1

¹ Iti ya ing mensahi tungkul king Nineve, ing istoria tungkul king vision a ikit nang Nahum a tau Elkos.

² E na paintulut ning Ginung Dios ing mika karibal ya; paparusan na la detang sasalangsang king kaburian na. Ablasan na la uli ning mua na.

³ E nia kabud mimimua ing Ginu agyamang mayupaya ya, at e na paintulut ing e la magdusa ding mikasala. Lalto ing bagyu nung nu ya lalakad ing Ginu, ding biga alikabuk da la ring bitis na!

⁴ Utusan ne ing dagat, at iti langi ya! Ding ilug palangian na la! Ding marangle ning Bashan lalangi la, ing Bunduk ning Carmel kukupas ya, at ding sampaga ning Lebanon malalanat la.

⁵ Gagalgal la ding bunduk kabud akit de ing Ginu; malalaso lang bunduk king arapan na. Gagalgal ya ing yatu at pati ding tau potang papakit ya ing Ginu.

⁶ Potang mua ya, ninu ing miligtas? Ninu ing makapibata king bagsik ning mua na? Ibulus na ing mikakalabkab nang mua; arapan na batu malaso la.

⁷ Ing Ginu mayap ya; ingatan na lang memalen na king oras ning kaligaligan da; ding magbalik sasaupan na la.

⁸ Anting bubulusuk a albug lubus na lang paten ding kalaban na; parala ne ing kamatayan karetang sasalangsang.

⁹ Nanu ing tatangka yu laban king Ginu? Lubus na kayung paten. Ala metung man ing aulitan na pa ing kapanialangsangan king Ginu.

¹⁰ Anting makakulaput a suksuk at malanging are, masilab kayu ngan!

¹¹ Ibat keka, Nineve, ating linto lalaking mignasang e mayap; migtangka laban king Ginu.

¹² Nganang sasabi ning Ginu karing memalen na ning Israel, Agyang masikan la ding tau Asiria at e abilang-bilang, makanyan man masambut la at lumbug. Taung kanakung pinili, pepasakitan da kayu, oneng e ku na daptan pasibayu yan.

¹³ Ngeni, angganan ku na ing upaya na ning Asiria kekayu, at patluran ku la ding tanikala a makagapus kekayu.

¹⁴ Iti ya ing sinabi na ning Ginu tungkul karing tau Asiria: Mabura la lagyu. Lasawan ku la ding idolo a atyu karing templo da ring kikilalanan dang dios. Magsadia kung kutkutan para karing tau Asiria; ala lang matulid mie!

¹⁵ Lawan yu, daratang ya ing tubud babo da ring bunduk; magdala yang mayap a balita! Daratang ne ban ibalita na ing tagumpe! Memalen ning Juda, pagselebran yu la ding kekayung piesta at tuparan ing pangakung penata yu king Dios. E na la lumusub pasibayu king bansa yu ding taung e mayap. Lubus na lang mawala!

2

¹ Nineve, atyu na ka lalam ning pangasalake! Ing upaya a manlasak keka dinatang ne. Mamunta na kayu karing puestu yu! Banten yu ne ing dalan! Magsadia na kayu king pamakilaban! (

² Uling malapit na niang ibalik ning Ginu ing dangalan na ning Israel, itang dangalan na bayu re penakawanan ding kalaban.)

³ Ding sundalung kalaban magdala lang malutung kalasag, at maka-imalan la ngan malutu. Magsadia na lang salake! Kikislap lang anting api ding karelang karwahe! Lundag-lundag la ding kabayu ra!

⁴ Ding karwahe da sagasagana lang mabilis king dalan, balik-balik la karing malualas nang suluk ning siudad. Kikislap lang anti ding sulu, at mabilis lang anti ing kildap.

⁵ Meyaus la ding opisyal; mitakid la kabang lulusub la. Milayi lang minta king pader, at ginawang kalasag para king pamakilaban.

⁶ Ding pasbul dalan lele ning ilug mibuklat la; king palasyu mitakutan la.

⁷ Mebihag ya ing reyna; mumungul lang anting patipati ding ipus na; durugdugan da lang salu ra king lungkut da.

⁸ Anting danum a mamagus ibat king mesirang dike tekasan de ring memalen ing Nineve! Magbalik kayu! Magbalik kayu! ngana ning kulisak, oneng metung man alang migbalik.

⁹ Samsaman yu ing pilak! Ing gintu kekong kuanan! Ing siudad mitmu yang pibandian!

¹⁰ Melasak ya ing siudad ning Nineve, ala yang katau-tau! King takut malalaso lang pusu; gagalgal la ding tud, sikanan mebating; maputla lang karelang lupa.

¹¹ Nukarin ya ngeni ing siudad a king misan anti yang kueba ding leon, ing lugal nung nukarin da la pakanan ding anak da, nung nu ding leon at ding anak da mamunta la, at ligtas king nanumang disgrasya?

¹² Pete ne ning leon ing biktima na; piglapak ne para king asawa na at karing anak da; kitmuan ne king mengalapak a karni ing kueba na.

¹³ Aku ing kekayung kalaban! nganang sasabi ning Ginung Mayupaya. Silaban ku la ding karwahe yu. Mate la king gera ding sundalus yu at kuanan ku ing sablang bage kinua yu karing aliwa. E na maramdam ing siwala da ring lalaking tubud yu. fig,,,,,Ing Pangabagsak na ning Nineve,(2)fig*

3

¹ Makalunus ya ing malaram at makamate siudad, mitmu ya king pibandian ban panakawanan at samsaman!

² Ing barug ning latiku kekong pakiramdaman, ing lagitik da ring parugang, ing luksu da ring kabayu, ing inge da ring karwahe!

³ Lulusub la ding lalaking pakakabayu, kikislap la ding espada at tandus da! Matas la pangatambak ding bangke, e la abilang-bilang ding taung mete; ding tau mangatakid la karela!

⁴ Nineve, ing babaing magtinda king katawan na mipaparusan ya. Makawili ya at mitmu king makabighaning banglu; megayuma la king Nineve ding bansa at meging ipus-ipusan na la.

⁵ Ing Ginung Mayupaya sasabian na, Nineve, laban ku keka! Lubasan da ka, at paintulutan ko ding bansa ing akit da sablang kekang kamarinayan.

⁶ Katmuan da kang dinat; ilako da ka dangalan at mitakutan la ding lumawe keka.

⁷ Mangapaurung la ding sablang manakit keka. Sabian da, Mibagsak ne ing Nineve! Ninu ing munie lunus king Nineve? Ninu ing mamatula king Nineve?

⁸ Nineve, mas mayap ka pa wari kesa king Tebes, ing sentru ning Ehipto? Ya man atin yang ilug a anting pader, ing Ilug ning Nilo ya ing dipensa na.

⁹ Ya ing mamahala king bansang Etiopia at Ehipto; alang kayangganan ing upaya na; kasangga ne ing Libya.

¹⁰ Makanyan man mebihag la ding memalen na ning Tebes, at miyugse karing aliwang lugal. Pamalupaluan da la ding anak da king balang kantu da ring dalan. Pakatanikala da lang dela ding marangal dang lalaki, at pirakerakayan da la ring mekabihag karela.

¹¹ Nineve, ika man malasing ka! Magkapilit ka namang makatakas karing kekang kalaban.

¹² Mangari la ding sabla mung kuta karing tanaman a higerang ating malulut a bunga; ugunan la mu at manakbag la ding bunga ra king kekang asbuk!

¹³ Mengari la karing babai ding kekang sundalus at e re adipensa ing bansa karing kalaban. Ing api ya ing sumira karing kandadu da ring pasbul dalan.

¹⁴ Saklu na kang danum bayu datang ing pangakubkub, at pakatibe mu la ding kekang kuta! Damusakan mu na ing pila ban gawang laryu at isadia mu na la ding ulmahan da!

¹⁵ Nanuman ing daptan mu, masilab ka pa mu rin o mate king labanan. Manapnap ka anti ding tanaman a liklak da ring durun. Darakal kang anti ding durun!

¹⁶ Mas dakal la ding negosianting apalto mu kesa karing batuin na ning banua! Oneng ngeni mebating lang anti ding durun a sinulapo.

¹⁷ Mengari la ding kekang opisyal karing dakal a durun a manatili karing pader neng aldo marimla. Oneng potang sunlag ne ing aldo, sulapo la at alang makibalu nung nu la minta!

¹⁸ Ari ning Asiria, mete na la ding kekang gobernador at matudtud na lang maniaman ding marangal mung lalaki! Pakakalat la ding kekang memalen karing bunduk, at ala metung man a makapagbalik karela karing tuknangan da.

¹⁹ Ala nang pangapaldan para karing kekang kapanamdaman, at e na la maulu ding sugat mu. Mamalakpak la king tula ding sablang makaramdam king balita ning pangabagsak mu. Atin waring mekaligtas king alang kalupa mung bigsikan?