1

¹ Iti ya ing mensahi a binie na ning Ginu kang Mikeas a tau Moreset kanitang di Jotam, Ahaz, at Hezekia ilang ari na ning Juda. Pepabalu na la ngan ning Ginu kang Mikeas deting sablang bage tungkul king Samaria at Jerusalem.

² Ikong sablang bansa, pakiramdaman yu iti; makiramdam kayu ikong manuknangan keti king yatu! Magtestigu yang laban kekayu ing Ginung Dios. Makiramdam kayu! Oyan magsalita ya karin king templo na banua.

³ Ing Ginu daratang yang ibat king banal nang lugal; kuldas ya at lumakad babo da ring bunduk.

⁴ Malaso la ding bunduk a tutukluan na kalupa ning kandila libutad ning api; magus la karing kapatagan anting danum a masalusung mababaldug ibat karing bunduk-bundukan.

⁵ Mapalyari ngan iting sabla uling mikasala la ding memalen na ning Israel at linaban la king Dios. Ninu ing pamarsalanan king pamaglaban na ning Israel? Alang aliwa nune ing Samaria, ing sentrung siudad! Ninu ing mikakasala uli na ning pamanyambang aliwang dios king Juda? Alang aliwa nune ing Jerusalem mismu!

⁶ Inya sasabian na ning Ginu, Gawan keng katumpuk a gabun ing Samaria king libutad ning marangle a pitatamnan karing ubas. Ibulus ku la ding batu nang misalbag ning siudad king kapatagan at palto ku la ding pundasyun na.

⁷ Pamalbalan ku lang malati ding sabla nang idolo at dulukan ku king api ing sablang bage miyabie karing babaing susuyu karing karelang altar at muli la mung katumpuk a sukal ding sablang rebultu na. Ikua na la ning Samaria deting sablang bage bilang upa da ring babaing misusuyu karing karelang katawan king oras ning pamanyamba kareting idolo. Ngeni idala da la ngan deti ding kalaban na ban samban da la king aliwang lugal.

⁸ Kanita nganang Mikeas, Uli na niti, magpaldas ku at manangis. Ban ipakilala ing kalungkutan ku lumakad kung makatapak at alang imalan king dalan. Ngulangul kung anti ding asu at gumaga kung anti ing ayup a ostrich.

⁹ E la malyaring kumayap ding sugat ning Samaria. E lumuat manamdaman ya namang anti kareti ing Juda; miras na ing kasiran karing pasbul dalan na mismu ning Jerusalem nung nu la manuknangan ding memalen ku.

¹⁰ E yu pamalita karing kalaban tamu karin Gat ing pangasambut tamu; e kayu papakit kikiak. Ikayung memalen na ning Bet Leafra, ipakit yu ing kekayung sindak king kapamilatan ning pamagkasatkasat yu king alikabuk.

¹¹ Ikayung memalen na ning Safir, lubas at mitmung dine, manaliwa kayung bansa. E la mangangas lumual ding manuknangan karing Zaanan king karelang siudad. Potang damdaman yu lang manangis ding tau ning Betezel, abalu yu king ala kayung alugalan karin.

¹² E la mipaindatun ding memalen na ning Marot king pamanaya rang kasaupan, uling pepaburen na nang milapit ning Ginu ing kasiran king Jerusalem.

¹³ Ikayung manuknangan king Lakis, isulud yu la ding kabayu karing karwahe. Pekiapusan yu ing dakal nang kasalanan ning Israel; inya ikayu ing mitulak king Jerusalem king pamikasala.

¹⁴ At ikayu namang memalen na ning Juda, mamun na kayu king balen ning Moreset Gat. E la malyaring manikuang saklolu ding ari na ning Israel king balen ning Aczib.

¹⁵ Memalen na ning Maresa, paburen na kayung manabu ning Ginu karing gamat na ning metung a kalaban a mamihag king balen yu. Salikut la ding manimuna na ning Israel king kueba karin Adullam.

¹⁶ Memalen na ning Juda, pututan yu na ing buak yu bilang pamagpaldas yu karing kekayung anak a pakamalan. Kalbuan yu na la ding buntuk yu anti ing ayup a buitre, uling kuanan da la kekayu ding anak yu at miyugse la king aliwang bansa.

2

¹ Makapangilabut ing kararasan da ring kera-kerang e matudtud kabang mibabalak lang e mayap! Kabuklat ning masala, kabud mirinan lang oportunidad, daraptan da itang e mayap a karelang binalak.

² Kuanan da la ring marangle nung mangailangan la; nung bale na la man ding kailangan da, kakuanan da la naman. Ala yang kapilmian a bili ing pamilya na o ing pibandian na ning tau.

³ Inya sasabian na ning Ginu, Babalakan ke ing metung a kasakitan para kekayu at e ye malyaring alisian. Uli na ning miras kekayu, e na kayu pasibayung lumakad pang mitmung kayabangan.

⁴ Potang datang na ing panaun a ita, gamitan da ring tau ing kwentu tungkul kekayu antimong alimbawa na ning kabiguan at ikanta de iting kanta ning kabiguan tungkul king bie yung delanan: Lubus keng misaldak! Kinua ning Ginu ing gabun mi, at binie na karing memihag kekami.

⁵ Uli na niti, potang datang ing panaun a misubling pasibayu iting gabun karing taung pinili na ning Ginu, e ya mirakayanan ing ninuman kekayu.

⁶ Ngarang sumabi kanaku ding tau, Patugut na kang manaral kekami! E ka magsalitang makanyan. E na ke ibili ning Dios king kamarinayan.

⁷ Misumpa la wari ding memalen na ning Israel? Milako ne wari kapibabatan ing Ginu? Daptan na la wari ning Ginu ding bage a anti karen? E ya wari magsalitang mitmung ganaka karing darapat matulid?

⁸ Nganang makibat ning Ginu, Oneng ikayu manalakaran kayung anting kalaban da ring taung kanakung pinili. Agyang ding sundalus a mumuli ibat king gera isipan da king kauli ra bale mipanatag na la bili, oneng atyu kayu karin, manenayang maniamsam pati karing balabal da.

⁹ Panabi yu la ding babaing mebalu ning balen ku karing pibalebaleng karelang pakamalan, at leko yu karing karelang anak ing ligaya a makasadia kung ibie karela.

¹⁰ Sulung, mabating na kayu; ala nang karatunan pang makatagan keti. Uli da ring kasalanan yu datang at datang ing kasiran keti.

¹¹ Ing propetang buri da ring taung deti ya ing propetang lakad-lakad mangalat kalaraman at kapamiraitnan at sasabing, Ing alak at matapang a inuman magus para kekayu.

¹² Oneng ikayung mitagan a memalen na ning Israel tipunan da kayung miyabe-abe. Tipunan da kayung anting tupang mumuli king karelang kural. Anting pipagpastulan a mitmung tupa, mikatmuan yang pasibayu ing bansa yu karing dakal a tau.

¹³ Ibuklat ne ning Dios ing dalan para karela, at tairan na lang lumual ibat king pangayugse ra king aliwang bansa. Lumual lang mirarapal karing pasbul dalan ning siudad at lumakad lang malaya. Ing karelang ari, ing Ginu mismu, ya ing tumaid king paglual da.

3

¹ Makiramdam kayu, ikayung manimuna na ning Israel, ikayung pamuntuk ning Israel! Sukat sana ing pagmalasakitan yu ing hustisia,

² oneng kasaman yu ing mayap at luluguran yu ing e mayap. Mabie lang babakbakan yu balat ding memalen ku at paglaputan yu ing laman karing butul da.

³ Kakanan yu la ding memalen ku. Tatalipan yu la balat, pamaklian yu la butul at panabakan anting karning lulutu yu king kaldera.

⁴ Daratang na ing panaun potang ikayu ing maus king Ginu, oneng e na kayu pakibatan. E na la pakiramdaman ding panalangin yu uli na ning e mayap yung depatan.

⁵ Mapipirait la ding memalen ku karing propetang mangakung kapayapan karetang babie upa karela, oneng pamatakut da ing gera karetang alang aibie upa. Nganang sasabi ning Ginu kareting propeta,

⁶ Uling lilinlangan yu la ding taung kanakung pinili, e na kayu manakit pang vision at e na kayu makapanula pa. Propeta, ditak namu ing makatagan king aldo yu; mapupupus ne ing aldo yu.

⁷ Mangapakarine la detang manula tungkul king daratang a panaun uling e meging tutu ing karelang ula. Mabigu la ngan uli na ning e na na la pakibatan ning Dios.

⁸ Oneng tungkul naman kanaku, kakatmuan na ku ning Ginu king espiritu at king upaya na, ning katuliran at tetagan a lub ban sabian ku la karing memalen na ning Israel ding karelang kasalanan.

⁹ Makiramdam kayu kanaku, ikayung manimuna na ning Israel, ikayung masama king hustisia at mamaluktut king matulid.

¹⁰ Tatalakad ye ing siudad ning Dios, ing Jerusalem, king babo na ning pundasyun na ning pamakamate at alang hustisia.

¹¹ Manungkulan la ding manimuna ning siudad para mu king suhul, babie lang palino ding pari tungkul king Kautusan uli na ning salapi; pabayad la naman ding propeta king pamanula ra at sasabian da ngan king atyu karela ing Ginu. Ngara, E ya wari atyu libutad tamu ing Gino? Inya alang e mayap a dugpa kekatamu.

¹² Uli yu masarul ya anting marangle ing Zion, maging metung yang buntun na ning kasiran ing Jerusalem, at maging metung yang kagubatan ing bunduk a katatalakaran na ning Templo.

4

¹ Karing aldo a daratang ing bunduk nung nu ya makatalakad ing Templo ning Ginu ya ing maging matas dili karing bunduk, maygit matas karing sablang bunduk-bundukan. Dakal lang bansang lumapit king Ginu,

² at ding karelang memalen sabian da, Tara mukiat tamu king bunduk ning Ginu, king Templo ning Dios ning Israel. Ituru na kekatamu nung nanu ing buri nang daptan tamu; lumakad tamu karing dalan a pinili na. Ing tuturu ning Ginu manibatan Jerusalem; manibat king Zion magsalita ya karing taung pinili na.

³ Lutasan na ing problema ning bansa king bansang kalupa na, at ing problema ding maragul a upaya malapit la man o marayu la. Gawan da lang sudsud ding espada ra, at sabungke ding tandus da. E na la kapilan man milaban-laban ni pagsadian pa ing gera.

⁴ Ing balang metung mibiebie ya king kapayapan libutad ning sarili nang ubasan at tanaman a higera, at ala nang munie takut kaninu man. Iti ya ing pengaku na ning Ginung Mayupaya.

⁵ Samba ya at mamintu ing balang bansa king kikilalanan nang dios, oneng itamu samba tamu at mamintu king Ginung kekatamung Dios king kapilan pa man.

⁶ Daratang ing panaun, nganang sasabi ning Ginu, nung kapilan ku la tipunan miyabe-abe ding taung kakung perusan, ding taung dinalan kasakitan king pangayugse ra king aliwang bansa.

⁷ Melumpu la at makarayu king bansang tibuan da, oneng dinan ku lang bayung pamagumpisa ding mitagan at maging metung lang maragul a bansa. Aku ing sumakup karela king Bunduk ning Zion manibat king panaun a ita at king alang angga.

⁸ At ika, Jerusalem a tore a pipagbanten na ning Dios a antimong pastul a magbante karing memalen na, pasibayu kang maging sentru na ning kayarian a keka kanitang misan.

⁹ Obat pakakulisak mu ing kiak mu? Obat balamu babai kang manganak? Uli na wari ning ala na kang ari at mete na la ding tagapayu mo?

¹⁰ Memalen na ning Jerusalem, mamalipit na kayu at saingsing king kaplas anti ing babaing manganak, uling ngeni lakuan yu ne ing siudad at manuknangan kayu king marangle. Kailangan ing munta kayu Babilonia. Oneng karin iligtas na kayu ning Ginu karing kalaban yu.

¹¹ Mitipun-tipun la ding dakal a bansa ban lusuban da ka. Sasabian da, Kailangan yang misaldak ing Jerusalem! Kailangan ta yang akit melasak iting siudad!

¹² Oneng e ra balu deting bansa ing isipan na ning Ginu. E ra balu king tinipun na la ban miyabe-abe lang parusan na antimo ing makayaptas a binutil a madadara.

¹³ Nganang sasabi ning Ginu, Memalen ning Israel, sulung, parusan yu la ding kalaban yu. Gawan da kayung masikan anting toro a ating sagung bakal at ating kuku a tangsu. Lasawan mu la ding dakal a bansa at ing pibandian a ikua ra king pamanampalasan iyain yu kanaku, ing Ginu ning mabilug a yatu.

5

¹ Memalen ning Jerusalem, tipunan yu la ding sundalus yu! Kukubkuban da na katamu! Lulusuban da ne ring kalaban ing manimuna na ning Israel!

² Nganang sasabi ning Ginu, Betlehem Efrata, metung ka karing malating diling balen na ning Juda, oneng keka ya lunto ing metung a manimuna para king Israel. Malyaring akit me ing pamilya na king metung a pamilyang atyu na kanita pang minumang panaun.

³ Inya paburen na lang manabu ning Ginu ding taung pinili na karing kalaban da angga king ibait ne ning metung a babai ing anak nang lalaki. Kanita ding kabalen nang miyugse karing aliwang bansa akayabe da lang pasibayu ding mismung kabalen da.

⁴ Potang datang ne, pamahalan na la ding kabalen na king upayang manibatan king Ginu at king kamalan na mismu ning Ginung Dios. Mibiebie lang panatag ding memalen na, uling tanggapan da ring tau king mabilug a yatu ing dangalan na,

⁵ at patupad na ing kapayapan. Potang salakayan da ne ring tau Asiria ing bansa tamu at akua ra nang milub king pader tamu, isagupa ta la karela ding pekamasikan tamung manimuna ban lumaban karela.

⁶ At sambutan de king kapamilatan da ring karelang espada ing bansang Asiria, ing bansa nang Nimrod, at iligtas da katamu karing tau Asiria potang salakayan de ing bansa tamu.

⁷ Mangari la ding memalen na ning Israel a miligtas king ambun a makapasno a peparala na ning Ginu para karing dakal a bansa; mangari lang patak ning uran a didilig karing tutubung tanaman. Manalig la king Ginu at e king tau.

⁸ Mikalat la karing bansa; mangari la king leon a manintun pamangan king kagubatan o king pipagpastulan. Maglibutad ya karing kawan; salakayan na la ampon paglapakan at ala nang asahan pang kaligtasan.

⁹ Sambutan na la ning Israel ding kalaban na at gisanan na la ngan.

¹⁰ Nganang sasabi ning Ginu, King panaun a ita, kuanan ku la ding kekayung kabayu at paglasakan ku la ding kekayung karung panggera.

¹¹ Lasakan ku la ding siudad ning kekayung bansa at idagsa ding sablang kekayung dipensa.

¹² Siran ku la ding panggayumang gagamitan yu king pamagsalamangka at ala kung itagan karing mamamanula.

¹³ Siran ku la ding idolo yu at ding sagradu yung asias a batu. E yu na la kapilan man samban ding bage a gewa yu.

¹⁴ Ikuldas ku la ding larawan na ning diosang i Asera king kekayung bansa at lasawan ku la ding kekayung siudad.

¹⁵ At uli na ning maragul kung mua, papamayaran ku la ding bansang e mamintu kanaku.

6

¹ Pakiramdaman yu ing sumbung na ning Ginu laban king Israel. Talakad ka, O Ginu, at ipalad mu ing sumbung mu; paramdam mu karing bunduk at bunduk-bundukan ing sasabian mu.

² Ikayung bunduk a alang anggang pundasyun na ning yatu, makiramdam kayu king sumbung ning Ginu. Atin yang sumbung ing Ginu laban karing taung pinili na. Sabian na na ngeni ing bibintang na laban king Israel.

³ Nganang sasabi ning Ginu, Memalen ku, nanu ing depat ku kekayu? Meging pabayat ku wari kekayu? Pakibatan yu ku.

⁴ Leko da kayu ibat Ehipto at inangu king panga-ipus. Tinubud ke i Moises, i Aaron at i Miriam ban manimuna kekayu.

⁵ Ganakan yu sa, memalen ku, nung nanu ing binalak nang daptan kekayu ning Aring Balak ning Moab at nung nanu ing pekibat nang Balaam a anak nang lalaking Beor. Ganakan yu la sa ding bage mepalyari inyang lalakad kayung ibat king kampu karin Acacia papunta Gilgal. Ganakan yu la deting miyayaliwang bage at akit yu nung nanu ing depat ku ban aligtas da kayu.

⁶ Nanu ing idala ku king Ginu, ing Dios ning banua, potang samban ke? Pagdala ke wari karing baka a pabanua tua ban maging ain kung durulukan?

⁷ Tumula ya kaya ing Ginu nung pagdala keng libu-libung tupang lalaki o larung olibo a alang tuknang mamagus? Ibie ke kaya ing pangane kung anak ban mabayad ing dakal kung pamikasala?

⁸ Ali! Sinabi na na ning Ginu kekatamu nung nanu ing mayap. Ing pakiduang na kekatamu ning Ginu ya ini: daptan itang matulid, ipakit ing lugud a e kukupas, at mibiebie king mapagpakumbabang pamakiabe king kekatamung Dios.

⁹ Metung a kabiasnan ing mika takut king Ginu. Mamaus ya king siudad. Ngana, Makiramdam kayu, O memalen a mititipun king siudad!

¹⁰ Atyu la karing pibalebale da ring e mayap a tau ding pibandian a karelang atipun king kapamilatan na ning kapamiraitnan. Gagamit lang e ustung timbangan, metung a bage a tutu kung kasaman.

¹¹ Makananu ku lang patawaran ding taung gagamit king e ustung paniukad at timbangan?

¹² Magsamantala la ding mabandi karing pakakalulu, at malaram kayu ngan.

¹³ Inya naman ngeni pegumpisan ku na ing kasiran at ing pangasaldak yu uli da ring kasalanan yu.

¹⁴ Mangan kayu, oneng e kayu kumabsi; dumanup kayu pa mu rin. Dalan yu ing tinupun yu, oneng e yu pa mu rin aligtas. Siran na ning gera ing nanumang bage a aligtas yu.

¹⁵ Salbag kayung bini, oneng e yu palutan. Paslan yu la ding olibo ban manikua kayung laru, oneng e yu akuang agamit iti. Gawa kayung alak, oneng e yu akuang ainum iti.

¹⁶ Iti mapalyari uling pekiapusan yu ing e mayap nang ugali ning Aring Omri at ing anak nang i Aring Ahab. Uling menatili kayung tutuki karing palakad da, inya ibagsak da kayu at muli kayung pikakasaman da ring sabla. Insultuan da kayu ding tau nukarin man. fig,,,,,Makananu ku lang patawaran ding taung gagamit king e ustung paniukad at timbangan?,(6:11)fig*

7

¹ Makalunus ku! Mengari ku king taung danupan a e mitaganan karing prutas da ring tanaman at ubas. Megisan la ngan ding ubas at ding maniaman a prutas a higera.

² Ala nang mitagan a taung malinis a pamibiebie king bansa at ala nang tapat king Dios. Manenaya yang oportunidad ing balang metung ban makamate king kalupa nang tau. Pakirakpan ne ning balang metung ing kabalen na.

³ Magaling la ngan king pamaniapat e mayap. Maniawad lang suhul ding pamuntuk at ukum. Sasabian na karela ning mayupayang tau ing kaburian na, inya misasapakat la.

⁴ Agyang ing pekamayap at pekamalinis a pamibiebie karela mengari la pa mu ring suksuk a alang silbi. Dinatang na ing aldo a ing Dios parusan na na la ding tau, antimo ing binie nang babala karela king kapamilatan da ring karelang talapagbante, ding propeta. Ngeni e ra balu ing daptan da.

⁵ E ye paniwalan ni pagkatiwalan ing kalupa yung tau o ing kakaluguran yu. Mingat ka king sasabian mu agyang king asawa mu.

⁶ King panaun a iti ding anak a lalaki tuturing da lang mangmang ding karelang tata, sasalangsang la ding anak a babai karing sariling ima ra, makipate la ding talasawang babai karing katuangan dang babai; ding kalaban ning tau ila mismu ding miembru na ning pamilya na.

⁷ Oneng manaya ku king paniatang na ning Ginu. Manaya kung mitmung tiwala king Dios a magligtas kanaku. Pakiramdaman na ku ning kanakung Dios.

⁸ Ala lang matulid gawan da katamung pikaylian ding kalaban tamu. Wa, misakab tamu, oneng talakad tamung pasibayu. Wa, atyu tamu ngeni king karalumduman, oneng dinan na katamung sala ning Ginu.

⁹ Mikasala tamu king Ginu, inya ngeni sukat tamung pibatan karing mapilan a panaun ing mua na. Oneng bandang tauli idipensa na katamu at itulid na la ding kamalian a depat da kekatamu. Ilual na katamu king masala; akua tamu pang akit ing pamagligtas na kekatamu.

¹⁰ Kanita akit da ring kekatamung kalaban at mangapakarine la: ding kalaban a mengantio kekatamu inyang ngarang kukutang, Antayu mo ing Ginung kekayung Dios? Akit ta la deting masambut at madakurak kalupa na ning burak karing dalan.

¹¹ Memalen ning Jerusalem, daratang na ing panaun na ning pamaglarin karing mesirang pader ning siudad. King panaun a ita, lumapad ya ing kekayung gabun.

¹² Datang la kekayu ding kabalen yu ibat karing miyayaliwang bansa: ibat Asiria king dane aslagan, ibat Ehipto king dane mauli, ibat karing bansa king lele ning Ilug ning Eufrates, ibat karing marayung dagat, at ibat karing marayung kabundukan.

¹³ Oneng maging disyerto ya ing yatu uli na ning e ustung pamibiebie da ring manuknangan kaniti. fig,,,,,Datang la kekayu ding kabalen yu ibat karing miyayaliwang bansa...,(7:12)fig*

¹⁴ Ginu, ipakit mu king ika pin ing pastul da ring kekang memalen. Agyang manuknangan lang dili-dili ra king libutad na ning kagubatan, atin pa namang gabun a mataba a makapadurut karela. Paintulutan mu lang munta at makapangan king malabung nang pastulan ning Bashan at Gilead, antimo ing king milabas a panaun.

¹⁵ Gawa kang milagru para kekami, O Ginu, antimo ing depat mu, kanitang leko mu kami ibat Ehipto.

¹⁶ Akit da ring bansa iti at mangapakarine la agyang masikan la. Isara da la ring asbuk da king pangabigu ra at tukupan da la ring balugbug da.

¹⁷ Gumapang la king alikabuk anting ubingan; lumual lang gagalgal at tatakut karing kuta ra. Lumapit lang mitmung takut king Ginung kekatamung Dios.

¹⁸ Ala nang dios a anti keka, O Ginu; patawaran mu la ding kasalanan da ring kekang memalen a mitagan. E manatili kabang-kaba ing mua mu, nune matula mung papakit kekami ing ala mung kupas a lugud.

¹⁹ Maging mapaglunus kang pasibayu kekami. Damusakan mu la ding kasalanan mi at iyugse mu la king kalalalaman na ning dagat!

²⁰ Ipakit mu ing katapatan mu at ing ala mung kupas a lugud karing kekang memalen, ding lahi nang Abraham at Jacob, antimo ing pengaku mu kanitang minunang panaun karing makatua mi.