1

¹ Ibat ya iting sulat kari Pablo, Silvano, at Timoteo. Miparala ya karing miembru na ning iglesia karin Tesalonica, ding pinili na ning Dios Ibpa at ning Ginung Jesu-Cristo.

² Mananu na sanang ing grasya at kapayapan na ning Dios Ibpa at ning Ginung Jesu-Cristo miyabie kekayu.

³ Kapatad, kailangan ing parati keng pasalamat king Dios king uli yu. Matulid ing daptan mi iti uling manatiling susulung ing kekayung kasalpantayanan king Dios at susulung antimu rin ing lugud yu king metung at metung.

⁴ Pagmaragul da kayu karing sablang miembru na ning iglesia ning Dios, uli na ning kekayung pamanialpantaya at pamanatili libutad ding sablang kaguluan at kasakitan a kekayung daralanan.

⁵ Iti ya ing katunayan na ning matulid nang pamanatul ning Dios: karapatdapat kayung maging miembru na ning Kayarian na uli na ning kekayung kapibabatan libutad ning kaguluan.

⁶ Daptan na ning Dios ing sukat marapat; pasakitan na la ding babie kaguluan kekayu.

⁷ At ikayu namang mibata dinan na kayung kasnawan at antimu rin ikami. Daptan na iti potang datang yang manibat banua ing Ginung Jesus a kayabe ding mayupaya nang anghel.

⁸ Datang ya libutad ning milalablab a api at parusan na la ding sablang e kikilala king Dios at e tinupad king Mayap a Balita tungkul king Ginu tamung Jesus.

⁹ Ing maging parusa da ya ing alang anggang kapahamakan at pangawale king Ginu at king maligaya nang kayupayan.

¹⁰ Mapalyari iti potang miras na ing Aldo ning paniatang na keti ban tanggapan ing dangalan a ibie da ring pinili na at parangalan na la ding sablang menalig keya. Makakayabe kayu kareti uling tinggap yu ing Mayap a Balita a penaral mi kekayu.

¹¹ Inya parati da kayung ipanalangin king Dios ban maging karapatdapat kayu king kekayung pangayaus. Mananu na sanang ibie na kekayu king kapamilatan na ning upaya na ing sablang mayap yung kapagnasan at iganap ing dapat a bubunga na ning kekayung kasalpantayanan.

¹² King anti kaniting paralan, arinan yeng dangalan ing lagyu na ning kekatamung Ginung Jesus, at ikayu naman dinan na kayung dangalan agpang king grasya na ning kekatamung Dios at ning Ginung Jesu-Cristo.

2

¹ Ngeni ing tungkul naman king paniatang na ning Ginu tamung Jesu-Cristo, at ing pamanipun na kekatamu arap na: ipakisabi ming mayap kekayu, kapatad,

² king e kayu sa mabibigla o agad pailingasngas a isip king mibalitang dinatang na ing Aldo ning Ginu agyamang sabian da king iti ula o kapabaluan o kaya sulat a ibat kekami.

³ E kayu pailinlang kenu man king makananu mang paralan. Uling ing Aldo ning Ginu e datang anggang e mapalyari ing tauling Pamag-rebeldi laban king Dios at ing pangalto na ning Marawak, ing makatalaga king alang kawakasan a parusa.

⁴ Labanan na ing sablang sasamban da ring tau at ing isipan dang banal. Itas na ing sarili na, lungub ya king Templo na ning Dios; karin ya lukluk at ipasiag na king ya ing Dios mismu.

⁵ E yu wari atatandanan? Sinabi ku na kekayu iting sabla kanitang kayabe yu ku pa.

⁶ E pa mu pin milyari iti uling atin pang pipigil at balu yu nung nanu ita. Lunto ya ing Marawak potang datang na ing karampatan a panaun.

⁷ Magobra na ngeni king lihim ing upaya na ning Marawak at ing sukat mapalyari e mibalaus anggang e ya milalako ing pipigil kaniti. Nung milako ne

⁸ lunto ne kanita ing Marawak. Paten ne ning Ginung Jesus potang datang ne king kapamilatan na ning pangisnawa na at lasakan ne ning makasilo nang aslag.

⁹ Lunto ya ing Marawak a kayabe ing upaya nang Satanas at dapat yang miyayaliwang maling tanda at bage pagmumulalan.

¹⁰ At gamitan na ing miyayaliwang paralan na ning pamaglinlang karing mipapahamak; miligtas la sana deti, nung tinggap da mu at liguran ing katutuan.

¹¹ Uling e ra tinggap ing katutuan, pepaburen na na la ning Dios ban alinlang na la ning maragul a kamalian ban paniwalan da ing e tutu.

¹² Ing maging bunga na niti ya ing miparusan la ngan detang sablang memili king e tutu lugal king ing katutuan ya ing karelang tanggapan.

¹³ Sukat kaming parating babie pasalamat king Dios king uli yung kapatad a pakamalan na ning Ginu. Pasalamat kami uling pinili na kayu bilang mumunang dinan nang kaligtasan king kapamilatan na ning Espiritung papagbanal kekayu, at ning pamaniwala yu king katutuan.

¹⁴ Inaus na kayu ning Dios king kapamilatan na ning Mayap a Balita a penaral mi kekayu ban akayabe da kayu king ligaya na ning Ginu tamung Jesu-Cristo.

¹⁵ Inya, kapatad, manatili kayung matatag karing katutuan a tiru mi kekayu, king amanu o king sulat mi.

¹⁶ Mananu na sanang paligayan na katamu ning Ginu tamung Jesu-Cristo at ning kekatamung Dios a Ibpa a malugud kekatamu, at king kapamilatan na ning grasya na dinan na katamung alang anggang sikanan lub at mayap a kapanayan.

¹⁷ Katmuan na la sana ding pusu yu king sikanan lub, at dinan na kayung sikanan makarapat at makapagsalita king sablang mayap.

3

¹ Katataulian, kapatad, ipanalangin yu kami ban ing amanu na ning Ginu mikalat mabilis karing sablang lugal, at parangalan da ring sabla antimo ing milyari kekayu.

² Ipanalangin yu naman king miligtas kami karing alang katuliran at e mayap a tau; uling e ding sablang tau maniwala la king amanu na ning Dios.

³ Tapat ya ing Ginu. Dinan na kayung sikanan at iligtas na kayu king Marawak.

⁴ King uli na ning Ginu, maragul ing tiwala mi king daraptan yu la at isundung daptan ding bage a yuyutus mi kekayu.

⁵ Mananu na sanang tairan na kayu ning Ginu king lugud king Dios at king pamanatili kang Cristo.

⁶ Kapatad, king lagyu na ning Ginung Jesu-Cristo, yuyutus mi king dumayu kayu karing matamad, at e bisang mibiebie ketang panabilin mi karela.

⁷ Masalang balu yu king kailangan yung pakiapusan ing depat mi. E kami mikakunung megobra inyang atyu ke ken.

⁸ E kami tinanggap nanuman kekayu a e mi beyaran. Aldo't bengi kaming megobra ban e ke maging pabayat kenu man kekayu.

⁹ Depatan mi iti e uling ala kaming matulid manayang kasaupan kekayu, nune ban dinan da kayung mayap a alimbawa.

¹⁰ Inyang kayabe yu ke pa ken, iti ya ing maigpit ming penabilin, E ye pakanan ing ninumang e bisang magobra.

¹¹ Abanggit mi iti uling abalitan mi king ating mapilan kekayu a magtamad at alang daraptan nune mu ing mamakialam king pamibiebie da ring aliwa.

¹² King lagyu na ning Ginung Jesu-Cristo, yuyutus mi at ipakisabing mayap kareting tau king manintunan la sana at mibiebie masalese.

¹³ Kapatad, e kayu sana sasawa king pamaniapat mayap.

¹⁴ Tandanan ye at pangilagan ing ninumang e bisang tupad karing panabilin mi king sulat a iti ban mipakarine ya.

¹⁵ Oneng e yu ne man kikilalanan kalaban; nune panaralan yeng anting kapatad.

¹⁶ Mananu na sanang ing Ginu mismu a panibatan na ning sablang kapayapan, dinan na kayung kapayapan king sablang panaun at king sablang paralan. Ing Ginu manatili ya kekayu ngan.

¹⁷ Aku i Pablo, ing mismung sinulat kaniti: Pagmananuan da kayu ngan. Iti ya ing pipirma ku karing sablang sulat ku. Makanyan kung susulat.

¹⁸ Mananu na sanang manatili kekayu ngan ing grasya na ning Ginu tamung Jesu-Cristo.