1

¹ King kalimang aldo na ning kapat a bulan ning katlung pulung banua, aku, i Ezekiel a pari, ing anak nang Buzi, at ding Judiong miyugse, manuknangan ku king lele ning Ilug ning Kebar karin Babilonia. Mibuklat ya ing banua at ikit ku la ding vision na ning Dios. (

² Iti ya ing kalimang banua na ning pangayugse nang Aring Jeoiakin.)

³ Karin king Babilonia lele ning Ilug ning Kebar dimdam keng migsalita kanaku ing Ginu at penamdaman ku ing upaya na.

⁴ Linawe ku babo at ikit ke ing bagyu a menibatan bandang norti. Gugulis ya ing kildap ibat king metung a maragul a biga at masala ya ing banuang makapatulug. Ketang dane nung nu ing kildap gugulis, ating bage kikislap a mengari king tangsu.

⁵ Libutad na ning bagyu atin kung ikit a balamu apat lang kerubin a kawangis ding tau,

⁶ oneng ing balang metung karela atin yang apat a lupa at apat a pakpak.

⁷ Matulid la bitis at atin lang kuku a kalupa da ring king biserung baka. Kikislap lang anti ing pepakintab a tangsu.

⁸ Bukud karing tiapat dang lupa at tiapat dang pakpak, ing balang metung atin yang apat a gamat tau, manunggal a gamat lalam ning balang pakpak.

⁹ Makaladlad la ding adua karing pakpak ning balang metung karing kerubin, inya agawa re ing metung a kuadradu. Mitatagkilan la ding wakas ding karelang pakpak. Neng kikimut la, kikimut lang anti ing metung a grupu at e da la bitasang dudurut ding katawan da.

¹⁰ Atin yang apat a miyayaliwang lupa ing balang metung karing kerubin: lupa yang tau ing arap; lupa yang leon ing bandang wanan; lupa yang toro ing bandang kayli, at lupa yang agila ing kagulutan.

¹¹ Makatas la babo ding aduang pakpak ning balang metung angga king tatagkil la karing wakas nang pakpak ning katuki nang kerubin, at makatakap la ding adua nang pakpak karing katawan da.

¹² Makayarap ya nu man karin ing balang metung kareting kerubin, inya makapunta la ding grupu nukarin mang lugal a bisa lang munta; e na kailangan ing malikid la pa.

¹³ Libutad ding kerubin, ating metung a bage a kalupa na ning milalablab a sulu; ala yang patugut gagalo. Milalablab ing api at papalual yang kildap.

¹⁴ Ngara nang sumulung ding mismung kerubin at ngara nang murung a kasing bilis ning kildap.

¹⁵ Kabang lalawan ku la ding apat a kerubin menakit kung apat a parugang a tatagkil king gabun, aga-agape la.

¹⁶ Milupa-lupa la ding apat a parugang; ing balang metung kikislap yang anti ing batung alahas at ing balang metung atin yang aliwang parugang a makabakle kilub na.

¹⁷ Inya makakimut la ding parugang nu man karin la marap.

¹⁸ Laganas lang ating mata ding antas da ring parugang.

¹⁹ Nukarin mang lugal la munta ding kerubin, karin la naman munta ding parugang at nung mitatas la ding kerubin ibat king gabun, mitatas la namang kayabe da ring parugang.

²⁰ Nukarin mang lugal la bisang munta, karin la naman munta ding parugang, uling ding magmanehu karela ila ding kerubin.

²¹ Inya balang oras a kimut la o tuknang o mitas king angin, makanyan munaman ing daraptan da ring parugang.

²² Babo ding buntuk ding kerubin ating metung a bage a kalupa na ning suklub a megawa king makintab a kristal.

²³ Karin king lalam ning suklub makatalakad la ding kerubin; laladlad na la ning balang metung ding adua nang pakpak papunta king kasiping na at tatakpan ne ing katawan na karing aduang aliwa pang pakpak.

²⁴ Dimdam ku ing inge da ring pakpak kabang susulapo la; kalupa na ing biung na ning dagat, mengari king inge na ning maragul a grupu da ring sablang sundalus, anti king siwala na ning Mayupayang Dios. Tiklip da la ring pakpak da inyang tinuknang na lang susulapo,

²⁵ oneng atin pa mu ring inge a manibatan babo ning suklub da ring buntuk da.

²⁶ Babo ning suklub ating balamu metung a tronung megawa king batung safiro. at kalupa yang tau ing makalukluk karin.

²⁷ Balamu iting tau metung yang tangsung milalablab libutad ning api. Laganap ing maslag nang sala

²⁸ at kasing dakal ne kule ning metung a pinanari. Iti ya ing sala a makasilo a pakilala king panga-atyu na ning Ginu. Inyang ikit ku iti, diku ke ing lupa ku angga king gabun at dimdam ke ing metung a siwala.

2

¹ Ngana kanaku, Anak ning tau, talakad ka. Atin kung buring sabian keka.

² Kabang magsalita ya ing siwala, linub ya kanaku ing espiritu na ning Dios at tinikdo na ku, at dimdam ku ing aliwa na pang sinabi ning siwala. Ngana,

³ Anak ning tau, tutuburan da ka karing memalen na ning Israel. Mig-rebeldi la laban kanaku at angga man ngeni mag-rebeldi la pang anti ing pamag-rebeldi da ring makatua da.

⁴ Masias la buntuk at e ra ku gagalangan, inya tutuburan da ka ban sabian mu karela itang buri kung sabian karela bilang Ginung Dios.

⁵ Pakiramdaman da ka man o ali deting mag-rebeldi, abalu ra king ing metung a propeta atyu ya libutad da.

⁶ Oneng ika, anak ning tau, e ka sukat mitatakutan karela o king nanu pa mang sabian da. Salangsang la keka at insultuan da ka; anti kang manuknangan libutad da ring alakdan king pamakiabe mu karela. Makanyan man, e ka tatakut kareting mag-rebeldi o king nanumang bage sabian da keka.

⁷ Sabian mu karela ing nanumang sabian ku keka, makiramdam la man o ali la. E mu kakalinguan king mapaglaban la.

⁸ Anak ning tau, pakiramdaman mu ing sasabian ku keka. E ka mag-rebelding kalupa ra. Ibuklat me ing asbuk mu at kanan mu ing ibie ku keka.

⁹ Ikit ke ing metung a gamat at abutan na ku at tatalnan ne ing metung a makalulun a kasulatan.

¹⁰ Leko ne pangalulun ning gamat ing kasulatan at ikit ku king ating makasulat misusumangid; makasulat ing tangis ning kalungkutan, tagulele, at saingsing.

3

¹ Ngana ning Dios, Anak ning tau, kanan me iting makalulun a kasulatan; kaybat mako ka at magsalita na karing memalen na ning Israel.

² Inya biklat ke ing asbuk ku at sinubu ne kanaku ing makalulun a kasulatan ban kanan ke.

³ Ngana, Anak ning tau, kanan me iting kasulatan a ibie ku keka; magpakabsi ka kaniti. Pengan ke; kasing yumu ne ning pulut-panilan.

⁴ Kanita ngana ning Dios, Anak ning tau, munta na ka karing memalen na ning Israel at sabian mu karela ing nanumang yuyutus kung sabian mu.

⁵ E ra ka tutubud king bansang magsalitang aliwang languahi a masakit paki-intindian, nune karing Israelita.

⁶ Nung itubud da ka karing maragul a bansa a magsalitang masakit a languahi, makiramdam la keka.

⁷ Oneng ala metung man karing memalen na ning Israel ing mabisang makiramdam keka; agyang aku e ra ku pakiramdaman. Masias la ngan a buntuk at mapaglaban.

⁸ Oneng gawan da kang masias a buntuk at matatag a kalupa ra.

⁹ Gawan da kang anti ing batung matatag at masias anting diamante; inya e ka sukat mitatakutan kareting mag-rebeldi.

¹⁰ Ngana pa ning Dios, Anak ning tau, makiramdam kang masalese at tandanan mu ing sablang sasabian ku keka.

¹¹ Kaybat munta ka karing kabalen mung makayugse at makiramdam la man o ali keka, sabian mu karela, Oyni ing sasabian na ning Ginung Dios.

¹² Kanita tinas na ku ning espiritu na ning Dios at dimdam ke ing dabeung ning masikan a siwala. Ngana, Purian ing ligaya na ning Ginu king banua!

¹³ Dimdam ku lang susulapo agnan-agnan ding pakpak da ring kerubin at ing inge da ring parugang a kalupa na ning inge ning ayun a masikan.

¹⁴ Dinatang ya kanaku ing espiritu na ning Ginu a kayabe ing maragul a upaya, at kabang darala na ku ning espiritu dimdam ku ing kaplas kung lub at mua.

¹⁵ Makanyan kung miras Tel Abib, lele ning Ilug ning Kebar, nung nu la manuknangan ding Israelitang miyugse. Menatili ku karin kilub ding pitung aldo, oneng e ku mekapagsalita uli na ning inakmul na ku ning ikit ku ampon dimdam.

¹⁶ Kalabas na ning pitung aldo, migsalita ya ing Ginu kanaku.

¹⁷ Ngana, Anak ning tau, gagawan da kang bante para king Israel. Ipayabut mu la karing memalen ding babala a babie ku keka.

¹⁸ Nung sabian ku king malapit niang mate ing metung a taung e mayap, oneng e me dininan babala ban magbayu king pamibiebie na para aligtas na ing bie na, mate yang makasalanan, oneng ika ing ating pakibatan kanaku king kamatayan na.

¹⁹ Nung dininan meng babala ing taung e mayap, oneng e ya tinuknang darapat pamikasala, mate ya; manatili yang makasalanan, oneng ing bie mu miligtas ya.

²⁰ Nung dapat yang e mayap ing metung a mayap a tau at ibili ke king mapanganib a kabilian, mate ya uling e me dininan babala. Mate ya uli da ring kasalanan na. Kalinguan ku ing depat nang mayap at ika ing ating pakibatan king kamatayan na.

²¹ Nung dininan meng babala ing taung mayap ban e ya dapat pamikasala, at mekiramdam ne man keka at e ya mikasala, manatili yang mabie, at ing bie mu miligtas munaman.

²² Penamdaman ku ing mayupaya nang panga-atyu ning Ginu at dimdam kung sinabi na kanaku, Talakad ka at munta ka king kapatagan. Karin da ka pakipagsalitan.

²³ Inya minta ku king kapatagan at karin ku ikit ing ligaya na ning Ginu, antimo ing ikit ku kanita king lele ning Ilug ning Kebar. Migsakab ku king gabun,

²⁴ oneng linub ya kanaku ing espiritu na ning Ginu at telakad na ku. Ngana ning Ginu kanaku, Muli na ka at magkulung king bale mu.

²⁵ Mitali ka karing lubid, O anak ning tau, at e ka malyaring lumual ban makisalamuha karing kabalen mu.

²⁶ Ipata ke ing dila mu ban e mu la malyaring dinan babala deting mapag-rebelding tau.

²⁷ Kaybat na nita, potang pakisabian da kang pasibayu at ibalik keka ing upaya ning pamagsalita, sabian mu karela king aku, ing Ginung Dios, ing magsalita. Makiramdam la ding aliwa, oneng e da ka pansinan ding aliwa, uling metung lang bansang mapaglaban. fig,,,, ,Oneng linub ya kanaku ing espiritu na ning Ginu at telakad na ku.,(3:24)fig*

4

¹ Ngana pang sinabi ning Dios, Anak ning tau, kuma kang metung a baldosa; ibili me king arapan mu at igulis me ing siudad ning Jerusalem.

² Kaybat, ban alarawan mu ing pangakubkub na, ibili mu lang makapatulug ding dutung a paniagka, ding kulkul, ding kampu, at ding trosung paglasak.

³ Kuma kang metung a kawaling bakal at ibili meng anting metung a pader pilatan mu at ning siudad. Arapan me ing siudad. Paburen meng makubkub at ika ing kumubkub kaniti. Maging metung yang palatandanan king bansang Israel.

⁴ Kaybat magkera ka king banda mung kayli at ipatung ku keka ing pamikasala na ning bansang Israel.

⁵ Kilub ding atlung dalan at siam apulung aldo manatili ka karin at magdusa uli na ning karelang pamikasala. Katumbas ne ning metung a aldo ing balang banua ning karelang pangaparusan.

⁶ Potang apupus mu na ita, magbiling ka king banda mung wanan at pagdusan mu kilub ding apat apulung aldo ing pamikasala na ning Juda; manunggal aldo para king balang banua ning karelang pangaparusan.

⁷ Ilawe mu lang maratna ding mata mu king makubkub a Jerusalem. Ilislis me ing takde mung baru at iyatiat me ing kamau mu king siudad, at magsalita kang ula laban kaniti.

⁸ Igapus da ka ban e ka makabiling misusumangid anggang e mapupus ing pangakubkub na. fig,,,,,... iyatiat me ing kamau mu king siudad, at magsalita kang ula laban kaniti.,(4:7)fig*

⁹ Kuma ka ngening trigu, sebada, butul kamangyang, sitsaru, mihu, at espelta. Piyabe-abe mu ngan at gawa kang tinape. Iti ya ing kanan mu kilub ding atlung dalan at siam apulung aldo kabang makakera ka king dane mung kayli.

¹⁰ Makapaintulut keka aldo-aldo ing walung onsang tinape, at iti sukat makagyu angga king kabukasan.

¹¹ Limitadu mu ing danum a inuman mu, adua mung tasa balang aldo.

¹² Patau kang api king melanging dinat ding tau, maglutu kang tinape at kanan me iting tinape king akakit da ring tau.

¹³ Ngana ning Ginu, Ipayabut na niti nung makananu lang mangan ding Israelita king pamangan a babawal na ning Kautusan potang ikalat ku na la karing aliwang bansa.

¹⁴ Oneng ngakung mekibat, Ali, Ginung Dios! E ku pa bitasang dinatan ing sarili ku. Manibat na kanitang malati ku e ku pa bitasang mengan king nanumang karning animal a mete na kabud o pete da ring malyap a animal. E ku pa bitasang mengan nanumang pamangan a mituring e malinis.

¹⁵ Kanita sinabi na ning Ginu, Nung makanyan, paintulutan da kang gumamit dinat baka a gamitan mu king pamaglutu mung tinape.

¹⁶ Ngana pang tinuglung, Anak ning tau, ituknang ku ing paniatang ding tinape kilub ning Jerusalem. Magulu la pamisip at malisuas la ding tau karin kabang pagrasyun da na ing pamangan a pagkabie ra at ing danum a inuman da.

¹⁷ Kagisanan lang tinape ampon danum; masira na la lub kanita at mayayat la uli na ning kasalanan da.

5

¹ Ngana ning Ginu kanaku, Anak ning tau, kuma kang mataram a espada at gamitan me ban labahasan me ing buntuk mu at ing balbas mu. Kaybat timbangan mu ing buak mu king timbangan at gawan mung atlung dake.

² Silaban mu ing katlung dake king siudad potang meyari na ing pangakubkub. Kuanan mu ing katlung dake at paglatian mu king kekang espada kabang lalakad ka king siudad. Ikalat mu king angin ing tauling katlung dake at panagalan ku king kakung espada.

³ Mitagan kang mapilan a buak at ibalut mu king lilip ning kekang imalan.

⁴ Kaybat milual kang pasibayung mapilan at iyatsa mu king api at paburen mung maduluk. Manibat kareti ing api a mikalat king mabilug nang bansa ning Israel.

⁵ Ngana ning Ginung Dios, Pakalawen me ing Jerusalem. Binili ke king libutad ning yatu kayabe ding aliwang bansang kasiping na.

⁶ Oneng selangsangan na la ning Jerusalem ding kanakung kautusan at pepakit na king lalu yang e mayap kesa karing aliwang bansa; lalu yang e mapamintu kesa karing aliwang bansang kasiping na. Tinggian na la ning Jerusalem ding kanakung kautusan at e ya memintu karing kanakung tuntunan.

⁷ Inya makiramdam ka Jerusalem king kanakung sabian, aku ing Ginung Dios. Uli na ning e mu pamamintu karing kautusan ku o e pamananggap karing tuntunan ku, mekarapat kang mas dakal a kagutgutan kesa karing bansang makapadurut keka. Tikian mu ing panugali da ring aliwang bansa.

⁸ Inya aku, ing Ginung Dios, sasabian ku keka king aku ing kekang kalaban. Isaldak ku keka ing kayatulan king akakit da ring sablang bansa.

⁹ Uli na ning sablang depat mung pikakasaman ku, parusan ke ing Jerusalem king parusang e ku pa bitasang depat king milabas at e ku na daptan pasibayu.

¹⁰ Bilang bunga na niti, kanan da la ring pengari king Jerusalem ding anak da, at kanan da la ring anak ding pengari da. Parusan da ka at ikalat ku la king balang suluk ding miligtas.

¹¹ Anti na ning aku ing mabie Ginung Dios, oyni ing asabi ku: uling dinatan me ing kanakung Templo king e mayap at king makasumaming pemaniapat mu, isuka da ka at e ku malunus keka.

¹² Mate la king sakit at king danup ding katlung dake karing kekang memalen kilub ning siudad; mangautas la king lual ning siudad ding aliwang katlung dake karing espada, at ikalat ku la ding tauling katlung dake king angin at panagalan ku la king espada.

¹³ Ibugnus ku ing bigsikan na ning kanakung mua at kasbu anggang e ku mipasno. Potang iti mapalyari na ngan, maniwala na ka king aku, ing Ginu, migsalita ku pin keka uling mimua ku king kekang kataksilan.

¹⁴ Bukud pa kanyan, insultuan na ka at dumayu ya keka ing balang taung lalabas a ibat karing bansang makapadurut keka.

¹⁵ Parusan da ka neng mua ku at mikakasbu. Mangilabut la king takut ding bansang makapadurut keka. Masora lang manakit keka at pagsisti da ka pa.

¹⁶ Ituknang ku ing paniatang na ning pagkabie keka at paburen da kang mate king danup. Panamdaman mu ing kaplas ning danup a mengaring mataram a paslung bignus da keka.

¹⁷ Paratang kung maragul a danup at mangalyap a animal ban makamate karing anak mu at paratang ku munamang pesti, katampalasan, at gerang makamate keka. Aku, ing Ginu, ing migsalita.

6

¹ Migsalita ya ing Ginu kanaku. Ngana,

² Anak ning tau, arapan mu la ding bunduk ning Israel at ibie mu karela ing kakung mensahi.

³ Sabian mu karing bunduk ning Israel king makiramdam la king amanu na ning Ginung Dios, king kanakung sasabian karing bunduk, karing bunduk-bundukan, karing pidadalanan na ning danum, at karing kapatagan. Paratang kung espada ban maglasak karing lugal nung nu la sasambang idolo ding tau.

⁴ Malasak la ding altar at masira la ding altar a piyayainan insenso. Mate la ngan ding sablang tau king arap da ring karelang idolo.

⁵ Ikalat ku la ding bangke da ring memalen na ning Israel; ikalat ku lang makapadurut karing altar ding butul da.

⁶ Malasak la ding sablang siudad ning Israel angga king mapirasu lang mangalati ding sablang altar da at idolo, misambulat la ding altar dang pidurulukan insenso, at lumbug la ding sablang bage gewa ra.

⁷ Mate la ding tau nu la man karin at kilalanan da ring mitagan king aku ing Ginu.

⁸ Makanyan man, paburen ku lang makatakas ding mapilan at mikalat la karing aliwang bansa

⁹ nung nu la manuknangan king pangayugse. Aganaka da ku karin at akilala da king perusan ku la at leko dangalan, uling ginulut la kanaku ding pusu rang taksil at mas liguran da la ring idolo kesa kanaku. At mandiri la king sarili da uli na ning e mayap at makasumaming bage depat da.

¹⁰ Abalu ra kanita king aku ing Ginu at tutu la ding babala ku.

¹¹ Ngana ning Ginung Dios, Ipalipit mu la ding kekang gamat! Iparak mu la ding kekang bitis! Tumangis kang mitmung lungkut uli da ring sablang e mayap at makasumaming bage depat ding Israelita. Mate la king gera o kaya king danup o salut.

¹² Sakit la at mate detang atyu king marayung lugal; mate la king gera detang atyu king makalapit, at mate na la man king danup detang miligtas. Takman da ing bayat ning kanakung mua.

¹³ Mikalat la ding bangke libutad ding idolo at king makapadurut da ring altar, mikalat la king balang matas a bunduk-bundukan, karing babo ding balang bunduk, karing lalam ding malabung a tanaman, at king balang maragul a tanaman a ensina, karing balang lugal nung nu la dinuluk ain-sakripisyu para karing karelang idolo. Kanita ra akilala king aku ing Ginu.

¹⁴ Inya pakirasnan ku la ngan at lasakan ke ing karelang bansa. Gawan keng disyerto manibat king mauling disyerto angga king siudad ning Ribla king dane norti, ala kung laktawan a lugal a panuknanganan da ring Israelita. Kanita ra akilala king aku ing Ginu.

7

¹ Migsalita ya kanaku ing Ginu.

² Ngana, Anak ning tau, aku ing Ginung Dios. Iti ya ing kakung sasabian king bansang Israel: Dinatang na ing kawakasan na ning mabilug a bansa!

³ Israel, dinatang na ing kawakasan. Takman mu na ing kanakung mua at atulan da ka king depat mu. Singilan da ka uli na ning makasumami mung ugali.

⁴ E ra ka ipanupaya o pakitanan lunus. Parusan da ka uli na ning makasumaming bage depat mu. Akilala mu kanita king aku ing Ginu.

⁵ Nganang magsalita ning Ginung Dios, Tuki-tuking datang keka ing kasiran.

⁶ Yari na ing sabla! Ya na iti ing kawakasan mu. Angga na ka ken!

⁷ Daratang ne ing kawakasan para kekayung taung manuknangan king bansa. Malapit na ing panaun a ala nang marapat a pamagselebra karing altar king bunduk; bukud mung kaguluan ing miras kekayu.

⁸ Malapit ku nang iparala ing bayat ning kanakung mua. Atulan da ka uli na ning makasumaming ugali mu. Parusan da ka king depat mung e ustu.

⁹ Ala kung itagan o pakitanan lunus. Parusan da ka uli na ning makasumaming bage depat mu. Akilala mu kanita king aku ing Ginu at king aku ing mamarusa keka.

¹⁰ Daratang na ing aldo ning kasiran. Merakal ing keyalan hustisia; susukdul na king banua ing ketasan mung lub.

¹¹ Mamungang dakal a e mayap ing pamanampalasan. Alang mitagan karela, king karelang pibandian, king karelang dangalan o ligaya.

¹² Dinatang na ing panaun. Malapit ne ing aldo nung kapilan mawalan nang ulaga ing pamaniali at pamagtinda, uling dugpa ing parusa na ning Dios king balang metung at metung.

¹³ Ala nang negosianting kumaba bie ban abawi na itang mewala na, uling dagpa ing mua na ning Dios king balang metung at metung. E la miligtas ding e mayap.

¹⁴ Tumiup ya ing trumpeta at magsadia ya ing balang metung at metung. Oneng ala metung mang munta king gera, uling dugpa ing mua na ning Dios king metung at metung.

¹⁵ Ating labanan karing dalan; ing pesti at danup atyu karing pibalebale. Mate ya king labanan ing ninumang atyu king marangle at paten ne ning sakit ampon ning danup ing ninumang atyu king siudad.

¹⁶ Tumakas la karing bunduk ding mapilan; mangari la karing patipating meyabuang karing kapatagan. Saingsing la ngan uli na ning kasalanan da.

¹⁷ Mangaina la ding gamat ning balang metung at metung at galgal la ding tud da.

¹⁸ Misulud lang imalan a magaspang at galgal ing mabilug dang pangatau. Makalbu la ding buntuk da at mibili la ngan king kamarinayan.

¹⁹ Iyugse da lang anting basura ding pilak at gintu ra karing dalan, uling e na la aligtas ning gintu at ning pilak king mikakalabkab nang mua ning Ginu. E da la agamit deti ban pakibatan da ing pamangailangan da o uluan ing danup da. Ing gintu at pilak ya ing sangkan king pamikasala da.

²⁰ Kanitang misan pagmamaragul da la ring malagu rang alahas, oneng ginamit da la reti king pamangawang makasumaming idolo. Iti ya ing sangkan nung inya gewa nang makasumami ning Ginu para karela ing pibandian da. fig,,,,,Tumakas la karing bunduk ding mapilan.,(7:16)fig*

²¹ Ngana ning Ginu, Paburen ku la ding dayuan ban panakawanan da la at ding taung e mayap ila ding kuma king sabla rang pibandian at dinatan da pa iti.

²² Gulutan ku la potang lapastanganan de ing pakamalan kung Templo, potang luban de ring mapanako at dinatan de.

²³ Atyu king kagutgutan ing sabla uling mitmu ya ing bansa king pamakamate at mitmu la ding siudad king katampalasanan.

²⁴ Paratangan ku la keti ding lalung e mayap diling bansa at pepaburen ku lang kuanan da la ring kekong tuknangan. Milako la tiwala ding kekong pekamasikan a lalaki potang ding bansa paburen ku lang lapastanganan da la ring lugal a kekong pisasamban.

²⁵ Panintunan yu ing kapayapan potang ing kabiguan datang na, oneng e yu akit kapilan man.

²⁶ Miliwas-liwas datang ing kasiran at e patugut datang ing e mayap a balita. Aduan yu kanita karing propeta ing sabian da kekayu ing amamatiag da. Ala la namang balung sabian ding pari karing tau at ala lang aibie nanumang payu ding makatua.

²⁷ Magpaldas ya ing ari; milako ya kapanayan ing prinsipi at galgal la ding tau king takut. Parusan da kayu king sabla yung depat at atulan da kayu antimo nung makananu yu lang inatulan ding aliwa. Kanita ra akilala king aku ing Ginu.

8

¹ King kalimang aldo na ning kanam a bulan ning kanam a banua ning kekaming pangayugse, pakalukluk lang kayabe ku king kanakung bale ding manimuna da ring miyugse ibat king Juda. Kabud-abud dinatang kanaku ing upaya na ning Ginung Dios.

² Linawe ku babo at ikit ke ing metung a vision ning milalablab a itsurang tau. Lulupa yang api manibat king awakan angga lalam ning katawan na, at manibat king awakan paitas kikislap yang anti ing pepakintab a tangsu.

³ Inabut ne ing balamu gamat at sikmal na ku buak. Kanita king vision a iti, tinas na kung matas a matas ning espiritu na ning Dios at dela na ku Jerusalem. Dela na ku kilub ning pasbul dalan king dane norti ning Templo nung nukarin ating larawan a babie pamangalalu king Dios.

⁴ Karin ke ikit ing maslag a sala a pakilala king panga-atyu na ning Dios ning Israel antimo nung makananu keng ikit kanitang atyu ku king lele ning Ilug ning Kebar.

⁵ Ngana kanaku ning Dios, Anak ning tau, lumawe ka banda king norti. Linawe ku at karin king lele ning altar kilub ning pasbul dalan king dane norti ning Templo ikit ke ing larawan a babie pamangalalu king Dios.

⁶ Ngana ning Dios kanaku, Anak ning tau, akakit mu ing malilyari? Lawan mu la ding bage makasumami a pamaniaptan da keti ding memalen na ning Israel; tatabi da kung dumayu nang dumayu king banal kung lugal. Lakuas pang makasumami kesa kaniti ing akit mu.

⁷ Dela na ku king pasbul ning patyu at pepakit ne kanaku ing metung a busbus king pader.

⁸ Ngana, Anak ning tau, kulkulan me ing pader. Dinalan ku at ikit ke ing metung a pasbul.

⁹ At ngana kanaku, Lungub ka at lawan mu la ding makasumaming bage a daraptan da ken.

¹⁰ Inya linub ku at linawe. Mitmu la ding pader karing larawan da ring ubingan at aliwang e malinis a animal at karing aliwa pang bage a sasamban da ring Israelita.

¹¹ Pitu lang pulu ding makatuang manimuna na ning Israel a atyu karin; kayabe ya kareti i Jaazania a anak nang Safan. Tatalan yang pidurulukan insenso ing balang metung karela at paitas ing asuk a ibat king insenso.

¹² Nganang kinutang kanaku ning Dios, Akakit mo, anak ning tau, ing daraptan dang lihim ding makatuang manimuna na ning Israel? Sasamba la ngan kilub ning metung a kuartung mitmung larawan. Ngarang mangatuliran, E na katamu akakit ning Ginu! Gilutan na ne ing bansa.

¹³ Kanita ngana kanaku ning Ginu, Lakuas mu lang akit darapat bage mas makasumami kesa kanyan.

¹⁴ Inya dela na ku king pasbul dalan king dane norti ning Templo ning Ginu, at pepakit na la kanaku ding babaing manangis king kamatayan na ning kikilalanan dang dios a i Tamuz.

¹⁵ Kitang na, Anak ning tau, akakit mu yan? Lalu mu la pang akit ding bage lalung makasumami.

¹⁶ Inya dela na ku king patyu kilub ning Templo ning Ginu. Ketang lele ning piluluban king santuaryu, pilatan ning altar at ning balkun, atyu la ding maygit o kumulang aduang pulu't limang lalaki. Gugulutan de ing santuaryu at duruku lang mababa makayarap king dane aslagan; sasamban de ing saslag a aldo.

¹⁷ Ngana kanaku ning Ginu, Anak ning tau, akakit mu yan? E pa makagyu kareting memalen na ning Juda ing depat da karing sablang bage makasumaming ikit mu keti at king pamikalat dang katampalasanan king mabilug a bansa. Ali, kailangan da pa ing datang la at daptan da yan keti king mismung Templo at lalu da kung pamuan. Lawan mu nung makananu da kung ininsultu king lalung e mayap diling paralan a agyu rang daptan!

¹⁸ Inya takman da ing bigsikan ning kanakung mua. Ala kung itagan karela o pakitanan mang lunus. Manalangin lang masikan kanaku; kulisak lang anggang binit da, oneng e ku la pakiramdaman.

9

¹ Kaybat na nita, dimdam keng migsalitang masikan ing Dios. Ngana, Lumapit kayu keni, ikayung lalaking mamarusa king siudad. Idala yu la ding sandata yu.

² Agad-agad lang dinatang ding anam a lalaking ibat king lual ning pasbul dalan king dane norti ning Templo. Magdala yang sandata ing balang metung karela. Kayabe re ing metung a lalaking makaimalan linen; magdala yang bage paniulat king awakan na. Dinatang la ngan at tinalakad king lele ning altar a tangsu.

³ Kanita ing maslag a sala a pakilala king panga-atyu na ning Dios ning Israel sinlag ibat karing kerubin a penibatan na, at linub ing sala king pasbul ning Templo. Migsalita ya ing Ginu king lalaking makaimalan linen.

⁴ Ngana, Munta ka king mabilug a siudad ning Jerusalem at dinan meng tatak king kanuan ing metung at metung a sasaingsing at maliligalig uli da ring sablang bage makasumami a mararapat king siudad.

⁵ At dimdam kung sinabi na ning Dios karing aliwang lalaki ing anti kaniti: Tukian ye king siudad at makamate kayu. Ala kayung tatagan; e kayu malulunus kenu man.

⁶ Paten yu la ding matuang lalaki, ding kayanakan a lalaki at babai, ding ima at ding anak. Oneng e ye tatagkilan ing ninumang ating tanda king kanuan na. Magumpisa kayu keting Templo ku. Inya megumpisa la karing makatuang manimuna a pakatalakad kilub ning Templo.

⁷ Ngana pa karela, Dinatan ye ing Templo. Katmuan yu la ding patyu na karing bangke. Kimut na kayu! Inya pegumpisan da na lang pete ding tau kilub ning siudad.

⁸ Magdili-dili kung atyu karin kabang mararapat ing pamakamate tau. Migsubsub ku king gabun at ngakung kinulisak, O Ginung Dios, tutu na waring maragul ing mua mu king Jerusalem inya pamaten mu la ding sablang makatagan a tau na ning Israel?

⁹ Nganang mekibat, Dinapat lang tutung maragul a kasalanan ding memalen na ning Israel at Juda. Dinapat lang pamakamate tau king mabilug a bansa at kitmuan deng krimen. Sasabian da king aku, ing Ginu, gilutan ke kanu ing bansa at king e ku la kanu akakit.

¹⁰ Oneng e ku malunus karela; daptan ku karela itang depatan da karing aliwa.

¹¹ Kaybat na nita, mibalik ya ing lalaking makaimalan linen at nganang minie ulat king Ginu: Atuparan ku na ngan ing inutus yu.

10

¹ Miglalawe ku at ikit ku king kalaganapan king kabuntukan da ring kerubin ing balamu metung a tronung megawa king batung safiro.

² Ngana ning Dios king lalaking makaimalan linen, Munta ka pilatan ding parugang lalam ding kerubin, at katmuan mu la king mibabayang uling ding gamat mu. Kaybat ikalat mu ing uling king siudad. Linawe keng meko.

³ Makatalakad la ding kerubin king dane mauli ning Templo inyang linub ya. At kitmuan ne ning metung a biga ing patyung makalub.

⁴ Ing maslag a sala a pakilala king panga-atyu na ning Ginu sinlag ibat karing kerubin, at migbanda king pasbul ning Templo. Kanita kitmuan ne ning biga ing Templo at meging masala ya ing patyu king aslag ning Ginu.

⁵ Meramdam angga na king patyung makalual ing inge ding pakpak da ring kerubin; kalupa na ning siwala na ning Dios a Mayupaya neng magsalita ya.

⁶ Inyang inutus ne ning Ginu ing lalaking makaimalan linen para kumang mapilan a mibabayang uling king pilatan da ring parugang a atyu lalam ding kerubin, linub ya ing lalaki at tinalakad lele ning metung karing parugang.

⁷ Inabut ne ning metung karing kerubin ing gamat na king api a atyu karin libutad da. Dinamput yang mapilan a uling at binili na la karing gamat na ning lalaking makaimalan a linen. Kinua na la ning lalaki ding uling at meko ya.

⁸ Apansingan ku king ing balang metung karing kerubin atin yang balamu gamat ning tau king lalam ning balang bagius na.

⁹ Apansingan ku munaman king ating apat a parugang; milupa-lupa la ngan. Atyu ing balang metung at metung king lele ning balang kerubin. Kikislap la ding parugang anti ding mangamal a batu.

¹⁰ Atin yang aliwang parugang a makakurus ing balang metung karing parugang.

¹¹ Potang kikimut la ding kerubin, abe-abe lang miraras king lugal a buri dang puntalan; e na kailangan ing dumurut la.

¹² Mitmu lang mata ding katawan da, ding gulut da, ding gamat da, ding pakpak da, at ding parugang da.

¹³ Ila naman deti ring parugang a ikit ku king minunang vision.

¹⁴ Atin yang apat a lupa ing balang kerubin. Kalupa yang toro ing mumuna, kalupa yang tau ing kadua, kalupa yang leon ing katlu, at kalupa yang agila ing kapat.

¹⁵ (Ila naman ding kerubin a ikit ku king lele ning Ilug ning Kebar.) Potang paitas la ding kerubin

¹⁶ at potang galo la tutuki la karela ding parugang. Kapilan man laladlad da la ring pakpak da ban sulapo, tutuki la pa mu rin karela ding parugang.

¹⁷ Pota namang tuknang la, tuknang la naman ding parugang; at potang sulapo la, ding parugang tutuki la naman, uling ding kerubin ila ding ating upaya karela.

¹⁸ Kanita ing maslag a sala a pakilala king panga-atyu na ning Ginu likuan ne ing pasbul ning Templo, at minta ya king metung a lugal babo da ring kerubin.

¹⁹ Lidlad da la ring pakpak da at sinulapo lang ibat king yatu kabang makalawe ku, at tinuki la karela ding parugang. Tinuknang la king pasbul dalan dane aslagan ning Templo ning Ginu at ing maslag a sala atyu babo ra.

²⁰ Apansingan ku king ila naman ding kerubin a kanakung ikit lalam ning Dios ning Israel karin king Ilug ning Kebar.

²¹ Atin yang apat a lupa ing balang metung karela at apat a pakpak, at ing balamu gamat tau king lalam na ning balang pakpak.

²² Kalupa da lang kalupa ding lupa da retang ikit ku king lele ning Ilug ning Kebar. Taglus-taglus yang melaus ing balang metung at metung karing kerubin.

11

¹ Tinas na ku ning espiritu na ning Dios at dela king pasbul dalan dane aslagan ning Templo. Karin lele ning pasbul dalan ikit ku la ding aduang pulu't limang lalaki. Kayabe ya i Jaazania a anak nang Azur at i Pelatia a anak nang Benaia, ding aduang pamuntuk da ring memalen.

² Ngana kanaku ning Ginu, Anak ning tau, gagawa lang e mayap a tangka deting lalaki at babie lang e ustung payu keting siudad.

³ Sasabian da, E lumuat makatalakad tamung bale pasibayu. Mengari ya iting siudad king kalderang pipaglutuan at mengari tamu king karni kilub na, oneng king metung a banda ingatan na katamu king api.

⁴ Inya ngeni, anak ning tau, magsalita kang laban karela.

⁵ Liban na ku ning espiritu na ning Ginu at sinabi na kanaku ing ibie ku karing tau iting mensahi: Memalen ning Israel, balu ku ing kekayung pamaniabian at ing tatangka yu.

⁶ Pete yu la ding tutung dakal a tau keti king siudad, inya mitmu lang bangke ding dalan.

⁷ Inya aku, ing Ginung Dios, iti ing sasabian ku kekayu. Wa, metung ya ping kalderang pipaglutuan iting siudad, oneng isanu ing karni? Ding bangke da ring taung pete yu! Milako na kayu keti; iyugse da kayu king lual ning siudad.

⁸ Tatakut kayu karing espada? Mitubud kung lalaking paka-espada ban lumusub kekayu.

⁹ Ilako da kayu keting siudad at ibie da kayu karing dayuan. Inatulan da na kayung kamatayan

¹⁰ at mate kayu king labanan king mismung bansa yu. Kanita akilala na ning balang metung kekayu king aku ing Ginu.

¹¹ E na kayu adipensa niting siudad; e ya anti ing kalderang magdipensa king karning makadatuk. Parusan da kayu nu kayu man karin keti king bansa ning Israel.

¹² Akilala yu king aku ing Ginu at kabang pamintuan yu la ding kautusan da ring makasiping a bansa, lalabagan yu no man ding kanakung Kautusan at e pamintuan ding kanakung tuntunan.

¹³ Kabang magsalita kung ula, mibual ya i Pelatia at mete ya. Migsubsub ku king gabun at ngakung kinulisak, E makanyan, Ginung Dios! Paten mu na la ngan wari ding sablang mitagan king Israel?

¹⁴ Nganang migsalita kanaku ning Ginu,

¹⁵ Anak ning tau, ding taung manuknangan Jerusalem pisasabian da ka ampon ding kalupa mung Israelita a makayugse king marayung lugal. Ngarang sasabi, Tutu na lang marayu ding taung miyugse; e na la makasamba king Ginu. Pepabandi na ne kekatamu iting bansa.

¹⁶ Ngeni sabian mu karing kalupa mung miyugse ing kanakung sasabian. Aku ing sangkan king pangadala ra karing marayung bansa ban karin na la manuknangan, at aku ing mikalat karela karing aliwang bansa. Makanyan man, pansamantala kung mantabe karela karing bansa nung nukarin la mipadpad.

¹⁷ Inya sabian mu karela ing sasabian ku, aku ing Ginung Dios. Tipunan ku lang ibat karing bansa nung nu ku la kinalat at ibie keng pasibayu karela ing bansang Israel.

¹⁸ Potang magbalik na la, kailangan da lang ilako ding sablang marinat at makasumaming idolong karelang dasnan.

¹⁹ Dinan ku lang bayung pusu at bayung pamisip. Ilako ke karela ing masias dang pusung batu, at dinan ku lang pusung mapamintu.

²⁰ Tukian da la kanita ding Kautusan ku at tapat da lang pamintuan ding sablang tuntunan ku. Ila ding maging balen ku at aku ing maging Dios da.

²¹ Oneng parusan ku la ding taung maburing sasamba karing marinat at makasumaming idolo. Parusan ku la agpang king depat da. Ing Ginung Dios ya ing migsalita.

²² Megumpisa lang sinulapo ding kerubin at tinuki la karela ding parugang. Atyu babo ra ing makasilo nang aslag ning Dios ning Israel.

²³ Meko ing makasilo aslag king siudad at minta king bunduk king dane aslagan na niti.

²⁴ King vision tinas na ku ning espiritu na ning Dios, at dela na kung pasibayu karing taung miyugse king Babilonia. Kaybat mitda ya ing vision

²⁵ at selita ku karing taung miyugse ing sablang bage pepakit na kanaku ning Ginu. fig,,,,,King vision...,(11:24)fig*

12

¹ Migsalita ya kanaku ing Ginu.

² Ngana, Anak ning tau, manuknangan ka ngeni libutad da ring taung mapag-rebeldi. Atin lang mata, oneng e la manakit; atin lang balugbug, oneng e la makaramdam uling lahi lang mapag-rebeldi.

³ Ngeni, anak ning tau, ibalut mu ing kekang kailangan antimo ing daraptan na ning taung magbakwit at lumakad na ka bayu mabengi. Paburen mung akit da ring tau ing paglako mu at ing pamamunta mu king aliwang lugal. Mekad apansingan da ka reting mig-rebeldi.

⁴ Kabang masala pa, ibalut mu ing kailangan mu para king pangayugse ban akit da ka at kaybat paburen mung pagumasdan da ing paglako mu king kabengian a balamu mo pupunta ka king pangayugse.

⁵ Kabang magumasid la, gawa kang busbus king pader ning bale mu at karin mu idalan ing balutan mu.

⁶ Paburen mung apagumasdan da ing pamibili mu karing pago mu king balutan mu at ing paglual mu busal ning karalumduman kabang makatakap la ding mata mu, ita sanang e mu akakit ing pupuntalan mu. Maging metung yang babala ing kekang gawan karing Israelita.

⁷ Tiparan ku ing sinabi na ning Ginu. King aldo mu ring ita migbalutan ku antimo ing taung magbakwit. At king benging ita, karing gamat ku ginawa kung busbus king pader at linual ku. Kabang makalawe ya ing balang metung, binili ke king pago ku ing balutan at saka na ku meko.

⁸ Itang kayabakan, migsalita ya kanaku ing Ginu.

⁹ Ngana, Anak ning tau, ngening kukutang da ring mapag-rebelding Israelita nung nanu ing daraptan mu,

¹⁰ sabian mu karela itang pasabi ku karela, aku ing Ginung Dios. Mangaintulid ya iting mensahi king prinsiping manibala king Jerusalem at karing sablang taung manuknangan karin.

¹¹ Sabian mu karela king itang depat mu metung yang tanda ning mapalyari karela; maging bakwit la at bihag.

¹² Ibili ne ning prinsipi a manimuna karela ing balutan na karing pago na busal ning kabengian, at tumakas ya't dumalan king busbus a gewa ra king pader para pidalanan na. Takpan na la ding mata na at e na akakit ing pupuntalan na.

¹³ Oneng iladlad ke ing kanakung lambat at marakap ya kaniti. Kaybat, idala ke king siudad ning Babilonia at mate ya karin a e ne bitasang ikit ing siudad.

¹⁴ Iyugse ku la king miyayaliwang lugal ding miembru na ning konsehu na, ding tagapayu ampon guardia, at panintunan da la reti ding tau ban paten da la.

¹⁵ Potang iyugse ku na la karing miyayaliwang bansa da ring dayuan, kanita da akilala king aku ing Ginu.

¹⁶ Paburen ku lang miligtas ding mapilan king gera, king danup, at king miyayaliwang sakit ban libutad ding bansa akilala ra ing makasumami dang ugali at kilalanan da king aku ing Ginu.

¹⁷ Migsalita ya pa kanaku ing Ginu.

¹⁸ Ngana, Anak ning tau, galgal ka potang mamangan ka at galgal king takut potang miminum ka.

¹⁹ Sabian mu king mabilug a bansa king iti ing mensahi na ning Ginung Dios para karing memalen na ning Jerusalem a manuknangan pa king karelang bansa: Galgal la potang mangan la at galgal la king takut potang minum la. Masalanta ya ing karelang bansa, uling ala yang kagalangan king kautusan ing metung at metung a manuknangan karin.

²⁰ Malasak la ding siudad a ngeni mitmung tau at maging anti yang disyerto ing bansa. Kanita ra akilala king aku ing Ginu.

²¹ Migsalita ya kanaku ing Ginu.

²² Ngana, Anak ning tau, obat kaya augalian deng gagamitan ding memalen na ning Israel iting kasebian: Lalabas ing panaun at e la mipapaltutu ding ula?

²³ Ngeni sabian mu karela, aku ing Ginung Dios, iti ing malyari kung asabi tungkul kaniti. Angganan ku ne iting kasebian. E ne maulit pa kapilan man king Israel. Sabian mu karela: Dinatang na ing panaun at mipapaltutu na la ding ula!

²⁴ E na mika vision a e tutu o makabaligo ula libutad ding memalen na ning Israel.

²⁵ Aku, ing Ginu, ing magsalita karela at itang sabian ku ya ing marapat. E na mika pangabala pa. King mismung panaun yu, ikayung sablang mapag-rebeldi, daptan ku itang bela kung daptan kekayu. Migsalita na ku, nganang sasabi ning Ginung Dios.

²⁶ Pasibayu, ngana ning Ginu kanaku,

²⁷ Anak ning tau, isipan da ring Israelita king mangaintulid la mu ding kekang vision at ula king panaun a malambat pang e datang.

²⁸ Inya sabian mu karela king aku, ing Ginung Dios, sasabian ku: E na mika pangabala pa. Itang sinabi ku ya ing marapat. Aku, ing Ginung Dios, ing migsalita!

13

¹ Migsalita ya kanaku ing Ginu.

² Ngana, Anak ning tau, magsalita kang laban karing propeta na ning Israel a gagawang sarili dang ula. Sabian mu karela king makiramdam la king amanu na ning Ginu.

³ Iti ya ing sasabian na ning Ginung Dios: Makasumpa la deting mangmang a propeta! Ila mismu ding babie diwa king sarili dang pamisip at mamigawa karing sarili dang vision.

⁴ Memalen ning Israel, ala lang panga-aliwa ding kekayung propeta karing asung-gubat a maglungga karing lasak-lasak nang bale ning metung a siudad.

⁵ E da la pansin ding lugal nung nukarin la miragsa ding pader at e da la lalarinan deti. Inya e ya malyaring idipensa ing Israel potang datang ing gera king aldo ning Ginu.

⁶ E la tutu ding ikit dang vision at kalaraman la ding karelang inula. Sasabian da king sasalita ra ing kanakung amanu, oneng e ku la tinubud. Makanyan man, panenayan da ing mipaltutu la ding karelang amanu!

⁷ Sasabian ku karela: E la tutu detang vision a ikit yu at kalaraman la ding ula a sasalita yu. Sasabian yu king deti amanu ku la, oneng e na ku man migsalita kekayu!

⁸ Inya ngana karela ning Ginung Dios, E la tutu ding kekayung amanu at kalaraman la ding kekayung vision. Laban ku kekayu.

⁹ Malapit da na kayung parusan, ikayung propetang maki vision a e tutu at magsalitang makabaligong ula. Ala na kayu karin potang mitipun la ding memalen ku ban gawang kalutasan; e la miyabe ding lagyu yu king listahan da ring memalen na ning Israel; e na kayu bitasang makapagbalik pa king sarili yung bansa. Kanita yu akilala king aku ing Ginung Dios.

¹⁰ Ding propeta ilang maglili karing memalen ku king kapamilatan na ning pamagsalita rang Ing sabla masalese. Oneng e naman masalese ing sabla! Ginawa lang pader ding memalen ku karing batung kabud da na pitumpak-tumpak at kaybat dinatang la ding propeta at pininturan deng maputi ing pader.

¹¹ Sabian mu karing propeta king miragsa ya ing karelang pader. Paratang kung masikan a uran. Dugpa la ding maragul a batu at sapulan ne ning masikan a angin.

¹² Miragsa ya ing pader at ikutang na keka ning metung at metung nung nanung mayap ing binie ning pinturang maputi.

¹³ Ngeni iti ya ing sasabian na ning Ginung Dios: King kanakung mua paratang kung masikan a angin, uran a bubulusuk, at muran lipat ban siran ne ing pader.

¹⁴ Iragsa ke ing pader a pininturan dang maputi; isambulat ke at paburen ku lang lunto ding pundasyun na. Miragsa ya at paten na kayu ngan. Kanita na akilala ning metung at metung king aku ing Ginu. fig,,,,,Paratang kung masikan a angin, uran a bubulusuk, at muran lipat ban siran ne ing pader.,(13:13)fig*

¹⁵ Ing pader at detang memintura kaniti king pinturang maputi panamdaman da ing bigsikan na ning mua ku. Kaybat sabian ku keka king ala na yu ing pader at pati na ding meminturang maputi kaniti

¹⁶ detang propetang migsalita king Jerusalem king ing sabla masalese, oneng e naman masalese ing sabla! Ing Ginung Dios ya ing migsalita.

¹⁷ Ngana ning Ginu, Ngeni, anak ning tau, lawan mu la ding babaing kabalen mung gagawang ula. Magsalita kang laban karela

¹⁸ at sabian mu karela ing pasabi ku karela: Ikayung babaing propeta, makasumpa kayu! Ala kayung patugut manayi karing aptas a bibili yung peka anting-anting king pipulsuan ning bala namu at talukbung a panakap da ring sabla karing buntuk da ban mika upaya la karing aliwang tau. Buri yung akua ing upaya king bie at king kamatayan da ring kanakung memalen ban gamitan yu mu king sarili yung kapakanan.

¹⁹ Lalako yu ku dangalan king arapan da ring mismung memalen ku ban manikua kayung mapilan a kasakmal a sebada at mapilan a pirasung tinape. Pamaten yu la ding taung e mangaintulid kamatayan at lilingapan ding taung e naman mangaintulid mie. Inya magsalita kayung kalaraman karing memalen ku at maniwala no man kekayu.

²⁰ Ngeni iti ya ing sasabian na ning Ginung Dios: Pikakasaman ku la ding panaptas-pulsu a gagamitan yu king pamagkapilit yung mika atin kayung upaya king bie at kamatayan. Laputan ku la karing takde yu at ibulus ku la ding taung atyu lalam yung upaya.

²¹ Paglaputan ku la ding talikbung yu at iligtas ku la ding memalen ku king kekayung upaya. Kanita yu akilala king aku ing Ginu.

²² King kapamilatan da ring kekayung kalaraman sisiran yu la lub ding taung mayap a e ku buring manasakit. Sasabatan yu la ding taung e mayap king kapagnasan dang magbayung bie at iligtas ing bie ra.

²³ Inya miyangganan ngeni ing e tutu yung vision at makaliling ula. Iligtas ku la ding memalen kung atyu king upaya yu. Kanita yu akilala king aku ing Ginu.

14

¹ Dinatang la ding mapilan karing manimuna na ning Israel ban mangutang kanaku tungkul king kaburian na ning Ginu.

² Migsalita ya kanita kanaku ing Ginu.

³ Ngana, Anak ning tau, binie da la reting lalaki ding pusu ra karing idolo at paintulutan da la ring idolo ing tairan da la king pamikasala. Isipan da galang king dinan ku lang pakibat?

⁴ Ngeni magsalita ka karela at sabian mu king aku, ing Ginung Dios, sasabian ku karela: Ing ninumang Israelitang minie king pusu na karing idolo at peintulut na ing tairan ne king pamikasala at kaybat daratang ya ban mangutang king metung a propeta, pakibatan ke ing pakibat a mangaintulid karing dakal nang idolo!

⁵ Deting sablang idolo ilang sangkan king kataksilan da kanaku ding Israelita, oneng king pakibat ku panenayan ku ing pasibayu kung akua ing karelang katapatan.

⁶ Inya ngeni, sabian mu karing Israelita ing pasabi ku, aku ing Ginung Dios: Magbalik kayu at lakuan yu na la ding makasumami yung idolo.

⁷ Ing ninumang gumulut kanaku, Israelita ya man o dayuan a manuknangan king balen ning Israel, at kaybat samba yang idolo at munta yang mangutang king metung a propeta, aku, ing Ginu, dinan keng pakibat.

⁸ Salangsangan ke! Gawan keng metung a pialimbawanan at kasebian. Itiwalag ke king komunidad da ring memalen ku ban akilala mu king aku ing Ginu.

⁹ Nung melinlang ya ing propeta a minie maling pakibat, aku, ing Ginu, ing makipasari kanita. Itiwalag ke king katipunan da ring memalen na ning Israel.

¹⁰ Ing propeta at itang linapit mengutang parehu lang miparusan.

¹¹ Daptan ku iti ban e ra ku lakuan ding Israelita at ban e ra dirinatan ing sarili da karing karelang pamikasala. Ila ding maging kanakung memalen at aku ing maging karelang Dios. Ing Ginung Dios ya ing migsalita.

¹² Migsalita ya kanaku ing Ginu.

¹³ Ngana, Anak ning tau, nung dinapat yang pamikasala ing metung a bansa at migtaksil ya kanaku, pakirasnan ke at siran ku ing panibatan ning kabiayan na. Mika danup at parehu na lang paten ding tau at ding animal,

¹⁴ agyang pang ding atlung lalaking i Noe, i Daniel, at i Job ilang manuknangan karin, ing aligtas da ya mu ing sarili dang bie uli na ning kayapan da. Ing Ginung Dios ya ing migsalita.

¹⁵ Mapalyaring padala kung mabagsik a animal ban paten da la ring tau, maging mapanganib yang bansa angga king ala nang malyaring makapaglakbe karin.

¹⁶ At agyang pang ding atlung lalaking deti manuknangan la karin, nung makananung aku, ing Ginung Dios, Dios kung mabie, makanyan da lang e malyaring aligtas pati na ding mismung anak da. Ing bukud mung malyari dang aligtas ya ing sarili dang bie at maging anti yang disyerto ing bansa.

¹⁷ Malyaring padala kung gera king bansang ita at parala kung mapanyirang espada ban gisanan la ding tau at ding animal.

¹⁸ At agyang pang ding atlung lalaking deti manuknangan la karin nung makananung aku ing Ginung Dios, Dios kung mabie, makanyan da lang e malyaring aligtas ding mismung anak da. Ing bukud mung malyari dang aligtas ya ing sarili dang bie.

¹⁹ Nung padala kung pesti ketang bansang ita at king mua ku gisanan ku ing dakal a bie, paten ku la ding tau at ding animal,

²⁰ agyang pang di Noe, Daniel, at Job ilang manuknangan karin nung makananung aku, ing Ginung Dios, Dios kung mabiemakanyan da lang e malyaring aligtas ding anak da. Ing bukud mung makapagligtas king karelang bie ya ing karelang kayapan.

²¹ Iti ya ing sasabian na ning Ginung Dios: Parala ku ing apat a lalung mabayat a parusa king Jerusalem: ing gera, ing danup, ding mabagsik a animal, at ing salut ban gisanan da lang paten ding tau at ding animal.

²² Nung ating mitagan at ikua na lang aligtas ding anak na, pagumasdan mu la potang lumapit la keka. Akit mu kanita ing e mayap karela, at maniwala kang lubus king makatuliran pin ing parusang ipagpa ku king Jerusalem.

²³ Abalu mu kanita king ating sangkan ing metung at metung king depat ku. Ing Ginung Dios ya ing migsalita.

15

¹ Migsalita ya kanaku ing Ginu.

² Ngana, Anak ning tau, makananu yang ipakilupa ing ubas king metung a tanaman? Nanu ing kayapan na ning metung a sanga ning tanaman a ubas nung ipakilupa me karing tanaman ning kagubatan?

³ Agamit me kaya king nanu pa mang buri mung gawan? Malyari me kayang gawan agyang tulus mung pisabitan miyayaliwang bage?

⁴ Ala yang kasilbian nune mu ing gawan yang panangab. At potang mitau na la ding danggut na at meduluk ne ing libutad na, makagawa ka pa kayang nanuman kanite?

⁵ Ala neng kasilbian bayu ya pa masilab. Ngening silaban na ne ning api at dilukan lalu yang alang kasilbian. fig,,,,,Makagawa ka pa kayang nanuman kanite?,(15:4)fig*

⁶ Ngeni iti ya ing sasabian na ning Ginung Dios: Nung makananu yang mayayakua ing metung a sangang ubas king libutad ning gubat at mesilab, makanyan ku la namang kuanan ding taung manuknangan Jerusalem

⁷ at parusan ku la. Aligtasan da ne ing metung a silab, oneng ngeni silab pa mu rin ing maglaklak karela. Potang parusan ku na la, kanita mu akilala king aku ing Ginu.

⁸ E la meging tapat kanaku; inya gawan keng anting disyerto ing bansa ra. Ing Ginung Dios ya ing migsalita.

16

¹ Pasibayu yang migsalita kanaku ing Ginu.

² Ngana, Anak ning tau, ipakilala mu king Jerusalem ing makasumaming bage depat na.

³ Sabian mu king Jerusalem nung nanu ing sasabian na ning Ginung Dios: Mibait ka king bansa ning Canaan. Metung yang Amoreo i tata mu at Hetea ya i ima mu.

⁴ Kanitang mibait ka, ala mang memutut king kekang pusad o menos o menguskus asin o memalut keka king lampin.

⁵ Ala metung mang melunus keka ban daptan na mo sa keka ing isanu pa man kareti. Kanitang mibait ka, ala metung mang makiburi keka. Miyugse ka king malualas a marangle.

⁶ Kanita na ku man linabas at ikit da kang kaso-kaso king sarili mung daya. Makabalut kang daya at e ku apibata ing e ra ka iligtas.

⁷ Peparagul da kang anti ing metung a malabung a tanaman. Meragul ka at mesikan ampon mitas at meging metung kang dalaga. Masanting ya ubug ing salu mu at makaba ka buak, oneng lubas ka.

⁸ Inyang pasibayu kung linabas karin, apansingan ku king dinatang na ing oras a sukat na kang malsinta. Binalut ke king kanakung imalan ing lubas mung katawan at pengaku kung luguran da ka. Pekasalan da ka at meging kanaku ka. Ngana ning Ginung Dios.

⁹ Kaybat na nita, kinangwa kung danum at inos ku ing dayang atyu keka. Kiskusan kung larung olibo ing balat mu.

¹⁰ Pepaimalanan da ka king imalan a binurdahan. Dininan da kang sapatus a megawa king masanting a balat, at dininan aptas king buntuk a megawa king mapinung linen, at metung a balabal a megawa king seda.

¹¹ Pepasuluran da kang pulseras at kwintas.

¹² Dininan da kang singsing king arung at tingga ding balugbug mu at malagung korona king buntuk mu.

¹³ Pelamutian da ka karing gintu ampon pilak at parating misulud imalan a linen at sedang binurdahan. Mengan ka king tinape a megawa king masanting diling arina, at atin kang pulut-panilan ampon larung olibo ban pagkabiayan mu. Alang kalupa ing leguan mu at meging metung kang reyna.

¹⁴ Mibantug ka karing sablang bansa uli na ning ganap mung leguan uling aku ing pepalagu keka. Iti ya ing sasabian na ning Ginung Dios.

¹⁵ Oneng gewa mung puhunan ing leguan mu at kabantugan ban matudtud ka king siping na ning ninumang lalaking lalapit keka.

¹⁶ Ginamit mu ing mapilan king bestida mu ban palamutian la ding lugal mung pisasamban. At anting metung a babaing magtinda king katawan na binie mu ing kekang sarili king ninumang lalaki.

¹⁷ Kinua mu la ding alahas a pilak at gintu a binie ku keka at ginamit mu la ban gawang larawan da ring lalaki at mekipangatawan ka karela.

¹⁸ Kinua mu la ding bestidang binurdahan a binie ku at pepasulud mu la karing larawan, at inain mu karela ing larung olibo ampon insenso a binie ku keka.

¹⁹ Dininan da kang pamangan, ing masanting diling arina, larung olibo, at pulut-panilan, oneng inain mu iti bilang ain-sakripisyu ban tumula la ding idolo. Iti ya ing sasabian na ning Ginung Dios.

²⁰ Kaybat na nita, kinua mu la pa ding anak tang lalaki at babai, at binie mu la bilang ain-sakripisyu karing larawan a balamu mo e pa sapat ing kekang kataksilan.

²¹ Kailangan pa wari ing kuanan mu la pati na ding anak ku at isakripisyu mu la karing larawan?

²² King panaun na ning bie mung makasumami bilang babaing magtinda king katawan mu, e mu man aganaka ing bie mu inyang malati ka pa, inyang lubas ka at kaso-kaso king sarili mung daya.

²³ Ngana ning Ginung Dios, Makasumpa ka! Makasumpa ka! Depat mu ngan ing sablang e mayap a ita at kaybat

²⁴ mitalakad kang pisasamban para karing idolo king lele na ning balang dalan, at dinapat kang pamagtinda king katawan mu.

²⁵ Keladkad mu ing leguan mu king burak. Binie mu ing sarili mu king bala na mung lalaking lalapit keka at aldo-aldo lakuas kang meging e mayap a babai.

²⁶ Peintulutan mu la ding tau Ehipto, ding kasiping mung bale a mahilig king pamitan na ning laman ban sumiping la keka, at ginamit mu ing pamagtinda mung katawan ban pamuan mu ku.

²⁷ Ngeni inatiat ku ne ing gamat ku ban parusan da ka at ilako ing dake mu king pagkabiayan. Binie da na ka karing gamat da ring Filisteo a masama keka at masusumami king marinat mung pamaniaptan.

²⁸ Uling e ka lubus mipaldan karing aliwa, tekikian mu la pati na ding tau Asiria. Pepagamit ka naman karela, oneng e ka pa mipaldan.

²⁹ Pepagamit ka naman karing tau Babilonia, ing bansa da ring negosianti, oneng e ka naman lubus mipaldan karela.

³⁰ Iti ya ing sasabian na ning Ginung Dios: Depat mu ngan iti anting metung a babaing alang marine a magtinda king katawan mu.

³¹ Menalakad kang pisasamban para karing idolo karing balang dalan at dinapat kang pamagtinda king katawan. Oneng e na na ka man kalupa ning karaniwan a babaing magtinda king katawan na a mangailangan salapi.

³² Mengari ka king babaing makipangatawan karing e na kakilala lugal king ing asawa na ya ing luguran na.

³³ Babayaranan ya ing babaing magtinda king katawan na, oneng ika, ika pang mamayad karing kalaguyo mu at susuhulan mo pang datang ibat karing miyayaliwang lugal ban sumiping la keka.

³⁴ Pambihira ka karing babaing magtindang katawan! Ala metung man a memilit keka ban mipakanyan ka. Aliwa ika ing beyaranan, nune ika pa ing memayad karela! Wa, makayaliwa ka pin!

³⁵ Inya ngeni, Jerusalem a mengari king babaing magtinda king katawan na, pakiramdaman mu ing sasabian na ning Ginu!

³⁶ Iti ya ing sasabian na ning Ginung Dios: Likas mu ing imalan mu at anti ing babaing magtinda king katawan na, binie mu ing sarili mu karing kekang kalaguyo at karing sabla mung makasumaming idolo, at pete mu la ding anak mu bilang ain-sakripisyu karing idolo.

³⁷ Uli na niti, tipunan ku lang makapamisan ding sadiang kelaguyo mu, detang aburi mu at pati na detang kesaman mu. Idala ku la keka at ibili ku lang makapadurut keka, at kaybat ilako ku ing imalan mu at paburen kung lawan da ing kalubasan mu.

³⁸ Atulan da ka uli na ning depat mung pamakipangatawan at pamakamate. At uli na ning mua at kasbu ku parusan da kang kamatayan.

³⁹ Ibili da ka lalam dang upaya at lasakan da la ring lugal nung nukarin mu daraptan ing pamagtinda mung katawan at pamanyambang idolo. Kuanan da ing imalan mu at ding alahas mu at lakuan da kang lubas.

⁴⁰ Managkat lang tau ban basibasan da kang batu at panadtaran malati karing espada ra.

⁴¹ Silaban da la ring bale mu at paburen da la ring babai a akit da ing pangaparusan mu. Pututan ku na ing pamagtinda mung katawan at ing pamamie mung regalu karing kalaguyo mu.

⁴² Miyangganan na kanita ing mua ku at mipaindatun na ku. E na ku pasibayung mimua at mangalalu pa.

⁴³ Akalinguan mu na nung makananu da kang sinese kanitang malati ka at kaybat pepamua mu ku king kapamilatan na ning sablang e mayap a depat mu. Uli na niti, singilan da ka. Dinapat na kang miyayaliwang makasumaming bage, obat digdag mu pa ing pamakipaglalaki? Ing Ginung Dios ya ing migsalita.

⁴⁴ Ngana ning Ginu, Jerusalem, gamitan de ring tau tungkul keka iting kasebian, Nung nanu ya ing ima, makanyan ya naman ing anak a babai.

⁴⁵ Tune na ka ping anak ima mu! Pindirian neng ima mu ing asawa na at ding anak na. Mengari ka karing kapatad mung babai a pikasaman da ring asawa da at ding anak da. Ika at ding kapatad mung siudad atin kayung imang Hetea at tatang a Amoreo.

⁴⁶ Ing atsi mu, at ding baryu na, ya ing Samaria ning norti. Ing wali mung babai, at ding baryu na, ya ing Sodoma ning mauli.

⁴⁷ Mekagyu wari keka ing tukian mu ing bakas da at pakiapusan ing karelang makasumaming ugali? Ali, king ditak mung panaun meging mas lalu yang e mayap kesa karela.

⁴⁸ Kabang aku ing mabie Dios, nganang sasabi ning Ginung Dios, ing wali mung Sodoma at ding baryu na kapilan man e ra depat ing e mayap a depat mu at ding baryu mu.

⁴⁹ Migmaragul ya at ding anak na uling dakal la pagkabie, at mibiebie la king kapayapan ampon katahimikan. Mu pin, e ra la seupan ding pakakalulu at ding atyu king pamangailangan.

⁵⁰ Migmaragul la at meging masias a buntuk, at depat da la ring bage pikakasaman ku. Inya lesak ku la, antimo ing balu mu na.

⁵¹ E ya man kinapitna ing Samaria king depat mung pamikasala. Mas menugali kang makasumami. Mayakit lang alang kasalanan ding kapatad mu nung ipakilupa la king kekang depat a makasumami.

⁵² Ngeni pagdusan mu ing kekang sariling kamarinayan. Lalu lang mabayat ding kekang kasalanan kesa karing kasalanan da ring kekang kapatad angga king lalto lang balamu ala nang kasalanan, nung itulad la keka. Ngeni mangalare ka at pagdusan mu ing kamarinayan mu, uling pepakit mu lang balamu mayap ding kapatad mu.

⁵³ Ngana ning Ginu king Jerusalem, Gawan keng pasibayung manawa ing Sodoma at ding baryu na, at ing Samaria ampon ding baryu na. Wa, gawan da ka namang pasibayung manawa.

⁵⁴ Dumine ka king sarili mu at king kamarinayan mu mayakit king ding kapatad mu mas masanting la kabilian kesa keka.

⁵⁵ Minawa lang pasibayu at ika man ampon ding baryu mu mibalik kayu king sadia yung kanawan.

⁵⁶ E me wari pigsisti ing Sodoma kanitang aldo a ika atin kang pagmaragul,

⁵⁷ at bayu mibulalag ing e mayap a depat mo? Ngeni kalupa na ka naman; metung a pagsisti da ring tau Edom, ding tau Filistia, at ding aliwang kasiping mung bansa a masama keka.

⁵⁸ Sukat kang magdusa king manong at makasumaming bage depat mu. Ing Ginu ya ing migsalita.

⁵⁹ Ngana ning Ginung Dios, Daptan ku itang mangaintulid keka uling e mu la tiparan ding pangaku mu at lebagan me ing kasunduan.

⁶⁰ Oneng kilalanan ke ing kasunduan a gewa ku keka inyang kayanakan ka, at kayabe mu gawa kung kasunduan a manatili kapilan man.

⁶¹ Aganaka mu kanita nung makananu kang menugali at pikarine mu iti potang akua meng pasibayu i atsi mu at ing wali mung babai. Paburen ku lang maging antimong anak mung babai, agyang iti e kayabe king kasunduan ku keka.

⁶² Ibayu ke ing kasunduan ku keka at akikala mu kanita king aku ing Ginu.

⁶³ Patawaran ku ing sablang kasalanan a depat mu, oneng e mu la kalinguan deti at king dine mu e me man akuang ibuklat ing asbuk mu. Ing Ginung Dios ya ing migsalita.

17

¹ Migsalita ya kanaku ing Ginu.

² Ngana, Anak ning tau, sabian me karing Israelita ing metung a talimhaga.

³ Sabian mu king aku, ing Ginung Dios, pasabi ku keka karela ing anti kaniti: Ating maragul a agilang ating maragul a pakpak a miyayaliwa kule. Sinulapo ya karing bunduk king Lebanon at pikli ne ing sepu na ning tanaman a sedro.

⁴ Dela ne iti king bansa na a maki komersyu at binili ne king siudad da ring negosianti.

⁵ Kaybat na nita, kinangwa yang metung a punla king bansang Israel at tenam ne king matabang marangle nung nukarin e magkulang ing danum.

⁶ Tinubu ya ing tanaman at meging mababa yang tanaman a ubas a marayu darasnan. Dinagul lang paitas ding sanga tulid ning agila at malalam la disan ding uyat na. Dakal ya sanga at bulung ing tanaman a ubas. fig,,,,,Pikli ne ing sepu na ning tanaman a sedro.,(17:3)fig*

⁷ Atin munamang aliwa pang maragul a agilang ating maragul at makapal a pakpak. Telanga na la ding uyat na ning tanaman a ubas king agila, at telanga na la naman tulid na ding bulung na king kapagnasan nang dinan neng dakal a danum a maygit king danum a atyu king mulahan a pitubuanan na.

⁸ Oneng mitanam ne ing tanaman a ubas king matabang gabun, king marangle a e milalako basa ban mika malabung yang bulung at mamunga at maging makayama yang tanaman a ubas.

⁹ Inya aku, ing Ginung Dios, kukutang ku: Mie ya kaya at dagul iting tanaman? E ne kaya putputan ning minunang agila, pananggalan a bunga, pamaklian ding sanga, at saka na la paburen lange? E kailangan ing maragul a sikanan o ing metung a mayupayang bansa ban bagutan ya.

¹⁰ Makatanam ya pin, oneng mie ya kaya at dagul? E ya kaya langi potang sapulan ne ning angin a ibat king aslagan? E ya kaya langi king lugal nung nukarin ya tutubu? fig,,,,,Makatanam ya pin, oneng mie ya kaya at dagul?,(17:10)fig*

¹¹ Ngana kanaku ning Ginu,

¹² Kutnan mu la deting mag-rebelding tau nung balu re kabaldugan iting talimhaga. Sabian mu karela king dinatang ya Jerusalem ing ari na ning Babilonia at kinua ne ing ari at ding opisyal na at dela na lang minuli karin Babilonia.

¹³ Kinangwa yang metung karing pamilya na ning ari; ginawa yang kasunduan king ari at pepasumpan neng maging tapat. Kinangwa ya naman karing pikabaluan a lalaki a binihag na bilang prenda

¹⁴ ban pigilan ya ing bansa king pamag-rebelding pasibayu at ban siguraduan king ing kasunduan matupad ya.

¹⁵ Oneng mig-rebeldi ya ing ari na ning Juda at peparala yang tubud karin king Ehipto ban maniawad kabayu ampon dakal a sundalus. Magtagumpe ya kaya? Akua na kayang ayalsutan ita? E ne malyaring labagan ing kasunduan a e mo sa miparusan!

¹⁶ Kabang aku ing mabie Dios, nganang sasabi ning Ginung Dios, mate ya karin Babilonia iting ari uling lebagan ne ing sumpa na at e ne tiparan ing kasunduan a tenguanan na king ari na ning Babilonia a milukluk king lalaki king tronu.

¹⁷ E ne malyaring asaupan agyang pang ding mayupaya nang sundalus ning ari ning Ehipto ban labanan na la ding sundalus na ning Babilonia kabud magumpisa lang gawang kuta at kulkul a pisalikutan ban paten da la ring dakal a tau.

¹⁸ Lebagan na ing sumpa na at ing kasunduan a tenguanan na. Depat na la ngan deting bage at e ne makaligtas ngeni.

¹⁹ Nganang sasabi ning Ginung Dios, Kabang aku ing mabie Dios, parusan ke uli na ning pamaglabag na king kasunduan a pengaku nang tapat tuparan king lagyu ku.

²⁰ Iladlad ke ing salap ning taung mangasu at dakpan ne kaniti. Idala ke Babilonia at karin ke parusan, uling e ya meging tapat kanaku.

²¹ Mate la king gera ding pekamayap nang sundalus, at misalbag la ding mitagan king miyayaliwang lugal. Kanita mu akilala king aku, ing Ginu, ing migsalita. fig,,,,,Iladlad ke ing salap ning taung mangasu at dakpan ne kaniti.,(17:20)fig*

²² Iti ya ing sasabian na ning Ginung Dios, Kuanan ke ing pekamatas nang dake ning tanaman a sedro, at kuma kung suli na; itanam ke king matas a bunduk,

²³ king matas nang diling bunduk ning Israel. Manianga ya at mamunga, at maging metung yang sedrong makayama. Miyayaliwa lang uring ayup ding karin manuknangan, at manakit lang salilungan. fig,,,,,Miyayaliwa lang uring ayup ding karin manuknangan.,(17:23)fig*

²⁴ Ding sablang tanaman ning bansa karelang abalu king aku ing Ginu. Kukuturan ku la ding matas a tanaman, at ding mababa kaku lang paragulan. Palangian ku la ding tanaman a sagiwa, at ding malangi naman ilang kakung pasagiwan. Aku, ing Ginu, ing migsalita. Daptan ku itang sinabi kung daptan ku.

18

¹ Migsalita ya kanaku ing Ginu.

² Ngana, Nanu ya iting kasebian a ulit-ulitan dang sasabian ding tau king balen ning Israel? Pengan da la ring pengari ding maslam a ubas, oneng ding meliniu ipan ila ding anak.

³ Kabang aku ing mabie Dios, nganang sasabi ning Ginung Dios, e yu ne malyaring ulitan pang sabian king Israel iting kasebian.

⁴ Bandi ke ing bie ning ninumang tau, ing bie na ning pengari at ing bie ning anak. Ing taung mikakasala ya ing mate.

⁵ Alimbawa, ating metung a tune mayap a lalaki, matulid ya at ala yang kapintasan.

⁶ E ya sasamba karing idolo da ring Israelita at e ya mamangan karing ain a miyain karing bawal a pisasamban. E ne lalapitan at babainan ing asawa na ning kalupa nang lalaki at e ya mikakarelasyun king babaing atyu king panaun ning regla na.

⁷ E ne pipiraitnan o panakawanan ing ninuman. Susubli na itang singla na ning mindam; pakanan na la ding danupan at paimalanan ding lubas.

⁸ Paparam na la ding salapi na a alang patubu. Tatanggian na ing dapat a e mayap at e ya mangabiran king pamamie nang kayatulan king nanumang pisasabian.

⁹ Tutukian na la ding tuntunan ku at tapat na lang pamintuan ding kautusan ku. Makatuliran ya, inya kumaba ya bie, nganang sasabi ning Ginung Dios.

¹⁰ Nung sakali namang iting lalaki atin yang anak a mapanako at makamate at darapat king isanu pa man kareting e ustu

¹¹ a e na kapilan man depat tata na: mamangan ya king ain-sakripisyung miyain karing makabawal a pisasamban, lalapitan na la at babainan ding asawa da ring aliwang lalaki,

¹² pamiraitnan na la ding kalulu, manako ya, e na buring isubli itang singla da ring mindam, pupunta ya karing pisasamban da ring paganu at sasamban na la ding makasumaming idolo,

¹³ at kakua yang patubu neng paparam na la ding salapi na. Mie ya kaya? Ali ya! Depat na la ngan deting makasumaming bage, inya mate ya. Ya ing maki kasalanan king kamatayan na.

¹⁴ Alimbawa mong iting kaduang lalaki atin yang metung a anak a lalaki. Akakit na ning anak ing sablang pamikasalang daraptan nang tata na, oneng e ne pakiapusan.

¹⁵ E ya sasamba karing idolo da ring Israelita at e ya mamangan karing ain a miyain karing makabawal a pisasamban. E ne lalapitan at babainan ing asawa na ning aliwang lalaki,

¹⁶ at e ya manggipit kenu man o manako. Susubli na itang singla na nitang menandam. Pakanan na la ding danupan at paimalanan ding lubas.

¹⁷ Tatanggian na ing dapat a e mayap at e na la paparam ding salapi na a ating patubu. Pamintuan na la ding kautusan ku at tutukian na la ding tuntunan ku. E ya mate agyang mikasala ya i tata na. Siguradu yang mie.

¹⁸ King metung a banda, memirait ya i tata na ampon menako, at e ya pepatugut darapat e mayap king kenu man. Mate ya ing tata uli na ning pamikasalang depat na.

¹⁹ Oneng ikayu kukutang yu: Baket e ya sukat magdusa ing anak king kasalanan nang tata na? Iti ya ing pakibat: Uling depat ning anak itang matulid at mayap. Pemintuan na la ding kautusan ku at tikian na lang mitmung kaingatan. Inya siguradu yang mie.

²⁰ Ing mate ya itang mikasala. E ya sukat magdusa ing anak karing kasalanan nang tata na, at e ya sukat magdusa ing tata king kasalanan na ning anak na. Tanggap yang ablas ing taung mayap king depat nang mayap, at magdusa ya ing e mayap a tau king e mayap a depat na.

²¹ Nung tuknang yang darapat pamikasala ing e mayap a tau at pamintuan na la ding kautusan ku, nung daraptan na ing matulid at ing mayap, e ya mate; siguradu yang mie.

²² Mipatawaran la ding sabla nang kasalanan at e ya mate uling depat na ing matulid.

²³ Pota galang isipan mu king tutula ku neng akakit keng mamamate ing taung e mayap? nganang kukutang ning Ginung Dios. Ali ku. Mas buri keng akit sumisi at mabie.

²⁴ Nung tuknang yang darapat mayap ing taung matulid at pagumpisan nang daptan ing sablang e mayap, ing makasumaming bage a pamaniaptan da ring taung e mayap, manatili yang mabibie? Ali ya! Makalinguan na ing nanuman karing mayap a depat na. Mate ya uli na ning ala yang katapatan at uli da ring kasalanan na.

²⁵ Oneng sasabian yu, E makatuliran ing daraptan na ning Ginung Dios! Makiramdam kayu kanaku, ikayung Israelita. Isipan yu king ing paralan na ning daraptan ku e matulid? Ing kekayung paralan ya ing e matulid!

²⁶ Potang tuknang yang darapat mayap ing taung matulid at magumpisa yang dapat e mayap at kaybat mate ya, mate ya uli na ning e mayap a depat na.

²⁷ Potang tuknang yang darapat pamikasala ing taung e mayap at daptan na ing matulid at mayap, liligtas na ing bie na.

²⁸ Akikilala na ing daraptan na at tuknang yang darapat pamikasala, inya e ya mate; manatili yang mabibie.

²⁹ Ikayung Israelita sasabian yu king e makatuliran ing daraptan na ning Ginung Dios! Isipan yu king ing kanakung paralan e makatuliran, ali mo? Ing e makatuliran ya ing kekayung paralan. fig,,,,,Akikilala na ing daraptan na at tuknang yang darapat pamikasala.,(18:28)fig*

³⁰ Ngeni, aku, ing Ginung Dios, sasabian ku kekayung Israelita king atulan ke ing metung at metung kekayu agpang king depat na. Lakuan yu na ing sablang e mayap a darapatan yu at e yu paintulut ing siran na kayu ning kasalanan yu.

³¹ Ituknang yu na ing sablang e mayap a dapat yu; magbayu na kayu isip at pusu. Baket buri yu, ikayung Israelita, ing mate kayu?

³² Ala kung buring mate metung man kekayu, nganang sasabi ning Ginung Dios. Gumulut kayu karing kasalanan yu at mie kayu.

19

¹ Inutus na kanaku ning Dios ing ikanta ke iting kanta ning kalungkutan para karing aduang prinsipi na ning Israel:

² Metung yang leon ing kekang ima! Sinese na lang anak na libutad da ring mabagsik a lalaking leon.

³ Sinese ne ing anak na at tiru neng mangasu; mebiasa yang maglaklak tau.

⁴ Abalitan de ring bansa, at ikua reng arakap king gewa rang kulkul. Maka pango yang keladkad dang dela Ehipto.

⁵ Panenayan neng magbalik ning gaindu angga king ikit na ala neng panenayan pa. Kanita menese yang aliwa pa karing anak na, at meging metung yang mabagsik a leon.

⁶ Inyang ganap neng meragul, miggalagala yang kayabe ding aliwang leon. Mebiasa ya namang mangasu at maglaklak yang tau.

⁷ Penibag na la ding kuta, at piglasak ding balen. Mitatakutan la king leon ding tau neng gagaleung ya.

⁸ Misanmetung la ding bansa ban labanan ya; memanyatang la ding tau ibat king miyayaliwang lugal. Lidlad da lang karelang paniakap, at arakap de king karelang bitag.

⁹ Kilung de king maragul a awla, at dela king ari ning Babilonia. Binten deng masalese ban ing pamamius na e na pasibayung maramdam pa karing bunduk-bundukan ning Israel.

¹⁰ Mengari ya ing ima mu king tanaman a ubas a mitanam lele ning mamagus a batis. Uling ating dakal a danum ing ubas melabung ya bulung, at memunga yang punggul-punggul.

¹¹ Matibe la ding sanga na, at setro ding ari ing keulian da. Meragul ya ing ubas at miraras ya angga karing matas a biga; ikit ding sabla king malabung ya at matas ya pa.

¹² Oneng ding taung mabagsik angga yamut na piglaput da uli ning mua la, at king gabun karin de inugse. Papalangi na la ding bunga na ning angin a ibat king aslagan. Mepakli la ding sanga na; melangi la at silaban da la.

¹³ Ngeni mitanam ya king disyerto, king malangi at alang danum a lugal.

¹⁴ Mesilab ya ing pun na; liklak na la ning api ding sanga na, at pati na ding bunga. E na la pasibayung maging matibe ding sanga na ni maging setro ding kayarian. Iti metung yang kanta ning kalungkutan; ulit-ulit yang mikakanta.

20

¹ Kapulu nang aldo kanita ning kalimang bulan ning kapitung banua ning kekaming pangayugse. Dinatang la ding mapilan karing manimuna na ning balen ning Israel ban mangutang kanaku tungkul king kaburian na ning Dios, at linikluk la arapan ku.

² Kanita migsalita ya kanaku ing Ginu.

³ Ngana, Anak ning tau, magsalita ka kareting lalaki at sabian mu karela king ing Ginung Dios sasabian na: Dinatang kayu bang mangutang tungkul king kaburian ku, e makanyan? Kabang aku ing mabie Dios, e ku paintulut ing makapangutang kayu kanaku king nanumang bage. Aku, ing Ginung Dios, ing migsalita.

⁴ Anak ning tau, makasadia na kang atulan mu la? Sulung, nung makanyan. Ipaganaka mu la karela ding bage makasumami a depat da ring makatua ra.

⁵ Sabian mu karela ing sasabian ku. Minie kung pangaku karela kanitang pinili ke ing Israel. Pepakilala ku ing sarili ku karela karin king Ehipto at sinabi ku karela: Aku ing Ginung kekayung Dios.

⁶ Kanita ku pengaku karela king ilako ku la Ehipto at idala king pinili kung gabun a mataba at labis-labis ing kabiayan.

⁷ Inutus ku karela king iyugse da la ring makasumaming idolo a pakamalan da, at king e ra dirinatan ing sarili da karing e tutung dios ning Ehipto, uling aku ing Ginung karelang Dios.

⁸ Oneng e ra ku pemintuan at tinanggi lang makiramdam. E da la inugse ding makasumami dang idolo ni sinuku ding dios ning Ehipto. Makasadia ku kanitang ipatakman karela ing bigsikan na ning kanakung mua karin king Ehipto.

⁹ Oneng e ku depat ita ban e ya milako dangalan ing lagyu ku, uling king durungutan da ring taung kayabe da belita ku king Israel king tairan ku lang lumual Ehipto.

¹⁰ At makanyan ku lang tinaid king paglual da Ehipto at dela ku la king disyerto.

¹¹ Binie ku la karela ding kanakung tuntunan at tiru karela ding kanakung kautusan a munie bie king ninumang mamintu kareti.

¹² Gewa ke ing pamangiling king Aldo ning Sabbath bilang tanda ning kasunduan mi ban ipaganaka karela king aku, ing Ginu, gawan ku lang banal.

¹³ Oneng agyang king disyerto selangsangan da na ku. Lebagan da la ring kautusan ku at tinggian da la ring tuntunan ku a babie bie king ninumang mamintu kareti. Lubus deng e ginalang ing Aldo ning Sabbath. Makasadia na ku kanitang ipatakman ku karela ing bigsikan na ning kanakung mua karin king disyerto at layun ku lang gisanan paten.

¹⁴ Oneng e ku depatan ita, uling ita ing munie alang dangalan king kanakung lagyu libutad da ring bansa a menakit kanaku kanitang tairan ke ing Israel king paglual na Ehipto.

¹⁵ Inya tapat kung pengaku karin king disyerto king e ku la idala king bansa a binie ku karela, ing mabandi at matabang gabun, ing pekamasanting a gabun.

¹⁶ Inya gewa ke ing pangakung ita uling tinggian da la ring kanakung tuntunan. Lebagan da la ring kanakung utus at e de ginalang ing Aldo ning Sabbath; birian da pa ing samban da la ring idolo da. fig,,,,,Binie ku la karela ding kanakung tuntunan.,(20:11)fig*

¹⁷ Makanyan man, melunus ku karela. Inari ku king lub ku king e ku la paten karin king disyerto.

¹⁸ Bagkus dininan ku lang babala ding kayanakan libutad da. Ngaku karela: E yu la tutuparan ding kautusan a gewa da ring makatua yu; e yu la pakiapusan a ugali ni dirinatan ing sarili yu king kapamilatan da ring karelang idolo.

¹⁹ Aku ing Ginung kekayung Dios. Pamintuan yu la ding utus ku at ding kanakung tuntunan.

²⁰ Gawan yeng banal ing Aldo ning Sabbath ban maging tanda ne ning kasunduan tamu at ban ipaganaka na kekayu king aku ing Ginung kekayung Dios.

²¹ Oneng sinalangsang la naman kanaku detang kayanakan a deta. Lebagan da la ring kanakung utus at e da la pemintuan ding kanakung tuntunan a babie bie king kenu mang mamintu kareti. E de ginalang ing Aldo ning Sabbath. Makasadia na ku kanitang ipatakman karela ing bigsikan na ning kanakung mua karin king disyerto at paten ku la ngan.

²² Oneng e ku depatan ita, uling ita munie alang dangalan king kanakung lagyu libutad da ring bansang menakit kanaku inyang tairan ke ing Israel king paglual na Ehipto.

²³ Inya ginawa kung aliwang taimtim a pangaku karin king disyerto. Tapat kung pengaku king iyugse ku la ngan karing miyayaliwang bansang dayuan.

²⁴ Depatan ku iti uling tinggian da la ring kanakung tuntunan; lebagan da la ring utus ku; e de ginalang ing Aldo ning Sabbath at uling simban da la naman ding idolo a siyuan da ring makatua da.

²⁵ Kaybat na nita, binie ku la ding utus a e mayap at ding tuntunan a e babie bie.

²⁶ Pepaburen ku lang dinatan da ing sarili da karing mismung ain da, at pepaburen kung ibie da lang peka-ain ding pangane rang anak a lalaki ban parusan ku la; gewa ku iti ban ipakilala ku karela king aku ing Ginu.

²⁷ Ngeni, anak ning tau, aku ing Ginung Dios, sabian mu karing Israelita nung nanung sasabian ku karela. Iti metung ya pang paralan na ning pamaglapastangan da kanaku ding makatua ra king kapamilatan na ning kataksilan da.

²⁸ Dela ku la king gabun a pengaku kung ibie karela. Minie lang ain karing sablang ikit dang matas a bunduk-bundukan at berding tanaman. Pepamua da ku king kapamilatan da ring ain a karelang dilukan at king kapamilatan na ning alak a dela ra bilang ain da.

²⁹ Kitang ku karela: Nanu la deting matas a lugal a kekayung pupuntalan? Inya manibat na kanita meyaus lang Ding Matas a Lugal.

³⁰ Ngeni sabian mu karing Israelita ing kanakung sasabian: Baket kailangan pa ing daptan yu la naman ding kasalanan a depat da ring makatua yu, at paipagal kayung pupunta karing idolo da?

³¹ Angga man ngeni babie kayu namang regalu at dirinatan yu ing sarili yu karing idolo da ring makatua yu king kapamilatan na ning pamiyain yu karing anak yu bilang ain-a-durulukan king arapan da reting idolo. At ngeni ikayung Israelita lalapit kayu pa mu rin kanaku ban ikutang yu nung nanu ing kaburian ku! Kabang aku, ing Ginung Dios, ing mabie Dios, e ku paintulut ing makapangutang kayu kanaku tungkul king nanumang bage.

³² Inari yu na king lub yu king buri yu ing maging anti kayu karing memalen da ring aliwang bansa at samba karing dutung at batu. Oneng ita kapilan man e mapalyari.

³³ Kabang aku, ing Ginung Dios, ing mabie Dios, ini ing pakatandanan yu: uli na ning kanakung mua dirinan da kayung babala king panibalan da kayu king mabayat a gamat at ning sabla kung upaya.

³⁴ Ipakit ku kekayu ing kanakung upaya ampon ing kanakung mua potang tipunan da na kayung makapamisan at iyuli ibat karing miyayaliwang bansa nung nu kayu miyugse.

³⁵ Idala da kayu king Disyerto da ring Bansa at karin da kayu atulan kaparusan.

³⁶ Atulan da kayu antimo nung makananu ku lang inatulan kaparusan ding makatua yu karin king Disyerto ning Sinai, nganang sasabi ning Ginung Dios.

³⁷ Pamahalan da kayung masalese at gawan da kayung mapamintu king kanakung kasunduan.

³⁸ Ilako ku la libutad yu detang mapaglaban at makasalanan. Ilual ku la karing bansa nung nu la manuknangan ngeni, oneng e ku la paintulutan makapagbalik king bansang Israel. Abalu yu kanita king aku ing Ginu.

³⁹ Nganang sasabi ning Ginung Dios, At ngeni, ikayung sablang Israelita, bahala na kayu king kekayung sarili! Sulung, sumuyu kayu karing kekayung idolo! Oneng ipauna ku kekayu king kaybat na nita aku ing pamintuan yu at patugutan yu neng lalapastanganan ing banal kung lagyu king kapamilatan na ning pamiyain yung ain karing kekayung idolo.

⁴⁰ Ketang lugal a ita, king bunduk kung banal, ing matas a bunduk ning Israel, ikayung sablang memalen ning Israel samban yu ku. Tumula ku kekayu at panayan ku ing pagdala yu kung ain-sakripisyu, ding pekamasanting a ain at ding banal yung regalu.

⁴¹ Potang kaybat da na kayung alual karing bansa nung nu kayu miyugse at ikua da na kayung atipun makapamisan, tanggapan ku la ding ain-a-durulukan yu at akit da ring miyayaliwang bansa king aku banal ku.

⁴² Potang abalik da na kayu king Israel, king gabun a pengaku kung ibie karing makatua yu, akilala yu kanita king aku ing Ginu.

⁴³ Kanita yu la aganaka ding sablang makarine bage a depat yu at nung makananu yung dinatan ing kekayung sarili. Masumami kayu king sarili yu uli da ring bage e mayap a depat yu.

⁴⁴ Potang kimut ku ban idipensa ing dangalan ku, akilala yu ikayung Israelita, king aku ing Ginu, uling e da kayu tratusan anti ing mangaintulid karing bage manawang at e mayap a kekayung depatan. Ing Ginung Dios ya ing migsalita.

⁴⁵ Migsalita ya kanaku ing Ginu.

⁴⁶ Ngana, Anak ning tau, lumawe ka banda king mauli. Magsalita ka laban king mauli at sabian mu ing ula laban king gubat na ning mauli.

⁴⁷ Sabian mu king gubat na ning mauli king makiramdam ya nung nanu ing sasabian na ning Ginung Dios: Lawan mu, palto kung metung a api at silaban na la ding sablang tanaman a atyu keka, sagiwa la man o malangi. Alang bage makapatda kaniti. Mikalat ing api manibat king mauli angga king norti at panamdaman na ning metung at metung ing pali na ning api.

⁴⁸ Abalu da ring sabla king aku, ing Ginu, ing maki pasari kaniting silab at ala metung mang makapatda kaniti.

⁴⁹ Oneng ngakung tinutul, O Ginung Dios, e mu sa parapat kanaku ing anti kanyan! Sasabian na na ning metung at metung king maralas ku kanung magsalita king kapamilatan da ring bugtung.

21

¹ Migsalita ya kanaku ing Ginu.

² Ngana, Anak ning tau, magsalita kang laban king Jerusalem at laban karing lugal a pisasamban da ring tau. Dinan meng babala ing bansa ning Israel

³ king aku, ing Ginu, sasabian ku: Aku ing kekayung kalaban. Bagutan ke ing espada ku at paten da kayu ngan, mayap kayu man o e mayap.

⁴ Gamitan ke ing espada ku laban king ninumang manibat king norti at king mauli.

⁵ Akilala na ning metung at metung king aku, ing Ginu, begut ku ne ing kanakung espada at e ke isubling pasibayu king kaluban na.

⁶ Anak ning tau, saingsing kang kapait-paitan a balamu wari masaspak ya ing salu mu. Mangisnawa kang saldak king akakit da ring tau.

⁷ Potang ikutang da keka obat sasaingsing ka, ipakibat mu king ing sangkan ya ing balitang daratang. Potang miras na iting balita, mangatmu la ding pusu ra king takut, mangalambut la ding gamat da, mina la lub, at galgal la ding tud da. Dinatang na ing oras, atyu na keti. Ing Ginung Dios ya ing migsalita.

⁸ Ngana ning Ginu kanaku,

⁹ Anak ning tau, magsalita kang ula. Sabian mu karing tau king aku, ing Ginu, sasabian ku: Ing metung a espada, mitais ya at makintab ya.

¹⁰ Mitais ya ban makamate; pepakintab ya ban kislap yang anting kildap! E na mika pamagsaya pa, uling ing kakung balen e na la pinsinan ding miyayaliwang babala at pamamarusa.

¹¹ Mipakintaban ne ing espada, ban isadia ya king pangagamit na. Mitais ya at pepakintab ban ibili ya karing gamat na ning makamate.

¹² Ngulangul ka king lungkut, O anak ning tau; mangaintulid ya iting espada karing kakung memalen at karing sablang manimuna na ning Israel. Mate lang kayabe ding sabla kung memalen. Dugdugan me ing kekang salu king pangabigu mu!

¹³ Susubukan ku la ding kakung memalen, at nung karelang tanggian ing kapanisian, deting sablang bage mangapalyari la karela ngan.

¹⁴ Ngeni, anak ning tau, magsalita kang ula. Ipalakpak mu la ding gamat mu at manabak yang ulit-ulit ing espada. Metung yang espadang makamate; espada yang makapangilabut at maglipul.

¹⁵ Lalako na la sikanan lub ding kanakung memalen at daragsa na la. Babalan ke ing karelang siudad king kapamilatan na ning espadang kikislap anting kildap at makasadia yang makamate.

¹⁶ Ikang mataram a espada, sumulung ka bandang wanan o bandang kayli! Manabak ka nukarin ka man marap.

¹⁷ Ipalakpak ku la kanita ding gamat ku at milako na ing kanakung mua. Aku, ing Ginu, ing migsalita.

¹⁸ Migsalita ya kanaku ing Ginu.

¹⁹ Ngana, Anak ning tau, dinan mu lang tanda ding aduang dalan a malyari nang dalanan ning ari na ning Babilonia at ning espada na. Parehu lang magumpisa king metung a bansa. Ibili mu la ding palatandanan king salapungan da ring dalan.

²⁰ Ituldu ne ning metung king ari ing dalan papunta king Rabba, ing siudad da ring Ammonita, at ituru ne ing kaduang dalan papunta king Jerusalem, ing siudad a makapadurut kuta karin Juda.

²¹ Makatalakad ya ing ari na ning Babilonia tulid ning tanda king salapungan da ring dalan. Ban abalu ne ing dalan a pilinan na, ikusug na la ding paslu na at mangutang ya karing idolo na at siasatan ne ing ate na ning animal a misakripisyu.

²² Ngeni, tatalnan na ne king wanan nang gamat ing paslu a mitatakan Jerusalem! Sasabian na niting paslu ing munta ya at italakad na la ding panlasak karing pader; ikulio ne ing kulisak ning pamakilaban; iyarap na la ding panlasak karing pasbul dalan ning siudad, mitambak yang gabun, at gawa yang kulkul bilang kambilan.

²³ E ra paniwalan iti ding memalen na ning Jerusalem uling pamatakaran da la ring kasunduan a gewa ra. Oneng ipaganaka na la karela niting mesabing ula ding karelang kasalanan at dinan na lang babala king mabihag la.

²⁴ Iti ya ngeni ing kanakung sasabian, aku, ing Ginung Dios. Makabulalag na la ding kekayung kasalanan. Balu da na ding sabla ing kasalanan a depat yu. Papakit yu ing kekayung kasalanan king balang kekayung daraptan. E yu na alingad ing mikasala kayu, inya ibie da na kayu karing kekayung kalaban.

²⁵ Ikang e mayap at alang kabanalan a pamuntuk na ning Israel, ing aldo mu, ing oras ning kekang lubus a pangaparusan daratang ne.

²⁶ Aku, ing Ginung Dios, ing migsalita. Ilukas me ing kekang korona at turban. Mibayu na ing sabla-sabla. Itas la ding pakakalulu king upaya! Ibagsak la detang atyu king katungkulan.

²⁷ Lasakan ke! Lasakan ke! Gawan keng metung a lasak a siudad ing Jerusalem. Oneng mapalyari mu iti potang itang tilduan kung mamarusa datang ne. Ketang tilduan ku karin ke ibie.

²⁸ At ika, anak ning tau, magsalita kang ula. Ibalita mu king aku, ing Ginung Dios, pasabi ku keka karing Ammonita a maninsultu karing Israelita, ing anti kaniti: Ing metung a espada makayaniu yang manyira; pepakintab ya ban makamate at ban kislap anting kildap.

²⁹ E la tutu ding vision a kekong akakit at pawa la ngan kalaraman ding bage sinabi yung mapalyari. Tune alang mayap kekayu at ing kekong aldo daratang ya, ing aldo ning lubus yung pangaparusan. Tabtaban na kayu batal ning espada.

³⁰ Ikaluban mu ne ing espada! Atulan da ka king lugal nung nu ka melalang, ing bansa nung nukarin ka mibait.

³¹ Panamdaman mu ing kanakung mua potang ibugnus ku iti anting mikakalabkab a silab. At ibie da ka karing berdugu, ding taung sane king pamanyira.

³² Gisanan na kang laklakan ning silab. Tumulu ing kekang daya king mismung kekang bansa at ala metung mang makaganaka pa keka. Ing Ginu ya ing migsalita.

22

¹ Migsalita ya kanaku ing Ginu.

² Ngana, Anak ning tau, makasadia na kang matul king siudad a mitmu karing makamate tau? Pakalino mu la ding sablang bage makasumaming depat na.

³ Sabian mu king siudad nung nanung sasabian ku, aku ing Ginung Dios: Ing oras mu daratang na uling pete mu la ding tutung dakal karing sarili mung memalen at uling dinatan mu ing kekang sarili king pamanyamba mung idolo.

⁴ Mikasala kang pamakamate tau at midinatan ka king uli da ring idolong kekang gewa, inya ing kawakasan mu daratang na. Angga na ka ken! Iti ya ing sangkan nung inya peintulut kung gawan da kang pikaylian ding miyayaliwang bansa at pisunusunu ding sablang tau.

⁵ Kaylian da ka ring kasiping mung bansa at ding bansang atyu king marayu uli na ning pamaglapastangan mu karing kautusan.

⁶ Menalig la ding manimuna na ning Israel king sarili dang sikanan at darapat lang pamakamate tau.

⁷ Ala metung man king siudad a gagalang mo sa karing pengari na. Pamiraitnan mu la ding dayuan at sasamantalanan ding babaing mebalu at ding ulila.

⁸ Ala kang galang karing sagradung lugal at e me gagalangan ing Aldo ning Sabbath.

⁹ Mamigawa lang salita ding kekang memalen tungkul karing aliwa ban kanita apapate da la. Mamangan la karing ain a miyain karing idolo. Manatili lang magpasasa king tula ning laman ding aliwa.

¹⁰ Sisipingnan da la ring asawa da ring tata ra; sisipingnan da la naman ding aliwang babaing atyu king panaun ning regla da.

¹¹ Darapat lang pamakipangalugud at ding aliwa karela lalapitan do't agkatan ding karelang manuyang a babai o ding babaing karelang kasing-ibpa.

¹² Manupa lang tau ban makamate tau. Kakua lang patubu karing salaping paparam da karing kalupa rang Israelita, at mibabandi la king kapamilatan na ning pamagsamantala ra. Kelinguan da na ku. Ing Ginung Dios ya ing migsalita.

¹³ Parusan da kayu uli na ning depat yung pamanako at pamakamate tau.

¹⁴ Isipan mu galang king mika sikanan kang lub o sapat a sikanan ban akua meng itas ing gamat mu potang arapan da na ka? Aku, ing Ginu, ing migsalita at daptan ku ing sinabi ku.

¹⁵ Iyugse ku la ding kekang memalen karing miyayaliwang bansa at balen at wakasan ku na la ding sablang dapat mung e mayap.

¹⁶ At e ra ko galangan ding aliwang bansa, oneng ika akilala mu king aku ing Ginu.

¹⁷ Migsalita ya kanaku ing Ginu.

¹⁸ Ngana, Anak ning tau, ala lang kasilbian kanaku ding Israelita. Mengari la karing tagan-tagan a inugse metal, tangsu, lata, bakal, at tinggaputi a malalakuan kaybat nang medalise ning pilak king ornu.

¹⁹ Inya ngeni, aku, ing Ginung Dios, sasabian ku karela king anti ding mebanggit ala lang bitasang kasilbian kanaku. Idala ku lang miyabe-abe king Jerusalem,

²⁰ nung makananu ing minang pilak, tangsu, bakal, tinggaputi, at lata abe-abe mibili king ornung pandalise makanyan munaman ing daptan ku karela. Makanyan na kayung lasawan ning kanakung mua.

²¹ Wa, tipunan ku la king Jerusalem; patau kung api lalam da at lasawan la king kapamilatan na ning kanakung mua.

²² Malaso la king Jerusalem nung makananung ing pilak malalaso ya king ornu, at kanita ra akilala king tatablan na la ning mua ku, ing Ginu.

²³ Migsalita yang pasibayu kanaku ing Ginu.

²⁴ Ngana, Anak ning tau, sabian mu karing Israelita king e ya banal ing karelang bansa, inya paparusan ke king kanakung mua.

²⁵ Mengari la ding manimuna na karing leon a gagaleung babo da ring animal a apate ra. Makamate tau, kakuanan da la salapi at pibandian, at maglakuan lang dakal a babaing mebalu king pamakamate ra.

²⁶ Lalabagan da la ring pari ding kautusan ku at ala lang galang king nanu pa mang bage banal. Ala nang pamiyaliwa karela ing bage banal ampon ing e banal. E da na tuturu ing pamiyaliwa na ning bage malinis ampon ing e malinis, at e de gagalangan ing Aldo ning Sabbath. Ing meging bunga na niti ya ing e da na ku gagalangan ding memalen na ning Israel.

²⁷ Mengari la ding opisyal na ning kapamahalan karing asung-gubat a maglapak karing animal a karelang apate. Makamate la ban kanita mibandi la.

²⁸ Ding propeta tikpan da la reting kasalanan nung makananung ding tau tatakpan da la ring pader king pinturang maputi. Akakit da la ring e tutung vision at babie lang ula tungkul karing bage a e naman mapalyari. Pakilala da king magsalita la king amanu na ning Ginung Dios, oneng aku, ing Ginu, ala na ku man bitasang akasabi karela.

²⁹ Mamirait la at manako ding mabandi. E ustu ing tratu da karing pakakalulu at sasamantalanan da la ring dayuan.

³⁰ Menintun kung agyang metung mung tau a malyaring makatalakad metung a pader, itang malyaring makatalakad tulid da ring pader a metibag ban karin idipensa ne ing bansa potang ing mua ku lasakan ne. Oneng e ku menakit.

³¹ Inya ibugnus ku na ing mua ku karela, at anti ing api gisanan ku lang paten uli na ning depat da. Ing Ginung Dios ya ing migsalita.

23

¹ Migsalita ya kanaku ing Ginu.

² Ngana, Anak ning tau, ating aduang babaing mikapatad.

³ Manuknangan la king Ehipto inyang kayanakan la. Karin mesira ing pangadalaga ra at meging babai lang magtinda king karelang katawan.

⁴ Ohola ing lagyu ning atsi (ya ing simbulu na ning Samaria), at Oholiba ya lagyu ing wali (ya ing simbulu na ning Jerusalem). Ayasawa ku lang parehu at mikayanak ku karela.

⁵ I Ohola, agyang asawa ku ne, sindu na pa mu rin ing pamagtinda na king katawan na, at e ya mipaindatun king pamagnasa nang makipaglalaki karing tau Asiria.

⁶ Sundalus la deting maka uniporming kule muradu, nobling tau, at opisyal lang mangatas a katungkulan. Masanting la ngan ding opisyal da ring sundalung pakakabayu.

⁷ I Ohola babai de ring sablang opisyal a tau Asiria, at ing nasa na king tula ning laman ya ing mitulak king karinatan ampon king pamanyamba karing idolo da ring tau Asiria.

⁸ Sindu na itang pegumpisan na anting babaing magtinda king katawan na karin Ehipto nung nu ya mesira pangadalaga. Manibat na inyang anak ya pa mu kayabe na na lang matudtud ding lalaki, at tinuring da ne man anting babaing magtinda king katawan na.

⁹ Inya binie ku ne karing kalaguyo nang tau Asiria a pagnasan nang e makanyan-kanyan.

¹⁰ Linubas de; dekap da la ring anak nang lalaki at babai at pete de king kapamilatan ning espada. Sasalita da ring babai nukarin mang lugal ing milyari king bie na.

¹¹ Iti ikit nang Oholiba, oneng lalu yang masiri at igitan ne i Ohola king kasalanan na ning pamakipaglalaki.

¹² Mitmu ya namang kalibian karing magaling a lalaki at opisyal a tau Asiria, karing sundalus a pakauniporming masala kule ampon karing opisyal da ring sundalung pakakabayu, at karing sablang masanting a kayanakan a lalaki.

¹³ Ikit ku king tune yang e mayap; king ing makawali kalupa neng e mayap ning atsi na.

¹⁴ Mikutkut neng mikutkut king e mayap nang dapat. Megayuma ya karing misna kalutu a larawan da ring matas a opisyal na ning Babilonia a pakadukit king pader,

¹⁵ at pininturan matingkad a malutu, pakababat paha karing awakan da, at ating sula-sulapo turban karing buntuk da.

¹⁶ Mitmu yang kalibian karela inyang ikit na la, at mitubud yang tau karela karin king Babilonia.

¹⁷ Dinatang la reting tau Babilonia ban sipingnan de. Ginamit de at dinatan deng e mu nanu angga king bandang tauli mesumami ya lub karela i Oholiba.

¹⁸ Bilalag na ing sarili na king akakit da ring tau at pepabalu na king metung yang babaing magtinda king katawan na. Mesumami ku naman kang Oholiba antimo nung makananu kung mesumami kang atsi na.

¹⁹ Lalu yang meging e mayap a babai kesa ketang milabas a panaun, antimo ing penugalian na manibat na kanitang kayanakan na, inyang kapupurmeruan nang meging babaing magtinda king katawan na karin Ehipto.

²⁰ Mitmu yang kalibian karing lalaking maygit pa kalibian kesa karing bulugan a asno o kabayu.

²¹ Buri nang takman pasibayung Oholiba itang marinat nang pamibiebie karin Ehipto kanitang kayanakan na, kanitang pemialungan de ring lalaki na ning Ehipto ing salu na.

²² Inya ngeni, Oholiba, oyni ing asabi ku keka, aku, ing Ginung Dios. Sinawa na ka karing kalaguyo mung deta, oneng paratangan ku la mua keka at itubud ku la ban padurutnan da kang sundalus.

²³ Idala ku la ding sablang tau Babilonia at Caldea, ding lalaking ibat king Pekod, Soa, at Koa, at ding sablang tau Asiria. Tipunan ku la ding sablang masanting a nobling kayanakan at opisyal, ding sablang maulagang opisyal a matas a katungkulan, at ding opisyal da ring sundalung pakakabayu.

²⁴ Lusuban da ka manibat king norti; magdala lang dakal a sundalus ampon karung panggera at gareta. Atin lang kalasag at maka-helmet la ban e la numanu balang. Kubkuban da ka. Paburen da kang manabu karing gamat da at ila atulan da ka agpang karing karelang kautusan.

²⁵ Uling mua ku keka, paburen ku lang marap keka king mua ra. Tabakan de ing arung mu at ding kekang balugbug, at paten da la ring anak mu. Wa, kuanan da la keka ding anak mung lalaki at babai at silaban da lang mabie.

²⁶ Lubasan da ka at kuanan da la ring alahas mu.

²⁷ Angganan ku ing kalibian mu king tula ning laman ampon ing kanawangan a daraptan mu manibat na kanitang atyu ka Ehipto. E na ka kapilan man lumawe pa karing idolo o misip man tungkul king Ehipto.

²⁸ Iti ya ing sasabian na ning Ginung Dios Ibie da ka karing gamat da ring taung kasaman mu at kasuklaman mu.

²⁹ At uli na ning sama da keka, kuanan da ing sablang pibandian a pipagalan mu at lakuan da kang lubas anting babaing magtinda king katawan na. Ing kalibian mu king tula ning laman at ing pamamisali mu king kekang katawan

³⁰ ya ing pepasari kaniti keka. Meging babai da ka ring bansa at dinatan mu ing kekang sarili king kapamilatan da ring karelang idolo.

³¹ Tikian mu la ding bakas na ning kekang kapatad, inya ipainum kia naman keka ing kopa na ning pamamarusang ininum na.

³² Ngana ning Ginung Dios, Minum ka king kopang piinuman na ning kekang kapatad; kopa yang maragul at malalam. Kaylian na ka ning balang metung at insultuan na ka, uling ing kopa mitmu ya.

³³ Gawan na kang malungkut at malasing ning kopa ning takut at kasiran, ing kopa ning kapatad mung Samaria.

³⁴ Minum ka king kopa, at kekang napnapan ing laman na, at karing kabalbal niting kopa ing kekang salu laplapan me. Aku, ing Ginung Dios, ing migsalita.

³⁵ Ngeni iti ya ing sasabian na ning Ginung Dios: Uling kelinguan mu ku at ginulut ka kanaku, pagdusan mu ing kekang kalibian at ing pamamisali mu king kekang katawan.

³⁶ Ngana kanaku ning Ginu, Anak ning tau, makasadia na kang atulan me i Ohola at i Oholiba? Idalum mu la karing depat dang bage makasumami.

³⁷ Dinapat lang pamakipangalugud at pamakamate tau; pamakipangalugud a kayabe da ring idolo, at pamakamate karing anak a lalaking ayanak ku karela. Inain da la ring kanakung anak bilang ain-sakripisyu karing karelang idolo.

³⁸ Aliwa mu ita ing depat da. Gewa deng alang kabaldugan ing kanakung Templo at lebagan de ing Aldo ning Sabbath a kanakung tinatag.

³⁹ King mismung aldo a pete da la ring anak ku bilang ain-sakripisyu karing idolo, dinatang la king Templo ku at lepastangan de!

⁴⁰ Ulit-ulit lang peparalang tubud ban mangumbirang lalaking datang ibat karing marayung lugal, at dinatang no man deti. Mindilu la kanita ding aduang babaing mikapatad at inayus ding mata ra at misulud lang alahas.

⁴¹ Linukluk la karing malagung sopa at arapan da ya ing lamesang mitmung mayap a bage at pati na ing binie ku karelang insenso at larung olibo.

⁴² Meramdam ing inge da ring milulupung a lalaking dakal, ing metung a grupu da ring lalaking bayung datang a ibat king disyerto. Pepasulud da la ring pulseras karing gamat da reting babai, at pinutung ding malagung korona karing buntuk da.

⁴³ Kanita ngaku king sarili ku, Gamitan de ing metung a babaing metua na king pamakipangalugud.

⁴⁴ Ulit-ulitan da lang belikan deting babaing mamisali king katawan da. Belikan da lang pasibayu di Ohola at Oholiba, ding e mayap a babaing deta.

⁴⁵ Oneng ding banal a lalaki atulan da la king kasalanan a pamakipangalugud at pamakamate tau, uli na ning depat dang pamakipangalugud at uling mimantsahan lang daya ding gamat da.

⁴⁶ Iti ya ing sasabian na ning Ginung Dios: Magdala kang metung a grupung tau ban mamatakut at manako karela.

⁴⁷ Paburen mu la deting tau ban pamasibasan da la at lusuban da lang panabakan karing espada ra; paten da la ring anak da at silaban ding bale ra.

⁴⁸ Pututan ku na king mabilug a bansa ing marinat a pamibiebie, at iti maging metung a babala king balang babai ban e na dapat pasibayung pamakipangalugud antimo ing depat da reting aduang babai.

⁴⁹ At ikayung aduang babaing mikapatad, parusan da kayu king marinat a pamibiebie yu ampon pamanyamba karing idolo. Kanita yu abalu king aku ing Ginung Dios.

24

¹ King kapulung aldo ning kapulung bulan na ning kasiam a banua ning kekaming pangayugse, migsalita ya kanaku ing Ginu.

² Ngana, Anak ning tau, isulat me ing petsa na ning aldong iti, uling ya ing aldo nung kapilan ne pagumpisan lusuban ning ari ning Babilonia ing Jerusalem.

³ Sabian me kareting taung mag-rebeldi ing talimhagang sidia ku para karela; aku ing Ginung Dios: Isiang me king api ing kaldera, at katmuan meng danum. fig,,,,,Isiang me king api ing kaldera...,(24:3)fig*

⁴ Ibulug mu la ding masanting diling giling karni, ding pago at ding bitis; katmuan mia naman karing mepiling pirapirasung butul.

⁵ Gamitan mu ing karni ning matabang tupa; itangab mu ing dakal a dutung lalam ning kaldera. Paburen mung ing danum mukal; pabukal mu la ding butul at ing karni.

⁶ Iti ya ing sasabian na ning Ginung Dios: Makalunus ya ing siudad da ring makamate tau! Mengari ya king kalderang mengalawang a e bitasang malilinis. Tunggal-tunggal mung isaka ing pirapirasung karni angga king ala nang mitagan.

⁷ Ating merapat a pamakamate king siudad, oneng e tinalamsik ing daya king gabun nung nu na mo sana malyaring takpan ning alikabuk; tinalamsik king metung a batung maragul.

⁸ Likuan ku karin ing daya nung nu e malyaring misalikut, nung nu maniawad pamagbengansa.

⁹ Iti ya ing sasabian na ning Ginung Dios: Makalunus ya ing siudad da ring makamate tau! Aku mismu ing mitangab dakal a dutung.

¹⁰ Magdala kayung dakal pang dutung! Pepen yu ing api! Ilaga yu ing karni! Parayuputan ing sabo! Dulukan yu la ding butul!

¹¹ Ngeni isiang ye karing baya ing alang laman a kalderang tangsu at paburen yang mibaya king pali. Kanita maging malinis yang pasibayu ing kaldera antimo ing aduan na ning ritual kaybat nang metanggal ning kalawang na,

¹² agyamang ing sablang kalawang e na gisan leko ning api.

¹³ Jerusalem, dinatan da ka ring dapat mung imoral. Agyang migkapilit kung linisan da ka, makanyan man menatili kang marinat. E na ka pasibayung maging malinis anggang e mu panamdaman ing bigsikan na ning kanakung mua.

¹⁴ Aku, ing Ginu, ing migsalita. Dinatang na ing oras ban kimut ku. E ku la kalinguan ding kekang kasalanan o pakit nanumang lunus keka. Miparusan ka uli na ning depat mu. Ing Ginung Dios ya ing migsalita.

¹⁵ Pasibayu yang migsalita kanaku ing Ginu.

¹⁶ Ngana, Anak ning tau, king metung mung barug ilako ke ing taung pakamalan mung dili. E ka sukat magreklamu o saingsing o tumulu lua.

¹⁷ E mu paburen maramdam ing kekang siguk. E ka lulual alang takap a buntuk o alang sapin a bitis bilang tanda ning kekang pamagpaldas. E me tatakpan ing kekang lupa o mamangan man king kakanan da ring magpaldas.

¹⁸ Kapagsalita ku la ding tau itang abak a maranun. Ketang bengi na ning aldong ita, mete ya ing asawa ku at kabukasan depatan ku itang mipayabut kanaku.

¹⁹ Ngarang mengutang ding tau kanaku, Obat makanyan ka daraptan?

²⁰ Pekibat ku karela, Migsalita ya kanaku ing Ginu at sinabi na kanaku

²¹ king ibie ke kekayung Israelita iting mensahi: Ipagmaragul ye ing matibe Templo. Atna kayung kaburing lalawe at daralo kaniti, oneng gawan neng alang kabaldugan ning Ginu. At mate la ngan king gera ding kayanakan a miembru da ring pamilya yung melakuan Jerusalem.

²² Kanita yu daptan ing kanakung depatan. E yu la takpan ding kekayung lupa ni mangan king kakanan da ring magpaldas.

²³ E kayu lumual a alang takap a buntuk o alang sapin a bitis o manangis o kumiak man. Mayayat kayu uli da ring kekong kasalanan at saingsing king metung at metung.

²⁴ Maging metung kung tanda kekayu kanita; daptan yu ngan itang sablang depatan ku. Sasabian na ning Ginu king potang mapalyari na iti, akilala yu king ya ing Ginung Dios.

²⁵ Ngana kanaku ning Ginu, Ngeni, anak ning tau, ilako ke karela ing matibe Templo a karelang pagmaragul ampon tula, ing kapad dang lalawan at daralawan. Kuanan ku la naman ding karelang anak a lalaki at babai.

²⁶ King aldo a daptan ku iti, datang ya kekayu ing metung a mekatakas king kasiran at ibalita na iti kekayu.

²⁷ King aldo mu ring ita magbalik pasibayu keka ing upaya na ning pamagsalita a mewala keka at makipagsalita ka king taung datang. King anti kaniting paralan maging metung kang pekatanda karing tau at karelang akilala king aku ing Ginu.

25

¹ Migsalita ya kanaku ing Ginu.

² Ngana, Anak ning tau, magsalita ka laban king bansang Ammon.

³ Aku ing Ginung Dios. Sabian mu karing memalen na ning Ammon king makiramdam la king sasabian ku. Metula kayung menakit king pangapayalan nang kabaldugan ning kanakung Templo, king pangalasak ning bansang Israel, king pangayugse ra king marayung lugal ding memalen na ning Juda.

⁴ Uli na niti, paburen kung sambutan da kayu ding tribu na ning disyerto king dane aslagan. Italakad da la ring karelang kampu king kekayung bansa at manuknangan la karin. Kanan da la ring bunga ding tanaman at inuman ing gatas a mangaintulid kekayu.

⁵ Gawan ke ing siudad ning Rabba metung a lugal a pipagpastulan karing kamelyu, at ing mabilug a bansa ning Ammon maging lugal yang pipagkuralan da ring tupa ban akilala yu king aku ing Ginu.

⁶ Iti ya ing sasabian na ning Ginung Dios: Pelakpak yu la ding gamat yu at linundag kayu king tula. Pikasaman ye ing bansang Israel.

⁷ Uli na niti, paburen da kayung manabu karing gamat da ring aliwang bansa a kuma king pibandian yu. Lubus da kayung siran at e na makilala pang metung a bansa. Kanita yu akilala king aku ing Ginu.

⁸ Iti ya ing sasabian na ning Ginung Dios, Uling sinabi na ning Moab king ing Juda kalupa de ring aliwang bansa,

⁹ paburen ku la ngening malusub ding siudad a magdipensa king angganan na ning Moab, at pati na ding malagung diling siudad ning Bet Jesimot, ning Baal Meon, at ning Kiriataim.

¹⁰ Paburen kung kubkuban de ring tribu na ning disyerto king dane aslagan ing Moab at ning Ammon ban kalinguan da ne ring aliwang bansa.

¹¹ Parusan ke ing Moab at kanita ra akilala king aku ing Ginu.

¹² Iti ya ing sasabian na ning Ginung Dios, Mitmung bigsikan ing pamagbengansang depat da ring memalen na ning Edom karing memalen na ning Juda, at itang pamagbengansang ita ya ing pepasari king pamikasala nang alang kapupusan ning Edom.

¹³ Ngeni sasabian ku king parusan ke ing Edom at paten ing balang lalaki ampon animal karin. Gawan keng alang silbing bansa manibat king siudad ning Teman angga na king siudad ning Dedan, at mate la king gera ding memalen na.

¹⁴ Ipagbengansa da ku ring memalen kung Israelita king Edom at ipatakman da king Edom ing mabagsik kung mua. Abalu na kanita ning Edom nung nu anti kabayat ing kanakung pamagbengansa. Ing Ginung Dios ya ing migsalita.

¹⁵ Iti ing sasabian na ning Ginung Dios, Mitmung bigsikan ing pamagbengansang depat da ring Filisteo karing kalaban da manibat na kanitang minunang panaun at gisan da la king sama ra karela.

¹⁶ Inya naman aku papasiag ku ngeni king lusuban ku la ding Filisteo, at ala kung itagan metung man karela. Paten ke ing ninumang mitagan mabie king Kapatagan ning Filistia.

¹⁷ Parusan ku lang alang kalupa at bengansahan ku lang ganap. Panamdaman da ing kanakung mua. Kanita ra akilala king aku ing Ginu.

26

¹ King mumuna nang aldo ning bulan na ning kalabing metung nang banua ning kekaming pangayugse, migsalita ya kanaku ing Ginu.

² Ngana, Anak ning tau, iti ya ing kukulyo da ring memalen na ning siudad ning Tiro: Misambulat ya ing Jerusalem! Mibagsak ing negosyu na! Ala ta nang kalaban keng komersyu!

³ Ngeni, aku, ing Ginung Dios, iti ya ing kanakung sasabian: Siudad ning Tiro, aku ing kekang kalaban. Iparala ku la ban lumusub keka ding dakal a bansa at maging anti la karing alun ning dagat a datang keka.

⁴ Lasakan da la ring pader na ning kekang siudad at idagsa da la ring kekang tore. Kaybat na nita, palisan ku ing sablang alikabuk at mistula niang metung a batu ing lakuan ku.

⁵ Palangian da la ring lambat da ring manasan king babo na karin king libutad ning dagat nung nu ya makatalakad. Aku, ing Ginung Dios, ing migsalita. Panguanan da ring bansa ing pibandian na ning Tiro,

⁶ at paten da la karing espada ra ding manuknangan karing kabalenan na. Kanita na akilala ning Tiro king aku ing Ginu.

⁷ Iti ing sasabian na ning Ginung Dios, Itubud ke ing maragul dili karing sablang ari, i Aring Nebucadenesar ning Babilonia, ban lusuban ne ing Tiro. Datang yang ibat king norti at ding dakal a sundalus, ding dakal a kabayu, ding karung panggera, at ding sundalung pakasake kabayu.

⁸ Mate la king pamakilaban detang manuknangan karing balen. Gawa yang kulkul ampon kambilan ing kalaban at piaga-agapayan na la ding kalasag na anting bakud a matibe makapadurut keka.

⁹ Panibagan da la ring kekang pader karing trosung panibag, at idagsa da la ring kekang tore karing karelang palakul.

¹⁰ Mitakpan ka king alikabuk da ring kabayu da. Ing kurug da ring karelang kabayung guguliut karitun at karung panggera ugunan da la ring kekang pader kabang lalabas la karing pasbul dalan ning melasak a siudad.

¹¹ Lumusub la ding sundalus dang pakasake kabayu karing kekang dalan; paten da la ring kekang memalen karing karelang espada. Mibagsak la ding matibe mung asias.

¹² Pisamsaman da ring kekang kalaban ing kekang pibandian at kalakal. Tibagan da la ring kekang pader at isambulat ding kekang malapalasyung bale. Kuanan da la ring batu, dutung, at ing heganaganang mengatatal, at kaybat itambak da la king dagat.

¹³ Wakasan ku na ing sabla yung pamagkanta, at patahimikan ku na la ding kekayung alpa.

¹⁴ Mitagan ku mung metung a batu ban karin da la palangian ding manasan ding lambat da. E ne malarin kapilan man ing siudad. Aku, ing Ginung Dios, ing migsalita.

¹⁵ Iti ing sasabian na ning Ginung Dios king siudad na ning Tiro: Potang masasambut na ka king labanan, mangilabut la ding taung manuknangan king lele ning dagat uli na ning saingsing da ring sugatan at kulisak da retang pamaten da.

¹⁶ Kuldas la karing tronung luklukan da ring sablang ari da ring bansang mapaglayag keng dagat. Ilukas da la ring karelang balabal at ing imalan dang birdahan at lukluk lang gagalgal king gabun. Mangilabut lang e makanyan-kanyan king kekang kerarasan angga king e ra apigil ing galgal da.

¹⁷ Ikanta de iting kantang mete para keka: Mibagsak ne ing pikabaluan a siudad! Inakmul na la ning dagat ding barku na! Ding sinakup karing dagat ila ding memalen na niting siudad, at mematakut karetang taung manuknangan king lele ra.

¹⁸ Ngeni, king aldo a mibagsak ya, galgal la ding pulu at manimutla ding memalen na king anti kaniting kasiran.

¹⁹ Iti ing sasabian na ning Ginung Dios: Gawan da kang anti ding siudad a melasak nung nukarin ala metung mang manuknangan. Takpan da ka king danum ning malalam at malualas a dagat.

²⁰ Padulungan da ka king kalalalaman na ning kutkutan da ring mete ban akayabe mu la ding taung mebie kanitang minunang panaun. Ketang kalalalaman a kulkul a ita karin da ka papanatilian libutad na ning alang anggang kasiran, kayabe da ring mete. Bilang bunga na niti, e ra na ka kapilan man panuknanganan pa ding tau at ala nang kuma king lugal mu king lugal da ring mabie.

²¹ Gawan da kang metung a makatakut a pialimbawanan at iti ya ing maging kawakasan mu. Panintunan da ka ring tau, oneng e ra na ka bitasang akit. Ing Ginung Dios ya ing migsalita.

27

¹ Ngana kanaku ning Ginu,

² Anak ning tau, ikanta me ing kantang mete para king Tiro,

³ ing siudad a makatalakad king lele ning dagat at makipagkalakalan karing balang taung manuknangan lele ning dagat at pulu. Sabian mu ing sasabian na ning Ginung Dios: Tiro, pigmaragul mu ing sakdal mung lagu. fig,,,,,Ing siudad a makatalakad king lele ning dagat...,(27:3)fig*

⁴ Ing dagat ya ing kekang tuknangan. Ding kekang talapagobra inubug da kang anti ing masanting a barku.

⁵ Ginamit lang tablang ibat karing tanaman a sipres ning Bunduk Hermon, at sedro a ibat king Lebanon para king pisabitan layag.

⁶ Kinangwa lang tanaman a ensina king Bashan ban gawan dang kekang bagse. Gewa re ing kekang suelu karing dutung a pinu ning Cyprus, at belutanan deng garing.

⁷ Megawa la ding kekang layag king imalan a linen, burdadung linen a menibat pa Ehipto; agad kang akilala agyang atyu ka king marayu. Megawa la ding kekang layag king pekamapinung imalan, king imalan a kule muradu ibat king pulu ning Cyprus.

⁸ Ding talapamagse mu ibat la karing siudad ning Sidon at Arvad. Ding sarili mung lalaking magaling king obra ila ding kekang marinu.

⁹ Ding kekang kalpinteru ila ding lalaking misane masalese king obra a ibat Biblo. Ding maglayag karing balang barku sinali la karing kekang tindahan.

¹⁰ Sinuyu la keka ding sundalus a tau Persia, Lydia, at Libya. Sinabit da la ring karelang kalasag at helmet karing kekang kampu. Ila ding lalaking migkamit tagumpe para keka.

¹¹ Ding guguardia karing kekang pader ila ding sundalus a tau Arvad, at ding guguardia karing kekang tore ila ding lalaking tau Gamad. Sasabit da la ring karelang kalasag karing kekang pader. Ila ding lalaking minie lagu keka.

¹² Mekipagkalakalan ka king Tarsis at tinanggap kang pilak, bakal, lata, at tinggaputi bilang kalibe ning dakal mung paninda.

¹³ Mekipagkalakalan ka munaman karin king Javan, Tubal, at Mesek at pekilibe mu ing kekang paninda karing ipus at karing kasangkapan a tangsu.

¹⁴ Pisali mu ing paninda mu ban makasali kang kabayung pagobra ampon pakigera at karing animal a asno a ibat king Bet Togarma.

¹⁵ Mekipagkalakalan la keka ding memalen na ning Dedan; ding taung manuknangan karing lele dagat minie lang garing at ebonia keka bilang kalibe ning paninda mu.

¹⁶ Seli da ring memalen ning Aram ing kekang tinda at ing dakal mung pruduktu. Pekilibe da la ring karelang esmeralda, imalan a purpura, imalan a binurdahan, mapinung linen, sampagang batu, at rubi bilang bayad king kekang tinda.

¹⁷ Beyaran na ning Juda at ning Israel ing kekang paninda king trigu, pulut-panilan, larung olibo, at balsamu.

¹⁸ Seli da ring memalen ning Damasco ing kekang tinda at pruduktu; beyaran da king alak a ibat king Helbon at king lana a ibat king Sahar. Libayan da karing karelang kasangkapan a bakal at balsamu ing kekang paninda.

¹⁹

²⁰ Mekilibayan la ding memalen ning Dedan lanang magaspang para sapin sia king kekang paninda.

²¹ Beyaran da ring tau Arabia at ding pamuntuk ning bansang Kedar ing tinda mung biserung tupa, karing lalaking tupa, at kambing.

²² Ding negosianti ning Seba at Raama binie da la, bilang kalibe ning kekang paninda, ding karelang alahas, gintu, at ing pekamayap dang pabanglu.

²³ Mekisaliwanan la ngan keka ding siudad ning Haran, Canne, at Eden, ding negosianti ning Seba, ding siudad ning Assur at Kilmad.

²⁴ Pisali da keka ing pekamal dang imalan, telang purpura, telang birdahan, at malagung alpombrang maslag a kule at mapinung sintas at lubid.

²⁵ Seke mu ing kekang tinda karing maragul a barku a pisasakenan karga. Mengari ka king barku a maglayag king dagat, mitmu king kargang mabayat.

²⁶ Inyang ding kekang talabagse liwal da ka king dagat, ing angin-aslagan lesak na ka king kalibudtan ning dagat.

²⁷ Ing sablang kekang mal a paninda, ding sablang kekang marinu, kalpinteru ning barku at komersianti, sablang sundalus a makasake king barku limbug la ngan king dagat inyang mitiab ya ing kekang barku.

²⁸ Kakabling king pampang ing kulisak ding marinung malulumud.

²⁹ Ing balang barku ngeni ala yang katau-tau, at ing balang marinu sinaka ne king pampang.

³⁰ Manangis la ngan e makanyan-kanyan para keka, bububuran da lang alikabuk ding karelang buntuk, at king abu la kasat-kasat.

³¹ Sitsatan da lang buntuk da para keka, at misulud lang imalan a magaspang. Masaspak la salu kabang manangis la.

³² Magkanta lang kantang mete para keka: Ninu ing malyaring akalupa na ning Tiro a ngeni tahimik lalam ning dagat?

³³ Inyang ing kekong kalakal biniahi ra lipat da ring dagat, kitmuan mu ing pamangailangan na ning balang bansa. Mibandi la ding ari uli na ning dakal mung paninda.

³⁴ Ngeni king dagat 'ti ka mitiab, limbug king kalalalaman. Ing kekang kalakal at ding sablang keka mekipagobra king dagat kayabe mong limbug.

³⁵ Mengapakirut la ding taung manuknangan king lele ning dagat king milyari keka. Mebigla la pati ari at mayayakit ing takut karing lupa ra.

³⁶ Limbug na ka; mewala na ka kapilan man at mitakutan la ding negosianti king mabilug a yatu, at tatakut la pota ing milyari keka mapalyari munaman karela.

28

¹ Ngana kanaku ning Ginu,

² Anak ning tau, aku ing Ginung Dios, sabian mu king pamuntuk ning Tiro king sasabian ku ing anti kaniti: Milalu na ing kekang pamagmatas; sasabian mu king metung kang dios. Sasabian mu king bilang dios makalukluk ka king tronu a mipadurutnan king malalam a danuman. Magkunwari kang metung a dios. E ka dios uling tune kang tau; ala kang kadiosan.

³ Wa, isipan mu king maygit kang biasa kang Daniel, inya alang lihim a e mu balu.

⁴ Mibandi ka king gintu at pilak uli na ning kekang kabiasnan at gelingan.

⁵ Meging matalino ka king pamangomersyu at e ka pepatugut king pamagtubu. Kapagmaragul mu king kekang pibandian!

⁶ Inya ngeni, aku, ing Ginung Dios, sasabian ku keka: Uling isipan mu king biasa kang anti ing metung a dios,

⁷ parala kung mangabagsik a kalaban ban lumusub keka. Siran da ngan ing sablang malagung bage a abandi mu king kapamilatan na ning kekang gelingan at kabiasnan.

⁸ Ila ding makamate keka at iyugse da ka king kalalalaman na ning dagat.

⁹ Potang datang la keka ban paten da ka, asabi mu pa kaya king ika metung kang dios? Potang arapan mu na la ding makamate keka, akilala mu king atin kang kamatayan at alang bitasang kadiosan.

¹⁰ Mate kang anti ing asu karing gamat da ring dayuan a alang dios. Aku, ing Ginung Dios, ing migsalita.

¹¹ Pasibayu yang migsalita kanaku ing Ginu.

¹² Ngana, Anak ning tau, manangis ka para king daratang a mapalyari king ari ning Tiro. Sabian mu king aku, ing Ginung Dios, sasabian ku: Kanitang misan a panaun pialimbawanan ka king pangasakdal. Kabiasnan mo at kasanting mung lalaki kanita!

¹³ Menuknangan ka king Eden, ing hardin ning Dios, at makasulud miyayaliwang uring alahas a mangamal: rubi at diamante; topasyu, berilu, karnelan, haspe, sapiro, esmeralda, at karbungko. Makapalamuti kang gintu. Megawa la para keka kanitang aldo a ika melalang ka.

¹⁴ Mibili kung metung a anghel a makatakut karin ban magbante keka. Menuknangan ka king bunduk kung banal at linakad libutad ding kikislap a alahas.

¹⁵ Sakdal ing ugali mu manibat na kanitang melalang ka angga king aldo a megumpisa kang dinapat e mayap.

¹⁶ Meging samal ka king pamaniali at pamamisali at iti ya ing mitaguyud keka king pamanabusu at pamikasala. Inya pinilit da kang meko king banal kung bunduk at ing anghel a magbante keka tinabi na ka ibat karing kikislap a alahas.

¹⁷ Migmayabang ka uli na ning sintingan mu at ing kekang kabantugan gewa na kang anti ing metung a mangmang. Uli na niti, aku bitbat da ka king gabun at likuan da ka karin ban maging babala karing aliwang ari.

¹⁸ Ing ugali mung e karampatan king pamaniali at pamamisali ya ing sangkan king pangasalaula da ring lugal a pisasamban. Inya silaban ke ing siudad at pinatag king gabun. Ding ngeni keka manakit akakit da king minuli ka king abu.

¹⁹ Mewala na ka at e na mayakit pa kapilan man at mitakutan la ding sablang bansang dinatang keka; tatakut la pota ing milyari keka mapalyari munaman karela.

²⁰ Nganang sinabi kanaku ning Ginu,

²¹ Anak ning tau, magsalita kang laban king siudad ning Sidon.

²² Sabian mu karing memalen karin, king aku, ing Ginung Dios, ngakung magsalita karela: Sidon, aku ing kekang kalaban; purian da ku ding tau uli na ning daptan ku keka. Abalu ra king aku ing Ginu potang ipakit ku nung makananu kung banal king kapamilatan na ning pamamarusa ku karetang manuknangan keka.

²³ Padala kung salut libutad yu at paburen kung magus ing daya karing kekayung dalan. Lusuban da kayu karing balang lugal at mate la ding kekayung memalen. At kanita abalu yu king aku ing Ginu.

²⁴ Ngana ning Ginung Dios, E ne kapilan man maging anting tanaman a suksuk a makapanasakit king Israel ing ninuman karing makapadurut a bansa a meninsultu king Israel. At kanita ra akilala king aku ing Ginung Dios.

²⁵ Ngana ning Ginung Dios, Tipunan ku lang pasibayu ding memalen na ning Israel a kanakung kinalat karing miyayaliwang bansa, at akilala ra kanita ding sablang bansa king aku banal ku. Manuknangan la ding memalen na ning Israel king sarili dang bansa a kanakung binie king talasuyu kung i Jacob.

²⁶ Karin la manuknangan king mitmung kapayapan. Manalakad lang bale at mananaman lang ubas. Parusan ku la ding sablang kasiping dang bansa a meninsultu karela. At kanita ra akilala king aku ing Ginung karelang Dios.

29

¹ Inyang kalabing aduang aldo na ning kapulung bulan ning kapulung banua ning kekaming pangayugse, migsalita ya kanaku ing Ginu.

² Ngana, Anak ning tau, magsalita kang laban king ari na ning Ehipto. Sabian mu nung makananu yang miparusan at ing kabilugan a bansang Ehipto.

³ Sabian mu ing sasabian na ning Ginung Dios king ari na ning Ehipto: Aku ing kekang kalaban, ikang maragul a dapu a makababad king ilug. Sasabian mu king ing Ilug ning Nilo bandi me at ika ing ginawa kaniti.

⁴ Dinan keng taga ing baba mu at ipakat ku la keka ding asan a atyu king ilug mu. Kaybat na nita, isaka da ka king danum at ding sablang asan a makapakat keka.

⁵ Iyugse da ka king disyerto pati na ding asan a deta. Mipase ya king gabun ing katawan mu at e ya milibing. Paburen keng laklakan da ring ayup at ding animal ing bangke mu.

⁶ Kanita ra akilala ding memalen na ning Ehipto king aku ing Ginu. Mas mayap ya ing timbu kesa king saup a binie yu karing Israelita.

⁷ Inyang sindal da la ring takde ra kekayu, pemile yu la at penandus kilikili at pemakli yu la galudgud.

⁸ Inya ngeni, aku, ing Ginung Dios, sasabian ku kekayu king padala kung taung paka espada ban lumusub kekayu, at paten da la ring kekayung memalen ampon ding kekayung animal.

⁹ Maging ala yang kwentang bansa ing Ehipto. Kanita yu akilala king aku ing Ginu. Uling sinabi mu king bandi me ing Ilug ning Nilo at keka yang gewa iti,

¹⁰ aku ing kekang kalaban antimu rin kalaban ning kekang Nilo. Gawan keng alang kwentang bansa ing mabilug a Ehipto manibat king siudad ning Migdol king norti angga king siudad ning Aswan king mauli, angga na karing angganan ning Etiopia.

¹¹ Ala metung mang tau at animal a lumakad pa karin. Ala nang nanumang manuknangan karin kilub ding apat apulung banua.

¹² Gawan keng pekamalungkut a bansa ing Ehipto. Kilub ding apat apulung banua manatili lang lasak-lasak ding siudad ning Ehipto; mas lasak kesa karing aliwang siudad. Gawan ku lang bakwit ding tau Ehipto. Tumakas la at munta karing balang bansa at manuknangan libutad da ring miyayaliwang tau.

¹³ Ngana ning Ginung Dios, Kaybat ding apat apulung banua ibalik ku lang pasibayu ding tau Ehipto ibat karing bansa nung nu ku la inugse,

¹⁴ at paintulutan ku lang manuknangan king dane mauli ning Ehipto, ing tune rang tuknangan. Karin la maging metung a kayarian a alang sikanan;

¹⁵ ing pekamaina karing sablang kayarian at e na la kapilan man sumakup pa karing aliwang bansa. Gawan ku lang lubus alang kabaldugan ban e da la apilit ding aliwang bansa king buri da.

¹⁶ E ne kapilan man manalig pang saup ing Israel karela. Ipaganaka na king Israel ing milyari king Ehipto king migkamali ya king pamanalig na karela. Kanita na akilala ning Israel king aku ing Ginung Dios.

¹⁷ King mumuna nang aldo ning mumuna nang bulan ning kaduang pulu't pitung banua ning pangayugse mi, migsalita ya kanaku ing Ginu.

¹⁸ Ngana, Anak ning tau, pegumpisan na ning Aring Nebucadenesar ning Babilonia ing pamaglusub king bansang Tiro. Pepasakitan na lang ustu ding sundalus na king pamamusan mabayat a karga. Inya melugus la buak at mesugat a pago, oneng ala yang pekinabangnan ing ari at ding sundalus na king sablang kapagalan da.

¹⁹ Inya ngeni, aku, ing Ginung Dios, sasabian ku: Ipasakup ke ing bansang Ehipto king Aring Nebucadenesar. Panakawanan ne at samsamanan at idala na ing sablang pibandian na ning Ehipto bilang upa karing sundalus na.

²⁰ Ibabie ke ing Ehipto bilang bayad king kasuyuan na, uling megobra la ding sundalus na para kaku. Aku, ing Ginung Dios, ing migsalita.

²¹ Potang mapalyari na iti, gawan ku lang masikan ding memalen na ning Israel at ika, Ezekiel, paintulutan da kang magsalita ban ing siwala mu damdaman da ring sabla. At kanita ra akilala king aku ing Ginu.

30

¹ Pasibayu yang migsalita kanaku ing Ginu.

² Ngana, Anak ning tau, aku ing Ginung Dios, manula ka at sabian mu ing kanakung sasabian. King masikan a siwala sabian mu la deting amanu: Ing makatakut a aldo daratang ya!

³ Malapit ne iting aldo, ing aldo nung kapilan ing Ginu dapat ya. Metung yang aldo malulam, at mitmung kaligaligan para karing bansa.

⁴ Mika gera king Ehipto, at maragul a kaguluan king Etiopia. Dakal lang mate king Ehipto; masamantala ya ing bansa at malakuan yang mesalanta.

⁵ Paten na la naman ning gerang ita ding upahan a sundalus ibat Etiopia, Libya, Lydia, Arabia, Kub, at pati na detang mismung kanakung memalen.

⁶ Sasabian na ning Ginu, Manibat king Migdol king norti angga king Aswan king mauli, mate la ding sablang magdipensa ning Ehipto king labanan. Mate la ding pagmaragul nang sundalus ning Ehipto. Aku, ing Ginung Dios, ing migsalita.

⁷ Maging pekamalungkut yang bansa keti king yatu, at lubus lang malasak ding siudad na.

⁸ Potang silaban ku ne ing Ehipto at potang mete na la ding sabla nang magdipensa akilala ra kanita king aku ing Ginu.

⁹ Potang datang ne ing aldong ita at potang ing Ehipto melasak ne, itubud ku la ding talapagbalita a makasake karing barku ban alisuasan da la pilubluban ding alang kabalu-balung memalen na ning Etiopia at mitakutan la. Daratang ne ing aldong ita!

¹⁰ Iti ing sasabian na ning Ginung Dios, Gamitan ke ing Aring Nebucadenesar ning Babilonia ban wakasan na ing pibandian ning Ehipto.

¹¹ Datang ya ampon ding alang lunus nang sundalus ban lasakan de ing bansa. Lusuban de ing Ehipto karing espada ra at mangatmu yang mete ing bansa.

¹² Palangian ke ing Ilug ning Nilo at ibili ke ing Ehipto king lalam dang upaya ding e mayap a tau. Samantalanan de ring dayuan ing mabilug a bansa. Aku, ing Ginu, ing migsalita.

¹³ Iti ing sasabian na ning Ginung Dios, Siran ku la ding idolo at ding e tutung dios ning Memfis. Ala nang sumakup pa king Ehipto; pamatakutan ku la ngan ding tau karin.

¹⁴ Gawan keng disyerto ing dake nang mauli ning Ehipto at silaban ke ing siudad ning Zoan king dane norti. Parusan ke ing kabiserang siudad ning Tebes.

¹⁵ Ipatakman ku ing kakung mua king siudad ning Pelusium, ing maragul nang diling kuta ning Ehipto. Siran ku ing pibandian na ning Tebes.

¹⁶ Silaban ke ing Ehipto at mibili ya ing Pelusium king kasakitan. Matibag la ding pader na ning Tebes at datangan ne ning albug ing siudad.

¹⁷ Mate la king gera ding kayanakan nang lalaki ning Heliopolis at Bubastis, at mabihag la ding aliwa namang tau.

¹⁸ Datang ing dalumdum king Tapanhes potang siran ku ing kayupayan na ning Ehipto, at angganan ku na ing sikanan a pagmaragul da ring memalen na. Takpan ne ning lulam ing Ehipto at mabihag la ding memalen da ring sablang siudad na.

¹⁹ Potang parusan ke ing Ehipto king anti kaniting paralan, akilala ra kanita king aku ing Ginu.

²⁰ King kapitung aldo na ning mumunang bulan ning kalabing metung a banua ning kekaming pangayugse, migsalita ya kanaku ing Ginu.

²¹ Ngana, Anak ning tau, pikli ku ne gamat ing ari na ning Ehipto. Ala metung mang menulu o sinikasu ban kumayap ya ampon sikan at pasibayung makatalan espada.

²² Inya ngeni, aku, ing Ginung Dios, sasabian ku: Aku ing kalaban na ning ari ning Ehipto. Parehu ku lang paklian ding adua nang gamat, itang masalese at itang mepakli na, ban e ne makatalan pang espada.

²³ Ikalat ku la ding tau Ehipto king mabilug a yatu.

²⁴ Kanita ku la gawan mayupaya ding gamat na ning ari ning Babilonia at ibili ke ing espada ku king gamat na. Oneng paklian ku la ding gamat na ning ari ning Ehipto at saingsing ya at mate king akakit da ring kalaban na.

²⁵ Wa, painan ke ing ari na ning Ehipto at pasiknangan ku ne man ing ari na ning Babilonia. Potang ibie ku ne ing espada ku at potang iwasiwas ne tulid na ning Ehipto, kanita na akilala ning metung at metung king aku ing Ginu.

²⁶ Ikalat ku la ding tau Ehipto king mabilug a yatu. Kanita ra akilala king aku ing Ginu.

31

¹ Migsalita ya kanaku ing Ginu king mumunang aldo ning katlung bulan ning kalabing metung a banua ning kekaming pangayugse.

² Ngana, Anak ning tau, sabian mu iti king ari ning Ehipto at karing sasakupan na: Kayupaya mo! Kaninu da ka pakilupa?

³ Mengari ka king tanaman a sedro ning Lebanon; malagu la at masalilung ding kekang sanga. Tanaman kang binang matas at miraras karing biga.

⁴ Ating danum ban mitugtugan ya ampon dagul, at ating sibul lalam ning gabun ban masese ya. Paranuman de ing lugal nung nu ya tutubu, at pepayagusan da ing danum angga karing sablang tanaman ning kagubatan.

⁵ Uling parati yang miparanuman, meragul yang matas kesa karing aliwang tanaman. Malabung la ding sanga na, at makaba la.

⁶ Miyayaliwa lang ayup ding ginawang sale karing sanga na; king lilung na ding malyap a animal karin da la babait ding anak da. Ding bansa ning yatu magsalilung la king anino na.

⁷ Kalagu na ning tanaman a ita! Tune matas ya at makaba sanga. Ding yamut na managlus la karing malalam a sibul.

⁸ Ala yang kalupa agyang karing sedro king mulahan ning Dios. Agyang ding tanaman a sipres e la mika sangang kalupa na. At alang tanaman a kastanyo a akaparis na. Alang tanaman king mismung mulahan ning Dios a kasing santing na.

⁹ Gewa keng malagung kayabe da ring makaladlad nang sanga. Ya ing karirian da ring balang tanaman king Eden, ing mulahan ning Dios.

¹⁰ Inya ngeni, aku, ing Ginung Dios, sabian ku ing mapalyari kanitang tanaman a meragul at miraras karing biga. Kabang daragul ya, makanyan ya namang daragul a lub.

¹¹ Inya tinggian ke at peintulutan kung abandi ne ning dayuan a pamuntuk. Ibie na keting tanaman itang e mayap a katuliran na.

¹² Kuturan de ring alang lunus a dayuan at kaybat lakuan de. Dugpa la ding sanga na at ding mengatatal nang dake karing balang bunduk at libis ning bansa. Mamaglako la ding sablang bansang menuknangan king anino na.

¹³ Datang la ding ayup at tuklu king miragsang tanaman, at talasan da la ring malyap a animal ding sanga na.

¹⁴ Inya manibat na ngeni ala nang tanaman, nu ya man anti pangasese king danum, a dagul pang matas o miras karing biga at maging matas a matas. Mitakda na ing kamatayan da antimong tune tau, at mitalaga na lang makiabe karetang pupunta king kutkutan da ring mete.

¹⁵ Iti ya ing sasabian na ning Ginung Dios: King aldo dulung ya ing tanaman king tuknangan da ring mete, gamitan ku la ding sibul ban takpan da ing gabun bilang tanda na ning pamangulila na. Pigilan ku la ding ilug at e ku paintulut ing magus la ding dakal a sapa. Uling mete ne ing tanaman; parala kung dalumdum babo ding Bunduk ning Lebanon at palangian ku la ngan ding tanaman ning kagubatan.

¹⁶ Potang idala ku ne king tuknangan da ring mete, ing kaluskus ning pangabagsak na ya ing makaugun karing bansa. Ikatula da ring sablang tanaman ning Eden at ding sablang piling tanaman ning Lebanon a masese king danum a miras na king tuknangan da ring mete ing pangabagsak na.

¹⁷ Tuki la king tuknangan da ring mete ban makiabe karetang mibagsak na. At ding sablang menuknangan king anino na misalbag la libutad da ring bansa.

¹⁸ Ing tanaman ya ing ari ning Ehipto at ding sablang taung sasakupan na. Agyang king Eden alang tanaman a binang matas at pagmumulalan. Oneng ngeni, kalupa da ring tanaman king Eden, miras ya king lalam ning tuknangan da ring mete at makiabe ya karing alang dios at karetang mete king labanan. Aku ing migsalita, ngana ning Ginung Dios.

32

¹ King mumunang aldo ning kalabing aduang bulan ning kalabing aduang banua na ning kekaming pangayugse, migsalita ya kanaku ing Ginu.

² Ngana, Anak ning tau, dinan meng mabayat a babala ing ari na ning Ehipto. Ibie me iting mensahi ku: Mengari ka king leon libutad da ring bansa, oneng king kamatutuanan anti kang dapu a kakawe king ilug. Buburakan mu ing danum karing kekang bitis at dirinatan mu la ding ilug.

³ Dakpan da ka king kakung lambat potang mitipun na la ding dakal a bansa, at paburen ku lang iguyud de ing lambat king mamala.

⁴ Iyugse da ka king gabun at tipunan ku la ngan ding sablang ayup at animal ning yatu ban mangan keka.

⁵ Ikalat ku karing bunduk at king kapatagan ing buluk ning malalaso mung bangke.

⁶ Itugtug ku ing daya mu angga king kumalat babo da ring bunduk at katmuan na la ding batis.

⁷ Potang paten da na ka, takpan ke ing banua at patdan ku la ngan ding batuin. Salikut ya ing aldo kagulutan da ring biga at e ya sunlag ing bulan.

⁸ Patdan ku la ngan ding sablang sulu na ning banua at mibili ya king karalumduman ing kekang bansa. Aku, ing Ginung Dios, ing migsalita.

⁹ Maligalig la ding dakal a bansang e mu pa bitasang dimdam potang ikalat ku ing balita tungkul king kasiran a miras keka.

¹⁰ Mabigla la ding dakal a bansa king daptan ku keka. Potang iwasiwas ku ne ing espada ku, galgal la king takut ding ari. King aldo a miragsa ka, galgal la ngan king takut uling tatakut lang mate.

¹¹ Nganang sasabi ning Ginung Dios king ari ning Ehipto, Arapan me ing espada na ning Babilonia.

¹² Paburen ku lang ilage da la ring espada ra ding sundalus a ibat karing mabagsik a bansa at paten da la ring sablang memalen mu. Magisan la ding sablang memalen mu at ing aliwa pang bage a pagmaragul mu.

¹³ Paten ku la ding kekang baka king tulid ning balang talaga a piinuman. E na miburakan ing danum uling ala nang tumalas a tau o baka.

¹⁴ Paintulut kung magpanatag la at lumino ding kekang danuman at paburen kung magus la ding kekang ilug king mitmung kapayapan. Aku, ing Ginung Dios, ing migsalita.

¹⁵ Potang gawan ku neng alang ulagang bansa ing Ehipto at apate ku na la ding sablang manuknangan karin, kanita ra akilala king aku ing Ginu.

¹⁶ Iting mabayat a babala maging metung yang kantang mete. Ikanta de ring babai da ring bansa ban pagkalungkutan de ing Ehipto at ding sablang memalen na. Aku, ing Ginung Dios, ing migsalita.

¹⁷ Inyang kalabing limang aldo ning mumuna nang bulan ning kalabing aduang banua ning kekaming pangayugse, migsalita ya kanaku ing Ginu.

¹⁸ Ngana, Anak ning tau, magpaldas ka para karing sablang memalen na ning Ehipto. Padulungan mu la king kalalalaman a kayabe ding aliwang mayupayang bansa karin king tuknangan da ring mete.

¹⁹ Sabian mu karela: Isipan yu galang king maygit kayu kalagu kesa king ninuman? Manabu kayu king kalalalaman a tuknangan da ring mete, at magkera karin libutad ding alang dios.

²⁰ Miragsa la ding memalen na ning Ehipto a kayabe da retang mete king labanan. Makayaniu ne ing espadang makamate karela ngan.

²¹ Matula lang salubung karing tau Ehipto ding marangal nang bayani pati na detang mekilaban king panig ning Ehipto king tuknangan da ring mete. Ngarang kukulisak: Dinulung la keti ding alang dios a mete king labanan at oreti pakakera la!

²² Atyu ya karin ing Asiria; akit mu la nukarin mang suluk ding kutkutan da ring sundalus na. Mete la ngan deti king labanan,

²³ at atyu la ding karelang kutkutan karing pekamalalam nang dake ning tuknangan da ring mete. Miragsa la ngan king labanan ding sablang sundalus na at makapadurut la ding karelang kutkutan king pantiun na. Makanyan man, pematakutan de reti king misan a panaun ing tuknangan da ring mabie.

²⁴ Atyu ya karin ing Elam; akit mu la nukarin mang suluk ding kutkutan da ring sundalus na. Mete la ngan deti king labanan at dinulung la ngan e mesirkunsisyun king tuknangan da ring mete. Takut ing silbag da kanitang mabie la, oneng ngeni mete na la at makapase alang dangalan.

²⁵ Makapase ya ing Elam libutad da retang mete king labanan, at makapadurut la ngan keya ding kutkutan da ring sundalus na. E la ngan mesirkunsisyun; mete la ngan king labanan. Takut ing silbag da kanitang mabie la, oneng ngeni mete na la at makapase alang dangalan. Akayabe da la retang mete king labanan.

²⁶ Atyu ya karin i Mesek at i Tubal; akit mu la nukarin mang suluk ding kutkutan da ring karelang sundalus. E la ngan mesirkunsisyun; mete la ngan king labanan. Makanyan man, king misan a panaun takut ing silbag da karing mabie.

²⁷ Inyang kitkut da la, e la midinan king parangal a kalupa da ring karing bayani king minunang panaun a linub king tuknangan da ring metea kayabe da ring karelang sandata; pakabili la ding espada ra king lalam dang buntuk at ding kalasag da king babo ding salu da. Tune lang meging mayupaya deting bayani kanitang milabas a panaun, inya meging pitatakutan la king tuknangan da ring mabie.

²⁸ Makanyan lang mate at mabigu ding tau Ehipto libutad ding e mesirkunsisyun a mete king labanan.

²⁹ Atyu karin ing Edom at ding ari na at pamuntuk. Kanitang misan, mayupaya lang sundalus, oneng pakapase la ngeni king tuknangan da ring mete at kayabe ding e mesirkunsisyun a mete king labanan.

³⁰ Atyu la naman karin ding sablang prinsipi na ning norti at antimu rin ding tau Sidon. Kanitang misan a panaun sinalbag takut ing kayupayan da, oneng ngeni manabu lang alang dangalan king kalalalaman a kayabe da retang mete king labanan a makapase e mesirkunsisyun. Tatakman da naman ing mewalang dangalan da retang pupunta king tuknangan da ring mete.

³¹ King pamanakit da kareting mete king labanan mipasno ya pilubluban ing ari na ning Ehipto at ding sundalus na, nganang magsalita ning Ginung Dios.

³² Aku ing menagkat king ari na ning Ehipto ban pamatakutan la ding mabie, oneng ya ampon ding sablang sundalus na mate la at mipase kayabe da ring e mesirkunsisyun a mete king labanan. Ing Ginung Dios ya ing migsalita.

33

¹ Migsalita ya kanaku ing Ginu.

² Ngana, Anak ning tau, sabian mu karing tau ing mapalyari potang paratang kung gera king metung a bansa. Mamili la ding memalen na ning bansang ita metung karing kabalen da ban maging bante.

³ Potang akit na na lang daratang ding kalaban, tiupan ne ing trumpeta ban makapagsadia ya ing metung at metung.

⁴ Nung damdaman ne ning ninuman, oneng e ne dinan pansin at dinatang ya ing kalaban at pete ne, ya ing miparsalanan king sarili nang kamatayan.

⁵ Ya ing pepasari king sarili nang kamatayan, uling e ne dininan pansin ing babala. Nung pinsinan namu, mekatakas ya sana.

⁶ Nung namang akit neng daratang ning bante ing kalaban at e ne tiniupan ing trumpeta, datang ya ing kalaban at paten na la detang makasalanan, oneng ing bante ya ing parsalanan ku king karelang kamatayan.

⁷ Ngeni, anak ning tau, tutulduan da kang bante para king bansang Israel. Ipayabut mu la karela ding babala a babie ku keka.

⁸ Nung pepabalu ku king ing metung a taung e mayap ing malapit niang mate oneng e me pepabaluan ban makapagbayu yang bie at ban aligtas ing bie na, mate yang makasalanan, oneng ika ing ating pakibatan king pangamate na.

⁹ Nung pepabaluan me, oneng e ya tinuknang darapat pamikasala, mate ya mu ring makasalanan, oneng ika miligtas ka.

¹⁰ Migsalita ya kanaku ing Ginu. Ngana, Anak ning tau, ulitan mung sabian karing Israelita itang karelang sasabian: Kababayatnan kami uli da ring kasalanan mi at ding mali ming depat. Magigisan na ing bie mi. Makananu keng mie?

¹¹ Sabian mu karela king kabang aku, ing Ginung Dios, ing mabie Dios, e ku matulang akit keng mate ing metung a makasalanan. Mas buri ke pang akit tuknang king pamikasala na at mie. Israel, patugut na ka king dapat mung pamikasala. Baket buri mu pa ing mate ka?

¹² Ngeni, anak ning tau, sabian mu karing Israelita king potang ing metung a mayap a tau mikasala ya, e ne malyaring iligtas ning depat nang mayap. Nung tuknang yang darapat e mayap ing taung e mayap, e ya miparusan at nung ing mayap a tau magumpisa yang dapat pamikasala, mate ya.

¹³ Malyari kung apangaku ing bie king metung a taung mayap, nung isipan na king ing milabas nang kayapan sapat na at magumpisa yang dapat pamikasala, kalinguan ku ing nanumang depat nang mayap. Mate ya uli da ring kasalanan na.

¹⁴ Malyari keng dinan babala ing taung e mayap king e lumuat mate ya, nung tuknang ya king dapat nang pamikasala at daptan na itang matulid at mayap.

¹⁵ Nung isubli ne itang singla na ning menandam o kaya ibalik na itang penako na at nung tuknang yang darapat pamikasala at tukian na la ding kautusan a babie bie, e ya mate, nune mie ya.

¹⁶ Patawaran ku ing kasalanan na at mie ya uling depat na itang matulid at mayap.

¹⁷ Oneng sasabian da ring kabalen mu king e ustu ing daraptan ku. Ing pamibiebie ra ya ing e ustu!

¹⁸ Potang ing metung a matulid a tau tuknang yang darapat mayap at magumpisa yang dapat e mayap, mate ya uli na niti.

¹⁹ Potang ing metung a taung e mayap tuknang yang darapat pamikasala at daptan na itang matulid at mayap, aligtas na na ing bie na.

²⁰ Oneng ika, Israel, sasabian mu king e ustu ing daraptan ku. Atulan da ka agpang king daraptan mu.

²¹ King kalimang aldo na ning kapulung bulan ning kalabing aduang banua ning kekaming pangayugse, mekatakas ya ing metung a lalaki king Jerusalem. Dinatang ya at belita na kanaku king mibagsak ne ing siudad.

²² Itang bengi bayu ya dinatang, penamdaman ku ing mayupaya nang panga-atyu ning Ginu. Inyang dinatang ya kabukasan ing lalaki, binalik na kanaku ning Ginu ing upaya na ning pamagsalita.

²³ Migsalita ya kanaku ing Ginu.

²⁴ Ngana, Anak ning tau, ding taung manuknangan karing siudad a melasak ning bansang Israel sasabian da: Bukud yang metung i Abraham, makanyan man mibie ya kang Abraham ing mabilug a bansa. Dakal tamu, inya ing bansa kekatamu ya ngeni.

²⁵ Sabian mu karela king aku, ing Ginung Dios, sasabian ku karela: Mamangan kayung karni a atin pang daya. Sasamba kayung idolo. Makamate kayung kalupa yung tau. Baket aisip yung bandi ye ing bansa?

²⁶ Panaligan yu la ding kekayung espada. Makasumami ing sablang dapat yu. Makipangalugud ya ing metung at metung king e na asawa. Baket aisip yung bandi ye ing bansa?

²⁷ Sabian mu karela king aku, ing Ginung Dios, dirinan ku lang babala king kabang aku ing mabie Dios, mate la ding taung manuknangan karing melasak a siudad. Mapangan la karing malyap a animal detang manuknangan karing baryu. Mate la king sakit detang sasalikut karing bunduk at karing lukib.

²⁸ Gawan keng alang kabaldugan ing bansa at miyangganan ing upayang pagmaragul da. Maging mapanganib la ding bunduk ning Israel at ala metung man a munta karin.

²⁹ Potang parusan ku na la ding tau uli da ring kasalanan da at potang gawan ku neng alang kabaldugan ing bansa, kanita ra akilala king aku ing Ginu.

³⁰ Ngana ning Ginu, Anak ning tau, ika ing pipagsalitan da ring kabalen mu neng mititipun la lele da ring pader ning siudad o karing pasbul dang bale. Ngarang sasabi king metung at metung, Tara at makiramdam tamu nung nanu ing balitang ibat ngeni king Ginu.

³¹ Datangan da ka ring taung kanakung pinili ban makiramdam king kekang sabian, oneng e ra daraptan itang dimdam dang sukat dang daptan. Mayayama la king pamagsalita mu, oneng e la magbayu pamibiebie.

³² Para karela, ika metung ka mung talapagkanta karing kanta ning sinta o metung a biasang manigtigan alpa. Makiramdam la king sablang sasabian mu, oneng metung man king sinabi mu e ra daptan.

³³ Potang ing sablang sinabi mu mapalyari na at tune ping mapalyari, kanita ra abalu king ing metung a propeta atyu libutad da.

34

¹ Migsalita ya kanaku ing Ginu.

² Ngana, Anak ning tau, magsalita kang laban karing pamuntuk na ning Israel. Sabian mu ing ula karela at king aku, ing Ginung Dios, pasabi ku karela king miyatulan na la bilang pastul ning Israel! Lilingapan yu ing sarili yu, oneng e yu la kapilan man lingapan ding tupa.

³ Inuman yu ing gatas, misusulud kayung imalan a megawa king bulbul da ring tupa, at pupulkeruan ye ing masanting diling tupa ban kanan ye. Oneng e yu la kapilan man lingapan ding tupa.

⁴ E yu la lingapan ding maina, e yu la pepakayap ding masakit, e yu la inulu ding mesugat, at e yu la penintun ding melili o ding mebating. Bagkus meging mabagsik kayu karela.

⁵ Misalbag la ding tupa uling ala lang pastul, at ding malyap at mabagsik a animal ila ding mekamate at mengan karela.

⁶ Iti ya ing sangkan nung inya gala-gala la ding kanakung tupa karing matas a bunduk-bundukan at bunduk. Mikalat la king yatu at ala metung mang migmalasakit o menintun karela.

⁷ Ngeni, ikayung pastul, aku ing Ginu, makiramdam kayu king sabian ku kekayu.

⁸ Kabang aku ing Dios a mabie, mayap ing makiramdam kayu kanaku. Lisuban da la ring mabagsik a animal ding kanakung tupa; pete da la at pengan uling ala lang pastul. E da la pigkapilitan penintun ding kanakung pastul ding tupa. Ing sarili da ya ing lilingapan da at aliwa ding tupa.

⁹ Inya ikayung pastul, makiramdam kayu kanaku.

¹⁰ Aku, ing Ginung Dios, papasiag ku king aku ing kekayung kalaban. Ilako ku na la kekayu ding tupa ku at e da na kayu kapilan man paintulutan maging pastul da; e ku na paintulut king ing sarili yu ya mung bukud yung lingapan. Iligtas ku la ding tupa ku at e ku ipaintulut ing kanan yu la.

¹¹ Aku, ing Ginung Dios, sasabian ku kekayu king aku ing lumingap karing tupa ku at ingatan ku la.

¹² Nung makananu na lang panintunan ning pastul ding tupang misalbag at kaybat tipunan na la, makanyan munaman ing daptan ku. Kuanan ku la karing miyayaliwang lugal nung nu la mikalat kanitang aldo ning dalumdum at kasiran.

¹³ Ilako ku la karing bansa da ring dayuan; tipunan ku lang miyabe-abe at ibalik ku la king sarili dang bansa. Tairan ku lang magbalik karing bunduk at karing batis na ning Israel at idala ku la karing pastulan a malabung.

¹⁴ Paintulutan ku lang manyibsiban king sagiwang dikut karing bunduk at kapatagan at karing sablang malabung a pipagpastulan ning bansang Israel.

¹⁵ Aku mismu ing maging pastul da ring kanakung tupa, at panintun ku lang lugal a pipagpaynawan da. Aku, ing Ginung Dios, ing migsalita.

¹⁶ Panintunan ku la detang mebating, ibalik ku la detang melili, uluan ku la ding mesugat, at pakayapan ku la detang ating sakit; oneng paten ku la detang mataba at masikan, uling aku metung kung pastul a darapat ketang matulid.

¹⁷ Inya ngeni, kakung kawan, aku ing Ginung Dios, sasabian ku kekayu king ukuman ke ing balang metung kekayu at ikalilua ke itang mayap king e mayap, ikalilua ku la ding tupa karing kambing.

¹⁸ E kayu matulang mamangan king pekamasanting a dikut; pandamusakan yu pa itang e yu agisan pengan! Inuman yu ing malino danum at buburakan yu itang e yu agisan ininum!

¹⁹ Ding aliwa kung tupa ila ding mamangan ketang dikut a pindamusak yu at ilang miminum king danum a birakan yu.

²⁰ Inya ngeni, aku, ing Ginung Dios, sasabian ku kekayu king aku ing matul kekayung tupang masikan at tupang maina.

²¹ Penulak yu la king lele ding masakit at peniagu yu lang pepalakuan king kawan.

²² Oneng sagipan ku la ding kanakung tupa at e ku paintulut ing malapastangan la pa. Atulan ke ing balang metung karing tupa ku at ikalilua ke ing mayap ketang e mayap.

²³ Dinan ku lang ari a kalupa na ning talasuyu kung i David ban maging bukud dang pastul at e na la paburen.

²⁴ Aku, ing Ginu, ing maging Dios da at metung a ari a kalupa na ning talasuyu kung i David ban maging pamuntuk da. Aku ing migsalita.

²⁵ Gawa kung kasunduan a kayabe ra a munie katibayan king karelang kaligtasan. Ilako ku la king bansa ding sablang mabagsik a animal ban mangabiayan la ding kanakung tupa king mitmung kapayapan karing marangle, at makapagkera la karing kagubatan.

²⁶ Bendisyunan ku la at paintulutan ku lang mibiebie makapaligid king banal kung bunduk-bundukan. Bendisyunan ku la karin king kapamilatan na ning uran potang kailangan da iti.

²⁷ Mamunga la ding tanaman, mika pupul karing marangle at ing balang metung mibiebie yang payapa king sarili nang bansa. Potang patluran ku na la ding tanikalang makagapus karing taung kanakung pinili at ibulus ku la karetang menipus karela, kanita ra akilala king aku ing Ginu.

²⁸ E da na la kapilan man lupigan pa ding bansang paganu at ding malyap at mabagsik a animal at e da na la paten at kanan. Mibiebie lang payapa at ala nang mamatakut pa karela.

²⁹ Dinan ku lang gabun a mataba at angganan ku na ing danup king bansa. E da na la insultuan pa ding aliwang bansa.

³⁰ Akilala na kanita ning metung at metung king aku ing mimingat king Israel at king ila ding kanakung memalen. Aku, ing Ginung Dios, ing migsalita.

³¹ Ikayu, kanakung tupa, ing kawan a kanakung sesesen; ding taung kanakung pinili at aku ing kekayung Dios, ngana ning Ginung Dios.

35

¹ Migsalita ya kanaku ing Ginu.

² Ngana, Anak ning tau, magsalita kang laban king Edom.

³ Sabian mu karing memalen na ing sasabian ku, aku ing Ginung Dios: Aku ing kekong kalaban, O bunduk ning Edom! Gawan da kayung ilang, at bansang alang kabaldugan.

⁴ Lasakan ku lang kekong siudad, at maging ala yang kabaldugan ing kekong bansa. Kanita yu akilala king aku ing Ginu.

⁵ Ikayu ding menatili nang kalaban ning Israel at pepaburen yu lang mete king panaun na ning karelang kaligaligan, king oras ning katataulian a pangaparusan da karing karelang kasalanan.

⁶ Uli na niti, kabang aku ing mabie Ginung Dios, kamatayan ing kararasan yu at e yu malyaring atakasan iti. Mikasala kayu king uli na ning pamakamate tau at tukian na kayu ning pamakamate.

⁷ Gawan keng alang kasilbian a lugal ing bulubundukan na ning Edom at paten ke ing ninumang dumalan karin.

⁸ Takpan ku la ding bunduk karing bangke, at ding katawan da retang mete king labanan ilang takap karing bunduk-bundukan at karing kapatagan.

⁹ Gawan da kang alang kabaldugan king kapilan pa man, at kapilan man ala nang pasibayung manuknangan karing kekang siudad. Kanita mu akilala king aku ing Ginu.

¹⁰ Sinabi mu king ding aduang bansa, ing Juda at ing Israel at ding gabun da, keka la at king bandian mu la, agyang aku, ing Ginu, ing karelang Dios.

¹¹ Uli na niti, kabang aku ing Ginung Dios, ing mabie Dios, singilan da ka uli na ning mua mu, ning pamaninsultu mu, at sama mu karing taung kanakung pinili. Abalu ra king paparusan da ka uli na ning depat mu karela.

¹² Kanita mu akilala king aku, ing Ginu, dimdam ku ing pamagsalita mung ating kalapastanganan king ding bunduk ning Israel ala lang kabaldugan, at king deti keka la ban keka lang pagsamantalanan.

¹³ Dimdam ku ing pamagsalita mung mitmung kayabangan laban kanaku.

¹⁴ Ngana ning Ginung Dios, Gawan da kang tune alang kabaldugan ban tumula ya ing mabilug a yatu king pangabagsak mu

¹⁵ antimo nung makananu kang metula king pangalasak ning Israel, ing sarili kung pibandian. Wa, ding bunduk ning Seir at ing sablang gabun ning Edom maging ala lang kabaldugan. Kanita na akilala ning metung at metung king aku ing Ginu.

36

¹ Ngana ning Ginung Dios, Anak ning tau, magsalita ka karing bunduk ning Israel at sabian mu king makiramdam la

² king mensahi ku para karela: Kukulyo la ding kalaban ning Israel. Ngara, Kekatamu na la ngeni ding matua nang bunduk-bundukan!

³ Uli na niti, sabian mu ing ula at ipabalu mu karela ing sasabian ku. Aku ing Ginung Dios. Gewa deng pikaylian ding misiping-siping a bansa ing Israel kanitang ikua deng abihag at semantalanan ding bunduk na.

⁴ Inya ngeni makiramdam kayu king kanakung sabian, ikayung bunduk at bunduk-bundukan, batis at kapatagan, lugal a mesalanta, at siudad a ala nang taung manuknangan a mesamantala at meinsultu karing sablang bansang makapaligid.

⁵ Aku, ing Ginung Dios, mekapagsalita ku uli na ning maragul kung mua laban karing bansang makapaligid kekayu lalung-lalu na king Edom. Matula reng lepastangan at binihag ing kanakung bansa at sekupan da la ring kanakung pastulan.

⁶ Inya sabian me ing ula king bansang Israel; sabian mu karing bunduk, at bunduk-bundukan, karing batis at kapatagan king aku, ing Ginung Dios, mangalalu ku at mua uli na ning pamaginsultu da at paglalawe mababa karela.

⁷ Aku, ing Ginung Dios, tapatan kung sasabian king mainsultu la ding makapaligid a bansa.

⁸ Oneng pasibayu lang tumubu karing bunduk ning Israel ding bulung karing tanaman at mamunga la para keka, O balen kung Israel. E lumuat muli na ka king tuknangan mu.

⁹ Atyu ku siping mu at siguraduan kung masarul pasibayu ing marangle mu at mitamnanan bini.

¹⁰ Parakalan ku la ding memalen mu. Manuknangan ka karing siudad at italakad mung pasibayu ing sablang melasak.

¹¹ Dagdagan ku la bilang ding tau at ding sese yung animal. Mas dakal kayu kesa king milabas a panaun, at mikayanak kayung dakal. Paburen da kang manuknangan karin antimo ing sadia at gawan da kang alang kalupa king pibandian. Kanita mu akilala king aku ing Ginu.

¹² Iyuli da ka, O balen kung Israel, ban manuknangan kang pasibayu king kanakung bansa. Ya ing maging sarili mung bansa at e na mipaintulut pa ing dumanup la ding kekang anak.

¹³ Aku, ing Ginung Dios, sasabian ku: Wa, tutu king ding tau sasabian da king ing bansa, bansa yang mamangan tau at panakawanan ne ing kayarian karing anak na.

¹⁴ Oneng manibat ngeni e ne maging bansang mamangan tau at manako karing anak mu. Aku, ing Ginung Dios, ing migsalita.

¹⁵ E ne kailangan pang makiramdam ing bansa karing bansang mayli o mibabata karing taung maninsultu. E ne kapilan man manako ing bansa karing anak na ning kayarian. Aku, ing Ginung Dios, ing migsalita.

¹⁶ Migsalita ya kanaku ing Ginu.

¹⁷ Ngana, Anak ning tau, inyang manuknangan la ding Israelita king karelang bansa, dinatan de king kapamilatan na ning karelang pamibiebie at depat. Tinuring kung marinat ing karelang dapat anti ing babaing atyu king panaun ning pamagregla na.

¹⁸ Pepaburen kung panamdaman da ing bigsikan na ning kanakung mua uli na ning pamakamate rang tau king bansa ampon ding idolo a mindinat kaniti.

¹⁹ E ku atanggap ing paralan na ning pamibiebie ra ampon dapat. Inya kinalat ku la karing aliwang bansa.

²⁰ Meinsultu ya ing banal kung lagyu nu la man miras uling sasabian da ring tau, Mepilit lang meko deting tau king bansang binie na karela ning mismung karelang Dios.

²¹ Iti minie kapigaganakan king banal kung lagyu, uling maiinsultu ya ing lagyu ku nu la man miras ding Israelita.

²² Inya ngeni, ipayabut mu karing Israelita iting sasabian ku para karela, aku, ing Ginung Dios: E para king kekayung kapakanan ing kanakung buring daptan, O Israelita, nune para king kapakanan na ning kanakung banal a lagyu a leko yu dangalan king balang bansang kekong pintalan.

²³ Potang ipakit ku na karing bansa ing kabanalan na ning marangal kung lagyu, ing lagyung kekong leko dangalan libutad da, akilala ra kanita king aku ing Ginu. Aku, ing Ginung Dios, ing migsalita. Gamitan da kayu ban ipakit karing bansa king aku banal ku.

²⁴ Kuanan da kayu karing balang lugal at bansa at ibalik da kayu king sarili yung bansa.

²⁵ Pisikan da kayu king danum a malinis at gawan da kayung malinis king dinat da ring kekong idolo at king aliwang bage minie dinat kekayu.

²⁶ Dinan da kayung metung a bayung pusu at metung a bayung pamisip. Ilako ke kekayu ing masias yung pusung batu at dinan da kayung pusung mapamintu.

²⁷ Ibie ke kekayu ing kanakung espiritu at pagsikapan kung tukian yu la ding tuntunan ku at pamintuan yu la ding sablang kautusan a binie ku kekayu.

²⁸ Kanita manuknangan kayu king bansang binie ku karing makatua yu. Ikayu ding maging memalen ku at aku ing maging Dios yu.

²⁹ Iligtas da kayu king sablang bage a makarinat kekayu. Utusan kung magpakarakal ing binutil ban e yu na kapilan man dalanan pa ing danup.

³⁰ Parakalan ku la bunga ding tanaman yu at marangle ban e na mika danup a pasari king pangalako yu dangalan libutad da ring bansa.

³¹ Aganaka yu ing e mayap yung ugali at ding kamalian a kekong depat, at masumami kayu mismu king sarili yu uli da ring kekong kasalanan at kakulangan.

³² Israel, buri kung abalu mu king daraptan ku iti e para king kapakanan mu. Buri kung panamdaman mu ing kamarinayan at ing kalapastanganan a kekang daraptan. Aku, ing Ginung Dios, ing migsalita.

³³ Ngana ning Ginung Dios, Potang alinis da na kayu king sabla yung pamikasala, paintulut ku ing manuknangan kayung pasibayu karing kekayung siudad at paintulut ku ing italakad yung pasibayu itang melasak.

³⁴ Ing metung at metung karing sadiang daralan karing kekayung marangle akit na ing sobra nang pangalabung ning dikut at ing pangapaburen na, oneng paintulutan kung sarulan yung pasibayu.

³⁵ Isalita na ning metung at metung king iting bansa a kanitang misan metung yang gubat, ngeni meging anti ya king Mula ning Eden at nung makananung ding melasak a siudad mesamantala la at mipatag king gabun, ngeni atin lang taung manuknangan at makapaligid lang pader.

³⁶ Kanita ra akilala ding siping-siping a bansa a miligtas king aku, ing Ginu, ing mitalakad karing siudad a melasak at ing menanaman king gabun a mipaburen. Aku, ing Ginu, pengaku ku king tune daptan ku iti at daptan ku naman.

³⁷ Ngana ning Ginung Dios, Pasibayu ku lang paintulutan ding Israelitang maniawad kasaupan kanaku at parakalan ku ing bilang da antimong metung a kawan a tupa.

³⁸ Mangatmu lang tau ding siudad a ngeni makapatag king gabun antimo ing Jerusalem a kanitang misan a panaun mitmu ya karing tupa a miyabie bilang ain-sakripisyu king kapiestan. Akilala ra kanita king aku ing Ginu.

37

¹ Dimdam ku king sarili ku king atyu ku king mayupaya nang arapan ning Ginu, at tinaid na ku ning espiritu na at dela king libutad na ning kapatagan a mitmu karing butul da ring tau.

² Linibut na ku king kapatagan at ikit ku king dakal la ding butul tau at malangi lang malangi.

³ Ngana kanaku, Anak ning tau, malyari la pa kayang mie pasibayu deting butul? fig,,,,,Ikit ku king dakal la ring butul tau.,(37:2)fig* Pekibat ku, Ginung Dios, ika mu ing bukud makibalu kanyan!

⁴ Ngana kanaku, Magsalita ka kareting butul. Sabian mu kareting malanging butul king makiramdam la king amanu na ning Ginu.

⁵ Sabian mu karela king aku, ing Ginung Dios, sasabian ku karela: Dinan da kayung pangisnawa at mie kayung pasibayu.

⁶ Dinan da kayung amad ampon laman at balutanan da kayung balat. Dinan da kayung pangisnawa at biayan da kayung pasibayu. Kanita yu akilala king aku ing Ginu.

⁷ Inya pisiag ku itang inutus na kanaku. Kabang magsalita ku, mekaramdam kung kaluskus at megumpisa lang milapat-lapat ding butul.

⁸ Kabang makalawe ku, ikit ku lang mirinan amad at laman ding butul at mibalutanan la king balat. Oneng e la mangisnawa.

⁹ Ngana ning Dios kanaku, Anak ning tau, magsalita ka king angin. Sabian mu king angin king ing Ginung Dios utusan neng datang ibat karing miyayaliwang lugal ban pangisnawanan da la reting mete katawan at ban biayan na la.

¹⁰ Inya pisiag ku itang inutus na kanaku. Linub karing katawan da ing pangisnawa, at mebie lang pasibayu at tinalakad la; metung lang tune maragul a katipunan da ring sundalus.

¹¹ Ngana kanaku ning Ginu, Anak ning tau, mengari la ding memalen na ning Israel kareting butul. Sasabian da king malangi la, ala lang bitasang kapanayan at paintungulan.

¹² Inya magsalita ka karing memalen kung Israelita at sabian mu king aku, ing Ginung Dios, ibuklat ku la ding karelang kutkutan. Ilual ku la at iyuli king bansang Israel.

¹³ Potang abuklat ku na la ding kutkutan nung nu la mikutkut ding kanakung memalen at alual ku na la, akilala ra kanita king aku ing Ginu.

¹⁴ Ibie ku ing pangisnawa ku karela at pasublian ku lang mie at paburen ku lang manuknangan king sarili dang bansa. Kanita ra akilala king aku ing Ginu. Pengaku kung daptan iti at tune daptan ku. Aku, ing Ginu, ing migsalita.

¹⁵ Pasibayu yang migsalita kanaku ing Ginu.

¹⁶ Ngana, Anak ning tau, kuma kang kabante dutung at isulat mu ing anti kaniti: Ing Kayarian ning Juda. Kaybat, kuma kang aliwang kapirasung dutung at isulat mu ing anti kaniti: Ing Kayarian ning Israel.

¹⁷ Kaybat na nita, pituglungan mu la king danggut da ban mayakit lang metung mung dutung.

¹⁸ Potang ikutang da keka ding kabalen mu nung nanu ing kabaldugan na niti,

¹⁹ ipakibat mu karela king aku, ing Ginung Dios, kuanan ke ing kapirasung dutung a milalarawan king Israel at iyabe ke king kapirasung dutung a milalarawan king Juda. Gawan ku lang metung a dutung deting adua at talnan ke king kanakung gamat.

²⁰ Talnan mu la king gamat mu ding aduang kapirasung dutung at paburen mu lang akit da la ring tau.

²¹ Sabian mu karela king aku, ing Ginung Dios, malapit ku na lang kuanan ding sablang taung kanakung pinili karing bansa nung nu la miyugse at tipunan ku lang makapamisan; iyuli ku la king sarili dang bansa.

²² Pisanmetungan ku la ban maging metung la mung bansa king karelang tuknangan, karing bunduk ning Israel. Mika metung la mung ari a manimuna karela at e na la kapilan man mikawani pa anting aduang bansa o aduang kayarian.

²³ E da na dinatan ing sarili da karing makasumaming idolo o magpakasira king pamikasala. Gawan ku lang malaya karing sablang bage ning pamikasala ra at pamagtaksil kanaku. Gawan ku lang puru; ila ding maging memalen ku at aku ing maging Dios da.

²⁴ Ing metung a aring kalupa na ning talasuyu kung i David ya ing maging ari da. Misanmetung la lalam nang pamanibala ning metung a pamuntuk, at tuparan da la ring kautusan ku king mitmung katapatan.

²⁵ Manuknangan la king bansang binie ku king talasuyu kung i Jacob, ing gabun nung nu la menuknangan ding makatua da. Manuknangan la karin king kapilan pa man at antimu rin ding anak da at ding sablang lahi ra. Ing metung a ari a kalupa na ning talasuyu kung i David ya ing manimuna karela king kapilan pa man.

²⁶ Gawa kung kasunduan a kayabe ra a patutu king mag-ari karela ing kapayapan king kapilan man. Patatagan ku la at parakalan ku ing bilang da; papanatilian keng makatalakad king kapilan pa man king bansa da ing kanakung Templo.

²⁷ Manuknangan ku libutad da; aku ing maging Dios da at ila ding maging memalen ku.

²⁸ Potang italakad ku ne ing Templo ku karin ban manuknangan ku libutad da king kapilan pa man, kanita ra akilala ding bansa king aku, ing Ginu, pinili ke ing Israel ban maging balen ku.

38

¹ Migsalita ya kanaku ing Ginu.

² Ngana, Anak ning tau, sabianan me i Gog, ing pekapun da ring bansa ning Mesek at Tubal king bansang Magog. Magsalita kang laban kang Gog

³ at sabian mu king aku, ing Ginung Dios, ing kalaban na.

⁴ Ibalik ke king ibatan na; dinan keng taga ing panga na at ikaladkad ke at ding sundalus na. Dakal la ding sundalus na; dakal la ding kabayu na at pakasake makaunipormi; tatalan lang kalasag at espada ding sundalus.

⁵ Kayabe na la ding sundalus a ibat Persia, Etiopia, at Libya, at pakakalasag la ngan ampon pakahelmet.

⁶ Kayabe na la naman ding sablang sundalus da ring bansang Gomer at Bet Togarma ning dane norti; antimu rin ding sundalus a ibat karing miyayaliwang bansa.

⁷ Sabian mu king magsadia ya ampon ding sundalus na king nanumang iyutus na.

⁸ Kalabas ding dakal a banua utusan keng lumusub king bansa nung nu ding tau mekapagbalik lang miyabe-abe ibat karing dakal a bansa, at mibiebie lang alang takut king gera. Lusuban na la ding bunduk ning Israel a mipaburen at milako tau kilub ning makabang panaun, oneng ngeni panuknanganan de ring tau king mitmung kapayapan.

⁹ Ya ampon ding sundalus na at ding dakal a bansang kayabe na lusuban de anting bagyu at takpan ing bansa anti ing biga.

¹⁰ Iti ya ing sasabian na ning Ginung Dios kang Gog: Potang datang na ing oras a ita, magumpisa kang misip a e mayap a tangka.

¹¹ Lutasan mu king sarili mu ing lusuban me ing bansang alang ilaban nung nukarin la manuknangan ding tau king kapayapan at kapanatagan karing balen a alang pader at dipensa.

¹² Samsaman mu la at panakawanan a pibandian ding taung manuknangan karing siudad a kanitang misan a panaun siudad lang melasak. Mitipun la ibat karing miyayaliwang bansa at ngeni atin lang sese animal ampon pibandian at manuknangan la king libutad na ning yatu.

¹³ Ikutang da keka ding memalen na ning Seba at Dedan ampon ding mangalakal a ibat Tarsis, Tinipun mu la wari ding kekang sundalus at linusub keti ban manako at maniamsam pibandian? Buri mu waring manikuang gintu at pilak, baka at pibandian, at kaybat mako a dadala mu ing asamsam mo?

¹⁴ Inya tinubud na ku ning Ginung Dios ban sabian kang Gog itang pasabi na: Ngeni kabang manuknangan ya king kapanatagan ing balen kung Israel,

¹⁵ magsadia kang datang ibat king kekang lugal king marayung norti, panimunan mu la ding dakal at mayupayang grupu da ring sundalus a ibat karing dakal a bansa; pakasake la ngang kabayu.

¹⁶ Lusuban me ing balen kung Israel anti ing bigang tatakap king kabilugan a bansa. Potang datang na ing oras a ita, itubud da ka ban lusuban me ing kanakung bansa, ban ipakit ku karing bansa nung ninu aku, ban ipakit ku ing kanakung kabanalan king daptan ku king kapamilatan mu.

¹⁷ Ika ing sasabian ku kanita pang milabas a panaun, inyang pepabalu ku king kapamilatan da ring kanakung talasuyu, ding propeta ning Israel, king karing aldo datang mitubud kung metung a lumusub king Israel. Ing Ginung Dios ya ing migsalita.

¹⁸ Ngana ning Ginung Dios, Mikamas ku king aldo lusuban neng Gog ing Israel.

¹⁹ King pali ning mua ku sasabian kung matimid king karas ning aldo a ita mika masikan a ayun king bansang Israel.

²⁰ Ing balang asan at ayup, ing balang maragul at malating animal, at ing balang taung atyu keti babo ning yatu galgal ya uli na ning takut na kanaku. Mibagsak la ding bunduk, matibag la ding mataluktuk a bunduk-bundukan, at malasak ya ing balang pader.

²¹ Pamatakutan ke i Gog king sablang miyayaliwang sakuna. Aku ing Ginung Dios, ing migsalita. Mitabakan la ding sundalus nang paka-espada.

²² Parusan ke king salut ampon king pamipatayan. Dugpa kang Gog at karing sundalus na at karing dakal a bansang kakampi na ing masikan a uran at uran-lipat at api ampon asupre.

²³ King anti kaniting paralan ku ipakit karing sablang bansa king aku ing mayupayang dili at king aku banal ku. Kanita ra akilala king aku ing Ginu.

39

¹ Ngana kanaku ning Ginung Dios, Anak ning tau, magsalita kang laban kang Gog, ing matas a pekapun da ring bansang Mesek at Tubal. Sabian mu kang Gog king aku ing kalaban na.

² Ibalik ke king lakad na at tairan keng lumual king marayung norti angga king miras ya karing bunduk ning Israel.

³ Kaybat na nita, siran ke ing pana a atyu king kayli nang gamat at ibalag ding paslu a atyu king gamat nang wanan.

⁴ I Gog at ding sundalus na ampon ding kakampi na mate la king kabundukan ning Israel, at paburen kung ding bangke ra maging pamangan da la ring sablang ayup at malyap a animal.

⁵ Miragsa lang mate king marangle. Aku, ing Ginung Dios ing migsalita.

⁶ Gawa kung maragul a silab king bansang Magog at karing sablang balen king lele ning dagat nung nu la manuknangan payapa ding tau, at kanita na akilala ning metung at metung king aku ing Ginu.

⁷ Pakasiguraduan ku king ing kanakung balen Israel akilala ne ing banal kung lagyu, at e ku na paintulut ing malapastangan ya ing lagyu ku. Kanita ra akilala ding bansa king aku, ing Ginu, ing banal nang Dios ning Israel.

⁸ Ngana pa ning Ginung Dios, Ing aldo a binggitan ku siguradu yang datang.

⁹ Mamaglual la ding taung manuknangan karing siudad na ning Israel at pulutan da la ring malakuan a sandata ban gawan da lang panangab. Gawan da lang panangab ding kalasag, ding pana, ding paslu, ding tandus ampon ding palupalu at e la kakulangan panangab kilub da ring pitung banua.

¹⁰ E na kailangan pa ing manintun lang dutung king marangle o mangutud king kagubatan, uling atyu la karela ding melakuan a sandata ban gawan panangab. Kuanan da la pibandian detang karela mengua, at samsamanan da la detang meniamsam karela. Ing Ginung Dios ya ing migsalita.

¹¹ Ngana ning Ginu, Potang mapalyari na iting sabla, dinan keng pikutkutan i Gog karin king Israel, king Kapatagan da ring Maglakbe, dane nang aslagan ning Dagat a Mete. I Gog at ding sablang sundalus na karin la mikutkut at ing kapatagan mayaus yang Ing Kapatagan da ring Sundalus nang Gog.

¹² Mangailangan lang pitung bulan ding memalen na ning Israel ban akutkut da la ring mete, at ban pasibayu yang luminis ing bansa.

¹³ Sumaup ya ing metung at metung king bansa ban mikutkut la at uli na niti miparangalan la deti king aldo ning pamagtagumpe ku. Aku, ing Ginung Dios, ing migsalita.

¹⁴ Kaybat dang milabas ding pitung bulan, mamili lang lalaking lumibut king mabilug a bansa ban manintun pang mitagan a mete, at ikutkut da la. Daptan da iti ban luminis ya ing bansa.

¹⁵ Kabang dudulung la at sasaka king bansa, dinan deng tanda lele na ing balang butul ning tau ban panakit da kaniti ding mangutkut ikutkut da la king Kapatagan da ring Sundalus nang Gog.

¹⁶ (Mika balen a makasiping karin a mipamalagyuan king lagyu da ring sundalus nang Gog.) Makanyan yang maging malinis pasibayu ing bansa.

¹⁷ Ngana kanaku ning Ginung Dios, Anak ning tau, ausan mu la ngan ding sablang miyayaliwang ayup at animal ban mitipun makapadurut king dakal a pamangan at inuman a sidia ku karing bunduk ning Israel. Sabian mu ing mangan la king laman at minum daya.

¹⁸ Kanan da ing laman da ring mayupayang lalaki at inuman ing daya ding pamuntuk da ring yatu a mangapulkerung anti ding lalaking tupa, ding biserung tupa, ding kambing, at ding matabang toro.

¹⁹ Magpakabsi la king taba at maglasing king daya kaniting dakal a pamangan at inuman a sidia ku para karela.

²⁰ Magpakasawa la king kanakung lamesang ating kabayu at ding makasake karela at karing sablang miyayaliwang sundalus. Aku, ing Ginung Dios, ing migsalita.

²¹ Ngana ning Ginu, Ipakit ku karing sablang bansa ing kanakung ligaya at ipakit ku naman karela nung makananu kung gamitan ing kanakung upaya ban ipatupad ing inari ku king lub ku.

²² Kanita ra akilala ding tau Israel king aku ing Ginung karelang Dios.

²³ Akilala da naman kanita ding bansa king mebihag la ding Israelita uli na ning depat dang e ustu; uli na ning sinalangsang la kanaku, pepaburen ku ing mesambut la at pete ding karelang kalaban king gera.

²⁴ Pepaburen ku la uli na ning dapat dang e ustu at kasalanan.

²⁵ Ngana pa ning Ginung Dios, Oneng ngeni, malunus ku karing lahi nang Jacob, ding memalen na ning Israel, at gawan ku lang pasibayung mabandi. E ku na paintulut ing malapastangan ya ing lagyu ku.

²⁶ Kalinguan da na kanita ing meging kamarinayan da at kataksilan kanaku potang magbalik la at mibiebie alang ligalig king sarili dang bansa.

²⁷ Potang atipun ku na lang ibat karing miyayaliwang bansa, akit da ring karelang kalaban king aku banal ku.

²⁸ Akilala ra kanita ding Israelita king aku ing Ginung karelang Dios, ing pepasari king karelang pangabihag at pangayugse karing miyayaliwang bansa, oneng ngeni titipunan ku la ban ibalik king sarili dang bansa at alang malakuan metung man karela.

²⁹ Ibie ke ing kanakung espiritu karing memalen na ning Israel at e ku na la gulutan pa. Aku, ing Ginung Dios, ing migsalita.

40

¹ Kapulu nang aldo kanita ning bayung banua ning kaduang pulu't limang banua ning pangayugse mi at kalabing apat a banua na ne man ning pangabagsak ning Jerusalem. King aldong ita penamdaman ku ing mayupaya nang panga-atyu ning Ginu at kaybat leko na ku karin.

² King kapamilatan da ring vision dela na ku ning Dios king bansa ning Israel at binili ketang matas a bunduk. Ikit ku la king arapan ku ding dakal a gusali a balamu metung a siudad.

³ Linapit na ku at ikit ke ing metung a lalaking maslag anting tangsu. Makatalakad ya king pasbul dalan; atin yang tatalnan a taling linen a panyukad.

⁴ Ngana kanaku, Anak ning tau, talasan mu la deng mata mu at balugbug at pakaintindian mu ing sablang ipakit ku keka, uling iti ing sangkan nung inya midala ka keti. Kailangan ing sabian mu karing memalen na ning Israel ing sablang akit mu.

⁵ Ikit ke ing Templo a makabakud pader. Kinua ne niting tau ing panyukad nang apulung talampakan king kaba at sikdan ne ing pader. Apulu yang talampakan king katas ing pader at apulu ya namang talampakan king kapal.

⁶ Kaybat, minta ya king pasbul dalan dane aslagan. Menik ya king eran at karas na babo sikdan ne ing pasbul. Apulu yang talampakan king katas.

⁷ Ating pidadalanan king katalindikingan na niti a ating kuartu para karing guardia king balang suluk. Kuadradu la ding kuartu; tia pulung talampakan la sukad king mingatba at walu lang talampakan king kapal ding pader king pilatan da. King katalindikingan da reting kuartu ating malating dalan a apulung talampakan king kaba a papunta king maragul a sala arap ning Templo.

⁸ Sikdan ne ing sala; labi yang apat a talampakan king lualas.

⁹ Iti ya ing pekadanggut na ning pasbul dalan malapit king Templo. Apat yang talampakan king kapal ing danggut na ning pader. (

¹⁰ Paraparehu la sukad deting kuartung-guardia king misusumangid na ning malating dalan, at paraparehu la naman king kapal ding pader king pilatan da.)

¹¹ Kaybat na nita, sikdan ne niting tau ing lualas na ning pidadalanan papunta king pasbul dalan. Heganagana, adua yang pulu't aduang talampakan at labing anam yang talampakan ing pilatan ning pasbul dalan.

¹² King arap na ning balang metung karing kuartu ating metung a mababang pader a aduang pulung pulgada king katas at aduang pulung pulgada king kapal. (Tia pulung talampakan la sukad deting kuartu at kuadradu la.)

¹³ Kaybat na nita, sikdan ne manibat king danggut ning mumunang kuartu angga king tauling kuartu. Apat yang pulu't aduang talampakan ing pilatan da.

¹⁴ Sikdan nia naman ing tauling kuartung malapit king patyu. Atlu yang pulu't apat a talampakan king lualas.

¹⁵ Walu yang pulu't apat a talampakan ing kabilugan nang kaba ning pidadalanan papunta king pasbul dalan angga king tauling kuartu.

¹⁶ Atin lang awang deting kuartu kilub at lual da ring pader pilatan da ring kuartu. Atin lang tanaman a palmang makadukit king pader king kilub.

¹⁷ Kaybat na nita, tiki na ku niting tau king patyu. Ating atlung pulung kuartu a megawang makapakat king lual ning pader. Arap da reting kuartu ating lugal a kelatanan dang batu

¹⁸ a mamabut king makapadurut ning patyu. Mababa ya iti kesa ketang patyu king kilub.

¹⁹ Ating pidadalanan a matas papunta king kilub ning patyu. Sikdan ne niting tau ing pilatan da reting aduang pidadalanan. Dinalan anam apulu't walu yang talampakan.

²⁰ Kaybat na nita, sikdan ne niting tau ing kaba at lualas ning pasbul dalan king dane norti a papunta king lual ning patyu.

²¹ Kalupa da retang king pasbul dalan dane aslagan, paraparehu la naman sukad ding kuartu da ring guardia, ding pader a mamilatan kareti at itang pidadalanan. Walu yang pulu't apat a talampakan king kaba ing malating pidadalanan, at apat yang pulu't aduang talampakan king lualas.

²² Itang kuartung palub, ding awang, at ding makadukit a palmerang tanaman kalupa da la retang king pasbul dalan dane aslagan. Atin yang pitung balitang papunta king pasbul dalan at atyu king danggut arap ning patyu ing kuartung palub.

²³ King sumangid na niting patyu king dane norti, ating aliwang pasbul dalan papunta king patyung atyu kilub; kalupa ne nitang king dane aslagan. Sikdan ne niting lalaki ing pilatan da reting aduang pasbul dalan. Dinalan anam apulu't walu yang talampakan.

²⁴ Kaybat na nita, tiki na ku niting lalaki king dane mauli at menakit kaming aliwang pasbul dalan. Sikdan ne ing pader king kilub at ing kuartung palub. Kalupa da la naman sukad detang mesukad na.

²⁵ Ating awang karing kuartu da reting pidadalanan nung makananu lang atin ding aliwa. Walu yang pulu't apat a talampakan king kaba at apat yang pulu't aduang talampakan king lualas.

²⁶ Atin yang pitung balitang papunta karin at ing kuartung palub atyu munaman king danggut arap ning patyu. Ating makadukit a palmang tanaman karing pader na kilub a makayarap king pidadalanan.

²⁷ Atin munamang pasbul dalan a pidadalanan papunta king kilub ning patyu. Sikdan ne niting lalaki ing pilatan king kaduang pasbul dalan. Dinalan anam apulu't walu yang talampakan.

²⁸ Kaybat na nita, tiki na ku niting lalaki king pasbul dalan dane mauli papunta king kakilubkiluban na ning patyu. Sikdan ne ing pasbul dalan, at ikit na king kalupa de sukad ding pasbul dalan lual ning pader.

²⁹ Ding kuartu da ring guardia, ing kuartung palub, at ding pader kilub kalupa da la sukad detang atyu karing aliwang pasbul dalan. Atin la namang awang ding kuartu ning pasbul dalan. Walu yang pulu't apat a talampakan king kaba at apat yang pulu't aduang talampakan king lualas.

³⁰

³¹ Makayarap ya ing kuartu nang palub king patyung atyu lual at atin lang makadukit a palmang tanaman ding pader lele ning pidadalanan. Walu lang balitang ding papunta keting pasbul dalan.

³² Kaybat na nita, tiki na ku niting lalaki king pasbul dalan dane aslagan papunta king patyung atyu king kilub. Sikdan ne ing pasbul dalan, at ikit na king kalupa de sukad ding aliwa.

³³ Ding kuartu da ring guardia, ing kuartung palub, at ding pader kilub kalupa da la sukad detang mesukad nang pasbul dalan. Ating awang king makapadurut at antimu rin ing kuartung palub. Walu yang pulu't apat a talampakan king kaba at apat apulu't adua yang talampakan king lualas.

³⁴ Makayarap ya ing kuartung palub king patyung atyu king lual. Atin lang makadukit a palmang tanaman ding pader na lele ning pidadalanan. Walu lang balitang ding papunta ketang pasbul.

³⁵ Kaybat na nita, tiki na ku niting lalaki king pasbul dalan dane norti. Sikdan ne iti at ikit na king kalupa de sukad detang mesukad na.

³⁶ Atin la namang kuartu para karing guardia; mipalamutian la naman ding pader na king kilub, ating kuartung palub, at awang a makapadurut. Walu yang pulu't apat a talampakan king kaba at apat yang pulu't aduang talampakan king lualas.

³⁷ Makayarap ya ing kuartung palub king patyung atyu king lual. Atin munamang makadukit a palmang tanaman lele ning pidadalanan. Walu lang balitang ding papunta keting pasbul dalan.

³⁸ Ating kuartung makatuglung king patyung atyu king lual; makataid ya iting suglung king pidadalanan kilub dane norti. Tataglus ya king kuartung palub arap ning patyu nung nu da la lilinisan ding bangke da ring animal a miyain bilang ain-a-durulukan.

³⁹ Keting kuartung palub ating aduang lamesa king misusumangid. Karin da la papaten ding animal a miyain ban dulukan, ding ain-a-kapamayaran-king-kasalanan o ding ain-a-kapaglarinan-king-kasalanan.

⁴⁰ King lual ning kuartu atin munamang apat a lamesa; tiduang lamesa king mingatba ning pidadalanan papunta king pasbul dalan dane norti.

⁴¹ Walu la heganagana ding lamesang magagamit para paten la ding animal a miyain; apat la ding king kilub at apat la ding king lual ning patyu.

⁴² Apat la ing lamesa a megawa king tinabas a batu at magagamit la deti para isadia la ding ain-a-durulukan. Adua lang pulung pulgada king katas at atlu yang pulung pulgada ing kuadradu rang babo. Sisikap da la kareting lamesa ding kasangkapan a magagamit king pamakamate karing animal a miyayayain.

⁴³ Atin lang pasamanung sukad atlung pulgada king paligid da. Kareting lamesa da bibili ing sablang karning miyain.

⁴⁴ Kaybat na nita, tiki na ku niting lalaki king patyung atyu king kilub. Karin ating aduang kuartu: makayarap ya ing metung kareti king dane mauli lele ning pasbul dalan dane norti, at makayarap ya ing metung dane norti lele ning pasbul dalan dane mauli.

⁴⁵ Ngana kanaku niting lalaki, Ing kuartung makayarap king dane mauli para kareta yang pari a manibala king Templo,

⁴⁶ at ita namang kuartung makayarap king dane norti para kareta yang pari a manibala king altar. Lahi na lang Zadok ding sablang pari. Ila mung bukud karing lahi nang Levi a mipaintulutan makalapit king arapan na ning Ginu ban sumuyu.

⁴⁷ Sikdan ne niting lalaki ing patyu king kilub; dinalan anam apulu't walung talampakan ya; kuadradu ya. Atyu king dane albugan ing Templo at ating altar arap na.

⁴⁸ Kaybat na nita, tiki na ku niting lalaki king kuartung palub king Templo. Sikdan ne ing pidadalanan; siam yang talampakan king katas at adua yang pulu't apat a talampakan king lualas, at lima lang talampakan kapal ding mingatba nang pader.

⁴⁹ Atlu yang pulu't apat a talampakan king lualas at aduang pulung talampakan ya katas ing balitang papunta king kuartung palub. Atin munamang aduang asias a maragul a makatalakad mingatba ning pidadalanan.

41

¹ Kaybat na nita, tiki na ku niting lalaki king Banal a Lugal ning Templo. Sikdan ne ing pidadalanan; apulu yang talampakan king katas at

² labi yang walung talampakan king lualas, at walu lang talampakan king kapal ding mingatba nang pader. Sikdan nia naman ing kuartu; anam yang pulu't walung talampakan king kaba at atlu yang pulu't apat a talampakan king lualas.

³ Kaybat na nita, minta ya king kakilubkiluban a kuartu. Sikdan ne ing pidadalanan na niti; atlu yang talampakan king katas at apulu yang talampakan king lualas at labing adua yang talampakan king kapal ding mingatba nang pader.

⁴ Sikdan ne ing kuartu; atlu yang pulu't apat a talampakan; kuadradu ya. Atyu iting kuartu sumangid ning kuartung atyu king libutad. Kanita ngana kanaku, Iti ya ing Kabanal-banalan a Lugal.

⁵ Kaybat na nita, sikdan ne niting lalaki ing kapal ning pader ning Templo; apulu yang talampakan king kapal. King makapadurut nang pader ning Templo ating misiping-siping a mangalating kuartung tia pitung talampakan king lualas.

⁶ Atyu la deting kuartu karing atlung palapag a ating atlung pulung kuartu king balang palapag. Mas maimpis la ding makalual nang pader ning Templo king balang palapag kesa king palapag a atyu lalam, inya malyari lang magsandal ding balang kuartu king pader a alang sapnu.

⁷ Inya neng lawan me king lual ing Templo, balamu mo paraparehu ya kapal manibat king lalam angga king babo. Lual da reting kuartu ating aduang malualas a eran a makapakat king lual ning pader. Iti ya ing pidadalanan papunta kareting atlung palapag. Mas maragul la ding kuartung atyu king pekamatas a palapag, at antimu rin ing katuki na kesa ketang atyu king mumunang palapag.

⁸ Kaybat na nita, ikit kia munaman king Templo ing makatas at makapadurut a beranda. Walu yang talampakan king makapadurut at apulu yang talampakan king katas manibat king gabun, at kapante de ring pundasyun da ring kuartu a makapaligid.

⁹ Walu yang talampakan king kapal ing pader da ring kuartu.

¹⁰ Pilatan na ning beranda at ding gusaling gagamitan da ring pari ating bakanting lugal a sukad atlung pulu't apat a talampakan king paligid ning Templo.

¹¹ Ating pasbul king dane norti at king dane mauli. Parati la deting makabuklat, at walu yang talampakan ing lualas ning beranda a makapadurut king Templo.

¹² Ating gusali a makayarap king patyu king dane albugan ning Templo. Dinalan limang pulu yang talampakan king kaba, at dinalan labing anam yang talampakan king lualas. Siam lang talampakan king kapal ding pader nang makapadurut.

¹³ Kaybat na nita, sikdan ne niting lalaki ing lual ning Templo, at ikit na king dinalan anam apulu't walung talampakan ya king kaba. At dinalan anam apulu't walung talampakan ya munaman manibat king gulut ning Templo angga king gusali a atyu king dane albugan.

¹⁴ Dinalan anam apulu't walung talampakan ya munaman ing pilatan manibat king arap ning Templo at ning patyu.

¹⁵ Sikdan nia naman ing kaba ning gusali king bandang albugan pati ding kuartu king mingatba, at ikit na king dinalan anam apulu't walu ya namang talampakan. Ing kuartung palub ning Templo, ing Banal a Lugal, at ing Kabanal-banalan a Lugal

¹⁶ makatapal la ngan king tabla manibat king suelu angga karing awang.

¹⁷ Makatapal la ding pader kilub ning Templo karing medukit a palmang tanaman at karing kerubin a kasing katas da ring pasbul.

¹⁸ Salit-salit la ding dinukit a palma at kerubin. Atin yang aduang lupa ing balang metung karing kerubin:

¹⁹ ing metung lupa ne ning tau, at ing metung lupa ne ning leon. Migugulutan la deti at parehu lang makabalikid king tanaman a palma. Iti ya ing larawan a makadukit karing sablang pader ning Templo.

²⁰ Manibat king suelu angga king babo da ring pasbul makadukit la ding kerubin at ding tanaman a palma.

²¹ Kuadradu la ding amba da ring pasbul ning Banal a Lugal. King arap ning Kabanal-banalan a Lugal ating balamu

²² altar a megawa king dutung. Lima yang talampakan king katas, at apat yang talampakan king lualas. Dutung la ngan ding bitis na niti, at antimu rin ing talpakan na at ding dingding na. Ngana niting lalaki kanaku, Iti ya ing lamesang atyu arapan na ning Ginu.

²³ Ating pasbul king danggut na ning pidadalanan papunta king Banal a Lugal, at atin munaman king danggut na ning pidadalanan papunta king Kabanal-banalan a Lugal.

²⁴ Tidua la ding pasbul at balamu pamepe la neng bubuklatan la king libutad a ating tiduang bisagra.

²⁵ Atin lang makadukit a palmang tanaman at kerubin ding pasbul na ning Banal a Lugal at antimu rin karing dingding na. Atin munamang dutung a panakap lual na ning pasbul ning kuartung palub.

²⁶ Atin lang awang ding misusumangid nang dake niting kuartu, at mipalamutian lang tanaman a palma ding dingding na.

42

¹ Kaybat na nita, tiki na ku niting lalaki king patyu king kilual at linub na ku ketang gusaling atyu dane norti na ning Templo. E ya marayu iti ketang gusaling atyu king danggut ning dane albugan ning Templo.

² Iting gusali dinalan anam apulu't walung talampakan ya king kaba, at walung pulu't apat yang talampakan king lualas.

³ Makayarap ya itang metung nang kasumangid ketang beranda a ating atlung pulu't apat a talampakan king lualas a atyu king lele ning Templo. Makayarap ne man itang kasumangid na ketang lugal a maka sementu ning patyung atyu king kilual. Atin yang atlung palapag; mas mayatras ya ing palapag a atyu babo kesa ketang atyu lalam na.

⁴ Ketang dane norti ning gusali ating pidadalanan a sukad labing anam a talampakan king lualas, at dinalan anam apulu't walung talampakan king kaba at karin ya luluban.

⁵ Malati la ding kuartu ning katlung palapag kesa karetang king mumuna at kaduang palapag uli na ning makayatras la.

⁶ Ala lang asias ding kuartung atyu karetang atlung palapag, anti detang kuartu karing aliwang gusaling makatalakad king patyu king lual.

⁷ Walu yang pulu't apat a talampakan king lualas itang pader king lalam, kapitna ne ning kabilugan nang kaba. Atin yang kuartu itang kapitnang mitagan a walung pulu't apat a talampakan. Atin ya namang kuartu itang palapag king babo king kekaban na ning gusali.

⁸

⁹ Lalam da reting kuartu ning bandang aslagan ning gusali nung nu ya magumpisa ing pader ning patyu, ating pidadalanan papunta king patyung atyu lual.

¹⁰ King dane mauli ning Templo atin pang aliwang gusali a e masyadung marayu ketang gusaling atyu king dane albugan ning Templo.

¹¹ King arap da ring kuartu ating pidadalanan a kalupa na nitang king dane norti. Kalupa ne sukad, disenyu, at kalupa na la naman ding piluluban na.

¹² Ating pasbul lalam da ring kuartung atyu king dane mauli ning gusali, ketang danggut king aslagan nung nu ya magumpisa ing pader.

¹³ Ngana kanaku niting lalaki, Parehu lang sagradu deting gusali. Keti da la kakanan ding pari a lulub king arap ning Ginu ding sagradung dake ra king ain. Keti da la naman darala ding pari ding sagradung ain antimo ding ain-a-kapamayaran-king-kasalanan o ain-a-kapaglarinan-king-kasalanan.

¹⁴ Potang linub la king lugal a iti e la malyaring lumual king patyu a e menaliling imalan. Lakuan da kareting kuartu ing sinulud dang imalan king pamaniuyu king Ginu. Aliwa ya ing isulud dang imalan neng makiabe la kareng tau.

¹⁵ Inyang ayari na neng sikdan niting lalaki ing kilub ning Templo, tiki na kung linual king pasbul dalan dane aslagan, at sikdan ne ing lual ning Templo.

¹⁶ Sikdan ne king panyukad na ing dane aslagan, at ikit na king walu yang dalan apat apulung talampakan.

¹⁷ Kaybat sikdan ne ing dane norti, ing dane mauli, at ing dane albugan, at ikit na king paraparehu la sukad: tia walung dalan apat apulung talampakan la.

¹⁸

¹⁹

²⁰ Inya sikdan ne ing makapadurut a makabakud pader; walu yang dalan apat apulung talampakan king misusumangid. Ing pader ya ing mikakalilua king banal at king e banal.

43

¹ Kaybat na nita, tiki na ku niting lalaki ketang pasbul dalan a makayarap king aslagan.

² Karin ke ikit daratang ibat king aslagan ing makasilo nang aslag ning Dios ning Israel. Mengari ya ing siwala na king dabungbung ning alun ning dagat. Maslag yang maslag ing yatu uli na ning makasilo nang aslag.

³ Kalupa ne niting vision itang vision a ikit ku inyang dinatang ya ban lasakan ne ning Dios ing siudad ning Jerusalem. Kalupa nia naman itang vision a ikit ku karin king Ilug ning Kebar. Migsakab ku king gabun.

⁴ Linub king Templo iting makasilo nang aslag ning Ginu king kapamilatan na ning pasbul dalan a atyu king dane aslagan.

⁵ Kaybat na nita, telakad na ku ning espiritu na ning Ginu at linub na ku ketang patyu king kilub. Kinatmu ya ing Templo king makasilo nang aslag ning Ginu.

⁶ Makatalakad ya kanita siping ku ing lalaki inyang atin kung dimdam a siwalang makipagsalita kanakung manibatan king Templo.

⁷ Ngana kanaku, Anak ning tau, iti ya ing kanakung tronu at iti ya ing talpakan kung bitis. Iti ya ing maging tuknangan ku libutad da ring Israelita. E da ne lapastanganan pa maging ila o ding karelang ari ing banal kung lagyu king kapamilatan na ning pamanyamba rang idolo o ding bangke da ring karelang mete ari.

⁸ Deting mesabing ari ila ding mitalakad amba at asias pasbul lele na ning kanakung Templo at metung yang pader ing pilatan. Lepastangan de ing banal kung lagyu king kapamilatan na ning makasumaming bage depat da. Inya naman gisan ku lang pete uli na ning mua ku.

⁹ Inya ngeni sukat na lang tuknang sasamba karing idolo at ilako ding bangke da ring karelang ari. At aku naman manuknangan kung kayabe ra king kapilan pa man.

¹⁰ Ngana pa ning Ginu kanaku, At ika naman, O anak ning tau, ilarawan mu ne man iting Templo karing memalen na ning Israel. Paburen mung pagaralan de ing planu na. Paburen mung mipakarine la king depat dang pamikasala.

¹¹ Nung mangapakarine la, ilarawan meng masalese ing Templo: ing anyu na, ing kaayusan, ding piluluban at pilulualan na, at ing heganaganang bage para king Templo. Ipabalu mu la karela ding sablang patakaran na at kautusan at isulat mu la king akakit da ban atuntunan da la at agampanan.

¹² Iti ya ing kautusan tungkul king Templo: ing sablang lugal a sakup na king taluktuk ning bunduk sukat tunggen banal. Wa, iti ya ing kautusan tungkul king Templo.

¹³ Ila deti ring sukad ning Templo agpang ketang panyukad a megamit king pangasukad ning Templo: atin yang paligi king makapadurut king talpakan ning altar. Adua yang pulung pulgada king kalalam at aduang pulung pulgada ya naman king lualas at atin yang pasamanu a sukad apulung pulgada king katas.

¹⁴ Apat yang talampakan king katas ing altar manibat lalam angga babo ing mababa nang diling dake. Makayatras yang aduang pulung pulgada makapadurut manibat king danggut ing tutuki nang dake, at pitu yang talampakan king katas. Makayatras ya namang aduang pulung pulgada makapadurut manibat king danggut ing katuki nang dake.

¹⁵ Iting dake na babo nung nu da la durulukan ding ain-sakripisyu pitu yang talampakan king katas. Makatas lang bagya ding apat nang sagu kesa ketang king babo.

¹⁶ Kuadradu ya ing babo na ning altar; adua yang pulung talampakan king mingangatba nang dake.

¹⁷ Kuadradu ya naman itang dake na king libutad; adua yang pulu't apat a talampakan king mingangatba nang dake, at atin yang pasamanu king makalual nang danggut a sukad apulung pulgada. (Adua yang pulung pulgada ing paligi.) Atyu la king dane aslagan detang balitang a papunta king altar.

¹⁸ Kaybat na nita, ngana kanaku ning Ginung Dios, Anak ning tau, makiramdam ka king sabian ku keka. Potang megawa ne ing altar, italaga me kanaku king kapamilatan na ning pamanduluk karing ain-sakripisyu at pamipisik king daya da ring animal a miyain bilang ain-sakripisyu.

¹⁹ Detang pari a ibat king pamilya nang Zadok ning tribu nang Levi ila mung bukud makalapit king arapan ku ban sumuyu. Aku, ing Ginung Dios, ing mumutus kaniti. Dinan mu lang toro para ain-a-kapamayaran-king-kasalanan.

²⁰ Kuma kang ditak king daya ning toro at ibili mu karing apat nang sagu ning altar, karing apat nang suluk, at king makapadurut a pasamanu. Alinis mu ne kanita at aitalaga ing altar.

²¹ Kuanan me ing toro ning ain-a-kapamayaran-king-kasalanan at dulukan ketang lugal a mepili lual na ning Templo.

²² King kaduang aldo, iyain me ing lalaking kambing a alang dipektu para ain-kapatawaran-king-kasalanan. At sukat yang madalise ing altar kalupa na inyang miyain ya ing toro.

²³ Potang medalise ne ing altar, iyain mu ne kanita ing torong alang dipektu at ing lalaking tupa a ala munamang dipektu.

²⁴ Iyain mu la kanaku, ing Ginu; ding pari ilang mamubud asin kareti at dulukan da la bilang ain para kanaku.

²⁵ Aldo-aldo, kilub ding pitung aldo, miyain kang metung a kambing, metung a toro, at metung a lalaking tupa a paraparehung alang dipektu.

²⁶ Kilub ding pitung aldo, sukat deng linisan at isadia de ring pari ing altar ban mitalaga ya kanaku.

²⁷ Kalabas da reting pitung aldo, itang kawalung aldo at ding tuki-tuki nang aldo, iyain da na la ding pari king altar ding ain-a-durulukan at ain-ning-pamisulusulu da ring tau. At aku naman tanggapan da kayu. Aku, ing Ginung Dios, ing migsalita.

44

¹ Kaybat na nita, binalik na ku niting lalaki ketang pasbul dalan king kilual ning dane aslagan ning Templo. Makasara ya ing pasbul dalan.

² Kanita ngana kanaku ning Ginu, Manatili yang makasara iting pasbul dalan. Alang makadalan keti, uling aku, ing Ginung Dios ning Israel, dinalan na ku keti. Sukat yang manatiling makasara.

³ Bukud mung ing kasalukuyan a prinsipi ing makapunta karin ban mangan king arapan ku, ing Ginu. Lungub ya at lumual ketang pasbul ning kuartung maragul.

⁴ Kaybat na nita, tiki na ku niting lalaki ketang pasbul dalan dane norti ning arap ning Templo. Miglalawe ku at ikit ke ing Templo ning Ginu; mitmu ya king makasilo nang aslag ning panga-atyu na. Migsakab ku king gabun.

⁵ Kanita ngana ning Ginu kanaku, Anak ning tau, pakalawan mu at pakatingiran ing sablang akakit mu at daramdaman, uling sabian ku la ngeni keka ding sablang patakaran at tuntunan tungkul king Templo ku. Pilinan mu lang masalese detang karapatdapat a lungub king Templo at detang e sukat lungub.

⁶ At sabian mu karing masias a buntuk nang memalen ning Israel ing anti kaniti: ing Ginung Dios sasabian na, Memalen ning Israel, tuknang na kayung darapat karing bage makasumami.

⁷ Mesalaula ya ing Templo ku uling peintulutan yu lang linub ding dayuan a e mesirkunsisyun at ding marinat a pamisip at pusu inyang inain yu ing taba at ing daya da ring animal para ain-sakripisyu. Inya dinatan de ing Templo ku. At ikayu naman, subali pa karetang bage makasumaming depat yu, lebagan ye pa ing kakung kasunduan.

⁸ Lugal king ikayu ing manibala karing bage banal a mitalaga para kanaku, penibala yu la karing dayuan.

⁹ Inya aku, ing Ginung Dios, sasabian ku king ala nang dayuan a e mesirkunsisyun at ating marinat a isip at pusu ing malyaring milub king Templo, agyang pang dayuan lang mekipamalen na karing memalen na ning Israel.

¹⁰ Ngana pa ning Ginu, Parusan ku la ding Levitang meko marayu kanaku, detang ginulut kanaku king kapamilatan na ning pamanyamba rang idolo kanitang ginulut ya ing Israel.

¹¹ Makanyan man, malyari lang sumuyu king kakung Templo, magbante karing pasbul dalan ning Templo. Paten da la ring animal para dulukan at iyain deting ain da ring tau. Ila naman ding mag-asikasu karing tau bilang kasuyuan da.

¹² Wa, parusan ku la uling ila ding mengasiwa king pamanyamba rang idolo ding tau, at iti ing meging dalan na ning pamikasala na ning Israel.

¹³ E la malyaring lumapit kanaku ban sumuyu kanaku bilang pari o makalapit man karing bage sagradu o lungub king Kabanal-banalan a Lugal. Sukat dang pibatan ing makasumaming kamarinayan a depat da.

¹⁴ Makanyan man, gawan ku lang kasaup tungkul king karaniwan a obra a sukat marapat king Templo.

¹⁵ Ngana ning Ginung Dios, Oneng ding pari a pamilya nang Zadok ning tribu nang Levi, ding tinupad king karelang katungkulan king mitmung katapatan king Templo kanitang gilutan da ku ding Israelita, makalapit la kanaku ban sumuyu. Malyari lang talakad arapan ku ban miyain ain a taba at daya.

¹⁶ Ila mung makalub king Templo at makalapit king kanakung lamesa at mangasiwa king pamanyamba kanaku.

¹⁷ Kailangan ing misulud lang linen a imalan neng lulub la king pasbul dalan papunta king patyu a atyu king kilub ning Templo. E la sukat misusulud imalan a lana neng gagampanan da ing karelang katungkulan king patyu a atyu king kilub o king Templo.

¹⁸ Misulud lang turban at salol a linen ban e la mipawas, oneng e la gagamit sinturun.

¹⁹ Potang munta la king patyung atyu king kilual nung nu la karin ding tau, sukat dang ilukas ing imalan a ginamit da inyang sinuyu la kanaku king Templo at lakuan da iti king sagradung kuartu. Misulud lang aliwang imalan ban e la manasakit ding taung makatagkil karela.

²⁰ E la sukat pasatsat a buak ban makalbu la o magpakabang buak. Kailangan ing kasantingan ing urud ning buak da.

²¹ E la sukat miminum alak bayu la lungub king patyung atyu king kilub.

²² E la sukat makiasawa karing babaing mebalu o karing diborsiada. Bukud lang makapakiasawa karing dalagang Israelita a birhen pa o karing mebalu da ring pari.

²³ Sukat da lang ituru ding memalen ku ing pamiyaliwa na ning banal at ning e banal, at ning malinis at ning e malinis.

²⁴ Ila ding munie kayatulan king nanumang e pamikakaintindi ketang banal at ning e banal, agpang karing kakung kautusan. Sukat da lang ipatupad ding tikda kung piesta, agpang king kanakung patakaran at tuntunan, at sukat da lang papanatilian banal ding Aldo ning Sabbath.

²⁵ E na sukat dirinatan ning pari ing sarili na king kapamilatan na ning pamaglapit king taung mete, subali mu nung iti tata ne o ima ne o anak ne o kapatad neng lalaki o kapatad neng babaing e talasawa.

²⁶ Potang melinis neng pasibayu, manaya ya pang pitung aldo

²⁷ at kaybat na nita munta ya king patyung atyu king kilub ning Templo at miyain yang ain-sakripisyu para king pangadalise na ban makasuyu yang pasibayu king Templo. Aku, ing Ginung Dios, ing migsalita.

²⁸ Aku mu ing bukud dang dake mana ding pari; e la sukat mikakapibandian king Israel. Aku mu ing dake rang mana.

²⁹ Ila ding mangan karing ain-a-binutil, karing ain-a-kapamayaran-king-kasalanan, at karing ain-a-kapaglarinan-king-kasalanan. Maging bandi ra ing sablang bage king Israel a mitalaga para kanaku, ing Ginu.

³⁰ Karapatdapat ya karela ing mayap diling mumunang bunga da ring tanaman at ding makabukud a ain da ring tau. Itang mumunang tinape a alutu da ring tau sukat deng ibie karing pari at ing bendisyun manatili karing pibalebale da ring minain.

³¹ E la sukat mangan ding pari karing ayup o animal a kabud na mete o piglapak da ring kalupa rang animal.

45

¹ Potang pipitnan-pitnan yu ne ing bansa para ibie ing dake na ning metung at metung karing tribu, mikawani kayung metung a dake para king Ginu. Kailangan ing labing anam yang kilometru king kaba, at labing adua yang kilometru king lualas. Maging sagradu ya ing lugal a iti.

² Kailangan keting lugal ing aduang dalan limang pulu't siam a metru kuadradu para pitalakaran king Templo a makapadurut king patyung sukad aduang pulu't anam a metru king lualas.

³ Sukad kayung labing anam a kilometru king kaba at anam a kilometru king lualas para king Templo, ing Kabanal-banalan a Lugal.

⁴ Iti ya ing maging banal a dake king bansa a makatutuk para karing paring susuyu king Ginu king Templo. Karin da la italakad ding bale ra at ing Templo.

⁵ Itang kapitna a maki sukad munamang labing anam a kilometru king kaba at anam a kilometru king lualas para kareta yang Levitang pari a magobra king Templo. Mitatag lang balen karin ban pituknangan da.

⁶ Siping na niting banal a lugal a makatutuk kanaku, sukad kayu pang loti a labing anam a kilometru king kaba at atlung kilometru king lualas. Para karing memalen na ne man ning Israel iti.

⁷ Mikawani kayu munamang metung a loti para king prinsiping pamuntuk ning Israel. Itang dake a atyu bandang albugan ning sagradung lugal at ning bandi ning siudad at mamabut king Dagat ning Mediteraneo, at itang atyu bandang aslagan at mamabut king ilug. Kasing dagul ne niting loti ing dake na ning balang metung karing tribu.

⁸ Iting loting iti ya ing dake na ning prinsipi king bansa ning Israel ban e na na la ligaligan kapilan man ding tau at ding aliwa pang tribu ning Israel.

⁹ Ngana ning Ginung Dios, Maluat na kayung mikakasala, ikayung pamuntuk ning Israel! Ituknang yu na ing kekayung pamanampalasan at pamanalipusta. Daptan yu itang matulid at maka-hustisia. E yu na la pasibayung tatabi ding memalen ku karing gabun da. Aku, ing Ginung Dios, ing sasabi kaniti kekayu.

¹⁰ Kailangan ing ustu la king sukad at king timbang ding kekayung panyukad at timbangan.

¹¹ Ing efa a gagamitan yung panakal karing bage malangi sukat neng kalupa timbang ning bat a gagamitan yung panyukad karing bage likidu. Ing opisyal a panyukad ya ing homer. Ing pagbasian king panimbang ya ing homer. Katumbas ne niti ding apulung efa, at ding apulung efa katumbas da la ring apulung bat.

¹² Oreti ding sukat yung maging timbangan: ding aduang pulung gerah katumbas de ing metung a sekel, at ding anam apulung sekel katumbas ne ning metung a mina.

¹³ Iti naman ing kekayung iyain: ing kanam a pulung dake ning metung a homer ning trigu at sebada, at

¹⁴ ing kadinalan a dake ning larung olibo a bunga da ring tanaman yu. Sukdan iti king kapamilatan na ning bat: ding apulung bat katumbas ne ning metung a homer at ing metung a homer katumbas ne ning metung a kor.

¹⁵ Metung a tupa ing iyain karing balang aduang dalan a tupang papastulan karing marangle ning Israel. Gamitan la deting tupa bilang ain-a-pamangan, ain-a-durulukan, at ain-ning-pamisulusulu ban mipatawaran ing kasalanan yu. Aku, ing Ginung Dios, ing mumutus kaniti.

¹⁶ Sukat da lang idala ding tau ning Israel ding ain da king prinsipi na ning Israel.

¹⁷ Katungkulan na ning prinsipi ing isadia na la ding animal a dulukan kabilugan, ing ain-a-pamangan para king piesta, king pamagselebra karing Bayung Bulan, ding Aldo ning Sabbath, at ding aliwa pang makatuldung piesta. Ya munaman ing misadia karing ain-a-kapamayaran-king-kasalanan, ding ain-a-binutil, ding ain-a-durulukan, at ding ain-ning-pamisulusulu ban mipatawaran la kasalanan ding memalen na ning Israel.

¹⁸ Ngana pa ning Ginung Dios, King mumuna nang aldo ning mumunang bulan, kuma kayung metung a toro a alang dipektu at linisan ye ing Templo.

¹⁹ Ing pari ya ing kumang ditak king daya ning animal a ain-a-kapamayaran-king-kasalanan, at ikaskas na iti karing amba da ring pasbul ning Templo, karing apat nang suluk ning altar, at karing asias na ning pasbul papunta king patyung atyu king kilub.

²⁰ Makanyan munaman ing gawan na king kapitung aldo para king ninumang migkamali o mikasala king e na sasarian. King makanyan a paralan ye aingat banal ing Templo.

²¹ King kalabing apat namang aldo ning mumunang bulan, pagselebran ye ing Piesta ning Pamaglagpus. E kayu mamangan tinape a ating lebadura kilub ding pitung aldo.

²² King mumunang aldo, misadia yang metung a toro ing prinsipi bilang ain-a-kapamayaran-king-kasalanan para king sarili na at para karing memalen na ning Israel.

²³ Kilub ding pitung aldo ning piesta, aldo-aldo yang misadiang pitung toro at pitung lalaking tupa a paraparehung alang dipektu bilang ain-a-durulukan. Misadia ya namang metung a lalaking kambing bilang ain-a-kapamayaran-king-kasalanan.

²⁴ Misadia ya namang atlung pulu't pitung litrung ain-a-binutil tungkul king balang metung a toro, at para king balang metung karing lalaking tupa. Anam a litrung larung olibo para king balang toro o lalaking tupa.

²⁵ Makanyan munaman ing isadia para king Piesta da ring Dalungdung a magumpisa king kalabing limang aldo na ning kapitung bulan. Iyain na la ning prinsipi balang aldo kilub ding pitung aldo ding makanyan munamang ain-a-kapamayaran-king-kasalanan, ding ain-a-durulukan kabilugan, at antimu rin ding ain-a-binutil at larung olibo.

46

¹ Ngana ning Ginung Dios, Sukat yang makasara ing pasbul dalan king dane aslagan papunta king patyu kilub ding anam a aldo pamagobra. Oneng ibuklat ya king Aldo ning Sabbath at neng Piesta ning Bayung Bulan.

² Lungub ya ing prinsipi manibat king patyung atyu king kilual papunta king kuartung palub king pasbul, at talakad ya lele da ring asias ning pasbul kabang ding pari durulukan da lang kabilugan ding ain-sakripisyu na at ding ain-ning-pamisulusulu. Karin ketang pasbul ya samba at kaybat na nita lumual ne. E ya sasara ing pasbul dalan angga itang bengi.

³ Samba na la man king Ginu ding memalen neng Aldo ning Sabbath at neng Bayung Bulan, oneng keta king arap ning pasbul dalan.

⁴ Neng Aldo ning Sabbath, iyain na la ning prinsipi ding anam a biserung tupa at ing metung a lalaking tupa a paraparehung alang dipektu. Deti ain lang durulukan kabilugan.

⁵ King balang metung karing lalaking tupa, sukat yang magdala ing prinsipi bilang ain atlung pulu't pitung litrung binutil at king balang biserung tupa, magdala yang nanumang buri nang ibie. Magdala ya namang anam a litrung larung olibo para ketang atlung pulu't pitung litrung binutil a iyain.

⁶ King aldo ning Piesta ning Bayung Bulan, ing prinsipi miyain yang metung a toro, anam a tupang pabanua tua, at metung a lalaking tupa. Sukat la ngan alang dipektu deti.

⁷ Kayabe ning balang toro at lalaking tupa ya ing ain a atlung pulu't atlung litrung binutil, at king balang tupang pabanua tua, magdala yang nanumang buri nang ibie. Bukud pa kaniti, magdala yang anam a litrung larung olibo para ketang atlung pulu't atlung litrung binutil a iyain.

⁸ Kaybat lakuan ne ning prinsipi itang kuartung maragul palub king pasbul, at lumual ya naman ketang pidalanan na inyang linub ya.

⁹ Potang samba la king Ginu ding tau king isanu mang piestang mitakda, detang lulub king kapamilatan na ning pasbul dalan dane norti, sukat lang lumual ketang pasbul dalan dane mauli kaybat dang sinamba. At deta namang lulub king kapamilatan na ning pasbul dalan dane mauli, sukat lang lumual ketang pasbul dalan dane norti. Alang malyaring lumual ketang piluban na; dapat yang dumalan ing sinamba ketang kasumangid a pasbul dalan.

¹⁰ Lungub yang kayagnan da ing prinsipi at lumual ya namang kayagnan da.

¹¹ Neng aldo da reng kapiestan a mitakda, ing iyain atlung pulu't atlung litrung binutil king balang toro o lalaking tupa a iyain, at nanumang buri nang ibie ning sasamba para king balang tupang pabanua tua. Anam a litrung larung olibo ing iyain king balang atlung pulu't atlung litrung binutil.

¹² Neng magdala yang kusang-lub a ain ing prinsipi para king Ginu, durulukan yang kabilugan o ain-ning-pamisulusulu, ibuklat ya para dalanan na itang pasbul dalan dane aslagan a papunta king patyung atyu kilub. Iyain na ing ain na nung makananu yang miyayain neng Aldo ning Sabbath. Kaybat nang linual, isara ya ing pasbul dalan.

¹³ Ngana ning Ginu, Balang abak, magdala kayung metung a biserung tupa a pabanua tua at alang dipektu, at dulukan yang kabilugan bilang ain. Daptan iting pamiyain aldo-aldo.

¹⁴ Abayanan ya iting maygit anam a litrung arina at aduang litrung larung olibo a paniamut king arina. Iti ya ing tuntunan king kapilan pa man tungkul king aldo-aldo pamanain king Ginu.

¹⁵ Ing biserung tupa a pabanua tua, ing arina, at ing larung olibo sukat miyain king Ginu balang abak at king kapilan pa man.

¹⁶ Ngana ning Ginung Dios, Nung ing prinsipi pamanan ne king gabun na ing anak nang lalaki, maging bandi neng mana kanita niting anak bilang pibandian na ning pamilya na.

¹⁷ Nung ing prinsipi munie yang gabun king ninuman karing ipus na, maging bandi na ning ipus ita kabang ipus ya. Potang miras na ing Banua ning Pamaniubli, ing mesabing gabun misubling pasibayu king prinsipi, uling bukud mung ya at ding anak na ilang manatiling makibandi king gabun.

¹⁸ Ala yang matulid kuanan na ning prinsipi ing nanumang pibandian da ring tau. Ing nanumang kapirasung gabun a binie na karing anak nang lalaki sukat manibatan ketang gabun a bandi na ban e ya milako gabun ing ninuman karing memalen ku.

¹⁹ Kaybat na nita, tiki na ku ning lalaki ketang pidadalanan karetang kuartung makayarap king dane norti lele ning pasbul dalan ning dane mauli ning patyung atyu king kilub. Ila deti ring sagradung silid da ring pari. Pepakit ne kanaku ing metung a lugal king dane albugan da ring kuartu.

²⁰ Kaybat ngana kanaku, Iti ya ing lugal nung nu da la pabukalan ding pari ing ain-a-durulukan, at ing ain-a-kapamayaran-king-kasalanan, at nung nu da la yoyornu ding ain-a-binutil. Ala lang lulual ban e la manasakit ding tau king kasagraduan da reti.

²¹ Kaybat na nita, tiki na ku ketang patyung atyu king kilual, at linibut na ku karing apat nang suluk niti. Ating patyung ikit ku king balang suluk;

²² malati la at paraparehu la dagul. Anam lang pulu't walung talampakan king kaba at apat apulu't walung talampakan la king lualas.

²³ Makabakud yang pader ing balang metung kareti, at atin lang kalang a makapakat king pader.

²⁴ Ngana niting lalaki kanaku, Ila deti ring kusina nung nukarin ding susuyu king Templo pabukal da la ring ain-sakripisyu a yayain da ring tau.

47

¹ Binalik na ku niting tau ketang pasbul dalan a palub king Templo. Ikit ku karin king ating danum a mamagus ibat king sibul lalam ning pasbul dalan papunta king dane aslagan, nung nu ya makayarap ing Templo. Manibat ing agus king dane mauli nang dake ning Templo, lagpus king dane nang mauli ning altar.

² Kaybat na nita, linual na ku niting lalaki king pasbul dalan dane norti at linibut ketang pasbul dalan a makayarap king aslagan. Karin ating metung a sibul a mamagus manibat ketang dane mauli ning pasbul dalan.

³ Tinaglus kami ketang dane aslagan, at ketang panyukad a tatalnan na sinukad yang limang dalan at anam apulung yarda papuntang aslagan. Kaybat na nita, dinulung kami king danum a anggang bukung-bukung king lalam.

⁴ Sinukad yang pasibayung limang dalan at anam apulung yarda at angga na karing tud ku ing danum. Sinukad ne namang limang dalan at anam apulung yardang pababa, at angga na king awakan ku ing danum.

⁵ Sinukad ya pang limang dalan anam apulung yarda, at milalu na king kalalam ing danum at e na ku makadalakit nung e namu king kapamilatan ning pamangawe.

⁶ Ngana kanaku, Anak ning tau, pakatandanan mu iti. Kaybat na nita, binalik na ku king pampang ning ilug,

⁷ at inyang miras na ku karin, ikit ku la ding dakal a tanaman king misusumangid ning pampang.

⁸ Ngana kanaku, Mamagus ing danum a iti papunta king dane aslagan angga king Dagat a Mete. Milako na kanita kalat ing danum karas na king Dagat a Mete.

⁹ Nu mang lugal miras ing agus mika miyayaliwang uring animal at asan, uling milako na ing kalat ning danum. Ilako na ning agus ing kalat na ning danum ning Dagat a Mete, at nu man miras mika ating bie.

¹⁰ Datang la king pampang na ding manasan at manibat king Engedi angga king Eneglaim mika masanting a lugal ban piyatsanan lambat. Mika marakal a asan a miyayaliwang uri anti king Dagat ning Mediteraneo.

¹¹ Oneng e milako ing kalat da ring pinak at ding bana ban ating piyakuanan asin.

¹² Tumubu la king mingatba nang pampang ding miyayaliwang tanaman a mamunga. E la malanat a bulung at e la milako bunga. E tuknang ing karelang pamamunga uling magus karela ing danum a manibat king Templo. Maging pamangan la ding bunga ra at maging panulu la ding bulung da karing masakit.

¹³ Ngana ning Ginung Dios, Anti kaniti ing gawan tungkul king pangaparti na ning bansa para karing labing aduang tribu ning Israel: aduang dake ing miras king tribu nang Jose.

¹⁴ Kaybat, piparaparehu yu ing dake da ring aliwa. Pengaku ku karing makatua yu king ibie ke kekayu iting gabun bilang mana yu.

¹⁵ Iti ya ing angganan na ning kabilugan a gabun: king dane norti, ing Dagat ning Mediteraneo angga king Hetlon papunta king Pidadalanan ning Hamat angga king siudad ning Zedad,

¹⁶ papunta Berota at Sibraim (a atyu king angganan na ning Damasco at Hamat), angga king Hazerhaticon a atyu king angganan na ning Hauran.

¹⁷ Inya ing angganan na king dane norti magumpisa ya king Dagat ning Mediteraneo papuntang aslagan angga king Hazar-enon king Damasco at ning Hamat king dane nang norti.

¹⁸ Ing angganan na king dane aslagan: magumpisa ya king Hazar-enon pilatan ning Damasco at Hauran, at ing Ilug ning Jordan ya ing maging angganan na ning Israel king dane albugan at ning Gilead king dane aslagan angga na king Tamar king Dagat a Mete.

¹⁹ Ing angganan na king dane mauli: magumpisa ya king Tamar angga king danuman na ning Meribat Kades at dane norti-albugan king angganan na ning Ehipto angga na king Dagat ning Mediteraneo.

²⁰ Ing angganan na king dane albugan ya ing Dagat ning Mediteraneo papuntang norti angga king tulid ning Pidadalanan ning Hamat.

²¹ Makanyan yeng pipartian ing gabun para karing tribu na ning Israel.

²² Para kekayu ya ampon karing dayuan a manuknangan kayabe yu at mikayanak nang mibait keti. Ituring la deting anak da anting tune Israelita at karake la king gabun a pimamanan king Israel.

²³ Itang miras karela ya itang mayakua ketang dake na ning tribung kayayaniban da. Aku, ing Ginung Dios, ing migsalita.

48

¹ Oreti ding lagyu da ring tribu a maging batayan king gabun a mangaintulid king metung at metung: king tribu neng Dan itang dake a magumpisa king angganan na ning dane norti papunta king Hetlon angga Lebohamat at Hazar-enon bandang mauli ning Damasco.

² King tribu neng Aser itang dake a angganan na ning Dan a magumpisa king dane aslagan angga king dane albugan.

³ King tribu neng Neftali itang dake angganan ning Aser a magumpisa king dane aslagan angga king dane albugan.

⁴ King tribu neng Manase itang dake angganan ning Neftali a magumpisa king dane aslagan angga king dane albugan.

⁵ King tribu neng Efraim itang dake angganan ning Manase a magumpisa king dane aslagan angga king dane albugan.

⁶ King tribu neng Ruben itang dake angganan ning Efraim a magumpisa king dane aslagan angga king dane albugan.

⁷ King tribu neng Juda itang dake angganan ning Ruben a magumpisa king dane aslagan angga king dane albugan.

⁸ Ikawani ya para king makabukud a gamit itang dake atyu king angganan na ning Juda a magumpisa king dane aslagan angga king dane albugan. Sukad ya iting labing anam a kilometru king lualas king dane norti angga king dane mauli, at makanyan ya naman a sukad manibat king dane aslagan angga king dane albugan. Keting dake ya italakad ing Templo.

⁹ Iting makabukud a dake ning gabun a mitalaga para king Ginu sukat yang labing anam a kilometru king kaba at labing aduang kilometru king lualas.

¹⁰ Oyni ing tukian potang partian ya iting makabukud a lugal para king Ginu: labing anam a kilometru king kaba, at anam a kilometru king lualas ing para karing pari. Italakad ya king libutad ing Templo ning Ginu.

¹¹ Para karing pari ya iting dake, ding lahi nang Zadok, uling sindu ra ing pamanupad karing kautusan ku agyang ginulut la kanaku ding Israelita. E la mekiapus karing Levita.

¹² Para karela ya itang dake niting gabun a mibukud siping ding Levita at mitalaga king Ginu.

¹³ Para karing Levita ya itang magumpisa king angganan king sakup ding pari king dane mauli; labing anam a kilometru ya manibat king aslagan anggang albugan, at anam a kilometru ya manibat king norti anggang mauli.

¹⁴ E ra malyaring ipisali iti o ipaglibe o ilipat kaninu man uling sagradu iting mesabing gabun at mitalaga para king Ginu.

¹⁵ Itang mitagan a sukad a atlung kilometru king kalualas at labing anam a kilometru king kakaba para karing sabla ya. Iti e ya sagradu, oneng malyari deng gamitan pituknangan da. Kailangan ing atyu libutad ing siudad.

¹⁶ Iti ya ing maging sukad na ning siudad: aduang libu limang dalan at aduang pulung yarda ya king kaba at king lualas. Inya kuadradu ya.

¹⁷ Milakuan kayung bakanting dinalan apat apulung yarda a makapadurut king siudad.

¹⁸ Itang mitagan king mingatba a mamabut ketang dake para king Ginu: tia anam a kilometru ampon atlung kilometru king bandang aslagan at anam a kilometru ampon atlung kilometru king albugan. Para kareta yang taung manuknangan king siudad. Malyari deng pitamnanan ban mika pamangan la.

¹⁹ Ninuman ing manuknangan king siudad a ita, nu mang tribu ya ibat, malyari neng tamnanan ing gabun a ita.

²⁰ Labing aduang libu at siam apulu't lima metru kuadradu ing sablang gabun a italaga para king Ginu at king siudad.

²¹ Itang mitagan a gabun king dane aslagan at albugan na niting lugal nung nu ya makatalakad ing Templo, ing gabun da ring pari, at ding Levita at ning siudad mangaintulid king prinsipi. Mamabut iti king aslagan angga king angganan na king aslagan at king albugan angga king Dagat ning Mediteraneo, at ing angganan na king dane norti king dake a sakup ning Juda at king dane mauli itang dake a sakup ning Benjamin.

²²

²³ Ing dake da naman ding aliwang tribu ya iti: itang metung a dake manibat king aslagan angga king albugan mangaintulid king tribu ning Benjamin.

²⁴ Lele na ning angganan na ning tribu ning Benjamin manibat king dane aslagan angga king dane albugan mangaintulid king tribu ning Simeon.

²⁵ Lele na ning angganan na ning tribu ning Simeon magumpisa king dane aslagan angga king albugan mangaintulid king tribu ning Isacar.

²⁶ Lele na ning angganan na ning tribu ning Isacar magumpisa king dane aslagan angga king albugan mangaintulid king tribu ning Zebulun.

²⁷ Lele na ning angganan na ning tribu ning Zebulun magumpisa king dane aslagan angga king albugan mangaintulid king tribu ning Gad.

²⁸ King bandang mauli, ing angganan na nitang dake ning tribu ning Gad magumpisa ya king Tamar at angga ya king danuman ning Meribat Kades, angga king angganan ning Ehipto at angga king Dagat ning Mediteraneo.

²⁹ Makanyan yeng pipartian ing gabun para karing tribu na ning Israel, nganang sinabi ning Ginung Dios.

³⁰ Oreti naman ding kaayusan da ring pasbul dalan na ning siudad ning Jerusalem: king dane norti, aduang libu limang dalan at aduang pulung yarda ya king lualas

³¹ a ating atlung pasbul dalan para karing tribu nang Ruben, Juda, at Levi. Dinan lang lagyu deting pasbul dalan agpang karing lagyu da ring tribu ning Israel.

³² King dane aslagan, aduang libu limang dalan at aduang pulung yarda ya king lualas a atin munamang pasbul dalan para karing tribu nang Jose, Benjamin, at Dan.

³³ King dane mauli, aduang libu limang dalan at aduang pulung yarda ya king lualas a atin munamang atlung pasbul dalan para karing tribu nang Simeon, Isacar, at Zebulun.

³⁴ King dane albugan, aduang libu limang dalan at aduang pulung yarda ya king lualas a atin munamang pasbul dalan para karing tribu nang Gad, Aser, at Neftali.

³⁵ Apulung libu at walung pulung yarda ing makapadurut nang sukad ning siudad. Manibat king aldong iti, ing lagyu na ning siudad ya iti: Atyu Keti ing Ginu.