1

¹ Atyu la keting libru ding mensahi tungkul king Juda at Jerusalem a sinabi na ning Dios kang Isaias a anak nang Amoz. Milyari iti kanitang di Uzzia, Jotam, Ahaz, at Hezekia ilang ari na ning Juda.

² Ngana ning Ginu, Makiramdam ka, banua at yatu king kanakung sabian! Linaban la kanaku ding anak a kanakung sinese at peparagul.

³ Akikilala ne ning baka ing maki bandi keya at balu ne ning animal a asno ing taung babie pamangan keya. Oneng e na ku balu ning balen kung Israel at ding taung kanakung pinili; e ra bitasang aintindian.

⁴ Makalunus ka, ikang bansang makasalanan, ikang balen a mibait king lahi da ring mapamirait at e mayap a memalen. Gilutan me ing Ginu, ing Banal a Dios ning Israel, at lubus kang ginulut keya.

⁵ Obat e ka tutuknang lalaban king Ginu? Buri mung miragdagan pa ing parusa mo? Israel, mitmu neng sugat ing buntuk mu. Masakit ne ing pusu mu at ing kekang pamisip.

⁶ Ala nang masalese king katawan mu manibat king buntuk angga king talampakan. Mitmu kang galus, late, at sugat a nanaknak. E la pa melanggas ni miyaptasan man ding sugat mu o mikaskasanan panulu. fig,,,,,Israel, mitmu neng sugat ing buntuk mu.,(1:5)fig*

⁷ Mesalanta ne ing bansa mu at silab la't mipatag king gabun ding siudad mu. Kabang makalawe ka, kinua da ring dayuan ing gabun mu at sinira da ing sabla-sabla.

⁸ Bukud mung ing Jerusalem ya ing makatagan, metung yang siudad a makakubkub karing kalaban, magdili-dili yang anting bantayan libutad na ning tamnanan ubas o anting kubu libutad na ning tamnanan pipinu.

⁹ Lubus ya sanang melasak anti ing Sodoma at Gomorra, nung e na peintulut ning Ginung Mayupaya ing mitagan la ding mapilan a tau.

¹⁰ Jerusalem, mengari la ding kekang pamuntuk ampon ding taung keka manuknangan karing tau na ning Sodoma at Gomorra! Makiramdam ka sa king sasabian na keka ning Ginu. Pakiramdaman mu ing tuturu na keka ning Dios.

¹¹ Sasabian na keka, Isipan mu galang ing tutula ku karing ain-sakripisyu a alang patugut mung yayain kanako? Sinawa na ku karing tupang kekang durulukan bilang ain, antimu rin ing taba da ring pepataba mung animal. E ku tutula king daya da ring toro, tupa, at kambing.

¹² Ninu ing sinabi kekang idala mu ngan iti potang sasamba ka kanaku? Ninu ing sinabi kekang lapastanganan me ing kanakung Templo?

¹³ Tuknang na kang magdala karing ain a alang kabaldugan. Masusumami ku king bau na ning insenso a yayain mu kanaku. E ku na la apibata pa ding pamagpiesta mu king Bayung Bulan, ding pamagselebra mu king Aldo ning Sabbath, ding kekang pamitipun relihioso, uling midungisan la ngan deti karing kekang kasalanan.

¹⁴ Pikakasaman ku la ding pamagpiesta mu king Bayung Bulan at ding aldo mung pangilinan. Sinawa na kung mibabata kareti.

¹⁵ E ra ka pansinan potang itas mu la ding gamat mu king pamanalangin. E ra ka pakiramdaman agyang numanu kang manalangin makaba uling marinat la ding gamat mu uli na ning kekang kasalanan.

¹⁶ Wasan mu ing kekang sarili. Maglinis ka! Tuknang na kang darapat e mayap king akakit ku. Tuknang na kang darapat e mayap

¹⁷ at magaral na kang dapat king mayap. Patupad mu ing hustisia; saupan mu la ding magigipit, ibie mu ing karapatdapat karing ulila, at idipensa mu la ding mebalung babai.

¹⁸ Ngana ning Ginu, Me ka keni. Pisabian ta ing bage a yan. Agyang metuling ka uli na ning kasalanan, putian da kang anti ing maputing bulak. Malyaring milalu katuling ing kasalanan mu, makanyan man putian ku antimo ing maputing bulbul ning tupa.

¹⁹ Nung bisa ka mu at mamintu kanaku, ibie ku keka ing mayap a bage bubunga na ning gabun.

²⁰ Nung tanggi ka at salangsang kanaku, mate ka kapamilatan na ning gera. Aku, ing Ginu, ing migsalita.

²¹ Ing siudad a kanitang misan a panaun tapat ya at makatuliran, ngeni meging anti yang babaing magtinda king katawan na! Kanitang misan a panaun karin la manuknangan ding taung matulid a pamibiebie, oneng ngeni tau lang makamate kalupa dang tau.

²² Jerusalem, kanitang misan a panaun mengari kang pilak, oneng ngeni ala kang kabaldugan; kanitang misan mengari kang maniaman a alak, oneng ngeni mengari kang alak a semutanan danum.

²³ Rebeldi la ding kekang manimuna at kasabuat da la ring mapanako; maralas ing tatanggap lang regalu at suhul. E ra la kapilan man pigdipensa ding ulila king ukuman ni mekiramdam karing katuliran da ring babaing mebalu.

²⁴ Inya makiramdam ka ngeni king sasabian na ning Ginung Mayupaya, ing Mayupayang Dios ning Israel: Ibugnus ku ing milalablab kung mua karing kalaban ku.

²⁵ Kimut ku laban keka. Gawan da kang puru antimo nung makananu yang alang samut ing bakal at ilako ku ing sablang dinat mu.

²⁶ Dinan da kang pamuntuk at tagapayu antimo kanitang minunang panaun. Kanita ya mayaus banal at tapat a siudad ing Jerusalem.

²⁷ Uling makatuliran ya ing Ginu, iligtas ne ing Jerusalem at ding sablang atyu karin a sumisi at painggulut karing kasalanan da.

²⁸ Oneng paten na la ning Ginu ding sablang mikakasala at tatanggi keya.

²⁹ Dumine ka uli na ning sinamba ka karing dutung at uling ginawa kang banal a hardin.

³⁰ Malanat kang anti ing lalanging tanaman a ensina at ing hardin a e mitutugtugan danum.

³¹ Antimo nung makananu yang mitatau king ditak a baya ing are, makanyan lang magisan ding mayupayang tau uli na ning e ustu dang dapat, at alang makapatuknang king kasiran a dugpa karela.

2

¹ Oyni ing mensahi tungkul king Juda at Jerusalem a binie na ning Dios kang Isaias a anak nang Amoz:

² Karing aldo daratang, ing bunduk nung nu ya makatalakad ing Templo, ya ing maging pekamatas karing bunduk, maygit matas karing sablang bunduk-bundukan.

³ Dakal lang bansa ding lumapit, at karelang memalen sabian da, Tara, mukiat tamu king bunduk ning Ginu, king Templo ning Dios nang Jacob. Ituru na kekatamu nung nanu ing buri nang daptan tamu; lumakad tamu karing dalan a pinili na. Ing tuturu ning Ginu manibatan Jerusalem; manibat king Zion magsalita ya para karing taung pinili na.

⁴ Lutasan na ing e ra pamikakaintindi ding mangaragul a bansa. Panden da lang espada ra ban maging sarul la, at maging lait la ding tandus da. E na la lumual makigera ding bansa o magsadia para king labanan.

⁵ Inya, ikong lahi nang Jacob, munta kayu keni at lumakad tamu king sala a babie na ning Ginu kekatamu!

⁶ O Dios, tinggian mu la ding taung kekang pinili, ding lahi nang Jacob, uling kinatmu ya ing bansa karing salamangkerung ibat king Aslagan at king bansang Filistia. Pakiapusan da ing ugaling dayuan!

⁷ Mitmu ya ing bansa ra karing pilak at gintu at alang kalupa ing pibandian da. Mitmu yang dakal a kabayu ing bansa ra at ala lang patad ding karelang karung panggera.

⁸ Mitmu yang idolo ing bansa ra; sasamba la karing bage a gewa da ring gamat da.

⁹ Mimura ya at milako dangalan ing balang metung karela. E mu la sana patawaran, Ginu!

¹⁰ Salikut la karing kueba da ring mabatung bunduk-bundukan o kaya gawa lang kulkul king gabun ban aligtasan da ing mua na ning Ginu o kaya salikutan da ing upaya at ligaya na ning Ginu!

¹¹ Datang ing aldo nung kapilan miyangganan ing ketasan na ning tau at malasak ing kapalaluan na. Kanita ing Ginu ya na mung bukud mirangal.

¹² King aldong ita isaldak ne ning Ginung Mayupaya ing ninumang mapagmaragul, palalu, at masikanan.

¹³ Paten na la ding mangatas a tanaman a sedro na ning Lebanon at pati na ding sablang tanaman a ensina ning bansang Bashan.

¹⁴ Patagan na la ding mangatas a bunduk at bunduk-bundukan,

¹⁵ ing balang matas a tore, at ding pader ning balang kuta.

¹⁶ Ipalbug na la pati na ding pekamaragul at pekamalagung barku na ning Tarsis at ing sablang ating ulaga.

¹⁷ Miyangganan ing ketasan na ning tau at ing sablang kapalaluan na. Bukud mung ing Ginu ya ing mirangal king aldong ita

¹⁸ at lubus na lang lumbug ding sablang idolo.

¹⁹ Salikut la ding tau karing kueba da ring mabatung bunduk-bundukan o kaya kulkul la king gabun ban aligtasan da ing mua na ning Ginu o kaya salikutan da ing upaya na at ligaya potang datang ya ban ugunan ne ing yatu.

²⁰ Potang datang ne ing aldong ita, panugse da la ring idolong gintu at pilak a karelang gewa at paburen da la karing dagis at talibatab.

²¹ Potang datang ne ing Ginu ban ugunan ne ing yatu, salikut la ding tau karing kulkul at kueba karing mabatung bunduk-bundukan ban aligtasan da ing mua na at makasalikut la king upaya na at ligaya.

²² E yu na bibili ing kekayung kapanaligan karing taung matbud. Nanu wari ing ulaga ra? fig,,,, ,... ban aligtasan da ing mua na ning Ginu.,(2:19,21)fig*

3

¹ Ngeni ing Ginu, ing Mayupayang Ginu, malapit na nang ilako king Jerusalem at Juda ing nanuman at ing ninumang panaligan da ring tau. Ilako na karela ing karelang pamangan at ing karelang danum.

² Ilako na la karela ding karelang bayani at ding karelang sundalus, ding karelang ukum, at ding karelang propeta, ding karelang mamamanula, at ding lalaking mamahala king karelang gobiernu,

³ ding karelang manimuna king militar at memalen, ding karelang politiko, at ing ninumang gagamit salamangka ban manehuan ing bage mangapalyari.

⁴ Paburen na la ning Ginu ding anak a mura isip ban mamahala karing tau.

⁵ Samantalanan ne ning metung at metung ing ninu pa mang tau. E la munie kagalangan ding kayanakan karing karelang makatua, at e ra la galangan ding taung alang dangal ding makaygit karela.

⁶ Datang ing panaun nung kapilan ding mikakamaganak pilinan de ing metung karela at sabian da, Ika ing manimuna kekami kaniting oras na ning kalipitan uling atin ka pa namang imalan a asulud.

⁷ Oneng sabian na, Aliwa aku! E ra kayu malyaring asaupan. Ala ku munamang pamangan at imalan. E yu ku gagawan manimuna yu!

⁸ Wa, miraragsa ne ing Jerusalem! Mibabagsak ne ing Juda! Pawa ngang laban king Ginu ing sablang sasabian da at daraptan; e la mikakunung lapastangan king Dios.

⁹ Maging katibayan laban karela ing karelang pamangabiran. Makalantad na ing pamaniapat dang kasalanan; mengari la karing tau na ning Sodoma. E ra na alisian ing kapahamakan at ila mismu ing makipasari kaniti.

¹⁰ Sabian mu king tumula la ding taung malugud king katuliran at maging masalese para karela ing sablang bage. Akua rang nabangnan ing pipawasan da.

¹¹ Oneng siguradu lang mipahamak ding taung e mayap; nanuman ing depat da karing aliwa ya naman ing marapat karela!

¹² Ding manggipit karing kanakung memalen ila ding paparam salapi, at pipiraitnan da la. O Balen ku, lilili da ka ring kekang manimuna, inya e me balu ing dalan a sukat mung dalanan.

¹³ Makasadia ne ing Ginu ban isampa king husgadu ing dalum na; makasadia ya ba neng atulan ing balen na.

¹⁴ Iyarap na na la king husgadu ding makatua at manimuna na ning balen na. Ngana ning kayatulan na: Ikayu ing menako karing mulahan ubas at mitmu la ding pibalebale yu karing bage penako yu karing pakakalulu.

¹⁵ Ala kayung matulid damusak karing kanakung memalen at magsamantala karing pakakalulu. Aku, ing Ginung Dios a Mayupaya, ing migsalita.

¹⁶ Ngana ning Ginu, Lawan yu la ding babaing tau Jerusalem. Tutu lang mapagmaragul! Balamu ninu na ila neng lalakad la. E la patugut magmapundat a mata; kending-kending la king lakad da at pakalaksingan da la ring pulseras karing bitis da.

¹⁷ Oneng parusan ku la at kalbuan.

¹⁸ Daratang ne ing aldo nung kapilan ing Ginu ilako na karing babaing tau Jerusalem ing sablang bage pagmaragul da; ding palamuti a susulud da karing bitis da, buntuk, at batal

¹⁹ at karing gamat da. Ilako na la ding talikbung da

²⁰ at ding bandana karing buntuk da, ding palamuti, at gayumang bibili ra karing takde ra at awakan,

²¹ ding singsing karing taliri da, at karing arung da;

²² ing sablang mal a imalan, bata, balabal, at bag;

²³ ding mangalino rang imalan, panyu, turban, at ding mangakabang belo karing buntuk da.

²⁴ Lugal king maging mabanglu la, maging mabuluk la; king lugal ding mangamal dang sinturun, maging lubid lang magaspang; makalbu la ding mangalagu rang buak; lugal king malagung imalan da, misulud lang basan; miyalilan kamarinayan ing karelang leguan! fig,,,,,Balamu ninu na ila neng lalakad la.(3:16) Misulud lang basan.,(3:24)fig*

²⁵ Ding lalaki naman, wa, mate la king gera pati na ding pekamasikan.

²⁶ Mika tangisan at kalungkutan karing pibalebale na ning siudad, at maging anti ya ing siudad king babaing lubas a makatalpak king gabun.

4

¹ Potang datang na ing panaun a ita, talnan de ring pitung babai ing metung a lalaki at sabian da, Apakanan mi at apaimalanan ing kekaming sarili, oneng dapat a mayap paintulut mung sabian mi king ika ing asawa mi ban e ke manatili king kamarinayan na ning ala keng asawa.

² Ing panaun datang potang ing Ginu gawan na lang maragul at malabung ding sablang tanaman at dutung ning bansang Israel. Tumula la ding sablang taung mitagan at ipagmaragul da ing bubunga na ning gabun.

³ Mayaus yang banal ing balang metung a taung mitagan king Jerusalem a buri nang miligtas ning Dios.

⁴ King uli na ning upaya na, atulan ne ning Ginu at pakadalisayan ne ing bansa; wasan na at ilako ing e mayap king Jerusalem at ing dayang minagus karin.

⁵ At kanita king babo ning Bunduk ning Zion at karing sablang makatipun karin, palto yang biga ing Ginu neng aldo masala at asuk at aping masala neng bengi. Ing ligaya na ning Ginu ya ing takap at mingat king mabilug a siudad.

⁶ Maging salilung ne ning siudad ing ligaya na king mapaling aldo at king uran ampon bagyu.

5

¹ Paburen mung pagkanta ke ing kakung pakamalan, metung a kanta tungkul king bie na at king ubas nang mulahan. Ing kakung pakamalan atin yang mulahan ubas king gabun a mataba ning metung a bunduk-bundukan.

² Serulan na ing gabun at leko na lang batu; kaybat tenam na la ding pekamayap a ubas. Mitalakad yang bantayan king kalibudtan da, at kinulkul ya para king pipapaslan karing keyang ubas. Penaya na lang lulut ding ubas na, oneng maslam la ngang alang kalupa. fig,,,,,King gabun a mataba... serulan na ing gabun... leko na lang batu... tenam na la ding pekamayap diling ubas... mitalakad yang bantayan... kinulkul ya... penaya na lang lulut ding ubas na... oneng maslam la ngang alang kalupa.,(5:1-2)fig*

³ Ngeni ing kanakung pakamalan sasabian na, Ikayung memalen ning Jerusalem at Juda, atulan yu ku at ing mulahan kung ubas.

⁴ Migkulang ku kaya king pamanese ku king mulahan? Obat memunga yang maslam a ubas? Obat e la mayumung ubas ding binunga na?

⁵ Oyni ing daptan ku king mulahan kung ubas. Ilako ku la ding makapadurut nang tanam, at lasakan ke ing bakud at paburen ding animal ing kanan de at pandamusakan.

⁶ Paburen kung dagul nang dagul ing dikut at suksuk. E ke linisan o gambulan man, oneng paburen keng mapuput ya karing miyayaliwang suksuk. E ku paintulut dugpa ing uran king mulahan ubas.

⁷ Ing Israel ya ing mulahan ubas ning Ginung Mayupaya, ding ubas a tenam na ila ding tau ning Juda. Asahan na ing karelang daptan itang makatuliran, oneng ing ikit na patayan! Asahan na karela ing dapat lang kayapan, oneng ing pepasari da kabaligtaran at tangis!

⁸ Makalunus na kayo, uling daragdagan yu la pa ding bale at marangle a atyu na kekayu. E lumuat ala na lang paglugalan ding tau at ikayu namung dili yu ing manuknangan keti.

⁹ Dimdam keng magsalita ing Ginung Mayupaya. Ngana, Masira la deting sablang maragul at masanting a bale at metung man alang manuknangan karela.

¹⁰ Mupul la mung apulung galun a alak ding mulahan ubas karing walung hektariang gabun. Mupul ka mung metung a kaban karing apulung kaban a bini a kekang silbag.

¹¹ Makalunus na kayo, uling mibabangun kayu neng abak a maranun ban minum alak at magpuyat king pamaglasing.

¹² Karing piesta yu atin kayung alpa at pandereta ampon plauta at dakal a alak. Oneng e yu gagalangan ing daraptan na ning Ginu.

¹³ Inya naman mabihag kayu at miyugse marayu uling ala kayung galang. Mate lang danup ding kekayung manimuna, at mate la naman ding memalen king kau rang danum.

¹⁴ Kakau ne karela ing kayarian ding mete, inya pakanganga ne ing asbuk na. Akmulan na la ding kagalang-galang nang memalen ning Jerusalem at ding sablang mainge memalen.

¹⁵ Mangapakarine ya ing balang metung at metung at mibaba la ding sablang mapagmatas.

¹⁶ Oneng ipakit na ning Ginung Mayupaya ing kayupayan na king kapamilatan na ning pamaniapat na king matulid, at ipakit na ing kabanalan na king kapamilatan na ning pamanatul na king balen na.

¹⁷ Mayakit lang mamangan king melasak a siudad ding biserung tupa, at manakit lang pastulan ding biserung kambing. fig,,,,,... king melasak a siudad.,(5:17)fig*

¹⁸ Makalunus na kayo, uling e kayu makapagkalag karing kekayung depat a kasalanan.

¹⁹ Sasabian yu, Paburen yang magmalagua ing Ginu at daptan na ing sinabi na ban akit tamu. Paburen ya ing banal nang Dios ning Israel ing tuparan na ing tingka na. Lawan tamu nung nanu ing atyu king lub na.

²⁰ Makalunus na kayo, uling ausan yung e mayap ing mayap, at ing e mayap ya ing ausan yung mayap. Gagawan yeng masala ing madalumdum at gagawan yeng madalumdum ing masala. At gagawan yung mayumu pati ing mapait, at ing mayumu naman ya ing gagawan yung mapait!

²¹ Makalunus na kayo! Uling isipan yu ing tutu na kayung biasa at mautak king kekayung pamibalak.

²² Makalunus na kayo! Ikayung matalik minum alak! Alang maniambut kekayu pangaras king pamaniangkap alak!

²³ Oneng uli na mu ning suhul, bubulus yu la ding mikasala, at e yu na la man sasaupan manakit hustisia ding alang kasalanan.

²⁴ Inya naman nung makananung ing are at malanging dikut mamaluktut at magisan king api, makanyan lang marunut ding kekayung yamut, at langi la ding kekayung sampaga at ipaid na ning angin, uling tinggian yu ing turu na ning Ginung Mayupaya, ing banal a Dios ning Israel.

²⁵ Milalablab ing mua na ning Ginu king balen na, at inatiat na ne ing gamat na ba neng parusan. Mangaugun la ding bunduk at malakuan la ding bangke da ring mete karing dalan a kalupa na ning basura. Makanyan man, e pa mu rin miyangganan ing mua na ning Ginu. Manatili ya pa mu rin makayatiat ing gamat na ban mamarusa. fig,,,,,Ikayung matalik minum alak!,(5:22)fig*

²⁶ Munie yang tanda ing Ginu ban ausan ne ing metung a bansang atyu king marayung lugal. Pasuitan ne manibat king wakas ning yatu at lumapit ya king Ginu. At datang yang agad-agad; mamalagua yang datang!

²⁷ Alang magal ni mitakid man. Alang mitundu ni mipatudtud man. Alang lumualas a kuldun king awakan ni mapatlud a tali sandalyas.

²⁸ Matilus la paslu at makasadia da lang ibugnus ding karelang pana. Anti lang batung mabie ding kuku da ring kabayu ra, at anti lang alisus king kabilis ding parugang da ring karelang karung panggera.

²⁹ Gagaga la ding sundalus anti ding leon a mekapate animal at darala de king marayu nung nu alang ninumang makasamsam karela.

³⁰ Potang datang ne ing aldong ita, gumaga la king mabilug a Israel; gumaga lang anti ing biung ning alun ning dagat. Lawan ye iting bansa! Karalumduman at kasakitan ing daralanan na! Akmulan na ning dalumdum ing sala.

6

¹ Ikit ke ing Ginu kanitang banua na ning pangamate nang Aring Uzzia. Makalukluk ya king tronu nang matas. Mitmu ya ing mabilug a Templo king laylayan na ning imalan na.

² Makatalakad lang makapadurut king Ginu ding anam a milalablab a lelangan. Atin yang anam a pakpak ing balang metung karela. Tatakpan ne ning metung at metung karela ing lupa na karing aduang pakpak, ing katawan na karing adua, at gagamitan na la ding adua king pamanyulapo.

³ Ngara king metung at metung: Banal, banal, banal! Banal ya ing Ginung Mayupaya! Mitmu ya ing yatu king ligaya na!

⁴ Meugun la ding pundasyun na ning Templo uli ning masikan dang siwala, at mikatmuan yang asuk ing Templo.

⁵ Kanita sinabi ku, Ala na kung kapanayan! Makalunus ku uling makasalanan la ding labi ku, at uling manuknangan ku libutad ding taung marinat a labi. Ngeni, ikit ke karing sarili kung mata ing Ari, ing Ginung Mayupaya!

⁶ Kanita sinulapo yang papunta kanaku ing metung karing lelangan. Magdala yang baya a kinua na king altar king kapamilatan ning sipit.

⁷ Tigkilan ne ing labi ku king baya at ngana, Tigkilan na na la niti ding kekang labi. Ala na kang kasalanan ngeni at mipatawaran na la.

⁸ Kaybat na nita, dimdam keng magsalita ing Ginu. Ngana, Ninu ing itubud ku? Ninu ing maging kekaming talapagsalita? Ngakung mekibat, Aku pu! Itubud yu ku!

⁹ Inya sinabi na ing mako na ku at iyatad ku karing tau ing anti kaniti: Agyang numanu kayung makiramdam, e kayu makaintindi. Agyang numanu kayung lumawe, e yu akit ing malilyari.

¹⁰ Kaybat sinabi na kanaku, Gawan mu lang mapurul a isip ding taung deti, maklak, at bulag ban e la manakit o makaramdam o makaintindi. Magkang magbalik la lub kanaku at maulu la nung manakit la, makaramdam, at makaintindi.

¹¹ Ngakung kinutang, Angga kapilan manatili ing anti kaniti, Ginu? Nganang mekibat, Angga potang malasak na la ding siudad at ala na lang bitasang manuknangan. Angga king milako la tau ding bale ra, angga king maging anti ya king disyerto ing bansa.

¹² Iparala ku la ding tau king marayung lugal at gawan keng alang ulaga ing mabilug a bansa.

¹³ Nung atin mang mitagan metung a tau karing balang apulu, ita man mate ya; maging anti yang pun nang mitagan ning tanaman a ensinang mekutud. (Larawan ne ning pun a mitagan ing metung a bayung pamagumpisa para king balen na ning Dios.)

7

¹ Mika gera inyang i Ahaz, ing anak nang Jotam at apu nang Uzzia, ya ing ari na ning Juda. I Rezin a ari na ning Siria at i Peka a anak nang Remalia a ari na ning Israel, lisuban de ing Jerusalem; oneng e re ikuang simbut.

² Miras ing balita king ari na ning Juda king atyu na la ding sundalus na ning Siria king sakup ning Israel. Mitakutan ya ing ari at pati na ding taung sasakupan na. Ginalgal lang anting tanaman a tuturan na ning masikan a angin.

³ Kanita migsalita ya ing Ginu kang Isaias. Ngana, Ituki me ing anak mung lalaking i Sear-Yasub at puntalan ye i Aring Ahaz. Akit me king lele na ning dalan nung nu la magobra ding gagawang imalan, king wakas ning paligi a piagusan na ning danum a manibat king matas a batis.

⁴ Sabian mu king maging alistu ya, magpayapa ya at e mitatakutan o mababalisa isip. Uling ing mua na ning Aring Rezin at ding kayabe nang tau Siria at ning Aring Peka e babie maygit a panganib kesa king asuk da ring aduang kaputut a dutung a mibabaya.

⁵ Miyabe-abe lang ginawang planu ing Siria at ing Israel ampon ing ari na.

⁶ Buri deng lusuban ing Juda at pamatakutan ding tau ban makiabe la karela, at kaybat ilukluk de king tronu ing anak nang Tabeel.

⁷ Oneng aku, ing Ginung Dios, sasabian kung matni king kapilan man iti e mapalyari.

⁸ Ninu wari ing pangangas na ning Siria? Ing Damasco a siudad nang kabiserang maina! Mapirasu yang mangalati ing Israel kilub ding anam apulu at limang banua at e na mitalakad pa.

⁹ Ninu wari ing pangangas na ning Israel? Ing siudad ning Samaria a kabisera nang maina! Ninu naman ing pangangas na ning Samaria? Aliwa mu wari ing mainang i Aring Peka? Nung maina ing kekang kasalpantayanan, maina ka naman.

¹⁰ Pasibayu yang peparalang mensahi ing Ginu kang Ahaz. Ngana,

¹¹ Aduan mu king Ginung kekang Dios king dinan na kang metung a tanda. Malyaring manibatan ya iti king kalalaman na ning lugal da ring mete o kaya king matas a banua.

¹² Nganang mekibat Ahaz, E ku maniawad tanda. E ke ibili king kapagsubukan ing Ginu.

¹³ Inya nganang Isaias, Lahi nang David, makiramdam kayu sa. E pa makagyu kekayu ing gisanan yu la kapibabatan ding tau at gisanan yu wari pati ing kapibabatan na ning kanakung Dios?

¹⁴ Ing Ginu mismu munie yang metung a tanda para kekayu. Muktut ya ing metung a kayanakan a babai at manganak yang metung a lalaki at ing maging lagyu na Immanuel.

¹⁵ Potang balu na nang pilinan nung isanu ing mayap at ing e mayap, gatas ing maging inuman na, pulut-panilan naman ing maging pamangan na.

¹⁶ Bayu pa datang ing panaun a ita, kawalan lang memalen ding bansa da ring aduang aring mamatakut kekayu.

¹⁷ Ipagpa na kanita ning Ginu keka, king balen mu at king pamilya na ning kekang ari ding aldo ning kaligaligan a maygit mangasakit kesa karing aldo linabas manibat inyang kinawani ya ing kayarian Israel king Juda; idala ne pa ing ari na ning Asiria.

¹⁸ Potang datang ne ing aldong ita, masuit ya ing Ginu anting tanda karing tau Ehipto ban lumapit lang anting lango a manibatan karing pekamarayu nang dake ning Ilug ning Nilo. Datang la namang anting tamumu ding tau Asiria.

¹⁹ Katmuan da la ring mabatung libis at ding kueba karing batu, at laganasan da lang takpan ding lugal a masuksuk at marangle a pipagpastulan.

²⁰ Potang datang ne ing aldong ita, manupa yang barberu a tau Eufrates a alang aliwa nune ing ari na ning Asiria at labahasan na kayu balbas, buntuk at pati na ing mabilug yung katawan.

²¹ Potang datang ne ing aldong ita, agyang metung ya mu ing baka at adua la mu ding kambing a mitagan king metung a ortelanu,

²² makanyan man manikua yang labis-labis a gatas para king sablang pamangailangan na. Wa, ding mapilan a mitagan mika gatas la't pulut-panilan a karelang pangabiayan.

²³ Potang datang ne ing aldong ita, ding masanting a mulahan ubas a ating libung bunga a mikaka alagang libung pirasung pilak, maging lugal de ring malabung a dikut at tanaman a masuksuk.

²⁴ Datang la karin ding taung magdalang pana at paslu. Wa, mitubuanan yang dikut at tanaman a masuksuk ing mabilug a bansa.

²⁵ Mitubuanan la karing tanaman a masuksuk ding sablang bunduk-bundukan a kanitang misan mitamnan pangabiayan, at alang taung mangangas munta karin. Maging lugal niang pastulan karing baka at tupa.

8

¹ Nganang sinabi ning Ginu kanaku, Kuma kang maragul a pisulatan at isulat mu karing maragul a letra ing anti kaniti: Maher-shalal-hashbaz.

² Kuma kang aduang taung apagkatiwalan, i Uria a pari at i Zacarias a anak nang Jeberekias, ban maging testigu mu tungkul king kekang sinulat.

³ Kaybat na nita, siniping ku king kanakung asawa. Mebuktut ya at menganak yang metung a lalaki. Kanita, ngana ning Ginu kanaku, Pamalagyuan meng Maher-shalal-hashbaz.

⁴ Bayu ya mabiasang maus Ima at Tatang ing anak, masamsam ing sablang pibandian na ning Damasco at idala na ning ari ning Asiria ing makamkam nang pibandian ning Samaria.

⁵ Pasibayu yang migsalita kanaku ing Ginu.

⁶ Ngana, Uli na ning tinggian da ring taung deti ing danum nang banayad a agus ning Batis ning Siloe at uling gagalgal la arap ning Aring Rezin a anak nang Remalia,

⁷ aku, ing Ginu, paratangan ke ing ari na ning Asiria at ding sabla rang puersa militar ban lusuban de ing Juda. Sagupa lang anti ing masikan nang agus ning Ilug ning Eufrates; maglapo la karing pampang.

⁸ Laganapan de ing Juda anting albug a kasing katas pago at takpan da ing sabla. Ing Dios kayabe ta ya! Ingatan de ring makaladlad nang pakpak ing bansa.

⁹ Ikayung sablang bansa, pakiramdaman yu sa iti king mitmung takut! Makiramdam kayu, ikayung marayu nang lugal ning yatu. Magsadia kayu king pamakilaban, oneng mitakutan kayu sa! Wa, magsadia kayu, oneng tumakut kayu!

¹⁰ Magplanu kayu, oneng e kayu magtagumpe kapilan man. Sabian yu na ing sablang buri yung sabian! Oneng iti ngan mayalang kabaldugan, uling kayabe mi ya ing Dios.

¹¹ Ing Ginu at ing maragul nang upaya, minie yang babala kanaku king e ke sana tutukian ing dalan a daralanan da ring tau. Ngana,

¹² E ka makiabe karing lihim dang tangka ding tau at e ka tatakut karing katakutan da.

¹³ Tandanan mu king aku, ing Ginung Mayupaya, banal ku. Aku ing sukat mung pitakutan.

¹⁴ Uli na ning degulan na ning kanakung kabanalan mangari kung batu nung nu la matitisud ding tau; mangari kung bitag a dakap karing memalen na ning kayarian ning Juda at Israel at karing tau Jerusalem.

¹⁵ Dakal la ding mitisud at misakab. Misakab la at magisan mate. Marakap la king bitag.

¹⁶ Kailangan king ikayung kanakung alagad ing ingatan yu la't papanatilian ding turu a binie na ning Dios kanaku.

¹⁷ Migpampan ya ing Ginu karing memalen na, oneng manalig ku at ibili ing kapanayan ku king Ginu.

¹⁸ Atyu ku kening kayabe da ring anak a binie na ning Ginu kanaku. Ing Ginung Mayupaya a makatronu king Bunduk ning Zion, tinubud na kami bilang mabie nang mensahi para karing memalen na ning Israel.

¹⁹ Oneng sabian da ring tau kekayu king maniawad kayung payu karing mamamanula at karing makipagsalita karing espiritu a sitsit nang sitsit at bulung nang bulung. Sabian da, Nanu mo pin ing daptan da ring tau nune mu ing maniawad lang payu karing espiritu at sumangguni karing mete alang-alang karing mabie.

²⁰ Ipakibat yu naman karela, Makiramdam kayu king nanumang tuturu na kekayu ning Ginu! E kayu makiramdam karing makipagsalita karing espiritu da ring mete. Ala kayung akua king nanumang sabian da kekayu.

²¹ Maggala-gala la ding tau king mabilug a bansa; maina la lub at maranup. King uli na ning danup da at mua isumpa re ing ari da at ing karelang Dios. Talanga la banua

²² o lumawe king gabun, oneng ala lang akit nune mu kaguluan at karalumduman; makatakut a karalumduman ing maging kararasan da. Ala lang arapat ban miligtas kaniting kaguluan.

9

¹ Kanitang misan a panaun mengapakarine la ding tribu nang Zebulun at Neftali, oneng magdala yang dangalan ing daratang a panaun para karela manibat king Mediteraneo papunta king dane aslagan karing lugal a atyu lipat ning Jordan at pati na king Galilea mismu a panuknanganan da ring dayuan.

² Menakit lang sulung maragul ding taung linakad king dalumdum. Menuknangan la king lugal a madalumdum, oneng ngeni ing sala saslag ya karela ngan. fig,,,,,Oneng ngeni ing sala saslag ya karela ngan.fig*

³ Maragul a tula ing binie mu karela, O Ginu, meging maligaya ing bie ra king uli mu. Matula la king mayap a depat mu karela antimo ing tula da ring tau neng titipunan da ing pupul da o neng pipapartian da ing pibandian a ikua da.

⁴ Uling ing paud king batal da keka yang leko, at pati ing tambayuk karing karelang pago. Ika, O Ginu, ing sinambut king bansa a menalipusta at migsamantala karing kekang memalen. Simbut mu la antimo ing pamaniambut mu karing sundalus ning Midian kanitang milabas a panaun.

⁵ Ding botas da ring sasagupang kawal, at ing unipormi rang mengasnang daya ing api yang gumisan karela.

⁶ Uling mibait ya ing anak para kekatamu! Ing metung a anak a lalaki miyabie ya kekatamu! At ya ing maging pamuntuk tamu! Mayaus yang Makapagmulalang Tagapayu, Mayupayang Dios, Alang anggang Ibpa, Prinsipi ning Kapayapan.

⁷ Ing makamal nang upaya manatiling daragul; manatili ing kapayapan king keyang kayarian. Manibala ya bilang kayalili nang Aring David, at makabasi ing upaya na king mayap at matulid manibat ngeni at angga na king kapilan pa man. Iti ngan daptan ning Ginung Mayupaya.

⁸ Sildak na ning Ginu ing kayatulan na king kayarian Israel, karing lahi nang Jacob.

⁹ Ding sablang memalen na ning Israel, ing balang metung a manuknangan king siudad ning Samaria, akilala ra king iti dapat na ning Ginu. Meging mapagmatas la at palalu. Ngarang sasabi,

¹⁰ Melasak la ding gusaling megawa karing laryu; oneng alilan mi la karing gusaling gawa king batu. Meputut la ding tanan a megawa karing dutung a sikamoro, oneng alilan mi la karing pekamayap a dutung a sedro.

¹¹ Inya tinubud na la ning Ginu ding karelang kalaban ban lusuban da la;

¹² ing Siria king dane aslagan at ing Filistia king dane albugan na ning Israel. Biklat da la ring asbuk da ba reng laklakan ing Israel. Makanyan man, e mu rin tuknang ing mua na ning Ginu; manatili yang makayatiat ing gamat na ban mamarusa.

¹³ E la sinisi ding tau ning Israel agyang perusan na la ning Ginung Mayupaya. E la pa mu rin mibalik a lub king Ginu.

¹⁴ Inya king metung mung aldo parusan na la ning Ginu ding manimuna na ning Israel at ding memalen na; pututan na la buntuk at iki.

¹⁵ Ding buntuk ila ding matua at kagalang-galang a lalaki, at ding iki ila ding propetang tuturung kalaraman!

¹⁶ Ding manimuna karing taung deti linili da la at belatungan.

¹⁷ Inya metung man karing kayanakan a lalaki ala yang paintulutan makaligtas ing Ginu. E ya pakit lunus kenu pa mang mebalung babai at ulila, uling ala lang takut ding sablang tau king Dios, at e la mayap. E mayap ing sablang lulual king asbuk da. Makanyan man, e tuknang ing mua na ning Ginu; manatili yang makayatiat ing gamat na ban mamarusa.

¹⁸ Mengari ing dapat dang e ustu ding tau king aping lalaklak karing miyayaliwang dikut at tanaman a masuksuk. Mitataung anting silab king kasukalan a maki asuk a susun-susun papunta babo.

¹⁹ Uling mua ya ing Ginung Mayupaya, milalablab anting silab ing pamamarusa na king mabilug a bansa at makamate karing tau, at ya nang balang magligtas king sarili na ing metung at metung.

²⁰ Makanyan man, maniamsam la ding tau king nanumang bage a malyari dang apangan, oneng e la kumabsi. Kanan da pati na ding sariling anak da!

²¹ Lusuban de ring memalen na ning Manase at ding memalen na ning Efraim ing metung at metung, at miyabe lang lumusub king Juda. Makanyan man, e mu rin tuknang ing mua na ning Ginu; manatili yang makayatiat ing gamat na ban mamarusa. fig,,,,,Mitataung anting silab king kasukalan.,(9:18)fig*

10

¹ Makalunus na kayo, uling gagawa kayung kautusan ban gipitan ye ing kanakung balen.

² Makanyan yu lang sasabatan ding pakakalulu king katuliran da at king pamanintun dang hustisia. Makanyan yu lang panakawanan ding mebalung babai at ulila.

³ Nanu ing daptan yu potang datang ne ing aldo a parusan na kayu ning Dios? Nanu ing daptan yu potang ing Dios parala yang kasakitan a manibat king marayung bansa? Kaninu kayu lumapit ban maniawad saup? Nukarin yu isalikut ing pibandian yu?

⁴ Mate kayu king labanan o kaya maging bihag kayung iguyud da. Makanyan man, e mu rin tuknang ing mua na ning Ginu; manatili yang makatas a gamat ban mamarusa.

⁵ Ngana ning Ginu, Gamitan ke ing Asiria anting palupalu ban parusan ke itang kamuan ku.

⁶ Tuburan ke ing Asiria ban lusuban ne ing bansang alang takut kanaku; ding taung pepasari king mua ku. Tiburan ke ban maniamsam, manako at ban dakurakan na la ding tau anting dinat king dalan.

⁷ E makanyan ing isipan na at e makanyan ing kapagnasan na. Atin yang sariling babalakan a mabagsik ing ari na ning Asiria. Makasadia yang manyirang dakal a bansa.

⁸ Nganang magmayabang, Ari ya ing balang metung at metung karing kumander ku!

⁹ Simbut ku la ding siudad na ning Calno, Carkemis, Hamat, at Arpad. Simbut kia naman ing Samaria at Damasco.

¹⁰ Pekirasnan ku la ban parusan ding kayarian a sasambang idolo, idolo a dakal kesa karing atyu king Jerusalem at Samaria.

¹¹ Lesak ke ing Samaria at ding sablang idolo na, at daptan ku naman iti king Jerusalem at karing larawan a sasamban da karin.

¹² Oneng ngana ning Ginu, Kabud ayari ku ing daraptan ku king Bunduk ning Zion at king Jerusalem, kanita ku ne parusan ing ari na ning Asiria king sablang pamagmayabang na at kapalaluan.

¹³ Mapagmaragul ya ing ari na ning Asiria. Ngana, Aku mu ing maki dapat kanyan. Masikan ku, biasa, at mautak! Leko ku la ding angganan a mamilatan karing bansa at simsam ku ing sablang pibandian a tinipun da. Mengari kung toro a mendamusak karing taung manuknangan karin.

¹⁴ Mengari lang pugad manuk ding bansa na ning yatu at kinua ku ing pibandian a tinipun da kalupa na ning pamangua karing ebun a makatipun. Ala mang pakpak a sinulapo ba na kung pamatakutan; alang asbuk a ginaga ban mitakutan ku mo sa.

¹⁵ Oneng nganang magsalita ning Ginu, Maygit ya pa wari ing palakul kesa king taung gagamit? Maygit ya pa wari ing lagari kesa king gagamit? Aliwa ing palupalu ing mitatas king tau; ing tau ya ing mitatas king palupalu.

¹⁶ Padala yang sakit ing Ginung Mayupaya ban parusan na la ding tauan nang ating masanting a pamikakatawan. Sakit lang alang patugut milalablab king katawan da.

¹⁷ Ing Dios, ing sulu ning Israel, maging api ya at dulukan na kilub ning metung mung aldo ing sablang bage pati na ing dikut at tanaman a masuksuk.

¹⁸ Lubus lang magisan ding malabung a gubat at marangle antimo nung makananung papaten ne ning mabagsik a sakit ing tau.

¹⁹ Tutu na la mung ditak ding tanaman a mitagan, agyu na lang bilangan agyang ing anak a malati.

²⁰ Datang ing panaun nung kapilan ding memalen na ning Israel a miligtas king mua na ning Dios e na la kapilan man manalig king bansa a digsu na mekamate karela. Tune rang ibili ing kapanaligan da king Ginu, ing Dios a banal ning Israel.

²¹ Mapilan la mu ding memalen na ning Israel ding magbalik king karelang mayupayang Dios.

²² Ngening kasing dakal na la ning balas king pampang ning dagat ding memalen na ning Israel, makanyan man ditak la mu ding magbalik. Mitakda ing kasiran karing tau at iti talagang karapatdapat karela.

²³ Wa, antimo ing sinabi nang daptan na ning Ginung Dios a Mayupaya, parala yang kasiran king mabilug a bansa.

²⁴ Ngana ning Ginung Dios a Mayupaya karing memalen nang manuknangan king Zion, E kayu tatakut karing tau ning Asiria agyang pasakitan da kayung antimo ing depatan da kanita kekayu ding tau Ehipto.

²⁵ Ditak nang panaun ing pamamarusa ku kekayu at kaybat ila naman ding gisanan ku.

²⁶ Aku, ing Ginung Mayupaya, barugan ku la king kanakung pamarug antimo nung makananu ku lang berugan ding memalen na ning Midian king Batu ning Oreb. Parusan ke ing Asiria antimo inyang pepasakitan ke ing Ehipto.

²⁷ Potang ing panaun a ita datang na, ilako da kayu king upaya na ning Asiria at e na la maging pabayat pa ding paud da karing pago yu.

²⁸ Ibat king Rimmon linusub la ding kalaban. Atyu na la king siudad ning Ayat ding kalaban! Linabas na la king Migron! Likuan da king Mikmas ing kagamitan da!

²⁹ Miras na la king dalakitan at magpaynawa la king Geba! Mitakutan la ding memalen na ning Rama at at tinakas la ding memalen na ning Gibea, ing balen nang Saul.

³⁰ Kulisak kayung masikan, memalen ning Galim! Makiramdam kayu, memalen ning Laisa! Makibat kayu, memalen ning Anatot!

³¹ Mamulayi la ding memalen ning Madmena at Gebim ban iligtas da ing sarili ra.

³² Atyu na la ngening kasalukuyan ding kalaban king balen ning Nob at tatantu da la karin ding gamat da king Bunduk ning Zion, king siudad ning Jerusalem.

³³ Ibagsak na la ning Ginung Mayupaya antimo nung makananu lang mibabagsak ding sangang metabas king tanaman. Makutud la ding palalung dili at matas dili karela at mangapakarine la.

³⁴ Kuturan na la ning Ginu anting tanaman king libutad ning gubat king kapamilatan na ning palakul; miragsa lang anti ding matibe diling tanaman na ning Lebanon.

11

¹ Mengari ya king tanaman a mekutud ing pamidalandalan da ring ari king lahi nang David; nung makananu lang lalto ding suli king pun a mitagan, makanyan yang lunto ing metung a bayung ari a ibat karing lahi nang David.

² King uli ning espiritu ning Ginu tanggap yang kabiasnan, beluan, at gelingan para king pamanimuna king balen na. Balu na ing kaburian ning Ginu, at galangan ne;

³ ing ligaya na atyu king pamaniuyu king Ginu. E ya matul agpang king akakit ding mata na o king daramdaman ding balugbug na.

⁴ Atulan na la ding kalulu king alang pamangabiran, at idipensa matulid ding maina. King amanu na miparusan ya ing bansa, at taung e mayap mate la.

⁵ Pamahalan na lang memalen na king hustisia at king katapatan.

⁶ Miyabe la king kapayapan ing asung-gubat at ing tupa, at magkera ya ing leopardo siping ning kambing a biseru. Mangan lang miyabe ing biserung baka at ing biserung leon, at ing manese karela ya ing malating anak.

⁷ Mangan lang miyabe ing baka at ing oso, at matudtud lang miyabe ding karelang biseru. Mangan lang are ding leon anti ding baka.

⁸ E ya numanu balang ing anak agyang mamialung ya lele ning ubingan a kamandagan.

⁹ King Zion, ing bunduk a banal ning Dios, e ne mika nanumang e mayap. King Ginu ing bansa mikatmuan yang beluan antimo nung makananu lang mitmung danum ding dagat.

¹⁰ Datang ing aldo potang ing bayung aring ibat king lahi nang David maging tanda ya para karing sablang bansa. Mitipun la ding bansa king banal a siudad at parangalan de.

¹¹ Potang datang ne ing aldong ita, pasibayu nang gamitan ning Ginu ing upaya na at iyuli na la king bale da ring taung miyugse karin Asiria, Ehipto, at karing bansang Patros, Etiopia, Elam, Babilonia, at Hamat; ding karing lele dagat at pati na ding atyu karing pulu libutad ning dagat.

¹² Ipakit ne ning Ginu ing metung a tanda ban ipabalu na karing bansa king titipunan na na lang pasibayu ding memalen na ning Israel at Juda, at iyuli na la ibat karing apat nang suluk ning yatu.

¹³ E na ne karirian ning kayarian ning Israel ing Juda, at e na ne maging kalaban ning Israel ing Juda.

¹⁴ Miyabe lang lumusub karing Filisteo king dane albugan, at kuanan da la pibandian ding taung manuknangan king dane aslagan. Sambutan da la ring memalen na ning Edom at Moab at mamintu la karela ding tau Ammon.

¹⁵ Papamalan ne ning Ginu ing dagat ning Ehipto at padala yang mapaling angin ing Ginu ban langi ya ing Ilug ning Eufrates. Mitagan la ding pitung malating batis ban makadalakit ya karin ing ninuman.

¹⁶ Mika dalan a malualas king Asiria para karetang memalen na ning Israel a mitagan ban dalanan da antimo nung makananu lang ating delanan ding karelang makatua kanitang meko la Ehipto.

12

¹ King aldong ita magkanta la ding tau: Pasalamatan da ka, O Ginu! Agyang mimua ka kaku, ngeni pamatulan mu ku at ala na kang mua.

² Ing Dios ya ing talapagligtas ku; ya ing kakung panaligan at ala na kung katakutan. Dirinan na kung upaya at sikanan; ya ing kakung kaligtasan.

³ Nung makananung makaibie tula ing danum king mau, makanyan lang tumula ding memalen ning Dios potang liligtas na la.

⁴ King aldong ita ikanta mu: Pasalamat kayu king Ginu! Maus kayu king lagyu na! Ibalita yu karing sablang bansa ing depat na! Ipamalita yu ban miparangalan ya ing lagyu na!

⁵ Magkanta kayu king Ginu, uli ning mangayap a dapat na. Bustan yung iting balita miras karing sablang bansa.

⁶ Bustan ya ing balang metung king Zion kulisak ya at magkanta! Uling marangal ya ing banal nang Dios ning Israel, at manuknangan ya libutad ding memalen na.

13

¹ Iti ya ing mensahi na ning Dios tungkul king Babilonia a tinggap nang Isaias, ing anak nang Amoz.

² Itas ye ing bandera babo ning malanging bunduk-bundukan! Kulisak kayu karing sundalus at ipepe yu la ding gamat yu bilang senias karela ban lusuban da la ring pasbul dalan na ning siudad a palalu.

³ Inaus na la ning Ginu ding magaling at tapat nang sundalus ban makilaban king metung a banal a gera at parusan la ding kamuan na.

⁴ Pakiramdaman yu ing inge a manibat karing bunduk, ing inge ding dakal a tau, ing inge ding bansa at kayarian a mitipun-tipun. Magsadia ya ing Ginu da ring e mabilang-bilang a sundalus ban iparala na la king labanan ding sundalus na.

⁵ Daratang lang ibat karing marayung bansa at karing wakas na ning yatu. King mua na, daratang ya ing Ginu ban lasakan ne ing mabilug a bansa.

⁶ Ngulangul kayu uling ing aldo ning Ginu malapit ne, ing aldo a magdalang kasiran ning Mayupaya!

⁷ Mangalambut la at mina ya lub ing metung at metung.

⁸ Mitakutan la ngan at misakitan anti ing kasakitan na ning babaing manganak. Milalawayan la at king mitmung takut lare la lupa uli na ning dine ra.

⁹ Daratang ne ing aldo ning Ginu, ing aldo ning pamanablas na at mabagsik a mua. Maging anti ya king disyerto ing yatu at mate ya ing ninumang makasalanan.

¹⁰ Tuknang lang saslag ding batuin na ning banua; kulimlim ya ing aldo potang sunlag ya at e na ibie ning bulan ing sala na.

¹¹ Ngana ning Ginu, Parala kung kapahamakan king yatu at parusan ku la ngan ding taung e mayap uli da ring kasalanan da. Isaldak ke ing ninumang mapagmatas at parusan ke ing ninumang palalu at mabagsik.

¹² Mas ditak la ding miligtas kesa king gintung malagad atagpuan king Ofir.

¹³ Pagalgalan ke ing mabilug a yatu at miyalis ya ing yatu king kabilian na. Mapalyari iti king aldo a aku, ing Ginung Mayupaya, ipakit ku ing kanakung mua.

¹⁴ Mamulayi lang muli ding dayuan a manuknangan king Babilonia karing sarasarili dang bansa; misalbag lang anti ding usang tatakas karing mangasu at mangari lang tupang alang pastul.

¹⁵ Matabak ya at mate ing ninumang mayakit at marakap.

¹⁶ Ala lang akarapat potang king akakit da mapirasu la ding karelang anak a malati, panakawanan da la ring bale ra at salbahian da la ring karelang asawang babai.

¹⁷ Ngana ning Ginu, Susulsulan ku la ding tau na ning Medes ban lusuban de ing Babilonia. E la mahilig deti king pilak ni masisilo king kislap ning gintu.

¹⁸ Paten da la ring kayanakan a lalaki king kapamilatan da ring karelang pana at paslu. E ra la pakitanan lunus ding bingut at ding anak a malati.

¹⁹ Karing sablang kayarian, ing Babilonia ya ing malagung dili; ya ing pagmaragul da ring memalen na. Oneng aku, ing Ginu, ibagsak ke ing Babilonia anti ing depat ku king Sodoma at Gomorra!

²⁰ Ala nang manuknangan pa karin. Ala nang tau Arabia a maglakbe at manalakad tolda at ala nang magpastul pang tupa karin.

²¹ Maging lugal yang pagdatunan da ring malyap a animal at pipanialen da ring kulayu. Manuknangan la naman karin ding ayup a ostrich at mamaglundag la ding malyap a kambing.

²² Maramdam karing tore at palasyu ing bitaul da ring animal a hiyena ampon asung-gubat. Miras na ing oras ning Babilonia! Malapit na lang miwakasan ding aldo na.

14

¹ Pasibayu yang malunus ing Ginu karing memalen na ning Israel at pilinan na la pa mu rin maging memalen na. Pasibayu na lang ibalik king sarili dang bansa at datangan da la ring dayuan at manuknangan lang kayabe ra.

² Dakal lang bansa ding sumaup karing memalen na ning Israel ban makapagbalik la king bansang binie na ning Ginu karela, at karin la sumuyu ding aliwang bansa bilang ipus king Israel. Detang kanitang misan memihag king Israel, ila naman ngeni ding bihagan na ning Israel at ding memalen na ning Israel ilang sumakup karing taung menggipit karela kanitang misan a panaun.

³ Dinan na lang kapasnon ning Ginu ding memalen na ning Israel king karelang kalungkutan ampon kasakitan at king kapagalan king mabayat a obrang sapilitan dang pepaobra karela.

⁴ Potang daptan na ning Ginu iti, insultuan de ring memalen na ning Israel ing ari ning Babilonia. Sabian da: Mibagsak ne ing mabagsik a ari! E ne kapilan man makapanggipit pa!

⁵ Inangganan na na ning Ginu ing upaya da ring taung e mayap a manimuna

⁶ at king maragul a mua menalipusta karing tau, at e pepatugut liligalig karing bansang simbut da.

⁷ Ngeni mika atin ya ring kapasnon at kapayapan ing mabilug a yatu, at magkanta ya ing balang metung uli na ning tula na.

⁸ Magsaya la ding tanaman a sipres at ding sedro na ning Lebanon king pangabagsak ning ari uling ala nang mangutud karela uling ala ne ing ari!

⁹ Magsadia ya ing tuknangan da ring mete ban salubungan ne ing ari na ning Babilonia. Mililingat na la ding kaladua da ring meging mayupaya keti king yatu. Mibabangun la ding kaladua da ring aring ibat karing karelang tronu.

¹⁰ Ngara king ari na ning Babilonia, Ngeni kalupa da na kang maina! Metung na ka kekami!

¹¹ Kanitang misan a panaun peparangalan da ka ding tau karing musika da ring karelang alpa, oneng ngeni atyu na ka king tuknangan da ring mete! Ulad la ding pagkeran mu at mibalut ka karing bulati!

¹² Ari na ning Babilonia, masalang tala ning abak, misaldak kang ibat king banua! Kanitang milabas sekupan mu la ding dakal a bansa, oneng ngeni makapase ka king gabun.

¹³ Sinabi mu king ukiatan me ing banua at ibili me ing tronu mu babo da ring batuin, at lukluk ka bilang ari king bunduk na ning norti nung nu la mititipun ding kikilalanan dang dios.

¹⁴ Sinabi mu king ukiatan mu la ding matas a biga at mangari ka king Mayupaya.

¹⁵ Lugal king dasnan mu yan, menakbag ka king pekamalalam nang dake ning tuknangan da ring mete.

¹⁶ Lawan da ka at pagumasdan ding mete. Ngara kanitang mangutang, Aliwa wari ing taung iti ing menugun king yatu at pepagalgal karing kayarian?

¹⁷ Aliwa wari ya ing linasak karing siudad at gewang anting disyerto ing yatu? Aliwa wari ya ing e bisang mibulus karing bihag at e na la buring paulian?

¹⁸ Pakakera la ding sablang ari keti king yatu karing maragul at malagung pantiun;

¹⁹ oneng ika ala kang pantiun at miyugse ya at muluk ing bangke mu. Mitakpan ya karing bangke da ring sundalus a mete king labanan, at kayabe reng miyugse king mabatung kulkul at medamusak ya.

²⁰ E ka mikutkut a kalupa da ring aliwang ari, uling sinira me ing sarili mung bansa at pete mu la ding mismung kabalen mu. Alang mitagan karing miembru na ning e mayap mung pamilya.

²¹ Pagumpisan na ing pamakamate! Mate la ding anak nang lalaki niting ari uli da ring kasalanan ding makatua ra. Ala nang makasakup metung man karela king yatu, at e ra ne alaganasan karing siudad da.

²² Nganang sasabi ning Ginung Mayupaya, Lusuban ke ing Babilonia at paten ding memalen na. Ala kung itagan; alang miligtas maging ding anak. Aku, ing Ginu, ing migsalita.

²³ Gawan keng pinak ing Babilonia at karin la manuknangan ding kulayu. Palisan ke ing Babilonia king palis a mitapus king sablang bage atyu keting bansa. Aku, ing Ginung Mayupaya, ing migsalita.

²⁴ Nganang matimid sinabi ning Ginung Mayupaya, Nung nanu ing inisip ku, ita ya ing mapalyari. Ing birian kung marapat ya ing marapat.

²⁵ Paten ku la ding tau Asiria a manuknangan king bansa kung Israel at damusakan ku la karing kanakung bunduk. Ilako ke ing paud at ing karga a papusan da ring tau Asiria king balen kung pinili.

²⁶ Iti ya ing planu ku para king yatu at makatas ya ing gamat ku ban parusan ku la ding bansa.

²⁷ Wa, iti ya ing inari na nang daptan ning Ginung Mayupaya; makatas ne ing gamat na ban mamarusa at ala nang makapigil pa.

²⁸ Iti ya ing mensahi a mipasiag kanitang banuang mete ya i Aring Ahaz.

²⁹ Memalen ning Filistia, mepakli ne ing pamarug a pemarug da keka, oneng ala ka pang matulid ban magsaya. Potang mate ya ing metung a ubingan, atin namang lunto a lalung mabagsik. Miyayapsa ya king ebun na ning ubingan ing metung a dragon a susulapo.

³⁰ Maging metung yang pastul ing Ginu para karing pakakalulu na ning balen na at paburen na lang mibiebie payapa. Oneng kekayung tau Filistia, parala yang danup ing Ginu at alang mitagan mabie metung man kekayu.

³¹ Ikayung sablang siudad na ning Filistia, ngulangul kayu at papiglo maniawad saup! Ikayung sabla, galgal kayu king takut! Uling datang ing makapal a alikabuk a manibat king norti, sundalus la at alang mataloti karela.

³² Makananu ta lang pakibatan ding tubud a daratang kekatamu a ibat Filistia? Sabian tamu karela king telakad na ne ning Ginu ing Zion, at manakit na lang kapasnon karin ding taung pinili na a daralan king kasakitan.

15

¹ Iti metung yang mensahi tungkul king bansang Moab. King misan mung bengi malasak la ding siudad na ning Ar at Kir at mitiwangwang ya ing Moab.

² Mukiat la king bunduk-bundukan ding memalen na ning Dibon ban manangis king santuaryu karin. Tatangisan da la ring memalen na ning Moab ding siudad ning Nebo at Medeba; kinalbu da la ring buntuk da at lebahas ding balbas da uli na ning kalungkutan da.

³ Pakaimalan lang magaspang ding taung atyu karing dalan; malungkut la at kikiak ding tau karing plasa na ning siudad at karing asotea babo ding bale.

⁴ Kikiak la ding memalen na ning Hesbon at Eleale, at mararamdam ing kiak da angga karin Jahaz. Gagalgal la pati na ding sundalus; mimina la lub.

⁵ Masisindak ya ing pusu ku para king Moab! Tinakas la ding memalen at minta la king Zoar at king Eglat Selisiya. Dinalan la ding aliwa king dalan paukiat king Luhit; manangis la kabang dalan. Tinakas lang minta ding aliwa king Horonaim, ngungulangul lang masikan.

⁶ Malangi ya ing Sapa ning Nimrim; melangi ing dikut king lele na at alang nanumang mitagan a sagiwa.

⁷ Lipatan de ring tau ing Sapa ding Sause; magkapilit lang makatakas at idala ing atipun dang pibandian.

⁸ Mararamdam ing saingsing nu man karing suluk na ning Moab. Mararamdam angga karing balen na ning Eglaim at Beerelim.

⁹ Melare ya ing ilug ning balen Dibon uli na ning daya at atin yang sidia ing Dios a lalung masakit para karing taung atyu karin. Magus ing daya potang gisanan da lang paten ding sablang mitagan karin Moab.

16

¹ Ibat king siudad na ning Sela libutad ning disyerto, parala lang metung a biserung tupa ding memalen na ning Moab bilang regalu ra king pamuntuk na ning Jerusalem.

² Manaya la karing pampang na ning Ilug ning Arnon at pabalik-balik lang alang balung puntalan; mengari lang ayup a meyabuang karing sale ra.

³ Ngara karing memalen na ning Juda, Sabian yu kekami nung nanu ing sukat ming daptan. E yu ke paburen. Mangari kayu sana king tanaman a babie salilung neng kaugtuan aldo; paburen yu keng salilung kekayu. Tinakas kami; isalikut yu kami king lugal a e ra ke akit.

⁴ Paintulut yung manuknangan kami king bansa yu. Iligtas yu kami karetang bisang mamuksa kekami. (Miwakasan na ing pamanalipit ampon pamanyira at mawala la detang manyira king bansa.

⁵ Kanita maging ari ya ing metung karing lahi nang David, at panimunan na la ding tau king mitmung katapatan at lugud. Agad nang daptan itang matulid at lingunan na ing pamag-ari na ning hustisia.)

⁶ Sabian da ring memalen na ning Juda, Abalitan mi ing ketasan dang lub ding memalen na ning Moab. Balu mi king palalu la at ing balu ra ya mu ing sarili da, oneng alang batayan ing karelang pamagmaragul.

⁷ Manangis lang katakut-takut ding memalen na ning Moab, uli na ning daralanan dang kasakitan. Manangis la ngan potang aganaka ra ing maniaman a pamangan a sadia rang kakanan king siudad ning Kir Hareset. E ra balu nung nanu ing sukat dang daptan.

⁸ Masira la ding marangle lele ning Hesbon at ding mulahan ubas king Sibma; detang mulahan ubas a pepasari king pangalasing da ring pamuntuk da ring bansa uli na ning alak da. Kanitang misan a panaun laganap la ding tanaman ubas angga na king siudad na ning Jazer at papunta king dane aslagan angga na king disyerto at papunta king dane albugan angga na king sumangid nang pampang ning Dagat a Mete.

⁹ Ngeni tatangisan ku la ding mulahan ubas na ning Sibma nung makananu keng tatangisan ing Jazer. Tutulu ing lua ku uli na ning Hesbon at Eleale uling ala nang pupul a munie tula karing tau.

¹⁰ Ala na ngening matula karing marangle a mataba. Ala nang kukulisak o magkanta karing mulahan ubas. Ala nang daramusak ubas ban gawang alak; mituknang na ing masayang kulisakan.

¹¹ Sasaingsing kung mitmung lungkut uli na ning Moab; masaspak ya ining salu ku uli na ning Kir Hareset.

¹² Papagalan da ing sarili da ring memalen na ning Moab king pamamunta ra karing santuaryu da karing bunduk at karing templo ra ban manalangin, oneng ala lang mayap a apala kaniti.

¹³ Iti ya ing mensahi a binie nang makapauna ning Ginu tungkul king Moab.

¹⁴ At ngeni, ngana ning Ginu, Kilub ding atlung banua, mawala ing maragul nang pibandian ning Moab. Ditak la mu ding miligtas karing dakal nang memalen at maging maina la deti.

17

¹ Ngana ning Ginu, E ne maging siudad pa ing Damasco; maging katumpuk niang batu.

² Lubus lang milako tau ding siudad na ning Siria. Maging pipagpastulan na la mu karing tupa at baka, at ala nang manabi karela.

³ Milako ya dipensa ing Israel, at mawala ing kalayaan na ning Damasco. Mibili la ding mekaligtas a tau Siria king kamarinayan anti ding memalen na ning Israel. Aku, ing Ginung Mayupaya, ing migsalita.

⁴ Ngana pang sinabi ning Ginu, Datang ing aldo a miwakasan ing ligaya na ning Israel at miyalilan kakaluluan ing pibandian na.

⁵ Mangari ya ing Israel king marangle kaybat nang mepalut ning trigu king ortelanu; mangari ya king marangle na ning Kapatagan ning Refaim a gilutan da ring tau kaybat nang mepalut.

⁶ Ditak la mung tau ding miligtas at mangari ya ing Israel king tanaman a olibong meyagtal a bunga subali mu karing adua o atlung bungang mitagan a atyu king matas o ding mapilan a bungang melakuan karing mababang sanga. Aku, ing Ginung Dios ning Israel, ing migsalita.

⁷ Potang datang ne ing aldong ita, lumapit la ding tau king karelang Miglalang, ing banal a Dios ning Israel, ban maniawad saup.

⁸ E na la manalig karing altar a gewa da naman karing karelang gamat o manalig karing larawan na ning diosang i Asera a gewa da ring gamat da o gumalang karing altar at duluk insenso.

⁹ Potang datang ne ing aldong ita, ala kang akit a tau at lakuan da la king kasiran ding siudad a pakadipensa anti ding siudad a likuan da ring Heveo at Amoreo kanitang tinakas la arapan da ring memalen na ning Israel.

¹⁰ Israel, kelinguan me ing Dios a magligtas at mimingat keka anting matibe kuta. Bagkus, mitatag kang dakal a sagradung hardin ban samba king dios a e mu balu.

¹¹ Nung sakali mang tumubu la at maniampaga ita mu ring abak a ita, ala ka pa mu ring pupulan. Mistula mung kaguluan at sakit a e malyaring maulu ing kekang akua.

¹² Magugulu la ding bansang mayupaya at mengari ing inge ra king biung ning dagat ampon ding maragul a alun a sasagasa.

¹³ Susugud la ding bansa anting lulusub a alun; oneng sabianan na la ning Dios at matras la; mipaid lang anti ing alikabuk a atyu lele ning bunduk, mipaid lang anti ing are king alisus.

¹⁴ Babie lang takut kilub ning kabengian; oneng mawala la pangayabak. Iti ya ing kararasan da ring manlub manako king bansa tamu!

18

¹ Lipat da ring ilug na ning Etiopia ating lugal nung nukarin mararamdam ing kaluskus da ring pakpak.

² Ibat king lugal a ita datang la ding tubud king Ilug ning Nilo; makasake la karing bangka a megawa king timbu. Muli na kayu, ikayung masalusung tubud! Idala yeng mibalik iting mensahi king bansa yung kewani da ring ilug, king masikan at mayupaya yung bansa, karing memalen yung matas at mapinu balat at pitatakutan da ring tau king mabilug a yatu.

³ Makiramdam kayu, ikayung sablang tau keti king yatu. Lawan ye ing banderang peka tanda a mitas king taluktuk ning bunduk! Pakiramdaman ye ing tiup ning trumpeta!

⁴ Uling sinabi na ning Ginu kanaku, Lumawe kung alang imik ibat banua antimo nung makananung alang bulad lalto ing ambun busal ning malisangan a kabengian neng panaun na ning papalut, kasing lino na ning sala ning kaugtuan aldo.

⁵ Bayu da la pupulan ding ubas, potang ikua ra nang melaglag ding sampaga at ding ubas lululut na la, mayan lang magisan ding tau Etiopia karing kalaban nung makananu na lang agyung kuturan ning palang ding sanga king pun.

⁶ Malakuan la ding bangke da ring sundalus da at milantad la karing ayup at mabagsik a animal. At king panaun na ning kaleldo maging pamangan da la ring ayup, at ding mangan karela king panaun na ning dimla ila naman ding animal.

⁷ Potang datang ing panaun a ita tanggap yang ain ing Ginung Mayupaya kaniting bansang kewani da ring ilug; iting masikan at mayupayang bansa; deting taung matas at mapinu balat a pitatakutan da ring sabla king mabilug a yatu. Datang la king Bunduk ning Zion nung nu ya misasamban ing Ginung Mayupaya.

19

¹ Iti ya ing mensahi tungkul king Ehipto. Mamirapal yang datang ing Ginu king Ehipto. Makasake ya king mabilis a biga. Inya galgal la arap na ding idolo da ring tau Ehipto at masira la lub ding memalen na.

² Ngana ning Ginu, Paratang kung gera king Ehipto at pilaban-laban ku la ding mikakapatad at misisiping bale. Mipatepate la naman ding mililigligan a siudad at mipatepate la munaman ding ari uli na ning upaya.

³ Kimut ku ban mabigu la ding tangka da ring tau Ehipto at painan ku la lub. Lumapit la karing karelang idolo ban maniawad saup at mamunta la karing enkantador at aduananan da lang payu ding espiritu da ring mete.

⁴ Ibie ku la ding tau Ehipto king gamat na ning metung a mabagsik a ari a sumakup karela. Aku, ing Ginung Mayupaya, ing migsalita.

⁵ Kumati ing danum na ning Ilug ning Nilo at e lumuat mamala ya.

⁶ Mantut la ding piagusan nang danum ning ilug kabang lalangi lang tunggal ditak. Langi la naman ding timbu at tike

⁷ pati na ing sablang makatanam king pampang ning Ilug ning Nilo at ipaid na ning angin.

⁸ Saingsing ya at manangis ing balang metung a mangabiayan king pamanasan king Ilug ning Nilo uling ala lang ararakap ding karelang taga at lambat.

⁹ Lungkut la detang gagawang maputing linen a imalan;

¹⁰ milako la obra at lungkut la ding manayi ampon ding mangagaling a pangamat.

¹¹ Mangmang la ngan ding manimuna na ning siudad ning Zoan! Babie lang payu a alang kabaldugan ding pekabiasa nang diling lalaki na ning Ehipto. Makananu lang masikan a lub at asabi king ari king ila ding kayalili da ring minunang mangabiasa at ari?

¹² Ari na ning Ehipto, nu la karin detang mangabiasa mung tagapayu? Mekad asabi ra keka nung nanu la ding planu na ning Ginung Mayupaya para king Ehipto.

¹³ Mangmang la ding manimuna na ning Zoan at ning Memfis. Sukat sana ing tairan de ing bansa, oneng linili re iti.

¹⁴ Birian na ning Ginu ing misasalangsangan la payu. Bilang bunga na niti, pane e ustu ing ararapat na ning Ehipto, at anti yang malasing a paid-paid mangatalusad king sarili nang suka.

¹⁵ Ala metung man king Ehipto, mabandi ya man o kalulu, malati ya man o maragul, ing makaibie saklolu.

¹⁶ Potang datang na ing panaun a ita, maging malamarine lang anti ding babai ding memalen na ning Ehipto. Galgal la king takut potang akit de ing makatas nang gamat ning Ginung Mayupaya ba na lang parusan.

¹⁷ Mitakutan la ngan ding memalen na ning Ehipto king Juda. Aganaka ra nang agad ing parusang sidia na ning Ginung Mayupaya para karela kabud damdaman de ing lagyu na.

¹⁸ Potang datang na ing panaun a ita, ing amanung Hebreo ya ing maging salita da ring limang siudad ning Ehipto. Pasakup la ding tau karin at sumpa la king lagyu na ning Ginung Mayupaya. Mayaus yang Ing Siudad ning Aldo ing metung kareting siudad.

¹⁹ Potang datang na ing panaun a ita, mika altar para king Ginu libutad na ning bansang Ehipto at mika batung asias a mitalaga para king Ginu king angganan na ning Ehipto.

²⁰ Maging palatandanan la deti king panga-atyu na ning Ginung Mayupaya king Ehipto. Potang mayalipit la ding tau karin at maniawad lang saklolu king Ginu, mitubud yang talapagligtas para karela.

²¹ Ipakilala na ning Ginu ing mismung sarili na karing memalen na ning Ehipto, at kilalanan da ne man ampon samban at pagdala reng ain-sakripisyu at aliwa pang ain. Gawa lang taimtim a panata at tuparan da ing karelang pengaku.

²² Parusan na la ning Ginu ding memalen na ning Ehipto, oneng kaybat pakayapan na la. Lumapit la king Ginu at pakiramdaman na ing panalangin da at pakayapan na la.

²³ Potang datang na ing panaun a ita, mika ating dalan a malualas pilatan na ning Ehipto at ning Asiria. Dalanan deng lumba-sumaka deng memalen da reting aduang bansa at samba lang miyabe-abe.

²⁴ Potang datang na ing panaun a ita, maging kapante ne ning Israel ing Ehipto at ing Asiria; maging metung lang kanuanan para king mabilug a yatu deting atlung bansa.

²⁵ Bendisyunan na la ning Ginung Mayupaya at sabian na, Bendisyunan da ka, Ehipto a kanakung balen, at ika, Asiria a kanakung lelangan, at ika, Israel a kanakung pinili.

20

¹ King utus na ning Aring Sargon ning Asiria, lisuban ne ning matas diling pamuntuk da ring sundalung Asiriano ing Asdod, ing metung karing siudad na ning Filistia.

² Atlung banua bayu milyari iti, sinabi na ning Ginu kang Isaias, ing anak nang Amoz, king ilukas ne ing magaspang a imalan a susulud na pati na ding sandalyas na. Memintu ya i Isaias at linakad yang alang imalan at alang sapin a bitis.

³ Ngana ning Ginu inyang mebihag ne ing siudad na ning Asdod, Lalakad yang alang imalan ing talasuyu kung i Isaias at alang sapin a bitis kilub ding atlung banua. Iti ya ing tanda nung nanu ing mapalyari king Ehipto at Etiopia.

⁴ Tairan na la ning ari ning Asiria ding alang imalan a mabihag kareting aduang bansa. Lumakad lang alang imalan at alang sapin a bitis ding kayanakan at makatua, at mayakit ing pisinup-sinup nang dake ning karelang katawan. Iti magdalang kamarinayan king bansang Ehipto.

⁵ Masira la lub at milako kapanayan detang binie ra ing karelang kapanaligan king Etiopia at detang migmayabang tungkul king Ehipto.

⁶ Potang datang na ing panaun a ita, sabian da ring taung manuknangan king pampang ning Filistia, Lawan yu nung nanu ing milyari karing taung panaligan tamung magdipensa kekatamu laban king ari ning Asiria! Makananu tamu pa ngening miligtas?

21

¹ Iti ya ing mensahi tungkul king Babilonia. Mengari king alisus a mabilis tutiup king disyerto ing kapahamakan a datang ibat king metung a pitatakutan a bansa.

² Menakit kung metung a vision tungkul karing bage mangapalyaring mitmung bigsikan; metung yang tagimpan ning kataksilan at kasiran. Sundalus ning Elam, lumusub ka! Sundalus ning Media, kubkuban mu na la ding siudad! Dinan na nang kawakasan ning Dios ing sablang kasakitan a pepasari na ning Babilonia.

³ Mikatmuan kung takut at penamdaman ku ing kanakung ikit at dimdam king vision; sakit a kalupa na ning babaing malapit nang manganak.

⁴ Dudurut na ku akakit at gagalgal ku king takut. Panenayan kung datang na ing kabengian; meging pitatakutan yang pigagalgalan ku.

⁵ King vision, makasadia ne ing metung a bangketi; makalantang la ding alpombra. Mamangan la at miminum. Kabud-abud meramdam ya ing metung a siwala. Ngana, Pamuntuk da ring sundalus, talakad kayu at isadia yu la ding kekayung kalasag!

⁶ Kanita ngana kanaku ning Ginu, Sulung at mibili kang guardia at sabian mu king munie yang ulat king nanumang akit na.

⁷ Nung manakit yang taung daratang a makakabayung tidua-tidua at lalaking pakasake asno at kamelyu, pagumasdan na lang masalese deti.

⁸ Kanita kinulisak ya ing guardia. Ngana, Makamal a Ginu, patitingapun ku't kabakabukas magbante king kanakung puesto.

⁹ Kabud-abud daratang la! Tau lang pakasake kabayung tidua-tidua. Nganang memalita ning guardia, Mibagsak ya ing Babilonia! Mengalasolaso la at pakakalat king gabun ding sasamban dang idolo.

¹⁰ Balen kung Israel, medara kayung anti ing trigu, oneng ngeni belita ku kekayu ing mayap a balitang kanakung dimdam king Ginung Mayupaya, ing Dios ning Israel.

¹¹ Iti ing mensahi tungkul king Edom. Ating metung a mamaus kanaku ibat king Edom. Ngana, Guardia, pilan ya pang oras ing madalumdum a bengi? Sabian mu kanaku nung nu ya pa anti kaluat.

¹² Pekibat ning guardia, Daratang na ing abak, oneng datang pasibayu ing bengi! Nung bisa ka pang mangutang pasibayu, magbalik ka at mangutang.

¹³ Iti ya ing mensahi tungkul king Arabia. Ikayung memalen na ning Dedan, ikayung miyabe-abe magkampu king ilang nang lugal ning Arabia,

¹⁴ dinan yu lang inuman ding taung mau a lalapit kekayu. Ikayu namang memalen na ning bansang Tema, munie kayung pamangan karing takas.

¹⁵ Pupulayi lang tatakas ding tau karing espada a makayaniung makamate karela, karing pana a malapit nang mibugnus, at karing sablang panganib a darala na ning gera.

¹⁶ Kanita ngana kanaku ning Ginu, Kilub na mu ning pabanua miwakasan na ing degulan da ring memalen na ning Kedar.

¹⁷ Ding tauan nang tatalan pana at paslu ilang pekamatapang nang lalaki ning Kedar, oneng ditak la mu ding mitagan karela. Aku, ing Ginung Dios ning Israel, ing migsalita.

22

¹ Iti ya ing mensahi tungkul king Kapatagan ning Vision. Nanu ing malilyari? Obat magpiesta la ding sablang memalen ning siudad karing asotea babo ding bale ra?

² Obat magugulu ya ing kabilugan a siudad, mainge ya at malisuas? E la mete makilaban ding kekang lalaking mete king gera!

³ Memulandit la ding sabla mung manimuna at mebihag la bayu re ikuang abugnus ing metung a paslu.

⁴ Ngeni, lakuan yu kung dili-dili ban manangis kapait-paitan uli da ring mete kung memalen. E yu na ku sana aruan.

⁵ Oras na ngeni ning kalingasngasan, ning pangasambut at kagutgutan king Kapatagan ning Vision, at ing Ginung Dios a Mayupaya ya ing peparala kaniti kekatamu. Abagsak da la ring pader na ning kekaming siudad at kakablas ing saingsing yu karing bunduk-bundukan.

⁶ Pakakabayu la at pakakarung panggera ding sundalus na ning bansang Elam; pakasandata lang pana at paslu. Pakasadia na la naman ding kalasag da ring sundalus na ning bansang Kir.

⁷ Mitmu la ding mataba nang kapatagan ning Juda karing karung panggera, at atyu la ding sundalus a pakakabayu king arap da ring pasbul dalan na ning Jerusalem.

⁸ Mibagsak na la ngan ding sablang dipensa na ning Juda. Kaniting mepalyari, lege mu la ding armas king lugal nung nu la makasinup.

⁹ Ikit mu la ding lugal nung nu la kailangan malarin ding pader ning Jerusalem. Siniasat mu la ding sablang bale na ning Jerusalem at pepalasak mu la ding mapilan ban manikua kang batung paglarin karing pader na ning siudad.

¹⁰

¹¹ Ban makatipun kang danum kilub ning Jerusalem, ginawa kang depositung danum kilub da ring pader ban sumalud king danum a mamagus ibat king matuang depositung danum. Oneng e me dininan pansin ing Dios a mibalak kaniti king maluat nang panaun at pepasari kaniting mepalyari.

¹² Mamaus ya kanita keka ing Ginung Dios a Mayupaya ban manangis kayu at magpaldas, ban kalbuan la ding buntuk yu at ban misulud imalan a magaspang.

¹³ Lugal king daptan yu yan, meyli kayu at migsaya. Mekamate kayung tupa at baka ban kanan at mininum kayung alak. Ngayung sinabi, Mayap pa ing mangan tamu at minum uling bukas mate ta na!

¹⁴ Ing mismung Ginung Dios a Mayupaya ing migsalita kanaku. Ngana, E ku malyaring patawaran ing e ustung dapat kabang mabibie la. Aku, ing Ginung Dios a Mayupaya, ing migsalita.

¹⁵ Sinabi na kanaku ning Ginung Dios a Mayupaya king munta ku kang Sebna, ing talapangasiwa na ning pibalebale ning ari, ban sabian ing anti kaniti:

¹⁶ Sebna, ninu wari ika? Nanu ing matulid mung dumukit pantiun karing mabatung libis ning bunduk-bundukan?

¹⁷ Mapalyaring maulaga kang tau, oneng daklutan na ka ning Ginu at ibalugse.

¹⁸ Gawan na kang anting bola at ibasibas king mas maragul a bansa. Karin ka mate lele da ring karung panggera a pagmaragul mu. Meging kamarinayan ka king pamilya na ning kekang panginuan.

¹⁹ Ilako na ka ning Ginu king kekang katungkulan, at ibaba na ka king matas mung kabilian.

²⁰ Nganang sinabi ning Ginu kang Sebna, Potang iti mapalyari na, payaus ke ing kanakung talasuyung i Eliakim a anak nang Hilkia.

²¹ Pasulud ke kang Eliakim ing balabal mu at ing sinturun mu at ilipat ku ing sablang upayang sadiang keka. Mangari ya kanitang anting pengari karing memalen na ning Jerusalem at Juda.

²² Itumpak ku la king pago na ding susi na ning pibalebale nang David; alang makasara king ibuklat na at alang makabuklat king isara na.

²³ Ipilmi ke king lugal na anti ing tulus at ya ing maging panibatan na ning dangalan para king mabilug nang pamilya.

²⁴ Oneng maging pabayat la ding sablang kamaganak na at ding manalig kang Eliakim. Sumabit la kang Eliakim antimong kuran at tasa a pakasabit king tulus.

²⁵ Potang mapalyari na iti lubak ya ing tulus a mapilmi pangabili; mabagut ya at mibagsak. At iti ya ing maging kawakasan da ring sablang pakasabit kang Eliakim. Ing Ginu ya ing migsalita.

23

¹ Iti ya ing mensahi tungkul king Tiro. Ngulangul kayu, ikayung maglayag king dagat! Melasak ne ing kekayung sadsaran king Tiro; mesira la ding bale na at daungan. Miras kekayu iting balita kabang pauli la ding barku yung ibat king Kitim.

² Manangis kayu, ikayung negosianti na ning Sidon. Mitubud kayung tau

³ king kasumangid nang pampang ning dagat ban sali at mamisali king binutil ibat king kapatagan na ning Nilo ning Ehipto at ban mangalakal karing sablang bansa.

⁴ Dumine na ka man, O siudad na ning Sidon; uling susuka na ka ning dagat at ning kalalaman na. Ngara, E ku menganak kapilan man ni menese anak a lalaki o babai.

⁵ Masdan la pati na ding memalen na ning Ehipto potang abalitan da king melasak ya ing Tiro.

⁶ Inya ngulangul kayu, ikayung memalen na ning Fenicia! Subukan yung tumakas papunta Tarsis!

⁷ Iti ya kaya ing masayang siudad na ning Tiro a mitatag malambat nang panaun? Iti ya kaya ing siudad a mitubud tau lipat ning dagat ban karin manalakad balen?

⁸ Ninu ing migmunikala ban iti ngan marapat king Tiro, ing marangal a siudad, siudad da ring negosianting prinsipi a kagalang-galang king mabilug a yatu?

⁹ Ing migmunikala kaniti ya ing Ginung Mayupaya! Pinlanu na iti ban angganan na ing karelang pamagmaragul king depat da at pamakarinayan ding parangalan dang memalen.

¹⁰ Ikayung manuknangan king Tarsis, sulung, sarulan yu ing gabun! Ala nang mamingua kekayu!

¹¹ Tinas na ne ning Ginu ing gamat na king dagat at digsa na na la ding kayarian. Inutus na king lasakan la ding sentru na ning komersyu da ring tau Fenicia.

¹² Siudad ning Sidon, miyangganan na ing pamagmatas mu. Mayayalipusta la ding kekang memalen at e la rin miligtas agyang pang tumakas lang munta king Kitim.

¹³ Aliwa ding tau Asiria nune ding tau Babilonia ding mibulus karing mabagsik a animal ban salakayan de ing Tiro. Ding sinagupa karing tore ila ding tau Babilonia; ilang minyira karing kuta na ning Tiro at likuan deng mesalanta ing siudad.

¹⁴ Ngulangul kayu, ikayung maglayag king dagat! Melasak ne ing siudad a kekayung penaligan.

¹⁵ Daratang ing panaun potang makalinguan ya ing Tiro kilub ding pitung pulung banua, ing kaba na ning bie ning ari. Potang milabas na la deting banua, mangari ya ing Tiro king babaing magtinda king katawan na a babanggitan na ning kanta:

¹⁶ Kuanan me ing kekang alpa, king balen lumibut ka, O babaing taksil a mekalinguan na! Magkanta ka at manigtigan ban ding lalaki magbalik la keka.

¹⁷ Kapupus da reting pitung pulung banua, paintulutan ne ning Ginu ing Tiro ban mibalik king sadia nang kapanintunan, at pakiupa na ing sarili na karing sablang kayarian na ning yatu.

¹⁸ Mitalaga la king Ginu ding salaping atubu na king kapamilatan na ning komersyu na. E na la isikap deti, oneng detang susuyu king Ginu gamitan da la ring salapi ra ban saliwan ing pamangan at imalan a kailangan da.

24

¹ Durugan ne ning Ginu ing yatu at lakuan neng lasak-lasak. Masalanta ya iti at isambulat na la ding tau.

² Takman na ning balang metung ing kapahamakan: ding pari at antimu rin ding memalen, ding ipus at antimu rin ding panginuan, ding maniali at antimu rin ding mamisali, ding paparam at antimu rin ding manandam salapi, ding mabandi at antimu rin ding kalulu.

³ Malasak ya at masalanta ing yatu. Ing migsalita ya ing Ginu at iti mapalyari.

⁴ Langi ya ing yatu at lungkut; mangaina ya ing mabilug a yatu; malaso ing gabun at ing banua.

⁵ Merinat ya ing yatu king kapamilatan na ning e ra pamanupad ding tau karing kautusan na ning Dios, at king kapamilatan na ning pamanlabag da king kasunduan a telaga nang alang kawakasan.

⁶ Inya piniumpa na ne ning Dios ing yatu. Mamayaran la ding tau uli na ning depat dang pamikasala. Uli na niti, dumitak la ding taung mabie a mitagan.

⁷ Lalangi la ding tanaman a ubas at diritak ing alak. Malungkut la ngeni ding taung masaya kanitang misan a panaun,

⁸ at tinuknang ing masayang tigtigan da ring karelang alpa ampon tambul.

⁹ Ala na itang masayang pamagkanta ra kabang miminum lang alak; e na la tutula king lasa na ning alak.

¹⁰ Magulu ing sabla-sabla king siudad; maniara lang bale ding tau ban e la numanu balang.

¹¹ Mangulisak la ding tau karing dalan uling ala nang alak. Lubus milako at mebating ing tula king bansa.

¹² Lasak-lasak ne ing siudad at mesira la ding pasbul dalan.

¹³ Iti ya ing mapalyari karing balang bansa king mabilug a yatu. Maging kalupa ne ing kapupusan na ning pamamupul, potang meugun la ding tanaman a olibo at megisan na la bunga at meyagtal na la ding katataulian a bunga na ning tanaman a ubas.

¹⁴ Magkanta la king tula ra detang miligtas. Isalita ra detang atyu king Albugan ing degulan na ning Dios,

¹⁵ at purian de retang atyu king Aslagan. Parangalan de ring taung manuknangan lele ning dagat ing Ginu, ing Dios ning Israel.

¹⁶ At karing pekamarayung lugal ning yatu makaramdam tamung kanta bilang kapurian king Israel, ing makatuliran a bansa. Oneng alang kapanayan para kanaku! Mayayayat ku! Isusundu da ring taksil ing pamanganiaya ra kanaku at daragul ing karelang kataksilan.

¹⁷ Ikayung sablang manuknangan keti king yatu, makiramdam kayu! Ating pitatakutan, kulkul, at bitag a manenaya para kekayu.

¹⁸ Manabu ya king kulkul ing ninumang magkapilit mangilag karing mamatakut at mayakua ne man king bitag ing ninumang magkapilit mangilag king kulkul. Datang ing alang tuknang a uran at mangaugun la ding pundasyun na ning yatu.

¹⁹ Maspak ya ing yatu at misalbag ampon mibuklat.

²⁰ Ing mismung yatu magpaid-paid yang anti ing taung malasing, at miduyan ya anting kubu a ugunan na ning bagyu. Mibabayatnan ya ing yatu karing depat nang pamikasala; mibagsak ya at e ne kapilan man makabangun pa.

²¹ Daratang na ing panaun nung kapilan ing Ginu parusan na na la ding upayang atyu babo at ding pamuntuk na ning yatu.

²² Piyabe-abayan na la ning Dios ding ari anting bihag king metung a kulkul. Ikulung na la king sukulan angga king oras a datang ing pamamarusa karela.

²³ Dalumdum ya ing bulan at e ne sunlag ing aldo uling ing maging ari ya ing Ginung Mayupaya. Sakupan ne ing Jerusalem a makatalakad babo ning Bunduk ning Zion at akit da ring manimuna da ring tau ing ligaya na. fig,,,,,Piyabe-abayan na la ning Dios ding ari anting bihag king metung a kulkul.,(24:22)fig*

25

¹ Ika ing kakung Dios, O Ginu; galangan ke at purian ing lagyu mu. Dinapat kang bage pagmumulalan; king katapatan keka lang tiparan ding planung kekang belangkas king panaun a milabas.

² Keka lang lesakan ding siudad, at pati pader keka lang tibagan. Ding palasyung telakad ding kekeng kalaban e na la lunto kapilan man.

³ Purian da ka ding bansang mayupaya, at pitakutan da ka ding siudad da ring mabagsik a bansa.

⁴ Ding kalulu at alang akarapat keka linapit la, at meging panatag la king oras ning kaligaligan da. King panaun ning bagyu dirinan mu lang tuknangan, at king pali ning aldo metung a salilungan. Anti lang bagyung daratang ding lalaking tampalasan,

⁵ anting lawi king malanging lugal. Oneng ika, Ginu, kalaban mi keka lang pepatahimikan! Kekang pepatuknangan kulisak ding lalaking tampalasan; anting lulam a parimla king aldo malisangan.

⁶ Keting Bunduk ning Zion magsadia yang dakal a pamangan at inuman ing Ginung Mayupaya para karing sablang bansa keti king yatu. Maniaman a pamangan at mangamal diling alak ing pepasadia na.

⁷ Keti na biglang ipawi ing lulam na ning lungkut a malambat nang tatakap karing sablang bansa.

⁸ Ilako na neng lubus ning Ginung Dios ing kamatayan! Pulisan na ing lua na ning balang metung, at ilako na ing kamarinayan a daralanan na ning balen na king mabilug a yatu. Ing migsalita kaniti ya ing Ginu.

⁹ Potang mapalyari na iti, sabian na ning balang metung, Ya ing kekaming Dios! Binili mi ing kapanaligan mi king Dios at linigtas na kami. Ya ing Ginu. Binili mi ing kapanaligan mi king Dios at matula kami ngeni ampon masaya uling linigtas na kami!

¹⁰ Idipensa ne ning Ginu ing Bunduk ning Zion, oneng madamusak la ding memalen na ning Moab nung makananung madadamusak ing are king dinat da ring animal.

¹¹ Igawang da la ring karelang gamat; balamu magkapilit lang kawe, oneng pakarinayan na la ning Dios at lumbug la ding gamat da; ala lang akarapat.

¹² Lasakan na la ning Dios ding dipensa na ning Moab at ding matas dang pader at idagsa na la deti king alikabuk.

26

¹ Datang ing aldo nung kapilan ikanta re ding tau iting kanta king bansa na ning Juda: Atin keng siudad at matatag ya! Ing Dios mismu ya ing magbante karing pader na!

² Ding pasbul dalan ning siudad kekayu lang ibuklat, at paburen yang lungub ing bansang tapat, ing bansang darapat mayap.

³ Ika, Ginu, ing babie ganap a kapayapan karetang tutupad king kekang kaburian, at keka ibibili ra ing karelang kapanaligan.

⁴ Manalig kayu king Ginu king kapilan pa man; ya ing mimingat parati kekatamu ngan.

⁵ Sildak na la detang palalu; lesak neng matibe rang siudad at digsa ding pader king alikabuk.

⁶ Detang megipit ngeni lalakaran da ne, at daramusakan karing bitis da.

⁷ Ginu, gagawan meng patag ing dalan para karing taung mayap; matulid ya ing dalan a karelang daralanan.

⁸ Pamintuan mi ing kekang kaburian, at keka ibili mi ing kekeng kapanayan; ika mu ing bukud ming pagnasan.

⁹ King bengi ikang pagnasan na ning kakung pusu; ing espiritung atyu kaku taimtim na kang panintunan potang keka yang atulan ing yatu at ding tau, abalu ra kanita ing kabaldugan na ning kekang hustisia.

¹⁰ Agyang maganaka ka karing taung e mayap, makanyan man e la mebiasang dapat katuliran. Agyang king bansa da ring taung kikilala king matulid, e mayap mu rin ing karelang daraptan; e ra buring kilalanan ing kekang kamalan.

¹¹ E ra balu ding kekang kalaban king keka lang parusan. Ginu, ibili mu la king kamarinayan, at paburen lang misakitan; paburen lang magdusa king sidia mung parusa. Ipakit mu karela nung nu anti ing lugud mu karing pinili mung tau.

¹² Ginu, dinan mu keng kanawan; ing sablang kekeng akamtan bunga na ngan ning kekang daraptan.

¹³ O Ginung kekeng Dios, sekupan da ke ding aliwang tau, oneng ika mung bukud ing kekeng kilalang Ginu.

¹⁴ Ngeni mete na la at e na subli pang mie; ding kaladua ra e na la talakad, uling keka lang perusan at lesak. Ala nang makaganaka pa karela.

¹⁵ O Ginu, ing bansa keka yang degul; linapad mu la ding angganan na at iti keka minie dangalan.

¹⁶ O Ginu, ding taung kekang pinili keka lang pepagdusan, at king karelang kasakitan ika ing karelang ausan.

¹⁷ Ika, O Ginu, ing pepasari king kekeng saingsing, anti ke king babaing magkakasakit king pamanganak na.

¹⁸ Mibili kami king sakit at karamdaman, oneng ala keng arapat nanuman. Ala keng ikuang tagumpe para king kekeng balen; nanuman ala keng apala.

¹⁹ Detang kabalen ming mete subli lang mie! Ding katawan da pasibayu lang mika bie! Ding sablang matudtud king karelang kutkutan pasibayu lang migising, at magkanta lang matula. Nung makananu neng gagawan sagiwa ning ambun ing yatu, makanyan na lang biayan ning Ginu detang maluat nang mete.

²⁰ Kakung memalen, lungub na kayu karing kekayung pibalebale at isara ding pasbul kagulutan yu. Salikut kayu king ditak pang panaun kabang ing mua na ning Dios e pa mepawi.

²¹ Lawan yu, datang ya ing Ginu ibat king tuknangan na ban parusan na la ding tau keti king yatu uli na ning karelang pamikasala. Ibulalag na naman ning yatu ing daya nang tinulu, at e na na la isalikut ding mete na.

27

¹ King aldong ita gamitan ne ning Ginung Mayupaya ing mataram nang espada ban parusan ne ing Leviatan, ing mabilis at liko-likong dragon. Paten ne iting lasip a manuknangan king dagat.

² King aldong ita sabian na ning Ginu ing anti kaniti tungkul king makayama nang mulahan ubas:

³ Banten ke at parati keng paranuman. Banten ke aldo at bengi ban e ne ananu balang ning ninuman.

⁴ E na ku mua king mulahan ubas. Nung ating dikut at tanaman a masuksuk a sukat labanan, lubus ku la ngan silaban.

⁵ Nung buri da ring kalaban na ning kanakung balen ing kanakung pamagdipensa, sukat lang makikasundu kanaku. Wa, sukat lang makikasundu kanaku.

⁶ Karing aldo datang, ding memalen na ning Israel, ding lahi nang Jacob, magyamut lang anti ing tanaman; manyampaga la at mamunga. Mikatmuan ya ing yatu karing bunga da.

⁷ Perusan ne waring mabayat ning Ginu ing Israel antimo itang miras karing kalaban na? Kematen ya waring lalaking kasing dakal da ring kalaban na?

⁸ Perusan na la ning Ginu ding memalen na king kapamilatan na ning pangaugse ra king aliwang bansa. Inugse na la king kapamilatan na ning mabagsik a angin a ibat king aslagan.

⁹ Oneng mipatawaran mu ing kasalanan na ning Israel potang medunut lang mapinu ding sablang batu karing altar a paganu, at anggang e la magisan milako ding sagradung tulus a simbolo na ning diosang i Asera at ding altar a pidurulukan insenso.

¹⁰ Melasak ne ing siudad a mipadurutnan kuta. Ala neng bitasang tau; mengari ya king ilang a lugal. Meging pastulan nia mu para karing baka; pipagpaynawan da at pipanyibsiban.

¹¹ Melangi la at mepakli ding sanga da ring tanaman at titipunan da ring babai ban panangab. Uling ala lang aintindian nanuman ding tau, e na la lunusan ning Dios a karela Miglalang ni pakitanan man king lugud na.

¹² King aldong ita ing Ginu mismu tipunan na lang tunggal-tunggal ding Israelita a pinili na, manibat king Eufrates angga king angganan na ning Ehipto, antimo nung makananu rang kakawani ing trigu king sepu neng panaun na ning pamandara.

¹³ Potang datang ne ing aldong ita, tumiup ya ing trumpeta ban ausan lang muli ding Israelitang miyugse king Asiria at Ehipto. Datang la at samba king Ginu karin Jerusalem, king banal nang bunduk.

28

¹ Makalunus ya ing kayarian na ning Israel! Ing leguan na kukupas na anti ding koronang sampagang makaputung karing malasing nang manimuna. Sasalingalngal ing pabanglu karing buntuk dang mapagmatas, oneng pakapase la king kalasingan da.

² Oyan ing Ginu; atin yang metung a masikan at mayupayang panaligan a makasadiang salake karela. Datang yang anti ing mananabung uran-lipat, anting uran a balamu bubulus da, anti yang mabilis at mapanyirang albug at lasakan ne ing bansa.

³ Madakurak ing ketasan da reting malasing a manimuna.

⁴ Ing kukupas dang dangalan deting palalung manimuna lumbug anti ding mumunang bunga na ning tanaman a higera neng panaun da; agad-agad lang mayagtal at mapangan kabud melulut la.

⁵ Potang datang ne ing aldong ita, mangari ya ing Ginung Mayupaya king malagung koronang sampaga para karing memalen na a mitagan.

⁶ Ibie na ing matulid a pamangilala king hustisia para karetang sinuyung antimong ukum at tetagan a lub para karetang magdipensa karing pasbul dalan ning siudad.

⁷ Paid-paid la pati na ding propeta at pari king pamaglakad da uli na ning kalasingan da. Mangatisud la at mangasakab uli na ning milalung pamaninum dang alak at aliwa pang matapang a inuman. King milalu dang pangalasing ding propeta, e ra na la akuang aintindian detang vision a parala na ning Dios. Antimu rin, tutu la namang malasing ding pari, inya e ra na la akuang alulutas ding kasung lalapit da ring tau karela.

⁸ Mitmu lang suka ding lamesang karelang gagamitan; ala kang akit a dake malinis.

⁹ Ngarang magsalitang laban kanaku, Ninu wari i Isaias? Ninu wari ing isipan nang tuturu na? Ninu ing mangailangan king tuturu na? Mangaintulid mu ing turu na karing anak a bayung awat king susu.

¹⁰ Pagnasan nang ituru na katamu letra por letra, gulis por gulis, at lisyun por lisyun.

¹¹ Nung e kayu bisang makiramdam kanaku, gamitan na la ning Dios ding dayuan a magsalita king amanung e yu aintindian ban mika lisyun kayu.

¹² Kapaynawan at kanawan ing babie na para kekayu, oneng e ye pekiramdaman.

¹³ Iti ya ing sangkan nung inya ing Ginu tuturuanan na kayung letra por letra, gulis por gulis, at lisyun por lisyun. Mitakid kayu kanita king balang lakbang yu. Masugat kayu, masaluput, at mabihag.

¹⁴ Inya ikayung lalaking palalu a sasakup karing memalen keti Jerusalem, pakiramdaman yu ing sasabian na ning Ginu.

¹⁵ Ipagmaragul yu ing mika kasunduan kayu king kamatayan at ikua yung mekikasundu king tuknangan da ring mete. Sisiguradu kayu king miligtas kayu king kasiran potang datang na uling manalig kayu king kalaraman at kapamiraitnan tungkul king kaligtasan yu.

¹⁶ Iti ya ngeni ing sasabian na ning Ginung Dios: Mibibili kung matatag at matibe pundasyun king Zion. Karin ke ibili ing matibe batung paniuluk nung nu la makasulat deting amanu, Ing matibe kasalpantayanan mapibabata ya naman.

¹⁷ Ing hustisia ya ing paniukad kaniting pundasyun, at ing katapatan ya ing patulu na. Mitange ing sablang kalaraman a panaligan yu king masikan a uran-yelu at ing albug ya ing paniud king kapanatagan yu bili.

¹⁸ Milako ya bisa ing kasunduan a kekayung gewa king kamatayan at payalan keng ulaga ing kasunduan a kekayung gewa king tuknangan da ring mete. Mayakua kayu ngan potang magus na ing kasiran.

¹⁹ Salakayan na kayung alang patugut. Sukat yung arapan iti king aldo at bengi balang abak. Magdalang bayung pitatakutan ing balang bayung mensahing ibat king Dios!

²⁰ Mangari kayu king lalaking sasabian na ning kasebian a pilit bisang matudtud king pagkeran a milalu kakuyad; e ya makayatiat at e ne atakpan ing katawan na king ulas a malati.

²¹ Makilaban ya ing Ginu antimo ing depat na keta king Bunduk ning Perazim at keta king kapatagan ning Gibeon ban daptan na itang pagnasan nang daptan; agyamang tune makapagtaka iting dapat na. Arian na ing obra na, ing obrang bukud mung ya ing makibalu.

²² Inya e yu sa kaylian iting babala a babie ku kekayu! Nung gawan yung pikaylian, lalung maging masakit para kekayu ing makatakas. Dimdam ku na ing inari na king lub na ning Ginung Dios a Mayupaya king lasakan ne ing mabilug a bansa.

²³ Makiramdam kayu king kanakung sabian; pakaintindian yu ing sasabian ku kekayu.

²⁴ Alang ortelanung pane nang pane sasarul king marangle na at magsadiang tamnan na.

²⁵ Kabud asadia na ing gabun, salbaganan neng bining anis at komino. Tanam yang trigu at sebada karing dayus at tanam yang aliwang bini karing pibalingan da ring dayus.

²⁶ Balu nang daptan ing obra na uling tiru ne ning Dios.

²⁷ E ya kapilan man gagamit maragul a pamalupalu ban palual na la butul ding anis o ding komino; gagamit yang kasantingan a pamalupalu para kareti.

²⁸ E na sisiran ing binutil ning trigu king kapamilatan na ning alang tuknang a pamandara. Balu nang daran ing trigu king kapamilatan na ning pamidalan nang karitun babo na ban e masira ing binutil.

²⁹ Manibatan iting sablang kabiasnan king Ginung Mayupaya. Makapagtaka la ding paralan na at makapagmulala ing kabiasnan na.

29

¹ Makalunus ya ing Jerusalem, ing mismung altar ning Dios. Makalunus ya ing siudad a pipagkampuan nang David! Paburen yang mika pamagpiesta at pamagsaya kilub ning metung o adua pang banua,

² at kaybat na nita parala neng kasiran ing Dios king siudad a mayayaus Ing altar ning Dios. Mika pamanangis at kalungkutan at maging metung yang balamu altar a mitmung daya ing mabilug a siudad!

³ Lusuban ne ning Dios ing siudad; kubkuban ne at luban.

⁴ Maging anti yang multu ing Jerusalem a pilit bisang magsalita ibat king lalam ning gabun; siwalang mekulub a manibat libutad ning alikabuk.

⁵ Jerusalem, ding sablang dayuan a lumusub keka maging anti lang alikabuk a mipaid at mitange lang anting are ding makatakut dang sundalus. King metung mung saglit at king e asahan

⁶ iligtas na ka ning Ginung Mayupaya. Parala yang matning duldul at masikan a ayun. Paratang yang alisus at mikakalabkab a api.

⁷ Kanita ding sablang sundalung pakasandata da ring bansang lulusub king siudad ning altar ning Ginu, ding sabla rang sandata at miyayaliwang kagamitan, ing sablang iti matdang antimong paninap; mengari mung guniguni busal ning kabengian.

⁸ Mitipun la ding sablang bansa ban lumusub king Jerusalem; mangari la king metung a taung danupan a maninap king mamangan ya, oneng kagising na danupan ya o kaya mangari ya king lalaking mamamate king kau a maninap king miminum ya, oneng kagising na malangi ya asang.

⁹ Sulung at magpakamangmang kayu! Sige, magpakabulag kayu! Magpakalasing kayu agyang alang alak! Lumakad kayung pasepase agyang e kayu minum kapatak mu mang alak!

¹⁰ Gewa na kayung mitutundu ning Ginu at makasadiang matudtud malalam. Ding peka mata na ning balen ila ding propeta, oneng tikpan na la mata ning Dios.

¹¹ Mipampan karing kekayung kamalayan ing kabaldugan da ring vision a ikit yu; mangari kayu king librung makasara. Nung idala ye king metung a biasang mamasa at aduan yu ing basan ne kekayu, sabian na king e ne abasa uling makasara ya.

¹² Nung idala ye king e biasang mamasa at aduan yu king basan ne, sabian na king e ya biasang mamasa.

¹³ Ngana ning Ginu, Sasabian da reting tau king sasamban da ku, oneng ala lang kabaldugan ding amanu ra at marayu la kanaku ding pusu ra. Alang keliwan ing karelang relihiun karing tuntunan at piyuyugalian da ring tau, at makagyu mu ing minemoria da la.

¹⁴ Inya gawa kung bage pagmumulalan king arapan da, pagmumulalan at makapaniglo. Mawala ing kabiasnan da ring mangabiasa at mawalang kabaldugan ing pamanyuri da ring biasang sumuri.

¹⁵ Makalunus la detang lilihim da king Ginu ing karelang tatangka. Daraptan da king pasalikut ing karelang pamalak at isipan da king alang manakit o makibalu king daraptan da.

¹⁶ Babaligtad da ing sabla! Isanu wari ing mas maulaga: ing taung gagawang kuran o ing pila? Asabi na wari ning metung a bage a gewa na ning tau ing anti kaniti: E mu na ku man gewa? O asabi na kaya, E mu naman balu ing daraptan mu?

¹⁷ Antimo ing sasabian na ning kasebian, E lumuat maging marangle ya ing makapal a gubat at maging gubat ya ing marangle.

¹⁸ Potang datang ne ing aldong ita damdaman de ring maklak ing librung mabasa at mibuklat la mata at manakit la ding bulag a mabibie king karalumduman.

¹⁹ Pasibayu rang akit ding pakakalulu at taung mapagkumbaba ing tulang babie na ning Ginu, ing banal a Dios ning Israel.

²⁰ Ya na ita ing kawakasan da ring mapanalipit karing aliwa at e kikilala king Dios. Mate ya ing ninumang makasalanan.

²¹ Gisanan na lang paten ning Dios detang mamanyirang dangalan karing aliwa, detang sasabat king pangaparusan da ring kriminal, at detang mamigawang salita ban e la mirinan hustisia ding taung ating katuliran.

²² Inya ngeni, ing Ginu, ing Dios ning Israel a migligtas kang Abraham king kaligaligan na, sasabian na, O memalen ku, e na kayu mibili pa king kamarinayan at e na la mangalare king dine ding lupa yu.

²³ Potang akit yu na la ding anak a ibie ku kekayu, kanita yu kilalanan king aku ing banal a Dios ning Israel; galangan yu ku at dukuan.

²⁴ Mabiasa lang makaintindi ding taung mangmang at tumula la ding parating tututul king pangaturuanan da.

30

¹ Nganang migsalita ning Ginu: Makalunus na la ding manimuna na ning Juda uling mig-rebeldi la kanaku. Tutukian da la ring pamalak a e ku gewa at makikasundu la laban king kaburian ku; mipatung-patung na ing karelang pamikasala.

² King alang kapaintulutan kanaku, pupunta la Ehipto ban maniawad saup. Buri da king ing Ehipto ya ing magdipensa karela; inya bibili ra ing kapanaligan da king ari na ning Ehipto.

³ Oneng ala yang akarapat ing ari na ning Ehipto para asaupan na la at miyangganan mu ing pamagdipensa na king kamarinayan.

⁴ Agyang miras na la ding karelang pekakatawan karing siudad na ning Zoan at Hanes ning Ehipto,

⁵ sumisi la ding memalen na ning Juda ba't menalig la king bansang e ra apanaligan, ing bansang e makaibie king saup a panenayan da.

⁶ Iti ya ing mensahi na ning Dios tungkul karing animal king disyerto ning mauli: Maglakbe la ding pekakatawan libutad na ning mapanganib a lugal nung nu la manuknangan ding leon at nung nukarin ating kamandagan a ubingan at sulasulapo dragon. Sasakenan da lang mangamal a regalu ding karelang asno at kamelyu ban ibie king bansang e naman makaibie nanumang saup karela.

⁷ Alang ulaga ing saup a ibie na ning Ehipto. Inya pemalagyuan keng Ing Dragon a alang Akarapat ing Ehipto.

⁸ Sinabi na kanaku ning Dios king isulat ku king libru nung nanu lang uri ding tau ban iti magsilbing katunayan kapilan man tungkul king dapat dang e mayap.

⁹ Parati lang lalaban king Dios, parating maglaram at e makiramdam karing turu na ning Ginu.

¹⁰ Patuknangan da lang magsalita ding propeta. Ngara, Tuknang kayung magsalita kekami tungkul king matulid. Ing isalita yu kekami ya itang kapad ming daramdaman. Paburen yung mibiebie kami karing mali ming kapamalakan.

¹¹ Mabating kayu at patugut kayung babie pangabala king lakad mi. E mi ya buring daramdaman ing tungkul king kekayung banal a Dios ning Israel.

¹² Oneng ini ya ing sasabian na ning banal a Dios ning Israel: Pikakasaman yu ing kanakung sasabian kekayu oneng ing katampalasanan at kapamiraitnan ya ing kekong panaligan.

¹³ Uli na niti, mikasala kayu. Mengari kayu ngeni king matas a pader a ating abtak a makaba; kabud na kayu mibagsak.

¹⁴ Mangabalbal kayung mangalati anti ing kuran; uli na ning milalu ya pangasira ala kang akuang kapirasu mumang kapsa a malyaring gamitan king pamanguang mapaling baya o apanialuk mumang danum king talaga.

¹⁵ Ing Ginung Dios, ing Banal ning Israel, sasabian na karing tau, Magbalik kayu at manalig kayung pasibayu kanaku. Kanita maging masikan kayu at maging panatag. Oneng e yu buring daptan iti!

¹⁶ Bagkus ing daraptan yu ya ing isipan yu ing tumakas kayu karing kalaban yu kapamilatan na ning pamaniake yu karing mabilis a kabayu. Wa, matulid pin ing tumakas kayu! Isipan yu king mabilis la ding kekayung kabayu, oneng mas mabilis la ding tagal kekayu!

¹⁷ Mulayi la ding libu kekayu kabud akit ye ing metung mung kalaban at managyu na la ding limang kalaban ban mamulayi kayu ngang tumakas. Alang mitagan kekayu subali mu ing tulus ning bandera a makatasak babo ning bunduk-bundukan!

¹⁸ Makanyan man manenaya yang maging malam a lub kekayu ing Ginu. Makasadia yang malunus kekayu uling parati yang darapat king matulid. Mapalad la detang manalig king Ginu.

¹⁹ E na kayu pasibayung tumangis, ikayung memalen a manuknangan king Jerusalem. Mapaglunus ya at saupan na kayu, nung pasaup kayu king Ginu.

²⁰ Ipaintulut na ning Ginu ing dumalan kayung kasakitan, oneng atyu ya mismu karin ban turuanan na kayu at e yu ne kailangan pang panintunan uling e na sasalikut ing sarili na.

²¹ Nung malili kayu king dalan, king banda yu mang wanan o kayli, damdaman yu ing siwala na kagulutan yu. Sabian na, Oyni ing dalan. Keni kayu dumalan.

²² Kuanan yu la kanita ding kekayung idolo a tilbug king pilak at gintu at iyugse yu lang anting basura. Ngayung sumabi, Mabating kayu king arapan ku!

²³ Paratang yang uran ing Ginu kapilan mang mananaman kayu ban paragulan na la at dinan na kayung dakal a pupul at mika malabung lang pastulan ding kekayung baka.

²⁴ Mangan la king masanting diling dikut ding baka at asno a gagamitan yu king pamaniarul king marangle.

²⁵ King aldo a mabihag la ding kuta da ring kalaban yu at mate ding memalen da, magus la ding dakal a batis manibat king balang bunduk at bunduk-bundukan.

²⁶ Maging masala ya ing bulan anti ing aldo; maging pitu ne mang besis kasala ing aldo king sadia nang sala, anti la mong piyabe ing sala da ring pitung aldo king patingapun! Iti ngan mapalyari king aldo ing Ginu bendahan na la at pakayapan ding sugat a pepasari na karing taung pinili na. fig,,,,,Mangan la king pekamasanting diling dikut...,(30:24)fig*

²⁷ Mayakit king makarayu ing upaya na at ligaya ning Dios. Papakit na ning api at ning asuk ing mua na. Magsalita ya at milalablab lang anting api ding amanu na.

²⁸ Parala ne ing angin arapan na anting albug a papaniud king sablang bage. Malalasak la ding balang dalanan nang bansa at angganan na ing e mayap dang tangka.

²⁹ Oneng ika o bansang pinili na ning Dios, maging maligaya ka at magkanta ka antimo ing daraptan mu king kabengian na ning metung a sagradung selebrasyun. Maging masaya kang anti detang lalakad kabang babagayan na la ning plauta ngening papunta la king Templo ning Ginu, ing talaingat na ning Israel.

³⁰ Ipaintulut na ning Ginu king balang metung ing damdaman na ing makamal nang siwala at iparamdam na ing upaya na ning mua na. Mika ating malablab a api, matuling a lulam, makapal a uran-batu at uran a masikan.

³¹ Mitakutan la ding tau Asiria kabud damdaman de ing siwala na ning Ginu at panamdaman da ing bigsikan na ning pamamarusa na.

³² At kabang babarugan na lang ulit-ulit ning Ginu ding tau Asiria, bagayan na ne man ning balen a pinili na king musika da ring tambul at alpa. Ing Dios mismu ya ing lumaban karing tau Asiria.

³³ Maluat neng makasadia ing metung a lugal nung nu ya silaban ing ari na ning Asiria libutad ning maragul a api. Malalam ya at malualas at makatambak ing dakal a dutung; labulan na ning Ginu king pangisnawa nang mikakalukung api at mitau ing dutung.

31

¹ Makalunus na la detang pupunta king Ehipto ban maniawad saup! Manalig la king maragul nang puersa militar ning Ehipto: karing kabayu, karing dakal dang karung panggera at mangasikan a sundalus. Oneng e na la man manalig king Ginu, ing banal a Dios ning Israel, ni maniawad kasaupan king Dios.

² Balu na ing daraptan na! Parala yang kasiran. Tututuanan na ing babala nang parusan la ding taung e mayap at pati na detang magdipensa karela.

³ E la dios ding tau Ehipto; tau la mu! E la mayupaya ding kabayu da uling mistula la mung animal! Malaso ya ing bansang masikan potang kimut ya ing Ginu at mibagsak ya naman ing mainang bansang sasaupan na. Parehu lang magisan.

⁴ Ngana kanaku ning Ginu, Nung makananung e re atabi ding pastul ing leon king siping ning animal a apate na, agyang bulyon de at kulisakan, makanyan munamang alang makatabi kanaku, ing Ginung Mayupaya, king pamagdipensa ku king Bunduk ning Zion.

⁵ Nung makananu yang sulasulapo ing ayup babo ning sale na ban ipagdipensa na la ding malutub na, aku, ing Ginung Mayupaya, makanyan kia namang ipagdipensa at iligtas ing Jerusalem.

⁶ Ngana ning Dios, Memalen ning Israel, mikasala kayu kanaku at lebanan yu ku. Oneng ngeni, magbalik kayu kanaku!

⁷ Daratang ne ing panaun potang ikayu mismu iyugse yu la ding mekapalpikasalang idolo a gewa yu king pilak at gintu.

⁸ Malasak ya king gera ing Asiria, oneng e king upaya na ning tau. Tumakas la king labanan ding tau Asiria at maging ipus la ding karelang kayanakan a lalaki.

⁹ Mulayi ya ing ari da uli na ning takut, at mitakutan la ding manimuna, at lakuan da la ring karelang bandera. Migsalita ya ing Ginu, ing Ginung sasamban da karin Jerusalem at maki aping mitatau para karing ain-sakripisyu.

32

¹ Datang mu rin ing aldo a mika metung a mag-aring mitmung katapatan, at mika dakal a manimuna ning bansa a mamahalang kayabe ing hustisia.

² Mangari yang salilungan king angin ing balang metung karela, at lugal a salilungan king panaun ding bagyu. Mangari la karing batis a mamagus libutad ning disyerto; mangari la king anino na ning maragul a batu a babie salilung king malanging gabun.

³ Makabuklat la ding mata ra at balugbug para king pamangailangan ding tau.

⁴ E la milako kapibabatan nune magobra lang ating ganaka at sabian dang tapatan ing buri dang sabian.

⁵ Ala metung mang misip king kagalang-galang ya ing mangmang o sumabi king tapat ya ing taung mapaglinlang.

⁶ Magsalita yang kamangmangan ing taung mangmang at mimisip yang e mayap a bage daptan na. Mistulang insultu king Dios ing daraptan na at isipan at e na la dirinan pamangan ding danupan o inuman ding kakau.

⁷ E ya mayap ing taung mapaglinlang at darapat yang e mayap a bage; mimisip ya ban pakisiran na la ding pakakalulu king kapamilatan na ning pamaglaram at ban e ra akua itang mangaintulid karela.

⁸ Oneng darapat ya king mitmung katapatan ing taung maki dangal at tatalakaran nang matatag itang matulid.

⁹ Ikayung babaing mabibie tiaman-tiaman alang problema, makiramdam kayu king kanakung sasabian.

¹⁰ Mapalyaring panatag kayu bili ngeni, oneng lungkut kayu king daratang a banua; e yu na balu kanita ing sukat yung daptan uling ala kayung pupulan a ubas.

¹¹ Meging mayan ing bie yung delanan; e kayu mika problema oneng ngeni, galgal kayu king takut! Ilako yu ing piblas yu at mitali kayung langgotsi karing awakan yu.

¹² Dugdugan yu la ding salu yu king lungkut uling mesira la ding matabang marangle at ding mulahan ubas;

¹³ dikut at tanaman a masuksuk ing tutubu king gabun na ning kanakung balen. Tumangis kayu para karing sablang pibalebale a sadiang mitmung taung masaya at para king siudad a sadiang masaya.

¹⁴ Lakuan de ing palasyu at lubus deng lakuan ing siudad a mitmung tau. Manatili lang lasak-lasak king kapilan pa man ding bale at ding kuta a peka dipensa da. Malyap lang asno ding gumala karin, at karin la manakit pipanyibsiban dang dikut ding tupa.

¹⁵ Oneng misan pa itubud ne kekatamu ning Dios ing espiritu na. Maging mataba ing gabun a mipaburen at palto lang masanting a pupul ding marangle.

¹⁶ Mag-ari ing katuliran at ing hustisia king balang suluk na ning bansa.

¹⁷ Mika kapayapan at kapanatagan a lub king alang angga uli na ning daptan na ning metung at metung itang matulid.

¹⁸ Maging payapa la at panatag ding pibalebale da ring taung pinili na ning Dios at e na la mika problema pa. (

¹⁹ Dugpa ing uran-lipat karing gubat at malasak ya ing siudad.)

²⁰ Tumula ya ing metung at metung uli na ning dakal a danum para karing tanaman at payapang pastulan para karing asno at baka.

33

¹ Makalunus la ding kekaming kalaban! Menako la at migtaksil, agyang e la kepanakawanan o mipagtaksilan. Oneng miyangganan ing panaun na ning karelang pamanako at pamagtaksil uling maging biktima na la naman ning pamanako at kataksilan.

² Ginu, malunus ka kekami. Binili mi ing kapanaligan mi keka. Ingatan mu kami aldo-aldo at iligtas king panaun ning kaligaligan.

³ Ngening ika ing makilaban para kekami tatakas la ding bansa king inge ning labanan.

⁴ Mesamsam at meyakua ing pibandian dang balamu delanan da ring durun.

⁵ Sakdal ya degulan ing Ginu! Sasakupan na ing sabla. Katmuan neng hustisia at katapatan ing Jerusalem

⁶ at dinan neng kapanatagan ing bansa. Parati na lang ingatan ding taung pinili na at dinan na lang beluan at kabiasnan. Ing pekamaragul king pibandian da ya ing takut king Ginu.

⁷ Papiglo lang pasaup ding lalaking matapang! Manangis lang e makanyan-kanyan ding pekakatawan a magkapilit mitatag kapayapan.

⁸ Ala nang daralan karing dalan uling tutu lang mapanganib. Malalabag la ding kasunduan at e la matutupad ding pitanguanan. Ala nang metung mang taung kagalang-galang.

⁹ Alang makatanam king gabun at likuan deng makatiwangwang. Melangi la ding gubat ning Lebanon; mengari yang disyerto ing mataba nang Kapatagan ning Sharon at malagas la ngan a bulung ding tanaman king Bashan at king Bunduk ning Carmel.

¹⁰ Nganang sasabi ning Ginu karing bansa, Ngeni kimut na ku. Ipakit ku nung nu anti ku kayupaya.

¹¹ Ala lang ulaga ding gagawan yung planu at alang kabaldugan ing sablang daraptan yu. Ing mismung sarili yu ya ing sisiran yu!

¹² Malaso kayung anti ding batung durulukan da ban gawan api at anting suksuk a maging abu.

¹³ Paburen yung damdaman da ring atyu king malapit at marayu ing depat ku at kilalanan da ing upaya ku.

¹⁴ Gagalgal la king takut ding makasalanan nang memalen ning Zion. Ngarang sasabi, Mengari ing kayatulan na ning Dios king aping mikakalukung alang kapupusan. Ninu kekatamu ing malyaring miligtas king aping anti kanyan?

¹⁵ Miligtas kayu nung sabian yu at daptan ing matulid. E yu gagamitan ing upaya yu king pamaglinlang karing pakakalulu at e kayu tatanggap suhul. E kayu makiabe karing magplanung makamate kalupang tau o darapat karing bage a e mayap.

¹⁶ Kanita mipala kayu at maging panatag a bili; anti kayu mong atyu kilub na ning matibe kuta. Mika sapat kayung pamangan at danum a inuman.

¹⁷ Pasibayu yeng akit ing metung a ari a manimunang mitmung dangalan king bansang mamabut king marayung lugal.

¹⁸ Maging anti na mung metung a paninap ing sadia yung takut karing dayuan a manyingil buis at karing ispia.

¹⁹ E yu na la akit pa kapilan man ding palalung dayuan a magsalita king amanung e yu aintindian!

²⁰ Lumawe kayu king Zion, king siudad nung nu la gagampanan ding banal a selebrasyun. Lumawe kayu king Jerusalem! Metung yang payapang lugal a sukat panuknanganan! Mangari ya king metung a toldang pilmi pangatalakad, e la mababagut kapilan man ding tulus na at e la mapapatlud ding lubid na.

²¹ Ipakit na kekatamu ning Ginu ing ligaya na. Manuknangan tamu lele da ring malapad a ilug at batis, oneng alang malyaring maglayag kareti karing barku da ring kalaban.

²² Mayala lang kabaldugan ding sablang layag at lubid da reting barku; e ra akuang miladlad! Samsaman mi ing sablang pibandian da ring kalaban a pakasandata. Milalu karakal ing pibandian inya manikua lang dake agyang ding lumpu. Ing Ginu mismu ya ing maging ari tamu; panimunan na katamu at ingatan.

²³

²⁴ Ala metung man a manuknangan king balen tamu a malyaring saingsing uli na ning kapanamdaman na at mipatawaran ing sablang kasalanan.

34

¹ Lumapit kayu, ikayung sablang memalen da ring bansa! Mitipun-tipun kayu at makiramdam. Paburen ya ing mabilug a yatu at ding sablang manuknangan kaniti ing lumapit la keni at makiramdam.

² Mua ya ing Ginu karing sablang bansa at karing sabla rang sundalung pakasandata. Sildak na ne ing atul a kamatayan.

³ E la mikutkut ding mete ra, nune manatili lang malaso at muluk at maging malare la ding bunduk uli na ning daya ra.

⁴ Manabu ya ing aldo, ing bulan, at ding batuin, at malaso lang anti ing alikabuk. Lumbug ya ing banua; maging anti yang dase a milululun at manabu la ding batuin anting bulung ning ubas o ning tanaman a higera.

⁵ Sidia na ne ning Ginu ing espada na karin king banua at tabakan na ne ngeni ing Edom, ding taung miyatulan nang kasiran.

⁶ Mibalutanan ya ing espada na king karelang daya at taba kalupa da ring daya ra at taba ding biserung tupa at kambing a misasakripisyu. Iyain na ning Ginu iting ain-sakripisyu king siudad ning Bozra. Daptan na iting maragul a pamakamate king bansang Edom.

⁷ Mibulang la ding tau nung makananu lang mibulang ding malyap a toro at baka, at lare ya ing yatu king daya at mitakpan ya king taba.

⁸ Iti ya ing panaun a iligtas ne ning Ginu ing Zion at sambutan na la ding kalaban na.

⁹ Maging alketran la ding ilug ning Edom at maging asupri ing gabun. Mitau yang anting alketran ing mabilug a bansa.

¹⁰ Mitau ya aldo at bengi at kapilan man e tuknang paitas ing asuk na. Muling alang kabaldugan kabang-kaba ing gabun at ala nang tau a pasibayung maglakbe karin.

¹¹ Ding sumakup king bansa ila ding kulayu at ding awak. Gawan neng pasibayung alang kasilbian kalupa na inyang bayu ing pamaglalang ning Ginu.

¹² Alang aring manibala kaniting bansa at lumbug la ngan ding sablang manimuna.

¹³ Dikut at tanaman a masuksuk ing tumubu karing palasyu at karing pakapader a balen. Ding manuknangan kareti ila ding animal a asung-gubat at ding ayup a kulayu.

¹⁴ Malyap lang animal ding mag-galagala karin at demonyu la ding mikukulaitanan. Datang ya ing demonyu na ning kabengian a lalawe lugal ban pipagpaynawan na.

¹⁵ Gawa lang sale karin ding kulayu; mangebun la at iyapsa da la't sesen ding malutub da. Datang lang tunggal-tunggal karin ding ayup a buitre at karin la mitipun. fig,,,,,Ding sumakup king bansa ila ding kulayu at ding awak.,(34:11)fig*

¹⁶ Saliksikan ye ing libru ning Ginu para karing mabibie melalang at lawan yu nung nanu ing sasabian na. Alang mabating metung man kareting melalang at e ya milako kaparis ing metung man karela. Uling makanyan nang inutus ning Ginu; ya mismu tipunan na la't piyabe-abayan.

¹⁷ Ing Ginu ya ing mamirake king gabun at ibie na king balang metung karela ing dake na. Manuknangan la king lugal a ita king sablang panaun at maging bandi re king kapilan pa man.

35

¹ Ing disyerto magsaya ya, at karing gabun a alang ulaga lunto lang sampaga.

² Ing disyerto magkanta ya, at kulisak king tula; maging anti ya karing Bunduk ning Lebanon king lagu na, at maging mataba ya anti ding marangle ning Carmel at Sharon. Akit ning balang metung ing ligaya ning Ginu; akit da ing degulan na at upaya.

³ Dinan yu lang sikanan ding gamat a mapagal, at ding tud a gagalgal king pamangalambut.

⁴ Sabian yu king ninumang mimina lub, Siknangan mu ing lub mu at e ka tatakut! Daratang ya ing Dios ba na kang iligtas, datang ya ban ding kekang kalaban keya lang parusan.

⁵ Manakit la ding bulag, at makaramdam la ding maklak.

⁶ Ding pile lundag la at terak, at kulisak la ding pipi king tula ra. Magus ing danum libutad ning disyerto;

⁷ maging dagat-dagatan ing mapaling balas, at kumatmu yang sibul ing malanging gabun. Karing lugal a sadia rang tuknangan ding asung-gubat, dikut at timbu ing tumubu.

⁸ Mika malualas a dalan karin a mayaus Ing Dalan ning Kabanalan. E makadalan karin ing ninumang makasalanan ni makapaglinlang ding mangmang karing daralan.

⁹ Karin alang mayakit a leon ni makalabas ding animal a mitmung bigsikan. Detang linigtas ning Ginu ilang dumalan king panuli ra karing karelang tuknangan.

¹⁰ Miras la Jerusalem king mitmung tula, kakanta at kukulisak king saya. Maging maligaya la kapilan man, lungkut at kaligaligan karela mawala ngan.

36

¹ Kanitang kalabing apat a banua na ning pamag-ari nang Hezekia king Juda, i Senakerib a ari na ning Asiria linusub ya karing makakuta nang siudad ning Juda at abihag na la reti.

² Kaybat na nita, inutus na king matas diling pamuntuk na king mako ya manibat king Lakis at munta ya Jerusalem kayabe ding dakal a sundalus ban pasukuan ne ing Aring Hezekia. Migkampu ya ing pamuntuk king dalan nung nu la magobra ding gagawang tela; lele ning paligi a agusan ning danum a manibat king depositung danum babo.

³ Atlu lang tau Juda ding dinatang ban makikit kaniting pamuntuk. Ing metung kareti ya i Eliakim a anak nang Hilkia at mamahala king palasyu, i Sebna, ing kalihim, at ing pamuntuk a talaingat karing kasulatan a milagyuan Joa a anak nang Asaf.

⁴ Sinabi na karela ning pamuntuk a tau Asiria king buri nang abalu ning ari ing sangkan obat masikan ya lub i Aring Hezekia.

⁵ Ngana, Isipan yu galang king maygit la sikanan ding amanu kesa king gelingan at puersa na ning militar? Ninu ing babalakan yung sumaup kekayu king pamaglaban yu kanaku?

⁶ Ing Ehipto ya ing asahan yung sumaup kekayu? Oneng mengari ya mung balbal a timbu iting asahan yung gawan tukud; sugatan nia mu gamat ing gamat yu. Makanyan ya kabilian ing ninumang manalig king ari na ning Ehipto.

⁷ Ngana pa ning pamuntuk a tau Asiria, Magkang sabian yu kanaku king manalig kayu king Ginung kekayung Dios. Ding matas nang lugal at altar ila mismu ding lesak nang Hezekia kanitang inutus na karing memalen ning Juda at Jerusalem king samba la king metung mung altar.

⁸ Amunan da kayu king lagyu na ning ari ning Asiria. Dinan da kayung aduang libung kabayu, nung manakit kayung taung sake kareti.

⁹ E kayu man malyaring ipakilupa king mababang diling manimuna na ning Asiria at makanyan man asahan yu pa king Ehipto king paralan na kayung karung panggera at sundalus a pakasake kabayu!

¹⁰ Pota galang isipan yu king lisuban ke ing bansa yu at lesak ke a e ke kasaup ing Ginu? Ing Ginu mismu ya ing sinabi kanakung lusuban ke at lasakan ing bansa yu.

¹¹ Ngarang mekibat di Eliakim, Sebna, at Joa king pamuntuk, Nung malyari sana magsalita kayung Aramaico uling makaintindi ke king salitang Aramaico. E yu ke pakisabian king Hebreo uling makiramdam la ding sablang taung atyu king lele ning pader.

¹² Ngana ning pamuntuk, Isipan yu galang king tiburan na ku ning ari mi ban sabian ku ngan iti bukud mung kekayo at king ari yo? Ali, magsalita ku naman para karing taung pakalukluk king pader a e malyaring e mangan king dinat da at e minum king imi ra antimo ikayu.

¹³ Kanita tinalakad ya ing pamuntuk at migsalitang masikan king salitang Hebreo, Makiramdam kayu king pasabi na kekayu ning ari na ning Asiria.

¹⁴ Sasabian na king e yu paintulutan ing linlangan na kayung Hezekia. E na kayu aligtas Hezekia!

¹⁵ At e yu paintulutan ing ayagkat na kayung manalig king Ginu. E yu isipan king iligtas na kayu ning Ginu at king sabatan na la ding sundalus ning Asiria ban e ya mabihag ing kekayung siudad.

¹⁶ E ye pakiramdaman i Hezekia. Iyutus na kekayu ning ari na ning Asiria king lumual kayu king siudad at sumuku. At paintulut na ing mangan kayu karing ubas a bunga da ring sarili yung mulahan at karing bunga da ring kekayung tanaman a higera at minum karing sarili yung talaga

¹⁷ angga king alipat na kayu ning ari king bansa a kalupa na ning kekayu, nung nukarin atin munamang mulahan ubas a babie alak at ating trigung malyari yung gawan tinape.

¹⁸ E ye paintulutan i Hezekia ing alinlang na kayung misip king iligtas na kayu ning Ginu. Ikua da na la waring aligtas ding dios da ring aliwang bansa king ari na ning Asiria ding karelang bansa?

¹⁹ Nukarin la ngeni ding dios na ning Hamat at Arpad? Nu la karin ding dios na ning Sefarvaim? Atin waring metung man kareti a sinagip king Samaria? Aten?

²⁰ Kapilan na mo milyari king linigtas ne ning metung karing dios da reting sablang bansa ing karelang bansa king kekaming ari? Ba't mo isipan yu ngeni king aligtas ne ning Ginu ing Jerusalem?

²¹ E la bubulad ding tau at e la mekibat kataya mu mang amanu antimo ing penabilin na karela ning Aring Hezekia.

²² Kaybat na nita, ginabak da ri Eliakim, Sebna, at Joa ing imalan a karelang susulud uli na ing lungkut da at saka la minuli at minie lang ulat king ari tungkul king sinabi na ning pamuntuk a tau Asiria.

37

¹ Inyang dimdam nang Aring Hezekia ing ulat da, ginabak na ing imalan a susulud na uli na ning lungkut na; misulud yang magaspang a imalan at minta ya king Templo ning Ginu.

² Tinubud ne i Eliakim, ing opisyal a manibala king palasyu, i Sebna, ing kalihim ning palasyu, at ding makatua karing pari kang propeta Isaias a anak nang Amoz. Makasulud la namang imalan a magaspang.

³ Iti ya ing mensahi a penabilin nang ipayabut da kang Isaias: Ing aldong iti aldo ne ning kaligaligan; mipaparusan tamu at mibili king kamarinayan. Mengari tamu king babaing manganak, oneng e ne abait ing anak uli na ning maina ne.

⁴ Tinubud ne ning ari na ning Asiria ing matas diling opisyal na ban lapastanganan ne ing Dios a mabie. Mananu na sanang damdaman na la ning Ginung kekang Dios deting kalapastanganan at parusan na la detang migsalita kareti. Inya ipanalangin mu la king Dios ding mitagan karing kekatamung memalen.

⁵ Inyang tinggap neng Isaias ing mensahi na ning Aring Hezekia,

⁶ pepayabut na ing anti kaniting pakibat: Sasabian na keka ning Ginu king e ka sukat mitatakutan king sasabian da ring tau Asiria king ing Ginu e na ka agyung iligtas.

⁷ Gawa yang paralan ing Ginu ban miras ing balita king ari ning Asiria at iti ing maging sangkan na ning pamagbalik na king sarili nang bansa. At paintulut na ning Ginu king mate ya king sarili nang bansa king kapamilatan na ning espada.

⁸ Abalitan na ning opisyal a tau Asiria king meko ne king Lakis ing ari na at makilaban ya king makasiping a siudad na ning Libna. Inya tinaglus ya karin ban mangutang king ari.

⁹ Miras ing balita karing tau Asiria king ding sundalus na ning Ehipto a panimunan nang Aring Tirhaka ning Etiopia daratang la ban lumusub karela. Inyang dimdam na iti ning ari peparala yang sulat king Aring Hezekia na

¹⁰ ning Juda ban sabian na iti: Sinabi na keka ning dios a kekayung panaligan king e kayu manabu karing gamat ku, oneng e ka sa pailinlang kaniti.

¹¹ Mekad abalitan mu na nung nanu ing daraptan na ning ari ning Asiria karing bansa a birian nang lasakan. Isipan mu galang king miligtas ka?

¹² Ding makatua ku ila ding linasak karing siudad na ning Gozan, Haran, at Resef, at ila ding mekamate karing memalen na ning Beteden a manuknangan king Telasar. Ala metung man karing dios da ing mekapagligtas karela.

¹³ Nu la karin ngeni ding ari da ring siudad na ning Hamat, Arpad, Sefarvaim, Hena, at Iva?

¹⁴ Kinua neng Aring Hezekia ing sulat karing tubud at binasa ne. Kaybat minta ya king Templo; binili ne ing sulat king arapan na ning Ginu,

¹⁵ at nganang menalangin,

¹⁶ O Ginung Dios ning Israel a makalukluk king tronu babo da ring kerubin, ikang bukud ing Dios a sasakup karing sablang kayarian keti king yatu. Ika ing linalang king yatu at king banua.

¹⁷ Ngeni, Ginu, pakiramdaman mu kami sana at lawan mu ing mangapalyari kekami. Pakiramdaman mu, O Dios a mabie, ing sablang kalapastanganan a sasabian na kekang Senakerib.

¹⁸ Ikami ngan, Ginu, balu mi king ding ari na ning Asiria ilang menlasak karing dakal a bansa at likuan da lang makatiwangwang,

¹⁹ at minyilab karing karelang dios a e naman tune dios, nune larawan la mung gewa ra ding gamat ding tau king dutung at king batu.

²⁰ Ngeni, O Ginung kekaming Dios, iligtas mu kami sana karing tau Asiria ban akilala da ring sablang bansa king ika mung bukud ing Dios.

²¹ Kanita peparala yang mensahi i Isaias kang Aring Hezekia; sasabian na ing pakibat na ning Ginu tungkul king panalangin na ning ari.

²² Nganang sinabi ning Ginu, Senakerib, kaylian na ka ning siudad ning Jerusalem at pisunusunu na ka.

²³ Ninu ing isipan mung kekang lalapastanganan at insultuan? Meging ala kang galang kanaku, ing banal a Dios ning Israel.

²⁴ Tinubud mu la ding kekang talasuyu ban ipagmayabang mu kanaku king ika at ding sabla mung karung panggera ikua mu lang selakayan ding matas diling bunduk na ning Lebanon. Pigmayabang mu pa king kinutud mu la ding matas diling tanaman a sedro at ding masanting diling tanaman a sipres at king ikua mu lang disan ding pekasuluk nang diling dake ding gubat.

²⁵ Pigmayabang mu pa king kinulkul kang talaga at minum king danum da ring aliwang bansa, at melangi ya ing Ilug ning Nilo uling dilpak de ring bitis ding sundalus mu.

²⁶ E mu pa wari abalitan king maluat ku nang tingka yan? At ngeni tiparan ku na. Aku ing minie upaya keka ban gawan mu lang tambak-tambak a balbal a batu ding siudad a matibe pader.

²⁷ Ala lang akarapat ding taung manuknangan karin; mitakutan la at e la mekabulad. Mengari la king dikut king marangle o king dikut a tutubu king bubungan na ning bale potang tutiupan na la ning mapaling angin a ibat king aslagan.

²⁸ Oneng balu ku ing sablang bage tungkul keka, nung nanu ing daraptan mu at nung nukarin ka munta. Balu ku nung makananu kang mimimua kanaku.

²⁹ Abalitan ku ing bigsikan mu at ing ketasan mung lub at ngeni mibili kung taga king arung mu at busal king asbuk mu at ibalik da ka king lugal nung nu ka menibatan.

³⁰ Kaybat nganang Isaias kang Aring Hezekia, Oyti ing tanda king bage mapalyari kaniting banuang kasalukuyan at king tutuking banua. Ing bukud mung kanan ya pin ing trigu a kabud na tinubu, oneng makatanam kang trigu king tutuking banua at pupulan mu iti, at makatanam ka namang ubas at makapangan ka karing bunga ra.

³¹ Detang mitagan king bansang Juda lumabung lang anting tanaman a managlus a yamut king gabun at mamunga la.

³² Mika tau king Jerusalem at king Bunduk ning Zion uli da ring mitagan, uling iti ing buri nang mapalyari ning Ginung Mayupaya.

³³ Iti ya naman ing sinabi na ning Ginu tungkul king ari na ning Asiria: E ne luban iting siudad at e ya makabugnus agyang metung mung paslu. Alang sundalus a pakakalasag a makalapit kaniting siudad, at alang makagawang sabat a pangubkub kaniti.

³⁴ Magbalik ya king mismung dalan a ibatan na, at e ne bitasang aluban iting siudad. Aku, ing Ginu, ing migsalita.

³⁵ Idipensa ke at ingatan iting siudad para king sarili kung dangalan at uli na ning pangakung binie ku king talasuyu kung i David.

³⁶ Kanita minta ya king kampu da ring tau Asiria ing metung a anghel na ning Ginu, at mekamate yang dinalan walung pulu't limang libung sundalus. Itang kabukasan a abak a maranun, inyang migising la ding memalen, ikit da lang pakapase; mete la ngan!

³⁷ Kanita i Senakerib, ing ari ning Asiria, minatras ya at migbalik king Nineve.

³⁸ Misan a aldo, kabang sasamba ya king templo ning dios nang i Nisrok, ding adua karing anak nang lalaki, i Adramelek at i Sarezer, pete de karing karelang espada at kaybat tinakas lang minta king Ararat. I Esarhadon, ing metung na pang anak, ya ing minalili bilang ari na ning Asiria.

38

¹ Kanita mu ring panaun a ita, mesakit ya i Aring Hezekia at digsu nia mete. Delawan neng propeta Isaias a anak nang Amoz at ngana, Makamal a Ari, sasabian na keka ning Ginu king ayusan yu na ing sabla uling e na ka mipaldan. Isadia mu na ing sarili mu king kamatayan.

² Minarap ya i Hezekia king pader at menalangin ya.

³ Ngana, O Ginu, e mu sana kakalinguan king siyuan da kang mitmung katapatan at kalausan a lub, king parati kung magkapilit daptan itang buri mung parapat kanaku. At menangis yang kapait-paitan.

⁴ Inutus na kanita ning Ginu kang Isaias

⁵ king magbalik ya kang Hezekia at sabian ing anti kaniti: Aku, ing Ginu, ing Dios na ning makatua mung i David, dimdam ku ing panalangin mu at ikit ku ing lua mung tinulu; paintulutan da ka pang mie kilub ning labing limang banua.

⁶ Iligtas da ka at iting siudad ning Jerusalem king ari na ning Asiria. Isundu ku ing pamagdipensa kaniting siudad.

⁷ Nganang mekibat Isaias, Dinan na kang tanda ning Ginu ban patutuan king tuparan na ing pangaku na.

⁸ Paurungan neng apulung balitang ning Ginu ing anino na ning paniukad oras a pepagawa nang Aring Ahaz. At migbalik ya ping apulung balitang ing anino ning paniukad oras.

⁹ Pangapaldan nang Aring Hezekia ning Juda, sinulat ne iting kanta:

¹⁰ Bala ku lungub na ku king tuknangan ding mete, at e na ku mibawi agyang atyu ku pa king kalibudtan ning bie.

¹¹ Bala ku king keting yatung panuknangan da ring mabie e ku ne malyaring akit ing Ginu o ing ninumang taung mabibie.

¹² Mepatlud ing kakung bie at miyangganan, mengari ya king toldang bigbag da, anti ing imalan a ginabak dang leko king pipanabalan. Bala ku angganan na na ning Dios ing bie ku.

¹³ Kabukas kung tatangis king sakit, balamu wari ating leon a mamakli karing kakung butul. Bala ku angganan na na ning Dios ing bie ku.

¹⁴ Ing siwala ku meina at melati, at sinaingsing kung anti ing patipati. Mepagal la ding mata ku king kalalawe king banua. Ginu, iligtas mu ku king kakung problema.

¹⁵ Nanung kakung asabi? Ing Ginu ya ing makipasari kaniti. Maskup ya'ng salu ku, at e ku mipatudtud.

¹⁶ Ginu, mie ku para keka at bukud mung keka; uluan mu ku at paintulut mung mie ku.

¹⁷ Ing peitan ning bie ku miyalilan kapayapan. Liligtas me ing bie ku king sablang panganib; patawaran mung kakung kasalanan.

¹⁸ Ala metung man king tuknangan ding mete ing makapasalamat keka ni apurian at apanaligan ding mete ing kekang katapatan.

¹⁹ Ding mabie ilang makapuri keka, antimo ing ngeni daraptan ku keka. Sasalita da ring tata karing anak da nung nu anti ing katapatan mu karela.

²⁰ Ginu, ikang pepakayap kaku! Tigtigan mi lang alpa, at ikanta ing kapurian keka. Magkanta kaming kapurian king kekang Templo king kekaban ning bie mi.

39

¹ Halus king panaun mu ring ita, ing ari na ning Babilonia, i Merodak Baladan a anak nang Baladan, abalitan na king mesakit ya ing Aring Hezekia at kaybat mipaldan ya. Uli na niti, peparala yang sulat at regalu.

² Matula na lang tinggap Hezekia ding tubud na ning ari ning Babilonia. Kaybat na nita, pepakit na karela ing pibandian nang pilak at gintu, ding paniangkap-pamangan at pabanglu na. Pepakit na naman karela ing miyayaliwa nang kagamitan king pamakigera. Pepakit na ngan karela ing sablang pibandian nang pakasalikut karing miyayaliwa nang pisisinupan ning kayarian na.

³ Kanita minta ya ing propetang i Isaias king Aring Hezekia at nganang mengutang, Nukarin la ibat deting lalaki at nanu ing sinabi ra kekayu? Nganang mekibat Aring Hezekia, Ibat la king marayung bansa; ibat la Babilonia.

⁴ Ngana pang kinutang Isaias, Nanu ing ikit da king palasyu? Pekibat nang Aring Hezekia, Ikit da ngan ing sabla. Pepakit ku ngan karela ing sablang atyu karing pisisinupan ku king palasyu.

⁵ Kanita nganang Isaias king ari, Pakiramdaman yu ing sasabian na ning Ginung Mayupaya. Sasabian na king

⁶ datang ing panaun potang ing sablang bage a atyu king palasyu, ing sablang tinipun da ring makatua yu masamsam at miras Babilonia. Alang bitasang mitagan.

⁷ Kuanan da la ring mapilan karing anak yung lalaki at idala da la king Babilonia. Kapunan da la at gawan talapagsilbi king palasyu na ning ari.

⁸ Oneng e na aintindian iti ning Aring Hezekia. Bala na king mika kapayapan at kapanatagan king kekaban na ning bie na. Inya ngana, Mayap ing balitang ibat king Ginu a dela mu kanaku.

40

¹ Nganang sasabi ning kekatamung Dios, Paligayan yu la ding taung kakung pinili. Paligayan yu la!

² Pasiknangan yu la lub ding memalen ning Jerusalem. Sabian yu karela king labis-labis na ing kasakitan a karelang delanan, at mipatawaran nang karelang kasalanan. Sapat na ing parusa a binie ku karela.

³ Ing metung a siwala kukulisak na, Isadia ye para king Ginu ing metung a dalan king ilang. King disyerto gawa kayung dalan a matulid para king kekatamung Dios!

⁴ Tambakan ya ing balang kulkul, patagan ya ing balang bunduk at bunduk-bundukan; panten lang gurul-gurul a dalan.

⁵ Kanita ing ligaya ning Ginu mibulalag ya, at akit da iti ding sablang tau. Ing Ginu mismu ya ing migsalita.

⁶ Ngana ning metung a siwala, Mamasiag ka! Ngakung kinutang, Nanu ing ipasiag ku? Ipasiag king ing meto ketawan mengari yang dikut; at ing sablang leguan na sampaga king marangle ing kalupa na.

⁷ Lalangi ing dikut at malalanat lang sampaga potang tiupan na la ning angin a parala na ning Ginu. Wa, mengari yang dikut ing tau.

⁸ Lalangi ing dikut at malalanat lang sampaga, oneng ing amanu ning Dios manatili ya!

⁹ O Jerusalem, mukiat ka king matas a bunduk; isalita mu ing mayap a balita! O Zion, isikan mu ing pamaniaus mu; isalita mu ing mayap a balita! Magsalita kang masikan; e ka tatakut. Sabian mu karing balen ning Juda king ing karelang Dios daratang ya!

¹⁰ Ing Ginung Dios daratang ya ban sumakup kapamilatan ning upaya; daralan na la ding taung linigtas na.

¹¹ Anti ing pastul ingatan neng kawan na; ding malating tupa tipunan na la, karing takde na kilikan na la; ding gaindu ra tairan na la king mitmung kaingatan.

¹² Ating makatakal king danum ning dagat karing palad na? O ating makasukad king banua kapamilatan ding gamat na? Ating makalulan king gabun ning yatu king metung a tasa? O ating makatimbang at makasukad karing bunduk at bunduk-bundukan?

¹³ Ating ninumang makasabi king Ginu king sukat nang daptan? Ninu ing makaturu king Ginu o makaibie kausukan?

¹⁴ Ninu ding sasanggunian ning Dios tungkul king kamasalan na, at ninu ing mituru king dalan ning katuliran, ba nang apagaralan nung makananung sukat marapat ing miyayaliwang bage?

¹⁵ Ala lang ulaga king Ginu ding bansa; e la man anting kapatak a danum king lawe na; anti lang alikabuk a mapinu ding marayung pulu.

¹⁶ Ding sablang animal karing kagubatan ning Lebanon e la sapat ban ibie anting ain king kekatamung Dios, at tune lang ditak ding tanaman na ban makapataung api!

¹⁷ Ala lang bitasang ulaga king Ginu ding sablang bansa.

¹⁸ Kaninu ya malyaring apakilupa ing Dios? Makananu meng ilarawan ing itsura na?

¹⁹ E ne kalupa ning metung a idolo a gagawan ding tau, at babalutan dang gintu ding plateru, at king pilak karin de tutuklu.

²⁰ Ing e makasaling pilak o gintu mamili yang dutung a e malalaso. Lalawe yang taung magaling mandukit ban pagawang larawan a e mitutuag.

²¹ E yu pa wari balu? E pa wari mipabalu kekayu king panaun a milabas? E yu pa wari dimdam nung makananu yang megumpisa ing yato?

²² Lelang ne nitang makalukluk king tronu babo ning yatu, at lagpus king banua; anti lang malating panas ding taung atyu king bansa! Lidlad neng banua anting kortina, anting toldang panuknanganan na.

²³ Kukuldas na la ding pamuntuk a mayupaya, at gagawan na lang alang ulaga.

²⁴ Mengari la karing punla a katanam-tanam at e pa migwakat. Ngening ing Ginu mitutubud yang angin, lalangi la at susulapong anting are.

²⁵ Kaninu ya malyaring apakilupa ing Dios a banal? Atin pa waring aliwang anti ya?

²⁶ Talanga kayu banua! Ninu ing linalang karing akakit yung batuin? Ya itang karela tataid lulual anting kawal; balu na nung nu la anti karakal, at ausan ing balang metung king lagyu na! Uli ning degulan ning upaya na, metung man karela alang mawawala!

²⁷ Israel, obat ngeni tututul mu king ing Ginu e na la balu ding problema mu o ala yang pakialam king hustisiang mangaintulid keka?

²⁸ E mu wari balu? E mu pa wari dimdam? Ing Ginu ya ing Dios a alang kawakasan; ya ing linalang king mabilug a yatu. E ya mapapagal ni matitikal man. Ala metung mang malyaring makaintindi king keyang isipan.

²⁹ Pasiknangan na lang maina lub, at dirinan kapasnawan ding mapagal.

³⁰ Mimina la agyang deng kayanakan; mangabual la king pagal ding lalaking kayanakan.

³¹ Oneng detang manalig king Ginu ban pasaup manakit lang bayung sikanan. Sulapo lang anti ding agila; mulayi la, oneng e la magal; lumakad la, oneng e la mina.

41

¹ Ing Dios sasabian na, Ikong bansang atyu king marayu, magtahimik kayu at makiramdam kaku! Magsadia kayu king pamisampa yu king kasu yu king husgadu. Mirinan kayung oras ban magsalita. Mitipun tamu ban lawan nung ninu ing ating katuliran.

² Ninu wari ing migdala king gererung ibat king aslagan, at minie king tagumpe na? Ninu ing babie tagumpe laban karing ari at bansa? Mengari lang alikabuk potang espada na dagpa ya karela! Mengari lang are papaid ning angin neng sasambulat na lang pana na!

³ Panagalan na la at ing pamanagal na alang pangayantala; uli ning bilis ding bitis na balamu king gabun e la man dagpa.

⁴ Ninu ing mekapasari kaniting mepalyari? Ninu ing tinuldu king lakad ning istoria? Aku, ing Ginu, atyu na ku manibat na king kapupurmeruan at aku, ing Ginu, atyu ku pa mu rin angga king kawakasan!

⁵ Ikit ding memalen da ring marayung bansa ing kakung depatan; mitakutan la at king takut da gagalgal la. Inya miyabe-abe la at datang.

⁶ Mipapaniaup la at miyabe-abe, at pasiknangan de lub ing metung at metung.

⁷ Sabian ning kalpinteru king plateru, Masanting ya ing gewa mu! Itang migmoldi king idolong makintab pasiknangan ne lub itang memorma. Sabian ding aliwa, Masanting ya pangalapat at saka de papaku ing idolo king pagkabilian na.

⁸ Oneng ika, Israel, a kakung talasuyu, ika ing balen a pinili ku, ing lahi nang Abraham a kakaluguran ku.

⁹ Kinua da ka ibat karing wakas ning yatu; inaus da kang ibat karing suluk nang pekamarayu. Ika ing kakung talasuyu, ngakung sinabi keka. E ra ka pepaburen, nune pinili da ka.

¹⁰ E ka tatakut; kayabe mu ku! Aku ing kekang Dios; e ka sa mitatakutan. Gawan da kang masikan at kakung saupan; ingatan da ka at iligtas.

¹¹ Lawan mu, detang mua keka takman da ing kamarinayan ning pangasambut. Mate la detang makilaban keka,

¹² at keti king yatu mawala la.

¹³ Aku ing Ginung kekang Dios, pasiknangan da ka at keka kakung sabian, E ka tatakut; saupan da ka.

¹⁴ Ing Ginu sasabian na, Israel, agyang malati ka at maina, e ka sana tatakut; saupan da ka. Aku, ing banal a Dios ning Israel, ing magligtas keka.

¹⁵ Gawan da kang anti ing metung a pidadaran, metung a bayu at mataram a kasangkapan. Daran mu la ding bunduk at keka lang lasawan, at gawan mong alikabuk ding sablang bunduk-bundukan.

¹⁶ Keka lang iyatsa king matas; isulapo ning angin at isalbag ning alisus. Kanita ika tumula ka, uling aku ing kekang Dios; aku ing kekang purian, ing Banal a Dios ning Israel.

¹⁷ Potang ding memalen ku king pamangailangan da manintun lang danum, at potang langi la king kau ding karelang akmulan, kanita, aku ing Ginu, pakibatan ku ing karelang dalung. Aku, ing Dios ning Israel, kapilan man e ku la gulutan.

¹⁸ Gawa kung dakal a ilug a magus libutad ding malanging bunduk-bundukan, at sibul a magus karing kapatagan. Palto kung dakal a danum king disyerto, at batis king malanging gabun.

¹⁹ Patubuan ku la king disyerto ding tanaman a sedro, akasia, mirto, at olibo. King malanging gabun palto ku lang kagubatan, kagubatan ding tanaman a sipres ampon pino at tanaman a hunipero.

²⁰ Akit da iti ding tau at karelang abalu king aku, ing Ginu, ing pepasari kaniti. Akua rang aintindian king ing Banal nang Dios ning Israel ya ing mekapalyari kaniti ngan.

²¹ Ing Ginu, ing Ari ning Israel, sasabian na, Ikong kikilalanan dang dios ding bansa, yapag ye ing kasu yu; idala yu la ding kekong katibayan!

²² Me ko keni at ulan yu ing mapalyaring bage ba tamung abalu nung kapilan iti mapalyari. Ipalino yu la king ukuman ding bage milyari king milabas, at sabian yu ing sablang kabaldugan da kekami.

²³ Isalita yu kekami ing darala ning aldo bukas; kanita abalu mi king dios kayu pin! Agyang ditak mu dapat kayung kayapan o kaya parala kayung kasakitan; katmuan yu kami king takut at king kapagmulalan!

²⁴ Ikayu at ing sablang daraptan yu ala ngang ulaga; makasumami la ding kekayu sasamba!

²⁵ Pinili ke ing metung a lalaking manuknangan king aslagan; itubud ke ibat king norti ba na lang lusuban. Talasan na lang anting burak ding mamuntukan; mangari ya king taung gagawang kuran king pila daramusak.

²⁶ Ninu kekayu ing menula king iti ya ing mapalyari ban asabi mi king ustu kayu pala? Metung man kekayu ala yang sinabi agyang metung mung amanu; alang mekaramdam king atin kayung sinabi!

²⁷ Aku, ing Ginu, ing minunang memalita king Zion. Atin kung tiburan ban king Jerusalem sabian, Mumuli na lang kekang memalen!

²⁸ Inyang lawan ku la ding dios, ala metung man karela ing ating balung sabian; ala metung man a makapakibat karing kakung kutang.

²⁹ Ala lang kasilbian deting kikilalanan dang dios; ala lang arapat nanuman; maina la at alang kayupayan!

42

¹ Nganang sasabi ning Ginu, Oyni ing kakung talasuyung kakung pasiknangan; ya ing kakung pinili at bina kung matula. Kitmuan ke king kakung upaya, at king balang bansa idala na ing hustisia.

² E ya kulisak o itas man ing siwala na o magsalitang masikan karing dalan.

³ Ing mebalbal a timbu e ne paklian, at ing undap-undap a sulu e ne patdan; karing sabla ibie na ing hustisia.

⁴ E ya milako kapanayan o mina lub, at itatag na ing hustisia king yatu. Ing turu na panayan da ring bansang atyu king marayu.

⁵ Lelang na la ning Dios ding banua at layun lidlad na; inubug ne ing yatu at ding sablang bage karin mabibie; dininan na lang bie at pangisnawa ding sablang tau. At ngeni ing Ginung Dios sasabian na king talasuyu na,

⁶ Aku, ing Ginu, ing minaus at minie upaya keka ban kekang pagsikapan king yatu matupad ing hustisia. Kapamilatan mu gawa kung kasunduan karing sablang tau; king kapamilatan mu karing bansa sala ibie ku.

⁷ Ding mata da ring bulag keka lang ibuklat, at ibulus ding atyu pakalukluk karing sukulan a madalumdum.

⁸ Aku, ing Ginu, iti ya ing lagyu ku. Alang aliwang dios a malyaring makirake king kakung ligaya; e ku paintulut karing idolo ing makirake la king kakung kapurian.

⁹ Ding bage inula ku, metupad na la ngeni. Ngeni ding bage bayu sabian ku la keka, bayu la pa mapalyari sabian ku na la.

¹⁰ Magkanta kayung bayung kanta king Ginu; ing kapurian na ikanta yu king yatu! Purian ye, ikong maglayag king dagat; purian ye, ikong sablang lelangan a atyu king danuman! Magkanta kayu, ikong marayung pulu at ikong sablang manuknangan ken!

¹¹ Pabustan yung ing disyerto at ding balen na purian de ing Dios, pabustan lang memalen ning Kedar ing purian de! Pabustan lang memalen ning siudad ning Sela kulisak la king tula babo ding bunduk!

¹² Pabustan la detang manuknangan karing marayung bansa ing munie lang kapurian, at kaligayan king Ginu!

¹³ Ing Ginu lulual yang makilaban anti ing gerero; makasadia ya at mamalaguang makilaban. Kukulisak ne ing tanda ning pamakilaban; papakit nang upaya na laban karing keyang kalaban.

¹⁴ Nganang sasabi ning Dios, Menahimik ku king malambat a panaun; e ku la pekibatan ding taung kakung pinili. Oneng ing oras a kimut ku 'ti na dinatang; kukulisak ku anti ing babaing miraramdam.

¹⁵ Lasakan ku la ding bunduk-bundukan at ding bunduk; palangian ku ing dikut at ding tanaman. Gawan ku lang disyerto ding kapatagan a agusan ning danum, at palangian ding depositung danum.

¹⁶ Ding bulag kung memalen kaku lang tairan karing dalan a e ra pa bitasang delanan. Alilan kung sala ing karelang karalumduman, at ding lugal a e patag kaku lang patagan. Deting bage siguradu ku na lang daptan.

¹⁷ Ding sablang manalig karing idolo, ding mamaus dios karing larawan, mangapakarine la ngan at milako dangalan.

¹⁸ Nganang sasabi ning Ginu, Makiramdam kayu, ikong maklak! Lumawe kayu, ikong bulag!

¹⁹ Atin pa kayang mas bulag kesa king kakung talasuyu o mas maklak kesa king tubud a kakung tinubud?

²⁰ Israel, dakal na ing ikit mu, oneng nanu mo ing meging kabaldugan na niti para keka? Atin kang balugbug ban makaramdam, oneng nanu mo ing tune mung dimdam?

²¹ Ing Ginu Dios yang matulang magligtas, inya ding keyang kautusan at turu dininan na lang dangal, at buri na king kilalanan na la ning balen na.

²² Oneng ngeni ding memalen na lisuban da la at penakawanan; mesaluput la at karing kulkul la mebaldug, at mekulung karing sukulan. Kepanakawanan la at kesamsaman; ala metung mang dinatang ban iligtas la.

²³ Atin kaya kekayu a makiramdam kanite? Manibat kaya ngeni makiramdam na kayung masalese?

²⁴ Ninu ing pepaintulut king ing Israel panakawanan de? Ing Ginu mismung kekatamung pikasalanan! E ta kasi mebisang mibiebie antimo king buri na ni pemintuan ding turu a binie na.

²⁵ Inya bilus na ing mikakalabkab nang mua, at misakitan la king bigsikan ning gera. Anting aping milalablab king mabilug a Israel ing mua na, oneng e tamu bitasang aintindian ing mangapalyari; e tamu bitasang mekapagaral kaniti.

43

¹ Israel, ing Ginung keka linalang sasabian na, E ka tatakut; iligtas da ka. Inaus da ka king kekang lagyu; bandi ra ka.

² Neng daralan ka karing malalam a danuman, patnubayan da ka; e ra ka daigan ding kekang kaguluan. Nung dumalan ka libutad ning api, e ka masilab; ding mabayat a kapagsubukan e ra ka sambutan.

³ Uling aku ing Ginung kekang Dios, ing banal a Dios ning Israel, ing magligtas keka. E bala nung ing Ehipto kaku mawala ya, maging malaya ka sana. E bala ing mawala ya kaku ing Etiopia at ing Seba.

⁴ E bala ing mawala la kaku ding dakal a bansa, masagip ya sana ing bie mu, uling mal ka kaku, at dinan da kang dangalan, uling tune da kang pakamalan.

⁵ E ka tatakut; atyu ku siping mu! Ibat king marayung aslagan, at angga king marayung albugan, kaku lang iyuli kekang memalen.

⁶ King norti kakung sabian ing pabustan na lang muli, at king mauli ing e na la sa sasabatan. Pabustan yeng magbalik ing balen ku ibat karing bansang marayu, at king balang suluk ning yatu.

⁷ Ila ding sarili kung memalen, at kaku lang lelangan ba ra kung paligayan.

⁸ Ing Dios sasabian na, Ausan yu lang marap king husgadu ding taung pinili ku. Atin lang mata, oneng bulag la; atin lang balugbug, oneng maklak la!

⁹ Ausan la ding bansa ban datang king pamaglitis. Ninu karing karelang kikilalanan a dios ing maka-ula king panaun a daratang? Ninu karela ing meka-ula king ngeni mapapalyari na? Pabustan la deting dios ing idala da lang sarili dang testigu ban patunayan king atin lang matulid, ban saksian ing katutuan ning karelang sasabian.

¹⁰ Memalen ning Israel, ikayu ding kakung testigu; pinili da kayu ban maging kakung talasuyu, ban akilala yu ku at kaku maniwala kayu, at ban kekong aintindian king aku mung bukud ing Dios. Ala nang aliwa pa subali kaku; alang dios a minuna kaku ni datang kaybat ku.

¹¹ Aku mung bukud ing Ginu; alang makapagligtas kekayu nung aliwa mu aku.

¹² Minuna ku nang sinabi ing bage mapalyari, at kaybat dinatang ku ban saupan da kayu. Alang dios a dayuan a mekarapat na kanyan; ikayu ding kakung testigu.

¹³ Aku Dios ku at Dios ku kapilan man. Alang makatakas king kakung kayupayan; alang makapagbayu king kakung daraptan.

¹⁴ Ing banal nang Dios ning Israel, ing Ginu a magligtas kekayu, sasabian na, Ban aligtas da kayu, mitubud kung dakal a sundalus laban king Babilonia; lasakan ku la ding pasbul dalan ning siudad, at ing kulyo ding memalen na muli king pamanangis.

¹⁵ Aku ing Ginu, ing kekong banal a Dios. Lelangan da ka Israel, at aku ing kekang ari.

¹⁶ King milabas a panaun ing Ginu ginawa yang dalan libutad ning dagat, metung a pidadalanan libutad ning mapanganib a danuman. fig,,,, ,... ing Ginu ginawa yang dalan libutad ning dagat...,(43:16)fig*

¹⁷ Dela ne ing mayupayang armada king kasiran, ing armada ding karung panggera at kabayu. Miragsa la at kapilan man e na pasibayung talakad, anti ing api ning sulu mitda la!

¹⁸ Oneng ing Ginu sasabian na, Kalinguan yu na la ding bage mengapapauna; kareti e na kayu manalakaran pa.

¹⁹ Panayan yu ing bayung bage a kakung daptan. Mapapalyari na; ngeni pa akakit yu na! Gawa kung dalan libutad ning ilang, at dinan da kayung batis a mamagus king disyerto.

²⁰ Galangan da ku agyang ding mabangis a animal; ding asung-gubat at ding ayup a ostrich purian da ku potang payagusan ku la ding batis king disyerto ban munie danum karing taung pinili ku.

²¹ Ila ding taung lelangan ku para king sarili ku, at ikanta da kaku ing kapurian!

²² Ing Ginu sasabian na, Oneng ika, O Israel, mepagal ka kaku; kaku e ka sinamba.

²³ E mu la dela kaku ding tupang ain-a-durulukan; aliwa aku ing kekang peparangalan karing kekang ain-sakripisyu. E ra ka pebayatnan king pamaniawad ain ni lingasngas king pamaniawad insenso.

²⁴ E ka sinaling insenso para kaku; e mu ku peligayan king taba da ring kekang sese animal. Bagkus pebayatnan mu ku karing kekang kasalanan; lingasngas mu ku karing depat mung e ustu.

²⁵ Makanyan man, aku ing Dios a mamatawad karing kekang kasalanan; iti kakung daraptan uli ning kakung kadiosan; kaku nang pepatawaran ing kekang kasalanan.

²⁶ Tara munta kata king husgadu; karin iyarap mu ing kekang kasu. Patutuan mu king e ka mikasala kaku!

²⁷ Mikasala lang kekang makatua, at ding kekang manimuna.

²⁸ Lepastangan de ring pamuntuk yu ing kakung santuaryu. Inya kasiran king Israel ing dela ku, at peintulut ku ing mainsultu lang taung pinili ku.

44

¹ Ngana ning Ginu, Makiramdam ka ngeni, Israel, a kakung talasuyu, ing balen a kakung pinili, ing lahi nang Jacob!

² Aku ing Ginung linalang keka; seupan da na ka manibat na inyang mibait ka. E ka tatakut; ika ing kakung talasuyu, ing balen a pinili ku at kaluguran ku.

³ Munie kung danum king bansang kakau, at kaku lang payagusan ding batis king malanging gabun. Ibie ke ing espiritu ku karing anak mu, at ing bendisyun karing lahi mu.

⁴ Lumabung lang anti ing dikut, mangari la karing tanaman a tutubu lele ning batis a mamagus.

⁵ Ing metung at metung karing tau sabian na, Bandi na ku ning Ginu. Datang la ban makiabe karing memalen ning Israel. Ikintal ne king takde na ning balang metung karela ing lagyu ning Ginu, at sabian na king metung ya karing pinili ning Dios.

⁶ Ing Ginung sasakup at mimingat king Israel, ing Ginung Mayupaya, sasabian na, Aku ing mumuna, ing tauli, ing bukud mung Dios, ala nang aliwang dios subali kaku.

⁷ Atin na kayang mekarapat king depat ko? Ninu mo kaya ing makaula king sablang bage mapalyari manibat king mula angga na king kawakasan ning panaun?

⁸ E kayu tatakut, O memalen ku! Balu yu manibat na king minunang panaun angga na ngeni king sinabi kung makapauna ing sablang bage mapalyari, at ikayu ding kakung testigu! Atin pa waring aliwang dios? Atin pa waring aliwang mayupayang dios subali kako?

⁹ Ala lang kabaldugan ding sablang gagawang idolo at ding kikilalanan dang dios a tutu rang pakamalan. Ala lang ulaga! Bulag la at mangmang ding sasamba kareti at mibili la king kamarinayan.

¹⁰ Alang kasilbian ing gawa kang idolo o mipormang larawan.

¹¹ Mangapakarine ya ing ninumang sasamba kareti. Tau la mu ding gagawa kareting idolo. Paburen lang datang at marap king husgadu; mitakutan la at mibili king kamarinayan.

¹² Kakua yang kapirasung bakal ing pande; itangab ne king api at kaybat papandayan ne king gamat nang masikan. Masuan ne ing bakal at saka ne dinan ubug. Daranup ya, kakau, at mapapagal kabang magobra ya.

¹³ Susukdan na ne man ning kalpinteru ing dutung. Gugulis ne ing larawan, at dudukitan ing dutung karing kasangkapan na. Gagawan ne king larawan na ning tau, metung a masanting a larawan ban ibili king pibalebale na.

¹⁴ Mapalyaring kumutud yang tanaman a sedro para gamitan na o kaya mamili yang tanaman a ensina o kaya sipres king kagubatan. Mapalyaring tanam yang tanaman a laurel at manaya ya king uran ban tumubu ya at dagul.

¹⁵ Gagamitan ne ning tau ing kapirasung dutung antimong panangab, gawan neng idolo ing aliwang dake. Gagamitan ne ing aliwang kapirasu ban mikapali ya ing bale na king panaun na ning dimla at ban paglutung tinape. Gagawan neng dios ing aliwa namang kapirasung dutung ban samban na.

¹⁶ Panangab na ing aliwang kapirasung dutung; magnangnang yang karni a kanan na at kumabsi ya. Magsalab ya at ngana, Kasanting! E ku marimla! Kalablab ning api king kalang!

¹⁷ Gagawan neng idolo ing aliwa nang kapirasu ning dutung. Kaybat durukuan ne at sasamban. Manalangin ya king idolo. Ngana, Ika ing kanakung dios; iligtas mu ku!

¹⁸ E ra balu at e ra aintindian ing daraptan da reting tau uling milalu ing karelang kamangmangan. Sasara da la ring mata ra at ing pamisip da king katutuan.

¹⁹ Ala yang beluan o tetagan lub ing gagawa karing idolo ban sabian na, Penangab ku ing mapilan a kapirasu ning dutung. Miglutu kung tinape king uling at mignangnang karni at pengan ku. At gewa keng idolo ing aliwang mitagan king dutung. Ngeni, oyni durukuan ke ing kapirasung dutung!

²⁰ Anti ya mu waring mamangan abu. Tutu na neng lininlang ning kaisipan nang alang kabaldugan angga na king ala neng kapalyarian. E na buring aminan king sarili na king e ya pala dios ing idolong tatalnan na.

²¹ Ngana ning Ginu, Israel, e mu sa kakalinguan king ika ing kakung talasuyu. Lelang da ka ban maging kakung talasuyu, at kapilan man e ra kalinguan.

²² Pinawi ku lang anting lulam ding kekang kasalanan. Magbalik ka kaku, aku ing talapagligtas mu.

²³ Kulisak ka king tula, O matas a banua! Kulisak kayu, ikong lugal a mangalalam ning yatu! Kulisak kayu king tula, ikong bunduk at ing balang tanaman ning kagubatan! Uling linigtas ne ning Ginu ing Israel a keyang balayan, at pepakit nang upaya na.

²⁴ Aku ing Ginu, ing kekang talapagligtas; aku ing linalang keka. Aku ing Ginu, ing Miglalang king sablang bage. Aku mung bukud ing miladlad karing banua; alang sinaup kaku inyang lelangan ke ing yatu.

²⁵ Gagawan ku lang mangmang ding taung mamamanula, at bibiguan ku ing ula da ring magaral karing batuin. Palaraman ku la ding amanu da ring mangabiasa, at papakit ku king ing karelang kabiasnan kamangmangan mu.

²⁶ Oneng potang ing kakung talasuyu yang manula, potang itubud ke ing talasuyu ku ban ibulalag na ding munikala ku, papalyarian ku la deting ula at planu. Sabian ku king Jerusalem king ding tau karin la pasibayung manuknangan, at pasibayu lang malarin ding siudad ning Juda. Ding siudad a deta talakad lang pasibayu ibat king pangasira da.

²⁷ King metung mung amanu papamalan ke ing dagat.

²⁸ Sabian ku kang Ciro, Ika ing sumakup para kaku; daptan mu itang buri kung daptan mu; iyutus mu king ing Jerusalem larinan ya at ding pundasyun ning Templo italakad la.

45

¹ Pinili ne ning Ginu i Ciro ban maging ari. Tilduan ne ning Ginu ban sumakup karing bansa; tiburan ne ban lubasan la ding ari king upaya ra; ibuklat na la ning Ginu ding pasbul dalan ding siudad para king pinili na. Ngana ning Ginu kang Ciro,

² Aku mismu ing misadia king kekang dalanan; patagan ku la ding bunduk at bunduk-bundukan. Ding pasbul dalan a tangsu kaku lang lasakan, at siran ding tarangkang bakal.

³ Ibie ku la keka ding pibandian karing maralumdum dang lihim a pisisinupan. Akilala mu kanita king aku ing Ginu, at king ing Dios ning Israel inaus na ka king lagyu mu.

⁴ Ausan da ka ban saupan me ing Israel a kakung talasuyu, ing balen a pinili ku. Dininan da kang maragul a dangalan, agyamang ala kang balu tungkul kaku.

⁵ Aku ing Ginu; ala nang aliwa pang dios subali kaku. Ibie ku keka ing sikanan a kekang kailangan agyamang kaku ala kang kabaluan.

⁶ Iti kakung daptan ban ing balang tau ning mabilug a yatu akilala na king aku ing Ginu, at king ala nang aliwa pa subali kaku.

⁷ Lalalangan ku ing sala at dalumdum; parala kung kanawan at kapamahakan. Aku, ing Ginu, ing darapat kareti ngan.

⁸ Miparala kung tagumpe anting uran ibat banua; mibuklat ya ing yatu ban iti tanggapan na, at mag-ari ing kalayaan at ing katuliran. Aku, ing Ginu, ing darapat kaniti ngan.

⁹ Ing waring kapsang kuran mangangas yang makitua king ginawa, ing kuran a kalupa da ring aliwa? Ing waring kapsang kuran kutnan ne ing mangawa nung nanung gagawan na? Ing waring kapsang kuran magreklamu ya king ing mangawa kulang ya pangamat?

¹⁰ Atin waring metung mu mang mangangas magsalita karing pengari na, Obat makanyan yu kung gewa?

¹¹ Ing Ginu, ing banal a Dios ning Israel, itang miyuyubug king datang a panaun, sasabian na: Ala kang matulid mangutang tungkul karing kakung anak o sabian kaku itang sukat kung daptan!

¹² Aku itang ginawa king yatu, at linalang karing tau ban karin manuknangan. King kakung upaya lidlad ku la ding banua; ing aldo, bulan, at ding batuin atyu la ngan lalam kung upaya.

¹³ Aku mismu ing misubung kang Ciro ban kimut ya, ban ing kakung parasan tuparan na at itulid ing sabla. Kakung tuliran ing balang dalan a dalanan na. Italakad ne at larinan ing siudad kung Jerusalem, at ibulus ing mebihag kung balen. Ala metung man ing menupa o minie suhul ban iti daptan na. Ing Ginung Mayupaya migsalita ya.

¹⁴ Ngana ning Ginu king Israel, Ing pibandian ning Ehipto at ning Etiopia maging bandi mu at ding maragul nang lalaki ning Seba maging ipus mu la; makatanikala lang tuki keka. Duku la keka at karelang sabian; Ing Dios atyu keka; ya mung bukud ing Dios.

¹⁵ Ing Dios ning Israel a magligtas karing memalen na, Dios yang papampan na ing sarili na.

¹⁶ Detang sablang gagawang idolo mangapakarine la ngan; mibili la ngan king kabiguan.

¹⁷ Oneng linigtas ne ning Ginu ing Israel; ing tagumpe na manatili kapilan man; e na la mibili ding memalen na king alang dangalan.

¹⁸ Lelangan na la ning Ginu ding banua; ya kabud ing Dios! Ya ing miyubug at linalang king yatu; gewa neng matatag at manatili. E ne lelangan alang kabaldugan, nune lugal ya para panuknanganan da ring tau. Ya ing sasabi, Aku ing Ginu at ala nang aliwa pa subali kaku.

¹⁹ E ku migsalita king makalihim o selikut ing kakung parasan. E ku pekiduang karing memalen ning Israel ing panintunan da ku king karinan a alang kabaldugan. Aku ing Ginu at ing katutuan yang kakung sasabian; ibubulalag ku itang makatuliran.

²⁰ Ngana ning Ginu, Me ko keni, mitipun kayu ikong memalen ning yatu, ikong sablang mitagan king pangabagsak ning kayarian; iyarap yu ing sarili yu para king pamaglitis! Ding taung pidala-dala da la ring idolo rang dutung, at manalangin karing kikilalanan dang dios a e naman makapagligtas karela. Ala lang bitasang balu deting tau!

²¹ Me ko keni at iyarap ing kasu yu king husgadu; paburen lang mikukutnanan ding midimanda. Ninu king milabas a panaun ing sinabi king bage mapalyari? Aliwa wari aku, ing Ginu, ing Dios a magligtas king balen na? Ala nang aliwa pang dios subali kaku.

²² Mibalik na kayu ngeni kaku at miligtas kayu, ikong memalen king mabilug a yatu! Aku mu ing bukud a Dios at ala nang aliwa pa.

²³ Katutuan ing pengaku ku at iti e mibayu. Ing kakung pengaku taimtim kung tuparan. Ing balang metung lumapit ya at duku arapan ku, at isumpa nang maging tapat ya kaku.

²⁴ Karelang sabian king bukud mung king kakung kapamilatan karin mayakit ing tagumpe at sikanan; oneng ding sablang masama kaku karelang tanggapan ing kamarinayan.

²⁵ Aku, ing Ginu, kaku lang iligtas ding sablang lahi nang Israel, at kaybat aku ing purian da.

46

¹ Ya na iti ing kawakasan da ring idolo ning Babilonia! I Bel ampon i Nebo a kanitang misan misamban, oneng ngeni sasake da la karing asno, pabayat mu ing babie da karing animal a mapagal na.

² E ra aligtas ding idolo ing sarili ra; mebihag la at karing aliwang lugal karin da la dela. Ya na iti ing kawakasan da ring idolo ning Babilonia!

³ Lahi nang Jacob, makiramdam kayu kaku, ikong sablang mitagan king balen ku. Iningat da kayu manibat king oras ning pangabait yu.

⁴ Aku ing kekong Dios; ingatan da kayu angga king tumua kayu at muti ing buak yu. Lelangan da kayu; ingatan da kayu; saupan at iligtas da kayu.

⁵ Kaninu yu ku apakilupa? ngana ning Ginu. Atin pa waring aliwa a kakung kalupa?

⁶ Bubuklat do ring tau ding karelang suput, at gintu ing karelang bubulus; pilak karelang titimbangan. Manupa lang plateru ban gawa lang dios, at kaybat dukuan ampon samban.

⁷ Tatas de at pupusanan karing karelang pago; bibili re king metung a lugal ban karin talakad, e bitasang makakimut king lugal a pagkabilian na. Nung ing ninuman manalangin ya king idolo, e ya makapakibat o e ne aligtas king kagipitan na.

⁸ Ikong makasalanan, tandanan yu iti; ganakan yu itang kakung depatan.

⁹ E yu sa kakalinguan itang mepalyari king milabasan; tanggapan yu king aku mung bukud ing Dios, at ala nang aliwa pang kalupa ku.

¹⁰ Manibat na king kapupurmeruan sinabi ku na itang maging bunga; king milabas a panaun itang mapalyari sinabi ku na. Sinabi ku king e la magmintis ding kakung tangka, king ing sabla kakung daptan antimo ing kakung pignasan.

¹¹ Ausan keng datang ing metung a lalaking ibat king aslagan; anting balawe yang maniagmit at tuparan na ngan ing binalak kung gawan. Iti sinabi ku at mituparan.

¹² Makiramdam kayu kaku, ikong taung masias a buntuk a mimisip king ing pamagwagi tutung marayu.

¹³ Paratangan ku na ing aldo ning tagumpe, e na binang lumuat datang ne. Ing kakung pamagwagi e mayantala. Iligtas ke ing Jerusalem, at karin ing Israel pagdala keng dangalan.

47

¹ Ngana ning Ginu, Babilonia, king kekang tronu kuldas ka, at lukluk ka king alikabuk. Kanitang misan a panaun anti ka king metung a birhen; anti kang metung a siudad a e pa lisuban, oneng ngeni lunu ka at ipus.

² Idurut me ing gilingan! Arina kekang gilingan! Ilako me ing kekang panakap lupa! Mangamal mung imalan ilukas mu na! Ing baru mu keka neng ilislis king pamandalakit mu karing batis!

³ Ding tau akit da kang lubas; akit da kang mimura at mangapakarine. Mablas ku at alang metung mang kaku sabat.

⁴ Ing banal nang Dios ning Israel ing talapagligtas tamu, Ginung Mayupaya ing lagyu na.

⁵ Ngana ning Ginu king Babilonia, Lukluk kang tahimik busal ning karalumduman; e na ka mayaus pang reyna da ring bansa!

⁶ Mimua ku karing taung kakung pinili, e ku na la kilalang kakung bandi; pepailalam ku la king upaya mu, at e ka pepakit lunus karela; pati na ding matua pepagdusan mu la.

⁷ Inisip mu king angga king alang angga reyna ka, at e mu apibalak king pusu mu deting bage o aisip nung makananu lang miyangganan.

⁸ Ikang malugud king kalayawan pakiramdaman mu iti, ikang mimisip king ligtas ka at panatag a bili. Tuturing mung kasing dagul ning Dios ing sarili mu, king ala nang aliwa pang anti ika. Inisip mu king lub mu king kapilan man e ka mabalu o kabatingan karing anak mu.

⁹ Oneng king saguli mung penandit, king metung mung aldo, deting aduang bage keka datang la. Agyamang gamitan mu ing sabla mung pamagsalamangka, ing asawa mu at anak mawala la keka.

¹⁰ Panatag ka kabilian agyang alang bitasang mayap keka; bala mu siguru alang manakit keka metung man. Linili na ka ning kekang kabiasnan at ning kekang aintindian, at ngamung sinabi king kekang sarili, Aku Dios ku, at ala nang aliwa pang anti aku.

¹¹ Kagutgutan ing keka datang, at ing kekang salamangka e na asabat yan. Ing kasiran yang biglang keka datang, ing kasiran a e mu bitasang asahan!

¹² Pagsikapan mu lang sablang manaliguat mung salamangka at pati na ding kekang panggayuma; keka lang ginamit manibat na kanitang kayanakan ka. Mekad keka makaibie lang kasaupan; mekad ding kekang kalaban keka lang apamatakutan.

¹³ Ala kang akarapat agyang dakal ing payu a kekang tatanggapan. Paburen mong datang at lumapit ding kekang astrologo ban aligtas da ka, ding taung magaral karing batuin a manialiksik king maleparan a banua at ding keka magsalita bulan-bulan nung nanu ing mapalyari keka.

¹⁴ Mangari la karing putut-putut a are, at laklakan na la ning api! E ra akua mang aligtas ing karelang sarili, uling ing lablab ning api milalu kapali, e ya metung mung dapug a malyari dang pipagsalaban.

¹⁵ Iti ngan ya ing mayap a daptan da para keka detang astrologong kekang singgunian king kekaban ning bie mu. Gumulut la ngan keka, at lumakad karing sarili dang dalan, at ala metung man a mitagan ban magligtas keka.

48

¹ Memalen ning Israel, iti kekong pakiramdaman, ikong ibat king lahi nang Juda: Susumpa kayu king lagyu ning Ginu, at sasabian yu king sasamban ye ing Dios ning Israel, oneng ala kayung tututuanan metung man king kekong sasabian.

² At makanyan man pagmaragul yung sasabian king memalen na kayu ning siudad a banal, at king asahan ye ing Dios ning Israel Ginung Mayupaya ing lagyu na.

³ Ngana ning Ginu king Israel, Kanitang panaun a malambat nang milabas ing bage mapalyari kakung sinabi, at bigla kung pepalyarian.

⁴ Balu ku kanita pa ing pakit mung masias ka buntuk; masias anting bakal, at e anting tangsung abayutuk.

⁵ Inya kanita pa sinabi ku na ing kekang panaun a pakiarapan, selita ku la ding bage bayu la pa mapalyari ban sabatan ing kekang kapaniwalan a ding kekang idolo at larawan ilang pepasari kareting mepalyari.

⁶ Ing sablang makapauna ku nang sinabi mepalyari na ngan ngeni; sukat kekang tanggapan king ing kakung sinabi katutuan. Ngeni keka ku la sabian ding bayung bage datang a e ku sinabi king panaun a milabasan.

⁷ Ngeni ku la pa mu papalyarian, ala pang milyaring anti kanyan king panaun a milabasan. Nung mika atin man, mekad kekang sabian king iti lubus mung kamalayan.

⁸ Balu ku king e ka malyaring pagkatiwalan; pikabaluan king rebeldi ka manibat na king kapupurmeruan. Iti ing sangkan nung inya iti ngan e mu bitasang dimdam, nung inya ala metung man king sinabi na ing miras king kekang pakiramdam.

⁹ Ban purian de ring tau ing kakung lagyu, iyantala ku ing mua ku; iti kakung aguantan ban e ka mate.

¹⁰ Sibukan da ka king api ning kasakitan, antimo ing pilak a gagawan puru king ornu. Oneng ikit ku king ala kang ulaga.

¹¹ Ing kakung daraptan merapat para king sarili kung kapakanan; e ku paintulut king ing kakung lagyu malapastangan ya o paintulutan ing ninuman dumake king kaligayan a bukud mung kaku mangaintuliran.

¹² Ngana ning Ginu, Makiramdam ka kaku, Israel, balen a kakung inaus! Aku ing Dios, ing mumuna, ing katataulian, ing bukud mung Dios!

¹³ Ding mibili karing pundasyun na ning yatu ila ding kakung gamat, at karing banua ilang miladlad. Potang ausan ke ing yatu at ing banua, agad-agad datang la at karelang sarili iyarap da.

¹⁴ Mitipun kayu at makiramdam, ikong sabla! Ala metung man karing dios ing maka-ula king ing lalaking kakung pinili, lusuban ne ing Babilonia; ing buri kung iparapat ya ing daptan na.

¹⁵ Aku itang migsalita at minaus king lalaking kakung pinili; liwal ke at pitnubayan at dininan tagumpe.

¹⁶ Ngeni pakalapit mu kaku at kekang pakiramdaman ing kakung sabian. Manibat na king kapupurmeruan migsalita na kung hayagan, at menatiling papalyarian ing katutuan ding kakung amanu. (Ngeni dininan na kung upaya ning Ginung Dios at tinubud na ku.)

¹⁷ Ing banal a Dios ning Israel, ing Ginu a talapagligtas mu, sasabian na: Aku ing Ginung kekang Dios, ing bisang turu keka para king ikakayap mu, at mituturu keka king dalan a sukat mung tuntunan.

¹⁸ Nung mekiramdam ka mu sana karing kakung kautusan! Minagus na sana keka ing kanawan a anting sibul a e bitasang kalalangian! Ing tagumpe miras sana kekang anting alun a mamagus king pampang.

¹⁹ Ding kekang lahi meging kasing dakal na la sana ning balas, at e ku sana peintulut ing pangamate ra.

²⁰ Mako na kayu king Babilonia, malaya na kayu! Ikulisak yung mitmung tula iting balita; ipabalu yu karing sablang bansa: Linigtas ne ning Ginu ing Israel a talasuyu na!

²¹ E la bitasang kinau ding taung pinili ning Ginu kanitang tinaid na la libutad ning mapali at malanging disyerto. Pepayagusan na ing danum a ibat king batu; binangal ne ing batu at mamagus a danum ing linual.

²² Alang kapayapan para karing makasalanan, ngana ning Ginu.

49

¹ Makiramdam kayu kaku, ikong bansang marayu, ikong taung manuknangan king marayu! Bayu ku pa mibait, pinili na na ku ning Ginu at tilduan maging keyang talasuyu.

² Gewa na lang mataram anting espada ding kakung amanu. King mismung gamat na iningat na ku. Gewa na kung anti ing paslu, matilus at makasadiang mibugnus.

³ Ngana kaku, Israel, ika ing kakung talasuyu; uli mu, purian da ku ring tau.

⁴ Mekibat ku, Megobra ku, oneng meging alang kabaldugan! Gisan ku ing kakung sikanan, oneng ala kung arapat nanuman. Makanyan man, ing Ginu kaku yang apanaligan; ipagdipensa nang kakung daraptan at dinan na kung ablas king kakung gawan.

⁵ Bayu ku pa mibait, tilduan na na ku ning Ginu; gewa na kung talasuyu na ban ibalik ku la ding taung pinili na, ban ibalik ku la ding mikalat nang memalen ning Israel. Ing Ginu yang kaku babie dangalan; ya ing panibatan ning kakung sikanan.

⁶ Ngana kaku ning Ginu, Kakung talasuyu, atin kung mas maragul a paobra keka; e mu ing ibalik mu ing dangalan ding mitagan a memalen ning Israel, nune gawan da ka namang sulu para karing sablang bansa, ban ing mabilug a yatu miligtas ya.

⁷ Ketang alang kalupa king pamaglibak, at pikakasaman ding sablang bansa, at talasuyu da ring pamuntuk; ing banal a Dios at talapagligtas ning Israel sasabian na, Akit da kang malaya ding ari, at talakad la ban ipakit da ing pamangalang da; akit da naman iti ding prinsipi at duku la ban galangan da ka. Iti mapalyari uling ing Ginu ya ing memili king talasuyu na; ing banal a Dios ning Israel tutuparan na lang pangaku na.

⁸ Ngana ning Ginu karing taung pinili na, Potang ing panaun datang na ban iligtas da kayu, pakitanan da kayung ganaka at kakung pakibatan ing pamaniawad yung kasaupan. Banten da kayu at ingatan, at king kapamilatan yu gawa kung kasunduan karing sablang bansa. Paintulut kung manuknangan kayung pasibayu king kekong bansa a mesalanta.

⁹ Sabian ku karing makasukul, Mako na kayu. Malaya na kayu! At sabian ku karetang atyu king karalumduman, Lumual na kayu keni king masala! Mangari la karing tupang manyibsiban karing bunduk-bundukan;

¹⁰ e na la dumanup o kumau kapilan man. E na la ananu balang ning pali ning aldo at ning disyerto, uling ing karela manimuna ya itang malugud karela. Tairan na la king danum da ring batis.

¹¹ Gawa kung malualas a dalan karing bunduk, at misadia kung dalan a dalanan ding taung pinili ku.

¹² Ding taung kakung pinili datang lang ibat king marayu, manibat la king norti at king albugan at ibat king Aswan.

¹³ Magkanta kayu, ikong banua! Yatu, kulisak ka king tula! Paburen lang magkantang masikan ding bunduk! Pamatulan na la ning Ginu ding taung pinili na; malunus ya king karelang kasakitan.

¹⁴ Oneng sinabi da ring memalen ning Jerusalem, Pepaburen na katamu ning Ginu! Kelinguan na na katamu!

¹⁵ Inya ing Ginu makibat ya, Malyari ne kayang kalinguan ning ima ing anak na, at e ne luguran ing anak a beit na? Kalinguan ne man ning metung a ima ing anak na, aku e ra kayu kalinguan.

¹⁶ Jerusalem, kapilan man e ra ka malyaring kalinguan, sinulat ku ne ing lagyu mu karing palad ku.

¹⁷ E lumuat datang na la detang maglarin keka, detang miglasak mako na la.

¹⁸ Lumawe ka king makapadurut, at akit mu nung nanu ing malilyari! Mitipun-tipun na la ding kekang memalen; mumuli na la keka! Kabang aku ing mabie Dios, keka lang pagmaragul ding kekang memalen, anti king babaing kakasal king alahas mipalamutian!

¹⁹ Melasak ya at mesalanta ing bansa mu, oneng ngeni maging tutu yang maskup karetang daratang ban manuknangan! At detang keka minyira mirayu na la keka.

²⁰ Datang ing aldo, ding anak a mibait king panaun ning pangayugse keka karelang sabian, Milalu ya kaskup iting bansa; mangailangan tamung malualas a lugal ban maging kekatamung tuknangan!

²¹ Kanita sabian mu king kekang sarili, Ninu ing menganak kareting anak para kaku? Mewala la ding kakung anak at e na ku manganak pa. Miyugse ku at mitabi king marayung lugal; ninu ding peparagul kareting anak? Magdili-dili kung mitagan, nukarin la menibatan deting anak?

²² Ngana ning Ginung Dios karing memalen na, Sumenias ku karing bansa, at iyuli da lang anak yu karing kekong tuknangan.

²³ Maging anti lang tata kekayu ding ari; ding reyna lingapan da kayung anting ima yu. Duku la arapan yu at parangalan da kayu; king kababan lub ipakit da ing kagalangan kekayu. Akilala yu kanita king aku ing Ginu; ala metung mang mipakarine karetang manenayang saup kaku.

²⁴ Malyari kayang akua king sundalus ing banding ikua na? Malyari la kayang aligtas ding bihag ning metung a taung mapaniupil?

²⁵ Ing Ginu ipakibat na, Iti kabud ing mapalyari: Ding bihag ning sundalus mayakua la, at ing simsam ning taung mapaniupil. Labanan ke ing ninumang makilaban kekayu, at iligtas ku la ding anak yu.

²⁶ Agkatan ku lang mipatayan la ding kekayu manggipit; lasing la king pamakamate at king mua. Kanita ding tau akilala ra king aku ing Ginu, ing magligtas at magpalaya kekayu. Akilala ra kanita king aku ing Mayupayang Dios ning Israel.

50

¹ Ngana ning Ginu, Bala yu galang king kaku yang pepalakuan ing kakung balayan anti ing lalaking midiborsyu king keyang asawa? Nu la karin ngeni ding papelis ning pamidiborsyu? Bala yu galang king pisali da kayu king pangabihag kalupa ning lalaking mamisali karing anak na ban maging ipus la? Ali! Mebihag kayu uli da ring kekong kasalanan; mitabi kayu uli ra ding krimen a kekong depatan.

² Obat ing balen ku e ya kinimut inyang pintalan ke ban iligtas? Obat e ya mekibat inyang inaus ke? Milalu ku wari kaina ban e ra kayu aligtas? Apakati ke ing dagat king metung mung amanu, at agawa ku lang metung a disyerto ding ilug, ban king keyalan danum mate lang karelang asan.

³ Apadalumdum ke ing banua, angga king balamu magpaldas ya para karing mete.

⁴ Tiru na ku ning Ginung Dios nung nanu ing sukat kung sabian ban apasiknangan ku la ding mibabayatnan. Dirinan na kung sikanan balang abak ban itang ituru na kaku kakung pakiramdaman.

⁵ Dininan na kung pamanalastas ning Ginung Dios, at e ku linaban o ginulut king Ginu.

⁶ Inarap ke ing gulut ku karetang mamatbat kaku. E ku la sebatan inyang ininsultu da ku, inyang sepuliut dang balbas ku at pigluran ing lupa ku.

⁷ Oneng ing insultu ra e na ku ananu balang, uling ing Ginung Dios yang kaku babie kasaupan. Siniknangan ku ing lub ku ban apibata ku la. Balu ku king milako ing kakung dangalan,

⁸ uling ing Dios malapit ya at patunayan na king ala kung pamikasala. Ating masikan a lub bisang mandalum kako? Paburen yung munta kami king husgadu! Paburen yang karin misampang demanda!

⁹ Ing Ginung Dios ya ing mismung magdipensa kaku, ninu ngeni ing makapatune king mikasala ku? Lumbug la ngan ding sablang mandalum kaku; mawala lang anti ing imalan a pengan ding ipas.

¹⁰ Ikong sablang ating takut king Ginu, at mamintu karing amanu ning keyang talasuyu, mapalyaring ing dalan a kekong daralanan tune yang madalumdum, makanyan man king Ginu yu ibili ing kekong kapanaligan; magtiwala kayu king kekong Dios.

¹¹ Ikong sablang mitatangkang kasiran karing aliwa, masira kayu king mismung sarili yung tangka! Ing Ginu mismu ya ing pasari kaniti; misakitan kayung alang kapara.

51

¹ Ngana ning Ginu, Makiramdam kayu, ikong bisang miligtas, ikong kaku lalapit pasaup. Ganakan ye itang batu nung nu kayu menibat, king lugal nung nu kayu meyakua at metabas.

² Ganakan ye ing makatua yung i Abraham, at i Sarah nung kenu kayu menibatan. Ala yang anak i Abraham inyang inaus ke, oneng kaku yang binendisyunan at dininan dakal a anak; e la abilang-bilang ding keyang lahi.

³ Ipakit ku ing kakung lunus king Zion, karing sablang manuknangan karing melasak nang lugal. Agyang pang ing lugal na metung neng disyerto, gawan ke mu ring metung a hardin, anti ing hardin ku king Eden. Tula at saya ing atyu karin; kantang kapurian at kapasalamatan ing ikanta ra kaku.

⁴ Makiramdam kayu kaku, O taung kakung pinili, makiramdam kayu king kakung sabian: Babie ku ing amanu ku karing bansa; anting sala ning aldo ing iyatad da ring kautusan ku karela.

⁵ Mamirapal kung datang ban iligtas ku la; ing oras ning pamagtagumpe ku malapit na. Aku mismu ing sumakup karing sablang bansa. Ing paniatang ku panayan da ring marayung bansa; manaya lang ating kapanaligan a iligtas ku la.

⁶ Lumawe kayu king banua; lumawe kayu king yatu! Ing banua matda yang anting asuk; ing yatu madunut yang anti ing laun a imalan, at ding sablang tau mate lang anting lango. Oneng ing pamagligtas a darala ku manatili kapilan man; ing tagumpe ku e miyangganan.

⁷ Makiramdam kayu kaku, ikong maki balu king matulid, ikong king pusu yu makatanam lang kautusan ku. E kayu tatakut potang ding tau pamagsisti da kayu at lalapastanganan;

⁸ ding taung makanyan lumbug lang anti ing imalan a pengan ding ipas! Oneng ing kaligtasan a darala ku manatili kapilan man, ing tagumpe ku manatili king sablang panaun.

⁹ Migising ka, Ginu, at saupan mu kami! Gamitan mung kekang upaya at iligtas mu kami; gamitan mu antimo ing king panaun a malambat nang milabas. Ika ing memirasung malati king Rahab, ing dambuala ning dagat.

¹⁰ Ika ing pepakati king dagat, at ginawang dalan libutad ning danuman, ban makadalakit la detang kekang liligtas.

¹¹ Detang linigtas mu miras lang mitmung tula karin Jerusalem, king tula ra magkanta la at kukulisak. Tumula la king kapilan pa man; ing lungkut at siguk mawala ngan.

¹² Ngana ning Ginu, Aku ing babie sikanan keka. Obat tatakut ka king taung ating kamatayan a e manatiling anti ing dikut?

¹³ Kelinguan mu ne wari ing Ginung keka linalang, ing miladlad karing banua at mibili karing pundasyun ning yatu? Obat parati kang mabibie king takut mu king bigsikan da ring keka manggipit, at karetang keka magnasang makamate? E ra na ka apanasakit ning mua ra!

¹⁴ E lumuat ding bihag mibulus na la; kumaba ing bie ra, at ing sablang pamangan a kailangan da miyabie karela.

¹⁵ Aku ing Ginung kekang Dios; aku ing gogogo king dagat, at babie biung karing alun. Ginung Mayupaya ing lagyu ku!

¹⁶ Lidlad ke ing banua, at binili ding pundasyun ning yatu. Ngaku king Jerusalem, Ika ing balen a pinili ku! Binie ku la keka ding amanu ku, at ingatan da ka karing gamat ku.

¹⁷ Migising ka, Jerusalem! Mibangun ka at talakad! Ininum mu ne ing kopa ning kaparusan a pepainum na keka ning Ginu uli ning mua na keka; gisan mu at ngeni paid-paid ka!

¹⁸ Ala metung man a mamalale keka; ala metung man karing memalen mu ing tataid king kekang gamat.

¹⁹ Dobli ing kasakitan a digpa keka; ing bansa mu lesak ne ning gera, at ding memalen mu meranup la. Ala metung mang papakit lunus keka.

²⁰ At king suluk ning balang dalan miragsa lang kekang memalen uli ning mangaina la; mengari lang usa a merakap king lambat ning maniakap. Atakman da na ing bigsikan na ning mua ning Dios.

²¹ Ikong misasakitan nang memalen ning Jerusalem, ikong mangapaid a balamu malasing,

²² ing Ginung kekong Dios ingatan na kayu. Sasabian na, Ilako ku ne ing kopa king kekong gamat a binie ku kekayu uli ning mua ku. E na kailangan ing minum kayu king alak a makidapat king pamipaid-paid yu.

²³ Ilipat ke karetang kekayu menalipit, karetang makidapat king pangapase yu karing dalan at dinamusak kekayu ba lang midalan.

52

¹ Jerusalem, magpakasikan ka at magpakarangal pasibayu! Banal a siudad ning Dios, miblas kang mitmung leguan! E na la pasibayung lungub karing siudad mu ding paganu.

² Jerusalem, malaya na ka king panga-ipus mu! Mibangun ka ibat king alikabuk at lukluk na ka king kekang tronu! Kalagan mu la ding tanikala a gagapus keka, O mebihag nang balen ning Zion!

³ Ngana ning Ginung Dios karing memalen na, Alang salaping mebayad para kekayu kanitang meging ipus kayu; makanyan munaman alang salaping mabayad para maging malaya kayu.

⁴ Kanitang misan atyu kayu Ehipto anting dayuan, oneng kusa yung lub minta karin. Makanyan man kinua na kayung sapilitan ning Asiria at alang mebayad salapi para kekayu.

⁵ At ngeni makanyan munaman ing milyari kekayu king Babilonia; meging bihag kayu karin at alang salaping mebayad para kekayu. Magmaragul la at magmayabang detang sasakup kekayu at ala lang patugut lalapastangan kanaku.

⁶ Oneng king panaun a datang kilalanan yu king aku ing Dios at migsalita ku kekayu.

⁷ Makayama yang lalawan itang talapagbalitang daratang daralan karing kabundukan; magdalang mayap a balita, ing balita ning kapayapan! Ipabalu na ing tagumpe at sabian na king Zion, Ing kekang Dios ya ing mag-ari!

⁸ Detang magbante king siudad kukulisak la, kukulisak lang miyabe-abe king tula ra! Akakit da karing sarili rang mata ing pamagbalik na ning Ginu king Zion!

⁹ Kulisak kayu king tula; miyabe-abe kayung magkanta, ikong lugal a melasak ning Jerusalem! Paligayan na ne ning Ginu ing balen na; linigtas na ne ing siudad na.

¹⁰ Gamitan ning Ginu ing banal nang upaya; iligtas na la ding memalen na at mabilug a yatu iti akit na.

¹¹ Lakuan yu ne ing Babilonia, ikong karing kasangkapan ning Templo magdala. Karing bawal a bage e kayu tatagin; ingatan yung malinis ing sarili yu at lakuan yu ne ing siudad.

¹² Ngeni e na kailangan ing mako kayung mirarapal; e na kayu balamu tatakas! Ing Ginung kekong Dios ya ing kekayu tumaid, at ingatan na kayu misusumangid.

¹³ Ngana ning Ginu, Magtagumpe ya ing talasuyu ku king obra na; mirangal yang alang kalupa.

¹⁴ Mebigla la ding dakal kanitang ikit de; uling ing lupa na medisporma ya, halus e ne itsurang tau.

¹⁵ Oneng ngeni mangapamulala la ding dakal a bansa, at e la makapagsalita ding ari king pangapamulala ra. Akit da at aintindian itang bage a ngeni ra pa dimdam.

53

¹ Ngara ding tau, Ninu ing malyaring maniwala kekami king ipamalita mi ngeni? Ninu ing malyaring makaintindi king iti dapat ning Ginu?

² Kaburian ning Ginu king ing talasuyu na tumubu yang anting tanaman a magyamut king malanging gabun. Ala yang dangalan o leguan ban kekatamu yang pansinan. Alang nanumang makawili king talasuyu na ban lapitan ta ya mo sana.

³ Lepastangan de ring tau at tinggian; pibata na ing kaplas at ing kasakitan. Ala mang bisang lumawe king keyang kabilian; e ta ya pinsingan, anti yang alang kabaldugan.

⁴ Makanyan man ya ing mibata king kasakitan a kekatamu mangaintuliran, ing sakit a sukat itamu sana ing memusan. Bala tamu king ing keyang kasakitan parusang king Dios menibatan.

⁵ Oneng mesugat ya uli da ring kekatamung kasalanan, mebugbug ya uli ning depat tamung e mayap. Ing parusang keyang pigdusan yang kekatamu mekapaldan, kinayap tamu king uli ra ding barug a digpa king katawan na.

⁶ Mengari tamung tupang mebating; ing balang metung kekatamu minarap ya king sarili nang dalan. Oneng ing Ginu tilutan nang dugpa king keyang talasuyu ing kaparusan, itang parusang kekatamu mangaintuliran.

⁷ Pepasakitan deng ustu, oneng pibata na ngang mitmung katahimikan; e ya migsalita agyang metung mu mang amanu. Mengari ya king biserung tupa a malapit nang katatan; mengari yang tupang malapit nang ururan, e ya migsalitang nanuman. fig,,,,,... e ya migsalitang nanuman.,(53:7)fig*

⁸ Dekap de at sinintensia at kaybat liwal ban patayan; ala metung mang mekialam king meging keyang kapalaran. Pete re alang-alang king kasalanan ding kekatamung memalen.

⁹ Dela re king kutkutan kayabe da ring makasalanan; kitkut deng kayabe ding taung ating pibandian, agyamang ala yang depatan a kasalanan, at e bitasang migsalitang kalaraman.

¹⁰ Ngana ning Ginu, Kaburian ku ing dumalan yang kasakitan; metung yang ain-sakripisyu ing kamatayan na ban mipatawaran ing kasalanan. Inya akit na lang lahi na; kumaba ya bie at king kapamilatan na ing parasan ku magtagumpe.

¹¹ Kaybat ning bie nang mitmung kasakitan, pasibayu yang mika kaligayan; abalu na king e mewalang kabaldugan ing keyang kasakitan. Ing tapat kung talasuyu a tutu kung pitutulan tanggapan na ing parusang mangaintulid karing dakal, at alang-alang keting talasuyu patawaran ku la.

¹² Inya naman dakayanan keng lugal a mitmung dangalan, metung a lugal libutad ding taung mayupaya at marangal. King mitmung kalausan a lub dinaun nang bie na, at tinggap ing kapalaran da ring taung e mayap. Kinua na ing lugal ding dakal a makasalanan, at penalangin na king kamtan da sa ing kapatawaran.

54

¹ Jerusalem, mengari kang metung a babaing e mikayanak, oneng ngeni king tula makapagkanta ka't makakulisak. Ngeni mikayanak kang mas dakal kesa king babaing e na bitasang likuan ning asawa na!

² Idagul me ing toldang kekang tuknangan; ikaba mu la ding lubid na, at pakatibe ding tulus na!

³ Isulung mu la ding kekang angganan king mingatba-ngatbang lugal; akua rang pasibayu ding kekang memalen ing gabun a ngeni sasakupan da ring aliwang bansa; ding siudad a alang manuknangan karing tau pasibayu lang mikatmuan.

⁴ E ka tatakut; e na ka pasibayung milako dangalan; e na ka mibili pa king kamarinayan. Akua mu nang kalinguan ing kekang kataksilan kanitang kayanakan kang talasawa, at ing lubus mung pamangulila antimong metung a biuda.

⁵ Ing keka Miglalang mangari yang asawa keka, Ginung Mayupaya ing lagyu na! Ing banal nang Dios ning Israel ya ing magligtas keka; ya ing sasakup king mabilug a yatu!

⁶ Israel, mengari ka king kayanakan a babaing talasawa a kewanian ning asawa na, at lubus meligalig. Oneng ing Ginu ausan na kang magbalik na. Ngana,

⁷ King ditak a penandit likuan da ka; pasibayu kuanan da ka uli ning maragul kung lugud.

⁸ King ditak a penandit gilutan da ka, uling mimua ku keka, oneng ipakit ku keka ing lugud kung alang angga. Makanyan ing sasabian na ning Ginung magligtas keka.

⁹ Pengaku ku kanitang kapanaunan nang Noe king e na ku paralang albug king yatu. Ngeni ipangaku ku keka king e na ku pasibayung mimua; e ra na ka paniabianan o parusan.

¹⁰ Malyari lang mawala ding bunduk, at miyalis ding bunduk-bundukan, oneng ing tapat kung lugud keka kapilan man e miwakasan; tuparan ku king kapilan man ing pengaku kung kapayapan. Makanyan ing sasabian na ning Ginung malugud keka.

¹¹ Ngana ning Ginu, O Jerusalem, siudad a magkakasakit at ala nang akarapat, mamatula keka ala metung man. Italakad ku lang pasibayu ding kekang pundasyun king kapamilatan ding batung mangamal.

¹² Gawan ku la ding kekang tore karing batung rubi, ding kekang pasbul dalan gawan ku la karing batung maslag, ding makapadurut mung pader batung mangamal ing kakung ikabit.

¹³ Aku mismu ing turu karing kekang memalen, at dinan labis-labis a kabiayan ampon kapayapan.

¹⁴ Ing hustisia at ing katuliran gawan da kang masikan. Miligtas ka karing manggipit at king takut.

¹⁵ Nung lumusub ya keka ing ninuman, iti daptan na king e ku kaburian. Masambut ya ing ninumang keka lumaban!

¹⁶ Aku ing linalang king pande a pataung api at miyuyubug sandata. Aku munaman ing linalang king sundalus a gagamit karing sandata ban makamate.

¹⁷ Oneng alang sandatang malyaring makapanasakit keka; atin kang ipakibat karing sablang maki bintang keka. Idipensa ku la ding kakung talasuyu at dinan tagumpe. Ing Ginu ya ing migsalita.

55

¹ Ngana ning Ginu, Me ko keni, ikong sablang kakau, oyni ing inuman yo! Me ko keni, ikong alang pera, sali kayung trigu at mangan kayu! Me ko keni, sali kayung alak at gatas, e kayu magastus nanuman!

² Baket paigastus kayu king e tune makakabsi? Baket sueldu gagastusan yu la, makanyan man danupan kayu pa? Makiramdam kayu kaku, at daptan ing kakung sasabian, at mayama kayung mangan king pekamaniaman a pamangan.

³ Makiramdam kayu ngeni taung kakung pinili, at lumapit kayu kaku; lumapit kayu kaku at mika bie kayu! Gawa kung kasunduan kekayu a manatili king kapilan man, at ibie ku la kekayu ding kanuanan a pengaku ku kang David.

⁴ Gewa keng manimuna at komandanti da ring bansa, at kakung pepakit ing kakung kayupayan king kapamilatan na.

⁵ Ngeni keka lang ausan ding aliwang bansa a kanitang misan ila e ra ka kakilala, oneng ngeni mamirapal lang datang ban makiabe la keka! Aku, ing Ginung kekang Dios, ing banal nang Dios ning Israel, iti kaku ngan papalyarian; dinan da kang ligaya at dangalan.

⁶ Ngening malapit ya panintunan me ing Ginu at ausan me.

⁷ Paburen lang gumulut ding taung e mayap king karelang e ustung dapat, at ibayu ing karelang pamisip. Paburen lang magbalik king Ginung kekatamung Dios; uling mapaglunus ya at mapamatawad.

⁸ Ngana ning Ginu, Ding kakung isipan e da la kalupa ding kekong isipan, at ding kakung paralan makayaliwa la kekong paralan.

⁹ Nung makananu ya katas ing banua king yatu, makanyan lang maygit matas ding paralan at pamisip ku kesa karing kekayu.

¹⁰ Mengari ing kakung amanu king yelu at uran a mababaldug ibat king banua ban ing yatu diligan ya. Patubuan dang tanaman at munie bining tatanam at pamangan.

¹¹ Makanyan ing malyari king amanung kakung sasabian; e magbalik kakung alang daralan o e tiparan ing buri kung keyang daptan.

¹² Lakuan ye ing Babilonia kayabe ing tula; ibat king siudad mipanimunan kayung lumual payapa. Lunto ing pamagkanta karing bunduk at bunduk-bundukan, at ding tanaman kulisak la king tula ra!

¹³ Tumubu lang tanaman a sipres king ibatan ding dikut; lugal king suksuk lang lunsut, tanaman lang mirto ding tumubu. Iti ya ing maging tanda a manatili king kapilan pa man, metung a paganaka king aku pin ing Ginung makirapat kaniti.

56

¹ Ngana ning Ginu karing taung pinili na, E na lumuat iligtas da kayu. Inya daptan yu itang mayap at matulid.

² Bendisyunan ku la detang parating mangiling at gagalang king Aldo ning Sabbath. Bendisyunan ku la ding e darapat nanumang e mayap.

³ E na sukat sabian ning taung dayuan a mekianib karing taung pinili na ning Ginu ing anti kaniti, E na buri ning Ginu ing samba kung kayabe ra ding taung pinili na. E na naman sukat isipan ning taung kapun king uling e ya malyaring mikayanak e ne malyaring maging kayanib king balen a pinili ning Dios.

⁴ Sasabian na ning Ginu king taung anti kaniti, Nung gagalangan mu ku king kapamilatan na ning pamagmasusi mu king Aldo ning Sabbath at nung daraptan mu itang babie tula kanaku at tapat kang tutupad king kakung kasunduan,

⁵ e makalinguan ing kekang lagyu king kakung Templo at karing taung pinili ku. Mie yang lalung malambat ing lagyu mu kesa ketang mikayanak kang lalaki at anak a babai. E ka makalinguan.

⁶ At sasabian na ning Ginu karetang taung dayuan a meging dake na ning balen a pinili na a malugud at susuyu ampon mangiling king Aldo ning Sabbath at tapat tutupad king kasunduan:

⁷ Idala da kayu king Zion, king banal kung bunduk; dinan da kayung tula king kanakung bale pipanalanginan at tanggapan ku la ding ain-sakripisyung babie yu king kanakung altar. Mayaus yang bale pipanalanginan ing Templo ku para karing sablang tau.

⁸ Ing Ginung Dios a miyuli king balen nang Israel ibat pangayugse na king marayung lugal, pengaku nang ituki na la ding aliwang tau ban makiabe la karela.

⁹ Sinabi na ning Ginu karing aliwang bansa king datang lang anting mabagsik a animal at laklakan da la ring taung pinili na.

¹⁰ Ngana, Bulag la ding sablang manimuna a sukat munie babala karing taung pinili ku! Ala lang kabalu-balu. Mengari lang asung bante a e biasang kaung; kera-kera la mu at mamaninap. Tutu lang matako tudtud!

¹¹ Mengari la karing asung matako a alang pikabsian. Ala lang aintindian deting manimuna. Daraptan na ning balang metung at metung karela itang buri nang daptan at ala lang sisikasuan nune mu ing sarili dang kapakanan.

¹² Ngara deting lasenggu, Tara, kuma tamung alak at inuman ing anggang agyu tamu! Mas masanting ya ing aldo bukas kesa king ngeni!

57

¹ Mate la ding mayap a tau at ala metung mang makaintindi o magmasabal karela. Oneng potang mate la, ala nang sakuna a miras pa karela.

² Manakit lang kapayapan detang mabibie king mayap a pamibiebie at kapaynawan king karelang kamatayan.

³ Ikayung makasalanan, lumapit kayu keni ban miyatulan! Ala kayung pangayaliwa karing mangkukulam, karing makipangalugud, at karing babaing magtinda king katawan da.

⁴ Ninu ing gagawan yung pikaylian? Ikayung malaram, ninu ing kekong kakantiawan?

⁵ Sasamban yu la ding kikilalanan dang dios king kapamilatan na ning pamanyiping yu karing babaing atyu lalam da ring kekayung sagradung tanaman. Iyain yu la ding anak yu bilang ain-sakripisyu karing lukib a batu lele da ring mamagus a batis.

⁶ Karin kayu kakuang batung malinatnat at sasamban yu lang anting dios. Tutugtug yu ing alak bilang ain-sakripisyu yu karela at pagdala yu la pang trigu bilang ain yu. Isipan yu galang king tutula ku king sablang daraptan yung yan?

⁷ Ukiatan yu la ding mangatas a bunduk ban munie ain-sakripisyu, at ban daptan ing pamitan ning kekong laman.

⁸ Bibili yu la kilub yung bale tulid pasbul ding makasumami yung idolo. Kaybat, tinggian yu ku; maglubas kayu at magkera karing kama yung malapad kayabe ding kekayung kalaguyo, at babayaranan yu la ban sumiping la kekayu. At karin ing pita ning laman ya ing panusigan yu.

⁹ Mangaskas kayung laru at magpabanglu at kaybat pupunta kayung sasamba king dios a i Molek. Ban manakit kayung aliwa pang dios a malyari yung samban, mitutubud kayung tau karing marayung lugal pati na king tuknangan da ring mete.

¹⁰ Mapapagal kayu king pamanintun yung aliwang dios, oneng e kayu pa mu rin patugut. Isipan yu king ding idolo ila ding babie sikanan kekayu, inya e yu panamdaman ing pagal.

¹¹ Ngana ning Ginu, Ninu deting dios a pitatakutan yu at king uli ra maglaram kayu kanaku at lubus yu kung kakalinguan? Tinuknang na kayu waring tatakut kanaku uli na ning ala kung bulad king makabang panaun?

¹² Magkang isipan yu king ustu ing daraptan yu, oneng ibulalag ku ing kekayung dapat, at e ra kayu malyaring asaupan ding idolo yu.

¹³ Potang papiglo kayung maniawad saup, paburen yung ding idolo yu ilang sagip kekayu! Mipaid la ngan deti king tiup na mu ning angin! Oneng detang manalig kanaku abandi re ing bansa at samban da ku king kanakung Templo!

¹⁴ Ngana ning Ginu, Paburen yu lang mibalik kanaku ding taung pinili ku. Ilako yu ing nanumang sagabal king daralanan da! Gawan ye at isadia ing dalan!

¹⁵ Aku ing matas at banal a Dios a mabie kapilan man. Manuknangan ku king matas at banal a lugal, oneng manuknangan ku munaman libutad da ring taung mapagpakumbaba at sisisi ban abalik ku ing kapanaligan at ing kapanayan da.

¹⁶ Dininan ku lang bie ding taung pinili ku, at e ku na isundu ing pamamarsala karela, at e na ku mimua kabang-kaba karela.

¹⁷ Mimua ku pin karela uli na ning karelang pamikasala at kasakiman. Inya king mua ku perusan ku la at gilutan. Oneng masias la buntuk at sindu ra ing sarili dang kaburian.

¹⁸ Ikit ku ing karelang depat; makanyan man, uluan ku la. Tairan ku la at saupan ampon paligayan ding tatangis.

¹⁹ Iyaluk ku karela ing kapayapan, karing atyu king makalapit at ding king marayung lugal! Uluan ku la ding memalen ku.

²⁰ Oneng mengari la ding taung e mayap king balisang dagat a ing alun na e patugut sasadsad magdalang dinat at burak.

²¹ Alang kapayapan para karing makasalanan, ngana ning Ginu.

58

¹ Ngana ning Ginu, Kulisak kang masikan anggang binit mu! Sabian mu karing memalen kung Israelita ing kasalanan da!

² Sasamban da ku aldo-aldo at sasabian da king matula da lang buring abalu ding tuntunan ku at pamintuan ding kanakung kautusan. Aduan da ing dinan ku lang kautusan a makatuliran at matutula lang sasamba kanaku.

³ Ngarang mengutang ding tau, Baket kailangan pa ing mag-ayunu tamu, nung e na katamu mu rin pansin ning Ginu? Baket kailangan pa ing pairanup tamu, nung e na katamu mu rin papansinan? Nganang mekibat karela ning Ginu, King kamatutuanan kabang mag-ayunu kayu, iyagnan yu naman ing pamanintun yu king sarili yung kapakanan at gigipitan yu la ding magobra yu.

⁴ Mumuli mu ing pamag-ayunu yu king pamipatepate at tumbukan. E ku pakiramdaman ing panalangin yu nung makanyan mu ing pamag-ayunu yu.

⁵ Pasakitan yu ing sarili yu neng mag-ayunu kayu; duruku yu la ding buntuk yu anti ing bulung ning tanaman, at miladlad kayung langgotsi ampon mibibiling abu ban pipagkeran yu. Iti ya wari ing ausan yung pamag-ayuno? Isipan yu mo galang king tutula ku king dapat yung yan?

⁶ Oyni ing pamag-ayunung buri ku: Ilako yu la ding tanikala na ning pamanggipit, ipatupad ing hustisia, at gawan malaya ding magigipit.

⁷ Dinan yu la king pamangan yu ding danupan at ibuklat ding pibalebale yu para karing pakakalulung alang tuknangan. Dinan yu lang imalan ding lubas at e yu la tatanggian saupan ding kamaganak yu.

⁸ Kanita sunlag ya kekayu ing lupa ku anti ing aldo neng abak at agad lang kumayap ding sugat yu. Manatili kung atyu kekayu ban iligtas da kayu; ing panga-atyu ku kekayu ya ing mingat king sablang aldo ning bie yu.

⁹ Pakibatan da kayu potang manalangin kayu kanaku. Makibat ku potang maus kayu. Nung tuknang na kayung manggipit, manabusu, at magsalitang e mayap,

¹⁰ nung munie kayung pamangan karing danupan at saupan ding atyu king pamangailangan, kanita ing dalumdum a makapadurut kekayu miyalilan king sala na ning kaugtuan aldo.

¹¹ At manatili kung matnube kekayu at katmuan da kayu king sablang mayap a bage. Pasiknangan da kayu at dinan mayap a pamikakatawan. Mangari kayu karing tanaman king mulahan a parating madidilig at anting batis a e kakati.

¹² Larinan da ring memalen yu ing mesira king minunang panaun; italakad da lang pasibayu karing matuang pundasyun na ning siudad. Maging pikabaluan kayu anting taung miglarin karing pader at karing mesirang tuknangan.

¹³ Ngana ning Ginu, Nung kilalanan yeng banal ing Aldo ning Sabbath at nung tuknangan yung panintunan ing sarili yung kapakanan king aldong iti; nung pakamalan ye ing kanakung banal a aldo at nung galangan ye king kapamilatan na ning e yu pamaglakbe, pamagobra o king pamakipagkwentung alang kapupuntalan,

¹⁴ kanita manakit kayung tula a bunga na ning kekayung pamaniuyu kanaku. Gawan da kayung taung kalang-alangnan king mabilug a yatu; maging tula ye ing bansa a binie ku king makatua yung i Jacob. Aku, ing Ginu, ing migsalita.

59

¹ E ya maina ing Dios; aligtas na kayu! E ya maklak; daramdaman na kayung maniawad saup!

² Ding kasalanan yu ila ding sangkan nung inya e na kayu daramdaman. Ding kasalanan yu ilang pepasari king pangakawani yu king Dios.

³ Malaram kayu, mabagsik, at makamate tau!

⁴ Ala na kayu king matulid, makanyan man pupunta kayu pa mu rin king husgadu. Manalig kayu king kalaraman ba yeng apapaniambutan ing kasu yu. Gagampanan yu ing tingka yung makapanasakit karing aliwa.

⁵ Ding e mayap yung tangka a kekayung gagawan kasing bagsik da la ring ebun na ning ubingan a kamandagan. Balbalan ya ing ebun at ubingan ya ing lumual! Oneng ala kayung apala karing kekayung tangka; ala lang ulaga, anti lang imalan a megawa king saput ding babagua!

⁶

⁷ Ala kayung patugut mibabalak e mayap at mamalagua kayung daptan la. E kayu bitasang mikakunung makamate taung alang kasalanan. Kasiran at kapahamakan ing kekayung lalakuan nu kayu man miras,

⁸ at alang taung mipanatag a lub neng atyu kayu. Ala king katuliran ing sablang dapat yu. Baluktut ya ing dalan yu at ninumang tutuntun king dalan a yan ala yang kapanatagan.

⁹ Ngara ding tau, Ngeni balu mi na ing sangkan nung inya e na ke liligtas ning Dios karing gigipit karela. Pagnasan mi ing sala king paglakad mi, oneng pawa ngan karalumduman ing makapadurut kekami

¹⁰ at mengari kaming bulag a kakapkap. Mangatakid kami king kaugtuan aldo, balamu wari atyu ke king busal ning kabengian; balamu wari atyu kami king maralumdum dang tuknangan ding mete.

¹¹ Mitatakutan kami at maliligalig. Pagnasan mi naman ing iligtas na kami ning Dios king pangagipit at king e ustu, oneng alang malilyari.

¹² Ginu, ding kasalanan a depat mi laban keka tutu lang dakal. Ding kasalanan mi ilang susumbat kekami. Balu mi la ngan.

¹³ Mig-rebeldi kami laban keka; likuan da ka at e ke mebisang tuki keka. Gipitan mi la ding kalupa ming tau at ginulut ke keka. Mali la ding pamisip mi at pawang kalaraman ing sasabian mi.

¹⁴ Mipaburen ing hustisia at masakit panintunan ing katuliran. Mangapildis ing katutuan karing plasa at alang lugal ing katapatan.

¹⁵ Tutung ditak ing katapatan, inya ing ninumang tutuknang gagawang e mayap maging biktima ne ning krimen. Ikit na iti ning Ginu at melungkut ya uli na ning alang hustisia.

¹⁶ Mangapamulala ya uling ala yang akakit babie saup karing magigipit. Inya gamitan na ing upaya na ban iligtas na la at ban akua ing tagumpe.

¹⁷ Isulud ne ing hustisia anti ing baluti na ning sundalus, at anting helmet ing magligtas nang upaya. Miblas ya king maragul a kapagnasan at mibili la ding bage king sukat dang pagkabilian, at mamarusa ampon mablas karing kamalian a babie pasakit karing tau.

¹⁸ Parusan na la ding kalaban na, agpang king depat da, pati na detang manuknangan karing marayung lugal.

¹⁹ Manibat king aslagan angga na king albugan, ing balang tau mitakutan ya king Ginu at king maragul nang upaya. Datang yang anti ing mabilis nang agus ning ilug; anting masikan a angin.

²⁰ Ngana ning Ginu karing taung pinili na, Datang ku karin Jerusalem ban ingatan da kayu at iligtas, ikayung sablang ginulut karing pamikasala yu.

²¹ At gawa kung kasunduan kekayu: binie ku kekayu ing upaya ku at ding turu ku ban maging kekayu la king kapilan pa man. At pamintuan yu la manibat ngeni at ituru karing anak yu at karing lahi yu ban mamintu kanaku king kapilan pa man.

60

¹ Jerusalem, talakad ka, at sunlag anti ing aldo; ing ligaya ning Ginu keka saslag ya!

² Mitakpan la king kadalumduman ding aliwang bansa. Oneng keka ing sulu ning Ginu sunlag ya; ing ligaya na manatili keka!

³ King uli ning kekang sala datang la ding bansa. Ari datang la uling ing bayu mung aldo saslag ya.

⁴ Lumawe ka king makapadurut, at kekang lawan ing malilyari; kekang memalen mititipun la ban muli keka! Datang lang ibat king marayung lugal ding anak mung lalaki. Datang la ding anak mung babai a kikilikan dang anting anak a malati.

⁵ Akit mu yan at mikatmuan kang tula; galgal ka uli na ning kekang kaligagan. Idala ra keka ing pibandian da ring bansa. Keka datang ing pibandian a ibat king lipat ning dagat.

⁶ Manibat king Midian at Efa kamelyu datang la ngan. Ibat Seba naman gintu at insenso ing karelang daralan. Ipamalita da ring tau ing mayap a depat ning Ginu!

⁷ Sablang tupa ning Kedar at Nebayot maging ain-sakripisyu lang keka ra ibie; king altar da ibie ban ing Ginu ya ing paligayan. Mas matindag ya kesa king sadia ing Templong gawan ning Ginu.

⁸ Nanu la deting maglayag pakakalale daratang anting biga; anti lang patipating mumuli king tuknangan da?

⁹ Barku lang ibat karing marayung bansa, piniling tau ning Dios yuyuli da la. Pilak at gintu ing darala ra ban ing lagyu ning Ginu parangalan da, ing banal nang Dios ning Israel a makipasari karing sablang bansa ban parangalan lang taung pinili na.

¹⁰ Ngana ning Ginu king Jerusalem, Tau lang dayuan ding maglarin karing kekang pader, at karelang ari keka sumuyu la. King uli ning mua ku pepasakitan da ka, oneng ngeni lunus ibie ku keka.

¹¹ E la mikabat ding pasbul dalan mu king aldo at bengi ban ding ari ding bansa ayatad da keka ing pibandian da.

¹² Oneng ding bansang e susuyu keka malasak lang lubus.

¹³ Ding tanaman a pino, hunipero, at sipres a pekamasanting a tanaman karing gubat ning Lebanon idatang da la ban paglarin keka, Jerusalem, ban ing Templo ku magawa yang kitmuan leguan, ban siudad ku maging maligaya ya. fig,,,,,...a pekamasanting a tanaman karing gubat ning Lebanon...,(60:13)fig*

¹⁴ Datang la ding anak da ring keka menggipit, at duku ban kagalangan keka ibie ra. Samba la arapan mu detang kanitang misan keka meninsultu. Ing Siudad ning Ginu ing keka ra ipamalagyu, Zion, ing Siudad ning Dios a Banal ning Israel.

¹⁵ E na ka pasibayung mipainggulutan at pikakasaman ni siudad a melakuan at mipaburen. Gawan da kang marangal at mitmung leguan, metung a lugal ning tula angga king kapilan pa man.

¹⁶ Anti ing metung a imang pasusu king anak na ding bansa at ding ari lingapan da ka. Abalu mu king aku, ing Ginu, ing migligtas keka, ing mayupayang Dios ning Israel ya ing keka magpalaya.

¹⁷ Gintu ing idala ku keka at e tangsu, pilak at e bakal; tangsu at e dutung; bakal at e batu. Ding keka manimuna e ra na ka gipitan; uling gawan ku lang pamuntuk a ating hustisia at kapayapan.

¹⁸ Ing inge ning bigsikan e na maramdam; e na datang king kekang bansa ing kasiran. Maging anti kung pader a mag-dipensa keka; purian mu ku uling linigtas da ka.

¹⁹ E mu ne maging sulu ing aldo king kayaldawan o ing bulan neng kabengian. Aku, ing Ginu, ing maging sulu mung alang kapupusan; ing sala ning kakung ligaya ya ing sunlag keka. fig,,,,,Aku... ing maging sulu mung alang kapupusan...,(60:19)fig*

²⁰ Ding aldo ding kalungkutan mu miwakasan na la. Aldo at bulan lunto-lumbug la, oneng aku, ing Ginu, ing maging sulu mung alang angga.

²¹ Ing matulid yang daptan ding kekang memalen, at maging bandi re kapilan man ing gabun a kakung pengaku. Tenam ku la, aku ing karela linalang ban karing sabla sabian da ing kakung degulan.

²² Agyang ing pekamalati at kalulu mung diling pamilya maging maragul yang anti ing bansang mayupaya! Iti daptan kung agad potang ing panaun a mituldu datang na. Aku ing Ginu!

61

¹ Kitmuan na ku ning Ginung Dios king espiritu na. Pinili na ku at tinubud ban karing kalulu mayap a balita iyatad ku, ban uluan lang pusung sugatan, ban ihayag karing bihag ing pangaligtas da at ing kalayaan karing atyu king sukulan.

² Tinubud na ku ban sabian king miras na ing panaun ban ing Ginu iligtas ne ing balen a pinili na, at sambutan karelang kalaban. Tinubud na ku ban ding tatangis kaku lang paligayan,

³ ban detang tatangis king Zion kaku lang atdanan tula at saya king lugal ning kalungkutan, lugal king tangis magkanta lang kapurian. Mangari la karing tanaman a tenam na mismu ning Ginu. Daptan da ngan ing matulid at ustu, at purian de ing Dios uli ning depat na.

⁴ Larinan da lang siudad a maluat nang sira at makaragsa.

⁵ Aliwa lang tau ding sumuyu keka. Pastulan da lang kawan mung tupa at baka, gabun mu karelang tamnan, at mulahan mung ubas karela yang lingapan.

⁶ Makilala kayung pari ning Ginu, talasuyu ning Dios tamu. Tamasan yu ing pibandian da ring bansa, at ipagmaragul yu king iti kekong bandi.

⁷ Miyangganan nang kekong kamarinayan at alang dangalan. King sarili yung gabun karin kayu manuknangan, maging dobli ing kekong pibandian; tula yu manatili kapilan man.

⁸ Ngana ning Ginu, Kaluguran ku ing hustisia, kasaman ku ing pamanako at ing sablang e mayap. Ding taung kakung pinili tapat ku lang ablasan; karela gawa kung kasunduan a alang kayangganan.

⁹ Mibantug la karing sablang bansa; abalu na ning balang metung a manakit karela king ila ding taung kakung binendisyunan.

¹⁰ Magsaya ya ing Jerusalem uli ning depat ning Ginu. Mengari ya king dalagang makaimalan pangkasal. Pibablas ne ning Ginu king tagumpe at kaligtasan!

¹¹ Nung makananu lang sisibut at tutubu ding bini makanyan na lang iligtas ning Ginung Dios ding taung pinili na, at ding sablang bansa purian de ing Ginu.

62

¹ Magsalita ku ban sikan ya lub ing Jerusalem; e ku magtahimik anggang e ya mikabus, at anggang ing tagumpe e ya sunlag anting sulu ning kabengian.

² Jerusalem, sablang bansa akit dang kekang pamanagumpe! Ligaya mu akit da ring karelang ari. Mayaus ka king bayung lagyu, lagyung ibie ning Ginu.

³ Mangari kang malagung korona at mal a diadema para king Ginu,

⁴ E na ka pasibayung mayaus Mipaburen; ing bansa mu e ne mipamansagan, Ing Babaing Likuan ning Asawa na. Ing bayu mung lagyu Ing Dios tutula ya Keka! Ing bansa mu mayaus yang Masaya ing Bie nang Talasawa, uling ing Ginu metula ya keka at mangari yang metung a asawa para king kekang bansa.

⁵ Mangari ya king lalaking makiasawa king babaing kakasal na, itang miyubug keka pakasalan na ka. Nung makananung ing lalaking bayung kasal mayayama ya king ayasawa na, ing kekang Dios makanyan yang mipamatulan keka.

⁶ Jerusalem, karing pader mu mibili kung guardia; bengi at aldo sukat lang e magtahimik ban pangaku ning Ginu ipaganaka ra, at e ra paintulut ing makalinguan la.

⁷ E re sukat patugutan ing Ginu anggang ing Jerusalem e ne italakad pasibayu, at anggang e ya maging siudad a pupurian ning mabilug a yatu.

⁸ Tapat nang pengaku ning Ginu, at kapamilatan ning upaya na iti tuparan na: Ing kekong trigu e na maging kabiayan da ring kekong kalaban, at e na la minum ding dayuan king kekong alak.

⁹ Oneng ikong tinanam at minalut king trigu ing mangan king tinape na, at munie kapurian king Ginu! Ikong tinanam at minupul ubas ikayu ing minum king alak karing patyu ning kakung Templo.

¹⁰ Lumual kayu, ikong memalen ning Jerusalem at gawang dalan para karing magbalik yung kabalen! Isadia ye ing dalan a malualas; ilako lang batung kalatkalat! Mibili kayung tanda ban abalu da ring bansa fig,,,,,... gawang dalan para karing magbalik yung kabalen!,(62:10)fig*

¹¹ king ing Ginu ipabalu na ing anti kaniti king yatu: Sabian yu karing memalen ning Jerusalem king daratang ya ing Ginu ban magligtas kekayu; darala na la taung segipan na!

¹² Mayaus kayung Banal nang Memalen ning Dios, Ding Taung Linigtas ning Ginu. Ing Jerusalem mayaus yang Siudad a Pakamalan ning Dios, Ing Siudad a E Na Pepaburen ning Dios.

63

¹ Ninu iting daratang ibat king siudad ning Bozra ning Edom? Ninu iting makamal a makapiblas malutu, lalakad mitmung kayupayan, at sikanan? Ya ing Ginu, ing mayupayang magligtas; daratang ya ban ihayag na ing tagumpe na.

² Baket ing susulud na malutu a kalupa na ning lalaking daramusak ubas king pigagawan alak?

³ Nganang mekibat ning Ginu, Anti ding ubas demusak ku la ding bansa at alang dinatang ban sumaup kanaku. King mua ku telasan ku la, at ing daya ra ya ing pepalare king imalan ku.

⁴ Inari ku king lub ku king dinatang na ing aldo ning pamagligtas karing taung pinili ku; oras na ban parusan ku la ding kalaban da.

⁵ Inyang miglalawe ku, mipamulala ku king ikit ku uling ala metung mang sumaup kanaku. Oneng ing mua ku ya ing pepasikan kanaku, at ikua kung dili ku ing tagumpe.

⁶ King mua ku demusak ku la ding sablang bansa at simbulat ku la. Tigtug ku ing karelang daya king gabun.

⁷ Isalita ku ing e kukupas nang lugud ning Ginu, purian ke king sablang depat na kekatamu. Lubus na lang binendisyunan ding memalen ning Israel, uli na ning lunus at lugud nang alang kupas.

⁸ Nganang sinabi ning Ginu, Ila ding taung pinili ku; e ra ku pagtaksilan. Inya naman linigtas na la

⁹ king sabla rang kasakitan. E ya metung a anghel, nune ing Ginu mismu ya ing migligtas karela. Linigtas na la uli na ning lugud na at lunus. Ya ing parating mimingat karela king milabas a panaun.

¹⁰ Oneng linaban la king Ginu at pepalungkut de ing banal nang espiritu. Inya meging kalaban de ing Ginu at lebanan na la.

¹¹ Oneng aganaka ra kanita ing karelang milabas, itang panaun nang Moises a talasuyu ning Ginu. Kaybat kitang da, Nu ya karin ngeni ing Ginung migligtas karing manimuna na ning balen na keta king dagat? Nu ya karin ing Ginung minie king banal nang espiritu kang Moises?

¹² Nu ya karin ing Ginung ginamit king upaya na at dinapat makapagmulalang bage king kapamilatan nang Moises; sigsag ne ing danum ning dagat at tinaid na la ding memalen na libutad ning malalam a danuman ban akua na ing alang kapupusan a kabantugan para king sarili na? Alipatan de ing dagat king pamanimuna na ning Ginu karela, anti lang kabayung malyap; e la bitasang misakab.

¹³

¹⁴ Nung makananung tatairan na la ning pastul ding baka king malabung a dikut king kapatagan, makanyan na lang dininan kanawan ning Dios ding taung pinili na. Penimunan ne ing balen na at iti migdalang dangalan king lagyu na.

¹⁵ Ginu, lawan mu kami ibat king banuang tuknangan mu, busal ning kekang kabanalan at ligaya. Nukarin ing maragul mung malasakit para kekami? Nukarin ing upaya mu? Nukarin ing lugud mu at lunus? E mu ke sa kakalinguan.

¹⁶ Ika ing kekaming tatang. E ra ke kikilalanan agyang di Abraham at Jacob a makatua mi, oneng ika, Ginu, ing kekaming tatang, e mu ke tiknangan liligtas.

¹⁷ Baket paintulutan mung mililisia kami karing kekang dalan? Baket paburen mu ing kesiasan ming buntuk at ing pamipainggulut mi keka? King uli ra detang susuyu keka magbalik ka kekami at king uli da ring taung kekang pinili a menatiling bandi mu kapilan man.

¹⁸ Ikami, ding memalen mung banal, tinabi da kami ding kalaban at lepastangan de ing kekang santuaryu.

¹⁹ Linawe mu kaming balamu wari kapilan man e mu ke pa sekupan; anti waring e ke meging pili mung memalen.

64

¹ Baket e me gabakan ing banua at tipa ka? Akit da ka kanita ding bunduk at galgal la king takut.

² Galgal lang anti ing danum a bubukal babo ning api. Tipa ka at ipakit ing upaya mu karing kalaban mu at pagalgalan mu la ding bansa king arapan mu.

³ Kanitang misan a panaun tinipa ka at ginawang miyayaliwang makatakut a bage a e mi panenayan; ikit da ka ring bunduk at ginalgal la king takut.

⁴ Ala pang menakit at mekaramdam king metung a Dios a anti ika a darapat karing anti kareting bage para karetang mibibili king karelang kapanayan keka.

⁵ Matula mu lang tatanggapan detang manakit tula king pamaniapat dang matulid, detang makaganaka nung makananu mu lang buring mibiebie. Mimua ka kekami, makanyan man sinulung mi ing pamaniapat ming kasalanan. Agyamang maragul ing mu mua kekami, tiglus mi pa mu rin ing pamaniapat e ustu manibat na kanitang mumunang panaun.

⁶ Meging makasalanan ke ngan; agyang ing pekamayap ming dapat mengaring basan a marinat. Uli da ring kasalanan mi, meging anti kaming bulung a lalangi at pipaidpaid na ning angin.

⁷ Ala metung mang lalapit keka ban manalangin; ala metung mang lalapit keka ban maniawad saup. Pimpan mu ing sarili mu kekami; gilutan mu kami uli da ring kasalanan mi.

⁸ Oneng ika, Ginu, ing kekaming tatang. Mengari kaming pila at ika ing miyuyubug kekami. Ika ing linalang kekami,

⁹ inya e mu sana lulubusan ing mua mu kekami, e mu na la sana gaganakan pa ding kekaming kasalanan king alang kapupusan. Ikami ding taung pinili mu; malunus ka sa kekami.

¹⁰ Mengari la king disyerto ding banal mung siudad at melasak ya ing Jerusalem at likuan de ring tau.

¹¹ Ing Templo mi, ing banal at malagung lugal nung nu ra ka pinuri ding kekaming makatua, mipatag ya king gabun uli na ning silab. Melasak la ding sablang lugal ming pakamalan.

¹² Ginu, ayamyam mu iting sablang milyare? E ka gawang nanuman at paburen mu na kami mung magkasakit maygit king agyu ming pibatan?

65

¹ Ngana ning Ginu, Makasadia kung makibat karing panalangin da ring taung pinili ku, oneng e la menalangin. Panenayan kung panintunan da ku, oneng e ra ku penintun. E ya menalangin kanaku ing bansa agyamang parati kung makasadiang ipakibat karela: Atyu ku keni; saupan da kayu.

² Menatili kung makasadia ban tanggapan ku lang matula deting memalen ku, deting mangasias a buntuk a darapat e ustu at darapat king sarili dang kaburian.

³ Papamuan da kung alang patugut; ala lang marine! Babie lang ain-sakripisyung paganu karing sagradung hardin at duruluk insenso karing altar da ring paganu.

⁴ Pupunta la neng bengi karing kueba at karing kutkutan ban sumangguni karing espiritu da ring mete. Mamangan lang karning babi at miminum sabo ning karning miyabie karing ain-sakripisyung paganu.

⁵ At sasabian da pa karing aliwa king e la sukat lalapit karela pota atagkil da la uli mo kanung tutu lang banal. E ku na la apibata deng taung makanyan! Mengari king aping e matatda ing mua ku karela.

⁶ Inari ku na king lub ku ing parusang ipagpa ku karela at misulat na ing karelang sentensia. Pansinan ku ing pemaniapat da, papamayaran ku la

⁷ karing kasalanan da at pati na ding kasalanan da ring makatua da. Dinuluk lang insenso karing altar da ring paganu a atyu karing bunduk-bundukan, at migsalita lang kalapastanganan kanaku. Inya parusan ku la antimo ing karapatdapat karela king kasalanan da king milabas a panaun.

⁸ Ngana ning Ginu, Ala metung man a manyira karing mayap a ubas, nune gagawan da lang alak. Makanyan munaman, e ku la gisanan a lahi ding sablang taung pinili ku; iligtas ku la detang susuyu kanaku.

⁹ Bendisyunan ku la ding Israelita king tribu nang Juda at abandi re ding karelang lahi ing gabun kung atin dakal a bunduk. Karin la manuknangan ding taung pinili ku a susuyu kanaku.

¹⁰ Samban da ku at pastulan da la ring karelang tupa at baka king Kapatagan ning Sharon, king dane albugan at king Libis ning Kaguluan, king dane aslagan.

¹¹ Oneng makayaliwa ing daptan ku karetang e tatanggap kanaku, karing taung alang pansin king Zion, ing banal kung bunduk, at sasamba kang Gad at Meni, ding dios ning kapalaran at suerte.

¹² Maging kapalaran yu ing mate king makapangilabut a kamatayan uling e yu ku pekibatan inyang inaus da kayu at e mekiramdam inyang migsalita ku. Birian yung e yu ku pemintuan at ing e mayap ya ing depat yu.

¹³ Inya naman sasabian ku kekayu king mika atin lang labis-labis a pamangan at inuman ding sasamba at mamintu kanaku, oneng dumanup kayu at kumau. Maging maligaya la, oneng mipahamak kayu.

¹⁴ Magkanta la king tula ra, oneng kumiak kayu at mabigu.

¹⁵ Gamitan de ring taung pinili ku ing kekayung lagyu king pamaniumpa. Aku, ing Ginung Dios, paten da kayu. Oneng munie kung bayung lagyu karetang mamintu kanaku.

¹⁶ Ing ninuman king bansa a maniawad bendisyun, aduan na king mabendisyun ya king Dios a tapat. Ing ninumang sumpa, sumpa ya king lagyu na ning Dios a tapat. Mawala na la at makalinguan ding kaligaligan king milabas.

¹⁷ Ngana ning Ginu, Lalang kung bayung yatu at bayung banua. Lubus nang makalinguan ing milyari king milabas.

¹⁸ Magsaya kayu at tumula king kapilan pa man king uli na ning kanakung lalalangan. Mangatmu yang tula ing bayung Jerusalem a kanakung lalangan at maging masaya la ding memalen na.

¹⁹ Mikatmuan kung tula uli na ning Jerusalem at ding memalen na. Milako na ing tangisan karin; mawala na ing kagutgutan.

²⁰ E na la mate ding anak a bingut at kumaba ya bie ing balang metung at metung agpang king sukad na ning bie na. Mibilang lang anting kayanakan pa detang miras king idad a dinalan a banua. Mangabaldugan king perusan ku la detang mete bayu ing idad a ita.

²¹ Manalakad lang bale ra at maging tuknangan da la; e la maging tuknangan da ring aliwang tau. Mitatag lang mulahan ubas at nabangnan da la ring bunga ra; e la aliwa ding minum king katas ubas. Mangari la karing tanaman ding taung pinili ku a makaba bie. Lubus lang numabang karing bage pagobran da.

²²

²³ Magtagumpe la king nanumang pagobran da at e la numanu balang ding anak da. Bendisyunan ku la at ding lahi ra king sablang panaun a daratang.

²⁴ Pakibatan kung agad ing panalangin da bayu ra pa ayari ing panalangin da kanaku.

²⁵ Miyabe lang mangan ding asung-gubat at ding tupa; mangan lang are ding leon a antimo ding baka. E na la maging mapanganib ding ubingan. E na mika bage pang makapanasakit o makapanyira karin king Zion, ing banal kung bunduk.

66

¹ Ngana ning Ginu, Ing banua ya ing kanakung tronu at ing yatu ya ing talpakan ding bitis ku. Uli na niti, nanung klasing bale ing italakad yu para kanaku? Nanu yang uring lugal ing panuknanganan ku?

² Aku ing linalang king meto sikluban! Aku ing makibandi king sabla-sabla. Liligaya ku karing mapagpakumbaba at sisisi, karetang ating takut at mamintu kanaku.

³ Ing buri da ring tau yang daraptan da. Paraparehu mu para karela nung makamate la mang baka o tau bilang ain-sakripisyu; biseru ya mang tupa ing sasakripisyu ra o asu yang sekal da batal; trigu ya man ing ain o daya na ning babi; babie la mang insenso o manalangin king metung a idolo. Liligaya la karing makasumaming paralan na ning pamanyamba ra.

⁴ Inya padala kung kasakitan karela, kareta mismung pitatakutan da uling ala metung mang mekibat inyang minaus ku o mekiramdam inyang migsalita ku. Birian da pa ing e ra ku pemintuan at ing dapat lang e mayap.

⁵ Makiramdam kayu king sasabian na ning Ginu, ikayung ating takut at mamintu king Ginu: Uling tapat kayu kanaku, pikasaman da kayu ding mapilan karing kabalen yu at ala lang pakialam kekayu. Insultuan da kayu at ngarang sumabi, Paburen tamung pakit na kekatamu ning Ginu ing upaya na at ing pamagligtas na ba da kayung akit saya! Oneng ila mismu ding mangapakarine!

⁶ Makiramdam kayu! Ing inge king siudad, itang alingongo king Templo, ya ing alingongo ning pamamarusa na ning Ginu karing kalaban na!

⁷ Mengari ya ing banal kung siudad king metung a ima a biglang menganak a lalaki; e man bitasang miramdam!

⁸ Ating mu mang metung kekayu a menakit na o mekabalita na king anti kanyan? Atin waring bansa a mibait kilub na mu ning metung a aldo? E ya kailangan misakitan pa mung makaba ing Zion bayu ya mibait ing metung a bansa.

⁹ E yu isipan king ing balen ku paburen keng miras king penandit a pamanganak at kaybat e ke paintulutan mibait. Ing Ginu ya ing migsalita.

¹⁰ Makisanmetung kayu king tula ning Jerusalem; magsaya kayu para king Jerusalem, ikong sablang malugud kaniting siudad na! Makisanmetung kayu ngeni king tula na, ikong sablang menangis para king Jerusalem!

¹¹ Ikatula yu ing pangasaplala na, anti ing bingut king salu nang ima na.

¹² Ngana ning Ginu, Iyatad ku keka ing alang anggang kanawan; ing pibandian da ring bansa magus kekang anti ing ilug a e kakati. Mangari ka king bingut a pasusuan nang ima na; kikilikan na at sisesen king mitmung lugud.

¹³ Nung makananung paligayan ne ning metung a ima ing anak na, makanyan da kang paligayan karin king Jerusalem.

¹⁴ Potang akit mu nang mapalyari iti, tumula ka; pasiknangan na ka at dinan masanting a pamikakatawan. Abalu mu kanita king aku, ing Ginu, sasaupan ku la detang mamintu kanaku, oneng papakit ku ing mua ku karing kalaban ku.

¹⁵ Datang ya ing Ginu a kayabe ning api. Makasake ya karing bagius na ning bagyu ba na lang parusan detang kamuan na.

¹⁶ Parusan na la ngan king kapamilatan na ning api at ning espada ding taung mikasala keti king yatu, at dakal la ding mate.

¹⁷ Ngana ning Ginu, Malapit na ing kawakasan para karetang magpakadalise king pamanyamba ra ding paganu at makiabe king prusisyun papunta karing sagradung hardin, ding mamangan karning babi at dagis, at aliwa pang pamangan a makasumami.

¹⁸ Balu ku ing karelang isipan at ing karelang pamaniaptan. Daratang na ku ban tipunan ku la ding memalen da ring sablang bansa. Potang ikua ra nang mitipun akit da nung nanu ing arapat na ning upaya ku

¹⁹ at abalu ra king aku ing mamarusa karela. Oneng itagan ku la ding mapilan karela at itubud ku la karing bansa at karing marayung lugal a e pa mibalitanan king kabantugan ku o e pa menakit king degulan ku at upaya: karin Tarsis, Put, at Lud at ding mangagaling dang mamana at karin king Tubal at Javan. Ihayag da libutad da reting bansa ing kanakung kayupayan.

²⁰ Iyuli da la antimong pasalubung da kanaku ding kekayung kabalen a atyu kareting bansa. Iyatad da la king banal kung bunduk-bundukan karin Jerusalem; pakasake la karing kabayu, asno, kamelyu, karing karwahe, at gareta antimo nung makananung ding Israelita magdala lang ain-a-binutil king Templo karing lulanan a melinis.

²¹ Gawan ku lang pari at Levita ding mapilan karela.

²² Antimo nung makananung ing bayung yatu at ing bayung banua manatili la king kapamilatan na ning upaya ku, makanyan la namang manatili ding lahi yu at ing lagyu yu.

²³ King pamagselebra king Bayung Bulan at king balang Aldo ning Sabbath, datang la keti king Jerusalem ding memalen na ning balang bansa ban samba kanaku, ngana ning Ginu.

²⁴ Kabang mamako la, akit da la ring bangke da ring memag-rebeldi laban kanaku. E la mate kapilan man ding ulad a mamangan kareti at e matda kapilan man ing aping duruluk karela. Masumami la ding tau panakit da karela.