1

¹ Iti ya ing kapahayagan na ning Dios kang Jesu-Cristo, at pepahayag na king talasuyu nang i Juan king kapamilatan na ning anghel na. Miyabie ya iting kapahayagan ban ipabalu la karing talasuyu na ning Dios ding bage a malapit nang mapalyari.

² Iti ya ing patutuan nang Juan tungkul king sablang ikit na, ing sinabi na ning Dios, at ing katutuan a pepahayag nang Jesu-Cristo.

³ Mapalad la ding babasa king librung iti at ding makiramdam king ula a sinabi na at ding mamintu king makasulat! Uling malapit na lang mapalyari deting bage.

⁴ Iti ibat kang Juan at parala ne karing pitung iglesia king probinsia na ning Asia: Miyabie sana kekayu ing grasya at kapayapan ning Dios, ing Dios ning kasalukuyan a panaun, ning milabas, at ning panaun a daratang, at ibat karing pitung espiritu a atyu arap ning tronu na,

⁵ at ibat kang Jesu-Cristo, ing tapat a testigu, ing mumunang diling sinubling mebie at mag-ari karing sablang ari keti king yatu. Kaluguran na katamu at king uli ning kamatayan na gewa na katamung malaya karing kekatamung kasalanan,

⁶ at gewa na katamung kayarian ding pari ban sumuyu king Dios na at Ibpa. Kang Jesu-Cristo ing ligaya at upaya angga king kapilan pa man! Amen.

⁷ Pakatandanan yu iti: datang ya libutad da ring biga. Akit de ring sabla at pati na detang tinandus keya. Tumangis la ding sablang bansa na ning yatu uli na ning depat da kang Jesu-Cristo. Iti ya ing katutuan! Amen.

⁸ Aku ing Alpha at ing Omega, ngana ning Ginung Dios a Mayupaya, ing Dios ning kasalukuyan, ning milabas, at ning panaun a daratang.

⁹ Aku i Juan, ing kapatad yung kayabe king kekayung kasakitan at king kayarian nang Jesus at king pamibabata uli na ning pangayabe kang Jesus. Inugse ra ku king pulu ning Patmos uling penaral ku ing amanu na ning Dios at minie kung patutu tungkul kang Jesus.

¹⁰ Aldo ning Ginu kanita inyang liban na ku ning Espiritu at kagulutan ku dimdam ke ing masikan a siwalang balamu trumpeta.

¹¹ Ngana, Isulat mu king libru ing akakit mu at iparala me karing pitung iglesia: king Efeso, Esmirna, Pergamo, Tiatira, Sardis, Filadelfia, at king Laodicea.

¹² Melikid ku ban lawan ing magsalita at ikit ku la ding pitung gintung tumpakan-sulu.

¹³ Makatalakad ya libutad da reti ing metung a balamu lalaking makaimalan makaba angga karing sakung at ating gintung panaling makababat king salu na.

¹⁴ Kasing puti na ning bulbul tupa o ning bulak ing buak na at milalablab lang anting api ding mata na.

¹⁵ Kikinang la ding bitis na anting makintab a tangsung medalise king pugun, at bibiung anting danum a darabulbul ing siwala na.

¹⁶ Atin yang tatalnan a pitung batuin king wanan nang gamat, at lulual ya king asbuk na ing espadang matalas at mingatba taram. At makasilo ya ing lupa na, anti ya king aslag ning aldo neng kaugtuan.

¹⁷ Inyang ikit ke, miragsa kung anting mete king arap na. Pinatung ne kanaku ing wanan nang gamat at ngana, E ka tatakut. Aku ing Mumuna at ing Katataulian!

¹⁸ Aku ing Mabie! Mete ku oneng ngeni mabie ku king kapilan pa man. Tatalnan ku ing kayupayan king kamatayan at king kakarinan da ring mete.

¹⁹ Inya isulat mu ing akakit mu, ing mapapalyari ngeni, at ing mapalyari king daratang a panaun.

²⁰ Iti ya ing lihim dang kabaldugan ding pitung batuin a tatalnan ku king gamat kung wanan at ding pitung tumpakan-sulu: ding pitung batuin ila ding anghel da ring pitung iglesia, at ding pitung tumpakan-sulu ila kabud ding pitung iglesia.

2

¹ Isulat mu iti king anghel na ning iglesia karin Efeso: Iti ya ing pasabi na nitang tatalan karing pitung batuin king wanan nang gamat at lalakad libutad da ring pitung gintung tumpakan-sulu.

² Balu ku ing depat mu, ing kapagalan mu at kapibabatan king pamakiarap mung kasakitan. Balu ku king e mu peintulut ing e mayap. Balu ku king sibukan mu la ding sasabing apostol la at apatunayan mu king e la tune apostol.

³ Mapibabata ka at pekiarapan mu ing dakal a kasakitan king mitmung tetagan alang-alang kanaku at e ka sinawa.

⁴ Oneng ing paginakit ku keka ya iti: merimla ing lugud mu kanaku; e na na kalupa ning sadia.

⁵ E mu kakalinguan ing sadia mung kabilian. Sumisi ka at gumulut king e mayap mung dapat. Balikan mu ing sadia mung dapat a mayap. Nung e ka sumisi, datang ku at ilako ke ing tumpakan mung sulu.

⁶ Iti naman ing apupuri ku keka: pikakasaman mung kalupa ku ing gagawan da ring Nicolaita.

⁷ Nung atin kang balugbug, pakiramdaman mu ing sasabian na ning Espiritu karing iglesia! Ibie ku karing magtagumpe ing katuliran mangan king bunga na ning tanaman ning bie a atyu king Hardin ning Dios.

⁸ Isulat mu iti king anghel na ning iglesia karin Esmirna: Iti ya ing pasabi na nitang mumuna at katataulian, ing mete at mebie pasibayu.

⁹ Balu ku ing kapagsubukan a daralanan mu. Balu ku king pakakalulu ka, oneng mabandi ka king tune pibandian. Balu ku ing pamanyirang puri a daraptan da keka ding magpanggap Judio; oneng king kamatutuanan kampun na lang Satanas.

¹⁰ E ka mitatakutan karing kaligaligan a malapit nang mapalyari keka. Tandanan mu iti: ipasukul na la ning diablo ding mapilan kekayu. Kapagsubukan iti kekayu at magkasakit kayu kilub ding apulung aldo. Manatili kang tapat angga king kamatayan at ibie ke keka ing korona na ning bie.

¹¹ Nung atin kang balugbug, pakiramdaman mu ing sasabian na ning Espiritu karing iglesia! E la dumalan king kaduang kamatayan ding magtagumpe.

¹² Isulat mu iti king anghel na ning iglesia karin Pergamo: Iti ya ing pasabi na ning tatalan king matalas a espadang adua taram.

¹³ Balu ku king manuknangan ka king lugal nung nu ya makabili ing tronu nang Satanas. Makanyan man, manatili kang tapat kanaku. E mu tinggian ing kasalpantayanan mu kanaku inyang i Antipas a tapat kung talasuyu pete re ken king balen a panuknanganan nang Satanas.

¹⁴ Oneng atin kung paginakit keka uli da reting mapilan a bage: ating mapilan a tutupad king turu nang Balaam a tinuru kang Balak para manimuna king pamikasala da ring Israelita. Uli na niti, mengan la king pamangan a miyain karing idolo, at dinapat lang pamakipangalugud.

¹⁵ Atin munamang mapilan kekayu a tutupad king panaral da ring Nicolaita.

¹⁶ Inya sukat kayung sumisi king pamikasala yu. Nung e kayu sumisi, puntalan da kayu king malaguang panaun at gerahan ku la ding taung deta king kapamilatan na ning espadang lulual king asbuk ku.

¹⁷ Nung atin kang balugbug, makiramdam ka king sasabian na ning Espiritu karing iglesia! Karing magtagumpe, ibie ku ing makasalikut a manna a manibat banua. Ibie kia munaman king balang katau ing maputing batu nung nu ya makasulat ing metung a bayung lagyu a alang makibalu nune mu itang tanggap kaniti.

¹⁸ Isulat mu iti king anghel na ning iglesia karin Tiatira: Iti ya ing sasabian na ning Anak ning Dios a ating matang milalablab anting api at bitis a anting kikinang a tangsu.

¹⁹ Balu ku ing daraptan mu, ing lugud mu, katapatan, kasuyuan at kapibabatan. Balu kung maygit kesa king sadya ing daraptan mu ngeni.

²⁰ Oneng oyni ing e ku buri keka: paintulutan me i Jezebel, ing babaing migpanggap tubud na ning Dios. Pipiraitnan na la ding talasuyu ku at tuturu na lang dapat pamakipangalugud, at agkatan na lang mangan king pamangan a miyain karing idolo.

²¹ Dininan keng sapat a panaun ban sumisi, oneng e ya bisang magbayung bie.

²² Tandanan mu iti: irate ke king sakit at pati na detang akayabe na king pamakipangalugud. Dumalan lang kasakitan subali mu nung sisian da at gulutan ing pamaniapat dang e mayap kayabe na.

²³ Paten ku la naman ding anak na ban kanita abalu da ring sablang iglesia king aku ing susuri king pusu at isip da ring tau. Ablasan ke ing balang metung kekayu ketang depat yu.

²⁴ Oneng sasabian ku karing aliwang tau ken Tiatira a e makiramdam king e mayap nang turung Jezebel at e mebiasa king ausan dang malalam nang lihim Satanas, ala kung papusan a mabayat.

²⁵ Oneng ingatan yung masalese ing mayap a atyu kekayu angga king paniatang ku.

²⁶ King magtagumpe at makatupad king kaburian ku angga king kawakasan, ibie ku ing upayang sumakup karing sablang bansa, anti ing binie na kanaku ning Ibpa.

²⁷ Panibalan na la king kapamilatan na ning palupalung bakal at balbalan na la ding bansa antimo ing pamamalbal na karing kuran.

²⁸ Ibie kia naman karela ing batuin na ning abak.

²⁹ Nung atin kang balugbug, pakiramdaman mu ing sasabian na ning Espiritu karing iglesia!

3

¹ Isulat mu iti king anghel na ning iglesia karin Sardis: Iti ya ing sasabian na nitang ating pitung espiritu na ning Dios at ating pitung batuin. Balu ku ing daraptan mu. Balu ku king isipan da king mabie ka; oneng king kamatutuanan mete ka.

² Inya migising ka at biayan mu la ding bage makatagan keka bayu la mibalausnan mate. Akakit ku king e la pa ganap ding bage depat mu king arap ning kanakung Dios.

³ Inya ganakan mu nung makananu mu lang tinggap ding aral a dimdam mu. Tuparan mu la deti at sisian mu ing kekang pamikasala. Nung e ka migising, datang kung anting mapanakoking oras a e mu balu.

⁴ Makanyan man ating mapilan ken king Sardis a miningat malinis king imalan da; inya maging kayabe ku la deti king pamag-imalan maputi uling karapatdapat la.

⁵ Mipaimalanan lang maputi ding magtagumpe at e ku la ilako ding lagyu ra king libru na ning bie. Kilalanan ku ing kanaku la king arap ning Ibpa ku at king arap ding anghel na.

⁶ Nung atin kang balugbug, pakiramdaman mu ing sasabian na ning Espiritu karing iglesia!

⁷ Isulat mu iti king anghel na ning iglesia karin Filadelfia: Iti ya ing sasabian na nitang banal at apagkatiwalan, ing tatalan king susi nang David; alang makasara king nanumang ibuklat na at alang makabuklat king nanumang isara na.

⁸ Balu ku ing kekang dapat; balu ku king ditak mu ing agyu mu, oneng tiparan mu ing turu ku at meging tapat ka kanaku. Uli na niti, biklat ke ing metung a pasbul king arapan mu at ala metung mang makasara kaniti.

⁹ Pakiramdaman mu iti: palapitan ku la at pasikloran arap mu ding kampun nang Satanas, ding malaram at magpanggap Judio, ban abalu ra king kaluguran da ka.

¹⁰ Uling tiparan mung mitmung kapibabatan ing utus ku, ingatan da ka potang datang na ing oras ning kapagsubukan karing sablang tau keti king yatu.

¹¹ Datang ku king malaguang panaun. Ingatan mu ing mayap a atyu keka ban e na asamsam ning ninuman ing kekang korona.

¹² Gawan keng matibe asias king Templo na ning kanakung Dios ing magtagumpe at manatili ya karin kapilan man. Isulat ke keya ing lagyu na ning kanakung Dios at ing lagyu na ning siudad ning kanakung Dios, ing bayung Jerusalem a kuldas king banua ibat king kanakung Dios. Isulat kia naman keya ing bayu kung lagyu.

¹³ Nung atin kang balugbug, pakiramdaman mu ing sasabian na ning Espiritu karing iglesia!

¹⁴ Isulat mu iti king anghel na ning iglesia karin Laodicea: Iti ya ing sasabian na nitang maki lagyung Amen, ing tapat at tune testigu, ing penibatan na ning sablang lelang ning Dios.

¹⁵ Balu ku ing depat mu. E ka marimla ni mapali. Sana marimla ka o kaya mapali!

¹⁶ Uling maligamgam ka, isuka ra ka!

¹⁷ Sasabian mu, Mabandi ku at labis-labis king sablang bage! Oneng e mu balu king tutu kang gipit at makalunus! Kalulu ka, lubas, at bulag.

¹⁸ Inya tuturu ku keka king sali kang purung gintu kanaku ban tune kang maging mabandi. Sali ka namang maputing imalan ban mitakpan ing makarine mung kalubasan at sali kang panulung mata ban manakit ka.

¹⁹ Sasabianan ku la at didisiplinan ding sablang kaluguran ku. Inya magkapilit ka at sisian ing kasalanan mu.

²⁰ Lawan mu, makatalakad ku arap ning pasbul at tutuktuk; nung pakiramdaman na ning ninuman ing siwala ku at ibuklat ne ing pasbul, malaus ku king bale na at ya ampon aku miyabe kaming mangan.

²¹ Lukluk yang kayabe ku king tronu ku ing magtagumpe, nung makananung migtagumpe ku at ngeni makalukluk kayabe nang Ibpa ku king tronu na. fig,,,,,... makatalakad ku arap ning pasbul at tutuktuk...,(3:20)fig*

²² Nung atin kang balugbug, pakiramdaman mu ing sasabian na ning Espiritu karing iglesia!

4

¹ Kaybat na nita, aliwa ne mang bage ing ikit ku. Ikit ke karin banua ing metung a makabuklat a pasbul. At pasibayu keng dimdam ing siwala a kalupa na ning trumpeta. Ngana, Manik ka keni at ipakit ku la keka ding bage mapalyari king daratang a panaun.

² Kanita mu rin liban na ku ning Espiritu. At ikit ke king banua ing metung a tronu at ing makalukluk karin.

³ Maslag ya lupa a kawangis ne ning batung haspe at rubi. Ating metung a pinanaring kule esmeralda king paligid na ning tronu.

⁴ Makapadurut la king tronu ding aduang pulu't apat pang tronu a luklukan da ring aduang pulu't apat a makatua. Makaimalan lang maputi at maka koronang gintu.

⁵ Lulual king tronu ing kildap, ing alingongo, at ing duldul. Ating pitung milalablab a sulu arap ning tronu; ila deti ring pitu nang espiritu ning Dios.

⁶ Arap ning tronu, ating balamu dagat a kristal a kasing lino na ning salamin. Karing balang suluk na ning tronu makapadurut la ding apat a mabie lelangan a ating mata king arap at king gulut.

⁷ Lulupa yang leon ing mumunang mabie lelangan, kalupa yang baka ing kadua, kalupa yang tau ing katlu, at ing kapat kalupa yang susulapo agila.

⁸ Tianam la pakpak ding apat a mabie lelangan; mitmu yang mata kilub at lual ing balang metung karela. Aldo't bengi ala lang tuknang magkanta. Ngara, Banal, banal, banal ya ing Ginung Dios a Mayupaya king sabla, ing Dios napun, ngeni at king daratang a panaun.

⁹ At kabang magkanta lang kapurian, parangal, at kapasalamatan king makalukluk king tronu, ing mabie kapilan pa man,

¹⁰ ding aduang pulu't apat a makatua naman magsakab la king arap ning tronu at sasamban de itang makalukluk karin, ing mabie kapilan pa man. Yayain da la ring korona da arap ning tronu at sasabian da,

¹¹ Kekaming Ginu at Dios! Karapatdapat kang tanggap kapurian, dangal at upaya. Uling ika ing linalang karing sablang bage at lelangan mu la, at dininan bie ketang kekang kaburian.

5

¹ At ikit ke ing metung a libru king wanan nang gamat nitang makalukluk king tronu. Ating makasulat misusumangid kaniting libru, at atin yang pitung tatak.

² At ikit ke ing metung a mayupayang anghel; magsalita ya king masikan a siwala. Ngana, Ninu ing karapatdapat sumira karing pitung tatak at mibuklat kaniting libru?

³ Oneng ala metung man king banua, king yatu o lalam ning yatu a makabuklat at makalawe kilub ning libru.

⁴ Menangis kung kapaitpaitan uling alang karapatdapat muklat king libru at lumawe king laman na niti.

⁵ Kanita sinabi na kanaku ning metung karing makatua, E ka kikiak. Lawan mu! Ing Leon a ibat king lahi nang Juda, ing Anak nang David, ya ing migtagumpe at karapatdapat sumira karing pitung tatak at muklat king libru.

⁶ Kaybat na nita, ikit keng makatalakad ing metung a Kordero king pilatan ning tronu at ding apat a mabie lelangan ampon ding makatua. Anti yang mete ing Kordero. Atin yang pitung sagu at pitung mata iting Kordero. Ila deti ring pitung espiritu na ning Dios a tinubud na king mabilug a yatu.

⁷ Linapit ya ing Kordero at kinua ne ing librung tatalnan na king wanan nang gamat nitang makalukluk king tronu.

⁸ Inyang ikua na ne ing libru, migsakab la arap na ding apat a mabie lelangan at ding aduang pulu't apat a makatua. Ing balang metung karela atin yang alpa at silyo gintu a mitmung insenso, ing panalangin da ring taung pinili na ning Dios.

⁹ Kinta de ing bayung kanta. Ngara, Ika ing karapatdapat kuma king libru, at mibuklat karing tatak na. Uling pete ra ka at king kapamilatan na ning kekang kamatayan keka lang linigtas para king Dios ding taung manibat king balang lahi, salita, balen, at bansa.

¹⁰ Gewa mong metung a kayarian ding pari para sumuyu king kekatamung Dios, at ilang mag-ari king yatu.

¹¹ Pasibayu kung linawe at dimdam ku ing siwala da ring dakal at laksa-laksang anghel! Makapadurut la king tronu, karing apat a mabie lelangan at karing makatua.

¹² Ngarang magkantang masikan, Ing Korderong pete ra karapatdapat yang tanggap upaya, pibandian, kabiasnan, at sikanan, dangal, ligaya, at kapurian!

¹³ At dimdam ku lang magkanta ding lelangan a atyu banua, king yatu, king lalam ning yatu, at ding atyu king dagat, ding sablang lelangan king mabilug a sikluban, King makalukluk king tronu at king Kordero, miyabie ing dangal, ligaya, kapurian, at upaya angga king kapilan pa man!

¹⁴ Ngarang mekibat ding apat a mabie lelangan, Amen! At migsakab la ding makatua at simban de.

6

¹ Ikit keng biklat ne ning Kordero ing mumuna karing pitung tatak ning libru at dimdam keng migsalitang kasing sikan na ning duldul ing metung karing apat a mabie lelangan. Ngana, Mekeni!

² Linawe ku at ating linto metung a maputing kabayu at atin yang tatalnan a pana ing makasake. Dininan deng korona at meko yang anting sundalus a makagayak para king pamakilaban.

³ Inyang biklat ne ning Kordero ing kaduang tatak, dimdam keng migsalita ing kaduang mabie lelangan. Ngana, Mekeni!

⁴ Metung ne namang malutung kabayu ing linto. Dininan deng kayupayan ing makasake king kabayu ban pagumpisan na ing gera king yatu at mipatayan la ding tau. Metung yang espadang maragul ing binie ra keya.

⁵ Inyang biklat ne ning Kordero ing katlung tatak, dimdam keng migsalita ing katlung mabie lelangan. Ngana, Mekeni! Metung yang kabayung matuling ing ikit ku at atin yang tatalnan a timbangan ing makasake.

⁶ Atin kung dimdam a siwala a kalupa na ning siwalang ibat king libutad ding apat a mabie lelangan. Ngana, Katakal mung trigu ing asali na ning upa king patingapun a pamagobra, at atlung katakal a sebada ing asali na ning upa king patingapun a pamagobra. Oneng e mu sisiran ing larung olibo at ing alak!

⁷ Inyang biklat ne ning Kordero ing kapat a tatak, dimdam keng migsalita ing kapat a mabie lelangan. Ngana, Mekeni!

⁸ Ing ikit ku kabayu ne mang maputla kule. Kamatayan ing lagyu na ning makasake at tuki-tukian ne ning Hades. Dininan da lang upaya king kapat nang dake ning yatu ban makamate king kapamilatan na ning espada, danup, sakit at karing mabagsik a animal.

⁹ Inyang biklat ne ning Kordero ing kalimang tatak, ikit ku la king lalam ning altar ding pete ra uli na ning amanu na ning Dios at uli na ning tapat dang pamipatutu kaniti.

¹⁰ Ngarang sinabing masikan, O Ginung Mayupaya, banal at tapat! Kapilan mu la ukuman at parusan ding taung mekamate kekami?

¹¹ Mirinan yang maputing imalan ing balang metung karela. At sinabi ra karela ing magpaynawa la king ditak pang panaun anggang e miganap ing bilang da ring karelang kapatad at kayabe rang susuyu kang Cristo a paten da namang kalupa ra.

¹² Inyang biklat ne ning Kordero ing kanam a tatak, minayun masikan, meging matuling yang anti ing imalan da ring magpaldas ing aldo, meging malutu yang anting daya ing bulan.

¹³ Mebaldug la ding batuin na ning banua a antimo ing pangabaldug da ring bungang bubut ning tanaman a higera neng mamangin masikan.

¹⁴ Mitda ya ing banua antimo ing librung biglang misara at miyalis la ding bunduk at pulu king lugal da.

¹⁵ Sinalikut la karing kueba at karing siwang da ring batu at bunduk ding sablang ari na ning yatu, ding lalaking marangal, ding heneral, ding mabandi, ding mayupaya, ding sablang tau, ding ipus o malaya.

¹⁶ At sinabi ra karing bunduk at karing batu, Tambunan yu kami ban e mi ya akit a lupa itang makalukluk king tronu at ban e na ke dasnan ning mabagsik nang mua ning Kordero!

¹⁷ Uling dinatang ne ing marangal nang aldo ning karelang mua at ninu mo ing malyaring marap kaniti?

7

¹ Kaybat na nita, ikit ku la ding apat a anghel; makatalakad la karing apat nang suluk ning yatu. Pipigilan da la ring apat nang angin ning yatu ban e pa mu mangin king yatu o king dagat o king isanu mang tanaman.

² At ikit keng mumukiat king aslagan ing metung pang anghel; darala ne ing panatak na ning Dios a mabie. Kinulait yang masikan karing apat a anghel a dininan na nang upaya ning Dios ban manyira king yatu at king dagat.

³ Ngana niting anghel, E ye pa sisiran ing yatu o ing dagat o ding tanaman anggang e la mitatakan king kanuan ding talasuyu na ning kekatamung Dios.

⁴ At sinabi na kanaku ing bilang da ring mitatakan; dinalan apat apulu't apat a libu a ibat karing lahi nang Israel:

⁵ king lahi nang Juda, labing aduang libu la ding mitatakan; king lahi nang Ruben, labing aduang libu la ding mitatakan; king lahi nang Gad, labing aduang libu la ding mitatakan;

⁶ king lahi nang Aser, labing aduang libu la ding mitatakan; king lahi nang Neftali, labing aduang libu la ding mitatakan; king lahi nang Manase, labing aduang libu la ding mitatakan;

⁷ king lahi nang Simeon, labing aduang libu la ding mitatakan; king lahi nang Levi, labing aduang libu la ding mitatakan; king lahi nang Isacar, labing aduang libu la ding mitatakan;

⁸ king lahi nang Zebulun, labing aduang libu la ding mitatakan; king lahi nang Jose, labing aduang libu la ding mitatakan; at king lahi nang Benjamin, labing aduang libu la ding mitatakan.

⁹ Kaybat na nita, ikit ku la ding tutung dakal a tau; e na la abilang ning ninuman king karakal da! Ibat la deti king balang bansa at lahi, balen at salita. Makatalakad la arap ning tronu at ning Kordero. Makaimalan lang makaba at maputi at atin yang tatalnan a sangang palma ing balang metung.

¹⁰ Ngarang agnan-agnan migsalitang masikan, Ing kekaming pangaligtas ibat king Dios a makalukluk king tronu at king Kordero!

¹¹ Tinalakad la ding sablang anghel a makapadurut king tronu, karing makatua at karing apat a mabie lelangan. At migsakab la ngan arap ning tronu at sinamba la king Dios.

¹² Ngara, Amen! Kapurian, ligaya, kabiasnan, kapasalamatan, dangalan, upaya, at sikanan ing karapatdapat king kekatamung Dios king kapilan pa man! Amen!

¹³ Nganang mengutang kanaku ning metung karing makatua, Ninu deting makaimalan maputi at nu la menibatan?

¹⁴ Pekibat ku, E ku pu balu, ginu. Ikayu pu ing makibalu. Ngana kanaku, Ila deti ring migtagumpe king maragul a pangalupig. Pinipi ra at pepalto puti ing imalan da king kapamilatan na ning daya ning Kordero.

¹⁵ Iti ya ing sangkan nung inya atyu la king arap ning tronu ning Dios, at susuyu la king Dios aldo't bengi king templo na. At ing makalukluk king tronu ya ing matnube karela.

¹⁶ E na la dumanup ni kumau kapilan man; e na la mibilad pa king pali ning aldo o mapaltus king isanu mang pali.

¹⁷ Uling ing Kordero a atyu libutad ning tronu ya ing maging pastul da, at idala na la karing sibul ning danum a babie bie, at pulisan nang lubus ning Dios ing lua karing mata ra.

8

¹ Inyang sinira ne ning Kordero ing kapitung tatak, mika katahimikan king banua kilub ning halus kapitnang oras.

² At ikit ku la ding pitung anghel a makatalakad arap ning Dios. Dininan da lang tungga-tunggalan a trumpeta.

³ Dinatang ya ing metung pang anghel. Magdala yang insensaryung gintu at tinalakad ya arap ning altar. Mirinan yang dakal a insenso ban iyain na iting kayabe da ring panalangin da ring sablang pinili na ning Dios babo ning gintung altar a atyu arap ning tronu.

⁴ Ibat king gamat na ning anghel, minukiat ing asuk ning insenso arap ning Dios a kayabe ning panalangin da ring pinili na ning Dios.

⁵ Kaybat na nita, kinua ne ning anghel ing insensaryu, at kitmuan neng aping ibat king altar, at inatsa ne king yatu. At sinalisi ing duldul, inge, kildap, at ayun.

⁶ Migsadia la ding pitung anghel ban tiupan da la ring trumpeta da.

⁷ Inyang tiniupan ne ning mumunang anghel ing trumpeta na, minuran yelu at api a ating samut daya. Menabu iti king yatu, at mesilab ya ing katlu nang dake ning yatu ing katlung dake karing tanaman, at ing sablang sagiwang dikut.

⁸ Inyang tiniupan ne ning kaduang anghel ing trumpeta na, menabu ya king dagat ing metung a balamu maragul a bunduk a mitatau. Meging daya ing katlung dake ning dagat,

⁹ mete la ding katlung dake karing mabibie lelangan karin at mesira la ding katlung dake karing barku king dagat.

¹⁰ Inyang tiniupan ne ning katlung anghel ing trumpeta na, menabu yang ibat banua ing metung a maragul a batuin. Mitatau yang anting sulu at digpa ya karing katlung dake karing ilug at karing sibul.

¹¹ (Kapaitan ing lagyu na niting batuin.) Mepait ing katlung dake na ning danum at dakal lang mete karing tau uli na ning pamaninum da kaniti.

¹² Inyang tiniupan ne ning kapat a anghel ing trumpeta na, mepinsala ya ing katlu nang dake na ning aldo, ning bulan, at ding batuin. Inya milako ing katlung dake ning karelang aslag. Meralumdum ya ing katlung dake na ning patingapun, at lalu yang meralumdum ing katlung dake na ning bengi.

¹³ Kaybat na nita, ikit keng sinulapo ing agila king banua at dimdam kung kukulait na, Makasindak ing miras karing sablang atyu king yatu kabud tiupan da la ring atlung anghel ding trumpeta da!

9

¹ Inyang tiniupan ne ning kalimang anghel ing trumpeta na, ikit keng menabu king gabun ing metung a batuin a ibat banua. Miyabie ya kaniting batuin ing susi na ning malalam a bangin.

² Biklat ne ning batuin ing bangin; linual ing makapal a asuk a kalupa na ning asuk ning maragul a ornu. Uli na ning asuk, meralumdum ya ing aldo at ing makapaligid.

³ Memaglual la ding durun uli na ning asuk at leganapan de ing yatu. Mirinan lang upayang makapanasakit deting durun antimo ding alakdan.

⁴ Mipanabilin karela king e ra sisiran ing dikut o ding tanaman o ing isanu mang tanaman. Ding sukat dang panasakitan ila ding taung e mimarkan kanuan king tatak na ning Dios.

⁵ Ala lang kapaintulutan makamate kareting tau; nune pasakitan da la mu kilub ding limang bulan. Anting ket alakdan ing pamanasakit da.

⁶ Kilub da reting bulan panintunan da ing kamatayan, oneng e ra akit; buri da ing mate na la sana, oneng dumayu karela ing kamatayan.

⁷ Mengari lang kabayung makasadia king pamakilaban ding durun; atin lang balamu koronang gintu king buntuk at anti lang lupang tau ding lupa ra.

⁸ Anti ing buak da ring babai ing buak da at anti lang ipan leon ding ipan da.

⁹ Makatakap la salu king balamu baluting bakal at ing biung da ring karelang bagius anti ing biung da ring dakal a karwahe at kabayung makilaban king gera.

¹⁰ Atin lang iki at sipit a kalupa da ring karing alakdan; atyu karing iki ra ing upayang makapanasakit karing tau kilub ding limang bulan.

¹¹ Ing ari da ya ing anghel a magbante king tutung malalam a bangin; Abadon ing lagyu na king salitang Hebreo, at Apolion king Griego at mangabaldugan Ing Mapanyira.

¹² Milabas ing mumunang sindak. Adua la pa ring datang.

¹³ Inyang tiniupan ne ning kanam a anghel ing trumpeta na, dimdam ke ing siwala a manibat karing suluk na ning altar a gintu a atyu arap ning Dios.

¹⁴ Ngana king kanam a anghel, Kalagan mu la ding apat a anghel a makagapus king maragul a Ilug ning Eufrates.

¹⁵ At mekalag la ding apat a anghel ba ra lang paten ding katlung dake na ning meto ketawan. Misadia la para kaniting oras, aldo, at bulan na ning banuang iti.

¹⁶ Adua lang dalan a milyun ding sundalus dang pakasake kabayu. Iti ya ing bilang a dimdam ku.

¹⁷ At king vision, ikit ku la ding kabayu at ding pakasake a maki baluti king salu, malutu antimo ing api, asul antimo ing safiro at dilo antimo ing asupre. Anti lang buntuk leon ding buntuk da ring kabayu at lulual king asbuk da ing api, asuk ampon asupri.

¹⁸ Megisan ya ing katlung dake na ning meto ketawan uli ra deting atlung salut: api, asuk, at asupri a lulual karing asbuk da ring kabayu.

¹⁹ Atyu karing asbuk at iki da ring kabayu ing upaya da. Anti lang ubingan ding iki ra at atin lang buntuk a gagamitan da king pamanampalasan.

²⁰ E la sinisi ding mitagan karing taung e mete karing salut. E la ginulut king mismung dapat da. Sindu ra mu rin ing pamanyamba ra karing demonyu at karing larawan a gintu, pilak, tangsu, batu, at tanaman a e naman manakit ni makaramdam o makalakad.

²¹ E ra sinisian ing karelang pamakamate, pamaglinlang, pamakipangalugud, at pamanako.

10

¹ Kanita ikit ke ing aliwa pang mayupayang anghel. Kukuldas yang ibat banua. Makabalut yang biga at ating pinanari king kabuntukan na. Maslag yang anting aldo ing lupa na at anti lang asias a api ding bitis na.

² Tatalnan ne ing metung a malating librung makabuklat. Tiklu ne ing bitis nang wanan king dagat at ing kayli king gabun.

³ Migsalita yang masikan at antimong galeung ning leon ing siwala na. At kaybat na nita, meramdam la ding pitung duldul.

⁴ Sumulat ku sana kabud dimdam ku la ding pitung duldul oneng dimdam ke ing siwalang ibat banua. Ngana, Ilihim mu sana ing sinabi da ring pitung duldul; e mu susulat!

⁵ At tinas ne ing wanan nang gamat ning anghel a ikit kung makatuklu babo ning dagat at gabun,

⁶ at sinumpa ya king lagyu ning Dios a mabibie kapilan man, ing linalang king banua, yatu, dagat, at karing sablang bage atyu kareti. Nganang sinabi, E na lumuat!

⁷ Kabud tiniupan ne ning kapitung anghel ing trumpeta na, daptan na na ning Dios ing lihim nang kapagnasan antimo ing sinabi na karing propetang talasuyu na.

⁸ Kanita, dimdam ku ne namang migsalita kanaku ing siwalang ibat banua. Ngana, Lumapit ka king anghel a makatuklu babo ning dagat at babo ning gabun. Kuanan me ing makabuklat a librung tatalnan na.

⁹ Lepitan ke iting anghel at inawad ke ing malating libru. Ngana kanaku, Kuanan me at kanan. Sunlam ya king dungus mu, oneng mayumu yang anting pulut panilan pangaras na king asbuk mu.

¹⁰ At kinua ke at pengan ing malating libru. Mayumu yang anting pulut-panilan, oneng kabud ayakmul ke meslam ku dungus.

¹¹ Sinabi na pa kanaku, Kailangan king isalita mung pasibayu ing amanu na ning Dios tungkul karing miyayaliwang tau, bansa, salita, at karing ari.

11

¹ Kanita binie ne kanaku ning anghel ing metung a paniukad a balamu tukud at sinabi na, Talakad ka at sukdan me ing Templo ning Dios at ing altar at bilangan mu la ding sasamba karin.

² E mu na la susukdan ding patyu a atyu lual na ning Templo uling miyabie na la karing e kikilala king Dios. Dakurakan de reti ing Banal a Siudad kilub ding apat apulu't aduang bulan.

³ Parala ku la ding adua kung testigu a makaimalan magaspang, at kilub ding libu aduang dalan at anam a pulung aldo ipanaral da ing amanu na ning Dios.

⁴ Deting aduang testigu ila ding aduang tanaman a olibo at aduang pitutumpakan-sulu at atyu arap ning Ginu ning yatu.

⁵ Nung sakaling buri da lang panasakitan, lumual karing asbuk da ing api a duluk karing masama karela. At king anti kaniting paralan karin la mate ding bisang makapanasakit karela.

⁶ Atin lang upayang isara de ing banua ban e muran king panaun ning pamanaral da king amanu na ning Dios. Atin la namang upayang gawan dang daya ing danum at padalang salut king yatu kapilan man buri dang mapalyari.

⁷ Kabud ayari da ing pamipatutu ra king katutuan, lunto ya ing animal a mabagsik a manibat king bangin at makilaban ya karela. Masambut la at apate na la niting animal,

⁸ at mangapase la ding bangke ra king dalan na ning maragul a siudad a makasalikut king lagyung Sodoma o Ehipto. Keti ria naman pinaku king krus ing karelang Ginu.

⁹ Kilub ding atlu at kapitnang aldo, ding bangke ra alben da la ring taung ibat karing miyayaliwang bansa, lahi, salita ampon balen, at e ra paintulut ing mikutkut la.

¹⁰ Magsaya la ding tau na ning yatu uli na ning pangamate ra deting aduang propeta. Magpiesta la at mipapamie regalu uling deting aduang propeta ilang migdalang kasakitan karela.

¹¹ Kaybat da ring atlu at kapitnang aldo, binalik na ning Dios ing pangisnawa ra at tinikdo la. Mitakutan la ding sablang menakit karela.

¹² At kaybat, ding aduang propeta mekaramdam lang metung a masikan a siwalang menibat banua. Ngana, Manik kayu keni! At kabang makalawe la ding kalaban da, minukiat la banua king kapamilatan na ning biga.

¹³ Minayun masikan king oras a ita at melasak ya ing kapulung dake na ning siudad, at pitu lang libu ding mete king ayun. Mitakutan la ding taung mitagan at pinuri da ing degulan na ning Dios ning banua.

¹⁴ Metupad na ing kaduang sindak at malapit niang matupad ing katlu.

¹⁵ Inyang tiniupan ne ning kapitung anghel ing trumpeta na, ating masikan a siwalang menibat banua. Ngana, Ing pamag-ari king yatu milipat na king kekatamung Ginu at king Cristo na. Mag-ari yang alang kapupusan!

¹⁶ At migsakab la at sinamba king Dios ding aduang pulu't apat a makatuang makalukluk arap ning Dios.

¹⁷ Ngarang sinabi, Pasalamatan da ka, O Ginung Dios a Mayupayang tutu, Dios king milabas a panaun, at ngening salukuyan, uling pepakit mu ing maragul mung upaya at megumpisa na kang mag-ari!

¹⁸ Mimua la ding taung e kikilala king Dios, oneng dinatang na ing oras ning mua mu at ing pamanukum karing mete at ing pamamie ablas karing talasuyu mung propeta, karing sablang ating takut keka, marangal o kalulu man. Panaun na ban gisanan lang paten ding babie kasiran king yatu!

¹⁹ Kanita mibuklat ya ing Templo ning Dios karin banua at ikit ke ing Kaban ning Kasunduan na. Sinalisi ing kildap, duldul, ing masikan a alingongo, ing ayun, at minuran dakal a yelu.

12

¹ Kanita linto ya king banua ing metung a makapagmulalang tanda: metung yang babaing makaimalan king aldo at makatuklu babo ning bulan. At atin yang labing aduang batuin ing koronang atyu king buntuk na.

² Malapit niang manganak; inya sasaingsing ya at kukulisak king pamiramdam na.

³ Atin pang metung a tanda a linto king banua: metung yang maragul at malutung dragon. Atin yang pitung buntuk at apulung sagu; balang buntuk na atin yang korona.

⁴ Keladkad na la ning iki na ding katlung dake karing batuin na ning banua at bildug na la king yatu. Kaybat na nita, tinalakad ya arap ning babaing malapit nang manganak ba neng kanan ing anak kabud mibait ya.

⁵ At menganak yang metung a lalaki ing babai, oneng ating sinamsam king anak at dela ne king Dios at king tronu na. Ing anak a iti mitalaga yang mag-ari karing sablang bansa king kapamilatan na ning palupalung bakal.

⁶ At tinakas ya ing babai papunta king disyerto; king lugal a sidia na ning Dios ban karin maingat ya kilub ding libu aduang dalan at anam apulung aldo.

⁷ Kaybat na nita, mika gera karin banua! Mekilaban ya ing arkanghel Miguel at ding anghel na king dragon at karing kampun na.

⁸ Mesambut ya ing dragon ampon ding kampun na at milako la lugal karin banua.

⁹ Inugse re ing maragul a dragon, ing matuang ubingan a maki lagyung diablo o Satanas, ing maglinlang king mabilug a yatu. Inugse re king yatu at pati na ding kampun na.

¹⁰ At dimdam ke ing siwalang masikan a ibat banua. Nganang sinabi, Dinatang na ing pamagligtas na ning Dios! Pepakit na ing upaya na bilang Ari at ing upaya na ning Cristo na! Uling tinabi ne ing misusuplung karing kapatad tamu arap ning Dios aldo't bengi.

¹¹ Migtagumpe la laban king diablo uli na ning daya ning Kordero at ning pamipatutu ra king katutuan; e ra pitakutan ing mate la.

¹² Inya magsaya kayu, ikong banua at ikong sablang manuknangan karela! Oneng makalunus ing maging kararasan yuyatu at dagat! Uling ing maragul nang mua ning diablo mibagsak kekayu. Uling balu na king ditak na mu ing panaun na.

¹³ Inyang ikit na ning dragon king inugse re king yatu, tegal ne ing babaing menganak king anak a lalaki.

¹⁴ Oneng mirinan yang aduang pakpak na ning maragul a agila ing babai ban makasulapo ya papunta king disyerto. Karin maingat ya kilub ding atlung banua ampon kapitna, at mirayu ya king pamanataki na ning ubingan.

¹⁵ Uli na niti, ing asbuk ning ubingan pepalual yang danum a balamu ilug ba neng apaniud ing babai.

¹⁶ Oneng linigtas ne ning yatu ing babai inyang mibuklat ing gabun a minalduk king danum a pepalual na ning dragon.

¹⁷ King mua na ning dragon king babai, belikan na la ding mitagan a lahi na ning babai ban ilang pakilabanan na. Ila deti ring sablang mamintu king utus na ning Dios at manatiling tapat king katutuan a sinabi nang Jesus.

¹⁸ At tinalakad ya ing dragon king pampang na ning dagat.

13

¹ At ikit keng sinaka king dagat ing metung a animal a mabagsik. Atin yang pitung buntuk at apulung sagu. Atin yang korona ing balang sagu na at makasulat ya king balang buntuk na ing lagyung lalapastangan king Dios.

² Kalupa yang animal a leopardo iting animal a mabagsik; atin yang bitis a kalupa da ring bitis na ning metung a oso at mengari yang asbuk na ning leon ing asbuk na. Binie na ning dragon king animal a mabagsik ing sikanan na, ing tronu na, at ing maragul nang kayupayan.

³ Balamu atin yang sugat ing metung karing buntuk na a sukat nang ikamate; oneng kinayap ya iti. Mipamulala ya ing mabilug a yatu king mepalyari at tinuki la king animal a mabagsik.

⁴ Simban de ring tau ing dragon uling binie na ing upaya na king animal a mabagsik. Simban dia naman ing animal a mabagsik. Ngara, Ninu ing kalupa na ning animal a mabagsik? Ninu ing makalaban king animal a mabagsik?

⁵ Mipaintulutan ya ing animal a mabagsik a magsalitang e mayap at lapastangan king Dios, at sumakup kilub ding apat apulu't aduang bulan.

⁶ Lepastangan ne ing Dios, ing lagyu na, ing tuknangan na, at ding sablang atyu banua.

⁷ Mipaintulutan ya namang lumaban at maniambut karing anak na ning Dios, at mirinan ya namang katuliran sumakup king balang lahi, bansa, salita, at balen.

⁸ Samban de ring sablang mabibie keti king yatu; detang e misulat a lagyu king libru na ning bie bayu ya melalang ing yatu. Ingatan ne ning Korderong pete ra iting libru.

⁹ Makiramdam kayu, nung atin kayung balugbug!

¹⁰ Ing ninumang mitalagang mabihag, mabihag ya; ing makamate king espada, king espada ya naman mate. Iti maniawad kapibabatan at kasalpantayanan karing pinili na ning Dios.

¹¹ Kanita ikit ke ing metung pang animal a mabagsik a linto king yatu. Atin yang aduang sagu a kalupa da ring sagu na ning biserung tupa, at magsalita yang antimo ing dragon.

¹² Gagamitan na ing sablang kayupayan na ning minunang animal a mabagsik kabang makalawe ya keya ing minunang animal a mabagsik. Pinilit na la ding sablang tau na ning yatu ban samba king minunang animal a mabagsik a ating maragul a sugat a kinayap na.

¹³ Makapagmulala ing milagrung depat na ning kaduang animal a mabagsik king akakit da ring tau uling pati api apapatipan nang ibat banua.

¹⁴ Alinlang na la ding tau king yatu uli na ning milagrung depat na arap ning minunang animal a mabagsik. Ayagkat na la ban gawang larawan na ning minunang animal a mabagsik a mesugat king espada at ngeni mayap na.

¹⁵ Mipaintulutan ya naman ing kaduang animal a mabagsik munie pangisnawa king larawan na ning minunang animal a mabagsik ban makapagsalita ya, at apapate ding sablang e bisang samba kaniti.

¹⁶ Sapilitan na lang tetakan ning animal a mabagsik ding sablang tau king wanan dang gamat at kanuan, marangal la man o alang dangalan, masalapi o pakakalulu, ipus o malaya.

¹⁷ Alang makasali o makapamisali subali mu nung makatatak ya keya ing lagyu na ning animal a mabagsik o ing katumbas nang numero niti.

¹⁸ Mamawad kabiasnan iti. Malyari nang abalu ning ninumang biasa ing kabaldugan na ning numero a katumbas na ning lagyu na ning animal a mabagsik, uling ing numero lagyu ne ning metung a lalaki. Ing numero na 666.

14

¹ Kanita miglalawe ku at ikit ke ing Kordero; makatalakad ya king Bunduk ning Zion. Kayabe na la ding dinalan apat apulu't apat a libung tau. Makatatak ya karing kanuan da reti ing lagyu na ning Kordero at ing lagyu na ning Ibpa na.

² At dimdam ke ing metung a siwalang menibat banua a kalupa na ning biung ning danum a darabulbul at mananabu king libis na ning bangin at ning masikan a duldul. Kalupa ne ning musika da ring manigtigan king alpa ing siwalang dimdam ku.

³ Magkanta lang bayung kanta king arap ning tronu at king arap ding apat a mabie lelangan at ding aduang pulu't apat a makatua. Alang aliwang makaintindi king kanta da, nune mu ding dinalan apat apulu't apat a libung miligtas king yatu.

⁴ Ila deti ring lalaking e mika kaugnayan karing babai; birhen lang lalaki. Tutuki la king Kordero nukarin ya man munta. Meyatbus la karing tau ban maging mumuna lang ain king Dios at king Kordero.

⁵ E la bitasang miglaram; ala kang apintas karela nanuman.

⁶ Kanita ikit ke ing metung pang anghel; matas ya sulapo. Darala na ing e kukupas a Mayap a Balita ban sabian na karing tau keti king yatu, karing sablang bansa, lahi, salita, at balen.

⁷ Nganang sinabing masikan, Pitakutan ye ing Dios at purian ye, uling dinatang na ing oras na ning pamanatul na. Samban ye ing Dios a linalang king banua, king yatu, king dagat, at karing sibul ning danum!

⁸ Selisian ne ning kaduang anghel a migsalitang anti kanini, Mibagsak ne ing mayupayang bansang Babilonia a minie alak karing sablang tau, ing alak ning manong nang pita ning laman a pilit nang pepainum karela!

⁹ Selisian na la ning katlung anghel ding aduang mumunang anghel at sinabi nang masikan, Ing ninumang samba king animal a mabagsik at king larawan na at tanggap tatak king kanuan na o gamat,

¹⁰ minum ya naman king alak na ning Dios, ing alak na ning mua na a bilus nang alang samut king kopa na. Pasakitan na la king api at asupri king arap ning Kordero at arap ding anghel a banal.

¹¹ Ing asuk ning aping pasakit karela manatili kapilan man. Ala lang kapasnon aldo't bengi ding sasamba king animal a mabagsik at king larawan na at ing ninumang tatanggap king tatak na.

¹² Inya kailangan lang magpakatatag ding pinili na ning Dios, ding tutupad karing utus na, at tapat kang Jesus.

¹³ At dimdam ke ing metung a siwalang ibat banua. Ngana, Isulat mu iti: Ibat ngeni mapalad la ding mamate susuyu king Ginu. Wa, ngana ning Espiritu, mipaynawa la king karelang mabayat a obra, uling tuki karela ing bunga na ning dapat da.

¹⁴ Kanita miglalawe ku at ikit ke ing maputing biga. Makalukluk ya babo na ning biga ing metung a lelangan a lulupang tau. Atin yang koronang gintu at atin yang tatalnan a lait a mataram.

¹⁵ At atin pang metung a anghel a ikit kung linual king templo. Nganang migsalitang masikan king makalukluk king biga. Gamitan mu ne ing kekang lait; mupul na ka uling dinatang na ing oras na ning pamamamupul. Matua na ing palutan king yatu!

¹⁶ Inya itang makalukluk babo ning biga ginamit ne ing lait na at mepalut ing pupul king yatu.

¹⁷ At atin pang anghel a ikit kung lulual king templo na ning banua; atin ya namang tatalnan a lait a mataram.

¹⁸ Ibat king altar, linual ya ing metung pang anghel. Ya ing manibala king api. Nganang migsalitang masikan king anghel a ating lait a mataram, Gamitan mu ne ing kekang lait at pupulan mu na la ding ubas karing ubasan na ning yatu uling malulut na la!

¹⁹ Inya ginamit ne ning anghel ing lait na; pinupul na la ding ubas at inatsa na la king pipamaslan ubas a ya pin ing mua na ning Dios.

²⁰ Mepasla la ding ubas king pipamaslan lual ning balen at ibat king pipamaslan minagus ing daya, aduang dalan a milya king kaba at limang talampakan king lalam.

15

¹ Kanita ikit ke ing metung pang maragul at makapagmulalang tanda king banua; pitu lang anghel a magdalang pitung salut. Ila deti ring katataulian karing salut, uling kareti miyangganan ing mua na ning Dios.

² Atin kung ikit a balamu dagat a kristal a milalablab. Ikit ku la naman ding migtagumpe laban king animal a mabagsik at king larawan na at laban king maki lagyung katumbas na ning numero. Makatalakad la king dagat a balamu kristal; tatalnan da la ring alpang binie na ning Dios.

³ Kakanta de ing kanta nang Moises a talasuyu na ning Dios, at ing kanta na ning Kordero. Ngana, O Ginung Dios a Mayupayang tutu, marangal la at makapagmulala ding kekang dapat! O Ari ding bansa, matulid la at katutuan ding kekang dalan!

⁴ Ninu ing e tumakut keka, O Ginu? Ninu ing e munie kapurian king kekang lagyu? Uling ika mung bukud ing banal! Lumapit la at samba keka ding sablang bansa, uling ikit da la ring matulid mung dapat.

⁵ Kaybat na nita, ikit keng mibuklat ing Templo ning Tolda ning Kasunduan ning Dios at ning tau.

⁶ Linual la king Templo ding pitung anghel a magdalang pitung salut. Makaimalan lang malinis at maputing telang linen. Atin lang tali a gintu king salu.

⁷ Binie na la ning metung karing apat a lelangan a mabie ding pitung silyo gintu. Mitmu la deti king mua na ning Dios a mabie kapilan man.

⁸ Kinatmu ya ing Templo king asuk a manibat king ligaya at upaya na ning Dios, at alang makalub king Templo anggang e la metupad ding pitung salut a darala ra ding pitung anghel.

16

¹ Kanita dimdam ke ing metung a masikan a siwala king Templo. Nganang sasabi karing pitung anghel, Mako na kayu at itugtug yu king yatu ing mua na ning Dios a makaratuk karing pitung silyo!

² Meko ya ing mumunang anghel at tigtug na king yatu ing laman na ning silyo na. Mika kaplas la at makapandiring sugat ding taung ating tatak ning animal a mabagsik at ding sinamba king larawan na.

³ Kanita tigtug na ning kaduang anghel ing laman na ning silyo na king dagat. Meging daya ing danum, anting daya na ning taung mete at mete la ding sablang mabibie king dagat.

⁴ Kanita tigtug na ning katlung anghel ing laman na ning silyo na karing ilug at karing sibul, at meging daya munaman ing danum da.

⁵ Dimdam keng migsalita ing anghel a manibala king danuman. Ngana, Ika ing Banal a mabibie ngeni at king panaun a milabas! Makatuliran ka king gewa mung pamanatul.

⁶ Dininan mu lang daya ban inuman da uling peparayan da la ring taung pinili mu at ding propeta. Ita ya ing mangaintulid karela!

⁷ At dimdam ke ing metung a siwalang ibat king altar. Ngana, Wa, Ginung Dios a Mayupaya, tune matulid la at makatud ding kekang pamanatul!

⁸ Kanita tigtug na ning kapat a anghel ing laman na ning silyo na king aldo. At mirinan yang kapaintulutan ing aldo ban silaban na la ding tau king kapamilatan na ning pali na.

⁹ Mesilab la ding tau king mabagsik a pali at piniumpa re ing lagyu na ning Dios a maki upayang parala kareting salut. Oneng e la bisang sumisi at gumulut king karelang pamikasala at e bisang munie kapurian king Dios.

¹⁰ Kanita tigtug na ning kalimang anghel ing laman na ning silyo na king tronu na ning animal a mabagsik, at meralumdum ya ing kayarian na. Kinet da la ring tau ding labi ra king uli na ning sakit,

¹¹ at piniumpa re ing Dios uli na ning daralanan dang kasakitan at uli da ring sugat da. Makanyan man e la sinisi at e la ginulut king e mayap dang dapat.

¹² Kanita tigtug na ning kanam a anghel ing laman na ning silyo na king maragul nang Ilug ning Eufrates. Melangi ya ing ilug at mika dalan para karing aring manibat king aslagan.

¹³ At ikit ku lang lulual king asbuk na ning dragon, ning animal a mabagsik, at ning e tutung propeta, ding atlung marawak a espiritung balamu tugak.

¹⁴ Ila ding espiritu da ring demonyu a makarapat milagru. Libutan da la ring sablang ari na ning mabilug a yatu ban tipunan da la para king labanan king marangal nang Aldo ning Dios a Mayupayang tutu.

¹⁵ Makiramdam kayu! Datang kung anting mapanako! Mapalad ya itang manatiling makagising at makapiblas; e ya lumakad lubas at e ya mipakarine karing manakit keya.

¹⁶ Inya ding espiritu tinipun da la ring ari king lugal a ausan dang Armagedon king salitang Hebreo.

¹⁷ Kanita tigtug na ning kapitung anghel ing laman na ning silyo na king angin. Ating masikan a siwalang menibat king tronu na ning Templo. Ngana, Metupad na!

¹⁸ At mengildap, menuldul, at minayun masikan; ayun a alang kalupa king mabilug nang istoria na ning meto ketawan. Talagang masikan ya iting ayun!

¹⁹ Mepirasu yang atlung dake ing maragul a siudad, at melasak la ding sablang siudad king mabilug a yatu. E ya miligtas king parusa na ning Dios ing pikabaluan a Babilonia; pepainum ne iti king alak na ning mua na.

²⁰ Limbug la ding sablang pulu at ding sablang bunduk.

²¹ Minuran yelung mangaragul a tipak a titimbang halus limang pulung kilu balang metung at mibagsakan la ding tau. Penagkasan de ring tau ing Dios uli na niting salut, uling tune yang makapangilabut iting salut!

17

¹ Kanita ing metung karing pitung anghel a magdalang pitung silyo linapit ya kanaku at ngana, Mekeni, ipakit ku keka nung makananu yang miparusan ing pamuntuk da ring babaing magtinda king katawan na a makalukluk lele da ring dakal a ilug.

² Mekipangalugud la keting babai ding ari na ning yatu, at melasing la ring sablang tau keti king yatu king alak ning pamakipangalugud na.

³ Kanita liban na ku ning Espiritu at dela na ku ning anghel king disyerto. Ikit ke karin ing metung a babaing makasake king malutung animal a mabagsik a ating pitung buntuk at apulung sagu. Makasulat la king mabilug nang katawan ding sablang amanung lalapastangan king Dios.

⁴ Makaimalan yang malutu at kule ubi ing babai; mipalamutian ya king gintu, karing mangamal a batu, at perlas. Tatalnan ne ing metung a gintung kopa a mitmu karing makasumaming bage at king karokan na ning pamakipangalugud na.

⁵ Makasulat ya king kanuan na ing lagyung ating lihim a kabaldugan: Ing pikabaluan a Babilonia, ing ima ding babaing magtinda king katawan da at ning sablang manong keti king yatu.

⁶ At ikit keng melasing iting babai king daya da ring pinili na ning Dios at king daya da ring martir; ding pete ra uli na ning katapatan da kang Jesus. Mengapamulala ku inyang ikit ke.

⁷ Nganang kinutang kanaku ning anghel, Obat mengapamulala ka? Sabian ku keka ing lihim nang kabaldugan ning babai at ing sasaken nang animal a mabagsik a ating pitung buntuk at apulung sagu.

⁸ Ing animal a mabagsik a ikit mu mebie ya ketang minuna oneng mete ne ngeni; lunto yang pasibayu ibat king bangin at papunta ya king kasiran. Ding taung mabibie king yatu a e makasulat a lagyu king libru na ning bie ibat na inyang melalang ya ing yatu, mangapamulala la kabud akit de iting animal a mabagsik uling mete ne, oneng ngeni pasibayu yang lunto.

⁹ Iti maniawad kabiasnan at pamanalastas. Ding pitung buntuk ila ding pitung bunduk-bundukan a luluklukan na ning babai. Lalarawan da la naman ding pitung ari:

¹⁰ mibagsak na la ding lima karela; mag-ari ya pa ing metung at e ya pa linto ing katataulian. Pangalto na, manatili ya mung saguli.

¹¹ Ing animal a mabagsik a mebie king misan a panaun at ngeni mete na, ya ing kawalung ari at makakayabe ya karing pitu. Papunta ya king kasiran.

¹² Ding apulung sagu a ikit mu ila ding apulung ari a e pa mimiral, oneng atin lang upayang manibala kilub ning metung a oras kayabe ning animal a mabagsik.

¹³ Metung mu ing buri da reting apulu, at ibie da king animal a mabagsik ing karelang kayupayan at sikanan.

¹⁴ Pakilabanan de ing Kordero; oneng sambutan na la ning Kordero uling ya ing Ginu da ring sablang ginu at Ari da ring sablang ari. Akayabe na la king pamagtagumpe ding meyaus, mepili, at tapat nang talatuki.

¹⁵ Ngana na naman ning anghel kanaku, Ing ikit mung ilug a luluklukan na ning babai, tau la, bansa la, lahi la, at salita.

¹⁶ Ding apulung sagu at ing animal a mabagsik a ikit mu pikasaman de ing abaing magtinda king katawan na. Samsaman da ing sablang pibandian na at lakuan deng lubas; kanan da ing laman na at silaban da ing mitagan.

¹⁷ Uling binili na ning Dios karing pusu ra ing kaburian na ban misanmetung lang tupad at ibie da king animal a mabagsik ing kayupayan da angga king mipamintuan la ding amanu na ning Dios.

¹⁸ Ing babaing ikit mu ya ing pikabaluan a siudad a sasakup karing ari na ning yatu.

18

¹ Kaybat na nita, ikit keng titipang ibat banua ing metung pang anghel a ating maragul a kayupayan. Mesala king mabilug a yatu uli na ning kaningningan na.

² Ngarang kinulisak masikan, Mibagsak ne ing pikabaluan a Babilonia! Tuknangan da nia mu ngeni ding demonyu, lugal de ring e mayap a espiritu, at pugad ding marinat, at makasumaming ayup.

³ Uling pepainum na la ding sablang bansa king alak na ning pamakipangalugud na. Mekipangalugud la king Babilonia ding ari na ning yatu at misalapi la ding komersianti keti king yatu uli na ning hilig na king laman.

⁴ At dimdam ku ne naman ing metung pang siwalang ibat banua. Ngana: Kabalen ku, dumayu kayu king Babilonia. E kayu makiyabe king pamikasala na, ban e kayu miparusan kayabe na!

⁵ Uling susukdul king banua ing kasalanan na, at e na akalinguan ning Dios ing dewakan na.

⁶ Gawan yu king Babilonia itang kekayu gewa na; ablasan yung dobli ing depat na kekayu. Katmuan ye ing kopa na king inuman a maygit a pait king singkap na para kekayu.

⁷ Nung makananu yang migpasasa at migmatas, makanyan munaman ing ibie yung kasakitan at kalungkutan king Babilonia. Uling maralas nang sasabian, Makalukluk kung anting reyna; e ku mebalu, e ku takman kapilan man ing kalungkutan!

⁸ Uli na niti, datang la king Babilonia king misan mung aldo ding salut: sakit, lungkut, at danup. At masilab ya king api, uling mayupaya ya ing Ginung Dios a mamatul king Babilonia.

⁹ Kumiak la at tumangis ding ari na ning yatu, ding mekipangalugud at mekiabe king Babilonia king kanawangan, kabud akit da ing asuk na ning masisilab a siudad.

¹⁰ Pakarayu-rayu ra Babilonia uli na ning takut dang midame la king daralanan nang parusa. Sabian da, Makatakut! Makapangilabut ing kasakitan a digpa king mayupayang siudad ning Babilonia kilub na mu ning metung a oras!

¹¹ At tumangis la at lungkut ding komersianti na ning yatu uling ala nang sali king titinda ra.

¹² Ala nang sali king tinda rang gintu, pilak, mangamal a batu at perlas; imalan a linen, seda, telang kule ubi, at malutu; mabanglung tanaman, garing, dutung a primera klasi, tangsu, bakal, at marmol;

¹³ kanela, miyayaliwang paniangkap, insenso, mira, at olibano; alak at laru, arina at trigu, baka at tupa, kabayu at karwahe, ipus at pati na bie ning tau.

¹⁴ Sabian da ring komersianti, Ala na la ngan ding bage-bage kapad mu; e mu na akit kapilan man ing pibandian mu at leguan uling mebating na ngan!

¹⁵ Ding komersianting misalapi uli na ning pamangomersyu ra king siudad a iti dumayu la king Babilonia uli na ning takut dang miyawa king kasakitan na. Kumiak la at tumangis,

¹⁶ at sabian da, Makapangilabut ing milyari king siudad a pikabaluan a mimalan linen at telang kule ubi at malutu, maka alahas gintu, mangamal a batu at perlas!

¹⁷ Uling kilub na mu ning metung a oras limbug anting bula ing sabla! King makarayu, linawe la ding kapitan da ring barku, ding pasahero, ding marino, at ding sablang mangabiayan king dagat.

¹⁸ At tengisan de ing masisilab a siudad kabang akakit da ing asuk a manibat karin. Ngara, Ala yang kalupa keti king yatu iting pikabaluan a siudad!

¹⁹ Dininan da lang alikabuk ding buntuk da. Ngarang sinabi kabang kikiak la at manangis, Makatakut! Makapangilabut ing milyari king pikabaluan a siudad! Misalapi la ding sablang sinadsad king pampang na! Oneng kilub na mu ning metung a oras mewala ing sablang pibandian na!

²⁰ Magsaya ka, O banua, uli na ning pangalasak na! Magsaya kayu ikayung mepili, apostol at propeta! Inatulan na ne ning Dios uli na ning depat na kekayu!

²¹ Kanita ing metung a mayupayang anghel dinamput yang batu a kalupa na ning maragul a gilingan a batu. Besibas ne iti king dagat at agnan nang sinabi, Makanyan yang mibagsak ing pikabaluan a siudad na ning Babilonia at e yu ne akit pasibayu!

²² E yu na damdaman ing musika da ring manigtigan alpa, ding magkanta, ding musikong manigtigan plauta at trumpeta! E yu na la akit pasibayu ding mangagaling a pangamat king nanumang obra, at e yu na damdaman ing inge da ring gilingan.

²³ E na ka pasibayung miyaslagan agyang king metung mung sulu; e na maramdam ing tula da ring kakasal, uling meging mayupaya la king mabilug a yatu ding kekang komersianti, at gewang kalulu ding sablang bansa king pamaglinlang mu!

²⁴ Miparusan ya ing Babilonia uling meyakit king Babilonia ing daya da ring propeta, ding pinili na ning Dios, at ding sablang pete ra keti king yatu.

19

¹ Kaybat na nita, dimdam ke ing balamu metung a masikan a kulisak ding dakal a tau karin banua. Ngarang sasabi, Purian ya ing Dios! Ing kaligtasan, ligaya at upaya bukud mung king kekatamung Dios!

² Makatud la at matulid la ding pamanatul na! Inatulan ne ing kabalitan a babaing magtinda king katawan na a minyira king yatu king kapamilatan ning pamakipangalugud na. Perusan ne ning Dios uling pete na la ding talasuyu na ning Ginu!

³ Pasibayu dang sinabing masikan, Purian ya ing Dios! Mukiat angga king alang angga ing asuk ning masisilab a siudad a pikabaluan!

⁴ Migsakab la ding aduang pulu't apat a makatua at ding apat a mabie lelangan at sinamba la king Dios a makalukluk king tronu. Ngara, Amen! Purian ya ing Dios!

⁵ At ating migsalita king tronu. Ngana, Purian ye ing kekatamung Dios, ikayung sablang talasuyu na at ikayung sablang tau, marangal o alang dangalan a maki takut king Dios!

⁶ Kaybat, dimdam ku ing mikakametung dang kulisak ding dakal a tau; anti ya waring inge na ning danum a darabulbul a agus at kalugkug ning mangatning duldul. Ngara, Purian ya ing Ginu! Uling mag-ari ya ing Dios a Mayupayang tutu!

⁷ Sukat tamung magsaya at tumula at ibie ing ligaya king Dios! Uling malapit na ing kasal na ning Kordero; makasadia ne ing babaing kakasal na.

⁸ Binie na na ning Dios king babaing kakasal na ing malinis at maputing imalan ban isulud na. (Ing imalan ya ing mayap dang dapat ding pinili na ning Dios.)

⁹ At sinabi na kanaku ning anghel, Isulat mu iti: Mapalad la ding mekumbirang makipangan king kasal na ning Kordero. Tiglung na pa, Deti ilang tune amanu na ning Dios.

¹⁰ Migsakab ku king arap ban samban ke. Oneng sinabi na kanaku, E mu daraptan yan! Kalupa mu ku namang talasuyu at kapatad ding minie patutu tungkul kang Jesus. Ing Dios ya ing samban mu! Uling ing mihayag a katutuan tungkul kang Jesus ya ing kalamnan na ning sablang sinabi ra at sinulat ding propeta.

¹¹ Kaybat na nita, ikit keng mibuklat ing banua at ikit ke ing kabayung maputi. Ausan deng Tapat at Tutu ing makasake uling makatuliran ing pamanatul na at pamakilaban.

¹² Milalablab ya mata at dakal lang korona ding makaputung king buntuk na. Makasulat ya king katawan na ing lagyu na; oneng ya ing bukud makibalu king kabaldugan na niti.

¹³ Mitmu yang daya ing imalan na. Ing lagyung yayaus da: Ing Amanu na ning Dios.

¹⁴ Tutukian de ring sundalus na ning banua a makaimalan malinis at maputing tela, at makasake la naman karing kabayung maputi.

¹⁵ Ating espadang mataram a lulual king asbuk na. Gagamitan ne iti ban ibagsak na la ding bansa. At sakupan na la king kapamilatan na ning palupalung bakal at payagusan na ibat king pipamaslan ubas ing alak na ning mua na ning Dios a Mayupayang tutu.

¹⁶ Makasulat ya king imalan na at king puad na ing lagyung Ari da ring sablang ari at Ginu da ring sablang ginu.

¹⁷ Ikit kia naman ing metung a anghel a makatalakad king aldo. Kukulaitan na la ding ayup. Ngana, Me ko keni at mitipun-tipun kayu para king maragul nang bangketi ning Dios!

¹⁸ Me ko keni at kanan yu ing laman da ring ari, heneral, ding sundalus, ding kabayu, at ding makasake karela; kanan yu ing laman ding sablang tau, ipus at malaya, marangal at alang dangalan!

¹⁹ At ikit ke ing animal a mabagsik, ding ari na ning yatu, at ding karelang sundalus. Makatipun la ban labanan de ing makasake king kabayu at ding sundalus na.

²⁰ Merakap ya ing animal a mabagsik at ing e tutung propetang dinapat milagru arap na. (Deting milagru ilang ginamit na king pamaglinlang karing taung ating tatak ning animal a mabagsik at karing sinamba king larawan na.) Inugse da lang mabie deting adua king dagat-dagatan ning api at ning milalablab a asupri.

²¹ Mete la ding sundalus dang mitagan king espadang lulual king asbuk na nitang makasake king kabayu. At kinabsi la ding sablang ayup a mengan karing bangke ra.

20

¹ Kanita ikit ke ing anghel a titipang ibat banua. Tatalnan ne ing metung a maragul a kadena at ing susi na ning kalalalaman na ning yatu.

² Dekap ne ing dragon, itang ubingan king minunang panaun, ing diablo o Satanas. Ginapus ne iti kilub da ring libung banua.

³ Inugse ne niting anghel king kalalalaman na ning yatu at saka ne sinusi at tetakan ing pasbul ban e ne makalual at makapaglinlang pa karing bansa anggang e mapupus ing libung banua. Kalabas da reting banua ibulus ya kilub na ning saguling panaun.

⁴ Menakit ku namang dakal a tronu. At mirinan lang kapaintulutan matul ding makalukluk karing tronu. Ikit ku la ding kaladua da ring pete ra uli na ning pamagpatutu ra kang Jesus at karing amanu na ning Dios. E la sinamba deti king animal a mabagsik o king larawan na ni tinanggap king tatak na karing karelang kanuan o gamat. Mebie lang pasibayu ban mag-aring kayabe nang Cristo kilub ding libung banua.

⁵ Iti ya ing mumunang pamipasubling mebie karing mete. (E la subling mie ding mitagan anggang e la mapupus ding libung banua.)

⁶ Mapalad la at banal ding miyabe king mumunang pangasubling mebie. Ala neng upaya karela ing kaduang kamatayan; maging pari na la ning Dios at ning Cristo at mag-ari lang kayabe na kilub ding libung banua.

⁷ Kaybat da ring libung banua mabulus ya i Satanas.

⁸ Lumual ya ban linlangan na la ding bansa king mabilug a yatu; ngana wari, ing Gog at ing Magog. Tipunan na la at ituki king pamakilaban. Kasing dakal na la ning balas king pampang ning dagat ding sundalus na.

⁹ Minta la king miyayaliwang suluk na ning yatu at kibkuban de ing kampu da ring pinili na ning Dios at ing pakamalan nang siudad. Oneng dinatang ing api a ibat banua at mesilab la ngan.

¹⁰ At miyugse ya ing diablong miglinlang karela king dagat-dagatan na ning api at asupri a piyugsiyanan munaman king animal a mabagsik at king e tutung propeta; miyabe-abe lang miparusan karin aldo't bengi angga king kapilan pa man.

¹¹ Kaybat na nita, ikit ke ing metung a maragul a tronu'ng maputi at ing makalukluk karin. Mebating la king arapan na ing banua at ing yatu at e na la bitasang meyakit.

¹² At ikit ku lang makatalakad arap ning tronu ding mete, marangal at alang dangalan at mibuklat la ding libru. Mibuklat ya naman ing metung pang libru, ing libru ning bie. Miyatulan la ding mete agpang ketang depat da antimo ing makasulat karing libru.

¹³ Sinuka na la ning dagat ding mete a atyu king dagat. Pepalual na la naman ning Kamatayan at ning Hades ding mete a atyu karela. Miyatulan la ngan ketang depat da.

¹⁴ Miyugse ya ing Kamatayan at ing Hades king dagat-dagatan na ning api. (Iting dagat-dagatan na ning api ya ing kaduang kamatayan.)

¹⁵ Miyugse ya king dagat-dagatan na ning api ing ninumang e makasulat a lagyu king libru na ning bie.

21

¹ Kanita ikit ke ing metung a bayung banua at ing metung a bayung yatu. Ala ne ing sadiang banua at yatu; ala nia naman ing dagat.

² At ikit ke ing Banal a Siudad, ing bayung Jerusalem, titipa yang ibat banua, ibat ya king Dios. Anti ya king babaing kakasal; makagayak ya ban salubung king lalaking maging asawa na.

³ Kabud-abud dimdam ke ing masikan a siwalang ibat king tronu. Ngana, Ngeni, ing tuknangan na ning Dios atyu libutad da ring tau! Manuknangan yang kayabe da ring tau at maging balen na la. Akayabe re ing Dios at ya ing maging Dios da.

⁴ Pulisan na ing lua karing mata ra. Mawala na ing kamatayan, ing kalungkutan, ing tangis, at ing kaplas, uling linipas na la ding bage matua.

⁵ Nganang sinabi nitang makalukluk king tronu, Ngeni, ibayu ku ing sablang bage! At ngana kanaku, Isulat mu: Tutu at malyaring asahan ing sinabi ku.

⁶ Ngana pang sinabi, Metupad na! Aku ing Alpha at ing Omega, ing mumuna at katataulian. Ibie kung alang bayad king ninumang kakau ing danum ning sibul ning bie.

⁷ Iti ya ing tanggapan na ning magtagumpe: Aku ing maging Dios na at ya ing maging anak ku.

⁸ Oneng makatakut ing miras karing duag, karing taksil, karing magpasasa king e mayap, karing makamate tau, karing makipangalugud, karing mangkukulam, karing sasambang idolo, at karing sablang malaram. Miyugse la king dagat-dagatan na ning api at asupri; ing kaduang kamatayan.

⁹ Linapit ya kanaku ing metung karing pitung anghel a ating pitung silyo mitmu karing pitung tauling salut. Ngana, Mekeni at ipakit ke keka ing Babaing maging asawa na ning Kordero.

¹⁰ Liban na ku ning Espiritu at inatad na ku ning anghel king babo na ning metung a matas a bunduk. Pepakit ne kanaku ing Jerusalem, ing Banal a Siudad a titipa manibat banua at ibat king Dios.

¹¹ Maslag ya iti uli na ning kaligayan na ning Dios; kikislap yang anting maulagang batu, anting haspe at malino yang anti ing kristal.

¹² Makapal ya at matas a pader at atin yang labing aduang pasbul a ating bante anghel king balang metung. Makasulat la karing pasbul ding lagyu da ring labing aduang lahi na ning Israel.

¹³ Ating atlung pasbul king dane aslagan, atlu king bandang mauli, atlu king bandang norti, at atlu king bandang albugan.

¹⁴ Atin yang labing aduang batung pundasyun ing pader na ning siudad, at makasulat la kareti ding lagyu da ring labing aduang apostol na ning Kordero.

¹⁵ Atin yang tatalnan a gintung panyukad ing anghel a migsalita kanaku ban sukdan ne ing siudad, ding pasbul, at ing pader na.

¹⁶ Paraparehu ya sukad ing siudad; nung makananu ya kaba, makanyan ya naman kalapad. Sikdan ne ning anghel ing siudad; aduang libu at apat a ralan a kilometru ya ing kaba na at lapad at katas.

¹⁷ Sikdan nia naman ing pader; aduang dalan at labing anam yang talampakan king katas agpang king paniukad.

¹⁸ Batu yang haspe ing pader, at megawa ya ing siudad king purung gintu a maslag anting kristal.

¹⁹ Mipalamutian la karing miyayaliwang mangamal a batu ding pundasyun na ning pader. Haspe ya ing mumuna, safiro ya ing kadua, kalsedonia ya ing katlu, esmeralda ne man ing kapat, at

²⁰ onyx ya ing kalima, sardio ya ing kanam, krisolito ya ing kapitu, berilu ya ing kawalu, topasyo ya ing kasiam, krisoprasyo ya ing kapulu, hasinto ya ing kalabing metung, ametista ya ing kalabing adua.

²¹ Perlas la ding labing aduang pasbul; megawa ya ing balang metung king metung mung perlas. Puru yang gintu ing dalan na ning siudad at malino yang anting kristal.

²² Ala kung ikit a templo king siudad uling ing Ginung Dios a Mayupayang tutu at ing Kordero ilang peka Templo ra karin.

²³ E ne kailangan ing aldo o bulan ban aslagan ne ing siudad uling saslag karin ing ligaya na ning Dios at ing Kordero ya ing sulu.

²⁴ Lalakad la ding sablang tau king aslag na at karin da idala ding ari na ning yatu ing karelang pibandian.

²⁵ E la misara patingapun ding pasbul na uling ala nang bengi karin.

²⁶ Idala ra king siudad ing pibandian da at ligaya da ring bansa.

²⁷ Oneng e milub karin ing nanumang bage marinat, ing darapat makasumami o kalaraman. Deta mung makasulat a lagyu king libru na ning bie a ingatan na ning Kordero ila mung bukud milub king siudad.

22

¹ Kanita pepakit nia naman kanaku ning anghel ing ilug a babie bie. Malino anting kristal ing danum na uling manibatan king tronu na ning Dios at ning Kordero.

² Mamagus libutad ning dalan na ning siudad. Ding mingatbang pampang ning ilug atin lang tunggalan a tanaman a babie bie. Mamunga la balang bulan, at panulu la ding bulung da karing sakit da ring bansa.

³ Ala nang bage misumpa a mayakit pa karin. Atyu ya karin ing tronu na ning Dios at ning Kordero at samban de karin ding talasuyu na.

⁴ Akit de ing lupa na at misulat ya ing lagyu na karing kanuan da.

⁵ E na mika bengi karin. At e na la mangailangan sulu o aslag na ning aldo, uling dinan na lang sulu ning Ginung Dios at mag-ari lang alang kapupusan.

⁶ At sinabi na kanaku ning anghel, Tutu la at malyaring asahan deting amanu. Ing Ginung Dios a babie king Espiritu na karing propeta ya ing mitubud king anghel na ban ipakit karing talasuyu na ding bage a mapalyari king lalung malaguang panaun.

⁷ Nganang Jesus, Makiramdam kayu! Daratang na ku! Mapalad la ding tutupad karing ula a makalaman kaniting libru!

⁸ Aku, i Juan, ing mekaramdam at menakit kareting bage. Kaybat kung dimdam at ikit ing sabla, migsakab ku ba kung samba king arap ning anghel a pepakit kanaku kareting bage.

⁹ Oneng sinabi na, E mu sukat gawan yan! Uling talasuyu kung kalupa mu at kalupa da ring kapatad mung propeta at ding sablang tutupad karing amanung atyu keting libru. Ing Dios ya ing samban mu!

¹⁰ Ngana pa kanaku, E mu la sa lilihim deting ula a atyu keting libru uling malapit na lang mapalyari.

¹¹ Isundu na ning e mayap a tau ing dapat nang kasalanan, ing marinat king marinat nang pamibiebie; oneng ing mayap a tau isundu na ing pamagpakakayap na, at ing banal ing lalung pamagpakabanal na.

¹² Nganang Jesus, Makiramdam kayu! Malapit na kung datang! Darala ku la ding ablas a ibie ku king balang tau agpang ketang depat na!

¹³ Aku ing Alpha at ing Omega, ing mumuna at ing katataulian, ing kapupurmeruan at ing kawakasan.

¹⁴ Mapalad la detang pipipian da ing karelang imalan uling mirinan lang karapatan lungub king siudad at mangan karing bunga na ning tanaman a babie bie.

¹⁵ Oneng malakuan la king lual na ning siudad ding sakim, ding mangkukulam, ding makipangalugud, ding makamate tau, ding sasambang dios-diosan, at ding maburi at magsalita king kalaraman.

¹⁶ Aku, i Jesus, ing mitubud king kanakung anghel ban sabian na la deting bage kekayung atyu karing iglesia. Ibat ku king pamilya nang David; aku ing masalang tala ning abak.

¹⁷ Ngana ning Espiritu at ning Babaing kakasal, Mekeni! Ding sablang makaramdam kaniti kailangan ing sabian da naman, Mekeni! Ing ninumang kakau, lumapit ya; paburen yeng kuma ing bisa king danum a babie bie. Iti alang bayad.

¹⁸ Aku, i Juan, ing babie babala king ninumang makaramdam king ula a makasulat keting libru: ing ninumang mandagdag king laman na niting libru, dagdagan na naman ning Dios ing parusa na karing salut a makasulat keting libru.

¹⁹ At ing ninumang ating ilako karing ula a makasulat, ilako na naman ning Dios ing karapatan na king bunga na ning tanaman a babie bie at king Banal a Siudad a mababanggit keting libru.

²⁰ Ing patutu kareting bage sasabian na, Wa, tutu! Malapit na kung datang! Amen. Datang na ka sa, O Ginung Jesus!

²¹ Ing grasya na ning Ginung Jesus manatili karing sabla.