1

¹ Atyu ne ing Amanu bayu ya melalang ing yatu. Kayabe ne ning Dios ing Amanu at nung nanu ya ing Dios makanyan ya naman ing Amanu.

² Ibat na king kamumulan kayabe na ne ning Dios ing Amanu,

³ at king kapamilatan na ning Amanu lelang na ning Dios ing sablang bage; alang nanumang mepalyari king melalang nune mu king kapamilatan na.

⁴ Atyu keya ing bie at iting bie ya ing migdalang sala karing tau.

⁵ Saslag ya ing sala king karalumduman at e ne adaig ning karalumduman.

⁶ Tinubud ne ning Dios ing metung a tau; ing lagyu na Juan.

⁷ Dinatang ya ban munie patutu tungkul king sala ban king kapamilatan na ning pamipatutu na maniwala la ding sabla.

⁸ Aliwa i Juan ing sala; dinatang ya ban munie patutu tungkul king sala.

⁹ Iti ya ing tune sala a daratang king yatu ban munie sala karing sablang tau.

¹⁰ Atyu ne ing Amanu king yatu, oneng e ne akilala ning yatu agyamang lelangan ne ning Dios ing yatu king kapamilatan na ning Amanu.

¹¹ Dinatang ya king sarili nang balen, oneng e re tinggap ding kabalen na.

¹² Makanyan man karetang tinanggap at meniwala keya binie na ing karapatan a maging anak na la ning Dios.

¹³ Meging anak na la ning Dios e king kapamilatan na ning daya o ning pamitan ning laman o ning dapat ning tau; ing Dios mismu ya ing Ibpa ra.

¹⁴ Meging tau ya ing Amanu at mekipanuknangan ya kekatamu. Ikit mi ing kamalan na a mitmung lugud at katutuan, ing kamalan a mangaintulid mung bukud king bugtung nang Anak ning Ibpa.

¹⁵ Minie yang patutu i Juan tungkul keya. Ngana, Ya ing amanuan ku kanitang sinabi ku kekayu, Datang ya kaybat ku, oneng maygit ya kanaku, uling atyu ne bayu ku pa mibait.

¹⁶ Uli na ning ganap nang lugud tinanggap tamu ngang grasya, at grasya pa.

¹⁷ Binie ne ning Dios ing Kautusan king kapamilatan nang Moises, oneng ing lugud na at katutuan miras karing tau king kapamilatan nang Jesu-Cristo.

¹⁸ Ala pang menakit king Dios; oneng mipakilala ya ing Dios karing tau king kapamilatan na ning bugtung nang Anak; ing Anak a kayabe ning Ibpa king panga-Dios at kaluguran nang tutu.

¹⁹ Iti ing patutu nang Juan kanitang mitubud lang pari at Levita ding Judio ning Jerusalem ban ikutang da keya: Ninu ika?

²⁰ Pigtapat nang Juan at e na pepayalian, nune sinabi nang malino, Aliwa aku ing Cristo.

²¹ Kitnan deng pasibayu, Nung makanyan, ninu ika? Ika i Elias? Pekibat nang Juan, Aliwa aku. Kitnan da ne naman, Ika ing Propetang panenayan me? Aliwa, nganang mekibat Juan.

²² Ngara pa, Ninu wari ika? Sabian mu ban atin keng apakibat karetang mitubud kekami. Nanu ing asabi mu tungkul king kekang sarili?

²³ Mekibat ya i Juan, Aku ing siwala nitang kukulait king disyerto: Itulid ye ing dalan a dalanan ning Ginu! (Iti ya ing sinabi ning propeta Isaias.)

²⁴ Ding taung deti tubud lang ibat karing Pariseo.

²⁵ Kitnan da ne naman i Juan, Baket maminyag ka ngening aliwa pala ika ing Cristo o i Elias o ing Propeta?

²⁶ Nganang mekibat Juan, Maminyag ku king danum, oneng libutad yu ating metung a e yu akikilala.

²⁷ Ya ing daratang kaybat ku at e ku karapatdapat agyang kalag mu karing tali da ring sandalyas na.

²⁸ Iti mepalyari karin Betania, king kangatba ning Ilug ning Jordan nung nu ya maminyag i Juan.

²⁹ Kabukasan, ikit neng Juan i Jesus at lalapit ya keya. Nganang Juan, Oyan ing Kordero ning Dios a milalako king kasalanan ning yatu!

³⁰ Ya ing amanuan ku inyang sinabi ku, Ing daratang kaybat ku maygit ya kanaku, uling atyu ne bayu ku pa mibait.

³¹ E ku balu kanita nung ninu ya, agyamang dinatang kung maminyag king kapamilatan ning danum ban mipakilala ya king Israel.

³² Iti ya ing patutu nang Juan, Ikit ke ing Espiritu a kukuldas anting patipati a ibat banua at menatili ya keya.

³³ E ku balu kanita nung ninu ya; oneng ing mitubud kanaku ban maminyag king kapamilatan na ning danum ya ing sinabi kanaku, Ing akit mung kuldasan na at panatilian ning Espiritu, ya ing maminyag king kapamilatan ning Banal a Espiritu.

³⁴ Ikit ku iti at patutuan ku king ya ing Anak ning Dios.

³⁵ Kabukasan, atyu ne naman karin i Juan; kayabe na la ding adua karing alagad na.

³⁶ Ikit neng lalabas i Jesus at nganang sinabi, Oyan ing Kordero na ning Dios!

³⁷ Dimdam da ring aduang alagad ing sinabi nang Juan at tinuki la kang Jesus.

³⁸ Melikid ya i Jesus at kitnan na la inyang ikit nang tutukian de, Nanu ing panintunan yu? Mekibat la, Rabbi (ing buri nang sabian niting amanu, Maestro), nu karin ka manuknangan?

³⁹ Nganang mekibat Jesus karela, Tara, lawan yu. Tinuki la kang Jesus at ikit de ing tuknangan na; menatili lang kayabe na king aldong ita. (Mag-a-alas kuatro na ning gatpanapun kanita).

⁴⁰ Ing metung karing aduang mekaramdam king pamagsalita nang Juan at tinuki kang Jesus ya i Andres a kapatad nang Simon Pedro.

⁴¹ Kanita mu rin penintun neng Andres i Simon a kapatad na. Inyang ikit ne, sinabi na kang Simon, Atagpuan mi ya ing Mesiya (ngana wari, ing Cristo).

⁴² At tiki neng Andres i Simon kang Jesus. Linawe neng Jesus at ngana, Ika i Simon a anak nang Juan. Mayaus kang Cefas. (Ngana wari, Pedro.)

⁴³ Kabukasan, birian nang Jesus ing munta ya Galilea. Atagpuan ne karin i Felipe at nganang Jesus, Tuki ka kanaku! (

⁴⁴ Tau ya Betsaida i Felipe, ing balen da ri Andres at Pedro.)

⁴⁵ Penintun neng Felipe i Nathanael at ngana keya inyang ikit ne, Atagpuan mi ya itang mababanggit king libru na ning Kautusan a sinulat nang Moises at mababanggit munaman karing kasulatan da ring propeta: i Jesus ning Nazaret a anak nang Jose.

⁴⁶ Nganang kinutang Nathanael, Atin waring mayap a lunto Nazaret? Mekibat ya i Felipe, Tara, lawan mu.

⁴⁷ Inyang ikit nang Jesus king lalapit ya keya i Nathanael, nganang migsalita tungkul kang Nathanael, Oyan ing tune Israelita! Keya ala kang akit a pamagkunwari!

⁴⁸ Kitang nang Nathanael, Makananu mu kung akilala? Nganang mekibat Jesus, Bayu na ka inaus Felipe, ikit da na ka inyang atyu ka lalam ning tanaman a higera.

⁴⁹ Nganang Nathanael, Maestro, ika ing Anak ning Dios! Ika ing Ari ning Israel!

⁵⁰ Mekibat ya i Jesus, Maniwala ka wari uli na mu ning sinabi ku kekang ikit da kang atyu lalam ning tanaman a higera? Maygit pa kanyan ing akit mu!

⁵¹ At tiglung nang Jesus, Ing katutuan sasabian ku kekayu ngan: akit yeng makabuklat ing banua at tipa-manik la ding anghel ning Dios king tulid ning Anak ning Tau.

2

¹ King katlung aldo mika kasalan king Cana, Galilea. Atyu karin ing ima nang Jesus.

² Mekumbira ya naman i Jesus at ding alagad na.

³ Megisan ing alak, inya i Mariang ima nang Jesus sinabi na keya, Kegisanan lang alak.

⁴ Nganang mekibat Jesus, Babae, paburen mu, ing oras ku e pa dinatang.

⁵ Nganang sinabing ima na karetang ipus, Daptan yu ing nanumang sabian na kekayu.

⁶ Karin ating anam a tapayan. Ing balang metung kareti mikakalaman yang aduang pulu o atlung pulung galun a danum. Makasadia la deting tapayan para king seremonia ning pamaglinis da ring Judio.

⁷ Sinabi nang Jesus karing ipus, Katmuan yu lang danum ding tapayan. At kitmuan da la angga king labi.

⁸ Kaybat na nita, nganang Jesus karela, Ngeni sumaluk kayu at idala yu king manibala kaniting kasalan. Inya dela ra king manibala king kasalan

⁹ at tikman na ing danum a meging alak. E na balu ning manibala nung nu karin ibat itang alak a ita (oneng balu da ring ipus a sinaklu king danum). Inaus ne ning manibala ing lalaking kinasal

¹⁰ at sinabi na keya, Kaugalian ing iyapag mumuna ing maniaman a alak at nung dakal na la ainum ding bisita kanita pa iyapag ing alak a maina. Oneng ika tauli mung lege ing maniaman a alak!

¹¹ Iti milyari karin Cana, Galilea; iti ya ing mumunang milagru a depat nang Jesus. Karin na pepakit ing kayupayan na at iti meging dalan ne ning pamaniwala ra keya ding alagad na.

¹² Kaybat na nita, minta ya Capernaum, kayabe ne i ima na, ding kapatad nang lalaki, at ding alagad na. Menatili la karin kilub ding mapilan a aldo.

¹³ Malapit na mu ing Piesta ning Pamaglagpus da ring Judio, inya minta ya Jerusalem i Jesus.

¹⁴ Disnan na la king Templo ding magtindang baka, tupa at patipati ampon ding maglibe salapi a karin pakalukluk.

¹⁵ Ginawa yang pamarug a lubid at tinabi na la ngan king Templo ding magtinda, pati na ding tupa at baka. Piniambulat na la ding salapi da ring maglibe salapi at penuag ding karelang lamesa.

¹⁶ Nganang Jesus karing magtindang patipati, Ilako yu la keti ren! E ye gagawan palengki ing bale nang Ibpa ku!

¹⁷ At aganaka da ring alagad na ing sasabian na ning kasulatan, Ing pamagmalasakit ku para king bale mu balamu api a mikakaluku king pusu ku.

¹⁸ Uli na niti, kitang da ring Judio kang Jesus, Nanung tanda a pagmumulalan ing gawan mu ban apakit mu kekami king atin kang matulid dapat kaniti?

¹⁹ Mekibat ya i Jesus, Lasakan ye iting Templo at kilub ding atlung aldo italakad keng pasibayu.

²⁰ Ngara ding Judio, Megawa ya iting Templo kilub ding apat apulu at anam a banua at ika italakad me kilub na mu ning atlung aldo?

²¹ Oneng ing Templong amanuan na ya ing katawan na.

²² Inya inyang sinubli neng mie, aganaka da ring alagad na king sinabi na iti; at meniwala la king kasulatan at karing amanung sinabi nang Jesus.

²³ Kanitang atyu Jerusalem i Jesus king Piesta ning Pamaglagpus, dakal lang tau ding meniwala keya inyang ikit da la ring makapagmulalang tanda a depat na.

²⁴ Makanyan man e migtiwala i Jesus karela uling balu na la ding tau.

²⁵ E na kailangan pa ing damdaman na king aliwa ing tungkul king ninumang tau uling ya mismu balu na ing atyu king pusu na ning tau.

3

¹ Ating metung a lalaking milagyuan Nicodemo, metung yang Pariseo at pamuntuk ding Judio.

² Misan a bengi, iting lalaki minta ya kang Jesus. Ngana kang Jesus, Maestro, balu mi king metung kang talaturu a menibat king Dios, uling alang makagawa karing milagrung daraptan mu subali mu nung mamantabe ya keya ing Dios.

³ Mekibat ya i Jesus, Ing katutuan sasabian ku keka: subali mu nung mibait yang pasibayu ing tau e ne akit ing Kayarian ning Dios.

⁴ Kitang nang Nicodemo, Makananu yang mibait pasibayu ing tau nung matua ne? Makapagbalik ya pa wari king atian nang ima na ba yang mibait pasibayu?

⁵ Mekibat ya i Jesus, Ing katutuan sasabian ku keka: subali mu nung mibait ya king danum at king Espiritu ing tau e ya makalub king Kayarian ning Dios.

⁶ Ing mibait king laman, laman ya at ing mibait king Espiritu, espiritu ya.

⁷ E mu pagmulalan ing sinabi ku keka, Kailangan kayu ngan mibait pasibayu.

⁸ Tutiup ya ing angin king lugal a buri na at daramdaman yu ing biung na, oneng e yu balu nung nu manibat at nung nu pupunta. Makanyan munaman ing mapapalyari king balang metung a mibabait king Espiritu.

⁹ Nganang kinutang Nicodemo, Makananu lang mapalyari deting bage?

¹⁰ Mekibat ya i Jesus, Metung kang talaturu ning Israel at e mu la aintindian deting bage?

¹¹ Ing katutuan sasabian ku keka: sasabian mi itang balu mi at patutuan mi itang ikit mi. Makanyan man e yu tatanggapan ing pamipatutu mi.

¹² Nung e yu paniwalan ing sasabian ku tungkul karing bage keti king yatu, makananu kayung maniwala nung magsalita ku tungkul karing bage a atyu banua?

¹³ Ala pang miyukiat king banua subali mu ing Anak ning Tau a tinipang ibat banua.

¹⁴ At nung makananu neng tinas Moises ing ubingan a tangsu king disyerto, makanyan ya namang sukat itas da ing Anak ning Tau

¹⁵ ban ing ninumang maniwala keya mika bie yang alang angga.

¹⁶ Uli na ning maragul nang lugud ning Dios king yatu binie ne ing bugtung nang Anak ban ing ninumang maniwala keya e ya mate nune mirinan yang bie alang angga.

¹⁷ Uling tinubud ne ning Dios ing Anak na king yatu e ban atulan ne at parusan ing yatu, nune ban miligtas ya ing yatu king kapamilatan na.

¹⁸ E ya miyatulan kaparusan ing ninumang maniwala keya; oneng miyatulan ne ing e maniwala keya, uling e ya meniwala king bugtung nang Anak ning Dios.

¹⁹ Ing kayatulan ya iti: dinatang ya ing sala keti king yatu, oneng aliwa ing sala ing liguran da ring tau, nune ing dalumdum uling e mayap ing dapat da.

²⁰ Uling kasaman da ring darapat e mayap ing sala at e la lalapit king sala ban e mayakit ing karelang dapat.

²¹ Oneng lalapit ya king sala ing darapat king katutuan ban masalang mayakit king ding dapat na daraptan na la agpang king kaburian ning Dios.

²² Kaybat na nita, i Jesus at ding alagad na minta la king sakup ning Judea. Karin ya menatiling kayabe ra at meminyag ya.

²³ Maminyag ya naman i Juan king Enon malapit king Salim uling dakal a danum karin. Pintalan de karin ding tau i Juan at bininyag na la. (

²⁴ E ya pa makasukul kanita i Juan.)

²⁵ Mekiargu la ding mapilan karing alagad nang Juan king metung a Judio tungkul king seremonia na ning pamanos.

²⁶ Inya pintalan de i Juan at sinabi ra, Maestro, itang lalaking akayabe yu kangatba ning Jordan a kekang sasabian karing tau, maminyag ya naman at pupuntalan de ring sablang tau!

²⁷ Mekibat ya i Juan, Alang taung makatanggap nanuman subali ketang babie ning Dios keya.

²⁸ Ikayu mismu apatutuan yu king sinabi ku, Aliwa aku ing Cristo, nune mituburan kung makauna keya.

²⁹ Bandi ne ning lalaking kakasal ing babaing ikakasal na. Manenaya ya ing kakaluguran ning lalaking kakasal at makiramdam king paniatang na at maragul ing tula na kabud damdaman na ing bosis ning lalaking kakasal. Makanyan maging ganap ing tula ku ngeni.

³⁰ Ya ing sukat mirangal at aku ing sukat mibaba.

³¹ Itang daratang ibat babo maygit ya karing sabla. Itang manibat king yatu, king yatu ya at magsalita ya tungkul karing bage keti king yatu. Itang daratang ibat banua maygit ya karing sabla.

³² Patutuan na ing ikit na at dimdam, makanyan man alang tatanggap king pamipatutu na.

³³ Ing tatanggap king pamipatutu na patunayan na king tapat ya ing Dios.

³⁴ Magsalita ya itang tinubud ning Dios karing amanu na ning Dios, uling ganap neng babie keya ing Espiritu.

³⁵ Kaluguran ne ning Ibpa ing Anak at binie na keya ing sablang bage.

³⁶ Atin yang bie alang angga ing maniwala king Anak; oneng e ya mirinan bie ing e mamintu king Anak, nune manatili keya ing milalablab nang mua ning Dios.

4

¹ Abalitan da ring Pariseo king lalu lang dakal ding alagad a ayayagkat na at abibinyag Jesus kesa karing kang Juan. (

² King kamatutuanan aliwa i Jesus ing maminyag nune ding alagad na.)

³ Inyang abalu na iting Jesus, meko ya Judea at mibalik ya Galilea.

⁴ Kailangan king dumalan ya Samaria.

⁵ Miras ya Sicar, ing metung a balen ning Samaria a malapit king gabun a pepamana nang Jacob kang Jose a anak na.

⁶ Atyu karin ing talaga nang Jacob, at anti na ning mapagal ya i Jesus king pamaglakbe na, linukluk ya lele ning talaga. Halus kaugtuan nang aldo tapat kanita.

⁷ Dinatang ya ing metung a Samaritana ban saklung danum. Nganang Jesus king Samaritana, Maki-inum na ku mo. (

⁸ Alalu kanita ding alagad na uling minta la king balen ban saling pamangan.)

⁹ Mekibat ya ing Samaritana, Judio ka at aku Samaritana ku, obat maki-inum ka kanaku? (Sinabi na iti uling ala lang pamakiabe ding Judio karing Samaritano.)

¹⁰ Sinabi nang Jesus, Nung balu mu mu ing babie ning Dios at nung ninu ing maki-inum, mekad ika na ing maniawad keya at ibie na keka ing danum a mabie.

¹¹ Ngana ning babai, Ala kang paniaklu, ginu, at malalam ya ing talaga. Nukarin ka kumang danum a mabie?

¹² Maygit ka pa wari king makatua ming i Jacob a minie kekami kaniting talaga? Mininum ya at ding anak nang lalaki at ding sese nang animal keting talaga.

¹³ Mekibat ya i Jesus, Kumau yang pasibayu ing ninumang minum king danum niting talaga;

¹⁴ oneng e ne kumau kapilan man ing ninumang minum king danum a ibie ku. Uling ing danum a ibie ku keya maging sibul ya kilub na at ibie ne ing bie alang angga.

¹⁵ Ngana ning babai, Dinan mu ku kaniting danum, ginu, ban kanita e na ku kumaung pasibayu ni e na ku saklu keti.

¹⁶ Nganang Jesus king Samaritana, Puntalan me at ausan ing asawa mu, at kaybat mibalik ka keti.

¹⁷ Ngana ning babai, Ala kung asawa. Pekibat nang Jesus, Tutu ing sinabi mung ala kang asawa.

¹⁸ Uling lima na la ding meging asawa mu at e me tune asawa ing lalaking pakiabayan mu ngeni. Tutu ing sinabi mu kanaku.

¹⁹ Ngana ning babai, Aintindian ku, ginu, king metung kang propeta.

²⁰ Ding Samaritanong makatua mi simban de ing Dios keting bunduk, oneng ikayung Judio sasabian yu king karin Jerusalem ya sukat samban ing Dios.

²¹ Nganang Jesus, Babae, maniwala ka kanaku, datang ing oras nung kapilan ding tau e re samban ing Ibpa keting bunduk o king Jerusalem man.

²² Ikayung Samaritano e yu talagang balu nung ninu ing sasamban yu. Ikaming Judio balu mi nung ninu ing sasamban mi, uling ing kaligtasan manibatan karing Judio.

²³ Oneng daratang na ing oras, at miras na, nung kapilan ding tune sasamba samban de ing Ibpa king espiritu ampon king katutuan. Ding anti kareti ila ding buri nang samba ning Ibpa keya.

²⁴ Ing Dios Espiritu ya at detang sasamba king Dios kailangan king samban de king espiritu at king katutuan.

²⁵ Ngana ning babai, Balu ku king ing Mesiya, ing ausan dang Cristo, datang ya. Paniatang na, ipabalu na kekatamu ing sablang bage.

²⁶ Mekibat ya i Jesus, Aku ya, akung kapagsalita mu.

²⁷ Ketang penandit a ita, dinatang la ding alagad nang Jesus. Mengapamulala la inyang ikit deng makipagsalita king babai. Oneng metung man karela alang kinutang king babai nung nanu ing buri na ni e re kitnan i Jesus nung baket makipagsalita ya king babai.

²⁸ Kanita likuan ne ning babai ing banga na at minta ya king balen at sinabi na karing tau,

²⁹ Tara at lawan ye ing lalaking sinabi kanaku king sablang depat ku. Ya na kaya ing Cristo?

³⁰ Linual la ding tau king balen at pintalan de i Jesus.

³¹ Samantala, ding alagad na namang Jesus pakisabian deng mayap. Ngara, Maestro, mangan na kayu.

³² Oneng sinabi na, Atin kung pamangan a e yu balu.

³³ Inya megumpisa lang mikukutnanan ding alagad, Atin kayang migdalang pamangan keya?

³⁴ Nganang Jesus, Ing pamangan ku ya ing pamintuan ku ing kaburian na nitang mitubud kanaku at arian ing obrang mibie kanaku.

³⁵ Atin kayung kasebian, Apat nang bulan at datang na ing pamamupul. Oyni ing asabi ku kekayu: pagumasdan yu la ding marangle, matua na at makasadia nang palutan ing makatanam!

³⁶ Tatanggap yang upa ing papalut at titipunan na la ding bunga para king bie alang angga ban kanita ing tatanam at ing papalut parehu lang tumula.

³⁷ Kaniti ya mipatutuan ing kasebian, Aliwa ya ing tatanam at aliwa ya ing pupupul.

³⁸ Tinubud da kayu ban pupulan ing e yu pipagalan. Ding aliwa ilang mepagal at ikayung makinabang king pipagalan da.

³⁹ Dakal lang Samaritano king balen a ita ding meniwala kang Jesus uli na ning patutu ning babai: Sinabi na la kanaku ding sablang bage depat ku.

⁴⁰ Inya inyang dinatang la ding Samaritano kang Jesus inawad da king manatili ya karela; at menatili yang aduang aldo karin.

⁴¹ At lalu lang merakal ding meniwala kang Jesus uli na ning sasabian na.

⁴² Ngara king babai, Ngeni maniwala kami e king uli na ning sinabi mu, nune uling ikami mismu dimdam mi ya at abalu mi king ya ing tune Talapagligtas ning yatu.

⁴³ Kalabas da ring aduang aldo, meko ya i Jesus at minta ya Galilea.

⁴⁴ Uling i Jesus mismu ya ing pepatutu king e re gagalangan ing propeta king sariling balen na.

⁴⁵ Karas na Galilea, tinggap deng matula; ikit da ring tau ing sablang depat na karin Jerusalem inyang Piesta ning Pamaglagpus uling mekipamiesta la naman.

⁴⁶ Mibalik yang pasibayu king Cana, Galilea, nung nu na gewang alak ing danum. At karin Capernaum ating metung a opisyal na ning gobiernu; masakit ya ing anak nang lalaki.

⁴⁷ Pintalan ne inyang abalitan na king dinatang ya i Jesus king Galilea ibat Judea. Pekisabi na king puntalan ne sa at pakayapan ing anak nang mamamate.

⁴⁸ Nganang Jesus, Subali mu nung manakit kayung tanda at milagru e kayu maniwala.

⁴⁹ Ngana ning opisyal, Tara na, ginu, pota e tane dasnan mabie ing anak ku.

⁵⁰ Mekibat ya i Jesus, Muli na ka, ing anak mu mie ya! Peniwalan na ning lalaki ing sinabi nang Jesus at meko ya.

⁵¹ Kabang pa-uli ya, selubungan de ring ipus na at sinabi ra king kinayap ne ing anak na.

⁵² Kitnan na la nung nanung oras ya kinayap ing anak. Ngarang mekibat, Napun pu, king oras a ala una milako ing lagnat na.

⁵³ Kanita na aganaka ning tata king ita ya ing oras inyang sinabi nang Jesus, Ing anak mu mie ya. Inya ya at ing mabilug nang pamilya meniwala la kang Jesus.

⁵⁴ Iti ya ing kaduang milagrung depat nang Jesus inyang dinatang ya Galilea ibat Judea.

5

¹ Kaybat na nita, mika piesta la ding Judio at minta ya Jerusalem i Jesus.

² Karin lele na ning Pasbul ding Tupa, ating sibul a king salitang Hebreo mayayaus yang Betsata. Atin yang limang balkon.

³ Dakal lang makakerang masakit kareting balkonbulag, pile, at paralitiko. [Panenayan dang galo ing danum;

⁴ uling ating oras a ing metung a anghel na ning Ginu durulung ya at gagalon na ing danum. Ing mumunang midulung kaybat nang megalo ning danum kumayap ya king nanumang sakit a panamdaman na.]

⁵ Karin ating metung a lalaking atlu nang pulu't walung banuang masakit.

⁶ Ikit neng Jesus at balu na king maluat neng masakit iting lalaki. Kitnan ne, Bisa kang kumayap?

⁷ Mekibat ya ing lalaki, Ginu, ala pung midala kanaku king sibul potang gagalo ing danum at kabang papunta ku pa mu atin nang mekadulung makauna kanaku.

⁸ Nganang Jesus keya, Talakad ka, ibuat me ing pagkeran mu at lumakad ka.

⁹ Kanita mu rin kinayap ya ing lalaki. Binuat ne ing pagkeran na at linakad ya. Aldo ning Sabbath kanita.

¹⁰ Inya sinabi da ring Judio king lalaking kinayap, Aldo Sabbath ngeni at labag king Kautusan ing ibuat me ing pagkeran mu.

¹¹ Oneng pekibat na karela, Ing taung pepakayap kanaku ya ing sinabi kanakung Ibuat me ing pagkeran mu at lumakad ka.

¹² Kitnan de, Ninu ing taung sinabi keka king ibuat me ing pagkeran mu at lumakad ka?

¹³ Oneng e na balu nung ninu itang pepakayap keya uling meko ne i Jesus at uling dakal a tau king lugal a ita.

¹⁴ Kaybat na niti, atagpuan neng Jesus king Templo at sinabi na keya, Lawan mu, mayap na ka! E na ka mikakasalang pasibayu magkang lalu pang marawak ing dugpa keka.

¹⁵ Meko ya ing lalaki at sinabi na karing Judio king ing pepakayap keya ya i Jesus.

¹⁶ Uli na niti, pegumpisan deng ligalig ding Judio i Jesus uling depat na iti king Aldo ning Sabbath.

¹⁷ Oneng pekibatan na lang Jesus. Ngana, Alang tuknang ing pamagobra nang Ibpa ku at aku man kailangan kung magobra.

¹⁸ Inya lalu reng pigkapilitan paten ding Judio uling e mu ing lebagan ne ing Aldo ning Sabbath, nune ausan ne pang Ibpa na ing Dios. Nanupata, makipante ya king Dios.

¹⁹ Nganang Jesus karela, Ing katutuan sasabian ku kekayu: ala yang arapat ing Anak king sarili nang kaburian, nune daraptan na mu itang akakit nang daraptan na ning Ibpa. Nanuman ing daraptan na ning Ibpa ya naman ing daraptan na ning Anak.

²⁰ Uling kaluguran ne ning Ibpa ing Anak at papakit na king Anak ing sablang daraptan na. At pakitanan ne pang dapat a maygit kareti ban mangapamulala kayu.

²¹ Nung makananung pasublian na lang mie ning Ibpa ding mete, makanyan munaman biayan na la ning Anak ding buri nang biayan.

²² E ne atulan ning Ibpa ing ninuman. Binie na king Anak ing kabilugan a upaya ning pamanatul

²³ ban ding sabla gumalang la king Anak, antimo ing pamangalang da king Ibpa. Itang e gagalang king Anak e gagalang king Ibpa a mitubud keya.

²⁴ Ing katutuan sasabian ku kekayu: ing makiramdam king amanu ku at maniwala king mitubud kanaku atin yang bie alang angga. E ya mayatul, nune ibat king kamatayan linipat ne king bie.

²⁵ Ing katutuan sasabian ku kekayu: daratang na ing panaun, at miras na, nung kapilan damdaman da ring mete ing siwala na ning Anak ning Dios. At detang makaramdam mie la.

²⁶ Atin yang upayang munie bie ing Ibpa at dininan neng upayang munie bie ing Anak.

²⁷ Dininan neng upayang matul uling ya ing Anak ning Tau.

²⁸ E yu pagmulalan iti; uling daratang na ing oras nung kapilan ding sablang atyu karing kutkutan damdaman da ing siwala na

²⁹ at lumual la. Subli lang mie detang dinapat mayap at mie lang alang angga. Subli la naman mie detang dinapat e mayap, oneng miparusan la.

³⁰ Ala kung arapat king sarili kung kayupayan. Mamatul ku agpang king sasabian na ning Ibpa kanaku; inya matulid ing atul ku uling e ku pagnasan daptan ing sarili kung kaburian, nune ing kaburian na nitang mitubud kanaku.

³¹ Nung aku ing patutu tungkul king sarili ku, ing pamipatutu ku alang kabaldugan.

³² Oneng ating aliwang patutu tungkul kanaku at balu ku king tutu ing sasabian na tungkul kanaku.

³³ Pepadala kayung tubud kang Juan at pepatutuan na ing katutuan.

³⁴ E uli na ning kailangan ku ing patutu ning tau, nune sasabian ku iti ban miligtas kayu.

³⁵ Mengari yang sulung milalablab i Juan at maslag ya; at birian yung matula kayung sinaguli king aslag na.

³⁶ Ating pamipatutu tungkul kanaku a maygit king pamipatutu nang Juan: ila pin ding dapat a parapat na ning Ibpa kanaku a kanaku namang daraptan. Ila deti ring patutu kanaku king ing Ibpa ya ing mitubud kanaku.

³⁷ Ing Ibpang mitubud kanaku ya mismu patutu ya naman tungkul kanaku. E yu pa dimdam kapilan man ing siwala na at e ye pa ikit kapilan man ing itsura na.

³⁸ Ala lang lugal king pusu yu ding amanu na uling e kayu bisang maniwala king tinubud na.

³⁹ Sasaliksikan yu la ding Kasulatan uling isipan yu king kareti yu atuklasan ing bie alang angga. Oneng deti ila kabud ding patutu tungkul kanaku;

⁴⁰ makanyan man e kayu bisang lumapit kanaku ban mika bie kayu.

⁴¹ Aliwa ing kapurian da ring tau ing pagnasan ku.

⁴² Oneng balu ra kayu; balu ku king ala kayung lugud king Dios.

⁴³ Dinatang ku king lagyu nang Ibpa ku, oneng e yu ku buring tanggapan. Nung datang ya ing aliwa king sarili nang lagyu, tatanggapan ye.

⁴⁴ Makananu kayung makapaniwala ngening pagnasan yung tanggap kapurian ibat karing tau, at e yu pagnasan ing tanggap kapurian a manibat king bukud mung Dios?

⁴⁵ E yu isipan king aku ing mandalum kekayu king Ibpa. I Moises a panaligan yu ya ing mandalum kekayu.

⁴⁶ Nung meniwala kayu kang Moises kailangan sana ing maniwala kayu kanaku uling sinulat ya tungkul kanaku.

⁴⁷ Nung e yu paniwalan ing sinulat na makananu kayung maniwala karing amanu ku?

6

¹ Kaybat na nita, dinalakit ya i Jesus king kangatba na ning Dagat-dagatan ning Galilea (o Dagat-dagatan ning Tiberias).

² Tikian de ring dakal a tau uling ikit da la ring milagrung depat na king pamanulu karing masakit.

³ Minukiat ya i Jesus king bunduk-bundukan at karin linukluk yang kayabe da ring alagad na.

⁴ Malapit na kanita ing Pamaglagpus, ing piesta da ring Judio.

⁵ Inyang lawan nang Jesus ing makapadurut, ikit na lang lalapit keya ding dakal a tau. Ngana kang Felipe, Nukarin tamu saling tinape ban apakanan ta la deting tau? (

⁶ Balu nang Jesus nung nanung daptan na at sinabi na iti ba neng subukan i Felipe.)

⁷ Nganang mekibat Felipe, E la managyung panialing tinape ding aduang dalan a salaping pilak ban makapangan ya ing balang metung agyang ditak mu.

⁸ Ing metung karing alagad, i Andres a kapatad nang Simon Pedro, sinabi na,

⁹ Ating metung a anak a lalaki keti a migbakal limang tinape sebada at aduang asan. Nu na la anti deti para kareting dakal a tau?

¹⁰ Nganang Jesus, Paluklukan yu la ding tau. (Madikut king lugal a ita.) Inya linukluk la ding tau. Migit o kumulang la king limang libu ding lalaki.

¹¹ Kinua na lang Jesus ding tinape at inyang mekapasalamat ne king Dios, pemie na la karing pakalukluk. Makanyan munaman ing gewa na karing asan. Mirinan la ngan ding tau anggang bisa la.

¹² Inyang kinabsi la ngan, sinabi na karing alagad na, Tipunan yu la ding pisipising mitagan ban alang masayang.

¹³ Inya tinipun da la ring pisipisi a ibat karing limang tinape sebada, at akatmu da la ring labing aduang kaing karing tagan ding taung mengan.

¹⁴ Ngarang sinabi inyang ikit da ring tau ing milagrung depat na, Tune pin ya ing Propeta a datang keti king yatu!

¹⁵ Balu nang Jesus king buri deng lapitan ban pilitan deng gawan ari. Inya meko yang pasibayu at minta yang magdili-dili king bunduk-bundukan.

¹⁶ Inyang mabibengi na, minta la ding alagad king dagat-dagatan.

¹⁷ Sinake la king bangka at dinalakit lang papunta Capernaum. Bengi na kanita at e na la pa detangan Jesus.

¹⁸ Mayalun ya ing dagat uling tutiup ing masikan a angin.

¹⁹ Inyang mekabagse na lang ating lima o anam a kilometru, ikit deng lalakad i Jesus babo ning danum at palapit ya king bangka. Mitakutan la.

²⁰ Nganang Jesus karela, Aku, e kayu tatakut.

²¹ Matula reng pepasaken i Jesus king bangka; agad-agad yang sinadsad ing bangka king lugal a karelang pupuntalan.

²² Kabukasan, ikit da ring dakal a taung menatili king kangatba na ning dagat-dagatan king metung ya mu ing bangkang atyu karin. Balu ra king e ya sinake i Jesus king bangkang seken da ring alagad na, nune ding alagad na ila mung meko.

²³ Oneng ating mapilan a bangkang menibatan Tiberias a sinadsad malapit king lugal nung nu da la pengan ding tinape kaybat nang pepasalamat ning Ginu.

²⁴ Inyang ikit da ring tau king alayu karin i Jesus ni ding alagad na, sinake la kareting bangka at minta la Capernaum ban panintunan de i Jesus.

²⁵ Inyang ikit da ne i Jesus king kangatba na ning dagat, kitnan de. Ngara, Maestro, kapilan ka pa dinatang keti?

²⁶ Nganang mekibat, Ing katutuan sasabian ku kekayu: panintunan yu ku e uling ikit yu la ding depat kung milagru, nune uling mengan kayu at kinabsi karing tinape.

²⁷ E yu panintunan ing masisirang pamangan, nune panintunan yu ing pamangan a manatili angga king bie alang angga. Ibie na iti kekayu ning Anak ning Tau uling ya ing dininan nang upaya ning Dios Ibpa.

²⁸ Inya kitnan de, Nanu ing kailangan ming daptan ban arapat mi ing parapat ning Dios?

²⁹ Nganang mekibat Jesus, Iti ya ing parapat na ning Dios: maniwala kayu king tinubud na.

³⁰ Ngara kang Jesus, Nanu ing milagrung arapat mu ban akit mi at maniwala kami keka? Nanu ing kekang daptan?

³¹ Mengan lang manna king disyerto ding makatua mi. Agpang king kasulatan, Dininan na lang tinape ibat banua ban apangan da.

³² Nganang mekibat Jesus, Ing katutuan sasabian ku kekayu: aliwa i Moises ing minie kekayu king tinapeng ibat banua; nune ing Ibpa ku ya ing babie king tune tinape a ibat banua.

³³ Uling ing tinape a babie na ning Dios ya itang titipang ibat banua at babie yang bie king yatu.

³⁴ Ngara, Dinan mu kaming parati, ginu, kaniting tinape.

³⁵ Nganang Jesus karela, Aku ing tinape ning bie. E ya dumanup kapilan man ing lumapit kanaku at e ya kumaung danum kapilan man ing maniwala kanaku.

³⁶ Antimo ing asabi ku na kekayu, ikit yu na ku, makanyan man e kayu pa bisang maniwala kanaku.

³⁷ Lumapit la kanaku ding sablang babie na ning Ibpa kanaku at e ke tanggian ing ninumang lumapit kanaku,

³⁸ uling tinipa kung ibat banua e ban daptan ing sarili kung kaburian, nune ing kaburian na nitang mitubud kanaku.

³⁹ Iti ya ing kaburian na nitang mitubud kanaku: king e ku kabatingan agyang metung mu karing sablang binie na kanaku, nune pasublian ku la ngan mie king tauling aldo.

⁴⁰ Uling iti ya ing kaburian nang Ibpa ku: ing balang metung a manakit king Anak at maniwala keya mika bie yang alang angga at pasublian keng mie king tauling aldo.

⁴¹ Mibubulungan la ding Judio uling sinabi na, Aku ing tinape a tinipa ibat banua.

⁴² Sinabi ra, Aliwa iti i Jesus a anak nang Jose? Kakilala ta ya i tata na at ima na! Makananu nang asabing tinipa yang ibat banua?

⁴³ Mekibat ya i Jesus, E na kayu mibubulungan.

⁴⁴ Alang makalapit kanaku subali mu nung ilapit ne ning Ibpang mitubud kanaku at pasublian keng mie king tauling aldo.

⁴⁵ Makasulat karing libru da ring propeta, At ding sabla turuanan na la ning Dios. Lalapit la kanaku ding sablang mekaramdam at mebiasa king turu na ning Ibpa.

⁴⁶ Iti e mangabaldugan king atin nang menakit king Ibpa; ita mung ibat king Dios ya ing bukud menakit na king Ibpa.

⁴⁷ Ing katutuan sasabian ku kekayu: atin yang bie alang angga ing maniwala.

⁴⁸ Aku ing tinape ning bie.

⁴⁹ Mengan lang manna king disyerto ding makatua yu, makanyan man mete la.

⁵⁰ Oneng ing amanuan ku ya itang tinape a ibat banua; ing ninumang mangan kaniti e ya mate.

⁵¹ Aku ing mabie tinape a tinipang ibat banua. Ing ninumang mangan kaniti mie ya kapilan man. At ing laman ku ya ing tinape a ibie ku ban mie ya ing yatu.

⁵² Uli na niti, mapali lang mibadbaran ding Judio. Ngarang mipapangutang, Makananu nang aibie kekatamu ning taung iti ing laman na ba tamung apangan?

⁵³ Nganang Jesus karela, Ing katutuan sasabian ku kekayu: nung e kayu mangan king laman na ning Anak ning Tau at minum king daya na e kayu mika bie king sarili yu.

⁵⁴ Ing mangan king laman ku at minum king daya ku atin yang bie alang angga, at pasublian keng mie king tauling aldo.

⁵⁵ Uling ing laman ku tune yang pamangan at ing kanakung daya tune yang inuman.

⁵⁶ Ing mangan king laman ku at minum king daya ku manatili ya kanaku at aku manatili ku keya.

⁵⁷ Tinubud na ku ning mabie Ibpa at king uli na mabibie ku; anti munaman ing mamangan kanaku mabibie ya king uli ku.

⁵⁸ Iti ya ing tinapeng tinipa ibat banua. E ya anti king pengan ding makatua yu. Mengan la, oneng kaybat mete la. Ing mamangan king tinapeng iti mie ya kapilan man.

⁵⁹ Sinabi nang Jesus iti kilub ning sinagoga inyang tuturu ya Capernaum.

⁶⁰ Ngara ding dakal karing alagad na inyang dimdam da iti, Masakit ing sasabian na. Ninu ing makatanggap kanyan?

⁶¹ Oneng balu nang Jesus king mibubulungan la tungkul kaniti. Inya sinabi na karela, Magugulu kayu pamisip kanite?

⁶² O nung akit ye pa ing Anak ning Tau a magbalik king kabilianan na king minuna?

⁶³ Ing Espiritu ya ing babie bie. Ala yang aibie ing laman. Ding amanung sinabi ku kekayu Espiritu la at bie.

⁶⁴ Oneng ating mapilan kekayu a e maniwala. (Uling manibat king kapupurmeruan balu nang Jesus nung ninu ding e maniwala at nung ninu ing magtaksil keya.)

⁶⁵ At ngana pa, Iti yang sangkan nung inya sinabi ku kekayu king alang milapit kanaku subali mu nung burian na ning Ibpa.

⁶⁶ Manibat na kanita dakal na la karing alagad na ding ginulut at e na mekiabe kang Jesus.

⁶⁷ Inya sinabi nang Jesus karing labing adua, Ikayu, bisa kayu namang mako?

⁶⁸ Nganang mekibat Simon Pedro, Ginu, kenu ke pa munta? Atyu la keka ding amanung babie bie alang angga.

⁶⁹ Maniwala kami at balu mi na ngeni king ika ing Banal ning Dios.

⁷⁰ Pekibat nang Jesus, E ra kayu wari pinili ikayung labing adua? Makanyan man ing metung kekayu diablo ya!

⁷¹ Ing amanuan na ya i Judas; ing anak nang Simon Iscariote. Metung ya i Judas karing labing adua; at ya ing magtaksil kang Jesus.

7

¹ Kaybat na nita, miglakbe ya i Jesus king Galilea. E ya bisang maglakad king Judea uling buri deng paten ding Judio.

² Malapit na kanita ing piesta da ring Judio, ing piesta da ring Tolda.

³ Inya ngara kang Jesus ding kapatad nang lalaki, Mako ka keti at munta ka Judea ban akit da la ring kekang alagad ding dapat mu.

⁴ Uling alang taung darapat makalihim, nung bisa yang maging pikabaluan. Anti na ning daraptan mu na la deting bage, pakilala na ka king yatu! (

⁵ Agyang ding kapatad nang lalaki e la maniwala keya.)

⁶ Nganang Jesus karela, E pa dinatang ing panaun ku, oneng ing panaun yu e mamako.

⁷ E na kayu pikasaman ning yatu, oneng kasaman na ku uling patutuan ku king ding dapat na marawak la.

⁸ Ikayu na mung makipamiesta. E ku tumagun uling e pa panaun ban kimut ku.

⁹ Inyang asabi na iti karela, pepailakuan ya Galilea.

¹⁰ Kalako da ring kapatad na ban makipamiesta, minta ya mu rin i Jesus, oneng e mu hayagan nune pasalikut.

¹¹ Panintunan de ring pamuntuk da ring Judio king piesta. Ngarang mengutang, Nu ya karin?

¹² At misisitsitan la ding dakal a tau tungkul kang Jesus. Ngara ding aliwa, Mayap yang tau. Ali ya, uling lilili na la deng tau, ngara naman ding aliwa pa.

¹³ Oneng alang migsalitang hayagan tungkul kang Jesus uli na ning takut da karing pamuntuk da ring Judio.

¹⁴ Inyang halus mepitna na ing piesta, minta ya i Jesus king Templo at tinuru ya.

¹⁵ Pigmulalan da iti ding pamuntuk da ring Judio. Ngarang sinabi, Makananu yang mebiasa ing taung iti kabang e ne man megaral?

¹⁶ Mekibat ya i Jesus, E kanaku ing tuturu ku, nune ibat king Dios a mitubud kanaku.

¹⁷ Ninuman ing bisang tupad king kaburian ning Dios, abalu na nung ing kanakung tuturu ibat king Dios o nung aku maniabi ku king sarili kung kayupayan.

¹⁸ Buri na ning maniabi king sarili nang kayupayan ing miparangalan ya ing sarili na. Oneng ing manintun king dangalan na ning mitubud keya tapat ya at alang kalaraman keya.

¹⁹ Aliwa wari i Moises ing minie kekayu king Kautusan? Makanyan man ala metung man kekayu ing tutupad king Kautusan. Obat buri yu kung paten?

²⁰ Mekibat la ding tau, Alipnan na ka pin ning demonyu! Ninu wari ing bisang makamate keka?

²¹ Pekibatan na lang Jesus, Metung pa mung bage ing depat ku at pigmulalan yu na.

²² Binie neng Moises kekayu ing Kautusan tungkul king sirkunsisyun (iti e ibat kang Moises, nune karing makatua yu) at magsirkunsisyun kayu agyang king Aldo ning Sabbath.

²³ Nung sirkunsisyunan ye ing metung a anak king Aldo ning Sabbath ban matupad ing Kautusan nang Moises, obat mimimua kayu kanaku uling pepakayap keng lubus ing metung a tau king Aldo ning Sabbath?

²⁴ Tuknang kayung mamatul agpang mu king akakit yu, nune matul kayu ketang matulid.

²⁵ Ngarang migsalita ding mapilan a tau Jerusalem, Aliwa iti ing taung buri dang paten?

²⁶ Pagumasdan ye, magsalita yang hayagan at ala lang asabi laban keya! Pota galang balu ra na ding pamuntuk king ya ing Cristo?

²⁷ Alang makibalu metung man king lugal a panibatan na potang datang ya ing Cristo; oneng balu tamu nung nukarin ya ibat ing taung iti.

²⁸ Inya king pamanuru nang Jesus kilub ning Templo matimid nang sinabi, Talaga kayang balu yu ko at balu yu nung nukarin ku menibat? E ku dinatang king sarili kung kaburian. Itang mitubud kanaku tutu ya; oneng e ye balu.

²⁹ Aku balu ke uling ibat ku keya at ya ing mitubud kanaku.

³⁰ Uli na niti, buri deng dakpan; oneng alang dinakap keya uling e pa miras ing oras na.

³¹ Makanyan man dakal la karing tau ding meniwala kang Jesus at ngarang sinabi, Potang datang ne ing Cristo, gawa ya kayang dakal pang milagru kesa karing gewa na ning taung iti?

³² Dimdam da ring Pariseo ing babalita da ring tau tungkul kang Jesus, at ding pamuntuk da ring pari, at ding Pariseo mitubud lang guardia ba reng dakpan.

³³ Inya sinabi nang Jesus, Akayabe yu ku king ditak namung panaun at mibalik na ku ketang mitubud kanaku.

³⁴ Panintunan yu ku oneng e yu ku akit; nung nu ku munta e kayu makapunta.

³⁵ Ngarang misabisabi ding pamuntuk da ring Judio, Nukarin ya kaya munta? Obat e ta ya malyaring akit? Munta ya kaya karing Judio a manuknangan karing siudad da ring Griego? Turu ya kaya karing Griego?

³⁶ Nanu ing buri nang sabian king pamagsalita nang Panintunan yu ku, oneng e yu ku akit, at Nung nu ku munta e kayu makapunta?

³⁷ King tauling aldo, ing maragul diling aldo na ning piesta, tinalakad ya i Jesus at sinabi nang masikan, Nung ing ninuman kakau ya, lumapit ya kanaku at minum.

³⁸ Agpang king sasabian na ning kasulatan, Ing maniwala kanaku, manibat king pusu na magus la ding batis ning mabie danum.

³⁹ Iti sinabi na tungkul king Espiritu a tanggapan ding maniwala keya. E ya pa miyabie kanita ing Espiritu uling e ya pa mipaligayan i Jesus.

⁴⁰ Dakal la ding taung mekaramdam kaniti at sinabi ra, Tune pin ya ing Propeta!

⁴¹ Ngara naman ding aliwa, Ya pin ing Cristo! Oneng ding aliwa sinabi ra, Manibat ya wari Galilea ing Cristo?

⁴² Sasabian na ning kasulatan king ing Cristo manibatan ya king lahi nang David at manibatan ya Betlehem, ing balen nung nu ya menuknangan i David.

⁴³ Inya misagsag la ding tau tungkul kang Jesus.

⁴⁴ Buri da ring mapilan ing dakpan de, oneng alang dinakap keya.

⁴⁵ Migbalik la ding guardia karing pamuntuk da ring pari at Pariseo. Ngarang kinutang, Baket e ye dela keti?

⁴⁶ Mekibat la, Ala pang taung miniabing anti ing taung iti!

⁴⁷ Kitang da ring Pariseo karela, Ikayu man alinlang na na kayo?

⁴⁸ Atin na waring pamuntuk ding Judio o metung mu man Pariseo a meniwala na kang Jesus?

⁴⁹ Ala lang balu ding dakal a taung den king Kautusan nang Moises, inya makasumpa la!

⁵⁰ Ing metung karela, i Nicodemo, itang minta kang Jesus king misan a bengi, migsalita ya karela.

⁵¹ Ngana, Agpang king Kautusan tamu, e ta ya sukat atulan ing metung a tau anggang e tamu pekiramdaman at abalu ing depat na.

⁵² Pekibat da kang Nicodemo, Ika man tau ka Galilea? Pagaralan me ing Kasulatan at akit mu king alang lunto propeta a tau Galilea.

⁵³ [Minuli ya ing balang metung karela king sarili nang bale,

8

¹ oneng minta ya i Jesus king Bunduk ding Olibo.

² At kabukasan abak a maranun minta yang pasibayu king Templo. Lepitan de ring sablang tau karin. Linukluk ya i Jesus at tiru na la.

³ Dela re king arap na ding talaturu ning Kautusan at ding Pariseo ing metung a babaing merakap makipangalugud. Pepatalakaran de ing babai king arap da

⁴ at ngara kang Jesus, Maestro, merakap ya ing babaing iti a makipangalugud.

⁵ Agpang king Kautusan, inutus na kekatamung Moises king ing anti kaniting babai paten ya king basibas batu. Nanu ing asabi mu tungkul keya?

⁶ Sinabi ra iti ba reng pakirakpan; ban atin lang abusbus laban kang Jesus. Dinuku ya i Jesus at king kapamilatan na ning taliri na sinulat ya king gabun.

⁷ Sigiran de king karelang pamangutang; inya inarapan na lang Jesus at sinabi na karela, Ing ninuman alang kasalanan kekayu ya ing munang masibas keya.

⁸ Dinuku yang pasibayu at sinulat ya king gabun.

⁹ Inyang dimdam da iti meko lang tunggal-tunggal, megumpisa king matuang dili. I Jesus na mu ing melakuan at ing babaing makatalakad arap na.

¹⁰ Minatna ya i Jesus at ngana king babai, Nu la karin? Ala waring mitagan metung man ban matul keka?

¹¹ Nganang mekibat, Ala pu, ginu. Nganang Jesus, Aku man, e ra ka atulan. Mako na ka at e na ka mikakasalang pasibayu.]

¹² Pasibayu yang migsalita i Jesus karing Pariseo. Ngana, Aku ing sulu na ning yatu. E ya lumakad king dalumdum ing tutuki kanaku, nune mika sulu yang babie bie.

¹³ Ngara ding Pariseo, Ika mu ing patutu tungkul king sarili mu; e tutu ing sasabian mu.

¹⁴ Pekibat nang Jesus, Agyang aku ing patutu tungkul king sarili ku ing pamipatutu ku katutuan uling balu ku nung nu ku menibat at nung nu ku munta. Oneng e yu balu nung nu ku menibat at nung nu ku munta.

¹⁵ Mamatul kayu agpang king pamanatul tau; oneng aku ala kung atulan ninuman.

¹⁶ Agyang munie kung kayatulan, ing atul ku katutuan uling e mu akung dili ing mamatul, nune aku at ing Ibpang mitubud kanaku.

¹⁷ Makasulat king kekayung Kautusan king matanggap bilang katutuan ing pamipatutu ding adua katau.

¹⁸ Patutu ku tungkul king sarili ku at ing Ibpang mitubud kanaku patutu ya naman tungkul kanaku.

¹⁹ Inya kitang da, Nu ya karin ing Ibpa mu? Mekibat ya i Jesus, E yu ku balu ni e ye balu i Ibpa ku. Nung balu yu ku, balu ya naman ing Ibpa ku.

²⁰ Sinabi na lang deting amanu Jesus king lugal a pibaldugan ain kabang tuturu ya king Templo. Oneng alang dinakap kang Jesus uling e pa dinatang ing oras na.

²¹ Pasibayu nang sinabi karela, Mako ku at panintunan yu ku, oneng mate kayu king kekayung kasalanan. E kayu makapunta ketang nung nu ku munta.

²² Ngara ding Judio, Magpakamate ya kaya? Ita kaya ing sangkan nung inya sinabi nang E kayu makapunta ketang lugal nung nu ku munta?

²³ Mekibat ya i Jesus, Ibat kayu keti sulip; aku ibat ku babo. Ibat kayu king yatung iti; aku ali ku.

²⁴ Inya sinabi ku kekayu king mate kayu karing kasalanan yu. Talagang mate kayu karing kasalanan yu, nung e kayu maniwala king Aku pin Ya.

²⁵ Inya kitang da kang Jesus, Ninu wari ika? Pekibat nang Jesus, Aku itang sinabi ku na kekayu manibat na king kapupurmeruan.

²⁶ Dakal ku sukat sabian at atulan tungkul kekayu. Oneng ing mitubud kanaku tutu ya at ing dimdam ku keya ya mu ing sasabian ku king yatu.

²⁷ E ra aintindian king magsalita ya karela tungkul king Ibpa.

²⁸ Inya sinabi nang Jesus, Potang ikua yu neng tinas ing Anak ning Tau, kanita yu abalu king Aku pin Ya; at king ala kung daraptan king sarili kung upaya nune magsalita ku agpang king tiru na kanaku ning Ibpa.

²⁹ Kayabe ke ing mitubud kanaku; e na ku likuan dili-dili uling daraptan kung parati ing makaibie tula keya.

³⁰ Meniwala la ding dakal a mekaramdam karing bage a sinabi nang Jesus.

³¹ Inya sinabi nang Jesus karing Judiong meniwala keya, Nung tuparan yu ing tuturu ku, tune kayu ping alagad ku

³² at abalu yu ing katutuan at gawan na kayung malaya ning katutuan.

³³ Pekibat da kang Jesus, Lahi na keng Abraham at kapilan man e ke pa me-ipus kenu man. Makananu mung asabing Maging malaya kami?

³⁴ Mekibat ya i Jesus karela, Ing katutuan sasabian ku kekayu: ing balang mikakasala ipus ne ning kasalanan.

³⁵ E ya manatili ing ipus king pibalebale kapilan man, oneng manatili ya ing anak kapilan man.

³⁶ Nung ing Anak gawan na kayung malaya tune ping malaya kayu.

³⁷ Balu ku king lahi na kayung Abraham; makanyan man buri yu kung paten uling alang lugal ing tuturu ku karing pusu yu.

³⁸ Sasabian ku ing ikit ku king kanakung Ibpa, oneng daraptan yu ing kekayung dimdam king kekayung tata.

³⁹ Pekibat da kang Jesus, I Abraham ya ing tatang mi. Nganang Jesus karela, Nung anak na kayung Abraham, depat yu sa ing dapat nang Abraham.

⁴⁰ Oneng ngeni buri yu kung paten; akung taung maniabi kekayu king katutuan a dimdam ku king Dios. E anti kanyan ing depat nang Abraham!

⁴¹ Ing daraptan yu kalupa na ning daraptan na ning sarili yung tata. Pekibat da kang Jesus, E ke anak king lual; atin keng metung a tata, ing Dios.

⁴² Nganang Jesus karela, Nung ing Dios ya ing kekayung Tata, sukat ing luguran yu ku uling dinatang kung menibat king Dios. E ku dinatang king sarili kung kaburian, nune ya ing mitubud kanaku.

⁴³ Baket e yu aintindian ing sasabian ku? Uling e yu atanggap ing sasabian ku.

⁴⁴ Ing diablo ya ing tata yu at ing buri nang tata yu ya ing buri yung daptan. Makamate ya manibat na king minuna at kalaban ne ning katutuan uling alang katutuan keya. Neng maglaram ya ing diablo, magsalita ya agpang king sarili nang katutubu, uling malaram ya at ya ing tata na ning kalaraman.

⁴⁵ Oneng sasabian ku ing katutuan, inya e yu ku paniwalan.

⁴⁶ Ninu kekayu ing makapatutu king mikasala ku? Nung katutuan ing sasabian ku, baket e yu ku paniwalan?

⁴⁷ Ing menibat king Dios makiramdam ya karing amanu na ning Dios. Oneng e kayu ibat king Dios inya e kayu bisang makiramdam.

⁴⁸ Ngara ding Judio kang Jesus, E ke wari tinud king sinabi ming Samaritano ka at alipnan na ning demonyu?

⁴⁹ Mekibat ya i Jesus, E na ku alipnan ning demonyu, nune igagalang ke ing Ibpa ku, oneng ikayu e yu ku gagalangan.

⁵⁰ Makanyan man, e ku panintunan ing sarili kung dangalan; ating metung a manintun kaniti at ya ing mamatul.

⁵¹ Ing katutuan sasabian ku kekayu: ing tutupad king tuturu ku e na takman kapilan man ing kamatayan.

⁵² Ngara ding Judio, Ngeni, siguradu na kami king alipnan na ka pin ning demonyu! Mete ya i Abraham, antimu rin ding propeta; makanyan man sasabian mu, Ing tutupad king tuturu ku e na takman kapilan man ing kamatayan.

⁵³ Maygit ka pa wari king tata ming i Abraham a mete na? At mete na la naman ding propeta. King pamalak mu ninu ika?

⁵⁴ Pekibat nang Jesus, Nung parangalan ku ing sarili ku iti alang kabaldugan. Ing Ibpa ku ya ing parangal kanaku. Ya ing amanuan yung Dios yu.

⁵⁵ Oneng ikayu kapilan man e ye balu, aku balu ke. Nung sabian kung e ke balu maging malaram kung kalupa yu. Oneng balu ke at tutuparan ku ing amanu na.

⁵⁶ Metula ya i tata yung i Abraham inyang abalu na king akit na ing paniatang ku at ikit na iti at mesaya ya.

⁵⁷ Inya ngara ding Judio, Ala ka pang limang pulung banua tua at ikit mu ne i Abraham?

⁵⁸ Mekibat ya i Jesus, Ing katutuan sasabian ku kekayu: atyu na ku bayu ya mibait i Abraham.

⁵⁹ Inya kinangwa lang batu ban basibasan de i Jesus, oneng sinalikut ya at meko ya king Templo.

9

¹ Kabang lalakad ya i Jesus ikit ne ing metung a lalaking bulag ibat na king pangabait na.

² Kitang da ring alagad na, Maestro, ninu ing makikasalanan king pangabait nang bulaging lalaking iti o ding pengari na?

³ Mekibat ya i Jesus, Bulag ya e uling mikasala ya o ding pengari na. Iti milyari ban king kapamilatan na mibulalag la ding dapat na ning Dios.

⁴ Kabang aldo pa sukat ta lang daptan ding dapat na nitang mitubud kanaku. Ing bengi daratang nung kapilan ala nang makapagobra.

⁵ Kabang atyu ku king yatu, aku ing sulu ning yatu.

⁶ Inyang asabi na iti, linura ya king gabun at ginawa yang burak king kapamilatan na ning gabun at lura. At kiskas na ing burak karing mata na ning bulag.

⁷ Ngana, Munta ka at manimu king Sibul ning Siloe. (Ing Siloe mangabaldugan yang Tinubud.) Inya minta ya at menimu at mibalik yang manakit na.

⁸ Ngara ding kasiping nang bale at ding menakit keya inyang magpalimus ya, Aliwa iti ing lalaking parating makalukluk at magpalimos?

⁹ Ya pin, ngarang mekibat ding mapilan. Aliwa ya, kalupa nia mu, ngara naman ding aliwa. Oneng sinabi na ning bulag, Aku ita.

¹⁰ Kitnan de, Makananu lang mesala ding mata mu?

¹¹ Pekibat na, Ginawa yang burak ing taung ausan dang Jesus at kiskas na iti karing mata ku at sinabi na kanaku, Munta ka king Siloe at manimu ka. Inya minta ku at menimu at menakit ku.

¹² Ngarang kinutang, Nu ya karin? Nganang mekibat, E ku balu.

¹³ Dela re karing Pariseo ing lalaking sadiang bulag.

¹⁴ Aldo Sabbath inyang ginawa yang burak i Jesus at pepasala ne mata.

¹⁵ Kitnan dia naman ding Pariseo nung makananu yang mesala mata. Nganang mekibat karela, Kiskas na ing burak karing mata ku at menimu ku at ngeni manakit na ku.

¹⁶ Ngara ding mapilan a Pariseo, E ya king Dios ing taung ita uling e ya tutupad king Aldo ning Sabbath. Oneng sinabi da ring mapilan, Makananu yang makarapat ing taung makasalanan karing anti kareting milagru? Milaban-laban ing sasabian da.

¹⁷ Inya pasibayu deng kitnan ing sadiang bulag. Ngara, Ika naman, nanu ing asabi mu tungkul keya anti na ning pepasala na la ding mata mu? Pekibat na, Propeta ya.

¹⁸ E la bisang maniwala ding Judio king sadia yang bulag at ngeni manakit ne anggang e da la inaus ding pengari na.

¹⁹ At kitnan da la, Anak ye iti? Sasabian yu king mibait yang bulag. Nanu ing sangkan baket manakit ya ngeni?

²⁰ Mekibat la ding pengari na, Balu mi king ya ing anak mi at king mibait yang bulag.

²¹ Oneng e mi balu nung makananu yang manakit na ngeni o nung ninu ing mekapasala karing mata na. Kutnan ye; atyu ne king idad at makapagsalita ya para king sarili na!

²² Makanyan lang migsalita ding pengari na uling tatakut la karing Judio at uli na ning pikasundu da ring Judio king itiwalag de king sinagoga ing ninumang sumabi king i Jesus ya ing Cristo.

²³ Inya ngara ding pengari na, Kutnan ye; atyu ne king idad!

²⁴ Inya pasibayu deng inaus ing sadiang bulag at ngara keya, Sabian mu ing katutuan arapan na ning Dios! Balu mi king makasalanan ya ing taung ita.

²⁵ Nganang mekibat, E ku balu nung makasalanan ya o ali. Metung mu ing balu ku: kanita bulag ku, oneng ngeni manakit ku.

²⁶ Kitang da, Nanu ing depat na keka? Makananu na lang pepasala ding mata mu?

²⁷ Pekibat na, Sinabi ku na kekayu at e kayu bisang maniwala. Baket buri yung damdaman pasibayu? Bisa kayu namang maging alagad na?

²⁸ At ininsultu de, ngara, Ika na sanang diling alagad na, oneng ikami alagad na kaming Moises.

²⁹ Balu mi king migsalita ya ing Dios kang Moises, oneng tungkul king taung iti, e mi man balu nung nu ya ibat!

³⁰ Nganang mekibat ning taung mesala mata, Yan ing makapagmulala! E yu balu nung nu ya ibat, makanyan man ya ing pepasala karing mata ku!

³¹ Balu tamu king e na la pakiramdaman ning Dios ding makasalanan, oneng pakiramdaman na la ding tune sasamba keya at tutupad king kaburian na.

³² Manibat na king pangalalang na ning yatu ala pang mibalitang mekapasala karing mata na ning taung mibait bulag.

³³ Nung e ya ibat king Dios ing taung iti, ala yang arapat nanuman.

³⁴ Pekibat da, Ikang mipanganak at meragul king kasalanan, ikang turu kekame? At tiwalag de king sinagoga.

³⁵ Abalitan nang Jesus king tiwalag de; inya inyang ikit ne sinabi na keya, Maniwala ka wari king Anak ning Tau?

³⁶ Mekibat ya, Ninu ya, ginu, ban paniwalan ke?

³⁷ Nganang Jesus, Ikit mu ne at ya ing kapagsalita mu.

³⁸ Ngana ning lalaki, Maniwala ku, Ginu! At sinamba ya kang Jesus.

³⁹ Sinabi nang Jesus, Dinatang ku king yatung iti ban matul, ban manakit la ding bulag at mabulag la ding manakit.

⁴⁰ Dimdam da iti ding mapilan karing Pariseo a atyu karin kayabe na, at kitang da, Ing buri mung sabian bulag kame?

⁴¹ Mekibat ya i Jesus, Nung bulag kayu ala kayu sanang kasalanan; oneng sasabian yu ngeni, Manakit kami, inya manatili kayung makasalanan.

10

¹ Ing katutuan sasabian ku kekayu: ing lulub king kural da ring tupa a e daralan king pasbul nune king aliwang paralan, ing taung ita mapanako ya at tulisan.

² Oneng ing lulub king pasbul, ya ing pastul da ring tupa.

³ Ya ing bubuklatanan na ning bante pasbul. Pakiramdaman da ring tupa ing siwala na kabang ausan na la king lagyu ra at panimunan na la king paglual da.

⁴ At nung alual na na la ngan, manimuna ya karela at tukian de ring tupa uling balu re ing siwala na.

⁵ Oneng e re tukian ing aliwang tau, nune takasan de uling e re balu siwala ing aliwang tau.

⁶ Sinabi neng Jesus iting talimhaga karela, oneng e ra aintindian ing buri nang sabian.

⁷ Inya pasibayu nang sinabing Jesus karela, Ing katutuan sasabian ku kekayu: Aku ing pasbul na ning kural da ring tupa.

⁸ Mapanako la at tulisan ding sablang dinatang makauna kanaku, oneng ding tupa e da la pekiramdaman.

⁹ Aku ing pasbul. Miligtas ya ing ninumang lungub king kapamilatan ku. Malaya yang lungub at lual at makatagpu yang pastulan.

¹⁰ Daratang ya ing mapanako ba ya mung manako, makamate, at manyira. Dinatang ku ba lang mika biebie a labis-labis.

¹¹ Aku ing mayap a pastul. Makasadia yang mate ing mayap a pastul para karing tupa na.

¹² Ing upahan, potang akakit neng daratang ing asung-gubat, darayu ya at tatakas uling upahan ya mu at uling e na la bandi ding tupa. Inya sagmitan na la ning asung-gubat at isalbag ding tupa.

¹³ Tatakas ya ing taung upahan uling upahan ya mu at ala yang malasakit karing tupa.

¹⁴ Aku ing mayap a pastul. Balu ku la ding kanaku at balu da ku ding kanaku,

¹⁵ nung makananung ing Ibpa balu na ku at ing Ibpa balu ke. At babie ku ing kanakung bie para karing tupa.

¹⁶ Atin kung aliwang tupa a ala pa keting kural. Kailangan ku la namang panimunan deti; at pakiramdaman da ing siwala ku. Maging metung nia mu ing kawan at metung ing pastul.

¹⁷ Kaluguran na ku ning Ibpa uling makasadia kung ibie ing kanakung bie ba keng tanggapan pasibayu.

¹⁸ E ne akua ninuman kanaku iting bie, nune kusa keng babie iti. Atin kung upayang ibie at upayang kumang pasibayu kaniti. Iti ya ing utus na kanakung Ibpa ku.

¹⁹ Pasibayu lang misagsag ding Judio uli da reting amanu.

²⁰ Dakal la karela ding sinabi, Alipnan ne ning demonyu! Sira ya buntuk! Baket pakiramdaman ye?

²¹ Ngara naman ding aliwa, E makapagsalitang anti kaniti ing alipnan na ning demonyu! Makapasala ya waring mata ing demonyu?

²² Piesta na ning Pamitalaga king Templo kanita karin Jerusalem at panaun na ning dimla.

²³ Atyu king Templo i Jesus; lakad-lakad ya king Balkon nang Solomon,

²⁴ at pilupungnan de ring Judio. Ngara kang Jesus, Angga kapilan ing ibili mu kami king pamikekelangan? Nung ika ing Cristo, sabian mung tapatan kekami.

²⁵ Mekibat ya i Jesus, Sinabi ku na kekayu, oneng e kayu meniwala. Ding dapat a daraptan ku king lagyu nang Ibpa ku ilang patutu tungkul kanaku.

²⁶ Oneng e kayu bisang maniwala uling e ra kayu tupa.

²⁷ Makiramdam la king siwala ku ding kanakung tupa at akikilala ku la at tutuki la kanaku.

²⁸ Dirinan ku lang bie alang angga at e la mipahamak kapilan man. Alang makasamsam kareti kanaku.

²⁹ Ing Ibpa ku a minie kareti kanaku maygit ya karing sabla at alang makasamsam kareti king gamat nang Ibpa ku.

³⁰ Aku at ing Ibpa metung kami mu.

³¹ Pasibayu lang dinamput batu ding Judio ba reng basibasan.

³² Inya sinabi na karela, Pepakitanan da kayung dakal a mayap a dapat ibat king Ibpa, isanu kareti ing sangkan ning pamamasibas yu kanaku?

³³ Pakibat da, Babasibasan da ka e uli na ning mayap mung dapat, nune uli na ning pamaglapastangan mu king Dios! Uling magbansag kang Dios kabang metung ka mung tau!

³⁴ Mekibat ya i Jesus karela, E wari makasulat king kekayung Kautusan, Sinabi ku, dios kayu?

³⁵ Nung ausan na lang dios ning Kautusan ding taung dininan na ning Dios king amanu na, e malyaring payalian ing kasulatan.

³⁶ Pinili na ku ning Ibpa at tinubud keti king yatu. Makananu yung asabi kanaku ngeni ing lalapastanganan ke ing Dios uling sinabi kung Aku ing Anak ning Dios?

³⁷ Nung e ku la daraptan ding parapat ning Ibpa ku, e kayu sukat maniwala kanaku.

³⁸ Nung daraptan ku la, agyang e kayu maniwala kanaku, karing mu mang dapat ku sukat kayung maniwala ban abalu yu at aintindian king ing Ibpa atyu kanaku at aku atyu ku keya.

³⁹ At pasibayu deng pekikuanan dakpan i Jesus, oneng ikua na lang apangilagan.

⁴⁰ Pasibayu yang minta i Jesus king kasumangid na ning Ilug ning Jordan, king lugal nung nu ya minunang meminyag i Juan. Menatili ya karin.

⁴¹ At dakal lang tau ding minta kang Jesus. Ngara, Ala yang depat a milagru i Juan, oneng tutu ing sablang bage sinabi na tungkul king taung iti.

⁴² At dakal la ding taung meniwala kang Jesus karin.

11

¹ Ating metung a taung masakit; Lazaro ing lagyu na. Tau ya Betania, ing balen nang Maria at ning kapatad nang i Marta. (

² I Maria ya ing mitugtug pabanglu at menamulis karing bitis na ning Ginu king kapamilatan na ning buak na. Kapatad ne i Lazaro, ing masakit.)

³ Inya pepabalita da ring mikapatad a babai kang Jesus ing anti kaniti: Ginu, masakit ya ing kakaluguran mu.

⁴ Inyang tinggap nang Jesus iting balita, sinabi na, E na ikamate iting sakit; nune milyari iti para king ikaligaya na ning Dios ban mipaligayan ya ing Anak ning Dios king kapamilatan na niti.

⁵ Kaluguran na lang Jesus di Marta, Maria at i Lazaro.

⁶ Inyang abalitan nang masakit ya i Lazaro, menatili ya pang aduang aldo king lugal nung nu ya karin.

⁷ Kaybat na nita, sinabi na karing alagad, Tara, magbalik tamu Judea.

⁸ Ngara ding alagad, Maestro, bayu pamu buri da kang basibasan ding Judio; ngeni magbalik na ka na naman karin?

⁹ Nganang Jesus karela, E ya wari labing aduang oras ing patingapun? E ya mitakid ing ninumang lalakad king masala uling akakit na ing sala na ning yatu.

¹⁰ Oneng mitatakid ya ing ninumang lalakad king bengi uling alang sala keya.

¹¹ At ngana pa, Matudtud ya ing kakaluguran tamung i Lazaro, oneng puntalan ke ba keng gisingan.

¹² Ngara ding alagad, Ginu, nung matudtud ya, mipaldan ya.

¹³ Ing buri nang sabian Jesus, mete ne i Lazaro; bala da ring alagad ing karaniwan a pamanudtud ing amanuan na.

¹⁴ Inya malino nang sinabing Jesus karela, Mete ne i Lazaro.

¹⁵ Oneng king uli yu matula ku king ala ku karin ban maniwala kayu. Tara, puntalan ta ya.

¹⁶ I Tomas a mayayaus Kambal, sinabi na karing kalupa nang alagad, Tara, tukian ta ya ing Maestro ban nung mate ya, mate tamu munaman!

¹⁷ Inyang miras ne i Jesus, abalu na king apat neng aldo mikutkut i Lazaro.

¹⁸ Malapit ya ing Betania king Jerusalem; ating atlung kilometru manibat karin.

¹⁹ At dakal lang Judio ding dinalo kari Marta at Maria ba da lang damayan uli na ning pangamate na ning kapatad da.

²⁰ Panamdam nang Marta king daratang ya i Jesus, tinipa ya at seganan ne. Melakuan ya i Maria king bale.

²¹ Nganang Marta kang Jesus, Ginu, nung atyu ka keti e ya sana mete ing kapatad ku!

²² Agyang ngeni balu ku king ibie na keka ning Dios ing nanumang aduan mu.

²³ Nganang Jesus kang Marta, Mie yang pasibayu ing kapatad mu.

²⁴ Mekibat ya i Marta, Balu ku king mie yang pasibayu king tauling aldo.

²⁵ Nganang Jesus, Aku ing pamanyubling mebie at ing bie. Ing maniwala kanaku, agyang mate ya, mie yang pasibayu;

²⁶ at ing ninumang mabibie at maniwala kanaku e mate kapilan man. Paniwalan mu ite?

²⁷ Nganang mekibat, Wa, Ginu, paniwalan ku king ika ing Cristo, ing Anak ning Dios a datang keti king yatu.

²⁸ Pangasabi na niti, meko ya i Marta at inaus ne i Mariang kapatad na at sinitsit na, Atyu ing Maestro, kukutang na ka.

²⁹ Panamdam nang Maria kaniti, memalagua yang tinikdo at selubungan ne. (

³⁰ E pa miras kanita i Jesus king balen; atyu ya pa king lugal nung nu ne seganan Marta.)

³¹ Inyang ikit deng memalaguang tinikdo at linual, tikian de i Maria ding Judiong darame keya king bale. Bala ra munta ya king kutkutan ban manangis karin.

³² Miras ya king lugal nung nu ya karin i Jesus. Panakit na kang Jesus siniklaud ya i Maria king arap na at ngana, Ginu, nung atyu ka keti e sana mete ing kapatad ku!

³³ Panakit nang Jesus king i Maria manangis ya at pati ding Judiong kayabe na, mengisnawa yang malalam at metagkil ya kapanamdaman.

³⁴ Nganang kinutang Jesus karela, Nu ye kitkut? Mekibat la, Mekeni, Ginu at lawan mu.

³⁵ Kiniak ya i Jesus.

³⁶ Inya sinabi da ring Judio, Talagang kaluguran ne i Lazaro!

³⁷ Oneng ngara ding mapilan, Pepasala ne mata ing bulag! Baket pepaburen neng mete i Lazaro?

³⁸ Pasibayu yang mengisnawang malalam i Jesus at kaybat minta ya king kutkutan. Iti metung yang lukib a makatakap batung maragul.

³⁹ Nganang Jesus karela, Ilako ye ing batu. Mekibat ya i Marta, ing kapatad na ning mete, Ginu, mamau ne kanyan uling apat neng aldo makakutkut!

⁴⁰ Nganang Jesus, E ku wari sinabi keka king nung maniwala ka akit mu ing ligaya na ning Dios?

⁴¹ Inya leko re ing batu. Tinalanga ya banua i Jesus at ngana, Ibpa, pasalamat ku king pakiramdaman mu ku.

⁴² Balu ku king pakiramdaman mu ku kapilan man, oneng sinabi ku iti king uli da ring taung atyu keti ba lang maniwala king ika ing mitubud kanaku.

⁴³ Pangasabi na niti, kinulait yang masikan. Ngana, Lazaro, lumual ka!

⁴⁴ Linual ya ing mete; makabalut la ding gamat at bitis na king telang pamburul at makabalut yang imalan ing lupa na. Nganang Jesus karela, Kalagan ye at paburen yeng lumakad.

⁴⁵ Uli na niti, meniwala la kang Jesus ding keraklan karing Judiong dinalo kang Maria at menakit king depat na.

⁴⁶ Oneng minta la ding mapilan karela karing Pariseo at belita ra ing depat nang Jesus.

⁴⁷ Inya ding Pariseo ampon ding pamuntuk da ring pari inawad dang mipulung ya ing Sanhedrin. Ngarang kinutang, Nanu ing daptan tamu? Darapat yang dakal a milagru ing taung iti!

⁴⁸ Nung paburen ta niang makanyan, maniwala la keya ding sabla at datang la ding tau Roma at lasakan de ing kekatamung Templo at ing kekatamung bansa!

⁴⁹ Oneng nganang migsalita ning metung karela, i Caifas, ing Pekapun ding Pari king banuang ita, Ala kayung balu!

⁵⁰ E yu man aisip king mayap para king balen ing metung ya mu ing mate kesa king malasak ya ing mabilug a bansa!

⁵¹ Sinabi na iti e king sarili nang pamalak, nune bilang Pekapun ding Pari king banuang ita at inula na king mate ya i Jesus para king Israel.

⁵² At e mu para king bansang iti nune ban tipunan na lang anting metung mu ding makakalat nang anak ning Dios.

⁵³ Inya manibat king aldong ita minisip na lang paralan ban apapate re i Jesus.

⁵⁴ E ne linakad bulalagan i Jesus king Judea. Meko ya at minta king lugal a malapit king disyerto, king balen a mayayaus Efraim. Karin ya menatiling kayabe da ring alagad na.

⁵⁵ Malapit na ing Piesta ning Pamaglagpus da ring Judio. Dakal lang taung ibat karing balen at baryu ding minukiat Jerusalem bayu magpiesta ban gampanan da ing seremonia na ning pamaglinis.

⁵⁶ Panintunan de i Jesus at ngarang misabisabi kabang atyu la kilub ning Templo, Nanu ing pamalak yu? Datang ya kaya king piesta o ali ya?

⁵⁷ Oneng inutus da ring pamuntuk da ring pari at ding Pariseo king ing ninumang makibalu nung nu ya karin i Jesus kailangan nang ipabalu karela ban reng aparakap.

12

¹ Anam a aldo bayu ing Piesta ning Pamaglagpus, minta ya i Jesus king Betania, ing balen nang Lazaro a pepasublian nang mebie.

² Pigsadia deng apunan karin. Sinaup yang migsilbi i Marta at metung ya i Lazaro karing kasulu nang Jesus king lamesa.

³ I Maria naman kinangwa yang kapitnang litrung mal a pabanglung purung nardo. Kiskusan ne bitis i Jesus at pinulis na la deti king buak na. Sinalingalngal ing banglu king kabilugan a bale.

⁴ Oneng i Judas Iscariote, ing metung karing alagad nang Jesus, itang magtaksil keya, sinabi na,

⁵ Baket e mipisaling atlung dalan a salaping pilak iting pabanglu at mipamie la sa ding abli karing pakakalulu?

⁶ Sinabi na iti e uling atin yang malasakit karing pakakalulu, nune uling mapanako ya; ya ing tesoreru da at kukupit ya karing salaping ingatan na.

⁷ Oneng nganang Jesus, E ye pakialaman! Paburen yeng daptan na iti para king aldo na ning kanakung pangakutkut.

⁸ Kayabe yu la kabang panaun ding pakakalulu, oneng e kabang panaun ing kayabe yu ku.

⁹ Abalitan da ring dakal a Judio king atyu Betania i Jesus. Inya minta la karin, e mu king uli na, nune ban akit dia naman i Lazaro a pepasublian nang mebie.

¹⁰ Binalak da ring pamuntuk ding pari king papate ria naman i Lazaro

¹¹ uling king uli na dakal la ding Judiong kakawani karela at maniwala kang Jesus.

¹² Kabukasan, abalitan da ring dakal a taung dinatang makipamiesta king datang ya i Jesus.

¹³ Memangua lang sangang palma at linual la ba reng salubungan. Ngarang kukulisak, Purian ya ing Dios! Bendisyunan ne sa ning Dios ing daratang king lagyu ning Ginu!

¹⁴ Ikit neng Jesus ing metung a biserung asno at sekian ne, antimo ing sasabian na ning kasulatan:

¹⁵ Siudad ning Zion, e ka tatakut! Oyan, daratang ya ing ari mu, makasake ya king biserung asno!

¹⁶ King oras a ita, e ra aintindian iti ding alagad; oneng inyang mipaligayan ne i Jesus kanita ra aganaka king iti misulat tungkul keya at king depat da iti para keya.

¹⁷ Minie lang patutu tungkul kaniti ding dakal a taung atyu inyang inaus neng lumual i Lazaro king kutkutan ampon pepasublian mebie.

¹⁸ Iti ya ing sangkan nung inya selubungan de i Jesus ding dakal a tau; abalitan da king ya ing dinapat kaniting milagru.

¹⁹ Inya ngara ding Pariseo king metung at metung, Lawan yu, ala tamung akarapat! Tutukian de ring sablang tau!

²⁰ Ating mapilan a Griego karin a minta king piesta ban samba.

²¹ Linapit la deti kang Felipe a tau Betsaida, Galilea. Ngara, Malyari mi yang akit i Jesus?

²² Pintalan neng Felipe i Andres at sinabi na iti keya. At linapit la ilang adua kang Jesus at sinabi ra iti.

²³ Pekibat nang Jesus, Dinatang na ing oras ban mipaligayan ya ing Anak ning Tau.

²⁴ Ing katutuan sasabian ku kekayu: subali mu nung manabu ya king gabun ing binutil pale at mate, manatili yang dili-dili. Nung mate ya, mamunga yang dakal.

²⁵ Abating ne ning taung malugud king bie na ing bie na; oneng ing tanggi king bie na king yatung iti apapanatilian ne iti angga king bie alang angga.

²⁶ Ing ninumang bisang sumuyu kanaku kailangan yang tuki kanaku; nung nu ku karin, karin ya naman ing talasuyu ku. Parangalan neng Ibpa ku ing ninumang susuyu kanaku.

²⁷ Ngeni mababalisa ku pamisip. Nanu ing sabian ku? Sabian ku wari, Ibpa, iligtas mu ku king oras a iti? Ali, uling iti yang sangkan nung inya dinatang kuban dikilan ing kasakitan a iti.

²⁸ Ibpa, parangalan me ing lagyu mu. Kanita ing metung a siwalang ibat banua sinabi na, Peparangalan ku ne at parangalan ke pang pasibayu.

²⁹ Dimdam da ring taung atyu karin iting siwala at ngara, Menuldul! Sinabi da naman ding aliwa, Ating anghel a mekipagsalita keya!

³⁰ Mekibat ya i Jesus, Meramdam ya ing siwalang iti e king uli ku, nune king uli yu.

³¹ Panaun na ban atulan ya ing yatung iti. Mitabi ne ngeni ing pamuntuk na niting yatu.

³² At potang itas da na ku babo ning yatu, ilapit ku la kanaku ding sablang tau. (

³³ Sinabi na iti ban ipakilala na nung makananu deng ipapate.)

³⁴ Ngarang mekibat ding tau, Agpang king sasabian na ning Kautusan, ing Cristo manatili ya kapilan man. Inya makananu mung asabi king sukat yang itas ing Anak ning Tau? Ninu wari iting Anak ning Tau?

³⁵ Nganang Jesus karela, Ditak nang panaun ing akayabe ye ing sala. Lumakad kayu kabang atyu kekayu ing sala, pota arakap na kayu ning dalumdum. E na balu ning lalakad king dalumdum nung nu ya pupunta.

³⁶ Kabang atyu kekayu ing sala, maniwala kayu king sala ban maging talatuki na kayu ning sala. Inyang asabi nang Jesus iti, meko ya at selikutan na la.

³⁷ Agyang dakal ing milagrung depat na king akakit da, makanyan man e la meniwala keya.

³⁸ Uli na niti, metupad ing sinabi nang propeta Isaias: Ginu, ninu ing meniwala karing amanung dimdam da kekami? At kaninu na pepakilala ning Ginu ing upaya na?

³⁹ Iti yang sangkan nung inya e la meniwala, uling sinabi na namang Isaias:

⁴⁰ Binulag na la mata at pepasias a buntuk, ban e la manakit ding mata ra at e la makaintindi ding pamisip da, at e la mibalik a lub kaku ban pakayapan ku la.

⁴¹ Sinabi nang Isaias iti uling ikit na ing ligaya nang Jesus at migsalita ya tungkul keya.

⁴² Makanyan man, agyang karing pamuntuk da ring Judio dakal la ding meniwala kang Jesus. Oneng e ra pepaulata ing pamaniwala ra uli na ning takut da karing Pariseo, pota itiwalag da la king sinagoga.

⁴³ Buri da pa ing kapurian a ibat karing tau kesa king kapurian a ibat king Dios.

⁴⁴ Sinabi nang matimid Jesus, Ing maniwala kanaku maniwala ya e mu kanaku nune pati kanitang mitubud kanaku.

⁴⁵ At ing manakit kanaku akakit nia naman itang mitubud kanaku.

⁴⁶ Dinatang ku keti king yatu antimong sala ban ding sablang maniwala kanaku e na la manatili king dalumdum.

⁴⁷ Nung ating makiramdam karing amanu ku at e na la tutuparan, e ke atulan, uling e ku dinatang ban atulan ke ing yatu, nune ban iligtas ke.

⁴⁸ Ating matul king ninumang e tanggap kanaku at karing amanu ku. Ing amanung sinabi ku ya ing matul keya king tauling aldo!

⁴⁹ Uling e ku migsalita king sarili kung kayupayan, nune ing Ibpang mitubud kanaku ya ing minutus nung nanung sabian ku at ipabalu kekayu.

⁵⁰ At balu ku king babie bie alang angga ing utus na. Inya ing inutus nang sabian ku ning Ibpa ya ing sasabian ku.

13

¹ Bespera na kanita ning Piesta ning Pamaglagpus. Balu nang Jesus king dinatang na ing oras na ban mako ya keti king yatu at mibalik ne king Ibpa. Kaluguran na la ding bandi na a atyu king yatu at liguran na la angga king kawakasan.

² Kasulu na lang Jesus ding alagad na king apunan. Alulan na na ning diablo king isip nang Judas Iscariote a anak nang Simon ing pamagtaksil kang Jesus.

³ Balu nang Jesus king ing sablang upaya binie na na ning Ibpa keya at king ibat ya king Dios at papunta ya king Dios.

⁴ Tinalakad ya i Jesus, likas ne ing piblas na at bebatan na ing sarili na king tualya.

⁵ Kaybat, mitugtug yang danum king palanggana at pegumpisan na lang inos a bitis ding alagad. At pinulis na la king tualyang makababat king awakan na.

⁶ Nganang Simon Pedro inyang lapitan neng Jesus, Ginu, ikang manos karing bitis ko?

⁷ Pekibat nang Jesus, E mu pa aintindian ing daraptan ku ngeni, oneng bandang tauli aintindian mu.

⁸ Sinabi nang Pedro, E ku la malyaring paos ding bitis ku keka! Pekibat nang Jesus, Nung e ka paos bitis kanaku, ala kang pangataid kanaku.

⁹ Sinabi nang Simon Pedro, Ginu, nung makanyan, e mu ding bitis ku ilang wasan mu nune pati na ding gamat ku at ing buntuk ku!

¹⁰ Nganang Jesus, E ne kailangan manos ing mindilu na, subali karing bitis na, uling malinis ne mabilug a katawan. At malinis na kayu, oneng e ikayu ngan. (

¹¹ Uling balu nang Jesus nung ninung magtaksil keya; inya sinabi na, E ikayu ngan malinis na kayu.)

¹² Inyang aos na na la bitis at asulud na nang pasibayu ing piblas na migbalik ya king lamesa. Nganang kinutang karela, Aintindian yu ing depat ku kekayu?

¹³ Ausan yu kung Maestro at Ginu at tinud kayu; uling makanyan ku pin.

¹⁴ Nung akung kekayung Ginu at Maestro inos da kayu bitis, ikayu man sukat kayung mipapanos bitis.

¹⁵ Dininan da kayung alimbawa ban daptan yu naman ing anti ing depat ku kekayu.

¹⁶ Ing katutuan sasabian ku kekayu: e ya maygit ing ipus king panginuan na ni e ya maygit ing tinubud king mitubud keya.

¹⁷ Balu yu la deting bage at mapalad kayu nung tuparan yu la!

¹⁸ E para kekayu ngan ing sasabian ku. Balu ku la ding kanakung pinili. Oneng sukat matupad ing sasabian ning kasulatan, Pildak na ku ning pepakan ku.

¹⁹ Ngeni pa sasabian ku na iti kekayu ban nung mapalyari na, paniwalan yu king Aku pin Ya.

²⁰ Ing katutuan sasabian ku kekayu: ing tatanggap king ninumang tinubud ku, akung tatanggapan na at ing tatanggap kanaku tatanggapan ne itang mitubud kanaku.

²¹ Inyang asabi nang Jesus iti, melingasngas ya pilubluban at nganang migtapat, Ing katutuan sasabian ku kekayu: pagtaksilan na ku ning metung kekayu.

²² Mipaglalawe la ding alagad at e ra balu nung ninu ing amanuan na.

²³ Makahilig yang malapit kang Jesus ing pakamalan nang dili karing alagad na.

²⁴ Sininialan neng Simon Pedro at ngana, Ikutang mu na mo keya nung ninu ing amanuan na.

²⁵ Inya linapit ya kang Jesus at kitang na, Ginu, ninu ing amanuan mu?

²⁶ Pekibat nang Jesus, Isoso ke ing tinape at ing dinan ku kaniti, ya ita. At inyang asoso na ne ing tinape, inabut ne kang Judas, ing anak nang Simon Iscariote.

²⁷ Inyang atanggap na neng Judas ing tinape, linub ya keya i Satanas. Nganang Jesus, Daptan mu nang agad ing sukat mung daptan!

²⁸ Oneng alang makibalu metung man karing kasulu na nung baket sinabi na iti.

²⁹ Uling i Judas ya ing talaingat karing salapi ra, ating minisip king pasaliwan neng Jesus king kailangan da para king piesta o parinan na lang limus ding pakakalulu.

³⁰ Inyang apangan na neng Judas ing tinape, agad neng meko. Bengi na kanita.

³¹ Nganang Jesus kalako nang Judas, Ngeni mipaligayan ne ing Anak ning Tau at king kapamilatan na mipaligayan ya ing Dios.

³² Nung king kapamilatan na mipaligayan ya ing Dios, ing Dios naman paligayan neng agad ing Anak ning Tau.

³³ Anak ko, ditak nang panaun ing akayabe yu ku. Panintunan yu ku oneng sabian ku kekayu ngeni itang sinabi ku karing Judio, E kayu makapunta king puntalan ku.

³⁴ Babie ke kekayu ing metung a bayung kautusan: mikakalugud kayu. Nung makananu da kayung liguran, makanyan kayu namang mikakalugud.

³⁵ Abalu da ring sablang tau king alagad da kayu, nung mikakalugud kayu.

³⁶ Nganang kinutang Simon Pedro, Ginu, nu ka munta? Mekibat ya i Jesus, E ka makatuki ngeni kanaku ketang puntalan ku, oneng kaybat makatuki ka.

³⁷ Nganang pasibayung kinutang Pedro, Ginu, obat e ku makatuki keka ngeni? Idame ku ing bie ku para keka!

³⁸ Mekibat ya i Jesus, Idame mu ing bie mu kanako? Ing katutuan sasabian ku keka: alingad mu na kung mekatatlu bayu ya tulauk ing tatyo.

14

¹ Nganang sinabing Jesus karela, E kayu sukat mababalisa. Maniwala kayu king Dios at maniwala kayu naman kanaku.

² Ating dakal a kuartu king bale nang Ibpa ku. Nung e mu makanyan e ku sabian iti kekayu. Mako ku ban magsadiang lugal para kekayu.

³ At nung miras na ku at mekapagsadiang lugal para kekayu, mibalik kung pasibayu keti at ituki da kayu ban nung nu ku karin, karin kayu naman.

⁴ At balu yu ne ing dalan papunta king pupuntalan ku.

⁵ Nganang Tomas, Ginu, e mi man balu nung nu ka munta, makananu mi yang balu ing dalan?

⁶ Pekibat nang Jesus, Aku ing dalan, ing katutuan, at ing bie. Alang malyaring miras king Ibpa nung e mu king kapamilatan ku.

⁷ Nung balu yu ku, balu ya naman ing Ibpa. Manibat ngeni balu yu ne at ikit yu ne.

⁸ Sinabi nang Felipe, Ginu, ipakit me kekami ing Ibpa at managyu na iti kekami.

⁹ Mekibat ya i Jesus, Felipe, kalambat yu na kung kayabe e mu ku pa balu? Ing menakit kanaku, ikit na ne ing Ibpa. Baket sinabi mung Ipakit me kekami ing Ibpa?

¹⁰ E ka wari maniwala king atyu ku king Ibpa at ing Ibpa atyu kanaku? E la manibat kanaku ding amanung sasabian ku kekayu. Gagawan na ning Ibpang atyu kanaku ing obra na.

¹¹ Maniwala kayu kanaku: atyu ku king Ibpa at atyu kanaku ing Ibpa. Nung e kayu bisang maniwala king sasabian ku, maniwala kayu king uli da ring dapat ku.

¹² Ing katutuan sasabian ku kekayu: ing maniwala kanaku makarapat ya naman karing dapat a daraptan ku, at maygit pa kareti uling munta ku king Ibpa.

¹³ Ing nanumang aduan yu king lagyu ku daptan ku ban mipaligayan ya ing Ibpa king kapamilatan na ning Anak.

¹⁴ Nung maniawad kayung nanuman king lagyu ku, daptan ku.

¹⁵ Nung kaluguran yu ku, pamintuan yu la ding utus ku.

¹⁶ Maniawad ku king Ibpa at dinan na kayung Talasaup a akayabe yu kapilan man.

¹⁷ Ya ing Espiritu na ning katutuan a e na atanggap ning yatu uling e ne akakit at e ne balu. Oneng balu ye uling akayabe ye at manuknangan ya kekayu.

¹⁸ E ra kayu lakuan dili-dili; mibalik ku kekayu.

¹⁹ Saguli na mu at e na na ku akit ning yatu, oneng akit yu ku; uling mabie ku, ikayu man mie kayu.

²⁰ Abalu yu king aldong ita king atyu ku king Ibpa at ikayu atyu kayu kanaku, nung makananu kung atyu kekayu.

²¹ Ing tatanggap karing utus ku at tutupad kareti ya ing malugud kanaku. At luguran neng Ibpa ku itang malugud kanaku. Luguran ke at ipakilala ku keya ing kanakung sarili.

²² Kitnan neng Judas (aliwa ing Iscariote), Ginu, baket kekami ka mu pakilala at e king yatu?

²³ Pekibat nang Jesus, Pamintuan na la ning lulugud kanaku ding amanu ku; luguran neng Ibpa ku at i Ibpa ku at aku manuknangan ke keya.

²⁴ E tutupad karing amanu ku ing e lulugud kanaku. E kanaku ing amanung dimdam yu nune ibat king Ibpang mitubud kanaku.

²⁵ Sinabi ku la deting bage kekayu kabang kayabe yu ku pa.

²⁶ Oneng ing Talasaup, ing Banal a Espiritu a itubud na ning Ibpa king lagyu ku, ya ing mituru kekayu king sablang bage. Paganaka na kekayu ing sablang sinabi ku kekayu.

²⁷ Ing kapayapan lalakuan ku kekayu; ing kanakung kapayapan babie ku kekayu, ing kapayapan a e na kalupa ning babie ning yatu. E kayu sukat mababalisa o mitakutan man.

²⁸ Dimdam yung sinabi ku, Mako ku, oneng mibalik ku naman kekayu. Nung liguran yu ku, sukat kayung tumula king munta ku king Ibpa uling maygit ya kanaku ing Ibpa.

²⁹ Sinabi ku na iti ngeni kekayu bayu pa mapalyari ban maniwala kayu potang mapalyari na.

³⁰ E ku na pakakaban pa ing sabian ku kekayu uling daratang ne ing pamuntuk na ning yatung iti. Ala yang upaya kanaku;

³¹ oneng daratang ya ban akilala na ning yatu king kaluguran ke ing Ibpa at king daraptan ku ing yuyutus na kanaku. Talakad na kayu, tara na.

15

¹ Aku ing tune tanaman a ubas at ing Ibpa ku ya ing mananaman.

² Pupututan ne ing balang sanga kung e mamunga at lilinisan ne ing balang sangang mamunga ban lalu ya pang mamunga.

³ Malinis na kayu ngeni uli na ning amanung sinabi ku kekayu.

⁴ Manatili kayu kanaku at manatili ku kekayu. E ya makapamunga ing metung a sanga king sarili na; makapamunga ya mu nung manatili yang makataid king tanaman a ubas. E kayu makapamunga nung e kayu manatili kanaku, antimo ing sanga e ya makapamunga nung e makataid king tanaman a ubas.

⁵ Aku ing tanaman a ubas, ikayu ding sanga. Ing manatili kanaku at aku keya, mamunga yang dakal; uling ala kayung arapat nanuman, nung makakawani kayu kanaku.

⁶ Mangari ya ing e manatili kanaku king metung a sangang miyugse at langi ya. Titipunan la ding anti kareting sanga at iyugse king api at maduluk la.

⁷ Nung manatili kayu kanaku at ding amanu ku manatili la kekayu, aduan yu itang nanumang buri yu at miyabie kekayu.

⁸ Mipaligayan ya ing Ibpa ku, nung mamunga kayung dakal at king makanyan a paralan maging alagad da kayu.

⁹ Nung makananu na kung liguran ning Ibpa, makanyan da kayu namang liguran. Manatili kayu king lugud ku.

¹⁰ Nung tuparan yu la ding utus ku, manatili kayu king lugud ku, antimo nung makananu kung tutupad karing utus nang Ibpa ku at manatili ku king lugud na.

¹¹ Sinabi ku la kekayu deting bage ban manatili kekayu ing tula ku at miganap ing tula yu.

¹² Iti ya ing utus ku: mikakalugud kayu anti ing pamaglugud ku kekayu.

¹³ Ala nang lugud a maygit pa kesa ketang ibie na ning metung a tau ing bie na para karing kakaluguran na.

¹⁴ Kakaluguran da kayu, nung tuparan yu la ding utus ku.

¹⁵ E da na kayu ausan ipus, uling e na balu ning ipus ing daraptan na ning panginuan na. Inya inaus da kayung kakaluguran uling pepabalu ku kekayu ing sablang dimdam ku kang Ibpa ku.

¹⁶ E yu ku pinili, nune aku ing memili at tinuldu kekayu ban lumual kayu at mamunga karing bungang manatili. King uli na niti, nanumang aduan yu king Ibpa king lagyu ku, ibie na kekayu.

¹⁷ Iti ya ing yuyutus ku kekayu: mikakalugud kayu.

¹⁸ Nung kesaman na kayu ning yatu, sukat yung ganakan king minuna na na kung kesaman.

¹⁹ Nung para king yatu kayu, luguran na kayu ning yatu anting keya. Oneng e kayu para king yatu, nune pinili da kayung ibat king yatu, inya kasaman na kayu ning yatu.

²⁰ Ganakan yu ing sinabi ku kekayu: E ya maygit ing ipus king panginuan na. Nung ligaligan da ku, ligaligan da kayu naman. Nung tiparan da ing amanu ku, tuparan da naman ing kekayu.

²¹ Oneng iti ngan daptan da kekayu uli ku; uling e re akikilala ing mitubud kanaku.

²² E la sana mikasala nung e ku dinatang at migsalita karela; oneng ngeni ala lang asangkan king karelang kasalanan.

²³ Ing masama kanaku kasaman nia naman i Ibpa ku.

²⁴ Nung ding dapat a e na agawa ning ninuman e ku la depat libutad da, ala la sanang kasalanan. Oneng ikit da ing depat ku at pikasaman da ku ampon i Ibpa ku.

²⁵ Iti mepalyari ban matupad ing amanung makasulat king karelang Kautusan: Pikasaman da kung alang sangkan.

²⁶ Oneng datang ya ing Talasaup, ing Espiritu na ning katutuan a manibat king Ibpa. Itubud ke kekayu ibat king Ibpa at ya ing munie patutu tungkul kanaku.

²⁷ At ikayu man munie kayung patutu tungkul kanaku uling akayabe da kayu manibat na king kapupurmeruan.

16

¹ Sinabi ku iti kekayu ban e kayu milako pamanalig kanaku.

² Itiwalag da kayu karing sinagoga. Datang ing panaun potang ing ninumang makamate kekayu isipan na king susuyu ya king Dios.

³ At daptan da iti uling e re balu ing Ibpa ni e ra ku balu.

⁴ Sinabi ku la deting bage kekayu ban nung datang na ing oras a daptan da iti, aganaka yu king sinabi ku na la kekayu. E ku la sinabi deting bage kekayu kanitang minuna uling kayabe yu ku pa.

⁵ Oneng ngeni munta na ku ketang mitubud kanaku. Metung man kekayu alang mangutang nung nu ku munta.

⁶ Malungkut kayu uling sinabi ku la ngeni deting bage.

⁷ Ing katutuan sasabian ku kekayu: ikakayap yu ing paglako ku; uling nung e ku mako, e ya datang kekayu ing Talasaup. Nung mako ku, itubud ke kekayu.

⁸ At paniatang na, pakilala na karing tau keti king yatu nung isanu ing kasalanan, nung isanu ing matulid at ing kayatulan na ning Dios.

⁹ Tungkul king kasalanan: uling e la meniwala kanaku.

¹⁰ Tungkul naman king matulid: uling munta ku king Ibpa at e yu na ku akit.

¹¹ At tungkul king kayatulan na ning Dios: uling miyatulan ne ing pamuntuk na ning yatung iti.

¹² Dakal ku pa buring sabian kekayu, oneng e yu pa agyung paki-intindian ngeni.

¹³ Saupan na kayu paniatang na ning Espiritu ning katutuan ban aintindian yu ing sablang katutuan. Uling e ya magsalita king sarili na, nune magsalita ya kekayu king dimdam na at sabian na la ding bage datang.

¹⁴ Paligayan na ku uling manibatan kanaku ing sablang sabian na kekayu.

¹⁵ Ing sablang atyu king Ibpa, kanaku; inya sinabi kung Ing sablang sabian na kekayu manibatan kanaku.

¹⁶ Saguli na mu at e yu na ku akit at kaybat na ning ditak a panaun akit yu kung pasibayu.

¹⁷ Ngarang mipapagsalita ding mapilan karing alagad, Nanu kaya ing buri nang sabian king Saguli na mu e yu na ku akit, at kaybat na ning ditak a panaun akit yu kung pasibayu at Munta ku king Ibpa?

¹⁸ Nanu kaya ing buri nang sabian ning Saguli na mu? E tamu aintindian ing sasabian na!

¹⁹ Balu nang Jesus king buri deng kutnan, inya ngana karela, Iti wari ing kukutang yu: nung nanu ing buri kung sabian tungkul king sinabi kung Saguli na mu e yu na ku akit, at kaybat ning ditak a panaun akit yu kung pasibayu?

²⁰ Ing katutuan sasabian ku kekayu: tumangis kayu at lungkut, oneng tumula ya ing yatu. Lungkut kayu, oneng miyalilan tula ing lungkut yu.

²¹ Neng manganak ya ing metung a babai, lulungkut ya uling dinatang na ing oras ning pamagkasakit na. Potang abait na ne ing anak na, e na na agaganaka ing kasakitan a delanan na; tumula ya uling abait na ne king yatu ing metung a anak.

²² Makanyan munaman kekayu: malungkut kayu ngeni, oneng pakikitan da kayung pasibayu, at mikatmuan la king tula ding pusu yu. E na adayu ning ninuman ing tula yu.

²³ King aldo ita, ala na kayung aduan nanuman kanaku. Ing katutuan sasabian ku kekayu: nung maniawad kayung nanuman king Ibpa king lagyu ku, ibie na iti kekayu.

²⁴ Angga man ngeni ala kayu pang inawad king lagyu ku; maniawad kayu at mirinan kayu ban miganap ing tula yu.

²⁵ Sinabi ku la kekayu deting bage king kapamilatan da ring talimhaga. Oneng datang ing panaun a e na ku magsalita kekayu king kapamilatan da ring talimhaga, nune magsalita kung malino kekayu tungkul king Ibpa.

²⁶ King aldo ita, maniawad kayu king lagyu ku, at e ku sasabian king aku ing maniawad king Ibpa para kekayu,

²⁷ uling ing Ibpa mismu kaluguran na kayu. Kaluguran na kayu uling liguran yu ku at meniwala kayung ibat ku king Ibpa.

²⁸ Ibat ku king Ibpa at dinatang ku king yatu. Ngeni lalakuan ku ne ing yatu at mibalik na ku king Ibpa.

²⁹ Ngara ding alagad na, Ngeni magsalita na kang malino at e na ka gagamit talimhaga!

³⁰ Balu mi na ngeni king balu mu ing sabla, at e na kailangan ing kutnan na ka ning ninuman. Uli na niti, paniwalan mi king menibat ka king Dios.

³¹ Mekibat ya i Jesus karela, Maniwala na kayu ngene?

³² Daratang ing oras, at makaras na ing misalbag-salbag kayu; muli ya ing balang metung king sarili nang bale at lakuan yu kung magdili-dili. Oneng e ku tune magdili-dili uling kayabe ke ing Ibpa.

³³ Sinabi ku la deting bage ban mika kapayapan kayu king pamakiabe yu kanaku. Mika kasakitan kayu keti king yatu; oneng magpakatatag kayu! Migtagumpe na ku king yatu!

17

¹ Inyang asabi na la deting amanu tinalanga ya banua i Jesus at ngana, Ibpa, dinatang na ing oras; paligayan me ing Anak mu ban apaligayan na ka ning Anak.

² Uling dininan meng upayang sumakup karing sablang tau ban munie bie alang angga karing sablang binie mu keya.

³ Iti ya ing bie alang angga: ing akilala ra ka, ikang bukud ing tune Dios at i Jesu-Cristo a kekang tinubud.

⁴ Pepaligayan da ka keti king yatu; inari ku ing obrang pepagawa mu kanaku.

⁵ At ngeni, Ibpa, paligayan mu ku king keka mu ring kaligayan a sadiang atyu kanaku king pangayabe ku keka bayu ya melalang ing yatu.

⁶ Pepakilala da ka karing taung binie mu kanaku ibat king yatung iti. Keka la, binie mu la kanaku, at tiparan da ing amanu mu.

⁷ Ngeni balu da king ing sablang binie mu kanaku ibat keka,

⁸ uling tiru ku la king amanung tinggap ku keka at tinggap da iti. Abalu ra king tune kung menibat keka at meniwala la king tinubud mu ku.

⁹ Ipanalangin ku la. Manalangin ku e para king yatu, nune para karing binie mu kanaku uling keka la.

¹⁰ Keka ing sablang kanaku at kanaku ing sablang keka at mipaligayan ku king kapamilatan da.

¹¹ Ngeni munta na ku keka, lakuan ku ne ing yatu, oneng atyu la king yatu. Ibpang Banal, ingatan mu la king kapamilatan na ning upaya ning lagyu mu, ing lagyung binie mu kanaku ban maging metung la mu, antimo ikata metung kata mu.

¹² Kabang kayabe da ku iningat ku la king kapamilatan na ning upaya ning lagyu mu, ing lagyung binie mu kanaku. Iningat ku la at metung man karela alang mebating, subali mu king metung a kusang lub a migpakabating ban matupad ya ing kasulatan.

¹³ Oneng ngeni papunta na ku keka at sasabian ku la deting bage kabang atyu ku keti king yatu ban mikatmuan lang lubus king kanakung tula.

¹⁴ Binie ku karela ing amanu mu at pikasaman na la ning yatu uling e la para king yatu antimo aku e ku para king yatu.

¹⁵ E ku aduan keka ing ilako mu la king yatu, nune ilisia mu la king Marawak.

¹⁶ Nung makananung aku e ku para king yatu, makanyan la namang e para king yatu.

¹⁷ Gawan mu lang keka king kapamilatan na ning katutuan; katutuan ing amanu mu.

¹⁸ Nung makananu mu kung tinubud keti king yatu, makanyan ku la namang tutubud king yatu.

¹⁹ At king uli ra babie ku keka ing kanakung sarili ban ila man maging keka la kapamilatan na ning katutuan.

²⁰ E mu ila ding ipanalangin ku, nune pati na detang maniwala kanaku uli na ning karelang patutu.

²¹ Maging metung la ngan sa, Ibpa, antimo ika atyu ka kanaku at aku atyu ku keka, ban ila man maging metung la kekata; kanita maniwala ya ing yatu king ika tinubud mu ku.

²² Binie ke karela ing ligayang binie mu kanaku ban maging metung la antimo ika at aku metung kata mu:

²³ aku atyu ku karela at ika atyu ka kanaku ban maging ganap lang metung. Kanita abalu na ning yatu king tinubud mu ku at liguran mu la antimo ing pamaglugud mu kanaku.

²⁴ Ibpa, buri ku king nung nu ku karin kayabe ku la ding binie mu kanaku ban akit da ing binie mung kaligayan kanaku, uling liguran mu na ku bayu ya melalang ing yatu.

²⁵ O Ibpang Banal, e na ka balu ning yatu, oneng aku balu ra ka at abalu ra deting binie mu kanaku king ika ing mitubud kanaku.

²⁶ Pepakilala da ka karela at ipakilala da ka pa ban ing lugud mu kanaku miyabie karela, at aku manatili ku karela.

18

¹ Kaybat na lang asabi deting bage, minta ya i Jesus at ding alagad na king kasumangid na ning Sapa ning Kidron. Ating mulahan karin at linub la.

² Balu neng Judas a magtaksil kang Jesus ing lugal a ita uling maralas lang mititipun karin di Jesus at ding alagad na.

³ Minta ya karin i Judas; kayabe ne ing metung a grupu da ring sundalus at ding mapilan a guardia na ning Templo a peparala da ring pamuntuk ding pari at ding Pariseo. Magdala lang sulu, sulugi at sandata.

⁴ Balu nang Jesus ing sablang mapalyari, inya selubungan na la at kitnan, Ninu ing panintunan yu?

⁵ Ngarang mekibat, I Jesus ning Nazaret. Sinabi na karela, Aku ya. Kayabe re i Judas, ing migtaksil kang Jesus.

⁶ Inyang sinabi nang Jesus karela, Aku ya, mengapayatras la at miragsa king gabun.

⁷ Kitnan na lang pasibayu, Ninu ing panintunan yu? Ngarang mekibat, I Jesus ning Nazaret.

⁸ Nganang Jesus, Sinabi ku na kekayu king aku ya. Paburen yu lang mako deng taung deni, nung aku ing kekayung panintunan. (

⁹ Sinabi na iti ban matupad itang amanu na, Alang mabating metung man karing binie mu kanaku, Ibpa.)

¹⁰ Atin yang espada i Simon Pedro; begut ne iti at tebak ing ipus na ning Pekapun ding Pari. Atigpas ne wanan a balugbug. Malkus ing lagyu na ning ipus.

¹¹ Sinabi nang Jesus kang Pedro, Ikaluban me ing espada mu! E wari kailangan ing inuman ke ing kopa a painum na kanaku ning Ibpa?

¹² Dekap de i Jesus at ginapus de ring guardiang Judio at ding sundalus a panimunan na ning kapitan da.

¹³ Minuna reng dela kang Anas, ing katuangan nang Caifas a Pekapun ding Pari king banuang ita.

¹⁴ I Caifas ya itang minie payu karing Judio king makakayap ing katau ya mu ing mate para king balen.

¹⁵ Tinuki ya kang Jesus i Simon Pedro at ing metung pang alagad. Kakilala ne ning Pekapun ding Pari ing alagad a iti, inya mekalub yang kayabe nang Jesus king patyu na ning Pekapun ding Pari.

¹⁶ Melakuan ya i Pedro lual ning pasbul. Linual ya ing alagad a kakilala ning Pekapun ding Pari, at pekisabian ne ing babaing magbante king pasbul. Tiki neng linub i Pedro.

¹⁷ Nganang mengutang niting babai kang Pedro, E ka wari metung karing alagad na ning taung yan? Ali ku, nganang mekibat Pedro.

¹⁸ Marimla kanita, inya migdapug la ding ipus ampon ding guardia at migsalab la. Mekiabe ya i Pedro at migsalab ya naman.

¹⁹ Pengutnan ne ning Pekapun ding Pari i Jesus tungkul karing alagad na at king tuturu na.

²⁰ Mekibat ya i Jesus. Ngana, Hayagan kung migsalita karing sablang tau; parati kung tuturu kilub da ring sinagoga at kilub ning Templo nung nu la parating mititipun ding Judio. Ala kung sinabi nanuman king makasalikut.

²¹ Baket kukutnan mu ku? Mangutang ka karing mekaramdam kanaku nung nanu ing sinabi ku karela; balu ra nung nanu ing sinabi ku.

²² Inyang asabi na iti, timpaling ne ning metung karing guardiang atyu karin. Nganang sinabi, Baket makanyan kang makibat king Pekapun ding Pari?

²³ Pekibat nang Jesus, Nung e ustu ing sinabi ku, patunayan mu. Nung mayap ing sinabi ku, obat timpaling mu ku?

²⁴ Makagapus ya pa i Jesus inyang peparala neng Anas kang Caifas, ing Pekapun ding Pari.

²⁵ Makatalakad ya pa mu rin at magsalab karin i Pedro. Kitang da, E ka naman wari metung karing alagad na? Ali ku! nganang mekibat Pedro.

²⁶ Kitnan na ne naman ning metung karing ipus ning Pekapun ding Pari, kamaganak ne nitang tinigpas na balugbug Pedro, Aliwa wari ika ing ikit kung kayabe na king mulahan?

²⁷ Pepayalian nang pasibayung Pedro iti, at kanita mu rin tinulauk ya ing tatyo.

²⁸ Ibat king bale nang Caifas dela re i Jesus king palasyu na ning gobernador. Abak a maranun kanita. E la linub ding Judio king palasyu na ning gobernador ban e la midinatan, uling pagnasan dang makapangan la king apunan na ning Pamaglagpus.

²⁹ Inya liwalan na lang Pilato at kitang na karela, Nanung dalum ing yarap yu laban king taung iti?

³⁰ Pekibat da, Nung e ya dinapat e mayap ing taung iti, e mi ya sa dela keka.

³¹ Nganang Pilato karela, Kuanan ye at atulan agpang king Kautusan yu. Ngara ding Judio, Makabawal kekami ing papate mi ya ing ninuman. (

³² Iti milyari ban matupad ing sinabi nang Jesus nung makananu yang mate.)

³³ Pasibayu yang linub king palasyu i Pilato at inaus ne i Jesus. Nganang kinutang kang Jesus, Ika ing Ari da ring Judio?

³⁴ Mekibat ya i Jesus, Ibat keka yan o ating aliwang sinabi keka tungkul kanaku?

³⁵ Judio ku wari? nganang kinutang Pilato. Dela ra ka kanaku ding sarili mung kabalen at ding pamuntuk da ring pari. Nanu waring depat mu?

³⁶ Pekibat nang Jesus, E ya king yatu ing kanakung kayarian. Nung ing kayarian ku keti ya king yatu, makilaban la ding kanakung talasuyu ban e ku miyabie karing Judio. Oneng e ya king yatung iti ing kanakung kayarian!

³⁷ Nganang Pilato, Ing buri mung sabian, metung ka ping ari? Mekibat ya i Jesus, Ika ing sasabing ari ku. Iti ya ing sangkan nung inya mibait ku at dinatang keti king yatu ban munie patutu king katutuan. Makiramdam ya kanaku ing ninumang atyu king katutuan.

³⁸ Nganang kinutang Pilato, Nanu ing katutuan? Kaybat nang asabi iti, pasibayu na lang liwalan Pilato ding Judio. Ngana karela, Ala kung ikit a kasalanan na.

³⁹ Agpang king kekayung kaugalian kailangan kung mibulus metung a preso para kekayu neng Pamaglagpus. Buri yung ibulus ke ing Ari da ring Judio?

⁴⁰ Ngarang kinulisak mekibat, Ali mi ya, aliwa ya, nune i Barabas! (Metung yang tulisan i Barabas.)

19

¹ Inya pepakua neng Pilato i Jesus at pepabarug neng latiku.

² Ginawa lang koronang suksuk ding sundalus at pinutung de king buntuk nang Jesus. At pepasuluran deng imalan a kule ubi.

³ Lepitan de at ngara, Luid ya ing Ari da ring Judio! At kaybat penampaling de.

⁴ Linual yang pasibayu i Pilato at sinabi na karing tau, Iyarap ke kekayu ban abalu yu king e ku manakit nanumang kasalanan keya.

⁵ At linual ya i Jesus a ating koronang suksuk at makaimalan yang kule ubi. Sinabi nang Pilato karela, Oyni ing tau!

⁶ Panakit da kang Jesus ding pamuntuk da ring pari at ding guardia, sinabi rang masikan, Ipaku me king krus! Ipaku me king krus! Nganang Pilato karela, Kuanan ye at ikayung mipaku king krus uling ala kung akakit a kasalanan na.

⁷ Ngarang mekibat ding Judio, Atin keng kautusan at agpang king kautusan a iti kailangan yang mate uling pakilala na king Anak ne ning Dios.

⁸ Lalu yang mitakutan i Pilato inyang dimdam na la deting amanu.

⁹ Linub yang pasibayu king palasyu at kitnan ne i Jesus, Nu ka tau? Oneng e ne pekibatan Jesus.

¹⁰ Nganang Pilato, E ka bisang maniabi kanaku? E mu wari balu king atin kung upayang ipabulus da ka at upayang ipapaku da ka king krus?

¹¹ Mekibat ya i Jesus, Atin kang upaya kanaku uling iti binie na keka ning Dios. Inya lalung mabayat ing kasalanan na nitang menganiaya kanaku keka.

¹² Inyang dimdam nang Pilato iti, pigkapilitan neng ipabulus i Jesus. Oneng ngarang kinulisak ding Judio, Nung ibulus me ing taung yan, e na ka kakaluguran ning Emperador! Ing ninumang gagawang ari king sarili na, kalaban ne ning Emperador!

¹³ Panamdam nang Pilato kaniti, liwal ne i Jesus. At linukluk ya king piukuman, king lugal a mayayaus Dalan a Batu. (Gabbatha king salitang Hebreo.)

¹⁴ Kanita aldo na ning Pamagsadia para king Pamaglagpus, at mag-a-alas dosi na ning kaugtuan aldo. Nganang Pilato karing Judio, Oyni ing kekayung Ari!

¹⁵ Oneng kilisak da, Paten ya! Paten ya! Ipaku ya king krus! Nganang kinutang Pilato karela, Ipapaku ke king krus ing kekayung Ari? Mekibat la ding pamuntuk da ring pari, Ala keng ari nung e mu ing Emperador!

¹⁶ Kanita binie na neng Pilato karela i Jesus ba reng ipaku king krus. Inya kinua re i Jesus.

¹⁷ Linual yang mamusan king krus na papunta king lugal a mayayaus Lugal ning Bungu. (Golgota king salitang Hebreo.)

¹⁸ Karin de pinaku king krus. Kayagnan na lang pinaku da ring adua katau; mingatba la keya. Makalibutad ya karela i Jesus.

¹⁹ Sinulat neng Pilato ing metung a kapabaluan at pepabili ne king krus. Iti ya ing makasulat: I Jesus ning Nazaret, ing Ari da ring Judio.

²⁰ Dakal la karing Judio ding mekabasa keting kapabaluan uling ing lugal nung nu ya mipaku i Jesus malapit ya king siudad at misulat ya iti karing amanung Hebreo, Latin, at Griego.

²¹ Inya sinabi da ring pamuntuk da ring pari kang Pilato, Ing isulat mu e Ing Ari da ring Judio. nune, Sinabi na ning taung iti, Aku ing Ari da ring Judio.

²² Mekibat ya i Pilato, Ing sinulat ku, sinulat ku.

²³ Inyang apaku da ne ding sundalus king krus i Jesus, kinua ra ing imalan na at piparti-parti da ring apat a sundalus. Kinua ria naman ing tunika nang Jesus; iti ala yang tai at megawa yang une manibat babo angga lalam.

²⁴ Ngarang misabisabi ding sundalus, E ta ya gigisian iti, nune mipagsapalaran tamu ban abalu tamu nung ninung manikua kaniti. Milyari iti ban matupad ing sasabian na ning Kasulatan, Piparti-parti ra ing susulud ku, at pipagsapalaran da ing imalan ku. Makanyan ing depat da ring sundalus.

²⁵ Makatalakad ya lele na ning krus nang Jesus i ima na at ing babaing kapatad nang ima na at i Mariang asawa nang Clopas at i Maria Magdalena.

²⁶ Panakit nang Jesus kang ima na at king pakamalan nang alagad a makatalakad karin, sinabi na kang ima na, Babae, oyan ing anak mo.

²⁷ At ngana king alagad, Oyan i ima mo. At manibat na kanita inampun na ne ning alagad king pibalebale na.

²⁸ Kaybat na nita, balu nang Jesus king meganap na ing sablang bage at ban matupad ya ing kasulatan, sinabi na, Mau ku.

²⁹ Ating pitsil karin a mitmung alak a maslam. Sinoso re king alak ing metung a espongha at kaybat inasta re king sanga na ning tanaman a hisopo at tinutuk de king asbuk nang Jesus.

³⁰ Inyang asipsip nang Jesus ing alak a maslam, sinabi na, Meyari na! Kaybat diku ne ing buntuk na at mete ya.

³¹ Aldo ning Pamagsadia kanita. Ban e la manatili king krus ding bangke king Aldo ning Sabbath (ing Sabbath a ita pamagselebra yang e karaniwan), inawad da ring Judio kang Pilato king paklian da la puad ding mipaku king krus at ilako la karin ding bangke.

³² Inya dinatang la ding sundalus at pikli da la ring puad da retang aduang kayagnan nang mipakung Jesus.

³³ Inyang linapit la kang Jesus, e da la pikli ding puad na uling ikit dang mete ne.

³⁴ Oneng tindus ne katalindikingan ning metung karing sundalus at biglang linual ing daya ampon danum. (

³⁵ Ing menakit kaniti ya ing patutu; tutu ing sasabian na at balu na king katutuan ing sasabian na ban maniwala kayu.)

³⁶ Mepalyari iti ban matupad ing sasabian na ning kasulatan, Alang mapakli metung man karing butul na.

³⁷ At sasabian na naman ning aliwang kasulatan, Lawan de ring tau itang tindus da.

³⁸ Kaybat na nita, i Jose ning Arimatea pekisabi ne kang Pilato ing bangke nang Jesus. (I Jose metung yang alagad nang Jesus, oneng makalihim mu uli na ning takut na karing Judio.) At peintulutan neng Pilato. Inya meko ya at kinua ne ing bangke nang Jesus.

³⁹ Tinuki ya keya i Nicodemo; magdala yang pisamut a mira at aksibal at titimbang maygit apat apulung kilu. (I Nicodemo ya itang mekikit misan a bengi kang Jesus.)

⁴⁰ Kinua re ing bangke nang Jesus at kayabe ning pisamut a mira at aksibal binalut de king telang pamburul. Makayagpang iti king kaugalian da ring Judio king pamangutkut.

⁴¹ Ating mulahan king lugal nung nu re pinaku i Jesus at karin ating bayung kutkutan a e pa megamit.

⁴² Anti na ning aldo ne kanita ning Pamagsadia da ring Judio at uling malapit ne man iting kutkutan, karin de kitkut i Jesus.

20

¹ King abak a maranun na ning mumunang aldo ning paruminggu, maralumdum pa, minta ya king kutkutan i Maria Magdalena. Ikit na king makalako ya ing batung takap ning kutkutan.

² Inya milayi ya at minta kang Simon Pedro at king aliwang alagad a pakamalan nang Jesus. Ngana karela, Kinua re king kutkutan ing Ginu at e mi balu nung nu re binili!

³ Inya linual ya i Pedro at itang aliwang alagad at minta la king kutkutan.

⁴ Milayi la, oneng itang aliwang alagad milayi yang mabilis kesa kang Pedro, at minuna yang miras king kutkutan.

⁵ Dinuku ya at kilub ning kutkutan ikit na ing telang pamburul a makabili karin; oneng e ya linub.

⁶ Kanita dinatang yang katuki na i Simon Pedro at taglus-taglus yang linub king kutkutan. Ikit nang makabili karin ing telang pamburul

⁷ at ing panyung penakap king buntuk nang Jesus. Iti e makakayabe king telang pamburul, nune makakalilua yang makatuklip king metung a lugal.

⁸ Linub ya naman itang aliwang alagad a minunang dinatang at ikit na at meniwala ya. (

⁹ E ra pa aintindian kanita ing sasabian na ning kasulatan king kailangan yang subling mie i Jesus.)

¹⁰ At kaybat minuli la ding alagad.

¹¹ Makatalakad yang manangis i Maria lual na ning kutkutan. Dinuku ya kabang manangis ya at linawe kilub na ning kutkutan.

¹² Atin yang ikit a aduang anghel a makaimalan maputi; makalukluk la king pibilianan king bangke nang Jesus, ing metung king kabuntukan at ing metung king kabitisan.

¹³ Kitnan de, Babae, obat kikiak ka? Mekibat ya, Kasi kinua re ing Ginu ku at e ku balu nung nu re dela!

¹⁴ Pangasabi na niti, melikid ya at ikit neng makatalakad karin i Jesus; oneng e na balu king ya i Jesus.

¹⁵ Kitnan neng Jesus, Babae, obat manangis ka? Ninung panintunan mu? Bala nang Maria ya ing hardinero, inya sinabi na, Nung ikang kinangwa keya, ginu, sabian mu kanaku nung nu me dela at kuanan ke.

¹⁶ Maria! nganang Jesus. Inarapan ne at sinabi na, Rabboni! (Ngana wari king Hebreo Maestro.)

¹⁷ Nganang Jesus kang Maria, E mu ku tatagkilan uling e ku pa pepaitas papunta king Ibpa. Munta ka karing kapatad ku at sabian mu karela king paitas na kung magbalik kang Ibpa ku at Ibpa yu, king Dios ku at king Dios yu.

¹⁸ Inya pintalan na lang Maria Magdalena ding alagad at sinabi na karela, Ikit ke ing Ginu. At sinabi na karela ing pasabi nang Jesus.

¹⁹ Kanitang bengi na ning aldo mu ring ita, mitipun la ding alagad. Pakasara la ding pasbul king lugal nung nu la makatipun uli na ning takut da karing Judio. Dinatang ya i Jesus at tinalakad ya libutad da. Ngana karela, Kapayapan keko ngan.

²⁰ Pangasabi na niti, pepakit na la karela ding gamat na at ing katalindikingan na. Mesaya la ding alagad panakit da king Ginu.

²¹ Pasibayu nang sinabing Jesus karela, Kapayapan keko ngan. Nung makananu na kung tinubud ning Ibpa, makanyan da kayu namang tutubud.

²² Pangasabi na niti, pengisnawanan na la at sinabi na, Tanggapan ye ing Banal a Espiritu.

²³ Nung patawaran yu la ding kasalanan na ning ninuman, mipatawaran la; ing e yu patawaran e ya mipatawaran.

²⁴ Oneng i Tomas (ing mayayaus Kambal), ing metung karing labing adua, alayu inyang dinatang ya i Jesus.

²⁵ Inya sinabi da ring aliwang alagad kang Tomas, Ikit mi ya ing Ginu! Nganang mekibat Tomas, E ku maniwala anggang e ku la akit ding bakas ding paku karing gamat na at itagkil ing taliri ku king bakas da ring paku at ing gamat ku king katalindikingan na.

²⁶ Pangalabas da ring walung aldo, makatipun lang pasibayu ding alagad king bale at kayabe re i Tomas. Makasara la ding pasbul, oneng linub ya i Jesus at tinalakad ya libutad da. Nganang Jesus karela, Kapayapan keko ngan.

²⁷ At saka na sinabi kang Tomas, Lawen mu la deng gamat ku at itagkil me keni ing taliri mu. Dala me keni ing gamat mu at itagkil me king katalindikingan ku. E na ka magalinlangan, maniwala na ka!

²⁸ Mekibat ya i Tomas, Ginu ko at Dios ko!

²⁹ Nganang Jesus kang Tomas, Maniwala na ka uling ikit mu ko? Mapalad la detang maniwala kanaku agyamang e ra ku ikit!

³⁰ Ginawa yang dakal at miyayaliwa pang milagru i Jesus king akakit da ring alagad na, oneng e la makasulat keting libru.

³¹ Misulat la ding atyu keting libru ban maniwala kayu king i Jesus ya ing Cristo, ing Anak ning Dios at king pamaniwala yu mika bie kayu king kapamilatan na.

21

¹ Kaybat na nita, pasibayu yang pepakit i Jesus karing alagad na king pampang na ning Dagat-dagatan ning Tiberias. Pepakit ya king anti kaniting paralan.

² Miyabe-abe la di Simon Pedro, Tomas (ing mayayaus Kambal), Nathanael a tau Cana, Galilea, ding anak nang Zebedeo, at ding adua pa karing alagad nang Jesus.

³ Manasan ku, nganang sinabing Simon Pedro karela. Tuki kami keka, ngara naman kang Simon Pedro. Meko la at sinake king bangka. Oneng ala lang arakap nanumang asan king kabukas a ita.

⁴ Inyang saslag ne ing aldo, atyu i Jesus king pampang; oneng e re akilala ding alagad king ya i Jesus.

⁵ Ngana karela, Anak, atin kayung ikua? Ala, ngarang mekibat.

⁶ Sinabi na karela, Ibaldug ye ing lambat king dane nang wanan ning bangka at manikua kayu. Bildug de ing lambat at e re agyung isaka uli na ning keraklan da ring asan.

⁷ Ngana ning alagad a pakamalan nang Jesus kang Pedro, Ya ing Ginu! Panamdam nang Simon Pedro king ya pala ing Ginu, sinulud na ing imalan na (uling lubas ya) at linuksu ya king danum.

⁸ Oneng sinadsad lang makabangka king pampang ding aliwang alagad at guguyud de ing lambat a mitmung asan. E la masiadung malaut king pampang; manga dinalan a yarda mu ing dayu ra.

⁹ Kasaka da king pampang menakit lang uling a mibabaya at asan a makaderang ampon tinape.

¹⁰ Nganang Jesus karela, Magdala kayung mapilan keni karing asan a arakap yu.

¹¹ Inya sinake ya king bangka i Simon Pedro at ginuyud ne papunta king pampang ing lambat a mitmung mangaragul a asan; dinalan la at limang pulu't atlu heganagana. E ya mesira ing lambat agyang marakal la.

¹² Nganang Jesus karela, Me kayu keni at magalmusal kayu. Oneng ala metung man karela ing mengangas kinutang nung ninu ya uling balu ra king ya ing Ginu.

¹³ Linapit ya i Jesus at kinua ne ing tinape at binie ne karela at antimu rin ding asan.

¹⁴ Iti ya ing katlung pamipakit nang Jesus karing alagad kaybat nang sinubling mebie.

¹⁵ Inyang mekapag-almusal na la, kitnan neng Jesus i Simon Pedro. Ngana, Simon, anak nang Juan, kaluguran mu ko maygit kareni? Nganang mekibat Pedro, Wa, Ginu, balu mu king kaluguran da ka! Sinabi nang Jesus, Pakanan mu la ding kanakung biserung tupa.

¹⁶ Kitang nang kaduang besis, Simon, anak nang Juan, kaluguran mu ko? Mekibat ya i Pedro, Wa, Ginu, balu mu king kaluguran da ka. Nganang Jesus, Ingatan mu la ding tupa ku.

¹⁷ Kitang na king katlung besis, Simon, anak nang Juan, kaluguran mu ko? Melungkut ya i Pedro uling mekatatlu na kitang: Kaluguran mu ko? At mekibat ya, Ginu, balu mu ing sabla; balu mu king kaluguran da ka! Sinabi nang Jesus, Pakanan mu la ding tupa ku.

¹⁸ Ing katutuan sasabian ku keka: inyang kayanakan ka ika ing mibiblas king sarili mu at lalakad ka nung nu ka bisang munta. Potang tumua ka, iyatiat mu la ding gamat mu at aliwa ya ing miblas keka at midala keka king lugal a e ka bisang munta.

¹⁹ (Sinabi na iti ban ipabalu na nung makananu yang mate i Pedro at munie kaligayan king Dios.) Pangasabi na niti, nganang Jesus, Tuki ka kanaku!

²⁰ Melikid ya i Pedro at ikit ne king kagulutan na ing alagad a pakamalan nang Jesus; ya itang linapit king salu nang Jesus inyang mag-apunan la at kinutang, Ginu, ninu ing magtaksil keka?

²¹ Inyang ikit neng Pedro, kitang na kang Jesus, Ginu, nanu ing mapalyari king taung ini?

²² Pekibat nang Jesus, Nung burian kung mie ya angga king pamagbalik ku, nanu keka ita? Ika tuki ka kanaku!

²³ Inya mikalat ing balita karing kapatad king e ya mate iting alagad. Oneng e na sinabing Jesus king e ya mate, nune sinabi na, Nung burian kung mie ya angga king pamagbalik ku, nanu keka ita?

²⁴ Iti ya ing alagad a patutu tungkul kareting bage at ya naman ing sinulat kareti at balu mi king tutu ing sasabian na.

²⁵ At atin pang dakal a miyaliwang bage a depat nang Jesus; nung isulat ngan, babalakan ku king e la mipagyu ding librung misulat agyang king mabilug a yatu.