1

¹ King minunang librung sinulat ku, O Teofilo, selese ku ing sablang depat na at ing tiru nang Jesus ibat king kapupurmeruan

² angga king aldo a mitas ya banua. Bayu ya mitas banua milakuan yang panabilin king kapamilatan na ning Banal a Espiritu karing taung pinili na bilang apostol na.

³ Kilub ding apat apulung aldo, kaybat ning kamatayan na, maralas yang pepakit karela king miyayaliwang paralan a e karaniwan bilang patutu king ya mabie ya. Ikit de at akasabi na la tungkul king Kayarian ning Dios.

⁴ At inyang makatipun la nganang minie panabilin karela, E kayu mamako king Jerusalem, nune panayan ye karin ing regalung pengaku na ning Ibpa a asabi ku na kekayu.

⁵ Meminyag ya i Juan king kapamilatan na ning danum, oneng karing daratang a mapilan a aldo mabinyag kayu king Banal a Espiritu.

⁶ Kayabe de i Jesus kanitang mitipun la ding apostol at kitang da, Ginu, ibalik mu ne kanyan king Israel ing Kayarian?

⁷ Pekibat nang Jesus karela, Ing kayupayan nang Ibpa ku ya ing mitutuldu karing panaun at karing aldo, at e mangaintulid kekayu ing pakibaluan pa nung kapilan la datang.

⁸ Oneng mikatmuan kayung upaya potang datang ne kekayu ing Banal a Espiritu at ikayu ding maging testigu ku king Jerusalem, king mabilug a Judea at Samaria at angga na karing wakas ning yatu.

⁹ Kaybat nang asabi iti, mitas ya banua kabang makalawe la kang Jesus at pimpanan ne ning biga king panimanman da.

¹⁰ Makalawe la pa banua kabang paitas ya, inyang bigla lang linto king arap da ring aduang taung makaimalan a maputi.

¹¹ Ngara karela, Lalaking tau Galilea, baket pakatalakad kayu keti at makatalanga banua? I Jesus a ikit yung mitas banua king arap yu datang yang pasibayu, nung makananu yeng ikit mitas banua.

¹² Kaybat na nita, migbalik la Jerusalem ding apostol ibat king Bunduk ding Olibo a atin anggang metung a kilometru karayu king siudad.

¹³ Inyang miras la king siudad, tinaglus lang menik ketang kuartung karelang pitutuknangan: i Pedro, i Juan, i Santiago, i Andres, i Felipe, i Tomas, i Bartolome, i Mateo, i Santiago a anak nang Alfeo, i Simon a aktibista, at i Judas a anak nang Santiago.

¹⁴ Maralas lang mititipun ban miyabe-abe manalangin kayabe da ring babai, i Maria a ima nang Jesus at ding kapatad na.

¹⁵ Kaybat na ning mapilan a aldo mika pulung la ding talasalpantaya a ating mekad dinalan at aduang pulu heganagana. Tinalakad ya i Pedro ban magsalita.

¹⁶ Ngana, Kapatad, kailangan yang matupad ing kasulatan nung nukarin sinabi nang makapauna ning Banal a Espiritu king kapamilatan nang David, ing kasulatan tungkul kang Judas a menimuna karetang dinakap kang Jesus.

¹⁷ Metung ya i Judas karing meging galame na ning kekaming grupu, uling mepili yang mika dake king kekaming obra. (

¹⁸ Karing salaping tinggap nang Judas para king kataksilan na sinali yang kapirasung gabun at ya namang lugal a kematayan na; menabu yang mumuna buntuk, mitdas ya atian at linual ing heganaganang bituka na.

¹⁹ Abalitan da ngan iti ding sablang tau Jerusalem, inya king amanu dang sisuan ausan deng Akeldama ing marangleng ita. Ngana wari, Ing Marangle ning Daya.)

²⁰ Uling makasulat king libru ding Dalit, Milako ya sana tau ing bale na; ala sanang tuknang kilub na. Misulat munaman, Kuanan na sana ning aliwang tau ing dake nang gagampanan king kasuyuan.

²¹ Inya kailangan yang makiabe kekami ing katau antimong metung a talapatutu king pangasubli nang mebie ning Ginung Jesus. Kailangan ing metung ya karetang akayabe mi na kabang maglakbe ya ing Ginung Jesus abe mi, manibat king panaun a penaral nang Juan ing pamaminyag na angga na king aldo a meko ya i Jesus libutad tamu at mitas ya banua.

²²

²³ Inya inapag da la lagyu ding adua katau: i Jose a ausan dang Barsabas (mipalayawan munamang Justo) at i Matias.

²⁴ Kaybat ngarang menalangin, Ginu, atataruk me pilubluban ing balang tau. Uli na niti, O Ginu, ipakit mu kekami nung ninu kareting adua ing kekang pinili

²⁵ ban kuma king kasuyuan at panga-apostol a peinggulutan nang Judas a minta ketang lugal a pangaintuliran na.

²⁶ Kaybat na nita, mibagutan la karing lagyu da ring adua katau. At mebagut ya ing kang Matias, at ya ing digdag da king grupu da ring labing metung a apostol.

2

¹ Inyang miras ing aldo ning Pentecoste, makatipun la ding sablang talasalpantaya king metung a lugal.

² Kabud-abud mika alingongo a menibat king banua a balamu biung na ning masikan a angin; kitmuan ne ing bale nung nu la pakalukluk.

³ Kaybat na nita, ikit da lang mikakalat ding balamu dakal a dilang api at mika atin ya kareti king tulid na ing balang katau.

⁴ Mikatmuan la ngan king Banal a Espiritu. Megumpisa lang migsalita karing miyayaliwang amanu, agpang king binie na karela ning Espiritu.

⁵ Ating Judio kanita karin Jerusalem; talasamba la king Dios at menibatan la karing miyayaliwang bansa na ning yatu.

⁶ Inyang dimdam da iting alingongo mitipun-tipun la ding dakal a tau. Mengasdan la ngan uling dimdam da lang migsalita ding apostol king amanu nang sisuan ning balang metung karela.

⁷ Ngarang sinabi king pangasdan da at pangapamulala, E la ngan wari tau Galilea deting taung magsalitang makanyan?

⁸ Baket ngeni daramdaman ta lang magsalita karing sara-sarili tamung amanung sisuan?

⁹ Atin kekatamung menibatan Partia, Media at Elam, atin munamang menibatan Mesopotamia, Judea at Capadocia; ating menibatan karin Ponto at Asia,

¹⁰ Frigia at Pamfilia, Ehipto at karing lugal na ning Libya, malapit Cirene; ding aliwa naman kekatamu menibatan la Roma; Judio ampon paganung mekonberti king Judaismo;

¹¹ ding aliwa pa menibatan la Creta at Arabia. Makanyan man daramdaman ta la ngang magsalita karing sara-sarili tamung amanung sisuan; sasalita da ing makapagmulalang bage a depat na ning Dios!

¹² King pangasdan da at pangabalisa lub mikukutnanan lang alang patugut. Ngara, Nanu kaya kabaldugan iti?

¹³ Oneng atin namang mapilan a migsalitang kapanyiran. Ngara, Malasing la ding taung den!

¹⁴ Kanita tinalakad ya i Pedro at ding labing metung a apostol, at nganang migsalitang masikan karing tau, Kabalen a Judio at ikayung sablang manuknangan keti Jerusalem, pakiramdaman yu ku at paintulut yung sabian ku kekayu nung nanu ing kabaldugan na niti.

¹⁵ E la malasing ding taung deni, antimo ing isipan yu karela; alas nuebe na pa mu ning abak, tutu pang maranun.

¹⁶ Oneng iti ing sinabi na ning propeta Joel,

¹⁷ Iti ing kakung daptan karing tauling aldo, ngana ning Dios; dinan ku la ding sablang tau king kakung Espiritu. Ding anak mu manula la; ding kekang baintau manakit lang vision, at ding makatua mung lalaki maninap la.

¹⁸ Wa, pati na karing kakung talasuyu a lalaki at babai, itugtug ke ing kakung Espiritu karing aldo deta, at ila man manula la.

¹⁹ Palto kung tanda king banua, at miyayaliwang pagmulalan king yatu. Mika daya at api at makapal a asuk;

²⁰ kulimlim ya ing aldo, at lare ya ing bulan antimo ing daya, bayu ya datang ing maragul at maligayang Aldo ning Ginu.

²¹ At kanita, ninuman ing maus king lagyu ning Ginu miligtas ya.

²² Pakiramdaman yu iting sasabian ku, memalen ning Israel! I Jesus ning Nazaret ya ing taung tinubud na ning Dios. At ing pangatuburan na king Dios mipakilalang masala kekayu king kapamilatan da ring milagru, ding makapagmulalang bage, at ding tanda a depat na ning Dios king kapamilatan na. Ikayu mismu balu yu iti uling keti mismu libutad yu karin mepalyari.

²³ Ing Dios, king sarili nang kaburian at kabiasnan, telaga na nang makapauna king miyabie ya i Jesus kekayu, at pete ye inyang peintulut yung ipaku de king krus ding e mayap a tau.

²⁴ Oneng pepasublian neng mie ning Dios; linigtas ne king upaya na ning kamatayan uling e malyari kapilan man ing bihagan ne ning kamatayan.

²⁵ Uling sasabian nang David ing tungkul keya. Ngana, Ikit ke ing Ginu, atyu king arap ku king sablang panaun; atyu king banda kung wanan ban e ku maligalig.

²⁶ Uli na niti, mesaya ya ining pusu ku, at ing dila ku magkanta yang mitmung tula; miyatdanan ya namang matibe kapanayan, ing katawan ku,

²⁷ uling e me lakuan ing kaladua ku, at e me paburen king tuknangan da ring mete ni e mu paintulut king ining kekang Banal takman yang kasiran.

²⁸ Pepakilala mu la kaku ding dalan ning bie, at katmuan mu ku king tula uli ning atyu ka king siping ku.

²⁹ Kapatad, e na alingad ning ninuman king i David a kekatamung makatua mete ne at makakutkut; atyu ya pa libutad tamu ing pantiun na.

³⁰ Anti na ning metung yang propeta balu na king ing Dios pengaku na at simpa keya ing gawan neng kayalili na bilang ari ing metung karing lahi na;

³¹ ikit na nang makapauna ing daptan na ning Dios, inya ing sinabi na makatungkul king pangasubli nang mie ning Cristo: ya kabud itang sasabian nang, E mipaburen king tuknangan da ring mete; e ya mebuluk king kutkutan ing keyang katawan.

³² Binangun ne at pepasublian mie ning Dios iti mismung i Jesus, at ikami ngan testigu kami kaniti.

³³ Mitas ya king banda nang wanan ning Dios at tinggap ne keya ing Banal a Espiritu, antimo ing pengaku na ning Ibpa na at ing akakit yu at daramdaman ngeni ya itang kalam a tigtug nang labis-labis kekami.

³⁴ Uling aliwa i David ing minukiat karin banua; oneng ya itang sinabi, Ing Ginu sinabi na king kakung Ginu: Lukluk ka keni king banda kung wanan,

³⁵ anggang e ku la apasuku keka ding kekang kalaban.

³⁶ Uli na niti, kailangan dang abalu ding sablang memalen ning Israel king masalang tutu king iting Jesus, ing pinaku yu king krus, ya ing gewa nang Ginu at Cristo ning Dios!

³⁷ Inyang dimdam da ring tau iti, meligalig la pilubluban, at ngara kang Pedro at karing aliwang apostol, Nanu ing sukat ming daptan, kapatad?

³⁸ Pekibat nang Pedro karela, Sumisi kayu at painggulut karing kekayung kasalanan, ing metung at metung kekayu, at pabinyag kayu king lagyu nang Jesu-Cristo ba lang mipatawaran ding kekayung kasalanan at tanggapan ye ing Banal a Espiritu, ing regalu ning Dios.

³⁹ Uling ing pengaku na ning Dios para kekayu ya at para karing kekayung anak at para karing sablang atyu king marayu, ding sablang ausan nang lumapit keya ning Ginu tamung Dios.

⁴⁰ Migsalita ya pang malambat karela i Pedro king kapamilatan da ring miyayaliwang pamagmatulid, at nganang menagkat karela, Iligtas yu ing kekayung sarili king parusang daratang kaniting marawak a lahi!

⁴¹ Meniwala la ding keraklan karela king aral na, at tinggap da ing sinabi na at pepabinyag la. Kanita mu ring aldong ita angga lang atlung libu katau ding miragdag king kabilangan da.

⁴² Ginamit da ing karelang oras king pamagaral king tuturu da ring apostol; miyabe-abe la antimong metung a pamilya, misasanmetung la king panalangin at misulusulu la king pamamirasung tinape.

⁴³ Uli da ring dakal a makapagmulalang bage a daraptan da ring apostol, mikatmuan la ding sabla king takut.

⁴⁴ Menatili lang misasanmetung ding sablang talasalpantaya at para karela ngan ing sabla dang pibandian.

⁴⁵ Pemisali da ing kayatinan da at pibandian, at piparti-parti da ing ayabli ra karing sabla, agpang king pamangailangan na ning balang metung.

⁴⁶ Aldo-aldo lang mititipun miyabe-abe king Templo, at misulusulu la king pamamirasung tinape karing karelang pibalebale. Misulusulu lang mitmung saya at katapatan,

⁴⁷ pupuri la king Dios at ikua ra ing mayap dang pilubluban ding sablang tau. At aldo-aldo daragdag na la karela ning Ginu ding mangaligtas.

3

¹ Misan a aldo, papunta la king Templo di Pedro at Juan. Alas tres na ning gatpanapun kanita; oras para king pamanalangin.

² King lele na ning pasbul a ausan dang Pasbul a Masanting, ating metung a taung lumpu. Katutubu na ing pangalumpu na. Darala re aldo-aldo king lele na niting pasbul ban magpalimus karing taung lulub king Templo.

³ Inyang ikit na lang lulub di Pedro at Juan meniawad yang limus karela.

⁴ Linawe deng maratna di Pedro at Juan at ngara, Lumawe ka kekami!

⁵ Linawe na la; panayan nang atin lang ibie keya.

⁶ Oneng nganang migsalitang Pedro, Ala kung bitasang pera, oneng dinan da ka king atyu kanaku: king lagyu nang Jesu-Cristo ning Nazaret, lumakad ka!

⁷ Kanita inabut neng Pedro ing gamat na at seupan neng tinalakad. Kanita mu rin mirinan lang sikanan ding bitis na at bukung-bukung;

⁸ mipalundag ya, ikua nang mekatalakad at megumpisa yang linakad. Kaybat, tikian na lang linub king Templo, ngananang lumakad, ngananang lundag, pupuri at pasalamat king Dios.

⁹ Ikit de ring sabla king lalakad ya at babie kapurian king Dios.

¹⁰ Akilala da king ya ing taung sadiang makalukluk magpalimus king lele ning Pasbul a Masanting ning Templo. Mengapamulala la at mengasdan; e da abut isipan nung makananu yang kinayap.

¹¹ Kabang tataid ya pa kari Pedro at Juan ing taung mibait lumpu, mengapamulala la ding sablang tau at pupulayi lang linapit karela king balkon na ning Templo, itang balkon a ausan dang Balkon nang Solomon.

¹² Nganang Pedro panakit na karing tau, Memalen ning Israel, baket mangasdan kayu kaniti at pagmulalan yu kaming makanyan? Bala yu galang apalakaran mi ya ing taung ini king kapamilatan na ning sarili ming upaya o kabanalan?

¹³ Ing Dios nang Abraham, Isaac, Jacob, at ing Dios ding kekatamung makatua ya ing pepaligaya king Talasuyu nang i Jesus. Oneng ikayu ing peparakap keya at kaybat tinggian ye king arapan nang Pilato, agyamang buri neng ipabulus Pilato.

¹⁴ Banal ya at mayap, oneng tinggian ye at inawad kang Pilato, antimong dapat nang mayap kekayu, ing ibulus ne ing metung a mekamate tau

¹⁵ at pepapate ye ing panibatan na ning bie. Makanyan man, pepasublian neng mie ning Dios, at tungkul kaniti ikami ding babie patutu.

¹⁶ Uli na ning kapaniwalan mi king lagyu nang Jesus, iting lagyu ya ing minie upaya ban mibalik ing sikanan na niting taung akakit yu ngeni keti at kakilala yu. Ing kasalpantayanan kang Jesus ya ing mekapakayap kaniting tau antimo ing akakit yu ngeni.

¹⁷ Ngeni, kapatad, balu ku king ikayu at ding kekayung mamuntukan e yu tune balu ing sablang depat yu kang Jesus;

¹⁸ makanyan nang birian nang metupad ning Dios itang meula nang makapauna, inyang king kapamilatan da ring sablang propeta sinabi na king ing Cristo na dumalan yang kasakitan.

¹⁹ Inya ngeni sumisi kayu at magbalik lub king Dios ban mipatawaran ing kasalanan yu,

²⁰ at ban paratangan na ning Ginu ing panaun ning banal a bendisyun. Kaybat, itubud ne kanita i Jesus, ing Cristo a pinili na para kekayu.

²¹ Kailangan ing manatili ya pa karin banua anggang e datang ing panaun para mibayu ngan ing sablang bage, antimo ing pepabalu na ning Dios king kapamilatan da ring banal nang propeta kanita pang minunang panaun.

²² Uling sinabi nang Moises, Palto yang metung a propetang kalupa ku ing Ginung Dios para kekayu. Manibat ya karing sarili yung kapatad; kailangan yung pamintuan ing sablang sabian na kekayu.

²³ Ninuman ing e mamintu king sabian na ning propetang ita, mitiwalag ya king balen na at masintang ya.

²⁴ King kamatutuanan ding sablang propeta, manibat kang Samuel angga na king tauling dili kaybat na, atin la ngang sinabi at inula da ngan iting kasalukuyan a panaun.

²⁵ Ding pengaku na ning Dios a mibie king kapamilatan da ring propeta para kekayu la, at makayabe kayu ketang kasunduan a tinatag na ning Dios a kayabe da ring kekayung makatua. Antimo ing sinabi na kang Abraham, King kapamilatan da ring maging lahi mu bendisyunan ku la ding sablang tau king mabilug a yatu.

²⁶ Makanyan neng pinili at tinubud mumuna kekayu ning Dios ing Talasuyu na ban bendisyunan na kayu at saupan painggulut king e mayap yung pamibiebie.

4

¹ Kasalukuyan da pang magsalita karing tau di Pedro at Juan inyang linapit la karela ding pari, at ing kapitan ding guardia ning Templo, at ding Saduseo.

² Kalilingasngas da king ding aduang apostol tuturu da king sinubli yang mebie i Jesus, ing metung a bage patune king subli lang mie ding mete.

³ Inya dekap da la at pepakulung king sukulan angga itang kabukasan, anti na ning mabibengi na.

⁴ Oneng meniwala la ding dakal a taung mekaramdam king penaral da, at mamabut lang anggang limang libu ding lalaking miragdag.

⁵ Kabukasan, mitipun la Jerusalem ding pamuntuk da ring Judio, ding makatua, at ding talaturu ning Kautusan.

⁶ Mekipulung la king Pekapun ding Paring i Anas at kang Caifas at kang Juan ampon kang Alejandro, karing aliwa na pang galame ning pamilya na ning Pekapun ding Pari.

⁷ Pepatalakaran da la king arap da ring apostol at kitang da karela, Makananu yung depat iti? Nanu ing kayupayan yu o isanung lagyu ing ginamit yu?

⁸ Nganang mekibat Pedro a kitmuan king Banal a Espiritu, Makamal a pamuntuk at makatua na ning balen:

⁹ nung ing kukutang yu kekami ngeni tungkul ya king depat ming mayap king taung lumpu at nung makananu yang kinayap,

¹⁰ sukat yung abalu at pati na ing mabilug a balen na ning Israel king iting tau makatalakad ya keti king arap yu, at lubus yang kinayap uli na ning upaya ning lagyu nang Jesu-Cristo ning Nazaret a kekayung pepapaku king krus at pepasublian nang mie ning Dios.

¹¹ I Jesus ya itang amanuan na ning kasulatan, Ing batung e yu buri, ikayung manalakad bale, ya kabud ing meging maulagang diling batu.

¹² Bukud mung kang Jesus mayakit ing kaligtasan uling karing sablang lagyung binie na ning Dios karing tau keti king yatu, bukud mung king lagyung yan karin tamu malyaring miligtas.

¹³ Mengapamulala la ding miembru na ning Konsehu inyang ikit da ing tepangan da lub di Pedro at Juan, at inyang abalu da king karaniwan la mung taung alang pegaralan. Akilala ra kanita king akayabe na lang Jesus.

¹⁴ Oneng ala na la mang malyaring asabi laban karela uli na ning kayarap de mismu ing taung kinayap a atyu king siping da ri Pedro at Juan.

¹⁵ Inya inutus da lang mako king sala na ning Konsehu. At kalual da ri Pedro, misabisabi la ding miembru na ning Konsehu.

¹⁶ Ngarang mikukutnanan, Nanung daptan tamu karing taung deti? Balu da ring sablang tau keti king Jerusalem king ila ding dinapat kaniting milagru, at e tamu malyaring alingad iti.

¹⁷ Ban e na lalung mikalat karing tau iting pisasabian, masanting tantuan ta na la mung e na magsalita kenu man king lagyu nang Jesus.

¹⁸ Inya pepayaus da lang lungub pasibayu at sinabi da karela king e na la magsalita o tuturu king makananu mang paralan king lagyu nang Jesus.

¹⁹ Oneng ngarang mekibat di Pedro at Juan, Ikayu na mismu ing matul nung isanu ing matulid arap ning Dios: ing mamintu kami kekayu o mamintu ke king Dios.

²⁰ Uling e ke malyaring e magsalita tungkul king ikit mi ampon dimdam.

²¹ Lalu na lang tintuan maigpit ning Konsehu at kaybat binulus da la. Ala lang ikit a sangkan para parusan da la uling pupurian de ring sablang tau ing Dios uli na ning mepalyari.

²² Uling itang taung keraptanan milagru maygit neng apat apulung banua tua.

²³ Kabulus da ri Pedro at Juan, migbalik la karing karelang kayabe, at belita ra karela ing sinabi da ring pamuntuk da ring pari at ding makatua na ning balen.

²⁴ Inyang dimdam da iti, ngara ngan menalangin king Dios, O Ginu at Miglalang king banua at yatu at king dagat at king sablang atyu kareti!

²⁵ Ika ing migsalita king kapamilatan na ning talasuyu mung i David a makatua mi, inyang nganang sinabi lalam nang agkat ning Banal a Espiritu, Ba't ding bansa malisuas la, ba't ding memalen mitatangka lang alang parasan?

²⁶ Ding ari keti king yatu magsadia la, at ding pamuntuk mipupulung la laban king Ginu at king Pinili na?

²⁷ At iti pin ing mapapalyari: keni mismu Jerusalem, i Herodes ampon i Pilato mekipulung la karing paganu at karing memalen na ning Israel laban kang Jesus, ing banal mung Talasuyu at kekang Pinili.

²⁸ Misanmetung lang dinapat king sablang bage a king upaya mu at kaburian malambat mu nang birian marapat.

²⁹ Ngeni, O Ginu, pansinan mu ing babala ra kekami at saupan mu kami, ikaming talasuyu mu ban asabi ming mitmung tetagan a lub ing kekang amanu.

³⁰ Igong me ing gamat mu ban pakayap at palto kang makapagmulalang bage at milagru king lagyu nang Jesus, ing banal mung Talasuyu.

³¹ Kayari dang menalangin, minugun ya ing bale nung nu la makatipun at mikatmuan la ngan king Banal a Espiritu, at megumpisa lang migsalitang mitmung tetagan a lub king amanu na ning Dios.

³² Mikakametung la pusu ding sablang talasalpantaya at pamisip; ala metung man karela ing sinabing bandi na ing sariling pibandian na. Ing sabla dang pibandian para karela ngan.

³³ Sindu da ring apostol a kayabe ning maragul a kayupayan ing pamipatutu ra tungkul king pangasubli nang mie ning Ginung Jesus. E makanyan-kanyan a bendisyun ing tigtug na karela ning Dios.

³⁴ Alang mibili king kalipitan metung man karing talasalpantaya, uling pemisali da ring ating pibandian a gabun o ating pibalebale.

³⁵ Darala da la at intriga karing apostol ding salaping ayabli ra. At mirarakayan ya ing balang kapatad king abli, agpang king pamangailangan na.

³⁶ Makanyan ing depat nang Jose, ing metung a Levitang tubu karin Cyprus a pemalayawan dang Bernabe ding apostol (lagyung mangabaldugan Ing Babie Sikanan Lub)

³⁷ Atin yang kapirasung gabun; pisali na iti at inintriga na la ding ayabli na karing apostol.

5

¹ Oneng atin namang miyasawa, ing lagyu ra Ananias at Safira; misali lang kapirasu king pibandian da.

² King kabaluan nang Safira, e na la ngan inintrigang Ananias ding ayabli ra. Mitagan yang ditak a alaga, at inintriga na la ding sobra karing apostol.

³ Nganang Pedro, Ananias, baket peintulutan meng mig-ari i Satanas king pusu mu at ituru na kang maglaram king Banal a Espiritu king pamilingad mu karing meging abli na ning kekang pibandian?

⁴ Bayu mu pemisali, e wari bandi mung tune at kaybat mung apisali, ding ayabli mu e la wari keka la mu ren? Obat aisip mu pang dinapat king anti kanyan? Aliwa ding tau ding kekang paglingaran nune ing Dios mismu!

⁵ Kabud dimdam nang Ananias iti, miragsa ya at mete. Ding sablang mekabalita kaniti tiblan na la ning maragul a takut.

⁶ Dinatang la ding kayanakan a lalaki; binalut de ing bangke na at saka re liwal ban ikutkut.

⁷ Atlung oras kaybat nang milyari niti, dinatang ya i Safira. Ala yang kamalayan king mepalyari.

⁸ Nganang Pedro, Safira, sabian mung tapat kanaku, nung ing alagang iti ya na ing kabilugan a tinggap yung kayablian king banding pisali yung miyasawa. Nganang mekibat Safira, Ya na ngan yan.

⁹ Inya nganang Pedro, Obat aisip yu, ikayung adua ning asawa mu ing paniubukan ye ing Espiritu na ning Ginu? Oyan, pakiramdaman mu ing takbang da ring taung kaybat-ibat pa mung mengutkut king asawa mu; oren malapit na lang lungub king pasbul. Makasadia da na ka namang idalang lumual!

¹⁰ Kasabi na niti, miragsa ya i Safira at mete ya king durungutan nang Pedro. Linub la ding kayanakan at disnan deng mete na i Safira. Liwal de ban ikutkut siping na ning asawa na.

¹¹ Mig-ari ing maragul a takut king kabilugan a iglesia at karing sablang aliwa pang mekabalita tungkul kaniti.

¹² Dakal lang tanda at makapagmulalang bage ding depat da ring apostol libutad da ring tau. Parati lang mititipun ding sablang talasalpantaya king Balkon nang Solomon.

¹³ Ala metung man karing aliwang tau ing mengangas mekiabe karela agyamang matas ya paglalawe karela ing mabilug a balen.

¹⁴ Makanyan man alang tuknang ing pangarakal da ring sinalpantaya king Ginu. Merakal na lang merakal ding babai at lalaking mekiabe karela.

¹⁵ Bunga na ning sablang daraptan da ring apostol ding taung maki sakit, maka kama o maka dase mu, lulual da la karing dalan ban king pamaglabas nang Pedro agyang king anino na mu mirasnan la ding mapilan.

¹⁶ E la mabilang-bilang ding taung manibatan karing miyayaliwang balen a pakalapit Jerusalem; darala da la ring karelang masakit at ding alipnan da ring marawak a espiritu. Kinayap la ngan deti.

¹⁷ Uli na niti, meriria lang e mu nanu karing apostol. Inya ing Pekapun ding Pari at ding sablang kayabe na, ding miembru na ning pangkat ding Saduseo ning Jerusalem, pikayari dang gawang metung a takbang.

¹⁸ Peparakap da la ring apostol at pepakulung da la king sukulan balen.

¹⁹ Oneng kanita mu ring benging ita biklat na la ning anghel ning Ginu ding pasbul ning sukulan; tinaid na lang linual ding apostol at ngana karela,

²⁰ Sulung munta kayu king Templo at ituru yu ngan karing tau ing sabla tungkul kaniting bayung bie.

²¹ Pemintuan da ring apostol ing sinabi na; minta la king Templo itang abak a maranum at megumpisa lang tinuru. Ing Pekapun ding Pari at ding kayabe na tinipun da la ngan ding makatuang Judio para king maragul a pulung na ning Konsehu; kaybat mitubud la king sukulan ba da lang idala ding apostol king arap ning Konsehu.

²² Oneng e da la disnan karin ding apostol inyang miras la ding opisyal a mituburan king sukulan. Inya mibalik la king Konsehu at ngarang minie ulat,

²³ Inyang karas mi king sukulan disnan mi yang makakandadung masalese, at atyu la ding bante karing puestu da karing pasbul; inyang biklat mi la ding pasbul ala keng ikit metung mang tau king kilub!

²⁴ Inyang dimdam da iti, ing kapitan ding guardia na ning Templo at ding pamuntuk ding pari e da abut isipan nung nanung milyari karing apostol.

²⁵ Ketang oras a ita ating taung dinatang at ngana karela, Atyu la pu ding taung pepasukul yu king Templo; tuturu la karing tau!

²⁶ Inya meko ya ing kapitan at ding tauan na at dela da lang mibalik ding apostol. Makanyan man, e la ginamit nanumang puersa uling tatakut la pota ding tau pamasibasan da la.

²⁷ Linub da la ring apostol at inarap king Konsehu. Pengutnan na la ning Pekapun ding Pari.

²⁸ Ngana karela, Maigpit da kayung tintuan king tuknang na kayung tuturu tungkul king lagyu na ning taung iti; lawan yu nung nanu ing kekayung depat! Kinalat yu na king mabilug a Jerusalem ing kekayung tuturu at buri yu pang iparsala kekami ing pangamate na!

²⁹ Nganang mekibat Pedro at ding aliwang apostol, Kailangan ing pamintuan mi ya ing Dios at aliwa ding tau.

³⁰ Ing Dios da ring kekatamung makatua pepasublian neng mie i Jesus, kaybat yeng binitin king tanaman.

³¹ Tinas ne ning Dios king banda nang wanan ban maging Pamuntuk at Talapagligtas da ring tau ban kanita mika oportunidad lang makasisi ding Israelita at tanggap kapatawaran karing kasalanan da.

³² Testigu kami tungkul kareting bage at anti mu rin ing Banal a Espiritu, ing regalung babie na ning Dios karing mapamintu keya.

³³ Mimua la ding miembru na ning Konsehu inyang dimdam da iti, inya inari da king lub da ing ipapate da la ring apostol.

³⁴ Oneng tinalakad ya ing metung karing kayabe ra, ing metung a Pariseong milagyuan Gamaliel at metung a talaturu na ning Kautusan a tutu dang lalawan matas ding sablang tau. Inawad nang ilual da la pa mu ding apostol,

³⁵ at kaybat nganang migsalita king Konsehu, Makamal a Israelita, mimingat kayu king buri yung daptan kareting tau.

³⁶ E pa makaing malambat ing milabas a panaun kanitang linto ya i Teudas a pepakilalang metung yang matenakan; ating mekad apat a ralan a tau karing mekiabe keya. Oneng pete re at misambulat la ding talatuki na at limbug ya ing kilusan a tinatag na.

³⁷ Kaybat na nita, linto ne naman i Judas a tau Galilea, kanitang panaun a merapat ing sensus; menikua ya namang dakal a talatuki na, oneng pete ria naman iti at misambulat la naman ding talatuki na.

³⁸ Uli na niti, mumungkahi ku ngeni, paburen yu lang dili ra ding taung deti. Ibulus yu la. Nung iting katatagan o iting kilusan da, metung yang katatagan-tau, misalbag yang dili na;

³⁹ nung king kamatutuanan ibat ya king Dios, e mu ing e yu la sambutan, nune miras kayu pa ketang kabilian a ing Dios mismu ya ing kekayung pakilabanan! Tinggap na ning Konsehu ing mungkahi nang Gamaliel.

⁴⁰ Pepayaus da lang lungub pasibayu ding apostol, at inatulan da lang mabarug latiku. Kaybat, tintuan da lang e na magsalitang pasibayu king lagyu nang Jesus at layun da na lang binulus.

⁴¹ Meko lang kitmuan tula ding apostol king arap ning Konsehu, uling ila meyakit lang karapatdapat dumalan kaligaligan alang-alang king lagyu nang Jesus.

⁴² Tuturu la aldo-aldo king Templo at karing pibalebale; ala lang tuknang tuturu at manaral king Mayap a Balita tungkul kang Jesus, ing Cristo.

6

¹ Kaybat na nita, kabang susulung ing pangarakal da ring alagad, mipate-pate la ding Judio a ing salita ra Griego at ding Judiong tubu Palestina. Sasabian da ring taung deti king milalaktawan la king aldo-aldo pamagrasyun karing pondu ding babaing mebalu a kayabe da.

² Inya ding labing adua inaus da lang mipulung ding sablang alagad at ngara karela, E matulid ing paburen mi ing pamanaral king amanu na ning Dios ba mi mung sikasuan ing pamamie kabiayan.

³ Uli na niti, kapatad, mamili kayung pitung lalaking pikabaluan kekayu a kitmuan king Banal a Espiritu at kabiasnan, at ila ding panibalan mi kaniting bage.

⁴ Ikami, kanita, lubus ming gamitan ing panaun mi king pamanalangin at king pamanaral.

⁵ Metula la ding sabla king mungkahi da ring apostol; inya pinili re i Esteban, ing taung kitmuan king kasalpantayanan at king Banal a Espiritu. Kayabe na lang mepili di Felipe, Procoro, Nicanor, Timon, Parmenas, at i Nicolas a tau Antiokia, ing metung a paganung mekonberti king relihiun da ring Judio.

⁶ Linapit da la reting pitung tau karing apostol. Kaybat dang menalangin ding apostol, inarap da la reting pitu; timpak da la ring gamat da karing buntuk da.

⁷ Makanyan sinulung ing pamikalat king amanu na ning Dios. Merakal na lang merakal ding alagad karin Jerusalem, at dakal la ding pari a tinanggap king kasalpantayanan.

⁸ I Esteban, ing taung binendisyunan na ning Dios at kitmuan king upaya, dinapat yang milagru ampon mangangaragul a waga king akakit da ring tau.

⁹ Oneng pekilabanan de ring mapilan a miembru na ning sinagogang mipamansagan Sinagoga da ring Malaya. Karing Judio a bibilug kaniting sinagoga ating menibatan king Cirene at Alejandria. Ila ampon ding aliwa pang Judiong tubu Cilicia at Asia megumpisa lang mekiargu kang Esteban.

¹⁰ Oneng ing Banal a Espiritu dininan na ne mang tutung maragul a kabiasnan i Esteban, inya e ra agyung labanan ing sasabian na.

¹¹ Inya sitsutan da la at beyaranan ding mapilan a tau ba rang sabian, Ya ing taung dimdam ming magsalitang kalapastanganan kang Moises at king Dios!

¹² King anti kaniting paralan apagalsa da la pilubluban ding memalen, ding makatua ning balen, at ding talaturu ning Kautusan laban kang Esteban. Pintalan de at dekap i Esteban at keladkad de at inarap king Konsehu.

¹³ Migdala lang taung malaram. Sinabi ra, Ala yang patugut magsalita ing taung ini laban king kekatamung banal a Templo at laban king Kautusan nang Moises.

¹⁴ Dimdam ming sasabian na king iting Jesus ning Nazaret lasakan ne ing Templo at panalilan na la ngan ding kaugalian a miras kekatamu manibat na kang Moises!

¹⁵ Makalawe la ngan kang Esteban ding sablang makalukluk king Konsehu, at ikit da king ing lupa na lupa ne ning anghel.

7

¹ Kitang ning Pekapun ding Pari kang Esteban, Tutu pin ing bibintang da laban keka?

² Nganang mekibat Esteban, Mangatua ku at kapatad! Pakiramdaman yu sa ining sabian ku! Ing Dios a panibatan na ning ligaya pepakit ya king makatua tamung i Abraham kanitang iting penibatan tamu kasalukuyan na pang manuknangan karin Mesopotamia; kanitang bayu ya linipat karin Haran,

³ at nganang migsalita ning Dios kang Abraham, Lakuan me ing pamilya mu at bansa at munta ka king lugal a ituru ku keka.

⁴ Makanyan yang meko karin Caldea at miras Haran ban manuknangan karin. Kamate na ning pengari nang lalaki, pepapuntan ne ning Dios i Abraham king lugal a iti a ngeni kekayung pitutuknanganan.

⁵ E ne dininan ning Dios agyang malati mung dake king gabun a iti para maging bandi nang sariling Abraham; oneng pengaku na ning Dios king ibie ne keya at maging bandi neng sarili, at miyabie ya karing maging lahi na. Ala ya pang anak i Abraham kanitang oras a pengaku na ning Dios ing makanyan.

⁶ Anti keni ing sinabi na ning Dios kang Abraham, Manuknangan la ding lahi mu king aliwang bansa at maging ipus la karin at pasakitan da la kilub ding apat a ralan a banua.

⁷ Oneng aku ing matul king bansang manipus karela, nganang mengaku ning Dios, at kaybat mako la ketang bansang ita at samba la kanaku king lugal a iti.

⁸ Kaybat na nita, binie ne ning Dios kang Abraham ing seremonia na ning sirkunsisyun bilang palatandanan na ning kasunduan. Makanyan neng sinirkunsisyunan Abraham i Isaac king kawalung aldo kaybat nang mibait. Gewa na naman Isaac iti kang Jacob at makanyan munaman ing depat nang Jacob karing labing aduang makatua na ning Israel.

⁹ Pengalaluan de ring makatua na ning Israel i Jose at pisali reng anting ipus karin Ehipto. Oneng ing Dios atyu kang Jose.

¹⁰ Linigtas ne king sablang kaligaligan a delanan na. Binendisyunan ne ning Dios i Jose at dininan neng kabiasnan inyang minarap ya king ari ning Ehipto. Inya tilduan ne ning ari a maging gobernador na ning mabilug a bansa ampon ning palasyu na.

¹¹ Kanita naman mika danup king mabilug a Ehipto at Canaan, at maragul ing kasakitan a pepasari na niti. E na la menakit apangabiayan da ring makatua tamu.

¹² Inyang abalitan nang Jacob king dakal ing kabiayan karin Ehipto, tiburan na la ding kekatamung makatua, at ita ya ing pamagumpisa na ning pamaglakbe da karin.

¹³ King kadua rang pamagsaria karin Ehipto pepakilala ya i Jose karing kapatad nang lalaki, at makanyan neng milyaring akilala ning ari ing pamilya nang Jose.

¹⁴ Peparala yang panabilin i Jose kang Jacob a tata na at inagkat ne ampon ing mabilug a pamilya ban lumipat Ehipto; pitu lang pulu't lima katau heganagana.

¹⁵ Kanita ya linuslus papunta Ehipto i Jacob, at karin na la ngan mete, ya ampon ding makatua tamu.

¹⁶ Kaybat na nita, linipat da la ring karelang bangke karin king Sikem. Kitkut da la king kutkutan a seli nang Abraham king tribu nang Hamor.

¹⁷ Inyang milalapit na ing panaun para tuparan na ning Dios ing pengaku na kang Abraham, tutu nang maragul ing bilang na ning kekatamung lahi karin Ehipto.

¹⁸ Bandang tauli ing metung a ari a e makakilala kang Jose ya ing mig-ari king Ehipto.

¹⁹ Lininlang ne ing kekatamung lahi at meging mabagsik ya karing kekatamung makatua; sapilitan na lang pepayugse lual bale ding bingut dang bayung bait ba lang mate.

²⁰ Ketang panaun a ita kanita ne man mibait i Moises; metung yang bingut a tutung makayama. Selikut de kilub ning bale king kekaban da ring atlung bulan,

²¹ at inyang liwal de king bale, inampun ne ning prinsesang anak na ning ari at sinese ne antimong sarili nang anak.

²² Tiru na kang Moises ing sablang kabiasnan karin Ehipto, at meging mayupaya ya king dapat na at pamagsalita.

²³ Inyang idad neng apat apulung banua i Moises aisip nang dinalo karing kalahi nang Israelita.

²⁴ Ikit neng panasakitan na ning metung a tau Ehipto ing metung karela. Pigmasakit ne ing Israelita at minablas ya king tau Ehipto angga king apate ne. (

²⁵ Inisip na king akilala da ring kalahi na king gagamitan ne ning Dios ba na lang gawan malaya; oneng e ra kilala ing makanyan.)

²⁶ Kabukasan, ikit na lang mipapate ding aduang Israelita, at sibukan nang memilatan karela. Nganang miniabi, Kapamu, tau kekayu, e kayu wari mikamag-anak, baket mipanasakit kayung makanyan?

²⁷ Oneng ita mismung penibatan na ning pamipate tepus ne i Moises, at nganang kinutang keya, Ninu ing minie upaya keka para sakupan mu kami at atulan?

²⁸ Pota galang buri mu ku namang paten kalupa na nitang tau Ehipto a pete mu napon?

²⁹ Inyang dimdam nang Moises iti meko ya Ehipto, at menuknangan ya king sakup ning Midian. Karin mikayanak yang aduang lalaki.

³⁰ Kaybat dang milabas ding apat apulung banua, pepakit ya kang Moises ing metung a anghel libutad ning lablab ning mitataung tanaman keta king disyerto malapit king Bunduk ning Sinai.

³¹ Mipanganga ya i Moises king ikit na, at linapit ya king tanaman ba neng lawen masalese. Oneng dimdam neng migsalita ing Ginu. Ngana,

³² Aku ing Dios da ring kekang makatua, ing Dios nang Abraham, Isaac at Jacob. Ginalgal ya king takut i Moises at migtakap yang lupa.

³³ At ngana ning Ginu, Ilukas mu la ding sandalyas mu, uling sagradung gabun ing lugal a tutukluan mu.

³⁴ Miglalawe ku at ikit ku ing mabayat a kasakitan a daralanan na ning kanakung balen karin Ehipto. Dimdam ku ing karelang saingsing at tinipa ku ngeni ban iligtas ku la. Meka keni ngeni, tuburan da ka karin Ehipto.

³⁵ Iti ya ing Moises a tinggian da ring memalen na ning Israel. Ya itang kitnan dang Ninu ing minie upaya keka para sakupan mu kami at atulan? Ya kabud ing tinubud na ning Dios bilang talapanibala at talapagligtas at saup ning anghel a ikit na king mitataung tanaman.

³⁶ Tinaid na la at liwal Ehipto at dinapat yang milagru at makapagmulalang bage karin at king Dagat a Malutu at king disyerto kilub ding apat apulung banua.

³⁷ Ya itang Moises a sinabi karing memalen na ning Israel, Itubud ne kekayu ning Dios ing metung a propeta, antimo nung makananu na kung tinubud. Metung yang propetang manibatan mismu karing kekayung kalahi.

³⁸ Ya naman itang minantabe karing Israelita a mitipun king disyerto; atyu karin kayabe da ring kekatamung makatua, at itang anghel a migsalita keya keta king Bunduk ning Sinai; tinggap na ing mabie nang amanu ning Dios ban ipayabut na angga kekatamu.

³⁹ Oneng buri dang e re pemintuan ding kekatamung makatua; tinggian de at buri da pa ing magbalik la karin Ehipto.

⁴⁰ Inya sinabi da kang Aaron, Igawa mu keng dios a manimuna kekami. E mi balu nung nanu na ing milyari kanitang Moises a milual kekatamu king Ehipto.

⁴¹ Kanita na la ginawang metung a idolo a kaubug biserung baka at dininan deng ain-sakripisyu at pigpiestan de at perangalan ing mismung gewa da ring gamat da.

⁴² Oneng gilutan na la ning Dios at pepaburen na lang sinamba karing batuin na ning banua, antimo ing makasulat king libru da ring propeta, Balen Israel! E para kaku inya pete yu la at inain-sakripisyu ding animal king kekaban ding apat apulung banua keta king disyerto.

⁴³ Ing tolda nang Molek a dios-diosan ya itang kekong pisanan, at ing larawan ning batuin ning idolo yung i Refan; deti pawa lang dios-diosan a gewa yu ban samban. Inya ipayugse da kayu lagpus king angganan ning lugal a ausan dang Babilonia.

⁴⁴ Atyu karing kekatamung makatua keta king disyerto ing Toldang Tipanan ning Dios at ning tau. Megawa ya iting tolda antimo nung makananu nang penabilin ning Dios kang Moises. Miyakma ya ketang padrun a pepakit na ning Dios keya.

⁴⁵ Bandang tauli, pisanan de ring makatua tamung migmana kaniti, at pidaladala de kanitang tiki na lang Josue king gabun da ring aliwang bansa a tinabi na ning Dios alang-alang karela. Karin ya menatili ing tolda angga king panaun nang David.

⁴⁶ Tinggap nang David ing lugud na ning Dios, inya inawad na king Dios ing paintulutan ne sanang makapagawang bale para king Dios nang Jacob.

⁴⁷ Oneng i Solomon ya ing mikalmang pepagawang bale para king Dios.

⁴⁸ Makanyan man, e ya manuknangan ing Kakataskatasan a Dios karing bale a gewa da ring tau; antimo ing sasabian na ning propeta,

⁴⁹ Ing banua ya ing kakung tronu, at ing yatu ya ing tumpakan ding bitis ku. At ngana ning Ginu, Nanu yang klasing bale ing buri mung gawan para kaku? Isanu waring lugal a malyari kung pipagpaynawan?

⁵⁰ Ninung ginawa kareting sablang bage? Aliwa wari ako?

⁵¹ Mangasias kayu wari lub; tutu na la waring alang pakiramdam ding pusu yu? Tutu na kayu waring mengaklak ban e yu pansinan ing amanu na ning Dios? Ala kayung keyaliwa karing kekayung makatua; e ye munaman patugutan sasagkan ing Banal a Espiritu!

⁵² Atin waring metung mu mang propeta a e ra mo sa linupig ding kekayung makatua? Pete da la ring tinubud na ning Dios a memahayag kaniting panaun a malambat nang milabas tungkul king paniatang na ning banal nang Talasuyu. At ngeni ikayu ing menganiaya at mekamate keya.

⁵³ Ikayu ding mekatanggap king kautusan ning Dios, kautusan a binie da ring anghel. Makanyan man ikayu ding e tinupad kaniting kautusan!

⁵⁴ Inyang dimdam da iti ding miembru na ning Konsehu kang Esteban mimua la at mitigis a ipan king kamua ra keya.

⁵⁵ Oneng i Esteban a kitmuan king Banal a Espiritu, tinalanga ya banua at ikit na ing ligaya na ning Dios, at i Jesus a atyu banda nang wanan.

⁵⁶ Nganang sinabi, Lawan yu, akakit keng makabuklat ing banua at makatalakad ya ing Anak ning Tau king banda nang wanan ning Dios!

⁵⁷ Kinulisak lang masikan at tikpan da la ring balugbug da at delusungan de i Esteban.

⁵⁸ keladkad de lual na ning siudad at pemasibas deng batu. Likas da ing imalan da ring testigung menganiaya keya, at pepabante ra king metung a kayanakan a milagyuan Saulo.

⁵⁹ Alang tuknang ing pamamasibas dang batu kang Esteban kabang nganang mamaus king Ginu, Ginung Jesus, tanggapan me ing kanakung kaladua!

⁶⁰ Siniklaud ya at kilisak nang masikan, Ginu, e mu sa ipaparsala karela iti! Mete ya kaybat nang asabi iti.

8

¹ At tenguanan nang Saulo ing pangamate nang Esteban. King mismung aldong ita megumpisa yang dinalan mabagsik a pangalupig ing iglesia karin Jerusalem. Ding sablang alagad, subali karing apostol, mikalat la karing kabilugan a probinsia na ning Judea at Samaria.

² Kitkut de ring mapilan a taung tapat i Esteban kabang tatangisan deng e makanyan-kanyan.

³ Oneng pilit neng pekisiran Saulo ing iglesia; memunta ya balebale; keladkad na la ding talasalpantaya, babai at lalaki at saka na la pepasukul.

⁴ Lipat-lipat la karing miyayaliwang lugal ding talasalpantaya a mekatakas, at ipanaral da nu man karin ing Mayap a Balita.

⁵ Ing metung kareti ya i Felipe. Minta ya king siudad ning Samaria at penaral ne ing Cristo karing tau karin.

⁶ Mekiramdam lang masalese ding tau king penaral nang Felipe uli na ning dimdam da keya, at ila mismu ikit da la ring milagru a depat na.

⁷ Ating marawak a espiritung linual kukulisak karing dakal a inipus da, at dakal la ding lumpu at pile a kinayap.

⁸ Inya mika maragul a pamagsaya ketang siudad a ita.

⁹ King siudad mu ring ita ating metung a taung milagyuan Simon. Malambat na mu ring panaun ing papakit yang makapagmulalang gelingan karing tau karin king kapamilatan na ning pamagsalamangka. Sasabian na king atin yang maragul a kayupayan,

¹⁰ at ding sablang tau king siudad a ita, kalulu at masalapi, megaral at ali, tutu na lang ikua kapaniwalan. Ngarang sasabi, Ya ing Maragul nang Upaya ning Dios.

¹¹ Malambat na na lang tutung ikua king kayupayan na ning salamangka na, inya lubus la kapaniwalan kang Simon.

¹² Oneng inyang meniwala la king panaral nang Felipe tungkul king Mayap a Balita na ning Kayarian ning Dios at king lagyu nang Jesu-Cristo, pepabinyag la ngan ding babai at lalaki.

¹³ I Simon mismu meniwala ya at kaybat nang mebinyag parati yang tutuki kang Felipe, at mengapamulala ya inyang ikit na la ding mangangaragul a milagru at makapagmulalang bage a mangarapat.

¹⁴ Abalitan da ring apostol karin Jerusalem king ding tau Samaria tinggap da ing amanu na ning Dios; inya tinubud de karela i Pedro at i Juan.

¹⁵ Inyang miras la karin deting adua, penalangin da la ring talasalpantaya ban malyari deng tanggapan ing Banal a Espiritu.

¹⁶ Uling e ya pa tinipa ing Banal a Espiritu kaninu man karela; makagyung mebinyag la mu king lagyu na ning Ginung Jesus.

¹⁷ Kaybat na nita, timpak da la di Pedro at Juan ding gamat da karela, at tinggap de ngan ing Banal a Espiritu.

¹⁸ Ikit nang Simon king mibie ya karela ing Espiritu, inyang timpak da la ring gamat da ring apostol karing buntuk da. Inya inalukan na lang salapi di Pedro at Juan,

¹⁹ at nganang sinabi, Ibie yu naman kanaku iting upaya ban ninuman ing tumpakanan ku buntuk karing gamat ku tanggap ya king Banal a Espiritu.

²⁰ Oneng nganang mekibat Pedro, Maimpierno ka sanang kayabe da reng salapi mu ngening isipan mu king malyari mung asali karing salapi ing regalu na ning Dios!

²¹ E ka kayabe o karake king obra mi uling ing pusu mu marayu ya king Dios.

²² Inya, sukat kang sumisi at painggulut kaniting e mayap mung kapagnasan, at ipanalangin mu king Ginu ing patawaran na ka sa king pamanisip mu king anti kanyang pamikasala.

²³ Uling king akakit ku metung kang melasun a isip king diria at metung kang bihag ning kasalanan.

²⁴ Nganang Simon kari Pedro at Juan, Saupan yu ku sanang manalangin king Ginu ban kanita isanu man king sinabi yu e mapalyari kanaku.

²⁵ Kaybat dang mekaibie king karelang pamipatutu at apasiag ing amanu na ning Ginu, migbalik na la Jerusalem di Pedro at Juan. Kabang dalan panaral da ing Mayap a Balita karing miyayaliwang baryu na ning Samaria.

²⁶ Migsalita ya kang Felipe ing metung a anghel na ning Ginu. Ngana, Gayak ka at munta ka king dalan a manibatan Jerusalem at papunta Gaza, ing dalan a babaltang king disyerto.

²⁷ Inya migayak ya i Felipe at meko. Ating metung a kapun a tau Etiopia, pa-uli ne keta karela. Ing kapun a iti metung yang matas a opisyal na ning Reyna o Candace na ning Etiopia. Ya ing tesoreru na. Makasake yang karwahe; pabalik neng ibat sinamba king Dios karin Jerusalem. Kabang dalan mamasa ya; babasan ne ing metung nang dake ning libru na ning propeta Isaias.

²⁸

²⁹ Sinabi na ning Banal a Espiritu kang Felipe, Salubungan me at lapitan yang karwaheng yan.

³⁰ Memulayi yang sinalubung i Felipe at dimdam neng babasa king libru na ning propeta Isaias, inya nganang kinutang king tau Etiopia, Aintindian mu ing kekang babasan?

³¹ Nganang mekibat ning opisyal, Makananu kung aintindian nung alang mituru kanaku? Kimbiran neng sampa i Felipe at makisake keya king karwahe.

³² Ing dake na ning kasulatan a babasan na ya iti, Mengari yang tupang darala ra king pipatayan; kalupa ne ning biserung tupang e bubulad neng kukuananan deng lana; e ya migsalita metung mu mang amanu.

³³ Meinsultu ya at alang migdipensa para keya. Alang supling nang malyaring pisabian da, uling ing bie na keti sulip miwakasan na.

³⁴ Ngana ning opisyal kang Felipe, Sabian mu na kanaku nung ninu ing amanuan na ning propeta king sasabian nang iti? Ing sarili na o ating aliwa pa?

³⁵ Megumpisa yang migsalita i Felipe; selese na keya manibat kaniting dake na ning kasulatan ing Mayap a Balita tungkul kang Jesus.

³⁶ Kabang susulung la king karelang pamagbiahe, miras la king metung a lugal nung nu ating danum at ngana ning opisyal, Ating danum keti. Atin pang maging sagabal para aku e ku mabinyag? [

³⁷ Nganang Felipe, Malyari na kang mabinyag, nung maniwala kang kayabe na ning mabilug mung pusu. Nganang mekibat ning opisyal, Maniwala ku. Paniwalan ku king i Jesu-Cristo ya ing Anak ning Dios.]

³⁸ Inutus na ning opisyal king kutsero ing ituknang ne ing karwahe at kinuldas la ilang aduang Felipe at dinulung king danum at bininyag neng Felipe.

³⁹ Kasaka ra ibat king danum, dinayu na ne ning Espiritu ning Ginu i Felipe. E na ne ikit pasibayu ning opisyal. Sinulung ne king pamagbalik na papunta Etiopia at masaya yang masaya.

⁴⁰ Ikit nang Felipe king kabud nia miras Azoto. Sindu na ing pamaglakbe na; panaral na ing Mayap a Balita king balang balen a darasnan na angga king miras ya Cesarea.

9

¹ Kanitang kasalukuyan nang susundung Saulo ing balak nang papate na la ngan ding alagad na ning Ginu, migsaria ya king arap ning Pekapun ding Pari.

² Meniawad yang kasulatan a pakilala keya karing sinagoga karin Damasco. Inawad ne iti ban mika kayupayan yang maniakap at midala Jerusalem karing sablang talatuki king Dalan ning Ginu, babai at lalaki.

³ King pamaglakbe nang papunta Damasco, inyang milalapit ne king siudad, bigla yang sinlag king makapadurut keya ing metung a sala a ibat banua.

⁴ Miragsa ya king gabun at dimdam ne ing metung a siwala a mamaus keya. Ngana, Saulo, baket liligaligan mu ku?

⁵ Nganang kinutang, Ninu ika, Ginu? Aku i Jesus a kekang liligaligan, ngana ning siwala.

⁶ Talakad ka at malaus king siudad. Karin sabian da keka ing sukat mung daptan.

⁷ Tinuknang la ding kayabe nang maglakbe Saulo; e la mekabulad. Dimdam de ing bosis, oneng ala lang ikit nanuman.

⁸ Tinalakad ya i Saulo at migmulagat ya, oneng ala yang bitasang akakit. Inya telan de gamat at tinaid deng linub king Damasco.

⁹ E bitasang menakit kilub ding atlung aldo. King kekaban da ring aldong deta ala yang bitasang pengan o ininum.

¹⁰ Karin Damasco ating metung a talasalpantaya a milagyuan Ananias. Menakit yang vision nung nu na sinabi ning Ginu keya, Ananias! Nganang mekibat, Atyu ku keni, Ginu!

¹¹ Ngana ning Ginu, Miblas ka at munta ka king Kalye Matulid at karin king bale nang Judas pangutang me ing metung a tau Tarso a milagyuan Saulo. Manalangin ya

¹² at king metung a vision ikit neng linub king bale ing metung a lalaking milagyuan Ananias, at timpak na la king buntuk na ding gamat na ban manakit yang pasibayu.

¹³ Nganang mekibat Ananias, Ginu, dakal na lang tau ding memalita king taung iti tungkul king sablang makatakut a paniaptan na karing pinili mu karin Jerusalem.

¹⁴ At dinatang ya keti Damasco a magdalang kayupayan menibat karing pamuntuk da ring pari ban pandakpan na la ding sablang mamaus king lagyu mu.

¹⁵ Oneng ngana ning Ginu, Sulung munta ka, uling pinili keng sumuyu kanaku ba neng ipabalu ing lagyu ku karing paganu ampon karing ari at karing memalen na ning Israel.

¹⁶ Ipakilala ku keya ing sablang kasakitan a pibatan na alang-alang kanaku.

¹⁷ Inya meko ya i Ananias at melaus ya ketang bale at timpak na la ding gamat na king buntuk nang Saulo. Nganang migsalita, Kapatad a Saulo, ing Ginu ya ing mitubud kanaku, i Jesus a mismung pepakit keka king dalan kabang papunta ka keti. Tinubud na ku ban manakit na kang pasibayu at mikatmuan ka king Banal a Espiritu.

¹⁸ Kanita mu rin menabu la ding balamu kaliskis asan karing mata nang Saulo, at menakit yang pasibayu. Tinalakad ya at pepabinyag ya.

¹⁹ Inyang mekapangan ya, mibalik ing sikanan na. Menatili ya pang mapilan a aldo i Saulo a kayabe da ring talasalpantaya karin Damasco.

²⁰ Minta yang agad-agad karing sinagoga at megumpisa yang menaral tungkul kang Jesus. Ngana karing tau, Ya ing Anak ning Dios.

²¹ Mengapamulala la ding sablang mekaramdam kang Saulo at ngarang kukutang, Aliwa iti ing tau karin Jerusalem a makamate karing sablang mamaus king lagyung ite? At e ya wari minta keti para pandakpan na la at idala na lang magbalik karing pamuntuk da ring pari?

²² Oneng lalung migdalang kayupayan ing pamanaral nang Saulo, at tutu lang mangalino ding pruebang yapag na king i Jesus ya ing Cristo, inya ala lang apakibat keya ding Judio a manuknangan king Damasco.

²³ Kalabas da ring dakal a aldo, mipulung la ding Judio at pisabi ra nung makananu reng apapate i Saulo;

²⁴ oneng ikua nang abalitan nung nanu ing babalakan da laban keya. Aldo at bengi makayabat la karing pasbul ning siudad ba reng apate.

²⁵ Oneng misan a bengi tiki de ring kayabe nang Saulo at pepatagusgus de kilub ning buslu king metung a busbus ning pader.

²⁶ Minta ya Jerusalem i Saulo at pekikuanan nang makiabe karing alagad. Oneng tatakut la ngan kang Saulo. E ra abut paniwalan king tutu ne ping meging alagad na ning Ginu.

²⁷ Oneng seupan neng Bernabe at pepakilala ne karing apostol. Melinawan na karela nung makananu yang pepakit ing Ginu kang Saulo kanitang misan a maglakbe ya, at king migsalita ya ing Ginu keya. Selese na naman karela nung makananu yang menaral i Saulo king mitmung tepangan king lagyu nang Jesus karin Damasco.

²⁸ Makanyan yang menatiling kayabe-abe ra i Saulo king pamaglibut da king mabilug a siudad na ning Jerusalem; ala lang takut manaral king lagyu na ning Ginu.

²⁹ Mekipagsalita ya at mekiargu karing Judio a ing salita ra Griego at deti buri deng paten.

³⁰ Inyang abalitan da iti ding talasalpantaya, tiki re i Saulo karin Cesarea at pepapuntan de king Tarso.

³¹ Inya mika kapayapan ya ing iglesia king mabilug a Judea, Galilea at Samaria. Meragul ya at miragdag ya miembru king kapamilatan na ning kasaupan na ning Banal a Espiritu kabang susulung ya king pamibiebie ating takut king Ginu.

³² Linibut ya i Pedro karing miyayaliwang lugal, at kanitang misan minta yang dinalo karing memalen na ning Dios karin Lida.

³³ Atagpuan ne karin ing metung a taung milagyuan Eneas, metung yang paralitikong walu nang banuang makarate.

³⁴ Nganang Pedro keya, Eneas, uluan na kang Jesu-Cristo. Talakad ka at ituklip me ing pagkeran mu. Kanita mu rin tinalakad ya i Eneas.

³⁵ Ikit de ring sablang tau Lida ampon karin Sharon, at mekonberti la ngan king Ginu.

³⁶ Karin naman Jopa, ating metung a babaing milagyuan Tabita, metung yang talasalpantaya. (Ing lagyu na king Griego Dorcas, ngana wari, Usa.) Gagamitan na ing heganaganang panaun na king pamaniapat mayap at king pamaniaup na karing kalulu.

³⁷ King panaun a ita mesakit ya at mete ya. Inimu ra ne ing bangke na at binurul king metung a kuartu babo.

³⁸ E ya binang marayu king Lida ing balen Jopa. Inyang abalitan da ring talasalpantaya king i Pedro atyu Lida, mitubud lang aduang tau keya a kayabe ning panabilin: Mamalagua kayu sa pung dumalo keni kekami, nung malyari ngeni mu rin.

³⁹ Inya migayak ya i Pedro at tinuki ya karing tubud. Inyang karas na tiki re king kuartu babo. Pilupungan de ring sablang babaing mebalu; tatangis la kabang papakit da kang Pedro ing baru at aliwa pang imalan a teyan nang Dorcas kanitang mabie ya.

⁴⁰ Pepalualan na la ngan Pedro king kuartu, kaybat siniklaud ya at menalangin; inarapan ne ing bangke at ngana, Tabita, talakad ka! Migmulagat ya at tinalakad ya inyang ikit ne i Pedro.

⁴¹ Inabut ne gamat Pedro at seupan neng tinalakad. Kaybat na nita, inaus na la ngan ding talasalpantaya at ding babaing mebalu at inarap neng mabie karela.

⁴² Mikalat king mabilug a Jopa ing balita tungkul kaniti, at dakal lang tau ding meniwala king Ginu.

⁴³ Migdatun yang malambat i Pedro karin Jopa at mekipanuknangan ya king metung a taung maglinis balat; ing lagyu na Simon.

10

¹ Karin Cesarea ating metung a taung milagyuan Cornelio. Kapitan ya king rehimiento ding sundalung Romano a meyaus Rehimiento Italiano.

² Metung yang taung relihiosu; ya at ing mabilug nang pamilya sasamba la king Dios. Dakal ya depat ban misaupan la ding Judio at parati yang manalangin king Dios.

³ Misan a gatpanapun, itang bandang alas tres, menakit yang vision nung nu ne ikit masalese dinatang keya ing metung a anghel na ning Dios at dimdam nang inaus ne lagyu, Cornelio!

⁴ Minatna yang mitmung takut king anghel at ngana, Nanu pu ita, ginu? Mekibat ya ing anghel, Tinggap ning Dios ing kekang panalangin ampon dapat a mayap at e na ka kelinguan.

⁵ Ngeni mu rin mitubud kang mapilan a tau karin Jopa ban parakit me ing taung ausan dang Simon Pedro.

⁶ Metung yang bisita king bale nang Simon a maglinis balat a manuknangan king lele na ning dagat.

⁷ Inyang kalako na ning anghel a kesabi na, minaus yang adua karing ipus na i Cornelio at ing metung a sundalus makitakut king Dios at metung karing sadiang panaligan nang susuyu keya.

⁸ Sinabi na karela ing milyari at ila ding tiburan nang munta karin Jopa.

⁹ Itang kabukasan, inyang maglakad la at malapit na king Jopa ding inutusan nang Cornelio, i Pedro naman menik ya king asotea babo ban manalangin. Kaugtuan aldo tapat kanita.

¹⁰ Inya daramdaman na na kanita ing danup at bisa neng maugtu; oneng kabang sasadia ra ing paugtuan menakit yang vision.

¹¹ Ikit neng mibubuklat ing banua, at menakit yang metung a balamu maragul a ulas a babaldug da karing apat nang suluk ning yatu.

¹² Makalulan la karin ding miyayaliwang klasing animal; ding tiapat a bitis, ding gagapang, at susulapo.

¹³ Dimdam ne ing metung a bosis a sasabi: Talakad ka, Pedro, makamate ka karen ba mu lang apangan!

¹⁴ Oneng mekibat ya i Pedro, Ginu, e ku malyaring gawan yan! Kapilan man e ku pa mengan nanumang pamangan a marinat o midinatan.

¹⁵ Pasibayu nganang miniabi ning bosis, E mu tuturing marinat ing nanumang lininis na ning Dios.

¹⁶ Mekatatlung besis iti milyari; kaybat inigut deng pabalik banua itang bage ita.

¹⁷ Kabang isip-isipan nang Pedro nung nanu ing kabaldugan na ning vision a ikit na, kanita na la man miras karin ding tinubud nang Cornelio. Inyang ikua rang abalu nung nu ya manuknangan i Pedro, minta la karin.

¹⁸ Pepaindispu la at ngarang mengutang, Keti ya pu makituknang i mang Simon a ausan da namang Pedro?

¹⁹ Kasalukuyan na pang isip-isipan Pedro ing kabaldugan na ning ikit na, inyang ing Espiritu sinabi na, Makiramdam ka! Ating atlung taung manintun keka.

²⁰ Magsadia ka at tipa at e ka mikakunung tuki uling aku ing mitubud karela.

²¹ Inya tinipa ya i Pedro at ngana karing atlung tau, Aku ing panintunan yu. Nanu ing saria yu?

²² Ngarang mekibat, Tinubud na kami ning Kapitan Cornelio. Metung yang taung mayap a makitakut king Dios at gagalangan ne ning mabilug a bansang Judio. Sinabi na keya ning banal a anghel ning Dios ing kumbiran na kayung munta keta king bale na ba nang pakiramdaman ing nanumang sabian yu.

²³ Pepabalausnan na lang Pedro kilub ning bale at karin na na la pepatudturan kanitang benging ita. Kabukasan migayak ya at tinuki karela, at tinuki la naman keya ding mapilan a talasalpantaya karin Jopa.

²⁴ Miras ya Cesarea kanitang tinuking aldo. Disnan neng manaya i Cornelio at ding kamaganak na, antimu rin ding matalik nang kakaluguran a kimbiran na.

²⁵ Inyang atyu ne kilub i Pedro selubungan neng Cornelio, at siniklaud ya at dinuku arapan na.

²⁶ Oneng telakad neng Pedro. Ngana kang Cornelio, Tikdo ka uling metung ku namang taung kalupa mu.

²⁷ Sindu neng pekisabian Pedro kabang malalaus la kilub bale at karin da la disnan ding dakal a taung mitipun.

²⁸ Ngana karela, Ikayu mismu balu yu king ing metung a Judio e ne paintulutan ning relihiun na ban dumalo o makisalamuha karing paganu. Oneng pepakit ya kanaku ing Dios king e ke sukat tuturing marinat o midinatan ing ninumang tau.

²⁹ Inya kabud peparakit yu ku dinatang kung alang pamikakunu. Ngeni sabian yu kanaku, obat peparakit yu ku?

³⁰ Nganang mekibat Cornelio, Apat nang aldo ing milabas, king anti kaniting oras, manalangin ku kilub ning bale ku, itang bandang alas tres ning gatpanapun. Kabud-abud ing metung a lalaking maslag a pamimalan linto ya king arap ku

³¹ at ngana kanaku, Cornelio! Pekiramdaman na ning Dios ing kekang panalangin at e na kelinguan ing sablang depat mung mayap.

³² Mitubud ka karin Jopa at parakit me ing taung ausan dang Simon Pedro. Makituknang ya kang Simon a maglinis balat a manuknangan king lele ning dagat.

³³ Inya agad-agad da kayung peparakit, at dakal a salamat birian yu namang dinatang. Ngeni ikami ngan atyu ke keti king arapan na ning Dios manayang makiramdam king nanumang inutus nang sabian yu ning Ginu.

³⁴ Nganang migsalitang Pedro, Ngeni ku tune akilala nung makananung ing Dios e ya biasang mangabiran kenu man.

³⁵ Ing ninumang taung atin takut king Dios at daraptan na ing matulid, karapatdapat ya arapan na nu ya pa man bansa menibatan.

³⁶ Balu yu king pepabalu na ning Dios ing amanu na karing memalen na ning Israel, at mipasiag karela ing Mayap a Balita na ning kapayapan king kapamilatan nang Jesu-Cristo a Ginu da ring sablang tau.

³⁷ Balu yu itang mangangaragul a bage a mepalyari king mabilug a bansa na ning Israel, megumpisa karin Galilea, kaybat na ning binyag a penaral nang Juan.

³⁸ Balu yu itang tungkul kang Jesus ning Nazaret; nung makananu neng linanian ning Dios king Banal a Espiritu at king upaya. Uling ing Dios atyu keya minta ya karing sablang lugal darapat mayap at pakayap karing sablang inalipnan na ning diablo.

³⁹ Ngeni, aku ampon ding kayabe ku, testigu kami king sablang depat na king mabilug a bansa da ring Judio at king Jerusalem mismu, angga king binitin de king metung a tanaman,

⁴⁰ oneng king katlung aldo pepasublian neng mie ning Dios at pepakit ne

⁴¹ e king mabilug a balen nune karing mapilan a testigung pinili nang makapauna ning Dios. Ngeni ikami ding testigung deta; kasulu mi ya king pamangan at pamaninum kaybat nang sinubling mebie.

⁴² Inutus na ing manaral kami king balen na at patutuan mi karela king ya ing tilduan na ning Dios a mukum karing sablang mabie at mete.

⁴³ Migsalita la tungkul kang Jesus ding sablang propetaking ding sablang maniwala kang Jesus tanggapan da king kapamilatan na ning lagyu na ing kapatawaran da ring karelang kasalanan.

⁴⁴ Kabang magsalita ya i Pedro, tinipa ya ing Banal a Espiritu karing sablang makiramdam king pamanaral na.

⁴⁵ Ding talasalpantayang Judio a menibatan karin Jopa a kayabe nang Pedro pigmulalan da nung baket tigtug nia naman ning Dios karing paganu ing Banal a Espiritu.

⁴⁶ Uling dimdam da lang migsalitang miyayaliwang amanu at pupuri king Dios. Kanita nganang Pedro,

⁴⁷ Tinggap dia naman ding taung deti ing Banal a Espiritu antimo nung makananu ta yang tinggap. Ninu ing magkait binyag karing taung deti ngening kalupa ta la namang tinanggap king Banal a Espiritu?

⁴⁸ Inya inutus nang mabinyag la king lagyu nang Jesu-Cristo. Kaybat na nita, inawad da kang Pedro king manatili yang kayabe ra karing mapilan pang aldo.

11

¹ Abalitan da ring apostol ampon ding talasalpantaya a atyu king magbilug a Judea king tinggap da naman ding paganu ing amanu na ning Dios.

² Inyang minta ya i Pedro king Jerusalem, ngarang mekipate keya detang makapanig king pangasirkunsisyun da ring paganu,

³ Ba't daralo ka at makipangan karing e Judio?

⁴ Uli na niti, selese nang Pedro ing sablang mepalyari manibat king kapupurmeruan.

⁵ Ngana, Misan a aldo manalangin ku karin king balen na ning Jopa at king diwa ku menakit kung vision. Atin kung ikit kukuldas ibat banua a balamu metung yang malapad a ulas a bababa ra karing apat nang suluk; tinuknang ya iti king tulid ku.

⁶ Linawe ku ing laman na at ikit ku la ding animal a tiapat a bitis, animal a matunud at malyap, ding gagapang at ayup-bunduk.

⁷ Kaybat na nita, dimdam ke ing metung a bosis a mamaus kanaku. Ngana, Talakad ka Pedro at makamate ka karen ba mu lang apangan!

⁸ Ngakung mekibat, E ku malyaring gawan yan, Ginu! Ala pang pamangan a midinatan o marinat a linub king asbuk ku!

⁹ Pasibayu sinabi na ning bosis a menibat banua, E mu ausan marinat ing nanumang sasabian nang malinis ning Dios.

¹⁰ Mekatatlung besis milyari iti at kaybat ing sablang ita inigut deng paukiat pasibayu king banua.

¹¹ Ketang penandit a ita, atlu lang lalaki ding dinatang tulid na ning bale tuknangan ku; mituburan lang ibat Cesarea ba ra kung dakitan.

¹² At sinabi na ning Espiritu kanaku king e ku mikakunung tuking magbalik kayabe ra. Tinuki la naman kanaku karin Cesarea ding anam a talasalpantaya a kayabe ku ngeni, at minta ke king bale nang Cornelio.

¹³ Sinabi na kekami nung makananu neng ikit ing metung a anghel kilub ning pibalebale na a nganang sinabi: Mitubud kang tau karin Jopa ban dakitan de i Simon a ausan da namang Pedro;

¹⁴ atin yang sabian keka; king kapamilatan na ning sabian na keka, miligtas ka at ding sablang katubale mu.

¹⁵ Ya pa mung halus ka-umpisa kung migsalita inyang tinipa ya karela ing Banal a Espiritu antimo nung makananu yang tinipa kekatamu kanitang minuna.

¹⁶ Kanita ku aganaka ing sinabi na ning Ginu, Meminyag ya i Juan king kapamilatan na ning danum, oneng mabinyag kayu king Banal a Espiritu.

¹⁷ Akilala ku kanita king ing Dios dirinan na la namang regalung kalupa na ning binie na kekatamu kanitang meniwala tamu king Ginu tamung Jesu-Cristo. Ninu mo aku para sabatan ku ing buri nang daptan ning Dios?

¹⁸ Inyang dimdam da iti tiknang da ing karelang pamanuligsa at pinuri de ing Dios. Ngarang sinabi, Nung makanyan, dirinan na la namang oportunidad ning Dios ding paganu ban sumisi at painggulut karing karelang kasalanan at ban mika bie la!

¹⁹ Ding sablang mekatakas king pamaglupig a megumpisa king pangamate nang Esteban mengaparas la angga karin king Fenicia, Cyprus, at Antiokia. Penaral da ing amanu, oneng karing Judio mu.

²⁰ Ding aliwa karela, ding menibatan Cyprus at Cirene, minta la Antiokia at karin penaral da naman karing paganu ing Mayap a Balita tungkul king Ginung Jesus.

²¹ Inantabayanan na la ning Ginu at sinalpantaya la ding tutung dakal a tau at mekonberti la king Ginu.

²² Abalitan na iti ning iglesia karin Jerusalem, inya tinubud de i Bernabe karin Antiokia.

²³ Inyang miras ya karin at ikit na nung makananu na lang dininan grasya ning Dios, metula ya at pinayuhan na la ngan manatiling tune at tapat king Ginu a kayabe na ning mikakalukung lugud.

²⁴ Metung yang mayap a tau i Bernabe; kitmuan ya king Banal a Espiritu at matibe ya kasalpantayanan, at dakal lang tutu ding taung milapit king Ginu.

²⁵ Kaybat, tinaglus ya Tarso i Bernabe ba neng panintunan i Saulo.

²⁶ Inyang ikit ne, tiki ne Antiokia. Karin la menatiling miyabe kilub ning pabanua; mekiabe la king iglesia na ning Antiokia at tuturu karing dakal a tau. Karin Antiokia la minunang meyaus Cristianu ding talasalpantaya.

²⁷ King panaun a ita ating mapilan a propetang minta Antiokia ibat Jerusalem.

²⁸ Linibutad ya ing metung karela a milagyuan Agabo, at king kapamilatan na ning upaya na ning Banal a Espiritu inula na king malapit nang mikamaragul a danup king mabilug a yatu. (Dinatang iti king panaun na ning Emperador Claudio.)

²⁹ Pikayari da ring alagad king ing balang metung karela pakikuanan nang iparala itang sablang agyu ra karin ban sumaup karing talasalpantayang atyu Judea.

³⁰ Depat da iti at pekiparala da la ring salapi kari Bernabe at Saulo ba da lang ibie karing makatua na ning iglesia.

12

¹ Kanita mu ring panaun a ita pegumpisan na lang linupig Aring Herodes ding mapilan a miembru na ning iglesia.

² Pepatabtab ne batal i Santiago, ing kapatad nang Juan.

³ Inyang ikit nang iti mekaibie tula karing Judio, sindu na pa at peparakap ne i Pedro. (Iti milyari kanitang kapiestan da ring Tinape Alang Lebadura.)

⁴ Kaybat deng dekap i Pedro dela re king sukulan at karin de piliwas-liwas ginuardian ding apat a grupung sundalus, tiapat lang tau balang grupu. Isipan nang Herodes ing iyarap ne karing memalen Judio kalabas na ning Pamaglagpus.

⁵ Inya menatili ya king sukulan i Pedro; oneng menalangin lang taimtim king Dios para keya ding miembru na ning iglesia.

⁶ Kanitang benging bayu ne iyarap Herodes king balen, matudtud ya i Pedro pilatan da ring aduang guardia. Makatali ya karing aduang tanikala. Atin munamang guardiang makabante king pasbul ning sukulan.

⁷ Kabud-abud atyu ing metung a anghel na ning Ginu kilub ning sukulan at sinlag ing sala karin. Tepik ne pago ning anghel i Pedro; ginising ne at ngana keya, Malagua, talakad ka! Kanita mu rin mebalag la karing gamat na ding tanikala.

⁸ Sinabi na kanita ning anghel, Miblas ka at isulud mu la reng sandalyas mu. Memintu ya i Pedro at ngana ning anghel, Magbalabal ka at tuki ka kanaku.

⁹ Tikian neng Pedro lual na ning sukulan. Makanyan man, e na balu kanita nung tutu ing daraptan na ning anghel; bala na maninap ya mu.

¹⁰ Linabas la king mumunang bante, kaybat king kadua at ikua rang miras king pasbul bakal a palual papunta king siudad. Mibuklat yang dili na ing pasbul at melaus lang linual. Tinuntun la king metung a malating dalan, at bigla neng likuan ning anghel i Pedro.

¹¹ Kanita na apibulebule Pedro ing milyari keya at ngana, Ngeni ku asisiguradu king iti tutu pin! Tinubud ne ning Ginu ing anghel na, at linigtas na ku king gamat nang Herodes at king sablang bage tatangka rang daptan ding memalen Judio.

¹² Inyang api-isip-isip na ing milyari keya minuli ya king bale nang Maria a ima nang Juan Marcos. Disnan na lang makatipun at manalangin karin ding dakal a tau.

¹³ Kinatuk ya i Pedro king pasbul dalan at ing ipus a babaing milagyuan Roda ya ing memuklat king pasbul.

¹⁴ E ne pa ikuang abuklat ing pasbul akilala na ne bosis i Pedro; king tula na milayi yang linub pasibayu at sinabi na king manenaya ya i Pedro lual na ning pasbul.

¹⁵ Ngarang sinabi kang Roda, Maloloka na ka ne! Oneng pipilit na king tutu pin. Inya ngarang mekibat, Siguru yan ing anghel nang katutubu.

¹⁶ Samantala, e pepatugut tutuktuk i Pedro keta king pasbul. Inya biklat dia mu rin ing pasbul, at inyang ikit dang ya pin, tiblan na la ning takut.

¹⁷ Sininialan na la king gamat na king e la masigla, at inisplika na karela nung makananu neng linual ning Ginu king sukulan. Nganang migsalita, Ipamalita yu iti kang Santiago at karing aliwa pang kapatad. Kaybat meko ya at minta karing aliwa pang lugal.

¹⁸ Inyang kabukasan a abak, e makanyan-kanyan ing pangagulu da ring guardia; e ra balu nung nanu ing milyari kang Pedro!

¹⁹ Inutus nang Herodes ing panintunan de, oneng e re akit. Inya pepa-inbestiga na la ding guardia at minie yang kautusan king paten da la. Kaybat na nita, meko ya karin Judea i Herodes at miglabas yang makuyad a panaun karin Cesarea.

²⁰ Maluat na na lang kamuan Herodes ding memalen karin Tiro at Sidon; inya mekikit lang agnan-agnan keya. Muna, pekikuanan deng ayagkat makikampi karela i Blasto; ya ing talapangasiwa king palasyu na ning ari. Kaybat, lepitan de i Herodes at mekipagkasundu la keya, uling kakua yang pagkabie na ing karelang bansa king bansang sasakupan na ning ari.

²¹ King metung a aldo tildu na, migani ya i Herodes king imalan a susulud na ning metung a ari; linukluk ya king tronu na at migdiskursu ya karing tau.

²² Ngarang kukulait ding tau, E ya tau ing magsalita, nune metung yang dios!

²³ Kanita mu rin pepaturan ne ning anghel na ning Ginu i Herodes at milako ya male tau uling kisintian nang binie ra king sarili na ing dangal a mangaintulid king Dios. Ngitngat de ring ulad at iti ya ing kemate na.

²⁴ Sinulung ing pangakalat na ning amanu ning Dios. Merakal la ding sinalpantaya.

²⁵ Ayari nang Bernabe at Saulo ing karelang misyun at migbalik la Jerusalem, at tiki re i Juan a mayayaus munamang Marcos.

13

¹ King iglesia karin Antiokia ating mapilan a propeta at talaturu. Ila ding makatuki: i Bernabe, i Simeon (a meyaus Negro), i Lucio (a tau Cirene), i Manahen (a kayabe nang meragul ning Gobernador Herodes), at i Saulo.

² Kanitang misan, kabang miyayain lang kasuyuan king Ginu at tutupad king pamag-ayunu, ngana ning Banal a Espiritu karela, Italaga yu la di Bernabe at Saulo para king obrang itutuk ku karela.

³ Mig-ayunu la at menalangin, kaybat timpak da la ring gamat da karing buntuk da at saka ra na la tinubud.

⁴ Inya, i Bernabe at i Saulo, bitbit da ing tubud na ning Banal a Espiritu, minta la Seleucia at ibat karin miglayag lang papunta king pulu ning Cyprus.

⁵ Karas da Salamina, penaral da ing amanu na ning Dios karing sinagoga da ring Judio. Kasaup de king obra da i Juan Marcos.

⁶ Ikua reng adalakitan ing kabilugan a pulu at miras la angga Pafos. Disnan de karin ing metung a salamangkeru a milagyuan Bar-Jesus. Metung yang Judiong magbansag king propeta ya.

⁷ Kakaluguran neng Sergio Paulo, ing gobernador ning pulu, metung a taung biasa. Pepayaus na la ning gobernador di Bernabe at Saulo, uling buri nang damdaman karela ing amanu na ning Dios.

⁸ Oneng sebatan na la ning salamangkerung i Elimas (ita ing lagyu na king Griego); e na buring mika kasalpantayanan ya ing gobernador.

⁹ Kanita i Saulo a ausan da namang Pablo a mitmu king Banal a Espiritu, linawe neng maratna ing salamangkeru

¹⁰ at ngana, Anak ning diablo! Ika ing kalaban na ning sablang bage mayap; mitmu kang pamaglinlang at kapamiraitnan! Kapilan ka tuknang magliku king dalan nang matulid ning Ginu?

¹¹ Dugpa ya keka ngeni ing gamat na ning Ginu; mabulag ka at malambat mung e akit ing sala na ning aldo! Kanita mu rin penamdaman nang Elimas king ating digpang matuling a ulap king mata na, at kakapkap ya at durutdurut manintun tumaid keya.

¹² Inyang ikit na ning gobernador ing mepalyari, sinalpantaya ya; pigtakan nang e mu nanu ing turu tungkul king Ginu.

¹³ Miglayag ya i Pablo at ding kayabe na manibat Pafos at miras la Perga, Pamfilia. Likuan na lang Juan Marcos karin at migbalik ya Jerusalem.

¹⁴ Sinulung lang miglakad manibat Perga at miras la Antiokia, Pisidia; king Aldo ning Sabbath minta la king sinagoga at linukluk.

¹⁵ Kaybat na ning pamamasang meyakua king Kautusan at karing kasulatan da ring propeta pepasabi na karela ning talapangasiwa king sinagoga ing anti kanini: Kapatad, ikatula ming lubus nung bisa kayung magsalitang ditak ban munie diwa karing taung pesitagun.

¹⁶ Tinalakad ya i Pablo at tinas ne ing gamat na; kaybat megumpisa yang migsalita. Ngana, Kabalen kung Israelita at ikayung sablang paganu a ating takut king Dios, pakiramdaman yu ku!

¹⁷ Pinili na la ning Dios da reting Israelita ding kekaming makatua, at gewa na lang marangal a bansa ding kekaming kalahi kanitang atyu la pa antimong dayuan karin Ehipto. Linual na la ning Dios karin Ehipto king kapamilatan na ning maragul nang upaya,

¹⁸ at kilub ding apat apulung banua pibata na lang inantabayanan libutad ning disyerto.

¹⁹ Gisan na la ding pitung bansang manuknangan Canaan, at binie na karing Israelita ing gabun da reti at karelang bindian

²⁰ kilub ding apat a ralan at limang pulung banua. Kaybat na nita, dininan na lang ukum a menimuna karela angga king panaun nang Samuel a propeta.

²¹ At kanitang miniawad lang metung a ari, binie ne karela ning Dios i Saul a anak nang Cis ning tribu nang Benjamin. Ya ing meging ari da kilub ding apat apulung banua.

²² Kanitang leko ne king panga-ari i Saul, tilduan ne ning Dios maging ari da i David, at ini ing sinabi na ning Dios tungkul keya, Ikit ku kang David a anak nang Jese king ya ing lalaking buri ku; metung yang lalaking tupad king sablang buri kung iparapat.

²³ Metung ya i Jesus karing meging lahi nang David, at ya ing gewa nang Talapagligtas ning Dios king balen Israel antimo ing pengaku na.

²⁴ Bayu na pegumpisan Jesus ing obra na, penaral nang Juan karing sablang memalen na ning Israel king sukat lang sumisi at painggulut karing karelang kasalanan at pabinyag.

²⁵ At kanitang malapit na nang ayaring Juan ing misyun na, nganang sinabi karing tau, King pamalak yu ninu aku? Aliwa aku itang kekayung panenayan. Oneng akit yu! Datang ya kaybat ku, at e ku man karapatdapat kalag karing sandalyas a susulud na.

²⁶ Kapatad ku, lahi nang Abraham, at ikayung sablang paganu keti a ating takut king Dios: kekatamu miparala iting balita na ning kaligtasan!

²⁷ Uling e ra balu ding tau Jerusalem at ding karelang mamuntukan king ya ing Talapagligtas ni e ra la aintindian ding amanu da ring propeta a mababasa king balang Aldo Sabbath. Makanyan man ila mismu ding mekapatutu king ula da ring propeta king kapamilatan na ning pamakamate da kang Jesus.

²⁸ Agyamang e la menakit nanumang matulid para isaldak da kang Jesus ing atul a kamatayan, inawad da kang Pilato ing ipapate ne.

²⁹ Kaybat dang atuparan ing sablang sasabian da ring Kasulatan tungkul kang Jesus, kildas de king krus at binili re king metung a kutkutan.

³⁰ Oneng pepasublian neng mie ning Dios,

³¹ at e mu misan a aldo, nune maralas pepakit ya karetang keyabe-abe nang linibut manibat Galilea angga Jerusalem. Ila ngeni ding peka-testigu na karing memalen na ning Israel.

³² At ngeni atyu ke keti ban iyatad mi kekayu ing Mayap a Balita: itang pengaku nang daptan ning Dios karing kekatamung makatua. Ngeni, tiparan na na kekatamung meging lahi ra king kapamilatan na ning pamipasubli nang mie kang Jesus. Antimo ing makasulat king kaduang Dalit, Ika ing kakung Anak; king aldo a iti meging Tata mu ku.

³³

³⁴ At ini ing sinabi na ning Dios tungkul king pamipasubli nang mie kang Jesus ban kapilan man e ne magbalik pa king kasiran, Babie ku la keka ding banal at siguradung bendisyun a pengaku ku kang David.

³⁵ Antimo ing sasabian na king metung pang kasulatan, E mu paintulut king ing tapat mung talasuyu dumalan yang kasiran.

³⁶ Tiparan nang David ing nasa na ning Dios kanitang kapanaunan na at kaybat mete ya. Mikutkut ya siping da ring makatua na, at melaso ya ing katawan na.

³⁷ Oneng e ya dinalan kasiran itang pepasublian nang mie ning Dios.

³⁸ Ikayu ngan, kapatad ku, sukat yung abalung malino king mipanaral kekayu ing amanu tungkul king pangapatawad da ring kasalanan uli nang Jesus. Sukat yung akilala king ing ninumang maniwala kang Jesus maging malaya ya karing sablang kasalanan a e yu malyaring aligtasan king kapamilatan na ning Kautusan nang Moises.

³⁹

⁴⁰ Uli na niti, mingat kayu ban iting sinabi da ring propeta e mapalyari kekayu:

⁴¹ Lawan yu, ikong mapaninsultu mangapamulala kayu at mate! Uling ing dapat a gagawan ku king panaun yu metung a bage a e yu buring paniwalan, agyamang kaniti atin nang minisplika kekayu!

⁴² Inyang lulual na la king sinagoga di Pablo at Bernabe, ding tau kimbiran da lang magbalik pasibayu kanitang tutuking Aldo Sabbath ban salitanan da la pa tungkul kareting bage.

⁴³ Kalako ra king kapulungan da ring tau, dakal la ding Judio a tinuki kari Pablo at Bernabe at antimu rin ding dakal a paganu a mekonberti king Judaismo. Migsalita la karela ding apostol at penaralan da lang manatiling mibiebie king grasya na ning Dios.

⁴⁴ Itang tinuking Aldo ning Sabbath, halus dinatang la ding sablang tau karin Antiokia ban makiramdam king amanu na ning Ginu.

⁴⁵ Panakit da ring Judio karing dakal a tau, tiblan na la ning maragul a pangalalu. Inya migsalita lang laban king sasabian nang Pablo at ininsultu de pa.

⁴⁶ Oneng lalu lang mesikan a lub migsalita di Pablo at Bernabe. Ngara, Kailangan ing mumuna ming ipanaral kekayu ing amanu na ning Dios. Oneng anti ning tinggian yu at e yu bibilang mangaintulid king bie alang angga ing kekayung sarili, inya akit yu, lakuan da kayu at karing paganu ke munta.

⁴⁷ Uling ing kautusan a binie na ning Ginu kekami anti ya kanini: Binili da kayung bilang sulu karing paganu ban maging dalan na ning pangakabus ning mabilug a yatu.

⁴⁸ Inyang dimdam da iti ding paganu metula la at pepasalamat la king Ginu uli na ning amanu na, at meging talasalpantaya la ding sablang mepili para king bie alang angga.

⁴⁹ Mikalat ing amanu na ning Ginu king mabilug a lugal a ita;

⁵⁰ oneng ding Judio sitsutan da la ring mapilan karing masalaping babaing ating lub king Dios at ding lalaking kikilalanan da king siudad. Inagkat da lang lumaban kari Pablo at Bernabe at tinabi da la king karelang distrito.

⁵¹ Inya pigpag da ri Pablo at Bernabe ing alikabuk karing bitis da bilang tutul karela, at saka na la sinulung papunta Iconio.

⁵² Mikatmuan na la man king tula at king Banal a Espiritu ding talasalpantaya karin Antiokia.

14

¹ Makanyan munaman ing merapat karin Iconio: minta la di Pablo at Bernabe king sinagoga da ring Judio. King pamagsalita ra ikua da lang apapaniwalan ding dakal a Judio at paganu.

² Oneng detang Judio a e bisang maniwala sitsutan da la ring paganu at abaligtad da la panamdam laban karing talasalpantaya.

³ Menatili lang malambat ding apostol karin. Migsalita lang alang takut tungkul king Ginu. Pepatutuan na ning Ginu ing karelang panaral tungkul king grasya na inyang king kapamilatan na ning upayang binie na karela mekarapat lang milagru at miyayaliwang bage makapagmulala.

⁴ Mikakawani la ding tau king siudad; ding aliwa para karing Judio la; ding aliwa naman para karing apostol la.

⁵ Kanita ding paganu ampon Judio, kayabe da ring karelang pamuntuk, pikayari da ing panasakitan da la ring apostol at pamasibasan da la.

⁶ Inyang abalu da ring apostol iti linipat la karin Listra at Derbe, ding aduang siudad karin Licaonia at karing distritong makapadurut.

⁷ Karin da penaral ing Mayap a Balita.

⁸ Karin Listra ating metung a taung pane makalukluk. E pa mekalakad kapilan man uling lumpu ne kabait na.

⁹ Kabang makiramdam ya king pamanaral nang Pablo ikua rang misalubung a panimanman. Panakit nang Pablo king atin yang kapaniwalan maulu

¹⁰ sinabi nang masikan keya, Tikdo ka at talakad kang matulid! Linundag ya ing taung lumpu at miglakadlakad ya.

¹¹ Inyang ikit da ring tau ing depat nang Pablo, megumpisa lang kinulait king amanung Licaomano. Ngara, Ding taung deti dios lang tinipang makabalatkayung tau libutad tamu!

¹² Inaus deng Zeus i Bernabe, at i Pablo, anti na ning ya ing talapagsalita, inaus deng Hermes.

¹³ Ing pari ning dios-diosan a i Zeus a ating templo lual da ring pader ning siudad migdala yang lalaking baka at sampaga king pasbul ning siudad. Ya at ding dakal a tau bisa lang miyain sakripisyu karing apostol.

¹⁴ Inyang abalitan da ri Bernabe at Pablo ing buri dang daptan, pengabak da ing imalan a karelang susulud at milayi lang linibutad karing tau. Ngarang kukulisak,

¹⁵ Kakaluguran, e yu daraptan yan! Tau kami mung kalupa yu! Dinatang kami keti ba ming iyatad ing Mayap a Balita ban painggulut kayu karetang alang kwentang bage, at magbalik kayu lub king Dios a mabie a mengawa king banua, king yatu, king dagat, at king sablang atyu kareti.

¹⁶ Karing milabas a panaun peintulut na ning Dios king ing balang bansa sumulung ya king sarili nang lakad.

¹⁷ Makanyan man dininan na kayung masalang tanda tungkul king sarili na king kapamilatan da ring mayap a bage daraptan na kekayu; dirinan na kayung uran ibat banua at ya ing babie bunga karing tanaman yu king karampatan a panaun; ya ing babie pagkabie at mangatmung tula kekayu.

¹⁸ Agyang makanyan na ing sinabi ra ding apostol, maibug da la pang e apigil ding tau king pamiyain sakripisyu karela.

¹⁹ Dinatang la ding mapilan a Judio ibat Antiokia ning Pisidia at ibat Iconio; ikua da lang ayagkat ding tau laban karing apostol. Pemasibas de i Pablo at keladkad de lual ning balen inyang bala ra mete ne.

²⁰ Oneng milupung la kang Pablo ding talasalpantaya at kabang pilulupungan de tinalakad ya at migbalik king balen. Kabukasan minta la di Pablo at Bernabe king Derbe.

²¹ Kaybat dang penaral ing Mayap a Balita karin Derbe at kaybat dang menikuang dakal a alagad, mibalik la karin Antiokia ning Pisidia, kaybat dang pepaindalan Listra ampon karin Iconio.

²² Pepasiknangan da la lub ding talasalpantaya a disnan da karin at inusukan da lang manatili king kasalpantayanan. Ngarang sinabi, Kailangan ta ngan dumalan dakal a kasakitan bayu tamu milub king Kayarian ning Dios.

²³ King balang metung karing iglesia tinuldu lang makatuang talapanibala at kayabe na ning pamanalangin at pamag-ayunu peniwala da la king Ginung karelang panaligan.

²⁴ Dinalan la Pisidia at miras la Pamfilia.

²⁵ Kaybat dang penaral ing amanu na ning Dios king Perga tinaglus lang minta king Atalia.

²⁶ Manibat Atalia miglayag lang pabalik Antiokia, nung nu la kapupurmeruan mipanibala king grasya ning Dios para king obrang ngeni ikua ra nang agampanan lubus.

²⁷ Inyang miras la Antiokia tinipun da la ring miembru na ning iglesia at belita ra ngan ing sablang depat na ning Dios karela, at nung makananu neng biklat ning Dios karing paganu ing dalan para king kasalpantayanan.

²⁸ Menatili lang malambat kayabe da ring talasalpantaya karin Antiokia.

15

¹ Ating mapilan a taung menibatan Judea; dinatang la king Antiokia at pegumpisan dang tiru karing talasalpantaya ing anti kaniti, E kayu malyaring miligtas nung e kayu pasirkunsisyun antimo ing aduan na ning Kautusan nang Moises.

² Maigpit lang mipapagsalita at makiargu karela di Pablo at Bernabe tungkul king pisasabian a iti; inya mepikayari king i Pablo ampon i Bernabe at ding mapilan pang tau Antiokia kailangan lang munta Jerusalem ban makikit karing apostol at karing makatua tungkul kaniti.

³ Inya linakad la bilang tubud na ning iglesia, at king pamandalan da king sakup ning Fenicia at Samaria pemalita ra nung makananu lang mekonberti ding paganu. Iti minie maragul a tula karing sablang talasalpantaya.

⁴ Inyang miras la Jerusalem, matula na lang tinggap ning iglesia; antimu rin ding apostol at ding makatua. Pemalita ra karela ing sablang depat na ning Ginu karela.

⁵ Oneng tinutul la ding mapilan karing talasalpantaya a kayanib king pangkat da ring Pariseo at ngara, Kailangan lang masirkunsisyun ding paganu. Sukat lang iturung tupad king Kautusan nang Moises.

⁶ Mipulung la ding apostol at ding makatua ban surian da iting pisasabian.

⁷ Kaybat na ning makabang pamibadbaran, tinalakad ya i Pedro at nganang migsalita, Kapatad, masalang balu yu king kanitang minuna pinili na ku ning Dios ban ipanaral ku ing Mayap a Balita karing paganu ba reng damdaman at layun lang maniwala.

⁸ At ing Dios a makakilala king isipan da ring tau, pepakit na ing tula na karing paganu king kapamilatan na ning pamamie na karela king Banal a Espiritu antimo nung makananu neng binie kekatamu.

⁹ E na la gewang aliwa kekatamu; pepatawaran na la kasalanan uli na ning pamaniwala ra.

¹⁰ Inya nanu ngeni ing sangkan baket buri ye pang paniubukan ing Dios king kapamilatan na ning buri yung ipapusan karing talasalpantaya ing metung a bage a itamu mismu ni ding makatua tamu e ra agyung pisanan?

¹¹ E makanyan! Paniwalan tamu king ing kekatamung kaligtasan kalupa na ning karela; miyabie king kapamilatan na ning grasya ning Ginung Jesus.

¹² Alang mekabulad king mabilug a kapulungan kabang makiramdam la king balita da ri Bernabe at Pablo tungkul karing sablang milagru at makapagmulalang bage depat na ning Dios king kapamilatan da libutad da ring paganu.

¹³ Inyang meyari lang migsalita, i Santiago naman ya ing migsalita. Ngana, Kapatad, pakiramdaman yu ku!

¹⁴ Kaybat-ibat na pa mung lerawan Simon nung makananu nang minunang pepakit ning Dios ing malasakit na karing paganu inyang atin yang piniling balen karela a maging sarili na.

¹⁵ Makayagpang lubus iti king inula da ring propeta. Antimo ing sasabian na ning kasulatan,

¹⁶ Kaybat na niti magbalik ku, ngana ning Ginu, at italakad keng pasibayu ing miragsa nang bale David. Ibangun keng pasibayu at ibalik king sadia nang leguan.

¹⁷ Kanita panintunan de ing Ginu ding sablang tau, ding sablang paganu a inaus ku at piniling maging sariling kaku.

¹⁸ Iti ya ing sasabian ning Ginu a pepabalu kaniti king panaun a malambat nang linabas.

¹⁹ Nganang Santiago, Para kanaku, e tamu sukat pakasakit para karing paganu ing pamaglapit da king Dios.

²⁰ Nune kailangan tamung sumulat karela king makagyu na ing mangilag lang mamangan king isanu mang midinatan uli na ning iti miyain karing idolo; king mangilag la king pamakipangalugud, mangilag lang mamangan king karni da ring animal a pete rang e peparayan ampon king pamamangan daya.

²¹ Uling malambat neng mababasa ing Kautusan nang Moises karing sinagoga balang Aldo ning Sabbath, at mipanaral ing turu na king balang balen.

²² Ding apostol ampon ding makatua, at ing mabilug a iglesia, pikayari dang padalang mapilan a taung pekakatawan da a tuki kang Pablo at kang Bernabe karin Antiokia. Pinili da la ring aduang taung kikilalanan da ring talasalpantaya; i Judas a mayayaus Barsabas at i Silas.

²³ Peparala de karela ing makatuking sulat: Ding apostol at ding makatua a kekayung kapatad payabut da ing karelang komusta karing sablang kapatad a lahing paganu a manuknangan king Antiokia, Siria, at Cilicia.

²⁴ Miras kekami ing balita king ding mapilan a taung ibat kekami keni Jerusalem detangan da kayu at ligaligan at gilu isip king karelang pamagsalita. Makanyan man, ala lang kapaintulutan a ibat kekami para daptan da ita.

²⁵ Inya, mipulung kami at pikayari mi ing mamili keng pekakatawan mi at itubud la kekayu. Datang lang kayabe da ring pakamalan ming kakaluguran a Pablo at Bernabe

²⁶ a e pasayang king bie a susuyu ra king Ginu tamung Jesu-Cristo.

²⁷ Uli na niti, tutubud mi la kekayu di Judas at Silas a munie patutung personal karing bage sinabi mi na kaniting sulat.

²⁸ Uling kaburian na ning Banal a Espiritu at kasanmetung na kami kaniti, king e kayu mirinan aliwa pang tuntunan labis kareting makatuking tutung kailangan:

²⁹ mangilag kayu king pamangan a miyain karing idolo; e kayu mamangan daya; e kayu mamangan king karni da ring animal a pete rang e peparayan, at dumayu kayu king sablang imoralidad. Pangilagan yu ngan iti at e kayu milisia king matulid. Angga na keni.

³⁰ Pepalakuan da la ring tubud at tinaglus la Antiokia. Karas da karin tinipun da la ring sablang talasalpantaya at binie de karela ing sulat.

³¹ Inyang abasa re ding tau ing sulat, miragdag la tetagan a lub king payu a darala na.

³² I Judas at i Silas, anti na ning propeta la naman, ila mismu migsalita lang malambat karing talasalpantaya. Dininan da lang tetagan at sikanan a lub.

³³ Kaybat dang miglabas ditak a panaun karin, meko na lang kayabe na ning lugud at panalala da ring talasalpantaya at migbalik la karetang mitubud karela. [

³⁴ Oneng pepailakuan ya i Silas karin.]

³⁵ Pepaindalan la pa mu karin Antiokia di Pablo at Bernabe. Kayabe da ring aliwa pa, tiru da at penaral ing amanu na ning Ginu.

³⁶ E melambat kaybat na nita, nganang Pablo kang Bernabe, Tara, magbalik kata at dumalo karing kapatad king balang siudad nung nu ta penaral ing amanu na ning Ginu, at lawan ta nung mipakananu na la.

³⁷ Buri nang Bernabe ing ituki re i Juan Marcos,

³⁸ oneng para kang Pablo alang sangkan a matulid ing ituki re, uling e ya menatiling kayabe ra angga king kawakasan na ning karelang misyun nune migbalik ya at likuan na la karin Pamfilia.

³⁹ Mika mapali lang pamipagsalita angga king birian dang mikawani na la. Tiki neng Bernabe i Marcos at miglayag lang papunta Cyprus,

⁴⁰ ing pinili na namang Pablo ya i Silas. Meko lang kayabe na ning panalangin da ring talasalpantaya king mantabe sa karela ing grasya na ning Ginu.

⁴¹ Linibut ya i Pablo king kabilugan na ning Siria at Cilicia, at pepasiknangan na la lub ding iglesia karin.

16

¹ Sinulung yang miglayag i Pablo papunta Derbe at Listra. Manuknangan ya karin ing metung a alagad a milagyuan Timoteo. Metung ya naman alagad i ima na, Judio ya, oneng i tata na Griego ya.

² Ding kapatad karin Listra at Iconio mitmu lang pamipuri kang Timoteo.

³ Sinirkunsisyunan neng Pablo uling buri neng ituki bilang kayabe na king pamaglakad na. Depat na iti uling pikabaluan karing Judio karing lugal a deta king i tata na metung yang Griego.

⁴ King pamandalo ra king balang balen, binie da la karing talasalpantaya ding tuntunan a pikayari da ring apostol at ding makatua karin Jerusalem. Penabilin da karela king tuparan da la.

⁵ Inya mesikan la kasalpantayanan ding iglesia at miragdag la bilang aldo-aldo.

⁶ Linakad la angga Frigia at king sakup ning Galacia; e na peintulut ning Banal a Espiritu ing panaral da ing amanu king probinsia na ning Asia.

⁷ Inyang miras la king angganan na ning Misia; sibukan dang dinalakit papunta Bitinia, oneng iti e na peintulut karela ning Espiritu nang Jesus.

⁸ Inya sindu ra na ing pamaglakad da at biltangan de ing Misia at tinaglus la Troas.

⁹ Kanitang benging ita mika vision ya i Pablo; ikit ne ing metung a tau Macedonia a makisabing mayap keya. Ngana, Taglus ka keni Macedonia at saupan mu kami!

¹⁰ Kabud ikit neng Pablo iting vision, agad-agad keng meko papunta Macedonia, uling yari king lub mi king ing Dios ya ing minaus kekami ban ipanaral ing Mayap a Balita karing tau karin.

¹¹ King pamaglayag mi ibat Troas minta keng deretso karin Samotracia; itang kabukasan tinaglus ke Neapolis.

¹² Ibat karin melaus keng linub Filipos, ing siudad ning mumunang distrito ning Macedonia a kolonia na naman ning Roma. Kaybat da ring mapilan ming aldo pamanatili karin,

¹³ minta ke king lele ilug lual na ning siudad king Aldo ning Sabbath. Bala mi atin lang sinagoga karin ding Judio. Migluklukan kami at menaral kami karing babaing mitipun karin.

¹⁴ Ing metung karing babaing mekiramdam kekami ya i Lydia a tau Tiatira a magtindang telang purpura. Babai yang sasamba king Dios at inaslaganan ne isip ning Ginu ban makiramdam masalese king sasabian nang Pablo.

¹⁵ Ya ampon ding katubale na pepabinyag la. Kaybat peparalan na kaming amanu. Ngana, Nung tatanggapan yung aku tune kung talasalpantaya ning Ginu, kukumbiran da kayung tuknang keni kekami. At e mi apayalian ing kumbira na.

¹⁶ Misan a aldo kabang papunta kami king lugal a pipanalanginan, seganan na ke ning metung a babaing ipus a maki espiritung marawak. Uli na ning espiritung marawak a atyu keya agyu nang ulan ing daratang a panaun. King pamanula na dakal ya panakitan para karing makibandi keya.

¹⁷ Tinuki ya kang Pablo ampon kekami at nganang kukulisak, Talasuyu na la ning Dios a Kakataskatasan ding taung deni! Papasiag da kekayu nung makananu kayung malyaring miligtas!

¹⁸ Anti kaniti ing daraptan na kilub ding dakal a aldo, angga king mebuysit ya i Pablo at inarapan ne. Ngana king espiritu, King lagyu nang Jesu-Cristo yuyutus ku keka ing lumual ka at mabating ka keya! Kanita mu rin linual ya keya ing espiritung marawak.

¹⁹ Inyang akilala da ring makibandi kaniting babaing ipus king milako la kapanintunan, siklulu de i Pablo at i Silas at teguyud da la king plasa at inarap karing maki kayupayan.

²⁰ Delum da la king arap da ring opisyal Romano at ngara, Ding taung deti Judio la, at mangulu la king kekatamung siudad.

²¹ Tuturu lang kaugalian a makakontra king kekatamung kautusan; memalen na ke ning Roma at e mi atanggap o atuparan ing sasabian da.

²² Mekiabe la ding memalen karing linigalig kari Pablo at Silas. Pengabak da ring opisyal ing imalan nang Pablo ampon i Silas at layun da lang pepabarug latiku.

²³ Kaybat da ring e mabilang-bilang a barug a tinggap da, kilung da la king sukulan, at inutus da king guardia ing ikandadu na lang masalese.

²⁴ Inyang tinggap ning guardia ning sukulan ing utus, kilung na la king kakilub-kiluban a kulungan at pinosas na la bitis.

²⁵ Inyang malalam nang bengi i Pablo at i Silas menalangin la't migkanta king Dios, at mekiramdam la ding aliwang makasukul.

²⁶ Kabud-abud mika ayun a masikan; minugun yang e mu nanu ing sukulan. Mibuklat la ngan ding pasbul at mepatad la tanikala ding sablang makasukul.

²⁷ Inyang migising ya ing guardia na ning sukulan at ikit nang makabuklat la ding pasbul begut ne ing espada na, at nasa nang magpakamate uling bala na tinakas na la ding makasukul.

²⁸ Oneng kinulait yang masikan i Pablo. Ngana, E mu panasakitan ing kekang sarili, atyu ke ngan keni!

²⁹ Pepakua yang sulu ing guardia na ning sukulan at pupulayi yang linub king sukulan, at gagalgal yang siniklaud king arap da ri Pablo at Silas.

³⁰ Linual na la king sukulan kabang nganang kukutang, Sabian yu kanaku, ginu, nanu ing sukat kung daptan ba kung miligtas?

³¹ Ngarang mekibat, Maniwala ka king Ginung Jesus at miligtas ka at pati na ing mabilug mung pamilya.

³² At penaral da keya at karing katubale na ing amanu na ning Ginu.

³³ Keta mu ring oras a ita na ning kapitangan bengi linual na la ning guardia king sukulan at inos na la ding karelang sugat at kanita mu rin mebinyag yang kayabe da ring sablang katubale na.

³⁴ Kaybat na nita, tiki na lang minuli king bale na at dininan na lang pamangan, at pigsayan na ning mabilug nang pamilya ing pangakonberti da king Dios.

³⁵ Itang kabukasan a abak mitubud lang pulis ding opisyal Romano a abe na ning utus a anti keni: Ibulus yu la ding taung deti.

³⁶ Inya sinabi na ning guardia na ning sukulan kang Pablo, Inutus da ring opisyal ing ibulus da kayu, ikayung aduang Silas. Inya malyari na kayung mako at lumakad kayung mitmung kapayapan.

³⁷ Oneng nganang Pablo karing pulis, Ala na la mang ikit nanumang pamikasala kekami, makanyan man pepabarug da kaming latiku arapan na ning publiku, at memalen na ke pa naman ning Roma! Kaybat pepasukul da ke pa. At ngeni buri da keng palakuan lihim? E malyari yan! Paburen yu lang munta keni mismu ding opisyal Romano at ilang sukat mibulus kekami.

³⁸ Belita ra iti ding pulis karing opisyal Romano; mitakutan la inyang abalu rang memalen lang Romano di Pablo at Silas.

³⁹ Inya minta la at miniawad lang kapanupayan karela. Kaybat na nita, tinaid da lang linual king sukulan at inawad dang lakuan de sa ing siudad.

⁴⁰ Linual la king sukulan di Pablo at Silas at minuli la king bale nang Lydia; karin da la disnan ding talasalpantaya. Kaybat da lang penaralan at pepatatagan a lub melaus na lang meko.

17

¹ Sinulung lang miglakbe king kekaban na ning Ampipolis at Apolonia at miras la Tesalonica nung nu la ating sinagoga ding Judio.

² Agpang king sadia nang gagawan, minta ya i Pablo king sinagoga. Karin, balang Aldo ning Sabbath, kilub ding atlung dominggu, mekiargu ya karing tau tungkul karing Kasulatan;

³ pepalino na la at ginamit na lang peka prueba king ing Cristo a mipangakung datang sukat yang dumalan kasakitan at kaybat deng pete, subli yang mie. Nganang Pablo, Iting Jesus a ipanaral ku kekayu, ya ing Cristo.

⁴ Meniwala la ding mapilan karela at mekianib kari Pablo at Silas. Makanyan munaman ing depat da ring dakal a Griego a sasamba king Dios at antimu rin ding keraklan karing pikabaluan a babai.

⁵ Oneng mengalalu la ding Judio at tinipun da la ring mapilan karing alang kwentang taung lumba-sumaka karing dalan. Sitsutan da la reti ban mangulu king siudad. Lisuban de ing bale nang Jason king pamanintun da kari Pablo at Silas. Nasa da lang iyarap king balen.

⁶ Inyang e da la akit, i Jason at ding mapilan pang aliwang talasalpantaya ilang keladkad da at inarap karing makikayupayan king siudad. Ngarang kukulisak, Mangulu la ding taung deti nukarin la man miras! At ngeni dinatang la king kekatamung siudad,

⁷ at sasalikut na lang Jason king bale na. Lalabagan da la ring kautusan na ning Emperador ning Roma; sasabian da king atin pang aliwang ari a ausan dang Jesus.

⁸ King sinabi rang iti pepagalsa da la lub ding dakal a tau ampon ding manungkulan king siudad.

⁹ Ding opisyal pepagmultan da la ri Jason at ding kayabe na para mabulus la, at pepaburen da na lang minuli.

¹⁰ King bengi mu ring ita, pepapuntan da la ring talasalpantaya karin Berea di Pablo at Silas. Inyang karas da karin tambing lang tinaglus king sinagoga da ring Judio.

¹¹ Mas mayap la pilubluban ding tau karin kesa karing tau Tesalonica. Matingid lang mekiramdam king penaral nang Pablo. Pagaralan da la aldo-aldo ding Kasulatan ba rang akit nung tutu pin ing sinabi nang Pablo.

¹² Meniwala la ding dakal karela; meniwala la naman ding dakal karing pikabaluan a babaing Griego at ding dakal karing lalaki.

¹³ Oneng inyang abalitan da ring Judio karin Tesalonica king penaral nang pasibayung Pablo ing amanu na ning Dios karin Berea, minta la karin at pegumpisan da lang sitsutan at inablukan mangulu ding dakal a tau.

¹⁴ Kanita mu rin pepayatad de ring talasalpantaya i Pablo king lele dagat; oneng melakuan la karin Berea di Silas at Timoteo.

¹⁵ Inatad de ring minantabe kang Pablo angga king Atenas. Kaybat migbalik na la Berea kayabe ning panabilin nang Pablo king makikit la keya di Silas at Timoteo king malalaguang panaun.

¹⁶ Kabang panenayan na lang Pablo karin Atenas di Silas at Timoteo, e ya mipaindatun a lub inyang ikit na nung nu la anti karakal king idolo a sasamban da king mabilug a siudad.

¹⁷ Inya mekiargu ya karing Judio king sinagoga at karing paganu a sasamba king Dios. Makiargu ya aldo-aldo karing taung akakatagpu na king plasa na ning siudad.

¹⁸ Mekipagdebate la naman keya ding mapilan karing talaturung Epicureo at Estoico. Ngara ding aliwa, Nanung buri nang sabian niting taung magbibiasang alang balu? Ngara naman ding aliwa, Balamu yata magsalita ya tungkul karing dios a e pikabaluan. Asabi ra iti uling manaral ya i Pablo tungkul kang Jesus at tungkul king pamaniubling mie.

¹⁹ Inya tiki re i Pablo at inarap king kapulungan na ning Areopago at ngara keya, Bisa keng makabalu tungkul kaniting bayung doktrinang ipanaral mu.

²⁰ E mi makaing aintindian ing aliwa king kekang sasabian at buri ming abalu nung nanu ing kabaldugan da. (

²¹ Uling ding sablang memalen na ning Atenas at ding dayuan a manuknangan karin kapad dang lalabas ing panaun da king pamagsalita at pamakiramdam king pekatauli at bayung diling pisasabian.)

²² Tinalakad ya i Pablo libutad ning kapulungan king Areopago at nganang migsalita, Memalen ning Atenas! Ikit ku nung nu kayu anti ka-relihiosu.

²³ Uling kabang maglakad ku king kekayung siudad at miglalawe karing lugal a pisasamban yu, menakit ku namang metung a altar nung nu makasulat ing anti kaniti: King Dios a E Pikabaluan. Itang e yu balu a kekayung sasamban, ya ngeni ing panaral ku kekayu.

²⁴ Ing Dios a mengawa king yatu at king sablang atyu king yatu, ya ing Ginu ning banua at yatu; e ya manuknangan karing templo a telakad da ring tau.

²⁵ Ni e ne kailangan ing nanumang aibie na ning tau king pamagobra na para keya, anti na ning ya mismu ing babie bie at pangisnawa at king sabla karing heganaganang tau.

²⁶ King metung mung tau lelangan na la ding sablang lahi ba reng alaganapan ing mabilug a yatu, at ya mu rin ing mituldung makapauna nung nu ya angga bie ing balang bansa at ya naman ing mituldu karing angganan na ning balang metung karela.

²⁷ Makanyan ing depat na ban ding sablang tau panintunan de at marahil malyari deng atuklasan king kekaban na ning pamanintun da king dalan painturu keya. King kamatutuanan e ya marayu ing Dios king kaninu man kekatamu,

²⁸ anti na ning, Keya tamu mabibie at kikimut at makalto. Antimo ing sasabian da naman ding mapilan karing poeta yu, Tune na katamung anak na.

²⁹ Anti na ning anak na katamu ngan ning Dios, ala tamung matulid misip king ing kadiosan na kalupa na ning isanu mang megawa king gintu, pilak, at batu a inubug na ning gelingan na pangamat at pandukit ning tau.

³⁰ Oneng e na la pinsinan ning Dios ding panaun inyang ala lang balu ding tau, oneng ngeni yuyutus na karing sablang tau nukarin la man king sumisi la at painggulut king e mayap dang pamibiebie.

³¹ Uling tinuldu yang aldo nung nu ne ukuman king ganap a katuliran ing mabilug a yatu king kapamilatan na ning pinili na. Minie yang katunayan tungkul kaniti para karing sabla king kapamilatan na ning pamipasubli nang mie king taung ita!

³² Kabud dimdam da kang Pablo ing sasabian nang pangasubli nang mie ning metung a tau, mipakayli lang masikan ding mapilan karela. Ngara naman ding aliwa, Bisa ke pang damdam tungkul kanyan!

³³ Kaybat na nita, likuan neng Pablo ing kapulungan.

³⁴ Mekianib la keya ding mapilan at meniwala la; metung ya kareti i Dionisio, ing metug karing miembru na ning Areopago ampon ing metung a babaing milagyuan Damaris at ding mapilan pa.

18

¹ Meko ya Atenas i Pablo at tinaglus ya Corinto.

² Karin ne atagpuan ing metung a Judio a mayayaus Aquila a tubu Ponto. Karatang-datang nang ibat Italia a kayabe na ning asawa nang i Priscila, uling pepalakuan na la Roma ning Emperador Claudio. Delawan na lang Pablo

³ at melaus yang mekipanuknangan at mekiabe megobra karela, uling kalupa na la kapanintunan; mangawa lang tolda.

⁴ Mekiargu ya king sinagoga balang Aldo Sabbath; agkatan na lang paraparehu ding Judio at Griego.

⁵ Inyang dinatang ya i Silas at i Timoteo ibat Macedonia, telaga nang Pablo ing mabilug nang panaun king pamanaral king amanu na ning Dios; patutuan na king arap da ring Judio king i Jesus ya ing Cristo a mipangakung datang.

⁶ Inyang selangsangan de at memagsalita lang miyayaliwang kapanyiran laban keya, pigpag na ing alikabuk king imalan na bilang tutul karela at ngana, Nung mipahamak kayu ala kayung pamarsalanan nune mu ing sarili yu! Ala na kung pakibatan. Manibat ngeni karing paganu ku munta.

⁷ Inya likuan na la at mekituknang ya king bale na ning metung a paganung milagyuan Ticio Justo, tau yang sasamba king Dios; kasiping nia mu ning sinagoga ing bale na.

⁸ I Crispo, ing pamuntuk na ning sinagoga, meniwala ya king Ginu at pati na ing mabilug nang pamilya; at dakal la ding aliwa pang tau karin Corinto a mekiramdam king amanu; meniwala la at pepabinyag.

⁹ Misan a bengi, menakit yang vision i Pablo nung nu na sinabi ning Ginu keya, E ka tatakut, nune isundu mu ing kekang pamagsalita at e ka mimina lub,

¹⁰ uling kayabe mu ku. E na ka ananu balang ning ninuman, uling kanaku la ding keraklan karing tau king siudad a iti.

¹¹ Inya menatili ya Corinto i Pablo kilub ning pabanua't kapitna; tuturu na karing tau ing amanu na ning Dios.

¹² Kanitang mitulduan ya i Galion maging gobernador Romano na ning Acaya misasanmetung la ding Judio; dekap de i Pablo at delum king husgadu.

¹³ Ngarang sinabi, Ing taung iti agkatan na la ding tau ban samba king Dios king paralan a makasalangsang king yuyutus na ning kautusan!

¹⁴ Inyang megumpisa neng makibat i Pablo, nganang migsalitang Galion karing Judio, Nung iti sanang pisasabian makatungkul ya king metung a kamalian o metung a krimen a merapat, matulid a tutu ing pakiramdaman da kayu ikayung Judio.

¹⁵ Anti na ning iting piyamanuan tungkul ya karing amanu at karing lagyu at king sarili yung kautusan, ikayu na mismu ing lumutas kaniti. E ku malyaring munie kayatulan tungkul kareting bage!

¹⁶ Tinabi na lang lumual king husgadu.

¹⁷ Pisaup-saup de i Sostenes, ing pamuntuk ning sinagoga, at penumbuk de king arap na ning husgadu. Oneng iti e na bitasang pinsinan Galion.

¹⁸ Menatili ya pang kayabe da ring talasalpantaya i Pablo karin Corinto. Kaybat na nita, likuan na la at miglayag yang papunta Siria, kayabe na la di Priscila at Aquila. Oneng bayu ya meko ing sasaken da menata ya karin Cencrea at pepasatsat na ing buak na.

¹⁹ Miras la Efeso at karin ne likuan i Priscila at i Aquila. Minta ya king sinagoga at mekiargu ya karing Judio.

²⁰ Inawad da kang Pablo ing manatili ya pang mapilan a aldo karin kayabe ra, oneng e ya mebisa.

²¹ Nune sinabi na karela inyang mamako ne, Nung kaburian na ning Dios, magbalik ku kekayu. Makanyan yang memun at meko Efeso.

²² Inyang karas na Cesarea melaus ya Jerusalem at kinomustan ne ing iglesia at kaybat tinaglus ya Antiokia.

²³ Kaybat na ning makuyad a panaun a pamanatili na Antiokia, sindu na ing pamandalo na king distrito na ning Galacia at Frigia. Inatdanan na lang sikanan lub ding sablang talasalpantaya.

²⁴ Ating metung a Judiong milagyuan Apolos at tubu ya Alejandria, dinatang ya Efeso. Atin yang gelingan king pamagsalita at kabisadu na la ding sablang Kasulatan.

²⁵ Mituruanan ya tungkul king Dalan ning Ginu at kayabe na ning malablab a panamdam magsalita ya at tuturung ustu tungkul kang Jesus. Makanyan man, ing binyag nang Juan ya mu ing balu na kanita.

²⁶ Megumpisa yang migsalitang alang takut kenu man king sinagoga. Inyang abalitan de ri Priscila at Aquila, kimbiran de at tiki keta karela at tiruanan de king lalung maragul a kamalinawan tungkul king Dalan ning Dios.

²⁷ Kaybat na nita, binalak nang Apolos ing munta ya karin Acaya. Inya seupan de ring talasalpantaya karin Efeso at pemaralan rekomendasyun karing talasalpantaya a dasnan na Acaya. Inyang miras ya karin, meging maragul yang kasaupan karetang tinanggap king kasalpantayanan king kapamilatan na ning grasya ning Dios.

²⁸ Uling king masanting nang pamagmatulid simbut na la ding Judio king pamiargu arap ning publiku; pepatunayan na karela king kapamilatan da ring Kasulatan king i Jesus ya ing Cristo.

19

¹ Kabang atyu karin Corinto i Apolos, linibut ya i Pablo king kalibudtan na ning probinsia at miras ya Efeso. Karin atin yang disnan a alagad,

² at kitnan na la, Tinggap ye ing Banal a Espiritu kanitang meniwala kayo? Ngarang mekibat, Ali mi ya. E mi pa kapilan man dimdam king ating Banal a Espiritu.

³ Nganang kinutang, Makananu kayung mebinyag? King binyag nang Juan, ngarang mekibat.

⁴ Nganang Pablo, Ing binyag nang Juan para kareta yang peinggulut karing karelang kasalanan; at sinabi na karing memalen ning Israel king sukat lang maniwala ketang daratang a katuki na, ing buri nang sabian, i Jesus.

⁵ Inyang dimdam da iti, pepabinyag la king lagyu ning Ginung Jesus.

⁶ Timpak na lang Pablo ding gamat na karela, at tinipa ya karela ing Banal a Espiritu; megumpisa lang migsalitang miyayaliwang amanu at penaral da naman ing amanu na ning Dios.

⁷ Ating labing adua katau karing taung deti.

⁸ Minta ya i Pablo king sinagoga. Kilub ding atlung bulan migsalita yang alang takut karing tau; makiargu ya karela at agkatan na lang alang patugut tungkul king Kayarian ning Dios.

⁹ Oneng masias la buntuk ding mapilan karela at e la bisang maniwala at insultuan de pa ing Dalan ning Ginu king pamagsalita ra arap ding taung makatipun. Inya likuan na lang Pablo at tiki na la ding talasalpantaya; at balang aldo mitatag yang diskusyun king sala de lectura nang Tirano.

¹⁰ Iti menatiling aduang banua angga king ding sablang manuknangan king probinsia na ning Asia, Judio ampon paganu, ikua rang mirasnan king amanu na ning Dios.

¹¹ Dinapat yang miyayaliwang milagru ing Dios king kapamilatan nang Pablo.

¹² Pati ding panyu at sakbibing ginamit na kakaskas da la karing masakit at milalako ing sakit da at linual la karela ding marawak a espiritu.

¹³ Ating mapilan a Judio a libut-libut karing miyayaliwang lugal at manabi karing marawak a espiritu. Makiapus la namang gagamit king lagyu nang Jesus king pamanabi ra karing marawak a espiritu. Ngarang magsalita karing marawak a espiritu, Mamintu kayu kanaku king lagyu nang Jesus a ipanaral nang Pablo.

¹⁴ Ding darapat kaniti ila ding pitung lalaking anak na ning metung a Pekapun ding Paring Judio a milagyuan Esceva.

¹⁵ Oneng nganang makibat karela ning marawak a espiritu, Balu ke i Jesus at akikilala kia naman i Pablo; oneng ikayu, ninu ikayu?

¹⁶ Ing taung alipnan na ning marawak a espiritu delusungan na lang mitmung bengisan angga king adaig na la. Pupulayi lang memaglual king bale na; sugatan la at megabak a imalan.

¹⁷ Abalitan da ngan iti ding Judio at paganu a manuknangan Efeso; tiblan na la ngan ning maragul a takut at lalu yang mirinan maragul a dangal ing lagyu na ning Ginung Jesus.

¹⁸ Dinatang la ding keraklan karing talasalpantaya at tatanggapan da at papasiag king publiku ing sablang depat dang pamikasala.

¹⁹ Ding keraklan naman karetang darapat salamangka tinipun da la ding libru da at silaban da la king durungutan da ring sabla. Kinwenta da la ring libru at meyakit king mika alaga lang limang pulung libung salaping pilak.

²⁰ King anti kaniting mayupayang paralan mikalat ing amanu na ning Ginu at lalung meging mayupaya.

²¹ Kaybat dang mepalyari deti, tingka nang Pablo ing maglakbe king kabilugan na ning Macedonia at Acaya at kaybat taglus ya Jerusalem. Kaybat kung ikuang miras karin, nganang sinabi, kailangan ing dumalo ku naman Roma.

²² Inya tinubud na la karin king Macedonia ding adua karing kasaup na: di Timoteo at Erasto, kabang ya mismu menatili ya pa king probinsia na ning Asia.

²³ King panaun a ita, kanita naman mika maragul a kaguluan karin Efeso uli na ning Dalan ning Ginu.

²⁴ Ating metung a platerung milagyuan Demetrio. Gagawa yang malating larawan a pilak ning templo ning diosang Artemis. Ing kapanintunan nang iti babie maragul a panakitan karing magobra.

²⁵ Inya pilungan na la ngan Demetrio, kayabe da ring aliwa pang kalupa ra kapanintunan at ngana karela, Abe, balu yu king ing kekatamung kanawan king bie manibat king obrang iti.

²⁶ Sasaksian yu at daramdaman mismu nung nanu ing daraptan na niting taung ausan dang Pablo. Sasabian na king ding dios a gewa da ring tau e la tutung dios at akakua na lang apapaniwalan ding dakal a tau maging keti king Efeso at halus king kabilugan a probinsia na ning Asia.

²⁷ Uli na niti, makapanganib masira iting kapanintunan tamu. E mu ita, mamitamit ya namang milako kabaldugan ing templo na ning maulang diosang i Artemis at makapanganib masira ing dangalan na, ing diosang sasamban da ring sabla king Asia at king mabilug a yatu!

²⁸ Kabang pakiramdaman da iti, mimua la ding dakal a tau at ngarang kukulisak, Ala yang kaparis i Artemis a diosa na ning Efeso!

²⁹ Mikalat ing kaguluan king mabilug a siudad. Ding mangulu dekap da la ri Gayo at Aristarco, ding aduang tau Macedonia a kayabe nang maglayag Pablo, keladkad da lang dela king teatro.

³⁰ I Pablo mismu bisa yang palto arap da ring mangulu, oneng e re peintulutan ding talasalpantaya.

³¹ Ding mapilan karing manungkulan king probinsia a kakaluguran na peparala la naman amanu keya. Pakisabi ra kang Pablo king e ya sa papalto king teatro.

³² Samantala, magulu ya ing mabilug a kapulungan; ating mapilan a kukulisak king anti keni, ding aliwa naman anti keta ing kukulio ra, uling keraklan karela e ra man balu ing sangkan nung baket mitipun la karin.

³³ Inisip da ring mapilan king i Alejandro ya ing maki pasari, uling ya ing pepasampan da ring Judio king entablado. Kanita sininial ya i Alejandro; tinas ne ing gamat na at sibukan nang magsalita at magdipensa king arap da ring tau.

³⁴ Oneng inyang akilala rang metung yang Judio, lalu rang kilisak agnan-agnan ing metung mung bage kilub ding aduang oras, Ala yang kaparis i Artemis a diosa na ning Efeso!

³⁵ Bandang tauli, ding dakal a tau ikua na la mu ring apapanahimikan ning sekretaryu ning siudad. Nganang migsalita, Memalen ning Efeso, balu da ring sabla king ing siudad na ning Efeso ya ing mimingat king templo na ning maulang Artemis at king banal a batung menabu ibat banua.

³⁶ E na apayalian iti ning ninuman. Inya sana manahimik kayu at e kayu mamalagua.

³⁷ Dela yu la deting tau keti agyamang ala lang penakawanan a templo o ala na la man sinabing marawak laban king kekatamung diosa.

³⁸ Nung i Demetrio ampon ding magobra na atin lang susuplung laban king ninuman, atin namang aldo pamaglitis karing husgadu at atin namang taung tatalan upaya; sukat lang karin miyamanu.

³⁹ Nung atin pang aliwang bage buri yu, kailangan pisabian king piyarapan da ring memalen agpang king yuyutus na ning kautusan.

⁴⁰ Uling pota isipanan da katamung mangulu uli na ning mepalyari king aldong iti. Alang kamamatulid ing nanumang mua a anti kaniti at ala tamung aibie nanumang matulid para kumanian tamu.

⁴¹ At kaybat nang asabi iti, sera na na ing pamipulung.

20

¹ Inyang metahimik na, minaus yang pulung i Pablo karing talasalpantaya. Kaybat na lang arinan tetagan a lub king pamagsalita na, memun ya karela. Kaybat na nita, meko ne at tinaglus ya king Macedonia.

² Leganasan na lang pintalan ding puruk karin at maralas na lang penaralan king e la paisira lub. Miras ya Grecia at

³ menatili yang atlung bulan karin. Magsadia neng munta Siria inyang atuklasan nang atin lang lihim a tatangka ding Judio laban keya; inya inisip nang magbalik ya king delanan na Macedonia.

⁴ I Sopater a anak nang Pirro a tau Berea, ya ing kayabe nang miglakad; antimu rin i Aristarco at i Segundo a tubu karin Tesalonica; i Gayo a tubu karin Derbe; i Timoteo; at i Tiquico ampon Trofimo a menibatan king probinsia na ning Asia.

⁵ Minuna lang menulakan at penaya da kami karin Troas.

⁶ Menulakan kami ibat Filipos kaybat na ning Piesta ning Tinape Alang Lebadura, at kalabas da ring limang aldo ikua mi lang akayabe karin Troas, at menatili kaming paruminggu karin.

⁷ Domingo kanita inyang mitipun kami para king pamisulusulu anting mikakapatad. Migsalita ya i Pablo karing tau at e ya tinuknang migsalita angga itang kapitangan bengi, uling mako ya ita mu ring kabukasan.

⁸ Dakal la ding sulu ketang kuartu babo nung nu ke mipulung.

⁹ Ing metung a kayanakan a milagyuan Eutico makalukluk ya king pasamano na ning awang; anti na ning e mayayari ing pamagsalita nang Pablo, mitundu neng mitundu i Eutico angga na king mipatudtud ya at menabu king gabun ibat king katlung palapag. Mete ne inyang diklut de king gabun.

¹⁰ Oneng tinipa ya i Pablo at selakban ne at kinaul. E kayu migaganaka, nganang sinabi, mabie ya pa!

¹¹ Kaybat na nita, menik yang pasibayu; memisi yang tinape at mengan. Kaybat nang migsalitang malambat karela angga itang saslag ne ing aldo, meko ne i Pablo.

¹² Ita namang kayanakan inuli reng mabie keta karela at ing tula ra e makanyan-kanyan.

¹³ Tinaglus keng sinake king barku at menulakan kaming papunta Assos. Karin mi ya paindalanan at isake i Pablo. Penabilin na kekami iti uling maglakad ya king mamala papunta karin.

¹⁴ Inyang mikit kami karin Assos, seke mi ya at tinaglus kami Mitilene.

¹⁵ Manibat karin menulakan keng pasibayu at sinadsad malapit Quio itang kabukasan. Kalabas na ning metung pang aldo miras ke Samos at tinuki pang aldo sinadsad ke Mileto.

¹⁶ Binalak nang Pablo ing maglayag ya at dumalan Efeso ban e masayang ing panaun king pamandalan king probinsia na ning Asia. Mamirapal yang miras Jerusalem, nung malyari mu rin king kayaldawan na ning Pentecoste.

¹⁷ Inyang atyu Mileto i Pablo menabilin ya karin Efeso; pekiduang na king pakikitan de sa ring makatua.

¹⁸ Ngana karela inyang datangan de, Baluan yu nung makananu ing pamibiebie ku manibat na kanitang kapupurmeruan a aldo a akayabe yu ku king probinsia na ning Asia.

¹⁹ Siyuan ke ing Ginu king mitmung kapakumbaban, kasakitan, at kapagsubukan a miras kanaku uli na ning tangka ra laban kanaku ding Judio.

²⁰ Baluan yu king ala kung pigkaymut nanuman a malyaring makasaup kekayu kanitang kasalukuyan kung manaral at tuturu kekayu, maging king publiku o maging karing sarili yung pibalebale.

²¹ Parehu ku lang inagkat painggulut ding Judio at paganu king kasalanan da at magbalik a lub king Dios at maniwala king Ginung Jesus.

²² At ngeni, bilang kapamintuan king Banal a Espiritu, munta na ku Jerusalem. E ku balu nung nanu ing malyari kanaku karin.

²³ Ing bukud mung balu ku ya iti: king balang siudad dirinan na kung babala ning Banal a Espiritu king ing sukulan at miyayaliwang kaligaligan ila ding makapanaya kanaku.

²⁴ Oneng para kanaku e ku masiadung dirinan ulaga ing bie ku ban akua ku mu sanang agampanan ing kanakung misyun at apupus ing obrang binie nang daptan ku ning Ginung Jesus a alang aliwa nune ing apanaral ku ing Mayap a Balita ning grasya ning Dios.

²⁵ Lumba-sumaka ku libutad yu, manaral tungkul king Kayarian ning Dios. At ngeni balu ku king ninuman kekayu e na na ku akit pasibayu.

²⁶ Inya ngeni asabi kung matimid kekayu: nung wari't ninuman kekayu mabating ya, ala kung pakibatan nanuman tungkul keya.

²⁷ Uling king pamipabalu ku kekayu king kabilugan nang parasan ning Dios, ala kung selikut nanuman.

²⁸ Ingatan yu sa ing kekayung sarili at ing mabilug a kawan a binili na ning Banal a Espiritu king kekayung kapanibalan. Pastulan ye sa ing iglesia na ning Dios a pemuhunan na king mismung daya na ning Anak na.

²⁹ Balu ku king kalako ku, datang la kekayu ding mabangis a asung-gubat, at e re patawaran ditak mu man ing kawan.

³⁰ Agyang karing kayabe yu mismu, atin kekayu a magsalitang kalaraman ba da lang atake king kamalian ding talasalpantaya.

³¹ Uli na niti, mingat kayu at tandanan yu nung makananung king aldo at bengi kilub ding atlung banua e ra kayu selanan tiru angga na king petakanan keng lua ing balang metung at metung kekayu.

³² At ngeni panibala ra kayu king lingap ning Dios at king amanu nang magdalang grasya. Atin yang kayupayan mitalakad kekayu at munie king bendisyun a sasadia na para karing sablang pinili na.

³³ Ala kung pigimbutan king kekayung pilak o gintu o imalan.

³⁴ Ikayu mismu balu yu nung makananu ku lang ginamit ding gamat kung deni king pamagobra ban panintunan ku ing kabiayan a kailangan ku at kailangan da ring kasaup ku.

³⁵ Depatan ku ing makanyan ba kung ipakit kekayu nung makananu tamung sukat pigisanan ing kekatamung sarili ban saupan la ding maina, kabang gaganakan ta la ding amanung sinabi na ning Ginung Jesus mismu, Lalu yang mapalad ing babie kesa king tatanggap.

³⁶ Kayari nang migsalitang Pablo, siniklaud yang kayabe ra at menalangin.

³⁷ Kikiak la ngan; kinaul de at penuma kabang mamun ya karela.

³⁸ Penamdaman dang lalu itang sinabi na king e ra ne akit pasibayu. Kaybat na nita, inantabayanan de angga king barku a seken na.

21

¹ Memun ke karela at melaus na keng meko. Miglayag na kami at dinalakit matulid papunta Cos. Itang kabukasan miras ke Rodas, at manibat naman karin tinaglus ke Patara.

² Disnan mi ya karin ing metung a barkung papunta Fenicia; ya ing seken mi at pasibayu keng menulakan.

³ Miras kami angga ketang lugal a ababatiawan mi ne ing Cyprus; karin ke migbanda mauli ban dasan mi ya ing Siria. Sinaka kami karin Tiro kabang manguldas ya king sake nang karga ing barku.

⁴ Disnan mi la karin ding mapilan a talasalpantaya at mekituknang ke karela kilub ning paruminggu. King agkat na ning Banal a Espiritu sinabi da reti kang Pablo king e na sa babalaus ing pamunta na king Jerusalem.

⁵ Inyang miras ing oras a lakuan mi na la, meko kami mu rin at sindu mi ing kekaming pamaglayag. Ila ngan, pati asawa ra at anak, inatad da kami angga king lual ning siudad. Siniklaud ke ngan king pasigan at menalangin.

⁶ Kaybat ming mipapamun sinake na kami king barku at ila naman minuli na la bale ra.

⁷ Sindu mi ing kekaming pamaglayag. Manibat Tiro tinaglus ke Tolemaida. Kinomusta mi la ding talasalpantaya karin at melaus keng mekituknang metung a aldo karela.

⁸ Kabukasan, meko kami at sinadsad ke Cesarea. Pintalan mi ya karin ing bale na ning ebanghelistang i Felipe. Keta keya karin ke mekituknang. Metung ya i Felipe karing pitu kataung mepili karin Jerusalem.

⁹ Atin yang apat a anak a dalaga; papasiag da ing amanung ipayabut na ning Dios karela.

¹⁰ Atin na keng mapilan a aldo karin inyang dinatang yang ibat Judea ing metung a propetang milagyuan Agabo.

¹¹ Ikami ing saria na. Karas na, kelag ne ing sinturun nang Pablo, at saka ne penali karing sarili nang gamat ampon bitis at ngana, Oyni ing sasabian na ning Banal a Espiritu: Ing makabandi kaniting sinturun igapus deng makanyan ding Judio king Jerusalem, at iyintriga re karing paganu.

¹² Kabud dimdam mi iti, ikami ampon ding aliwa pang taung atyu karin, pekisabi mi kang Pablo ing e ne malalaus pupunta Jerusalem.

¹³ Oneng nganang mekibat, Ba, baket tatangis kayung makanyan? Buri yu kung masira lub? E mu ing makasadia kung igapus da Jerusalem, agyang mate karin makasadia ku alang-alang king Ginung Jesus.

¹⁴ E mi ya apilit, inya ala na keng sinabi nune na mu, Ing kaburian na ning Ginu ya ing matupad.

¹⁵ Kaybat ming menatiling mapilan a aldo karin, geyak mi na ing karga mi at menulakan kami papunta Jerusalem.

¹⁶ Tinuki la naman kekami ding mapilan a alagad a ibat Cesarea. Tiki da kami king bale a pituknangan mi. Bale neng Mnason a tau Cyprus, at meging talasalpantaya ibat na kanitang minuna.

¹⁷ Matula da keng tinggap ding talasalpantaya inyang miras na ke Jerusalem.

¹⁸ Itang kabukasan, tiki na keng Pablo ban dalawan ya i Santiago. Disnan mi la keta keya ding sablang makatua na ning iglesia.

¹⁹ Pinuge na lang Pablo at minie yang ganap a balita tungkul king sablang depat na ning Dios libutad ding paganu king kapamilatan na.

²⁰ Kaybat deng pekiramdaman, pepasalamat la ngan king Dios at ngara kang Pablo, Akakit mu pin ngeni, kapatad, libu-libu la ding Judio a talasalpantaya. Tutu la ngang tapat king Kautusan.

²¹ Abalitan da ka ampon ing ipanaral mu karing sablang Judio a manuknangan karing bansa da ring paganu. Ipanaral mu kanu king painggulutan da ne ing Kautusan nang Moises. Sasabian mu pa kanu king e ra na la kailangan sisirkunsisyunan ding anak da ni e ra na sukat tuparan ing ugaling Judio.

²² Siguradung abalitan da kanyan ing paniatang mu keti. Balu mu nung nanu ing sukat daptan?

²³ Tuparan mu sa ining sasabian mi keka. Ating apat a lalaki keti a maki panata.

²⁴ Tukian mu la at makiabe ka karela king seremonia na ning pamaglinis at ika ing mamayad king gastus da; kanita akua da lang apasatsat deng buntuk da. King anti kanyan a paralan abalu da ring sabla king alang katutuan ing isanu mang bage a abalitan da na tungkul keka. Nune lalu ra pang akilala king ika mismu tutuntun ka king Kautusan nang Moises.

²⁵ Tungkul naman karing paganu a meging talasalpantaya; peparalan mi lang sulat nung nu mi sasabian karela ing pikayari mi king e la sukat mamangan king isanu mang pamangan a miyampang karing idolo o king isanu pa mang daya o karing animal a mepate a e ra peparayan at dumayu la king nanumang pamakipangalugud.

²⁶ Uli na niti, tiki na lang Pablo ding apat a lalaki at itang kabukasan gimpanan na ing seremonia na ning pamaglinis a kayabe ra. Linub ya king Templo at tikda na nung kapilan mapupus ing seremonia na ning pamaglinis, at nung kapilan ya miyain sakripisyu para king balang metung karela.

²⁷ Inyang malapit na lang milabas ding pitung aldo, ding mapilan a Judio a menibat king probinsia na ning Asia ikit de i Pablo kilub ning Templo. Sitsutan da la ring sablang tau karin ban dakpan de i Pablo.

²⁸ Ngarang kukulisak, Kabalen a Judio, meko keni, sumaup kayu kekami. Oyni ing taung maski nu ya munta tuturu na la ding sabla laban karing memalen na ning Israel, laban king Kautusan nang Moises at laban kaniti mismung Templo! Ngeni tiki na la pang linub keti king Templo ding mapilan a paganu at dinatan de iting banal a lugal! (

²⁹ Sinabi ra iti uling ikit deng kayabe nang Pablo king siudad i Trofimong tau Efeso at bala ra tiki neng Pablo kilub ning Templo.)

³⁰ Agad mikalat ing kaguluan king mabilug a siudad at agnan-agnan lang dinalusung ding tau at dekap de i Pablo. Keladkad deng liwal king Templo, at kanita mu rin sera da la ring pasbul ning Templo.

³¹ Paten da ne sa i Pablo, oneng miras ing balita king komandante da ring sundalung Romano.

³² Agad-agad yang mituking opisyal at sundalus ing komandante, at marapal lang dinalusung karing dakal a taung migugumguman. Inyang ikit de ring tau ing komandante ampon ding sundalus a kayabe na, tiknangan deng panasakitan i Pablo.

³³ Lepitan ne ning komandante i Pablo; peparakap ne karing sundalus na at inutus nang igapus de karing aduang tanikala. Kanita nganang kinutang, Ninu ing taung ini at nanu ing depat na?

³⁴ Kilio ding mapilan karing tau ing metung a bage, ding aliwa naman aliwang bage ing kukulio ra. Tutung maragul ing kaguluan, inya e na akuang abalu ning komandante nung nanu ing tune milyari; inya inutus na karing sundalus ing ipanik de i Pablo king kuartel.

³⁵ Ikua reng alapit king eran at mepilit deng binuat uling e ra la agyung aguantan king kaguluan ding tau.

³⁶ Tatagal la ngan kang Pablo at ngarang kukulisak, Paten ye!

³⁷ Inyang malapit da neng ilub i Pablo king kuartel, nganang migsalita king komandante, Malyari da kayung akasabi sagule? Ba, biasa kang Griego? nganang kinutang ning komandante.

³⁸ Nung makanyan aliwa ika itang tau Ehipto a menimuna kanitang aldo king metung a rebolusyun at mekapanuking anggang apat a libung teroristang pakasandata king disyerto?

³⁹ Nganang mekibat Pablo, Metung kung Judio, bait karin Tarso, Cilicia, metung kung memalen na ning metung a importanting siudad. Inya paburen yu ku sanang makapagsalita karing tau.

⁴⁰ Dininan neng kapaintulutan ning komandante, inya tinuklu ya i Pablo king babo ning eran at tinas ne ing metung nang gamat ba lang manahimik ding tau. Inyang menahimik la, migsalita ya i Pablo karela king Hebreo.

22

¹ Ngana, Kabalen, kapatad at pengari, pakiramdaman yu sa ing matulid a sabian ku kekayu!

² Inyang dimdam deng magsalitang Hebreo karela, lalu lang menahimik, at sindu nang i Pablo ing pamagsalita na.

³ Metung kung Judio, mibait ku king Tarso, Cilicia, oneng meragul ku keti Jerusalem at meging estudiante na kung Gamaliel. Dinalan ku king maigpit a pamagsane king Kautusan da ring kekatamung makatua at meging tapat ku king Dios antimo nung makananu kayung tapat ikayung atyu ngeni keti.

⁴ Ligalig ku la at pete ding taung tutuntun king Dalan a iti. Pindakap ku la babai at lalaki at pepasukul.

⁵ Ing Pekapun ding Pari at ing mabilug a Konsehu apatunayan da king maniabi kung katutuan. Tinanggap kung kasulatan karela para karing kapatad a Judio karin Damasco, inya miparas ku karin ban pandakpan ku la ding taung deti at ibalik ku lang makagapus keti Jerusalem ba lang miparusan.

⁶ Kabang maglakbe ku at milalapit na karin Damasco, bandang kaugtuan aldo, ing metung a maslag a sala ibat banua kinislap yang bigla king makapadurut kanaku.

⁷ Menabu ku king gabun at dimdam ke ing metung a bosis. Nganang magsalita kanaku, Saulo, Saulo! Baket liligaligan mu ku?

⁸ Ngakung kinutang, Ninu ika, Ginu? Nganang mekibat kanaku, Aku i Jesus ning Nazaret; aku ing kekang liligaligan.

⁹ Ikit da ring taung kayabe ku ing sala, oneng e ra dimdam ing bosis na nitang migsalita kanaku.

¹⁰ Kitang ku pa, Nanu ing sukat kung daptan, Ginu? Ngana ning Ginu kanaku, Talakad ka at malaus kang lungub Damasco at karin sabian da keka ing sablang telaga na ning Dios para daptan mu.

¹¹ Mebulag ku king maslag a sala, inya tinaid da ku gamat ding kayabe ku at tiki ra kung linub Damasco.

¹² Ating metung a taung milagyuan Ananias; metung yang taung relihiosu a tutupad king kekatamung Kautusan at tutu reng gagalangan ding sablang Judio a manuknangan karin Damasco.

¹³ Pintalan na ku at lepitan at ngana kanaku, Kapatad a Saulo, manakit kang pasibayu! At kanita mu rin menakit kung pasibayu at linawe ku keya.

¹⁴ Ngana kanaku, Ing Dios da ring kekatamung makatua pinili na kang makakilala king kaburian na, manakit king banal nang Talasuyu at damdaman meng magsalita king sarili nang bosis.

¹⁵ Uling maging metung kang talapatutu na ban ipamalita mu karing sablang tau ing kekang ikit at dimdam.

¹⁶ Inya ngeni, nanu pa ing panayan mu? Talakad ka at pabinyag at maos la ding kekang kasalanan king kapamilatan na ning pamaniaus mi king lagyu na.

¹⁷ Mibalik ku Jerusalem at kabang manalangin ku kilub ning Templo menakit kung vision

¹⁸ nung nu ke ikit ing Ginu, at nganang migsalita kanaku, Mamirapal kang mako keti Jerusalem uling e ra tanggapan ding tau keti ing patutu mu tungkul kanaku.

¹⁹ Ngakung mekibat, Ginu, balu ra namang masala king memunta ku karing sinagoga at pindakap ku la at penasakit ding taung meniwala keka.

²⁰ At inyang ing talapatutu nung i Esteban pete re, aku mismu makarungut ku at kinsintian ing pamakamate ra keya at aku pa ing migbante king imalan da ring mekamate keya.

²¹ Sige, lumakad na ka, ngana ning Ginu kanaku, uling itubud da ka king marayu, karing paganu.

²² Mekiramdam la kang Pablo ding tau angga king penandit a asabi na iti; oneng kaybat megumpisa na la namang kinulisak anggang binit. Ngara, Iligpit ye! Paten ye! E ya sukat paburen mabie!

²³ Kukulisak lang alang patugut, iyasiwas da ing karelang imalan at mamatsa lang alikabuk king angin.

²⁴ Inutus na ning komandante Romano karing sundalus na king ilub da ne i Pablo king kuartel at inutus na ing barugan deng latiku ba rang akuang abalu nung baket kukulisak lang makanyan ding Judio laban keya.

²⁵ Inyang ikua ra neng agapus at anyu ra neng barugan latiku, nganang Pablo king opisyal a makatanud karin, Paintulut na wari ning kautusan ing latikuan ya ing metung a memalen Romano a e pa man melitis para king isanu pa mang pamikasala?

²⁶ Inyang dimdam na iti ning opisyal, milayi ya king komandante at kitang na keya, Nanu ing daraptan yu? Ing taung ita metung yang memalen Romano!

²⁷ Inya lepitan ne ning komandante i Pablo at kitang na, Sabian mu kanaku, metung ka ping memalen Romano? Wa, nganang mekibat Pablo.

²⁸ Ngana ning komandante, Maragul ku ginastus bayu ku meging metung a memalen Romano. Nganang mekibat Pablo, Oneng aku mibait kung memalen Romano.

²⁹ Bigla lang mengapaurung ding sundalus a mangutang sana kang Pablo; at mitakutan ya ing komandante inyang abalu nang metung yang memalen Romano i Pablo at saka ya pa ing pepagapus keya.

³⁰ Buri nang abalu ning komandante nung nanu ing susumbung da ring Judio laban kang Pablo; inya itang kabukasan pepalako na la ding tanikala nang Pablo at inutus na karing pamuntuk da ring pari at king mabilug a Konsehu ing mipulung la. Kaybat na nita, tiki ne i Pablo at pepayarapan ne karela.

23

¹ Maratna na lang linawe Pablo ding miembru na ning Konsehu at ngana, Kabalen at kapatad, malinis ya ing konsiensia ku tungkul king mabilug kung pamibiebie arap ning Dios angga king mismung aldong iti.

² Ing Pekapun ding Paring i Ananias inutus na karing makalapit kang Pablo ing tampalingan de asbuk.

³ Nganang Pablo, Ing Dios ya ing bala keka; ikang mengaring pader a pininturan maputi. Kunwari makalukluk ka ken para ukuman mu ku agpang king Kautusan, oneng ika kabud ing lalabag king Kautusan king pamanutus mung panasakitan da ku!

⁴ Ngarang sinabi ding taung makasigi kang Pablo, Insultuan me ing Pekapun ding Pari na ning Dios!

⁵ Mekibat ya i Pablo, E ku balu, kapatad, king ya pala ing Pekapun ding Pari. Ing kasulatan sasabian na, E me lalapastanganan ing pamuntuk na ning kekang balen.

⁶ Inyang ikit nang Pablo king ding mapilan karing kayarap na Saduseo la at ding aliwa naman Pariseo la, nganang migsalitang masikan king arap ning Konsehu, Kapatad, metung kung Pariseo. Pariseo la ding pengari ku. Miyarap ku kekayu keti uling panayan ku ing pangasubli rang mie ding mete.

⁷ Kabud dimdam da ing sinabi nang iti, megumpisa lang mitua ding Pariseo at Saduseo; misagsag ya ing karelang grupu. (

⁸ Uling sasabian da ring Saduseo king e la mipasublian mie ding tau, at king alang anghel o espiritu; oneng maniwala la ngan ding Pariseo tungkul karing atlung deti.)

⁹ Mitas na lang mitas a bosis king pamagsalita ra. Tinalakad la ding mapilan a talaturu ning Kautusan a kapangkat da ring Pariseo at migprotesta lang masikan. Ngara, Ala keng akakit a pamikasala king taung ini! Mekad menakit ya pin o mekaramdam metung a espiritu o kaya metung a anghel!

¹⁰ Meging tutung magulu ing pamipagdebate ra, inya migaganaka ya ing komandante pota pamindangan de i Pablo. Inya inutus na karing sundalus na ing tipa la king kapulungan at ilako re libutad da i Pablo at idala re king kilub ning kuartel.

¹¹ Kanitang tinuking bengi pepakit ya kang Pablo ing Ginu at ngana keya, E mu painan ing lub mu! Nung makananu kang minie patutu para kanaku keti Jerusalem, makanyan munaman ing daptan mu karin Roma.

¹² Itang kabukasan a abak mipulung la ding aliwang Judio at misangguni tungkul king metung a tangka. Penata ra king e la mangan o minum nanuman anggang e re akuang apate i Pablo.

¹³ Ating maygit apat apulu katau karing misasanmetung dapat kaniti.

¹⁴ Kaybat na nita, minta la karing pekapun da ring pari at makatua at ngara, Misasanmetung kaming menatang masusi king e ya mangan o minum nanuman ing ninuman kekami anggang e mi ya apate i Pablo.

¹⁵ Ngeni, ikayu nang balang paralang amanu king komandante Romano king iyarap neng pasibayu kekayu i Pablo. Sangkan yung bisang manikuang lalung tiak a inpormasyun tungkul keya. Ikami naman magsadia kaming manambang keya at paten mi ya bayu na akuang miras keti.

¹⁶ Oneng dimdam na iting tangka ning pangunakan nang Pablo king kapatad nang babai; inya minta ya at melaus kilub ning kuartel at belita na iti kang Pablo.

¹⁷ Kanita pepayaus neng Pablo ing metung karing opisyal at ngana keya, Ituki me ing binatilyung ini king komandante; atin yang buring ibalita keya.

¹⁸ Tiki ne ning opisyal at dela king komandante at ngana, Pepayaus na ku ning presong i Pablo at pekisabi na kanaku ing ituki ke king arap yu iting binatilyu, uling atin ya kanung buring ibalita kekayu.

¹⁹ Tinaid ne at dinayung bagya ning komandante ba neng pakisabian lihim. Ngana keya, Nanu ing buri mung ibalita kanaku?

²⁰ Pekibat na ning binatilyu, Ding manungkulan a Judio pikasundu ra pung pakisabian da kayung iyarap ye bukas king Konsehu i Pablo; sangkan dang bisang mika lalung tiak a inpormasyun tungkul keya.

²¹ Oneng e yu la pu pakiramdam, uling atin pung maygit apat apulung lalaking makayabat lihim manenayang manambang keya. Menata la pung e mangan at minum nanuman anggang e re akuang apate i bapa ku. Makasadia ra na pung daptan iti at panenayan da mu ing magdesisyun kayu.

²² Penabilin na ning komandante king e na paniabian kenu man ing siplung na keya. Kaybat, pepaulian na ne ing binatilyu.

²³ Kaybat na nita, minaus yang adua ing komandante karing opisyal na at ngana, Misadia kayung aduang dalan a sundalus para munta la Cesarea at ding pitung pulung sundalus a pakasake kabayu at aduang dalan a magtalan tandus at magsadia kayung manulakan potang alas nuebe na ning bengi.

²⁴ Lumawe kayung kabayung malyaring asaken nang Pablo at iyatad yeng e ninanu balang angga king miras ya king Gobernador Felix.

²⁵ Kaybat nang asabi iti ning komandante, ginawa yang sulat a anti keni kalamnan:

²⁶ I Claudio Lisias pupugayan ne ing Kagalang-galang a Gobernador Felix.

²⁷ Dekap de ring Judio ing taung ini at paten da ne sana. Oneng abalu ku king metung yang memalen Romano, inya aku at ding sundalus ku pintalan mi ya at segipan.

²⁸ Uling buri kung abalu nung nanu ing susumbung da laban keya, inya inarap ke king karelang Konsehu.

²⁹ Atuklasan ku king e ya dinapat nanumang bage a mangaintulid mo sanang ikamate na o ikasukul; ating pangataid king sarili dang kautusan ing dalum da laban keya.

³⁰ At inyang miras king kanakung kabaluan king ding mapilan a Judio lihim dang tatangka ing paten de, inari ku king lub ku ing iparala ke kekayu. Sinabi ku karing kalaban na king kekayu ra sukat iyarap ing nanumang dalum da laban keya.

³¹ Tiparan da ring sundalus ing utus a miyabie karela. Kinua re i Pablo at tiki re kanitang benging ita angga king balen na ning Antipatris.

³² Itang kabukasan migbalik la ding sundalus king kuartel at ding sundalus a pakasake kabayu ila na mu ding mitagan ban mantabe kang Pablo.

³³ Dela re karin Cesarea at diwang de king Gobernador ing sulat a darala ra at saka re inintriga keya i Pablo.

³⁴ Binasa ne ning Gobernador ing sulat. Kitang na kang Pablo nung isanu ing probinsiang tibuan na. Inyang abalu na keya king tubu ya karin Cilicia,

³⁵ nganang sinabi, Marap ka king husgadu potang datang la keti ding mandalum keka. Kaybat, inutus na king idala re at guardian i Pablo king kuartel nang Herodes.

24

¹ Kalabas da ring limang aldo minta ya Cesarea ing Pekapun ding Paring i Ananias at ding mapilan a makatua at ing metung a abogadong milagyuan Tertulio. Minarap la king husgadu ning Gobernador Felix at inapag da keya ing dalum da laban kang Pablo.

² Meyaus yang talakad i Tertulio at pegumpisan nang inapag ing kasu laban kang Pablo. Ngana, Kagalang-galang a Gobernador, ing matalino yu pung pamamuntukan migdalang maragul a kapayapan a malambat mi na ngening tatamasan, antimu rin dakal ing kailangan a pamagbayung ipatupad yu para king kapakanan na ning kekaming bansa.

³ Matula ming kikilalanan iti karing sablang lugal at king sablang panaun. At iti pasalamatan mi pung maragul kekayu.

⁴ Makanyan man, ban e ra kayu masiadung pangabalanan king kekayung oras, malugud yu sa pung pakiramdaman ining makuyad kung pamanalese.

⁵ Ikit-ikit mi king ing taung ini nung wari sana, meging metung yang sakit a mapanganib; nu ya man miraras a suluk keti king yatu guguluan na la ding Judio at metung yang manimuna king sekta da ring Nazareno.

⁶ Buri ne pang lapastanganan ing Templo, inya dekap mi ya. [Makasadia mi neng atulan agpang king sarili ming Kautusan,

⁷ oneng i Lisias a komandante na ning rehimiento dinatang ya, at king mitmung bigsikan simsam ne kekami.

⁸ Kaybat na nita, inutus nang Lisias king ding kayamanu na ning taung ini kekayu la sukat makiarap.] Nung pangutnan ye ing taung ini, ikayu mismu akua yung abalu keya ing sablang bage susumbung mi laban keya.

⁹ Minagpang la ding Judio kaniti at sinabi ra king tutu ngan iting sabla.

¹⁰ Sineniasan ne ning Gobernador i Pablo ban magsalita at nganang Pablo, Balu ku king malambat na kayung ukum king bansang iti, inya matula kung idipensa ing sarili ku king kekayung arapan.

¹¹ E pa mimigit labing aduang aldo ing milabas manibat kanitang dinatang ku Jerusalem ban samba, at akit yu king e ku maglaram nung kekayung surian masalese.

¹² Misan man e ra ku ikit ding Judio a makiargu kenu man kilub ning Templo ni e ra ku ikit mangulu karing tau maging king kilub ding sinagoga, maging king isanu mang suluk ning siudad.

¹³ Ala lang malyaring ipalad a ebidensya tungkul king karelang susumbung laban kanaku.

¹⁴ Oneng ini ing malyari kung ayaminan king arap yu: sasamban ke ing Dios da ring kekaming makatua king pamanuntun ku king Dalan a king palage ra metung yang maling sekta. Oneng paniwalan ku naman ing sablang makasulat king Kautusan nang Moises at karing kasulatan da ring propeta.

¹⁵ Nung nanu ing panenayan da ring mismung taung deti king Dios, ya naman ing panenayan ku: king ding sablang tau, maging ding mayap, maging ding marawak, mipasublian la ngang mie.

¹⁶ Inya daraptan ku ing sablang agyu ku ban manatili kung maki malinis a konsiensia arap ning Dios at ding tau.

¹⁷ Kaybat na ning makabang panaun a mibiebie kung makarayu king Jerusalem birian kung migbalik ban iyatad ku la ding ditak a salaping pekasaup karing sarili kung kabalen at ban miyain sakripisyu.

¹⁸ Makanyan ing gagampanan ku kaybat kung ayari ing seremonia na ning pamaglinis inyang ikit da ku detang tau kilub ning Templo. Mapilan la mu ring taung kayabe ku at alang nanumang kaguluan a merapat karin.

¹⁹ Ding atyu mu kanita ila ding mapilan a Judio a menibat king probinsia ning Asia; sana ila ding sukat atyu keti ban miyapag dalum king arap yu, nung atin lang nanuman malyaring abintang laban kanaku

²⁰ o kaya naman, sabian yu karing taung atyu keti ing magsalita la nung nanu mo ing pamikasalang atuklasan da kanaku inyang inarap da ku king Konsehu.

²¹ Mekad sabian da king kamalian ing gewa ku inyang sinabi kung masala king arap da: Uli na ning pamanaya ku king pangasubli rang mie ding mete, inya ti ku ngeni malilitis king arap yu.

²² Kanita ing Gobernador Felix, uling atin yang sapat a kabaluan tungkul king Dalan a mesambitla, tiknang na pa mu ing piyamanuan. Ngana karela, Panayan ta na ing paniatang na ning komandante Lisias bayu ku lutasan ing kekayung piyamanuan.

²³ Inutus na king opisyal a manibala kang Pablo ing ipabante neng masalese karing guardia, oneng e re paka igpitan nune paintulutan dang adalo re ding kakaluguran na at apagdalang nanumang kailangan na.

²⁴ Kalabas da ring mapilan a aldo dinatang ya i Felix, kayabe ne ing asawa nang i Drusila a metung namang Judio. Peparakit ne i Pablo at mekiramdam ya king pamagsalita na tungkul king kasalpantayanan kang Cristo Jesus.

²⁵ Oneng inyang tiglus nang Pablo ing pamagsalita na tungkul king kabanalan, king pamangawat king sarili at ing tungkul king daratang a Aldo ning Pamanukum, mengilabut ya i Felix at nganang sinabi, Sige, mako na ka pa mu. Payaus da kang pasibayu potang mika panaun ku.

²⁶ Panenayan na ketang oras a ita ing suhulan neng Pablo; ita ing sangkan nung inya manibat kanita maralas neng payaus para makipagsalita keya.

²⁷ Milabas ing aduang banua, inyang inalilan neng Porcio Festo i Felix king panga-gobernador. King imbut nang Felix a akua na la pilubluban ding Judio, pepaburen neng menatiling makasukul i Pablo.

25

¹ Atlung aldo kaybat nang dinatang Festo king probinsia, meko ya Cesarea at minta Jerusalem.

² Karin, ding pamuntuk da ring pari at ding aliwa pang pamuntuk da ring Judio inapag da kang Festo ing susumbung da laban kang Pablo. Pekisabi ra kang Festo,

³ antimong dapat nang mayap karela, ing pabalik ne sa Jerusalem i Pablo. Inawad da iti uling pikayari da ing papate re kabang dalan.

⁴ Nganang Festo, Makasukul ya pa i Pablo karin Cesarea at aku mismu e na lambat magbalik ku karin.

⁵ Ba't e yu la patukian kanaku karin Cesarea ding kekayung peka pamuntuk at isampa yung pasibayu ing dalum laban kang Pablo, nung ating nanumang marawak a depat na.

⁶ Menatili yang kayabe ra i Festo a manga-walu o apulu pang aldo at kaybat minuli ne Cesarea. Itang kabukasan na ning pangaras na karin linukluk ya king husgadu at inutus nang iyarap de keya i Pablo.

⁷ Karas nang Pablo, migpadurut la keya ding Judio a menibat Jerusalem at pegumpisan da ing pamisampa karing dakal at mangabayat a bintang laban keya a e ra naman apamatutuanan.

⁸ Oneng nganang migdipensang Pablo para king sarili na, Ala kung depat nanumang laban king Kautusan da ring Judio o laban king Templo o kaya laban king Emperador ning Roma.

⁹ King imbut nang magpalugud Festo karing Judio, nganang kinutang kang Pablo, Bisa na ka mang magbalik Jerusalem ban karin ka malitis king arap ko?

¹⁰ Pekibat nang Pablo, Atyu ku ngeni makayarap king husgadu na ning Emperador at keti ku pa mu sukat malitis. Ala kung depat a pamikasala laban karing Judio, at ikayu mismu masalang balu yu yan.

¹¹ Nung lebagan ke ing kautusan at atin kung depat a mangaintulid king sentensiang kamatayan e ku tututulan. Nung alang katutuan karing bibintang da laban kanaku e ku sukat manabu king gamat da. Mapelar ku king Emperador.

¹² Kanita i Festo, kaybat nang mekisangguni karing tagapayu na, nganang mekibat, Mamapelar ka king Emperador, inya king Emperador ka munta.

¹³ E melambat kaybat na nita, dinatang ya Cesarea ing Aring Agripa at i Berenice ban dalawan de at pugayan i Festo.

¹⁴ Inyang miglambat na lang bagya karin abuklat nang Festo king ari ing kasu nang Pablo. Ngana, Ating metung a makasukul keti a akalakuanan na pa ning administrasyun na ning Gobernador Felix;

¹⁵ at kanitang minta ku Jerusalem ding pamuntuk da ring pari at ding makatua da ring Judio biklat dang pasibayu kanaku ing kasu, at inawad da kanaku ing sentensiahan ku ne.

¹⁶ Oneng sinabi ku karela king e ra ugali ding manungkulan na ning Imperyo ning Roma ing ipapate re ing ninumang taung bibintanganan dang pamikasala anggang e na la akayarap king husgadu ding bibintang keya, at anggang e mika panaun idipensa na ing sarili na king bibintang da laban keya.

¹⁷ Kanitang dinatang la keti, e ku pepasayang panaun. Itang kabukasan agad kung linukluk king husgadu at inutus kung iyarap de kanaku ing tau.

¹⁸ Inyang ikua rang mekapiarap king husgadu, ala na la mang inarap nanuman karing pamikasalang isipan kung iyapag da.

¹⁹ Ing karelang piyamanuan laban keya makatungkul mung bukud king sarili dang relihiun at tungkul king metung a taung milagyuan Jesus. Mete ne kanu ing taung iti, oneng pipilit nang Pablo king mabie ya.

²⁰ E ku balu nung makananu kung alutasan ing pisasabian a ita, inya kitang ku kang Pablo nung bisa yang karin ne Jerusalem malitis tungkul karing bibintang da laban keya.

²¹ Oneng minapelar ya i Pablo; inawad na ing e ya milalako guardia at ing Emperador ya ing lumitis king kasu na. Inya inutus ku ing guardian ya anggang e ke akuang aparala king Emperador.

²² Nganang Agripa kang Festo, Buri keng pakiramdaman personal yang taung yan. Nganang mekibat Festo, Bukas mu rin damdaman me.

²³ Itang kabukasan dinatang ya i Agripa at i Berenice, kambe ning makule seremonia at antabayanan da ring matas a opisyal militar at ding matenakan a memalen na ning siudad. Melaus lang linub king sala na ning Gobernador. Inutus nang ilub da ne i Pablo.

²⁴ Inyang atyu ne karin i Pablo, migsalita ya i Festo. Ngana, Kagalang-galang a Aring Agripa at ikayung sablang keti makarungut abe mi: Oyni ing taung dadalum na kanaku ning mabilug a bansang Judio, maging ding keti, maging ding karin Jerusalem. Kukulisak da king e ne sukat paburen manatiling mabie.

²⁵ Oneng e ku manakit nanumang depat na a mangaintulid mo sanang sentensiang kamatayan. At anti na ning ya mismu minapelar ya king Emperador, birian ku nang ipadala ke keya.

²⁶ Oneng ala ku pang apipihu nanuman tungkul keya a malyari ku mo sanang isulat king Emperador. Uli na niti, dela ke keti king arap yu, lalu na kekayu, Kagalang-galang a Aring Agripa, ban kaybat yung ininbestiga ing kasu na, atin kung malyaring asulat.

²⁷ Uling balamu para kanaku ala king matulid ing iparala ke ing metung a makasukul nung e naman masalese ing bintang laban keya.

26

¹ Ngana ning Aring Agripa kang Pablo, Atin kang kapaintulutan magsalita ngeni para idipensa mu ing kekang sarili. Minie yang galang king ari i Pablo at migsalita ya bilang pamagdipensa para king sarili na.

² Ngana, Kagalang-galang a Aring Agripa! Metung pung mayap kung kapalaran ing ngeni king kekayung daramdaman adipensa ku ing sarili ku king sablang bage bibintang da kanaku ding Judio.

³ Kikilalanan ku pung mayap a kapalaran iti ngening ikayu balu yu lang masalese ding kaugalian at pisasabian Judio. Inya aduan ku pu ing maragul yung kapibabatan king pamakiramdam kanaku.

⁴ E makalingad karing sablang Judio nung makananu ku pamibiebie manibat na kanitang malati ku. Balu ra ibat king samula nung makananu kung ginamit ing mabilug kung bie king sarili kung balen a tibuan at karin Jerusalem.

⁵ Sadia ra nang balu, nung burian da mung magsalita, king manibat king kapupurmeruan mibiebie ku antimong metung a Pariseo, metung nang miembru ning peka-maigpit a sekta na ning kekaming relihiun.

⁶ At ngeni atyu ku pu makatalakad keti ban malitis uli na ning pamanalig ku king pengaku na ning Dios karing kekaming makatua;

⁷ ing pangakung panayan da ngan matupad ding labing aduang tribu na ning kekaming lahi, ngening sasamban de ing Dios aldo at bengi. At uli na mu ning kapanaligan a yan, Makamal kung Ari, inya ngeni dadalum da ku ring Judio!

⁸ Ba't mo pin ikayung atyu keti tutu yung pagkasakitan paniwalan king apasublian na lang mie ning Dios ding mete?

⁹ Aku mismu kanitang misan inisip ku ing kailangan kung pigisanan ing agyu ku laban king lagyu nang Jesus ning Nazaret.

¹⁰ Ita ing depat ku karin Jerusalem. Tinanggap kung kayupayan karing pamuntuk da ring pari at pepasukul ku la ding dakal karing pinili na ning Dios at inyang misentensiahan la deti king atul a kamatayan, kayabe ku king pamanatul karela.

¹¹ Maralas peparusan ku la karing sablang sinagoga at pinilit ku ing painggulut la king karelang kasalpantayanan. Tutu kung meging mabagsik karela angga na king miras ku king siudad da ring aliwang bansa king pamagligalig ku karela.

¹² Iti ya ing kanakung paksa inya minta ku misan a aldo karin Damasco a ating kayupayan at utus a tinggap ku karing pamuntuk da ring pari.

¹³ Makamal a Ari, kabang dalan, king kaugtuan na ning aldo a ita kanita ku menakit sala a menibat banua a maslag pa king aldo. Sinlag makapadurut kanaku at karing kayabe kung maglakbe.

¹⁴ Menabu kami ngan king gabun, at dimdam ke ing metung a bosis a magsalita kanaku king amanung Hebreo. Ngana, Saulo, Saulo! Baket liligaligan mu ku? Ala kang aliwang panasakitan nune mu ing kekang sarili. Masakit para keka ing paldakan me ing matilus.

¹⁵ Ngakung kinutang, Ninu ika, Ginu? At pekibat na ning Ginu, Aku i Jesus a kekang liligaligan!

¹⁶ Oneng ngeni mibangun ka at talakad. Pepakit ku keka ba ra kang tulduan maging kanakung talasuyu; ipamalita mu karing aliwa nung nanu ing ikit mu kanaku king aldong iti at nung nanu ing pakit ku pa king daratang a panaun.

¹⁷ Iligtas da ka karing memalen na ning Israel at karing paganu nung kenu ra ka itubud.

¹⁸ Ika ing mibuklat karing karelang mata at ibat king dalumdum iyarap mu la king sala, at ibat king upaya nang Satanas tairan mu la king Dios ban king kapamilatan na ning kasalpantayanan da kanaku mipatawaran la karing karelang kasalanan, at mibilang la karing taung pinili na ning Dios.

¹⁹ Uli na niti, Makamal a Aring Agripa, tinupad ku king inutus na ning vision na kanaku ning banua.

²⁰ Muna karin Damasco at karin Jerusalem at kaybat king mabilug a bansa da ring Judio, at penaral ku karing paganu king sukat lang sumisi karing karelang kasalanan at magbalik la lub king Dios at daptan da la detang bage pakilala king pamanisi ra.

²¹ Ita ing meging sangkan nung inya dekap da ku ding Judio kabang atyu ku king Templo, at buri da kung paten.

²² Oneng angga king aldo iti seupan na ku ning Dios, inya atyu ku ngeni keti babie patutu kekayung sabla, maging karing mababa at maging karing mayupaya. Ing sasabian ku ya itang sinabi rang mapalyari ding propeta ampon i Moises:

²³ king ing Cristo sukat yang dumalan kasakitan at ya ing maging peka mumuna karing mipasublian mie ban ihayag na ing sala na ning kaligtasan karing Judio at karing paganu.

²⁴ Kabang makanyan nang pagdipensang Pablo ing sarili na, kinulait ya keya i Festo. Ngana, Pablo, sira ka buntuk! Ing maragul mung kabiasnan sisiran na ka pamisip!

²⁵ Nganang mekibat Pablo, E ku pu sira buntuk, Kagalang-galang a Gobernador! Ing sasabian ku pu katutuan at masala.

²⁶ Aring Agripa! Malilyari ku pung magsalitang mitmung kapangangasan kekayu uling balu yu ngan iting sabla. Asisiguradu ku king isanu man kareti e makalingad kekayu. Uling ining sasalita ku e mepalyari king metung mung suluk a e pikabaluan.

²⁷ Aring Agripa, e kayu wari pu maniwala karing propeta? Balu ku maniwala kayu!

²⁸ Ngana kang Pablo ning Aring Agripa, King makuyad a panaun buri mu ku yatang maging Cristianu?

²⁹ Kilub na mu ning makuyad a panaun o ning makaba man, nganang mekibat Pablo, ipanalangin ku king Dios ing ikayu at ikayung sablang makiramdam kanaku ngeni maging Cristianu kayung kalupa ku subali mu karing tanikalang deni!

³⁰ Kanita ing Ari, ing gobernador, i Berenice at ding sabla tinalakad la,

³¹ at kagulut da ngarang misabisabi, Ing taung ini ala yang depatan nanuman a sukat nang ikamate o kaya ikasukul!

³² At sinabi nang Aring Agripa kang Festo, Mayan me sanang ibulus ing taung yan nung e ya mu minapelar king Emperador.

27

¹ Inyang mepikayari king sukat na keng maglayag papunta Italia, inintriga de i Pablo at ding aliwa pang makasukul kang Julio, ing opisyal king rehimiento da ring sundalus ning Roma a ausan dang Rehimiento ning Emperador.

² Sinake kami king barkung menibatan Adramitio, ing makasadia nang manulakan papunta karing sadsaran barku na ning probinsia ning Asia at miglayag na kami. Kayabe mi ya i Aristarco, ing metung a tau Tesalonica, Macedonia.

³ Itang kabukasan sinadsad ke Sidon. Pepakitanan neng mayap a lub Julio i Pablo at pepaintulutan neng sinaka at makikit karing kakaluguran na ba reng asaupan king nanumang pamangailangan na.

⁴ Manibat karin menulakan keng pasibayu. Uli na ning makasalangsang ke king tiup ning angin, memalebe kami king dane nang aslagan ning pulu ning Cyprus.

⁵ Inyang milapit kami banda Cilicia at Pamfilia delakitan mi ya ing dagat at miras kami karin Mira, ing metung a siudad ning Licia.

⁶ Atagpuan ne karin ning kapitan ing metung a barkung ibat Alejandria a malapit nang manulakan para Italia, at kaniti na ke linipat ampon seke.

⁷ Mabagal ke pamaglayag; minabut dakal a aldo at tutu keng migkasakit bayu mi ikuang miras tulid Cnidus. E na peintulut ning tiup na ning angin ing sumulung ke pa king dagat, inya memalebe kami king dane nang aslagan ning pulu ning Creta a makakubli king angin. Lebasnan mi ya ing Salmone.

⁸ E ke dinayu king pasigan at kayabe na ning maragul a kasakitan, ikua ming miras king lugal a ausan dang Mayap a Sadsaran; e binang makarayu king balen na ning Lasea.

⁹ Melambat kaming menatili karin angga king meging mapanganib ing isulung ing pamaglayag uling milabas na kanita ing Aldo ning Pamisut. Inya nganang mekasabing Pablo karela,

¹⁰ Makamal, anti ku na mong akakit nung isulung yu iting pamaglayag, dakal ing mapinsala king karga at king barku at mekad mipanganib pa ing bie tamu.

¹¹ Oneng menalig ya ing opisyal na ning rehimiento king sinabi na ning kapitan ampon ning makibandi king barku at e king sinabi nang Pablo.

¹² E ne man masanting a lugal ing sadsaran na ning barku para ilabas karin ing panaun na ning dimla; inya makanayun la ding keraklan karing tau king pamaglayag at king pamagkapilit miras karin Fenice, nung malyari mu rin. Iti metung yang sadsaran karin Creta a makayarap amianan-aslagan at mauli-aslagan at karin da buring ilabas ing panaun na ning dimla.

¹³ Megumpisang tiniup bagya-bagya ing angin ibat banda mauli, at inisip da ing malyari na lang makapaglayag; inya simpa ra ne ing sinipete at memalebe la king kekaban na ning Creta.

¹⁴ Oneng e melambat, mignus manibat king mamala ing masikan a angin, ing ausan dang Eurakulon.

¹⁵ Tiran ne ing barku, at anti na ning imposibli ing salungatan ing angin pepaburen mi neng itange na ning angin ing barku.

¹⁶ Mekapagkubli kami inyang miras ke banda nang mauli ning malating pulu na ning Cauda. Karin, ikua mi yang asampa ing bangka na ning barku agyamang migkasakit keng tutu.

¹⁷ Ginuyud de ing barku at kaybat tinali mi yang mangaragul a lubid. King takut dang tumud ya king mabatu a malapit king pasigan na ning Libya, beba da la ring layag at migpatinganiud na kami mu.

¹⁸ Menatiling sisikan ing tiup ning bagyu, inya itang kabukasan pegumpisan dang penugse king dagat ing karga,

¹⁹ at inyang mikabukasan, pati kasangkapan na ning barku kusa ra nang inugse.

²⁰ Melambat mu rin ing e ke menakit aldo o batuin at e pa mu rin tinuknang ing masikan a angin. inya inari mi na king lub mi ing e na ke miligtas.

²¹ Uling melambat na mu rin ing e la makapangan ding makasake king barku, tinalakad ya i Pablo at nganang migsalita, Makamal, nung mekiramdam kayu kanaku at e yu pinilit meko karin Creta sana ikua tamung alisian iting heganaganang kasiran at perhuisyu.

²² Oneng ngeni pakisabi kung mayap kekayu, e yu sa painan ing lub yu! Metung man kekayu alang numanu balang; ing barku ya mung bukud malasak.

²³ Uling nabengi detangan na ku ning metung a anghel na ning Dios a sasakup kanaku at sasamban ku,

²⁴ at sinabi na, E ka tatakut, Pablo! Kailangan kang miras king arap ning Emperador. Alang-alang keka malugud na la ngang iligtas a bie ning Dios ding sablang kayabe mung maglayag.

²⁵ Uli na niti, e yu painan ing lub yu! Uling maragul ku pamagtiwala king Dios at asahan kung matupad ing sabla antimo ing sinabi na kanaku.

²⁶ Mu pin, mipadpad tamu king metung a pulu.

²⁷ Inyang kalabi mi nang apat a bengi, pidpad na ke ning bagyu king Dagat ning Adriatico. Inyang bandang kapitangan bengi inisip da ring marino king milalapit na ke king mamala.

²⁸ Inya mibaldug lang pising ating pabayat at ataruk da king dinalan at aduang pulung talampakan kalalam ing danum; milabas pa ing sinaguling penandit at terukan dang pasibayu at ikit da siam namung pulung talampakan kalalam.

²⁹ Pitatakutan da king makatud ya king mabatu ing barku mi inya bildug da la ring apat a sinipete king mulin ning barku, at menalangin lang sumala na sana.

³⁰ Bisa lang tumakas ding marino king barku; beba re ing bangka king danuman at sangkan lang bisang mibiling sinipete king sumanga na ning barku.

³¹ Oneng nganang Pablo king opisyal militar at karing sundalus, Istung likuan de reng marinong den ing barku, e kayu miligtas.

³² Inya petad da la ring sundalus ding lubid na ning bangka at pepaburen deng menyud.

³³ Malapit na mung sumala at pekisabi nang mayap Pablo ing mangan la sa agyang ditak mu. Ngana, Labi na kayung apat a aldo ngening e mamangan at balisa kayung manaya.

³⁴ Inya mangan na kayu! Kailangan yu ing mangan ba kayung miligtas. E ya numanu balang ing ninuman kekayu.

³⁵ Kaybat nang asabi iti, kinangwa yang mapilan a tinape. Pepasalamat ya king Dios king durungutan da; pirasu ne ing tinape at megumpisa yang mengan.

³⁶ Miyatdanan lang tetagan a lub at ing balang metung karela mengan yang ditak.

³⁷ Heganagana adua keng dalan pitung pulu't anam a taung makasake king barku.

³⁸ Kaybat nang kinabsi ning balang metung bewasnan da pa ing karga na ning barku. Inugse ra king dagat ing trigu.

³⁹ Inyang mesala na, e ra pa mu rin akakit ding marino nung nu ke karin, oneng atiglapan de ing metung a lawa a ating pasigan at inisip da, nung malyari mu rin, sadsad ke karin at karin de pasayaran ing barku.

⁴⁰ Inya pematlud da la tali ding sinipete at pepaburen da na lang limbug king danuman. Antimu rin kelag da la ring lubid a pipigil karing gaud. Kaybat tinas da la ring layag king sumanga na ning barku ban sapulan neng pasulung ning angin ing barku banda king pasigan.

⁴¹ Oneng tinud ya king mabatu ing barku at sinayad ya; mibara ya ing arap ning barku at e ne mikimut kabang mengalaglag ya ing mulin king masikan a tiup ning alun. fig,,,,,... tinud ya king mabatu ing barku at sinayad ya...,(27:41)fig*

⁴² Buri da ring sundalus ing gisanan da lang pamaten ding sablang makasukul ban metung man karela alang makakawe king pasigan at makatakas.

⁴³ Oneng ing opisyal da buri neng iligtas i Pablo, inya sebatan na ing balak dang iti. Inutus na king ding sablang biasang kawe luksu na lang mumuna at kawe lang papunta king pasigan;

⁴⁴ ding aliwa naman tuki na la kanita; kalawat la karing tabla o king isanu mang pirasu nang mebaklas ning barku. At makanyan ke ngan miras a e ninanu balang king pasigan.

28

¹ Inyang ikua mi na ngan mekasaka king pasigan, abalu mi king ita ing pulung ausan dang Malta.

² Pepakitanan da keng ganaka ding manuknangan karin. Megumpisang minuran at tutung marimla, inya pepatau lang dapug at sikasuan da keng masalese.

³ Memulut yang kasaklulung dutung i Pablo. Inyang malapit na nang ibili iti king dapug, ating linual a kamamalu inyang mikapali ya king api at kinatikat ya king gamat na.

⁴ Inyang ding tau karin ikit deng makabito king gamat nang Pablo ing kamamalu, ngara king metung at metung, Siguru ing taung ini makamate yang tau. Mekaligtas ne king kamatayan king dagat oneng e na paintulut ning banua ing mie ya pa.

⁵ Oneng pigpag ne king api ing kamamalu at e ya ninanu balang i Pablo.

⁶ Panayan da ing lumbag ya o kabud na miragsa at mate bigla. Oneng kaybat dang menayang malambat e la menakit nanumang apaniglon dang malyari kang Pablo; minaliwa la isip at ngara, Metung yang dios yan!

⁷ Ing pamuntuk ketang pulung ita metung yang lalaking milagyuan Publio at malapit ketang lugal a ita ing pibandian nang gabun. Malugud na keng tinuring bisita na kilub ding atlung aldo.

⁸ Makarate ya ing tata nang Publio, malagnat ya at atin yang disinteria. Liban neng Pablo king kuartu na; menalangin ya at timpak na la ding gamat na king masakit at pepakayap ne.

⁹ Inyang milyari iti, dinatang la ding sablang aliwang masakit king pulung ita at kinayap la ngan.

¹⁰ Pindinan da keng dakal a regalu at inyang maglayag na kami sekenan de ing barku king sablang kailangan mi king kekaban na ning pamaglayag.

¹¹ Kalabas da ring atlung bulan, menulakan kami king metung a barkung menibat Alejandria. Metung yang barkung ausan dang Ding Dios a Kambal at linabas mi ing panaun ning dimla karin.

¹² Sinadsad ke king siudad ning Siracusa at menatili ke karin kilub ding atlung aldo.

¹³ Manibat karin sinulung keng miglayag at miras na ke man king siudad ning Regio. Itang kabukasan tiniup ing angin ibat banda mauli, at kilub ding aduang aldo miras ke king balen a ausan dang Puteoli.

¹⁴ Atagpuan mi la karin ding mapilan a talasalpantaya, at pekisabi ra ing tuknang keng manga paruminggu karin. Bandang tauli ikua ming miras Roma.

¹⁵ Abalitan da kami ding talasalpantaya karin Roma at miparas la angga king Palengki na ning Apio at king lugal a ausan dang Tres Tavernas ban salubung kekami. Kabud ikit na lang Pablo, pepasalamat ya king Dios at mirinan yang tetagan a lub; mesaya ya.

¹⁶ Inyang miras na ke Roma, mipaintulutan ya i Pablo a mibalebaleng kayabe na ning metung a sundalus a guguardia keya.

¹⁷ Kalabas da ring atlung aldo minaus yang kapulungan i Pablo karing pamuntuk da ring Judio karin. Inyang ikua ra nang mitipun, nganang migsalita karela, Kapatad, agyamang ala kung depat nanuman laban karing kekatamung kalahi o lebag karing kaugalian a amana tamu karing kekatamung makatua, pepasukul da ku karin Jerusalem at inintriga da ku karing Romano.

¹⁸ Pengutnan da ku at buri da kung ibulus uling ala lang ikit kanaku a mangaintulid sentensiang kamatayan.

¹⁹ Oneng inyang titulan da ring Judio iti, mepilit kung minapelar king Emperador agyamang ala kung asabi nanuman laban karing sarili kung kabalen.

²⁰ Yan ing sangkan nung inya inawad kung akit da kayu at akasabi; uling makagapus ku karing tanikalang deni alang-alang king Cristo a panenayan na ning balen Israel.

²¹ Ngara kang Pablo, Ala ke pang tinggap a kasulatan ibat Judea ni ala pang kabalen a dinatang keti ibat karin a magdalang nanumang balita o makapagsalita nanunamang e mayap tungkul keka.

²² Oneng bisa keng makaramdam karing kekang pamalak uling balu mi king nukarin mang lugal magsalita la ding tau laban kaniting sektang kayayaniban mu.

²³ Inya mitakda lang metung a aldo kang Pablo; lalu lang dakal karela ding memaniatang kanitang aldong ita ketang tuknangan nang Pablo. Manibat king abak angga itang bengi pepamalino na at pepayabut karela ing amanu tungkul king Kayarian ning Dios. Pigkapilitan na lang abaldug a lub tungkul kang Jesus king kapamilatan na ning pamagsitas na king Kautusan nang Moises at karing kasulatan da ring propeta.

²⁴ Meyakua la ding mapilan karela king pamagsalita na, oneng e la bisang maniwala ding aliwa.

²⁵ Memaglako lang e mikakametung kaybat nang asabing Pablo iting katayang amanu, Tinud yang tinud migsalita ing Banal a Espiritu karing kekayung makatua king kapamilatan na ning propeta Isaias!

²⁶ Uling nganang sinabi, Sulung, munta ka at sabian mu kareting tau: Makiramdam kayu mang ulit-ulit, e yu mu rin aintindian; lumawe kayu mang lumawe, e kayu manakit.

²⁷ Uling mepurul la isip ding taung deti; tikpan da la ring balugbug da at piniak da lang mata ra. Pota manakit la ding mata ra, makaramdam lang balugbug da, at makaintindi lang isip da, at magbalik la lub kaku, at aku pakayapan ku la.

²⁸ Nganang Pablo, Sukat yung abalu king ing amanu na ning Dios tungkul king kaligtasan mipayabut na karing paganu at pakiramdaman da! [

²⁹ Kabud asabi nang Pablo iti, meko la ding Judio, maigpit lang mipapagmatulid.]

³⁰ Kilub ding aduang banua, menuknanggan ya i Pablo king metung a bale a upahan na; karin na la tinggap ding sablang bisang makikit keya.

³¹ Hayagan at alang takut yang menaral tungkul king Kayarian ning Dios at tinuru ya tungkul king Ginung Jesu-Cristo.