1

¹ Iti ya ing mensahi a binie na ning Ginu karing Israelita king kapamilatan nang Malakias.

² Nganang sasabi ning Ginu karing memalen na, Pepakitanan da kayung lugud. Oneng mekibat la, Makananu mung pepakit ing lugud mu kekami? Mekibat ya ing Ginu, Mikapatad la ri Esau at Jacob, oneng liguran ke i Jacob ampon ding lahi na,

³ at kesaman ke i Esau at ding lahi na. Sinira ku la ding bulubundukan nang lugal, at likuan ke karing mabagsik a animal ing tuknangan na.

⁴ Nung sabian da ring lahi nang Esau, ding Edomita, Melasak la ding kekaming balen, oneng italakad mi lang pasibayu. Kanita ipakibat na karela ning Ginu, Paburen yu lang italakad da la; siran ku lang pasibayu! Ding tau ausan da lang Ing e mayap a bansa at Ing bansa a kamuan na kapilan man ning Ginu.

⁵ Akit da iti ding memalen na ning Israel karing mismung mata ra at sabian da, Mayupaya ya ing Ginu agyang king lual na ning bansang Israel!

⁶ Nganang sasabi ning Ginung Mayupaya karing pari, Gagalangan ne ning anak ing tata na, at ing ipus ing panginuan na. Aku ing kekayung tata, obat e yu ku gagalangan? Aku ing kekayung panginuan, obat e yu ku gagalangan? Lalapastanganan yu ku, makanyan man kukutang yu kanaku, Makananu da kang lalapastanganan?

⁷ E yu na ku gagalangan king kapamilatan na ning pamamie yung ain a alang kabaldugan king kanakung altar. At kaybat kukutang yu pa, Makananu keng milako galang keka? Sabian ku kekayu: milako kayu galang kanaku king kapamilatan na ning keyalan yung galang king kanakung altar.

⁸ Potang magdala kayung bulag o masakit o pile animal ban iyain yu kanaku, isipan yu galang ing ustu ita? Subukan yeng ibie ing makanyan a animal king gobernador! Tumula ya kaya kekayo o dinan na kayu kayang pabor?

⁹ Ngeni, ikayung pari, subukan yung aduan king Dios king maging maganaka ya sa kekatamu. E na pakibatan ing panalangin yu at iti kasalanan yu.

¹⁰ Sasabian na ning Ginung Mayupaya, Sana isara na la ning metung kekayu ding pasbul ning Templo ban e kayu makapataung alang kwentang api king kanakung altar. E ku tutula kekayu; e ku la tanggapan ding ain a darala yu kanaku.

¹¹ Gagalangan da ku ring tau manibat king metung nang suluk ning yatu angga na king sumangid na. Nu man karin duruluk lang insenso para kanaku at miyayain lang karampatan a ain-sakripisyu. Gagalangan da ku ngan!

¹² Oneng ikayu insultuan yu ku potang sasabian yung ing altar ku ala yang kwenta, at potang ing pamangan a iyain yu kanaku ya itang e yu buri.

¹³ Ngayung sasabi, Sinawa ta nang darapat kaniti! at lalawan yu ku pang marok a mata. Animal lang penako yu ding kekayung yayain kanaku o kaya animal lang pile o ating sakit. Isipan yu galang ing tanggapan ke kekayu ing makanyan a animal?

¹⁴ Dugpa ing sumpa king mapamirait a miyayain kanakung animal a alang kwenta, ngening atin yang animal a alang dipektu karing sese na a pengaku nang ibie kanaku! Uling metung kung aring marangal, at tatakut la kanaku ding sablang tau ning yatu.

2

¹ Nganang sasabi ning Ginung Mayupaya karing pari, Iting kautusan para kekayu ya.

² Sukat yu kung galangan king nanumang kekayung daraptan. Nung e kayu makiramdam king sasabian ku kekayu, miparala kung sumpa kekayu. Mibili kung sumpa karing bage tatanggapan yu para king kekayung pangabiayan. Mibili na kung sumpa kareti uling e yu pinsinan ing yuyutus ku kekayu.

³ Parusan ku la ding maging anak yu at ikaskas karing lupa yu ing dinat da ring animal a sasakripisyu yu, at miyugse kayung kayabe ra.

⁴ Kanita abalu yu king aku ing minie kekayu kaniting kautusan ban e mapatlud ing kanakung kasunduan karing pari a lahi nang Levi.

⁵ King kanakung kasunduan, pengaku ku ing bie at ing kanawan karela, at iti ya ing binie ku karela ban galangan da ku. Ginalang da ku at pitakutan karing aldo reta.

⁶ Tiru da ing matulid, aliwa ing e matulid. Mibiebie la agpang king kaburian ku; e mu ing depatan da ing matulid, nune seupan da la pa ding dakal ban tuknang lang darapat e mayap.

⁷ Katungkulan da ring pari ing ituru da ing tune kabiasnan tungkul king Dios. Sukat lang lumapit karela ding tau ban abalu ra ing kaburian ku, uling ila ding tubud na ning Ginung Mayupaya.

⁸ Oneng ngeni, ikayung pari, linisia kayu king tune dalan. Ing turu yu ya ing minie dalan karing dakal king pamaniapat dang e ustu. Lebagan ye ing kasunduan a gewa ku kekayu.

⁹ Inya aku naman tairan ku la ding memalen na ning Israel ban insultuan da kayu, uling e yu pamintuan ing kaburian ku at e kayu parehu lawe karing taung tuturu yu.

¹⁰ E wari metung ya mu ing tatang tamu? E wari metung ya ing Dios a linalang kekatamo? Nung makanyan, obat e tamu tutupad karing pangakung binie tamu king metung at metung? Obat lalabagan ta ya ing kasunduan a gewa ning Dios karing makatua tamu?

¹¹ E ra tiparan ding memalen na ning Juda ing pengaku ra king Dios, at dinapat lang makasumaming bage king Jerusalem at king mabilug a bansa. Ginawa lang kalapastanganan king Templong pakamalan na ning Ginu. Mekiasawa la ding lalaki karing babaing sasamba karing dios a dayuan.

¹² Ilako ne sana ning Ginu king komunidad ning Israel ing ninumang darapat kaniti, at e na na la paintulutan makiabe kapilan man king ain a darala na ning bansa mi para king Ginung Mayupaya.

¹³ Oyni pa ing aliwa yung pamaniaptan. Kakatmuan ye ing altar ning Ginu karing kekayung lua, kiak, at tangis uling e na na la tatanggapan ding ain a darala yu.

¹⁴ Kukutang yu nung ba't e na na la tatanggapan. Ing sangkan ya iti: uling balu na king e yu la tiparan ding pengaku yu king babaing kekayung kesal inyang kayanakan yu. Ya ing kekayung kayabe king bie, oneng e yu tiparan ing pengaku yu king Ginu agyang simpa yu king arapan na ning Dios king maging tapat kayu karing sarasarili yung asawa.

¹⁵ E na kayu wari gewa ning Dios a metung mung katawan at espiritu karing sarasarili yung asawa? Nanu ing parasan na tungkul kaniti? Ing mikayanak kayung tune memalen na ning Dios. Inya mingat ya ing balang metung at metung kekayu ban e na asira ing pangaku na king asawa na.

¹⁶ Nganang sasabi ning Ginung Dios ning Israel, Kasaman ku ing diborsyu. Kasaman ku potang ing metung kekayu darapat yang bigsikan king asawa na. Siguraduan yung e yu na sa labagan ing pengaku yung katapatan king kekayung asawa.

¹⁷ Pegalan ye ing Ginu king kekayung salita. Oneng kukutang yu, Makananu mi yang pegalan? Pegalan ye king kapamilatan na ning pamagsalita yung anti kaniti, Isipan ning Ginung Mayupaya king mayap lang tau ding sablang darapat e mayap; king kamatutuanan kapad na la deti. O kaya, king kekayung pamangutang, Nukarin ya ing Dios a e mangabiran?

3

¹ Nganang mekibat ning Ginung Mayupaya, Iparala ke ing kanakung tubud ban isadia ne ing dalan para kanaku. At bigla yang datang king Templo na ing Ginung kekayung panintunan. Datang ya ing tubud a buri yung akit at sabian ne ing kakung kasunduan.

² Oneng ninu ing malyaring makapibata king aldo ning paniatang na? Ninu ing malyaring makaligtas potang pakit ne? Mangari ya king matapang a sabun, mangari ya king api a gagawan neng puru ing bakal.

³ Datang ya ban manukum a kalupa na ning taung maminu at gagawang puru king pilak. Nung makananu neng gagawan puru ning plateru ing pilak at ing gintu, makanyan munaman ing daptan na ning tubud ning Ginu: gawan na lang puru ding pari ban idala da la king Ginu detang karampatan a ain.

⁴ At ding ain a darala da ring memalen na ning Juda at ning Jerusalem karapatdapat la para king Ginu antimo ing king milabas a panaun.

⁵ Sasabian na ning Ginung Mayupaya, Lunto ku libutad yu ban ukuman da kayu at magtestigu kung agad laban karing darapat pamagsalamangka, karing makipangalugud, karing magsalitang kalaraman, karing mamirait karing katuliran dang upa ding magobra da at karetang magsamantala karing babaing mebalu, karing ulila, karing dayuan, at antimu rin karing sablang e gagalang kanaku.

⁶ Aku ing Ginu at e ku mibabayu. Inya ikayung lahi nang Jacob e kayu pa lubus megisan.

⁷ Ikayu, antimo ding makatua yu, ginulut kayu karing kanakung kautusan at e yu la tiparan. Magbalik kayu kanaku at magbalik ku kekayu. Oneng kukutang yu, Nanu ing daptan mi ban makapagbalik ke keka?

⁸ Kukutang ku kekayu, matulid ing panakawanan ne ning tau ing Dios? Agyang makananu e ustu ita, makanyan man panakawanan yu ku! Makananu da kang panakawanan? ngayung kukutang. Panakawanan yu ku king kapamilatan da pring sikapulu at ding ain.

⁹ Talab ing sumpa kekayu, uling panakawanan na ku ning mabilug a bansa.

¹⁰ Idala yu ing mabilug yung sikapulu king Templo ban mika ating dakal a pamangan karin. Subukan yu ku at aku naman ibuklat ku la ding awang ning banua, at itugtug ku ing dakal a mayap a bage para kekayu.

¹¹ E ku paintulut ing siran da ring ulad ing kekayung tanam, at mamunga lang dakal a bunga ding mulahan yung ubas.

¹² At ausan da kayung mapalad ding tau da ring sablang bansa, uling maging masanting yang lugal a pituknangan ing bansa yu. fig,,,, ,Aku ing Ginu at e ku magbayu.,(3:6)fig*

¹³ Nganang sasabi ning Ginu, Migsalita kayung kalapastanganan tungkul kanaku. Oneng kukutang yu, Nanu wari ing sinabi ming laban keka?

¹⁴ Sinabi yu, Alang kwenta ing susuyu king Dios. Nanung kwenta na ning pamamintu tamu king sasabian na o ing pamagkapilit tamung ipakit king Ginung Mayupaya king malungkut tamu king e ustung depat tamu

¹⁵ ngening akakit tamu king ding taung mapagmatas ila ding pekamasayang tau. E mu ing minawa la bie ding taung e mayap, nune paniubukan da pa ing kapibabatan na ning Dios king kapamilatan ning e mayap dang dapat at e la man nananu balang.

¹⁶ Kanita mipapagsalita la ding taung ating takut king Ginu, at mekiramdam ya ing Ginu, at dimdam na ing sablang sinabi ra. King akakit na, misulat la king libru ning kapigaganakan detang ating takut at kagalangan king Ginu.

¹⁷ Ila ding maging taung kanakung bandi, nganang sasabi ning Ginung Mayupaya. King aldo a kimut ku, maging ganap lang kanaku. Pakitanan ku lang lunus nung makananung ing metung a tata papakit yang lunus king anak nang lalaking susuyu kang tata na.

¹⁸ Pasibayu rang akit ding taung kanakung pinili ing pamiyaliwa na ning bage mapalyari king taung mayap ampon king taung e mayap, king taung susuyu kanaku ampon king taung e susuyu kanaku.

4

¹ Daratang ne ing aldo nung kapilan ding taung mapagmatas at e mayap masilab lang kalupa na ning are, nganang sasabi ning Ginung Mayupaya. King aldong ita masilab la at alang mitagan metung man karela.

² Oneng ikayung mamintu kanaku, ing upaya ning pamagligtas ku sunlag ya kekayu anti ing aldo at dinan na kayung kapaldanan ning sala na. Maging malaya kayu at masaya antimo ding biserung tupa a pepalualan da king kural.

³ King aldong ita a kimut ku, sambutan yu la ding taung e mayap at maging anti la king alikabuk a daramusakan yu.

⁴ E yu la sa kakalinguan ding turu na ning talasuyu kung i Moises, ding utus at tuntunan a binie ku king kapamilatan na king Bunduk ning Sinai para karing memalen na ning Israel ban karelang pamintuan.

⁵ Oneng itubud ke pa kekayu ing propeta Elias bayu datang iting maragul at makatakut a aldo ning Ginu.

⁶ Tipunan na lang pasibayu ding pengaring lalaki at ding anak; nung e makanyan datang ku at lasakan ke ing bansa yu.