1

¹ Deting amanu ila ding sinabi nang Amos. Pastul ya i Amos at tau ya king balen na ning Tekoa. Sinabi na la ning Dios kang Amos deting amanu aduang banua bayu dinatang ing ayun. I Uzia ya kanita ing ari king Juda at i Jeroboam a anak nang Joas ya naman ing ari king Israel.

² Nganang sinabing Amos, Magsalita ya ing Ginu karin king Zion; ing bosis na babalandrang ibat Jerusalem. Lalangi ing pipagpastulan, at malalanat ing dikut king Bunduk ning Carmel.

³ Ngana ning Ginu, Ulit-ulit lang mikakasala ding memalen na ning Damasco. Uli na niti siguradu ku lang parusan uling pigbagsikan da la ring memalen na ning Gilead.

⁴ Inya paratang kung silab king palasyung pepatalakad nang Aring Hazael, at silaban ku la naman ding kuta nang Aring Benhadad.

⁵ Lasakan ku la ding pasbul dalan na ning siudad ning Damasco, at ilako ku la ding manuknangan king Kapatagan ning Aven at ing pamuntuk na ning Beteden. Mabihag la ding memalen na ning Siria at midala la king bansang Kir.

⁶ Ngana ning Ginu, Ulit-ulit lang mikakasala ding memalen na ning Gaza. Uli na niti, siguradu ku lang parusan uling binihag da la ngan ding memalen na ning bansa at pisali da lang anting ipus karing memalen na ning Edom.

⁷ Inya paratang kung silab karing pader na ning siudad ning Gaza at silaban ku la naman ding kuta na.

⁸ Ilako ku la ding pamuntuk da ring siudad ning Asdod at Askelon. Parusan ke ing siudad ning Ekron at mate la ngan ding sablang mitagan a tau Filistia.

⁹ Ngana ning Ginu, Ulit-ulit lang mikakasala ding memalen na ning Tiro. Uli na niti, siguradu ku lang parusan uling kinua da la ring sablang memalen na ning bansa at inugse da la king bansang Edom. E re tiparan ing gewa rang kasunduan tungkul king pamikaluguran.

¹⁰ Inya paratang kung silab karing pader na ning siudad ning Tiro at silaban ku la ding kuta na.

¹¹ Ngana ning Ginu, Ulit-ulit lang mikakasala ding memalen na ning Edom. Uli na niti, siguradu ku lang parusan uling penagal da lang espada ding Israelitang kapatad da at e da la pekitanan nanumang lunus. Alang kayangganan ing mua ra karela at e ra buring kalinguan.

¹² Inya paratang kung silab king Teman at silaban ku la ding kuta na ning Bozra.

¹³ Ngana ning Ginu, Ulit-ulit lang mikakasala ding memalen na ning Ammon. Uli na niti, siguradu ku lang parusan uli na ning kasakiman dang gabun lislas da la atian ding babaing mabuktut ning Gilead.

¹⁴ Inya paratang kung silab karing pader na ning siudad ning Rabba at silaban ku la ding kuta na. Kulio la ding tau king aldo ning labanan at mangaring masikan a bagyu ing labanan.

¹⁵ Miyugse ya king aliwang bansa ing ari at ding opisyal na.

2

¹ Ngana ning Ginu, Ulit-ulit lang mikakasala ding memalen na ning Moab. Uli na niti, siguradu ku lang parusan uling lepastangan da la at silaban ding butul na ning ari ning Edom angga king meging abu la.

² Paratang kung silab king bansang Moab at silaban ku la ding kuta na ning Keriot. Mate la ding memalen na ning Moab libutad ning inge ning labanan, libutad ning kulio da ring sundalus at tiup da ring trumpeta.

³ Paten ke ing ari na ning Moab at pati na ding sablang manimuna na ning balen.

⁴ Ngana ning Ginu, Ulit-ulit lang mikakasala ding memalen na ning Juda. Uli na niti, siguradu ku lang parusan uling ininsultu da la ring turu ku at e ra la pemintuan ding utus ku. Melili la uli da ring kikilalanan dang dios a siyuan da naman ding makatua da.

⁵ Inya paratang kung silab king Juda at silaban na la ding kuta na ning Jerusalem. fig,,,,,Inya paratang kung silab...,(1:425:5)fig*

⁶ Ngana ning Ginu, Ulit-ulit lang mikakasala ding memalen na ning Israel. Uli na niti, siguradu ku lang parusan. Pamisali da lang anting ipus ding taung alang kasalanan a e makabayad karing utang da, at pisasali da lang anting ipus ding pakakalulung lalaki king alaga namu ning kaparis a sandalyas.

⁷ Daramusakan da la matulid ding maina at ding lipit a alang akarapat at panabi da la ring pakakalulu. Ing kayanakan a lalaki at ing tata na parehu deng sisipingnan ing ipus a babai. King uli na niti, lalapastanganan de ing banal kung lagyu.

⁸ Karing sablang lugal nung nu la sasamba, ing pagkeran da ya ing imalan a singla da karela ding kalulu. King Templo na ning karelang Dios karin da inuman ing alak a kinua ra karing ating utang karela.

⁹ Samantalang king uli mu, O balen ku, pete ku la ding Amoreo, ding lalaking kasing katas da ring tanaman a sedro at kasing tibe da ring tanaman a ensina.

¹⁰ Leko da kang ibat Ehipto at seupan da ka king disyerto kilub ding apat apulung banua, at binie ku keka ing gabun ding Amoreo ban maging bandi mu.

¹¹ Pinili ku la ding mapilan karing anak mung lalaki ban maging propeta at ding mapilan karing kayanakan mung lalaki ban maging Nazareo. E wari tutu iti, O memalen ning Israel? Aku, ing Ginu, ing magsalita.

¹² Oneng pemilit yu lang minum alak ding Nazareo at binawal yu la ding propeta ban e ra ibie ing amanu ku.

¹³ Inya ngeni pabayatnan da kayu antimo nung makananu yang kababayatnan at lalagitik ing garetang mitmung kargang binutil.

¹⁴ E la miligtas kanaku agyang ding mabilis dang diling mulayi; milako la sikanan ding masikan at e ra aligtas ding sundalus ing sariling bie ra.

¹⁵ E la maguanta ding mamana; e la makatakas ding mabilis mamulayi at e ra aligtas ing bie da ring lalaking pakasake kabayu.

¹⁶ Agyang ding matapang dang diling sundalus ibalag da la ring sandata ra at mulayi lang tumakas king aldo ita. Iti ya ing sinabi na ning Ginu.

3

¹ Makiramdam kayu, O memalen ning Israel, kaniting mensahi na ning Ginu a selita na tungkul kekayu, ikayung sablang bansang tinaid nang leko Ehipto.

² Ngana, Ikayu mung bukud ing pinili ku karing sablang bansa keti king yatu at pigmalasakitan. At iti pasari king beyatan na ning kekayung kasalanan, at iti ing sangkan ban sukat da kayung parusan karing kekayung kasalanan!

³ Maglakbe la waring miyabe ding adua katau nung e ra pa mu pikasunduan?

⁴ Galeung ya wari ing leon king kagubatan nung ala yang ikit a apangan na? Galeung ya wari ing anak a leon king kueba na nung ala yang arakap?

⁵ Tuklu ya wari ing ayup king bitag nung ing bitag ala yang apan? Mibugnus ya wari ing bitag nung alang tinagkil kanite?

⁶ E la wari mitakutan ding tau neng tutiup ya ing trumpeta na ning labanan? Atin waring sakuna a mapalyari king siudad nung e na peparala ning Ginu?

⁷ Kapilan man e ya darapat nanuman ing Ginung Dios a e no mo sa pepabaluan king planu na ding propetang talasuyu na.

⁸ Ninu mo ing e mitakutan neng gagaleung ya ing leon? Potang magsalita ya ing Ginung Dios, ninu mo ing makapibatang e ne sabian ing mensahi na?

⁹ Ipabalu mu iti karing manuknangan karing palasyu na ning Asdod at Ehipto: Mitipun kayu karing bunduk-bundukan ning Samaria, at lawan yu ing maragul a kaguluan at ding krimen a mangapalyari karin.

¹⁰ Ngana ning Ginu, Kakatmuan da la ring taung deti ding bale rang mangaragul karing pibandian a penako ra at kinua king pilit. E ra bitasang balu nung nanu ing kabaldugan na ning pamaging tapat.

¹¹ Uli na niti, kubkuban ne ning kalaban ing karelang bansa; lasakan na la ding karelang kuta at luban na lang panakawanan ding mangaragul dang bale.

¹² Ngana ning Ginu, Nung makananung ing metung a pastul ala yang asasagip nune mu ding aduang bitis o kaya metung a balugbug ning tupang piglapak ning leon, makanyan munaman ing malyari karing taung manuknangan king Samaria; mapilan la mu ding mitagan a ngeni taung kera-kera karing malambut a luklukan.

¹³ Makiramdam na kayu ngeni at dinan yu lang babala ding lahi nang Jacob, nganang sasabi ning Ginung Dios a Mayupaya.

¹⁴ King aldo parusan ku la ding memalen na ning Israel uli na ning dakal dang kasalanan, lasakan ku la ding altar na ning Betel. Makutud la ding suluk na ning balang altar at mibagsak la king gabun.

¹⁵ Lasakan ku la ding tuknangan da neng panaun na ning dimla at ding bale tuknangan da neng kaleldo. Mibagsak la at malasak ding bale mipalamutian karing garing, at malaso la at malasak munaman ding bale maragul.

4

¹ Pakiramdaman yu iti, ikong babaing tau Samaria a tataba anti ding baka a pataban karin king Bashan. Ikayu ding manggipit karing maina at manabusu karing pakakalulu, at mamilit karing asawa yu king e ra kayu sa paburen kagigisanan alak!

² Anti na ning banal ya ing Ginung Dios, pengaku na ing anti kaniti: Datang la ding aldo a kaladkaran da kayu karing kalawit; mangari yang asan a metaga ing balang metung kekayu.

³ Ikaladkad da kayu king malapit diling busbus na ning pader at karin da kayu inabu.

⁴ Ngana ning Ginung Dios, Memalen ning Israel, sulung, munta kayu at gawang kasalanan king banal nang lugal ning Betel! Munta kayu naman karin Gilgal at gawa kayung kasalanan anggang binit yu. Sulung, magdala kayung animal a kekong iyain balang abak at idala yu la ding kekong sikapulu balang katlung aldo!

⁵ Sulung, iyain yu la ding kekong tinape ating lebadura bilang kekong ain-a-kapasalamatan king Dios at pagparangalan yu la ding aliwa yu pang ain! Uling iti ing bage a tutu yung kapad daraptan.

⁶ Aku ing peparatang danup karing sabla yung siudad, makanyan man e kayu migbalik lub kanaku.

⁷ E ku pepauran inyang kailangan da ring kekong tanaman ing uran. Pepauran ku king metung a siudad, oneng ali ku king aliwa. Miyuranan ya ing metung a marangle, oneng melangi ya ing aliwang marangle.

⁸ Uli na ning maina na la king kau, minta la ding dakal a tau da ring siudad king metung a siudad nung nu ra asahan ing manakit lang danum, oneng e mekagyu karela. Makanyan man e kayu migbalik lub kanaku.

⁹ Peparatang kung angin a mapali ban malanat ing kekong tanam. Gisan da lang pengan ding durun ding kekong mulahan at tamnanan ubas ampon ding kekong tanaman a higera at olibo. Makanyan man e kayu mu rin migbalik-a-lub kanaku. fig,,,,,Makanyan man e kayu mu rin migbalik-a-lub kanaku.,(4:9)fig*

¹⁰ Peparatang kung pesti kekayu antimo itang peparatang ku king Ehipto. Pete ku la ding kayanakan yung lalaki king labanan at kinua ku la ding kekong kabayu. Kitmuan ku la ding kekong arung king buluk da ring bangke libutad da ring kekong kampu. Makanyan man e kayu migbalik lub kanaku.

¹¹ Pete ku la ding mapilan kekayu antimo ing depat ku karing tau na ning Sodoma at Gomorra. Mengari la ding mitagan kekayu king milalablab a dutung a mesagip king silab. Makanyan man e kayu pa mu rin migbalik-a-lub kanaku, nganang sasabi ning Ginu.

¹² Uli na niti, O memalen ning Israel, parusan da kayu. Uli na ning daptan ku ing anti kaniti, magsadia kayung marap king atul ku!

¹³ Ing Dios ya ing linalang karing bunduk at king angin. Pabalu na karing tau ing isipan na; alilan ne ing aldo king bengi. Lalakad ya angga na karing wakas ning yatu. Iti ya ing lagyu na: Ginung Dios a Mayupaya!

5

¹ Memalen ning Israel, makiramdam kayu kaniting kanta a kakung ikanta para kekayu tungkul karing mete:

² Ing dalagang Israel miragsa ya, at e ne pasibayung talakad pa! Oyta, king gabun makapase ya, at alang sumaup ban ibangun ya.

³ Sasabian na ning Ginung Dios, Papalual yang libung sundalus ing metung a siudad king Israel, oneng dinalan la mu ding mibabalik; papalual yang dinalan ing aliwang siudad, oneng apulu la mu ding mibabalik.

⁴ Sasabian na ning Ginu karing memalen ning Israel, Aku ing panintunan yu at e kayu mate.

⁵ E kayu pupunta king Beerseba ban samba. E yu ku pagpilitan akit king Betel; muli ya king ala ing Betel. E kayu pupunta karin Gilgal uling makatalaga lang miyugse ding memalen na king aliwang lugal.

⁶ Lumapit kayu king Ginu at e kayu mate. Nung e ye lapitan datang yang anting silab at gisanan na la ding memalen na ning Israel. Dulukan na la ning api ding memalen na ning Betel at ala metung man a makapatda kaniti.

⁷ Maging makalunus ing mapalyari kekayu uli na ning babaluktut yu ing hustisia at e yu babie ing katuliran a mangaintulid karing tau!

⁸ Ing Ginu ya ing linalang karing batuin, ing Pleiades at ing Orion. Gagawan nang anting aldo masala ing karalumduman, at ing aldo gagawan neng bengi. Ausan nang lumapit ning Ginu ing danum ning dagat, at tutugtug na king yatu. Ing lagyu na Ginu.

⁹ Parala yang kasiran karing taung masikan, at pati na karing kuta ra.

¹⁰ Kasaman yu la ding taung papakilala king e matulid at ding taung magsalita king mabilug a katutuan arapan na ning husgadu.

¹¹ Gigipitan yu la ding kalulu at panakawanan yu la king karelang pupul. Inya e kayu makapanuknangan karing bale batu a kekong tatalakad o makainum alak ibat karing malagu yung mulahan ubas.

¹² Balu ku nung nu la anti karakal at kabayat ding kekong kasalanan. Lulupigan yu la ding mayap a tau, tatanggap kayung suhul at sasabatan yu la ding pakakalulu king pamagkamit dang hustisia karing husgadu.

¹³ Inya masanting pa ing e na kayu bubulad kaniting panaun a e mayap!

¹⁴ Ing mayap ya ing sukat yung daptan at aliwa ing e mayap ban e kayu mate. Kanita tune makiabe ya kekayu ing Ginung Dios a Mayupaya, antimo ing papaniwala yu.

¹⁵ Pikasaman yu ing e mayap at luguran yu ing mayap, at pagsikapan yung mag-ari ing hustisia karing husgadu. Palamang-lamang malunus ya ing Ginu karing mitagan a memalen na ning bansang iti.

¹⁶ Inya sasabian na ning Ginu, ing Dios a Mayupaya, Mika tangisan at saingsing king balang dalan na ning siudad. Mayaus la ding makiupang manangis at pati ding ortelanu ban tumangis karing mete da.

¹⁷ Mika tangisan libutad da ring sablang mulahan ubas, uling datang ku ban parusan da kayu. Ing Ginu ya ing migsalita. fig,,,,,Mika tangisan at saingsing...,(5:16)fig*

¹⁸ Makalunus ing mapalyari kekayung magnasang datang ne ing aldo ning Ginu! Nanu mo ing apala yu king aldong ita? E ya maging aldo na ning sala para kekayu nune aldo ne ning dalumdum!

¹⁹ Mangari ya king metung a lalaking tatakas king leon, oneng mekasalubung yang oso! O kaya, mangari ya king metung a lalaking minuli king bale na at migsandal king dingding, oneng matuktuk ya palang ubingan!

²⁰ Magdala yang karalumduman ing aldo ning Ginu, e sala; aldo yang makatakut; ala yang bitasang sala! fig,,,,,Mangari ya king metung a lalaking tatakas king leon...,(5:19)fig*

²¹ Ngana pa ning Ginu, Pikakasaman ku la ding kekong relihiosung katipunan; e ku na la apibata!

²² E ku la pakundanganan ding kekong ain-a-durulukan at ain-a-pamangan. At e ku la tanggapan ding pepataba yung animal a darala yung anting ain-ning-pamisulusulu.

²³ Tuknangan yu na ing masigla yung pamagkanta. E ku na la buring daramdaman ding kekayung alpa.

²⁴ Nune paburen yung magus ing hustisia anti ing danum king batis at ing katuliran anti king ilug a e kakati.

²⁵ Memalen ning Israel, king kekaban da retang apat apulung banua ning pamanaid ku kekayu libutad ning disyerto e ku inawad kekayu ing dinan yu kung ain-sakripisyu at aliwa pang ain.

²⁶ Oneng ngeni uli na ning simban yu la ding larawan nang Sakkut a kekong ari at i Kaiwan, ing kikilalanan yung dios a batuin, sapilitan yu lang idala reng larawan a ren

²⁷ potang iyugse da na kayu king aliwang bansa a lagpus pa Damasco, nganang sasabi ning Ginu a maki lagyung Dios a Mayupaya.

6

¹ Makalunus ing mapalyari kekayung makusuelung mabibie king Zion, at ikayung panatag a bili king Samaria, ikayung marangal a tau na niting marangal a bansang Israel, ikayung lalapitan dang aduananan saup ding tau!

² Munta kayu at lawan ye ing siudad ning Calne. Kaybat sumulung kayu king marangal nang siudad ning Hamat, at taglus kayung kuldas angga na king Gat a siudad da ring Filisteo. Mas mayap la wari kabilian kesa karing kayarian ning Juda at ning Israel? Mas malualas wari ing karelang sasakupan a gabun kesa king kekayo?

³ E yu buring tanggapan karing isip yu king datang ya kekayu ing aldo ning kasiran; lalu na mung pamalaguanan datang ning pamaniaptan yu ing aldong ita.

⁴ Makalunus ing mapalyari kekayung kera-kera karing malambut yung katring belutanan garing, at sawasawang mamangan karing karning biserung tupa at biserung baka.

⁵ Antimo i David, tutu yung kapad ing gagawang kanta a babagayan karing alpa.

⁶ Miminum kayung alak karing kopang maragul at gagamit king mabanglung diling pabanglu, oneng e na kayu man lulungkut king kasiran a dugpa king Israel.

⁷ Inya ikayu ding mumunang diling miyugse king aliwang bansa. Mituknang na kanita ing pamagpiesta yu at ing pamagsadia yung dakal a pamangan at inuman.

⁸ Nganang matimid sinabi ning Ginung Dios a Mayupaya, Kasaman ku ing ketasan dang lub ding memalen na ning Israel. Kasaman ku la ding malapalasyu rang tuknangan. Ibie ke karing kalaban da ing karelang sentrung siudad at ing sablang atyu keting siudad. fig,,,,,Kasaman ku ing ketasan dang lub ding memalen na ning Israel.,(6:8)fig*

⁹ Nung ating apulung lalaking mitagan king metung a pamilya, mate la reti.

¹⁰ Potang ing kamaganak na ning mete a mengasiwa munaman king pamangutkut ilual na ne king bale ing bangke, maus ya king ninumang melakuan king bale at ikutang na, Atin pang aliwang kayabe mung melakuan ken? At ing ipakibat ya iti: Ala na! Sabian na kanita ning kamaganak na, E ka mainge! Ingatan tamung e mabanggit bitasa ing lagyu na ning Ginu.

¹¹ Potang ibie na ning Ginu ing utus na, malasak la ngan ding bale, maragul la man o malati.

¹² Makapulayi la wari ding kabayu libutad ding maragul a bato? Sasarulan de wari ding tau ing dagat karing baka ra? Makanyan man ikayu ikua yeng gewang lasun ing hustisia; ikua yeng gewang bukut ing matulid.

¹³ Pagmaragul yung abihag ye ing balen Lodebar. Ngayu pang sasabi, Agyu-agyu ta yang salakayan ing Karnaim.

¹⁴ Sasabian na ning Ginung Dios a Mayupaya, O memalen na ning Israel, paratangan ku la ding sundalus na ning aliwang bansa ban salakayan de ing bansa yu. Gipitan da kayu manibat king Pidadalanan ning Hamat angga king Batis ning Araba.

7

¹ Pepakit ne kanaku ning Ginung Dios ing metung a vision. Keting vision ikit keng linalang dakal a durun ing Ginu kanitang kaybat-ibat na pa mung ikua ning ari ing dake na king are at inyang tutubung pasibayu ing dikut.

² King vision ikit kung gigisanan dang kakanan ding durun ing balang sagiwang bage king mabilug a bansa. Sinabi ku kanita, O Ginung Dios, patawaran me sa ing balen mu! Makananu la pang mie kanyan ding tau? Ditak la mu at maina la pa!

³ Migbayu ya isip ing Ginu at ngana, E ku na papalyarian ing ikit mu.

⁴ Pepakit ne kanaku ning Ginung Dios ing metung pang vision. Keting vision ikit keng magsadia ban parusan na la ding taung pinili na king kapamilatan na ning silab. Pepamalan ne ning silab ing malapad a dagat lalam ning gabun at megumpisa nang mikakalat ing silab king bansa.

⁵ Kanita sinabi ku, O Ginung Dios, patdan mu na ing silab! Makananu la pang mie kanyan ding tau? Ditak la mu at maina la pa! fig,,,, ,O Ginung Dios, patdan mu na ing silab!,(7:5)fig*

⁶ Pasibayu yang migbayu isip ing Ginung Dios at ngana, E ku munaman papalyarian iti.

⁷ Pepakit ne kanaku ning Ginu ing metung pang vision. Keting vision ikit keng makatalakad lele ning metung a pader a gemitanan dang patulu inyang magawa ya at atin yang tatalnan a patulu king gamat na.

⁸ Nganang kinutang kanaku, Amos, nanu ing akakit mu? Mekibat ku, Metung ya pung patulu. Kanita sinabi na, Lumawe ka, gamitan ke ing patulu ban ipakit ku king kakung balen king mengari lang pader a e gemitanan patulu. E ku na ibayu ing kakung tingka tungkul king parusang ibie ku karela.

⁹ Malasak la ding lugal nung nu la karin sinamba ding lahi nang Isaac. Malasak la ding lugal a banal ning Israel. Dinan ku neng kawakasan ing pamilya na ning Aring Jeroboam.

¹⁰ Kanita i Amazia, ing pari ning Betel, pepabalita na kang Aring Jeroboam ning Israel iti. Ngana, Atin yang tatangka i Amos laban keka libutad da ring memalen ning Israel. Ing pamagsalita na ya ing makasira king balen.

¹¹ Ini ya ing sasabian na, Mate ya king labanan i Jeroboam at mabihag la ding memalen na ning Israel, at miyugse la king aliwang bansa!

¹² At kanita nganang Amazia kang Amos, Hoy, propeta, patugut na ka! Muli na ka king bansang Juda at karin ka manaral. At pabayad ka karela king pamanaral mu.

¹³ E na ka pasibayung manaral keti king Betel. Iti ya ing lugal nang pisasamban ning ari; iti ya ing templo ning bansa.

¹⁴ Nganang mekibat Amos kang Amazia, E ku propetang makikiupa ban manaral. Metung ku mung pastul at talaingat karing tanaman a higera.

¹⁵ Oneng kinua na ku ning Ginu king obra ku antimong pastul at inutusan na kung lumakad at magsalita king lagyu na para karing memalen na ning Israel.

¹⁶ Inya ngeni makiramdam ka king sasabian na ning Ginu. Sasabian mu king tuknang na kung magsalitang ula, king tuknang na kung magsalita laban karing memalen na ning Israel.

¹⁷ Uling sinabi mu yan, oyni ngeni ing sasabian na keka ning Ginu, Amazia, makisiping ya ing asawa mu karing lalaki keti king siudad at mate la king gera ding anak mu. Mapirake ya ing gabun mu at miyabie ya karing aliwa at ika mismu mate ka king metung a bansang paganu. Maging bihag la ding memalen na ning Israel at miyugse la king aliwang bansa!

8

¹ Pepakit ne kanaku ning Ginung Dios ing metung pang vision. Ikit ke keting tagimpan ing metung a basket a mitmung prutas.

² Ngana kanaku ning Ginu, Amos, nanu ing akakit mu? Mekibat ku, Metung yang basket a ating prutas. Kanita ngana kanaku ning Ginu, Dinatang na ing kawakasan para karing memalen kung Israel. E ku na ibayu pa ing tingka ku tungkul king parusang ibie ku karela.

³ King aldong ita, maging tangis lang malungkut ding kanta kilub ning palasyu. Mikalat la ding bangke king sablang lugal. Iyugse da la reting alang bulad.

⁴ Pakiramdaman yu iti, ikayung dadakurak karing taung atyu king kalipitan at magkapilit makamate karing pakakalulu na ning bansa.

⁵ Ikayu mismu sasabian yu king sarili yu, Milabas na la sana deting aldo pangilinan ban apisali ta na ing kekatamung binutil. Obat e ya pa mapupus ing Aldo ning Sabbath ban makapagtinda na keng pasibayu? Kanita itas mi na ing alaga at agamit mi na lang pasibayu ding paniukad at timbangan a e ustu ban apamiraitnan mi la ding maniali kekami.

⁶ Ipisali mi ing ala nang silbing trigu king matas a alaga. Manintun kaming taung pakakalulu a alang ipamayad karing utang na, at saluan mi yang anting ipus king alaga namu ning kaparis a sandalyas.

⁷ Ing Ginu, ing Dios ning Israel simpa na, E ku na kalinguan kapilan man ing dapat dang e mayap.

⁸ Uli na niti, mika ayun keti king yatu at maligalig ya ing balang metung a memalen na ning bansa. Galgal ya ing mabilug a bansa; mitas-mibaba ya anti ing Ilug ning Nilo.

⁹ Daratang na ing panaun a ipalbug ke ing aldo at dalumdum ya ing yatu king kaugtuan na ning aldo. Aku, ing Ginung Dios, ing magsalita.

¹⁰ Gawan ku lang aldo ning pamangutkut mete ding kekong piesta, at alilan ku lang pamanangis ding masaya yung pamagkanta. Pasatsat ku la kekayu ding buntuk yu at papamiblasan da kayung imalan a magaspang. Mangari kayu karing pengaring manangis king pangamate na ning bugtung dang anak a lalaki. Maging maplas ya ing aldong ita angga king kawakasan na.

¹¹ Daratang na ing panaun a paratang kung danup king mabilug a bansa. Dumanup la ding tau, oneng e para king pamangan; kumau la, oneng e para king danum. Dumanup la at kumau king amanung manibat king Ginu. Aku, ing Ginung Dios, ing sinabi kaniti.

¹² Gumala la ding tau manibat king Dagat a Mete angga king Mediteraneo, at manibat king dane norti angga na king aslagan. Gumala la keni at karin king pamanintun da king amanung manibat king Ginu, oneng e ra akit iti.

¹³ King aldong ita, mibulang la agyang ding kayanakan a lalaki at babaing masikan a pamikakatawan uli na ning alang danum.

¹⁴ Detang susumpa karing kikilalanan nang dios ning Samaria at sasabing Saksi ke ing dios ning Dan o kaya Saksi ke ing dios ning Beerseba, miragsa la ding taung deta at e na la talakad kapilan man.

9

¹ Ikit ke ing Ginu; makatalakad ya lele ning altar. Nganang minutus: Pukpukan mong masikan ding punta da ring asias ning Templo ban maugun la. Idagsa mu la ban dugpa la karing buntuk da ring tau. Paten ku la king gera ding mitagan. Alang miligtas metung man karela; mate la ngan.

² Agyang gawa la pang kulkul at sumulud la angga king kutkutan da ring mete, akit ku la rin at akua. Agyang mukiat la pa banua, ibaba ku la rin.

³ Akit ku la rin at arakap agyang salikut la king taluktuk na ning Bunduk ning Carmel. Nung salikut la man king kalalalaman na ning dagat, utusan ku ne man ing dambuala ning dagat ban pangetan na la.

⁴ Nung sakali namang mabihag la karing kalaban da, iyutus ku karing makabihag karela ing paten da la. Inari ku na king lub ku king gisanan ku la lahi at e saupan.

⁵ Tagkilan ne ning Ginung Dios a Mayupaya ing yatu at mayun; manangis la ding sablang manuknangan karin. Ing mabilug a yatu mibaba-mitas yang anti ing Ilug ning Nilo.

⁶ Gagawa yang tuknangan na ing Ginu king babo banua at babo yatu bibili ne ing suklub ning banua. Ausan nang lumapit ing danum ning dagat, at iti tutugtug na king yatu. Ginu ing lagyu na!

⁷ Ngana ning Ginu, Memalen ning Israel, parehu ing lawe ku kekayu at karing memalen ning Etiopia. Linigtas ku la ding memalen na ning Filistia king Creta, linigtas ku la ding tau Siria king Kir, nung makananu da kayu namang linigtas king Ehipto.

⁸ Aku, ing Ginung Dios, lawen ke iting makasalanan a kayarian na ning Israel at gisanan ke keti king babo yatu. Oneng e ku la lubus gisanan ding sablang lahi nang Jacob.

⁹ Aku ing munie utus at itatap ku la ding memalen ning Israel anti ing binutil a tatatap da king igu. Simen ku la at ilako ding sablang e karapatdapat.

¹⁰ Mate la king gera ding sablang makasalanan libutad na ning kanakung balen, ding sablang sasabing, E na paintulut ning Dios ing misakitan tamu!

¹¹ Nganang sasabi ning Ginu, Daratang na ing aldo a aku ibawi ke ing kayarian nang David a mengaring bale melasak. Larinan ku la ding dalig na at italakad keng pasibayu. Gawan keng pasibayu a antimo ing king minuna.

¹² Inya makanyan deng salakayan ding memalen ning Israel ing mitagan king sakup ning Edom at karing sablang bansang meging bandi ku kanitang misan a panaun.

¹³ Nganang magsalita ning Ginu, Ding aldo daratang la, potang e la pa man meyaring tinanam ding tau atin na lang pupupulan, at ding gagawang alak e ra la pa ayagad ding mamunga rang ubas. Magus karing bunduk ing mayumung alak, at taglus iti karing bunduk-bundukan.

¹⁴ Ibalik ku la ding kakung memalen karing karelang gabun. Larinan da la ring karelang melasak a siudad, at manuknangan la karin; mananaman lang ubas at minum lang alak; gawa lang karelang mulahan at kanan da ing karelang tenam.

¹⁵ Itanam ke ing balen ku king gabun a karela binie ku, at e na la mabagut pasibayu. Ing magsalita ya ing Ginung kekayung Dios.