1

¹ Ibat ya iting sulat kang Pablo, ing meyaus apostol nang Cristo Jesus uli na ning kaburian ning Dios, at kang Sostenes a kekatamung kapatad.

² Miparala ya king iglesia ning Dios karin Corinto, karing inaus nang maging banal ning Dios, ing balen a miyabe kang Cristo Jesus kayabe ding sablang tau a mamaus nu karin man king lagyu na ning Ginu tamung Jesu-Cristo, ing Ginu ra at Ginu tamu naman.

³ Mananu na sanang ibie na kekayu ning Dios a kekatamung Ibpa at ing Ginu tamung Jesu-Cristo ing grasya at kapayapan.

⁴ Maralas kung babie kapasalamatan king kanakung Dios para kekayu uli na ning grasyang binie na kekayu king kapamilatan nang Cristo Jesus.

⁵ Uling king pangayabe yu kang Cristo meging mabandi kayu king sablang bage, pati na king pamagsalita at beluan.

⁶ Ing aral tungkul kang Cristo malino mayayakit kekayu.

⁷ Tune atyu ngan kekayu ing sablang grasyang espiritual kabang panayan yu ing pangapakilala na ning Ginu tamung Jesu-Cristo.

⁸ Antabayanan na kayu angga king wakas ban mayakit kayung alang kapintasan king Aldo ning Ginu tamung Jesu-Cristo.

⁹ Tapat ya ing Dios a minaus kekayu ban mika pamakiabe kayu king Anak na, i Jesu-Cristo a Ginu tamu.

¹⁰ Ausan da kayu kapanamdaman, kapatad, king lagyu na ning Ginu tamung Jesu-Cristo: mikakasundu kayu, ikayung sabla, king kekayung pisasabian ban e mika ating pamisagsagan kekayu. Misasanmetung kayu king pamisip at parasan.

¹¹ Kapatad, abalitan ku king kapamilatan da ring mapilan nang tauan Cloe king mipatepate kayu kanu.

¹² Ing buri kung sabian ya iti: ing metung kekayu sasabian na, Aku kang Pablo ku!; ngana naman ning metung, Aku kang Apolos ku!; ngana ning aliwa, Aku kang Pedro ku!; ngana pa ning metung, Aku kang Cristo ku!

¹³ Mengapirake ne wari i Cristo? I Pablo ya wari ing mipaku king krus king uli yo? Mebinyag kayu wari king lagyu nang Pablo?

¹⁴ Salamat king Dios! Metung man ala kung bininyag kekayu subali mu kari Crispo at Gayo.

¹⁵ Inya e na asabi ning ninuman kekayu king mebinyag ya king lagyu ku. (

¹⁶ Wa pin pala, bininyag kia naman i Estefanas at ding katubale na. Subali karela, ala na kung aliwa pang atatandanan a bininyag ku.)

¹⁷ E na ku tinubud Cristo ban maminyag nune ban ipanaral ke ing Mayap a Balita, at ipanaral ke e king pamagsalitang makabasi king kabiasnan tau ban ing kamatayan nang Cristo king krus e mipayalan kabaldugan.

¹⁸ Uling ing aral tungkul king kamatayan nang Cristo king krus kamangmangan para karing mipapahamak; oneng kekatamung mililigtas, upaya ne ning Dios.

¹⁹ Uling sasabian na ning kasulatan, Siran ku ing kabiasnan da ring biasa, at ipalto kung alang ulaga ing beluan da ring matalino.

²⁰ Ngeni, nu ya magbili ing biasa o ing matalino o ing magaling king debate keti king yatu? Pepakit na ning Dios king ing kabiasnan king yatu kamangmangan mu!

²¹ Uling king kabiasnan na ning Dios, gewa nang masakit para karing tau ing abalu re king kapamilatan na ning karelang kabiasnan. Nune meyapan na ning Dios ing iligtas na la ding maniwala king kapamilatan na ning kamangmangan ning panaral mi.

²² Milagru ing aduan da ring Judio, at kabiasnan ing panintunan da ring Griego.

²³ Oneng ikami ipanaral mi ya i Cristo a mipaku king krus; ing aral a makatakid karing Judio, at kamangmangan para karing paganu.

²⁴ Oneng para karetang inaus na ning Dios, Judio la man o paganu, i Cristo ya ing upaya at kabiasnan na ning Dios.

²⁵ Uling ing balamu kamangmangan na ning Dios maygit king kabiasnan da ring tau, at ing balamu keinan na ning Dios, sikanan yang maygit king sablang sikanan da ring tau.

²⁶ Ngeni, kapatad ku, ganakan yu ing kekong kabilian inyang inaus na kayu ning Dios. King paglalawe na ning tau, mapilan la mu kekayu ding biasa, ding mayupaya o matas a kabilian king sosyedad.

²⁷ Makanyan man, pinili na ning Dios ing bibilang dang kamangmangan ding tau ban pakarinayan na la ding biasa, at ing bibilang dang keinan ding tau ban ipakarine na la ding mayupaya.

²⁸ Pinili na la ning Dios ding alang kabaldugan king yatu, ding pikakasaman da at ding alang ulaga ban siran na itang isipan dang maulaga ding tau.

²⁹ Inya alang ninumang makapagmaragul arapan na ning Dios.

³⁰ Oneng inabe na kayu ning Dios kang Cristo Jesus at binie ne kekatamu i Cristo ban maging kabiasnan ta ya; king uli na metanggap tamu king Dios, meging banal na katamung balen at linigtas na katamu.

³¹ Inya, antimo ing sasabian na ning kasulatan, Ing ninumang bisang magmaragul, sukat nang ipagmaragul ing depat na ning Ginu.

2

¹ Kanitang dinatang ku kekayu, kapatad, ban ipanaral ku kekayu ing makalihim nang katutuan ning Dios, e ku migsalita king mangalalam a amanu o king matas a kabiasnan.

² Uling sinabi ku king kanakung sarili ing kalinguan ku ing sablang bage kabang atyu ku libutad yu, subali kang Jesu-Cristo at lalung-lalu na ing kamatayan na king krus.

³ Maina ku inyang dinatang ku kekayu at gagalgal ya ing mabilug kung katawan king takut,

⁴ at ing kanakung pamagsalita at aral e la miyabie kekayu king makayama nang amanu ning kabiasnan-tau, nune king patutu na ning Espiritu at upaya na ning Dios.

⁵ Inya e makatalakad ing kekayung kasalpantayanan king kabiasnan-tau, nune king upaya na ning Dios.

⁶ Makanyan man, maniabi kung kabiasnan karetang atin nang sibukan king bie espiritual. Oneng e king kabiasnan na ning yatu ni e king upaya da ring pamuntuk na ning yatu a milalako na upaya.

⁷ Ing kabiasnan a sasabian ku ya ing lihim nang kabiasnan ning Dios; kabiasnan a milihim karing tau; oneng telaga na ning Dios bayu ya pa melalang ing yatu para king ikaligaya tamu.

⁸ Metung man karing pamuntuk king panaun a iti alang makakilala kaniting kabiasnan. Nung akikilala da mu iting kabiasnan, e re sa pinaku king krus ing Ginu na ning ligaya.

⁹ Antimo ing sasabian na ning kasulatan, Ing e na pa ikit o dimdam ning tau, ing e na abut isipan mapalyari ning tau, ya mismu ing sidia ning Dios para karing lulugud keya.

¹⁰ Pepabalu na ning Dios kekatamu ing lihim na king kapamilatan na ning Espiritu. Asasaliksik na ning Espiritu ing sablang bage at pati na ding mangalalam nang parasan ning Dios.

¹¹ Ninu ing taung makibalu king isipan na ning tau subali mu king espiritu a atyu keya? Inya alang makibalu king Dios nung aliwa mu ing Espiritu na.

¹² Aliwa ing espiritu na ning yatu ing tinggap tamu. Ing Espiritu a tinggap tamu ya ing Espiritung ibat king Dios ban abalu tamu ngan ing sablang grasyang binie na ning Dios kekatamu.

¹³ Inya e kami magsalita karing amanung tiru na ning kabiasnan-tau, nune karing amanung tiru na ning Espiritu ban apalino mi ing katutuan espiritual karing panuknanganan na ning Espiritu.

¹⁴ Oneng ing e na panuknanganan ning Espiritu e na la malyaring atanggap ding regalu na ning Espiritu ning Dios. E na la siguradung aintindian; ala lang kabaldugan para keya uling ing ulaga ra malyari mung mayakit dapat king espiritu.

¹⁵ Balu nang atulan ning taung panuknanganan na ning Espiritu ing ulaga na ning sablang bage, oneng alang ninumang makapanatul keya.

¹⁶ Antimo ing sasabian na ning kasulatan, Ninu ing makibalu king pamisip ning Ginu? Ninu ing makaibie payu keya? Oneng atyu kekatamu ing pamisip nang Cristo.

3

¹ Kapatad, e ra kayu pa malyaring pakipagsalitan antimo ing pamakipagsalitang daraptan ku karing taung panuknanganan na na ning Espiritu. Kailangan ing pakipagsalitan da kayu antimong taung maka-yatu, antimong bingut pa king kasalpantayanan Cristianu.

² Kailangan king gatas ing ipakan ku kekayu uling e kayu pa makasadia king masias a pamangan. Angga ngeni e kayu pa makasadia

³ uling mabibie kayu pa antimong taung maka-yatu. Ating mipapangalalu kekayu at mipatepate. Iti mangabaldugan king tau kayu ping maka-yatu at mabibie agpang king panugali na ning yatu.

⁴ Neng sasabian na ning metung kekayu, Aku kang Pablo ku, at ing aliwa naman sabian na, Aku kang Apolos ku, e kayu wari taung maka-yatu kanyan?

⁵ Ninu wari i Apolos? At ninu i Pablo? Ikami ngan talasuyu na kami ning Dios at gagamitan na ban tairan da kayu king pamaniwala. At depat na ning balang metung kekami ing obrang binie na keya ning Ginu.

⁶ Aku ing tinanam king bini, i Apolos ya ing menugtug, oneng ing Dios ya ing pepatubu king tanaman.

⁷ Aliwa ing tinanam o ing menugtug ing maulaga, nune ing Dios a pepatubu king tanaman.

⁸ Ala yang pamiyaliwa ing tinanam king menugtug; parehu na lang ablasan ning Dios ketang depat da.

⁹ Uling parehu kaming talapagobra king obra na ning Dios at ikayu ing marangle na. Gusali na kayu naman ning Dios.

¹⁰ King pamangamit ku king kagiwan a binie na kanaku ning Dios, depat ku ing obra na ning magaling manalakad bale. Binili ke ing pundasyun at ing aliwang tau ya ing misundu. Kailangan yang maingat ing balang manalakad bale.

¹¹ Uling binili na ne ning Dios ing pundasyun, i Jesu-Cristo; ya mung bukud at ala nang aliwa pang pundasyun a malyaring ibili.

¹² Deng aliwa gumamit lang gintu o pilak o mal a batu king pamanalakad da babo ning pundasyun; deng aliwa, gumamit lang dutung o talaib o kaya are.

¹³ At ing depat na ning balang magobra mayakit ya ulaga potang mipabalu ya king Aldo ning Pamanukum. Uling king Aldong ita mipakilala ing tune nang dapat ning balang tau; subukan na ning api at ipakit na ing tune nang ulaga ning balang tau.

¹⁴ Nung ing telakad na ning magobra babo ning pundasyun e na dulukan ning api, tanggap yang bayad ing megobra.

¹⁵ Nung ing pegobran na masilab, mangalugi ya agyamang miligtas ya; oneng antimong taung kesilaban. fig,,,,,... ing Dios ya ing pepatubu king tanaman.,(3:6)fig*

¹⁶ E yu wari balu king templo na kayu ning Dios, at ing Espiritu na ning Dios manuknangan ya kekayu?

¹⁷ Inya nung siran ne ning ninuman ing templo na ning Dios, siran na ne man ning Dios ing minyira. Uling banal ya ing templo na ning Dios, at ikayu mismu ing templo na.

¹⁸ E na sukat pipiraitnan ning ninuman ing sarili na. Nung atin kekayung mimisip king biasa ya agpang king paglalawe na ning yatung iti, sukat yang magpakamangmang ba yang maging tune biasa.

¹⁹ Uling ing kabiasnan na ning yatung iti kamangmangan mu king arapan na ning Dios. Uling sasabian na ning kasulatan, Darakpan na la ning Dios ding biasa king sarili rang kayalistuan.

²⁰ At ing aliwang kasulatan sasabian na, Balu na ning Ginu king alang kabaldugan ing pamisip da ring biasa.

²¹ Inya e na sukat ipagmaragul ning ninuman ing arapat na ning tau. Uling ing sablang bage kekayu ngan:

²² i Pablo, i Apolos, at i Pedro; iting yatu, ing bie at ing kamatayan, ing kasalukuyan, at ing daratang a panaun; iting sabla kekayu ngan.

²³ At ikayu kang Cristo kayu, at i Cristo naman king Dios ya.

4

¹ Sukat yu kaming kilalanan talasuyu nang Cristo at mipanibalan karing lihim nang katutuan ning Dios.

² Metung ya ing bage mayayawad king taung mamahala: ing maging tapat ya sa.

³ Alang nanu naman kanaku nung atulan yu ku king husgadu. Uling aku man e ke atulan ing kanakung sarili.

⁴ Malinis ku konsiensia, oneng e na buring sabian niti king ala kung kakulangan. Ing Ginu ya ing matul kanaku.

⁵ Inya e kayu dapat mamatul kaninu man bayu miras ing oras. Manaya kayu angga king paniatang na ning Ginu a munie kamasalan karing mangalalam a lihim, at mibulalag king makasalikut dang parasan ding sablang tau. Kanita na tanggapan king Dios ning balang katau ing kapurian a mangaintulid keya.

⁶ King uli yu, kanakung kapatad, mekapagsalita ku tungkul kekaming Apolos. Ginamit kung alimbawa para kekayu tungkul kekaming adua ban abalu yu ing buri nang sabian ning kasebian, E kayu lulual king pisasabian. E ne sukat kampian ning ninuman ing metung a tau at pikasaman ne ing aliwa.

⁷ Ninu ing minie kapaintulutan ban magmaragul ka? Nanung atyu keka a e mu tinggap king Dios? Baket magmaragul ka; balamu mo ing atyu keka e ibat king Dios?

⁸ Mabandi na kayu! Ing sablang bage kailangan yu atyu na ngan kekayu. Ari na kayu pala, ikami ali ke pa! Wa, kaburi ko nung ari na kayu pin sana ban kanita maging ari keng kayabe yu.

⁹ Uling king pamalak ku, ikaming apostol, pinili na ke ning Dios ban maging mababang dili karing sablang tau; miyatulan mate arapan na ning publiku at antimong piyalben para karing sablang anghel at ding tau.

¹⁰ Meging mangmang kami alang-alang kang Cristo; oneng mangabiasa kayu tungkul kang Cristo! Maina kami, oneng mangasikan kayu! Me-insultu kami, oneng miparangalan kayu!

¹¹ Angga kaniting kaorasan danupan kami at mau; halus ala keng isulud; metampalasan kami; alang tuknangan.

¹² Magobra keng alang patugut ban e ke mate danup. Bibendisyunan mi la deng tau neng paniumpa da kami; mibabata kami neng panasakitan da kami;

¹³ e ke makibat marawak a amanu neng insultuan da kami. Mengari kaming basura keti king yatu, at pekamababang uring tau angga kaniting kaorasan!

¹⁴ Susulat ku iti e ban pakarinayan da kayu, nune ban ituru da kayu bilang anak kung pakamalan.

¹⁵ Agyang mika apulu kayung libung maestro tungkul king pamibiebie Cristianu, atin kayung metung mung tata. Meging tata yu ku king pangayabe yu kang Cristo Jesus king kapamilatan na ning pamanaral ku kekayu king Mayap a Balita.

¹⁶ Inya ipakisabi kung mayap king apusan yu ing alimbawang pepakit ku kekayu.

¹⁷ Iti ing sangkan nung inya tutubud ke kekayu i Timoteo. Ya ing kanakung pakamalan at tapat a anak king Ginu. Ipaganaka na la kekayu ding prinsipyu a kanakung tikian king bayung bie makayabe kang Cristo Jesus, at ila naman ding tuturu ku karing iglesia nukarin pa man.

¹⁸ Meging mapagmaragul la ding mapilan kekayu uling inisip da king e da na kayu dalawan pasibayu.

¹⁹ Nung burian na ning Dios, datang ku ken king malaguang panaun; alben ku mo nung nanu ing arapat da reti agyang miyayaliwa ing pamaniabian da!

²⁰ Uling ing kayarian ning Dios e ya bukud salita, nune dapat ya.

²¹ Isanu ing buri yu: datangan da kayung ating pamarug o ating pusung malugud at maganaka?

5

¹ Mibalita kanaku king ating mangapalyaring imoralidad libutad yu, bage a tutung makarine a e ra daraptan agyang ding paganu. Mibalita kanaku king ing metung kekayu pakiabayan ne ing dara na, ing asawa nang tata na!

² Makananu kayu ngening makapagmaragul king ugaling anti kanyan? Kailangan kayung dumine at lungkut at ilako ye king kekayung katipunan ing lalaking dinapat kanyan.

³ Aku naman, agyang makarayu ku kekayu, makanyan man kasanmetung yu ku king panamdam.

⁴ King lagyu na ning Ginu tamung Jesus, inatulan ku ne iting lalaki king depat nang makarine. Anti na ku mong atyu ken kaniting desisyun ku. Anti ning mititipun kayung miyabe-abe, makayabe ku kekayu king espiritu king kapamilatan na ning upaya na ning Ginu tamung Jesus a atyu kekatamu.

⁵ Kailangan yang ibie iting lalaki kang Satanas para king pangasintang na katawan ban ing espiritu na miligtas ya king oras na ning Aldo ning Ginu.

⁶ E mayap ing magmaragul kayu! E ye wari balu ing kasebian, Ing ditak a lebadura papagalsan ne ing masa?

⁷ Kailangan yeng ilako iting matuang lebadura na ning kasalanan ban maging ganap kayung malinis. Kanita maging bayu kayung masa a alang nanumang lebadura a antimo ing tune kung sadiang balu tungkul kekayu. Makasadia ne ing kekatamung Pamaglagpus, ngening i Cristo, ing biserung tupa na ning Pamaglagpus, misakripisyu ne.

⁸ Inya, pagselebran ta ya ing kekatamung Pamaglagpus e king tinape a atin matuang lebadura, ing lebadura na ning pamikasala at imoralidad, nune king tinape a alang lebadura, ing tinape na ning kalinisan at katapatan.

⁹ King sulat a peparala ku kekayu, sinabi ku king e kayu makiabe karing taung imoral.

¹⁰ Aliwa ding imoral a paganu ding amanuan ku o ding sakim o mapanako o ding sasambang idolo. Para alisian yu la deti, kailangan ing mako kayu king yatung iti.

¹¹ Ing amanuan ku ya ing e kayu makiabe king magbansag kapatad, oneng imoral ne man, sakim, sasambang idolo, mapanagkas, lasenggu o mapanako. E kayu naman bitasang makiabe mamangan king taung anti kaniti.

¹² Ala kung matulid atulan ku la ding atyu king lual na ning iglesia. Ing Dios ya ing matul karela. E yu wari katungkulan ing atulan yu la ding miembru na ning kekayung sariling katipunan? Antimo ing sasabian na ning Kasulatan, Ilako ye ing marawak a tau king katipunan yu.

6

¹ Nung atin yang reklamu ing metung kekayu king kapatad na king iglesia, munta ya wari karing hues a paganu lugal king munta ya karing pinili na ning Dios?

² E yu wari balu king ding pinili na ning Dios ilang matul king yatu? Nung atulan ye ing yatu, e yu la wari agyung atulan ding mangalating bage?

³ E yu wari balu king itamu ding matul karing anghel? E kasi lalu ta lang ayatulan ding bage keti king yatu!

⁴ Nung deting bage lalto la, idala yu la waring pasalese karing taung e na kikilalanan ning iglesia?

⁵ Dumine na kayu man! Ala na waring metung mu mang biasa kekayu a makasalese king kaguluan da ring mikakapatad king iglesia?

⁶ Kailangan pa wari ing midaluman la ding mikakapatad king iglesia king ukuman da ring alang kasalpantayanan?

⁷ Ing mismung pamidaluman laban king metung at metung, mangabaldugan king mabibigu ing kekayung pamikakapatad kang Cristo. Baket e yu atanggap ing meargabiadu kayu? Baket e yu atanggap ing mepirait kayu?

⁸ King kamatutuanan, ikayu mismu maniugat kayung kapanamdaman at manako, at ding maging biktima yu ila mismu ding kapatad king iglesia!

⁹ Balu yung masalese king e re malyaring kamtan ding marawak ing Kayarian ning Dios. E yu pipiraitnan ing kekayung sarili! Uling ding taung imoral, ding sasambang idolo, ding makipangalugud, ding makipangatawan king kalupa rang babai o lalaki,

¹⁰ ding mapanako, sakim, lasenggu, mapanagkas, at ding tulisan e re kamtan ing Kayarian ning Dios.

¹¹ Anti la kareting mebanggit ding mapilan kekayu. Oneng mewas na ing kasalanan yu; mitalaga na kayu king Dios at meging banal uli na ning lagyu ning Ginung Jesu-Cristo, at uli na ning Espiritu ning kekatamung Dios.

¹² Malyaring ing metung kekayu sabian na, Atin kung matulid gawa king sablang bage buri ku. Wa, tutu ita; oneng e ing sablang bage makakayap keka. Asabi ku munaman ing Atin kung matulid gawa king sablang bage buri ku. Oneng e ku paintulutan ing ipusan na ku ning nanuman.

¹³ Mapalyaring ing metung munaman kekayu sabian na, Ing pamangan para king atian ya at ing atian para king pamangan ya. Wa, tutu ita; oneng deti parehu na lang dinan angganan ning Dios. E ya para king imoralidad ing katawan na ning tau, nune para king Ginu ya, at ing Ginu para king katawan ya.

¹⁴ Pepasublian neng mie ning Dios ing Ginu ibat king kamatayan, at pasublian na katamu namang mie king kapamilatan na ning upaya na.

¹⁵ E yu wari balu king ding kekayung katawan dake na la ning katawan nang Cristo? Paintulutan ku kaya ing kuanan ke ing metung nang dake ning katawan nang Cristo at gawan keng dake na ning katawan ning babaing magtinda king katawan na? Ali, e malyari!

¹⁶ E yu wari balu king ing lalaking makiabe king babaing magtinda king katawan na makisanmetung ya keya king laman? Ing kasulatan malino nang sasabian, Ilang adua maging metung na la mung katawan.

¹⁷ Oneng itang makisanmetung king Ginu makisanmetung ya keya king Espiritu.

¹⁸ E kayu makipangalugud. Ing kasalanan a daraptan na ning tau makalual king katawan na; oneng ing darapat king pamakipangalugud mikakasala ya king mismung sarili nang katawan.

¹⁹ E yu wari balu king ding katawan yu templo na la ning Banal a Espiritu a atyu kekayu at tinggap yung ibat king Dios? E yu bandi ing sarili yu, nune bandi ne ning Dios.

²⁰ Seli na kayu ning Dios at mal ing binayad na para kekayu. Inya gamitan yu la ding kekayung katawan para king ikaligaya na ning Dios.

7

¹ Ngeni pakibatan ku la ding bage a sinulat yu kanaku. Mayap king lalaki ing e ya makiasawa.

² Ban aiwasan na ning tau ing pamakipangatawan, ing balang lalaki kailangan yang mika sarili nang asawa, at ing balang babai kailangan yang mika sarili nang asawa.

³ Kailangan nang tuparan ning lalaki ing katungkulan na bilang asawa king asawa na, at makanyan munaman ing babai.

⁴ Ala yang upaya ing babai king sarili nang katawan; nune ing asawa na ya ing maki upaya. Makanyan munaman, ala yang upaya ing lalaki king sarili nang katawan; nune ing asawa na ya ing maki upaya.

⁵ E yu pagkait ing sarili yu king metung at metung, subali mu nung atin kayung pikasunduan king e yu pa mu daptan ban mirinan kayung panaun king pamanalangin. Oneng kaybat, isundu yu ing kekayung relasyun anting miyasawa ban e na kayu atuksung Satanas uli na mu ning e yu akawat ing kekayung sarili!

⁶ Sasabian ku iti kekayu e anting utus, nune anting pamangilala king kekayung kabilian.

⁷ King kamatutuanan, buri ku sana king ding sablang tau anti la kanaku; oneng ing balang metung atin yang makabukud a kagiwan a ibat king Dios, at deting kagiwan e la paraparehu.

⁸ Oyni ing asabi ku karing e talasawa at karing babaing mebalu: mas mayap nung manatili lang e makiasawa antimo aku.

⁹ Nung e yu apibata, makiasawa kayu. Mas mayap pa ing makiasawa kayu kesa king mikasala kayu.

¹⁰ Karing talasawa yuyutus ku, e ku sariling utus iti nune utus ning Ginu king e ne kailangan kakawanian ning talasawang babai ing asawa na;

¹¹ nung sakaling kawanian ne, kailangan ing e ya makiasawang pasibayu o kaya makikasundu yang pasibayu king asawa na, at ing talasawang lalaki e ne kailangan kawanian ing asawa na.

¹² Karing aliwa sasabian ku naman (aku mismu at aliwa ing Ginu): nung ing lalaking Cristianu atin yang asawa a e talasalpantaya at bisa ne mang miyabe lang miyasawa, e ne kailangan kawanian ning lalaki.

¹³ Makanyan munaman, nung ing babaing Cristianu atin yang asawa a e talasalpantaya at bisa ya mu ring makiabe keya, e ne kailangan kawanian.

¹⁴ Uling ing lalaking e Cristianu matanggap ya king Dios king kapamilatan na ning asawa nang Cristianu. Makanyan munaman, ing babaing e Cristianu matanggap ya king Dios king kapamilatan na ning asawa nang Cristianu. Nung e mu makanyan, ding anak da maging paganu la; oneng king kamatutuanan matatanggap la king Dios.

¹⁵ Nung ing metung a e Cristianu buri neng kawanian ing asawa nang Cristianu, paburen ye. King anti kaniting kasu ing talasawang Cristianu, lalaki o babai, malaya ne; uling inaus na kayu ning Dios ban mie king kapayapan.

¹⁶ Nanung male mu, talasawang babaing Cristianu, pota ika ing maging dalan na ning kaligtasan na ning kekang asawa? Nanung male mu, talasawang lalaking Cristianu, magkang aligtas me ing kekang asawa?

¹⁷ Ing balang metung kailangan yang mibiebie king bie a binie na ning Dios, king kabilian na inyang inaus ne ning Dios. Iti ya ing tuntunan a tuturu ku karing sablang iglesia.

¹⁸ Nung ing taung mesirkunsisyun tinggap na ing aus ning Dios, e na kailangan ing ilako ne ing tanda na ning pangasirkunsisyun na. Nung ing taung e mesirkunsisyun tinggap na ing aus na ning Dios, e na kailangan ing pasirkunsisyun ya.

¹⁹ Uling ing pangasirkunsisyun o ing e pangasirkunsisyun alang ulaga. Ing maulaga ya ing pamamintu karing utus na ning Dios.

²⁰ Ing balang tau kailangan yang manatili king kabilian na inyang tinggap na ing aus ning Dios.

²¹ Inyang inaus na ka ning Dios, metung kang ipus? Nung makanyan ing kabilian mu, e mu sa kalilingasngas iti; nung ating upayang maging malaya ka, gawan mu.

²² Uling ing ipus a inaus na ning Ginu metung yang taung malaya na king Ginu; makanyan munaman king malayang lalaki a inaus nang Cristo, metung yang ipus na.

²³ Seli na kayu ning Dios king maragul a alaga; inya e na kayu pasibayung pa-ipus karing tau.

²⁴ Kapatad, ing balang metung kekayu kailangan yang manatili king pamakiabe na king Dios king sadia nang kabilian inyang inaus na kayu.

²⁵ Tungkul naman karing e talasawa: ala kung tinggap a kautusan ibat king Ginu, oneng ibie ku ing kaisipan ku antimong karapatdapat a apagkatiwalan yu uli na ning lunus na ning Ginu.

²⁶ Uli na ning kasalukuyan a kagutgutan, isipan ku king masanting ing manatili ya ing tau king sadia nang kabilian.

²⁷ Atin kang asawa? Nung atin, e mu sisisian ing pamakiasawa mu. Ala kang asawa? Nung ala, e na ka lalawe pang maging asawa mu.

²⁸ Nung mekiasawa ka, e ka dinapat pamikasala, at nung ing dalaga mekiasawa ya, e ya naman dinapat pamikasala. Oneng lalu kung buri, nung aligtas da kayu karing aldo-aldo problema na ning bie talasawa.

²⁹ Kapatad, iti ya ing buri kung sabian: ditak na ing oras a makatagan at manibat ngeni kailangan lang mibiebie antimong e talasawa ding talasawang lalaki;

³⁰ detang manangis antimong e manangis; detang matula antimong e matula; detang maniali antimong e ra bandi ing seli ra;

³¹ detang negosianti antimong alang pansin king negosyu ra. Uling iting yatu, king kabilian na ngeni, e ne magluat.

³² Buri ku king ala na kayu sanang problema. Ing e talasawa maging malingap ya king obra na ning Ginu, uling buri na ing paligayan ne ing Ginu;

³³ oneng ing talasawang lalaki maging malingap ya karing bage keti king yatu, uling buri neng paligayan ing asawa na;

³⁴ inya e na balu ing arapan na. Ing babaing e talasawa o birhen bukud nang papansinan ing obra na ning Ginu, uling buri na ing mitalaga ya king Dios ing katawan na at espiritu; oneng papansinan na la ning talasawang babai ding bage keti king yatu, uling buri neng paligayan ing asawa na.

³⁵ Sasabian ku iti king ikakayap yu. E ku pagnasan ing sabatan ku ing matulid yu. Nune, pagnasan ku ing daptan yu sana ing ustu at karampatan at ibie yung lubus ing kekayung sarili king kasuyuan king Ginu a alang pasubali.

³⁶ Tungkul karing birhen a dalaga at baintau a atin nang pamitanguanan: nung isipan na ning lalaki king e ya maging karapatdapat king kapalsinta na, nung ing buri na ning laman na milalu at panamdaman na king kailangan lang mikasal, kailangan lang pakasal, ketang buri na. E ya mikasala.

³⁷ Nung ing lalaki, kusa nang inari king lub na king e ya makiasawa, nung balu nang pigilan ing nasa na, desisyunan na nung nanu ing daptan na, mayap ing e ne pakasalan ing babai.

³⁸ Inya mayap ing depat na ning lalaking makiasawa king ketanguanan nang dalaga, oneng lalung mayap ing depat na ning lalaking e makiasawa king kapalsinta na.

³⁹ E ya libring makiasawang aliwa ing babaing talasawa kabang mabie ya ing asawa na; nung mate ya ing asawa na, libri neng makiasawa king lalaking buri na; oneng kailangan king iti metung yang Cristianu.

⁴⁰ Lalu yang tumula, nung manatili ya king sadia nang kabilian. Iti ya ing kaisipan ku at isipan ku king atyu munaman kanaku ing Espiritu ning Dios.

8

¹ Ngeni, tungkul naman king pamangan a miyain karing idolo. Wa, katutuan king itamung sabla atin tamung kabiasnan, agpang king kekayung kasebian. Ing kabiasnan ya ing babie ketasan lub king tau; oneng ing lugud ya ing babie tibe.

² Ing taung mimisip king atin yang balu e na pa balu ing dapat nang abalu.

³ Oneng balu ne ning Dios ing taung lulugud keya.

⁴ Ngeni ing tungkul king pamangan a miyain karing idolo. Balu tamu king ing idolo makabasi ya king bage a e katutuan; balu tamu king atin mung metung a Dios.

⁵ Nung sakali mang karin banua o keti king yatu atin karing ausan dang dios at agyang pang dakal la deting dios at ginu,

⁶ makanyan man para kekatamu atin mung metung a Dios, ing Ibpa a linalang king sablang bage. Mabibie tamu para keya at atin tamung metung a Ginu, i Jesu-Cristo. King kapamilatan na, ding sablang bage melalang la at king uli na mabibie tamu.

⁷ Oneng e re balu ding sabla iting katutuan. Ating mapilan a angga ngeni makasane la pa karing idolo, at ngening mangan la king pamangan a miyain karing idolo isipan da king iti pamangan na ning idolo. Maina la konsiensia at panamdaman da king merinat la uli na ning pamamangan da.

⁸ E na katamu alapit ning pamangan agyang ditak king Dios; alang mawala kekatamu nung e tamu mangan at ala tamu namang pakinabangnan nung mangan tamu.

⁹ Makanyan man, mingat kayu, magkang ing kekayung kalayaan maging dalan ne ning pamikasala da ring maina king kasalpantayanan.

¹⁰ Uling nung ing taung maina konsiensia tungkul kaniti akit na kang mamangan king templo na ning idolo, ikang ating kabiasnan, e ya naman wari mipasiknangan a lub mangan king pamangan a miyain karing idolo?

¹¹ Inya iting taung maina konsiensia, ing kapatad yu a meging sangkan na ning pangamate nang Cristo, mikasala ya uli na ning kekang kabiasnan!

¹² King anti kaniting paralan mikasala ka kang Cristo king kapamilatan na ning pamikasala mu karing kapatad mung Cristianu at pamaniugat mu king maina rang konsiensia.

¹³ Nung ing pamangan ya ing maging sangkan na ning pamikasala na ning kanakung kapatad, e na ku pasibayung mangan karni ban e ya mikasala ing kapatad ku.

9

¹ E ku wari metung a taung malaya? E ku wari apostol? E ke wari ikit i Jesus a Ginu tamu? Aliwa wari ikayu ing bunga na ning kanakung kasuyuan king Ginu?

² Nung sakali mang ding aliwa e ra ku atanggap apostol, ikayu atanggap yu ku! Ikayu mismu, uli na ning bie yung makayabe king Ginu, ikayu ing katunayan king aku apostol ku.

³ Iti ya ing pakibat ku karing taung mangutang kanaku.

⁴ Ala ke waring katuliran sustentuan na ning iglesia king kekaming pamangailangan?

⁵ Ala ke waring katuliran mituking asawang Cristianu king kekaming pamaglakbe antimo ing daraptan da ring aliwang apostol at ding kapatad na ning Ginu at i Pedro?

⁶ Bukud mu waring ikaming aduang Bernabe ding kailangan magobra para king kabiayan me?

⁷ Ninu ing balu yung sundalus a beyaran na ing sarili nang gastus king pangasundalus na? Ninu ing ortelanung e mengan karing ubas a bunga da ring tenam na? Ninung pastul tupa ing e magkabie king gatas da ring papastulan na?

⁸ E ku kailangan magmatulid king kapamilatan da reting pamanalimbawa, uling makanyan munaman ing sasabian na ning Batas.

⁹ Mababasa king Batas nang Moises ing anti kaniti: E me tatali asbuk ing baka neng dadara ya. Ngeni, ding baka mu wari ding pagmalasakitan na ning Dios?

¹⁰ Aliwa wari itamu ing amanuan na inyang sinabi ne iti? Wa, tune misulat iti para kekatamu. Ing sasarul at ing papalut magobra lang ating kapanayan a manikua lang dake king pupul.

¹¹ Tinanam kaming bining espiritual kekayu. Kalabisan wari nung sakaling mupul kaming pakinabang a material kekayu?

¹² Nung ding aliwa atin lang matulid dumake kekayu, e ke wari maygit ating katuliran? Makanyan man, e mi ginamit iting katuliran, nune ing sablang bage pibata mi ban e mirinan pangabala ing dalan na ning Mayap a Balita tungkul kang Cristo.

¹³ E yu wari balu king ding taung susuyu king Templo kakuanan da ing pamangan da king Templo, at detang miyayain karing ain-sakripisyu king altar, atin lang dake kareting yayain da?

¹⁴ Makanyan munaman, inutus na ning Ginu king ding manaral king Mayap a Balita kailangan lang mangabiayan king kapamilatan na ning Mayap a Balita.

¹⁵ Oneng e ku la ginamit deting katuliran ni e ku susulat iti ban aduan ku la kekayu deting katuliran para king kanakung sarili. Mayap pa ing mate na ku kesa king pawalan nang kabaldugan ning ninuman ing kanakung katuliran a pagmaragul!

¹⁶ Ala kung matulid magmaragul agyang panaral ke ing Mayap a Balita. Utus kanaku ing manaral. Makalunus ku, nung e ke ipanaral ing Mayap a Balita!

¹⁷ Nung depat ku ing obra ku king sarili kung kaburian, atin kung asahan a mibayaran ku; oneng daraptan ku antimong katungkulan, uling peniwala na kanaku ning Dios iting obra.

¹⁸ Inya nanung ablas ing panayan ku? Alang aliwa nune ing makapanaral ku king Mayap a Balita a alang bayad, at e manenaya king katuliran ku king obra ku para king Mayap a Balita.

¹⁹ Tau kung malaya, e na ku ipus ning ninuman; oneng gagawan keng ipus da ring sabla ing sarili ku ban makapanagkat kung dakal a tau para kang Cristo.

²⁰ Inyang megobra ku karing Judio, meging anti kung Judio ban ayagkat ku la; agyamang e ku makasakup king Batas nang Moises, mibiebie ku antimo ila ban ayagkat ku la.

²¹ Makanyan munaman, inyang megobra ku karing paganu a e na sakup ning Kautusan nang Moises, mibiebie kung anting paganu, ban ayagkat ku la ding paganu. Iti e mangabaldugan king e ku la pamintuan ding kautusan na ning Dios, uling tune kung atyu lalam ning kautusan nang Cristo.

²² Karing maina king kasalpantayanan, meging maina kung kalupa ra, ban ayagkat ku la. Inya karing sablang bage meging anti ku karing sablang tau, ban ayagkat ku la ding mapilan king makananu pa mang paralan.

²³ Daraptan ku iti uli na ning Mayap a Balita, ban mirakayanan ku king obra na.

²⁴ Tune balu yu king ding makilaban king karera kayabe la ngan pupulayi, oneng metung ya mu karela ing maniambut king premyu. Uli na niti, mulayi kayu king anggang agyu yu ban akua ye ing premyu.

²⁵ Ing balang magsane makilaban king pialung, maigpit nang didisiplinahan ing sarili na king sablang bage. Daraptan na iti ban miputungan yang koronang e manatili; oneng daraptan tamu iti ban miputungan tamu king koronang manatili kapilan man.

²⁶ Inya pupulayi kung matulid papunta king angganan a pakirasan; iti ya ing sangkan nung inya e ku tutumbuk king angin.

²⁷ Pasakitan ke ing katawan ku king tumbuk at pailalam ke king ganap a pamangawat, magkang kaybat kung menaral karing aliwa, aku mismu e ku matanggap. fig,,,,,... metung ya mu karela ing maniambut king premyu.,(9:24)fig*

10

¹ Kapatad, buri ku king e yu sa kakalinguan ing milyari karing makatua tamu a tinuki kang Moises. Atyu la king lilung ning biga, at mekadalakit la ngan libutad ning Dagat a Malutu.

² King biga at king dagat la ngan mebinyag antimong talatuki nang Moises.

³ Mengan la ngan king pamangan a espiritual,

⁴ at minum la king batung espiritual a minantabe karela, at ing batung ita ya i Cristo.

⁵ Oneng e ya rin metula ing Dios karing keraklan karela, inya mikalat-kalat la ding bangke ra king disyerto.

⁶ Ngeni, deting bage lisyun la para kekatamu ban e tamu magnasa karing marawak a bage, antimo ing depat da.

⁷ E kayu sasambang idolo a antimo ing depat da ring mapilan karela. Antimo ing sasabian na ning kasulatan, Linukluk la ding tau ban mangan la at minum, at tinalakad la ban dapat makasumaming bage.

⁸ E tamu kailangan makipangatawan antimo ing depat da ring mapilan karela, at king metung mung aldo adua lang pulu't atlung libu katau ding mete karela.

⁹ E ta ya kailangan paniubukan ing Ginu antimo ing depat da ring mapilan karela, at mete la uling meket lang ubingan.

¹⁰ E kayu kailangan magreklamu antimo ing depat da ring mapilan karela, at pete na la ning Kamatayan.

¹¹ Mepalyari la deting sablang bage ban maging lisyun la para karing aliwa, at misulat la bilang babala para kekatamu. Uling mabibie tamu king panaun a malapit nang miwakasan.

¹² Ing taung mimisip king matatag ya talakad kailangan yang mingat pota miragsa ya.

¹³ Ing balang kapagsubukan a daratang kekayu, ya naman ing karaniwan a daratang karing tau. Oneng tapat ya ing Ginu king pangaku na at e na kayu paburen masubuk king e yu agyung pibatan. King oras a masubuk kayu, dinan na kayung sikanan ban apibata yu, at gawa yang paralan ban adaig yu ing kapagsubukan.

¹⁴ Inya, kanakung kakaluguran, painggulutan yu ing pamanyambang idolo.

¹⁵ Magsalita ku kekayu a anting taung makaintindi; ikayung matul king sasabian ku.

¹⁶ Ing kopa na ning kanuanan a pasalamatan tamu king Ginu, e wari mangabaldugan king miyabe-abe tamu king daya nang Cristo ngening miminum tamu kaniting kopa? At ing tinape a pirarakayan tamu, e wari mangabaldugan king miyabe-abe tamu king katawan nang Cristo ngening kakanan ta ya?

¹⁷ Uling ating metung a tinape, ita ngan agyang dakal tamu, metung tamu mung katawan uling miyabe-abe ta ngan king metung mung tinape.

¹⁸ Lawan yu la ding memalen ning Israel: detang mamangan ketang miyain a sakripisyu darake la king altar ning kasuyuan king Dios.

¹⁹ Nanu ing buri kung sabian? King ding idolo o ing pamangan a miyain kareti tune atin kabaldugan?

²⁰ Ali! Ing buri kung sabian ya iti: ing miyain a sakripisyu karing altar da ring paganu minain ya karing demonyu at e king Dios. At e ku buri ing maging kayabe da kayu ding demonyu.

²¹ E kayu malyaring minum king kopa na ning Ginu at king kopa da ring demonyu; e kayu malyaring makiabe king lamesa na ning Ginu at king lamesa da ring demonyu.

²² Buri ta ya waring mangalalu ing Ginu? Mas masikan tamu pa wari kesa king Gino?

²³ Masasabi king Malaya tamung gawan ing sablang bage. Tutu iti, oneng e mayap ing sablang bage. Malaya tamung gawa king sablang bage, oneng e makasaup ing sablang bage.

²⁴ E na kailangan panintunan ning ninuman ing sarili namung kapakanan, nune itang makakayap karing aliwa.

²⁵ Malyari kayung mangan king nanumang makatinda king palengki, antimo ing karni, ala nang kutang-kutang pa ban e ne magugulu ing konsiensia yu.

²⁶ Uling ing kasulatan sasabian na, Ing yatu at ing sablang atyu kaniti bandi na ning Ginu.

²⁷ Nung ing e Cristianu kimbiran na kayung mangan at tinggap yu ing aniaya, kanan yu ing miyampang kekayu a ala nang kutang-kutang pa uli na ning kekayung konsiensia.

²⁸ Nung ating sumabi, Iti pamangan yang miyain karing idolo, e yu kakanan itang pamangan a ita, alang-alang ketang sinabi kekayu at para king ikatahimik na ning konsiensia na,

²⁹ aliwa ing sarili yung konsiensia, nune itang konsiensia na ning aliwa. Ngayung sumabi, Ba't ing kalayaan ku kailangan maputut uli na ning konsiensia na ning aliwang tau?

³⁰ Nung pasalamatan ke ing Dios king kanakung pamangan, obat ininsultuan na ku ning ninuman tungkul king pamangan a kanakung pasalamatan?

³¹ Inya nanuman ing daraptan yu, mamangan kayu man o miminum, daptan yu ngan king ikaligaya na ning Dios.

³² E kayu babie kasangkanan king pamikasala na ning ninuman, Judio o paganu o ding miembru king iglesia na ning Dios.

³³ Antimo ing daraptan ku: pagkapilitan keng paligayan ing metung at metung king sabla kung daraptan, e para king ikakayap ku, nune para king ikakayap da ring sabla ba lang miligtas.

11

¹ Makitulad kayu kanaku, antimo ing pamakitulad ku kang Cristo.

² Tune ra kayung papurian uling parati yu kung agaganaka at uling tutukian yu ing tiru ku kekayu.

³ Oneng buri kung abalu yu king i Cristo ya ing ating upaya king balang lalaki. Ing lalaki ing ating upaya king asawa na, at ing Dios ya ing ating upaya kang Cristo.

⁴ Inya nung ing lalaking manalangin o manaral king amanu na ning Dios, makatakap ya ing buntuk na, lalako ne dangalan i Cristo.

⁵ At ing ninumang babaing manalangin o manaral king amanu na ning Dios a alang talikbung king buntuk na, lalako ne dangalan ing asawa na; ala lang pamiyaliwa ila ning babaing kalbu.

⁶ Nung e ne talikbungan ning babai ing buntuk na, mayap pa ing pututan ne ing buak na. At anti na ning makarine para king metung a babai ing satsatan ne ing buntuk na o paurud na ing buak na, kailangan ing takpan ne ing buntuk na.

⁷ E ne kailangan takpan ning lalaki ing buntuk na, uling ya ing larawan na at ligaya ning Dios. Oneng ing babai ya ing ligaya na ning lalaki;

⁸ uling e ibat ing lalaki king babai, nune ing babai ya ing ibat king lalaki.

⁹ King kamatutuanan, e ya melalang ing lalaki king uli na ning babai, nune ing babai ya ing melalang para king lalaki.

¹⁰ King uli da ring anghel, kailangan neng dinan talikbung ning babai ing buntuk na ban ipakit na king atyu lalam nang upaya ning asawa na.

¹¹ King bie tamu king Ginu, maulaga ya ing babai para king lalaki, at maulaga ya ing lalaki para king babai.

¹² Nung makananu yang melalang ing babai a ibat king lalaki, makanyan munaman ing lalakimibait ya king babai, at ing sablang bage ibat ngan king Dios.

¹³ Atulan yu king kekayung sarili: makatud kaya para king babaing manalangin king Dios king publiku ing e ya makatalikbung a buntuk?

¹⁴ Tuturu na ning naturalesa mismu king manong para king lalaki ing makaba ya buak,

¹⁵ oneng iti dangalan para king babai. Ing makabang buak miyabie keya bang maging talikbung na.

¹⁶ Nung ating ninumang bisang makiargu tungkul kaniti, ing asabi ku ya iti: ikami o ding iglesia na ning Dios ala kaming aliwang kaugalian king pamanyamba.

¹⁷ E ra kayu apurian kareting makatuking panabilin, uling ing kekayung pamitipun king iglesia dakal ing pasari nang e mayap kesa king mayap.

¹⁸ Mumuna, mibalita kanaku king ating milaban-laban a grupu king kekayung kapulungan, at isipan ku king iti ating katutuan. (

¹⁹ King pamalak ku, ing pamisagsagan kailangan ban ding atyu king katutuan makilala la.)

²⁰ Neng mitipun-tipun kayu, aliwa ing Apunan ning Ginu ing kakanan yu,

²¹ uling ing metung at metung kakanan na ing sariling darala na. Inya deng mapilan daranup la at ding mapilan lalasing la.

²² Ala kayu waring sariling bale a malyari yung pipanganan at piinuman? Buri ye galang insultuan ing iglesia na ning Dios at ibili yu la king kamarinayan ding pakakalulo? Nanung panayan yung sabian ku kekayu? Purian da kayu? Agyang ditak e ra kayu purian!

²³ Uling ing turu a binie ku kekayu tinggap ku naman king Ginu: king ing Ginung Jesus, kanitang benging mipagtaksilan ya, kinua ne ing tinape,

²⁴ pepasalamat ya king Dios, pemirasu ne ing tinape at ngana, Iti ya ing katawan ku a miyain para kekayu. Daptan yu iti bilang kapigaganakan kanaku.

²⁵ Antimu rin, kaybat dang mengan, kinua ne ing kopa at ngana, Iting kopa ya ing bayung kasunduan ning Dios a patibayan na ning kanakung daya. Balang minum kayu kaniti, daptan yu bilang kapigaganakan kanaku.

²⁶ Uling balang mangan kayu kaniting tinape at minum kaniting kopa, babalita yu ing kamatayan na ning Ginu angga king datang ya.

²⁷ Inya, nung mamangan ya ing metung a taung e karapatdapat king tinape na ning Ginu o miminum king kopa na, mikakasala ya laban king katawan na at daya ning Ginu.

²⁸ Kailangan nang surian ning balang metung ing sarili na bayu ya mangan king tinape at minum king kopa.

²⁹ Uling nung e na aintindian ing kabaldugan na ning katawan na ning Ginu neng mamangan ya king tinape at neng miminum ya king kopa, atulan ne ing sarili na neng mamangan ya at miminum.

³⁰ Iti ya ing sangkan nung inya dakal la kekayu ding masakit at maina at ding mapilan mete la.

³¹ Nung surian tamu pa ing kekatamung sarili, e na katamu atulan ning Ginu.

³² Oneng neng atulan na katamu at paparusan ning Ginu, daraptan na iti ba tamung e miparusan kayabe na ning yatu.

³³ Inya, kanakung kapatad, neng mititipun kayu ban mangan king Apunan ning Ginu, mipapanaya kayu sana.

³⁴ Nung atin mang danupan, kailangan yang muli at mangan king bale na ban kanita e kayu mirasnan king kayatulan na ning Dios ngening mitipun-tipun kayu. Saka ku na salesen ing makatagan pang pisasabian potang datang ku ken.

12

¹ Ngeni, ing tungkul naman karing regalu ning Banal a Espiritu. Buri kung abalu yu ing katutuan da reti.

² Balu yu king inyang paganu kayu, mitake kayu king e tune dalan da ring dios-diosan a pipi.

³ Inya, kailangan yung pakaintindian king ala ninuman a panimunan na ning Espiritu ning Dios ing makasabing, Isumpa ya i Jesus! At alang makasabi, I Jesus Ginu ya, subali mu nung patnubayan ne ning Banal a Espiritu.

⁴ Ating miyayaliwang uring regalung espiritual, oneng ibat la ngan deti king metung mung Espiritu.

⁵ Ating miyayaliwang paralan ning pamaniuyu, oneng metung ya mu ing Ginung susuyuan.

⁶ Ating miyayaliwang kagiwan oneng ing Dios ya naman ing babie kareti.

⁷ Ing balang metung mirinan yang katunayan king atyu ya keya ing Espiritu para king ikakayap da ring sabla.

⁸ Binie na ning Espiritu king metung ing amanu na ning kabiasnan, kabang king aliwa binie na ing upayang magsalita king beluan.

⁹ Ing metung at bukud mung Espiritu ya ing minie kasalpantayanan king metung at king aliwang tau ing upayang manulu.

¹⁰ Binie na king metung a tau ing upayang dapat milagru; king aliwa, ing magsalita king amanu na ning Dios at king aliwa pa, ing kagiwan makakilala ing pamiyayaliwa da ring regalung ibat king Espiritu at detang e ibat king Espiritu. King aliwa, binie na ning Espiritu ing upayang magsalitang miyayaliwang amanu; king aliwa, ing kagiwan palino king kabaldugan da reting amanu.

¹¹ Oneng metung ya mu ing Espiritu a darapat kareti; babie yang miyayaliwang kagiwan karing tau, ketang kaburian na.

¹² Uling mengari ya i Cristo king metung a katawan a ating dakal a dake; makanyan man metung ya mung katawan agyamang dakal lang miyayaliwang dake.

¹³ Makanyan munaman, itamu ngan, Judio o Griego, ipus o malaya, mebinyag tamu king metung mung katawan king kapamilatan na ning metung mung Espiritu. At itamu ngan minum tamu king metung mung Espiritu.

¹⁴ Uling dakal lang dake ding bibilug king katawan at e mu metung a dake.

¹⁵ Nung ing bitis sabian na, Uling e ku gamat, e ku kayabe king katawan, ita e mangabaldugan king e na ne dake ning katawan.

¹⁶ At nung ing balugbug sabian na, Uling e ku mata, e ku kayabe king katawan, ita e mangabaldugan king e na ne dake ning katawan.

¹⁷ Nung ing mabilug a katawan mata ya ngan, makananu yang makaramdam? At nung puru ne mang balugbug, makananu yang makabau?

¹⁸ Oneng e makanyan; seria na lang binili ning Dios ding miyayaliwang dake king katawan.

¹⁹ Alang katawan nung bukud yang metung a dake!

²⁰ King kamatutuanan, dakal la ding dake, oneng metung ya mu ing katawan.

²¹ Inya e na asabi ning mata king gamat, E ra ka kailangan! Ni ing buntuk e na asabi karing bitis, E ra kayu kailangan!

²² E mu ita, e tamu malyaring mie, nung alalu ding balamu maina nang dake ning katawan.

²³ At deting isipan tamung alang kabaldugan a dake na ning katawan ila mismu ding kailangan tamung pakaingatan kabang detang dake a e masanting lalawan ila ding lalu tamung pakadinan pansin

²⁴ a e ra naman kailangan ding mangalagung dake na ning katawan tamu. Oneng pibage-bage na la ning Dios ding dake na ning katawan ban dinan na lang mas maragul a dangalan detang dake ning katawan a alang makaying dangal.

²⁵ Inya alang pamipatepate king katawan, oneng ding miyayaliwang dake atin lang malasakit king metung at metung.

²⁶ Nung manamdaman ya ing metung nang dake ning katawan, manamdaman la ngang abe na ding aliwang dake; nung ing metung a dake miparangalan ya, ding sablang dake miparangalan lang abe na.

²⁷ Ngeni, ikayu ngan katawan na kayung Cristo at dake ne ning balang metung kekayu.

²⁸ Binili na la ning Dios king iglesia ding sabla king kailangan dang pagkabilian: mumuna, ding apostol; kadua, ding propeta; katlu, ding talaturu; at kaybat ding darapat milagru at detang ating upayang manulu o makasaup karing aliwa o mamahala karela o magsalitang miyayaliwang amanu.

²⁹ E la ngan apostol o propeta o talaturu. E ila ngan atin lang upayang dapat milagru

³⁰ o manulung sakit o magsalitang aliwang amanu o magpalino nung nanu ing kabaldugan da reting amanu.

³¹ Pagnasan yu la sanang lalung akua ding maulagang regalu. At ngeni, ituru ke ing paralan a maygit king sabla.

13

¹ Nung makapagsalita ku karing amanu da ring tau at ding anghel, oneng ala na ku mang lugud, mangari mu ing amanu ku king kampanang bibiung o king pompiang a kakalaksing.

² At nung atyu kanaku ing kagiwan na ning masanting a pamanaral at aintindian ku ngan ing sablang makalihim at ing sablang kabiasnan at ing maragul a kasalpantayanan a makayalis karing bunduk, oneng ala na ku mang lugud, ala kung kabaldugan.

³ Ipamie ku man ing atyu kanaku at pasilab ing katawan ku king ain-sakripisyu, oneng ala na ku mang lugud, ala kung apala.

⁴ Mapibabata ya at maganaka ing lugud; e ya mapangalalu o makasarili o mapagmatas;

⁵ e ya magaspang a ugali, e maimut, e masungit; e ya tatanam mua;

⁶ e ya tutula king e mayap a dapat, nune tutula ya king katutuan.

⁷ E ya talakasawa ing lugud; ing sabla paniwalan na; e milalako kapanayan, at pibabatan na ing sabla.

⁸ Ala yang kayangganan ing lugud. Ating mangalagung aral, oneng e la manatili; ating makikagiwan king pamagsalita, oneng iti miwakasan munaman; ating kabiasnan, oneng iti ating kapupusan.

⁹ E pa ganap ing kabiasnan tamu at ing kagiwan tamu king pamanaral king amanu na ning Dios;

¹⁰ oneng potang datang na itang ganap, kanita itang e ganap mawala na.

¹¹ Inyang anak ku, migsalita ku, minisip ku, at mengatuliran kung anting anak. Oneng ngening metua na ku, likuan ku na ing panugaling anak.

¹² Ngeni ing akakit tamu balamu larawan yang malabug king salamin; oneng datang ing aldo a akit ta yang lupa at lupa. Ditak mu ing balu ku ngeni; oneng king daratang a panaun maging ganap na, antimo nung makananu na kung balu ning Dios.

¹³ Ngeni, deting atlu manatili la: ing kasalpantayanan, ing kapanayan, at ing lugud; oneng ing pekamaragul kareti ya ing lugud.

14

¹ Inya, ing lugud ya ing pakikuanan yu. Pakikuanan yu la ding regalung espiritual lalung-lalu na ing pamagsalita karing amanu na ning Dios.

² Ing taung magsalitang aliwang amanu e ya magsalita king tau nune king Dios, uling ninuman alang makaintindi keya. Magsalita ya karing lihim a katutuan king kapamilatan na ning upaya ning Espiritu.

³ Oneng ing manaral king amanu na ning Dios, magsalita ya karing tau at babie yang kasaupan, turu, at kapasnon.

⁴ Ing taung magsalitang miyayaliwang amanu sasaupan nang bukud ing sarili nang bie espiritual; oneng itang manaral karing amanu na ning Dios sasaupan ne ing mabilug a iglesia.

⁵ Buri ku ing makapagsalita kayu ngang miyayaliwang amanu; oneng lalu kung buri ing makapanaral kayu king amanu na ning Dios. Ing taung makapanaral karing amanu na ning Dios lalu yang maulaga kesa kanitang makapagsalitang miyayaliwang amanu, subali mu nung ating makapalino king sasabian na ban ing mabilug a iglesia misaupan ya.

⁶ Ngeni, kapatad, nung aku datangan da kayu at magsalita kung miyayaliwang amanu, nanung ulaga na nita? Ala, subali mu nung king pamagsalita ku apasiag ku la kekayu ding mapilan a pawaga na ning Dios o mapilan a beluan o ing amanu o ing turu na ning Dios.

⁷ Agyang ding instrumentong musika a e naman mabie antimo ing plauta o alpa, nung e la mangalino nota, makananu mung aintindian ing musikang titigtig da?

⁸ At nung ing papasiag na ning trumpeta e masalese, ninung makapagsadia king pamakilaban?

⁹ Makanyan munaman, makananu rang aintindian ding tau ing sasabian yu, nung e malino ing pamagsalita yu? Idala na la mu ning angin ding amanu yu!

¹⁰ Dakal lang miyayaliwang amanu keti king yatu, makanyan man atin yang kabaldugan ing balang metung.

¹¹ Nung e ke balu ing amanung gagamitan na ning taung magsalita, maging dayuan ya kanaku at maging dayuan ku keya.

¹² Anti na ning tutu yu lang pagnasan ding regalu na ning Espiritu, maygit king sabla pagkapilitan yu lang lalung gamitan detang makasulung king pangaragul na ning iglesia.

¹³ Inya ing magsalitang aliwang amanu, kailangan yang manalangin para king regalu a makapalino king kabaldugan na ning sasabian na.

¹⁴ Uling nung manalangin ku king aliwang amanu, ing espiritu ku ya ing manalangin, oneng ing pamisip ku ala yang pakinabangan.

¹⁵ Ngeni, nanu ing kailangan kung daptan? Manalangin kung kayabe na ning espiritu ku, oneng manalangin ku naman kayabe na ning pamisip ku; magkanta kung kayabe na ning espiritu ku, at magkanta ku naman kayabe na ning pamisip ku.

¹⁶ Neng babie kang kapasalamatan king Dios king kapamilatan na ning aliwang amanu, makananu yang makapakibat Amen ing karaniwan a taung kayabe mu neng e na aintindian ing sasabian mu?

¹⁷ Agyang pang mayap ing panalangin mung kapasalamatan king Dios e ya misaupan king makananu mang paralan ing aliwang tau.

¹⁸ Pasalamat ku king Dios uling makapagsalita ku king miyayaliwang amanu a maygit kaninu man kekayu.

¹⁹ Oneng king pamanyamba na ning iglesia king Dios, buri ku pa ing magsalita kung limang amanu a aintindian da at pakinabangan da ring aliwa kesa king libung amanu a e ra naman aintindian.

²⁰ Kapatad, e kayu sa mangaring anak king kekayung pamisip; maging inosenti kayung anak pangaras king marawak; oneng maging ganap kayu sanang matua king kekayung pamisip.

²¹ Makasulat karing Kasulatan, Pakipagsalitan ku la deting tau, ngana ning Ginu, king kapamilatan da ring taung aliwa amanu. Magsalita ku king kapamilatan da ring labi da ring dayuan, makanyan man, e ra ku pakiramdaman.

²² Inya, ing kagiwan na ning pamagsalita king miyayaliwang amanu tanda ya para karing e talasalpantaya, e para karing talasalpantaya, samantalang ing kagiwan na ning pamagsalita king amanu ning Dios tanda ya para karing talasalpantaya at e para karing e talasalpantaya.

²³ Nung ing kabilugan a iglesia mititipun yang makapamisan at ing balang metung magsalita ya king miyayaliwang amanu, at lungub ya ing karaniwan a tau o ing e talasalpantaya, e na wari sabian king sira kayu ngan a buntuk?

²⁴ Oneng nung ipanaral da ring sabla ing amanu na ning Dios, at lungub ya ing e talasalpantaya o ing karaniwan a tau, matagkil ya kapanamdaman at sumisi ya king kasalanan na king kapamilatan na ning daramdaman na;

²⁵ mabalu la ding lihim nang isipan. Inya duku ya at samba king Dios at malaus ipasiag na, Tune ing Dios atyu libutad yu!

²⁶ Kapatad, nanu ing buri kung sabian? Neng mititipun kayu ban samba, ing metung magkanta ya, ing aliwa turu ya, ing aliwa sabian na ing bage ibat king Dios, ing aliwa magsalita ya king aliwang amanu, at ing aliwa naman ipalino na ing kabaldugan na ning amanung iti. Ing sablang bage kailangan mararapat king ikatibe na ning iglesia.

²⁷ Nung atin mang magsalita king miyayaliwang amanu, managyu na la ding adua o atlu katau at liwas-liwas lang magsalita at ing aliwa naman ipalino na la ding kabaldugan da ring amanu.

²⁸ Nung alang makapalino, e ne kailangan magsalita king aliwang amanu ing ninuman, nune magsalita niang dili na king Dios.

²⁹ Ding adua o atlu kataung magsalita king amanu na ning Dios manaral la samantalang ding aliwa naman surian da ing panaral da.

³⁰ Nung ing metung karing makalukluk tanggap yang amanung ibat king Dios, kailangan yang tuknang itang manaral.

³¹ Ikayung sabla malyari kayu ngang manaral king amanu na ning Dios, kailangan liwas-liwas kayu ban ding sabla mabiasa la at mipasiknangan a lub.

³² Ing kagiwan king pamagsalita king amanu na ning Dios mangailangan disiplina;

³³ uling ing Dios e ne Dios ning kaguluan nune Dios ne ning kapayapan. Antimo ing kaugalian da ring sablang taung bibilug karing iglesia na ning Dios,

³⁴ kailangan lang manahimik ding babai kilub ning iglesia; e makapaintulut karela ing magsalita, antimo ing sasabian na ning Batas.

³⁵ Nung atin lang buring abalu, ikutang da namu karing sarili dang asawa karas da bale. Uling metung a bage makarine para king babai ing magsalita king kapulungan na ning iglesia.

³⁶ Pota galang isipan yu king ibat kekayu ing amanu na ning Dios o ikayu mung bukud ing tinanggap kanite?

³⁷ Nung ing ninuman isipan nang tubud ne ning Dios o tinanggap yang regalung espiritual, kailangan nang paki-intindian king ing susulat ku kekayu utus a ibat king Ginu.

³⁸ Ing ninumang e munie pansin kaniti, e yu nia naman papansinan.

³⁹ Inya, kapatad, pakikuanan yung makapanaral king amanu na ning Dios, oneng e yu la babawalan ding magsalita king miyayaliwang amanu.

⁴⁰ Ing sablang bage kailangan marapat ustu at king kaayusan.

15

¹ Kapatad, ngeni buri kung ipaganaka kekayu ing Mayap a Balita a penaral ku kekayu a kekayu namang tinggap, at ngeni katatalakaran nang matibe ning kasalpantayanan yu.

² Ita ya ing Mayap a Balita, ing aral a penaral ku kekayu. Iligtas na kayu ning Mayap a Balita, nung manatili kayung sasalpantaya, nung ali, muling alang kabaldugan ing pamanialpantaya yu.

³ Linipat ku kekayu ing kanakung tinggap a binang maulaga: i Cristo mete ya para king kasalanan tamu, antimo ing mababasa karing Kasulatan;

⁴ king mikutkut ya at sinubling mebie king katlung aldo; antimo ing mababasa king Kasulatan;

⁵ king pepakit ya kang Pedro at kaybat karing labing aduang apostol.

⁶ Pepakit ya namang makapamisan karing maygit limang dalan a alagad; angga ngeni mabie la pa ding dakal, at mete na la ding mapilan.

⁷ Pepakit ya kang Santiago at kaybat karing sablang apostol.

⁸ King katataulian, pepakit ya naman kanaku agyamang aku makayaliwa ku pangabait, nung wari sa, mibait kung e oras.

⁹ Uling aku ing malating dili karing sablang apostol. E ku man karapatdapat mayaus apostol uling gilu ke ing iglesia ning Dios.

¹⁰ Oneng king kapamilatan na ning grasya ning Dios apostol ku ngeni, at ing grasya a binie na kanaku e mayalang kabaldugan. Uling megobra kung maygit kesa karing aliwang apostol; ita e ku sariling dapat nune ing grasya na ning Dios ya ing megobrang kayabe ku.

¹¹ Inya, ibat man kanaku o karing aliwa, iti ya ing panaral mi ngan, at iti ya naman ing paniwalan yu.

¹² Ngeni, anti na ning ing kekaming panaral ya ing Cristo a sinubling mebie, makananu rang asabi ding mapilan kekayu king ding mete e la subling mie?

¹³ Nung iti katutuan, mangabaldugan king i Cristo e ya sinubling mebie,

¹⁴ at nung i Cristo e ya sinubling mebie alang kwenta ing kekaming ipanaral at alang kwenta ing paniwalan yu.

¹⁵ Maygit kaniti, mayakit king maglaram kami tungkul king Dios, uling sinabi mi king pepasublian neng mebie i Cristo, oneng e ne pala pepasublian mebie, nung katutuan king ding mete e la mipasublian mie.

¹⁶ Uling nung ding mete e la subling mie, i Cristo man e ya sinubling mebie.

¹⁷ At nung i Cristo e ya sinubling mebie, ing kasalpantayanan yu alang kabaldugan, at atyu kayu pa king pamikasala.

¹⁸ Mangabaldugan munaman king ding meniwala kang Cristo at mete na e la miligtas.

¹⁹ Nung ing kekatamung kapanayan kang Cristo para king bie iti, itamu ding taung dapat kalunusan dili keti king yatu.

²⁰ Oneng ing katutuan sinubli yang mebie i Cristo, at ya ing katunayan king ding mete subli la namang mie.

²¹ Uling nung makananung king kapamilatan na ning metung a tau dinatang ing kamatayan, king makanyan munamang paralan ing pamaniubling mie datang king kapamilatan na ning metung a tau.

²² Uling king pangayabe da ring tau kang Adan mete la, king makanyan munamang paralan subli lang mie ding tau uli na ning pangayabe da kang Cristo.

²³ Oneng ing balang metung king sarili nang kabilian: i Cristo, ing mumuna karing sabla; kaybat detang makayabe kang Cristo, king oras ning paniatang na.

²⁴ Kaybat na nita, datang na ing kawakasan at sakupan na lang Cristo ding sablang mag-ari, manungkulan, at maki-kayupayan, at ibie ne ing Kayarian king Dios a Ibpa.

²⁵ Uling kailangan yang sumakup i Cristo anggang e na la asambut ning Dios ding sablang kalaban na at ibili lalam nang upaya.

²⁶ Ing katataulian a kalaban a sambutan na ya ing kamatayan.

²⁷ Uling ing kasulatan sasabian na, Binili na la ning Dios ding sablang bage lalam na ning upaya na. Wa, king amanung sablang bage malino king e ya kayabe ing Dios a mibili karing sablang bage lalam nang upayang Cristo.

²⁸ At potang ding sablang bage mibili na la lalam nang pamaniakup Cristo, ing Anak mismu kanita ibili ne ing sarili na lalam nang upaya ning Dios a mibili king sabla lalam nang upaya, at ing Dios ya ing lubus mag-ari karing sabla.

²⁹ Ngeni, nanu ing maging kabilian da retang pabinyag para karing mete? Nanu ing karelang panayan? Nung tutu pin king ding mete e la subling mie, obat pepabinyag la pa alang-alang karing mete?

³⁰ At ikami, obat makapanganib ke bie balang oras?

³¹ Kapatad, pakiarapan ku aldo-aldo ing kamatayan! Ing dangalan ku a atyu kekayu king uli na ning pangayabe tamu king bie nang Cristo Jesus, ya ing mipapasiag kaniti.

³² Nung alang-alang mu king tau inya pekilabanan ku la ding mabagsik a animal keni king Efeso, nanu ing maging pakinabang ku? Nung ding mete e la mipasublian mie, tukian ta nia itang kasebian, Mangan tamu at minum, uling bukas mate tamu.

³³ E kayu pailinlang: Ding e mayap a kayabe ila ding sisira karing mayap a panugali.

³⁴ Mibalak na kayung masalese at tuknang kayung darapat kasalanan. Sasabian ku iti ba kayung dumine uling ding mapilan kekayu e re balu ing Dios.

³⁵ Mekad ikutang na ning metung, Makananu lang subling mie ding mete? Nanu ya uri ing karelang katawan?

³⁶ Mangmang! Neng tatanam kang bini king gabun e ya tumubu anggang e ya pa mate.

³⁷ At itang tenam mu king gabun aliwa ya ing tanaman a maragul na, nune ing bini, antimo ing binutil trigu o aliwang binutil.

³⁸ Ing Dios ya ing patubu king katawan na ning bining mitanam at iti king paralan na, ing balang bini king sariling katawan na.

³⁹ At e paraparehu ing laman da ring sablang mabibie; aliwa ing laman da ring tau, aliwa ing karing animal, aliwa ing karing ayup at ding karing asan.

⁴⁰ At ating katawan a atyu banua, at katawan a atyu keti king yatu; atin lang sariling leguan ding katawan a atyu keti king yatu.

⁴¹ Atin yang sariling leguan ing aldo; makayaliwa ing king bulan at ing karing batuin; agyang ding batuin e la paraparehu leguan.

⁴² Makanyan ing mapalyari potang subli lang mie ding mete. Potang mikutkut ya ing katawan, iti malaso ya; potang subli yang mie ala neng kamatayan.

⁴³ Tutu yang matsura at maina neng kukutkut ta ya; potang subli yang mie maging malagu ya at masikan.

⁴⁴ Neng kukutkut ta ya, katawan yang pisikal; potang subli yang mie maging katawan yang espiritual. Wa, nung ating katawan pisikal, atin munamang katawan espiritual.

⁴⁵ Uling ing kasulatan sasabian na, I Adan, ing minunang tau, milyari yang mabie lelangan, oneng ing tauling Adan, Espiritu yang babie bie.

⁴⁶ Aliwa ing espiritual ing mumuna, nune ing pisikal, at kaybat ing espiritual.

⁴⁷ Melalang ya ing minunang Adan king alikabuk na ning yatu; ing kaduang Adan ibat ne man king banua.

⁴⁸ Detang king yatu kalupa na la ning melalang king kapamilatan na ning gabun; detang king banua kalupa na la nitang ibat king banua.

⁴⁹ Antimo nung makananu na ka tamung kalupa ning taung megawa king gabun makanyan tamu munamang maging kalupa na ning menibatan king banua.

⁵⁰ Kapatad, iti ya ing buri kung sabian: e ya malyaring mirakayanan ing laman at daya king Kayarian ning Dios, at itang katawan a ibat king gabun e na malyaring tanggapan ing bie alang angga.

⁵¹ Makiramdam kayu, oyni ing lihim: e tamu ngan mate oneng manaliwa tamu

⁵² king saguli mung penandit, at king tiup ning katataulian a trumpeta. Kabud tumiup ya ing trumpeta, subli lang mie ding mete at e na la mate kapilan man at itamu ngan manaliwa tamu.

⁵³ Uling ing katawan a malalaso kailangan yang miblas king e malalaso, at ing katawan a ating kamatayan kailangan yang miblas king alang kamatayan.

⁵⁴ At potang miblas ya ing katawan a malalaso ketang e malalaso, at miyalilan ya ing ating kamatayan ketang ala nang kamatayan, matupad ne kanita ing kasulatan: Mesintang ne ing kamatayan; ing tagumpe ganap na!

⁵⁵ O Kamatayan, nukarin ing kekang tagumpe? O Kamatayan, nukarin ing kekang upayang manyira?

⁵⁶ Ing kasalanan ya ing upaya nang manyira ning kamatayan, at king Batas na kakuanan ning kasalanan ing upaya na.

⁵⁷ Inya pasalamatan ta ya ing Dios king tagumpe a babie na kekatamu king kapamilatan na ning Ginu tamung Jesu-Cristo!

⁵⁸ Inya, pakamalan kung kapatad, magpakatatag kayu at e kayu paisira lub. Magobra kayung alang patugut para king Ginu, uling balu yu king ing kasuyuan yu king Ginu e mayalang kabaldugan.

16

¹ Ngeni, ing tungkul naman king ambagan para saupan la ding kapatad tamu king iglesia karin Judea. Kailangan yung daptan itang minungkahi kung daptan da ring iglesia karin Galacia.

² King mumunang aldo na ning paruminggu, ing balang metung kekayu mikawani yang alaga ketang penakitan na, at tipunan na la ban nung datang ku e na kayu mika ambagan pa.

³ Kabud dinatang na ku ken, itubud ku la ding kapatad kayabe na ning sulat ku a pakilala king ila ding pinili yung manatad king saup yu karing kapatad karin Jerusalem.

⁴ Nung kailangan ing aku ing munta, ila ding maging kayabe kung lumakad.

⁵ Taglus ku ken kaybat ku king Macedonia uling karin ku dumalan.

⁶ Malyari kung manatiling malambat ken o mapalyaring ken ku ilabas ing panaun na ning dimla ban asaupan yu ku king isanu mang lugal a tutuki kung puntalan.

⁷ Uling king pamandalan ku ken, e ku buri ing saguli da kayu mung akit. Buri ku ing akayabe da kayu king makabang panaun, nung ipaintulut na ning Ginu.

⁸ Oneng babalakan kung manatili keni king Efeso angga king aldo ning Pentecoste.

⁹ Ating dakal a oportunidad keni ban makapagobra kung masalese agyamang dakal la ding kalaban.

¹⁰ Nung datang ya ken i Timoteo, siguraduan yung iyapus neng anting bale na ing lugal yu, uling ya man magobra yang anti aku para king Ginu.

¹¹ E ye lalawan mababa, nune saupan ye ban makapagbalik yang mitmung kapayapan keni; uling aku ampon ding kapatad keni panenayan mi yang datang.

¹² Ngeni, ing tungkul naman king kapatad a Apolos. Pakisabian keng mayap ban dalawan na kayung kayabe da ring aliwang kapatad. Oneng isipan na king e pa oras ing dumalo ya ken. Dalawan na kayu mu rin potang mirinan yang oportunidad.

¹³ Alistu kayu, tatagan yu ing kekayung kasalpantayanan; e kayu tatakut at e yu painan ing lub yu.

¹⁴ Daptan yu ing sablang obra yu king mitmung lugud.

¹⁵ Balu ye i Estefanas at ing pamilya na; ila ding minunang mekonberti king kasalpantayanan Cristianu karin Acaya, at binie ra ing karelang sarili king pamanuyu karing pinili na ning Dios. Kapatad, ipakisabi kung mayap

¹⁶ king pasakup kayu sana karing anti kareting tau at king ninumang magobra at susuyung kayabe ra.

¹⁷ Matula ku king paniatang da ri Estefanas, Fortunato, at Acaico, uling ilang mengatmu king kailangan yung gawan.

¹⁸ At peligayan da ku at pepasaya antimo ing depat da kekayu. Kailangan lang pakundanganan ding taung anti kareti.

¹⁹ Pakomusta da kayu ding iglesia king probinsia na ning Asia; payabut da ri Aquila at Priscila at ding kapatad a mipupulung king pibalebale ra ing masayang komusta kekayung sabla.

²⁰ Ding sablang kapatad keni pakomusta da kayu naman. Mipapagmananu kayu antimong mikakapatad kang Cristo.

²¹ Aku i Pablo, ing mismung susulat kaniti: Komusta kayu ngan ken.

²² Misumpa ya ing ninumang e lulugud king Ginu! Marana tha, Datang na ka, O Ginu mi!

²³ Ing grasya na ning Ginung Jesus manatili kekayu.

²⁴ Ipayabut ku ngan kekayu ing lugud ku king lagyu nang Cristo Jesus.