1

¹ Ibat ya iting sulat kang Pablo a apostol nang Cristo Jesus king kapamilatan na ning kaburian ning Dios, at ibat ya naman kang Timoteo a kapatad tamu. King iglesia na ning Dios karin Corinto at karing sablang pinili na ning Dios king kabilugan a Grecia:

² Mananu na sanang ing Dios a Ibpa tamu at ing Ginu tamung Jesu-Cristo ibie na kekayu ing grasya at kapayapan.

³ Munie tamung kapasalamatan king Dios at Ibpa na ning Ginu tamung Jesu-Cristo, ing malunusan a Ibpa at ing Dios a panibatan na ning sablang tula!

⁴ Pamatulan na katamu king sabla tamung kalungkutan ban king kapamilatan na ning tulang tinggap tamu keya, itamu naman asaupan ta la ding atyu king nanu pa mang kalungkutan.

⁵ Nung makananung dakal ing pibabata ming kasakitan king pangayabe mi kang Cristo, makanyan munaman ing tinggap ming tula ibat keya.

⁶ Nung magkakasakit ke man, iti para king ikakayap yu at ikaligtas; neng mipatulan kami, iti para king ikatula yu at ikasikan yu lub ban makapibata kayung kalupa mi king kasakitan a daralanan yu.

⁷ Inya matibe ing kapanayan mi kekayu uling balu mi king kayabe da kayu king kekaming tula, nung makananu da kayung kayabe king kasakitan.

⁸ Kapatad, buri ming ipaganaka kekayu ing kasakitan a milyari kekami king Asia. Tutung mabayat ing kekaming delanan a kasakitan; e mi asahan ing mie ke pa.

⁹ Bala mi ita na ing oras na ning kamatayan mi. Oneng milyari ita ban e ke manalig king kekaming sarili nune king Dios a pasubling mie karing mete.

¹⁰ Linigtas na kami king panganib na ning kamatayan, at buri ming isundu na ing pamagligtas na kekami,

¹¹ king uli na ning saup ning kekayung pamanalangin. King makanyan a paralan, dakal la ding pasalamat king Dios uli na ning grasyang babie na kekami bilang pakibat na karing dakal a manalangin.

¹² Iti ya ing pagmaragul mi: patutuan na ning pilubluban mi king ing pamakiabe mi karing sabla, lalung-lalu na kekayu, tapat at alang pamagkunwari. Iti uli na ning saup ning Dios at e uli na ning kabiasnan-tau.

¹³ Inya e yu dirinan aliwang kabaldugan ing pamaniulat mi kekayu, subali mu king ababasa yu at aintindian. Asahan ku king lubus yu sanang aintindian,

¹⁴ ing e yu pa lubus aintindian ngeni ban king paniatang na ning Aldo ning Ginung Jesus, apagmaragul yu kami nung makananu da kayu namang apagmaragul.

¹⁵ Uli na ning kapaniwalan kung iti, binalak kung paindalan pa mu ken ban midobli ing kekayung tula.

¹⁶ Binalak kung dumalan ken king pamamunta ku karin Macedonia, at dumalan pasibayu kaybat ku karin ban asaupan yu ku king pamaglakbe ku papunta karin Judea.

¹⁷ Uli waring e mibalaus ing pamamunta ku ken, sabian yu nang menaliwa na ku pamisip? Bala yu galang pabayu-bayu ku pamisip antimo ding taung makayatu a ngeni sasabian da Wa, at kaybat Ali?

¹⁸ Nung makananung ing Dios tapat ya, makanyan munaman ing kanakung katapatan kekayu: ing Wa manatili yang Wa.

¹⁹ Uling ing Anak ning Dios, i Jesu-Cristo a penaral mi kekayu di Silvano at Timoteo, e ya Wa at Ali; nune manatili yang Wa.

²⁰ Uling ya ing katuparan na ning sablang pengaku na ning Dios. Uli na, makapakibat tamung Amen king ikaligaya na ning Dios.

²¹ Uling ing Dios mismu ya ing patibe kekami at kekayu king pangayabe kang Cristo, at ya munaman ing memili kekami.

²² Tetakan na kami bilang bandi na, at dininan king Espiritu na, antimong katibayan king tuparan na ing pengaku na.

²³ Saksi ke ing Dios, balu na ing makalaman king pusu ku! E ku pepaindalan ken uling ikayu munaman ding intindian ku.

²⁴ E mi buring sakupan ing kekayung pamanialpantaya, uling matatag na kayu kasalpantayanan. Oneng miyabe-abe tamung magobra para king sariling ikatula yu.

2

¹ Inari ku king lub ku king e ra na kayu pa dalawan ban e ra kayu atdanan pasibayung kalungkutan.

² Uling nung atdanan da kayung kalungkutan, ninu pa ing mamatula kanaku? Ding mismung pepalungkut ko?

³ Iti ya ing sangkan nung inya sinulat ke itang sulat a ita kekayu ban king pamunta ku ken e kalungkutan ing isagana yu kanaku, ikayu a kailangan munie tula kanaku. Uling paniwalan ku king ing tula ku tula yu munaman.

⁴ Tutu kung malungkut at magugulu isip, inya silatanan da kayu. E ditak ing lua a tinulu karing mata ku kabang gagawan ke itang sulat a ita. Silatanan da kayu e ban atdananan da kayung kalungkutan, nune ban abalu yu nung nu anti karagul ing lugud ku kekayu.

⁵ Nung pepasari yang kalungkutan ing ninuman king aliwa, aliwa aku ing pepalungkut na, nune ikong sabla. Sasabian ku iti e king mabagsik a amanu uling e ku bisang maging mabagsik keya.

⁶ Oneng makagyu na king mikasala ing parusa a depat da keya ding keraklan kekayu.

⁷ Patawaran yu ne ngeni at pamatulan pota lubus yang masira lub.

⁸ Ipakisabi kung mayap kekayu king ipakit yu keya king kaluguran ye pa mu rin.

⁹ Iti ya ing sangkan nung inya gewa ke iting sulat: ban abalu ku nung tutuparan yu ing sablang tuturu ku kekayu.

¹⁰ Ing ninumang pepatawaran yu, pepatawaran ku nia naman. Ing ninumang pepatawaran ku, nung atin man, pepatawaran ku ne alang-alang kekayu, king arapan nang Cristo

¹¹ ban e na katamu alinlang Satanas, uling e makalingad kekatamu ing buri nang malyari.

¹² Inyang miras ku Troas ban ipanaral ing Mayap a Balita tungkul kang Cristo, ikit ku king ing Ginu ya ing miklat king dalan ban arapat ku ita.

¹³ Oneng e ku mipanatag a lub uling e ke disnan karin i Tito a kekatamung kapatad. Inya memun ku karing tau at tinaglus ku Macedonia.

¹⁴ Salamat king Dios uling parati na katamung yayabe king tagumpe nang Cristo uli na ning pangayabe tamu keya. At king kapamilatan tamu pepalaganap na ning Dios ing mabanglung bau, ing pangapakilala nang Cristo.

¹⁵ Mengari tamung mabanglung bau na ning insenso a durulukan nang Cristo para king Dios. At lalaganap iti karing mililigtas at karing papunta king kasiran.

¹⁶ Karing papunta king kasiran bau yang makamate; oneng karing mililigtas mabanglu yang bau a babie bie. Ninu ing malyaring ganap king anti kaniting dapat?

¹⁷ E ra ke kalupa ding aliwa; pangomersyu re ing amanu na ning Dios. Bilang tubud na ning Dios at talasuyu nang Cristo, mitmung katapatan ming panaral ing amanu na.

3

¹ Isipan yu galang king pupurian mi na naman ing kekaming sarile? Kalupa ra ke wari ding aliwa a mangailangan pang rekomendasyun para kekayu o ibat kekayu?

² Ikayu mismu ing kekaming rekomendasyun a makasulat karing pusu mi ban akilala ra at abasa ding sablang tau.

³ Ikayu ing malino nang sulat Cristo, ing sulat a peparala na king kapamilatan mi. Iti makasulat e king tinta nune king Espiritu ning Dios a mabie, at e karing metabas a batu nune karing pusu da ring tau.

⁴ Asasabi mi iti uli na ning pamagtiwala mi king Dios king kapamilatan nang Cristo.

⁵ Uling king kekeng sarili ala kaming sapat a kagiwan ban daptan iting obra; ing kekaming kagiwan ibat king Dios.

⁶ Ya ing maki kaburian ban maging talasuyu na kami ning bayung kasunduan, ing kasunduan a e mayayakit king misulat a kautusan, nune king Espiritu. Uling makamate ya ing misulat a kautusan, oneng ing Espiritu babie yang bie.

⁷ Nung king kapamilatan na ning Kautusan a makasulat karing tinabas a batu a magdalang kamatayan meyakit ya ing ligaya na ning Dios angga na king e re alawe ding Israelita ing lupa nang Moises, agyang lilipas ing aslag na niting ligaya,

⁸ e kasi lalung maygit ing ligayang darala na ning Espiritu?

⁹ Nung ing Kautusan a migdalang kaparusan makaligaya ya, lalu yang makaligaya ing kasuyuan a magdalang kaligtasan!

¹⁰ Uli na niti, asabi tamu king ing sadiang ligaya ala ne uling miyalilan ne king lalung maygit a ligaya.

¹¹ Nung atin yang ligaya ing linipas na, lalu yang ating ligaya itang manatili king kapilan pa man.

¹² Uli na ning kapanayan tamung iti, masikan tamu lub.

¹³ E na katamu kalupang Moises a migtalukbung lupa ban e ra akit ding Israelita ing paglako na nitang ligayang ita.

¹⁴ Tune lang meging masias a buntuk. Angga ngening kapanaunan manatili lang mitatakpan a isip balang babasan de ing matuang kasunduan. I Cristo ya ing milalako king talukbung a iti.

¹⁵ Angga man ngeni, atin yang takap ing pamisip da balang babasan de ing Kautusan nang Moises.

¹⁶ Oneng milalako ya ing takap potang marap ya ing tau king Ginu.

¹⁷ Ing Ginung mababanggit ya ing Espiritu, at nung nu ya atyu ing Espiritu ning Ginu, karin ating kalayaan.

¹⁸ At ngening milako ne ing takap karing lupa tamu, itamung sabla maging aslag na katamu ning ligaya na ning Ginu. At lalu tamung miwawangis king ligaya na king kapamilatan na ning Ginu, ing Ginu ya ing Espiritu.

4

¹ Uli na ning lunus ning Dios, pinili na kami para king obrang iti, inya naman e ke mimina lub.

² Pangilagan mi ing dapat a makarine a mararapat king makasalikut. E kami maglinlang at e mi babaluktut ing amanu na ning Dios. King mitmung katapatan, hayagan ming ipanaral ing katutuan at uli na niti, aduan mi arap ning Dios ing paniwalan da kami ding sablang tau.

³ At nung atin ya pang kalabugan ing Mayap a Balita a pisiag mi, iti maging malabug mu para karing makasalanan.

⁴ E la maniwala uling ding pamisip da binulag na la ning dios na niting yatu. Binulag na la ban e ra akit ing aslag na ning Mayap a Balita tungkul king ligaya nang Cristo a larawan na ning Dios.

⁵ Aliwa ing sarili mi, nune i Cristo Jesus ya ing panaral mi bilang kekatamung Ginu, at ikami bilang talasuyu yu king uli nang Jesus.

⁶ Uling ing Dios a sinabing Busal ning karalumduman, sunlag ya ing sulu, ya mu rin ing Dios a babie aslag king kekatamung pusu ban makilala ing ligaya na ning Dios a mihayag king lupa nang Cristo.

⁷ Oneng matbud kami, ikaming lulanan na niting pibandian a espiritual, anti ke waring kapsa ban mipakilala king ing matas a kayupayan e kekami nune king Dios.

⁸ Gigipitan da kami misusumangid, oneng e na ke man masasaul; e mi balu ing daptan mi, oneng e na ke man milalako kapanayan.

⁹ Guguluan da kami, oneng e ke milalako kakaluguran; miraragsa kami oneng e ra na ke man apapate.

¹⁰ Parati ming darala king katawan mi ing kamatayan nang Jesus ban king kekeng katawan mayakit munaman ing bie na.

¹¹ Parati kaming mibibili king panganib na ning kamatayan alang-alang kang Jesus ban king katawan ming ating kamatayan mipakilala ya ing bie na.

¹² Inya ing kamatayan ya ing magobra kekami, oneng ing bie ya ing magobra kekayu.

¹³ Sasabian na ning Kasulatan, Uling maniwala ku, inya magsalita ku. King makanyan munamang espiritu ning kasalpantayanan magsalita tamu munaman uling maniwala tamu.

¹⁴ Balu tamu king ing Dios a pepasubling mie king Ginung Jesus, ya naman ing pasubling mie kekatamung kayabe na at midala kekatamung sabla king arapan na.

¹⁵ Para king ikakayap yu iting sablang bage ban ngening dakal la ding tatanggap king grasya na ning Dios, lalu na la mang dakal ding pasalamat at paligaya keya.

¹⁶ King uli na niti, e kami mimina lub. Agyamang mimina ya ing katawan mi, parati ne mang mibabayu sikanan ing pilubluban mi.

¹⁷ Uling iting ditak at sagasaguling kasakitan a daralanan mi mamungang kaligayan a alang kapupusan at alang kalupa.

¹⁸ Inya makalawe kami karing bage a e mayayakit at e karing bage mayayakit. Uling e la manatili ding bage mayayakit, oneng ding bage a e mayayakit manatili la kapilan man.

5

¹ Uling balu tamu king nung masira ne ing toldang tuknangan tamu keti king yatu, ing kekatamung katawan keti king yatu, atin tamung alang anggang tuknangan karin banua; metung yang tuknangan a e na gewa ning tau nune gewa ne ning Dios.

² Sasaingsing tamu keti king yatu, at tutu ta yang pagnasan ing tuknangan karin banua

³ ban nung asulud ta na iti, e tamu mayakit lubas.

⁴ Kabang manuknangan tamu king toldang iti, magkakasakit tamu at sasaingsing; e tamu bisang maging lubas, nune babo na ning bie tamung ating kapupusan buri ta yang isulud ing bie alang angga.

⁵ Sasadia na katamu ning Dios para king bage iti at binie ne kekatamu ing Espiritu bilang katibayan king ibayu na katamu pin.

⁶ Inya manatili tamung masikan a lub. Balu tamu king kabang manuknangan tamu kaniting katawan, makarayu tamu king tuknangan na ning Ginu,

⁷ uling mabibie tamu king pamanalig king Dios, at e karing bage mayayakit.

⁸ Masikan tamu lub; buri ta neng lakuan ing katawan ban manuknangan kayabe na ning Ginu.

⁹ Maygit king sabla, ing kekatamung parasan ya ing maging kalugud-lugud tamu king Dios, maging king tuknangan keti o karin man.

¹⁰ Uling marap tamu ngan king piukuman nang Cristo ban tanggap king mayap o marawak a pangaintuliran na ning depat tamu inyang mabibie tamu keti king yatu.

¹¹ Uli na ning balu mi ing kailangan yang pitakutan ing Ginu, pagkapilitan ming agkatan la ding tau ban mibalik keya. Balu na ning Dios ing mabilug ming pangatau at asahan ku king lubus yu kami namang kakilala.

¹² E mi sasabian iti ban pagmaragul mi ing kekaming sarili, nune ban dinan da kayung katuliran pagmaragul yu kami, kanita apakibatan yu la ding taung alang pagmaragul nune mu ding akakit da ring mata ra at aliwa ing tune pangatau.

¹³ Nung isipan yung sira kami pamisip, iti milyari alang-alang king Dios, at nung matinu na kami man, iti para king ikakayap yu.

¹⁴ Uling ing lugud nang Cristo ya ing balamu mitutulak kekami, ngening abalu ming mete ya para karing sabla at uli na niti miyayabe la ding sabla king kamatayan na.

¹⁵ Mete ya para karing sabla ban ding mabibie ngeni e na la mabibie para king sarili ra, nune para mu kang Cristo a mete at mipasublian mie para karela.

¹⁶ Uli na niti, ing paglalawe mi ngeni kaninuman e makatalakad king paniukad na ning tau. King milabas a panaun, makanyan ing panlalawe mi kang Cristo. Oneng ngeni e na makanyan.

¹⁷ Inya ing ninumang makisanmetung kang Cristo metung yang bayung lelangan. Ala na ing sadia nang pangatau; mibayu neng lubus.

¹⁸ Ing Dios ya ing makirapat kaniting sabla. Gewa na kaming kakaluguran na king kapamilatan nang Cristo, at tilduan na kami ban gawan lang kakaluguran na ding tau.

¹⁹ Ing panaral mi ya iti: ing Dios atyu kang Cristo at tinuring neng kakaluguran na ing tau at kelinguan na na ing kasalanan na. At pigkatiwala na kekami ing ikalat mi ya ing balitang iti.

²⁰ Uli na niti, atyu kami keti bilang pekakatawan nang Cristo; ing Dios ya na mismu ing mamaus kekayu king kapamilatan mi: alang-alang kang Cristo, makikasundu kayu king Dios.

²¹ E ya mikasala i Cristo, oneng alang-alang king kekatamung ikakayap, tinuring neng makasalanan ning Dios ban kayabe na maging banal tamu arap ning Dios king kapamilatan na.

6

¹ Anti na ning kayabe kami king obra na ning Dios, ipakisabi ming mayap kekayu king e yu sa payalan kabaldugan ing grasya a tinggap yu keya.

² Uling ing Dios sasabian na, Pekiramdaman da ka king oras a karapatdapat kaku, sinaupan da ka king aldo ning kaligtasan. Makiramdam kayu! Ngeni na ing oras a karapatdapat. Ngeni na ing aldo ning kaligtasan!

³ Pangilagan mi ing makarapat nanumang bage makatakid kenu man ban ala lang asabi king kekaming kasuyuan.

⁴ Nune king heganaganang bage pepakilala mi king talasuyu na kami ning Dios king kapamilatan na ning pamibabata mi king dakal a kasakitan, kalungkutan, at kalipitan.

⁵ Perusan da kami, sinukul, at pemugbug; megobra kami aldo at bengi, at sinala king pamanudtud at pamangan.

⁶ Pepakilala mi king talasuyu na kami ning Dios king kapamilatan na ning malinis a pamibiebie, kabiasnan, kapibabatan at ganaka; antimu rin king kapamilatan na ning Banal a Espiritu at ning tapat ming lugud,

⁷ king tapat a pamagsalita king katutuan, at king upaya na ning Dios. Ing katuliran ya ing kekaming armas a paglaban at paniagka.

⁸ Ngara na kaming parangalan at ngara na kaming panyiran; ngara na kaming insultuan, ngara na kaming pamurian. Inaus da kaming malaram agyamang maniabi kaming katutuan.

⁹ Tinuring da kaming e ra kakilala agyamang kakilala da kami; halus mangamate na, oneng masikan ke pang masikan. Agyamang perusan da kami, e kami mete;

¹⁰ agyamang maragul ing kalungkutan, parati keng masaya; lupa keng pakakalulu, oneng seupan mi lang misalapi ding dakal; balamu mo ala kaming nanumang pibandian, oneng atyu ngan kekami ing sabla.

¹¹ Kakaluguran a tau Corinto, tapatan ing pamagsalita mi kekayu. Nung nanu ing atyu king lub mi ya ing sasabian mi.

¹² E mi ya sasara ing pusu mi kekayu; ikayu ding misara karing pusu yu kekami.

¹³ Magsalita ku kekayu ngeni antimong tata yu; ibuklat yu la ding pusu yu kanaku, nung makananu keng biklat kekayu ing pusu ku.

¹⁴ E kayu makiabe karing e talasalpantaya. Malyari waring miyabe ing katuliran at ing dewakan? O kaya ing sala at ing dalumdum?

¹⁵ Malyari la waring mikasundu i Cristo at ing diablo? Makananu yang maki-ugnayan ing sasalpantaya king e sasalpantaya?

¹⁶ Makananu lang malyaring makapisanmetung ing Templo na ning Dios at ding idolo da ring paganu? Itamu ing templo na ning Dios a mabie! Ing Dios mismu ya ing sinabi, Manuknangan ku at antabayanan ku la; aku ing maging Dios da, at ila ding maging memalen ku.

¹⁷ Inya ing Ginu sinabi na, Dumayu kayu karela, kawani kayu karela. E kayu tatagkil king nanumang marinat, at aku tanggapan da kayu.

¹⁸ Maging Ibpa yu ku, at maging anak da kayu, ngana ning Ginung Mayupayang tutu.

7

¹ Pakamalan a kakaluguran, anti na ning makanyan ing mipangaku kekatamu, kailangan tamung linisan ing kekatamung sarili king sablang babie dinat king kekatamung katawan at espiritu. Magkapilit tamung mika ganap a kabanalan at mibiebie a ating takut king Dios.

² Dinan yu keng lugal karing pusu yu. Metung man kekayu ala kaming diptananan marok, pinyira o pirait.

³ Sasabian ku iti e ban atulan da kayu, uling sinabi ku na kekayu king kaluguran da kayu at kayabe da kayu king bie at kamatayan.

⁴ Lubus kung magtiwala kekayu; ipagmaragul da kayung parati! Maligaya ku agyamang dakal ing kasakitan at maglapo ya king tula ing pusu ku.

⁵ E kami mu rin mipaynawa inyang miras ke Macedonia. Pane kasakitan ing delanan mi; misusumangid ing kaguluan at dakal ing takut a atyu karing pusu mi

⁶ Oneng e na la paburen ning Dios ding malungkut; peligayan na ku king paniatang nang Tito.

⁷ Aliwa mu ing paniatang na ing minie tula kanaku nune ing mayap a depat yu keya. Belita na ing kasabikan yung manakit kanaku, ing kekayung kalungkutan at malasakit. Inya lalu kung matula ngeni.

⁸ Agyamang pepalungkut da kayu king kanakung sulat, e ku sisisian ing pamaniulat kung ita. Malyaring melungkut ku uling balu ku king migdala yang lungkut ing kanakung sulat, oneng pansamantala mu.

⁹ Ngeni masaya ku, e uling pepalungkut da kayu, nune uling ing kekayung kalungkutan meging kasangkapan king kekayung pamagbayung bie. Ing anti kaniting kalungkutan ibat king Dios, inya e kayu mipakarok uli mi.

¹⁰ Uling managkat kekayu ing kalungkutan a ibat king Dios ban sumisi kayu at magbayung bie, at alang kalungkutan kaniti. Oneng ing kalungkutan a babie na ning yatu mamungang kamatayan.

¹¹ Lawan yu nung nanu ing bubunga na ning kalungkutan yung ibat king Dios: meging masikap kayu at magkapilit ban patutuan yu king ala kayung kasalanan karing bage deta. Kemuan yu ing sarili yu, midinan kayung takut, sabik kayu king paniatang ku, mika malasakit kayung parusan ya ing mikasala. King sablang paralan pepakit yu king ala kayung kasalanan karing bage deta.

¹² E ku sinulat kekayu king uli na ning mikasala o uli na ning keraptanan king marawak, nune ban mibulalag arap ning Dios ing kekayung tune malasakit para kekami.

¹³ Inya tutu kung mesaya king depat yu. At lubus keng mesaya uli na ning tulang tinggap nang Tito; mipanatag ya lub manibat na inyang ikit na kayu ngan!

¹⁴ Pigmaragul da kayu keya at e na ku man mipakarine. Parati ming sasabian kekayu ing katutuan at makanyan nang ikit Tito king tutu pin ing pagmaragul mi tungkul kekayu.

¹⁵ At kabang agaganaka na ing kekayung kapamintuan, lalu na na kayu mang luluguran. E na akakalinguan ing pamananggap yu at pamangalang keya.

¹⁶ Matutula ku uling lubus da kayung apagkatiwalan!

8

¹ Kapatad, buri kung ibalita kekayu ing arapat na ning grasya ning Dios karing iglesia na ning Macedonia.

² Mesubuk la king kapamilatan da ring dakal a kasakitan a delanan da. At agyamang maragul ing kakaluluan da, masaya la pa mu rin at makabuklat la pusung sumaup.

³ Kusa lang lub minambag e mu king agyu ra nune maygit pa king agyu ra. Balu ku iti uling

⁴ pekisabi dang mayap kanaku king dinan lang oras sumaup karing kapatad king Judea.

⁵ Minigit pa king asahan mi! Binie ra ing karelang sarili mumuna king Ginu at kaybat kekami, agpang king kaburian na ning Dios.

⁶ Uli na niti, pekisabian mi ya i Tito, anti na ning ya ing menimuna kaniti, king saupan na kayu angga king agampanan yu iting pamaniapat yung mayap.

⁷ Pikabaluan kayu king pamanialpantaya, king pamagsalita, king kabiasnan, king kasipagan, at ing lugud yu para kekami. Sikapan yung manimuna kayu naman king pamaniapat mayap.

⁸ E ra kayu didikta; babalita ku mu kekayu ing daraptan dang kasaupan ding aliwa ban akilala ku ing katapatan na ning lugud yu.

⁹ Balu yu nung nu anti karagul ing lugud na kekatamu ning Ginu tamung Jesu-Cristo. Agyamang mabandi ya, meging pakakalulu ya alang-alang kekayu ban mibandi kayu king kapamilatan na ning kakaluluan na.

¹⁰ At iti ya ing payu ku kekayu tungkul kaniting bage: isundu yu sa ing pegumpisan yung obra king milabas a banua. Ikayu ing menimuna e mu king pamaniapat nune king pamagkusa.

¹¹ Inya isundu yu iti! Papanatilian yu ing kekayung pamagkusa kanitang minuna angga king ayari yu; munie kayu ketang agyu yu.

¹² Uling nung laus king lub yu ing pamamie, tanggapan na ning Dios ing kekayung kagiwan; e na panenayan ing munie kayu king e yu agyu.

¹³ Sasabian ku iti e uling buri ku lang e kabayatnan ding aliwa at kabayatnan na kayu man.

¹⁴ E na kayu man gipit ngening kasalukuyan, inya kailangan yu lang saupan ding atyu king pamangailangan. Nung ikayu naman ing miras king pamangailangan at ila e la gipit, ila naman ding sumaup kekayu. King anti kaniting paralan, makapisaup-saupan kayu.

¹⁵ Antimo ing sasabian na ning kasulatan, Ing tinipun dakal e ya linabis, at ing tinipun ditak e ne man migkulangan.

¹⁶ Pasalamat ku king Dios uling pagmalasakitan na kayung Tito, antimo ing pamagmalasakit ku kekayu!

¹⁷ Uling tinggap nang matulang Tito ing kekaming pamakisabing mayap. King kapagnasan nang makasaup ya kekayu, migprisinta ya king ya na ing munta ken.

¹⁸ Tutubud mi yang kayabe na ing kapatad a kakilala da ring sablang iglesia uli na ning pamanaral na king Mayap a Balita.

¹⁹ At aliwa mu yan! Pinili de ring iglesia ban maglakbe kayabe mi at saupan na kaming manibala king obrang iti. Ing anti kaniting kasuyuan babie parangal king Ginu at papakit na ing maragul ming kapagnasan sumaup.

²⁰ Mimingat kami ban ala yang asabi ing ninuman king pamanibala kaniting maragul a ambagan.

²¹ Pagkapilitan ming arapat maayus iti, e mu king arap ning Ginu nune pati na king arap ding tau.

²² Inya tutubud mi yang kayabe ra ing metung pang kapatad a asubukan mi nang maralas at ikit mi na sipagan. Lalu yang masipag sumaup ngeni uli na ning maragul nang tiwala kekayu.

²³ Tungkul naman kang Tito, ya ing kayabe ku at kasaup kung susuyu kekayu. At tungkul naman karing kapatad a kayabe na ila ding pekakatawan da ring iglesia at babie lang ligaya kang Cristo.

²⁴ Inya ipakit yu, kapatad, ing tapat yung lugud karela ban abalu da ring iglesia king tutu pin ing pagmaragul mi tungkul kekayu.

9

¹ E na kailangan ing sumulat ku pa kekayu tungkul king saup yu karing kapatad kang Cristo king iglesia karin Judea.

² Balu ku king makasadia kayung sumaup at pagmaragul ku iti karing tau Macedonia. Sinabi ku karela king makasadia lang sumaup ding kapatad king Acaya keta pang milabas a banua. Dakal lang metagkil a kapanamdaman uli na ning kekayung malasakit.

³ Inya pepaunan ku na la ken deting kapatad ban mayakit king tutu ing pagmaragul ku tungkul kekayu at ban asadia yu na ing saup yu, antimo ing sinabi ku na.

⁴ Pota mipakarine kami at pati na ikayu, nung ating tau Macedonia a tuki kanaku at akit dang e kayu pala makasadia!

⁵ Inya pekisabian ku la ding kapatad king muna na la ken ban asadia ra ing saup a pengaku yu. King makanyan a paralan lunto king kusang lub ing pamamie yu at e king sapilitan.

⁶ Tandanan yu iti: ing tatanam ditak, mupul yang ditak, at ing tatanam namang dakal, mupul yang dakal.

⁷ Ing balang katau kailangan yang munie ketang inari na king lub na, laus a lub at e mapipilit, uling kaluguran ne ning Dios ing taung matulang babie.

⁸ Arapat na ning Dios ing dinan na kayung labis-labis, maygit king kekayung pamangailangan ban atin kayung sapat a agamit para king sarili yu, at itang labis naman agamit yu king pamaniapat mayap.

⁹ Antimo ing sasabian na ning kasulatan, Meging maganaka ya karing pakakalulu; ing ganaka na manatili kapilan man.

¹⁰ Ing Dios a babie karing bining itanam ning tatanam at king tinape a apangan na, ya naman ing munie bini kekayu at paragulan ne iti ban mamungang dakal ing kekayung mayap a pilubluban.

¹¹ Parakalan na kayu pibandian ban lalu kayung makasaup karing dakal. Makanyan lang dakal ding pasalamat king Dios uli na ning kasaupan a idala mi karela.

¹² Ing kasaupan yung iti karing kapatad e na mu pakibat king karelang pamangailangan nune maging sangkan king alang kapupusan a pamipasalamat da king Dios.

¹³ Ing mesubuk yung pamaniaup patutuan na karela king tapat yeng pamintuan ing Mayap a Balita nang Cristo. Uli na niti, purian de ing Dios at pasalamatan de uli na ning pamamie yung ambag king mitmung ganaka.

¹⁴ Inya king mitmung lugud ipanalangin da kayu deting tau, uli na ning maragul a grasyang binie na kekayu ning Dios.

¹⁵ Salamat king Dios king uli na ning binie nang alang kapara!

10

¹ Aku, i Pablo ing sasabian dang mapagpakumbaba ding mapilan pota mung kayarap da kayu, oneng matapang neng ala na ku king arap yu, ipakisabi kung mayap kekayu alang-alang king kapakumbaban at ganaka nang Cristo;

² e yu ku sana pipilitan magsalitang mataram potang datangan da kayu, antimo ing daptan ku karing sasabing mabibie kami agpang king lakad na ning yatu.

³ Wa, tutu ing mabibie kami keti king yatu, oneng e ke makilaban ketang paralan na ning yatu.

⁴ Darala da ring kekaming sandata ing upaya na ning Dios a makapanyira karing kuta at e na la sandata ning yatu. Sisiran mi ing maling pamagmatulid,

⁵ at ing sablang pamagmaragul laban king Dios; bibihagan mi ing sablang kaisipan ban mamintu kang Cristo.

⁶ At potang ganap na ing kekayung pamamintu, kanita parusan mi ing sablang keyalan kapamintuan.

⁷ Ding bage makalual ila mu ding lalawan yu. Nung tiwala ya ing ninuman king ya para kang Cristo ya, ganakan na king ikami man para kang Cristo kami.

⁸ Nung ipagmaragul ku man ing kekaming kayupayan, ing kayupayan a binie na ning Dios para king ikatibe na at e para king ikasira na ning kasalpantayanan; iti e ku pikarine.

⁹ E yu sa isipan king pamatakutan da kayu mu king sulat kung iti.

¹⁰ Ngara ding mapilan, King sulat ya matapang at king piarapan duag ya at ala lang ulaga ding sasabian na!

¹¹ Kailangan dang abalu ding taung magsalitang makanyan king ing sasabian mi king sulat neng atyu ke king marayung lugal, ya naman ing daraptan mi neng kayarap da kayu.

¹² E mi pakipate o pakilupa man ing kekaming sarili karing mitatas karing sarili dang bangku. Mangmang la! Ila mismu mipapanyukad la at mipaparehu king karelang sarili.

¹³ Oneng e ke lalagpus king sukad a binie na kekami ning Dios; manatili kami mung angga king obrang telaga na ning Dios para kekami at kaniti makayabe ing obra mi libutad yu.

¹⁴ E ke linagpus king sukad mi uling sakup na kayu niting angganan inyang mumuna keng minta ken a magdala king Mayap a Balita tungkul kang Cristo.

¹⁵ E milalu ing pamamuri mi king kekaming sarili uling e mi pagmaragul ing pipagalan da ring aliwa. Asahan mi king tumibe ing kekayung kasalpantayanan at uli na niti sumulung ing kekaming obra kekayu, oneng e lagpus king angganan na ning sukad a telaga na ning Dios.

¹⁶ Kaybat, malyari mi neng ipanaral ing Mayap a Balita karing aliwang bansa a makalaut kekayu, at e mi ipagmaragul ing obrang arapat da na ding aliwa.

¹⁷ Antimo ing sasabian na ning kasulatan, Nung bisa yang magmaragul ing ninuman, ing depat na ning Dios ya ing kailangan nang ipagmaragul.

¹⁸ Uling ing parangalan na ning Dios ya itang karapatdapat keya at aliwa itang pupuri king sarili na.

11

¹ Apibata yu ku sana king ditak kung kamangmangan. Pibatan yu ku sana!

² Daramdaman ku king kanakung sarili ing pangalalu a kalupa na ning pangalalu na ning Dios kekayu, uling mengari kayung dalagang birhen a pekitanguanan ku king metung a lalaki, i Cristo.

³ Oneng mikakunu ku; pota malasun ing kekayung pamisip at mirayu kayu king tapat at malinis a pamanalig kang Cristo, antimo nung makananu neng alinlang ning ubingan i Eva.

⁴ Uling matula yeng paburen ing ninumang daratang at manaral king metung a Jesus a makayaliwa ketang penaral mi kekayu, at tatanggapan ye ing espiritu at ing aral a makayaliwa ketang tinggap yu kekami!

⁵ Isipan ku king e ku mitauli king makananu pa mang bage kareting kekayung mangagaling a apostol.

⁶ Mapalyaring e ku magaling magsalita, oneng e na ku man kulang king kabiasnan. King miyayaliwang oportunidad at paralan, pepakilala mi iti kekayu.

⁷ E ra kayu inaduananan bayad king Mayap a Balita ning Dios a penaral ku kekayu. Migpakumbaba ku ba kayung mitas. Asabi yu wari king kasalanan iting depat ko?

⁸ Ding aliwang iglesia ila ding minie saup king kanakung pamangailangan, inyang sinuyu ku kekayu. Anti ku la waring penakawanan ba ra kayu mung asaupan.

⁹ At inyang kekulangan kung gastusan, e ku meging pabayat kenu man kekayu uling pigdala da kung saup ding kapatad a menibat karin Macedonia. Antimo king milabas at angga na king daratang a panaun e ku daptan ing maging pabayat ku kekayu!

¹⁰ King uli ning katutuan nang Cristo a atyu kanaku, e ku tuknang munie kapurian kaniti nukarin mang lugal ning Acaya.

¹¹ Obat daraptan ku iti? Uli waring e ra kayu kaluguran? Balu na ning Dios king tune da kayung kaluguran!

¹² Oneng isundu kung daptan ing daraptan ku ngeni ban e la mirinan matulid ding magkunwaring apostol king ing karelang daraptan kalupa na ning kekaming daraptan.

¹³ E la tune apostol, nune maglinlang la mu at magkunwaring apostol nang Cristo.

¹⁴ E yu kailangan pagmulalan iti! Uling i Satanas man magkunwari yang anghel na ning sala!

¹⁵ Inya e kailangan pagmulalan, nung ding talasuyu nang Satanas magkunwari lang talasuyu na ning katuliran. Ing maging kararasan da ya pin ing katumbas na ning depat da.

¹⁶ Iyulit ku: e na sa isipan ning ninuman king mangmang ku. Nung makanyan ing isipan yu, tanggapan ku na ba na ku mang makapagmaragul antimong metung a mangmang.

¹⁷ Ing sasabian kung pamagmaragul a iti e ibat king Ginu nune pamagmaragul na ning metung a mangmang.

¹⁸ Anti na ning dakal la ding pupuri tungkul king bage makayatu, aku man purian ke ing sarili ku.

¹⁹ Pibata yu la ding mangmang, uli na ning biasa kayu!

²⁰ Pibata yung ma-ipus, masakmal a pamisip, masamantala, pagmayabangnan, at matampaling.

²¹ Agyamang makarine, tatanggapan ku king e ku malyaring daptan yan! Nung atin mang makapagmaragul, aku man makapagmaragul ku. Magsalita kung anting metung a mangmang.

²² Hebreo la? Aku man. Israelita la? Aku man. Lahi na lang Abraham? Aku man.

²³ Talasuyu na lang Cristo? Anti ku waring mangmang king pamagsalita ku, oneng mas mayap kung talasuyu nang Cristo kesa karela! Maygit ing kanakung kapagalan; maralas mesukul; miparusan e mu nanu at maralas mibili king bingit ning kamatayan.

²⁴ Mekatalimang besis kung tinanggap tia titlung pulu't siam a barug-latiku karing Judio,

²⁵ mekatatlung besis kung mepalupalu, at misan mebasibas batu. Mekatatlung besis ya mitiab ing barkung sasaken ku; misan, kabukas at patingapun kung gato-gato king dagat.

²⁶ King maralas kung pamaglakbe, mibili ku king miyayaliwang panganib: karing albug, karing tulisan, karing kalupang Judio, at karing paganu; king panganib karing siudad, king disyerto, king dagat, at karing magkunwaring kapatad.

²⁷ Delanan ku ing dakal a kapagalan at kasakitan, ing maralas a kapuyatan, danup at kau. Tikman ku munaman ing alang apangan, ing dimla, at alang salilungan.

²⁸ Subali kareting kasakitan, maragul ing pamigaganaka ku aldo-aldo karing iglesia.

²⁹ Nung ating mimina, karame na ku, at nung ating mananabu king pamikasala, iti labis kung panamdaman.

³⁰ Nung magmaragul ku man, ing pagmaragul ku ya ing kanakung keinan.

³¹ E ku maglaram. Iti balu na ning Dios at Ibpa na ning Ginung Jesus. Purian ya ing lagyu na angga king kapilan pa man!

³² Inyang atyu ku Damasco, pepabante ne ning gobernador a sakup nang Aring Aretas, ing pasbul ning siudad ba na kung parakap;

³³ oneng binili da ku king tiklis a pepatagusgus da king pader at mekatakas ku.

12

¹ Kailangan kung magmaragul agyamang ala kung akua kaniti. Ing sabian ku naman ngeni ila ding vision at ding kapahayagan na kanaku ning Ginu.

² Atin kung balung Cristianu a midala king katlung banua, labi nang apat a banua ing milabas. (E ku siguradu nung ita vision mu o tune mepalyari; ing Dios ya ing bukud makibalu.)

³ Iyulit ku: ing Dios ya ing bukud makibalu at e ku siguradu nung iti vision o tune mepalyari. Ing balu ku, midala ya king Paraiso.

⁴ Karin, dimdam na la ding bage a e na abut ilarawan ning amanu at e na kailangan sambitlan man ning ninuman.

⁵ Ipagmaragul ke ing taung ita, oneng e ku ipagmaragul ing kanakung sarili. Ding ipagmaragul ku ila ding kanakung keinan.

⁶ At nung magparangalan ku man, e ku lumual mangmang, uling tutu iting sasabian ku. Oneng pipigilan ku ing sarili ku uling e ku buri ing maygit ya isipan ing ninuman tungkul kanaku kesa king akakit na, at daramdaman kanaku.

⁷ Ban e ku la pagmaragul ding makapagmulalang kapahayagan na ning Dios kanaku, mirinan kung masakit a kapansanan king katawan; migsilbi ya iting tubud nang Satanas kanaku ban e ku maging palalu.

⁸ Mekatatlung besis ku penalangin king Ginu king ilako ne sana iti,

⁹ oneng iti ya ing pakibat na, Managyu ing grasya ku para keka; lalung mayakit ing upaya ku neng maina ka. Inya tutu kung pagmaragul ing kanakung keinan, ba na kung pasiknangan ning upaya nang Cristo.

¹⁰ Inya king uli nang Cristo, e baling maina ku, maiinsultu, mipasakitan, malulupig, at magugulu. Uling nung kapilan ku maina, kanita na ku man masikan.

¹¹ Balamu mu mangmang kung maniabi; oneng mepilit ku king uli yu. Ikayu sana ing kailangan muri kanaku. Agyamang ala kung kabaldugan, e na ku man mitauli karing mangagaling a apostol a ren.

¹² King mitmung kapibabatan pepatutuan ku kekayu king aku tune kung apostol king kapamilatan da ring milagru, at ding miyayaliwang makapagmulalang bage a depat na ning Dios.

¹³ Nanu wari ing ala kekayu a atyu karing aliwang iglesia? Ala, subali mu king bage a e ku meniawad nanumang bage kekayu. Ipanupaya yu sa nung iti metung a pamagkulang!

¹⁴ Iti ya ngeni ing katlu kung pamunta ken, oneng e ra kayu pabayatnan. Ikayu ing kailangan ku at aliwa ing pibandian yu. Ding pengari ilang kailangan tumipun para karing anak, at aliwa ding anak ding tumipun para karing pengari.

¹⁵ Ikatula kung gastusan ing sablang kayatinan ku, at ibie pati na bie ku para king ikakayap yu. Ditak mung lugud wari ing isukli yu king maragul kung lugud kekayu?

¹⁶ Ipalage tamung e ku meging pabayat kaninuman kekayu, oneng ating sasabi king biasa ku mung magparalan at pipiraitnan da kayu mu.

¹⁷ Semantalanan ku wari ing ganaka yu king kapamilatan da ring tinubud ku ken?

¹⁸ Pekisabian ke i Tito ban munta ken, at pepatuki ke ing metung a kapatad. Semantalanan na kayu waring Tito? E wari mibiebie kami king metung mung espiritu, at king metung mung parasan?

¹⁹ Isipan yu galang king pagdipensa mi ing kekaming sarile? Ali! Magsalita kami arapan na ning Dios ketang kaburian nang Cristo. Kaluguran kung kapatad, ing sabla daraptan mi para king ikatibe na ning kasalpantayanan yu.

²⁰ Mikakunu ku pota king pamamunta ku ken, atin kung akit a e ku buri kekayu, at ikayu naman atin kayung akit a e yu aburi kanaku. Pota ing akit ku ken ya ing pamipatepate, pamangalalu, pamipagkamua, kaimutan, pamanyirang puri, indredus, pamagmaragul, at kaguluan.

²¹ Mikakunu ku, pota king pasibayu kung pamamunta ken, pakarine na ku ning Dios king arapan yu. Uling siguradu kung kiakan ing depat dang pamikasala ding dakal king milabas a panaun; oneng e na la man sinisi at ginulut king dapat ning pamikasalapamakipangalugud at ing marawak nang pamitan ning laman.

13

¹ Iti ya ing katlung pamagbisita ku ken. Antimo ing sasabian na ning kasulatan, Ing nanumang sumbung kailangan king patutuan da ring adua o atlung testigu.

² Ngening makawale ku at marayu kekayu, iyulit ku karing mikasala at karing aliwa pa ing sinabi ku king kaduang pamagbisita ku ken: e na ku mamatawad.

³ Daptan ku iti ban patutuan kekayu king i Cristo ya ing magsalita king kapamilatan ku para kekayu. E ya maina king pamakiutus na kekayu nune mayupaya ya.

⁴ Agyamang maina ya inyang pinaku re king krus, mabibie yang pasibayu ngeni king uli na ning upaya na ning Dios. Kayabe na maina kami munaman, oneng mabibie ku ngeni uli na ning upaya na ning Dios ban sumuyu kekayu.

⁵ Surian yung masalese ing sarili yu nung mabibie kayu agpang king kasalpantayanan; subukan yu ing kekayung sarili. E yu wari daramdaman king sarili yu king i Cristo Jesus atyu kekayu? Subali mu nung e kayu migtagumpe.

⁶ Paniwalan ku king e kami mebigu.

⁷ Ipanalangin ku king Dios king e kayu sana darapat marawak, e ban mayakit mu ing migtagumpe kami nune ban makarapat kayung mayap agyang lunto kaming e migtagumpe.

⁸ Uling ala kaming arapat laban king katutuan. Para king katutuan ing bukud mung daraptan mi.

⁹ Matula kami agyamang maina kami nung masikan na kayu man. Inya, ipanalangin mi naman ing maging ganap kayu ngan sa.

¹⁰ Susulat ku la deting bage kabang ala ku pa ken ban king pamamunta ku ken e na kailangan ing pakit kung bigsikan king pamangamit ku king upayang binie na ning Ginu kanaku. Miyabie iting upaya kanaku para king ikakayap yu, e king ikakarok yu.

¹¹ Angga na keni, kapatad ku, ing pamaniulat ku at mamun na ku. Pagkapilitan yu sanang maging ganap; tukian yu ing payu ku; misasanmetung kayu at mangabiayan payapa. Ing Dios na ning lugud at kapayapan mantabe ya kekayu.

¹² Mipapanatu kayu anting mikakapatad kang Cristo. Kukomustan da kayu ding kapatad tamu king iglesia.

¹³ Mananu na sanang ing grasya na ning Ginung Jesu-Cristo, ing lugud na ning Dios, at ing pamakiabe na ning Banal a Espiritu manatili kekayung sabla.