1

¹ Misan a aldo, migsalita ya ing Ginu kang Jonas a anak nang Amitai.

² Ngana, Munta ka Nineve at magsalita kang laban keting mayupayang siudad uling e makalihim kanaku ing e mayap dang daraptan ding memalen na.

³ Oneng minta ya i Jonas king aliwang lugal ban atakasan ne ing Ginu. Minta ya king Jopa nung nukarin ne disan ing metung a barkung malapit nang mako para munta Tarsis. Binayad na ing pasahi na, at sinake yang kayabe ra ding mamahala king barku ban maglayag munta Tarsis. Isipan nang Jonas king e na ne akit ning Ginu.

⁴ Oneng peparala yang masikan a angin ing Ginu king dagat at mika bagyu. Milalu ya kasikan ing bagyu at halus malasak ya ing barku.

⁵ Mitakutan la ding marino at kinulisak lang maniawad saklolu karing sarasarili dang dios. Ban mabawas ing panganib, inugse ra king dagat ing kargang makasake king barku. Samantalang malilyari iti, minta ya i Jonas king kakilubkiluban na ning barku at karin ya metudtud maniaman.

⁶ Ikit ne ning kapitan ning barku at ngana kang Jonas, Obat atyu ka ken at matudtud? Talakad ka at maniawad kang saup king kekang dios; magkang malunus ya kekatamu at iligtas na katamu.

⁷ Ngara ding marino king metung at metung, Mibagutan tamu ban akit tamu nung ninu ing maki kasalanan king pangabili tamu kaniting panganib. Mibagutan la at ing lagyu nang Jonas ya ing mebagut.

⁸ Kanita ngara kang Jonas, Nanu ing asabi mu kanyan? Ika ing sukat ming parsalanan kaniting panganib. Nanu ing sangkan obat atyu ka keti? Isanu ing bansang ibatan mu? Nu ka makabalen?

⁹ Nganang mekibat Jonas, Metung kung Hebreo. Sasamban ke ing Ginu, ing Dios ning banua at linalang king yatu at king dagat.

¹⁰ At sinabi na pang Jonas karela king tatakasan ne ing Ginu. Mitakutan la ding marino at ngara kang Jonas, Makapangilabut ing depat mu!

¹¹ Sisikan nang sisikan ing bagyu, inya ngara, Nanu ing sukat ming daptan keka ban tuknang ing bagyu?

¹² Mekibat ya i Jonas, Iyugse yu ku king dagat at tuknang ing bagyu. Balu ku king aku ing maki kasalanan, inya mirasnan kayu kaniting masikan a bagyu.

¹³ Makanyan man, migkapilit la ding marino ban asadsad de ing barku king pampang; memagse la anggang binit da. Oneng lalung mesikan ing bagyu at ala lang akarapat.

¹⁴ Inya kinulisak la king Ginu. Ngara, O Ginu, ipakisabi ming mayap king e mu ke sa paburen mate king uli na ning bie ning lalaking iti; ala kaming kasalanan. Ika, O Ginu, ing maki pasari kaniting malilyari. Dapat mu iti!

¹⁵ At kaybat, biwat de i Jonas at inatsa re king dagat, at kanita mu rin tinuknang ing bagyu.

¹⁶ Uli na niting milyari, mitakutan la ding marino king Ginu. King takut da, minie lang ain-sakripisyu at mengaku lang sumuyu king Ginu.

¹⁷ King utus ning Ginu inakmul ne ning metung a maragul a asan i Jonas, at menatili ya king atian na ning asan kilub ding atlung aldo at atlung bengi.

2

¹ Kabang atyu ya king kilub ning atian ning maragul a asan menalangin ya i Jonas king Ginung Dios na. Ngana,

² King kakung kagipitan, O Ginu, minaus ku keka, at pekibatan mu ku. Ibat king kalalaman ning tuknangan ding mete minaus kung pasaup keka, at pekiramdaman mu ku.

³ Inugse mu ku king malalam, king malalam ning dagat, nung nu makapadurut kaku ing danum, at sasapuk la kaku ding maragul mung alun.

⁴ Bala ku mewala na ku king arapan mu, at kapilan man e ku ne akit ing banal mung Templo.

⁵ Dinatang ing danum at piputan na ku; ganap na kung pepalbug ning dagat, at ing dikut ning dagat kinatikat king buntuk ku.

⁶ Miras ku king lalam da ring bunduk, king lugal a pakasara pasbul king kapilan pa man. Oneng ika, O Ginung kakung Dios, segipan mu ku ibat king malalam.

⁷ Inyang mengalambut na ku, menalangin ku keka, O Ginu, at king banal mung Templo dimdam mu ku.

⁸ Detang sasamba karing idolong alang kabaldugan, gilutan da ing katapatan da keka.

⁹ Oneng aku magkanta kung kapurian keka; dinan da kang ain-sakripisyu, at tupad king keka pengaku ku. Ing kaligtasan manibatan king Ginu!

¹⁰ Kanita inutusan ne ning Ginu ing asan a maragul ban isuka ne i Jonas king pampang. At memintu ya ing maragul a asan.

3

¹ Migsalita yang pasibayu ing Ginu kang Jonas.

² Ngana, Jonas, munta ka Nineve, ing mayupayang siudad, at sabian mu karing tau karin ing mensahing binie ku keka.

³ Inya memintu ya king Ginu i Jonas at minta ya Nineve, ing siudad a king dagul na mangailangan atlung aldo para lakaran uli na ning maragul ya.

⁴ Melaus neng miglakad kilub ning siudad. Kaybat nang mekalakad metung a aldo nganang migsalitang masikan, Kilub ding apat apulung aldo malasak ya ing Nineve!

⁵ Meniwala la ding memalen na ning Nineve king mensahi ning Dios. Inya pikayari da king mag-ayunu ya ing balang metung magumpisa king pekamaragul angga king malating dili, misulud lang imalan a magaspang ban ipakit da king sinisi la king depat dang pamikasala.

⁶ Inyang abalitan na ning ari ning Nineve iti, tinalakad yang ibat king tronu na; likas ne ing balabal na, misulud yang imalan a magaspang at linukluk ya king abu.

⁷ Pepalual yang metung a kapabaluan karing memalen na ning Nineve. Ngana, Iti kautusan yang ibat king ari at karing pamuntuk na: Alang mamangan metung man kekayu; makabawal karing sabla: tau, baka, at tupa ing mangan la at minum.

⁸ Sukat lang misulud imalan a magaspang ding sablang tau at animal. Sukat yang manalangin taimtim ing balang metung king Dios, at sukat nang gulutan ing ugali nang e mayap at ing e ustung daraptan na.

⁹ Mapalyaring alilan na ning Dios ing banta na; mapalyaring e ne mimua kekatamu at e tamu malaus mate!

¹⁰ Ikit na ning Dios ing depatan da ring tau; ikit na king likuan da na ing dapat dang e mayap. Inya binayu na ning Dios ing banta na, at e na na belaus ing sinabi nang parusan na la.

4

¹ Mimua ya i Jonas lugal king tumula ya kaniting milyari.

² Inya nganang menalangin, Ginu, bayu ke likuan ing kanakung tuknangan e ku wari sinabi keka king iti ya ing marahil mung daptan? Iti ya ing sangkan nung inya migkapilit kung tinakas papunta king Tarsis! Balu ku king Dios kang malugud at mapaglunus, king manatili kang mapibabata, maganaka, at manatiling makasadiang magbayu balak at e mamarusa.

³ Inya naman, Ginu, paburen mung mate na ku. Mas mayap pa ing mete ku kesa king mabie ku.

⁴ Ngana ning Ginu, Jonas, ala kang matulid mimua.

⁵ Minta ya i Jonas king dane aslagan na ning siudad at karin ya linukluk. Ginawa yang balag at sinalilung ya karin; pagumasdan na nung nanu ing malyari king Nineve.

⁶ Kanita pepatubuan ne ning Ginung Dios ing metung a tanaman ban munie salilung kang Jonas at ban e ya manamdaman pali. At tutu yang mesaya i Jonas king tinubung tanaman.

⁷ Oneng kabukasan, inyang saslag ne ing aldo, inutusan ne ning Dios ing metung a ulad ban siran ne ing tanaman, at mete ya ing tanaman.

⁸ At inyang sinlag ne ing aldo, ing Dios peparala yang mapaling angin a ibat king aslagan, at maibug yang malyu i Jonas king pali na ning aldo a dapga king buntuk na. Inya buri na ing mate ne sana. Nganang sinabi, Mas mayap ing mete ku kesa king mabie ku.

⁹ Oneng ngana ning Dios, Jonas, ala kang matulid mimua king tanaman. Mekibat ya i Jonas, Atin kung matulid mimua at king kamua kung yan bisa na kung mate!

¹⁰ Ngana ning Ginu, Jonas, tinubu ya iting tanaman king misan a bengi at limbug ya king tinuking bengi; e mu ne man pipagalan ni pepatubu man, makanyan man lulungkut ka king milyari!

¹¹ Inya lalu kung sukat mika maragul a lunus king Nineve, ing mayupayang siudad a ita. Uling atin yang maygit dinalan at aduang pulung libung memalen a inosenti, at atin ya namang dakal a baka! fig,,,,,ING BIE DELANAN NANG JONAS,(1, 2, 3, 4)fig*.