1

¹ Iti ya ing kasulatan a piakitan karing sinabi nang Jeremias, ing anak nang Hilkia, ing metung karing paring Judio ning balen Anatot king sakup ning tribu ning Benjamin.

² Migsalita ya ing Ginu kang Jeremias kanitang labi neng atlung banuang mag-ari king Juda i Josias a anak nang Amon.

³ Migsalita yang pasibayu kang Jeremias kanitang i Jeoiakim a anak nang Josias ya ing ari. Maralas yang mekipagsalita kang Jeremias ing Ginu angga na king kalabing metung a banua ning pamag-ari nang Zedekias a anak nang Josias. Mibagsak ya ing Jerusalem at miyugse la ding memalen na king kalimang bulan ning banuang ita.

⁴ Ngana kanaku ning Ginu,

⁵ Balu da na ka bayu da ka dininan bie at pinili da na ka bayu ka pa mibait ban maging propeta karing bansa.

⁶ Pekibat ku, Ginung Dios, e ku biasang magsalita; anak ku pa mu.

⁷ Oneng ngana kanaku ning Ginu, E mu sasabian king anak ka pa mu, bagkus munta ka karing tau nung nu ra ka itubud at sabian mu karela ing sablang bage a iyutus kung sabian mu.

⁸ E ka tatakut karela uling kayabe mu ku at ingatan da ka. Aku, ing Ginu, ing migsalita!

⁹ Kanita, inatiat ne ning Ginu ing gamat na; tigkil na la ding labi ku at ngana kanaku, Makiramdam ka. Ibabie ku la keka ding amanung sukat mung sabian.

¹⁰ Ngening aldong iti dirinan da kang upaya karing bansa at kayarian ban mamutput at manlasak, manyira at manialdak, manalakad at tanam.

¹¹ Nganang kinutang kanaku ning Ginu, Jeremias, nanu ing akakit mu? Pekibat ku, Metung yang sanga na ning tanaman a almendro.

¹² Ngana ning Ginu, Tinud ka at lalawan ku ing pangatuparan da ring amanu ku.

¹³ Migsalita yang pasibayu kanaku ing Ginu. Nganang kinutang, Nanu pa ing akakit mu? Pekibat ku, Akakit ke ing metung a kalderang bubukal manibat king dane norti at malapit niang mibakung banda keti.

¹⁴ Kanita ngana kanaku ning Ginu, Magus ing kasiran a anting bubukal a danum manibat king dane norti karing sablang manuknangan keting bansa,

¹⁵ uling ausan ku la ngan ding sablang bansa ning dane norti ban datang. Italakad ne ning balang ari ing tronu na karing pasbul dalan ning Jerusalem at karing makapadurut nang pader at antimu rin karing makapadurut da ring aliwang siudad ning Juda.

¹⁶ Parusan ku la ding taung kanakung pinili uling mikasala la; gilutan da ku at minie lang ain-sakripisyu karing aliwang dios at uling ginawa lang idolo at kaybat simban da la.

¹⁷ E mu painan ing lub mu; munta ka at sabian mu la karela ding sablang bage inutus kung sabian mu. E ka tatakut karela; nung mitakutan ka ngeni karela lalu da kang pamatakutan potang atyu na ka karela.

¹⁸ Ngening aldong iti gawan da kang anting makakutang siudad, anting metung a asias a bakal at anting pader a tangsu. Lumaban la keka ding ari ning Juda, ding pamuntuk, ding pari, at ding memalen.

¹⁹ Lumaban la keka, oneng e la maniambut uling kayabe mu ku at e ra ka paburen. Aku, ing Ginu, ing migsalita.

2

¹ Sinabi na kanaku ning Ginu

² king ibalita ku iting mensahi na king balang memalen na ning Jerusalem: Agaganaka ku ing kekang katapatan inyang kayanakan mu, nung nu anti karagul ing lugud mu kaku inyang pekasalan da ka; tikian mu ku king libutad ning disyerto, karing lugal a e bitasang mitamnan.

³ Israel, bukud mung kaku ka; ika ing banal kung pibandian. Peparala kung kasakitan at kasiran king ninumang manyira keka. Aku, ing Ginu, ing migsalita.

⁴ Ikayung lahi nang Jacob at tribu nang Israel, makiramdam kayu king mensahi na ning Ginu.

⁵ Ngana ning Ginu: Nanung kamalian ing ikit da kaku ding kekong makatua at dinayu la kaku? Nanu ing sangkan ba't gilutan da ku? Simban da la ring alang kabaldugan a idolo, at ila mismu meging ala lang kabaldugan.

⁶ E ra ku man aganaka agyamang linigtas ku la king Ehipto, at tinaid libutad ning disyerto: king bansang disyerto at kulkul, king malangi at makatakut a lugal a alang manuknangan at alang bisang dumalan.

⁷ Dela ku la king matabang gabun, ban nabangnan da ing pupul at miyayaliwang bage mayap. Makanyan man karas da karin selaula de ing kakung bansa; gewa deng karumaldumal ing bansang binie ku karela.

⁸ E ra man kitang ding pari, Nu ya karin ing Ginu? Ding mismung kakung pari e da ku balu. Linaban la kaku ding pamuntuk; migsalita la ding propeta king lagyu nang Baal, at sinamba la karing idolong alang kabaldugan.

⁹ Inya aku, ing Ginu, iyarap keng pasibayu ing dalum ku laban karing taung kakung pinili. Angga na karing anak da ring anak da.

¹⁰ Munta ka king dane albugan king pulu ning Cyprus, at mitubud ka dane aslagan a sakup ning Kedar. Akit mu king ala pang bage milyaring kalupa ning keti.

¹¹ Ala pang bansang menalili karing kikilalanan nang dios agyang e la tutu. Oneng ding taung kakung pinili pekilibe da ku, ing Dios a minie dangalan karela, karing e tutung dios a alang arapat mayap karela.

¹² Mangapamulala ka, O banua, at masdan, aku, ing Ginu, ing migsalita,

¹³ uling ding taung pinili ku dinapat lang aduang pamikasala; ginulut la kaku, ing sibul ning malinis a danum, at ginawa lang pilulanan a e mu adatukanan danum.

¹⁴ E ya ipus ing Israel; e ya mibait king panga-ipus. Obat ngeni panintunan de ring kalaban na?

¹⁵ Ding kalaban na anti lang leon a gagaleung; milalu kasikan ing galeung da. Gewa reng disyerto ing bansa na; melasak la ding balen na at ala metung mang manuknangan karela.

¹⁶ Wa, ding lalaki na ning Memfis at Tapanhes bilbal de bikan ing buntuk na.

¹⁷ Israel, ika mismu ing dinapat kanyan king sarili mu! Gilutan me, ing Ginung kekang Dios, kabang tatairan na ka king dalan.

¹⁸ Nanu mong mayap ing ibunga na ning pamamunta mu Ehipto? Atin kang apala king pamaninum mu king danum ning Ilug ning Nilo? Nanu mong mayap ing ibunga na ning pamamunta mu king Asiria? Atin kang apala king pamaninum mu king danum ning Ilug ning Eufrates?

¹⁹ Ing sarili mung alang kayapan ya ing mamarusa keka, at ing kataksilan mu kaku ya ing mangondena keka. Abalu mu nung nu anti kapait at alang kayapan ing likuan mu ku, ing Ginung kekang Dios; ala na kang galang nanuman. Aku, ing Ginung Dios a Mayupaya, ing migsalita.

²⁰ Sasabian ning Ginung Dios, Israel, gilutan mu king milabas a panaun ing kakung upaya; tinggian mu ing pamamintu at pamanyamba kaku. Karing balang matas a bunduk-bundukan, at lalam ding balang malabung a tanaman keka lang simban ding e tune dios.

²¹ Tenam da kang anting piling ubas, anti ing pekamayap a bini. Oneng lawan mu ing milyari keka! Mengari ka king mebuluk at alang ulagang ubas.

²² Agyang wasan mu ing sarili mu king matapang diling sabun, akit ku pa mu rin ing bakas ning kekang kasalanan.

²³ Makananu mung asabi king ing sarili mu e mu dinatan, king kapilan man e me simban i Baal? Ganakan mu ing kasalanan a depat mu king kapatagan; lawan mu ing depat mu karin. Mengari ka king dumalagang kamelyu a manintun potro, pulapulaying alang balung puntalan,

²⁴ kurakurakul libutad ning disyerto. Potang makaratang ya landi, ninu ing makasupil king Israel? E ne magal manintun ing bulugan a magnasa king Israel uling agad neng atagpuan king oras a makanyan.

²⁵ Israel, e mo buring magagasgas ding kekang talampakan ni paburen lalangi ing kekang akmulan king pamanagal mu karing aliwang dios. Oneng sinabi mu, Ali! Makapasubu na ku. Aluguran ku na la ding dios a dayuan at kaku lang panintunan.

²⁶ Ngana ning Ginu, Memalen ning Israel, nung makananung mangapakarine ya potang marakap ya ing mapanako, ikayu ngan, ding kekayung ari at pamuntuk, ding kekayung pari, at propeta, mangapakarine kayu naman.

²⁷ Mangapakarine kayu, ikayung sablang sasabi king ing kapirasung dutung ya ing kekong tata at king ing metung a batu ya ing kekong ima. Matupad iti uling ginulut kayu kanaku lugal king mibalik kayu kanaku. Oneng potang atyu kayu king kaligaligan, ausan yu kung datang ban iligtas da kayu.

²⁸ Nu la karin ding kikilalanan yung dios a kekong gewa? Paburen yung ila ding magligtas kekayu, nung agyu ra, potang atyu kayu king kaligaligan. Juda, nung makananu la karakal ding kekang siudad makanyan la naman karakal ding kekang kikilalanan a dios.

²⁹ Nanu ing kekong sasaingsing? Baket linakan kayu laban kanaku?

³⁰ Perusan da kayu, oneng iti e mekakayap kekayu; e yu buri ing sasabianan da kayu. Anti kayu king mabangis a leon, pete yu la ding kekong propeta.

³¹ Memalen ning Israel, makiramdam kayu king kanakung sasabian. Meging anti ku waring disyerto kekayu, anting maralumdum at mapanganib a lugal? Baket sasabian yu ing daptan yu ing buri yung daptan at king e na kayu magbalik kanaku?

³² Malyari na la waring kalinguan ning kayanakan a babai ding alahas na o ing imalan nang pangkasal ning babaing kakasal? Oneng kelinguan da ku ding taung kanakung pinili kilub ding e mabilang-bilang a aldo.

³³ Tutu mu la mong balung pakitagpuan ding kekang palsintan. Maging ding e mayap karing babai atin lang malyaring pulutan keka.

³⁴ Mimantsahan ya ing susulud mung imalan king daya da ring pakakalulu at alang kasalanan; e king daya da ring mapanako. Makanyan man

³⁵ keka pang sasabian, Ala kung kasalanan; talagang e ne mua kanaku ing Ginu. Oneng aku, ing Ginu, parusan da ka uling lilingad mu ing depat mung pamikasala.

³⁶ Baket gewa mung mababa ing sarili mu king kapamilatan na ning pamaglapit mu karing dios da ring aliwang bansa? Mabigu ka king Ehipto antimo nung makananu kang mebigu king Asiria.

³⁷ Mipalako kang e bubulad Ehipto uli na ning dine mu. Aku, ing Ginu, ing tinanggi karing kekang panaligan; ala kang pakinabangan karela.

3

¹ Ngana ning Ginu, Nung idiborsyu ne ning lalaki ing asawa na, at ing babai naman kawanian ne at maging asawa ne ning aliwang lalaki, e na ne akuang pasibayu ning minuna nang asawa. Lubus neng minie dinat king bansang ita. Oneng ika, Israel, karakal mu kelaguyo at ngeni bisa kang magbalik kanako!

² Lumawe ka babo da ring bunduk-bundukan. Atin waring lugal a e ka menugaling anting babaing magtinda king katawan na? Penaya mu la king lele dalan ding lalaking kekang suki, nung makananu yang manaya ing metung a Arabo king disyerto karing maging biktima na. Dinatan me ing bansa king kapamilatan na ning pamagtinda mu king kekang katawan.

³ Iti ya ing sangkan nung inya e minuran at e bitasang minuran agyang king panaun ning kauran. Pati itsura mu lupang babaing magtinda king katawan na; tutu na kang alang marine!

⁴ At ngeni sasabian mu kanaku, Ika ing Tata ku at pepakamalan mu ku manibat na inyang malati ku.

⁵ E manatili ing mua mu; e ka malyaring manatiling mua kanaku. Israel, ita ing sinabi mu, oneng depat mu mu rin ing sablang e mayap a agyu mung daptan.

⁶ Ngana kanaku ning Ginu inyang i Josias ya ing ari, Ikit mu nung nanu ing depat na ning Israel, ing babaing taksil? Likuan na ku; at king balang bunduk-bundukan at lalam ding tanaman pekiapusan na ing dapat ning metung a babaing magtinda king katawan na.

⁷ Bala ku king magbalik ya kanaku kaybat nang depat iti. Oneng e ya migbalik kanaku at iti ikit na ngan Juda, ing taksil a kapatad nang babai.

⁸ Ikit na namang Juda king diborsyu ke ing Israel at tinabi ke uling pigtaksilan na ku. Makanyan man e ya mitakutan ing Juda at menugali ya namang anti ing babaing magtinda king katawan na.

⁹ E ne tiblan ning dine ditak mu man. Dinatan ne ing bansa; dinapat yang kataksilan king kapamilatan na ning pamanyamba na karing batu at karing dutung.

¹⁰ Kaybat na nita, i Juda, ing taksil a kapatad nang Israel, migkunwari yang magbalik kanaku; e laus king lub na. Aku, ing Ginu, ing migsalita. fig,,,,,...pamanyamba na karing batu at karing dutung.,(3:9)fig*

¹¹ Kaybat na nita, sinabi na ning Ginu kanaku king agyang ginulut ya ing Israel, mayap ne man kesa king taksil a Juda.

¹² Inutus na kung munta kang Israel ban sabian ku, Taksil a Israel, magbalik na ka kanaku. Biasa kung lumunus at e na ku mua; e kabang kaba ing mua ku keka.

¹³ Tanggapan mu mu ing mikasala ka at king linaban ka king Ginung kekang Dios. Kilalanan mu at ibalita king tutu pin ing mekipangalugud ka karing aliwang dios king lalam ning balang tanaman a malabung at king e ka memintu karing kanakung kautusan. Aku, ing Ginu, ing migsalita.

¹⁴ Taksil a memalen, magbalik kayu; aku ing makibandi kekayu. Kuma kung metung kekayu king balang balen at kuma kung tidua katau king balang tribu, kaybat ibalik da kayu king Bunduk ning Zion.

¹⁵ Dinan da kayung pamuntuk a mamintu kanaku at ila panibalan da kayung ating kabiasnan at ating aintindian.

¹⁶ Potang merakal na kayu king lugal a ita, tuknang na lang babanggit ding tau tungkul king Kaban ning Kasunduan. E ra ne aisip o aganaka man; e ra ne kailangan man ni gawa pang aliwa.

¹⁷ Potang datang na ing oras a ita, mayaus yang Ing Tronu ning Ginu ing Jerusalem at mitipun la karin ding sablang bansa ban samban da ku. E ra na panusigan ing buri da ring masias at e mayap dang pusu.

¹⁸ Makiabe ya ing Israel king Juda at ilang adua miyabe lang lumual ibat king pangayugse ra king bansang atyu king dane norti, at magbalik la king bansang binie ku karing makatua da. Maging pibandian da iti kabang panaun.

¹⁹ Ngana ning Ginu, Israel, pignasan kung tanggapan da ka bilang anak ku, at dinan malagung bansa; bansang malagung dili king mabilug a yatu. Buri ku ing ausan mu kung tatang, at e na ka gumulut kaku kapilan man.

²⁰ Oneng kalupa na ning metung a taksil a asawa, e ka meging tapat kaku. Aku, ing Ginu, ing migsalita.

²¹ Meramdam ing inge babo ding bunduk-bundukan: Iti ya ing memalen ning Israel a kikiak at magamuamu, uling mibiebie lang memalen na king pamikasala at kelinguan de ing Ginung Dios da.

²² Magbalik na kayu, ikong sablang ginulut king Ginu; pakayapan na kayu at gawan na kayung tune tapat. Sasabian yu, Wa, lumapit na kami king Ginu uling ya ing kekaming Dios.

²³ E na ke bitasang asaupan ning paganu ming pamanyamba babo da ring bunduk-bundukan. Bukud mung manibatan king Ginung kekaming Dios ing kasaupan para king Israel.

²⁴ Oneng ing pamanyamba kang Baal, ing dios ning sablang sukat pikarine, ya ing pepasari king pangawala ra kekami ding sabla ming sese animal, ding anak ming lalaki at babai, ing sablang pipawasan da ring makatua mi manibat na kanitang minunang panaun.

²⁵ Kailangan ing magkasat kami king dine at paburen ing takpan na kami ning kekaming kamarinayan. Ikami at ding makatua mi e ke pepatugut mikakasala laban king Ginung kekaming Dios. E ke bitasang memintu karing kautusan na.

4

¹ Ngana ning Ginu, Memalen ning Israel, nung bisa kayung magbalik, sukat ing mibalik kayu kanaku. Nung ilako yu la ding idolong kasaman ku at nung maging tapat kayu kanaku,

² maging matulid at ustu para kekayu ing sumpa kayu king kapamilatan na ning lagyu ku. Ding sablang bansa kanita aduan da kanaku ing bendisyunan ku la at ila purian da ku. fig,,,,,... sukat ing mibalik kayu kanaku.,(4:1)fig*

³ Nganang sasabi ning Ginu karing memalen ning Juda at Jerusalem, Sarulan yu la ding e masasarul yung marangle; e yu la tatanam ding bini libutad ding suksuk.

⁴ Ikayung memalen ning Juda at Jerusalem, tuparan ye ing kasunduan a gewa yung kayabe ku, ing kekayung Ginu, at italaga yu ing kekayung sarili kanaku. Nung ali, mikalabkab anting api ing mua ku uli da ring e mayap a bage depatan yu. Manduluk ya at metung man alang makapatda kaniti.

⁵ Tiupan ye ing trumpeta king mabilug a bansa! Kulisak kayung masikan at malino! Sabian yu karing memalen ning Juda at Jerusalem ing munta la karing siudad a makakuta.

⁶ Ituru ye ing dalan papunta king Zion! Iligtas yu ing sarili yu! Magmalagua kayu! Uling ing Ginu parala yang kasakitan, at maragul a kasiran a manibat king norti.

⁷ Anti yang leon a lulual ibat king salikutan nang lugal, lalage ne ing metung a manlasak karing bansa. Daratang ya ban lasakan ne ing Juda. Lakuan na lang lasak-lasak ding siudad na, at ala nang taung makapanuknangan pa karela.

⁸ Inya, misulud kayung imalan a magaspang, ngulangul at manangis kayu, uling ing mabagsik nang mua ning Ginu e pa milako king Juda.

⁹ Kaybat, ngana ning Ginu, King aldong ita, masira la lub ding ari at ding pamuntuk; masdan la ding pari at mangapamulala la ding propeta.

¹⁰ Kanita, sinabi ku, O Ginung Dios, tune mu lang alinlang ding memalen ning Jerusalem! Sinabi mung mika kapayapan, oneng makaumang ya ing espada karela.

¹¹ Daratang ing panaun a mibalita karing memalen ning Jerusalem king ing metung a mapaling angin daratang yang papunta karela ibat king disyerto. E ne kalupa ning banayad a angin a mitatange mu king apa.

¹² Ing daratang a angin a mamintu king utus ning Ginu masikan yang e palak kesa kaniti! Ing Ginu mismu ya ing misasaldak kayatulan king balen na.

¹³ Lawan yu, daratang yang anti ding biga ing kalaban. Mengari lang alisus ding karung panggera na at mabilis la pa karing agila ding kabayu na. Makalunus tamu! Mate tana kanyan! fig,,,,,... daratang yang anti ding biga ing kalaban.,(4:13)fig*

¹⁴ Jerusalem, wasan mu ing e mayap a atyu king pusu mu ban miligtas ka. Kapilan ka kaya tuknang mimisip e mayap?

¹⁵ Magdala lang e mayap a balita ding tubud a ibat king siudad ning Dan at ding ibat karing bunduk-bundukan ning Efraim.

¹⁶ Daratang la ban dinan da lang babala ding bansa at sabian king Jerusalem king daratang na la ding kalaban a manibat king marayung bansa. Kukulio lang laban karing siudad ning Juda,

¹⁷ at paligiran de ing Jerusalem antimo neng babanten de ring lalaki ing marangle. Iti mapalyari uling mig-rebeldi la ding memalen na laban king Ginu. Ing Ginu ya ing migsalita.

¹⁸ Juda, ika ing pepasari kaniti king kekang sarili king uli na ning e makatud mung pamibiebie at ding bage pemaniapat mu. Iti ya ing mapait mung kayatulan.

¹⁹ Ay, kasaket! E ku na apibata ing sakit! Maskup ya ing salu ku! Mabilis ya tibuk ining pusu ku! E ku mipaindatun; daramdaman ku la ding trumpeta at ing kulisak king marangle ning labanan.

²⁰ Salasalisi ing kasiran a daratang; melakuan yang salanta ing bansa Bigla na la mung melasak ding tolda mi; megisi la ding kortina ra.

²¹ Angga kapilan ku kaya tangalan ing labanan, at daramdaman ing kabling ding trumpeta?

²² Ngana ning Ginu, Kamangmangan da pala ding taung kakung pinili; e ra ku akikilala. Mengari la karing anak a alang balu; ala la pang aintindian. Kagaling da king pamaniapat e mayap, oneng ala lang bitasang balu king pamaniapat mayap!

²³ Miglalawe ku king yatu; sira ya at ala yang laman, miglalawe ku king banua; pawang maralumdum ing kakung ikit.

²⁴ Linawe ku la ding bunduk, galgal la; mengari lang duyan ding bunduk-bundukan a yuyuyu ra.

²⁵ Ikit ku king alang tau; ala na agyang ayup a susulapo.

²⁶ Meging disyerto ya ing gabun a mataba; melasak la ding siudad na, uli ning mabagsik nang mua ning Ginu. (

²⁷ Sinabi na ning Ginu king ing mabilug a yatu maging anti yang disyerto, oneng e ne lubus lasakan iti.)

²⁸ Lungkut ya ing yatu, dalumdum ya ing banua. Migsalita ne ing Ginu, at e na bawian ing sinabi na. Inari na na king lub na ing sukat nang daptan, at e ne gumulut king buri na.

²⁹ Tumakas ya ing balang metung kabud maramdam ing inge ding pakakabayu at mamana. Ding aliwa luban de ing kagubatan; at ding mapilan libutad batu karelang ukiatan. Lakuan da la ring karelang siudad, at ala nang manuknangan karela king kapilan man.

³⁰ Jerusalem, ing oras mu dinatang na! Baket makaimalan kang malutu? Baket maka-alahas ka pa at kukulayan ding talukap mung mata? Magpakalagu ka oneng iti muli mung alang kwenta! Likuan da na ka ding malsinta keka, at buri da ing paten ka.

³¹ Dimdam ke ing metung a saingsing a kalupa ning king babaing manganak, ing kulisak ning babaing manganak king pangane na. Iti saingsing ning Jerusalem; abut-abutan na ing pangisnawa na, gagawang na lang gamat na at ngana, Mate na ku kanini! Daratang na lang makamate kaku!

5

¹ Memalen ning Jerusalem, mamulayi kayung pabalikbalik karing dalan! Maglalawe kayu at magumasid! Pakalawe yu! Salugsugan ye ing palengki ban lawan nung ating metung mu mang taung darapat king matulid, at magkapilit maging tapat king Dios. Nung atin kayung akit, patawaran ne ning Ginu ing Jerusalem.

² Agyang sasabian yung sasamban ye ing Ginu, e naman laus king lub yu ing kekong amanu.

³ Manintun yang katapatan ing Ginu. Oneng e yu pinsinan agyang berug na kayu; lemutak na kayu, oneng e kayu migbayu. Masias kayu buntuk karing kekong kasalanan at e bisang gumulut.

⁴ Kanita ku aisip king deti kalulu la mu at mangmang. E ra balu ing karelang daraptan; e ra balu ing aduan ning Dios karela, itang parapat na karela ning Ginu.

⁵ Puntalan ku la ding taung atyu king upaya, at makipagsalita ku karela. Siguradung balu da naman itang aduan ning Dios da, itang buri nang parapat ning Ginu karela. Oneng tinggian da ing kayupayan ning Ginu, at keya e la mebisang mamintu.

⁶ Iti ing sangkan nung inya datang la ding leon ibat king kagubatan, at paten da la; ding asung-gubat a ibat king disyerto paglapakan da la, at gumala lang leopardo libutad ding balen da. Malapak la nung lumual la ding tau karing bale ra, uli ning dakal dang pamikasala at ulit-ulit ing kataksilan da king Dios.

⁷ Nganang kinutang ning Ginu, Baket kailangan ku lang patawaran ding kasalanan da ring taung kakung pinili? Gilutan da ku at sinamba la karing dios a e naman tutu. Pepakan ku la anggang bisa la, oneng dinapat lang pamakipangalugud at linabas da ing karelang panaun karing babaing magtinda king katawan da.

⁸ Mengari la karing mabsing kabayung bulugan; maliswas la king pamagnasa king asawa ning aliwa.

⁹ E ku la wari sukat parusan kareting bage pamaniaptan da at magbengansa king bansang anti kanite?

¹⁰ Parala kung kalaban ban kuturan da lang mulahan dang ubas ding taung kakung pinili, oneng e da la lubus siran deti. Sabian ku mu karela king makagyung paglako da la sanga, uling e la kaku ding sangang deta.

¹¹ Lubus da kung pigtaksilan ding memalen ning Israel at Juda. Aku, ing Ginu, ing migsalita.

¹² E la tapat king Ginu at ngarang sinabi, Siguradung ala yang daptan kekatamu. E tamu dumalan kasakitan; e mika gera o danup keti kekatamu.

¹³ Sinabi da pa king mistula la mung lalabul angin ding propeta at ala ne man karela ing amanu ning Ginu. Makanyan ing malyari karela!

¹⁴ Ngana kanaku ning Ginung Dios a Mayupayang tutu, Jeremias, uling makanyan lang migsalita ding taung deti, gawan ku lang anting api ding amanu ku king asbuk mu. Maging anti lang dutung ding tau at gisanan na la ngan ning api.

¹⁵ Memalen ning Israel, magdala yang bansang manibatan king marayung lugal ing Ginu ban lusuban na kayu. Masikan ya at matua nang bansa; bansa yang e yu aintindian a salita.

¹⁶ Sundalus lang masikan ding mamana na at makamate lang alang lunus.

¹⁷ Laklakan da ing kekayung pupul at ing kekayung pagkabie; paten da la ring anak yung lalaki at babai. Gisanan da lang paten ding sese yung baka at tupa; siran da la ring kekayung tanaman a ubas at higera. Lasakan da la ring karelang sundalus ding siudad yung pakakuta a panaligan yu.

¹⁸ Nganang sasabi ning Ginu, Makanyan man, e ku la lubus gisanan karing aldo deta ding taung kanakung pinili.

¹⁹ Jeremias, potang ikutang da nung nanu ing sangkan nung ba't depat ku la deting sablang bage, sabian mu karela king makananu lang ginulut kanaku at sinuyu karing dios da ring dayuan king mismung bansa ra, makanyan la namang sumuyu karing dayuan king bansang e karela.

²⁰ Ngana ning Ginu, Sabian mu karing lahi nang Jacob at karing memalen ning Juda:

²¹ Pansinan yu iti, ikayung memalen a mangmang at alang balu; atin kayung mata, oneng e na ko man manakit, at atin kayung balugbug, oneng e na ko man makaramdam.

²² Aku ing Ginu, obat ala kayung galang man kanaku? Baket e kayu galgal king arapan ku? Binili ku ing balas anting peka angganan ning dagat, metung a manatiling angganan a e na alipatan. Malyaring malimbuyu ya ing dagat, oneng e ne malyaring lagpus king pampang; malyaring dabungbung masikan ing alun, makanyan man e ne malyaring alipatan.

²³ Oneng ikayu, masias kayu buntuk at mapaglaban; ginulut kayu at likuan yu ku.

²⁴ E yu bitasa mang aisip ing galangan yu ku agyang parala kung uran king panaun ning uran kaybat ning dimla at dirinan da kayung panaun para mupul balang banua.

²⁵ Makanyan man, ding kekayung kasalanan ilang sinabat kareting mayap a bage ban e yu la nabangnan.

²⁶ Manuknangan la ding taung e mayap libutad da ring taung kanakung pinili. Kalupa da la ring taung miyuyumang bitag at manenaya ban dakap ayup; minumang na la ban dakap tau.

²⁷ Nung makananung kakatmuan ne ning metung a mangasu ing aula na karing ayup, makanyan da lang kitmuan ding taung deti ding bale ra karing pibandian a simsam da. Inya mayupaya la at mabandi;

²⁸ mataba la at labis-labis king pamangan. Alang patugut ing dapat dang e mayap. E ra babie karing ulila ing matulid ni papakit nanumang hustisia karing magigipit.

²⁹ Oneng aku, ing Ginu, parusan ku la karing bage depat da. Ganti ku kaniting bansa.

³⁰ Milyari king bansa ing metung a makapangilabut at makatakut a bage:

³¹ pawang kalaraman ing sasabian da ring propeta, ding pari ila ding mag-ari at tutuki king buri da reting propeta, at ala yang bitasang tutul ing balen ku. Oneng nanu kaya ing daptan da potang miwakasan na iting sabla-sabla?

6

¹ Memalen ning Benjamin, tumakas kayu ba kayung miligtas! Lakuan yu ne ing Jerusalem! Tiupan yu ne ing trumpeta king Tekoa at gawa kayung dapug bilang senias king Bet-Akerem. Malapit nang datang ing kasakitan at kasiran a manibat king norti.

² Malagu ya at maslag ing siudad ning Zion, oneng masira ya iti;

³ karin la gawang kampu ding ari ampon ding sundalus da. Padurutnan de ing siudad karing toldang italakad da at magkampu ya ing balang metung king lugal a buri na.

⁴ Sabian da, Magsadia kayung lusuban ya ing Jerusalem! Magsadia kayu! Lumusub tamu king kaugtuan aldo tapat! Oneng ngarang sumabi kanita, Tauli ta na; lalbug ne ing aldo at sisilim na.

⁵ Lumusub tamu agyang bengi na; lasakan ta la ding kuta na ning siudad.

⁶ Inutus na ning Ginung Mayupaya kareting ari ing kuturan da la ring tanaman, at gawa lang buntun gabun ban kubkuban ya ing Jerusalem. Ngana ning Ginu, Parusan ke iting siudad uling mitmu ya king pamanggipit.

⁷ Nung makananu neng apapanatiling malinis ning talaga ing danum na, ing Jerusalem naman papanatilian nang sagiwa ing dapat nang e mayap. Daramdaman ku ing pamanampalasan at pamanyira kilub ning siudad; ala kung akakit nune mu ding taung masakit at ding sugatan.

⁸ Memalen ning Jerusalem, paburen yung maging babala la kekayu deting kaligaligan, nung ali, lakuan da kayu; gawan keng anting disyerto ing kekayung siudad, lugal a alang manuknangan metung man.

⁹ Ngana kanaku ning Ginung Mayupaya, Napnapan de ing Israel antimo nung makananu yang magigisan mayayagtal a bunga ing mulahan ubas. Inya kabang ating panaun iligtas me ing balang metung a agyu mung iligtas.

¹⁰ Ngaku, Ninu ing makiramdam kanaku, nung magsalita ku karela at dinan ku lang babala? Masias la buntuk at e la bisang makiramdam king pasabi mu; gagawan dang pikaylian ing pasabi mu kanaku karela.

¹¹ Ginu, aku man tatablan na na ku ning mua mu karela; e ku na agyung aguantan. Kanita ngana kanaku ning Ginu, Sulung, ibugnus mu ing mua ku karing anak a atyu karing dalan, karing sablang pititipunan da ring kayanakan a lalaki. Magisan la ngang mayakua ding miyasawa, lalaki at babai, at e la miligtas pati ding matua nang matua.

¹² Miyabie la ding bale ra karing aliwa, antimu rin ding marangle ra at ding asawa rang babai. Parusan ku na la ding memalen na niting bansa.

¹³ Magpakabandi ya ing balang metung, maragul at malati, king e ustung paralan; pati ding propeta at pari biasa na lang mamirait karing tau.

¹⁴ Bagya mu nung uluan da la ring taung kanakung pinili; lalawan da lang alang kabaldugan ding sugat da. Ngarang sasabi, Masalese na ing sabla ngening e naman masalese.

¹⁵ Merine la wari inyang depat da la reting makasumaming bage? Ali la! E la bitasang merine. E la man biasang dumine. Inya naman, miragsa la nung makananu lang miragsa ding aliwa. Kabud digpa ku gamat karela, ita na ing kawakasan da. Aku ing Ginu, ing migsalita.

¹⁶ Nganang sinabi ning Ginu karing taung pinili na, Talakad kayu karing salapungan da ring dalan at maglalawe kayu. Pangutang yu la ding matuang dalan at nung nu ya karin ing masanting diling dalan. Karin kayu dumalan at mie kayu king kapayapan. Oneng sinabi ra, E ke bisa!

¹⁷ Kaybat na nita, memili yang taung magbante ing Ginu ban makiramdam king babala a payabut na ning trumpeta. Makanyan man sinabi ra, E ke makiramdam!

¹⁸ Inya ngana ning Ginu, Makiramdam kayu, ikayung aliwang bansa at lawan yu ing malapit nang mapalyari karing taung pinili ku.

¹⁹ Yatu, makiramdam ka! Bilang parusa king sablang e mayap dang nasa, parala kung kasiran karing taung deti uling tinggian da ing turu ku at e da la pemintuan ding amanu ku.

²⁰ Nanu tang ulaga na ning insenso a darala ra kanaku ibat Seba o ning miyayaliwang pabanglu a ibat king marayung bansa? E ku la tanggapan ding ain da o tumula karing ain-sakripisyu da.

²¹ Inya paburen ku lang mitisud at misakab ding taung deti. Mate la ding lalaki, ding tata ampon ding anak at antimu rin ding mikakaluguran at misisiping bale.

²² Ngana ning Ginu, Daratang la ding taung ibat king metung a bansa king norti; magsadia yang makigera ing metung a marayu at mayupayang bansa.

²³ Makasadia na la ding karelang pana at espada; mabagsik la at alang lunus. Mengari la king darabungbung a dagat neng pakasake la karing karelang kabayu. Magsadia na la ban labanan de ing Jerusalem.

²⁴ Ngara ding memalen ning Jerusalem, Dimdam mi na ing balita at mangaina kami; mararaig kami king sindak at king sakit a kalupa na ning king babaing manganak.

²⁵ E ke mangangas lulual king marangle o lumakad man karing dalan, uling pakasandata la ding kekeng kalaban at makatakut ing makapadurut kekami. fig,,,,,Dimdam mi na ing balita at mangaina kami...,(6:24)fig*

²⁶ Nganang sasabi ning Ginu karing taung pinili na, Magsulud kayung imalan a magaspang at magbiling-biling king abu. Tumangis kayung kapait-paitan antimo ing pamanangis yu king kabubugtungan yung anak a lalaking mete. Salake ya king oras a e yu piadian ing datang ban manlasak kekayu.

²⁷ Jeremias, subukan mu la ding taung kanakung pinili nung makananu meng susubukan ing bakal king api, at lawan mu nung nanu lang uri pangatau.

²⁸ Mapaglaban la at masias a buntuk, kasing kasias na la ning tangsu at ning bakal. Baluktut la ngan a dapat; lakad-lakad lang mangalat kapanyiran.

²⁹ Mapali neng mapali ing ornu, oneng e bisang malaso at matanggal ing dinat at kalawang. Alang kabaldugan ing isundu la pang daralisayan ding taung kanakung pinili uling e la milalako detang e mayap.

³⁰ Mayaus lang pilak a e metanggap, uling aku, ing Ginu, ing e tinanggap karela.

7

¹ Tinubud na ku ning Ginu king pasbul dalan ning Templo nung nu la lulub ding memalen na ning Juda ban samba.

² Sinabi na kanaku king talakad ku karin at ibalita ku karela itang pasabi na ning Ginung Mayupaya, ing Dios ning Israel.

³ Ya iti: Alilan yu ing paralan na ning pamibiebie yu at ding bage pamaniaptan yu ban paintulut ku ing pamanatili yung manuknangan keti.

⁴ Tuknang na kayung manalig kareting amanung mapaglinlang: Panatag kami bili keti! Iti ya ing Templo ning Ginu, iti ya ing Templo ning Ginu, iti ya ing Templo ning Ginu!

⁵ Alilan yu ing paralan na ning pamibiebie yu at ding bage pamaniaptan yu. Parehu sa ing lawe yu king metung at metung.

⁶ Tuknangan yu na ing pamagsamantala karing dayuan, karing ulila, at karing babaing mebalu. Tuknangan yu na ing pamakamate karing alang kasalanan a memalen na ning bansang iti. Tuknang na kayung sasambang aliwang dios uling iti ya ing makasira kekayu.

⁷ Nung magbayu kayu, paintulut ku kanita ing pamanatili yung manuknangan keting bansang binie ku karing kekayung makatua bilang pibandian yu king kapilan pa man.

⁸ Lawan yu, binili yu ing kekayung kapanaligan karing amanung mapaglinlang.

⁹ Manako kayu, makamate kayung kalupang tau, makipangalugud kayu, magsalita kayung kalaraman, babie kayung ain-sakripisyu kang Baal, at sasamba kayung aliwang dios a e yu balu.

¹⁰ Daraptan yu la deting bage a kasaman ku at kaybat lalapit kayu at tatalakad king arapan ku, king kanakung sariling Templo at ngayu, Ligtas kami keti!

¹¹ Bala yu galang salikutan ya ing Templo ku para karing mapanako? Akakit ku ing pamaniaptan yu.

¹² Munta kayu king Silo, ing minunang lugal a pinili ku ban karin ku misamban at lawan yu nung nanu ing depat ku kaniti uli da ring kasalanan da ring memalen kung Israel.

¹³ Depat yu la ngan deting sablang kasalanan at agyang migsalita kung ulit-ulit e kayu mebisang makiramdam. E kayu mekibat inyang inaus da kayu.

¹⁴ Inya naman, daptan ku keting Templo ku a panaligan yu itang depat ku king Silo. Daptan ku naman keting lugal a iti a binie ku karing makatua yu at kekayu ing depat ku king Silo.

¹⁵ Itabi da kayu king arap ku a antimo ing depat ku karing kekayung kamaganak, ding memalen na ning Israel. Aku, ing Ginu, ing migsalita.

¹⁶ Ngana kanaku ning Ginu, Jeremias, e na ka manalangin para karing taung deti. E na ka manangis o manalangin para karela; tuknang na kang makisabing mayap kanaku uling e ra ka pakiramdaman.

¹⁷ E mu wari akakit ing pamaniaptan da karing siudad ning Juda at karing siudad ning Jerusalem?

¹⁸ Manipun lang dutung ding anak, patau na la mang api ding lalaki at sasadia da ring babai ing masa a gawan dang bibingka para king diosang ausan dang Reyna ning Banua. Tutugtug da naman ing alak a ain da para karing aliwang dios ban panasakitan da ku lub.

¹⁹ Oneng aku pin kaya ing tune rang panasakitan? Ali, ing mismung sarili da ya ing panasakitan da at pamakarinayan.

²⁰ Inya aku, ing Ginung Dios, ibugnus ku ing mabagsik kung mua keting Templo, karing tau, karing animal, at pati na karing tanaman at ing makatanam king marangle. Maging anti ya king api ing mua ku a e na apatda ning ninuman.

²¹ Taung kakung pinili, lulubusan yu lang durulukan king altar ding mapilan karing ain-sakripisyu at ding mapilan mipaintulut lang kanan yu. Oneng aku, ing Ginu, sasabian ku: mayap pang kanan yu na ngan.

²² Inyang liwal ku la ding makatua yu king Ehipto, ala kung binie karela nanumang utus tungkul karing ain-a-durulukan o karing aliwang ain-sakripisyu.

²³ Oneng inutus ku lang mamintu kanaku ban aku ing maging karelang Dios at ila ding maging kanakung memalen. At sinabi ku karela king mibiebie la agpang king inutus ku karela ban ing sabla-sabla maging masalese para karela.

²⁴ Oneng e ra ku pemintuan ni pekiramdaman man. Lugal king pamintuan da ku, ing depat da ya pin ing penusigan da ing agkat ning masias at e mayap dang pusu at meging e la mayap lugal king maging mayap la.

²⁵ Manibat na kanitang aldo a meko la ding makatua yu karin Ehipto angga na ngening aldong iti, e ku sinawang mitutubud talasuyu kung propeta kekayu.

²⁶ Makanyan man, ala metung man a mekiramdam o minie pansin. Lalu kayung meging masias a buntuk at mapaglaban kesa karing makatua yu.

²⁷ Inya, Jeremias, isalita mu la ngan deting amanu karing memalen ku, oneng e la makiramdam keka; ausan mu la, oneng e la makibat.

²⁸ Sabian mu karela king ing karelang bansa e ya mamintu kanaku, ing Ginung karelang Dios, ni mabibiasa king parusang dagpa karela. Mewala na ing katapatan. E re man babanggitan iti king karelang pamipagsalita.

²⁹ Manangis kayu, memalen ning Jerusalem; ururan yu ing buak yu at iyugse yu. Ikanta ye babo ding bunduk-bundukan ing kanta ning kamatayan, uling aku, ing Ginu, mua ku at tinggian ke ing balen ku.

³⁰ Dinapat lang metung a bage e mayap ding memalen na ning Juda. Binili da la kilub ning Templo ku ding karelang idolo a pikakasaman ku at dinatan de iti.

³¹ Mitalakad lang altar king Kapatagan ning Hinom a ausan dang Tofet ban karin da la iyain king api ding anak dang lalaki at babai. E ku inutus ing daptan da iti; e man bitasang linub king pamisip ku iti.

³² Inya, ing oras datang a e ne mayaus Tofet o Kapatagan ning Hinom, nune mayaus yang Kapatagan a Pipatayan. Karin da la ikutkut ding mete uling ala nang aliwa pang lugal a pikutkutan da para kareti.

³³ Maging pamangan da la ring ayup at ding malyap a animal ding bangke ra at ala metung man a manabuang karela.

³⁴ Maging metung yang disyerto ing bansa. Ituknang ku ing tula at saya karing siudad na ning Juda at karing dalan na ning Jerusalem at pati na ing siwalang masaya karing kasalan.

8

¹ At king panaun a ita ilual la king kutkutan ding butul da ring ari at ding opisyal na ning Juda at antimu rin ding karing pari at ding karing propeta at ding aliwang taung menuknangan king Jerusalem.

² Lugal king tipunan da la ngan at ikutkut, ikalat da la king aslagan na ning aldo, ning bulan at ding batuin a liguran da ampon siyuan at karelang singgunian ampon simban. Maging anti lang dinat ding animal ding butul a pakakalat king gabun.

³ At ding memalen na naman niting e mayap a bansa a miligtas at manuknangan karing lugal nung nu ku la inugse, pagnasan da ing mate na la sa kesa king mie la pa. Aku, ing Ginung Mayupaya, ing migsalita.

⁴ Sinabi na kanaku ning Ginu ing sabian ku iti karing taung pinili na, Nung misakab ya ing metung a tau, e ne wari talakad pasibayu? Nung malili ya king lakad na, e ya wari magbalik king ibatan na?

⁵ Obat mo, O taung kanakung pinili, gilutan yu ku at e kayu bisang magbalik kanaku? Pakakalawat yu ing talan yu karing kekayung idolo at e kayu bisang magbalik kanaku.

⁶ Pekiramdaman da kayung masalese, oneng e yu naman sinabi ing katutuan. Ala pang sinisi metung man kekayu king e mayap a depat na; ala metung man kekayu a mengutang, Nanu ing depat kung pamikasala? Susulung na ning balang metung ing sarili nang lakad, ala yang pamiyaliwa king kabayung sasagasa king labanan.

⁷ Balu da agyang deng ayup a tagak ing oras a magbalik la; balu da ring batu-batu, ding sibad, at ding tarat ing oras na ning pamanalis dang lugal. Oneng, O taung kanakung pinili, e yu la balu ding kautusan ku king pamanibala ku kekayu.

⁸ Makananu yung asabi ing biasa kayu at balu ding kautusan ku? Lawan yu, penalilan da la ring kautusan ku ding e tapat a talasulat.

⁹ Mangapakarine la ding mangabiasa yung lalaki; e ra balu ing daptan da at marakap la. Tinggian da la ring amanu ku; nanung kabiasnan ing makatagan pa ngeni karela?

¹⁰ Inya ipamie ku la ding marangle ra karing aliwang tau at ding karelang asawa karing aliwang lalaki. Ing balang metung, malati at maragul, magkapilit yang mibandi king e ustung paralan. Agyang ding propeta at pari mamirait na la karing tau.

¹¹ Uluan da lang bagya-bagya ding sugat da ring taung kanakung pinili a balamu wari ala lang ulaga. Masalese na ing sabla, ngarang sasabi, kabang ing sabla-sabla e naman masalese.

¹² Taung kanakung pinili, merine kayu wari inyang depat yu la ding bage makasumami? Ali kayu! E kayu bitasang merine; e kayu man biasang mangalare lupa! Inya miragsa kayu nung makananu lang miragsa ding aliwa. Potang parusan da na kayu, ita na ya ing maging wakas yu. Aku, ing Ginu, ing migsalita.

¹³ Buri ku lang tipunan ding taung kanakung pinili antimo nung makananu nang titipunan ning metung a tau ing pupul na, oneng mengari lang tanaman a ubas a alang bunga; mengari lang tanaman a higera a e mamunga; malangi pati bulung da. Inya ibie ku karing dayuan ing gabun da. fig,,,,,... mengari lang tanaman a ubas a alang bunga...,(8:13)fig*

¹⁴ Baket tahimik tamung pakalukluk? ngarang mangutang ding taung pinili na ning Dios. Tara, lungub tamu karing makapader a siudad at karin tamu mate. Inatulan na katamung kamatayan ning Ginung kekatamung Dios; dininan na katamung inuman a ating lasun uling mikasala tamu.

¹⁵ Pignasan tamu ing kapayapan, oneng alang dinatang. Pignasan tamu ing pangapaldan, oneng takut ing dinatang.

¹⁶ Miras na la king siudad ning Dan ding kalaban at daramdaman ta na lang kukurakul ding karelang kabayu. Gagalgal ya ing mabilug a bansa potang gigikgik la ding karelang kabayu. Dinatang la ding kekatamung kalaban ban siran de ing bansa at ing sablang atyu keting bansa, ing kekatamung siudad at ding sablang memalen na.

¹⁷ Ngana ning Ginu, Mingat kayu! Parala kung ubingan a kamandagan libutad yu a e yu malyaring apatunud at panuktukan da kayu.

¹⁸ E malyaring tuknang ing kalungkutan ku; mangaina ya ing kakung pusu. fig,,,,,...mangaina ya ing kakung pusu.,(8:18)fig*

¹⁹ Makiramdam kayu! Ing tangis ding kabalen ku king mabilug a bansa daramdaman ku, Ala ne kaya ing Ginu king Zion? Ing ari ning Zion, ala ne kaya karin? Ing Ginu, ing karelang ari, nganang mekibat, Baket pepamua yu ku karing dinukit yung larawan at karing dayuan a idolo?

²⁰ Ngara ding memalen, Linabas ing kaleldo at meyari na ing pamamupul, oneng e tamu miligtas.

²¹ Medurug ya ing kakung pusu uling medurug la ding taung pinili ku. Tune malungkut ku at alang kalupa ing kalungkutan ku.

²² Ala na waring panulu karin king Gilead? Ala na waring manulu karin? Baket e la manakit kapaldanan ding taung kakung pinili?

9

¹ Sana ing buntuk ku metung yang talaga, at ding kakung mata sibul na la ning lua, ban atangisan ku la aldo at bengi ding kabalen kung pete ra.

² Sana atin kung tuknangan king disyerto nung nu ku la asalikutan ding kabalen ku. E la ngan tapat, taksil la ngan.

³ Parati lang magsalitang kalaraman; kalaraman ing mag-ari king bansa lugal king ing katutuan. Ngana ning Ginu, E ngan mayap ing daraptan da ring taung pinili ku, at e ra ku kikilalanan Dios da.

⁴ Sukat yang mingat ing metung at metung agyang king kakaluguran na, ala nang makapagtiwala king kapatad na; uling ing balang kapatad mapaglinlang yang anti i Jacob, at ing balang metung sisiran neng kakaluguran na.

⁵ Ila ngan karela lang lilinlangan ding karelang kakaluguran, at metung man alang magsalitang katutuan; sinane da lang dila ra king pamaglaram, at e la bisang tuknang darapat kasalanan.

⁶ Salasalisi ing dapat dang katampalasanan, antimu rin ing dapat dang pamaglinlang. Sasabian na ning Ginu: Ding pinili ku ila ding e tatanggap kaku.

⁷ Sasabian na pa ning Ginung Mayupaya: Dalisayan ku lang anti ing bakal, at ibili ku la king kapagsubukan. Dinapat lang e mayap. Nanu pang kakung daptan para karela ngan?

⁸ Anti lang paslung ating lasun ding karelang dila; kalaraman ing karelang sasalita. Mayap ing sasabian ning metung at metung king kalupa nang tau, oneng king kamatutuanan umangnan neng kasiran.

⁹ E ku la wari parusan? E ku wari mablas king bansang anti kanyan? Aku, ing Ginu, ing migsalita.

¹⁰ Ngaku, Tumangis ku para karing kabundukan, at managulele ku para karing marangleng pipagpastulan, uling melangi la at ala nang taung daralan karela. E na mararamdam ing siwala da ring baka; ding ayup at malyap a animal tinakas na la, at e mu na la akit pa.

¹¹ Ngana ning Ginu, Gawan keng katumpuk a kasiran ing Jerusalem, at lugal a tuknangan da ring animal a jackal. Maging disyerto la ring siudad ning Juda, lugal a e na apituknangan ning ninuman.

¹² Kitang ku, Ginu, baket melasak ya ing bansa, obat melangi yang anti ing disyerto? Baket ala metung mang daralan libutad na? Ninu ing ating sapat a kabiasnan para makaintindi kaniti? Kaninu mu pepabalu ban isalita na karing aliwa?

¹³ Pekibat ning Ginu, Iti mepalyari uling gilutan da ring taung pinili ku ing turu a binie ku karela. E ra ku pemintuan ni tiparan ing sinabi ku karela.

¹⁴ Lugal king aku ing karelang tukian, meging masias la buntuk at simban da la ring idolo nang Baal antimo ing tiru da ring makatua da.

¹⁵ Aku, ing Ginung Mayupaya, ing Dios ning Israel, lawan mu ing kanakung daptan; dinan ku lang mapait a tanaman bilang karelang pamangan at dinan lasun ing karelang inuman.

¹⁶ Ikalat ku la karing bansang e ra balu ni abalitan man ding makatua da, at mitubud kung dakal a sundalung pakasandata ban lumaban karela angga king magisan la.

¹⁷ Ngana ning Ginu, Isipan mu ing bage mangapalyari! Ausan mu la ban datang ding managulele, ding babaing magkanta neng ating mete.

¹⁸ Ngara ding tau, Sabian mu karela king mamalagua lang magkantang malungkut angga king tumulu ing lua karing mata mi, at talukab ming mata mabasa la king pamanangis.

¹⁹ Pakiramdaman mu ing pamanangis ning Zion: Melasak kami! Ganap na ing kekeng kamarinayan! Sukat mi neng lakuan ing bansa mi; piglasak da lang bale mi.

²⁰ Ngaku, Babae, pakiramdaman yu ing sasabian na ning Ginu, pakapakiramdaman yu ing keyang amanu. Turuanan yu lang manangis ding anak yung babai, at magkantang malungkut ding kakaluguran yu.

²¹ Dinatang ing kamatayan karing kekatamung awang, at linub karing palasyu tamu; gisan na la ding anak a atyu karing dalan, at ding kayanakan a lalaki king palengking karinan.

²² Nukarin man pakakalat lang bangke; anti lang dinat a makabuntun karing marangle, anti lang aptas a trigung likuan da ring papalut, at metung man alang mamulut. Iti ya ing pasabi na kaku ning Ginu para kekayu.

²³ Ngana ning Ginu, Ing beluan ding lalaking biasa e ra sukat pagmayabang ni ing sikanan ding lalaking masikan ni ing pibandian ding lalaking dakal a pibandian.

²⁴ Nung ing ninuman bisa yang magmayabang, ing sukat nang pagmayabang ya ing keyang beluan at aintindian tungkul kaku, uling ing lugud ku e kukupas at ing mayap at matulid ya ing kakung daraptan. Ila deti ring bage a makaibie tula kaku. Aku, ing Ginu, ing migsalita.

²⁵ Ngana pang sasabi ning Ginu, Daratang na ing panaun ban parusan ku la

²⁶ ding memalen na ning Ehipto, Juda, Edom, Ammon, Moab, at ding sablang manuknangan king disyerto a makuyad a buak. Mesirkunsisyun la ngan deting tau, oneng e ra tiparan ing kasunduan a lalarawan na niti. Ala metung man kareting tau at pati na karing king Israel ing tinupad king kanakung kasunduan.

10

¹ Memalen ning Israel, pakiramdaman yu ing mensahi na ning Ginu para kekayu.

² Ngana, E yu pakiapusan ing ugali da ring aliwang bansa; e kayu sukat magugulu isip karing tanda king banua, agyamang ding aliwang bansa magugulu la.

³ Ala yang ulaga ing relihiun da reting tau. Kinutud de ing metung a tanaman king gubat; dinukit ne ning magaling a pangamat,

⁴ at pelamutian deng gintu at pilak. Pinaku de ban e ya miragsa.

⁵ Anti la waring tau-tauan libutad da ring tamnanan a pipinu; e la makapagsalita; kailangan lang pusanan uling e la makalakad. E kayu tatakut kareting idolo; e ra kayu ananu balang ni alayu karela ing gawang kayapan. fig,,,,,...E la makapagsalita; kailangan lang pusanan...,(10:5)fig*

⁶ Ginu, ala kang kalupa: mayupaya ka, marangal ya at mayupaya ing kekang lagyu.

⁷ Ninu ing e mitakutan keka, ika a ari da ring bansa? Sukat lang tumakut keka. Ala kang kalupa karing sablang lalaki rang biasa ding bansa o kenu man karing karelang ari.

⁸ Bolang la ngan at mangmang. Nanung abalu ra karing idolong dutung?

⁹ Ding idolo da belutanan lang pilak a ibat Tarsis at king gintung ibat king Ufas; pawa la ngang dapat da ring magaling a pangamat. Asul at muradu ing imalan a pasulud da a gewa ding magaling a gagawang imalan.

¹⁰ Oneng ika, Ginu, ing tune Dios, ika ing mabie Dios at alang anggang ari. Gagalgal ya ing yatu potang mimua ka; e ra apibata ding bansa ing kekang mua. (

¹¹ Ikayung taung pinili ku sukat yung sabian karela king magisan la ding kikilalanan dang dios uling aliwa naman ila ding ginawa king yatu at king banua. Mawala la keti king yatu.)

¹² King uli ning upaya ning Ginu, gewa ne ing yatu; king kabiasnan na lelangan ne ing yatu at lidlad ding banua.

¹³ King amanu na bibiung ing dakal a danum karing banua; peparala na lang biga ibat karing wakas ning yatu. Gagawa yang kildap ban kislap libutad ning uran, at tutubud na ing angin ibat king silid nang pisisinupan.

¹⁴ Kabud akit ding lalaki iti, akilala ra ing karelang kamangmangan, at ing ala dang kabaldugan; balang pande a gagawa karing idolo masira ya lub, uling ding idolong gagawan na e la tutu at e la mabie.

¹⁵ Ala lang kabaldugan at maglinlang la; malasak la potang datang ya ing Ginu.

¹⁶ E re kalupa ing Dios nang Jacob; ya ing linalang king sabla-sabla at pinili ne ing Israel ban maging sarili nang bansa. Ginung Mayupaya ing lagyu na.

¹⁷ Memalen ning Jerusalem, makubkub kayu karing kalaban yu! Magbalutan na kayu.

¹⁸ Ngeni iyugse na kayu ning Ginu lual na niting bansa; ibasibas na na kayu angga king ala nang mitagan metung man kekayu. Ing Ginu ya ing migsalita.

¹⁹ Ngarang menangis ding memalen na ning Jerusalem, Grabi ing kekeng pangapanasakit! E la bisang kumayap ding kekeng sugat, at bala mi apibata mi.

²⁰ Mesira la ding kekeng tolda, ding lubid da mepatlud la. Ding kekeng anak meko la ngan; alang sumaup ban ding tolda mitalakad lang pasibayu; ala metung mang misabit karing panabing.

²¹ Mekibat ku, Mangmang la ding manimuna tamu; e la maniawad payu king Ginu. Iti ya ing sangkan nung inya e la migtagumpe, at ikua rang mikalat-kalat ding sasakupan dang tau.

²² Makiramdam kayu! Ating balitang dinatang! Ating maragul a alingongo king bansang atyu king norti; ding sundalus na gawan da lang disyerto ding siudad ning Juda, maging lugal da la ring animal a jackal.

²³ Ginu, balu ku king ala metung mang makibalu king sarili nang pupuntalan; ala metung mang makiupaya king sariling bie na.

²⁴ Ginu, disiplinahan mo ding taung pinili mu; oneng e mu ke sa igpitan ni paparusan neng mua ka; uling ita na ing maging kawakasan mi.

²⁵ Ibaling mu ing mua mu karing bansang keka e sasamba, at karing taung e tatanggap keka. Pete da lang taung pinili mu, lesak da kaming e mu nanu at ing bansa mi liklak de at gisan.

11

¹ Ngana kanaku ning Ginu,

² Pakiramdaman mu ing kayaduanan na niting kasunduan. Sabian mu karing memalen na ning Juda at Jerusalem

³ king aku, ing Ginung Dios ning Israel, isumpa ke ing ninumang e mamintu kareting kayaduanan na ning kasunduan.

⁴ Iti ya ing kasunduan a pikayari mi ding makatua yu kanitang liwal ku la karin Ehipto, ing bansang mengaring milalablab a ornu para karela. Sinabi ku karela king pamintuan da ku at tuparan ing sablang inutus ku. Sinabi ku karela king nung pamintuan da ku ila ding maging taung pinili ku at aku naman ing maging Dios da.

⁵ Tuparan ku kanita ing pangakung binie ku karing karelang makatua, king ibie ke ing mayap at matabang gabun a ngeni bandi ra na. Ngaku, Opu, Ginu.

⁶ Ngana kanita ning Ginu kanaku, Munta ka karing siudad na ning Juda at karing dalan ning Jerusalem. Ibalita mu karin ing mensahi ku at sabian mu karing memalen king dinan dong pansin ding kayaduanan na ning kasunduan at pamintuan da la.

⁷ Inyang liwal ku la ding makatua da karin king Ehipto, sinabi kung matimid karela king pamintuan da ku at angga man ngeni dirinan ku lang babala ding tau.

⁸ Oneng e ra ku pekiramdaman o pemintuan. Bagkus, sindu na ning balang metung ing kesiasan nang buntuk at ing dapat nang e mayap. Inutus ku karela king tuparan de ing kasunduan, oneng e la mebisa. Inya naman pepagpa ku karela ing sablang parusang mababanggit king kasunduan.

⁹ Ngana pa kanaku ning Ginu, Atin lang tatangkang laban kanaku ding memalen na ning Juda at Jerusalem.

¹⁰ Migbalik la karing dapat dang pamikasala ding makatua da at tinangging tupad king parapat ku karela. Sinamba lang aliwang dios. Parehu lang linabag ing Israel at ing Juda king kasunduan a pikayari mi ding makatua da.

¹¹ Inya ngeni, aku, ing Ginu, babie kung babala karela king paratang kung kasiran karela at e la makatakas. At e ku la pakiramdaman potang maniawad lang saup.

¹² Mamunta la kanita ding memalen na ning Juda at Jerusalem karing aliwang dios a dirinan dang ain-sakripisyu at pasaup la karela. Oneng deting aliwang dios e da la malyaring aligtas potang datang na ing kasiran.

¹³ Nung makananu la karakal ding siudad ning Juda, makanyan la naman karakal ding aliwang dios ding memalen na. Menalakad la namang dakal a altar ding memalen na ning Jerusalem ban pidinan dang ain-sakripisyu para kang Baal, ing makasumaming kikilalanan dang dios. Nung makananu la karakal ding dalan ning Jerusalem, makanyan la naman karakal ding altar a telakad da para kang Baal.

¹⁴ Jeremias, tuknang na kang manalangin at makisabing mayap kanaku para kareting tau. E ku la pakiramdaman potang atyu la king kaligaligan at potang maniawad lang saup.

¹⁵ Ngana ning Ginu, Darapat lang e mayap a bage ding taung kanakung pepakamalan. Nanu ing matulid dang lungub king kanakung Templo? Isipan da galang king asabat da ing kapahamakan king kapamilatan na ning pamangawa rang pangaku at pamamie dang ain-sakripisyung animal? Tumula la mo kaya kanita?

¹⁶ Kanitang misan inaus ku lang mabulung a tanaman a olibong memungang dakal karing maniaman a bunga; oneng ngeni, kayabe ning biung a anting duldul, silaban ku la ding bulung na at pamaklian ding sanga na. fig,,,,,... silaban ku la ding bulung na...,(11:16)fig*

¹⁷ Aku, ing Ginung Mayupaya, ing mitanam king Israel at Juda; oneng ngeni babalan ku lang kapahamakan. Ila mismu ding makipasari kaniti uling dinapat lang e ustu; pepamua da ku king kapamilatan na ning pamamie dang ain-sakripisyu kang Baal.

¹⁸ Pepabalu na la kanaku ning Ginu ding tangka da ring kalaban ku laban kanaku.

¹⁹ Mengari ku king mamung tupa a kinua ra at liwal ban paten, at e ku balu king ding e mayap a bage binalak da para kanaku la pala. Ngara, Tara, kuturan ta ya ing tanaman a ating bunga; paten ta ne ban lubus neng makalinguan.

²⁰ Kanita ngakung menalangin, Mayupayang Ginu, metung kang ukum a e mangabiran; paniubukan mu ing pamisip da at panamdam ding tau. Binili ku karing gamat mu ing kasu ku; paburen mung akit ku ing pamanablas mu kareting tau.

²¹ Pagnasan da kung mate ding lalaki na ning Anatot. Sinabi ra kanaku king paten da ku nung isundu ku ing pamanaral karing amanu na ning Ginu.

²² Inya ngana ning Ginung Mayupaya, Parusan ku la! Mate la king gera ding kayanakan dang lalaki; mate la king danup ding anak da.

²³ Tikda ku na ing panaun para ipagpa ku ing kapahamakan karing memalen na ning Anatot. At metung man karela alang mitagan potang datang na ing panaun a ita.

12

¹ Ginu, nung makipagmatulid ku keka tungkul king kakung kasu, mayakit king ika ing maki matulid. Makanyan man buri da ka pang pangutnan tungkul king hustisia. Baket mipapala la ding taung makasalanan? Baket magtagumpe la ding taung e tapat?

² Tatanam mu la at magyamut la; daragul la at mamunga. Mayap ngan ing sasabian da tungkul keka, makanyan man marayu na la man keka ding pilubluban da.

³ Oneng ika, Ginu, balu mu ku; ing daraptan ku akakit mu at balu mu nung nu anti ing lugud ku keka. Kaladkaran mu la't ilako deting tau anting tupang malapit da nang katatan; banten mu la angga king oras a paten da la.

⁴ Angga kapilan ing malangi ya ing bansa mi pati ing dikut karing marangle? Mate la ding ayup at animal uli ning dapat dang kasalanan ding kekeng kabalen, ding memalen a sasabi king e mu akakit ing karelang dapat.

⁵ Ngana ning Ginu, Jeremias, nung mapapagal ka king pamakisaglulu karing tau, makananu kang makapakisaglulu karing kabayu? Nung king malualas a lugal ala kang yaguanta, makananu kang maguanta libutad ning kagubatan king lele ning Jordan?

⁶ Pati ding kapatad mung lalaki, mismung katubale mu, pigtaksilan da ka; mekiabe la king pamagtaksil keka. E ka magtiwala karela agyang magsalita lang masanting a amanu keka.

⁷ Ngana ning Ginu, Pepaburen ku ne ing Israel; kaku yang tinggian ing kakung piling bansa. Ding taung kakung pakamalan king upaya ding karelang kalaban karin ku na la ngan pepailalam.

⁸ Ginulut la kaku ding taung pinili ku; gagaleung la kaku anti ing leon king gubat, inya kesaman ku na la man.

⁹ Mengari yang ayup ing bansang kakung pinili a mingatba-ngatba rang sasalakayan ding ayup a balawe. Sulung, agkatan lang malyap a animal ban datang at makisulu la naman.

¹⁰ Pinyira de ring dakal a pamuntuk a dayuan ing mulahan kung ubas; dekurak da la ring kakung marangle; gewa reng disyerto ing malagu kung bansa.

¹¹ Gewa reng alang kabaldugan a bansa; alang kasilbian king kakung arapan. Meging disyerto ya ing mabilug a bansa, metung man ala nang magmalasakit.

¹² King malualas at karing matas nang lugal ning disyerto dinatang la ding lalaki ban maniamsam. Peparatang kung gera ban siran ya ing mabilug a bansa; ala metung mang makapibiebie king kapayapan.

¹³ Tinanam lang trigu ding taung pinili ku, oneng dikut ing karelang pinupul; megobra lang anggang binit da, oneng ala lang apala. Uli ning kakung mabagsik a mua e memunga ing karelang tenam.

¹⁴ Ngana ning Ginu, Atin kung buring sabian karing kasiping nang bansa ning Israel a minyira king binie kung gabun king balen kung Israel. Ilako ku la deting taung e mayap karing karelang bansa; mangari la king tanaman a meputput. Iligtas ke ing Juda king gamat da.

¹⁵ Oneng lunusan ku la kaybat ku lang leko; ibalik ku la ding balang bansa king mismung bansang tuknangan da.

¹⁶ Nung tanggapan de king mabilug dang pusu ing relihiun da ring taung kanakung pinili at nung isumpa ra, Ing Ginu mabie ya antimo nung makananu da lang pepasumpan kang Baal ding taung kanakung pinili. Maging dake na la kanita ning balen a kanakung pinili at mipala la.

¹⁷ Nung e ya mamintu ing isanu mang bansa, lubus ku ne kanitang bagutan at siran. Aku, ing Ginu, ing migsalita.

13

¹ Sinabi na kanaku ning Ginu king mako ku at saling mapilan a salol a linen at kaybat isulud ku la. Oneng sinabi na king e ku la tatalbug king danum.

² Inya seli ku la at sinulud.

³ Kaybat na nita, migsalita yang pasibayu kanaku ing Ginu. Ngana,

⁴ Munta ka king Ilug ning Eufrates. Dalan mu la ding salol a linen at isalikut mu la king siwang da ring batu.

⁵ Inya meko ku at selikut ku la king lele na ning Ilug ning Eufrates.

⁶ Kalabas ning mapilan a panaun, sinabi na kanaku ning Ginu king magbalik ku king Eufrates at kuanan ku la ding salol a linen.

⁷ Inya migbalik ku. Inyang miras ku king lugal nung nukarin ku la selikut, ikit ku king mesira la at e na la malyaring magamit.

⁸ Kaybat na nita, migsalita yang pasibayu kanaku ing Ginu. Ngana,

⁹ Makanyan kung siran ing ketasan nang lub ning Juda at ing maragul nang ketasan lub ning Jerusalem.

¹⁰ E la mebisang mamintu kanaku deting taung e mayap. Masias la pa mu rin a buntuk at tune e mayap; sinamba la at sinuyung aliwang dios. Uli na niti, maging anti la kareting salol a linen a e na malyaring magamit.

¹¹ Nung makananu yang matalik ing salol king awakan ning tau, makanyan ku namang pagnasan ing maging matalik la pangakalawat kanaku ding memalen na ning Israel at ning Juda. Depat ku iti ban ila ding maging taung kanakung pinili at magdalang kapurian at dangalan king kanakung lagyu. Oneng e la bisang memintu kanaku.

¹² Ngana kanaku ning Ginung Dios, Jeremias, sabian mu karing memalen na ning Israel king ing balang metung a banga a lulanan alak sukat yang katmuan alak. Ipakibat da king balu ra king ing balang bangang lulanan alak sukat yang katmuan king alak.

¹³ Sabian mu kanita karela king aku, ing Ginu, katmuan ku lang alak ding memalen na niting bansa angga king lasing la; ding ari a lahi nang David, ding pari, ding propeta, at ding sablang memalen na ning Jerusalem.

¹⁴ Kaybat na nita, pipupugkulan ku la anti ding banga, pengari at anak. E ku malunus karela ni pakit ganaka karela. E na ku malyaring pigilan ning lunus king pamakamate ku karela.

¹⁵ Memalen ning Israel, migsalita ya ing Ginu! Magpakumbaba kayu at makiramdam.

¹⁶ Galangan ye ing Ginu, ing kekong Dios, bayu ya paratang dalumdum at bayu kayu mitakid karing bunduk; bayu na alilan misnang kapal a dalumdum ing sala a kekong asahan.

¹⁷ Nung e kayu makiramdam, lihim kung kumiak uli ning kekong ketasan; Kumiak kung e makanyan-kanyan at ing lua ku magus, uling ding taung pinili ning Ginu mayakua la at maging bihag.

¹⁸ Ngana pa kanaku ning Ginu, Sabian mu king ari at kang ima na king kuldas na la king karelang tronu, uling mebalag na la karing buntuk da ring malagung korona ra.

¹⁹ Mipaligiran na la ding siudad king dane mauli na ning Juda; ala metung man a makalabas karela. Mebihag la at miyugse ding sablang memalen na ning Juda karing aliwang bansa.

²⁰ Jerusalem, lawan mu! Daratang lang ibat king norti ding kekang kalaban! Nu la karin ding taung pagmaragul mu, ding taung mipanibala king lingap mu?

²¹ Nanu ing sabian mu ngening ding taung isipan mung kakaluguran mu ila pala mismu ding lumusub at sumakup keka? Manamdaman kang anti ing babaing manganak.

²² Nung ikutang mu ba't milyari ngan iti keka, ba't megabak ing imalan mu at melapastangan ka puri, iti milyari uling ing kasalanan mu tune alang kalupa.

²³ Ayalilan na wari ning taung matuling ing kule na ning balat na; alako na la kaya ning animal a leopardo ding pultik na? Nung arapat da, ikayung alang daraptan a mayap malyari kayu namang mabiasang dapat king matulid.

²⁴ Ikalat na kayu ning Ginu anti ing are a ituki na ning angin ning disyerto.

²⁵ Iti ya ing sinabi nang maging kalma yu. Iti ya ing inari na king lub nang daptan na kekayu, uling kelinguan ye at uling menalig kayu karing e tutung dios.

²⁶ Ing Ginu mismu ya ing lumabas kekayu at ilantad na kayu king kamarinayan.

²⁷ Ikit na kayung darapat karing bage kasaman na. Ikit na kayung minta karing dios da ring paganu a atyu karing bunduk-bundukan at marangle; ikit na kayung anti ing lalaking magnasa king asawa na ning kasiping nang bale o anti ing kabayung bulugan a tatagal king kabayung babai. Memalen ning Jerusalem, mitakda na ing kapahamakan a dugpa kekayu! Kapilan kayu pa kaya magbayung bie?

14

¹ Nganang migsalita ning Ginu kanaku tungkul king lawi,

² Manangis ya ing Juda, mamamate la ding siudad na; pakapase la king gabun ding memalen na uli ning lungkut da, at kukulisak yang maniawad saup ing Jerusalem.

³ Tutuburan da la ring mabandi ding karelang ipus ban kumang danum; pupunta la reti karing talaga, oneng danum ala lang akua; magbalik lang alang laman ding karelang banga. Mimina la lub at e ra balu ing daptan da, at tatakpan da lang lupa ra. fig,,,,,... magbalik lang alang laman ding karelang banga.,(14:3)fig*

⁴ E la mipaindatun ding ortelanu; tatakpan da lang karelang lupa, uling alang uran a mananabu at ing gabun mengabtak na.

⁵ King marangle ing gaindung usa lalakuan ne ing bayung bait a biseru na, uling alang dikut king lugal a ita.

⁶ Pakatalakad la karing taluktuk ding bunduk-bundukan ding malyap a asno, anti la karing animal a jackal a abut-abut pangisnawa; pupula la ring mata ra, uling ala lang akit a pamangan da.

⁷ Mamaus la kaku ding taung kakung pinili. Ngara, Agyang ing kasalanan mi tetestigu laban kekami, makanyan man, Ginu, saupan mu kami antimo ing pengaku mu. Gilutan da kang e mu misan; mikasala kami keka.

⁸ Ika mung bukud ing kapanayan ning Israel, ika ing magligtas kekami king kapahamakan. Baket mengari kang dayuan king kekeng kakarinan, obat anti kang maglakbe a manatili mung misan a bengi?

⁹ Baket mengari ka king lalaking misdan, anti ing sundalung alang sikanan sumaup? Makanyan man, Ginu, atyu ka libutad mi, ikami ding taung kekang pinili; e mu ke lalakuan magdili-dili.

¹⁰ Nganang sasabi ning Ginu tungkul kareting tau, Aburi da ing tatakasan da ku at e la mebisang mamigil king karelang sarili. Inya e ku la katulan. E ku kalinguan ing depat dang kamalian at parusan ku la uli da ring karelang kasalanan.

¹¹ Ngana kanaku ning Ginu, E mu na aduan pa kanaku ing saupan ku la deting tau.

¹² E ku pakiramdaman ing pamaniawad dang kasaupan agyang mag-ayunu la pa; e ku mu rin tumula karela agyang dinan da ku pang durulukan a sakripisyu at ain-a-binutil. Bagkus, paten ku la king gera, king danup, at king sakit.

¹³ Kaybat na nita sinabi ku, Ginung Dios, balu mu king ding propeta sasabian da karing tau king e mika gera o danup uling ita ya ing pengaku mu. Sasabian da pa king bukud mung ing kapayapan ya ing mag-ari king bansa.

¹⁴ Oneng ngana ning Ginu, King lagyu ku magsalita lang kalaraman deting propeta; e ku la tinubud ni dininan nanumang kautusan a magsalita agyang metung mu mang amanu. E la ibat kanaku ding vision a amanuan da, ding karelang pamamanula; bage lang alang ulaga a bunga namu ning karelang kaisipan.

¹⁵ Aku, ing Ginu, sasabian ku keka ing daptan ku kareting propetang e ku naman tinubud, oneng magsalita la king kapamilatan na ning lagyu ku at sasabi king ing gera at danup e miras keting bansa: ila ding paten ku king gera at danup.

¹⁶ Makanyan la namang mate ding taung selitanan da kareting bage. Miyugse la ding karelang bangke karing dalan na ning Jerusalem at ala metung mang mangutkut karela. Iti ing mapalyari karela ngan pati na karing karelang asawa at anak. Papamayaran ku la king depat dang e mayap.

¹⁷ Inutus na kanaku ning Ginu king sabian ku karing tau ing tungkul king kanakung kalungkutan at sabian ku: Mananu sanang ing lua karing kakung mata tumulu aldo't bengi, mananu na sanang e tutuknang mamagus, uling malalam la pangasugat ding kakung kabalen, at lubus lang misakitan.

¹⁸ Neng lulual kung pupunta karing marangle, kaku lang akakit ding bangke ra ding lalaking mete king gera; potang pupunta ku karing balen, kaku lang akakit ding taung mamamate king danup. Susundu da ring propeta at ding pari ing obra da, oneng e ra balu ing daraptan da.

¹⁹ Ginu, lubus mu ne waring tinggian ing Juda? Kasaman mu la wari ding memalen ning Zion? Baket penasakit mu keng masolu angga king e na ke malyaring maulu? Menintun keng kapayapan, oneng iti alang binungang mayap; manaya keng maulu, oneng kaligaligan ing dinatang.

²⁰ Mikasala kami keka, O Ginu; tatanggapan mi ing kekeng sariling pamikasala at ding kasalanan ding kekeng makatua.

²¹ Ganakan mu la sa ding pangaku mu; e mu ke sa lalakuan, e me sa bibili king kamarinayan ing Jerusalem, ing karinan ning marangal mung tronu. E me sa sisiran ing kasunduan a gewa mung kayabe mi.

²² Ala metung man karing idolo ding bansa a makaparatang uran; ing banua king sarili na e makabaldug uran ditak man. Binili mi ing kapanayan mi keka, O Ginung kekeng Dios, uling ika mu ing makarapat kareting bage.

15

¹ Kanita ngana kanaku ning Ginu, Agyang pang i Moises at i Samuel ilang talakad makisabing mayap kanaku, e ku la pa mu rin pakitanan nanumang lunus deting tau. Itabi mu la; palakuan mu la king arapan ku.

² Potang ikutang da keka nung nu la sukat munta, sabian mu king sinabi ku ing anti kaniti: Mitakda lang mate ding mapilan king sakit; inya ita ya ing kararasan da! Mitakda lang mate ding aliwa king gera; inya ita ya ing kararasan da! Mitakda lang mate ding aliwa king danup; inya ita ya ing kararasan da! Mitakda lang mabihag ding aliwa; inya ita ya ing kararasan da!

³ Aku, ing Ginu, inari ku na king lub ku king apat lang makatakut a bage ding mangapalyari karela: mate la king gera; itaginis da la ring asu ding bangke ra; ding ayup ilang mangan karela, at ding malyap a animal ilang laklak king mitagan.

⁴ Mangatakutan la karela ding sablang tau keti king yatu uli na ning depat nang Manase, ing anak nang Hezekia, king Jerusalem kanitang ya ing ari na ning Juda.

⁵ Sasabian na ning Ginu, Memalen ning Jerusalem, ninu mo ing malunus kekayu at ninu ing tumangis kekayu? Ninu mong taung mangabala agyang saguli mu ban komustan na kayu?

⁶ Ikayu ding taung tinanggi kaku; gilutan yu ku. Inya pekirasnan da kayu at lesak, uling sinawa na kung mamigil king mua ku kekayu.

⁷ King balang balen ning bansa anti kayung are a silbag ku king angin. Taung kakung pinili, lesak da kayu at pete ding anak yu, uling e kayu tinuknang king dapat yung e mayap.

⁸ Mas dakal la ding babaing mebalu king kekong bansa kesa king balas king pampang ning dagat. Pete ku la ding anak yung lalaki agyang kayanakan la pa, at pepalungkutan ding karelang ima. Bigla ku lang lisuban a kayabe ing takut at galgal.

⁹ Mebungsul ya ing imang kebatingan pitung anak, patad-patad ya pangisnawa. Ing kayaldawan na meging karalumduman ya; milako ya dangalan at kinatmu king kamarinayan. Paburen ku lang paten da kayu ding kekong kalaban, ikong angga ngeni mabie pa. Aku, ing Ginu, ing migsalita.

¹⁰ Masakit ing kabilian ku! Baket beit na ku pa ning ima ku keti king yatu? Mapipilit kung makipate at makiargu king balang tau ning bansa. E ku peparam salapi ni menandam, makanyan man paniumpa da ku.

¹¹ Ginu, mananu na sanang ding sablang sumpa ra mipaltutu la nung wari't e ku mekasuyung tapat keka, nung e ku mekisabing mayap keka king lagyu da ring kanakung kalaban inyang atyu la king kaguluan at kagipitan. (

¹² Ala metung man a makapakli king bakal lalung-lalu na ing bakal a semutanan tangsu a ibat king norti.)

¹³ Ngana kanaku ning Ginu, Mitubud kung kalaban a maniamsam king pibandian at ban parusan la karing kasalanan a depat da king mabilug a bansa.

¹⁴ Gawan ku lang ipus da ring karelang kalaban king bansang ala lang bitasang kamalayan, uling mengaring api ing mua ku at mikakalabkab king kapilan pa man.

¹⁵ Kanita sinabi ku, Ginu, ika balu mu. Ganakan mu ku at saupan mu ku. Yablas mu ku karing liligalig kanaku. Tuknangan mu na lang pibabatan ban e la magtagumpe king nasa rang paten da ku. E mu sa kakalinguan king insultuan da ku king uli mu.

¹⁶ Migsalita ka kanaku at pekiramdaman ku ing balang amanu mu. Keka ku, Ginung Dios a Mayupaya, inya ding kekang amanu kitmuan deng tula at ligaya ing pusu ku.

¹⁷ E ku ginamit ing panaun ku king pamagkusuelu at pamagsayang kayabe da ring aliwa. Bilang kapamintuan karing utus mu mibiebie kung sarili ku at kitmuan mu kung mua karing tau.

¹⁸ Baket manatili kung magkakasakit? Baket e la mau-ulu ding sugat ku? Baket e la kakayap? Buri mu wari ing mabigu ku kalupa ning batis a lalangi neng kaleldo?

¹⁹ Inya nganang mekibat kanaku ning Ginu, Tanggapan da ka nung magbalik ka at pasibayu kang maging talasuyu ku. Nung magsalita ka karing bage makabaldugan, lugal king magsalita ka ketang alang kabaldugan, kanita pasibayu kang maging kanakung propeta. Magbalik la keka ding tau at e na kailangan pa ing lumapit ka karela.

²⁰ Gawan da kang anti ing pader a tangsu arapan da ring taung deti. Pakipaten da ka man ding tau oneng e ra ka sambutan. Mantabe ku keka at ingatan da ka.

²¹ Iligtas da ka king gamat da ring taung e mayap at tampalasan a tau. Aku, ing Ginu, ing migsalita.

16

¹ Pasibayu yang migsalita kanaku ing Ginu. Ngana,

² E ka makiasawa o mikakayanak keting lugal.

³ Sabian ku keka ing mapalyari karing anak a mibait keti at ing mapalyari karing pengari da.

⁴ Mate la karing makatakut a sakit at ala metung mang manangis at mangutkut karela. Mangari la ding bangke ra king dinat da ring animal a mitambak king gabun. Mate la king gera o king danup at maging pamangan da la ring ayup at ding malyap a animal ding bangke ra.

⁵ E ka lulub king bale nung nukarin ating pamagpaldas. E ka manangis para kaninu man. E ku na la dinan kapayapan ding taung kanakung pinili o pakitanan mang lugud at lunus.

⁶ Mate ya ing mabandi at ing kalulu king bansang iti, oneng alang mangutkut o manangis para karela. Ala metung mang gumalus king sarili na o maniatsat king buntuk na ban ipakit na ing lungkut na.

⁷ Ala metung mang makisulung mangan o minum abe ning ninuman ban pasiknangan ne lub potang mate ya ing kaluguran na. Ala metung mang pakit pamakirame agyang king kematen tata na o ima na.

⁸ E ka lulub king bale a ating taung magtau. E ka makiluklukan karela king pamangan at pamaninum.

⁹ Aku, ing Ginung Mayupaya, ing Dios ning Israel. Makiramdam ka kening kanakung sabian. Patuknangan ku ing inge ning tula ampon saya at pati na ing masigla rang pamagsaya ding kakasal. Akit da ring tau ing mangapalyari keti bayu la mate.

¹⁰ Potang sabian mu ngan iti karela, ikutang da obat birian ku lang parusan mabayat. Ikutang da nung nanung kamalian ing depat da at nung nanung kasalanan ing depat da laban king Ginung karelang Dios.

¹¹ Sabian mu kanita karela king ing Ginu sinabi na, Gilutan da ku ding kekong makatua at sinamba la at sinuyu karing aliwang dios. Gilutan da ku at e da la tiparan ding utus ku.

¹² Oneng lalung grabi ing pemaniapat yu kesa karing makatua yu. Masias kayu ngan a buntuk at e mayap at e mamintu kanaku.

¹³ Uli na niti, iyugse da kayu king aliwang bansang e yu balu o ding makatua yu. At karin aldo't bengi kayung sumuyu karing aliwang dios at aku e ra kayu pakitanan nanumang lunus.

¹⁴ Ngana ning Ginu, Daratang ne ing aldo nung kapilan ding tau e na la sumpa kanaku, ing Dios a mabie a milual karing memalen na ning Israel karin king Ehipto.

¹⁵ Nune sumpa la kanaku bilang Dios a mabie a milual karing memalen na ning Israel ibat king metung a bansa king dane norti at karing sablang aliwa pang bansa nung nu ku la inugse. Ibalik ku lang pasibayu king sarili dang bansa, king bansang binie ku karing makatua da. Aku, ing Ginu, ing migsalita.

¹⁶ Ngana pa ning Ginu, Mitubud kung dakal a manasan ban datang at dakap kareting tau. Kaybat mitubud kung dakal a mangasu a manintun karela king balang bunduk at bunduk-bundukan at karing lukib libutad da ring batung mangaragul.

¹⁷ Akakit ku ing sablang daraptan da. Alang nanumang bage a makasalikut kanaku; e la miligtas ding kasalanan da karing mata ku.

¹⁸ Papamayaran ku lang aduang besis king depat dang pamikasala at king e mayap uling dinatan de ing bansa ku karing idolo a mengaring bangke alang bie at uling kitmuan de ing bansa ku karing dios dang e tutu.

¹⁹ Ginu, ika ing mimingat at babie sikanan kanaku; sasaupan mu ku king oras ning kaligaligan. Datang la keka ding bansang ibat karing miyayaliwang suluk na ning yatu at sabian da, Ala lang pibandian ding makatua mi nune mu ding dios a e tutu; ala nune mu ding alang silbing idolo.

²⁰ Malyari ya waring makagawang dakal a dios ing tau? Nung makagawa ya, e la tune dios ding agawa na.

²¹ Ngana ning Ginu, Nung makanyan, ipakilala ku karing bansa misan mu at para king kapilan pa man ing upaya ku at sikanan; abalu ra kanita king aku ing Ginu.

17

¹ Nganang sasabi ning Ginu, Memalen ning Juda, misulat ing kasalanan yu king paniulat a megawa king bakal; midukit karing kekayung pusu king kapamilatan na ning diamanting pandukit at makadukit munaman karing suluk da ring kekayung altar.

² Sasamba la ding memalen yu karing altar at karing sagradung asias a mitalakad para king diosang i Asera a atyu king lele ning balang tanaman a malabung, karing bunduk-bundukan,

³ at karing bunduk ning malualas a bansa. Samsaman da la ring kalaban ding kekayung alahas at ing pibandian yung makasalikut uli da ring kasalanan a depat yu king kabilugan yung bansa.

⁴ Kailangan yeng isuku ing bansa a binie ku kekayu, at gawan da kayung ipus da ring kalaban yu king bansang e yu bitasang balu, uling mengaring api ing mua ku kekayu at mikakalabkab king kapilan pa man.

⁵ Nganang sasabi ning Ginu, Isumpa ke ing ninumang taung manalig king kalupa nang tau, king sikanan ning kalupa nang tau at painggulut kaku.

⁶ Mangari ya king mababang tanaman king disyerto a tutubu king malanging marangle, king gabun a malat a alang bitasang tutubung tanaman. Alang bitasang kayapan a mapalyari keting bansa. fig,,,,,Mangari ya king mababang tanaman king disyerto...,(17:6)fig*

⁷ Oneng bendisyunan ke ing taung manalig kaku.

⁸ Mangari ya king tanaman a tutubu lele ning batis, at miraras la king danum ding uyat na. E ya tatakut potang ing kaleldo daratang, uling manatili lang sagiwa ding bulung na; e ya maliligalig neng e mumuran; manatili yang mamunga.

⁹ Ninu ing makibalu king pusu ning tau? Tune yang mapaglinlang at e mayap.

¹⁰ Aku, ing Ginu, ing sasalugsug karing kaisipan, at susubuk karing pusu da ring tau. Lalawan ke ing balang tau agpang king pamibiebie na, agpang king daraptan na.

¹¹ Ing taung mibandi king e ustung paralan mengari ya king ayup a lulukub karing e na ebun. Busal ning kayanakan na, mawala ing pibandian na, at king kawakasan ning bie na mayakit ing mangmang ya.

¹² Mengari ya king maligayang tronu ing kekatamung Templo, makatalakad manibat king kapupurmeruan king metung a matas a bunduk.

¹³ Ginu, ika ing kapanayan na ning Israel; kamarinayan ing kamtan da ring sablang painggulut keka. Matda lang anti ding lagyung misulat king alikabuk, uling ika, Ginu, ing karelang gilutan, ika ing sibul ning makapasno danum.

¹⁴ Ginu, uluan mu ku at lubus kung kumayap; iligtas mu ku at lubus kung miligtas. Ika ing kakung pupurian!

¹⁵ Ngara ding tau kanaku, Antalu ding babala a sinabi na ning Ginu kekami? Sulung, ibalaus na na la ngeni!

¹⁶ Oneng, Ginu, kapilan man e ku inawad keka ing parala kang kasakitan karela; e ku pignasan ing mag-ari ing kaligaligan karela. Balu mu iti, Ginu, balu mu itang sinabi ku.

¹⁷ E ka sana maging pitatakutan kanaku; ika ing kanakung santungan at kaligtasan neng daratang ing kaligaligan.

¹⁸ Paburen mu lang mangapakarine ding lulupig kanaku, oneng e mu ku yayabe. Pamatakutan mu la, oneng e mu ku pamatakutan. Pasakitan mu la at paglapakan.

¹⁹ Ngana kanaku ning Ginu, Jeremias, mako ka at ibalita mu ing mensahi ku king Pasbul dalan da ring Tau, nung nukarin la lulub at lulual king siudad ding ari na ning Juda. Kaybat, munta ka naman karing aliwang pasbul dalan ning Jerusalem.

²⁰ Sabian mu karing ari at karing sablang memalen na ning Juda at king balang manuknangan king Jerusalem at daralan kareting pasbul, king makiramdam la king bage a kanakung sabian.

²¹ Sabian mu karela king ingatan da ing bie ra, king e la sukat magdalang nanumang karga king Aldo ning Sabbath; e la sukat magdalang nanumang bage neng daralan la karing pasbul na ning Jerusalem

²² o magdalang nanumang bage ibat karing pibalebale ra neng Aldo ning Sabbath. E la sukat magobra neng Aldo ning Sabbath; sukat deng pagselebran bilang aldo banal, antimo ing inutus ku karing makatua da.

²³ E ra ku pekiramdaman ding karelang makatua ni minie pansin. Meging masias la buntuk; e ra ku buring pamintuan ni mebiasa king tiru ku karela.

²⁴ Sabian mu kareting tau king sukat da lang tuparan ding sabla kung kautusan. E la sukat magdalang nanumang karga neng daralan la karing pasbul dalan ning siudad neng Aldo ning Sabbath. Sukat deng pagselebran ing Aldo ning Sabbath bilang aldo banal at e la sukat bitasang magobra.

²⁵ Kanita ding karelang ari at prinsipi lungub la karing pasbul dalan ning Jerusalem at kamtan da ing kayupayan antimo itang kang David. Kayabe da ring memalen na ning Juda at Jerusalem, sake la karing karwahe at kabayu at parati yang mitmung tau ing siudad na ning Jerusalem.

²⁶ Datang la ding taung ibat karing balen na ning Juda at karing baryung makapadurut Jerusalem: datang lang ibat king bansa ning Benjamin, karing lele bunduk-bundukan, bunduk at king dane mauli ning Juda. Idala da la king Templo ku ding ain-a-durulukan at ain-sakripisyu, ain-a-binutil, at insenso at antimu rin ding ain-a-kapasalamatan.

²⁷ Oneng kailangan ing pamintuan da ku at pagselebran de ing Aldo ning Sabbath bilang aldo sagradu. Neng daralan la karing pasbul dalan ning Jerusalem king aldo a ita, e la sukat mamusan nanumang karga, nung ali, silaban ku la ding pasbul dalan ning Jerusalem. Magisan lang masilab ding palasyu na ning Jerusalem at ala metung mang makapatda king silab a iti.

18

¹ Ngana kanaku ning Ginu,

² Munta ka king bale na ning taung gagawang kuran at aliwa pang kasangkapan a pila, at karin ku ibie ing mensahi ku keka.

³ Inya minta ku karin at ikit ke ing taung gagawang kuran; gagamitan ne ing metung a parugang king pamagobra na.

⁴ Neng ating mayayakit a e ustu karing kasangkapan a gagawan na, kuanan nang pasibayu ing pila at iyubug ne ing aliwang kasangkapan.

⁵ Kanita ngana kanaku ning Ginu,

⁶ Memalen ning Israel, ala ku waring matulid daptan kekayu itang daraptan na ning gagawang kuran king pila? Atyu kayu karing gamat ku nung makananung ing pila atyu karing gamat na ning taung gagawang kuran at aliwa pang kasangkapan king pila.

⁷ Nung sakaling datang ing oras a sabian kung bagutan ke, lasakan o siran ing isanu pa mang bansa o kayarian,

⁸ oneng itang bansang ita tuknang yang darapat e mayap, e ku na ibalaus kanita itang sinabi kung daptan ku.

⁹ Nung sakali namang sinabi kung italakad ke o gawan ing isanu mang bansa o kayarian,

¹⁰ oneng ita namang bansang ita e na ku pamintuan at darapat yang e ustu, e ku ne ibalaus kanita itang sinabi kung daptan ku.

¹¹ Inya ngeni, sabian mu karing memalen na ning Juda at Jerusalem king gagawa kung planu laban karela at magsadia na ku ban parusan ku la. Sabian mu karela king tuknang na lang mabibie king pamikasala, king sukat na lang magbayung bie.

¹² Oneng karelang ipakibat, E ke bisa, obat mo kailangan pa? Maging masias ke ngan pin a buntuk at e mayap anggang bisa kami.

¹³ Ngana ning Ginu, Ikutang mu king balang bansa nung ing anti kaniting bage mepalyari nang minuna? Dinapat lang makapangilabut a bage ding memalen ning Israel!

¹⁴ Kewalan na la waring yelu ding mabatung taluktuk ning Lebanon? Kinati na la wari ding sibul nang marimla ning bunduk?

¹⁵ Makanyan man, kelinguan da ku ding taung pinili ku; duruluk lang insenso para karing idolo. Misakab la king dalan a sukat dang dalanan; e da na la tutuntunan ding matuang dalan; lalakad la karing gasgas a e ra sadiang daralanan.

¹⁶ Gewa deng metung a bage pitatakutan iting bansa, at insultuan king kapilan pa man. Masdan la ding daralan king akakit da, pipiling-piling da lang buntuk da king pangapamulala ra.

¹⁷ King arapan da ring karelang kalaban ikalat ku la ding taung kakung pinili. Mangari lang alikabuk a pipaid-paid ning angin a manibat aslagan. Paburen ku la; e ku la saupan potang ing kasiran datang.

¹⁸ Kanita ngara ding memalen, Tara, gawa tamung kapanyiran laban kang Jeremias! Atin namang pari a turu kekatamu; ating lalaking biasa a munie payu kekatamu at propetang manaral king amanu na ning Dios. Tara, idalum ta ya at tuknang ta nang makiramdam king sasabian na.

¹⁹ Inya ngakung menalangin, Ginu, pakiramdaman mu sana ing sasabian ku at pakiramdaman mu sana ing sasabian da ring kalaban ku tungkul kanaku.

²⁰ Ing e mayap wari ya ing ablas ning mayap? Ginawa na lang kulkul para kanaku ban karin ku manabu. Ganakan mu sana nung makananu kung linapit keka at migsalita para karela ban e mu la arapan king kekang mua.

²¹ Oneng ngeni, Ginu, paburen mung mate la ding anak da king danup; paburen mu lang mate king gera. Paburen mung kawalan lang asawa at anak ding babai; paburen mung mate la ding lalaki king sakit at ding kayanakan a lalaki king labanan.

²² Parala kang dakal a tau ban manlub alang babala karing karelang pibalebale; paburen mung kulisak la king takut. Ginawa na lang kulkul para kanaku ban karin ku manabu at miyumang lang bitag ba ra kung arakap.

²³ Ginu, balu mu la ngan deting tangka ra ba ra kung apate. E mu sa panupaya ing e ustung dapat da o patawaran ing kasalanan da. Paburen mu lang masambut at arapan mu la kabang mua ka. fig,,,, ,Ginu, pakiramdaman mu sana ing sasabian ku...,(18:19)fig*

19

¹ Sinabi na kanaku ning Ginu king mako ku at saling metung a banga. Sinabi na naman king mituki kung mapilan karing makatua na ning balen ampon mapilan karing makamatuang pari,

² at dumalan ku king Pasbul dalan ding Magkukuran papunta king Kapatagan ning Hinom. Karin ku ibalita ing mensahing ibie na kanaku.

³ Sinabi na ning Ginu king sabian ku iti: Ikayung ari ning Juda at memalen na ning Jerusalem, aku, ing Ginung Mayupaya, ing Dios ning Israel, makiramdam kayu king kanakung sabian. Parala kung kasiran king lugal a ita at mabigla ya ing ninumang makabalita kaniti.

⁴ Daptan ku ing anti kaniting kasiran king lugal a iti uling likuan da ku ding taung pinili ku, at dinatan de iting lugal king kapamilatan na ning pamamie dang ain-sakripisyu keti para karing aliwang dios a e ra balu o kamalayan ding karelang makatua o ding ari na ning Juda. Pepatulu lang daya keting lugal king daya da ring taung alang kasalanan,

⁵ at menalakad lang altar para kang Baal ban dulukan da la ring anak da bilang ain-sakripisyu. E ku bitasang inutus karela ing daptan da iti; e man bitasang linub iti king isip ku.

⁶ Inya ngeni, ing oras datang nung kapilan iting lugal e ne mayaus Tofet o Kapatagan ning Hinom nune mayaus yang Kapatagan ning Pipatayan.

⁷ Siran ku la keting lugal a iti ding sablang balak da ring memalen na ning Juda at Jerusalem. Paburen ku lang maniambut karela ding kalaban da at paten king labanan. Ibie ku la ding bangke ra karing ayup at karing malyap a animal ban kanan da.

⁸ Iparala ku ing anti kaniting makatakut a kasiran keting siudad; masdan ya at mangapamulala ing ninumang daralan.

⁹ Paligiran de ring kalaban ing siudad at pakikuanan da lang paten ding memalen na. Maging makatakut ing pamanlusub da. Uli na niti, ding memalen a atyu kilub ning siudad kanan da la laman ding kasiping dang bale at pati na ding mismung anak da.

¹⁰ Sinabi na kanita kanaku ning Ginu ing balbalan ke ing banga king akakit da ring lalaki a tinuki kanaku,

¹¹ at sabian karela king ing Ginung Mayupaya sinabi na, Balbalan ku la ding memalen at iting siudad, at maging anti la king mebalbal a banga a e na malyaring malarin pasibayu. Ikutkut da la ring mete ra agyang king Tofet uling ala nang aliwa pang lugal a malyaring pikutkutan da.

¹² Pangaku kung iyapus ke king Tofet ing siudad a iti at ding memalen na.

¹³ Anti ing Tofet maging marinat la ngan ding bale ning Jerusalem at ding bale da ring ari ning Juda at pati na ding babo ding sablang bale nung nu la dinuluk insenso para karing batuin, at nung nu la mitugtug alak bilang ain karing aliwang dios. fig,,,, ,Sinabi na kanita kanaku ning Ginu ing balbalan ke ing banga...,(19:10)fig*

¹⁴ Likuan ke ing Tofet nung nukarin na ku tinubud ning Ginu ban ibalita ing mensahi na. Meko ku at tinalakad king patyu ning Templo at sinabi ku karing sablang tau

¹⁵ king ing Ginung Mayupaya, ing Dios ning Israel, sinabi na, Iparala ku king siudad a iti at king balang makasiping a balen ing sablang parusang sinabi kung daptan ku, uling masias kayu buntuk at e bisang makiramdam king sasabian ku.

20

¹ I Pasur, ing paring anak nang Immer, ya ing pamuntuk da ring opisyal ning Templo. Inyang dimdam na kung magsalita kareting bage,

² pepabarug na ku at pepatanikala lele ning makamatas a Pasbul dalan ning Benjamin ning Templo.

³ Kabukasan, kaybat na kung binulus Pasur king pangatanikala ku, sinabi ku, Pasur, e na ka pemalagyuan Pasur ning Ginu. Ing binie nang lagyu keka ya iti: Ing Makapangilabut king Nukarin mang Lugal.

⁴ Uling ing Ginu mismu sinabi na, Gawan da kang pangingilabutan king mismung sarili mu at karing kakaluguran mu, at akit mu la ngan mate karing espada da ring karelang kalaban. Ibili ku la ngan ding memalen na ning Juda king lalam nang upaya ning ari ning Babilonia; idala na lang bihag ding mapilan king bansa na at ipapate na la ding aliwa.

⁵ Paburen kung kuanan da naman ding kalaban da ing sablang pibandian na niting siudad at kuanan da ing sablang kayatinan na at pibandian pati na ding mangamal a pibandian da ring ari na ning Juda, at idala ra ngan iti king Babilonia.

⁶ At ika, Pasur, mabihag ka at ing mabilug mung pamilya at midala kayu Babilonia. Karin ka mate at mikutkut kayabe da ring sabla mung kakaluguran a selitanan mung dakal a kalaraman.

⁷ Ginu, lininlang mu ku, at melinlang na ku man. Mas masikan ka kesa kaku, at adaig mu ku. Pagsisti da ku ding sabla; kaylian da ku kilub ning patingapun.

⁸ Kailangan pa neng magsalita ku ing ikulisak ku, Katampalasanan at Kasiran ing dugpa kekayu! Ginu, insultuan da ku at e matatanggap king sablang panaun, uling babalita ku ing kekang amanu.

⁹ Oneng potang kakung sabian, Kalinguan ku ne ing Ginu, e ku ne banggitan pa ing lagyu na, kanita ing keka namang amanu mengari ya king aping milalablab king libutad ning pusu ku; magalsa kilub dang busbus ding butul ku, mangaina na ku king pamamigil. E ku na bitasang ayaguanta.

¹⁰ Ding sabla daramdaman ku lang bubulung Makapadurut kekatamu ing makapangilabut! Isumbung ta ya karing atyu king kayupayan! Agyang ding matalik kung kakaluguran panenayan da ing kakung pangabagsak. Ngarang sasabi, Marahil akua nang malinlang; kanita arakap ta ya at apagbengansan.

¹¹ Oneng ika, Ginu, atyu ka siping ku, masikan ka ampon mayupaya, at detang kaku maglupig mibual la. Mangapakarine lang alang angga, uling e la malyaring magtagumpe. E na makalinguan kapilan man ing karelang kamarinayan.

¹² Oneng, Mayupayang Ginu, king alang pamangabiran taung makatuliran keka lang paniubukan, balu mu ing atyu karing pusu ra at kaisipan. Inya paburen mung akit ku ing pamagbengansa mu karing kalaban ku, uling karing gamat mu karin ku binili ing nasa ku.

¹³ Pagkanta ye ing Ginu! Purian ye ing Ginu! Liligtas na la ding magigipit king upaya da ring taung e mayap.

¹⁴ Isumpa ya ing aldo kebaitan ku! Kalinguan ya itang aldo inyang beit na ku ning kakung ima!

¹⁵ Isumpa ya ing lalaking minie tula kang tatang ku inyang sinabi na: Mayap a oras! Lalaki ya ing kekang anak!

¹⁶ Mangari ya sa itang lalaking ita karing siudad a lesak nang alang lunus ning Ginu. Sana damdaman na neng abak ing saingsing ning kaplas, at king kaugtuan ing inge ning labanan,

¹⁷ uling e na ku pete bayu ku mibait; kanita meging kutkutan ke sa ing atian nang ima ku.

¹⁸ Obat kaya mibait ku pa? Ban mika kaligaligan ku at kalungkutan, ban miwakasan ing bie ku king kamarinayan?

21

¹ Tinubud ne kanaku ning Aring Zedekias ning Juda i Pasur a anak nang Malkias at i Zefania, ing paring anak nang Maaseia, ban sabian ing anti kaniti:

² Dapat a mayap, magsalita ka king Ginu para kekami, uling ing Aring Nebucadenesar ning Babilonia at ding sundalus nang pakasandata lisuban de ing siudad. Marahil makarapat yang metung a milagru ing Ginu para kekami ban matras ya i Nebucadenesar.

³ Kanita migsalita ya ing Ginu kanaku at sinabi ku karing lalaking mituburan kanaku

⁴ king sabian da kang Zedekias king ing Ginu, ing Dios ning Israel, sinabi na, Zedekias, sambutan ku la ding sundalus mung pakasandata a makilaban king ari at ding sundalus ning Babilonia a makakubkub kekayu lual ning siudad. Itambak ku la ding sandata da ring kekang sundalus king libutad ning siudad.

⁵ Labanan da ka king mabilug kung sikanan, mua, kasbu, at bigsikan.

⁶ Paten ke ing balang mabibie a atyu keting siudad; ding tau at ding animal; paraparehu lang mate king makatakut a salut.

⁷ Oneng ika ampon ding pamuntuk mu at memalen a miligtas king gera, danup, at salutpaburen da kayu ngan mabihag kang Nebucadenesar at karing kalaban yung bisang makamate kekayu. Ipapate na kayung Nebucadenesar. Ala yang itagan metung man kekayu o pakitanan lunus o pakalulu ing ninuman. Aku, ing Ginu, ing migsalita.

⁸ Kanita sinabi na kanaku ning Ginu king sabian ku karing memalen ing anti kaniti: Makiramdam kayu! Aku, ing Ginu, dirinan da kayung kapaintulutan mamili king dalan a papunta king bie at king kamatayan.

⁹ Mate ya king gera, king danup o king salut ing ninumang manatili kilub na ning siudad. Oneng e ya mate ing ninumang lumual at sumuku karing tau Babilonia a ngeni kukubkub king siudad; akua nang iligtas ing bie na.

¹⁰ Inari ku na king lub ku king e ke iligtas iting siudad; lasakan ke. Miyabie ya king ari na ning Babilonia at silaban ne angga king mipatag ya king gabun. Aku, ing Ginu, ing migsalita.

¹¹ Sinabi na kanaku ning Ginu king ibie ke iting mensahi king pamilyang lahi nang Aring David king Juda:

¹² Aku ing Ginu, makiramdam kayu king kanakung sabian. Ing sanang matulid ya ing sikasuan yung marapat aldo-aldo. Labanan yu la ding manggipit, idipensa ye ing ninumang alipitan da. Nung ali, ding e mayap a bage a kekayung daraptan ilang makapasari king mua kung anting aping milalablab at e na apatda ning ninuman.

¹³ Ika, Jerusalem a makalukluk king matas nang dake ning kapatagan, anti kang batung matas a mamukud king libutad ning kapatagan. Oneng labanan da ka. Sasabian mu king alang makalusub keka o alang makalasak karing kekang dipensa.

¹⁴ Oneng parusan da ka uli na ning depat mu. Silaban ke ing palasyu mu at gisanan nang laklakan ning api ing sablang makapadurut kaniti. Aku, ing Ginu, ing migsalita.

22

¹ Sinabi na kanaku ning Ginu king munta ku king palasyu na ning ari ning Juda a lahi nang David.

² Karin sabian ku king ari at karing pamuntuk na ampon karing memalen na ning Jerusalem king makiramdam la king pasabi na ning Ginu.

³ Ngana, Aku, ing Ginu, yuyutus ku kekayu king daptan yu ing matulid at ing alang pamangabiran. Idipensa ye ing taung pipiraitnan na ning manalipit. E yu la alipitan, nune pakiutusan yu lang mayap ding dayuan, ding ulila, at ding mebalung babai. E yu la papaten keting banal a lugal a iti ding taung alang kasalanan.

⁴ Nung tune yung tuparan itang inutus ku kekayu, kanita manatili lang maging ari ding lahi nang David. At deti, kayabe da ring karelang pamuntuk at ding memalen, manatili lang lual-lungub karing pasbul dalan na niting palasyu a pakasake karing karelang karwahe at kabayu.

⁵ Nung e yu la pamintuan ding utus ku, sasabian kung matni kekayu king malaso ya iting palasyu. Aku, ing Ginu, ing migsalita.

⁶ Para kanaku, ing marangal nang palasyu ning Juda kasing lagu ne ning lugal ning Gilead at ding Bunduk ning Lebanon; oneng gawan keng disyerto, metung a lugal a alang bitasang manuknangan.

⁷ Mitutubud kung tau ba reng siran. Idala da la ngan ding palakul da; kuturan da la ring malagu nang asias a sedro at silaban da la.

⁸ Kaybat na nita, dumalan la karin ding dakal a dayuan at ikutang da king metung at metung: Ginu, baket depat mu ing makanyan a bage keting marangal a siudad?

⁹ Kanita ipakibat da king iti mepalyari uli na ning ginulut kayu king kasunduan yu kanaku, ing kekayung Dios, at sinamba kayu at sinuyu karing aliwang dios.

¹⁰ Memalen ning Juda, e kayu sa manangis para king Aring Josias; e yu sa pagkalungkutan ing pangamate na. Oneng manangis kayu para kang Joahaz a anak na; idala re king marayu. E ne makapagbalik kapilan man, at e na ne malyaring akit pa ing balen nang tibuan.

¹¹ Ngana ning Ginu tungkul kang Joahaz a anak nang Josias a sinalisi kang tata na bilang ari na ning Juda, Meko ne keti at e ne makapagbalik kapilan man.

¹² Mate ya king bansa nung nu re dela at e na ne akit kapilan man iting bansa na.

¹³ Makasumpa ya ing taung manalakad king bale na king kapamilatan ning alang hustisia, at daragul ne king kapamilatan ning keyalan katapatan, at papagobran na lang kalupa nang tau, oneng e no dirinan sueldu.

¹⁴ Makasumpa ya ing taung sasabing, Gawa kung bale maragul a ating malualas a kuartu babo. Inya dininan neng awang ing bale na, pinartisyunan ne karing dutung a sedro, at pininturan neng malutu.

¹⁵ Maging maygit ka waring ari ngening ing bale mu megawa ya karing dutung a sedro, at mas malagu ya kesa karing bale da ring aliwang tao? I tata mu meligaya yang mitmung tula king bie na. Menatili yang matulid at parehu lawe karing tau, at mipala ya king sablang depat na.

¹⁶ Binie na karing kalulu ing katuliran da king husgadu, at ing sabla linto masalese para karela. Iti ya ing kabaldugan na ning balu me ing Ginu.

¹⁷ Oneng ika ala kang aliwang akakit nune mu ing sarili mung kapakanan; pamaten mu lang taung alang kasalanan at alipitan ampon tatampalasan ding kekang memalen. Ing Ginu ya ing migsalita.

¹⁸ Inya iti ya ing sasabian na ning Ginu tungkul kang Jeoiakim a anak nang Josias, ing ari ning Juda, Ala metung mang manangis king pangamate na o sumabing, Ay kasaket, kapatad, ay kasaket! Ala metung mang managulele o kumiak para king ari ning Juda: O ginu ku! O kakung ari!

¹⁹ Potang ikutkut de, anti kang mengutkut asnong mete; iguyud de at iyugse lual ding pasbul dalan ning siudad ning Jerusalem.

²⁰ Memalen ning Jerusalem, mukiat na kayu king Bunduk ning Lebanon, at manangis karin; munta na kayu king bansa ning Bashan at manangis kayu; manangis kayu manibat karing bunduk ning Abarim, uling mesambut na la ding sablang kekong kakampi.

²¹ Ing migsalita kekayu ya ing Ginu kanitang manawa kayu pa pamibiebie, oneng e ye pekiramdaman. Iti ing maralas yung daraptan king kekaban ning bie yu; kanita pa e ye buring pamintuan ing Ginu.

²² Ipaid na lang marayu ning angin ding kekong pamuntuk, mabihag la ding kekong kakampi king labanan, milako ya dangalan ing kekong siudad, at mibili ya king kamarinayan, uli ning sablang depat yung e mayap.

²³ Panatag kayu bili karing pibalebale yung megawa karing dutung a sedrong ibat king Lebanon, oneng potang datangan na kayu ning sakit, makalunus ing maging kararasan yu, sakit a kalupa ning babai king oras ning pamanganak na.

²⁴ Ngana ning Ginu kang Aring Jeoiakin a anak nang Aring Jeoiakim ning Juda, Kabang aku ing mabie Dios, agyang ika pa ing singsing a panatak a susulud ku king wanan kung gamat, makanyan man ilukas da ka

²⁵ at ibie da ka karing taung katakutan mu, ding taung bisang makamate keka. Ibie da ka kang Aring Nebucadenesar ning Babilonia at karing sundalus na.

²⁶ Iyugse da ka at i ima mu king aliwang bansa a e yu parehung kebaitan at parehu kayung mate karin.

²⁷ Pagnasan meng akit pasibayu iting bansa, oneng e na ka makapagbalik kapilan man.

²⁸ Sinabi ku, Meging anti ne wari king bangang mebalbal i Aring Jeoiakin a miyugse at ala nang makibure? Ba't ya at ding anak na mebihag la at miyugse king bansang e ra bitasang balu?

²⁹ O bansa, bansa, bansa! Pakiramdaman mu ing sinabi ning Ginu:

³⁰ Mitakda king taung iti ing e ya mikayanak, at e magtamgumpe kapilan man. E ya mikayanak a mag-ari king Juda, at lukluk bilang kayalili nang Aring David. Aku, ing Ginu, ing migsalita.

23

¹ Makalunus ing mangapalyari potang dugpa na ing kayatulan na ning Ginu karetang pamuntuk a makamate at maniambulat karing taung pinili na!

² Iti ya ing sasabian na ning Ginu, ing Dios ning Israel, tungkul karing pamuntuk a sukat mo sanang miningat karing taung pinili na. E yu la iningat ding taung pinili ku; simbulat yu la at penabi. Inya ngeni parusan da kayu uli na ning depat yung e mayap.

³ Tipunan ku la ding mitagan karing taung pinili ku manibat karing bansa nung nu ku la kinalat, at ibalik ku lang pasibayu king bansang karelang tibuan. Mikayanak lang dakal at dakal ing bilang da.

⁴ Tuldu kung pamuntuk a manibala karela. E na la pasibayung mitakutan ding taung kanakung pinili o galgal man at e ku na la pasibayung parusan. Aku, ing Ginu, ing migsalita.

⁵ Ngana ning Ginu, Datang mu rin ing aldo nung kapilan mamili kung metung a ari a ibat king lahi nang David at maging ari yang kalupa na. Manibala yang mitmung kabiasnan at daptan na ing mayap at ing matulid king kabilugan a kayarian.

⁶ Potang ya na ing ari, mipanatag la bili ding memalen na ning kabilugan a Juda at mibiebie la ding memalen na ning Israel king kapayapan. Mayaus yang Ing Ginu ya ing Talapagligtas tamu.

⁷ Datang mu rin ing aldo, nganang sasabi ning Ginu, nung kapilan ding memalen e na la kapilan man sumpa kanaku bilang mabie Dios a milual karing memalen na ning Israel king bansang Ehipto.

⁸ Bagkus sumpa la kanaku bilang mabie Dios a milual karing memalen na ning Israel ibat king bansa king dane norti at karing aliwa pang bansa nung nu ku la kinalat. Kanita manuknangan na la king mismung sarili dang bansa.

⁹ Masaspak ya ing pusu ku, at gagalgal ing mabilug kung katawan. Uli ning Ginu, uli ding banal nang amanu, meging anti ku king taung malasing, king lalaking mipalalung minum alak.

¹⁰ Mitmu ya ing bansa karing taung migtaksil king Ginu; mibiebie la king e mayap at abusuan ing karelang upaya. Uli ning sumpa ning Ginu magpaldas ya ing bansa, at melangi lang pipagpastulan.

¹¹ Ngana ning Ginu, Ala lang Dios ding propeta at ding pari; arakap ku lang darapat e ustu king mismung Templo.

¹² Ding dalan a karelang tutuntunan maging matalusad la at madalumdum; mitalusad la at miragsa. Iparala ku karela ing kasakitan; daratang na ing oras ning karelang pangaparusan. Aku, ing Ginu, ing migsalita.

¹³ Ikit ku na ing kasalanan da ring propeta ning Samaria: migsalita la king lagyu nang Baal, at linili da la ring kakung memalen.

¹⁴ Oneng ikit ku ing lalung e mayap karing propeta ning Jerusalem: darapat lang pamakipangalugud at magsalitang kalaraman; sasaupan da lang darapat e ustu ding tau, inya alang tuknang ing pamaniapat dang e mayap. Para kaku, e la ngan mayap anti ding tau Sodoma, at e la mayap anti ding memalen ning Gomorra.

¹⁵ Inya, aku ing Ginung Mayupaya, sasabian ku ing bage tungkul karing propeta na ning Jerusalem: Ibie ku la karela ding mapait diling tanaman bilang karelang pamangan, at danum a maki lasun bilang karelang inuman, uling kinalat da ing e mayap king mabilug a bansa.

¹⁶ Ngana ning Ginung Mayupaya karing memalen na ning Jerusalem, E yu la pakiramdaman ding propeta king karelang pamaniabian; e tutu ing sasalita da kekayu. Sasabian da kekayu itang bunga na ning sariling kaisipan da at aliwa ing kanakung sinabi karela.

¹⁷ Alang patugut dang sasabian karing taung e bisang makiramdam kanaku king ing sabla muling mayap para karela ngan. At king balang metung at metung a masias a buntuk sasabian da king e ne bitasang dasnan ning kasakitan.

¹⁸ Sinabi ku, Ala metung man kareting propeta ing mekabalu karing lihim nang isipan ning Ginu. Ala metung man karela ing mekaramdam na o mekaintindi king mensahi na o mekiramdam man o minie pansin king sinabi na.

¹⁹ Ing mua na mangaring bagyu a dugpa karing buntuk da ring darapat e mayap,

²⁰ at e tuknang iti anggang e na atuparan itang sablang buri nang daptan. Karing aldo a datang, kanita ra akuang aintindian iti ding taung pinili na.

²¹ Nganang sinabi ning Ginu, E ku la tinubud deting propeta, makanyan man linual la. Ala kung binie nanumang amanu ku karela, oneng migsalita la mu rin king lagyu ku.

²² Nung balu da la mu sana ding lihim a isipan ku, sana ikua da nang apanaral ing mensahi ku karing taung kanakung pinili, at ikua da lang apabalik a lub at apalakuan king dapat dang e mayap.

²³ Aku ing Dios a atyu nukarin man at e mu bukud king metung a lugal.

²⁴ Ala metung mang taung makasalikut king lugal a e ku mo sana akit. E yu wari balu king atyu ku nukarin mang lugal karin banua at keti king yatu?

²⁵ Dimdam ku ing e mayap a sinabi ra detang propetang migsalitang kalaraman king kapamilatan ning lagyu ku, at sasabi king binie ku kanu karela ing mensahi ku king kapamilatan da ring paninap da.

²⁶ Angga pa kaya kapilan king deting propeta ilili da la ring taung kanakung pinili king kapamilatan na ning kalaraman a gagawan da?

²⁷ Isipan da king ding paninap a sasalita ra maging dalan la ban kalinguan da ku ring taung kanakung pinili a antimo ing pamangalinguan da kaku ding makatua rang sinamba kang Baal.

²⁸ Ing propetang meninap sukat neng sabian iti antimong paninap mu, oneng ing propetang mekaramdam king mensahi ku sukat nang ipanaral iti king mitmung katapatan. Nanu ing ulaga na ning are nung ipakilupa me king binutil a trigu?

²⁹ Mengari yang api ing mensahi ku at anti ya king mantilyu a babalbal mangalati karing batu.

³⁰ Laban ku kareting propeta a mipapanandam king amanu na ning metung at metung, at kaybat ibabalita dang aku ing minie kaniti karela.

³¹ Laban ku naman karetang propetang magsalita karing sarili dang amanu at kaybat sasabian dang ibat kaku.

³² Aku, ing Ginu, makiramdam ka king kakung sabian! Laban ku karing propetang magsalita karing apaninap da at lilili ding taung kanakung pinili, at pati ding karelang kalaraman at pamagmayabang. E ku la tinubud ni inutusan lumual at ala no mang bitasang silbi karing tau. Aku, ing Ginu, ing migsalita.

³³ Ngana ning Ginu kanaku, Jeremias, neng ing metung karing taung pinili ku o ing metung a propeta o pari kutnan na ka, Nanu ing mensahi na ning Ginu? sabian mu, Metung kang mabayat a pupusanan na ning Ginu, inya iyugse na ka.

³⁴ Nung ing metung a propeta o pari o ing metung kareting memalen gagamitan na la ding amanung, Ing mabayat a pupusanan na ning Ginu, parusan ke at ing pamilya na.

³⁵ Ing sukat marapat ya iti: Sukat nang ikutang ning balang metung karing kakaluguran na at kamaganak, Nanu ing binie nang pakibat ning Ginu? Nanu ing sinabi na ning Ginu?

³⁶ Inya e yu la sukat gamitan ding amanung, Ing mabayat a pupusanan na ning Ginu uling nung daptan na ning ninuman yan, gawan keng tune mabayat ing mensahi ku keting tau. Pemaluktut da la ring tau ding amanu na ning karelang Dios, ing mabie Dios, ing Ginung Mayupaya.

³⁷ Jeremias, kutnan mu la ding propeta, Nanu ing pakibat a binie na ning Ginu kekayu? Nanu ing sinabi na ning Ginu?

³⁸ At nung e ra tuparan ing utus ku at gagamitan da la ring amanung, Ing mabayat a pupusanan na ning Ginu, kanita sabian mu karela king

³⁹ siguradu ku lang daklutan at ibasibas king marayu, ila at ing siudad a binie ku karing makatua da.

⁴⁰ Iparala ku karela ing alang anggang kamarinayan at ing keyalan dangalan a e na makalinguan kapilan man.

24

¹ Pepakit na la kanaku ning Ginu ding aduang basket a ating bungang higera. Makabili la deti king arap ning Templo. (Milyari iti kaybat neng binihag at delang Aring Nebucadenesar ning Babilonia i Aring Jeoiakin ning Juda a anak nang Jeoiakim. Kayabe lang mebihag ding manimuna na ning Juda, ding pande, at ding mangagaling a pangamat king obra.)

² Atin yang mayap a bungang higera ing mumunang basket, detang minunang melulut; atin yang e mayap a bungang higera ing kaduang basket, tune e la mayap kanan.

³ Kanita ngana kanaku ning Ginu, Jeremias, nanu ing akakit mu? Pekibat ku, Bungang higera la pu. Tune lang mayap ding mayap a bunga, at detang e mayap tune lang e mayap kanan.

⁴ Inya ngana kanaku ning Ginu,

⁵ Aku, ing Ginu, ing Dios ning Israel, lalawen ku la ding taung mebihag at midala king Babilonia a kalupa da reting mayap a bungang higera at pakiutusan ku lang ating ganaka.

⁶ Ingatan ku la at ibalik keting bansa. Palabungan ku la at e na pasibayung lasakan pa; itanam ku la at e na bagutan pa.

⁷ Ibie ku karela ing kapagnasan a abalu da king aku ing Ginu. Kanita ila ding maging memalen ku, at aku ing maging Dios da, uling magbalik la kanaku king mabilug dang pusu.

⁸ Tungkul naman kang Aring Zedekias ning Juda, ding tauan nang makapadurut king tronu na at ding memalen na ning Jerusalem a menatili keting bansa o linipat king Ehipto, aku, ing Ginu, pakiutusan ku la ngan anti deting bungang higera a e mayap kanan.

⁹ Iparala ku karela ing kasiran a maging pitatakutan da ring sablang bansa na ning yatu. Maging pikaylian da la ring tau, pituya-tuya da la, insultuan da la, at gamitan da la ring lagyu ra anting sumpa king balang lugal nung nu ku la iyugse.

¹⁰ Parala kung gera, danup, at salut karela angga king ala nang mitagan metung man king bansa a binie ku karela at karing makatua da.

25

¹ King kapat nang banuang pamag-aring Jeoiakim, ing anak nang Josias ning Juda, tinggap ke ing mensahing ibat king Ginu tungkul karing sablang memalen na ning Juda. (Iti ya ing mumunang banua na ning pamag-ari nang Nebucadenesar ning Babilonia.)

² Ngaku karing sablang memalen na ning Juda at Jerusalem,

³ Kilub ding aduang pulu't atlung banua, manibat king kalabing atlung banua nang pamag-aring Josias a anak nang Amon king Juda angga ngening aldong iti, migsalita ya kanaku ing Ginu, at e ku migkulang king pamagsalita kekayu tungkul king sinabi na, oneng e yu pinsinan.

⁴ E kayu bisang makiramdam o munie pansin agyamang ing Ginu menatili yang mitutubud karing talasuyu nang propeta.

⁵ Sinabi da kekayu king lakuan yu na ing e mayap yung pamibiebie, at tuknang nang darapat karing e ustung bage ban manatili kayung mangabiayan king bansang binie na ning Ginu kekayu at karing makatua yu bilang kekayung pibandian king kapilan pa man.

⁶ Sinabi da kekayu king e kayu sasamba at susuyu karing aliwang dios, at e ye pamuan ing Ginu king kapamilatan na ning pamanyamba yu karing idolong kekayung gewa. E na kayu sana perusan nung pemintuan ye ing Ginu.

⁷ Oneng sasabian na ning Ginu king e kayu bisang makiramdam, bagkus pepamua ye king kapamilatan da ring kekayung idolo at ikayu mismu ing pepasari king pangaparusan yu.

⁸ Uling e kayu bisang makiramdam king Ginung Mayupaya, oyni ing sasabian na,

⁹ Itubud ku la ding sablang tau na ning norti at ing talasuyu kung i Aring Nebucadenesar ning Babilonia. Iparala ku la ban lumaban keting bansa at karing memalen na, at karing sablang bansang makapadurut keting bansa. Lubus ku lang lasakan at manatili ing kasiran king kapilan pa manmetung a bage makatakut at makapangalgal a lalawan. Aku, ing Ginu, ing migsalita.

¹⁰ Patuknangan ku ing inge na ning karelang tula at ligaya at ing masayang inge da ring karelang kakasal. E la mika ating laru para karing sulu ra at e na mika atin pang binutil.

¹¹ Manatili yang lasak iting mabilug a bansa at makapangalgal lalawan, at sumuyu la ding makapadurut a bansa king ari na ning Babilonia kilub ding pitung pulung banua.

¹² Kaybat na nita, parusan ke ing Babilonia at ing ari na uli na ning pamikasala ra. Lasakan ke ing bansang Babilonia at manatili yang lasak king kapilan pa man.

¹³ Parusan ke ing Babilonia karing sablang kasakitan a sinabi kung iparala ku karing bansa, inyang migsalita ku kang Jeremias, ding sablang kasakitan a misulat keting libru.

¹⁴ Papamayaran ku la ding tau Babilonia king depat da at ding dakal a bansa at ding marangal a ari gawan da lang ipus.

¹⁵ Ngana ning Ginu, ing Dios ning Israel, Oyni ing kopang lulanan alak a mitmu king kakung mua. Kuanan me at painuman mu la ding sablang bansa nung nu ra ka itubud.

¹⁶ Potang makainum na la, mangapasepase la at milako la pamisip uli na ning gera a iparala ku laban karela.

¹⁷ Inya kinua ke ing kopa king gamat na ning Ginu at pepainum ku la ding bansa nung nu na ku tinubud ning Ginu.

¹⁸ Ing Jerusalem at ding sablang lugal ning Juda ampon ding ari da at manimuna mipainuman la ngan kaniti ban maging disyerto la, metung a makatakut at makapangalgal a lalawan, at ban gamitan da la ring tau ding lagyu da anting sumpa. Iti ya ing mapapalyari ngening aldong iti.

¹⁹ Iti ya ing listahan da ring aliwa pang mipainuman king kopa:

²⁰ ing ari na ning Ehipto, ding opisyal na at manimuna; ding sablang tau Ehipto,

²¹ at ding sablang dayuan karin; ding sablang ari na ning bansang Uz; ding sablang ari da ring siudad ning Filistia; Askelon, Gaza, Ekron, at ing makatagan king Asdod; ding sablang tau ning Edom, Moab, at Ammon;

²² ding sablang ari na ning Tiro, at Sidon; ding sablang ari da ring bansa ning Mediteraneo;

²³ ding siudad ning Dedan, Tema, at Buz; ding sablang tau a ururan dang makuyad ing buak da;

²⁴ ding sablang ari na ning Arabia; ding sablang ari da ring tribung atyu king disyerto;

²⁵ ding sablang ari na ning Zimri, Elam, at Media; ing metung at metung karing sablang ari

²⁶ na ning dane norti, marayu at malapit. Ing balang bansa keti king yatu sukat yang minum kaniti. Ing katataulian a minum ya ing ari na ning Babilonia.

²⁷ Kanita ngana kanaku ning Ginu, Sabian mu karing tau king aku, ing Ginung Mayupaya, ing Dios ning Israel, iyutus ku karela ing minum la angga king lasing la at sumuka; angga king miragsa la at e na makabangun pa, uli na ning gera a iparala ku laban karela.

²⁸ At nung tanggian deng kuanan ing kopang atyu king kekang gamat at e minum kaniti, kanita sabian mu karela king ing Ginung Mayupaya sinabi na king bisa la o e la bisa minum la kaniti.

²⁹ Pagumpisan ku na ing pamaglasak king mismung sarili kung siudad. Isipan da galang king e la miparusan? Wa, miparusan la uling miparala kung gera karing sablang tau na ning yatu. Aku, ing Ginung Mayupaya, ing migsalita.

³⁰ Jeremias, sukat mung ibalita ing sablang sinabi ku. Kailangan ing sabian mu kareting tau ing anti kaniti, Magsalita yang masikan ibat banua ing Ginu, at manuldul yang ibat karing katasan ning banua. Ngulangul ya laban karing taung pinili na; kulyo yang anti ing lalaking daramusak karing ubas, ing balang metung king yatu damdaman ne,

³¹ at kabling ing siwala na karing wakas ning yatu. Atin yang dalum ing Ginu laban karing bansa. Tipunan na la ngan ding tau ban litisan na la, at atulan na lang kamatayan ding e mayap. Ing Ginu ya ing migsalita.

³² Sasabian na ning Ginung Mayupaya king ing kapahamakan datang karing balang bansa, at ing metung a masikan a bagyu datang yang ibat karing wakas na ning yatu.

³³ King aldong ita mikalat la ding bangke da ring taung pete na ning Ginu karing misusumangid nang wakas ning yatu. Ala metung mang manangis para karela at ala mang kuma ampon mangutkut karela. Manatili lang makakera king gabun a antimo ing mitambak a dinat ding animal.

³⁴ Kumiak kayu, ikong manimuna, ikong pastul da ring taung kanakung pinili; kumiak kayung masikan! Manangis kayu at magkasat-kasat king alikabuk. Dinatang na ing oras ning pamakamate kekayu at mangari kayu karing lalaking tupa a kakatatan.

³⁵ Ala nang paralan ba kayu mu sanang makatakas.

³⁶ Uli na ning kagipitan, saingsing kayu at mangulisak uling king mua na ning Ginu lesak ne ing bansa yu

³⁷ at likuan neng lasak-lasak ing payapa yung bansa.

³⁸ Gilutan na la ning Ginu ding taung pinili na antimo neng lalakuan ne ning leon ing kueba na. Ding bage makapangilabut ning gera at ing mabagsik nang mua ning Ginu ya ing pepasari king pamaging disyerto na ning bansa.

26

¹ Inyang magumpisa yang mig-ari king Juda i Jeoiakim a anak nang Josias, migsalita ya kanaku ing Ginu.

² Ngana, Jeremias, talakad ka king libutad ning patyu ning Templo at ibalita mu ing sablang inutus kung sabian mu karing taung manibatan karing balen na ning Juda ban samba karin. Ala kang lalaktawan metung man karing amanu ku.

³ Mapalyaring makiramdam la ding tau at lakuan da ing e mayap dang pamibiebie. Nung makanyan ing mapalyari, e ku na kanita ibalaus ing balak kung kasiran karela uli na ning dapat dang e mayap.

⁴ Sinabi na kanaku ning Ginu king sabian ku karing tau ing anti kaniti: Aku, ing Ginu, sinabi ku king sukat yu kung pamintuan king kapamilatan na ning pamanupad yu karing turu a binie ku kekayu,

⁵ at dinan yong pansin ding amanu da ring talasuyu ku, ding propetang alang tuknang kung tutubud kekayu. E yu bitasang pemintuan ing sinabi da kekayu.

⁶ Nung manatili kayung e mamintu daptan ku keting Templo itang depat ku karin king Silo, at gamitan de ring sablang bansa ning yatu anting sumpa ing lagyu na niting siudad.

⁷ Ding pari, ding propeta, at ding sablang tau dimdam dang sasabian ku la ngan deting amanu king Templo.

⁸ At kaybat kung asabi ing pasabi na ning Ginu, dekap da ku at ngarang kinulisak, Sukat kang paten!

⁹ Baket sinabi mu king lagyu ning Ginu king iting Templo maging anti ya king Silo at king iting siudad malasak ya at ala nang bitasang manuknangan keti? Kanita pilupungnan da ku ding tau.

¹⁰ Inyang abalitan da ring manimuna na ning Juda ing milyari, memalagua lang meko king palasyu at minta la king Templo at linukluk la karing karelang lugal king Bayung Pasbul dalan.

¹¹ Kanita ngara ding pari at ding propeta karing manimuna at karing tau, Karapatdapat yang sentensiang kamatayan ing lalaking iti uling migsalita yang laban king kekatamung siudad. Ikayu mismu dimdam yeng migsalita.

¹² Kanita sinabi ku, Tinubud na ku ning Ginu ban ibalita ku ing sablang dimdam yu laban keting Templo at keting siudad.

¹³ Kailangan ing magbayu kayung bie at pamintuan ye ing Ginung kekayung Dios. Nung makanyan ing daptan yu e na na kanita ibalaus ing balak nang kasiran a sinabi nang iparala na kekayu.

¹⁴ Atyu na ku man king lalam ning kekong upaya! Daptan yu kanaku itang isipan yung mayap at matulid.

¹⁵ Oneng iti ya ing pakatandanan yu: nung paten yu ku, ikayu at ding tau niting siudad mikasala kayung pamakamate king taung alang kasalanan uling ing mitubud kanaku ya ing Ginu ban ibie ke kekayu iting babala.

¹⁶ Kanita ngara ding manimuna at ding tau karing pari at propeta, Migsalita ya kekatamu ing lalaking iti king lagyu na ning Ginung kekatamung Dios; e ya sukat paten.

¹⁷ Kaybat na nita, tinalakad la ding mapilan a makatua at ngara karing taung makatipun,

¹⁸ Inyang i Hezekia ya ing ari na ning Juda, i propeta Mikeas ning Morastita sinabi na karing sablang tau king ing Ginung Mayupaya migsalita yang anti kaniti, Masarul yang anti ing marangle ing Zion; maging buntun ne ning kasiran ing Jerusalem, at maging gubat ya ing Templo king bunduk-bundukan.

¹⁹ I Aring Hezekia at ding memalen na ning Juda e re pete i Mikeas, bagkus mitakutan ya i Hezekia king Ginu at depat na ing agyu na ba neng paligayan ing Ginu. At binawi na ning Ginu itang binalak nang miparalang kasakitan a sinabi nang iparala na. Ngeni itamu ing malapit nang paralang kasakitan king mismung sarili tamu. (

²⁰ Atin munamang metung a lalaki, Urias ing lagyu na; anak neng Semaia ning Kiriat Jearim. King lagyu na ning Ginu migsalita ya iting lalaki anti i Jeremias laban king siudad a iti at iting bansa.

²¹ Inyang dimdam nang Aring Jeoiakim at ding sundalus na ampon opisyal ing sinabi nang Urias, migkapilit ya ing ari ban ipapate ne. Oneng abalitan nang Urias iti; inya tinakas ya king takut na at minta ya Ehipto.

²² Makanyan man, tinubud ne ning Aring Jeoiakim i Elnatan a anak nang Akor at ding mapilan pang lalaki ban munta Ehipto at kuanan ya i Urias.

²³ Binalik deng pasibayu kang Aring Jeoiakim; pepapate ne at pepayugse ing bangke nang Urias king kutkutan na ning balen.)

²⁴ Oneng, aku, e ku miras karing gamat da ring tau at e ku mete, uling sinaupan na kung Ahikam a anak nang lalaking Safan.

27

¹ King pamagumpisa na ning pamag-ari nang Zedekias, ing anak nang Josias a ari ning Juda, sinabi na kanaku ning Ginu

² king gawa kung metung a paud para kanaku king kapamilatan da ring pirasung balat at dutung a pikurus at ibili ke iti king batal ku.

³ Kaybat sinabi na kanaku ning Ginu king parala kung mensahi karing ari na ning Edom, Moab, Ammon, Tiro, at Sidon king kapamilatan da ring karelang pekakatawan a dinatang king Jerusalem ban makikit kang Aring Zedekias.

⁴ Ing Ginung Mayupaya, ing Dios ning Israel, sinabi na kanaku king utusan ku lang sabian da karing karelang ari king ing Ginu pasabi na:

⁵ Aku, king kapamilatan na ning maragul kung upaya at sikanan, lelangan ke ing yatu, ding tau, at ding sablang animal a mabibie king yatu, at malyari keng ibie iti king ninumang pilinan ku.

⁶ Aku itang mibili kareting sablang bansang atyu lalam nang upaya ning kanakung talasuyu, ing Aring Nebucadenesar ning Babilonia, at apapasuyuan ku la pati na ding malyap a animal.

⁷ Suyuan de ring sablang bansa at sumuyu la naman karing anak nang lalaki at apung lalaki angga king datang ing oras na ning pangabagsak ning bansa na. Kanita sumuyu ya iting bansa na karing lalung mayupayang bansa at mayupayang ari.

⁸ Nung e ya pailalam ing isanu mang bansa o kayarian king pamamahala na, parusan ke ing bansang ita king kapamilatan na ning gera, danup, at salut angga king paintulutan keng lubus neng siran Nebucadenesar.

⁹ E kayu makiramdam karing kekong propeta o kenu mang sasabing aula na ing aldo daratang king kapamilatan ding paninap o king kapamilatan na ning pamaniaus karing espiritu da ring mete o king kapamilatan na ning salamangka. Ila ngan sasabian da kekayu king e kayu pasakup king ari na ning Babilonia.

¹⁰ Lilinlangan da kayu mu deting propeta ban milaut kayu king kekong bansa. Aku ing mitabi kekayu at magisan kayu.

¹¹ Nung pailalam ya ing isanu mang bansa king ari na ning Babilonia at suyuan ne, kanita paintulutan keng manatili king sarili nang bansa ban mananaman at manuknangan karin. Aku, ing Ginu, ing migsalita.

¹² Sinabi ku naman iti kang Aring Zedekias ning Juda. Ngaku, Pailalam ka king ari na ning Babilonia. Suyuan me at ding memalen na at e ka mate.

¹³ Baket kailangan ing ika at ding memalen mu mate la king gera o king danup o salut? Iti ya ing sinabi nang mapalyari ning Ginu king isanu mang bansang pailalam king ari na ning Babilonia.

¹⁴ E mu la pakiramdaman ding propeta a sasabing e ka susuku king ari na ning Babilonia. Lilinlangan da ka mu.

¹⁵ Sinabi na ning Ginu king e na la tinubud den at king ila, king lagyu na, magsalita lang kalaraman keka. Inya, itabi na ka at mate ka at ding propetang magsalitang kalaraman keka.

¹⁶ Kanita sinabi ku karing pari at karing tau king ing Ginu sinabi na: E kayu makiramdam karing propeta a sasabing e lumuat misubli lang ibat king Babilonia ding kasangkapan na ning Templo. Maglaram la kekayu!

¹⁷ E yu la pakiramdaman! Suyuan ye ing ari na ning Babilonia at e kayu mate! Obat kailangan pa keting siudad ing maging buntun ne ning kasiran?

¹⁸ Nung tune lang propeta at nung tune atyu ing mensahi ku karela, paburen lang aduan da kanaku, ing Ginung Mayupaya, king e ku la paintulut midala Babilonia ding mitagan a kasangkapan ning Templo at ding king palasyu na ning ari! (

¹⁹ Inyang ing Aring Nebucadenesar dela neng bihag Babilonia ing ari na ning Juda, i Jeoiakin a anak nang Jeoiakim, at ding pikabaluan nang lalaki ning Juda at Jerusalem, likuan na la ding asias, ing tangsung lulanan danum, ding pipatungan, at ding aliwa pang kasangkapan na ning Templo.)

²⁰

²¹ Aku, ing Ginung Mayupaya, ing Dios ning Israel, makiramdam kayu king sabian ku tungkul karing kasangkapan a melakuan king Templo at ding king palasyu ning ari na ning Jerusalem:

²² midala la king Babilonia at manatili la karin angga king aldo munie kung pansin kareti. Ibalik ku la kanitang pasibayu at isubli king lugal a iti. Aku, ing Ginu, ing migsalita.

28

¹ King banua mu ring ita, king kalima nang bulan ning kapat a banua nang pamag-aring Zedekias, ing propetang ibat king balen ning Gibeon, i Hananias a anak nang Azur, migsalita ya kanaku king Templo. King daramdaman da ring pari at ding tau sinabi na kanaku

² king ing Ginung Mayupaya, ing Dios ning Israel, sinabi na: Inangganan ku na ing upaya na ning ari ning Babilonia.

³ Kilub ding aduang banua ibalik ku la keting lugal ding sablang kasangkapan na ning Templo a kinua na at delang Nebucadenesar king Babilonia.

⁴ Ibalik kia naman ing ari na ning Juda, i Jeoiakin a anak nang Jeoiakim, at ding sablang memalen na ning Juda a mebihag at midala king Babilonia. Wa, ilako ku na ing upaya na ning ari ning Babilonia. Aku, ing Ginu, ing migsalita.

⁵ Kanita king daramdaman da ring pari at ding sablang taung pakatalakad kilub ning Templo, sinabi ku kang Hananias:

⁶ Masanting! Sana daptan na ning Ginu iti! Tune pin sanang gawan nang tutu ing ula mu at ibalik ibat Babilonia ding sablang kasangkapan na ning Templo at ding sablang tau a midalang bihag.

⁷ Oneng makiramdam ka king kanakung sabian keka at karing tau.

⁸ Ding propetang migsalita king milabas a panaun, bayu ku dinatang at ika antimu rin, inula ra king ing gera, danup, at salut datang karing dakal a bansa at karing mayupayang kayarian.

⁹ Oneng ing propetang manula king mika kapayapan malyari ya mung makilalang tune propetang tubud na ning Ginu, nung ing ula na maging tutu.

¹⁰ Kanita leko neng Hananias ing paud a atyu king batal nang Jeremias; pikli ne at pemirasung malati

¹¹ at ngana king daramdaman da ring sablang tau, Sinabi na ning Ginu king makanyan neng paklian ing paud a binili nang Aring Nebucadenesar karing batal da ring sablang bansa, at daptan na iti kilub ding aduang banua. Kanita meko na ku.

¹² Mapilan mung panaun kaybat na nita, sinabi na kanaku ning Ginu

¹³ king puntalan ke i Hananias at sabian: Hananias, sinabi na ning Ginu king malyari meng apakli ing paud a dutung, oneng alilan ne king paud a bakal.

¹⁴ Ing Ginung Mayupaya, ing Dios ning Israel, sinabi na king mibili yang paud a bakal kareting sablang bansa at king suyuan de i Aring Nebucadenesar ning Babilonia. Asabi na naman ning Ginu king pasuyuan na la kang Nebucadenesar pati na ding malyap a animal.

¹⁵ Sinabi ku iti kang Hananias at ngaku pa: Hananias, makiramdam ka! E na ka tinubud ning Ginu at papaniwalan mu la deting tau king e katutuan.

¹⁶ Inya ing Ginu mismu sinabi na king itabi na ka. Mate ka bayu ya mapupus iting banua uling inagkat mu la ding tau ban mag-rebeldi lang laban king Ginu.

¹⁷ At mete ya i Hananias king banua mu ring ita, king kapitung banua.

29

¹ Sinulat ku karing pari at karing propeta ampon manimuna da ring memalen, at karing sablang tau king Jerusalem a binihag nang Nebucadenesar at dela king Babilonia.

² Sinulat ke iti kaybat nang miyugse king marayung lugal ning Aring Jeoiakin, at i ima na ampon ding opisyal na ning palasyu, ding manimuna na ning Juda at ning Jerusalem, ding pande, at ding mangagaling a pangamat king obra.

³ Tinubud neng Aring Zedekias ning Juda i Elasan a anak nang Safan at i Gemarias a anak nang Hilkia, kang Aring Nebucadenesar at iting sulat. Ngana ning sulat:

⁴ Ing Ginung Mayupaya, ing Dios ning Israel, sasabian na karing sablang tau na ning Jerusalem a binihag nang Nebucadenesar at dela king Babilonia:

⁵ Manalakad kayung bale at manuknangan kayu kareti. Mananaman kayu at kanan yu ing bunga na ning pamananaman yu.

⁶ Makiasawa kayu at mikayanak. Kaybat paburen yu lang makiasawa ding anak yu ban mikayanak la naman. Kailangan ing dakal kayu at e diritak king bilang.

⁷ Magobra kayu para king ikakayap da ring siudad nung nu ku peintulut ing midala kayu bilang bihag. King uli ra, manalangin kayu kanaku, uling nung minawa la bie, minawa kayu naman a bie.

⁸ Aku, ing Ginu, ing Dios ning Israel, e yu paintulut ing linlangan da kayu ding propeta a manuknangan kayabe yu o mapirait king ninumang sasabing aula na ing bage mapalyari king daratang a panaun. E yu la dirinan pansin ding paninap a sasalita ra kekayu.

⁹ Magsalita la mung kalaraman king kapamilatan na ning lagyu ku. E ku la tinubud den. Aku, ing Ginu, ing migsalita.

¹⁰ Ngana pa ning Ginu, Kabud milabas na la ding pitung pulung banua ning Babilonia, ipakit ku ing kanakung malasakit kekayu at tuparan ku ing pengaku kung ibalik da kayu king kekayung bansa.

¹¹ Aku mu ing bukud makibalu karing planu ku para kekayu, detang planu ban minawa kayu bie at e ban misaldak; ding planu ban ibie da kekayu ing panenayan yu para karing aldo daratang.

¹² Maus kayu kanita kanaku. Lumapit kayu kanaku at manalangin, at pakibatan da kayu.

¹³ Panintunan yu ku at akit yu ku, uling panintunan yu ku king mabilug yung pusu.

¹⁴ Wa, sasabian ku, akit yu ku at ibalik da kayu king kekayung bansa. Manibat karing balang bansa at lugal nung nu ra kayu inugse, tipunan da kayu at ibalik king bansa nung nu ra kayu kinua anting bihag. Aku, ing Ginu, ing migsalita.

¹⁵ Sasabian yu king ing Ginu dininan na kayung propeta ken king Babilonia.

¹⁶ Pakiramdaman yu ing sasabian na ning Ginu tungkul king ari a sasakup king kayarian a pemahalan nang David, at ing tungkul karing tau na niting siudad. Ila ding kamaganak yu a e mebihag kayabe yu.

¹⁷ Ngana ning Ginung Mayupaya, Iparala ku ing gera, ing danup, at ing salut karela, at gawan ku lang anti ding bunga da ring higerang e mu apangan uling tune lang mebuluk.

¹⁸ Panalukian ku la king kapamilatan na ning gera, danup, at salut. Mangatakutan la ding sablang bansa ning yatu king akit dang iti. King balang lugal nung nu ku la inugse, galgal la at mabigla ding tau king akit da karela. Gawan da lang pikaylian at gamitan da la ring lagyu da bilang sumpa.

¹⁹ Mapalyari karela iti uling e ra pemintuan ing mensahing alang patugut kung peparala karela king kapamilatan da ring talasuyu kung propeta. E la bisang makiramdam.

²⁰ Ikayung tau Jerusalem a peintulut kung mebihag at idala na ning ari ning Babilonia, aku ing Ginu, makiramdam kayu king kanakung sasabian.

²¹ Ing Ginung Mayupaya, ing Dios ning Israel, migsalita ya tungkul kang Ahab a anak nang Kolaia at kang Zedekias a anak nang Maaseia a magsalitang kalaraman king lagyu na. Sinabi na ning Ginu king ibie na la king lalam nang upayang Aring Nebucadenesar ning Babilonia at ipapate na la king akakit da ring mata yu.

²² Sabian da potang ding memalen na ning Jerusalem a mebihag at midala king Babilonia pagnasan deng isumpa ing ninuman, Daptan na sana keka ning Ginu ing depat na kang Zedekias at kang Ahab a linitsun nang mabie ning ari ning Babilonia!

²³ Yan ing mapalyari karela uling dinapat lang pamikasala; mekipangalugud la at migsalitang kalaraman king kapamilatan na ning lagyu ning Ginu. Laban iti king kaburian na ning Ginu; balu na ing depat da at testigu ya laban karela. Ing Ginu ya ing migsalita.

²⁴ Ing Ginung Mayupaya, ing Dios ning Israel, dininan na kung mensahi para kang Semaia ning Nehelam

²⁵ nung ninu ing peparalang sulat king lagyu na para karing sablang tau na ning Jerusalem at kang Zefania, ing paring anak nang Maaseia, at karing sablang aliwang pari. Keting sulat, sinabi nang Semaia:

²⁶ Gewa na kang pari ning Ginu bilang kayalili nang Jeoiada, at ika na ngeni ing pamuntuk king Templo. Katungkulan mu ing siasatan me at itanikala ampon itali batal king bakal ing balang mamulang a taung magkunwaring propeta.

²⁷ Obat e mu depat yan kang Jeremias ning Anatot a mamagsalita karing tau bilang propeta?

²⁸ Sukat yang sabatan uling sinabi na karing taung atyu Babilonia king manatili lang bihag karin king makabang panaun, inya sukat lang manalakad bale tuknangan da, mananaman, at kanan ing sablang apupul da.

²⁹ Binasa neng Zefania kanaku iting sulat,

³⁰ at kaybat sinabi na kanaku ning Ginu

³¹ king iparala ke ing mensahi karing sablang bihag king Babilonia tungkul kang Semaia. Ngana: Aku, ing Ginu, parusan ke i Semaia at ding sablang lahi na. E ke tinubud; makanyan man migsalita ya kekayung balamu mo wari metung yang propeta at pepaniwalan na kayu king e katutuan. E ya mikayanak libutad yu.

³² E na la akit king bie na ding mayap a bage a malapit ku nang daptan para karing taung kanakung pinili, uling inagkat na lang mag-rebeldi laban kanaku. Aku, ing Ginu, ing migsalita.

30

¹ Migsalita ya kanaku ing Ginu, ing Dios ning Israel.

² Ngana, Isulat mu king pisusulatan a lulun ing sablang bage sinabi ku keka,

³ uling daratang na ing panaun nung kapilan ku la ibalik ding taung kanakung pinili, ing Israel at ing Juda. Ibalik ku lang pasibayu king bansang binie ku karing makatua da at bandian de iting pasibayu. Aku, ing Ginu, ing migsalita.

⁴ Nganang sasabi ning Ginu karing memalen na ning Israel at Juda:

⁵ Dimdam ke ing kulisak ning gagalgal, ing kulisak ning tatakut at aliwa ing kulisak ning kapayapan.

⁶ Tuknang ka at mibulebule! Malyari ya waring manganak ing lalaki? Baket akakit ku la ding gamat ding balang lalaki a makatalan karing karelang atian anti ing babaing miraramdam? Baket maputla ya ing balang metung?

⁷ Daratang ne ing aldo makatakut; ala yang kalupa ing aldong iti; panaun ne ning kaligaligan para karing taung kakung pinili; oneng mikabus la.

⁸ Ngana ning Ginung Mayupaya, Potang datang ne ing aldong ita, paklian ke ing paud a atyu karing batal da at ilako ku la ding tanikala ra. E na la pasibayung maging ipus da ring dayuan.

⁹ Nune, ila ding sumuyu kanaku, ing Ginung karelang Dios, at ibie ke ing lahi nang David ban maging ari da.

¹⁰ Taung kakung pinili, e kayu tatakut; memalen ning Israel, e kayu mangatakutan. Iligtas da kayu ibat king marayung bansa, king bansa nung nu kayu midalang bihag. Magbalik kayu king kekong bansa, at king kapayapan karin kayu manuknangan; mipanatag kayu bili at metung man ala nang mamatakut kekayu.

¹¹ Datangan da kayu at iligtas. Lasakan ku la ngan ding sablang bansa nung nu ra kayu inugse, oneng e ra kayu gisanan paten. E ku paintulut ing e kayu miparusan; oneng potang parusan da na kayu, ing karapatdapat ya ing iyatul ku kekayu. Aku, ing Ginu, ing migsalita.

¹² Ngana ning Ginu karing taung pinili na, Alang panulu para karing kekong menasakit, e la malyaring kumayap ding kekong sugat.

¹³ Ala metung mang kekayu lumingap, alang lunas para karing kekong sugat, ala nang kapanayan para king kekong pangakayap.

¹⁴ Kelinguan da kayu ding sablang kekayu malsinta; ala na lang pakialam. Aku ing linusub kekayu antimong metung a kalaban; ing digpa kekayung parusa bina yang mabayat, uling dakal ing kekong kasalanan at dakal ing e mayap kekayu.

¹⁵ Tuknang na kong daralung tungkul king kekong panamdaman; ala nang panulu para king kekong ikakayap. Makanyan da kayung perusan, uling dakal ing kekong kasalanan at dakal ing e mayap kekayu.

¹⁶ Oneng ngeni, ding sablang kekayu linaklak ilang malaklak, at ding sablang kekong kalaban, ila naman ding mabihag. Ding sablang kekayu menggipit ila ding magipit, at ding sablang keko miniamsam ila ding masamsam.

¹⁷ Pasibayu da kong pakayapan; ding sugat yu kaku lang uluan, agyang sabian da ring kekong kalaban, Miyugse ya ing Zion; alang magmalasakit metung man king Zion. Aku, ing Ginu, ing migsalita.

¹⁸ Ngana pa ning Ginu, Ibalik ku la ding taung pinili ku king bansa da, at lunus ing pakit ku king balang pamilya. Ing Jerusalem malarin ya; at pati na ing palasyu na.

¹⁹ Ding karin manuknangan kapurian ing ikanta da, kulisak la king tula ra. Bendisyunan ku la at dakal la king bilang; ing kakung bendisyun atdanan na lang dangalan.

²⁰ Ibalik ku ing matua nang kayupayan ning bansa, at pasibayung italakad matibe; parusan ku la ding sablang liligalig karela.

²¹ Ing manimuna da manibatan ya king mismung bansa da, at karing kabalen da ing prinsipi ra. Potang agkatan ke, lumapit ya; ninu wari ing mangangas datang nung e ya mekumbira?

²² Ila ding maging memalen ku, at aku ing maging Dios da. Aku, ing Ginu, ing migsalita.

²³ Anti ya king bagyu ing mua ning Ginu; masikan yang angin a mabagsik dumalan babo ding buntuk da ring e mayap.

²⁴ E ya patugut anggang e ngan merapat ing sablang buri nang daptan. Karing aldo daratang kanita da pa lubus aintindian ding memalen na.

31

¹ Ngana ning Ginu, Daratang ne ing panaun nung kapilan aku ing maging Dios da ring sablang lahi nang Israel at ila ding maging memalen ku.

² Karin king disyerto pepakit kung lunus karetang taung mekaligtas king kamatayan. Inyang bisa lang mika kapaynawan ding Israelita,

³ pepakit ku karela ibat king marayung lugal. Memalen ning Israel, menatili kung malugud kekayu, inya menatili kung papakit kekayu ing lugud kung e kukupas.

⁴ Pasibayu da kayung italakad. Pasibayu da kayung patigtigan karing kekong pandereta at terak kayung masaya.

⁵ Pasibayu kayung tanam ubas karing bunduk-bundukan na ning Samaria at mangan la detang menanaman karing bunga da ring ubasan.

⁶ Wa, daratang na ing panaun nung kapilan ding lalaking magbante ikulisak da karing bunduk-bundukan na ning Efraim, Tara at mukiat tamu king Zion, king Ginung kekatamung Dios.

⁷ Ngana ning Ginu, Magkanta kayung masaya para king Israel, ing maragul dili karing bansa. Magkanta kayu karing kanta ning kapurian, Linigtas na la ning Ginu ding memalen na; kinabus na la ding sablang mitagan.

⁸ Iyuli ku lang ibat king norting bansa, at tipunan ibat karing wakas ning yatu. Datang lang kayabe ra ding bulag at pile, ding mabuktut at ding malapit nang manganak. Muli lang metung a maragul a bansa.

⁹ Kikiak lang datang ding taung kakung memalen; manalangin la kabang kaku lang tatairan. Tairan ku la karing sibul ning danum, karing patag a dalan, at e la misakab. Uling anti kung tata para king Israel, at ing Efraim ya ing kakung pangane.

¹⁰ Ngana pa ning Ginu, Ikong bansa, makiramdam ko kaku at ibalita yu la ding amanu karing marayung pulu. Kaku lang kinalat ding taung kakung pinili, oneng kaku lang tipunan at banten anti ing pastul a magbante karing keyang kawan.

¹¹ Gewa ku lang malaya ding memalen ning Israel, at linigtas ibat king bansang mayupaya.

¹² Datang la at magkanta king tula king Bunduk ning Zion, at tumula la karing kakung babie: binutil, alak, at larung olibo, tupa ampon baka. Mangari la king mulahan a parating mididiligan, at e na la takman kalungkutan kapilan man.

¹³ Terak la kanita ding anak a babai, at maging masaya la at tumula la ding lalaki, kayanakan, at ding makatua. Pasiknangan ku la lub, at ing pamagpaldas da gawan kung tula, at ing lungkut da saya. fig,,,,,Terak la kanita ding anak a babai, at maging masaya la at tumula la ding lalaki, kayanakan, at ding makatua.,(31:13)fig*

¹⁴ Pakabsian ku la ding pari king pekamaniaman a pamangan, at ibie ing kailangan da ring sablang taung kakung pinili. Aku, ing Ginu, ing migsalita.

¹⁵ Ngana ning Ginu, Ing metung a siwala meramdam ya king Rama, ing siwala ning mapait a tangis. Manangis ya i Raquel uling ding anak na ala na la, at tatanggian na ing mipaligayan ya.

¹⁶ Tuknang na kang kikiak, at lua kekang pulisan. Ing sablang kekang depat para karing kekang anak siguradung miyablasan; datang lang pasibayu ibat king bansa da ring kalaban.

¹⁷ Ating kapanayan para king kekang panaun a daratang; magbalik la keka ding kekang anak. Aku, ing Ginu, ing migsalita.

¹⁸ Daramdaman ku la ding memalen ning Israel a magsalitang mitmung lungkut. Ngara, Ginu, mengari kami karing malyap at alang isip a toro, oneng tiru mu kaming maging mapamintu. Ibalik mu kami; makasadia kaming mibalik keka, ing Ginung kekeng Dios.

¹⁹ Ginulut ke keka, oneng e migluat mignasa keng mibalik. Kaybat mu keng perusan, diku mi la ding kekeng buntuk king lungkut. Mengapakarine kami at milako dangalan, uling mikasala kami inyang kayanakan kami.

²⁰ Israel, ika ing pakamalan kung anak, ing anak a tutu kung kaluguran. Neng babanggitan ke ing kekang lagyu, agaganaka da kang mitmung lugud. Titibuk ya ing pusu ku para keka; maging malunusan ku keka.

²¹ Mibili kang tanda at tandanan me ing dalan; pasibayu meng panintunan ing dalan a kekang likuan. Magbalik kayu, memalen ning Israel, muli na kayu karing balen yung likuan.

²² Angga kapilan, ikong taung alang kapanaligan ing mikakunu kayu? Linalang kung metung a bage bayu at makayaliwa, anting babaing magdipensa para king lalaki.

²³ Ing Ginung Mayupaya, ing Dios ning Israel, sasabian na, Potang ibalik ku na la ding tau king karelang bansa, pasibayu dang sabian king bansa ning Juda at karing balen na ing anti kaniti, Mananu na sanang bendisyunan ne ning Ginu ing banal nang bunduk-bundukan ning Jerusalem, ing banal a lugal nung nu ya manuknangan.

²⁴ Manuknangan la ding tau king Juda at karing sablang balen na at mika ortelanu ampon pastul a kayabe ding kawan da.

²⁵ Dinan ku lang kapaynawan detang mapagal at pakabsian ing balang metung a maina uli na ning danup.

²⁶ Inya ding tau karelang sabian, Metudtud ku at presku ku panamdam inyang migising ku.

²⁷ Aku, ing Ginu, sasabian ku king ing panaun daratang na nung kapilan katmuan ku lang tau at animal ding bansang Israel at Juda.

²⁸ At nung makananu keng begutan, lesakan, belugse, lesak, at kelisan king balat ning gabun, makanyan keng itanam at italakad pasibayu.

²⁹ Potang datang na ing panaun a ita, e ra na pasibayung sabian ding tau, Mengan lang maslam a ubas ding pengari, at meliniu la ipan ding karelang anak.

³⁰ Nune, liniu ya ipan ing balang mangan maslam a ubas, at mate ya ing ninuman uli na ning depat nang kasalanan.

³¹ Ngana ning Ginu, Daratang na ing panaun nung kapilan gawa kung bayung kasunduan karing memalen ning Israel at karing memalen ning Juda.

³² E ne kalupa nitang matuang kasunduan a gewa kung kayabe ding karelang makatua inyang linigtas ku la karing gamat ku at leko king Ehipto. E re tiparan ing kasunduan agyang meging anti kung asawang lalaki karela.

³³ Anti ya kaniti ing bayung kasunduan a gawan ku karing memalen ning Israel: Ibili ke ing kautusan ku king mabilug dang pangatau at isulat ke iti karing karelang pusu. Aku ing maging karelang Dios at ila naman ding maging memalen ku.

³⁴ Ala na metung man kanita ing ituru ne ing kabalen na ban pakibaluan ne ing Ginu uling ding sabla abalu ra ku, manibat king malating dili at angga na king maragul dili. Patawaran ku ing karelang kasalanan at kalinguan ku ing karelang kasalanan. Aku, ing Ginu, ing migsalita.

³⁵ Papaslag ne ning Ginu ing aldo ban maging sala neng aldo, ing bulan, at ding batuin para king kabengian. Aligogon ne ing dagat ban miung ya; Ginung Mayupaya ing lagyu na.

³⁶ Pangaku na king manatili yang bansa ing Israel kabang manatili ing kaayusan ning keyang lelangan.

³⁷ Nung datang ing oras a ing banua masukad ya, at ding pundasyun ning yatu masiasat la, kanita tanggian na la ding memalen ning Israel, uli ning kasalanan da. Ing Ginu ya ing migsalita.

³⁸ Ngana ning Ginu, Daratang na ing panaun nung kapilan ing mabilug nang siudad ning Jerusalem pasibayu yang mitalakad manibat king dane albugan ning Toring Hananel angga king Pasbul dalan ning Suluk.

³⁹ At taglus ya ing angganan na manibat karin king dane albugan angga king bunduk-bundukan na ning Gareb at dumurut angga na king Goa.

⁴⁰ Ing kabilugan a kapatagan nung nu ra la kukutkut ding mete at iyugse ing basura at ding sablang marangle babo ning Sapa ning Kidron at angga na king Pasbul dalan ding Kabayu dane aslagan, maging banal lang lugal para kanaku. E ne kapilan man pasibayung mabagut o malasak ing siudad.

32

¹ Migsalita ya ing Ginu kanaku king kapulu nang banuang pamag-aring Zedekias ning Juda; ya naman iti ing kalabi nang walung banuang pamag-aring Nebucadenesar king Babilonia.

² King panaun a ita, lulusuban de ring sundalus na ning ari ning Babilonia ing Jerusalem at makakulung ku king sukulan a makataid king palasyu.

³ Kilung na ku karin ning Aring Zedekias at singkanan na kung mengalat balita king ing Ginu kanu sinabi na, Paburen keng bihagan na ning ari ning Babilonia iting siudad,

⁴ at e ya makatakas i Aring Zedekias. Miyabie ya king gamat na ning ari ning Babilonia; akit ne lupa at lupa at magsalitang arapan king ari.

⁵ Midala ya i Zedekias king Babilonia at manatili ya karin angga king akayarap ke. Agyang labanan na la pa ding sundalus na ning Babilonia, makanyan man masambut ya. Aku, ing Ginu, ing migsalita.

⁶ Sinabi na kanaku ning Ginu

⁷ king i Hanamel, ing lalaking anak nang bapa kung Salum, datangan na ku at ipakisabi nang mayap king saliwan ke ing marangle na a atyu king Anatot, king gabun ning tribu ning Benjamin, uling aku ing pekamalapit nang kamaganak at ing ating matulid sali kaniti.

⁸ Nung makananu nang sinabi kanaku ning Ginu, makanyan yang dinatang kanaku karin king sukulan ing pisan kung i Hanamel at inawad na kanaku king saliwan ke ing marangle. Kanita ku abalu king tune yang migsalita kanaku ing Ginu.

⁹ Seli ke ing marangle nang Hanamel at tinimbang ku la ding salaping pemayad ku; mika alaga yang labing pitung pirasung pilak.

¹⁰ Pinirman ke at tetakan ing kasulatan ning pamisaliwanan at minaus kung lalaki ban magtestigu kaniti, at tinimbang ku la ding salapi king timbangan.

¹¹ Kaybat na nita, kinua ku la ding kopia ning pamisaliwanan, ing kopia ning kontrata, at ding kondisyun na at ing kopia ning titulu ning gabun,

¹² at binie ku la kang Baruk, ing anak nang lalaking Neria at Maseia. Binie ku la kang Baruk king akakit na ning pisan kung i Hanamel, ding testigu a migpirma king kasulatan na ning pamisaliwanan at king akakit da ring lalaking pakalukluk king patyu.

¹³ King daramdaman da ngan sinabi ku kang Baruk,

¹⁴ Ing Ginung Mayupaya, ing Dios ning Israel, iyutus na keka king dalan mu la deting kasulatan ning pamisaliwanan, ing ating tatak at ing titulu na ning gabun at ibili mu la king datukanan a megawa king pila ban maingat la king makabang panaun.

¹⁵ Ing Ginung Mayupaya, ing Dios ning Israel, sinabi na king ding bale, marangle, at ding mulahan ubas pasibayu lang asali king bansang iti.

¹⁶ Kaybat keng aibie ing kasulatan na ning pamisaliwanan kang Baruk, menalangin ku.

¹⁷ Ngaku, Ginung Dios, lelangan me ing yatu at ing banua king kapamilatan na ning kekang maragul a upaya at sikanan; alang bage a e mu arapat.

¹⁸ Pepakit mu ing lugud mung e kukupas karing libu-libung tau, oneng paparusan mu la naman uli da ring kasalanan ding pengari da. Metung kang maragul at mayupayang Dios; ika ing Ginung Mayupaya.

¹⁹ Mayap la ding kekang tatangka at darapat kang mangaragul a bage; akakit mu ing sablang daraptan da ring tau at ablasan mu la agpang king pamibiebie ra at dapat.

²⁰ King milabas a panaun, dinapat kang dakal a milagru at bage pagmulalan karin king Ehipto at angga ngening aldong iti darapat ka pang milagru e mu para king Israel nune karing sablang aliwang bansa, inya pikabaluan ka nukarin mang lugal.

²¹ King kapamilatan da ring milagru at bage pagmulalan a minie takut karing kekaming kalaban, ginamit mu ing kekang upaya at sikanan ban ilako la ding memalen mung Israel karin king Ehipto.

²² Binie me karela iting mayap at matabang gabun a pengaku mu karing karelang makatua.

²³ Oneng inyang miras na la keting gabun at karela yang bindian, e da na la tiparan ding utus mu at e la mibiebie agpang karing turu mu. Ala lang bitasang tiparan karing bage inutus mung daptan da. Inya naman dela mu karela iting sablang kasiran.

²⁴ Ginawa lang barikada ding sundalus na ning Babilonia king makapadurut ning siudad ba reng abihag, at lulusuban da ne. Ing gera, ing danup, at ing salut ila ding sangkan king pangabagsak na ning siudad karing gamat da. Akakit mu king ing sablang sinabi mu mepalyari.

²⁵ Makanyan man, ika, Ginung Dios, ing minutus kanakung saling marangle king daramdaman da ring saksi agyang ing siudad malapit da niang abihag ding sundalus na ning Babilonia.

²⁶ Kanita ngana kanaku ning Ginu,

²⁷ Aku ing Ginu, ing Dios da ring sablang tau. Alang bage a e ku arapat.

²⁸ Ibie ke iting siudad kang Aring Nebucadenesar ning Babilonia at karing sundalus na at ilang makabihag keting siudad.

²⁹ Silaban de iti angga king mapupud yang kayabe da ring bale da ring taung pepamua kanaku uli na ning pamanduluk dang insenso para kang Baal babo rang bale, at uli na ning karelang pamitugtug alak bilang ain da karing aliwang dios.

³⁰ Manibat king kapupurmeruan ning istoria na ning karelang bie, sinugat da na ku kapanamdaman at pepamua ding memalen na ning Israel at ning Juda king kapamilatan na ning depat da.

³¹ Manibat ketang oras a mitalakad ya iting siudad, pepamua da na ku deting tau at sinugat a panamdam. Inari ku king lub ku king lasakan ku ne,

³² uli na ning dakal a e ustung merapat king kapamilatan da ring memalen na ning Juda at ning Jerusalem at ding karelang ari, manimuna, pari, at propeta.

³³ Gilutan da ku at agyang sindu ku ing pamanuru karela; e la mekiramdam ni mebiasa man.

³⁴ Kebit da la pa ding makasumami rang idolo king Templong pisasamban kanaku at dinatan de.

³⁵ Ginawa lang altar para kang Baal karin king Kapatagan ning Hinom ban ibie da lang ain-sakripisyu ding anak da para kang Molek, ing kikilalanan dang dios. E ku inutus karela ing daptan da iti at e bitasang linub king isip ku king daptan da ing makanyan a bage at tairan da la ring memalen na ning Juda king pamikasala.

³⁶ Ngana kanaku ning Ginu, ing Dios ning Israel, Jeremias, sasabian da ring tau king ing gera, ing danup, at ing salut ilang sangkan king pangabagsak na niting siudad karing gamat na ning ari ning Babilonia. Makiramdam ka ngeni king kanakung sabian.

³⁷ Tipunan ku la ding tau manibat karing bansa nung nu ku la inugse uli na ning mua ku, kasbu, at pangasugat a panamdam. At ibalik ku la keting lugal at paburen ku lang mibiebie king alang panganib.

³⁸ Ila kanita ding maging memalen ku, at aku ing maging Dios da.

³⁹ Dinan ku lang metung mung pusu at metung mung parasan king bie: king pitakutan da ku king sablang panaun para king sarili dang ikakayap at ding maging lahi ra.

⁴⁰ Gawa kung alang anggang kasunduan karela. E ku tuknang darapat mayap a bage para karela at ibili ku ing takut king mabilug dang pusu ban kanita e na la pasibayung magtaksil kanaku.

⁴¹ Maging tula ku ing dapat mayap a bage para karela at papanatilian ku na lang manuknangan keting labuad.

⁴² Nung makananu kung dela iting kasakitan kareting memalen, makanyan ku la munamang idala karela ding bage mayap a kanakung pengaku.

⁴³ Sasabian da ring tau king iting bansa maging anti ya king disyerto a alang tau at alang animal a malyaring mie, at miyabie ya kanu karing tau Babilonia. Oneng pasibayu lang masali ding marangle keting bansa.

⁴⁴ Sali la ding tau at mapirma la ding katibayan na ning pamisaliwanan, mitatakan, at misaksian. Marapat iti king sakup ning tribu ning Benjamin, karing baryung makapadurut Jerusalem, karing balen na ning Juda, karing balen karing bunduk, karing lele da ring bunduk-bundukan, at king dane mauli na ning Juda. Ibalik ku la ding tau king karelang lugal. Aku, ing Ginu, ing migsalita.

33

¹ Kabang atyu ku pa king sukulan ning palasyu, pasibayung dinatang kanaku ing amanu na ning Ginu.

² Migsalita ya kanaku ing Ginu, ing linalang king yatu, ing miyubug kaniti, at mibili king lugal na. Ngana kanaku ning maki lagyung Ginu,

³ Maus ka kanaku at pakibatan da ka; sabian ku la keka ding malagu at makapagmulalang bage a e mu balu.

⁴ Aku, ing Ginu, ing Dios ning Israel, sasabian ku king malasak la ding bale na ning Jerusalem at ing palasyu na ning Juda uli na ning pangakubkub na.

⁵ Ating lumaban karing sundalus na ning Babilonia at katmuan da la ring bale karing mete a kanakung idagsa king uli na ning mua ku at pangasugat a panamdam. Pepaburen ku ne iting siudad uli da ring e mayap a bage a depat da ring memalen na.

⁶ Oneng uluan ke iting siudad at ding memalen na at ibalik la king masanting a pamikakatawan. Maging labis-labis ing pagkabiayan da at maging panatag king bie.

⁷ Ibalik ku la ding pibandian na ning Juda at ning Israel, at pasibayu lang italakad antimo ing kabilian da kanitang minunang panaun.

⁸ Linisan ku la king karelang kasalanan a depat dang laban kanaku at patawaran ku ing kasalanan da at ing pamag-rebeldi ra kanaku.

⁹ Ing Jerusalem ya ing panibatan na ning tula, dangalan, at kapurian para kanaku, at mitakutan la ding balang bansa ning yatu, at galgal la potang damdaman da la ring mayap a bage a daptan ku para karing memalen na ning Jerusalem, at ibie ku ing pangapala keting siudad. fig,,,, ,... pasibayung dinatang kanaku ing amanu na ning Ginu.,(33:1)fig*

¹⁰ Nganang migsalita ning Ginu, Sasabian da ring tau king mengari ya kanu iting bansa king disyerto, king alang tau o animal man a manuknangan. At tutu ing sasabian da uling ding balen na ning Juda at ding dalan na ning Jerusalem ala lang laman; alang tau o animal man a manuknangan. Oneng pasibayu yang damdaman kareting lugal

¹¹ ing kulisakan ning ligaya at tula ampon ding masayang inge da ring kakasal. Damdaman yu la ding taung magkanta kabang darala da la ring ain dang kapasalamatan king kakung Templo. Sabian da, Munie kayung kapasalamatan king Ginung Mayupaya, uling mayap ya, at ing lugud na alang angga. Gawan keng mapala iting bansa anti kanitang minunang panaun. Aku, ing Ginu, ing migsalita.

¹² Nganang migsalita ning Ginu, Keting bansang mengaring disyerto nung nu alang tau o animal a mabibie, mika pasibayung pastulan nung nukarin da la adala ding pastul ding tupa ra.

¹³ Karing balen karing bulubundukan, king lele ding bunduk-bundukan at king dane mauli ning Juda, king gabun ning tribu ning Benjamin, karing baryung makapadurut king Jerusalem, at karing balen ning Juda pasibayu lang mamilang ding pastul karing tupa ra. Aku, ing Ginu, ing migsalita.

¹⁴ Ngana ning Ginu kanaku, Daratang na ing panaun nung kapilan ku tuparan ing pengaku ku karing memalen na ning Israel at Juda.

¹⁵ At king panaun a ita mamili kung maging ari da king lahi nang David at maging anti ya king pamag-ari na. Daptan na ning aring ita ing mayap at ing makatuliran king mabilug a bansa.

¹⁶ Miligtas la ding memalen na ning Juda at Jerusalem at mibiebie la king alang panganib. Ing siudad mayaus yang Makatuliran Ya ing kekeng Ginu.

¹⁷ Aku, ing Ginu, pangaku ku king manatili yang ating lahi i David ban maging ari na ning Israel,

¹⁸ at king ating manatiling paring ibat king tribu nang Levi ban sumuyu kanaku, at ban mamie karing ain-a-durulukan, karing binutil ain, at karing ain-sakripisyu.

¹⁹ Ngana kanakung sinabi ning Ginu,

²⁰ Ginawa kung kasunduan king aldo at king bengi ban sunlag la king takdang oras, at e ya malabag ing kasunduan a ita kapilan man.

²¹ Makanyan ku munamang ginawang kasunduan kang David a kanakung talasuyu, king manatili yang ating lahi ban maging ari, at metung a kasunduan karing paring ibat king tribu nang Levi ban manatili lang susuyu kanaku; at e la malabag detang kasunduan a deta kapilan man.

²² Dagdagan ku la bilang ding lahi nang David a talasuyu ku at ding paring ibat king tribu nang Levi ban maging masakit ing pamamilang karela antimo ing pamamilang karing batuin na ning banua o ing balas king pampang na ning dagat.

²³ Ngana kanaku ning Ginu,

²⁴ E mu wari apansinan ing sasabian da ring tau king aku kanu tinggian ke ing Israel at ing Juda, ding aduang pamilyang kanakung pinili? Inya linawe da la ring taung kanakung pinili king mitmung pamaninsultu at e da na la bitasang tatanggapan antimong metung a bansa.

²⁵ Oneng aku, ing Ginu, atin kung kasunduan king aldo at king bengi, at ginawa kung kautusan a mamahala king yatu at king banua.

²⁶ Nung makananu kung depat iti, makanyan ku munamang papanatilian ing kanakung kasunduan karing anak nang Jacob at kang David a kanakung talasuyu. Mamili kung metung karing lahi nang David ban manimuna karing lahi nang Abraham, Isaac, at Jacob. Maging malunusan ku karing taung kanakung pinili at pasibayu ku lang gawan mapala.

34

¹ Migsalita ya kanaku ing Ginu inyang ing Aring Nebucadenesar ning Babilonia at ding sundalus na tatanggap lang saup karing aliwang sundalus a ibat karing sablang bansa at taung miyayaliwa kule balat a makapailalam king upaya na. Lulusub la kanita king Jerusalem at karing makasiping a balen.

² Ing Ginu, ing Dios ning Israel, sinabi na kanaku king munta ku at sabian kang Aring Zedekias ning Juda ing anti kaniti: Aku, ing Ginu, ibie ke iting siudad king ari na ning Babilonia at silaban ne angga king mipatag ya king gabun.

³ E ka makatakas; mabihag ka at miyabie king ari ning Babilonia. Akit me lupa't lupa at akapagsalita meng arapan; kaybat midala ka Babilonia.

⁴ Zedekias, pakiramdaman mu ing sasabian ku tungkul keka. E ka mate king labanan.

⁵ Mate ka king kapayapan. Nung makananu lang dinuluk insenso ding tau inyang kitkut da la ring makatua mu a meging ari bayu ika, duluk la namang insenso para keka. Tumangis la para keka at sabian da, Mete ya ing kekeng ari! Aku, ing Ginu, ing migsalita.

⁶ Kaybat na nita, binie ke iting mensahi kang Aring Zedekias karin king Jerusalem

⁷ kabang ding sundalus na ning ari ning Babilonia lulusuban de ing siudad. Lulusuban dia naman ing Lakis at ing Azeka, ding aliwang pakakutang siudad a mitagan king Juda.

⁸ Pikasundu ning Aring Zedekias at ding memalen na ning Jerusalem ing ibulus

⁹ da la ring ipus dang Hebreo, lalaki at babai, ban ala nang manipus karing kalupa dang Israelita.

¹⁰ Pikayari da ring sabla at ding manimuna da ing ibulus da la ring karelang ipus at e na la manipus pang pasibayu. At binulus da la.

¹¹ Oneng e linuat migbayu la isip; kinua da lang pasibayu at pinilit gewang ipus da.

¹² Kanita ing Ginu,

¹³ ing Dios ning Israel, sinabi na kanaku king sabian ku karing memalen ing anti kaniti: Ginawa kung kasunduan karing makatua yu inyang linigtas ku la king Ehipto at leko king panga-ipus. Sinabi ku karela king

¹⁴ balang kapitung banua ibulus ya ing ninuman karing kalupa dang Hebreo a mipisali karela at nung ninu ing mekasuyu na karela kilub ding anam a banua. Oneng e ra ku pekiramdaman ding makatua yu ni pemintuan ing sinabi ku.

¹⁵ Mapilan pa mung aldo ing milabas migbayu kayu isip at depat yu itang bage katanggap-tanggap kanaku. Pikayari yu ngan king ibulus ye ing kalupa yung Israelita at ginawa kayung kasunduan king kanakung arapan, king Templo nung nukarin da ku sasamban ding tau.

¹⁶ Oneng pasibayu kayung migbayu isip at lepastangan yu ku. Kinua yu lang pasibayu ding ipus a binulus yu at pinilit yu lang gewang pasibayung ipus.

¹⁷ Inya ngeni, aku, ing Ginu, sasabian ku king e yu ku pemintuan; e yu binie karing kalupa yung Israelita ing karelang kalayaan. Inya, dinan da kayung kalayaan: ing kalayaan mate king gera, king salut, at king danup. Mitakutan ya ing balang bansa ning yatu king daptan ku kekayu.

¹⁸ Ding opisyal na ning Juda at ning Jerusalem, at ding opisyal na ning palasyu, ding pari, at ding sablang manimuna, ginawa lang metung a kasunduan kanaku king kapamilatan na ning pamanlakad da pilatan na ning mepitnang toro a karelang sigsag king aduang dake. Oneng sinira de ing kasunduan at e ra tiparan ing kayaduanan na. Inya daptan ku kareting tau itang depat da king toro.

¹⁹

²⁰ Ibie ku la karing gamat da ring karelang kalaban a bisang makamate karela, at maging pamangan da la ring ayup at ding malyap a animal ding bangke ra.

²¹ Ibie kia naman i Aring Zedekias ning Juda at ding opisyal na karetang bisang makamate karela. Ibie ku la karing gamat da ring sundalus na ning Babilonia a tinuknang lulusub laban kekayu.

²² Ibie ke ing utus at mibalik la keting siudad. Lusuban de at bihagan ampon silaban. Gawan ku lang anting disyerto ding balen ning Juda nung nukarin alang mabibie. Aku, ing Ginu, ing migsalita.

35

¹ Ngana kanaku ning Ginu inyang i Jeoiakim a anak nang Josias ya ing ari na ning Juda,

² Munta ka king pamilya da ring Recabita at magsalita ka karela. Kaybat idala mu la king metung nang kuartu ning Templo at apagan mu lang alak.

³ Inya dela ke ing mabilug a pamilyang Recabitai Jazanias (ing anak ning kalagyu nang Jeremias a anak nang Habazinias) at ding kapatad nang lalaki at anak nang lalaki

⁴ at dela ku la king Templo. Dela ku la king kuartu da ring disipulu na ning propetang i Hanan a anak nang Igdalias. Atyu ya iting kuartu king babo ning kuartu nang Maaseia a anak nang Salum; ya ing pekamaulagang opisyal na ning Templo, at atyu lele ding kuartu da ring aliwang opisyal.

⁵ Kaybat binili ku la ding kopa at ding lulanan a mitmung alak king arapan ding Recabita. Ngaku karela, Minum kayung alak.

⁶ Pekibat da, E ke miminum alak uling i Jonadab, ing kekeng makatua a anak nang Recab, inutus na kekami at karing maging lahi mi ing e ke miminum kapilan man king nanumang alak.

⁷ Inutus na naman kekami ing e ke manalakad bale ni sarul gabun at e tanam ubas ni sali mang mulahan ubas. Inutus na king manatili kaming manuknangan karing tolda ban makapanatili keng manuknangan keting bansa bilang dayuan.

⁸ Pemintuan mi ngan ing inutus na kekaming Jonadab. E kami miminum alak ni ding asawa mi, anak a lalaki o babai.

⁹ E kami manalakad bale ban tuknangan; manuknangan kami karing tolda at ala kaming mulahan ubas, marangle o binutil.

¹⁰ Lubus ming pemintuan ing nanumang inutus nang Jonadab a makatua mi.

¹¹ Inyang lisuban neng Aring Nebucadenesar ing bansa mi, pikayari mi ing munta kami king Jerusalem ban miligtas karing sundalus na ning Babilonia at Siria. Iti ya ing sangkan nung inya manuknangan ke king Jerusalem.

¹² Kanita ing Ginung Mayupaya, ing Dios ning Israel,

¹³ sinabi na kanaku ing mako ku at sabian karing memalen na ning Juda at Jerusalem ing anti kaniti: Aku, ing Ginu, kukutang ku nung ba't tinanggi kayung makiramdam kanaku at e memintu karing utus ku.

¹⁴ Memintu la ding lahi nang Jonadab king utus a e la miminum alak at angga king aldong iti e la bitasang miminum. Menatili kung magsalita kekayu, makanyan man e yu ku pemintuan.

¹⁵ Sindu ku ing pamitubud karing talasuyu kung propeta, at sinabi da kekayu king patugut na kayung darapat e mayap at dapat king matulid. Belan da kayu king e kayu sasamba ni susuyu karing aliwang dios ban makapanatili kayung manuknangan king bansa a binie ku kekayu at karing makatua yu. Oneng e yu ku buring pakiramdaman ni babie man pansin kanaku.

¹⁶ Memintu la ding lahi nang Jonadab king utus a binie na karela ning makatua da, oneng ikayu e yu ku pemintuan.

¹⁷ Inya naman, aku, ing Ginung Mayupaya, ing Dios ning Israel, iparala ku ing sablang kasiran kekayung memalen na ning Juda at Jerusalem a kakung pengaku. Daptan ku iti uling e kayu mekiramdam inyang migsalita ku kekayu at uling e kayu mekibat inyang inaus da kayu.

¹⁸ Kanita sinabi ku king pamilyang Recabita king ing Ginung Mayupaya, ing Dios ning Israel, sinabi na, Pamintuan yu ing utus a binie na kekayung Jonadab a makatua yu; tikian yu ngan ing tiru na kekayu, tiparan yu ngan ing bage inutus na kekayu.

¹⁹ Inya aku, ing Ginung Mayupaya, ing Dios ning Israel, pangaku ku kang Jonadab a anak nang Recab king manatili yang mika lahing lalaki ban sumuyu kanaku.

36

¹ Migsalita ya kanaku ing Ginu kanitang kapat nang banuang pamag-aring Jeoiakim king Juda a anak nang Josias. Ngana,

² Kuma kang pisusulatan a lulun at isulat mu ing sablang sinabi ku keka tungkul king Israel at king Juda ampon karing sablang bansa. Isulat mu ing sablang sinabi ku keka manibat na kanitang minunang migsalita ku keka, inyang i Josias ya ing ari at angga na ngening kasalukuyan.

³ Magkang gumulut la ding memalen na ning Juda king e ustung pamibiebie potang damdaman da ing sablang kasiran a buri kung iparala karela. Kanita patawaran ku ing depat dang e ustu at ing kasalanan da.

⁴ Inya inaus ke i Baruk, ing anak nang Nerias, at pepasulat ku ing sablang sinabi na kanaku ning Ginu. Sinulat na ngang Baruk iti king pisusulatan a lulun.

⁵ Kaybat inutusan ke i Baruk. Ngaku, Baruk, e na mipaintulut kanaku ing lungub ku king Templo ning Ginu.

⁶ Buri ku king munta ka karin king tutuking panaun na ning pamag-ayunu at basan meng masikan ing lulun ban damdaman da ing sablang sinabi na kanaku ning Ginu, at itang pepasulat ku keka. Daptan mu yan nung nu ring sabla damdaman da ka pati na ding memalen na ning Juda a ibat karing karelang balen.

⁷ Magkang manalangin la king Ginu at lakuan da ing e mayap dang pamibiebie, uling belan ne ning Ginu iting bansa king maragul nang mua at kasbu.

⁸ Inya binasa nang Baruk ing amanu na ning Ginu karin king Templo antimo ing inutus kung daptan na.

⁹ King kasiam nang bulan ning kalimang banuang pamag-ari nang Jeoiakim king Juda, pigselebran da ring tau ing pamag-ayunu ban tanggapan da ing mayap nang pilubluban ning Ginu. Pigselebran de iting pamag-ayunu ding sablang manuknangan king Jerusalem, at ding dinatang ibat karing balen ning Juda.

¹⁰ At kabang makiramdam la ding tau, binasa nang Baruk ing sinabi ku. Milyari iti king Templo, manibat king kuartu nang Gemarias a anak nang Safan a kalihim. Atyu ya babo ning patyu lele ning piluluban papunta king Bayung Pasbul dalan ning Templo ing kuartu na.

¹¹ I Micaias a anak nang Gemarias at apu nang Safan, dimdam neng babasan nang Baruk ing sablang sinabi ning Ginu a makasulat king lulun.

¹² Kaybat minta ya king palasyu, king kuartu ning kalihim nung nu la mipupulung ding opisyal. I Elisama, ing kalihim, i Delaias a anak nang Semaia, i Elnatan a anak nang Akbor, i Gemarias a anak nang Safan, i Zedekias a anak nang Hananias, at ding aliwa pang opisyal a atyu karin.

¹³ Sinabi nang Micaias karela ing sablang dimdam na inyang babasan neng Baruk karing tau ing lulun.

¹⁴ Kanita tinubud de ring opisyal i Jehudi a anak nang Netanias at apu nang Selemias, at apu na king tud Cusi ban sabian na kang Baruk king idala ne karela ing lulun a binasa na karing tau. Dela neng Baruk ing kasulatan karela.

¹⁵ Lukluk ka, ngara, at basan me kekami ing lulun. Inya binasa neng Baruk karela.

¹⁶ Kaybat neng binasa, milalawayan lang ating takut at ngara kang Baruk, Kailangan ipabalu mi iting bage king ari.

¹⁷ Kaybat kitnan de, Sabian mu na mo kekami nung makananu mung asulat iting sablang bage? Pepasulat neng Jeremias yan keka?

¹⁸ Mekibat ya, Pepasulat nang Jeremias kanaku ing sablang amanung atyu ken at sinulat ku king tinta keting lulun!

¹⁹ Kanita ngara, Baruk, kailangan ing mako na kayu at salikut, ika ampon i Jeremias. E yu sasabian kenu man nung nu kayu munta.

²⁰ Binili de ring opisyal ing lulun king kuartu nang Elisama, ing kalihim, at minta la king palasyu ban sabian king ari ing sablang bage.

²¹ Kaybat na nita, tiburan ne ning ari i Jehudi ban kuanan ne ing lulun. Kinua neng Jehudi ing lulun king kuartu nang Elisama at binasa ne iti king ari at karing sablang opisyal a pakatalakad makapadurut king ari.

²² Panaun na ning dimla kanita at makalukluk ya ing ari arap ning api king palasyung tuknangan na neng panaun na ning dimla.

²³ Kabud mekayari yang makabasang atlu o apat a kabulung ning lulun, pupututan na la ning ari king kapamilatan na ning kutsilyu at iyugse king api. Depatan na iti angga king mesilab ya ngan ing kabilugan a lulun.

²⁴ E ya mitakutan o melungkut man ing ari at ding opisyal a mekaramdam king pangabasa na ning lulun.

²⁵ E na la pinsinan ning ari di Elnatan, Delaias, at Gemarias inyang pekisabi rang mayap king e ne sa sisilaban ing lulun.

²⁶ Kaybat inutusan ne ning ari i Prinsipi Jerameel at i Seraia a anak nang Azriel at i Selemias a anak nang Abdeel ban dakpan de i propeta Jeremias at ing kalihim nang i Baruk. Oneng selikut na la ning Ginu.

²⁷ Ngana kanaku ning Ginu kaybat neng silaban Aring Jeoiakim ing lulun nung nukarin makasulat ing pepasulat ku kang Baruk,

²⁸ Kuma kang aliwang lulun at isulat mu ing sablang misulat king minunang lulun.

²⁹ Sinabi na naman ning Ginu ing sabian ku kang Aring Jeoiakim ing anti kaniti: Silaban me ing lulun at ikutang mu kang Jeremias ing sangkan obat sinulat na king ing ari ning Babilonia king datang ya at lasakan ne iting bansa at paten ding memalen na at ding animal.

³⁰ Inya ngeni, aku, ing Ginu, sasabian ku keka, Aring Jeoiakim, king ala nang lahi mu a mag-ari king kayarian nang David. Miyugse ya ing bangke mu king lugal a tatangaran na ning aldo at ning yelu neng bengi.

³¹ Parusan da ka at ding kekang lahi ampon opisyal, uli da ring kasalanan a depat yu. Ika at ding memalen na ning Jerusalem at Juda e la minie nanumang pansin karing babala a sinabi ku. Inya ngeni iparala ku kekayu ing sablang kasakitan a abanggit ku na kekayu.

³² Kanita kinangwa kung aliwang lulun at binie ke kang Baruk a kalihim ku. At sinulat na ing sablang pepasulat ku. Sinulat na ing sablang misulat na king minunang lulun at ing aliwa pang mensahing pepasulat ku kang Baruk.

37

¹ Gewa neng ari ning Aring Nebucadenesar ning Babilonia i Zedekias king lugal nang Jeoiakin a anak nang Jeoiakim. Anak neng Josias i Zedekias a meging ari na ning Juda.

² E ya memintu i Zedekias ni ding opisyal na at ding memalen king utus a binie na ning Ginu king kapamilatan ku.

³ Tinubud neng Aring Zedekias i Jeucal a anak nang Selemias at ing paring i Zefania a anak nang Maaseia ban ipakisabi kanaku king manalangin ku king Ginu para king bansa.

⁴ E ku pa makasukul kanita at malaya kung makisalamuha karing tau.

⁵ Lulusuban de ring sundalus na ning Babilonia ing Jerusalem, oneng minurung la inyang abalitan da king mekalipat na la ding sundalus na ning Ehipto king angganan ning Ehipto.

⁶ Kanita ing Ginu, ing Dios ning Israel, sinabi na kanaku

⁷ king sabian ku kang Aring Zedekias ing anti kaniti: Daratang na la ding sundalus na ning Ehipto ban sumaup keka, oneng magbalik la king sarili dang bansa.

⁸ At magbalik la kanita ding sundalus na ning Babilonia ban lusuban de iting siudad, bihagan de at silaban angga king mipatag ya king gabun.

⁹ Aku, ing Ginu, babie kung babala keka king e yu sa pipiraitnan pa ing sarili yu king pamisip king e na la mibalik ding sundalus na ning Babilonia. Siguradu lang magbalik.

¹⁰ Nung sakali mang sambutan yu la ding sablang sundalus na ning Babilonia at ding mitagan ila mu detang sugatan a pakakera kilub ding tolda, makatalakad la pa mu rin deti at silaban de iting siudad angga king mipatag ya king gabun.

¹¹ Minurung la ding sundalus na ning Babilonia uling daratang la king Jerusalem ding sundalus na ning Ehipto.

¹² Inya ibat king Jerusalem minta ku king gabun ning tribu ning Benjamin ban kuanan ing dake ku king pibandian ning pamilya mi.

¹³ Oneng inyang miras na ku king Pasbul dalan ning Benjamin, ing opisyal a mamahala karing sundalung magbante king oras a ita, Irias ing lagyu na (anak neng Selemias at apu neng Hananias), sebat na ku at ngana, Tatakas ka ban makianib karing sundalus na ning Babilonia ne?

¹⁴ Pekibat ku, Ali ku! E ku tatakas. Oneng e na ku buring paniwalan Irias. Inya dekap na ku at dela karing opisyal.

¹⁵ Mua la kanaku at pemalupalu da ku at kilung king bale nang Jonatan, ing kalihim; gewa reng sukulan ing bale na.

¹⁶ Dela ra ku king sukulan a atyu lalam na ning gabun at kilung da ku karin king maluat a panaun.

¹⁷ E linuat, pepakua na ku ning Aring Zedekias at karin king palasyu lihim na kung kitnan. Ngana, Atin pang mensahing ibat king Ginu? Atin, ngakung mekibat. At ngaku pa, Miyabie ka karing gamat na ning ari ning Babilonia.

¹⁸ Kaybat kitang ku king ari, Nanung kasalanan ing depat ku laban keka o karing opisyal o kareting memalen ban mika matulid kang ipasukul mu ku?

¹⁹ Nanung milyari karing propeta mu a sinabi keka king ing ari na ning Babilonia e na ka lusuban ni ing bansa?

²⁰ Ngeni, Makamal a Ari, makisabi kung mayap king pakiramdaman mu ku sa at daptan mu ing sablang aduan ku keka. Dapat a mayap e mu ku sa babalik king sukulan karin king pibalebale nang Jonatan. Siguradu kung mate nung ipabalik mu ku karin.

²¹ Inya inutus na ning Aring Zedekias ing mikulung ku king sukulan na ning palasyu. Karin ku mesukul at balang aldo miririnan kung tinape a manibatan karing panaderia angga king megisan la ding tinape king siudad.

38

¹ I Sefatias a anak nang Matan at i Gedalias a anak nang Pasur ampon i Jeucal a anak nang Selemias, at i Pasur a anak nang Malkias dimdam da kung magsalita karing tau king

² ing Ginu sinabi na, Ing ninumang manatili keting siudad mate ya king gera o king danup o king salut. Oneng e ya mate ing ninumang lumual at sumuku karing sundalus na ning Babilonia; aligtas na ing bie na.

³ Sinabi ku naman karela king ing Ginu sinabi na, Ibie ke iting siudad karing sundalus na ning Babilonia at abihag de iti.

⁴ Kanita minta la king ari ding opisyal at sinabi ra, Makamal a Ari, sukat yang paten ing lalaking iti. Painan na la lub ding sundalus na ning siudad king pamagsalita nang makanyan; daraptan na ing anti kanyan pati na karing taung mitagan king siudad. E na la sasaupan ding memalen; buri namu ing kapahamakan.

⁵ Nganang mekibat Aring Zedekias, Nung makanyan, daptan yu ing buri yung daptan kang Jeremias; e ra kayu pigilan.

⁶ Inya kinua da ku at king kapamilatan da ring lubid bildug da ku king talaga ning Prinsipi Malkias a atyu king patyu ning palasyu. Ala yang danum ing talaga; burak ing atyu karin at mikutkut ku karin.

⁷ I Ebedmelec a tau Etiopia at metung a kapun a magobra king palasyu dimdam na ing balita king bildug da ku king talaga. At king oras a ita atyu ya ing ari king pulung a mararapat king Pasbul dalan ning Benjamin.

⁸ Inya minta ya karin i Ebedmelec at sinabi na king ari,

⁹ Makamal a Ari, e pu ustu ing depat da reting lalaki. Bildug de i Jeremias king talaga; siguradu yang mate king danup, uling ala nang pamangan king siudad.

¹⁰ Kanita inutus na ning ari king magdala yang atlung lalaki i Ebedmelec ban isaka da ku king talaga bayu ku mate.

¹¹ Inya tiki na lang Ebedmelec ding lalaki at minta la king kuartung pisisinupan imalan ning palasyu. Kinangwa lang galut-galut a imalan at beba da kanaku king kapamilatan da ring lubid.

¹² Sinabi na kanakung Ebedmelec king ibili ku la ding galut-galut a imalan king kilikili ku ban e ku manasakit karing lubid. Tiparan ku ing sinabi na

¹³ at inabit da kung paukiat king talaga. Kaybat na nita, dela da ku king lugal ning sukulan.

¹⁴ Pasibayu na kung pepayaus Aring Zedekias ban mikit kami karin king katlung piluluban na ning Templo. Ngana kanaku, Mangutang ku keka at buri ku king ipakibat mu kanaku ing bukud mung katutuan.

¹⁵ Sinabi ku, Nung sabian ku keka ing katutuan, ipapate mu ku mu, at nung dinan da kang payu e mu munaman pakiramdaman.

¹⁶ Inya lihim yang mengaku kanaku i Aring Zedekias. Ngana, Susumpa ku king arapan na ning Dios a mabie, ing Dios a minie bie kekatamu, king e ra ka ipapate o ibie karing gamat da ring bisang makamate keka.

¹⁷ Kanita sinabi ku kang Zedekias king ing Ginung Mayupaya, ing Dios ning Israel, sinabi na, E ka mate nung sumuku ka karing opisyal na ning ari ning Babilonia at e ya masilab iting siudad. Miligtas ka at ing pamilya mu.

¹⁸ Nung e ka sumuku, miyabie ya iting siudad karing tau Babilonia nung ninu ding silab kaniti angga king mipatag ya king gabun at e ka malyaring makatakas karela.

¹⁹ Pekibat ning ari, Tatakut ku karing kabalen tamung kinampi karing tau Babilonia. Magkang ibie da ku karela at panasakitan da ku.

²⁰ Sinabi ku, E ka miyabie karing gamat da. Ipakisabi kung mayap keka king pamintuan mu sana ing sinabi na keka ning Ginu ban e ka numanu balang at miligtas ka.

²¹ Oneng king kapamilatan na ning vision a pepakit na kanaku ning Ginu ing mapalyari, nung tanggi kang sumuku.

²² Magumasid ka! Ding sablang babaing mitagan king palasyu ning Juda darala da la karing opisyal na ning ari ning Babilonia. Pakiramdaman mu ing sasabian da kabang darala da la karela, Ding tapat nang kakaluguran ning ari lininlang de, at deigan de. At ngening makakutkut la ding bitis na king burak likuan de ring kakaluguran na.

²³ Sinabi ku pa ing anti kaniti: Midala la ding sabla yung kebabainan at anak karing tau Babilonia at ika mismu e ka makatakas karela. Bihagan na ka ning ari na ning Babilonia at masilab ya iting siudad angga king mipatag ya king gabun.

²⁴ Nganang mekibat Zedekias, E mu paburen ating makabalu king pisabi ta at e ya mibili king panganib ing bie mu.

²⁵ Nung sakaling abalitan da ring opisyal ing sinabi ku keka, magbalik la at ikutang nung nanu ing sinabi ku keka, ipangaku da keka king e da ka paten, nung sabian mu ing sablang bage.

²⁶ Sabian mu karela king pekisabian mu ku mung mayap ban e da ka sana babalik king sukulan; ban e ka mate karin.

²⁷ Kanita dinatang la kanaku ding sablang opisyal at kitnan da ku. Sinabi ku ing pasabi na ning ari karela. Ala lang akarapat uling ala metung man a mekaramdam king pisabi mi ning ari.

²⁸ At kilung da ku king sukulan na ning palasyu angga na king aldo mebihag ya ing Jerusalem.

39

¹ King kapulu nang bulan ning siam nang banuang pamag-aring Zedekias king Juda, dinatang ya ing Aring Nebucadenesar ning Babilonia at ding sabla nang sundalus, at lisuban de ing Jerusalem.

² King kasiam nang aldo ning kapat a bulan na ning kalabing metung a banua na ning pamag-ari nang Zedekias, melasak la ding pader ning siudad. (

³ Inyang mebihag ne ing Jerusalem dinatang la ding sablang matas nang opisyal ning ari ning Babilonia, at linukluk la king Pasbul dalan Libutad, kayabe da la ri Nergal Sarezer, Samgar Nebo, Sarsekim, at ing metung pang lalaking maki lagyung Nergal Sarezer.)

⁴ Inyang ing Aring Zedekias at ding sablang sundalus na ikit da ing mapapalyari, migkapilit lang makatakas king siudad inyang bengi na. Meko la at delanan de ing hardin ning ari, at dinalan la king pasbul dalan pilatan da ring aduang pader at tinakas lang papunta king Kapatagan ning Jordan.

⁵ Oneng tinagal la ding sundalus na ning Babilonia at arakap de i Zedekias karin king kapatagan a malapit Jerico. Kaybat dela re kang Aring Nebucadenesar a atyu kanita king siudad ning Ribla a sakup ning Hamata. Karin ne inatulan.

⁶ Karin king Ribla na la pepapate Aring Nebucadenesar ding anak nang lalaking Zedekias kabang makalawe ya iting tata. Pepapate na la namang Aring Nebucadenesar ding opisyal na ning Juda.

⁷ Kaybat na nita, pepadukit na la ding mata nang Zedekias at pepatanikala neng pepadala king Babilonia.

⁸ Kabang mapapalyari iti, silaban de ring sundalus na ning Babilonia ing palasyu at ding bale da ring memalen at lesak da la ring pader na ning Jerusalem.

⁹ Katataulian, i Nebuzaradan, ing pekapun da ring sundalus, dela na la detang tinakas minta keya at ding sablang taung mitagan king siudad at ding kinampi karela.

¹⁰ Likuan na la karin king Juda ding mapilan a pakakalulung taung alang pibandian, at dininan na lang mulahan ubas at gabun.

¹¹ Inutusan neng Aring Nebucadenesar i Nebuzaradan, ing pekapun da ring sundalus. Ngana,

¹² Kuanan me i Jeremias at banten neng masalese. E me panasakitan; daptan mu ing sablang parapat na keka.

¹³ Inya i Nebuzaradan at ding matas a opisyal, di Nebusazban at Nergal Sarezer at ding aliwa pang opisyal na ning ari na ning Babilonia,

¹⁴ kinua da ku king sukulan na ning palasyu. Penabilin da ku kang Gedalias, ing anak nang Ahikam at apu nang Safan. Katungkulan na ing ligtas kung miras king kanakung tuknangan. Inya menatili ku karin a kayabe da ring memalen.

¹⁵ Inyang atyu ku pa king sukulan na ning palasyu, sinabi na kanaku ning Ginu

¹⁶ king sabian ku kang Ebedmelec, ing tau Etiopia, king ing Ginung Mayupaya, ing Dios ning Israel, sinabi na, Antimo ing sinabi kung daptan ku, miparala kung kasiran keting siudad at e kanawan. Akit mu potang mapalyari na iti.

¹⁷ Oneng aku, ing Ginu, iligtas da ka at e ka miyabie karing gamat da ring taung katakutan mu.

¹⁸ Ingatan da ka at e ka mibili king kamatayan. Makatakas ka uling binili mu ing kapanaligan mu kanaku. Aku, ing Ginu, ing migsalita.

40

¹ Migsalita ya kanaku ing Ginu kaybat na kung binulus ning pekapun da ring sundalus a i Nebuzaradan karin king Rama. Makatanikala kung dela ra karin a kayabe da ring aliwang memalen na ning Jerusalem at Juda a mebihag at miparala king Babilonia.

² Linele na ku ning opisyal a mamuntukan at ngana, Belan neng siran iting bansa ning Ginung kekang Dios,

³ at depat na ngeni itang sinabi nang daptan na. Merapat ngan iti uling mikasala la ding kabalen mu king Ginu at e re pemintuan.

⁴ Ngeni, kalagan ku na la ding tanikalang atyu karing gamat mu at ibulus da na ka. Nung bisa kang tuki kanaku king Babilonia, tuki ka at akung bala keka karin. Nung e ka bisang tuki, e ka tutuki. Atyu ing pamamili keka keting mabilug a bansa at malyari kang munta king lugal a buri mung puntalan.

⁵ Nganang Nebuzaradan inyang e ku mekibat, Mibalik ka kang Gedalias a anak nang Ahikam at apu nang Safan. Gewa neng gobernador ning ari ning Babilonia i Gedalias para karing balen ning Juda. Malyari kang makiabe kang Gedalias at manuknangan kayabe da ring memalen o malyari kang munta nukarin mang lugal a buri mung puntalan. Kaybat dininan na kung regalu at mapilan a pamangan ban bakalan ku at peintulutan na kung mako.

⁶ Meko ku ban manuknangan kayabe nang Gedalias karin king Mizpa at menuknangan kung kayabe da ring memalen a mitagan king bansa.

⁷ E la sinuku ding mapilan karing opisyal at sundalus na ning Juda. Abalitan da king ing ari na ning Babilonia gewa neng gobernador ning bansa i Gedalias, at penibalan ne karing sablang e mebihag at e midala king Babilonia, ding pakakalulung memalen na ning bansa.

⁸ Inya i Ismael a anak nang Netanias, i Joanan a anak nang Karea, i Seraia a anak nang Tanhumet, ding anak nang Efai ning Netopa, at i Jezenias ning Maaca minta lang kayabe da ring lalaki kang Gedalias karin king Mizpa.

⁹ Nganang Gedalias karela, E kayu sukat mitatakutan karing sundalus na ning Babilonia. Paniwalan yu ku sana. Keti na kayu manuknangan at sumuyu king ari na ning Babilonia at e kayu numanu balang.

¹⁰ Manatili ku keti king Mizpa at maging pekakatawan yu ku potang datang na la keti ding sundalus na ning Babilonia. Malyari kayung manipun at mitambak alak, prutas ampon larung olibo, at manuknangan karing baryu a kekayung sakupan.

¹¹ King metung a banda, ding sablang Israelitang atyu king Moab, Ammon, Edom, at karing aliwa pang bansa, abalitan da king peintulut na ning ari ning Babilonia ing makapanatili la ding mapilan king Juda at king i Gedalias ya ing gewa nang gobernador para karela.

¹² Inya likuan da la ring lugal nung nu la miyugse at migbalik la king Juda. Pekikitan de i Gedalias karin king Mizpa at karin la tinupun dakal a alak at prutas.

¹³ Kaybat na nita, minta la kang Gedalias karin king Mizpa i Joanan at ding manimuna da ring sundalus a e sinuku

¹⁴ at ngara, Gedalias, e mu wari balu king tinubud neng Aring Baalis ning Ammon i Ismael ba na kang paten? Oneng e ya meniwala i Gedalias kaniting sinabi ra.

¹⁵ Kanita lihim neng pekisabian Joanan i Gedalias. Ngana, Gedalias, paintulutan mu kung mako at paten ke i Ismael a anak nang Netanias at ala metung mang makabalu nung ninu ing mekamate kang Ismael. Baket kailangan ing mipaintulutan ya ba na ka mung paten? Maging sangkan iti karing sablang Judio a mitipun makapadurut keka at mamungang kasakitan karing sablang memalen a melakuan king Juda.

¹⁶ Nganang mekibat Gedalias, E mu daraptan yan. E tutu ing sasabian mu tungkul kang Ismael!

41

¹ King kapitung bulan na ning banuang ita, i Ismael a anak nang Netanias at apu nang Elisama a miembru king pamilya ning ari at metung karing matas a pekapun ning ari, dinatang ya at ding apulung lalaki ban pakikitan ya king Mizpa i Gobernador Gedalias. Kabang mamangan lang miyabe-abe,

² i Ismael at ding apulung lalaki begut da la ring espada ra at pete de i Gedalias.

³ Pete na la namang Ismael ding sablang Israelitang kayabe nang Gedalias king Mizpa at ding sundalus na ning Babilonia a mipaintagun atyu karin.

⁴ Kabukasan, bayu ating mekabalu king pangamate nang Gedalias,

⁵ walu lang pulung lalaki ding dinatang ibat king Sikem, Silo, at Samaria. Lebahas da la ring balbas da, ginabak da la ring imalan da at sinugat ing sarili da. Magdala lang binutil at insenso ban iyain king Templo.

⁶ Inya linual ya i Ismael ba na lang salubungan; manangis ya kabang lulual ya. Ngana karela inyang akayarap na na la, Malaus kayu ban akit ye i Gedalias.

⁷ Kabud kalub da king siudad, i Ismael at ding tauan na pete da la at inugse ding bangke ra king talaga.

⁸ Oneng ating apulung lalaki king grupu a sinabi kang Ismael, Dapat a mayap, e mu ke papaten! Atin keng trigu, sebada, larung olibo, at pulut-panilan a pakasalikut karing marangle. Inya e na la pete.

⁹ Maragul ya ing kulkul a kitmuan nang Ismael karing taung pete na. Iti ya ing kulkul a pepakulkul nang Aring Asa ban maging peka dipensa na laban kang Aring Baasa ning Israel.

¹⁰ Kanita binihag na lang Ismael ding anak nang babai ning ari at ding sablang tau ning Mizpa a penabilin nang Nebuzaradan, ing pekapun da ring sundalus, kang Gedalias. Binihag na la ngan Ismael at dela king bansang Ammon.

¹¹ Abalitan nang Joanan at ding sablang manimuna da ring sundalus a kayabe na ing pamakamate depat nang Ismael.

¹² Inya ila at ding tauan da tegalan de at atagal de king lele ning maragul a sibul karin king Gibeon.

¹³ Mesaya la ding bihag nang Ismael inyang ikit de i Joanan at ding manimuna da ring sundalung kayabe na

¹⁴ at milayi lang papunta karela.

¹⁵ Oneng i Ismael at ding walung lalaking tauan na mekatakas la kang Joanan at milayi la king bansang Ammon.

¹⁶ Kanita i Joanan at ding manimuna da ring sundalung kayabe na ilang miligtas karing taung binihag nang Ismael karin king Mizpa kaybat neng pete i Gedalias. Inya tinipun da la ring sundalus, ding anak, at ding kapun.

¹⁷ Tatakut la karing tau Babilonia uling pete neng Ismael i Gedalias, ing lalaking gewa nang gobernador ning ari ning Babilonia. Inya meko lang papunta Ehipto ban aligtasan da la ring tau Babilonia. King pamaglakad da, migpaynawa la king Tsimham malapit king Betlehem.

42

¹ Kanita ding sablang manimuna da ring sundalus pati na i Joanan a anak nang Karea at i Azaria a anak nang Nesaias, dinatang lang kayabe da ring miyayaliwang tau.

² Ngara kanaku, Daptan mu sana ing ipakisabi ming mayap keka! Manalangin ka king Ginung kekatamung Dios para kekami. Manalangin ka para kekaming mitagan. Dakal kami king panaun a milabas, oneng ditak na kami mu ngeni antimo ing akakit mu.

³ Manalangin ka king Ginung kekatamung Dios ban ituru ne ing dalan a dalanan tamu at ing sukat tamung daptan.

⁴ Ngakung mekibat, Wa, manalangin ku king Ginung kekatamung Dios, anti ing pakisabi yung mayap kanaku, at sabian ku kekayu ing nanumang sabian na ning Ginu. Ala kung ilingad nanuman kekayu.

⁵ Kanita ngara kanaku, Mananu na sanang ing Ginu maging tune ya at tapat a testigu laban kekami nung e mi pamintuan ing sablang utus a binie na ning Ginung kekatamung Dios para kekami.

⁶ Munie tula o ali kekami ing iyutus na, mamintu kami king Ginung kekatamung Dios nung kenu kami pasaup keka ban manalangin. Maging mayap ing sabla kekami, nung pamintuan mi ya.

⁷ Kalabas na ning apulung aldo migsalita ya kanaku ing Ginu.

⁸ Inya inaus ke i Joanan, ding sablang manimuna da ring sundalus, at ding aliwang tau.

⁹ Ngaku karela, Ngana ning Ginu, ing Dios ning Israel nung kenu yu ku tinubud,

¹⁰ Nung bisa kayung manatiling manuknangan keting bansa, italakad da kayu at e lasakan. Itanam da kayu at e bagutan. Ing dela kung kasiran kekayu minie maragul a lungkut kanaku.

¹¹ Tuknang na kayung mitatakutan king ari na ning Babilonia. Kayabe yu ku at iligtas da kayu king upaya na.

¹² Uling malunusan ku, gawa kung paralan ban malunus ya kekayu at paintulutan na kayung muli karing pibalebale yu. Aku, ing Ginu, ing migsalita.

¹³ Nung sabian yu, E kami manatili king bansang iti, at e ye pamintuan ing Ginung kekayung Dios.

¹⁴ E yu sukat sabian ing anti kaniti: Ali, mako kami at manuknangan king Ehipto nung nukarin e ke takman pang gera o makaramdam king aus ning pamakilaban o dumanup man, at karin kami manuknangan,

¹⁵ kanita pakiramdaman ye ing amanu ning Ginu, ikayung mitagan ning Juda. Makanyan ing ipakibat na ning Ginung Mayupaya, ing Dios ning Israel: Nung talagang disididu na kayung mako at manuknangan king Ehipto,

¹⁶ akua na kayu ning gera a kekong katakutan, tukian na kayu ning danup a pangilagan yu, at mate kayu karin king Ehipto.

¹⁷ Mate la king gera ding sablang taung bisang munta at manuknangan king Ehipto o kaya mate la king danup o salut. Ala metung man a mitagan; ala metung mang makatakas king kasiran a iparala ku karela.

¹⁸ Nganang sasabi ning Ginung Dios ning Israel, Nung makananung ing kanakung mua at kasbu mibagsak karing memalen na ning Jerusalem, makanyan munamang mibagsak kekayu, nung malaus kayung munta Ehipto. Mabigla la ding taung manakit kekayu; gawan da kayung pikaylian at gamitan de ing lagyu yu king pamaniumpa. E yu ne akit pa iting lugal.

¹⁹ Ngaku pa karela, Sinabi na ning Ginu kekayung mitagan king Juda king e kayu pupunta king Ehipto. Inya ngeni babie kung babala kekayu

²⁰ king gagawa kayung maragul a kamalian. Inawad yu kanaku king manalangin ku king Ginu para kekayu at pengaku yu king daptan yu ing sablang bage iyutus na kekayu.

²¹ At ngening sinabi ku kekayu, e yu naman pemintuan ing sablang bage a pasabi na ning Ginu a sabian ku kekayu.

²² Inya ngeni, tandanan yu iti: mate kayu king gera o king danup o king salut king bansa a buri yung puntalan at panuknanganan.

43

¹ Ayari kung selita karing tau ing sablang bage pasabi na kanaku ning Ginung karelang Dios.

² Kanita i Azaria a anak nang Hosaias at i Joanan a anak nang Karea at ding aliwa pang masias a buntuk a tau, sinabi da kanaku, Malaram ka. E na ka tinubud ning Ginung kekaming Dios ban sabian mu kekami king e ke pupunta at manuknangan king Ehipto.

³ Oneng sitsutan na kang Baruk a anak nang Nerias laban kekami ban kanita sambutan da kami ding tau Babilonia at paten o bihagan at idala king Babilonia.

⁴ Inya i Joanan o ninuman karing opisyal da ring sundalus o metung man karing memalen e ya bisang mamintu king utus na ning Ginu a manatili king balen Juda.

⁵ Kanita i Joanan at ding sablang opisyal da ring sundalus tiki da la king Ehipto ding mitagan king Juda at ding taung migbalik ibat karing bansa nung nu la miyugse:

⁶ ding lalaki, ding babai, ding anak, at ding anak nang babai ning ari. Tiki da la ngan ding sablang taung likuan nang Nebuzaradan, ing pekapun da ring sundalus na ning Babilonia, king pamanibala nang Gedalias; kayabe ku kareti at i Baruk.

⁷ E la memintu king utus ning Ginu at minta la king Ehipto angga na king siudad ning Tapanhes. fig,,,, ,E la memintu king utus ning Ginu, at minta la king Ehipto...,(43:7)fig*

⁸ Karin, migsalita ya kanaku ing Ginu. Ngana,

⁹ Kuma kang batung mangaragul at ikutkut mu la arapan na ning piluluban king gusali na ning gobiernu keti king siudad. Paburen mung akit da ka ring mapilan a Israelita ing gagawan mu.

¹⁰ Kaybat sabian mu karela king aku, ing Ginung Mayupaya, ing Dios ning Israel, itubud ke ing talasuyu ku, ing Aring Nebucadenesar ning Babilonia at ibili ke ing tronu na babo da reting batung kekang kitkut at iladlad ke ing tolda ning ari king makapadurut karela.

¹¹ Datang ya i Nebucadenesar at sambutan ne ing Ehipto. Mate la king salut ding taung mitakdang mate king salut; mabihag la detang mitakdang mabihag, at mate la king gera detang mitakdang mate king gera.

¹² Patau kung api karing templo da ring kikilalanan nang dios ning Ehipto, at silaban na la ning ari na ning Babilonia ding karelang kikilalanan a dios o kaya idala na la. Nung makananu nang pipipian ning pastul ing mabuluk nang imalan, makanyan neng pipian ing bansang Ehipto at mako yang matagumpe.

¹³ Lasakan na la ding sagradung batung monumento ning Heliepolis karin king Ehipto, at silaban na la ding templo da ring kikilalanan nang dios ning Ehipto.

44

¹ Migsalita ya kanaku ing Ginu tungkul karing sablang Israelitang manuknangan king Ehipto, karing siudad ning Migdol, Tapanhes, at Memfis, at king dane mauli ning bansang ita.

² Ngana ning Ginung Mayupaya, ing Dios ning Israel, Ikit yu ing kasiran a dela ku king Jerusalem at karing aliwang siudad na ning Juda. Manatili lang lasak angga ngeni at ala metung mang manuknangan karin.

³ Milyari iti uling dinapat lang e mayap a bage ding karelang memalen at pepamua da ku. Minie lang ain-sakripisyu at siyuan da la ring aliwang dios a e ra bitasang balu ni ikayu o ding makatua da.

⁴ E ku tinuknang mitutubud karing talasuyu kung propeta a sinabi kekayung e yu daraptan ing bage pikakasaman ku.

⁵ Oneng e kayu bisang makiramdam o minie pansin karela. E yu buring lakuan ing e mayap yung ugaling mamain ain-sakripisyu karing aliwang dios.

⁶ Inya bigsak ku ing kanakung mua at kasbu karing balen na ning Juda at karing dalan na ning Jerusalem at silaban ku la. Melasak la at meging makapangilabut lang lalawan angga na king aldong iti.

⁷ Inya aku, ing Ginung Mayupaya, ing Dios ning Israel, kukutang ku ngeni kekayu nung ba't daraptan yu ing makanyan a e ustung bage king mismung sarili yu? Buri yung dugpa ing kasiran karing kekayung lalaki at babai, karing anak, at karing sususo ban metung man karing memalen yu ala nang mitagan?

⁸ Baket pamuan yu ku king kapamilatan na ning kekayung pamanyambang idolo at pamamie ain-sakripisyu karing aliwang dios angga man keti king Ehipto, nung nu kayu manuknangan ngening kasalukuyan? Daraptan yu iti ban siran ing kekayung sarili, ban ing balang bansa ning yatu gawan na kayung pikaylian at gamitan ing kekong lagyu anting sumpa?

⁹ Kelinguan yu na la wari ding sablang e mayap a bageng merapat karing balen ning Juda at karing dalan ning Jerusalem king kapamilatan da ring makatua yu, ding ari na ning Juda, at ding asawa ra, at king kapamilatan yu, at ding asawa yo?

¹⁰ Oneng angga ngening aldong iti e kayu pa migpakumbaba. E kayu tatakut kanaku ni mibiebie agpang karing sablang kautusan a binie ku kekayu at karing makatua yu.

¹¹ Inya, aku, ing Ginung Mayupaya, ing Dios ning Israel, maging kalaban yu ku at lasakan ke ing mabilug a Juda.

¹² Tungkul naman karing memalen nang mitagan ning Juda at disididung munta at manuknangan king Ehipto, lumawe kung paralan ban mate la ngan. Mate la ngan, malati't maragul king Ehipto king kapamilatan na ning gera o ning danup. Maging makapangilabut lang lalawan; gawan da lang pikaylian at gamitan de ing lagyu ra bilang sumpa.

¹³ Parusan ku la ding manuknangan king Ehipto anti ing pamamarusa ku king Jerusalem king kapamilatan na ning gera, danup, at salut.

¹⁴ Ala metung mang mitagan kareting memalen na ning Juda a munta king Ehipto ban karin manuknangan; e la makatakas o makaligtas. Ala metung mang makapagbalik karela king Juda a pagnasan dang karin manuknangan pasibayu. Ala metung mang makapagbalik subali mu karing mapilan a bakwit.

¹⁵ Kanita ding sablang lalaking makibalu king ding karelang asawa minie lang ain-sakripisyu karing aliwang dios at ding sablang babaing pakatalakad karin pati na ding Israelitang menuknangan king Patros dane mauli ning Ehipto. Sinabi na kanaku ning maragul a katipunan ding tau,

¹⁶ E mi atanggap ing bage sinabi mu kekami king lagyu na ning Ginu.

¹⁷ Daptan mi ngan ing bage sinabi ming daptan mi. Munie kaming ain-sakripisyu at mitugtug keng ain-a-alak para king kekaming diosa, ing Reyna ning Banua, nung makananung ikami at ding makatua mi, ing kekaming ari at ding manimuna mi penugalian ming daraptan karing balen ning Juda at karing dalan ning Jerusalem. King panaun a ita, dakal kami pamangan, mibandi kami at alang kaligaligan.

¹⁸ Oneng manibat na inyang tinuknang keng babie ain-sakripisyu at tutugtug ain-a-alak para king Reyna ning Banua, mewala ngan ing sablang kayatinan mi at mete la king gera at king danup ding kekeng memalen.

¹⁹ Ngara namang tinuglung ding babai, Peintulut da ring asawa mi ing munie kaming bibingkang ugis ning Reyna ning Banua at mitugtug ain-a-alak para keting diosa.

²⁰ Pekibatan ku la ding sablang lalaki at babai a mekibat kanaku king makanyan a paralan.

²¹ Ngaku karela, Tungkul karing ain-sakripisyung kekayung binie pati na ding kekayung makatua, ding ari yu, at ding manimuna yu, at ding memalen na ning bansa karing balen ning Juda, at karing dalan na ning Jerusalemisipan yu galang king e na balu ning Ginu yan o kelinguan na na?

²² King mismung aldong iti makapase ya king kasiran ing kekong bansa at ala metung mang manuknangan karin. Meging makapangilabut yang akakit at gagamitan de ring tau ing lagyu na bilang sumpa, uling e na na abata ning Ginu ing kekayung kasalanan at e mayap a dapat.

²³ Miras kekayu iting kasiran antimo ing mayayakit ngeni uling minie kayung ain-sakripisyu karing aliwang dios at mikasala kayu king Ginu king kapamilatan na ning e yu pamamintu karing sabla nang kautusan.

²⁴ Ngaku karing tau, lalung-lalu na karing babai, itang sasabian na ning Ginung Mayupaya, ing Dios ning Israel, karing memalen na ning Juda a manuknangan king Ehipto:

²⁵ Ikayu at pati na ding asawa yu ginawa kayung masusing pangaku king Reyna ning Banua. Pengaku yu king munie kayung ain-sakripisyu at mitugtug ain-a-alak, at tiparan yu ing pengaku yu king Reyna ning Banua. Sulung, tuparan yu ing pangaku yu! Gampanan yu la ding panata yu!

²⁶ Oneng ngeni, aku, ing Ginu, pakiramdaman yu ing panata a gewa ku king mayupaya kung lagyu para kekayung sablang Israelitang manuknangan king Ehipto. E ku na kapilan man paintulut kenu man kekayu ing gamitan ne ing lagyu ku king pamangawa nang panata king kapamilatan na ning pamagsalitang anti kaniti: Susumpa ku king lagyu na ning Ginung Dios a mabie!

²⁷ Gawa kung paralan ban e kayu mipala, nune magisan kayu. Mate kayu, ikayung sabla, king gera o king salut angga na king ala metung mang mitagan kekayu.

²⁸ Oneng ating mapilan kekayu a makatakas king kamatayan at ibat king Ehipto magbalik la king Juda. Kanita abalu ra ding miligtas nung isanung amanu ing meging tutu, ing kanaku o ing karela.

²⁹ Aku, ing Ginu, munie kung katibayan king parusan da kayu keting lugal, at mapalyari ing pangaku kung miparalang kasiran kekayu.

³⁰ Ibie ke i Aring Hopra ning Ehipto karing gamat da ring kalaban nang bisang makamate keting ari. Makanyan ing depat ku kang Aring Zedekias na ning Juda; binie ke karing gamat nang Aring Nebucadenesar ning Babilonia a kalaban na at mignasang makamate keting ari.

45

¹ King kapat nang banuang pamag-aring Jeoiakim, ing anak nang Josias ning Juda, sinulat nang Baruk itang buri kung daptan na. Kaybat sinabi ku

² kang Baruk king ing Ginu, ing Dios ning Israel, sinabi na, Baruk,

³ sasabian mu king e na ka bisa! Digdagan na ning Ginu ing kanakung problema. Sinawa na kung magkakasakit; e ku mipaynawa!

⁴ Oneng aku, ing Ginu, daragsa ku la ding kanakung telakad at putputan ku itang tenam ku. Gawan ku iti king mabilug a yatu.

⁵ Manaya ka waring makayaliwang tratus para king sarili mo? Ali ka sa. Miparala kung kasiran karing sablang tau, oneng makatakas ka pa mu rin at e mate nu ka man munta. Aku, ing Ginu, ing migsalita.

46

¹ Migsalita ya kanaku ing Ginu tungkul karing bansa.

² Iti ya ing sinabi na tungkul king Ehipto. Migsalita ya tungkul karing sundalus nang Aring Neco ning Ehipto, ing simbut na ning Aring Nebucadenesar ning Babilonia karin king Carkemis lele ning Ilug ning Eufrates kanitang kapat nang banuang pamag-aring Jeoiakim ning Juda.

³ Ding opisyal ding sundalus ning Ehipto karelang kukulisak, Isadia yu lang kekong paniagka at king labanan magmartsa na!

⁴ Isadia yu lang kabayu at saken na la, gayak na kayu at isulud lang helmet yu! Itais yu lang tandus yu! Isulud lang baluti yu!

⁵ Oneng nanung akakit ku? ngana ning Ginu. King takut da magbalik la. Mesambut lang sundalus da; uli ning takut, memamulandit la at e na balabalikid pa.

⁶ E la makaligtas detang mabilis milayi; e la malyaring makatakas ding sundalus. King dane norti ning Ilug ning Eufrates, karin la mitisud at misakab.

⁷ Ninu iting tatalakad a balamu wari ing Nilo, anti ing ilug a maglapo karing pampang na?

⁸ Ya ing Ehipto, ing tatalakad anti ing Nilo, anti ing ilug maglapo karing pampang na. Ngana ning Ehipto, Talakad ku at takpan ke ing yatu, lasakan ku la ding siudad at pati na ding taung karin manuknangan.

⁹ Utusan yu na lang mako ding kabayu, at ding karung panggera ban manulakan na! Itubud yu na lang sundalus: ding lalaki ning Cus at Put a magdalang paniagka at ding biasang mamana ning Ludim.

¹⁰ Iti ya ing aldo ning Ginung Dios a Mayupaya: aldo ne iti ning pamagbengansa na, ngening aldong iti na la parusan ding keyang kalaban. Laklakan na la ning espada na angga king kumabsi ya, at inuman na ing daya ra kabang bisa ya. Ngening aldong iti na la isakripisyu ding biktima na king dane norti lele ning Ilug ning Eufrates.

¹¹ Memalen ning Ehipto, munta kayu Gilead, at lumawe kayung panulu karin. Ala palang ulaga ing sablang panulu yu; kekayu ala nanumang makaulu.

¹² Abalitan da ring bansa ing keka digpang kamarinayan; dimdam ning metung at metung ing kekang tangis. Mitakid ya ing sundalus king kalupa nang sundalus, at parehu lang mipapase king gabun.

¹³ Nganang migsalita kanaku ning Ginu inyang ing Aring Nebucadenesar ning Babilonia dinatang ya ban lusuban ne ing Ehipto:

¹⁴ Sabian mu iti karing balen ning Ehipto, karin Migdol, Memfis, at Tapanhes: Magsadia kayu ban idipensa ing sarili yu; ing sablang atyu kekayu siran ning gera!

¹⁵ Baket ing kikilalanan yung dios a mayupayang i Apis mibagsak ya? Uling ing Ginu digsa ne!

¹⁶ Mitisud la't misakab ding kekong sundalus, sasabian ning metung at metung, Mamalagua ka! Muli ta na king bansa tamung tibuan, at tumakas king espada ning kalaban!

¹⁷ Dinan yeng bayung lagyu ing ari ning Ehipto Mainge, Mayabang, at Minyira king malagu nang oras.

¹⁸ Aku, ing Ginung Mayupaya, ing ari. Aku ing Dios a mabie. Nung makananung ing Bunduk ning Tabor durungdunganan no ding aliwang bunduk, at ing Bunduk ning Carmel makatalakad yang matas king dagat, makanyan ya sikanan itang kekayu lumusub.

¹⁹ Magsadia na kayung mabihag, ikong memalen ning Ehipto! Ing Memfis magawa yang disyerto, metung a lasak a lugal a alang manuknangan.

²⁰ Mengari ya ing Ehipto king malagung dumalagang baka a penget ning tamumung ibat king norti.

²¹ Agyang ding sundalus nang inupahan mengari la king biserung bakang pepataban. E la mekiarap at mekilaban; ginulut la at memulayi la ngan. Dinatang ing aldo ning karelang kamatayan, at ing oras ning karelang kasiran.

²² Milayi ya ing Ehipto; inge na kalupa na ning tatakas a ubingan uling daratang la ding sundalung kalaban. Lisuban de king kapamilatan ding palakul; mengari la karing lalaking mangutud tanaman

²³ at manyira king kagubatan. E mo abilang-bilang ding dakal dang tauan, maygit lang marakal ding sundalus kesa karing durun.

²⁴ Mengapakarine la ding memalen ning Ehipto; mesakup la karing tau ning norti. Aku, ing Ginu, ing migsalita.

²⁵ Ing Ginung Mayupaya, ing Dios ning Israel, sasabian na, Parusan ke i Amon, ing kikilalanan nang dios ning Tebes at pati ing Ehipto at ding kikilalanan dang dios at ding ari na. Kuanan ke ing ari na ning Ehipto at ding sablang menalig keting ari.

²⁶ At ibie ke karing gamat da ring bisang makamate karela, kang Aring Nebucadenesar ning Babilonia at ding sundalus na. Kaybat pasibayu lang manuknangan ding tau king Ehipto antimo ing king milabas a panaun. Aku, ing Ginu, ing migsalita.

²⁷ E kayu tatakut, taung kakung pinili, memalen ning Israel, e ye painan ing lub yu. Iligtas da kayu ibat king bansang marayu, king bansa nung nu makasukul kayu. Muli kayu karing tuknangan yu, at mibiebie payapa; mipanatag kayu at metung man ala nang mamatakut kekayu.

²⁸ Datangan da kayu at iligtas. Lasakan ku la ding sablang bansa nung nu da kayu inugse, oneng e da kayu lubus gisanan. E ku paintulut ing e kayu miparusan; ing parusang karapatdapat ya ing kakung iparala. Aku, ing Ginu, ing migsalita.

47

¹ Migsalita ya kanaku ing Ginu tungkul king Filistia bayu ne lisuban ning ari ning Ehipto ing Gaza.

² Ngana: Lawan mu! Ing danum king norti daragul, at mamagus anti ing ilug a disnan ning albug. Takpan ne ing bansa at ing sabla-sabla, ding siudad at ding memalen karin manuknangan. Maniawad lang saklolu ding tau; tumangis yang kapait-paitan ing balang tau ning yatu.

³ Damdaman da ing kurakul da ring kabayu, ing bulusuk ding panggerang karu, ing inge ding parugang. E la mibalik ding tata ban saupan ding anak da, uling mangaina lang karelang gamat.

⁴ Dinatang ne ing aldo ban lasakan ya ing Filistia, ban king Tiro at Sidon ikawani ya, at ing sablang kasaupan a makatagan pa. Aku, ing Ginu, ing makamate karing tau Filistia, detang sablang dinatang karing pampang ning Creta.

⁵ Maragul a lungkut ing dinatang karing memalen ning Gaza, at ding memalen ning Askelon tahimik la. Angga kapilan ing magpaldas la ding taung mitagan ning Filistia?

⁶ Kukulisak mu, Espada ning Ginu! Angga kapilan ing pamanabak mu? Magbalik ka king kekang kaluban, patugut ka at karin ka magpaynawa!

⁷ Oneng makananu yang magpaynawa, atin kung obrang parapat king espada? Inutusan keng lusuban ne ing Askelon, at ding taung manuknangan king pampang.

48

¹ Iti ya ing sinabi na ning Ginung Mayupaya tungkul king Moab: Karing memalen ning Nebo malunus ka; ing karelang balen melasak ya! Mebihag ya ing Kiriataim, ding matibe nang kuta melasak la, at memalen na mengapakarine la;

² mewala na ing dangalan ning Moab. Binihag ne ning kalaban ing Hesbon, at magtangka yang lasakan ne ing bansang Moab. Ing balen ning Madmen manahimik ya; ding kalaban nang sundalus magmartsa la.

³ Kukulisak ding memalen ning Horonaim, Katampalasanan! Kasiran!

⁴ Ing Moab melasak ya; pakiramdaman yu ing tangis ding anak na.

⁵ Pakiramdaman yu ing karelang siguk karing lele ning dalan paukiat king Luhit, ing saingsing ding magigipit king dalan pababa ning Horonaim.

⁶ Ngara, Tumakas na kayu; iligtas yu ing sarili yu! Mulayi kayung anti ing malyap a asno ning disyerto!

⁷ Moab, penaligan mu ing kekang sikanan at pibandian, oneng mayakua ka naman, at i Kemos a kekong kikilalanan a dios mitabi ya at ding prinsipi na at pari.

⁸ Metung man karing balen e makailag king kasiran; ing libis at ing kapatagan malasak la ngan. Aku, ing Ginu, ing migsalita.

⁹ Isadia yu ne ing kutkutan para king Moab; e lumuat datang king Moab ing kasiran. Malasak la ding balen na, at ala nang manuknangan karela. (

¹⁰ Makasumpa ya ing lalaking e darapat king mabilug nang pusu king dapat ning Ginu! Makasumpa ya ing lalaking e makamate king kapamilatan na ning espada na!)

¹¹ Ngana ning Ginu, Menatili yang mabibie panatag ing Moab at e ya pa mebihag kapilan man. Mengari ya ing Moab king alak a e matatagin king pangapanatili na at e bitasang mililikas king aliwang lulanan. E bitasang milako lasa at menatiling maniaman ing lasa na.

¹² Oneng ngeni, daratang la ding aldo nung kapilan ku la itubud ding tau ban itugtug de ing Moab anti ing alak. Ilako da la laman ding lulanan nang alak at pamalbalan da lang mangalati.

¹³ Mangapakarine la kanita ding memalen na ning Moab king kikilalanan dang dios a i Kemos nung makananu lang mipakarine ding Israelita king aliwang dios a karelang penaligan king Betel.

¹⁴ Lalaki na ning Moab, obat sasabian yung bayani kayu at matapang a sundalung mesubuk na king labanan?

¹⁵ Daratang ne ing manyira king Moab at karing siudad na mate la ding mayap nang kayanakan a lalaki. Aku ing Ari, ing Ginung Mayupaya, ing migsalita.

¹⁶ Ing kawakasan ning Moab daratang na; malapit nang datang ing keyang kasiran.

¹⁷ Magpaldas kayu para kaniting bansa, ikong sablang manuknangan siping na, ikong sablang makibalu king gelingan na. Sabian yu, Ing maragul nang pamamahala mepatlud na; ala nang keyang ligaya at upaya.

¹⁸ Ikong manuknangan king Dibon, kuldas na kayu karing luklukan yung pandangal, at lukluk king alikabuk. Atyu ne ing manyira king Moab at lesak na na lang kuta na.

¹⁹ Ikong manuknangan king Aroer, king dalan talakad at manaya; ikutang yu karing tatakas, nung nanu ing merapat.

²⁰ Mibagsak ne ing Moab, ya ing karelang ipakibat; manangis kayu para king Moab; makarine ya. Ibalita yu karing taung atyu lele ning Ilug ning Arnon king ing Moab melasak ne!

²¹ Dinatang na ing kayatulan karing siudad a atyu karing kapatagan: king Holon, Jaza, Mefat,

²² Dibon, Nebo, Bet Diblataim,

²³ Kiriataim, Betgamul, Betmeon,

²⁴ Keriot, at Bozra. Dinatang na ing kayatulan karing sablang siudad ning Moab, ding king marayu at malapit.

²⁵ Mewala ne sikanan ing Moab, ing upaya na ala na. Aku, ing Ginu, ing migsalita.

²⁶ Ngana ning Ginu, Lasingan ye ing Moab uling mig-rebeldi ya laban kanaku. Gumulung ya ing Moab king sarili nang suka at kaylian de ring tau.

²⁷ Moab, agaganaka mu nung makananu mu lang gewang pikaylian ding memalen na ning Israel? Linawe mu lang antimo waring merakap kayabe da ring mapanako.

²⁸ Ikayung taung manuknangan king Moab, lakuan yu na la ding kekong balen! Mako na kayu at manuknangan karing matas a batu! Pakiapusan ye ing patipating gagawang sale king gilid da ring matilo bunduk.

²⁹ Mapagmaragul ya ing Moab! Abalitan ku ing pamagmaragul da, ing ketasan da, at kapalaluan da ring memalen na, nung nu anti katas ing paglalawe ra king sarili da.

³⁰ Aku, ing Ginu, balu ku ing karelang kesiasan buntuk. Alang kabaldugan ing karelang kayabangan at e la manatili ding bage daraptan da.

³¹ Inya, tatangis ku para king mabilug a Moab at para karing memalen na ning Kir Heres.

³² Lalu ku lang kiakan ding memalen na ning Sibma kesa karing memalen na ning Jazer. Siudad ning Sibma, mengari ka king wake; miraras la ding sanga mu king Dagat a Mete at angga na king Jazer. Oneng ngeni mesira na la ding bunga mu neng kaleldo at ding ubas mu.

³³ Mebating ing tula at ligaya king mataba nang gabun ning Moab. E na mamagus ing alak karing pipapaslan ubas; ala nang gagawang alak at kukulisak king tula.

³⁴ Kukulisak la ding memalen na ning Hesbon at Eleale at mararamdam ing kulisak da angga king marayung Jahaz; daramdaman da ring memalen na ning Zoar at mararamdam angga king Horonaim at Bayung Eglat. Melangi ya at pati na ing Batis ning Nimrim.

³⁵ Sabatan ku la ding memalen na ning Moab king pamangawa ra karing ain-a-durulukan karing matas a lugal at pamanain-sakripisyu para karing kikilalanan dang dios. Aku, ing Ginu, ing migsalita.

³⁶ Inya manangis ya ing pusu ku uli na ning Moab at uli da ring memalen na ning Kir Heres. Mengari ku king metung a magkanta king kantang mete king kapamilatan na ning plauta, uling mewala ing sablang bandi ra.

³⁷ Kinalbu ne ning balang metung at metung ing buntuk na at lebahas ing balbas na. Pengili da la ring gamat da at misulud yang imalan a magaspang ing balang metung.

³⁸ Ating pamagpaldas karing sablang bale na ning Moab at karing plasa na, uling bilbal keng anting kuran ing Moab at ala metung mang makiburi.

³⁹ Melaso ya ing Moab! Ngulangul kayu! Mengapakarine ya ing Moab. Lasak ya at gagawan deng pikaylian ding sablang bansang kasiping na. Aku, ing Ginu, ing migsalita.

⁴⁰ Pengaku na ning Ginu king ing metung a bansa a anting agila sungaban ne karing makaladlad nang pakpak ing Moab,

⁴¹ at mabihag la ding balen at ding kuta na. King aldong ita mitakutan la ding sundalus na ning Moab anti ing babaing manganak.

⁴² Malasak ya ing Moab at e ne maging bansa uling mig-rebeldi yang laban kanaku.

⁴³ Takut, kulkul, at bitag la ding manaya karing memalen na ning Moab. Ing Ginu ya ing migsalita.

⁴⁴ Manakbag ya karing kulkul ing ninumang magtangkang tumakas king takut, at mayakua ya ing ninumang sumaka karing kulkul karing bitag, uling tikda ne ning Ginu ing oras para king kasiran na ning Moab.

⁴⁵ Magkapilit lang manintun pagkambilan ding alang akarapat a bakwit karin king Hesbon, ing siudad a king misan a panaun pemahalan neng Aring Sihon, oneng masisilab ya. Dilukan na la ning silab ding lugal a megubat at ding matas dang bunduk ding memalen na ning Moab a mahilig king gera.

⁴⁶ Malunus kayu karing memalen na ning Moab. Mete la ding taung sinamba kang Kemos at merakap la ampon mebihag ding anak dang lalaki at babai.

⁴⁷ Oneng karing aldo datang ing Ginu gawan neng pasibayung mapala ing Moab. Iti ya ing sinabi nang mapalyari ning Ginu tungkul king Moab.

49

¹ Iti ing sinabi na ning Ginu tungkul king Ammon: Nukarin la ding lalaki na ning Israel? Ala na wari metung man a magdipensa para king bansa ra? Baket pepaburen da la ring taung sasamba kang Molek a kuanan de ing sakup ning tribu nang Gad at karin manuknangan?

² Oneng ing aldo daratang nung kapilan ku iparamdam karing memalen na ning siudad ning Rabba ing inge na ning labanan at malasak la at masilab ding baryu na angga king mipatag la king gabun. Kanita ing bansang kinua ra king Israel kuanan neng pasibayu.

³ Memalen ning Hesbon, tumangis kayu! Melasak ya ing Ai! Ikong babai na ning Rabba, magpaldas kayu! Misulud kayung imalan a magaspang at manangis kayu. E yu balu nung nukarin kayu mulayi. Mayakua ya at miyugse ing kikilalanan yung dios a i Molek at ding pari na at prinsipi.

⁴ Ikong e tapat a tau, obat magmaragul kayu? Mangaina na kayu. Obat manalig kayu king kekong upaya at sasabian king ala metung mang mangangas lumusub kekayu?

⁵ Miparala kung takut king sablang makapadurut kekayu. Mamulayi kayu. Mulayi ya ing balang metung ban e ya mate at ala metung man a manipun karing sundalus mung mikalat.

⁶ Kaybat na niti gawan keng pasibayung mapala ing Ammon. Aku, ing Ginu, ing migsalita.

⁷ Oyni ing sinabi na ning Ginung Mayupaya tungkul king Edom: Milako na la wari beluan ding tau na ning Edom? E na la wari makaibie payu ding karelang tagapayu tungkul king karelang daptan? Mewala na ngan wari ing karelang kabiasnan?

⁸ Memalen ning Dedan, tumakas na kayu at mulayi! Salikut kayu! Malapit ku na lang paten ding lahi nang Esau uling dinatang na ing oras ning pamamarusa ku karela.

⁹ Neng managtal lang ubas ding lalaki maglakuan lang mapilan karing sanga, at neng daratang la ding mapanako neng bengi, detang buri da mu ilang kakuanan da.

¹⁰ Oneng linubas ku lang ganap ding lahi nang Esau at pepalto ku la ding lugal nung nu la sasalikut ban e na la kapilan man makasalikut. Mete na la ding memalen na ning Edom at ding kamaganak da at kasiping bale. Ala metung mang mitagan.

¹¹ Lakuan yu la kanaku ding kekong ulila at ingatan ku la. Ayasahan da ku ring kekong mebalung babai. fig,,,,,Salikut kayu!,(49:8)fig*

¹² Nung minum la ding e karapatdapat king kopa na ning parusa, ikayu pa kaya ing e miparusan? Wa, minum kayu kaniting kopa ning parusa!

¹³ Aku mismu sinumpa ku king ing siudad ning Bozra maging makatakut yang lalawan at maging disyerto ya; gawan deng pikaylian ding tau at gamitan de ing lagyu na bilang peka sumpa. Manatili lang lasak king kapilan pa man ding sablang baryu na. Aku, ing Ginu, ing migsalita.

¹⁴ Ngaku, Edom, mekatanggap kung balita a ibat king Ginu. Mitubud yang mensahero ban sabian karing bansa king tipunan da la ring sundalus da ban magsadia king pamaglusub keka.

¹⁵ Gawan na kang maina ning Ginu at metung man alang gumalang keka.

¹⁶ Lininlang na ka ning ketasan. Ala nang maki takut keka antimo ing isipan mu. Manuknangan ka karing mabatung bangin, king taluktuk ning bunduk; oneng agyang manuknangan ka king matas anting agila, ibaba na ka ning Ginu. Ing Ginu ya ing migsalita.

¹⁷ Ngana ning Ginu, Mabayat ing kasiran a datang king Edom; mabigla ya at mitakutan ing balang manakit.

¹⁸ Mapalyari munaman king Edom itang milyari king Sodoma at Gomorra inyang melasak la at ding kasiping dang balen. Ala nang manuknangan pang pasibayu karin. Aku, ing Ginu, ing migsalita.

¹⁹ Anti ing leon a lulual king kagubatan lele ning Ilug ning Jordan paukiat king malabung a pastulan, datang ku at papulayan ku lang palual king bansa da ring tau Edom. Kanita ing manimuna a pilinan ku ya ing manibala king bansa. Ninu ing pakilupa yu kanaku? Ninu ing mangangas manamun kanaku? Ninung pamuntuk ing makasalangsang kanaku?

²⁰ Pakiramdaman ye ing pamalak a gewa ku laban karing memalen na ning Edom, at itang buri kung daptan karing memalen na ning siudad ning Teman. Makaladkad la pati na anak da at mitakutan ya ing balang metung.

²¹ Potang mibagsak ne ing Edom, mika inge a pasari king pangaugun na ning mabilug a yatu at maramdam ing kulisak ning babala angga na king marayung Dagat ding Timbu.

²² Anti ing agilang makaladlad a bagius lusuban de ring kalaban ing Bozra. King aldong ita, mitakutan la ding sundalus na ning Edom anti ing babaing manganak.

²³ Iti ya ing sinabi na ning Ginu tungkul king Damasco: Maliligalig la ding memalen da ring siudad na ning Hamat at Arpad uling abalitan da ing e mayap a balita. Mengari king alun ning dagat ing kaligaligan a daratang karela at e la mipaindatun.

²⁴ Mangaina la ding memalen na ning Damasco at tinakas uli na ning takut. Mengari la king babaing manganak; atyu la king kasakitan at kalungkutan.

²⁵ Lubus ne ngening alang tau ing pikabaluan a masayang siudad.

²⁶ King aldong ita, mate la karing dalan na ning siudad ding kayanakan nang lalaki at magisan la ding sabla nang sundalus.

²⁷ Silaban ku la ding pader na ning Damasco at ding palasyu nang Aring Benhadad. Aku, ing Ginu, ing migsalita.

²⁸ Iti ya ing sinabi na ning Ginu tungkul king tribu ning Kedar at karing pamuntuk na ning siudad ning Hazor a simbut na ning Aring Nebucadenesar ning Babilonia: Lusuban yu la ding memalen na ning Kedar at paten ya itang tribu da ring memalen na ning aslagan!

²⁹ Kuanan yu la ding tolda ra at sese dang animal, ding kortina da ring tolda ra at ing sablang atyu karing karelang tolda. Kuanan yu la ding karelang kamelyu at sabian karing memalen: Makapadurut kekayu ing sindak!

³⁰ Memalen ning Hazor, aku, ing Ginu, babie kung babala kekayu king mulayi na kayu king marayung lugal at salikut kayu. Atin yang gewang planu ing Aring Nebucadenesar ning Babilonia laban kekayu at iti ya ing sasabian na,

³¹ Me ko keni! Lusuban ta la detang taung isipan dang ligtas la at panatag a bili! Ala lang pasbul dalan ding karelang siudad o kandadu at ganap yang alang dipensa.

³² Kuanan yu la ding karelang kamelyu at baka! Ikalat ku la king balang suluk detang taung paurud makuyad a buak, at miparala kung kasiran karela king balang lugal da.

³³ Maging disyerto ya ing Hazor king kapilan pa man, metung a lugal a bukud mung ding animal a jackal ilang manuknangan. Ala nang manuknangan pang pasibayu karin. Aku, ing Ginu, ing migsalita.

³⁴ Inyang meging ari ya i Zedekias king Juda, migsalita ya ing Ginung Mayupaya kanaku tungkul king bansang Elam.

³⁵ Ngana, Paten ku la ding sabla nang mamana a meging kasangkapan king pamaging mayupaya ning Elam.

³⁶ Patiupan ke ing angin karing suluk ning bansa ra laban karela, at ikalat ku la ding memalen na king miyayaliwang lugal angga king ala nang bakwit a e miras king kaisanu pa mang bansa.

³⁷ Gawan ku lang duag ding memalen na ning Elam karing karelang kalaban a bisang makamate karela. Uli na ning maragul kung mua gisanan ku lang paten ding memalen na ning Elam, at mitubud kung sundalus laban karela angga king lubus ku lang agisan.

³⁸ Paten ku la ding karelang ari at ding manimuna ra at ibili ke karin ing tronu ku.

³⁹ E lumuat gawan ku lang pasibayung mapala ding memalen na ning Elam. Aku, ing Ginu, ing migsalita.

50

¹ Iti ya ing mensahi a binie na ning Ginu kanaku tungkul king siudad ning Babilonia at karing memalen na:

² Sabian yu, ibalita yu karing bansa! Ibalita yu! Ibie ye ing sinial at ipamalita yu! E yu sukat isalikut ing balita! Mibagsak ne ing Babilonia! Ing dios dang i Marduk mengapirasu ya! Mengapakarine lang idolo na, ding makasumami nang larawan mengalasi la!

³ Dinatang ya ing metung a bansang ibat king norti ban lusuban ne ing Babilonia at gawan neng disyerto. Mamulayi la ding lalaki at ding animal, at metung man ala nang manuknangan karin.

⁴ Ngana ning Ginu, Potang datang na ing aldong ita, datang lang manangis manintun kanaku, ing karelang Dios, ding memalen na ning Israel at Juda.

⁵ Ikutang de ing dalan papunta king Zion at kaybat tukian de. Gawa lang alang anggang kasunduan kanaku at tuparan de.

⁶ Mengari la ding taung kanakung pinili karing tupang pepaburen da ring pastul da; mewala la karing bunduk. Kalupa da la ring tupang maggala-gala karing miyayaliwang bunduk at akalinguan da nung nu ya karin ing karelang tuknangan.

⁷ Darakpan da la ring ninumang manakit karela. Ngarang sasabi ding karelang kalaban, Mikasala la king Ginu, inya ustu ing depat tamu. Menalig la king Ginu ding karelang makatua at sukat la sanang menatiling tapat king Ginu.

⁸ Memalen ning Israel, tumakas na kayu! Lakuan yu ne ing bansang Babilonia! Pakikuanan yung ikayu ing munang mako!

⁹ Aligogon ke ing grupu da ring masikan nang bansa ning norti at lusuban de ing Babilonia. Isadia da ing karelang sarili laban kaniting bansa at sambutan de. Biasa lang mangasu; e la magmintis ding paslu ra king pamamana ra.

¹⁰ Kuanan da ing pibandian na ning Babilonia at kuanan da retang maniamsam ing sablang bage buri da. Aku, ing Ginu, ing migsalita.

¹¹ Ngana ning Ginu, Memalen ning Babilonia, selanta ye ing bansa ku. Masaya kayu at matulang anti ing baka a dadarang binutil o king lalaking kabayung mainge.

¹² Makanyan man, ing mipakarine ya ing kekong maragul a siudad at milako ya dangalan. Maging malati yang dili ing Babilonia karing sablang bansa; langi ya at maging disyerto yang alang danum.

¹³ Uli na ning mua ku, ala metung mang manuknangan king Babilonia; malasak ya at mangilabut la ampon mangapamulala ding sablang manakit kaniting bansa.

¹⁴ Lalaking ating pana, magsadia na kayu para king pamakilaban king Babilonia at kubkuban ye. Ibugnus yu la ngan ding kekong paslu king Babilonia, uling mikasala ya kanaku, ing Ginu.

¹⁵ Ikulisak ye king mabilug a siudad ing balita na ning pamakilaban! Ngeni sinuku ne ing Babilonia. Melasak la at mibagsak ding pader na. Mamablas ku karing tau na ning Babilonia. Mablas kayu naman karela at daptan yu itang depat da karing aliwa.

¹⁶ E yu paintulut ing tumubu la ding bini king bansang ita ni paintulut ing matipun ing pupul. Mitakutan ya karing lulusub a sundalus ing ninumang dayuan a manuknangan karin at mamanuli la karing sarasarili dang bansa.

¹⁷ Ngana ning Ginu, Mengari ya king tupang panagalan da ing balen ning Israel at sasambulat ding leon. Mumuna, lisuban na la ning ari na ning Asiria at kadua, ngitngat na la ning Aring Nebucadenesar ning Babilonia ding butul da.

¹⁸ Uli na niti, aku, ing Ginung Mayupaya, ing Dios ning Israel, parusan ke ing Aring Nebucadenesar at ing bansa na antimo nung makananu keng perusan ing ari na ning Asiria.

¹⁹ Ibalik ku la ding memalen na ning Israel king bansa da. Mangan la king pagkabiayan a tutubu king Bunduk ning Carmel at king lugal ning Bashan at kanan da ing sablang buri dang kanan a tutubu king sakup ning Efraim at Gilead.

²⁰ Potang datang na ing aldong ita, ala nang mayakit pang kasalanan king Israel at ala nang e mayap king Juda, uling patawaran ku la ding taung tinagan ku bie. Aku, ing Ginu, ing migsalita. fig,,,,,Mengari ya king tupang panagalan da... at sasambulat ding leon.,(50:17)fig*

²¹ Ngana ning Ginu, Lusuban yu la ding memalen na ning Marataim at ning Pekod. Paten yu la ngan at gisanan. Daptan yu ing sablang iyutus ku kekayu. Aku, ing Ginu, ing migsalita.

²² Meramdam king bansa ing inge na ning labanan at maragul ing kasiran.

²³ Pemalbal neng mangalati ning Babilonia king pamukpuk na ing mabilug a yatu, at mengalasi-lasi ya ing pamukpuk na! Mengapamulala la ding sablang bansa king milyari king bansang ita.

²⁴ Babilonia, mekilaban ka kanaku at merakap ka king bitag a sidia ku para keka agyang e me balu iti.

²⁵ Biklat ke ing lugal nung nu ku la sasalikut ding kanakung sandata at lege ku la uli na ning kanakung mua, uling aku, ing Ginung Dios a Mayupaya, atin kung obrang daptan king Babilonia.

²⁶ Lusuban ye king misusumangid at lasakan ding lugal a pisisinupan nang pamangan! Itambak yu ing asamsam yu antimo nung makananung makatambak ing binutil. Lasakan ya ing bansa. Ala kayung tatagan nanuman!

²⁷ Paten la ngan ding sundalus! Gisanan yu la! Makalunus la ding memalen na ning Babilonia! Dinatang na ing oras ban parusan la! (

²⁸ Makatakas la ding bakwit ning Babilonia; mako la Babilonia at ibalita ra king Jerusalem nung makananung minablas ya ing Ginu karing tau Babilonia uli na ning depat da king Templo na.)

²⁹ Sabian mu karing mamana ing lusuban de ing Babilonia. Itubud me ing balang metung a biasang gumamit pana at paslu. Kubkuban ye ing siudad at ala kayung paburen a makatakas. Papamayaran ye king depat na, at daptan yu itang depat na karing aliwa uling pigmaragulan na ku, ing Banal ning Israel.

³⁰ Inya mate la karing dalan ning siudad ding kayanakan nang lalaki, at magisan la king aldong ita ding sablang sundalus na. Aku, ing Ginu, ing migsalita.

³¹ Babilonia, mitmu kang kapagmaragulan, inya aku, ing Ginung Dios a Mayupaya, laban ku keka! Dinatang na ing oras ban parusan da ka.

³² Mitisud ya at misakab ing mapagmaragul mung bansa at ala metung mang mitikdo keka. Silaban ku la ding kekang siudad at malasak ing sablang makapadurut karin.

³³ Ngana ning Ginung Mayupaya, Meyalipit la ding memalen na ning Israel at ning Juda. Pakabanten da la ring mekabihag karela at e da la paintulutan mako.

³⁴ Oneng masikan ya itang sagip karela, Ginung Mayupaya ing lagyu na. Ya mismu ing magdipensa king karelang kasu at dinan neng kapayapan ing yatu, oneng kaguluan ing idala na karing memalen na ning Babilonia.

³⁵ Ngana ning Ginu, Kamatayan ing karapatdapat king Babilonia! Kamatayan ing karapatdapat karing memalen na ampon pamuntuk, at karing lalaki nang mangabiasa.

³⁶ Kamatayan ing karapatdapat karing malaram nang propeta; mangmang la! Kamatayan ing karapatdapat karing sundalus na; mataloti la!

³⁷ Gisanan la ding kabayu ra at karwahe! Kamatayan ing karapatdapat karing sundalus a upahan na; mangaina la! Siran ing pibandian na; panakawanan ya at samsaman.

³⁸ Palangian ya ing bansa na, at ding ilug na. Bansa yang mitmung idolo ing Babilonia a pepasari king kamangmangan da ring tau.

³⁹ Inya, dalawan de ring demonyu at ding e mayap a espiritu ampon ding marinat a ayup. E na la manuknangan pasibayu ding tau karin ni king panaun a datang.

⁴⁰ Mapalyari keya itang milyari king Sodoma at Gomorra inyang lesak ku la at ding siping nang balen. Ala nang manuknangan metung man karin. Aku, ing Ginu, ing migsalita.

⁴¹ Daratang la ding tau ibat king metung a bansa ning norti; bansa yang mayupaya king marayung lugal, at dakal lang aring magsadia para king pamakilaban.

⁴² Pana at espada ing darala da; ala lang lunus at mabagsik la. Anti la king biung ning dagat kabang pakasake la karing kabayu ra. Makasadia la para labanan ya ing Babilonia.

⁴³ Damdaman na ning ari ning Babilonia ing balita, at mangalambut la ding gamat na. Akmulan ne ning sindak, ning sakit a kalupa na king babaing manganak.

⁴⁴ Anting leon a lulual king kagubatan lele ning Jordan paukiat king pastulan a malabung ning bansa, aku, ing Ginu, datang ku at payatrasan ding tau Babilonia king siudad da. Kanita ing pamuntuk a pilinan ku ya ing mamahala king bansa. Ninu ing kalupa ku? Ninu ing mangangas manamun kanaku? Ninung pamuntuk ing makasalangsang kanaku?

⁴⁵ Inya pakiramdaman ye ing tingka kung gawan laban king siudad ning Babilon, at ing buri kung daptan karing memalen na. Makaladkad la pati ding anak da at mitakutan ya ing balang metung.

⁴⁶ Potang mibagsak ne ing Babilon, mika inge a pasari king panga-ugun na ning mabilug a yatu at maramdam ing tangis karing aliwang bansa.

51

¹ Ngana ning Ginu, Miparala kung masikan a angin a manyira king Babilonia at karing memalen na.

² Mitubud kung taung dayuan a manyira king Babilonia anting angin a mipapaid king are. Potang datang na ing kasiran a ita, lusuban de king misusumangid nang dake ning Babilonia at lakuan deng alang laman.

³ E yu la dirinan panaun ding sundalus na ban e da la abugnus ding paslu ra o misulud man karing baluti ra. E yu paintulut ing miligtas la ding kayanakan dang lalaki! Gisanan yu lang paten ding sabla nang sundalus!

⁴ Mangasugat la at mangamate karing dalan da ring siudad da.

⁵ Aku, ing Ginung Dios a Mayupaya, e ke gilutan ing Israel at ing Juda agyang mikasala la kanaku, ing Banal ning Israel.

⁶ Lakuan yu ne ing Babilonia! Tumakas na kayu! E yu paintulut ing mate kayu uli na ning kasalanan ning Babilonia. Mamablas na ku at paparusan ke agpang ketang depat na.

⁷ Mengari ya ing Babilonia king kopang gintung atyu king gamat ku; palasingan ke ing mabilug a yatu. Mininum la ding bansa king alak na at memulang la.

⁸ Bigla yang mibagsak at melasak ing Babilonia! Kiakan ye! Kuma kayung panulu para karing sugat na, magkang kumayap ya.

⁹ Ngara ding dayuan a manuknangan karin, Gewa mi ing sablang agyu mi ban saupan ya ing Babilonia, oneng ala keng akarapat. Tara mako ta na at magbalik karing tuknangan tamu. Perusan ne ning Dios king mabilug nang sikanan ing Babilonia at lubus neng lesak. fig,,,,,Tumakas na kayu!,(51:6)fig*

¹⁰ Ngana ning Ginu, Kukulisak da ring taung kanakung pinili, Pepakit na ning Ginu king atyu tamu king matulid. Tara mako ta na at sabian karing memalen na ning Jerusalem ing depat ning Ginung kekatamung Dios.

¹¹ Ginising na la panamdam ning Ginu ding ari na ning Medes uling pagnasan na ing lasakan ne ing Babilonia. King anti kaniti ne ablasan uli na ning pangalasak na ning Templo na. Ngarang minutus ding mamuntukan king pamaglusub, Itais yu la ding paslu yu! Isadia yu la ding kalasag yu!

¹² Ibie ya ing senias king pamaglusub karing pader ning Babilonia. Dagdagan la ding guardia! Mibili kayung bante karing puesto ra! Isadia la ding salake! fig,,,,,Ibie ya ing senias king pamaglusub karing pader ning Babilonia.,(51:12)fig* Depat na ning Ginu itang sinabi nang daptan na karing memalen na ning Babilonia.

¹³ Atin yang dakal a ilug itang bansang ita at dakal a bandi, oneng dinatang na ing oras na at miyangganan na ing sukad ning bie na.

¹⁴ Sinumpa ya ing Ginu king kapamilatan na ning bie na king miparala yang dakal a lalaking anting makapal a durun ban lusuban ya ing Babilonia, at kulisak lang kayabe ing pamagtagumpe.

¹⁵ Lelangan ne ning Ginu ing yatu king kapamilatan ning keyang upaya, at ing bansa king kapamilatan ning kabiasnan na, at lidlad na la ding banua.

¹⁶ King utus na danum babo biga dadabungbung; parala na lang biga manibat karing wakas ning yatu. Pagulisan neng kildap busal ning uran, at ibat king salikutan na pepalual yang angin.

¹⁷ Maging mangmang la at mulala kabud akit da iti; mangapakarine ya ing balang platerung gintu uli ding gewa rang idolo, uling dios lang e tutu at alang bie.

¹⁸ Ala lang kabaldugan at sukat lang isumpa; magisan la ngan potang datangan na la ning Ginu.

¹⁹ E re kalupa ing Dios nang Jacob; ya ing linalang king sabla, at pinili ne ing Israel ban maging balen na. Ginung Mayupaya ing lagyu na.

²⁰ Ngana ning Ginu, Babilonia, ika ing kakung pamukpuk, ing armas ku king pamakilaban. Ginamit da ka ban ibagsak lang bansa at kayarian,

²¹ ban lasawan lang kabayu at ding makasake karela, paglatian lang karung panggera at ding magmanehu karela,

²² ban paten lalaki at babai, makatua at kayanakan, anak a lalaki at babai,

²³ ding pastul at ding karelang kawan, ortelanu at ding kabayu rang panyarul; ban lasawan lang pamuntuk at matas a katungkulan.

²⁴ Ngana ning Ginu, Akit mu kung singil king Babilonia at karing memalen na uli na ning sablang e mayap a depat da king Jerusalem.

²⁵ Babilonia, mengari ka king bunduk a sisira king mabilug a yatu, oneng aku, ing Ginu a kekang kalaban, sakmalan da ka; patagan da ka king gabun at dulukan angga king maging abu ka.

²⁶ Ala metung man karing batung ibat king melasak ing magamit pa king pamanalakad gusali. Maging disyerto ka king kapilan pa man. Aku, ing Ginu, ing migsalita.

²⁷ Ibie ye ing senias ning pamanlusub! Tiupan ye ing trumpeta ban damdaman de ring bansa! Isadia yu la ding bansa para king gera laban king Babilonia! Sabian yu karing kayarian ning Ararat, Minni, at Askenaz ing lumusub na la. Tuldu kang metung a opisyal a manimuna king pamanlusub. Palualan lang anting susulapo durun ding kabayu.

²⁸ Isadia na la ding bansa king gera laban king Babilonia. Pabaluan la ding ari na ning Medes, ding karelang manimuna at opisyal, at ding sundalus ding sablang bansang sasakupan da.

²⁹ Gagalgal ya at mumugun ing yatu uling tutuparan na na ning Ginu ing balak nang gawan neng disyerto ing Babilonia at karin ala nang manuknangan pa.

³⁰ Tinuknang na lang makilaban ding sundalus na ning Babilonia at menatili la karing karelang kuta. Mewala na ing karelang tepangan at mengalambut la. Melasak la ding pasbul dalan ning siudad at masisilab la ding bale.

³¹ Daratang ya king ari ning Babilonia ing metung at metung karing talapagdalang balita ban sabian king ing siudad na melasak ya king misusumangid.

³² Abihag de ring kalaban ing ilug nung nu la lilipat at silaban da la ring kuta. Mitakutan la ding sundalus na ning Babilonia.

³³ E migluat mesaluput la karing kalaban at pindamusak da lang anti ding binutil king pidadaran. Aku, ing Ginung Mayupaya, ing Dios ning Israel, ing migsalita.

³⁴ Gili ne ning ari ning Babilonia ing Jerusalem at pengan ne. Anti ing lulanan, leko ne laman ing siudad; anting ganid iti inakmul ne. Kinua na itang buri na, at inugse itang mitagan.

³⁵ Paburen sabian da ring memalen ning Jerusalem, Mamayad ya sa ing Babilonia, king bigsikan a kekatamu depat na! Paburen sabian da ring memalen ning Jerusalem, Mamayad ya sa ing Babilonia, king kasakitan a delanan tamu!

³⁶ Inya sinabi na ning Ginu karing memalen ning Jerusalem, Idipensa ku ing kekong katatalakaran; iyablas da kayu. Palangian ke ing piakuanan nang danum ning Babilonia at palangian ku la ding ilug na.

³⁷ Ing bansang ita maging tambakan ne ning kasiran nung nu la manuknangan ding malyap a animal. Maging makatakut ing mayakit; metung man ala nang manuknangan karin at mangatakutan la ding sablang manakit.

³⁸ Gagaleung lang anti ding leon ding memalen na ning Babilonia at gagaga lang anti ding malating leon.

³⁹ Matako la? Isadia ku lang dakal a pamangan at palasingan ku la at gawan masaya. Matudtud la at e na la migising kapilan man.

⁴⁰ Anti ding tupa o ding toro o ding kambing idala ku la king pipatayan. Aku, ing Ginu, ing migsalita. fig,,,,,Ing bansang ita maging tambakan ne ning kasiran nung nu la manuknangan ding malyap a animal.,(51:37)fig*

⁴¹ Oyni ing sasabian na ning Ginu tungkul king Babilonia: Mebihag ya ing siudad a pinuri na ning mabilug a yatu! Makapangilabut yang akakit da ring bansa ing Babilonia!

⁴² Miglapo ya ing dagat king Babilonia at tikpan ne ning dadabungbung a alun.

⁴³ Meging makatakut lang lalawan ding balen na; mengari la king disyertong alang danum nung nu alang manuknangan o daralan man.

⁴⁴ Parusan ke i Bel, ing kikilalanan nang dios ning Babilonia, at ipasubli ku la keya ding bage penako na; e ra ne samban pa ding bansa. Mibagsak la ding pader ning Babilonia.

⁴⁵ Memalen ning Israel, mako kayu ken! Iligtas yu ing sarili yu king milalablab kung mua.

⁴⁶ E yu painan ing lub yu o mitakutan man king balitang kekayung daramdaman. Aliwang balita balang banua ing kakalat; ding balita tungkul king kasiran king bansa at ing metung a ari a makilaban king aliwang ari.

⁴⁷ Inya datang ing panaun nung kapilan ku la pakikitan ding idolo na ning Babilonia. Mangapakarine ya ing mabilug a bansa at mate la ding sablang memalen na.

⁴⁸ Ing sablang bage king yatu at king banua kulisak king tula potang mibagsak ya ing Babilonia karing taung datang a ibat king norti ba reng lasakan.

⁴⁹ Ing Babilonia ya ing pepasari king kamatayan da ring tau ning mabilug a yatu, at mibagsak ya ngeni ing Babilonia uling ya ing pepasari king kamatayan da ring dakal a Israelita. Aku, ing Ginu, ing migsalita.

⁵⁰ Ngana ning Ginu karing memalen nang atyu Babilonia: Aligtasan yu ing kamatayan! Mako na kayu ngeni! Mamalagua na kayung mako! Agyang marayu kayu karing kekong pibalebale, aku ing ganakan yu, ing kekayung Ginu, at ganakan ye ing Jerusalem.

⁵¹ Sabian yu, Milako ke dangalan at mengapakarine; ala keng akarapat nanuman, uling ding dayuan ilang sinakup karing lugal a banal ning Templo.

⁵² Inya, aku sabian ku king ing panaun datang nung kapilan ku la pakikitan ding idolo na ning Babilonia, at saingsing la ding sugatan king mabilug a bansa.

⁵³ Nung sakali mang aukiatan ne ning Babilonia ing banua at makagawang matibe kuta karin, makanyan man, mitubud ku ring tau karin ban lasakan de. Aku, ing Ginu, ing migsalita.

⁵⁴ Ngana ning Ginu, Pakiramdaman yu ing inge ning tangis karin king Babilonia, ing tagulele tungkul king kasiran king bansa.

⁵⁵ Lalasakan ke ing Babilonia, at patahimikan ku ne. Mamirapal la ding sundalus; anti lang bibiung a alun at lulusub lang abe ing masikan a kulisak.

⁵⁶ Dinatang la ban lasakan ya ing Babilonia; mebihag la ding sundalus na at mepakli ding pana ra. Aku ing Dios a mamarusa king e ustu, at atulan ke ing Babilonia agpang king depat na.

⁵⁷ Palasingan ku la ding pamuntuk na, ding lalaking biasa, manimuna, at sundalus. Matudtud la at e na la migising pa. Aku, ing Ari, ing migsalita; aku, ing Ginung Mayupaya.

⁵⁸ Ding makapal nang pader ning mayupayang Babilonia king gabun mitomba la, at ding matas nang pasbul dalan masilab no man. Ing sablang dapat ding bansa alang kabaldugan, ing kapagalan da muli mu king api. Aku, ing Ginung Mayupaya, ing migsalita.

⁵⁹ I Seraia a anak nang Nerias at apu nang Maseia, ya ing taung tubud-tuburan nang Aring Zedekias. King kapat nang banuang pamag-aring Zedekias king Juda, kayabe neng miglakbe king Babilonia i Seraia at dininan keng mapilan a bage daptan na.

⁶⁰ Sinulat ku king metung a libru ing sablang kasiran a datang king Babilonia at ding sablang bage tungkul king Babilonia.

⁶¹ Ngaku kang Seraia, Potang miras na ka Babilonia, siguraduan mung mabasa lang masikan karing tau ing sablang bage makasulat.

⁶² Kaybat manalangin ka king anti kaniti: Ginu, sinabi mu king lasakan me iting lugal ban ala nang manuknangan pang melalang, tau o animal, at king maging disyerto ya king kapilan pa man.

⁶³ Seraia, potang ayari mu neng abasa karing tau iting libru, itali me king metung a batu at iyatsa king Ilug ning Eufrates.

⁶⁴ At sabian mu, Iti ya ing mapalyari king Babilonia: lumbug ya at e ne lunto pasibayu uli na ning kasiran a iparala na ning Ginu. Angga la keti ding amanu nang Jeremias.

52

¹ Adua yang pulu't metung a banua i Zedekias inyang meging ari ya king Juda, at mig-ari ya king Jerusalem kilub ding labing metung a banua. Hamutal ya lagyu i ima na; anak neng Jeremias a menuknangan king balen ning Libna.

² Depat nang Aring Zedekias ing e mayap a e na buri ning Ginu. Kalupa na ning depat nang Aring Jeoiakim ing dapat na.

³ Mimua ya ing Ginu karing memalen na ning Jerusalem at Juda, inya peintulut na ing mabihag la at miyugse king aliwang bansa. Mig-rebeldi ya i Zedekias laban kang Aring Nebucadenesar ning Babilonia.

⁴ Inya dinatang ya i Nebucadenesar at ding sabla nang sundalung pakasandata, at lisuban de ing Jerusalem kanitang kapulung aldo na ning kapulung bulan ning siam nang banuang pamag-aring Zedekias. Ginawa lang kampu ra king lual ning siudad at mitalakad lang pader a barikada king makapadurut ning siudad.

⁵ E la pepatugut linusub angga na king kalabing metung a banua nang pamag-aring Zedekias.

⁶ King kasiam a aldo ning kapat a bulan ning banua mu ring ita meragul ing danup angga king ala na lang apangan ding tau.

⁷ Melasak la ding pader ning siudad, at agyang kibkuban de ring sundalus na ning Babilonia ing siudad, makanyan man mekatakas la ding sundalus na ning Jerusalem inyang bengi na. Tinakas la king kapamilatan na ning pamandalan da king hardin ning palasyu, at linabas la king pasbul dalan pilatan da ring aduang pader. Milayi lang papunta king Kapatagan ning Jordan.

⁸ Oneng ding sundalus ning Babilonia tegalan de i Aring Zedekias at abihag de karin king kapatagan lele ning Jerico; likuan de ring sablang sundalus na.

⁹ Dela re i Zedekias king Aring Nebucadenesar a atyu kanita king siudad ning Ribla karin king bansang Hamat. Karin ne inatulan i Aring Zedekias.

¹⁰ Karin king Ribla na la pepapate ding anak nang lalaking Zedekias kabang makalawe ya ing tata ra. At pepapate na la namang Aring Nebucadenesar ding opisyal na ning Juda.

¹¹ Kaybat na nita, pepadukit ne mata i Zedekias at pepatanikala ne at pepadala king Babilon. Menatili ya i Zedekias king sukulan ning Babilon angga na king aldo mete ya.

¹² King kapulu nang aldo ning kalimang bulan ning kalabing siam nang banuang pamag-aring Nebucadenesar ning Babilonia, linub ya Jerusalem i Nebuzaradan, ing tagapayu ning ari at pekapun ding sabla nang sundalus.

¹³ Silaban ne ing Templo, ing palasyu, at ding bale da ring sablang importanting tau ning Jerusalem

¹⁴ at ding sundalus na lesak da la ring pader ning siudad.

¹⁵ Kaybat dela na lang Nebuzaradan king Babilonia ding taung mitagan king siudad at detang mekikampi karela at ding aliwa pang lalaking magaling a pangamat king pamagobra.

¹⁶ Oneng likuan na la king Juda ding mapilan a pakakalulung taung alang pibandian nanuman, at pepagobran na la karing mulahan ubas at karing marangle.

¹⁷ Pemirasu da la ring sundalus na ning Babilonia ding tangsung asias at ding pitutumpakan; antimu rin ding mangaragul a tangsung datukanan danum, at kinua da ngan at dela ra king Babilonia ing sablang tangsu.

¹⁸ Kinua da la naman ding pala at ding lulanan abu a gagamitan king pamaglinis king altar, ding kasangkapan a gagamitan karing sulu, ding palangganang gagamitan king pamanialud daya da ring ain-sakripisyu, ding silyo a gagamitan king pamamataung insenso, at ding sablang tangsung kasangkapan a gagamitan king kasuyuan king Templo.

¹⁹ Kinua na ngan ning kapitan da ing sablang bage megawa king gintu at pilak; ding malating silyo, ding kawaling gagamitan para king pamagdalang mibabayang karbun, ding silyo a gagamitan king pamanialud dayang ibat karing ain-sakripisyu, ding lulanan abu, ding pibibilianan sulu, ding silyong gagamitan para king insenso, at ding silyong gagamitan king pamitugtug karing ain-a-alak.

²⁰ Ding tangsung kasangkapan a pepagawa nang Aring Solomon para king Temploding aduang asias, ding aduang karitun, ing maragul a datukanan danum, at ding labing aduang torong mamahala kaniti a e atimbang uling mabayat la.

²¹ Milulupa la ding aduang asias: aduang pulu't pitung talampakan ya katas ing balang metung, at labing walung talampakan ya king makapadurut. Kalubkuban la at apat a pulgada ya kapal ing bakal.

²² Babo na ning balang asias ating tangsung pitu at kapitnang talampakan king katas, at king makapadurut metung yang salasala a mipalamutian pomegranate at megawa la king tangsu.

²³ King salasala na ning balang asias ating dinalan a pomegranate at ding siam apulu't anam kareti mayayakit la manibat king gabun.

²⁴ Karagdagan kaniti, i Nebuzaradan, ing pekapun da ring sundalus, dela na lang bilang bihag di Seraia, ing matas dili katungkulan karing pari, i Zefania, ing kaduang matas a katungkulan karing pari, at ding atlu pang importanting opisyal ning Templo.

²⁵ Ibat king siudad, kinua ne ing lalaking opisyal da ring sundalus, ing kayaduangan ning pekapun a mamahala karing kasulatan militar at ding aliwa pang anam apulung importanting lalaki.

²⁶ Dela na la ngan Nebuzaradan king ari ning Babilonia a atyu king siudad ning Ribla

²⁷ sakup ning Hamat. Karin na la pepabarug at pepapate ning ari. Inya mebihag la ding memalen na ning Juda king sarili dang bansa at miyugse la king aliwang bansa.

²⁸ Iti ya ing listahan da ring taung kinua na at binihag Nebucadenesar: king kapitung banua nang pamag-ari mekabihag yang atlung libu at aduang pulu't atlu;

²⁹ king kalabi nang walung banua, walung dalan atlung pulu't adua la ding kinua na at binihag ibat Jerusalem;

³⁰ at king kaduang pulu't atlu nang banua, pitung dalan apat apulu't lima lading kang Nebuzaradan. Heganagana, apat a libu at anam a ralan la ding kinua ra at binihag.

³¹ Kanitang banuang meging ari ya i Evilmerodak king Babilonia, pepakit yang ganaka kang Aring Jeoiakin ning Juda king kapamilatan na ning pamaglual na keya king sukulan. Milyari iti kanitang kadua nang pulu't limang aldo ning kalabing aduang bulan na ning katlung pulu't pitung banua nang pangabihag Jeoiakin.

³² Meging maganaka ya kang Jeoiakin i Evilmerodak; dininan neng katungkulan a mas marangal kesa karing aliwang aring kayabe nang miyugse king Babilonia.

³³ Inya mipaintulut kang Jeoiakin ing alilan na ing imalan nang presu at mangan king lamesa na ning ari kabang mabie ya.

³⁴ Miririnan yang sustentu aldo-aldo para king pamangailangan na kabang mabie ya.