1

¹ Ding pekamasanting kantang sinulat nang Aring Solomon.

² Sana uman mu ku karing labi mu; ing kekang lugud maygit ya king alak a maniaman.

³ Ing kekang banglu sasalingalngal; ing lagyu mu tutugtug na ngan. Inya ding babai malsinta la keka.

⁴ Kuanan mu ku at ituki; magmalagua kata, ika ing ari ku at king kuartu mu karin mu ku idala. Tamasan ta ikatang adua ing ligaya. Paintulut mung kakung takman ing lugud mung maniaman a maygit king alak a inuman. Matulid ing malsinta la keka ding sablang dalaga.

⁵ Ikong kebabainan ning Jerusalem, matuling ku, oneng malagu na ku man, matuling kung anti ding tolda ning Kedar, oneng malagu naman anti ring kurtina nang Aring Solomon.

⁶ E yu ku sana lalawan mababa uri agyang ing kule ku komanggi; ing aslag ning aldo ya ing mekapasari kaniti. Ding kapatad kung lalaki kaku mua la ngan, at pepagobran da ku king ubasan. Ala kung panaun ban kakung katawan kaku yang lingapan.

⁷ Sabian me kaku, O kakung pakamalan, ing lugal nung nu me papastulan ing kekang kawan. Nukarin ya ing karelang pipagpaynawan neng aldo kaugtuan? Keka yang tulduan ban e ra na ka panintunan karing aliwang pipagpastulan.

⁸ E me wari balu ing lugal, O babaing alang kalupa king lagu? Keka yang tukian ing kawan a mandikut; kekang kambing karin mo pastulan lele ding tolda ding aliwang pastul kawan. fig,,,,,O babaing alang kalupa king lagu.,(1:8)fig*

⁹ O sinta ku, kaninu da ka ipakilupa? Kalupa mu la detang kabayung malagu ning ari ning Ehipto a gagamitan na king karwahe na.

¹⁰ Masanting lang lalawan ding pisngi mu pilatan ning buak mung makaikat, at ning batal mung ating kwintas.

¹¹ Igawa ra kang gintung kwintas, at palamutian ya king pilak.

¹² Kabang makasandal ya ing ari king luklukan na ing kakung pabanglu sinalingalngal.

¹³ Mabanglu yang anting mira ing kakung pakamalan, inyang king kakung salu karin ya migkera.

¹⁴ Anti ya king kapunggul a bulaklak ing kakung pakamalan, karing mulahan ubas ning Engedi migbukadkad.

¹⁵ Kalagu mo, O sinta ko; tune kang malagu! Mapundat lang mata mu.

¹⁶ Masanting ka, O kakung pakamalan; makawili kang lalawan! Berding dikut ya ing kekatang pagkeran;

¹⁷ dutung lang sedro ding barakilan ning bale ta, at ing kisami na sipres la.

2

¹ Anti ku king metung a sampaga ning Sharon, metung a tanaman a liryu a tutubu king libis ning bunduk.

² Anti ing sampagang liryu libutad ding suksuk, makanyan ya ing babaing kakung pakamalan libutad ding kebabainan.

³ Anti ing tanaman a mansanas libutad ning gubat, makanyan ya ing kakung pakamalan libutad ding kelalakinan. Tula ku ing sasalilung king anino na, at maniaman lang tatakman ding bunga na.

⁴ Dela na ku king lamesa nang mitmung pamangan, at liningap na ku king keyang pakamal.

⁵ Pepakabsian na ku karing pasas, mibayu ing kakung sikanan karing mansanas a maniaman. Meina ku uli na ning sinta.

⁶ Makaulun ya ing kakung buntuk king kayli nang gamat, at makakaul ne man kaku ing wanan nang gamat.

⁷ Ipangaku yu sana kaku, O kebabainan ning Jerusalem, king lagyu ding babaing usa at aliwa pang mabilis mamulaying animal ning kagubatan, ing e yu pangabalanan ing kekeng lambingan.

⁸ Daramdaman keng mabilis daratang ing kakung pakamalan; biltangan na lang bunduk at ding talimunduk ba na kung pakikitan.

⁹ Anti ya king metung a masanting o malating usa ing kakung sinta; lele ning bakud ming pader makatalakad ya, karing awang at siwang silip-silip ya ban aku ing akit na.

¹⁰ Ing kakung pakamalan kaku sinabi na: Tara, sinta ku, tuki na ka kaku.

¹¹ Linipas na ing panaun ning dimla, ing uran tinuknang na,

¹² king marangle atin nang sampaga, dinatang na ing oras ning pamagkanta, ing kanta ding batu-batu king kekatamung bansa mararamdam na.

¹³ Lululut na lang bungang higera; mabanglu ing makapadurut uli ding bulaklak ding ubas. Tara, sinta ku, tuki na ka kaku.

¹⁴ Anti ka king patipati a salasalikut karing siwang da ring batu. Paburen mung akit ke ing malagu mung lupa at damdaman ing malagu mung siwala.

¹⁵ Ding asung-gubat dakpan la uling sisiran da la ding ubas a maniampaga na.

¹⁶ Bandi ke ing pakamalan ku, at aku bandi na ku. Papastulan na lang tupa na libutad ding liryung sampaga,

¹⁷ angga ing marimlang angin ning kayabakan, at mawala nang karalumduman. Mulayi kang mabilis anti ing usa; kabundukan ning Beter baltangan mu na la.

3

¹ Neng bengi king kakung pagkeran panintunan ke ing kakung pakamalan; kaku yang ausan, oneng e na ku pakibatan.

² Mibangun ku at penintun ke karing dalan at suluk ning siudad, oneng e ke ikit ing kakung pakamalan.

³ Ikit da ku ring guardiang magronda king siudad. Ngakung mengutang karela, E ye pu ikit ing kakung pakamalan?

⁴ Inyang likuan ku na la ding guardia, ikit ke ing pakamalan a kaku babie ligaya. Kinaul ke at e ke buring mako angga king tinaid ke king bale at kuartu nang ima ku nung mu ku mibait.

⁵ O kebabainan ning Jerusalem, kekayu ipakisabi kung mayap king lagyu ding babaing usa at aliwa pang mabilis mamulaying animal ning kagubatan, ing e yu sana abalanan ing kekaming lambingan.

⁶ Nanu ya iting daratang ibat king disyerto a anting asuk ning mira at insenso, at aliwa pang tindang mabanglu ning taung magnegosyo?

⁷ I Solomon ya ing daratang, makalukluk ya king tronu na; anam lang pulung sundalus ding keyang guardia, ding sundalung mayap dili king Israel.

⁸ Atin la ngan espada at beteranu la king gera; ding karelang espada makasadia la king nanumang panganib a darala ning kabengian.

⁹ King tronung luklukan nang Aring Solomon karin de pupusanan; megawa ya iti king dutung ning Lebanon.

¹⁰ Makabalut lang pilak ding asias na, imalan binurdahan gintu ing babo na. Ding kutsun na makabalut lang purpurang imalan a gewa da ring kebabainan ning Jerusalem.

¹¹ Kebabainan ning siudad ning Zion, 'me ko keni at lawan ye i Aring Solomon. Susulud ne ing koronang pinutung nang ima na inyang kinasal ya, ing aldo ning tula nang alang kalupa.

4

¹ Kalagu mo, O sinta ko; tune kang malagu! Mapundat lang mata mu lalam ning kekang belu. Anti ya king metung a kawan-kambing ing kekang buak a lundag-lundag kukuldas king bunduk ning Gilead.

² Ding kekang ipan maputi lang anti ding tupang meurud at melinis; paris-paris la at e ka bungal.

³ Ding kekang labi anti la karing lasung malutu; lalu kang lalagu neng magsalita ka. Ding pisngi mung malare-lare makawili lang lalawan lipat ning ing belu papampanan na la.

⁴ Kalupa ne ning tore nang David ing kekang batal, mabilug ya at malinatnat; neng atin yang kwintas anti yang sabitan kalasag ding lalaking matapang.

⁵ Ding susu mu anti lang aduang usa king salu mu a mamangan karing liryu.

⁶ King salu mung mabanglu karin ku magkanlung angga king tumiup ing marimlang angin ning kayabakan, at mawala nang lubusan ing sablang karalumduman.

⁷ Kalagu mo, O sinta ko! Ala kung apintas keka.

⁸ O ketanguanan ko, tara lakuan ta ne ing Lebanon, at ing taluktuk ning Amana. Lakuan mu ne ing bunduk ning Senir at ing Hermon, ding lugal a salikutan da ring leopardo at leon.

⁹ O sinta ko at ketanguanan ko, uli ning suliap ding mata mu at ning kwintas king batal mu binihag me ining pusu ku.

¹⁰ Kaniaman na ning lugud mo, O sinta ko at kakaburi ko! Mas maniaman ing lugud mu kesa king alak, at ala yang kalupa ing banglu mu karing sablang pabanglung balu ku!

¹¹ Ding labi mu lalasa lang pulut-panilan; ing dila mu 'tin yang pulut at gatas; ing bau ning kekang imalan mabanglung anti ing Bunduk ning Lebanon.

¹² O sinta ko at kakaburi ko, mengari kang makasalikut at makabakud a hardin; mengari ka naman king makasalikut a sibul.

¹³ Ding kekang suli lalsut la antimo ding king mulahan a granada, at ala lang kalupa ding bunga ra. 'Tyu la karin ding tanaman a henna at nardo a piakuanan pabanglu,

¹⁴ at antimu rin ding saffron, kalamo, kanela, at ding tanaman a piakuanan insenso, mira, aloe a maulagang pabanglu.

¹⁵ Miparanuman ya ing hardin king sibul, king danum a mamagus ibat karing Bunduk ning Lebanon.

¹⁶ Tumiup ka, O angin ning norti! Datang na ka, O angin ning mauli! Tiupan yang kakung hardin ban banglu mikalat. Paburen yang datang king hardin na ing kakung pakamalan at mangan karing prutas a pekamaniaman.

5

¹ Linub ku king kakung mulahan, ing kakung kakaburi at kakung ketanguanan. Mangua kung mira at aliwa pang mabanglung tanaman; mangan kung pulut at pulut ding panilan; inuman ku ing alak at ing gatas. Mangan kayu, O malsinta, at minum angga king lasing kayu!

² Matudtud ku, oneng makagising ya ing pusu ku. Kabud-abud ing kakung pakamalan dimdam keng tutuktuk king pasbul. Ngana kaku, Paluban mu ku, O sinta ku, kakung kaluguran at sakdal kung kaligayan! King ambun mebasa ya ing kakung buntuk, at king ulap ing kakung buak.

³ Likas ku na ing kakung imalan; obat kailangan pang isulud kung miuman? Inos ku na lang bitis ku; e na kailangan ing kaku lang dinatan.

⁴ Inyang ing kakung pakamalan talnan ne ing busnianan ning pasbul, penamdaman ku ing kaligayan king mabilug kung katawan.

⁵ Tinalakad ku ban ibuklat ing pasbul at paluban ing kakung pakamalan; atin yang patak ning mabanglung mira ing kakung gamat inyang ing pasbul ume ku neng ibuklat.

⁶ Biklat ke ing pasbul para king pakamalan ku, oneng ing kakung pakamalan ala yu. Sabik kung damdaman ing siwala na; inaus ke, oneng alang mekibat. Penintun ke, oneng e ke ikit.

⁷ Ikit da ku ring guardia kabang king siudad magronda la; pelupalu ra ku at mesugat ku, at ing kakung balabal karela yang ginabak.

⁸ O kebabainan ning Jerusalem, kekayu ipakisabi kung mayap; nung keko yang akit ing kakung pakamalan, kekong sabian king atin kung sakit a panamdaman, uli ning kapalsintan.

⁹ O babaing alang kalupa king leguan, ala na waring lalaking maygit king kekang pakamalan? Atin ya waring panga-aliwa ing kekang pakamalan karing dakal a kelalakinan, inya aduan mu ing kekeng kasaupan?

¹⁰ Ing kakung pakamalan masanting ya at masikan; metung ya mu karing apulung libung kelalakinan.

¹¹ Makinis ya lupa at kule yang tangsu ing balat na. Kulut ing buak na at matuling anti ing king awak.

¹² Ding mata na masanting lang anti ding patipating atyu lele ning sapa, at dinilu king gatas.

¹³ Ding pisngi na kalupa de ring malagung hardin king banglu sasalingalngal. Ding labi na anti lang liryu a mabasa king mirang pabanglu.

¹⁴ Ding takde na anti la king pulserang gintu a ating batung mangamal. Ing katawan na anti ya king garing a malinatnat at karing batung safiro belutanan.

¹⁵ Ding puad na anti la karing alabastrung asias karing gintung talpakan makatalakad. Makawili yang lalawan; anti ya king matas a Lebanong kabundukan at ding sedrong mangatas nang tanaman.

¹⁶ Makayama yang magsalita, at parati kang bisa. Iti ing itsura na ning kakung pakamalan, O kebabainan ning Jerusalem.

6

¹ O babaing alang kalupa king leguan, nukarin ya wari minta ing kekang pakamalan? Sabian mu nung nukarin ya minta, at saupan da kang manintun.

² Minta ya ing kakung pakamalan king mulahan na nung nu la tutubu ding tanaman a balsamu. King mulahan na karin ne papastulan ing kawan na, at sampagang liryu agtalan na la.

³ Bandi ke ing kakung pakamalan, at aku bandi na ku; king libutad ding liryu karin ne papastulan ing keyang kawan.

⁴ O sinta ku, malagu kang anti ing siudad ning Tirza; anti ing siudad ning Jerusalem ing kekang leguan. Ing leguan mu makapagmulalang lalawan anti reting siudad a pikabaluan.

⁵ E mo sana lalawe kaku ding mata mu, uling bibihagan da ku. Anti ya king metung a kawan-kambing ing kekang buak a lundag-lundag kukuldas king bunduk ning Gilead.

⁶ Ding kekang ipan maputi lang anti ding tupang meurud at melinis; paris-paris la at ala lang bungal.

⁷ Ding pisngi mung malare-lare makawili lang lalawan agyang ing belu papampanan na la.

⁸ Paburen mung atin yang anam apulung reyna ing ari, subali pa karetang walung pulung babaing kasese na; subali pa karetang dalagang e mabilang-bilang.

⁹ Oneng aku metung ya ing kakung palsintan at malagu yang anti ing patipati. Ya'ng bukud anak nang ima na at kaligayan. Pupurian de ring sablang babaing menakit, at pati na ding reyna at babaing kasese ning ari.

¹⁰ Ninu iting daratang a balamu ing aldo a saslag neng abak? Malagu yang anti ing bulan ampon ing aldo maslag, at matindag yang anti ing katasan.

¹¹ Minta ku king mulahan ding tanaman a almendro ban sagiwang tanam king kapatagan kakung lawan, ban lawan nung ding ubas meniampaga no ngan pati na ding pomeganateng tanaman.

¹² Maligaga ku at sabik king lugud mu; mengari ku king sundalung mamarap king labanan.

¹³ Tumerak ka, tumerak ka, O babaing Sulamita! Paburen mung alben da ka kabang teterak ka. Obat buri yu kung alben kabang teterak ku bilang babaing Sulamita pilatan ding aduang grupu a paka sandata?

7

¹ Tune lang malagung lalawan ding kekang bitis neng makasulud lang sandalyas. Ing ubug da ring kekang puad anti lang alahas a seria nang gewa ning magaling a pangamat.

² Karin ating tasa at parati yang ating maniaman a alak. Ing malambut mung atian anti yang kabuntun a trigu a makapadurut karing sampagang liryu.

³ Anti lang aduang usa ding susu mu; mengari lang kambal a bunduk.

⁴ Anti yang toreng garing ing kekang batal. Mata mu anti la karing sibul ning siudad ning Hesbon, lele ning pasbul dalan ning maragul a siudad. Ing kekang arung malagu yang anti ing tore ning Lebanon a makalawe king siudad ning Damasco.

⁵ Anti ya king matas a Bunduk ning Carmel ing makayatna mung buntuk. Malagu yang anti ing imalan a purpura ing makaikat mung buak; leguan na ari bibihagan ne.

⁶ Kalagu mo; wa, tune kang malagu! Kawiliwili ka, O sinta ko!

⁷ Mahinhin kang anti ing tanaman a palma; ding punggul-punggul nang bunga ding kekang susu ilang karelang kalupa.

⁸ Ukiatan ke ing tanaman a palma ban agtalan ding bunga na. Ding adua mung susu anti lang aduang punggul a ubas; ing mabanglu mung pangisnawa mansanas ing keyang kalupa,

⁹ at ing pekamaniaman a alak ya ing kalupa ning kekang uma. Nung makanyan, paburen magus ing alak king kakung pakamalan, paburen dumalan karing labi na at ipan.

¹⁰ Bandi na ku ning kakung pakamalan, at aku ing keyang pagnasan.

¹¹ Tara na, O sinta ku, king marangle kata munta; king baryu kata matudtud.

¹² Maranun katang munta king mulahan ubas, at lawan nung atin nang minyanga at memulaklak. Lawan ta la naman ding tanaman a pomegranate nung atin na lang sampaga. Karin ing lugud ku ibie ku keka.

¹³ Sasalingalngal ing banglu ding tanaman a mandragora, at ding pekamaniaman a prutas atyu na la king pasbul ta. Detang luma at kayakua-akua kaku la ngan sidia para keka, O kakung sinta.

8

¹ Sana kapatad da ka a sinusu king salu nang ima ku! Ban nung akit da ka king dalan uman da ka, at alang mitakid kaku.

² Ituki ra ka king bale nang ima ku ban ituru mu kaku ing sinta. Painuman da kang maniaman a alak, at katas ning pomegranateng prutas.

³ Ing buntuk ku makaulun ya king kayli mung gamat, at makakaul ne man kaku ing wanan mung gamat.

⁴ Ipangaku yu kaku, O kebabainan ning Jerusalem, ing e yu sana pangabalanan ing kekeng lambingan.

⁵ Ninu ing daratang ibat king disyerto a makasandal king keyang pakamalan? Ginising da ka karin king lalam ning tanaman a mansanas, ing lugal a kekang beitan.

⁶ Aku mung dili sana ing kekang luguran, aku mu sana ing kekang kaulan. Nung nu ya anti kayupaya ing kamatayan, ing lugud makanyan ya naman. Ing pangalalu mabagsik yang anti ing kutkutan; anti ya king aping gigisan.

⁷ E na apatda ning danum; e na alumud ning albug. Nung gamitan mu ing kekang pibandian ban saling lugud mangapakarine ka mu king kekang gawan.

⁸ Atin kaming wali a babai, ding susu na malati la pa. Nanu ing daptan mi potang paglolon da ne?

⁹ Nung anti ya mu sa king pader igawa mi yang tore a pilak. Nung pasbul ne man, takpan mi ya king dutung a sedro.

¹⁰ Metung kung pader, at ding susu ku ila ding peka tore na. Siping ning kakung pakamalan balu na atin kung kapanatagan.

¹¹ Atin yang mulahan i Aring Solomon king lugal a ausan dang Baal Hamon. Ing balang metung karing ortelanung kasamak na mamayad yang libung pirasung pilak.

¹² Matula ya i Solomon karing pilak a keyang tatanggapan, at ding ortelanu king aduang dalan a karelang pakinabang. Aku naman atin kung sariling mulahan!

¹³ O sinta kung atyu king kakung mulahan, magsalita ka sana ban ding kakung kakaluguran siwala mu karelang damdaman.

¹⁴ Magmalagua ka, O kakung sinta! Anti ing mabilis a usa o baintaung usa datang na ka sanang ibat karing bunduk nung nu la tutubu ding tanaman a piakuanan pabanglu.