1

¹ Ating metung a lalaki king sakup ning Uz a milagyuan Job; ala yang kapintasan at makatuliran ya. Metung yang taung ating takut king Dios at mangilag king e ustu.

² Pitu la ding anak nang lalaki at atlu la ding babai.

³ Atin yang pitung libung tupa, atlung libung kamelyu, limang dalan a paris a baka, limang dalan a gaindung asno ampon dakal a ipus. Ya ing mabanding dili karing tau king Aslagan.

⁴ Meging kaugalian da ring anak nang lalaki ing liwas-liwas lang magtau karing karelang pibalebale king aldo a mitutuk karela, at parati da lang kukumbirahan ding atlu rang kapatad a babai ban mangan at minum kayabe ra.

⁵ Itang abak a kayari ning karelang anda, maranun yang mibangun i Job at miyain yang ain-sakripisyu para karing balang metung karing anak na; pota ating karelang mikasala king e na sasarian at mekalapastangan ya king Dios.

⁶ Inyang datang ne ing aldo ban marap la king Dios ding lelangan ning banua, dinatang lang kayabe ra i Satanas.

⁷ Nganang kinutang ning Dios, Satanas, nukarin ka ibat? Pekibat nang Satanas, Ibat ku keta at karin; lilibutan ke ing yatu.

⁸ Ngana ning Ginu kang Satanas, Apansingan mu ne ing talasuyu kung i Job? Ala kang akit kalupa na king yatu. Tau yang alang kapintasan at makatuliran; atin yang takut king Dios at mangilag ya king nanumang e ustu.

⁹ Pekibat nang Satanas, Samban na ka mo kayang Job nung alang sangkan king pamanyamba na?

¹⁰ Manibat king ibat ingatan mu ne at ing pamilya na at ing sablang heganaganang pibandian na. Bibendisyunan mu ing heganaganang daraptan na at dininan meng baka a halus laganapan da ne ing mabilug a bansa.

¹¹ Subukan mung idayu ing heganaganang atyu kang Job at siguradung isumpa na ka.

¹² Ngana ning Ginu kang Satanas, Nung makanyan, bibili ku king kekang upaya ing heganaganang atyu kang Job; e mia mu panasakitan. Kaybat na nita meko ne king arapan na ning Ginu i Satanas.

¹³ Misan a aldo inyang ding anak nang lalaki at babaing Job mamangan la at miminum alak king bale ning pangane,

¹⁴ dinatang yang pupulayi ing magdalang balita kang Job. Ngana, Kasalukuyan mi ya pung sasarulan ing asikan karing baka at manyibsiban la ding asno king pipagpastulan,

¹⁵ inyang bigla lang linusub ding Sabeo at dela da la ngan. Pete da la ngan ding ipus yu. Bukud mung aku pu ing mekatakas ban mamalita kekayu.

¹⁶ Kabang magsalita ya pa, dinatang ne naman ing metung pang ipus at ngana, Mituran la pu king kildap ding tupa yu pati na ding pastul yu at mete la ngan. Bukud mung aku pu ing miligtas ban mamalita kekayu.

¹⁷ Kabang magsalita ya pa, dinatang ne naman ing metung pang ipus at ngana, Selakayan da ke pu ding atlung grupung Caldeo; dela da la ring kamelyu at pete ding kekong ipus subali mu aku. Bukud mu pung aku ing mekatakas ban mamalita kekayu.

¹⁸ Kabang magsalita ya pa, dinatang ne naman ing metung pang ipus at ngana, Ding anak yu pung lalaki at babai mamangan la at miminum alak king bale ning pangane,

¹⁹ inyang dinatang ya ing masikan a angin a ibat king disyerto. Digsa ne ing bale; mibagsak ya karing anak yu at mete la ngan. Bukud mu pung aku ing miligtas ban mamalita kekayu.

²⁰ Kanita tinalakad ya i Job; ginabak na ing imalan na uli ning lungkut na. Sitsat ne ing buntuk na, migsakab ya king gabun, at sinamba ya king Dios.

²¹ Ngana, Lubas ku inyang mibait ku at lubas ku naman keng mate ku. Ing Ginu ya ing minie at ya ing kinangua. Purian ya ing lagyu na ning Ginu! fig,,,,,Ing Ginu ya ing minie at ya ing kinangua.,(1:21)fig*

²² Makanyan man ing milyari, e ya mikasala i Job; e ne sinisian ing Ginu.

2

¹ Inyang datang yang pasibayu ing aldo ban marap la king Dios ding lelangan na ning banua, dinatang lang kayabe ra i Satanas ban marap king Dios.

² Nganang kinutang ning Dios, Satanas, nukarin ka ibat? Pekibat nang Satanas, Ibat ku keta at karin; lilibutan ke ing yatu.

³ Ngana ning Ginu kang Satanas, Apansinan mu ne ing talasuyu kung i Job? Ala kang akit kalupa na king yatu. Tau yang alang kapintasan at makatuliran; atin yang takut king Dios at mangilag ya king nanumang e ustu. Ganap pa mu rin ing kasalpantayanan na anti ing sadia agyamang inamun mu kung paintulutan da kang ipahamak me king alang kasangkanan.

⁴ Pekibat nang Satanas, Ibie na ngan ing heganaganang atyu king tau ba yang e mate.

⁵ Oneng nung panasakitan me ing katawan na, siguradung isumpa na ka.

⁶ Kanita ngana ning Ginu kang Satanas, Nung makanyan, atyu ne king lalam mung upaya, oneng e mia mu papaten.

⁷ Kaybat na nita meko ne king arapan ning Ginu i Satanas, at pepalto na la kang Job ding bayang mangatdas king mabilug nang katawan, manibat king talampakan na angga na king bumbunan na.

⁸ Linukluk ya king abu i Job, at kinangwa yang kapirasung kapsa ban pangayud na karing baya na.

⁹ Kanita ngana ning asawa na, O nanu, angga man ngeni atin ka pang katapatan king Dios antimo ing sadia? Obat e me pa isumpa ing Dios at saka na ka mate? fig,,,,,Obat e me pa isumpa ing Dios at saka na ka mate?,(2:9)fig*

¹⁰ Nganang mekibat Job, Makanyan lang magsalita ding babaing mangmang. Nung tatanggapan ta ing tula king Ginu, e ta wari sukat munamang tanggapan ing kalungkutan? Agyamang ketang daralanan nang kasakitan a ita ala yang sinabing laban king Dios i Job.

¹¹ Inyang abalitan da ring atlu nang kakaluguran ing heganaganang kapahamakan a miras kang Job, pikayari da ing dalawan de ban makirame at pasiknangan a lub. Deting atlu ila ri Elipas ning siudad ning Teman, Bildad ning sakup ning Suah, at i Zofar ning sakup ning Naama.

¹² Marayu la pa ikit da ne i Job, oneng e re akilala. Menangis lang masikan inyang akilala re, at uli na ning lungkut da ginabak da ing imalan da at mibili lang alikabuk king buntuk da.

¹³ Kaybat na nita, linukluk la king gabun siping nang Job kilub ding pitung aldo at pitung bengi, at alang migsalita metung man karela uli na ning ikit dang degulan na ning kasakitan a daralanan na.

3

¹ King katataulian biklat neng Job ing asbuk na at simpa ne ing aldo nang beitan.

² Nganang Job king Dios:

³ Paburen matda ya ing aldo kebaitan ku, pati na ing benging memalita, Anak a lalaki mipangagli ya.

⁴ Paburen yang aldong ita a maging maralumdum ya! Sana ing Dios babo e na ne panintunan pa ni aslagan ning sala.

⁵ Paburen bandian ne ning lungkut at ning dalumdum; paburen ding biga karin la magdatun; paburen ing karalumduman takpan ne ing aldo.

⁶ Paburen samsaman na ning karalumduman ing benging ita; paburen e ne tumulang miyabe pa karing aldo ning pabanua; paburen mung e ne mibilang pa karing bulan ning banua.

⁷ Wa, maging baug ya sana ing benging ita; ala sanang meramdam a masayang kulisak.

⁸ Paburen la ding maniumpa ing isumpa re ing aldong ita, detang biasang gumising king Leviatan.

⁹ Paburen maging maralumdum la ding batuin ning munag sumala na; paburen meng manayang alang panayan a sala, at e na na kapilan man akit pang datang ing sala ning abak.

¹⁰ Uli ning ing benging ita peintulut nang mibait ku pa, at karing kakung mata e na pimpanan ing kalungkutan.

¹¹ Baket kaya e ku pa mete kabait ku? Obat king atian nang ima ku e ku pa mete kalual ku?

¹² Obat kaya iningat na ku pa nitang ima ku king kandungan na? Obat pepasusuan na ku pa?

¹³ Nung mete na ku mu kanita sana ngeni makapaynawa na

¹⁴ kung abe ding ari at ding talaturu ning yatu a pepatalakad karing melasak a palasyu

¹⁵ o matudtud na sanang abe ding prinsiping karing gintu at pilak a bandi ra king bale ra kitmuan da la.

¹⁶ Obat kaya e da ku meging kalupa ding pungul a mibait mete na o ding bingut a e bitasang menakit king masala?

¹⁷ King kutkutan ding taung e mayap ala na lang arapat, at karin manakit lang kapaynawan ding taung mepagal.

¹⁸ Karin maging ding pakasukul abe-abe la king kapayapan; e da na damdaman ing kulisak ding mabagsik dang manibala.

¹⁹ Atyu la ngan karin ding maina at masikan, at malaya ya ing ipus king panginuan na.

²⁰ Obat ing bie mipagkalub pa king taung daralan kasakitan? Obat ing bie mipagkalub pa king magdusang kapait-paitan?

²¹ Panenayan na ing kamatayan oneng e naman daratang; minamayap na pa ing kutkutan kesa king nanumang pibandian.

²² Kulisak lang masikan king tula potang ing kutkutan karela neng dasan.

²³ Obat miyabie pa king tau ing sala nung makasalikut ne man ing dalanan na, ing kilungan na kilub ning Dios?

²⁴ Bukud na mung pangisnawang saldak ing kakung pamangan, at anting danum a mamagus ing kakung saingsing.

²⁵ Ing heganaganang kakung pitatakutan ya na pin man ing kaku daratang, at ing heganaganang kakung pangilagan ya na pin man ing kakung atatagpuan.

²⁶ Ala kung kapaynawan, ala kung karatunan; ing kagutgutan ku alang tuknang.

4

¹ Nganang migsalitang Elipaz, ing tau Teman:

² Nung ing ninuman magsalita ya keka, manamdaman ka kaya? Oneng e ku apibata ing e ku magsalita keka.

³ Lawan mu, dakal na la ding tiru mu, ikua mu lang apasikan a lub ding mangaina.

⁴ Tiru mu la karing kekang amanu detang miraragsa; maina tud keka lang pepatatag.

⁵ Baket mangainipan ka ngening keka miras iti; ngening ika mitagkilan ka, obat malilingasngas ka?

⁶ E wari ing takut mu king Dios ya ing kekang tiwala, at ing kalinisan ding dapat mu ila ding kekang kapanayan?

⁷ Misip ka ngeni, atin kang balung taung banal a mipahamak? Atin nang taung makatuliran a mipaburen?

⁸ Keng ikit ku, detang sinarul e ustu at sinalbag kaguluan, ita munaman ing karelang pipulan.

⁹ King pangisnawa na ning Dios mawala la; at king mikakalabkab nang mua magisan la.

¹⁰ Anting leon ding e mayap mamuangit la at mumungul, oneng ing Dios patahimikan na la; pamaklian na lang ipan da.

¹¹ Kalupa ding leon a alang apangan mate la at ding anak da misalbag la.

¹² Misan banayad miras kaku ing amanu, anting sitsit miras king balugbug ku.

¹³ Anti ing makatakut a paninap king kabengian e na ku mipatudtud.

¹⁴ ing takut kaku dinatang, ginalgal mabilug kung katawan.

¹⁵ King lupa ku ing angin sinagi ya; mengilabut ing mabilug kung katawan.

¹⁶ Ating makatalakad king arapan ku, e ya bitasang kikimut; linawe ke oneng e ku abitasa nung nanu ya; mistulang tahimik kanita inyang ing metung a siwala meramdam ya:

¹⁷ Atin na waring taung meyakit matulid arapan ning Dios o banal arap ning Miglalang?

¹⁸ Agyamang karing talasuyu na banua e na aibie ing tiwala na, agyang karing anghel na manakit yang kasalanan da;

¹⁹ lalu na ding lelangan na a manuknangan karing bale pila; mistulang alikabuk ing karelang ibatan a malyaring dunutan anting ayup-ayupan.

²⁰ Itang abak mabie la; bayu miras ing bengi mete la; ala mang makibalu.

²¹ Meyakua ing heganaganang atyu karela; mete la, oneng e ra mu rin kimtan ing kabiasnan.

5

¹ Job, maus ka; atin kayang makibat keka? Atin kayang anghel a kekang alapitan?

² Makamate ing kabalisan king mangmang, at ing kapangaririan king taung pangkaraniwan.

³ Ikit ku nung makananu yang panatag ing mangmang, oneng biglang-bigla mibagsak ya ing tuknangan na.

⁴ E na la manakit pang karatunan ding anak nang lalaki; ala mang karela talakad magdipensa arap ding ukuman.

⁵ Kanan da ring danupan ing pupul ning mangmang pati itang tutubu karing suksukan; ding mau buri dang kamkaman ing keyang pibandian.

⁶ E naman manibatan king alikabuk ing kasakitan; e munaman tutubu king gabun ing kaguluan.

⁷ King sarili na ning tau manibatan ing kaguluan na, kalupa ning king api manibat ing susulapo lipatu.

⁸ Nung aku mu ing atyu king bili mu, king Dios lumapit na ku.

⁹ Ing gagawan na marangal, e mu la abut isipan; makapagmulalang dapat na e mu la abilang.

¹⁰ Parala na king yatu ing uran, at paranuman na lang marangle.

¹¹ Tatas na la kabilian ding kalulu, at dirinan nong tula ding malungkut.

¹² Sasabatan na ing tangka da ring mapagsamantala, ban ing heganagana rang pamalak muli mu king ala.

¹³ Darakpan na la ding tosu king sariling bitag da, at ding paralan da agad miyayangganan la.

¹⁴ Agyamang ing aldo makaslag ya maralumdum ing darasan da, kakapkap la antimo king kabengian.

¹⁵ Oneng liligtas na la ning Dios ding kalulu king kamatayan; ipangilag na la ding mangailangan karing manalipusta.

¹⁶ Dirinan na lang kapanayan ding pakakalulu, at ding e mayap patahimikan na la.

¹⁷ Lawan mu, masaya ya itang sasabian na ning Dios, inya e ka sa mimimua, nung paniabianan na ka.

¹⁸ Uluan na la ding sigatan na; nung king gamat na menamdaman ka, king gamat na naman mipaldan ka.

¹⁹ Ulit-ulitan na kang ingatan king miyayaliwang kapanamdaman;

²⁰ king panaun ning danup e na ka paburen mate; at ilisia na ka king kamatayan king panaun ning gera.

²¹ Iligtas na ka king kamandag ning dila; potang ing kapahamakan keka daratang e mu pitatakutan ing keyang kasiran.

²² Keka yang kaylian ing kasiran at danup, at e pitakutan ding animal ning yatu.

²³ Milako ya batu ing marangle kekang sasarulan, ding animal ning marangle e da ka lusuban.

²⁴ Kanita payapa kang mie kilub ning kekang tolda; siasatan mu la ding kekang kawan at akit mu ing ala lang kulang.

²⁵ Akit mu ing dakal la ding anak mu, at ding lahi mu kasing dakal na la ning dikut ning yatu.

²⁶ Kalupa ning trigu a melulut king pun, ganap ka king ketuan potang miras ka king kutkutan.

²⁷ Siniasat mi iti at kekeng apagaralan king katutuan. Pakiramdaman mu at pakibaluan para king kekang kapakanan.

6

¹ Nganang mekibat Job:

² Nung malyari mu sanang mibili la king timbangan ding heganagana kung kaguluan pati na ing kaligaligan,

³ mayakit ing mabayat la kesa king balas ning dagat; makanyan kang e dapat magmulala king mapali kung pamagsalita.

⁴ Pakatusuk la kaku ding paslu ning Mayupayang Dios; kakalat king mabilug kung pangatau ing lasun dang e mu nanu. Makatalakad arap ku ing heganaganang makatakut ning Dios.

⁵ Ing asno panatag ya potang king dikut mamangan ya, at antimu rin ing baka neng makayarap ya king are na.

⁶ Ninu ing makapangan ketang tutung matabang? Ninu ing makalasa king maputi ning ebun?

⁷ Ala kung ganang tagkil king anti kanita, anti la mo king pamangan neng masakit ka.

⁸ Sana ing Dios ibie nang kakung kayaduanan.

⁹ Sana ing Dios paten na na ku.

¹⁰ Nung balu kung iti daptan na, magluksu ku king tula, nu man anti karagul ing sakit a ipagpa na. Balu ku king ing Dios banal ya; mamintu ku king kaburian na.

¹¹ Nanu wari ing sikanan ku ban manaya ku? Nanu wari ing kararasan ku ban mibabata ku?

¹² Ing sikanan ku wari sikanan de ring batu? O ing laman ku wari anti yang tangsu?

¹³ Ala na kung sikanan a mitagan pa ban iligtas ing kakung sarili; ala na kung alapitan ban aduanan kasaupan.

¹⁴ Kelinguan ke ing Dios o ali ke man, king anti kaniting kaligaligan kailangan ku la ding kakaluguran.

¹⁵ Oneng ikong kakung kakaluguran, ing kalupa yu batis a lilipas; mistulang kalalangian kabud ala nang uran.

¹⁶ Ding batis king panaun ning dimla baradu la king yelung atyu karela,

¹⁷ neng kaleldo mawawala la; king pali ning panaun lalangi la.

¹⁸ Ding maglakbe lakuan deng dalan da, ing batis yang panintunan da; king pamaglibut-libut da king ilang mawala la.

¹⁹ Manintun la ding maglakbe ibat Tema; manalig la ding maglakbe ibat Seba.

²⁰ Ing karelang tiwala linto alang kalma, uling ding batis a disnan da malangi la.

²¹ Kaku ngeni makanyan kayu: anti kayung malanging sapa; ikit yu ing kabiguan ku, king takut betingan yu ku.

²² Meniawad ku waring regalu kekayu o pasuhul ku wari kekayu?

²³ Pasagip ku wari king kalaban o payatbus king manalipusta?

²⁴ Ipakilala yu nung makananu kung mikasala; ituru yu ku at manahimik ku.

²⁵ Mayupaya la ding amanung magdalang katapatan, oneng ing sasabian yu pawang alang kabaldugan.

²⁶ Isipan yu king ing heganaganang kakung sasabian alang kabaldugan; obat kekayu lang pakibatan ding amanu kung maniambitan? fig,,,,,Isipan yu king ing heganaganang kakung sasabian alang kabaldugan.,(6:26)fig*

²⁷ Agyang ding ulila pipagbagutan yu la, kakaluguran pisali yu la naman ba kayung manakitan.

²⁸ Ngeni, lawan yu ku lupa; e ku maglaram king kekong arapan.

²⁹ Sinobra na kayu; e yu paintulut ing e makatuliran. E yu ku atulan; atyu ku king katuliran.

³⁰ Karing labi ku manakit kayung kalaraman? E ku wari balu ing mayap at ing e mayap?

7

¹ E wari king yatu ing bie ning tau anting pilit a pamagserbisyu? E wari ing bie nang daralanan kalupa na mu ning king upahan?

² Kalupa na mu ning ipus a magnasang salilungan o ning upahan a manayang bayaran.

³ Lalabas la ding pabulan ala lang kapupuntalan; ding kaku miyabie bengi pawa lang mitmung lungkut.

⁴ Ngakung kukutang potang magkera na ku: Kapilan ku mibangun? Uli ning ing bengi tutu yang makaba; kabukas bibiling ku anggang sasala.

⁵ Katawan ku mitmu yang ulad at dinat; maglangib yang kakung balat kaybat pasibayung mangatdas.

⁶ Ding aldo ku lalabas lang ala namang kapanayan, lalabas lang mabilis kesa king gamat ning gagawang imalan.

⁷ Ganakan mu, O Dios ko, king ing bie ku metung yang inawa; e na ku manakit pang tula kapilan man.

⁸ Itang mata na nitang lalawe kaku e na ku akit; panintunan da ku ding mata mu, oneng ala na ku.

⁹ Nung makananung ing biga matatda ya at mawawala, makanyan ya namang e na magbalik ing taung mete na.

¹⁰ King pibalebale na e ne magbalik pa; e da ne kakilala ding kayabe king bale na.

¹¹ Inya e ku malyaring manahimik. Magsalita ku pin uli ning sakit a kakung daralanan. Magreklamu ku pin uli ning mapait kung panamdaman.

¹² Aku wari ing ubingan ning dagat o ing dambuala nang mabagsik ban banten mu ku at tanuran?

¹³ Isipan ku mo ing kakera ku king kakung pagkeran mapawi nang sakit a kakung panamdaman.

¹⁴ Oneng ali uling king kakung paninap pamasdanan mu ku; karing vision pamatakutan mu.

¹⁵ Angga king buri ku pa ing mabite at mate kesa kening kabilian ning katawan kung mabie.

¹⁶ Kasaman ke ing bie ku; e na ku man mie kabang-kaba. Paburen mu na ku mung makanyan, ing bie ku ala nang kabaldugan. fig,,,,,Kasaman ke ing bie ku; e na ku man mie kabang-kaba.,(7:16)fig*

¹⁷ Nanu ya wari ing tau para keka? Baket dirinan meng maragul a ulaga, at ing pamisip mu pane makaukul king tau?

¹⁸ Balang abak keka yang daralawan, at balang penandit keka yang paniubukan.

¹⁹ Baket e mu ilako saguli kaku ding mata mu ban ining wawa king asbuk ayakmul ku.

²⁰ Ikang magbante karing tau, nung mikasala ku, nanu keka ing gewa ku? Baket apili mu kung kekang puntirian? Baket tutu kung makapangabayat keka?

²¹ Baket e mu pa patawaran ing kakung kasalanan, at panupaya ing maling kakung depatan? Saguli namu ikutkut da na ku, panintunan mu ku man, ala na ku.

8

¹ Nganang migsalitang Bildad, ing tau Suah:

² Nanu, ala nang kapupusan ing kekang pamagsalita? E na tuknang ing mayangin a pamagsalita mo?

³ Malyari waring ing Dios matulid yang ilisia na? Malyari waring ibaluktut na ning Mayupaya ing hustisia?

⁴ Nung ding anak mu mikasala la laban king Dios, tinggap da na ing kabayaran ning pamikasala ra.

⁵ Nung king Dios lumapit ka at makisabing mayap king Mayupaya,

⁶ nung matulid ka at kapintasan ala keka, datang ya at saupan na ka at kanawan king pibalebale mu keka ibie na.

⁷ Agyang kalulu mu ing kekang penibatan ding tauli mung aldo maging mabandi no man.

⁸ Aduan ku keka ing mangutang ka sana king panaun dang milabas ding kekang makatua, pagaralan mu nung nanu ing atuklasan da;

⁹ pablasang itamu kapilan ta pa mu, ala tamung kamalayan nanuman; ing bie tamu anting anino mung daralan.

¹⁰ Ituru da ka reti at sabian da keka itang heganaganang karelang beluan.

¹¹ Tumubu wari ing timbu nung nu alang sapa? Dagul la wari nung alang danum?

¹² Nung langi la danum ding sapa, kabang sagiwa la at e pa metabas ila ding munang malanta.

¹³ Makanyan la kararasan ding taung king Dios mangalinguan; ding alang Dios a katawan muling ala ing karelang kapanayan.

¹⁴ Ing tiwala na anti niang sinulad, ing kapanaligan na anti ya king bale ning babagua.

¹⁵ Nung magsandal ya king bale ning babagua adala nia? Nung kalawatan ne, atalakad ne nita?

¹⁶ Anti lang dikut ding taung e mayap lalam ning aldo lalsut la, ding suli da mabilug a mulahan katmuan da.

¹⁷ Yamut da karing batu pakakulaput la, karing balang batu pakakalawat la.

¹⁸ Nung keka lang putputan metung man alang makabalu king atyu la karin.

¹⁹ Wa, ya na ngan iti ing tula ding e mayap a lalaki, at kaybat da reti datang la ding karelang kayalili.

²⁰ Lawan mu, e na la lakuan ning Dios ding mayap ni saupan ding e mayap.

²¹ Misan pa karing pisngi milarawan ing timan, at karing labi mu ing kulisak ning tula maramdam.

²² Miras ing kamarinayan karing kekang kalaban, at ding tuknangan ding makasalanan mawala la ngan.

9

¹ Nganang mekibat Job:

² Wa, balu ku king makanyan pin. Makananu yang sumambut ing tau king kasu na laban king Ginu?

³ Nung ipilit ning ninuman ing makiargu ya king Ginu, agyang metung mu karing libu nang kutang ala yang malyaring apakibatan.

⁴ Ing Dios biasa yang tutu at mayupaya; alang taung makatalakad laban king Ginu.

⁵ Yayabe na la ning Ginu ding bunduk king e ra kamalayan, pamaligtad na la deti potang mimimua ya.

⁶ Potang ayun padala na la, mangakimut ya ing yatu king kabilian na; pagalgalan ne angga na king pundasyun na.

⁷ Ing Dios ya ing mumutus king aldo, at karing batuin ban ing sala pigilan da.

⁸ Ninu ing magdili-diling milantang king banua, at babo alun ning dagat miglakad pa?

⁹ Ing Dios ya'ng mibili king kabilian da ring batuin king banua, ing Saru, ing Orion, ding Pleiades, at ding batuin ning mauli.

¹⁰ E ta la abut mang isipan ding maragul nang daraptan. E la mabilang-bilang ding makapagmulala nang dapat.

¹¹ Daralan ya ing Dios siping ku, oneng e ke akakit. Sumulung ya man e ku man apansinan.

¹² Nung atin yang samsaman ninung makasabat? Ninu ing makakutang king Ginu: Nanu ing kekang gagawan?

¹³ E na pipigilan ning Dios ing mua na; kampun nang Rahab pakapase la king kabitisan na.

¹⁴ Makananu ke ngening pakibatan o mamiling amanung imatulid?

¹⁵ Agyamang ala kung kasalanan, e ku pa mu rin makiargu; maniawad na ku mung lunus king Dios a ukum ku.

¹⁶ At nung paintulutan na kung makiargu, e ku pa mu rin paniwalan ing makiramdam ya kaku.

¹⁷ Pablasang king metung mung bagyu lasawan na ku, paniugatan na ku king alang kasangkanan a balu ku.

¹⁸ E na ku dirinan mang panaun makapangisnawa; bagkus king kasakitan kakatmuan na ku pa.

¹⁹ Nung ing labanan tungkul king sikanan, ya na ing mas masikan; nung ing pisasabian keng ukuman ninu ing malyaring maus king Ginu?

²⁰ Tapat ku at alang kasalanan, oneng ding amanu ku ilang mangondena kaku, ing anggang sasabian ku ilang babie kayatulan king sarili ku.

²¹ Ala kung kasalanan, makanyan man parehu na kaku; kaku yang pikakasaman ing bie ku.

²² Metung mu ing heganagana; ita ya ing kakung sasabian, ing Dios parehu na lang siran ding ala o ating kasalanan.

²³ Mayli ya ing Dios potang ing kamatayan bigla yang datang king taung alang kasalanan.

²⁴ Miyabie ya ing yatu karing e mayap a tau. Tatakpan na la mata ding ukum. Nung aliwa ya ing Dios ing makirapat, ninu mo?

²⁵ Mabilis la pa king taung pupulayi ding aldo ku; king kabilis dang lilipas ala lang akakit a mayap.

²⁶ Anti lang bangkang mabilis babo ning danuman, anting susulapo a agila neng sasagmit yang pamangan.

²⁷ Nung sabian ku ing tuknang na kung daraing, at alilan ku na ing itsura ku, at timan ing mayakit king lupa ku,

²⁸ datang naman ing takut uli ning dakal kung kasakitan, uling balu kung e mu ku pa mu rin patawaran.

²⁹ Miyatulan ku pa mu rin king pamikasala; obat magmalasakit ku pa nung muli mung alang ulaga?

³⁰ Nung king sabun maglinis ku man at kakung gamat pakalinis-linisan,

³¹ oneng idagsa mu na ku man king mabuluk a pitak; agyang ing imalan ku kasuklaman na ku.

³² Uling ing Dios e ne man tau ban malyaring pakibatan ku, inya e kami malyari ikeng adua marap king ukuman.

³³ Alang malyaring mamilatan kekaming adua; alang matul kekami, king Dios at kaku.

³⁴ Nung ilako nia mu ing pamarug na arapan ku, at ilako na ing takut ku uli ning bigsikan na,

³⁵ kanita magsalita kung alang takut king Ginu uling balu ku ing kalamnan na ning kakung pusu.

10

¹ Anti ning milako na ku gana king bie, kakung tutul alang pamamigil kaku yang ibie. Magsalita ku tungkul king kapait-paitan ning kakung panamdaman.

² Sabian ku king Dios, E mu ku atulan. Ipabalu mu kaku nung nanu ing sasangkan mu kaku.

³ Matulid para keka ing alipitan mu ko? Ing insultuan mu la ding mismung dapat ding gamat mo, at kaybat panusigan pa ing tangka da ring e mayap?

⁴ Ing panlalawe mu wari kalupa na ning panlalawe mi?

⁵ Ing bie mu wari makuyad ya mung kalupa ning kekame,

⁶ nung inya panintunan mu la ding kakung kasalanan at sasalugsugan mu la ding kakung kasalanan?

⁷ Balu mu king ala kung kasalanan, at keka alang makapagligtas kaku metung man.

⁸ Belangkas da ku, at inubug ding gamat mu, at ngeni ding kabud gamat mu ilang sumira kaku.

⁹ Ganakan mu king pila inubug mu ku, at ngeni king alikabuk ibalik mu ko?

¹⁰ E wari dininan meng sikanan i tata ku ban ayanak na ku, at peparagul mu king sepupunan ning ima ku?

¹¹ E wari belangkas mu ku karing butul at amad, at kaybat pepaimalanan mu ku king laman at balat?

¹² Dininan mu kung bie layun iningat pa, lalam ning lingap mu mibiebie ku.

¹³ Oneng ngeni balu ku king kekaban ning panaun mu tingka mung lihim ing panasakitan mu ku.

¹⁴ Makabante kang lawe-lawe nung aku mikasala ku ban mika oportunidad kang e mu ku payalang sala.

¹⁵ Makalunus ku king arapan mu nung mikasala ku! Nung ali ku keka alang nanu naman; makarine ining kabilian ku at kaligaligan king kekang arapan.

¹⁶ Nung gawa na ku mang pamanalakaran anti kung leon a kekang pakirakpan. Apanasakit mu ku mu sana gawa kang bage makapagmulala.

¹⁷ Alang tuknang mu lang babayu ding testigu laban kaku; alang tuknang darakal ing mua mu kaku; ala kang tuknang mimisip bayung paralan laban kaku.

¹⁸ Baket peintulut mu ku pang linual king atian ning kakung ima? Mayap pa ing mete na ku bayu ating menakit kaku.

¹⁹ Parehu namu ing mibait ka at kaybat mete ka, at ing e ka bitasang mika bie.

²⁰ E wari malapit nia mung mapupus ing kakung bie? Lakuan mu kung magdili-dili ban ditak mu man magkamit kung kaligayan.

²¹ Saguli namu mako na ku; e na ku magbalik pa. Munta ku king sakup ning malalam a karalumduman.

²² Ing sakup a ing sala na dalumdum, pawang karalumduman at kaguluan; ing sala na karalumduman.

11

¹ Nganang Zofar a tau Naama:

² E wari karampatan lang pakibatan ding dakal a salitang mesabi? Makalako la waring kasalanan king taung masalita?

³ Isipan mu galang ing e ra ka agyung pakibatan? Isipan mu galang mangapipi kami uli ding amanu mung manalipusta?

⁴ Sasabian mu, Alang pamangabiran ing pamanalakaran ku, ala kung dungis arap ning Dios.

⁵ Sana ing Dios pakibatan na ka,

⁶ at ipakilala na keka ing dakal ya dake ing kabiasnan; dakal la ding bage malalam kaisipan tau e na agyung dasan. Ing parusang babie ning Ginu kulang ketang mangaintulid keka.

⁷ Malyari mu kayang pakibaluan ing kalalalaman na at angganan ning degulan na at upaya ning Dios?

⁸ Lalagpus ya banua, at e me agyung pakirasan. Malalam ya pa king kutkutan ding mete, at ala kang kamalayan.

⁹ Ing sukad ning degulan ning Dios maygit ya king yatu, at malualas ya kesa king dagat.

¹⁰ Nung dumalan ya ampon maniukul at matul, ninu ing makapigil king Dios?

¹¹ Balu na la ding taung alang silbi; balu na ing dakal dang kasalanan.

¹² Tau la mang mangmang magumpisa lang mika isip potang malyap a asno matunud ya ing ibait na.

¹³ Ibili mu, Job, ing matulid king pusu mu. Pakiabutan me ing Dios.

¹⁴ Ilako mu ing nanumang e mayap a atyu keka, e mu paintulut ing e ustu kilub ning kekang tuknangan.

¹⁵ Kanita iyatna meng lupa mung alang dungis; maging panatag ka at alang takut.

¹⁶ Kalinguan mu na ing kekang kalungkutan; isipan mu na mung anting danum a linabas.

¹⁷ Kanita maging masala ya pa king kaugtuan aldo ing bie mu; at ding kalungkutan na sunlag lang antimo ing abak.

¹⁸ Mie kang panatag, mitmu king kapanayan; ingatan na ka ning Dios, at karatunan ibie na keka.

¹⁹ Ala kang takut karing kekang kalaban; dakal lang lumapit kekang maniawad kasaupan.

²⁰ Manintun lang alang asahan ding taung e mayap, at akilala da ing ala na lang dalanan pang pitakasan. Ing bukud mung kapanayan da sana datang na ing kamatayan.

12

¹ Nganang mekibat Job:

² Alang kapikakunuan ikayu ing siwala ding taung dakal. Keng mate kayu, mate munamang kayabe yu ing kabiasnan.

³ Atin ku munamang pamangilalang kalupa yu; e na ku man mitauli kekayu; balu da ngan ding tau ing sinabi yu.

⁴ Meging pikaylian ku karing kakung kakaluguran; aku ing minaus king Dios, at pekibatan na ku; tau kung makatuliran at alang kapintasan, ngeni metung kung pikaylian.

⁵ Ikong alang kaligaligan tutung mababa ing panlalawe yu karing taung milako kalma; kekayu lang insultuan taung miraragsa.

⁶ Samantalang ding tulisan at alang Dios a katawan mabibie la king katahimikan, agyamang ala lang panginuan nune mu ing sarili dang sikanan.

⁷ Agyang ding animal at ding ayup dakal ing aturu da kekayu.

⁸ Kutnan yu la ding lelangan ning yatu at ning danuman tungkul king karelang beluan;

⁹ ila ngan kamalayan da king ibat la king gamat na ning Ginung Mayupaya a linalang karela.

¹⁰ King gamat ning Dios atyu ya ing bie ding lelangan na, makalalam king upaya ning Ginu ing bie ding tau.

¹¹ Nung makananu yang magkusuelu ing dila king panlasa ning pamangan, makanyan ya naman ing balugbug king amanung daramdaman na.

¹² Miyabie karing mangatua ing kabiasnan, at karing mika makabang bie ing pamangilala miyabie.

¹³ Atyu king Dios ing kabiasnan at ing upaya; atyu king Dios ing beluan at ing pamangilala.

¹⁴ Alang makatalakad king nanumang lasakan na; at alang makalual king ninumang ikulung na.

¹⁵ Nung ing uran e na pigilan lawi ing datang; nung e na pigilan ing danum, albug naman ing datang.

¹⁶ Masikan ya at siguradu yang magtagumpe ing Dios; atyu la lalam nang upaya ding mapipirait at ding mamirait.

¹⁷ Lalako na la kabiasnan ding pamuntuk, at gagawan na lang mangmang ding manimuna.

¹⁸ Kukuldas na la king trono ding ari, at karing sukulan papalub na la.

¹⁹ Kukuldas na la ding pari, at daragsa ding mayupaya.

²⁰ Patahimikan na la ding apagkatiwalan, at lalako beluan ding makatua.

²¹ Pakarinayan na la detang atyu king upaya, dirinan nang angganan ing sikanan ding manimuna.

²² Tutubud na ing sala king karalumduman.

²³ Pasiknangan na la at gagawan marangal ding bansa, kaybat lulupigan na la at lalasakan.

²⁴ Gagawan na lang mangmang ding karelang manimuna, galagala lang lingo alang pupuntalan.

²⁵ Kakapkap la king maralumdum, at pasepase la anting malasing.

13

¹ Lawan yu; ikit da na ding kakung mata ing heganagana, dimdam da na ding balugbug ku at aintindian ku na.

² Ing heganaganang balu yu, balu ku naman; e na ku man magkulangan kekayu king nanu pa man.

³ Oneng bisa kung makipagsalita king Dios a Mayupaya, at buri kung iyarap ing kakung pisasabian.

⁴ At ikayu naman, tatakpan yu king kalaraman ing kekong alang beluan; kalupa yo ding manulung e na bitasang makapaldan karing karelang uluan.

⁵ Nung isara yu la mu ding asbuk yu king katahimikan, apapaniwalan yu la ding aliwa king atin kayung beluan.

⁶ Pakiramdaman yo ngeni ding kakung sangkan, at pansinan yu ing kakung pamangatuliran.

⁷ Magsalita kayung kalaraman para king Dios? Ya ita ing kekong kapagnasan pati na ing pamagsalitang maki pamaglinlang?

⁸ Ipakit yu wari ing kekong pamangabiran, at pisasabian ning Dios kekong ilaban?

⁹ Minamayap yu naman potang ikayu ing surian na? Alinlang ye kaya kalupa ning pamaglinlang ning tau kareng kalupa nang tao?

¹⁰ Alang sala ikayu ing sabianan na, nung king lihim atin kayung pamangabiran.

¹¹ E yu wari pagmulalan ing dangalan na? E kayu wari mangatakutan king kayupayan na?

¹² Ing kawangis da ring kekong kasebian abu'ng alang kasilbian, at burak mu ing kalupa da ring kekong pamangatuliran.

¹³ Manahimik kayu pamu, paburen yung magsalita ku; at nung nanu kaku ing ibunga da, ya na ita. fig,,,,,Manahimik kayu pamu, paburen yung magsalita ku.,(13:13)fig*

¹⁴ Makasadia kung itaya ke ing kakung bie.

¹⁵ Ala na ku mu ring kapanayan agyang ing bie ku kuanan na ne, oneng idipensa ke pa mu rin ing sarili ku king arap na.

¹⁶ Atyu keni ing kakung kaligtasan, uling ing taung alang Dios a katawan e ya lumapit king arap na.

¹⁷ Ding kakung amanu kekayu lang pakaintindian karing balugbug yu, kekayu lang pakiramdaman.

¹⁸ Oyni, makasadia kung iyapag ke ing kakung kasu, uling balu ku ing makamatulid ku.

¹⁹ Daratang ka kaku, O Dios, ba mu kung bintanganan? Nung datang na ka, makasadia na kung manahimik at mate.

²⁰ Adua mung bage ing aduan ku ban e ku salikut king arap mu.

²¹ Tuknangan mu na kung parusan, at ilaut mung takut ku keka.

²² Kanita maus ka at makibat ku; o paburen mung magsalita ku at ika pakibatan mu ku.

²³ Nanu la wari ding mali ku at kasalanan? Ipakilala mu la kaku ding kakung kasalanan, at pamanialangsangan?

²⁴ Baket pangilagan mu ku? Baket anting kalaban ing tratu mu kaku?

²⁵ Nasa mu ing pamatakutan mu ko? Anti ku mung bulung; keka yang kakalabanan ing malanging are.

²⁶ Iyarap mu la kaku ding mangabayat a dalum, pati na detang gewa ku inyang kayanakan ku.

²⁷ Ginapus mu la ding bitis ku, babanten mu balang takbang a gagawan ku, keka lang pagumasdan pati bakas ding bitis ku.

²⁸ Inya misasaldak kung anting dutung a mebuluk, anting imalan a ngitngat dang ane.

14

¹ Ing bie ning tau a beit ning babai makuyad ya mu, at dakal ya kaligaligan.

² Mibubukadkad yang anti ing bulaklak, at kaybat malanat ampon malagas; kalupa ning anino agad yang lilipas.

³ Iti naman ya ing babanten ding mata mu at lalawan, at kaybat yarap me pa keka ban atulan?

⁴ Kapilan man alang malinis a malyaring manibatan king nanumang marinat antimo ing tau. Ala metung man.

⁵ Anti na ning ding aldo na makabilang la, at ding bilang ding bulan atyu la keka, at tikda mu na la ding angganan a e na malyaring dalanan,

⁶ ilaut mu la king tau ding kekang mata, at lakuan meng dili-dili na; paburen meng magkusuelu king bie nang mabayat, nung iti apalyari na.

⁷ Tanaman 'tin yang kapanayan, nung iti makutud ya man; ibalik na ing bie na karing suling tumubu. fig,,,,,Tanaman 'tin yang kapanayan, nung iti makutud ya man.,(14:7)fig*

⁸ Tumua la man yamut nang makakutkut lalam, maging ing pun mate ya man,

⁹ makanyan man potang danum datang manulud ya anting bayung tanaman.

¹⁰ Oneng potang ing tau mate ya, at ikutkut king malalam; ita na ing angganan na. Nu ya pa karin kanita?

¹¹ Kalupa da ring ilug a tinuknang mamagus, at ding lawa a melangi at memala,

¹² ding tau kamate ra talakad ali na la; anggang ing banua manatili ya e mu na la agising king tudtud da.

¹³ Sana isalikut mu ku king tuknangan da ring mete; paburen mung makapampan ku kabang ing mua mu atyu, at itakda me ing panaun ban ganakan mu ku.

¹⁴ Nung mate ya ing tau mie ya pa kaya? Minamayap ku pa ing manayang masanting a panaun; panayan ku nang miyangganan ya ing panaun ning kaligaligan.

¹⁵ Kanita maus ka, at makibat ku. Kanita matula na ka kaku, aku a lalang ding gamat mu.

¹⁶ Kanita banten mu na la ding balang takbang a kakung gawan, oneng e mu na la tandanan ding balang kakung kasalanan.

¹⁷ Keka lang patawaran, at ilaut king kekang arapan; keka lang linisan ding kakung kasalanan.

¹⁸ Ing panaun datang potang ding bunduk matibag la, at ding batu milako la king sadiang kabilian da;

¹⁹ lalagasan no ning danum ding batu, tutuki ning agus ing gabun ning yatu; makanyan mung lalasakan ing kapanayan king bie ning tau.

²⁰ Laban king tau kapilan man ika ing magwagi; itabi me kapilan man at e na makapagbalik, king kamatayan na lupa na mangakibit.

²¹ Tanggap la mang dangalan ding anak na, ala neng kamalayan; mibili la man king kamuran, ala ya ring kabaluan.

²² Ala neng daramdaman subali namu ing kaplas ning sarili nang katawan, at ing sarili na ya namu ing pagkalungkutan na.

15

¹ Nganang Elipaz a tau Teman:

² Job, ala lang kabaldugan ding kekang amanu. Ala lang bitasang beyatan.

³ Alang biasang tau a magsalitang kalupa mu o idipensa ing sarili na karing amanung alang kabaldugan.

⁴ Nung ing kekang paralan ya mu ing mapalyari, ala nang mitakutan king Dios, at ala nang manalangin pa.

⁵ Mayayakit ing kekang kasalanan kapamilatan ding sasabian mu sasalikut ka pa karing mangasanting mung amanu.

⁶ E na kailangan pa ing aku atulan da ka; atulan da na ka ding balang amanung manibat keka.

⁷ Ika wari ing pangane karing tau? Atyu na ka wari inyang ing Dios gawan na la ding bunduk?

⁸ Ikua mu la waring abalu ding planung tingka ning Dios? Keka na wari makabukud ing kabiasnan ning tau?

⁹ Nanu mo ing balu mu a e mi balu? Nanu mo ing malino keka a kekami ali?

¹⁰ Tinggap mi ing beluan mi karing maputi na buak at makatua libutad mi, maygit lang matua deti kesa kang tata mu.

¹¹ Baket tatanggian mu ing lingap a babie na keka ning Dios, at ding banayad a amanung selita mi keka?

¹² Baket paigulu ka, at king mua mu kekami mangamulagat ka mata?

¹³ Baket ing mua mu king Dios bubugnus mu, pati ding e karampatan a amanu lulual la king asbuk mu?

¹⁴ Atin waring taung e mikasala? Atin waring taung mibait banal arap ning Dios?

¹⁵ Lawan mu, agyang karing anghel na ing Dios e ya magtiwala. E la naman sakdal deti king paglalawe na.

¹⁶ Lalu na king taung makasumami at baluktut a ugali, a anting danum nang inuman ing kasalanan!

¹⁷ Ipakilala ku keka, makiramdam ka; at ing kakung sibukan ya ing kakung sabian.

¹⁸ Ding mangabiasa tiru da kaku ing katutuan a karelang abalu karing karelang makatua, ala lang selikut nanuman king karelang beluan.

¹⁹ Bukud mung karela ya miyabie ing gabun; kapilan man alang dayuan a managkat lumaut king Dios.

²⁰ Ing taung e mayap a menalipusta karing aliwa, king sakit mamalipit ya king kekaban ning bie na.

²¹ Makatakut a kulisakan ing daramdaman na. Busal ning kanawan na bigla neng datangan ning mapamuksa.

²² Ala neng kapanayan pang makatakas king karalumduman, balu na king panenayan ne ning pataram.

²³ Buitri la ding makapanayang mangan king laman ning keyang katawan. Balu na king makasadia ne ing aldo ning karalumduman.

²⁴ Mitakutan ya king kaligaligan a daratang; datang yang anting mayupayang ari.

²⁵ Ita ya ing maging kararasan na ning taung tinas neng gamat na, at sikmal ban king Dios lumaban ya.

²⁶ King kesiasan nang buntuk sinugud yang linaban king Dios; king makapal nang kalasag makaprotekta ya.

²⁷ Mabilug ya at metaba ing lupa na; mengapal ya king taba ing awakan na.

²⁸ Menuknangan ya karing siudad a mesalanta; karing pibalebale a e ra na dapat pang tuknangan ning ninuman, at mitalagang maging kabuntun mung batu.

²⁹ E ya manatiling mabandi; nanumang bandi na muli mu king ala. Maging ing anino na mawala ya,

³⁰ karalumduman e na atakasan. Mangari ya king tanaman a sanga na king api masilab la, at ing angin isulapo na la ding sampaga na.

³¹ Uling bina yang mangmang at manalig king e ustu, ing e ustu ya naman ing maging kayablasan na.

³² Langi ya bayu miras ing panaun na, at sanga na e no sagiwa pa.

³³ Ubas ing kalupa na, pamalag na lang bubut nang bunga. Tanaman a olibo ing kalupa na pamalag na lang sampaga na.

³⁴ Ding taung king Dios e maniwala e la mika lahi. Ding bale mitalakad king suhul tampusan na la ning api.

³⁵ Ing king kaisipan da kaguluan, ing gagawan da e mayap; ing pusu ra mitmu ne man king pamaglinlang.

16

¹ Nganang mekibat Job:

² Dimdam ku na la ding amanung makanyan; ing pamamatula yu kaku lalung makabayat kening kakung panamdaman. fig,,,,,Ing pamamatula yu kaku lalung makabayat kening kakung panamdaman.,(16:2)fig*

³ Ala na waring kayangganan ing pamagsalita yung kayabangan? Nanu naman ing sangkan ba't e ko tutuknang makibat?

⁴ Nung ikayu ing atyu king kabilian ku, makapagsalita ku namang kalupa yu; balu ku la namang pitairan-tairan ding amanung laban kekayu, at kakung pipiling-piling ing buntuk ku kekayu.

⁵ Apasiknangan da kayu lub king kakung tuturu, at adinan kapasnawan king sakit a kekong panamdaman.

⁶ E naman makasaup kaku ing nanumang sabian ku; nung kuanan ku naman king e bubulad e munaman makapaldan ita king sakit a panamdaman ku.

⁷ Gisan ning Dios ing kakung sikanan, at peintulut na pati pamilya ku megisan.

⁸ Apayayat na ku; butul balat na ku mu, at ita yang gagawan dang patutu ding tau king mikasala ku.

⁹ King mua na piglapak na ku at pikasaman nang e mu nanu; pinggaligitan na ku karing keyang ipan, at lawe na kaku mataram.

¹⁰ Pilabilabi da ku ring tau; pinyapingil da ku at misanmetung la laban kaku.

¹¹ Binie na ku ning Dios king gamat da ring taung e mayap.

¹² Mabibie kung tahimik, oneng ing Dios sigmit na ku batal; bitbat na ku at melugmuk ku. Telakad na ku anting pipagpuntirian na.

¹³ Ibat karing lugal paslu ding pana na daratang la; tinirik lang miniugat king laman ku; makanyan man e ya pepakit lunus kaku.

¹⁴ Saksak keni, saksak keta ing gewa na kaku; delusungan na kung anting sundalus a milablab a mua kaku.

¹⁵ Melungkut ku at misulud kung saku; mesambut ku inya migluklukan ku king abu.

¹⁶ Menangis ku angga king melare yang lupa ku, mengalbag lang mata ku; menuling lang talukap ding mata ku.

¹⁷ Makanyan man alang masabing depat kung katampalasanan, at taimtim ing kakung panalangin.

¹⁸ E mu tatakpan, O gabun, ing kakung daya! E me buring matatda ing siwala kung maniawad hustisia!

¹⁹ Ngeni pa, ing testigu ku atyu banua, atyu king kakataskatasan ing kakung talaingat.

²⁰ Kasaman da ku ding kakaluguran; king Dios mamagus ing kakung lua.

²¹ Manintun kung magpakalunus king Dios para kaku, anting kakaluguran a magdipensa.

²² Mapilan na la mu ding kakung banua, maglakad na ku king dalan at e na magbalik kapilan man.

17

¹ Malapit neng mapupus ining bie; pangisnawa ku maskup ne, kutkutan kaku manaya ne.

² Makapadurut ku karing kaku manyunu; lawan ku ing bubuska da kaku.

³ Kakung Dios, magsalita kung katutuan; maniwala ka sa kening kakung sasabian. Ala nang aliwa pang manalakaran king kakung sasabian.

⁴ Anti ning sera mu la ding kaisipan da king pamagmatulid; sana naman e mu la papagtagumpen pa.

⁵ Agpang king metung a matuang kasebian, ing tau pagtaksilan ne ing keyang kakaluguran uli ning pibandian, inya anak na ilang misakitan.

⁶ Iting kasebian ya ngeni ing gagamitan ding tau laban kaku; daratangan da ku at pagluran ing lupa ku.

⁷ Uli ning kakung lungkut ding kakung mata mepula la; ding gamat at bitis ku meging tingting na la.

⁸ Mangasdan la detang sasabian dang mayap la, at ila ngan lalawan da kung alang Dios a katawan.

⁹ Detang sasabian da ing makatuliran la daragul nang daragul ing kapaniwalan da king ila makanyan la.

¹⁰ Nung ila ngan dinatang la at tinalakad king arapan ku, metung man ala kung akit a mayap karela.

¹¹ Linipas na lang aldo ku; e la migtagumpe ding kakung planu; ala na kung kapanayan.

¹² Nung kakung kakaluguran karelang sasabian king ing bengi aldo ya; sasabian da malapit nia mu ing sala, oneng kakung balu ing atyu ku king karalumduman.

¹³ Ing makatagan nang kapanayan ku ya ing tuknangan da ring mete nung nukarin ku magkera ban matudtud king karalumduman.

¹⁴ Ausan keng tata ing kakung kutkutan, at kakung ima at kapatad a babai ding ulad a mamangan kaku.

¹⁵ Nukarin pa ating kapanayan para kaku? Ninu ing ating akakit?

¹⁶ E ya tuki kaku ing kapanayan kabud minta ku king tuknangan da ring mete.

18

¹ Nganang mekibat Bildad a tau Suah:

² Job, ding taung anti keka e la biasang tahimek? Nung tuknang ka mu ban makiramdam makipagsalita kami keka.

³ Baket bibilang mu kaming anting baka'ng mangmang?

⁴ Ala kang panasakitan king mua mu nung e mu ing sarili mu. Mipaburen ya wari ing yatu uli ning mua mo? Iyalis na la wari ning Dios ding bunduk king uli mo?

⁵ Wa, ing sulu ning taung e mayap patdan de; mawala ya ing lablab ning api na.

⁶ Kulimlim ya ing sala kilub ning tolda na, at matda ya ing sulu babo na.

⁷ Maging e la matatag ding takbang; misakab ya uli ding sarili nang kapamalakan.

⁸ Dumalan ya king metung a lambat, at marakap lang bitis na;

⁹ sakung na king bitag marakap ya, at pigilan ne.

¹⁰ Makasalikut ya king gabun ing metung a silu; king dalanan na ing paniakap makaumang ya.

¹¹ Ing makatakut makapadurut; tutukian ne gulut na king balang takbang na.

¹² Mabandi ya kanita, ngeni danup-danup ya; ing kabiguan siping na makapanaya.

¹³ Linaganap ing makamate sakit king mabilug nang katawan; inya nanaknak la ding bitis at gamat na.

¹⁴ Sepuliut deng liwal king toldang panaligan na, at teguyud deng inarap king Aring Kamatayan.

¹⁵ Ngeni king tolda na agyang ninu malyari yang manuknangan; ing asupri yang sinabug dang paglinis king tolda na.

¹⁶ Melangi lang yamut na, at pati ding sanga na.

¹⁷ Mitda babo ning tuknangan na ing kabantugan na; ala nang bitasang makaganaka pa.

¹⁸ Itabi de king tuknangan da ring mabie; ibat king masala mitabi ya king karalumduman.

¹⁹ Ala yang anak ni lahing mitagan a mabie nung nu ya manuknangan.

²⁰ Manibat king aslagan angga na king albugan mangilabut la king meging keyang kapalaran.

²¹ Ita ya ing kapalaran da ring taung e mayap, ing kararasan da ring alang pamakimetung king Dios.

19

¹ Nganang mekibat Job:

² Angga pa kapilan yu ku guguluan, at pasukalan a lub king kekong pamaniabian?

³ Ulit-ulitan yu kung pamaniangkanan; e na ko merine man king kekong gagawan.

⁴ Tutu na mo ing mikasala ku, ing kasalanan ku manatiling kaku mu.

⁵ Isipan yu king mayap kayu kesa kaku, at tatanggapan yu ing kaguluan a miras kaku bilang patutu king pamikasala ku.

⁶ E yu akakit king ing Dios ya ing makirapat kanyan? Mibili yang bitag a paniakap kaku.

⁷ Tututulan ku ing bigsikan na, oneng ala namang makiramdam; ala na ku mang tatanggapan king pamaniawad kung katuliran.

⁸ Kilungan na kung matas, inya ala kung alsutan. Binili ne ing karalumduman king kakung daralanan.

⁹ Kinua na ing heganagana kung pibandian, at sinira ing kakung dangalan.

¹⁰ Bubugbugan na ku king mingatba-ngatba. Anting tanaman pitput nang kakung kapanayan, at likuan na ku ban langi at mate.

¹¹ Mua ya ing Dios at papayabut na kaku; tuturing na kung e mayap nang diling kalaban.

¹² Abe-abe lang dinatang ding sundalus na, ginawa lang kulkul at kibkuban de ing kakung tolda.

¹³ Dela na la king marayu ding kapatad ku, deng mang kakilala ku dinayu la kaku.

¹⁴ Likuan da ku pati ding kamaganak ku, at malapit kung kakaluguran.

¹⁵ Kelinguan da na ku detang meging bisita ku king pibalebale ku; tuturing da kung anting e kakilala ding ipus kung babai; mistula kung dayuan king karelang panlalawe.

¹⁶ Neng ausan ke ing ipus ku, e na ku pakibatan; kailangan pa ing pakisabian keng mayap.

¹⁷ Pangilagan na ku ning mismung asawa ku; meging pikakasaman ku pati karing kapatad ku.

¹⁸ Maging ding anak a malati mababa ing lawe da kaku; pituya-tuya da ku.

¹⁹ Ding matalik kung kakaluguran kasusumamian da ku, at ding taung liguran ku lebanan da ku.

²⁰ Mewala na ing kakung laman; butul ku mataram lang anting ipan lalam ning kakung balat.

²¹ Ikong kakung kakaluguran, malunus kayu kaku, uling ing gamat ning Dios digpa ya kaku.

²² Baket pakiapusan ye ing Dios king pamanligalig yu kaku? E pa wari sapat ing pasakit a depat yu kaku?

²³ Sana e la makalinguan kakung amanu, misulat la sana deti king libru.

²⁴ Sana kapamilatan ding matilus a bakal midukit la king tapias a batu ban manatili la king kapilan pa man.

²⁵ Uling balu ku king mabie ya ing Talaingat ku, at king katataulian talakad ya babo ning yatu ban ingatan na ku.

²⁶ Agyamang megisan ne ining balat ku, kabang atyu ku pa king katawan ku akit ke ing Dios.

²⁷ Akit ke king siping ku; tangalan de ring mata ku, at ala nang aliwa pa. Meina ku lub uli ning sinabi yu:

²⁸ Makananu ta yang ligaligan? Nanu ing sangkan a isandali tamu?

²⁹ Oneng ngeni, sukat kayung tumakut king pataram, ing pataram a pakilala king mimimua ya ing Dios king kasalanan, at ba yung akilala king ating metung a mamatul.

20

¹ Nganang mekibat Zofar a tau Naama:

² Giluan mu ku Job. Ngeni e ku abatang e ra ka pakibatan.

³ Ing sinabi mu makapanamdaman, oneng balu ku nung makananu da kang pakibatan.

⁴ E mu wari balu manibat na king minunang panaun, manibat na inyang mibili ya ing tau king yatu,

⁵ king ing tula ding e mayap makuyad, at ding alang Dios e la maglambat?

⁶ Agyamang ing degulan na mamabut king banua at uli ning katas na miraras ya ing buntuk na karing biga,

⁷ anting alikabuk isulapo neng marayu ning angin. Detang sadiang makakilala pagmulalan da nung nu ya minta.

⁸ Anting paninap matda ya, anting vision ning kabengian e ne mayakit kapilan man.

⁹ E na ne akit pa ning matang sadiang manakit; e na ne tangalan pa ning karinan a tuknangan na.

¹⁰ Pakikuanan ding anak na ing maglarin la, ban ding taung inargabiaduan na karela ibalik da ing pibandian a kimkam na.

¹¹ Itang sadia nang kayanakan at sikanan kayabe nang muli king alikabuk.

¹² Uling ing kasalanan mayumu ya king panlasa na, sasalikut na lalam ning dila na,

¹³ at pipigilan na iti ban king asbuk na apipilasa na.

¹⁴ Oneng king dungus na ita sumlam ya, anting lasun galogon ne ing atian na.

¹⁵ Ing penako nang pibandian ita isuka na ngan; king atian na ipalual na ning Dios.

¹⁶ Anting lasun ing akmulan ning taung e mayap; paten ne anting tiktuk ning kamandagan a ubingan.

¹⁷ E na no akit pa ding ilug a agusan ning larung olibo ni ding sapang agusan ning gatas at pulut-panilan.

¹⁸ Mapilit yang ibili na ing heganaganang pipagalan na; e ya mika panaun magtamasa king pibandian na.

¹⁹ Uli ning inalipit na la at kelinguan ding kalulu; at simsam ding pibalebale a telakad ding aliwa.

²⁰ Ala yang pikabsian ing kasakiman na.

²¹ Kaybat nang mengan ala nang mitatagan, oneng miyayangganan na ngeni ing heganaganang keyang pibandian.

²² Libutad ning kayatinan na panamdaman na ing kakulangan; datang ing kabiguan na king mitmung bigsikan.

²³ Paburen mung magpakabsi ya king kapad na! Parusan ne ning Dios king bigsikan ning mua na.

²⁴ Potang tatakasan ne ing bakal a pataram; ing tangsung paslu tumarak ne man king keyang katawan.

²⁵ Potang bagutan de king katawan na, tutulu ya king daya ing kikinang nang punta, mikatmuan ya king takut mabilug nang pangatau.

²⁶ Mawala ngan ing heganaganang tinipun nang pibandian; ing aping e na pepatawan ning ninuman tampusan neng abe ding atyu king keyang tuknangan.

²⁷ Ibulalag ning banua ing kasalanan na, at ing yatu talakad yang laban king pangatau na.

²⁸ Ing bandi na mawala arap ning mua ning Dios.

²⁹ Ita ya ing kararasan na ning taung e mayap, ing paintungulan na a tikda ning Dios.

21

¹ Nganang Job:

² Pakiramdaman yu ing kakung sasabian; iti ya ing pakisabi kung mayap kekayu.

³ Dinan yu ku mung panaun makapagsalita; kayari ku, isundu yu ing kekong pamanyunu.

⁴ Ing kakung pakilaban e naman tungkul karing kalupang tau; atin kung matulid milako kapibabatan.

⁵ Lawan yu kung masalese, king kekong pangasindak e na kayu makabulad.

⁶ Potang apibulebule ku ing milyari kaku, mangasdan ku at mangalgal mabilug kung katawan.

⁷ Baket kaya ing Dios paintulut na lang mabibie ding e mayap? Baket akakua dang tutua at maging mayupaya?

⁸ Maging matatag la kabilian ding anak na king arap na, pati na ding anak da ring anak na.

⁹ E na la didinan kaligaligan ning Dios king pibalebale ra; nanumang takut ala karela.

¹⁰ Ding karelang toro alang sala mikaka lahi la; manganak lang baka ra at darakal la.

¹¹ Anting tupa king kawan anak da masaya lang mitatagalan at mamialungan.

¹² Magkanta la at teterak kabang babagayan da lang plauta ampon alpa.

¹³ Mabibie la king kanawan, at king katahimikan muli la king karelang kutkutan.

¹⁴ Sasabian ding e mayap king Dios king lakuan na lang magdili-dili; e da na nasa pang abalu ing kaburian na king bie ra.

¹⁵ Paniwalan da king e na kailangan pa ing Dios pagsilbian ya, at king Dios ala naman pakinabang ing manalangin la.

¹⁶ Sabian da king ing tagumpe ra ibat king sikanan da, oneng ing anti kaniting kaisipan e ku malyaring tanggapan.

¹⁷ Kapilan ne mo mitda ing sulu ning e mayap? Atin na karelang tinakman king kapahamakan? Perusan na no ning Dios king kamua na deting e mayap

¹⁸ at pesulagpuan nang anting are o anting sepu a silapo ning bagyu?

¹⁹ Sasabian yu king parusan ne ning Dios ing anak uli ding kasalanan ding pengari na. Ali! Paburen mung parusan ne ning Dios ing mikasala; paburen mung ipakit na king ita gewa na uli ding kasalanan da.

²⁰ Paburen lang magdusa ding mikasala king parusang digpa karela; paburen lang panamdaman da ing mua ning Dios a Mayupaya.

²¹ Kapupus ning bie ning tau, atin ya pa kayang apakialaman king pamilyang likuan na?

²² Malyari ne kayang ituru ning tau ing Dios a mamatul agyang karetang atyu king matas?

²³ Atin taung mamamate king kasusukdulan ning sikanan na, ganap ya king karatunan at kapanatagan,

²⁴ katawan na mabilug king taba na, utak ning butul na mabasa pa.

²⁵ Atin namang mamate a ala yang tikman a tula nanuman; mebie ya at mete ya, pusu na mitmu yang mapait.

²⁶ Parehu lang mate deta at king alikabuk muli; karing ulad mapangan la.

²⁷ E makalingad kaku ing isipan yu, at ing paralan ban ipahamak yu ku.

²⁸ Ngayung kukutang, Nu ya karin ngeni ing bale ning taung mayupaya, itang taung dinapat king e mayap?

²⁹ E kayu mangutang kareng taung maglakbe? E yo wari balu ding balita a darala da king pamagbalik da?

³⁰ King aldo a mimua ya ing Dios at mamarusa ya, e wari ing taung e mayap ya ing mililigtas?

³¹ Alang taung manalakaran laban king taung e mayap o manyingil king gewa nang kasalanan.

³² Potang yatad da ne king kutkutan na atin karin manatiling makabante.

³³ E la mabilang ding mantabe king pangakutkut na, maging ing gabun banayad yang makatambun.

³⁴ Oneng ikayu, pakikuanan yu kung pamatulan karing amanu yung ala namang kabaldugan. Balang kekong sasabian pawa mung kalaraman.

22

¹ Kanita nganang Elipaz a tau Teman:

² Atin ya kayang nanumang silbi ing tau king Dios, ngening agyang ing peka biasang dili ing makinabang mu ya ing keyang sarili?

³ Ing pamangawa mung mayap pakinabangnan na kaya ning Dios o nung ika mayap ka makasaup kaya ita?

⁴ Uli na wari ning takut mu inya paniabianan na ka, at darala na ka ban mayatul?

⁵ Ali, uling tutung maragul ing kekang kasalanan; alang tuknang ing kasalanan a kekang gagawan.

⁶ Ban makapamayad ya keka ing kapatad mu king utang na, kinua mung keyang susulud at likuan meng alang imalan.

⁷ E mu la dininan danum ding mapagal, at e mu la pepakan ding danupan.

⁸ Ginamit mu ing upaya mu at kabilian ba mung abandi ing mabilug a gabun.

⁹ E mu ing pigkaymut mu ing saup mu karing mebalu, penakawanan mo pa ding ulila at inabusu.

¹⁰ Inya ngeni makapadurut ka karing pakaumang a kulkul, at bigla kang mikatmuan king takut.

¹¹ Dinatang ing karalumduman, inya ala kang akakit nanuman, at tatakpan na ka ning danum ning albug.

¹² E wari ing Dios manuknangan ya karin king matas a banua, at nu la man anti katas ding tala angga la mu king durungdungan na?

¹³ Inya ngamung kukutang, Nanu ing balu ning Dios? Makapampan ya karing biga, makananu na katamung atulan?

¹⁴ Isipan mu king ing makapal a biga tatakpan na la ding mata na, kabang maglakad ya king suklub ning banua.

¹⁵ Makasadia kang dumalan karing dalan a pane rang daralanan ding taung e mayap?

¹⁶ E pa man miras ing panaun da, ing danum ning albug tiki na na la.

¹⁷ Ila deta ring taung e tinanggap king Dios, at meniwala king e na la ananu balang.

¹⁸ Makanyan man ing Dios ya ing maki gawa king pangabandi ra; e ku la aintindian a pamisip detang taung e mayap.

¹⁹ Potang miparusan la ding e mayap, matula la ding mayap; mayli la ding alang malit.

²⁰ Magisan ing bandi ning taung e mayap, at dulukan ning api ing nanumang mitagan.

²¹ Job, makikasundu ka king Dios at tuknangan mu neng bibilang antimong kalaban; bendisyunan na ka nung ita ing kekang gawan.

²² Tanggapan mu la ding turu a babie na keka at isikap mu la ding amanu na king kekang pusu.

²³ Magpakumbaba kang magbalik king Dios, at pangilagan mu na ing e ustu a mararapat king kekang tuknangan.

²⁴ Ding kekang gintu keka lang iyugse, at itambak mu la ding peka puru kareti king sapa a kinati.

²⁵ Ing Mayupaya ya ing kekang maging pibandian, at ya ing gintu at pilak a para keka matas a pangaimbak.

²⁶ Kanita king Mayupaya ya miyabie lubus mung tiwala, at akilala mu ing ya ing panibatan ning kekang tula.

²⁷ Potang manalangin ka pakiramdaman na, at tuparan mu lang pangaku a binie mu.

²⁸ Nanumang kekang pagnasan, ita miyabie keka, at ing sala sunlag ya king kekang daralanan.

²⁹ Daragsa na la ning Dios ding mapagmatas, oneng sasagipan na la ding mapagpakumbaba.

³⁰ Liligtas na la ding taung alang pamikasala, miligtas ka nung malinis ka gamat.

23

¹ Nganang mekibat Job:

² Angga ngeni lalaban ku, at magreklamu king Dios. E ku apigil ing kakung saingsing.

³ O nung abalu ku sana nung nu ke atagpuan, puntalan ke angga na king luklukan na.

⁴ Ipalad ku ing kasu ku king arap na, ibie ku la ding matulid ku.

⁵ Buri kung abalu nung nanu ing sabian na, at nung makananu na kung pakibatan.

⁶ Gamitan na kaya ing mabilug nang sikanan laban kako? Ali, pakiramdaman na ku kabang magsalita ku.

⁷ Karin malyari yang makipagmatulid ing taung mayap, at payalan na kung kasalanan king kapilan pa man.

⁸ Penintun ke king dane Aslagan, oneng e ke ikit ing Dios karin. Penintun ke king dane Albugan; alayu munaman karin.

⁹ Penintun ke king dane Norti, oneng e ke ikit karin; minta ku munaman king dane Mauli, oneng e ria naman ikit karin ding kakung mata.

¹⁰ Oneng balu ning Dios ing balang takbang ning bie ku; nung surian na ku, akit na ing malinis ku.

¹¹ Tapat keng tikian ing dalan a tildu na. E ku linisiang bitasa.

¹² Memintu kung alang kutang-kutang karing kautusan na; pemintuan kung kaburian na, at aliwa ing kaku.

¹³ E ya magbayu. Metung man alang makalaban o makasabat king buri nang gawan.

¹⁴ Tuparan na itang tingka na para kaku; at ita metung ya mu karing dakal nang planu.

¹⁵ Gagalgal ku king takut king arapan na. fig,,,,,Gagalgal ku king takut king arapan na.,(23:15)fig*

¹⁶ Pepainan na ku lub ning Dios; maragul ing takut ku king Mayupaya,

¹⁷ maygit king kilungan na ku king makapal a karalumduman.

24

¹ Baket kaya ing Mayupaya e ya mitakdang aldo pamanatul para karetang talasuyu na?

² Lalako da la ring tau ding batung pekatanda ding angganan ban dagul ing gabun da; manako lang tupa, at yayabe da la karing sarili dang kawan.

³ Kukua la karing asno da ring ulila, at e re ibie ing bakang singla ning mebalu anggang e ya mekabayad king utang na.

⁴ Pipigilan da lang kalulu ban e re atanggap ing karelang katuliran, at mangapilitan lang tumakas at salikut ding mangailangan.

⁵ Anti lang malyap a asno ning ilang; galagala lang manintun pamangan para karing karelang anak.

⁶ Kailangan da lang palutan ding marangle a e naman karela, at pagnapnapan ding ubasan da ring taung e mayap.

⁷ Karas ning bengi matudtud lang ala mang panakap king sarili da, alang panlaban nanuman king dimla.

⁸ Mababasa la king mababaldug a uran ibat karing bunduk, misisiksikan lang sasalilung karing batu.

⁹ Ding e mayap sasamsaman da la ding bingut a mengulilang tata, at kukuanan da la ring anak da ring kalulu bilang kabayaran ning utang da.

¹⁰ Libut-libut lang lubas, ala lang imalan; mangaranup-danup la samantalang trigu ing karelang pupupulan.

¹¹ Laru ing gagawan da libutad ding olibong bandi ra ding e mayap; papaslan da lang ubas ban maging alak, oneng king kau ra ala namang panulu.

¹² Manibat karing siudad ding sugatan at mamamate mamaus la, oneng e na pansin ning Dios ing dalangin da.

¹³ Atin taung tatanggi king sala; e re aintindian nung nanu ya ni tutukian nung nu ya pupunta.

¹⁴ Maralumdum pa talakad ne ing taung makamate karing kalulu; karas ning bengi ing pamanako naman ya ing gawan na.

¹⁵ Panayan na naman ing sisilim ning makipangalugud; tatakpan neng lupa na ban e re akilala.

¹⁶ Karas ning bengi ding mapanako manlub lang bale, oneng neng aldo sasalikut la; ing sala pangilagan da.

¹⁷ Tatakut la king masala, oneng king maralumdum nanuman takut ala karela.

¹⁸ Tutuki ne ning albug ing taung e mayap; at atyu lalam ning sumpa ning Dios ing gabun a bandi na; e ne pupunta ban magobra king ubasan a mula na.

¹⁹ Nung makananu yang mawawala ing yelu neng mapali, makanyan ya naman ing makasalanan king tuknangan da ring mabie.

²⁰ Agyang ing ima na e na ne agaganaka; anting tanaman pengan de at gisan ding ulad.

²¹ Mangapalyari ngan iti uling mebalung babai lepastangan na la, at e papakit ganaka karing e mikayanak a babai.

²² King sikanan ning Dios babagsak na lang masikanan; potang kimut ya ing Dios, mate la ding e mayap.

²³ Malyaring paintulutan neng mie panatag ning Dios, oneng makabante yang makalawe king kekaban ning keyang bie.

²⁴ Mibandi ya man king ditak a panaun ing e mayap, oneng kaybat anting tanaman langi ya, kalupa ning mabungang tinalage king gabun mebagut at mipase.

²⁵ Atin ninuman ing makapayale? Atin makatanggi karing kakung sinabe?

25

¹ Nganang Bildad, ing tau Suah:

² Mayupaya ya ing Dios; talakad lang mitmung takut, at kagalangan ding tau; manatili ing kapayapan king kayarian na banua.

³ Atin makabilang karing anghel a talasuyu na? Atin lugal nung nukarin ing sala na e makaslag?

⁴ Atin metung mu man a malyaring maging matulid o malinis king arapan na?

⁵ Lawan mu, agyang ing bulan e ya masala o ding batuin man king paglalawe na.

⁶ Nung makanyan, nanu pa kaya king taung mistula mung ulad? Nanu ing ulaga ning tau king arapan na?

26

¹ Nganang mekibat Job:

² Karagul ning asaup yu kaku, king kalulu at mainang anti kako!

³ Kekayu yang dininan payu ining alang kabiasnan, at labis-labis yung pisiag ing ganap a beluan.

⁴ Ninung isipan yung makiramdam karing dakal yung sasabian? Kaninung espiritu ya ing menibat kekayu?

⁵ Mangalgal la ding espiritu da ring mete king danuman lalam ning yatu.

⁶ Alang makapampan king Ginu king tuknangan da ring mete; alang takap a sasabat karing mata na.

⁷ Inatiat ne ing banua king dane norti, at binitin ne ing yatu libutad ning kalawakan.

⁸ Kitmuan na lang danum ding makapal a biga, at ya ing pipigil ban king bayat na e mabaldug.

⁹ Sasalikut ne ing kabilugan a bulan gulut ning biga.

¹⁰ Ginulis yang mabilug babo ning danuman ban ikawani na ing dalumdum king sala.

¹¹ Mangalgal la king takut ding asias ning banua potang sasabianan na la.

¹² Pepatahimikan ne ing dagat king upaya na; king gelingan na pete ne i Rahab, ing dambuala ning dagat.

¹³ Lininis ne ing banua king pangisnawa na; at pete ne ing tatakas a ubingan king gamat na.

¹⁴ Lawan mu, deti malati lang dake na ning upaya na, ding sitsit na ila mu ding daramdaman tamu. Ninu ing makabalu king tune nang upaya ning Dios?

27

¹ Nganang pasibayung migsalitang Job:

² Anggang mabie ya ing Dios a milako king katuliran ku, at ing Mayupaya a minie kalungkutan king bie ku,

³ anggang dirinan na kung inawa

⁴ e la magsalitang nanumang e mayap dening labi ku, e ya magsalitang kalaraman ining dila ku.

⁵ Marayung-marayu kaku ing sabian ku ing ustu kayu; ipilit ku pin anggang mabie ku king aku ala kung kasalanan.

⁶ Kapilan man e ke gulutan ing pamanalakaran ku king atyu ku king matulid; malinis ya ing konsiensia ku.

⁷ Sana ding heganaganang sasalangsang at lalaban kaku miparusan lang anting e mayap at taung e makatuliran.

⁸ Nanu mo ing kapanayan da detang taung alang Dios a katawan king oras a ing Dios kuanan na ing bie ra?

⁹ Pakiramdaman na kaya ning Dios ing saingsing da potang datang na ing kaligaligan karela?

¹⁰ Pignasan da sana itang tulang babie na; menatili la sana king pamanalangin.

¹¹ Paburen yung ituru ku kekayu ing degulan ning upaya ning Dios, at ikwentu ku kekayu nung nanu ing binalak ning Dios a Mayupaya.

¹² Oneng e na kailangan pa uling king sarili yu ikit yu na; obat magsalita kayu pang ala king matulid?

¹³ Makanyan na lang paparusan ning Dios a Mayupaya ding taung e mayap, ding taung tampalasan.

¹⁴ Dakal la man ding anak da, oneng mate la ngan king gera; kulang mung kulang ing pamangan a pagkabie ra.

¹⁵ Mate no man king sakit ding mitagan, at ding mebalu ra e ra man tangisan ing kamatayan da.

¹⁶ Mika pilak ya mang anting balas a tatambak da, at imalan a bubuntun da anting gabun;

¹⁷ oneng ating mayap a taung misulud king imalan, at ating tapat a taung kuma king pilak.

¹⁸ Ing tatalakad nang bale anti ya king bale babagua o kalupa ning kubu ning ipus a magbante king marangle.

¹⁹ King misan a panaun matudtud ya ing mabandi, oneng kabuklat ding mata na bandi na ala na.

²⁰ Anting biglang albug datang ing takut; king kabengian itange na lang marayu ning angin;

²¹ palisan na la manibat karing karelang tuknangan ning angin a ibat king aslagan;

²² alang lunus yang dugpa karela kabang gagawan da ing agyu ra ban miligtas la.

²³ Bibiung yang dagpa karela ing angin kabang pupulayi la, pamatakutan na la ketang mapanyira nang upaya.

28

¹ Ating minahan nung nukarin ing pilak karelang kukulkulan; atin munamang lugal nung nu ing gintu karelang gagawan puru.

² Kukulkulan da ing bakal king gabun, at lalasawan ing tangsung ibat king batu.

³ Sasalugsugan de ing kalalalaman ning karalumduman ning yatu; batu king maralumdum karelang kukulkulan.

⁴ Marayu king tuknangan da ring tau o marayu pa king lugal a lekaran na na ning ninuman; kukulkul lang gagawang dalan palub karing minahan. King kalungkutan magobra la, pakakalawat la karing lubid kilub ding kulkul a gewa ra.

⁵ Ing yatu ya ing panibatan ning pamangan ning tau, oneng lalam na pangulkulan da ne man, at pamirasuan.

⁶ Atin lang iyas a safiro ding batu na ning yatu, at atin yang mugmug a gintu.

⁷ Ayup mang maniagmit pamangan ala pang menakit king dalan, ayup mang lawin mata ra e ra pa ikit.

⁸ Ala pang leon o nanumang mabangis a animal ing dinalan king malungkut a dalan.

⁹ Kukulkulan da la ring tau ding mangasias diling batu, at alukayan de ing bunduk king katatalakaran na.

¹⁰ Kilub ding mangaragul a batu gagawa lang karelang dalanan, at karelang atutuklasan batung mangamal.

¹¹ Kilkulan da la ring panibatan ding ilug, lege da king masala ing makasalikut.

¹² Oneng nukarin malyaring mayakit ing kabiasnan? Nukarin kami malyaring magaral ban ating aintindian?

¹³ E ya malyaring mayakit ing kabiasnan king katipunan ding tau; alang makibalu king tune nang ulaga.

¹⁴ Ing kalalalaman sasabian na, Alayu kaku at ing dagat sasabian na, Keni alayu.

¹⁵ E me asali king pilak o gintu.

¹⁶ E me malyaring pakilupa ing ulaga na king purung gintu o alahas.

¹⁷ Maulaga yang e palak king gintu o kristal, at e me apakilibe karing alahas o king purung gintu.

¹⁸ Ing ulaga ning kabiasnan maygit ya kesa king koral o kristal; mal yang e palak karing perlas.

¹⁹ E me apakiwangis ing kabiasnan king pinung topas o purung gintu.

²⁰ Nung makanyan nukarin ya ing penibatan ning kabiasnan? Nukarin kami magaral ban atin keng aintindian?

²¹ Makasalikut ya karing mata da ring mabie, makapampan ya maging karing susulapo ayup.

²² Tatanggapan ning kamatayan, at ning kasiran king bali-balita mu ing dimdam da tungkul karela.

²³ Ing bukud mung Dios ya ing makibalu king dalan. Balu ne ing lugal ning kabiasnan nung nukarin me atagpuan.

²⁴ Uling akakit ne ing wakas ning yatu; akakit na ing heganagana lalam ning banua.

²⁵ Inyang binie na ning Dios ing upaya ning angin, at binalak ne ing degulan na ning dagat;

²⁶ inyang inari na nung nukarin dugpa ing uran, at ing dalanan ning duldul;

²⁷ kanita ne ikit ing kabiasnan, at ing ulaga na terukan na. Kanita ne bilalag.

²⁸ Ngana ning Dios king tau: Lawan mu, ing takut at kagalangan king Dios ya ing kabiasnan, at ing gumulut king kasalanan ya ing beluan.

29

¹ Nganang pasibayung migsalitang Job:

² Sana misan pa ing bie ku maging kalupa ne ning sadia inyang ing Dios ingatan na ku,

³ kanita pane yang kayabe ku, dirinan na kung sala king pamaglakad ku king karalumduman.

⁴ Kanita mabandi ku, at iningat ne ning lugud ning Dios ing pibalebale ku.

⁵ Kanita kayabe ke ing Dios a Mayupaya, at atyu la siping ku deng anak ku.

⁶ Dirinan da kung dakal a gatas ding baka ku at kambing, agyang keng mabatu tutubu la ding tanaman kung olibo.

⁷ Potang magpulung la ding makatua ning siudad, at munta ku king lugal ku libutad da,

⁸ potang akit da ku ding kayanakan lelele la ba da kung dinan dalan, at tatalakad la ding makatua ban ibie dang karelang galang.

⁹ Tuknang la king pamagsalita ra ding karelang manimuna,

¹⁰ agyang ding karela pikabaluan manahimik la.

¹¹ Ding balang menakit o mekaramdam kaku atin lang mayap a balung sabian tungkul king kakung gagawan.

¹² Potang saingsing ya ing kalulu, sasaup ku; sinaupan ku la ding ulilang e ra balu man nung ninu ing karelang lapitan.

¹³ Kapurian babie da kaku detang tau atyu king kalalaman ning karelang kasakitan. Aku ing sangkan inya magkanta la ding babaing mebalu king tula ra.

¹⁴ Menatili kung darapat king makatuliran, at king alang pamangabiran.

¹⁵ Aku ing meging mata da ring bulag, at bitis da ring pile.

¹⁶ Aku ing tata da ring kalulu, at menalakaran king panig da ring dayuan a atyu king kaligaligan.

¹⁷ Sinira ku ing upaya da ring taung mabagsik, at karelang biktima kakung segipan.

¹⁸ Ing mie kung makaba ya ing kakung asahan, at mate ku king katahimikan kilub ning kakung tuknangan.

¹⁹ Ing kalupa ku ya ing tanaman a king danum kakung yamut e la kagigisanan, at ding kakung sanga kabukas king ambun mabasa la.

²⁰ Pupurian da kung alang tuknang ding tau, at kapilan man e na ku likuan ning kakung sikanan.

²¹ Neng babie kung payu, king kakung sasabian ding tau tahimik la at makiramdam;

²² kayari ku ala na lang daragdag pa. Penamdaman da ing sinabi ku karela;

²³ tatanggapan do ngan ding sabla kalupa ning pamanialubung ning ortelanu king uran kaybat ning kaleldo.

²⁴ Tinimanan ku la inyang milalako ing tiwala ra; mesikan la lub uli ning masaya kung lupa.

²⁵ Kinua ku ing pamamahala, at gewa ku ing pamagpasya; penimunan ku la anting ari karing tropa na, at dininan tula king panaun ning kalungkutan da.

30

¹ Oneng ngeni gagawan da na ku mung pitutulan ding lalaking mas anak kesa kaku! Ala lang bitasang kabaldugan ding karelang tata; e ku la man buring kasaup ding asu kung magbante tupa.

² Ala kang pakinabang king kagiwan da. Nanumang obra ala lang agawa uling maina la.

³ Uli ning danup da, at kakaluluan karela lang gigisanan malanging yamut ding tanaman.

⁴ Karela lang paglaputan at kakanan ding tanaman king ilang; maging ing alang lasang tanaman a timbu!

⁵ Anti lang mapanako king kulisak panabi ding tau.

⁶ Kailangan lang manuknangan karing kulkul a delanan ning danuman, karing busbus a kilkulan da gilid ning bunduk.

⁷ Anting animal king ilang magbitaul lang masikan, at abe-abe lang misisiksikan lalam da ring tanaman.

⁸ Tinabi da la king gabun da ding taung alang kwenta; e do man tuturing kabilang karela.

⁹ At ngeni daratangan da ku at pikayli-kaylian; para karela mistula na ku mung pitutulan.

¹⁰ Pandirian da ku at pangingilagan, pagluran da ku pa lupa.

¹¹ Uling ing Dios gewa na kung maina at ala nang akarapat, lubus-lubusan da ing bigsikan da nung arapan da ku.

¹² Deting magulung tau nung luban da ku arap-arapan; tinabi da kung mengapapulayi; sasadia da laban kaku ing kakung kasiran.

¹³ Sebat de ing pitakasan ku, at pakikuanan dang ilugmuk da ku; metung mang tau alang memigil karela.

¹⁴ Ketang dalanan dang makatiwangwang sasagasa lang daratang; medakurak kung karela mipailalam.

¹⁵ Mikatmuan ku king takut; mewala ing nanumang dangalan ku anting tinabi ning angin, at anting biga ing pibandian ku mewala.

¹⁶ Malapit nia mung datang kaku ing kamatayan; alang kapaldanan nanuman kening kakung kasakitan.

¹⁷ Karas ning bengi kakung butul mangirut la; itang sakit a ngangatngat kaku alang paynawa.

¹⁸ Kinuelyu na ku ning Dios layun mengapilipit ing kakung imalan.

¹⁹ Bigsak na ku king burak; mistula na ku mung dinat. fig,,,,,Bigsak na ku king burak...,(30:19)fig*

²⁰ Mamaus ku keka, O Dios, oneng kapilan man e mu ku pekibatan; at neng manalangin ku e mu ku pakiramdaman.

²¹ Tutu kang meging mabagsik kaku; ligaligan mu ku ketang lubus a upaya mu.

²² Dimput mu ku at seke king angin, king angin ning bagyu piitsa-itsa mu ku.

²³ Wa, balu ku ing darala mu ku king kamatayan, ing kararasan a makapanaya karing sabla.

²⁴ E wari ing taung mibagsak na king bie na, ala nang arapat nune namu maniawad pakalulu.

²⁵ E wari menangis ku para karetang atyu king kaligaligan? E wari mebagbag ku kapanamdaman karetang atyu king kakaluluan?

²⁶ Oneng inyang manintun kung tula dinatang ing kaguluan; inyang manaya ku king sala, dinatang ing karalumduman.

²⁷ Malisuas ya ing pusu ku, ala yang kapaynawan. Tuki-tuki la ding aldo daratang pawang kasakitan ing karelang daralan.

²⁸ Lakad-lakad ku; malungkut ing itsura ku, ala yang sala nanuman ing lupa ku. Mamarap ku karing tau kasaupan da ing aduan ku.

²⁹ Magdili-dili ya at malungkut ining kakung siwala, anti ya king siwala ning tuku o ning asung magbitaul.

³⁰ Manuling at mangasugat ining kakung balat; katawan ku mibabaya ne man king lagnat.

³¹ Kanita ing masayang tigtigan ing king lira ku mararamdam, ngeni keni mang plauta ku ing kekang daramdaman musika yang maniambitan.

31

¹ Ginawa kung taimtim a kapangakuan king kareng babai e na ku lumawe maki pamagnasa.

² Nanu ya ing maging dake ku king Dios a atyu babo, at ing kakung katuliran ibat king Mayupayang atyu king katasan?

³ E wari kaguluan ing tatanggapan da ring e makatuliran, at kasiran ing karing gagawang kasalanan?

⁴ E wari akakit na ing heganagana kung gewa, at ala kang alingad karing kakung takbang?

⁵ Susumpa ku king kapilan man e ku ginawang kasalanan, at e ku pignasan ing ding aliwa kaku lang linlangan.

⁶ Paburen mung timbangan na ku ning Dios karing ustung timbangan, at akit na nung makananu kung alang kasalanan.

⁷ Nung wari't linisia ku king ustung dalan o pignasan ku ing e ustu o mimantsan la ding gamat ku king kasalanan,

⁸ kanita paburen mung masira lang kakung tanaman, at king pupul ku ding aliwa ila ding mangan at makinabang.

⁹ Nung wari't pignasan ke ing asawa ning aliwa, at makasalikut menaya lual ning pasbul na,

¹⁰ paburen mung ing asawa ku maglutu yang pamangan para king lalaking aliwa, at siping ning aliwang lalaki karin ya magkera.

¹¹ Ing makanyan a kasalanan mangaintulid parusang kamatayan.

¹² Ing maging kawangis na api a mapali at makatampus; lubus nang gisanan ing kakung pibandian.

¹³ Pakiramdaman ku at dirinan kalutasan ing saingsing ding alipan kung kaku daratang.

¹⁴ Nung e mu pin makanyan makananung ing Dios kaku yang arapan? Nanu ing malyari kung sabian potang ing Dios ya'ng datang at aku ing keyang atulan?

¹⁵ Ing Dios a linalang king kakung alipan ya naman ing kaku linalang.

¹⁶ Kapilan man e ku la pigkaitan ding kalulu; kapilan man e ku la pepaburen ding mebalung mangailangan

¹⁷ o kaya peintulutan ing aku mangan ku at ding ulila ali la.

¹⁸ Sinese ke anting pengari na manibat na king anak ya, at manibat king kabait na, kaku yang tiru na.

¹⁹ Potang menakit kung mangailangan, king keyang kakaluluan ala yang isaling imalan,

²⁰ dinan keng imalan a lana a ibat karing kakung tupa. At kanita pasalamat ya kabilugan ning pusu na.

²¹ Nung wari't binuatanan keng gamat ing ulila uling balu ku e na ku sambutan king ukuman,

²² kanita pepe ning pago ku matanggal ya sana, at takde ku milako ya king pisuguan na.

²³ Uli ning takut ku king parusa ning Dios, kapilan man e ku gawan iting bage.

²⁴ Kapilan man e ku menalig king pibandian

²⁵ o pigmaragul ing kakung kayatinan.

²⁶ Kapilan man e ke simban ing aldo makaslag o ing bulan king keyang leguan.

²⁷ Kapilan man e ku milisia, at karela sinamba o inuma ining gamat king pamangalang karela.

²⁸ Ing kasalanan a anti kanita kamatayan ing katulid na, uling metung yang kalapastanganan king Dios a Mayupaya.

²⁹ Kapilan man e ku ketula ing kasiran da detang kaku maki mua o migsaya inyang ing e mayap miras karela;

³⁰ at e ku mikasalang penalangin ku ing karelang kamatayan.

³¹ Balu da ring taung kaku makipagobra king matula ku lang tinggap bale ku ding dayuan.

³² Makabuklat ya pasbul ing kakung tuknangan, alang maglakbe a metudtud king dalan.

³³ Ding aliwang lalaki sasalikut da ing karelang kasalanan, oneng ing kaku kapilan man ali ku.

³⁴ E ku pitakutan kapilan man nung nanu ing sabian da ring aliwa. E ku kinua king e bubulad o sinalikut kaya uli namu ning takut ku king malyaring sabian da kaku.

³⁵ Alang bisang makiramdam king sasabian ko? Susumpa ku king ing balang sasabian ku tutu. Paburen pakibatan na ku ning Dios a Mayupaya. Nung misulat la mu ban kakung abasa ding sumbung ding kalaban a laban kaku,

³⁶ mapagmaragul ku la pang isulud king pago ku, at ibili anting korona king buntuk ku.

³⁷ Makayatna ku kanuan king arap na, sabian ku king Dios ing heganagana kung depat.

³⁸ Nung simsam ke ing gabun a kakung asikan karing taung maki katuliran,

³⁹ nung pengan ku ing pupul a alang bayad, at aku ing meging sangkan ning kamatayan ding maki mulahan,

⁴⁰ paburen mung tumubu ing suksuk ampon ing dikut kayalili ning sebada at trigu. Keti la mepupus ding amanu nang Job.

32

¹ Uli na ning kapaniwalan nang Job king ala yang kasalanan, tiknangan deng pakibatan ding atlung lalaki.

² Kanita ya mimua i Elihu a anak nang Barakel at lahi nang Bus, king pamilya nang Ram, uling ing sarili nang Job ya ing dirinan nang matulid at aliwa ing Dios.

³ Mua ya naman karing atlu nang kakaluguran Job uling agyang sinabi da king i Job atyu ya king kamalian oneng ala lang balung ipakibat da kang Job inya lalto pa king balamu ing Dios ya pa ing atyu king kamalian.

⁴ Uli na ning i Elihu ya ing anak karela, menaya ya anggang e la ngan meyaring migsalita.

⁵ Mimua ya inyang e na la makabulad ding atlung lalaki,

⁶ at megumpisa yang migsalita i Elihu. Ngana: Anak ku mu at matua na kayu, inya mikakunu ku at tatakut kung sabian ing atyu king lub ku.

⁷ Sinabi ku king sarili ku king dapat lang magsalita ding maki idad na, king idake ra ing dakal a kabiasnan da.

⁸ Oneng ing espiritu ning Mayupaya ya ing daratang king tau, at babie beluan.

⁹ Aliwa ing tua da ring tau yang babie kabiasnan o makasaup karela ban abalu ra nung nanu ing mayap.

¹⁰ Inya ngeni, aduan ku ing makiramdam kayu at sabian ku kekayu nung nanu ing isipan ku.

¹¹ Mibata kung mekiramdam kabang magsalita kayu, at menaya ku kabang panintunan yu la ding amanung maki kabiasnan.

¹² Maingat da kayung pekiramdaman, at lawan yu, ala metung man ing mekatutul kekayu king sinabi nang Job.

¹³ Makananu yung sabian ngeni ing atyu kekayu ing kabiasnan? Uli ning e ye atutulan i Job, ing Dios ya ngeni ing kailangan makibat.

¹⁴ Ikayu, aliwa aku, ing akasabi nang Job, oneng e ke pakibatan kalupa ning kekayu.

¹⁵ E na la mekabulad kang Job; ala na lang asabi pa.

¹⁶ Manaya na ku wari uling e la magsalita, uling pakatalakad na la mu, at ala nang balung sabian?

¹⁷ Aku ing munie pakibat; sabian ku ing isipan ku.

¹⁸ E na ku makapanaya pa ban magsalita. E ku na la apibata ding amanung atyu kaku.

¹⁹ Nung e ku pa magsalita, matdas kung anting balat a lulanan a maki bayung alak.

²⁰ Kailangan kung magsalita ba kung mika kanawan. Ibuklat ku lang labi ku ba kung magsalita.

²¹ Kaninu man ala kung kakabiran ni e ku gumamit pamipapuri kenu man.

²² E ku ugali ing babie kapurian uling malalagua na kung arian ning kaku linalang.

33

¹ At ngeni Job, makiramdam kang masalese king kakung sabian.

² Ing atyu king pusu ku kakung sabian keka.

³ Tapat la ding amanu ku, at king katutuan ku magsalita.

⁴ Gewa na ku at dininan bie ning espiritu ning Dios.

⁵ Nung agyu mu pakibatan mu ku; isadia mu la at talakaran ding pakibat mu.

⁶ Parehu katamu king arapan ning Dios, parehu katamung meubug king gabun.

⁷ Inya ala kang sukat ikatakut kaku; e ra ka patasan.

⁸ Atyu ku at oyni ing sinabi mung dimdam ku:

⁹ Ala kung dapat pakibatan; ala kung gewang e ustu. Malinis ku; ala kung kasalanan.

¹⁰ Manintun yang sangkan ing Dios laban kaku, binilang na ku anting keyang kalaban.

¹¹ Ginapus na la ding bitis ku, at binten balang kimut ku.

¹² Oneng sasabian ku keka Job ing mali ka. Maygit ya ing Dios king kenu mang tau.

¹³ Baket sasangkanan meng e biasang makiramdam ing Dios king reklamu ning tau?

¹⁴ Agyamang ing Dios ulit-ulit yang magsalita, ala namang makiramdam king sasabian na.

¹⁵ Neng benging matudtud ya ing tau, kapamilatan ning paninap at vision

¹⁶ magsalita ya ing Dios king tau, at pamatakutan na la karing babala na.

¹⁷ Gagawan na ita ban tuknang la king pamikasala ra, at ilisia na la king ketasan da.

¹⁸ E na la buring masira, at lilisia na la king karelang kamatayan.

¹⁹ Parala yang miyayaliwang sakit king tau, miyayaliwang kapanamdaman ning katawan ba nia mung atulid king gagawan na.

²⁰ Milalako ya gana king pamangan, ing pelalung maniaman dungus na e na buring tanggapan.

²¹ Meyayat ya; butul-balat nia mu;

²² malapit nia mung munta king tuknangan da ring mete.

²³ Sana datang yang sumaup ing metung mu man karing libu-libung anghel a paganaka karing katungkulan da ring tau.

²⁴ King lunus na ing anghel nganang sumabi, Ilako ye! E ne mabaldug pa king tuknangan da ring mete. Oyni ing panatbus.

²⁵ Sikan ya pamikakatawan at pasibayu yang maging anak;

²⁶ manalangin ya at makiramdam ya ing Dios; samban ne king mitmung tula ing Dios; ipamalita na karing tau ing pangaligtas na.

²⁷ Sabian na karing tau, Mikasala ku. Aliwa ing mayap ya ing gewa ku, oneng pepatawaran na ku ning Dios.

²⁸ Sebat na ing pangabaldug ku king tuknangan da ring mete, at angga ngeni atin kung bie.

²⁹ Ulit-ulit ing Dios gagawan na;

³⁰ liligtas ne bie ing tau, at babie na ing tula ning mabibie.

³¹ Inya makiramdam ka, Job, kening kakung sasabian manahimik ka, at paburen mung magsalita ku.

³² Oneng makibat ka, nung atin na ka mang buring sabian, masaya ku namang tanggapan ing kekang katuliran.

³³ Nung ali na ka man, manahimik ka at makiramdam, at ituru ku keka ing kabiasnan.

34

¹ Ngana pang migsalitang Elihu:

² Makiramdam kayu ikong taung mangabiasa, makiramdam kayu ikong taung ating beluan.

³ Paniubukan na la ning balugbug ding amanu, kalupa na ning pamaglasa na ning dila king pamangan.

⁴ Pilinan ta ya itang ustu; itamu mismu ing matul ketang mayap.

⁵ Sasabian nang Job king ala yang kasalanan, king pigkaymut ning Dios ing hustisia.

⁶ Agyang atyu king matulid bibilang deng malaram, agyang ala yang kasalanan ing sugat ning panamdam na ala nang pangapaldan.

⁷ Menakit na kayung taung kalupa na ning Job a ine? Kapilan man e na papakit ing kagalangan king Dios.

⁸ Maburi yang makiabe karing taung e mayap a dapat, at galagala yang kayabe ra ding makasalanan.

⁹ Ngana pa king ala namang pakinabang ing pamamintu king kaburian ning Dios.

¹⁰ Makiramdam kayu kaku ikong makaintindi, marayung-marayu ing gawa yang e ustu ing Dios a Mayupaya.

¹¹ Dirinan na lang ablas ding tau agpang king karelang depat, at pakiabayan na la agpang king mangaintulid karela.

¹² Ing katutuan, e ya gagawang e ustu ing Dios a Mayupaya; kapilan man e na paintulutan ing e makatuliran.

¹³ Tinggap na wari ing upaya na kenu man? Ating ninumang minie upaya ban sakupan ne ing yatu?

¹⁴ Nung kuanan nang pasibayu ing inawa ning bie,

¹⁵ ding balang mabie, abe-abe lang mate at king alikabuk la pasibayung magbalik.

¹⁶ Makiramdam ka kaku, nung ika biasa ka.

¹⁷ Keka yang atulan ing Dios a makatuliran? Keka yang isipan king kasaman na ing hustisia?

¹⁸ Ing Dios ya ing matul karing ari at manungkulan a alang kabaldugan o maki kasalanan.

¹⁹ E ya papakit pamangabiran karing manungkulan ni karing mabandi laban karing kalulu, uling ya ing linalang karela ngan.

²⁰ King metung mung saglit mate la king kapitangan bengi. Ing barugan na mate ya; king alang nanuman ding mayupaya paten na la.

²¹ Ding mata na makalawe la karing balang gewa da ring tau; alang makasalikut king Dios, uling balu na ngan ing takbang da.

²² Alang dalumdum nu ya man anti kapal ing malyari nang pisalikutan ning taung e mayap.

²³ Uling ing Dios e ne man mitakdang oras kenu man ban king arap na munta ya para miyatulan.

²⁴ Agyang alang kapaniasatan babagsak na lang mayupaya, at king lugal da aliwa lang lulukluk na.

²⁵ Uling balu na ing gagawan da; king kabengian lalako na la at daragsa.

²⁶ Parusan na lang makasalanan king akakit da ring tau,

²⁷ uling tinuknang la king pamanuki ra king Dios, at ala na lang pinsinan metung man karing keyang kautusan.

²⁸ Ila ding meging sangkan inya ding kalulu sinaingsing la king Dios, at dimdam na ing kulait ding maniawad kasaupan.

²⁹ Nung ing Dios ala yang gawan nanuman, ala metung man ing makapintas. Nung isalikut ne ing lupa na, nanu ing akarapat ning ninuman?

³⁰ Ala lang agawa nanuman ding bansa ban apalakuan de ing manungkulan a alang Dios a katawan a karela manalipit.

³¹ Tinggap mu na la Job ding kasalanan mu king Dios, at mengaku na kang e na mikasala pang pasibayo?

³² Inawad mu na king Dios ing ipakilala na la keka ding kekang kamalian, at pengaku mu nang tuknang gagawang kasalanan?

³³ Anti na ning tutul ka king gagawan ning Dios panenayan mu ngeni ing gawan na ing kaburian mo? Atyu keka ing disisyun alayu kaku; sabian mu ngeni kekami nung nanu ing isipan mu.

³⁴ Ding taung maki beluan sabian da kaku, pati na ding taung biasa a makaramdam kaku sabian da

³⁵ king magsalita ya i Job king e na balu; alang kalaman-laman ing keyang sasabian.

³⁶ Balikan mung isipan ing heganagana nang sinabi; akit mu ing magsalita ya anting taung e mayap.

³⁷ Daragdag na pa ing pamaglaban karing kasalanan na; insultuan ne ing Dios king kekatang arapan.

35

¹ At nganang Elihu: E matulid, Job, ing sabian mu king ika ala kang kasalanan king arapan ning Dios

²

³ o kaya kutnan me ing Dios, Makananu wari keka ing kasalanan ku? Nanu mo ing apala ku nung aku e ku mikakasala?

⁴ Pakibatan da ka at pati na ding kekang kakaluguran.

⁵ Talangan me at lawan ing banua! Lawan mu nung nu la anti katas ding biga!

⁶ Nung mikakasala ka man, e mu ne man ananu balang ing Dios. Nung ulitan mu lang kekang kasalanan maligalig ya?

⁷ Asasaupan me ing Dios nung ika matulid ka? Ala ne mang nanumang kailangan ing Dios keka.

⁸ Ing kalupa mung tau ya ing magdusa karing kekang pamikakasala, at king mayap munaman ya ing misasaupan.

⁹ Sasaingsing la ding taung magigipit; maniawad lang saup karing aliwa ban sagipan da la.

¹⁰ Oneng e re lalapitan ing Dios a karela Linalang, ing malyaring sumaup karela king maskup dang kabilian.

¹¹ E re lalapitan ing Dios a babie kabiasnan kekatamu, kabiasnan a maygit kesa karing animal o ayup.

¹² Kanita maniawad lang kasaupan oneng ing Dios e na la pakibatan, uli ning ketasan da at kasalanan.

¹³ Alang kasilbi-silbi ing dalung da king Dios; e na la akakit o daramdaman ning Dios a Mayupaya.

¹⁴ Ika nang sinabi, Job, king ing Dios e me akakit; manaya ka at mibabata pa, ing kasu mu atyu king arap na.

¹⁵ Isipan mu king ing Dios e ya mamarusa, at king e na dirinan pansin ing kasalanan.

¹⁶ Masasayang mu ing salita na kang salita; malino king e mu balu ing sasabian mu.

36

¹ Ngana pang migsalitang Elihu:

² Makiramdam ka at mibabata ka pang bagya king sabian ku alang-alang king Dios.

³ Maleparan ing beluan ku, at gamitan ku ngan ban apakilala ku keka king makatuliran ya ing kakung Miglalang.

⁴ Ala kung sabian kekang kalaraman, uling tau yang biasa ining atyu king kekang arapan.

⁵ Tune king ing Dios mayupaya ya, at ala yang insultuan ninuman; balu na ing heganagana.

⁶ E na la paluatan mabie ding taung e mayap, bagkus dirinan na lang matulid ding taung mangadakurak.

⁷ Ingatan na la ding makatuliran; kayabe ding ari paintulutan na lang manimuna; kabang-kaba parangalan da la.

⁸ Nung ding tau pakagapus no man karing tanikala, at magdusa uli ning depat da,

⁹ ipakilala na ning Dios ing karelang kasalanan, at ing penugali rang ketasan.

¹⁰ Ausan na la kapanamdaman, at agkatan gumulut king kasalanan.

¹¹ Nung pakiramdaman de ing Dios at suyuan, dalanan dang bie makatagan king kapayapan at kanawan.

¹² Nung e la makiramdam, mate la king pataram, at mate lang alang beluan.

¹³ Susundu ra ing mua ra detang alang Dios a katawan, tanggap la mang parusa e la mu rin manalangin maniawad kasaupan.

¹⁴ Mate la king karelang kayanakan, mapupus ing bie ra king kamarinayan.

¹⁵ Tuturu na la ning Dios ding tau kapamilatan ning kasakitan, at gagamitan na ing kaligaligan ban mibuklat la mata.

¹⁶ Linaut na ka ning Dios king kaligaligan, at pepatakman na keka ing bie panatag; ing lamesa mu mitmu ya king pamangan.

¹⁷ Oneng kinatmu ka king pamanatul karing e mayap; ing pamanatul at ing hustisia dinatang keka.

¹⁸ Mingat ka pota alinlang na ka ning suhul o ilisia na ka king dalan ning pibandian.

¹⁹ E na ka asaupan nung saingsing kang maniawad kasaupan; e na na ka asaupan ngeni ning mabilug mung sikanan.

²⁰ E mu ne pagnasan pang datang ing kabengian, potang ding bansa mawala la.

²¹ Mingat ka e mu arapan ing kasalanan; ing kasakitan mu miras keka ban kekang pangilagan.

²² Ganakan mu ing degulan ning upaya ning Dios; ya na ing maragul dili karing heganaganang talaturu.

²³ Ala metung man ing makasabi king Dios nung nanu ing gawan na o abintanganan meng ginawa yang kasalanan.

²⁴ Alang tuknang a pamipapuri king Dios karing gagawan na; ika man purian me.

²⁵ Ding heganaganang tau ikit da ing gewa na; karelang tatangalan ketang marayu dang kabilian. fig,,,,,Ding sablang tau ikit da ing gewa na.,(36:25)fig*

²⁶ E tamu lubus abalu ing degulan na o bilangnan ding bilang ding banua nang delanan.

²⁷ Ing Dios ya ing kukua king danum ning yatu, at kaybat gawan nang patak ning uran.

²⁸ Ya ing mibabaldug king uran ibat karing biga ban paranuman ne ing meto ketawan.

²⁹ Alang makibalu king lakad ning biga o nung makananu yang kakalugkug king banuang tuknangan na.

³⁰ Tutubud ne ing kildap king malualas a banua, oneng ing kalalaman ning dagat manatili king karalumduman.

³¹ Makanyan na lang pakanan ding tau; babie na ing labis-labis a pamangan.

³² Dakpan ne karing gamat na ing kildap; yutus neng paturan ne ing tulduan na.

³³ Ing inge ning duldul babalita na ing pamangalalung mitmung kamua laban king kasalanan.

37

¹ Pakarugan na ku salu ning bagyu.

² Pakiramdaman ye ing siwala ning Dios, ing duldul a manibatan king asbuk na.

³ Tutubud ne ing kildap king malualas a banua, manibat king metung nang punta ning yatu angga king kangatba na.

⁴ Katuki na maramdam ne man king duldul ing makamal nang siwala, samantalang ing kildap gugulis ne man.

⁵ King utus ning Dios makapagmulalang bage ing mararapat. Pagmulalan tamu, oneng e tamu aintindian.

⁶ King utus na mabaldug ing yelu king yatu, at parala ya namang uran a alang tuknang, at ya naman ing paralang uran a masikan.

⁷ Inya tuknang la ding tau king karelang obra; pakilala na king ing heganagana dapat na.

⁸ Kanita ding mabagsik a animal lungub la at manatili karing lungga ra.

⁹ Ing angin a magdalang bagyu ibat ya king mauli, at ing marimlang amiam ibat naman king norti.

¹⁰ King pangisnawa ning Dios danum maging yelu, at ing malualas a danuman sisias anting batu.

¹¹ King banua gugulis ing mataram a kildap,

¹² uli ning pamamintu ra king kaburian ning Dios. Mamintu la ngan king utus ning Dios, nukarin pa man king kabilugan ning yatu.

¹³ Padala na ing uran ban paranuman ing gabun; malyaring padala na bilang pamamarusa o ban pakit na ing pakamal na.

¹⁴ Tuknang ka pa mu, Job, at makiramdam ka; isipan mu pa mu ing makapagmulalang gagawan ning Dios.

¹⁵ Balu mu nung makananu yang mumutus ing Dios, at nung makananu nang king banua payaslagan na ing kildap?

¹⁶ Balu mu nung makananu nang papagato ning Dios ing biga? Yan ing makapagmulalang dapat ning Dios a ganap king beluan.

¹⁷ E mu balu yan. Makagyung pibabatan mu ing pali potang maratun king gabun ing angin ning mauli.

¹⁸ Agawa mung kalupa ning Dios ing iladlad me ing suklub ning banua, at apasias meng kalupa ning kikintab a bakal?

¹⁹ Ituru mu kami nung nanu ing sabian mi; ala na kaming balung sabian, ala lang laman dening kekeng utak.

²⁰ E ku aduan ing makipagsalita ku king Dios; obat dinan keng panaun siran na ku?

²¹ At ngening ing angin dinalan ya, at lininis ne ing banua; makasilo ya ing sala king banua, tutu yang masala para alawe ta ya.

²² Manibat king norti daratang ing ginintuan a leguan; maka imalan ya ing Dios king makapagmulala nang kamalan.

²³ Ing upaya ning Dios tutung maragul, e ta man makalapit; bina yang makatuliran, ala yang pamangabiran.

²⁴ Inya ding tau katakutan de; e na la pansinan ding taung sasabian da ing biasa la.

38

¹ Kanita busal ning bagyu, migsalita ya ing Ginu kang Job. Ngana:

² Ninu wari ika a magduda king kakung kabiasnan kapamilatan ding kekang amanung alang beluan?

³ Talakad ka at magpakalalaki, at pakibatan mu la ding kutang ku keka.

⁴ Nukarin ka inyang lelang ke ing yatu? Nung tutu ing dakal ka balu, sabian mu kaku.

⁵ Ninu ing migpasya nung nu ya anti ing sukad na? Ninu ing miyatiat babo na king gulis a paniukad? Balu mu la ding pakibat?

⁶ Nu la makatalakad ding pundasyun na o ninu ing mibili king batu nang paniuluk?

⁷ King munag sumala ning aldo a ita ding batuin miyabe-abe lang migkanta, at ding lelangan ning banua mengulisak la king tula ra.

⁸ Ninu ing misara karing pasbul ban masabat ya ing dagat inyang ita misapuak ya ibat king yatung sepupunan na?

⁹ Gewa ke ing biga bilang piblasan na, at king makapal a dalumdum kaku yang bebatan.

¹⁰ Dininan keng angganan ing dagat, at binili gulut ding pasbul a pakasara.

¹¹ Ngaku, Angga na ka mu ken, at e na makalagpus pa, at keni ding palalu mung alun tuknang la.

¹² Job, king kekaban ning bie mu inutusan mu neng datang ing ganingaldo?

¹³ Inutus mu na king sala ing katmuan ne ing yatu ban ding e mayap mayabuang la king pangasalikut da?

¹⁴ Ding bunduk-bundukan, at ding kapatagan king aslag ning aldo linto la, kalupa ding tuklip ning imalan melino la, kalupa ning marka na ning panatak king pila.

¹⁵ Ing sala ning aldo bina yang masala karing e mayap, at mangapigil la king tangka rang gawang kasiran.

¹⁶ Ibat na ka karing panibatan da ring sibul king kalalalaman ding dagat? Linakad na ka king kalalalaman ding danuman?

¹⁷ Atin nang pepakit keka karing pasbul dalan a magbante king maralumdum a tuknangan da ring mete?

¹⁸ Atin kang beluan king degulan na ning yatu? Pakibatan mu ku nung balu mu.

¹⁹ Balu me ing panibatan ning sala o ing panibatan ning karalumduman?

²⁰ Atuldu mu karela nung nu la angga munta o apapagbalikan mu la kaya?

²¹ Balu ku king balu mu uling bina na kang matua, makabait na ka kanita!

²² Liban mu na la ding silid pisisinupan, nung nu ku sisikap ing yelu at uran-lipat?

²³ Sasadia ku la den king panaun ning kaguluan, karing aldo ding gera.

²⁴ Nu ya karin ing dalan papunta king lugal a panibatan ning sala o ing lugal a panibatan na ning angin ning aslagan?

²⁵ Ninu ing kinulkul king paliging dalanan na ning mananabung uran, at ing minie dalanan king kildap abe ning duldul?

²⁶ Ninu ing paralang uran karing lugal a ala mang makatuknang?

²⁷ Ninu ing paranum king malangi at maung gabun ban tumubu ing dikut?

²⁸ Atin yang tata ing ambun o ing uran?

²⁹ Kaninung sepupunan ya ibat ing yelu a sobra king karimla

³⁰ a papasias anting batu king danum, at maging masias a yelu ing dagat?

³¹ Atali mu la at piabayan ding batuin ning Pleiades o akalag mu la kaya ding batuin ning Orion?

³² Aturu me ing dalanan da ring batuin king miyayaliwang panaun, at ing dalanan da ring batuin ning Maragul at ning Malating Saru king banua?

³³ Balu me ing kautusan a pamintuan da ring atyu king suklub ning banua, at apalyari mung gampanan da ing atyu keti king yato?

³⁴ Malyari mu lang autusan ding biga ban mabingbing ka king uran a ibaldug da?

³⁵ Atuburan mu la ding kildap ban keka mamintu la, at keka sabian da, Atyu na ke pu kekayu makasadiang sumuyu?

³⁶ Ninu ing mibiling kabiasnan karing biga o minie beluan king ulap?

³⁷ Ninu ing maki kabiasnan a makapamilang karing biga? Ninu ing makatagilid karen ban ibaldug karelang bitbit a uran,

³⁸ ing uran a makapasari ban alikabuk maging mapekat?

³⁹ Malyari meng dakpan itang maging pamangan da ring leon o apakabsi mu ing danup da ring anak da

⁴⁰ kabang manenaya lang pakasalikut karing kueba o manaya karing karelang kulungan?

⁴¹ Ninu ing magsadia king apangan da ring awak potang king danup ding malutub da malisuas la at pamangan kaku maniawad la?

39

¹ Balu mu nung kapilan la mibabait ding malyap a kambing da ring bundok? Linawe mu na la deng usa neng manganak la?

² Balu mu nung nu la anti kaluat king atian ning gaindu ra bayu la miganap? Balu mu ing panaun nung kapilan la miramdam?

³ Balu mu nung kapilan la durukung mababa ban ibait da lang anak da?

⁴ Karing kagubatan la daragul at sisikan, at kaybat mako la at e na magbalik pa.

⁵ Ninu ing minie kalayaan karing asnong malyap? Ninu ing mibulus kareng asnong mabilis?

⁶ Binie ke karela ing ilang ban maging karelang tuknangan, at peintulutan karing gabun a malat manuknangan.

⁷ Pangilagan da la ding siudad a masigla, ala namang makapatunud karela ban gamitan king pamagobra.

⁸ Karing bunduk karin la manintun apangan da; karela lang kakanan ding sagiwang bulung.

⁹ Makasadia ya mo kayang magobra para keka ing malyap a baka? Bisa ya mo kayang kabukas ya king kekang kuadra?

¹⁰ Amanehu me kaya king lubid ban apaniarul mia? O apaguliut me kaya ing balsa king kekang taldawa?

¹¹ Apanaligan me kaya uli ning maragul nang sikanan, at ayasahan meng gawan na ing kekang mabayat a obra?

¹² Ayasahan me kayang iyuli na ing kekang pinupul, at idala na ing mepalut manibat king lugal ning pidadaran?

¹³ Matikas lang mamayagpag ding pakpak ning ayup a ostrich, oneng den kaya pakpak lang magdalang lugud?

¹⁴ Uling lalakuan na la ding ebun na king gabun, at panayan na karin ing tanggap lang pali.

¹⁵ E na pakibalak king karing bitis madamusak la o balbalan da la ding malyap a animal.

¹⁶ Ketang pangimut na ding ebun balamu e no bandi, ala yang malasakit agyang masayang ing kapagalan na.

¹⁷ Ita makanyan uling ing Dios gewa neng mangmang; e ne dininan kabiasnan.

¹⁸ Oneng potang magumpisa yang mamulayi kaylian nia mu ing kabayu, at ing makasake na.

¹⁹ Ika wari, Job, ing minie sikanan king kabayu? At king buak nang makaba king tundun ika wari ing minie?

²⁰ Uli mu wari inya makalundag yang anting durun, at potang gagaleung ya karing tau sindak naman ing ipasari na?

²¹ Kukudkud na lang patus na king kapatagan; king mabilug nang sikanan mamirapal yang munta king labanan.

²² Ing takut kaylian na king nanuman e ya manginayang, at alang pataram a makapaurung.

²³ Kalakalaksing la at kikislap ding armas da ring pakasake karela.

²⁴ Maki bigsikan at kamua yang pupulayi; katiup da ring trumpeta kabayu e ne makapaindatun.

²⁵ Gagaleung ya karing balang tiup ding trumpeta; marayu ya pa ing labanan ababau na na, daramdaman na ing kulisak nang utus ding opisyal.

²⁶ Uli na wari ning kekang kabiasnan inya balawe matas ya sulapo, at kaladlad ding pakpak na papuntang mauli ing sulapo na?

²⁷ Panayan na pa wari ning agila kekang utus bayu sulapo ya, at king bunduk a matas sale na karin ne gawan?

²⁸ Gawan ne karing batu ing tuknangan na, batung mangatilus ilang salikutan na.

²⁹ Manibat karin king malapit, at marayu makabante ya manintun yang apate na at apangan na.

³⁰ Nung nukarin la ding mete karin atyu ya, ding malutub na daya pagkabie ra.

40

¹ Ngana pang migsalita ning Ginu kang Job: Ing taung mapanintun kamalian makilaban ya king Mayupaya? Paburen mung makibat ya itang bisang makipagsalita king Dios.

²

³ Mekibat ya i Job king Ginu. Ngana:

⁴ Migsalita kung kamangmangan, Ginu. Nanu ing apakibat ku? Isara ku ne ing asbuk ku.

⁵ Labis na king dapat kung sabian ing sinabi ku.

⁶ Kanita busal ning bagyu pasibayu yang migsalita ing Ginu.

⁷ Antimong lalaki talakad ka, at pakibatan mu la ding kutang ku keka.

⁸ Keka ya ngening buring ipakilala king e ku makatuliran, ba mung apakilala ing ika ing ustu at aku ing mali?

⁹ Kasing sikan mu ko? Aparisan ne ning siwala mu ing duldol?

¹⁰ Nung makanyan, talakad kang marangal, at maki dangalan; miblas ka king ligaya at kamalan.

¹¹ Lawan mu la ding maki ketasan; ibugnus mu ing mua mu karela at keka lang insultuan.

¹² Wa, lawan mu la at ikuldas mu la; keka lang lasawan ding marawak ketang karelang katatalakaran.

¹³ Ikutkut mu la ngan king gabun; itali mu la king tuknangan da ring mete.

¹⁴ Kanita aku ing mumunang keka munie kapurian, at tanggapan king ing tagumpe mu sariling keka ya.

¹⁵ Lawan me ing dambualang Behemot; aku ing linalang king dambuala; aku munaman ing linalang keka. Kalupa ding baka dikut ing kakanan na, fig,,,,,Ayup a ostrich...kabayu...agila...ing dambuala...,(39:14, 24, 27; 40:15)fig*

¹⁶ oneng lawan mu ing sikanan ning katawan na, at ing upayang atyu karing laman na!

¹⁷ Ing iki na katalakad yang tanaman a sedro; masikan la ding kalamnan ning bitis na.

¹⁸ Kasing tibe lang tangsu ding butul na, at ding bitis na anti lang bakal.

¹⁹ Ya ing makapagmulalang dili karing kakung lelangan! Ing bukud mung Linalang ya ing malyaring sumambut keting dambuala.

²⁰ Ing dikut a pamangan na tutubu karing bunduk-bundukan nung nukarin mamialung la ding malyap at mabagsik a animal.

²¹ Magkera ya lalam ding masuksuk a tanaman, at sasalikut ya lalam ding timbu ning sapa.

²² Sasalilung ya lalam da ring masuksuk a tanaman, at ding tanaman ning sapa makapaligid la king dambuala.

²³ Ala yang takut agyang mabilis ya ing agus; tahimik ya agyang sapulan ne ning danum ning Jordan.

²⁴ Ninu ing makabulag ba reng arakap? Ninu ing makasilu king arung na?

41

¹ Malyari me kayang arakap i Leviatan keng taga o itali keng lubid ing dila na?

² Asulud me ing lubid king arung na o ibili ing taga king panga na?

³ Aduan na kaya keka ing ibulus mia o maniawad ya kayang lunus keka?

⁴ Gawa ya kayang kasunduan keka, at mangakung pagsilbian na kang alang angga?

⁵ Itali me kaya anting ayup a sese o anting bage paglimbang ding babaing kekang ipus?

⁶ Saliwan de kaya ding manasan? Pirasuan de kaya ding magtinda ban pisale?

⁷ Atusuk mo kaya king balat na ding dakal a sibat ding manasan, o taglusan ne kaya ning tandus ing buntuk na?

⁸ Tagkilan mia misan at e mu na ulitan; e mu na kalinguan ing labanan.

⁹ Milako ya tapang ing manakit kang Leviatan; ing ninumang manakit king gabun magsapad ya.

¹⁰ Alang anti ing tapang na potang meyabuang ya; alang masikan a lub talakad arap na.

¹¹ Alang makalaban a e numanu balang; ala metung man king mabilug a yatu.

¹² Paburen mung ibalita ku la keka ding bitis ning Leviatan, at ilarawan keka nung nu ya anti karagul at kasikan.

¹³ Ala metung man ing makalako king panlual nang susulud o makatandus king makapal nang balat.

¹⁴ Ninu ing makabuklat king sikang na a mipadurutnan karetang makatakut nang ipan?

¹⁵ Tuki-tuki lang kalasag a makailera king gulut na; taidtaid la at masias lang anting batu.

¹⁶ Matigik ya pangataid ing metung king katuki na; agyang angin ya mu e milub king pilatan da.

¹⁷ Alang nanumang bage ing makapikawani karela king katibe ra pangasuglung king metung at metung.

¹⁸ Mangildap king sala neng manatsing ya, mibabaya lang mata na anti ing aldo saslag neng abak.

¹⁹ Lulual king asbuk na ing aping milalablab, at alang tuknang susulapo ing mitataung lipatu.

²⁰ Lulual naman ing asuk karing busbus ding arung na; kalupa ning asuk ning dikut a mitatau lalam ning kuran.

²¹ Silaban ning pangisnawa na nanuman ing dasan na; lulual king asbuk na ing aping milalablab.

²² King sikan ning tundun na ding manakit tatakut la.

²³ Alang dake maina king balat na; e mu abaluktut, masias anting bakal.

²⁴ Ala yang takut kenu man ing pusu nang masias anting batu; matatag ya antimo ing batung panglalam ning gilingan.

²⁵ At ngening talakad ne man mitatakutan lang pekamasikan; uli ning takut da ala lang agawa.

²⁶ Alang espada a makasugat ni pana o tandus o nanumang matilus.

²⁷ Anti yang are keya ing bakal, at ing tangsu anti yang dutung a malambut.

²⁸ E ne pulayan ing pana a daratang; batung besibas mu king dambuala anti yang are panamdaman na.

²⁹ King dambuala ing palupalu mengari yang are pipalutan, kaylian na la mu deng taung miyayasiwas tandus.

³⁰ Anti yang mataram a kapsa ing atian na; nung magsapad ya anti ya mong balsa, pikakawanian na gabun a malambut.

³¹ Apapagalo ne ing dagat anting danum a bubukal; apapabula ne anting metung a kalderung laru.

³² Maputi yang kikislap ing delanan na; apapaputi ne anting bula ing dagat.

³³ Alang nanuman king yatu ing apakilupa mu; metung yang melalang a alang takut nanuman.

³⁴ Lawe na mababa king peka palalung diling animal; ya ing ari ding malyap at mabagsik a lasip.

42

¹ Mekibat ya i Job king Ginu. Ngana:

² Balu ku, Ginu, ing agawa mu ing heganagana, at alang makasagka king nanumang kekang tangka.

³ Kitang mu nung ba't masikan ku lub mangutang king kekang kabiasnan samantalang metung ku mung taung ala namang beluan. Migsalita ku karing bage a e ku aintindian, karing bage tutung pagmumulalan a e ku aintindian.

⁴ Sinabi mu ing makiramdam ku kabang magsalita ka, at pakikuanan kung apakibatan ku la ding kekang kutang.

⁵ Kanitang minuna ing balu ku mu keka ya ing dimdam ku karing aliwa, oneng ngeni ikit da ka ding sarili kung mata.

⁶ Inya tutu kung pagmarinayan ing heganagana kung sinabi, at sisisian ku king alikabuk at abu.

⁷ Ngana ning Ginu kang Elipaz kayari nang migsalita kang Job, Mua ku keka at karing adua mung kakaluguran, uling e kayu migsalita king katutuan tungkul kanaku antimo ing gewa ning talasuyu kung i Job.

⁸ Ngeni, magdala kayung pitung baka at pitung tupang lalaki kang Job, at iyain yu lang ain-sakripisyu para karing sarili yu. Ipanalangin na kayung Job at tanggapan ku ing panalangin na at e ku gawan kekayu itang mangaintulid kekayu. E kayu migsalita king katutuan tungkul kanaku a antimo ing gewa nang Job.

⁹ Gewa da ri Elipaz, Bildad, at Zofar ing sinabi na karela ning Ginu at pekiramdaman ning Ginu ing panalangin nang Job.

¹⁰ Kaybat na lang penalangin Job ding atlu nang kakaluguran, gewa neng pasibayung mabandi ning Ginu. Dininan neng dobli king sadia nang bandi.

¹¹ Dinalo de ring kapatad nang lalaki at babai at ding sadia nang kakaluguran, at migpiesta lang kayabe na king pibalebale na. Pisiag da ing pamakirame ra kang Job at inaru de karing kasakitan a pepagpa na ning Ginu. Minie yang ditak a salapi at gintung singsing ing balang metung karela. fig,,,,,Gewa neng pasibayung mabandi ning Ginu.,(42:10)fig*

¹² Binendisyunan ne ning Dios ing tauling dake ning bie nang Job maygit king minuna. Meging bandi na la ding labing apat a libung tupa, anam a libung kamelyu, libung kaparis a baka, at libung gaindung asno.

¹³ Atin yang pitung anak a lalaki at atlung anak a babai.

¹⁴ Inaus neng Jemimah ing pangane karing babai, ing kadua Keziah, at ing bungsu Keren Hapuch.

¹⁵ Ala nang babai pa king mabilug a yatu a kasing lagu da ring anak nang Job. Kalupa da ring anak nang lalaki, pepamanan na la ding babai.

¹⁶ Mebie yang dinalan apat apulung banua i Job, at ikit na la ding apu na, ding apu na king tud, at ding apu na king talampakan.

¹⁷ Tutu neng matua i Job inyang mate ya.