1

¹ Iti ya ing mensahi a binie na ning Ginu kang Hosea a anak nang Beeri. Miyabie ya kanitang kapanaunan da ring Aring Uzzia, Jotam, Ahaz, at Hezekia ning Juda, at kanitang i Jeroboam a anak nang Jeoas ya naman ing ari ning Israel.

² Ngana ning Ginu kang Hosea kanitang kapupurmeruan nang migsalita king Israel king kapamilatan na, Sulung, makiasawa ka; oneng pagtaksilan na ka ning maging asawa mu at mamuli la ding anak mu king ugali nang ima ra. Makanyan ing depat da kanaku ding taung pinili ku; gilutan da ku at pigtaksilan.

³ Makanyan yang mekapakiasawa i Hosea kang Gomer a anak nang Diblaim. Inyang beit na neng Gomer ing pangane rang anak a lalaki,

⁴ nganang sinabi ning Ginu kang Hosea, Pamalagyuan meng Jezreel, uling e lumuat parusan ku ne ing ari na ning Israel uli na ning pamakamate a depat ning makatua nang i Jehu karin king Jezreel. Dinan ku nang angganan ing pamamahala ra ding pamilya nang Jehu king Israel.

⁵ At king panaun a ita, ibagsak ku ing upaya nang militar ning Israel king Kapatagan ning Jezreel.

⁶ Menganak yang pasibayu i Gomer at babai ya ing anak na. Kanita ngana ning Ginu kang Hosea, Pamalagyuan meng E Liguran, uling e ku na la pakitanan pang lugud ding memalen na ning Israel at e ku na la patawaran.

⁷ Oneng atin kung lugud karing memalen na ning Juda. Aku, ing Ginung karelang Dios, iligtas ku la, oneng e king espada o pana o kabayu o karing sundalung pakasake kabayu.

⁸ Kaybat neng inawat Gomer i E Liguran, mebuktut yang pasibayu at menganak yang lalaki.

⁹ Kanita ngana ning Ginu kang Hosea, Pamalagyuan meng E Ra Kayu Memalen, uling e ku ne bansa ing Israel at aliwa na aku ing karelang Dios.

¹⁰ Maging anti la king balas ning dagat ding memalen na ning Israel; e la malyaring bilangan o sukdan man. Ngeni sasabian na ning Dios karela, E ra na kayu memalen, oneng datang ya ing aldo a sabian na karela, Ikayu ding anak na ning Dios a mabie!

¹¹ Misanmetung la ding memalen na ning Juda at ding memalen na ning Israel. Mamili lang metung a manimuna ra, at pasibayu lang dakal at lumabung king karelang bansa. Wa, maging aldo yang mapalad ing aldo nang Jezreel!

2

¹ Inya ausan yu la ding kalupa yung Israelita Ding Memalen na ning Dios at Ding Pakamalan na ning Ginu!

² Anak ku, pakisabian yeng mayap i ima yu, agyang e ku ne asawa at aku naman e na na ku asawa. Pakisabian yeng mayap king tuknang ne sanang magtaksil at e na na pamisali pa ing katawan na.

³ Nung e na tuknangan yan, lubasan ke antimo kanitang aldo mibait ya. Gawan keng anti ing malanging gabun at anti ing disyerto, at mate yang maung danum.

⁴ E ku la pakitanan lunus ding anak nang mibait king kataksilan

⁵ na ning babaing e tapat king asawa na. Ya mismu ing sinabi, Puntalan ku la ding lalaking kalaguyo ku; ila ding babie pamangan kanaku, inuman, imalan a lana at linen, larung olibo, at alak.

⁶ Inya bakuran ke karing suksuk at gawa kung pader ban e ya milual.

⁷ Panalukian na la ding lalaking kalaguyo na, oneng e na la akuang atagal. Panintunan na la, oneng e na la akit. Kanita sabian na, Magbalik ku king minuna kung asawa; mas masanting ku bili kanita kesa ngeni.

⁸ E na balu king aku ing minie king binutil, king alak, at king larung olibo at king sablang pilak at gintu a ginamit na king pamanyamba na kang Baal.

⁹ Inya king panaun na ning pamamupul kuanan kung pasibayu ing binie kung binutil at alak; kuanan ku munaman ing binie kung imalan a lana at linen a panakap na king katawan nang lubas.

¹⁰ Kaybat, lubasan ke king akakit da ring kalaguyo na at ala metung mang makapagligtas king kanakung upaya.

¹¹ Dinan ku nang angganan ing pamagsaya na; ding dakal nang piesta balang banua, ding aldo pangilinan na bulan-bulan at ding pamagselebra na king Aldo ning Sabbath. Nanupata, ding sablang relihiosang katipunan a tatagunan na.

¹² Pamutputan ku la ding tanaman nang ubas at ding tanaman a higera a sasabian nang pemayad da ring kalaguyo na uling siyuan na la. Gawan ku lang gubat ding mulahan nang ubas at tanaman a mamunga, at siran da ngan ding mabagsik a animal.

¹³ Parusan ke uli na ning pamangalinguan na manibat inyang dinuluk yang insenso para kang Baal, at inyang pelamutian neng iyas ing sarili na ban tukian na la ding kalaguyo na. Ing Ginu ya ing migsalita.

¹⁴ Inya idala keng pasibayu king disyerto; karin ibalik ke lub kanaku king kapamilatan da ring amanu na ning lugud.

¹⁵ Isubli ku la bilang bandi na ding mulahan nang ubas at gawan keng pasbul ning kapanayan ing Kapatagan ning Akor. Tanguanan na ku karin a antimo ing depat na kanitang kayanakan na, kanitang dinatang yang ibat Ehipto.

¹⁶ Kanita, pasibayu na kung ausan asawa na. E na na ku ausan Baal na.

¹⁷ E ku ne kapilan man paintulutan banggitan ne pa ing lagyu nang Baal.

¹⁸ At king aldong ita, gawa kung kasunduan karing sablang mabagsik a animal at ayup ban e ra la panasakitan ding kanakung pinili. Ilako ku la king bansa ding sablang sandatang gagamitan da king gera antimo ding espada at pana. At paburen ku lang mibiebie king kapayapan at kapanatagan ding taung kanakung pinili.

¹⁹ Israel, gawan da kang asawa ku, gawan ku ing matulid at ustu; pakitanan da kang lugud a e kukupas, pakitanan da kang lunus a alang kayangganan, at maging kaku ka kapilan man.

²⁰ Tuparan ku ing kakung pangaku, at gawan da kang bandi ku, at kilalanan mu king aku ing Ginu.

²¹ At king aldong ita, pakibatan ku la ding panalangin ding tau Jezreel. Ibaldug ku ing uran king yatu,

²² at tumubu king yatu ing binutil, ubas, at olibo.

²³ Itanam ke king gabun ing kakung bansa at lumabung ya. Ipakit ku ing lugud ku karing taung mayayaus E Liguran, at kakung sabian karing taung mayayaus E kakung Memalen, Ikayu ding kakung memalen, at karelang ipakibat, Ika naman ing Dios mi.

3

¹ Pasibayu yang migsalita ing Ginu kanaku. Ngana, Sulung, luguran mia mu rin ing babaing makipaglalaki. Luguran me antimo ing manatili kung lugud karing memalen na ning Israel agyang pang lalapit la karing aliwang kikilalanan dang dios at maburing babie ain-a-pasas karing idolo.

² Inya memayad kung labing limang pirasung pilak at pitung sakung sebada ban asali ke.

³ Sinabi ku keting babai king manaya ya pa mung makabang panaun at samantala, e na na babalikan pa ing makilaguyo king ninumang lalaki at aku naman pibatan ku pa mung e ke miyabe.

⁴ Iti mangabaldugan king e ya mika ari o mika manimuna ing Israel king makabang panaun; e ya naman mika ain o mika sagradung asias a batu, idolo o larawan a gagamitan king pamanula tungkul king daratang a panaun.

⁵ Oneng datang ing panaun at pasibayu lang magbalik king Ginung karelang Dios at king metung a lahi nang David a karelang ari. Potang datang ne ing aldong ita, mika takut la king Ginu at tanggapan da ing kayapan na.

4

¹ Atin yang sumbung ing Ginu laban karing taung manuknangan king bansang iti. Makiramdam ka, Israel, king sasabian na: Alang katapatan o lugud a mayayakit king bansang iti at e ra ku kikilalanan Dios da ring memalen na.

² Mangaku la, oneng e ra naman tutuparan; magsalita lang kalaraman, makamate la, manako la, at makipangalugud la. Milalalu na ing e mayap dang pamaniaptan, misalasalisi ing pamakamate ra.

³ Uli na niti, langi ing gabun at mate ing sablang mabibie. Mate la ding sablang animal at ayup. Wa, pati na ding asan.

⁴ Nganang sasabi ning Ginu, E ye paintulutan ing ninuman a sangkanan na la o paniabianan ding tau. Laban ya kekayung pari ing kanakung sumbung.

⁵ E kayu tutud king obra yu bengi at aldo; ding propeta antimu rin. Lasakan ke ing Israel a ima yu.

⁶ Mipapahamak la ding taung kanakung pinili uli na ning ala lang beluan tungkul kanaku. Ikayung pari, e yu ku naman balu at tinggian yu la ding kanakung utus. Inya tanggian da kayu naman at e ku na la kilalanan ding kekayung anak bilang kanakung pari.

⁷ Nung kapilan la merakal ding pari kanita naman lalung merakal ing pamikasala yu kanaku. Inya alilan kung kamarinayan ing kekayung dangalan.

⁸ Mibabandi kayu uli da ring kasalanan da ring taung kanakung pinili, inya buri yu king lalu la sanang mikasala.

⁹ Mangaintulid munamang dugpa kekayu ing kaparusan a dugpa karing memalen! Parusan da kayu at papamayaran king e mayap yung pamaniaptan.

¹⁰ Potang kanan yu ing dake yu karing ain, danupan kayu pa mu rin. Samban ye ing kikilalanan dang dios a makaibie anak; makanyan man e kayu mikayanak, uling ginulut kayu kanaku ban tuki karing aliwang tutunggen dang dios.

¹¹ Nganang sasabi ning Ginu, Ing alak, luma ya man o bayu, ya ing pasari king ala dang matulid a pamisip ding tau.

¹² Maniawad lang payu king metung a kapirasung dutung. Sasabian na naman karela ning kapirasung dutung ing buri dang abalu! Gilutan da ku. Mengari la king babaing magtinda king katawan na; binie ra ing sarili da karing kikilalanan dang dios.

¹³ Karing sagradung lugal da ring taluktuk ding bunduk karin la babie ain, at duruluk lang insenso karing bunduk-bundukan lalam da ring malabung a tanaman uling masalilung karin! Ing bunga na niti ya ing maging babai lang magtindang katawan ding anak yung dalaga, at ding manuyang yung babai pagtaksilan da la ring anak yung asawa ra.

¹⁴ Makanyan man e ku la parusan, uling ikayu mismu makiabe kayu karing babai king templo a magtinda karing karelang katawan at kayabe yu lang babie ain kang Baal. Antimo ing sasabian na ning kasebian, Mipahamak ya ing balen a e masalese isip.

¹⁵ Agyang e kayu tapat kanaku, ikayung memalen na ning Israel, ing Juda sana e ya mikasalang kalupa na ning kekayu. E kayu pupuntang sasamba king Gilgal o king Betaven, at e kayu gagawang pangaku karin king lagyu na ning mabie Ginu.

¹⁶ Masias la buntuk ding memalen na ning Israel; kalupa da la ring bakang e biasang mamintu. Makananu ku lang pakanan anting biserung tupa king malualas a marangle?

¹⁷ Megayuma la karing idolo da ring memalen na ning Israel. Paburen yu la!

¹⁸ Kaybat dang mekainum dakal a alak, magpakasasa la karing babaing magtinda king katawan da; mas buri da ing alang marine kesa king dangalan.

¹⁹ Miyugse la king marayu antimong dela na ning angin, at kanita la dumine uli da ring ain da karing kikilalanan dang dios.

5

¹ Ikayung pari, makiramdam kayu kaniti! Makiramdam kayu, ikayung memalen na ning Israel! Ikayung miembru na ning pamilya ning ari, makiramdam kayu! Ikayu ding sukat munie matulid a atul karing aliwa, inya kekayu dugpa ing kayatulan! Meging bitag kayu king Mizpa, anting lambat a makaladlad king Bunduk ning Tabor.

² Metung kayung malalam a kulkul a makayumang king siudad ning Sitim, at parusan da kayu ngan.

³ Balu ke ing Israel. Balu ku ing lihim na. E ya meging tapat kanaku at mirinatan la ding memalen na.

⁴ Ing e mayap dang depat ding tau ya ing pipigil karela ban e la makapagbalik king Dios da. Masikan ing upaya na karela ning pamanyamba rang idolo at e re kikilalanan ing Ginu.

⁵ Magsalitang masikan laban karela ing kapalaluan da ring memalen na ning Israel. Ding kasalanan da ilang pasari king pangatakid da at pangasakab, at kayabe da lang mibagsak ding memalen na ning Juda.

⁶ Darala da la ring tupa ra at baka ban ibie da bilang ain king Ginu, oneng iti mayalang kabaldugan. E re akit ing Ginu, uling likuan na na la.

⁷ Pigtaksilan de ing Ginu; e na la bandi ding anak da. Inya e na lambat masira la at ding marangle da.

⁸ Tiupan yu la ding trumpeta na ning Gibea! Tiupan ye ing trumpeta king Rama. Isikan yu ing kulisak ning pamakilaban karin Betaven! Ikayung lalaki na ning tribu nang Benjamin, sumugud kayu king labanan!

⁹ Mibagsak ya ing Israel king daratang a aldo na ning pamamarusa. Memalen na ning Israel, ing sasabian ku siguradung mapalyari!

¹⁰ Nganang sasabi ning Ginu, Mua ku uling liban de at kinua da ring manimuna na ning Juda ing gabun da ring karelang kapatad. Inya ibagsak ku ing parusa ku karela anting masikan a agus ning ilug.

¹¹ Gigipitan de ing Israel. Palakuan de king gabun a bandi na, uling pinilit na ing maniawad yang saup karetang e makaibie saup.

¹² Inya paratang kung kasiran king Israel at pangabagsak karing memalen na ning Juda.

¹³ Inyang ikit na ning Israel king grabi ing sakit na at inyang ikit na la ning Juda ding sariling sugat na, kanita ya minta ing Israel king Asiria ban maniawad saup king marangal a ari, oneng e na la aulu o apakayap niti ding sugat da.

¹⁴ Lusuban ku la ding memalen na ning Israel at Juda. Mangari ku king leon a lumusub karela. Paglapakan ku la at kaybat lakuan ku la. Potang ikaladkad ku la, alang malyaring makapagligtas karela.

¹⁵ Gulutan ku la ding taung kanakung pinili anggang e ra tanggapan ing karelang kasalanan at anggang e ra ku panintunan. Mekad king karelang kasakitan magkapilit lang panintunan da ku.

6

¹ Ngara ding tau, Tara, magbalik ta na king Ginu! Penasakit na katamu, oneng siguradung uluan na katamu; sinugat na katamu, oneng bendahan na la ding sugat tamu.

² Biayan na katamu kaybat ding adua o atlung aldo at mibiebie tamu arapan na.

³ Magkapilit tamung abalu ta ya. Siguradu yang datang kekatamu antimo nung makananu yang daratang ing abak. Datang ya kekatamu anti ing uran a didilig king yatu king panaun ning kauran.

⁴ Nganang sasabi ning Ginu, Israel at Juda, nanu ing daptan ku kekayu? Agad mawawala ing lugud yu kanaku, kalupa na ning ulap neng abak, at lalbug anting ambun ning abak a maranun.

⁵ Inya tinubud ku la ding kanakung propeta kekayu a magdala king kanakung amanung kayatulan at kasiran laban kekayu. Ing parapat ku kekayu malino at mayan daptan.

⁶ Ing buri ku ya ing lugud yung e kukupas, aliwa ding animal a iyain yu kanaku. Mas buri ku ing abalu da ku ring taung kanakung pinili kesa king duluk lang ain para kanaku.

⁷ Oneng lebagan de ing kasunduan kalub da reting tau king bansang Adan.

⁸ Mitmu ya ing siudad ning Gilead karing taung e mayap at karing taung makamate kalupang tau.

⁹ Mengari no man ding pari karing tulisan a manenayang maniabat king taung maging biktima ra. Agyang king dalan papunta king banal a lugal ning Sikem darapat lang pamakamate tau. At sasarian dang daraptan iting e mayap!

¹⁰ Karumaldumal ing ikit ku king Israel; dinatan da ring taung kanakung pinili ing karelang sarili king kapamilatan na ning karelang pamanyambang idolo.

¹¹ At ikayu namang memalen na ning Juda, atin kung telagang panaun ban parusan da kayu king e mayap yung gagawan.

7

¹ Potang buri ku lang uluan ding memalen kung Israelita at gawan pasibayung masalese bili, kanita da naman papakit ing karelang dapat a e ustu at ing dapat dang e mayap. Mipamirait la, manlub la karing bale at manako la, panakawanan da la ring tau king dalan.

² Isipan da king kelinguan ku na ing sablang e mayap a dapat da; makapadurut la karela ding kasalanan da at iti e ku malyaring e akit.

³ Nganang sasabi ning Ginu, Lilinlangan de ring tau ing ari at ding pamuntuk na king kapamilatan na ning e mayap dang tangka.

⁴ E mu la apagkatiwalan; taksil la ngan. Mengari la king mapaling ornu na ning gagawang tinape a e na pa susubung ing panangab kabang sasadia ne ing masa.

⁵ King kayaldawan na ning ari, ya at ding pamuntuk na pepalasing da la. Milangan da la king kapamilatan na ning pamipainum dang alak karela.

⁶ Wa, kayabe na ning lihim dang e mayap a tangka, mikakapali lang anti ing ornu. Anting dapug king kabengian ing karelang mua at mikalabkab pangayabak.

⁷ King mua ra pete da la ring karelang pamuntuk. Piliwas-liwas da lang pete ding karelang ari, oneng metung man alang meniawad saup kanaku.

⁸ Nganang sasabi ning Ginu, Mengari la ding memalen na ning Israel king malabsang bibingka; asahan da la ring kasiping dang bansa.

⁹ Ing karelang pamanalig karing dayuan ya ing sangkan nung inya ala lang sikanan, at e ra balu king ding aldo ra makabilang na la.

¹⁰ Magsalitang masikan ing kapalaluan da ring tau Israel laban karela. Makanyan man, e la migbalik lub kanaku, ing Ginung karelang Dios.

¹¹ Mengari ya ing Israel king taung mangmang at alang aintindian; mamaus ya king Ehipto at pupunta ya king Asiria!

¹² Miladlad kung lambat ban arakap ku lang kalupa da ring ayup potang lalabas la. Parusan ku la king depat dang e mayap.

¹³ Misakitan la! Gilutan da ku at linaban la kanaku. Masira la! Buri ku lang iligtas, oneng magsalita lang kalaraman laban kanaku.

¹⁴ Ngungulangul lang manangis karing karelang pagkeran, oneng e la manalangin taimtim kanaku. Paniugatan da la ring karelang katawan kalupa da ring paganu neng manalangin lang para pamangan at alak, makanyan man lalaban la kanaku.

¹⁵ Migplanu lang e mayap laban kanaku, agyang aku ing minie bie at sikanan karela.

¹⁶ Pilit lang gugulut kanaku at lalapit karing kikilalanan dang dios a alang arapat para karela. E mu la apagkatiwalan antimo ing pana a e ustu pangabaluktut. Takman da ing mabagsik a kamatayan uling palalu lang magsalita ding karelang manimuna. At ding tau Ehipto kaylian da la uli na ning mapalyari karela.

8

¹ Nganang sasabi ning Ginu, Tiupan ye ing trumpeta! Daratang lang anting agila ding kalaban king kanakung bansa! Lebagan de ring taung kanakung pinili ing kasunduan; e ra la tiparan ding utus ku.

² Agyang ausan da kung Dios at sasabian da king ila ding taung kanakung pinili,

³ makanyan man tinggian da ing mayap. Uli na niti, ding kalaban da panagalan da la.

⁴ Memili lang ari da, oneng e king pamamilatan ku. Tinuldu lang manimuna, oneng iti e ku kabaluan. Ginawa lang idolo karing karelang pilak at gintu; iti mekasira karela.

⁵ Tinggian ke ing gintung biserung baka a sasamban da ring memalen na ning siudad ning Samaria. Milalablab ing mua ku karela. Angga pa kapilan bayu ra gulutan iting pamanyamba?

⁶ Ing metung a magobra ning Israel ya ing ginawa karing idolo at aliwa ing Dios! Mabalbal yang mangalati ing idolong gintung biserung baka a sasamban da ring tau ning Samaria!

⁷ Potang salbag lang angin, mupul lang bagyu! Ing binutil a tutubu a alang bunga ala yang aibie tinape. Nung sakali mang makapamunga ya, ding makinabang kaniti ila ding dayuan!

⁸ Meging kalupa da nia mu ding aliwang bansa ing Israel; kalupa ne ning busbus a banga a alang kasilbi-silbi.

⁹ Masias la buntuk. Mengari lang malyap a asno; ing buri da ya ing malilyari. Meko la ban manintun saup king Asiria. At pisali da ring memalen na ning Israel ing sarili da karing aliwang bansa ban manikua lang magdipensa karela.

¹⁰ Oneng e lumuat tipunan ku la at parusan; mamalipit la king sakit potang gipitan na la ning ari na ning Asiria.

¹¹ Nung kapilan la merakal ding altar a telakad da ring memalen na ning Israel para king pangalako ning karelang kasalanan, kanita la lalung merakal ding lugal nung nu la malyaring mikasala!

¹² E mu la abilang ding kautusan a sinulat ku para karing taung deti, oneng tinggian da lang antimo ding dayuan.

¹³ Buri da ing babie ain-sakripisyu at tutu lang maburing mamangan karni. Oneng aku, ing Ginu, e ku tutula karela at ngeni ganakan ku ing karelang kasalanan at parusan ku la. Uli na niti, ibalik ku lang pasibayu king panga-ipus.

¹⁴ Menalakad lang palasyu ding memalen na ning Israel, oneng kelinguan de ing karelang Miglalang. Menalakad lang matibe siudad ding memalen na ning Juda, oneng paratang kung api ban masilab la ding karelang siudad at ding karelang palasyu.

9

¹ Memalen ning Israel, ituknang yu ing pamagselebra karing kekayung piesta. Balamu paganu kayu. Gilutan ye at e kayu meging tapat king kekayung Dios. Ikayung sabla king mabilug a bansa pisali yu kang Baal ing kekayung sarili anti ing babaing magtinda king katawan na. At metula kayu king binutil a isipan yung binayad na kekayu!

² Oneng e maging sapat ing kekayung binutil ampon larung olibo at kagisanan kayung alak.

³ E la manatili king bansa ning Ginu ding memalen na ning Israel. Kailangan lang magbalik karin Ehipto, at mangan la king makabawal a pamangan karin king Asiria.

⁴ Karing aliwang bansang deta e la malyaring makaibie alak a ain o makapagdalang ain para king Ginu. Mirinatan la ding sablang mangan king pamangan da a antimo ing pamangan neng ating mete. Magamit mu para uluan ing danup da; ala lang adala kaniti antimong ain king Templo ning Ginu.

⁵ At potang datang na ing aldo da ring mituldung piesta para parangalan ya ing Ginu, nanu ing daptan da kanita?

⁶ Potang datang ing kasiran at potang mikalat la ding tau, ding tau Ehipto tipunan da la ban ikutkut karin king Mempis! Ding karelang pibandian a pilak at ding lugal nung nukarin king misan a panaun makatalakad la ding karelang tuknangan mitakpan la karing dikut at tanaman a masuksuk.

⁷ Dinatang na ing oras ning pamamarusa, ing oras nung kapilan tanggapan da ring tau ing kaparusan a mangaintulid karela. Abalu ning Israel potang mapalyari na ita. Ngayung sasabi, Mangmang ya ing propetang iti; sira ya buntuk iting taung maki espiritu. Maragul ing mua yu kanaku, uling maragul ing kekayung kasalanan.

⁸ Tinubud na ku ning Dios bilang propeta ban munie babala king Israel a balen na. Oneng nu ku man munta, pagkapilitan yu kung darakpan anting ayup. King mismung Templo ning Dios ding kalaban ning propeta ila ding memalen.

⁹ Tune e mayap ing pamaniaptan da, kalupa na ning depat da karin king Gibea. E na kalinguan ning Dios ing karelang kasalanan; parusan na la uli na niti.

¹⁰ Nganang sasabi ning Ginu, Anti yang ubas ing Israel king malanging gabun kanitang minuna keng ikit. Inyang minuna ku lang ikit ding makatua yu, anti la karing mumunang melulut a bunga da ring tanaman a higera king kapanaunan da. Oneng inyang miras la king Bunduk ning Peor, megumpisa lang sinamba kang Baal at e melambat meging makasumami lang kalupa da ring idolong liguran da.

¹¹ Mabating anting ayup a sinulapo ing dangalan na ning Efraim at ala nang anak pa a mibait karela, ala nang babaing muktut o kumagli man.

¹² At nung atin la mang anak a aparagul, kuanan ku la deti at metung man ala kung itagan mabie. Potang gulutan ku na la deting tau, dugpa karela ing makatakut a bage.

¹³ Ginu, akakit ku king Israel nung makananu da lang panalukian at iyatad ding pengari ding karelang anak king pipatayan.

¹⁴ Nanu ing sukat kung aduan a daptan mu para karing taung deti? Gawan mu lang baug ding karelang asawa! Ilako mu la gatas ding salu ra!

¹⁵ Nganang sasabi ning Ginu, Megumpisa king Gilgal ing sablang dapat dang e mayap. Karin ku megumpisang mimua karela. Uli na ning depat dang e mayap, itabi ku la king kanakung bansa. E ku na la luguran pa; linaban la kanaku ding sablang manimuna da.

¹⁶ Mengari la ding memalen na ning Israel king tanaman a melangi yamut at e na mamunga. E na la mikayanak. Nung mikayanak la man, paten ku la ding anak a pakamalan da.

¹⁷ Tinggian na la ning Dios a kanakung susuyuan ding taung pinili na, uling e la mekiramdam. Maglibut-libut la karing miyayaliwang bansa.

10

¹ Mengari la ding memalen na ning Israel king ubas a memungang dakal. Nung kapilan la minawa kabilian kanita la merakal ding telakad dang altar. Nung kapilan la merakal a pupul king asikan da, kanita da la pekalagu ding sagradung asias a batu a karelang sasamban.

² Mapaglinlang la ding pusu ra at ngeni sukat na lang dumalan kasakitan uli na ning karelang kasalanan. Lasakan na la ning Dios ding karelang altar at lasawan na la ding sagradung asias.

³ E lumuat sabian da reting tau, Ala keng ari ngeni uling e kami tatakut king Ginu. Nanu mo ing arapat na ngeni ning metung a ari para kekami?

⁴ Ala lang daraptan nung e mu bukud magsalita at e tutupad karing pangaku ra at karing kasunduan a tatatag da. Meging baluktut ing hustisia; mengaring dikut a makalasun king mesarul a gabun.

⁵ Mitakutan la at magpaldas ding memalen na ning siudad ning Samaria uli na ning pangawala na ning gintung baka na ning Betaven. Ila at ding paring susuyu karing kikilalanan dang dios tangisan da iti. Manangis la potang iti malubas ya king ginintuan nang leguan.

⁶ Midala ya iting idolo king Asiria bilang regalu king marangal a ari. Milako ya dangalan ing Israel, at mangapakarine ya uli na ning payu a tikian na.

⁷ Mawala ya ing karelang ari anti king kapirasung dutung a tiki na ning agus.

⁸ Masira la ding pisasamban dang idolo karing babo da ring bunduk-bundukan ning Aven. Tumubu ing suksuk at dikut karing karelang altar. Ikulait da ring tau karing bunduk, Isalikut yu kami! at karing bunduk-bundukan sabian da, Tambunan yu kami! fig,,,,,Tumubu ing suksuk at dikut karing karelang altar.,(10:8)fig*

⁹ Nganang sasabi ning Ginu, E la tinuknang ding memalen na ning Israel king pamaniapat pamikasala laban kanaku manibat na kanitang aldo a mikasala la karin Gibea. Inya tagalan na la ning gera karin Gibea.

¹⁰ Datangan ku la deting makasalanan a memalen at parusan ku la. Misasanmetung la ding bansa laban karela at miparusan la uli na ning dakal dang kasalanan.

¹¹ King misan a panaun mengari ya ing Israel king dumalagang baka a makasadia at maburing dadarang binutil, oneng binili ke ing paud king malagu nang batal at sinane ke para king lalung mabayat a obra. Pepakulyut ke king Juda ing sarul at king Israel ing aswe.

¹² Ngakung sinabi, Sarul kayung bayung gabun para king kekayung sarili, mananaman kayung katuliran at mupul kayu king kanawan a ibunga na ning katapatan yu kanaku. Panaun na ban mibalik kayu kanaku, ing kekayung Ginu, at datang ku at pauran ku ing bendisyun kekayu.

¹³ Oneng e mayap ing tenam yu at pipulan yu iti. Pengan yu ing binunga da ring kekayung kalaraman. Uling menalig kayu karing kekayung karung panggera at karing dakal yung sundalus,

¹⁴ datang ing gera karing kekayung memalen at malasak la ding sabla yung kuta. Mangari king aldo inyang lesakan neng Aring Salman king gera ing siudad ning Betarbel, at mipatanan la at mete ding pengaring babai at ding karelang anak.

¹⁵ Makanyan ing malyari kekayung memalen na ning Betel, uling tutung maragul ing depat yung e mayap. Mate ya ing ari na ning Israel kabud magumpisa ing labanan.

11

¹ Nganang sasabi ning Ginu, Liguran ke ing Israel kanitang anak ya pang malati, at manibat king Ehipto inaus ku neng anak ku.

² Nung kapilan ke tinuring kakung anak, kanita ya lalung ginulut kaku. Ding taung kakung pinili babie lang ain-sakripisyu kang Baal; dinuluk lang insenso para karing idolo.

³ Makanyan man, aku ing tinuru king Israel ban mabiasa yang lumakad. Kinilik ku la ring memalen na karing kakung takde, makanyan man e ra dininan ulaga ing ingat a depat ku karela.

⁴ Linapit ku la kaku king mitmung lugud at pakamal. Kinua ku la at linapit king salu ku; dinuku ku ban pakanan ku la.

⁵ E la mebisang mibalik kanaku, inya sukat lang magbalik king Ehipto, at ing Asiria ya ing sumakup karela.

⁶ Datang ing gera karing karelang siudad at siran na la ding pasbul dalan da ring siudad. Mate la king gera ding dakal a tau, uling pilit dang tikian ing e mayap dang payu.

⁷ Pilit lang gugulut kanaku. Saingsing la uli na ning paud a atyu karing batal da, oneng metung man alang sumaup milako kaniti.

⁸ Makananu ra kang isakuil, Israel? Makananu ra kang gulutan? Paten da ka kayang anti ing depat ku king Adma o iyapus da ka king depat ku king Zeboiim? E na paintulut ning pusu ku iti! Tutung maragul ing lugud ku keka!

⁹ E ra ka parusan king mua ku; e ku ne pasibayung lasakan pa ing Israel. Uling aku Dios ku at e ku tau. Aku, ing Banal, atyu ku libutad yu. E ra kayu datangan king mua ku.

¹⁰ Potang galeung na kung anting leon karing karelang kalaban kanita da ku tukian ding taung pinili ku. Manibat king albugan mamalagua lang datang kanaku.

¹¹ Ibat king Ehipto datang lang kasing bilis ding ayup, at ibat king Asiria anting patipati. Ibalik ku lang pasibayu karing karelang pibalebale. Aku, ing Ginu, ing sinabi kaniti.

¹² Nganang sasabi ning Ginu, Pepadurutnan da ku ring memalen na ning Israel karing karelang kalaraman at kapamiraitnan. At angga ngeni mag-rebeldi la ding memalen na ning Juda laban kanaku, ing tapat at banal a Dios.

12

¹ Pawang alang ulaga at makasira ing sablang daraptan da ring memalen na ning Israel manibat king abak anggang bengi. Merakal ing kataksilan at ing katampalasanan. Gagawa lang kasunduan king Asiria, at makipagkalakalan lang laru king Ehipto.

² Atin yang sumbung ing Ginu laban karing memalen na ning Juda; parusan nia naman ing Israel uli na ning e ustung ugali da ring memalen na. Papamayaran na la king depat da.

³ Mekilaban ya ing makatua dang i Jacob king kakambal nang i Esau kabang atyu la pa kilub nang atian ning ima ra; inyang meragul ne i Jacob, lebanan ne ing Dios.

⁴ Mekibatbatan ya king metung a anghel at miniambut ya. Menangis ya i Jacob at meniawad yang bendisyun. Dinatang ya ing Dios karin king Betel, at migsalita ya kang Jacob.

⁵ Ya ing Ginu, ing Dios a Mayupaya; Ginu ing lagyung iyaus da king Dios king oras ning pamanyamba.

⁶ Inya ngeni, ikayung lahi nang Jacob, manalig kayu at magbalik king kekayung Dios. Maging tapat kayu at patupad yu ing hustisia, at isundu ing pamanaya king kekayung Dios.

⁷ Ngana ning Ginu, Mapamirait la ding memalen na ning Israel; anti la karing taung Cananeo. Maburi la karing e ustung timbangan ban piraitnan da la ring maniali karela.

⁸ Oneng sasabian da, Mabandi kami! Misuerti kami! At ala ninuman a makasabi king mibandi kami king e ustung paralan.

⁹ Aku ing Ginung kekayung Dios a milual kekayu ibat karin Ehipto. Papanuknanganan da kayung pasibayu karing tolda a antimo ing kabilian yu kanitang detangan da kayu karin king disyerto.

¹⁰ Migsalita ku karing propeta at dininan ku lang dakal a vision, at minie kung babala king balen ku king kapamilatan da ring propeta.

¹¹ Makanyan man, atin pang sasambang idolo karin king Gilead; mate la detang sasamba kareti. Miyayain la ding baka bilang ain-sakripisyu karin Gilgal, inya maging buntun lang batu ding altar karin king libutad ning marangle. fig,,,,,... maging buntun lang batu ding altar karin...,(12:11)fig*

¹² Tinakas yang minta king bansang Aram ing kekatamung makatuang i Jacob, at pistulan na la karin ding tupa na ning aliwang tau ban makapakiasawa ya.

¹³ Mitubud yang propeta ing Ginu ban ilako ne ing balen ning Israel king panga-ipus na karin Ehipto, at ban ingatan ne.

¹⁴ Pepamuan deng e mu makanyan-kanyan ding memalen na ning Israel ing Ginu; mangaintulid kamatayan ing depat da at e na la patawaran ning Dios. Parusan na la uli na ning kalapastanganan a depat da king Dios.

13

¹ Kanitang minuna, mitakutan la ding aliwang tribu na ning Israel kabud migsalita ya ing tribu nang Efraim. Matas ing paglalawe da ring aliwang tribu na ning Israel king Efraim. Oneng mikasala la ding memalen na ning Efraim uli na ning pamanyamba ra kang Baal. Uli na niti, mate la.

² E tinuknang ing karelang pamikasala king kapamilatan na ning pamangawa rang larawan a bakal ban samban da. Gagawa lang pilak a idolo a bunga na ning karelang pamisip at dapat da ring gamat da. At ngarang sasabi, Munie kayung ain-sakripisyu kareti! Obat ayuyuma da la reting idolo, ding rebultu a kalupa da ring baka?

³ Inya naman deting tau lumbug lang anti ing ulap neng abak at anting ambun a mawawala neng abak a maranun. Mangari la king apa king pidadaran a papaid na ning angin at anting asuk a manibat king kalang. fig,,,,,Obat ayuyuma da la reting idolo...,(13:2)fig*

⁴ Nganang sasabi ning Ginu, Aku ing Ginung kekayung Dios a milual kekayu ibat king Ehipto. Ala kayung aliwang Dios nung e mu aku. Aku mu ing bukud yung talapagligtas.

⁵ Iningat da kayu inyang atyu kayu king mapaling disyerto.

⁶ Oneng inyang miras na kayu king gabun a mataba, mika atin kayung labis-labis a pagkabie at kinabsi kayu, migmaragul kayu at kelinguan yu ku.

⁷ Inya naman mangari kung leon a sagupa kekayu. Mangari kung metung a leopardong manaya king kekayung daralanan.

⁸ Mangari kung gaindung oso a kewalan karing anak na king pamanlusub ku kekayu at paglapakan da kayu. Mangari kung leon a maglaklak kekayu at paglapakan da kayung anting animal ning gubat. fig,,,,,Mangari kung metung a leopardong manaya king kekayung daralanan.,(13:7)fig*

⁹ Memalen na ning Israel, gisanan da kayung paten! Ninu ing makasaup kekayu?

¹⁰ Meniawad kayung ari at dakal a manimuna. Oneng makananu reng aligtas ing balen?

¹¹ King mua ku, dininan da kayung ari at king mua ku naman leko ku la ngan.

¹² Makasulat ing kasalanan na at ing e mayap nang dapat ning Israel, at makasikap ya ing listahan.

¹³ Atin yang panaun pang mie ing Israel, oneng tutu yang mangmang; e na sasamantalanan iti. Mengari yang anak a malapit nang mibait a e bisang lual king atian nang ima na.

¹⁴ E ku la iligtas deting tau king kutkutan da ring mete ni sagipan king upaya na ning kamatayan. Kamatayan, paratangan mu na la ding kekang salut! Kutkutan ding mete, paten mu na la! Ala na kung lunus kareting tau.

¹⁵ Agyang lumabung yang anting dikut ing Israel, makanyan man parala ku ing mapaling angin ning aslagan a manibatan king disyerto, at palangian na la ding sibul na at batis. Kuanan ku ing sablang bage maulaga.

¹⁶ Sukat yang magdusa ing Samaria uling mig-rebeldi yang laban kanaku. Mate la ding memalen na king gera; pamaspas da la ring malating anak king gabun, at panlaslasan da la atian ding babaing mabuktut.

14

¹ Magbalik na kayu king Ginung kekayung Dios, O memalen ning Israel. Ing kekayung kasalanan ya ing pepasari king kekayung pangabagsak.

² Mibalik na kayu at sabian ye king Ginu iting panalangin: Patawaran mu sana ing sabla ming kasalanan; tanggapan mu sana ing panalangin mi at samban da ka antimo ing pengaku mi.

³ E na ke bitasang aligtas ning Asiria, at e ra ke adipensa ding kabayung panggera. Kapilan man e mi na sabian pa karing idolo, Ikayu ding kekaming dios! O Ginu, ika ing papakit lunus kareting ala nang bitasang alapitan.

⁴ Nganang sasabi ning Ginu, Ibalik ku la kaku ding taung kakung memalen. Luguran ku la king mabilug kung pusu, uling e na ku mua karela.

⁵ Karing memalen ning Israel mangari kung uran king malanging gabun. Mamulaklak lang anti ding sampaga; maging matatag la yamut anti ding tanaman ning Lebanon.

⁶ Manyanga la at lumabung, at maging malagu lang anti ding tanaman a olibo. Maging mabanglu lang anti ding tanaman a sedro ning Lebanon.

⁷ Misan pa mibiebie la lalam ning kakung lingap. Mananaman lang binutil, at maging mabunga lang kalupa da ring mulahan ubas. Mibantug lang anti ing alak ning Lebanon.

⁸ E na na la kailangan ning Israel ding idolo; pakibatan ku la ding panalangin da at ingatan ku la. Mangari kung tanaman a malabung karela a salilungan da. King kapamilatan ku mamunga la.

⁹ Sana aintindian da ring biasa ing misulat keting libru, at isikap da karing pusu ra. Matulid la ding paralan na ning Ginu at ding matulid a tau tutukian da la king pamibiebie ra, oneng mitakid la at misakab kareti ding makasalanan.