1

¹ Ibat ya iting sulat kang Pablo a e na inaus maging apostol ning ninumang tau o king kapamilatan na ning ninuman, nune inaus ne at tilduan Jesu-Cristo at ning Dios Ibpa a pepasubling mebie kang Jesus.

² Antimu rin, manibatan ya karing sablang kapatad a kayabe ku keni. Aku at ila iparala mi ya karing iglesia ken king Galacia kayabe na ning kekaming komusta.

³ Manatili sana kekayu ing grasya at kapayapan na ning Dios a Ibpa tamu at ning Ginu tamung Jesu-Cristo.

⁴ Ban iligtas na katamu king e mayap a mag-ari king kasalukuyan a panaun, inain nang Cristo ing sarili na alang-alang karing kekatamung kasalanan bilang kapamintuan king kaburian na ning kekatamung Dios at Ibpa.

⁵ King Dios ing kapurian angga king kapilan pa man! Amen.

⁶ Tutu kung pagtakan ing mabilis yung pamainggulut king minaus kekayu king kapamilatan na ning grasya nang Cristo, at birian yung tinuki king aral a makayaliwa sasabian.

⁷ King kamatutuanan, alang aliwang Mayap a Balita, oneng ginamit ke ing amanung makayaliwa uli na ning ating mapilan a taung gugulu kekayu at buri deng alilan ing Mayap a Balita a pisiag nang Cristo.

⁸ Ipaintulut yung sabian kung tapatan kekayu king nung ipanaral ne ning ninuman ing Mayap a Balita a makayaliwa sasabian kesa king Mayap a Balita a penaral mi kekayu, agyang ikami pa yan o kaya metung yang anghel a ibat banua, kailangan yang miparusan king impierno!

⁹ Sinabi mi nang minuna kekayu iti at sasabian kung pasibayu ngeni: nung ipanaral ne ning ninuman kekayu ing metung a aral a makayaliwa king Mayap a Balita a dimdam yu na, miparusan ya sa king impierno!

¹⁰ King pamagsalita kung makanyan, ing kapurian da kaya ding tau ya ing kanakung pagnasan? Ali! Ala kung aliwang pagnasan nune mu ing kapurian na ning Dios! Ing aku mibantug ku karing tau, ya kaya ing pakikuanan ko? Nung yan ya pa ing pakikuanan ku, e na ku kailangan maging talasuyu nang Cristo!

¹¹ Buri kung abalu yu, kapatad ku, king e ya ibat king tau ing Mayap a Balita a penaral ku.

¹² E ke tinggap king kaninu mang tau o tiru ning ninuman kanaku, nune i Jesu-Cristo mismu ya ing mipasiag kaniti kanaku.

¹³ Abalitan yu na nung makananu ku pamibiebie kanitang miembru ku king relihiun da ring Judio, at nung makananu keng giluan alang lunus ing iglesia na ning Dios, at nung makananu kung depat ing sablang agyu ku ba keng asira.

¹⁴ Makauna kung e palak karing Judio a kasing idad ku king pamanupad king Judaismo. Maygit e palak ing katapatan ku karing kaugalian da ring kekaming makatua.

¹⁵ Oneng ing Dios, king mal nang grasya, pinili na na ku kanita pang atyu ku king atian nang ima ku, at inaus na kung sumuyu keya. At inyang birian na neng

¹⁶ pakilala kanaku ing Anak na ban ipanaral ku karing paganu ing Mayap a Balita tungkul keya, e ku linapit meniawad payu kaninu man

¹⁷ ni e ku minta Jerusalem para makikit karetang minunang meging apostol kanaku. Nune, minta kung agad-agad karin Arabia, at kaybat migbalik ku karin Damasco.

¹⁸ Kaybat da ring atlung banua kanita ku pa mu minta karin Jerusalem ban makikit kang Pedro. Agyang menatili kung kayabe na kilub ding labing limang aldo,

¹⁹ ala kung ikit karing aliwang apostol nune mu i Santiago, ing kapatad na ning Ginu.

²⁰ Katutuan iting susulat ku. E ku maglaram, ing Dios balu na!

²¹ Kaybat minta ku karing miyayaliwang lugal karin Siria at Cilicia.

²² King panaun a ita e ra ku pa balu lupa ding miembru da ring iglesia nang Cristo karin Judea.

²³ Ing bukud mung balu da kanaku ya ing dimdam da karing aliwa, king aku, ing mengulu karela kanitang misan, ngeni ipanaral ke ing kasalpantayanan a pigkapilitan kung siran king milabas a panaun.

²⁴ Inya maragul ing pasalamat da king Dios alang-alang kanaku.

2

¹ Kalabas da pa mu ding labing apat a banua kanita ku migbalik pasibayu Jerusalem. Kayabe ke i Bernabe; tiki kia naman i Tito.

² Minta ku karin uling pepabalu na ning Ginu kanaku ing kailangan kung munta. King pribadung kapulungan da ring pamuntuk, pepalino ku karela nung makananu kung ipanaral karing paganu ing Mayap a Balita. Depat ku iti uling pigaganakan ku king ing kasalukuyan kung daraptan o ing depat ku na e ra kilalanan.

³ E re pinilit masirkunsisyun ing kayabe kung i Tito, agyamang metung yang Griego. E re pinilit

⁴ agyamang ding mapilan a magkukunwaring kapatad at mekiabe king grupu ra buri deng masirkunsisyun. Deti ila ding taung migkunwaring kayabe king kasalpantayanan ba rang pakibaluan nung nanu ing kalayaan a tinggap tamu king pangayabe tamu kang Cristo Jesus. Buri da keng gawang ipus,

⁵ oneng agyang ditak mu e mi dininan dalan ing buri da ba ming papanatilian malinis ing katutuan na ning Mayap a Balita para kekayu.

⁶ Oneng detang kikilalanan dang pamuntuk, para kanaku, nung ninuman ila, e maulaga kanaku, uling e ya mamatul ing Dios king itsura na ning tau; ala na lang digdag pang bayu king sinabi ku.

⁷ Nune, kilala da pa king ing Dios ya ing tinuldu kanaku king pangapanaral na ning Mayap a Balita karing paganu antimo nung makananu neng tilduan manaral karing Judio i Pedro.

⁸ Uling ing upaya na ning Dios pepalyarian na kung maging apostol para karing paganu antimo nung makananu yang megawang apostol i Pedro para karing Judio.

⁹ Inya i Santiago, i Pedro, at i Juan a kikilalanan dang peka pamuntuk, kilala da king ing Dios ya ing minie kanaku kaniting makapasubaling misyun; uli na niti, gelamanuan da kami ikeng aduang Bernabe, antimong tanda na ning kaparehu da keng talapagobra. Pikasunduan mi ngan king magobra ke karing paganu, at ila naman karing Judio.

¹⁰ Ing bukud mung inawad da ya pin ing e mi la kakalinguan ding pakakalulu, at iti ya naman ing pigkapilitan kung daptan.

¹¹ Inyang dinatang ya i Pedro Antiokia, selangsangan ke king durungutan da ring tau, uling tutung masala king magkamali ya.

¹² Bayu la miras karin ding mapilan a taung tinubud nang Santiago, ugali nang Pedro ing makiabe mamangan karing kapatad a paganu. Oneng pangaratang da reting tau, mengilag ya at e na bisang mangan kayabe ding paganu uling pitatakutan na la detang makapanig king pangasirkunsisyun da ring paganu.

¹³ Mekiapus la ding aliwang kapatad a Judio kang Pedro; mekituki ya pati na i Bernabe king karelang pamagkunwari.

¹⁴ Inyang ikit ku king ing dalan a tutuntunan da makalisia ya king katutuan a tuturu na ning Mayap a Balita sinabi ku kang Pedro king arap da, Ika metung kang Judio, oneng ing panugali mu e panugaling Judio, nune panugaling paganu. Inya nanu ing matulid mu para pilitan mu lang manugaling anting Judio ding paganu?

¹⁵ Wa, tutu pin ing mibait kaming Judio at e anting paganung makasalanan.

¹⁶ Makanyan man balu mi king ing metung a tau kikilalanan neng matulid ning Dios king kapamilatan na mu ning kasalpantayanan kang Jesu-Cristo, at e king kapamilatan na ning pamanupad king aduan na ning Kautusan. Ikami man meniwala kami kang Cristo Jesus ban kilalanan na kaming taung matulid king Dios king kapamilatan na ning kasalpantayanan mi kang Cristo, at e king kapamilatan na ning pamanupad mi king aduan na ning Kautusan. Uling alang taung malyaring matanggap king Dios king kapamilatan na ning pamanupad king aduan na ning Kautusan.

¹⁷ Nung king pamagkapilit ming kilalanan na keng matulid ning Dios king kapamilatan na ning pangayabe mi kang Cristo, mayakit kaming makasalanan kalupa da ring paganu. Iti kaya mangabaldugan king i Cristo ya ing tinaid kekami king pamikasala? Imposibling malyari ita!

¹⁸ Nung pagumpisan kung italakad pasibayu itang lesak ku na, mayakit king lalabagan ke ing Kautusan.

¹⁹ Nung ing Kautusan ya mu rin ing pisasabian, aku mete na ku king Kautusan, ing Kautusan mismu ya ing mekamate kanaku ban ngeni malyari kung mie para king Dios. Mipaku ku king krus kayabe nang Cristo,

²⁰ at nung mabibie ku ngeni aliwa na aku ing mabibie nune i Cristo ya ing mabibie kanaku. At kabang atyu ku keting yatu mabibie ku king kapamilatan na ning kasalpantayanan ku king Anak ning Dios a linugud kanaku, at miyain king sarili na alang-alang kanaku.

²¹ E ku malyaring payalan kabaldugan ing grasyang binie na ning Dios kanaku. Uling nung makagyu ne ing Kautusan ban kilalanan na katamung matulid ning Dios, mangabaldugan king alang ulaga ing kamatayan nang Cristo!

3

¹ Mengasira na kayu wari buntuk, ikayung tau Galacia? Ninu ing mekagayuma kekayu? Mipamalino masala king daramdaman yu ing pangamate nang Jesu-Cristo king krus!

² Metung mung bage ing ikutang ku kekayu ngeni: tinggap ye ing Espiritu ning Dios uli na ning pamanupad yu king Kautusan o uli na ning pamaniwala yu king mipanaral kekayu?

³ Tutu na kayu waring mengasira buntuk? Megumpisa kayu king kapamilatan na ning Banal a Espiritu, ngeni buri yung pupusan king kapamilatan na ning sarili yung kayupayan?

⁴ Tutu na la waring alang ulaga kekayu ing sibukan yo? Ali naman siguru!

⁵ Obat babie ne kekayu ning Dios ing Espiritu? Obat darapat yang makapagmulalang bage libutad yu? Uli waring daraptan yu ing aduan na ning Kautusan o uling maniwala kayu king Mayap a Balita a mipanaral kekayu?

⁶ Kalupa na mu nitang sasabian na ning kasulatan tungkul kang Abraham: Meniwala ya king Dios at uli na ning kasalpantayanan na kilala neng taung matulid ning Dios.

⁷ Uli na niti, kailangan yung kilalanan king ding taung ating kasalpantayanan ila ding tune nang lahing Abraham.

⁸ Kanita pa pepakit na na ning kasulatan king ding paganu kilalanan na lang taung matulid ning Dios king kapamilatan na ning kasalpantayanan. Inya ing kasulatan penaral na nang makapauna ing Mayap a Balita kang Abraham inyang nganang sinabi, King kapamilatan mu bendisyunan na la ning Dios ding sablang tau keti king yatu.

⁹ Meniwala ya i Abraham at mibendisyunan ya; inya mibendisyunan la namang kalupa na ding sablang maniwala.

¹⁰ Ding sablang magtiwala king pamamintu king Kautusan mabibie la lalam na ning metung a sumpa. Uling sasabian na ning kasulatan, Makasumpa ya ninumang e mamintu king sablang makasulat king libru na ning Kautusan!

¹¹ Ngeni, tutung masala king alang taung mipatawaran a kasalanan king Dios king kapamilatan na ning Kautusan; uling ing kasulatan sasabian na: Mibiebie ya king kasalpantayanan ing taung mipatawaran a kasalanan king Dios.

¹² Oneng e ya makatalakad ing Kautusan king kasalpantayanan. Nune, agpang king sasabian na ning kasulatan, Ing taung darapat king sablang aduan na ning Kautusan mibiebie ya agpang king Kautusan.

¹³ Oneng linigtas na katamung Cristo king sumpang darala na ning Kautusan inyang anti yang misumpa alang-alang kekatamu; uling sasabian na ning kasulatan: Makasumpa ya ing ninumang ibitin da king dutung.

¹⁴ Depatan nang Cristo iti ban ing bendisyun a pengaku na ning Dios kang Abraham miyabie karing paganu king kapamilatan nang Cristo Jesus. Kanita itamu, king kapamilatan na ning kasalpantayanan, malyari ta yang tanggapan ing Espiritung pengaku na ning Dios.

¹⁵ Kapatad, gumamit kung metung a karaniwan a alimbawa: potang pikasunduan da ring adua katau ing metung a bage, kabud mepirma ne ing kasunduan da, e ne malyaring e kilalanan ning ninuman; e nia naman malyaring dagdagan iti o bawasan.

¹⁶ Ngeni, mengaku ya ing Dios kang Abraham at king lahi na. E na sasabian ning kasulatan, at karing kekang lahi, ngana wari, karing dakal a tau. Ing sasabian na, at king kekang lahi, ngana wari, king katau mu a i Cristo.

¹⁷ Anti keni ing buri kung sabian. Ginawa yang metung a kasunduan ing Dios at pengaku na ing tuparan ne. Ing Kautusan a miyabie kalabas da ring apat a ralan at atlung pulung banua kaybat nang milyari nita, e ne malyaring siran ing kasunduan at payalan ulaga ing pangaku na ning Dios.

¹⁸ Nung makatalakad king Kautusan ing babie na ning Dios, e na makatalakad king pangaku na. Oneng itang binie na ning Dios kang Abraham miyabie keya uli na ning pangaku na ning Dios keya.

¹⁹ Nung makanyan, nanu ya parasan ing Kautusan? Miragdag ya bandang tauli ban mipakilala mu nung nanu ing pamaglabag, at miyabie ya samantalang e ya pa lalto itang lahi nang Abraham a nung kenu ya mangaintulid ing pangaku. Miyabie ya ing Kautusan ibat king gamat da ring anghel kayabe na ning saup ning metung a taung memilatan.

²⁰ E ya mangailangan talapamilatan ing bukud mung metung, at metung ya mu ing Dios.

²¹ Ing buri na waring sabian niti king ing Kautusan laban ya king pengaku na ning Dios? Ali; buri namung sabian king nung makaibie yang bie ing Kautusan, malyari na lang pawalan kasalanan ning Dios king pamanupad da king Kautusan.

²² Oneng ala yang pasubalian ing kasulatan ngening sasabian na king ing kasalanan ya ing magobra king mabilug a yatu. Inya king kapamilatan na ning pamanialpantaya kang Jesu-Cristo malyari lang tanggap ding sasalpantaya king pengaku na ning Dios.

²³ Bayu dinatang ing panaun na ning pamanialpantaya, ing Kautusan ya ing magobra; bihag na katamu ning upaya na ning Kautusan anggang e mihayag ing kasalpantayanan.

²⁴ Ing Kautusan ya ing peka talaingat tamu anggang e dinatang i Cristo, at anggang e na katamu pepawalang kasalanan ning Dios king kapamilatan na ning kasalpantayanan.

²⁵ Ngening mirasnan ta na king panaun na ning pamanialpantaya, aliwa na ing Kautusan ing talaingat tamu.

²⁶ King kapamilatan na ning kasalpantayanan karin kayu meging anak na ning Dios king pangayabe yu kang Cristo Jesus.

²⁷ King pangabinyag yu miyabe kayu kang Cristo. Mipiblasan kayu king bie na mismung Cristo.

²⁸ Inya ala nang pamiyaliwa karing Judio at karing paganu, karing ipus at karing malaya, karing lalaki at karing babai. Uling ikayu ngan sabla metung kayu mu king pangayabe yu kang Cristo Jesus.

²⁹ Nung makayabe kayu kang Cristo, ikayu ding lahi nang Abraham, ikayu ding tanggap king pengaku na ning Dios.

4

¹ Isundu ku ing buri kung sabian: kabang anak ya pa ing talapagmana ala yang pangayaliwa king metung a ipus agyamang ya ing makibandi king sabla.

² Kabang anak ya pa, ating taung mimingat keya at manibala king pibandian na angga king panaun a tilduan nang tata na.

³ Makanyan munaman, inyang anak ta pa mung malati, anti tamung ipus a atyu king lalam dang upaya ding tuntunan keti king yatu.

⁴ Oneng inyang miras na ing mituldung panaun, tinubud ne ning Dios ing Anak na. Mibait ya king metung a babai, at mibiebie ya lalam nang upaya ning Kautusan da ring Judio,

⁵ ba na lang atbusan detang atyu king sakup na ning Kautusan ban malyari tamung maging anak na ning Dios.

⁶ Anting katunayan king ikayu pin anak na kayu, tinubud ne ning Dios ing Espiritu na ning Anak na karing pusu tamu, ing Espiritung mamaus masikan, Tatang, kanakung Tatang.

⁷ Uli na niti, anak na kayu ning Dios; e na kayu ipus! At nung gewa na kayung anak na ning Dios, ibie na kekayu ing sablang mangaintulid kekong anak na.

⁸ Kanitang e ye balu ing Dios me-ipus kayu karing bage a e naman dios.

⁹ Oneng ngening akikilala yu ne ing Dios o ngening akikilala na kayu ning Dios, makananu kayu ngening bisang magbalik karing tuntunan a alang ulaga at alang sikanan? Obat bisa kayung pa-ipus karela?

¹⁰ Atin kayu pang pangilinan a aldo, bulan, panaun at banua!

¹¹ Pigaganakan ku ing magkang masayang ing sablang pipagalan ku para kekayu.

¹² Pakisabi kung mayap kekayu, kapatad, ing tularan yu ku uling aku man mekitulad ku kekayu. Ala kayung depat a marawak kanaku.

¹³ Atatandanan yu pa nung inya ikua kung mekapanaral kekayu kanitang minuna? Uli na mu ning mirasnan kung sakit ken king Galacia.

¹⁴ Agyamang ing kapanamdaman ku minie maragul a kapagsubukan kekayu, e yu ku ininsultu o likuan, nune tinggap yu kung antimong metung a anghel na ning Dios; tinggap yu kung antimong i Cristo Jesus mismu ya na ing tinggap yu.

¹⁵ Kasaya yu kanita! Nanu ing milyari? Aku mismu apatutuan ku king nung malyari la mung dukitan ding mata yu, dinukit yu na la sana at binie kanaku.

¹⁶ At ngeni, bibilang yu kung kalaban yu uli na mu ning sinabi ku kekayu ing katutuan?

¹⁷ Wa, deng aliwang taung den papakit da ing magmalasakit la para kekayu, oneng e mayap ing karelang kapagnasan. Buri da kayu mung mirayu kanaku, kanita magmalasakit kayu naman karelang kalupa na ning pamagmalasakit da kekayu.

¹⁸ Masanting ing ating malasakit nung mayap ing parasan, iti katutuan kapilan man at e mu neng kayarap yu ku!

¹⁹ Pakamalan kung anak, misan pa, kalupa na ning babaing manganak, pasibayu kung daralan kasakitan king uli yu anggang e ya miyubug kekayu i Cristo.

²⁰ Sana kayabe yu ku ngeni ban asabi ku kekayu ing atyu king pilubluban ku. E ku mipaindatun a lub king uli yu!

²¹ Oyni ing ikutang ku kekayu, ikayung sablang malisuas bisang pailalam king Kautusan: E yu daramdaman ing sasabian na ning Kautusan?

²² Sasabian na king mika adua yang anak a lalaki i Abraham; ayanak ne ing metung king babaing ipus, at ayanak ne ing kadua king asawa nang malaya.

²³ Mibait ya ing anak na ning babaing ipus king paralan a karaniwan; mibait ya ing anak na ning babaing malaya agpang king pangaku na ning Dios.

²⁴ Iti malyaring lawan antimong metung a talimhaga. Deting aduang babai lalarawan da la kekatamu ding aduang kasunduan. Manibatan ya ing metung karela king Bunduk ning Sinai at mibait la ding anak na king panga-ipus at ing babaing iti ya i Agar.

²⁵ I Agar larawan ne ning Bunduk ning Sinai karin Arabia at simbulu ne ning salukuyan a siudad na ning Jerusalem; ipus yang kayabe da ring sablang memalen na.

²⁶ Oneng ing maligayang Jerusalem malaya ya at ya ing kekatamung ima.

²⁷ Uling sasabian na ning kasulatan, Magsaya ka, ikang baug a e pa mikayanak! Kulisak ka at maniambitan king mitmung tula, ikang e pa menganak! Uling ing babaing mipaimburisan mikayanak yang lalung dakal kesa king babaing kautus ning asawa na.

²⁸ Ngeni, kapatad, ikayu ding anak na ning Dios uli na ning pengaku na, antimo i Isaac.

²⁹ King panaun a ita ing anak na ning ipus, ing anak a mibait king paralan a karaniwan, linupig ne itang anak a mibait uli na ning Espiritu ning Dios; at makanyan munaman ing malyari ngeni.

³⁰ Oneng nanu ing sasabian na ning kasulatan? Sasabian na, Itabi ya ing babaing ipus at ing anak na; uling ing anak na ning babaing ipus e ya kailangan mirakayanan kayabe na ning anak ning babaing malaya king pibandian nang tata ra.

³¹ Uli na niti, kapatad ku, e na katamu anak ning babaing ipus, nune anak na katamu ning babaing malaya.

5

¹ Gewa na katamung malaya'ng Cristo at buri na ing manatili tamung malaya. Uli na niti, manatili kayu sanang malaya at e yu na paintulut ing ma-ipus kayu pang pasibayu.

² Aku mismu i Pablo, ing sasabi kaniti kekayu: nung paintulut yung masirkunsisyun kayu pa, ing buri nang sabian niti king ala yang kasilbian kekayu i Cristo.

³ Misan pa sasabian kung matimid king ninumang mabisang pasirkunsisyun sapilitan yang tupad king kabilugan a Kautusan kabud depatan na iti.

⁴ Nung magtiwala kayu king pamamintu king Kautusan para matanggap kayu king Dios, tandanan yu king anti yu nang kewani ing sarili yu kang Cristo. Makalual na kayu king grasya na ning Dios.

⁵ Panayan tamung ing Dios mismu tanggapan na katamu. Yan ing panayan tamu king upaya na ning Espiritu ning Dios a magobra at king kapamilatan na ning kasalpantayanan tamu.

⁶ Uling potang makayabe tamu kang Cristo Jesus, mesirkunsisyun ka man o ali, parehu mu; ing maulaga ya ing kasalpantayanan a darapat king kapamilatan na ning lugud.

⁷ Kasalese na na ning daraptan yo! Ninu ta ing sinabat king pamanuntun yu king katutuan?

⁸ Ing Dios a minaus kekayu e na daptan ing anti kanyan.

⁹ Ngana ning kasebian, Ing ditak a lebadura agyu nang papagalsan ing kabilugan a masa.

¹⁰ Makanyan man magtiwala ku pa mu rin kekayu. Ing pangayabe tamu king Ginu atdanan na kung kapanaligan king e kayu manaliwa pamalak tungkul king bage iti. Panaligan ku naman king ing taung manggulu kekayu, ninu ya pa man, parusan ne ning Dios.

¹¹ At nung aku, kapatad, ipanaral ku king kailangan pa ing pangasirkunsisyun, obat malulupig ku pa angga ngeni? Nung tutu mu ita, ing pamanaral ku tungkul king krus nang Cristo e ra ne sana ikakatisud.

¹² Sana malaus na lang pakapun deng manggulung den kekayu!

¹³ Kapatad ku, antimo ing balu yu na, king kalayaan karin kayu meyaus. Oneng e yu gagawan sangkan iting kalayaan ban pasakup kayu karing agkat na ning laman. Nune, pakikuanan yung ing lugud ya ing mutus kekayu king pamisusuyuanan yu.

¹⁴ Uling ing kabilugan a Kautusan mumuli ya king metung mung kautusan: Luguran ye ing kalupa yung tau antimo ing sarili yu.

¹⁵ Nung mengari kayu karing animal a mipapanasakit at mipapanyira, mingat kayu, pota magisan kayu.

¹⁶ Paintulut yung linawan ku ing buri kung sabian! Nung ing tukian yu ya ing Banal a Espiritu, mirayu kayu king nanumang panganib a agkat na ning kekayung laman.

¹⁷ Uling ing buri na ning laman makakontra king Espiritu at ing buri na ning Espiritu makakontra king buri na ning laman. Uli na ning maigpit dang pamilaban deting adua, maralas ing e yu atutuparan ing mayap yung kapagnasan.

¹⁸ Nung ing Espiritu ya ing kekayung tutukian, ala na kayu king lalam nang upaya ning Kautusan.

¹⁹ Malino ing dapat na ning laman. Mayayakit iti king bie imoral, marinat at bastus nang dapat;

²⁰ king pamanyamba karing idolo at karing mangkukulam. Milaban-laban la ding tau, mipatepate la, mipapangalalu la, mipapagkamua la at mapagimbut. Mipatepate la karing miyayaliwang partido at lupung;

²¹ mipapangangaria la, maglasing la, magpasasa la king manong at darapat miyayaliwang bage a kawangis da reti. Inya ausan da kayu pansin ngeni antimo kanitang minuna: ding sablang darapat king anti kareti e re tanggapan ing Kayarian ning Dios.

²² Oneng ing bunga na ning Espiritu ya ing lugud, tula, kapayapan, kapibabatan, ganaka, kayapan, katapatan,

²³ kapakumbaban, at ing pamangawat king sarili. Alang kautusan laban kareting bage.

²⁴ At ding sablang atyu kang Cristo Jesus anti da nang pinaku king krus ing sablang pamitan na at marawak a buri na ning karelang pangatau.

²⁵ Ing Espiritu ya ing pasari king bie tamu, inya kailangan tamung tuki munaman king agkat na ning Espiritu.

²⁶ Kailangan tamung lisian ing katasan lub at e ta la pasakitan lub ding aliwa at e tamu sukat mipapangalalu.

6

¹ Kapatad, nung ing ninuman manabu ya king pamikasala, ikayung antabayanan na ning Espiritu ing kailangan sumaup keya ban makapagbalik ya lub; oneng daptan yu iti king mitmung kabanayaran. Ingatan yu naman ing sarili yu, pota ikayu man matuksu kayu.

² Mipapaniaup kayung mamusan king pupusanan na ning metung at metung. King anti kaniting paralan yu atuparan ing kautusan nang Cristo.

³ Nung isipan na ning ninuman king importanti ya kabang ali ne man, pipiraitnan na mu ing sarili na.

⁴ Surian na ning balang metung ing sarili nang dapat. Nung akit na king iti mayap, malyari nang ipagmaragul ing sariling dapat na at e na na kailangan pakilupa king dapat na ning aliwang tau.

⁵ Uling ing balang tau kailangan nang pusanan ing sarili nang karga.

⁶ Ing taung mituturuanan king amanu na ning bie kailangan nang idake ing nanumang mayap a atyu keya para karing tuturu keya.

⁷ E yu pipiraitnan ing kekayung sarili; e yu isipan king alinlang ye ing Dios. Nung nanu ing tenam ning tau, ya naman ing pupulan na.

⁸ Ing tatanam karing bage tungkul king laman, kamatayan ing pupulan na. Ing tatanam karing bage tungkul king Espiritu, mupul yang bie alang angga.

⁹ Inya e tamu sa sasawan ing pamaniapat mayap; nung biasa tamung mibabata angga king wakas, mupul tamu paniatang na ning panaun a makatuldu.

¹⁰ Samantalanan tamu ing sablang oportunidad a makagawa tamung mayap king kalupang tau lalung-lalu na karing kapatad tamu king kasalpantayanan.

¹¹ Apagmasdan yu siguru ing maragul ya letra ing sulat a iti uling aku mismu ing susulat ngeni!

¹² Ding maburi king pamagpakitang tau ila kabud ding mamilit kekayu ban pasirkunsisyun kayu. Daraptan da yan ba ra mung aligtasan ing pangalupig uli na ning krus nang Cristo.

¹³ Agyang ding mismung tatanggap pangasirkunsiyun e la tutupad king Kautusan. Buri da mung apagmaragul king ikayu man apatukian da kayu king anti kaniting seremonia, inya makanyan da kayung pipilitan.

¹⁴ Para kanaku, ing bukud mung apagmaragul ku ya ing krus na ning Ginu tamung Jesu-Cristo; uling king kapamilatan na ning krus na, ing yatu mete ne para kanaku at aku mete na ku king yatu.

¹⁵ Alang ulaga nung ing metung a tau mesirkunsisyun ya man o ali ya. Ing bukud mung maulaga ya ing metung yang lelangan a lubus nang mibayu.

¹⁶ Ing kapayapan at lunus na ning Dios manatili sa karing sablang tutuki kaniting tuntunan at karing sablang bibilug king Israel a balen na!

¹⁷ Katataulian, e na na sa daragdagan ning ninuman ing kanakung kasakitan, uling ding biuk a atyu king kanakung katawan pakilala da king aku ipus na kung Jesus.

¹⁸ Ing grasya na ning Ginu tamung Jesu-Cristo manatili sa kekayu ngan, ikayung kapatad. Amen.