1

¹ Ibat ya iting sulat kang Pablo a king kaburian na ning Dios meging apostol neng Cristo Jesus, at ibat ya naman king kapatad tamung i Timoteo.

² Miparala ya karing pinili na ning Dios karin Colosas, ding tapat ming kapatad kang Cristo. Dinan na kayu sanang grasya at kapayapan ning Dios a Ibpa tamu.

³ Neng manalangin kami para kekayu, parati kaming pasalamat king Dios a Ibpa na ning Ginu tamung Jesu-Cristo,

⁴ uling abalitan mi ing kekayung kasalpantayanan kang Cristo Jesus, at ing lugud yu para karing sablang pinili na ning Dios.

⁵ Kanitang ing tune amanu, ing Mayap a Balita, kapupurmeruan yang miras kekayu, dimdam yu ing kapanayan a yayampang na. Inya ing kasalpantayanan yu at lugud makatalakad king kekayung panenayan a makasadiang siguradu kekayu karin banua.

⁶ Magdala yang bendisyun ing Mayap a Balita at mikakalat ya king mabilug a yatu, antimo nung makananu ing mepalyari kekayu manibat na kanitang aldo a kapupurmeruan yung abalitan ing grasya na ning Dios at milyaring yung akilala ing katutuan tungkul king grasya ning Dios.

⁷ Abalu yu iti kang Epafras, ing pakamalan ming kalupang talasuyu at tapat a talapagobra para kang Cristo, at pekakatawan mi kekayu.

⁸ Belita na kekami ing lugud a binie na ning Espiritu kekayu.

⁹ Uli na niti, parati da kayung ipanalangin manibat na kanitang abalitan mi ing tungkul kekayu. Aduan mi king Dios ing katmuan na kayu sanang kabiasnan tungkul king kaburian na at king sablang beluan at pamanalastas a babie ning Espiritu.

¹⁰ Kanita makapibiebie kayu antimo nung makananu na kayung buring mibiebie ning Ginu, at parating makatupad ketang babie tula keya. Ing pamibiebie yu mamungang miyayaliwang dapat a mayap at dagul ing beluan yu tungkul king Dios.

¹¹ Mipasiknangan kayu sana king maragul a sikanan a manibatan king maligaya nang kayupayan ban malyaring yung akarga ing sabla king mitmung kapibabatan.

¹² Pasalamat kayung mitmung tula king Ibpa uling gewa na kayung karapatdapat mirakayanan king sasadia na ning Dios king kayarian ning sala para king balen a pinili na.

¹³ Uling linigtas na katamu king upaya na ning karalumduman at linipat na katamu king kayarian na ning Anak nang pakamalan

¹⁴ a migpalaya kekatamu. Ngana wari, mipatawaran la ding kasalanan tamu.

¹⁵ I Cristo ya ing larawan na ning Dios a e mayayakit at ya ing pangane na ning meto lelangan.

¹⁶ King kapamilatan na lelangan na ning Dios ing sablang bage a atyu banua at ing keti king yatu; ing sablang mayayakit at e mayayakit, pati na ding kayupayan a espiritual, ding ginu, ding pamuntuk, at ding upaya; ing sabla-sabla melalang ngan king kapamilatan na at para keya.

¹⁷ Atyu ne bayu melalang ing nanu pa man at miyabe ing sablang bage king kapamilatan na.

¹⁸ Ya ing buntuk ning iglesia a katawan na. Anti na ning ya ing panibatan na ning bie ning katawan, ya naman ing pangane karing sablang mipasublian mie ban ya ing maging mumunang dili karing sabla.

¹⁹ Ing Dios mismu birian na king ing mabilug nang kadiosan manuknangan king Anak.

²⁰ King kapamilatan na ning Anak, tinggap ne ning Dios king sarili na ing meto sikluban. Tinatag na ning Dios ing kapayapan king kapamilatan na ning Anak nang mipaku king krus. Uli na niti, ikua nang abalik ning Dios king sarili na ing sablang bage, maging ing keti king yatu at maging ing karin king banua.

²¹ Kanitang misan mirayu kayu king Dios at meging kalaban na kayu uli da ring e mayap a depat yu at inisip.

²² Oneng ngeni king kapamilatan na ning kamatayan na king krus ning Anak na, tinggap na kayu ning Dios king sarili na ban alapit na kayung banal at malinis, at alang pangapintas king arapan na.

²³ Oneng kailangan kayu ping manatiling matatag king kasalpantayanan; e matitigatig king kapanayan yu king mipangaku king Mayap a Balita a kekayung dimdam. Iti ya itang Mayap a Balitang mipanaral karing sablang tau keti king yatu at aku, i Pablo, talasuyu na na ku man ning Mayap a Balitang yan.

²⁴ Ngeni, alang-alang kekayu, matula ku king kasakitan a daralanan ku. Uling king kasakitan na ning katawan ku, makasaup kung miganap king kasakitan na pang makatagan Cristo para king katawan na a alang aliwa nune ing iglesia.

²⁵ Pepalyarian na ku ning Dios a maging talasuyu na ning iglesia ban gampanan ku iting banal a dapat alang-alang king ikakayap yu. Iting banal a dapat a amanuan ku ya ing ipanaral kung lubus ing amanu na.

²⁶ At iti ya ing misteryong milihim king malambat a panaun karing sablang tau, oneng ngeni bilalag na ning Dios king balen a pinili na.

²⁷ Uling ing tangka na ning Dios ya iti: ipakilala na ing lihim na karing pinili na, at ipakit na karing sablang tau ing maragul a ligayang darala na niting lihim. At ing lihim a iti alang aliwa nune ini: atyu kekayu i Cristo at iti mangabaldugan king mirakayanan kayu king ligaya na ning Dios.

²⁸ Iti ya ing Cristo a panaral mi karing sablang tau. Iti ya ing kabiasnan nung nu mi la sasane at tuturu ding sabla ban kanita ing balang metung akua mi yang alapit king arap ning Dios, at mayakit yang ganap a pangayabe kang Cristo.

²⁹ Ban matupad iti, magsakripisyu ku at magkapilit kayabe na ning sikanan a babie nang Cristo, ing sikanan a magobra king mabilug kung pangatau.

2

¹ Ipaintulut yung sabian ku kekayu nung nu anti ing pamagsakripisyu ku para kekayu at para karing tau Laodicea, at pati na karetang taung e makakilalang personal kanaku.

² Daraptan ku ing anti kaniti ban mikatmuan lang tetagan ding pusu ra at ban ngening misasanmetung la king lugud mirinan lang ganap a pamanalastas a bunga na ning pamangilala ra king lihim ning Dios, ing lihim ya pin i Cristo mismu.

³ Kang Cristo makasimpan ing sablang pibandian na ning kabiasnan at beluan tungkul king Dios.

⁴ Inya ngakung sasabi kekayu, e yu paintulut ing linlangan na kayu ning ninuman king pamagmatulid nang makawili, oneng e na man tutu.

⁵ Agyamang makarayu kayu kanaku, e na kayu man makakalinguan king kanakung panalala. Matutula ku pin makabalita king masalese yung pamibiebie at king matatag yung pamanyalpantaya kang Cristo.

⁶ Anti na ning tinggap yeng bilang Ginu i Cristo Jesus, mibiebie kayung kayabe na.

⁷ Magyamut kayung malalam kang Cristo Jesus at tatagan yu ing talakad yu, at lalu yu sanang pasiknangan ing kasalpantayanan yu, antimo ing kekayung apagaralan. Mangatmu kayu sanang kapasalamatan.

⁸ Sikasuan yu king e na kayu sa alinlang ning ninuman king kapamilatan na ning nanumang kabiasnan a alang tune kalamnan, kabiasnan a makalinlang uling manibatan mu king turu da ring tau. Makatalakad e kang Cristo nune karing patakaran na ning yatu.

⁹ Uling ing kabilugan a kadiosan atyu king katawan nang Cristo,

¹⁰ at ikayu, king pangayabe yu kang Cristo, miganap ing kekayung bie. Makapaygit yang e palak karing pamuntuk at upaya karin banua.

¹¹ Mesirkunsisyun kayu king pangayabe yu kang Cristo, e king sirkunsisyun a karaniwan dang daraptan ding tau, nune king pamagsirkunsisyun nang Cristo, ing sirkunsisyun a lubus midadayu kekayu king upaya na ning palpikasalang laman.

¹² Uling inyang mebinyag kayu, mikutkut kayung kayabe nang Cristo, at king pangabinyag yu mipasublian kayu namang mebie kayabe nang Cristo king kapamilatan na ning kasalpantayanan yu king upaya ning Dios a pepasubling mebie.

¹³ Kanitang misan mete kayu king kamatayan a espiritual a pepasari na ning kekayung kasalanan at uli na ning paganu kayung e makasakup king Kautusan. Oneng ngeni biniayan na kayu ning Dios kang Cristo! Pepatawaran na katamu king sabla tamung kasalanan.

¹⁴ Kelisan ne ing listahan da ring kekatamung utang a kailangan tamung bayaran agpang king kautusan. Leko na lang lubus at pinaku na la king krus.

¹⁵ At king krus a ita linupig na lang Cristo ding pamuntuk at upayang espiritual. Gewa na lang piyalben ning balen inyang linimbun na la kagulutan na kaybat ning pamagtagumpe na.

¹⁶ Inya e yu ne paniwalan ing ninumang gagawang tuntunan tungkul king kanan o inuman o tungkul karing aldo dapat pangilinan o tungkul king Piesta ning Bayung Bulan o tungkul king Sabbath.

¹⁷ Ding sablang den metung la mung anino da ring bage mangapalyari king aldo daratang; ing katutuan ya pin i Cristo.

¹⁸ E yu paintulut ing atake na kayu ning ninumang sasabing atin yang matas a upaya kekayu uli da ring e karaniwan a vision a ikit na, at pipilit na ing maling kapakumbaban ampon ing pamanyamba karing anghel. Ing taung anti kaniti, kabud nia pairagul a buntuk king sarili nang pamagbibiasa.

¹⁹ E na ne kikilalanan bilang pekabuntuk na i Cristo. Lalam nang upayang Cristo masesese ya ing kabilugan a katawan at manatiling kabilugan uli da ring pikalukaluan at uyat, at daragul ya antimo nung makananu neng buring dagul ning Dios.

²⁰ Mete na kayung kayabe nang Cristo at malaya karing espiritung sasakup king sikluban. Baket ngeni, mabibie kayu antimo waring lubus nang sakup ning yatu? Baket mamintu kayu pa karing tuntunan a sasabing:

²¹ E me tatalnan ini, E mu tatakman ita, E me tatagkilan ita pang metung a ita?

²² Deting sablang bage ala na lang kasilbian misan a megamit na la. Deti purus lang tuntunan at turu a gewa da ring tau.

²³ Nung king bage balamu pin atin lang daralang kabiasnan neng pilit da lang pasamba ding anghel at pipilit da ing maling kapakumbaban, at pasakitan deng mabayat ing karelang katawan; oneng ala na la mang bitasang upayang makapamigil karing buri ning katawan.

3

¹ Mipasublian na kayung mebie kayabe nang Cristo. Inya kailangan yu lang panintunan detang bage a atyu karin banua nung nu ya karin i Cristo at makalukluk king banda nang wanan ning Dios.

² Isipan yu lang parati ding bage a atyu karin banua, aliwa ding bage a atyu keti king yatu.

³ Uling mete na kayu at ing bie a ngeni atyu kekayu makapampan ya king Dios kang Cristo.

⁴ Oneng king oras a mipakilala ya i Cristo, at ya ing bie yung tune, ikayu man mipakilala kayung kayabe na, at karake na king ligaya na!

⁵ Uli na niti, kailangan yung paten ing sablang agkat na ning yatu a atyu kekayu: ing pamakipangalugud, ing kanongan, ing kalibian, ding e mayap nang pamitan ning laman, at ing kasakiman (uling ing kasakiman metung yang anyu ning pamanyamba karing idolo).

⁶ King uli da ring anti kareting bage ing mua ning Dios datang karetang e mamintu keya.

⁷ At ikayung mismu kanitang misan meging metung kayu karing anti kareting tau, kanitang ing pamibiebie yu pagarian da ring anti kareting pamitan ning laman.

⁸ Oneng ngeni kailangan yu ngan painggulutan iting sabla-sabla: ing kamua, ing pelian buntuk, ing e mayap a lub. E man kailangan lumual karing labi yu ing nanumang kapanyiran at panagkas.

⁹ E kayu maglaram king metung at metung uling likas yu na ing matuang pangatau at ing sabla nang e mayap a ugali

¹⁰ at miblas kayu king bayung pangatau. Iti ya ing bayung pangatau a mibabayung alang patugut at miwawangis king larawan na ning Dios a linalang kekayu; kanita miganap ing beluan yu tungkul king sarili na.

¹¹ Uli na niti, ala na lang pamiyaliwa ding Griego karing Judio, ding mesirkunsisyun o ding ali, ding dayuan o ding Esquita, ding ipus o ding malaya. Oneng i Cristo ya ing sabla at atyu karing sabla.

¹² Ikayu ing balen a pepasubali na ning Dios; kaluguran na kayu at pinili na kayu. Uli na niti, kailangan kayung miblas king laus-pusung kapaglunusan, king ganaka at kababan lub, king kamu at kapibabatan.

¹³ Mipapanupaya kayu at mipapamatawad kapilan mang atin yang paginakit ing ninuman king aliwa. Pepatawaran na kayu ning Ginu, inya ikayu man sana mipapamatawad kayu.

¹⁴ Idagdag yu kaniti ngan ing lugud uling iti ya ing bubuklud king ganap a pamisasanmetung.

¹⁵ Mag-ari sa karing pusu yu ing kapayapan nang Cristo uling para kaniti kayu meyaus misasanmetung anting galame na ning metung mung katawan. Maging mapasalamat kayu sana.

¹⁶ Labis-labis sanang manatili karing pusu yu ing amanu nang Cristo. Mituturuanan kayu at mipapamie payu king mitmung kabiasnan. Kayabe na ning kapasalamatan a makasale karing pusu yu, pagkanta ye ing Dios karing salmo at himno ampon banal a kanta.

¹⁷ Nanumang sabian yu o daptan, gawan yu ngan king lagyu na ning Ginung Jesus. King kapamilatan na pasalamatan ye ing Dios a Ibpa.

¹⁸ Ikayung babaing talasawa, pailalam kayu karing asawa yu uling ita ya ing kailangan yung daptan bilang Cristianu.

¹⁹ Lalaking talasawa, luguran yu la at pakiutusan mitmung yumu ding asawa yu.

²⁰ Ikayung anak, maging mapamintu kayu karing pengari yu kapilan man, uling iti ya ing babie tula king Ginu.

²¹ Ikayung pengari, e yu la parating kakamuan ding anak yu, pota masira la lub.

²² Ikayu namang ipus, pamintuan yu la sanang parati ding kekayung panginuan king sablang bage, at mamintu kayu e mu neng babanten da kayu ba yu lang akua pilubluban, nune king pusung tapat at uli na ning lugud yu king Ginu.

²³ Nanuman ing daraptan yu, daptan yung laus king pusu yu, antimo waring ing Ginu ya ing sisilbian yu at aliwa ding tau.

²⁴ Ganakan yu king ablasan na kayu ning Ginu; tanggapan yu king Ginu ing sidia na para karing pinili na. Uling i Cristo ya ing tune Panginuan a kekayung susuyuan.

²⁵ Ing taung e darapat ustu, ninu ya man, siguradu nang bayaran ing depat nang e ustu; uling e ya biasang mangabiran kenu man ing Dios.

4

¹ Ikayung panginuan, tratusan yu lang mayap at mitmung katuliran ding ipus yu. Ganakan yu king atin kayu namang metung a Panginuan karin banua.

² Manatili kayung manalangin taimtim at e kayu mamatukba neng manalangin kayu at pasalamat kayu king Dios.

³ E yu kami naman sa kakalinguan ipanalangin ban dinan na ke pang mayap a oportunidad ning Dios a makapanaral king amanu na at makapagsalita king lihim nang Cristo. Uling iti ya kabud ing meging sangkan na ning pangasukul ku ngeni.

⁴ Inya ipanalangin yu king makapagsalita ku sanang masalese ba kung asabing mitmung kamasalan antimo ing kailangan marapat.

⁵ Maging matalino kayu sa king pamakiabe yu karing e talasalpantaya; gamitan yung masalese ing sablang oportunidad a miyabie kekayu.

⁶ Pane sanang makawili ing pamagsalita yu at pibuburian at kailangan kayung biasang munie ustung pakibat karing sablang mangutang kekayu.

⁷ Ing pakamalan tamung kapatad a i Tiquico, ing tapat a talapagobra at kalupang talasuyu king obra na ning Ginu, ya nang balang mamalita king sabla tungkul kanaku.

⁸ Inya tutubud ke kekayu ba na kayung pasiknangan a lub king pamamalita na tungkul king malilyari kekami ngan keni.

⁹ Kayabe nia naman i Onesimo, ing kaluguran at tapat tamung kapatad. Balu ye; metung ya karing kayabe yu. Ilang adua ibalita ra ngan kekayu ing sablang mapapalyari keni.

¹⁰ I Aristarco a kayabe ku keni king sukulan, pakomusta na kayu at antimu rin i Marcos a pisan nang Bernabe. (Penabilin ku neng minuna kekayu king tanggapan yeng matula, nung mipaindalan ya ken.)

¹¹ Pakomusta na kayu namang Jesus a ausan dang Justo. Deting atlung taung binggitan ku ila mu kabud ding Judio a meging Cristianung kayabe kung magobra para king Kayarian ning Dios at tutu lang maragul a sasaup kanaku.

¹² Pakomusta na kayung Epafras, ing metung pa munamang menibatan king grupu yu at talasuyu nang Cristo Jesus. Taimtim na kayung ipanalangin parati; aduan na king Dios ing gawan na kayu sanang matatag at lubus mapamintu king kaburian na.

¹³ Aku mismu asabi kung mitmung katutuan kekayu king magobra yang e makanyan-kanyan para kekayu at para karing tau Laodicea at Hierapolis.

¹⁴ Ipayabut nang Lucas, ing pakamalan tamung doktor, at i Demas, ing karelang komusta.

¹⁵ Sabian yu naman karing kapatad karin Laodicea king kukomustan mi la, antimu rin kang Nimfa at king iglesiang mipupulung king bale na.

¹⁶ Kaybat yeng abasa iting sulat, e ye kakalinguan pabasa munaman king iglesia karin Laodicea. Antimu rin, basan ye ing sulat a iparala da kekayu ding tau Laodicea.

¹⁷ Pakisabi yu naman kang Arkipo king samasnan nang gampanan ing obrang miyabie keya a ibat king Ginu.

¹⁸ King sarili kung gamat ngakung susulat: Kukomustan na kayung Pablo. E yu sa kakalinguan ing pangasukul ku! Ing grasya na ning Dios manatili sa kekayu.