1

¹ Iti ya ing mensahi na ning Ginu kang Joel a anak nang Petuel.

² Pakiramdaman yu iti, ikong lalaking makatua; makiramdam kayu, ikong sablang atyu Juda. Atin na kayang milyaring anti kaniti king kekong kapanaunan o king kapanaunan ding kekong pengari?

³ Sabian yu iti karing kekong anak; ila karing anak da karela namang sabian at ila karing lahi ra sabian da naman.

⁴ E la pepatugut daratang ding durun karing tanaman; itang karelang tagan ding tinuki ila naman ding mengan.

⁵ Ikong lasenggu, migising kayu at kumiak; manangis kayu, ikong miminum alak, uling mesira la ding ubas a makatalagang gawan bayung alak.

⁶ Ding tutung dakal a durun lisuban da ing kekatamung gabun, masikan la at e mu la abilang; ding karelang ipan kasing taram da la ding ipan ning leon.

⁷ Tanaman tamung ubas sinira da la, at pengan tanaman tamung higera. Bikbak da lang balat da angga king ding sanga menimuti la.

⁸ Ikong memalen, kumiak kayu; kumiak kayung anti ing pamangiak ning dalaga king mete a kakaburi na.

⁹ Ala nang binutil ni alak man ban king Templo ibie; ding pari malungkut la uling ain king Ginu ala lang adala.

¹⁰ Alang makatanam karing marangle; ing gabun malungkut, uling ing binutil mesira; ding ubas melangi la ngan at mepanat lang olibong tanaman. fig,,,,,...ing gabun malungkut...,(1:10)fig*

¹¹ Ikong ortelanu, lungkut kayu; ikong magbante karing mulahan ubas, kumiak na ko man, uling ing trigu at ing sebada pati sablang tanaman mesira.

¹² Ding tanaman a ubas, at tanaman a higera melanat la; melangi la ngan tanaman a mamunga; ing tula ding tau mewala na.

¹³ Ikong pari king altar susuyu, magaspang a imalan ing isulud yu at kumiak kayu! Templo kekayu yang luban ban karin manangis kabukas! Alang binutil ni alak man ban king kekong Dios iyampang.

¹⁴ Iyutus yu ing pamag-ayunu, maus kayung kapulungan! Pamuntuk kekayu lang tipunan pati ding sablang king Juda manuknangan; at kilub ning Templo maus kayu king kekong Dios!

¹⁵ Daratang ne ing aldo ning Ginu, ing aldo nung kapilan ing Mayupaya ipagpa nang kasiran. Makatakut ing ipasari na ning aldong ita!

¹⁶ Ala tamung akarapat kabang kekatamung lalawan ing mesirang pupul. Ala nang tulang mayayakit kilub ning Templo ning kekatamung Dios.

¹⁷ Mamamate lang bini king malanging gabun. Alang binutil a malyaring isikap, inya ding kamalig a alang laman atyu la ngeni king kasiran.

¹⁸ King danup gagala la ding baka, uling alang dikut para karela; daralan lang kasakitan pati ding tupa.

¹⁹ Ginu, mamaus ku keka, uling ing pipagpastulan at ding tanaman melangi la, anti waring ing api ya ing sinilab karela.

²⁰ Pati ding mabagsik a animal mamaus la keka, uling ding batis melangi la.

2

¹ Tiupan ya ing trumpeta; kampana tigtigan ya king Zion, ing bunduk-bundukan nang banal ning Dios. Galgal kayu memalen ning Juda! Uling ing aldo ning Ginu malapit niang datang kekayu.

² Aldo yang maralumdum at malungkut, aldo yang matuling at malulam. Lumusub la ding dakal a durun anting dalumdum a kakalat babo ding bunduk. E pa mika anti kanyan, at e na mika anti pa kanian.

³ Mengari la king api a lalaklak karing tanaman. King karelang arapan ing bansa anti ya ing Mula ning Eden, oneng king karelang kagulutan metung yang malanging ilang. Karela alang miligtas metung man.

⁴ Kabayu ing karelang kawangis; pupulayi lang anti ding kabayung pakigera.

⁵ Mainge lang anti ding karung panggera karing babo bunduk lundag-lundag la; lalagutuk lang anti ing malanging dikut neng masisilab ya. Maka-ayus lang anti karing dakal a sundalus, king pamakilaban makasadia la.

⁶ Kabang lalapit la, ing balang tau gagalgal ya; manimutla ya ing balang lupa.

⁷ Lulusub lang anti ding gerero; mengari la karing sundalus potang pader karela yang ukiatan. Ala lang patugut magmartsa, diretsu ing lakad da at e la manaliwang dalan

⁸ ni e la misusumpungan man. Sasagupa la karing kutang dipensa, at ala nanumang makasabat karela.

⁹ Mabilis lang lulub king siudad, lulundagan da lang pader a matas; bale karela lang papanikan, at anti lang mapanako daralan karing awang.

¹⁰ King paglusub da, gabun mumugun ya at gagalgal yang banua. Ing aldo at bulan daralumdum la, at batuin ipagkaymut dang aslag da.

¹¹ Kakabling la ding utus ning Ginu karing e abilang-bilang nang sundalus; ding sundalus a mamintu king Ginu; tune dakal la at masikan lang tutu. Makapangilabut ya ing aldo ning Ginu! Ninu kaya ing miligtas kaniti?

¹² Oneng agyang ngeni, ngana ning Ginu, sumisi kayu at magbalik lub kaku king mabilug yung pusu, at kayabe ning pamag-ayunu, kiak kayu ampon lungkut.

¹³ At gabakan ding pusu at aliwa ing imalan yu. Magbalik kayu king Ginung kekong Dios. Maganaka ya at mitmu king lunus; mapibabata ya at tutuparan na sablang pengaku na; manatili yang mamatawad kapilan man at e biasang mamarusa. fig,,,,,At gabakan ding pusu at aliwa ing imalan yu.,(2:13)fig*

¹⁴ Siguru ing Ginung kekong Dios mikaduan ya lub, at kayabe ning dakal a pupul ing bendisyun na kekayu ibie na. Kanita iyain yu king Ginu alak ampon binutil.

¹⁵ Tiupan ye ing trumpeta king babo ning Bunduk ning Zion; iyutus yu ing pamag-ayunu at maus kayung pulung!

¹⁶ Tipunan yong miyabe-abe ding memalen; isadia la para king banal a kapulungan; makatua kekayu lang ausan; anak kekayu lang tipunan pati na ding sususung bingut. Agyang ding bayung miyasawa lakuan da lang bale ra, at sukat ing datang la.

¹⁷ Ding pari king Ginu susuyu pilatan ning altar, at ning pasbul ning Templo, paburen lang tumangis at manalangin: Ginu, malunus ka king kekang balen, e mu paintulut ing insultuan da kami at kaylian ding aliwang bansa king kapamilatan ning karelang pamagsalita: Nu ya karin ing kekong Dios?

¹⁸ Kaybat, ing Ginu pepakit yang masabal king bansa na; karing memalen na melunus ya.

¹⁹ Pekibatan na la; ngana, Ngeni kekayu ibie ku binutil, alak, at larung olibo at kumabsi na kayu. Ing pamaninsultu da kekayu ding aliwang bansa tuknangan da na.

²⁰ Ding dakal a durun a ibat king norti ilako ku na la, at ding mapilan kareti king ilang ku la itabi. Ding mumuna rang pulutung mitabi la king Dagat a Mete, ing pulutung dang makatauli king Mediteraneo ku no man itabi. Muluk la ding mete rang katawan. Kaku lang paten uli ning sablang keko ra depatan.

²¹ Marangle, e ko sa tatakut; tumula at magsaya kayu uli ning sablang depat ning Ginu para kekayu.

²² Ikong animal, e ko sa mitatakutan uling sagiwa na lang kekong pastulan; ding tanaman mamunga na la ngan, at dakal lang bungang higera at ubas.

²³ Tumula kayu, memalen ning Zion, magsaya kayu uli ning depat na para kekayu ning Ginung kekong Dios. Kekayu binie na ing sapat a uran king kekong pupul; bildug na ing uran king panaun ning dimla, at uran-kaleldo antimo ing sadia.

²⁴ Ding lugal a pidadaran king binutil mikatmuan la ngan; ding makatulid a lulanan karing pipamaslan king alak at king larung olibo maglapo-lapo la ngan.

²⁵ Ibalik ku itang keka mewala inyang ding dakal a durun pengan dang kekang pupul. Kareting minyira keka aku ing pepadala.

²⁶ Ngeni mika pamangan kang dakal at kumabsi ka. Ing Ginung kekang Dios keka yang purian, ing dinapat makapagmulalang bage para keka. E ne pasibayu pang mainsultu ing kakung balen.

²⁷ Kanita, ika Israel, abalu mu king aku, ing Ginu a kekang Dios, at ala nang aliwa pang atyu libutad yu. Ing kakung balen e ne mainsultung pasibayu.

²⁸ Kaybat na nita, itugtug ke ing kakung espiritu king metung at metung: ding anak yung lalaki at babai sabian da ing kakung mensahi; maninap la ding kekong mangatuang lalaki at ding lalaki yung kayanakan manakit la ngang vision.

²⁹ King panaun a ita, itugtug ke ing kakung espiritu, pati na karing ipus a lalaki at babai.

³⁰ Munie kung babala tungkul king aldong ita, king yatu at king banua; mika patayan, silab, at asuk a makapal.

³¹ Ing aldo dalumdum ya, at ing bulan lare yang anting daya, bayu datang ing maragul at makapangilabut a aldo ning Ginu.

³² Oneng ding sablang pasaup king Ginu miligtas la. Antimo ing sinabi ning Ginu kanita pa, Ding mapilan king Jerusalem makatakas la; detang buri kung mitagan, mitagan la.

3

¹ Ing Ginu sasabian na, King panaun a ita ibalik ku ing kanawan king Juda at king Jerusalem.

² Tipunan ku lang sablang bansa, at king Kapatagan ning Husgadu idala ku la. Karin atulan ku la ngan king sabla rang depat karing kakung memalen. Karela lang kinalat ding Israelita karing bansang dayuan, at pinitna de ing Israel a kakung balen.

³ Mipagsapalaran la ban lutasan nung ninu ding mirinan karing karelang abihag. Ding anak a lalaki at babai king panga-ipus karela lang pisali ban ing karelang abli pamayad dang alak at karing babaing magtinda king katawan da.

⁴ Tiro, Sidon, at ika kabilugan a Filistia, nanu ing buri yung gawan kanaku? Bisa kayung mamayad kanako? Nung makanyan ing buri yu, bayaran da kayung agad!

⁵ Kinua yu ing kanakung pilak at gintu, at dela yu ing pibandian ku karing templo yu.

⁶ Dela yu la karing marayung bansa ding memalen na ning Juda at Jerusalem, at pisali yu la karing Griego.

⁷ Ngeni, ilual ku na la karing lugal nung nukarin yu la pisali. Daptan ku kekayu itang depat yu karela.

⁸ Paburen ku lang mangapisali karing tau Juda ding kekayung anak a lalaki at babai; ipisali da la karing Sabeo a manuknangan king marayung lugal. Aku, ing Ginu, ing migsalita.

⁹ Iting kapabaluan karing sablang bansa kekong ibalita: Magsadia kayu para king gera; ding gerero yu ausan yu la, sablang sundalus yu tipunan la at saka na kayu magmartsa!

¹⁰ Gawan lang espada ding kekong sarul, at kekong pangaltas gawan yong tandus. Pati na ding maina sukat lang sagupa.

¹¹ Magmalagua kayung datang, ikong sablang bansang makapadurut, at king kapatagan karin kayu mitipun. Padulungan mu na la, O Ginu, ding kekang sundalus ban karela lang lusuban!

¹² Sukat lang magsadia ding bansa, at munta king Kapatagan ning Husgadu. Karin, aku, ing Ginu, lukluk ku ban ukuman ku la ding sablang bansang makapadurut.

¹³ Milalu na ing dapat dang e ustu; palutan lang anti ing binutil king oras ning pamamupul. Damusakan lang anti ing pamandamusak karing ubas king pipapaslan, angga king magus ing maglapo katas.

¹⁴ Libu-libu la ding atyu king Kapatagan ning Husgadu. E lumuat karin datang ing aldo ning Ginu.

¹⁵ Ing aldo at ing bulan dalumdum la, at pagkaimut da ring batuin ing sala ra.

¹⁶ Ing Ginu magsalita yang masikan manibat king Bunduk ning Zion; kakablas ing siwala na manibat king Jerusalem; gagalgal ya ing banua at yatu. Oneng ingatan na lang memalen na.

¹⁷ Kanita, ika Israel, abalu mu king aku ing Ginung kekang Dios. King Zion ku manuknangan, ing kakung banal a bunduk-bundukan. Maging banal yang siudad ing Jerusalem; e ra ne alusuban pa ding dayuan king kapilan man.

¹⁸ King panaun a ita, ding bunduk mitakpan la karing mulahan ubas, at ding baka mayakit la karing bunduk-bundukan; ing danum maglabis-labis para king kabilugan a Juda. Magus ya ing metung a batis ibat king Templo ning Ginu, at paranuman ne ing Kapatagan ning Acacia.

¹⁹ Maging disyerto ya ing Ehipto, at malanging gabun ing Edom, uling lisuban de ing Juda at pete ding memalen nang alang kasalanan.

²⁰ Iyablas ku la detang pete ra; alang mitakas karing mikasala. Oneng ing Juda at ing Jerusalem mika tau la king kapilan man, at aku, ing Ginu, manuknangan ku king Bunduk ning Zion.