1

¹ Iti ya ing mensahi na ning Ginu a binie na kang Zepania kanitang i Josias a anak nang Amon ya ing ari na ning Juda. (Ibat ya i Zepania king lahi nang Aring Hezekia king kapamilatan da ri Amaria, Gedalias, at Cusi.)

² Ngana ning Ginu, Siran ku ngan ing sablang bage keti king yatu:

³ ding sablang tau, animal, ayup, at asan. Ibagsak ku la ngan ding e mayap. Paten ku la ding sablang tau; alang mitagan metung man. Aku, ing Ginu, ing migsalita.

⁴ Parusan ku la ding memalen na ning Juda at ing mabilug a Jerusalem. Buran ku karin ing nanumang bakas ning pamanyamba kang Baal, at ala nang metung mang makaganaka pa karing paganung pari a susuyu keting dios-diosan.

⁵ Paten ke ing ninumang mumukiat king bubungan at sasamba king aldo, king bulan, at karing batuin. Paten ku la naman detang sasamba at susumpang katapatan kanaku, at kaybat gagawang kapangakuan king lagyu na ning kikilalanan dang dios a i Molek.

⁶ Paten ku la detang ginulut kanaku at e na bitasang tutuki kanaku, detang e na lalapit kanaku o mangutang at manintun kanaku.

⁷ Magtahimik kayu arapan na ning Ginung Dios! Malapit ne ing aldo nang pamanukum. Magsadia ya ing Ginu ba na lang isakripisyu ding taung pinili na, at kinumbira na na la ding kalaban ban kuanan da ing pibandian na ning Juda.

⁸ Potang datang ne ing aldo ning pamakamate, nganang sasabi ning Ginu, parusan ku la ding pamuntuk, ding anak nang lalaki ning ari, at ding sablang makiapus karing ugali da ring dayuan.

⁹ Potang datang ne ing aldong ita, parusan ku la ding sablang sasambang anting paganu at manako at makamate ban katmuan de king penako ra ing templo na ning karelang kikilalanan a dios.

¹⁰ Potang datang ne ing aldong ita, nganang sasabi ning Ginu, makaramdam kayung manangis king Pasbul dalan ning Asan ning Jerusalem. Damdaman yu lang manangis ding taung atyu king mas bayung dake na ning siudad, at damdaman yu ing masikan a lagusgus a manibatan karing bunduk-bundukan.

¹¹ Managulele kayu at tumangis potang damdaman yu na iti, ikayung manuknangan king mababang dake na ning siudad, uling mate la ding sablang komersianti!

¹² King panaun a ita kuma kung sulu at saliksikan ke ing Jerusalem. Parusan ku la ding taung tiwala king panatag dang kabilian a sasabi king lub da, E ya dapat nanumang mayap o e mayap ing Ginu.

¹³ Mayakua ing karelang pibandian at malasak la ding bale ra. E na la makapanuknangan kapilan man karing bale a tatalakad da o makainum alak ibat karing tanaman dang ubas. fig,,,,,E ya dapat nanumang mayap o e mayap ing Ginu.,(1:12)fig*

¹⁴ Malapit ne ing marangal nang aldo ning Ginu; malapit neng malapit at mabilis yang daratang! Ing aldong ita maging aldo yang mitmung pait, uling tumangis la pati ding pekamatapang nang sundalus uli na ning ala lang akarapat!

¹⁵ Maging aldo ne ning maragul a mua; aldo ne ning kaguluan at kalipitan, aldo ne ning pangalasak at kasiran, aldo ne ning karalumduman at kalungkutan, aldo yang matamle at malulam;

¹⁶ metung yang aldo a mitmu king inge da ring trumpetang mamaus king pamakigera at king kulisak da ring sundalung lulusub karing pakapader a siudad at mangatas a tore.

¹⁷ Nganang sasabi ning Ginu, Paratang kung alang kalupang kasiran karing sablang tau angga king ing balang metung lumakad yang kakapkap a antimo ing taung bulag. Mikasala la kanaku, inya ngeni ing daya ra magus anti ing danum at muluk lang pakapase king gabun ding karelang bangke.

¹⁸ King aldo a ipakit na ning Ginu ing maragul nang mua, ala lang akarapat ding sabla rang pilak at gintu ban miligtas la bie. Masira ya ing mabilug a yatu king api na ning mua na. Dinan nang wakas, wa, bigla nang dinan wakas ing bie ning balang mabibie keti king yatu.

2

¹ Bansang alang marine, magbayu na kang bie

² bayu mu akuang malanat at mate anti ing metung a sampaga, bayu datang ing mikakalabkab nang mua keka ning Ginu, bayu datang ing aldo nung kapilan na ipakit ing maragul nang mua.

³ Magbalik kayu king Ginu, ikayung sablang mapagpakumbaba keti king bansa a mamintu karing utus na. Daptan yu ing matulid at magpakumbaba kayu arapan ning Ginu. Mapalyaring aligtasan yu ing parusa king aldo nung kapilan na ipakit ning Ginu ing maragul nang mua.

⁴ Ala metung mang mitagan king siudad ning Gaza. Lakuan de ring sablang tau ing Askelon. Mitabi la ding memalen na ning Asdod kilub na mu ning kapitnang aldo, at mitabi la naman ding memalen na ning Ekron king karelang siudad.

⁵ Makataning na ing bie yu, ikayung Filisteo, ikayung manuknangan king lele ning dagat. Sildak na na ning Ginu ing atul na kekayu. Paten na kayu at metung man alang mitagan kekayu.

⁶ Maging marangle yang pipagkubuan da ring pastul ing gabun yu king lele ning dagat at pipagkuralan da karing tupa da.

⁷ Ding sumakup king kekayung gabun ila ding memalen na ning Juda a miligtas. Pastulan da la karin ding karelang kawan at matudtud la karing bale na ning Askelon. Mantabe ya karela ing Ginung karelang Dios at minawa lang pasibayu.

⁸ Nganang sasabi ning Ginung Mayupaya, Dimdam ku ing pamaninsultu at pamanyunu da ring memalen na ning Moab at Ammon karing taung kanakung pinili, at ing pamagmayabang dang kuanan de ing karelang bansa.

⁹ Bilang mabie Ginu, ing Dios ning Israel, matni kung sasabian king ing Moab at ing Ammon malasak lang anti ing Sodoma at Gomorra. Maging lugal lang pikukulkulan asin at ning alang anggang kasiran a tubuanan na ning makapal a dikut. Ding maniamsam king pibandian da at kuma king bansa ra ila ding miligtas karing kanakung pinili.

¹⁰ Makanyan lang miparusan ding memalen na ning Moab at Ammon uli na ning karelang ketasan lub at kapalaluan, at uli na ning pamaninsultu da karing taung pinili na ning Ginung Mayupaya.

¹¹ Papangilabutan na la ning Ginu. Gawan na lang alang kabaldugan ding kikilalanan dang dios na ning yatu, at samba ya ing balang bansa king Ginu king mismung sasakupan nang lugal ning balang metung karela.

¹² Paten na la naman ning Ginu ding tau Etiopia.

¹³ Gamitan na ning Ginu ing upaya na ban lasakan ne ing Asiria. Gawan neng disyerto ing siudad ning Nineve, disyertong alang bitasang danum.

¹⁴ Maging lugal yang pipagpaynawan da ring baka, tupa, at miyayaliwa pang animal. Ding manuknangan karing mesirang bale ila ding ayup a kulayu at karing awang da karin la gumaga. Karing karelang pasbul karin la gumaga ding awak. Mabaklas la ding dutung a sedro karing gusali na.

¹⁵ Makanyan ing mapalyari king siudad a tutung mapagmaragul king sarili nang upaya at mimisip king e ya numanu balang. Bala da ring memalen na king ing karelang siudad ya na ing mayupayang dili keti king yatu. Oneng alang kalupa ing kasiran a kaulian na; maging lugal yang panuknanganan da ring mabagsik a animal! Mangapaurung ya king takut ing balang taung lalabas karin. fig,,,,,Ding manuknangan karing mesirang bale ila ding ayup a kulayu...,(2:14)fig*

3

¹ Miyatulan ne ing Jerusalem, ing siudad a e mayap, ing rebelding siudad a manabusu karing mismung memalen na.

² E ya mekiramdam king Ginu o pepailalam king disiplina na. E na binili ing kapanaligan na at e ya pepasaup king Ginu.

³ Mengari lang danupan a leon ding pamuntuk na, at mengari la karing asu a danupan ding hues na; tutu lang matako inya e ra buring mikabukasan pati butul.

⁴ E mu la apanaligan at taksil la ding propeta; insultuan da ring pari itang bage sagradu, at pamaluktut de ing kautusan na ning Dios para king sarili dang kapakanan.

⁵ Oneng e ya mamako ing Ginu king siudad; daraptan na ing mayap at e bitasang gagawang e mayap. E na kakalinguan babie balang abak ing katuliran karing memalen na. Makanyan man e la tutuknang darapat e mayap ding e mayap a taung atyu karin, at e la man dirine.

⁶ Nganang sasabi ning Ginu, Lubusan ku lang kelisan ding miyayaliwang bansa; lesakan ku la ding siudad da at likuan ku lang lasak-lasak ding karelang pader at tore. Ala nang manuknangan karing karelang siudad; ala lang tau ding dalan; alang mitagan metung man.

⁷ Bala ku kanita king mika takut la kanaku ding taung kanakung pinili at tanggapan da na ing kanakung disiplina, king e ra na bitasang kalinguan ing aral a tiru ku karela. Oneng e melambat migbalik la king sadiang dapat dang e mayap.

⁸ Inya panayan yu ku, nganang sasabi ning Ginu. Panayan ye ing aldo a aku talakad ku at idalum ku la ding bansa. Inari ku na king lub ku ing tipunan ku la ding bansa at ding kayarian ban takman da ing bigsikan na ning kanakung mua. Malasak ya ing mabilug a yatu king kapamilatan na ning milalablab kung mua.

⁹ Ibayu ku la kanita ding tau da ring bansa at bukud lang kanaku manalangin at e karing aliwang dios. Aku ing karelang pamintuan.

¹⁰ Agyang king marayung Etiopia datang lang magdalang ain para kanaku ding misalbag a taung kanakung pinili.

¹¹ King panaun a ita, O balen ku, e na kailangan ing pikarine yu ing pamag-rebeldi yu kanaku. Ilako ke ing ninumang magmatas at magpalalu at kapilan man e na kayu pasibayung magrebelding laban kanaku king banal kung bunduk-bundukan.

¹² Lakuan ku la karin ding taung mipasakitan at mapagpakumbaba a lumapit kanaku ban maniawad saup.

¹³ E na la gawang nanumang e mayap kenu man ding mitagan nang memalen ning Israel o magsalitang kalaraman o maglinlang. Mipala la at mipanatag a kabilian, at ala nang takut kaninu man.

¹⁴ Magkanta kang masikan, O Zion; kulisak ka, O Israel! King mabilug mung pusu magsaya ka, O Jerusalem!

¹⁵ Tiknang na na ning Ginu ing kekang parusa; leko na na la sablang kekang kalaban. Ing Ginu, ing Ari ning Israel, atyu keka; ala nang sangkan ngeni ban tumakut ka.

¹⁶ Ing panaun daratang nung kapilan da sabian king Jerusalem, E ka tatakut, siudad ning Zion! E mu paintulut ing mangalambut la ding kekang gamat!

¹⁷ Ing Ginung kekang Dios atyu keka; dinan na kang tagumpe uli ning upaya na. Manakit yang tula keka ing Ginu, at king lugud na ibayu na ing bie mu. Magkanta ya at tumula keka,

¹⁸ masaya yang anti ding taung magpiesta. Ngana ning Ginu, Pinupus ku na ing miplanu mung kasiran, at leko ku na ing kekang kamarinayan.

¹⁹ Ing panaun daratang na! Parusan ku la ding kekayu manalipusta; ding sablang pile kaku lang sagipan, at ding miyugse karing bansang dayuan kaku lang ibalik karing karelang tuknangan. Alilan kung dangalan ing karelang kamarinayan, at ing mabilug a yatu purian na la ngan.

²⁰ Ing panaun daratang na! Iyuli ku na la ding mikalat yung memalen. Wa, gawan da kayung pikabaluan king yatung kabilugan, at ipala da kayung pasibayu. Ing Ginu ya ing migsalita.