1

¹ Kanitang kawalu nang bulan ning kadua nang banua ning pamag-ari nang Dario king Persia, binie ne ning Ginu iting mensahi kang propeta Zacarias a anak nang Berekias at apu nang Iddo.

² Sinabi na ning Ginung Mayupaya kang Zacarias king sabian na karing tau ing anti kaniti: Aku, ing Ginu, maragul ing mua ku karing kekayung makatua,

³ oneng ngeni sasabian ku kekayu, Magbalik kayu kanaku at magbalik ku kekayu.

⁴ E kayu sana mangari karing kekayung makatua. Kanitang panaun a milabas, mipayabut karela ing kanakung mensahi king kapamilatan da ring propeta. Sinabi da reti karela king lakuan da na sa ing e mayap dang pamibiebie at gumulut na la king e ustung dapat. Oneng e la mekiramdam ni memintu kanaku.

⁵ Mete na la ding kekayung makatua at detang propetang deta.

⁶ King kapamilatan da ring propetang kanakung talasuyu, pepayabut ku la karing kekayung makatua ding kanakung kautusan at babala, oneng e ra la pinsinan. Uli na niti, misakitan la. Kanita la pa mu sinisi at kilalanan king aku, ing Ginung Mayupaya, perusan ku la agpang ketang karapatdapat karela at ketang inari ku na king lub ku.

⁷ Kanitang kadua nang banua ning pamag-ari nang Dario, ketang kabengian na ning kaduang pulu't apat a aldo ning kalabing metung a bulan (ing bulan ning Sebat), dininan na kung metung a mensahi ning Ginu king kapamilatan na ning vision.

⁸ Ikit ke ing metung nang anghel ning Ginu; makasake ya king kabayung malutu. Tinuknang ya libutad da ring tanaman a mirto king kapatagan at atin pang aliwang kabayu king kagulutan na; kule lang malutu, pultik-pultikan, at maputi.

⁹ Ngakung mengutang, Nanu pu ing buri dang sabian deting kabayu? Nganang mekibat, Ipakit ku keka ing buri dang sabian.

¹⁰ Tinubud na la ning Ginu deti ban libutan de at siasatan ing yatu.

¹¹ Minie lang ulat king anghel. Ngara, Alibutan mi ne ing mabilug a yatu, at ikit mi king panatag ya bili ing mabilug a yatu.

¹² Kanita ngana ning anghel, Ginung Mayupaya, pitu nang pulung banua ngeni ing mua mu king Jerusalem at karing siudad ning Juda. Nu pa anti kaluat bayu mu ipakit ing lunus mu karela?

¹³ Pekibatan ne ning Ginu ing anghel karing makapaldan a amanu,

¹⁴ at sinabi na kanaku ning anghel king ibalita ku iting selita ning Ginung Mayupaya: Atin kung maragul a lugud at malasakit king Jerusalem, ing banal kung siudad.

¹⁵ Tune kung mua karing bansang magtamasa king katahimikan at kapayapan. Kabang aku mo pipigilan ku ing mua ku karing memalen ku, detang bansang deta lalu da na la mang pepasakitan ding memalen ku.

¹⁶ Inya mibalik ku Jerusalem ban ipakit ku ing lunus ku king siudad. Malarin ya ing kanakung Templo at mitalakad yang pasibayu ing siudad.

¹⁷ Sinabi na naman kanaku ning anghel king ibalita ku: Ing Ginung Mayupaya sasabian na king minawa lang pasibayu ding siudad na at saupan neng pasibayu ing Jerusalem at gawan neng sarili nang siudad.

¹⁸ Miglalawe ku at menakit kung apat a sagung toro.

¹⁹ Ngakung kinutang king anghel a kapagsalita ku, Nanu ing buri dang sabian deting sagu? Nganang mekibat, Lalarawan da la reti ding bansang mayupaya at king uli ra mikalat la ding memalen na ning Juda, Israel, at Jerusalem.

²⁰ Kaybat na nita, pepakit na la kanaku ning Ginu ding apat a lalaking pande.

²¹ Ngakung mengutang, Obat dinatang la ren? Nanu ing daptan da? Nganang mekibat, Dinatang la ren ban pamatakutan da la at idagsa ding bansa a lubus miglupig king bansa ning Juda at king uli ra mikalat la ding memalen na.

2

¹ Miglalawe ku at ikit ke ing metung a lalaking ating tatalnan a paniukad.

² Kitang ku king lalaki, Nu ka munta? Pekibat na, Sukdan ke ing Jerusalem ban akit ku nung nu ya anti kakaba at kalualas.

³ Kaybat, ikit ke ing anghel a akapagsalita ku; linakbang yang palapit at linapit ya ing metung pang anghel ba neng salubungan.

⁴ Ngana ning minunang anghel king aliwang anghel, Mulayi ka at sabian mu ketang baintaung ating tatalnan a paniukad king mika tutung dakal a tau at baka king Jerusalem angga king mangari ya karing baryung alang bakud a pader.

⁵ Pengaku na ning Ginu king ya mismu ing maging bakud a api a magpadurut king siudad ban idipensa ne, at king sabla nang kamalan karin ya manuknangan libutad da.

⁶ Nganang sinabi ning Ginu karing memalen na, Aku ing mikalat kekayu karing miyayaliwang suluk na ning yatu. Oneng ngeni, ikayung miyugse, takasan yu ne ing Babilonia at muli na kayu Jerusalem.

⁷

⁸ Anti na mo waring aku ing lebanan na ning ninumang lumaban kekayu. Inya tinubud na ku ning Ginung Mayupaya at binie ne iting mensahi para karing bansang meniamsam karing memalen na:

⁹ Ing Ginu mismu ya ing lumaban kekayu at masamsam kayu karing taung king misan a panaun gewa yung ipus. Potang iti mapalyari na, abalu na ning metung at metung king ing mitubud kanaku ya ing Ginung Mayupaya.

¹⁰ Ngana ning Ginu, Memalen ning Jerusalem, magkanta kayung mitmung saya! Daratang ku ban manuknangan libutad yu!

¹¹ King aldong ita dakal lang bansa ding lumapit king Ginu at maging memalen na la munaman. Manuknangan ya libutad yu at abalu yu king tinubud na ku kekayu.

¹² Pasibayu yang maging makapasubaling pibandian na ning Ginu ing Juda king banal nang bansa, at maging siudad yang kaluguran nang dili ing Jerusalem.

¹³ Magtahimik ya ing balang tau king arapan na ning Ginu uling daratang yang ibat king banal nang lugal.

3

¹ Pepakit ne pa kanaku ning Ginu ing Pekapun da ring Paring i Josue a makatalakad arapan na ning anghel ning Ginu. Karin siping nang Josue makatalakad ya i Satanas; makasadia yang miyapag dalum laban kang Josue.

² Ngana ning anghel ning Ginu kang Satanas, Parusan na ka sa ning Ginu, Satanas! Parusan na ka sa ning Ginung malugud king Jerusalem! Mengari ya ing taung yan king kapirasung dutung a mesagmit king api.

³ Makatalakad ya karin i Josue; makasulud yang imalan a marinat.

⁴ Ngana ning anghel karing talapagsilbi na karin banua, Ilukas yu ing marinat a imalan a susulud na ning taung yan. Kaybat ngana kang Josue, Leko ku na ing kekang kasalanan at dinan da kang bayung imalan a isulud mu.

⁵ Inutus na naman karing talapagsilbi king ikabit de ing malinis a turban king buntuk nang Josue. Memintu la at kaybat pepasulud de kang Josue ing bayung imalan kabang makatalakad ya karin ing anghel ning Ginu.

⁶ Kanita sinabi na ning anghel ning Ginu kang Josue king

⁷ ing Ginung Mayupaya sinabi na: Nung tuparan mu la ding utus ku at gampanan ding katungkulan a binie ku keka, manatili kang talapanibala ning kanakung Templo at ing paligid na, at pakiramdaman ku la ding panalangin mu antimo nung makananu ku lang pakiramdaman ding panalangin da ring anghel a atyu king arapan ku.

⁸ Inya makiramdam ka, Josue, ika a Pekapun da ring Pari. Makiramdam kayu, ikayung kalupa nang pari, ikayung tanda na ning mayap a panaun a daratang: ipalto ke ing kanakung talasuyu a mayayaus Ing Sanga!

⁹ Bibili ke arapan nang Josue ing magdili-diling batu'ng ating pitung lupa. Idukit ke ing metung a kasulatan kaniti at king metung mung aldo ilako ku ing kasalanan na niting bansa.

¹⁰ Potang datang ne ing aldong ita, agkatan ne ning balang metung kekayu ing kasiping nang bale ban datang at magsayang mitmung kapayapan at kapanatagan libutad da ring kekayung mulahan ubas at tanaman yung higera.

4

¹ Linapit yang pasibayu ing anghel a kepagsalita ku at ginising na ku antimo neng gigisingan ya ing ninumang tau king tudtud na.

² Nganang kinutang, Nanu ing akakit mu? Metung yang tumpakan-sulu a megawa king gintu, ngakung mekibat. Ating metung a lulanan laru babo na. Pitu la ding sulu king tumpakan-sulu, atin yang pitung piririnan pabelu ing balang metung.

³ Ating aduang tanaman a olibo lele na ning tumpakan-sulu, mingatba la kaniti.

⁴ Kitang ku kanita king anghel, Nanu ing buri dang sabian deti?

⁵ E mu balu ing buri dang sabian den? ngana namang kinutang kanaku. Ali ku, ngakung mekibat.

⁶ Sinabi na kanaku ning anghel king ibie ke kang Zerubabel iting mensahi a ibat king Ginung Mayupaya: Magtagumpe ka e king kapamilatan na ning sikanan ning sandata at e king kekang sariling upaya, nune king kapamilatan na ning kanakung espiritu.

⁷ Lumbug la king arapan mu ding sagabal a kasing katas da ring bunduk. Italakad meng pasibayu ing Templo at kabang bibili me ing katataulian a batu king paglugalan na, sabian dang masikan ding tau, Kasanting na, kasanting na!

⁸ Miras munaman kanaku ing aliwa pang mensahing ibat king Ginu.

⁹ Ngana, I Zerubabel ya ing mekabili king pundasyun na ning Templo at ya naman ing manari kaniti. Potang iti mapalyari na, abalu da ring kanakung memalen king aku ing mitubud keka karela.

¹⁰ Masisira na la lub uling ditak mu ing mayayari. Miyatdanan lang tula potang akit da king e patugut i Zerubabel king pamipatalakad na king Templo.

5

¹ Miglalawe kung pasibayu at ikit ke ing metung a kasulatan a makalulun a sulasulapo.

² Kitnan na ku ning anghel nung nanu ing ikit ku. Pekibat ku, Metung yang kasulatan a makalulun a sulasulapo; atlu yang pulung talampakan king kaba at labing limang talampakan ya king lapad.

³ Kanita ngana kanaku, Makasulat kaniti ing sumpa a laganap king mabilug a bansa. Mababasa king metung nang dake niting kasulatan a makalulun king milako ya ing balang mapanako king bansa, at mababasa king kasumangid king milako ya naman ing balang magsalitang kalaraman lalam ning metung a sumpa.

⁴ Sasabian na ning Ginung Mayupaya king iparala ne iting sumpa at luban ne bale ing balang mapanako at ing balang magsalitang kalaraman. Manatili ya karing pibalebale at lakuan na lang lasak-lasak.

⁵ Linto yang pasibayu ing anghel at ngana, Lawan mu! Ating aliwang bage a daratang!

⁶ Nanu ya? ngakung kinutang. Nganang mekibat, Metung yang kaing at lalarawan na ing kasalanan na ning mabilug a bansa.

⁷ Atin yang takap ing kaing a megawa king tinggaputi. Kabang lalawan ke, mibuklat ya ing takap at kilub ning kaing ating metung a babaing makalukluk! fig,,,,,... kilub ning kaing ating metung a babaing makalukluk!,(5:7)fig*

⁸ Ngana ning anghel, Lalarawan na niting babai ing e mayap. Kanita tinimid ne ing babai kilub ning kaing at saka ne tikpan pasibayu.

⁹ Linawe ku babo at ikit ku la ding aduang babaing susulapo palapit kanaku; atin lang maragul a pakpak a kalupa na ning king tagak. Diklut de ing kaing at silapo re.

¹⁰ Ngakung kinutang king anghel, Nukarin de idala ing kaing?

¹¹ Nganang mekibat, King Babilonia, nung nu la manalakad templo para kaniti. Potang mayari ne ing templo, ibili de karin ing kaing ban samban.

6

¹ Miglalawe kung pasibayu at ikit ku la ding apat a karung panggera a lulual ibat king pilatan da ring aduang bunduk a tangsu.

² Kukuliutan de ring malutung kabayu ing mumunang karu; ing kadua, ding matuling a kabayu;

³ ing katlu, ding maputing kabayu; at ing kapat, ding pultik-pultikan a kabayu.

⁴ Kanita kitang ku king anghel, Nanu ing buri dang sabian deting karu?

⁵ Pekibat na, Ila deti ring apat a direksyun na ning angin; kalualalual da pang ibat king arapan na ning Ginu ning mabilug a yatu.

⁶ Papunta ya ing karu a kukuliutan da ring matuling a kabayu king norti, king Babilonia; papunta la ding maputing kabayu king albugan, at papunta la ding kabayung pultik-pultikan king bansang atyu king mauli.

⁷ Mamalagua lang mako at maniasat king yatu ding kabayung pultik-pultikan. Ngana ning anghel, Sulung, siasatan ye ing yatu! at ita ing depat da.

⁸ Kanita kilait na ning anghel kanaku, Ikua rang alako ding kabayung minta king dane norti ing mua ning Ginu.

⁹ Binie ne kanaku ning Ginu iting mensahi.

¹⁰ Ngana, Kuanan mu la ding regalu a binie da ri Heldai, Tobias, at Jedaia a dinatang ibat king pangayugse ra Babilonia, at munta kang agad king pibalebale nang Josias a anak nang Zepania.

¹¹ Gawa kang korona king pilak at gintu a binie da at ibili me king buntuk ning Pekapun da ring Pari, i Josue a anak nang Jeozadak.

¹² Sabian mu kang Josue king ing Ginung Mayupaya sasabian na, Ya iti ing lalaking mayayaus Ing Sanga; manianga ya nu ya man karin at italakad neng pasibayu ing Templo ning Ginu.

¹³ Ya ing mitalakad kaniti at tanggapan na ing dangalan a mangaintulid king metung a ari, at panibalan na la ding memalen na. Talakad ya ing metung a pari lele ning tronu at misaupan la king obra.

¹⁴ Maging metung yang kapigaganakan ing korona bilang parangal kang Heldai, Tobias, Jedaia, at kang Josue kilub ning Templo ning Ginu.

¹⁵ Datang la ding taung manibatan karing marayung lugal at sumaup la kekayu king pangatalakad nang pasibayu ning Templo ning Ginu. At potang mitalakad ne, abalu yu king ing mitubud kanaku kekayu ya ing Ginung Mayupaya. Mapalyari ngan iti nung ganap yu lang pamintuan ding utus na ning Ginung kekayung Dios.

7

¹ Kanitang kapat nang banua ning pamag-ari nang Dario, king kapat nang aldo ning kasiam a bulan (ing bulan ning Kislev), sinabi na ning Ginu ing amanu na kanaku.

² Tinubud de ring memalen na ning Betel i Sarezer at Regemmelec ampon ding karelang tauan king Templo ning GinuMayupaya ban manalangin para king bendisyun ning Ginu,

³ at ban ikutang da karing pari at propeta ing anti kaniti: Sukat mi pang isundu ing pamagpaldas uli na ning pangalasak na ning Templo king kapamilatan ning pamag-ayunu king kalimang bulan antimo ing daraptan mi karing dakal nang banuang milabas?

⁴ Iti ya ing pakibat ning Ginu a miras kanaku:

⁵ Sabian mu karing memalen na ning bansa at karing pari king inyang mig-ayunu la at migpaldas king kalima at kapitung bulan kilub ding pitung pulung banua, depatan da ita e para parangalan da ku.

⁶ At inyang mengan la at minum, depatan da ita para mu king sarili dang kapakanan.

⁷ Iti ya ing sinabi na ning Ginu king kapamilatan da ring minunang propeta kanitang panaun a ing Jerusalem manawa ya pa bili at mitmu yang tau, at kanitang panaun a dakal la pa ring taung manuknangan e mu karing balen a makapadurut king siudad nune pati na king dane mauli at karing kapatagan lele da ring bunduk king dane albugan.

⁸ Binie ne ning Ginu iting mensahi kang Zacarias:

⁹ King milabas a panaun binie ku la deting kautusan karing kanakung memalen: Sukat yung pansinan ing pangatupad ning hustisia, at sukat kayung pakit ganaka ampon lunus king metung at metung.

¹⁰ E yu la gigipitan ding babaing mebalu, ding ulila, at ding dayuan a manuknangan libutad yu o ing ninumang atyu king pamangailangan. At e kayu babalak nanumang e mayap a makapanasakit king aliwa.

¹¹ Oneng birian da ring kanakung memalen ing e la makiramdam. Migmaklak-maklakan la;

¹² gewa da lang masias anting batu ding pusu ra. Mimua kung e mu nanu uli na ning e la mebisang makiramdam king turu ku a pepayabut ku king kapamilatan da ring propetang mabie pa kanitang panaun a ita.

¹³ E ku na la pekiramdaman inyang menalangin la kanaku uling e la mekiramdam inyang migsalita ku.

¹⁴ Anti ing bagyu kinalat ku la ban manuknangan karing dayuan a bansang e ra bitasang balu. Mipaburen ya iting masanting a gabun, at metung man alang manuknangan.

8

¹ Binie ne ning Ginung Mayupaya iting mensahi kang Zacarias. Ngana,

² Maluat ku neng buring saupan ing Jerusalem uli na ning maragul kung lugud karing memalen na, ing lugud a meging sangkan na ning pangamua ku karing kalaban na.

³ Magbalik ku Jerusalem, ing banal kung siudad, at manuknangan ku karin. Maging pikabaluan ya bilang tapat a siudad, at mayaus yang banal a bunduk-bundukan ing bunduk-bundukan ning Ginung Mayupaya.

⁴ Magtukud la ding lalaki at babai uli na ning ketuan da, at pasibayu lang magluklukan karing plasa na ning siudad.

⁵ At pasibayu lang mikatmuan ding dalan karing mamialung a anak a lalaki at babai.

⁶ Iti balamu masakit dang paniwalan ding memalen nang mitagan ning bansa, oneng kanaku e masakit paniwalan.

⁷ Iligtas ku la ding memalen ku karing bansa nung nu da la inugse,

⁸ at ibalik ku lang pasibayu ibat king aslagan at ibat king albugan ban manuknangan la king Jerusalem. Ila ding maging balen ku, at aku ing maging karelang Dios a manibala karela king mitmung katapatan ampon katuliran.

⁹ Tatagan yu ing lub yu! Ding amanung daramdaman yu ngeni ila naman ding amanung selita da ring propeta kanitang bibili re ing pundasyun na ning Templo para king pangatalakad nang pasibayu.

¹⁰ Bayu na ikuang miras ning panaun a ita alang tau o animal man a malyaring upahan para magobra, at ala munamang metung man a ligtas mo sa king kalaban na. Pipatepate ku la ding tau.

¹¹ Oneng ngeni makayaliwa ing tratu ku karing mitagan nang memalen niting bansa.

¹² Mananaman la libutad ning kapayapan. Mamunga la ding karelang tanaman a ubas, palto yang dakal a pagkabiayan ing gabun, at mabaldug ing dakal a uran. Ibie ku iting sablang kanawan karing memalen a mitagan niting bansa.

¹³ Memalen ning Juda at Israel! King milabas a panaun mipapaniumpa la ding dayuan kapamilatan na ning pamagsalitang Dugpa sana keka ing kasiran a digpa king Juda at Israel! Oneng iligtas da kayu at kaybat na nita, detang dayuan a deta sabian da king metung at metung, Mibendisyunan ka sa antimo ing Juda at Israel! Inya tatagan yu ing lub yu at e kayu sa mitatakutan.

¹⁴ Sasabian na ning Ginung Mayupaya, Kanitang pepamua da ku ding kekayung makatua, mibalak kung miparalang kasiran karela at e ku migbayu isip, nune depat ku itang binalak ku.

¹⁵ Oneng ngeni babalakan ku ing bendisyunan ku la ding memalen na ning Jerusalem at ning Juda. Inya e kayu mitatakutan.

¹⁶ Ila deti ring bage a sukat yung daptan: Magsalita kayung katutuan king metung at metung. Ibie yu king husgadu ing tune hustisia; itang hustisiang magdalang kapayapan.

¹⁷ E kayu mimisip gawang nanu pa mang ikapanasakit ning metung at metung. E kayu magsalitang kalaraman king kapamilatan na ning metung a sumpa. Pikakasaman ku ing pamaglaram, ing alang hustisia, at ing pamanampalasan.

¹⁸ Binie ne ning Ginung Mayupaya iting mensahi kang Zacarias:

¹⁹ Ding pamag-ayunu a mararapat balang kapat, kalima, kapitu, at kapulung bulan maging selebrasyun lang mitmung tula at kaligayan para karing memalen na ning Juda. Kailangan ing luguran yu ing katutuan at ing kapayapan.

²⁰ Sasabian na ning Ginung Mayupaya, Daratang na ing oras potang datang la king Jerusalem ding taung ibat karing dakal a siudad.

²¹ Detang menibat king metung a siudad sabian da karing menibatan king aliwang siudad, Papunta kami Jerusalem ban samban mi ya ing Ginung Mayupaya at ban maniawad kami king bendisyun na. Tara tuki kayu kekami!

²² Dakal lang tau at bansang mayupaya ding datang king Jerusalem ba reng samban ing Ginung Mayupaya at ban maniawad bendisyun king Dios.

²³ King panaun a ita, lumapit la ding apulung dayuan king metung a Judio at sabian da, Bisa kaming mirakayanan king mayap yung kalma uling abalitan mi king ing Dios atyu ya kekayu.

9

¹ Iti ya ing mensahi na ning Ginu: Migsalita yang kaparusan king bansa ning Hadrak at para king siudad ning Damasco. Bandi na la ding sablang tribu na ning Israel; bandi nia naman ning Ginu ing sentru na ning Siria.

² Ing Hamat, king angganan na ning Hadrak, bandi nia naman; antimu rin ding siudad ning Tiro at Sidon at ing sablang gelingan a atyu karela.

³ Mitalakad yang mangatibe kuta ing Tiro para king sarili na, at mitambak yang dakal a pilak at gintu angga na king balamu pangkaraniwan na mung anti ing alikabuk at sukal karing dalan na.

⁴ Oneng ilako na ngan ning Ginu ing sablang kayatinan na. Iyugse na ing pibandian na king dagat, at king kapamilatan na ning silab gisanan ne ing siudad angga king mipatag ya king gabun.

⁵ Akit na iti ning siudad ning Askelon at mitakutan ya. Akit na naman iti ning siudad ning Gaza at tutu nang panamdaman. Ing Ekron, antimu rin, uling mewala na ing sabla nang asahan. Mate ya ing ari ning Gaza, at malakuan yang alang memalen ing Askelon.

⁶ Manuknangan la king Asdod ding taung misamut-samut a lahi. Ngana ning Ginu, Angganan ku na ing pamagmatas-matas da reting Filisteo.

⁷ E na la mangan kapilan man king karning ating daya o mangan king makabawal a pamangan. Maging dake na la ning kanakung balen ding sablang miligtas, at maging anti lang metung a pamilya king tribu nang Juda. Maging dake ne ning kanakung balen ing Ekron antimo ding Jebuseo.

⁸ Banten ke ing kanakung bansa ban e ra ne aluban ding kalaban na. E ku na paintulut karing magsamantala ing gipitan da la pa ring kanakung memalen. Ikit ku nung makananu lang migkasakit ding kanakung memalen.

⁹ Magsaya kayu, memalen ning Zion! Kulisak kayu king tula, ikong tau Jerusalem! Lawan yu, daratang ya kekayu ing kekong ari! Daratang yang kayabe ing tagumpe, oneng mapagpakumbaba ya at metung yang asno ing sasaken na, metung yang biseru, anak ning gaindung asno. fig,,,,,Lawan yu, daratang ya kekayu ing kekong ari!,(9:9)fig*

¹⁰ Ngana ning Ginu, Ilako ku na la ding karung panggera ning Israel, at ding kabayung pakigera karin king Jerusalem; ding pana a magagamit king labanan kaku na la ngan siran. Kapayapan ing itatag ning kekong ari karing miyayaliwang kayarian; ing pamamahala na magumpisa king dagat angga king kasumangid a dagat; manibat king Ilug ning Eufrates angga na karing sepu ning yatu.

¹¹ Ing Ginu sasabian na, Uli ning kasunduan ta a mitatakan king daya ding ain-sakripisyu, ding kekang memalen gawan ku lang malaya; ilako ku la king alang danum a talaga ning pangayugse ra karing aliwang bansa.

¹² Muli na kayu, ikong miyugse a ngeni atin nang kapanayan; magbalik na kayu karing katahimikan da ring kekong tuknangan. Ngeni kekayu sasabian ku dobli-dobli ing ibayad ku kekayu, at bendisyun para king kasakitan a kekong delanan.

¹³ Gamitan ke ing Juda anti ing pana ning sundalus, at ing Israel anti ding paslu. Gamitan ku la ding lalaki ning Zion anting metung a espada ban labanan ku la ding sundalus ning Grecia.

¹⁴ Pakit ya ing Ginu karing memalen na; ibugnus na lang paslu na anting kildap. Ing Ginung Dios trumpeta yang tiupan na; lumusub ya libutad ning alisus king mauli manibatan.

¹⁵ Ing Ginung Mayupaya memalen na ingatan na la, at ding kalaban da karela lang paten. Kulisak la libutad ning labanan anti ding taung malasing, at ing daya ding kalaban karelang payagusan; magus anti ing daya ning animal a sasakripisyu, ing dayang tutugtug da karing suluk ning altar.

¹⁶ Potang ing aldong ita datang na, iligtas ne ning Ginu ing balen na, antimo ing pastul a sasagip karing sese nang animal a atyu king panganib. Anti ding iyas king korona sunlag lang masala king bansa na.

¹⁷ E mu nanung kayapan at leguan ing mayakit kanita king bansa! Dagul lang masikan a katawan ding baintau na at dalaga uli ning binutil at alak a pangabiayan da.

10

¹ Maniawad kayung uran king Ginu king panaun ning kauran. Ing Ginu ya ing parala king lulam at mibabaldug king uran; pasagiwan ne ing marangle para karing sabla.

² Sasangguni la ding tau karing idolo at karing mamamanula, oneng pawang kalaraman at alang kabaldugan ing pakibat da reti. Ding aliwa dirinan da lang kabaldugan ding paninap, oneng lilili da la mu; alang kabaldugan ing pamamatula a babie ra. Inya maglibut-libut la ding tau anti ding meliling tupa. Mibibili la king kagutgutan uling ala lang manimuna.

³ Sasabian na ning Ginu, Mua ku karetang dayuan a mamahala king kanakung balen at parusan ku la ngan deti. Bandi ku la ding memalen na ning Juda, at aku, ing Ginung Mayupaya, ing mingat karela. Ila ding kakung maging pakakabayung mangabilis king pamakilaban.

⁴ Lunto la libutad da ring talapanibala at manimuna a mamahala king kanakung balen.

⁵ Magtagumpe la ding memalen na ning Juda a mengari karing sundalus a damusak karing kalaban da libutad ning burak karing dalan. Lumaban la uling atyu karela ing Ginu, at sambutan da la pati na ding kalaban a pakakabayu.

⁶ Gawan ku lang masikan ding memalen ning Juda; iligtas ku la ding memalen ning Israel. Malunus ku karela, at iyuli ku la ngan karing bale ra. Maging anti la karing taung e ku bitasang tinggian. Aku ing Ginung karelang Dios; pakibatan ku ing karelang panalangin.

⁷ Ding memalen ning Israel maging masikan lang anti ding sundalus, masaya anti ding lalaking miminum alak. E ra kalinguan ding karelang lahi iting tagumpe ra, at maging masaya la uli ning depat ning Ginu karela.

⁸ Ausan ku la ding kakung memalen, at miyabeabe kong tipunan. Iligtas ku la ngan, at antimo ing sadia rang kabilian, dakal ing karelang bilang.

⁹ Agyang kinalat ku la karing miyayaliwang bansa, makanyan man karing marayung lugal e ra ku kalinguan. Ila at ding anak da miligtas la, at miyabeabe pasibayung muli karing tuknangan da.

¹⁰ Ibat Ehipto at Asiria iyuli ku la bale ra, at papanuknanganan king sariling bansa ra. Papanuknangan ku la naman Gilead, at antimu rin king Lebanon; kumatmu ya karing tau ing mabilug a bansa.

¹¹ Potang lumabas na la king dagat ning karelang kagutgutan, aku, ing Ginu, ing marug karing alun at mamala ya ing danum nang malalam ning Ilug ning Nilo. Ing ketasan ning Asiria maputut na, at ing mayupayang Ehipto mawala ing upaya na.

¹² Gawan ku lang masikan ding kakung memalen; samban da ku at aku ing karelang pamintuan. Ing Ginu ya ing magsalita.

11

¹ Lebanon, ibuklat mu la ding pasbul mu, ban ing silab akua nong gisanan ding kekang tanaman a sedro!

² Manangis kayu at ngulangul, ikong tanaman a sipres; miragsa na la ding tanaman a sedro; mekutud na la detang makayamang tanaman! Manangis kayu at managulele, O tanaman a ensina ning Bashan, uling megisan neng mekutud ing makapal a kagubatan!

³ Ding pamuntuk manangis lang e makanyan-kanyan, uling karelang ligaya mewala na ngan! Pakiramdaman yu ing galeung ding leon; ing kagubatan a karelang tuknangan king Jordan mewala ya!

⁴ Ngana kanaku ning Ginung kakung Dios, Pakiapusan mu ing gagawan na ning pastul ding tupang malapit nang makatat.

⁵ Papaten da la ring maniali kareti at makanyan man e la mipaparusan. Pisasali ra ing karni at ngarang sasabi, Salamat king Ginu! Mibandi ta na ngeni! Pati ding mismung pastul da e la malulunus karela. (

⁶ Ngana ning Ginu, E ku ne lunusan pa ing ninuman king yatu. Aku mismu ing mibili karing memalen king gamat da ring sasakup karela. Siran de reting pamuntuk ing yatu, at e ku la iligtas ding tau king upaya da reting pamuntuk.)

⁷ Inupahan da ku detang maniali at mamisaling tupa, at meging pastul ku karing tupang malapit nang makatat. Kinangwa kung aduang tukud: pemalagyuan keng Mayap a Pilubluban ing metung at ing kadua Pamisasanmetung. At kanaku yang pistulan ing kawan.

⁸ Milako ku kapibabatan karing atlung pastul a masama kanaku. At kilub na mu ning pabulan tinabi ku la.

⁹ Kanita sinabi ku king kawan, E yu na ku maging pastul. Mate ne itang sukat mate, at malipul ne itang sukat malipul. Mipapatayan la ding mitagan.

¹⁰ Kaybat na nita, kinua ke ing tukud a mipamalagyuan Mayap a Pilubluban at pikli ke ban makalis ya ing kasunduan a gewa ning Ginu karing aliwang bansa.

¹¹ Inya king aldong ita mebura ya ing kasunduan. Lalawan da ku ding maniali at mamisaling tupa, at balu ra king magsalita ya ing Ginu king kapamilatan na ning depat ku.

¹² Ngaku karela, Nung bisa kayu, ibie yu la ding sueldu ku. Nung e kayu bisa, kekayu na la. Inya beyaranan da kung atlung pulung pirasung pilak bilang sueldu ku.

¹³ Oneng ngana kanaku ning Ginu, Ibaldug mu la den king kaban ning Templo. Inya dela ku la ding atlung pulung pirasung pilaking matas diling alaga a isipan dang katulid kuat bildug ku la king kaban ning Templo.

¹⁴ Kaybat pikli ke ing kaduang tukud, itang mipamalagyuan Pamisasanmetung at mepatlud ing pamisasanmetung na ning Juda at Israel.

¹⁵ Kanita ngana kanaku ning Ginu, Misan pa pakiapusan mu ing gagawan na ning metung a pastul, oneng ing pakiapusan mu ngeni ya ing pastul a alang kabaldugan.

¹⁶ Tinuldu kung metung a pastul a manibala king kanakung kawan, oneng e na la pagmalasakitan detang atyu king panganib ni panintunan detang mababating; e na la uluan detang mesugat ni pakanan detang mitagan. Bagkus ing daraptan na ya ing kakanan ne ing matabang dili karing tupa at tutuklapan na la ding kuku da.

¹⁷ Makalunus ing mapalyari king alang kabaldugan a pastul a ita! Pepaburen na la ding tupang papastulan na. Lubus nang siran ning gera ing kayupayan na. Langi ya ing takde na at mabulag ya ing wanan nang mata.

12

¹ Iti ya ing mensahi tungkul king Israel. Ibat ya iti king Ginu, ing Ginu a miladlad king banua at linalang king yatu at minie bie king tau. Sasabian na,

² Gawan keng anting metung a kopang alak ing Jerusalem; minum la king kopa ding bansang makapadurut keting siudad at magsuresure lang anti ding malasing. At potang kubkuban da ne ing Jerusalem, makubkub la naman ding siudad ning Juda.

³ Oneng potang datang ne ing aldong ita, iyapus ke ing Jerusalem king metung a mabayat a batu; manasakit ya ing bansa a sumubuk mibuat kaniti. Mikampi-kampi la ding sablang bansa ban lusuban de.

⁴ Potang datang ne ing aldong ita pamasdanan ku la ngan ding sablang kabayu at guluan ku la pamisip ding sablang pakasake kareti. Banten ku la ding memalen na ning Juda, at bulagan ku la mata ding kabayu da ring kalaban.

⁵ Kanita sabian da ring pamilya nang Juda king sarili ra, Babie yang sikanan ing Ginung Dios a Mayupaya karing memalen na a manuknangan Jerusalem.

⁶ Potang datang ne ing aldong ita, gawan ku la ding pamilya nang Juda anting metung a silab king kagubatan o kaya king metung a marangle binutil a malapit nang pupulan; lasakan da la ngan ding bansang makapadurut. E la numanu balang ding memalen na ning Jerusalem kilub ning siudad.

⁷ Aku, ing Ginu, ing munie mumunang pamagtagumpe karing sundalus ning Juda ban kanita ing dangalan a tanggapan da ring lahi nang David at memalen na ning Jerusalem e maygit kesa ketang karing aliwang dake na ning Juda.

⁸ King aldong ita ingatan na la ning Ginu detang manuknangan king Jerusalem; pati ing mainang dili karela maging masikan yang anti i David kanitang milabas a panaun. Ding manimuna karela ila ring lahi nang David, anti la ing anghel ning Ginu, anti ing Dios mismu.

⁹ Potang datang ne ing aldong ita lasakan ke ing balang bansa a magkapilit lumusub king Jerusalem.

¹⁰ Katmuan ku la ding lahi nang David at ding aliwang memalen na ning Jerusalem king espiritu ning lunus at panalangin. Lumawe la ketang pete ra king tandus, at panangisan de antimo detang manangis king karelang kabubugtungan a anak. Manangis lang kapait-paitan anti detang kematen king anak dang pangane lalaki.

¹¹ Potang datang ne ing aldong ita mika masikan a pamanangis karin Jerusalem antimo ing pamanangis kang Hadad-rimmon karin king Kapatagan ning Megido.

¹² Manangis ya ing balang pamilya king bansa king sarili na: ing pamilyang ibat kang David, ing pamilyang ibat kang Natan, ing pamilyang ibat kang Levi, ing pamilyang ibat kang Simei, at ding aliwa pang pamilya. Manangis ya ing balang pamilya king sarili na, at manangis lang makayaliwa ding lalaki karing babai king balang pamilya.

13

¹ Potang datang ne ing aldong ita, nganang sasabi ning Ginung Mayupaya, lunto ya ing metung a sibul ban maos la ding lahi nang David at ding memalen na ning Jerusalem king kasalanan da at king karelang pamanyambang idolo.

² King aldong ita kalisan ku la lagyu ding idolo king bansa, at ala nang makaganaka pa karela kapilan man. Itabi ke ing ninumang magbansag propeta, at ilako ku ing pamagnasang samba karing idolo.

³ Kanita nung atin pang magkapilit magsalitang anting propeta, ing mismung tata na at ima na ilang sumabi king sukat yang mate, uling magbansag yang magsalita king amanu na ning Ginu, oneng pawang kalaraman naman ing sasalita na. Potang mangamanu ya, ing mismung tata na at ima ilang maniaksak at makamate king anak da.

⁴ Potang datang ne ing aldong ita, ala metung mang propeta a magmaragul karing vision a ikit na o manugaling propeta o misulud king imalan a magaspang ning propeta ban alinlang na la ding tau.

⁵ Bagkus sabian na, E ku propeta. Metung kung ortelanu a sasarul mu king gabun a bandi ku manibat inyang kayanakan ku.

⁶ Nung sakali mang ating mangutang keting tau, Obat sugatan ka salu? ipakibat na, Ikua ku la den ketang bale na ning kakaluguran ku.

⁷ Sasabian na ning Ginung Mayupaya, Espada, migising ka at dalusungan me ing pastul a makipagobra kanaku! Paten me at misambulat la ding tupa. Lusuban ku la ding kanakung memalen

⁸ at mate ya ing kaduang-katlung dake, at miligtas ya ing katlung dake na ning bansa.

⁹ Paniubukan ke ing katlung dake a mitagan at gawan keng puru antimo ing pilak a madadalise king api. Paniubukan ku la antimo nung makananu yang masusubuk ing gintu. Kanita maus la kanaku at pakibatan ku la. Sabian ku karela king ila ding kanakung memalen, at ibalita da king aku ing karelang Dios.

14

¹ Malapit ne ing aldo nung kapilan lukluk ya ing Ginu king piukuman. Kuanan da kanita ing pibandian na ning Jerusalem, at pirakerakayan da ing meyakua king mismung akakit yu.

² Tipunan na la ning Ginu ding sablang bansa at gerahan de ing Jerusalem. Mibagsak ya ing siudad; panakawanan da la ring pibalebale at salbahian da la ring babai. Mabihag la ding kapitna karing tau at miyugse la king aliwang bansa, oneng e da la ilako king siudad ding mitagan.

³ Kaybat lage ya ing Ginu at makilaban ya karing bansang deta, antimo ing pamakilaban na king milabas a panaun.

⁴ King aldong ita talakad ya babo ning Bunduk ding Olibo, king dane aslagan na ning Jerusalem. Kanita mapirasu ya king adua ing Bunduk ding Olibo king maragul a kapatagan manibat king dane aslagan angga king dane albugan. Malis ya ing kapitna ning bunduk banda king norti, at ing kapitna banda king mauli.

⁵ Makatakas kayu king pamandalan yu ketang kapatagan a pipitna king bunduk king adua. Tumakas kayung anti ing pamanakas da ring makatua yu inyang mika ayun kanitang panaun nang Aring Uzzia ning Juda. Datang ya ing Ginung kanakung Dios; kayabe na la ding sabla nang anghel.

⁶ Potang datang ne ing aldong ita, e na mika dimla o mika yelu

⁷ ni dalumdum man. Parating ating sala, agyang king kabengian. Bukud mung ing Ginu ya ing makibalu nung kapilan mapalyari iti.

⁸ Potang datang ne ing aldong ita, magus ibat Jerusalem ing malinis a danum; magus ing kapitna king Dagat a Mete, at ing kapitna king Mediteraneo. Kaleldo man o kauran, magus alang patugut ing danum.

⁹ Kanita maging ari ya ing Ginu king mabilug a yatu; samban ne ning balang tau bilang Dios at abalu ne kaniti mu ring lagyu.

¹⁰ Maging kapatagan ya ing kabilugan a lugal manibat king Geba king norti angga king Rimon king mauli. Oneng manatili ya king matas a lugal ing Jerusalem; lumapad ya ing siudad magumpisa king Pasbul dalan nang Benjamin angga king Pasbul dalan ning Suluk a pipaglugalan na ning minunang pasbul, at manibat king Tore nang Hananel angga king pigagawan nang alak ning ari.

¹¹ Karin la manuknangan payapa ding tau; ala nang panganib pa king nanu pa mang kasiran.

¹² Parala yang makatakut a salut ing Ginu karing sablang bansang makigera king Jerusalem. Malaso ing laman da kabang mabie la pa; malaso la naman ding mata ra at dila.

¹³ Potang datang ne ing aldong ita, guluan na la isip ning Ginu, at ibie na ing maragul a takut karing tau angga king ing balang metung karela panasakitan ne king gamat na ing kalupa nang tau.

¹⁴ Lumusub la naman ding lalaking tau Juda ban idipensa re ing Jerusalem. Kuanan da at tipunan ing pibandian da ring makapadurut a bansa, gintu, pilak, at ing dakal a imalan.

¹⁵ Dugpa munaman ing makatakut a salut karing kabayu, mula, kamelyu, at asno; karing sablang animal a atyu karing kampu da ring kalaban.

¹⁶ Kanita munta la Jerusalem balang banua ding sablang miligtas dang memalen ding bansang linusub Jerusalem ban samban de ing bilang ari Ginung Mayupaya, at pagselebran de ing Piesta da ring Dalungdung.

¹⁷ Nung ating metung a bansa a e bisang munta at samba king Ginung Mayupaya bilang ari, e na dugpa ing uran king bansang ita.

¹⁸ Nung tanggian da ring tau Ehipto ing pamagselebra king Piesta da ring Dalungdung, dugpa munaman karela ing mismung salut a binie na ning Ginu king balang bansa a tatangging munta.

¹⁹ Iti ya ing maging parusa a dugpa king Ehipto at karing aliwa pang bansa nung e ra pagselebran ing Piesta da ring Dalungdung.

²⁰ Potang datang ne ing aldong ita agyang ding kampanilya da ring kabayu midukitan la kareting amanu: Makatalaga ya iti king Ginu. Ding kalderang pipaglutuan kilub ning Templo maging sagradu lang anti ding silyo a atyu arapan na ning altar.

²¹ Mitalaga ya ing balang kalderang pipaglutuan karin Jerusalem at king mabilug a Juda ban magamit king pamanyamba king Ginung Mayupaya. Gamitan da la reti ding taung babie ain king pamaglaga king karni da ring animal a miyain king ain-sakripisyu. Potang datang ne ing aldong ita, ala nang taung mayakit pang mangomersyu kilub na ning Templo ning Ginung Mayupaya.