1

¹ Iti ya ing mensahi na ning Ginu a sinabi na kang propeta Habakuk.

² O Ginu, angga pa kapilan bayu mu pakibatan ing aduan kung kasaupan? Angga pa kapilan bayu mu ke iligtas king pamipasakit ding kalaban?

³ Baket apibata mung akakit ing makanyan a kaguluan? Baket apibata mung lalawan ing mararapat a e mayap? Makapadurut kanaku ing kasiran ampon pamipasakit at ating labanan at pamipatepate nukarin mang lugal.

⁴ Maina ya at ala yang ulaga ing batas, at alang bitasang hustisia a miyabie. Mibababo la ring taung e mayap kesa karing mayap, inya kabaligtaran ing malilyari king hustisia.

⁵ Kanita ngana ning Ginu karing memalen na, Isundu yu ing pamagumasid karing bansang makapadurut kekayu at masdan kayu king akit yu. Gawa kung bage a e yu abut paniwalan potang iti abalitan yu.

⁶ Paburen ku lang mibabo king upaya ding tau Babilonia, detang taung mabagsik at alang karatunan. Magmartsa lang papunta karing miyayaliwa nang suluk ning yatu ban lusuban da la ring aliwang bansa.

⁷ Sasalbag da ing takut ampon kilabut, at uli na ning kapalaluan da, tuturing dang batas ing mismung sarili ra.

⁸ Mabilis lang tutu ding kabayu ra kesa karing leopardo; mabagsik lang maygit karing asung-gubat. Daratang lang ibat karing marayung bansa ding karelang sundalung pakakabayu; kukurakul la. Mengari la karing agila a sisimbad mabilis king pamanikma ra king animal a itikma da.

⁹ Pasulung ing lakad da ring sundalus na ban lumusub ampon manampalasan, at gagalgal ya king takut ing balang metung karing tau kabang daratang la. Marakal lang anting balas ding karelang bihag.

¹⁰ Lalapastanganan da la ring ari at gagawan da lang pikaylian ding taung matas a katungkulan. Alang kuta a makasabat karela; mibubuntun lang gabun karing tulid nang pader at kaybat bihagan de.

¹¹ Kaybat lumabas lang anting angin at bigla lang mawala deting tau Babilonia a ing sikanan da ya ing karelang dios.

¹² Ginu, manibat na kanitang minuna ika na ing Dios. Ika ing kanakung Dios, ing banal at alang angga. Ginu a kanakung Dios at talaingat, pinili mu la ding tau Babilonia at gewa mu lang masikan ban parusan da kami.

¹³ Makananu mu lang apibata deting taung traidul at e mayap? Tutu lang banal ding kekang mata para lumawe ka king e mayap at e mu la apibatang akakit ding taung darapat e mayap. Baket e ka bubulad kabang pamaten da la ring taung mas mayap kesa karela? fig,,,,,Makananu mu lang apibata deting taung traidul at e mayap?,(1:13)fig*

¹⁴ Obat ayayamyam mung ibilang lang anting asan o ayup-ayupan ding taung alang manimuna karela?

¹⁵ Pandakpan da la ring tau king kapamilatan na ning taga; balamu wari asan la. Guguyud da la karing lambat at kukulisak la king tula uli da ring arakap da!

¹⁶ Sasamban da la at ampanganan ain-sakripisyu ding karelang lambat, uling ding lambat da ilang babie karela king pekamayap king sabla-sabla.

¹⁷ Manatili da la kayang gagamitan ding espada ra at e la kaya patugut manlasak alang lunus karing bansa?

2

¹ Mukiat ku king kanakung toreng-batiawan at manaya ku ban abalu ku nung nanu ing sabian na ning Ginu kanaku, at nung nanu ing pakibat na tungkul king kanakung reklamu.

² Iti ya ing pekibat na ning Ginu kanaku: Isulat mung masalese karing tinabas a batung pisusulatan ing pepabalu ku keka ban malyari yang mabasa king metung mung saglit.

³ Isulat mu uling e pa miras ing panaun para mipatutuan iti. Oneng mabilis neng daratang ing panaun ban ing papakit ku keka mipaltutu. Balamu mabagal ing paniatang na, oneng panayan me, siguradung marapat; e ya mayantala.

⁴ At iti ya ing mensahi: E la miligtas detang e mayap, oneng detang matulid a pamibiebie mie la, uli na ning kasalpantayanan da king Dios.

⁵ Mapaglinlang ing pibandian. Palalu la at ala lang karatunan ding taung sakim; kalupa na ning kamatayan, e la bitasang patugut. Inya lulusuban de ing bansa kaybat ning metung a bansa para king sarili dang kapakanan.

⁶ Ding taung mesakup isunu da la at insultuan ding taung miniakup karela. Sabian da karela, Kakuanan yu ing e kekayu, oneng makalunus na kayo! Angga kapilan ing magpakabandi kayu king kapamilatan na ning pamamilit yung mamayad la ding mika utang kekayu?

⁷ Oneng ikayung meniakup karing aliwa, king e yu piadian, mikutkut kayu naman king utang at mapilit kayung mamayad patubu. Datang la ding kalaban at pagalgalan da kayu. Kuanan da ing pibandian yu!

⁸ Simsam yu la ding memalen da ring dakal a bansa, oneng ngeni detang mitagan ila ding maniamsam kekayu, uli na ning pamakamate depat yu at uli na ning kasiran a piniapat yu karing tau keti king yatu at karing miyayaliwa nang siudad.

⁹ Makalunus na kayo! Agawa yu lang mabandi ding kekayung pamilya king kapamilatan na ning pamaniamsam, at pekikuanan yung ligtas la ding bale yu king nanumang sakuna at panganib!

¹⁰ Oneng ding dapat yu ilang migdalang kamarinayan karing kekayung pamilya. Ing depat yung kasiran karing aliwang bansa ya ing mismung pepasari king sarili yung kasiran.

¹¹ Pati batu da ring pader kukulisak lang laban kekayu at kakablas da ring dingding ing kulisak.

¹² Makalunus na kayo! Tinatag ye ing metung a siudad king kapamilatan na ning pamangawang krimen, at peparagul ye iti king kapamilatan na ning pamakamate.

¹³ Megisan la sikanan ding bansang sekupan yu king obrang ala namang kabaldugan, at kaybat muli mu king api ing sablang pegobran da. Ing Ginung Mayupaya ya ing makirapat kaniti.

¹⁴ Nung makananu lang mitmung danum ding dagat makanyan ya namang kumatmu ing yatu king beluan tungkul king ligaya na ning Ginu.

¹⁵ Makalunus na kayo! Pemakarinayan yu la king kekayung bigsikan at pinyira dangalan ding kekayung kasiping a bansa; mipaid lang anti ding malasing uli na ning depat yu karela.

¹⁶ E lumuat ikayu naman ing mibuntunanan kamarinayan king lugal na ning dangalan. Ikayu man minum kayung alak at mipaid kayu. Painuman na kayu ning Ginu king mismung kopang kekayung pemarusa, at miyalilan kamarinayan ing kekayung dangalan.

¹⁷ Kinutud yu la ding tanaman karing kagubatan ning Lebanon; ngeni ikayu naman ing makutud. Pete yu la ding animal na; ngeni ding mamatakut kekayu ila ding animal. Iti mapalyari uli na ning dakal a pamakamate depat yu, at uli na ning kasiran a piniapat yu karing tau keti king yatu at karing miyayaliwa nang siudad.

¹⁸ Nanung kwenta na ning metung a idolo? Metung ya mung bage gewa na ning tau, at ala yang sasabian keka nune mu pawang kalaraman. Nanung pakinabang na ning tau king pamanalig na king mismung gewa nang idolo a e man makapaniabi?

¹⁹ Makalunus na kayo! Sasabian yu king kapirasung dutung, Migising ka! o king kapirasung batu, Mibangun ka! Atin ya waring malyaring apabalu kekayu ing metung a idolo? Mapalyaring belutanan yang pilak at gintu, oneng e ne man mabie.

²⁰ Ing Ginu atyu king banal nang Templo: paburen yung ing balang tau keti king yatu magtahimik ya king arapan na. mik ya king arapan na.

3

¹ Iti metung yang panalangin na ning propeta Habakuk:

² O Ginu, abalitan ku ing kekang depat, at mengatmu kung takut at kagalangan. Ngeni pasibayu mu la sanang daptan king kekeng kapanaunan ding makapagmulala mung dapat a sadia mung daraptan. Malunus ka, agyang neng mua ka.

³ Pasibayu yang daratang ing Dios ibat king Edom, daratang ya ing banal a Dios ibat karing bunduk-bundukan ning Paran. Ing ligaya na tatakpan ne ing banua, at ing yatu mitmu ya king kapurian na.

⁴ Daratang yang maslag anti ing kildap; ing sala lulual king gamat na nung nukarin makapampan ing kayupayan na.

⁵ Salut ing parala na arapan na, at utusan ne ing kamatayan tuki king bie na.

⁶ Potang tuknang ya, yatu mamayun ya; at potang maglalawe ya, bansa gagalgal la. Ding alang anggang kabundukan misalbag la ngan; ding alang kapupusan a bunduk-bundukan lalbug la, ding bunduk-bundukan a delanan na kanitang minunang panaun.

⁷ Ikit ku lang mitakutan ding memalen ning Cusan, at gagalgal ding tau king Midian.

⁸ Ginu, ding ilug wari ila ding keka pepamua? Ing dagat kaya ya ing mekapamua keka? Karing babo ding biga ka makasake; ing bagyu yang kekang karwahe; kabang ing kekang balen pagdala meng tagumpe.

⁹ Makasadia meng gamitan ing kekang pana; makasadia ka ban ding paslu ibugnus la. Ing kekang kildap king yatu ya ing mekapikawani.

¹⁰ Inyang ding bunduk ikit da ka, ginalgal la; danum mibulus ibat banua. Ing danum lalam ning yatu mekimut, at ding karelang alun mitas lang e mu nanu.

¹¹ King kislap ding mabilis mung paslu at ing kintab ning tandus mu, ing aldo at ing bulan tinuknang la king lakad da.

¹² King mua mu lipat-lipatan meng yatu, ding bansa keka lang demusak uli ning mua mung milalablab.

¹³ Linual ka ban iligtas me ing kekang balen, ban ing aring kekang pinili keka yang sagipan. Digsa me ing manimuna da ring taung e mayap, at ding talatuki na pete mong lubus.

¹⁴ Ding kekang paslu kinutkut la king komandanti ning armada na kanitang dinatang yang anting alisus ban ikami ing isambulat na, kalupa ra detang pakasalikut maglupig karing pakakalulu.

¹⁵ Demusak me karing kekang kabayu ing dagat, at migbula ing mayupayang danuman.

¹⁶ Iti ngan abalitan ku at gagalgal ku; ding kakung labi gagalgal la king takut. Ing katawan ku mengalambut ya, at mengaina la ding bitis ku. Ing paniatang ning kayaldawan tahimik kung panenayan, potang ing Dios parusan na na la ding sinalake kekata ngan.

¹⁷ Agyang ding tanaman a higera ala lang bunga, at ding tutubung ubas, agyamang magpalya ing pupul da ring olibo at karing marangle alang pupul a binutil, agyamang ding tupa mate la ngan at alang baka karing kural,

¹⁸ matula ku pa mu rin at masaya, uling ing Ginung Dios ya ing kakung talapagligtas.

¹⁹ Ing babie sikanan kaku ya ing Mayupayang Ginu; gagawan na kung matatag a talakad antimo ding usa, at ingatan na ku karing kabundukan.