1

¹ Ing sasakupan nang lugal Aring Asueru ning Persia inyang kapanaunan na magumpisa ya king India at angga ya king Etiopia. Bibilugan de ring dinalan aduang pulu't pitung probinsia.

² Atyu king siudad ning Susa ing sentru na ning kayarian na.

³ King katlung banua na ning pamag-ari na, minie yang bangketi para karing sabla nang opisyal at talapamahala. Atyu la ding dakal a sundalus na ning Persia at Media at ding gobernador ampon ding taung kagalang-galang karing probinsia.

⁴ Kilub ding dinalan walung pulung aldo pepakit na karela ing pibandian na ning kayarian na at ing labis-labis a kabiayan na.

⁵ Kalabas da retang aldong deta, minie ne mang bangketi para karing sablang taung manuknangan king Susa, mabandi la man o kalulu. Merapat iting bangketi kilub ding pitung aldo karin king patyu ning palasyu.

⁶ Makagayak ya ing patyu king asul at maputing kurtinang linen a pakatali king mapinung lubid at argoliang pilak at makasabit la karing asias a marmol. Megawa la king gintu at pilak ding luklukan a ating sandalan. Mosaik ya ing patyu a megawa king porfido, maputing marmol; atin yang maragul at makintab a perlas at mangamal a batu.

⁷ Mininum lang alak karing kopang gintu a miyayaliwa tabas. Labis-labis ing mangamal a alak a sidia na ning ari.

⁸ Makainum ka anggang bisa ka uling minie yang utus ing ari karing talapagsilbi ning palasyu king dinan da lang alak ding bisita anggang bisa la.

⁹ Kilub ning palasyu, minie ya namang bangketi i Reyna Vasti para karing babai.

¹⁰ King kapitung aldo na ning bangketi makainum ya at masaya ing ari inyang pepayaus na la ding pitu nang kapun a talapagsilbi nai Mehuman, Bizta, Harbona, Bigta, Abagta, Zetar, at i Carkas.

¹¹ Inutus na karela ing idala de i Reyna Vasti; sukat yang makaputung king buntuk na ning reyna ing korona na. Buri neng ipagmaragul ning ari karing bisita na uling tune yang malagu ing reyna.

¹² Oneng e ya mebisang tinuki ing reyna karing kapun a lalaking tubud ning ari. Inya mikalabkab ing mua na ning ari.

¹³ Ugali na ning ari ing mangutang ya at maniawad payu karing tauan nang biasa king kautusan at kayatulan.

¹⁴ Ding kutnanan na ila di Carsena, Setar, Admata, Tarsis, Meres, Marsena, at i Memucan. Ila ding pitung pikabaluan a opisyal na ning Persia at Media; malapit la king ari.

¹⁵ Ngana ning ari karela, Agpang king kautusan, nanu ing sukat daptan kang Reyna Vasti uling e ya memintu king utus ku inyang peparakit ke karing tubud kung kapun?

¹⁶ Nganang mekibat Memucan king daramdaman da ring abe na, Makamal a Ari, e mu kekayu ya dinapat e ustu i Reyna Vasti, nune karing sablang pamuntuk at memalen na ning kayarian yu.

¹⁷ Siguradung abalu da ring sablang babai iting milyari. Inya, mika matulid lang lumaban karing karelang asawa. Sabian da, E ya memintu i Reyna Vasti kang Aring Asueru inyang papapuntan ne arapan na.

¹⁸ King aldong iti asisiguru ku nang balu da na ding babai na ning Persia at Media ing depat ning reyna king ari at ibalita ra iti karing asawa ra. Inya mika problema la ding lalaki karing asawa rang e bisang pailalam king kaburian da.

¹⁹ Nung burian yu pu, Makamal a Ari, gawa kayung metung a utus king e ne malyaring makikit pa kekayu i Reyna Vasti at alilan yeng aliwa a maygit kesa kang Reyna Vasti. Iyabe ya iting utus karing kautusan na ning Persia at Media at e sukat mauman.

²⁰ Potang mipabalu ne iting utus king mabilug yung kayarian, siguradung galangan ne ning balang babaing talasawa ing asawa na, mabandi ya man o ali ya.

²¹ Metula ya ing ari at ding tagapayu na kaniting munikala nang Memucan.

²² Inya peparala yang sulat karing sablang probinsiang sakup na agpang king karelang sariling pamanyulat at salita ban ing asawang lalaki ya ing malyari buri king pamilya na at kautusan la ding amanu na.

2

¹ Kaybat na nita, milako ne mua ing ari. Makanyan man, parati nang agaganaka itang depat nang Vasti at itang utus a gewa na laban keya.

² Inya migmungkahi la king ari ding taga-payu nang malapit keya. Ngara, Baket e kayu pu papaintun mangalagung dalaga para kekayu?

³ Mamili kayu pung opisyal king balang probinsia na ning kayarian at idala da la reting mangalagung dalaga king kekayung harem keti king Susa, ing kabiserang siudad. Ipagkatiwala yu la kang Hegai, ing kapun a mamahala karing babai yu, at ibie ing sablang kailangan da ban lalung lunto ing lagu da.

⁴ Itang aburi yu kareting dalaga ya ing pilinan yung kapalit nang Reyna Vasti. Metula ya ing ari kaniting munikala, inya mebisa ya.

⁵ Kanitang panaun a ita, ating Judiong manuknangan king siudad ning Susa. Mordecai ing lagyu na; anak neng Jair at apu neng Simei at apu ne king tud Kis ning tribu nang Benjamin.

⁶ Metung ya karing abihag nang Aring Nebucadenesar, at ibat Jerusalem dela ne Babilonia. Kayabe ne i Aring Jeconia ning Juda.

⁷ Atin yang pisan a dalaga i Mordecai; Ester ing lagyu naHadasa king Hebreo. Malagu ya at balangkinitan a katawan, oneng ala neng pengari. Inampun neng Mordecai antimong tune nang anak i Ester inyang mete la ding pengari na.

⁸ Metung ya i Ester karing dalagang midala king siudad ning Susa inyang mipatupad ya ing utus na ning ari. Miyabe ya karetang mipagkatiwala kang Hegai a mamahala king harem ning ari.

⁹ Meging malapit ya lub i Hegai kang Ester. Inya depat na ing sablang agyu na ban lalung lunto ing lagu na. Dininan neng makapasubaling pamangan ampon gamit pampalagu, at memili yang pitung babai king palasyu ning ari ban lingun keya. E mu ita, dininan neng masanting a lugal king harem na ning ari.

¹⁰ E na pepabalung Ester nung nanung lahi ing penibatan na o nung ninu ding kamaganak na, uling iti ing panabilin a binie nang Mordecai keya.

¹¹ Labas-labas ya aldo-aldo i Mordecai king patyu ning harem ban abalu na ing kabilian nang Ester at nung nanu ing mapapalyari keya.

¹² Pabanua ing reglamentu king pampalagu karing dalaga: anam a bulan ing masahian lang laru ampon mira, at anam a bulan king balsamung laru, at aliwa pang pabanglung pampalagu. Kaybat na nita, liwas-liwas da lang iyarap king Aring Asueru ding dalaga.

¹³ Malyari nang isulud ning ninuman karela itang buri nang imalan neng makikit ya king ari.

¹⁴ Munta ya king ari itang bengi, at idala re pangayabak king aliwang harem at ipagkatiwala kang Saasgaz, ing metung pang kapun a mamahala karing babai na ning ari. E ya malyaring makapagbalik king ari ing ninumang babai nung e ya metula keya at nung e ne pakiduang a lagyu.

¹⁵ Miras ing oras ban makikit ya i Ester king ari. I Ester, ing anak nang Abihail at pisan nang Mordecai a minampun keya bilang anak na, ala yang inawad nanumang isulud na. Bukud nang tikian ing payu nang Hegai, ing lalaking kapun a mamahala king harem ning ari. Kelaguan la ngan at nayun ding sablang menakit kang Ester.

¹⁶ Bulan ning Tebet kanita, ing kapulung bulan na ning kapitung banua ning pamag-ari nang Asueru, inyang idala re i Ester king palasyu ning ari... inyang idala re i Ester king palasyu ning ari.(2:16)

¹⁷ Mas kaluguran ne ning ari i Ester kesa karing aliwang babai, at tune yang menabu lub keya. Inya kang Ester ne pinutung ing korona at ya ing meging reynang kayalili nang Vasti.

¹⁸ Minie yang maragul a bangketi ing ari para karing opisyal na at aliwang pamuntuk bilang parangal kang Ester. Migdeklara yang metung a piesta opisyal king mabilug a kayarian at memie yang dakal at mangamal a regalu karing tau.

¹⁹ Makalukluk ya kanita i Mordecai lele na ning pasbul dalan ning ari inyang tipunan da la king kaduang besis ding dalaga.

²⁰ E na pa pigtapat Ester ing lahing penibatan na o ding kamaganak na antimo ing penabilin nang Mordecai keya. Pemintuan na ing penabilin na kalupa ning pamamintu na inyang malati ya pa mu lalam ning lingap na.

²¹ Karing aldo a deta, kabang makalukluk ya king pasbul dalan na ning ari, dimdam na lang mipagsalitang Mordecai di Bigtan at Teres, ding aduang kapun a lalaking guguardia karing kuartu na ning ari. Mua la kang Aring Asueru at pikayari da ing paten de.

²² Abalu nang Mordecai iti at sinabi na kang Reyna Ester, at sinabi na namang Ester iti king ari, makayagpang king atuklasan nang Mordecai.

²³ Pepasiasat na ning ari iting bage at meyakit king tutu pin. Inya binite da la ring aduang taung migtangkang makamate king ari. Misulat iti king opisyal a talaan na ning kayarian.

3

¹ Kalabas da reting bage milyari, tinas ne katungkulan Aring Asueru i Haman a Agageo at anak nang Hamedata. Ya ing gewa nang matas a pamuntuk da ring ministru na.

² Inutus na ning ari karing opisyal na ing dukuan de at galangan i Haman. Oneng e ya duruku o gagalang i Mordecai.

³ Ngarang kinutang kang Mordecai ding opisyal ning ari, Baket sasalangsangan mu ing utus na ning ari?

⁴ Pakisabian de aldo-aldo, oneng e ya rin mebisa. Inya simbung de kang Haman ban lawan nung nanu mo ing daptan na kang Mordecai, uling sinabi na king metung yang Judio.

⁵ Mikalabkab ing mua nang Haman kang Mordecai inyang ikit na king e ya pin bisang duku at gumalang.

⁶ Lalu yang mimua inyang abalitan nang Judio ya pala i Mordecai. Inya e mu i Mordecai ing buri nang paten nune ding sablang Judiong manuknangan king kayarian nang Asueru.

⁷ King mumunang bulan, ing bulan ning Nisan, ning kalabing aduang banua nang pamag-aring Asueru, minutus ya i Haman a mika aldo-aldong bagutan a ausan dang Pur ban abalu ne ing aldo at bulan a gampanan ya ing tingka nang e ustu laban karing Judio. Ing linual ya ing kalabing atlung aldo ning Adar, ing kalabing aduang bulan.

⁸ Kanita na sinabing Haman kang Aring Asueru ing anti kaniti, Atin pung metung a lahi a makakalat king mabilug yung kayarian at atatagpuan la karing balang probinsia. Makayaliwa la ugali at e la bisang mamintu karing kautusan na ning kekayung kayarian. E pu makakayap iti kekayu at king kayarian nung paburen na lang makanyan.

⁹ Nung burian yu pu, Makamal a Ari, gawa kayung kautusan ban pamaten la ngan deting tau. Nung mika kautusan a anti kanita, siguradung mika atlung dalan pitung pulu't limang toneladang pilak king kaban na ning ari a malyaring magamit king obra na ning kayarian.

¹⁰ Likas ne ning ari ing singsing nang ating panatak at binie ne kang Haman, ing Agageo at anak nang Hamedata at kalaban da ring Judio.

¹¹ Ngana ning ari, Keka na la ding salapi at ding tau; daptan mu itang buri mung daptan karela.

¹² Inya king kalabing atlung aldo na ning mumunang bulan, inaus na lang Haman ding kalihim na ning ari at inutusan na lang gawang sulat para karing gobernador da ring probinsia at pamuntuk balen. Misulat iti king salitang gagamitan da at king lagyu na ning Aring Asueru. Kaybat tetakan na la king singsing a ating panatak ning ari.

¹³ King kapamilatan da ring talapanatad sulat, miras la ding sulat karing sukat mirinan ban king metung mung aldo, ing kalabing atlung aldo ning kalabing aduang bulan, ing bulan ning Adar, paten la ngan ding sablang Judiokayanakan at makatua, babai at anak at kuanan ing sablang pibandian da. Ala lang tatagan metung man; kailangan ing gisanan la ngang paten.

¹⁴ Mirinan yang kopia king utus ing balang probinsia ban ipabalu ing kalamnan na king metung at metung karing memalen ban magsadia ya king aldo mitakda.

¹⁵ King utus na ning ari, memalagua lang meko ding talapanatad sulat, at abalu reng agad ding tau ning balang probinsia ing utus lalung-lalu na king Susa, ing sentrung siudad. Makalukluk ya at miminum ing ari at i Haman kabang magugulu ne man ing siudad ning Susa.

4

¹ Inyang abalitan nang Mordecai ing sablang milyari, ginabak na ing imalan na uli na ning lungkut na. Kaybat misulud yang imalan a magaspang at mibili yang abu king buntuk na at miglakad king siudad. Manangis yang masikan at king mitmung kapait-paitan

² angga na king miras ya king dalan palub king palasyu. E ya linub uling makabawal kenu man ing lungub a makaimalan magaspang.

³ King balang probinsia nung nu ya miras ing utus ning ari, mika tangisan mitmung kapait-paitan karing Judio; mig-ayunu la at misulud magaspang a imalan, at migkera la king abu ding keraklan karela. fig,,,,,... mika tangisan mitmung kapait-paitan karing Judio.,(4:3)fig*

⁴ Miras ing balita kang Reyna Ester king kapamilatan da ring damas na at ding lalaking kapun. Bina yang meligalig ing reyna; pepadalan neng imalan i Mordecai ban alilan na ing magaspang a imalan a saku a susulud na, oneng e ya mebisa i Mordecai.

⁵ Inya pepayaus neng Ester i Hatak, ing metung karing kapun na ning ari a miyatasan sumaup keya. Inutusan neng paintunan ne i Mordecai at ikutang nung baket mipakanyan ya.

⁶ Inya linual ya i Hatak, at ikit ne i Mordecai king plasa na ning siudad, arap ning dalan palub king palasyu.

⁷ Selita na ngan Mordecai kang Hatak ing sablang milyari at pati na ding salaping ibie nang Haman king kaban ning kayarian, nung magisan lang mate ding sablang Judio.

⁸ Dininan neng kopia ning kautusan ning ari a gisanan lang paten ding Judio a linual king Susa ban ibie ne kang Ester, at ibalita ing karelang gipit a kabilian, at ban lumapit ya i Ester king ari at malunus ya sa karing kabalen nang Judio.

⁹ Meko ya i Hatak at sinabi na ngan kang Ester ing sablang pasabi nang Mordecai.

¹⁰ Kaybat, tiburan neng pasibayung Ester kang Mordecai a kayabe niting mensahi:

¹¹ Balu ra ngan ding sablang pamuntuk na ning ari at ding memalen karing probinsiang sakup na king paten ya ing ninumang lalaki o babai a lumapit king ari a e na pepayaus. Iti ya ing bukud kautusan a mipatupad subali mu karetang kaninu ne ituldu ing gintu nang setro. Atlu nang pulung aldo ngeni ing e na ku payaus ning ari.

¹² Sinabi ra kang Mordecai itang pasabi nang Ester.

¹³ At ngana namang peparalang pakibat Mordecai kang Ester: E mu sana isipan king uli na mo ning atyu ka king palasyu na ning ari bukud mung ika karing sablang Judio ing miligtas.

¹⁴ Nung manatili kang e bubulad king panaun a anti ngeni, pihung ibat king aliwang lugal ating magligtas karing Judio, oneng ika at ing lahi mu mate ya. Ninu mo ing makibalu king inya atyu ka ngeni king palasyu uli na ning problemang iti?

¹⁵ Inya nganang peparalang pakibat Ester kang Mordecai:

¹⁶ Sulung, tipunan mu la ngan ding sablang Judio king Susa, at mag-ayunu kayu para kanaku. E kayu mamangan o miminum kilub ding atlung aldo at bengi. Aku at ding damas ku mag-ayunu kami munaman. Kaybat, lapitan ke ing ari agyang iti labag king kautusan. E bala ing mate ku, nung iti ing kailangan.

¹⁷ Kanita meko ya i Mordecai at depatan na itang sablang parapat nang Ester.

5

¹ Kalabas da ring atlung aldo, sinulud nang Ester ing imalan reyna at minta ya't tinalakad king korti na ning ari, tulid na ning palasyu ning ari. Makalukluk ya kanita ing ari king tronu na kilub ning palasyu at makayarap ya king pasbul palub king palasyu.

² Ikit ne ning ari i Reyna Ester at ikua kapanamdaman kabang makatalakad ya karin. Tildu ne kang Ester ing tatalnan nang gintung setro, inya linapit ya king ari i Ester at tigkil ne ing punta ning setro.

³ Ngana ning ari, Nanu ing sadia mu keti, Reyna Ester? Sabian mu ing kailangan mu at ibie ku agyang pang ing kapitna na ning kanakung kayarian.

⁴ Nganang mekibat Ester, Nung malyari pu sana, Makamal a Ari, kukumbiran da kayu at i Haman ngening aldong iti ban mangan at minum king sidia ku para king ari.

⁵ Sinabi na ning ari, Ausan ye ngeni mu rin i Haman ban matupad ing kayaduanan na ning Reyna Ester. Inya meging bisita neng Ester ing ari at i Haman king tuknangan na.

⁶ Kabang miminum lang alak, nganang mengutang ning ari kang Ester, Atin kang buri kako? Sabian mu at ibie ku keka agyang pang ing kapitna na ning kayarian ku.

⁷ Nganang mekibat Ester, Ing aduan ku at pakisabing mayap kekayu ya iti:

⁸ Nung tune ping apapaligaya da kayu at tula yu ing ibie ing nanumang aduan ku kekayu, nung burian yu, agkatan da kayung pasibayu bukas, ikayu at i Haman ban mangan. Kanita ku na sabian kekayu ing buri ku.

⁹ Masaya yang masayang minuli i Haman king aldong ita. Oneng mikapali ya buntuk inyang ikit ne i Mordecai king lele ning pasbul palub king palasyu, uling e ya dinuku o minie galang.

¹⁰ Makanyan man, ayaguanta na ing sarili na at tinaglus yang minuli. Karas na bale na, pepayaus na la ding kakaluguran na at i Zeres a asawa na.

¹¹ Pigmayabang na karela ing dakal nang pibandian, ding dakal nang anak, ing pangatas na katungkulan, at nung nu ya anti kaulaga king ari maygit karing aliwang opisyal.

¹² Ngana pang Haman, Aku mu ing kinumbira nang Reyna Ester a maging kayabe na ning ari king pamangan at inuman a sidia na. Kumbiradu ku munaman king reyna bukas a kayabe ning ari.

¹³ Oneng ala ngang kabaldugan kanaku iti kabang akakit ke ing Judiong i Mordecai a makalukluk king pasbul palub king palasyu.

¹⁴ Kanita nganang Zeres a asawa na at ding kakaluguran na, Obat e ka pagawang pibitayan a pitung pulu't limang talampakan king katas? At bukas abak, aduan mu king ari ing ibitin ya batal karin i Mordecai. Kaybat, masaya kang pakiabayan me ing ari king pamangan a sidia ning reyna. Metula ya i Haman kaniting minungkahi ra, inya pepagawa ne ing pibitayan.

6

¹ King benging ita, e ya mipatudtud ing ari, inya pepakua ne ing librung pisusulatanan king istoria ning kayarian at binasa de king ari.

² Mebasa king metung nang dake niting libru nung makananu nang atuklasan Mordecai ing tangka da ri Bigtana at Teres, ding aduang lalaking kapun a guardia karing kuartu na ning ari, a paten ya ing ari.

³ Nganang kinutang ning ari, Nanung ablas o parangal ing miyabie kang Mordecai tungkul kaniting mayap a depat na kanaku? Ngarang mekibat ding talasuyu na, Ala pu!

⁴ Nganang kinutang ning ari, Ninu itang atyu king korti? Kalub-alub na pa kanitang Haman king korti ning palasyu ban aduan king ari ing ibitin ya batal i Mordecai king pibitayan a makasadia na.

⁵ Ngarang mekibat ding talasuyu ning ari, I Haman pu ing atyu karin. Sinabi na ning ari, Paluban ye keni.

⁶ Linapit ya i Haman at ngana ning ari, Haman, nanu ing sukat daptan king taung buri nang parangalan ning ari? Ngana king lub nang Haman, Ninu mo ing parangalan na ning ari nung aliwa aku?

⁷ Inya nganang Haman king ari, Pakua yu itang imalan a sinulud yu at itang kabayung seken yu inyang miputungan kayung korona bilang ari.

⁸

⁹ Ibie ing imalan at ing kabayu king metung karing kagalang-galang a pamuntuk na ban ipasulud na ing imalan king taung parangalan na ning ari. Kaybat isake ne king kabayu at ilibut ne king plasa ning siudad kabang sasabian nang masikan ing anti kaniti: Oyni ing lalaking buri nang parangalan mitmung tula ning ari!

¹⁰ Kanita ngana ning ari kang Haman, Malagua ka, kuanan mu itang imalan ku at itang kabayu. Ing sablang sinabi mu ya ing daptan mu kang Mordecai, ing Judiong makalukluk king pasbul palub king palasyu.

¹¹ Inya kinua nang Haman ing imalan-ari at ing kabayu. Sinulud na kang Mordecai ing imalan at seke ne king kabayu; linibut ne king mabilug a siudad kabang sasabian na, Oyni ing lalaking buri nang parangalan mitmung tula ning ari! fig,,,,,Oyni ing lalaking buri nang parangalan mitmung tula ning ari.,(6:11)fig*

¹² Kaybat na nita, mibalik ya i Mordecai karin king pasbul palub king palasyu. Memalagua ne mang minuli i Haman keta karela; malungkut ya at tatakpan ne ing lupa na uli na ning mengapakarine ya.

¹³ Kinwentu na kang Zeres a asawa na at karing kakaluguran na ing sablang milyari. Kanita nganang Zeres at ding kakaluguran na, Nung metung yang Judio i Mordecai a pegumpisan na ning pangabagsak ning upaya mu, e me malyaring sambutan; ika ing siguradung sambutan na.

¹⁴ Kabang mipapagsalita la pa, dinatang la ding lalaking kapun a tubud na ning ari, at malalagua deng tiki i Haman king pamangan a sidia nang Ester.

7

¹ Inya minta ya ing ari at i Haman king tuknangan nang Ester ban

² pasibayung mangan karin. Kabang miminum lang alak, nganang kinutang ning ari kang Ester, Nanu ing buri mu, Reyna Ester? Sabian mu at ibie ku keka agyang pang ing kapitna ning kayarian ku.

³ Nganang mekibat Reyna Ester, Nung tune ping apapaligaya da kayu at nung burian yu, o Kagalang-galang a Ari, e yu sa paintulut ing paten da ku at ding kanakung kalahi.

⁴ Pisali da ku at ding kabalen ku ban paten at lubusan gisanan a lahi. E na ku sana bubulad nung pisali da kami mu ban gawan ipus at e ra na kayu inabala pa, uling agyu ming pibatan ing kasakitan.

⁵ Kanita kitang nang Aring Asueru kang Reyna Ester, Ninu ing maki dapat kanyan? Nukarin ya ing taung pangangas a makirapat kanyan?

⁶ Nganang mekibat Ester, Ing kekaming kalaban at manligalig kekami ya ining Haman a ini a marawak! Ginalgal ya king takut i Haman king arapan na ning ari at ning reyna.

⁷ Mimua ya ing ari at likuan na ing pamangan at minta ya king hardin ning palasyu. Melakuan ya i Haman ban ipakisabi neng mayap ing bie na kang Reyna Ester, uling anti na nang akakit ing parusan neng mabayat ning ari.

⁸ Inyang mibalik ya karin ing ari, ikit neng makasakab i Haman king luklukan nung nu ya makasandal ing reyna. Inya nganang migsalitang masikan ning ari, Pati pala ing reynang asawa ku buri neng salbahian king akakit ku at king mismung palasyu ku! Kayari nang migsalita ning ari, tinikma de ring talasuyu na ning ari i Haman at tikpan de lupa.

⁹ Kanita nganang Harbona, ing metung karing lalaking kapun a talasuyu ning ari, E mu pu ita ing depat nang Haman; pepagawa ya pa pung pibitayan king bale na a pitung pulu't limang talampakan king katas para kang Mordecai, ing mekapagligtas king bie yu!

¹⁰ Karin ye bitayan! nganang minutus ning ari. Inya binite re i Haman ketang pibitayan a pepagawa na para kang Mordecai. Kaybat na nita, milako na ing mua na ning ari.

8

¹ King aldo mu ring ita, binie nang Aring Asueru kang Reyna Ester ing sablang pibandian nang Haman, ing kalaban da ring Judio. At milapit ne man king ari i Mordecai, uling sinabi nang Ester king kamaganak ne.

² Likas ne ning ari ing singsing nang ating panatak a kinua nang pasibayu kang Haman at binie ne iti kang Mordecai. At tilduan na ne mang Ester i Mordecai bilang katiwala king pibandian a likuan nang Haman.

³ Pasibayu yang linapit i Ester kang Aring Asueru; migsakab ya arapan na at tutulu luang mekisabing mayap king ari king gawa ya sanang paralan ban e mibalaus ing tingka nang Haman a Agagite a pamaten la ngan ding Judio.

⁴ At tildu ne ning ari ing setro na kang Ester, inya tinalakad ya i Ester at ngana,

⁵ Nung burian na ning ari at nung makaligaya ku kekayu, at nung king panlalawe na ning ari king iti matulid, ipakisabi kung mayap king gawa kayung metung a kautusan ban pawalan yang bisa ing kautusan a pepasari nang Haman, ing Agageo at anak nang Hamedata, ban paten la ding Judiong manuknangan karing probinsiang sakup yu.

⁶ E ku malyaring apibata ing akit ku ing kamatayan da ring kalahi ku at kamaganak.

⁷ Kanita nganang Aring Asueru kang Reyna Ester at kang Mordecai a Judio, Lawan mu, binie ku na kekayu ing pibandian nang Haman at pepabite ke uling buri na lang paten ding Judio.

⁸ Ngeni, malyari kayung gawang sulat para karing Judio at isulat yu ing nanumang buri yu king lagyu ku. Kaybat pirman ke at tatakan king singsing ku. E malyaring milako bisa ing nanumang utus a pinirman ku at tetakan ku.

⁹ Milyari iti kanitang kaduang pulu't atlu nang aldo ning katlung bulan ning Sivan. Inaus na lang Mordecai ding talasulat ning ari at dinikta ne ing metung a sulat para karing gobernador at talapangasiwa karing dinalan aduang pulu't pitung probinsia, magumpisa king India angga king Etiopia. Sinulat da la karing salita da reting probinsia.

¹⁰ Pepasulat na la deting Mordecai king lagyu nang Aring Asueru at tetakan na la king singsing a panatak na ning ari. Kaybat, inatad da la king kapamilatan da ring lalaking makasake karing kabayung mangabilis na ning palasyu.

¹¹ King kapamilatan da reting sulat, paintulutan na la ning ari ding Judio king balang lugal ing mitipun la ban idipensa ing sarili da at ing pamilya da laban king ninumang lumusub karela. Malyari lang lumaban at makamate karing mangangas a makamate karela o maniamsam king pibandian da.

¹² Daptan da iti king mabilug nang kayarian Aring Asueru, king kalabing atlung aldo ning Adar, ing kalabing aduang bulan.

¹³ Mika kopia ya kaniting utus ing balang probinsia at mipabalu karing sablang tau ban makapagsadia lang magdipensa ding Judio king sarili da king aldong ita laban karing kalaban da.

¹⁴ Inya king utus ning ari, sinake la ding talapanatad sulat karing mangabilis nang kabayu ning palasyu at memalagua lang miglakbe. Kinalat dia naman ing utus ning ari king kabilugan ning Susa, ing sentrung siudad.

¹⁵ Kaybat na nita, linual ya king palasyu i Mordecai; makaimalan yang ari a kule asul at maputi, at balabal a mapinung linen at metung a masanting a koronang gintu. Migbiba la ding tau ning Susa king tula ra inyang ikit de.

¹⁶ Mika kapanayan la ampon tula at dangalan ding Judio.

¹⁷ Nu mang lugal a mipabalu ya ing utus ning ari, mika tula at pamagpiesta karing Judio. At dakal la karing tau ding meging Judio uli na ning mitatakutan na la ngeni karela.

9

¹ Miras ing kalabing atlung aldo na ning bulan ning Adar, ing aldo nung kapilan ya mipatupad ing utus ning ari ban paten la ding heganaganang kalaban dang Judio. Oneng e ra balu king kabaligtaran ing milyari, uling ding Judio ila ding makamate.

² King aldong ita, mitipun la ding Judio ning balang siudad na ning kayarian ning Aring Asueru nung nu la manuknangan ban paten ing ninumang bisang makamate karela. Oneng alang mengangas a lumusub karela uling tatakut la karela ding dakal.

³ Sinaup la karela ding gobernador at ding aliwa pang pamuntuk ning balang probinsia uli na ning takut da kang Mordecai.

⁴ Meging pikabaluan king mabilug a kayarian king i Mordecai metung ya ngening mayupayang tau king palasyu at lalu ya pang meging mayupaya.

⁵ Inya ding Judio pete da la ring sabla dang kalaban at depat da itang buri dang daptan karing masama karela.

⁶ Lima lang dalan a kalaban ding apate ra king siudad ning Susa.

⁷ Pete da la naman di Parsandata, Dalfon, Aspata,

⁸ Porata, Adalia, Aridata,

⁹ Parmasta, Arisai, Aridai, at i Vaizata.

¹⁰ Ila deti ring apulung anak nang Haman a anak nang Hamedata, ing kalaban da ring Judio. Oneng e ra teginan ding Judio ing pibandian da ring kalaban da.

¹¹ King aldo mu ring ita, pepabalu da la king ari ding mepate king siudad ning Susa.

¹² Ngana ning ari kang Reyna Ester, Limang dalan la pala katau ding mete king Susa at kabilang la kareti ding apulung anak nang Haman. Nanu kaya ing milyari karing aliwang probinsia? Nanu pa ing buri mu? Sabian mu at ibie ku keka.

¹³ Nganang mekibat Ester, Nung burian yu, Makamal a Ari, paintulutan yu la sana ring Judio king Susa ing daptan dang pasibayu bukas itang mipaintulut a depatan da ngening aldong iti. At ibitin la king pipagbitayan ding bangke da ring apulung anak nang Haman.

¹⁴ Inya inutus na ning ari ing ibitin da la king pibitayan ding bangke da ring apulung anak nang Haman.

¹⁵ King kalabing apat nang aldo ning bulan ning Adar, mitipun lang pasibayu ding Judio ning siudad ning Susa, at atlu lang dalan a kalaban ding apate ra. E da munaman teginan ing nanumang pibandian da ring kalaban.

¹⁶ Mitipun-tipun la naman ding aliwang Judio karing miyayaliwang lugal na ning kayarian at pigdipensa ra ing bie ra. Asambut da la ring kalaban da at mekapate lang pitung pulu't limang libu kataung masama karela. Oneng e ra teginan ing pibandian da.

¹⁷ Milyari iti king kalabing atlung aldo na ning bulan ning Adar. Ala nang pamakamate itang kalabing apat a aldo, inya masaya lang migpiesta.

¹⁸ Kanita mitipun la ding Judiong manuknangan king Susa king kalabing atlung aldo at king kalabing apat a aldo ban arapan la ding kalaban, oneng masaya lang migpiesta king kalabing limang aldo, uling agisan da na lang pete ding kalaban da.

¹⁹ Iti ing sangkan nung inya pagselebran de ring Judiong manuknangan karing baryu ing kalabing apat nang aldo ning bulan ning Adar bilang kapiestan da at panaun ning pamamie regalu king metung at metung.

²⁰ Sinulat na ngan Mordecai iting sablang milyari ban e makalinguan, at peparala yang sulat karing sablang Judiong manuknangan king kayarian nang Aring Asueru, malapit la man o marayu.

²¹ Penabilinan na la king galangan de balang banua ing kalabing apat at kalabing limang aldo na ning bulan ning Adar,

²² uling kareting aldong deti da la simbut ding karelang kalaban; aldo lang meging masaya lugal king maging kalungkutan la. Sinabi na karela ing magpiesta la at magsaya kilub da reting aldo, at mipapamie lang regalu king metung at metung at karing kalulu.

²³ Inari da king lub da ing isundu ra ing pegumpisan da at tukian balang banua ing panabilin a sinulat na karelang Mordecai.

²⁴ Ginawa yang e mayap a tangka i Haman a Agageo at anak nang Hamedata at kalaban da ring Judio ban gisanan na lang paten ding Judio. Binalak ne ing ausan dang bagutan, ing purim, ban pilinan ya ing aldo a gisanan lang paten.

²⁵ Oneng pintalan neng Ester ing ari, at kaybat sinulat ne ning ari ing metung a utus. Inya ing e mayap nang tangkang Haman laban karing Judio mibagsak king sarili na, at ya at ding anak na ila ding mebite king pibitayan.

²⁶ Iti ing sangkan nung inya deting aldo kapiestan inaus da lang Purim, ngana wari, bagutan. At uli da ring sulat nang Mordecai at ning sablang milyari karela ngan,

²⁷ inari da king lub da at tikda para karela at karing maging lahi ra at ding makiabe karela king paselebran da lang alang mintis deting aduang aldo balang banua, agpang king sinulat nang panabilin Mordecai.

²⁸ Mepikayari king ing balang pamilyang Judio king daratang a panaun at nu mang probinsia o siudad king sukat da lang tandanan at pagselebran deting aduang aldo na ning Purim king kapilan pa man.

²⁹ At i Reyna Ester a anak nang Abihail, at i Mordecai a Judio sinulat la naman ban patibayan ya ing sulat tungkul king Purim a abanggit na nang Mordecai king minuna nang sulat.

³⁰ Miparala ya ing sulat at ing kopia na karing sablang Judio a manuknangan karing dinalan aduang pulu't pitung probinsia na ning kayarian nang Asueru. Nasa da ring sulat ing kapayapan at ing katutuan,

³¹ at king sukat da lang pagselebran ding aldo ning Purim king mitakdang panaun, antimo ing penabilin na karelang Mordecai at ning Reyna Ester. Mayayawad munaman karela at karing maging lahi ra ing mag-ayunu la at manangis.

³² Misulat ya king metung a libru ing sulat nang Ester a patibe king pamagselebra karing aldo ning Purim.

10

¹ Sapilitan na lang pepamayaran buis ning Aring Asueru ding taung sakup na at pati na ding atyu karing mangarayung pulu.

² Ing upaya na at ing sablang depat nang mayap, pati na ing parangal at pangatas na katungkulan Mordecai, misulat ngan king Librung Istoria da ring Ari ning Media at Persia.

³ Pangadua ya king upaya i Mordecai a Judio king Aring Asueru. Metung yang taung kagalang-galang at katanggap-tanggap karing kalupa nang Judio, uling pigmalasakitan na ing ikakayap da at ing ikaunlad da ring sabla nang kalahi.