1

¹ Ibat ya iting sulat kang Pedro, ing apostol nang Jesu-Cristo. Miparala ya para kekayung taung pinili na ning Dios a ngening kasalukuyan makakalat bilang dayuan karing probinsia na ning Ponto, Galacia, Capadocia, Asia, at Bitinia.

² Ikayu ding pinili na ning Dios Ibpa ketang parasan na at pepabanalan na kapamilatan na ning Espiritu na ban mamintu kang Jesu-Cristo, layun luminis king upaya na ning kamatayan na. Ing grasya at kapayapan manatili sanang labis-labis kekayu.

³ Purian ta ya ing Dios at Ibpa na ning Ginu tamung Jesu-Cristo! Uli na ning maragul nang lunus, dininan na katamung bayung bie king kapamilatan na ning pamanyubli nang mebie Jesu-Cristo. Iti ya ing mangatmung mabie kapanayan kekatamu,

⁴ inya manaya tamung tanggap king e mu nanung bendisyun a sasadia na ning Dios para karing pinili na. Sasadia na iti para kekayu karin banua nung nu e malyaring malaso o masira o kumupas.

⁵ Makapanaya iti para kekayu, ikayung liligtas na ning upaya ning Dios king kapamilatan na ning kasalpantayanan kabang panenayan yu itang kaligtasan a makasadiang mipakilala king kawakasan na ning panaun.

⁶ Sukat kayung tumula tungkul kaniti agyamang king kasalukuyan e yu alisian ing miyatdanan lungkut king ditak a panaun uli na ning miyayaliwang kapagsubukan a kekayung daralanan.

⁷ Miraras la deti kekayu ban masubuk ing kadalisayan na ning kekayung kasalpantayanan. Agyang ing gintu a malyaring malaso, masusubuk pa naman king api; makanyan munaman, ing kekayung kasalpantayanan a maygit mal kesa king gintu, kailangan masubuk ing katapatan na. Kaybat nang mesubuk at saka menatili ing kasalpantayanan yu, kanita yu ayasahan ing tanggap kapurian, ligaya at dangalan king Aldo a mipakilala ya i Jesu-Cristo.

⁸ Kaluguran ye agyamang e ye pa ikit. Paniwalan ye agyamang king kasalukuyan e ye akakit. Inya mipaligayan kayu king maragul a tula a e na alarawan ning amanu na ning tau.

⁹ Tatanggapan yu na ing bunga na ning kekayung kasalpantayanan. Iti ya at alang aliwa nune ing pangaligtas yu.

¹⁰ Iti ya ing kaligtasan a penintun dang mitmung kaingatan ding propeta a menula tungkul kaniting regalung ibie na ning Dios kekayu.

¹¹ Sinuri da ing panaun at paralan na ning paniatang na niti. Ing Espiritu nang Cristo a atyu karela ya ing tutuldu kaniting panaun, uling iting Espiritu ya ing pepabalung makapauna karela tungkul king kasakitan a sukat nang dalanan Cristo at king kaligayan a salisi.

¹² Pepabalu na ning Dios kareting propeta king ing karelang obra e para king sarili dang kapakanan nune para kekayu. Pepakilala na iti inyang migsalita la tungkul karing katutuan a ngeni kekayu nang dimdam karing talapanaral na ning Mayap a Balita. Menaral la kekayu kapamilatan na ning Banal a Espiritung miyabie karela ibat banua. Ila naman ding sinabi kekayu karing mesabing katutuan, ding katutuan a mismung ding anghel buri dang apaki-intindian.

¹³ Inya manatili kayung makasadia ampon disiplinadu, at ipamisan yung lubus ing kapanayan yu king regalung miyabie kekayu nung wari't mipakilala ne i Jesu-Cristo.

¹⁴ Tukian yu ing kaburian na ning Dios. E yu la paburen magbabo king bie yu detang buri na ning laman kanitang ala kayu pang balu.

¹⁵ Magpakabanal kayu king sablang dapat yu, antimo nung makananu yang banal ing Dios a minaus kekayu.

¹⁶ Ing Kasulatan mismu sasabian na, Magpakabanal kayu uling aku banal ku.

¹⁷ Ing ausan yung Ibpa neng manalangin kayu ya ing Dios a mamatul alang pamangabiran karing tau, ketang depat na ning balang metung. Inya gamitan yu ing mabilug yung bie keti king yatu, ing pansamantala yung tuknangan, king kagalangan king Dios bilang Ibpa yu.

¹⁸ Uling balu yu nung nanu ing meging bayad na ning kalayaan yu ketang bie alang kabaldugan a amana yu karing kekayung makatua. Ing meging bayad na e metung a bage a malyaring milako ulaga a kalupa da ring pilak o ding gintu.

¹⁹ Meging malaya kayu king alang kalupang ulaga na ning sakripisyu nang Cristo a mengaring metung a biserung tupang alang dipektu o nanumang kapintasan.

²⁰ Pinili na ne ning Dios bayu ya pa melalang ing yatu at mipakilala ya kareting tauling aldo alang-alang kekayu.

²¹ King kapamilatan na maniwala kayu king Dios a pepasubling mebie at pepaligaya keya; inya ing kasalpantayanan yu at kapanaligan makapamisan ngan king Dios.

²² Ngening ikua yung melinis king kapamilatan na ning pamanupad yu king katutuan, at ikua yung mika tapat a lugud karing kapatad yu king kasalpantayanan, manatili kayu sanang mikakalugud kayabe na ning mabilug yung pusu.

²³ Uling king kapamilatan na ning mabie at alang anggang amanu ning Dios mibait kayung pasibayu bilang anak na ning pengaring alang kamatayan, at e ning pengaring ating kamatayan.

²⁴ Antimo ing sasabian na ning Kasulatan, Mengari la king dikut king parang ding sablang tau, at ing sablang kamalan da mengari mu king sampaga na. Lalangi ing dikut at ding sampaga mangatanggal la,

²⁵ oneng ing amanu na ning Ginu manatili kapilan man. Iting amanu ya ing Mayap a Balita a mipanaral kekayu.

2

¹ Lakuan yu, uli na niti, ing sablang e mayap, ing pamamirait, ing pamagkunwari, ing pamangalalu, at pamaninsultu.

² Mangari kayu sa karing bingut a parating magnasa king purung gatas a espiritual ban king pamaninum yu king anti kaniting gatas dagul kayu at miligtas.

³ Uling sasabian na ning kasulatan, Atakman yu na nung nu ya anti kaganaka ing Ginu.

⁴ Lumapit kayu king Ginu, ing batung mabie a tinggian dang alang kabaldugan ding tau, oneng pinili na ning Dios at mal ya king arapan na.

⁵ Lumapit kayu king Ginu ban ikayu man, bilang mabie batu, bilugan ye ing metung a pibalebale espiritual anting banal a pari a miyain ain-sakripisyung espiritual a katanggap-tanggap king Dios king kapamilatan nang Jesu-Cristo.

⁶ Uling sasabian na ning Kasulatan, Memili kung metung a batung mal a ngeni bibili ku anting batung pamuntuk king Zion; at ninuman ing maniwala king batu e ya mipakarine kapilan man.

⁷ Iting batu tutu yang maulaga para kekayung maniwala, oneng karetang e maniwala: Ya ing mismung batung tinggian da ring manalakad bale, oneng kaybat ya ing meging batung maulagang dili.

⁸ At sasabian na ning metung pang Kasulatan, Iti ya ing batung makatisud karing tau, iti ya ing batung mabie a makaragsa karela. Metisud la uling e la meniwala king amanu at iti ya ing telaga na ning Dios para karela.

⁹ Oneng ikayu metung kayung lahing mepili, pari kayung susuyu king Ari, banal kayung bansa, at memalen a pepasubali na ning Dios, at pinili nang magsalita karing makapagmulala nang dapat. Inaus na kayu ibat king karalumduman at linipat na kayu king makapagmulala nang sala.

¹⁰ Kanitang misan e kayu man metung a balen, oneng ngeni balen kayung pinili na ning Dios; kanitang misan e yu man balu ing lunus na ning Dios, oneng ngeni tinggap yu ing lunus na.

¹¹ Kakaluguran, ausan da kayu kapanandaman, bilang dayuan a makayugse king aliwang balen. E kayu manusig karing buri na ning katawan yu, uling parati la deting lalaban king kekayung kaladua.

¹² Ing kekayung panugali libutad ding paganu sukat sanang maging kapuripuri. Kanita bisa la mang magsalitang kasiran laban kekayu, ala lang aliwang akit nune mu ding dapat yung mayap. Uli na ning mayap yung dapat purian de ing Dios king Aldo ning paniatang na.

¹³ Alang-alang king Ginu, pasakup kayu king isanu mang kayupayan a telakad da ring tau: king Emperador a tatalan king kakataskatasan a upaya

¹⁴ o karing gobernador a tinubud nang mamarusa karing darapat e mayap at babie ablas karing darapat mayap.

¹⁵ Uling kaburian na ning Dios, king kapamilatan da ring mayap a daraptan yu, ing papanahimikan yu la king keyalan dang balu ding taung mangmang.

¹⁶ Mibiebie kayu bilang taung malaya; makanyan man e yu gagamitan ing kekayung kalayaan ban takpan ing nanumang e mayap a dapat, nune mibiebie kayu bilang talasuyu na ning Dios.

¹⁷ Igalang yu la ding sablang tau; luguran yu la ding kapatad yu king kasalpantayanan; mika takut kayu sana king Dios at igalang ye ing Emperador.

¹⁸ Ikayung ipus, pailalam kayu king upaya da ring panginuan yu at pakit kayung ganap a kagalangan, e mu detang maganaka at mayap, nune agyang ding mabagsik.

¹⁹ Ablasan na kayu ning Dios, nung balu yung pibatan ing kaplas a bunga na ning kasakitan a e yu pangaintuliran, uling aintindian yu ing kaburian na.

²⁰ Nanung ulaga na ning pamibabata yu karing parusang mangaintulid kekayu uli na ning depat yung marok? Nung biasa kayung mibata king kasakitan a miraras kekayu agyang potang darapat kayung mayap, bendisyunan na kayu ning Dios para kaniti.

²¹ Iti ya ing sangkan nung inya inaus na kayu ning Dios uling i Cristo mismu dinalan yang kasakitan para kekayu, at likuananan na kayung alimbawa ban kanita tuki kayu king bakas nang delanan.

²² E ya dinapat nanumang pamikasala; alang metung mang kalaraman a meramdam karing labi na.

²³ E ya minablas insultu inyang ininsultu de; e na inisip ing ganti ya inyang pepasakitan de, nune peniwala na ing sarili na king Dios, ing Ukum a makatuliran.

²⁴ Dela na la king katawan nang Cristo ding kasalanan tamu kanitang pinaku de king krus ban kanita itamu mate ta na king kasalanan at mie tamu king katuliran. King kapamilatan da ring sugat a tinggap na, kinayap kayu.

²⁵ Mengari kayung tupang melili; oneng ngeni migbalik na kayu king Pastul at Talaingat da ring kekayung kaladua.

3

¹ Makanyan munaman, ikayung babaing talasawa, pasakup kayu karing sarasarili yung asawa ban kanita nung ding aliwang lalaking talasawa e la pa maniwala king amanu na ning Dios, mayagkat la agyang e kayu magsalita king kapamilatan na ning ugali yu,

² uling ila mismu akit da kekayu ing wagas at mayap a panugali.

³ Aliwa sana ing pamangamit yung palamuti ing panaligan ban gawan yung malagu ing sarili yu, antimo ing pami-ayus king buak, pamisulud alahas o masanting a imalan.

⁴ Nune ing kekayung leguan sukat atyu king kilub, king pusu yu, leguan a e malyaring kumupas: ing palamuti ning malagu at mababa lub a tutung maulaga king arapan na ning Dios.

⁵ Makanyan ing leguan a sinese da ring banal a babai king minunang panaun. Atin lang kapanaligan king Dios at pepasakup la karing karelang sarasariling asawa.

⁶ Makanyan ya i Sarah; meging mapamintu ya kang Abraham at ing aus na king asawa na, Ing ginu ku. Ikayu ngeni ding anak na, nung manatili kayung tutuntun king mayap a pamibiebie, at ala kayung pitatakutan nanuman.

⁷ Ikayu man, lalaking talasawa, king pamakiutus yu karing sarasarili yung asawa, sukat yung pakaintindian king e yu la kalupa sikanan. Inya igalang yu lang masalese, uling ila, kayabe yu, tanggap la naman king regalu na ning bie alang angga a ibie na ning Dios. Iti ing sukat yung daptan ban kanita e mirinan sagabal ing pamanalangin yu.

⁸ Katataulian, sukat kayung mikakasundu at midadamayan. Mikakalugud kayu antimo ding mikakapatad at maging maganaka ampon magpakumbaba king metung at metung.

⁹ E yu sana ablasan marok ing marok, e yu ablasan panagkas ing panagkas; nune ipanalangin yu la king bendisyunan na la ning Dios uling para kanyan na kayu inaus ning Dios ban tanggap kayung bendisyun.

¹⁰ Uling sasabian na ning Kasulatan, Ninuman ing bisang magtamasa king bie at bisang manakit payapang panaun, sukat nang pangilagan ing pamagsalitang marok, at tuknang yang maglaram.

¹¹ Sukat yang gumulut king e mayap at sukat yang dapat mayap; sukat nang panintunan at ingatan ing kapayapan.

¹² Uling makalawe ya ing Ginu karing banal at parati yang makiramdam king karelang panalangin; oneng e ya tutula, karing darapat marok!

¹³ Ninu mo ing ligalig kekayu, nung ing kapagnasan yu ya ing dapat mayap?

¹⁴ Nung maging kailangan ing dumalan kayung kasakitan uli na ning matulid, mapalad kayu pa mu rin! E kayu paitakut karing tau at e kayu migaganaka.

¹⁵ Makagyung samban ya i Cristo king mabilug yung pusu at kilalanan ye bilang Ginu. Manatili kayu sanang makasadiang makibat karing taung mangutang tungkul king kapanayan na ning kapayapan a atyu kekayu ngan. Ibie yu sana king mitmung ganaka at kagalangan.

¹⁶ Ingatan yeng malinis ing konsiensia yu ban kanita potang insultuan da kayu, detang maninsultu king mayap yung panugali, bilang talasuyu nang Cristo, ilang dili ra dumine la king sablang paniabian da laban kekayu.

¹⁷ At nung burian na ning Dios ing dumalan kayung kasakitan, masanting a e palak ing dumalan kasakitan uli na ing pamaniapat yung mayap kesa king pamaniapat yung e mayap.

¹⁸ Uling i Cristo mismu mete ya para karing kekayung kasalanan, misan mu at para king kapilan pa man, ing taung banal para karing taung makasalanan, ban kanita akua na katamung ilapit king Dios. Pete re ing katawan na, oneng sinubli yang mebie bilang espiritual,

¹⁹ at minta ya ing espiritu na at menaral karing espiritung makasukul.

²⁰ Ila deti ring espiritu da retang e memintu king Dios, inyang mapibabata yang menaya king pamagbalik da lub kanitang panaun a kasalukuyan ne pang gagawan Noe ing barku na. Ding mapilan a tau, walu la heganagana, miligtas la king danum.

²¹ Ing binyag a lalarawan na ning danum ya ngeni ing makaligtas kekayu. Iti e ya mistulang pamanos king dinat na ning katawan, nune metung yang pangakung sasabian na ning tau king Dios ibat king malinis a konsiensia. Makakabus kekayu ing binyag king kapamilatan na ning pangasubli nang mebie Jesu-Cristo

²² a minukiat na banua, at makalukluk king banda nang wanan ning Dios, mag-ari karing sablang anghel at karing kayupayan at upayang atyu karin banua.

4

¹ Ganakan yu nung nu anti ing kasakitan a delanan nang Cristo keti king yatu. Makanyan munaman, ikayu arian yung mitmung tetagan king lub yu ing mibata. Uling ninuman ing misasakitan a katawan ginulut ne king pamikasala.

² At ngeni, king kekaban na ning bie na aliwa na ing buri ning katawan ing mag-ari keya nune ing kaburian na ning Dios.

³ Dakal na ing panaun a ginamit yu king pamirapat-dapat a kalupa na ning karing paganu. Migbabad kayu king manong a dapat. Menusig kayu king buri na ning laman at alang patugut miglasing. Migpasasa kayu king alak angga king e yu na balu ing pamaniaptan yu neng miyabe-abe kayung magkonsuelo. E yu na pikarine ing makasumaming pamanyamba karing idolo.

⁴ Paniglon dang tutu ding paganu nung wari't ngeni e na kayu makiabe king karelang pamibiebie a mitmung kagaspangan a panugali, inya nanu la pamaniabian tungkul kekayu.

⁵ Oneng pakibatan da iti arapan na ning Dios a makasadiang mukum karing mabie at karing mete.

⁶ Uling ya kabud ing mukum karing mete, inya meging kailangan munaman ing miyaralan la king Mayap a Balita. Mipanaral karela iti ban mie lang kayabe na ning Dios agyamang ikua ra nang mirasnan king kamatayan a mangaintulid karing sablang tau.

⁷ Malapit nang mirinan kawakasan ing sablang bage. Inya kailangan panatag kayu lub at masala kaisipan ba kayung makapanalangin masalese.

⁸ Maygit king sabla, mikakalugud kayung mitmung katapatan uling patawaran na ning lugud ing dakal a kasalanan.

⁹ Makabuklat ya sanang parati king metung at metung kekayu ing kekayung pibale-bale at e yu sana sasawan iti.

¹⁰ Ing balang metung, bilang mayap a talapangasiwa na ning miyayaliwa nang regalu ning Dios, sukat nang gamitan para king ikakayap ning metung at metung ing isanu mang regalu a makapasubali nang tinggap king Dios.

¹¹ Ninuman ing talapanaral, sukat nang ipanaral ing amanu na ning Dios, ninuman ing susuyu, sukat yang sumuyung kayabe ning mabilug a sikanan a babie ning Dios. Kanita king sabla-sabla, miyabie ing kapurian king Dios king kapamilatan nang Jesu-Cristo nung kenu mangaintulid king ligaya, at ing upaya angga king kapilan pa man! Amen.

¹² Pakamalan kung kakaluguran, e yu pagtakan ing mabayat a kapagsubukan a daralanan yu a balamu mo e karaniwan.

¹³ Nune sukat yung ikatula ing mirarakayanan kayu king kasakitan nang Cristo ban potang mipakilala na ing kaligayan na, mikatmuan kayung tula.

¹⁴ Kapalad yu nung palmuran da kayu uli na ning alagad na kayung Cristo, uling iti mangabaldugan king ing Espiritung babie ligaya, ing Espiritu na ning Dios, manatili ya kekayu.

¹⁵ Ninuman sana kekayu e ya miparusan uli na ning metung yang makamate tau o mapanako o kriminal o mapanggulu ya.

¹⁶ Nung mipasakitan kayu uli na ning Cristianu kayu, e yu pikakarine iti, nune pasalamatan ye ing Dios alang-alang king lagyu yung Cristianu.

¹⁷ Miras na ing aldo para magumpisa na ing pamanukum at ding taung pinili na ning Dios ila ding mumunang diling maukum. Nung kekatamu megumpisa nanu kaya ing maging kararasan da retang taung e maniwala king Mayap a Balitang ibat king Dios?

¹⁸ Antimo ing sasabian na ning Kasulatan, Nung tutung masakit para karing mayap ing miligtas, nanu kaya ing kararasan da ring taung alang Dios at palpikasala?

¹⁹ Inya detang daralan kasakitan uli na ning iti ya ing kaburian ning Dios para karela, kailangan dang ipaniwalang lubus ing karelang sarili king katapatan a lub ning karela Miglalang, at isundu ra ing pamaniapat dang mayap.

5

¹ Antimong metung a makatuang talapangasiwa, aku mismu ausan ku la kapanamdaman ding makatuang talapangasiwa na ning iglesia libutad yu. Metung ku karing menakit king pamailasa nang Cristo at metung na karing mirakayanan king ligayang mipakilala king paintungul. Ausan da kayu kapanamdaman:

² pastulan ye ing kawan a binie na ning Dios kekayu, lingapan yeng kusang lub, antimo ing buri na ning Dios at e anting mapipilit mu. Daptan yu ing obra yu e uli na ning salapi, nune uli na ning kapagnasan yung makasuyu.

³ E kayu paginu karing mibili king lalam yung kalingapan, nune sukat kayung maging pialimbawanan na ning kawan.

⁴ At potang palto ne ing Pamuntuk a Pastul, tanggapan ye itang maligayang korona a kapilan man e kumupas.

⁵ At ikayung kayanakan a lalaki, pailalam kayu upaya karing makatua. Ikayu ngan sabla isulud yu ing kababan lub ba kayung misusuyuanan, uling sasabian na ning Kasulatan, Kasaman na la ning Dios ding palalu, oneng papakit yang ganaka karing mababa lub.

⁶ Inya iduku yu ing sarili yu king gamat nang mayupaya ning Dios ban king panaun a karampatan ipuk na kayung matas a matas.

⁷ Ibili yu ngan keya ing sablang kapigaganakan yu, uling atin yang malasakit kekayu.

⁸ Parati kayung makasadia at magbante! Uling ing kekayung kalaban, ing diablo, lilibut yang anting leon a mamius, manintun yang alaklak na.

⁹ Labanan ye, kayabe ning tetagan ning kekayung kasalpantayanan, ngening balu yu king ding kalupa yung talasalpantaya king mabilug a yatu daralanan da naman ing kasakitan a kalupa na ning kekayu.

¹⁰ Oneng kaybat yung dinalan kasakitan king saguling panaun, ing Dios a panibatan na ning sablang grasya a minaus kekayu ban mirakayanan king ligaya nang alang angga kayabe nang Cristo, ya mismu ing pakayap kekayu at munie tetagan, sikanan at matibe a katatalakaran.

¹¹ Keya ing upaya kapilan man! Amen.

¹² Iting makuyad kung sulat kekayu, misulat ya king kasaupan nang Silvano a kikilalanan kung tapat a kapatad. Buri da kayung dinan sikanan lub at ibie kekayu ing kanakung patutu king iti ya ing tune nang grasya ning Dios. Inya tatagan yu ing pamanalakaran yu kaniti.

¹³ Ing iglesiang atyu Babilonia a mepiling abe yu, pakomusta na kayu at makanyan munaman ing ipayabut na ning anak kung i Marcos.

¹⁴ Pugayan ye ing metung at metung king mitmung kagalangan at lugud. Kapayapan keko ngang atyu kang Cristo.