1

¹ Kagalang-galang a Teofilo, Dakal na la mu rin pu ding migkapilit sinulat istoria tungkul karing bage mepalyari libutad mi.

² Makayagpang ing karelang sinulat king sinabi da kekami ding mekasaksi at menaral kareting bage ibat na king kapupurmeruan.

³ Kaybat kung inusisang mitmung kaingatan iting sablang bage, meyapan ku na naman pu ing sumulat metung a maayus a istoria para kekayu, Kagalang-galang a Teofilo.

⁴ Depat ku iti ban abalu yung lubus ing katutuan da ring sablang bage a mituru na kekayu.

⁵ Kanitang i Herodes ya ing ari na ning Judea, ating metung a pari a milagyuan Zacarias. Miembru ya king grupu da ring pari nang Abiya. Elizabeth ya lagyu ing asawa na at iti ibat ya king lahi nang Aaron a pari.

⁶ Mibiebie la deting miyasawa king mitmung kayapan king arapan na ning Dios. Mapamintu lang lubus karing kautusan at tuntunan a ibat king Ginu.

⁷ Oneng e la mikayanak uling baug ya i Elizabeth at matua na lang parehu.

⁸ Misan a aldo, ing grupu nang Zacarias ya ing makatutuk mangasiwa king Templo.

⁹ Agpang king kaugalian a tutukian da ring pari, ya ing misuertian at mepiling duluk king insenso king altar. Inya linub ya king Templo ning Ginu,

¹⁰ kabang ding dakal a taung atyu lual manalangin la king oras ning pamanduluk.

¹¹ Kabud-abud pepakit ya kang Zacarias ing anghel na Ginu; makatalakad ya king banda nang wanan ning altar, king lugal nung nu ra durulukan ing insenso.

¹² Misdan ya i Zacarias panakit na king anghel at mitakutan ya.

¹³ Oneng ngana ning anghel, Zacarias, e ka tatakut! Dimdam na ning Dios ing kekang panalangin, inya manganak yang metung a lalaki ing asawa mung i Elizabeth. Pamalagyuan meng Juan.

¹⁴ Tumula ka at magsaya, at dakal lang tumula king pangabait na

¹⁵ uling maging marangal ya king panimanman na ning Ginu! E ya minum alak o nanumang inuman a makalasing. At mikatmuan ya king Banal a Espiritu manibat king pangabait na.

¹⁶ Dakal la karing anak na ning Israel ding papagbalikan na king Ginung karelang Dios.

¹⁷ Datang yang mumuna king Ginu, masikan at mayupayang antimo i propeta Elias ba na lang pikasunduan pasibayu ding tata at ding anak; ban tuntun la ding makasalanan king dalan da ring matulid, at ban isadia ne para king Ginu ing balen a pinili na.

¹⁸ Nganang Zacarias king anghel, Makananu kung abalu king tutu yan? Matua na ku at antimu rin ing asawa ku.

¹⁹ Aku i Gabriel, nganang mekibat ning anghel, makatalakad ku arap ning Dios a mitubud kanaku ban sabian ku at ipayabut keka iting mayap a balita.

²⁰ Oneng e mu pala paniwalan ing balita ku a tutu namang mapalyari potang miras na ing mituldung panaun. Mapipi ka uling e ka meniwala. Manatili kang e makapagsalita anggang e matupad ing pangaku ku keka.

²¹ Panenayan deng lumual ding tau i Zacarias; pigmulalan da nung baket meluat yang tutu kilub ning Templo.

²² Inyang linual ya, e ya makapagsalita karela. Inya inisip da king menakit yang metung a vision kilub ning Templo. Uling e ya makapagsalita, sisinial na namu karing gamat na ing buri nang sabian karela.

²³ Kayari na ning pamagsilbi na king Templo, minuli ya bale na i Zacarias.

²⁴ Kalabas da ring mapilan a aldo, milamnan ya i Elizabeth a asawa na at migdatun ya king bale kilub ding limang bulan.

²⁵ Nganang sinabing Elizabeth, Seupan na ku mu rin ning Ginu king kapamilatan na niting mepalyari. Segipan na ku king maragul a kamarinayan king arapan da ring tau!

²⁶ Inyang kanam na nang bulan Elizabeth, tinubud ne ning Dios ing anghel Gabriel karin Nazaret, ing metung karing balen na ning Galilea.

²⁷ Atin yang balita para king metung a babaing birhen a makapangakung kasal king lalaking milagyuan Jose a ibat king lahi nang Aring David. Maria ing lagyu na ning babaing birhen.

²⁸ Dinatang ya kang Maria ing anghel at ngana, Ing kapayapan manatili keka! Ing Ginu atyu keka at binendisyunan na kang e mu nanu!

²⁹ Tutu yang melingasngas a lub i Maria uli na niting amanung sinabi na ning anghel at isip-isipan na nung nanu ing kabaldugan na niti.

³⁰ Ngana ning anghel, Maria, e ka mitatakutan uling meging malam ya lub keka ing Dios.

³¹ Milamnan ka at ibait me ing metung a anak a lalaki at pamalagyuan meng Jesus.

³² Maging marangal ya at mayaus yang Anak ning Kakataskatasan a Dios. Gawan neng ari ning Ginung Dios, antimo i David a makatua na.

³³ Ya ing maging ari da ring lahi nang Jacob king sablang panaun at e ya mapupus ing kayarian na kapilan man!

³⁴ Nganang sinabing Maria king anghel, Makananung mapalyari iti kabang ala na ku mang asawa?

³⁵ Pekibat na ning anghel, Datang ya keka ing Banal a Espiritu at lilungan na ka ning upaya na ning Dios. Uli na niti, mayaus yang Anak ning Dios ing banal a anak a mibait keka.

³⁶ Lawan me i Elizabeth a kamaganak mu. Sasabian da ring tau king e ne manganak, oneng ngeni kanam na na, agyamang matua ne.

³⁷ Uling alang bage a e na apapaliarian ning Dios.

³⁸ Nganang Maria, Talasuyu na ku ning Ginu, marapat sa kanaku antimo ing sinabi mu. At likuan ne ning anghel.

³⁹ E melambat, ginayak ya i Maria at mamalagua yang minta king metung a balen king kabundukan na ning Judea.

⁴⁰ Minta ya king bale nang Zacarias at dininan neng mayap a oras i Elizabeth.

⁴¹ Inyang dimdam nang Elizabeth ing pamagmananu nang Maria, ginalo ya ing anak king atian na. At i Elizabeth, kitmuan king Banal a Espiritu,

⁴² migsalita yang masikan. Ngana, Mapalad ka karing sablang babai! At mapalad ya ing anak a mibait keka!

⁴³ Makananu kung pengaintuliran ing dalawan na ku ning ima na ning kanakung Ginu?

⁴⁴ Uling kabud dimdam ku ing kekang pamagmananu ginalo ya ing anak king atian ku king tula.

⁴⁵ Mapalad ka uling paniwalan mu king ing balita na keka ning Ginu mipaltutu!

⁴⁶ Nganang Maria, Ing pusu ku pupurian ne ing Ginu;

⁴⁷ magsaya ya ing kaladua ku uli ning Dios a kakung Talapagligtas,

⁴⁸ uling e na ku kelinguan, akung maluka nang talasuyu! Manibat ngeni ausan da kung mapalad ding sablang tau,

⁴⁹ uli ning mangaragul a bage a depat na kaku ning Mayupayang Dios. Banal ing lagyu na;

⁵⁰ lulunusan na la ding ating takut keya, karing sablang mituki-tuking lahi.

⁵¹ Inatiat ne ing mayupaya nang takde, at simbulat na la ding mangatas a lub ketang kapalaluan ning karelang nasa.

⁵² Bigsak na la ding ari ibat karing karelang tronu, at ding atyu king kababan ilang tinas na.

⁵³ Pepakabsian na la ding danupan karing mayap a bage, at pepalakuan na lang alang darala ding mabandi.

⁵⁴ Tiparan na ing pengaku na karing makatua tamu at dinatang ya ba neng saupan ing Israel a talasuyu na;

⁵⁵ pepakitanan neng lunus i Abraham at ding sablang lahi na king kapilan pa man!

⁵⁶ At inabayan neng Maria i Elizabeth kilub ding atlung bulan. Kaybat na nita, minuli ne.

⁵⁷ Dinatang ing aldo nang pamanganak Elizabeth, at beit ne ing metung a anak a lalaki.

⁵⁸ Abalu da ring siping nang bale at kamaganak ing makapagmulala nang kayapan ning Ginu kang Elizabeth. At mekipagsaya la ngan kang Elizabeth.

⁵⁹ Mesirkunsisyun ya ing anak inyang walu neng aldo tua. Pamalagyuan de sanang Zacarias, ing lagyu nang tata na,

⁶⁰ oneng nganang tinutul ima na, Ali, Juan ing lagyu na.

⁶¹ Ngara kang Elizabeth, Ala metung man karing kamaganak mu a makanyan a lagyu!

⁶² Inya sininialan de ing tata; kitang da nung nanu ing buri nang ipamalagyu king anak.

⁶³ Meniawad yang apisulatanan i Zacarias at sinulat na, Ing lagyu na Juan. Mipamulala la ngan!

⁶⁴ Kanita mu rin mekapaniabi yang pasibayu i Zacarias at pinuri ne ing Dios.

⁶⁵ Tiblan na la ngan ning takut ding sablang siping dang bale at mikalat ing balita tungkul king mepalyari king mabilug a kabundukan na ning Judea.

⁶⁶ Kukutang da ring sablang mekabalita kaniti, Nanu kaya ing paintungulan na ning anak a iti? Masala king ing upaya na ning Ginu atyu keya.

⁶⁷ I Zacarias, ing tatang nang Juan, mikatmuan ya king Banal a Espiritu at nganang migsalita,

⁶⁸ Purian ta ya ing Ginu, ing Dios ning Israel! Inatdanan na lang kasaupan ding memalen na at pinalaya na la.

⁶⁹ Dininan na katamung metung a mayupayang Talapagligtas a ibat king lahi nang David a talasuyu na.

⁷⁰ Iti ya ing malambat na nang pengaku king kapamilatan ding banal nang propeta:

⁷¹ king iligtas na katamu karing kekatamung kalaban, at karing gamat ding sablang masama kekatamu.

⁷² Pengaku na naman ing pakit yang lunus karing makatua tamu, at ganakan ne ing banal nang kasunduan.

⁷³ Yan ing pangaku a sinumpa na kang Abraham a makatua tamu;

⁷⁴ king iligtas na katamu karing kekatamung kalaban; ban malaya tamung makasamba keya;

⁷⁵ ban maging banal tamu at maging matulid king panimanman na king kekaban ning bie tamu.

⁷⁶ Ika, anak ku, mayaus kang propeta na ning Kakataskatasan a Dios. Datang kang makauna king Ginu ban isadia mu ing dalanan na,

⁷⁷ at ituru me king balen na ing dalan ning kaligtasan, ing pangapatawad ding karelang kasalanan.

⁷⁸ Ing Dios tamu tune yang mapaglunus at maganaka. Ing munag ning kaligtasan ipaslag ne kekatamu,

⁷⁹ at ibat banua sunlag ya karing atyu king karalumduman, at karing atyu king lilung ning kamatayan ban ituntun na katamu king dalan ning kapayapan.

⁸⁰ At dinagul ya ing anak at sinulung ya pamikakatawan at espiritu. Menuknangan ya king disyerto angga king panaun a linual ya ban pakilala ya king Israel.

2

¹ King panaun a ita, inutus nang Emperador Augusto king magpalista la ding sablang atyu king sasakupan na ning Imperyo ning Roma.

² Iting mumunang pamipalista merapat inyang i Quirino ya ing gobernador na ning Siria.

³ Inya minuli ya ing balang metung king sarili nang balen ban palista.

⁴ Manibat Nazaret, Galilea, minta ya i Jose king Betlehem, Judea, ing balen a beitan nang David, uling ibat ya i Jose king lahi nang David.

⁵ Kayabe neng minuli i Maria a maging asawa na ban palista munaman. Miyaldo ne kanita.

⁶ Kabang atyu la karin, miras ing oras ning pamanganak nang Maria.

⁷ At beit ne ing pangane nang anak a lalaki. Binalut neng lampin at kinera ne king lilibangan, uling alang lugal para karela king pipaglayunanan.

⁸ King sakup na mu rin ning lugal a ita, ating pastul king marangle. Lalamayan da lang babanten ding tupa ra.

⁹ Bigla yang pepakit karela ing anghel ning Ginu. At linaganap king makapatulug ing makasilo nang ligaya ning Ginu. Tiblan na la ning maragul a takut!

¹⁰ Oneng ngana ning anghel karela, E kayu mitatakutan! Uling pagdala da kayung mayap a balita a munie maragul a tula karing sablang tau.

¹¹ Uling king benging iti king balen nang David mibait ya ing kekayung Talapagligtas, ing Cristo a Ginu.

¹² Ing tanda kaniti ya ini: manakit kayung metung a bingut a makabalut lampin at makakera king lilibangan.

¹³ At bigla yang meyakit siping na ning anghel ing metung a maragul a grupu ding anghel banua. Ngarang pupuri king Dios,

¹⁴ Ligaya king Dios king kakataskatasan, at keti sulip kapayapan karetang taung katulan na!

¹⁵ Inyang migbalik na la banua ding anghel, ngara ding pastul king metung at metung, Tara munta tamu Betlehem ban akit tamu iting mepalyaring balita na kekatamu ning Ginu.

¹⁶ Inya memalagua lang meko at atagpuan de i Maria at i Jose, at ikit de ing bingut a makakera king lilibangan.

¹⁷ Panakit da ring pastul king bingut belita da karela ing sinabi na ning anghel tungkul keya.

¹⁸ At mipamulala la ding sablang mekaramdam king belita da ring pastul.

¹⁹ Mitanam la deting bage king pamisip nang Maria at migunamgunam ya tungkul kareti.

²⁰ Mibalik la king marangle ding pastul a pupuri king Dios uli na ning sablang dimdam da at ikit; makayakma ngan king sinabi na ning anghel karela. fig,,,,,Mitanam la deting bage king pamisip nang Maria...,(2:19)fig*

²¹ Kalabas na ning paruminggu, inyang miras na ing aldo masirkunsisyun ya ing bingut, pemalagyuan deng Jesus, ing lagyung binie na ning anghel bayu ya pa mipangagli.

²² Miras ing aldo ban tuparan da ri Jose at Maria ing yuyutus na ning Kautusan nang Moises at gampanan ing seremonia king pamaglinis. Inya dela re ing anak king Jerusalem ban iyain de king Ginu.

²³ Iti ya ing makasulat king kautusan na ning Ginu, Kailangan yang mitalaga king Ginu ing balang lalaking pangane.

²⁴ At minta la naman karin ban miyain ain-sakripisyu antimo ing yuyutus na ning kautusan ning Ginu: kaparis a batubatu o kaya aduang pitsun.

²⁵ Ating metung a lalaking manuknangan karin Jerusalem, ing lagyu na Simeon. Metung yang taung mayap at ating takut king Dios. Panayan na ing pangaligtas na ning Israel. Ing Banal a Espiritu atyu kang Simeon.

²⁶ Pepabalu na kang Simeon ning Banal a Espiritu king e ya mate anggang e ne akit ing Cristo a pengaku na ning Ginu.

²⁷ King agkat ning Banal a Espiritu, linub ya i Simeon king Templo. Inyang ding pengari nang Jesus dela re king Templo ban daptan ing aduan na ning Kautusan,

²⁸ kimunan neng Simeon ing anak karing takde na at pepasalamat ya king Dios. Ngana:

²⁹ Ginu, ngening tiparan mu ing kekang pangaku, paburen mu neng paynawa ining kekang talasuyu.

³⁰ Ikit da na mu rin ding mata ku ing kekang pamagligtas

³¹ a kekang sidia king arapan ding sablang bansa.

³² Metung a sala a pakilala king kekang dalan karing paganu, at munie dangalan king Israel a kekang balen.

³³ Mipamulala la ding pengari na ning anak king sinabi nang Simeon tungkul king anak da.

³⁴ Binendisyunan na lang Simeon at ngana kang Mariang ima nang Jesus, Pinili ne ning Dios iting anak para king kapahamakan at king kaligtasan da ring dakal king Israel. Makatalaga yang maging tanda a ibat king Dios; oneng insultuan de ring dakal a tau.

³⁵ Makanyan mibulalag ing isipan ding dakal. At sugatan ne ing pusu mu ning kalungkutan a kasing taram ning metung a punyal.

³⁶ Atin munamang metung a propetang babai karin, ing lagyu na Anna. Anak neng Fanuel a ibat king tribu nang Aser. Metung yang babaing tutu nang matua at keutus niang pitung banua ning asawa na;

³⁷ kaybat mebalu ne kilub ding walung pulu at apat a banua. E bitasang mamako king Templo. Aldo't bengi sasamba ya king Dios king kapamilatan na ning pamag-ayunu at pamanalangin.

³⁸ Ketang oras munamang ita, dinatang ya at pepasalamat king Dios. Migsalita ya tungkul king anak para karetang manaya king pamagligtas na ning Dios king Jerusalem.

³⁹ Inyang atuparan da na ing sablang aduan na ning Kautusan ning Ginu, migbalik la Nazaret, Galilea, ing balen dang tibuan.

⁴⁰ At meragul ya ing anak at meging masikan ya. Mebiasa ya at ing grasya na ning Dios atyu kang Jesus.

⁴¹ Balang banua pupunta la Jerusalem ding pengari nang Jesus ban tumagun king Piesta ning Pamaglagpus.

⁴² Inyang labi neng aduang banua tua i Jesus, mekipamiesta la antimo ing sadia rang daraptan.

⁴³ Kaybat na ning piesta minuli la, oneng pepailakuan ya Jerusalem ing anak a i Jesus. E ra apansingan iti ding pengari na;

⁴⁴ inisip da king kayabe da ne king grupu ra. Pepatingapun na lang maglakad inyang apansingan da king e re kayabe. Penintun de karing kamaganak da at kakaluguran,

⁴⁵ oneng e re ikit. Inya migbalik la Jerusalem ban panintunan de.

⁴⁶ King katlung aldo, ikit de kilub ning Templo; makalukluk yang kayabe da ring Judio a talaturu, makiramdam ya at mangutang karela.

⁴⁷ Mengapamulala la ding sablang mekaramdam kang Jesus king kabiasnan na at pakibat.

⁴⁸ Mipamulala la ding pengari na inyang ikit de at nganang ima na, Anak, obat depatan mu kekami iti? I tatang mu at aku migaganaka kami king pamanintun keka.

⁴⁹ Pekibat na karela, Baket penintun yu ku? E yu wari balu king kailangan kung atyu king bale nang Ibpa ko?

⁵⁰ Oneng e ra aintindian ing buri nang sabian.

⁵¹ Kayabe reng migbalik Nazaret i Jesus. Meging mapamintu ya karela. Sinikap na ngang Maria iting bage king pusu na.

⁵² At dinagul ya i Jesus king masanting a pamikakatawan ampon king kabiasnan at katanggap-tanggap ya king Dios at karing tau.

3

¹ Labi neng limang banuang Emperador kanita i Tiberio; i Poncio Pilato ya naman ing gobernador king Judea, at i Herodes ya ing pamuntuk ning Galilea. I Felipe a kapatad na pamuntuk ne man king sakup na ning Iturea at Traconite. I Lisanias ya ing pamuntuk king Abilinia.

² I Anas at i Caifas naman ila ding pekapun ding pari. King panaun a ita atyu king disyerto i Juan a anak nang Zacarias. Kanita dinatang kang Juan ing amanu na ning Dios.

³ Inya linual ya i Juan at linibut king mabilug a sasakupan ning Ilug ning Jordan. At panaral na, Sisian yu la at painggulutan ding kekayung kasalanan at pabinyag kayu ban ing Dios patawaran na kayu.

⁴ Antimo ing makasulat king libru nang propeta Isaias, Ating metung a taung kukulisak king disyerto: Isadia ye ing dalanan ning Ginu; tuliran ye ing dalan a dalanan na!

⁵ Tambunan yu la ding kulkul, at patagan ding bunduk at bunduk-bundukan. Tuliran yu la ding dalan a bukut, at samasnan yu la ding matsurang dalan.

⁶ Ding sablang tau akit da ing pamagligtas na ning Dios!

⁷ Dakal lang taung linapit ban pabinyag la kang Juan. Ngana karela, Ikayung lahing ubingan! Ninung sinabi kekayung aligtasan yu ing mua na ning Dios a malapit nang datang?

⁸ Daptan yu la detang bage a pakilala king sinisi na kayu at ginulut karing kekayung kasalanan. At e yu pangangas sasabian king i Abraham ya ing kekayung makatua. Sasabian ku kekayu king agyang karing batung deni ing Dios makapalto yang lahi nang Abraham!

⁹ Makasadia ne ing palakul ban kuturan la angga king yamut ding tanaman. Makutud ya ing balang tanaman a e mamungang mayap at miyugse ya king api.

¹⁰ Ngarang kinutang kang Juan, Nung makanyan, nanu ing sukat ming daptan?

¹¹ Nganang mekibat, Ninuman ing ating aduang kapiblas a imalan sukat neng idake ing metung ketang ala, at ing ninumang ating pamangan sukat na lang dinan ding aliwa.

¹² Linapit la kang Juan ding mapilan a talapanyingil buis ban pabinyag at kitnan de, Maestro, nanu ing daptan mi?

¹³ Pekibat na karela, E kayu sisingil sobra king sukat yung singilan.

¹⁴ Kitnan dia naman ding mapilan a sundalus. Ngara, Ikami naman, nanu ing kekeng sukat daptan? Pekibat na karela, E kayu kakuang salapi kaninu man king kapamilatan na ning puersa o king uli na ning pamamatakut. Managyu na kayu king sueldung tatanggapan yu.

¹⁵ Meragul ing kapanayan ding tau at pigmulalan de i Juan. Inisip da king ya na siguru ing Cristo.

¹⁶ Inya nganang Juan karela ngan, Bibinyagan da kayu king danum, oneng ing metung a maygit kesa kanaku datang ya. E ku man karapatdapat agyang kalag mu karing tali nang sandalyas. Binyagan na kayu king Banal a Espiritu ampon king api.

¹⁷ Darala ne ing sabungke na ba nang daran at ikawani ing pale king sepu at tipunan na ing pale king bangan at dulukan na ing sepu king aping e matatda kapilan man.

¹⁸ King miyayaliwang paralan agkatan na lang Juan ding tau kabang panaral na karela ing Mayap a Balita.

¹⁹ Oneng menaral yang laban i Juan kang Gobernador Herodes, uling gewa neng asawa na i Herodias agyamang asawa ne ning kapatad na. Dakal pa ing e mayap a depat nang Herodes.

²⁰ At ing lalu pang e mayap a depat na ya ing pepasukul ne i Juan.

²¹ Mebinyag la ngan ding taung atyu karin at pati na i Jesus. Kabang manalangin ya i Jesus mibuklat ya ing banua.

²² At tinipa ya ing Banal a Espiritu a anting patipati at tinuklu ya kang Jesus. Nganang sinabi ning metung a siwalang ibat banua, Ika ing Anak kung pakamalan; mipaligayan kung tutu keka.

²³ Atin neng atlung pulung banua tua i Jesus inyang pegumpisan na ing obra na. King kaisipan da ring tau, i Jesus anak neng Jose a anak nang Heli,

²⁴ a anak nang Matat, a anak nang Levi, a anak nang Melki, a anak nang Janai, a anak nang Jose,

²⁵ a anak nang Matatias, a anak nang Amos, a anak nang Nahum, a anak nang Esli, a anak nang Nagai,

²⁶ a anak nang Maat, a anak nang Matatias, a anak nang Semein, a anak nang Josec, a anak nang Joda,

²⁷ a anak nang Joanan, a anak nang Resa, a anak nang Zerubabel, a anak nang Salatiel, a anak nang Neri,

²⁸ a anak nang Melki, a anak nang Adi, a anak nang Cosam, a anak nang Elmadam, a anak nang Er,

²⁹ a anak nang Josue, a anak nang Eliezer, a anak nang Jorim, a anak nang Matat, a anak nang Levi,

³⁰ a anak nang Simeon, a anak nang Juda, a anak nang Jose, a anak nang Jonam, a anak nang Eliakim,

³¹ a anak nang Melea, a anak nang Menna, a anak nang Matata, a anak nang Natan, a anak nang David,

³² a anak nang Jese, a anak nang Obed, a anak nang Boaz, a anak nang Salmon, a anak nang Nason,

³³ a anak nang Aminadab, a anak nang Admin, a anak nang Arni, a anak nang Hezron, a anak nang Perez, a anak nang Juda,

³⁴ a anak nang Jacob, a anak nang Isaac, a anak nang Abraham, a anak nang Tera, a anak nang Nahor,

³⁵ a anak nang Serug, a anak nang Reu, a anak nang Peleg, a anak nang Eber, a anak nang Sela,

³⁶ a anak nang Cainan, a anak nang Arfaxad, a anak nang Sem, a anak nang Noe, a anak nang Lamec,

³⁷ a anak nang Matusalem, a anak nang Enoc, a anak nang Jared, a anak nang Mahalaleel, a anak nang Kenan,

³⁸ a anak nang Enos, a anak nang Set, a anak nang Adan, a anak ning Dios.

4

¹ Meko ya i Jesus king Ilug ning Jordan; kitmuan ya king Banal a Espiritu at dela ne ning Espiritu king disyerto

² nung nu ne tiksuan ning diablo kilub ding apat apulung aldo. E ya bitasang mengan nanuman kilub da reting aldo, inya tutu yang danupan inyang milabas la.

³ Ngana ning diablo, Nung ika ing Anak ning Dios, yutus mu kaniting batu ing maging tinape ya.

⁴ Pekibat nang Jesus, Ing Kasulatan sasabian na, E mu bukud king tinape ya mabibie ing tau.

⁵ Kaybat na nita, inukiat ne ning diablo king matas a lugal at king metung a saglit pepakit na la kang Jesus ding sablang kayarian na ning yatu.

⁶ Ngana ning diablo, Ibie ku keka ing sablang kayupayan at ing sablang pibandian na ning yatu uling iti ngan miyabie kanaku, inya aibie ku kenu mang buri kung ibie.

⁷ Iti ngan maging keka nung siklaud ka king arapan ku.

⁸ Nganang mekibat Jesus, Ing Kasulatan sasabian na, Samban me ing Ginung kekang Dios at ya mung bukud mung suyuan.

⁹ Kanita tiki ne ning diablo karin Jerusalem at dela ne king taluktuk na ning Templo at ngana, Nung ika ing Anak ning Dios, luksu kang ibat ken,

¹⁰ uling ing Kasulatan sasabian na, Itubud na la ning Dios ding anghel na ba ra kang ingatan.

¹¹ Sasabian na naman, Sapnuan da ka karing karelang gamat ban e la manasakit ding bitis mu karing batu.

¹² Pekibat nang Jesus, Ing Kasulatan sasabian na, E me sukat paniubukan ing Ginung kekang Dios.

¹³ Inyang e ne atuksu ning diablo i Jesus karing miyayaliwang paralan, likuan ne king mapilan a panaun.

¹⁴ Migbalik ya Galilea i Jesus at atyu keya ing upaya na ning Banal a Espiritu. Mikalat ing balita tungkul kang Jesus king mabilug a lugal a ita.

¹⁵ Tinuru ya karing karelang sinagoga at pupurian de ring sabla.

¹⁶ Kaybat na nita, mibalik ya Nazaret i Jesus, ing lugal nung nu ya meragul. King Aldo ning Sabbath, antimo ing ugali na, minta ya king sinagoga. Tinalakad ya ban mamasa karing Kasulatan.

¹⁷ Binie re kang Jesus ing libru nang propeta Isaias. Biklat ne ing libru at ikit ne at binasa iting makasulat:

¹⁸ Ing Espiritu ning Ginu atyu kanaku, uling pinili na ku ban ipanaral ke ing Mayap a Balita karing pakakalulu. Tinubud na ku ban ihayag ing kalayaan karing bihag, at ing pangabalik da panimanman ding bulag, at ing pangayatbus ding mayayalipit,

¹⁹ at ipabalu ing banua ning pamagligtas ning Ginu king balen na.

²⁰ Lilun neng Jesus ing libru, binalik ne king kasaup, at linukluk ya. Makalawe la kang Jesus ding sablang tau king sinagoga.

²¹ Ngana karela, Metupad ya ngeni iting Kasulatan kabang pakiramdaman yeng mababasa.

²² Ikua na la ngan kapanamdaman at pigmulalan da ing sintingan na ning sinabi na. Ngara, Aliwa wari iti ing anak nang Jose?

²³ Ngana karela, Balu ku king sabian ye kanaku ing kasebian, Doktor, uluan mu ing kekang sarili. At sabian yu naman kanaku, Daptan mu munaman king kekang balen ing abalitan ming depat mu karin Capernaum.

²⁴ Ngana pang Jesus, Sasabian ku iti kekayu, e ya miparangalan kapilan man ing propeta king sarili nang balen.

²⁵ Pakiramdaman yu ku: katutuan king dakal lang babaing mebalu karin Israel king panaun nang Elias inyang e minuran kilub ding atlung banua at kapitna, at mika maragul a danup king mabilug a bansa.

²⁶ Makanyan man, e ya mituburan munta i Elias kaninu man kareti nune mu king babaing mebalu ning Zarepat, king sakup ning Sidon.

²⁷ At dakal lang leprosuan karin Israel king panaun nang propeta Eliseo; oneng metung man kareti alang kinayap nung e mu i Naaman a tau Siria.

²⁸ Mimua la ding sablang taung atyu king sinagoga inyang dimdam da iti.

²⁹ Tinalakad la at liwal de i Jesus king balen at dela re king bingit na ning bunduk-bundukan a katatalakaran na ning karelang balen ba reng inabu king bangin.

³⁰ Oneng linabas ya kalibudtan da ring dakal a tau at sinulung na ing pamaglakad na.

³¹ Kaybat na nita, minta ya i Jesus king Capernaum, ing metung karing balen ning Galilea. Tiru na la ding tau king Aldo ning Sabbath.

³² Meniglo la ngan king pamanuru na uling ing pamagsalita na ating kayupayan.

³³ Ating metung a lalaki king sinagoga a ating espiritung marawak; kinulisak yang masikan. Ngana,

³⁴ Nanu ing buri mu kekami, Jesus ning Nazaret? Minta ka wari keti ba mu keng gisanan? Balu ku nung ninu ika: ika ing Banal nang tubud ning Dios!

³⁵ Nganang minutus Jesus king espiritung marawak, Magtahimik ka at lumual ka king lalaking yan! Bitbat ne ning demonyu ing lalaki king arapan da; linual ya at e ne penasakit mang bitasa.

³⁶ Mengapamulala la ding sabla at ngara king metung at metung, Nanung klasing pamagsalita yan? King mitmung kayupayan ayuyutus na lang Jesus ding espiritung marawak at mamintu na la man keya!

³⁷ At mikalat king sablang suluk na ning lugal a ita ing balita tungkul kang Jesus.

³⁸ Meko ya i Jesus king sinagoga at minta ya king bale nang Simon. Matas ya lagnat ing katuangan nang babaing Simon at sinabi re kang Jesus.

³⁹ Lepitan ne king pagkeran na at inutus na king lagnat king lakuan ne. Likuan ne ning lagnat at agad-agad yang tinalakad at sinilbian na la.

⁴⁰ Inyang limbug ne ing aldo, ding sablang ating kamaganak a maki miyayaliwang sakit dela da la kang Jesus; timpak na la ding gamat na king balang metung karela at kinayap la ngan.

⁴¹ Pati demonyu linual karing taung dakal at kukulisak da, Ika ing Anak ning Dios! Oneng binawal na lang Jesus at e na la buring magsalita, uling balu ra king ya ing Cristo.

⁴² Inyang ganingaldo na, meko ya i Jesus king balen at minta ya king metung a lugal a tahimik. Panintunan de ring tau at inyang atagpuan de e ra ne buring mako.

⁴³ Oneng sinabi na karela, Kailangan munaman ing ipanaral ke ing Mayap a Balita na ning Kayarian ning Dios karing aliwang balen, uling iti ya ing tinubud nang daptan ku ning Dios.

⁴⁴ Inya menaral ya karing sinagoga da ring Judio.

5

¹ Makatalakad ya kanitang misan i Jesus king pampang ning Dagat-dagatan ning Genesaret at panikuanan da ring tau ing milapit kang Jesus ban makiramdam king amanu na ning Dios.

² Ikit na lang makasadsad king pampang ding aduang bangka; sidsad da la reti ding manasan ban linisan da la ring karelang lambat.

³ Sinake ya i Jesus king metung kareting bangka, itang kang Simon at inawad na kang Simon king ilaut neng bagya king pampang. Linukluk ya i Jesus king bangka at tiru na la ding dakal a tau.

⁴ Kayari nang migsalita, ngana kang Simon, Ilaut me pang bagya ing bangka king malalam at ibaldug yu la ding lambat yu ba kayung makarakap asan.

⁵ Nganang mekibat Simon, Maestro, kabukas na keng babaldug lambat, oneng e ke mekarakap nanuman. Makanyan man, nung ita ya ing yutus mu, ibaldug ku la ding lambat.

⁶ Bildug da la ring lambat; milalu la king karakal ding arakap dang asan at halus masira la ding lambat da.

⁷ Inya sininialan da la ring kayabe ra karing aliwang bangka ban lumapit la at sumaup karela. Linapit la at seke da la ring asan karing adua rang bangka. Halus mititiab la ding bangka king pangakatmu ra.

⁸ Inyang ikit nang Simon Pedro iting mepalyari, siniklaud ya arap nang Jesus at ngana, Dumayu ka kanaku, Ginu, uling tau kung palpikasala!

⁹ Mengapamulala ya i Simon at ding kayabe na king keraklan da ring asan a arakap da.

¹⁰ Makanyan ya namang mengapamulala i Santiago at i Juan a anak nang Zebedeo at kayabe nang Simon. Nganang Jesus kang Simon, E ka tatakut, manibat ngeni manasan kang tau.

¹¹ Ginuyud da la king mamala ding bangka ra; likuan da ing sabla-sabla at tinuki la kang Jesus.

¹² Misan a aldo, atyu i Jesus king metung a balen nung nune disnan ing metung a lalaking leprosuan king mabilug nang katawan. Inyang ikit ne i Jesus, migsakab ya king arap na at inawad na, Ginu, nung burian mu, apakayap mu ku!

¹³ Inatiat neng Jesus ing gamat na at tigkilan ne. Ngana, Buri ku, kumayap ka! Kanita mu rin milako ya lepra ing lalaki.

¹⁴ At nganang minie bilin Jesus, E mu paniabian iti kaninu man, nune munta ka king pari, palawe ka keya. Kaybat miyain kang ain antimo ing inutus nang Moises ban patunayan karing sabla king ngeni malinis na ka.

¹⁵ Oneng lalung mikalat ing balita tungkul kang Jesus, inya minta la kang Jesus ding dakal a tau ban makiramdam at paulu king miyayaliwang sakit da.

¹⁶ Makanyan man, maralas yang pupunta i Jesus karing lugal a tahimik at karin ya manalangin.

¹⁷ Misan a aldo kabang tuturu ya i Jesus, makalukluk la ding mapilan a Pariseo at talaturu ning Kautusan a menibatan karing miyayaliwang balen ning Galilea, Judea, ampon ibat Jerusalem. Ing upaya nang pakayap ning Ginu atyu kang Jesus.

¹⁸ Darala de ring mapilan a lalaki ing metung a paralitiko a makabili king pagkeran. Buri deng ilub king bale ban ilapit de kang Jesus.

¹⁹ Uling dakal la ding tau ala lang adalanan ba reng alub. Inya inukiat de king bubungan at biklas da la ring tisa at karin de bildug ing pagkeran na libutad da ring tau at king mismung arapan nang Jesus.

²⁰ Inyang ikit nang Jesus ing maragul dang kasalpantayanan, ngana king lalaking paralitiko, Kakaluguran, mipatawaran la ding kekang kasalanan. fig,,,,,... bildug ing pagkeran na libutad da ring tau...,(5:19)fig*

²¹ Ngarang misabisabi ding talaturu ning Kautusan at Pariseo, Ninu iting magsalitang kalapastanganan king Dios? Alang makapamatawad kasalanan nune mu ing Dios!

²² Oneng balu nang Jesus ing karelang isipan, inya ngana karela, Baket makanyan kayu isipan?

²³ Mayan sabian ing: Ding kasalanan mu mipatawaran la o Talakad ka at lumakad?

²⁴ Patunayan ku kekayu king ing Anak ning Tau atin yang kayupayan mamatawad kasalanan keti king yatu. At kanita sinabi na king lalaking paralitiko, Talakad ka, pusanan me ing pagkeran mu at muli na ka!

²⁵ Kanita mu rin, king akakit da ngan, tinalakad ya; kinua ne ing pagkeran na at minuli yang pupuri king Dios.

²⁶ Lubus la ngan mengasdan! King mitmung takut, pinuri de ing Dios. Ngara, Makapagmulalang tutu ing ikit tamu ngeni!

²⁷ Kaybat na nita, linual ya i Jesus at ikit ne ing metung a talapanyingil buis a milagyuan Levi; makalukluk ya king opisina na. Nganang Jesus, Tuki ka kanaku.

²⁸ Tinalakad ya i Levi, likuan na ing sabla at tinuki ya kang Jesus.

²⁹ At pigtawan neng maragul Levi i Jesus king bale na. Dakal lang talapanyingil buis at aliwa pang tau ding kasulu ra.

³⁰ Bubulung la ding mapilan a Pariseo at talaturu ning Kautusan at ngarang mengutang karing alagad na, Baket makipangan kayu at makipaninum karing talapanyingil buis at palpikasala?

³¹ Nganang mekibat Jesus karela, E re kailangan ding taung alang sakit ing doktor, nune ding taung masakit ilang mangailangan king doktor.

³² E ku dinatang ban ausan ku lang sumisi ding banal, nune ding makasalanan.

³³ Ngara ding mapilan a tau kang Jesus, Parati lang mag-ayunu ampon manalangin ding alagad nang Juan at antimu rin ding alagad ding Pariseo. Oneng e la mangiling king pamangan at pamaninum ding alagad mu.

³⁴ Nganang mekibat Jesus, Isipan yu kaya king ding bisita king kasalan makapag-ayunu la kabang kayabe de pa ing lalaking kakasal? Agyang makananu ali la!

³⁵ Oneng datang ing oras a mikawani ne karela ing lalaking kakasal at kanita na la mag-ayunu.

³⁶ Selita nia naman Jesus karela iting talimhaga. Ngana, Alang taung kakuang kapirasu king bayung imalan ba neng panagpi king lumang imalan. Nung daptan na iti, apirasu ne ing imalan a bayu at iting kapirasung imalan a bayu e ya mibage king luma.

³⁷ Ala munamang taung maglulan bayung alak karing laun a lulanan a megawa king balat animal. Nung daptan na iti, atdasan na la ning alak a bayu ding laun a lulanan at miyugse mu ing alak at matdas la ding lulanan.

³⁸ Sukat ilulan ing bayung alak karing bayung lulanan a gewa king balat animal.

³⁹ E na buri ning ninuman ing bayung alak kaybat nang mekainum king lumang alak. Maniaman ing lumang alak kesa king bayu, nganang sumabi.

6

¹ Misan a Aldo ning Sabbath, lalabas ya i Jesus king asikan. Menakdut la ding alagad na king trigu at saka ra lulugusan karing palad da ban gigutan.

² Ngara ding mapilan a Pariseo, Baket daraptan yu ing babawal na ning kekatamung Kautusan king Aldo ning Sabbath?

³ Pekibatan na lang Jesus, E yu pa wari abasa ing depat nang David at ding kayabe na inyang meranup la?

⁴ Linub ya king bale na ning Dios, kinua na la ding tinape a miyain king Dios, pengan na la at saka na la dininan ding kayabe na. Labag king kekatamung Kautusan ing mangan ya ing ninuman karing tinape miyain king Dios, subali mu ding pari.

⁵ Tiglung na pang Jesus, Ing Anak ning Tau Ginu ne ning Sabbath.

⁶ Kanitang misan munamang Aldo ning Sabbath, linub ya i Jesus king sinagoga at tinuru ya. Ating metung a lalaki karin; panat ya wanan a gamat.

⁷ Ding mapilan a talaturu ning Kautusan ampon Pariseo manintun lang dalan ban asangkanan deng darapat mali, inya pegumasdan deng miamasamas ban lalwan da nung manulu ya king Aldo ning Sabbath.

⁸ Oneng balu nang Jesus ing karelang babalakan, inya ngana king taung panat a gamat, Talakad ka at munta keni king arap. Tinalakad ya ing lalaki at minta ya king arap.

⁹ Kanita nganang Jesus karela, Kutnan da kayu. Paintulut na ning kekatamung Kautusan ing dapat mayap o dapat e mayap o ing sagip bie o ing makamate king Aldo ning Sabbath?

¹⁰ Miglalawe yang makadurut karela ngan at kaybat ngana king lalaki, Iyatiat me ing gamat mu. Inatiat ne at kinayap ya ing gamat na.

¹¹ Oneng mikamas la kang Jesus at pisabisabi ra nung nanung malyari dang arapat laban kang Jesus.

¹² King panaun a ita, minukiat ya i Jesus king metung a bunduk-bundukan ban manalangin. Karin ya menatiling kabukas manalangin.

¹³ Inyang mayabak na, inaus na la ding alagad na. Memili yang labing adua kareti at inaus na lang apostol:

¹⁴ i Simon (a pemalagyuan na namang Pedro) at i Andres a kapatad na; i Santiago at i Juan, i Felipe at i Bartolome,

¹⁵ i Mateo at i Tomas, i Santiago a anak nang Alfeo at i Simon (a ausan dang Patriota),

¹⁶ i Judas a anak nang Santiago at i Judas Iscariote, ing migtaksil.

¹⁷ Kinuldas ya i Jesus king bunduk-bundukan a kayabe ra. Miras ya king kapatagan at disnan na la karin ding dakal karing alagad na. Atyu la naman karin ding dakal a taung menibatan king mabilug a Judea at Jerusalem at menibatan karin Tiro at Sidon, ding aduang siudad king lele ning dagat

¹⁸ ban makiramdam kang Jesus at paulu karing karelang sakit. Dinatang la naman ding liligaligan da ring marawak a espiritu at kinayap la.

¹⁹ Pagkapilitan deng atagkil ding sablang tau, uling pakayapan na la ngan ning upayang lulual kang Jesus.

²⁰ Linawe na lang Jesus ding alagad na at ngana, Mapalad kayu, ikong pakakalulu, uling kekayu ya ing Kayarian ning Dios!

²¹ Mapalad kayu, ikong danupan ngeni, uling mipakabsian kayu! Mapalad kayu, ikong tatangis ngeni, uling mipaligayan kayu!

²² Mapalad kayu nung pikasaman da kayu, tanggian at pamakarinayan at paniabianan e mayap king uli na ning Anak ning Tau!

²³ Tumula kayu at magsaya potang mapalyari na ita, uling maragul ing ablas a makapanaya kekayu karin banua. Makanyan kabud ing depat da ring karelang makatua karing propeta.

²⁴ Oneng kalulu na kayu, ikong mabandi ngeni; tikman yu na ing kanawan!

²⁵ Kalulu na kayu, ikong ating labis-labis a pagkabie, uling dumanup kayu! Kalulu na kayu, ikong magsaya king tula, uling tumangis kayu!

²⁶ Kalulu na kayu, ikong pupurian da ring tau, uling makanyan munaman ing pamipuring depat da ring makatua da karing e tutung propeta.

²⁷ Ikayung makiramdam kanaku, sasabian ku kekayu: Luguran yu la ding kekayung kalaban; daptananan yu lang mayap ding masama kekayu.

²⁸ Bendisyunan yu la ding maniumpa kekayu, at ipanalangin yu la ding manabusu kekayu.

²⁹ Nung timpaling de ing pisngi mu, iyarap mia naman ing kasumangid. At nung kuanan de ing kekang balabal, ibie me pati na ing kekang baru.

³⁰ Ibie mu kaninu mang maniawad keka ing aduan na, at e mu ne pasubli nung kuanan ne ning aliwa ing bandi mu.

³¹ Daptan mu karing aliwa itang buri mung daptan da keka.

³² Nung ding malugud kekayu ila mung luluguran yu, baket manaya kayu pang ablas? Agyang ding makasalanan kaluguran da la ring malugud karela!

³³ At nung ding daraptanan yung mayap ila mu detang darapat mayap kekayu, baket manaya kayung ablas? Agyang ding makasalanan daraptan da ita!

³⁴ At nung ding makapamayad ila mung paparaman yu, baket manenaya kayung ablas. Agyang ding makasalanan paparaman da la ring kalupa dang makasalanan balang makasingil!

³⁵ E makanyan! Sukat yu lang luguran ding kekayung kalaban, at daptananan yu lang mayap. Mamaram kayu, at e na kayu manenayang mibayaranan pa. King anti kaniting paralan tanggap kayung maragul a ablas at maging anak na kayu ning Kakataskatasan a Dios, uling maganaka ya agyang karing alang pasalamat at marawak.

³⁶ Maging malunusan kayu, nung makananu yang malunusan i Ibpa yu.

³⁷ E yu la atulan ding aliwa, at e na kayu naman atulan ning Dios. E kayu mamarusa, at e na kayu parusan ning Dios. Mamatawad kayu, at patawaran na kayu naman ning Dios.

³⁸ Dinan yu la ding aliwa, at dinan na kayu naman ning Dios: tanggap kayu king ustung takal, masiksik, dakal at maglapo ing miyabie kekayu. King sukad a piniukad yu karing aliwa karin na kayu naman sukdan ning Dios.

³⁹ Selita nia namang Jesus iting talimhaga. Ngana, E ne ataid ning bulag ing kalupa nang bulag; nung tairan ne, parehu lang manabu king kulkul.

⁴⁰ Alang estudianti a maygit king maestro na; nung ayari na na ning estudianti ing pamagaral na, maging kalupa na ne ning maestro na.

⁴¹ Baket apapansin me ing puling king mata na ning kapatad mu, at e mu ne man apapansin ing trosung atyu king sariling mata mu?

⁴² Makananu mung sabian king kapatad mu, Kapatad, paburen mung idayu ke ing kekang puling ngening e me akakit ing trosung atyu king mata mu? Hipokrita! Ilako me pa ing trosung atyu king mata mu, at kanita masala meng akit at alako ing puling king mata ning kapatad mu.

⁴³ E ya mamungang e mayap ing tanaman a mayap ni ing tanaman a e mayap e ya mamungang mayap.

⁴⁴ Makikilala ya ing balang tanaman karing bunga na. E kayu mupul biabas nung ing tenam yu santol ya; e kayu munaman mupul ubas nung ing tenam yu lansonis ya.

⁴⁵ Papalto yang kayapan ing mayap a tau ibat king mayap a makalaman king pusu na, at papalto yang e mayap ing e mayap a tau ibat king marawak a makalaman king pusu na. Uling magsalita ya ing tau ketang makalaman king pusu na.

⁴⁶ Baket ausan yu kung Ginu, Ginu, at e yu naman daraptan ing sasabian ku?

⁴⁷ Sabian ke kekayu nung ninu ing kalupa na ning balang metung a lalapit kanaku, ing makiramdam karing amanu ku at mamintu.

⁴⁸ Kalupa ne ning metung a taung manalakad bale; kinulkul yang malalam at telakad ne ing pundasyun na babo ning batu. Dinatang ing albug at linapo ya ing ilug, at delanan ne ning masikan a agus ing bale; at e ne aragsa uling matatag ya pangatalakad.

⁴⁹ Oneng ing makiramdam karing amanu ku at e na la pamintuan, kalupa ne ning metung a taung menalakad bale a e mibiling matatag a pundasyun. Inyang datangan ne iti ning albug agad nang miragsa, at makatakut ing pangasaldak na!

7

¹ Inyang ayari na na lang sinabing Jesus deting sablang bage karing tau minta ya Capernaum.

² Karin ating metung a kapitan da ring sundalung Romano a tutung malugud king ipus na. Masakit ya iting ipus at atyu king bingit ning kamatayan.

³ Kabud abalitan na niting kapitan king atyu karin i Jesus, tiburan na la ding mapilan a makatuang Judio ban pakisabi ra kang Jesus king puntalan ne at pakayapan ing ipus na.

⁴ Panakit da kang Jesus, ngarang mekisabing mayap, Karapatdapat ya king saup mu ing kapitan.

⁵ Kaluguran na la ding kekatamung kabalenq at penalakad na katamu pang metung a sinagoga.

⁶ Uli na niti, tikian na lang Jesus. Inyang malapit na la king bale, pepasagana ne niting kapitan i Jesus karing kakaluguran na ban sabian da ing anti kaniti, Ginu, e na kayu paipangabala. E ku karapatdapat ban puntalan yu ku king bale ku

⁷ ni e ku karapatdapat makiarap kekayu. Magsalita kayu mu at kumayap ya ing ipus ku.

⁸ Uling metung kung manibala a sakup da naman ding mangatas a opisyal at ating kung sundalus a sasakupan. Nung yutus ku king metung, Lumakad ka, mamintu ya; nung king aliwa naman sabian ku, Mekeni, lumapit ya; at nung sabian ku king kanakung ipus, Daptan mu ini, daptan na.

⁹ Mipamulala ya i Jesus inyang dimdam na iti; belikdan na la ding dakal a taung tutuki keya. Ngana karela, E ku pa menakit kasalpantayanan a kalupa na niti agyang king Israel!

¹⁰ Inyang mibalik na la ding tubud king bale na ning kapitan, disnan deng mayap na ing ipus.

¹¹ Kaybat na nita, minta ya i Jesus king balen ning Nain. Tinuki la kang Jesus ding alagad na at ding dakal a tau.

¹² Inyang atyu ne king pasbul ning balen asaganan ne ing metung a libing. Ing mete bugtung niang anak a lalaki ning babaing mebalu. Dakal lang taung ibat king siudad ding mekipaglibing.

¹³ Panakit na ning Ginu king babaing mebalu, melunus ya keya. Inya sinabi na king babai, E ka tatangis.

¹⁴ Kanita linapit ya at tigkilan ne ing kabaung at tinuknang la ding mamusan. Nganang Jesus, Baintau, sasabian ku keka: mibangun ka!

¹⁵ Linukluk ya ing mete at saka ya migsalita. Binie neng Jesus kang ima na.

¹⁶ Mitakutan la ding sabla at pinuri de ing Dios. Ngara, Linto ya libutad tamu ing metung a maragul a propeta! Dinatang ya ing Dios ba neng iligtas ing balen na!

¹⁷ Iting balita tungkul kang Jesus kinalat king mabilug a Judea at karing misiping-siping a balen.

¹⁸ Belitanan de i Juan ding alagad na tungkul kareting sablang bage a mepalyari. Inya inaus na lang Juan ding adua karela,

¹⁹ at tinubud na la king Ginu ba rang ikutang, Ika ing sasabian nang datang Juan o manaya ke pang aliwa?

²⁰ Inyang miras la kang Jesus sinabi ra, Tiburan na keng Juan a Maminyag ba ming ikutang keka nung Ika ing datang o manaya ke pang aliwa?

²¹ Kanitang penandit a ita pepakayap na lang Jesus ding dakal a tau karing karelang sakit at kapanamdaman ampon karing espiritung marawak, at pepasublian na la panimanman ding dakal a bulag.

²² Nganang mekibat karing tubud nang Juan, Magbalik kayu at ibalita yu kang Juan ing ikit yu at dimdam: manakit la ding bulag, makalakad la ding pile, kakayap la ding leprosuan, makaramdam lang pasibayu ding maklak, at mabibie lang pasibayu ding mete at mipanaral ing Mayap a Balita karing pakakalulu.

²³ Mapalad ya ing taung e magduda kanaku!

²⁴ Inyang meko na la ding tubud nang Juan, migsalita ya i Jesus karing dakal a tau tungkul kang Juan. Ngana, Inyang pintalan ye i Juan king disyerto, nanu ing buri yung akit? Ing metung a timbu a babayutuk na ning angin?

²⁵ Nanu ing buri yung akit? Ing taung misusulud king masiglang imalan? King kamatutuanan, ding mibablas makanyan sobra-sobra la kabiayan at manuknangan la karing palasyu!

²⁶ Sabian yu na mo kanaku nung nanu ing buri yung aket? Ing metung a propeta? Wa, sasabian ku kekayu, maygit ya pa king metung a propeta ing ikit yu.

²⁷ Uling i Juan ya ing sasabian na ning Kasulatan, Iti ya ing tubud ku, ngana ning Dios. Tuburan keng mumuna keka ban isadia ne ing dalan para keka.

²⁸ Sasabian ku kekayu: maygit ya i Juan kaninu mang taung mibait; oneng ing pekamalati king Kayarian ning Dios maygit ya kesa kang Juan.

²⁹ Dimdam de i Jesus ding sablang atyu karin at pati na ding talapanyingil buis. Deti ila ding mamintu king kaburian na ning Dios at ila ding bininyag nang Juan.

³⁰ Oneng tinggian da ring Pariseo at ding talaturu ning Kautusan ing parasan na ning Dios para karela, at e la mebisang pabinyag kang Juan.

³¹ Ngeni, kaninu ku la ipakilupa ding tau king panaun a iti? Ninu ing kalupa ra?

³² Mengari la karing anak a pakalukluk king plasa. Ing metung a grupu sabian na king aliwa, Menigtigan keng masayang musika para kekayu, oneng e kayu tinerak! Migkanta keng malungkut, oneng e kayu tinangis!

³³ Dinatang ya i Juan a Maminyag, mig-ayunu ya at e mininum nanumang alak, oneng ngayu, Alipnan ne ning demonyu!

³⁴ Dinatang ya ing Anak ning Tau; mengan ya at mininum alak at ngayu, Lawan ye iting tau! Matako ya at lasenggu ampon kakaluguran de ring talapanyingil buis at ding makasalanan!

³⁵ Makanyan man, mipatunayan yang matulid ing kabiasnan na ning Dios karetang tatanggap kaniti.

³⁶ Kimbiran ne ning metung karing Pariseo i Jesus ban makipangan king bale na. Minta ya i Jesus king bale na at linukluk ya ban mangan.

³⁷ King balen a ita ating metung a babaing mabibie king pamikasala. Abalitan neng atyu makipangan king bale na ning Pariseo i Jesus. Uli na nita, migdala yang metung a alabastrong lulanan mitmung pabanglu.

³⁸ Linukluk ya lele nang bitis Jesus. Tatangis ya at besa na la king lua nang tutulu ding bitis nang Jesus. At kiskusan na la deti king buak na; penuma na la at saka na la tigtugan pabanglu.

³⁹ Inyang ikit na iti ning Pariseong mengumbira kang Jesus, sinabi na king sarili na, Nung ing taung ini tune yang propeta, sukat nang balu nung ninu at nung nanu yang uring babai ining tatagkil keyametung yang babaing palpikasala!

⁴⁰ Migsalita ya i Jesus at ngana, Simon, atin kung buring sabian keka. Nganang mekibat, Maestro, nanu pu ita?

⁴¹ Nganang Jesus, Ating aduang lalaking maki utang king metung a mamaram salapi. Ing utang na ning metung limang dalan a salaping pilak, at ing metung naman limang pulung salaping pilak.

⁴² Ala lang pamayad deting adua, inya parehu na lang pepatawaran king karelang utang. Ninu kareting adua ing lalung lugud king mematawad?

⁴³ Nganang Simon, Isipan ku pu, itang pepatawaran nang dakal. Sinabi nang Jesus, Ustu ing pakibat mu.

⁴⁴ Kanita belikdan neng Jesus ing babai at saka na sinabi kang Simon, Akakit me ing babaing ine? Dinatang ku king bale mu at e mu ku dininan danum a panos bitis, oneng ing babaing ini besa na la ding bitis ku king lua na at pepalangi na la king buak na.

⁴⁵ E mu ku selubungan inuma, oneng ya e na la tiknangan penuma ding bitis ku kabud dinatang ku.

⁴⁶ E me tigtugan laru ing buntuk ku, oneng ya kitmu na lang pabanglu ding bitis ku.

⁴⁷ Uli na niti, sasabian ku keka: linugud yang dakal a dakal uling mipatawaran la ding dakal nang kasalanan. Ninumang tinanggap ditak a kapatawaran, ditak mung lugud ing papakit na.

⁴⁸ Kanita sinabi nang Jesus king babai, Mipatawaran la ding kasalanan mu.

⁴⁹ Ngara king sarili da ring aliwang kasulu na king lamesa, Ninu kaya ining mangangas mamatawad kasalanan?

⁵⁰ Oneng sinabi nang Jesus king babai, Linigtas na ka ning kasalpantayanan mu; sulung, mako na kang payapa.

8

¹ Kaybat na nita, minta ya i Jesus karing balen at karing baryu. Panaral na ing Mayap a Balita tungkul king Kayarian ning Dios. Kayabe na la ding labing adua,

² at ding mapilan a babaing likuan da ring espiritung marawak at meulu king sakit a miyayaliwa: i Maria (a mayayaus Magdalena) nung kenu na la pepalualan ding pitung demonyu;

³ i Juana a asawa nang Cuza a katiwala nang Herodes; i Susana at ding aliwa pang babai. Gagamitan da reti ing sarili dang pibandian king pamaniaup da kang Jesus at karing alagad na.

⁴ Daratang lang alang patugut kang Jesus ding taung manibatan karing miyayaliwang balen. Inyang metipun la selita neng Jesus karela iting talimhaga. Ngana,

⁵ Linual ya ing metung a ortelanu ban salbag bini. King pamanialbag na, ating bining digpa king dalan-dalanan at medamusak, at pengan da ring ayup.

⁶ Ating digpa king mabatu at melangi inyang tinubu uling malangi ing gabun.

⁷ Digpa ing aliwa king libutad ning dikut a masuksuk. Ing bini at ing dikut a masuksuk miyagnan meragul, at piputan na ning suksuk ing bining tutubu.

⁸ Digpa ing aliwa namang bini king gabun a mataba, meragul at memungang tiadinalan a binutil balang metung. At nganang tinuglung Jesus, Makiramdam kayu, nung atin kayung balugbug!

⁹ Kitang da ring alagad nang Jesus nung nanu ing kabaldugan na niting talimhaga.

¹⁰ Nganang mekibat Jesus, Miyabie kekayu ing beluan tungkul karing lihim ning Kayarian ning Dios, oneng miyabie karing aliwa king kapamilatan da ring talimhaga ban kanita lumawe la man e la manakit, at makiramdam la man oneng e la makaintindi.

¹¹ Iti ya ing kabaldugan na ning talimhaga: ing bini ya ing amanu na ning Dios.

¹² Ding bining digpa king dalan-dalanan ila ding mekaramdam king amanu, oneng daratang ya ing diablo at sasamsaman na ing amanu karing pusu da ban e la maniwala at e la miligtas.

¹³ Ding bining digpa king gabun a mabatu ila naman detang dinamdam king amanu at tinggap dang matula. Oneng e tinaglus king pusu ra. Meniwala la sinaguli, oneng painggulut la potang daratang ing kapagsubukan.

¹⁴ Ing bining digpa libutad ning dikut a masuksuk kalupa da la detang makiramdam king amanu, oneng ing karelang kalingasngasan, ing pibandian at ing pamagsaya king bie ya ing makisiksikan king amanu at pupuputan da. Inya e na akuang lululut ning karelang bunga.

¹⁵ Ing bining digpa king gabun a mataba mangaintulid ya karetang dinamdam king amanu at sininup da iti kilub ning pusung mayap at mapamintu; iti menatili angga na inyang mika bunga.

¹⁶ Alang taung manyinding sulu at kaybat takpan ne king metung a palanggana o ibili ne lalam ning pagkeran. Nune, tutumpak ne king pibibilianan sulu ban kanita ding taung lulub bale akit da ing sala.

¹⁷ Ing nanumang bage makasalikut, mibulalag, at ing nanumang makatakap, mayakit at milantad king masala.

¹⁸ Uli na niti, mingat kayu king kekayung pamakiramdam; uling itang atin na miragdagan pa itang atyu na keya, at itang ala nanuman, milako pa itang ditak a isipan nang atyu na keya.

¹⁹ Dinatang ya i ima nang Jesus at ding kapatad nang lalaki, oneng e la milapit kang Jesus uli da ring dakal a tau.

²⁰ Ating metung a sinabi kang Jesus, I ima yu pu ampon ding kapatad yung lalaki atyu la king lual at buri da kayung akit.

²¹ Oneng sinabi nang Jesus karela ngan, I ima ku at ding kapatad ku ila detang makiramdam at mamintu king amanu na ning Dios.

²² Misan a aldo sinake ya i Jesus king bangka; kayabe na la ding alagad na. Ngana karela, Tara, dalakit tamu kasumangid na ning dagat-dagatan. At megumpisa lang dinalakit.

²³ Metudtud ya i Jesus kabang maglayag la. Tiniup ing masikan a angin king dagat-dagatan at lulub ing danum king bangka. Mibili la king maragul a panganib.

²⁴ Lepitan de ring alagad i Jesus at ginising de. Ngara, Maestro, Maestro! Malapit ta na mung mangamate! Mibangun ya i Jesus at sebianan ne ing angin at ing mangaragul a alun. Tinuknang at mesalese ing panaun.

²⁵ Kaybat na nita, ngana karing alagad na, Nukarin ing kekayung kasalpantayanan? Oneng mipamulala la at mitakutan. Ngara king metung at metung, Ninu kaya yan? Apapamintuan na pati na ing angin at ing alun!

²⁶ Sinadsad la king lugal da ring tau Gerasa, king kasumangid ning dagat-dagatan ning Galilea.

²⁷ Kabud kasaka nang Jesus, selubungan ne ning metung a tau karin. Iti maki demonyu ya. Malambat neng panaun lubas ni e manuknangan karing bale nune mu karing lukib a pipangutkutan.

²⁸ Kinulisak yang masikan panakit na kang Jesus; migsakab ya arap na at ngana, Jesus, Anak ning Kakataskatasan a Dios! Nanu ing buri mung daptan kanaku? Pakisabi kung mayap keka ing e mu ku sana panasakitan!

²⁹ Sinabi na iti uling inutus nang Jesus king espiritung marawak king lakuan ne. Maralas, nung sumpungan ne, agyang ikulung de o itali re bitis ampon gamat karing tanikala, apapatlud na la deti at darala ne ning demonyu king disyerto.

³⁰ Nganang kinutang Jesus, Nanu ka lagyu? Ing lagyu ku Batalyun, nganang mekibat, uling dakal lang demonyu ding linub keya.

³¹ Inawad da ring demonyu kang Jesus king e na la sana papuntalan king bangin.

³² Ating maragul a kawan babi malapit karin; manyibsiban la king libis ning bunduk-bundukan. Inawad da ring demonyu kang Jesus king paburen na la sanang lungub karing babi at peintulutan na la.

³³ Inya linual la ding demonyu king tau at linub la karing babi. Dinulung ya ing mabilug a kawan babi king saug papunta king dagat-dagatan, at melumud la karin.

³⁴ Ikit da ring pastul babi ing milyari. Memulayi lang meko, pemalita da ing balita king balen ampon karing baryung makapatulug.

³⁵ Linual la ding tau ban lawan da ing milyari. Disnan de i Jesus at ikit de ing lalaking pilualan da ring demonyu. Makalukluk ya iting lalaki arap nang Jesus, makaimalan ne at masalese ne pamisip at mitakutan la naman.

³⁶ Ding menakit king mepalyari pemalita ra karing tau nung makananu yang kinayap itang tau.

³⁷ At ding sablang tau king Gerasa inawad da kang Jesus ing mako ya uling tutu lang mitakutan. Inya sinake ya i Jesus king bangka at meko ya.

³⁸ Nganang mekisabing mayap kang Jesus ning lalaking pilualan da ring demonyu, Paintulutan yu ku pung tuki kekayu. Oneng nganang Jesus,

³⁹ Muli na ka at ipamalita mu nung nanu ing depat na ning Dios para keka. Linibut ya ing lalaki king mabilug a balen, at pemalita na ing depat nang Jesus para keya.

⁴⁰ Inyang migbalik ya i Jesus, matula deng selubungan ding tau, uling panenayan de ngan datang.

⁴¹ Kanita ya dinatang i Jairo, ing metung a opisyal ning sinagoga karin. Migsakab ya arap nang Jesus at inawad na king tukian ne sana king bale na,

⁴² uling mamamate ya ing kabubugtungan nang anak a babai a labing aduang banua tua. Kabang dalan pilulupungan de ring tau i Jesus.

⁴³ Kabilang ya kareti ing metung a babaing labi nang aduang banuang kayayagasan daya; megisan na king pamipaulu karing doktor ing pibandian na, oneng e ya kinayap.

⁴⁴ Mekisiksikan ya karing dakal a taung tutuki kagulutan nang Jesus, at tigkilan ne ing punta na ning imalan na. At kanita mu rin tinuknang yang daraya.

⁴⁵ Nganang mengutang Jesus, Ninung tinagkil kanaku? Alang minamin king ating tinagkil. At sinabi nang Pedro, Maestro, makapadurut la keka ding dakal a tau at misisiksikan la.

⁴⁶ Oneng nganang Jesus, Ating tinagkil kanaku! Dimdam kung ating upayang linual kanaku.

⁴⁷ Ikit na ning babai king merakap ya, inya migtapat ya at gagalgal yang migsakab king arap nang Jesus. King arapan da ring sabla pigtapat na nung baket tigkilan ne at nung makananu yang kinayap agad-agad.

⁴⁸ Nganang Jesus, Anak, pepakayap na ka ning kasalpantayanan mu. Mako na kang mitmung kapayapan.

⁴⁹ Kabang sasabian nang Jesus iti, dinatang ya ing metung a tubud ibat king bale nang Jairo. Mete ne pu ing anak yu, ngana kang Jairo, e yu ne pangabalanan ing Maestro.

⁵⁰ Dimdam nang Jesus iti at ngana kang Jairo, E ka tatakut; maniwala ka mu at kumayap ya.

⁵¹ Karas na bale Jesus ala yang peintulutan lungub kayabe na subali mu di Pedro, Juan at Santiago ampon ding pengari na ning anak.

⁵² Tatangis la at managulele ding sabla uli na ning milyari king anak. Nganang Jesus, E kayu tatangis, e ya mete ing anak; matudtud ya mu!

⁵³ Keylian de ngan uling balu ra king ing anak mete ya.

⁵⁴ Telanan neng Jesus king gamat at saka na sinabing masikan, Talakad ka, anak!

⁵⁵ Misubli ing bie na at kanita mu rin tinalakad ya. At inutus nang Jesus karela king dinan deng apangan na ing anak.

⁵⁶ E ra balu ing piramdaman da ring pengari na. Penabilin nang Jesus karela king e ra paniabian kaninu man ing mepalyari.

9

¹ Inaus na lang Jesus ding labing adua at dininan na lang upaya at kayupayan palual demonyu ampon pakayap king miyayaliwang sakit.

² Tiburan na la namang manaral tungkul king Kayarian ning Dios at pakayap karing masakit.

³ Sinabi na karela, E kayu magdalang nanuman king pamaglakad yu; maski tukud, datukanan, pamangan, salapi o imalan subali mu ing susulud yu.

⁴ Nu karin mang lugal a tanggapan da kayu manatili kayu king metung mung bale anggang e kayu lumipat aliwang balen.

⁵ Nung sakaling e ra kayu tanggapan, lakuan ye ing balen a ita at ipagpag yu ing alikabuk karing bitis yu bilang tutul karela.

⁶ Meko la ding alagad at minta la karing baryu; panaral da ing Mayap a Balita at pakayapan da la ring masakit king balang lugal a pintalan da.

⁷ I Herodes, ing gobernador ning Galilea, abalitan na ngan ing bage mangapalyari. Tutu yang mababalisa pamisip uling ding mapilan sasabian da king sinubli yang mebie i Juan a Maminyag.

⁸ Ding aliwa naman sasabian da king dinatang ya ing propeta Elias. Ding aliwa naman sasabian da king sinubli yang mebie ing metung karing propeta king minunang panaun.

⁹ Inya nganang Herodes, Pepatabtab ke batal i Juan; oneng ninu iting lalaking babalita ra? At pekikuanan neng akit i Jesus.

¹⁰ Migbalik la ding apostol at belita ra kang Jesus ing sablang depat da. Tiki na la at ila mung kayabe nang minta king balen ning Betsaida.

¹¹ Inyang abalu ra iti ding dakal a tau tinuki la kang Jesus. Tinggap na la at selitanan tungkul king Kayarian ning Dios, at pepakayap na la ding sablang sukat pakayapan.

¹² Inyang malapit neng lumbug ing aldo lepitan de ring labing adua at ngara, Palakuan yu na la ding tau ban mipunta la karing balen o baryung malapit ba lang manintun apangan da at apitudturan, uling mikelangan iting lugal.

¹³ Oneng nganang Jesus karela, Ikayu mismu dinan yu lang apangan da. Ngarang mekibat, Lima la mung tinape at aduang asan ding bakal mi. Buri mung mako kami ban saling pamangan para karing dakal a taung dete?

¹⁴ (Ating manga limang libu katau karing lalaking atyu karin.) Nganang Jesus karing alagad na, Paluklukan yu lang makagrupung tia limang pulu katau.

¹⁵ Memintu la ding alagad at pepaluklukan da la ring sabla.

¹⁶ Kinua na lang Jesus ding limang tinape at aduang asan; tinalanga ya banua at pepasalamat ya king Dios para kareti. Pirasu na la at saka na la diwang karing alagad ban ipamie da la karing tau.

¹⁷ Mengan la ngan at kinabsi la. Labi lang aduang kaing ding akatmu da ring alagad inyang tinipun da la ring tagan karing mengapirasung tinape.

¹⁸ Misan, kabang manalangin yang dili-dili i Jesus, lepitan de ring alagad. Ninu aku agpang king sasabian da ring dakal a tau? nganang kinutang Jesus karela.

¹⁹ Mekibat la, Sasabian da ring mapilan king ika kanu i Juan a Maminyag. Ding aliwa sasabian da king ika kanu i Elias. Ding aliwa naman sasabian da king sinubli yang mebie ing metung karing propeta ning minunang panaun.

²⁰ Nganang kinutang karela, O ikayu naman, para kekayu, ninu aku? Mekibat ya i Pedro, Ika ing Cristo ning Dios.

²¹ Pekapanabilin nang Jesus king e ra sana paniabian iti kaninu man.

²² Ngana pang tinuglung, Sukat yang dumalan dakal a kasakitan ing Anak ning Tau. Tanggian de ring makatua da ring Judio, ding pamuntuk da ring pari, at ding talaturu ning Kautusan, at paten de; oneng subli yang mie king katlung aldo.

²³ At sinabi na naman karela ngan, Nung ing ninuman bisa yang tuki kanaku, kalinguan na ing sarili na, pusanan ne ing krus na aldo-aldo, at tuki ya kanaku.

²⁴ Uling ing ninumang bisang magligtas king bie na, abating ne iti; oneng ing ninumang mibating king bie na king uli ku, akit ne iti.

²⁵ Atin ya waring apakinabangnan ing tau nung maging bandi ne ing mabilug a yatu oneng mipahamak ne man ing mismung bie na? Tune ala!

²⁶ Ing mikarine kanaku at king turu ku, pikarine nia naman ning Anak ning Tau, nung datang neng abe ning ligaya na ampon ning ligaya na ning Ibpa at ning ligaya da ring banal a anghel.

²⁷ Sasabian ku kekayu king ating mapilan keti a e mate anggang e re akit ing Kayarian ning Dios.

²⁸ Kalabas da ring walung aldo kaybat na lang sinabi deting bage, tiki na lang minukiat Jesus di Pedro, Juan at Santiago king bunduk-bundukan ban manalangin.

²⁹ Kabang manalangin ya, minaliwa ya itsura ing lupa na at meging makasilo king puti ing imalan na!

³⁰ Kabud-abud ating aduang tau a meyakit kasabi na. Deti ila di Moises at Elias;

³¹ makapiblas la king e mu nanung kaligayan at kasabi re i Jesus. Pisasabian da ing tungkul king malapit nang pamanupad king parasan na ning Dios king kapamilatan na ning pangamate na karin Jerusalem.

³² Matudtud yang maniaman i Pedro at ding kayabe na, oneng mipagising la at ikit da ing kaligayan nang Jesus ampon ding aduang lalaking makatalakad kayabe na.

³³ Inyang lalakuan da ne i Jesus ding adua katau, nganang Pedro kang Jesus, Maestro, mayap ing keti ta na! Gawa tamung atlung kubu; metung para keka, metung para kang Moises, at ing metung para kang Elias. (Tune nang e balu ing sasabian na.)

³⁴ Kabang magsalita ya pa, linto ya ing metung a biga at tikpan na la; mitakutan la ding alagad inyang mitulid ya karela ing biga.

³⁵ Ngana ning siwalang ibat king biga, Iti ya ing Anak ku, ing kanakung pinili, pakiramdaman ye!

³⁶ Inyang tinuknang neng magsalita ing siwala, ikit deng ya na mung dili na i Jesus. Linihim da ring alagad iting bage milyari at ala lang belitanan ninuman king panaun a ita tungkul king ikit da.

³⁷ Kabukasan, kinuldas la king bunduk-bundukan at seganan de ring tutung dakal a tau i Jesus.

³⁸ Kinulisak ya ing metung a lalaking kayabe da ring dakal a tau. Ngana, Maestro, ipakisabi kung mayap keka, lawan me ing anak kung lalaki, ing bugtung kung anak!

³⁹ Sasalakayan ne ning espiritung marawak; bigla yang kukulisak, mangaskad ya, at bubula ya asbuk. Panasakitan neng alang patugut at e ne buring lakuan!

⁴⁰ Pekisabi ku karing alagad mu ing palualan de, oneng ala lang arapat.

⁴¹ Nganang Jesus, Tau kekayu, keyalan yung kasalpantayanan at karagul yu kasalanan! Angga pa kapilan ing pakiabayan da kayu? Angga pa kapilan ing pibatan da kayu? Kaybat, ngana king lalaki, Idala me keni ing anak mu.

⁴² Kabang lalapit ya ing anak, bitbat ne ning demonyu king gabun at pepagalgalan ne. Tinabi neng Jesus ing espiritung marawak; pepakayap ne ing anak at saka ne binie kang tatang na.

⁴³ Mengapamulala la ding sablang taung atyu karin king mayupaya nang dapat ning Dios. Kasalukuyan da pang mangapamulala ding tau king sablang depat nang Jesus inyang nganang sinabi karing alagad na,

⁴⁴ E yu kakalinguan ining sabian ku kekayu! Miyabie ya ing Anak ning Tau king upaya da ring tau.

⁴⁵ Oneng e ra aintindian ing kabaldugan na ning sinabi na. Milihim karela ban e ra aintindian. Mikakunu na la mang ikutang da kang Jesus nung nanu ing kabaldugan na niti.

⁴⁶ Pipapaten da ring alagad nung ninu karela ing marangal dili.

⁴⁷ Balu nang Jesus ing isipan da, inya kinua ne ing metung a anak at telakad ne siping na.

⁴⁸ At sinabi na karela, Ing ninumang tanggap kaniting anak king lagyu ku, aku ing tatanggapan na at ing ninumang tatanggap kanaku, tatanggapan nia naman itang mitubud kanaku. Uling itang malating dili kekayu ya ing marangal dili.

⁴⁹ Nganang Juan, Maestro, menakit keng taung papalual karing demonyu king lagyu mu at bewalan mi ya uling e ya kayabe king grupu tamu.

⁵⁰ E ye babawalan, nganang Jesus keya ampon karing aliwang alagad, uling ing ninumang e laban kekayu kakampi ye.

⁵¹ Inyang milalapit na ing aldo ning pangaukiat na banua, inari nang Jesus king lub na king marap ne Jerusalem.

⁵² Pepadala yang tubud a makauna keya at minta la deti king metung a baryu ning Samaria at sidia ra ing sabla para keya.

⁵³ Oneng e re tinggap karin ding tau uling apansingan de king papunta ya Jerusalem.

⁵⁴ Inyang ikit da iti di Santiago at Juan a alagad na, sinabi ra, Ginu, buri mu ing patipa kaming api ibat banua ban masilab la dete?

⁵⁵ Belikdan na lang Jesus at sebianan na la,

⁵⁶ at sinulung na la king aliwang baryu.

⁵⁷ Kabang lalakad la king dalan, ngana ning metung a lalaki, Tukian da ka nu ka man munta.

⁵⁸ Nganang Jesus, Atin lang lungga ding asung-gubat at sale ding ayup, oneng ing Anak ning Tau ala ya mang lugal ban pipagpaynawan na.

⁵⁹ Sinabi na king metung, Tuki ka kanaku. Oneng pekibat na niting lalaki, Tuki ku keka, ginu, oneng paburen yu ku pa mung ikutkut ke i tatang ku.

⁶⁰ Nganang Jesus, Paburen mung ding mete ing ikutkut da la ring karelang sariling mete. Oneng ika tuki ka at ipanaral me ing Kayarian ning Dios.

⁶¹ Ngana ning metung pang lalaki, Tuki ku keka, ginu, oneng paburen mu ku pa mung makapamun karing pamilya ku.

⁶² Sinabi nang Jesus, Ing ninumang magumpisang sarul at balabalikid ya king kagulutan na e ya maging karapatdapat king Kayarian ning Dios.

10

¹ Kaybat na nita, memili yang pitung pulu't adua katau ing Ginu, at tinubud na lang tidua-tidua ban munta na lang mumuna keya king balang lugal a puntalan na.

² Sinabi na karela, Dakal ing palutan, oneng ditak la mu ding magobra. Ipanalangin yu king makibandi king palutan king parala yang dakal a talapagobra ba rang tipunan ing pupul na.

³ Lumakad na kayu! Tutubud da kayu antimong tupa libutad da ring asung-gubat.

⁴ E kayu magdalang pitaka o suput-magpalimus o sandalyas at e kayu tutuknang kabang dalan.

⁵ Kapilan man lungub kayu king metung a bale sabian yu pa mu, Kapayapan king bale iti.

⁶ Nung payapa ya ing makatuknang karin, manatili keya ing kapayapan; nung ali ne man, ibawi yu ing binie yung kagalangan keya.

⁷ Manatili kayu king bale a tanggap kekayu; mangan kayu at minum king nanumang yapag da kekayu, uling ing magobra sukat yang mibayaranan. E kayu lilipat tuknangan.

⁸ Nung munta kayu king isanu mang balen at tanggapan da kayu, mangan kayu king yapag da kekayu.

⁹ Pakayapan yu la ding masakit karin at sabian yu karela, Ing Kayarian ning Dios malapit ne kekayu.

¹⁰ Nung munta kayu king isanu mang balen at e ra kayu tanggapan, lual kayu karing dalan at sabian yu,

¹¹ Agyang ing alikabuk ning balen yu a mipakat karing bitis mi ipagpag ming antimong tutul kekayu; oneng tandanan yu iti, ing Kayarian ning Dios malapit ne kekayu!

¹² Sasabian ku kekayu king ing Sodoma tanggap yang mayan a parusa king Aldo ning Pamanukum kesa king balen a ita.

¹³ Makalunus na ka Corazin! Makalunus ka naman Betsaida! Nung ding milagru a merapat libutad yu merapat la karin Tiro at Sidon, maluat na la sanang makasulud imalan a magaspang ding tau karin at makalukluk king abu antimong tanda ning karelang pamanisi!

¹⁴ Lalung maragul ing parusang dugpa kekayu king Aldo ning Pamanukum kesa karing tau ning Tiro at Sidon.

¹⁵ At ika naman Capernaum, buri mung itas angga banua ing sarili mo? Misaldak ka angga king kalalalaman na ning impierno!

¹⁶ Nganang Jesus karing alagad na, Ing ninumang makiramdam kekayu, makiramdam ya kanaku; ing ninumang tanggi kekayu, tatanggian na ku at ing ninumang tanggi kanaku, tatanggian ne itang mitubud kanaku.

¹⁷ Migbalik lang masaya ding pitung pulu't adua. Ngarang sinabi, Ginu, memintu la kekami pati ding demonyu uli na ning lagyu mu!

¹⁸ Nganang Jesus karela, Ikit ke i Satanas a antimong kildap a menakbag ibat banua.

¹⁹ Makiramdam kayu! Dininan da kayung kayupayan damusak karing ubingan at alakdan at maygit king upaya ning Kalaban at alang nanumang makapanasakit kekayu.

²⁰ Oneng e kayu magsaya ngening mamintu la kekayu ding marawak a espiritu, nune tumula kayu uling makasulat la ding lagyu yu karin banua.

²¹ King oras mu ring ita kitmuan ya i Jesus king tula uli na ning Banal a Espiritu at sinabi na, Ibpa, Ginu na ning banua at yatu! Pasalamatan da ka uling pepabalu mu la karing e megaral ding bage a selikut mu karing biasa at megaral. Wa, Ibpa, iti depat mu uli na ning tula mu at kaburian.

²² Binie nang Ibpa ku kanaku ing sablang bage. Ala metung mang makibalu nung ninu ing Anak subali mu ing Ibpa, at ala metung mang makibalu king Ibpa subali mu ing Anak at detang buri nang pabaluan ning Anak.

²³ Kanita belikdan na lang Jesus ding alagad at sinabi nang lihim karela, Kapalad da ring taung manakit king akakit yo!

²⁴ Dakal lang propeta at ari ding bisang manakit king akakit yu, oneng e ra ikit at bisang damdam king daramdaman yu, oneng e ra dimdam.

²⁵ Linapit ya ing metung a talaturu ning Kautusan ba neng paniubukan i Jesus. Nganang mengutang, Maestro, nanu ing sukat kung daptan ba kung tanggapan ing bie alang angga?

²⁶ Pekibat nang Jesus, Nanu wari ing makasulat king Kautusan? Nanu ing aintindian mu kareti?

²⁷ Mekibat ya, Sukat meng luguran ing Ginung kekang Dios king mabilug mung pusu, at king mabilug mung kaladua, at king mabilug mung sikanan, at king mabilug mung kaisipan, at Sukat meng luguran ing kalupa mung tau antimo ing kekang sarili.

²⁸ Nganang Jesus, Ustu ing pakibat mu, daptan mu iti at mie ka.

²⁹ Oneng buri na ning talaturu ning Kautusan ing ipakit na king maka matulid ya; inya ngana pang kinutang kang Jesus, Ninu wari ing kalupa kung tau?

³⁰ Nganang mekibat Jesus, Ating metung a taung ibat Jerusalem; papunta ya Jerico. Sebatan de ring tulisan at kinua ra ing imalan a susulud na; pemalupalu re, at likuan deng halus mete na.

³¹ Mipaintagun daralan ya ing metung a pari king lugal a ita; inyang ikit ne linipat ya kasumangid na ning dalan.

³² Makanyan munaman, miras ya karin ing metung a Levita, at ikit ne ing biktima da ring tulisan; linipat ya naman king kasumangid na ning dalan.

³³ Dinalan ya naman karin ing metung a Samaritanong maglakbe. Ikit nia munaman at melunus ya.

³⁴ Lepitan ne at tigtugan na lang laru at alak ding sugat na at saka na la tinali. Kaybat seke ne king asno na at dela ne king bale pipaglayunanan at sinese ne karin.

³⁵ Kabukasan, kinangwa yang aduang salaping pilak king bulsa na at binie na la king mamahala king pipaglayunanan. Ngana, Sesen me at nung magkanu man ing maging kulang, bayaran ku pamagbalik ku.

³⁶ Ninu ngeni king pamalak mu, nganang Jesus, kareting atlu ing dinapat pamakilupang tau king sebatan da ring tulisan?

³⁷ Pekibat na ning talaturu ning Kautusan, Itang pepakit lunus keya. Nganang Jesus, Nung makanyan, sige, anti munaman kaniti ing daptan mu.

³⁸ Tiglus nang Jesus at ding alagad na ing pamaglakbe ra at miras la king metung a baryu. Tinggap na lang matula king pibalebale na ning metung a babaing milagyuan Marta.

³⁹ Atin yang kapatad a milagyuan Maria. Linukluk ya iti king arap na ning Ginu at mekiramdam ya king tuturu na.

⁴⁰ E na balu ing arapan nang Marta king dakal a obrang sukat nang daptan; inya linapit ya kang Jesus at sinabi na, Ginu, e mu apapansin king pepaburen na kung magobrang dili-dili ning kapatad ko? Pakisabi yu na mo kang Maria ing saupan na ko!

⁴¹ Pekibat ning Ginu, Marta, Marta, maliligalig ka at mayayabala karing dakal a bage,

⁴² oneng metung mu ing tune kailangan. Tinud yang memili i Maria at iti e milako keya.

11

¹ Misan, manalangin ya i Jesus king metung a lugal. Inyang mayari ne, ngana ning metung a alagad, Ginu, ituru yu kaming manalangin antimo ing depatan nang Juan karing alagad na.

² Nganang Jesus, Sabian yu ing anti kaniti neng manalangin kayu: Ibpa, samban ya sa ing lagyu mu; datang ne sa ing Kayarian mu.

³ Dinan mu keng pamangan aldo-aldo.

⁴ At patawaran mu kami karing kasalanan mi, uling patawaran mi la naman detang mikasala kekami. E mu ke iyarap king mabayat a kapagsubukan.

⁵ Ngana pang sinabi karela, Ipalage tamung ing metung kekayu minta ya king metung a kakaluguran king kapitangan ning bengi at sabian na, Abe, paraman mu kung atlung tinape.

⁶ Mipaindalan ya ing metung kung kakaluguran a maglakbe at ala kung ayampang keya!

⁷ At ipalage tamung ing pakibat na nitang kekang kakaluguran a atyu king kilub bale anti kaniti, E mu ku istorbuan! Makakandadu ne ing pasbul at matudtud na kami ding anak ku. E na ku malyaring mibangun ban arinan da ka king pamangailangan mu.

⁸ Sasabian ku kekayu, agyamang e ya mibangun uli na ning karelang pamikaluguran, mibangun ya mu rin ban ibie ing aduan na ning kakaluguran na uli na ning pamamilit na niti.

⁹ Inya sasabian ku kekayu: Maniawad kayu at mirinan kayu; manintun kayu, at manakit kayu; tuktuk kayu, at mibuklatanan kayung pasbul.

¹⁰ Uling ing balang maniawad miririnan ya; ing balang manintun manakit ya, at ing balang tutuktuk mibuklatanan ya.

¹¹ Ninu mo kekayung tata ing munie ubingan king anak na nung iti maniawad yang asan?

¹² Dinan ye waring alakdan nung iti maniawad yang ebun?

¹³ Agyamang marawak kayu biasa kayu pa namang munie mayap a bage karing kekayung anak, e kasi lalu na ing Ibpa yung atyu banua! Ibie ne ing Banal a Espiritu karing maniawad keya!

¹⁴ Pepalual neng Jesus ing metung a demonyu a pepasari king pangapipi na ning metung a lalaki. Inyang linual ya ing demonyu, mekapagsalita ya ing pipi. Mengapamulala la ding tau.

¹⁵ Oneng ating mapilan karela a sinabi, I Beelzebul, ing pekapun da ring demonyu, ya ing minie upaya keya ban palual karing demonyu.

¹⁶ Atin munamang mekipagsalita kang Jesus ba reng paniubukan. Inawad da kang Jesus ing pakit yang milagru a ibat banua.

¹⁷ Oneng balu nang Jesus ing karelang isipan, inya sinabi na karela, Mibagsak ya ing isanu mang kayarian a misasagsag karing grupu a milaban-laban; mibagsak ya ing pamilyang misasagsag.

¹⁸ Inya nung mapirasu ya ing kayarian nang Satanas, makananu yang manatili? Sasabian yu king papalualan ku la ding demonyu uling dininan na kung upayang Beelzebul.

¹⁹ Nung papalual kung demonyu king kapamilatan nang Beelzebul, ninu naman ing minie upaya karing kekayung alagad ban apalual da la? Ila mismu patutuan da king migkamali kayu!

²⁰ Nung papalual kung demonyu king kapamilatan na ning upaya ning Dios, mangabaldugan king miras ne kekayu ing Kayarian ning Dios.

²¹ Nung ing metung a taung masikan at makasandatang ganap banten ne ing bale na, ing bandi na ligtas.

²² Nung luban ne ning taung mas masikan at sambutan ne, kuanan na la ngan ding sandatang panaligan na ning makibandi, at ipamie na ning taung linub ing banding penako na.

²³ Ing taung e kampi kanaku laban ya kanaku, at ing e makipanipun kanaku, king kamatutuanan mangalat ya.

²⁴ Potang lumual ya ing marawak a espiritu king metung a tau, maglibut-libut ya karing malanging lugal, at manintun yang apipagpaynawan na. Nung ala yang akit, nganang sumabi king sarili na, Magbalik ku king bale ibatan ku.

²⁵ Karas na akit na king malinis ya at aregladu ing bale.

²⁶ Inya mako ya at mangumbirang pitung espiritung maygit karok kesa keya, at lungub la at manuknangan karin. Inya lalung maging marawak kesa king sadia ing maging kabilian na ning taung ita.

²⁷ Kabang magsalita ya pa i Jesus, kinulisak ya ing metung a babai libutad da ring dakal a tau. Ngana kang Jesus, Mapalad ya ing babaing migdala keka king sepupunan na at pepasusu keka!

²⁸ Oneng pekibat nang Jesus, Lalu lang mapalad detang makiramdam king amanu na ning Dios at tutuparan da iti!

²⁹ Nganang Jesus kabang pilulupungan de ring dakal a tau, Karawak da ring tau king panaun a ite! Manintun lang milagru, oneng alang miyabie karela subali mu king milagru nang Jonas.

³⁰ Nung makananu yang meging tanda i Jonas karing tau Nineve, makanyan ya namang maging tanda ing Anak ning Tau para karing tau king kasalukuyan.

³¹ King Aldo ning Pamanukum talakad ya ing Reyna ning Mauli at pamarsalanan na la ding tau ning panaun a iti. Uling menibat ya king kasuluk-sulukan na ning yatu ban makiramdam king kabiasnan nang Solomon; oneng maygit yang e palak kang Solomon ing atyu ngeni keti.

³² King Aldo ning Pamanukum talakad la ding tau Nineve at pamarsalanan da kayu, uling inyang dimdam deng menaral i Jonas ginulut la karing karelang kasalanan. At sasabian kung matni kekayu: maygit yang e palak kang Jonas ing atyu ngeni keti!

³³ Alang manyinding sulu at kaybat isalikut ne o kaya takpan ne king palanggana; nune ibili ne iti king pitutumpakan sulu ban ding taung lulub akit da ing sala.

³⁴ Mengari lang sulu ning katawan ding mata yu. Nung masala la ding mata mu, sumala ya ing mabilug mung katawan. Nung mapula la ding mata mu, dalumdum ya ing mabilug mung katawan.

³⁵ Inya mingat ka, pota ing sala a atyu keka, karalumduman pala.

³⁶ Inya nung mitmu yang sala ing mabilug mung katawan at alang bitasang dalumdum, iti lubus yang masala anti ing sulung maslag a tatangad keka.

³⁷ Inyang meyari yang magsalita i Jesus, kimbiran ne ning metung a Pariseo ban makipangan king bale na. Inya minta ya king bale na niti at linukluk ya arap ning lamesa.

³⁸ Mipamulala ya ing Pariseo inyang ikit na king e ya menos gamat i Jesus bayu ya mengan.

³⁹ Inya ngana ning Ginu, Ikayung Pariseo lilinisan yu la lual ding tasa at pinggan, oneng kilub mitmu kayung kasakiman at dewakan.

⁴⁰ Mangmang! E wari ing Dios a linalang king makalual ya naman ing linalang king atyu kilub?

⁴¹ Kailangan ipamie yung limus ing laman ding kekayung tasa at pinggan, at maging malinis ing sablang bage kekayu.

⁴² Makalunus kayu, ikayung Pariseo! Ibabie yu king Dios ing kapulung dake na ning kekayung paniangkap antimo ing paminta, bawang, at aliwa pang paniangkap a gule, oneng kakalinguan yu ing hustisia at lugud king Dios. Kailangan ing tuparan la deti kabang e yu na la man kakalinguan daraptan ding aliwa.

⁴³ Makalunus kayu, ikayung Pariseo! Uling buri yu lang luluklukan ding luklukan pandangal karing sinagoga at buri yu ing sasaluduan karing plasa.

⁴⁴ Makalunus na kayo! Uling mengari kayung kutkutan a alang tanda at daramusakan da ring tau king e ra balu.

⁴⁵ Ngana ning metung karing talaturu ning Kautusan, Maestro, pati ikami insultuan mu king sasabian mung yan!

⁴⁶ Pekibat nang Jesus, Makalunus kayu naman, ikayung talaturu ning Kautusan! Uling papusan yu karing tau ing mabayat a karga a ikayu mismu e yu buring tagkilan ditak mu man ban saupan yu la mo sanang mamusan.

⁴⁷ Makalunus kayu! Patalakad kayung kutkutan para karing propetang pete da ring kekayung makatua.

⁴⁸ Inya, ikayu mismu patutuan yu king nayun kayu king depat da ring makatua yu; uling ila ding mekamate karing propeta at ikayu naman ing patalakad kutkutan para karela.

⁴⁹ Uli na niti, ing Kabiasnan na ning Dios sasabian na, Parala kung propeta karela at tubud; paten da la ring aliwa at lupigan da na la man ding aliwa pa.

⁵⁰ Inya ding tau ning kapanaunan a iti miparusan la uli na ning pangapate da ring propeta manibat na king pangalalang na ning yatu,

⁵¹ manibat na king pangapaslang nang Abel angga king pangapaslang nang Zacarias a pete ra pilatan ning altar at ning santuaryu ning Templo. Wa, sasabian ku kekayu, ding tau ning panaun a iti miparusan la uli na ngan niti!

⁵² Makalunus kayu, ikayung talaturu ning Kautusan! Uling leko ye ing susi na ning beluan; e na kayu bisang lungub, sasabatan yu la pa ding bisang lungub!

⁵³ Inyang mamako ne i Jesus king lugal a ita, pegumpisan deng penataki ding talaturu ning Kautusan at ding Pariseo. Pengutnan de tungkul karing dakal a bage

⁵⁴ ba reng asilu at arakap king pamagsalita na.

12

¹ Kabang misisiksikan la ding libu-libung tau, angga king mipapandamusak na la, migsalita ya pa mung mumuna i Jesus karing alagad na. Ngana, Pangilagan yu ing lebadura da ring Pariseo. Ngaku wari, ing pamagbanal-banalan da.

² Alang bage makatakap a e milantad, at alang lihim a e mibulalag.

³ Nanuman ing sinabi yu king maralumdum maramdam king masala, at nanuman ing sinitsit yu king silid mikulait manibat karing bubungan.

⁴ Sasabian ku kekayu, kakaluguran, e yu la pitatakutan ding makapate king katawan at kaybat ala na lang arapat pang marawak.

⁵ Sabian ku kekayu nung ninu ing sukat yung pitakutan: tumakut kayu king Dios a kaybat nang mekamate atin ya pang upayang mugse king impierno. Wa, sasabian ku, tumakut kayu king Dios!

⁶ E la wari misasali mung mura ding limang denas? Makanyan man, metung man karela e ne kakalinguan ning Dios.

⁷ Makabilang agyang ing buak yu. Inya, e kayu tatakut; maygit kayu ulaga kesa karing dakal a denas!

⁸ Sasabian ku kekayu: ninuman ing sumabi king arapan da ring tau king ya kanaku ya, makanyan munaman ing daptan na para keya ning Anak ning Tau arapan ding anghel ning Dios.

⁹ Oneng ing ninumang tanggi kanaku king arapan da ring tau, tanggian nia naman ning Anak ning Tau king arapan da ring anghel ning Dios.

¹⁰ Mipatawaran ya ing ninumang magsalita laban king Anak ning Tau; oneng e ya mipatawaran ing ninumang lapastangan king Banal a Espiritu.

¹¹ At nung idala ra kayu ban litisan karing sinagoga o king arapan da ring pamuntuk at maki kayupayan, e yu ikakabalisa nung makananu yung idipensa ing sarili yu o nung nanu ing kekayung sabian.

¹² Uling ing Banal a Espiritu ya ing mituru kekayu king oras a ita nung nanu ing sukat yung sabian.

¹³ Ngana kang Jesus ning metung a taung kayabe da ring malda, Maestro, yutus mu king kakung kapatad king ibie na kanaku ing parti ku king pibandian a likuan nang tatang mi.

¹⁴ Pekibat na, Abe, ninu ing tinuldu kanaku ban maging ukum o ban pipartian ku kekayu ing kekayung mana?

¹⁵ At sinabi na karing sabla, Mangilag kayu king sablang uri na ning kasakiman, uling ing bie ning tau ala yu king pibandian na nu pa man anti iti karakal.

¹⁶ Kanita selita neng Jesus iting talimhaga. Ngana, Ing asikan na ning metung a taung mabandi mika masanting a pupul.

¹⁷ Nanung daptan ku? nganang mengutang king sarili na. Ala na kung pilulanan king kanakung pupul.

¹⁸ A, oyni ing daptan ku, ngana, lasakan ku la ding kanakung kamalig at mitalakad kung lalung mangaragul. Karin ku ilulan ing kanakung pupul at ing sablang aliwa kung pibandian.

¹⁹ At kaybat sabian ku king kanakung sarili, Kasuerti mo! Atyu na ngan keka ing sablang kailangan mu king makabang panaun. Inya magpaynawa na ka mu; mangan, minum at magsaya!

²⁰ Oneng ngana ning Dios keya, Mangmang! Ngening bengi mate ka; kaninu mipunta ing pibandian a tinipun mu?

²¹ Makanyan, nganang Jesus, ing kararasan da ring taung tinipun pibandian para mu king sarili da, oneng e la mabandi arapan na ning Dios.

²² Kaybat na nita, nganang Jesus karing alagad na, Iti ya ing sangkan nung inya sasabian ku kekayu: e kayu mababalisa tungkul king pamangan a kailangan yu ban mie kayu o tungkul king imalan para king katawan yu.

²³ Maygit ya ulaga ing bie kesa king pamangan at maygit ya ulaga ing katawan kesa king imalan.

²⁴ Pagumasdan yu la deng awak: e la tatanam ni e la pupupul; ala lang bangan ni kamalig, makanyan man pakanan na la ning Dios. Di lalu na ikayo; maygit kayu ulaga kesa karing ayup!

²⁵ Ninu kekayu ing makapakaba king bie na agyang metung mu mang aldo king kapamilatan na ning pangabalisa na isip?

²⁶ Nung e yu arapat agyang ing malating bage a anti kaniti, baket paigulu kayu isip karing aliwang bage?

²⁷ Lawan yu la ding sampagang tutubu king marangle; e la magobra ni e la gagawang imalan para king sarili da. Sasabian ku kekayu, agyang mabandi ya i Solomon e ya mimalan a kasing santing na ning metung kareting sampaga.

²⁸ Ing Dios ya ing mamiblas king dikut, ing dikut a atyu ngeni, oneng bukas ala na at maduluk king ornu. Ikayu pa kaya ing e na piblasan? Karitak yu naman a kasalpantayanan!

²⁹ Inya e kayu pailingasngas nung nu kayu kumang pamangan at inuman.

³⁰ (Uling deting bage ila ding kayayalisuas dang panintunan ding paganu keti king yatu.) Balu na ning Ibpa yu king kailangan yu la deting bage.

³¹ Maygit king sabla, pagsikapan yung pag-arian na kayu ning Dios, at dinan na kayu kareting bage kailangan yu.

³² E kayu tatakut, malating kawan, uling ikakatula na ning Ibpa yu ing ibie ne kekayu ing Kayarian.

³³ Ipisali yu ing pibandian yu at ipamie yu ing abli karing pakakalulu. Gawa kayung bulsa a e maluluma at tumipun kayung pibandian karin banua uling karin e la mabawas; alang miraras a mapanako at alang puliliang makasira.

³⁴ Uling nung nu karin ing kekayung pibandian karin ya ing pusu yu.

³⁵ Parati kayu sanang makasadia king nanumang malyari, makapiblas at makasindi sulu.

³⁶ Makiapus kayu karing ipus a manaya king pamagbalik na ning karelang panginuan ibat king kasalan ban king paniatang na potang tuktuk ya king pasbul agad-agad deng buklatanan.

³⁷ Mapalad la ding ipus a dasnan nang makagising at manaya king karelang panginuan! Sasabian ku kekayu, magsadia yang pamangan ing panginuan, paluklukan na la king lamesa at silbian na la.

³⁸ Mapalad la nung dasnan na lang magbante agyang datang ya king kapitangan ning bengi o king ganingaldo!

³⁹ Tandanan yu iti! Nung balu namu ning buntuk na ning pamilya nung nanu yang oras datang ing mapanako, magsadia ya at e na paintulut milub ya king pibalebale na.

⁴⁰ Ikayu man sukat kayung magsadia uling datang ya ing Anak ning Tau king oras a e ye asahan.

⁴¹ Kitang nang Pedro, Ginu, sasabian ye iting talimhaga para kekami o para karing sabla?

⁴² Pekibat ning Ginu, Ninu wari ing ipus a tapat at matalino? Aliwa wari itang panibalan na ning panginuan na king pibalebale na ban munie pamangan karing aliwa pang ipus king oras ning pamangailangan da?

⁴³ Mapalad ya itang ipus a ita, nung dasnan neng magobra ning panginuan na king pamagbalik na!

⁴⁴ Wa, sasabian ku kekayu, panibalan ne ning panginuan na king sabla nang pibandian.

⁴⁵ Nung ing ipus a ita sabian na king sarili na, E ya agad datang ing kanakung panginuan, at pagumpisan na na lang panasakitan ding aliwang ipus a lalaki at babai at mangan ya at minum at maglasing.

⁴⁶ Datang ya ing panginuan na nitang ipus a ita king aldo a e na panayan at king oras a e na balu. At parusan neng mabayat ning panginuan na at iyabe ne karing e tapat a ipus.

⁴⁷ Ing ipus a makibalu king kaburian na ning panginuan na, oneng e ne man migsadia ni tinupad man, miparusan yang mabayat.

⁴⁸ Oneng ing ipus a e makibalu king kaburian na ning panginuan na at darapat karing bage sukat nang ikaparusa, miparusan ya man, mayan mu. Ing ninumang mirinan dakal, dakal ing mayawad keya; at ing ninumang mipagkatiwalan dakal, dakal ing pakibatan na.

⁴⁹ Dinatang ku ban patawan ke ing yatu; sana milalablab ne!

⁵⁰ Atin pang metung a binyag a kailangan kung tanggapan, at e ku mipaindatun anggang e matupad iti!

⁵¹ Pota galang isipan yu king dinatang kung magdalang kapayapan keti king yatu? Sasabian ku kekayu: e kapayapan nune pamisagsagan.

⁵² Manibat ngeni, misasalangsangan la ding lima katau king pibalebale: atlu laban karing adua at adua laban karing atlu.

⁵³ Milaban-laban la ding tata at ding anak dang lalaki, ding ima at ding anak dang babai at antimu rin ding katuangan a babai at ding manuyang a babai.

⁵⁴ Ngana munamang Jesus karing tau, Neng akakit yung makapal ing lulam king albugan, agad yung sabian king muran at makanyan pin ing mapalyari.

⁵⁵ At nung tutiup ing angin ning mauli sasabian yu king datang ing lisangan at makanyan pin ing mapalyari.

⁵⁶ Hipokrita! Balu yung dinan kabaldugan ing tanda na ning banua at yatu, obat e yu balung dinan kabaldugan ing kasalukuyan a panaun?

⁵⁷ Baket e yu atulan dili yu ing matulid a kailangan daptan?

⁵⁸ Nung delum da ka king husgadu, makipanareglu kang agad king mindalum keka kabang atin pang panaun; pota itaglus na ing dalum at ibie na ka king ukum, at ibie na ka ning ukum karing pulis, at isukul da ka ding pulis.

⁵⁹ Sasabian ku keka: e ka milual karin kabang e ka makabayad angga king katataulian a sentimos.

13

¹ King oras a ita, dinatang la ding mapilan a tau at belita ra kang Jesus king pepapate na lang Pilato ding mapilan a tau Galilea kabang mamain la king Dios.

² Ngana karela, Isipan yu galang king maragul la kasalanan deting tau Galilea kesa karing aliwang tau karin, uling makanyan ing miras karela?

³ Ali! Sasabian ku kekayu: nung e kayu sumisi at painggulut karing kekayung kasalanan mate kayu ngang kalupa ra.

⁴ O deta namang labing walu kataung mete inyang mipatanan la king tore na ning Siloe? Isipan yu galang king mas maragul la kasalanan kesa karing aliwang taung manuknangan Jerusalem?

⁵ Ali la! Oneng sasabian ku kekayu: nung e kayu sumisi at painggulut karing kekayung kasalanan, mate kayu namang kalupa ra!

⁶ Kanita selita neng Jesus iting talimhaga. Ngana, Ating metung a taung ating tanaman a higera king ubasan na. Linawe na nung atin yang bunga, oneng ala yang ikit.

⁷ Inya sinabi na king mamahala king ubasan, Atlu na kung banuang pupunta keti at manintun bunga king tanaman a iti, oneng ala ku pang ikit. Kuturan mu ne! Makaskup nia wala king ubasan!

⁸ Oneng pekibat na ning mamahala, E ta ya pa mu kukuturan king banuang iti. Gambulan ke at dinan pataba.

⁹ Nung mamunga ya keng tutuking banua, lalung masanting; nung ali ya, kanita ta ne kuturan.

¹⁰ Misan a Aldo ning Sabbath, atyu i Jesus king sinagoga; tuturu ya.

¹¹ Ating metung a babai karin a labi nang walung banuang masakit uli na ning marawak a espiritung atyu keya. Bukut ya at e ya bitasang makayatna.

¹² Inyang ikit neng Jesus inaus ne at ngana, Babae, kumayap na ka king sakit mu!

¹³ At timpak na lang Jesus ding gamat na king babai; kanita mu rin mekatalakad ya ing babai at pinuri ne ing Dios.

¹⁴ Oneng mimua ya ing manibala king sinagoga uling menulu ya i Jesus king Aldo ning Sabbath. Inya sinabi na karing tau, Ating anam a aldo a sukat tamung magobra. Datang kayu keti kareting aldo ban paulu at e king Aldo ning Sabbath!

¹⁵ Mekibat ya ing Ginu, Hipokrita! E ye wari kakalagan king kural ing kekayung baka o asno at painuman agyang Aldo ning Sabbath?

¹⁶ Metung yang lahi nang Abraham ing babaing iti; ginapus neng Satanas kilub ding labing walung banua. E wari karampatan ing kalagan ya agyang king Aldo ning Sabbath?

¹⁷ Mipakarine la ding sablang kalaban na king pakibat na; oneng mesaya la ding sabla king sablang makapagmulalang depat na.

¹⁸ Nganang Jesus, Nanu ing kalupa na ning Kayarian ning Dios? Kaisanu ke apakilupa?

¹⁹ Kalupa ne ning metung a butul mustasa a tenam na ning metung a tau king mulahan na. Dinagul ya iti angga na inyang meging anti yang tanaman a matas. At memaniale la ding ayup karing sanga na.

²⁰ Ngana pang Jesus, Kaisanu ke pa apakilupa ing Kayarian ning Dios?

²¹ Kalupa ne ning lebadurang sinamut ning metung a babai king atlung takal a arina, at migalsa ing kabilugan a masa.

²² Sindu nang Jesus ing pamaglakad na. Tuturu ya karing balang balen at baryung daralanan nang papunta Jerusalem.

²³ Ngana ning metung a kinutang kang Jesus, Ginu, ditak la mu ding taung miligtas? Pekibat nang Jesus,

²⁴ Pagpilitan yung milub king makiput a pasbul. Sasabian ku kekayu, dakal la ding bisang lungub oneng e la milub.

²⁵ Kabud sera ne ning manibala king pibalebale, mibata kayung makatalakad king lual at katuk na kayung katuk. Sabian yu, Ginu, paluban yu kami! Ipakibat na kekayu, E ra kayu balu penibatan!

²⁶ At sabian yu, Kesulu mu kaming mengan at mininum at tinuru ka karing balen mi!

²⁷ At sabian nang pasibayu kekayu, E ku balu nung nu kayu tau! Dumayu kayu kanaku, ikayung sablang marawak a dapat!

²⁸ Tumangis kayu at mitigis a ipan kabud akit yung atyu la king Kayarian ning Dios di Abraham, Isaac, Jacob, at ding sablang propeta, oneng ikayu naman mitabi kayu.

²⁹ At datang la ding tau ibat king aslagan at king albugan, king norti at king mauli, at lukluk la king lamesa king Kayarian ning Dios.

³⁰ Kanita ating miyuna karing makatauli ngeni, at ating mitauli karing makauna ngeni.

³¹ Dinatang la king oras a ita ding mapilan a Pariseo. Ngara kang Jesus, Mako ka keti at manaliwang lugal, uling buri na kang ipapate Herodes.

³² Sinabi nang Jesus karela, Sabian yu ketang asung-gubat a ita king papalual kung demonyu at manulung masakit ngeni at bukas at king katlung aldo arian ku ing obra ku.

³³ Oneng kailangan kung itaglus ing lakad ku ngeni, bukas at makadua; uling e kailangan mate ing metung a propeta subali mu king Jerusalem.

³⁴ Jerusalem, Jerusalem! Pamaten mu la deng propeta at pamasibasan ding tinubud na keka ning Dios! Mekatapilan ing buri ku lang tipunan ding kekang anak, antimo nung makananu na lang titipunan ning gaindung manuk ding sisi na king lalam ding pakpak na, oneng e ka bisa!

³⁵ Inya mipaburen yang lubus ing kekang Templo. Sasabian ku keka, e mu na ku akit pasibayu manibat ngeni anggang e mu sabian, Bendisyunan ne sa ning Dios ing daratang king lagyu na ning Ginu!

14

¹ Misan a Aldo ning Sabbath, mekumbira yang makipangan i Jesus king bale na ning metung a pamuntuk da ring Pariseo, at pegumasdan deng masalese ding tau.

² Karin ating lalaking mengalbag a bitis at gamat; linapit ya kang Jesus.

³ Inya kitang nang Jesus karing talaturu ning Kautusan at Pariseo, Paintulut na ning Kautusan ing pakayap masakit king Aldo ning Sabbath o ali na?

⁴ Alang mekibat metung man karela. Telanan neng Jesus ing masakit, pepakayap ne at saka ne pepaulian.

⁵ Kaybat na nita, sinabi na karela, Nung ing ninuman kekayu atin yang anak a lalaki o bakang menabu king talaga king Aldo ning Sabbath, nanu ing daptan na? E ne wari isaka agyamang Aldo ning Sabbath?

⁶ E la mekapakibat king kutang a iti.

⁷ Apagumasdan nang Jesus nung makananu lang mamili karing luklukan pandangal ding mapilan a mekumbira. Selita ne karela ngan iting talimhaga. Ngana,

⁸ Nung kimbiran na ka ning ninuman king metung a kasalan, e me pipilinan ing luklukan pandangal. Pota ating mekumbirang mas marangal kesa keka.

⁹ At lapitan na ka ning mengumbira kekayung adua at sabian na keka, Paburen meng lukluk king luklukan mu ing taung ini! Mipakarine ka kanita at king pekamarayung luklukan karin ka lukluk.

¹⁰ Ing masanting mung daptan neng mekumbira ka ya ing lukluk ka king pekamarayung luklukan. Lapitan na ka kanita ning mengumbira at sabian na keka, Kakaluguran, keni ka king kabisera. Mirangal ka kanita king arapan da ring aliwang bisita.

¹¹ Uling ing ninumang magmatas mibaba ya, at ing ninumang magpakumbaba mitas ya.

¹² Sinabi na naman Jesus king mengumbira keya, Neng magtau ka, e mu la kukumbiran ding kekang kakaluguran o ding kekang kapatad o ding kekang kamaganak o ding masalaping siping mung bale, uling kumbiran da ka naman, at kanita miyablasan ka king depat mu karela.

¹³ Neng magtau ka, ding kumbiran mu ila ding pakakalulu, ding lumpu, ding pile, at ding bulag.

¹⁴ Mibendisyunan ka uling ila e ra ka ayablasan. Ablasan na ka ning Dios keng subli lang mie ding banal.

¹⁵ Dimdam na iti ning metung karing kasulu nang mamangan, at ngana kang Jesus, Kasuerti da ring miyabe-abe king pamangan king Kayarian ning Dios!

¹⁶ Mekibat ya i Jesus, Ating metung a taung migtaung maragul at dakal la ding kimbiran na.

¹⁷ Inyang miras na ing oras, inutusan ne ing ipus na at pepasabi na karing mekumbira, Munta na kayu keni; makasadia na ing sabla!

¹⁸ Oneng ginawa la ngan sangkan. Ngana king ipus ning mumuna, Mekasali kung hasienda at kailangan keng puntalan ban lawan. Ikayu na ing balang magpasensia kanaku.

¹⁹ Ngana naman ning metung, Mekasali kung limang kaparis a baka at kailangan ku lang subukan. Ikayu na sanang balang magpasensia kanaku.

²⁰ Sinabi na naman ning metung pa, Bayu kung kasal; e ku makatagun.

²¹ Mibalik ya ing ipus at belita na iti king panginuan na. Mimua ya iti at sinabi na king ipus na, Munta kang malagua karing dalan at pigulut na ning siudad at idala mu la keti ding kalulu, ding lumpu, ding bulag, at ding pile.

²² Kabalik na ning ipus, sinabi na, Agawa ku na pu, ginu, ing inutus yu, oneng malualas ya pa ing lamesa.

²³ Inya ngana ning panginuan king ipus na, Munta ka pa karing baryu at sitio at pilitan mu lang munta keti ding tau ban kumatmu ya ing bale ku.

²⁴ Sasabian ku keka, king ala metung man karing mekumbira ing makatakman king pamangan a sidia ku!

²⁵ Milalu la karakal ding taung tutuki kang Jesus; inarapan na la at ngana,

²⁶ E ya malyaring maging alagad ku ing ninumang lalapit kanaku nung maygit neng kaluguran kesa kanaku i tata na at ima na, ing asawa na at ding anak na, ding kapatad nang lalaki at babai at pati na ing mismung sarili na.

²⁷ E ya malyaring maging alagad ku ing ninumang e bisang mamusan king krus na at tuki kanaku.

²⁸ Nung magplanu yang patalakad tore ing metung kekayu, e ya pa wari lukluk at balakan na ing gastusan na ban abalu na nung managyu la ding pera na ba yang mayari ing tore?

²⁹ Pota mitalakad la ding pundasyun oneng e na ne man apayari, kaylian dia ding sablang manakit.

³⁰ Sabian da, Pegumpisan neng telakad ning taung iti at e na ne man pala apayari!

³¹ O ninung ari a makilaban king kalupa nang ari ing e pa mu lukluk at misip nung ding apulu nang libung sundalus agyu da lang labanan ding aduang pulung libung sundalus na ning kalaban na?

³² At nung e na agyu, mitubud yang pekakatawan na kabang marayu ya pa ing kalaban na ban makipagkasundu.

³³ Makanyan munaman e ya malyaring maging alagad ku ing ninuman, nung e na lakuan ing sablang atyu keya.

³⁴ Mayap ing asin; nung milako lasa ala nang paralan ban mibalik ing kalat na.

³⁵ Ala nang kasilbian iti para king gabun o para king pikukuanan pataba. Iyugse ra na mu. Inya makiramdam kayu nung atin kayung balugbug!

15

¹ Kanitang misan, linapit la kang Jesus ding dakal a talapanyingil buis at makasalanan ban makiramdam.

² Mibubulungan la ding Pariseo at ding talaturu ning Kautusan. Ngara, Makisalamuha ya ing taung iti at makisulu karing makasalanan!

³ Inya sinabi neng Jesus karela iting talimhaga:

⁴ O nu mong ing metung kekayu atin yang dinalan a tupa at mebating ya ing metung kareti, nanu ing daptan na? Lakuan na la ding siam apulu't siam king pastulan at panintunan ne ing mewala anggang e ne akit.

⁵ At nung akit na ne, masaya neng pusanan karing pago na

⁶ at iyuli ne. Kaybat kumbiran na la ngan ding kakaluguran na at kasiping bale. Sabian na karela, Matula kung tutu uling ikit ke ing tupa kung mebating; munta kayu keni; magsaya tamu!

⁷ Sasabian ku kekayu king makanyan munamang mika maygit a kasayahan karin banua uli na ning makasalanan a sisisi at ginulut king kasalanan na kesa karing siam apulu't siam a banal a e kailangan sumisi.

⁸ O nung ing metung a babaing ating apulung salaping pilak kebatingan yang metung kareti, nanu ing daptan na? Sindi yang sulu; palisan ne ing bale at panintunan neng masalese anggang e ne akit.

⁹ Nung akit na ne iti, kumbiran na la ding kakaluguran na at kasiping bale. Sabian na karela, Matula kung tutu uling ikit ke ing mewala kung salaping pilak! Munta kayu keni; magsaya tamu!

¹⁰ Sasabian ku kekayu king makanyan munamang mika kasayahan karing anghel na ning Dios uli na ning makasalanan a sisisi at painggulut king kasalanan na.

¹¹ Ngana pang Jesus, Ating metung a taung ating aduang anak a lalaki.

¹² Ngana ning bungsu, Tatang, ibie mu na kanaku ing mana ku. Pinitna na ning tata ing bandi na karing adua nang anak.

¹³ Kaybat ning mapilan a aldo, pisali na ning bungsu ing mana na at minta ya king marayung bansa. Darala na la ding sablang ayabli na. Karin na la ginastus ding pera na king e ustung pamibiebie.

¹⁴ Inyang agastus na la ngan ding pera na, mika maragul a danup king bansang ita at melipit yang e mu nanu.

¹⁵ Inya mekipagobra ya king metung a taung mabandi king bansang ita. Pepapuntan ne niti king baryu ban manese babi.

¹⁶ Buri nang pakabsian ing sarili na agyang karing bungang tanaman a kakanan da ring babi, oneng alang minie keya.

¹⁷ Inyang api-isip-isip na ing kabilian na, nganang mekabalak, Karakal na ipus tatang ko at sawa-sawa lang pamangan, kabang aku mamamate kung danup keti!

¹⁸ Magbalik ku kang tatang ku at sabian ku, Tatang, mikasala ku king Dios at keka.

¹⁹ E na ku karapatdapat mayaus pang anak mu; ibilang mu na ku mung metung karing ipus mu.

²⁰ Inya tinalakad ya at migbalik kang tatang na. Marayu ya pa ikit na neng tata na at tutu yang melunus; inya memulayi yang sinalubung keya; kinaul ne at penuma.

²¹ Ngana ning anak, Tatang, mikasala ku king Dios at keka. E na ku karapatdapat mayaus pang anak mu.

²² Oneng sinabi na ning tata karing ipus na, Mamalagua kayu! Dala ye keni ing masanting diling imalan at ipasulud ye keya. Pasuluran yeng singsing at sandalyas.

²³ Kuanan ye ing pataban a biserung baka at paten ye; mangan tamu at magsaya!

²⁴ Uling ing anak kung iti mete ne, oneng sinubli yang mebie; mebating ya, oneng meyakit yang pasibayu. At megumpisa lang migsaya.

²⁵ Atyu kanita king marangle ing anak a pangane. Inyang pauli ya at malapit na king bale, mekaramdam yang tigtigan at terakan.

²⁶ Inaus ne ing metung karing ipus at kitnan ne, Nanu ing malilyari keti?

²⁷ Pekibat na ning ipus, Dinatang ya pu ing kapatad yu! Pepapate neng tatang yu ing biserung bakang pataban, uling ing kapatad yu mibalik yang mabie at alang sakit.

²⁸ Mimua ya ing pangane at e bisang lungub. Inya linual ya ing tata at inaru ne.

²⁹ Oneng sinabi na, Siyuan da kayu kilub ding dakal a banua at kapilan man e ra kayu pepasukal a lub. Agyang misan mu e yu ku dininan biserung kambing ban pagtawan ku la ding kanakung kakaluguran!

³⁰ Ngeni mong dinatang ya ing anak yung yan a minyira king kekayung pibandian karing babaing magtinda king katawan da pepapate ye pa ing biserung bakang pataban!

³¹ Ngana ning tata, Anak ko, kapilan man kayabe ra ka at keka ing sablang bandi ku.

³² Sukat tamung magsaya at tumula uling ining kapatad mu mete ne, makanyan man sinubli yang mebie; mebating ya at meyakit ya.

16

¹ Nganang Jesus karing alagad na, Kanitang misan, ating mabandi a ating metung a katiwala. Simbung da king ing pibandian na panyiran na mu ning katiwala.

² Inya pepayaus ne at kitang na, Nanu ing ababalitan ku tungkul keka? Munie kang kwenta kanaku tungkul king kekang pamanibala king pibandian ku uling e na ka malyaring maging katiwala ku.

³ Ngana ning katiwala king sarili na, Lalako na na ku ning panginuan ku king pangakatiwala. Nanu ing daptan ku? E ku agyung sarul; makarine naman nung magpalimus ku.

⁴ A, balu ku na ing daptan ku! Milako ku man king obra atin namang tanggap kanaku karing pibalebale ra.

⁵ Tunggal-tunggal na lang pepayaus ding ating utang king panginuan na. Ngana king minuna, Nu anti ing utang mu king kanakung panginuan?

⁶ Pekibat na, Dinalan a barilis a larung olibo. Ngana ning katiwala, Oyni ing kasulatan na ning utang mo. Lukluk ka at gawan meng limang pulu. Mamalagua ka!

⁷ Kitnan ne ing kadua, Ika, nu anti ing utang mu? Pekibat na, Dinalan a kaban a trigu. Ngana ning katiwala, Oyni ing kasulatan na ning utang mo. Walung pulu ing isulat mu.

⁸ Pinuri ne ning panginuan ing mapamirait a katiwala uli na ning pepakit nang katosuan. Uling maygit lang biasang mamahala ding taung maka-yatu kesa karing taung maka-Dios.

⁹ At sindu nang Jesus ing pamagsalita na. Ngana, Inya sasabian ku kekayu: gamitan yu king pamakikaluguran ing pibandian keti king yatu. Magisan man iti, matanggap na kayu man king tuknangan a alang angga.

¹⁰ Ing tapat king malating bage a mipagkatiwala keya, tapat ya naman king maragul a bage a mipagkatiwala keya; ing e mu apagkatiwalan king malating bage, e mia naman apagkatiwalan king maragul a bage.

¹¹ Nung e ra kayu apagkatiwalan king pibandian na niting yatu, ninu ing magkatiwala kekayu king tune pibandian?

¹² At nung e ra kayu apagkatiwalan king pibandian da ring aliwa, ninu ing munie kekayu king tune mangaintulid kekayu?

¹³ Alang ipus a makasuyung aduang panginuan uling pikasaman ne ing metung at luguran ne ing metung; maging tapat ya king metung at pikasaman ne ing metung. E kayu makasuyung agnan king Dios at king pibandian.

¹⁴ Dimdam da iti ding Pariseo at pikayli-kayli re i Jesus uling malugud la king salapi.

¹⁵ Inya sinabi na karela, Ikayu ding magpanggap banal king arapan da ring tau, oneng akikilala na ning Dios ing atyu karing pusu yu. Uling ing isipan dang maulaga ding tau, ya naman ing alang ulaga king panimanman na ning Dios.

¹⁶ Ing Kautusan nang Moises at ing sinulat da ring propeta mipairal angga mu ketang panaun a dinatang ya i Juan a Maminyag. Manibat na kanita, mipanaral ne ing Mayap a Balita tungkul king Kayarian ning Dios, at ing balang metung magkapilit yang milub kaniti.

¹⁷ Oneng mayan pa ing lumipas ya ing banua at ing yatu kesa king milako ya ulaga ing malating dake na ning Kautusan.

¹⁸ Makipangalugud ya ing ninumang mididiborsyu king asawa na at makiasawa king aliwa, at makipangalugud ya naman ing makiasawa king babaing diniborsyu ning asawa na.

¹⁹ Ating metung a taung mabandi a mimalan mal at ating labis-labis a pamangan aldo-aldo.

²⁰ At atin munamang pulubi a milagyuan Lazaro; mitmu yang sugat at atyu lele nang pasbul ning mabandi.

²¹ Bisa yang makapangan agyang king mugmug a mananabu ibat king lamesa na ning mabandi. Aliwa mu ita, lalapitan de pa ding asu at didilatan da la ring sugat na.

²² Mete ya ing pulubi at dela de ring anghel king siping nang Abraham. Mete ya naman ing mabandi at mikutkut.

²³ Kabang magdusa ya king Hades, tinalanga ya ing mabandi at ikit ne king marayu i Abraham at i Lazaro a atyu siping na.

²⁴ At nganang kinulait ning mabandi, Tatang Abraham, malunus kayu kanaku. Utusan ye i Lazaro ba neng basan danum ing sepu na ning taliri na at parimlan ne ing dila ku uling magkasakit ku king aping ini!

²⁵ Oneng nganang Abraham, Anak ko, ganakan mu king kanitang atyu ka king yatu migpakasawa ka king mangayap a bage at mibata yang kasakitan i Lazaro. Oneng ngeni mipaligayan ya keni kabang ika naman magdusa ka.

²⁶ Bukud pa king sablang yan, atyu pilatan tamu ing metung a maragul a bangin. Inya e la makapunta keni ding atyu ken, at ding atyu ken e la makapunta keni.

²⁷ At ngana ning mabandi, Nung makanyan, tatang Abraham, ipakisabi kung mayap king papuntan ye i Lazaro king bale nang tatang ku

²⁸ uling atin kung limang kapatad a lalaki. Itubud ye karin ba na lang dinan babala, kanita ila mu man e la miras keting lugal ning pamagdusa.

²⁹ Oneng sinabi nang Abraham, Atyu ya karela i Moises at ding propeta; paburen mu lang makiramdam karela.

³⁰ Nganang mekibat, E sapat ita, nung puntalan na la ning metung a sinubling mebie, sumisi la at painggulut karing kasalanan da.

³¹ Sinabi nang Abraham, Nung e la makiramdam kang Moises at karing propeta e la munaman maniwala agyang king mete a sinubling mebie.

17

¹ Nganang Jesus karing alagad na, E la kapilan man mawala ding panibatan na ning pamikasala, oneng makapangilabut ing kararasan na ning taung panibatan na niti!

² Mayap pa ing isabit ya king batal na ing metung a maragul a gilingan-batu at iyatsa ya king dagat kesa king maging sangkan ne ning pamikasala na ning metung karing mangalating deti.

³ Inya mingat kayu! Nung mikasala ya ing kapatad mu, sabianan me; patawaran me nung sumisi ya.

⁴ Nung makatapitung besis yang mikasala keka kilub ning patingapun, at makatapitung besis yang linapit keka at sinabing, Sisisi ku, sukat meng patawaran.

⁵ Ngara ding apostol king Ginu, Dagdagan mu ing kekaming kasalpantayanan!

⁶ Pekibat na ning Ginu, Nung atin kayung kasalpantayanan a kasing dagul na mu man ning butul mustasa, asabi yu kaniting tanaman a sikomoro, Mabagut ka at iyalis mu ing kekang sarili king dagat! at mamintu ya kekayu.

⁷ O nu mong ing metung kekayu atin yang ipus a sasarul o magpastul tupa, nung muli neng ibat king marangle, sabian yu wari keya, Mekeni at mangan na ka?

⁸ Agyang makananu e yu sabian ita; ing sabian yu, Isadia mu kung apunan; kaybat miblas ka at silbian mu ku kabang mamangan ku. Kaybat na nita, saka na ka mangan.

⁹ Pasalamatan ya wari ing ipus uling tiparan na ing inutus mu keya?

¹⁰ Makanyan munaman kekayu; nung arapat yu na ing sablang inutus da kekayu, sabian yu, Mistula kami mung ipus; tinupad kami mu king kekaming katungkulan.

¹¹ King pamaglakad nang Jesus papunta Jerusalem, dinalan ya king angganan na ning Samaria at ning Galilea.

¹² Inyang lulub ya king metung a baryu, selubungan de ring apulung leprosuan, tinuknang lang makarayung bagya

¹³ at kinulait la. Ngara, Jesus! Maestro! Malunus ka kekami!

¹⁴ Ngana karela inyang ikit na lang Jesus, Lumakad kayu at pakit karing pari. Kabang dalan, kinayap la.

¹⁵ Inyang apansingan na ning metung karela king kinayap ya; migbalik yang kukulisak kapurian king Dios.

¹⁶ Migsakab ya arap nang Jesus at pepasalamat ya keya. Samaritano ya ing taung iti.

¹⁷ E la wari apulu ding kinayap? nganang kinutang Jesus. Nu la karin ding siam?

¹⁸ Ala waring migbalik at minie kapurian king Dios subali mu kaniting dayuan?

¹⁹ At nganang Jesus king Samaritano, Talakad ka at mako na ka; kinayap ka uli na ning kasalpantayanan mu.

²⁰ Misan, ating mapilan a Pariseo a mengutang kang Jesus, nung kapilan ya datang ing Kayarian ning Dios. Nganang mekibat, E ya mayakit daratang ing Kayarian ning Dios.

²¹ At alang makasabing, Alben yu, atyu keni! o Atyu karin! uling ing Kayarian ning Dios atyu kilub yu.

²² At ngana karing alagad na, Datang ing oras nung nu yu pagnasan ing akit ye ing metung karing aldo ning Anak ning Tau, oneng e ye akit.

²³ Ating sumabi kekayu, Atyu karin! o Atyu keni! Oneng e kayu lulual ban panintunan ye.

²⁴ Nung makananung kikislap ing kildap king banua at aslagan na ing misusumangid nang dane ning banua, makanyan ya munaman ing Anak ning Tau king aldo na.

²⁵ Oneng kailangan ya pa mung dumalan dakal a kasakitan at tanggian de ring tau king kasalukuyan.

²⁶ Nung nanu ing milyari kanitang panaun nang Noe, makanyan munaman ing malyari king panaun ning Anak ning Tau.

²⁷ Kanitang panaun nang Noe, mamangan la at miminum ding tau, kakasal la at makiasawa la angga king aldo a sinake ya i Noe king barku. Dinatang ing albug at mete la ngan.

²⁸ Mangari munaman kanitang panaun nang Lot, mamangan la at miminum ding tau, sasali la at mamisali la, tatanam at manalakad bale.

²⁹ Oneng king aldo a meko ya i Lot karin Sodoma, minuran api at asupri at meduluk la ngan.

³⁰ Makanyan munaman ing malyari king aldo a datang ya ing Anak ning Tau.

³¹ King aldo ita, itang atyu king bubungan e ya pa mu kuldas ban kuanan na ing pibandian na kilub ning bale. Makanyan munaman e ya sukat muli itang atyu king marangle.

³² E yu kakalinguan itang milyari king asawa nang Lot!

³³ Ing ninumang magkapilit magligtas king bie na, abating ne iti; oneng ing ninumang mibating king bie na, aligtas ne.

³⁴ Sasabian ku kekayu, king benging ita, ating aduang lalaki king metung a pagkeran; ing metung mayakua ya at ing metung mitagan ya.

³⁵ Ating aduang babaing miyayabe gigiling, ing metung mayakua ya at ing metung mitagan ya. [

³⁶ Ating aduang lalaki king marangle; ing metung mayakua ya at ing metung mitagan ya.]

³⁷ Nganang mengutang ding alagad, Ginu, nu karin mapalyari iti? Pekibat na, Nung nu ya karin ing bangke karin la naman makatipun ding ayup a buitre.

18

¹ Selita neng Jesus karela ing metung a talimhaga ban ituru na karela king sukat lang parating manalangin at e la kapilan man mimina lub.

² Ngana, King metung a siudad, ating metung a ukum a alang takut king Dios at ala yang gagalangan a tau.

³ King siudad mu ring ita, ating metung a babaing mebalu a maralas pupunta king ukum at parati nang sasabian, Saupan yu ku pu laban king kanakung kalaban!

⁴ E ya mebisa ing ukum kilub ning makabang panaun. Oneng king katataulian ngana king sarili na, Agyang ala kung takut king Dios at e gagalang kaninu man,

⁵ saupan keng manakit katuliran ing babaing iti ban tuknangan na kung pangabalanan, pota abuysit na ku pa keng pamamunta na keti!

⁶ At ngana ning Ginu, Dimdam yu ing sinabi na ning marawak a ukum.

⁷ Ngeni, ipagkaymut na kaya ning Dios ing katuliran karetang sariling pinili na a mamaus pasaup keya aldo't bengi? E na la kaya agad saupan?

⁸ Sasabian ku kekayu, agad-agad na lang dinan katuliran. Oneng paniatang na ning Anak ning Tau, manakit ya kayang taung sasalpantaya keya keti king yatu?

⁹ Selita nia naman iting talimhaga karing taung tutungge mayap king sarili da at maninsultu naman karing aliwa.

¹⁰ Ngana, Ating aduang lalaking menik king Templo ban manalangin: ing metung Pariseo ya at ing metung naman talapanyingil yang buis.

¹¹ Tinalakad ya ing Pariseo at nganang menalangin king sarili na, O Dios, pasalamat ku keka king e ra ku kalupa ding aliwang tau; e ku mapanako, e ku mapamirait, e ku makipangalugud o kalupa na ning talapanyingil buis a ini.

¹² Makatadua paruminggu mag-ayunu ku; ibabie ku keka ing kapulung dake na ning sablang panakitan ku.

¹³ Oneng makatalakad yang marayu ing talapanyingil buis; e ya man bisang matna banua, nune durugdugan ne ing salu na at sasabian na: O Dios, malunus ka kanaku; metung kung makasalanan!

¹⁴ Sasabian ku kekayu, nganang Jesus, Ing lalaking iti ya ing minuling mekilalang banal arap ning Dios at aliwa itang metung. Uling ing ninumang mitatas king sarili na mibaba ya, at ing ninumang magpakumbaba mitas ya.

¹⁵ Dela da la ring mapilan a tau ding anak dang mangalati kang Jesus ba na lang itumpak ding gamat na karela. Inyang ikit da iti ding alagad na, sebianan da la ring tau.

¹⁶ Oneng inaus na lang Jesus ding anak at sinabi na karing alagad, Paburen yu lang lumapit kanaku ding anak at e yu la sasabatan, uling para karing anti kareti ya ing Kayarian ning Dios.

¹⁷ Iti yang tandanan yu! Ninuman ing e tanggap king Kayarian ning Dios anti ing pamananggap da ring mangalating anak kapilan man e ya milub karin.

¹⁸ Kitnan ne ing metung a pamuntuk da ring Judio i Jesus. Ngana, Mayap a Maestro, nanung daptan ku ban tanggapan ku ing bie alang angga?

¹⁹ Pekibat nang Jesus, Baket ausan mu kung mayap? Alang mayap nune mu ing Dios.

²⁰ Balu mu la ding kautusan: E ka makipangalugud; e ka makamate; e ka manako; e ka sasaksi king e katutuan; igalang me i tatang mu at ima mu.

²¹ At sinabi na, Daraptan ku na ing sablang yan manibat na inyang kayanakan ku.

²² Inyang dimdam nang Jesus iti, ngana, Atin pang metung a bage a kulang keka. Ipisali mu ing sablang pibandian mu at ipamie mu ing abli mu karing pakakalulu at mika pibandian ka karin banua. Kaybat, mibalik ka keti at tuki ka kanaku.

²³ Oneng melungkut ya ing lalaki inyang dimdam na iti uling tutu yang mabandi.

²⁴ Ikit nang Jesus king melungkut ya at sinabi na, Kasakit dang lungub king Kayarian ning Dios ding ating pibandian!

²⁵ Mas mayan ya pang dumalan ing kamelyu king busbus ning karayum kesa king lungub ya ing mabandi king Kayarian ning Dios.

²⁶ Mengutang la ding mekaramdam kaniti, Nung makanyan, ninu ding miligtas?

²⁷ Pekibat nang Jesus, Ing e ra arapat ding tau, arapat na ning Dios.

²⁸ Kanita i Pedro sinabi na, Alben yu, likuan mi la ding kekaming pibalebale ban tuki ke keka.

²⁹ Sinabi nang Jesus karela, Ing katutuan sasabian ku kekayu: alang tau a pepainggulut king pibalebale na, asawa, kapatad at pengari o ding anak na alang-alang king Kayarian ning Dios

³⁰ ing e tanggap lalung dakal king kasalukuyan at bie alang angga king panaun a daratang.

³¹ Kewani na lang Jesus ding labing adua at sinabi na karela, Lawan yu! Papunta ta na Jerusalem at karin matupad ing sablang sinulat da ring propeta tungkul king Anak ning Tau.

³² Ipanganiaya re karing paganu a maninsultu, lapastangan, at maglura keya.

³³ Paglatikuan de at paten, oneng king katlung aldo subli yang mie.

³⁴ Oneng e ra aintindian ding alagad ing dimdam da; e malino karela ing kabaldugan na nita at e ra balu nung nanu ing amanuan nang Jesus.

³⁵ Inyang malapit ne i Jesus karin Jerico, ating metung a lalaking bulag a makalukluk lele na ning dalan; magpalimus ya.

³⁶ Dimdam na lang daralan ding dakal a tau; mengutang ya nung nanu ing malilyari.

³⁷ Ngarang mekibat, Daralan ya i Jesus ning Nazaret.

³⁸ At nganang kinulisak masikan, Jesus, Anak nang David, malunus ka kanaku!

³⁹ Sebianan de ring tau king mumuna at sinabi ra king e ya mainge, oneng lalu yang kinulait masikan. Ngana, Anak nang David! Malunus ka kanaku!

⁴⁰ Tinuknang ya i Jesus king pamaglakad na at inutus na king ilapit de keya ing bulag. Pangalapit na, kitnan neng Jesus,

⁴¹ Nanu ing buri mung daptan ku keka? Nganang mekibat, Ginu, bisa kung manakit pasibayu.

⁴² At sinabi nang Jesus king bulag, Manakit ka! Pepakayap na ka ning kekang kasalpantayanan!

⁴³ Kanita mu rin menakit ya at tinuki ya kang Jesus at pepasalamat ya king Dios. Inyang ikit da iti ding tau, pinuri de ngan ing Dios.

19

¹ Linub ya at linabas i Jesus karin king Jerico.

² Ating metung a mabandi karin a pamuntuk da ring talapanyingil buis, ing lagyu na Zaqueo.

³ Pilit neng buring akit nung ninu i Jesus. Oneng pandak ya i Zaqueo at e ne agyung lawen uli na ning keraklan da ring tau.

⁴ Inya migpauna yang milayi at minukiat ya king metung a tanaman a sikomoro ba neng akit dumalan i Jesus karin.

⁵ Pangaras nang Jesus king lugal a ita, tinalanga ya at sinabi na, Zaqueo, kuldas kang malagua uling kailangan kung salangi ngeni king bale mu.

⁶ Memalagua yang kinuldas at matula neng tinggap i Jesus.

⁷ Mibubulungan la ding sablang menakit king mepalyari. Ngara, Makipagbisita ya king metung a makasalanan!

⁸ Tinalakad ya i Zaqueo at sinabi na king Ginu, Ginu, ing kapitna king pibandian ku ipamie ku karing pakakalulu. At nung sakaling atin kung pirait ninuman, isubli kung makatapat a besis keya.

⁹ Nganang Jesus kang Zaqueo, Dinatang ngeni ing kaligtasan king pibalebaleng iti; ing taung ini lahi nia namang Abraham.

¹⁰ Uling dinatang ya ing Anak ning Tau ban panintunan na la at iligtas ding mebating.

¹¹ Sindu nang Jesus ing pamagsalita na at selita ne ing metung a talimhaga karing taung makiramdam. Depat na iti uling malapit ne Jerusalem at isipan da ring tau king malapit niang lunto ing Kayarian ning Dios.

¹² Ngana, Ating metung a taung marangal a minta king marayung bansa ba yang magawang ari at kaybat magbalik ya naman.

¹³ Bayu ya meko, inaus na la ding apulu nang ipus at dininan na lang tungga-tunggalan a salaping gintu, at sinabi na karela, Pagnegosyu yu la den angga king pamagbalik ku.

¹⁴ Tutu ra ne mang kesaman ding memalen na, inya kalako na mitubud lang pekakatawan da ban sabian da, E mi ya buring maging ari ing taung iti.

¹⁵ Gewa ria mu ring ari ing taung ita. Kaybat minuli ya at pepayaus na la ding ipus a dininan nang salaping gintu ban abalu na nung magkanu ing penakitan na ning balang metung.

¹⁶ Linapit ya ing minunang mirinan at ngana, Ing salapi yung gintu, ginu, menakitan yang apulu.

¹⁷ Masanting, nganang mekibat. Mayap kang ipus! Anti na ning meging tapat ka king ditak a bage, panibalan da ka karing apulung siudad.

¹⁸ Linapit ya ing kadua at ngana, Ing kekayung salaping gintu, ginu, menakitan yang lima.

¹⁹ At sinabi na, Manibala ka karing limang siudad.

²⁰ Linapit ya ing aliwa pang ipus at ngana, Oyni, ginu, ing kekayung salaping gintu. Binalut ke king panyu at selikut.

²¹ Tatakut ku kekayu uling masakit kayung pakiutusan; kakuanan yu ing e kekayu at pupupulan yu ing e yu tenam.

²² Pekibat na ning panginuan na, E ka mayap a ipus! King sinabi mung yan karin da ka atulan! Balu mu na palang masakit kung pakiutusan at kakuanan ku ing e kanaku at pupupulan ku ing e ku tenam,

²³ obat e me bildug king bangku ing salapi ku? King pamagbalik ku mika interes ya mu man sana.

²⁴ At sinabi na karing atyu karin, Kuanan ye keya ing salaping gintu at ibie ye king atin nang apulung salaping gintu.

²⁵ Oneng ngara, Atin neng apulung salaping gintu, ginu!

²⁶ Sasabian ku kekayu, nganang mekibat, ing ninumang atin na, mirinan ya pa; oneng itang ala, agyang itang ditak a atyu keya mayakua pa.

²⁷ Ngeni, tungkul naman karetang kalaban kung e maki buri king maging ari ku karela, idala yu la keni at paten yu la king arap ku!

²⁸ Kaybat nang asabi iti, sinulung neng migpauna karela papunta Jerusalem.

²⁹ Inyang malapit ne king Betfage at Betania, king bunduk a ausan dang Bunduk ding Olibo, pepaunan na la ding aduang alagad.

³⁰ Sinabi na karela, Munta kayu king tutuking baryu. Kalub yu karin akit ye ing metung a biserung asno. Makatali ya at ala pang mekasake kaniti. Kalagan ye at idala ye keti.

³¹ Nung sakaling ating mangutang kekayu: Baket kakalagan ye yan? sabian yu, Kailangan ne ning Ginu.

³² Inya linakad na la ding mituburan at ikit de ing asno, antimo ing sinabi na karelang Jesus.

³³ Kabang kakalagan de, ding makibandi kitnan da la, Baket kakalagan ye yan?

³⁴ Pekibat da, Kailangan ne ning Ginu.

³⁵ Dela re ing asno kang Jesus. Kaybat deng sepinan king gulut ing asno king balabal da, pepasaken de i Jesus.

³⁶ Kabang dalan, lalatag da la ring tau ding balabal da king daralanan na.

³⁷ Inyang malapit ne Jerusalem, king lugal a pababa king Bunduk ding Olibo, kinulisak la king tula ding heganaganang alagad a milulupung keya at king masikan a bosis pinuri de at pepasalamatan ing Dios king sablang ikit dang milagru.

³⁸ Ngara, Bendisyunan ne sa ning Dios a daratang king lagyu na ning Ginu! Kapayapan karin banua at ligaya king Dios!

³⁹ Ngara ding mapilan a Pariseong makalibutad karing dakal a tau, Maestro, iyutus mu karing alagad mu ing e la masigla.

⁴⁰ Pekibat na, Sasabian ku kekayu, nung magtahimik la, ding batu mismu ilang kulisak.

⁴¹ Inyang malapit ne king siudad i Jesus at ababatiawan na ne, tengisan ne.

⁴² Ngana, Nung balu mu mu ing makaibie kapayapan keka king aldo iti! Oneng e mu pin akakit ngeni!

⁴³ Datang la ding aldo a padurutnan da kang kuta ding kekang kalaban; kubkuban da ka at lusuban king misusumangid.

⁴⁴ Lasakan da kang lubus at pati na ding anak mung atyu kilub ding kekang pader. Ala lang itagan metung mang batu a makatumpak king kalupa nang batu uling e mu kilala ing paniatang na ning Dios keka ba na kang iligtas!

⁴⁵ Linub ya i Jesus king Templo at tinabi na la ding magtinda.

⁴⁶ Ngana karela, Makasulat: Ing bale ku mayaus yang bale pipanalanginan. Oneng gewa yeng tuknangan ding mapanako!

⁴⁷ Aldo-aldo tuturu ya i Jesus kilub ning Templo. Buri da ring pamuntuk ding pari, ding talaturu ning Kautusan, at ding makatua na ning balen king ipapate re.

⁴⁸ Oneng e la manakit paralan nung makananu rang arapat iti, uling taimtim yang makiramdam kang Jesus ing mabilug a balen; ala lang buring salanan king sasabian na.

20

¹ Misan a aldo, kabang tuturu ya i Jesus karing tau kilub na ning Templo at manaral tungkul king Mayap a Balita, linapit la ding pamuntuk da ring pari at ding talaturu ning Kautusan; kayabe da la ring makatua na ning balen.

² Ngara, Sabian mu na mo kekami ing katuliran mung dapat kareting bage? Ninu ing minie kayupayan keka?

³ Pekibat nang Jesus, Kutnan da kayu naman. Sabian yu na mo kanaku

⁴ nung kenu ibat ing upaya nang maminyag Juan, ibat king Dios o karing tau?

⁵ At ngarang mipapangutang, Nung sabian tamung ibat king Dios, sabian na naman kekatamu, Baket e ye peniwalan?

⁶ Nung sabian tamung, Ibat karing tau, pamasibasan da katamu ding tau uling paniwalan da king propeta ya i Juan.

⁷ Inya ing pekibat da kang Jesus, E mi balu.

⁸ At nganang Jesus karela, E ku naman sabian kekayu nung nanu ing katuliran kung dapat kareting bage.

⁹ Kanita selita neng Jesus iting talimhaga karing tau: Ating metung a taung menanaman ubas king gabun na. Pekiupa ne karing kasamak at minta ya king aliwang bansa. Menatili yang maluat king lugal a ita.

¹⁰ Inyang miras na ing panaun ning pamamupul ubas, pepapuntan ne ing metung a ipus ban kuanan na ing parti na king pupul. Oneng bigbugan de ring kasamak ing ipus at pepaulian deng alang darala.

¹¹ At pepapuntan ne ing metung pang ipus; pemugbug dia naman ampon lepastangan at pepaulian deng ala munamang darala.

¹² Pepapuntan ne ing katlu; penasakit de at penabi.

¹³ Ngana ning makibandi king ubasan, Nanu ing daptan ku? Papuntan ke ing sariling anak kung lalaking pakamalan; siguradung igalang de!

¹⁴ Oneng inyang ikit de ring kasamak ing anak a lalaki, ngarang misabisabi, Iti ya ing talapagmana. Tara, paten ta ya ban miras kekatamu ing mana na!

¹⁵ Inya liwal de king ubasan at pete re. Nanu kaya ing daptan na karela ning makibandi king ubasan?

¹⁶ Ya mismu munta ya karin at pamaten na la detang kasamak at ibie ne karing aliwang kasamak ing ubasan. Inyang dimdam da iti ding tau, sinabi ra, E na na sa paintulut ning Dios kekatamu yan!

¹⁷ Linawe na lang Jesus at kaybat kitnan na la, Nung makanyan, nanu ing buri nang sabian niting telatag ning Kasulatan? Ing batung e ra buri ding manalakad bale, ya ing meging batung pamuntuk.

¹⁸ Manasakit ya ing ninumang makatakid king batung iti at mangalaso-laso ya ing dagpan na.

¹⁹ Kanita mu rin buri deng dakpan ding talaturu ning Kautusan at ding pamuntuk da ring pari i Jesus, uling aintindian da king ila ding pamaramdaman na king talimhaga; oneng tatakut la karing tau.

²⁰ Inya menaya lang masanting a panuan. Sitsutan da la ring mapilan a tau ban magkunwaring manintun king katuliran at ilang tiburan da ba reng arakap i Jesus king pamagsalita na ban kanita adalum de at miyabie king upaya ning Romanung Gobernador.

²¹ Ngara deting ispia kang Jesus, Maestro, balu mi king ustu ing kekayung sasabian at tuturu. E kayu mangabiran kenu man, nune tuturu yu ing katutuan tungkul king buri na ning Dios para king tau.

²² Sabian yu na mo kekami nung labag king Kautusan ing mamayad buis king Emperador ning Roma o ali?

²³ Oneng balu nang Jesus ing e mayap dang kapagnasan, inya ngana karela,

²⁴ Pakitanan yu kung metung a denaryu. Kaninu ya larawan at lagyu ing atyu keni? Ngarang mekibat, King Emperador la.

²⁵ Inya nganang Jesus karela, Nung makanyan, ibie yu king Emperador ing mangaintulid king Emperador, at ibie yu king Dios ing mangaintulid king Dios.

²⁶ Mebigu la king kapagnasan dang arakap de king pamagsalita na arap da ring tau. Ala na lang asabi pa uling mebigla la king pekibat na.

²⁷ Ating mapilan a Saduseo a linapit kang Jesus. Ding Saduseo ila ding taung sasabing alang pamaniubling mebie.

²⁸ Ngara, Maestro, sinulat neng Moises iting kautusan para kekami: Nung ing metung a lalaki mate yang alang ayanak king asawa na, ing kapatad nang lalaki kailangan neng pakasalan ing mebalu ban mika anak la para king mete.

²⁹ Ating pitung mikakapatad a lalaki. Mekiasawa ya ing pangane at mete ya namang alang ayanak.

³⁰ Pekasalan ne ning kadua ing mebalu, at mete yang alang ayanak.

³¹ Makanyan munaman ing milyari king katlu angga king kapitu; ayasawa de ngan at mete lang alang ayanak king mebalu.

³² King katataulian, mete ya naman ing babai.

³³ Ngeni, king aldo pamaniubling mebie, ninu karing pitung mikakapatad ing maging asawa na, anti na ning mikasal ya karela ngan?

³⁴ Nganang mekibat Jesus karela, Miyayasawa la ding lalaki at babai king kapanaunan a iti,

³⁵ oneng e na la makiasawa ding lalaki at babaing kabilang karing subling mie.

³⁶ Mitulad la karing anghel at e na la malyaring mate; uling king pamaniubli rang mie maging anak na la ning Dios.

³⁷ Agyang i Moises patutuan na king subli lang mie ding mete. Uling king istoria tungkul king mababang tanaman a milalablab, ing Ginu inaus neng Dios nang Abraham, Dios nang Isaac, at Dios nang Jacob.

³⁸ Ngana wari, ing Dios e re Dios ding mete, nune Dios de ring mabie uling ding sabla mabie la uli na.

³⁹ Ngara ding mapilan a talaturu ning Kautusan, Maestro, tinud ka king pakibat a yan!

⁴⁰ Ala nang mengangas pang mengutang.

⁴¹ Nganang Jesus karela, Makananu rang asabi king ing Cristo anak neng David?

⁴² Uling i David mismu sasabian na king libru da ring Dalit, Ing Ginu sinabi na king kakung Ginu: Lukluk ka banda kung wanan,

⁴³ anggang e ku la lubus apasukuan keka ding kekang kalaban.

⁴⁴ Ngeni nung i David inaus neng Ginu, ing Cristo, makananu ya mo ngening maging anak na?

⁴⁵ Nganang Jesus karing alagad na kabang makiramdam la ding sabla,

⁴⁶ Mimingat kayu karing talaturu ning Kautusan a maburing lakad-lakad pakaimalan a makaba at maburing pupugayan da karing plasa. Buri da la ring luklukan pandangal karing sinagoga at ding kabisera neng makipamiesta la.

⁴⁷ Ila ding gigisan king kabiayan da ring mebalung babai, at kaybat magkunwaring manalangin makaba! Lalung mabayat ing dugpang parusa karela!

21

¹ Megumasid ya i Jesus king makapadurut at ikit na la ding masalaping babaldug king karelang ain king pibabalduganan kareti king Templo.

² Ikit nia naman ing metung a pakakalulung babaing mebalu; babaldug na la ding aduang salapi.

³ Sinabi nang Jesus, Ing katutuan sasabian ku kekayu, ing pakakalulung babaing iti ya ing maragul a inain kesa karing sabla.

⁴ Uling binie na ing sablang pagkabie na, oneng ila binie ra mu itang labis ketang kailangan da.

⁵ Pipagsalitan da ring mapilan karela ing sintingan na ning Templo, ing sintingan a babie da ring marmol at ding ain a miyain king Dios. Inya sinabi nang Jesus,

⁶ Ding akakit yung den, datang ing panaun, metung man alang mitagan a batung makatumpak king kalupa nang batu; mabaldug la ngan king gabun.

⁷ Ngarang mengutang kang Jesus, Maestro, kapilan malyari iti? At nanu ing palatandanan king pangatupad na niti?

⁸ Pekibat na, Mingat kayu ban e na kayu alinlang ning ninuman. Uling dakal la ding datang king lagyu ku a sumabing, Aku ing Cristo! at Ing panaun dinatang na! E kayu tutuki karela.

⁹ E kayu pailigalig nung makabalita kayung gera at rebolusyun. Kailangan king mapalyari la pa mu deti, oneng e mangabaldugan king ing kawakasan dinatang na.

¹⁰ At ngana pa karela, Lusuban ne ning metung a bansa ing kalupa nang bansa at lumaban ya ing metung a kayarian king kalupa nang kayarian.

¹¹ Mika mangasikan a ayun, danup, at salut karing miyayaliwang lugal at ating lunto makapangilabut a bage a mangaragul a tanda a manibat banua.

¹² Bayu malyari iting sabla, pandakpan da kayu at ligaligan. Idala da kayu karing sinagoga ban litisan at ipasukul. King uli ku iyarap da kayu karing ari at karing gobernador.

¹³ Iti ya ing maging masanting yung oras ban munie patutu tungkul kanaku.

¹⁴ Ipanatag yu ing lub yu; e kayu paibalisa nung makananu yung ipagdipensa ing kekayung sarili;

¹⁵ uling dinan da kayung amanu at kabiasnan a e na agyung labanan o tutulan ning ninuman karing kekayung kalaban.

¹⁶ Agyang ding pengari yu, kapatad, kamaganak, at kakaluguran ipanganiaya ra kayu; ipapate da la ring mapilan kekayu.

¹⁷ Pikasaman da kayu ding sabla king uli ku.

¹⁸ Oneng metung man king buak yu alang mabating.

¹⁹ Magpakatatag kayu uling king kekayung kapibabatan karin yu tanggapan ing kaligtasan.

²⁰ Potang akit yu neng kukubkuban da ring sundalus ing Jerusalem, abalu yu king e lumuat malasak ne.

²¹ Sukat lang tumakas karing bunduk ding atyu king Judea at sukat lang mako ding manuknangan king siudad, at e na la sukat lungub pa karin ding atyu king baryu.

²² Uling ila deti ring Aldo ning Pamamarusa ban matupad ing sablang sasabian ding Kasulatan.

²³ Maging makalunus la ding mabuktut at ding pasusu karing aldo deta! Uling datang ing maragul a kasakitan at mua ning Dios laban king bansang iti.

²⁴ Mate la ding mapilan king espada at idala da lang bihag ding aliwa karing sablang bansa. Damusakan de ring paganu ing Jerusalem anggang e mapupus ing panaun a mitakda para karela.

²⁵ Mika ating palatandanan king aldo, king bulan at karing batuin. Magulu la ding bansa keti king yatu at malitu uli na ning dagat at ning alun.

²⁶ Mabungsul la ding tau king takut at king pamanisip da karing bage mapalyari king yatu; uling mayugun la at milisia la dalan ding planeta at ding aliwa pang bage king banua.

²⁷ King panaun a ita, akit deng daratang ing Anak ning Tau libutad na ning biga at kayabe ning maragul a kayupayan at kamalan.

²⁸ Kabud magumpisa na lang mapalyari deting bage, tumula kayu uling malapit na ing pangaligtas yu.

²⁹ Kaybat na nita, selita neng Jesus karela ing metung pang talimhaga. Ngana, Lawan ye ing tanaman a higera at ding aliwa pang tanaman.

³⁰ Nung akit yu na lang manulud, balu yu king malapit na ing kaleldo.

³¹ Makanyan munaman, potang akit yu na lang mangapalyari deting bage, abalu yu king malapit neng datang ing Kayarian ning Dios.

³² Tandanan yu! Mapalyari ngan ing sablang bage iti bayu la ngan mangamate ding taung mabibie ngening kasalukuyan.

³³ Lumipas ya ing banua at ing yatu, oneng manatili ing amanu ku.

³⁴ Mingat kayu! E yu paburen ing mipasoso kayu king katakawan at pamaglasing, at e kayu paibalisa king pamanintun kabiayan, pota dasnan na kayu ning Aldong ita a e kayu makasadia.

³⁵ Uling datang ya ing aldong ita king e ra piadian ding sablang tau king mabilug a yatu.

³⁶ Inya, magsadia kayu king balang oras; manalangin alang patugut ban mika sikanan kayu at aligtasan yu ing sablang mangapalyari at ban makayarap kayu king Anak ning Tau.

³⁷ Aldo-aldo tuturu ya i Jesus kilub ning Templo at mamako ya mu neng bengi at magpaynawa king Bunduk ding Olibo.

³⁸ Inya maranun pa pupunta na la king Templo ding tau ban makiramdam kang Jesus.

22

¹ Malapit nang datang ing Piesta ning Tinape Alang Lebadura a ausan dang Pamaglagpus.

² Manintun lang masanting a paralan ding pamuntuk da ring pari at talaturu ning Kautusan nung makananu reng apapate i Jesus, oneng tatakut la karing tau.

³ Kanita linub ya i Satanas kang Judas a mayayaus Iscariote, ing metung karing labing adua.

⁴ Meko ya at mekipagsalita karing pamuntuk da ring pari at karing opisyal da ring guardia na ning Templo, nung makananu neng apanganiaya i Jesus karela.

⁵ Metula la at pengakuanan deng dinan salapi.

⁶ Mebisa ya i Judas at manibat na kanita menintun neng oportunidad ba neng apanganiaya i Jesus king e ra kamalayan ding tau.

⁷ Miras ing aldo na ning Tinape Alang Lebadura nung kapilan de papaten ing biserung tupa para king Pamaglagpus.

⁸ Inutusan na lang Jesus di Pedro at Juan. Ngana karela, Mako na kayu at isadia yu ing kekatamung apunan para king Pamaglagpus.

⁹ Ngarang kinutang kang Jesus, Nukarin mu buring isadia mi?

¹⁰ Pekibat na, Makiramdam kayu! Kalub yu king siudad akasalubung ye ing metung a lalaking magdalang metung a bangang danum. Tukian ye angga king bale a puntalan na

¹¹ at sabian yu king makibandi king bale: Pakutang na keka ning Maestro nung nukarin ya ing kuartu a malyari nang pipanganan king Apunan ning Pamaglagpus kayabe da ring alagad na?

¹² Ituru ne kekayu ing metung a maragul a kuartu a kompletu gamit. Karin kayu magsadiang apunan.

¹³ Meko la at disnan da at ikit ing sabla-sabla antimo ing sinabi nang Jesus karela, at sidia ra ing apunan ning Pamaglagpus.

¹⁴ Inyang miras na ing oras, linukluk ya i Jesus king lugal na king lamesa at ding apostol.

¹⁵ Ngana karela, Malambat ku nang pagnasan ing akayabe da kayung mangan king apunan ning Pamaglagpus bayu ku dumalan kasakitan!

¹⁶ Sasabian ku kekayu: kapilan man e na ku pasibayung mangan kaniti anggang e lubus matupad iti king Kayarian ning Dios.

¹⁷ Kinua ne ing kopa at kaybat nang mekapasalamat king Dios binie ne karela. Ngana, Tanggapan ye iti at pisulusuluan yeng inuman.

¹⁸ Sasabian ku kekayu king manibat ngeni e na ku minum kaniting katas ning ubas anggang e datang ing Kayarian ning Dios.

¹⁹ At kinua ne ing tinape at kaybat nang mekapasalamat king Dios, pemirasu ne ing tinape at binie ne karela. Ngana, Iti ya ing katawan ku [a miyain para kekayu. Daptan yu iti king kapigaganakan kanaku.

²⁰ Makanyan munaman, kaybat na ning apunan, binie ne ing kopa at sinabi na, Ing kopang iti ya ing bayung kasunduan a mitatalakad king kapamilatan na ning daya kung dumagus para kekayu].

²¹ Oneng kasulu ke keti ing magtaksil kanaku!

²² Uling mate ya ing Anak ning Tau agpang king birian ning Dios; oneng makalunus ne itang taung magtaksil kanaku!

²³ At mikukutnanan la nung ninu kaya karela ing gawang kataksilan kang Jesus.

²⁴ Linto ing metung a pisasabian karing alagad nung ninu karela ing marangal dili.

²⁵ Sinabi nang Jesus karela, Ding ari keti king yatu giginuan da la ring karelang sasakupan at ding maki kayupayan mayayaus lang Kakaluguran da ring Tau.

²⁶ Oneng e makanyan king kabilian yu, nune, ing pekamarangal kekayu sukat yang maging antimong peka-anak dili at ing pamuntuk maging anti yang talasuyu.

²⁷ Ninu ing lalung marangal, ing makalukluk king lamesa o ing susuyu keya? Siempre, itang makalukluk. Oneng atyu ku libutad yu bilang metung a talasuyu.

²⁸ Menatili kayung kayabe ku karing sablang kapagsubukan a delanan ku.

²⁹ Nung makananu na kung dininan katuliran sumakup ning Ibpa ku, makanyan munaman ing gawan kung kasunduan kekayu.

³⁰ Mangan kayu at minum kayabe ku king Kayarian ku at lukluk kayu karing tronu ba yu lang ukuman ding labing aduang tribu na ning Israel.

³¹ Simon! Simon! Makiramdam ka! Inawad nang Satanas at mipaintulut king ikayung sabla subukan na kayu antimo nung makananung ing ortelanu sisimen na ing sepu king pale.

³² Oneng penalangin da ka king kapilan man e sa lubus milako ing kekang kasalpantayanan. At kabud mibalik ka lub kanaku, pasiknangan mu la ding kekang kapatad.

³³ Mekibat ya i Pedro, Ginu, makasadia da kang damayan king sukulan at king kamatayan!

³⁴ Nganang Jesus, Pedro, tandanan mu iti: bayu ya tulauk ing tatyo king aldo iti makatatlu mu na ku ikuang alingad.

³⁵ Kanita kitang nang Jesus karela, Inyang tinubud da kayung alang pitaka, suput o sandalyas, kekulangan kayung nanu man? Ngarang mekibat, Ali kami.

³⁶ Oneng ngeni, nganang Jesus karela, nung atin kayung pitaka o suput idala ye. Ing ninumang alang espada kailangan ing pisali ne ing balabal na ba yang saling metung.

³⁷ Uling sasabian ku iti kekayu: sukat matupad kanaku ing sasabian na ning Kasulatan, Mibilang ya karing kriminal. Uling ing misulat tungkul kanaku matutupad na.

³⁸ Ngara ding alagad, Ginu, oreni ding aduang espada! Nganang mekibat, Managyu na!

³⁹ Meko ya king siudad i Jesus at minta ya king Bunduk ding Olibo, antimo ing meging kaugalian na, at tinuki la ding alagad na.

⁴⁰ Karas da karin ngana karela, Manalangin kayu ban e kayu manabu king tuksu.

⁴¹ Dinayu yang bagya karela; siniklaud ya at menalangin.

⁴² Ngana, Ibpa, nung malyari idayu me kaku iting kopa. Makanyan man aliwa ing kaburian ku, nune ing kaburian mu ya ing mipamintuan. [

⁴³ Pepakit ya kang Jesus ing metung a anghel a ibat banua at pepasiknangan ne lub.

⁴⁴ Uli na ning mabayat a panamdam na, lalu yang menalangin taimtim; tutulu ing pawas na a mengaring dayang papatak king gabun.]

⁴⁵ Kaybat nang menalangin, tinikdo ya at belikan na la ding alagad na. Disnan na lang matudtud uli na ning maragul dang kalungkutan.

⁴⁶ Ngana karela, Baket matudtud kayu? Mibangun kayu at manalangin ban e kayu manabu king tuksu.

⁴⁷ Magsalita ya pa i Jesus inyang dinatang la ding dakal a tau; panimunan na la ning taung milagyuan Judas, ing metung karing labing adua. Lepitan ne i Jesus ba neng uman.

⁴⁸ Oneng sinabi nang Jesus, Judas, ipanganiaya me wari ing Anak ning Tau king kapamilatan na ning metung a uma?

⁴⁹ Inyang ikit da ring alagad a kayabe nang Jesus ing malilyari, sinabi ra, Ginu, panabakan mi na la?

⁵⁰ At tebak ne ning metung karela ing ipus na ning Pekapun ding Pari; atigpas ne ing balugbug nang wanan.

⁵¹ Oneng sinabi nang Jesus, Ustu na! Tigkilan ne ing balugbug na ning ipus at pepakayap ne.

⁵² Kanita sinabi nang Jesus karing pamuntuk da ring pari at pamuntuk da ring guardia na ning Templo at karing makatua na ning balen a minta karin ba reng dakpan, Tulisan ku wari inya dinatang kayung magdalang espada at palupalo?

⁵³ Tuturu ku aldo-aldo king Templo at atyu kayu naman karin; makanyan man e yu ku dekap. Oneng panaun yu ngeni at ing upaya na ning karalumduman ya ing matutupad.

⁵⁴ Dekap de i Jesus at dela re king bale na ning Pekapun ding Pari. Tikian neng Pedro, oneng makarayu yang bagya.

⁵⁵ Mekiabe ya i Pedro karing taung makapadurut king dapug a gewa ra king patyu.

⁵⁶ Ikit ne karin ning metung a ipus a babai at pegumasdan neng masalese. Kaybat, ngana niting ipus, Kayabe nia naman ing taung iti!

⁵⁷ Oneng lingad na; nganang Pedro, Babae, e ke man kakilala ing taung sasabian mu!

⁵⁸ Kaybat da ring mapilan a penandit, apansin ne ning metung a lalaki at ngana keya, Metung ka naman karela! Oneng pekibat nang Pedro, Abe, magkamali ka!

⁵⁹ Kaybat nang milabas ning metung a oras, pekatimid na namang sinabi ning metung a lalaking menakit kang Pedro, Talagang kayabe neng Jesus ing taung iti, uling metung yang Galileo!

⁶⁰ Oneng pekibat nang Pedro, Abe, e ku balu ing sasabian mu! Kanita mu rin, kabang magsalita ya pa, tinulauk ya ing tatyo.

⁶¹ Melikid ya ing Ginu at linawe ne i Pedro. At aganaka nang Pedro ing sinabi na ning Ginu, Bayu ya tulauk ing tatyo king aldo iti alingad mu na kung makatatlu.

⁶² Linual ya i Pedro at menangis yang kapait-paitan.

⁶³ Kabang insultuan de i Jesus at pamalupaluan ding magbante,

⁶⁴ tikpan de lupa at saka re kukutnan. Ngara, Sige na mo, ulahan mu nung ninu ing mekatud keka?

⁶⁵ Miyayaliwang kalapastanganan ing piniabi ra kang Jesus.

⁶⁶ Inyang masala na, mitipun la ding makatua na ning balen at ding pamuntuk da ring pari at ding talaturu ning Kautusan, ding sablang bibilug king Sanhedrin at inarap de i Jesus king karelang kapulungan.

⁶⁷ Ngara, Sabian mu kekami, ika pin ing Cristo? Pekibat na, Nung sabian ku, e yu ku rin paniwalan

⁶⁸ at nung kutnan da kayu e na kayu man makibat.

⁶⁹ Oneng manibat ngeni lukluk ya ing Anak ning Tau king banda nang wanan ning Dios a Mayupaya.

⁷⁰ At ding sabla kitnan de, Nung makanyan, ika pin ing Anak ning Dios? Pekibat na, Ikayu mismu sasabian yu king aku pin ya.

⁷¹ Sinabi ra, Nanu pang katibayan ing kailangan tamu? Itamu mismu dimdam tamu ing sarili nang amanu!

23

¹ Tinalakad ya ing mabilug a kapulungan at dela re i Jesus arapan nang Pilato.

² Pegumpisan dang inapag ing dalum laban kang Jesus. Ngara, Arakap mi ya ing taung iti; susutsutan na la ding kabalen mi at babawal na lang mamayad buis king Emperador at sasabian na pa king ya mismu ing Cristo, ing ari.

³ Kitang nang Pilato, Ika pin ing Ari da ring Judio? Nganang mekibat Jesus, Ika na mismu ing sasabi.

⁴ Nganang sinabing Pilato karing pamuntuk da ring pari at karing tau, Ala kung akakit a pamikasala na niting tau.

⁵ Oneng pipilit dang sasabian, King kapamilatan na ning turu na guguluan na la ding tau king mabilug a Judea. Megumpisa ya karin Galilea at ngeni miras ne keti.

⁶ Inyang dimdam nang Pilato iti, kitang na nung tau ya Galilea i Jesus.

⁷ At inyang abalu nang i Jesus ibat ya king sakup nang Herodes, pepadala ne kang Herodes a atyu kanita king Jerusalem.

⁸ Metula yang e mu nanu i Herodes inyang ikit ne i Jesus. Dakal ne abalitan tungkul kang Jesus at malambat na neng buring akit. Panenayan neng akit gawang milagru i Jesus.

⁹ Inya pengutnan na neng pengutnan, oneng e ya bitasang mekibat i Jesus.

¹⁰ Atyu la karin ding pamuntuk da ring pari at ding talaturu ning Kautusan a alang tuknang king pamagbintang da kang Jesus.

¹¹ Ininsultu ne at pisunu-sunung Herodes at ding sundalus na. Pepasuluran deng mal a imalan at binalik de kang Pilato.

¹² At king aldo ita mikaluguran la di Herodes at Pilato; king milabas mipagkamua la.

¹³ Pepayaus na lang Pilato ding pamuntuk da ring pari, ding makatua na ning balen, ampon ding tau,

¹⁴ at sinabi na karela, Delum ye kanaku iting tau king kasalanan a pamaniutsut karing tau. Ngeni, siniasat ke king arapan yu at ala kung ikit a pamikasala na karing bage susumbung yu.

¹⁵ Agyang i Herodes ala yang ikit a pamikasala na, inya pepabalik ne kekatamu. E karampatan ing atulan yang kamatayan uling ala yang kasalanan.

¹⁶ Ipabarug keng latiku at kaybat ipabulus ku ne. [

¹⁷ Balang Piesta ning Pamaglagpus, kailangan king i Pilato mibulus yang metung a preso para karela.]

¹⁸ Oneng kilisak dang agnan-agnan ding dakal a tau, Paten ya ing taung yan! Ibulus ya i Barabas! (

¹⁹ Mesukul ya i Barabas uli na ning kaguluan a milyari king siudad at uli na ning pamakamate tau.)

²⁰ I Jesus ya ing buri nang ibulus Pilato, inya migsalita yang pasibayu karing tau.

²¹ Oneng kilisak da, Ipaku ya king krus! Ipaku ya king krus!

²² Nganang Pilato karela king katlung besis, Baket, nanung gewa nang marawak? Ala kung akakit a sangkan ba yang magdusang kamatayan. Ipabarug keng latiku kaybat ipabulus ya.

²³ Oneng lalu rang pekakulisak king kailangan yang ipaku i Jesus king krus at ing karelang kilisak ya ing migtagumpe.

²⁴ Inya sildak nang Pilato kang Jesus ing atul a aduan da.

²⁵ Binulus ne ing taung mesukul uli na ning pamangulu at pamakamate tau, at binie ne i Jesus karela ban gawan da ing buri dang daptan keya.

²⁶ Inyang dela ra ne i Jesus ban ipaku king krus, akasalubung de ing metung a lalaking ibat king baryu. Ing lagyu na Simon; tau ya Cirene. Pinigil de at pepapusan ing krus kang Simon kagulutan nang Jesus.

²⁷ Tutukian de ring dakal a tau i Jesus, kabilang la kareti ding babaing manangis at managulele uli na.

²⁸ Belikdan na lang Jesus at sinabi na karela, Anak nang babai ning Jerusalem, e yu ku tatangisan! Ing tangisan yu ya ing kekayung sarili at ding kekayung anak.

²⁹ Tandanan yu ini: datang la ding aldo nung nu ra sabian ding tau, Kapalad da ring babaing baug, ding kapilan man e menganak at kapilan man e pepasusu!

³⁰ Karing aldo deta sabian da ring tau karing bunduk, Pairagsa kayu kekami! at karing bunduk-bundukan, Kambilan yu kami!

³¹ Uling nung makanyan ing ararapat da king tanaman potang sagiwa ya, nanu kaya ing marapat potang malangi ya?

³² Atin la naman delang aduang kriminal ban paten dang kayabe nang Jesus.

³³ Inyang miras la king lugal a mayayaus Bungu, pinaku re i Jesus king krus. Pinaku da la naman ding aduang kriminal, ing metung king banda nang wanan at ing metung king banda nang kayli.

³⁴ Nganang Jesus, Ibpa, patawaran mu la uling e ra balu ing daraptan da. At piparti-parti ra ing imalan na king kapamilatan na ning pamibagutan.

³⁵ Makatalakad la ding tau karin at manalbe la kabang pituya-tuya de ring makatua da ring Judio. Ngara, Linigtas na la ding aliwa; paburen yung iligtas na ngeni ing sarili na, nung ya pin ing Cristo, ing pinili ning Dios!

³⁶ Pituya-tuya dia naman ding sundalus; lepitan de at alukan maslam a alak.

³⁷ Ngara, Nung ika pin ing ari da ring Judio iligtas mu ing kekang sarili!

³⁸ Deting amanu makasulat la king kabuntukan na: Iti ya ing Ari da ring Judio!

³⁹ Ininsultuan nia naman ning metung karing kriminal a makabitin. Ngana, Aliwa wari ika ing Cristo? Iligtas mu ing kekang sarili at pati na ikami!

⁴⁰ Oneng sebianan ne ning metung ing kayabe na. Ngana, Ala na kang takut king Dios? Ing parusang tinggap mu kaparehu ne ning keya.

⁴¹ Matulid para kekata ing magdusang anti kaniti uli na ning depat tang marawak; oneng ya ala yang bitasang depat a marawak.

⁴² At kaybat sinabi na kang Jesus, Jesus, e mu ku sana kakalinguan potang datang na ka king kekang kayarian!

⁴³ Nganang Jesus keya, Ing katutuan sasabian ku keka: ngeni mu rin akayabe da ka king Paraiso.

⁴⁴ Inyang mag-a-alas dose na ning ugtu, meralumdum king mabilug a bansa angga king alas tres ning gatpanapun.

⁴⁵ Milako ya sala ing aldo; megabak ya king libutad ing kortina na ning Templo.

⁴⁶ Nganang kinulisak masikan Jesus, Ibpa, karing gamat mu panabilin ke ing kanakung espiritu! Kaybat nang sinabi iti mepatlud ya inawa. fig,,,,,Ibpa, karing gamat mu panabilin ke ing kanakung espiritu!,(23:46)fig*

⁴⁷ Inyang ikit ning kapitan da ring sundalus ing milyari, pinuri ne ing Dios. Ngana, Tune ya ping alang kasalanan iting tau!

⁴⁸ Ikit da ring taung makatipun manalbe karin ing milyaring iti at minuli la; durugdugan da la ring salu ra.

⁴⁹ Ding sablang kakilala nang Jesus at pati na ding babaing tinuki keya manibat Galilea, makatalakad lang e binang marayu; ikit da iting sablang bage milyari.

⁵⁰ Ating metung a lalaking milagyuan Jose, tau ya Arimatea, ing metung karing balen da ring Judio. Mayap ya at gagalangan de ring tau; kabilang ya karetang manaya king pamaniatang na ning Kayarian ning Dios. Agyamang miembru ne ning Sanhedrin, e ya nayun king desisyun da at depat kang Jesus.

⁵¹

⁵² Pintalan ne i Pilato at inawad ne ing bangke nang Jesus.

⁵³ Inyang kildas ne ing bangke, binalut ne king ulas a linen at binili ne king kutkutan a linukib king batu a e pa bitasang megamit.

⁵⁴ Aldo Biernes kanita at malapit nang magumpisa ing Sabbath.

⁵⁵ Tinuki la kang Jose ding babaing talatuki nang Jesus manibat Galilea, at ikit de ing pikutkutan na pati na ing pangabili na karin ning bangke nang Jesus.

⁵⁶ Kaybat na nita, minuli la at migsadiang pabanglu at laru para king bangke na. Migpaynawa la king Aldo ning Sabbath, antimo ing yuyutus na ning Kautusan.

24

¹ King kamamaranunan na nitang Domingung abak, minta la ding babai king kutkutan; darala ra ing pabanglung sidia ra.

² Disnan deng midugang na ing batung makatakap king pasbul na ning kutkutan.

³ At inyang linub la, e re disnan ing bangke ning Ginung Jesus.

⁴ Megulu la pamisip king milyari at kabud-abud ikit da lang atyu karin ding aduang lalaking makaimalan a makasilo.

⁵ Uli na ning maragul dang takut, dinuku la angga king gabun. Kitang da ring lalaki karela, Baket panintunan ye ing mabie karing mete?

⁶ Ala na yu keti; sinubli neng mebie! Ganakan yu itang sinabi na kekayu kanitang atyu ya pa Galilea.

⁷ Ing Anak ning Tau kailangan yang miyabie karing taung makasalanan, mipaku ya king krus at subling mie king katlung aldo.

⁸ Kanita ra aganaka ding babai ing sinabi na.

⁹ Meko la king kutkutan at belita ra karing labing metung at karing sablang kayabe ra iting sablang milyari.

¹⁰ Deting babai ila di Maria Magdalena, Juana, at i Mariang ima nang Santiago; ila at ding aliwa pang babaing kayabe ra ilang memalita kaniti karing apostol.

¹¹ Oneng inisip da ring apostol king imposibli ing sasabian da at e ra la peniwalan. [

¹² Oneng tinalakad ya i Pedro at milayi yang minta king kutkutan; dinuku ya at miglalawe. Ala yang aliwang ikit nung e mu ing ulas a linen. Kaybat minuli ya bale; isip-isipan na nung nanu kaya ing milyari.]

¹³ King aldo mu ring ita, ding adua karing alagad papunta la king baryung ausan dang Emaus; atin yang labing metung a kilometru dayu manibat Jerusalem.

¹⁴ Pipagsalitan da ing sablang bage milyari.

¹⁵ Kabang mipagsalita la at mikukutnanan, linapit ya i Jesus at mekiyagnan ya karela.

¹⁶ Ikit de, oneng e re bitasang akilala.

¹⁷ Kitnan na lang Jesus, Nanu ing pipagsalitan yu kabang lalakad kayu? Tinuknang la; mitmu lang lungkut.

¹⁸ Ngana kang Jesus ning metung a milagyuan Cleopas, Ikayu na mung dili karing manuknangan Jerusalem ing e maki balu karing bage a kaybat-ibat pa mung mepalyari karin?

¹⁹ Nganang kinutang, Nanung bage? Pekibat da, Ding bage mepalyari kang Jesus ning Nazaret, ing propetang mayupaya king dapat at amanu king arapan na ning Dios at ding sablang tau.

²⁰ Dinemanda re ding kekaming pekapun ding pari at ding makatua na ning balen ban miyatulan kamatayan at pepapaku re king krus.

²¹ Ya pa naman ing asahan ming magligtas king Israel! Subali pa kanita, iti ya na ing katlung aldo manibat inyang milyari ita.

²² Mebigla kami king belita da ring mapilan a babaing kayabe mi. Minta la kanu king kutkutan nanding abak a maranun

²³ at e re disnan ing bangke na. Migbalik la at sasabian da king menakit la kanung anghel a sinabi karela king mabie ya i Jesus.

²⁴ Minta la naman king kutkutan ding mapilan a kayabe mi at makanyan pin ing disnan da; oneng e ria naman ikit i Jesus.

²⁵ Kanita sinabi nang Jesus karela, Kapurul yu naman a isip! Angga ngeni e yu pa paniwalan ing sablang inula da ring propeta?

²⁶ E wari kailangan king ing Cristo dumalan ya king sablang bage iti bayu ya lungub king Kayarian na?

²⁷ At selese nang Jesus karela ing masasabi karing sablang kasulatan tungkul keya, manibat karing libru nang Moises at karing Kasulatan da ring sablang propeta.

²⁸ Miraras na la king baryung karelang pupuntalan at pepawaga nang Jesus king isundu na pa ing pamaglakad.

²⁹ Oneng pinigil de. Ngara, Tuki na kayu pa mu kekami, lalbug ne ing aldo at daralumdum na. Inya tinuki yang sinalangi karela.

³⁰ Inyang kasulu da ne king pamangan, kinangwa yang tinape at pepasalamat ya king Dios; at pemirasu ne ing tinape at binie ne karela.

³¹ Mibuklat la mata at akilala ra king ya pala i Jesus, oneng bigla yang mewala king panimanman da.

³² Ngara king metung at metung, Inya pala balamu milablab kata pusu kabang pakisabian na kata king dalan at lilinawan na la kekata ding Kasulatan!

³³ Kanita mu rin linakad la at migbalik Jerusalem. Disnan da lang makatipun ding labing metung at ding aliwa pang kayabe ra

³⁴ a sasabing, Tutu ya ping sinubling mebie ing Ginu! Pepakit ya kang Simon!

³⁵ Belita da ring adua katau ing milyari kabang dalan at nung makananu reng akilala ing Ginu inyang pemirasu ne ing tinape.

³⁶ Kabang babalita da pa iti karela, kabud-abud atyu i Jesus libutad da. Ngana karela, Kapayapan keko ngan!

³⁷ Oneng mitakutan la at mengilibut uling bala ra multu ya ing akakit da.

³⁸ Inya nganang Jesus karela, Baket magugulu kayu at mikakunu?

³⁹ Lawan yu la ding kanakung gamat at bitis at kilalanan yu king aku at alang aliwa. Salatan yu ku ba yung akit. Ala yang laman at butul ing multu, oneng atin ku antimo ing akakit yu. [

⁴⁰ At pangasabi na niti, pepakit na la karela ding gamat na at bitis.]

⁴¹ E la pa mu rin maniwala uli na ning maragul dang tula at pangasdan. Inya kitang na karela, Atin kayung nanumang apangan keti?

⁴² Dininan deng kapirasung ningnang a asan;

⁴³ kinua ne iti at pengan king akakit da.

⁴⁴ Kaybat ngana karela, Ing amanuan ku kanitang kayabe yu ku pa ya pin iti: kailangan ing matupad ing sablang misulat tungkul kanaku king Kautusan nang Moises, karing libru da ring propeta, at karing Dalit.

⁴⁵ Kanita biklat na la pamisip ba da lang aintindian ding Kasulatan

⁴⁶ at sinabi na karela, Anti kaniti ing makasulat: Kailangan yang dumalan kasakitan ing Cristo at subli yang mie king katlung aldo,

⁴⁷ at king lagyu na, ing pamanisi at kapatawaran ding kasalanan sukat mipanaral karing sablang bansa, magumpisa keti Jerusalem.

⁴⁸ Ikayu ding testigu kareting sablang bage.

⁴⁹ E yu kakalinguan king aku mismu itubud ke kekayu itang pengaku nang Ibpa ku. Inya e kayu mamako king siudad anggang e yu tanggapan ing upayang ibat banua.

⁵⁰ Kaybat na nita, tiki na lang Jesus king lual na ning siudad. Karas da Betania, tinas na la ding gamat na at binendisyunan na la.

⁵¹ Kabang bibendisyunan na la, likuan na la at mitas ya banua.

⁵² Simban de at mibalik la Jerusalem king mitmung tula,

⁵³ at e la patugut pupunta king Templo, pupuri at pasalamat king Dios.