¹⁹ Amin a kagawaan ya ikanad dalem na Tulda tan amin a palpal na Tulda tan saray palpal na pinagkaalar et nepeg a gansa ra.

²⁰ Iganggan mo ray Israelita a mangyakar irad sika na sankaabigan a larak na oliba ya onkanad lamparaan, pian akaselsel lawas.

²¹ Di Aaron tan saray anak ton lalaki et sikaray mangasikaso na lamparaan ed dalem na Tuldan ayaman ko diad paway na kurtina a walad arap na Kaban na Sipanan. Diad arap ko, say lamparaan et nepeg a mandarlang manlapud labi ya anggad kabwasan. Sayan ganggan et nepeg a sumpalen ya anggad angga na saray Israelita tan saray kabyangay boleg da.

28

¹ "Paawit moy agim ya Aaron tan saray lalakin anak to a di Nadab, Abiu, Eleazar, tan Itamar. Ibiig mo rad saray Israelita, ta sikaray manlingkur a papari ed siak.

² "Manggawa ka na saray kawes na pari a para si agim ya Aaron, pian napaalsay nengneng to tan say kagalangan to.

³ "Paawit mo ray amin a marunong a mandait ya initdan ko na karunongan, tan ibagam ed sikara ya igawaan day Aaron na kawes to, ta sikatoy isaklang a sakey a pari a manlingkur ed siak.

⁴ "Ibagam ed sikara a manggawa ray sakey ya apis na pagew, sakey ya ipod, sakey ya andokey a kawes, sakey a binordaan a kawes ya antikey so taklay to, sakey a turban, tan sakey ya abel a balabal. Nepeg dan gawaen ira yan kawes na pari a para si agim ya Aaron tan saray lalakin anak to, ta sikaray manlingkur a papari ed siak.

⁵ "Saray marunong a mandait et nepeg ya ikana ray balituk, asul, purpura, tan ambalangan tinebey, tan pinon linen.

⁶ "Nepeg a diad panggawa ray ipod, ikana ray balituk, asul, purpura, tan ambalangan tinebey, pinon linen tan abordaan.

⁷ "Manggawa ray duaran balabal na takeb a sikaray pangipeketan na duaran samput na ipod.

⁸ "Say balibaliy inkalagan balkes ya agawa met ed balituk, asul, purpura, tan ambalangan tinebey, pinon linen, tan abordaan et nepeg ya ipeket ed ipod pian mansaip ira.

⁹ "Mangala ka na duaran baton onisi tan itatak mod sikara so kangaranan na labinduan lalakin anak nen Jacob,

¹⁰ manlapud sankatakkenan ya anggad sankalangweran; anemiran ngaran so itatak mod sakey a bato tan anemirad sananey.

¹¹ Paitatak mod marunong a platiro diad duaran bato so kangaranan na saray lalakin anak nen Jacob, tan ipeket mo rad balituk a panangipatoonan.

¹² Ipeket mo ra ed saray balabal na takeb na ipod, ta sikaray pakanudnunotan ed saray boleg na Israel. Diad onya si Aaron sakbaten tod saray takeb to so kangaranan da, pian siak a Katawan et nanunotan ko lawas iray totook.

¹³ Manggawa ka na duaran balituk a panangipatoonan,

¹⁴ tan duaran kadina a puron balituk a singa nilobir a koldon, tan ipeket mo ra ed saray panangipatoonan.

¹⁵ Manggawa ka na babalin apis na pagew na Pangulon Pari, ta ikana tod pangamta na linaway Dios. Ikanam iray singa saray inkanam ed impanggawam na ipod: balituk, asul, purpura, tan ambalangan tinebey, tan pinon linen.

¹⁶ Nepeg a kuadrado tan dinobli; siamiran pulgada so karokey to tan siamiran pulgada so benlag to.

¹⁷ Peketan mo na apatiran karasig na mabmablin bato; diad ononan dasig peketan mo na sakey a baton rubi, sakey a topasio, tan sakey a garniti;

¹⁸ diad kumadwan dasig, peketan mo na sakey a baton ismiralda, sakey a sapiro, tan sakey a diamanti;

¹⁹ diad kumatlon dasig, peketan mo na sakey a baton hasinto, sakey ya agata, tan sakey ya amatista;

²⁰ diad kumapat a dasig, peketan mo na sakey a baton birilo, sakey a kornalina, tan sakey a haspi. Ipeket mo ra ya ed panangipatoonan a balituk.

²¹ Diad kapag sakey ed sarayan labinduan bato say sakey a ngaran na lakin anak nen Jacob et itatak; sikaray pakanudnunotan ed saray labinduan tribu na Israel.

²² Manggawa ka na saray puron balituk a kadina a para apis na pagew, a singa nilobir a koldon.

²³ Manggawa ka na duaran singsing a balituk tan ipeket mo ra ed saray tagey a suyok na apis na pagew,

²⁴ tan ipeket mo ray duaran balituk a koldon ed sayan duaran singsing.

²⁵ Ipeket mo ray duaran samput na koldon ed saray duaran panangipatoonan, insan ipeket mo rad arap na saray balabal na ipod.

²⁶ Insan ka manggawa na duaran singsing a balituk tan ipeket mo rad saray leksab a suyok na apis na pagew, diad akindalem na samput ya abay na ipod.

²⁷ Manggawa ka ni na duaran balituk a singsing tan ipeket mo ra ed leksab na arap na duaran balabal na ipod, diad abay na tupig tan tagtagey na balibaliy inkalagan balkes.

²⁸ Saray singsing na apis na pagew isinger mo ra ed saray singsing na ipod, pian say apis na pagew mansiansiad tagtagey na balkes tan ag onlokak. Asul a koldon so pangisinger mo.

²⁹ No onloob si Aaron ed Masanton Pasen, isolung to so apis na pagew ya akaitatakan na kangaranan na saray boleg na Israel, pian siak a Katawan et nanunotan ko lawas iray totook.

³⁰ Ipeket mod apis na pagew so Urim tan Tummim, pian si Aaron et sankaawit to ra no onloob ed pasen a kawalaan ko. Diad saratan a panaon nepeg ton isolung lawas so sayan apis na pagew, pian naamtaan to so linawak para saray Israelita.

³¹ Say intiron andokey a kawes ya onlatup ed ipod et nepeg a gawaen ed asul ya abel.

³² Nepeg a walay lewlew a pangisolungan na olo, tan diad gilig na lewlew itdan na patalker a singa lewlew na kawes pian ag napilat.

³³ Diad liber-liber na saloy to peketan mo na saray granada a ginawad asul, purpura, tan ambalangan tinebey, tan isaletsalet mo ray kampanilya a balituk.

³⁴

³⁵ Si Aaron isolung to yan kawes no manlingkur a sakey a pari. No onla ed kawalaan ko diad Masanton Pasen odino no ontaynan diman, narengel so tanul na saray kampanilya, et diad ontan ag ompatey si Aaron.

³⁶ Manggawa ka na arkos a puron balituk tan tatakan mo na Nisaklang ed Katawan.

³⁷ Isinger mo ya na asul a koldon diad arap na turban.

³⁸ Si Aaron et nepeg ya isolung to ya ed muling to, pian siak a Katawan et awaten koy amin a bagat ya isaklang ed siak na saray Israelita, anggaman a wala ray lingon nagawa na totoo diad pangisaklang da.

³⁹ Say antikey so taklay a kawes nen Aaron et gawam ed pinon linen tan gawam met ed pinon linen so turban; manggawa ka met na abordaan ya abel a balabal.

⁴⁰ Manggawa ka na saray kawes ya antikey so taklay, saray abel a balabal, tan saray sakub na toktok na olo para saray lalakin anak nen Aaron, pian napaalsay nengneng da tan say kagalangan da.

⁴¹ Isolung mo ra yan kawes ed kinen agim ya Aaron tan saray anak ton lalaki. Insan mo ra ikonsagra tan isaklang diad panlanam ed sikara na larak na oliba, pian makapanlingkur iran papari ed siak.

⁴² Igawaan mo ra na potut a pantalon a linen; say karokey to et manlapud balangbang ya anggad ulpo, pian ag nanengneng so laman da.

⁴³ Si Aaron tan saray anak to et nepeg ya isolung da ra ya lawas no onloob ira ed Tuldan Ayamay Katawan odino no onasingger irad altar a manlingkur a papari diad Masanton Pasen, pian ag ira ompatey lapud pangipanengneng dad laman da. Sikato yay mansiansian tontonen a nepeg a sumpalen di Aaron tan saray kabyangay boleg to.

29

¹ "Saya so gawaen mo ed kinen Aaron tan saray lalakin anak to diad pangikonsagram ed sikara, pian manlingkur iran papari ed siak. Mangala ka na sakey a kilaw a bakan kalakyan tan duaran karniron kalakyan ya anggapoy deral na laman da.

² "Ikanam so sankaabigan ya arina, balet ag mo lalaukan na libadura, diad panggawam na tinapay. Igawam ed larak na oliba so arum ya arina, say arum igawam ya anggapoy larak, tan say arum gawam a maimpis a kanen a pinoranisay larak.

³ "Ikargam irad baskit tan ibagat mo rad siak no isaklang mo may bakan kalakyan tan saramay duaran karniron kalakyan.

⁴ "Iyakar mo ra di Aaron tan saray anak to diad lolooban na Tuldan ayaman ko tan ames mo ra onung ed ganggan.

⁵ "Insan mo isolung ed kinen Aaron iray kawes na parisay antikey a taklay a kawes, say ipod, say andokey a kawes ya onlatup ed ipod, say apis na pagew, tan say balkes.

⁶ "Itoon mod olo to so turban tan isinger mod saya so masanton tanda na impangisaklang ya akaitatakay, Nisaklang ed Katawan.

⁷ "Insan mo alaen so larak a panagpoyuk, ikalbom ed olo to, tan poyukan mo.

⁸ "Paasingger mo ray anak to tan solungan mo ra na kawes ya antikey so taklay;

⁹ "balabalan mo rad awak tan isinger mod kaoloan da so sakub na toktok na olo. Ontan so pangikonsagram ed kinen Aaron tan saray lalakin anak to. Sikara tan saray kabyangay boleg da et nepeg a manlingkur iran papari ed siak diad ando lan ando.

¹⁰ Iyakar mod arap na Tuldan Ayamay Katawan so bakan kalakyan tan ibagam ed kinen Aaron tan saray lalakin anak to ya itapew dad olo to iray kalimaan da.

¹¹ Patey mod arapan ko so baka diad lolooban na Tulda.

¹² Mangala kay daiset a dala na bakan kalakyan tan diad panamegley na tamorom iponaris mod saramay pinagkasaklur na altar. Say keran dala ikalbom ed leksab na altar.

¹³ Insan mo alaen so amin a taba a kinmulyapot ed saray loob-loob, say sankaabigan a parti na altey, tan saray duaran batuk a pati taba ra, tan poolan mo ran sakey a bagat ed siak diad tapew na altar.

¹⁴ Balet poolan mod paway na kampo so laman na bakan kalakyan, say katat to tan say pait to; sikatoy bagat a para kasalanan.

¹⁵ Alam so sakey ed saramay karniron kalakyan tan ibagam ed kinen Aaron tan saray lalakin anak to ya itapew dad olo to iray kalimaan da.

¹⁶ Patey mo may karniro tan alam so dala to, insan mo isibo ed saray apatiran dapag na altar.

¹⁷ Tegtegteg mo may karniro; orasan mo ray loob-loob to tan saray sali to tan iyan mo ra ed tapew na olo to tan saray arum a tegteg.

¹⁸ Poolan mod tapew na altar so intiron karniro a sakey a bagat a popoolan. Makapaliket ed siak so balingit na sayan bagat.

¹⁹ Alam so sananey a karniro tan ibagam ed kinen Aaron tan saray anak to ya itapew dad olo to iray kalimaan da.

²⁰ Patey mo may karniro, tan mangala ka na daiset a dala to tan iporanis mod gilig na kawanan a kalayagan di Aaron tan saray anak to; iporanis mo met ed saray kawanan a tangan na kalimaan da tan diad saray kawanan a tangan na kasaliyan da. Isibom ed apatiran dapag na altar so keran dala.

²¹ Mangala ka na daiset a dala a walad altar tan say daiset a larak a panagpoyuk, tan iwalsik mo ra ed saray kawes di Aaron tan saray anak to. Diad ontan si Aaron, saray anak to, tan saray kawes da et nisaklang iran masanto ed siak.

²² Gerger moy taba na karniron kalakyan, say taba na ikul, say taba na saray loob-loob, say sankaabigan a parti na altey, saray duaran batuk a pati taba ra, tan say kawanan ya ulpo.

²³ Diad sambaskit a tinapay a nisaklang ed siak, mangala ka na sansasakey a tinapay: sakey a tinapay ya inggawad larak na oliba, sakey a tinapay ya ag inggawad larak, tan sakey a kanen a maimpis.

²⁴ Iyan mo ra yan amin a kakanen ed saray lima nen Aaron tan saray anak to tan paisaklang mo ran sakey a nidoma-doman rigalo ed siak.

²⁵ Insan mo ra alaen ed sikara tan poolan mo ra ed tapew na altar diad tapew na samay bagat a popoolan; tan sikato yay kakanen a bagat ed siak. Makapaliket ed siak so balingit na sayan bagat.

²⁶ Alam so pagew na sayan karniron kalakyan tan iyapay mon nidoma-doman rigalo ed siak. Sayan parti na ayep et kayaryan mo.

²⁷ No nikonsagra la so pari, say pagew tan say ulpo na karniron kalakyan ya inkanad pangikonsagra et nepeg ya iyapay a nidoma-doman rigalo ed siak tan nibiig a kayaryan na saray papari.

²⁸ Nepeg ya ag balut naoman yan imbagak; no saray totoo et mangisaklang ira na saray bagat a para kareenan, say pagew tan say ulpo na ayep et kayaryan ira na saray papari. Sikato yay rigalod siak a Katawan na saray totoo.

²⁹ Saray masanton kawes nen Aaron et nepeg ya ipalima ed saray anak to kayari na ipatey to, pian nisolung da ra no sikaray ikonsagra.

³⁰ Say lakin anak nen Aaron, ya onsalat ed sikato a sakey a pari tan onloob ed Tuldan Ayamay Katawan a manlingkur ed Masanton Pasen, et nepeg ya isolung to ra yan kawes ed loob na pitoran agew.

³¹ Alam so karni na karniron kalakyan ya inkanad impangikonsagrad kindi Aaron tan saray anak to tan ilambung mo ed sakey a masanton pasen.

³² Diad lolooban na Tuldan Ayamay Katawan so panganan dad saya, a pati saray tinapay ya atilak ed samay baskit.

³³ Kanen da so inkanad sirimonya na pakapaandiy kasalanan nen akonsagraan ira. Saray papari labat so nayarin mangan ed sayan kakanen, lapud masanto yan kakanen.

³⁴ No walay kerad kabwasan a karni odino tinapay, nepeg a poolan; ag nepeg a kanen, ta masanto.

³⁵ Diad loob na dugarugan pitoran agew gawam so sirimonya na pangikonsagra ed kinen Aaron tan saray anak to onung na ingganggan ko.

³⁶ Inagew-agew a nepeg mon ibagat so sakey a karniron kalakyan, pian napaandi so kasalanan; saya et linisan to so altar. Insan mo lanaan na larak na oliba, pian napasanto.

³⁷ Gawam ya ed loob na pitoran agew. Diad ontan magmaliw a sigput a masanto so altar, tan siopaman odino antokaman a makadiwit ed sayan altar et napasakitan, lapud pakayari na inkasanto to.

³⁸ Inagew-agew ed anggan kapigan a panaon, mangibagat kayo na duaran kordiro ya ataonan la.

³⁹ Ibagat yod kabwasan so sakey a kordiro tan diad labi say sakey.

⁴⁰ Say ononan kordiro tekepan yo na sakey kilon pinon arina a nikames ed sakey a litron puron larak na oliba tan sakey a litron alak a sikatoy sakey a bagat.

⁴¹ Ibagat yod labi so kumadwan kordiro, tan tekepan yo na singa karakel na arina, larak na oliba, tan alak a singa samay bagat ed kabwasan. Saya so kakanen a bagat ed siak a Katawan, tan makapaliket ed siak so balingit to.

⁴² Diad amin a panaon ya onsabi, sayan bagat a popoolan et nepeg ya ibagat ed arap ko diad lolooban na Tuldan Ayamay Katawan. Diman ak miabetan ed saray totoo tan mitongtong ak ed sika.

⁴³ Diman ak miabetan ed saray Israelita, tan say kagalangan ko pagmaliwen ton masanto iman a pasen.

⁴⁴ Gawaen kon masanto so Tulda tan say altar, tan gawaen ko met a masanto si Aaron tan saray anak ton lalaki, pian makapanlingkur iran papari ed siak.

⁴⁵ Manayam ak ed kawalaan na saray Israelita tan siak so Dios da.

⁴⁶ Naamtaan da a siak so Katawan a Dios da ya angipaway ed sikara ed Egipto, pian makapanayam ak ed kawalaan da. Siak so Katawan a Dios da.

30

¹ "Manggawa ka na altar ya akasia a panagpoolan na insinso.

² "Nepeg a kuadrado; labinwalon pulgada so karokey to tan labinwalon pulgada so kaawang to, tan talomplo tan anem a pulgada so kaatagey to. Saray pinagkasaklur ed apatiran suyok to et nepeg a katekep na altar.

³ "Okupan mo na puron balituk so tagey to, saray apatiran dapag to, tan saray pinagkasaklur to, tan moldoraan mo na balituk iray gilig-gilig to.

⁴ "Manggawa kay duaran balituk a liken tan ipeket mo rad duaran dapag diad leksab na moldora tan sikaray pangisolungan ed saray tiken a panagsakbatan.

⁵ "Nepeg ya akasia ra yan tiken tan okupan mo ra na balituk.

⁶ "Iliram yan altar diad paway na kurtinan akabitin ed arap na Kaban na Sipanan. Diman so pasen a pangabetan kod sika.

⁷ "Kapag kabwasan no iparaan nen Aaron iray lamparaan, sikatoy nepeg a mamool na ambalingit ya insinso ed tapew na altar.

⁸ "Onya met so gawaen to no selselan to ray lamparaan no labi. Sayan bagat na insinso et mansiansia lawas ya anggan kapigan.

⁹ "Diad sayan altar ag kayo mangibabagat na insinson aliwan masanto odino bagat ya ayep odino bagat a trigo, tan ag kayo mangikakalbo dia na bagat ya alak.

¹⁰ Maminsan ed kapag taon gawaen nen Aaron so sirimonya a panlinis ed sayan altar diad pangiporanis tod saray pinagsaklur na altar; say iporanis to et say dala na ayep ya imbagat a pangekal na kasalanan. Gawaen ya a tinaon ed kapigan man a panaon. Sayan altar et nepeg a sigput a masanto, tan nisaklang ed siak a Katawan.

¹¹ Say Katawan kuantod kinen Moises,

¹² No alaen moy bilang da ray Israelita, balang sakey ed sikara nepeg a dondonen tod siak so bilay to, pian anggapoy ondalan a salot ed sikato legan ya aalaen so bilang na totoo.

¹³ Balang sakey ed saray totoon bilangen et nepeg a mangiter na nakaukolan a bayar onung ed panagsimbang ed santuario. Balang sakey nepeg a bayaran to ya, tan sakey yan bagat ed siak.

¹⁴ Balang sakey a nabilang, salanti say balang lakin mantaon na duamplo a mampaatagey, et nepeg a mangiter ed siak na sayan babayaran.

¹⁵ Say mayaman a too ag nepeg a mambayar na masoluk, tan say mairap-bilay ag nepeg a mambayar na kulang, no sikaray mambayar na panondon dad bilay da.

¹⁶ Alam ira yan kuarta ed saray Israelita tan igastos mo ed panasikaso ed Tuldan Ayamay Katawan. Sayan buis sikatoy bayar a panondon na bilay da, et ag ko ra lingwanan ya iyagel.

¹⁷ Say Katawan kuantod kinen Moises,

¹⁸ Manggawa kay gansan talyasi a panorasan tan say gansan ansagan to. Iliram ed nanleetan na Tulda tan say altar, tan kargaan mo na danum.

¹⁹ Si Aaron tan saray anak ton lalaki et ikana ra yan danum a panoras day lima tan sali ra,

²⁰ kasakbayan iran onloob ed Tulda odino onasingger ed altar a mangisaklang na bagat a kakanen. Diad ontan ag ira ompatey.

²¹ Nepeg dan orasan so lima tan sali ra, pian ag ira ompatey. Sayan totontonen nepeg a sumpalen da tan saray kabyangay boleg da ed anggan kapigan a panaon.

²² Say Katawan kuantod kinen Moises,

²³ Mangala ka na saray sankaabigan a rikadoanemiran kilo ya onturon mira, taloran kilon ambalingit a kanila, taloran kilon ambalingit a kania,

²⁴ tan anemiran kilon kasia (asimbang ira yan amin onung ed panagsimbang ed santuario). Laukan mo na sakey a galon a larak na oliba,

²⁵ tan manggawa ka na masanton larak a panagpoyuk a singa panaggaway pabalingit.

²⁶ Ikanam ya a pampoyuk ed Tuldan Ayamay Katawan diad Kaban na Sipanan,

²⁷ diad lamisaan a pati amin a kagawaan to, diad panangipatoonan na lamparaan a pati kagawaan to, diad altar a panagpoolan na insinso,

²⁸ diad altar a panangisaklangan na bagat a popoolan a pati amin a kagawaan to, tan diad talyasi a pati ansagan to.

²⁹ Onyay pangisaklang mod saraya, et magmaliw iran sigput a masanto, tan siopaman odino antokaman a makadiwit ed saraya napasakitan lapud pakayari na inkasanto ra.

³⁰ Insan mo poyukan si Aaron tan saray lalakin anak to tan ikonsagram ira a papari a manlingkur ed siak.

³¹ Ikuanmod saray Israelita, Sayan masanton larak a panagpoyuk et nepeg ya ikana ed panlingkur ed siak diad kapigan man a panaon.

³² Ag nepeg ya ikalbo ed ordinarion too, tan ag yo nepeg ya aligen so inkagawa to. Masanto yan larak; nepeg a masanto so pangipasen yo.

³³ Siopamay toon mangalig na inkagawa to odino mangikanad siopaman ya aliwan pari, sikatoy ag la nibilang a sakey ed saray totook.

³⁴ Say Katawan kuantod kinen Moises, Mangala ka na nampaparan karakel na onggendan a masamit a rikadoistakti, onika, galbanum, tan puron olibanum.

³⁵ Manggawa ka na insinso, a singa panaggawa na pabalingit. Laukan mo na asin pian mansiansian puro tan masanto.

³⁶ Temek mon singa pinon pulbo so daiset ed sayan insinso, iyakar mod dalem na Tuldan Ayamay Katawan, insan mo ipukapok ed arap na Kaban na Sipanan. Ipasen mon sigput a masanto so sayan insinso.

³⁷ Ag kayo manggagawa na singa onyan insinson para sikayo. Ipasen yon masanton bengatla a nisaklang ed siak.

³⁸ Siopamay toon manggawa na kapara to ya, ta ikana ton pabalingit, ag la nibilang a sakey ed saray totook.

31

¹ "Say Katawan kuantod kinen Moises,

² "Pinilik si Bezalel a lakin anak nen Uri tan apo nen Hur tan kabyangan na boleg na Juda;

³ "sikatoy pinanok na pakayarik. Initdan ko na pakatalus, dunong, tan pakayari a manggawa na antokaman a kimey ya inartian;

⁴ "nayarian toy mamplano na balibalin kimey tan nagawa to ra ed balituk, pilak, tan gansa;

⁵ "marunong a mantabas na saray alahas ya ilira, tan mankorti na tabla tan arum ni ran inartian a kimey.

⁶ "Pinilik met ya ontulong ed kinen Bezalel si Oholiab a lakin anak nen Ahisamac tan kabyangan na boleg nen Dan. Initdan ko met na baleg a dunong iray amin nin arum a kumikimey, pian nagawaan day amin a labay kon pagawa:

⁷ "say Tuldan Ayamay Katawan, say Kaban na Sipanan a pati say sakub tod tapew, amin a kagawaan ed dalem na Tulda,

⁸ "say lamisaan tan saray kagawaan to, say puron balituk a panangipatoonan na lamparaan tan amin a kagawaan to, say altar a panagpoolan na insinso,

⁹ "say altar a panangisaklangan na bagat a popoolan tan amin a kagawaan to, say talyasi tan say ansagan to,

¹⁰ saray balibaliy inkagawan kawes na pari a para si Aaron tan saray anak ton lalaki ya ikana ra no manlingkur iran papari,

¹¹ say panaglana a larak, tan say ambalingit ya insinson para Masanton Pasen. Diad panggawa ed sarayan bengatla, nepeg a gawaen da onung ed amin a ganggan kod sika.

¹² Say Katawan kuantod saray Israelita

¹³ diad panamegley nen Moises, Ngilinan yoy Agew a Panagpainawak, lapud sikatoy sakey a tanda ed siak tan sikayo, diad amin a panaon ya onsabi; sikato met so mangipanunot ed sikayo a siak a Katawan et ginawa ta kayon dilin totook.

¹⁴ Nepeg yon ngilinan so agew na panagpainawa, lapud masanto yan agew. Siopamay toon ag manngilin ed sayan agew, no ag ingen mankimey, nepeg a pateyen.

¹⁵ Anem agew a makapankimey kayo, balet say kumapiton agew et masanton agew a nisaklang ed siak. Siopamay toon manggaway kimey ed sayan agew, nepeg a pateyen.

¹⁶ Saray Israelita nepeg a ngilinan da yan agew, ta sakey yan tanda na sipanan.

¹⁷ Sakey yan mansiansian tanda na sipanan ed saray Israelita tan siak, lapud siak a Katawan et pinalsak so tawen tan say dalin ed loob na anemiran agew, tan diad kumapiton agew tinmonda ak a nankimey tan nampainawa ak.

¹⁸ Nen asumpal na Dios so akisalita ed kinen Moises diad tagey na Palandey na Sinai, inter tod kinen Moises so duaran tapyak a bato ya angitatakan na dilin Dios na saray ganggan.

32

¹ "Nen anengneng na saray totoo ya ag ni inmakseb si Moises no ag ingen abaybayag lan wadmad tagey na palandey, kinumpog day Aaron tan kuandad sikato, Ag tayo amta no antoy agawad saman a toon Moises ya angipaway ed sikatayod Egipto, kanyan igawaan mo kami na sakey a dios a mangiwanwan ed sikatayo.

² "Kanyan kuanen Aaron ed sikara, Ekal yo ray balituk ya ikaw na kaasawaan yo, ikaw na saray anak yon lalaki tan bibii, ta iyakar yo ra diad siak.

³ "Kanyan amin da ray totoo ineekal da ray ikaw dan balituk tan inyakar da rad kinen Aaron.

⁴ "Inala to ra nen Aaron, tinonaw to ra, inkalbo tod moldora, tan ginawa ton balituk a bakan kalakyan. Saray totoo kuanda, Israel, sikato ya so dios tayo ya angipaway ed sikatayod Egipto.

⁵ "Insan si Aaron nanggawa na altar ed arap na samay balituk a bakan kalakyan tan imbawag to, Nabwas walay pista a pamagalang ed Katawan.

⁶ "Diad kabkabwasan angyakar ira na pigaran ayep ya isaklang dan bagat a popoolan tan bagat a para kareenan. Nandorongon nampista iray totoo, tan say pista et agawa ya inoman tan liketan na laman.

⁷ "Say Katawan kuantod kinen Moises, Ganatan moy onakseb, ta saray totoom ya impaway mod Egipto et nankasalanan ira tan impolisay da ak.

⁸ "Sinmian la rad dalan ya ingganggan kon tombuken da; nanggawa ray inmoldoran balituk a bakan kalakyan, igagalang da tan pangibabagatan da. Ibabaga ra a sikatoy dios da ya angipaway ed sikara manlapud Egipto.

⁹ "Amtak so inkaawet na olo da ra yan totoo.

¹⁰ Natan, ag mo ak babanoen. Ampetang so olok ed sikara, kanyan deralen ko ra. Insan pagmaliwen ta ka, tan saray kabyangay boleg mo, a sakey a bansan matalonggaring.

¹¹ Balet si Moises akikasi ed Katawan a Dios to tan kuanto, Katawan, akin et mapalaloy pasnuk mod saray totoom ya impaway mod Egipto diad panamegley na baleg a pakayarim tan biskeg mo?

¹² Akin et abuloyan mon saray Egipsio et nayarian dan ibaga ya impaway mod Egipto iray totoom, ta getmam a pateyen ira ed kapalandeyan tan deralen iran sigput? Ag ka la kari mamapasnuk; mangoman ka lay kanunotan tan ag mo la komun ipapadalan so deral ed saray totoom.

¹³ Nunot mo pa ra di aripen mon Abraham, Isaac, tan Jacob. Nunot mo pa a sinambaan mo ya itdan iray amayamay a kabyangay boleg a singa karakel na bibitewen ed tawen, tan iter mod saray kabyangay boleg da so intiron dalin ya insipan mon kayaryanen da ed ando lan ando.

¹⁴ Lapud saya say Katawan angoman na kanunotan tan ag to la impadalan ed saray totoo to so deral a ginetma to lan gawaen.

¹⁵ Inmakseb ed alusadsar na palandey si Moises tan sankaawit to ra may duaran tapyak a baton nantopag ya akaitatakan na saray ganggan.

¹⁶ Say Dios a dili so nanggawa ed saramay tapyak a bato tan intatak tod saraya iray ganggan.

¹⁷ Nadngel nen Josue a maneeyag iray totoo tan kuantod kinen Moises, Narerengel koy eyag na bakal ed kampo.

¹⁸ Si Moises kuanto, Aliwan eyag na impanalo so narerengel ko, odino akis na inkatalo; sakey a tanul na panagkanta.

¹⁹ Nen asingger lay Moises ed kampo tan nabantag to la may bakan kalakyan tan saray totoon mansasayaw-sayaw, mapalaloy impakapasnuk to. Dimad alusadsar na palandey imbantak to ra may awit ton tapyak a bato, et apisagpisag ira.

²⁰ Inala to may bakan ginawa ra, tinonaw to, tinemek ton singa pulbo, inlauk tod danum, insan to impainom ed saray Israelita.

²¹ Inkuantod kinen Aaron, Antoy ginawa na sarayan totoo ed sika, et impanggawam ira na ontan lan belat na kasalanan?"

²² Inmebat si Aaron, Ag ka kari mamapasnuk ed siak; amtam a sipaparaan la ran manggaway kaogsan.

²³ Inkuandad siak, Ag tayo amta no antoy agawad saman a toon Moises ya angipaway ed sikatayod Egipto, kanyan igawaan mo kami na dios a mangiwanwan ed sikatayo.

²⁴ Kinerew kod sikaran iyakar dad siak iray balituk ya alahas da, et amin da ray walay alahas ineekal da tan inter da rad siak. Imbuntok kod apoy ira may alahas da, et bakan kalakyan so pinawayan to.

²⁵ Si Moises anengneng ton si Aaron et pinaolyan ton ag la nabano iray totoo tan ginawa ray sikaran dili a makulangkulang ed arap na saray kalaban da.

²⁶ Kanyan nanalagey ed puirta na kampo tan ineyag to, Amin yon kagampi na Katawan, dago kayo dia! Kanyan amin daray Levita nantitipon irad kawalaan to,

²⁷ tan kuantod sikara, Say Katawan a Dios na Israel igaganggan to kayon amin ya isalokbit yoy ispada yo tan manliber kayod kampo manlapud sayan puirta ya anggad sananey, tan patey yo ray agagi yo, saray kakaaro yo, tan saray kakaabay yo.

²⁸ Saramay Levita inmonur ira, kanyan pinapatey day sakey a talon libon lalaki ed saman ya agew.

²⁹ Si Moises kuantod saray Levita, Natad sayan agew insaklang yoy sikayon dili a manlingkur a papari ed Katawan diad impamatey yod saray lalakin anak tan agagi yo, kanyan say Katawan binindisionan to kayo ed sayan agew.

³⁰ Diad ontombuk ya agew si Moises kuantod saray katoowan, Ambelat a tuloy so kasalanan a ginawa yo. Balet onkalab ak lamet ed palandey ta laen koy Katawan; angangko nagamuran koy pakapirdona na kasalanan yo.

³¹ Si Moises pinmawil sirin ed Katawan tan kuanto, Ambelat a tuloy so kasalanan a ginawa na saraman a totoo. Nanggawa ray dios a balituk tan inggalang da.

³² Pirdonam pa ray kasalanan da; balet no ag mo ra pirdonaen, boral mo lay ngaran ko ed libro ya angisulatan mod kangaranan na saray totoom.

³³ Say Katawan inmebat, Say kangaranan na saramay nankasalanan ed siak so boralen kod librok.

³⁴ Laka la, ta ipangulom iray totoo ya onla ed pasen ya imbagak a laen yo. Say anghil ko so mangiwanwan ed sikayo, balet onsabiy oras a dusaen ko ra man a totoo lapud kasalanan da.

³⁵ Kanyan say Katawan angipadalan na salot ed saray totoo, lapud impanggawa ray Aaron na balituk a bakan kalakyan.

33

¹ "Say Katawan kuantod kinen Moises, Taynan yo yan pasen, sika tan saray totoo ya impaway mod Egipto, ta laka yod dalin a sinambaan kon iter ed kinen Abraham, Isaac, tan Jacob tan diad saray kabyangay boleg da.

² "Ibakik a mangiwanwan ed sikayo so sakey ya anghil, tan pagiten ko ray Cananeo, saray Amorreo, saray Heteo, saray Pereseo, saray Heveo, tan saray Jebuseo.

³ "Sikayoy onla ed sakey a mayaman tan mataban dalin. Balet aliwan siak a dili so mila ed sikayo lapud anawet so olo yon totoo, ompan naderal ta kayo ed dalan.

⁴ "Nen nadngel ya na saray totoo, ginapwan day nanermen tan ag la ran balut nanalahas.

⁵ "Say Katawan kuantod sikara diad panamegley nen Moises, Anawet so olo yon totoo. No siak so milad sikayo anggan maganon bekta labat, deralen ta kayon sigput. Okpus yo natan iray alahas yo, insan ko nunoten no antoy gawaen kod sikayo.

⁶ "Kanyan nen tinaynan na saray Israelita so Palandey na Sinai, ag la ra nankanay alahas.

⁷ "Kapag ilira na saray Israelita so kampo, si Moises alaen to may masanton Tulda tan ipaalagey to ed paway na kampo diad arawdawiy daiset. Tinawag to na Tuldan Ayamay Katawan, tan siopamay toon labay toy mangipanon ed Katawan, ompaway ya onlad Tulda.

⁸ "Kapag si Moises et ompaway ya onlad man ed Tulda, saray totoo manalagey ira ed lolooban na katuldaan da tan bantagen day Moises ya anggad ag to iloob ed Tulda.

⁹ "No akaloob lay Moises ed Tulda, onleksab imay lusek a lorem, tan manayam ed lolooban na Tulda, insan say Katawan mitongtong ed kinen Moises manlapud samay lorem.

¹⁰ No anengneng la na saray totoo so lusek a lorem dimad lolooban na samay Tulda, ondakmomo ran mangigalang ed Katawan.

¹¹ Say Katawan misalita sirin a lupa-lupaan ed kinen Moises, a singa pisalita na sakey a too ed kaaro to. Insan si Moises ompawil ed kampo. Balet say katulong ton tobun-balon laki a si Josue ya anak nen Nun et manayam ed dalem na Tulda.

¹² Si Moises kuantod Katawan, Tua ya imbagam ed siak ya ipangulok iray totoo ya onlad saman a dalin, balet ag mo imbagad siak no siopay ibakim a mangibad siak. Imbagam a kabat mo ak tan makaliliket kad siak.

¹³ No talagan makaliliket kad siak, ibagam pad siak so linawam, pian nalingkuran ta ka tan nituloy koy pamaliket kod sika. Ag mo pa met lilingwanan a pinilim yan bansa a kayaryan mo.

¹⁴ Say Katawan kuanto, Mila ak ed sikayo, tan panaloen ta kayo.

¹⁵ Inmebat si Moises, No ag ka milad sikami, ag mo kami patataynanen ed sayan pasen.

¹⁶ Panoy pakaamta na siopaman a makaliliket kad saray totoom tan diad siak, no ag ka milad sikami? Say kiwawalam ed sikami et mangipanengneng a doma kami ed saray arum a totoo diad tapew na dalin.

¹⁷ Say Katawan kuantod kinen Moises, Gawaen koy kerew mo, lapud kabkabat ta ka tan makaliliket ak ed sika.

¹⁸ Insan kinerew nen Moises, Pikasik pan ipanengneng mod siak so kagalangan mo.

¹⁹ Inmebat so Katawan, Ipadalan kod arap mo so amin a kaabigan ko tan ibawag koy ngaran ko a Yahweh Aroen tan kasian ko ray pilien ko.

²⁰ Ag ko ipanengneng ed sikay lupak, ta anggapoy toon mambilay a makanengneng na lupak,

²¹ balet niay pasen ed abay ko a kawalaay sakey a baton baleg a pakapanalageyan mo.

²² No onlabas so kagalangan ko, iyan ta ka ed letak na bato tan sakuban ta ka na limak legan kon ondadalan.

²³ Insan ko ekalen so limak et beneg ko lad satay nanengneng mo, aliwan say lupak.

34

¹ "Say Katawan kuantod kinen Moises, Manabas ka na duaran tapyak a bato a singa saramay inmona, ta itatak kod sikara iray salitan nitatak ed saramay inmonan duaran tapyak a bato ya imbetag mo.

² "Mamparaan ka nabwas na kabwasan, kalab kad Palandey na Sinai, tan bana mo ak dimad tagey to.

³ "Anggapoy nepeg a milad sika; anggapoy toon nepeg a nenengneng ed anggan iner a pasen na palandey; nepeg met ya anggapo so karniro odino baka a mankabkab ed alusadsar na palandey.

⁴ "Kanyan si Moises anabas na duaran tapyak a bato, tan diad kabkabwasan na ontombuk ya agew inawit to rad tagey na Palandey na Sinai, onung na ingganggan na Katawan.

⁵ "Say Katawan inmakseb diad panamegley na sakey a lorem, nanalagey diman a kaiba toy Moises, tan imbawag toy ngaran to a Yahweh.

⁶ "Say Katawan ed satan linmabas ed arap nen Moises tan imbawag to, Siak a Katawan so sakey a Dios a maaro tan mapangasi; aliwa ak a maipapasnuk tan napno ak na baleg a panangaro tan katooran.

⁷ "Tooren koy sipan kod saray libo-libon kailalakan tan pirdonaen koy kaogsan tan kasalanan; balet dusaen kon dusaen iray anak tan apo, anggad kumatlo tan kumapat a kailalakan, lapud saray kasalanan na saray atateng da.

⁸ "Tampol a dinmakmomo ya anggad dalin si Moises tan angigalang.

⁹ "Inkuantod, Katawan, no talagan makaliliket kad siak, kerewen kod sikan mila kad sikami. Anawet so olo na sarayan totoo, balet pirdonam pa ray kaogsan tan kasalanan mi, tan awat mo kami a totoom.

¹⁰ Say Katawan kuantod kinen Moises, Misipanan ak natan ed saray Israelita. Diad arap da manggawa ak na saray makapakelaw a bengatla ya ag nin balut agawa ed inerman a pasen diad saray bansa ed tapew na dalin. Amin a katoowan nanengneng da ray makapakelaw a gawaen ko, siak a Katawan, lapud manggawa ak para sikayo na makapakebyew a bengatla.

¹¹ Onur yo ray ganggan ya iter ko natan ed sikayo. Pagiten ko ray Amorreo, saray Cananeo, saray Heteo, saray Perezeo, saray Heveo, tan saray Jebuseo legan na pankukurang yo.

¹² Ag kayo misisipanan ed saray totood bansa a laen yo, ta nayarin patit ya ed sikayo.

¹³ Igeba yo ingen iray altar da, deral yo ray masanton lusek da, tan batang yo ray tanda na diosa ran Asera.

¹⁴ Ag kayo mangigagalang ed arum a diriyos ta siak a Katawan et maimon ak a Dios.

¹⁵ Ag kayo misisipanan ed saray totood bansan laen yo, ta no mangigalang irad diriyos da tan mangibagat irad sikara, bagaan da kayon mibiang ed sikara, et natukso kayod satan a mangan na kakanen ya ibabagat da ed saray diriyos da.

¹⁶ Saray lalakin anak yo et asingger a mangasawa ra na saray bibiin anak da, et natanggoyur da ran ombeneg ed siak tan mangigalang ed saray diriyos da.

¹⁷ Ag kayo manggagawa na inmoldoran diriyos a galangen yo.

¹⁸ Silibraan yoy Pista na Tinapay ya Anggapoy Libadura. Onung na ingganggan kod sikayo, mangan kayo na tinapay ya anggapoy libadura ed loob na pitoran agew no bulan na Abib, ta saman imay bulan ya impanaynan yod Egipto.

¹⁹ Amin a lakin pangulowan tan amin a besag a kalakyan ya amon ayep et kayaryan ko,

²⁰ balet nepeg yon dondonen so balang besag ya asno diad pangibagat yo na sakey a kordiro a mangalay pasen to. No ag yo dondonen, poter yoy beklew to. Dondon yo so balang pangulowan a laki. Balang toon ondagod siak nepeg a walay awit ton bagat.

²¹ Walay anem agew a pakapankimey yo, balet mampainawa kayo no kumapiton agew, anggan panaon na panagbaka odino panagani.

²² Silibraan yoy Pista na Panagani no igapo yo lay manani na onaan a bungay trigo yo, tan silibraan yoy Pista na Abung-abung diad samput na taon no borboren yo la ray bungay kakiewan.

²³ Diad loob na sakey taon amin da ray lalaki ed sikayo et nepeg a mamitlo ran ondago a mangigalang ed siak a Katawan, say Dios na Israel.

²⁴ Kayarik a pagiten iray totood bansan looban yo tan no apaawang ko lay dalin yo, anggapo lad satay toon manakop na bansa yo legan na taloran pista ya abitla.

²⁵ Ag kayo mangibabagat na tinapay a pinaalsad libadura no mangisaklang kayod siak na ayep. Ag kayo mangikekera ya anggad kabwasan na antokaman a parti na ayep a pinatey no Pista na Paskua.

²⁶ Kapag taon iyakar yod abung na Katawan a Dios yo so ononan trigon naani yo. Ag yo ilulutod gatas na ina to so kordiro odino kilaw na kanding.

²⁷ Say Katawan kuantod kinen Moises, Isulat mo ra yan salita, ta sikara yay letnegan na pisisipanan kod sika tan say Israel.

²⁸ Diad loob na apataploy agew tan labi si Moises kaiba tod tagey na palandey so Katawan; ag balut angan, ni inminom. Intatak tod saray tapyak a bato iray salita na sipanansaray Samploran Ganggan.

²⁹ Nen inmakseb a nanlapud Palandey na Sinai si Moises a sankaawit to ray Samploran Ganggan, sinminag so lupa to lapud akisalita ed Katawan; balet ag to ya amta.

³⁰ Si Aaron tan amin a totoo ninengneng day Moises, et anengneng da a masnag so lupa to, kanyan antakot iran onsingger ed sikato.

³¹ Balet si Moises pinaasingger to ra di Aaron tan saray amin a pangulo na katoowan tan akisalitad sikara.

³² Kayari to ya, si Moises minungkog na amin ya Israelita, tan inter tod sikara iray amin a ganggan ya inter ed sikato na Katawan dimad tagey na Palandey na Sinai.

³³ Kayari na impitongtong nen Moises ed sikara, sinakbungan to so lupa to.

³⁴ Kapag si Moises onlan mitongtong ed Katawan diad dalem na Tuldan Ayamay Katawan, ekalen toy sakbung na lupa to. Kapaway to, ibaga tod saray Israelita iray amin ya ingganggan na Katawan;

³⁵ nanengneng na saray Israelita a masnag so lupa to. Insan to sakbungan so lupa to ya anggad iyakar ton pitongtong lamet ed Katawan.

35

¹ "Si Moises tinawag to ray amin ya Israelita tan kuantod sikara, Sikato yay gawaen yo ya ingganggan na Katawan:

² "Anem agew a makapankimey kayo, balet masanto so kumapiton agew, sakey a masanton agew na panagpainawa a nisaklang ed siak a Katawan. Siopamay mankimey ed satan ya agew nepeg a pateyen.

³ "Ag kayo anggan mamaparlang ed dalem na kaabungan yo no Agew na Panagpainawa.

⁴ "Si Moises kuantod amin ya Israelita, Sikato yay ingganggan na Katawan:

⁵ "Mangibagat kayo ed Katawan. Amin a maliket a mangibagat nepeg a mangisaklang na balituk, pilak, odino gansa;

⁶ "pinon linen; asul, purpura, tan ambalangan tinebey; abel a bagoy kanding;

⁷ "ambalangan pinamagan katat na karniron kalakyan; pinon katat; tablan akasia;

⁸ "larak a para saray lamparaan; saray rikadon onkanad panaglana a larak tan ambalingit ya insinso;

⁹ "kornalina tan arum iran alahas ya ipepeket ed ipod tan diad apis na pagew na Pangulon Pari.

¹⁰ Dago kayon amin a marunong a kumikimey, ta gawa yoy amin ya ingganggan na Katawan:

¹¹ say Tulda, saray sakbung to, saray kawit tan saray tabla to, saray balewet to, saray lusek to, tan saray dapan to;

¹² say Kaban na Sipanan, saray tiken to, say sakub to, tan say mananib a kurtina;

¹³ say lamisaan, saray tiken to tan amin a kagawaan to; saray tinapay ya inyapay ed Dios;

¹⁴ say panangipatoonan na lamparaan a para silew tan saray kagawaan to; saray lamparaan tan say larak da;

¹⁵ say altar a panagpoolan na insinso tan saray tiken to; say panaglana a larak; say ambalingit ya insinso; say kurtina na lolooban na Tulda;

¹⁶ say altar a panagpoolan na saray bagat, pati say gansan parilya to, saray tiken to, tan amin a kagawaan to; say talyasi tan say ansagan to;

¹⁷ saray kurtinan pinagkaalar na Tulda, saray lusek to tan saray dapan to; say kurtina na pinagkaalar;

¹⁸ saray palpal tan saray lobir na Tulda tan say pinagkaalar to;

¹⁹ tan saray balibalin kawes na saray pari ya isolung da no manlingkur ira ed Masanton Pasensaray masanton kawes nen Aaron a pari tan saray lalakin anak to.

²⁰ Saray amin ya Israelita tinaynan day Moises,

²¹ tan amin a maliket tan mabolus a mangibagat et inyaakar da ray bagat da ed Katawan a panggawa na Tuldan Ayamay Katawan. Inyaakar day amin a nakaukolan ya ikana ed pangigalang ed Dios tan diad panggawa na saray kawes na pari.

²² Amin a totoon mabolus so linawa, bii may laki, inyaakar da ray balituk a sara da, saray ikaw da, saray singsing da, saray kolintas da, tan amin a klasiy balituk ya alahas, tan insaklang da ra ed Katawan.

²³ Balang toon walay pinon linen to; asul, purpura, odino ambalangan tinebey; abel a bagoy kanding, ambalangan pinamagan katat na karniron kalakyan; odino pinon katat, inyakar to.

²⁴ Amin a totoon nayarian day mangiter na pilak odino gansa, inyaakar da ya imbagat ed Katawan, tan amin a walaan na tablan akasia a nayarin ikana ed antokaman a kimey, inyaakar da.

²⁵ Amin iray bibiin marunong a mankimey angyaakar ira na ginagawa ran pinon linen a tinebey tan saray tinebey ya asul, purpura, tan ambalanga.

²⁶ Nanggagawa ra met na bagoy kanding a tinebey.

²⁷ Saray pangulo angyaakar ira na saray kornalina tan arum ni ran alahas ya ipeket ed ipod tan apis na pagew;

²⁸ angyaakar met ni ra na saray rikado tan larak a para saray lamparaan, para panagpoyuk a larak, tan para ambalingit ya insinso.

²⁹ Amin da ray Israelita a maliket a mangibagat ed Katawan et mabolbolus dan inyaakar iray bagat da a para kimey ya ingganggan na Katawan a gawaen nen Moises.

³⁰ Si Moises kuantod saray Israelita, Say Katawan pinili toy Bezalel a lakin anak nen Uri tan apo nen Hur a kabyangan na boleg nen Juda.

³¹ Say Dios pinano to na pakayari to tan initdan to na karunongan, pakayari, tan pakatalus a manggawa na antokaman a kimey ya inartian,

³² nayarian toy mamplano na balibalin kimey tan nagawa to ra ed balituk, pilak, tan gansa;

³³ marunong a mantabas na saray alahas ya ilira tan mankorti na tabla tan arum ni ran inartian a kimey.

³⁴ Say Katawan initdan toy Bezalel tan si Oholiab, a lakin anak nen Ahisamac tan kabyangan na boleg nen Dan, na karunongan a mangibangat na arum a totoo na nipaakar ed dunong dan mankimey.

³⁵ Initdan to ra na karunongan a manggawa ed amin a klasiy kimey a gagawaen na saray managtatak na arti, managgolis na arti, tan managinaramey na pinon linen; asul, purpura, tan ambalangan lana; tan arum ni ran abel. Nayarian da a gawanen so antokaman a kimey tan marunong iran mangigolis na arti.

36

¹ "Si Bezalel, si Oholiab, tan amin nin arum a marunong a kumikimey, ya angiteran na Katawan na karunongan tan pakatalus a manggawa na antokaman a nakaukolan ed pangipaalagey na Tuldan Ayamay Katawan, et nepeg a gawaen day amin a bengatla onung na ingganggan na Katawan.

² "Si Moises tinawag to ra di Bezalel, Oholiab tan amin nin arum a lalakin marunong a mankimey ya angiteran na Katawan na karunongan tan maliket iran ontulong, tan imbaga nen Moises ed sikara ya igapo da lay mankimey.

³ "Inawat dad kinen Moises iray amin a bagat a maliket ya inyaakar na saray Israelita ya ikanad pangipaalagey na masanton Tulda. Balet saray Israelita intuloy day angyaakar ed kinen Moises na saray bagat da kapag kabwasan.

⁴ "Insan saramay marunong a kumikimey a manggagawad santuario linma rad kinen Moises

⁵ "tan kuandad sikato, Saray totoo et mangyaakar ira na masoluk nen say nakaukolan ed kimey ya ingganggan na Katawan a gawaen.

⁶ "Kanyan si Moises ingganggan to ed intiron kampo ya ag la aruman na siopaman so bagat a para masanton Tulda; ag la sirin angyakar na bagat iray totoo.

⁷ "Saray niyakar lan bagat et masoluk la a panumpal na amin a kimey.

⁸ "Amin iray sankarunongan ed saramay mankikimey et sikaray nanggawa na Tuldan Ayamay Katawan. Ginawa ra ed samploran kurtina a pinon linen. Asul, purpura, tan ambalanga so tinebey da, tan binordaan da ra na saray kirubin.

⁹ "Nampapara so kabaleg na balang sakey a kurtina; labinapat a yarda so dokey da tan duaran yarda so benlag da.

¹⁰ Impansasaip dan dinait so limara tan ontan met so ginawa ra ed limara.

¹¹ Nanggawa rad gilig na samput na kapag samay impansasaip na saray panagkawitan ya asul ya abel.

¹² Pineketan da na limamplon panagkawitan so onaan a kurtina ed sakey ya impansasaip tan limamplo met so samput a kurtina ed samay sakey; impanpepetekan da ra.

¹³ Nanggawa ra na limamplon balituk a panagkawit a sikaray amakasakey ed saramay duaran impansasaip a kurtina.

¹⁴ Insan nanggawa ra na labinsakey a kurtina a bagoy kanding a para sakbung na Tulda.

¹⁵ Ginawa da ran nampaparay kabaleg, labinliman yarda so dokey da tan duaran yarda so benlag da.

¹⁶ Impansasaip dan dinait so limara tan ontan met so ginawa ra ed saramay anemira.

¹⁷ Pineketan da na limamplon panagkawitan so gilig na samput a kurtina ed samay sakey ya impansasaip tan limamplo met so samput a kurtina ed samay sakey.

¹⁸ Nanggawa ra na limamplon gansan panagkawit a mamakasakey ed saramay duaran impansasaip, pian nagawa ran sakey a sakbung.

¹⁹ Nanggawa ni ray duaran sakbung, sakey so pinabalanga tan pinamagan katat na karniron kalakyan tan say sakey a pinon katat; inkana da ran sakbung ed tapew.

²⁰ Nanggawa ra na saray tablan akasia a pamaalagey na Tulda.

²¹ Limaran mitro so dokey na kapag tabla tan duamplo tan piton pulgada so lapar to,

²² tan walay duaran kagur to, pian makapantetekep ira yan tabla. Amin a tabla wala ray kagur da.

²³ Nanggawa ray duamplon tabla a para bandad abalaten na Tulda,

²⁴ tan nanggawa ra met na apataplon pilak a dapan na tabla, duaran dapan ed silong na kapag tabla a sikaray pineketan na duaran kagur.

²⁵ Nanggawa ra na duamplon tabla a para bandad baybay na Tulda,

²⁶ tan nanggawa ra met na apataplon pilak a dapan, duaran dapan ed silong na kapag tabla.

²⁷ Nanggawa ra na anemiran tabla para beneg na Tulda diad bandad sagur

²⁸ tan duaran tabla a para saray sokung.

²⁹ Sarayan tabla ed sokung et asangal ira manlapud leksab ya anggad tagey. Onyay impakagawa na saray duaran tabla a sikaray duaran sokung.

³⁰ Kanyan walay waloran tabla a walay labinanem a pilak a dapan da, duara ed silong na kapag tabla.

³¹ Nanggawa ra na labinliman balewet ya akasia, limara so para saray tabla ed sakey a diking na Tulda,

³² limara so para saray tabla ed sananey a diking, tan limara so para saray tabla ed bandad sagur na Tulda diad beneg to.

³³ Say karokey na pegley a balewet, a nilira ed pegley da ray tabla, et manlapud sakey a samput ya anggad sakey a samput na Tulda.

³⁴ Inokupan da na balituk iray tabla tan pineketan da na saray balituk a liken a mangegnad saray balewet a naokupan met na balituk.

³⁵ Nanggawa ra na kurtina a pinon linen. Asul, purpura, tan ambalanga so tinebey to tan binordaan da ra na saray kirubin.

³⁶ Nanggawa ra na apatiran lusek ya akasia a pangibitinan ed samay kurtina, inokupan da ra na balituk, tan pineketan da ra na saray panagkawit a balituk. Insan ira nanggawa na apatiran dapan a toonan na sarayan lusek.

³⁷ Inggawaan da na kurtina a pinon linen so lolooban na Tulda; asul, purpura, tan ambalanga so tinebey to tan binordaan da.

³⁸ Para sayan kurtina nanggawa ra na limaran lusek ya akasia a wala ray nipeket a panagkawit, inokupan da na balituk iray toktok da tan saray tekang da, tan nanggawa ra na gansan dapan para sarayan lusek.

37

¹ "Say Kaban na Sipanan a ginawa nen Bezalel et tablan akasia; apataplo tan liman pulgada so karokey to, duamplo tan piton pulgada so kaatagey to.

² "Inokupan to na puron balituk ed paway tan diad dalem to tan minoldoraan to na balituk iray gilig-gilig to.

³ "Nanggawa na apatiran balituk a liken a panagsakbatan tan impeket to ra ed saray apatiran sali to, duaran liken ed kapag diking.

⁴ "Nanggawa na saray tiken ya akasia a panagsakbatan, inokupan to ra na balituk,

⁵ "tan insolung to ra ed saray liken diad kapag diking na Kaban.

⁶ "Nanggawa na sakey a puron balituk a sakub na Kaban; apataplo tan liman pulgada so karokey to tan duamplo tan piton pulgada so kaawang to.

⁷ "Nanggawa na duaran kirubin a pinitpit a balituk,

⁸ "sakey so para kapag samput na sakub. Ginawa to ran akatekep ed samay sakub na Kaban.

⁹ "Saramay kirubin et nanarapan ira, tan asakbungan na saray akabuskag a payak da imay sakub.

¹⁰ Nanggawa na lamisaan ya akasia; talomplo tan anem a pulgada so karokey to, labinwalon pulgada so kaawang to, tan duamplo tan pito a pulgada so kaatagey to.

¹¹ Inokupan to na puron balituk tan minoldoraan to na balituk iray gilig-gilig to.

¹² Nanggawa na pinagkakuadro to a taloran pulgaday kalapar to tan minoldoraan to na balituk iray gilig-gilig to.

¹³ Nanggawa na apatiran panakbatan a liken a balituk tan impeket to ed apatiran suyok a kawalaan na saray sali to.

¹⁴ Saramay liken a pangisolungan ed saray pangsakbatan na lamisaan et nipeket ira ed abay na samay pinagkakuadro.

¹⁵ Nanggawa na saray tiken ya akasia tan inokupan to ra na balituk.

¹⁶ Nanggawa na saray puron balituk a kagawaan na samay lamisaan; saray plato, saray kupa, saray ankelag a pasig, tan saray yaung ya ikanad bagat ya alak.

¹⁷ Puron balituk so ginawa ton panangipatoonan na lamparaan. Pinitpit a balituk so ginawa ton dapan tan sengeg to; intekep ed saya iray rosas a pati saray simit tan pital.

¹⁸ Anemiran sanga so akaonat ed saray diking to, talora ed balang sakey.

¹⁹ Kapag sakey ed saray anemiran sanga to walay taloran rosas ton singa almindras a pati saray simit tan pital.

²⁰ Say sengeg na panangipatoonan walay apatiran rosas to a singa almindras a pati saray simit tan pital.

²¹ Walay simit ed kapag silong na taloran paris a sanga.

²² Saray simit, saray sanga, tan say panangipatoonan na lamparaan et nantetekep iran pinitpit a puron balituk.

²³ Nanggawa na pitoran lamparaan a para samay panangipatoonan, tan nanggawa na saray puron balituk a panagpotut na pabilo tan saray delsangan.

²⁴ Talomplo tan kapalduan kilo so inkana ton puron balituk diad impanggawa to na panangipatoonan na lamparaan tan amin da ra yan kagawaan to.

²⁵ Nanggawa na altar ya akasia a panagpoolan na insinso. Kuadrado yan altar, labinwalon pulgada so karokey to tan labinwalon pulgada so kaawang to, tan talomplo tan anem a pulgada so kaatagey to. Akitekep ed altar iray pinagsaklur to ed apatiran suyok.

²⁶ Inokupan to na puron balituk so tagey to, saray apatiran dapag to, tan saray pinagkasaklur to, tan minoldoraan to na balituk ed saray gilig-gilig to.

²⁷ Nanggawa na duaran balituk a liken tan impeket to ra ed duaran dapag diad leksab na moldora tan sikaray pangisolungan ed saray tiken a panagsakbatan.

²⁸ Nanggawa na saray tiken ya akasia tan inokupan to ra na balituk.

²⁹ Nanggawa met na masanton larak a panagpoyuk tan say puron ambalingit ya insinso; ginawa to ra a singa panaggaway pabalingit.

38

¹ "Nanggawa na altar ya akasia a panagpoolan na saray bagat. Kuadrado yan altar; duara tan kapalduan mitro so karokey to, tan duara tan kapalduan mitro so kaawang to tan sakey tan kapalduan mitro so kaatagey to.

² "Nanggawa na saray pinagkasaklur ed toktok na apatiran suyok, tan akatekep ira ed samay altar. Inokupan to ra na gansa.

³ "Nanggawa met na saray amin a kagawaan na altar: saray palangganan pananginay dapul, saray karyo, saray yaung, saray tinidor, tan saray palangganan pananginay ngalab. Gansa ra yan amin a kagawaan.

⁴ "Nanggawa na gansan parilya tan inlira tod silong na pinagkakuadro na altar, et asabi to so kapaldua na altar.

⁵ "Nanggawa na apatiran liken tan impeket to rad apatiran suyok.

⁶ "Nanggawa na saray tiken ya akasia a panagsakbatan, inokupan to ra na gansa,

⁷ "tan insolung to rad saray liken, sakey ed kapag diking na altar. Tabla so inkana ed impanggawad samay altar, tan longugan.

⁸ "Nanggawa na gansan talyasi a panagorasan tan say gansan ansagan to. Say inkana tod impanggawad saraya et saray gansan ispiho na saray bibiin nanlilingkur ed lolooban na Tuldan Ayamay Katawan.

⁹ "Saray pinon linen a kurtina so ginawa ton pinagkaalar na Tuldan Ayamay Katawan. Diad dapag ya abalaten say karokey na kurtina et limamplon yarda,

¹⁰ nisabit ira ed duamplon gansan lusek a nipatoon ed duamplon dapan a gansa, tan wala ray pilak a panagkawit tan sangal to.

¹¹ Onya met so ginawa ton pinagkaalar ed bandad baybay.

¹² Diad dapag a sagur say karokey na saray kurtina et duamplo tan liman yarda; wala ray samploran lusek, samploran dapan, saray pilak a panagkawit, tan saray sangal da.

¹³ Diad dapag a bokig a kawalaay lolooban say benlag na pinagkaalar to et duamplo tan liman yarda.

¹⁴ Diad kapag diking na lolooban say benlag na pinagkaalar et pitora tan kapalduan yarda; wala ray taloran lusek tan taloran dapan.

¹⁵

¹⁶ Pinon linen iray amin a kurtina na pinagkaalar.

¹⁷ Gansa ray dapan na saray lusek; pilak iray panagkawit, saray sangal, tan say okup na toktok na balang lusek. Amin da ray lusek na pinagkaalar et atoop ira na saray sangal a pilak.

¹⁸ Say kurtina na lolooban na Tulda et pinon linen; asul, purpura, tan ambalanga so tinebey to tan abordaan. Samploran yarda so benlag to tan duara tan kapalduan yarda so ondoy to, a singa saray kurtina na pinagkaalar.

¹⁹ Nibitin ya ed apatiran lusek a gansa ya apatira so dapan da. Pilak iray panagkawit da, saray okup na toktok da, tan saray sangal da.

²⁰ Gansa ray amin a palpal na Tulda tan amin a palpal na pinagkaalar.

²¹ Saya so listaan na belat na saray mital ya inkana ed Tuldan Ayamay Katawan, a kawalaan na duaran tapyak a bato ya akaitatakan na Samploran Ganggan. Si Moises so angiganggan a gawaen yan listaan tan ginawa na saray Levita a mankikimey diad panangiwanwan nen Itamar a lakin anak nen Aaron a pari.

²² Si Bezalel a lakin anak nen Uri tan apo nen Hur a kabyangay boleg nen Juda so nanggawa na amin ya ingganggan na Katawan ed kinen Moises.

²³ Say katulongan to a si Oholiab a lakin anak nen Ahisamac tan kabyangan na boleg nen Dan et marunong a managtatak na arti, managgolis na arti, tan managinaramey na pinon linen tan asul, purpura, tan ambalangan lana.

²⁴ Amin a balituk a nisaklang ed Katawan ya inkana rad impamaalagey na Tulda et mambelat na siam a lasus tan siamaplo tan anem a kilo, onung na panagsimbang ed santuario.

²⁵ Say pilak ya inter na totoo nen binilang ira et mambelat na talon libo, apat a lasus tan talomplon kilo, onung na panagsimbang ed santuario.

²⁶ Sayan belat et katiponan na amin ya imbayar na amin a totoon binilang; balang sakey a too nambayar na nakaukolan a bayar onung na panagsimbang ed santuario. Say karakel na lakin mantaon na duamplo a mampaatagey a sikaray binilang et anem a lasus tan talon libo liman lasus tan limamplo.

²⁷ Talon libo, apat a lasus tan siamiran kilo so pilak a nikana ed impanggawa na sanlasus a dapan na Tuldan Ayamay Katawan tan say kurtina, talomplo tan apat a kilo so kapag dapan.

²⁸ Say akeraan a duamplo tan talon kilon pilak si Bezalel ginawa to ran sangal, saray panagkawit na saray lusek, tan say okup na toktok na balang lusek.

²⁹ Say belat na amin a gansan nisaklang ed Katawan et duan libo, apat a lasus tan labinapat a kilo.

³⁰ Inkana to ya ed impanggawa to na saray dapan na lolooban na Tulda, say gansan altar a pati gansan parilya to, amin a kagawaan na altar,

³¹ saray dapan na pinagkaalar tan say lolooban to, tan amin a palpal na Tulda tan say pinagkaalar.

39

¹ "Asul, purpura, tan ambalangan tinebey so inkana ra ed impanggawa ra na saray balibalin kawes da ray papari ya isolung da no manlingkur ira ed Masanton Pasen; inggawaan day Aaron na saray kawes na pari. Ginagawa da ra ya onung na ingganggan na Katawan ed kinen Moises.

² "Say inkana ra ed impanggawa na ipod et say balituk, asul, purpura tan ambalangan tinebey, tan pinon linen.

³ "Nampitpit ira na balituk tan impagmaliw dan maimpis, ginugulay da ran singa tinebey, insan da ra insaletsalet ed pinon linen, tan diad asul, purpura, tan ambalangan tinebey.

⁴ "Nanggawa ra na duaran balabal na takeb, tan impeket da rad saray duaran samput na ipod.

⁵ "Say balibaliy inkalagan balkes a ginawad balituk, asul, purpura, tan ambalangan tinebey tan pinon linen et nipeket ed samay ipod kanyan nansaip ira, onung na ingganggan na Katawan ed kinen Moises.

⁶ "Imparaan da ray baton onisi tan impeket da ra ed saray panangipatoonan; balibaliy imkatatakan da na kangaranan na saray labinduan lalakin anak nen Jacob.

⁷ "Impeket da ra ed saray balabal na takeb na ipod, ta sikaray pakanudnunotan ed labinduan boleg na Israel onung na ingganggan na Katawan ed kinen Moises.

⁸ "Nanggawa ra na apis na pagew a say inkana ra et kapara na saramay inkanad ipod tan kapara to met so borda ra.

⁹ "Kuadrado ya tan dinobli; siamiran pulgada so karokey to tan siamiran pulgada so benlag to.

¹⁰ Impeket dad saya so apatiran karasig na mabmablin bato: diad ononan dasig pineketan da na sakey a baton rubi, sakey a topasio, tan sakey a garniti;

¹¹ diad kumadwan dasig, pineketan da na sakey a baton ismiralda, sakey a sapiro, tan sakey a diamanti;

¹² diad kumatlon dasig, pineketan da na sakey a baton hasinto, sakey ya agata, tan sakey ya amatista;

¹³ diad kumapat a dasig, pineketan da na sakey a baton birilo, sakey a kornalina, tan sakey a haspi. Nipeket ira ya ed saray panangipatoonan a balituk.

¹⁴ Diad kapag sakey ed sarayan labinduan bato say sakey a ngaran na sakey a lakin anak nen Jacob et nitatak; sikaray pakanudnunotan ed saray labinduan tribu na Israel.

¹⁵ Nanggawa ra na puron balituk a kadina a para apis na pagew, a singa nilobir a koldon.

¹⁶ Nanggawa ra na duaran panangipatoonan a balituk tan duaran singsing a balituk, tan impeket da ra yan singsing ed saray tagey a suyok na apis na pagew.

¹⁷ Impeket dad saramay duaran singsing iray duaran balituk a koldon

¹⁸ tan impeket day duaran samput na koldon ed saray duaran panangipatoonan, insan impeket da ra ed saray balabal na ipod.

¹⁹ Nanggawa ra na duaran singsing a balituk tan impeket da ra ed saray leksab a suyok na apis na pagew diad akindalem na samput ya abay na ipod.

²⁰ Nanggawa ni ra na duaran singsing a balituk tan impeket da ra ed leksab na arap na duaran balabal na ipod, diad abay na tupig tan tagtagey na balibaliy inkalagan balkes.

²¹ Onung na ingganggan na Katawan ed kinen Moises, insinger da na asul a koldon iray singsing na apis na pagew ed saray singsing na ipod, pian say apis na pagew et mansiansiad tagtagey na balkes tan ag onlokak.

²² Say intiron andokey a kawes ya onlatup ed ipod et agawa ed asul ya abel.

²³ Say lewlew a pangisolungan na olo et initdan na patalker a singa lewlew na kawes, pian ag napilat.

²⁴ Diad liber-liber na saloy to pineketan da na saray granada a puron linen tan ginawad asul, purpura, tan ambalangan tinebey, tan insaletsalet da ray kampanilya a puron balituk, onung na ingganggan na Katawan ed kinen Moises.

²⁵

²⁶

²⁷ Nanggawa ra na saray pinon linen a kawes ya antikey so taklay a para si Aaron tan saray lalakin anak to,

²⁸ nanggawa ra met na turban a pinon linen, saray sakub na toktok na olo a pinon linen,

²⁹ tan say balabal ya abel a pinon linen a ginawad asul, purpura, tan ambalangan tinebey tan binordaan da, onung na ingganggan na Katawan ed kinen Moises.

³⁰ Nanggawa ra na arkos a puron balituk a sikatoy masanton tanda na inkisaklang, tan tinatakan da na Nisaklang ed Katawan.

³¹ Insinger da na asul a koldon diad arap na turban onung na ingganggan na Katawan ed kinen Moises.

³² Asumpal a siansia iray amin a kimey ed Tuldan Ayamay Katawan. Saray Israelita ginawa ray amin a bengatla onung na ingganggan na Katawan ed kinen Moises.

³³ Inyakar dad kinen Moises imay Tulda tan amin a kagawaan to, saray panagkawit to, saray tabla to, saray balewet to, saray lusek to, tan saray dapan to;

³⁴ say ambalangan pinamagan katat na karniron kalakyan a para sakbung to; say pinon katat a sakbung to; say sanib a kurtina;

³⁵ say Kaban na Sipanan a nankarga na saray tapyak a bato, saray tiken to, tan say sakub to;

³⁶ say lamisaan tan amin a kagawaan to, tan saray tinapay a nibagat ed Dios;

³⁷ say puron balituk a panangipatoonan na lamparaan, saray lamparaan to, amin a kagawaan to, tan say larak a para saray lamparaan;

³⁸ say altar a balituk; say larak a paangpoyuk; say ambalingit ya insinso; say kurtina na lolooban na Tulda;

³⁹ say altar a gansa a pati parilya to a gansa, saray tiken to, tan amin a kagawaan to; say talyasi a panagorasan a pati ansagan to;

⁴⁰ saray kurtina na pinagkaalar a pati saray lusek to tan saray dapan to; say kurtina na lolooban na pinagkaalar tan saray lobir to; saray palpal na Tulda; amin a kagawaan ya ikana ed dalem na Tulda;

⁴¹ saray balibalin kawes a nepeg ya isolung na saray papari no onloob irad Masanton Pasensaray masanton kawes nen Aaron a pari tan saray lalakin anak to.

⁴² Saray Israelita ginawa ra yan amin a kimey onung na ingganggan na Katawan ed kinen Moises.

⁴³ Inapiapiger iran ninengneng nen Moises, et anengneng ton ginawa ray amin a bengatla, onung na ingganggan na Katawan. Kanyan binindisionan nen Moises ray totoo.

40

¹ "Say Katawan kuantod kinen Moises,

² "Diad ononan agew na ononan bulan iliram so Tuldan Ayamay Katawan.

³ "Iyan mod loob to so Kaban na Sipanan a nankarga na Samploran Ganggan tan ibitin mo so kurtina ed arap to.

⁴ "Iyan mod loob na Tulda so lamisaan tan yan mod tapew to iray kagawaan to. Iloob mo met so panangipatoonan na lamparaan tan iliram iray lamparaan.

⁵ "Iliram ed arap na Kaban na Sipanan so altar a balituk a panagpoolan na insinso tan ibitin mod lolooban na Tulda so kurtina.

⁶ "Iliram ed arap na Tulda so altar a panagpoolan na saray bagat.

⁷ "Iliram ed nanleetan na Tulda tan altar so talyasi a panagorasan tan panom na danum.

⁸ "Iliram so pinagkaalar to tan ibitin mod lolooban to so kurtina to.

⁹ "Insan mo isaklang so Tulda tan amin a kagawaan to diad panamegley na panlanam na larak, et magmaliw a masanto.

¹⁰ Insan mo isaklang so altar tan amin a kagawaan to diad panamegley na panlanam na larak, et magmaliw a sigput a masanto.

¹¹ Onya met so pangisaklang mo ed talyasin panagorasan tan say ansagan to.

¹² Iyakar mod lolooban na Tulda si Aaron tan saray lalakin anak to tan ames mo ra onung ed ganggan.

¹³ Solungan mo si Aaron na kawes na pari, lanaan mo na larak na oliba tan isaklang mo, pian makapanlingkur a sakey a pari ed siak.

¹⁴ Alam iray anak to tan isolung mod sikara so kawes ya antikey so taklay.

¹⁵ Insan mo ra lanaan na larak na oliba a singa impanlanam ed ama ra, pian makapanlingkur iran papari ed siak. Sayan panlanam ed sikara gawaen to ran papari ed amin a panaon ya onsabi.

¹⁶ Ginawa nen Moises iray amin a bengatla, onung na ingganggan na Katawan ed sikato.

¹⁷ Kanyan diad ononan agew na ononan bulan na kumadwan taon kayari na intaynan da manlapud Egipto, nilira so Tuldan Ayamay Katawan.

¹⁸ Inlira nen Moises iray dapan na Tulda, saray tabla to, impeket to ray balewet to, tan impaalagey to ray lusek to.

¹⁹ Inlaknab tod tapew na Tulda so sakbung tan tinapewan to na sananey a sakbung, onung na ingganggan na Katawan.

²⁰ Insan to inala ra may duaran tapyak a bato tan inyan to rad dalem na Kaban na Sipanan. Insorub tod saray liken na Kaban iray tiken tan inlira tod tapew na Kaban imay sakub.

²¹ Insan to inyan ed dalem na Tulda imay Kaban tan imbitin to may sanib a kurtina. Diad onya sinaniban to may Kaban na Sipanan, onung na ingganggan na Katawan.

²² Diad paway na sanib a kurtina ed bandad baybay si Moises inyan tod dalem na Tulda imay lamisaan,

²³ tan inyan tod tapew to iray tinapay ya imbagat ed Katawan, onung na ingganggan na Katawan.

²⁴ Diad bandad abalaten a kasumbaliwan na lamisaan, inlira to so panangipatoonan na lamparaan,

²⁵ tan diad arap na Katawan sinelselan to ra may lamparaan onung na ingganggan na Katawan.

²⁶ Inyan tod dalem na Tulda diad arap na samay sanib a kurtina imay altar a balituk,

²⁷ tan pinoolan to so ambalingit ya insinso, onung na ingganggan na Katawan.

²⁸ Imbitin tod lolooban na Tulda imay kurtina,

²⁹ tan diman ed arap na kurtina inlira to may altar a panagpoolan na saray bagat. Dimad tapew na altar insaklang toy bagat a popoolan tan say bagat a trigo, onung na ingganggan na Katawan.

³⁰ Inyan tod nanleetan na Tulda tan altar imay talyasin panagorasan, insan to pinano na danum.

³¹ Si Moises, si Aaron tan saray lalakin anak to et nanooras na saray lima ra tan saray sali ra

³² kapag onloob irad Tulda odino onla rad altar, onung na ingganggan na Katawan.

³³ Inlira nen Moises so pinagkaalar ed kaliber-liber na Tulda tan altar, insan imbitin tod lolooban na samay pinagkaalar so kurtina. Ontan sirin asumpal to iray amin a kimey.

³⁴ Insan say lorem kinobutan to may Tuldan tan pinano na kagalangan na Katawan.

³⁵ Lapud saya, si Moises ag makaloob ed dalem na Tulda.

³⁶ Saray Israelita inyalis da labat so kampo ra kapag ontagey so lorem a manlapud samay Tulda.

³⁷ Legan a manayam diman ed Tulda so lorem ag da inyalis so kampo ra.

³⁸ Legan na impanaakar-akar da, anengneng da no agew so lorem ya akakobut ed Tuldan Ayamay Katawan tan anengneng da no labi so apoy a mandarlang ed tagey to.