1

¹ Iti ya ing Mayap a Balita tungkul kang Jesu-Cristo, ing Anak ning Dios.

² Megumpisa ya iting balita kanitang matupad ing ula nang Isaias a propeta: Oyan ing kakung tubud a parala kung makauna keka, isadia na ing kekang dalanan.

³ Sasabian na naman ning metung a kukulisak king disyerto, Isadia ye ing dalanan na ning Ginu, itulid ye ing dalan a tuntunan na!

⁴ Dinatang ya king disyerto i Juan, maminyag ya at manaral. Ngana karing tau, Sumisi kayu at painggulut karing kekayung kasalanan at pabinyag kayu ban patawaran na kayu ning Dios.

⁵ Minta la king disyerto ding sablang tau ning mabilug a Judea at Jerusalem ban makiramdam kang Juan. Kimpisal da la ring kasalanan da at bininyag na lang Juan king Ilug ning Jordan.

⁶ Megawa king buak kamelyu ing imalan a susulud nang Juan, kapirasu yang balat animal ing sinturun na. Durun at pulut-panilan ing pamangan na.

⁷ Nganang menaral Juan, Lalu yang mayupaya kesa kanaku ing daratang a katuki ku; e ku man karapatdapat agyang kalag mu karing tali nang sandalyas.

⁸ Bibinyagan da kayu king danum, oneng binyagan na kayu king Banal a Espiritu.

⁹ E melambat dinatang ya i Jesus ibat Nazaret, Galilea, at bininyag neng Juan king Ilug ning Jordan.

¹⁰ Kabud kasaka nang Jesus king danum ikit neng mibuklat ing banua at ikit ne ing Espiritu titipa ya keya antimo ing metung a patipati.

¹¹ Meramdam ya ing metung a siwalang ibat banua. Ngana, Ika ing pakamalan kung Anak; keka tutu kung matutula.

¹² Kaybat na nita, agad neng tinaid ning Espiritu king disyerto.

¹³ Karin ya menatili kilub ding apat apulung aldo; tiksuan neng Satanas. Malyap lang animal ding manuknangan karin, oneng e re pepaburen ding anghel i Jesus nune sinilbian de.

¹⁴ Inyang mesukul ya i Juan minta ya i Jesus king Galilea at penaral na ing Mayap a Balita a ibat king Dios.

¹⁵ Miras na ing mituldung panaun, nganang sinabi, at malapit ne ing Kayarian ning Dios! Sisian yu la at painggulutan ding kekayung kasalanan at maniwala kayu king Mayap a Balita!

¹⁶ Kabang maglakad ya i Jesus king lele na ning Dagat-dagatan ning Galilea, ikit na la ding mikapatad a manasan, i Simon at i Andres; yatsa re king danum ing karelang lambat.

¹⁷ Nganang Jesus karela, Tuki kayu kanaku at gawan da kayung manasan tau.

¹⁸ Kanita mu rin likuan da la ring karelang lambat at tinuki la kang Jesus.

¹⁹ E ya pa makaing mirayu king pamaglakad na, ikit na la ding mikapatad a Santiago at Juan, ding anak nang Zebedeo. Atyu la king karelang bangka; sasadia da la ring karelang lambat.

²⁰ Inaus na la namang Jesus; kanita mu rin likuan de king bangka i tata ra a kayabe da ring makiupa at tinuki la kang Jesus.

²¹ Minta la Capernaum, at kabukasan, Aldo ning Sabbath kanita, linub ya i Jesus king sinagoga at tinuru ya karin.

²² Pigmulalan de ring tau, uling tinuru ya karelang mitmung kayupayan; e re kalupa ding talaturu ning Kautusan.

²³ Kabud-abud linub ya king sinagoga ing metung a lalaking alipnan na ning marawak a espiritu; kukulisak ya. Ngana,

²⁴ Nanung pakialam mu kekami, Jesus ning Nazaret? Minta ka keti ba mu kaming gisanan? Balu ku nung ninu ika: ika ing Banal a menibatan king Dios!

²⁵ Oneng sebianan neng Jesus ing marawak a espiritu. Ngana, Tahimik ka! Lual ka keya!

²⁶ Pepagalgalan ne ning marawak a espiritu ing tau at kukulisak yang linual keya.

²⁷ Mengapamulala la ding sabla, inya ngarang mipapangutang, Nanu iti? Ngeni ta pa dimdam yan! Agyu na lang utusan Jesus pati na ding marawak a espirituat mamintu na la man!

²⁸ At mabilis mikalat king mabilug a Galilea ing balita tungkul kang Jesus.

²⁹ Kanita mu rin meko ya king sinagoga i Jesus at ding alagad na at tinaglus la king bale da ri Simon at Andres. Kayabe da la ri Santiago at Juan.

³⁰ Makarate ya kanita ing babaing katuangan nang Simon uli na ning matas ya lagnat, at sinabi reng agad kang Jesus.

³¹ Lepitan neng Jesus; telanan ne gamat at seupan neng tinalakad. At likuan ne ning lagnat ing matuang babai at migsilbi ya karela.

³² Inyang silim-silim na, limbug ne ing aldo, dela da la ring tau kang Jesus ding sablang masakit at ding alipnan da ring demonyu.

³³ Mitipun la ding sablang memalen king tulid na ning pasbul ning bale.

³⁴ Pepakayap na la ding dakal a taung masakit a maki miyayaliwang kapanamdaman. Penabi na la naman ding dakal a demonyu at e na la pepaburen migsalita uling balu ra nung ninu i Jesus.

³⁵ Ganingaldo pa mibangun ne i Jesus. Minta ya king metung a lugal a tahimik lual ning balen at karin ya menalangin.

³⁶ Penintun neng Simon at ding kayabe na;

³⁷ ngara inyang ikit de, Panintunan da kayu ding sabla.

³⁸ Oneng nganang Jesus karela, Kailangan tamung munta karing aliwang balen ba kung makapanaral munaman karin uling iti ya ing sangkan nung inya meko ku Capernaum.

³⁹ Inya linibut ya king mabilug a Galilea; manaral ya karing karelang sinagoga at panabi na la ding demonyu.

⁴⁰ Lepitan ne ning lalaking leprosuan i Jesus; siniklaud ya king arapan na at nganang migpakalunus, Nung burian mu, apakayap mu ku.

⁴¹ Melunus ya i Jesus; tigkilan ne at nganang sinabi, Buri ku kumayap ka!

⁴² Kanita mu rin mewala ing lepra na ning tau at kinayap ya.

⁴³ Agad-agad neng pepalakuan Jesus kaybat neng maigpit penabilinan.

⁴⁴ Lawan mu, nganang sinabi, e mu pamalita iti kaninu man. Mako na ka at munta ka at pakit king pari. Kaybat miyain kang ain agpang king utus nang Moises ban patunayan karing tau king kinayap na ka.

⁴⁵ Oneng meko ya at pemalita na ing milyari. Uli na nita, e ne milub hayagan i Jesus king balen. Makagyu na mu ing atyu king lual na ning balen, karing lugal a tahimik at karin de pagsarian ding taung manibat karing miyayaliwang lugal.

2

¹ Kalabas da ring mapilan a aldo, mibalik ya i Jesus king Capernaum at mikalat ing balita king atyu ya bale.

² Inya mitipun la ding tutung dakal a tau; e la mipagyu agyang king tulid na ning bale. Kabang aralan na lang Jesus ding tau,

³ detang de ing metung a paralitikong bubuat da ring apat a tau.

⁴ E re alapit kang Jesus uli na ning keraklan da ring tau, inya bikbak de ing bubung ning bale king tulid na. Inyang mekabusbus na lang pidalanan na, beba re ing pagkeran nung nu ya makakera ing paralitiko.

⁵ Inyang ikit nang Jesus ing maragul dang kasalpantayanan, sinabi na king paralitiko, Anak ko, mipatawaran la ding kasalanan mu.

⁶ Ngara king lub da ring mapilan a talaturu ning Kautusan a pakalukluk karin,

⁷ Obat makanyan ya sasabian ing taung ini? Kalapastanganan king Dios yan, ah! E wari ing Dios mung bukud ing malyaring mamatawad kasalanan?

⁸ Agad nang balung Jesus ing atyu king pilubluban da; inya ngana karela, Obat mimisip kayung makanyan?

⁹ Isanu ing mas mayan sabian king paralitiko, Mipatawaran la ding kasalanan mu o Talakad ka, idala me ing pagkeran mu, at saka ka lumakad?

¹⁰ Patutuan ku ngeni kekayu king ing Anak ning Tau atin yang upayang mamatawad kasalanan keti king yatu. Ngana king paralitiko,

¹¹ Talakad ka; idala me ing pagkeran mu at muli na ka!

¹² King akakit da ring sabla, tinalakad ya kanita mu rin ing paralitiko; biwat ne ing pagkeran na at meko ya. Mengapamulala la ngan at megumpisa lang minie kapurian king Dios. Ngarang sasabi, E ta pa ikit kapilan man ing anti kaniti!

¹³ Minta yang pepasibayu i Jesus king lele na ning Dagat-dagatan ning Galilea. Tikian de ring tutung dakal a tau at pegumpisan na lang tiru.

¹⁴ Kabang maglakad ya, ikit ne i Levi a anak nang Alfeo, makalukluk ya king opisina nang pipanyingilan buis. Nganang Jesus, Tuki ka kanaku. Tinalakad ya i Levi at tinuki ya kang Jesus.

¹⁵ Kanitang mamangan ya i Jesus at ding alagad na king bale nang Levi, mekisulu la karela ding dakal a talapanyingil buis at ding makasalanan a tinuki keya.

¹⁶ Ikit da iti ring mapilan a talaturu ning Kautusan a Pariseo at ngarang sinabi karing alagad nang Jesus, Obat makisulu ya karing talapanyingil buis at karing makasalanan?

¹⁷ Dimdam nang Jesus iti, inya nganang mekibat, E re kailangan ding taung alang sakit ing doktor, nune deta mung ating sakit. Dinatang ku keti ban papagbalikan ku la lub ding makasalanan at aliwa ding banal.

¹⁸ Kanitang misan, mag-ayunu la ding alagad nang Juan a Maminyag at ding karing Pariseo. Ating mapilan a taung linapit kang Jesus at ngarang mengutang, Baket mag-ayunu la ding alagad nang Juan a Maminyag at ding karing Pariseo, oneng ali la ding kekang alagad?

¹⁹ Mekibat ya i Jesus, Makapag-ayunu la wari ding kumbiradu king kasal kabang kayabe de pa ing lalaking kakasal? Ali la, kabang kayabe de pa.

²⁰ Potang e da ne kayabe, kanita la pa mu malyaring makapag-ayunu.

²¹ Alang managping bayung tela king laun a imalan; pamanurung na ning bayung tela, manga-igut ya ing laun at lalu yang dagul ing gisi.

²² Ala munamang mibibiling bayung alak karing laun a lulanan a gewa king balat, uling mangatdas la deti king bayung alak. Parehung masayang ing alak at ding lulanan. Kailangan bayu la ding lulanan, nung bayu ing alak!

²³ Misan a Aldo ning Sabbath, maglakad ya i Jesus at ding alagad na king asikan trigu. Kabang daralan la menakdut lang binutil trigu.

²⁴ Inya ngarang sinabi ding Pariseo kang Jesus, Lawan mu ing gagawan da ring alagad mu. Labag king kekatamung Kautusan ing gawan da yan king Aldo ning Sabbath!

²⁵ Nganang mekibat Jesus, E yu pa wari abasa ing depat nang David kanitang i Abiatar ya ing Pekapun ding Pari? Kanitang ya at ding kayabe na meranup la at ala lang apangan, linub ya i David king bale ning Dios at mengan ya karing tinape a mitalaga king Dios. Agpang king kekatamung Kautusan, bukud mung ding pari ilang ating karapatan mangan kareti, oneng mengan ya i David at dininan na la pa ding kayabe na.

²⁶

²⁷ At ngana pang Jesus, Melalang ya ing Aldo ning Sabbath para king kapakanan na ning tau; aliwa ing tau yang melalang para king Aldo ning Sabbath.

²⁸ Inya ing Anak ning Tau Ginu ne ning Aldo ning Sabbath.

3

¹ Pasibayu yang linub i Jesus king sinagoga; karin ating metung a lalaking panat metung a gamat.

² Pegumasdan de ring taung atyu karin i Jesus ba rang akit nung uluan ne ing lalaking ita king Aldo ning Sabbath ban atin lang adalum laban keya.

³ Inaus neng Jesus ing lalaking panat metung a gamat. Ngana, Munta ka keni king arap.

⁴ Kaybat, kitnan na la ding tau, Paintulut na ning kekatamung Kautusan ing dapat mayap o ing dapat e mayap king Aldo ning Sabbath? Ing sagip bie o ing makamate? Oneng e la mekibat.

⁵ Miyalung mua at lungkut ing meyakit king lupa nang Jesus kabang maglalawe ya karing taung makapadurut uli na ning kesiasan dang lub. Inarapan ne ing lalaking panat metung a gamat at ngana, Iyatiat me ing kekang gamat. Inatiat na ne man ning lalaki ing gamat na at iti kinayap ya.

⁶ Meko la ding Pariseo at mekikit la karing tauan nang Herodes; pisabisabi ra kanita mu rin nung makananu reng apapate i Jesus.

⁷ Meko ya i Jesus at ding alagad na at minta la king lele ning Dagat-dagatan ning Galilea. Tikian de ring dakal a taung menibatan Galilea. Dinatang la naman ding tutung dakal a taung menibatan Judea,

⁸ Jerusalem, Idumea, king kangatba na ning Ilug ning Jordan, at karing miyayaliwa nang suluk ning Tiro at Sidon inyang abalitan da ing sablang depatan nang Jesus.

⁹ Pepasadia neng Jesus karing alagad na ing metung a bangkang asakian na ba nang apangilagan ing pamisiksikan da ring taung daratang.

¹⁰ Dakal ne pepakayap, inya pilulupungan de ring sablang maki sakit ba re mu mang atagkilan.

¹¹ Kapilan man akakit de ring marawak a espiritu, magsakab la ding karelang alipnan king arapan nang Jesus at kukulisak da, Ika ing Anak ning Dios!

¹² Maigpit nang inutus Jesus karela king e ra paniabian nung ninu ya.

¹³ Kaybat na nita, minta ya i Jesus king bunduk-bundukan at saka na la inaus ding pinili na at linapit la.

¹⁴ Memili yang labing adua (a inaus nang apostol) ban maging kayabe-abe na ampon tuburan manaral,

¹⁵ at dininan na lang upayang palual karing demonyu.

¹⁶ Ila deti ring labing aduang pinili na: i Simon (a pemalayawan nang Pedro);

¹⁷ i Santiago at i Juanding anak nang Zebedeo, (deti pemalayawan na lang Boanerges, ngana wari, Bugasuk);

¹⁸ di Andres, Felipe, Bartolome, Mateo, Tomas, Santiago a anak nang Alfeo, i Tadeo, i Simon, ing aktibista

¹⁹ at i Judas Iscariote, ing migtaksil kang Jesus.

²⁰ Inyang minuli ne i Jesus, pasibayu lang mitipun ding dakal a tau, inya e na man ikuang mekapangan Jesus at ding alagad na.

²¹ Kabud abalitan da iti ding kamaganak na minta la karin ba reng ilako, uling sasabian da ring tau, Masisira ya buntuk!

²² Ngara naman ding talaturu ning Kautusan a dinatang ibat Jerusalem, Alipnan neng Beelzebul a pamuntuk da ring demonyu! Ya ing babie kang Jesus king upayang makapalual karing demonyu!

²³ Uli na nita, pepalapitan na lang Jesus ding tau at selitanan na lang mapilan a talimhaga. Ngana, Makananu neng palualan Satanas i Satanas?

²⁴ Nung milaban-laban la deng sasakupan na ning metung a kayarian, e ya manatili ing kayarian a ita.

²⁵ Nung e la mikakasundu deng mipapamilya, misalbag ya ing pamilyang ita.

²⁶ Makanyan munaman, nung mag-rebeldi ya i Satanas laban king sarili na, at milaban-laban la ding sasakupan na, e magluat datang ing kawakasan na.

²⁷ Alang malyaring makapanlub king bale na ning metung a taung masikan at saka na samsaman ing pibandian na, subali mu nung igapus ne pa ing maki bale. Kaybat, kanita ne pa mu lubus aluban at panakawanan ing baleng ita.

²⁸ Pakatandanan yu, malyari lang mipatawaran ding tau king sablang kasalanan at pamaninsultu da king Dios.

²⁹ Oneng ala yang kapatawaran ing ninumang magsalitang marawak king Banal a Espiritu. E mipatawaran ing kasalanan na ning taung makanyan. (

³⁰ Sinabi nang Jesus iti uling sasabian da ring mapilan, Alipnan ne ning marawak a espiritu.)

³¹ Kanita dinatang ya i ima na at ding kapatad nang lalaking Jesus. Menaya la king lual na ning bale at pepayaus de.

³² Ketang penandit a ita, makalukluk lang makapadurut kang Jesus ding dakal a tau at ating sinabi keya, Atyu ya pu ing pengari yung babai ampon ding kapatad yung lalaki at babai, at pakiduang da kayu.

³³ Ninung ima ku at ninu ding kapatad ku? nganang Jesus.

³⁴ Linawe ya karing makapadurut a tau at ngana, Oyni i ima ku at ding kapatad ko!

³⁵ Uling ing ninumang tutupad king kaburian na ning Dios, ya ing ima ku at kapatad kung lalaki at babai!

4

¹ Pasibayu yang tinuru i Jesus king lele na ning Dagat-dagatan ning Galilea. Pilupungan de ring dakal a tau, inya sinake ya king metung a bangkang makasadsad karin at linukluk ya karin. Atyu la king pampang ding dakal a tau, atyu na la lele na ning danum.

² Tiru na lang dakal a bage king kapamilatan da ring talimhaga. Ngana:

³ Makiramdam kayu! Ating metung a ortelanung linual bang salbag bini king asikan na.

⁴ King pamanialbag nang bini, ating digpa king dalan-dalanan. Dinatang la ding ayup at penuktuk da iti.

⁵ Atin namang bining digpa king mabatu nung nu maimpis mu ing gabun. Tinubung agad ing bini agyang maimpis mu ing gabun karin,

⁶ oneng inyang mapali ne aslag ing aldo, melanat at melangi ing bining tinubu, uling e la malalam a darasnan ding yamut.

⁷ Atin namang bining digpa king dikut a masuksuk; melabung ing suksuk at piputan na ing bining tinubu, inya e mika bunga iti.

⁸ Ating bining digpa king gabun a mataba at iti tinubu, melabung at memungang masalese; mika titlung pulung binutil, tianam apulu, at tiadinalan a binutil.

⁹ Kaybat tiglung nang Jesus, Makiramdam ya itang ating balugbug!

¹⁰ Inyang magdili-dili ne i Jesus, ding mapilan a kayabe-abe na ampon ding labing adua lepitan de at kitnan tungkul king talimhagang selita na.

¹¹ Nganang sinabi karela, Kekayu miyabie ing makaintindi karing lihim tungkul king Kayarian ning Dios; oneng karing aliwa ing sablang bage mipabalu king kapamilatan da ring talimhaga

¹² ban kanita, Nanan da mang lumawe e la manakit, nanan da mang makiramdam e ra aintindian, pota mibalik la pa lub king Dios, at ya naman patawaran na la.

¹³ Kaybat, kitnan na lang Jesus, E ye pa aintindian ing talimhagang binie ko? Makananu yu lang aintindian ding aliwa pang talimhaga?

¹⁴ Ing bining miyasik ya ing amanu na ning Dios.

¹⁵ Ing digpa king dalan-dalanan ila detang mirasnan king amanu, oneng kaybat dang dimdam iti agad yang daratang i Satanas at lalako na ing amanung miras karela.

¹⁶ Ding aliwang tau naman kalupa da ing bining digpa king mabatu nung nu maimpis mu ing gabun. Kabud dimdam da ing amanu agad dang tatanggapan mitmung tula.

¹⁷ Oneng e magyamut karing pusu ra, inya e la mibatang malambat. Kabud datang ing kasakitan o pangalupig uli na ning amanu, malagua lang dirimla.

¹⁸ Ding aliwang tau kalupa da ing bining digpa king gabun a masuksuk. Dimdam da ing amanu,

¹⁹ oneng balisa la pamisip tungkul karing bage-bage king yatung iti, at maburi la king pibandian ampon mapagnasa la karing aliwa pang bage, inya alang paglugalan ing amanu karing pusu ra. Uli na niti, e la mikakabunga.

²⁰ Oneng ding aliwa kalupa da ing bining digpa king gabun a mataba; pakiramdaman da at tatanggapan ing amanu at mamunga la: ating mikakabungang titlung pulung binutil, ating tianam apulu, at ating tiadinalan.

²¹ Sindu nang Jesus ing pamagsalita na. Ngana, Sisindian ya wari ing sulu para sukluban mia king metung a palanggana o kaya ibili king lalam ning pagkeran? E wari sisindian ya ban ibili king metung a pitutumpakan?

²² Alang makasalikut a e milage at lihim a e mibulalag.

²³ Makiramdam ya itang ating balugbug!

²⁴ At tiglung na pa, Paki-intindian yung masalese ing kekayung daramdaman! Ing paniukad a ginamit yu, ya naman ing paniukad na kekayu ning Dios at maygit pa.

²⁵ Uling ing atin na lalu ya pang mirinan at itang ala, agyang itang ditak a atyu keya milako pa.

²⁶ Ngana pang Jesus, Apakilupa me ing Kayarian ning Dios king taung sasalbag bini king asikan na.

²⁷ Kaybat nang sinalbag susundu nang daraptan ing sadia nang gagawan aldo-aldo; sibut at lumabung ing bini king e na kamalayan nung makananu.

²⁸ Ing gabun yang balang pasibut at babie bunga king tanaman; muna lunto ya ing bulung, kaybat ing buku, at kaybat ing bunga.

²⁹ Potang matua na ing bunga, palutan nang agad ning menanaman uling miras na ing pamamupul.

³⁰ Kaisanu ya pa malyaring pakilupa ing Kayarian ning Dios? ngana pang kinutang Jesus. Nanung talimhaga ing gamitan tamu ba ta yang ailarawan?

³¹ Kalupa ne ning metung a butul mustasa, ing malating dili karing sablang bini a kinua na ning metung a tau at tenam ne king gabun.

³² Oneng kabud mitanam ya iti at tinubu, maging maragul yang dili karing sablang gule; mikakasanga yang mangaragul. Uli na nita, makapaniale la ding ayup karing sanga na.

³³ Menaral ya i Jesus karing tau king kapamilatan da ring dakal a talimhagang kalupa da reti, ketang abut dang aintindian.

³⁴ E ya menaral karela a e mo sa ginamit talimhaga; oneng neng ala neng kayabe nune mu ding alagad na mamalinawan na karela ing kabaldugan da ring talimhaga.

³⁵ Inyang mebengi na, nganang Jesus karing alagad na, Tara, dalakit tamu king kangatba na ning dagat-dagatan.

³⁶ Inya likuan da la ring dakal a tau; sinake la king bangkang sasaken nang Jesus at delakit de. Atin lang kayagnan a aliwa pang dakal a bangka.

³⁷ Dinatang ing tutung masikan a angin; sasapulan de ring maragul a alun ing bangka, halus kakatmu ne king danum.

³⁸ Makasandal ne man i Jesus king metung a ulun king banda nang tauli ning bangka; matudtud ya. Ginising de ring alagad na. Ngara, Maestro, ala nanuman keka nung mangamate tamu ngan?

³⁹ Tinalakad ya i Jesus at inutus na king angin, Tuknang ka! at inutus na king alun, Tahimik ka! Tinuknang ing angin at mika maragul a katahimikan.

⁴⁰ Kaybat ngana karing alagad na, Baket mitakutan kayu? Ala kayu pang kasalpantayanan?

⁴¹ Detangan na la ning maragul a takut at kilabut, at ngara king metung at metung, Ninu ya? Pati na ing angin at ing alun mamintu keya!

5

¹ Miras la king kangatba ning dagat-dagatan, king sakup ning Gerasa.

² Kakuldas nang Jesus king bangka, seganan ne ning metung a lalaking ibat king sementeryu. Alipnan de ring marawak a espiritu ing lalaking iti

³ at karing lukib a pipangutkutan mete karin ya manuknangan. E re agapus malambat agyang karing tanikala pa.

⁴ Maralas deng dirinan pango king bitis at gagapus de gamat karing tanikala, oneng pamatluran na la ding tanikala at pamaklian na la ding pango. Alang taung makayaguanta keya!

⁵ Aldo't bengi kukulisak ya libutad da ring pantiun at karing bunduk at paniugatan na karing batu ing sarili na.

⁶ Marayu ya pa i Jesus abatiawan na ne. Pupulayi yang linapit at siniklaud king arap na.

⁷ Kukulisak yang masikan. Ngana, Jesus, Anak ning Dios a Kakataskatasan, obat pakialaman mu ku? Ipakisabi ku keka, e mu ku pasakitan alang-alang king Dios! (

⁸ Sinabi na iti, uling inutus na nang Jesus keya, Espiritung marawak, lual ka king taung yan!)

⁹ Kitnan neng Jesus, Nanu ka lagyu? Mekibat ya, Ing lagyu ku Batalyun uling dakal kami!

¹⁰ Maigpit nang pekisabi kang Jesus king e na la sana palakuan king lugal a ita.

¹¹ Ating dakal a babing manyibsiban dikut king libis ning bunduk-bundukan.

¹² Migpakalunus la kang Jesus ding marawak a espiritu. Ngara, Papuntan mu kami karing babi ba keng lungub karela.

¹³ At tilutan na lang Jesus. Linual la king tau ding marawak a espiritu at linub la karing babi. Ding babi, atin sigurung aduang libu karakal, linusub lang milayi papunta king bangin; mebaldug la ngan king dagat-dagatan at melumud la.

¹⁴ Memulayi lang meko ding magbante karing babi at pemalita ra iti king balen at karing baryu. Inya minta la karin ding tau ban lawan da nung nanu ing milyari.

¹⁵ Inyang miras la kang Jesus ikit de ing lalaking inalipnan da ring e abilang-bilang a demonyu. Makalukluk ya, makabaru ne at masalese pamisip. Mitakutan la!

¹⁶ Belita ra karela ding mekasaksi kaniti ing milyari king inalipnan da ring demonyu at ing kerarasan da ring babi.

¹⁷ Inya pekisabi rang mayap kang Jesus ing lakuan na na la sana.

¹⁸ Inyang sasake ne i Jesus king bangka, pekisabi na ning inalipnan ding demonyu ing ituki ne sana.

¹⁹ Oneng e ne tilutan Jesus, nune sinabi na, Muli na ka at sabian mu karing kekang pamilya nung nu anti karagul ing gewa na keka ning Ginu at nung makananu yang melunus keka!

²⁰ Meko ya ing tau at pemalita na Decapolis ing sablang depat nang Jesus keya. Mengapamulala la ding sablang mekaramdam king belita na.

²¹ Pasibayu yang dinalakit i Jesus king kangatba. Atyu pa king lele na ning dagat-dagatan pilupungan da ne ding dakal a tau.

²² Dinatang ya ing metung a lalaking mayayaus Jairo, ing metung karing talapanibala na ning sinagoga. Panakit na kang Jesus, siniklaud ya king arap na

²³ at nganang mekisabing mayap, Mamamate ya pu ing anak kung dalagita. Nung malyari tuki kayu pu kanaku at itumpak yu la ding gamat yu king anak ku ba yang kumayap at e mate!

²⁴ Tinuki ne man i Jesus. At tikian de ring dakal a tau. Misisiksikan lang lelele kang Jesus.

²⁵ Ating metung a babai karin a labi nang aduang banuang kayayagasan daya

²⁶ at tutu yang magkakasakit. Dakal na lang doktor ding linawe king sakit na at megisan na ing pibandian na king pamipaulu. Oneng e re apakayap ditak man; nune lalu ya pang misubi sakit.

²⁷ Abalitan na ing sasabian da ring tau tungkul kang Jesus, inya mekisiksikan ya karing taung milulupung kang Jesus angga king ikua nang milapit king kagulutan na. Tigkil ne imalan

²⁸ uling nganang sasabi king lub na, Atagkil kia mu imalan kumayap na ku.

²⁹ Kanita mu rin tinuknang ing agus ning daya nang mayayagas at dimdam nang kinayap ya.

³⁰ Inyang dimdam nang Jesus king ating upayang linual keya belikdan na la ding tau at nganang kinutang, Ninu ing tinagkil king imalan ku?

³¹ Ngarang mekibat ding alagad na, Akakit mung dakal lang tau ding sisiksik keka at saka mu kukutang nung ninung tinagkil king imalan mo?

³² Oneng sindu nang miglawe-lawe Jesus; panintunan ne itang tinagkil keya.

³³ Uling balu na ning babai ing mepalyari keya, gagalgal yang linapit kang Jesus; siniklaud ya king arap na at pigtapat na ing mabilug a katutuan.

³⁴ Sinabi nang Jesus, Anak, pepakayap na ka ning kasalpantayanan mu kanaku. Muli na ka ngeni at ipanatag mu ing lub mu. Mayap na kang lubus.

³⁵ Kasalukuyan na pang magsalitang Jesus inyang ating mapilan a dinatang ibat king bale nang Jairo. Ngara, Mete ne pu ing anak yu, ba't pangabalanan ye pa ing Maestro?

³⁶ E na pinsinan Jesus ing karelang sinabi, nune ngana kang Jairo, E ka migaganaka, maniwala ka mu.

³⁷ Ala yang aliwang tiki nune mu i Pedro at ding mikapatad a Santiago at Juan.

³⁸ Inyang miras na la king bale nang Jairo, ikit nang Jesus ing magugulu la ding tau; dimdam na la ding tatangis at managulele.

³⁹ Kalub na king bale ngana karela, Ba't magugulu kayu at manangis? E ya mete ing anak; matudtud ya mu!

⁴⁰ At keylian de. Pepalualan na la ding tau subali mu ing tata at ing ima na ning anak, at ding atlung alagad at linub la king lugal nung nu ya karin ing anak.

⁴¹ Telan ne gamat at ngana, Talitha koum, ngana wari, Inang, sasabian ku keka, mibangun ka!

⁴² Kanita mu rin mibangun ya ing anak at saka ya linakad. (Atin neng labing aduang banua tua.) Mengapamulala la ngan ding sabla!

⁴³ Maigpit nang penabilin Jesus karela ing e ra paniabian iti kenu man at inutus nang dinan deng pamangan ing anak.

6

¹ Meko ya karin i Jesus at minuli ya king sarili nang balen, kayabe na la ding alagad na.

² Karas na ning Aldo ning Sabbath, megumpisa yang tinuru king sinagoga. Mengapamulala la ding dakal a taung mekaramdam kang Jesus. Ngarang sinabi, Nukarin na ngan ibat yan? Nanung kabiasnan ing miyabie keya? Makapagmulala ing daraptan na!

³ E wari ya ing kalpinterung anak nang Maria, at kapatad da ri Santiago, Jose, Judas, at Simon? At ding kapatad nang babai e ta la wari kayabe-abe keti? At e la meniwala kang Jesus.

⁴ Inya nganang Jesus karela, Parangalan de ring sablang tau ing propeta subali mu ding kabalen na, ding kamaganak na, at ding katubale na.

⁵ E ya dinapat nanumang milagru karin, nune mu inyang itumpak na la ding gamat na karing mapilan a masakit at kinayap la.

⁶ Tutu nang pigmulalan Jesus ing keyalan dang kapaniwalan. Linibut ya i Jesus karing makapadurut a balen ba yang turu.

⁷ Inaus na la ding labing adua at tiburan na lang tidua-tidua. Dininan na lang upayang makapalual karing marawak a espiritu

⁸ at saka na la penabilinan. Ngana, E kayu magdalang nanuman king kekayung pamaglakbe subali mu king metung a tukud. E kayu magdalang pamangan, ni balutan, ni salapi karing bulsa yu, ni piblasan. Oneng magsandalyas kayu.

⁹

¹⁰ Ngana pa karela, King isanu mang bale a kekayung pituknanganan karin kayu manatili angga king paglako yu king balen a ita.

¹¹ Nung e ra kayu buring tanggapan king metung a lugal o pakiramdaman, mako kayu karin at ipagpag yu ing alikabuk karing bitis yu bilang tutul karela!

¹² Meko la ding labing adua at penaral da karing tau ing sukat lang sumisi at painggulut karing karelang kasalanan.

¹³ Pepalualan da la ring dakal a demonyu at kiskusan da lang laru at pepakayap ding dakal a taung ating sakit.

¹⁴ Uling tutu yang pikabaluan a lagyu i Jesus, miras kang Herodes ing balita tungkul keya. Ating sasabing, Ya i Juan a Maminyag a sinubling mebie, inya ararapat na la deting makapagmulalang bage.

¹⁵ Atin namang sasabi, Ya i Elias. Ngara naman ding aliwa pa, Propeta yang kalupa da ring propeta kanitang minunang panaun.

¹⁶ Ngana namang Herodes inyang abalitan na ngan iti, Sinubli yang mebie i Juan a pepatabtab ku batal!

¹⁷ I Herodes ya ing peparakap, pepagapus at pepasukul kang Juan. Inutus na iti alang-alang kang Herodias a kinua nang antimong asawa, agyamang iti bayo ne kang Felipe a kapatad na.

¹⁸ Nganang maralas sinabing Juan kang Herodes, Labag king Kautusan ing pakiabayan me ing asawa na ning kapatad mu!

¹⁹ Inya misinup yang samang lub i Herodias laban kang Juan at buri neng paten, oneng e na arapat iti uli nang Herodes.

²⁰ Tatakut ya i Herodes kang Juan uling balu na king metung yang mayap at banal a tau, inya iningat na king e ya malyaring numanu balang. Maburi yang makiramdam kang Juan, agyamang mababalisa ya pamisip king sasabian na.

²¹ Bandang tauli menakit ya mu ring oportunidad i Herodias. Milyari iti inyang i Herodes, king aldo nang kebaitan, kimbiran na la at pigtawan ding sablang mangatas nang opisyal ning gobiernu, ding pamuntuk militar at ding mangarangal nang memalen ning Galilea.

²² Linub ya ing anak nang babaing Herodias at tinerak ya; lubus yang mewili i Herodes at ding kumbiradu na. Inya ngana ning ari king dalaga, Aduan mu kanaku ing nanumang buri mu at ibie ku keka.

²³ Melaus na pang sinumpa king ibie na agyang ing kapitna na ning kayarian na.

²⁴ Linual ya ing dalaga at kitang na kang ima na, Nanu ing kakung aduan? Ing buntuk nang Juan a Maminyag, nganang mekibat ning ima.

²⁵ Memalagua yang migbalik ing dalaga king ari. Ngana, Ing buri ku pung ibie yu kanaku ngeni mu rin, ya ing buntuk nang Juan a Maminyag. Ipabili ye king metung a bandehadu!

²⁶ Mebigla yang e mu nanu ing ari; oneng uli na ning asumpa na king daramdaman da ring kumbiradu na, e na atanggian ing inawad na ning dalaga.

²⁷ Agad-agad nang inutus king metung a guardia ing idala ne keya ing buntuk nang Juan. Memintu ya ing guardia at tibtab ne batal i Juan keta king sukulan;

²⁸ binili ne king metung a bandehadu ing buntuk at saka ne binie king anak nang Herodias. Binie na ne man kang ima na.

²⁹ Inyang abalitan da iti ding alagad nang Juan, kinua re ing bangke na at kitkut de.

³⁰ Migbalik la ding apostol at belita da kang Jesus ing sablang arapat da at tiru.

³¹ Tutu lang dakal ding taung daratang at mamako angga king e na na akua mang makapangan Jesus at ding apostol na. Inya sinabi na karela, Tara, munta tamu king tahimik a lugal, dumayu tamu pa mu kareng dakal a taung den ba kayung mipaynawang ditak.

³² Meko lang makasake king bangka, at minta la king metung a tahimik a lugal.

³³ Oneng dakal la ding menakit king karelang paglako at akilala ra la. Inya ibat karing sablang balen, mirarapal lang minta ding tau king direksyun a pupuntalan nang Jesus at ding alagad na, at minuna la pang miras karin kesa karela.

³⁴ Kakuldas nang Jesus, ikit na la ding tutung dakal a tau, at melunus ya karela uling balamu tupa lang alang pastul. Miyayaliwang bage ing tiru na karela.

³⁵ Inyang sisilim na linapit la ding alagad na at ngarang sinabi, Mikelangan a lugal iti at malapit nia mung lumbug ing aldo.

³⁶ Paulian yu na la ding tau karing baryu at balen a pakalapit ba lang makasaling apangan da.

³⁷ Oneng ngana karela, Ikayu ing munie pamangan karela. Buri yu keng mako para saling tinape a alagang aduang dalan a salaping pilak ban ipakan karela? ngarang kinutang ding alagad.

³⁸ Ngana namang kinutang Jesus karela, Pilan la wari ding tinape bekalan yu? Lawan yu na mo. Linawe ra at ngarang mekibat, Lima la mu at aduang asan.

³⁹ Inutus nang Jesus ing paluklukan da lang paka-grupu ding tau king dikut.

⁴⁰ Inya linukluk la ding tau; ating grupung tiadinalan at ating grupung tialimang pulu katau.

⁴¹ Kinua na lang Jesus ding limang tinape at ding aduang asan; tinalanga ya banua at pepasalamat ya king Dios. Pemirasu na la ding tinape at diwang na la karing alagad ba da lang ipamie karing tau. Pemie na la naman karela ding aduang asan.

⁴² Mekapangan la ngan at kinabsi la ding sabla.

⁴³ Inyang tinipun da la ring alagad ding mitagan a pira-pirasung tinape ampon asan, kinatmu la pa ding labing aduang kaing.

⁴⁴ Ating limang libu karing lalaking mekapangan karing tinape.

⁴⁵ Agad-agad na lang pepasaken Jesus king bangka ding alagad na. Inutus na king magpauna na la Betsaida, king kangatbang pampang ning dagat-dagatan samantalang paulian na la ding tau.

⁴⁶ Inyang mekapamun ya karing tau minukiat ya king bunduk-bundukan ban manalangin.

⁴⁷ Inyang mabengi na atyu ya ing bangka king libutad ning dagat-dagatan samantalang atyu magdili-dili king mamala i Jesus.

⁴⁸ Ikit na lang magkakasakit babagse ding alagad na, uling makasalangsang la king angin. At inyang ganingaldo na pintalan na la, lalakad ya babo ning danum. Lagpusan na la sana,

⁴⁹ oneng ikit deng lalakad babo ning danum. Bala ra multu ya, inya kinulisak la.

⁵⁰ Mitakutan la inyang ikit de. Agad nang migsalita karelang Jesus. Ngana, E kayu tatakut! Aku i Jesus! Magpanatag kayu!

⁵¹ Sinake ya king bangka at tinuknang ing angin. Tutu lang mengapamulala ding alagad

⁵² uling e ra pa aintindian ing kabaldugan da ring tinape ni e ra abut isipan.

⁵³ Inyang mekadalakit na la king dagat-dagatan sinadsad la Genesaret, at tinali re karin ing bangka ra.

⁵⁴ Inyang lalakuan da ne ing bangka, akilala deng agad ding tau i Jesus.

⁵⁵ Inya pemalita ra karing tau karing balen a makapadurut. At tataluki da la kang Jesus ding mekabalita ding karelang masakit nu ya pa man karin.

⁵⁶ Nu ya man munta karing balen, siudad o baryu bibili da la ring tau ding karelang masakit karing plasa, at aduan da kang Jesus ing paintulutan na la sana agyang makatagkil mu man king lilip nang imalan. Kinayap la ding sablang mekatagkil king lilip ning imalan na.

7

¹ Lepitan de i Jesus ding Pariseo at ding mapilan a talaturu ning Kautusan a menibatan Jerusalem.

² Ikit da king ding mapilan karing alagad na mamangan lang e menos gamat. Ing buri nang sabian niti e la menos gamat antimo ing pamanos a turu da ring Pariseo. (

³ Uling tutukian da ring Pariseo at antimu rin ding sablang Judio ing turu a tinggap da karing karelang makatua: e la mangan anggang e la menos gamat anggang siku.

⁴ At e ra naman apangan ing nanumang mesali king palengki nung e ra pa mu inos iti. At dakal la pang aliwang tuntunan a tinggap da, alimbawa, ing makatud a pamanos karing tasa, kuran, kalderang tangsu, at pagkeran.)

⁵ Uli na niti, kitang da kang Jesus ding Pariseo at ding talaturu ning Kautusan, Baket sasalangsangan da ring alagad mu ing turu da ring kekatamung makatuamamangan lang e menos gamat?

⁶ Nganang mekibat Jesus karela, Tinud ing ula nang Isaias tungkul kekayu! Hipokrita kayu antimo ing sinulat na: Ding taung deti, ngana ning Dios, parangalan da ku karing labi ra, oneng marayu la kaku ding pusu ra.

⁷ Alang kabaldugan ing kaku pamanyamba ra, uling ding kautusan a gewang tau tuturu da lang antimong kakung kautusan!

⁸ At sinabi nang Jesus, Lelele yu ing kautusan na ning Dios at tutuparan yu ing kautusan da ring tau.

⁹ At tiglung na pang Jesus, Tutu kayung biasang gawang paralan king pamipayalang ulaga king kautusan na ning Dios ban apatupad yu ing kekayung sariling turu!

¹⁰ Uling inutus nang Moises, Igalang me i tata mu at i ima mu. Antimu rin, Ing ninumang magsalitang e mayap laban kang tata na o ima na, sukat yang ipapate.

¹¹ Oneng ikayu tuturu yu, Agyamang atin yang nanumang asaup ing metung a tau kang tata na o kaya kang ima na, nung sabian na karela: Iti Corban (ngana wari, iti mitalaga na king Dios),

¹² kanita mipanupaya ne at libri neng e sumaup kang tata na o kaya kang ima na.

¹³ King anti kaniting paralan payalan yung kabaldugan ing amanu na ning Dios, king kapamilatan na ning matua yung kaugalian. At dakal pang bage anti kaniti ing kekayung pamaniaptan.

¹⁴ Inaus na lang pasibayung Jesus ding dakal a tau at ngana karela, Ikayu ngan, makiramdam kayu kanaku at pansinan yu:

¹⁵ Aliwa ing lulub king asbuk ning tau ing makarinat keya nune itang lulual king asbuk na. [

¹⁶ Makiramdam ya ing ating balugbug!]

¹⁷ Inyang likuan na na la ding dakal a tau, melaus ya king bale at kitnan de ring alagad na tungkul king talimhaga.

¹⁸ Pekibat nang Jesus karela, E yu naman wari aintindian? E yu wari balu king aliwa ing lulub king tau ing makarinat keya?

¹⁹ Iti e tataglus king pusu na nune king atian na, at kaybat lumual munaman keya. (Kaniting pamagsalita nang Jesus pepakilala na king ing sablang pamangan malyaring kanan.)

²⁰ At ngana pang tinuglung, Ing lulual king asbuk ning tau ya ing makarinat keya.

²¹ Uling ketang manibatan king pusu na karin magumpisa ing e mayap a kaisipan at ya ing mitutulak keya ban dapat karing bage e mayap: ing pamanako, ing pamakamate,

²² ing pamakipangalugud, ing kasakiman, at ing pamaniapat king miyayaliwang bage e matulid; ing pamamirait, ing manawang, ing diria, ing pamanyirang puri, ing ketasan, at ing kamangmangan.

²³ Ing sablang e mayap a iti manibatan king pusu ning tau at ya ing makarinat keya.

²⁴ Meko ya karin i Jesus at minta ya king sakup ning siudad ning Tiro. Minta ya king metung a bale at e na buring mabalu ing atyu karin. Oneng e ya mekasalikut malambat.

²⁵ Abalitan na ning metung a ima a ating anak a babaing maki espiritung marawak king atyu karin i Jesus. Minta yang agad iting ima kang Jesus at siniklaud ya king arapan na.

²⁶ Metung yang dayuan; tubu ya karin Fenicia, Siria. Pekisabi nang mayap kang Jesus ing palualan ne sa ing espiritung marawak king anak na.

²⁷ Pekibat nang Jesus, Mumuna ta la pa mung pakanan ding anak. E matulid ing kuanan ing pamangan da ring anak at iyugse karing asu.

²⁸ Tutu pin pu ita, ginu, nganang sinabi ning babai, oneng agyang ding asu lalam ning lamesa makapangan la king ayuyugse da ring anak!

²⁹ Uli na niti, sinabi nang Jesus, King uli na ning pekibat mu, muli na ka at ala ne ing espiritung marawak king anak mu!

³⁰ Minuli ya ing babai. Disnan neng makakera ing anak na, at ala ne pin ing espiritung marawak.

³¹ Pamagbalik nang Jesus ibat Tiro, linabas ya Sidon at tinaglus ya king Dagat-dagatan ning Galilea. Dinalan ya king sakup ning Decapolis.

³² Dela re kang Jesus ing metung a lalaking maklak at pipi at inawad da ing itumpak ne sa ing gamat na kaniting lalaki.

³³ Kelilua neng Jesus ing lalaki karing dakal a tau. Binili na la ding taliri na karing balugbug na ning pipi; linura ya at saka ne tigkilan a dila.

³⁴ Kaybat tinalanga ya banua i Jesus; mengisnawa yang malalam at sinabi na king tau, Ephphatha, ngana wari, Mibuklat kayu!

³⁵ Kanita mu rin mekaramdam ya ing tau; milako ing pangapipi na at mekapagsalita yang malino.

³⁶ Inutus nang Jesus karing tau king e ra paniabian iti kaninu man. Nung kapilan na la binawal kanita ra lalung pemalita.

³⁷ Mengapamulala lang e mu nanu at ngarang sinabi, Makapagmulala ing sablang daraptan na! Makaramdam na la ding maklak at makapaniabi na la ding pipi!

8

¹ Mapilan a aldo ing milabas, mitipun lang pasibayu ding dakal a tau. Inyang ala na lang apangan, inaus na lang Jesus ding alagad na at sinabi na karela,

² Malulunus ku kareting dakal a tau uling atlu na lang aldo kayabe ku ngeni at ala lang apangan.

³ Nung paulian ku lang e pa mengan, mangaliu la king dalan uling marayu la penibatan ding aliwa.

⁴ Kitnan de ring alagad, Nu tamu manikuang pamangan king mikelangan a lugal a iti ban apakan ta la ding anti kareting karakal a tau?

⁵ Kitang nang Jesus, Pilan la wari ding tinape yu? Pitu la, ngarang mekibat.

⁶ Inutus nang Jesus karing dakal a tau ing lukluk la king gabun. Kaybat, kinua na la ding pitung tinape, pepasalamat ya king Dios, pemirasu na la ding tinape at saka na la binie karing alagad ban ipamie da la karing tau. At makanyan ing depatan da ring alagad.

⁷ Atin la namang mapilan a asan a malati. Pepasalamat ya i Jesus king Dios para karing asan. Kaybat, inutus na karing alagad na king ipamie da la naman deti.

⁸ Mengan la ding sabla at kinabsi la. Ating apat a libu karing tau. At tinipun da la ring alagad ding pira-pirasung tinape a tagan dang mengan; pitu lang kaing a mitmu. At pepaulian na lang Jesus ding tau.

⁹

¹⁰ Agad-agad yang sinake king bangka a kayabe da ring alagad na at minta la king sakup ning Dalmanuta.

¹¹ Detangan de ring mapilan a Pariseo i Jesus at megumpisa lang mekiargu keya. Buri deng arakap king pamagsalita na. Inawad da kang Jesus king pakit yang metung a milagru a patutu king ing upaya na manibat banua.

¹² Mengisnawa yang saldak i Jesus at nganang sinabi, Baket maniawad lang milagru ding tau ngeni? Sasabian ku kekayu, ding taung deti e la mipakitanan nanumang milagru!

¹³ Likuan na la at migbalik ya king bangka; dinalakit ya king kangatba nang pampang ning dagat-dagatan.

¹⁴ Akalinguan da ring alagad ing magbakal tinape. Metung ya mu ing darala ra king bangka.

¹⁵ Mingat kayu, nganang Jesus karela, mangilag kayu king lebadura da ring Pariseo at king lebadura nang Herodes.

¹⁶ At ngara king metung at metung, Sasabian na iti uling ala tamung tinape.

¹⁷ Balu nang Jesus ing karelang pisasabian, inya kitnan na la, Obat pisasabian yu ing ala kayung tinape? E yu balu at e yu pa aintindian? Tutu la waring maina ding kekayung pamisip?

¹⁸ Atin kayung mata, e kayu manaket? Atin kayung balugbug, e kayu makaramdam? E yu atatandanan itang mepalyari

¹⁹ kanitang pemirasu ku la ding limang tinape para karing limang libu katau? Pilan lang kaing a mitmu ding atipun yu karing tagan? Labi lang adua, ngarang mekibat.

²⁰ Kitang na pang Jesus, Kanitang pemirasu ku la ding pitung tinape para karing apat a libu katau, pilan lang kaing a mitmu king tagan a tinipun yu? Pitu la, ngarang mekibat.

²¹ Makanyan man e yu pa aintindian? nganang kinutang karela.

²² Miras la Betsaida. Dela de ring mapilan a tau kang Jesus ing metung a bulag at pekisabi ra king tagkilan ne.

²³ Telanan ne gamat Jesus ing bulag at tinaid ne lual na ning balen. Linuran ne mata at inaplus na la karing gamat na at kaybat ngana, Atin kang nanumang akakit?

²⁴ Miglalawe ya ing lalaki at ngana, Manakit kung dakal a tau; anti la mong tanaman oneng lalakad la.

²⁵ Inaplus na lang pasibayung Jesus ding mata na ning bulag. Miglalawe yang masalese ing bulag. Migbalik ing panimanman na at malino nang ikit ing sabla.

²⁶ Pepaulian na neng Jesus at inutus na king e ne babalik king balen.

²⁷ Linakad ya i Jesus at ding alagad na papunta karing balen na ning Cesarea Felipe. Kabang lalakad la king dalan, nganang kinutang karing alagad na, Keng palage da reng tau ninu kanu aku?

²⁸ Ngarang mekibat, Sasabian da ring aliwa king ika kanu i Juan a Maminyag. Sasabian da naman ding aliwa king ika kanu i Elias, at sasabian da naman ding aliwa pa king metung ka kanu karing propeta.

²⁹ O ikayu naman, keng palage yu, ninu aku? nganang kinutang karela. Ika ing Cristo, nganang Pedro.

³⁰ Kaybat na nita, penabilin na karela king e ra paniabian iti kaninu man.

³¹ Pegumpisan na lang tirung Jesus ding alagad na. Ngana, Sukat yang dumalan dakal a kasakitan ing Anak ning Tau. Tanggian de ring makatua na ning balen, ding pamuntuk da ring pari, at ding talaturu ning Kautusan. Papate re, oneng king katlung aldo subli yang mie.

³² Malino nang sinabi karela iti. Kanita kewani neng Pedro i Jesus karing alagad at tinutul ya king sinabi na.

³³ Oneng inarapan na lang Jesus ding alagad na at sebianan ne i Pedro. Ngana, Dumayu ka kanaku, Satanas, ing isipan mu e king Dios nune king tau!

³⁴ Pepalapitan na lang Jesus ding dakal a tau at ding alagad na. Ngana karela, Nung bisa yang tuki kanaku ing ninuman, payalian na ing sarili na, pusanan ne ing krus na, at tuki ya kanaku.

³⁵ Uling ing ninumang bisang sagip king bie na, abating ne iti. At ing ninumang kabatingan king bie na king uli ku at king uli na ning Mayap a Balita, akit ne iti.

³⁶ Atin ya waring apala ing tau nung abandi ne ing mabilug a yatu oneng mawala ne man ing bie na?

³⁷ Ala yang malyaring ibayad ing tau ban magbalik ing bie na.

³⁸ Inya nung pikarine na ku ampon ing kanakung turu ning ninuman kaniting kapanaunan a marawak at e kikilala king Dios, pikarine nia naman ning Anak ning Tau potang datang ne king kaligayan ning Ibpa na a kayabe ding banal nang anghel. fig,,,,,... payalian na ing sarili na, pusanan ne ing krus na, at tuki ya kanaku.,(8:34)fig*

9

¹ At sinabi na pa karela, Tandanan yu ini: karing mapilan a atyu keti ating e takman king kamatayan anggang e re akit datang king mitmung kayupayan ing Kayarian ning Dios.

² Kalabas da ring anam a aldo minukiat ya i Jesus king matas a bunduk. Ding bukud mung tiki na ila di Pedro, Santiago, at i Juan. Samantalang makalawe la ikit deng minaliwa itsura.

³ Meging maslag king puti ing imalan na; alang makapalto king makanyan a puti keti king yatu.

⁴ Kanita mu rin ding atlung alagad ikit da la ri Elias at i Moises; makipagsalita la kang Jesus.

⁵ Nganang Pedro kang Jesus, Maestro, masanting ing keti ta na. Gawa keng atlung kubu, metung para keka, metung para kang Moises, at metung para kang Elias.

⁶ Mitakutan yang e mu nanu i Pedro at ding abe nang alagad, inya e na balu ing sukat nang sabian.

⁷ Linto ya ing metung a biga at tikpan na la at meramdam ya ing siwalang ibat king biga. Ngana, Iti ya ing Anak kung kaluguran; makiramdam kayu keya!

⁸ Kanita mu rin miglalawe la king makapadurut, oneng ala lang ikit a aliwa; i Jesus ya na mung kayabe ra.

⁹ Samantalang kukuldas la king bunduk, nganang maigpit menabilin Jesus karela, E yu paniabian kaninu man iting ikit yu anggang e ya subling mie ing Anak ning Tau.

¹⁰ Pemintuan da ing penabilin na, oneng ila-ila pisasabian da ing bage mepalyari. Ngara, Nanu ing buri nang sabian king pamaniubling mie?

¹¹ At kitang da kang Jesus, Baket sasabian da ring talaturu ning Kautusan king muna ya pa mung datang i Elias?

¹² Nganang mekibat Jesus, Datang yang mumuna i Elias ban isadia na ing sablang bage. Makanyan man obat sasabian da ring Kasulatan king tanggian de ing Anak ning Tau at dumalan yang dakal a kasakitan?

¹³ Makanyan man sasabian ku kekayu king dinatang ne i Elias, at depatan da na ding tau ing sablang buri dang daptan kang Elias, antimo ing sasabian da tungkul keya ding Kasulatan.

¹⁴ Kabalik da karing aliwang alagad, disnan da lang kayabe da ring dakal a tau. Makiargu la ding mapilan a talaturu ning Kautusan karing alagad.

¹⁵ Misdan lang menakit ding tau kang Jesus. Pupulayi lang sinalubung kang Jesus.

¹⁶ Kitnan na lang Jesus ding alagad na, Nanu ing pakiargu yu karela?

¹⁷ Nganang mekibat ning metung karing atyu karin, Maestro, dela ke keka ing anak kung lalaki uling atin yang espiritung marawak at e ya makapagsalita.

¹⁸ Balang datangan ne niting espiritu, daragsa ne king gabun; bubula ya asbuk, pititigisan na la ding ipan na, at mangasias ya mabilug a katawan. Inawad ku karing alagad mu ing palualan de iting espiritung marawak, oneng e ra arapat.

¹⁹ Nganang Jesus karela, Taung alang kasalpantayanan! Angga kapilan da kayu pakiabayan? Angga kapilan da kayu pibatan? Dala ye keni ing anak!

²⁰ At dela re kang Jesus. Panakit na kang Jesus ning espiritung marawak, agad-agad neng pepagalgalan ing anak. Miragsa ya ing anak; migbiling-biling ya, at bubula ya asbuk.

²¹ Kapilan ya pa makanyan? nganang kinutang Jesus king tata. Manibat na kanitang malati ya, ngana ning tata.

²² Maralas neng yugse king api o kaya king danum ba neng apate. Malunus ka kekami, saupan mu kami nung atin kang akarapat!

²³ Wa, nganang Jesus, nung atin kang akarapat! Ing sabla mapalyari king taung ating kasalpantayanan.

²⁴ Kanita mu rin kinulisak ya ing tata at ngana, Atin kung kasalpantayanan! Nung e pa sapat, saupan mu ku!

²⁵ Apansinan nang Jesus king lalapit la keya ding dakal a tau, inya inutus na king espiritung marawak, Espiritung maklak at pipi, yutus ku keka king lumual ka at e na ka mibabalik keting anak kapilan man!

²⁶ Kayagnan na ning masikan a kulisak, pepagalgalan neng e mu nanu ning espiritung marawak ing anak; kaybat linual ne king anak. Mistula yang mete ing anak; inya sasabian na ning balang menakit, Mete ya!

²⁷ Oneng telanan ne gamat Jesus ing anak; seupan neng mibangun at tinalakad ya.

²⁸ Inyang linub ya i Jesus king bale, lihim deng kitnan ding alagad na. Ngara, Baket e mi ya apalual ing espiritung marawak?

²⁹ Nganang mekibat Jesus, Apalual la mu ding anti kareting espiritung marawak king kapamilatan na ning panalangin [at pamag-ayunu].

³⁰ Meko la king lugal a ita at linabas la Galilea. E na buring ipabalung Jesus nung nu ya karin

³¹ uling kasalukuyan na lang tuturu ding alagad na. Ngana karela, Manabu ya ing Anak ning Tau karing gamat da ring makamate keya; makanyan man kaybat da ring atlung aldo subli yang mie.

³² E ra aintindian ing kabaldugan na ning sinabi nang Jesus, oneng tatakut lang mangutang kang Jesus.

³³ Dinatang la Capernaum at inyang atyu ne bale, kitang nang Jesus karela, Nanung piarguan yu kabang dalan?

³⁴ Oneng e la bubulad uling kabang dalan piarguan da nung ninu ing marangal dili.

³⁵ Linukluk ya kanita i Jesus, inaus na la ding labing adua at ngana karela, Nung buri na ning ninuman ing mumuna yang dili, paitauli ya at maging talasuyu de ring sabla.

³⁶ Tinaid ne ing metung a malating anak at dela ne king arap da. Kaybat kinaul ne at sinabi na karela,

³⁷ Ing ninumang tanggap king metung karing malating anak a deti king lagyu ku, aku ing tatanggapan na; at ing ninumang tatanggap kanaku, aliwa mu aku ing tatanggapan na nune pati na itang mitubud kanaku.

³⁸ Nganang Juan, Maestro, menakit keng taung papalual demonyu king lagyu mu. Binawal mi ya uling e ta ya kayabe.

³⁹ Nganang Jesus, E ye babawalan uling e ya makapagsalitang laban kanaku ninumang darapat milagru king lagyu ku.

⁴⁰ Uling ing ninumang e laban kekatamu para kekatamu ya.

⁴¹ Tandanan yu ini: ing ninumang munie kekayung metung a basung danum uling alagad na kayung Cristo, siguradu yang tanggap ablas.

⁴² Nung ing ninuman panibatan ne ning pamikasala na ning metung karing malating deni a maniwala kanaku, mayap pa ing itali ya ing maragul a gilingan a batu king batal na at iyugse ya king dagat.

⁴³ Nung ing gamat mu ya ing panibatan na ning pamikasala mu, pututan me! Mayap pa ing metung ka gamat lungub banua kesa king adua ka gamat a miyugse king impierno, king api a e matatda. [

⁴⁴ Karin e la mamamate ding karelang ulad, at e matatda ing api.]

⁴⁵ At nung ing bitis mu ya ing panibatan na ning pamikasala mu, pututan me! Mayap pa ing metung ka bitis lungub banua kesa king adua ka bitis miyugse king impierno. [

⁴⁶ Karin e la mamamate ding karelang ulad, at e matatda ing api.]

⁴⁷ At nung ing mata mu ya ing panibatan na ning pamikasala mu, dukitan me! Mayap pa ing metung ka matang lungub king Kayarian ning Dios, kesa king adua ka matang miyugse king impierno.

⁴⁸ Karin e la mamamate ding karelang ulad, at e matatda ing api.

⁴⁹ Uling maging puru ya ing balang metung king kapamilatan na ning api.

⁵⁰ Ing asin mayap, nung milako lasa ing asin, makananu pang abalik ing kalat na? Manatili kayung ating asin at mikakasundu kayu king metung at metung.

10

¹ Meko ya karin i Jesus at minta ya king sakup ning Judea at dinalakit ya king Ilug ning Jordan. Pasibayu deng pilupungan ding dakal a tau. Tiru na la antimo ing sadia nang daraptan.

² Linapit la kang Jesus ding mapilan a Pariseo uling buri deng arakap king pamagsalita na. Sabian mu kekami, ngarang kinutang, paintulut na ning kekatamung Kautusan ing idiborsyu ne ning lalaki ing asawa na?

³ Nganang mekibat Jesus karela, Nanu ing kautusan a binie nang Moises kekayu?

⁴ Ngarang mekibat, Peintulut nang Moises ing gawa yang kasulatan king diborsyu ing lalaki; kaybat malyari na lang mikawani.

⁵ Sinabi nang Jesus karela, Sinulat neng Moises kekayu iting kautusan uling tutu kayung masakit ituru.

⁶ Oneng kanita pang kapupurmeruan, inyang lalangan na ning Dios ing sabla, lelangan na lang lalaki at babai ding tau.

⁷ King uli na niting sangkan, lakuan ne ning lalaki i tata na at i ima na, at makiabe ya king asawa na

⁸ at ilang adua maging metung la. Inya e na la mibilang adua nune metung na la mu.

⁹ E na la sukat pikawanian ning tau ding piyabe na ning Dios.

¹⁰ Inyang karin na la bale, pasibayu deng kitnan ding alagad i Jesus tungkul kaniting bage.

¹¹ Sinabi na karela, Ing lalaking kawani king asawa na at makiasawa king aliwa, dinapat yang pamakipangalugud laban king asawa na.

¹² Antimu rin, ing babaing kawani king asawa na at makiasawa king aliwa, dinapat yang pamakipangalugud.

¹³ Lalapit da la ring mapilan a tau kang Jesus ding anak ba na lang itumpak karela ding gamat na, oneng pengamanuan da la ring alagad ding magdala.

¹⁴ Inyang apansin nang Jesus iti, mimua ya at sinabi na karela, Paburen yu lang lumapit kanaku ding anak; e yu la babawalan, uling para karing anti kareti ya ing Kayarian ning Dios.

¹⁵ Tandanan yu: ing ninumang e tanggap king Kayarian ning Dios kalupa na ning pamananggap na ning anak a malati, e ya milub karin.

¹⁶ At kinaul na la ding anak a mangalati; timpak na la ding gamat na king balang metung karela, at binendisyunan na la.

¹⁷ Inyang mamako ne i Jesus, pupulayi yang linapit ing metung a lalaki at siniklaud ya arap na at kitang na, Mayap a Maestro, nanu ing daptan ku ban tanggapan ku ing bie alang angga?

¹⁸ Nganang mekibat Jesus, Baket ausan mu kung mayap? Alang mayap nune mu ing Dios.

¹⁹ Balu mu la ding kautusan: E ka makamate; e ka makipangalugud; e ka manako; e ka maglaram; e ka mamirait; igalang me i tata mu at i ima mu.

²⁰ Ngana ning lalaki, Maestro, ibat pa inyang anak ku tiparan ku na la deting kautusan.

²¹ King mitmung lugud, linawe neng maratnang Jesus ing lalaki at ngana, Metung pang bage ing kulang keka. Muli ka, pisali mu ing sablang pibandian mu at ibie mu ing abli karing pakakalulu, at mika pibandian ka karin banua; kaybat tuki ka kanaku.

²² Inyang dimdam na ning lalaki iti, meslam ya lupa at malungkut yang meko, uling tutu yang mabandi.

²³ Kanita, inarapan na lang Jesus ding alagad na at ngana karela, Tutu ping masakit karing ating pibandian ing lungub king Kayarian ning Dios!

²⁴ At mebigla la ding alagad kareting amanu, oneng ngana pang tinuglung Jesus, Anak, tutu ping masakit karing ating pibandian ing lungub king Kayarian ning Dios!

²⁵ Mas mayan pa king metung a kamelyu ing dumalan ya king busbus ning karayum kesa king lungub ya ing metung a mabandi king Kayarian ning Dios.

²⁶ Lalu lang mipamulala ding alagad at ngarang mikukutnanan, Nung makanyan, ninu ing miligtas?

²⁷ Linawe na lang maratnang Jesus at ngana karela, Karing tau iti masakit mapalyari, oneng king Dios, ali; ing sabla apapalyarian na ning Dios.

²⁸ Nganang migsalitang Pedro, Lawan mu, likuan mi ing sabla at tinuki kami keka.

²⁹ Nganang Jesus karela, Wa, at sasabian ku kekayu ini: nung lakuan ne ning ninuman ing pibalebale na o kaya ding kapatad nang lalaki o kapatad nang babai o kaya ima na o i tata na o kaya ding anak na o asikan, king uli ku ampon king uli ning Mayap a Balita,

³⁰ tanggap yang dinadinalan a besis king panaun a iti: bale, kapatad a lalaki, kapatad a babai, ima, anak, asikan, at kaligaligan antimu rin, at king panaun a datang tanggap yang bie alang angga.

³¹ Oneng dakal la ding ngeni mumuna a maging tauli, at dakal la ding tauli ngeni a maging mumuna.

³² Atyu la king dalan paukiat Jerusalem. Mumuna ya i Jesus karing alagad na. Mitmu lang kapikakunuan ding alagad at tatakut na la man ding taung tutuki kang Jesus. Misan pa kewani na lang Jesus ding labing adua at sinabi na karela ing mapalyari keya.

³³ Lawan yu, ngana karela, paukiat tamu Jerusalem at karin miyabie ya ing Anak ning Tau karing pamuntuk da ring pari at karing talaturu ning Kautusan. Atulan deng mate at ibie re karing paganu.

³⁴ Panyunu re deti, pagluran de, paglatikuan de at paten. Oneng kaybat da ring atlung aldo subli yang mie.

³⁵ Linapit la kang Jesus di Santiago at Juan, ding anak nang Zebedeo. Ngara, Maestro, atin keng buring aduan keka.

³⁶ Nanu ing buri yung aduan kanaku? nganang kinutang karela.

³⁷ Mekibat la, Nung lukluk na ka king maligayang kayarian mu, paintulut mu sa ing makalukluk kami king banda mung wanan at kayli.

³⁸ Sinabi nang Jesus karela, E yu balu ing aduan yu. Apibata yu kaya ing kasakitan a pibatan ku? Malyari kayu kayang pabinyag kalupa na ning binyag a paminyag da kanaku?

³⁹ Malyari kami, ngarang mekibat. Sinabi nang Jesus karela, Ing kasakitan a pibatan ku tune ping pibatan yu, at mabinyag kayu king binyag a ikabinyag ku,

⁴⁰ oneng ala kung upayang mamili nung ninu ing magbili king banda kung wanan o kaya king kayli. Ding luklukan a sasabian yu sasadia na la ning Dios para karing pinili nang lukluk kareti.

⁴¹ Inyang dimdam da ring apulung alagad iti, mimua la kari Santiago at Juan.

⁴² Uli na nita, pepalapitan na la ngan Jesus at ngana, Balu yu king ding paganu giginuan da la ring ibibilang dang pamuntuk da at ding mamuntukan ila ding mapapamintu.

⁴³ E makanyan kekayu. Nung ing ninuman kekayu bisa yang maging marangal, maging talasuyu ya karing aliwa

⁴⁴ at nung ing metung kekayu buri na ing maging mumuna, maging talasuyu de ring sabla.

⁴⁵ Uling e ya dinatang ing Anak ning Tau ban pasuyu nune ban sumuyu, at iyain ing bie na para king pangayatbus da ring dakal a tau.

⁴⁶ Miras la Jerico. At inyang mamako ne i Jesus at ding alagad na ampon ding dakal a tau, ing metung a lalaking bulag, i Bartimeo a anak nang Timeo, makalukluk yang magpalimus lele na ning dalan.

⁴⁷ Inyang dimdam nang lalabas ya i Jesus ning Nazaret, megumpisa yang kinulisak. Ngana Jesus, Anak nang David, malunus ka kanaku!

⁴⁸ Binawal de ring dakal at inutus da king magtahimik ya. Oneng lalu nang sikan ing siwala na. Ngana, Anak nang David, malunus ka kanaku!

⁴⁹ Tinuknang ya i Jesus at sinabi na, Ausan ye. Inya inaus de ing bulag. Ngara, Magsaya ka at talakad uling payaus na ka.

⁵⁰ Belugse ne ning bulag ing balabal na; paluksu yang tinalakad at linapit ya kang Jesus.

⁵¹ Kitang nang Jesus, Nanu ing buri mung daptan ku keka? Maestro, nganang mekibat ning bulag, buri ku, manakit ku sanang pasibayu.

⁵² Mako na ka, nganang Jesus, uli na ning kasalpantayanan mu kinayap ka. Kanita mu rin menakit ya at tikian ne i Jesus king dalan.

11

¹ Inyang milalapit na la Jerusalem, malapit king balen ning Betfage at Betania, ababatiawan da ne ing Bunduk ding Olibo, pepaunan na lang Jesus ding adua karing alagad na.

² Ngana karela, Munta kayu king baryung arapan yu. Pangaras yu karin dasnan ye ing metung a biserung asno a makatali. Ala pang taung sinake kaniti. Kalagan ye at idala ye keni.

³ Nung ating kutang kekayu, Baket kakalagan ye? sabian yu, Kailangan ne ning Ginu at pasubli nia naman agad keti.

⁴ Minta la at disnan de ing metung a biserung asno king lele dalan; makatali ya king pasbul dalan. Samantalang kakalagan de,

⁵ kitang da ring taung atyu karin, Nanu ing daraptan yu, obat kakalagan ye?

⁶ Mekibat la antimo ing tiru nang Jesus karela at peintulutan da na lang mako ding tau.

⁷ Dela re ing biserung asno kang Jesus. Timpak da la king asno ding karelang balabal at sinake ya i Jesus.

⁸ Linantang da ring dakal a tau ing karelang balabal king dalan. Memakli lang sangang tanaman ding aliwa at binili da la king daralanan na.

⁹ At ding taung mumuna at ding makatauli kang Jesus kukulisak da, Purian ya ing Dios! Bendisyunan ne sa ning Dios ing daratang king lagyu na ning Ginu!

¹⁰ Bendisyunan ne sa ning Dios ing daratang nang kayarian David a tatang tamu! Hosanna king Kakataskatasan!

¹¹ Linub ya Jerusalem i Jesus, at tinaglus ya kilub na ning Templo. Kaybat nang linawe ing sablang atyu karin, linual ya at ding labing adua at minta la Betania anti na ning mabibengi na.

¹² Kabukasan, samantalang lalakad lang ibat Betania, meranup ya i Jesus.

¹³ King makarayu ikit ne ing metung a tanaman a higera, malabung ya. Lepitan ne ba nang lawan nung atin yang bunga. Inyang milapit ne, bulung mu ing ikit na, uling e ra pa panaun mamunga ding higera.

¹⁴ Sinabi nang Jesus king tanaman a higera, Ala nang makapangan pa karing bunga mu! At dimdam da iti ding alagad.

¹⁵ Inyang miras na la Jerusalem, linub ya king Templo i Jesus, at pegumpisan na lang tinabi ding mamisali ampon maniali kilub na ning Templo. Penuag na la ding lamesa da ring maglibe-salapi, at ding luklukan da ring magtindang pati-pati.

¹⁶ At binawal neng dumalan kilub na ning Templo ing ninumang ating daralan.

¹⁷ Tiru na la kanita ding tau. Ngana, Makasulat karing Kasulatan king sinabi na ning Dios, Ing bale ku mayaus yang bale pipanalanginan para karing sablang tau. Oneng gewa yeng pugad da ring mapanako!

¹⁸ Dimdam da iti ding pamuntuk da ring pari at ding talaturu ning Kautusan. Inya megumpisa lang menintun paralan ban apapate re i Jesus. Tatakut la kang Jesus uling mangapamulala la ding dakal a tau king turu na.

¹⁹ Inyang mabibengi na, meko nia naman Jerusalem i Jesus at ding alagad na.

²⁰ Kabukasan ning abak a maranun, king paglakad da apansinan deng melangi ya ing tanaman a higera at pati ding uyat na.

²¹ Aganaka nang Pedro ing mepalyari at ngana kang Jesus, Maestro, lawan mu, melangi ya ing tanaman a higerang piniumpa mu!

²² Nganang Jesus karela, Sukat kayung salpantaya king Dios.

²³ Ing katutuan sasabian ku kekayu, nung sabian na ning ninumang king bunduk a ini, Malis ka at iyatsa mu ing sarili mu king dagat, at nung ala yang alinlangan king pusu na at paniwalan na king iti mapalyari, marapat para keya.

²⁴ King uli na niti sasabian ku kekayu, nung manalangin kayu at aduan yu ing nanuman, panaligan yu king iti tinggap yu na, at ing sabla miyabie kekayu.

²⁵ At neng tatalakad kayu ban manalangin, patawaran ye ing ninumang mikasala kekayu ban i Ibpa yung atyu banua patawaran na kayu naman. [

²⁶ Nung e yu la patawaran ding mikasala kekayu, e na kayu naman patawaran ning Ibpa yung atyu banua.]

²⁷ Migbalik na la naman Jerusalem. At kabang lalakad ya king Templo, lepitan de i Jesus ding pamuntuk da ring pari, ding talaturu ning Kautusan ampon ding makatua na ning balen.

²⁸ Kitang da kang Jesus, Nanu ing kayupayan mung gawa karing bage deti? Ninu ing minie keka king kayupayan a yan?

²⁹ Mekibat ya i Jesus, Kutnan da kayu naman at nung apakibatan yu ku, kanita ku sabian kekayu nung kenu ku ibat ing kayupayan dapat kareting bage.

³⁰ Sabian yu kanaku nung kaninu menibatan ing kayupayan nang maminyag Juan: king Dios o king tau?

³¹ At pisabisabi ra, Nung sabian tamung menibatan king Dios, sabian na kekatamu, Baket e ye peniwalan?

³² Sabian ta kayang Ibat king tau? (Tatakut la karing tau uling ding sabla kikilalanan deng propeta i Juan.)

³³ Inya pekibat da kang Jesus, E mi balu. Sinabi nang Jesus karela, E ku naman sabian kekayu nung nanu ing kayupayan kung dapat kareting bage.

12

¹ Tiglus nang Jesus ing pamagsalita na, oneng ngeni king kapamilatan da ring talimhaga. Ngana, Ating metung a taung menanaman ubas king marangle na at bekuran ne. Kinulkul ya namang pibilianan para king pipapaslan ubas at mitalakad ya namang metung a matas a pipagbanten. Kaybat na nita, pepanibala ne iting ubasan karing kasamak na at minta ya king aliwang bansa.

² Inyang miras ing pamamupul tiburan ne ning makibandi king ubasan ing metung karing ipus na ban kuanan ing parti na karing kasamak.

³ Oneng dekap de ring kasamak ing ipus, penumbuk de at pepalakuan alang daralang ubas.

⁴ Pasibayu yang mitubud aliwang ipus ing makibandi, oneng pikpuk de buntuk at pemakarine.

⁵ Mitubud ne naman metung, oneng pete re. Makanyan munaman ing gewa ra karing dakal pang ipus a tiburan na: atin lang pemugbug at atin lang pete.

⁶ Metung nia mu ngeni ing malyari nang atuburan karela, ing pakamalan nang bugtung a anak a lalaki. Ya ing katataulian a tinubud na. Ngana king lub na, Siguradung igalang de ing anak ku.

⁷ Oneng ngarang misabisabi ding kasamak, Iti ya ing talapagmana. Tara, paten ta ya ban miras kekatamu ing mana na!

⁸ Inya dekap de at pete at inugse re ing bangke na lual na ning ubasan.

⁹ Ngeni, nanu ing isipan yung daptan na ning makibandi king ubasan? nganang kinutang Jesus. Puntalan na la at pamaten at ibie ne ing ubasan karing aliwang makisamak.

¹⁰ E ye pa wari abasa iting kasulatan? Ing batung e ra buri ding manalakad bale ya ing meging batung pamuntuk.

¹¹ Depat na iti ning Ginu, at pagmulalan tamu!

¹² Pigkapilitan da ring pamuntuk da ring Judio ing parakap de uling aulata ra king ila ding pamaramdaman na kaniting talimhaga. Uli na ning takut da karing tau, e re teginan at meko la.

¹³ Mituburan la ding mapilan a Pariseo at Herodiano ba reng arakap i Jesus king pamagsalita na.

¹⁴ Lepitan de at ngara, Maestro, balu mi king tapat ka at e ka mangabiran kenu man uling pante-pante ing lawe mu karing sablang tau. Tuturu mu nung nanu ing kaburian na ning Dios. Labag king Kautusan tamu ing mamayad buis king Emperador ning Roma o ali? Mamayad kame o ali kami?

¹⁵ Oneng balu nang Jesus king magkunwari la mu, inya ngana karela, Baket paniubukan yu ku? Dinan yu kung salaping pamayad buis ba keng lawan.

¹⁶ At dininan de. Kitang nang Jesus karela, Kaninu ya larawan at lagyu ing atyu kaniting salapi? King Emperador la, ngarang makibat.

¹⁷ Inya nganang Jesus karela, Nung makanyan ibie yu king Emperador ing mangaintulid king Emperador, at ibie king Dios ing mangaintulid king Dios. At mengapamulala la ngan kang Jesus.

¹⁸ Ating mapilan a Saduseo a linapit kang Jesus. Ding Saduseo ila ding sasabing alang pamaniubling mie. Ngara,

¹⁹ Maestro, ginawa yang kautusan i Moises para kekami. Anti ya kaniti: Nung mate ya ing metung a lalaki at e mikayanak king asawang lakuan na, kailangan neng pakasalan ning kapatad nang lalaki ing mebalu ban mikayanak la para king mete.

²⁰ Ating pitung mikakapatad a lalaki. Mekiasawa ya ing pangane at mete yang alang anak.

²¹ Kesal ne ning kaduang pangane ing mebalung babai, at mete ya naman alang ayanak. Makanyan munaman ing depatan na ning katlu

²² at ding mituki-tuking mikakapatad. Ayasawa na la ngan niting babai ding pitung mikakapatad at mete lang e mikayanak king babai. King katataulian, mete ya naman ing babai.

²³ Ngeni, king aldo ning pamaniubling mebie ninu kareting pitu ing kilalanan nang asawa ning babai, anti na ning ayasawa de ngan?

²⁴ Nganang mekibat Jesus karela, Magkamali kayu! Balu yu nung baket? E yu la balu ding kasulatan ni ing upaya na ning Dios.

²⁵ Uling king aldo ning pamaniubling mebie ala nang pamiasawa; maging anti lang anghel ning banua.

²⁶ Tungkul naman king pamaniubli rang mebie ding mete, e ye pa wari abasa king Libru nang Moises itang dake babanggit king milalablab a tanaman? Makasulat karin ing sinabi na ning Dios kang Moises. Ngana, Aku ing Dios nang Abraham, ing Dios nang Isaac, at ing Dios nang Jacob.

²⁷ Inya magkamali kayu! Ing Dios e re Dios ding mete nune ding mabie.

²⁸ Dimdam na ning metung a talaturu ning Kautusan a atyu karin ing karelang pamiargu. Apagumasdan na king biasa yang mekibat i Jesus karing Saduseo, inya linapit ya at kitnan ne, Isanu ing maragul diling kautusan?

²⁹ Mekibat ya i Jesus, Iti ya ing maragul diling kautusan: Makiramdam ka, Israel! Ing Ginung kekatamung Diosya mung bukud Ginu.

³⁰ Luguran me ing Ginung kekang Dios king mabilug mung pusu, at king mabilug mung kaladua, at king mabilug mung kaisipan, at king mabilug mung sikanan.

³¹ Ini ing kadua: Luguran me ing kalupa mung tau antimo ing kekang sarili. Alang aliwang kautusan a maygit pa kareti.

³² Ngana ning talaturu ning Kautusan, Tinud ka, Maestro! Tutu ing sinabi mu. Metung ya mu ing Dios at ala nang aliwa pa subali king Dios.

³³ At ing lulugud king Dios king mabilug nang pusu, king mabilug nang pamisip, at king mabilug nang sikanan, at ing lulugud king kalupa nang tau antimo ing lugud na king sarili na, maygit yang maulaga kesa ketang sablang ain-a-durulukan at aliwa pang ain.

³⁴ Apansinan nang Jesus king biasa yang makibat iting lalaki, inya sinabi na, E ka marayu king Kayarian ning Dios. At kaybat na nita, ala nang mengangas pang mengutang kang Jesus.

³⁵ Nganang kinutang Jesus kabang tuturu ya king Templo, Makananu rang asabi ding talaturu ning Kautusan king ing Cristo anak neng Aring David?

³⁶ I David mismu, king agkat ning Banal a Espiritu, sinabi na: Ing Ginu sinabi na king kakung Ginu, Lukluk ka banda kung wanan, anggang e ku la lubus apasukuan keka ding kalaban mu.

³⁷ I Aring David mu rin ing minaus keyang Ginu; makananu ra ngening asabi king ing Cristo anak neng David? At matula lang mekiramdam kang Jesus ding dakal a tau.

³⁸ Ngana pang tinuru karela, Mingat kayu karing talaturu ning Kautusan a maburing lalakad makasulud makabang imalan at pupugayan da ring tau karing palengki.

³⁹ Maburi lang lulukluk karing piling luklukan karing sinagoga at kabisera karing bangketi.

⁴⁰ Ila ding magsamantala king kabiayan da ring babaing mebalu at magparangalan king pamanalangin dang makaba! Lalung mabayat ing parusang miras karela!

⁴¹ Linukluk ya i Jesus arapan na ning pibabaldugan ain kilub ning Templo at pegumasdan na la ding taung babaldug salapi. Dakal la ding mabandi a minie maragul a alaga.

⁴² Linapit ya naman ing metung a babaing mebalu at mildug yang malati mung alaga.

⁴³ Inaus na la pansin Jesus ding alagad na at ngana karela, Balu yo, iting pakakalulung mebalu ya ing minie maygit kesa karing aliwa.

⁴⁴ Uling minie la ding aliwa ketang labis-labis a atyu karela, oneng iting pakakalulung mebalu, agyang pakakalulu ya, binie na ngan ing sabla nang pangabiayan.

13

¹ Ngana ning metung karing alagad na inyang lulual ne i Jesus king Templo, Maestro, lawan mu! Pangaragul da reng bato! Kasanting da reng gusali!

² Nganang mekibat Jesus, Ding mangaragul a gusaling akakit mung den malasak la ngan. Alang batung mitutumpak a mitagan king kabilian da; mibagsak la ngan den!

³ Kabang makalukluk ya i Jesus king Bunduk ding Olibo, tulid ning Templo, lihim deng kitnan di Pedro, Santiago, Juan, at Andres.

⁴ Ngara kang Jesus, Sabian mu na mo kekami nung kapilan la matupad deting bage, at nanu la ding tanda a pakilala king deting bage matupad na la.

⁵ Sinabi nang Jesus karela, Mingat kayu ban e na kayu alinlang ning ninuman.

⁶ Dakal lang taung datang kekayu king lagyu ku, sabian da, Aku ya! at ilili da la ring dakal.

⁷ E kayu paigulu isip nung damdaman yu ing akbung ning gera at ing labanan a malilyari karing aliwang bansa. Iti mapalyari ngan, oneng e mangabaldugan king ing kawakasan dinatang na.

⁸ Uling gerahan ne ning metung a bansa ing kalupa nang bansa at ing metung a kayarian ing kalupa nang kayarian. Mika ayun king miyayaliwang lugal at mika danup. Nung akit yu na ing makanyan a bage, magumpisa na ing kasakitan a kalupa ning pamagumpisa na ning kasakitan ning babaing manganak.

⁹ Tatagan yu ing sarili yu! Uling pandakpan da kayu at iyarap karing husgadu. Paglatikuan da kayu karing sinagoga. Iyarap da kayu karing gobernador at ari king uli ku ban munie patutu karela.

¹⁰ Kailangan ya pa mung ipanaral ing Mayap a Balita karing sablang bansa bayu datang ing kawakasan.

¹¹ At nung pandakpan da na kayu at iyarap king husgadu, e kayu paibalisang mimisip nung nanu ing sabian yu. Ketang oras a ita, sabian yu itang nanumang miyabie kekayu uling ing Banal a Espiritu ya ing magsalita at aliwa ikayu.

¹² Ipanganiaya ne ning kapatad na ing kapatad na ba neng apapate, at ing tata ing anak na. Lumaban la ding anak karing karelang pengari at ipapate da la.

¹³ Pikasaman da kayu ding sablang tau king uli ku; oneng ing manatiling tapat angga king kawakasan ya ing miligtas.

¹⁴ Nung akit yu nang mararapat king lugal a e sukat mapalyari Ing Makapangilabut a Kasiran a tune makapagalgal (pakaintindian na ning babasa iti), detang atyu king Judea sukat lang tumakas karing bunduk.

¹⁵ E ne kailangan kuldas ing taung atyu king asotea o lungub man king bale na ban kumang nanumang adala na.

¹⁶ At e ne kailangan muli ing taung atyu king marangle ban kumang balabal.

¹⁷ Makalunus ing maging kabilian da ring mabuktut at ding ima a ating pasusuan karing aldo deta!

¹⁸ Ipanalangin yu king iti e sana datang king panaun ning dimla!

¹⁹ Karing aldo deta dalanan da ring tau ing maragul a kaguluan a e pa milyari kapilan man manibat na inyang lelangan ne ning Dios ing yatu angga ngeni ni kapilan man king daratang a panaun e na mika anti pa kanita.

²⁰ At nung e na la kinuyad ning Ginu ding aldo deta, alang taung mitagan. Oneng alang-alang karing pinili na kinuyad na la ding aldo reta.

²¹ Nung sabian na kekayu ning ninuman, Atyu keni ing Cristo! o kaya, Atyu karin! e kayu maniwala.

²² Uling ating lunto a e tutung Cristo at e tutung propeta. Pakit lang tanda at gawa lang makapagmulala ba ra lang alili, nung malyari mu sa, pati na ding pinili na ning Dios.

²³ Ngeni pa sasabian ku na la deting sablang bage a mapalyari. Inya mingat kayu!

²⁴ Pangalabas na ning kasakitan da ring tau, dalumdum ya ing aldo, e na ibie ning bulan ing sala na,

²⁵ at manabu la ding batuin at mangatugun la ding upaya ning banua.

²⁶ Kanita re akit ing Anak ning Tau, daratang ya libutad ding biga a kitmuan upaya at kamalan.

²⁷ Itubud na la ding anghel na karing apat nang suluk ning yatu at tipunan da la ring pinili ning Dios ibat karing mingatba-ngatbang wakas ning yatu.

²⁸ Pagaralan yu ing malilyari king tanaman a higera. Kabud sasagiwa la ding sanga na at sisibut ne bulung, balu yu king malapit na ing kaleldo.

²⁹ Makanyan munaman, kabud akit yu lang malilyari deting bage, balu yu king malapit na ing oras na ning paniatang na; magumpisa na.

³⁰ Tandanan yu: mapalyari la ngan deting bage bayu la mate ding taung mabibie ngening kasalukuyan.

³¹ Ing banua at ing yatu lumipas la, oneng ding amanu ku kapilan man ali la.

³² Alang makibalu metung man king paniatang na ning aldo o oras a ita ni ding anghel ning banua ni ing Anak. Ing bukud mung makibalu ya ing Ibpa.

³³ Mingat kayu at parating makasadia uling e yu balu nung kapilan mapalyari ita.

³⁴ Mangari ya king metung a lalaking miglakbe king marayung lugal: ipanibala ne ing tuknangan na karing ipus na, ing balang metung agpang king katungkulan na, at iyutus ne ing guardia king pasbul ban manatiling makasadia king pamagbalik na.

³⁵ Inya magsadia kayung parati, uling e yu balu nung kapilan ya datang ing makibandi king bale, mapalyaring sisilim o king kapitangan ning bengi o ganingaldo o abak;

³⁶ pota bigla yang datang at dasnan na kayung matudtud!

³⁷ Ing sasabian ku kekayu ya naman ing sasabian ku karing sabla: Magsadia kayu!

14

¹ Adua na mung aldo at Piesta na na ning Pamaglagpus at ning Tinape Alang Lebadura. Manintun lang paralan ding pamuntuk da ring pari at ding talaturu ning Batas ban lihim deng aparakap at apapate i Jesus.

² Ngara, E ta daraptan iti king aldo na ning piesta, pota magulu la ding tau.

³ Atyu kanita karin Betania i Jesus, king bale nang Simon a leprosuan. Kabang mamangan ya, dinatang ya ing babaing magdalang metung a alabastrong lulanan mitmung mal a pabanglu; purung laru a ibat king tanaman a nardo. Biklat ne ing alabastrong lulanan at tigtug na ing pabanglu king buntuk nang Jesus.

⁴ Mimua la ding mapilan a atyu karin at ngarang misabisabi, Sinayang na mu ing pabanglu.

⁵ Nung pisali na yan, mika abli yang maygit atlung dalan a salaping pilak at malyari na lang aibie ding ayabli na karing pakakalulu! At migsalita lang e ustu king babai.

⁶ Oneng nganang Jesus karela, Paburen ye! Obat pakialaman ye? Mayap ing depat na kanaku.

⁷ Maralas yu lang akakayabe ding pakakalulu, at araptanan yu lang mayap nanumang oras a buri yu. Oneng e yu ku malyaring akayabe kabang panaun.

⁸ Depat na niting babai ing agyu na; e pa man kiskusan na na kung pabanglu ban isadia ne ing katawan ku para king pangakutkut ku.

⁹ Tandanan yu iti: nukarin ya man mipanaral ing Mayap a Balita mabanggit munaman ing depat na niting babai bilang kapigaganakan keya.

¹⁰ Kaybat na nita, i Judas Iscariote, ing metung karing labing adua, minta ya karing pamuntuk da ring pari ba neng ipanganiaya i Jesus.

¹¹ Tutu lang metula inyang dimdam da iti at pengakuanan deng dinan salapi. Manibat na kanita menintun neng paralan i Judas ban apanganiaya ne i Jesus.

¹² King mumuna nang aldo ning Piesta ning Tinape Alang Lebadura, ing aldo ning pamakamate biserung tupa para king Pamaglagpus, kitnan de i Jesus ding alagad. Ngara, Nukarin mu buring isadia mi ing apunan para king Pamaglagpus?

¹³ Tiburan na lang Jesus ding adua karing alagad na kayabe niting panabilin: Munta kayu king siudad. Salubungan na kayu karin ning metung a lalaking magdalang bangang danum. Tukian ye

¹⁴ king bale salangian na, at sabian yu king makibale, Pakutang na ning Maestro: Nu ya karin ing kuartu a pipanganan mi ding kanakung alagad king apunan ning Pamaglagpus?

¹⁵ At ituru ne kekayu ing malualas a kuartu babo; maka ayus ya at kumpletu gamit. Karin yu isadia ing apunan tamu.

¹⁶ Meko la ding alagad at minta la king siudad, at ikit da ing sablang lerawan nang Jesus karela. At sidia ra ing apunan na ning Pamaglagpus.

¹⁷ Inyang bengi na, dinatang ya i Jesus, kayabe na la ding labing adua.

¹⁸ At nganang migsalita kabang mamangan la, Ing katutuan sasabian ku kekayu: pagtaksilan na ku ning metung kekayung kayabe kung mamangan.

¹⁹ Melungkut ya ing metung at metung karela at kitnan de, Ako?

²⁰ Mekibat ya i Jesus, Metung ya kekayung labing adua at kayabe keng titiltil tinape king pinggan.

²¹ Mate ya ing Anak ning Tau agpang king misulat; oneng makalunus ya itang taung magtaksil king Anak ning Tau! Mayap pa ing e ne mibait!

²² Kabang mamangan la, kinangwa yang tinape i Jesus, at pepasalamat ya king Dios. Pemirasu ne ing tinape, at binie ne karing alagad na. Ngana, Tanggapan ye; iti ya ing kanakung katawan.

²³ Kaybat na nita, kinua ne ing kopa, at pepasalamat ya king Dios, at binie ne ing kopa karela at mininum la ngan.

²⁴ Nganang Jesus karela, Iti ya ing kanakung daya, ing daya ning kasunduan, ing dayang mibubu para karing dakal a tau.

²⁵ Ing katutuan sasabian ku kekayu, e na ku pasibayung minum kaniting alak angga king aldo a inuman ku ing bayung alak king Kayarian ning Dios.

²⁶ At kaybat deng kinta ing metung a kanta, minta la king Bunduk ding Olibo.

²⁷ Nganang Jesus karela, Ikayu ngan painggulutan yu ku, uling iti ya ing sasabian na ning kasulatan, Paten ke ing pastul at misalbag la ding tupa.

²⁸ Oneng kaybat kung sinubling mebie, muna kung magbalik kekayu karin Galilea.

²⁹ Nganang Pedro, Painggulutan da ka ding sabla, oneng aku e ra ka painggulutan!

³⁰ Pedro, nganang Jesus, pakatandanan mu ini, ngeni mu ring benging iti makatatlu mu ku ilingad bayu ya tulauk makatadua ing tatyo.

³¹ Matimid nang sinabing Pedro, E ra ka ilingad agyang paten da kung kayabe mu! Makanyan ngan ing sinabi ra kang Jesus.

³² Miras la king lugal a ausan dang Getsemani. Nganang Jesus karing alagad na, Lukluk kayu pa ken kabang manalangin ku.

³³ Oneng tiki na la di Pedro, Santiago, at Juan. At megumpisa yang mebalisa at migkasakit a pilubluban.

³⁴ Sinabi na karela, Saskup ku salu uling mabayat ing panamdaman ku. Malakuan kayu ken at magbante kayu.

³⁵ Sinulung ya pang ditak at saka ya menalangin makasakab king gabun king e sa daratang ing oras ning kasakitan na.

³⁶ Ngana, Ibpa, O Ibpa ko, ing sabla arapat mu. Idayu me kaku iting kopa. Oneng aliwa ing kaburian ku, nune ing kaburian mu ya ing mipamintuan.

³⁷ Kaybat na nita, migbalik ya at disnan na lang matudtud ding atlung alagad. Ngana kang Pedro, Simon, matudtud ka? E mu arapat ing e ka matudtud metung mu mang oras?

³⁸ Magpuyat kayu at manalangin ban e na kayu sambutan ning tuksu. Ing espiritu makasadia ya, oneng ing laman maina ya.

³⁹ Pasibayu na lang likuan at menalangin ya at inulit na ing kayaduanan na.

⁴⁰ Belikan na la ding alagad na at disnan na na la namang matudtud, uling pilit lang mipipiak ding mata ra. E ra balu nung nanu ing sabian da kang Jesus.

⁴¹ King katlung pamagbalik na, sinabi na karela, Angga ngeni matudtud kayu pa at magpaynawa? Migising na kayu! Dinatang na ing oras! Miyabie ne ing Anak ning Tau karing gamat da ring makasalanan.

⁴² Mibangun na kayu at tara na. Oyni na ing magtaksil kanaku!

⁴³ Magsalita ya pa i Jesus inyang i Judas, ing metung karing labing adua, dinatang ya; kayabe na la ding dakal a taung magdalang espada at palupalu. Deti tubud lang ibat karing pamuntuk da ring pari, karing talaturu ning Batas, at karing makatua na ning balen.

⁴⁴ Minie yang senias ing taksil karela: Itang uman ku ya ing kekayung kailangan. Dakpan ye at ituki, oneng banten yeng masalese.

⁴⁵ Karas nang Judas, agad neng lepitan i Jesus at ngana, Maestro! at inuma ne.

⁴⁶ Inya dekap de i Jesus at telanan deng matalik.

⁴⁷ Begut ne ning metung karetang atyu karin ing espada na at tebak ne ing ipus na ning Pekapun ding Pari at atigpas ne balugbug.

⁴⁸ At nganang Jesus karela, Tulisan ku wari? Kailangan pa wari ing datang kayung paka-espada at paka-palupalu para dakpan yu ko?

⁴⁹ Tuturu ku aldo-aldo king Templo at atyu kayu naman karin, oneng e yu ku dekap. Kailangan ping matupad ing sasabian da ring Kasulatan!

⁵⁰ Likuan de ring alagad na; tinakas la ngan.

⁵¹ At tikian ne ning metung a baintaung makabalabal mung linen. Dekap dia naman,

⁵² oneng meka puslit ya at milayi yang lubas; melakuan ya king gamat da ing balabal na.

⁵³ At dela re i Jesus king bale na ning Pekapun ding Pari. Karin la makatipun ding sablang pamuntuk da ring pari, ding makatua na ning balen, at ding talaturu ning Batas.

⁵⁴ Tikian neng Pedro i Jesus, oneng makarayung bagya. Tinaglus ya angga king patyu na ning bale ning Pekapun ding Pari. Linukluk ya karin i Pedro lele na ning dapug at migsalab yang kayabe ra ding guardia.

⁵⁵ Pilit lang manintun ebidensia ding pamuntuk da ring pari at ing kabilugan a Sanhedrin laban kang Jesus ba reng apapate. Oneng ala lang ikit nanuman.

⁵⁶ Dakal lang testigu ding memigawang patutu laban kang Jesus, oneng e paraparehu ing karelang sinabi.

⁵⁷ Ating mapilan a migtestigu laban kang Jesus at ngarang migsalitang kalaraman,

⁵⁸ Dimdam ming sinabi na, Lasakan ke iting Templong gewang tau at kilub ding atlung aldo mitalakad kung aliwa a e ra gewa ding tau!

⁵⁹ Makanyan man, e mu rin paraparehu ing karelang sinabi.

⁶⁰ Tinalakad ya ing Pekapun ding Pari king arap na ning kapulungan at kitnan ne i Jesus, Nanu ing asabi mu king bibintang da keka? Obat e ka makibat?

⁶¹ E bitasang mekibat i Jesus; menatili yang alang bulad. Nganang kinutang pasibayu ning Pekapun ding Pari, Ika ing Cristo, ing Anak ning Dios?

⁶² Aku, nganang mekibat Jesus. At ikayu akit ye ing Anak ning Tau a makalukluk king banda nang wanan ning Mayupaya. Akit yeng daratang a kayabe da ring biga banua!

⁶³ Ginabak na ning Pekapun ding Pari ing sarili nang imalan at ngana, Nanan ta la pa ding testigu!

⁶⁴ Ikayu mismu dimdam yu ing kalapastanganan na king Dios. Nanu ing desisyun yu? At inatulan de ngang mate.

⁶⁵ At pigluran de ring mapilan, tikpan de lupa at penumbuk. Ulan mu na mo nung ninu ing menumbuk keka? ngarang sinabi kang Jesus. At penampaling de ring guardia.

⁶⁶ Atyu king lalam ning patio i Pedro inyang dinatang ya ing metung karing babaing ipus na ning Pekapun ding Pari.

⁶⁷ Panakit na ning babaing iti kang Pedro a magsalab king dapug, linawe neng maratna. Ika man, ngana kang Pedro, kayabe na kang Jesus ning Nazaret!

⁶⁸ Oneng pepayalian nang Pedro iti. E ku balu ni e ku aintindian ing buri mung sabian, nganang mekibat. At minta ya king pasilyung palual king pasbul banda king pasbul dalan (at tinulauk ya ing tatyo).

⁶⁹ Ikit na ne naman ning ipus a babai at sinabi na karetang atyu karin, Ing taung iti metung ya karela!

⁷⁰ Oneng pepayalian na namang Pedro iti. Kalabas na ning mapilan a penandit, ding taung atyu karin sinabi ra naman kang Pedro, Talagang metung ka karela, uling tau ka naman Galilea.

⁷¹ Sinumpa ya i Pedro, Talagang e ke kakilala ing taung yan! Parusan na ku ning Dios, nung e tutu ing sasabian ku.

⁷² Kanita ne man tinulauk kadua ing tatyo. At aganaka nang Pedro ing sinabi nang Jesus: Ilingad mu kung makatatlung besis bayu ya makataduang tulauk ing tatyo. Mengalambut ya i Pedro at menangis.

15

¹ Kabukasan ning abak a maranun, mipulung la ding pamuntuk da ring pari, ding makatua na ning balen, ding talaturu ning Kautusan, at ing kabilugan a Sanhedrin. Pepagapus de i Jesus at dela re kang Pilato.

² Ika pin ing Ari da ring Judio? nganang kinutang Pilato. Ika mismu sasabian mu, ngana namang mekibat Jesus.

³ Dakal ing sumbung a inarap ding pamuntuk da ring pari laban kang Jesus,

⁴ inya kitnan neng pasibayung Pilato, Ala kang ipakibat karela? Lawan mu, tutu lang dakal a susumbung laban keka!

⁵ Oneng e bitasang mekibat i Jesus, inya mengapamulala ya i Pilato.

⁶ Balang daratang ing Piesta ning Pamaglagpus, mibubulus yang metung a preso i Pilato, itang aduan da ring tau.

⁷ Makasukul ya kanita ing metung a lalaking ausan dang Barabas, kayabe de ring aliwang rebelding mekamate tau king milabas a rebolusyun.

⁸ Linapit la ding tau at inawad da kang Pilato king daptan na na ing sadiang pamibulus metung a preso.

⁹ Kitang na karela, Buri yeng ibulus ku ing Ari da ring Judio?

¹⁰ Malino nang balung Pilato king ding pamuntuk da ring pari inarap de keya i Jesus uli na ning diria.

¹¹ Oneng ding pamuntuk da ring pari sitsutan da la ring tau ban aduan da king i Barabas ya ing ibulus na.

¹² Nung makanyan, nganang Pilato, nanu ing daptan ku kaniting ausan yung Ari da ring Judio?

¹³ Ipaku ya king krus! ngarang kinulisak ding dakal a tau.

¹⁴ Baket, nanung kasalanan ing depat na? nganang kinutang Pilato. Lalu rang pekasikan ing kulisak, Ipaku ya king krus!

¹⁵ King kapagnasan nang apamatulan na lang Pilato ding tau, pepabulus ne i Barabas; pepabarug neng latiku i Jesus at kaybat binie ne karela ban ipaku re king krus.

¹⁶ Dela re ding sundalus i Jesus king patio kilub ning pretorio (ing palasyung tuknangan na ning Gobernador) at inaus da la ring abe rang sundalus.

¹⁷ Belabalan de i Jesus king metung a malutung imalan; ginawa lang koronang suksuk at binili de king buntuk na.

¹⁸ Pisunu-sunu reng sasaluduan. Ngara, Luid ya ing Ari da ring Judio!

¹⁹ Pemukpuk de buntuk king kapirasung timbu, pigluran de, siniklaud la arapan na, at pisunu-sunu reng pupugayan.

²⁰ Kaybat deng gewang pikaylian, likas de kang Jesus ing pepasulud dang malutung imalan at sinulud dang pasibayu ing sarili nang imalan. Kaybat, linual de ban ipaku king krus.

²¹ Ating metung a lalaking lalabas ibat king baryu. Pinilit de ring sundalus ban papusan keya ing krus nang Jesus. Simon ing lagyu na; tau ya Cirene, at tata re di Alejandro at Rufo.

²² At dela re i Jesus king lugal a ausan dang Golgota, ing kabaldugan na Lugal ning Bungu.

²³ Dininan deng alak a semutanan mira, oneng e na ininum.

²⁴ Pinaku re king krus at piparti-parti da ring sundalus ing imalan na. Mibagutan la ban abalu ra nung isanung dake ing katuliran ning balang metung.

²⁵ Alas nuebe na ning abak inyang pinaku re king krus.

²⁶ Ngana ning misulat a dalum laban kang Jesus: Ing Ari da ring Judio.

²⁷ Kayagnan na lang mipakung Jesus ding aduang tulisan, ing metung king banda nang wanan at ing metung king banda nang kayli. [

²⁸ Makanyan yang metupad ing sasabian na ning Kasulatan: Binilang de karing kriminal.] fig,,,,,Mibagutan la...,(15:24)fig*

²⁹ Ininsultu de ring lalabas at pipiling-piling da la ring buntuk da. Ngara, Aha! Ika ing lasak king Templo at italakad me kilub ding atlung aldo?

³⁰ Iligtas mu ngeni ing sarili mu! Kuldas ka keng krus!

³¹ Pisunu-sunu dia naman ding pamuntuk da ring pari at ding talaturu ning Kautusan. Ngara king metung at metung, Linigtas na la ding aliwa, oneng e na aligtas ing sarili na!

³² Paburen yeng kuldas ngeni king krus ing Cristo, ing Ari ning Israel! Nung akit mi yang kuldas, maniwala kami. Insultuan dia naman ding tulisan a makapakung mingatba keya.

³³ At medalumdum king mabilug a bansa manibat king kaugtuan aldo anggang alas tres ning gatpanapun.

³⁴ Inyang alas tres na, kinulisak ya i Jesus. Ngana, Eloi, Eloi, lema sabachthani? Ngana wari, Dios ko, Dios ko, baket pepaburen mu ku?

³⁵ Dimdam de ring mapilan a taung atyu karin. Ngara, Lawan yu, ausan ne i Elias!

³⁶ Milayi ya ing metung karela, sinoso neng aslam ing metung a espongha at tinali ne king punta na ning metung a timbu ban pasipsip ne kang Jesus. At nganang sinabi, Lawan tamu nung tipa ya pin i Elias ba neng ikuldas!

³⁷ At kinulisak yang masikan i Jesus at mepatad ya pangisnawa.

³⁸ Megabak ya ing kortina ning Templo manibat king babo angga king lalam.

³⁹ Panakit na ning kapitan da ring sundalus a makatalakad tulid na ning krus nung makananu yang mepatlud a pangisnawa i Jesus, sinabi na, Tune ing taung iti Anak ne ning Dios!

⁴⁰ Ating mapilan a babaing magumasid king marayu. Kayabe ya kareti i Maria Magdalena, at i Mariang ima ra di Santiagong anak at Jose ampon i Salome.

⁴¹ Tikian de reti at siyuan i Jesus inyang atyu ya Galilea; atyu la naman karin ding aliwa pang babaing tinuki kang Jesus king Jerusalem.

⁴² Inyang mabibengi na dinatang ya i Jose a tau Arimatea. Metung yang gagalangan a miembru na ning Sanhedrin a manaya king paniatang na ning Kayarian ning Dios. Uling aldo na kanita ning Pamagsadia (ngana wari, aldo bayu ing Sabbath), migmasikan yang lub mekikit kang Pilato at pekisabi ne ing bangke nang Jesus.

⁴³

⁴⁴ Mipamulala ya i Pilato inyang dimdam nang mete ne i Jesus. Pepayaus neng Pilato ing kapitan at kitang na nung mete ne pin i Jesus.

⁴⁵ Inyang sinabi na ning kapitan king mete ne i Jesus, peintinulut neng Pilato ing bangke kang Jose.

⁴⁶ At sinali yang telang linen i Jose para pamalut king bangke. Inyang akuldas na ne ing bangke, binalut ne king tela at binili ne king metung a kutkutan a linukib king batu. Kaybat na nita, pepadugang ne ing maragul a batu king pasbul na ning kutkutan.

⁴⁷ Magumasid ya i Maria Magdalena at i Mariang ima nang Jose, at ikit de ing lugal nung nu ya mikutkut i Jesus.

16

¹ Kalabas na ning Aldo ning Sabbath, sinali lang pabanglu di Maria Magdalena, Mariang ima nang Santiago, at Salome ban ikuskus da king bangke nang Jesus.

² Abak a maranun ning Domingo kanita, kabang saslag ya ing aldo, minta la king kutkutan.

³ Kabang dalan, ngara king metung at metung, Ninu kaya ing makasaup kekatamu ban ilako ne ing batung makasabat king pasbul ning kutkutan?

⁴ Inyang lumawe la ikit da ing makalako ne ing maragul a batu.

⁵ At inyang milub na la king kutkutan, ikit de ing metung a kayanakan a lalaking makalukluk king bandang wanan at makaimalan yang maputi. Mitakutan la.

⁶ E kayu tatakut, ngana ning lalaki. Panintunan ye i Jesus ning Nazaret, ing mipaku king krus? Ala ne keti. Sinubli neng mebie! Oyan ing lugal nung nukarin de binili.

⁷ Inya mako na kayu at sabian yu kang Pedro at karing aliwang alagad king muna ne kekayu Galilea. Dasnan yu ne karin antimo ing sinabi na kekayu kanita pa.

⁸ Linual la at memulaying meko king kutkutan uling gagalgal la king takut. Oneng kaninu man ala lang sinabi uli na ning pangatakutan da. ING MAKABANG KAPUPUSAN NA NITING MAYAP A BALITA [

⁹ Domingung abak a maranun kanita, kaybat nang sinubling mebie Jesus, pepakit yang mumuna kang Maria Magdalena nung kenu na la pepalualan ding pitung demonyu.

¹⁰ Pintalan na lang Maria Magdalena ding alagad nang Jesus at belitanan na la. Disnan na lang malungkut at manangis.

¹¹ E re peniwalan inyang dimdam da kang Maria Magdalena king mabie ya i Jesus at king pepakit ya keya.

¹² Kaybat na nita, pepakit ya i Jesus king aliwang paralan karing adua kabang maglakad lang papunta king baryu.

¹³ Migbalik la Jerusalem at belita ra karing kayabe ra ing milyari, oneng e ra la munaman peniwalan.

¹⁴ Katataulian, pepakit ya i Jesus karing labing metung kabang mamangan la. Sebianan na la uli na ning keyalan dang kasalpantayanan at ning kesiasan dang buntuk, at uling e la bisang maniwala karing menakit keya kaybat nang sinubling mebie.

¹⁵ At sinabi nang Jesus karela, Munta kayu king mabilug a yatu at panaral ye ing Mayap a Balita karing sablang tau.

¹⁶ Miligtas ya ing ninumang maniwala at pabinyag; oneng miparusan ya ing ninumang e maniwala.

¹⁷ Karetang maniwala, mayakit la deting mayupayang tanda: king lagyu ku makapalual lang demonyu; makapaniabi lang aliwang amanu;

¹⁸ e la numanu balang agyang talnan da la ring ubingan o makainum lang lasun; itumpak da la ring gamat da karing masakit at deti kumayap la.

¹⁹ Kaybat nang migsalita karela, mitas ya banua ing Ginung Jesus, at linukluk ya king banda nang wanan ning Dios.

²⁰ Meko la ding alagad at menaral la karing sablang lugal. Seupan na la ning Ginu king obrang iti at pepatunayan na ing panaral da king kapamilatan na ning binie nang upaya karela, ing upayang makagawang milagru. Amen.] ING MAKUYAD A KAPUPUSAN NA NITING MAYAP A BALITA [

²¹ Pintalan de ring babai i Pedro at ding kakaluguran na, at belita ra karela ing sablang sinabi na ning lalaking atagpuan da king kutkutan.

²² Kaybat na nita, i Jesus mismu, king kapamilatan da ring alagad na, pepabal na king mabilug a yatu ing banal at ing e kukupas a balita na ning alang anggang kaligtasan.]