1

¹ Ibat ya iting sulat kari Pablo at Timoteo a talasuyu nang Cristo Jesus. Karing sablang pinili na ning Dios at makayabe kang Cristo Jesus, at karing sablang pamuntuk, at talasaup na ning iglesia ken king Filipos.

² Ing grasya at kapayapan ibie na sa kekayu ning Dios a Ibpa tamu at ning Ginu tamung Jesu-Cristo.

³ Pasalamatan ke ing kanakung Dios neng agaganaka da kayu.

⁴ Neng manalangin ku para kekayu, manalangin kung mitmung tula

⁵ uli na ning pamanantabe yu kanaku king pamikalat na ning Mayap a Balita ibat na king kapupurmeruan angga na ngeni.

⁶ At siguradu ku king ing Dios a megumpisa kaniting mayap a dapat kekayu ya naman ing miganap kaniti angga king Aldo datang ya i Cristo Jesus.

⁷ Atyu kayung parati king pusu ku! Inya matulid mung tutu ing makanyan ing panamdaman ku tungkul kekayu. Uling karake da kayu ngan kaniting pribilehiong binie na ning Dios kanaku, maging king kasalukuyan a aku makasukul ku, maging kanitang malaya ku pang magdipensa, at babie katibayan king Mayap a Balita.

⁸ Balu na ning Dios king maniabi kung katutuan neng sasabian kung ing maragul kung panalala kekayu manibatan king lugud nang Cristo Jesus mismu.

⁹ At iti ing panalangin ku para kekayu: sumulung na sanang sumulung ing kekayung lugud at tune kabiasnan, at ganap a pamanalastas

¹⁰ ban abalu yang pilinan itang mayap dili. Kanita mayakit kayung tune malinis at alang pangapintas king Aldo datang ya i Cristo at

¹¹ mitmu kayu king tune kabanalan a bukud mung kang Jesu-Cristo manibatan para king ikaligaya na at ikapuri ning Dios.

¹² Kapatad, buri kung abalu yu king mekasaup maragul king pangakalat na ning Mayap a Balita ing sablang mepalyari kanaku.

¹³ Abalu da ring sablang guardia king palasyu at ding aliwa pang taung atyu keni king aku makasukul ku uling alagad na kung Cristo.

¹⁴ At ing pangasukul ku lalu na lang pepatibe lub ding keraklan karing kapatad king pamanalig da king Ginu. E mu iti, nune lakuas lang mesikan a lub king pamanaral da king amanu na ning Dios.

¹⁵ Tutu pin king ding mapilan panaral de i Cristo uli na ning diria at pamagpalalu, oneng ding aliwa naman panaral de uli na ning malinis a kapagnasan.

¹⁶ Daraptan da iti uli na ning lugud, uling balu ra king ing Dios ya ing mitubud kanaku ban ipagdipensa ku ing Mayap a Balita.

¹⁷ Panaral dia naman ding aliwa i Cristo, oneng e laus king lub da, nune ba ra mung panusigan ing sarili dang kapritsu. Isipan da king lalu ra kung apamasakitan a lub kabang atyu ku keni king sukulan.

¹⁸ Para kanaku ita alang kwenta! Nune lalu kung matutula uling i Cristo mipapanaral ya king sablang paralan, mayap la man o e la mayap a kapagnasan. At manatili kung miyayatdanan tula

¹⁹ ngening balu ku king malaya kung pasibayu, king kapamilatan na ning kekayung panalangin at ning kasaupan a babie na ning Espiritu nang Jesu-Cristo.

²⁰ Ing maragul kung pagnasan at panenayan ya pin ing e ku sa magkulangan king kanakung katungkulan, nune king sablang penandit, lalung-lalu na king kasalukuyan, mikatmuan ku sanang tetagan a lub ban mirangal ya i Cristo king mabilug kung pangatau, maging king bie ku o king kamatayan ku.

²¹ Uling nanu mo pin ing bie? Para kanaku ya i Cristo! Uli na niti, ing kamatayan metung yang lalung maragul a pakinabang.

²² Nung king pangakaba ku bie makarapat kung lalung maulagang dapat, e ku apipihu nung isanu ing kanakung pilinan.

²³ Makasipit ku karing aduang bage: tune kung buring lakuan ing bie'ng iti ban makapakiabe na ku kang Cristo at iti alang kasimpara kayapan;

²⁴ oneng lalu naman tutung kailangan ing kumaba ku bie alang-alang kekayu.

²⁵ Makapihu ku kaniti, inya balu ku ing makapanatili ku pa. Manatili ku pang kayabe yu ngan ban aragdagan ku ing kekayung paniulung at tula king kasalpantayanan.

²⁶ Inya nung wari't akayabe da kayung pasibayu kanita lalu yu na kung apamagmaragul king pamibiebie yung makayabe kang Cristo Jesus.

²⁷ Mibiebie kayu king paralan a makayagpang king Mayap a Balita nang Cristo. Nung daptan yu ing anti kanyan, datang ku man at dumalo mismu kekayu o king makarayu abalitan ku ing kekayung pamibiebie, masalang tutu king matatag kayu talakad king pamisasanmetung king diwa at dirikil yu ing kekayung sarili anting metung para king kasalpantayanan a darala na ning Mayap a Balita.

²⁸ E kayu mitatakutan karing kekayung kalaban king isanu mang pakiarapan. Lalarawan na na ning karelang kapanialangsangan itang kabiguan a karelang kararasnan, oneng para kekayu kaligtasan naman. Iting sabla makayagpang king kapagnasan na ning Dios.

²⁹ Uling metung yung pribilehiong e karaniwan ing sumuyu kang Cristo e mu king pamanialpantaya yu keya, nune pati na king kasakitan a dalanan yu alang-alang keya.

³⁰ Kalupa na ning kanaku ing pamakilaban yu, antimo nung makananu yu kung ikit mekilaban kanitang minuna at antimo ing ababalitan yu; angga man ngeni makilaban ku pa.

2

¹ Nung ating nanumang ulaga kekayu ing kekatamung bie a makayabe kang Cristo, nung tune ping makapanagkat ing lugud o ing Espiritung atyu kekatamu ngan o ing nanumang panirug o panalala,

² aduan ku kekayu ing paligayan yu kung lubus king kapamilatan na ning pamikakametung yu pamalak, pamikakametung yu king lugud, king metung mung pilubluban, at metung mung panamdam.

³ E kayu sana mipapatlalu; ala sanang mipapagmayabang; nune maging mapagpakumbaba ya sa ing metung at metung; e yu isipan kapilan man king mas mayap kayu kesa karing aliwa.

⁴ Mipapanatindi kayu sana at e mu ing sarili nang kapakanan yang isipan nang mumunang dili ning balang metung.

⁵ Makilupa kayu panamdam kang Cristo Jesus:

⁶ Agyamang atyu keya ing panga-Dios, makanyan man e na pinilit ing makipante ya king Dios.

⁷ Nune linubas na ing sarili na king sablang kamalan; mekilupa ya karing tau, at kinua na ing aske ning metung a ipus.

⁸ At king pamakiwangis na karing tau, migpakumbaba yang maygit karing sabla at meging mapamintu ya angga king kamatayan, wa, angga king kamatayan king krus.

⁹ Uli na niti, pepaygit ne ning Dios at dininan neng lagyu a mimigit karing sablang lagyu.

¹⁰ Inya king lagyu nang Jesus, kailangan lang siklaud ding sabla, ding king banua, ding keti king yatu at ding king lalam ning yatu.

¹¹ At ding sabla karelang ipasiag king i Jesu-Cristo Ginu ya, king ikaligaya na ning Dios Ibpa.

¹² Uli na niti, mal kung kakaluguran, nung makananu yung parating tikian ing sasabian ku kanitang kayabe yu ku pa, lalung maulaga ing pamintuan yu ku ngeni, ngening e yu na ku kayabe. Isundu yu ing pamagobra para king kaligtasan yu a abe ing takut at galgal,

¹³ uling e tutuknang darapat ing Dios kekayu ba yung burian at atuparan ing malugud nang parasan.

¹⁴ Daptan yung alang tutul ing sabla o alang pamitua

¹⁵ ban maging malinis kayu at alang dungis, antimong ganap nang anak ning Dios, mabibie libutad da ring marawak at palpikasalang tau keti king yatu. Kailangan kayung sunlag libutad da antimo ding batuin a babie sala king banua

¹⁶ kabang ampanganan yu la king amanung babie bie. Nung makanyan ing kekayung daptan, mirinan kung maragul a katuliran magmaragul tungkul kekayu king Aldo datang ya i Cristo. Uling mayakit king ing kanakung pamagkapilit at obra e bitasang mesayang.

¹⁷ Nung ing daya ku kailangan yang miyabe tumulu king sakripisyung yayain na ning kekayung kasalpantayanan, masaya ku pa mu rin at matula a kayabe yu.

¹⁸ At ikayu naman sana akayabe da kayu king kanakung saya at tula.

¹⁹ Atin kung kapanaligan king Ginung Jesus king apapuntan ke ken i Timoteo king malaguang panaun ban mipanatag ku lub kabud abalitan ku keya ing kekayung kabilian.

²⁰ Ya mu kabud ing balu kung biasang makisanmetung a panamdam kanaku at ating tune malasakit para kekayu.

²¹ Ala lang sisikasuan ding aliwa nune mu ing sarili dang kapakanan; ala lang malasakit para king kapakanan nang Jesu-Cristo.

²² Ikayu mismu balu yu ing katapatan nang Timoteo. Balamu tune keng mi-tata king pamitambayan mi king obra para king Mayap a Balita.

²³ Inya babalakan keng papuntan kekayu kabud mu ring asiguradu ku ing maging kabilian ku keni.

²⁴ Muna ing saup ning Ginu, aku man pagnasan kung makapunta ken king lalung malaguang panaun.

²⁵ Inisip kung masanting ing paulian ku ne ken ing kapatad tamung i Epafrodito a megobra at minarap king labanan a kayabe ku at meging tubud-tuburan yu king pamipadala yung saup kanaku.

²⁶ Tutu neng bisang magbalik ken. E ya mipaindatun manibat na kanitang abalu na king abalitan yung mesakit ya.

²⁷ Wa, mesakit ya pin at ditak nia mete, oneng salamat na mu melunus ya ing Dios keya ampon kanaku. Pakiabe ku ing kanakung sarili, uling nung melaus yang mete, panamdaman ku sanang e mu nanu.

²⁸ Inya buri ku naman ing makauli ne ken. Balu ku ing ikatula yu ing akit yeng pasibayu. Aku man mipanatag na ku lub kanita.

²⁹ Uli na niti, tanggapan ye sanang mitmung tula bilang metung a tune kapatad king Ginu. Igalang yu la ding taung anti kang Epafrodito,

³⁰ uling e na pikakunuan sinugud king panganib ing bie na, at ditak nia mu mete alang-alang king pamagobra na para kang Cristo ban aibie na mu kanaku itang kasaupan a kekayu dapat manibatan.

3

¹ Katataulian, kapatad ku, dinan na kayu sanang maragul a tula ning Ginu. E ku sasawan ing ulitan ku ing sinulat ku nang minuna kekayu at iti naman para king ikakayap yu.

² Mangilag kayu karing taung e mayap a panugali; balamu asu lang mapad king pamaniapat marawak at tutung mahilig king pamamungus king maselan nang dake ning katawan.

³ Ganakan yu king aliwa ila, nune itamu ding tune mesirkunsisyun uling sasamban ta ya ing Dios agpang king Espiritu na, at miyayatdanan tamung tula king bie tamung makayabe kang Cristo Jesus. E tamu kailangan ing magtiwala king seremonia na ning pamaniugat king katawan.

⁴ Nung ing katunayan a mayayakit king katawan ya mu ing pisasabian, aku na ing mumunang kailangan magtiwala king anti kaniting seremonia. Nung isipan na ning ninuman ing malyari yang magtiwala king seremoniang anti kaniti, lalu kung ating matulid misip makanyan.

⁵ Mesirkunsisyun ku inyang paruminggu ku pa mung makabait. Penganak da kung Israelita king tribu nang Benjamin, metung kung tune Hebreo. Nung ing pamanupad king Kautusan ya naman ing pisasabian, metung kung sadiang Pariseo.

⁶ Tutu keng pigmasakit ing Kautusan angga king gilu ke ing iglesia. Inya nung tungkul mu king pamanupad karing kautusan, ala lang apintas kanaku.

⁷ Oneng deting sablang bage a kailangan kung lawan anting pakinabang, ngeni lalawan ku lang anting pangalugi alang-alang kang Cristo.

⁸ At e mu ding bage deta, nune ing sabla lalawan kung alang kapakinabangnan alang-alang king metung a bage a tutung maulaga; iti ya't e aliwa ing aku akilala ke i Cristo Jesus a Ginu ku. Alang-alang kang Cristo Jesus, pibatan ku ing pangabating na ning sabla; lalawan kung anting alang kwenta ing sabla akamtan kia sana i Cristo

⁹ at lubus kung miyabe keya. Mipabanalan ku e king kapamilatan na ning nanumang kapamintuan king Kautusan, nune king kapamilatan na ning pamanialpantaya kang Cristo. Iti ya ing kabanalan a manibatan king Dios at makatalakad king kasalpantayanan.

¹⁰ Ing bukud mung buri ku ya pin ing akilala ke i Cristo at panamdaman ku itang upaya na ning pangasubli nang mebie, at ing miyabe ku king kasakitan na ban milupa ku keya king kamatayan na,

¹¹ at ayasahan kung aku mismu miyabe ku king pamaniubli rang mie ding mete.

¹² E ku sasabian king ikua ku nang tinggap iti o king aku banal na ku. E ku patugut magkapilit ban akua ku iti uling i Cristo Jesus ikua na na ku.

¹³ Wa, kapatad, e ku isipan king ikua ku nang apakirasan; oneng ing bukud mung daraptan ku ya ing kakalinguan ku ing delanan ku na at daraptan ku ing sablang agyu ku ban pakirasan ing atyu king arapan ku.

¹⁴ Inya pupulayi kung matulid king pakirasan ku ban akua ke ing premyu a alang aliwa nune ing bie alang angga karin banua a yayaus na ning Dios king kapamilatan nang Cristo Jesus.

¹⁵ Itamung sablang matua na king kasalpantayanan anti kanyan ing kailangan tamu ngang isipan. Nung ding aliwa kekayu e la pa makanyan a isipan, ipabalu na iti kekayu ning Dios.

¹⁶ King makananu pa man, kailangan tamung manatili karing tuntunan a apagaralan ta na angga ngeni.

¹⁷ Kapatad, e kayu sana sasawang makiapus kanaku. Binie mi na ing mayap a alimbawa kekayu. Pagumasdan yu la ding makiapus na kaniti.

¹⁸ Sinabi ku nang maralas kekayu at ngeni mipapatangis kung ulitan: dakal la ding mabibie antimong kalaban na ning krus nang Cristo.

¹⁹ Deti pawa la ngang papunta king impierno, uling ing karelang atian ya ing gagawan dang dios da. Pagmaragul da pa itang sukat da sanang pikarine. Ing bukud mung maulaga karela ila ding miyayaliwang bage keti king yatu.

²⁰ Oneng para kekatamu, ing tune tamung balen ya ing banua. Manibat ya king banua ing panenayan tamung Talapagligtas, ing Ginu tamung Jesu-Cristo.

²¹ Alilan na la ding katawan tamung matbud at malalaso. Gawan na lang kalupa na ning katawan na a maslag king ligaya. At iti gawan na king kapamilatan na mu rin nitang upaya a gagamitan na ba na lang sakupan ding sablang bage.

4

¹ Uli na niti, kapatad ku at kakaluguran a tutu kung pakamalan at buri ku nang buring akit, makanyan kayung kailangan manatiling matatag king pamibiebie yung makayabe king Ginu. Ikayu ding tula ku at pagmaragul!

² Aduan ku kekayu, Euodia at Sintique: mikasundu na kayu sa antimong mikapatad king Ginu.

³ At ika man, tapat kung kayabe, ipakisabi kung mayap ing saupan mu la sana deting aduang babai, uling migpakasakit la namang kayabe ku deting adua king pamikalat king Mayap a Balita at di Clemente, at ding aliwa pang kayabe kung megobra a ngeni makasulat a lagyu king libru ning bie.

⁴ Tumula kayu sanang parati king pamibiebie yung makayabe king Ginu. At iyulit kung sabian, tumula kayu!

⁵ Pakitanan yu lang mayap a lub ding sabla. Malapit neng datang ing Ginu.

⁶ E kayu paibalisa lub, nune king sabla yung pamanalangin aduan yu king Dios ing kekayung kailangan, at king pamaniawad yu e yu kakalinguan pasalamat keya.

⁷ At ing kapayapan a lalagpus king abut nang isipan ning tau ibie na sa kekayu ning Dios; ing kapayapan a yan ya ing papanatili king pangayabe yu pusu at kaisipan kang Cristo Jesus.

⁸ Katataulian, kapatad ku, katmuan yu lang parati ding isip yu karetang bage mayap at marangal: ding bage tutu, matas, ustu, malinis, kalugud-lugud, at mitmung dangal.

⁹ Tuparan yu king bie yu itang apagaralan yu at tinggap, ing dimdam yu at ikit kanaku. At ing Dios a babie kapayapan kekatamu manatili ya kekayu.

¹⁰ Karagul na ning tulang tatanggapan ku king Ginu, uling kaybat nang milabas ning makabang panaun, misan pa mika panaun kayung ipakit yu ing malasakit yu para kanaku. E ku buring sabian king tinuknang na kayung magmalasakit kanaku, e kayu mu pin mirinan panaun.

¹¹ At e ku sasabian iti uli na ning panamdaman kung mipaburen ku; uling mebiasa na kung magdamut king atyu kanaku.

¹² Balu ku nung nanu ing maging kalulu at balu ku naman nung nanu ing mika ating labis-labis. Sane na ku kaniti, inya nu man karin at kapilan man kontentu ku, mabsi ku man o danupan, king kalipitan man o king kanawan.

¹³ Atin kung sikanan marap king nanuman uli na ning sikanan a babie nang Cristo kanaku.

¹⁴ Makanyan man, pasalamatan kung maragul ing sinaup yu kanaku king oras ning kanakung problema.

¹⁵ Ikayung mismung tau Filipos balu yung masalese king inyang meko ku Macedonia kanitang panaun a bayu-bayu ya pa mung mipanaral ing Mayap a Balita, ikayu mung bukud ing iglesiang sinaup kanaku; ikayu mung bukud ding kerame ku king tula at kasakitan.

¹⁶ Maralas, inyang mengailangan kung saup karin Tesalonica, peparala yu ing kanakung kailangan.

¹⁷ Aliwa ing regalu a peparala yu ing maulaga para kanaku; ing maulaga ya itang pakinabang a mibubuntun kekayu.

¹⁸ Uli na niti, ing sulat a iti ya ing peka resibo na ning sablang peparala yu kanaku at ing binie yu maygit pa king kailangan ku! Atyu na kanaku ing sablang kailangan ku ngening i Epafrodito detang na kanaku ing sabla yung binie. Deti mengari lang mabanglung ain king Dios; mengari lang sakripisyung tatanggapan na at ikakatula ning Dios.

¹⁹ Bilang ablas yu, ibie na sa ning kanakung Dios ing sablang kailangan yu, ibat king grasya nang alang sukad a atyu kang Cristo Jesus.

²⁰ King kekatamung Dios at Ibpa miyabie ing ligaya angga king alang angga! Amen.

²¹ Ipayabut ku karing sablang pinili na ning Dios at magtiwala kang Cristo Jesus ing komusta mi, ikami dening kapatad a kayabe ku keni.

²² Ipayabut da naman ding sablang kapatad keni, lalung-lalu na ding magsilbi keni king palasyu na ning Emperador, ing masaya rang komusta.

²³ Ing grasya na ning Ginung Jesu-Cristo manatili kekayu ngan.