1

¹ Ibat ya iting sulat kang Santiago, ing talasuyu ning Dios at ning Ginung Jesu-Cristo. Pupugayan ku la ngan ding sablang pinili na ning Dios, ding makakalat king mabilug a yatu.

² Kekayu ngan sablang kapatad ku, nung miraras kekayu ing miyayaliwang kapagsubukan, sukat yu iting ibilang antimong tula

³ uling balu yu king arapan na ning anti kaniting kapagsubukan, ing maging bunga na ya ing lalu kayung mabiasang mibata.

⁴ At siguraduan yu king ing pamibabata yu asadsad yu angga king wakas; alang kupas ban maging sakdal kayu at ganap, alang kakulangan nanuman.

⁵ Nung kekayu ating mangailangan kabiasnan, sukat nang aduan iti king Dios at ibie na kekayu ning Dios uling maganaka ya ing Dios at e ya mamarsala.

⁶ Oneng sukat kayung maniawad a ating matibe kasalpantayanan at alang duda nanuman. Ing taung magduda mengari yang alun na ning dagat a pitange-tange na ning masikan nang tiup ning angin.

⁷ E na sa isipan ning taung anti kaniti ing tanggap yang nanuman king Ginu

⁸ uli na ning e ya laus at e ya pilmi lub king nanumang daraptan na.

⁹ Sukat nang ikatula ning kapatad a pakakalulu nung tatas ne kabilian ning Dios,

¹⁰ at sukat nang pasalamatan ning kapatad a mabandi, nung bababa na ne man ning Dios. Uling lilipas kalupa na ning sampaga ning dikut ing nanumang pibandian.

¹¹ Kaslag na ning mapaling aldo malalanat ing dikut; matanggal la ding sampaga na at ala na ing sadia rang leguan. Makanyan munaman ing mapalyari king taung atinan: kasalukuyan nang pasulungan ing negosyu na at kabud nia mu lumbug.

¹² Mapalad ya ing taung manatiling tapat king oras na ning kapagsubukan. Uling nung magtagumpe ya king kapagsubukan, tanggapan ne ing korona. Iti ya ing bie a pengaku na ning Dios karing malugud keya.

¹³ Nung matutuksu ya ing ninuman king anti kaniting kapagsubukan, e na sa sasabian, Ing tuksung yan manibatan king Dios. Uling e ya malyaring matuksu ing Dios king e mayap at e na ne man tuksuan ing ninuman.

¹⁴ Oneng daralan yang kapagsubukan ing tau neng agkatan ne ning sarili nang e mayap a kapagnasan;

¹⁵ kaybat, ing e mayap nang kapagnasan ibait na ing kasalanan. Ing kasalanan naman magdalang kamatayan.

¹⁶ Inya e kayu pailinlang, kaluguran kung kapatad!

¹⁷ Ing sablang mayap at ing sablang ganap a grasya manibat banua; daratang ibat king Ibpa, ing Linalang karing sala king banua, ing e mibabayu ni gugulut pasaring kadalumduman.

¹⁸ King sarili nang kaburian beit na katamu king kapamilatan na ning amanu ning katutuan ban itamu ding maging mumunang diling bunga na ning sablang lelangan na.

¹⁹ Tandanan yu ini, kaluguran kung kapatad! Maging matni kayu sana king pamakiramdam, oneng banayad king pamagsalita at mabagal king pamimua.

²⁰ Uling e makasaup ing mua na ning tau ban maging matulid ya.

²¹ Inya, ilako yu ing sablang e mayap a panugali at ing e mayap a dapat, at tanggapan king mitmung kababan lub ing amanung tatanam na ning Dios karing pusu yu a makapagligtas kekayu.

²² E yu lilinlangan ing sarili yu, nune maging talatupad kayu king amanu na ning Dios at e na mu kabud talapakiramdam.

²³ Ing makiramdam king amanu at kaybat e na tutuparan, mengari ya king taung lalawe king sarili nang itsura king salamin.

²⁴ Kaybat nang ikit king saguling penandit, kakalinguan na nang agad-agad kagulut na, nung nanu ya itsura.

²⁵ Oneng ninuman ing susuring masalese at manatiling tutupad king ganap a kautusan a babie kalayaan karing tau, at e nia kabud makiramdam at kaybat mangalinguan, ing taung anti kaniti ya ing bendisyunan na ning Dios king sablang dapat na.

²⁶ Nung isipan na ning ninuman king relihiosu ya, oneng e na ne man balung pigilan ing dila na, lilinlangan na mu ing sarili na at alang kabaldugan ing pangarelihiosu na.

²⁷ King arapan na ning Dios a Ibpa tamu, ing tune at dalise relihiun ya ini: saupan la ding ulila at ding babaing mebalu king karelang kasakitan, at ingatan ing sarili ban e midinatan king e mayap na ning yatung iti.

2

¹ Kapatad, antimong talasalpantaya king Ginu tamung Jesu-Cristo, ing Ginu na ning ligaya, sukat kayung parehu lawe karing tau.

² Alimbawa, ing metung a taung makapiblas masanting at makasingsing a gintu linub ya king kekayung kapulungan, kayagnan neng dinatang ing metung a pakakalulung gisi-gisi a imalan.

³ Nung lalu yeng atensyunan ing taung masanting a piblas at sabian yu, Keni kayu pu lukluk, masanting ya ing luklukan a ini, oneng king taung pakakalulu at gisi-gisi a imalan ngayung sumabi, Keta na ka mu talakad, o kaya, Lukluk na ka mu king lapag,

⁴ e kayu maging parehu lawe at maging talapanatul kayung ating e mayap a isip.

⁵ Lawan yu, kaluguran kung kapatad! Ding lalawan nang pakakalulu ning yatu ila ding pinili na ning Dios para mipabandian la king kasalpantayanan, at magkamit king Kayarian a pengaku na karing malugud keya.

⁶ Oneng linawe yu lang mababa uri ding kalulu! Ninu wari ding manalipit kekayu at midadala kekayu arapan da ring husgadu? E ding mabandi?

⁷ E wari ila naman ding manyira king lagyung mitmung dangal a binie na ning Dios kekayu?

⁸ Masanting kayu daraptan, nung tutuparan ye ing kautusan a binie na ning Dios a sasabian ning Kasulatan, Luguran me ing kalupa mung tau antimo ing sarili mu.

⁹ Oneng kabud e kayu paraparehu lawe karing tau, mikakasala kayu at agpang king Kautusan sukat kayung miyatulan.

¹⁰ Ninuman ing tutupad king kabilugan a Kautusan, oneng e ne tiparan ing metung a malating kautusan, lebagan na na la ngan ding sablang kautusan.

¹¹ Uling ing sinabing E ka makipangalugud, ya naman ing sinabing E ka makamate. Agyang e ka makipangalugud, lalabag ka mu rin king kautusan, nung makamate na ka man.

¹² Inya mingat kayu king pamagsalita yu at dapat uling miyatulan kayu ketang kautusan a minie kalayaan kekayu.

¹³ Atulan neng alang lunus ning Dios ing ninumang e biasang lumunus; oneng e ya sukat mitakutan ing mapaglunus arapan na ning ukum.

¹⁴ Kapatad, nanung kwenta na nung sabian na ning metung a tau, Atin kung kasalpantayanan, oneng ing dapat na e na naman patutuan iti? Aligtas ne kaya ning anti kaniting kasalpantayanan?

¹⁵ Alimbawa, ating kapatad a mangailangan imalan at alang apangan.

¹⁶ Nanung kwenta na ning sabian mu: Saupan na ka sana ning Dios! E ka paidimla at mangan ka sanang masalese!, nung e mu ne man dirinan imalan a isulud na at kanan a apanulu nang danup?

¹⁷ Makanyan ya naman ing kasalpantayanan: nung kabud ya mu pamaniwala, oneng ala ne mang dapat a mayayakit kayabe na, kasalpantayanan yang mete.

¹⁸ Oneng atin naman sasabing, Ika, atin kang kasalpantayanan, aku naman atin kung dapat. Ing ipakibat ku naman anti kanini, Ipakit mu kanaku ing kasalpantayanan mung ala namang dapat, at ipakit ku naman keka king kapamilatan da ring dapat ing kanakung kasalpantayanan.

¹⁹ Maniwala ka king ating metung mung Dios? Masanting! Ding demonyu man maniwala la at gagalgal la pa king takut.

²⁰ Mangmang! E mu wari aintindian king alang kwenta ing kasalpantayanan, nung ala yang dapat a mayap?

²¹ E mu wari balu king liguran ne ning Dios i Abraham uli na ning depat na inyang inain ne king altar ing anak nang i Isaac?

²² Ken mu akit king miyabe megobra ing kasalpantayanan na at dapat; meging ganap ing pamanialpantaya na king kapamilatan na ning dapat na.

²³ Metupad ing sasabian na ning Kasulatan, Sinalpantaya ya i Abraham king Dios at uli na ning kasalpantayanan na tinggap ne ning Dios. Inya ing Dios inaus neng kakaluguran i Abraham.

²⁴ Ken yu akit king mabibilang yang metanggap king Dios ing tau uli da ring dapat na at e mu kabud king kapamilatan na ning pamanialpantaya na.

²⁵ Makanyan munaman ing milyari kang Rahab, ing babaing magtinda king katawan na. Tinggap ne ning Dios uli na ning depat nang mayap inyang matula na lang tinggap detang ispia a tiburan da ring Israelita, at sinopan na lang mekatakas kapamilatan na ning pamanuru na king aliwang dalan.

²⁶ Inya, nung makananung ing katawan a makakawani king espiritu, katawan yang mete, makanyan munaman, ing kasalpantayanan a makakawani king dapat a mayap, kasalpantayanan yang mete.

3

¹ Kapatad, e la sa magnasang maging talaturu ding dakal kekayu ngening balu yu king itamung talaturu tanggap tamung lalung mabayat a kayatulan.

² Maralas tamu ngan magkamali. Ninuman ing e bitasang magkamali king sasabian na, tau yang ganap at biasang mamigil king sarili na.

³ Dirinan ta yang paket king asbuk ing kabayu ban apatukian ta ya king buri tamu, at ban apapuntan ta ya king direksyun a buri tamu.

⁴ Makanyan munaman, ding barku, maragul la man at tutulak na la ning masikan a angin, oneng ayayalis ne direksyun ning malating timun, at pupunta ya nukarin ne man buring marap ning piloto.

⁵ Makanyan ya naman ing dila na ning tau, agyamang malati ya mung dake na ning katawan, oneng pagmayabang na ing maragul a apapalyari na. Isipan yu namu! Ing metung a maragul a gubat malyari neng silaban ning metung a malating siklab!

⁶ Mengari ya king api ing dila. Makayaliwa yang dili karing sablang dake na ning kekatamung katawan; ayayawa ne king e mayap ing mabilug tamung pangatau. Ing api na manibatan mismu king impierno at asisilab na ing sabla king mabilug tamung pamibiebie.

⁷ Malyari na lang patunuran ning tau at tune na lang apapatunud ding miyayaliwang uring lelangan, ding mabangis a animal at ayup, ding lelangan a gagapang at ding asan.

⁸ Oneng alang taung makapatunud king dila. Tutu yang e mayap at e me apigil; mitmu yang kamandag.

⁹ Gagamitan ta ya king kapurian king kekatamung Ginu at Ibpa, at ya namang gagamitan tamu king pamalmura king kalupa tamung tau a melalang king wangis na ning Dios.

¹⁰ Ing kapurian at palmura parehung manibatan king metung mung asbuk. Kapatad, iti e sukat malyari.

¹¹ Lulual wari king metung mung sibul ing danum a matabang at ing danum a malat?

¹² Ing tanaman a higera, kapatad ku, kapilan man e ya makapamungang olibo ni ing ubas e ya malyaring mamungang biabas. E mu naman apikuanan danum a matabang ing danum a malat.

¹³ Ninu kekayu ing biasa at makaintindi? Ipakilala yu iti king kapamilatan na ning mayap a pamibiebie, at ipakit yu ing mayap yung dapat a bunga na ning kababan lub at kabiasnan.

¹⁴ E kayu sukat magmayap-mayap nung king lub yu mag-ari ing kapangaririan, ing kaplas lub at kaimutan, at e yu tatakpan ing katutuan king pamamigawang amanu.

¹⁵ Ing anti kaniting kabiasnan e manibatan king Dios nune king yatu, alang nanumang dake ing espiritu at maka-demonyu.

¹⁶ Nukarin man mag-ari ing pangariria at pansariling nasa, karin munaman ing kaguluan at ing miyayaliwang uring e mayap.

¹⁷ Oneng ing kabiasnan a manibatan king Dios, mumunang dili, ating yang malinis a pamibiebie, malugud ya king kapayapan, maganaka ya, at mapanatindi; kitmuan ya king pamaglunus at mayap a dapat, e biasang mangabiran at e ya mapagkunwari.

¹⁸ Ing kayapan ya ing bunga na ning kapayapan a sasalbag da ring taung malugud king kapayapan.

4

¹ Nanu ing panibatan na ning sablang pamipate at pamikontrang lalto kekayu? Aliwa wari deti ding bunga na ning pamitan ning katawan yu a alang patugut mag-rebeldi laban king pangatau yu?

² Atin kayung buri, oneng e la malyaring miyabie kekayu, inya makamate kayu; atin kayung buri, oneng e yo akua, inya mikontra-kontra kayu at mipatepate. Ala kekayu ing bage buri yu uling e yu aduan iti king Dios.

³ At nung aduan yu at e yu tatanggapan, ing sangkan uling ing parasan yu e mayap; maniawad kayu karing miyayaliwang bage para gamitan yu mu king sarili yung tula.

⁴ Taksil a tao! E yu wari balu king ding maki-kaluguran king yatu maging kalaban na la ning Dios? Inya, ninuman ing bisang maging kakaluguran na ning yatu gagawan neng kalaban na ning Dios ing sarili na.

⁵ Isipan yu kaya king meyala yang kwenta ing Kasulatan a sasabing, Ing espiritung binili na ning Dios kekatamu kitmuan ya karing mabagsik a nasa.

⁶ Oneng ing grasyang babie na ning Dios kekatamu lalu namang masikan. Uling sasabian na ning Kasulatan, Lalabanan na la ning Dios ding palalu, oneng dirinan na lang grasya ding mapagpakumbaba.

⁷ Inya, pailalam kayu king upaya na ning Dios. Labanan ye ing diablo, at dumayu ya kekayu.

⁸ Lumapit kayu king Dios, at lumapit ya kekayu ing Dios. Wasan yu la ding gamat yu, ikayung palpikasala! Linisan yu la ding pusu yu, ikayung pabayu-bayu pamisip!

⁹ Pagkalungkutan yu, kumiak kayu, at tangisan yu; alilan yung pamanangis ing kekayung sagaksak, at alilan yung lungkut ing kekayung tula!

¹⁰ Magpakumbaba kayu arapan na ning Ginu, at ibangun na kayu.

¹¹ Kapatad, e kayu mipapanyira. Ing manyira king kapatad na o mamatul, sisiran ne at atulan ing mismung Kautusan. At nung atulan me ing Kautusan, mangabaldugan king e me tutuparan, nune atulan me.

¹² Ing Dios ya mung bukud ing gagawang Kautusan, at ya mung bukud ing mamatul. Ya mung bukud ing makapagligtas at makalipul. Ninu mo ika ban atulan me ing kalupa mung tau?

¹³ Ngeni, pakiramdaman yu ku, ikayung sasabing, Ngeni o kaya bukas maglakbe kami king siudad a anti keta at karin kami magdatun kilub ning pabanua. Manintunan kami at tumipun dakal a salapi.

¹⁴ Balu yu wari nung nanu ing darala na ning aldo bukas? Mengari mu ing bie yu king ulap a lalto king saguling penandit at kaybat mawala.

¹⁵ Inya ini ing sukat yung sabian, Nung burian na ning Ginu at atin pang bie, daptan mi ing anti keni o ing anti keta.

¹⁶ Oneng tutu kayung matas a lub at mapagparangalan; ing pamagparangalan a anti kaniti e ustu.

¹⁷ Inya, mikakasala ya ing taung makibalu king mayap a sukat nang daptan, oneng e na daraptan. daraptan.

5

¹ At ngeni, ikayung mabandi, pakiramdaman yu ing sasabian ku! Tumangis kayu at kiakan ing makalunus a bage a malapit nang dugpa kekayu!

² Merunut na ing pibandian yu at ngitngat da nang pulilya ing imalan yu.

³ Kalawangnan na ing kekayung gintu at pilak at iting kalawang ya ing munie patutu laban kekayu. Yan ing silab anting api king kekayung laman. Yan ing pibandian a tinipun yu para karing tauling aldo.

⁴ Magsalitang laban kekayu ing upang e yu binie karing taung megobra king kekayung gabun. Susukdul king banua ing saingsing da ring talapagobrang linipit yu; miraras king panamdam na ning Ginung Mayupayang tutu.

⁵ Migpasasa kayu king tula at kalayawan keti king yatu. Anti yung pepataban at sidia ing sarili yu kalupa da ring animal a sesesen da para katatan.

⁶ Inatulan ye at pepapate ye ing taung alang kasalanan at ya e na kayu lebanan.

⁷ Inya, mibabata kayu, kapatad, mibabata kayu angga king paniatang na ning Ginu. Lawan yu nung makananu yang manenayang mitmung kapibabatan ing metung a ortelanu bayu mikabungang maulaga ing gabun na. Mapibabata yang manenaya king mumuna at tauling uran.

⁸ Sukat kayu namang mapibabata; e kayu paisira lub uling malapit na ing aldo nang paniatang ning Ginu.

⁹ Kapatad, e kayu mipapamarsala ban e na kayu atulan ning Dios. Ing Ukum malapit ne, atyu ne king pasbul.

¹⁰ Kapatad, ganakan yu la ding propeta a meging talapagsalita na ning Ginu. Gawan yu lang uliran yu king kapibabatan king oras ning kasakitan.

¹¹ Ausan ta lang mapalad uling mebiasa lang mibata angga king kawakasan. Dimdam yu na ing tungkul king kapibabatan nang Job. Balu yu nung makananu neng inablasan ning Ginu bandang tauli. Ipakilala na niti king malugud ya ing Ginu at mapaglunus.

¹² Kapatad, maygit king sabla e kayu susumpa neng mangaku kayu; e kayu pasaksi king banua o king yatu o king nanuman. Sabian yu, Wa, nung wa ing buri yung sabian, at Ali, nung ali, ban e na kayu atulan ning Dios.

¹³ Ating ninuman kekayu a daralan kasakitan? Sukat yang manalangin. Atin namang manamdaman tula? Sukat nang ikanta ing kapurian king Dios.

¹⁴ Atin naman masakit kekayu? Sukat na lang payaus ding mamuntukan king iglesia ban ipanalangin de, at kuskusan laru king lagyu na ning Ginu.

¹⁵ Iligtas ne ing masakit ning panalangin a bunga na ning kasalpantayanan. Ibangun ne ning Ginu at nung atin yang kasalanan mipatawaran la naman.

¹⁶ Inya, ipagtapat yu king metung at metung ing kekayung kasalanan at mipapanalangin kayu ban kumayap kayu. Maragul ing malyari nang ibunga ning panalangin na ning taung mayap.

¹⁷ Tau ya namang kalupa tamu i Elias. Taimtim nang penalangin ing e sana muran at e minuran kilub ding atlung banua at anam a bulan.

¹⁸ Menalangin yang pasibayu at menabu ing uran at memunga la ding tanaman.

¹⁹ Kapatad, nung mililisia ya king katutuan ing metung kekayu at ing metung naman apapabalik ne lub,

²⁰ dapat nang abalu king ing makapabalik king metung a makasalanan ibat king e mayap nang pamibiebie, aligtas ne iting kaladua king kamatayan at apalyari na ing pangapatawaran da ring dakal a kasalanan.