1

¹ Mapalad ya ing taung e makiramdam king tuturu ding e mayap a dapat, at e makikiabe king dapat ding makasalanan o makikiluklukan karetang alang Dios a katawan.

² Matula na lang pamintuan ding kautusan ning Ginu, at keya lang pagaralan aldo o bengi man.

³ Mengari ya king tanaman a tutubu lele ning danuman, at mamunga ya king keyang kapanaunan. Sagiwa lang parati ding keyang bulung; magtagumpe sabla nang daraptan.

⁴ Oneng ding taung makasalanan e la makanyan; sepu la waring pipaid-paid ning angin.

⁵ Potang datang ing pamanukum na taung e mayap mitalakad ali la; mikawani la ding makasalanan king katipunan ding makatuliran.

⁶ Ingatan ne ning Ginu ing taung makatuliran, oneng ing taung makasalanan miras ya king kapahamakan.

2

¹ Ba't ding bansa rebulusyun ing isipan da? Nanung kapupuntan na ning tatangka ra?

² Ari keting yatu abe-abe la, at e mayap ing buri da; karelang mamuntukan mipupulung la; ing Ginu ya'ng buri dang labanan at ing aring pinili na.

³ Ngara, Patluran tamung upaya ra, at e na payalipan pa karela!

⁴ Ing Ginu naman karin banua, king tronu na makalukluk ya; kailian na la mu king gagawan da.

⁵ King mua na sabianan na la; tumakut la king bagsik na. Ngana karela,

⁶ King Zion a bunduk kung banal, ing kakung ari karin ke likluk.

⁷ Ngana naman ning aring pinili na, Kakung isalita utus ning Ginu: Ika ing kakung anak, king aldo'ng iti meging tata mu ku.

⁸ Maniawad ka at ibie ku lang sablang bansa keka; pati na ing mabilug a yatu iyabe mu la king bandi mu.

⁹ King kekang palupalung bakal keka lang pamaluan, at keka lang pamalbalan anting kuran.

¹⁰ Inya, ikong ari, magpakabiasa kayu; mingat kayu ngan pamuntuk ning yatu.

¹¹ suyuan ye't pitakutan ing Ginu, tumula kayu at galgal; kekayu yang suyuan, nung ali mimua ya at magisan ko ngan; uling tutu yang mayan mimua. Mapalad la ding sablang lalapit pasaup king Ginu.

3

¹ O Ginu, karakal da ring kakung kalaban; e la ditak ding kaku bisang lumaban!

² Kaku karelang sasabian, Ing Dios e ne saupan.

³ Oneng ika, O Ginu, ing kalasag ku, ika ing babie tagumpe kaku; babalik mu kaku ing sikanan lub.

⁴ King Ginu maus kung masikan, at ya naman king bunduk nang banal, kaku munie yang kapakibatan.

⁵ Malyari na ku ngening magkera ban matudtud, at kaybat migising ku, uling ing Ginu ya ing magbante kaku.

⁶ Laksa-laksa la man ding kalaban a kaku makapadurut e ku la rin pitakutan.

⁷ Me keni, Ginu! Iligtas mu ku, O Dios ko! Ding kakung kalaban keka lang parusan, at ilako sikanan. ding sablang makasalanan.

⁸ King Ginu manibatan ing kaligtasan; keka ya sanang bendisyunan ing kekang balen.

4

¹ Pakibatan mu ku sana, O Dios a makatuliran, neng mamaus ku keka; king kaligaligan liligtas mu ku; lunusan mu ku at pakibatan dalangin ku.

² O Tao, angga pa kapilan ing insultuan yu ing kakung dangalan? Angga pa kapilan ing luguran yu ing alang kabaldugan, at panintunan ing kalaraman?

³ Ganakan yu king makapaygit la ding tapat king Ginu; neng mamaus ku pakiramdaman na ku ning Ginu.

⁴ Malyari kayung mimua, oneng e kayu sa mikakasala; karing kekong pagkeran misip kayu sa at magpayapa.

⁵ Itang mayap at ustu yang iyain yu, at manalig kayu king Ginu.

⁶ Ding dakal karelang kukutang, Ninu ing makaibie kanawan kekatamu? Lunusan mu ke sana, O Ginu.

⁷ Ing lalung maragul a tula binie mu king pusu ku; maygit yang e palak king tulang kakamtan da detang labis-labis a kakanan at inuman.

⁸ Payapa kung magkera, at agad-agad mipapatudtud ku, uling ika mung bukud O Ginu, ing makapanatag king lub ku.

5

¹ O Ginu, pakiramdaman mu ku, pansinan mu sa ing saingsing ku.

² O ari ku at Dios ku, saingsing ku pakiramdaman mu, uling keka mamaus ku.

³ Neng abak pakiramdaman mu ku; uling keka mamaus ku, at panayan ku ing saup mu.

⁴ Dios kang e matula king e ustu; kapilan man ing e ustu e mu katulan.

⁵ E mo man buring akakit ding taung palalu; kasaman mo ngan ding e mayap a tau.

⁶ Keka lang papaten ding malaram, at kasaman ding taung mapaglinlang ampon tampalasan.

⁷ Oneng aku, uling tutu mu kung kaluguran, malaus ku king bale mu; king mitmung takut samba ku kilub ning banal mung Templo.

⁸ O Ginu, ituru mu kaku ing kekang katuliran, uling dakal lang kakung kalaban; pakit meng masala kaku ing kekang kaburian ba keng mayan atuparan.

⁹ Uling alang mayayakit a katutuan karing asbuk ding kakung kalaban, mitmu lang kapanyiran; kutkutan la waring e mitambunan; pamanyunu ing karelang sasabian.

¹⁰ Atulan mu la't parusan, O Dios ko; sablang babalakan da ya sanang ikabigu ra. King arap mu itabi mu la, uli ning linaban la keka, at ning dakal dang pamikasala.

¹¹ Oneng ding sablang lalapit keka tumula la, at keka ikanta da kapilan man ing tula ra, at ding sablang malugud keka keka lang ingatan ban magkanta la king tula da.

¹² O Ginu, ika ing babie bendisyun king taung makatuliran; ing lugud mu ya ing kalasag na.

6

¹ O Ginu, king kamua mu e mu ku sa paparusan! E mu ku sana kakamuan at paniabianan.

² Lunusan mu ku, Ginu, uling sikanan ala ku; Ginu, uluan mu ku sana; mabilug kung katawan masakit ya.

³ Magdusa kung e makanyan-kanyan king maragul a kalingasngasan. O Ginu, angga kapilan, iting kasakitan?

⁴ Balikdan mu ku, O Ginu, at sagipan mu ku; uli ning lugud at lunus mu iligtas mu ku.

⁵ King tuknangan da ring mete na keka ala nang makaganaka pa; karin alang makaibie kapurian keka.

⁶ Mepayo na ku kening kakung pamanangis; balang bengi karing lua ku ulunan mabasa ya, at pati na ing kakung pagkeran.

⁷ Mata ku lalabug na la, uling labis-labis ing kakung dusa; kakung kalaban iti depat da.

⁸ Lakuan yu ku, ikong sablang darapat e mayap, uling dimdam ning Ginu ing kiak ku.

⁹ Pekibatan na ning Ginu ing kakung panalangin; panalangin ku tatanggapan na ning Ginu.

¹⁰ Ding sabla kung kalaban dumine la sana't mitakutan; lakuan da ku at mako lang mitmung kamarinayan.

7

¹ O Ginu, O Dios ko, keka ku lalapit; iligtas mu ku at ingatan karing sablang tatagal kaku.

² Nung ali mangari lang leon idala da ku, at paglapakan da ku, at alang magligtas kaku.

³ O Ginu, O kakung Dios, nung wari't dening gamat ku atin lang e mayap a depat;

⁴ nung wari't inablasan keng e mayap ing tapat kung kaluguran o semantalanan ing kakung kalaban a alang kasalanan,

⁵ bustan mung atagal da ku at dakpan ning kakung kalaban, at bie ku pandamusakan na, at king alikabuk lakuan!

⁶ Ginu, mibangun ka at mimua, O Dios ko, talakad na ka! Ing mua ding kalaban ku daigan mu, saupan mu ku, ika a patupad king katuliran.

⁷ Bustan mung ding bansa mitipun lang makapadurut keka, at manibat banua sakupan mu la.

⁸ Ing ukum ding bansa ya ing Ginu. O Ginu, atulan mu ku ketang kakung katuliran, at keyalan kasalanan.

⁹ O Dios a e mangabiran a talasuri ning pusu at kaisipan, ding taung mitmung kasalanan keka na la sanang parusan, at patatagan ding taung banal.

¹⁰ Ing Dios ya ing kakung kalasag; detang mamintu liligtas na la ning Dios.

¹¹ Ing Dios ukum yang e mangabiran; aldo-aldo makasadia yang mamarusa.

¹² Nung ing tau e ya sumisi at tuknang king pamikasala na; kanita itais ne ning Dios ing espada na o isadia ne ing pana na.

¹³ Deting sandatang pamakamate na makasadia na la, pati ding paslu nang mataram.

¹⁴ Lawan me, ing mimisip king e mayap pangagli na ing kapamiraitnan, at babait na ing kalaraman.

¹⁵ Gagawa yang metung a kulkul, at pekalalam ne; oneng ya mu rin kabud ing mayakmul king gewa nang kulkul!

¹⁶ Ing e ustung depat na migbalandra king bie na; ing katampalasan na king sariling buntuk na digpa.

¹⁷ Inya ing Ginu kaku yang pasalamatan, uling makatuliran ya; ing lagyu ning Ginung Kakataskatasan pagkanta keng kapurian.

8

¹ O Ginung kekeng Ginu, sakdal ya kamalan ing lagyu mu king mabilug a yatu! Kekang dangalan lalagpus king banua;

² anak at bingut kakanta ra. Matibe kuta keka yang telakad ban kalaban keka lang patahimikan.

³ Neng pagumasdan ke ing banua, ing banuang gewa da ring taliri mu; at ing bulan at batuin karin binili mu;

⁴ nanu ya ing tau ba't keka yang gaganakan; nanu ya ing tau ba't keka yang pagmalasakitan?

⁵ Makanyan man, lelangan meng halus kapante mu; pitungan meng kamalan at ligaya.

⁶ Penibala mu king tau ing sablang dapat mu; lalam nang upaya pepasakup mu ing sabla-sabla;

⁷ ding tupa at baka pati animal a malyap,

⁸ ayup at asan king danuman at ing sablang kakawe king dagat.

⁹ O Ginung kekeng Ginu, sakdal ya kamalan ing lagyu mu king mabilug a yatu!

9

¹ Pasalamatan da ka, O Ginu, king mabilug kung pusu; kakung pamalita sablang depat mung makapagmulala. fig,,,,,Pasalamatan da ka, O Ginu...,(9:1)fig*

² Keka tumula ku at magsaya ku; purian ke ing lagyu mu, O Kakataskatasan a Ginu.

³ Panakit da keka ding kakung kalaban, miragsa la ngan; layun mate la king kekang arapan.

⁴ Pekilaban mu ing katuliran ning kakung piamanuan; minatul kang mitmung katuliran.

⁵ Inatulan mo ding bansang e kikilala keka; ding e mayap pete mu la, lagyu ra kapilan man e na masambitla pa.

⁶ Gisan mu la't tinampus ding kekeng kalaban, pati siudad da keka lang lesakan; inya lubus na lang makalinguan.

⁷ Oneng ing Ginu ari ya kapilan man. Sidia ne ing tronu na anting piukuman.

⁸ Ukuman neng yatu king mitmung katuliran, atulan na la king katutuan na, ding sablang taung lelangan na.

⁹ Matibe yang kuta ing Ginu para karing malulupig a tau; metung yang matibe tuknangan king oras ning kaligaligan.

¹⁰ Detang mekasubuk king lagyu mu manalig la keka, O Ginu; kapilan man e mu la lakuan ding lalapit king kekang arapan.

¹¹ Magkanta kayung kapurian king Ginung manuknangan king Zion! Mayap a depat na ibalita karing sablang bansa.

¹² E na malyaring kalinguan ing saingsing ding atyu king kasakitan, nune singilan na la ding tampalasan king dayang pepatulu ra.

¹³ Malunus ka sa kaku, O Ginu! Lawan mung kasakitan a depat da kaku detang masama kaku; king bingit ning kamatayan damputan mu ku,

¹⁴ ban kilub ning siudad ning Zion kakung ikanta ing kekang kapurian, at tumula king kaligtasan a kekang binie.

¹⁵ Ding taung alang Dios menakbag la king mismung kulkul a gewa ra; king bitag a inumang da kaku karin la merakap ding sariling bitis da.

¹⁶ King pamanatul na makikilala ya ing Ginu; ding e mayap antimu rin makilala la karing dapat da.

¹⁷ King Sheol la miras ding taung e mayap, pati na ding bansang king Dios e bisang tanggap.

¹⁸ Uling ding atyu king pamangailangan kapilan man e la makalinguan, at itang kapanayan ding kalulu kapilan man e mawala.

¹⁹ Me keni, O Ginu, e mu paintulut magtagumpe ya'ng tau, bustan mung mayatul la arapan mu ding bansang e kikilala keka.

²⁰ Katmuan mu lang takut, O Ginu, at ipabalu mu karela king tau la mu!

10

¹ Ginu, ba't lalaut ka kekami? Ba't sasalikut ka king oras ning kaligaligan mi?

² Abusuan ne at gigipitan ning taung e mayap ing taung kalulu; ila sanang marakap king bitag a karelang yuyumang para karing kalulu.

³ Ing taung e mayap pagmaragul na pa ing e mayap nang nasa ning pusu na; angga king ing Ginu pituya-tuya ne at susumpa.

⁴ Uling sapat na ing atyu king bie na; ala neng panintunan pa. Ala, alang Dios! ngana ning kaisipan na.

⁵ Magtagumpe ya ing taung e mayap king nanumang gagawan na; ing kekang pamanukum ala man king kaisipan na; pituya-tuya na lang kalaban na.

⁶ Ngana king lub na, Matatag ku kapilan man; alang dugpa kaku nanumang kabiguan.

⁷ Ing asbuk na mitmu yang pamalmura, pamaglaram, at pamamala; kaguluan at e mayap ing atyu king dila na.

⁸ Karing baryu karin ya salasalikut, manenayang makamate king lihim karing taung alang kasalanan. Silip-silip yang magugumasid,

⁹ manenayang makapampan, leon ing kalupa na ban sagmitan taung kalulu kabud linub ya king makaumang nang lambat.

¹⁰ Ing taung alang kalaban-laban daragsa ne, at king upaya na pailalam ne.

¹¹ Nganang sasabi king lub na, Mengalinguan ne ing Dios; e na ku akit uling papampanan neng lupa na.

¹² Talakad ka, O Ginu, at sagipan mu ku, O Dios ko, ganakan me ing kalulung magdusa!

¹³ Obat lilibakan ne ning taung e mayap ing Dios, at sasabian nang e ne kanu parusan?

¹⁴ Oneng akakit mu, O Ginu, ing kasakitan at kaligaligan, at makasadia kang sumaup. Ing taung alang arapat keka na ipanibala ing sarili na, uling bukud ika ing talasaup da ring ulila.

¹⁵ Ilako mu na ing upaya na ning taung e mayap at palpikasala; parusan mung kasalanan da angga king iti lubus matda na!

¹⁶ Ing Ginu ya ing ari king kapilan pa man, at detang alang Dios a katawan lubus lang mitabi king balen na.

¹⁷ O Ginu, ing panalangin ding taung mababa lub keka sanang pakiramdaman; pusu ra keka la sanang dinan sikanan.

¹⁸ Layun mo sanang pagdipensa ding ulila at ding gigipitan da; ban ing mistulang tau e ne mamatakut kapilan man.

11

¹ Ing Ginu ya'ng kaku mimingat, makananu yung ngeni kaku sabian, Karing bunduk sulapo kang anting ayup;

² uling ding taung e mayap sasadia da na lang pana ra; paslu da kakasa da na la ban king karalumduman ibugnus da la para king taung malinis a pilubluban.

³ Nung ding pundasyun ning katatalakaran na mibual na la, ing taung banal nanu pa ing arapat na?

⁴ Ing Ginu atyu ya king banal a Templo na, ing tronu na atyu karin banua; mata na king yatu makalawe la, miraras karing sablang tau ing pamaglalawe na.

⁵ Ding banal at ding makasalanan parehu na lang susurian; oneng kasaman na lang maburing darapat katampalasanan.

⁶ Pauran yang baya at asupring bubukal karing sablang makasalanan; mapaling angin ing dugpang parusa karela.

⁷ Ing Ginu matulid ya, at malugud king katuliran; inya karing taung makatuliran, pakit ne ing lupa na. fig,,,,,...inya karing taung makatuliran, pakit ne ing lupa na.,(11:7)fig*

12

¹ O Ginu, sumaup ka, uling maka-Dios a tau ala na; taung tapat ala nang mitagan.

² Pawang kalaraman ing karelang pisasabian; mapagkunwari la at mapaglinlang.

³ Ginu, keka la sanang patahimikan ding labi a papalual kalaraman, at ding dilang magsalitang kayabangan;

⁴ detang sasabing atyu king dila ing karelang sikanan, at alang makabawal karela, at ala lang giginuan.

⁵ Oneng ngana ning Ginu, Kimut na ku para karing gigipitan dang kalulu, at karing sasaingsing saup karela kakung ibie.

⁶ Ding amanu na ning Ginu apanaligan la, pilak ing kalupa ra a dinalan mekatapitu king ornu.

⁷ Ika, O Ginu, ing talaingat mi kapilan man, at magligtas kekami kaniting mapaglinlang a lahi.

⁸ E mayap a tau nu man karin atilu, at ing e mayap pagparangalan ning balang metung at metung.

13

¹ O Ginu, angga kapilan ing kaku kekang pamangalinguan? Angga me kapilan isalikut ing lupa mu kaku?

² Angga kapilan kakung pibatan ing kakung panamdaman, at ing aldo'ldo kung kasakitan? Angga kapilan na ku daigan ning kakung kalaban?

³ Lawan mu ku at pakibatan, O Ginu at Dios ko! Ibalik mu mewala kung sikanan ban ing kamatayan e ku takman.

⁴ Pota kakung kalaban sabian na, Ikua kia mu ring deigan. At ikatula na pa ing kakung kasiran.

⁵ Aku, Ginu, manalig ku king alang kupas a lugud mu. Matula ku uling iligtas mu ku.

⁶ Magkanta ku keka, Ginu, uli ning mayap a depat mu kaku.

14

¹ Ding mangmang karelang sasabian Alang Dios! Makanyan la ngan ding taung e mayap; makasumami ing karelang dapat. Ala metung man karela ing darapat mayap.

² Manibat banua ing Ginu maglalawe ya; lalawan na karing taung lelangan na nung atin pang biasa, at sasamba arap na.

³ Oneng ding sabla melili la ngan king dalan, pawa ngang e mayap ing karelang gagawan. Metung man alang darapat kayapan.

⁴ Nganang kinutang ning Ginu, E no kaya mabiasa pa deting sablang darapat e ustu a mengaring mamangan putu king balen ku, mangalinguan lang samba kaku?

⁵ Oneng king takut galgal la, uling ing Dios makapanig ya karing taung alang pamikasala.

⁶ Kailian yu la man ding babalakan ning kalulu, makanyan man king Ginu lubus yang magtiwala.

⁷ Kakung nasa king datang ya sanang ibat king Zion ing magligtas king Israel. I Jacob tumula ya at ing Israel magsaya ya potang pasibayu neng bendisyunan ning Ginu ing balen na.

15

¹ O Ginu, ninu ing malyaring lungub kilub ning Templo mu? Ninu ing karapatdapat manuknangan king Zion a banal mung bunduk-bundukan?

² Ya itang taung ala kang asabi king keyang pamibiebie, itang darapat king katuliran; itang parating magsalitang katutuan,

³ at e gagamit king dila na king kapanyiran; e gagawang makapanasakit king kakaluguran na, at e magsalitang kalaraman king kenu man.

⁴ E na la katulan detang tatanggi king Dios; oneng detang king Dios mamintu, at tatakut ilang gagalangan na; tutuparan na sabla nang kapangakuan nu man anti ing maging kabayaran.

⁵ Itang e mamatubu king salaping paparam na, at e me asuhul laban karing taung alang kasalanan. Ing taung mibiebie makanyan matatag ya, at e maugun kapilan man.

16

¹ O Dios ko, ingatan mu ku, uling ika ing kakung panaligan.

² King Dios kakung sabian, Ika ing kakung bukud panginuan; nanumang mayap a atyu kaku binie mu.

³ Deta namang king Ginu tapat marangal la't kalang-alangnan, at karela ligaya ing kakung kakamtan.

⁴ Detang sasambang aliwang dios, anti rang parakalan ing karelang kasakitan; ain karela e ku magdala ni lagyu ra e ko banggitan.

⁵ Ika, Ginu, ing bukud kung pibandian, ing tula a kakung pagnasan; karing gamat mu atyu ing mayap kung kapalaran.

⁶ Mayap la ding regalung kaku binie mu; tutu lang makayama kaku!

⁷ Ing Ginu kaku yang purian, uling kaku babie yang mayap a dalan ban kakung tuntunan; tatairan neng kakung kaisipan king kapitangan ning kabengian.

⁸ E ke malyaring kalinguan ing Ginu, uling parati yang atyu king siping ku; matatag ku at e mauugun.

⁹ Inya ing pusu ku masaya ya, at matula yang kakung kaladua; pati pamikakatawan ku panatag ya.

¹⁰ E mu paintulut ing miras ku king tuknangan da ring mete ni e mu itulut king ing kekang kakaluguran dungdungan ne ing kutkutan.

¹¹ Ing dalan a papunta king bie kaku papakit me; siping mu atyu tulang alang kapante; ing saup mu magdalang tulang alang kapupusan.

17

¹ O Ginu, pakiramdaman mu ku; katuliran ing aduan ku; kakung dalangin miras sa king kekang panandam, uling tau kung e maglinlang.

² Keka ku sana tanggapan ing kayatulan a kakung katuliran, bustan mu sanang karelang akit ing katutuan.

³ Pusu ku balu me; bengi man sisi-siasatan me. Sibukan mu ku at ala kang ikit a e mayap; uling kakung pamagsalita kakung ingatan.

⁴ Ding taung mapanagkas e ku la pakiapusan, uling tapat ku lang pamintuan ding amanung king labi mu manibatan.

⁵ Karing kekang dalan bitis ku karin la daralan, inya e ku mitakid king kakung pamaglakbang.

⁶ Keka maus ku, O Dios ko, uling pakibatan mu ku, keka sanang pakiramdaman ing kakung sasabian.

⁷ Ipakit mu ing alang kupas mung lugud, O talapagligtas ding keka lalapit pasaup; siping mu ligtas ku karing kakung kalaban.

⁸ Ingatan mu ku antimong pekamal keka, lalam mung pakpak ingat mu makanyan sana;

⁹ uling ding taung e mayap buri da keng panasakitan. Kaku makapadurut la,

¹⁰ lunus ala karela; kapalaluan ing pamaniabian da.

¹¹ Tekikian da ku at pedurutnan; buri dang arakap da ku sana.

¹² Balamu leon lang danupan manintun paglapakan; balamu leon lang malati, pakasalikut lang manaya ban aku ing karelang sagmitan.

¹³ Ginu, me keni keka lang arapan; gisanan mu lang sambutan! Iligtas mu ku karing taung e mayap king kapamilatan ning kekang panabak.

¹⁴ Ginu, iligtas mu ku karing taung anti kareti; gamat mung mayupaya gamitan mu ne kareting taung labis-labis king pagkabie; parusan mu la ketang parusang sidia mu karela; ding anak at apu ra idame mu la.

¹⁵ Lupa mu kaku yang tangalan, uling darapat kung katuliran, at kagising ku neng abak tula kumatmu ku uling 'tyu ku arapan mu.

18

¹ Kaluguran da ka, O Ginu, ika ing kaku mag-dipensa.

² Kaku ing Ginu anti yang batung maragul a e mauugun; anti yang pader a matibe a babie kaligtasan. Ing kakung Dios batu ya waring matibe a magdipensa kaku, at anti yang kalasag ku.

³ Purian ya ing Ginu, ngakung kukulisak, at miligtas ku karing sabla kung kalaban.

⁴ Makagapus ku karing tali ning kamatayan; tatange na ku ning masalusung agus ning kasiran.

⁵ Miras ku king bingit ning kamatayan; atyu na ku king oras ning kawakasan.

⁶ Kaniting gipit kung kabilian, ing Ginu ya ing kakung inaus; king Templo na kakung bosis dimdam na, kakung saingsing miras king panamdam na.

⁷ Kanita ing yatu meugun ya, at ginalgal pati na pundasyun ding bunduk; milyari iti uling mimua ya ing Dios.

⁸ King arung na asuk ing linual, at king asbuk na aping mikakalabkab at uling a mibabaya.

⁹ Pininpin ne ing banua at saka ya tinipa, king makapal a ulap karin la makatuklu ding bitis na.

¹⁰ Sinake ya ketang kerubin, at mabilis sinulapo makasake king pakpak ning angin.

¹¹ Ing dalumdum gewa neng pampan na, at ing matuling a ulap a magdalang uran ya'ng gewa nang tolda.

¹² At ing kildap linto arap na, lipat a mangaragul ampon mapaling baya.

¹³ Kanita menuldul king banua, at bosis ning Kakataskatasan a Ginu peparamdam na.

¹⁴ Bignus na lang paslu na, at kalaban mikalat la; king kislap ning kildap misambulat la.

¹⁵ Ing kalalaman ning dagat linto ya, at ding pundasyun ning yatu meyakit la inyang ding kekang kalaban sebianan mu la, O Ginu, uling mimua ka.

¹⁶ Dinungo ya ing Ginu ibat banua, at saka na ku inabut, layun na kung sinaka ibat king kalalaman ning dagat.

¹⁷ Linigtas na ku king mayupaya kung kalaban; karing kalaban a mas masikan kaku.

¹⁸ Lisuban da ku king aldo ning kakung kabiguan; oneng iningat na ku ning Ginu.

¹⁹ Liwal na ku at dela king malualas a lugal; linigtas na ku uling tune na kung kaluguran.

²⁰ Inablasan na ku ning Ginu uli ning kakung katuliran; binendisyunan na ku, uling malinis lang kakung gamat.

²¹ Ing utus ning Ginu kakung tiparan; e ke gilutan ing Dios.

²² Kautusan na e ku la kelinguan, at e ku la lebagan kapilan man.

²³ Ala kung kapintasan king arapan na; apangilagan ku ing pamaniapat kasalanan.

²⁴ Inya ing Ginu ablasan na kung mayap, uli ning pamanupad ku karing utus na; ding kakung gamat malinis la; iti akakit ding mata na.

²⁵ Ginu, tapat ka karetang tapat keka; karetang keka e migkulang, papakit mu munamang e ka magkulang karela;

²⁶ karing malinis, papakit mu ing kekang kalinisan, oneng karing taung e mayap mabagsik na ka man.

²⁷ Liligtas mu lang taung mapagpakumbaba, oneng ding palalu keka lang ibababa.

²⁸ Ing Ginu a Dios ku ya'ng babie sala kaku; tatabi nang dalumdum a makapadurut kaku.

²⁹ Uli mu sambutan ku lang kakung kalaban, at uli ning kakung Dios pader kaku yang alundagan.

³⁰ Iting Dios dapat na ganap la; ayasahan lang amanu na. Detang lalapit pasaup king Ginu kalasag ya karela.

³¹ Atin pa waring Dios nung e mu ing Ginu? Atin pa waring batung mabie nung e mu ya?

³² Ya ing Dios a babie sikanan kaku, at mimingat king daralanan ku.

³³ Bitis ku gewa mong kasing bilis ding king usa; tetagan mu kakung talakad karing lugal a matas.

³⁴ Gamat ku keka lang sinane king pamakilaban, at kaku yang ayabit agyang pana yang bakal.

³⁵ King kekang kalasag iningat mu ku't linigtas; iningat mu ku, at gewa mu kung marangal.

³⁶ Kakung daralanan keka yang pinatag, ban bitis ku e la mitalusad.

³⁷ Tegal ku lang kakung kalaban, at ikua ku na la mang atagal; e ku la likuan anggang e la megisan.

³⁸ Wekasan kung bie ra ban e na makabangun pa, at king kakung arapan miragsa la.

³⁹ Dirinan mu kung sikanan king kakung pamakilaban, at tagumpe karing kakung kalaban.

⁴⁰ Kakung kalaban pepaurungan mo ngan; masama kaku, kaku la ngang gisan.

⁴¹ Kukulisak lang maniawad saup, oneng karela alang migligtas; kinulisak la't pepasaup king Ginu, oneng saup e na binie.

⁴² Mapinung-mapinu ku lang dinurug, ban angin ipaid na lang anting alikabuk, at karing dalan dekurak ku lang anting burak.

⁴³ Linigtas mu ku king pamag-rebeldi da ring tau, karing karelang bansa gewa mu kung pamuntuk da; taung e ku kakilala kaku pepasakup la.

⁴⁴ Kabud damdaman da ku, agad lang mamintu; aliwang bansa gagalgal lang magsaria kaku.

⁴⁵ Dakal lang dayuan ding menimutla; gagalgal lang linual karing karelang kuta.

⁴⁶ Ing kakung Ginu mabie ya, mipuri ya ing kakung batung tuknangan! Ing Dios a talapagligtas ku ya ing purian!

⁴⁷ Ing Dios ya ing mablas karing kakung kalaban, at pepailalam na la kaku ding tau.

⁴⁸ Liligtas na ku karing kakung kalaban; karing kalaban pepagtagumpian na ku, segipan na ku karing mabagsik a tau.

⁴⁹ Inya libutad ding sablang bansa, Ginu, ikang kakung purian, kekang lagyu kaku yang pagkanta.

⁵⁰ Maragul a tagumpe ing binie na king ari na; papakitanan ne king lugud a manatili ing pinili na, i David, at ding lahi na.

19

¹ Sasabian na ning malualas a banua ing dangalan ning Dios; pakilala na ing depat na.

² Ing aldo babalita na iti king tutuking aldo, at ing bengi pabalu na king benging katuki na.

³ Alang amanung sasalita ra o bosis a damdaman mu karela;

⁴ makanyan man king mabilug a yatu kakablas ing bosis da, at karing wakas ning yatu ing mensahi ra. Karin ing Dios mibili yang metung a tolda para king aldo.

⁵ Lulual yang anting lalaking kakasal ibat king silid na; mengari ya king mamialung a masayang makilaban.

⁶ King dane aslagan karin ya saslag ing aldo, lalbug ne man king dane albugan; king pali ning aldo ing sabla mirarasnan.

⁷ Ganap ya ing kautusan ning Ginu; babie yang bayung bie king tau. Apanaligan lang tuntunan na ning Ginu, kabiasnan babie ra king taung alang balu.

⁸ Ding kautusan ning Ginu matulid la; ninuman ing tupad tula ing kamtan na. Ding utus ning Ginu ustu la; babie lang sala karing mata.

⁹ Karapatdapat ing gumalang mitmung takut king Ginu, sukat manatili iti kapilan man. Ding atul ning Ginu pawa lang katutuan, at makatuliran la ngan.

¹⁰ Mal lang maygit king gintu; maygit lang pagnasan king purung gintu; mas mayumu la kesa king inuyat, maygit la kaniaman king pulut-panilan.

¹¹ Karing utus mu mabibiasa yang talasuyu mu, mayap ing kakamtan king pamamintu ku.

¹² Ninu mo ing makibalu king sabla nang pamagkulang ning tau? Inya karing kamalian a e ku balu patawaran mu ku.

¹³ Iligtas me ining kekang talasuyu king kasalanan ning kapalaluan; e me paburen mag-ari iti kaku, kanita maging lubus kung alang kapintasan; alang mantsa ning mabayat a kasalanan.

¹⁴ Ding amanung lulual karing labi ku at ing pamibulebule ning kakung pusu, maging katanggap-tanggap la sa arapan mu, O Ginu a peka batu kung matibe at kakung talapagligtas!

20

¹ Pakibatan na ka sa ning Ginu king oras ning kekang kaligaligan! Ingatan na ka sa ning lagyu ning Dios nang Jacob!

² Ibat king Templo na saup keka ibie na sana, at ibat king Zion alalayan na ka.

³ Sablang ain mu tanggapan na la sana, at kekang ain-sakripisyu matula na sanang tanggapan.

⁴ Ibie na sa keka ing kapagnasan ning pusu mu, at dinan katuparan sabla mung planu.

⁵ Kulisak keng masikan uli ning tagumpe kimtan mu, at ing lagyu ning Ginu ya'ng purian tamu! Ibie na ngan sa ning Ginu sablang kekang aduan.

⁶ Ngeni balu ku na: ing Ginu tagumpe babie na ketang aring pinili na; ibat king banal nang banua ibie nang pakibat kayabe ding tagumpe a dapat ning wanan nang gamat.

⁷ Manalig lang aliwang tau karing karung panggera o karing kabayu da; ikami manalig ke king lagyu ning Ginu.

⁸ Mangalyu la at miragsa, oneng ikami makatalakad kaming lumaban.

⁹ Tagumpe king ari ibie mu, O Ginu; neng mamaus kami pakibat ibie mu.

21

¹ Matula ya ing ari uli ning sikanan a binie mu, O Ginu; matula yang e mu nanu king tagumpe a binie mu.

² Binie mu ing nasa ning pusu na; e mu pigkaymut ing aduan ding labi na.

³ Pigdala meng mayap a bage; pitungan me king koronang gintung dalise.

⁴ Bie ing inawad na keka, at binie mu bie makaba at alang angga.

⁵ Meging maragul ya't marangal, uli ning saup a kekang pepabal; bintun mu king ari ing ligaya at kamalan.

⁶ Ala yang kapupusan ing binie mung bendisyun; masaya ya uli ning atyu ka king arapan na.

⁷ Binili ning ari king Ginu ing kapanaligan na, at manatili yang matatag king kapilan pa man, uli ning lugud na't lunus ning Kakataskatasan.

⁸ Sabla nang kalaban a mua, dakpan na la, at king wanan nang gamat bihagan na la.

⁹ Dulukan mu la king milalablab a ornu king aldo a datang ka at palto. At ing Ginu king mua na gisanan na la, at ing api silaban na la ngan.

¹⁰ Anak da keti king yatu gisanan na la ngan, at ding anak ding karelang anak anti munaman.

¹¹ Mibalak la mang e mayap laban keka; e la magtagumpe king e mayap a tingka da.

¹² Mulayi la at tumakas la, uling iyarap me karela ing kekang pana.

¹³ O Ginu, pakit mung kekang sikanan, magkanta kaming kapurian uli ning kekang kayupayan.

22

¹ Dios ko, Dios ko, baket pepaburen mu ku? Baket meko kang marayu at saup kaku pigkaimut mu?

² O Dios ko, aldo't bengi ikang kakung ausan; e ku mipaindatun kening kakung kabilian; obat e mu ku pa pakibatan?

³ Oneng ika ing makalukluk king banal a lugal, ing bukud pupurian ning Israel.

⁴ Kekeng makatua ikang karelang penaligan, at dininan mu lang kaligtasan.

⁵ Inyang minaus la keka king panganib miligtas la; memungang mayap ing keka pamanalig da.

⁶ Balamu e na ku tau nune anti kung ulad a tatabi da, at pikakasaman ding memalen!

⁷ Ding sablang menakit kaku kailian da ku; pipiling da lang buntuk da at pituya-tuya da ku!

⁸ Ngarang sasabi, Ing Ginu ya ing kekang penaligan, obat ngeni e na ka papansinan? Nung kaluguran na ka pin, obat e na ka sasagipan?

⁹ Ika ing ilut inyang mibait ku, at miningat king pandagul ku kapamilatan ning kakung ima.

¹⁰ Manibat na kanita ika na ing kakung penaligan, at ing Dios ku kanitang mibait ku.

¹¹ E ka lalaut kaku, uling malapit ing panganib kaku, at metung man alang sumaup kaku.

¹² Ding kalaban ku anti lang toro'ng makapadurut kaku, kalupa da la ring mabagsik nang toro ning Bashan.

¹³ Asbuk da kaku nganganga da la ngan; gagaga lang balamu leon a mapaglapak at danupan.

¹⁴ Ing sikanan ku mebating; ing kalupa na danum a mitugtug king gabun; mengalisia-lisia la sablang kakung butul. Pusu ku anti yang kandila; kilub ning kakung salu malalaso ya.

¹⁵ Anti yang gabun a malangi ing batal ku; mipapakat ya kening telabanua ining dila ku; halus mete ku inyang king alikabuk likuan mu ku.

¹⁶ Padurutnan da ku ding balamu asu, kukubkuban da ku ding e mayap a tau; gamat ku bisbus da la pati na ding bitis ku.

¹⁷ Kakung butul kaku lang abilang; pituya-tuya da ku kabang aku ing karelang lalawan.

¹⁸ Karelang pirakayan susulud kung imalan, at kakung tibabal karela yang pisugalan.

¹⁹ E ka sana lalaut kaku, O Ginu! Datang na kang agad, O talapagligtas ku.

²⁰ King espada iligtas meng kaladua ku, at ing bie ku king ket da rening asu.

²¹ King asbuk ning leon sagipan mu ku; iligtas mu ku karing sagu da reting mabangis a toro!

²² Sabian ke ing lagyu mu karing kapatad ku, at ika ing kakung purian king karelang kapulungan.

²³ Ikong maki takut king Ginu, purian ye! Ikong sablang lahi nang Jacob, parangalan ya! Ikong sablang lahi nang Israel, samban ye!

²⁴ Uling ala yang inumis ni pepaburen ninumang pakakalulung atyu king kagipitan; kabud karela yang ausan agad na lang pakibatan.

²⁵ Ika ing kakung purian king maragul a kapulungan, uli ning kekang depatan; kakung penata kakung tuparan king karelang arapan.

²⁶ Mangan la at kumabsi ding kalulu; detang king Ginu lalapit purian de. King kapilan pa man sana minawa la!

²⁷ Ding sablang tau aganaka re ing Ginu at kilalanan de, datang lang sablang bansa ban king Ginu samba.

²⁸ Uling ing Ginu ari ya, ya ing pamuntuk ding bansa.

²⁹ Duku la king Ginu ding sablang mayupaya at palalu; ding sablang king alikabuk menibatan, king arap na duku la ngan.

³⁰ Ding anak a mibait king panaun a daratang ya ing karelang suyuan; ing daratang a lahi balitanan ya tungkul king Ginu.

³¹ Mibalita karetang e pa mibait ing pamagligtas na; karetang e pa makabait ing sablang depatan na.

23

¹ Ing Ginu ya ing pastul ku, e ku magkulang king nanuman;

² king dikut a malabung karin na ku papagpaynawan, at king makapasno danuman karin na ku daralan.

³ Dirinan na kung bayung sikanan. Tatairan na ku king dalan ning katuliran, antimo ing keyang pengaku.

⁴ Agyang king libis a mapanganib karin ku dumalan, e ku numanu balang, uling ika ing kakung kayabe. Ing pamarug mu't tukud ilang kaku babie sikanan lub. fig,,,,,Agyang karing libis a mapanganib karin ku dumalan...,(23:4)fig*

⁵ Misasadia yang pamangan king kakung arapan king mismung akakit ding kakung kalaban; tutugtugan neng laru ing buntuk ku, tula ku e makanyan-kanyan.

⁶ Pawang ing kayapan at lugud ilang mantabe kaku kabang mabie ku, at king bale ning Ginu manuknangan ku king kapilan pa man.

24

¹ Ing sabla bandi ning Ginu, at ing sablang atyu king yatu. Bandi ne ing mabilug a yatu, at ding sablang keti manuknangan.

² Ya ing kaniti menatagan king libutad ning danuman; pekatigik ne talakad libutad ning dagat.

³ Ninu ing maki katuliran mukiat king bunduk ning Ginu? Ninu ing maki matulid lungub king banal nang Templo?

⁴ Ya itang ating malinis a gamat, itang ating pusung dalise; itang e magnasa king e mayap, at e magsalitang kalaraman laban king kenu man.

⁵ King Ginu tanggap yang kanawan, at kapatawaran king Dios a keyang kaligtasan.

⁶ Makanyan la ugali ding taung manintun king Ginu, ding lalapit king Dios nang Jacob.

⁷ Ding pasbul ning siudad a matua na pakabuklat yu na la, uling lungub ya ing ari ning ligaya.

⁸ Ninu wari iting ari ning ligaya? Alang aliwa nune ing Ginung Mayupaya; tagumpe akakua na king marangle ning gera.

⁹ Ding lumang pasbul ning siudad pakabuklat yu na la, uling lungub ya ing ari ning ligaya.

¹⁰ Ninu wari iting ari ning ligaya? Ing Ginung Mayupaya, ya ing ari ning ligaya!

25

¹ Ika, O Ginu, ing kakung ausan;

² O Dios ko, ika ing kakung panaligan. E mu sa paburen ing sambutan da ku ding kakung kalaban.

³ Ding keka manalig e la tanggap kabiguan; bukud mung daratang ing kabiguan karetang keka alang katapatan.

⁴ Ginu, ituru mu la sa kaku ding kekang dalan; ituru mu la kaku ding kekang tuntunan.

⁵ Ituru mu ku at tairan king kekang katutuan, uling ika ing kakung Dios at kaligtasan; patitingapun ikang kakung panayan.

⁶ O Ginu, ganakan mu ing lugud mung e kukupas a keta pang minuna keka nang selita.

⁷ Kalinguan mu na sa ing gewa kung kasalanan, at keinan inyang anak ku; uli ning wagas a lugud mu at kayapan lub e mu ku sa kalinguan, O Ginu!

⁸ Mayap ya ing Ginu at makatuliran; tuturu neng tune dalan karing makasalanan.

⁹ Darala na lang mapagpakumbaba king dalan ning katuliran; karela tuturu ne ing tune dalan.

¹⁰ Ding sablang dalan ning Ginu katapatan la, at para kareta lang tutupad king kasunduan na at kautusan.

¹¹ Alang-alang king kekang lagyu, O Ginu, dakal kung kasalanan keka sanang patawaran.

¹² Ing ninuman king Ginu tatakut at gagalang, abalu re ing dalan a sukat dang dalanan.

¹³ Mangabiayan yang mitmung kanawan, at anak na gabun karela yang bandian.

¹⁴ Kakaluguran na la ning Ginu ding mamintu karing utus na, at karela pabalu nang kasunduan na.

¹⁵ Ding mata ku parati lang makalawe king Ginu, uling liligtas na ku king bitag a inumang da kaku.

¹⁶ Balikdan mu ku at lunusan, uling magdili-dili ku at mipasakitan.

¹⁷ Ilako mu ku karing kalingasngasan ku, at isaka king kaligaligan ku.

¹⁸ Lawan mu ining dusa ku't kasakitan; kekang patawaran sabla kung kasalanan.

¹⁹ Lawan mu: milalu la karakal ding kakung kalaban; pawa ra kung kasaman at buring panasakitan!

²⁰ Ingatan mu ku at sagipan; keka ku lalapit pasaup e mu ku pakarinayan.

²¹ Mananu na sanang ing kakung katapatan at katuliran ilang maging kakung salilungan, uling ika, Ginu, ing kakung panaligan.

²² Dios ko, king sablang kaguluan iligtas me ing Israel!

26

¹ O Ginu, ibie mung kakung katuliran, uling matulid ing kakung daraptan, at bukud mung ika ing kakung panaligan.

² Siasatan mu ku, Ginu, at subukan! Lawan mung kakung kapagnasan at kaisipan.

³ Ing lugud mung e kukupas e ku kakalinguan at mibiebie ku king kekang katutuan.

⁴ E ku mekiabe karing taung malaram, at e mekisalamuha karing magbanal-banalan.

⁵ Kasaman ku ing pamakiabe karing taung darapat e ustu, at e ku mekiluklukan karing makasalanan.

⁶ Ginu, wasan ku la ding kakung gamat anting tanda king ala kung depat a pamikasala; kekang altar kaku yang lapitan.

⁷ Magkanta kung kapasalamatan, at sablang makapagmulala mung depat kaku ngan sabian.

⁸ Kaluguran ke ing Templo mung tuknangan, at ing lugal ning kekang kaligayan.

⁹ E mu ku darame king parusa da ring makasalanan, at taung tampalasan;

¹⁰ karing taung midinatan a gamat king kasalanan, at tatanggap suhul karing gamat dang wanan.

¹¹ Oneng aku matulid ing kakung daraptan; lunus ibie mu at ing kaligtasan.

¹² Bitis ku matatag la talakad king gabun a patag; arap ding taung pakatipun, ing Ginu ya'ng kakung purian!

27

¹ Ing Ginu ya ing kakung sulu at kaligtasan, ninu ing kakung pitakutan? King panganib ing Ginu ingatan na ku, ninu ing pitakutan ku?

² Neng lalapitan da ku ban paten ding e mayap a tau, deting kakung kalaban at kapagkamua, ila ding mismung mitakid at mibulang.

³ Kubkuban da ku man ding dakal a kawal e ku mu rin mitakutan; sagupa la man kaku ding kalaban, ing Dios ya pa mu rin ing kakung panaligan.

⁴ Metung mung bage ing aduan ku king Ginu, at metung mu ing kakung pagnasan; king Templo na sa karin ku manuknangan king kapilan pa man ban kakung tangalan ing keyang kayapan, at turu na tanggapan.

⁵ Siguradu na kung ingatan neng atyu ku king kaguluan; king panganib ya'ng kakung salilungan, at itas na ku at ibili king batung matatag.

⁶ Inya kaku lang sambutan makapadurut a kalaban, at iyain kilub ning Templo na ain at matulang kulisak; pagkanta ke at purian ing Ginu!

⁷ O Ginu, pakiramdaman mu ing keka aus ku! Malunus ka at pakibatan mu ku.

⁸ Ngamung sinabi, Me keni; panintunan mu ku. Ngakung mekibat, Buri da kang akit, Ginu.

⁹ Lupa mu e me sa papampan kaku. King kamua mu e me sa palakuan ining kekang alipan. Ika ing kakung kasaupan; e mu ku sa lalakuan o paburen man, O Dios a kakung kaligtasan!

¹⁰ Pepaburen da ku ding pengari ku, oneng ing Ginu ali na ku.

¹¹ Ituru me, O Ginu, ing sukat kung dalanan; king patag a dalan karin mu ku sa tairan, uling dakal ku kalaban.

¹² E mu la paburen maniambut kaku, uling malaram la ding testigu ra laban kaku, at buri da kung panasakitan.

¹³ Iti ya ing paniwalan ku: takman ku ing kayapan ning Ginu keting kasalukuyan a panaun.

¹⁴ Manalig ka king Ginu; e mu painan ing lub mu, at e ka tatakut; wa, manalig ka king Ginu.

28

¹ Keka, O Ginu, mamaus ku; ika ing panaligan ku, pakiramdaman mu ku! Nung e mu ku pansinan mangari ku karing malapit na king kamatayan.

² Pakiramdaman mung kakung saingsing, ngening mamaus ku keka, ngening manalangin kung makayarap king banal a Templo mu.

³ E mu ku sa yayabe kareng taung e mayap a pamibiebie; maniabi lang kayapan karing labi ra, oneng e ustu naman ing karelang isipan.

⁴ Ablasan mu ing karelang depat, itang depat dang e mayap; ing mangaintulid king dapat da ya ing ibie mu karela!

⁵ Sablang depat ning Ginu pati mayap a dapat na, e ra bitasang sikasu. Iragsa no sana at e na mitalakad pa.

⁶ Ing Ginu keko yang purian, uling dimdam nang kakung saingsing.

⁷ Ing Ginu ya ing kakung kalasag at sikanan, ya ing bukud kung pagkatiwalan, inya manakit kung kasaupan; masaya ku at pagkanta keng kapasalamatan.

⁸ Ing Ginu ya ing sikanan ning balen na; ya ing magdipensa at magligtas king taung kaluguran na.

⁹ Ginu, iligtas me ing balen mu, bendisyunan me iting bandi mu. Ika sa ing karelang pastul ban karela lingun kapilan man.

29

¹ Purian ye ing Ginu, ikong king banuang lelang na! Purian ye uli ning ligaya na at upaya.

² Lagyu nang marangal sukat yeng parangalan; ing Ginu kekayu yang samban potang pakit nang kabanalan na.

³ Ing bosis ning Ginu mararamdam babo ning danuman! Ing upaya ning Dios duldul ing kawangis; ing bosis na kakablas king maragul a danuman.

⁴ Mayupaya ing bosis ning Ginu; mitmung kamalan ing bosis ning Ginu.

⁵ Papaklian no ning bosis ning Ginu ding tanaman a sedro; ding sedro'ng tanaman karin king Lebanon.

⁶ Palundagan ne ing Bunduk ning Lebanon anti ing luksu ning bakang biseru, at ing Bunduk ning Hermon anting malyap a toro.

⁷ Ing bosis ning Ginu papalto neng kildap a mataram.

⁸ King bosis na galgal yang disyerto; pagalgalan na lang disyerto ning Kades.

⁹ King bosis na mangapanganak lang usa; king bosis na sablang tanaman ning kagubatan malalagas la; kabang kilub ning Templo na Ing Ginu purian ye! ngara ding tau.

¹⁰ Ing Ginu ari de pati ding danuman a malalam; ari ya king kapilan pa man.

¹¹ Dinan ne sanang sikanan ining balen na; bendisyunan ne sa ning Ginu at dinan kapayapan.

30

¹ Pupurian da ka, O Ginu, uling linigtas mu ku; e mu peintulut ing tumula la kakung kalaban king kakung kabiguan.

² O Ginung kakung Dios, minaus ku keka, at kakung katawan keka yang pepakayapan.

³ O Ginu, linigtas me ing bie ku king kamatayan, e mu ku inabe karing padulung na king kutkutan.

⁴ Pagkanta yang kapurian ing Ginu, ikong sablang tapat! E yu kakalinguan pasalamat king lagyu nang banal!

⁵ Saguli mu ing mua na; kabang-kaba ing ganaka na; karas ning bengi mapalyaring ating lua, oneng datang ing tula.

⁶ Panatag ku lub sinabi, Matatag ku; e ra ku atugun.

⁷ Uli ning kayapan mu telakad mu kung matatag anti ding bunduk a e makikimut; inyang ing lupa mu keka yang pimpan, kaku dinatang ing takut at kaligaligan.

⁸ Keka, O Ginu, minaus ku; keka inawad ku:

⁹ Nanu ing apala mu nung mate ku, nung wari't king aun kuldas ku? Apurian da ka kaya ding mete o asabi ing kekang kayapan?

¹⁰ Pakiramdaman mu ku sa, O Ginu, at malunus ka kaku; Ginu, saupan mu ku!

¹¹ Inalilan mung pamanerak ing kakung kalungkutan; leko mu ing paldas kung imalan, king tula karin mu ku belabalan.

¹² Inya ngeni e ku malyaring magtahimik; alang tuknang kapurian keka ikanta. O Ginu, kakung Dios, parati kung pasalamat keka.

31

¹ Ika, O Ginu, ing kakung lalapitan; e mu paintulut miras kaku ing kamarinayan! Iligtas mu ku king kekang katuliran.

² Pakiramdaman mu ku; malagua ka, saupan mu ku. Maging anti ka sanang batu'ng pisalikutan, at kutang matatag a kaku babie kaligtasan.

³ Ika ing kaku magdipensa, at kakung salilungan; antimo ing pengaku mu; alalayan mu ku't patnubayan.

⁴ Iligtas mu ku king inumang dang silu kaku, uling ika ing kakung panaligan.

⁵ Karing gamat mu ipanibala ku ing bie ku. Ika ing migligtas kaku, Ginu; O Dios, tune kang tapat.

⁶ Keka lang pikakasaman ding sasambang e tutung dios, oneng ika, Ginu, ing kakung panaligan.

⁷ Tumula ku at magsaya uli ning lugud mu; kakung kasakitan kekang pinsinan, at sabla kung kabalisan.

⁸ E mu paintulut ing bihagan na ku ning kalaban; kalayaan kekang binie ban kaku lang dasan lugal a kakung buring puntalan.

⁹ Malunus ka kaku, O Ginu, uling maliligalig ku. Mata ku midadame, katawan, at mabilug kung pangatau.

¹⁰ Bie ku halus kalungkutan ya; king saingsing magigisan ya. Ing sikanan ku mababating uli ning kakung kaligaligan; marurunut pati kakung butul.

¹¹ Gewa da kung kalibakan ding kakung kalaban; ding kasiping kung bale makanyan munaman; karing kakung kakaluguran, metung na ku mang pitatakutan. Detang kaku manakit king dalan, e ra balu nung makananu da kung lisian.

¹² Mengari ku karing mete king isip mebura na; mengari kung sukal a karelang yugse.

¹³ Daramdaman ku ing pisisitsitan da ku; tatakut ku nu ku man marap; uling misanmetung la ngan ban bie ku karelang patayan.

¹⁴ Oneng keka ku manalig, O Ginu; kakung sasabian, Ika ing Dios ku.

¹⁵ Ing bie ku atyu karing gamat mu; iligtas mu ku karing kalaban ku, at karing manggipit kaku.

¹⁶ Bustan mung tumiman ka kening kekang talasuyu. Uli ning lugud mung e kukupas iligtas mu ku!

¹⁷ Ginu, keka mamaus ku; e mu ku paburen mabibigu! Ding sukat tanggap kabiguan at mipatahimikan king kutkutan ila detang darapat e ustu.

¹⁸ Isara mu lang asbuk dang malaram a magsalitang kapalaluan at kapanyiran laban karing darapat katuliran.

¹⁹ O Ginu, ing kayapan mu alang kalupa, makasadia para karetang ating takut keka! Balu ding sabla ing kekang ganaka a kekang babie karetang manalig keka.

²⁰ Ika ing mimingat karela ban milaut la king intriga da; tatairan mu la king ligtas a lugal, king e ra dasan ding taung manyira.

²¹ Purian ye ing Ginu, uli ning lugud nang e kukupas; makapagmulala ing depat na kaku inyang balamu siudad kung karelang kibkuban.

²² King kakung takut ngakung mipakulisak, Milaut ku king kekang panimanman. Makanyan man kekang dimdam ing kakung aus inyang keka meniawad kung saup.

²³ Luguran ye ing Ginu, ikong sablang pinili na! Ding tapat king Ginu, ingatan na la, oneng detang palalu, maygit na lang parusan.

²⁴ Magpakatatag kayu ngan, at siknangan ing lub yu; ikong manalig king Ginu!

32

¹ Mapalad ya ing taung mipatawaran a kasalanan, at mipanupaya king keyang kakulangan.

² Mapalad ya ing taung king Ginu alang atrasu at alang kapamiraitnan king keyang pusu.

³ Inyang kakung kasalanan e ku kimpisal tutu kung misakitan, at sasaingsing patitingapun.

⁴ Aldo at bengi ing kekang gamat dagpa ya kaku misnang bayat; sikanan ku menapnap, balamu bulung tanaman a mepanat.

⁵ Kanita linapit ku keka, Ginu, at pigtapat sablang kasalanan a makasalikut kaku. Ngaku, Ikumpisal ku king Ginu ing sablang kakung kasalanan; at keka namang deyu ing beyatan ning kakung kasalanan.

⁶ Inya ing balang metung karing keka tapat maus ya king oras ning kaligaligan na. Agyang datang man ing agus a masikan ding keka tapat e la mirasnan.

⁷ Ika, Ginu, ing kakung salikutan; liligtas mu ku king oras ning kaligaligan. Padurutnan mu kung kaligtasan.

⁸ Ngana ning Ginu, Ituru ke ing sukat mung dalanan; dinan da kang kausukan, at mata ku keka e ku la ikawang.

⁹ E ka sa mangari king kabayu o king asno a alang pamisip a malino; mangailangan lang paket at renda ban mamintu la keka.

¹⁰ Masuksuk ya ing dalan ning taung e mayap, oneng itang king Ginu tapat lugud ing makapadurut.

¹¹ Tumula kayu king Ginu, tumula kayu, ikong banal! Ikong sablang ating malinis a pusu, tula ikulisak yu.

33

¹ Ikong sablang matulid a pamibiebie, king Ginu tumula kayu; ikong maki pusung dalise, kapurian sukat yung ibie.

² Kayabe ning lira ing Ginu kekayu yang purian, kayabe ding gitara panigtigan ye.

³ Pagkanta yeng bayung kanta, manigtigan kayung masalese kayabe ning masikan a kulisak!

⁴ Uling ing amanu ning Ginu mitmung katapatan, at apanaligan sabla nang depatan.

⁵ Kaluguran na ing hustisia at ing katapatan; kakatmuan ne ing yatu king lugud na.

⁶ King amanu na banua melalang ya, aldo, bulan, batuin, at aliwa pa.

⁷ Ing danum ning dagat, at pati itang atyu king kalalaman titipunan na king metung a lugal.

⁸ Galangan ne sa ning meto yatu ing Ginu! Samban ye, ikong sablang mabibie king yatu!

⁹ Melalang ya ing yatu king metung nang amanu; minutus ya mu at ing sabla pepalto na.

¹⁰ Ing Ginu ya ing sisira king tatangka da ring bansa; bibiguan nang e mayap dang nasa.

¹¹ Oneng ding sariling balak ning Dios manatili la kabang-kaba; kapagnasan na kapilan man e la matda.

¹² Maligaya ya ing bansa, nung ing Dios ya ing Ginu na. Maligaya ya ing balen a pinili na.

¹³ Ibat banua ing Ginu makalawe ya; sablang taung lelangan na lalawan na.

¹⁴ Ibat king tronu na pagumasdan na sablang tau king yatu.

¹⁵ Ya ing miyubug king isip da; sablang dapat da balu na.

¹⁶ Uling dakal ya sundalus magwagi ne wari ing ari? Uling tutu yang masikan ing makilaban akua na na wari ing kaligtasan?

¹⁷ Ding kabayu ala lang kabaldugan ban sumambut king pamakilaban; karelang sikanan e mu apanaligan ban miligtas.

¹⁸ Oneng ing Ginu ingatan na la detang ating takut at gagalang, at sablang manalig king lugud na.

¹⁹ Iligtas na la king kamatayan; king panaun ning danup dinan na lang pamangan.

²⁰ Ing Ginu ya ing kekatang kapanayan, talasaup, at kambilan.

²¹ Maligaya kami uli na, uling lagyu nang banal panaligan mi ya.

²² O Ginu, lugud mu kekami ipakit anti na ning keka ke manalig.

34

¹ Pasalamatan ke ing Ginu king kapilan pa man; labi ku e la tuknang pupuri king Ginu.

² Ing Ginu ya ing pagmaragul ku; makiramdam kayu at tumula, ikong mayayalipusta.

³ Parangalan yeng abe ku ing Ginu; miyabe-abe ta yang purian ing lagyu na.

⁴ Menalangin ku king Ginu, at pekibatan na ku; karing sablang kakung takut linigtas na ku.

⁵ Lumawe kayu king Ginu at tumula kayu, at e kayu mipakarine.

⁶ Ing taung maliligalig king Ginu minaus ya, at pekiramdaman ne; linigtas ne king sabla nang dusa.

⁷ Ing anghel ning Ginu babanten na la detang ating takut at gagalang; king panganib liligtas na la.

⁸ Pilasan yu at subukan ing kayapan na! Tumula ya ing taung lalapit king Ginu!

⁹ Ikong taung pinili ning Ginu, pitakutan ye't igalang, at sabla yung kailangan kekong kamtan.

¹⁰ Magkulangan la at daranup ding leon, oneng detang king Ginu magdulap e la magkulangan.

¹¹ Meko keni, kalupa kung tau; kaku makiramdam kayu ban takut at kagalangan king Ginu ituru ku.

¹² E wari makabang bie ing kekong pagnasan, at sablang kayapan ing buri yung kamtan?

¹³ Uli niti, dila keko yang pigilan at e kayu magsalitang kalaraman.

¹⁴ Ing e mayap keko nang lakuan, at ing mayap yang kekong daptan; panintunan at pakikuanan ing kapayapan.

¹⁵ Lalawan na la at ingatan ning Ginu ding matulid, at pakiramdaman nang karelang saingsing.

¹⁶ Lalabanan na la ning Ginu ding taung darapat pamikasala, at paten na la ba na lang makalinguan.

¹⁷ Neng mamaus lang taung matulid, pakiramdaman na la ning Ginu, at liligtas king sabla rang problema.

¹⁸ Malapit ya ing Ginu karetang meina lub, at sasagipan na la detang milako kapanayan.

¹⁹ Dakal ing kasakitan a daralanan na ning taung-matulid, oneng iligtas ne ning Ginu kareting kasakitan.

²⁰ Ingatan ne ning Ginu nanuman ing mapalyari; metung man karing butul na alang mapakli.

²¹ Ing e ustu ya ing makamate king makasalanan; detang masama karing banal tanggap lang kaparusan.

²² Iligtas na la ning Ginu ding talasuyu na; alang dugpang parusa karetang lalapit king Ginu.

35

¹ O Ginu, keka sanang talakaran kakung piamanuan; ding makipate kaku keka la sanang labanan.

² Kuanan meng sandata mu't kalasag, at saupan mu ku sanang agad.

³ Talnan meng kekang tandus at palakul, laban karing kaku tatagal; kaku, O Ginu, sabian mu king ika ing talapagligtas ku.

⁴ Mipakarine la sa at milako puri ding sablang bisang makamate kaku; pasiyatras la sa at isip magulu ding ating e mayap a tangka kaku!

⁵ Maging anti la sanang sepu a ipaid na ning angin, at isambulat ning tubud mung anghel.

⁶ Bustan mung talusad ya, at dalumdum ing dalan da kabang ing kekang anghel panagalan na la.

⁷ King alang sangkan buri da kung dakpan, kinulkul lang malalam ba ra kung patayan; e ku man balu ing sangkan.

⁸ King e ra kamalayan dugpa sana karela ing kasiran; king inumang dang lambat sana ila ding marakap, king gewa rang kulkul ila sana ding manakbag!

⁹ Oneng aku tumula ku king Ginu, tumula ku uling linigtas na ku.

¹⁰ King mabilug kung pangatau sabian ku, Ginu, ninu ing kalupa mu? Ding maina keka lang sasagipan ketang masikan karela, at ing pakakalulu king manalipusta king bie na.

¹¹ Ding malaram a testigu linto la, at e katutuan ing kaku bibintang da.

¹² E mayap ing yablas da king dapat kung mayap; iti tutu kung panamdaman.

¹³ Inyang masakit la diname ku karela, at pati king pamangan menaguanta; alang tuknang ing panalangin ku para karela.

¹⁴ Uling kapatad at kakaluguran ing turing ku karela; linakad kung mitmung lungkut, anti ku waring kewalan ima.

¹⁵ Inyang aku ing misakitan migsaya la pang e makanyan-kanyan; mitipun-tipun la ba ra kung insultuan. King e ku kamalayan pinyira da kung alang tuknang.

¹⁶ Pisunu-sunu da ku at gewang karelang pikaylian; pititigis da lang ipan da kaku!

¹⁷ O Ginu, angga ka kapilan na mu makalawe? Iligtas mu ku kaniting kakung kaligaligan, ing bie ku kareting leon a mabagsik.

¹⁸ Kanita libutad ding dakal a taung makapulung, purian da ka at pasalamatan.

¹⁹ E mu paintulut tumula lang kakung kalaban ngening ala kung kasalanan. E mu sa paburen ing pikindatan da ku detang alang sangkan mua kaku.

²⁰ E la biasang magsalita king kapayapan; ding taung payapa ila pang karelang panyiran.

²¹ Asbuk da agad dang kukulisak, Ah, ah, mebante ka; miyadia ka, ikit da ka!

²² Ika ing testigu king malilyari, O Ginu; e ka sa magmaklak-maklakan kaku; e ka sa lalaut kaku.

²³ Kimut na ka at idipensa mu ku, O Dios ku at Ginu ko; kakung dangalan kekang talakaran.

²⁴ O Ginu, ibie mu kakung katuliran uling makatuliran ka, at e mu paintulut karing kakung kalaban ing lunto ku karelang kalibakan.

²⁵ E mu paburen isipan da at sabian, Oyni ing panayan tamo! at e mu paintulut sabian da, Simbut ta ne, ikit na!

²⁶ Pamakarine mu la at guluan a isip ding matula king kabilian kung gipit. Mipakarine la sana't milako dangalan detang migmaragul kaku.

²⁷ Oneng kulisak lang matula detang king katuliran ku magnasa; sabian dang alang patna, Purian ya ing Ginu, uling buri na ing makakayap kaku.

²⁸ At kakung sabian ing kekang kayapan; ika ing kakung purian aldo o bengi man.

36

¹ Magsalita ya ing kasalanan king pusu ning taung e mayap; ala yang takut king Dios dit' man.

² Tutung maragul ing lawe na king sarili na; inya isipan na king alang manakit at mua king depat nang pamikasala.

³ Asbuk na mitmu yang kapamiraitnan at kalaraman, ing kabiasnan lubus nang gilutan, at pati na ing pamaniapat kayapan.

⁴ Kabang makakera ya king pagkeran na e mayap itang isipan na; pamibiebie na e na buring larinan, ing e mayap e na buring lakuan.

⁵ Ing lugud mu, O Ginu, alang kalupa; ing kekang katapatan lalagpus king banua.

⁶ Ding kautusan mu't kaburian anti la karing matas a bunduk; ing kayatulan mu malalam anti ing dagat. O Ginu, ding tau at animal parehu mu lang pagmalasakitan.

⁷ O Dios, tutung mal ing lugud mu; lalam ding pakpak mu lalapit la ding tau.

⁸ Kakabsi la king kabiayan ning bale mu; miminum la king batis ning lub mung mayap.

⁹ Atyu keka ing sibul ning bie; ing aslag mung tagle ya ing keke matnube.

¹⁰ Isundu mu sa lugud mu karetang keka kikilala, at bendisyunan detang ating malinis a bie.

¹¹ E mu paintulut ing damusakan da ku ding palalu, at pitapus-tapus ding e mayap a tau.

¹² Pagumasdan yu: ding taung e mayap mibagsak la; e na la pasibayung makatalakad pa king pangalugmuk da.

37

¹ E ka sa paibalisa uli ding taung e mayap o diriria karing taung darapat kalokuan.

² Uling e lumuat langi lang anting dikut; anti ding tanaman malanat la ngan.

³ Magtiwala ka king Ginu at dapat kang mayap, ban payapa kang manuknangan king kekang tuknangan.

⁴ King Ginu panintunan ing tula a buri mu, at ibie na kapagnasan ning kekang pusu.

⁵ Pagkatiwala mu ing bie mu king Ginu; manalig ka king Ginu, at saupan na ka.

⁶ Pakit nang maslag ing kekang kayapan, at ing kekang katuliran anti ing aldo neng kaugtuan.

⁷ Magtahimik ka king arap ning Ginu at ya'ng panayan mu. E ka paisakit lub king taung mipapala o king ninumang magtagumpe king e mayap nang nasa.

⁸ E ka sa paimua at ilako sama king lub mu, at apangilagan mu ing basaggulu.

⁹ Uling ding darapat e mayap mitabi la, oneng detang manalig king Ginu ilang magmana king gabun.

¹⁰ E lumuat lumbug lang taung e mayap; e mu na la akit agyang panintunan mo pa;

¹¹ oneng ding mababa lub bandian de ing gabun, at ing ganap a kapayapan.

¹² E ustu ing babalakan na ning taung e mayap laban king taung malinis a daraptan, at pititigis na lang keyang ipan;

¹³ oneng ing Ginu kaylian nia mu, uling akakit nang daratang ing keyang kawakasan.

¹⁴ Begut ne ing espada na ning taung e mayap, at inigut neng keyang pana ban na lang paten ding kalulu at gipit at pati na ding taung matulid.

¹⁵ Oneng iting espada ra king mismung pusu da karin ya dugpa, at ding pana ra mapakli la.

¹⁶ Ing ditak nang kayatinan ning kalulu maygit yang e palak king dakal dang pibandian ding taung e mayap;

¹⁷ uling mabating ing sikanan ning e mayap at ing saupan ning Ginu ya ing taung mayap.

¹⁸ Ingatan na la ning Ginu detang mamintu king utus na; ing mana ra kapilan man e milako.

¹⁹ Nung datang ing kagipitan balu ra ing karelang daptan; king panaun ning danup e la magkulangan.

²⁰ Oneng mate la ding e mayap a tau; lumbug lang kalaban ning Ginu, malanat lang anti ding bulaklak, at matda anting asuk ning silab.

²¹ Ing taung e mayap mandam ya, oneng e na balung isubli itang inandam na; ing taung mayap mapaglunus ya at mamie ya.

²² Ding binendisyunan na ning Ginu manuknangan la king bansa a binie na, oneng detang taung sinumpa na mitabi la.

²³ Ing Ginu ya ing mimingat king paglakad ning tau, at king gagawan na tutula ya ing Ginu.

²⁴ Nung mitakid ya, makanyan man e ya miragsa, uling ing Ginu ya'ng talaingat na.

²⁵ Manibat na inyang anak ku angga na ngening metua na ku metung man taung matulid ala kung ikit a pepaburen na mo sa ning Ginu; o ding lahi na a mepilit magpalimus pamangan karing tau.

²⁶ King sablang oras darapat yang mayap at karing manandam babie yang kasaupan; pati anak na tanggap lang kanuanan.

²⁷ Ing e ustu kekang lakuan, at ing mayap yang kekang daptan ban manatili kang atin tuknangan;

²⁸ uling kaluguran ning Ginu ing katuliran, inya ding taung tapat king Ginu kapilan man e na la gulutan; oneng lahi da ring darapat e ustu angganan na.

²⁹ Ding makatuliran ilang manikua king mipangakung gabun; karin la manuknangan king kapilan pa man.

³⁰ Kabiasnan ing lulual king asbuk ning makatuliran, at sasalita na ning dila na ing katuliran.

³¹ Atyu king pusu na ing kautusan ning Dios; tutuparan na king bie na.

³² Pagumasdan ne ning taung e mayap ing taung matulid, ing kamatayan na yang pagnasan na;

³³ oneng ing Ginu e na paintulut ing manabu ya ing taung matulid karing gamat da ni paburen mayatul potang marap ya king ukuman.

³⁴ Magtiwala ka king Ginu, at keka lang pamintuan ding kautusan na; saupan na ka ban ing mipangakung gabun keka yang bandian, at akit mu lang mitabi ding taung ating dapat e ustu.

³⁵ Misan ikit ke ing metung a taung mayabang; matibe yang anti ing tanaman a matas ning Lebanon,

³⁶ oneng ala na yu karin inyang pasibayu kung lumabas; e ke ikit agyang penintun keng masalese.

³⁷ Pagumasdan ye ing taung matulid; ing taung tapat keko yang pansinan; lahi na manatili la king kapilan pa man.

³⁸ Oneng ding taung makasalanan e la makanyan, uling magisan la ngan; metung man karela alang mitagan.

³⁹ Ing kaligtasan ding taung matulid king Ginu manibatan; ya ing karelang salilungan king oras ning kaligaligan.

⁴⁰ Saupan na la ning Ginu at iligtas; iligtas na la karing gamat ding taung e mayap, uling ing Ginu ya ing karelang sasalilungan.

38

¹ O Ginu, e mu ku sa kakamuan at paparusan.

² Kinutkut la kaku ding paslu mu, digpa ya kaku ing gamat mu.

³ Uli ning mua mu masakit ya mabilug kung katawan; ala kung kapaldanan uli ning depat kung kasalanan.

⁴ Malulumud ku king keraklan ding kakung pamikasala; e ku la adala-dala uling anti lang mabayat a karga.

⁵ Mamau la at nanaknak ding kakung sugat, iti bunga ning kasalanan a kakung depat.

⁶ Mangabaluktut ku at sayasayukut king gabun, kilub ning patingapun mitmu kung lungkut.

⁷ Malibub ku uli ning mapaling lagnat; balamu ata e na ku kumayap.

⁸ Pata ku panamdam, at lubus na kung meina; sasaingsing ku uli ning kaplas ning lub ku.

⁹ O Ginu, kakung kapagnasan balu mu; e makalingad keka ing saingsing ku.

¹⁰ Salu ku tatatap ya, sikanan ku ala na; mata ku melula na la.

¹¹ Pangilagan da ku ding kakaluguran at kayabe-abe ku, kasiping bale e la bisang lumapit kaku.

¹² Yuyumang do kaku ding silu da, kaku kamatayan ing nasa ra; detang bisang makapanasakit kaku pisasabian da ing kasiran ku; patitingapun katraydulan ing karelang babalakan.

¹³ Maklak ku waring e makaramdam, pipi ku waring e makapagsalita dit' man?

¹⁴ Anti ku king taung alang daramdaman at alang balung sabian king piamanuan.

¹⁵ Oneng ika, O Ginu, ing kakung panaligan; O Ginu kung Dios, ing aus keka sanang pakibatan.

¹⁶ Ngakung sinabi, E mu sa paintulut karing kakung kalaban ing gawan da kung pikaylian, detang magmaragul kaku potang miraragsa ku!

¹⁷ Malapit na kung mibulang, at ing sakit e na ku buring lakuan.

¹⁸ Sasabian ku ing kasalanan a kakung depat; kasalanan a kakung depat sisisian ku ngan.

¹⁹ Dakal la at masikan ding kakung kalaban; mua la agyang ala kung kasalanan.

²⁰ Detang kaku mamablas e mayap king mayap kung depat, lalabanan da ku uling ing nasa ku mayap.

²¹ O Ginu, e mu ku sa paburen! O Dios ko, e mu ku sana lalakuan!

²² O Ginu, agad mu kung saupan, ika a kakung kaligtasan!

39

¹ Ngaku king lub ku, Mingat ku king kakung daraptan ban dila ku e ya makarapat kasalanan; asbuk ku kaku yang pigilan kabang kayarap ku lang taung makasalanan.

² Menahimik ku, inya e ku bubulad; ala kung sinabi pati kayapan man, oneng lalung merakal ing kakung kasakitan.

³ Kabang mibulebule ku, meskup ya ing kakung salu; inya ngakung sinabi,

⁴ Ginu, sabian mu nung kapilan ku mate. Nu pa kakaba ining kaku binie mung bie? Pabalu mung tutu yang mabilis kumupas ing bie ku.

⁵ Makuyad yang tutu ing bie ku; balamu ala yang ulaga king arapan mu. Anti ya mung sakildap ing bie ning tau keti king yatu.

⁶ Mengari yang anino ing taung mabibie; sabla nang daraptan muli mung alang kabaldugan; ing pibandian a titipunan na e na balu nung kaninu iti malakuan.

⁷ Ngeni, O Ginu, nanu mo ing kakung panenayan? Keka ku bibili ing kakung kapanayan.

⁸ Iligtas mu ku king sabla kung kasalanan; e mu sa paintulut ing gawan da kung pikaylian ding mangmang.

⁹ E ku bubulad; asbuk ku e biklat, uling balu ku king iti kekang dapat.

¹⁰ Pamamarusa mu kaku keka nang ituknang; gamat mu karelang gisan ing kakung sikanan.

¹¹ Paparusan mu ing pamikasala na ning tau ban akua nang magpakatinu; ipas ka waring gigisan king kayatinan na; wa, ing tau angin ing kalupa na.

¹² O Ginu, kakung panalangin kekang pakiramdaman; O Ginu, kakung saingsing kekang pakiramdaman. E ka sa magmaklak-maklakan kening kakung tangis. King bale mu anti kung bisitang dinatang; dayuan a makituknang anti ding kakung makatua.

¹³ Masanting pa lakuan mu na ku ban mipaldan ku; kanita tula tanggapan ku bayu ku man mako at mawala keting yatu.

40

¹ Menaya kung mitmung kapibabatan king Ginu; linusan na ku at dimdam nang panalangin ku.

² Leko na ku king kulkul a malalam, at king maglaklak a burak. Bitis ku tiklu na la king metung a batu, at kakung talakad gewa nang matatag.

³ Binili ne king asbuk ku ing bayung kanta; kanta yang kapurian para king kekatamung Dios. Dakal la ring manakit kaniti at mitakutan la, at manalig la king Ginu.

⁴ Maligaya ya ing taung manalig king Ginu; itang e makikiabe karing taung palalu at e lalapit karing dios a e tutu.

⁵ Maragul, O Dios a kakung Ginu, ing milagrung depat mu, at tatangka mu para kekeng tau. Ala kang kalupa keti king yatu! Nung kaku lang sabian kekang depatan, e ku la agyung sabian ngan!

⁶ E ain-sakripisyu o ain ing kekang pagnasan; e animal a sisilaban king altar ing kekang aduan o ain a kapamayaran king kasalanan; nune balugbug a keka biasang makiramdam.

⁷ Inya keka sinabi ku, Oyni, atyu ku arap mu, Ginu. Tungkul kaku makasulat king libru mu.

⁸ Matula kung tuparan, O Dios ko, ing kekang kaburian! King kakung pusu Kautusan mu ilang makasimpan.

⁹ King maragul a katipunan ning balen mu, ing mayap a balita ning pamagligtas mu sinabi ku. Ginu, balu mu king e ku tutuknang magsalita karing kekang depatan. fig,,,,,... ing mayap a balita ning pamagligtas mu pisiag ku.,(40:9)fig*

¹⁰ E ku selikut king pusu ku ing depat mung pamagligtas, king maragul a katipunan lalu kung sinabi, ing pamaniaup mu, katapatan, at ing lugud mung alang kayangganan.

¹¹ Ginu, e mu sana pagkaimut lunus mu kaku, bustan mung ing lugud at katapatan mu ilang parating mingat kaku.

¹² Makapadurut ku king e abilang-bilang a kaguluan; pasakitan da ku ding kakung kasalanan, at mata ku e la manakit; mas dakal la king buak king kakung buntuk, at mewala ngan kakung sikanan.

¹³ Matula mu ku sanang saupan, O Ginu! O Ginu, me keni at malagua mu kung saupan.

¹⁴ Detang kaku bisang makamate mabaligo la sa, at mangapakarine; detang maburi king kakung kasiran, mabigu la sa at milako dangalan!

¹⁵ Detang kaku mayling manatsa, mipakarine la sa at miragsa.

¹⁶ Deta namang lalapit keka dinan mo sanang tulang alang kalupa; mananu na sanang ding pasalamat keka uli ning depat mung pamagligtas karela, sabian da, Ing Dios tune marangal ya!

¹⁷ Maina ku at pakakalulu; oneng e na na ku man kakalinguan ning Ginu kening kakung kabilian. Ika, ing kakung talasaup at Talapagligtas; malagua mu ku sanang saupan, O Dios ko!

41

¹ Masaya ya ing taung karing kalulu magmalasakit, uling ing Ginu matula neng saupan king oras ning kagipitan.

² Ingatan ne ning Ginu at pakaban a bie at gawan masaya keti king masala; karing gamat ding kalaban na e ne paburen mipailalam.

³ Uluan ne ning Ginu potang sakit ya, at ibalik na ing sikanan a mewala.

⁴ Ngakung sinabi king Ginu, Ginu, keka mikasala ku; malunus ka at uluan mu ku.

⁵ Ngarang magsalitang kapanyiran ding kakung kalaban, Mate ne sana ban makalinguan yang lagyu na.

⁶ E la tapat detang kaku magbisita; lalawe lang e mayap a ipagindredus da, at makanyan ing daraptan da potang kalako ra.

⁷ Detang kaku masama pisisitsitan da ku; e mayap ing isipan da tungkul king sakit a miras kaku.

⁸ Ngara, Grabi ing sakit a miras king katawan na; e ne kumayap king pangarate na.

⁹ Pati na ing matalik kung kakaluguran at pagkatiwalan; itang kasulu kung mamangan pigtaksilan na ku naman.

¹⁰ O Ginu, malunus ka kaku; ibalik mu ing sikanan a mewala kaku ban karela makaganti ku!

¹¹ Kanita ku abalu king matula ka kaku; nung ding kalaban e la magtagumpe kaku.

¹² Balu ku ing saupan mu ku, uling ing mayap ya ing daraptan ku; arap mu talakad ku king kapilan pa man.

¹³ Purian ya ing Ginu, ing Dios ning Israel! Purian ye angga king kapilan pa man. Amen! Amen!

42

¹ Nung makananu yang kakau ing usa king danum a mamagus, makanyan yang kakau keka, O Dios, ing kakung kaladua.

² King mabie Dios kakau yang kakung kaladua; kapilan ke kaya akit ing lupa na ban samban ya?

³ Aldo't bengi ing lua ku yang meging kakung pamangan kabang kakung kalaban karelang kukutang, Nu ya karin ing kekang Dios?

⁴ Saskup ya ing salu ku potang ing panaun a milabas agaganaka ku, lalung-lalu na inyang kayabe lang taung dakal ing bale ning Dios yang kekeng pintan, kabang masaya lang kukulisak, at pasalamat ding taung tatagun king kapiestan.

⁵ Ba't malungkut ku? Ba't ala kung kapanatagan a lub? Ing Dios ya'ng kakung panaligan; pasibayu ibie ku king Ginu ing kapurian; ing kakung Dios a babie kasaupan.

⁶ Kaladua ku malungkut ya, inya agaganaka da ka king bansa ning Jordan, at karin king Hermon at king Bunduk ning Mizar.

⁷ Ing kalalaman ning dagat, at alun a malati't maragul king kaladua ku ilang tatambun.

⁸ Sana lugud nang e kukupas ning Dios aldo-aldo ipakit na ban king kabengian kaku yang pagkanta; ing Dios ning bie ku ya ing dalanginan.

⁹ Kakung sabian king Dios a kaku maningat, Obat kelinguan mu ku? Obat manatili keng magpaldas a pasakitan ning kalaban?

¹⁰ Tutu da kung pasakitan ding kakung kalaban, at pikayli-kaylian; alang patugut karelang sasabian, Nukarin ya ing Dios mu?

¹¹ Obat malungkut ku? Obat manamdaman ku? Ing Dios ya ing panaligan ku, uling pasibayu keng pasalamatan; ya ing kakung talasaup at Dios ku.

43

¹ O Dios ko, sabian mu king ala kung kasalanan; idipensa mung kakung piamanuan laban karing taung alang Dios a katawan. Iligtas mu ku karing taung mitmung kapamiraitnan, at karing e makatuliran!

² Ika, O Dios, ing kaku mimingat; obat likuan mu ku? Obat kailangan ku pang dumalan kasakitan karing mabagsik kung kalaban?

³ Iparala mung kekang sala, at ing katutuan ban aku ing karelang patnubayan, at tairan king Zion, ing bunduk a banal nung nukarin yang kekang tuknangan!

⁴ Karin ketang altar mu, O Dios, lumapit ku; ikang babie kaku king tulang e mu nanu; tigtigan keng alpa at purian da ka, O Dios a kakung Dios.

⁵ Ba't malungkut ku? Ba't manamdaman ku? Ing Dios ya'ng panaligan ku; uling pasibayu ibie ku ing kapurian king Ginu. Ya ing talasaup ku at Dios ku.

44

¹ Inistoria da kekami, O Dios, ding makatua mi ing makapagmulala mung depatan kanitang karelang kapanaunan.

² Ika kanu ing mitabi karing dakal a paganu ban karelang gabun kekang pabandi karing taung pinili mu; ding paganu keka lang pepagdusan, oneng ing kekang balen dininan meng kanawan.

³ E re asamsam ing gabun a ita kapamilatan ding karelang espada o king sikanan a atyu karela; nune uli ning kekang kayupayan at sikanan, at uling minantabe ka karela. Iti kekang depatan uling keka lang kaluguran.

⁴ Ika ing Ari ku at Dios ku; ing papagtagumpe king kekang balen.

⁵ King saup mu deigan mi lang kekeng kalaban; king lagyu mu simbut mi la ngan.

⁶ E king kakung pana karin ku manalig o king kakung espada karin ku masagip.

⁷ Ika ing migligtas kekami karing kalaban mi; binigu mu lang masama kekami.

⁸ King Dios e ke tinuknang babie kapurian at kapasalamatan king kapilan pa man.

⁹ Ngeni likuan mu kami at pepasambut; e na ka mamantabe karing kekeng sundalus.

¹⁰ Pepayatrasan mu kami libutad ning labanan, at kekaming pibandian simsam ding kalaban.

¹¹ Peintulut mung katatan da kami anting tupa, at karing bansang dayuan kinalat mu ke pa.

¹² Pisali meng sarili mung balen king malating alaga; balamu tutu na keng alang kwenta.

¹³ Ding sablang makapadurut a bansa akakit dang kekang gewa; pikaylian da kami at pituya-tuya.

¹⁴ Gewa mu keng kasebian da ring bansa; karelang kaylian at paninsultuan.

¹⁵ Menatili kung sira dangalan; maibug kung mate king kamarinayan

¹⁶ king pamanyumpa at pamag-insultu ding kalaban at masama kaku.

¹⁷ Iti ngan milyari agyang e ra ka kelinguan o e tinupad king tinatag mung kasunduan.

¹⁸ Agyamang e ke meging taksil keka, kautusan mu pemintuan mi la.

¹⁹ Makanyan man likuan mu kami, at pepaburen karing mabagsik a animal libutad ning makapal a karalumduman.

²⁰ Nung sakali mang king Dios tinuknang keng sinamba o kaya menalangin king dios a aliwa,

²¹ siguradung iti atuklasan mu, uling balu mu laman ding pusu mi.

²² Wa, uli mu papaten da kami patitingapun, anti keng tupang karelang pupulkeruan.

²³ Ginu, migising ka! Ba't matudtud ka? Mibangun ka at e mu ke sa tatanggian kapilan man.

²⁴ Ba't sasalikutan mu kami? Ba't kelinguan mu ing kekeng kasakitan at kekaming dusa?

²⁵ Oyni king gabun milugmuk kami; king alikabuk makapase.

²⁶ Me keni at saupan mu kami! Uli ning lugud mung e kukupas ikami sana kekang iligtas!

45

¹ Maglapo yang malagung amanu ing kakung kaisipan, kabang ing ari kaku yang pagkanta. Ing dila ku kasing bilis ne ning panyulat ning mayap a talasulat.

² Karing sablang anak ding tau ika ing masanting dili; ing pamagsalita mu makawili, parati na kang bibendisyunan ning Dios.

³ King kekang awakan kekang espada itakas mu ne, O aring makapayan; maslag ka at tune marangal.

⁴ Sulung maglakbe na kang mitmung kamalan ban magtagumpe ing katutuan at ing katuliran; magtagumpe ka uli ning kekang sikanan.

⁵ Mataram la ngan ding kekang paslu, ding pusu ding kalaban ilang karelang tuturan; sablang bansa sisiklod la ngan king kekang arapan.

⁶ Ing kayarian a kekang tinggap king Dios manatili ya kapilan man. Kayabe ning pamaniakup mu ing katuliran.

⁷ Kaluguran mu ing katuliran, at kekang kasaman ing e mayap. Iti ing sangkan nung inya ing Dios a kekang Dios, pinili na ka at dininan dakal a tula kesa karing aring aliwa.

⁸ Ing susulud mung imalan mabanglu ya king aloe at mira. King palasyu mu king garing pelamutian karin da ka panigtigan.

⁹ Karing damas king kekang palasyu kabilang la ding prinsesa, at king dane mung wanan ing kekang reyna karin ne man; gintung puru lang alahas na.

¹⁰ Makiramdam ka, O babaing maging reyna, pakiramdaman mung kakung amanu; kekang kamaganak at kabalen keka na la ngan kalinguan.

¹¹ Bustan ing leguan mung tagle ya ing pagnasan ning ari; ya ing ginu mu, inya pamintuan me.

¹² Ding tau ning Tiro datang lang magdalang regalu; taung mabandi keka makikaluguran la.

¹³ Ing prinsesang king palasyu manuknangan ala yang kalupa king lagu na; ing imalan nang susulud megawa king gintung sinulad.

¹⁴ King malagu nang susulud a imalan makanyan deng king ari tairan; alalayan de ring damas na a miyarap munaman king aring marangal.

¹⁵ Miras lang abe ning tula at saya, at lungub la king palasyu ning ari.

¹⁶ Ika, O ari, mika marakal kang anak a lalaki, ban karing makatua mu manalili at maging ari; gawan mu lang mamuntukan a mag-ari king mabilug a yatu.

¹⁷ E na ka kalinguan ning kakung kanta ngeni at kapilan man, at parati da kang purian ding taung dakal.

46

¹ Ing Dios ya ing salilungan tamu at sikanan, makasadia yang sumaup king oras ning kaligaligan.

² Inya e tamu sukat mitatakutan agyang ding bunduk manabu la karing kalalalaman fig,,,,,... e tamu sukat mitatakutan.,(46:2)fig*

³ o dabungbung man ing danuman, at ding bunduk galgal la ngan king alun a mitmung bigsikan.

⁴ Ating ilug a mamagus babie tula king siudad ning Dios, king banal a tuknangan ning Kakataskatasan.

⁵ Atyu ing Dios libutad ning siudad, inya e ya masira kapilan man; sakoruan ne ning Dios paniatang ning abak a maranun.

⁶ Mitatakutan lang bansa; ding kayarian gagalgal la, at yatu malalaso ya kabud damdaman na ing balamu duldul nang bosis ning Dios.

⁷ Atyu libutad tamu ing Ginung Mayupaya; ing Dios nang Jacob ya ing salilungan tamu.

⁸ Me ko keni, pagumasdan yu la ding dapat ning Ginu, makapagmulala ing depat na keti king yatu.

⁹ Ing sablang pamigera king yatu patuknangan na na; papatluran ne ing pana, at ing tandus papaklian ne, at ing kalasag king api ne iyugse!

¹⁰ Ngana, Tuknang na kong milalaban at kekong kilalanan king aku ing Dios; sakup ko ding bansa pati ing mabilug a yatu.

¹¹ Atyu libutad tamu ing Ginung Mayupayang tutu; ing Dios nang Jacob ya ing salilungan tamu.

47

¹ Ikong sablang tau, makpak kayu; king mitmung tula king Dios kulisak kayu!

² Uling ing Ginung Kakataskatasan sukat yang pitakutan; king mabilug a yatu, ya ing aring sakdal a degulan.

³ Pepailalam na lang tau kekatamu, at pepasakup na lang bansa.

⁴ Ya ing memili king gabun a kekatamung tuknangan a bandi nang Jacob a pakamalan na.

⁵ Papanik ya ing Dios king tronu na libutad ning masayang kulisak, at tiup ding trumpeta.

⁶ Magkanta kayung kapurian king Dios; pagkanta yeng kapurian ing ari!

⁷ Uling ing Dios ya ing ari ning mabilug a yatu; magkanta kayung kapurian king Dios.

⁸ Mag-ari ya ing Dios karing sablang bansa; makalukluk ya king sagradung tronu na.

⁹ Ding pamuntuk ding aliwang bansa migtipun la, kayabe ding lahing pinili na ning Dios nang Abraham; uling ding sandata ding sablang tau ning yatu bandi na la ngan ning Dios a mayupaya king sabla.

48

¹ Ing Ginu sakdal ya dangalan, inya karapatdapat yang purian karin ketang keyang siudad, ketang bunduk nang banal.

² Ing bunduk ning Dios ya ing Zion; matas ya at masanting yang lalawan; ya ing siudad a bandi ning aring marangal at babie tula king mabilug a yatu!

³ Kilub ding pader na ing Dios sinabi na king ligtas ya ing ninuman.

⁴ Misan ding ari mitipun la; kaybat miyabe-abe king bunduk linusub la.

⁵ Oneng mebigla la inyang karela yang ikit; mitakutan la't meko'ng mirarapal.

⁶ Ginalgal la king takut at mebalisa; mengari la king babaing malapit nang manganak.

⁷ Anti lang barkung maragul ning Tarsis; lesakan na la kapamilatan ning angin-aslagan.

⁸ Iting depat ning Dios kekeng dimdam, at ngeni kekeng ikit king siudad ning Dios, ing Ginung Mayupayang tutu; kapilan man king siudad ya ing mag-dipensa.

⁹ O Dios, kilub ning banal mung Templo kekeng isip-isipan ing alang kupas a lugud mu.

¹⁰ Nukarin man pupurian da ka ding tau, at pikabaluan king mabilug a yatu. Mitmung katuliran ing pamanibala mu.

¹¹ Bustan lang tumula ding tau ning Bunduk ning Zion, bustan la namang magsaya ding king Juda, uling makatuliran ing pamanatul ning Dios.

¹² Lakaran me't durutan ing Zion; ding tore na kekayu lang bilangan.

¹³ Pader na kekayu lang pansinan, kuta na kekayu lang siasatan. ban king daratang a lahi kekong banggitan:

¹⁴ Ing Dios, Dios ta ya kapilan man; king sablang panaun patnubayan na katamu ngan.

49

¹ Pakiramdaman yu ini, ikong sablang tau! Pakiramdaman yu, ikong keti king yatu;

² taung mababa o matas, mabandi at kalulu!

³ Magsalita kung amanung mitmung kabiasnan; malino ing kakung isipan.

⁴ Pansinan ku lang kasebian, at karelang kabaldugan kakung pakibaluan kabang ining alpa kaku yang titigtigan.

⁵ E ku tumakut neng mapanganib, at karing kalaban a makapadurut kaku

⁶ o karing taung manalig king karelang pibandian, at magmayabang king karelang kayatinan.

⁷ Katutuan king ala metung mang tau ing makayatbus king sarili na ni asali king Dios ing alaga ning bie na.

⁸ Ala kang malyaring pamayad king tau; nanumang atyu king bie na e sapat

⁹ ban ing bie na aligtas na, at kapilan man mie ya.

¹⁰ Balu na king mate la ngan pati ding biasa at mangmang, at ing sablang tinipun dang pibandian karing aliwa da mu lakuan.

¹¹ Ding karelang pantiun ilang maging karelang tuknangan kapilan man; maging tuknangan da lang alang kapupusan, agyang pang ing gabun a seli da makalagyu karela.

¹² Ing tau nu ya man karangal kalupa ding animal mate ya munaman.

¹³ Iti ya ing apala da ring kontentu king pibandian da.

¹⁴ Ing kawakasan da kamatayan kalupa da ring tupa, at ing Kamatayan yang maging pastul da. Masambut la karing makatuliran; katawan da malaso ya, at ing Sheol yang maging tuknangan da.

¹⁵ Oneng ing Dios iligtas na ku; iligtas na ku king upaya ning kamatayan.

¹⁶ Inya e me sa kakaririan ing taung darakal a pibandian, neng daragul ing kayatinan na.

¹⁷ Uling potang mate ya ala ne mang idala ni ketang kutkutan na. fig,,,,,....potang mate ya ala ne mang idala.,(49:17)fig*

¹⁸ Agyang pang king bie na kontentu ya, at pinuri ding tau uling masuerti ya,

¹⁹ makanyan man potang mate ya ding makatua na akayabe na la; manatili ya kapilan man king karalumduman.

²⁰ Ing tau nu ya man karangal kalupa da ring animal mate ya munaman.

50

¹ Ing Mayupayang tutu, ing Dios a Ginu, magsalita ya; ausan ne ing mabilug a yatu manibat king aslagan angga king albugan.

² Ing Dios saslag ya ibat king Zion, ing siudad a sakdal king leguan.

³ Daratang ya ing kekatamung Dios, oneng e king katahimikan; makauna ya ing aping milalablab, at ing masikan a bagyu ya ing makapadurut king Dios.

⁴ Ing banua at yatu ausan na la ban saksian da ing pamanukum na king balen na.

⁵ Ngana, Tipunan yu la ding taung tapat, ding memalen a mekikasundu kaku kayabe ning karelang ain-sakripisyu.

⁶ Ing banua sasabian na king ing Dios makatuliran ya; ya mismu ing ukum.

⁷ Memalen ku, makiramdam kayu, uling magsalita ku; Israel, laban keka munie kung patutu, uling aku ing Dios, ing kekang Dios.

⁸ E ra ka paniabianan uli ding ain mu o ding ain-a-durulukan a parating yayain mu kaku.

⁹ Ding kekang lalaking baka e ku la kailangan o metung mang kambing karing kekang kawan.

¹⁰ Uling bandi ku la ngan ding animal king kagubatan, at ding baka karing libu-libung bunduk-bundukan. fig,,,,,.... bandi ku la ngan ding animal king kagubatan.,(50:10)fig*

¹¹ Balu ku la ngan ding ayup a susulapo, at bandi ku ing sablang mabibie king marangle.

¹² Nung danupan ku man keka e ku sabian, uling ing yatu at ing sabla kaku ngan.

¹³ Mamangan ku waring karni ding lalaking baka o miminum king daya ding kambing mo?

¹⁴ Ing sukat king Dios a kekang iyain ya ing kapasalamatan, at kekang pangaku king Kakataskatasan kekang tuparan.

¹⁵ King oras ning kekong kaguluan maus kayu kaku; iligtas da kayu at parangalan yu ku.

¹⁶ Oneng ngana ning Dios karing darapat e mayap, Nanung matulid yung manggit karing kakung kautusan? Ala kayung matulid ban ing kasunduan kekayu yang pisabian!

¹⁷ Uling kekong tatanggian ing itulid ke ing kekong dalan, at e tatanggapan kakung kautusan.

¹⁸ Maging kakaluguran da kayu ding mapanako, at kabarkada ding makipangatawan tau.

¹⁹ Matalusad kayu ngan a dila, at kalaraman ing kekong sasalita.

²⁰ Ding mismung kekong kapatad kekayu lang bibintanganan; karela e mikakunung mikalat kapanyiran.

²¹ Daraptan yu yan, at uling e ku bubulad bala yu king kalupa yu ku. Oneng ngeni paniabianan da kayu ngan ban kakung malinawan maling kekong depatan.

²² Inya pakatandanan yu, ikong kaku mangalinguan, magkang paglapakan da kayu at alang sumaup kekayu!

²³ Ing ninumang miyayain ain-a-kapasalamatan aku ing parangalan na; ing ninumang mabibieng makatuliran kaku tanggap yang kaligtasan.

51

¹ O Dios ko, malunus ka kaku, uli ning alang kupas a lugud mu. Uli ning maragul a lunus mu wasan mu lang kakung kasalanan!

² Linisan mu ing sablang kakung karinatan, at patawaran mung kakung kasalanan.

³ Balu ku lang kakung kakulangan at ding kakung kasalanan; parati lang atyu king kakung kaisipan.

⁴ Mikasala ku laban keka; bukud mung keka ku mikasala. Depat ku itang e mayap king arapan mu, inya matulid ing atulan mu ku. Makatuliran ing parusan mu ku.

⁵ Marawak na ku manibat na inyang mibait ku; kanita pang pengagli da ku makasalanan na ku.

⁶ Katapatan at katutuan ing kekang panenayan; katmuan me sa king kekang kabiasnan ining kakung kaisipan.

⁷ Wasan mu ing kasalanan ku, at luminis ku. Wasan mu ku, at maging maputi ku; maputi pa kesa king yelu.

⁸ Katmuan mu ku king tula at saya; agyamang pepasakitan mu ku't pepalasan, makanyan man tumula kung pasibayu.

⁹ Kalinguan mu na lang kakung kasalanan, at buran sabla kung kasalanan.

¹⁰ Gawan meng malinis ing pusu ku, O Dios ko, ibayu me ing pilubluban ku, at katapatan ibie mu kaku.

¹¹ E mu ku tatabi king kekang arapan; e me lalako kaku ing espiritu mung banal.

¹² Ibalik me kaku itang tulang bunga ning pamagligtas mu, at gawan mu kung mapamintu king sablang kaburian mu.

¹³ Kanita, karing makasalanan matula keng ituru ing kekang kautusan, at keka magbalik la ngan.

¹⁴ Sagipan me ing bie ku, O Dios ko, at iligtas mu ku, ban matula kung isalita ing kekang pamagligtas.

¹⁵ O Ginu, saupan mu kung magsalita at ikanta ku ing kapurian keka.

¹⁶ E mu la buri ding ain-sakripisyu, nung ali, keka kaku lang ibie ni e mo katulan ain-a-durulukan.

¹⁷ Ing ain ku, O Dios ko, mapagpakumbaba yang espiritu. Ing pusung sisisi at magpakumbaba kapilan man e me tanggian.

¹⁸ O Dios, maging maganaka ka sa king Zion, keka yang saupan; pader ning Jerusalem keka lang italakad.

¹⁹ Kanita, matula mu lang tanggapan ding ain a karampatan, at ain ming durulukan; main keng baka king kekang altar.

52

¹ O taung magkakalalake, ba't kekang pagmaragul ing e mayap a depat mu? Tapat ya ing Dios king kapilan pa man.

² Tatangka mu ing kasiran, ing kekang dila anti yang labahas a mataram; ing sasabian na pane kalaraman.

³ Mas kaluguran mu pa ing e mayap kesa king mayap, at ing kalaraman kesa king katutuan.

⁴ Keka lang kapad ding amanung manyugat, O taung ating dilang malaram!

⁵ Oneng ing Dios idala na ka king kasiran a alang angga; ilako na ka king kekang tolda at iyabe karing mete.

⁶ Ding taung matulid iti akit da, at mitakutan la, oneng kaybat sabian da,

⁷ Oyan ing taung king Dios e bisang lumapit nune menalig king dakal nang pibandian; ing pemuhunan na ya ing ugali nang e mayap.

⁸ Oneng aku anti ku king tanaman a olibo king lele ning bale ning Dios tutubu; king kapilan man lugud nang maniaman yang kakung panaligan.

⁹ Pasalamatan da ka king kapilan pa man, uli ning kekang depatan; lagyu mu kaku yang sabian uling iti mayap, arapan ding kekang memalen sabian ku ing kekang kayapan.

53

¹ Ding mangmang karelang sasabian, Alang Dios. Makanyan la ngan, ding taung e mayap; makasumami ing karelang dapat. Ala metung man karela a darapat mayap.

² Manibat banua ing Dios maglalawe ya; lalawan na karing taung lelangan na nung atin pang biasa at sasamba arap na.

³ Oneng ding sabla ing dalan a sukat dang dalanan, karela yang linisian; pawa ngang e mayap ing karelang gagawan. Metung man alang darapat kayapan!

⁴ Nganang kinutang ning Ginu, Tutu na la waring alang balu deting sablang darapat e ustu a mengaring mamangan putu king balen ku, at mangalinguan lang samba kako?

⁵ Oneng king takut galgal lang alang kalupa, uling ing Dios ikalat na la butul ding kalaban ning balen na; tinggian na la ning Dios.

⁶ Kakung nasa king datang ya sanang ibat king Zion ing magligtas king Israel! I Jacob tumula ya at ing Israel magsaya ya potang pasibayu neng bendisyunan ning Dios ing balen na.

54

¹ O Dios ko, uli ning lagyu mu, iligtas mu ku; idipensa mu ku king kayupayan mu.

² O Dios ko, pakiramdaman mu ing panalangin ku; pakiramdaman mung kakung panalangin.

³ Uling lulusuban da ku ding taung palalu; buri da kung paten ding taung alang pusu, ding taung alang kagalangan king Dios.

⁴ Oneng ing Dios saupan na ku; iligtas na ku ning Ginu.

⁵ Ibalik na sa karela ing kasalanan da anting parusa; O Dios a tapat, gisanan mu la sana.

⁶ King mitmung tula keka ain ibie ku; purian keng lagyu mu, O Ginu, uli ning kayapan mu.

⁷ King sabla kung kaguluan linigtas mu ku; ikit ku lang mesambut ding kakung kalaban.

55

¹ O Dios ko, pakiramdaman mu ing panalangin ku; pakiramdaman mung kakung pamakisabing mayap.

² Pakiramdaman mu ku at pakibatan kening kakung masakit a kabilian, at alang karatunan.

³ Gagalgal ku neng kakung daramdaman ing e mayap a balak ding kakung kalaban; tutu kung panamdaman ing e mayap a karelang gagawan; parati da kung guguluan; kamuan da ku't pikakasaman.

⁴ Tutu kung mangatakutan, magkang malaus ku king kamatayan.

⁵ Detangan na ku ning takut at galgal, at mibalutan king sindak.

⁶ Inya ngaku, Sana makasulapo ku kalupa ning patipati, kanita manakit kung tuknangan ku.

⁷ Kanita sulapo kung malaut, at king disyerto karin na ku manuknangan.

⁸ Mamalagua kung manintun salilungan ban apangilagan ing angin at bagyung masikan.

⁹ O Ginu, guluan mu la pati king pamipapagsalita da, uling king siudad da mag-ari ing katampalasan at kaguluan.

¹⁰ Aldo't bengi karing pader na karin la ligid-ligid; kakatmuan deng krimen at kaguluan.

¹¹ Kasiran ing atyu king kalibudtan na; kitmuan yang pamanalipit at kapamiraitnan ding dalan na.

¹² Nung dapat na iti ning metung a kalaban, ing pamaninsultu na agyu kung pibatan; nung ing magmayabang metung yang kalaban, akua keng asalikutan.

¹³ Oneng ika a kayabe ku, ikang makirapat mismu; ika a matalik kung kakaluguran.

¹⁴ Mikabalu kata ing metung at metung; miyabe katang sasamba king Dios.

¹⁵ Datang sa karing kalaban ing kamatayan; manakbag la sanang mabie king kutkutan, uling karing pibalebale ra at pusu ing e ustu ya ing atyu.

¹⁶ Oneng maus ku at pasaup king Dios, at ing Ginu iligtas na ku.

¹⁷ Abak, ugtu, at bengi saingsing kung alang tuknang, at kakung aus pakiramdaman na.

¹⁸ King pamakiarap karing kalaban saupan na ku ban e ra ku sambutan ding dakal kung kalaban.

¹⁹ Ing Dios a ari manibat king mula, damdaman na ku at daigan na la, e la bisang magbayu at takut king Dios karela ala.

²⁰ Ing kakung kayabe-abe kakaluguran pigtaksilan na la; ya mismung sinira king pangaku na.

²¹ Ing pamagsalita na tutung masanting, oneng mua ing atyu king pusu na; amanung sasabian na masanting la, oneng mataram lang anting espada.

²² Idala ing kaligaligan yu king Ginu, at alalayan na kayu; e na paintulut kapilan man ing maraig ya ing taung makatuliran.

²³ O Dios, keka yang kuanan bie da ring makamate tau, at mapaglinlang; e ra na akuang tumua man, oneng aku, Ginu, ika ing kakung panaligan.

56

¹ O Dios ko, malunus ka kaku, uling lulusuban da ku kalupa kung tau; patitingapun liligaligan da ku.

² Ala lang patugut kaku dadakurak; tutu lang dakal ding kakung kalaban.

³ Neng tatakut ku, ika ing panaligan ku, O Ginung Mayupayang tutu.

⁴ Ing amanu't pangaku ning Dios kakung pasalamatan at panaligan; pengaku na kakung pupurian. Ba't kalupa kung tau kaku yang pitakutan?

⁵ Patitingapun ala lang daraptan, aku ing karelang pasakitan; ala lang aliwang pag-imbutan nune mu ing kakung kasiran.

⁶ Miyabe-abe lang manenaya ban aku ing karelang tambangan; parati rang lalawan ing kakung gagawan.

⁷ O Dios ko, parusan mu la sana, uli ning e mayap a dapat da; king kekang mua lupigan mu la.

⁸ Balu mu nung nu karakal ing kakung problema; lua kung tinulu balu mu la; king kekang libru iti ngan kekang linista.

⁹ Kakung kalaban mamulayi la ngan kabud kekang damdaman kakung kapaniausan. Iti ing kakung paniwalan: ing Dios aku ing papanigan na.

¹⁰ Ing amanu't pangaku ning Dios siguradu nang daptan; kaku yang purian uling pangaku na tuparan na.

¹¹ King Dios ku binili ing kakung kapanaligan, inya ala kung sukat pigaganakan. Ba't kalupa kung tau kaku yang pitakutan?

¹² Ding pengaku ku keka, O Dios, sukat ku lang tuparan, ain ning kapasalamatan keka kaku lang ibie.

¹³ Linigtas mu ku king kamatayan; e mu pepaburen ing tanggap kung kabiguan, inya arap mu maglakad kung kayantabe ning sala a kekang babie.

57

¹ Malunus ka kaku, O Dios, malunus ka sa, uling ika ing kakung lalapitan; king lalam ding kekang bagyus karin ku salilung, anggang e la mako ding bagyung masikan.

² Maus ku king Dios a Kakataskatasan; king Dios a babie king sablang kakung kailangan.

³ Ibat banua pakiramdaman na ku at iligtas, at daigan na la ding kaku manalipusta. Kaku iparala nang lugud na at katapatan.

⁴ Atyu ku libutad ding taung balamu leon, balamu leon lang mamangan-tau; ding ipan da balamu paku la at paslu, at dila ra anti lang espadang mataram.

⁵ Pakit mu ing dangalan mu, O Dios ko, at king mabilug a yatu ipakit mung ligaya mu.

⁶ Miyumang lang silu ding kakung kalaban, inyang masasambut ku king kakung kaligaligan; ginawa lang kulkul king kakung daralanan, oneng ila mismu ding menabu.

⁷ Lubus keng keka manalig, O Dios; pagkanta da ka't purian.

⁸ Migising ka, O kakung kaladua! Migising ka, kakung alpa at lira! Pati aldo gisingan ku na.

⁹ Pasalamatan da ka, O Ginu, arap ding sablang tau; magkanta kung kapurian keka libutad ding sablang bansa.

¹⁰ Uling ing lugud mung e kukupas miraras king banua, at ing kekang katapatan lalagpus king biga.

¹¹ Ing dangalan mu, O Dios ko, pakit mu king banua, at king mabilug a yatu ipakit mung kekang ligaya.

58

¹ Ikong pamuntuk, babie yu kaya ing makatud a kayatulan? King pamanatul yu karing tau e kayu kaya mangabiran?

² Mangabiran kayu! Uling ing bukud mung kekong isipan ya ing e mayap a malyaring kekong daptan; king bansa katampalasan ing kekong pamaniaptan.

³ Kabang atyu la pa king atian ding marawak magkamali na la; maglaram na la kabait da.

⁴ Kamandagan lang anti ing ubingan; mengari la king kamamalung magmaklak-maklakan;

⁵ king patunud karela e makaramdam o king bosis ning salamangkeru.

⁶ O Dios ko, pananggalan mo ngan sa ipan; paglako mu la patsit deting leon a mabagsik!

⁷ Mamala la sanang anti ing danum; langi la sanang anti ing dikut a karelang daralanan.

⁸ Malaso la sanang anting yelu; kalupa ning kikuan a mete kabait na.

⁹ Kalupa na ning dikut keka lang pututan king e ra kamalayan.

¹⁰ Ding taung matulid tumula la ngan kabud karelang lawan ing digpa karelang kaparusan; magtampiso la king daya ding makasalanan.

¹¹ Kanita karelang sabian, Talaga palang miyablasan lang mayap ding makatuliran, at ating Dios king yatu mamatul!

59

¹ Iligtas mu ku karing kalaban ku, O Dios ko; idipensa mu ku laban karing lulusub kaku.

² Karing darapat e mayap iligtas mu ku at karing makamate-tau.

³ Buri da kung tambangan deting kalaban; mikampi-kampi la ban aku ing karelang labanan, e uling atin kung kasalanan o pamagkamaling depatan, O Ginu.

⁴ Ala ku mang gewang e ustu; makanyan man aku ing karelang lulusuban.

⁵ Mibangun ka, O Ginung Dios a Mayupaya, me keni at saupan mu ku, at lawan kakung kabilian, O Dios ning Israel. Migising ka at layun parusan ding paganu, at e ka papakit lunus karing taksil a tau.

⁶ Neng bengi anti lang asung daratang king siudad magbitaul at limbun-limbun.

⁷ Ding asbuk da bubula la, karelang dila anti lang mataram a espada! Makanyan man karela pang sasabian, Alang makaramdam king kekatamung pamaniabian.

⁸ Oneng ika, O Ginu, kaylian mu la mu; e mu la man pansin deting paganu.

⁹ Ing sikanan mu yang kakung panaligan; ika ing kakung salilungan, O Dios, inya ika ing kakung purian.

¹⁰ Kaluguran na ku ning kakung Dios, uli niti, saupan na ku, ban ipakit na lang mesambut ding kakung kalaban.

¹¹ O Dios, kalaban e mu la pa mu papaten, magkang mangalinguan yang kakung balen; nune keka lang isalbag at ibagsak kapamilatan ning kekang kayupayan, O Ginung kekeng talapagligtas.

¹² Karing asbuk da at labi e mayap ing karelang pamaniabian; bustan mu lang marakap king karelang kapalaluan. Uli ning pamaniumpa ra at pamaglaram.

¹³ Lubus mu lang gisanan paten; king kekang mua papagdusan mo ngan, kanita ding tau karelang kilalanan king ika ing Dios a mag-ari king Israel at king meto yatu.

¹⁴ Neng bengi magbalik la; king siudad gagala la; anti lang asu king pamagbitaul da; gala-gala lang manintun alaklak da, at nung e la kumabsi mimimua la.

¹⁵

¹⁶ Oneng aku, ikanta ku ing kekang kayupayan; balang abak kakung ikanta kekang pakamal, uling ika ing meging kakung salilungan, ing kakung salikutan king oras ning kaguluan.

¹⁷ Keka, O kakung sikanan, magkanta kung kapurian; uling ika, O Dios, ing kakung salilungan, ing Dios a e mapapagal king pamaglugud.

60

¹ O Dios ko, likuan mu ke ngan, at digpa kekami ing kabiguan; e na ka sa mimimua, kekami magbalik na ka sa.

² Pepagalgalan me ing bansa, at keka yang biklat; ulipan me ing gabun a mengabtak ban e ya misambulat.

³ Pepaburen mong migdusang e makanyan-kanyan ding kekang memalen; pase-pase kaming anting taung malasing.

⁴ Dininan mong babala ding ating takut keka ban ing kasiran karelang apangilagan.

⁵ Datang na ka ban ding kekang pakamalan miligtas la king karelang kasakitan, at kekeng panalangin kekang pakibatan.

⁶ Karin ketang banal nang santuaryu ing Dios nganang mengamanu, Magtagumpe ku at kaku yang pirakayan ing bansa ning Sikem, at kaku yang ibie ing Sucot king kakung balen.

⁷ Ing Gilead bandi ke at ing Manase; ing kakung helmet ya ing Efraim, at ing Juda ya ing kakung pekasetro.

⁸ Ing Moab yang gawan kung pipanuasan, at ing Edom yang piyugsianan kung sandalyas ban patutuan kung bandi ke. King Filistia ikulisak ing tagumpe.

⁹ Ninu, O Dios, ing midala kaku king siudad a matibe? Ninu ing kaku matnube ban ing Edom dasan ke?

¹⁰ O Dios, tune mu na ke waring gilutan, at kekeng kawal e mu no wari patnubayan?

¹¹ Saupan mu kaming makilaban karing kalaban, uling ing saup ning tau alang arapat nanuman.

¹² King saup ning Dios tagumpe kekatamung kamtan; sambutan na lang kekatamung kalaban.

61

¹ O Dios ko, kakung panalangin keka sanang pakiramdaman; kakung panalangin keka sanang pansinan.

² Kening lugal nung nu ku miyugse ika ing kakung ausan, uling malungkut ya ing kakung pusu. Iligtas mu ku at ingatan.

³ Ika ing kakung salilungan, at talapagligtas karing kalaban.

⁴ Bustan mung kapilan man king kekang tolda karin ku manuknangan, at karing kekang bagyus karin mu ku lukuban.

⁵ Dimdam mu la, O Dios ko, ding sinabi kung pangaku, at itang karapatdapat karing tatakut king lagyu mu kaku binie mu.

⁶ Ing bie ning ari pakaban mu sa; bustan mung inawa na manatili kabang-kaba.

⁷ King kekang arapan mamuntukan ya sana kapilan man; ing kekang pakamal at katapatan ila sa ding maging peka-guardia na.

⁸ Kanita kapilan man purian da ka ngening aldo-aldo tutupad ku king kakung pengaku.

62

¹ Bukud mung ing Dios ya ing kakung panenayan; ing kakung kaligtasan king Dios manibatan.

² Ya ing bukud kung talaingat at talapagligtas; ya ing kuta a kakung dipensa, inya kapilan man e ku numanu balang.

³ Angga ye kapilan lulusuban ing taung kalupa ning bakud a makaragsa?

⁴ Ing bukud yung nasa ya ing milako ya king marangal a kabilian. Ing tula yu ya ing magsalitang kalaraman, karing labi yu kekayu yang pamurian, oneng ing pusu yu mitmu yang kapanyiran.

⁵ Bukud mung ing Dios ya ing kakung asahan; ing kakung kapanayan king Dios manibatan.

⁶ Ya mung bukud ing mimingat at magligtas kaku; ya ing kakung kuta a kakung salilungan, inya e ku bitasang mitakutan.

⁷ King Dios makatalakad ing kakung kaligtasan at dangalan; ya ing mayupaya kung talapagligtas; ing Dios ya ing kakung salilungan.

⁸ Ikong kakung kabalen, manalig kayu sana king Dios king sablang panaun. Sabla yung kaguluan king Dios idala yu, uling ya ing salilungan tamu.

⁹ Ding tau mengari lang bula a agad matatda, taung marangal at mababa ala na lang ulaga. Nung parehu mu lang timbangan ala kang akit dang beyatan. Bula ing karelang kalupa.

¹⁰ E kayu sa manalig king pamanampalasan; ala kayung apala nung manako na kayu man. Nung sakaling dakal man ing kekong pibandian, iti e yu sa panaligan.

¹¹ E mu mekatadua ku ne dimdam ing Dios, agpang king sasabian na, bukud mung bandi na ing kayupayan

¹² at king ing lugud na manatili kapilan man. Ika, O Ginu, keka yang ablasan ing ninuman ketang depat na.

63

¹ O Dios, ika ing kakung Dios, tune ra kang panintunan; ing mabilug kung pangatau kakau ya keka; kaladua ku pagnasan na ka; mengari kung melangi at abtak a gabun a kakau keka.

² Paintulut mu ing akit da ka king banal mung santuaryu. Pakit mung kekang kaligayan at kayupayan.

³ Ing lugud mung alang kupas mayap yang e palak king bie; inya pupurian da ka.

⁴ Pasalamatan da ka king kekaban ning bie ku, at manalangin ku keka.

⁵ Ing kaladua ku kumabsi ya antimo neng ating piesta, pagkanta da ka karing masayang kanta ning kapurian.

⁶ Gaganakan da ka kabang makakera ku; kilub ning kabukas ika ing kakung isipan,

⁷ uling parati mu kung sasaupan. King anino ding pakpak mu karin masaya magkanta ku.

⁸ Keka e ku bisang kawani, uling liligtas da ku ding gamat mu.

⁹ Oneng detang bisang makamate kaku mabaldug la king kalalalaman ning yatu.

¹⁰ Mate la king labanan, at bangke ra kanan da ring asung-gubat.

¹¹ Oneng ing ari magsaya ya king Dios, at ding sablang mangaku king lagyu na paligayan de, uling asbuk ding malaram misara la.

64

¹ Pakiramdaman mu, O Dios, ing kakung panalangin, iligtas mu ku karing pitatakutan kung kalaban.

² Idipensa mu ku king lihim dang tangka ding taung e mayap, karing dakal a taung darapat e ustu.

³ Ding karelang dila pekataram da lang anting espada, matilus lang anting paslu ding karelang amanu.

⁴ King makasalikut a paralan karela yang sasabatan ing taung alang kasalanan, at uling ala lang takut bigla reng panasakitan.

⁵ Misasabuatan la king e mayap dang tangka, king pamiyumang dang silu misasanmetung la; karelang sasabian, Kekatamu alang manakit metung man;

⁶ alang makabalu king krimen a kekatamung gawan; e tamu marakap uling kekatamu yang pekaisipan. Tune ing pusu na't kaisipan ning tau metung lang misteryu.

⁷ Oneng paturan na la ning Dios king paslu na, at king e ra kamalayan masugat la.

⁸ Paten na la uli ning dila ra, at ding manakit karela kailian da la king maging kararasan da.

⁹ At ding sablang tau mitakutan la; karelang pibulayan sabla nang depatan, at karing aliwa karelang ibalita.

¹⁰ Ding sablang matulid tumula la king Ginu uli ning depat nang mayap; manakit lang tuknangan king Ginu. Ding mayap a tau ya ing karelang purian.

65

¹ O Dios, matulid ing munie keng kapasalamatan keka king Zion, at ding penata mi keka kekami lang tuparan,

² uling kekeng dalangin kekang pakibatan, inya ding sablang makasalanan ika ing karelang lapitan.

³ Mangasambut kami uli ra ding kekeng kapanialangsangan, makanyan man kekami ibie mu ing kapatawaran.

⁴ Kaligaya na ning taung kekang pipilinan, at king kekang santuaryu karin me patuknangan. Lubus keng ligaya kilub ning kekang tuknangan; karing bendisyun ning Templo mung banal.

⁵ O Dios a kekeng talapagligtas, kekaming kayaduanan kekang pakibatan kapamilatan ding makapag- mulalang kekang depatan. Ika ing kapanayan ding sablang tau pati ding atyu king lipat ning dagat.

⁶ King kekang sikanan keka lang telakad ding kabundukan; makanyan mung papakit ing maragul mung kayupayan.

⁷ Kekang patahimikan dabungbung ning dagat, ding mainge alun at ding taung magugulu.

⁸ Ing mabilug a yatu pagmulalan na lang kekang makapagmulalang depat. Misusumangid nang wakas ning yatu kukulisak dang tula ra uli ding dapat mu.

⁹ Ing yatu keka yang daralawan at pauranan; layun pataban ban mamunga yang dakal. Ibat banua tutugtug na ban ing gabun palto yang miyayaliwang tanaman. Makanyan mu ngang sidia:

¹⁰ paranuman mu ing gabun a mesarul layun palambutan at ayusan; ban tumubung tanam.

¹¹ Marakal ing pupul a babie mu, at nukarin ka man munta ding tau king kabiayan maglabis-labis la.

¹² Ding pipagpastulan mitmu la karing kawan, mitmu lang tula ding bunduk-bundukan.

¹³ Wa, ding mataba at dakal a tupa gagala la, at ing marangle dakal a trigu papalto na. Papalakpak ing sabla at magkanta la pang matula.

66

¹ Purian ye ing Dios king masayang kulisak, ikong sablang melalang!

² Magkanta kayu king ikaligaya na ning lagyu na; ibie ing tapat a kapurian! Dalit kayu king ikaligaya na ning lagyu na.(66:2)

³ Sabian iti king Dios, Tutu lang makapagmulala ding kekang daraptan! Uling maragul ing kekang kayupayan, inya duruku la't gagalgal arapan mu ding kekang kalaban.

⁴ Ding atyu king yatu keka samba la; magkanta lang kapurian para keka, at kekang lagyu ya ing purian da.

⁵ Me ko keni at lawan yu ing makapagmulalang dapat ning Dios king libutad da ring tau.

⁶ Pepamalan neng dagat, inya mekalakad la libutad na taung kekatamung makatua! Mesaya tamu uli niting depat na.

⁷ Ya ing mag-aring mitmung kayupayan king kapilan pa man; pagumasdan na la ding bansa, inya e ya sukat magkamaling lumaban king Ginu ing ninuman!

⁸ Ikong sablang bansa, ing Dios mi yang kekong purian; paramdam yu king Ginu ing babie yung kapurian.

⁹ Ya ing babie bie kekatamu aldo-aldo, at e na paintulut ing misakab tamu.

¹⁰ Ika, O Dios, pinyubukan mu kami anting pilak king api madadalise.

¹¹ King makaumang a lambat peintulut mung marakap kami; mabayat a pusan binili mu karing gulut mi.

¹² Peintulut mu ing masambut kami karing kalaban; king silab at albug karin mu ke pepadalanan, makanyan man kekang peintulutan ing miras ke king ligtas a lugal.

¹³ King bale mu lungub ku ban ain ibie ku, at tuparan ing kakung pengaku,

¹⁴ pati na detang panatang sinabi ku inyang atyu ku king kaguluan.

¹⁵ Munie kung ain-a-durulukan, tupa lang pepataban; toro ampon kambing ibie ku la naman, at ing asuk da miras banua.

¹⁶ Ikong sablang ating takut king Dios, 'me ko keni at makiramdam kayu. Ibalita ku kekayu ing sablang depat na kaku.

¹⁷ Kinulait kung pasaup king Dios, at pinuri ke king kanta.

¹⁸ Nung king kakung pusu manuknangan ing kasalanan, siguradung ing Ginu e na ku pakiramdaman.

¹⁹ Oneng ing Dios tune na kung pekiramdaman; dimdam na ing kakung kayaduanan.

²⁰ Purian ya ing Dios uling kakung dalangin e na tinggian, at lugud nang e kukupas kaku e na kelinguan.

67

¹ O Dios, lunusan mu kami at bendisyunan; aslagan mu kami sana king lupa mung malam,

² ban ing sablang melalang abalu na ing kekang kaburian, at ing babie mung kaligtasan.

³ Mananu na sanang ding tau, O Dios, ika ing karelang purian; ika sana ing purian na ning sabla mung lelang!

⁴ Paintulut mung bansa tumula la at magkantang masaya, uling alang pamangabiran ing kekang kayatulan karing sablang tau, at keka lang patnubayan.

⁵ Mananu na sanang ding tau, O Dios, ika ing karelang purian; ika sana ing purian da ring taung kekang lelangan!

⁶ King kekeng asikan dakal ing kekeng pipulan, ing Dios, ing kekatamung Dios, ya ing minie kaniti ngan.

⁷ Binendisyunan na katamu ngan ning Dios; sana igalang de't pitakutan nukarin man.

68

¹ Talakad ya ing Dios at isambulat na lang kalaban na! Detang masama king Dios tumakas la ngan king arap na.

² Nung makananung mipapaid ing asuk, makanyan na la namang ipaid; anting kandilang malalaso king api, makanyan lang malaso ding darapat e mayap king arap na.

³ Oneng ding taung matulid tumula la at magsaya king arap na; king tula ra kulisak la at terak la pa.

⁴ Magkanta kayu para king Dios, purian ya ing lagyu na; isadia yang dalan para ketang daratang king biga makasake. Ginu ing lagyu na, magsaya kayu arapan na.

⁵ Ya ing Ibpa da retang alang tata, at ding babaing mebalu ya ing talaingat da; makanyan ya ing Dios a manuknangan ketang banal a Templo na.

⁶ Atin yang tuknangan para karetang alang tuknangan, at lulual na la ding bihag king sukulan; oneng ding sasalangsang king malanging gabun karin la manuknangan.

⁷ O Dios, kanitang keka lang teiran ding kekang memalen, at kanitang ing disyerto yang kekang delanan,

⁸ ginalgal ya ing gabun; ing banua mildug yang uran, uling ing Dios ning Sinai, ing Dios ning Israel, ya ing daratang.

⁹ O Dios, peparala mu ing dakal a uran; binayu me sikanan ing maina mung bansa.

¹⁰ Kanita ding kekang memalen karin menakit lang tuknangan; uli ning kekang kayapan ding atyu king kalipitan e la misakitan.

¹¹ Ing Ginu ya ing minie utus, at iti belita da ring dakal a babai.

¹² Ngara, Tatakas na la king labanan ding ari at ding sundalus da! Ding babaing king bale melakuan, ilang mirakerake king pibandian a mesamsam:

¹³ patipati lang makabalut pilak ding karelang pakpak; ding karelang bagyus kikinang king mapinu rang gintu. (Obat ding mapilan kekayu atyu la karing kural da ring tupa kabang makilaban la?)

¹⁴ Inyang ing Mayupayang Dios silbag na la ding ari karin king Bunduk Salmon, yelu ing pepauran na.

¹⁵ Ing Bunduk ning Bashan maragul ya! Ala kang kalupa, O bunduk a dakal a tungatung!

¹⁶ O bunduk a matas, obat keka yang kasusumamian ing aliwang bunduk a pinili ning Dios ban maging tuknangan na? Karin ing Ginu manuknangan ya king kapilan pa man!

¹⁷ Kayabe ding libu-libu nang matibe karung panggera king Sinai ing Ginu meko ya, ban king banal a lugal ya munta.

¹⁸ King matas a taluktuk minukiat ya, dakal a bihag lang darala na, tinanggap yang regalu karing taung mig-rebeldi. Ing Ginung Dios karin manuknangan ya.

¹⁹ Ing Ginu purian ya, uling aldo-aldo lulunasan na kekatamung problema, at Dios yang kekatamu misasalba. fig,,,,,Ing Ginu purian ya, uling aldo-aldo lulunasan na kekatamung problema.,(68:19)fig*

²⁰ Ing kekatamung Dios, Dios yang magligtas! Ya ing Ginu a Ginu tamu, at king kamatayan liligtas na katamu.

²¹ Balbalan na la ning Dios ding buntuk da ring kalaban na a e bisang gumulut king e ustung ugali ra.

²² Nganang sinabi ning Ginu, Ding kekang kalaban ibalik ku la manibat Bashan; kuanan ku la ibat king dagat a malalam

²³ ban magtampiso kayu king daya rang tinulu, at kekong asu makadilat la naman king daya da ring kalaban.

²⁴ Ikit da ing matagumpe mung pamaglakad, O Dios ko, ing paglub mu bilang Dios at ari ketang banal a santuaryu mu.

²⁵ Mumuna la ring talapagkanta, ding musiko tauli la; pilatan da dalaga lang manigtigan pandereta.

²⁶ Purian ye ing Dios king katipunan ning balen na; ikong lahi nang Israel, ing Ginu kekayu yang purian!

²⁷ Ing tribu nang Benjamin a malating dili ya ing mumuna, ding pamuntuk ning Juda at ding kayabe na katuki na la, at pamuntuk ding Zebulun at Neftali tuki la.

²⁸ O Dios, kekang upaya kekami kekang iparala, itang upaya a pepakit mu king panaun a milabasan

²⁹ ibat king Jerusalem a kekang Templo nung nu ding ari keka babie lang regalu.

³⁰ Sabianan me ing Ehipto, ing malyap a animal libutad ding timbu, at ding bansa a mengaring toro a maki biseru angga king keka sumuku la, at karelang pilak ibie ra keka. Isambulat mu la ding taung maburi king gulu.

³¹ Sugu ibat Ehipto datang lang magdalang tangsu, at ding tau Etiopia king Dios mabiasa lang manalangin.

³² Ikong sablang kayarian ing Dios kekayu yang pagkanta; ing Ginu pagkanta yeng kapurian.

³³ Ing Ginung maglakbe king banua, ing banuang milalu na tua. Oyan! kekayu yang pakiramdaman uling magsalita yang masikan.

³⁴ Ing kayupayan ning Dios kekong ibalita; ya ing mag-ari king bansang Israel at upaya na king banua kekong akit.

³⁵ Karin ketang santuaryu nang tuknangan ing Dios tune yang pagmulalan; karing memalen na yang babie upaya at sikanan. Ing Dios kekatamu yang purian!

69

¹ O Dios ko, iligtas mu ku! Angga na king batal ku ing danum.

² Lalbug na ku kening malalam a burak; ala na kung apitukluan mang masias; atyu na ku king dake a malalam, at halus ilumud da na ku ding alun a maragul.

³ Mepayo na kung papiglo; melangi na ku akmulan. Mepula na lang kakung mata king pamanayang kasaupan keka.

⁴ Ding mua kaku agyang ala lang asangkan mas marakal la kesa king kakung buak. Ding kalaban kung malaram buri da kung paten, at tutu la ngan masikan. Pilit dang pasubli kaku ing pibandian a e ku naman penako.

⁵ O Dios, keka e la makalingad ding kakung kasalanan; ing meging kamulangan ku balu mu!

⁶ E mu la sa pakarinayan, agyang atin kung kakulangan, detang ika ing karelang panaligan. O Ginung Dios a tutung Mayupaya! O Dios ning Israel, e mu sa paintulut, king uli ku, mipakarine la ding lalapit keka.

⁷ King uli mu insultuan da ku, at tutu kung mengapakarine.

⁸ Mengari kung aliwang tau karing kapatad ku, anti kung dayuan karing kayabe ku king bale.

⁹ Tiktak karagul ing pamagmalasakit ku king bale mu, balamu api a mikakaluku king pusu ku; ing pamag-insultu da keka kaku digpa.

¹⁰ King mitmung kapakumbaban mig-ayunu ku, makanyan man pagsisti da ku ding tau.

¹¹ Inyang king magaspang a imalan mibablas ku pikayli-kayli da ku.

¹² Pisasabian da ku ding tau karing dalan, at pikanta-kanta ra ku ding malasing.

¹³ Oneng para kaku, keka ku manalangin, O Ginu, O Dios, king panaun a tula mu pakibatan mu ku, uli ning maragul a lugud mu ika pakibatan mu ku, uling tutuparan mu ing pangaku mung iligtas mu ku!

¹⁴ Iligtas mu ku at sagipan king burak, at king danum a malalam; karing kakung kalaban sagipan mu ku naman.

¹⁵ E mu paintulut ing itange na ku ning albug o malumud king malalam; e mu paintulut ing kuanan na ku ning kamatayan.

¹⁶ King uli ning mayap mung pilubluban at katapatan, O Ginu, uli ning maragul mung lunus kaku, saupan mu ku.

¹⁷ E me sana gugulutan ining kekang talasuyu; king maragul a kaguluan makapadurut ku; sana ibie mung agad ing kekang pakibat.

¹⁸ Lapitan mu ku; iligtas mu ku karing kakung kalaban!

¹⁹ Balu mu nung makananu da kung ininsultu, nung makananu da kung pilmuran, at leko dangalan; kakung kalaban balu mu la ngan.

²⁰ King pamaninsultu ra kaku mispak yang kakung salu; tutu kung ala nang akarapat, kalungkutan ing atyu kaku; manintun kung dumame kaku, oneng ala metung man; mamatula kaku ala kung atagpuan.

²¹ Inyang danupan ku lasun ing karelang dinuang; inyang mau ku, ing binie ra inuman a maslam.

²² Paintulut mung ing pamangan king lamesa ra maging dalan ne ning kasiran da, at sagradung pamisulusulu ra maging dalan ne ning pangabagsak da.

²³ Paintulut mung labug la at mabulag a mata ban e na la manakit pa; paburen mung mina la ding katawan da.

²⁴ Ibugnus mu karela ing mua mu, at iparamdam ing mua mung mikakaluku.

²⁵ Ala na sanang manuknangan karing lugal a pitutuknangan da, karing pibalebale ra ala na sanang taung mitagan.

²⁶ Uling liligaligan da la ring kekang perusan, at daragdagan da la pa ding kasakitan a binie mu karela.

²⁷ Tandanan mu ing sabla rang kasalanan; e mo dirinan kaligtasan.

²⁸ Kalisan mu la ding lagyu ra king libru ding mabie; king listahan ding taung makatuliran e mu la yayabe.

²⁹ Oneng tutu lang maplas ding sugat ku at misasakitan ku; O Dios ko, saupan mu ku at pakayapan.

³⁰ Ing lagyu ning Dios king kanta kaku yang purian; parangalan ke at pasalamatan.

³¹ Iti makaligaya king Dios maygit karing baka at toro a yayain da king Dios.

³² Panakit ding megipit kaniti tumula la, at ding king Dios sasamba mipasiknangan la.

³³ Uling ing Ginu pakiramdaman na ing saingsing ding atyu king pamangailangan, at e na la lakuan detang kaluguran na a atyu king sukulan.

³⁴ Banua at yatu, ing Dios kekayu yang purian; dagat at sablang atyu lelangan na, purian ye munaman.

³⁵ Iligtas ne ning Dios ing siudad ning Zion, at ding siudad ning Juda italakad na lang pasibayu; ding tau karela yang bandian at karin na manuknangan;

³⁶ ding anak da ring talasuyu na ilang magmana, at karin la manuknangan ding sablang malugud king Dios.

70

¹ Iligtas mu ku ngeni, O Dios ko! O Ginu, agad mu kung saupan.

² Detang bisang makamate kaku mabaligo la sa at mabigu! Detang matula king problemang kaku digpa mabigu la sa pati dangal milako sana!

³ Detang kaku matulang manatsa, sana masambut la at mangapakarine la.

⁴ Deta namang lalapit keka tumula la sana at magsaya! Mananu na sanang ding pasalamat keka king pamagligtas mu karela sabian da, Ing Dios marangal ya!

⁵ Aku, Ginu, maina ku at pakakalulu; magmalagua mu ku sanang saupan, O Dios ko! Ika, Ginu, ing kakung talasaup at talapanatbus; agad mu ku sanang saupan!

71

¹ Ika, O Ginu, ing lalapitan kung salilungan, e mu sa paintulut dugpa kaku ing kabiguan!

² Uli ning makatuliran ka, kakung asahan ing saupan mu ku at iligtas; dalangin ku pakiramdaman mu; sagipan mu ku.

³ Maging anti ka sanang matibe salilungan para kaku, metung a kuta a dipensa ku kapilan man; ika ing kakung salilungan at talaingat.

⁴ O Dios ko, iligtas mu ku karing e mayap a tau; king gamat ding e matulid at mabagsik a tau iligtas mu ku.

⁵ Ika, O Ginung Dios, ing kakung kapanayan at asahan manibat na kanitang anak ku.

⁶ King mabilug kung bie keka ku manalig, ika na ing miningat at minantabe kaku manibat na kanitang mibait ku. Inya naman kapilan man ika ing kakung purian.

⁷ Ing bie ku pialimbawanan ya karing aliwa, uling ika ing masikan kung talaingat.

⁸ Patitingapun pupurian da ka; babalita ku ing kekang ligaya.

⁹ Ngening matua na ku, e mu ku sana lalakuan; e mu ku sana paburen ngening tatakasan na na ku ning kakung sikanan.

¹⁰ Magsalita lang laban kaku ding kalaban, at buri da kung patayan.

¹¹ Ngara, Ing Dios likuan na ne; tara, tagalan ta ya at dakpan; uling ala nang sumaup metung man.

¹² O Dios ko, e ka sa lalaut kaku magmalagua ka, O Dios ko, ba mu kung saupan.

¹³ Mananu na sanang kaku sasalake masambut la at mate; detang magnasang panasakitan da ku milako la sana dangalan at mangapakarine.

¹⁴ Manalig ku keka king kapilan pa man, at lalu da kang purian alang tuknang.

¹⁵ Ibalita ku ing kekang kayapan, at aldo-aldo ibalita ku ing binie mung kaligtasan agyamang iti e ku aintindian.

¹⁶ Purian ku, O Ginung Dios, Kakataskatasan, ing makapagmulala mung kayupayan kakung sabian masikan, ing keka bukud mung kayapan.

¹⁷ Manibat na inyang kayanakan ku, O Dios, tiru mu na ku at aku naman ala kung tuknang mamalita karing makapagmulala mung dapat.

¹⁸ Ngening matua na ku at maputi na buak, O Dios ko, e mu ku sana lalakuan. Mantabe ka kaku kabang ipamalita ku pa karing lahing daratang ing kekang kayupayan at sikanan. fig,,,,,Ngening matua na ku...,(71:18)fig*

¹⁹ O Dios, mayupaya ka, at ing kekang katuliran miraras angga king matas a banua. Kekang depatan makapagmulala; O Dios, ala kang kalupa.

²⁰ Peintulut mu ing kakung dalanan ing dakal a mabayat a kaligaligan, makanyan man kaku parati mung babalik ing sikanan ban e ke dasan ing malalam a kutkutan.

²¹ Kakung dangalan kekang dagdagan, at pasibayu mu kung paligayan.

²² King kakung lira, O Dios, purian da ka't pasalamatan, purian ku ing kekang katapatan; pagkanta da ka at bagayan ning alpa, O bukud Banal ning Israel.

²³ Kulisak kung mitmung saya potang magkanta ku para keka; uli ning pamagligtas mu kaku, kaladua ku purian na ka.

²⁴ At king kekaban ning patingapun ining kakung dila ing katuliran mu ipamalita na: uling mengapakarine la at milako dangalan detang bisang aku ing karelang panasakitan.

72

¹ O Dios ko, ing kekeng ari keka yang turuanan matul a alang pamangabiran; king kekang hustisia dakayanan me sana,

² ban king mitmung katuliran pamahalan ne ing kekang balen, at karing magigipit ibie na ing katuliran.

³ Mananu na sanang ing balen munie yang dakal a kanawan, at mag-ari ing katuliran.

⁴ Idipensa na sana ning ari ing katuliran ding atyu king kakaluluan; ding king kalipitan saupan na la, at ding manalipit karela lupigan na la.

⁵ Antimo ing aldo at ing bulan makanyan ya sanang manatili kapilan man ing kekeng aring pakamalan.

⁶ Maging anti ya sa king uran a didilig king marangle, at anting patak ning uran para king yatu.

⁷ Magbabo sa ing katuliran king kapanaunan na; laganap sa ing kapayapan anti ing saslag a bulan.

⁸ Mag-ari ya sa karing mingatba- ngatbang dagat, at manibat king Ilug ning Eufrates angga king wakas ning yatu.

⁹ Sumuku la sa ding kalaban na, at magpakumbaba arap na.

¹⁰ Ding ari ning Tarsis at ding aliwang kapuluan buis da king ari ibie ra; ding ari ning Arabia at ning Etiopia datang lang magdalang regalu para king ari mi.

¹¹ Ding sablang ari duku la arap na, at sablang bansa sumuyu la king kayarian na.

¹² Sagipan na la ding pakakalulung pasaup, at ding taung mipaburen a mangailangan saup.

¹³ Lunusan na la ding maina at kalulu, at liligtas na la ding alang agyu.

¹⁴ Karing mapanlupig at tampalasan liligtas na la uling ding karelang bie maulaga la king bie na.

¹⁵ Ing bie na sa ning ari kumaba, at miyabie sa king ari mi ing gintu ning Arabia. Ala sanang tuknang ing pamanalangin para king tronu na, at ing bendisyun ning Dios king kayarian na manatili sana.

¹⁶ Nukarin man sa tumud ing pupul, ding kabundukan mitakpan la sanang tanaman mabungang anti ding king Lebanon; dakal la sa ding taung manukna- ngan karing siudad na anting dikut a malabung king marangle.

¹⁷ E ya sa makalinguan ing lagyu na kapilan man, at manatili ing kabantugan na kalupa na ning aldo. Mananu na sanang ding bansa aduan da ing bendisyunan na ning Dios anti ing gewa na king ari.

¹⁸ Purian ya ing Ginu, ing Dios ning Israel a bukud pepalto karing makapagmulalang dapat.

¹⁹ Purian yang alang angga ing mayupaya nang lagyu; mananu na sanang kumatmu ya ing yatu king ligaya na!

²⁰ Iti ya ing kawakasan ding panalangin nang David a anak nang Jese.

73

¹ Tune yang maganaka ing Dios king taung matulid, karing sablang ating pusung malinis.

² Oneng halus milako ku kapanaligan; kapaniwalan ku ala nang mitagan,

³ uling ding palalu kaku lang keririan at ding taung e mayap darakal la pibandian.

⁴ E la bitasang misasakitan; masikan la at masanting a pamikakatawan.

⁵ E la magkakasakit anti ding aliwa; ala lang kaligaligan kalupa ding aliwa.

⁶ Ing peka kwintas karing karelang batal ya ing ketasan, at ing karelang imalan ya ing pamanampalasan.

⁷ Ding pusu ra mitmu lang kasalanan; e mayap ing parati dang isipan.

⁸ Manyunu la at e mayap ing karelang pisasabian; ing pamagsamantala ya ing karelang parating isipan.

⁹ Pati na ing Dios karela yang lalapastanganan; balamu ninu na ila potang manutus la.

¹⁰ Iti ing sangkan nung inya pati na ing balen ning Dios tutuki ya karela, at maniwala king balang sabian da.

¹¹ Ngara, Ing Dios ala yang kabaluan; ing Kakataskatasan e na rin atuklasan!

¹² Pansinan mu: makanyan la ding palpikasala; mabandi na la at mibabandi la pa!

¹³ Balamu ing malinis a pusu alang kwenta, at ing pamaningat ban e makarapat pamikasala,

¹⁴ uling patingapun pasakitan mu ku, O Dios at neng abak aku ing kekang babarugan.

¹⁵ Nung makanyan ku pin migsalita, balamu e ku kabilang karing kekang memalen.

¹⁶ Migkapilit kung iti pakaintindian, oneng mabayat yang lutasan,

¹⁷ angga king mipalub ku king Templo ning Dios. Karin kaku tune meging malino ing maging kararasan da ring e mayap a tau.

¹⁸ Wa, idala mu la karing lugal a matalusad ban karin mu la ibagsak!

¹⁹ Kabud-abud na miras ing kasiran karela; makapangilabut ing kawakasan da.

²⁰ Anti la mung paninap; matda la karas ning abak; potang migising ka, Ginu, mabating la.

²¹ Inyang masakit ya ing lub ku, angga na niang singkup yang kakung salu;

²² meging mangmang ku't alang aintindian; mengari kung animal king kekang arapan.

²³ Makanyan man, keka e ku linaut, uling makatalan ka king kakung gamat.

²⁴ Patnubayan mu ku kapamilatan ning kekang turu, at kaybat tanggapan mu kung ating dangalan.

²⁵ Ninu mo ing asahan ku banua nung e mu ika? At keti king yatu neng kayabe da ka ala na kung aliwang panintunan pa.

²⁶ Mina ya mang kakung katawan at kaisipan ing Dios mu rin ya ing kakung sikanan; ya mung bukud ing kakung kailangan king kapilan pa man.

²⁷ Ding sablang gumulut keka mangamate la; gisanan mu la ding magtaksil keka.

²⁸ Para kaku alang kalupang kayapan ing maging malapit king Dios, ing maging salilungan ke ing Ginung Dios; ding makapagmulala nang dapat ipamalita ku la ngan.

74

¹ O Dios, obat likuan mu kaming alang kapupusan? Manatili ka waring mua king kekang balen?

² Ganakan me ing kekang balen a pinili mu king panaun a maluat nang milabas, ing lahi a kekang linigtas king panga-alipan maging sarili mung mana; ganakan me ing Bunduk ning Zion a king misan meging kekang tuknangan.

³ Paindalanan mu la at pasyalan deting lugal a lubus melasak; sinira da la ring kalaban ding sablang bage atyu king Templo!

⁴ Karin king Templo tagumpe kukulio da ring kalaban; karelang bandera tinas de bilang tanda ning karelang tagumpe.

⁵ Mengari la karing taung king bunduk manyutung; digsa da lang tanaman karing karelang palakul.

⁶ Ing sablang dinukit a dutung karelang sinira karing piku at palakul.

⁷ Silaban de ing kekang santuaryu, lesak de at lepastangan ing banal a lugal nung nu ra ka sasamban.

⁸ Ngarang misabisabi, E tamu patugut anggang e ta la asambut. Inya silaban da lang sablang banal a lugal king bansa.

⁹ Ala nang palatandanan a manibat king Dios; ala nang propeta metung man at alang makasabi nung kapilan iti miyangganan.

¹⁰ Angga kapilan, O Dios, ing pikayli-kaylian da ka ding kekeng kalaban? Paburen mo waring insultuan da ka king kapilan pa man?

¹¹ Obat e mu ne buring saupan? Obat ing wanan mung gamat keka yang pimpan?

¹² Ika, O Dios, ing ari mi ibat na king kapupurmeruan; ing maralas kekami migligtas.

¹³ King kekang upaya keka yang pinitna ing dagat; keka lang linaso buntuk ding dambuala king danuman manuknangan.

¹⁴ Ika ing linaso king buntuk ning Leviatan, at gewa meng pamangan para karing animal a atyu king ilang.

¹⁵ Ika ing mibugnus karing sibul at batis; ika namang pepamala karing ilug a mangaragul.

¹⁶ Lelangan me ing aldo at ing bengi, king bulan at karing batuin ika ing mibili;

¹⁷ ika ing mibili karing angganan na ning yatu; ika ing mitatag king kaleldo at king panaun ning dimla.

¹⁸ Ganakan mu, Ginu, kaylian da ka ding kekang kalaban; ala lang Dios a katawan at ikang karelang pikakasaman.

¹⁹ E me babie ing balen mung alang kalaban-laban king mabagsik nang kalaban ni e kakalinguan kapilan man ing balen mung karelang insultuan.

²⁰ E me sa kakalinguan itang kasunduan mu kekami! Magbabo ing katampalasan nukarin mang lugal.

²¹ E mo sa paburen mipakarine ding malulupig; paintulut mung purian da ka ding kalulu at ding taung gipit.

²² Talakad ka, O Dios, idipensa mu ing kekang piamanuan, ganakan mung kaylian-kaylian da ka patingapun ding alang Dios a katawan.

²³ Ganakan mu ing kukulisak da ring kalaban, itang alang tuknang a alingongo ding kekang kalaban!

75

¹ Babie keng kapasalamatan, O Dios! Pasalamatan da ka. Sasabian mi ing kekang degulan layun babalita ding makapagmulala mung depatan.

² King penandit a kakung itakda, ngana ning Ginu, matul kung alang pamangabiran.

³ Galgal ya ing yatu at ding sablang tau, makanyan man e la tugun ding pundasyun na.

⁴ Karing palalu kakung sabian, Ing kekong pamagmayabang kekayu nang ituknang. At karing taung e mayap,

⁵ E ye pagmaragulan at tuknang na kayung magsalitang kapalaluan king Kakataskatasan.

⁶ Ing kayatulan e manibatan king aslagan o king albugan o kaya king mauli o king norti,

⁷ nune manibatan king Dios ing pamanatul; pawalan na lang sala ding aliwa oneng ding aliwa parusan na la.

⁸ Atin yang tatalnan a kopa ing Ginu, mitmu ya king alak ning mua na. Itugtug na iti ban ding taung e mayap inuman da; minum la angga king iti agisan da.

⁹ Oneng e ke ituknang ibalita ing Dios nang Jacob; e ku tuknang magkantang kapurian king Dios.

¹⁰ Pamaklian na la sagu ding taung e mayap, oneng ding karing banal itas na la ngan.

76

¹ Pikabaluan ya ing Dios king Juda, king Israel lagyu na marangal ya.

² King Jerusalem karin ne telakad ing tolda na, at king Zion karin ya ing tuknangan na.

³ Karin ding paslu ding kalaban pikli na la, pati ding paniagka, espada, at baluti.

⁴ Ika, O Ginu, sari ka linang at degulan! Karagul mu kamalan ngening magbalik ka ibat karing kabundukan nung nu mo simbut ding kekang kalaban.

⁵ Ding sundalus dang matapang mewala ing pibandian a karelang asamsam, ngeni matudtud lang maniaman king kutkutan; ngeni ala nang kabaldugan ing karelang sikanan at kayalistuan.

⁶ O Dios nang Jacob, inyang keka lang sebianan, ding kabayu at ding pakasake kareti mete la ngan.

⁷ Oneng ika, Ginu, pitatakutan da kang e makanyan-kanyan! Ninung mangangas talakad king kekang arapan potang ing mua mu mikakalatang?

⁸ Pepakilala mu ing atul mu ibat king banua; ala yang imik ing yatu at gagalgal ya

⁹ kanitang tinalakad ka ban sabian ing kayatulan king ukuman na ban magligtas karing gigipitan da.

¹⁰ Ing mua ning tau lalu nang daragdagan ing kapurian keka; ding mitatagan king gera pagselebran da lang kekang piesta.

¹¹ Ding panata yu king Ginung kekong Dios tuparan yu la; pagdala yeng regalu, ikong bansang pakalapit. Buri ning Dios ing pitakutan de ring tau.

¹² Ibaba na lang mayabang a prinsipi, at pamatakutan na la ding marangal a ari.

77

¹ Manalangin kung masikan king Dios; kakung pakasikan ba na kung damdaman.

² King oras ning kaguluan manalangin ku king Ginu; tinas ku la king pamanalangin kabukas ding kakung gamat, oneng ing tula a kakung kailangan e ku tinggap.

³ Neng gaganakan ke ing Dios sasaingsing ku; neng migunamgunam ku mimina ku lub.

⁴ E na ku patudturan kabukas; king kakung kaguluan e ku makabulad.

⁵ Genaka ku la ding aldo napun nakadua na, ding banuang mipapauna na.

⁶ Migunamgunam ku kabukas; migunam ku at ing pusu ku nganang sinabi,

⁷ Paburen na ku kaya ning Ginu kabang-kaba? Kaku kaya kapilan man e ne tumula?

⁸ Ing lugud na kayang alang kupas miyangganan na? Iti na kaya ing kapupusan ning pangaku na?

⁹ Akalinguan na na kaya ning Dios ing pangamalunusan na o inalilan mua ing ganaka na?

¹⁰ Ngaku pang sinabi, Iti ya ing kaku makasakit lub: ing Dios balamu ala neng sikanan.

¹¹ Kaku lang ganakan detang depat mung pagmulalan, O Ginu, wa, detang depat mu king panaun a milabasan.

¹² Kaku lang gunamgunaman, at biayan king kakung kaisipan ding sablang makapagmulalang kekang depat.

¹³ Ding sablang paralan mu, O Dios, banal la! Ala nang aliwang dios a kalupa mu degulan!

¹⁴ Ika ing Dios a darapat karing bage pagmulalan; pepakit mu ing kekang upaya karing sablang bansa.

¹⁵ Uli ning kekang upaya linigtas mong kekang memalen, ding lahi da ri Jacob at Jose.

¹⁶ O Dios, inyang ikit na ka ning danuman ginalgal yang e makanyan-kanyan pati na itang laman ning dagat.

¹⁷ Bilus ning lulam ing uran; ibat king banua memaksing ing duldul; kildap mu kinislap king makapadurut.

¹⁸ Ing kekang duldul memaksing king banua; ing kekang kildap mabilug a yatu inaslagan na; ing yatu kinurug at ginalgal ya.

¹⁹ Inyang keka yang delakitan ing maragul a dagat, at linakad babo ning danum, alang menakit karing bakas mung likuan.

²⁰ Tinaid mong kekang memalen antimong metung a kawan king kapamilatan nang Moises ampon i Aaron.

78

¹ Makiramdam ka, O balen ku, king kakung tuturu; itingid mung kekang panamdam karing amanung kakung sabian.

² Ing asbuk ku magsalita ya king kapamilatan ning talimhaga, at ibulalag ku lang lihim a aral a milihim king milabas a panaun;

³ itang sablang dimdam ta na at balu a tiru ding makatua tamu.

⁴ E tamu kailangan lilihim karing kekatamung lahi, nune kailangan tamung ilipat at sabian karing tutuking lahi ing sikanan ning Ginu, at ding makapagmulalang bage depat na.

⁵ Kang Jacob minie yang kautusan; penabilin na karing kekatamung makatua king ituru lang kautusan na karing karelang anak.

⁶ Kanita abalu da la naman ding tutuking lahi, at pati na ding daratang a lahi. Ila man ituru da la karing maging anak da,

⁷ kanita king Dios ibili ra ing kapanayan da, at e ra kalinguan ing dapat ning Dios, nune tupad lang parati king kautusan na.

⁸ Kanita e la mangari karing karelang makatua; king Dios e la maging masias a buntuk at lahing mapaglaban; maging lahi lang matatag at manatiling tapat king Dios.

⁹ Pakasandata la ngan ding anak nang Efraim, oneng king aldo ning pamakilaban ginulut la ngan.

¹⁰ E la tinupad king kasunduan da king Dios, at e la bisang tuntun king keyang kautusan.

¹¹ Kelinguan da lang bage depat na, ding dakal a mala a pepakit na karela.

¹² Ginawa yang mala ing Dios king akakit ding makatua ra karin Ehipto, king kapatagan karin Zoan.

¹³ Pinitna ne ing dagat at karin na la pepadalanan, at ing danum mengaring pader a matas.

¹⁴ Neng aldo kapamilatan ning biga ya ing tinaid karela, at neng bengi kapamilatan ning aping masala.

¹⁵ Binangal na lang batu king ilang; dininan na lang dakal a inuman antimo waring meyakua king kalalaman.

¹⁶ Pepasibul yang batis karing batu, at minagus ing danum antimo ing ilug.

¹⁷ Makanyan man king Dios sindu ra ing e tupad king kaburian na; keta king disyerto lebanan de ing Kakataskatasan.

¹⁸ Seria deng piniubukan ing Dios king pamaniawad pamangan a karelang kapad.

¹⁹ Angga king ing Dios lepastangan de pa. Ngara, Agyu na kata waring pakanan keting ilang; keti king disyerto, nanung malyari nang ayampang?

²⁰ Wa, ya itang mikpuk king batu, at ing danum sinibul lapo-lapo. Oneng agyu na kata kayang dinan tinape at karning apangan tamo?

²¹ Mimua ya ing Ginu inyang dimdam na la. Milablab anting api ing mua na kang Jacob at king Israel,

²² uling e la bisang manalig; e la bisang maniwala king iligtas na la.

²³ Makanyan man ing Ginu minutus ya king biga, at inutus nang ibuklat lang pasbul ning banua.

²⁴ Pepauran yang manna ban apangan da, at dininan nong tinape

²⁵ Inya ing tau king pamangan ding anghel mengan ya, labis-labis ing pamangan a binie na karela.

²⁶ Pepatiup ne ing angin ning aslagan, at ing angin ning mauli king uli ning upaya na.

²⁷ Ing pamangan para karela anting alipugpug nang pepauran, at peparatang yang dakal a ayup a kasing dakal ning balas king pampang ning dagat.

²⁸ Pepagpa na la king pepagkampuan da, at makapadurut karing karelang tolda.

²⁹ Mengan la ding tau at kinabsi la, uling binie na karela ing pamangan a buri da.

³⁰ Oneng bayu ra ikuang apanusigan ing danup ning atian, kabang king asbuk atyu pa ing pamangan,

³¹ ing mua ning Dios mikalatang, at ding pekamasikan karela gisan na lang pete, at ding magaling nang kayanakan ning Israel.

³² Agyamang makanyan na ing milyari, sinulung da pa mu rin ing karelang pamikasala; karing milagru pilit lang e bisang meniwala.

³³ Inya pitlud nang anting pangisnawa ing bie ra, at bildug na karela ing biglang parusa.

³⁴ Inyang atin neng paten karela ding aliwa kanita king Dios linapit la; migbalik la lub at taimtim sinisi la.

³⁵ Aganaka ra king ing Dios ya ing talaingat, king ing Dios a Kakataskatasan ya ing Talapagligtas da.

³⁶ Oneng ing amanung sinabi ra pawang kalaraman; pamagkunwari ing atyu karela.

³⁷ Uling ding pusu ra e la tapat; king kasunduan da king Dios e la mu rin tinupad.

³⁸ Makanyan man, ing Dios a mapaglunus pepatawaran na la at kinabus. Maralas nang pipigilan ing mua na, at ing kasbu na.

³⁹ Aganaka na king tau la mu, mengari lang tiup ning angin a lalabas at kaybat mawala.

⁴⁰ E mu makatapilan ing lebanan de karin king ilang, at king disyerto sigatan de kapanamdaman!

⁴¹ Ing Dios ulit-ulit deng paniubukan, at ing Banal ning Israel karela yang pepalungkutan.

⁴² Ing maragul nang upaya karelang kelinguan, at itang aldo a linigtas na la karing karelang kalaban;

⁴³ inyang dinapat yang milagru karin Ehipto, king kapatagan ning Zoan.

⁴⁴ Gewa nang daya ing danum da ring karelang ilug ban ala lang ainum.

⁴⁵ Peparala yang dakal a lango ban pasakitan da la ring tau Ehipto; pepalto yang tugak a misna karakal ban marangle karela yang siran.

⁴⁶ Sepakan nang ulad ing tenam da, at pengan da ring durun itang mitagan a mikabunga.

⁴⁷ Ing uran-lipat naman pepagpa na karing ubas a tenam da; ding karelang tanaman a sikomoro pete na la king dimla.

⁴⁸ Ding karelang baka mete la ngan king yelung peparatang na; ding karelang tupa't kambing king kildap la mituran.

⁴⁹ Bignus na karela ing bigsikan na, ing kamua na at kasbu; mengari lang pulutung ding anghel a tinubud nang makamate karela.

⁵⁰ E na pinigil ing mua nang mikakalabkab, e na la linigtas king kamatayan at karing salut karin no gisan.

⁵¹ Ding pangane karin Ehipto pete na la ngan, ding sablang pangane ibat king lahi nang Ham.

⁵² Kaybat liwal neng anting tupa ing balen na, at tinaid anting kawan king ilang.

⁵³ Tinaid na lang mitmung kaingatan, inya e la mitakutan, kabang ding karelang kalaban king dagat la mitakpan!

⁵⁴ Dela na la king bansa nang banal; karing bunduk a simbut na.

⁵⁵ Penabi na lang memalen karin, at pirakerake na at pepabandi karing tribu ning Israel; ing gabun ding memalen karin at ding tuknangan da pepatuknang na la karela.

⁵⁶ Makanyan man piniubukan de't lebanan ing Dios a Kakataskatasan; e la memintu karing utus na.

⁵⁷ Peinggulutan de at meging taksil la pa antimo ding makatua ra; e la apagkatiwalan antimo ing baluktut a pana.

⁵⁸ Pepamua re ing Dios karing santuaryung telakad da para karing karelang idolo, peparatangan de pangalalu karing dios-diosan a karelang simban.

⁵⁹ Ikit ning Dios iti, at ing mua na mikalatang; ing Israel lubus neng likuan.

⁶⁰ Ing tuknangan na karin Silo, ing tuknangan na libutad ding memalen na likuan na la.

⁶¹ Pepaburen neng mebihag ing Kaban ning Kasunduan, ing tanda ning kayupayan na at kaligayan menabu ya karing kalaban.

⁶² Pepaburen na lang pete ra ding karelang kalaban uling kemuan ne ing sarili nang bansa.

⁶³ Megisan la ding lalaki rang kayanakan king labanan, inya ala lang katulid a asawa ding karelang kadalagnan.

⁶⁴ Pati karelang pari mete la ngan king pataram, at ding karelang mebalu e la mekapaniambitan.

⁶⁵ Mengari ya ing Ginu king taung biglang migising; kalupa ning taung mikapali king ininum nang alak.

⁶⁶ Pepayatrasan na lang kalaban, makarine ing karelang pangasambut, at iti alang kapupusan.

⁶⁷ Oneng tinggian ne ing lahi nang Jose; ing lahi nang Efraim e nia naman buri

⁶⁸ nune ing lahi nang Juda ya ing pinili na, at ing Bunduk ning Zion a tune nang pakamalan.

⁶⁹ Karin ing Templo na telakad ne; kalupa ning tuknangan na karin banua; gewa neng tutung matatag kalupa ning yatu.

⁷⁰ Pinili ne i David a talasuyu na, at king pamagpastul tupa karin ne kinua.

⁷¹ Ibat king pamagpastul karing tupa gewa neng ari ning Israel at pastul ding memalen na.

⁷² Iningat na lang David king mitmung katapatan; pemahalan na la king ganap a kabiasnan.

79

¹ O Dios, ding paganu liban deng kekang bansa. Ing banal mung Templo karela yang lepastangan, at kasiran ing karelang likuan king Jerusalem.

² Ding katawan ding kekang talasuyu karing ayup gewa da lang pamangan; ding bangke ding kekang talasuyu gewa da lang pamangan para karing animal.

³ Ing daya ding kekang memalen pepayagusan dang anting danum king Jerusalem, at ala nang mitagan ban karela mangutkut.

⁴ Meging pikaylian kami karing kasiping ming bansa; insultuan da kami at pituya-tuya.

⁵ O Ginu, nu pa anti kaluat ing mua mu kekami? Ing mua mu kekami ala na kayang angga? Ing mua mu manatili kayang milalablab anti ing api?

⁶ Ibaldug mu ing mua mu karing bansang e bisang kilala keka, at karing taung e manalangin keka!

⁷ Uling karela yang gisan ing lahi nang Jacob, at karela yang lesak ing kekang bansa.

⁸ E mu ke paparusan uli ding kasalanan ding kekeng makatua; lunus mu kekami ibie mu ngening ala na keng kapanayan.

⁹ Saupan mu kami, O Dios a kekeng talapagligtas; sagipan mu kami at patawaran pamikasala mi alang-alang king lagyu mung marangal.

¹⁰ Baket ding aliwang bansa karelang kukutang, Nukarin ya ing kekong Dios? Paintulut mung karing bansa akit mi ing pamanablas mu, uling pepatulu ra ing daya ding kekang talasuyu.

¹¹ Paintulut mung ing saingsing ding bihag miras king arapan mu, at king kapamilatan ning maragul mung kayupayan iligtas mu la detang miyatulan kamatayan.

¹² Ginu, pitung besis mu lang papamayaran ding kasiping ming bansa, uli ning pamaglapastangan da keka.

¹³ Kanita ikami namang kekang memalen at tupang kekang papastulan ikang pasalamatan king kapilan pa man, at purian alang kapupusan.

80

¹ Pakiramdaman mu kami, O Pastul ning Israel, pakiramdaman mu kami, ikang pamuntuk ning kekang kawan. Ika a makalukluk king tronu babo da ring kerubin.

² Ipakilala mu ing kekang sarili karing tribu nang Efraim, Benjamin, at Manase. Ipakit mu kekami ing kekang sikanan; me keni at iligtas mu ke ngan.

³ Ibalik mu kami, O Dios! Malunus ka kekami at miligtas kami!

⁴ O Ginung Dios a Mayupaya, angga kapilan mu la kamuan ding panalangin da ring tau keka?

⁵ Ing kalungkutan yang kekami mu pepakan; ing luang dakal yang meging kekeng inuman.

⁶ Pepaburen meng pipaten da ring bansang kekeng kasiping ing kekeng gabun; ding kalaban mi kaylian da kami at pagsisti.

⁷ O Dios a Mayupayang tutu, ibalik mu kami; pakit mu ing lunus mu at miligtas kami.

⁸ Liwal me Ehipto ing metung a tanaman ubas; tinabi mu la ding dayuan king sarili dang lugal, at keka yang tenam ing tanaman ubas.

⁹ Sidia me at lininis ing kekang pitamnanan; tinubu yang agad at kelatanan ing mabilug a bansa.

¹⁰ King lilung ding bunduk mitakpan la; pati ding tanaman a sedro mitakpan la karing sanga na.

¹¹ Miras la ding sanga na king dagat, at minangga la pa king ilug a Maragul.

¹² Baket ngeni keka yang lesak ing bakud na? Inya balang daralan agtalan de bunga;

¹³ ding babing dikut luluban de at pandamusakan, at kakanan ding aliwang animal ning kagubatan.

¹⁴ O Dios a Mayupayang tutu, balikdan mu ke sanang pasibayu; ibat banua mung matas lawan mu kami; me keni at iligtas meng tenam mung ubas;

¹⁵ iligtas me ing tanaman a kekang tenam; iting ubas a tanaman a kekang pepalabung at pepasikan.

¹⁶ Silaban de ring kekeng kalaban at layun kinutud. Mate la sana potang lawen mu la king mua mu karela!

¹⁷ Oneng ingatan mu la't iligtas ding taung kekang pinili, ing balen a dininan mung sikanan.

¹⁸ Kanita kapilan man e na ke magtaksil keka; dinan mu kaming bayung bie at purian da kang miyabe-abe.

¹⁹ O Ginu, Dios a Mayupaya, ibalik mu kami; lunusan mu kami at miligtas kami.

81

¹ Magkanta kayung masaya para king Dios a kekatamung sikanan! King Dios nang Jacob, magkanta kayung kapurian!

² Ing pamagkanta pagumpisan yu na, at tigtigan yu na lang pandereta, a kayabe ning malambing dang sunis ding alpa at lira.

³ Tiupan yu lang trumpeta neng piesta, potang bayu ya ing bulan at neng mabilug ya.

⁴ Uling iti kautusan ning Israel, kautusan yang ibat king Dios nang Jacob.

⁵ Binie neng anting tuntunan karing anak nang Israel inyang segupa ne ing Ehipto. Ing metung a siwalang e ku sadiang daramdaman ngana kaku,

⁶ Aku ing milako king pupusanan mung mabayat; kildas ku la ding laryu a kekang pupusanan.

⁷ King oras ning kagutgutan kaku minaus ka, at linigtas da ka. Makasalikut ku king duldul kanitang pekibatan da ka, at paniubukan da ka inyang 'tyu ka karing batis ning Meriba.

⁸ Makiramdam ka, balen ku, kening kakung babala, O Israel, sana kaku makiramdam ka.

⁹ E ka mikaka aliwang dios subali kaku; e me sasamban ing dios-diosan da ring taung dayuan.

¹⁰ Aku ing Ginung kekang Dios a midala keti keka ibat Ehipto. Ibuklat me ing kekang asbuk at kaku yang subuanan.

¹¹ Oneng ing balen ku e ya mekiramdam kaku, ing Israel e ya bisang mamintu.

¹² Inya king kesiasan dang pusu pepaburen ku na la, bahala na lang gawa ketang buri da.

¹³ Sana ing balen ku makiramdam ya kaku; sana ing Israel mamintu ya kaku!

¹⁴ E lumuat daigan ku la ding karelang kalaban, at sambutan ding masama karela.

¹⁵ Galgal la at duku ding sablang kaku masama, at magdusa lang alang angga.

¹⁶ Oneng ing Israel pakanan ke king masanting diling trigu, at pakabsian king pulut-panilan.

82

¹ Ing Dios ya ing manimuna king kapulungan karin banua, king kapulungan da ring dios nganang minieng kayatulan:

² Ing pamanatul yung alang katuliran kekayu nang ituknang, at tuknangan yu na lang papanigan ding taung alang kayapan!

³ Ibie yu ing katuliran da ring kalulu at ding ulila; ibie yu ing mangaintulid karing mangailangan at karing alang akarapat.

⁴ Sagipan yu la king upaya da ring taung e mayap!

⁵ Kamangmangan yo! Ala kayung balu! King karalumduman karin kayu manuknangan, at ing hustisia keti king yatu mewala na.

⁶ Ngaku kekayu, Ikayu dios kayu; anak na kayu ngan ning Kakataskatasan a Ginu,

⁷ makanyan man mate kayu antimong tau; antimo ing anak ning ari, miwakasan munaman ing bie yu.

⁸ Talakad ka, O Dios, at yatu keka yang atulan, uling ding sablang bansa keka la naman.

83

¹ O Dios, e ka sa manahimik; e ka sa magtudtudturan at kabud na alang bulad!

² Oren ding kekang kalaban mag-rebeldi la; lalaban la ding sablang mua keka.

³ Atin lang lihim a babalakan laban karing kekang memalen; atin lang tatangka laban karing taung kekang ingatan.

⁴ Ngara, Tara, karelang bansa kekatamu yang lusuban, ban ing Israel lubus neng makalinguan.

⁵ King pamisasapakat da metung mu ing pikayari da; misasanmetung la laban keka:

⁶ ing Edom at ing Ismael, ing Moab at ing Agar,

⁷ ing Gebal, Ammon, at ing Amalek, ing Filistia ampon ding memalen ning Tiro.

⁸ Ing Asiria munaman mekikampi ya karela, kari Ammon at Moab, ding lahi nang Lot.

⁹ Daptan mu munaman itang binie mung dusa karing tau Midian, karing tau Sisera, at karing tau Jabin ning Ilug ning Kison.

¹⁰ Pete mu la karin king Endor, at ding bangke ra king gabun melaso la.

¹¹ Yapus mu la kari Oreb at Zeeb ding pamuntuk da; yapus mu la ding komandanti ra kari Zeba at Zalmuna

¹² a parehung sinabi, Tara, kekatamung kuanan at bandian ing lugal a bandi ning Dios.

¹³ O Dios, isalbag mu lang anting alikabuk; anti ing sepu a papaid ning angin.

¹⁴ Gawan mu lang anti ing masisilab a gubat; anti ing silab a gigisan karing kabundukan.

¹⁵ Tagalan mu la kapamilatan ning kekang bagyu, at katmuan mu lang takut king angin mung masikan.

¹⁶ O Ginu, pamakarine mu la, at pakilala me karela ing kekang upaya.

¹⁷ Paintulut mong masambut at mitakutan king kapilan man, at mate king alang dangalan.

¹⁸ Pakilala mu karela king ikang bukud ing Ginu, ing Kakataskatasan a sasakup king mabilug a yatu.

84

¹ Kalagu na ning Templo mu, O Ginung Mayupayang tutu!

² Sabik ya at mau, O Ginu, ing kekang talasuyu a miras kilub ning bale mu. Magkanta yang matula ing mabilug kung pangatau para king Dios a mabie.

³ Agyang ding denas king Templo mu atin lang sale, at ing sibad atin yang bale; malutub na daragul la lele ning kekang altar. O Ginung Mayupayang tutu, O Ari ku at Dios ku! fig,,,,,Agyang ding denas king Templo mu atin lang sale.,(84:3)fig*

⁴ Kapalad da retang king Templo mu manuknangan; keka magkanta lang kapurian a alang kawakasan.

⁵ Kapalad da retang manalig king kekang sikanan, detang lubus bisang miras king Zion.

⁶ Kabang daralan la king malanging gabun ning kapatagan ning Baca, maging lugal yang dakal a sibul, at ing maranun a uran kakatmuan neng batis!

⁷ Kabang susulung la, lalu lang sisikan; ing Dios da ring dios karela yang tangalan karin king kabundukan ning Zion.

⁸ O Ginu, O Dios a Mayupayang tutu, pakiramdaman mu sa ing panalangin ku; O Dios nang Jacob, dalangin ku pakiramdaman mu.

⁹ Bendisyunan me, O Dios, ing ari ming talapaglualu at maging maganaka ka sa anti ning ya ing ari a kekang pinili.

¹⁰ Ing metung a aldo kilub ning Templo mu maygit ya kesa king libung aldo nukarin man. Mas buri ku ing maging bante kung pasbul king Templo mu kesa king manuknangan ku karing palasyu da ring e mayap a tau.

¹¹ Ing Ginung Dios ya ing kekatamung kalasag at aring marangal; dininan na katamung ganaka. Ala yang pagkaimut a bage mayap karetang lalakad king daklat na.

¹² O Ginung Mayupayang tutu, kapalad da retang magtiwala keka!

85

¹ O Ginu, pepakit kang maganaka king kekang bansa; binalik mu king Israel ing sablang kasaplalan;

² ing kasalanan ding memalen kekang pepatawaran; kekang kelinguan sabla rang kasalanan.

³ Leko mu ing sabla mung mua; peparimla mu ing kasbu mung mikakapali.

⁴ O Dios a Talapagligtas mi, kekang lingap ibalik mu kekami; kalinguan mu nang paginakit mu kekami.

⁵ Manatili ka waring mua kekami kabang-kaba? Ala na waring kapupusan ing kekang mua?

⁶ Ibalik mu na ing kekeng sikanan ban ikami ngan masaya ra kang purian.

⁷ Ipakit mu kekami, O Ginu, ing lugud mung e kukupas; saupan mu ke sana at iligtas.

⁸ Ing sasabian ning Ginung Dios kakung pakiramdaman, uling ipangaku na ing kapayapan kekatamung memalen na, karetang tapat at karetang e na magbalik king karelang kamulangan.

⁹ Tutu yang makasadiang magligtas ing Dios karetang ating takut, at kanita king kekatamung bansa manatili ing lingap na.

¹⁰ Misagana ing alang kupas a lugud at katapatan; mikaul naman ing katuliran at kapayapan.

¹¹ Ing katapatan sumibul manibat king bansa, at ing katuliran matyo ibat banuang matas.

¹² Wa, ibie ning Ginu ing sablang kasaplalan, at king asikan tamu dakal ing kekatamung pupul.

¹³ Manimuna ya at tuki ing katuliran, at isadia neng dalanan na.

86

¹ Pakiramdaman mu ku, O Ginu, at pakibatan mu ku, uling atyu ku king kakaluluan ampon kalipitan.

² Ining bie ku keka sanang ingatan, uling keka tapat na ku man; iligtas mu ku uling aku ing kekang talasuyu at keka magtiwala ku.

³ Ika ing kakung Dios, inya malunus ka sa kaku; patitingapun ika ing kakung ausan.

⁴ Paligayan me, Ginu, ining talasuyu mu, uling kakung panalangin keka ipayabut ku.

⁵ Uling maganaka ka at mapamatawad, O Ginu, karing sablang mamaus keka mitmu kang lugud.

⁶ Ginu, kakung dalangin keka sanang pakiramdaman, ing kakung panalangin keka sanang tingiran.

⁷ King oras ning kaligaligan ika ing kakung ausan, uling dirinan mu kung kapakibatan.

⁸ Alang dios a kalupa mu, O Ginu; alang mekarapat karing bage a depat mu.

⁹ Ding bansang kekang lelangan keka lumapit la, ban samba at munie kapurian king kekang lagyu.

¹⁰ Mayupaya ka at darapat bage makapagmulala; bukud mung ika ing Dios at ala nang aliwa pa.

¹¹ O Ginu, ituru mu ing buri mung parapat kaku, at pamintuan da kang mitmung katapatan; ituru mu kung sumuyu keka king taimtim a pilubluban.

¹² Pasalamatan da ka, O Ginung kakung Dios, king mabilug kung pusu, at king kapilan pa man kaku yang parangalan ing kekang lagyu.

¹³ Tutung maragul ing alang kupas a lugud mu kaku; king malalam a kutkutan linigtas mu ku.

¹⁴ Ding taung palalu, O Dios ko, lulusuban da ku; bie ku buri deng paten ding taung alang pusu, ding taung keka e kikilala.

¹⁵ Oneng ika, O Ginu, Dios kang mapaglunus; mapibabata ka at parati kang malugud at tapat.

¹⁶ Balikdan mu ku sa at lunusan; kening kekang talasuyu ibie mu, uling kalupa nang ima ku sinuyu ke keka.

¹⁷ Kaku patutuan mu, O Ginu, ing kekang kayapan; ban detang taung kaku masama mangapakarine la kabud akit dang pematulan mu ku at seupan.

87

¹ Telakad ne ning Dios ing siudad na king banal a Bunduk ning Zion.

² Maygit neng kaluguran iting siudad king isanu mang balen nang Jacob.

³ O siudad ning Dios, keka sanang pakiramdaman king ing masasabi keka mayap ngan.

⁴ Potang isulat ku la lagyu ding bansang mapamintu kaku, iyabe ke ing Babilonia at Ehipto; iyabe kia naman ing Filistia, Tiro, at Etiopia karetang king Jerusalem manuknangan.

⁵ Tungkul king Zion ding tau karelang sabian king ding sablang bansa sasakupan na la, at gawan nong masikan ning Kakataskatasan.

⁶ Gawa yang listahan da ring bansa ing Ginu, at karing memalen ning Jerusalem iyabe na la ngan.

⁷ Ding sablang manuknangan karin magkanta la at terak, at karelang sabian, Ing sablang bendisyun at kekatamung tatanggapan king Zion manibatan.

88

¹ O Ginung Dios a kakung talapagligtas, patitingapun aduan ku ing saup mu, at neng bengi ika mu rin ing kakung ausan.

² Kakung panalangin keka sanang pakiramdaman, ing kakung sasabian keka sanang pakiramdaman.

³ E ku na akarga ing problemang kaku dinatang, at ing kamatayan maibug na na kung akmulan.

⁴ Mibilang na ku karetang malapit nang taglus king kutkutan; tau kung kegisanan nang sikanan.

⁵ Anti ra kung likuan libutad ding mete; kawangis da retang pete ra king kutkutan makarate na; kalupa da na ku detang taung kekang kelinguan a e mu na malyaring asaupan.

⁶ Binili mu ku king malalam a aun, king tuknangan a malalam at madalumdum.

⁷ Ing mua mu kaku tune mabayat, kawangis ning maragul a alun a kaku tatakap.

⁸ Pati kakaluguran ku dinayu mo kaku; karela metung kung pikakasaman. Mesaluput ku at e na makatakas.

⁹ Daralumdum na ing kakung akakit kening kakung kasakitan; O Ginu, patitingapun ika ing kakung ausan at keka ku manalangin.

¹⁰ Gawa ka waring milagru para karing mete? Makatalakad la pa kaya ban kapurian ibie keka?

¹¹ Abalita da pa kaya karin king kutkutan ing alang kupas a lugud mo o ing kekang katapatan king tuknangan da ring mete?

¹² Akit da la kayang kekang milagru king madalumdum o ing kekang pamagligtas king tuknangan da ring taung mekalinguan?

¹³ Oneng aku, Ginu, keka maus ku at pasakup; balang abak panalangin ku keka iyarap.

¹⁴ Ginu, obat tatanggian mu ku? Obat kaku sasalikut me ing lupa mu?

¹⁵ Makalunus ku uling manibat na inyang anak ku, misasakitan na ku at digsu na mete; e ku na akarga ing kaku babie mung dusa.

¹⁶ Ing mua mu lulugmuk na ku; tutung makatakut ing babie mung kasakitan kaku;

¹⁷ mengari lang albug a kaku makapadurut patitingapun; lubus da kung kukubkuban.

¹⁸ Leko mo kaku pati na ing matalik kung kakaluguran; ing bukud mung kayabe kung makatagan ya ing karalumduman.

89

¹ Parati kung ikanta, O Ginu, ing lugud mung e kukupas; ibalita ku ing katapatan mu king kapilan pa man.

² Uling alang kayangganan ing lugud mu; ing katapatan mu matatag yang anti ing banua.

³ Nganang sinabi, Ating kasunduan a gewa ku king kakung pinili; pengaku ku kang David a talasuyu ku

⁴ king ing lahi na kaku yang papanatilian ari kapilan man, at ing kayarian na e ya miwakasan.

⁵ Ding banua sasabian da la, O Ginu, ding makapagmulalang dapat mu; ing katipunan ding kekang banal sasabian da ing kekang katapatan.

⁶ O Ginu, ninung atyu banua a malyaring keka pakilupa; alang dios a kalupa mu.

⁷ Metung kang Dios a gagalang da, at pitatakutan king kapulungan ding banal.

⁸ O Ginung Dios a Mayupaya, king kayupayan ala kang kalupa; O Ginu king sablang bage tapat ka.

⁹ Ika ing sasakup king dagat a mabagsik; ding alun nang manyintang keka lang patahimikan.

¹⁰ Itang dambualang i Rahab piglati me at pete; king mayupaya mung sikanan simbut mu la ding kekang kalaban.

¹¹ Keka ya ing banua at keka ya naman ing yatu; king yatu ika ing linalang at king sablang makalulan.

¹² Ika ing linalang king mauli at king norti; ing Tabor at ing Hermon masaya lang magkanta keka.

¹³ Tutu kang mayupaya at tutu kang masikan, at ing gamat mung wanan makayatiat ya.

¹⁴ Ing hustisia at katuliran ila ding asias ning kekang kayarian; ing lugud at katapatan mayayakit king sabla mung daraptan.

¹⁵ Mapalad la, O Ginu, ding taung biasang samba at magkantang kapurian keka, ding mabibie king aslag ning kekang ganaka!

¹⁶ Uli mu, magsaya la patitingapun layun da kang pupurian uli ning kekang kayapan.

¹⁷ Maragul la ding tagumpe a kekami kekang babie; magtagumpe kami uling kaluguran mu kami.

¹⁸ Ika, Ginu, ing memili king kekeng talapamingua, ika ing minie king ari mi, O Banal ning Israel.

¹⁹ Kanitang minuna, king kapamilatan ning vision, migsalita ka karetang tapat keka. Ngamu karela, King metung a bayani pinutung ku ne ing korona; likluk ke king tronu na itang pinili ku karing maldang tau.

²⁰ Gewa keng ari i David a kakung talasuyu, at tigtugan king banal a laru.

²¹ Kaku yang alalayan at king kakung kayupayan dinan keng sikanan.

²² Minsan man e la magtagumpe kang David ding keyang kalaban; e re sambutan ding taung alang kayapan.

²³ Aku ing gumisan karing kalaban na, at gisanan paten ding masama kang David.

²⁴ Kang David manatili ing lugud ku't katapatan; magtagumpe ya kapilan man.

²⁵ Ing kayarian na miras ya angga king dagat, at pati na king Ilug Eufrates.

²⁶ Kaku sabian na, Ika ing Tata ku at Dios ku; ika ing Talaingat at Talapagligtas ku.

²⁷ Aku naman ibilang keng anak a pangane ku, ya ing mayupayang diling ari ning yatu.

²⁸ Parati keng tuparan ing pangakung binie ku, at ing kasunduan mi manatili ya.

²⁹ Papanatilian keng ari kapilan man ing lahi na; parati yang metung karing lahi na ing maging ari.

³⁰ Nung ding lahi na e la tupad karing kakung kautusan, at lapastanganan da lang kakung tuntunan,

³¹ nung labagan da ing kakung turu, at e da la tuparan ding kakung kautusan,

³² kanita kaku lang parusan king dapat dang makasalanan. Kaku lang papagdusan king dapat dang kamalian.

³³ Oneng ing lugud ku kang David e miwakasan; ing pangakung binie ku kakung tuparan.

³⁴ E ke labagan itang kakung kasunduan; metung mang pangaku ku kang David e ku bawian.

³⁵ Misan mu at para king kapilan man; sinumpa ku king banal kung lagyu; kang David kapilan man e ku maglaram!

³⁶ Ing lahi na, anting ari, manatili ya anggang saslag yang aldo;

³⁷ manatili ya king kapilan man anti ing bulan, itang tapat a testigu king banuang maleparan.

³⁸ Oneng ngeni keka yang tinggian at gilutan, at kamuan meng e makanyan- kanyan ing aring kekang pinili.

³⁹ Keka yang lebagan ing kasunduan mu king kekang alipan, at ing korona na king gabun me inugse.

⁴⁰ Digsa mo ngan ding pader ning siudad na, at ding keyang kuta ligpak mu la.

⁴¹ Ding sablang daralan panakawanan dang keyang pibandian; pituya-tuya de ring bansang keyang kasiping.

⁴² Ding kalaban na ilang kekang pepaniambutan; pepatula mo ngan ding sabla nang kalaban.

⁴³ Meging ala yang silbi ing espada na, at pepaburen meng mesambut king labanan.

⁴⁴ Leko me king gamat na ing setro, at king alikabuk me belugse ing tronu na.

⁴⁵ King kekang depat malagua yang metua, at mengapakarine ya.

⁴⁶ O Ginu, ala nang angga ing pamagpampan mu kekami? Angga kapilan ing mua mung milalablab anting api?

⁴⁷ E mu sa kakalinguan king makuyad mu ing bie ku; ganakan mu sa king lelangan mu kaming ating kamatayan.

⁴⁸ Ninung mabie a e takman king kamatayan? Ninu ing makapangilag king malalam a kutkutan?

⁴⁹ O Ginu, nukarin ing lugud mung wagas king panaun a milabas? Antayu ing pengaku mung katapatan kang David?

⁵⁰ Ganakan mu, O Ginu, nung makananu reng insultuan ding tau ining talasuyu mu, at ing insultu a pibata ku karing paganu.

⁵¹ O Ginu, ing kekang pinili insultuan de ring kalaban! Lilibakan de nukarin ya man munta.

⁵² Purian ya ing Ginu king kapilan pa man!

90

¹ Ginu, ika ing kekeng meging tuknangan karing dakal a panaun a milabasan.

² Bayu mo pa pepalto ding kabundukan o ing yatung kekang lelangan, ika na ing Dios a alang kayangganan, at Dios ka kapilan man.

³ Babalik me ing tau king alikabuk a keyang ibatan; kekang sasabian, O anak ding tau, king alikabuk mibalik kayu.

⁴ Anti lang patingapun ding libung banua keka; mengari la king napun a linabas na o anting oras a makuyad neng bengi.

⁵ Tatange mu la ding tau anting agus ning albug; kasing kaba na kami mu ning paninap; mengari kaming dikut a neng abak sisibut.

⁶ Kabang abak pa sagiwa la at mamulaklak; karas ning bengi lanat la.

⁷ King pelian ning mua mu magigisan kami; king kekang kasbu gagalgal ke ngan.

⁸ Atyu la king kekang arapan ding kekeng kasalanan; ding makasalikut ming kasalanan balu mu la ngan.

⁹ Kukuyad ing bie mi uli ning kekang mua; lalbug yang kalupa ning bage bilung ning tau.

¹⁰ Ing bie mi angga mung pitung pulung banua; miraras kaming walung pulung banua nung masikan ke pa; makanyan man, kaguluan at problema ing darala ra; mabilis yang lilipas ing bie at kaybat mawala ne.

¹¹ Ninu ing makibalu king puersa ning kekang mua? Ninu ing makaintindi king kasbung makatakut a kekang darala?

¹² Inya ituru mu kekami king ing bie makuyad ya, ban pusu mi king beluan mipabiasnan la.

¹³ Ginu, ing kekang mua kekami angga kapilan? Keka la sanang lunusan dening kekang alipan.

¹⁴ Kagising mi neng abak katmuan mu ke sa king lugud mung alang kupas, ban magkanta kami at tumula kabang mabie kami.

¹⁵ Alilan mung tula itang lungkut a kekami kekang peparala kanitang panaun ning kekeng kasakitan.

¹⁶ Ipakit mu karing talasuyu mu ing makapagmulalang dapat mu; paintulut mung ding lahi mi karelang akit ing mayupaya mung dapat.

¹⁷ O Ginung Dios, ing keka sanang bendisyun ibie mu kekami; king sablang dapat mi tagumpe keka sanang ibie.

91

¹ Ing ninumang lalapit king Kakataskatasan a Dios at manatili king lalam ning keyang kayupayan,

² malyari nang sabian, Ika ing kakung santungan at kambilan; ika ing kakung Dios a kakung panaligan.

³ Iligtas na ka king panganib, at karing makamate sakit.

⁴ Karing pakpak na lukuban na ka; ingat na keka ibie na; ing katapatan na ya ing mingat keka.

⁵ Ala kang dapat pitakutan a panganib neng kabengian o neng aldo karetang bigla na lulusub

⁶ ni sakit katakap ning silim o nanumang e mayap a makamate neng aldo.

⁷ Malyaring ding libu king siping mu mate la, at ding apulung libu a makapadurut keka, oneng e ka numanu balang.

⁸ Lumawe ka at kekang akit ing kaparusan a dugpa karing makasalanan.

⁹ Uling gewa meng salilungan ing Ginu, ing Kakataskatasan a keka maningat.

¹⁰ Alang dugpa kekang e mayap ni sakit a miras king kekang tuknangan.

¹¹ Karing anghel ning Dios penabilin na ka, ban mingat keka nukarin ka man munta.

¹² Ingatan da ka karing karelang gamat, ban ding bitis mu karing batu e la mitalusad.

¹³ Keka lang damusakan ding leon at ding ubingan, ding leon a mitmung bigsikan at ubingan a kamandagan.

¹⁴ Ngana ning Dios, Iligtas ku la detang malugud kaku, at idipensa detang tatanggap kaku bilang karelang Ginu.

¹⁵ Potang maus la kaku kaku lang pakibatan; kaku lang saupan king karelang kagutgutan; kaku lang iligtas at parangalan.

¹⁶ Ing makabang bie karela ku ibie, at ing kaligtasan.

92

¹ Mayap ing pasalamat king Ginu, at ing magkantang kapurian king lagyu ning Dios a Kakataskatasan.

² Mayap ing isalita ing lugud nang e kukupas balang abak, at ing keyang katapatan karas ning kabengian,

³ at bagayan karing instrumentong de kuerdas, at sunis ning alpa.

⁴ Ding dapat mu, O Ginu, paligayan da ku; uli ding dapat ding gamat mu king tula mipapakanta ku.

⁵ Ding dapat mu, O Ginu, tutu lang marangal! Ding kekang pamisip bina lang malalam!

⁶ Iti makalingad karing taung alang beluan, at e na aintindian ning taung mangmang.

⁷ Agyang pang lumabung lang anting dikut ding taung e mayap, at dakal man ing karelang pibandian, makanyan man miras karela ing mitakdang kasiran,

⁸ uling ika, O Ginu, ing Kakataskatasan king kapilan pa man.

⁹ Wa, Ginu, ding sablang kekang kalaban magisan la ngan, at masambut ding darapat kasalanan.

¹⁰ Oneng gewa mu kung kasing sikan ning toro, at dininan tulang e makanyan- kanyan.

¹¹ Ikit ku lang mesambut ding kakung kalaban, at karelang kulisak kakung dimdam.

¹² Ding taung banal lumabung lang kalupa ning palma; lumabung lang kawangis ding tanaman a sedro ning Lebanon.

¹³ Mangari la karing tanaman a mitanam king tuknangan ning Ginu, king Templo ning Dios dagul la at lumabung.

¹⁴ Agyang matua na la mamunga la pa; manatili lang mabie at sagiwa.

¹⁵ Pakilala na niti king ing Ginu makatuliran ya; ya ing kakung talaingat a alang kakulangan.

93

¹ Ing Ginu ari ya; makagani ya king kamalan at sikanan. Ing yatu matatag ya pundasyun; kapilan man e ya maugun.

² Ing tronu mu, O Ginu, matatag ya manibat na kanitang minuna, at ika atyu na ka bayu pa megumpisa ing sabla.

³ O Ginu, ing kalalaman ning danuman tinas nang siwala na; tinas ne ing siwala na at melingongo.

⁴ Maygit pa king alingongo ning maragul a danuman, at mayupaya king alun ning dagat ing pamag-ari ning Ginung makapayan.

⁵ O Ginu, ding kekang kautusan ala lang kayangganan; ing kekang tuknangan sidsad ya king kabanalan kapilan man.

94

¹ O Ginu, Dios kang biasang mamarusa; ipakit mu na ing kekang mua!

² O Ukum ning yatu, talakad na ka at ibie karing palalu ing mangaintulid karela.

³ Angga la kapilan matula, O Ginu, ding e mayap a tau?

⁴ Angga la kapilan magmayabang ding darapat kasalanan, angga ro kapilan pagmayabang ding e ustu rang gagawan?

⁵ O Ginu, ding kekang memalen karela lang pasakitan, at ding kekang pinili karela lang gigipitan.

⁶ Ding mebalu ampon dayuan paten da la, pati na ding anak a mengulilang tata.

⁷ Karelang sasabian, Ing Ginu e na naman akakit ing kekatamung daraptan, ing Dios ning Israel iti e na apapansinan.

⁸ O balen ku, ba't mapurul ka isip? Mangmang, kapilan ka pa mabiasa?

⁹ Ing Dios ya ing makigawa king balugbug at mata; bala yu galang e ya makaramdam at manaket?

¹⁰ Sasabianan na la ding bansa; e no wari parusan? Ya ing talaturu ding sablang tau; ya wari ing alang balu?

¹¹ Balu na la isipan ning Ginu ding tau; balu na king alang kapupuntan ing karelang pamangatuliran.

¹² Mapalad ya ing taung kekang tuturuanan, O Ginu, ya ing kekang yayanad king kekang kautusan.

¹³ Ibie mu keting tau ing kapaynawan king panaun ning kagutgutan kabang kukulkulan de ing aun para karing darapat kasalanan.

¹⁴ E na la gulutan ning Ginu ding memalen na ni lakuan ding taung pakamalan na.

¹⁵ Ing e pamangabiran magbalik karing piukuman, at ding taung makatuliran karela yang igalang.

¹⁶ Ninu ing tinalakad para kaku laban karing e mayap a tau? Laban karing darapat kasalanan ninung sinaup kaku?

¹⁷ Nung ing Ginu e na ku mu seupan, malambat na sanang panaun ing miras ku king tahimik a kutkutan.

¹⁸ Inyang sinabi ku, Mananabu ku, ing lugud mung alang kupas, O Ginu, agad na kung sepu.

¹⁹ Neng magugulu ya ing isip ku, tutula ku uli ning saup a babie mu.

²⁰ Malyari mu la waring pakiabayan ding ukum a e makatuliran, at mamaluktut king katutuan?

²¹ Miyabe-abe lang lalaban karing taung makatuliran, at detang alang kasalanan atulan da lang kamatayan.

²² Oneng ing Ginu ya ing mimingat kaku; ing Dios ya ing talaingat ku.

²³ Parusan na la king depat dang pamikasala, at paten na la uli ning kasalanan da. Wa, ing Ginung kekatamung Dios, paten na la.

95

¹ Me ko keni, magkanta tamu king Ginu, purian ta ya ing Dios a magligtas kekatamu.

² Lumapit tamu king Ginu a ating kapasalamatan; masaya tamung magkantang kapurian.

³ Uling ing Ginu, Dios yang mitmung kayupayan; maygit yang mayupaya kesa karing sablang dios-diosan.

⁴ Atyu ya king gamat na ing yatu manibat king kalalaman angga na karing matas a bunduk.

⁵ Bandi ne ing dagat, uling ya ing linalang kaniti; bandi nia naman ing gabun, uling gewa nia naman iti.

⁶ Me ko keni, duku tamu at samban ya; tara, siklaud tamu king arapan ning Ginu. Ya ing linalang kekatamu!

⁷ Ya ing kekatamung Dios; itamu ding memalen a pagmalasakitan na, anti tamung tupang ingatan na. Pakiramdam yu ngeni ing sasabian na.

⁸ E kayu sa masias a pusu; e yu sa pakiapusan ing gewa ra ding kekong makatua inyang atyu la king Meriba king disyerto karin Masa.

⁹ Karin inamunan da ku't piniubukan agyamang karela nang ikit ing depat kung mayap para karela ngan.

¹⁰ Ing lahing ita pikasaman ke kilub ding apat apulung banua; inya kakung sinabi, Ding taung deti tune lang alang katapatan; e da la buring pamintuan ding kakung kautusan.

¹¹ Uli ning mimua ku karela sinumpa ku king e la miras king gabun nung nu ko mo sana papagpaynawan.

96

¹ Magkanta kayung bayung kanta king Ginu! Magkanta ka king Ginu, O meto yatu!

² Magkanta kayu king Ginu at purian ye; ibalita yu aldo-aldo ing pamagligtas na kekatamu!

³ Ing kayupayan na karing bansa ibalita yu, at ding makapagmulalang dapat na karing sablang tau.

⁴ Uling ing Ginu maula ya, at dapat yang purian, kailangan yang galangan maygit karing aliwang dios-diosan.

⁵ Ding dios da ring paganu idolo la mu; oneng ing linalang king banua ya ing Ginu.

⁶ Makapadurut king Ginu ing ligaya at kamalan; kayupayan at leguan ing atyu king keyang Templo.

⁷ Purian ya ing Ginu, ikong sablang tau keti king yatu, purian ing ligaya at kayupayan na!

⁸ Purian ya ing maligaya nang lagyu; king Templo na malaus kayu at ain ibie yu.

⁹ King banal a gayak samban ya ing Ginu; galgal ka arapan na, O meto yatu!

¹⁰ Karing sablang bansa sabian yu: Ing Ginu ari ya. Ya ing minie tetagan king yatu, inya e ya numanu; king mitmung katuliran ukuman na lang sablang tau.

¹¹ Paburen yang tumula ing banua; paburen ing yatu magsaya ya, at pati na ing dagat at ing sablang keyang sakup;

¹² paburen yung ding marangle at ding sablang tanam da tumula la! Kanita ding sablang tanaman ning kagubatan magkanta la uli ning tula ra, fig,,,,,...sablang tanaman ning kagubatan magkanta la uli ning tula ra.,(96:12)fig*

¹³ potang datang ya ing Ginu ban mag-ari king yatu. Pamahalan no ding sablang tau king alang pamangabiran, at king mitmung katuliran.

97

¹ Ing Ginu mag-ari ya! O yatu, magsaya ka! Ikong sablang pulu, tumula kayu sa!

² Ing biga at dalumdum makapatulug king Ginu; manalumpakan king kabanalan at alang pamangabiran ing pamag-ari na.

³ Atyu mumuna na ing api; sisilaban na lang makapadurut nang kalaban.

⁴ Ing kildap na pasalan neng yatu; ing yatu gagalgal ya panakit na.

⁵ Malalaso lang anting kandila ding bunduk king arap ning Ginu ning mabilug a yatu.

⁶ Ing kekang katuliran sasabian na ning banua, sablang bansa akakit da ing ligaya na.

⁷ Mibili la king kamarinayan ding sablang sasamba karing idolo; detang magparangalan karing idolo dang alang kabaldugan. Ding sablang dios da duku la king arapan na.

⁸ Ing Zion makiramdam ya at matula ya, at ding siudad ning Juda magsaya la, uli ding kayatulan mu, O Ginu.

⁹ Ginung Mayupayang tutu, ari na ka ning mabilug a yatu; maygit ka karing sablang dios a e tutu.

¹⁰ Kaluguran na la ning Ginu detang masama king e mayap; ing bie ding memalen na ingatan na; liligtas na la karing gamat da ring taung e mayap.

¹¹ Saslag ing sala para karing banal, at ing tula karing mayap a pilubluban.

¹² Tumula kayu king Ginu, ikong sablang banal, at ing banal nang lagyu kekayu yang pasalamatan!

98

¹ Pagkanta yeng bayung kanta ing Ginu, uli ning makapagmulala nang depatan! King sarili nang kayupayan at banal nang gamat ing tagumpe ikua na.

² Pisiag ning Ginu ing tagumpe na; ing pamagligtas na karing bansa pepakilala na.

³ Ing pengaku na king balen ning Israel e na kelinguan; karela mitmu yang lugud at katapatan. Ing tagumpe ning Dios ikit ding sablang tau ning yatu.

⁴ Gawa kang masayang inge king Ginu, O mabilug a yatu, purian yang kayabe ding kanta, at kulisak ning tula.

⁵ Magkanta kayung kapurian king Ginu! Manigtigan kayung lira!

⁶ Tiupan yo ding trumpeta at tambuli, at kulisak kayung mitmung tula king Ginung ari tamu.

⁷ Magkainge ka, O dagat, pati na ing sablang atyu keka! Magkanta ka, O yatu, at sablang manuknangan keka.

⁸ Ikong sablang ilug makpak kayu ngan; ikong sablang kabundukan miyabe-abe kayung matulang magkanta

⁹ king arap ning Ginu, uling daratang ya ban yatu ya'ng pamahalan na, at ukuman ding tau ketang katuliran at alang pamangabiran.

99

¹ Ing Ginu mag-ari ya, at ding tau gagalgal la! Makalukluk ya king tronu na babo da ring kerubin; kabang makalukluk ya, ing yatu gagalgal ya.

² Ing Ginu mayupaya ya karin king Zion; ya ing pamuntuk ding sablang bansa.

³ Ing lagyu nang maula at makamal ding sabla karela yang purian. Banal ya!

⁴ Mayupayang Ari, ing matulid yang kekang kaluguran; king Israel tinatag mu ing katuliran; at binie mung katuliran at alang pamangabiran.

⁵ Purian ya ing Ginung kekatamung Dios; samba kayu arap nang tronu! Banal ya ing Ginu!

⁶ I Moises at i Aaron pari na la, i Samuel naman menalangin ya; deti ngan king Ginu minaus la, at pekibatan na la.

⁷ Migsalita ya karela busal ning biga, at tiparan da lang tuntunan at kautusan a binie ning Ginu karela.

⁸ O Ginung kekaming Dios, pekibatan mu lang kekang memalen; pepakit mu karela king Dios kang mapamatawad agyamang perusan mu la uling mikasala la.

⁹ Ing Ginung kekatamung Dios kailangan yang purian; king banal nang bunduk kekatamu yang samban, uling banal ya ing Ginung kekatamung Dios.

100

¹ Gawa kang masayang inge king Ginu, O meto yatu!

² King mitmung tula suyuan ya't samban; lumapit ko king Ginu a ating masayang kanta.

³ Kilalanan yu king ing Ginu ya ing Dios. Ya ing linalang kekatamu at bandi na katamu; itamu ding memalen na at tupang papastulan na.

⁴ Ding pasbul ning Templo na luban yu na la kayabe ing kapasalamatan, at ding patyu na a ating kapurian. Pasalamatan ye at purian.

⁵ Uling ing Ginu mayap ya; alang angga ing lugud na, at tapat ya kapilan man.

101

¹ Ing kanta ku tungkul ya king katapatan at katuliran; Ginu, iti keka ke iyampang.

² King dalan ning kabanalan karin ku dumalan. O Ginu, kapilan mu ku kaya datangan? Mibiebie kung alang kapintasan king mismung kakung tuknangan.

³ E ku paintulut magbabo ing nanumang e mayap. Pikasaman ku ing dapat ding taung e mayap, at e ku la pakiabayan.

⁴ E ku gawang nanumang pamaglinlang; e ku paintulut lungub ing e mayap king kakung kaisipan.

⁵ Ing ninumang king lihim sisira king kalupa nang tau kaku yang tanggian; e ke kampian ing taung palalu at mayabang.

⁶ Ding taung tapat king Dios ilang kakung pakiabayan; king kakung palasyu paintulutan ku lang manuknangan; detang talagang apagkatiwalan ila mung mipaintulutan aku ing karelang suyuan.

⁷ E ya malyaring manuknangan king kakung palasyu ing taung malaram; e lumuat king kakung arapan ing taung mapagkunwari.

⁸ Aldo-aldo kaku lang paten ding sablang taung e mayap ning kekatang bansa; king siudad ning Ginu kaku la ngan itabi ding taung darapat e mayap.

102

¹ Pakiramdaman mu sana, O Ginu, ing panalangin ku; miras sa king arap mu ing saup a aduan ku!

² E mu ku sa lalakuan neng atyu ku king kaguluan. Saingsing ku keka sanang pakiramdaman, at potang keka mamaus ku agad mu ku sanang pakibatan.

³ Ing bie ku mawawala anti ing asuk; ing katawan ku mitatau yang anti ing api.

⁴ Malalanat yang anting dikut ing kakung pusu; king pamangan ala kung ganang mangan.

⁵ Masikan kung sasaingsing; meging butul-balat na ku mu.

⁶ Mengari kung ayup a malyap king disyerto; magdili-dili kung anti ing kulayu karing lasak-lasak a gusali.

⁷ Dit'man e ku mipatudtud; mengari kung ayup king bubungan magdili-dili.

⁸ Aldo-aldo da kung e patugutan insultuan ding kakung kalaban; detang manyunu kaku gagamitan dang paniumpa ing kakung lagyu.

⁹ Uli ning kasbu mu at mua kaku abu ing meging kakung pamangan, at ing lua ku miyabe king kakung inuman. Dimput mu ku at belugse.

¹⁰

¹¹ Ing bie ku kalupa ne ning anino neng bengi, at anti ing dikut a melanat.

¹² Oneng ika, Ginu, ari ka kapilan man; ing balang lahi e na ka kalinguan.

¹³ Talakad ka at lunusan me ing Zion; oras na ban keka yang lunusan; ing takdang panaun miras na ban keka yang sakluluan.

¹⁴ Uling ding talasuyu mu kaluguran de agyang 'ti ne makapase, at kalulunusan de agyang melasak ne.

¹⁵ Pitakutan de ring bansa ing lagyu ning Ginu, at ding sablang ari king yatu, pitakutan da ing upaya na.

¹⁶ Potang italakad neng pasibayu ning Ginu ing Zion, ipakit na ing degulan na.

¹⁷ Saingsing ding misasakitan keyang pakiramdaman, at karelang panalangin keyang pansinan.

¹⁸ Isulat yu para karing daratang a lahi ing depat ning Ginu, ban pati ding e pa mibait munie lang kapurian king Ginu.

¹⁹ Karin ketang santuaryu na banua, ing Ginu tinando ya; ibat banua ing yatu linawe ne.

²⁰ Ing saingsing ding makasukul dimdam na, at ding miyatulan mate gewa na lang malaya.

²¹ Inya ding tau king Zion lagyu na karela yang ipasiag, at ding tau Jerusalem karela yang pasalamatan

²² potang ding miyayaliwang bansa at kayarian mitipun la, ban king Ginu la samba.

²³ Leko na ing kakung sikanan busal ning kakung pangakayanakan; ing bie ku keya yang kinuyad.

²⁴ O Dios ko, bie ku e mu pa sana kakuanan kabang e ku pa miras king ketuan. O Ginu, ika mabie ka kapilan man.

²⁵ King panaun a malambat nang milabas, ing yatu keka yang telakad, at ing banua lelangan de ring kekang gamat.

²⁶ Deti ngan lumipas la, ika mu ing mitagan; malaso la ngan anti ing imalan; anti ing imalan a mirinatan keka lang alilan.

²⁷ Oneng ika e ka manaliwa kapilan man, at ing bie mu alang kapupusan.

²⁸ Ding anak mi mibiebie lang mitmung kapanatagan, at ding lahi da manatili lang alang pigaganakan king lalam mung kayampunan.

103

¹ Purian me ing Ginu, O kaladua ku; mabilug kung pangatau, purian meng banal nang lagyu!

² O kaladua ku, ing Ginu keka yang purian; sablang keka na pepanabang e mu sana kakalinguan.

³ Ing sabla kung kasalanan keyang patawaran, at pakayapan nang sabla kung kapanamdaman.

⁴ King kamatayan kakabus na ku; ing lugud na't lunus babie na kaku.

⁵ Kaku panabang nang bage mayap ban manatili ing kakung pangakayanakan at masikan kalupa ning agila.

⁶ Ing Ginu darapat yang kayatulan a matulid; papanigan na la ding malulupig.

⁷ Pepakilala na kang Moises ing kapagnasan na, at king balen nang Israel ding dapat nang pagmumulalan.

⁸ Malunusan ya at maganaka ing Ginu, e ya agad mimimua, at tapat ing lugud na.

⁹ E ya tatanam mua kenu man o mua mo sanang alang kapupusan.

¹⁰ E na katamu papatulan king depat tamung kasalanan o ablasan ing dapat a e ustu at kamalian.

¹¹ Nung makananu ya katas ing banua king yatu makanyan ya ing lugud na karetang ating takut king Ginu.

¹² Nung makananu yang marayu ing aslagan king albugan, makanyan la karayu king Ginu ding kasalanan tamu.

¹³ Nung makananu na lang lulunusan ning tata ding anak na, makanyan na la naman lulunusan ning Ginu ding ating takut king kadiosan na.

¹⁴ Balu na nung nukarin tamu ibat; balu na alikabuk yang kekatamung ibatan.

¹⁵ Ing bie tamu dikut ing kalupa na; mabibie tamu at tutubu anti ing sampaga king marangle;

¹⁶ king tiup ning angin malagas ya, at lumbug nia king lugal na. fig,,,,,king tiup ning angin malagas ya, at lumbug nia king lugal na.,(103:16)fig*

¹⁷ Oneng ing lugud ning Ginu karing malugud at ating takut manatili angga king alang angga; ing lugud na mamabut karing anak da ring anak da.

¹⁸ Iti mapalyari karetang tutupad king kasunduan na, at e mangalinguan karing kautusan na.

¹⁹ King banua ne binili ning Ginu ing tronu na, at mag-ari ya karing sablang melalang.

²⁰ Ikong masikan at mayupayang anghel, purian ye ing Ginu, ikong mayupaya at masikanan a mamintu king keyang amanu.

²¹ Purian ye ing Ginu, ikong sablang talasuyu na banua, ikong talasuyu nang tutupad king kaburian na!

²² Purian ye ing Ginu, ikong sablang lelangan na, king sablang lugal nung nu ya mamuntukan! O kaladua ku, ing Ginu keka yang purian!

104

¹ Purian me ing Ginu, O kaladua ku! O Ginung kakung Dios, ing degulan mu e mu nanu! Makaimalan ka king dangalan at kamalan.

² Makabalabal ka king sala! Laladlad me ing banua anting tolda,

³ at babo ning danuman telakad me ing kekang bale. Ding kekang peka karwahe ila ding biga, at babo ding pakpak ning angin ka makasake.

⁴ Ing angin ya ing kekang tubud- tuburan nukarin man, at ing kislap ning kildap ya ing kekang utus-utusan.

⁵ Matatag meng binili ing yatu king katatalakaran na, at e ya maugun kapilan man.

⁶ King dagat karin me belabalan, at ding bunduk limbug la king danuman.

⁷ Minagus ing danum inyang kekang sebianan; king masikan mung bosis minagus ngan.

⁸ Minagus pababa karing bunduk, at miras karing kapatagan, king lugal a sidia mu.

⁹ Tildu mu ing angganan a e na dapat lagpusan, ban ing yatu e ra ne takpan pasibayu.

¹⁰ Payagusan mu lang sibul karing libis ban magus pilatan ding talimunduk.

¹¹ Karing malyap a animal babie lang inuman; karin milulunasan ing kau ding asnong malyap.

¹² Karing tanaman lele da, ding ayup maniale la at magpasiuk la pa.

¹³ Ibat king matas mung tuknangan tutugtugan mu la ding kabundukan angga king kumatmu ing gabun king babie mung kalam.

¹⁴ Sagiwang dikut para karing animal kekang patubuan, at tanaman a gamitan ning tau ban pikuanan king kabiayan,

¹⁵ at alak a makaibie tula king pusu na; laru ban lupa na saya ya, at tinape a munie sikanan.

¹⁶ Ding tanaman ning Ginu e la magkulangan uran, ding sedro ning Lebanon a keyang tenam.

¹⁷ Karin ding ayup maniale la, at karing tanaman a sipres mamugad la.

¹⁸ Ding kambing a malyap manuknangan no man king kabundukan, at karing pilatan ding batu karin la manuknangan ding kunehu.

¹⁹ Ing bulan keka yang lelangan ban ing panaun mitulduan; balu ning aldo nung nanu yang oras lumbug.

²⁰ Paratangan mu ing bengi, at kanita no man lalage ding animal a malyap.

²¹ Ding anak ding leon gagaleung la kabang manintun lang apangan da; libut-libut lang manintun king pamangan a babie ning Dios karela.

²² Kabud sunlag ya ing aldo mamanialikut na la ban magpaynawa karing lukib da.

²³ At ing tau naman lulual ya ban magobra angga na king ing aldo lumbug ya.

²⁴ O Ginu, ding kekang lelangan e la mabilang-bilang! King mitmung kabiasnan keka la ngang lelangan! Mitmu ya ing yatu karing kekang lelangan.

²⁵ Kabilang ya kareti ing dagat a tutung maragul at malapad; mabibie la karin ding lelangan a e mu abilang-bilang malati o maragul man;

²⁶ karin ding barku mako la't datang, at karin ya mamialungan itang Leviatan a kekang lelang.

²⁷ Deti ngan ika ing karelang asahan king aldo-aldo pamangan a karelang kailangan.

²⁸ Itang babie mu titipunan da; potang ding gamat mu bubuklat mu la, e la misingap king kabsi ra.

²⁹ Potang darayu ka karela mangatakutan la; nung patluran mung karelang pangisnawa mate la; magbalik la king alikabuk a ibatan da.

³⁰ Oneng kabud dinan mu lang pangisnawa malalang la, at ing yatu dinan meng bayung bie.

³¹ Ing ligaya ning Ginu manatili sa kapilan man, tumula ya sa king sabla nang lelangan!

³² Lawan nia mu ing yatu, at iti gagalgal ya; tagkilan na la mu ding bunduk, at agad lang palual asuk.

³³ Pagkanta ke ing Ginu kabang mabie ku, pagkanta keng kapurian ing kakung Dios kabang mabie ku.

³⁴ Mananu na sanang ing kakung pamagkanta makaibie yang tula, uling king Ginu tutula ku.

³⁵ Mawala la sana keti king yatu ding makasalanan; ding taung e mayap sana mawala no ngan. Purian me ing Ginu, O kaladua ku! Purian ya ing Ginu!

105

¹ O munie kayung kapasalamatan king Ginu; maus kayu king lagyu na; sablang keyang depatan karing tau kekong sabian.

² Magkanta kayu para king Ginu, pagkanta yeng kapurian; ibalita yu ing makapagmulala nang depatan.

³ Tumula kayu uli ning banal nang lagyu; bustan lang tumula ding sablang sasamba king Ginu!

⁴ Panintunan ye ing Ginu at ing sikanan na; ing pamagdulap king Ginu e yu sana kakalinguan.

⁵ E yu la sana kakalinguan ding milagrung gewa ning Ginu, at ding pisiag nang kayatulan,

⁶ O lahi nang Abraham a talasuyu na, O anak nang Jacob a pinili ning Ginu.

⁷ Ing Ginu ya ing kekatamung Dios; ding kautusan na para king mabilug a yatu la.

⁸ E ne kakalinguan dit'man ing keyang kasunduan, ing pangaku na karing libu-libung lahi.

⁹ Ing kasunduan a gewa na kang Abraham, ing pangaku na kang Isaac, deti tuparan na la ngan.

¹⁰ Ginawa yang kasunduan ing Ginu kang Jacob, kasunduan a manatili kapilan man.

¹¹ Ngana, Keka ibie ke ing gabun ning Canaan bilang mana a kekang pibandian.

¹² King panaun a ita tutu la pang ditak; dayuan la ngan king Canaan.

¹³ Karing miyayaliwang bansa at kayarian la miglipat-lipat.

¹⁴ E na la pepaburen mayalipit kaninu man, alang-alang karela ding ari belan na la.

¹⁵ Ngana, Ding pinili ku e yu la nananan, ding propeta ku e yu la panasakitan.

¹⁶ Kaybat, peparatang nang danup king lugal a ita, at sinira na ing sablang apangan da.

¹⁷ Oneng tinubud neng makauna karela i Jose; anting ipus, pisali de.

¹⁸ Tenikala da lang bitis na, at pati na ing batal na

¹⁹ angga king ing amanu na meging tutu la; ing pepatutu ya ing amanu ning Ginu.

²⁰ Kanita ing ari ning Ehipto pepabulus ne; ing panginuan ding bansa gewa neng malaya,

²¹ at penibalan ne king pibalebale na, at talapangasiwa king sabla nang bandi.

²² Dininan neng upayang sumakup karing opisyal na, at ituru na lang kabiasnan ding mamuntukan na.

²³ Kaybat minta ya Ehipto ing Israel, at karin ne migdatun.

²⁴ Peparakalan ne ning Dios ing balen na, at pepasiknangan maygit karing karelang kalaban.

²⁵ Deti namang tau Ehipto peparatangan na la kasbu laban king balen na, at karela pepalinlang ding talasuyu na.

²⁶ Kanita i Moises a talasuyu na tiburan ne, at i Aaron a pinili na.

²⁷ Kapamilatan da pepakit na la ding makapagmulalang dapat na, at aliwa pang mala ketang bansang ita.

²⁸ Peparala na ing dalumdum at meralumdum ya ing bansang Ehipto, oneng selangsangan da ring tau Ehipto ing keyang amanu.

²⁹ Inalilan nang daya ing danum karing ilug da, at ding asan mete la.

³⁰ Kaybat kinatmu yang tugak ing karelang bansa, pati palasyu ning ari atin munaman.

³¹ Migsalita ya at ding lango ampon amuk linto la nukarin mang suluk.

³² King lugal ning uran, uran-lipat ing pepagpa na, at mikit ing duldul at kildap king bansang ita;

³³ sinira na lang mulahan dang ubas at tanaman a higera; ding sablang tanaman pemakli na la.

³⁴ Migsalita ne naman at durun la ding dinatang; king karakal da, e la malyaring bilangan.

³⁵ Gisan da ing sablang bulung a karelang disan, at ing sablang atyu karing karelang asikan.

³⁶ Ding pangane rang lalaki king bansang ita pete na la, ding sablang mumunang anak king balang pamilya.

³⁷ Kaybat tinaid neng linual ing Israel; gintu at pilak karelang daralan. Masikan la ngan at masalese pamikakatawan.

³⁸ Metula ya ing Ehipto king paglako ra, uling kabang atyu la pitatakutan da la.

³⁹ Selilungan na la king biga, at dininan api ban munie sala neng bengi.

⁴⁰ Inyang miniawad lang pamangan ayup lang pugu ding binie na, at dakal a tinapeng ibat banua.

⁴¹ Inaspak ne ing batung maragul, at linual ing dakal a danum; sinibul at minagus ing danum anting ilug king disyertong ita.

⁴² Genaka na ing banal a amanu na, itang pangaku na kang Abraham a talasuyu na.

⁴³ Inya linual ne ing balen na; ding taung pinili na magkanta la, at kukulisak la king tula da.

⁴⁴ At binie na karela ing gabun da ring bansa; pati ing bunga ning kapagalan da miyabie karela

⁴⁵ ban kautusan na e da la kalinguan, at ding utus na karela lang tuparan. Purian ya ing Ginu!

106

¹ Purian ye ing Ginu! Pasalamatan ye ing Ginu, uling mayap ya; ing lugud nang e kukupas alang angga.

² Ninu ing makapagsalita karing dapat nang maragul ning Ginu? Ninung makaibie ganap a kapurian king Ginu?

³ Mapalad la ding taung tutupad karing keyang utus, ding parating darapat king matulid.

⁴ Ginu, e mu ku sana kakalinguan potang ing kekang balen keka neng saupan; iyabe mu ku karetang kekang sagipan.

⁵ Paintulut mung kakung akit ing kasaplalan ning kekang balen, at king karelang tula makiabe layun ligaya karing sablang ibat keka.

⁶ Ikami at ding kekeng mangatua parehu kaming dinapat pamikasala; ing depat ming kasalanan alang kalupa.

⁷ Kanitang atyu la king Ehipto ding kekeng makatua e da la aintindian ding makapagmulala mung depatan; karelang kelinguan ing lugud mung alang angga, at karin king Dagat da ring Timbu, keka O dios a Kakataskatasan, mig-rebeldi la.

⁸ Makanyan man keka lang segipan antimo ing kekang pengaku, ban kekang ipabalu ing upaya ning kekang lagyu.

⁹ King amanu na memala ya ing Dagat da ring Timbu, at tinaid na lang papunta king malanging gabun.

¹⁰ Linigtas na la karing gamat ding menalipan karela; linigtas na la king puersa da ring kalaban da.

¹¹ Timbunan na lang kalaban karing maragul a alun, at karela alang mitagan metung man.

¹² Kanita ing balen Israel meniwala ya king amanu na, at migkantang kapurian king Ginu.

¹³ Oneng agad dang kelinguan ing depat na; e da penaya ing turu na.

¹⁴ Karin king disyerto penusigan da ing sariling buri da, at ing Dios pekilabanan de pa.

¹⁵ Itang inawad da, ing Dios binie na, oneng binie na naman ing makamate pesti karela.

¹⁶ Karin king disyerto keririan de i Moises at i Aaron a tapat nang talasuyu ning Ginu.

¹⁷ Kanita ing gabun mignganga ya, at inakmul ne i Datan, at i Abiram at ing mabilug nang pamilya mikutkut ya.

¹⁸ Ing milalablab a api dinatang, at ding talatuki da mesilab la ngan; mesilab la ngan detang darapat e matulid.

¹⁹ Karin king Horeb ginawa lang metung a biserung baka, at iting larawan a pinandayan ya ing karelang simban.

²⁰ Pekilibe de ing Dios a mayupaya king larawan ning baka a dikut ing kakanan na.

²¹ Kelinguan de ing Dios a migligtas karela kapamilatan ding mayupaya nang dapat karin Ehipto.

²² Tune makapagmulala ing depat na king bansang ita, at king Dagat da ring Timbu makapangilabut ing pepasari na.

²³ Binalak na ing paten na la, oneng i Moises a talasuyu na tinalakad ya ban mamilatan para karela, at e na belaus ning Dios itang karela buri nang ipagpa.

²⁴ Kaybat ing gabun a pengaku na karela yang tinggian, uling ing pengaku na e da paniwalan.

²⁵ Kilub dang tolda bulung-bulung la, at e la memintu king utus ning Ginu da.

²⁶ Inya sinumpa na king karin disyerto paten na la,

²⁷ at ikalat ding lahi ra layun isambulat karing aliwang bansa.

²⁸ Karin king Peor sinamba la kang Baal, at mengan la karing ain a miyabie karing dios a e naman mabie.

²⁹ King depat da ing Dios mimua ya, inya ing pesti a makamate miras karela.

³⁰ Kanita i Fineas tinalakad ya at memilatan, at ing pesti tinuknang.

³¹ Uli ning depat na, liguran de ring kekaldan, at e kalinguan king kapilan pa man.

³² Pepamua de ing Ginu karin king sibul ning Meriba, at uli nita, pati i Moises midame ya.

³³ Pepasukal de ing pilubluban na, inya bugasuk na lang sebianan.

³⁴ E da la pete ding paganu antimo ing inutus na karela ning Ginu.

³⁵ Ing depat da ya ing memakiasawa la karela at menugaling kalupa da.

³⁶ Sinuyu la naman karing karelang idolo, at iti meging dalan ne ning karelang kasiran.

³⁷ ly Pati anak dang lalaki at babai karing idolo na ning Canaan karin da la inain.

³⁸ Pete da la't inain ding anak dang ala pang kamalayan, inya ing lugal a ita king daya da karin ya midinatan.

³⁹ King depat da karelang dinatan ing sarili da, at king Ginu meging taksil la.

⁴⁰ Meragul ing mua na karela; mesumami ya karing taung pinili na.

⁴¹ Inya pepaburen na lang mipailalam king upaya da ring dayuan, at ding sinakup karela ila ding kalaban.

⁴² Ding kalaban inalipit da la, at lubus lang mesakup king upaya da.

⁴³ Maralas na lang linigtas, oneng ing lumaban king Ginu ya ing mas buri da, at lalu lang migbabad king pamikasala.

⁴⁴ Makanyan man pekibatan na la inyang minaus la, at lunus karela binie na.

⁴⁵ Alang-alang karela, genaka ne itang kasunduan da; uling tutu nong kaluguran, penupaya na la.

⁴⁶ Ginawa yang paralan ban ding mekabihag karela lumunus la karela.

⁴⁷ Iligtas mu kami, O Ginung kekaming Dios, ibat karing miyayaliwang bansa tipunan mu kami ban ika ing kekeng pasalamatan, at ing lagyu mung banal kekami yang purian.

⁴⁸ Ing Ginu, ing Dios ning Israel, ya ing purian; purian ye ngeni at king kapilan pa man! Amen ing dapat dang sabian ding sablang tau.

107

¹ Pasalamatan ye ing Ginu, uling mayap ya; ing lugud na alang angga!

² Bustan yung ding linigtas na ing Ginu ya ing purian da, detang kinabus na karing kalaban da,

³ at ibat karing miyayaliwang bansa tinipun na ko ngan manibat king aslagan at albugan, norti at mauli.

⁴ Ating melili king disyerto, at e menakit siudad ban karelang pituknangan;

⁵ danup at kau ing karelang delanan; pati kapanayan da megisan.

⁶ Kanita minaus la king Ginu, uli ning kasakitan a karelang daralanan, at linigtas na la king gipit dang kabilian.

⁷ Tinaid na la king matulid a dalan ba lang miras king siudad a malyari dang pituknangan.

⁸ Uli ning alang kupas a lugud na, ing Ginu kailangan deng pasalamatan, alang-alang karing milagrung depat na para karela ngan!

⁹ Anggang bisa ya, ing taung mau painuman ne, at ing taung danupan pakabsian ne king mayap a bage.

¹⁰ King dalumdum at lungkut la migdatun ding aliwa, king kasakitan bihag la at makatanikala.

¹¹ Uling lebag da lang kautusan ning Kakataskatasan a Dios, at tinggian dang tuntunan na.

¹² Misakitan la king mabayat a obra, king pangaragsa da alang lalapit ban sumaup karela.

¹³ Kanita minaus la king Ginu king kasakitan da, at linigtas na la king gipit dang kabilian.

¹⁴ Leko na la king dalumdum at lungkut, at ding kekang tanikalang bakal pitlud na la ngan.

¹⁵ Uli ning alang kupas a lugud na, ing Ginu kailangan deng pasalamatan, alang-alang karing milagrung depat na para karela ngan!

¹⁶ Sinira na lang tangsung pasbul, at pemaluktut ding rehas a bakal.

¹⁷ Mesakit la ding aliwa uli ning karelang pamikasala, at dinalan lang kasakitan uli ning e ustung karelang depatan.

¹⁸ Ala lang ganang mangan king nanumang pamangan, inya mibingit la king kamatayan.

¹⁹ Kanita minaus la king Ginu uli ning kasakitan a karelang daralanan, at linigtas na la king gipit dang kabilian.

²⁰ King amanung peparala na kinayap la ngan, at miligtas la king kamatayan.

²¹ Uli ning alang kupas a lugud na, ing Ginu kailangan deng pasalamatan; alang-alang karing milagrung depat na para karela ngan!

²² Kailangan lang munie ain-a-kapasalamatan, at matula da lang ikanta sabla nang depatan!

²³ Ding aliwa sinake lang barku ban lipat ning dagat karin la mangalakal.

²⁴ Libutad ning danuman ing makapagmulala nang depat ikit da ngan.

²⁵ King amanu na tiniup ing angin a masikan, at meragul la ding alun ning dagat.

²⁶ Tinas na lang matas a matas ding barku da; at kaybat sildak na la angga king kalalalaman. Mesira la lub; bala ra mate no ngan.

²⁷ Miragsa la't mipaid anting taung malasing; ing sablang beluan da e mekasaup karela.

²⁸ Kanita minaus la king Ginu uli ning kasakitan a karelang daralanan, at linigtas na la king gipit dang kabilian.

²⁹ Pepatahimikan na ing bagyung masikan; ding alun a maragul tinuknang la naman.

³⁰ Metula lang e mu nanu uli ning katahimikan, at pitnubayan na la angga king sadsaran a karelang pakirasnan. fig,,,,,....at pitnubayan na la angga king sadsaran...,(107:30)fig*

³¹ Uli ning alang kupas nang lugud, ing Ginu kailangan deng pasalamatan, alang-alang karing depat na para karela ngan!

³² King katipunan ding tau kailangan dang ihayag ing kayupayan na, at king kapulungan ding makatua kailangan da ne mang purian.

³³ Ding ilug pelangian na la, at ding sibul pepamalan na no man;

³⁴ ing gabun a sadiang mataba meging gabun a malat, uli ning ugali rang e mayap ding taung karin manuknangan.

³⁵ Oneng ing disyerto gewa neng danuman, at ing gabun a masias gewa neng batisan.

³⁶ Karin ding danupan peintulutan na lang manuknangan, at manalakad lang siudad a karelang tuknangan.

³⁷ Menasik la at menanaman ubas, at ing karelang pupul misna king karakal.

³⁸ Binendisyunan na la at peparakalan a bilang; merakal pati ding sese dang animal.

³⁹ Uli ning pangalupig, kabiguan, at kalungkutan, meritak la bilang.

⁴⁰ Bignus na ing mua na karing menalipit karela, at karing maleparan a ilang pepaburen na lang melili.

⁴¹ Oneng linigtas na la ding mayayalipit at mangailangan; ding anak da peparakalan na lang anting kawan.

⁴² Metula la inyang ikit da iti ding banal, oneng e la mekabulad ding e mayap a dapat.

⁴³ Ninumang biasa, deting bage kailangan na lang pakaintindian; ing lugud ning Ginu karela sanang pagaralan tanggapan.

108

¹ Makasadia ya ining pusu ku, O Dios ko; makasadia na ku; makasadia kung magkanta at magsalitang kapurian keka! Migising na ka, O kakung kaladua!

² Migising na ka, O alpa ku at lira! Ing abak kaku yang gisingan.

³ Pasalamatan da ka, O Ginu, libutad ding bansa; libutad ding tau magkanta kung kapurian keka.

⁴ Uling ing lugud mung alang kupas susukdul king banua; ing kekang katapatan mamabut karing biga.

⁵ O Dios ko, mitas ka pa sana lagpus king banua; king meto yatu ipakit mu na ing kekang ligaya,

⁶ ban ing balen a kekang pakamalan kaligtasan akua na; gamitan mu ing upaya mu; pakibatan mung panalangin ku.

⁷ Ibat ketang banal nang santuaryu ing Dios sasabian na, Bilang tanda ning kakung tagumpe, ing gabun ning Sikem kaku yang pitnan at ing Kapatagan ning Sucot kaku yang pamartian.

⁸ Ing Gilead kaku ya at ing Manase. Ing Efraim yang gawan kung helmet, at ing Juda ya ing kakung maging setro.

⁹ Ing Moab gawan keng pipanuasan, at ing Edom yang piyatsanan kung sandalyas. Ing mabilug a Filistia maging kaku ya.

¹⁰ Oneng ninu, Ginu, ing kaku tuki king panlub ku keting kutang matibe? Ninu ing sumaup kaku ban king Edom miras ku?

¹¹ O Dios ko, talaga kayang lubus mu na keng gilutan? Talaga kayang e mu no saupan ding kekaming kawal?

¹² Saupan mu kaming lumaban karing kalaban, uling ing saup ning tau alang babie kasilbian.

¹³ Nung ing Dios ya ing kekatamu sasaup magtagumpe tamu; kalaban tamu sambutan na la ning Ginu.

109

¹ Pupurian da ka, O Dios; pakibatan mung panalangin ku.

² Uling ding taung e mayap, at malaram aku ing karelang pakisiran; laban kaku magsalita lang kapanyiran.

³ Pilit da kung pakisiran, at lulusuban alang kasangkanan.

⁴ Pamagbintang ing ablas da king lugud ku't panalangin para karela ngan.

⁵ King mayap a kakung depat ing ablas da e mayap, at king lugud, kamua ing karelang ablas.

⁶ Iyarap mu taung e mayap a kalupa na, bustan mung ing mandalum metung yang kalaban na;

⁷ potang miyarap king ukuman lunto ya sanang makasalanan; lawan mung kasalanan pati keyang panalangin!

⁸ Ing bie na kuyaran mu sa; bustan ing pibandian na miras karing aliwa.

⁹ Bustan mung ding anak na maulila la, at mabalu ing asawa na!

¹⁰ Bustan mung ding anak na maglipo-lipo la at mamulubi; king lasak dang bale bustan mung mitabi la.

¹¹ Bustan ing pibandian na samsaman da ring pikautangan na; bustan ding aliwang tau ilang numabang king pipagalan na.

¹² Metung man ala sang malunus, at karing anak nang meyalang tata.

¹³ Bustan mung ding anak na't lahi mate la, kanita mabura pati ing lagyu na.

¹⁴ Ing kasalanan ding makatua na ing Ginu e no sa kalinguan; at ing pamikasala nang ima na e sa makalinguan kapilan man!

¹⁵ Mananu na sanang ing Ginu karelang kasalanan e na kakalinguan, oneng ila naman lubus la sanang makalinguan.

¹⁶ Uling e ya pepakit ganaka king kalupa nang tau; pepasakitan na la ding pakakalulu, gipit, at alang akarapat.

¹⁷ Kapad na ing maniumpa, inya misumpa ya sa; e no buring mipala ding aliwa, inya e ya sa mipala.

¹⁸ Anting imalan a susulud na ing pamaniumpa; bustan mung mibabad ya ing katawan na king sumpa na; managlus sanang anting laru angga karing butul na.

¹⁹ Paburen mung mangaring imalan a makabalut king katawan na, at sinturun a makabatabat king awakan na.

²⁰ Makanyan na la sanang parusan ning Ginu ding kakung kalaban, ding sablang kaku magsalitang kapanyiran.

²¹ Oneng, O Dios, a kakung Ginu, saupan mu ku anti ing pengaku mu; iligtas mu ku uling mayap ka at malugud.

²² Uling pakakalulu ku at atyu king pamangailangan; tutu kung panamdaman ing kakung kasakitan.

²³ Mawawala ku antimo ing anino ning kabengian; mananakbag kung anti ing durun neng ugunan de ing tanaman.

²⁴ Mangaina lang tud ku uli ning danup; butul-balat ing kelualan ku.

²⁵ Kaylian da ku ding kapate ku a manakit kaku; pipiling-piling da lang buntuk da.

²⁶ Saupan mu ku, O Ginu ku at Dios ko; sagipan mu ku alang-alang king alang kupas a lugud mu.

²⁷ Pakilala mu karing kapate ku king ika ing magligtas kaku.

²⁸ Isumpa da ku man, oneng bendisyunan mu na ku man; pamakarine mu lang kakung kapate; bustan mung tumula na ku man.

²⁹ Mananu na sanang mipaimalanan la king alang dangalan; king dine la sa mibalabalan.

³⁰ King siwalang masikan pasalamat ku king Ginu; king kapulungan da ring tau kaku yang purian.

³¹ Uling kakampian ne ing taung 'tyu king kakaluluan, at liligtas ne karetang bisang makamate.

110

¹ Ngana ning Ginu king kakung ginu, Lukluk ka king banda kung wanan, angga king agawa ku lang dalpakan mung bitis ding kekang kalaban.

² Manibat king Zion ing Ginu palawakan na ing gabun a kekang sasakupan; kalaban king kekang kayupayan keka na la ipailalam.

³ King aldo a arapan mu lang kekang kalaban, ding memalen magkusa lang ika ing karelang saupan; ibat king sagradung bunduk ding kayanakan datang lang anting ambun ning abak ban keka makiabe.

⁴ Atin yang pangaku ing Ginu keka, at iti e ne bawian. Ngana, Pari ka kapilan man; king pangapari nang Melkisedek karin ka makabilang.

⁵ Atyu banda mung wanan ing Ginu; ding ari daigan na la king aldo a mimua ya.

⁶ Ukuman na lang sablang bansa, mitambak lang bangke king lugal ning labanan; ding ari king mabilug a yatu sambutan na la.

⁷ Minum ya king batis lele na ning dalan; mibawi ya sikanan at king labanan tagumpe akua na.

111

¹ Purian ya ing Ginu! King mabilug kung pusu pasalamatan ke ing Ginu king kapulungan ning balen na.

² Ding dapat ning Ginu tutu lang makapagmulala; buri da lang pakaintindian ding kareti matula.

³ Mitmung dangalan at kamalan ing sabla nang daraptan, at ing kabanalan na manatili kapilan man.

⁴ Ding makapagmulalang depat na kekatamu paganaka na la, maganaka ya at malunusan.

⁵ Dinan na lang pamangan ding ating takut king Ginu; e ne kakalinguan kapilan man itang pangaku na.

⁶ Pepakit na king keyang balen ing upaya na; binie no karela ding gabun da ring dayuan.

⁷ King sabla nang daraptan tapat ya at makatuliran; ayasahan lang sabla nang kautusan.

⁸ Manatili la kapilan man, uling tutu la at makatuliran.

⁹ Binie na ing kaligtasan, karing memalen na, at karela ginawa yang alang anggang kasunduan. Banal ya at mayupaya ing lagyu na.

¹⁰ Ing ating takut king Ginu ya ing pasimula king kabiasnan; dirinan na lang mayap a pamanalastas ding mamintu karing utus na. Purian ya kapilan pa man.

112

¹ Purian ya ing Ginu! Mapalad ya ing taung gagalang king Ginu, karing kautusan na matulang tutupad.

² Ding anak na maging mayupaya la keti king yatu; minuan la kapilan man ding lahi na.

³ Minawa ya ing pamilya na, at layun mipabandian, at sagana king kabiayan king kapilan pa man.

⁴ Uling ing sala saslag para karing taung banal, karing maganaka, mapaglunus, at makatuliran.

⁵ Mapalad ya ing taung maganakang paparam kualta, at tapat king nanumang daraptan na.

⁶ E ya mabigu kapilan man ing taung mayap, at parati neng ganakan.

⁷ E ya tatakut tanggap king e masanting a balita; masikan ya kapaniwalan at king Ginu magtiwala ya.

⁸ E ya maliligalig o mitatakutan man; siguradu yang akit na lang masambut ding keyang kalaban.

⁹ Makabuklat ya gamat, at karing pakakalulu mapaniapat yang mayap; manatili kapilan man ing mayap nang pilubluban. Maging mayupaya ya at miparangalan.

¹⁰ Akit da iti ding taung e mayap; migagaligit la at mamako agad, uling mewala ngan ing karelang asahan.

113

¹ Purian ya ing Ginu! Ikong talasuyu ning Ginu, purian ye lagyu!

² Mananu na sanang ing lagyu ning Ginu ya ing purian da ngeni, at king kapilan pa man.

³ Manibat king aslagan ning aldo angga king albugan, ing lagyu ning Ginu purian ya.

⁴ Ing Ginu mag-ari ya karing heganaganang bansa; lalagpus king banua ing ligaya na.

⁵ Ninu ing kawangis ning Ginung kekatamung Dios a makalukluk king tronu karin king banuang matas?

⁶ Oneng karin ketang kabilian na, tatando ya ban banua at yatu akit na.

⁷ King pangapase ding kalulu king gabun babangun na la; tatas na no man ding atyu king kalulung kabilian,

⁸ at karing prinsipi na la yayabe, karing prinsipi ning balen na.

⁹ Ing babaing e mikakayanak parangalan ne king pibalebale na; paligayan ne kapamilatan ning pamamie nang anak. Purian ya ing Ginu!

114

¹ Inyang ing Israel meko ya king Ehipto, kanitang ing lahi nang Jacob likuan de ing bansang dayuan,

² ing Juda ya ing meging banal nang balen, ing Israel ya ing meging sarili nang pibandian.

³ Inyang ikit ning Dagat da ring Timbu tinakas ya, at ing Ilug ning Jordan tiknang na ing agus na.

⁴ Linundag la ding bunduk anting lalaking tupa, at ding talimunduk anting biserung tupa.

⁵ Dagat, nanu ing milyari keka? Obat tinakas ka? Ilug ning Jordan, obat tiknang mu ing agus mu?

⁶ Ikong bunduk, obat mipalundag kayung anting lalaking tupa, at ikong talimunduk anti ding biseru da?

⁷ Galgal ka, O mabilug a yatu king paniatang ning Ginu; arapan ning Dios nang Jacob,

⁸ gagawa yang ilug karing batu, at papalto yang mamagus a danum ibat karing batu.

115

¹ Keka, O Ginu, bukud mung keka, at e kekami mangaintulid ing dangalan at ligaya, uling alang kupas ing lugud mu at katapatan.

² Oneng ding bansa kukutang da kekatamu: Nu ya karin ing Dios yu?

³ Ing kekaming Dios atyu karin banua; daraptan na itang buri nang daptan.

⁴ Kabang ding dios da gintu la mu at pilak; gewa da la ring karelang gamat.

⁵ Atin lang asbuk, oneng e no man makapagsalita; atin lang mata, oneng e no man manakit;

⁶ atin lang balugbug, oneng e no man makaramdam, atin lang arung, oneng e no man makabau.

⁷ Atin lang gamat, oneng e no man makatagkil, atin lang bitis, oneng e no man makalakad, katiting mang siwala e la makagawa.

⁸ Deta sanang ginawa karela maging kalupa da la, at pati na detang manalig karela.

⁹ O balen Israel, ing Ginu ya ing kekang panaligan. Ya ing keka babie kasaupan at kambilan.

¹⁰ Ikayung pari a lahi nang Aaron, ing Ginu ya ing kekong panaligan, uling ya ing kekayu babie kasaupan at kalasag.

¹¹ Ikong gagalang king Ginu, ya ing kekong panaligan. Ya ing kekayu babie kasaupan at kalasag.

¹² Ing Ginu e na katamu malyaring kalinguan; bendisyunan na katamu ngan, ding memalen ning Israel bendisyunan na la, at pati na ding pari a lahi nang Aaron.

¹³ Bendisyunan na la ning Ginu ding ating takut gawang pamikasala, malati la man o maragul.

¹⁴ Parakalan na ko sana ning Ginu pati na ding maging anak da ring anak yu.

¹⁵ Bendisyunan na kayu sana ning Ginu, ing linalang king banua at yatu!

¹⁶ Ing banuang maleparan king Ginu ya mu, oneng karing tau binie ne ing yatu.

¹⁷ Ding mete e re malyaring apurian, detang miras na king marimlang kutkutan.

¹⁸ Oneng itamung mabie ing Ginu kekatamu yang purian ngeni at king kapilan pa man. Purian ya ing Ginu!

116

¹ Kaluguran ke ing Ginu, uling pakiramdaman nang panalangin ku.

² Pakiramdaman na ku neng mamaus ku king Ginu; inya ya ing kakung ausan anggang ating kung inawa.

³ Inyang atyu ku king panganib, at malapit na king kutkutan, mikatmuan kung takut ampon kagutgutan.

⁴ Kanita minaus ku king lagyu ning Ginu. Ngaku, O Ginu, makisabi kung mayap, iligtas mu ku!

⁵ Mapaglunus ya ing Ginu at makatuliran; ing kekatamung Dios, Dios yang malunusan.

⁶ Ingatan na la ning Ginu detang alang akarapat; inyang atyu ku king panganib ya ing kaku sinagip.

⁷ Magtiwala ka king Ginu, O kaladua ku, uling ing Ginu dakal ing mayap a depat na para kaku.

⁸ Linigtas na ku king kamatayan; ing lua kung mamagus pinulis na ngan, at e na ku pepaburen meraig king kabiguan.

⁹ King arap ning Ginu karin ku mibiebie.

¹⁰ Ya pa mu rin ing kakung pagkatiwalan, agyamang ngakung sinabi, Lubus kung milugmuk king kasakitan.

¹¹ At neng atyu ku king kagutgutan kakung sasabian, Ala kang ayasahan king ninuman.

¹² Nanu ing malyari kung ayampang king Ginu, uli ning sablang mayap a depat na kaku?

¹³ King Ginu kakung iyampang alak a maniaman bilang kapasalamatan king binie nang kaligtasan.

¹⁴ King katipunan ding memalen na ding pangaku ku king Ginu kaku lang tuparan.

¹⁵ Panamdaman na ning Ginu, nung ing metung karing memalen na mate ya.

¹⁶ O Ginu, aku ing kekang talasuyu, susuyuan da ka antimo ing pamaniuyu na keka ning kakung ima. King kamatayan linigtas mu ku.

¹⁷ Keka kakung ibie ing ain-ning- kapasalamatan, at ampanganan king kakung panalangin.

¹⁸ Ding kakung pangaku king Ginu kaku lang tuparan; king katipunan ding kekang memalen,

¹⁹ king santuaryu ning Templo mu karin Jerusalem. Purian ya ing Ginu!

117

¹ Ikong sablang bansa, ing Ginu purian ye sa. Purian ye ikong sablang tau keti king yatu. fig,,,,,Ikong sablang bansa, ing Ginu purian ye sa.,(117:1)fig*

² Uling maragul ing lugud na kekatamu ngan, at ing katapatan na manatili king kapilan pa man. Purian ya ing Ginu!

118

¹ O munie kayung kapasalamatan king Ginu, uling mayap ya; wagas ing lugud na at alang angga.

² Ding memalen ning Israel bustan sabian da, Wagas ing lugud na at alang angga.

³ Ding pari ning Dios bustan yung sabian da, Wagas ing lugud na at alang angga.

⁴ Ding sablang sasamba king Ginu, bustan yung sabian da, Wagas ing lugud na at alang angga.

⁵ Inyang atyu ku king kagutgutan minaus ku king Ginu; pekibatan na ku at linigtas na ku.

⁶ Nung ing Ginu atyu ya king kakung siping ala kung pitakutan; ing ninumang tau kaku ala yang arapat nanuman.

⁷ Ing Ginu ya'ng sasaup kaku; akit ku lang masambut ding kapate ku.

⁸ Masanting e palak ing magtiwala king Ginu kesa king kalupang tau.

⁹ Masanting e palak ing magtiwala king Ginu kesa karing pamuntuk da ring tau.

¹⁰ Pedurutnan da ku ding kalaban, oneng king lagyu ning Ginu kaku la ngan deigan.

¹¹ Nu ku man lumawe makapadurut la kaku, oneng king lagyu ning Ginu kaku lang simbut!

¹² Anti lang putakti a linusub kaku, mitatau lang kalupa ning talahib; oneng king lagyu ning Ginu gisan ku la ngan!

¹³ Maibug kung miragsa inyang gipitan da ku, ing Ginu dininan na kung kasaupan.

¹⁴ Gagawan na kung mayupaya at masikan ning Ginu; ya ing babie kaligtasan kaku.

¹⁵ Kekong pakiramdaman ing masayang kantahan ning tagumpe ding king tolda da ring memalen ning Dios. Ngara, Ing mayupaya nang gamat ning Ginu ya ing makirapat kaniti!

¹⁶ Ing upaya na ya'ng minie tagumpe king kekatamung pamakilaban karing kalaban.

¹⁷ E ku mate, nune mie ku ban sabian lang depat ning Ginu.

¹⁸ Perusan na kung mabayat ning Ginu, oneng e na peintulut ing mate ku.

¹⁹ Ibuklat yu la ding pasbul ning Templo; lungub ku at pasalamat king Ginu!

²⁰ Iti pasbul ne ning Ginu; deta mung makatuliran ilang keti daralan.

²¹ Ginu, ika ing kakung pasalamatan, uling kakung panalangin kekang pekibatan layun mu kung pepagtagumpayan.

²² Ing sikuil dang batu ding manalakad bale, ya naman ing linto pekamasalese.

²³ Ing Ginu ya ing makirapat kaniti, at tune makapagmulalang lalawan!

²⁴ Iti ya ing aldo tinatag ning Ginu; sukat tamung tumula at magsaya!

²⁵ Iligtas mu kami sana, O Ginu, iligtas mu kami! Papagtagumpen mu ing sablang lakad mi!

²⁶ Itang daratang king lagyu ning Ginu, bendisyunan ne sa; ibat king Templo tanggap yang bendisyun!

²⁷ Ing Ginu ya ing Dios; meging maganaka ya kekatamu! Kabang tatalan tamung sangang tanaman, pagmulan ing piesta at maglakad tamung makapadurut king altar.

²⁸ Ika ing kakung Dios, at keka pasalamat ku; isalita ku ing kekang degulan.

²⁹ O munie kayung kapasalamatan king Ginu, uling mayap ya; wagas ing lugud na at alang angga.

119

¹ Mapalad la detang malinis a pamibiebie; detang mamintu king kautusan ning Ginu.

² Mapalad la detang tutupad king tuntunan na, detang mamintu king mabilug dang pusu,

³ e la darapat king e mayap, nune tutuntun la king dalan na.

⁴ Binie mu la kekami ding kekang kautusan ban kekami lang tuparan king mitmung kaingatan.

⁵ Mananu na sanang manatili kung tapat karing utus a kaku mu patupad!

⁶ E ku mipakarine nung ding kekang kautusan pagsikapan ku la ngan tutuparan.

⁷ King mabilug kung pusu ikang purian kabang kaku lang pagaralan ding kekang kayatulan.

⁸ Ding kekang tuntunan kaku lang tuparan; e mu ku sana lubus lalakuan!

⁹ Makananu yang makapanatiling malinis a bie ing lalaking kayanakan? Ing keyang daptan ya ing tuparan na lang kekang kautusan.

¹⁰ Pagkapilitan da kang suyuan king mabilug kung pusu; e mu paintulut ing kaku lang labagan ding kekang kautusan.

¹¹ King kakung pusu karin ku la selikut ding kekang kautusan ban keka e ku mikasala.

¹² O Ginu, pupurian da ka; kekang tuntunan kaku ituru mu la.

¹³ Ulit-ulitan ku lang sabian masikan ding sabla mung kautusan.

¹⁴ Maygit kung pitutulan ing tupad karing kekang kautusan kesa ing tumipun dakal a pibandian.

¹⁵ Kaku lang pagaralan ding kekang tuntunan; ding turu mu kaku lang isipan.

¹⁶ Tutula ku karing utus mu; e ku la kalinguan ding kekang amanu.

¹⁷ Maging maganaka ka sa kakung talasuyu mu ban e ku mate, ban makatupad ku karing amanung kekang binie.

¹⁸ Mata ku keka lang ibuklat ban kaku lang akit ding makapagmulala nang katutuan ning kekang kautusan.

¹⁹ E ku magluat keti king yatu, inya e mu la sasalikut kaku ding utus mu.

²⁰ Maragul ing pamagnasa ning kakung kaladua, king kapilan man abalu ko sanang kekang kautusan.

²¹ Keka lang sasabianan ding palalu; isumpa mo ding e mamintu karing utus mu.

²² Idayu mu ku kareting mapaninsultu at mapaglibak a tau, uling pamintuan ku lang utus mu.

²³ Mipulung la ding mamuntukan ban misabisabi lang laban kaku, makanyan man kaku lang pegaralan ding kekang tuntunan.

²⁴ Ing tula ku ila ding kekang kautusan; ilang kaku babie kausukan.

²⁵ Mesambut ku't makapase king gabun; antimo ing pangaku mu ibangun mu ku.

²⁶ Ing sablang kakung depatan keka pigtapat ku ngan, at kekang pekiramdaman; kaku ituru mu lang kekang tuntunan.

²⁷ Saupan mu kung kaku lang aintindian ding kekang kautusan, at ding dapat mung pagmumulalan kakung isip-isipan.

²⁸ Ing kalungkutan daraigan na ku; pasiknangan mu ku agpang king pengaku mu.

²⁹ Ing malili ku e mu sa paintulutan; king mitmung kayapan kaku ituru mong kekang kautusan.

³⁰ Pinili ke ing dalan ning kapamintuan; ding kekang kautusan e ku la kakalinguan,

³¹ Ginu, tiparan ku la ngan; e mu ku sana paburen mipapakarine.

³² E ku mipaindatun anggang e ko ngan atuparan ding kekang kautusan, uling ing pamanalastas babie mu naman.

³³ O Ginu, ituru mu la kaku ding kabaldugan ding kekang kautusan, at kaku lang pamintuan king kapilan pa man.

³⁴ Dinan mu kung kabiasnan ban king mabilug kung pusu kaku lang atuparan ding kekang kautusan.

³⁵ Papanatilian mu kung mamintu karing kekang kautusan, uling kareti ing ligaya kakung tatanggapan.

³⁶ Saupan mu kung magnasang tupad karing kekang tuntunan, at aliwa ing pikualtan ya ing kakung sisikasuan.

³⁷ E mu paintulut ing sikasuan ku la ding bage a alang kabaldugan, at kalupa ning pengaku mu mipala ku sa.

³⁸ Tuparan mu ing pengaku mu kaku a kekang talasuyu; itang pangaku mu karing keka mapamintu.

³⁹ Sagkan mu ing insultu a kakung pitatakutan; ding sablang kekang kautusan mayap la ngan!

⁴⁰ Aku, pagnasan ku lang tuparan ding kekang kautusan; bayung bie kekang babie uli ning kekang katuliran.

⁴¹ Ipakit mu kaku, O Ginu, ing maragul a lugud mu kaku, at iligtas mu ku antimo ing pengaku mu.

⁴² Kanita ding kaku maninsultu karela atin kung ipakibat, uling amanu mu kaku lang pagkatiwalan.

⁴³ Saupan mu kung maniabi king katutuan kapilan man, uling magtiwala ku karing kekang kayatulan.

⁴⁴ Kaku lang tuparan ding kekang kautusan ngeni at king kapilan pa man.

⁴⁵ Mibiebie kung mitmung kalayaan, uling pagkapilitan ku lang tuparan ding kekang kautusan.

⁴⁶ Karing ari kaku lang sabian ding kekang kautusan, at iti e ku pikarine dit' man.

⁴⁷ Ding kekang kautusan a kakung pakamalan tula ing kakung kakamtan.

⁴⁸ Gagalangan ku la't palsintan ding kekang kautusan; kekang tuntunan kaku lang isip-isipan.

⁴⁹ Ing pengaku mu kaku a kekang talasuyu, e mu sana kakalinguan, uling iti yang kaku babie kapanayan.

⁵⁰ King kakung kasakitan mipaligayan ku, uling migdalang bie ing pengaku mu.

⁵¹ Parati da kung insultuan ding palalu, makanyan man ala kung lebagan karing kekang kautusan.

⁵² Ginu, potang agaganaka ku la detang minuna mung payu, kaligayan ing kakung kakamtan.

⁵³ Mimimua kung e mu nanu potang ding e mayap a tau lalabag la karing utus mu.

⁵⁴ King kekaban niting makuyad a bie ku, kanta gagawa ku tungkul karing kautusan mu.

⁵⁵ Ginu, neng bengi ika ing kakung gaganakan, at kaku lang isip-isipan kekang kautusan.

⁵⁶ King pamanupad ku karing kekang kautusan kaligayan ing kakung kakamtan.

⁵⁷ Ika mung bukud ing pagnasan ku, O Ginu; pangaku kung mamintu karing utus mu.

⁵⁸ King mitmung kataimtiman keka kakung pakisabing mayap ing lunusan mu ku antimo ing pengaku mu.

⁵⁹ Sinuri ku ining kakung pamirapatdapat; mangaku kung karing kautusan mu tupad.

⁶⁰ Mamirapal ku ban ing panaun e masayang king pamamintu karing kekang kautusan.

⁶¹ Agyang ginapus da ku ding taung tampalasan, ding kekang kautusan e ku la rin kelinguan.

⁶² Mibabangun ku neng kapitangan bengi ban kakung purian ing makatuliran mung kayatulan.

⁶³ Kakaluguran ku la ding sablang susuyu keka, at ding sablang mamintu karing utus mu.

⁶⁴ O Ginu, king lugud mung alang kupas mitmu ya ing meto yatu; ding kekang kautusan ituru mu la kaku.

⁶⁵ Ginu, kekang tiparan ing pengaku mu, at maganaka ka kakung talasuyu mu.

⁶⁶ Didinan mu kung beluan at kabiasnan, uling kaku lang pagkatiwalan ding kekang kautusan.

⁶⁷ Inyang e mu ku pa perusan, melili ku, oneng ngeni amanu mu kakung tutuparan.

⁶⁸ Maganaka ka at mitmung kayapan! Kaku ituru mu lang kekang tuntunan.

⁶⁹ Pawang kalaraman ing piniabi ra tungkul kaku, sisiran da ku ding taung palalu; kekang kautusan kaku lang pamintuan king mabilug kung pusu.

⁷⁰ Ding taung deti ala lang aintindian, oneng aku liligaya ku king kekang kautusan.

⁷¹ Mekakayap kaku ing dinalan kung kasakitan, uling kaku lang apagaralan ding kekang kautusan.

⁷² Ipaigit ku la ding utus mu king pilak at gintu niting yatu.

⁷³ Ika ing linalang at mimingat kaku; dinan mu kung kabiasnan ban kaku lang apagaralan ding kekang kautusan.

⁷⁴ Panakit da kaku ding keka gagalang magsaya la ngan, uling ing kekang amanu yang kakung pagkatiwalan.

⁷⁵ Balu ku, O Ginu, king e la mangabiran ding utus mu; uli ning kekang katapatan perusan mu ku.

⁷⁶ Bustan mung ing alang kupas a lugud mu yang mamatula kaku antimo ing kekang pengaku kaku a kekang talasuyu.

⁷⁷ E ku mate nung ing lunus ibie mu kaku, uling tutula ku karing kautusan mu.

⁷⁸ Mangapakarine la sa ding taung palalu, uli ning maling bintang da kaku; aku naman ding tuntunan mu ilang isip-isipan ku.

⁷⁹ Detang ating takut at gagalang keka lumapit la kaku; lumapit la ding sablang makibalu karing kautusan mu.

⁸⁰ Sana ganap ku lang atuparan ding kekang kautusan ba kung e mipakarine, at akua ku ing tagumpe.

⁸¹ Meinip na kung manenaya, O Ginu, ban iligtas mu ku; manalig ku king kekang amanu.

⁸² Mapagal na ku matang manaya king pengaku mu, at ngakung kukutang, Kapilan mu ku kaya saupan?

⁸³ Ala kung silbi kalupa ning mebusbus a balat pilulanan alak; makanyan man, e ku la kelinguan ding kekang kautusan.

⁸⁴ Angga kapilan ya mibata ining talasuyu mu? Kapilan mu la parusan ding gugulu kaku?

⁸⁵ Ding taung palalu a e tutupad karing utus mu, ginawa lang kulkul ban karin da ku inabu.

⁸⁶ Guguluan da ku deting tau king karelang pamaglaram; ding kekang kautusan tune lang apagkatiwalan, inya aku sana ing kekang saupan.

⁸⁷ Digsu da na ku mu apate, oneng ding kekang kautusan e ku la rin peinggulutan.

⁸⁸ Uli ning lugud mung alang kupas, sikasuan mu ku sa ban ding utus mu kaku lang atuparan.

⁸⁹ Ing amanu mu, O Ginu, manatili kapilan man, ala yang kayangganan karin king banua.

⁹⁰ Ing katapatan mu manatili king sablang panaun; binili me ing yatu king lugal na at manatili ya pa.

⁹¹ Angga ngeni ing sabla atyu, uling iti utus mu, pablasang ing sabla susuyu keka.

⁹² Nung e mu king tulang kakung kakamtan karing kekang kautusan, mete ku sana uli ning kasakitan.

⁹³ Ding kekang kautusan kapilan man e ku la kalinguan, uling ilang pasari kening kakung bie.

⁹⁴ Iligtas mu ku, uling bandi mu ku, at uling migkapilit kung mamintu karing utus mu.

⁹⁵ Abatan da ku ding taung e mayap ba ra kung paten, oneng ding kekang kautusan kaku lang pagaralan.

⁹⁶ Abalu ku king ing sabla ating kawakasan, oneng ding kekang kautusan tune lang alang kayangganan.

⁹⁷ Tune keng pakamalan ing kekang kautusan; aldo't bengi kaku yang pagaralan.

⁹⁸ Ing kekang kautusan gagawan na kung mas biasa kesa karing kakung kalaban, uling kayabe keng utus mu kapilan pa man.

⁹⁹ Maygit ing pamanalastas ku kesa karing kakung talaturu, uling kaku lang pagaralan ding kekang tuntunan.

¹⁰⁰ Maygit ing kakung kabiasnan kesa karing makatua, uling ding kekang kautusan kaku lang tutuparan.

¹⁰¹ Lalabanan ku ing sablang tuksu, ban apamintuan ku ing amanu mu.

¹⁰² E ku la kelinguan ding kekang tuntunan, uling ika mismu ing talaturu ku.

¹⁰³ Kayumu rang pilalasan ding kekang amanu! King pulut-panilan maygit la king yumu!

¹⁰⁴ Darakal ing kakung kabiasnan a manibat karing kekang kautusan, inya ing e ustung dapat kakung pikakasaman.

¹⁰⁵ Anti yang sulu ing amanu mu a makiabe king paglakad ku, at sala yang saslag king kakung daralanan.

¹⁰⁶ Tuparan ke ing masusi kung pangaku: ing mamintu karing makatuliran mung kautusan.

¹⁰⁷ Tutung mabayat ing kasakitan ku, Ginu; e mu ku sa paburen mate antimo ing pengaku mu.

¹⁰⁸ Tanggapan mu, O Ginu, ing kapasalamatan a keka babie ku, layun ituru ding kekang kautusan kaku.

¹⁰⁹ Makasadia kung parati ban itaya ining bie ku, oneng e ke kakalinguan ing utus mu.

¹¹⁰ Ginawa lang bitag para kaku ding taung e mayap, oneng ding kekang kautusan e ku la selangsangan.

¹¹¹ Ding kekang tuntunan ilang bandi kung alang kapupusan; ilang bukud makaligaya kaku.

¹¹² Inari ku king lub ku king tukian ku lang kekang kautusan angga king oras ning kakung kamatayan.

¹¹³ Kaku lang pikakasaman ding taung salawahan, oneng ding kekang utus ilang tune kung pakamalan.

¹¹⁴ Ika ing kakung salikutan at kambilan; ing kekang pangaku yang kakung pagkatiwalan.

¹¹⁵ Kawani kayu kaku, ikong darapat e mayap. Ding utus ning Dios ku ilang pamintuan ku.

¹¹⁶ Pasiknangan mu ku antimo ing pengaku mu at e ku mate; e mu paintulut ing mabigu ya ing kapanayan ku.

¹¹⁷ Ingatan mu ku at e ku numanu balang, at pagsikapan ku lang parating tuparan ding kekang kautusan.

¹¹⁸ Keka lang tatanggian ding e mamintu karing kekang tuntunan; ding mapamirait dang tangka mumuling alang kabaldugan.

¹¹⁹ Tuturing mu lang anting basurahan ding taung darapat e mayap, inya aku naman kaku lang pakamalan ding kekang kautusan.

¹²⁰ Uli mu mitatakutan ku; kaku lang pitatakutan ding kayatulan mu.

¹²¹ Kakung depatan ing mayap at ing matulid; e mu ku sana paburen karing kakung kalaban.

¹²² Ipangaku mung saupan me ing kekang talasuyu; e mu paintulut ing gipitan da ku ding taung palalu.

¹²³ Mengaslak na lang kakung mata king pamanaya king pamagligtas a pengaku mu kaku.

¹²⁴ Daptan mu kaku ing aduan ning alang kupas a lugud mu; kekang kautusan keka lang ituru kaku.

¹²⁵ Aku talasuyu mu ku; dinan mu kung kabiasnan, ban kaku lang aintindian kekang tuntunan.

¹²⁶ Oras na, Ginu, ban kimut ka, uling utus mu lalabagan da la.

¹²⁷ Maygit king gintu at gintung puru ing lugud ku karing utus mu.

¹²⁸ Inya kaku lang tutukian sabla mung tuntunan, oneng kasaman ku ing e matulid a kararaptanan.

¹²⁹ Tune lang makapagmulala ding kekang turu; inya pamintuan ku la king mabilug kung pusu.

¹³⁰ Babie sala karing tau ing pangapalino ding kekang amanu, at babie kabiasnan karing alang balu.

¹³¹ Anti kung susunga uling sabik ku lang pagnasan ding kekang kautusan.

¹³² Balikdan mu ku at lunus ibie mu kaku antimo ing sadia mung daraptan karing malugud keka.

¹³³ Agpang king kekang pengaku, e mu ku paburen mananabu; e mu ku paisaul king e mayap.

¹³⁴ Iligtas mu ku karing taung mapanalipit, ban kekang kautusan kaku lang atuparan.

¹³⁵ Binendisyunan mu ku king kapamilatan ning panga-atyu mu, at ding utus mu ituru mo kaku.

¹³⁶ Balamu ilug a mamagus king lupa ku ing lua, uling ding utus mu e da la pamintuan ding aliwa.

¹³⁷ O Ginu, tune banal ka at ding utus mu makatuliran la.

¹³⁸ Ding binie mung tuntunan tutu lang e mangabiran at makatuliran.

¹³⁹ Balamu aping milalablab ing mua ku uling ding kalaban ku e la tutupad karing utus mu.

¹⁴⁰ Mesubuk king tutu ing pangaku mu, inya naman iti kakung pakamalan!

¹⁴¹ Malati ku mu at e pibuburian, oneng e ku la kakalinguan ding kekang kautusan.

¹⁴² Ing kekang katuliran manatili kapilan man; kapilan man ing kekang kautusan tune katutuan.

¹⁴³ Mengatmu ku mang kasakitan at kaguluan, oneng inatdanan da kung tula ding kekang kautusan.

¹⁴⁴ Ding kekang tuntunan e la mangabiran kapilan man; didinan mu kung beluan ban ining bie e miyangganan.

¹⁴⁵ Ginu, taimtim ku lub mamaus keka, pakibatan mu ku sana, at ding utus mu tuparan ku la.

¹⁴⁶ Keka mamaus ku, iligtas mu ku at pamintuan ku lang utus mu.

¹⁴⁷ Bayu ya pa datang ing abak, ika na ing kakung ausan; ing pangaku mu ya'ng kakung asahan.

¹⁴⁸ Makakera ku, oneng kabukas makagising ku ban kaku lang isip-isipan ding kekang tuntunan.

¹⁴⁹ Ginu, bosis ku keka sanang pakiramdaman, alang-alang king alang kupas a lugud mu; lunusan mu ku at ingatan me ining kakung bie.

¹⁵⁰ Lalapit la ding manggulu kaku, deti tau lang e bitasang tutupad king kekang kautusan.

¹⁵¹ Oneng ika, Ginu, malapit ka kaku, at manatili la ding utus mu.

¹⁵² Deting tuntunan mu kanita pang panaun a minuna balu ku na la; papanatilian mu la king kapilan man.

¹⁵³ Lawan mu ing kasakitan ku layun ikabus mu, uling e ku la kakalinguan ding utus mu.

¹⁵⁴ Idipensa mu ku at iligtas; antimo ing pengaku mu kaku.

¹⁵⁵ E la miligtas ding makasalanan, uling e da la pamintuan ding kekang kautusan.

¹⁵⁶ Oneng maragul ing lunus mu, O Ginu; pakit mu ing lunus mu at ikabus mu ku!

¹⁵⁷ Dakal la ding kalaban ku at manlupig kaku, makanyan man e ku sasalang tutupad karing utus mu.

¹⁵⁸ Masusumami ku neng akakit ku la ding taksil, uling ding utus mu e da la pamintuan.

¹⁵⁹ Lawan mu, pakamalan ku la ding kekang kautusan; agpang king lugud mung e mibabayu, inya ikabus mu ku.

¹⁶⁰ Ing suma na ning kekang kautusan ya ing katutuan, at ding sabla mung tuntunan manatili la kapilan man.

¹⁶¹ Ding mayupayang mamuntukan guguluan da kung alang bitasang kasangkanan, oneng pamintuan ku la mu rin ding kekang kautusan.

¹⁶² Ding kekang pangaku makaligaya la kaku; anti ku king taung mekatuklas dakal a pibandian.

¹⁶³ Kasaman ku at kasusumamian ing kalaraman, oneng kaluguran ke ing kekang kautusan.

¹⁶⁴ Pitung besis patingapun pupurian da ka, uling ding kekang kayatulan makatuliran la.

¹⁶⁵ Atin lang ganap a kapayapan ding malugud king kekang kautusan; alang makatakid nanuman karela ngan.

¹⁶⁶ Asahan ku ing iligtas mu ku, O Ginu, at itang utus mu pamintuan ku.

¹⁶⁷ Kaku lang pamintuan ding kekang tuntunan, at tune ku lang pakamalan.

¹⁶⁸ Pamintuan ku la ding kekang kautusan at aral; balu mu ing sabla kung daraptan.

¹⁶⁹ O Ginu, miras sa king kekang arapan ing aduan kung kasaupan! Anti ing pengaku mu, dinan mu kung kabiasnan.

¹⁷⁰ Miras sa keka ing panalangin ku, at iligtas mu ku antimo ing pengaku mu.

¹⁷¹ Parati da kang purian, uling tuturu mu lang kekang tuntunan.

¹⁷² Ing amanu mu kaku yang ikanta, uling ding kautusan mu matulid la.

¹⁷³ Parati ka sanang makasadiang sumaup kaku, uling pamintuan ku la ding utus mu.

¹⁷⁴ Ginu, tune kung pagnasan ing kekang pamagligtas! Tutula ku king kekang kautusan.

¹⁷⁵ Dinan mu kung bie ba ra kang apurian, at bustan mung ding kekang kautusan kaku ilang munie kasaupan.

¹⁷⁶ Mengari ku king tupa a mebating; ining kekang talasuyu keka ya sanang panintunan, uling e ku la kelinguan ding kekang kautusan.

120

¹ Inyang magugulu ku, minaus ku king Ginu at pekibatan na ku.

² Iligtas mu ku, O Ginu, karing taung malaram at mapaglinlang.

³ Nanung daptan na kekayu ning Dios, O taung malaram? Nanung parusang ibie na kekayu?

⁴ Ding paslung mataram ding kawal at mibabayang uling ilang dugpa kekayu!

⁵ Ing mabibie libutad yu kasing karok ne ning mabibie king Meshech o libutad ding memalen king Kedar!

⁶ Malambat na kung tutung mibiebie libutad ding taung masama king kapayapan.

⁷ Tau kung malugud king kapayapan, oneng potang iti ya ing pisabian gera ing karelang kaburian!

121

¹ Iyatna ku la ding kakung mata karing bunduk-bundukan nung nukarin manibatan ing kakung kasaupan.

² Ing Ginu ya'ng sumaup kaku, ing Ginung mengawa king banua at yatu.

³ E na paintulut ing mitisud ka; parati yang makagising ing mimingat keka.

⁴ Wa, ing mimingat king Israel e ya mipapaiglip o matudtud man.

⁵ Ing Ginu ya ing bante mu; siping mu atyu ban keka magdipensa.

⁶ King patingapun ing aldo e na ka panasakitan o ing bulan kekaban ning kabengian.

⁷ Ingatan na ka ning Ginu king sablang panganib; ilisia na ka king sablang disgrasya.

⁸ Ingatan na ka king kekang pamaglako angga na king pamagbalik mu ngeni at king kapilan pa man.

122

¹ Mesaya ku inyang sinabi ra kaku, Tara, munta tamu king bale ning Ginu! fig,,,,,Tara, munta tamu king bale ning Ginu!,(122:1)fig*

² At ngeni atyu ta na makatalakad kilub ding pasbul ning Jerusalem!

³ Iting Jerusalem, kasanting na, kaayus na king pangalarin na!

⁴ Karin pupunta la ding lahi, ding lahi ning Israel ban pasalamat king Ginu antimo ing inutus na.

⁵ Karin ding ari ning Israel lukluk la, ban matul karing sasakupan da.

⁶ Ipanalangin ye ing kapayapan ning Jerusalem king Ginu. Minawa la sana detang malugud keka!

⁷ Ing kapayapan manatili sana kilub ding pader mu, at masanting a kabiayan kilub ding kekang palasyu.

⁸ Alang-alang karing kamaganak at kaluguran ku, keka Jerusalem, sabian ku, Ing kapayapan manatili keka!

⁹ King uli ning Templo ning Ginung kekatamung Dios penalangin ku ing kekang kasaplalan.

123

¹ Keka yatna ku la dening kakung mata, keka a makalukluk king tronu king banua.

² Kalupa ning ipus a lalaki o babai a magtiwala king ginu na, makanyan kaming magtiwala keka, O Ginung kekeng Dios, angga king lunusan mu kami.

³ Malunus ka sana kekami, O Ginu; malunus ka sana kekami, tutu nang dakal ing kalibakan a kekeng tinggap.

⁴ Tutu da na keng malambat insultuan ding taung dakal a pibandian, at umisan ding mayabang.

124

¹ Nung ing Ginu e ya migpanig kekatamu, nanu kaya ing mepalyari? Makibat ka ngeni, O Israel!

² Nung e na katamu penigan ning Ginu inyang ding kalaban lisuban da katamu,

³ magkang penakmul da ka tamung mabie, uling maragul ing kasbu da kekatamu;

⁴ ing agus ning albug tiki na katamu sa at pepalbug,

⁵ linumud na kata sa ning mabilis a agus.

⁶ Pasalamatan ta ya ing Ginu; e na peintulut ing pamuksan da katamu ding kalaban.

⁷ Anting ayup miligtas tamu king inumang dang bitag; mesira ya ing bitag at miligtas tamu.

⁸ Ing saup tamu atyu king lagyu ning Ginu, ing linalang king banua at yatu.

125

¹ Ding taung magtiwala king Ginu kalupa re ing Bunduk ning Zion a kapilan man e matugun at midusug.

² Nung makananu lang makapadurut ding bunduk king Jerusalem, makanyan neng padurutnan ning Ginu ing keyang balen ngeni at king kapilan man.

³ Uling ding e mayap e no man mamahala kabang-kaba king bansa ding makatuliran; miyawa la namang gawa king e mayap.

⁴ Ginu, kayapan ing ibie mu karing taung mayap a daraptan, karetang tapat karing kekang kautusan.

⁵ Potang parusan mu la ding taung e mayap, iyabe mu la ding painggulut karing kekang kautusan. Ing kapayapan manatili king Israel!

126

¹ Inyang binalik na kami ning Ginu karin Jerusalem balamu wari maninap kami mu.

² Sasagakgak kami at magkanta king tula mi. Kanita ngarang sinabi ding bansang manakit, Ing depat ning Ginu karela binang makapagmulala.

³ Tune ping makapagmulala ing depat na para kekami; mesaya kaming e mu nanu!

⁴ Minawa ke sanang pasibayu, O Ginu, anting danum a babie ning uran karing melanging ilug.

⁵ Detang menangis inyang tatanam la, kailangan lang magsaya ngening pupupul la! fig,,,,,...kailangan lang magsaya ngen ing pupupul la!,(126:5)fig*

⁶ Detang tatangis kabang daralan da ing bining itanam da, magbalik lang magkanta king tula kabang sasaka ra ing pupul da!

127

¹ Nung aliwa ing Ginu ing mitalakad king bale, alang ulaga ing gewa da ring manalakad-bale. Nung ing Ginu e ne ingatan ing siudad, alang kabaldugan ing pamagbante da ring guardia.

² Baket paipagal ka pang manintunan, migigising maranun at magpuyat? Ing Ginu e no paburen ding kaluguran na kabang matudtud la.

³ Ding anak regalu lang ibat king Ginu; tune lang bendisyun a binie na.

⁴ Anti la mong paslu king gamat ning kawal ding anak a lalaking ayanak ning tau king kayanakan na.

⁵ Mapalad ya ing taung dakal a paslu king lulanan na; e ya masambut potang arapan no ding keyang kalaban king lugal ning piukuman.

128

¹ Mapalad la ding taung mamintu king Ginu, at mibiebie tutupad karing keyang kautusan!

² Mangabiayan ka king bunga ning kekang kapagalan; maging masaya ka at minawa ka bie.

³ King pibalebale mu ing kekang asawa mangari ya king ubas a mabunga; ding anak mu mangari lang makapadurut a olibong tanaman.

⁴ Makanyan yang mipala ing taung mamintu king Ginu.

⁵ Ing Ginu bendisyunan na ka sa manibat king Zion; akit mu sanang minawa ya ing Jerusalem king kekaban ning bie mu.

⁶ Kumaba ka sa bie ban pati apu akit mu! Ing kapayapan manatili king Israel!

129

¹ Sabian mu, Israel, nung makananu da kang linupig ding kapate mu ibat na inyang anak ka.

² Manibat inyang anak ku pa mu ding kapate ku gilu da na ku at pepasakitan; oneng kapilan man e ra ku deigan.

³ Malalam lang tabak ding king gulut ku digpa, serulan a taldawa ing meging kalupa na.

⁴ Oneng ing Ginu, ing makatuliran, linigtas na ku king panga-alipan.

⁵ Mananu na sanang ding sablang masama king Zion mangapakarine la, at mangapaurung la.

⁶ Paburen lang maging kawangis ning dikut karing babo bale; langi na la bayu ra akuang tumubu.

⁷ Alang manipun o manaptas man.

⁸ Karing lalabas alang sumabi, Bendisyunan na ka sa ning Ginu! Bendisyunan da kayu king lagyu ning Ginu!

130

¹ Manibat king kalalalaman mamaus ku keka, O Ginu,

² pakiramdaman me ing aus ku at ing pamaniawad ku king saup mu!

³ Nung tatandanan mu la mu ding kekeng kasalanan, ninu ing e miyatulan?

⁴ Oneng ika patawaran mu kami, nung inya kailangan da kang pamintuan.

⁵ Sabik kung manaya king Ginu, uling panaligan ku itang pengaku mu.

⁶ Panayan ke ing Ginu; maygit king pamanaya na ning bante king paniatang ning abak fig,,,,,... maygit king pamanaya na ning bante king paniatang ning abak.,(130:6)fig* Wa, maygit king pamanaya na ning bante king paniatang ning abak.

⁷ Israel, magtiwala ka king Ginu; ing lugud na alang kupas, at parati yang makasadiang magligtas.

⁸ Iligtas ne ing Israel a balen na king sabla nang pamikasala.

131

¹ Ginu, ala na kaku ing nanumang katasan lub; likuan ku na ing sablang kapagmaragulan. E ku no panintunan pa ding bage makarangal o nanumang bage lampas king agyu kung isipan.

² Kontentu ku at payapa bili, kawangis ning bingut king kandungan nang ima na panatag ku lub.

³ Inya, Israel, magtiwala ka king Ginu, ngeni at king kapilan man!

132

¹ O Ginu, i David e me sa kakalinguan, at ing sablang delanan nang kasakitan.

² Ganakan mu sana itang pengaku na keka; itang penata na keka, O Mayupayang Dios nang Jacob.

³ Ngana, E ku muli king kakung bale o magkera king kakung katri;

⁴ e ku magpaynawa o matudtud

⁵ anggang e ke apagawang tuknangan na, ing Mayupayang Dios nang Jacob.

⁶ Abalitan mi king karin Betlehem atyu ya karin ing Kaban ning Kasunduan, at king marangle ning Jearim karin mi ya atuklasan.

⁷ Ngami, Tara munta tamu king bale ning Ginu; tara samba tamu arap nang tronu!

⁸ Me keni, Ginu, at lungub ka king kekang tuknangan, kayabe ning Kaban ning Kasunduan ning kekang kayupayan, keti manatili ka king kapilan pa man.

⁹ Ding kekang pari ing matulid ya sanang karelang gawan; kekang memalen king tula kulisak la sana!

¹⁰ Kang David a talasuyu mu atin kang pengaku; ing pinili mung ari e me sana tatanggian.

¹¹ Kang David tapat mung pengaku, at e mu painggulutan ing binie mung amanu. Ngamu, Ing metung karing anak mu maging ari ya, at ya ing manalili keka.

¹² Nung ding anak mu king kasunduan tupad la, at karing kautusan a babie ku karela, kanita ding anak da naman maging ari lang kekang kasalisi angga king kapilan man.

¹³ Pinili ne ning Ginu ing Zion; buri neng maging keyang tuknangan.

¹⁴ Ngana, Karin ku tuknang kapilan man; karin ku gampanan ing pamag-ari ku.

¹⁵ Labis-labis kung ibie ing kailangan na; ding kalulu nang memalen pakabsian ku la.

¹⁶ Papagtagumpen ku ing sablang gagawan ding pari na; magkanta la at kulisak king tula ding sablang memalen na.

¹⁷ Karing lahi nang David palto kung metung a aring marangal, at papanatilian keng mamahala ing kakung pinili.

¹⁸ Pamakarinayan ku la ding kalaban na, oneng ing kayarian na sumulung ya at misaplala.

133

¹ Kasampat na at kalagung lalawan potang ding memalen ning Dios misasanmetung la ngan! fig,,,,,Kasampat na at kalagung lalawan potang ding memalen ning Dios misasanmetung la ngan!,(133:1)fig*

² Mengari king larung mabanglu king buntuk mitugtug, at managlus karing balbas at talab ning baru nang Aaron.

³ Mengari king ambun king Bunduk ning Hermon a mananabu karing bunduk-bundukan ning Zion. Karin ing Ginu pengaku na ing bendisyun na, king bie a alang angga.

134

¹ Meko keni, ikong talasuyu na, ikong susuyu kabukas king Templo na, lumapit kayu at purian ye ing Ginu.

² Itas yu lang gamat yu neng manalangin kayu kilub ning Templo na, at purian ye ing Ginu!

³ Mananu na sanang karin king Zion, ing Ginung linalang king banua at yatu bendisyunan na kayu.

135

¹ Purian ye ing Ginu! Purian ye ing keyang lagyu. Purian ye, ikong king Ginu susuyu,

² ikong susuyu kilub nang Templo ning kekatamung Dios.

³ Purian ye ing Ginu uling mayap ya. Magkanta kayung kapurian king lagyu na uling maganaka ya!

⁴ Pinili ne i Jacob maging bandi na, ing balen ning Israel ban maging sarili nang bandi.

⁵ Balu ku king ing Ginu maragul ya; igitan na la ding sablang dios-diosan.

⁶ Daraptan na itang sablang buri na keti king yatu o karin banua, king dagat o king kalalaman na.

⁷ Ya ing paratang king biga ibat karing suluk ning yatu; ya ing pasari king kildap neng babagyu, at papalual king angin king keyang pisisinupan.

⁸ Karin Ehipto sablang pangane pete na la anak a pangane ding tau at sese dang animal.

⁹ Karin dinapat yang milagru at bage makapagmulala, ban parusan ne ing Ari at ding opisyal na.

¹⁰ Dakal lang bansa ding gisan na; aring mayupaya pete na la.

¹¹ Antimo i Sihon a ari ding Amoreo, at i Og a ari ning Bashan, at ding sablang ari king Canaan.

¹² At binie na ing karelang gabun karing memalen na; king balen Israel binie na ngan.

¹³ O Ginu, mipasiag kang Dios king kapilan pa man; sablang lahi e ra ka kalinguan.

¹⁴ Ingatan na la ning Ginu ding memalen na; ding talasuyu na lunusan na la.

¹⁵ Ding dios-diosan da ring bansa megawa la king gintu ampon pilak; gewa da la ring taung magaling a pangamat.

¹⁶ Atin lang asbuk, oneng e no man makapagsalita; atin lang mata, oneng e no man manakit bitasa.

¹⁷ Atin lang balugbug, oneng e no man makaramdam; atin lang asbuk, oneng e no man mangisnawa.

¹⁸ Detang ginawa at magtiwala karela, maging kawangis da la sana detang dios-diosan a gewa ra!

¹⁹ O memalen ning Israel, purian ye ing Ginu; ikong pari ning Dios, purian ye ing Ginu!

²⁰ Ikong Levita, purian ye ing Ginu! Purian ye, ikong sablang ating takut king Ginu!

²¹ Ing Ginu kekayu yang purian, ing Ginung atyu king Zion, king Jerusalem a keyang tuknangan! Purian ya ing Ginu!

136

¹ Pasalamat kayu king Ginu uling mayap ya; uling ing lugud na alang angga.

² Pasalamat kayu king Dios da ring sablang dios; uling ing lugud na alang angga.

³ Pasalamat kayu king Ginu da ring sablang ginu; uling ing lugud na alang angga.

⁴ Ya mung bukud ing makarapat karing maragul at makapagmulalang milagru; uling ing lugud na alang angga.

⁵ King kabiasnan na lelangan ne ing malapad at matas a banua; uling ing lugud na alang angga.

⁶ Ya ing mitalakad king yatu libutad ning danuman; uling ing lugud na alang angga.

⁷ Ya ing linalang king aldo at king bulan; uling ing lugud na alang angga.

⁸ Lelang ne ing aldo ban sunlag kilub ning patingapun; uling ing lugud na alang angga.

⁹ Lelang ne ing bulan at ding batuin ban sunlag neng bengi; uling ing lugud na alang angga.

¹⁰ Pete na la king Ehipto ding sablang pangane; uling ing lugud na alang angga.

¹¹ Liwal ne king Ehipto ing balen ning Israel; uling ing lugud na alang angga.

¹² Liwal ne ing balen na kapamilatan ning mayupaya nang gamat; uling ing lugud na alang angga.

¹³ Pinitna ne ing Dagat da ring Timbu; uling ing lugud na alang angga.

¹⁴ At delakit na lang memalen na; uling ing lugud na alang angga.

¹⁵ Oneng ing ari ning Ehipto at ding sundalus na linumud na la; uling ing lugud na alang angga.

¹⁶ Inantabayanan na lang memalen na king paglakbe ra king disyerto; uling ing lugud na alang angga.

¹⁷ Pete na lang aring mayupaya; uling ing lugud na alang angga.

¹⁸ Ding aring pikabaluan gisan na la ngan; uling ing lugud na alang angga.

¹⁹ I Sihon a ari ding Amoreo pete ne; uling ing lugud na alang angga.

²⁰ Pete nia naman i Og a ari ning Bashan; uling ing lugud na alang angga.

²¹ Ing karelang gabun binie na karing memalen na; uling ing lugud na alang angga.

²² Binie na kang Israel a talasuyu na; uling ing lugud na alang angga.

²³ E na katamu kelinguan inyang mesambut tamu; uling ing lugud na alang angga.

²⁴ Linigtas na katamu karing kalaban tamu; uling ing lugud na alang angga.

²⁵ Babie yang pamangan karing tau at animal; uling ing lugud na alang angga.

²⁶ Pasalamat kayu king Dios ning banua; uling ing lugud na alang angga.

137

¹ Karing pampang ding ilug ning Babilonia karin kami pakalukluk, at manangis inyang agaganaka mi ya ing Zion.

² Karing tanaman a tutubu karin mi la sinabit ding kekeng alpa.

³ Ding memihag kekami inawad da ing magkanta kami ban patulan mi la; Ipagkanta yu kami, ngarang sinabi, metung a kanta tungkul king Zion.

⁴ Makananu mi yang ikanta ing kanta ning Ginu king bansa da ring dayuan?

⁵ Nung kalinguan da ka, O Jerusalem, e na ku sa makapanigtigan pa!

⁶ E na ku sana makapagkanta pa sakaling kalinguan da ka, nung aliwa ika ing ituring kung maragul diling tula king bie ku!

⁷ Ganakan mu sa, O Ginu, ing gewa da ring tau Edom kanitang mebihag ya ing Jerusalem. Ganakan mu nung makananung ulit-ulitan dang sasabian, Lasakan ya at iragsa angga king gabun!

⁸ Mibagsak ka naman, Babilonia. Mapalad ya itang mablas keka king sablang kekami mu gewa!

⁹ Mapalad ya itang damput karing anak mung bingut ban karing batu ipukul!

138

¹ King mabilug kung pusu pasalamatan da ka, O Ginu; arapan da ring anghel magkanta kung kapurian keka.

² Arapan ke ing banal mung Templo; duku ku at purian ing kekang lagyu, uling pepakilala mu king sablang bage makapaygit ya ing lagyu at kautusan mu.

³ King aldo minaus ku, ika pekibatan mu ku; mismung sikanan mu ya ing binie mu kaku.

⁴ Ding sablang ari ning mabilug a yatu purian da ka, O Ginu, uling dimdam do ring pangaku mu.

⁵ At karelang ikanta ing depat mu, at ing degulan ning ligaya mu.

⁶ Atyu ka king Kakataskatasan, ding mababa lub keka no mang ingatan, at keka e la makasalikut ding palalu.

⁷ Makapadurut ku man king kagutgutan; ining bie ku keka yang ingatan. Kalaban kung mua kaku keka lang sasabatan, at liligtas mu ku kapamilatan ning upaya mu.

⁸ Tuparan mung sablang kekang pangaku; ing alang kupas a lugud mu, O Ginu, alang kayangganan; ing bage kekang pegumpisan keka munamang pupupusan.

139

¹ O Ginu, sinuri mu ku at kakilala mu ku!

² Balu mu ing sablang gagawan ku; agyang keng marayu aintindian mu ing isipan ku.

³ Akakit mu ku, magobra ku man o makapaynawa; balu mu ing sablang gagawan ku.

⁴ Bayu ne pa asabi ning asbuk ku ing amanu, balu mu na ing sabian ku.

⁵ Atyu ka king makapadurut kaku, at king kekang upaya ingatan mu ku.

⁶ Alang makalingad king bie ku keka; ing kabiasnan mu lalagpas king kaisipan ku.

⁷ Nu ku mo malyaring munta ban takasan da ka? Nukarin da ka malyaring asalikutan?

⁸ Mukiat ku man king banuang matas atyu ka karin; nung magkera ku man king tuknangan da ring mete, karin atyu ka mu rin!

⁹ Sulapo ku man lampas king aslagan, manuknangan ku man king pekamalaut a lugal king albugan,

¹⁰ karin atyu ka ba mu kung tairan; atyu ka karin ban aku ing kekang saupan.

¹¹ Malyaring aduan ku king dalumdum ing isalikut na ku o kaya king sala a makapadurut kaku ing maging dalumdum,

¹² oneng ing dalumdum e maralumdum keka, ing bengi masalang antimong aldo. Ing sala at ing karalumduman parehu keka.

¹³ Ika ing linalang king sablang dake ning katawan ku; inubug mu ku king atian nang ima ku.

¹⁴ Pasalamatan da ka uling kailangan kang pitakutan, at pagmumulalan ing dapat mu! Balu ku iti king mabilug kung pusu.

¹⁵ Inyang miyuyubug ku king mitmung kaingatan king atian nang ima ku, inyang daragul ku king palanakan, ita keka e lihim.

¹⁶ Balu mu ing kaba ning bie ku, uling iti makasulat king libru mu bayu ku pa man magumpisang mangisnawa, inyang deti metung man ala pang linto.

¹⁷ O Dios, e ku la abut isipan ding isipan mu; karakal dang tuto!

¹⁸ Nung kaku lang bilangan, maygit la kabilangan kesa karing binutil. At nung miras na ku king karelang angganan, atyu ku pa mu rin king kekang siping.

¹⁹ O Dios, sana gisanan mu na lang e mayap a tau! Sana lakuan da na ku ding taung tampalasan!

²⁰ Ding taung deti e mayap ing sasabian da tungkul keka; magsalita lang e mayap a bage laban king lagyu mu.

²¹ O Ginu, tutu ku lang kasaman detang ating mua keka! Pikakasaman ku la detang keka lalaban!

²² Kasaman ku la king mabilug kung pusu; bibilang ku lang anting kakung kalaban.

²³ Surian mu ku, O Dios, at pakibaluan mung isipan ku; subukan mu ku at kilalanan ing kakung isipan.

²⁴ Lawan mu nung ating e mayap kaku, at tairan mu ku king dalan papunta king bie alang angga.

140

¹ Karing e mayap a tau iligtas mu ku, O Ginu; karing tampalasan ingatan mu ku.

² Parati lang mitatangkang e mayap; ing pamipate ya ing karelang kapad.

³ Ding dila ra anti lang ubingan a kamandagan; ding karelang amanu anti lang kamandag ning kamamalu.

⁴ Ingatan mu ku, Ginu, king upaya ding taung e mayap; ilisia mu ku karing taung tampalasan a magnasa king kakung kasiran.

⁵ Ding palalu misadia lang metung a silu para kaku; binili da na la ding bitag da, at karing gasgas makayumang la ding kaku paniakap da.

⁶ Sasabian ku king Ginu, Ika ing kakung Dios. Pakiramdaman mung pamaniawad kung kasaupan, Ginu!

⁷ O Ginu a masikanan kung Talapaglualu, iningat mu ku king labanan.

⁸ E mu binie ing parasan da ring taung e mayap; e mu paintulut magtagumpe ing e mayap dang kapamalakan.

⁹ E mu la paintulutan magtagumpe ding kalaban ku; baldug mu karela itang e mayap dang banta laban kaku.

¹⁰ Manabu sana karela ing uling a mibabaya; mabaldug la sana king malalam a kulkul at e na misaka kapilan man.

¹¹ E sana magtagumpe ing bintang ding malaram; makatagal sana ing e mayap king tampalasan ban na lang pamuksan.

¹² Ginu, balu ku ika ing mimingat karing kalulu, at king matulid da ring mangailangan.

¹³ Ding banal purian da ka pin; mie la king kekang arapan.

141

¹ Mamaus ku keka, Ginu; magmalagua mu ku sanang saupan! Tingiran mu sana ing dalung ku keka.

² Sana tanggapan mu ing panalangin ku antimong mabanglung insenso, at ding gamat kung makatas king panalangin antimong pambenging ain-sakripisyu.

³ Ginu, mibili kang bante king asbuk ku a magbante karing pasbul ding labi ku.

⁴ Ipangilag mu ku king pamagnasang gawang kasalanan, at king pamakiabe karing taung darapat e mayap. Kapilan man e ku sa makisulu karing karelang pamangan.

⁵ Ing mayap a tau malyari na kung parusan o sabianan, iti bunga ning mayap nang pilubluban; oneng kapilan man e ku tanggapan ing kapurian ding e mayap a tau, uling alang tuknang manalangin ku laban king e ustu dang pamaniaptan.

⁶ Potang ding pamuntuk da pagnabu da la karing mabatung libis, kanita ding sabla tanggapan da king tutu la ding kakung amanu.

⁷ Kalupa na ning tanaman a mekutud at mepirasu, makanyan lang misambulat ding butul da angga na king labi ning kutkutan da.

⁸ Manatili kung magtiwala keka, O Ginung Dios, pagnasan ku ing ingatan mu ku; e mu paintulut ing mate ku.

⁹ Pangilag mu ku karing silu a inumang da para kaku, lubus mu kung ilisia karetang bitag a sidia da kaku deting e mayap a tau.

¹⁰ Deting taung e mayap ila sana ding marakap karetang sidia rang silu kaku kabang aku naman lumabas kung e man ninanu.

142

¹ Mamaus kung maniawad saup king Ginu; king Ginu manalangin ku,

² darala kung sablang aduan ku king Ginu; ipagtapat ku king Ginu sablang kagutgutan ku.

³ Potang lumapit na kung sumuku balu na ing kailangan kung daptan. Ding kalaban ku inumang de ing silu para kaku king gasgas a daralanan ku.

⁴ Potang lumawe ku siping ku, ala kung akakit makasadiang sumaup kaku; ala metung mang magdipensa kaku. Ala na metung mang magmalasakit kaku.

⁵ Ginu, mamaus kung maniawad saup keka; ika, O Ginu, ing kakung santungan, ika mung bukud ing nasa ku kabilugan ning bie ku.

⁶ Tingiran mu ing pamaniawad kung kasaupan, uling milako na ing kakung kapanayan. Iligtas mu ku karing gugulu kaku; masikan lang e palak kaku.

⁷ Iligtas mu ku kening kakung kagutgutan; kanita libutad ding memalen mung makatipun purian da ka, uli ning ganaka mu kaku.

143

¹ Tingiran mu ing panalangin ku, O Ginu; pakiramdaman mu ining kakung panalangin uli ning makatuliran ka; pakibatan mu ku uling tapat ka!

² E mu ku yayarap keka ban kekang litisan; tau ke ngan makasalanan king kekang arapan.

³ Kalaban ku e na ku tiknangan tutukian at lubus na kung deigan. Binili na ku king madalumdum a sukulan, at meging kawangis ko ding mete king panaun a milabasan.

⁴ Inya maibug na kung sumuku; milako ing kakung kapanayan.

⁵ Gaganakan ku la ding aldo milabas; gaganakan ku ing sablang kekang depat, isip-isipan ku ing sablang gewa mu.

⁶ Tatas ku la keka dening kakung gamat king panalangin; kalupa ning malanging gabun kakau ya keka ining kakung kaladua.

⁷ Mamalagua kang makibat kaku, O Ginu! Mepupus na ing sabla kung kapanayan. E me sasalikut ing sarili mu kaku, nung ali kayabe ku karetang manabu king tuknangan da ring mete.

⁸ Ipaganaka mu kaku balang abak ing lugud mung alang kupas, uling keka ku magtiwala! Ding panalangin ku miraras la keka; ituru me ing dalan a kailangan kung tuntunan.

⁹ Iligtas mu ku, O Ginu, karing kakung kalaban! Keka linapit kung manintun salilungan!

¹⁰ Uling ika ing Dios ku; ituru mu kung mamintu king kaburian mu! Maging maganaka ka sa kaku, karing dalan a alang panganib patnubayan mu ku.

¹¹ Alang-alang king pangaku mu, O Ginu, iligtas me ing bie ku. King kekang kayapan anguan mu ku karing kakung kagutgutan!

¹² Uli ning lugud mu kaku paten mu lang kalaban ku, at gisanan mu la ding sablang manalipusta kaku uling talasuyu mu ku.

144

¹ Purian ya ing Ginu, ing kakung talaingat! Sasane na ku king pamakilaban; sasadia na ku king labanan.

² Ya ing kakung kuta at talaingat, ing kakung santungan at talapagligtas; lubus kung tiwala king Ginu, at miligtas ku. Bibili na la lalam kung upaya ding bansa.

³ Ginu, nanu ya wari ing tau? Ba't keka yang papansinan? Tau ya mu, ba't keka yang gaganakan?

⁴ Ing tau anti yang tiup ning angin; anti yang aninong lalabas ing bie na.

⁵ O Ginu, ibuklat me ing banua at kuldas ka; tagkilan mu lang bunduk at masuk la.

⁶ Payaslagan mu ing kildap at ding kalaban keka lang isambulat; ibugnus mu lang paslu mu at papulayan mo ngan.

⁷ Abutan mu ku manibat ken banua; sagipan mu ku king danum a malalam, iligtas mu ku king upaya da ring dayuan.

⁸ Pawang kalaraman ing sasabian da; malaram la agyang sinumpa lang maniabi king katutuan.

⁹ Bayu yang kanta, O Ginu, ing ikanta ku keka; bagayan ke king lira kung apulu kwerdas.

¹⁰ Ika ing babie tagumpe karing ari; ika ing mililigtas kang David a talasuyu mu.

¹¹ Iligtas mu ku karing tampalasan a kakung kalaban; iligtas mu ku king upaya da ring dayuan, pawang kalaraman ing karelang sasabian; malaram la agyang sinumpa lang maniabi king katutuan.

¹² Dening anak ming lalaki king karelang kayanakan kawangis da sana maragul at malabung a tanaman, at ding anak ming babai matimyas la sanang asias a paniuluk anting palamuti karing palasyu.

¹³ Karing miyayaliwang pupul kumatmu la sana ding kekeng bangan, at ding tupa naman karing marangle laksa-laksa la sanang manganak.

¹⁴ Ding sese tamung baka dakal la sana; e la sa kamamaten anak o makikikuan. E na sana maramdam ing tangis ning lungkut at dusa karing kekatang dalan.

¹⁵ Mapalad ya ing bansa nung makanyan ing malilyari king sakup na; mapalad la ding memalen, nung ing Ginu ya ing Dios da!

145

¹ Ibalita ku ing kekang kamalan, O kakung Dios at Ari; alang angga ing pamipasalamat ku keka.

² Balang aldo pasalamatan da ka, at purian alang kapupusan.

³ Ing Ginu mayupaya ya at mangaintulid yang labis-labis a kapurian; ing kamalan na e mu agyung pakirasan.

⁴ Ing kekang dapat purian da manibat king metung a lahi angga na ketang katuki na; ibalita da ing mayupaya mung dapat.

⁵ Pamalita ding tau ing ligaya mu't kamalan, at ding makapagmulala mung daraptan ilang kakung isip-isipan.

⁶ Ipamalita ding tau ing mayupaya mung dapat, at ing kekang degulan kaku namang sabian.

⁷ Ibalita da ing sabla mung kayapan, at ikanta ing kekang katuliran.

⁸ Malugud ya at mapaglunus ing Ginu; banayad ya king pamimua, at maglapo king e kukupas ing lugud na.

⁹ Mayap ya lub ing Ginu karing sabla; ing lunus na atyu king sablang dapat na.

¹⁰ Ding sablang lelangan mu purian da ka, O Ginu, at ding memalen mu pasalamatan da ka!

¹¹ Ipamalita ra ing ligaya na ning kekang kayarian, at ing kekang kayupayan,

¹² ban ipakilala ra la ding sabla ding mayupaya mung dapat, at ing maligaya nang kamalan ning kekang kayarian.

¹³ Ing pamag-ari mu alang kapupusan; ari ka kapilan man. Tapat ya ing Ginu karing sabla nang pangaku, at maganaka karing sablang dapat na.

¹⁴ Sasaupan na lang magugulu, at tatalakad na la detang atyu king kabiguan.

¹⁵ Ding sabla makalawe la, at king Ginu manaya, at babie na karela ing pamangan king panaun a kailangan da.

¹⁶ Ing babie mu karela sobra-sobra; ibabie mu karing sabla ing kailangan da.

¹⁷ Makatuliran ya ing Ginu king sablang dapat na, at maganaka karing sablang dapat na.

¹⁸ Malapit ya ing Ginu karing sablang mamaus; mitmung katapatan.

¹⁹ Babie ning Ginu ing kapagnasan da ring sablang ating takut; pakiramdaman na naman ing saingsing da at liligtas na la.

²⁰ Ding sablang malugud king Ginu ingatan na la, oneng ding taung e mayap paten na la.

²¹ Parati keng pupurian ing Ginu; bustan sablang tau purian deng banal nang lagyu king kapilan pa man.

146

¹ Purian ya ing Ginu! Purian me ing Ginu, O kaladua ku!

² Purian ke ing Ginu kabang mabie ku; pagkanta ke ing Dios ku king kekaban ning bie ku.

³ E ka magtiwala karing mamuntukan a tau o king ninumang e makapagligtas keka.

⁴ Kamate ra magbalik la king alikabuk, at king aldong ita ing sablang balak dang gawan miyangganan.

⁵ Mapalad ya ing taung sasaupan na ning Dios nang Jacob, at magtiwala king Ginung Dios na,

⁶ ing miglalang king banua at yatu, at king dagat at king sablang atyu karela; tapat ya kapilan man.

⁷ Potang manatul ya, papanig ya karing malulupig, at babie yang pamangan karing danupan. Ing Ginu ya ing babie kalayaan karing bihag,

⁸ at pasalan na la mata ding bulag. Babangun na la ding mebigu; kaluguran na lang makatuliran.

⁹ Ingatan na la ning Ginu ding dayuan a manuknangan king kekatamung bansa; sasaupan na la ding mebalu at ulila, oneng ding balak da ring e mayap lalako na la.

¹⁰ Ing Ginu mag-ari ya king kapilan pa man, ing Dios mu, O Zion, mag-ari yang alang angga. Purian ya ing Ginu!

147

¹ Purian ya ing Ginu! Mayap ing magkantang kapurian king kekatamung Dios; masanting at masampat ing purian ya.

² Tatalakad neng pasibayu ning Ginu ing Jerusalem; titipunan na lang memalen nang miyugse karing aliwang bansa.

³ Ding mebigu pakayapan na la, at lalanggasan na lang sugat da.

⁴ Balu na nung pilan la ding batuin, at ausan ne ing balang metung king lagyu na.

⁵ Masikan ya at mayupaya ing kekatamung Ginu; ing kabiasnan na e mu asukdan.

⁶ Tatalakad na la ning Ginu ding mangadakurak, at babagsak na la king gabun ding taung e mayap.

⁷ Pagkanta yeng kapurian ing Ginu; panigtigan ye king alpa ing kekatamung Dios.

⁸ Ing banua tatakpan neng biga; ya ing babie uran king yatu; king dikut karing bunduk ya ing patubu.

⁹ Ya ing babie pamangan karing animal, at karing malutub a awak a sisiak.

¹⁰ E na la katulan ding masikan a kabayu; e na la naman katulan ding sundalung matapang;

¹¹ oneng manakit yang tula karetang babie kagalangan, karetang magtiwala king tapat nang lugud.

¹² Purian me ing Ginu, O Jerusalem! Purian me ing kekang Dios, O Zion!

¹³ Ya ing patibe karing kekang pasbul, at bendisyunan na lang kekang anak.

¹⁴ Ya ing babie kapayapan karing kekang angganan, at king mayap diling trigu karin na ka pakabsian.

¹⁵ Potang mutus ya, agad iting matutupad keti king yatu.

¹⁶ Antimong bulbul tupa ing yelung parala na; antimong alikabuk neng sasambulat na.

¹⁷ Bual-bual nang babagsak ing yelu, anti waring graba; ninu mo ing makapibata king dimlang pasari na?

¹⁸ Potang mutus ya, malalaso ing yelu; payanginan na at magus ya ing danum.

¹⁹ Parala na ing amanu na kang Jacob, ding tuntunan at kautusan na kang Israel.

²⁰ Karing aliwang bansa iti e na gewa, e ro akikilala ding utus na. Purian ya ing Ginu!

148

¹ Purian ya ing Ginu! Purian ye ing Ginu manibat ken banua, ikong manuknangan king katasan.

² Purian ye, ikong sablang anghel na; purian ye, ikong sablang sundalus na banua.

³ Aldo at bulan, purian ye; purian ye, ikong sablang saslag a batuin.

⁴ Purian ye, kakataskatasan a banua at ikayu, danuman babo banua.

⁵ Bustan yung ila ngan purian de ing lagyu ning Ginu! Minutus ya at melalang la;

⁶ king utus na mipilmi la lugal king kapilan pa man, at e la malyaring e mamintu.

⁷ Purian ye ing Ginu manibat ken king yatu, ikong dambuala king dagat, at sablang kalalalaman;

⁸ ikong kildap at uran-lipat, yelu at biga, at masikan a angin a mamintu king utus na.

⁹ Purian ye, ikong bunduk at bunduk-bundukan; ikong tanaman a mamunga at ikong kagubatan;

¹⁰ ikong sablang animal, matunud at malyap, ikong sablang gagapang at susulapo.

¹¹ Purian ye, ikong ari at sablang tau, prinsipi at sablang mamuntukan,

¹² ikong kayanakan a babai at lalaki, matua at pati na anak a malati.

¹³ Bustan mu lang purian de ing lagyu ning Ginu, uling ing lagyu na maygit ya karing sablang lagyu; ing ligaya na lalagpus king yatu at king banua.

¹⁴ Ya ing minie sikanan king bansa na, inya sabla nang memalen karela yang purian, ding memalen ning Israel a tutu nang pakamalan. Purian ya ing Ginu!

149

¹ Purian ya ing Ginu! Pagkanta yeng bayung kanta ing Ginu; purian ye libutad ding kapulungan ding tapat king Ginu.

² Tumula ka, Israel, uli ning kekang Talapaglalang; uli ning Ari mu, magsaya kayu, memalen ning Zion!

³ Purian ye ing lagyu na kapamilatan ning pamanerak; manigtigan kayu karing tambul at alpa, at purian ye.

⁴ Ing Ginu manakit yang tula karing memalen na; puputungan na la king tagumpe ding mapagpakumbaba.

⁵ Bustan mu lang magsaya ding memalen ning Dios king tagumpe ra; bustan mu lang matulang magkanta karing piesta ra.

⁶ Bustan mu lang kulisak masikan, pupuri king Dios, kabang tatalnan da la ding mataram a espada,

⁷ ban sambutan ding bansa at parusan ding memalen da;

⁸ ban igapus king tanikala ding ari da, ding mamuntukan da karing tanikalang bakal;

⁹ ban parusan la ding bansa antimo ing utus ning Dios. Iti ya ing tagumpe ning balen ning Dios. Purian ya ing Ginu!

150

¹ Purian ya ing Ginu! Purian ye ing Dios king Templo na! Purian yu ing sikanan na karin banua. fig,,,,,Purian ya ing Ginu!,(150:1)fig*

² Purian ye uli ding mayupaya nang dapat; purian ye uling sakdal ya degulan!

³ Purian ye king tiup ding trumpeta; purian ye kayabe ding alpa at lira!

⁴ Purian ye kayabe ding tambul at king terak; purian ye kayabe ding alpa at plauta!

⁵ Purian ye kayabe ding pandereta; purian ye kayabe ding kakalaksing a pandereta!

⁶ Purian ye ing Ginu, ikong sablang melalang! Purian ya ing Ginu!