1

¹ Ibat ya iting sulat kang Pablo, ing metung karing talasuyu na ning Dios at apostol nang Jesu-Cristo. Mepili ku at mituburan sumaup king kasalpantayanan da ring taung pinili na ning Dios, at tairan la king katutuan a tuturu na ning kekatamung relihiun

² a makatalakad king pamanaya king bie alang angga. E ya malyaring maglaram ing Dios; pengaku na kekatamu iting bie kanita pang bayu ya megumpisa ing meto ketawan.

³ King panaun a karapatdapat pepakilala na iti king amanung pepayabut na. Iti mipaniwala kanaku at ya ing ipanaral ku agpang king kautusan na ning Dios a kekatamung Talapagligtas.

⁴ Susulat ku iti kang Tito, ing anak kung tune king kasalpantayanan a kekaming pisanmetungan. Ing grasya at kapayapan ibie na sa keka ning Dios a Ibpa tamu at ning kekatamung Talapagligtas, i Cristo Jesus.

⁵ Likuan da ka Creta ban samasnan mu la ding bage kailangan pang ibayu at ban tuldung makatuang talapangasiwa king iglesia na ning balang balen antimo ing penabilin ku keka.

⁶ Ing balang makatuang talapangasiwa sukat ing ala yang kapintasan: metung ya asawa at kailangan king talasalpantaya la ding anak na, at e la kabalitan king nanumang kesiasan buntuk at pamaglaban.

⁷ Uling ing makatuang talapangasiwa ya ing manibala king iglesia bilang pekakatawan na ning Dios. Kailangan ing ala yang kapintasan; kailangan munaman ing e ya manabusu o agad mikakapali buntuk; e ya lasenggu o tampalasan o kaya sakim king pibandian.

⁸ Biasa ya sanang maki parang tau at malugud king mayap. Biasa yang mamigil king sarili, marangal ya pamibiebie, banal at disiplinadu ya.

⁹ Sukat yang manatiling matatag king e mamaliwang kalamnan na ning mipanaral a amanu ban apaniwalan ya maging king pamanuru karing aliwa king tune doktrina, maging king pamakidibate karing kalaban a mituturung maling doktrina.

¹⁰ Uling dakal la ding alang disiplina a linto karing mekonberting Judio. Lilinlangan da la ring aliwa at kamulangan ing pamaniaptan da.

¹¹ Kailangan lang sugpuan uling guguluan da la ring kabilugan a pamilya king pamanuru da king bage a e ra sukat ituru. Ing bukud mung buri da ya ing manakitan lang salapi at iti tutung makarine.

¹² Metung yang tau Creta mismu, ing metung karing sarili dang propeta, ing sinabi: Parati lang maglaram ding tau Creta; kaugali lang animal, matamad la, at matako.

¹³ At katutuan ing sinabi na. Uli na niti, sabianan mu lang mataram ban mika matibe lang kasalpantayanan

¹⁴ at tuknang na lang maniwala karing pikatsa da ring Judio, at karing kautusan a menibatan karing taung e bisang tanggap king katutuan.

¹⁵ Malinis ing sabla para karetang ating malinis a pilubluban; oneng para karing marinat a isip at alang kasalpantayanan ing sabla marinat, uling marinat la ding karelang kaisipan at konsiensia.

¹⁶ Sasabian da king balu re ing Dios, oneng palaraman na la ning dapat da. Tau lang pikakasaman at mapaglaban, inya e mu la ayasahan.

2

¹ Oneng ika sukat mung ituru ing panugaling aduan na ning mayap a doktrina.

² Panabilinan mu la ding makatuang lalaki king e la maglasing, maging marangal la, at biasang mamigil king sarili, matatag king karelang pamanialpantaya, malugud, at mapibabata.

³ Antimu rin, panabilinan mu la ding makatuang babai ing manugali lang antimong babaing mabibie king kabanalan antimo ing sukat karela. E la mapanyirang puri at e magbisyu king alak. Sukat dang ituru ing mayap

⁴ ban ayaralan da la ring kayanakan a babai at luguran da la ring karelang sarasariling asawa at anak;

⁵ biasang mamigil king sarili ra at malinis a pamibiebie, at maging mayap a mibalebale ampon biasang manusig karing karelang asawa. Ninuman kanita alang makapagsalita laban king amanung manibatan king Dios.

⁶ Makanyan mu la namang aralan ding kayanakan a lalaki king pamamigil king karelang sarili.

⁷ Ika mismu, king sablang bage, sukat kang pakit alimbawa king pamaniapat mayap. Maging tapat ka sa at laus a lub king kekang tuturu.

⁸ Mamili kang amanu king kekang pamagsalita ban e na ka apintas ning ninuman; kanita mangapakarine la ding kekang kalaban uling ala lang asabing e mayap tungkul kekatamu.

⁹ Sukat lang mamintu ding ipus karing karelang panginuan at panusigan da la king sablang bage. E la mapamakibat karela

¹⁰ ni e da la panakawanan. Nune, ipakit dang parati king apagkatiwalan la, at tapat ban king sablang dapat da arinan dang dangal ing aral tungkul king Dios a Talapagligtas tamu.

¹¹ Uling pepakilala na ning Dios ing grasya na para king ikaligtas da ring sablang tau.

¹² Ing grasya na ya ing turu kekatamu ban lakuan tamu ing e mayap a pamibiebie at ing agkat na ning yatu. Uli na niti, mabibie tamung biasang mamigil king sarili, mitmung dangalan at kabanalan king yatu

¹³ kabang panenayan ta ya itang maligayang Aldo. Ita ing Aldo a pakit yang mitmung kaligayan ing Dios at Talapagligtas tamung i Jesu-Cristo.

¹⁴ Binie na ing sarili na para kekatamu ba na katamung sagipan king sablang e mayap at gawan na katamung bansang bandi nang sarili, malinis at makatalaga king pamaniapat mayap.

¹⁵ Ituru mu iting sabla at gamitan mu ing ganap mung kayupayan kabang agkatan mu la at sasabianan ding makiramdam keka. E mu paburen ing lawan na kang mababa ning ninuman.

3

¹ Ipaganaka mu karing taung panibalan mu ing pasakup la karing manungkulan at tatalan upaya. Mamintu la karela at makasadiang dapat king sablang mayap.

² Sabian mu karela ing e la magsalitang e mayap laban king ninumang tau, nune makikasundu la at makikaluguran, at parating papakit ganaka at mayap a pilubluban karing sablang tau.

³ Uling kanitang misan itamu man meging mangmang tamu, mapaglaban, melili, at me-ipus king miyayaliwang pita at kalayawan na ning katawan. Mibiebie tamu kanita a ating e mayap a nasa. Kesaman da katamu ding tau at kesaman ta la munaman.

⁴ Oneng inyang ing lunus na at lugud ning Dios a Talapagligtas tamu mipakilala,

⁵ linigtas na katamu, e uli na ning nanumang dapat a mayap a gewa tamu mismu, nune uli na ning sarili nang lunus. Linigtas na katamu king kapamilatan na ning danum a paglinis nung nu na katamu dirinan bayung pangabait at bayung bie a ibat king Banal a Espiritu.

⁶ Uling tigtugan na katamung labis-labis ning Dios king Banal a Espiritu, king kapamilatan nang Jesu-Cristo a kekatamung Talapagligtas

⁷ ban king kapamilatan na ning grasya na matanggap tamung karampatan king Dios, at maging talapagmana king bie alang angga a kekatamung panenayan.

⁸ Deting amanu katutuan la. Buri kung lawan mung masalese iting sablang bage ban ding sablang sasalpantaya king Dios magmalasakit lang gumamit king panaun da king pamaniapat mayap. Uling iti ngan mayap at pakinabangnan da ring tau.

⁹ Oneng pangilagan mu ing dibate a alang kapupuntan, ing pamagsalitang tunggal-tunggal karing lagyu da ring makatua, ing pamisalangsangan, at pamakipate tungkul king Kautusan. Iti ngan alang kabaldugan at alang kwenta.

¹⁰ Ausan me pansin makataduang besis ing ninumang panibatan na ning pamipatepate at kaybat dumayu na ka keya.

¹¹ Balu mu king ing taung anti kanita kasiran mu ing malyari nang gawan, at ing mismung pamikasala na pakilala na king magkamali ya.

¹² Potang apapuntan ku ne keka i Artemas o i Tiquico, daptan mu ing sablang agyu mu ban apuntalan mu ku karin Nicopolis, uling inari ku na king lub ku king karin ku ilabas ing panaun na ning dimla.

¹³ Pakikuanan mung asaupan me king lakad na i Zenas, ing abogado, at i Apolos at sikapan mu sa king alang kulang nanuman ing kailangan dang bakalan.

¹⁴ Ituru mu la ding kekatamung kapatad ban mabiasa lang gumamit king panaun da king pamaniapat mayap, at sikasuan da itang tune kailangan; e na la kabud mabibie makatungangu aldo-aldo.

¹⁵ Pakomusta da ka ding sablang kayabe ku keni. Ikomusta mu kami naman karing sablang kakaluguran tamu king kasalpantayanan. Ing grasya na ning Dios manatili kekayu ngan.