1

¹ Ibat ya iting sulat kang Simon Pedro, ing metung karing talasuyu at apostol nang Jesu-Cristo. Miparala ya kekayung dininan na ning kekatamung Dios at Talapagligtas a i Jesu-Cristo, king maulagang kasalpantayanan a kalupa na ning kekami, ketang katuliran na.

² Maglapo kayu sana king grasya at kapayapan uli na ning kekayung kabiasnan tungkul king Dios at kang Jesus a Ginu tamu.

³ Dininan na katamu ning banal a upaya na ning Dios king sablang kailangan tamu ban makapibiebie tamung mitmung kabanalan. Binie na iti king kapamilatan na ning pamangilala tamu king minaus kekatamu ban idake na kekatamu ing sarili nang kaligayan at kayapan.

⁴ King anti kaniting paralan dininan na katamu karing maragul at maulagang regalu a pengaku na. Kanita, king kapamilatan da reting regalu agyu yung lisian ing mapanyirang buri ning laman a atyu king yatu at akua yung mirakayanan king kadiosan na.

⁵ Iti mismu ing sangkan nung inya kailangan yung idagdag ing kayapan king kekayung kasalpantayanan, at ing kekayung kayapan dagdagan yung kaibasnan,

⁶ at ing kekayung kabiasnan abayanan yung pamangawat king sarili, at king pamangawat king sarili iyabe ing pamanatili, at ing pamanatili yu lapatanan yung kabanalan,

⁷ at ing kabanalan abayanan yung pamakilupang tau, at iting pamakilupang tau abayanan yung lugud.

⁸ Ila deti ring miyayaliwang kayapan a kailangan atyu kekayu at palabungan ban ing pamangilala yu king Ginung Jesu-Cristo e mayalang kabaldugan at maging mapakinabang.

⁹ Ninuman ing ala kareti mistula yang bulag a mengalinguan king mipatawaran ne karing kasalanan na.

¹⁰ Inya, kapatad, lalu kayung magkapilit manatiling matatag king kabilian nung nu na kayu inaus at pinili ning Dios. Kanita kapilan man e kayu malili.

¹¹ King anti kaniting paralan, malalagua da kayung paluban king alang anggang Kayarian nang Jesu-Cristo a Ginu at Talapagligtas tamu. fig,,,,,... lalu kayung magkapilit manatiling matatag...,(1:10)fig*

¹² Inya buri kung parating paganaka kekayu deting bage agyamang balu yu na la at atin na kayung tetagan king katutuan a tinggap yu.

¹³ Minamayap ku ing pasagiwan karing kekayung kaisipan deting bage kabang atin kung bie.

¹⁴ Balu ku king e na maglambat ing bie ku, antimo ing asabi na na kanaku ning Ginung Jesu-Cristo.

¹⁵ Inya daptan ku ing sablang agyu ku ban nung mayangu na ing bie ku, parati yu na la mung agaganaka deting bage.

¹⁶ King pamihayag mi kekayu tungkul king paniatang nang mitmung kayupayan ning Ginu tamung Jesu-Cristo, e kami menalig karing salitang pigawa. Ikit mi karing sarili ming mata ing ligaya na.

¹⁷ Atyu kami karin inyang dininan neng dangal at kaligayan ning Dios Ibpa, inyang ing siwala miras ibat king Kakataskatasan a Ligaya ning Banua at nganang sinabi, Iti ya ing sarili kung Anak a pakamalan, keya tutu kung mipamatulan!

¹⁸ Ikami mismu dimdam mi ya itang siwalang menibatan banua uling kayabe na kami keta king banal a bunduk.

¹⁹ Inya lalu keng makasiguru keng sasabian da ring propeta. E yu sisian nung makiramdam kayung masalese kaniti uling mengaring metung a sulung saslag kekayu king karalumduman, angga king maspak ya king alaya ing Aldo ning Ginu, at sunlag ya karing pusu yu ing batuin na ning abak.

²⁰ Maygit king sabla, dapat yung abalu ini: ala yang sariling upayang munie kamalinawan ing ninuman king isanu mang karing ula na ning Kasulatan,

²¹ uling e menibatan ing ula da ring propeta king kaburian na ning tau, nune menibat mismu king Dios at sinabi da ring taung pepakimutan na ning Banal a Espiritu.

2

¹ Nung makananu kanitang minunang panaun ating linto propetang e tutu karing tau Israel, makanyan munaman ating lunto e tutung talaturu libutad yu. King karelang kabiasnan, ituru da kayu king e tutu a makasira king kekayung kasalpantayanan. Tanggian de ing Ginung migligtas karela angga king miras karela ing kapahamakan a e ra isip-isipan.

² At dakal la ding tuki king karelang kanawangan at lapastanganan de pati na ing Dalan ning katutuan.

³ King karelang kasakiman, paglinlangan da kayu karing makawiling pamagsalita ba rang akua ing kekayung kayatinan. Malambat neng makasadia ing Manukum karela at e ya matudtud ing Mamuksa karela.

⁴ E na la penupaya ning Dios ding anghel a mikasala; kilung na la king impierno at panenayan da karin king karalumduman ing Aldo ning Pamanukum.

⁵ E na la penupaya ning Dios ding tau kanitang minunang panaun, nune gisan na lang pete ning Dios ding e mayap a tau king kapamilatan na ning maragul a albug; ala yang peintulutan miligtas nune mu i Noe a menaral tungkul king matulid a pamibiebie ampon ding pitung taung kayabe na.

⁶ Piniumpa na la naman ning Dios at silaban ding siudad ning Sodoma at Gomorra ban ipakit na karing e mayap a tau ing karelang kararasan.

⁷ Oneng linigtas ne ing mayap a taung i Lot a tutung meligalig a lub uli na ning dapat dang imoral ding taung e mayap.

⁸ Mekipamalen ya karela ing mayap a taung ita at aldo-aldo ikit na at dimdam ing miyayaliwang e mayap a bage, at lubus nang penamdaman ing e ustung depat da.

⁹ Inya balu na lang iligtas ning Ginu ding tapat keya king kapagsubukan a daralanan da, at balu na lang parusan ding e mayap angga king Aldo ning Pamanukum

¹⁰ lalung-lalu na detang manusig king marinat nang buri ning laman at tatanggi king kayupayan na ning Dios. Mapangangas la at palalu deting e tutung talaturung sasabian ku. Ala lang pakundangan at kagalangan karing atyu banua, nune insultuan da la pa.

¹¹ Agyang ding anghel a maygit e palak sikanan at upaya kesa kareting e tutung talaturu, king pamiyarap dang sumbung karela king arapan na ning Dios, e la pa naman gagamit nanumang insultu laban karela.

¹² Oneng ding taung deti mengari lang animal a mabagsik a alang pamisip a mibait ban pandakpan da at katatan; insultuan da ing nanumang bage e ra aintindian. Mapuksa la antimo ding animal a malyap.

¹³ Mipasakitan la naman uli na ning kasakitan a depat da karing aliwa. E la patugut magpasasa agyang king aldo masala ba ra mung apanusigan ing tula'ng buri ning karelang katawan. Tutung makarine at makasirang puri ing mayakit lang kasulu yu king pamangan, angga na king gagawan dang pagkonsuelo ing linlangan da kayu.

¹⁴ Ala lang aliwang panintunan nune ding babaing daraptanan dang kanawangan; e la sasawang gagawang kasalanan. Tutuki da la king pamikasala ding mangaina lub. Tutu na lang misane king kasakiman. Tau lang piniumpa!

¹⁵ Kinawani la at melili king dalan a matulid; tutukian da ing bakas nang Balaam a anak nang Beor a maburi king pakinabang a ibat king e mayap a dapat

¹⁶ angga king pemakarinayan ne ning metung a asno. Migsalita ya ing asno anting metung a tau ba nang sabatan ing kamulangan a pamaniaptan na ning mesabing propeta.

¹⁷ Mengari lang sibul a kinati ding taung anti kareti at ulap a papawi na ning angin a masikan; para karela sidia na ne ning Dios ing kalalalaman a lugal a madalumdum.

¹⁸ Milalu la king pamagsalita, oneng ala namang kabaldugan ing karelang sasabian. Kakasangkapanan da ing buri na ning laman ba da lang asilu detang bayu pa mu mikawani karing taung e mayap a ugali.

¹⁹ Pangakuanan da lang kalayaan, samantalang ila mismu ipus na la ning panugaling makasira; uling ing tau ipus ne ning nanumang makasupil keya.

²⁰ Ding taung mekakilala na kang Jesu-Cristo, ing Ginu tamu at Talapagligtas, mekaligtas na la king e mayap a bubunga na ning yatu. Nung pasibayu lang marakap at madaig kaniti, ing kaulian da maygit e palak a karokan kesa king minuna rang meging kabilian.

²¹ Mayap pang e palak ing e ra na bitasang balu ing dalan na ning katuliran kesa king kaybat deng abalu gumulut la king sagradung kautusan a mibie karela.

²² Ing mepalyari karela patutuan ne itang kasebian, Katutubu na ning asu ing balikan na ing suka na. Ing babi, agyang diluan me, magbalik ya mu rin king burak.

3

¹ Pakamalan kung kakaluguran, kadua neng pamaniulat ku kekayu iti. King minunang sulat a peparala ku kekayu at antimu rin kaniting kadua kung sulat, ala kung aliwang kapagnasan nune ing paganaka ku la kekayu ding mapilan a bage ba kung gisingan kekayu ing malinis a pamisip.

² Buri ku king e yu kakalinguan ing sinabi da ring banal a propeta kanitang minuna, at ing kautusan a binie na ning Ginu at Talapagligtas king kapamilatan da ring apostol a tinubud na kekayu.

³ Mumunang dili, sukat yung abalu king karing tauling aldo lunto la ding taung mibiebie ketang sarili dang e mayap a kapagnasan. Insultuan da kayu at gawan pikaylian

⁴ at ngarang sumabi kekayu, Pengaku nang Cristo ing magbalik ya? Antayu ngeni? Ikua ra nang mete ding makatua tamu, oneng alang mibayu keti manibat ketang melalang ya ing yatu!

⁵ Para karela alang kabaldugan king ing banua at yatu lelangan na la ning Dios king upaya na ning amanu na. Pepalto na ing gabun ibat king danum at libutad ning danum.

⁶ King kapamilatan na naman ning danum, ing Albug, lesak nia naman ing yatung minuna nang lelangan.

⁷ King upaya na mu rin ning amanu na, papanatilian ne ning Dios ing banua at yatu ban siran na king api paniatang ning Aldo ning pamanukum na, at pamakamate karing e mayap a tau.

⁸ Pakamalan kung kakaluguran, e yu kakalinguan ini: king Ginu, ing metung a aldo mengari yang libung banua, at ing libung banua mengari ya mung metung a aldo.

⁹ E na piliban-liban ning Ginu ing pamanupad na king pengaku na, antimo ing isipan da ring aliwa. Dirinan na la mung panaun ding sabla ba lang sumisi, uling e na buri ning Dios ing mipahamak ya ing ninuman.

¹⁰ Oneng ing Aldo ning Ginu datang yang antimo ing metung a mapanako. King Aldo ita mamaksing ya ing banua at matda ya. Malaso la king api ding batuin at planeta at masilab ing sablang atyu king yatu.

¹¹ Anti na ning makanyan mirinan kawakasan ing sabla, nanung uring pangatau ing sukat mayakit kekayu? Sukat kayung mibiebie mitmung kabanalan at king ganap a kasuyuan king Dios.

¹² Kabang panenayan ye at pamalaguanan ing paniatang ning Aldo na, daptan yu ing sablang agyu yu. Ita ing Aldo a milablab ya ing mabilug a banua at malaso ya at malaso la king pali ding batuin at planeta.

¹³ Oneng ing tune tamung panenayan ya itang pengaku na ning Dios: ing bayung banua at bayung yatu nung nu mag-ari ing ganap a katuliran ning Dios.

¹⁴ Inya, pakamalan kung kakaluguran, kabang manenaya kayu king Aldo ita, daptan yu ing sablang agyu yu ba kayung maging payapa pamibiebie, malinis at alang kapintasan arapan na ning Dios.

¹⁵ At ing kapibabatan na ning Ginu kekayu, lawan yung antimong oportunidad a babie na kekayu ba kayung miligtas. Yan munaman ing babanggitan na ning pakamalan tamung kapatad a Pablo kanitang sinulat ya kekayu, king kabiasnan a binie na ning Dios kang Pablo.

¹⁶ Makanyan mu rin ing parati nang paganaka karing sablang sulat na tungkul kaniting bage. Ating mapilan a dake karing sulat na a masakit paki-intindian, at dirinan dang e ustung kabaldugan ding alang balu at maina. At yan munaman ing gagawan da tungkul karing aliwang Kasulatan. Inya ipapahamak da ing karelang sarili.

¹⁷ Oneng ikayu, pakamalan kung kakaluguran, iti sadia yu nang balu. Inya sukat kayung mingat ban e ra kayu atake king kamalian da ring taung e kikilalang kautusan. Pota ikayu mismu abating yu ing masalese yu nang kabilian.

¹⁸ Inya e kayu patugut susulung king grasya at beluan kang Jesu-Cristo a Ginu tamu at Talapagligtas. Keya ing kapurian ngeni at king kapilan pa man! Amen.