1

¹ Kanitang minuna, king dakal at miyayaliwang paralan, migsalita ya ing Dios karing kekatamung makatua king kapamilatan da ring propeta.

² Oneng kareting tauling aldo, migsalita ya kekatamu king kapamilatan na ning Anak na. King kapamilatan na lelangan ne ning Dios ing meto sikluban at ing Anak ya ing tilduan nang talapagmana king sabla king kapupusan na ning panaun.

³ Ya ing maslag nang sala ning ligaya na ning Dios uling ganap neng kawangis king kadiosan na; ya ing magmantini king meto sikluban king kapamilatan na ning mayupaya nang amanu. Ngening alinis na na la ding tau king dinat na ning karelang kasalanan, linukluk ya king banda nang wanan ning Dios a Mayupayang tutu karin banua.

⁴ Nung makananung ing lagyung binie na ning Dios king Anak lalagpus yang e palak king lagyu da ring anghel, makanyan yang makapaygit e palak karela.

⁵ E na bitasang sinabi ning Dios king kaninu man karing anghel, Ika ing Anak ku; king aldo iti meging Ibpa mu ku. E na naman sinabi king ninumang anghel, Aku ing maging Ibpa na, at maging Anak ke.

⁶ At inyang malapit na niang itubud ning Dios keti king yatu ing Anak nang pangane, sinabi na, Sukat deng samban ding sablang anghel ning Dios.

⁷ Tungkul naman karing anghel, nganang sinabi ning Dios, Papalyarian na lang angin ding anghel na, at aping milalablab ding talasuyu na.

⁸ Oneng tungkul king Anak, nganang sinabi ning Dios, Ing kekang tronu, O Dios, manatili ya kapilan pa man! Sumakup ka bilang Aring makatuliran.

⁹ Kaluguran mu ing matulid, at pikakasaman mu ing dewakan; inya ing Dios a kekang Dios pinili na ka at dininan king tula ning dangalan a mimigit e palak kesa king binie na karing kekang kayabe.

¹⁰ Sinabi na naman, Ika, Ginu, kanitang kapupurmeruan lelangan me ing yatu, at karing mismung gamat mu inubug me ing banua.

¹¹ Lumipas la ngan, oneng manatili ka kapilan man; maging laun la ngan anting imalan.

¹² Ituklip mu lang kalupa ning balabal at kalupa ning imalan, panalilan mu la ngan. Oneng ika manatili kang alang pangabayu, uling ala kang kawakasan.

¹³ Kapilan man e na sinabi ning Dios kaninu man karing anghel na, Lukluk ka king banda kung wanan, anggang e ku la lubus apasukuan keka ding kekang kalaban.

¹⁴ Nung makanyan, nanu la pin mo ding anghel? Pawa lang espiritung susuyu king Dios, at tutuburan nang sumaup karing sablang tanggap kaligtasan.

2

¹ Iti ing sangkan nung inya lalu ta lang sukat pakaingatan ding katutuan a kekatamung dimdam ban e tamu milisia king tune dalan.

² Uling meyakit king tutu la ding amanung sinabi da ring anghel, inya ing ninumang sinalangsang o linabag king sinabi ra tinanggap yang lapat a kaparusan.

³ Makanyan tamu namang e malyaring lisian ing parusa, nung e tamu balung ingatan iting kaligtasan a e mu nanu degulan. Ing Ginu mismu ya ing minunang pepabalu kaniting kaligtasan at patunayan da kekami ding sablang mekaramdam king iti katutuan.

⁴ Pepatutuan na naman ning Dios iti king kapamilatan da ring mangayupayang tanda, milagru at miyayaliwang pagmumulalan, at king kapamilatan da ring regalu na ning Banal a Espiritu a binie na karing dakal a tau agpang king kaburian na.

⁵ E ne pepailalam ning Dios karing anghel ing mamuntukan la king bayung yatung malapit nang datang, ing yatung kekatamu ngening pisasabian.

⁶ Nune, antimo ing masasabi king metung nang dake ning Kasulatan, Nanu ya ing tau, O Dios, ba meng ganakan o ing anak ning tau, ba meng ingatan?

⁷ King ditak a panaun gewa meng mababang bagya karing anghel; oneng dininan meng ligaya at dangalan a karapatdapat king metung a ari,

⁸ at gewa meng talapanibala king sablang bage. Inyang ing Dios gewa neng talapanibala king sabla ing tau, ing sabla pepasakup na keya. King kasalukuyan e ta ya pa akakit sasakup king sablang bage ing tau.

⁹ Oneng ing akakit tamu ya i Jesus a king sinaguling panaun megawang mababang ditak kesa karing anghel. Ngeni akakit ta yang makakorona king ligaya at dangalan uli na ning kamatayan a delanan na. Kaburian na ning Dios king takman yang kamatayan i Jesus para kekatamu ngan.

¹⁰ Matulid king ing Dios a linalang at papanatili king sabla ing gawan neng ganap i Jesus king kapamilatan na ning kasakitan ban adala na la ding dakal nang anak king pamakirake king ligaya na. I Jesus ya ing panibatan na ning karelang kaligtasan.

¹¹ Ing mamatawad karing kasalanan da ring tau at itang mamatawad at ding taung mipatawaran metung la mu Ibpa. Inya e na la pikarine ausan kapatad na ding tau.

¹² Ngana, Isalita ke ing lagyu mu karing kakung kapatad, magkanta kung kapurian keka king libutad da ring sablang taung makatipun.

¹³ Sinabi na naman, Manalig ku king Dios. At ngana pa, Atyu ku keni kayabe da ring anak a binie na ning Dios kanaku.

¹⁴ Anti na ning ding sablang anak, antimo ing aus na karela, tau lang ating laman at daya, i Jesus mismu mekilupa ya karela at mekisanmetung ya king karelang pangatau. Depat na iti ban king kapamilatan na ning kamatayan na akua neng paten ing diablo a makikayupayan king kamatayan.

¹⁵ King makanyan a paralan ikua na lang meging malaya detang meging ipus king kekaban na ning bie ra uli na ning takut da king kamatayan.

¹⁶ Masalang tutu king aliwa ding anghel ding sasaupan na, nune, ketang sasabian na ning Kasulatan, Ding lahi nang Abraham ilang sasaupan na.

¹⁷ Iti mangabaldugan king kailangan yang makilupa king sablang bage karing kapatad na ban akua nang maging tapat, at mapaglunus a Pekapun ding Paring susuyu arapan na ning Dios. Kanita akua rang mipatawaran ding kasalanan da ring tau.

¹⁸ Uling ya mismu dinalan yang kapagsubukan at kasakitan. Inya ngeni malyari na lang asaupan ding aliwang daralan king kapagsubukan.

3

¹ Inya, kapatad kung banal at kalupa ku namang inaus na ning Dios, ganakan ye i Jesus a tinubud na ning Dios ban maging Pekapun ding Pari na ning kasalpantayanan tamu.

² Tapat ya king Dios a memili keya antimo nung makananu yang meging tapat i Moises king pamilya na ning Dios.

³ Maygit yang marangal ing taung menalakad bale kesa king bale a telakad na. Inya mas marangal ya i Jesus kesa kang Moises.

⁴ Tutu king ating taung menalakad king balang bale, oneng ing Dios ya ing mitalakad king sablang bage.

⁵ Meging tapat ya i Moises king kabilugan nang pamilya ning Dios. Bilang metung a talasuyu, minie yang patutu tungkul karing bage a sabian na ning Dios king daratang a panaun.

⁶ Oneng tapat ya i Cristo bilang Anak a mamuntukan king mabilug nang pamilya ning Dios. Itamu ing pamilya na, nung manatili tamung matibe lub at maragul a tiwala king kekatamung kapanayan.

⁷ Inya, antimo ing sasabian na ning Banal a Espiritu, Nung damdaman yu ngeni ing siwala ning Dios,

⁸ e kayu masias a buntuk antimo ing depat ding mig-rebeldi laban king Dios, at piniubukan de karin king disyerto.

⁹ Karin tiksuan da ku't piniubukan ding kekayung makatua, nganang magsalita ning Dios, agyamang ikit da ing kakung depat kilub ding apat apulung banua.

¹⁰ Inya kemuan ku la ding taung deta at ngakung sinabi, Kapilan man e la meging tapat, e na la mebiasang tinupad karing kakung kautusan.

¹¹ Uli ning mua ku, ngakung miniumpa karela, Kapilan man e la milub king lugal ning kapaynawan a sidia ku para karela!

¹² Kapatad, mingat kayu sana ban kanita alang mipapakarok kekayu, at e milako kasalpantayanan ban e ye lakuan ing Dios a mabie.

¹³ Sukat kayung mituturuanan aldo-aldo kabang atin pang panaun, antimo ing sasabian na ning Kasulatan, ban ing ninuman kekayu e ya malinlang king kasalanan, at e maging masias a pusu.

¹⁴ Uling kayabe na katamu ngang Cristo, nung manatili tamung matibe kalawat angga king kawakasan king kapanaligan a miyabie kekatamu ibat pa king kapupurmeruan.

¹⁵ Iti ya ing sasabian na ning Kasulatan, Nung damdaman yu ngeni ing bosis ning Dios, e kayu masias a buntuk, antimo ing depat ding makatua yu kanitang mig-rebeldi la laban king Dios.

¹⁶ Ninu ding mig-rebeldi laban king Dios agyamang dimdam da ing siwala na? Aliwa wari ding sablang taung leko nang Moises king Ehipto?

¹⁷ At ninu ding kemuan na ning Dios kilub ding apat apulung banua? Aliwa wari ding ginawang pamikasala at mete king disyerto?

¹⁸ Inyang nganang miniumpa ning Dios, E la miras kapilan man king lugal ning kapaynawan a sidia ku para karela, ninu ding taung amanuan na? Aliwa wari detang mig-rebeldi laban keya?

¹⁹ Inya balu tamung e la milub king gabun a pengaku na karela uling e la meniwala king Dios.

4

¹ Manatili pa angga ngeni itang pangaku na ning Dios tungkul king pamaglub at pangaras king lugal ning kapaynawan a sasadia na. Inya mingat tamu pota atin kekayu a mipagkaitan king pangakung ita.

² Uling kalupa da ring makatua tamu, dimdam ta ya munaman ing Mayap a Balita. Oneng ila e ra pekinabangnan ing amanung dimdam da uling e ra peniwalan.

³ Oneng itamung ating kapaniwalan, itamu ding milub king lugal na ning kapaynawan, agpang king sinabi na mu rin ning Dios, King kamua ku, piniumpa ku la; e la bitasang milub king lugal ning kapaynawan a sidia ku para karela! Sinabi na iti agyamang ding dapat na meyari na la kanita pang lelangan ne ing yatu.

⁴ Uling anti kaniti ing masasabi king metung nang dake ning Kasulatan tungkul king kapitung aldo, King kapitung aldo, pepaynawa ya ing Dios king sablang dapat na.

⁵ Iti mu rin ing mababanggit pasibayu: E la bitasang milub king lugal ning kapaynawan a sidia ku para karela.

⁶ E la milub at menakit kapaynawan detang minunang mekaramdam king Mayap a Balita uling e la meniwala. Oneng ating aliwang milub at manakit kapaynawan.

⁷ Iti mayayakit uling pasibayu yang mitakdang aliwang aldo a mayayaus Ngeni. Kalabas na ning makabang panaun, binggitan ne iti king kapamilatan nang David king Kasulatan a mebanggit na, Nung damdaman yu ngeni ing siwala ning Dios, e kayu masias a buntuk.

⁸ Nung ikua na lang alub Josue ding tau king lugal na ning kapaynawan, e ne sana migsalita pa ing Dios tungkul king aliwang aldo.

⁹ Uli na niti, atin pang kapaynawan a makasadia para karing pinili na ning Dios, kapaynawan a kalupa na ning pamagpaynawa na ning Dios king kapitung aldo.

¹⁰ Uling ninuman ing milub at manakit kapaynawan king siping ning Dios, paynawa ya munaman karing dapat na a kalupa ning pamagpaynawa na ning Dios king dapat na.

¹¹ Inya gisanan tamu ing sablang agyu tamu ba tamung milub at manakit kapaynawan. Ninuman sa kekatamu e ya makiapus king pamanialangsang da ban e ya mipahamak kalupa ra.

¹² Uling ing amanu na ning Dios mabie ya at darapat ya. Maygit yang mataram kesa king nanumang espadang dobli taram. Managlus ya angga na king nung nu la mikakit ing kaladua at ing espiritu, angga na karing pisuglungan butul at utak da ring butul. Balu nang panuyatan pati na ing lihim nang buri at isipan ning tau.

¹³ Ala kang asalikut nanuman king Dios. Ing sablang melalang makabuklat at makalantad king panimanman na at king Dios tamu munie kwenta tungkul king kekatamung sarili.

¹⁴ Anti na ning kang Jesus, ing Anak ning Dios, atin tamung metung a marangal at Pekapun ding Pari a miras angga king arapan na ning Dios, magpakatatag tamu king kekatamung kasalpantayanan.

¹⁵ Ing kekatamung Pekapun ding Pari biasa yang makisanmetung a panamdam king kekatamung keinan. Uling dinalan ya naman king sablang kapagsubukan a kalupa na ning daralanan tamu agyamang e ya mikasala.

¹⁶ Inya kayabe na ning matibe kapanaligan, lumapit tamu king tronu na ning Dios ba tamung tanggapan ing lunus at saup king oras ning pamangailangan tamu.

5

¹ Ing balang pekapun ding pari mapipili ya ibat karing kalupa nang tau at mitutulduan yang sumuyu king Dios para karela. Miyayain yang ain at sakripisyu para karing kasalanan.

² Anti na ning ya mismu ating yang miyayaliwang keinan, malyari yang makirame karing alang balu at karing mililisia king dalan.

³ Uli na ning ya mismu maina ya, kailangan ya naman miyain ain-sakripisyu e mu para karing kasalanan da ring tau nune para munaman karing sarili nang kasalanan.

⁴ Ing dangalan a maging pekapun ding pari e na malyaring kuanan ning ninuman king sarili nang kaburian. Ing Dios ya ing mamaus keya, antimo ing pangayaus nang Aaron.

⁵ Makanyan munaman, e na binie Cristo king sarili na ing dangalan a maging pekapun ding pari, nune tinggap na iti king Dios a sinabi, Ika ing kakung Anak; king aldong iti meging Ibpa mu ku.

⁶ Sasabian na naman ning aliwang dake ning Kasulatan, Maging pari ka kapilan man ketang panga-pari nang Melkisedek.

⁷ King kekaban na ning bie na king yatu, miyain yang panalangin i Jesus at menigapu yang masikan at menangis arap ning Dios a makapagligtas king kamatayan na. Uli na ning migpakumbaba ya at memintu, pekiramdaman ne ning Dios.

⁸ Agyamang ya ing Anak ning Dios, mebiasa yang memintu king kapamilatan na ning kasakitan na.

⁹ At inyang meging ganap ne, ya ing meging panibatan ning alang anggang kaligtasan para karetang sablang mamintu keya.

¹⁰ At peintulut na ning Dios ing gawan neng pekapun ding pari, agpang king panga-pari nang Melkisedek.

¹¹ Dakal ing malyari ming asabi tungkul king bage iti, oneng masakit ipalino kekayu uling e kayu bisang makiramdam.

¹² Kailangan sana king panaun a iti ing talaturu na kayu, oneng angga man ngeni kailangan kayu pang ituru karing pasimula nang lisyun ning amanu na ning Dios. Kailangan king kasalukuyan agyu yu nang mangan masias, oneng angga ngeni gatas pa mu ing agyu yung inuman.

¹³ Metung ya pang bingut ing mangabiayan king gatas, ala ya pang male tungkul king mayap at king e mayap.

¹⁴ Oneng ing masias a pamangan para kareta yang atyu na king idad a sane na king pamangilala king mayap at king e mayap.

6

¹ Inya lakuan ta na la ding pasimulang lisyun tungkul kang Cristo. Munta tamu karing lisyun a malyaring munie ganap a beluan kekatamu. E ta na gagamit pang panaun para mu pasibayu lang ibili ding peka pundasyun na ning aral nang Cristo; ing pamangalinguan karing dapat a alang ulaga arap ning Dios at ing pamanialpantaya keya;

² ing turu tungkul king binyag at ing pamitumpak karing gamat; ing pamanyubli rang mie ding mete, at ing kayatulan a alang kapupusan.

³ Saka ta na la balikan den, nung dinan na katamung panaun ning Dios. Kailangan sumulung tamu!

⁴ Uling makananu la pang makasisi at makapibalik lub ding mengalinguan? Kanitang misan miyaslagan na la king sala ning Dios. Tikman da na la ding regalu na ning banua at kayabe la karing tinanggap king Banal a Espiritu.

⁵ King karelang sibukan balu ra king ing amanu na ning Dios pawang kayapan at tinalab karela ing upaya na ning Dios a lubus mipabalu king daratang a panaun.

⁶ Nung kaybat da ngang atakman iting sabla at saka la mangalinguan, e na la malyaring makasisi at makapagbalik a lub, uling pasibayu reng papaku king krus at lalantad king kamarinayan ing Anak ning Dios.

⁷ Bibendisyunan na ning Dios ing gabun a maralas tatanggap uran, at tutubu la ding tanaman a malyari rang pakinabangnan ding mananaman.

⁸ Nung dikut at tanaman a masuksuk ing tumubu karin, alang kwenta ing gabun a ita; mika piligru pang isumpa na ning Dios at bandang tauli silaban da mu.

⁹ Agyamang magsalita kaming anti kaniti, kaluguran kung kapatad, asisiguradu ming atyu kayu king lalung mayap a kabilian, at susulung kayu king dalan a papunta king kaligtasan.

¹⁰ Uling ing Dios tapat ya; e na kalinguan ing kekayung depat at ing lugud a pepakit yu, at angga man ngeni papakit yu king pamaniuyu yu karing kalupa yung Cristianu.

¹¹ Pagnasan ming lubus king papanatilian na sa ning balang metung kekayu at isundu ing pamagkapilit na angga king kawakasan ban tanggapan yu ing pangatupad da ring sabla yung pagnasan.

¹² Inya e kayu magtamad. Tularan yu la ding mapibabata at ding ating kapanaligan king Dios, at tanggapan yu ing pangaku na.

¹³ Inyang mengaku ya ing Dios kang Abraham, sinumpa yang tuparan na ing pengaku na. Anti na ning ala nang aliwa pang maygit king sarili na, ginamit ne ing sarili nang lagyu inyang sinumpa ya.

¹⁴ Nganang sinabi, Pangaku ku keka king bendisyunan da kang lubus at dinan da kang dakal a lahi.

¹⁵ Mapibabata yang menaya i Abraham, inya naman tinggap na ing pengaku na ning Dios.

¹⁶ Neng susumpa ya ing metung a tau gagamitan ne ing lagyu na ning metung a maygit king sarili na, at king kapamilatan na niti mayayari ing pisasabian.

¹⁷ Makanyan munaman, digdag ne ning Dios ing metung a sumpa king pangaku na ba nang pakilala karing pengakuanan na king e na alilan kapilan man ing king lub na.

¹⁸ Inya e ya magbayu at maglaram ing Dios tungkul kareting aduang bage: ing pangaku na at sumpa. Itamung menakit kaligtasan king Dios, sukat tamung mirinan tetagan a lub king pamanaya karing pengaku na.

¹⁹ Ing kapanayan a iti ya ing peka sinipete na ning bie tamu. Matatag at matibe at mamabut angga king sumangid na ning tabing ning Templo, at tataglus angga king kakilub-kiluban na ning tuknangan na ning Dios.

²⁰ Linub neng mumuna kekatamu i Jesus karin at para kekatamu. Karin ya meging Pekapun ding Pari kapilan man ketang panga-pari nang Melkisedek.

7

¹ Iting Melkisedek ya ing ari na ning Salem at pari ne ning Kakataskatasan a Dios. Kanitang i Abraham pa-uli yang ibat king labanan nung nu na la apate ding ari, selubungan neng Melkisedek at saka ne binendisyunan.

² Binie nang Abraham kang Melkisedek ing kapulung dake na ning sablang ikua na king labanan. (Ing mumuna nang kabaldugan ning lagyung Melkisedek ya ini: Ari ning Katuliran. At uling ya ing ari na ning Salem ing lagyu na mangabaldugan ya munamang: Ari ning Kapayapan.)

³ Alang makibalu nung ninu i tata na o ima na o nung ninu ding makatua nang Melkisedek; alang piakitan tungkul king aldo nang beitan o ing aldo ning kematayan na. Kalupa na ning Anak ning Dios, manatili yang pari kapilan man.

⁴ Lawan yu nung nu ya anti karangal! Binie nang Abraham ing kapulung dake na ning ikua na king labanan. At metung yang patriarka i Abraham!

⁵ Ding mitulduan maging pari karing lahi nang Levi yuyutus na la ning Kautusan king mangolekta lang kapulung dake karing memalen na ning Israel, ngana wari, karing sarili dang kabalen, agyamang lahi na la namang Abraham.

⁶ E ya kabilang i Melkisedek karing lahi nang Levi, oneng tinanggap yang kapulung dake kang Abraham. At binendisyunan ne pa iting taung tinanggap king pangaku na ning Dios.

⁷ Alang pamagduda king ing mamendisyun maygit ya degulan kesa king bibendisyunan na.

⁸ Tau lang ating kamatayan ding Levita a kakuang kapulung dake, oneng mabie ya pa i Melkisedek angga ngeni antimo ing patutuan na ning Kasulatan.

⁹ Inya malyari munamang sabian king inyang minie yang kapulung dake i Abraham, i Levi a maki lahi karing mangolektang kapulung dake, minie ya namang kapulung dake king kapamilatan nang Abraham.

¹⁰ Uling e ya pa makabait kanita i Levi, inya malyari tamung asabi king atyu ya pa king katawan nang Abraham a makatua na, inyang iti selubungan neng Melkisedek.

¹¹ Ing pangaibie na ning Kautusan karing memalen na ning Israel menalakaran king panga-pari da ring lahi nang Levi. Ngeni, nung ing dapat da ring pari a ibat king lahi nang Levi tune maka-ibie genapan, e ne sana kailangan linto ing aliwa pang pari a e ketang panga-pari nang Aaron, nune ketang panga-pari nang Melkisedek.

¹² Uling kabud mipalitan ing panga-pari, kailangan ya namang alilan ing kautusan.

¹³ At ing Ginu tamu a amanuan na ning sablang mesabi, menibatan ya king aliwang lahi, at metung man king lahing ita alang migsilbi antimong pari.

¹⁴ Pikabaluan king mibait ya king lahi nang Juda at e ne bitasang binggitan Moises iting lahi inyang migsalita ya tungkul karing pari.

¹⁵ Iti lalung maging malino inyang linto ya ing aliwang pari a kalupa nang Melkisedek.

¹⁶ Meging pari ya e king kapamilatan na ning lahi na antimo ing yuyutus na ning kautusan, nune king kapamilatan na ning upaya na ning bie alang kapupusan.

¹⁷ Uling ing Kasulatan sasabian na: Pari ka kapilan man ketang panga-pari nang Melkisedek.

¹⁸ Inya linele re ing matuang tuntunan uling maina ya at alang ulaga.

¹⁹ Uling e na agawang ganap ning Kautusan nang Moises ing isanu mang bage. Ngeni mirinan tamung lalung mayap a kapanayan, at king kapamilatan na ning kapanayan a yan milalapit tamu king Dios.

²⁰ Maygit pa kaniti, sinumpa ya at mengaku ing Dios. E ya sinumpa ing Dios inyang gewa na lang pari ding lahi nang Levi.

²¹ Oneng inyang gewa neng pari i Jesus sinumpa ya at mengaku. Nganang sinabi, Ing Ginu sinumpa ya at e ya magbayung isip. Pari ka kapilan man.

²² Inya i Jesus ya naman ing garantia king makasiguru tamu king metung a lalung mayap a kasunduan.

²³ Bukud pa kanyan, ding pari a menibat king lahi nang Levi dakal lang misalasalisi uling mete la at e ra asundu ing karelang tungkulan.

²⁴ Oneng mabie ya i Jesus kapilan man at e ya miyalilan king panga-pari na.

²⁵ Inya agyu na lang iligtas ngeni at kapilan man ding sablang lalapit king Dios king kapamilatan na, uling mabie ya kapilan man ban mamilatan king arap ning Dios para karela.

²⁶ Uli na niti, matulid ing mika Pekapun tamung Pari a munie king kekatamung kailangan. Uling banal ya i Jesus; ala yang kamalian o kasalanan; mikawani ya karing taung makasalanan at mitas yang matas pa king banua.

²⁷ E re kalupa ding aliwang pekapun ding pari; e na kailangan Jesus ing miyain yang ain-sakripisyu king balang aldo para king sarili nang kasalanan at kaybat para karing kasalanan da ring tau. Miyain yang metung mung ain-sakripisyu, misan mu at para king kapilan pa man, kanitang binie na ing sarili na.

²⁸ Tutuldu yang taung maina ing Kautusan nang Moises ban maging pekapun lang pari; oneng ing pekapun ding paring pengaku na ning Dios a kayabe ning metung a sumpa a dinatang makatauli king Kautusan, ya kabud ing Anak a sakdal ganap angga man king kapilan pa man.

8

¹ Ing kapupuntan na ning sablang sasabian mi ya ini: atin tamung metung a Pekapun ding Pari a makalukluk king banda nang wanan ning tronu ning Kakataskatasan a Dios.

² Ya ing pekapun ding pari a susuyu king Kabanal-banalan a Lugal, ngana wari, king tune tolda a telakad na mismu ning Dios, e ning tau.

³ Ing balang pekapun ding pari mitutulduan yang munie ain at animal bilang ain-sakripisyu king Dios; inya sukat munaman ing atin yang ayain ing kekatamung Pekapun ding Pari.

⁴ Nung atyu ya mu keti king yatu, e ya malyaring kilalanan bilang pari king makananu mang paralan, uling atin nang pari keti a munie ain, agpang king Kautusan da ring Judio.

⁵ Oneng king katunayan ing obrang gagampanan da metung mung wangis at peka anino na ning karin banua. Kalupa na ning anti kanitang king panaun nang Moises. Inyang tatalakad neng Moises ing Tolda, sinabi na ning Dios keya, Pakasiguraduan mu king gawan mu ing sabla antimo ing pepakit ku keka karin king bunduk.

⁶ Oneng, antimo ing milyari, mirinan yang kayupayan i Jesus bilang pari a mimigit e palak ketang miyabie karela, antimo nung makananu yang lalung mayap itang kasunduan a tinatag na pilatan na ning Dios at ding tau. Uling makatalakad ya iting kasunduan karing lalung mangaulagang bage a mipangaku.

⁷ Nung itang minunang kasunduan ala yang kakulangan, e ne sana meging kailangan ing kadua.

⁸ Oneng menakit yang kakulangan ing Dios king balen na, inya nganang sinabi, Datang la ding aldo, ngana ning Ginu, nung nu ke itatag ing metung a bayung kasunduan karing memalen ning Israel, at king tribu nang Juda.

⁹ E ne maging kalupa na nitang kasunduan a tinatag ku karing karelang makatua, kanitang tinaid ku lang leko ibat Ehipto. E la menatiling tapat king kasunduan a tinatag kung kayabe ra, inya pepaburen ku la, ngana ning Ginu.

¹⁰ Iti, ngeni, ya ing kasunduan a itatag ku karing memalen ning Israel king daratang a panaun, ngana ning Ginu: Ibili ku la ding kakung kautusan king kaisipan da, at idukit ku la karing pusu ra. Aku ing maging Dios da, at ila naman maging balen ku la.

¹¹ E na kailangan pa king ituru ne ning ninuman karela ing kalupa nang memalen o sabian na king ninuman karing kapatad na, Kilalanan me ing Ginu. Uling ila ngan akilala da ku, manibat king pekamalati angga na king maragul dili.

¹² Patawaran ku la karing karelang kasalanan, at kalinguan ku na ing e mayap dang dapat.

¹³ King pamagsalita na ning Dios tungkul king metung a bayung kasunduan, mangabaldugan king bibilang na neng alang ulaga itang minuna; E na lambat lumipas ya ing isanu mang bage milalako ulaga at maluluma.

9

¹ Atin yang tuntunan ing minunang kasunduan para king pamanyamba at atin ya namang pisasamban a telakad da ring tau keti king yatu.

² Telakad de ing metung a tolda a ating aduang dake. Ing mumunang darasnan ya itang ausan dang Banal a Lugal. Kilub na niti atyu ing lampara, ing lamesa, at ding tinape a yayain da king Dios.

³ Ing kaduang dake a atyu king kagulutan na ning kaduang tabing ya itang ausan dang Kabanal-banalan a Lugal.

⁴ Atyu karin ing altar a pidurulukan dang insenso at ing Kaban ning Kasunduan a parehung binalut king gintu. Kilub na ning Kaban atyu ing metung a gintung kuran a ating laman a manna, at ing tukud nang Aaron, ing tukud a mika bulung, at ding aduang tinabas a batu nung nu la makasulat ding kautusan.

⁵ Bandang babo na ning Kaban atyu la ding kerubin a pakilala king atyu karin ing Dios. Makaladlad la ding pakpak da babo na ning luklukan nung nu la mipatawaran ding kasalanan. Oneng e mi na ilarawan tunggal-tunggal ngeni ing heganagana.

⁶ Ngening makanyan la panga-ayus deting bage, parati lang lulub ding pari king mumunang dake na ning tolda ba rang gampanan ing karelang katungkulan.

⁷ Oneng bukud mung ing Pekapun ding Pari ya ing lulub king kaduang dake at daraptan na iti misan mu king pabanua. Magdala yang daya a iyain na king Dios para king sarili nang kasalanan at para karing kasalanan a arapat da ring tau king e ra balu.

⁸ King sablang ayus a iti, ing Banal a Espiritu tuturu na king ing dalan papunta king Kabanal-banalan a Lugal e ya pa makabuklat kabang atyu ya pa karin ing mumunang dake.

⁹ Iti metung ya mung anino at ing pakilala na ya pin ing panaun a kasalukuyan. Buri nang sabian niti king detang ain at animal a sasakripisyu ra karin e re agawang ganap ing pusu na ning talasamba.

¹⁰ Deti makatungkul la mu king pamangan, inuman, at miyayaliwang seremonya king pamaglinis. Puru lang tuntunan at mipatupad la reti anggang e na babayu ning Dios ing sabla.

¹¹ Oneng ngeni dinatang ne i Cristo, ing Pekapun ding Pari na ning bayung kasunduan. Ing toldang pisusuyuan na lalu yang maragul at ala yang kalupa; e re gewa ding tau, ngana wari, e ya kabilang karing lelangan keti king yatu.

¹² Misan ya mu linub king Kabanal-banalan a Lugal i Cristo at ita sapat na para kapilan man. E ra daya ding kambing at biserung baka ing darala nang ain anting sakripisyu, nune ing sariling daya na at apakiabutan na ing alang anggang kaligtasan para kekatamu.

¹³ Nung ing daya da ring kambing at ding toro at ing abu na ning dumalagang bakang dilukan a pipisik da at bububud karing taung lalawan nang marinat ning Kautusan malilinis la king sablang dinat da,

¹⁴ lalung maygit e palak kaniti ing arapat na ning daya nang Cristo a king kapamilatan na ning Espiritung alang angga inain na ing sarili na bilang ganap a sakripisyu king Dios. Ing daya na ya ing makalinis karing pusu tamu at kaisipan ban manibat king sablang dapat a alang kabaldugan asuyuan ta ya ing Dios a mabie.

¹⁵ Uli na niti, i Cristo ya ing talapamilatan na ning bayung kasunduan ban ding sablang inaus na ning Dios tanggapan da ing alang anggang regalung pengaku na. Milyari iti uli na ning kamatayan na a mekapagligtas karing tau king miyayaliwang kasalanan da kanitang makasakup la pa king minunang kasunduan.

¹⁶ Neng ating metung a testamento, kailangan mipatunayan pa mu king ing ginawa king testamento mete ne.

¹⁷ Uling ing testamento makagyung metung yang mistulang papil kabang ing ginawa kaniti mabie ya pa; oneng mika epektu ya iti kabud mete ne ing ginawa kaniti.

¹⁸ Agyang itang minunang kasunduan e ya mirinan katibayan nune mu king kapamilatan na ning daya.

¹⁹ Muna, sinabi ne pa mung Moises ing balang metung karing tuntunan a mababanggit king Kautusan. Kaybat, kinua na ing daya da ring biserung baka at kambing a semutanan danum. Sinoso ne kaniti ing malutung lana at ing sanga na ning hisopo at pisikan ne king daya ing libru ning Kautusan ampon ding sablang tau.

²⁰ Kayagnan na niti sinabi na, Iti ya ing dayang babie katibayan king kasunduan a binie na ning Dios at ipatupad na kekayu.

²¹ Makanyan nia namang pisikan Moises ing Tolda at ing sablang gagamitan king pamanyamba.

²² Agpang king Kautusan, halus ing sablang bage malilinis king kapamilatan na ning daya at mipatawaran la ding kasalanan bukud mung king kapamilatan na ning pamitulu ning daya.

²³ Deting bage magagamit king tolda a mistula da mung anino ding atyu karin banua, kailangan lang gawan malinis king kapamilatan da ring anti kareting ain. Oneng ding mismung bage a atyu karin banua mangailangan lang lalung mayap a ain.

²⁴ Uling e ya linub i Cristo king metung a Banal a Lugal a gewa da ring tau at anino nang mistula ning tune, nune linub ya karin banua mismu at ngeni atyu arap ning Dios at mamilatan ya para kekatamu.

²⁵ Ing Pekapun ding Pari da ring Judio lulub ya king Kabanal-banalan a Lugal balang banua, at magdala yang daya da ring animal. Oneng i Cristo linub ya misan mu ba nang iyain ing sarili na at ita makagyu na.

²⁶ Nung e makanyan ing gewa na, e kasi kailangan ing ulit-ulit yang mamamate manibat na kanitang melalang ya ing yatu. Oneng pepakit ya misan mu at para king kapilan pa man ngening malapit nang mapupus ing panaun, ba nang ilako ing kasalanan king kapamilatan na ning pamisakripisyu na king sarili na.

²⁷ Mitakda yang mate ing balang tau misan mu at kaybat na nita ukuman ne ning Dios.

²⁸ Makanyan munaman, i Cristo misan ya mu miyain ain-sakripisyu ba nang ilako ing kasalanan da ring tau. Datang yang pasibayu, e para miyain yang pasibayu para king kasalanan, nune para iligtas na la ding sabik manenaya king pamagbalik na.

10

¹ Metung ya mung malabug a anino ing Kautusan, at e ya ganap at e ya tapat a larawan da ring mayap a bage datang king aldo bukas. E na la agawang ganap ning Kautusan ding taung lalapit king Dios king kapamilatan da ring ain a babie dang alang patugut banua-banua.

² Nung mipatawaran na la ding lalapit king Dios king kapamilatan da ring anti kareting ain, ala na la sanang gaganakan pa tungkul karing kasalanan da, at e na la sa kailangan miyain pang ain-sakripisyu.

³ Oneng ding ain a deti ila pang paganaka banua-banua karing tau tungkul karing karelang kasalanan,

⁴ uling ing daya da ring toro at ding kambing e ra alako kapilan man ing kasalanan.

⁵ Uli na niti, inyang malapit neng datang i Cristo keti king yatu, sinabi na king Dios, E ka maburi king ain-sakripisyu at karing ain a animal, oneng sidia mu kung metung a katawan.

⁶ E ka tutula karing ain-a-durulukan king altar o karing sakripisyung kapamayaran karing kasalanan.

⁷ Kanita ngakung sinabi, O Dios, atyu ku keni, ban tupad king kaburian mu, antimo ing misulat tungkul kanaku king libru ning Kautusan.

⁸ Muna sinabi na, E ka maburi ni e ka tutula karing ain-sakripisyu at karing ain a animal o karing ain-a-durulukan babo ning altar, at karing sakripisyung kapamayaran karing kasalanan. Sinabi na iti agyamang deting sabla miyayain la ketang aduan ning Kautusan.

⁹ Kaybat nganang sinabi, Atyu ku keni, O Dios, ban tupad king kaburian mu. Inya lalako na la ning Dios ding sablang matuang sakripisyu at alilan na la king sakripisyu nang Cristo.

¹⁰ Uling tiparan nang Jesu-Cristo ing kaburian na ning Dios, inya itamu ngan malilinis tamu king kasalanan king kapamilatan na ning pamiyain na king sarili nang katawan, misan mu at para king kapilan pa man.

¹¹ Ing balang paring Judio tutupad ya aldo-aldo king kasuyuan a katungkulan nang gampanan, at ulit-ulit na lang yayain ding sadia mu ring sakripisyu a e bitasang malyaring makalako karing kasalanan.

¹² Oneng i Cristo miyain yang metung mung sakripisyu para karing kasalanan, metung a sakripisyung sapat angga king kapilan pa man. Kaybat, linukluk ya king banda nang wanan ning Dios.

¹³ Karin ya ngeni manenaya angga king lubus na lang apasuku ning Dios ding kalaban na.

¹⁴ Uli na niti, king kapamilatan na ning metung mung ain-sakripisyu apakiabutan na ing genapan a alang angga para karing sablang melinis king kasalanan.

¹⁵ Patutuan na naman iti ning Banal a Espiritu. Muna nganang sasabi,

¹⁶ Iti ya ing kasunduan a itatag kung kayabe ra pangaras da ring aldo deta, ngana ning Ginu. Ibili ku la ding kakung kautusan king kaisipan da at idukit ku la karing karelang pusu.

¹⁷ At kaybat nganang sinabi, Kalinguan ku na lang lubus ding karelang kasalanan at ing sabla rang marok a dapat.

¹⁸ Inya kabud mipatawaran la deti, e ne kailangan pa ing ain makalako king kasalanan.

¹⁹ Inya, kapatad, atin tamung ganap a kalayaan lungub king Kabanal-banalan a Lugal king kapamilatan na ning kamatayan nang Jesus.

²⁰ Biklat ne para kekatamu ing metung a bayung dalan, ing metung a dalan a mabie a lalagpus king tabing, ngana wari, tinaglus king katawan na.

²¹ Kang Jesus atin tamung pekapun ding paring manibala king bale ning Dios.

²² Inya kailangan tamung lumapit king Dios a kayabe ning matibe kasalpantayanan, at ning matatag a kapanaligan. Lumapit tamu king Dios a ating malinis a konsiensia ngening milako na la dinat ding kekatamung pusu at mewas la ding katawan tamu king danum a dalise.

²³ Manatili ta sa king matibe kapanayan a kekatamung sasabian uling ing Dios a mengaku tapat ya.

²⁴ Magkapilit tamung ayagkat ya ing metung at metung ban lugud at dapat mayap.

²⁵ E tamu tutuknangan ing pamanagun karing pamitipun tamu antimo ing daraptan da na ring mapilan. Nune, agkatan ta yang tumagun ing metung at metung, lalung-lalu na ngening akakit yung milalapit na ing Aldo nang paniatang ning Ginu.

²⁶ Nung kaybat tamung akilala at tinggap ing katutuan sarian ta pang gagawang pamikasala, ala nang ain a malyari pang iyain bilang kapamayaran king kasalanan.

²⁷ Ing bukud na mung makatagan ya ing mitakutan king mapalyari king aldo bukas: ing Pamanukum at ing mitataung api a mamuksa karing lalaban king Dios!

²⁸ Papaten deng alang lunus ing ninumang lalabag king Kautusan nang Moises kaybat nang miyatulan uli na ning patutu da ring adua o atlung testigu,

²⁹ e kasi lalu yang mabayat ing parusang dugpa king taung maninsultu king Anak ning Dios at lalapastangan king dayang meging katibayan na ning tipan ning Dios at pepabanal keya at king taung maninsultu king Espiritung magdalang lunus?

³⁰ Uling balu tamu nung ninu itang sinabing, Aku ing ganti, aku ing mamarusa, at sinabi na naman, Atulan ne ning Ginu ing balen na.

³¹ Tutung makapangilabut ing maging kayatulan na ning Dios a mabie karing taung makanyan a dapat!

³² Ganakan yu ing kekayung milabas. Karing aldo deta, kaybat yung miyaslagan king sala na ning Dios, dakal kayu kasakitan a delanan, makanyan man menatili kayung tapat.

³³ Maralas mepalmura kayu at metampalasan king publiku at karing aliwa namang aldo mekirame kayu karing kayabe yung dinalan king anti kanyan.

³⁴ Demayan yu la ding mesukul king kasakitan da, at inyang ing sablang pibandian yu mesamsam, tinggap yung matula, uling balu yu king atin pang pibandian a lalung mayap at alang kayangganan.

³⁵ Inya e yu painan ing lub yu uling ing tetagan a lub magdalang maragul a ablas.

³⁶ Kailangan ing mibata kayu ban atuparan yu ing kaburian na ning Dios at tanggapan itang pengaku na.

³⁷ Uling ing Kasulatan sasabian na, King saguli mung penandit, miras ne itang mipangakung datang; e na malambat datang ne.

³⁸ Ing taung pinili ku mie ya agpang king kasalpantayanan na; oneng nung mangalinguan ya, e ku tumula keya.

³⁹ E tamu kabilang karing mangalinguan at mangapahamak; nune kabilang tamu karing sasalpantaya king Dios a miligtas.

11

¹ Ing kasalpantayanan ya ing batayan karing bage a kekatamung panenayan, at ing katibayan para karing bage a e tamu akakit.

² Uli na ning kasalpantayanan da ring kekatamung makatua, metula ya ing Dios karela.

³ King kapamilatan na ning kasalpantayanan karin tamu aintindian king ing meto sikluban melalang ya king amanu na ning Dios, at king ing kekatamung akakit megumpisa ngan king e tamu akakit.

⁴ Ing kasalpantayanan nang Abel ya ing mekagawa ketang pamanain na king Dios king metung a ain a maygit ketang kang Cain. Inya kilala neng taung katanggap-tanggap ning Dios inyang tinggap na ing ain na. King kapamilatan na ning kasalpantayanan na, magsalita ya pa i Abel agyamang mete ne.

⁵ Uli na ning kasalpantayanan nang Enoc, king lugal mate ya, mitas ya at miras king Dios. Ala nang bitasang menakit keya uling dela ne ning Dios babo. Sasabian na ning Kasulatan king kanitang bayu ya midala banua i Enoc, peligayan ne ing Dios.

⁶ E ne apaligayan ning ninuman ing Dios, nung ala yang kasalpantayanan. Uling ing ninuman lalapit king Dios kailangan nang salpantayanan king ating Dios, at ing Dios ya ing mamablas karing sablang manintun keya.

⁷ Ing kasalpantayanan munaman ing mekayagkat kang Noe ban makiramdam ya king babala na ning Dios tungkul karing bage a mapalyari king aldo bukas a e na pa ikit Noe. Pemintuan ne ing Dios at ginawa yang metung a barku a mekapagligtas keya at king pamilya na. King kapamilatan na ning kasalpantayanan nang Noe pepalto nang makasalanan ya ing yatu, at ya naman mebilang ya karing taung katanggap-tanggap bilang ablas na ning kasalpantayanan na.

⁸ Uli na ning kasalpantayanan nang Abraham, pemintuan na itang aus na ning Dios keya. Minta ya king balen a pengaku nang ibie ning Dios keya. Likuan ne ing sarili nang balen agyamang e na balu itang pupuntalan na.

⁹ King kapamilatan na ning kasalpantayanan mibiebie yang antimong metung a dayuan king gabun a pengaku na ning Dios keya. Menuknangan ya karing tolda, at antimu rin i Isaac, at i Jacob a tinanggap munaman king pangaku na mu ring ita ning Dios.

¹⁰ Uling penenaya neng Abraham itang siudad a ginulis na at telakad ning Dios, ing siudad a ating matibe pundasyun.

¹¹ Ing kasalpantayanan ya namang mekapalyaring tata kang Abraham agyamang matua neng tutu at mismung i Sarah a asawa na e ne malyaring mikayanak. Penaligan nang tuparan na ning Dios ing pangaku na.

¹² Uli na niti, king metung mung tau, agyamang iti halus mete nia mu, karin la linto ding dakal a lahi a kasing dakal da ring batuin king banua at e mabilang-bilang antimo ing balas king pasigan.

¹³ Mete la ngan deting taung ating kasalpantayanan. Wa, ila mismu e ra tinggap itang pengaku na ning Dios, oneng kanita pang marayung panaun a ita ikit da at ketula ampon masala rang kilala king ila dayuan la at maglakbe mu keti king yatu.

¹⁴ Ding taung makanyan a paglalawe king sarili ra papakit dang masala king atin lang panintunan pang tune rang bansa.

¹⁵ Aliwa ing gabun a likuan da ing karelang isipan, uling nung ita ya ing karelang panintunan, libri la sanang mekapagbalik karin.

¹⁶ Oneng ali, ing panintunan da metung yang bansa a lakuas mayap at iti ya ing bansa dang maligaya karin banua. Inya e na pikarine ning Dios ing ausan deng Dios da, uling atin yang sasadiang metung a siudad para karela.

¹⁷ Ing kasalpantayanan nang Abraham ya naman ing mekayagkat keya ba neng iyain bilang ain-a-durulukan i Isaac a anak na kanitang sibukan ne ning Dios. I Abraham ya itang pengakuanan na ning Dios, makanyan man makasadia ya pa mu ring iyain ne ing bugtung nang anak bilang ain-sakripisyu.

¹⁸ Ing Dios ya ing sinabi, King kapamilatan nang Isaac tanggapan mu la ding maging lahi mu.

¹⁹ Oneng atin yang kapaniwalan i Abraham king ing Dios agyu neng pasublian mie i Isaac, inya naman tinggap neng pasibayu, nung wari sa, anti ya mong mipasublian mie i Isaac.

²⁰ Ing kasalpantayanan ya namang minutus kang Isaac ba nang ipangaku kang Jacob at kang Esau ing bendisyun king aldo bukas.

²¹ Ing kasalpantayanan ya ing mekayagkat kang Jacob ban bayu ya mate bendisyunan ne ing balang metung karing anak nang Jose. Tinalan ya king tangke na ning tukud na at simban ne ing Dios.

²² Ing kasalpantayanan ya namang minutus kang Jose inyang migsalita ya bayu ya mete tungkul king paglual da Ehipto ding Israelita, at milakuan yang bilin tungkul karing butul na.

²³ Ing kasalpantayanan ya namang menagkat karing pengari nang Moises ban isalikut de kilub ding atlung bulan manibat kanitang mibait ya. Ikit da king metung yang anak a masanting at e la mitakutan sinalungat king utus na ning Ari ning Ehipto.

²⁴ Ing kasalpantayanan ya ing menagkat kang Moises inyang meragul ne ban tanggian nang mayaus yang anak na ning prinsesang anak ning ari.

²⁵ Birian nang diname king kasakitan da ring taung pinili na ning Dios kesa king magpasasa ya king pamikasalang babie pansamantalang tula.

²⁶ Kilala na king ing dumalan kamarinayan alang-alang king Cristo a maygit e palak a ulaga kesa king sablang pibandian na ning Ehipto; akilala na iti uling e na pitda ing lawe na king ablas ning aldo bukas.

²⁷ Ing kasalpantayanan ya naman ing menagkat kang Moises, inya birian neng likuan ing Ehipto, alang takut king mua na ning ari; e ya mebisang magbalik Ehipto, anti neng akakit ing Dios a e mayayakit.

²⁸ Ing kasalpantayanan ya namang minutus kang Moises ba neng itatag ing Pamaglagpus at iyutus karing tau king ipisik da ing daya karing pasbul ban ing Anghel ning Kamatayan e na la paten ding pangane lalaki da ring Israelita.

²⁹ Ing kasalpantayanan ya ing sinaup karing Israelita inyang ikua rang midalakit king Dagat a Malutu a antimo king gabun a malangi; inakmul na la ning danum inyang mengangas lang dinalakit ding tau Ehipto.

³⁰ Ing kasalpantayanan ya ing mekalasak karing pader na ning siudad ning Jerico, kaybat dang migmartsang makapadurut kaniti ding Israelita kilub ding pitung aldo.

³¹ Ing kasalpantayanan ya namang mekaligtas kang Rahab, ing babaing magtinda king katawan na, inyang mete la ding kayabe na a linaban king Dios. Milyari iti kang Rahab uli ning matula na lang tinggap ding ispiang Israelita.

³² Kailangan ku pang manggit aliwa? Ala na kung panaun para salesayan ku pa ing tungkul kang Gideon, Barak, Samson, Jefta, David, Samuel, at ding propeta.

³³ Deti tau la ngan pawang linaban karing kayarian king kapamilatan na ning kasalpantayanan, at migwagi la. Depat da ing matulid at tinggap da ing pengaku na ning Dios. Asara da la asbuk ding leon,

³⁴ apatda ra ing mangaragul a silab, at miligtas la king espada king oras ning pamakilaban. Tau lang maina, oneng tinanggap lang sikanan; meging masikan la king arap ning labanan, at simbut da la at apaurungan ding sundalus da ring dayuan.

³⁵ King kapamilatan na ning kasalpantayanan da king Dios, tinggap da lang pasibayu ding babai ding karelang mete kaybat dang mipasublian mie. Tinggian da ring aliwa ing ibulus da la, inya mete la king katampalasanan a tinggap da ban kanita mipasublian lang mie king lalung mayap a pamibiebie.

³⁶ Meyalipusta la at melatiku ding mapilan; ginapus da la at sinukul naman ding aliwa.

³⁷ Mebasibas lang batu, atin lang legaring mangapitna, atin lang pete king espada. Libut-libut lang pakasulud balat tupa at balat kambing, kalulu la, piglupig da la at ininsultu.

³⁸ E ya karapatdapat para karela ing yatu! Libut-libut la karing disyerto at kabundukan, menuknangan la karing kueba at kulkul king gabun.

³⁹ Agyamang masalang meyakit ing karelang pamanialpantaya king Dios, makanyan man e ra tinggap itang pengaku na ning Dios,

⁴⁰ anti na ning ing Dios atin yang lalung mayap a kapagnasan para kekatamu. Ing kapagnasan na ya ing e la malyaring miras king ganap a tula, nung e ra katamu kayabe.

12

¹ Ngening mipadurutan tamu kareting dakal a testigu, sukat tamung ilako ing nanumang maging sagabal, lalung-lalu na ing kasalanan a pipigil kekatamu. Kayabe na ning maragul a kapibabatan manatili tamung mabilis a pulayi king ligligan a arapan tamu.

² E ta la lalako ding mata tamu kang Jesus uling keya megumpisa at migaganap ing kekatamung kasalpantayanan. E ya pepaisira lub i Jesus uli na ning krus! Nune, uli na ning tulang makapanaya keya pibata na ing kamarinayan a mate ya king krus. At ngeni atyu makalukluk king banda nang wanan ning tronu na ning Dios.

³ Isipan yu na mu itang delanan na nung makananu nang pibata ing pamaglaban da ring taung makasalanan! Inya e yu painan ing lub yu at e kayu tutuknang.

⁴ Uling king pamakilaban yu king kasalanan angga ngeni e yu pa keilanganan ing patulu kayung daya.

⁵ Akalinguan yu ne wari itang amanung babie sikanan lub a sabian na ning Dios kekayu bilang anak na? Anak ko, e mu gagawan alang ulaga nung wari't ing Ginu itutulid na ing kamalian mu; e ka paisira lub nung sasabianan na ka.

⁶ Uling didisiplinahan na la ning Ginu ding sablang kaluguran na, at babarugan na la ding sablang kikilalanan nang anak na.

⁷ Nanuman ing kasakitan a daralanan yu, ibilang yung anting pamamarusa na ning metung a tata, uling ding kasakitan yu pakilala ra king tuturing na kayung tune nang anak ning Dios. Atin waring anak e na bitasang dinisiplina ning tata na?

⁸ Nung e na kayu didisiplinan antimo ing daraptan na karing sabla nang anak, mangabaldugan king e na kayu tune anak, nune anak kayu king lual.

⁹ Bukud pa kanyan, ding tata tamu king laman didisiplinan da katamu, at uli na nian igagalang ta la. E wari lalung matulid ing pasakup tamu king Dios a Ibpa tamu king espiritu ba tamung mie?

¹⁰ Didisiplinan da katamu ding kekatamung pengari, ketang isipan dang ustu at iti king saguli mung penandit karin da daraptan. Oneng didisiplinan na katamu ning Dios para king ikakayap tamu ban maging banal tamung kalupa na.

¹¹ Neng daralan tamung kasakitan, ketang oras a ita, wa, tutung maplas at e pibuburian; oneng kalabas na, ding mirasnan king anti kanitang disiplina miririnan lang kapayapan at mikakalisyun la.

¹² Inya itas yu la ding gamat yung mangalambut at pasiknangan yu la ding tud yung mangaina!

¹³ Isulung yu ing kekayung paglakad karing gasgas a matulid ban e ya mabalda ing bitis yung mepile, nune lakuas yang kumayap.

¹⁴ Magparati kayung makiutus mayap karing sablang tau at magkapilit kayung mibiebie banal, uling nung alang kabanalan e ya akit ing Ginu.

¹⁵ Ingatan yu king ing ninuman e ya mangalinguan king lugud na ning Dios. Ingatan yung ing ninuman kekayu e ya maging kalupa na ning tanaman a makalasun a tutubu, at makasakit karing sablang darasnan na.

¹⁶ Ingatan yu naman king ing ninuman kekayu e ya makipangalugud o payalan na lang ulaga ding bage espiritual, antimo i Esau, king metung a pinggan a pamangan, pekilibe na ing karapatan na bilang pangane.

¹⁷ Balu yu king kaybat, inawad na kang tata na king ibie na ing bendisyun na bilang tata. Oneng mipagkait keya iti uling e na na abalikan pa ing depat na agyang numanu ya pang tumangis.

¹⁸ E na kayu man miras, antimo ing pangaras da ring Israelita, king Bunduk ning Sinai nung nukarin ating aping mitatau, maragul a karalumduman at angin a masikan,

¹⁹ matning tiup ning trumpeta at siwalang magsalita. Kanitang dimdam de ring Israelita ing siwalang ita, mekisabi lang mayap king e na la sa damdam metung pang amanu na,

²⁰ uling e ra agyung kargahan ing kautusan a ngana, Ninuman ing tuklu king bunduk, agyang metung yang animal, basibasan ya angga king mate ya.

²¹ Tune makapangilabut itang karelang ikit, inya pati na i Moises asabi na, Gagalgal ku king takut!

²² Oneng ikayu ikua yung miras king Bunduk ning Zion, at king siudad ning Dios a mabie, ing maligayang Jerusalem, kayabe da ring e mabilang-bilang a anghel na.

²³ Miras kayu king masaya rang pamitipun ding bibilang nang pangane ning Dios a makasulat a lagyu karin banua. Miras kayu king Dios a ukum da ring sablang tau, at miras kayu karing espiritu da ring taung banal a ganap nang mipabanalan.

²⁴ Miras kayu kang Jesus a mitatag king bayung kasunduan, at miras kayu king dayang mipisik a mangakung mas mayap a bage maygit ketang daya nang Abel.

²⁵ Inya mingat kayu at e kayu tatangging makiramdam king migsalita. Nung detang e mebisang makiramdam king migsalita karela e la miligtas king parusa, e kasi lalu ta nang e miligtas, nung e tamu makiramdam king magsalitang ibat karin banua!

²⁶ Ing siwala na pepagalgalan ne ing yatu king panaun a ita, oneng ngeni ipangaku na, Pagalgalan keng pasibayu e mu ing yatu nune pati na ing banua.

²⁷ Ing amanung pasibayu malino nang pakilala king maugun la ding bage lelangan at midayu ban detang e maugun mitagan la.

²⁸ Inya pasalamat tamu king Dios uling tinanggap tamung metung a kayarian a e maugun. Pasalamatan ta ya at samban ing Dios a kayabe ing kagalangan at takut; king paralan a tutung makaibie tula keya

²⁹ uling ing kekatamung Dios anti ya king aping manyilab.

13

¹ Pasulungan yu ing pamikakalugud yu bilang mikakapatad kang Cristo.

² E yu la kakalinguan tatanggapan ding dayuan karing pibalebale yu. Ating tinanggap karing anti kareti, at e ra balu king anghel la pala ding karelang tinggap.

³ Ganakan yu la ding atyu karing sukulan; iyapus yung antimong atyu kayu king sukulan a kayabe ra. Makanyan munaman, damayan yu la ding daralan kasakitan.

⁴ Igalang da ring sabla ing bie talasawa at manatili la sanang tapat ding talasawa king metung at metung. Uling siguradu na lang parusan ning Dios ding e tapat at ding makipangatawan king e ra asawa.

⁵ Ingatan yung e mididinatan ing bie yu king lugud king salapi at maging kontentu kayu king nanumang atyu kekayu. Uling ing Dios mismu sinabi na, E ra kayu lakuan kapilan man; e ra kayu paburen kapilan man.

⁶ Inya malyari tamung asabing mitmung kapanaligan, Ing Ginu ya ing sasaup kaku, ala kung pitatakutan! Nanu mo ing arapat ning tau kaku?

⁷ Ganakan yu la ding meging pamuntuk yu, ding sablang menaral king amanu na ning Dios kekayu. Ganakan yu nung makananu lang mibiebie at mete, at pakiapusan yu la king karelang kasalpantayanan king Dios.

⁸ I Jesu-Cristo ya naman ing napun, ing kasalukuyan, at king kapilan pa man.

⁹ E kayu pailili king dalan a matulid uli na ning makayaliwang turu. Lalung masanting para kekatamu ing mipasiknangan king lugud na ning Dios kesa king kapamilatan na ning pamanuntun karing kautusan tungkul king pamangan. Ding tutuntun kareti ala na la mang kakamtan a pakinabang.

¹⁰ Ding pari a susuyu king tolda da ring Judio e la malyaring makisulu king sakripisyu karing kekatamung altar.

¹¹ Ing Pekapun ding Pari da ring Judio darala nang lulub ing daya da ring animal king Kabanal-banalan a Lugal para iyain da antimong ain-sakripisyung kapamayaran karing kasalanan; oneng ding bangke da ring animal durulukan da la lual na ning balen.

¹² King uli na mu rin niting sangkan, mete ya i Jesus lual ning pasbul balen ban alinis ne ing tau king kasalanan na king kapamilatan na ning sarili nang daya.

¹³ Inya munta tamu kang Jesus king lual ning balen at damayan ta ya king kamarinayan a pibata na.

¹⁴ Uling ala yu keti king yatu ing balen a manatili, at ing panintunan tamu ya itang siudad a datang king aldo bukas.

¹⁵ Inya king kapamilatan nang Jesus, miyain tamung alang anggang ain-sakripisyu ning kapurian king Dios. Ngana wari, pasalamat tamung alang patad king lagyu na king kapamilatan da ring amanung sasabian tamu.

¹⁶ Isulung yu ing pamaniapat mayap at ing pamisaupan king metung at metung, uling deti sakripisyu lang babie tula king Dios. fig,,,,,King uli na mu rin niting sangkan, mete ya i Jesus lual ning pasbul balen...,(13:12)fig*

¹⁷ Pamintuan yu la ding kekayung pamuntuk at tukian yu ing karelang yuyutus. Ila ding alang patugut mimingat kekayu at ila ding munie kwenta king Dios tungkul kaniti. Nung mamintu kayu karela, atuparan dang matula ing karelang obra; nung ali mibayatnan la lub tupad kaniti at ikayu naman ding maperhuisyu.

¹⁸ Panalangin yu ke sanang parati. Asisiguradu ming atin keng malinis a konsiensia at buri mi ing mibiebie mitmung dangal king sablang penandit.

¹⁹ Maygit king sabla, ipakisabi kung mayap ing ipanalangin yung makapagbalik kung agad kekayu.

²⁰ Ing Dios a panibatan na ning sablang kapayapan ya ing pepasubling mebie kang Jesus a Ginu tamu, ing Marangal a Pastul da ring tupa; uli na ning daya na a meging katibayan na ning alang anggang kasunduan.

²¹ Mananu na sanang ing Dios a panibatan na ning kapayapan ibie na kekayu ing sablang bage mayap a kekayung kailangan ba yung atuparan ing kaburian na, at king kapamilatan nang Jesu-Cristo, daptan na sa kekatamu ing sablang makaligaya keya. Purian ya i Jesu-Cristo king kapilan pa man! Amen.

²² Kapatad, aduan ku kekayu ing pakiramdaman yung mitmung kapibabatan iting amanung tuturu ku kekayu, uling iting sinulat ku kekayu e naman tutung makaba.

²³ Buri kung abalu yu king ing kapatad tamung i Timoteo milual ne king sukulan. Nung agad yang datang, ituki ke pamamunta ku ken.

²⁴ Ikomusta yu kami karing sablang pamuntuk yu at karing sablang pinili na ning Dios. Kukomustan da kayu ding kapatad tamung taga Italia.

²⁵ Ing grasya na ning Dios manatili sa kekayu ngan.