1

¹ Ibat ya iting sulat kari Pablo, Silvano, at Timoteo. Miparala ya karing miembru na ning iglesia karin Tesalonica, ding pinili na ning Dios Ibpa at ning Ginung Jesu-Cristo. Mananu na sanang ing grasya at kapayapan miyabie kekayu.

² Parati kaming pasalamat king Dios king uli yu at yayabe da kayu king kekaming panalangin.

³ Gaganakan ming alang patugut king arapan na ning kekatamung Dios at Ibpa ing kekayung mayap a dapat a bunga na ning kekayung pamanialpantaya, ing kekayung kapagalan king agkat na ning lugud, at ing manatili yung kapanayan king Ginung Jesu-Cristo.

⁴ Kapatad, balu mi king kaluguran na kayu ning Dios at pinili na kayu ban maging bandi na.

⁵ Ing Mayap a Balita a lubus ming paniwalan pisiag mi ya e mu king salita, nune king upaya at kayabe ning pamipatutu ning Banal a Espiritu. Ikit yu nung makananu keng mibiebie libutad yu. Ala keng aliwang sikasuan nune mu ing kekayung ikakayap.

⁶ Mekiapus kayu kekami at king Ginu. Tinggap ye ing Mayap a Balita at uli na niti dinalan kayung dakal a kasakitan. Makanyan man, menatili pa mu rin kekayu ing tula a babie na ning Banal a Espiritu.

⁷ Inya naman meging pialimbawanan da kayu ding kapatad karin Macedonia at Acaya.

⁸ Uling e mu ing miras karin king Macedonia at Acaya ing amanu na ning Ginu king kapamilatan yu, nune mikalat karing miyayaliwang lugal ing balita tungkul king kekayung kasalpantayanan. Inya e na kailangan kekami ing magsalita pa tungkul kaniti.

⁹ Ila na mismu ding mamalita nung makananu yu keng tinggap. Ila naman ding sinabi nung makananu yung likuan ing pamanyamba karing idolo ban sumuyu king tune at mabie Dios,

¹⁰ at manaya king pamagbalik na ibat banua ning Anak na, i Jesus, ing pepasublian nang mebie. I Jesus ya naman ing magligtas kekatamu king daratang nang milalablab nang mua ning Dios.

2

¹ Ikayu mismu, kapatad, ing makibalu king ing pamagbisita mi kekayu e meyalang kabaldugan.

² Balu yu nung makananu da keng pepasakitan at ininsultu karin Filipos bayu ke pa miras kekayu ken king Tesalonica. Agyang dakal ing sagabal, pepasiknangan na ke lub ning Dios ban ipanaral mi kekayu ing Mayap a Balita.

³ Ing kekaming pamanaral e makatalakad king kamalian o king e mayap a kapagnasan o pamagnasang maglinlang.

⁴ Nune, birian na ning Dios ing pigtiwala ne kekami ing Mayap a Balita, inya menaral kami e ban paligayan mi ya ing tau nune ing Dios a susubuk karing kekaming pusu.

⁵ Balu na ning Dios at balu yu munaman king e kami magkunwari king pamamuri o ginamit amanung tatakap king sakim a kapagnasan.

⁶ E mi pagnasan ing purian yu kami o ning ninuman,

⁷ agyang atin keng matulid purian yu bilang apostol nang Cristo. Meging mamu kami at malugud libutad yu kalupa na ning ima a malingap karing anak na.

⁸ Uli na ning maragul ming lugud kekayu, telaga mi ing kekaming sarili king pamanaral kekayu king Mayap a Balita. Aliwa mu iti, nune pati bie mi binie mi para kekayu uling tune kayung meging mal kekami!

⁹ Siguradung atatandanan yu pa, kapatad, nung makananu kaming megobra at migpakapagal aldo't bengi ban e kami maging pabayat kenuman samantalang panaral mi ya kekayu ing Mayap a Balita.

¹⁰ Testigu kayu at ing Dios king meging tapat kami, matulid at masalese mekiabe kekayung talasalpantaya.

¹¹ Antimo ing balu yu, meging anti keng tata king balang metung at metung kekayu.

¹² Pesiknangan da kayu lub, peligayan, at inamun mibiebie karapatdapat king Dios a minaus kekayu ban dakayanan na king Kayarian na at ligaya.

¹³ Iti munaman ing sangkan nung inya parati keng pasalamat king Dios. Uling inyang penaral mi ya ing amanu na ning Dios pekiramdaman ye at tinggap e anting amanu na ning tau nune bilang amanu na ning Dios; at tune namang king Dios ya. At iting penaral mi mayayakit king bie yu, ikayung talasalpantaya.

¹⁴ Ing malilyari kekayu, kapatad, ya naman ing malilyari karing iglesia na ning Dios karin Judea, karing taung atyu karin a manalig kang Cristo Jesus. Guguluan da kayu ding mismung kabalen yu antimo ing pangagulu da karing kalupa rang Judio

¹⁵ a mekamate king Ginung Jesus at karing propeta, at menggulu munaman kekami. Makasumami la arap ning Dios at kalaban da la ring sablang tau!

¹⁶ Babawalan da ke mang manaral karing paganu. Pilit dang sasabatan ing pangaligtas da ring paganu. Mamabut na angga banua ing karelang dewakan, inya mibagsak karela ing milalablab nang mua ning Dios.

¹⁷ At ngeni, kapatad, inyang miwale kami kekayu king ditak a panaun, e king panalala nune king panimanman, lubus keng mengulila at sabik kaming akit da kayung pasibayu.

¹⁸ Aku mismu, i Pablo, e mu misan ing mignasa kung dalawan da kayu. Oneng parati na kaming dirinan sagabal Satanas.

¹⁹ Ala kaming aliwang kapanayan nune mu ikayu. Ikayu ing kekaming tula at korona na ning tagumpe a apagmaragul mi arap ning Ginung Jesus potang datang yang pasibayu.

²⁰ Wa, ikayu ing kekaming dangalan at kaligayan!

3

¹ Inyang e na ke makapibata, meyapan ming pailakuan na kami karin Atenas,

² at itubud ya kekayu i Timoteo a kapatad tamu at talasuyu na ning Dios king pamanaral king Mayap a Balita tungkul kang Cristo. Tinubud mi ya ban pasiknangan na ing kekayung pamanalig king Ginu at pasiknangan na kayu lub

³ ban kanita e ya painggulut ing ninuman kekayu uli na ning pamagligalig da kekayu. Ikayu mismu balu yu king ding kaligaligan dake na la ning kaburian na ning Dios para kekatamu.

⁴ Uling kanitang kayabe yu ke pa, makapauna mi nang sinabi kekayu king guluan da katamu, at iti naman ya ing milyari.

⁵ Inyang e na ku makapibata, tinubud ke i Timoteo ban manikua kung balita tungkul king kabilian yu ngeni king pamanialpantaya king Ginu. Migaganaka ku pota alinlang na na kayu ning diablo at mayalang kabaldugan ing kekaming kapagalan kekayu.

⁶ Mekapagbalik ne ngeni keni i Timoteo. Atin yang daralang masanting a balita tungkul king kekayung kasalpantayanan at lugud. Belita na naman kekami king parati yu keng agaganaka at maragul kanu ing kapagnasan yung akit yu keng pasibayu antimo nung makananung maragul ing kapagnasan ming akit da kayu.

⁷ Uli na niti, kapatad, ing kekayung kasalpantayanan kang Cristo minie tula kekami libutad ning kasakitan at kabalisan.

⁸ Ing pamanatili yung matatag king kasalpantayanan ya ing babie sikanan lub kekami.

⁹ Makananu mi ya kayang pasalamatan ganap ing Dios king sablang tulang binie yu kekami?

¹⁰ Taimtim ming ipanalangin aldo't bengi ing akit da kayu sanang pasibayu at asaupan da kayu king nanumang maging kakulangan ning kekayung kasalpantayanan.

¹¹ Mananu na sanang ing Dios at Ibpa, at ing Ginu tamung Jesus dinan nang dalan ing pamagbisita mi kekayu.

¹² Mananu na sanang paragulan na at palablaban na ning Ginu ing kekayung lugud king metung at metung at karing sablang tau, antimo ing lugud mi kekayu.

¹³ King anti kaniting paralan, pasiknangan na kayu lub ban manatiling ganap at alang kapintasan king arap ning kekatamung Dios at Ibpa angga king paniatang nang pasibayu ning kekatamung Ginung Jesus at ding sablang pinili na.

4

¹ Katataulian, kapatad, king uli na ning Ginung Jesus ausan mi ing kekayung kapanamdaman king lalu yu sanang pagkapilitan ngeni ing mibiebie kayung kalugud-lugud, ing pamibiebie a kailangan yung tuntunan agpang king abalu yu kekami ban maging kawiliwili kayu king Dios.

² Uling balu yu la ding turu a ibat king Ginung Jesus a kekaming tiru kekayu.

³ Buri na ning Dios ing magpakabanal kayu, at lubus mangilag king pamakipangalugud.

⁴ Kailangan banal at marangal ing nasa ning ninuman king pamakiasawa na

⁵ at e king pamanusig na mu ning pamitan na ning laman, antimo ing panugalian ding taung e makakilala king Dios.

⁶ Kanita e na dakurakan o samantalanan ning ninuman ing matulid ning kalupa nang tau. Antimo ing sinabi mi na kekayu king milabas a panaun at maigpit ming penabilin: parusan ne ning Ginu ing dapat kareting dewakan.

⁷ Inaus na katamu ning Dios ban mibiebie king kalinisan at e king kanawangan.

⁸ Inya, ing ninumang e tanggap king turung iti, aliwa ing tau ing e na tatanggapan nune ing Dios a minie kekayu king Banal nang Espiritu.

⁹ E na kailangan ing sulatanan na kayu pa ning ninuman tungkul king pamaglugud karing kapatad king kasalpantayanan, uling tiru na na ning Dios kekayu nung makananu kayung mikakalugud.

¹⁰ At iti naman ya ing daraptan yu karing kapatad king mabilug a Macedonia. Makanyan man, ipakisabi mi pang mayap kekayu, king lalu yu sanang dagdagan ing kekayung lugud.

¹¹ Pagkapilitan yu sanang mibiebie kayung tahimik. Arapan yu ing sarasarili yung dapat, at manintunan kayung malinis antimo ing tiru mi kekayu.

¹² King anti kaniting paralan, igalang da kayu ding e pa makakilala king kekatamung Ginu. Bukud pa kaniti, e yu ipanalig karing aliwa ing kekayung kabiayan.

¹³ Kapatad, buri ming abalu yu ing katutuan tungkul karing mete na ban e kayu lungkut, antimo ding taung alang kapanayan.

¹⁴ Maniwala tamu king mete ya i Jesus at sinubling mebie. Inya maniwala tamu king pasublian na la namang mie ning Dios ding sablang mete a manalig kang Jesus ban iyabe na la keya.

¹⁵ Iti ya ing turu na ning Ginu a sasabian mi kekayu: datang yang pasibayu ing Ginu at itamung mabie pa king aldo a datang ya e ta la igitan ding mete na.

¹⁶ Kuldas yang ibat banua ing Ginu kayagnan na ning kulait a mumutus; ing bosis ning arkanghel at tiup na ning trumpeta ning Dios. Muna na lang pasublian mie ding mete a ating kasalpantayanan kang Cristo.

¹⁷ Kaybat na nita, itamung mabie pa iyukiat na katamu king biga at iyabe karing pepasublian nang mebie ban salubungan ta ya ing Ginu king angin. At kanita akayabe ta ya ing Ginu king kapilan pa man.

¹⁸ Inya mipapamatula kayu king metung at metung kapamilatan da reting amanu.

5

¹ E na kailangan ing isulat ku pa ing panaun at oras a mapalyari la deting bage.

² Uling ikayu mismu balu yu king ing Aldo ning Ginu kalupa ne ning paniatang na ning mapanako.

³ Potang sasabian da ring tau, Payapa at panatag ing sabla-sabla, biglang datang ing kasiran. E la makaligtas uling ing paniatang na niti kalupa na ning pamiramdam ning babaing manganak.

⁴ Oneng ikayu, kapatad, ala kayu king karalumduman, inya e na kayu abigla ning Aldo ita a datang anting mapanako.

⁵ Ikayung sabla anak na kayu ning sala at anak na ning aldo. E tamu para king dalumdum o para king bengi.

⁶ Inya, kailangan tamung manatiling makagising, parating makasadia, at malino pamisip, e anti ding aliwa.

⁷ Uling neng bengi karin la matudtud ding tau at neng bengi la naman maglasing.

⁸ Anti na ning atyu tamu king panig na ning aldo, kailangan tamung ating mabie kaisipan. Gawan ta yang baluti na ning salu ing kasalpantayanan at ing lugud, at gawan helmet ing kapanayan king pamagligtas a daptan na ning Dios para kekatamu.

⁹ E na katamu telaga ning Dios ban magdusa king mua na, nune ban iligtas king kapamilatan na ning Ginu tamung Jesu-Cristo.

¹⁰ Mete ya para kekatamu ban mie tamung kayabe na, mete tamu o mabie ta man king pamagbalik na.

¹¹ Uli na niti, mipapamatula kayu at misaup-saup antimo ing daraptan yu na ngeni.

¹² Ipakisabi ming mayap kekayu, kapatad, king igalang yu la sa ding paipagal para kekayu, ding pinili na ning Dios ban manimuna at turu kekayu.

¹³ Ibie yu karela ing ganap a kagalangan at lugud uli na ning karelang obra. Miyabe-abe kayu sanang payapa.

¹⁴ Ipakisabi ming kekayu, kapatad, king sabianan yu la sana ding matamad, pasiknangan yu la lub ding maina, saupan yu la ding mangailangan at mibabata kayu king metung at metung.

¹⁵ E yu la ablasan marok ding dinapat marok kekayu, nune isundu yu ing pamaniapat mayap king metung at metung at karing sabla.

¹⁶ Magsaya kayung parati;

¹⁷ manalangin kayung alang patugut.

¹⁸ Pasalamatan yu ing sablang mangapalyari uling iti ya ing buri ning Dios king pangayabe yu kang Cristo Jesus.

¹⁹ E ye pipigilan ing Espiritu.

²⁰ E yu insultuan ing amanung papasiag na ning Dios.

²¹ Surian yu ing sablang bage at ing mayap ya ing pulutan yu.

²² Dumayu kayu king sablang anyu na ning marawak.

²³ Pabanalan na kayu sanang lubus ning Dios a babie kapayapan kekayu. At papanatilian na sanang alang kapintasan ing mabilug yung pangatau, espiritu, kaladua, at katawan angga king paniatang ning kekatamung Ginung Jesu-Cristo.

²⁴ Tune yang tapat ing minaus kekayu at daptan na la deting bage.

²⁵ Kapatad, ipanalangin yu kami munaman.

²⁶ Atuan yu la ding kapatad king mitmung lugud.

²⁷ Aduan ku king lagyu na ning Ginu king basan ye sa iting sulat karing sablang kapatad.

²⁸ Manatili sa kekayu ing grasya na ning Ginu tamung Jesu-Cristo.