1

¹ Ibat ya iting sulat kang Pablo, ing apostol nang Cristo Jesus, agpang king kaburian na ning Dios a kekatamung Talapagligtas at Cristo Jesus a kekatamung kapanayan.

² Miparala ya kang Timoteo, ing tune kung anak king kasalpantayanan. Mananu na sanang miyabie keka ing grasya, lunus at kapayapan a ibat king Dios Ibpa at Cristo Jesus a kekatamung Ginu.

³ Antimo ing pekisabi ku nang mayap keka kanitang papunta ku Macedonia, buri kung manatili ka Efeso uling karin ating mapilan a taung tuturung maling doktrina. Iyutus mu karela king tuknang na lang darapat kaniti.

⁴ Sabian mu munaman karela king e ra sisiran ing karelang panaun karing kwentung a tutu at karing mangakabang listahan da ring makatua. Uling ita ya ing panibatan na ning e pamikaintindi, at iti e makasaup king parasan na ning Dios a mipabalu karing tau king kapamilatan na ning kasalpantayanan.

⁵ Ing parasan na niting panabilin ya ing palablaban ing lugud a manibat king pusung malinis, mayap a pilubluban at tapat a pamanialpantaya.

⁶ Ating mapilan a ginulut kareting bage at mewili la king alang kabaldugan a pamiargu.

⁷ Buri da ing maging talaturu na la ning Kautusan kabang e ra naman aintindian ing karelang paniabian ni ding bage a tuturu da king mitmung tiwala.

⁸ Balu tamu king ing Kautusan mayap ya, nung gagamitan ya king ustung paralan.

⁹ E tamu sa kakalinguan king e la megawa ding kautusan para karing mayap a tau, nune megawa la para karing taung talapanialangsang at kriminal, karing makasalanan at karing e bisang kikilala king Dios, karing alang kabanalan at karing alang takut king Dios, karing taung makamate tata at ima, at karing makamate tau.

¹⁰ Megawa la munaman ding kautusan para karing taung makipangalugud, karing makipangatawan karing kalupa dang lalaki o babai, karing manguang tau, karing malaram, at mapamikudta o darapat aliwa pang salungat king mayap a doktrina.

¹¹ Makayagpang ya iting mayap a doktrina king Mayap a Balita a mipaniwala kanaku ba kung ipanaral. Iti ya ing Mayap a Balita a ibat king maligaya at nuan a Dios.

¹² Pasalamat ku kang Cristo Jesus a kekatamung Ginu uling dininan na kung sikanan para king obrang iti, at uling kilala na king karapatdapat ku inyang pinili na kung maging talasuyu na.

¹³ Pinili na ku ban sumuyu keya agyamang migsalita kung laban keya. Ligalig ke at lepastangan kanitang minuna. Makanyan man melunus ya kanaku ing Dios uling e ku balu ing daraptan ku kanita uling e ku pa maniwala keya.

¹⁴ At binie na kanaku ning Ginu ing maglapo nang lunus; binie na kanaku ing kasalpantayanan, at ing lugud a atyu kekatamu uli na ning pangayabe tamu kang Cristo Jesus.

¹⁵ Oyni ing metung a katutuan a kailangan dang tanggapan at paniwalan ding sabla: dinatang ya i Cristo Jesus keti king yatu ban iligtas na la ding makasalanan at aku ing marok dili karela.

¹⁶ Oneng iti ya kabud ing sangkan nung inya melunus ya ing Dios kanaku ban king milyari kanaku ipakit nang Cristo Jesus ing maragul nang kapibabatan, at maging pialimbawanan iti para karing salpantaya keya at tanggap lang bie alang angga.

¹⁷ King metung mung Dios, Aring alang angga, alang kamatayan at e mayayakit miyabie ing kapurian at ligaya king kapilan pa man! Amen. fig,,,,,... dinatang ya i Cristo Jesus keti king yatu ban iligtas na la ding makasalanan...,(1:15)fig*

¹⁸ Timoteo, anak ko, ipaniwala ku la keka deting panabilin. Iti makayagpang karing ula a mebanggit na king milabas a panaun tungkul keka. Deti sanang amanu ila ding maging sandata mu king kekang pamakiarap king mayap a labanan,

¹⁹ at ingatan mu sana ing kekang kasalpantayanan at malinis a konsiensia. Ating mapilan a taung e mekiramdam king karelang konsiensia, at uli na niti sinira da ing karelang kasalpantayanan.

²⁰ Kabilang la kareti di Himeneo at Alejandro; pepaburen ku na la kang Satanas ban mabiasa lang tuknang magsalita laban king Dios.

2

¹ Maygit king sabla, ipakisabi kung mayap king ing kekayung kayaduanan, panalangin, pamanigapu, at pamipasalamat iyampang yu king Dios para karing sablang tau.

² Makanyan munaman ing daptan yu para karing ari at karing ating upayang manibala ban mibiebie tamung tahimik at payapa, mataimtim at ating kabanalan.

³ Iti mayap at makaligaya king Dios a kekatamung Talapagligtas.

⁴ Buri na king miligtas la ding sablang tau at mabiasa la king katutuan.

⁵ Uling ating metung a Dios at ating metung a talapamilatan king Dios at karing tau; ya ing taung i Cristo Jesus.

⁶ Inain na ing bie na ban iligtas na la ding sablang tau. Ya ing katunayan a mibulalag king mituldung panaun na ning banal nang parasan ning Dios ban miligtas la ding sabla.

⁷ Makanyan kung mituburan maging apostol at talaturu da ring paganu ban ipanaral ku karela ing kasalpantayanan at ing katutuan. Tutu ing kanakung sasabian; e ku maglaram.

⁸ Uli na niti, buri ku king ding lalaki karing sablang lugal itas da lang gamat da king pamanalangin a ating malinis a konsiensia, alang mua o pamipatepate.

⁹ Ding babai naman sukat lang maging mahinhin at maingat king karelang pamimalan. E sukat masagwa ing kaayusan ning buak da; e la sana gagamit palamuting gintu o perlas, at mangamal a imalan.

¹⁰ Kailangan mayakit karela ing mayap a dapat at manayun a ugali antimo ing makabage karing talasalpantaya king Dios.

¹¹ Kailangan lang tahimik makiramdam ding babai king oras na ning pamagaral at lubus lang pasakup.

¹² E ke paintulutan ing babai ban turu o sumakup karing lalaki; kailangan ing manahimik ya.

¹³ E yu sa kakalinguan king i Adan ya ing minunang melalang bayu i Eva.

¹⁴ Aliwa i Adan nune i Eva ing melinlang at linabag king utus ning Dios.

¹⁵ Makanyan man, miligtas ya ing babai king uli na ning pamanganak na, nung manatili ya king kasalpantayanan, king lugud at kabanalan ampon kahinhinan.

3

¹ Tutu ya iting kasebian: Ing ninumang bisang maging talapanibala king iglesia magnasa yang mayap a dapat.

² Inya kailangan king talapanibala ing ala yang kapintasan, metung ya asawa, biasa yang mangawat king sarili na, maisip, kagalang-galang, makabuklat a pibalebale karing tau, at mayap yang talaturu.

³ E ya mahilig king alak at e ya mabagsik nune maganaka ya, malugud ya king kapayapan, at e malugud king salapi.

⁴ Kailangan ing balu neng panibalan ing sarili nang pamilya, igagalang de at pamintuan ding anak na.

⁵ Makananu neng pamahalan masalese ning ninuman ing iglesia na ning Dios nung ding mismung katubale na e na la balung pamahalan?

⁶ Kailangan king e ya bayu pa king kasalpantayanan, magkang magmaragul ya at miyatulan ya antimo ing milyari king diablo.

⁷ Kailangan munaman ing igagalang de ring taung e miembru king iglesia ban e de atatsa at ban e ya manabu king silu na ning diablo.

⁸ Kailangan munaman king ding talasuyu king iglesia ing marangal la, tapat magsalita, e mapaninum alak at e sakim.

⁹ Kailangan ing tapat lang manatili king kasalpantayanan at ating malinis a konsiensia.

¹⁰ Kailangan ing masubuk la pa mu, at nung mayakit lang karapatdapat kanita la paintulutan sumuyu.

¹¹ Kailangan king ing babaing asawa ning balang metung karela marangal ya naman: e ya maindredus, nune maisip ya, at tapat king sabla-sablang bage.

¹² Kailangan king ing talasuyu metung ya asawa, masalese yang manibala karing anak na, at king mabilug nang pibalebale.

¹³ Igalang de ring sabla ing talasuyung tapat king katungkulan na, at atin yang ganap a tetagan mipasiag king kasalpantayanan a miyabie kekatamu king uli na ning pangayabe tamu kang Cristo Jesus.

¹⁴ Maragul ing kanakung kapanayan a mikit kata king lalung malaguang panaun. Makanyan man susulat ku la deting panabilin

¹⁵ ban nung sakali mang e ku agad miratang, agad mung abalu nung nanu ing maging panugali mu king pibalebale na ning Dios a mabie, ing iglesia a asias a pundasyun na ning katutuan.

¹⁶ Tune ping malalam ing misteryo na ning kekatamung relihiun: Pepakit ya king porma ning tau, pepatutuan ne ning Espiritu, at ikit de ring anghel. Mipanaral ya king mabilug a yatu, peniwalan de ring sablang tau, at minukiat ya banua.

4

¹ Malino nang sasabian ning Espiritu king paniatang na ning tauling panaun lakuan da ring mapilan ing kasalpantayanan. Tukian da la ring mapaglinlang a espiritu at ing tuturu da ring demonyu.

² Magobra la ding demonyu king kapamilatan da ring turu da ring taung malaram, at atin nang tatak ning diablo karing mepata dang konsiensia.

³ Ibawal da ing pamakiasawa at mangiling la king pamangan; pamangan a sukat tanggapan mitmung kapasalamatan uling lelangan na ning Dios ban kanan da ring talasalpantaya, at ding taung lubus makaintindi king katutuan.

⁴ Mayap ing sablang lelangan na ning Dios at e dapat isipan e mayap, nung iti tatanggapan mitmung kapasalamatan,

⁵ uling lininis na na ning amanu na ning Dios at ning panalangin.

⁶ Maging mayap kang talasuyu nang Cristo Jesus, nung ituru mu la deting bage karing kapatad. At kabang tuturu mu la deti, sesen mu munaman ing kekang sarili king pamangan espiritual at king tune aral a kekang tutukian.

⁷ E mu sisiran ing kekang panaun king kwentung e tutu, nune magsane ka king kabanalan.

⁸ Ating ditak a pakinabang ing pamagsane king katawan. Oneng mas maragul ing pakinabang king pamagsane king kabanalan, uling atin yang daralang pangaku e mu king kasalukuyan a bie nune pati na king bie king aldo bukas.

⁹ Tutu ya iting kasebian at sukat yang lubus tanggapan at paniwalan.

¹⁰ Iti ya ing sangkan nung inya magkapilit tamu at magobrang masalese uling asahan ta ya ing mabie Dios, ing Talapagligtas da ring sabla, lalung-lalu na ding talasalpantaya.

¹¹ Ituru mu la at ipatupad deti.

¹² E mu paburen ing insultuan na ka ning ninuman uli ning kayanakan mu; nune maging alimbawa da ka sa ding talasalpantaya king pamagsalita, king panugali, king lugud, king kasalpantayanan, at king malinis a pamibiebie.

¹³ Kabang panenayan mu kung datang, pagmalasakitan mu at dinan panaun ing pamamasang Kasulatan arapan da ring malda, ing pamanaral at pamanuru.

¹⁴ E mu paburen ing regalung espiritual a atyu keka a miyabie keka inyang mangamanu la ding propeta, at inyang ding makatua na ning iglesia timpak da la ring gamat da keka.

¹⁵ Daptan mu la deting bage at italaga mung lubus ing kekang sarili kareti ban akit da ring sabla ing kekang paniulung.

¹⁶ Ingatan mu ing kekang pangimut at ing kekang pamanuru. Isundu mu ing pamaniapat kareting bage ban miligtas ka at pati na ding makiramdam keka.

5

¹ E me pangamanuan ing lalaking matua kesa keka, nune pakisabian me antimong tatang mu. Ituring mu lang kapatad ding lalaking kayanakan.

² At ituring mu lang anting ima mu ding makatuang babai at anting kapatad mu ding kayanakan a babai king mitmung kalinisan.

³ Saupan mu la ding babaing tune mebalu.

⁴ Nung ing metung a babaing mebalu atin yang anak o apu, ila deti ring kailangan lumingap king karelang makatua bilang ablas karela uling iti kalugud-lugud king Dios.

⁵ Ing tune babaing mebalu ya itang magdili-dili king bie na. Ing Dios ya ing bukud nang kapanayan, inya parati yang manalangin aldo't bengi at maniawad saup king Dios.

⁶ Oneng ing babaing mebalu a mayatu anti ne mong mete na agyamang mabie ya pa.

⁷ Ipatupad mu iti ban e la mapintas.

⁸ Ing ninumang e bisang sumaup karing kamaganak na, lalung-lalu na karing mismung katubale na, tinggian na na ing kasalpantayanan at marawak yang e palak kesa karing alang kasalpantayanan.

⁹ Ding kailangan miyabe king listahan da ring babaing mebalu ila deti: e la kukulang king idad a anam apulu, misan la mekiasawa

¹⁰ at pikabaluan la king pamaniapat mayap: peparagul da la ring anak da king mayap a pamibiebie, malugud lang tatanggap karing taung makipanuknangan karing pibalebale ra, sinuyu la karing pinili na ning Dios, sinaup la karing mengailangan, at king miyayaliwang paralan dinikil da ing karelang sarili king pamaniapat mayap karing aliwa.

¹¹ E mu la iyayabe king listahan ding babaing mebalung anak pa mu uling kabud pignasan dang makiasawang pasibayu painggulutan da na ing pamaniuyu kang Cristo.

¹² Uli na niti, mikasala la uling lebagan da ing minuna dang pengaku keya;

¹³ pagaralan dang magtamad at lipat-lipat karing bale. Aliwa pa ita, maging mapakialam la pa at maindredus.

¹⁴ Inya nung akung kutnan mu, mayap pa ing makiasawa lang pasibayu, mikayanak la, at pamahalan de ing sarili dang pibalebale ban e la mirinan dalan ding kekatamung kalaban para magsalitang kapanyiran laban kekatamu.

¹⁵ Sasabian ku iti uling ating mapilan a mebalu a ayagkat na nang Satanas.

¹⁶ Ing ninumang talasalpantaya, babai o lalaki, a ating mebalung babai king pamilya na, kailangan ing lingapan na la ban e ya kabayatnan ing iglesia. King anti kaniting paralan, alingap na la ning iglesia ding mebalung alang tune ayasahan.

¹⁷ Sikapan mung tanggap lang dobling kasaupan ding mayap a makatuang manibala king iglesia, lalung lalu na detang manaral at tuturu king amanu na ning Dios.

¹⁸ Uling sasabian na ning Kasulatan, E me sasara asbuk ing baka kabang dadara ya. Makasulat munaman, Ing magobra mangaintuliran yang kabayaran.

¹⁹ E mu pakiramdaman ing sumbung laban king metung a makatua, nung e ra patutuan ding adua o atlung testigu.

²⁰ Pangamanuan mu la king arapan ding sabla ding e bisang tuknang darapat kasalanan ban mirinan lang takut ding aliwa.

²¹ King arapan na ning Dios at i Cristo Jesus at ding banal nang anghel, yuyutus ku king tuparan mu la deting panabilin king alang pamanulak o pamangabiran.

²² E mu la marapal ipapatung ding kekang gamat king ninuman ban dinan upayang manibala. Ingatan mung e ka mikakadake king kasalanan da ring aliwa. Manatili ka sanang alang kapintasan.

²³ E mu bukud danum ing kekang inuman. Anti na ning maralas kang sasakit, minum ka namang ditak a alak ban malaso ka pengan.

²⁴ Ing kasalanan da ring mapilan a tau mayayakit na bayu pa miras king husgadu, oneng ing kasalanan da ring aliwa mayakit king katataulian.

²⁵ Makanyan munaman, ating mayap a dapat a agad mayakit at agyamang ali la, e la malyaring manatiling makalihim.

6

¹ Ding ipus sukat da lang igalang ding karelang panginuan ban ala lang asabi laban king Dios at karing kekatamung turu.

² Nung sakaling ding panginuan da talasalpantaya la, lalu da la sanang igalang uling kapatad da la king kasalpantayanan. Kailangan ing lalu dang samasnan ing karelang pamakiutus uling ding makinabang king obra da kasanmetung da la king kasalpantayanan at lugud. Ituru mu la at ipatupad deting bage.

³ Nung ating tuturung aliwang doktrina at laban king tune nang amanu ning Ginung Jesu-Cristo at king aral tungkul king kabanalan,

⁴ deti sira la buntuk king kayabangan at ala lang balu! Sakit da na ing makipagdebate at makiaskal tungkul karing amanu, bage a panibatan ning diria, ning pamipagkamua, ning pisasabian a alang ketuntunan ampon pamagduda,

⁵ at alang kawakasan a pamakitaltalan karing bukut a matulid, at e na makakilala king katutuan. Isipan da king ing relihiun paralan ya ban misalapi la.

⁶ Wa, maragul ing pakinabang king relihiun king taung managyu na king atyu keya.

⁷ Uling ala tamung bitasang dela keti king yatu at ala tamu namang idala king paglako tamu keti king yatu.

⁸ Inya, kailangan ta na sanang matula nung atin tamung pamangan at imalan.

⁹ Oneng ding bisang mibandi mananabu la king tuksu at mangarakap la king dakal a kamulangan at e ustung kapagnasan a pasari king karelang pangabagsak at kasiran.

¹⁰ Uling ing lugud king salapi ya ing yamut ning sablang dewakan. Uli na ning kapagnasan mibandi, ating mikawani king kasalpantayanan at dinalan dakal a kaplas lub.

¹¹ Oneng ika, tau na ning Dios, pangilagan mu la ngan deting bage. Magkapilit kang mibiebie king katuliran, king kabanalan, king kasalpantayanan, king lugud, king kapibabatan, at mababa lub.

¹² Daptan mu ing anggang agyu mu king ligligan alang-alang king kasalpantayanan at tanggapan mu ing bie alang angga; uling para kaniti na ka inaus ning Dios inyang pisiag mu ing kekang kasalpantayanan king arap da ring dakal a testigu.

¹³ King arapan na ning Dios a babie bie karing sablang bage at king lagyu nang Cristo Jesus a pepatutu king arapan nang Poncio Pilato, yuyutus ku keka:

¹⁴ tuparan mu ing utus at papanatilian mung malinis at alang kamalian angga king Aldo nang paniatang ning Ginu tamung Jesu-Cristo.

¹⁵ King mituldung aldo, ipakilala ne ning banal at bukud Mayupaya, ing Ari da ring sablang ari at Ginu da ring sablang ginu.

¹⁶ Ya mung bukud ing alang kamatayan at manuknangan king aslag a e alapitan. Ala pang menakit king Dios o malyaring manakit king Dios. King Dios ing dangalan at ing kayupayan a alang angga! Amen.

¹⁷ Iyutus mu karing mabandi king e la sa mapagmaragul ni manalig king pibandian a alang kapilmian; nune manalig la king Dios a babie labis-labis king bage a makaligaya kekatamu.

¹⁸ Ituru mu lang dapat mayap, magpakabandi king mangayap a dapat, makabuklat a palad at mapaniaup karing aliwa.

¹⁹ King anti kaniting paralan makatipun lang pibandian para king aldo bukas, at tanggapan da ing tune bie.

²⁰ Timoteo, pakaingatan mu ing mipaniwala keka. Pangilagan mu ing pisasabian a e kalugud-lugud king Dios, at ing bukut a pamagmatulid a ausan dang Kabiasnan ding tau.

²¹ Uling ating mapilan a mimisip king atin lang kabiasnan at milisia la king kasalpantayanan. Mananu na sanang ing grasya na ning Dios manatili keko ngan.