1

¹ Ibat ya iting sulat kang Pablo, ing talasuyu nang Cristo Jesus at meyaus maging apostol at mepili ban manaral king Mayap a Balita ning Dios.

² Ing Mayap a Balita ya ing malambat na nang pengaku ning Dios king kapamilatan da ring propeta, antimo ing masasabi karing Banal a Kasulatan.

³ Iting Mayap a Balita tungkul ya king Anak na, i Jesu-Cristo a Ginu tamu; agpang king pangatau na, mibait ya king lahi nang David;

⁴ agpang king Espiritu na ning katutubu nang kabanalan, mekilala yang mitmung kayupayan bilang Anak ning Dios inyang sinubli yang mie ibat karing mete.

⁵ King kapamilatan na, binie na kanaku ning Dios ing pribilehiung maging apostol ban king lagyu nang Cristo idala la ding sablang bansa king pamaniwala at pamamintu keya.

⁶ Karing mesabing bansa kayabe kayu naman, ikayung atyu Roma a inaus na ning Dios ban miyabe kayu kang Jesu-Cristo.

⁷ Kekayu ngan sablang atyu Roma, kekayung pakamalan na ning Dios at inaus nang maging sarili nang balen: Ibie na sa kekayu ning Dios a Ibpa tamu at ning Ginung Jesu-Cristo ing grasya at kapayapan.

⁸ Muna, king kapamilatan nang Jesu-Cristo, pasalamat ku king Dios para kekayung sabla, uling kabalitan ing kasalpantayanan yu king mabilug a yatu.

⁹ Balu na ning Dios a susuyuan ku king kabilugan na ning pusu ku king pamanaral king Mayap a Balita tungkul king Anak na, king parati da kayung ipanalangin.

¹⁰ Balang manalangin ku, aduan ku king Dios ing paintulut na kanaku ing makapagbisita ku kekayu ken.

¹¹ Tutu kung maung makikit kekayu ba ra kayung dakayanan king grasyang espiritual a makaibie sikanan kekayu.

¹² Ngaku wari, ba tamung makapisaup-saupan; ikayu asaupan yu ku king kasalpantayanan yu, at aku naman asaupan da kayu king kanaku.

¹³ Kapatad, buri kung abalu yu king mekatapilan na ku migsadiang magbisita kekayu, oneng parating ating babie sagabal kanaku [inya angga ngeni e ku pa mibalaus]. Bisa ku namang makapanagkat kekayu, antimo ing depat ku karing aliwang bansa.

¹⁴ Uling atin kung katungkulan manaral karing Griego at karing Barbaro, karing megaral at karing mangmang.

¹⁵ Uli na niti, tutu kung pagnasan ing apanaral ke ing Mayap a Balita kekayu munamang atyu Roma.

¹⁶ E ke pikakarine ing Mayap a Balita, uling iti ya ing upaya nang magligtas ning Dios karing sablang maniwala, muna karing Judio at antimu rin karing paganu.

¹⁷ Uling pakilala na ning Mayap a Balita nung makananu nang patawaran ning Dios ing kasalanan ding tau king kapamilatan na ning kasalpantayanan da at iti maging ganap king kapamilatan na naman ning kasalpantayanan da. Antimo ing sasabian na ning kasulatan, Ing taung mipatawaran king kasalanan king kapamilatan na ning kasalpantayanan na king Dios mie ya king kapamilatan na ning kasalpantayanan.

¹⁸ Mipakilalang manibat banua ing milalablab nang mua ning Dios karing sablang pamikasala ra at ing alang kabanalan ding tau a babie sagabal king pangakilala na ning katutuan.

¹⁹ Parusan na la ning Dios uling malino karela ing malyari dang abalu tungkul king Dios. Ing Dios mismu ya ing pepakilala kaniti karela.

²⁰ Manibat na kanitang lelangan ne ning Dios ing yatu, ing miyayaliwa nang kayapan a e mayayakit, ing alang angga nang upaya at kadiosan malino mipakilala king kapamilatan da ring bage a gewa na. Inya ala lang bitasang asangkan!

²¹ Balu re ing Dios, oneng e ra babie itang kagalangan a mangaintulid king Dios at e re pasalamatan. Nune meging alang kabaldugan ing karelang pamagmatulid at meralumdum la ding kaisipan dang e makaintindi.

²² Sasabian da king biasa la, oneng mistula lang mangmang.

²³ Lugal king samban de ing Dios a alang kamatayan, sasamba la karing larawan da ring taung ating kamatayan o ding larawan da ring ayup o ding animal o ding lelangan a gagapang.

²⁴ Uli na niti, pepaburen na lang mibabad ning Dios king karinatan na ning pusu ra angga king milako la dangalan.

²⁵ Pakilibe ra ing katutuan ning Dios king kalaraman; sasamba la at susuyu karing lelangan na ning Dios lugal king samba la at sumuyu king Miglalang a nuan king kapilan pa man. Amen.

²⁶ Uli na ning dapat dang anti kaniti, pepaburen na la ning Dios king marawak dang nasa. Inalilan da ring babai ing natural a pamiyugnayan karing lalaki, at makiugnayan la karing kalupa rang babai.

²⁷ Pepainggulut la naman ding lalaki king natural a relasyun da karing babai, at pepalablab da ing manong nang pamitan ning karelang katawan karing kalupa rang lalaki. Darapat lang kanawangan ding lalaki karing kalupa rang lalaki, inya ila mismu tanggapan da ing parusang mangaintulid king karelang e mayap a dapat.

²⁸ At uling e la bisang kilala king Dios, pepaburen na la ning Dios king e mayap dang pamisip angga na ketang daraptan da ing e ra sukat daptan.

²⁹ Mitmu la king sablang uri ning dewakan, king kasiran, king kasakiman at marawak a ugali; mitmu lang kapangaririan, pamakamate, pamipate, kapamiraitnan, at kapanyiran kalupang tau. Meging maburi la king indredus,

³⁰ king pamanyirang puri; kesaman de ing Dios, meging ala lang galang karing aliwa, mapagmatas, mayabang; e la patugut mimisip dewakan; mapaglaban la karing karelang pengari;

³¹ ala lang konsiensia, taksil la, alang pusu, at alang lunus karing kalupa rang tau.

³² Balu ra ing sasabian na ning kautusan na ning Dios king ding taung makanyan kailangan lang mate. Makanyan man, e pa makagyu ing daraptan da la deting bage, nune pamayapan da la pa ding aliwang darapat kareti.

2

¹ Inya, kakaluguran ku, ala yang bitasang matulid ing ninuman kekayu a matul karing aliwa. Uling king pamanatul mu karing aliwa atulan mu na pati na ing kekang sarili uling ing dapat mu alang pangayaliwa ketang dapat na.

² Balu tamu king e ya magkamali ing Dios potang atulan na la ding taung darapat karing anti kareting bage.

³ Oneng, ika kakaluguran, daraptan mu la naman ding bage atulan mu karing aliwa! Isipan mu mo king miligtas na ka man king kayatulan na ning Dios?

⁴ Pota galang payalan mung ulaga ing maragul nang ganaka, pamanupaya, at kapibabatan? E mu wari balu king maganaka ya ing Dios uling pakikuanan na lang apabalik a lub?

⁵ Oneng uli na ning kesiasan mung buntuk at ning pusu mung e biasang sumisi, lalu mung bubuntun king kekang sarili ing maragul a kaparusan a tanggapan mu king Aldo a mibugnus ing milalablab nang mua ning Dios at mipakilala ing matulid nang kayatulan.

⁶ Uling ablasan ne ning Dios ing balang tau agpang king dapat na.

⁷ Ating taung e patugut darapat mayap, manintun ligaya, dangal at bie alang angga; ibie na kareti ning Dios ing bie alang angga.

⁸ Ding aliwang tau naman maimut la at tatanggian da ing matulid, at tutukian da ing baluktut; karela na ibugnus ning Dios ing milalablab nang mua at bigsikan.

⁹ Mika kasakitan at pagsalbat karing taung darapat marawak, muna karing Judio at antimu rin karing paganu.

¹⁰ Oneng ibie na ning Dios ing ligaya, dangal, at kapayapan karing sablang darapat king mayap, muna karing Judio at antimu rin karing paganu.

¹¹ Uling e ya mangabiran ing Dios.

¹² E la makasakup ding paganu king Kautusan nang Moises; nung mikasala la, miyatulan la e agpang king Kautusan a iti. Makasakup la ding Judio king Kautusan; nung mikasala la, miyatulan la agpang king Kautusan.

¹³ Uling aliwa ding makiramdam king Kautusan ding kilalanan nang matulid ning Dios nune ding tutupad kaniti.

¹⁴ E na la sasakupan ning Kautusan ding paganu, oneng agpang king katutubu rang kaugalian tutupad la king aduan na ning Kautusan, iti maging metung yang kautusan para karela agyamang alalu king lalam nang upaya ning Kautusan.

¹⁵ Pakilala na ning karelang panugali king makasulat ya ing Kautusan karing pusu ra. Ing karela munamang konsiensia ya ing patutu kaniti uling maralas na lang liligaligan ning karelang konsiensia, at neng misan pamayapan na ning karelang konsiensia ing dapat da.

¹⁶ Inya, agpang king Mayap a Balita a ipanaral ku, makanyan ing mapalyari king Aldo a atulan na ning Dios king kapamilatan nang Jesu-Cristo ing lihim dang isipan ding tau.

¹⁷ Oneng ngamung sumabi king ika Judio ka at magdipendi ka king Kautusan, at pagmaragul mu ing kaugnayan mu king Dios.

¹⁸ Balu mu ing kaburian na at akikilala mu ing mayap uling iti tuturu na keka ning Kautusan;

¹⁹ asisiguru mu king talataid na ka ning bulag, king metung kang sulu libutad ning karalumduman,

²⁰ king metung kang talaturu karing mangmang, at talaturu da ring anak. Aintindian mu king atyu keka ing sablang beluan at katutuan uli na ning Kautusan.

²¹ Tuturu mu la ding aliwa, baket e mu turuanan ing kekang sarili? Ipanaral mu, E ka manako, oneng ika manako ka?

²² Ngamu, E ka makipangalugud, oneng ika makipangalugud ka? Kasusuklaman mu la ding idolo, oneng lulub kang manako karing templo?

²³ Pagmaragul mu king atyu keka ing kautusan, oneng lalapastanganan mu ne man ing Dios king pamaglabag mu king Kautusan na?

²⁴ Ing kasulatan sasabian na, King uli yu, ikayung Judio, insultuan de ring paganu ing lagyu na ning Dios.

²⁵ Nung tutuparan me ing Kautusan, miririnan ulaga ing kekang pangasirkunsisyun; nung lalabagan mia mu rin ing Kautusan, mayap pang e na ka bitasang mesirkunsisyun.

²⁶ Nung daraptan na ning metung a paganu a e mesirkunsisyun itang yuyutus na ning Kautusan, e ne wari kilalanan ning Dios bilang metung a mesirkunsisyun?

²⁷ Inya ikayung Judio atulan da kayu ding paganu, uling lalabagan ye ing Kautusan agyamang misulat ya para kekayu at mesirkunsisyun kayu, kabang ila tutuparan da ing yuyutus na ning Kautusan agyamang e la mesirkunsisyun king laman.

²⁸ Ninu ing tune Judio, ninu ing tune mesirkunsisyun? Aliwa mu kabud ing mibait karing pengaring Judio at mesirkunsisyun king katawan.

²⁹ Ing tune Judio ya itang taung mibayu pusu at pilubluban. Ngana wari, itang mesirkunsisyun kilub, ing sirkunsisyun a pasari na ning Espiritu ning Dios, e ning Kautusan a makasulat king papil. Iti ya ing taung tatanggap kapurian king Dios at e karing tau.

3

¹ Inya nanu ing igitan na ning Judio king paganu? Nanu ing ulaga ning pangasirkunsisyun?

² Dakal a tutu! Mumunang dili, karing Judio na peniwala ning Dios ing amanu na.

³ O nu mong ding aliwa karela e la meging tapat king Dios? E na buring sabian niti king e ne maging tapat ing Dios king pengaku na!

⁴ Kapilan man e malyari iti! Manatili yang tapat ing Dios agyang maglaram la ding sablang tau, antimo ing masasabi king kasulatan, Kailangan kang mayakit matulid king kekang sasabian; sukat kang magtagumpe potang mibili ka king kapagsubukan.

⁵ Ngeni nung uli na ning kekatamung e ustung dapat mipakilala ing makatuliran nang dapat ning Dios, nanu ing asabi tamu? Asabi tamu kaya king ala yang hustisia ing Dios uling paparusan na katamo? (Makanyan lang mangatuliran deng tau.)

⁶ Kapilan man e tamu asabi ita! Nung e ya makatuliran ing Dios, makananu neng ayatulan ing yatu?

⁷ Oneng ngeni nung king kanakung pamaglaram lalu namang mipakilala ing katutuan na ning Dios king ikaligaya na, obat sukat ku pang miyatulan antimong makasalanan?

⁸ Nung makanyan, obat e tamu pa sabian, Tara, dapat tamung e mayap ban dakal ing mayap? Makanyan kanu ing tuturu mi ngarang manyira kekami ding aliwang tau! Miparusan la deti antimo ing karampatan karela.

⁹ Ngeni, itamu kayang Judio aigitan ta la ding paganu? Bitasang ali! Pepakilala ku na king ding Judio at ding paganu paraparehu la ngang atyu lalam nang upaya ning kasalanan.

¹⁰ Antimo ing sasabian ning Kasulatan: Alang taung banal, ala metung man;

¹¹ alang makakilala ni alang manintun king Dios.

¹² Pepainggulut la ding sablang tau king Dios; magkamali la ngan; alang darapat mayap, ala metung man.

¹³ Mengari la ding asbuk da king pantiun a makabuklat; mamagus karing dila ra ing kalaraman, ding labi ra kamandagan lang anti ding karing ubingan;

¹⁴ puru panagkas at peitan ing karelang sasabian.

¹⁵ Ala lang kapikakunuan makapanasakit at makamate;

¹⁶ king balang delanan da, milalakuan lang kasiran at kasakitan.

¹⁷ Lubus na lang milisia king dalan ning kapayapan,

¹⁸ ni ing Dios e re bitasang balung pitakutan.

¹⁹ Ngeni balu tamu king ing nanumang makalaman king Kautusan mangaintulid karing sasakupan na ning Kautusan ban ala lang dalan maniangkan ding sabla, at ban ing meto yatu mipailalam ya king kayatulan na ning Dios.

²⁰ Uling alang taung mipatawaran a kasalanan king arapan na ning Dios king kapamilatan na ning pamanupad na king Kautusan; ing parasan na ning Kautusan ya ing mipakilala king mikasala ya ing tau.

²¹ Oneng ngeni mipakilala na ing paralan a gagamitan na ning Dios ba na lang ilapit keya ding tau at iting paralan makayaliwa ya king Kautusan agyang minie yang patutu ing Kautusan ampon ding propeta tungkul kaniti.

²² Lalapit na la ning Dios ding tau king sarili na king kapamilatan na ning kasalpantayanan da kang Jesu-Cristo. Daraptan na iti ning Dios karing sablang taung sasalpantaya kang Cristo. Paraparehu la ngan

²³ ding sablang tau uling mikasala la ngan, at mirayu la king Dios a Talapagligtas da.

²⁴ Oneng king grasya a matula nang binie ning Dios, i Cristo gewa na la ngan malaya ding tau at king kapamilatan nang Cristo Jesus, ding sabla ikua ra ngan milapit king Dios.

²⁵ Telaga ne ning Dios bilang ain a kapamayaran ban king pamipatulu na king daya na mipatawaran la kasalanan ding tau king kapamilatan na ning pamanialpantaya ra keya. Depat na ning Dios iti ban ipakilala na ing kabanalan na. Kanitang minuna pibabata na la at e na la pinsinan ding kasalanan da ring tau;

²⁶ oneng ngening kasalukuyan, papansinan na la ding kasalanan da ring tau ba nang pakilala ing kabanalan na. Makanyan nang papakit ning Dios king banal ya, at mipatawaran ya kasalanan ing balang tau king pamanialpantaya na kang Jesus.

²⁷ Inya nanu mo ing malyari tamung ipagparangalan? Ala! At baket pin makanyan? Uli na ning mamintu tamu king Kautusan? Ali, nune ba tamung salpantaya.

²⁸ Uling paniwalan tamu king pawalan neng kasalanan ning Dios ing tau king kapamilatan na ning kasalpantayanan, at e king pamanupad na king yuyutus na ning Kautusan.

²⁹ Pota galang naman ing Dios para karing Judio ya mo? E ria naman kaya Dios ding paganu? Wa, Dios dia naman ding paganu,

³⁰ uling metung ya mu ing Dios. At ilapit na la king sarili na ding Judio king kapamilatan na ning kasalpantayanan da, at makanyan munaman ing daptan na karing paganu.

³¹ Nung makanyan malyari ta ne kayang payalan ulaga ing Kautusan uli na ning kasalpantayanan a ite? Ali! E makanyan! Nune tutuparan ta ya ing Kautusan.

4

¹ Nanung malyari tamung asabi tungkul kang Abraham a makatua na ning kekatamung lahi?

² Nung mipawalan ya kasalanan i Abraham uli na ning depat na atin yang apagmaragul. Oneng ala yang apagmaragul arapan na ning Dios;

³ uling ing kasulatan sasabian na, Meniwala ya i Abraham king Dios, at uli na ning pamaniwala na kilala neng banal ning Dios.

⁴ Tatanggap yang upa ing taung magobra; e la regalu ding upa na nune sueldu lang mangaintulid keya.

⁵ Oneng ing taung manalig king kasalpantayanan at e king dapat na, at maniwala ya king Dios a makapamatawad karing makasalanan, kanita ing kasalpantayanan na ya ing kikilalanan na ning Dios bilang kapatawaran keya king arapan na.

⁶ Iti ya ing amanuan nang David kanitang migsalita ya tungkul king ligaya na ning taung tatanggapan na ning Dios bilang mipatawaran, e uli na ning nanumang depat nang mayap. Ngana,

⁷ Mapalad ya ing taung pepatawaran na ning Dios king keyang kamalian, at detang leko na na kasalanan!

⁸ Mapalad ya ing taung e na na singilan ning Ginu karing kasalanan na!

⁹ Bukud ya kayang kareng Judio iting sinabi nang David? Ali! Mangaintulid ya naman kareng paganu. Abanggit ta ne ing sasabian na ning kasulatan, Meniwala ya i Abraham king Dios at uli na ning kasalpantayanan na tinggap neng banal ning Dios.

¹⁰ Kapilan milyari iti? Bayu o kaybat nang mesirkunsisyun Abraham? Bayu; e kaybat.

¹¹ Bandang tauli ya pa mu mesirkunsisyun at ing pangasirkunsisyun na metung yang palatandanan a patutu king ing kasalpantayanan na king Dios ya ing sangkan nung inya tinggap neng banal ning Dios kanitang e ya pa mesirkunsisyun. Makanyan yang malilyaring tata rang espiritual i Abraham ding sablang maniwala king Dios. At tatanggapan na lang banal ning Dios agyamang e la mesirkunsisyun.

¹² E ku lalako king i Abraham tata ria naman ding mesirkunsisyun. Oneng e uli na ning pangasirkunsisyun da, nune uli na ning mabibie la agpang king kasalpantayanan a kalupa na ning kang Abraham kanita pang bayu ya mesirkunsisyun.

¹³ Pengaku na ning Dios kang Abraham at karing lahi na king ing yatu maging bandi ne. Miyabie ya iting pangaku e uli na ning pamamintu nang Abraham king Kautusan, nune uli na ning meniwala ya at tinggap neng banal ning Dios.

¹⁴ Uling nung ing pangaku na ning Dios miyabie mu karetang mamintu king Kautusan, mangabaldugan king alang ulaga ing pamanialpantaya na ning tau, at alang ulaga ing pangaku na ning Dios.

¹⁵ Gigisingan na mu ning Kautusan ing milalablab nang mua ning Dios; nung nukarin alang kautusan, ala munamang pamaglabag king kautusan.

¹⁶ Inya, makatalakad ing pangaku king kasalpantayanan ban makilala king ing pangaku metung yang grasya a babie nang alang bayad ning Dios, at makasadia ya para karing sablang lahi nang Abraham; e mu karelang mamintu king Kautusan nune pati na karetang ating kasalpantayanan a kalupa na ning kang Abraham. Tata ta ya ngan i Abraham;

¹⁷ antimo ing sasabian na ning kasulatan, Pepalyarian da kang tata ra ding dakal a bansa. Wa, tata ta ya ngan i Abraham king arapan na ning Dios nung kenu na binili ing kasalpantayanan na, ing Dios a pasubling mie karing mete at mumutus king pangalto da ring bage a e sadiang makalto.

¹⁸ Agyamang balamu alang kapalyarian itang panenayan nang Abraham, menaya ya pa mu rin at meniwala, at king anti kanitang paralan milyari yang tata da ring dakal a bansa antimo ing mipangaku keya kanitang misan: Ding lahi mu maging kasing dakal da la ring batuin.

¹⁹ Halus dinalan neng banua tua kanita; oneng e bitasang kinupas ing kasalpantayanan na inyang aisip na king halus gugupu ne, at king i Sarah ala ne king idad a malyari ya pang mikayanak.

²⁰ Ditak man e ya milako kasalpantayanan i Abraham ni e ya migduda tungkul king pengaku na ning Dios keya; mirinan yang tetagan a lub king kasalpantayanan na at pepaligayan ne ing Dios.

²¹ Lubus ya kapaniwalan king agyu nang tuparan ning Dios ing pengaku na.

²² Uli na niti, king kapamilatan na ning kasalpantayanan na metanggap yang banal king Dios.

²³ Ding amanung metanggap yang banal king Dios e la misulat para keya mung bukud.

²⁴ Misulat la naman para kekatamung matanggap bilang banal king Dios uli na ning pamaniwala tamu king ya ing pepasubling mebie kang Jesus a Ginu tamu,

²⁵ i Jesus a pete ra uli da ring kekatamung kasalanan, at mipasublian mie ba tamung mipawalan kasalanan.

5

¹ Inya ngening mipatawaran na ing kasalanan tamu king kapamilatan na ning kasalpantayanan, mika kapayapan tamu king Dios king kapamilatan na ning Ginu tamung Jesu-Cristo.

² King kapamilatan na ning kasalpantayanan tamu peparas nang Jesus kekatamu iting grasyang tatanggapan tamu ngening kasalukuyan. Inya ikakatula tamu ing kapanayan a atyu kekatamu, kapanayan king pangarakayanan tamu king ligaya na ning Dios!

³ Oneng aliwa mu iti ing malyari tamung ikatula. Malyari tamung tumula karing kekatamung kasakitan; balu tamu king ding kasakitan mamunga lang kapibabatan,

⁴ at ing kapibabatan mamungang tetagan; ing tetagan magdalang kapanayan,

⁵ at iti namang kapanayan e makabigu kekatamu uling tigtug na ning Dios ing lugud na karing pusu tamu king kapamilatan na ning Banal a Espiritu a babie na ning Dios kekatamu.

⁶ Uling kanitang kasalukuyan tamung alang akarapat, king panaun a tildu na ning Dios, mete ya i Cristo para karing taung makasalanan.

⁷ E mayan king ninuman ing paimate ya alang-alang king metung a taung makatuliran. Mekad para king metung a taung mayap ating bisang paisubu agyang king kamatayan.

⁸ Oneng mete ya i Cristo para kekatamu kanitang makasalanan tamu pa! At iti patunayan na king kaluguran na katamu ning Dios.

⁹ Anti na ning ngeni milapit ta na king Dios king kapamilatan na ning kamatayan nang Cristo, e kasi lalu tamung asisiguru king iligtas na katamu king mikakalabkab nang mua ning Dios!

¹⁰ Kanitang milabas meging kalaban na katamu ning Dios, oneng milapit tamu keya king kapamilatan na ning kamatayan ning Anak na. Ngening metanggap ta na king Dios, lalu tamung ayasahan ing miligtas tamu king kapamilatan na ning bie nang Cristo!

¹¹ Aliwa mu yan; magsaya tamu king Dios king kapamilatan na ning Ginu tamung Jesu-Cristo uling king kapamilatan na meging kakaluguran na katamu ning Dios.

¹² Dinatang ing kasalanan keti king yatu king kapamilatan na ning metung a tau, at ing kasalanan na migdalang kamatayan. Bilang bunga na niti, linaganap ing kamatayan king mabilug a ketawan, uling mikasala la ding sablang tau.

¹³ Atin nang kasalanan keti king yatu bayu ya pa miyabie ing Kautusan; oneng nung nu alang kautusan alang masasabing pamikasala.

¹⁴ Makanyan man manibat king panaun nang Adan angga king panaun nang Moises mig-ari ing kamatayan karing sablang tau pati na karetang e mikasala king pamaglabag king kautusan na ning Dios antimo ing pamaglabag nang Adan. I Adan larawan ne nitang metung a taung mipangakung datang.

¹⁵ Oneng e la miwawangis deting adua. Uling ing regalung kusa nang binie ning Dios e ne kalupa nitang kasalanan nang Adan. Tutu pin king mig-ari karing dakal a tau ing kamatayan uli na ning kasalanan na ning metung a tau. Oneng lalung maragul ing grasya na ning Dios at antimu rin itang regalung kusa nang binie karing dakal a tau king kapamilatan na ning grasya na ning metung a tau, i Jesu-Cristo.

¹⁶ Makayaliwa ya ing regalu na ning Dios ketang kasalanan na ning metung a tau. Kaybat nang merapat nitang metung mung kasalanan a ita, sinalisi ing kayatulan a magdalang kaparusan; oneng kaybat na ning anti kanitang dakal a pamikasala dinatang ne man ing grasyang e tamu pangaintuliran, at iti magdalang kapatawaran.

¹⁷ Wa, king kapamilatan na ning kasalanan ning metung mung tau karin megumpisa ing pamag-ari na ning kamatayan; oneng lalu namang maragul ing binunga na ning depat na ning katau, i Jesu-Cristo! Ding sablang tatanggap king maglapo nang grasya ning Dios at detang kikilalanan nang matulid mie la at makipag-ari king kapamilatan nang Cristo.

¹⁸ Inya nung ing metung a kasalanan migdalang kaparusan karing sablang tau, makanyan namang migdalang kapatawaran at bie karing sablang tau ing depat na ning katau.

¹⁹ At nung makananu lang meging makasalanan ding sabla uli na mu ning kapanialangsangan na ning metung a tau makanyan la namang mipatawaran ding sabla uli na ning kapamintuan na naman ning metung a tau.

²⁰ Miyabie ya ing Kautusan ban miragdag ing pamikasala; oneng nung kapilan merakal ing kasalanan kanita naman lalung merakal ing grasya na ning Dios.

²¹ Inya nung makananung mig-ari ing kasalanan king kapamilatan na ning kamatayan, makanyan munaman mig-ari ing grasya na ning Dios king kapamilatan na ning kapatawaran ban kamtan tamu ing bie alang angga king kapamilatan nang Jesu-Cristo a Ginu tamu.

6

¹ Nanu ngeni ing sabian tamu? King itamu manatili tamung mabibie king pamikasala ban kanita lalung dakal ing grasya na ning Dios?

² E makanyan! Mete ta na king kasalanan, inya makananu tamung manatili pang mabibie king kasalanan?

³ E wari mituru kekayu king inyang mebinyag tamu at miyabe kang Cristo Jesus mebinyag tamu at miyabe king kamatayan na?

⁴ King matulid a pangasabi, inyang mebinyag tamu mikutkut tamung abe na at mirakayanan king kamatayan na ban nung makananu yang sinubling mebie king kapamilatan na ning maligaya nang upaya ning Ibpa, makanyan tamu munamang mibiebie king panibayung bie.

⁵ Uling nung mekiabe tamu kang Cristo king kamatayan na, makanyan tamu namang miyabe king pangasubli nang mebie.

⁶ Balu tamu king ing matua tamung pangatau mipaku yang kayabe nang Cristo king krus ban siran na ing upaya na niting katawan a makasalanan, at ba tamung miligtas king panga-ipus king kasalanan.

⁷ Potang ing tau mate ya ala ne king upaya na ning kasalanan.

⁸ Nung miyabe tamu king kamatayan nang Cristo, paniwalan tamung subli tamu namang mie kalupa na.

⁹ I Cristo, antimo ing balu tamu, king pangasubli nang mie, e ne mate kapilan man; ala neng upaya keya ing kamatayan.

¹⁰ Inyang mete ya, mete ya para king kasalanan; misan mu at para king sablang panaun. At ngeni mabie ya para king Dios.

¹¹ Inya ikayu man ibilang yu nang mete para king kasalanan ing kekayung sarili, oneng mabie para king Dios king pangayabe yu kang Cristo Jesus.

¹² Inya e na sukat mag-ari ing kasalanan karing katawan yung malalaso, at e yu na sukat panusigan ing e mayap nang pamitan

¹³ ni e yu na pakasangkapan king kasalanan ing isanu mang dake na ning kekayung sarili para magamit king isanu mang e mayap a parasan. Nune sukat yung ibie ing kekayung sarili king Dios bilang taung mete na, oneng mipasublian mie at isuku yung kabilugan keya ing sarili yu ban magamit king pamaniapat king matulid.

¹⁴ E na kayu pailalam pasibayu king upaya na ning kasalanan, uling ala na kayu ngeni king lalam nang upaya ning Kautusan nune atyu kayu lalam nang upaya ning grasya ning Dios.

¹⁵ Nanu ngeni? Uli mong ala ta na king lalam nang upaya ning kautusan nune atyu tamu king lalam nang upaya ning grasya, dapat ta nang pamikasala? Ali, e makanyan!

¹⁶ Tune balu yu king neng yayampang yu king aliwa ing kekayung sarili, antimong ipus, pa-ipus kayu king taung kekayung pamintuan: pa-ipus kayu king kasalanan at iti papunta king kamatayan o pa-ipus kayu king Dios at iti papunta naman king pangapatawad da ring kasalanan.

¹⁷ Oneng salamat king Dios! Agyamang kanitang misan meging ipus na kayu ning kasalanan, memintu kayung maniaman a lub karing turu a tinggap yu.

¹⁸ Meging malaya kayu king panga-ipus yu king kasalanan ban pa-ipus kayu king kabanalan.

¹⁹ (Gagamit kung karaniwan a amanu uli na ning katutubu yung keinan.) Kanitang misan sinuku yung lubus ing kekayung sarili king karinatan at kanawangan para king nasa a marok. Ngeni naman sukat yung isukung ganap ing kekayung sarili anting ipus na ning kabanalan.

²⁰ Kanitang ipus na kayu pa ning kasalanan, tutu kayung mirayu king kabanalan.

²¹ Oneng nanu naman ing maging pakinabang yu king pamaniapat karing bage-bage a ngeni pikakarine yu? Alang aliwa nune ing kamatayan!

²² Oneng ngeni meging malaya na kayu king kasalanan at ipus na kayu ning Dios. Ing pakinabang yu ya ing pamibiebie a lubus makatalaga keya, at ing bunga na niti ya ing bie alang angga!

²³ Ing bayad na ning kasalanan, kamatayan; oneng ing regalung kusa nang babie ning Dios ya ing bie alang angga kayabe nang Cristo Jesus a Ginu tamu.

7

¹ Kapatad, asisiguru kung aintindian yu ining buri kung sabian kekayu, uling makaintindi kayu ngan tungkul king kautusan. Atin yang upaya ing kautusan king tau kaba mung mabie ya.

² Metung a alimbawa: katungkulan na ning babaing talasawa, agpang king kautusan, ing maging tapat ya king asawa na kabang mabie ya ing lalaki; nung mate ne ing lalaki, e ne masasakup ing babai ketang kautusan a sasabing e ne malyaring kawanian ing asawa na.

³ Inya nung makiabe ya king aliwang lalaki kabang mabie ya pa ing asawa na, ausan neng makipag-lalaki ning kautusan; nung ing asawa na mete ne, metung neng babaing malaya, agpang king kautusan, at e ya mikakasalang makipangalugud, nung makiasawa ya king aliwang lalaki.

⁴ Tutu munaman ing anti kaniti para kekayu, kapatad ku. Mete na kayu naman para king Kautusan, uling dake na kayu ning katawan nang Cristo, at ngeni dake na na kayu nitang mipasublian mie ban mamunga kayung mayap a dapat para king Dios.

⁵ Uling kanitang mibiebie tamu, agpang king katutubu ning kekatamung pangatau, ding e mayap nang nasa a ginising na ning Kautusan ilang magobra karing kekatamung katawan at ing maging bunga na ya ing kamatayan.

⁶ Oneng ngeni malaya ta na king Kautusan, uling mete ta na ketang mekabihag kekatamu kanitang milabas. E ta ya susuyuan ing Dios lalam ning matuang tuntunan na ning kautusan a misulat, nune king bayung bie a babie na ning Espiritu.

⁷ Nanu ngeni ing malyari tamung sabian? King ing Kautusan makapalpikasala ya? Ali ya! Nung akilala ku nung nanu ing kasalanan, akilala ku uli na mu ning Kautusan. E ku sana ikuang abalu nung nanu ing manangkamin, nung ing Kautusan e na sinabi, E ka manangkamin.

⁸ Menakit dalan ing kasalanan para gisingan na kanaku king kapamilatan na ning kautusan ing miyayaliwang pamanangkamin. Nung alang kautusan, alang kasalanan.

⁹ Aku mismu kanitang misan mibiebie kung alang balu tungkul king kautusan; oneng inyang abalu ke ing kautusan, megumpisang tinubu kanaku ing pamikasala

¹⁰ at aku naman mete ku. At ing kautusan a kailangan magdalang bie kanaku kamatayan ing dela na.

¹¹ Mirinan pamikatagun ing kasalanan at lininlang na ku king kapamilatan na ning kautusan; makanyan na kung pete.

¹² Inya, ing Kautusan banal ya at ing kautusan banal ya, matulid ampon mayap.

¹³ E kasi ing mayap ya ing makirapat king kanakung pangamate? Ali! Ing kasalanan ya ing makirapat kaniti: kesangkapanan ne ning kasalanan ing mayap, at inatdanan na kung kamatayan ban makilala ing tune nang kabaldugan ning kasalanan. Inya, king kapamilatan na ning kautusan, lalu kung akikilala ing makatakut nang dewakan ning kasalanan.

¹⁴ Balu tamu king ing Kautusan tungkul ya karing bage espiritual; oneng aku tau kung ating kamatayan a mepisali antimong ipus ning kasalanan.

¹⁵ E ku aintindian ing mismung daraptan ku; uling e ku daraptan ing kailangan kung daptan, nune ing ararapat ku ya ing kabud ing kasaman ku.

¹⁶ Neng daraptan ku ing bage a e ku sukat daptan, mipakilala king tatanggapan kung ustu ya ing Kautusan.

¹⁷ Inya aliwa aku ing tune darapat kaniting bage; nune ing kasalanan a atyu kanaku.

¹⁸ Balu ku king alang kayapan a mayayakit kanaku, ngaku wari, king kanakung pangatau. Agyamang atyu kanaku ing bisang dapat king mayap, e ku ararapat.

¹⁹ E ku ararapat ing mayap a sukat kung daptan; nune ing ararapat ku ya ing e mayap a e ku buring daptan.

²⁰ Nung ing e ku sukat daptan ya ing ararapat ku, mangabaldugan king aliwa na aku mismu ing darapat kaniti, nune ing kasalanan a atyu kanaku.

²¹ Iti ya ing prinsipyu a atuklasan ku: neng buri kung daptan ing mayap, ing e mayap ya ing malapit kanaku.

²² Ing mabilug kung pangatau tutula ya king kautusan na ning Dios.

²³ Oneng akakit ku king ating aliwang prinsipyung magobra king kanakung pangatau a balamu metung yang prinsipyung pilit sasalangsang king didikta na ning lub ku. Gagawan na kung bihag niting prinsipyu na ning kasalanan a magobra king mabilug kung pangatau.

²⁴ Inya tau kung tutung makalunus! Ninu ing magligtas kanaku king katawan a ini a atyu king upaya na ning kamatayan?

²⁵ Salamat king Dios a darapat kaniti king kapamilatan nang Jesu-Cristo a Ginu tamu! Inya, iti ngeni ing kanakung kabilian: king sarili kung pamisip asuyuan ke ing kautusan na ning Dios, oneng ing maina kung pangatau susuyuan ne ing kautusan na ning kasalanan.

8

¹ Inya e na la miyatulan kaparusan detang mabibie kang Cristo Jesus.

² Ing kautusan ning Espiritu a babie king bie a makayabe kang Cristo Jesus, leko na ku king kautusan ning kasalanan at kamatayan.

³ Depat na ning Dios ing e na arapat ning Kautusan uli na ning keinan ning tau. Tinubud ne ning Dios ing Anak na a dinatang kalupa na ning taung makasalanan ban ilako na ing kasalanan. King kapamilatan na ning depat nang iti ning Dios perusan na ing kasalanan a magobra king keinan na ning tau

⁴ ban ing katuliran a aduan na ning Kautusan lubus matupad kekatamung mabibie agpang king Espiritu at e agpang king keinan na ning katutubung pangatau.

⁵ Uling detang mabibie ketang agkat na ning katutubu rang pangatau, mimisip la ketang aduan na ning katutubu rang pangatau. Detang mabibie naman king agkat na ning Espiritu, mimisip la agpang ketang kaburian na ning Espiritu.

⁶ Nung mimisip la ketang aduan na ning katutubung pangatau, ing pupulan da kamatayan at deta namang mimisip ketang aduan na ning Espiritu, bie at kapayapan ing karelang tanggapan.

⁷ Inya maging kalaban ne ning Dios ing taung mimisip ketang aduan na ning katutubu rang pangatau, uling iti e mamintu king kautusan na ning Dios, at king kamatutuanan e na agyung pamintuan.

⁸ Detang manusig king agkat na ning katutubung pangatau e re malyaring apaligayan ing Dios.

⁹ Oneng e kayu mabibie ketang aduan na ning katutubung pangatau, nune mabibie kayu ketang agkat na ning Espiritu, nung tune yang manuknangan kekayu ing Espiritu ning Dios. E ya kang Cristo ing e na panuknanganan ning Espiritu nang Cristo.

¹⁰ Nung manuknangan ya kekayu i Cristo, mate ya man ing katawan uli na ning kasalanan yu, mabie ya ing espiritu yu uling pepawalan na kayung kasalanan ning Dios!

¹¹ Nung ing Espiritu na ning Dios a pepasubling mie kang Jesus, manuknangan ya kekayu, ing pepasubling mie kang Cristo pasublian na la namang mie ding katawan yung malalaso kapamilatan na ning Espiritu nang manuknangan kekayu.

¹² Inya, kapatad, atin tamung katungkulan, oneng e para mibiebie ketang agkat na ning katutubung pangatau tamu.

¹³ Uling mate kayu nung mibiebie kayu ketang agkat na ning katutubung pangatau; nung king agkat na ning Espiritu papaten yu ing e mayap nang pamitan ning katawan, mie kayu.

¹⁴ Anak na la ning Dios detang tutuki king agkat na ning Espiritu ning Dios.

¹⁵ Uling ing Espiritu a binie na ning Dios kekayu e na kayu papalyarian ipus ba kayung pasibayung mangatmung takut; nune papalyarian na kayung maging anak na ning Dios. Potang ausan ta ya ing Dios: Tatang, Tatang ko!

¹⁶ patutuan na ning Espiritu ning Dios king kekatamung espiritu king itamu anak na katamu ning Dios.

¹⁷ At anti na ning anak na katamu, talapagmana na katamu ning Dios at kayabe na katamung talapagmanang Cristo; nung darake tamu king kasakitan nang Cristo, mirakayanan tamu naman king kaligayan na.

¹⁸ Isipan ku king ing daralanan tamung kasakitan ngening kasalukuyan a panaun e man sukat ipakilimpi king ligayang makapanaya a mihayag kekatamu king daratang a panaun.

¹⁹ Masipit na nang panenayan ning meto lelangan ing pamipakilala na ning Dios karing anak na.

²⁰ E na sariling kaburian ning meto lelangan ing mabigu ya nune kaburian na ning Dios; oneng dininan neng kapanayan.

²¹ Uling ing meto lelangan maging malaya ya king panga-ipus na king kasiran, at mirakayanan ya ing kalayaan at kaligayan da ring anak na ning Dios.

²² Masalang balu tamu king angga ngening kasalukuyan sasaingsing ya ing meto lelangan king sakit a kalupa na ning metung a babaing manganak.

²³ Oneng e mu bukud ing meto lelangan, itamung mirinan king Espiritu, antimong mumunang dili karing regalu na ning Dios, sasaingsing tamu naman kabang panayan tamu king Dios ing ibilang na katamung anak na, ing pangayatbus da ring kekatamung katawan.

²⁴ Uling miligtas tamu, oneng atin ta pang kapanayan. Nung akakit ta na itang kekatamung panenayan, e na tune kapanayan ita. Ninu wari ing manaya ketang akakit na na?

²⁵ Nung manaya tamu ketang e ta pa akakit, panayan tamu king mitmung kapibabatan.

²⁶ King anti kanyan munamang paralan daratang ya ing Espiritu ban saupan na katamu uling tau tamung maina. Uling e tamu man balu nung makananu tamung sukat manalangin; oneng ing Espiritu ya mismu ing magparalampu arapan na ning Dios para kekatamu, king dalung a e ra man asabi ding amanu na ning tau.

²⁷ Ing Dios a manakit angga na king kabubusalan na ning pusu ning tau balu na ing atyu king pilubluban na ning Espiritu; uling ing Espiritu ya ing magparalampu king arapan na ning Dios alang-alang king balen na at agpang king kaburian na.

²⁸ Balu tamu king karing sablang bage darapat ya ing Dios para king ikakayap da ring malugud keya, ding inaus na at pinili agpang king parasan na.

²⁹ Ila detang pinili na manibat na kanitang minuna at telaga nang maging tune nang kalupa ning Anak na ban ing Anak yang maging pangane da ring dakal a mikakapatad.

³⁰ Inaus na la ning Dios detang telaga na para kaniti, at pepatawaran na la at dekayanan king kaligayan na.

³¹ King heganaganang iti, nanu ing malyari tamung asabi? Nung ing Dios atyu king panig tamu, ninu ing laban kekatamu?

³² E ne pepasubalian pati na ing sariling Anak na, nune inain ne para king ikakayap tamu! Nung pati Anak na binie na kekatamu, ipagkaymut na pa kaya kekatamu ing nanumang malyaring aibie na?

³³ Ninu ing misuplung laban karing pinili na ning Dios? Nung ing Dios mismu pepayalan na na katamung kasalanan,

³⁴ ninu pa ing makayatul kekatamu? I Cristo Jesus kaya? Aliwa! E mu ing mete ya para kekatamu; sinubli ya namang mie at atyu king banda nang wanan ning Dios at makisabi yang mayap para kekatamu!

³⁵ Ninu mo ing ating upayang ikawani na katamu king lugud nang Cristo? Ing kaligaligan kaya, ing kasakitan, ing pangalupig, ing danup, ing kalubasan, ing panganib o ing kamatayan?

³⁶ Antimo ing sasabian na ning kasulatan: Alang-alang kekayu makatibi kaming patitingapun king kamatayan; pekilupa da kami karing tupang malapit da nang katatan.

³⁷ Ali! Uling karing sablang bage atin tamung ganap a tagumpe king kapamilatan nang Cristo a linugud kekatamu.

³⁸ Matibe ku kapaniwalan king agyang ing kamatayan o ing bie man, ding anghel o ding aliwa pang upaya o sikanan karin banua, antimu rin ing nanuman king kasalukuyan o king daratang a panaun,

³⁹ ing atyu babo o ing atyu lalam o ing nanumang melalang, e na katamu kapilan man malyaring ikawani king lugud na ning Dios kang Cristo Jesus a Ginu tamu.

9

¹ Sasabian ku ing katutuan; talatuki na kung Cristo at e ku maglaram. Ing sarili kung konsiensia a pamahalan na ning Banal a Espiritu, patutuan na king e ku maglaram.

² Ing buri kung sabian ya ini: tutu kung pagkalungkutan at alang kalupa ing kaplas ning pusu ku

³ para karing kapatad ku a kanakung sariling laman at daya. Maniaman ku lub tanggapan ing miparusan at mikawani ku kang Cristo, nung iti ya ing makasaup karela.

⁴ Ila ding taung pinili na ning Dios; inampun na la bilang sariling anak na at pepabalu na karela ing kaligayan na; tinatag na la ding kasunduan kayabe ra at binie ne karela ing Kautusan; atyu karela ing tune kapanyamban; tinggap da ing dakal nang pengaku ning Dios;

⁵ ila ding meging lahi ding pikabaluan a Hebreong penibatan da, at ing Cristo, king pangatau na, ibat ya king karelang lahi. Mipuri yang alang kapupusan ing Dios a mag-ari king sabla-sabla! Amen.

⁶ E ku sasabian king mebigu ing pangaku na ning Dios; uling e ding sablang memalen na ning Israel tau lang pinili na ning Dios

⁷ ni e la ngan anak na ning Dios ding lahi nang Abraham. Ngana ning Dios kang Abraham, Ding lahi nang Isaac ilang maging lahi mu.

⁸ Ing buri nang sabian niti king ding anak a mibait ketang natural a paralan e na la anak ning Dios; nune ding anak a mibait bilang bunga na ning pangaku ning Dios ila ding makilalang tune lahi.

⁹ Uling ing pangaku na ning Dios anti kanini: King karampatan a panaun magbalik ku at mikayanak neng lalaki i Sarah.

¹⁰ Oneng e mu ita, uling parehu la tata ding adua nang anak a lalaking Rebeca, i Isaac a penibatan tamu.

¹¹ Ban ing pangapili na ning metung kareting adua lubus neng maging bunga ning sarili nang parasan ning Dios, sinabi na ning Dios kang Rebeca, Ing koya karing aduang den ya ing sumuyu king wali. Sinabi na iti bayu la pa mibait; bayu la mekagawang nanumang mayap o e mayap. Inya makayagpang ya ing pamamili na ning Dios ketang pamaniaus na at e ketang nanumang depat da.

¹²

¹³ Ngana ning kasulatan, Liguran ke i Jacob, oneng pikasaman ke i Esau.

¹⁴ Nanu ing asabi tamu tungkul kaniti? King mangabiran ya ing Dios? Ali ya!

¹⁵ Uling sinabi na kang Moises, Dinan keng lunus itang buri kung dinan, at lunusan ke itang buri kung lunusan.

¹⁶ Inya e makatalakad ketang buri na o daraptan na ning tau, nune bukud mu king lunus na ning Dios.

¹⁷ Uling nganang migsalita ning kasulatan king ari ning Ehipto, Gewa da kang ari ba da kang kasangkapanan king pamipakilala ku king kanakung upaya, at king pangahayag na ning kanakung lagyu king mabilug a yatu.

¹⁸ Inya dinan neng lunus ning Dios itang buri nang dinan at pasiasan ne buntuk itang buri na.

¹⁹ Malyaring ikutang na ning metung kekayu, Nung makanyan pala, obat pamarsalanan ne ning Dios ing tau? Ninu wari ing makatutul king kaburian na ning Dios?

²⁰ Ninu mo ika, kakaluguran, para magsalita kang makanyan king Dios? Ing metung a lulanan a megawa king pila e na kukutang king taung ginawa keya, Obat makanyan mu kung gewa?

²¹ E wari ing taung gagawang lulanan atin yang upayang gumamit king pila agpang ketang buri na at gawang aduang lulanan king metung mung tumpuk a pila; ing metung magamit ya king espesyal a okasyun at ing metung naman para king karaniwan a pamangamit?

²² Makanyan munaman ing malyari tamung asabi tungkul king dapat na ning Dios. Birian nang ipakilala ing milalablab nang mua at ipakilala ing upaya na. Makanyan man maragul ing kapibabatan na karetang mangaintulid king milalablab nang mua, detang makasadia nang magisan.

²³ Buri na namang ipakilala ing maragul nang kaligayan a mitugtug kekatamu a buri nang mirarasnan king lunus na, kekatamung sidia nang tanggap king kaligayan na.

²⁴ Uling itamu ding inaus na; e mu ding ibat karing Judio nune ding ibat karing paganu munaman.

²⁵ At iti ya ing sasabian na king libru ning Hosea, Ding taung sadiang e kaku, ausan ku lang Balen Ku, Ing bansang sadiang e ku kaluguran, ausan keng Ing kakung Pakamalan.

²⁶ At king kabud lugal nung nu ra dimdam, Aliwa ikayu ing kakung balen, karin la mayaus anak ning Dios a mabie.

²⁷ At migsalita ya i Isaias tungkul king Israel. Ngana, Agyang pang kasing dakal na la ning balas king pasigan ding memalen ning Israel, ditak la mu karela ding miligtas;

²⁸ uling mabilis at mabagsik ing atulan ne ning Ginu ing kabilugan a yatu.

²⁹ Kalupa na nitang sinabi na namang Isaias kanitang minuna, Nung ing Ginung Mayupayang tutu e na katamu likuananan lahi, mekad meging anti tamu king Sodoma; mekad meging kalupa na katamu ning Gomorra.

³⁰ Nanu ing sabian tamu? Ding paganu a e naman magkapilit milapit king Dios ila kabud ding pepatawaran na king kapamilatan na ning kasalpantayanan,

³¹ samantalang e re atuklasan ding taung pinili na ning Dios a manintun kautusan a malyaring makapilapit karela king Dios.

³² Nanu ing meging sangkan? E la menalig king kasalpantayanan, nune ketang sariling dapat da. Mitisud la king batung makatisud

³³ a amanuan na ning kasulatan, Lawan yu, ibili ke king Zion ing metung a batu a makatisud karing tau; metung yang batung makaragsa karela, oneng ing ninumang maniwala keya e ya mabigu.

10

¹ Kapatad, king mabilug kung pusu tune kung pagnasan king miligtas la ding mismung sarili kung kalahi! Manalangin ku king Dios para karela!

² Aku mismu apatutuan ku king tune lang tapat king Dios, oneng ing katapatan da e makatalakad king tune beluan.

³ E re ikuang akilala ing dalan nung nu na la payalan kasalanan ning Dios ding tau at pilit lang mitatag sarili dang dalan; inya e la pepasakup king paralan na ning Dios tungkul king pangapayalan dang kasalanan ding tau.

⁴ I Cristo ya ing kawakasan na ning Kautusan at king kapamilatan na matanggap ya king Dios ing ninumang sasalpantaya.

⁵ Iti ya ing sinulat nang Moises tungkul king pangapatawaran ning kasalanan agpang king Kautusan: Mie ya king kapamilatan na ning Kautusan.

⁶ Anti naman keni ing masasabi tungkul king pangapatawaran ding kasalanan arapan na ning Dios king kapamilatan na ning kasalpantayanan: E mu kukutang king kekang sarili, Ninu ing mukiat karin banua? (ngana wari, para ibaba me i Cristo.)

⁷ Ni e mu kukutang, Ninu ing dulung king kalalalaman na ning yatu? (ngana wari, para isaka me ibat king kakarinan da ring mete i Cristo).

⁸ Ing sasabian na anti kaniti: Malapit kekayu ing amanu na ning Dios, atyu karing labi yu at karing kekayung pusu, ngaku wari, ing kasalpantayanan a ipanaral mi kekayu.

⁹ Nung ipasiag mu karing kekang labi, I Jesus Ginu ya at paniwalan mu king kabubusalan na ning pusu mu king pepasublian neng mie ning Dios, miligtas ka.

¹⁰ Uling maniwala tamu king kabubusalan na ning pusu tamu at uli na nita payalan na katamung kasalanan ning Dios; king kapamilatan na ning pamipasiag tamu king kasalpantayanan mililigtas tamu.

¹¹ Ngana ning kasulatan, E ya mabigu ing ninumang maniwala keya.

¹² Ala lang pamiyayaliwa ding Judio at ding paganu; ing Dios ya naman ing Ginu da ring sabla at labis-labis na lang bendisyunan ding sablang mamaus keya.

¹³ Antimo ing sasabian na ning kasulatan, Miligtas ya ing ninumang mamaus king lagyu na ning Ginu.

¹⁴ Oneng makananu lang makayaus king Ginu, nung e la pa maniwala? At makananu lang maniwala, nung ala la pang dimdam tungkul king Ginu? At makananu lang makaramdam, nung ala namang menaral karela?

¹⁵ Makananu namang mika talapanaral, nung alang mituburan manaral? Agpang king sasabian na ning kasulatan, Kasampat na ning paniatang da ring manaral king Mayap a Balita!

¹⁶ Oneng e ila ngan tinggap de ing Mayap a Balita. Ing propeta Isaias mismu sinabi na, Ginu, ninu ing meniwala king penaral mi?

¹⁷ Inya daratang ing kasalpantayanan king kapamilatan na ning pamakiramdam king amanung mipanaral at ing amanung manibatan king pamanaral tungkul kang Cristo.

¹⁸ Oneng ngakung kukutang, Pota galang e ra naman dimdam ing amanung mipanaral? Wa, dimdam da, antimo ing sasabian na ning kasulatan: Ing karelang bosis minabut angga king mabilug a yatu; ing amanu ra miras angga na karing sikoti na ning yatu.

¹⁹ Pasibayu, ngakung kukutang, e ra kaya balu iti ding tau Israel? Pekibatan na nang Moises iti kanita pang minuna. Ngana, Papangalaluan da kayu karing taung e naman metung a bansa; pamuan da kayu laban king metung a bansang bibilugan ding taung alang balu.

²⁰ At lalu pang mataram ing pamagsalita nang Isaias inyang nganang sinabi, Atuklasan da ku ding taung e naman manintun kaku; pepakit ku karing taung e naman mangutang tungkul kanaku.

²¹ Oneng tungkul king Israel nganang sasabi, Patingapun kung mamaus king metung a balen a mapaglaban at e mapamintu kanaku!

11

¹ Iti naman ngeni ing kukutang ku: Tinggian ne ning Dios ing sarili nang balen? Agyang ditak ali ne! Aku mismu metung kung Israelita, metung kung lahi nang Abraham at miembru na ning tribu nang Benjamin.

² E ne tinggian ning Dios ing balen na, ing balen a pinili na ibat pa king kamumulan. Balu yu nung nanu ing sasabian na ning kasulatan tungkul king pamakisabi nang mayap ning propeta Elias king Dios laban king Israel.

³ Ngana, Ginu, pete da na la ding kekang propeta at piglasak da la ring kekang altar; aku nang dili ing mitagan at buri da ku pang paten!

⁴ Nanu ing pekibat na ning Dios keya? Ing pekibat na, Mitagan kung pitung libung lalaking e pa sinamba kang Baal a idolo.

⁵ Makanyan a makanyan ing malilyari ngening kasalukuyan: atin pa mu ring makatagan karing taung pinili na ning Dios uli na ning grasya na.

⁶ Ing pamamili na karela manalumpakan king grasya na at e ketang nanumang depat da. Uling nung ing pamamili na ning Dios manalumpakan mu king daraptan da ring tau, e mu na atunggen grasya iti.

⁷ Nanu ing milyari? E ra atuklasan ding memalen ning Israel itang karelang panintunan. Metung ya mung malating grupu a pinili na ning Dios ing mekatuklas; migmaklak-maklakan la ding aliwa king aus na ning Dios.

⁸ Antimo ing sasabian na ning kasulatan, Pepasias na la pusu ning Dios at pepaburen na lang mepurul a kaisipan; angga man king aldong iti e la manakit ding mata ra, at e la makaramdam ding balugbug da.

⁹ At sasabian nang David, Marakap la sa at masilu karing karelang pamagpiesta; miragsa la sa at miparusan!

¹⁰ Mabulag la sa mata ba lang e manakit, at mangabukut-bukut la sa kapilan man karing karelang problema.

¹¹ Inya, ngaku pang kukutang, ngening misakab la ding Judio mangabaldugan kaya king melaus na lang miragsa? Ali! Uling ing karelang pamikasala migdalang kaligtasan karing paganu ban kanita dumiria la karela ding Judio.

¹² Nung ing pamikasala da ring Judio migdalang maragul a bendisyun king mabilug a yatu, at ing pangabigu ra migdalang dakal a bendisyun karing paganu, e kasi lalung maragul ing bendisyun a ibunga na nung wari't ding sablang Judio magbayu lang bie!

¹³ Ikayung paganu, oyni ing asabi ku kekayu. Kabang apostol ku kekayu, ipagmaragul ku ing kasuyuan kekayu.

¹⁴ Mekad king kapamilatan na niti ding kanakung sariling kalahi apapangalaluan ku la tungkul king lingap ku kekayu, at king paralan a yan malyari ku lang iligtas ding aliwa karela.

¹⁵ Nung kanitang ding kalahi ku e la metanggap, ing yatu naman milapit ya king Dios, pota kayang matanggap lang pasibayu keya, nanu ing maging bunga na niti? Alang aliwa nune ing pangasubli ra bie ding taung mete na!

¹⁶ Nung ing mumunang kapirasung tinape miyain ya king Dios, keya ya naman ing kabilugan a tinape at nung ding yamut ning metung a tanaman miyain la king Dios, keya la naman ding sanga.

¹⁷ Ding mapilan karing sanga na ning tanaman a olibong mesese mepakli la at ing sanga na ning tanaman a olibong kabud na tinubu misusug ya keya. Ikayung paganu mengari kayu ketang olibong kabud na tinubu at ngeni misusug kayu king sikanan at bie rang manawa ding Judio.

¹⁸ Inya, e yu la sukat payalan kabaldugan detang mengapakling anting sanga. Makananu kayung makapagmaragul? Metung kayu mung sanga, aliwa ikayu ing magsustentu king yamut, ing yamut ya ing magsustentu kekayu.

¹⁹ Mekad ngayu namang sumabi, Wa, oneng mepakli la ding sanga ban ikaming kuma king lugal da.

²⁰ Wa, tutu ita. Mepakli la uling e la sinalpantaya, kabang ikayu menatili kayu uling sasalpantaya kayu. Oneng e kayu daragul a lub uli na niti; nune kailangan kayung mika ating takut.

²¹ E na la pepasayangnan ning Dios ding Judio a mengaring sangang katutubu ning tanaman; ikayu kaya isipan yung pasayangnan na kayu?

²² Keti tamu akakit nung nu anti ing ganaka na ning Dios at nung nu anti ing bigsikan na. Pagbagsikan na la detang sangang metanggal, oneng maganaka ya kekayu, nung manatili kayu king mayap nang lub; nung ali kayu, ikayu man mangapakli kayu.

²³ At ding Judio naman, nung painggulut la king keyalan dang kasalpantayanan, misubli la king sadia rang lugal, uling agyu na lang isubli ning Dios.

²⁴ Ikayung paganu mengari kayu king sanga na ning olibong kabud na tinubu king metung a lugal at mepakli kayu. Kaybat, agyang laban king naturalesa, mitaid kayu king metung a tanaman a olibong sese at saria rang gagambulan. Mengari la ding Judio kaniting olibong mesese. Inya lalung mayan para king Dios ing isusug na lang pasibayu king tanaman a sarili rang penibatan.

²⁵ Kapatad, pota isipan yu king balu yu na ing sabla. Buri kung abalu ye ngan ing katutuan a makalihim. Anti ya keni: e manatili kabang panaun ing kesiasan na lub Israel. Manatili mu angga potang ing mabilug a yatung e Judio akua na nang matanggap king Dios.

²⁶ King makanyan a paralan ya mikabus ing mabilug a Israel, agpang king sasabian na ning kasulatan, Ing Talapagligtas manibatan ya king Zion, idayu na ing sablang e mayap karing lahi nang Jacob.

²⁷ Itatag ke karela iting kasunduan, potang ilako ku la ding karelang kasalanan.

²⁸ Meging kalaban na la ning Dios ding Judio uling tatanggian de ing Mayap a Balita at maging kalaban na la alang-alang kekayung paganu; oneng bilang balen a pinili na, kaluguran na la pa mu rin ning Dios ding Judio alang-alang karing karelang makatua.

²⁹ Uling e biasang manaliwa isip ing Dios tungkul karing pipilinan na at bibendisyunan.

³⁰ Tungkul naman kekayung paganu, kanitang minuna e kayu memintu king Dios; oneng ngeni tinggap yu ing lunus na ning Dios uli na ning e ra pamamintu ding Judio.

³¹ Makanyan munaman, uli na ning lunus a kekayung tinggap, ding Judio ngeni e la mamintu king Dios ban ila man malyari dang tanggapan ing lunus na.

³² Uling pepaburen na lang mebihag ning Dios ding sablang tau king karelang e pamamintu ban malyari nang ipakit karela ing lunus na.

³³ E mu asukdan ing pibandian na ning Dios! Antimu rin ing kabiasnan na ampon beluan! Ninu ing makasaliksik king kayatulan na? Ninu mo ing makaintindi king pamamaralan na?

³⁴ Antimo ing sasabian na ning kasulatan, Ninung makibalu king isipan na ning Ginu? Ninu ing makaibie payu keya?

³⁵ Ninu na ing atin nang aibie nanuman keya ba nang pangaintuliran ing mibayaran?

³⁶ Uling ya ing linalang king sabla-sabla at ing sabla atyu ngan ngeni king uli na at para keya. King Dios ing kapurian angga na king kapilan pa man! Amen.

12

¹ Inya, kapatad ku, king uli na ning maragul nang lunus ning Dios kekatamu, ipakisabi kung mayap kekayu: samban ye king kapamilatan na ning pamiyain yu karing kekayung katawan bilang mabie at banal a ain, tune babie tula king Dios. Iti ya ing tune kapanyamban a kailangan yung iyain keya.

² E kayu makiapus king lakad na ning yatung iti, nune ibayu yu ing kekayung panugali king kapamilatan na ning pamagbayu yu isip. Kaniti yu atuklasan ing kaburian na ning Dios at akilala yu nung isanu ing mayap at ing katanggap-tanggap keya at ing ganap.

³ King uli na ning grasyang binie na ning Dios kanaku, sasabian ku ngeni kekayu ngan: e yu lalawan maragul ing kekayung sarili maygit ketang karampatan kekayu. Nune maging banayad kayu king kekayung pamibalak, at ing balang metung kekayu kailangan ing surian na ing sarili na agpang king sukad na ning kasalpantayanan a binie na ning Dios keya.

⁴ Dakal tamu miyayaliwang dake king metung mung katawan, at deting dake atin lang miyayaliwang kasilbian.

⁵ Makanyan munaman, agyamang dakal tamu metung tamu mung katawan kayabe nang Cristo at makayabe tamu king metung at metung antimong miyayaliwa nang dake ning metung a katawan.

⁶ Atin tamung miyayaliwang kagiwan agpang king binie na ning Dios king balang metung. Nung ing kagiwan a tinggap mu ya ing maging talapagsalita na ning Dios, ipanaral mu ing amanu na ning Dios agpang king kasalpantayanan a atyu keka,

⁷ nung pamaniuyu, gamitan mu king pamaniuyu. Nung pamanuru ing kagiwan a kekang tinggap, gamitan mu king pamanuru,

⁸ nung pamamie payu, dinan mu lang payu ding mimina lub. Ding maglimus, maglimus lang mitmung ganaka. Ding tatalan upaya kailangan lang magkapilit e mu nanu; ing darapat mayap king aliwa, daptan nang mitmung tula.

⁹ Ala sanang pamagkunwari ing lugud yu; pikasaman yu ing e mayap at papanatilian yu ing mayap.

¹⁰ Mikakalugud kayu antimo ding mikakapatad, at mikamaragul kayu sanang kagalangan king metung at metung.

¹¹ King alang sawang pamagkapilit, magobra kayu para king Ginu kayabe na ning kalausan a lub.

¹² Tumula kayu uli na ning kekayung kapanayan. Mibabata kayu king oras ning kekayung kapagsubukan, at manatili kayu sa king pamanalangin.

¹³ Sumaup kayu karing kapatad yung Cristianung atyu king pamangailangan, at tanggapan yu lang matula ding dayuan karing pibalebale yu.

¹⁴ Bendisyunan yu la ding liligalig kekayu; e yu la panagkasanan kapilan man, nune aduan yu king Dios ing bendisyunan na la.

¹⁵ Makiabe kayu king tula da ring matula, makirame kayu king lungkut da ring malungkut.

¹⁶ Pakit kayung parehu paglalawe, at ating malasakit karing sabla. E kayu matas a lub, nune biasa kayu sanang makiabe karing kalulu. E yu isipan ing tutu na kayung biasa.

¹⁷ E yu ablasan marok ing depat dang marok kekayu. Daptan yu itang bibilang dang mayap ding sablang tau.

¹⁸ Daptan yu ing sablang agyu yu ban makapibiebie kayung payapa kayabe da ring sablang tau.

¹⁹ Kanakung kakaluguran, kapilan man e kayu mamablas, nune ipanibala yu king milalablab nang mua ning Dios, uling sasabian na ning kasulatan, Aku ing mablas, aku ing singil, ngana ning Ginu.

²⁰ Antimo ing sasabian na ning kasulatan, Nung maranup ya ing kekang kalaban, pakanan me; nung mau ya, dinan meng inuman; uling king pamaniapat mu king anti kanyan mipakarine ya king sarili na.

²¹ E kayu paisaul king marawak, nune labanan yu ing marawak king mayap.

13

¹ Sukat yang mamintu ing metung at metung karing manimuna king balen, uling alang kayupayan a makalto nung e na paintulut ning Dios, at binili na la karin ning Dios ding atyu king katungkulan.

² Inya ninuman ing sasalangsang king kayupayan sasalangsangan na ing tildu na ning Dios, at miparusan ya ing ninumang sasalangsang king tildu na ning Dios.

³ Ala lang sukat pitakutan karing manungkulan ding darapat mayap, nune deta mung darapat e mayap. Bisa kang e mitakutan king atyu king katungkulan? Dapat ka ketang mayap at purian na ka.

⁴ Uling metung yang talasuyu na ning Dios a magobra para king kekang ikakayap. Nung darapat kang e mayap, kailangan meng pitakutan uling e pabiru-biru ing upaya nang mamarusa. Ya ing talasuyu na ning Dios at instrumento na ning milalablab nang mua ning Dios para karing darapat e mayap.

⁵ Inya kailangan kang mamintu karing atyu king kayupayan, e mu ban apangilagan mu ing milalablab nang mua ning Dios, nune uling iti ya ing aduan na ning konsiensia yu.

⁶ Ita munaman ing sangkan nung inya kailangan kayung mamayad buis, uling magobra la para king Dios ding atyu king katungkulan neng tutuparan da ing karelang katungkulan.

⁷ Inya bayaran yu itang pakibatan yu karela; bayaran yu ing buis yu para king kekayung sarili at para king pibandian yu, at ibie yu ing karapatdapat at kagalangan karing mangaintuliran.

⁸ E kayu mikakapakibatan kenu man; ing bukud mung pakibatan yu ya ing luguran ya ing metung at metung. Mekatupad ne king Kautusan ing ninumang lulugud king kalupa nang tau.

⁹ Ding kautusan, E ka makipangalugud, e ka makamate, e ka manako, e ka manangkamin, deti ngan at ding aliwa pa, mumuli la ngan king metung mung kautusan: Luguran me ing kalupa mung tau antimo ing sarili mu.

¹⁰ E ya kapilan man mamerhuisyu ing lugud king kalupa nang tau. Inya ing lugud ya ing katuparan na ning kabilugan a Kautusan.

¹¹ Kailangan yung daptan iti uling balu yu king miras na ing oras: kailangan ing migising na kayu ngeni; ing kaligtasan tamu mas malapit ngeni kesa kanitang megumpisa tamung sinalpantaya.

¹² Halus linipas ne ing bengi at malapit neng sunlag ing aldo. Painggulut ta na king pamaniapat karing sablang dapat na ning madalumdum at damputan ta na la ding sandata at lage ta na king masala ban marap king labanan.

¹³ Mibiebie ta na sanang karampatan, antimong taung mabibie king aldo masala, e na magpasasa king katakawan at pamaglasing; e na darapat king nanumang imoralidad, ala nang magaspang a ugali, e na mipatepate at mipapangariria.

¹⁴ Paburen yung i Jesu-Cristo a Ginu ya ing maging paniagka yu; e yu na panusigan ing e mayap nang pamitan ning kekayung keinan.

14

¹ Tanggapan ye ing ninumang taung maina king kasalpantayanan. E kayu makiargu keya tungkul king sarili nang kaisipan.

² Ing kasalpantayanan na ning metung a tau malyaring paintulut na ing ala yang pangilinan king pamangan, oneng ing taung maina king kasalpantayanan ala yang aliwang buring kakanan nune mu gule.

³ E ne sa insultuan ning taung e mangiling king isanu mang pamangan itang ating pangilinan, at e ne sa atulan ning taung mamangan mung bukud gule ing taung alang pangilinan a pamangan, uling tatanggapan ne ning Dios ing anti keya.

⁴ Ninu wari ika para atulan me ing ipus na ning ninuman? Bukud mung ing panginuan na ya ing matul, nung magtagumpe ya o mabibigu ya. At siguradu namang magtagumpe ya uling ing Ginu ya ing papagtagumpe keya.

⁵ Malyaring isipan na ning metung a tau king ing metung a aldo maygit ya ulaga kesa karing aliwang aldo, kabang ing aliwa namang tau isipan na king paraparehu la mu ding sablang aldo. Kailangan yang manatiling matatag king sarili nang tatalakaran ing metung at metung.

⁶ Ing ninumang paulaga king isanu mang aldo daraptan na iti bilang parangal king Ginu; ita namang alang pangilinan a pamangan daraptan na iti bilang parangal king Ginu uling balu nang pasalamatan king Dios ing kakanan na. Ninuman ing e bisang mangan karing mapilan a bage, daraptan na iti bilang parangal king Ginu at ya man biasa yang munie pasalamat king Dios.

⁷ Ala ninuman kekatamu ing mabibie para mu king sarili na at ala munamang mamamate para mu king sarili na.

⁸ Nung mabie ta man, mibiebie tamu para king Ginu. Nung mate tamu, mate tamu para king Ginu; inya mabie ta man o mete, king Ginu tamu pa mu rin.

⁹ Uling i Cristo mete ya at sinubling mebie ba yang maging Ginu da ring mabie at ding mete.

¹⁰ Oneng ika obat mo atulan me ing kapatad mu? Ba't mo pikakasaman me ing kekang kapatad? Marap tamu ngan king piukuman na ning Dios

¹¹ uling sasabian na ning kasulatan, Anti na ning aku ing mabie Dios, ngana ning Ginu, siklaud ya ing balang tud king arapan ku, at sabian da ring sabla king aku ing Dios.

¹² Inya king Dios ya munie kwenta ing balang metung at metung tungkul king sarili na.

¹³ Inya, ituknang ta na ing pamanatul king metung at metung; iti ing arian yu king lub yu at daptan: e kayu gagawang nanumang ikatisud na o ikanabu king pamikasala na ning kalupa yung tau.

¹⁴ Ing pangayabe ku king Ginung Jesus pakilala nang lubus kanaku king alang nanumang marinat king sarili na; nung ing metung a tau paniwalan na king ing metung a bage marinat ya, maging marinat ya pin para keya.

¹⁵ Nung makapanasakit ka king kapatad mu uli na ning kekang kakanan, king anti kanitang paralan e makatalakad king lugud ing daraptan mu. E mu sa paintulut king ing pamangan a kakanan mu makatakid ya king taung meging sangkan na ning kamatayan nang Cristo!

¹⁶ E mu paburen king ing kikilalanan mu antimong mayap mika marawak yang lagyu.

¹⁷ Uling ing Kayarian ning Dios e ya mangabaldugan pamangan o inuman, nune metung yang bage a makatungkul king kabanalan, kapayapan at tula a babie na ning Banal a Espiritu.

¹⁸ At ninuman ing susuyu kang Cristo king anti kanyan a paralan katanggap-tanggap ya king Dios ampon king tau.

¹⁹ Inya ding sukat tamung pakiabutan ila detang bage mamungang kapayapan at makasaup king pamipatibe lub king balang metung.

²⁰ E yu sa sisiran uli na mu ning pamangan ing nanumang dapat na ning Dios. Malyaring kanan ing nanumang pamangan, oneng e ustu ing mangan king nanumang munie pamikasala king kapatad mu.

²¹ Ing masanting daptan ya ing e ka mamangan karni, e ka miminum alak o e ka darapat nanumang malyaring makatisud king kapatad mu.

²² Makagyu namung para keka at king Dios ing nanumang paniwalan mu tungkul kaniting bage. Mapalad ya itang taung e miririnan alinlangan potang gagawan na ing isanu mang paniwalan nang ustu!

²³ Nung atin yang alinlangan tungkul king kakanan na parusan ne ning Dios, nung kanan nang malaus iti, uling ing daraptan na e makatalakad king kasalpantayanan. Uling kasalanan ing nanumang bage a e manalumpakan king kasalpantayanan.

15

¹ Itamung masikan a kasalpantayanan kailangan ta lang saupan mamusan ding maina king karelang pupusanan. Aliwa ing sarili tamu ing kekatamung paligayan.

² Ing balang metung kekatamu kailangan neng paligayan ing kapatad na alang-alang king karelang ikakayap ban asaupan neng sumulung king kasalpantayanan.

³ Uling e na peligayan Cristo ing sarili na. Antimo ing sasabian na ning Kasulatan, Digpa la kanaku ding insultu a sasabian da ring maninsultu.

⁴ Ing sablang misulat karing Kasulatan misulat ban ituru da katamu, at ban mika kapanayan tamu king kapamilatan na ning kapibabatan at sikanan lub a babie da ring Kasulatan.

⁵ At mananu na sanang ing Dios a panibatan na ning sablang kapibabatan at sikanan lub, papalyarian na kayung mika metung mung kaisipan king pamanuki king alimbawa nang Cristo Jesus,

⁶ ban kanita ikayu ngan, king metung a bosis, makaibie kayung kapurian king Dios at Ibpa na ning Ginu tamung Jesu-Cristo.

⁷ Inya king ikaligaya na ning Dios, tanggapan ye ing metung at metung antimo ing pamananggap nang Cristo kekayu.

⁸ Sasabian ku kekayu, meging talasuyu ya i Cristo karing memalen Judio, e mu para apakilala na king ing Dios biasa yang tupad mitmung katapatan king pengaku na karing makatua da,

⁹ nune para arinan na la namang dalan ding paganu ban apaligayan de ing Dios alang-alang king lunus na. Antimo ing sasabian na ning kasulatan, Uli na niti purian da ka libutad ding paganu, at pagkanta keng kapasalamatan ing kekang lagyu.

¹⁰ At ngana pang sasabi, Tumula kayu, ikayung paganu, kayabe da ring taung pinili ning Dios!

¹¹ At ngana pa, Purian ye ing Ginu, ikayung sablang paganu; purian ye, ikayung sablang bansa!

¹² At pasibayu, nganang sasabing Isaias, Ing metung a lahi nang Jese datang ya; keya lang pamahalan ding paganu, at ibili ra keya ing karelang kapanayan.

¹³ Mananu na sanang ing Dios a panibatan na ning kapanayan katmuan na kayu king sablang tula at kapayapan king kapamilatan na ning kasalpantayanan yu keya ban manatiling susulung ing kekayung kapanayan uli na ning upaya ning Banal a Espiritu.

¹⁴ Kapatad, aku mismu asisiguradu ku king ikayu man atin kayung mayap a pilubluban, king kitmuan kayu king sablang beluan at malyari kayung mituturuanan king metung at metung.

¹⁵ Oneng king sulat kung ini tutu kung matapang palual amanu tungkul karing mapilan a bage a buri kung ipaganaka kekayu. Iti darala na mu ning kapaintulutan a binie na kanaku ning Dios

¹⁶ ngening meging metung kung talasuyu nang Cristo Jesus karing paganu. Susuyu ku bilang pari a manaral king Mayap a Balita a ibat king Dios ban ding paganu maging metung lang ain a karapatdapat matanggap king Dios, miyayain keya king kapamilatan na ning Banal a Espiritu.

¹⁷ Inya kayabe nang Cristo Jesus, malyari kung ipagmaragul ing kasuyuan a daraptan ku alang-alang king Dios.

¹⁸ Uling e ku mangangas magsalitang nanuman subali mu king depat nang Cristo king kapamilatan ku ba na lang ayagkat ding paganu king kapamintuan king Dios. Depat na iti kapamilatan ning amanu at dapat,

¹⁹ king kapamilatan da ring mayupayang waga at milagru at king upaya na ning Banal a Espiritu. Inya lubus keng penaral ing Mayap a Balita tungkul kang Cristo, manibat karin Jerusalem at karing sablang lugal a libutan ku angga na karin Ilirico.

²⁰ Parati kung pagkapilitan ing apanaral ku kapilan man ing Mayap a Balita karing lugal a e pa makakilala kang Cristo, ban e ku manalakad king pundasyun a telakad na ning aliwang tau.

²¹ Nune ing pengatawanan ku ya ing makatupad ku king sasabian na ning kasulatan. Ngana, Akit de retang e pa mekabalita tungkul keya, at aintindian de retang e pa mekaramdam keya.

²² Inya maralas kung meyantala king pamandalo ku kekayu.

²³ Oneng ngening ikua ku nang ayari ing obra ku kareting lugal a reti at anti na ning malambat da na kayung buring dalawan,

²⁴ isipan ku abalaus ku na ngeni. Buri da kayung paindalanan king pamaglakbe kung papunta karin Espania ba yu ku namang asaupan king pamamunta ku karin kaybat kung matulang mekadalo kekayu kilub ding mapilan a aldo.

²⁵ Makanyan man makasadia kung taglus pa mu Jerusalem para ibie ing saup karing pinili na ning Dios karin.

²⁶ Uling ding iglesia karin Macedonia at Acaya kusa rang pikayari ing padalang limus a malyaring makasaup karing pakakalulu karing pinili na ning Dios karin Jerusalem.

²⁷ Ila mismu pikayari dang daptan iti at king kamatutuanan, atin lang talagang katungkulan sumaup karing kalulung deta. Nung dinan da la ring Judio ding paganu karing bendisyun dang espiritual, makanyan da namang kailangan isuyu ding paganu karing Judio ing karelang bendisyun material.

²⁸ Kabud ayari ku iting misyun at ikua ku na lang aintriga karela ding heganaganang alagang metipun para karela, munta na ku Espania at dalawan da kayu king pamaglakbe kung papunta karin.

²⁹ King paniatang ku kekayu, balu ku king datang kung kayabe na ning ganap nang bendisyun Cristo.

³⁰ Kapatad, ipakisabi kung mayap kekayu, king lagyu na ning Ginu tamung Jesu-Cristo at king lugud a babie na ning Espiritu: makisanmetung kayu sa kanaku king taimtim a pamanalangin king Dios para kanaku.

³¹ Ipanalangin yu king milisia ku sana king nanumang pamagligalig da ring e talasalpantaya karin Judea at king ing kanakung kasuyuan karin Jerusalem tanggapan da sanang matula ding pinili na ning Dios karin.

³² Makanyan ku sanang akuang miras kekayu king mitmung tula, nung iti ya ing kaburian na ning Dios at kamtan ku sana ing panibayung diwa king pamandalo ku kekayu.

³³ Mananu na sanang ing Dios a panibatan na ning kekatamung kapayapan manatili ya kekayu ngan. Amen.

16

¹ Panabilin keng mayap kekayu ing kapatad tamung i Febe, ing diakonisa king iglesia karin Cencrea.

² Tanggapan ye sa king lagyu na ning Ginu antimo ing karampatan dang daraptan ding pinili na ning Dios, at ibie yu sana keya ing nanumang kasaupan a malyaring kailangan na kekayu; uling ya mismu meging mapaniaup ya karing dakal a tau at kanaku.

³ Kukomustan ku la di Priscila at Aquila a ketambayan ku king kasuyuan kang Cristo Jesus.

⁴ Mibili king panganib ing bie ra alang-alang kanaku. Maragul ku utang a lub karela at e mu aku, nune pati na ding sablang iglesia da ring paganu.

⁵ Ikomusta yu ku naman king iglesiang mipupulung king bale ra. Komusta ya naman ing pakamalan kung kakaluguran a Efeneto, ing minunang diling meniwala kang Cristo king probinsia na ning Asia.

⁶ Komusta ya naman i Maria a megobrang alang patugut para kekayu.

⁷ Komusta la naman ding kalupa kung Judio, di Andronico at Junias a keyabe ku king sukulan; pikabaluan la karing apostol at minuna la pang meging Cristianu kesa kanaku.

⁸ Komusta ya naman i Ampliato, ing pakamalan kung kakaluguran at kapatad king Ginu.

⁹ Komusta ya i Urbano, ing keyabe-abe ku king kasuyuan kang Cristo, antimu rin, i Estaquis a pakamalan kung kakaluguran.

¹⁰ Komusta ya naman i Apeles a mesubuk na katapatan kang Cristo. Komusta mu rin karing katubale na ning pamilya nang Aristobulo.

¹¹ Kukomustan kia naman i Herodion, ing kalupa kung Judio at karing kapatad kang Cristo king pamilya nang Narciso.

¹² Ipayabut ku naman ing komusta ku kari Trifena at Trifosa a megobrang alang patugut king kasuyuan king Ginu, at kang Persis a tutu kung pakamalan at tutung dakal a pegobrahan para king Ginu.

¹³ Ikomusta yu ku kang Rufo, ing alang kasimparang talapagobra king kasuyuan para king Ginu, at kang ima na a parating tinanggap kanaku antimong anak nang tune.

¹⁴ Ikomusta yu ku kang Asincrito, kari Flegonte, Hermes, Patrobas, Hermas at karing sablang aliwa pang kapatad kang Cristo a kayabe ra.

¹⁵ Komusta la di Filologo at Julia, i Nereo at ding kapatad nang babai, i Olimpas at ding sablang kayabe rang pinili na ning Dios.

¹⁶ Mipapanatu kayu king metung at metung king mitmung lugud. Pakomusta da kayu naman ding sablang iglesia nang Cristo.

¹⁷ Ausan da kayu ngan kapanamdaman, ikayung kapatad ku: mingat kayu karetang makapasaring pamisagsagan at makagutgut king kasalpantayanan da ring tau, at sasalangsang king turung tinggap yu; mangilag kayu karela.

¹⁸ Uling ding darapat king anti kareting bage e re susuyuan i Cristo a Ginu tamu, nune ding sarili dang atian ilang karelang susuyuan. King masanting at makawili dang pamagsalita lilinlangan da la ring taung alang balu.

¹⁹ Kabalitan karing sabla ing kekayung katapatan king Mayap a Balita, at iti ya ing sangkan nung inya panatag ku lub tungkul kekayu. Buri ku sa ing maging matalino kayu ketang mayap, oneng alang balu ketang e mayap.

²⁰ Ing Dios a panibatan na ning kapayapan, malapit na neng palupig kekayu i Satanas. Ing grasya na ning Ginu tamung Jesu-Cristo manatili kekayu.

²¹ I Timoteo, ing kayabe kung talapagobra, ipayabut na kekayu ing komusta na; antimu rin ding kalupa kung Judiong di Lucio, Jason at i Sosipatro.

²² Aku, i Tercio a sinulat kaniti, ipayabut ku naman kekayu ing kanakung komusta bilang kapatad yu kang Cristo.

²³ Kukomustan na kayu namang Gayo, ing makibandi king bale nung nu ku makipanuknangan at pipupulungan na naman ning iglesia; i Erasto a tesoreru na ning siudad at ing kapatad tamung i Quarto pakomusta da kayu naman. [

²⁴ Ing grasya na ning Ginu tamung Jesu-Cristo manatili kekayu ngan. Amen.]

²⁵ Purian ta ya ing Dios a ating upayang munie king sikanan a kailangan yu ba kayung makapibiebie king kekayung kasalpantayanan, agpang king Mayap a Balita a ipanaral ku, ing Mayap a Balita tungkul kang Jesu-Cristo at agpang king pangapakilala na ning katutuan a milihim king malambat a panaun a milabas!

²⁶ Ngeni, ing katutuan a ita mibulalag na king masala king kapamilatan da ring kasulatan ding propeta, at king kautusan na ning Dios a alang angga, mipabalu karing sablang bansa ban ding sabla maniwala la at mamintu.

²⁷ King bukud mung Dios a makibalu king sabla, miyabie ing ligaya king kapamilatan nang Jesu-Cristo angga na king kapilan pa man! Amen.