1

¹ Diad gapoy gapo nen pinalsa na Dios iray katawenan tan say dalin,

² say mundo anggapoy oksuy tan nengneng to. Ambilbilonget so tapew na manungol a dayat a nilanayapan toy ganagana tan mansiplug so pakayari na Dios ed tapew na danum.

³ Insan inkuan na Dios, Onlesa so liwawaet linmesay liwawa;

⁴ anengneng na Dios a maung so liwawa. Insan imbiig na Dios so liwawa ed bilonget;

⁵ tinawag to na Agew so liwawa tan Labi so bilonget. Linmabas so labi tan sinmabiy kabwasansikato ya so onaan ya agew.

⁶ Insan inkuan na Dios, Onlesay liwang a mamalduay danum tan pambiigan tod duaran pasenet agawa. Onya so impamalsa na Dios ed liwang a linmeet ed danum, kanyan walay danum ed tagey to tan diad leksab to.

⁷

⁸ Tinawag to na Tawen so liwang. Linmabas so labi tan sinmabiy kabwasansikato ya so kumadwan agew.

⁹ "Insan inkuan na Dios, Natipon ed sakey a pasen so danum a walad silong na tawen, pian ompaway so amagan pasenet agawa.

¹⁰ Tinawag to na Dalin so amagan pasen, tan Dayat imay danum ya atipon. Say Dios anengneng to a maung so agawa.

¹¹ Insan ingganggan na Dios, Sikan dalin, mamatubo ka na amin a klasiy tanaman, saray mangiter na ilik tan saray mambungay prutas a nambokelet agawa.

¹² Pinatubo na dalin iray amin a klasiy tanaman, saray mangiter na ilik, saray mambungay prutas a nambokel. Say Dios anengneng to a maung so agawa.

¹³ Linmabas so labi tan sinmabiy kabwasansikato ya so kumatlon agew.

¹⁴ Insan inkuan na Dios, Onlesa ed tawen iray silew a mangibiig na agew ed labi tan mangipanengneng na igapo na saray agew, taon, tan saray panaon;

¹⁵ onsilew irad tawen a mangiter na liwawa ed dalinet agawa.

¹⁶ Onya so impamalsa na Dios ed saray duaran baleg a silew, say banwa a baleg silew a manoley no agew tan say bulan a memelag a silew a manoley no labi; pinalsa to met iray bitewen.

¹⁷ Impasen tod tawen ira yan silew a mangiter na liwawa ed dalin,

¹⁸ manoley no agew tan labi, tan mangibiig na liwawa ed bilonget. Say Dios anengneng to a maung so agawa.

¹⁹ Linmabas so labi tan sinmabiy kabwasansikato ya so kumapat ya agew.

²⁰ Insan ingganggan na Dios, Sikan danum, mamawala ka na amayamay a klasiy mabilay a bengatla, tan sikan liwang, mamawala ka na amayamay a klasiy manok.

²¹ Onya so impamalsa na Dios ed saray ankakabaleg a dragon ed dayat, amin a klasiy pinalsa a manaayam ed danum, tan amin a klasiy manok. Say Dios anengneng to a maung so agawa.

²² Binindisionan to ran amin a kuantod sikara, Sikayo ran pinalsan manaayam ed danum, mamparakel kayo tan pano yoy dayat, tan sikayo ran manok, mamparakel kayo.

²³ Linmabas so labi tan sinmabiy kabwasansikato ya so kumaliman agew.

²⁴ Insan ingganggan na Dios, Sika a dalin, mamawala ka na amin a klasiy mabilay ya ayep, saray amo tan saray atap, saray baleg tan saray melaget agawa.

²⁵ Onya so impamalsa na Dios ed sarayan amin ya ayayep. Say Dios anengneng to a maung so agawa.

²⁶ Insan inkuan na Dios, Natan mamalsa tayoy too; gawaen tayo ran kaparparay indengan tayo tan kaolibay tayo. Sikaray manoley ed saray sira, saray manok, tan amin ya ayayep, saray amo tan saray atap, saray baleg tan saray melag.

²⁷ Onya so impamalsa na Dios ed too; pinalsa to ra a kaparay indengan to. Pinalsa toy laki tan say bii,

²⁸ binindisionan to ra, tan inkuantod sikara, Mamparakel kayoy anak, makmakan yoy intiron mundo, tan oleyan yo. Oleyan yo ray sira, saray manok, tan amin iray ayayep.

²⁹ Inter kon tagano yo iray amin a tanaman a mangiter na ilik tan amin a kiew a mambungay prutas a nambokel;

³⁰ balet inter kod saray ayayep tan saray amin a manok iray dika tan tanaman a tagano raet agawa.

³¹ Ninengneng na Dios iray pinalsa to, et maung a tuloy iran amin. Linmabas so labi tan sinmabiy kabwasansikato ya so kumanem ya agew.

2

¹ "Asumpal sirin ya apalsa so tawen tan dalin tan amin a logan da.

² "Diad loob na anem agew asumpal na Dios a pinalsa ira yan amin, insan diad kumapiton agew nampainawa ed amin a kimey to.

³ "Binindisionan na Dios yan kumapiton agew tan imbiig ton sakey a masanton agew, ta diad sayan agew asumpal toy impamalsa tod ganagana tan nampainawa.

⁴ "Onya so istoria na inkapalsa na sansinakuban. Nen kayari na Katawan a Dios a pinalsa so tawen tan dalin,

⁵ "anggapo ni ray tanaman ed dalin odino bokel a tinmubo, lapud ag to ni pinaoran, tan anggapoy toon ondalus ed dalin.

⁶ "Balet pinmaway so danum ed saray sobul tan aparanuman so dalin.

⁷ "Insan say Katawan a Dios angalay dabuk ed dalin, minoli ton sakey a too-too, insan to iningasan na linawan manangiter na bilay ed saray abut na eleng to, et nagmaliw a mabilay a too.

⁸ "Insan say Katawan a Dios nanggawa na sakey a tanamanan diad bandad bokig a sakop na Eden, tan diman to impanayam imay toon minoli to.

⁹ "Pinatubo to rad may amin a klasiy mararakep a kiew tan pinabunga to ra na masasamit a prutas. Diad pegley na tanamanan so kawalaan na kiew a mangiiter na pakaamta ed maung tan maoges.

¹⁰ Walay ilog ya onaagos ed Eden tan sasalugen to may tanamanan; diad paway na Eden nansanga na apatiran ilog.

¹¹ Pison so ngaran na onaan ya ilog; onaagos ed kaliber-liber na bansa na Havila. (

¹² Dia naalmoy puron balituk, tan pati nidoma-doman pabalingit tan saray ankablin batoy alahas.)

¹³ Gihon so ngaran na kumadwan ilog; onaagos ed kaliber-liber na bansa na Cus.

¹⁴ Tigris so ngaran na kumatlon ilog; onaagos ed bandad bokig na Asiria, tan Eufrates so ngaran na kumapat ya ilog.

¹⁵ Insan say Katawan a Dios inala to may too tan impasen tod tanamanan na Eden, pian nadalusan to tan naasikaso to.

¹⁶ Ingganggan tod sikato, Nayarian mon kaney bunga na antokaman a kiew ed tanamanan,

¹⁷ balet ag ka mamangan na bunga na samay kiew a mangiiter na pakaamta ed maung tan maoges. Ag nepeg a kanen so bunga na saman a kiew; ta no kanen mo, ompatey ka diad agew a pangan mo.

¹⁸ Insan inkuan na Katawan a Dios, Aliwan maung a mambukbukor so too. Igawaan ko na sakey a manepeg a kaiba to tan katulongan to.

¹⁹ Kanyan nanmoli na dalin tan sayan minoli to ginawa ton ayayep tan manomanok. Insan to ra inyakar ed samay too, ta nengnengen to no antoy pangingaran tod sikara. No antoy impanawag tod balang sakey, sikatoy ngaran to.

²⁰ Samay too sirin initdan toy kangaranan iray amin a manok tan ayayep; balet anggapod saraya so manepeg a kaiba to tan katulongan to.

²¹ Insan say Katawan a Dios pinaogip toy malmalet imay too; nen naogip, angoyus na sakey ed saray taglang to may laki, insan to kinopit so laman ya angalaan to.

²² Ginawa ton bii imay taglang, insan to inyakar ed samay laki.

²³ Inkuanto may laki, A, salamat, sikato yan siansiay kaparak. Pokel ya inalad saray pokel ko, tan laman ya inalad laman ko. Bii so ngaran to, ta inala ed laki.

²⁴ Sikato ya sirin so makasengeg no akin et taynan na laki so ama to tan say ina to tan mikasakey ed asawa to, et magmaliw iran saksakey a laman.

²⁵ Labus-lakseb imay laki tan samay asawa to, balet ag da ya imbaing.

3

¹ "Say oleg so sankasiliban ed saray amin ya ayayep a pinalsay Katawan a Dios. Tinepet na oleg ed samay bii, Imbaga tan tua na Dios ya ag yo kanen so bunga na dinanman a kiew ed tanamanan?

² "Inmebat imay bii, Nayarian min kanen so bunga na dinanman a kiew ed tanamanan,

³ "likud ed bunga to may kiew a walad pegley to. Imbagay Dios ed sikami ya ag mi kanen odino diwiten so bunga to man a kiew; no kanen mi o diwiten mi, ompatey kami.

⁴ "Inkuanto may oleg, Aliwan tua tan; ag kayo ompatey.

⁵ "Imbagay Dios itan ta amta ta a no kanen yo, magmaliw kayon singa Dios ya amta yo no anto so maung tan maoges.

⁶ "Anengneng na samay bii a marakerakep imay kiew tan masamsamit a kanen so bunga to, tan sakey a pampilpilalekan a pakagamuray kakabatan. Kanyan amorbor na bunga, insan to kinan. Initdan toy asawa to, tan kinan to met.

⁷ "Kapangan da, naitdan iray pakatalus tan naamtaan da a labus-lakseb ira; kanyan nandadait iray bolung na igos, insan da intapi-tapi.

⁸ "Nen ngarngarem la arengel da so tanul na panaakar na Katawan a Dios ed tanamanan, kanyan inamutan dad otel na kakiewan.

⁹ "Balet tinawag na Katawan a Dios imay laki, Iner so kawalaan mo?

¹⁰ Inmebat imay laki, Arengel ta kad tanamanan; antakot ak ta labuslakseb ak, kanyan inamutan ta ka.

¹¹ Tinepet na Dios, Siopay angibagad sikan labus-lakseb ka? Kinan mo sirin imay bunga ya imbagak ed sikan ag mo kanen?

¹² Inmebat imay laki, Samay biin inter mon kaibak et inter tod siak imay bunga, insan ko kinan.

¹³ Tinepet na Katawan a Dios ed samay bii, Akin et ginawam so ontan? Inmebat imay bii, Pinalikdo ak na samay oleg, et angan ak na samay bungay kiew.

¹⁴ Insan inkuan na Katawan a Dios ed samay oleg, Nadusa ka lapud sayan ginawam; sika labat so nisamba ed amin da ray ayayep. Saya so dusam: Manlapud natan manilak-ilak ka, tan say dabuk so kanen mo legan mon mambilay.

¹⁵ Pambosulan ta ka tan samay bii; mambosulan lawas so anak mo tan say anak to. Temeken na anak to so olom tan ketketen mo so mokur da.

¹⁶ Inkuanto natan ed samay bii, Aruman koy gunigon mo no manlokun ka tan nairapan ka ed pananak mo. Anggaman ontan, pampilalekan mo nin siansiay asawam tan sikatoy manoley ed sika.

¹⁷ Inkuantod samay laki, Dinengel moy asawam tan kinan moy prutas ya imbagak ed sikan ag mo kanen. Lapud sayan ginawam, nisambay dalin. Nakaukolan a mansagput kay baleg legan mon mambilay, pian mangiter so dalin na malaem a taganom.

¹⁸ Patuboen to ray dika-rika tan sabisabit, tan mangan ka ray tantanaman a balang.

¹⁹ Nakaukolan moy manlinget tan mansagput na baleg, pian makaiter so dalin na antokaman a napambilay ya anggad ipatey tan ipawil mod dalin a nanlapwan mo. Nanlapu kad dalin, tan magmaliw ka lamet a dalin.

²⁰ Eva so impangingaran nen Adan ed samay asawa to, ta sikatoy ina na amin a katoowan.

²¹ Insan say Katawan a Dios nanggawa na saray kawes a katat a para si Adan tan samay asawa to, tan kinawesan to ra.

²² Insan inkuan na Katawan a Dios, Nagmaliw la a singa sakey ed sikatayo so too, tan wala lay pakaamta tod maung tan maoges. Nakaukolan a sebelan a mangala na bungay kiew na bilay, ta no mangala tan mangan, mambilay ya anggad angga.

²³ Kanyan say Katawan a Dios pinataynan tod tanamanan na Eden imay too, pian nadalusan toy dalin a nanlapwan na laman to.

²⁴ Diad bandad bokig na tanamanan na Eden angipasen na saray kirubin tan sakey a mandarlang ya ispada a manwasiwas ed amin a dapag, pian anggapoy makaasingger ed samay kiew na bilay.

4

¹ "Inakdulan nen Adan si Eva ya asawa to. Nanlokun si Eva tan nananak na sakey a laki. Diad tulong na Katawan, kuanen Eva, akaanak ak na sakey a laki. Kanyan inngaran to na Cain imay ogaw.

² "Et nananak lamet na sakey a laki a si Abel. Nagmaliw a pumapastol si Abel, balet sakey a dumaralus si Cain.

³ "Kalabas na pigaran taon, angyakar si Cain na pigaran naani to tan imbagat tod Katawan.

⁴ "Insan angyakar met si Abel na kordiron besag na sakey ed saray karniro to, pinatas to, tan imbagat to ray sankaabigan a parti. Akaliket so Dios ed kinen Abel tan samay bagat to,

⁵ "balet ag akaliket ed kinen Cain tan samay bagat to. Mapalaloy pasnuk nen Cain tan binmilonget so lupa to.

⁶ "Inkuan na Katawan ed kinen Cain, Akin et mamapasnuk ka? Akin et ambilonget so lupam?

⁷ "No maung so ginawam, manimimis ka komun; balet lapud maoges so ginawam, say kasalanan et sisiliban to kan tekmelan. Labay to kan oleyan, balet nepeg mon taloen.

⁸ "Insan inkuanen Cain ed kinen agi ton Abel, Mamasyar ta ed kaalogan. Nen wadman la ra, tinekmelan nen Cain si agi to tan pinatey to.

⁹ "Tinepet na Katawan ed kinen Cain, “Kawalaan nen Abel ya agim?" Inmebat, “Ag ko amta. Siak tay managasikasod agik?"

¹⁰ Insan inkuan na Katawan, Akin et onyay ginawam? Manlapud dalin, manakakis ed siak so dala na agim; singa bosis ya onkekerew na bales.

¹¹ Nisamba ka; ag mo la nadalusan so dalin a singa inlokas toy sangi to nen inesep toy dala na agim a pinatey mo.

¹² No ondalus ka, anggapoy naanim; magmaliw kan anggapoy abung tan akar-akar ka diad tapew na dalin.

¹³ Inkuanen Cain ed Katawan, Ambelat a tuloy yan dusa; ag ko nasungdoan.

¹⁴ Patataynanen mo ak ed dalin tan diad arap mo. Magmaliw ak ya anggapoy abung tan akar-akar diad tapew na dalin, tan pateyen ak na siopaman a makalmod siak.

¹⁵ Balet inmebat so Katawan, Andi! No walay mamatey ed sika, pitoran totoo so pateyen a pinagkabales to. Kanyan minarkaan na Katawan si Cain a pamasakbay ton ag pateyen na siopaman a makabet ed sikato.

¹⁶ Tinmaynan si Cain ed arap na Katawan tan nanayam ed dalin a tatawagey Akar-akar, diad bokig na Eden.

¹⁷ Inakdulan nen Cain so asawa to, et nanlokun tan inngaran toy Enoc. Insan amaalagey na siudad si Cain tan inngaran tod ngaran na sayan anak to.

¹⁸ Walay lakin anak nen Enoc a manngaray Irad ya ama nen Mehujael, say ama nen Metusael ya ama nen Lamec.

¹⁹ Duaray inasawa nen Lamec, si Ada tan si Zilla.

²⁰ Inyanak nen Ada si Jabal a sengeg na boleg da ray totoon walaan na ayayep tan diad saray tulda so panaayaman da.

²¹ Say agi to si Jubal a sengeg na boleg da ray managtogtog na arpa tan plauta.

²² Inyanak nen Zilla si Tubal-cain a nanggawa na amin a klasiy kagawaan a gansa tan balatyang. Say biin agi nen Tubal-cain et si Naama.

²³ Inkuanen Lamec ed saramay asawa to, Ada tan Zilla, dengel yo ak: Pinatey koy sakey a lakin tubonbalo, ta kinabil to ak a sinugatan.

²⁴ No pitoran totoo so pateyen a pinagkabales na impamatey ed kinen Cain, Pitomplo tan pito a totoo so pateyen a pinagkabales na pamatey ed siak.

²⁵ Inakdulan nen Adan so asawa to, et nananak na sakey a laki ya inngaran to na Set. Inkuan na asawa to, Initdan ak na Dios na anak ya onsalat ed kinen Abel a pinatey nen Cain.

²⁶ Walay anak nen Set ya inngaran to na Enos. Diad sayan panaon, inggapo na katoowan so ontawag ed masanton ngaran a Yahweh.

5

¹ "Sikato yay listaan na saray kabyangay boleg nen Adan. (Nen pinalsay Dios so too, ginawa ton kaolibay to.

² "Pinalsa to ran laki tan bii, binindisionan to ra, tan tinawag to ra na Katoowan.)

³ "Nen sanlasus tan talomploy taon nen Adan, walay anak ton laki a kaolibay to, tan inngaran to na Set.

⁴ "Kasumpal to ya, nambilay niy Adan na walon lasus taon. Wala ni ray arum ya anak ton lalaki tan bibii,

⁵ "tan inatey nen mantaoy siam a lasus tan talomplo.

⁶ "Nen sanlasus tan limay taon nen Set, walay anak ton laki a si Enos,

⁷ "tan nambilay ni na walon lasus tan pitoy taon. Wala ni ray arum ya anak ton lalaki tan bibii,

⁸ "tan inatey nen mantaoy siam a lasus tan labindua.

⁹ "Nen siamaploy taon nen Enos, walay anak ton laki a si Kenan,

¹⁰ tan nambilay ni na walon lasus tan labin limay taon. Wala ni ray arum ya anak ton lalaki tan bibii,

¹¹ tan inatey nen mantaoy siam a lasus tan lima.

¹² Nen pitomploy taon nen Kenan, walay anak ton laki a si Mahalalel,

¹³ tan nambilay ni na walon lasus tan apataploy taon. Wala ni ray arum ya anak ton lalaki tan bibii,

¹⁴ tan inatey nen mantaoy siam a lasus tan samplora.

¹⁵ Nen anemaplo tan limay taon nen Mahalalel, walay anak ton laki a si Jared,

¹⁶ tan nambilay ni na walon lasus tan talomploy taon. Wala ni ray arum ya anak ton lalaki tan bibii,

¹⁷ tan inatey nen mantaoy walon lasus tan siamaplo tan lima.

¹⁸ Nen sanlasus tan anemaplo tan duay taon nen Jared, walay anak ton laki a si Enoc,

¹⁹ tan nambilay ni na walon lasus. Wala ni ray arum ya anak ton lalaki tan bibii,

²⁰ tan inatey nen mantaoy siam a lasus tan anemaplo tan dua.

²¹ Nen anemaplo tan limay taon nen Enoc, walay anak ton laki a si Matusalem.

²² Kasumpal to ya, nambilay si Enoc na talon lasus taon a kaibiba toy Dios, tan wala ni ray arum ya anak ton lalaki tan bibii.

²³ Nambilay si Enoc na talon lasus tan anemaplo tan limay taon.

²⁴ Nambilay a kaiba toy Dios, insan naandipat, ta inalay Dios.

²⁵ Nen sanlasus tan walomplo tan pitoy taon nen Matusalem, walay anak ton laki a si Lamec,

²⁶ tan nambilay ni na piton lasus tan walomplo tan duay taon. Wala ni ray arum ya anak ton lalaki tan bibii,

²⁷ tan inatey nen mantaoy siam a lasus tan anemaplo tan siam.

²⁸ Nen sanlasus tan walomplo tan duay taon nen Lamec, walay anak ton laki

²⁹ tan inkuanto, Itdan to itayo na sayan ogaw na inawa ed amin da ray mairap a kimey tayo ed sayan dalin ya insamba na Katawan; kanyan inngaran to na Noe.

³⁰ Nambilay ni si Lamec na liman lasus tan siamaplo tan limay taon. Wala ni ray arum ya anak ton lalaki tan bibii,

³¹ tan inatey nen mantaoy piton lasus tan pitomplo tan pito.

³² Kayariy liman lasus taon nen Noe, nanilalak na taloran lalaki a di Sem, Ham, tan Jafet.

6

¹ "Nen ondarakel la ray katoowan tan akayatan da lay intiron mundo, dakel met la ray nianak a bibii.

² "Saray anak na Dios anengneng dan maganggana ra yan bibii, kanyan nampili ray inasawa ra.

³ "Insan inkuan na Katawan, Ag ko iyabuloy a mambilay ya anggad angga iray katoowan; ompatey ira. Manlapud natan, mambilay iray ag onsoluk ed sanlasus tan duamploy taon.

⁴ "Diad saraman ya agew, tan anggan diad saray ontombuk, wala ray alan a manaayam ed dalin ya anak ira na saramay magangganan bibii tan saramay anak na Dios. Sikaray matalonggaring a bayani tan bantug a lalaki nen saman a panaon.

⁵ "Nen anengneng na Katawan so ontan lan kaogsan na amin a totoo ed tapew na dalin, say ontan lan kinaoges lawas na kanunotan da,

⁶ "naermenan ed impamalsa tod totoo tan diad impangipasen tod sikara ed tapew na dalin. Diad ontan lan pagbabawi to,

⁷ "inkuanto, Paandipaten kod tapew na dalin ira yan totoo a pinalsak, saray ayayep, tan saray manok, ta maermen ak ed impamalsak ed sikara.

⁸ "Balet pakaliliketan na Katawan si Noe.

⁹ "Saya so impanbilay nen Noe. Wala ray taloran anak ton lalaki a di Sem, Ham, tan Jafet. Si Noe labat so maung a too nen panaon to. Anggapoy pakabalawan ed sikato, ta kaibiba toy Dios.

¹⁰ Balet maoges ya amin iray arum a totoo, tan kinmayat so kaogsan ed amin a pasen.

¹¹

¹² Say Dios ninmengneng ed mundo tan anengneng ton maoges, lapud maoges so pambibilay na amin a katoowan.

¹³ Inkuan na Dios ed kinen Noe, Tinibokel ko lad kanunotan ko a panganggaen koy bilay na amin a katoowan. Sigput ko ran deralen, ta napnoy mundo na maoges a gawgawa ra.

¹⁴ Manggawa kay biong para sika; ikanam so maung a klasiy kiew, igawaan mo na saray kuarto, tan balkut mo na alkitran ed loob tan diad paway to.

¹⁵ Gawam a sanlasus tan limamplon mitro so karokey to, duamplo tan liman mitro so kaawang to, tan labinliman mitro so kaatagey to.

¹⁶ Igawaan moy atep, tan iyatagey mod saray dingding to na kapalduay mitro. Gawam a taloran grado, tan igawaan moy sakey a puirta ed diking to.

¹⁷ Delapen koy intiron dalin, pian naderal so antokaman a mabilay. Ompatey ya amin iray walad tapew na dalin,

¹⁸ balet misipanan ak ed sika. Loob kayod samay biong, sika tan say asawam, saray anak mo tan saray kaasawaan da.

¹⁹ Pian mambilay ira, mangawit kad biong na sankaparis ed amin a klasiy ayayep, tan sankaparis ed amin a klasiy manok.

²⁰ Mangawit ka met na amin a klasiy kakanen a para sikayo tan sikara.

²¹

²² Sinumpal nen Noe ya amin iray ingganggan na Dios.

7

¹ "Inkuan na Katawan ed kinen Noe, Loob kad biong, sika tan amin a kabyangay pamilyam, ta nalmoan ko a diad intiron mundo sika labat so matonung ed arap ko.

² "Mangawit kay pitoran kaparis ed amin a klasiy ayep a malinis, balet sankaparis labat ed amin a klasiy ayep a marotak.

³ "Mangawit ka met na pitoran kaparis na balang klasiy manok. Gawam ya, pian amin a klasiy ayep tan manok et nabilay ira tan walay napanmonatan ed intiron tapew na dalin.

⁴ "Pitoy agew ni, manlapud natan, paoranen ko ed loob na apataploy agew tan apataploy labi, pian naderal ya amin iray mabilay a pinalsak ed tapew na dalin.

⁵ "Sinumpal nen Noe ya amin iray ingganggan na Katawan.

⁶ "Anem a lasus so taon nen Noe nen adelap so mundo.

⁷ "Sikato tan say asawa to, saray anak ton lalaki tan saray kaasawaan da et linmoob irad biong, pian ag ira ompatey ed delap.

⁸ "Onung na ingganggan na Dios ed Noe, akilad kinen Noe diad dalem na biong iray sankaparis ed amin a klasiy ayep tan manok, malinis man o marotak onung ed ganggan.

⁹

¹⁰ Kalabas na pitoy agew, sinmabiy delap.

¹¹ Nen mantaon si Noe na anem a lasus taon, diad kumalabimpiton agew na kumadwan bulan, sinmasangi ray dalin tan pinmapaway iray ankakabaleg a sobul ed dalem na dalin tan linmokas ya amin iray puirtay tawen,

¹² tan inmoran ed dalin na apataploy agew tan apataploy labi.

¹³ Diad saman ya agew, si Noe tan say asawa to et linmoob irad biong a kaiba da ray anak dan lalaki a di Sem, Ham, Jafet, tan saray kaasawaan da.

¹⁴ Kaiba ra met ya amin iray klasiy ayep, atap man o amo, baleg man o melag, tan amin a klasiy manok.

¹⁵ Onung na ingganggan na Dios, sankaparis ed amin a klasiy mabilay a pinalsa

¹⁶ iray kaiba nen Noe a linmoob ed biong. Insan kinaputan na Katawan si Noe ed dalem na biong.

¹⁷ Ag tinmondan inmaralem so delap ed loob na apataploy agew, ya anggad linmetaw imay biong.

¹⁸ Inmaralem niy danum, tan manletletaw imay biong.

¹⁹ Inmaralem lan inmaralem tan asalinap ton amin iray sankaatageyan a palandey;

²⁰ siansian inmaralem ya anggad pitoran mitroy kaatagey tod toktok na saray palandey.

²¹ Inatey ya amin iray pinalsan mabilay ed tapew na dalinamin a manok, amin ya ayep, tan amin a too.

²² Inatey ira yan amin sirin.

²³ Dineral na Katawan ya amin iray mabilay ed tapew na dalinsaray totoo, saray ayayep, tan saray manok. Si Noe tan saray kaiba tod dalem na biong so mabilay labat.

²⁴ Ag inmabebay danum ya anggad kalabas na sanlasus tan limamplon agew.

8

¹ "Ag alingwanan na Dios si Noe tan amin ya ayep a kaiba tod dalem na biong; pinasiplug na Dios so dagem, et ginmapon inmabebay danum.

² "Kinmopit ira may sinmasangin dalin, et tinmondan pinmaway iray sobul ed dalem na dalin tan kinmaput iray puirtay tawen. Tinmonday oran,

³ "tan diad loob na sanlasus tan limamploy agew nankalkalnan inmabebay danum.

⁴ "Diad kumalabimpiton agew na kumapiton bulan, sinmarsar ed palandey na Ararat imay biong.

⁵ "Tuloy-tuloy ya inmabebay danum, tan diad onaan ya agew na kumaplon bulan pinmaway iray toktok na kapalandeyan.

⁶ "Kasumpal na apataplon agew inlokas nen Noe so sakey a bintana a ginawa to,

⁷ "ta imbolus toy sakey a wawak. Ag pinmawil, no ag ta nantikyab lan nantikyab ya anggad amaga lay dalin.

⁸ "Legan to ya, imbolus toy sakey a malapati, ta nengnengen to no inmabeba lay danum.

⁹ "Balet lapud wala niy danum ed intiron dalin, anggapoy natoonan to may malapati. Kanyan pinmawil ed biong, siningkat nen Noe tan inloob to lamet.

¹⁰ Nanalagar na pitoy agew, insan pinatikyab to lamet imay malapati.

¹¹ Pinmawil na labi a sankatangal toy sakey a balon bolung na oliba. Naamtaan ed satan nen Noe ya ataptapew lay danum.

¹² Nanalagar ni na pitoy agew, insan to pinatikyab lamet imay malapati; natan ag la pinmawil.

¹³ Nen mantaon si Noe na anem a lasus tan sakey, diad ononan agew na onaan a bulan, anggapo lay delap. Inekal toy tarung na biong, ninengneng toy kaliber-liber, tan anengneng ton namamagaan lay dalin.

¹⁴ Diad kumaduamplo tan pitoy agew na kumadwan bulan, amaga lay dalin.

¹⁵ Inkuan na Dios ed kinen Noe,

¹⁶ Paway ka lad biong, pati say asawam, saray anak mon lalaki, tan saray kaasawaan da.

¹⁷ Papaway mo met la ra may manok tan saramay ayayep, ta mamparakel ira tan onkayat irad intiron mundo.

¹⁸ Pinmaway la sirin si Noe, pati say asawa to, saray anak ton lalaki, tan saray kaasawaan da.

¹⁹ Pinmaway met ira may ayayep tan saramay manok a nanoolup so balang klasi.

²⁰ Nanggaway Noe na altar a para Katawan; angalay sakey ed balang klasi na saray manok tan saray ayayep a malinis onung ed ganggan tan insaklang to ran bagat a popoolan ed altar.

²¹ Akapaliket ed Katawan so naangub ton balingit na samay bagat, kanyan inkuantod sikaton dili, Ag ko lan balut isambay dalin lapud saray gagawaey too; amtak a manlapud ogaw ni, maoges lay kanunotan to. Ag ko lan balut deralen ya amin iray pinalsan mabilay a singa ginawak.

²² Anggad wala niy mundo, walan walay panaon na panagtanem tan panaon na panagani, walay panaon na ambetel tan say panaon na ampetang, say tiagew tan say nepnep, say agew tan say labi.

9

¹ "Si Noe tan saray anak ton lalaki et binindisionan ira na Dios ya inkuanto, Mamparakel kayoy anak, pian nakayatan day intiron mundo.

² "Ontakot ed sikayo ray amin ya ayayep, manok, tan sira. Inter ko ra yan amin ed silong na pakayari yo.

³ "Nayarian yo ran kanen, tan nayarian yo met a pambilay iray tantanaman; iter kon tagano yo ra yan amin.

⁴ "Say ag nayarin kanen yo et say karni a nandala, ta walad dala so bilay.

⁵ "Nadusa so siopaman a mamatey na too. Dusaen ko na patey so anggan anton ayep a mamatey na too.

⁶ "Siopamay mamatey na too pateyen met na kapara ton too, ta apalsan kaolibay na Dios so too.

⁷ "Natan, nakaukolan a mamparakel kayoy anak, pian onkayat ed intiron mundo iray kabyangay boleg yo.

⁸ "Inkuan na Dios ed kinen Noe tan saray anak ton lalaki,

⁹ "Misipanan ak ed sikayo tan saray kabyangay boleg yo,

¹⁰ tan diad amin a mabilay a pinalsasaray manok, saray ayayepamin da ray kaiba yon pinmaway ed biong.

¹¹ Diad sarayan balikas misipanan ak ed sikayo: Isipan ko ya ag lan balut deralen na delap iray amin a mabilay a pinalsa. Ag lan balut deralen na delap so dalin.

¹² Niay pakanengnengan na sayan andi-anggaan a pisipanan kod sikayo tan amin da ray mabilay a pinalsa:

¹³ paletawen kod lorem so bunlalakaw. Sikato yay tanda na impisipanan kod mundo.

¹⁴ Kapag sakuban koy tawen na lorem tan onletaw so bunlalakaw,

¹⁵ nanunotan koy sipan kod sikayo tan diad amin ya ayayep ya ag lan balut deralen na delap iray amin a mabilay.

¹⁶ Kapag onletaw so bunlalakaw ed lorem, nengnengen ko tan nanunotan koy impisipanan ko ed amin a mabilay ed tapew na dalin.

¹⁷ Sikato yay tanda na impisipanan ko.

¹⁸ Sikara yay anak nen Noe a pinmaway irad biong: Si Sem, si Ham ya ama nen Canaan tan si Jafet.

¹⁹ Sarayan taloran anak nen Noe et sikaray sengeg na amin a totoo ed tapew na dalin.

²⁰ Sakey a dumaralus si Noe tan sikatoy onaan a nantanem na ubas.

²¹ Aminsan ya agew inminom na alak si Noe, et abuek; inekal toy amin a kawes tod laman to, insan akaogip ed dalem na tulda to.

²² Nen anengneng nen Ham ya ama nen Canaan a labus-lakseb si ama to, pinmaway tan imbaga tod saray duaran agagi to.

²³ Angalay kolibemben si Sem tan si Jafet, inyan dan duad takeb da, insan ira nampasoner a linmoob ed tulda, ta ag da labay a nanengneng so ama ran labus-lakseb.

²⁴ Nen amawmawan lay Noe, tan naamtaan toy ginawad sikato na kayogtanan ya anak ton laki,

²⁵ inkuanto, Nisamba komuy Canaan! Magmaliw ya aripen na saray agagi to.

²⁶ Nagalang komun so Katawan, say Dios nen Sem! Magmaliw ya aripen nen Sem si Canaan.

²⁷ Say Dios parakelen to komuy Jafet! Saray kabyangay boleg to miayam ira komun ed totoo nen Sem! Magmaliw ya aripen nen Jafet si Canaan.

²⁸ Kasumpal na delap, nambilay niy Noe na talon lasus tan limamploy taon,

²⁹ tan inatey nen mantaoy siam a lasus tan limamplo.

10

¹ "Kasumpal na delap, naniilalak ira di Sem, Ham, tan Jafet ya anak nen Noe. Sikara yay kabyangay boleg da.

² "Saray lalakin anak nen Jafet sikara di Gomer, Magog, Madai, Javan, Tubal, Mesec, tan Tiras.

³ "Saray lalakin anak nen Gomer et di Askenaz, Rifat, tan Togarma.

⁴ "Saray lalakin anak nen Javan sikara di Elisa, Espanya, Chipre, tan Dodanim.

⁵ "Sikara yay sengeg na saray totoon manaayam ed saray gilig na dayat tan diad saray isla. Anak tan apo nen Jafet ira yan amin; manaayam so balang sakey ed dilin tribu tan bansa to, tan walay dilin salita na balang tribu.

⁶ "Saray lalakin anak nen Ham et di Cus, Egipto, Libia, tan Canaan.

⁷ "Saray lalakin anak nen Cus sikara di Seba, Havila, Sabta, Raama, tan Sabteca. Saray lalakin anak nen Raama et di Saba tan Dedan.

⁸ "Si Cus walay anak ton laki a manngaray Nimrod, a sikatoy onaan a makapanyarin manoley a nianak diad mundo.

⁹ "Lapud tulong na Katawan, nagmaliw a sakey a makapanyarin marunong ya umaanup, kanyan pibitla ra, Say Katawan gawaen to ka komun a marunong ya umaanup a singa si Nimrod!

¹⁰ Diad gapo sakop na nanarian to so Babilonia, Erec, tan Acad, a wala ran amin ed dalin na Babilonia.

¹¹ Manlapud saman a dalin, linmad Asiria, tan impaalagey to ray siudad na Ninive, Rohobotir, Cale,

¹² tan Resen a walad nanleetan na Ninive tan say matalonggaring a siudad na Cale.

¹³ Saray kabyangay boleg nen Egipto et saray totoon taga Lydia, Anam, Lehab, Naftuh,

¹⁴ Patrus, Cuslu, tan Creta a sengeg na saray Filisteo.

¹⁵ Say pangulowan ya anak nen Canaan et si Sidon, tan say kumadwa si Het.

¹⁶ Si Canaan et sengeg met na saray Jebuseo, Amorreo, Gergeseo,

¹⁷ Heveo, Arkeo, Sineo,

¹⁸ Arvadeo, Zemareo, tan Hamateo. Kinmayat ira yan boleg a Cananeo.

¹⁹ Say nasasakopan dan dalin, manlapud Sidon, et nampaabalaten ya anggad Gerar, diad abay na Gaza, tan nampabokig ya anggad Sodoma, Gomorra, Adma, tan Zeboim, diad abay na Lasa.

²⁰ Sikara yay kabyangay boleg nen Ham; manaayam so balang sakey ed sikara diad dilin tribu tan bansa to, tan walay dilin salita na balang tribu.

²¹ Si Sem a pangulowan ya agi nen Jafet so sengeg na amin da ray Hebreo.

²² Saray lalakin anak to sikara di Elam, Asur, Arpaksad, Lud, tan Aram.

²³ Saray kabyangay boleg nen Aram et saray totoon taga Uz, Hul, Geter, tan Mesek.

²⁴ Si Arpaksad so ama nen Sela ya ama nen Eber.

²⁵ Duaray anak nen Eber: Peleg so ngaray sakey, ta nen panaon to naapag-apag iray totood mundo; Joktan so ngaray sakey.

²⁶ Saray kabyangay boleg nen Joktan et saray totood Almodad, Selef, Hazarmavet, Jerah,

²⁷ Hadoram, Uzal, Dikla,

²⁸ Obal, Abimael, Saba,

²⁹ Ofir, Havila, tan Jobab. Si Joktan so sengeg da ra yan amin a totoo.

³⁰ Say dalin a panaayaman da sakop toy manlapud Mesa ya anggad Sefar, diad nipokdul a pasen ed bokig.

³¹ Sikara yay kabyangay boleg nen Sem; manaayam so balang sakey ed dilin tribu to tan bansa to, tan walay dilin salita na balang tribu.

³² Si Noe so sengeg na amin da ra yan totoo, a walay bansa ra tan kailalakan da. Kasumpal na delap, saray anak nen Noe so sengeg na amin a totood balang bansa ed tapew na dalin.

11

¹ "Nen saman saksakey so salita tan panagbalikas na amin a katoowan ed intiron mundo.

² "Nen amaarap irad bokig, asabi ray patar ed Babilonia tan nanayam irad man.

³ "Inkuandad sakey tan sakey, Manggawa tayoy laryo tan palbaen tayo ran maung. Kanyan wala ray laryo ra a pinagkabato ra, tan alkitran a pinagkasiminto.

⁴ "Insan inkuanda, Mangipaalagey tayoy sakey a siudad a walay tori ton toktokdulen toy tawen, pian ombantug itayo ta ag la pigan nikaykayat itayod intiron mundo.

⁵ "Inmakseb so Katawan, ta nengnengen toy siudad tan say tori ya impaalagey na saraman a totoo,

⁶ "insan inkuanto, Natan, saksakey ira yan totoo tan saksakey so salita ra. Gapo labat ya na getma ran gawaen. Ag mabayag, nagawaan da lay labalabay dan gawaen.

⁷ "Onakseb itayo tan pandoromaen tayoy salita ra, pian ag ira makapantatalusan.

⁸ "Inkayat ira sirin na Katawan diad intiron mundo, kanyan tinondaan da ya impaalagey imay siudad.

⁹ "Babilonia so impanawag dad saman a siudad, ta diad sayan lugar impandoroma na Katawan so salita na amin a katoowan tan manlapud man, inkayat to ran amin ed intiron mundo.

¹⁰ Sikara yay kabyangay boleg nen Sem. Kalabas na duay taon kayari to may linmabas a delap, si Sem, nen mantaon na sanlasus, walay anak ton laki a manngaray Arpaksad.

¹¹ Nambilay ni na liman lasus a taon tan wala ni ray arum ya anak ton lalaki tan bibii.

¹² Nen mantaon na talomplo tan lima si Arpaksad, awalaay ilalak a laki a si Sela;

¹³ nambilay ni na apat a lasus tan taloy taon tan wala ni ray arum ya anak ton lalaki tan bibii.

¹⁴ Nen mantaoy talomplo si Sela, walay anak ton laki a si Eber;

¹⁵ nambilay ni na apat a lasus tan taloran taon tan wala ni ray arum ya anak ton lalaki tan bibii.

¹⁶ Nen mantaoy talomplo tan apat si Eber, walay anak ton laki a si Peleg;

¹⁷ nambilay ni na apat a lasus tan talomplon taon tan wala ni ray arum ya anak ton lalaki tan bibii.

¹⁸ Nen mantaon na talomplo si Peleg, walay anak ton laki a si Reu;

¹⁹ nambilay ni na duan lasus tan siamira a taon tan wala ni ray arum ya anak ton lalaki tan bibii.

²⁰ Nen mantaon na talomplo tan dua si Reu, walay anak ton laki a si Serug;

²¹ nambilay ni na duan lasus tan piton taon tan wala ni ray anak ton lalaki tan bibii.

²² Nen mantaon na talomplo si Serug, walay anak ton laki a si Nacor;

²³ nambilay ni na duan lasus taon tan wala ni ray arum ya anak ton lalaki tan bibii.

²⁴ Nen mantaon na duamplo tan siam si Nacor, walay anak ton laki a si Tare;

²⁵ nambilay ni na sanlasus tan labinsiam taon tan wala ni ray arum ya anak ton lalaki tan bibii.

²⁶ Nen mantaon na pitomplo si Tare, walay anak ton lalaki a di Abram, Nacor, tan Haran.

²⁷ Sikara yay kabyangay boleg nen Tare: si Tare so ama di Abram, Nacor, tan Haran. Si Haran so ama nen Lot,

²⁸ tan inatey si Haran diad dilin baley ton Ur na Babilonia nen mabilay niy ama to.

²⁹ Inasawa nen Abram si Sarai, tan inasawa nen Nacor si Milca ya anak nen Haran ya ama nen Isca.

³⁰ Anggapoy anak nen Sarai, ta lepes.

³¹ Tinmaynan si Tare ed baley na Ur na Babilonia, a kaiba toy anak ton Abram, si apo ton Lot ya anak nen Haran, tan si manugang ton Sarai ya asawa nen Abram. Linma rad dalin na Canaan, et nen asabi ray dalin na Haran, diman la ra nanayam.

³² Inatey diman si Tare nen mantaoy duan lasus tan lima.

12

¹ "Inkuan na Katawan ed kinen Abram, Taynan moy baley mo, saray kakanayon mo, tan say abung na amam, insan ka onlad bansan ipanengneng kod sika.

² "Itdan ta kay amayamay a kabyangay boleg mo, tan magmaliw iran sakey a bansan matalonggaring. Bindisionan ta ka tan pagmaliwen kon bantug so ngaran mo, pian sikay pakabindisionan na arum a totoo.

³ "Bindisionan ko ray mamindision ed sika, Balet isambak iray mangisambad sika. Diad panamegley mo bindisionan kon amin iray bansa ed mundo.

⁴ "Nen mantaon na pitomplo tan lima si Abram, tinaynan toy Haran, onung na imbagay Katawan ed sikato.

⁵ "Inawit nen Abram si Sarai ya asawa to, si Lot a kaanakan to, tan amin iray kayamanan tan saray aripen ya atipon da nen wala rad Haran, insan ira amaarap ed dalin na Canaan. Nen sinmabi rad Canaan,

⁶ "tinmuloy si Abram ya anggad masanton kiew ed More, say masanton lugar na Sikem. (Diad saman a panaon, manaayam ni rad may Cananeo.)

⁷ "Pinmanengneng so Katawan ed kinen Abram tan inkuantod sikato, Sikato yay bansa ya iter kod saray kabyangay boleg mo. Nanggawad may Abram na altar a para Katawan a pinmanengneng ed sikato.

⁸ "Insan tinmuloy ed bandad abalaten diad nipokdul a pasen a nibokig na Betel, tan nankampod nanleetan na Betel tan Hai diad bokig. Nanggawa met diman na altar tan inggalang toy Katawan.

⁹ "Manlapud man, tinmonda-tondan nanaayam ed nandoroman pasen ya anggad akasabid bandad abalaten a parti na Canaan.

¹⁰ Balet walay eras ed saman a lugar, et lapud mapalalo la linmay Abram ed bandad abalaten, diad Egipto, ta manayam diman a magano.

¹¹ Nen asingger to lan beltangen so ketegan a mamaarap ed Egipto, inkuantod kinen Sarai ya asawa to, Maganggana kan bii.

¹² No nanengneng da ka ray Egipsio, ibaga ran asawa ta ka. Pateyen da ak ed satan, balet bilayen da ka.

¹³ Walay maung, ibagam ed sikaran agi ta ka, pian ag da ak pateyen, no ag ingen asikasoen da ak lapud sika.

¹⁴ Nen akasabi rad Egipto, anengneng a tua na saray tagad man a magangganay asawa nen Abram.

¹⁵ Anengneng na pigarad saray opisyal na palasio tan imbalita rad ari so ontan lan ganggana to; kanyan inawit day Sarai ed palasio na ari.

¹⁶ Lapud sikato, maung so imapangasikaso na ari ed kinen Abram tan initdan to na saray karniro tan kanding, saray baka tan asno, saray kamilyo tan pati saray aripen a lalaki tan bibii.

¹⁷ Balet lapud inalay ari si Sarai, say Katawan impansakit to na ambelat so ari tan saray totood palasio.

¹⁸ Impaawit na ari si Abram tan tinepet to, Antoy ginawam ed siak? Akin et ag mo imbagad siak ya asawam manaya si Sarai?

¹⁹ Akin et imbagam ya agim tan inabuloyan mon inalak ya asawa? Niay asawam, alam la tan taynan ki la!

²⁰ Ingganggan na ari ray totoo to a paekalen da rad bansa, kanyan pinataynan day Abram, samay asawa to tan amin a kayaryan to.

13

¹ "Manlapud Egipto linmay Abram ed bandad abalaten na Canaan a kaiba to si Sarai ya asawa to tan amin a kayaryan to; akilad sikato si Lot.

² "Mayamyaman lay Abram, ta amayamay la ray karniro, kanding, baka, pilak tan balituk to.

³ "Tinmaynan lamet diman tan nanalis-alis so nankampoan to ya anggad akasabit Betel. Insan asabi to may pasen a nanleetan na Betel tan Ai a nanayaman to nen samam

⁴ "tan nanggawaan toy altar. Diman to inggalang so Katawan.

⁵ "Si Lot a kaiba nen Abram et wala met iray karniro to, kanding tan saray baka to; wala met so dilin pamilya to tan saray dilin aripen to.

⁶ "Kulang so pampastolan no manolup iran dua, ta dakerakel iray ayayep da.

⁷ "Lapud saya mabetbet so siblangan da ray pumapastol nen Abram tan saray pumapastol nen Lot. (Diad saman a panaon, manaayam nid man iray Cananeo tan saray Perezeo.)

⁸ "Inkuanen Abram ed kinen Lot, Sankanayon ita, tan ag nepeg a mansebeg iray totook tan saray totoom.

⁹ "Say maung, mansiyan ita la. Pilim so labalabay mon dalin. Lakad sakey a pasen; onla ak balet ed sananey.

¹⁰ Ninengneng sirin nen Lot so kaliber-liber tan abantag ton say patar na Jordan ya anggad Zoar et dakel so danum to, a singa Tanamanan na Katawan o singa dalin na Egipto. (Diad saman a panaon, ag ni dineral na Katawan so siudad na Sodoma tan say siudad na Gomorra.)

¹¹ Kanyan pinili nen Lot a betang to so intiron Patar na Jordan, insan amaarap diman ed bokig. Onyay impansian dan dua.

¹² Tinmilak si Abram ed Canaan, balet nanayam si Lot ed saray siudad diad patar ya asingger ed Sodoma.

¹³ Maoges iray totood man; mapalaloy kasalanan dad Katawan.

¹⁴ Kasiput nen Lot, inkuan na Katawan ed kinen Abram, Manlapud tan ed kawalaan mo, nengneng mon maung so kaliber-liber mo;

¹⁵ amin a dalin a nabantag mo, iter kod sika tan diad saray kabyangay boleg mo, tan kayaryan mo ra ya anggad angga.

¹⁶ Diad karakel na iter kod sikan kabyangay boleg mo, no bilangen mo ra singa ka mambibilang na dabuk.

¹⁷ Natan sirin, liber mo yan dalin, ta iter kod sikan amin.

¹⁸ Inyalis nen Abram so tulda to ed abay na saray masanton kiew ed Mamre diad Hebron tan nanayam diman. Nanggawad man met na altar a para Katawan.

14

¹ "Saray apatiran arari a di Amrafel na Babilonia, Arioc na Elasar, Kedorlaomer na Elam, tan Tidal na Goiim

² "et akibakal irad limaran arari a di Bera na Sodoma, Birsa na Gomorra, Sinab na Adma, Semeber na Ziboiim, tan say ari na Bela (o Zoar).

³ "Sarayan limaran ari nankakasakey ira tan impanoolup da ray sondalo ra ed Patar na Sidim ya Inatey a Dayat natan.

⁴ "Labinduay taon la ran walad silong na pakaoley nen Kedorlaomer, balet diad kumalabintalon taon nilabanan da.

⁵ "Diad kumalabinapat taon si Kedorlaomer, saray ararin kakaiba to, tan saray sondalo ra et linma ran linmaban ed saramay limara. Diad inyakar da tinalo da ray Refaita ed Astarot-Carnaim, saray Zuzita ed Ham, saray Emita ed Save-kiryataim.

⁶ "Tinalo da met iray Horeo diad kapalandeyan na Edom, tan inosilan da ra ya anggad Elparan, diad samput na kalawakan.

⁷ "Insan ira amoliktar, pinmawil irad Cades (Enmispat nen saman), sinakop da ray amin a dalin na saray Amalecita, tan tinalo da ray Amorreo a manaayam ed Hazazontamar.

⁸ "Tinipon na saray ari na Sodoma, Gomorra, Adma, Zeboim, tan Bela ed patar na Sidim iray sondalo ra tan akilaban irad

⁹ "saray ari na Elam, Goiim, Babilonia, tan Elasar; limara laban ed apatira.

¹⁰ Dakel diman iray maawang a bobun na alkitran, et nen ibabatikan day bakal ira may ari na Sodoma tan Gomorra naplag irad saraman a bobun, balet akabatik ed kapalandeyan ira may taloran ari.

¹¹ Inala na apatiran arari iray amin a walad Sodoma tan Gomorra, pati saray kakanen, insan la ra tinmaynan.

¹² Manaayam diman si Lot a kaanakan nen Abram, kanyan inala ra met tan amin a kayaryan to.

¹³ Balet walay toon akabatik tan imbaga to ra yan amin ed kinen Abram a Hebreo, a manaayam ed abay na saray masanton kiew nen Mamre ya Amorreo. Si Mamre tan di Escol tan Aner ya agagi to et kagampi ray Abram.

¹⁴ Nen nadngelan nen Abram ya adakep si kaanakan to, tinawag ton amin iray totoo ton sarag day mibakal tan akatipon na talon lasus tan labinwalon lalaki. Inosilan to ya anggad Dan ira may apatiran arari.

¹⁵ Kasabi tod man, impankadwa to ray totoo to, dinogpaan dad labi iray kalaban da tan tinalo da ra. Inosilan to ran anggad Hoba a walad baybay na Damasco,

¹⁶ tan abawi to ray amin ya asamsam da. Abawi to met si Lot tan saray kayaryan to, pati saray bibii tan arum ni ran totoon adakep.

¹⁷ Nen pinmawil si Abram, kayari ton tinalo si Kedorlaomer tan saramay arum ya arari, inabet na ari na Sodoma diad Patar na Save (tatawagen met na Patar na Ari).

¹⁸ Inabet met nen Melkisedek ya ari na Salem tan pari na Sankatageyan a Dios. Inawitan toy Abram na tinapay tan alak,

¹⁹ binindisionan to, tan inkuanto, Say Sankatageyan a Dios ya amalsay tawen tan dalin et bindisionan to komuy Abram.

²⁰ Nagalang komun so Sankatageyan a Dios ya angiter ed sikay pananalod saray kalaban mo. Inter nen Abram ed kinen Melkisedek so kakaplo na amin ya asamsam to.

²¹ Inkuan na samay ari na Sodoma ed kinen Abram, Kayaryan mo la tay asamsam mo; ipawil mo labat ed siak iray amin a totook.

²² Inmebat si Abram, Sambaan kod Katawan, say Sankatageyan a Dios a Manamalsay tawen tan dalin,

²³ ya ag kon balut mangala na antokaman a kayaryan mo, anggan tinebey o sakey a bariber na sandalya. Ag mon balut nibagad satan, Siak so nampayaman ed Abram.

²⁴ Anggapoy alaen kon para siak. Say birbiren ko labat a nalak saray inaakan na totook. Balet abuloyan yo ray kakaibak a di Aner, Escol, tan Mamre a mangalay betang da.

15

¹ "Kasumpal to yan inkagawa, walay pasingayew ed kinen Abram tan arengel ton inkuan na Katawan ed sikato, Ag ka natatakot, Abram. Salimbengan ta kad kaatapan tan itdan ta kay baleg a tumang.

² "Balet inkuanen Abram, Katawan a DIOS, antoy kaabigan ya iter ed siak na tumang mo, anta anggapo met so anak ko. Si Eliezer labat a taga Damasco so tumatawir ko.

³ "Ag mo ak initday anak, kanyan say sakey ed saray aripen ko so manawir ed saray kayaryan ko.

⁴ "Arengel to lamet ya inkuan na Katawan, Ag tawiren nen Eliezer ya aripen mo iray kayaryan mo; say dilin anak mo so manawir.

⁵ "Say Katawan pinapaway to tan inkuanto, Nengneng moy tawen tan salim a bilangen iray bitewen; ontan naani so karakel na saray kabyangay boleg mo.

⁶ "Anisiay Abram ed Katawan, tan lapud sayan pananisia to say Katawan impasen ton matonung si Abram.

⁷ "Insan inkuan ed sikato na Katawan, Siak so Katawan ya amataynan ed sika manlapud Ur na Babilonia, pian niiter kod sika yan dalin.

⁸ "Balet tinepet nen Abram, Katawan a DIOS, panoy pakaamtak a nakayaryan ko yan dalin?

⁹ "Inmebat, Awit ka diay sakey a baka, sakey a kanding, tan sakey a karniro, a mantaon iran amin na talora. Awit ka dia met na sakey a sibong na malapati tan sakey a palekpek.

¹⁰ Inawit nen Abram ira yan ayayep ed Dios, pinaldua to ra likud ed saramay manok, insan to ra impandarasig a nampepetekan so balang kapaldua.

¹¹ Dinapoan ira na saray buitri, balet inaabul ira nen Abram.

¹² Nen onseselek lay agew, akaogip na malmalet si Abram, tan balbaleg a takot so sinmabid sikato.

¹³ Inkuan na Katawan ed sikato, Magmaliw iran sangkaili ed sakey a bansa iray kabyangay boleg mo; aripenen da rad man tan pairapen da ran apat a lasus a taon.

¹⁴ Balet dusaen koy bansan mangaripen ed sikara, tan dakel a kayamanan so awiten da no taynan da man a bansa.

¹⁵ Sika, andokey so bilay mo, mareen so ipatey mo, insan ka nipompon.

¹⁶ Onlabas so apatiran kailalakan kasakbayan a makapawil ira diay kabyangay boleg mo. Pansiansiaen kon panayamen ira diay Amorreo ya anggad alablabas lay inkaoges da, insan ko ra dusaen tan pataynanen.

¹⁷ Nen sinmelek lay agew tan ambilonget la, biglan walay banga a manasasewek tan kiew a mandarlang a dinmalan ed nanleetan na saramay pinalduan laman na ayayep.

¹⁸ Diad saman ya agew, akisipanan so Dios ed kinen Abram. Inkuanto, Isipan kon iter ed saray kabyangay boleg mo yan dalin, manlapud ketegan na Egipto ya anggad Ilog na Eufrates,

¹⁹ pati saray dalin da ray Cineo, Cinezeo, Cadmoneo,

²⁰ Heteo, Perezeo, Rafaita,

²¹ Amorreo, Cananeo, Gergeseo, tan Jebuseo.

16

¹ "Anggapoy anak nen Sarai ya asawa nen Abram. Walay aripen ton bii ya Egipsia a manngaray Agar,

² "kanyan inkuantod kinen Abram, Ag inyabuloy na Katawan a nawalaan ak na anak. Anta no akdulan mo may biin aripen ko? Nayarin makaanak na para siak. Inmabuloy si Abram ed imbaga nen Sarai;

³ "kanyan inter nen Sarai ed sikato si Agar a piakdulan to. (Agawa ya nen samploy taon lan manaayam ed Canaan si Abram.)

⁴ "Inakdulan nen Abram si Agar, et nanlokun. Nen naamtaan nen Agar a malokun, nagmaliw a mapasirayew tan nilemlemew toy Sarai.

⁵ "Inkuanen Sarai ed kinen Abram, Kasalanan mo so panlelemlemew nen Agar ed siak. Siak a dili so angiter ed sika na saman ya aripen ko, tan nanlapud naamtaan ton malokun la lelemlemewen to ak. Say Katawan lay manintinsia no siopay nalilingod sikatan dua.

⁶ "Inmebat si Abram, Aripen mo tan walad silong na pakayarim; gawam ed sikatoy labay mo. Pinapairap nen Sarai si Agar, kanyan tinmaynan.

⁷ "Inabet na anghil na Katawan si Agar ed abay na sobul a walad kalawakan, diad dalan a mamaarap ed Sur,

⁸ "tan inkuanto, Agar ya aripen nen Sarai, nanlapwan mo tan iner so laen mo? Inmebat, Ibabatikan koy amok a bii a si Sarai.

⁹ "Inkuanto may anghil sa Katawan, Pawil ka, tan paaripen kad sikato.

¹⁰ Insan inyarum ton inkuan, Itdan ta ka na saray kabyangay boleg mo a diad karakel da et anggapoy makabilang.

¹¹ Mananak kay sakey a laki, tan ingaran mo na Ismael, ta nadngel na Katawan so tagleey mo.

¹² Balet mambilay a singa atap ya asno so anak mo; magmaliw a kalaban toy amin a too tan labanan dan amin. Siyanan to ray amin a kakanayon to, ta kabosul to ra.

¹³ Tinepet nen Agar ed sikaton dili, Anengneng ko tan talaga so Dios, et mabilay ak ni? Inngaran to sirin so Katawan ya akisalitad sikato na, Dios a Mannenengneng.

¹⁴ Kanyan tatawagen na saray totoo imay bobun a walad nanleetay Cades tan Bered na Say Bobun na Mabilay a Nanenengneng to Ak.

¹⁵ Nananak si Agar na sakey a laki, tan inngaran to na Ismael.

¹⁶ Walomplo tan anem lay taon nen Abram nen naanakan to si Agar.

17

¹ "Nen mantaoy siamaplo tan siam si Abram, pinmanengneng ed sikato so Katawan tan inkuanto, Siak so Dios a Makapanyarin-amin. Toluk kad siak tan gawam lawas so kamaungan.

² "Misipanan ak ed sika tan itdan ta kay amayamay a kabyangay boleg mo.

³ "Dinmakmomoy Abram ya anggad dalin so lupa to, insan inkuan na Dios.

⁴ "Misipanan ak ed sika; pagmaliwen ta kan ama na amayamay a bansa.

⁵ "Aliwa lan Abram so ngaran mo, no ag ta Abraham la, ta gawaen ta kan ama na amayamay a bansa.

⁶ "Amayamay so iter kod sikan kabyangay boleg mo, magmaliw iran amayamay a bansa, tan pigarad sikaray magmaliw ya arari.

⁷ "Tooren koy impisipanan kod sika tan saray kabyangay boleg mo diad arapen iran panaon, tan ipasen kon sakey ya andi-anggaan a sipanan. Siak so Dios mo tan siak so Dios na saray kabyangay boleg mo.

⁸ "Sangkaili kayo natan ed sayan dalin a panaayaman yo; iter ko yan dalin ed sika tan saray kabyangay boleg mo. Say intiron dalin na Canaan kayaryanen ya anggad angga na saray kabyangay boleg mo, tan siak so Dios da.

⁹ "Inkuan ni na Dios ed kinen Abraham, Nakaukolan a tooren yo met so impisipanan kod sikayo, sika tan saray kabyangay boleg mo diad arapen a panaon.

¹⁰ Nakaukolan a sika tan saray kabyangay boleg mo et pasegat yo so balang sakey a laki ed sikayo.

¹¹ Manlapud natan nakaukolan a pasegat yoy ogaw a laki no waloy agew to; pasegat yo met iray aripen a nianak ed abung yo tan saray aripen a sinaliw yod arum a bansa. Sikato yay tanda na sipanan tayo.

¹²

¹³ Nakaukolan a mampasegat so balang sakey a laki ed sikayo, tan sikato yay tanda ed laman yo a pakanengnengan ya andianggaan so impisipanan kod sikayo.

¹⁴ Siopamay lakin ag asegat et ag la nibilang a kabyangan na saray totook, ta ag to tinoor so impisipanan ko.

¹⁵ Intuloy ni na Dios ya inkuan ed kinen Abraham, Ag mo la tatawagen na Sarai so asawam; manlapu lad natan Sara so ngaran to.

¹⁶ Bindisionan ko tan makaanak kad sikato na sakey a laki. Bindisionan ko, et magmaliw ya ina na saray bansa, tan wala ray magmaliw ya arari ed saray kabyangay boleg to.

¹⁷ Dinmakmomo si Abraham ya anggad dalin so lupa to, balet akalek nen ninunot tod sikaton dili, Makaanak ni kasiy sakey a lakin mantaon lay sanlasus? Mananak ni kasiy Sara, anta siamaplo lay taon to?

¹⁸ Inkuantod Dios, Abuloyan mo lay Ismael a sikato lay mananawir ko!

¹⁹ Balet inkuan na Dios, Andi. Mananak na sakey a laki si Sara ya asawam tan ingaran mo na Isaac. Tooren ko so impisipanan kod sikato tan saray kabyangay boleg to. Anggad-angga yan sipanan.

²⁰ Dinengel koy kerew mo nipaakar ed kinen Ismael, kanyan bindisionan ko tan itdan koy amayamay ya anak tan amayamay a kabyangay boleg. Magmaliw ya ama na labinduan prinsipi, tan pagmaliwen kon sakey a bansa iray kabyangay boleg to.

²¹ Balet tooren koy impisipanan kod anak mon Isaac ya iyanak nen Sara diad singa onyan panaon, no ontombuk a taon.

²² Tinmaynan lay Dios nen asumpal ya akisalita ed kinen Abraham.

²³ Diad saman lamlamang ya agew, inonur nen Abraham so imbagay Dios, ta sinegat toy anak ton Ismael tan amin da ray lalakid abung to, pati saray aripen a nianak ed abung to tan saray aripen a sinaliw to.

²⁴ Siamaplo tan siam lay taon nen Abraham nen asegat,

²⁵ tan labintaloy taon la nen Ismael.

²⁶ Asegat iran dua ed saksakey ya agew,

²⁷ pati saray amin ya aripen nen Abraham.

18

¹ "Pinmanengneng so Katawan ed kinen Abraham diad saray masanton kiew nen Mamre. Manyodyorung si Abraham ed puirtay tulda to nen kapetapetangay agew;

² "tinmangwa, et anengneng toy taloran totoo a manalalagey irad ag arawin pasen. Binatik to ran tampol ya inabet, insan dinmakmomo ya anggad dalin so lupa to.

³ "Inkuanto, Wadya ak a magter a manlingkur ed sikayo. Ag yo komun lalabasay abung ko; tonda ki nin magano.

⁴ "Abuloyan yo ak a mangalay danum a panoras yoy sali yo; nayarian yoy mampainawad silong to yan kiew.

⁵ "Mangala ak met na kanen yo, pian naitdan kayoy biskeg a mangituloy na panaakar yo. Pinagalangan yo ak ed inyakar yo dia, kanyan abuloyan yo aka manlingkur ed sikayo. Inmebat ira, Salamat; sigi sirin.

⁶ "Linmoob a tampol si Abraham ed tulda tan inkuantod Sara, Ganatan mo, mangala kay sankaabigan ya arina, tan manggawa kay tinapay.

⁷ "Insan batik ed poluk na baka, tan angalay sakey a mataban kilaw, insan inter tod sakey ya aripen a nangganat ya angiparaan.

⁸ "Angalay kiso, gatas, tan samay niluton karniy kilaw, insan to ra-imparongo ed saramay taloran too. Sikaton diliy nansirbid sikara legan dan angan diad silong na kiew.

⁹ "Tinepet dad sikato, Kawalaan nen asawam a Sara? Wadyad dalem na tulda, ebat to.

¹⁰ Inkuan na sakey ed sikara, Siam bulan a manlapud natan, ompawil ak dia, et wala lad satan so lakin anak nen Sara. Wadmay Sara ya onderengel ed biek na puirta a nibeneg nen Abraham.

¹¹ Mataktakken la ra di Abraham tan Sara, tan ag la naliliberay Sara.

¹² Kanyan inmelek a bukor si Sara tan inkuantod sikaton dili, Natan ta akolaw ak la, manliket ak ni kasin miakdul? Insan sakey ni, matakken met lay masiken ko.

¹³ Tinepet na Katawan ed kinen Abraham, Akin et inmelek si Sara tan inkuanto, Makapananak ak ni kasi, anta akolaw ak la?

¹⁴ Akin, walay mairap ed Katawan? Onung na inkuanko la, siam bulan a manlapud natan, ompawil ak dia, et wala lad satan so lakin anak nen Sara.

¹⁵ Lapud antakot si Sara, ag to inako. Ag ak pa inmelek, inkuanto. Ag ka la mantitila, ebat to. Inmelek ka.

¹⁶ Pinmikal la ra may lalaki tan linma rad pasen a naosdungan day Sodoma; akilay Abraham, ta pasiputen to ra.

¹⁷ Inkuan na Katawan ed sikaton dili, Ag ko iyamut ed kinen Abraham so gawaen ko.

¹⁸ Magmaliw a baleg tan makapanyarin bansa iray kabyangay boleg to, tan diad panamegley to bindisionan kon amin iray bansa.

¹⁹ Sikatoy pinilik, pian niganggan to ray anak to tan saray kabyangay boleg to ya ontoluk irad siak diad panggawa ray kaptekan tan katonungan. No gawaen da ya, sumpalen koy amin ya insipan kod sikato.

²⁰ Insan inkuan na Katawan ed kinen Abraham, Makapataktakot iray dalem ed siak sumpad Sodoma tan Gomorra, tan balbaleg so kasalanan da.

²¹ Nakaukolan ya onakseb ak, ta kabaten ko no tua kasi o andi ira yan nadngelan kon dalem.

²² Linma la ra may duaran lalaki tan amaarap irad Sodoma, balet tinmilak so Katawan ed kinen Abraham.

²³ Sinmingger si Abraham ed Katawan tan inkuanto, Talaga sirin a deralen mo ray matonung a totoo, pati saray maoges?

²⁴ No wala bilang ed siudad so limamplon totoo a matonung, deralen mo nin siansiay intiron siudad? Ag mo kasi palabasen, pian nilaban ira may limaplo?

²⁵ Andi-duaruwan ag mo pipatey iray matonung ed saray maoges. Ag nayarin balut a gawaen moy ontan. Ta no gawaen mo, napidusa ray matonung ed saray maoges. Ag nayarin balut! Ag ta matonung so huis na intiron mundo?

²⁶ Inmebat so Katawan, No walay narumog kon limamplon matonung a totoo ed Sodoma, ag ko la deralen so intiron siudad lapud sikara.

²⁷ Nansalita lamet si Abraham, Pasinsiaan mo pa lay tepel na linawak a misalita lamet ed sika, Katawan. Sakey ak labat a too, tan anggapoy kanepegan kon onkerew.

²⁸ Balet nayarin wala rad may apataplo tan liman totoo a matonung, aliwan limamplo. Deralen mo kasiy intiron siudad lapud kulang na limarad limaplo? Inmebat so Katawan, No walay narumog kon apataplo tan liman totoo a matonung, ag ko la deralen lapud sikara.

²⁹ Nansalita lamet si Abraham, No bilang ta apataplo ra, deralen mo ni kasi? Inmebat, No walad may apataplo, ag ko la deralen lapud sikara.

³⁰ Inkuanen Abraham, Ag ka komun mamapasnuk, Katawan, ta mansalita ak lamet. No bilang ta talomplo ra, deralen mo ni? Inmebat, No walad may talomplo, ag ko deralen lapud sikara.

³¹ Inkuanen Abraham, Pasinsiaan mo pa lay tepel na linawak, ta mikasi ak lamet ed sika, Katawan. No bilang ta dogduamplo ra, deralen mo ni? Inmebat, No walad may narumog kon duamplon matonung, ag ko la deralen lapud sikara.

³² Inkuanen Abraham, Ag ka komun mamapasnuk, Katawan, ta mikasi ak nin maminsan. No bilang ta samsamploray narumog diman a matonung? Inmebat, No walay samplora, ag ko deralen lapud sikara.

³³ Kasumpal na Katawan ya akisalitad kinen Abraham, linma la tan sinmempet met lay Abraham.

19

¹ "Nen sinmabid saman a labi ed Sodoma ira may duaran anghil, manyodyorung si Lot ed puirtay siudad. Kanengneng tod sikara, inmalagey tan inabet to ra. Dinmakmomo ya anggad dalin so lupa to

² "tan inkuanto, Wadya ak a manlingkur ed sikayo. Tuloy kayod abung ko. Diman ki la manoras na sali yo tan onogip. Diad kabwasan, nayarian yoy ombangon a masakbay, insan ki la onsiput. Balet inmebat ira, Andi, dia lad plasay ogipan mi.

³ "Pinilit to ran ondawes ed abung to, kanyan akila rad sikato. Ingganggan nen Lot iray aripen to a manggawa ray tinapay tan mangiparaan ira na maung a pandeman na saray bisita; nen nisaklang lay lamisaan, angan ira.

⁴ "Kasakbayan ya ondokul ira may bisita, niliktub na saray lalakin taga Sodoma so abung. Wadman ya amin iray lalakin tagad man, matakken may malangwer.

⁵ "Inkulyaot dad kinen Lot, Kawalaan da ra may lalakin mioogip ed abung mo? Ipaway mo ra dia, ta labay mi ran piakdulan.

⁶ "Pinmaway si Lot, insan inkaput toy puirta.

⁷ "Inkuantod sikara, Agagi, kerewen kod sikayon ag yo komun gagawaen so ontan lan kaogsan.

⁸ "Walay duaran anak kon mamarikit. Ipaway ko ra tan gawa yod sikaray labay yo. Balet ag yo didiwiten ira yan lalaki; bisitak irad abung ko tan nepeg ko ran iyagel.

⁹ "Balet inkuanda, Palabas mo kami, sikan sangkaili! Siopa kan mangibagay gawaen mi? Paliis ka, no andi maoges niy gawaen mid sika nen say sikara. Intolak day Lot, ta pasooten da lan lokasay puirta.

¹⁰ Balet ginoyur na saramay duaran bisita si Lot, inloob dad abung, tan inkaput day puirta.

¹¹ Insan da binulag ira may amin a lalakin walad paway, kanyan ag da napogta so puirta.

¹² Inkuanda ra may duaran lalaki ed kinen Lot, No walay siopaman a wadya-saray anak mon lalaki tan bibii, saray manugang mo, tan arum ni ran kakanayon mo a manaayam diad siudadipaway mo ra,

¹³ ta deralen mi yan lugar. Nadngel na Katawan iray makapataktakot a dalem a sumpad sarayan totoo, kanyan imbaki to kamin maneral ed Sodoma.

¹⁴ Linmay Lot ed saramay lalakin mangasawad saray anak to, tan inkuanto, Ganatan yoy onekal dia; deralen na Katawan yan lugar. Balet abaloan dan manlulurey si Lot.

¹⁵ Diad palbangon, impangganat na saramay anghil si Lot. Ganatan mo! inkuanda. Awit moy asawam tan saray duaran marikit mo, pian ag kayo ompatey no naderal so siudad.

¹⁶ Siansian ngalngali ag onalis si Lot. Balet kinasian na Katawan, kanyan saramay lalaki binembenan dad lima si Lot, say asawa to, tan saray duaran marikit ya anak to, tan inggayugoy da ran impaway ed siudad.

¹⁷ Insan inkuan na sakey ed saramay anghil, Ilaban yoy bilay yo! Ag kayo onlilingaw ed nanlapwan yo tan ag kayo ontotondad patar. Batik kayod kapokdulan, pian ag kayo ompatey.

¹⁸ Balet inmebat si Lot, Andi, ag mo kari pagagawa tan ed sikami.

¹⁹ Balbaleg lay utang na linawak ed sika, ta inlaban moy bilay ko. Balet arawdawi ra may kapokdulan; aboten ak lamlamang na deral tan ompatey ak kasakbayay isabik diman.

²⁰ Nanenengneng mo may melag a baley ay? Asingger iman a batikan ko. Abuloyan mo pan diman lay batikan kosankanengneng mon melmelag iman a baleybalet nilaban diman so bilay ko!

²¹ Inmebat, On, abuloyan ko. Ag ko deralen iman a baley.

²² Ganatan mo! Batik kad man! Anggapoy nagawaan ko ya anggad pakasabim diman. Lapud imbaga nen Lot a melag iman a baley, atawag na Zoar.

²³ Ompapaway so agew nen sinmabid Zoar si Lot.

²⁴ Kabebekta say Katawan pinaoran toy manliub ya asupri ed saray siudad na Sodoma tan Gomorra,

²⁵ tan dineral to ra tan say intiron patar, pati amin a totood man tan amin ya ontutubod dalin.

²⁶ Balet say asawa nen Lot linmingaw ed nanlapwan to, kanyan nagmaliw a pongul ya asin.

²⁷ Diad kabkabwasan ed ontombuk ya agew, ginangganatan nen Abraham so onlad samay pasen a nanalageyan tod arap na Katawan.

²⁸ Inosdungan to ray siudad na Sodoma tan Gomorra tan samay intiron patar, et anengneng ton manlalapud man so asewek, a singa asewek a manlalapud baleg ya ornowan.

²⁹ Balet nen dineral na Dios iray siudad na saman a patar a panaayaman nen Lot, ag to nilingwanay Abraham, kanyan inabuloyan ton nibatikan nen Lot so deral.

³⁰ Lapud antakot si Lot a manayam ed Zoar, linmad kapokdulan a kaiba to ra may anak ton mamarikit, tan diman ira nanayam ed sakey ya ongib.

³¹ Inkuan na pangulowan ed samay yogtan to, Onmamasiken lay ama ta, tan anggapo lad intiron mundo iray lalakin mangasawad sikata, pian mananak ita.

³² Bueken tay ama ta, akdulan ta, pian mananak ita.

³³ Diad saman a labi initdan day alak, tan inakdulan na samay pangulowan ya anak to; balet diad inkabwek ton maung ag to amtay agawa.

³⁴ Nen ontombuk ya agew inkuanto may pangulowan, Inakdulan ko kalabyan si ama ta; bueken ta lamet ed sayan labi, tan gawam so singa ginawak. Nawalaan tad satay sansakey ya anak.

³⁵ Kanyan diad saman a labi, binwek da lamet si ama ra, tan inakdulan na samay yogtan; balet diad inkabwek ton maung ag to amtay agawa.

³⁶ Diad saya nanlokun ira may duaran bibiin anak nen Lot, lapud impiakdul dad ama ra.

³⁷ Nananak na laki may pangulowan, tan inngaran to na Moab; sikatoy sengeg ya anggad natan na saray Moabita.

³⁸ Nananak met na laki may yogtan, tan inngaran to na Benami; sikatoy sengeg ya anggad natan na saray Ammonita.

20

¹ "Manlapud Mamre inmalis si Abraham ed bandad abalaten a parti na Canaan, tan nanayam ed nanleetay Cades tan Sur. Ag abayag, nen manaayam ed Gerar,

² "imbaga ton agi toy Sara ya asawa to. Kanyan impaawit nen Ari Abimelec na Gerar si Sara.

³ "Aminsan a labi pinmayawar ed kogip to so Dios a kuanto, Ompatey ka, ta inalam so biin wala lay asawa to.

⁴ "Balet ag inabayan nen Abimelec si Sara, kanyan inkuanto, Katawan, anggapoy kasalanan ko! Dusaen mo ak tan saray totoo?

⁵ "Si Abraham a dili so angibagad siak ya agi toy Sara, tan imbaga met nen Sara ya agi toy Abraham. Malinis so konsinsiak a nanggawad saya, tan anggapoy maoges a ginawak.

⁶ "Inmebat so Dios diad panamegley na kogip, On, amtak a malinis so konsinsiam ed impamaawit mo, kanyan ag ko inyabuloy a diwiten mo, pian ag ka mankasalanan ed siak.

⁷ "Ipawil mo la sirin imay bii ed dilin asawa to; say asawa ton propita ipikasi to kan ag ompatey. Balet no ag mo ipawil, pasakbayan ta kan ompatey ka, sika tan saray totoom.

⁸ "Diad kabkabwasan ed ontombuk ya agew, tinawag nen Abimelec ya amin iray opisyal to tan imbalita toy agawa; mapalaloy inkataktakot da.

⁹ "Insan tinawag nen Abimelec si Abraham tan inkuanto, Antoy ginawam ed sikami? Antoy maoges a ginawak ed sika, et inter mo yan segsegang ed siak tan say nanarian ko? Aliwan manepeg so ginawam ed siak!

¹⁰ Akin et ginawam so onya?

¹¹ Inmebat si Abraham, “Abaloan kon anggapo diay ontatakot ed Dios, kanyan apagaan ak ta ompan pateyen da ak pian naala ray asawak.

¹² Diad tuay tua, sikatoy agik ta saksakey so ama mi, balet sananey so ina to. Anggaman ontan, sikatoy inasawak.

¹³ Kanyan nen say Dios et pinataynan to ak ed abung di amak tan pinaonla to ak ed sananey iran dalin, inkuankod kinen Sara, Nipanengneng moy katooran mod siak diad pangibagam ed siopaman ya agi mo ak.

¹⁴ Insan impawil nen Abimelec si Sara ed kinen Abraham; initdan to met na saray baka, karniro, tan saray aripen.

¹⁵ Inkuantod Abraham, Niay intiron dalin ko; manayam kad inerman a pasen a labay mo.

¹⁶ Inkuantod kinen Sara, Itdan koy agim na sanlibon pilak a pakanengnengan na amin a kaibam ya anggapoy kasalanan mo; naamtaan na amin ed satan ya anggapoy maoges a ginawam.

¹⁷ Lapud samay agawad kinen Sara ya asawa nen Abraham, say Katawan ginawa to ya ag makapanlokun iray bibii a walad abung nen Abimelec. Kanyan impikasi nen Abraham si Abimelec, tan pinaabig na Dios. Pinaabig to met so asawa nen Abimelec tan saray bibiin aripen to, pian makapananak ira.

21

¹ "Binindisionan na Katawan si Sara, onung na insipan to.

² "Nanlokun tan nananak na sakey a laki ed kinen Abraham nen masiken la, tan diad samay panaon ya imbagay Dios.

³ "Inngaran nen Abraham imay ogaw na Isaac.

⁴ "Nen waloy agew to, sinegat nen Abraham, onung na ingganggay Dios.

⁵ "Sanlasus taon la nen Abraham nen nianak si Isaac.

⁶ "Inkuanen Sara, Makapagayaga tan makapalek so ginaway Dios ed siak; siopamay makadngel ed saya mielek met ed siak.

⁷ "Insan inkuanto ni, Wala kasiy akakpel ya angibagad kinen Abraham a mampasuso ak niy ogaw? Anggaman ontan, nananak kami na sakey a laki, anta matakken lay masiken ko.

⁸ "Binmaleg imay ogaw tan diad agew ya impamaksod sikato, nantaryay baleg a ponsia si Abraham.

⁹ "Aminsan ya agew si Ismael a lakin anak nen Agar ya Egipsia ed kinen Abraham et migagalaw ed kinen Isaac ya anak nen Sara.

¹⁰ Anengneng ya nen Sara tan inkuantod kinen Abraham, Pataynan mo yan aripen a bii tan say anak to. Ag nayarin say anak to et miapag ed kayamanan mo a tawiren nen Isaac ya anak ko.

¹¹ Lapud saya agunigon na baleg si Abraham, ta anak to met si Ismael.

¹² Balet inkuan na Dios ed sikato, Ag mo panggugunigonan so ogaw tan say aripen mon si Agar. Gawam so antokaman ya ibabaga nen Sara, ta si Isaac so panlapwan na saray kabyangay boleg mon insipan kon iter ed sika.

¹³ Itdan ko met na amayamay ya anak so anak mod samay aripen a bii, pian magmaliw iran sakey a bansa, ta anak mo met lanti si Ismael.

¹⁴ Diad kabkabwasan ed ontombuk ya agew, initdan nen Abraham si Agar na kakanen tan supot a katat a napnoy danum. Inlira to ra ya tan samay ogaw ed beneg nen Agar, insan to la ra pinasiput. Tinmaynan si Agar, insan nanakarakar ed kalawakan na Beer-seba.

¹⁵ Nen naoput la may danum a balun to, intilak to may ogaw ed silong na kiew ya abeba,

¹⁶ insan to inyorung ed pasen a sakey a siamaploy mitro so kinaarawi to. Inkuantod sikaton dili, Ag ko nitepel a nengnengen so ipatey na anak ko. Nen wadman a manyodyorung, ginapwan toy inmakis.

¹⁷ Arengel na Dios so panaakis na samay ogaw, tan manlapud tawen inkuan na sakey ya anghil na Dios ed kinen Agar, Antoy panggugunigonan mo, Agar? Ag ka natatakot. Arengel na Dios so panaakis na ogaw.

¹⁸ Alagey ka, laka ta alam, tan ligliwam. Gawaen kon baleg a bansa ray kabyangay boleg to naani.

¹⁹ Inlokas na Dios iray mata nen Agar, et anengneng toy sakey a bobun. Linma tan pinano toy danum imay katat a supot, insan to pinainom imay ogaw.

²⁰ Diad ibabaleg na samay ogaw, walad sikatoy Dios; nanayam ed kalawakan na Paran tan nagmaliw a maung ya umaanop.

²¹ Inalaan nen ina to na biin Egipsia ya asawaen to.

²² Diad saman a panaon inawit nen Abimelec si Ficol a pangulo na saray sondalo to, linma rad kinen Abraham tan inkuanen Abimelec, Walad sikay Dios ed antokaman a gagawaen mo.

²³ Kanyan mansamba ka dia ed imatun na Dios ya ag mo kami papalikdoen, siak, saray anak ko, tan saray kabyangay boleg ko. Matoor ak ed sika, kanyan isipan mon matoor ka met ed siak tan diad sayan dalin a panaayaman mo.

²⁴ Inkuanen Abraham, On, sambaan ko.

²⁵ Nanriklamoy Abraham ed kinen Abimelec nipaakar ed bobun a sinamsam na saray aripen nen Abimelec.

²⁶ Inkuanen Abimelec, Ag ko amta no siopay nanggawad saya. Ag mo met imbagad siak, tan natan ko ya labat nadngelan.

²⁷ Insan initdan nen Abraham si Abimelec na pigaran karniro tan baka, tan nampaknaan iran dua.

²⁸ Angibiig si Abraham na pitoran kordiron kabatyan ed saray karniro to,

²⁹ kanyan tinepet nen Abimelec, Akin et ginawam itan?

³⁰ Inmebat si Abraham, Awat mo pa yan pitoran kordiro. Diad pangawat mo akoen mon siak so nankotkot ed sayan bobun.

³¹ Kanyan atawag iman a pasen na Beer-seba, ta damay nampaknaan dan dua.

³² Kasumpal dan nampaknaan ed Beer-seba, pinmawil la rad Filistia di Abilemec tan Ficol.

³³ Angitanem si Abraham na sakey a kiew a tamariski ed Beer-seba, tan inggalang toy Katawan, say andi-anggaan a Dios.

³⁴ Abayag a nanayam ed Filistia si Abraham.

22

¹ "Ag abayag, sinubok na Dios si Abraham; tinawag to, Abraham! Wadya ak, ebat nen Abraham.

² "Alam so anak mo, inkuan na Dios, say bogbogtung ya anak mon si Isaac ya inararom a tuloy, tan lakad dalin na Moria. Diman mo ibagat ed siak si Isaac diad tagey na palandey ya itorok ed sika.

³ "Diad kabkabwasan na ontombuk ya agew, nambelang si Abraham na kiew a para bagat, intapew tod asno to, tan intagar toy Isaac tan saray duaran aripen to. Ginapwan day amaarap ed samay pasen ya imbagay Katawan.

⁴ "Nen kumatlon agew abantag nen Abraham imay pasen.

⁵ "Insan inkuantod saramay aripen to, Dia kayo tan sayay asno. Onla ak tan sayay ogaw ed saman a pasen, ta mangigalang kamid Dios, insan mi kayo dia pawilen.

⁶ "Impasakbat nen Abraham ed kinen Isaac imay kiew a para bagat; sikato balet awit toy yuro tan ngalab a pamarlang da. Nen manaakar ira,

⁷ "inkuanen Isaac, Ama! Anto man, anak? ebat to. Tinepet nen Isaac, Nanenengneng kon walay ngalab tan kiew, balet kawalaay kordiron ibagat?

⁸ "Inmebet si Abraham, “Say Dios a dili so mangiter na kordiro ya ibagat.” Intuloy day panaakar da.

⁹ "Kasabi rad samay pasen ya imbagay Katawan, nanggaway Abraham na altar, tan inoksuy tod tapew ta imay kiew. Binalur toy anak to, insan to inyan ed tapew na samay kiew.

¹⁰ Inala to may yuro, ta pateyen to.

¹¹ Balet tinmawag a manlapud tawen so anghil na Katawan, Abraham, Abraham! Inmebat, Wadya ak.

¹² Ag mo didiwiten itay ogaw o panggawaan na antokman, inkuanto. Amtak natan ya oonuren tan gagalangen moy Dios, ta ag mo insiblet ed siak so bogbogtung ya anak mo.

¹³ Linmingaw-lingaw si Abraham tan anengneng toy sakey a karniron kalakyan a say saklur to et nipanget ed abeban kiew. Inala to tan sikatoy insaklang ton bagat a popoolan, aliwa lan samay anak to.

¹⁴ Inngaran nen Abraham iman a pasen na Say Katawan so Mangiter. Tan anggad natan, ibabalikas na totoo, Mangiter so Katawan diad palandey to.

¹⁵ Tinmawag lamet a manlapud tawen imay anghil na Katawan ed kinen Abraham,

¹⁶ Sambaan kod dilin ngaran kosay Katawan so mansasalitaa bindisionan ta ka na amayamay a kaabigan. Lapud ginawam ya, tan ag mo insiblet ed siak so bogbogtung ya anak mo,

¹⁷ isipan ko ya itdan ta ka ray kabyangay boleg mo a singa karakel a bitewen ed tawen o buer ed gilig na dayat. Taloen na saray kabyangay boleg mo iray kalaban da.

¹⁸ Nabindisionan iray amin a bansad mundo a singa impamindision kod saray kabyangay boleg molapud inonur moy ganggan ko.

¹⁹ Pinawil nen Abraham ira may aripen to, linma rad Beer-seba tan nanayam diman si Abraham.

²⁰ Ag abayag nadngelan nen Abraham a si Milca et walay waloran anak ton lalaki ed kinen Nacor ya agi nen Abraham:

²¹ si Uz a sikatoy pangulowan, si Buz, si Kemuel ya ama nen Aram,

²² si Kesed, si Hazo, si Pildas, si Jidlaf, tan si Betuel.

²³ (Si Betuel so ama nen Rebeca.) Inaanak nen Milca ra yan walon lalaki ed kinen Nacor ya agi nen Abraham.

²⁴ Si Reuma a biin inamung nen Nacor et inaanak to ra di Tebal, Gaham, Tahas, tan Maaca.

23

¹ "Nambilay si Sara na sanlasus tan duamplo tan pitoy taon.

² "Inatey ed Hebron diad dalin na Canaan tan lapud saya, nanermen si Abraham.

³ "Tinaynan toy pasen a kawalaay bangkay nen asawa to, linmad saray Heteo, tan inkuanto,

⁴ "Sangkaili ak dian miaayam ed sikayo; lakoan yo ak pa na dalin a pangipomponan kod asawak.

⁵ "Inmebat ira,

⁶ "Dengel kad sikami. Bibirbiren mi kan makapanyarin pangulo; ipompon moy asawam ed sankamaungan a lobuk mi. Maliket so anggan siopad sikami a mangiter na lobuk, pian nipompon moy asawam.

⁷ "Inmalagey si Abraham tan tinmuek ed arap da

⁸ "tan inkuanto, No iyabuloy yod siak ya ipompon ko diay asawak, kerew yo pad kinen Efron, a lakin anak nen Zohar,

⁹ "ta ilako tod siak so Ongib na Macpela, a walad samput na alog to. Bayaran koy intiron bili to, diad arap yo, pian nakayaryan kon para panangipomponan.

¹⁰ Wadman si Efron a manyodyorung a kaiba to ray Heteo ed pasen a pandaragupay totoo, diad puirtay siudad; inmebat a sankarengel na amin a wadman,

¹¹ On, iter kod sika may ongib tan pati samay alog a kawalaan to. Diad arap da ray kakanayon ko, iter kod sika pian nipompon moy asawam.

¹² Balet tinmuek si Abraham ed arap da

¹³ tan inkuantod kinen Efron a sankarengel na amin, No ontan sirin, dengel yo ak pa. Saliwen ko la sirin so intiron alog. Nia so bayar to; natan ipompon ko lad man so asawak.

¹⁴ Inmebat si Efron,

¹⁵ Mambili labat na apat a lasus a kuartan pilak iman a dalinpiga met la yad sikatan dua? Ipompon mod man so asawam.

¹⁶ Inmabuloy si Abraham tan sinimbang to may bili ya imbaga nen Efron a sankarengel na saray totooapat a lasus a kuartan pilak, onung na panagsimbang na saray nigosianti.

¹⁷ Onya so impakakayaryan nen Abraham ed samay alog nen Efron ed Macpela, diad nibokig na Mamre. Kaiba toy ongib tan amin a kiew diman.

¹⁸ Binirbir na amin da ra may Heteo ya akaimatun ed tongtongan a kayaryan la nen Abraham iman a pasen.

¹⁹ Insan imponpon nen Abraham si asawa ton Sara ed saman ya ongib ed alog na Macpela a nibokig na Mamre ed dalin na Canaan.

²⁰ Kanyan samay alog tan samay ongib a wadman, a kayaryan nen saman na saray Heteo, et nagmaliw a kayaryan nen Abraham tan ginawa ton panangipomponan.

24

¹ "Masikesiken lay Abraham, tan binindisionay Katawan ed amin a ginagawa to.

² "Inkuantod sankatakkenan ya aripen to a makaoley ed amin a kayaryan to, Iyan moy limam ed nanleetan na saray ulpok tan mansamba ka.

³ "Labay kon isambam, diad ngaray Katawan, say Dios na tawen tan dalin, ya ag ka mampipili na asawaey anak ko ed saray totoo diad Canaan a panaayaman ko.

⁴ "Nakaukolan ya onla kad bansan nianakan ko, ta iyalaan moy Isaac ya anak ko na asawaen to diad saray kakanayon ko.

⁵ "Balet tinepet to may aripen, No bilang ta ag milad siak dia so biin naalmok, antoy gawaen ko? Itagar ko kasiy anak mo ed dalin a nanlapwan mo?

⁶ "Inmebat si Abraham, Aleg! Ag mon balut papaonlaen diman so anak ko.

⁷ "Say Katawan a Dios na tawen pinaekal to ak ed abung di amak tan diad dalin da ray kakanayon ko, tan sinambaan tod siak ya iter to yan dalin ed saray kabyangay boleg ko. Mangibaki na anghil to ya ononan onla nen say sika, pian makala kad man na asawaen na anak ko.

⁸ "No say bii et ag milad sika, ag mo la totooren yan sipan mo. Balet, anggan antoy nagawa, ag mo papaonlaen diman so anak ko.

⁹ "Kanyan inyan na samay aripen so lima to ed nanleetan na saray ulpo nen Abraham ya amo to, tan sinambaan to a sumpalen to may pagagawa nen Abraham.

¹⁰ Samay aripen, a makaoley ed kayaryan nen Abraham, angala na samploran kamilyo nen amo to, pinano toy beneg da na mabmabli ran rigalo, insan linmad siudad a nanayaman nen Nacor diad baybay na Mesopotamia.

¹¹ Kasabi tod abay na bobun a walad paway na siudad, pinatalimukor to ra may kamilyo. Ngarem lad saman tan sikatoy oras ya ipapaway da ray bibii ya onasul.

¹² Nampikasi may aripen, Katawan a Dios nen amok ya Abraham, maung komun so pansumpalan to yan akar ko natan, tan toor mo pay sipan mod amok.

¹³ Wadya ak ed abay na bobun, a diay asulan na saray mamarikit ed siudad.

¹⁴ Ikuankod sakey ed sikara, Iyepas mo pay boyug mo, ta miinom ak. No ikuanto, Inom ka, tan painomen ko met iray kamilyom, sikato komuy pinilim a para aripen mon si Isaac. No onyay nagawa, naamtaan kon tinoor mo so sipan mod kinen amok.

¹⁵ Kasakbayan ton asumpal so pikakasi to, sinmabiy Rebeca a sankasakbat toy boyug. Anak ya nen Betuel a lakin anak nen Milca ya asawa nen Nacor a lakin agi nen Abraham.

¹⁶ Magangganan talaga si Rebeca, tan sakey nin birhin. Linmasur ed bobun, kinargaan toy boyug to, insan la sinmigep.

¹⁷ Binatik na samay aripen tan inkuanto, Nayariy miinom ed boyug mo?

¹⁸ Nayari, inkuanto may marikit, insan to inepas so boyug a sankasakbat to tan binembenan to leleg ya oniinom imay aripen.

¹⁹ Kasumpal ton inminom, inkuanto may marikit, Iyalaan ko met na danum iray kamilyom, tan painomen ko ra ya anggad kapenek da.

²⁰ Ginanatan ton inkalbo may keran danum ed atotung, insan binmatik ed bobun a mangala niy danum, anggad apainom ton amin iray kamilyo.

²¹ Mamambantay imay aripen tan ag oneseesel, ta labay ton amtaen no kasin say Katawan et inyabuloy to a maung so pansumpalan na sayan akar to odino andi.

²² Kasumpal ya inminom ira may kamilyo, angipaway imay aripen na mabmablin singsing a balituk tan inyan tod eleng na samay marikit, insan to sinolungay duaran balituk a pulsiras iray taklay to.

²³ Inkuanto, Ibagam pad siak no siopay amam. Wala kasiy napipundoan ko tan saray kakaibak ed abung yo ed sayan labi?

²⁴ Inmebat, Say amak si Betuel a lakin anak nen Nacor tan Milca.

²⁵ Dakel ed sikami ray dayami tan arum a nakan na ayep, tan walay pasen a napanayaman mo.

²⁶ Tinmalimukor imay aripen tan inggalang toy Katawan.

²⁷ Inkuanto, Nadayew komuy Katawan a Dios na amok ya Abraham; tinoor toy sipan tod kinen amok. Say Katawan inwanwan to ak a linma ed saray dilin kakanayon nen amok.

²⁸ Batik imay marikit ed abung nen ina to tan imbaga toy amin ya agawa.

²⁹ Walay lakin agi nen Rebeca a manngaray Laban. Batik ed paway ya onlad samay bobun a kawalaan to may aripen, lapud

³⁰ anengneng to may singsing a para eleng tan saramay pulsiras ed saray taklay na agi to, tan nadngel toy agi ton angibaga na saray sinalita na samay aripen. Nila to may aripen a manalalagey ed abay na saray kamilyo to diad gilig na bobun.

³¹ Inkuanto, Mila kad siak ed abung mi. Sakey kan too a binindisionay Katawan. Akin et manalalagey ka dia? Walay kuartod abung mi ya akaparaan ed sika, tan walay pasen met na saray kamilyom.

³² Akilad abung sirin imay aripen, inyepas nen Laban so karga na saramay kamilyo, insan to ra initdan na dayami tan arum a kakanen na ayep. Angala met na danum a panoras na saray sali to may aripen nen Abraham tan saray kakaiba to.

³³ Nen parongoen da la ran mangan, inkuanto may aripen, Ag ak mangan no ag ko ni nibaga ed sikayo so pegdat ko. Ibagam sirin, ebat nen Laban.

³⁴ Siak so aripen nen Abraham, inkuanton inggapo.

³⁵ Binindisionan a maung na Katawan so amok tan ginawa ton mayaman. Initdan toy amayamay a karniro, kanding, baka, pilak, balituk, lalaki tan bibiin aripen, kamilyo, tan asno.

³⁶ Si Sara, anggaman ya akolaw la et nananak ed kinen amok na sakey a laki. Inter nen amok ya amin iray kayaryan to ed sayan anak.

³⁷ Impansamba ak nen amok a tooren koy ganggan to. Inkuanto, Ag ka mampipili na asawaey anak ko ed saray mamarikit diad Canaan a panaayaman ko.

³⁸ Ingen, lakad saray totoo nen amak, diad saray kakanayon ko, tan ipilian mo may anak ko na asawaen to.

³⁹ Tinepet ko balet, No bilang ag mila so biin naalmok, antoy gawaen ko?

⁴⁰ Inmebat, Say Katawan a lawas totoluken ko et mangibakiy anghil to a kaibam tan mangiter ed sikay maung a pansumpalan. Niyalaan moy anak ko na asawaen to diad saray dilin totook, diad pamilya na amak.

⁴¹ Saksakey so pakaliktaran mod sambam: no onla kad saray kakanayon ko et ag da ka awaten, alokpus ka lad sambam.

⁴² Nen sinmabi ak ed bobun diad sayan agew, impikasik, Katawan a Dios nen amok ya Abraham, iyabuloy mo pan maung so pansumpalan na sayan gagawaen ko.

⁴³ Wadya ak natan ed abay na bobun. No walay biin onla dian onasul, kerewen kon piinomen to ak ed boyug to.

⁴⁴ No piinomen to ak tan painomen to ni ray kamilyok, sikato komuy pinilim ya asawaey anak na amok.

⁴⁵ Kasakbayan ya asumpal koy maolimek a pampipikasik, nitan lay Rebeca a sankasakbat toy boyug, tan linman inmasul ed bobun. Inkuankod sikato, Nayariy miinom?

⁴⁶ Inyepas ton tampol so boyug to tan inkuanto, Inom ka, tan painomen ko met iray kamilyom. Inminom ak sirin, tan pinainom to ray kamilyo.

⁴⁷ Nen tinepet kod sikato no siopay ama to, inebat ton say ama to et si Betuel ya anak nen nacor tan Milca. Inyan kod satan so singsing ed eleng to tan saray pulsiras ed saray taklay to.

⁴⁸ Tinmalimukor ak tan inggalang koy Katawan. Indayew koy Katawan a Dios na amok ya Abraham ya angiwanwan ed siak a tampol ed kanayon na amok, a walay biin anak ton nalmok a para anak na amok.

⁴⁹ Natan, no maliket kayon manumpal na kanepegan yo tan gawaen yod kinen amok so manepeg, ibaga yo; no andi, ibaga yo met, pian amtak so gawaen ko.

⁵⁰ Inmebat si Laban tan si Betuel, Nanlapud Katawan yan bengatla, kanyan aliwan sikamiy nepeg ya onebat na on odino andi.

⁵¹ Niay Rebeca, itagar mo no ompawil ka. Paasawam ed satay anak na amom, onung na imbagay Katawan.

⁵² Nen nadngel ya na samay aripen nen Abraham, dinmakmomo tan inggalang toy Katawan.

⁵³ Insan impaway to ray awit ton alahas a balituk tan pilak tan saray kawes, tan inter to rad kinen Rebeca. Initdan to met so lakin agi nen Rebeca tan say ina to na mabmabli ran rigalo.

⁵⁴ Angan tan inminom imay aripen nen Abraham tan saramay kakaiba to, tan pinalabas day labid man. Kabangon dad kabwasan, inkuanto may aripen, Abuloyan yo ak lan onsempet ed amok.

⁵⁵ Balet inkuan na samay agi nen Rebeca tan si ina to, Panayam yo ni diay Rebeca na sakey a simba o samploran agew, insan ki la onla.

⁵⁶ Inmebat, Ag yo ak la popokpokan. Lapud Katawan, maung so nansumpalan to yan akar ko; abuloyan yo ak lan onsempet ed amok.

⁵⁷ Inkuanda, Tawagen tayoy Rebeca, ta tepetan tayo no antoy kuantod saya.

⁵⁸ Tinawag da sirin tan tinepet da, Labay mo lay milad sayan too? On, ebat to.

⁵⁹ Kanyan impila ray Rebeca tan say abayag lan aripen na pamilya to ed samay aripen nen Abraham tan saray kakaiba to.

⁶⁰ Insan da inter ed Rebeca so bindision da diad panamegley na sarayan balikas, Sika, agi magmaliw ka komun ya ina na libo-libon totoo. Taloen komun na saray kabyangay boleg mo iray siudad na kalaban da.

⁶¹ Sinmapat ed kamilyo si Rebeca tan saray bibiin kakaiba to, insan la ra sinmiput a tomtombuken da may aripen nen Abraham.

⁶² Legan na inyakar na samay aripen ed saray kakanayon nen Abraham, akasabiy Isaac ed kalawakan na Beer-lahai-roi, tan diman nanayam ed bandad abalaten na Canaan.

⁶³ Aminsan ya onngangarem la pinmaway ya ompasyar ed kaalogan, et anengneng to ray onsasabin kamilyo.

⁶⁴ Nen anengneng nen Rebeca si Isaac, inmepas ed kamilyo to,

⁶⁵ tan tinepet tod samay aripen nen Abraham, Siopa may tood alog a mamapaarap dia? Sikato tay amok, ebat to. Kanyan inala nen Rebeca so pandung to tan sinakbungan toy lupa to.

⁶⁶ Samay aripen insalaysay tod kinen Isaac iray amin a ginagawa to.

⁶⁷ Inyakar nen Isaac si Rebeca ed loob na tuldan nanayaman nen Sara ya ina to, tan inasawa to. Inaro nen Isaac si Rebeca, kanyan aligliwa si Isaac ed impatey nen ina to.

25

¹ "Angasaway Abraham na sananey a bii a manngaray Ketura.

² "Saray anak tod sayan bii et di Zimran, Jocsan, Medan, Madian, Isbak, tan Suah.

³ "Si Jocsan so ama ra di Seba tan Dedan, tan si Dedan so sengeg da ray Asurim, Letusim tan Leumim.

⁴ "Saray lalakin anak nen Madian sikara di Efa, Efer, Hanoc, Abida, tan Eldaa. Si Ketura so sengeg da ra yan amin a totoo.

⁵ "Impatawir nen Abraham ed kinen Isaac iray amin a kayamanan to;

⁶ "balet legan ton mabilay, iniitdan toy rigalo ray anak tod saray arum ya asawa to. Insan imbaki to ra yan anak to ed dalin a bandad bokig, pian niarawi rad kinen anak ton Isaac.

⁷ "Masiken lan tuloy si Abraham nen inatey; sanlasus tan pitomplo tan lima so taon to.

⁸

⁹ "Di Isaac tan Ismael ya anak to imponpon dad ongib na Macpela, diad alog a walad bokig na Mamre tan kayaryan nen saman nen Efron ya anak nen Zobar a Heteo.

¹⁰ Saya may alog a sinaliw nen Abraham ed saray Heteo; nipompon irad man di Abraham tan Sara ya asawa to.

¹¹ Kapatey nen Abraham, binindisionan na Dios si Isaac a manaayam ed saman a panaon diad Beer-lahai-roi.

¹² Sikara ra yay kabyangay boleg nen Ismael a lakin anak nen Abraham ed kinen Agar, samay Egipsia ya aripen nen Sara.

¹³ Nia ray kangaranan na lalakin anak nen Ismael, manlapud sankapangulowanan ya anggad sankayogtanan: Nebayot, Kedar, Abdeel, Mibsam,

¹⁴ Misma, Duma, Massa,

¹⁵ Hadad, Tema, Jetur, Nafis, tan Kedema.

¹⁶ Sikara ra yay ilalak nen Ismael. Sikaray sengeg na labinduan tribu, tan inngaran dad kangaranan da ray bario tan saray arum a pasen a nanaayaman da.

¹⁷ Nen inatey si Ismael, mantaoy sanlasus tan talomplo tan pito.

¹⁸ Saray kabyangay boleg nen Ismael nanayam irad pasen a nanleetay Havila tan Sur, diad bokig na Egipto tan mamaarap ed Asiria. Nanayam iran akabiig ed saray arum a kabyangay boleg nen Abraham.

¹⁹ Sikato yay impanbilay nen Isaac ya anak nen Abraham.

²⁰ Mantaoy apataplo si Isaac nen asawaen toy Rebeca ya agi nen Laban tan anak nen Betuel, sakey ya Arameo a taga Mesopotamia.

²¹ Ag mananak si Rebeca, ta lepes, kanyan impikasi nen Isaac. Inebatan na Katawan so pikakasi to, et nanlokun si Rebeca.

²² Lasun so lokun to, tan kasakbayan a nananak manlalaban la ran duad dalem na eges to. Inkuanto, Akin et onyay nagagawad siak? Tinepet to sirin ed Katawan no akin et onmay agawad sikato.

²³ Inkuan na Katawan ed sikato, Duaran bansa so logan na eges mo; Mananak kay duaran bansan manlaban. Mabiskeg niy sakey ed sikaran dua; Manlingkur so pangulowan ed yogtan.

²⁴ Nen sinmabiy agew a pananak nen Rebeca, nananak na lasun a lalaki.

²⁵ Say onaan balangaan tan mabagoy laman to, kanyan ningaran na Esau.

²⁶ Say kumadwa inanak ya akapeket ed mokur nen Esau, kanyan ningaran na Jacob. Mantaoy anemaplo si Isaac nen nianak ira.

²⁷ Binmaleg ira may ogogaw. Nagmaliw a marunong ya umaanup si Esau tan maliket ya ompaway-paway ed kalawakan; mareen balet si Jacob tan maliket a manayam ed abung.

²⁸ Si Esau so inararo nen Isaac, ta labalabay ton siraen iray ayep a nanaanup nen Esau; si Jacob balet so inararo nen Rebeca.

²⁹ Aminsan ya agew a manlalambung si Jacob na ambalangan bokel na agayep, nitan lay Esau a nanlapud anupan. Narasan, kanyan

³⁰ inkuantod kinen Jacob, Narnarasan ak; itdan mo ak pa tay ambalangan ilalambung mo. (Kanyan angaranan met na Edom si Esau.)

³¹ Inmebat si Jacob, Iter kon amin ed sika, no iter mod siak iray kanepegan na inkapangulowan mo.

³² Inkuanen Esau, On. Ompapatey ak lad eras; anto niy kakanaan na saray kanepegan ko?

³³ Inmebat si Jacob, Sambaan mo ni ya iter mon talagad siak so kanepegan mo. Nansamba si Esau tan inter tod kinen Jacob iray kanepegan to.

³⁴ Initdan nen Jacob na tinapay tan samay agayep ya inlambung to. Angan tan inminom si Esau, insan inmalagey tan linma la. Ag kinawanan nen Esau sirin iray kanepegan na inkapangulowan to.

26

¹ "Wala lamet so sinmabin eras ed Canaan, likud ed samay sinmabi la nen panaon nen Abraham. Linmay Isaac ed kinen Abimelec ya ari na Palestina, diad Gerar.

² "Pinmayawar so Katawan ed kinen Isaac tan inkuanto, Ag ka oonlad Egipto; manayam kad pasen ya ibagak ed sika.

³ "Dia ka la manayam; ibaan ta ka tan bindisionan ta ka. Iter ko yan amin a pasen ed sika tan saray kabyangay boleg mo. Tooren koy insipan kod kinen Abraham ya amam.

⁴ "Singa karakel na bitewen ed tawen iray iter kod sikan kabyangay boleg mo, tan iter ko yan amin a pasen ed sikara. Amin a bansa kerewen dad siak a bindisionan ko ra a singa pamindision kod saray kabyangay boleg mo.

⁵ "Bindisionan ta ka, ta inonur ak nen Abraham tan sinumpal ton amin iray ganggan tan saray bilin ko.

⁶ "Kanyan nanayam ed Gerar si Isaac.

⁷ "Nen tinepet na saray lalakid man so nipaakar ed asawa to, imbaga ton agi to, lapud antakot a mangipatuan asawa to. Antakot ta ompan pateyen da, et naala ray Rebeca a maganggana.

⁸ "Abayag lan manaayam diman si Isaac. Aminsan ya agew, tinmandag ed bintana si Abimelec tan anengneng ton mankakarinyowan si Isaac tan si Rebeca.

⁹ "Impatawag nen Abimelec si Isaac tan inkuanto, Asawam manaya! Akin et imbagam ya agim? Inmebat si Isaac, Abaloan kon napatey ak no ibagak ya asawak.

¹⁰ Agaylay ginawam ed sikami! inkuanen Abimelec, Maininomay komun na sakey ed saray totook so akiakdul ed sikato; et sikay natetel ed impakasalanan mi komun.

¹¹ Pinasakbayan nen Abimelec iray amin a totoo, Pateyen so siopaman a mandiwit ed sayan too o say asawa to.

¹² Tinaneman nen Isaac iman a dalin, tan diad saman a taon akaani na maminlasus a kinarakel ed samay intanem to, lapud binindisionan na Katawan.

¹³ Anggapoy tonda na inaligwas to tan nagmaliw a mayamyaman.

¹⁴ Mangimon ed sikato ray Filisteo, ta amayamay so karniro, baka, tan aripen to.

¹⁵ Kanyan tinabunan da ray amin a bobun a ginawa na saray aripen nen Abraham nen mabilay ni.

¹⁶ Insan inkuanen Abimelec ed kinen Isaac, Taynan kad bansa mi, ta nagmaliw kan makapanyari nen say sikami.

¹⁷ Tinmaynan sirin si Isaac, tinmondad patar na Gerar, tan diman nanayam.

¹⁸ Kinotkotan ta lamet ira may bobun ya agawa nen panaon nen Abraham, tan tinabunan na saray Filisteo nen andi lad bilay si Abraham. Say impangingaran nen Isaac ed sarayan bobun et kapara na saramay impangingaran nen ama to.

¹⁹ Nankotkot na bobun diad patar iray aripen nen Isaac, et akalmo ray danum.

²⁰ Saray pastol na Gerar akikolkol irad saray pastol nen Isaac, tan inkuanda, Kayaryan mi yan danum. Kanyan inngaran nen Isaac na Kolkol imay bobun.

²¹ Nankotkot na sananey a bobun iray aripen nen Isaac, tan walay kolkolan lamet. Kanyan inngaran toy Bosulan iman a bobun.

²² Tinmaynan diman tan nankotkot lamet na sananey a bobun. Anggapoy kolkolan ed saya, kanyan inngaran toy Kawayangan. Inkuanto, Natan onaligwas itayo dia, ta dia so angiteray Katawan ed sikatayo na kawayangan.

²³ Tinmaynan si Isaac tan linmad Beer-seba.

²⁴ Diad saman a labi na intaynan to pinmayawar ed sikato so Katawan tan inkuanto, Siak so Dios nen amam ya Abraham. Ag ka natatakot; kaiba ta ka. Bindisionan ta ka tan itdan ta kay amayamay a kabyangay boleg, lapud samay sipan kod kinen Abraham ya aripen ko.

²⁵ Nanggaway altar diman si Isaac tan inggalang toy Katawan. Nankampod man, insan nankotkot lamet na bobun iray aripen to.

²⁶ Manlapud Gerar, linmay Abimelec ed kinen Isaac; kaiba toy Ahuzat a sumisimbawa to tan si Ficol a pangulo na saray sondalo to.

²⁷ Tinepet nen Isaac, Akin et linma kad siak, anta kinabosul mo ak tan pinataynan mo ak ed bansam?

²⁸ Inmebat ira, Amta mi la natan a walad sikay Katawan, tan isipen min nakaukolan a mampapaknaan tayoy malet. Labay min isipan mo

²⁹ ya ag mo kami papasakitan, a singa ag mi impamasakit ed sika. Maung so impanengneng mid sika tan mareen so impamataynan mid sika. Natan, malinew a binindisionan kay Katawan.

³⁰ Imparaanan ira nen Isaac na ponsia; angan tan inminom ira.

³¹ Kabkabwasan ed ontombuk ya agew, nansipan so balang sakey ed sikara tan pinaletan da na samba. Maliket so impamasiput nen Isaac ed sikara, ta sankaaro la ra.

³² Diad saman ya agew, pinmawil iray aripen nen Isaac tan imbalita rad sikato may bobun a kinotkot da. Inkuanda, Akalmo kamiy danum.

³³ Inngaran toy Samba man a bobun. Onyay impakalay ngaran na siudad na Beer-seba.

³⁴ Nen mantaoy apataplo si Esau, inasawa to ray duaran marikit a Heteo, si Judit ya anak nen Beeri tan si Basemat ya anak nen Elon.

³⁵ Lapud sikara, nagmaliw a magunigon so bilay di Isaac tan Rebeca.

27

¹ "Masiken lay Isaac tan bulag la. Impatawag toy Esau ya anak ton pangulowan tan inkuanto, Anak ko! Wadya ak, ama, ebat to.

² "Inkuanen Isaac, Sankanengneng mon masiken ak la tan asingger lay ipatey ko.

³ "Alam so panam, lakad takel, ta iyanupan mo ak na sakey ya ayep.

⁴ "Ilutoan mo ak na samay labalabay kon potahi, insan iyakar mo dia. Kasumpal kon mangan, iter kod sikay samput a bindision, kasakbayay ipatey ko.

⁵ "Nen mitotongtong si Isaac ed kinen Esau, onderengel si Rebeca. Kanyan kasiput nen Esau

⁶ "inkuanen Rebeca ed kinen Jacob, Arengel koy amam ya inkuantod kinen Esau,

⁷ "Iyalaan mo ak na sakey ya ayep tan ilutom a para siak. Kasumpal kon mangan, iter kod sikay bindision ko diad arap na Katawan, kasakbayay ipatey ko.

⁸ "Natan, anak ko, dengel mo ak tan gawam so ibagak.

⁹ "Lakan mangala na duaran mataban kilaw na kanding, ta ilutoan koy amam na samay labalabay ton potahi.

¹⁰ Sikay onlan mangiter ed sikato, pian sikay pangiteran toy bindision to, kasakbayay ipatey to.

¹¹ Balet inkuanen Jacob ed kinen ina to, Panon to ya, et mabagoy Esau tan pino so baog ko?

¹² Nayarin aplusen ak nen amak tan naalmoan ton titilaan ko, et say samba so naalak la laingen, aliwan say bindision.

¹³ Inmebat si ina to, Siak so pelagan na satan a samba, anak ko; basta gawam so ibabagak, tan alam ira may kanding a papaalak.

¹⁴ Linma sirin ya angalad sato; insan nanlutoy ina to na potahin labalabay a siraen nen ama to.

¹⁵ Inala nen Rebeca so walad abung a sankaabigan a kawes nen Esau, insan to insolung ed kinen Jacob.

¹⁶ Imbalkut to met ira may katat na kanding ed saray taklay to tan diad tenger ton anggapoy bago.

¹⁷ Inter tod sikato met imay inluto to, pati say tinapay a ginawa to.

¹⁸ Insan linmay Jacob ed kinen ama to tan inkuanto, Ama! On, ebat to. Siopa kan anak ko?

¹⁹ Inkuanen Jacob, Siak si Esau ya anak yon pangulowan; sinumpal koy imbaga yod siak. Yorung kayo pa, ta mangan kayod sayan potahin awit ko, pian niiter yod siak so bindision yo.

²⁰ Inkuanen Isaac, Panoy impakalam a tampol, anak ko? Inmebat si Jacob, Tinulongan ak na Dios a Katawan yo.

²¹ Inkuanen Isaac ed kinen Jacob, Singger ka pad siak, pian naaplus ta ka. Sikan talaga si Esau?

²² Sinmingger si Jacob, inaplus nen ama to. Inkuanto, Singa bosis nen Jacob so bosis mo, balet singa taklay nen Esau iray taklay mo.

²³ Ag to abirbir si Jacob, ta mabago ray taklay to a singa saray taklay nen Esau. Iter to la lawari so bindision to,

²⁴ balet tinepet to lamet, Sikan talagay Esau? On, siak, ebat to.

²⁵ Inkuanen Isaac, Itdan mo ak imay nilutom. Kasumpal kon mangan, iter ko lad sikay bindision ko. Initdan nen Jacob, tan initdan to met na alak.

²⁶ Insan inkuanen ama to, Asingger ka, ta anguban mo ak, anak ko.

²⁷ Nen anguban to, naangub nen Isaac so angub na kawes nen Esau, kanyan inter toy bindision to ed kinen Jacob. Inkuanto, Say balingit na anak ko singa balingit na alog a binindisionay Katawan.

²⁸ Itdan ka komuy Dios na linaew na tawen, tan gawaen ton mataba ray alog mo! Itdan to ka komuy dakel a naani tan daakan ya alak!

²⁹ Magmaliw komun ya aripen mo ray bansa, tan ontuek komun ed sika ray totoo. Oleyan mo komun ya amin iray kakanayon mo tan ontuek ed sika komun iray kabyangay boleg nen inam. Nisamba komun iray mangisambad sika, tan nabindisionan komun iray mamindision ed sika.

³⁰ Asumpal lay impangiter nen Isaac na bindision to, tan kasiput nen Jacob sinmabiy agi ton Esau a nanlapud anupan.

³¹ Nanluto met na mananam a potahi, insan iter tod kinen ama to. Inkuanto, Ama, yorung kayo pa, ta mangan kayod sayan potahin awit ko, pian niiter yod siak so bindision yo.

³² Siopa ka? tepet nen Isaac. Inmebat, Siak si Esau, say pangulowan ya anak yo.

³³ Ginmiwgiw so intiron laman nen Isaac, tan tinepet to, Siopa sirin imay amatey na ayep, insan to imparongod siak? Kinan ko, kasakbayan ya onsabi ka. Inter kod sikatoy samput a bindision ko, tan kien to la ya anggad angga.

³⁴ Kadngel nen Esau ed saya, inmakis na makmaksil tan ampaipait tan inkuanto, Itdan yo ak pa met na bindision yo, ama!

³⁵ Inmebat si Isaac, Linma diay agim tan tinilaan to ak. Inala to lay bindision mo.

³⁶ Inkuanen Esau, Sikato yay kumadwan impansaol tod siak. Ag la pankelawan a Jacob so ngaran to. Inala to la ray kanepegan kod inkapangulowan ya anak, tan natan inala to ni so bindision a para siak. Anggapo ta lay inkera yon bindision a para siak?

³⁷ Inmebat si Isaac, Ginawak lan manoley ed sika, tan ginawak ya aripen ton amin iray kakanayon to. Initdan koy dakel a naani tan daakan ya alak. Natan, anggapo lay nagawaan kon para sika, anak!

³⁸ Intuloy nen Esau so mikasid kinen ama to, Akin, saksakey so bindision yo, ama? Bindisionan yo ak pa met, ama! Insan manakis.

³⁹ Inkuanan Isaac ed sikato, Anggapoy linaew na tawen a para sika, Anggapoy mataban dalin a para sika.

⁴⁰ Mambilay ka diad panamegley na ispadam, Balet manlingkur kad agim. Anggaman ontan, no onlaban kad sikato, Makaekal ka ed silong na pakayari to.

⁴¹ Binosul nen Esau si Jacob lapud sikatoy angiteran na ama ra na samay bindision. Inkuanen Esau ed sikaton dili, Asingger lay ipatey nen amak tan say panermen ed sikato; kasumpal to ya, pateyen koy Jacob.

⁴² Balet arengelan nen Rebeca so getma nen Esau, kanyan impatawag toy Jacob tan inkuanto, Dengel ka, getma nen Esau ya agim so ombawi diad pamatey tod sika.

⁴³ Natan, anak ko, gawam so ibagak ed sika. Mamparaan ka tan lakan tampol ed kinen Laban ya agik, diad Haran.

⁴⁴ Miayam kad sikato, anggad kinmepa lay pasnuk nen agim,

⁴⁵ tan alingwanan to lay ginawam ed sikato. Mangibaki ak ed satan na mangawit ed sika. Ag ko labay a nabalang ta kayon dua ed saksakey ya agew.

⁴⁶ Inkuanen Rebeca ed kinen Isaac, Agaylay irap ko tan onsasawa ak lad saray taga arum a bansa ya asawa nen Esau. No mangasawa met si Jacob na sakey ed saray Hetea a singa sikara, maung ni laingay inatey ak.

28

¹ "Tinawag nen Isaac si Jacob, inlugay to, tan inkuanto, Ag ka mangaasaway biin Cananea.

² "Mamparaan ka, ta lakad Mesopotamia, diad abung nen lakim a Betuel. Asawam so sakey ed saray bibiid man, say sakey ed saray anak nen pangamaen mo a Laban.

³ "Bindisionan komun na Dios a Makapanyarin-amin so pangasawam tan itdan to ka komuy amayamay ya anak, pian magmaliw kan ama na amayamay a bansa.

⁴ "Bindisionan to ka komun tan saray kabyangay boleg mo, a singa samay impamindision tod kinen Abraham, tan nakayaryan mo komun yan dalin a panaayaman mo tan sikatoy dalin ya inter na Dios ed kinen Abraham!

⁵ "Imbaki nen Isaac si Jacob ed Mesopotamia, diad kinen Laban ya anak nen Betuel a taga Aram. Si Laban et agi nen Rebeca ya ina nen Jacob tan Esau.

⁶ "Naamtaan nen Esau a binindisionan nen Isaac si Jacob tan imbaki tod Mesopotamia a mananap na asawaen to. Naamtaan to met a nen binindisionan nen Isaac, ingganggan ton ag mangaasawa na biin Cananea.

⁷ "Nalmoan ton inonur nen Jacob so ama tan ina to, tan linman tuad Mesopotamia.

⁸ "Atalusan sirin nen Esau ya ag labay nen ama ton Isaac iray bibiin Cananea.

⁹ "Kanyan linmad kinen Ismael ya anak nen Abraham, tan inasawa toy Mahalat ya anak nen Ismael tan agi nen Nebayot.

¹⁰ Tinmaynan ed Beer-seba si Jacob tan amaarap ed Haran.

¹¹ Nen onseselek lay agew, sinmabid masanton pasen tan nankampod man. Dinmokul a naogip a dinmangan ed sakey a bato.

¹² Akogip to ya akanengneng na sakey a takayan a say balitang to et manlapud dalin ya anggad tawen, tan wala ray anghil ya onlalasur tan onsesegep ed samay takayan.

¹³ Insan anengneng toy Katawan a manalalagey ed abay to. Inkuan na Katawan, Siak so Katawan a Dios nen Abraham tan si Isaac. Iter kod sika tan saray kabyangay boleg mo yan dalin a pandokdokulan mo.

¹⁴ Magmaliw iran singa karakel na dabuk ed dalin. Onkayat ira ed amin a sokung na mundo, tan diad panamegley mo tan saray kabyangay boleg mo, bindisionan ko ray amin a bansa.

¹⁵ Ag mo lilingwanan a wala ak ed sika tan iyagel ta kad inerman a laen mo, tan ipawil ta kad sayan dalin. Ag ta ka taynan, anggad pakasumpal kon gawaen ya amin iray insipan kod sika.

¹⁶ Abangon si Jacob tan inkuanto, Wadyay Katawan! Wadyad sayan pasen, et ag ko amta!

¹⁷ Tinmakot tan inkuanto, Makapataktakot yan pasen! Talagan sikato yay abung na Dios tan puirtay tawen.

¹⁸ Kasabiy kabwasan, asaksakbay a binmangon si Jacob, inala to may baton dinanganan to, insan to inapiapiger ya impaalagey ya inlira a sakey a pakanudnunotan. Kinalboan toy larak na oliba a pangisaklang tod Dios.

¹⁹ Betel so impangingaran tod saman a pasen. (Nen saman, Luz so ngaran to man a baley.)

²⁰ Insan sinambaan tod Katawan a Dios, No kaiba mo ak lawas tan iyagel mo ak legan na sayan akar ko tan itdan mo ak na kawes tan kakanen,

²¹ tan ag ak naano a makapawil ed abung na amak tan sika so Dios ko,

²² sayan bato a ginawak a pakanudnunotan et magmaliw a pasen a pangigalangan ed sika, tan iter koy kakaplo na amin ya iter mod siak.

29

¹ "Intuloy nen Jacob so akar to tan amaarap ed dalin a bandad Bokig.

² "Kabebekta anengneng toy sakey a bobun ed alog a walay taloran simpok na karniron mandokdokul ed abay to. Diay inoman da tan walay baleg a batod sangab to.

³ "Kapag mantitipon irad may karniro, ekalen na saray pastol imay bato, painomen da ra, insan da ipawil imay bato ed pasen to.

⁴ "Tinepet nen Jacob ed saray pumapastol, Kakaaro, taga iner kayo? Taga kami Haran, ebat da.

⁵ "Tinepet to, Kabat yoy Laban ya anak nen Nacor? On, ebat da.

⁶ "Maksil ni? tepet to. On, ebat da, Nengneng mo, nia lay Raquel ya anak to, a kaiba to ray karniro nen ama to.

⁷ "Inkuanen Jacob, Atagey niy agew tan aliwa nin oras na panangisempet na karniro, akin et ag yo ra painomen, insan yo ra ipawil ya ipastol?

⁸ "Inmebat ira, Ag mi tan nagawaan ya anggad wadya la ran amin so karniro tan nakal lay bato; insan mi la rad satan painomen.

⁹ "Legan nen Jacob a mitotongtong ed sikara, sinmabiy Raquel a kaiba to ray karniro nen ama to.

¹⁰ Nen anengneng nen Jacob si Raquel a kaiba to ray karniro nen pangamaen ton Laban, inmasingger ed samay bobun, inekal to may bato, tan pinainom to ra.

¹¹ Insan to inanguban si Raquel, tan manakis ed liket to.

¹² Inkuantod sikato, Kanayon ak nen amam; anak ak nen Rebeca. Batik si Raquel ta imbaga tod kinen ama to so insabi nen Jacob.

¹³ Nen nadngel nen Laban so balitan nipaakar ed kinen kaanakan ton Jacob, binatik ton inabet, nilakap to tan inanguban to, insan to intagar ed abung to. Nen imbaga nen Jacob so amin ya agawa,

¹⁴ inkuanen Laban, On, andi-duaruwa a sikay dilin laman tan pokel ko. Nanayam dimay Jacob na sakey bulan.

¹⁵ Inkuanen Laban ed kinen Jacob, Anggaman kaanakan ta ka, tumangan ta kad pankikimey mo. Pigaray labay mon iyupak ed sika?

¹⁶ Walay duaran bibiin anak nen Laban: Lea so pangulowan, tan Raquel so yogtan.

¹⁷ Balibali ray mata nen Lea, balet maung ya impanlaman tan maganggana si Raquel.

¹⁸ Walay panibeg nen Jacob ed kinen Raquel, kanyan inkuanto, Manlingkur ak ed sikayo a pitoy taon, no paasawa yod siak si Raquel.

¹⁹ Inmebat si Laban, Labay ta ka nin mangasawad sikato nen say arum; sigi, manayam ka dia.

²⁰ Nanlingkur sirin a pitoy taon si Jacob pian naasawa toy Raquel, balet singa pigpigaran agew imay pitoy taon, lapud panangaro tod kinen Raquel.

²¹ Insan inkuanen Jacob ed kinen Laban, Sinmabi lay panaon a pangasawak ed anak ko.

²² Kanyan namponsiay Laban tan inimbitaan toy amin a totoo.

²³ Balet diad saman a labi si Lea, aliwan si Raquel, so inter nen Laban, tan sikatoy inakdulan sirin nen Jacob. (

²⁴ Inter nen Laban si aripen ton Zilpa ed kinen Lea, pian walay katulong to.)

²⁵ Diad kabwasan labat so impakaamta nen Jacob a si Lea manayay kaakdul to. Linmad kinen Laban tan inkuanto, Akin et ginawa yo yad siak? Si Raquel so nansagputan ko. Akin et pinalikdo yo ak?

²⁶ Inmebat si Laban, Aliwan kaogaliyan dia ya ononay yogtan a miasawa nen say pangulowan.

²⁷ Manalagar ka na sakey simba. Asumpal lad satan so ponsia, insan iter kod sikay Raquel, no manlingkur ka nid siak na pitoy taon.

²⁸ Inmabubon si Jacob, tan kalabas na sakey simba, inter nen Laban ed sikato si Raquel. (

²⁹ Inter nen Laban si aripen ton Bilha ed kinen Raquel, pian walay katulong to.)

³⁰ Inakdulan met sirin nen Jacob si Raquel, tan inaro to ni nen si Lea. Insan nanlingkur ni na pitoy taon ed kinen Laban.

³¹ Nen anengneng na Katawan ya ag inaro nen Jacob si Lea, inabuloyan ton makapananak; si Raquel, balet, ag mananak ta lepes.

³² Nanlokun si Lea tan nananak na sakey a laki. Inkuanto, Anengneng na Katawan so segsegang ko; natan aroen ak la nen asawak; kanyan inngaran to na Ruben imay ogaw.

³³ Nanlokun lamet tan nananak na sakey nin laki. Inkuanto, Inter met na Katawan yan anak ko, ta arengel ton ag ak inaroy asawak; kanyan inngaran to na Simeon.

³⁴ Nanlokun a pitlo tan nananak na sakey nin laki. Inkuanto, Natan magmaliw a lalon maasingger so asawak, ta inyanakan koy taloran lalaki; kanyan inngaran to na Levi.

³⁵ Nanlokun a pipat tan nananak na sakey a laki. Inkuanto, Natan idayew koy Katawan; kanyan inngaran to na Juda. Nanlapud saman, tinmonda lan mananak.

30

¹ "Balet anggapoy anak nen Raquel, kanyan angimon ed kinen atsi to. Inkuantod kinen Jacob, Itdan mo ak na anak ko; ta no andi, ompatey ak.

² "Akapasnuk si Jacob ed kinen Raquel tan inkuanto, Dios ak sirin? Say Dios, aliwan siak, so makasengeg na ag mo pananak.

³ "Inkuanen Raquel, Niay Bilha ya aripen ko; akdulan mo pian mananak na para siak tan magmaliw ak ya ina ed panamegley to.

⁴ "Kanyan inter toy Bilha ed kinen Jacob, insan inakdulan to.

⁵ "Nanlokun si Bilha tan nananak ed kinen Jacob na sakey a laki.

⁶ "Inkuanen Raquel, Pinilaan ak na Dios. Dinengel toy pikakasik, tan initdan to ak na anak a laki; kanyan inngaran to na Dan.

⁷ "Nanlokun lamet si Bilha tan nananak ed kinen Jacob na kumadwan laki.

⁸ "Inkuanen Raquel, Pinasyay impilaban kod kinen atsik, balet analo ak; kanyan inngaran to na Neftali imay ogaw.

⁹ "Nen anengneng nen Lea ya ag la mananak, inter tod kinen Jacob si Zilpa ya aripen to.

¹⁰ Insan nananak ed kinen Jacob si Zilpa na sakey a laki.

¹¹ Inkuanen Lea, Mapalar ak; kanyan inngaran to na Gad imay ogaw.

¹² Nananak lamet ed kinen Jacob si Zilpa na sakey a laki;

¹³ inkuanen Lea, Agaylay liket ko! Saray bibii tawagen da ak a maliket; kanyan inngaran to na Aser.

¹⁴ Nen panaganiy trigo, linmay Ruben ed kaalogan tan akalmo na saray tanaman a mandragora, insan inawit to rad kinen ina ton Lea. Inkuanen Raquel ed kinen Lea, Itdan mo ak pa na mandragoran awit nen anak mo.

¹⁵ Inmebat si Lea, Ag ka ni napnek ed impangalam na asawak? Natan labay mo nin alaen iray mandragora na anak ko. Inkuanen Raquel, No iter mod siak iray mandragora nen anak mo, sikam lay miakdul ed kinen Jacob diad sayan labi.

¹⁶ Nen sinmempet ed labi si Jacob a nanlapud kaalogan, inabet nen Lea tan inkuanto, Miakdul kad siak ed sayan labi, ta binayaran ta ka na saray mandragora nen anak ko. Kanyan inakdulan tod saman a labi.

¹⁷ Inebatan na Dios so pikakasi nen Lea; nanlokun tan nananak ed kinen Jacob na kumaliman laki.

¹⁸ Inkuanen Lea, Tinumangan ak na Dios, ta inter kod kinen asawak so aripen ko; kanyan inngaran to na Isacar imay ogaw.

¹⁹ Nanlokun lamet tan nananak ed kinen Jacob na kumanem a laki.

²⁰ Inkuanto, Initdan ak na Dios na marakep a rigalo. Natan akoen ak la na asawak, ta inyanakan koy anemiran lalaki; kanyan inngaran to na Zabulon imay ogaw.

²¹ Ag abayag, nananak na sakey a bii, tan inngaran to na Dina.

²² Anunotan na Dios si Raquel; inebatan toy pikakasi to, kanyan inyabuloy ton makaanak.

²³ Nanlokun tan nananak na sakey a laki. Inkuanto, Inekal na Dios so kababaingan ko diad impangiter tod siak na sakey ya anak a laki.

²⁴ Itdan ak ni komun na Katawan na sakey ya anak a laki; kanyan inngaran to na Jose imay ogaw.

²⁵ Kasumpal na inkianak nen Jose, inkuanen Jacob ed kinen Laban, Bolusan yo ak pa la, pian makapawil ak lad bansa mi.

²⁶ Iter yod siak iray asawak tan saray anak ko; binayaran ko la ra diad impanlingkur kod sikayo. Kabat yo met so ontan lan kaabigan na impanlingkur kod sikayo.

²⁷ Inkuanen Laban ed sikato. Niay nibagak; inaral koy panagparles, et naamtaan kon binindisionan ak na Katawan lapud sika.

²⁸ Ibagam labat no pigay labay mon iyupak ed sika.

²⁹ Inmebat si Jacob, Kabat yo no panoy impanlingkur kod sikayo tan no panoy imbolaslas na saray ayayep yo diad impangasikasok.

³⁰ Say daiset a walad sikayo kasakbayay insabik et dinmakerakel, tan binindisionan kayoy Katawan lapud siak. Natan sinmabi lay panaon a nunoten ko lay pankaabigan na pamilyak.

³¹ Antoy upa ya iter kod sika? tepet nen Laban. Inmebat si Jacob, Anggapoy labay kon upa. Ituloy koy pangasikasok ed saray karniro yo no onabubon kayod sayan paknaan:

³² Onla ak natan ed kawalaan na saray karniro, tan alaen koy balang andeket a kordiro tan balang kanding a batekan o baklayan. Saraya labat so labay kon iyupa yod siak.

³³ Diad panakar na panaon, mainomay yon amtaen no niluko ta kayo o andi. No nengnengen yo ray ayayep ya inyupa yod siak, tan walay nanengneng yon kanding ya aliwan baklayan o batekan tan karniron aliwan andeket, nibaga yon tinakew.

³⁴ Inmebat si Laban, Marakep itan! Ontan sirin so gawaen ta.

³⁵ Balet diad saman ya agew inekal nen Laban iray kanding a kalakyan a gulisan o batekan tan saray kabatyan a baklayan tan batekan o walay ampotin batek; inekal to met iray andeket a karniro. Impaasikaso to rad saray anak ton lalaki,

³⁶ insan to ra inyarawid kinen Jacob a taloy agew no akaren so kaarawi to. Inasikaso nen Jacob ira may atilak ya ayayep nen Laban.

³⁷ Angalay Jacob na saray sanga na estoraki, almindra, tan platano, insan to inobakan iray arum a partiy sanga pian singa walay gulis dan ampoti.

³⁸ Inyan to ra yan sanga ed arap na saramay ayayep, diad pasen a paniinoman da. Inyan to rad man, ta mankakastaan ira no onla ran oninom.

³⁹ Lapud akastaan ira diad arap na saramay sanga nananak iray baklayan a binmawer, baklayan, tan batekan.

⁴⁰ Imbiig nen Jacob iray karniro ed saray kanding, tan impaarap to rad saray baklayan a binmawer tan andeket ya ayayep nen Laban. Diad onya, dinmakel lan dinmakel so ayayep nen Jacob tan imbiig to rad saray ayayep nen Laban.

⁴¹ No mankasta ray ayayep a maung so laman da, iyan nen Jacob ira may sanga ed arap da diad paniinoman da, pian mannginew ira ed pegley na saramay sanga.

⁴² Balet ag to iyan ira may sanga ed arap na saray ayayep a makapoy so laman. Ag abayag, kayaryan nen Laban iray makapoy so laman, tan kayaryan nen Jacob iray maung so laman.

⁴³ Lapud saya nagmaliw a mayamyaman si Jacob. Amayamay iray karniro, kanding, kamilyo tan asno to, tan aripen to.

31

¹ "Nadngelan nen Jacob a kuan na saray lalakin anak nen Laban, Inala nen Jacob so amin a kayaryan nen ama tayo. Nanlapud ama tayo so amin a kayamanan to.

² "Alikas to met a nanaoman lay panangaro nen Laban ed sikato.

³ "Insan inkuan na Katawan ed sikato, Pawil ka lad dalin na saray atateng mo tan saray kakanayon mo. Olupen ta ka.

⁴ "Kanyan nampabakian nen Jacob ira di Raquel tan Lea ya abeten dad alog a kawalaan da ray ayayep to.

⁵ "Inkuantod sikara, Nalilikas kon mangooman lay panangarod siak di ama tayo; balet aasikasoen ak lawas na Dios nen amak.

⁶ "Kabat yon dua ya inyoput koy biskeg ko ed impanlingkur kod ama yo.

⁷ "Anggaman ontan, sinaol da ak tan amimpulon inooman day upak. Balet ag inyabuloy na Dios a napasakitan da ak.

⁸ "Nen inkuandi ama tayon Laban, Saray baklayan a kanding so upam, nananak na baklayan iray kabatyan. Nen inkuanda, Saray gulisan a kanding so upam, nananak na gulisan iray kabatyan.

⁹ "Inala na Dios iray ayayep nen ama yo tan inter to rad siak.

¹⁰ Nen panaon na panagkasta, walay kogip ko. Anengneng kon saray kalakyan a kanding a mankakasta et gulisan, batekan, tan baklayan so kolor da.

¹¹ Inkuan ed siak na anghil na Dios diad kogip, Jacob! On, wadya ak, ebat ko.

¹² Intuloy ton inkuan, Nengneng mo, amin a kanding a kalakyan a mankakasta et gulisan, batekan, tan baklayan ira. Gagawaen ko ya, ta nanenengneng koy gagawaen nen Laban ed sika.

¹³ Siak imay Dios a pinmayawar ed sika diad Betel, a dimay angipaalageyan moy bato a pakanudnunotan tan insaklang mon masanto ed siaktan diman met so nanggawaan moy sakey a sinambaan a sipan ed siak. Natan mamparaan ka, taynan kad sayan dalin tan pawil kad dalin a nianakan mo.

¹⁴ Inmebat ira di Raquel tan Lea, Anggapo lay nakdaan a tawiren mid ama mi.

¹⁵ Singa kami la sangkailid sikato. Inlako to kami, tan inggastos to lan amin so kuartan nanlakoan tod sikami.

¹⁶ Amin iray kayamanan ya inalay Dios ed kinen ama mi et kayaryan mi tan kayaryan na saray anak mi. Sumpal moy imbaga na Dios ed sika.

¹⁷ Namparaan sirin si Jacob ya ompawil ed kinen ama to diad dalin na Canaan. Impakabayo tod saray kamilyo iray anak to tan saray asawa to, tan pinaona to ray amin ya ayayep to tan antokaman a kayaryan a nalmoan tod Mesopotamia.

¹⁸

¹⁹ Linmay Laban a mangatlid saray karniro to; et nen andid man ed abung, tinakew nen Raquel iray talintaoy diriyos na pamilya tan kayaryan nen ama to.

²⁰ Pinalikdo nen Jacob si Laban diad ag to impangibagay itaynan to.

²¹ Inawit ton amin iray kayaryan to tan ginanatan toy tinmaynan. Binaliw toy Ilog na Eufrates tan amaarap ed Palandey na Galaad.

²² Kalabas na taloy agew nibagad kinen Laban a tinmaynan si Jacob.

²³ Intagar to ray totoo to tan inosilan ton pitoy agew si Jacob, et nabot to ed palandey na Galaad.

²⁴ Diad kogip nen Laban ed saman a labi, linmay Dios ed sikato tan inkuanto, Manalwar ka! Ag mo didiwiten a balut si Jacob.

²⁵ Nanayam si Jacob ed kapokdulan, balet si Laban tan saray kakanayon to et nankampo rad kapokdulan na Galaad.

²⁶ Inkuanen Laban ed kinen Jacob, Akin et pinalikdo mo ak diad impangawit mod saray bibiin anak ko a singa ra asamsam ed bakal?

²⁷ Akin et pinalikdo mo ak diad inyalis mon ag ko amta? No imbagam labat komun ed siak, pinasiput ta kan walay liket, kansion, tan togtog na saray arpa tan pandirita.

²⁸ Ag mo anggan impaanguban iray apok tan saray anak ko kasakbay dan inmalis. Makapoy man a ginawam!

²⁹ Walay pakayarik a mamasakit ed sika, balet pinasakbayan ak na Dios nen amam ya ag ta kan balut diwiten.

³⁰ Kabat kon tinmaynan ka, lapud labay mo lay makasempet ed abung mo, balet akin et tinakew mo ray diriyos ko?

³¹ Inmebat si Jacob, Antakot ak, ta inisip kon alaen yod siak iray anak yon bibii.

³² Balet no narumog yo dia iray diriyos yo, nakaukolan a pateyen so siopaman a pakarumogan. Nia ray lalakin mantasi. Mananap kayoy antokaman a kayaryan yo tan ala yoy gawa yo. Ag amta nen Jacob a tinakew nen Raquel iray diriyos nen Laban.

³³ Sinukisok nen Laban so tulda nen Jacob; insan linmoob ed tulda nen Lea tan diad tulda na saramay duaran aripen a bibii, balet ag to arumog iray diriyos to. Linmoob ed satan diad tulda nen Raquel.

³⁴ Balet inala la nen Raquel ira may diriyos, inkarga to rad supot ya apis na beneg na kamilyo, insan to inirungan. Inanap ira nen Laban diad intiron tulda, balet ag to ra narumog.

³⁵ Inkuanen Raquel ed kinen ama to, Ag yo ak pamapasnukan; ta ag ak makaalagey ed arap yo, ta sinmabid siak so binulan a sakit min bibii. Inanap nen Laban iray diriyos to, balet ag to ra nalmo.

³⁶ Naingungotan si Jacob. Inkuanto, Antoy kasalanan a ginawak? Antoy ganggan a sinumlang ko, et naitdan kayoy kanepegan a mangosil ed siak?

³⁷ Natan ta inonaan yo lan amin iray kayaryan ko, antoy nalmo yon kagawaay abung a kayaryan yo? Ipaway yo diad arap na totook tan totoo yo, pian nanengneng da tan nasintinsiaan da no siopay nalilingod sikatayo.

³⁸ Duamploy taon ko lad sikayo; ag tinmondan nananak iray karniro tan saray kanding yo, tan ag ak angan na anggan sakey a kordiro.

³⁹ No walay karniron pinatey na ayep ed takel, inakok so inkaandi to; ag ko la inyakar ed sikayo, pian ag yo la naamtaan a siak so akankasalanan. Pinasoot yo ak a mambayar ed amin ya atakew ed agew man o labi.

⁴⁰ Naynay ak a nanirap, lapud petang na agew tan betel na labi. Ag ak makaogip.

⁴¹ Onyay agawgawa diad loob na duamploy taon kod sikayo. Labinapat a taon so impankimey ko pian naalak iray bibiin anak yo, tan anem taon pian naalak iray ayayep yo. Anggaman ontan, amimpulon inooman yoy upak.

⁴² No ag ak labat tutulongan na Dios da ray atateng ko, say Dios ya inggalang di Abraham tan Isaac, pinataynan yo ak la komun a kalima-lima. Balet anengneng na Dios so gunigon ko tan say kimey ko; kalabyan inter to lay sintinsia to.

⁴³ Inmebat si Laban ed kinen Jacob, Anak ko ra yan bibii, kayaryan ko ray anak da, tan kayaryan ko met ira yan ayayep. Kayaryan koy amin a nanenengneng mo dia. Balet anggapoy nagawaan kon mamokpok ed saray anak ko tan saray anak da.

⁴⁴ Kanyan sipaparaan ak mipaknaan ed sika. Mangibunton tay bato a pakanudnunotan ed sayan paknaan ta.

⁴⁵ Angala sirin na bato si Jacob tan impaalagey tod man a sakey a pakanudnunotan.

⁴⁶ Ingganggan to ray totoo to a mantipon iray bato tan ibunton da. Insan angan ira diad abay to may bunton.

⁴⁷ Ingaran nen Laban iman a pasen na Jegar-sahaduta; si Jacob balet inggaran to na Galeed.

⁴⁸ Inkuanen Laban ed kinen Jacob, Sayan bunton na bato so mangipanunot ed sikatan dua. Sikato yay makasengeg ya atawag na Galeed iman a pasen.

⁴⁹ Inkuan met ni nen Laban, Bantayan ita komun na Katawan legan a nanarawiyan ita. Kanyan atawag met iman a pasen na Mispa.

⁵⁰ Intuloy nen Laban ya inkuan, No makapoy so ipatnag mod saray anak ko, o mangasawa ka na arum a bibii, anggaman ya ag ko amta, ag mo lilingwanan a bambantayan ita na Dios.

⁵¹ Nia ray baton imbunton ko ed nanleetan ta, tan niay baton pakanudnunotan.

⁵² Sayan bunton na bato tan sayan baton pakanudnunotan et sikaray manangipanunot. Ag kon balut onlad labas to yan bunton a dogpaan ta ka, tan ag kan balut oonlad labas to yan bunton a labas to yan baton pakanudnunotan a dogpaan mo ak.

⁵³ Say Dios nen Abraham tan say Dios nen Nacor so manintinsiad sikatan dua. Insan diad ngaran na Dios ya inggalang nen ama ton Isaac, sinambaan nen Jacob a tooren to yan sipan.

⁵⁴ Amatey na sakey ya ayep tan imbagat tod man ed palandey, insan to inimbitaan a mangan iray totoo to. Kasumpal dan angan, pinalabas day labi diad saman a palandey.

⁵⁵ Kabkabwasan, inaanguban nen Laban iray apo to tan saray anak ton bibii a pamasiput tod sikara, insan la sinmempet.

32

¹ "Intuloy nen Jacob so pankukurang to. Inabet na pigaran anghil.

² "Nen anengneng to ra, inkuanto, Kampo ya na Dios; kanyan inngaran to man a pasen na Mahanaim.

³ "Angibakiy Jacob na totoo to ed kinen agi ton Esau diad dalin na Edom.

⁴ "Imbilin tod sikaran onyay ibaga ra: Siak a si Jacob, say mapaabeban aripen mo, ipapakabat kod sika Esau, ya abayag ak a nanayam ed kindi pangamaen tan Laban tan natan ak labat ompawil.

⁵ "Wala ray bakak, asno, kanding, karniro, tan aripen ko. Imbakik ed sika ra yan totoo, ta labay koy mipulangan ed sika.

⁶ "Nen pinmawil ed kinen Jacob ira may imbaki to, inkuanda, Linma kamid kinen agim ya Esau, tan wala lad dalan a mangabet ed sika. Kaiba toy apat a lasus a lalaki.

⁷ "Ataktakot tan agunigon si Jacob. Impankadwa to ray totoon kaiba to, saray karniro, kanding, baka, tan saray kamilyo.

⁸ "Inkuantod sikaton dili, No dogpaan toy onaan ya olup, nayarin makabatik so walad onur ya olup.

⁹ "Insan nampikasiy Jacob, Dios nen lakik ya Abraham tan Dios nen amak ya Isaac, dengel mo ak pa! Imbagam ed siak, Katawan, ya ompawil ak ed dalin ko tan saray kakanayon ko, tan ag mo ak paolyan pian maung so pansumpalan ko.

¹⁰ O matoor a Katawan, ag ak manepeg a mangawat na panangarom tan panangasim ya impatnag mod siak a mapaabeban aripen mo. Binaliw koy Jordan ya anggapoy awit ko no ag say baston labat, balet natan pinmawil ak a kaibak ira yan duaran olup.

¹¹ Kerewen kod sika ya iyagel mo ak ed kinen Esau. Antakot ak ta ompan onla dian ondogpad sikami et pateyen to kamin amin, pati saray bibii tan saray ogogaw.

¹² Ag mo pa lilingwanan ya insipan mon ag mo ak paolyan pian maung so pansumpalan ko; insipan mo met ya itdan mo ak na saray kabyangay boleg ko a diad kinarakel da et ag ira nabilang, ta singa kinarakel na buer ed gilig na dayat so bilang da.

¹³ Kasumpal na impamalabas day labid man, nampiliy Jacob ed saray ayayep to na irigalo tod kinen Esau: duan lasus a kabatyan a kanding tan duamplon kanding a kalakyan, duan lasus a kabatyan a karniro tan duamplon karniron kalakyan, talomplon kamilyon mampapasuso tan saray kilaw da, apataplon kabatyan a baka tan samploran bakan kalakyan, duamplon kabatyan ya asno tan samploran asno a kalakyan.

¹⁴

¹⁵

¹⁶ Impansisian to rad pigaran grupo tan impaasikaso tod sakey ya aripen to so balang grupo. Inkuantod sikara, Onona kayo, balet panaarawian yoy balang sakey a grupo.

¹⁷ Imbilin tod walad onaan ya aripen, No naabet moy Esau a kuyak tan tepeten to, Siopay amom Iner so laen mo? Siopay akankien ed saray ayayep a walad onaan mo?

¹⁸ onyay iyebat mo, Kien ira nen aripen mon Jacob. Ipapayakar to ran rigalo ed kuya ton Esau.

¹⁹ Onya met so imbilin tod kumadwan aripen, say kumatlo, tan amin da ni ray arum a managasikasoy ayayep: Onyay ibaga yod kinen Esau no naabet yo:

²⁰ On, say aripen yon Jacob et wadtad bandad onur. Inisip nen Jacob a diad pangiter to na rigalo napakepa toy pasnuk nen Esau, tan no naabet to, pirdonaen da.

²¹ Impaiyona to la ra may rigalo to, tan naogip nid kampo to diad saman a labi.

²² Diad saman lamlamang a labi, binmangon si Jacob, intagar to ra may duaran asawa to, saramay duaran inamung ton aripen a bibii, tan saramay labinsakey ya anak to, insan da binaliw so Ilog na Jabok.

²³ Kasumpal to ran pinabaliw, impaibaliw to met iray amin a kayaryan to,

²⁴ balet tinmilak a bukbukor to. Insan sinmabiy sakey a too tan akibalsakan ed kinen Jacob ya anggad palbangon.

²⁵ Nen alikas na samay too ya ag manalo, pinoniti tod tapi si Jacob, et apiley.

²⁶ Inkuanto may too, Paonlam ak la, ta asingger lay kabwasan. Andi, no ag mo ak ni bindisionan, ebat nen Jacob.

²⁷ Antoy ngaran mo? tepet samay too. Jacob, ebat to.

²⁸ Inkuanto may too, Aliwa lan Jacob so ngaran mo. Akibalsakan kad Dios tan saray totoo, et analo ka; kanyan Israel la so ngaran mo.

²⁹ Inkuanen Jacob, Ibagam met sirin so ngaran mo. Balet inmebat, Akin et labay mo nin naamtan so ngaran ko? Binindisionan tod satan si Jacob.

³⁰ Inkuanen Jacob, Anengneng koy Dios ed lupa-lupaan, et mabilay ak ni; kanyan inngaran toy Peniel iman a pasen.

³¹ Pinmaway lay agew nen ontaynan lay Jacob manlapud Peniel; mankitley lapud samay tapi to.

³² Anggad natan, ag mangakan iray kabyangay boleg nen Israel na laman na tapi, ta diad sayan laman so aponiti ed kinen Jacob.

33

¹ "Anengneng nen Jacob si Esau a nitan lan kaiba to ray apat a lasus a totoo to, kanyan inapag to ray ogogaw ed kindi Lea, Raquel, tan saramay duaran bibiin aripen to.

² "Walad onaan ira may aripen tan saray anak da, insan mantombuk si Lea tan saray anak to, tan diad onur si Raquel tan si Jose.

³ "Inmonay Jacob ed sikaran amin tan nandakmomon amimpito legan ya onaasingger ed kinen agi to.

⁴ "Balet binatik nen Esau ya inabet, nilakap to, insan to inanguban. Manakis iran dua.

⁵ "Nen anengneng nen Esau ira may bibii tan saramay ogogaw, tinepet to, Siopa ra yay kaibam? Inmebat si Jacob, Sikara yay ogogaw ya inter na Dios ed siak lapud panangaro to.

⁶ "Inmasingger ira may aripen tan saramay anak da tan dinmakmomo ran angigalang;

⁷ "sinmoblay si Lea tan saramay anak to, tan say kaonuran si Jose tan si Raquel.

⁸ "Tinepet nen Esau, Antoy kabaliksan da ra may onaan a nabet ko? Inmebat si Jacob, Rigalok ira man ed sika, ta labay koy mipulangan ed sika.

⁹ "Balet inkuanen Esau, Malaem la ray kayaryan ko, agi; kien mo la ray kayaryan mo.

¹⁰ Inkuanen Jacob, Andi komun. No talagan pirdonaen mo ak, awat moy panangarok. Say pakanengneng kod lupam et singa pakanengneng kod lupa na Dios, natan ta maung so impatnag mod siak.

¹¹ Awat mo kariy panangarok ya awit kon para sika, kinasian ak na Dios, ta inter ton amin iray nakaukolan ko. Ag to tinondaan ya anggad inawat nen Esau ira may rigalo.

¹² Inkuanen Esau, Onla itayo la. Siak so onona.

¹³ Inmebat si Jacob, Naksawan tan makapoy la ra yay ogogaw, insan sakey ni, nakaukolan ya asikasoen ko ra yay karniro tan baka tan saray kilaw da. No dagdagen iran manakar a masiglat ed sanagew labat, ompatey iran amin.

¹⁴ Onona ka la, ta ontombuk ak lan mantantan. Manakar kami, onung na anggaay nayarian na saray ayayep tan saray ogogaw, anggad naabot ta kad Edom.

¹⁵ Inkuanen Esau, No ontan sirin, mangitilak ak ed sika na pigaran totook. Balet inkuanen Jacob, Andi-bali la tan; masarag lay impamirdonam ed siak.

¹⁶ Kanyan diad saman ya agew, amaarap lad Edom si Esau.

¹⁷ Si Jacob balet linmad Sukot tan diman angipaalagey na dilin abung to tan saray salimbengan na ayayep to. Kanyan atawag na Sukot iman a pasen.

¹⁸ Nen ompawil si Jacob a manlapud Mesopotamia, maliket ya akasabid Sikem diad sakop na Canaan, tan nankampod sakey ya alog ya asingger ed siudad.

¹⁹ Sinaliw to man a parti na alog ed saray kabyangay boleg nen Hamor ya ama nen Sikem; sanlasus a kuartan pilak so imbayar to.

²⁰ Nanggawad may sakey ya altar tan nginaranan to para El, say Dios na Israel.

34

¹ "Aminsan ya agew, si Dina a biin anak nen Jacob tan Lea et linman dinmalaw ed pigaran bibiid Canaan.

² "Nen anengneng nen Sikem a lakin anak nen Hamor a Heveo imbatik to, insan to pinasoot ya inakdulan.

³ "Balet nen naimano ton magangganan tuloy si Dina, sinmabiy baleg a panibeg tod sikato tan kinokoyung to.

⁴ "Inkuantod kinen ama to, Labay kon asawaen yan bii. Ala yo pa a para siak.

⁵ "Naamtaan nen Jacob so impamasoot dad anak ton Dina, balet lapud saray anak ton lalaki et wala rad kaalogan anggapoy ginawa to ya anggad insabi ra.

⁶ "Nen nitan la ray lalakin anak nen Jacob a nanlapud kaalogan, sinmabi met si Hamor ya ama nen Sikem, ta labay toy mitongtong ed kinen Jacob. Nen nadngelan day agawa, abigla ra tan mapalaloy pasnuk da ed sayan impamasoot nen Sikem ed agi ran bii tan say impamaabeba tod saray totood Israel.

⁷

⁸ "Inkuanen Hamor ed sikara, Si anak kon Sikem et naibegan toy anak mon marikit; paasawam la kari ed sikato.

⁹ "Mampapaknaan tayo ya iyabuloy tayoy panaasawaan na totoo tayo.

¹⁰ Diad ontan, nayarian yoy manayam diad bansa mi; nayarian yoy manayam ed inerman a labay yo, mannigosio kayo, tan mankayaryan kayo na antokaman.

¹¹ Insan inkuanen Sikem ed kinen ama nen Dina tan saray agagi ton lalaki, Iter yo yan kekerewen ko, et iter koy antokaman a labay yo.

¹² Ibaga yod siak no anto ray labay yon irigalok, tan no pigay labay yon ibayar ko; iter koy antokaman a kerewen yo, dapot no paasawa yod siak si Dina.

¹³ Saramay lalakin anak nen Jacob et inebatan day marakep si Sikem tan si ama to, balet walad kanunotan dan palikdoen da ra lapud agawa ed kinen Dina ya agi ra.

¹⁴ Inkuandad kinen Sikem, Ag mi iyabuloy a miasaway agi mi ed sakey a lakin ag asegat; makapabaing yad sikami.

¹⁵ Onabuloy kami labat no magmaliw kayon singa sikami, diad pamasegat yod amin a lalaki ed sikayo.

¹⁶ Onabuloy kami met a manaasawaan iray totoo mi tan saray totoo yo. Manayam kami dia tan mikasakey kamid sikayo.

¹⁷ Balet no ag kayo onabubon ed saraya, awiten miy Dina tan ontaynan kami la.

¹⁸ Inmabubon si Hamor tan si anak ton si Sikem.

¹⁹ Ag la nanabalay Sikem ya anumpal ed tongtongan da, ta inaro to may biin anak nen Jacob. Manona si Sikem ed amin da ray kabyangay pamilya to.

²⁰ Linma si Hamor tan si anak ton Sikem ed pandaragupan na totoo diad puirtay baley, tan inkuandad saray kabaleyan da,

²¹ Makaaro ra yay totoon sinmabi diad sikatayo; panayamen ti la ra dia tan paolyan ti ran mannigosio dia. Maawang met ingen yay lugar tayo. Asawaen ti ray mamarikit da tan ipaasawa tayo ray mamarikit tayo ed sikara.

²² Balet manayam ira dia tan mikasakey irad sikatayo, no pasegat tayon amin iray lalaki ed sikatayo a singa sikara.

²³ Diad onya, nakayaryan tayoy amin ya ayayep da tan arum ni ran kayaryan da. Kanyan onabuloy ti lan manayam ira diad sikatayo.

²⁴ Inmabuloy ya amin iray ombaley ed imbaga di Hamor tan Sikem. Kanyan nampasegat ya amin iray lalaki.

²⁵ Kasumpal na taloy agew nen ag ni inmabig ira may nampasegat, saray duaran lalakin anak nen Jacob tan agagi nen Dina a di Simeon tan si Levi et inala ray ispada ra, linma rad siudad ya anggapoy makaamtad getma ra, insan da pinatey ya amin iray lalaki.

²⁶ Pinatey da met si Hamor tan si anak ton Sikem, inala ray Dina ed abung nen Sikem, insan la ra tinmaynan.

²⁷ Kasumpal na impanpapatey nen Simeon tan si Levi, sinmabi ray arum ya anak nen Jacob tan inala ray amin a naala ra ed baley. Ginawa ra ya, pian makabawi ra ed inkaderal na kagalangan na agi ra.

²⁸ Inala ray amin a karniro, baka, asno, tan amin a bengatlan walad baley tan diad kaalogan.

²⁹ Inala ray amin a makana; inala ra met iray bibii tan saray ogogaw, tan amin a bengatlan walad kaabungan.

³⁰ Inkuanen Jacob ed kindi Simeon tan Levi, Initdan yo ak na gunigon; natan bosulen ak na saray Cananeo, saray Perezeo, tan amin iray wadyad sayan pasen. Dagdaiset iray totook; no mankakasakey iran amin, insan da ak labanan, ompatey so intiron pamilya tayo.

³¹ Balet inmebet ira, Ag nayarin gawaen dan singa marotak a bii si Dina ya agi mi.

35

¹ "Inkuan na Dios ed kinen Jacob, Lakan tampol ed Betel tan manayam kad man. Manggawa kad may altar a para siak a Dios a pinmayawar ed sika nen ibabatikan moy agim ya Esau.

² "Kanyan inkuanen Jacob ed pamilya to tan amin a kaiba to, Ibantak yo ray diriyos na arum a bansa ya awit yo; linisan yoy sikayon dili, insan kayo mampales na malinis.

³ "Onekal itayo la dia tan onla itayo ed Betel, a dimay panggawaan koy altar a para Dios a tinmulong ed siak nen wala ak ed kairapan tan inoolup to ak ed inerman a nilak.

⁴ "Inter da sirin ed kinen Jacob iray amin a walad sikaran diriyos na arum a bansa, pati saray ikaw ya akabitin ed saray layag da. Inkotkot to ra yan amin ed silong na kiew a robli ya asingger ed Sikem.

⁵ "Nen onsisiput si Jacob tan saray anak ton lalaki, sinmabiy baleg a takot ed saray totood kaliber-liber iran baley, kanyan ag da ra inosilan.

⁶ "Linmay Jacob tan amin a totoo to diad Luz, a tatawagey Betel natan, diad dalin na Canaan.

⁷ "Nanggawad man na altar tan inngaran to man a pasen na Betel, ta dimay pinayawaran na Dios ed sikato nen ibabatikan toy agi to.

⁸ "Inatey si Debora a nankomponid kinen Rebeca nen ogaw ni, tan imponpon dad silong na kiew a robli a walad abalaten na Betel. Kanyan saman a kiew atawag na Robli na Ermen.

⁹ "Nen pinmawil si Jacob a nanlapud Mesopotamia, pinmayawar lamet ed sikato so Dios tan binindisionan to.

¹⁰ Inkuan na Dios ed sikato, Jacob so ngaran mo, balet manlapud natan Israel la. Kanyan Israel so inngaran na Dios ed sikato.

¹¹ Insan inkuan na Dios ed sikato, Siak so Dios a Makapanyarin-amin. Nawalaan kay amayamay ya anak. Manlapud sika ray bansa tan arari.

¹² Iter kod sikay dalin ya inter kod kindi Abraham tan Isaac, tan iter ko met ed saray kabyangay boleg mo no andi ka lad bilay.

¹³ Insan tinaynan lay Dios si Jacob.

¹⁴ Diman ed samay pasen ya akitongtongay Dios ed sikato, angipaalagey si Jacob na baton pakanudnunotan tan insaklang tod Dios diad impangikalbo toy alak tan larak na oliba.

¹⁵ Inngaran to na Betel iman a pasen.

¹⁶ Tinaynan nen Jacob tan say pamilya to so Betel, et nen asingger la ra ed Efrata, sinmabiy panaon a pananak nen Raquel, et nanairapan ed pampapasakit to.

¹⁷ Nen mapalaloy pampapasakit to, inkuan na manamyanak ed sikato, Ag ka natatakot, Raquel; sakey a laki lamet so anak mo.

¹⁸ Balet ompapatey si Raquel. Nen kuan lan naoyus so bilay to, inngaran to na Benoni may ogaw, balet inngaran nen ama to na Benjamin.

¹⁹ Nen inatey si Raquel, imponpon dad gilig na dalan a mamaarap ed Efrata, a tatawagen natan na Betlehem.

²⁰ Angyan diman si Jacob na baton pakanudnunotan; anggad natan sikato niy tanda na lobuk nen Raquel.

²¹ Intuloy nen Jacob so impankurang to, tan nankampo ed biek a dapag na tori ed Eder.

²² Nen manaayam si Jacob ed saman a pasen, inakdulan nen Ruben si Bilha, sakey ed saray asawan inamung nen ama to. Nadngelan nen Jacob, et mapalaloy pasnuk to. Labinduan amin iray lalakin anak nen Jacob.

²³ Sikara yay anak tod kinen Lea: Ruben (say pangulowan ya anak nen Jacob), Simeon, Levi, Juda, Isacar, tan Zabulon;

²⁴ diad kinen Raquel: Jose tan Benjamin;

²⁵ diad kinen Bilha ya aripen nen Raquel: Dan tan Neftali;

²⁶ diad kinen Zilpa ya aripen nen Lea: Gad tan Aser. Nianak ira yan amin ed Mesopotamia.

²⁷ Binmisitay Jacob ed kinen ama ton Isaac diad Namre, ya asingger ed Hebron, tan nanayaman nen Abraham tan Isaac.

²⁸ Nambilay si Isaac na sanlasus tan walomploy taon,

²⁹ kanyan mataktakken la nen inatey. Imponpon na saray anak to a di Esau tan Jacob.

36

¹ "Sikara ya so kabyangay boleg nen Esau a tatawagen met na Edom.

² "Inaasawa nen Esau iray bibiin taga Canaan: si Ada ya anak nen Elon a Heteo; si Oholibama ya anak nen Ana a lakin anak nen Zibeon a Heveo;

³ "si Basemat ya anak nen Ismael tan agi nen Nebayot.

⁴ "Saraya so anak to: si Elifaz ed kinen Ada, si Reuel ed kinen Basemat,

⁵ "di Jeus, Jalam, tan Core ed kinen Oholibama. Nianak ira yan amin ed Canaan.

⁶ "Si Esau tinaynan toy agi ton Jacob tan linmad sananey a dalin. Kaiba to ray asawa to, saray anak to, amin a totoon walad pakaoley to, saray ayayep to, tan amin a kayaryan to ya atipon tod Canaan.

⁷ "Tinmaynan lapud kulang lay taganon niiter na dalin a panaayaman da nen Jacob; dakerakel iray ayayep da, kanyan ag la ra nayarin manayam ed sakey a pasen.

⁸ "Nanayam si Esau ed kapokdulan na Edom.

⁹ "Sikara yay kabyangay boleg nen Esau a sengeg na boleg da ray Edomita.

¹⁰ Nananak si Ada ya asawa nen Esau na sakey a laki a si Elifaz, Limaray lalakin anak nen Elifaz: di Timan, Omar, Zefo, Gatam, tan Kenaz. Diad kinen Timna, a sananey ya asawa nen Esau, walay anak ton sakey a si Amalec. Nananak si Basemat ya asawa nen Esau na sakey a laki a si Reuel. Apatiray lalakin anak nen Reuel: di Nahat, Zera, Sama, tan Miza.

¹¹

¹²

¹³

¹⁴ Nananak si Oholibama ya asawa nen Esau na taloran lalaki: di Jeus, Jalam, tan Core. Si Oholibama et anak nen Ana ya anak nen Zibeon.

¹⁵ Sikara yay tribu a say sengeg da et si Esau. Si Elifaz, a pangulowan a lakin anak nen Esau, so sengeg na sarayan tribu: Teman, Omar, Zefo, Kenaz,

¹⁶ Core, Gatam, tan Amalec. Say sengeg da ra yan amin a tribu et si Ada ya asawa nen Esau.

¹⁷ Si Reuel ya anak nen Esau so sengeg na sarayan tribu: Nahat, Zera, Sama, tan Miza. Say sengeg da ra yan amin a tribu et si Basemat ya asawa nen Esau.

¹⁸ Saraya so tribu a say sengeg da et si Esau a say asawa to si Oholibama ya anak nen Ana: Jeus, Jalem, tan Core.

¹⁹ Si Esau so sengeg na amin da ra yan tribu.

²⁰ Saray onaan a totoon nanayam ed dalin na Edom et nankapiga ran tribu tan say sengeg da saray onggendan a kabyangay boleg nen Seir a Horeo: Lotan, Sobal, Zibeon, Ana, Dison, Ezer, tan, Disan.

²¹

²² Si Lotan so sengeg na saray boleg di Hori tan Heman. (Si Lotan et walay biin agi to a si Timna.)

²³ Si Sobal so sengeg na saray boleg di Alvan, Manahat, Ebal, Sefo, tan Onam.

²⁴ Duaray lalakin anak nen Zibeon a di Aya tan Ana. (Sikato ya may Ana ya akalmo na saray ampetang a sobul diad kalawakan nen ipapastol to ray asno nen ama to.)

²⁵ Si Ana so ama nen Dison a sengeg na saray boleg di Hemdan, Esban, Itran, tan Keran. Wala met so biin anak nen Ana a si Oholibama.

²⁶

²⁷ Si Ezer so sengeg na saray boleg di Bilhan, Zaavan, tan Acan.

²⁸ Si Disan so sengeg na saray boleg di Uz tan Aran.

²⁹ Sikara yay tribu na Horeo diad dalin na Edom: Lotan, Sobal, Zibeon, Ana, Dison, Ezer, tan Disan.

³⁰ Kasakbayan a walay ari ed Israel, saraya so arari a nanoley ed dalin na Edom: Bela ya anak nen Beor a taga Dinaba Jobab ya anak nen Zera a taga Bosra Husam a taga Teman Hadad ya anak nen Bedad a taga Avit (tinalo to ray Madianita diad bakal ed bansa na Moab) Samla a taga Masreca Saul a taga Rehobot a gilig na Ilog Baal-hanan ya anak nen Acbor Hadad a taga Pau (si Mehetabel so asawa to ya anak nen Matred tan apo nen Mezahab)

³¹ Si Esau so sengeg na sarayan tribu na Edomita: Timna, Alva, Jetet, Oholibama, Ela, Pinon, Kenaz, Teman, Mibzar, Magdiel, tan Iram. Say pasen a panaayaman na balang sakey a tribu et ningaran met ed ngaran to man a tribu.

37

¹ "Nanayam si Jacob diad dalin na Canaan a nanayaman met nen ama to.

² "Sikato yay istoria na pamilya nen Jacob. Si Jose a mantaoy labimpito so manaasikaso ed saray karniro tan kanding. Kaiba to ray agagi ton lalaki ya anak di Bilha tan Zilpa, ya asawa met ira nen ama to. Indalem tod kinen ama to ray maoges a gagawaen da ray agagi to.

³ "Inararo nen Jacob si Jose nen saray arum ya anak to, ta nianak nen masiken lay Jacob. Inggawaan toy Jose na kawes ya andokey so taklay to.

⁴ "Nen anengneng na saray agagi nen Jose ya inaro ni ne Jacob ya ama ra nen say sikara, aliwa-liway pitotongtong dad sikato lapud kabkabosul da.

⁵ "Aminsan a labi nankogip si Jose, et tinongtong to ya ed saray agagi to.

⁶ "Inkuanto, Dengel kayod kogip ko.

⁷ "Wala tayon amin ed kaalogan a mambeberber na trigo. Inmalagey imay binerber ko tan nantanyareg; saray binerber yo et niliber da tan tinmuek ira.

⁸ "Anto? Abaloan mo sirin manari kad sikami? tepet na saray agagi to. Kanyan lalon binosul da, lapud saray imbagbaga ton nipaakar ed kogip to.

⁹ "Insan nankogip lamet si Jose tan inkuantod saray agagi to, Nankogip ak lamet. Anengneng koy agew, bulan, tan labinsakey a bitewen a tinmuek irad siak.

¹⁰ Imbaga to met yan kogip to ed kinen ama to, et nampasnukan da. Anto tan a kogip? inkuanen ama to. Abaloan mo sirin si inam, saray agagim, tan siak et ondago kamin ondakmomod sika?

¹¹ Mangimon iray agagi nen Jose ed sikato, balet ninudnunot ira ya nen ama to.

¹² Aminsan ya agew, nen saray agagi nen Jose et linma rad Sikem a mampastol na saray karniro nen ama ra,

¹³ inkuanen Jacob ed kinen Jose, Laen mo ra may agagim dimad Sikem a kawalaan dan pampapastolan. Inmebat si Jose, On, ama.

¹⁴ Inkuanen ama to, Nengneng mo no antoy kipapasen da ray agagim tan saray karniro, insan pawil ka dia tan ibagam ed siak. Kanyan pinasiput nen ama to ed Patar na Hebron. Sinmabiy Jose ed Sikem,

¹⁵ tan manliliber-liber diman nen anengneng na sakey a too a nantepet, “Antoy aanapen mo?

¹⁶ Aanapen ko ray agagik a mampapastol na karniro, ebat to. Ibagam pad siak no iner so kawalaan da.

¹⁷ Inkuanto may too, Andi la ra dia. Arengel kon ibabaga ra ya onla rad Dotan. Kanyan tinombuk ira nen Jose ed Dotan, et nalmo to rad man.

¹⁸ Anengneng da nen arawi ni tan kasakbayan to ran naasinggeran, nantotongtongan dan pateyen.

¹⁹ Inkuan na sakey tan sakey ed sikara, Nia la may managkogip.

²⁰ Pateyen tayo, insan tayo ibantak ed bobun so bangkay to. Ibaga tayon pinatey na ayep ed katakelan. Nengnengen tayod satan no antoy pagmaliwan na saray kogip to.

²¹ Nadngel ira nen Ruben, kanyan labay ton iyagel si Jose. Ag tayo ekalay bilay, inkuanto.

²² Ibantak yo labat ed sayay bobun diad kalawakan, balet ag yo didiwiten. Inkuanto ya, pian niagel tod sikara tan nipawil tod kinen ama to.

²³ Nen sinmabiy Jose, inekal day kawes ton andokey so taklay.

²⁴ Insan siningkat da tan imbuntok dad bobun a nakatan.

²⁵ Nen mangakan ira, anengneng day olup na saray Ismaelita a nanlapud Galaad tan mamapaarap irad Egipto. Napnoy beneg na kamilyo ra na pasas tan rikado.

²⁶ Inkuanen Juda ed saray agagi to, Antoy nagunggona tayod pamatey ed agi tayo, insan tayo ibori?

²⁷ Ilako ti lad saray Ismaelita. Diad ontan ag ti la napasakitan; agi tayo ni met, kalamanan tan kadalaan tayo. Inmabubon ira may agagi to.

²⁸ Nen onlalabas iray komirsiantin Madianita, inagwat na saramay sanaagi si Jose, insan da inlakoy duamplon kuartan pilak ed saray Ismaelita; inawit da sirin si Jose ed Egipto.

²⁹ Nen pinmawil ed samay bobun si Ruben tan anengneng ton anggapo lad may Jose, pinilat toy kawes to diad ermen to.

³⁰ Linmad saray agagi to tan inkuanto, Andid man si Jose! Antoy gawaen ko?

³¹ Amatey iray sakey a kanding, tan insawsaw dad dala to so kawes nen Jose.

³² Inyakar da may kawes ed kinen ama ra tan inkuanda, Nalmo mi ya. Nengneng yo pa no kayaryan nen anak yo.

³³ Abibtir to tan inkuanto, On, kawes to! Pinatey na sakey ya ayep ed katakelan. Abingbingkas si Jose ya anak ko!

³⁴ Pinilat nen Jacob so kawes to diad ermen to tan nansolung na sako. Abayag a nanermen lapud si anak to.

³⁵ Dinmagon amin iray anak ton lalaki tan bibii a manligliwad sikato, balet ag to labay so naligliwa tan inkuanto, Anggan wala ak lad pasen a panaayaman da ray inaatey, panermenan ko ni so anak ko. Kanyan ag to tinondaan ya inermenan ko ni so anak ko. Kanyan ag to tinondaan ya inermenan si anak ton Jose.

³⁶ Leleg a nagagawa ra ya, inlako na saramay Madianita si Jose ed kinen Potifar diad Egipto. Sakey ed saray opisyal na ari si Potifar tan pangulo na saray guardia ed palasio.

38

¹ "Ag abayag nanlapud samay impangilakod Jose, tinaynan nen Juda iray agagi to tan linmad kinen Hira a taga baley na Adullam.

² "Akabat tod may sakey a biin Cananea a say ama to et manngaray Sua. Inasawa to, nanlokun,

³ "tan nananak na sakey a laki ya inngaran to an Er.

⁴ "Nanlokun lamet tan nananak na sakey a laki ya inngaran to na Onan.

⁵ "Nananak na kumatlon laki ya inngaran to na Sela. Walad Aczib si Juda nen nianak si Sela.

⁶ "Si Juda inalaan toy Er na asawa a Tamar so ngaran to.

⁷ "Maoges so kagagawa nen Er, kanyan nampasnuk so Katawan tan pinatey to.

⁸ "Inkuanen Juda ed kinen Onan ya agi nen Er, Laka, ta akdulan moy balo ya ayrom. Gawam so kanepegan mon agi na asawa to, pian nawalaan na anak so agim.

⁹ "Balet amta nen Onan ya ag nibilang iran anak to iray nailalak to, kanyan kapag miakdul ed kinen ayro to, iyibung tod dalin so bini to, pian ag nawalaay anak si agi to.

¹⁰ Nampasnuk so Katawan ed sayan ginawa nen Onan, kanyan pinatey to met.

¹¹ Insan inkuanen Juda ed kinen manugang to, Sempet ka nid abung nen amam tan ag ka ni miaasawa ya anggad ibaleg nen anak kon Sela. Inkuanto ya lapud antakot, ta ompan napatey met si Sela, a singa agawad saramay duaran agi to. Sinmempe la sirin si Tamar.

¹² Ag abayag, inatey so asawa nen Juda. Nen asumpal so impanermen to, linmad Timna si Juda tan si kaaro ton Hira a taga Adullam ed pasen a pankakatlian na saray karniro to.

¹³ Walay angikuan ed kinen Tamar, Onlay katolangan mo ed Timna a mankatli na saray karniro to.

¹⁴ Kanyan inekal toy kawes na balo ya akasolung ed sikato, sinakbungan toy lupa to na pandung, tan nanirung ed lolooban na Enaim, sakey a baley ed dalan a mamaarap ed Timna. Kabat to a balolaki la si Sela, balet ag to ni inasaway Tamar.

¹⁵ Nen anengneng nen Juda, abaloan ton sakey a biin marotak, ta sinakbungan toy lupa to.

¹⁶ Inasinggeran tod gilig na dalan tan inkuanto, Gala, ta paliket mo ak. (Ag to amta a si Tamar iman a manugang to.) Inkuanto may bii, Antoy iter mod siak?

¹⁷ Inmebat, Ipawitan ta kay kilaw na kanding. Inkuanto, Labay ko, no itdan mo ak na kaletan ya anggad pakaawat koy kanding.

¹⁸ Antoy iter kod sikan kaletan? tepet nen Juda. Inmebat, Say singsing mon panagmarka, a pati say kadina to, tan say baston a sankalibit mo. Inter ira sirin nen Juda ed sikato. Nanakdul ira, et nanlokun si Tamar.

¹⁹ Sinmempet lay Tamar, inekal toy pandung to, tan insolung to lamet iray kawes na balo.

²⁰ Imbaki nen Juda si kaaro ton Hira a mangiter na samay kanding ya insipan to tan mangala na samay kaletan ya inter to, balet ag naalmo nen Hira imay bii.

²¹ Tinepet tod pigaran lalaki ed Enaim, Kawalaan to may biin marotak a wadya nen saman ed gilig na dalan? Inmebat ira, Anggapo pa ni dian balut so ontan a bii.

²² Pinmawil ed kinen Juda tan inkuanto, Ag ko naalmo. Inkuan na saray lalakid man ya anggapo nid man a balut so biin marotak.

²³ Inkuanen Juda, Paolyan mo la sirin ya iyatol to ra may inter ko, ta ompan elekan ita na saray totoo. Talagan bayaran ko met ingen, et ag mo met naalmo.

²⁴ Kasumpal na sakey a taloy bulan, walay angikuan ed kinen Juda, Walay piaakdulan nen manugang mon si Tamar, ta malokun. Ingganggan nen Juda, Ipaway yo, insan yo poolan ya anggad ag to ipatey.

²⁵ Nen ipapaway da si Tamar, impaibaga tod kinen katolangan to: Alokunan ak na lakin akankayaryan ed saraya. Nengneng mo ra tan ibagam no siopay akankayaryansayan singsing, a pati kadina to, tan sayan baston.

²⁶ Abirbir ira nen Juda tan inkuanto, Anggapoy kasalanan to, ta ag ko ginaway kanepegan kod sikato. Impaasawak komun ed kinen anak kon Sela. Ag lan balut inakdulan nen Juda si Tamar.

²⁷ Nen asingger lan mananak si Tamar, nalmoan a lasun a lalaki so iyanak to.

²⁸ Nen mampapasakit, impaway na sakey ed sikara so lima to; siningkat na manamyanak imay lima, binerberan to na ambalangan tinebey, tan inkuanto, Sikato yay onaan a pinmaway.

²⁹ Balet ginoyur na samay ogaw so lima to, tan samay agi to la laingen so onaan a pinmaway. Insan inkuanto may manamyanak, Onya manaya so kapapaway mo! Kanyan angaranay Fares.

³⁰ Sinmoblay a pinmaway so agi to, samay walay ambalangan tinebey ed lima to, et angaranay Zara.

39

¹ "Saramay Ismaelita inyakar dad Egipto si Jose tan inlako rad kinen Potifar, sakey ed saray opisyal na ari tan kapitan na saray guardiad palasio.

² "Walad si Jose sa Katawan, kanyan maaligwas so bilay to. Nanayam ed abung na amo ton Egipsio.

³ "Anengneng na amo to a walad si Jose so Katawan, tan maung so pansusumpalay amin a gagawaen to.

⁴ "Makaliliket ed sikato si Potifar, kanyan ginawa to a dilin aripen to. Impasen ton inkargado na abung to tan amin a kayaryan to.

⁵ "Nanlapud saman, binindisionan na Katawan so sankapamilyaan nen Potifar, lapud kinen Jose. Binindisionan na Katawan ya amin iray walad abung to tan amin a walad saray kaalogan to.

⁶ "Impia tod kinen Jose ya amin iray kayaryan to, kanyan anggapoy nepeg ton asikasoen, likud labat ed pampili toy kanen to. Maung ya impanlaman si Jose tan guapo.

⁷ "Ag abayag, naibegan na asawa to may amo to. Kinerew ton manakdul ira,

⁸ "balet ag labay nen Jose tan inkuantod sikato, Anggapoy nepeg ya asikasoen nen amok, lapud wadya ak. Impasen to ak ya inkargado na amin a kayaryan to.

⁹ "Nampara lay pakaoley mi ed sayan abung tan anggapoy ag to inter ed siak, likud ed sika. Ag ko nayarian a gawaen itan a kabandayan, ta mankasalanan ak ed Dios.

¹⁰ Anggaman ya inagew-agew ton kerewen a manakdul ira, ag labay nen Jose.

¹¹ Balet aminsan ya agew nen linmoob ed abung nen Potifar si Jose a manumpal a kimey to, nibanan andi rad may aripen.

¹² Siningkat na samay asawa nen Potifar so saloy na kawes nen Jose tan inkuanto, Akdulan mo ak la. Balet akaokpus si Jose tan batik ed paway; atilak ed lima to may bii so kawes ton kolibemben.

¹³ Nen anengneng ton akabatik ed paway si Jose tan atilak so kawes tod lima to,

¹⁴ tinawag to ray aripen to tan inkuanto, Nengneng yo ya! Eekalan itayoy kagalangan na samay Hebreo ya insempet na asawak. Linmoob ed kuartok tan labay to ak ya akdulan, balet inmeyeg ak na anggaay nayarian ko.

¹⁵ Nen nadngel ton inmeyag ak, batik ed paway, et atilak tod abay ko so kawes to.

¹⁶ Insinup to may kawes, anggad sinmempet so amo nen Jose.

¹⁷ Insan inkuan na samay bii, Samay aripen a Hebreo ya insempet mo dia et linmoob ed kuartok tan papasooten to ak.

¹⁸ Balet nen inmeyag ak, batik ed paway, tan atilak toy kawes to ed abay ko.

¹⁹ Mapalaloy pasnuk nen Potifar,

²⁰ kanyan impaerel toy Jose tan impaikolung to a kaiba to ray priso na ari.

²¹ Balet walad kinen Jose so Katawan tan binindisionan to, kanyan akaliket ed sikatoy inkargadod prisowan.

²² Impasen toy Jose ya inkargado ed amin da ray arum a priso tan amin a nagagawad prisowan.

²³ Anggapo lay sakit na olo to may inkargadoy prisowan ed antokaman a nipiad kinen Jose, ta walay Katawan ed kinen Jose tan pinaaligwas tod amin a gagawaen to.

40

¹ "Ag abayag, nankasalanan ed ari so inkargadoy alak tan say pangulon panadiro ed palasio.

² "Diad pasnuk na arid sikara,

³ "impaipriso to rad abung na kapitan da ray guardia, a diman met so akaiprisoan nen Jose.

⁴ "Abayag irad prisowan, tan samay kapitan impasen toy Jose a mangasikasod sikara.

⁵ "Aminsan a labi, diman ed prisowan, nankogip imay inkargadoy alak tan samay pangulon panadiro; nandomaan iray kogip.

⁶ "Nen linmad sikara si Jose diad kabwasan, anengneng ton nagugunigon ira.

⁷ "Tinepet to, Akin et nengneng yoy nagugunigon ed sayan agew?

⁸ "Inmebat ira, Walay kogip na balang sakey ed sikami, et anggapo diay makapangipatalus. Say Dios so manangipatalus, inkuanen Jose. Ibaga yod siak ira tay kogip yo.

⁹ "Kanyan inkuanto may inkargadoy alak ed palasio, Diad kogip ko, walay tanaman ya ubas ed arap ko

¹⁰ a taloray sanga to. Kapaway na saray bolung, nanrosas, tan aluto ray bunga.

¹¹ Sankabembenan koy kupa na ari, kanyan inalak ira may bungay ubas tan pinespes ko rad kupa, insan ko inter ed ari.

¹² Inkuanen Jose, Niay talus to: saramay taloran sanga kabaliksan day taloran agew.

¹³ Kalabas na taloy agew, ibolus kay ari, pirdonaen to ka, tan ipawil ko kad gendat a kimey mo. Iderew mod sikatoy kupa, a singa gagawaen mo nen sikay inkargado na alak to.

¹⁴ Balet kerewen ko pad sika a no maung lay kipapasen mo et salita mo ak met ed kinen ari, pian natulongan mo ak ya ompaway ed sayan prisowan.

¹⁵ Diay tuay tua, inala ak labat ed dalin da ray Hebreo, tan anggan diad Egipto anggapoy ginawak a makasengeg na kaprisoan ko.

¹⁶ Nen naamtaan na samay pangulon panadiro a maung so impangipatalus nen Jose ed kogip na samay inkargadoy alak ed palasio, inkuanto, Wala met so kogip ko; sankaagtok so taloran pananginay tinapay.

¹⁷ Diad samay pananginan a walad tapew, wadman ya amin so klasiy kakanen a para ari, balet totoktoken na saray manok.

¹⁸ Inmebat si Jose, Niay talus to: saramay taloran pananginay tinapay kabaliksan day taloran agew.

¹⁹ Kalabas na taloy agew, ibolus kay aribalet papotul toy olom! Insan paibitin tod tiken so kabalgan mo, et kanen na saray manok so bangkay mo.

²⁰ Kalabas na taloy agew, nen agew na inkianak na ari, angiparaan na ponsia a para amin ya opisyal to; impaipaway to may inkargadoy alak ed palasio tan samay pangulon panadiro to tan inyarap to rad saray opisyal to.

²¹ Pinapawil to may inkargadoy alak ed gendat a kimey to,

²² balet impapatey to may pangulon panadiro. Agawan amin ira may imbaga nen Jose,

²³ balet ag lan balut anunotan na samay inkargadoy alak si Josealingwanan to lan amimpinsan.

41

¹ "Kalabas na duay taon, kinogip na arid Egipto a sikatoy manalalagey ed pandel na Ilog na Nilo.

² "Kabebekta pinmaway ed ilog so pitoran baka a mararakep tan matataba, tan nankakabkab ira na dika.

³ "Insan pinmaway met so pitoran baka a mapmabeng tan kapokepokel. Inmasingger ira ed saramay onaan a pitoran baka ed pandel na ilog.

⁴ "Insan saramay mapmabeng a baka kinan da ra may matataban baka. Abangon ed satan so ari.

⁵ "Akaogip ni tan nankogip lamet. Pinmaway ed sakey a sengeg so pitoran dawa a maiiyan tan mataktakken.

⁶ "Insan pinmaway met so pitoran dawa ya apa tan amaga ra, lapud adalan ira na dagem a nanlapud kalawakan.

⁷ "Saramay pitoran dawa ya apa inakmun da ra may pitoran maiiyan. Aliing so ari, tan naamtaan ton nankogip.

⁸ "Kaimbuas agunigon, kanyan impaawit to ray amin a salamangkiro tan saray makabat a lalaki ed Egipto. Imbaga tod sikara iray kinogip to, balet anggapoy makapangipatalus ed sikara.

⁹ "Insan samay inkargadoy alak inkuantod ari, Akoen kod sayan agew a nankasalanan ak.

¹⁰ Nen nampasnuk kad siak tan samay pangulon panadiro, impaipriso mo kami ed abung na kapitan da ray guardia.

¹¹ Aminsan a labi, nankogip kami, et nandomaay talus da ra may kogip mi.

¹² Walad may kaiba min sakey a Hebreon malangwer ya aripen na kapitan da ray guardia. Imbaga mid sikato ra may kogip mi, insan to ra impatalus.

¹³ Tinmua ya amin so imbaga to: impawil mo ak ed gendat a kimey ko, balet pinatey mo may panadiro.

¹⁴ Impaawit nen ari si Jose, kanyan nipaway a tampol ed prisowan. Kasumpal ton nambalbas tan nampales, pinmarontal ed ari.

¹⁵ Inkuan na arid sikato, Walay kogip ko, et anggapoy makapangipatalus. Abalitaan kon nayarian moy mangipatalus na kogip.

¹⁶ Inmebat si Jose, Ag ko nayarian, Kagalang kon Ari; balet say Dios so makapangiter na dugan talus na kogip.

¹⁷ Inkuan na ari, Kinogip kon manalalagey ak ed pandel na Ilog na Nilo.

¹⁸ Kabebekta sinmakbit a nanlapud ilog so pitoran baka a mararakep tan matataba, tan nankabkab ira na dika.

¹⁹ Insan sinmakbit met so pitoran baka mapmabeng tan kapokepokel. Sankaaliwaan iran bakan anengneng kod intiron Egipto.

²⁰ Saramay mapmabeng a baka kinan da ra may matataba,

²¹ balet ag nabaloan so impangan da, ta ag met naoman so nengneng da. Abangon ak ed satan.

²² Kinogip ko met ya anengneng kon pinmaway so pitoran dawa a maiiyan tan matatakken.

²³ Insan pinmaway met so pitoran dawa ya apa tan amaga, lapud adalan na dagem a nanlapud kalawakan.

²⁴ Saramay pitoran apa a dawa inakmun da ra may pitoran maiiyan. Imbagak ira yan kogip ko ed saray salamangkiro, balet anggapod sikaray makapangipatalus ed siak.

²⁵ Inkuanen Jose, Saksakey so talus da ra yan duan kogip mo; imbagay Dios ed sika so gawaen to.

²⁶ Saramay pitoran baka a matataba kabaliksan day pitoran taon, tan saramay pitoran dawa a maiiyan kabaliksan da met so pitoran taon; saksakey so kabaliksan da.

²⁷ Saramay pitoran baka a mapmabeng a sinmakbit, tan saramay pitoran dawa ya apa tan amagaan lapud adalan na dagem a nanlapud kalawakan, kabaliksan day pitoy taon a walay eras.

²⁸ Onung na imbagak lad sika, impanengneng na Dios ed sika so gawaen to.

²⁹ Onsabiy pitoy taon a walay inawa ed intiron dalin na Egipto.

³⁰ Kasumpal to ya, ontombuk so pitoy taon a walay eras; nalingwanan ira may maung a taon, ta say eras deralen toy intiron bansa.

³¹ Nalingwanan imay panaon na inawa, ta ontombuk so mapalalon eras.

³² Say impakapidwa na kogip mo kabaliksan to a say Dios tinibokel to lad kanunotan to yan gawaen, tan asingger lan nagawa.

³³ Natan mamili kay sakey a toon makabat tan maisip, tan ipasen mon inkargado ed intiron bansa.

³⁴ Mamili ka met na saray arum ya opisyal a mantipon na kakalima na amin a bungay dalin legan na pitoy taon a daakan so naani.

³⁵ Patipon mon amin iray kakanen legan na saray onsabin maung a taon, tan itdan mo ray pakaoley a mangisinup ed kamalir diad saray siudad, tan pabantayan mo ra.

³⁶ Saray taganon atipon igana ran para saray onsabin pitoran taon a walay eras ed Egipto, pian ag naerasan iray totood Egipto.

³⁷ Sayan plano inabubonan na ari tan saray opisyal to,

³⁸ tan inkuantod sikara, Anggapo lay naalmo tayon magmaung a too nen say si Jose, ta walad sikato so ispiritu na Dios.

³⁹ Inkuan na ari ed kinen Jose, Impanengneng na Dios ed sika yan amin, kanyan anggapoy ontalonad sika ed kakabatan tan kaisipan.

⁴⁰ Ipasen ta kan inkargado ed bansak, tan onuren na totook iray amin a ganggan mo. Sikay onkumadwad siak ed pakaoley.

⁴¹ Toroen ta ka natan a gobirnador na intiron Egipto.

⁴² Inekal na ari so singsing to a panagmarka, insan to insolung ed gamet nen Jose. Sinolungan toy kawes a linen, tan initdan toy kadinan balituk a para beklew to.

⁴³ Impaikana to ed kinen Jose so kumadwan karwahi to, insan saray guardiad palasio nambabando rad onaan to, Paliis kayo! Paliis kayo! Onya so inkatoro nen Jose a gobirnador ed intiron Egipto.

⁴⁴ Inkuan na ari ed sikato, Siak so ari, sikay onkumadwa, et anggapod intiron Egipto so makagawa na antokaman no anggapoy abuloy mo.

⁴⁵ Initdan toy Jose na balon ngaran: Zafenat-panea. Initdan to met na asawa a si Asenat ya anak nen Potifera a pari ed siudad na Heliopolis. Mantaoy talomplo si Jose nen ginmapon manlingkur ed ari na Egipto. Nampatanir ed ari tan nanliber-liber ed intiron Egipto.

⁴⁶

⁴⁷ Legan na pitoy taon na inawa, amayamay so naani.

⁴⁸ Tinipon nen Jose ray amin a naani legan na saramay pitoy taon, tan inkamalir to rad saray siudad. Diad balang siudad tinipon to ray naani ed kaalogan a kaabay to.

⁴⁹ Singa karakel na buer ed dayat so atipon to. Diad karakel da, tinondaan to la ran sinukat.

⁵⁰ Kasakbayan a sinmabi ra may taon na eras, awalaay Jose na duaran anak a lalaki diad kinen asawa ton Asenat.

⁵¹ Inkuanto, Impalingwanan na Dios iray amin a kairapan ko a pati say pakakailiw kod pamilya na amak; kanyan inngaran to na Manases imay pangulowan ya anak to.

⁵² Inkuanto met, Say Dios initdan to ak na anak ed sayan dalin a paniirapan ko; kanyan inngaran to na Efraim imay kumadwan anak to.

⁵³ Nansamput ira may pitoy taon na inawa ed Egipto,

⁵⁴ tan ginmapo lay pitoy taon na eras, onung na samay imbaga nen Jose. Walay eras ed arum a bansa, balet walay nakan na saray totoo ed intiron Egipto.

⁵⁵ Nen anggapo lay nakan da ray Egipsio, linma rad ari. Inkuantod sikara, Laka yod kinen Jose tan gawa yoy ibaga to.

⁵⁶ Nen kinmayat so eras ed intiron bansa, inlokas nen Jose iray amin a kamalir tan nilakoan to ray Egipsio, ta mapalalo lan tuay eras.

⁵⁷ Linmad Egipto iray katoowan ed intiron mundo ta nansaliw iray tagano ed kinen Jose, lapud mapalalo lay eras ed inerman a pasen.

42

¹ "Nen nadngelan nen Jacob a walay trigo ed Egipto, inkuantod saray lalakin anak to, Akin et ag kayo ongalaw?

² "Abalitaan ko a walay trigo ed Egipto; laka yod man a manaliw, pian ag itayo ompatey ed eras.

³ "Kanyan linmad Egipto ray samploran agagi nen Jose ed ama, ta manaliw iray trigo.

⁴ "Balet ag imbaki nen Jacob si Benjamin ya agin peteg nen Jose, ta ompan walay maoges a nagawad sikato.

⁵ "Saray anak nen Jacob et wala ray kaiba ran manaliw met na trigo, ta walay eras ed Canaan.

⁶ "Si Jose, lapud sikatoy gobirnador na Egipto, so manlalako na ilik ed saray totood intiron mundo. Sinmabi ra may agagi to, tan dinmakmomo rad sikato ya anggad dalin so lupa ra.

⁷ "Nen anengneng nen Jose ira may agagi to, abirbir to ra, balet impanengneng ton singa ag to ra kabat. Masebeg a tinepet tod sikara, Iner so nanlapwan yo? Nanlapu kamid Canaan; linma kami dian manaliw na tagano, ebat da.

⁸ "Abirbir ira nen Jose, balet ag da abirbir.

⁹ "Anunotan to ra may kogip ton nipaakar ed sikara, et inkuanto, Ispia kayo; linma ki dian mannengneng no antoy kakapoyan na bansa mi.

¹⁰ Andi, katawan, ebat da. Linma kami dia, sikamin aripen mo, ta manaliw kamiy tagano.

¹¹ Sanaagi kamin amin. Aliwa kamin ispia; maung kamin totoo.

¹² Inkuanen Jose ed sikara, Andi! Linma ki dian mannengneng no antoy kakapoyan na bansa mi.

¹³ Inkuanda, Labindua kamin amin a sanaagi; saksakey so ama mi a wala natan ed Canaan. Inatey lay sakey ya agi mi tan atilak ed ama mi so sankayogtanan.

¹⁴ Duga may kuanko, ebat nen Jose. Ispia kayon tua.

¹⁵ Onyay panubok kod sikayo: Isambak ed ngaray ari ya ag kayo dia makaalis, anggad nanengneng ko dia so yogtan ya agi yo.

¹⁶ Ompawil so sakey ed sikayo a mangawit ed sikato dia. Guardiaan iray natilak ed sikayo, anggad nasubok no tuay ibabaga yo. Ta no aliwan tua, diad ngaran na mabilay ya ari, peteg ya ispia kayo.

¹⁷ Kasumpal to ya, impaipriso to ran taloy agew.

¹⁸ Diad kumatlon agew, inkuanen Jose ed sikara, Sakey ak a toon walay takot tod Dios, kanyan ag ta kayo papatey no gawaen yoy ibagak.

¹⁹ Pian napaneknekan ya aliwa kayon matila, natilak so sakey ed sikayo ed prisowan a nanayaman yo; sikayo ran arum, nayarian yo lay onsempet, ta iyakar yod saray narasan a pamilya yo so trigo a sinaliw yo.

²⁰ Insan awit yo dia tay yogtan ya agi yo. Napaneknekan ed satan ya ag kayo mantitila, et ag ta kayo papatey. Inmabuloy irad saya,

²¹ tan inkuan na sakey tan sakey ed sikara, Nankasalanan itayo ed samay ginawa tayod agi tayo; anengneng tayoy baleg ya irap to nen akikasid sikatayo, balet ag tayo dinengel. Kanyan wala tayo natan ed sayan irap.

²² Inkuanen Ruben, Imbagak ed sikayon ag yo didiwiten, et ag yo ak met dinengel. Natan nadudusa itayo, lapud impatey to.

²³ Atalusan nen Jose so ibabaga ra, balet ag da amta, ta misasalita rad sikato diad panamegley na sakey a manangipatalus.

²⁴ Inmarawid sikara si Jose tan nanakis. Nen nayarian to lay mansalita, pinmawil, pinili toy Simeon, tan impaitaker ton sankanengneng da.

²⁵ Ingganggan nen Jose a panoen na trigo ira may sako na agagi to, ipawil so kuarta na balang sakey ed dilin sako to, tan itdan iray kakanen a para panakar da. Agawa ra yan amin.

²⁶ Inlogan na saramay sanaagi ed beneg na saray asno so trigo a sinaliw da, insan la ra sinmiput.

²⁷ Diad pasen a nampalabasan day labi, nilokasan na sakey ed sikara so sako to, ta pakanen toy asno to, et nalmo tod tapew na kargay sako imay kuartan imbayar yo.

²⁸ Nipawil may kuartak, ineyag tod saray agagi to. Wadyad sakok. Apagaan ira tan diad takot da nantetepetan ira, Anto yan ginawa na Dios ed sikatayo?

²⁹ Kasabi rad Canaan, imbaga rad kinen ama ra so amin ya agawad sikara:

³⁰ Masebesebeg ya akitongtong ed sikami so gobirnador na Egipto, tan papalsaan to kamin maniispia ed bansa to.

³¹ Aliwa kamin ispia, ebat mi, maung kamin totoo.

³² Labindua kamin amin a sanaagi, tan saksakey so ama mi. Inatey lay sakey ya agi mi, tan walad Canaan a kaiba nen ama mi so sankayogtanan.

³³ Inmebet imay too, Onyay pakaamtaan ko no tagalan maung kayon totoo: Ontilak so sakey ed sikayo; saray arum onsempet la ran mangawit na ilik ed saray narasan a pamilya yo.

³⁴ Awit yo diay sankayogtanan ya agi yo. Naamtaan kod satan ya aliwa kayon ispia, no ag ingen maung a totoo; ipawil kod sikayoy agi yo, tan nayarian yo diay manayam tan mannigosio.

³⁵ Nen inekal day karga na sako ra, nalmo na balang sakey so supot na kuarata to; nen anengneng da may kuarta, asabian ira tan si ama ra na takot.

³⁶ Inkuanen ama ra, Labay yon naandin amin iray anak ko? Anggapo lay Jose; anggapo met lay Simeon; tan natan labay yo met ya alaey Benjamin. Siak so maniirap!

³⁷ Inkuanen Ruben ed ama to, No ag ko nipawil ed sikayo si Benjamin, nayarian yon pateyen iray duaran anak kon lalaki. Imatalek yod siak; asikasoen ko tan ipawil kod sikayo.

³⁸ Balet inkuanen Jacob, Ag nayarin milad sikayoy anak ko; inatey lay agi to, tan sikato labat lay atilak. Nayarin walay maoges a nagawad sikato diad dalan. Masiken ak la; ompatey ak ed ermen ya iter yod siak.

43

¹ "Linmoor so eras ed Canaan.

² "Nen naoput la na pamilya nen Jacob imay trigo a nanlapud Egipto, inkuanen Jacob ed saray anak ton lalaki, Pawil kayo, ta manaliw kayoy daiset a nakan tayo.

³ "Inkuanen Juda ed sikato, Impurpurek to may too ya ag kami naawat ed arap to no ag mi kaibay agi mi.

⁴ "No onabuloy kayon awiten miy agi mi, onla kamin manaliw na tagano a para sikayo.

⁵ "No ag kayo, ag kami met la onla, ta imbaga to may too ya ag kami naawat ed arap to no ag mi kaibay agi mi.

⁶ "Inkuanen Jacob, Akin et initdan yo ak na ontan lan gunigon diad impangibaga yon wala niy agi yo?

⁷ "Inmebat ira, Ag tinondaan na samay too a tinepet so nipaakar ed sikami tan say pamilya tayo, Mabilay niya ama yo? Wala niy agi yo? Nepeg min ebatan iray tepet to. Panoy pakaamta min paawit toy agi mi?

⁸ "Inkuanen Juda ed kinen ama to, Ipila yod siak si Benjamin, et onla kami lan tampol. Diad satan anggapod sikatayoy ompatey ed eras.

⁹ "Ipostak so bilay ko tan siak so makaoley ed sikato. No ag ko nipawil a mabilay ed sikayo, siak so mangakoy tetel ed anggad angga.

¹⁰ No ag kami komun naabalan abaybayag, akakar tan akapawil kami la ya amidwa.

¹¹ Inkuanen ama ra, No ontan so nepeg a nagawa, onyay gawa yo sirin: Mangawit kayoy sankamaungan iran bungay dalin, ikarga yod saray balkut yo, tan irigalo yo rad satay gobirnador: pigaran pasas, daiset a dilo, saray rikado, alponsigo, tan almindra.

¹² Mangawit kayo met na kuartan mamidway karakel nen samay onaan ya inawit yo, ta nepeg yon ipawil imay kuartan walad saray sako yo. Nayarin lingo labat iman.

¹³ Awit yo sirin si agi yo, insan ki la onla.

¹⁴ Iyabuloy komun na Dios a Makapanyarin-amin a kasian to kayo tay too, pian ipawil tod sikayo si Benjamin tan samay sakey ya agi yo. Para say siak, no nepeg a naandid siak iray anak ko, sipaparaan ak.

¹⁵ Kanyan saramay sanaagi inala da ra may irigalo ra tan samay kuarta, insan la ra linmad Egipto a kaiba ray Benjamin. Kasabi ra, pinmarontal irad kinen Jose.

¹⁶ Nen anengneng nen Jose a kaiba ray Benjamin, inkuantod aripen ya inkargadod abung to, Itagar mod abung ira yan totoo. Mirongo rad siak no ogto, kanyan mamatas kay sakey ya ayep tan iparaan mo.

¹⁷ Sinumpal to may aripen so pagagawad sikato, tan intagar tod abung nen Jose ira may sanaagi.

¹⁸ Nen oonla la rad abung, natatakot ira tan inkuandad sikaran dili, Niaakar kami dia lapud samay kuartan nipawil ed saray sako mi nen onaan ya inyakar mi dia. Biglaan da kamin dogpaan, alaen da ray asno mi, tan gawaen da kamin aripen to.

¹⁹ Nen wala rad puirtay abung, inkuandad samay inkargado,

²⁰ Wala pay ibaga mid sika. Linma kami la dian analiw na tagano.

²¹ Nen ompapawil kami la, tinmonda kamin nampainawa, et nen nilokasan mi ray sako mi, nalmoy balang sakey ed sikami so kuarta to. Natan, inawit mi ra dian ipawil ed sika.

²² Wala met so awit min kuartan panaliw mi na tagano. Ag mi amta no siopay angipawil ed saray sako mi na samay kuarta.

²³ Inkuanto may aripen, Ag kayo mapaga. Ag kayo natatakot. Angangko say Dios yo, say Dios na ama yo, so angipawil na kuarta yo. Inawat kod saman so bayar yo. Insan inyakar tod sikara si Simeon.

²⁴ Samay aripen inyakar tod abung ira may sanaagi. Initdan to ray danum a panoras day sali ra, tan pinakan to ray asno ra.

²⁵ Imparaan da ra may rigalon iter dad kinen Jose no onsabid kaagewan, ta nibagad sikaran mirongo rad sikato.

²⁶ Nen sinmabiy Jose, inyakar dad sikato ra may rigalo ra, tan dinmakmomo ra ed arap to ya anggad dalin so lupa ra.

²⁷ Tinepet toy kipapasen da, insan to ni tinepet, Komusta may ama yon asalita yod siak? Mabilay ni tan maksil ni?

²⁸ Inmebat ira, Say ama mi a mugmon aripen mo et mabilay ini tan maksil ni. Insan tinmalimukor ira tan tinmuek irad sikato.

²⁹ Nen anengneng nen Jose si Benjamin ya agi ton peteg inkuanto, Sikato ya sirin so sankayogtanan ya agi yo ya asalita yod siak. Bindisionan ka komuy Dios, anak ko.

³⁰ Insan biglan tinmaynan si Jose, ta napnoy puso to na panangarod kinen agi to. Ngalngali la makaakis, kanyan linmad kuarto to tan diman nanakis.

³¹ Kasumpal ton nandilamus, pinmaway, binembenan toy inkasikato, tan ingganggan ton isaklang da la ray lamisaan.

³² Sakey a lamisaan so anganan nen Jose, tan sananey so anganan da ray agagi to. Sananey met so anganan da ray Egipsio a mangakan diman, ta ipapasen dan ag onkana ray Hebreo a mirongod sikara.

³³ Akayorung iray sanaagi ed lamisan a walad arap nen Jose, manlapud pangulowan ya anggad yogtan. Nen anengneng da so pasen ed lamisaan na balang sakey ed sikara, nannenengnengan ira diad pankelaw da.

³⁴ Nanlapud lamisaan nen Jose so niparongod sikara; si Benjamin maminliman karakel so niiter ed sikato nen saramay arum. Angan tan inminom ira a kaiba ray Jose, tan ontan lay likeliket da.

44

¹ "Ingganggan nen Jose imay aripen ya inkargadoy abung to, Panom iray sako ra na tagano a nayarian dan sakbaten, tan ipawil mod tapew na kargay sako so kuarta na balang sakey ed sikara.

² "Ikargam ed tapew na kargay sako to may yogtan so kupak a pilak, tan say kuarta to. Inonur na aripen so ganggan ed sikato.

³ "Nen ontombuk a kabwasan, asakbay a sinmiput ira may sanaagi ya akakabayo rad asno ra.

⁴ "Nen ag ni ra akaarawid siudad, inkuanen Jose ed samay aripen ya inkargadod abung to, Abot mo ra man a totoo tan tepet mod sikara, Akin et kaogsan so imbales yod kamaungan nen amok?

⁵ "Akin et tinakew yoy pilak a kupa to? Sikato man a kupa so paniinoman to tan pampaparlesan to. Balbaleg a kaogsan so ginawa yo!

⁶ "Nen nabot ira na samay aripen, inolit to ra man a salita.

⁷ "Inmebat ira, Antoy labay mon ibaga diad pansasalitam na ontan? Sambaan mi ya ag mi ginawa tay ibabagam.

⁸ "Kabat mo ya impawil mid sika manlapud Canaan imay kuartan nalmo mi ed tapew na saray karga na sako mi. Akin et manakew kami na pilak o balituk ed abung na amom?

⁹ "No naalmod sakey ed sikami itay kupan abalang, nepeg toy napatey tan magmaliw ya aripen mo iray arum ed sikami.

¹⁰ Inkuanto, Onabuloy ak ed satan, balet say pakalmoan labat na kupa so magmaliw ya aripen ko, tan saray arum nayarian da lay onla.

¹¹ Kanyan tampol ya inyabeba dad dalin iray sako ra, insan da ra nilolokasan.

¹² Nananap a maung imay aripen nen Jose; pinalapu tod sankapangulowanan ya anggad sankayogtanan, et nalmod sako nen Benjamin imay kupa.

¹³ Pinipilat na saramay sanaagi iray kawes da a pangipanengneng day ermen da, impapawil da ra may sako ra ed beneg na saray asno ra, insan ira pinmawil ed siudad.

¹⁴ Nen sinmabid abung nen Jose si Juda tan saray agagi to, wadman niy Jose. Dinmakmomo rad arap to,

¹⁵ tan inkuanto, Antoy ginawa yo? Ag yo ta amta a siak a toon manoley et naerel ta kayo diad panamegley na panagparles?

¹⁶ Antoy nibaga mi? kuanen Juda. Panoy pankatonungan mi? Panoy pakapangipanengneng min anggapoy kasalanan mi? Say Dios a dili so amapapaway ed kasalanan mi. Natan, aripen yo kami lan amin, aliwan saman labat so akalmoay kupa.

¹⁷ Inkuanen Jose, Andi, ag ko tan balut gawaen! Saman labat so akalmoay kupa so magmaliw ya aripen ko. Saray arum ed sikayo, nayarian yo lay onsempet ed kinen ama yo.

¹⁸ Inmasingger si Juda ed kinen Jose tan inkuanto, Abuloyan mo ak pan misalitad sika. Ag ka komun mamapasnuk ed siak, O katawan; kaparam lay ari.

¹⁹ Tinepet mod sikami no walay ama mi o agi mi.

²⁰ Inyebat min walay ama min masiken la tan sakey ya agi min sankayogtanan a nianak nen matakken lay ama mi. Inatey lay agi to yan ogaw tan sikato labat so mabilay ya anak nen ina to, kanyan ontan lay panangarod sikato nen ama mi.

²¹ Ingganggan mon awiten mi dia, pian nanengneng mo,

²² tan inyebat min mairap ya iyarawid kinen ama to, ta ompan ipatey ya nen ama to.

²³ Inkuan mo balet ya ag kami la makapiarapan ed sika no ag mi kaiba.

²⁴ Nen pinmawil kamid kinen ama mi, sinalita mid sikaray imbagam.

²⁵ Insan inkuanda, Pawil kayo, ta manaliw kayoy daiset a tagano tayo.

²⁶ Inmebat kamin ag kami makapawil; ag kami makapiarapan ed sika no ag mi kaibay sankayogtanan ya agi mi.

²⁷ Inkuandad sikami, Kabat yon dogduaray inanak nen Raquel ya asawak.

²⁸ Naandi lay sakey; nayarin say laman to et binibingkas na ayep ed katakelan, ta ag ko nin balut anengneng nanlapud saman.

²⁹ No alaen yod siak lamet yay agi yo, et walay nagawad sikato, ompatey ak ed ermen ya iter yod siak, siak a masiken la.

³⁰ Ompatey si ama mi no nanengneng ton ag ko kaibay ogaw diad ipawil mi. Singa nansoldungan so pait da. Diad kinamasiken da la, ipatey da yan ermen ya iter mid sikara.

³¹

³² Sakey ni, impotikak ed kinen amak so bilay ko para sayan ogaw. Imbagak ed sikara a no ag ko nipawil ed sikara yan ogaw, akoen koy tetel ed intiron bilay ko.

³³ Natan sirin, siak lay ontilak ya aripen mo; papawil mo a kaiba to ray agagi to.

³⁴ Ta panoy ipawil kod kindi amak no ag ko kaiba? Ag ko nitepel ya ipasakbat yan gunigon ed kindi amak.

45

¹ "Ag la napokpokan nen Jose so liknaan to diad arap na saray aripen to, kanyan pinapaway to ran amin. Anggapoy atilak ed saramay aripen to nen impaamta toy sikaton dili ed saramay agagi to.

² "Diad kasil na pansibsibek to, arengel na saray Egipsio, et imbalita ra ya ed ari.

³ "Inkuanen Jose ed saramay agagi to, Siak si Jose. Mabilay nin tuay amak? Balet diad ontan lan takot da ra may agagi to, ag ira makaebat.

⁴ "Insan inkuanen Jose ed sikara, Asingger kayo pa. Sinmingger ira, insan inkuanto, Siak si agi yon Jose ya inlako yod Egipto.

⁵ "Ag kayo mapaga tan ag yo tetetelen so sikayon dili lapud inlako yo ak dia. Ta say Dios so angibakid siak dia ya onaan nen say sikayo, pian mambilay iray totoo.

⁶ "Kumadwa yan taon labat na eras; wala niy limaran taon ya ag nayariy mambaka tan anggapoy naani.

⁷ "Say Dios so angibakid siak ya onaan nen say sikayo, pian nilaban kayo diad panamegley na sayan makapakelaw ya inkagawa, tan mambilay kayo tan saray kabyangay boleg yo.

⁸ "Kanyan aliwan sikayo so angibakid siak dia, no ag ta say Dios. Ginawa to ak a sanktageyan ya opisyal na ari. Siak to inkargado ed intiron bansa to; siak so manoley ed intiron Egipto.

⁹ "Natan sirin, ganatan yoy ompawil ed kindi ama tayo tan ibaga yod sikara yan papaibaga nen anak dan si Jose, Say Dios impagmaliw to ak a manoley ed intiron Egipto; dago kayon tampol ed siak.

¹⁰ Nayarian yoy manayam ed dalin na Gosen, pian asingger kayod siaksikayo, saray anak yo, saray apo yo, saray karniro yo, saray kanding yo, saray baka yo, tan saray arum nin kayaryan yo.

¹¹ No wala kayod Gosen, naasikaso ta kayo. Wala niy limay taon na eras, et ag ko labay a naerasan kayo, saray pamilya yo, tan saray ayayep yo.

¹² Intuloy nen Jose ya inkuan, Natan amin yo, pati sika Benjamin, nanenengneng yo a siak a talaga si Jose.

¹³ Ibaga yod kinen amak so ontan lan pakapanyarik dia ed Egipto, tan ibaga yoy amin ya anengneng yo. Insan ganatan yon iyakar ira dia ed siak.

¹⁴ Nilakap toy Benjamin ya agi to tan nilakap met nen Benjamin, insan ira manakis a dua.

¹⁵ Manakakis ni nen nilalakap tan inaanguban ton sansakey iray agagi to. Kasumpal to ya, akitongtong ed sikato ray agagi to.

¹⁶ Nen sinmabid palasio so balita a sinmabi ray agagi nen Jose, akaliket so ari tan saray opisyal to.

¹⁷ Inkuantod kinen Jose. Ibagam ed saray agagim a kargaan da ray beneg na ayayep da, onsempet irad dalin na Canaan,

¹⁸ tan awiten day ama ra tan saray pamilya ra no ompawil ira dia. Iter kod sikaray sankamaungan a dalin ed Egipto, pian onsoluk so taganon pambilay da.

¹⁹ Ibagam met ed sikara a mangawit iray pigaran kariton a manlapud Egipto, pian walay naloganan na saray kaasawaan da tan saray ankelag nin anak da. Paawit mo diay ama ra, no ompawil ira.

²⁰ Ag da kapagaan ya itilak iray kayaryan da, ta naitdan ira na sankamaungan a dalin ed Egipto.

²¹ Sinumpal na saray anak nen Jacob so nibagad sikara. Initdan ira nen Jose na pigaran kariton, onung ed ganggan na ari, tan say nakan ed pambiahi ra.

²² Initdan to met so balang sakey ed sikara na kawes ya ipales da, balet initdan toy Benjamin na talon lasus a kuartan pilak tan limaran kawes.

²³ Impawitan toy ama to na samploran asno a napnoy beneg da na sankamaungan iran bungay dalin ed Egipto, tan samploran asno a napnoy beneg da na trigo, tinapay, tan arum ni ran kakanen a para pambiahi nen ama to.

²⁴ Pinasiput to ray agagi to tan binilin to ra, Ag kayo mansesebeg ed dalan.

²⁵ Tinmaynan ira sirin ed Egipto tan sinmempet irad kinen ama ran Jacob ed Canaan.

²⁶ Mabilay niy Jose! inkuandad sikato. Sikatoy manooley ed intiron Egipto! Ag akaskasel si Jacob, tan ag to ra panisiaan.

²⁷ Balet nen asalita rad sikaton amin iray imbaga nen Jose ed sikara, tan anengneng to ra may kariton ya impaawit nen Jose a loganan to, kinmasil so liknaan to.

²⁸ Insan inkuanto, Mabilay niy anak kon Jose! Anto niy kerewen ko? Nakaukolan ya onla ak, pian nanengneng ko kasakbayan na ipatey ko.

46

¹ "Binalkut nen Jacob so amin a kayaryan to, linmad Beer-seba, tan diman angisaklang na saray bagat ed Dios nen ama ton Isaac.

² "Akisalitay Dios ed sikato diad panamegley na sakey a pasingayew ed labi tan inkuanto, Jacob, Jacob! Wadya ak! Anto man? ebat to.

³ "Siak so Dios, say Dios nen amam, inkuanto. Ag ka natatakot ya onlad Egipto; gawaen kod man a baleg a bansa iray kabyangay boleg mo.

⁴ "Ibaan ta kayod man, tan ipawil kod sayan dalin iray kabyangay boleg mo. Walad diking moy Jose no ompatey ka.

⁵ "Manlapud Beer-seba, nambiahi si Jacob. Saramay anak to inlogan day Jacob, saray ogogaw, tan saray kaasawaan da ed saramay kariton ya impawit na arid Egipto.

⁶ "Inawit da ray ayayep da tan amin a bengatlan akayaryan dad Canaan, tan linma rad Egipto. Inawit nen Jacob ya amin iray kabyangay boleg to:

⁷ "saray anak ton lalaki tan bibii, saray apo ton lalaki tan bibii.

⁸ "Sikara yay kabyangay pamilya nen Jacob ya akilad sikato ed Egipto: si Ruben a pangulowan ya anak to,

⁹ "tan saray lalakin anak nen Ruben: Hanoc, Fallu, Hezron, tan Carmi;

¹⁰ si Simeon tan saray anak ton lalaki: Jemuel, Jamin, Ohad, Jakin, Zohar, tan Saul ya anak na biin Cananea;

¹¹ si Levi tan saray anak ton lalaki: Gerson, Coat, tan Merari;

¹² si Juda tan saray anak ton lalaki: Er, Onan, Sela, Fares, tan Zara (di Er tan Onan inatey irad Canaan); saray lalakin anak nen Fares et di Hezron tan Hamul;

¹³ si Isacar tan saray anak ton lalaki: Tola, Pua, Job, tan Simron;

¹⁴ si Zabulon tan saray anak ton lalaki: Sered, Elon, tan Jahleel.

¹⁵ Sikara yay anak nen Jacob ed kinen Lea a nianak irad Mesopotamia. Kaiba ra met si Dina, say marikit ya anak nen Jacob. Talomplo tan talon amin iray kabyangay boleg nen Jacob ed kinen asawa ton Lea.

¹⁶ Si Gad tan saray lalakin anak to: Zefon, Hagui, Suni, Ezbon, Eri, Arodi, tan Areli;

¹⁷ si Aser tan saray lalakin anak to: Emna, Isva, Isvi, Beria, tan Sera ya agi ran bii. Saray lalakin anak nen Beria: Heber tan Malkiel.

¹⁸ Sarayan labinanem et kabyangay boleg nen Jacob ed kinen Zilpa, samay aripen ya inter nen Laban ed kinen Lea ya anak to.

¹⁹ Duaray lakin anak nen Raquel ya asawa nen Jacob: di Jose tan Benjamin.

²⁰ Diad Egipto duaray anak nen Jose, di Manases tan Efraim, ed kinen Asenat ya anak nen Potifera a pari ed Heliopolis.

²¹ Saray lalakin anak nen Benjamin sikara di Bela, Beker, Asbel, Gera, Naaman, Ehi, Ros, Mupia, Hupim, tan Ard.

²² Sarayan labinapat so kabyangay boleg nen Jacob ed kinen Raquel.

²³ Si Dan tan say anak ton laki a si Husim.

²⁴ Si Neftali tan saray lalakin anak to: Jazeel, Guni, Jezer, tan Silem.

²⁵ Sarayan pitoran lalaki so kabyangay boleg nen Jacob ed kinen Bilha, samay aripen ya inter nen Laban ed kinen Raquel ya anak to.

²⁶ Anemaplo tan anem ya amin iray anak tan apo nen Jacob a linmad Egipto, likud ed saray asawa na saray anak to.

²⁷ Duaray anak nen Jose ed Egipto, kanyan pitomplon amin so kabyangay pamilya nen Jacob a linmad Egipto.

²⁸ Pinaona nen Jacob si Juda, ta kerewen tod Jose ya abeten to rad Gosen. Kasabi ra,

²⁹ linmogan si Jose ed karwahi to, insan linmad Gosen a mangabet ed kinen ama to. Kaasingger to, nilakap to, tan abayag a nanakis.

³⁰ Inkuanen Jacob ed kinen Jose, Sipaparaan ak lan ompatey, natan ta anengneng ta ka tan amtak a mabilay ka ni.

³¹ Insan inkuanen Jose ed saray agagi to tan amin a kabyangay pamilya nen ama to, Onla ak, ta ibagak ed ari a sinmabid siak iray agagik tan amin a kabyangay pamilya na amak a manaayam irad Canaan.

³² Ibagak ed sikato a pumapastol kayo tan managkomponi kayoy ayayep; ibagak met ya inawit yo ra diay karniro yo, saray baka yo, tan amin a kayaryan yo.

³³ No tawagen kayoy ari tan tepeten to no antoy anapan yo,

³⁴ ag yo lilingwanan ya ibagan managkomponi kayoy ayayep a nanlapud gapo, a singa saray lalaki yo. Diad ontan, panayamen to kayod dalin na Gosen. Imbaga ya nen Jose, ta ag labay a kaamung na saray taga Egipto iray pumapastol.

47

¹ "Kanyan intagar nen Jose so limara ed saray agagi to tan linma rad ari. Inkuanen Jose ed sikato, Sinmabin nanlapud Canaan ira di amak tan saray agagik a kaiba da ray karniro ra, saray baka ra, tan amin a kayaryan da. Wala ra natan ed Gosen.

² "Imparontal tod ari ira may agagi to.

³ "Inkuan na ari, Antoy anapan yo? Inmebat ira, Pumapastol kami, a singa saray atateng mi.

⁴ "Linma kami dian manayam ed sayan bansa, ta lapud mapalalon eras ed Canaan, anggapoy pangipastolan mid saray karniro mi. Abuloyan yo kami pan manayam ed Gosen.

⁵ "Inkuan na ari ed kinen Jose, Natan ta sinmabi lay amam tan saray agagim,

⁶ "tan walad silong na pakayarim so intiron dalin na Egipto, panayam mo rad Gosen a sankamaungan a parti na bansa. No wala ra bilang so lalakin marunong a mankomponiy ayep, ipasen mo ran inkargado ed saray dilin ayayep ko.

⁷ "Insan inyakar nen Jose ed ari so ama to. Si Jacob initdan toy ari na bindision to.

⁸ "Tinepet na ari, Pigara lay taon mo?

⁹ "Inmebat si Jacob, Sanlasus tan talomplon taon lay impanbilay kon alis-alis so panayaman. Antikey tan mairap so bilay ko, ya aliwan singa saray atateng ko ya andokey so impanbilay da ya alis-alis met so nanayaman da.

¹⁰ Kasakbayan ya inmalis si Jacob binindisionan to may ari, insan la linma.

¹¹ Si Jose impanayam tod Egipto si ama to tan saray agagi to, tan inter tod sikaray sankamaungan a dalin a walad abay na siudad na Rameses, onung na ingganggay ari.

¹² Initdan met nen Jose na pambilay si ama to, saray agagi to, tan amin da ray arum a kabyangay pamilya nen ama to, pati say sankayogtanan ya anak.

¹³ Dinmalan so mapalalon eras ta anggapoy nakan ed amin a pasen, et kinmapoy iray totood Egipto tan Canaan.

¹⁴ Kapag manaliw iray trigo, tiponen nen Jose so kuarta tan iyakar tod palasio.

¹⁵ Nen naoput lad Egipto tan Canaan so kuarta, linmad kinen Jose ray taga Egipto tan inkuanda, Itdan mo kamiy nakan! Ag mo kami papaolyan ya ompatey. Anggapo lay kuarta mi.

¹⁶ Inmebat si Jose, Awit yo ra diay ayayep yo; sikara lay ibayar yod tagano ya iter kod sikayo, no anggapo lay kuarta yo.

¹⁷ Kanyan inawit dad kinen Jose iray ayayep dan kabayo, karniro, kanding, baka, tan asno. Diad saman a taon, initdan to ray nakan a salat na saray ayayep da.

¹⁸ Nen ontombuk a taon linma rad sikato tan inkuanda, Ag mi iyamut ed sika ya anggapo lay kuarta mi; pati saray ayayep mi et kayaryan mo la ra. Anggapo lay nakdaan ya iter mid sika likud ed saray laman mi tan saray dalin mi.

¹⁹ Ag mo kami papaolyan ya ompatey. Gawam so manepeg a polaing! Ag mo aabuloyan a nataynan iray kaalogan mi. Itdan mo kami lay nakan, ta sikami tan saray dalin mi lay ombayar. Magmaliw kamin aripen na ari, tan kayaryan to la ray dalin mi. Itdan mo kami na trigo a pambilay mi tan say bini ya itanem mid kaalogan mi.

²⁰ Sinaliw nen Jose a para ari so amin a dalin ed Egipto. Apasootan ya amin iray Egipsio a mangilakoy dalin da, ta mapalaloy eras. Nagmaliw sirin a kayaryan na ari so amin a dalin.

²¹ Manlapud sakey a samput ya anggad sananey a samput na Egipto, impagmaliw nen Jose ya aripen iray totoo.

²² Say dalin labat na saray papari so ag to sinaliw. Ag da kinaukolan ya ilako ray dalin da, ta walay inter na ari a pambilay da.

²³ Inkuanen Jose ed saray totoo, Sinaliw ta kayo la tan saray dalin yo a para ari. Niay trigo ya itanem yod kaalogan yo.

²⁴ No panagani, iter yoy kakalima ed ari. Say kera ikana yon bini tan tagano yo tan tagano na saray pamilya yo.

²⁵ Inmebat ira, Sinambot moy bilay mi tan maung kad sikami; paaripen kami lad ari.

²⁶ Kanyan impaakseb nen Jose so sakey a ganggan ed Egipto a kayaryan na ari so kakalima na ani. Wala ni yan ganggan ya anggad natan. Saray dalin labat na papari so ag kayaryan na ari.

²⁷ Nanayam ed Egipto ira may Israelita, diad Gosen; minmayaman ira tan dinmakerakel ira.

²⁸ Nanayam ed Egipto si Jacob na labimpitoy taon, anggad mantaon na sanlasus tan apataplo tan pito.

²⁹ Nen asingger lan ompatey, impatawag toy anak ton Jose tan inkuantod sikato, Iyan moy limam ed nanleetan na saray ulpok tan isipan mo ya ag mo ak ipopompon ed Egipto.

³⁰ Labay koy nipompon ed kawalaan da ray atateng ko; ipaway mo ak ed Egipto tan ipompon mo ak ed angipomponan ed sikara. Inmebat si Jose, Gawaen koy imbaga yo.

³¹ Inkuanen Jacob, Mansamba ka a gawaen mo. Nansamba si Jose, tan akisalamat si Jacob diad katri to.

48

¹ "Ag abayag ed samay impantongtong dan sanama, nibagad kinen Jose a mansasakit si ama to. Kanyan intagar to ray duaran lalakin anak to a di Manases tan Efraim, ta nengnengen day Jacob.

² "Nen nibagad kinen Jacob a sinmabiy Jose ya ondalaw ed sikato, inanosan toy binmangon tan inmirung ed dokulan.

³ "Inkuanen Jacob ed kinen Jose, Pinmayawar ed siak to so Dios diad Luz ed dalin na Canaan tan binindisionan to ak.

⁴ "Inkuantod siak, Parakelen kon maung so kabyangay pamilyam, pian magmaliw ya amayamay a bansa iray kabyangay boleg mo; iter kod saray kabyangay boleg mo yan dalin tan kayaryanen da ed anggad angga.

⁵ "Intuloy ya inkuanen Jacob, Ibibilang kon anak iray duaran lalakin anak mo a nianak ed Egipto kasakbayan na inyakar ko dia; anak ko ra di Efraim tan Manases a singa di Ruben tan Simeon.

⁶ "No wala ni ray anak mon lalaki, ag ira nibilang ya anak ko; alaen day tawir da diad panamegley di Efraim tan Manases.

⁷ "Gagawaen ko ya, lapud kinen inam a Raquel. Kaermenan kon tuloy nen inatey si Raquel ed dalin na Canaan ya ag arawid Efrata, nen ompapawil ak a nanlapud Mesopotamia. Imponpon kod man diad gilig na dalan a mamaarap ed Efrata. (Betlehem so tawag natan ed Efrata.)

⁸ "Nen anengneng nen Jacob iray anak nen Jose, tinepet to, Siopa ra yan ogogaw?

⁹ "Inmebat si Jose, Anak ko ran inter na Dios ed siak diad Egipto. Inmebat si Jacob, Iyasingger mo ra diad siak, pian nabindisionan ko ra.

¹⁰ Korarap la ray mata nen Jacob, lapud masiken la, tan ngalngali la ag makanengneng. Inyasingger nen Jose ira may ogogaw ed sikato, nilakap to ra tan inanguban to ra.

¹¹ Inkuanen Jacob ed kinen Jose, Ag kon balut inilaloan a nanengneng ta ka ni, et natan inyabuloy ni ingen na Dios a nanengneng kon pati saray anak mo.

¹² Inala nen Jose ira may ogogaw ed akwalan nen Jacob tan dinmakmomon anggad dalin so lupa to.

¹³ Inyan nen Jose si Efraim diad nikawigi nen Jacob tan si Manases diad nikawanan.

¹⁴ Balet impankorusan nen Jacob iray taklay to, tan intapew tod olo nen Efraim so kawanan a lima to anggaman a sikatoy yogtan, tan say kawigin lima to diad tapew na olo nen Manases a sikatoy pangulowan.

¹⁵ Insan to binindisionan ni Jose: Sarayan lalaki bindisionan ira komun na Dios, say Dios a nilingkuran di amak ya Abraham tan amak ya Isaac! Bindisionan ira komun na Dios ya angiwanwan ed siak ya anggad sayan agew!

¹⁶ Bindisionan ira komun na anghil ya angipaliis ed siak ed antokaman a kaogsan. Mansiansia komun ed panamegley da so ngaran ko tan say ngaran di amak ya Abraham tan amak ya Isaac. Nawalaan ira komun na amayamay a kabyangay boleg.

¹⁷ Agoloy isip nen Jose nen anengneng ton intapew nen ama tod olo nen Efraim so kawanan a lima to; kanyan inala tod olo nen Efraim so lima nen ama to, ta iyalis tod olo nen Manases.

¹⁸ Inkuantod kinen ama to, Aliwan ontan, ama. Sikato yay pangulowan; itapew yod olo to so kawanan a lima yo.

¹⁹ Ag inmabuloy si ama to tan kuanto, On, amtak anak ko. Magmaliw met a matalonggaring a totoo iray kabyangay boleg nen Manases. Balet magmaliw a matalonggaring ni so yogtan to nen say sikato, tan magmaliw a matalonan bansa iray kabyangay boleg to.

²⁰ Diad saman ya agew binindisionan to met ira may ogogaw a kuanto, Ikana na saray Israelita so kangaranan yo diad pamindision da. Ikuanda, Pagmaliwen kayo komun na Dios a singa di Efraim tan Manases. Diad onya insaginonur nen Jacob si Manases ed kinen Efraim.

²¹ Insan inkuanen Jacob ed kinen Jose, Onung na sankanengneng mo, magano ak lan ompatey, balet mansiansian kaibam so Dios, tan papawilen to kad dalin na saray atateng mo.

²² Diad sika, aliwan saray lalakin agagim, so pangitdan ko na Sikem, say mataban dalin a sinamsam kod saray Amorreo diad panamegley na ispadak tan panak.

49

¹ "Impaawit nen Jacob iray anak tan lalaki tan kuanto, Gali diad abay ko, ta ibagak so nagawad sikayo diad arapen a panaon:

² "Mantitipon tan dengel kayo, lalakin anak nen Jacob, Dengel kayod ama yon Israel.

³ "Ruben ya anak kon pangulowan, sikay biskeg ko, Tan onaan ya anak ko nen kabisbiskegan ko, Say sankamapaatageyan tan sankabiskegan ed amin da ray anak kon lalaki.

⁴ "Singa ka mabiskeg a delap, Balet ag ka magmaliw a sankatalonggaringan, Lapud akiakdul kad inamung kon bii, Tan dinotakan moy dokulan na amam.

⁵ "Sanagi ra di Simeon tan Levi. Ikakana ray armas dad panggawa ray deral.

⁶ "Ag ak mibalid maamut iran tongtongan da. Ag ak mibiang ed saray pandaragop da, Ta lapud petang na olo ra amatey iray totoo Tan nilopuy da ray bakan kalakyan a para galaw.

⁷ "Sakey a samba komuy niwala ed pasnuk da, lapud alablabas, Tan diad petang na olo ra, lapud mapalalon maruksa. Ikaykayat ko rad intiron dalin na Israel. Itaytayak ko rad saray totoo na Israel.

⁸ "Juda, idayew ka na saray agagim a lalaki. Tetekmelan mod beklew iray kalaban mo. Ondakmomod sika iray lalakin agagim.

⁹ "Si Juda et singa lion. Papateyen to ray labay ton pateyen, insan ompapawil ed balaung to. Maninat-inat tan mandokul-dokul. Anggapoy makakpel a manigensigen ed sikato.

¹⁰ Bembenan toy baston na ari. Manoley lawas iray kabyangay boleg to. Maniter ed sikato iray bansa na buis da Tan ondakmomo ran ontoluk ed sikato.

¹¹ Isisinger tod sengeg na ubas so kilaw ya asno to, Isisinger tod sankaabigan ya ubas. Ipepesak toy kawes to ed alak ya ambalangan singa dala.

¹² Ombabalanga ray mata to lapud kakainom toy alak. Ompopoti ray ngipen to lapud kakainom toy gatas.

¹³ Si Zabulon et manayam ed gilig na dayat. Magmaliw a puirto na saray barko iray sakop ton gilig na dayat. Say dalin to onsabi ya anggad Sidon.

¹⁴ Si Isacar et singa mabiskeg ya asno A mandokdokul ed leet na saray sapin a sako.

¹⁵ Balet nanenengneng ton maunga pasen so pampapainawaan to Tan makaroyroyo so dalin. Ipaparaan toy takeb ton manakbat Tan sikatoy napapasoot a mankimey a sakey ya aripen.

¹⁶ Si Dan et manoley ed saray totoo to. Magmaliw iran singa saray aruma tribu na Israel.

¹⁷ Magmaliw ya oleg ed gilig na dalan si Dan, Sakey a nanditan oleg diad gilig na basbas, A mangetket ed mokur na kabayo, Pian napelag a nabalongyar ed beneg to so akakabayo.

¹⁸ Manalagar ak na panangilaban mo, Katawan.

¹⁹ Dogpaan na sakey ya olup na matatakew si Gad, Balet poliktaran to ra, insan to ra osilan.

²⁰ Panlapwan na masustansian tagano so dalin nen Aser. Mangiter na kakanen a manepeg ed ari.

²¹ Si Neftali et sakey ya ulsa a batik-batik ya anggan iner, Tan makapalikliket iray anak ton ankekelag.

²² Si Jose et singa sakey ya asnod katakelan a walad gilig na sobul, Sakey a kilaw na kabayo a walad alusadsar na palandey.

²³ Pinasyan dogpaan na saray kalaban to, Tan osilan dan awit day pana ra.

²⁴ Balet mansiasiansian mabiskeg so pana to, Tan napapabiskeg iray taklay to Diad panamegley na pakayari na Makapanyarin Dios nen Jacob. Napapabiskeg na Managpastol, say Manangyagel ed Israel.

²⁵ Say Dios na amam so ontutulong ed sika, Say Makapanyarin-amin a Dios a mamibindision ed sika, Na saray bindision ya oran a manlalapud tawen Tan aralem iran sobul a manlalapud dalem na dalin, Saray bindision ya amayamay a baka tan amayamay ya anak,

²⁶ Saray bindision a trigo tan saray rosas, Saray bindision a dagdagan iran palandey, Saray makapalikliket a bengatlan manlalapud andi-anggaan iran pokdul. Mansiansia komun ira yan bindision ed olo nen Jose, Diad muling na samay nibiig nen saman ed saray agagi ton lalaki.

²⁷ Si Benjamin et singa sakey a maruksan asod katakelan. Agew-labin mamangakan na napapatey to.

²⁸ Sikara yay labinduan tribu na Israel, tan sikara yay kaonuran a salita nen ama ra nen bindisionan toy balang sakey ed sikara.

²⁹ Insan ingganggan nen Jacob iray lalakin anak to, Natan ta magano ak lan mitipon ed saray totook ya andi lad bilay, kerewen kon ipompon yo ak ya ipitipon ed amak tan saray lalakik diad lobuk a walad alog nen Efron a Heteo,

³⁰ diad Macpela a bokig na Mamre, diad dalin na Canaan. Sinaliw nen laki yon Abraham iman ya ongib tan alog ed kinen Efron a Heteo, pian pamponponan.

³¹ Diman so angipomponan dad kindi laki Abraham tan di asawa ran Sara; diman so angipomponan ed kindi laki Isaac tan di asawa ran Rebeca; tan diman met so angipomponan kod kinen Lea.

³² Asaliw ed saray Heteo ira may alog tan ongib. Diman yo ak ipompon.

³³ Kayarin binilin nen Jacob iray anak ton lalaki, pinmawil a dinmokul, insan inatey.

50

¹ "Intakba nen Jose so laman to ed kinen ama to, manakakis tan inaanguban tod lupa.

² "Insan to ingganggan iray aripen ton doktor ya ibalsamo ray bangkay nen ama to.

³ "Apataplon agew so impakaibalsamod sikato a singa pakakaibalsamod karaklan. Insan pitomplon agew ya inermenan na saray Egipsio.

⁴ "Nen kayariy panaon na panagermen, inkuanen Jose ed saray opisyal na ari, No walay panagmatalek yod siak, ibaga yo pad ari,

⁵ "Nen ngalngali la ompatey so amak, impaisipan dad siak ya ipompon kod lobuk ya imparaan dad dalin na Canaan. Kanyan abuloyan yo ak pan onla, ta ipompon koy amak, insan ak dia ompawil.

⁶ "Inmebat so ari, Laka, ta ipompon moy amam onung na insipan mon gawaen.

⁷ "Kanyan linman imponpon nen Jose so ama to, Akilad kinen Jose iray amin ya opisyal na ari, saray lalakin atagey so kipapasen dad palasio, tan amin a manonan lalaki ed Egipto.

⁸ "Akilad sikato ray kabyangay pamilya to, saray lalakin agagi to, tan saray arum nin kabyangay pamilya nen ama to. Atilak ed dalin na Gosen iray ankekelag ya anak da, tan saray karniro, kanding, tan saray baka ra.

⁹ "Akila met ed sikato ray lalakin akalogan ed karwahi, tan saray akakabayo; dakerakel iran nanoolup.

¹⁰ Nen akasabi rad pasen a panagilikan diad Atad a bokig na Jordan, nanggawa ra na andokey tan maermen a sirimonyay pompon. Pitoy agew a nanggaway Jose na sirimonyay ermen.

¹¹ Nen anengneng na saray Cananeo ira may totoon maneermen diad Atad inkuanda, Sirimonya ya na ermen da ray Egipsio. Sikato yay makasengeg no akin et atawag iman a pasen na Abel-mizraim.

¹² Kanyan ginawa na saray lalakin anak nen Jacob so ingganggan tod sikara:

¹³ inyakar dad Canaan so bangkay to, imponpon dad ongib ed Macpela a bokig na Mamre, diad samay alog a sinaliw nen Abraham ed kinen Efron a Heteo, ta ginawa ton pasen a pomponan.

¹⁴ Kayarin nipompon nen Jose so bangkay nen ama to, pinmawil ed Egipto a kaiba to ray lalakin agagi to tan amin ya akilad sikaton akitolur.

¹⁵ Kayariy impatey nen ama ra, inkuan na lalakin agagi nen Jose, Nayarin bosulen itayo ni nen Jose tan mamplanon ombawid sikatayon amin, lapud samay ginawa tayod sikato.

¹⁶ Kanyan impaikuan dad kinen Jose, Kasakbayan ya inatey si ama tayo,

¹⁷ impaikuandad sika, Pirdonam pa la ray agagim a lalaki ed samay kasalanan a ginawa rad sika. Pirdona mo kami pa la sirin natan ed samay kaogsan a ginawa mi, sikamin aripen na Dios nen amam. Inmakis si Jose nen nadngel to yan impaibaga ra.

¹⁸ Insan saray agagi ton dili so dinmago tan dinmakmomo rad sikato. Inkuanda, Nia kami ran aripen mo.

¹⁹ Balet inkuanen Jose ed sikara, Ag kayo natatakot; ag ko nayarian ya alaey pasen na Dios.

²⁰ Nankokomplutan yo aka nanggawaay maoges, balet say Dios impagmaliw to a pankaabigan iman a kaogsan, pian makapambilay iray amayamay a totoo, saray totoon mabilay natan lapud saman ya agawa.

²¹ Anggapoy nepeg yon takotan. Asikasoen ta kayo tan saray anak yo. Onya so impamabiskeg toy linawa ra tan impanligliwa tod sikara.

²² Kaiba nen Jose a nanayam ed Egipto iray kabyangay pamilya nen ama to; sanlasus tan samploray taon to nen inatey.

²³ Naalagar to nin anengneng iray anak nen Efraim tan saray apo tod sikato. Mabilay ni nen naawat a kabyangan na pamilya to iray anak nen Makir, say lakin anak nen Manases.

²⁴ Inkuantod saray lalakin agagi to, Ngalngali ak la ompatey, balet andi-saew ya asikasoen kayo na Dios, tan ipaway to kayod sayan dalin tan iyakar to kayod dalin a sinambaan ton iter ed kindi Abraham, Isaac, tan Jacob.

²⁵ Insan kinerew tod saray totoo to a sambaan dan gawaen yan bilin to. Inkuanto, Isipan yod siak a no say Dios et iyakar to kayod saman a dalin, piawit yo ray pokel ko.

²⁶ Kanyan inatey si Jose nen mantaoy sanlasus tan samplora. Imbalsamo rad Egipto, insan da inkargad longun.