1

¹ Iti ya ing istoria na ning depat nang Nehemias, ing anak nang Hacalia. Bulan ne ning Kislev kanita at adua neng pulung banuang ari king Persia i Artaxerxes. Aku, i Nehemias, atyu ku kanita king Susa, ing sentrung siudad.

² Dinatang ya i Hanani, ing metung karing kapatad kung lalaki, kayabe ne ing metung a grupu ding lalaking ibat Juda. Kitnan ku la tungkul king kabilian na ning Jerusalem at antimu rin ding kalupang Judiong miyugse a mekabalik ibat Babilonia.

³ Ngarang mekibat kanaku, Makalunus ing kabilian da ring miligtas a mekapagbalik Jerusalem, ing lugal nung nu la mibait. Manga-insultu la karing paganu a manuknangan karin. Lasak-lasak ya pa mu rin ing pader at ding pasbul dalan ning siudad manibat na kanitang mesilab la.

⁴ Linukluk ku at kiniak inyang dimdam ku iti. Melungkut ku at e ku mengan kilub ding mapilan a aldo. Menalangin ku king Dios.

⁵ Ngaku, O Ginung Dios ning Banua, mayupaya ka at gagalgal kami king kekang arapan. Tutuparan mu ing kekang pangaku karetang malugud keka at tutupad karing utus mu.

⁶ Lawan mu ku at pakiramdaman ing panalangin ku aldo at bengi para karing talasuyu mung Israelita. Wa, aku at ding makatua ku mikasala kami keka.

⁷ E mayap ing depat mi keka; e kami memintu karing utus mu at tuntunan a binie mu king kapamilatan nang Moises a talasuyu mu.

⁸ Ganakan mu ing sinabi mu king talasuyu mung i Moises. Ngamu, Nung e kayu maging tapat kanaku, ikalat da kayu karing miyayaliwang bansa.

⁹ Nung mibalik kayu kanaku at tupad karing utus ku, tipunan da kayu nu kayu man miyugse at ibalik da kayu ketang lugal a pinili ku nung nu yu ku samban.

¹⁰ Ila ding kekang talasuyu at ding sarili mung memalen. Ila ding linigtas mu king kapamilatan na ning kekang upaya at sikanan.

¹¹ O Ginu, pakiramdaman mu sana ing panalangin ku at ing panalangin da ring aliwang talasuyu mu a bisang munie parangal keka. Papagtagumpen mu sana ngeni ing lakad ku at malunus ya sa kanaku ing ari. Kanitang panaun a ita aku ing talaingat king kopa nang alak ning ari.

2

¹ Bulan na kanita ning Nisan at kaduang pulung banua na ning pamag-ari nang Artaxerxes. Mamangan ya ing ari at inyang idala ku ing alak apansinan na king kanita ku pa malungkut.

² Inya nganang kinutang, Nehemias, obat lupa kang malungkut? Keng lawe ku e na ka man masakit; siguru atin kang problema ne? Mikarugan ku salu

³ at ngakung mekibat, Kagalang-galang a Ari, kumaba pu sana ing bie yu! Malungkut ku pu uling lasak-lasak ya ing siudad nung nu la mikutkut ding makatua ku at silab la ding pasbul nang dalan. fig,,,,,Nehemias, obat lupa kang malungkut?...,(2:2) fig*

⁴ Ngana ning ari, Atin kang buring aduan kanako? Menalangin ku king Dios ning Banua,

⁵ at kaybat ngaku king ari, Kagalang-galang a Ari, nung e kayu mimua kanaku paintulutan yu ku sanang muli king Juda, ing siudad nung nu la mikutkut ding makatua ku, ban alarin keng pasibayu ing siudad.

⁶ Mebisa ya ing ari (kasiping neng mamangan kanita ing reyna na). Kitang na nung nu anti kaluat ing ala ku at nung kapilan ku mibalik. Sinabi ku nung nu anti kaluat at nung kapilan ku mibalik.

⁷ Inawad ku king ari ing igawa na ku sanang sulat para karing gobernador na ning probinsia dane Albugan ning Ilug ning Eufrates ban paintulutan da kung lumabas angga king miras ku Juda.

⁸ Inawad ku naman king igawa na kung sulat para kang Asaf, ing talaingat king kagubatan ning ari, ban dinan na kung dutung a gamitan para karing pasbul na ning kutang bantayan ning Templo, para karing pader ning siudad, at para king bale a pituknangan ku. Binie na ngan ning ari ing sablang inawad ku, uling mamantabe ya kanaku ing Dios.

⁹ Pepatukian na la kanaku ning ari ding mapilan a opisyal at sundalung pakakabayu ban akayabe ku king pamaglakbe king probinsia dane Albugan ning Ilug ning Eufrates. Inyang miras na ku, binie ku la ding sulat ning ari para karing gobernador.

¹⁰ Oneng inyang abalitan na iting Sanbalat ning Bet Horon at i Tobia, ing pamuntuk king probinsia ning Ammon, e la matula uling ating dinatang para king kapakanan da ring memalen na ning Israel.

¹¹ Miras ku Jerusalem at menatili ku karin kilub ning atlung aldo.

¹² Ala kung belitanan tungkul king obrang parapat na kanaku Jerusalem ning kakung Dios. King kapitangan ning bengi, mibangun ku at linual king siudad a kayabe ding mapilan a kapanalig. Metung yang animal ing dela mi, ing asno a seken ku.

¹³ Malalam ya pa ing bengi inyang meko ku king siudad. Dinalan kami king Pasbul dalan ning Kapatagan dane albugan, at kaybat minta ku dane mauli ning Sibul ning Dragon angga na king Pasbul dalan ning Basurahan. Linawe ku lang masalese ding melasak nang pader ning Jerusalem at ding pasbul dalan a mesilab.

¹⁴ Kaybat minta ku king Pasbul dalan ning Sibul at king Talaga ning Ari. Alang dalan ban makalabas ya ing asnong sasaken ku.

¹⁵ Inya king kapitangan ning bengi minta ku king Kapatagan ning Kidron at siniasat ke ing pader, at mibalik ku ketang delanan ku king Pasbul dalan ning Kapatagan.

¹⁶ Ala lang kabaluan ding opisyal nung nukarin ku minta at nung nanu ing depatan ku. Ala ku pa munamang belitanan karing kalupa kung Judio, ding pari, ding manimuna, ding pamuntuk o ninuman karing kayabe kaniting obra.

¹⁷ Kaybat ngakung sinabi karela, Akakit yu ing problemang liban tamo? Lasak-lasak ya ing Templo at silab la ding pasbul nang dalan. Tara, larinan ta la ding pader na ning siudad ban milako ta na king kamarinayan.

¹⁸ Sinabi ku naman karela nung makananu na kung pitnubayan at sinaupan ning Dios, at itang sinabi na kanaku ning ari. Ngarang mekibat, Tara na at magobra ta na. At pegumpisan da na ing obra.

¹⁹ Oneng pisunu-sunu da kami inyang abalitan da ri Sanbalat, Tobia, at ing metung a tau Arabia a mayayaus Gesem ing obrang pegumpisan mi. Ngara, Nanu ing kekong daraptan? Mag-rebeldi kayung laban king ari?

²⁰ Ngakung mekibat, Papagtagumpen na kami ning Dios ning Banua. Talasuyu na kami at italakad mi yang pasibayu ing Templo. Oneng, ikayu, ala kayung dake o katuliran o nanuman keting siudad a iti.

3

¹ I Eliasib, ing pari a matas dili katungkulan, at ding kalupa nang pari pegumpisan deng pegobran miyabe-abe ing Pasbul dalan ding Tupa. Kebit da la ring pasbul at kaybat telaga re. Telaga re ing pader angga na king miras ya king Tore ding Dinalan at ing Tore nang Hananel. ...pegumpisan deng pegobran miyabe-abe...(3:1)

² Pegobran da ne man ding lalaki na ning Jerico ing tutuking dake, at i Zacur a anak nang Imri, ya ing misundu king katuking dake.

³ Pegobran da ne man ding pamilya nang Hasenaa ing Pasbul dalan ding Asan. Kebit da la ring amba at ding pasbul king pagkabilian da, at kaybat ding bisagra na at ding kabat karing pasbul.

⁴ I Meremot, ing anak nang Uria at apu nang Hakoz, ya ing megobra king katuking dake. I Mesullam, ing anak nang Berekias at apu nang Mesezabel, ya ing sinalising megobra king katuking dake. I Zadok, ing anak nang Baana, ya naman ing megobra king katuking dake.

⁵ Ding sinalising megobra king katuking dake ila ding lalaki na ning Tekoa, oneng tinanggi lang mamintu ding pikabaluan a lalaki na ning balen karing kapatas a mangasiwa king obra.

⁶ I Joiada, ing anak nang Pasea, at i Mesullam a anak nang Besodia, ila ding mitalakad pasibayu king Pasbul dalan nang Jesana. Kebit da la ring amba at ding pasbul king pagkabilian da, at kaybat ding bisagra na at kabat karing pasbul.

⁷ Ding sinalising megobra ila di Melatia ning Gibeon, Jadon ning Meronot, at ding lalaki ning Gibeon at Mizpa. Inari da itang obra angga king tuknangan na ning gobernador ning probinsia dane Albugan ning Ilug ning Eufrates.

⁸ I Uziel, ing anak nang Haraia, ya ing sinalising megobra. Plateru yang gintu i Uziel. Selisian neng Hanania, ing gagawang pabanglu. Angga ya ketang Malualas a Pader ing pegobran na.

⁹ Ing sinalising megobra ya i Refaia, ing anak nang Hur. I Refaia ya ing pamuntuk na ning kapitna nang dake ning Jerusalem.

¹⁰ Ing sinalising megobra ya i Jedaia, ing anak nang Harumaf. Malapit ya king bale na ing pegobran na. Selisian neng Hatus, ing anak nang Hasabneia.

¹¹ Ding sinalising megobra ila di Malkija, ing anak nang Harim, at i Hasub, ing anak nang Pahat Moab. Pegobran dia naman ing Tore ding Ornu.

¹² I Sallum, ing anak nang Halloes, ya ing sinalising megobra. Kayabe na lang megobra ding anak nang babai. Ya ing pamuntuk na ning kapitna nang dake ning Jerusalem.

¹³ Ding miglarin king Pasbul dalan ning Kapatagan ya i Hanun at ding memalen na ning Zanoa. Kebit da la ring pasbul king pagkabilian da, ding bisagra at ding kabat karing pasbul. Linarin dia naman itang pader a ating sukad libu limang dalan a talampakan a mamabut angga king Pasbul dalan ning Basurahan.

¹⁴ Ing miglarin king Pasbul dalan ning Basurahan ya i Malkija, ing anak nang Rekab. Kebit na la ding pasbul king pagkabilian da, ding bisagra at ding kabat karing pasbul. I Malkija ya ing pamuntuk ning Bet Hakerem.

¹⁵ Ing miglarin king Pasbul dalan ning Sibul ya i Sallum, ing anak nang Colhoze. Dininan neng bubung ing pasbul dalan, kebit na la ding pasbul, ding bisagra at kabat karing pasbul. I Sallum ya ing pamuntuk na ning Mizpa. Pegobran nia naman itang pader lele ning Talaga nang Sela at ning hardin ning ari angga karetang balitang pababa king Siudad nang David.

¹⁶ Ing sinalising megobra ya i Nehemias, ing anak nang Azbuk. Ya ing pamuntuk na ning kapitna ning Betzur. Angga ya king pantiun nang David ing pegobran na at ning talaga, at king tuknangan da ring sundalus.

¹⁷ Ding sinalising megobra ban malarin ya ing pader ila ding Levita. Ila deti: i Rehum, ing anak nang Bani, pegobran ne itang tutuk na. Kaybat na, i Hasabia, ing pamuntuk na ning kapitna ning Keila. Megobra ya king lagyu ning distritu na.

¹⁸ Ing sinalisi kang Hasabia ya i Bavai, ing anak nang Henadad. Ya ing pamuntuk na ning kapitna ning Keila.

¹⁹ Ing katuki na ya i Ezer, ing anak nang Jesua. Ya ing pamuntuk ning Mizpa. Ing pegobran na ya ing arap ning pisisinupan sandata at angga na ketang nung nu ya liliku ing pader.

²⁰ Ing sinalising megobrang mitmung sipagan ya i Baruk, ing anak nang Zabbai. Minabut ya ing pegobran na king pasbul dalan ning bale na ning Pekapun ding Paring i Eliasib.

²¹ Kaybat na, ing sinalising megobra ya i Meremot, ing anak nang Uria at apu nang Hakoz. Minabut king angganan na ning bale nang Eliasib ing pegobran na.

²² Ding sinalising paring megobra king miyayaliwang dake ning Jerusalem ila deti:

²³ i Benjamin at i Hasub, megobra la ketang dake angga king tulid dang bale; i Azaria, ing anak nang Maaseia at apu nang Ananias, pegobran ne itang dake tulid nang bale;

²⁴ i Binui, ing anak nang Henadad, pegobran ne itang dake manibat king bale nang Azaria angga ketang suluk na ning pader;

²⁵ i Palal, ing anak nang Uzai, pegobran ne itang dake magumpisa ketang suluk ning pader at tulid ning tore ning palasyu lele na ning patyu ning mag-guardia;

²⁶ i Pedaia, ing anak nang Paros, pegobran ne itang dake tulid ning Pasbul dalan ning Danum king dane aslagan at ing toreng bantayan ning Templo. Malapit ya iti king siudad ning Ofel, ing lugal nung nu la manuknangan ding abe-kasaup magobra king Templo.

²⁷ Ding sinalising megobra ila ding lalaki na ning Tekoa. Iti ya ing kadua rang pamagobra, at ing pegobran da ya ing sumangid na ning maragul a bantayan ning Templo angga king pader lele ning Ofel.

²⁸ Pegobran de ring metung a grupu ding pari itang dake papunta dane norti, nung ibat ka king Pasbul dalan Kabayu. Pegobran ne ning metung at metung karela itang dake tulid ning bale na.

²⁹ I Zadok, ing anak nang Immer, pegobran ne itang dake tulid ning bale na. I Semaia, ing anak nang Secania, ya ing sinalising megobra. Ya ing guardia king Pasbul dalan Aslagan.

³⁰ Ing sinalising megobra ya i Hanania, ing anak nang Selemia; at i Hanun, ing kanam nang anak Zalaf. Iti ya ing kadua rang besis pamagobra. I Mesullam, ing anak nang Berekias, ya ing sinalising megobra. Pegobran ne itang dake tulid nang bale.

³¹ Ing sinalising megobra ya i Malkija; metung yang platerung gintu. Minabut ing pegobran na king bale da ring abe-kasaup king Templo at ding negosianti. Iting dake ning lugal atyu tulid ning Pasbul dalan ning Mifkad papunta king Templo, malapit king silid babo ning suluk ning pader.

³² Ing tauling dake pegobran da ya itang pilatan ning silid babo ning suluk ning pader at ning Pasbul dalan ding Tupa. Ding megobra kaniti ila ding platerung gintu at ding negosianti.

4

¹ Mibua ing mua nang Sanbalat inyang abalitan nang tatalakad mi yang pasibayu, ikeng Judio, ing pader na ning Jerusalem. E mu ita, pituyatuya na ke pa.

² Nganang sinabi king arapan da ring kayabe na at ding Samaritanung sundalus, Nanu ing daraptan da reng alang akarapat a Judiong den? Abalik da pa kaya ing sadiang bage? Magsakripisyu la? Ayari da kaya ing obra kilub ning patingapun? Abawi da la pa kaya ding batung mitambunan at mesilab?

³ Makatalakad ya siping nang Sanbalat i Tobia, ing Ammonita, at nganang tinuglung, Nanung klasing pader ing tatalakad da? Dumalan ya mu ing asung-gubat mibagsak ya!

⁴ Inya menalangin ku. Ngaku, Pakiramdaman mu, O kekaming Dios, ing pamaninsultu a sasabian da kekami. Paburen mung magbalandra karela ing pamaninsultu da. Paburen mung masamsam ing sabla rang pibandian at mabihag la ampon midala king dayuan a bansa.

⁵ E mu la sana patawaran at e mu kakalinguan ing karelang kasalanan, uling inalipusta da kami king gagawan mi.

⁶ Inya tiglus mi ing pamitalakad pasibayu king pader, at e miglambat ayari mi ya ing kapitna ning katas na uling makasadia la ngang magobra ding tau.

⁷ Mimua yang e mu nanu i Sanbalat, i Tobia, ding tau Arabia, Ammon, at Asdod inyang abalitan dang alang tuknang ing pamagobra mi karing pader na ning Jerusalem at halus mikakit na la ding pilatan da ring pader.

⁸ Inya pikayari da ing miyabe-abe lang lumusub Jerusalem at gawang kaguluan karin.

⁹ Oneng menalangin kami king kekaming Dios at mibili kaming lalaking mag-guardia aldo't bengi.

¹⁰ Atin lang kakanta ding memalen na ning Juda. Ngana ning kanta ra: Mangaina kami king bayat ning kekeng pupusanan; ding batu ning pader a melaso kailangan mi lang ilako. Malyari mi ya kayang italakad pasibayu ing pader?

¹¹ Bala da ring kalaban mi king e mi la akakit o e mi balu ing balak dang salake kekami angga king apate da kami at mituknang ing obra.

¹² Oneng oras-oras babalita da kekami ding Judiong kasalamuha ra ing tangka da reting kalaban laban kekami.

¹³ Inya dininan ku lang espada, tandus, at pana ampon paslu. Kaybat, pinuestu ku la, agpang king pamilyang penibatan da, kagulutan ning pader a e pa meyari.

¹⁴ Apansinan ku king magugulu la isip ding tau, inya ngakung sinabi karela at karing karelang manimuna ampon pamuntuk, E kayu sukat mitatakutan karing kalaban tamu. E tamu sana kakalinguan king ing Ginu tamu maragul ya at mayupaya. Makilaban tamu para karing kabalen tamu, para karing anak tamu, asawa, at pibalebale.

¹⁵ Abalitan da ring kalaban mi ing balu mi na pala ing tangka ra, at api-isip-isip da king ing Dios ya ing sinabat kaniti. Inya tiglus mi ing pamagobra king pader.

¹⁶ Manibat na kanita, magobra la ding kapitna karing tauan ku at ding kapitna naman mag-guardia la. Pakasulud lang baluti, atin lang tandus, kalasag, pana ampon paslu. At binie da ring kekaming pamuntuk ing sablang agyu rang isaup karing memalen

¹⁷ a magobra king pader. Tatalan yang sandata pati ing metung dang gamat detang mamakut materialis.

¹⁸ Atin yang makasakbit a sandata king awakan na ing metung at metung karing magobra. Parati yang atyu lele ku itang mitutukan tumiup king trumpeta.

¹⁹ Ngakung sinabi karing manimuna at pamuntuk at karing tau, Dakal ing obra tamu at masiadu tamung mikakanlaut king metung at metung king pamagobra tamu king pader.

²⁰ Datang kayu kabud damdaman yeng tumiup ing trumpeta at miyabe-abe tamu. Ing kekatamung Dios ya ing makilaban para kekatamu.

²¹ Aldo-aldo, kabuklat ning masala angga king lunto la ding batuin neng bengi, magobra kami. Magobra la ding kapitna kekami king pader kabang ding kapitna tatalan lang tandus at mag-guardia. fig,,,,,Tatalan yang sandata pati ing metung dang gamat detang mamakut materialis.,(4:17)fig*

²² Sinabi ku naman karing kapatas at karing tauan da ing sukat lang atyu Jerusalem neng bengi ban aguardia mi ya ing siudad neng bengi at makapagobra munaman neng aldo.

²³ E ku na likas ing imalan ku, uling parati keng tatalnan ing kanakung sandata. Makanyan munaman ding kayabe ku, kasaup, at guardia. Tatalnan ne ning metung at metung kekami ing sandata na.

5

¹ Kalabas ning mapilan a panaun, migreklamu la ding dakal karing lalaki at babai na ning balen laban karing karelang kalupang Judio.

² Ngara ding mapilan karela, Maragul kami pamilya; mangailangan kaming binutil a apangan mi ba kaming e mate king danup.

³ Ngara naman ding aliwa, Singla mi la ring kekaming gabun a asikan, mulahan ubas, at bale ban e kami mate king danup.

⁴ Ding aliwa pa sasabian da, Mepilitan kaming menutang salapi ban makapamayad kaming buis king ari para karing kekaming asikan ampon mulahan ubas.

⁵ Metung kami mu ibatan at paraparehung Judio. Paraparehu ing kabilian da ring anak mi ampon ding anak da. Makanyan man, mepilitan kaming pisali mi lang bilang ipus ding anak mi uling ala keng akarapat. Ipus na la ding mapilan karing anak ming babai; e mi na la bandi ding kekaming marangle at mulahan ubas.

⁶ Mibua ing mua ku inyang dimdam ku iting saingsing da ring tau,

⁷ at inari king lub ku ing sumbatan ku la ding manimuna at pamuntuk da ring memalen. Ngakung migsalitang mataram karela, Gigipitan yu la ding mismung kapatad yu king gagawan yung yan! Minaus kung maragul a pulung ban lunasan iting problema.

⁸ Ngaku king kapulungan, Depat tamu ing sablang agyu tamu ban ayatbus ta la ding kalupa tamung Judio king karelang panga-ipus karing aliwang bansa. Oneng ikayu naman ngeni pipilitan yu la ding kapatad yu ban maging ipus yu a kalupa yung Judio. E la makabulad; tahimik la.

⁹ Inya sinabi ku, E ustu ing daraptan yu! Sukat kayung tumakut king kekatamung Dios ban e ra katamu insultuan ding bansang kekatamung kalaban.

¹⁰ Aku at ding kapatad ku ampon tauan paparam kaming salapi ampon binutil. E ta na la sisingilan pa king karelang utang.

¹¹ Isubli yu la ngeni mu ring aldong iti ding karelang marangle, mulahan ubas at olibo, ding bale ra, salapi, binutil, alak at larung olibo a malambat yu nang sisingil karela.

¹² Ngarang mekibat, Wa, isubli mi la at e mi la aduananan nanumang patubu. Daptan mi ing sinabi mu. Kaybat inaus ku la ding pari at pepangakuanan arapan da ring manimuna king tuparan da ing pengaku ra.

¹³ Kanita kinua ke at pigpag ing babat a ating bulsa king awakan ning imalan ku at sinabi ku karela, Anti kaniti ing daptan na kekayu ning Dios, nung e yu tuparan ing pangaku yu; ipagpag na kayu at alang mitagan nanuman king pibandian yu. At ing metung at metung king katipunan pekibat na, Amen at pinuri de ing Dios. Tiparan da ing pengaku ra.

¹⁴ Kilub da ring labing aduang banuang pamanungkulan ku bilang gobernador na ning Juda, manibat na king kaduang pulung banua nang pamag-aring Artaxerxes angga na king katlung pulu't aduang banua, e ku mengan at ding kamaganak ku ketang pamangan a mangaintulid king metung a gobernador.

¹⁵ Meging pabayat la karing tau ding mengalabasan a gobernador; migmolestia lang pamangan at alak karing tau subali pa karing apat apulung pirasung pilak a aduan da. Kayabe la pati ding abe ra bale king pamanabusu karing tau. Oneng aku makayaliwa ku ugali karela uling tatakut ku king Dios.

¹⁶ Pakigisanan ku ing kanakung sikanan king pamitalakad pasibayu king pader, at e ku pignasan ing mika pibandian ku. Kayabe ku lang magobra king pader ding abe ku king bale.

¹⁷ Atin kung pakanan a dinalan at limang pulung Judio at pamuntuk subali pa karetang dayuan a lalapit kanaku.

¹⁸ Aldo-aldo makamate kung metung a biserung baka, anam a tupa, at dakal a manuk, at balang kapulung aldo milalage kung miyayaliwang alak. Makanyan man, e ku kakuanan itang sustentung pamangan a katuliran na ning gobernador uling magkakasakit la ding tau.

¹⁹ E mu sana kakalinguan para king kapakanan ku, O Dios ku, ing mayap a depat ku kareting tau.

6

¹ Abalitan da ri Sanbalat, Tobia, Gesem, at ding aliwa pang kalaban king ayari mi neng gagawan ing pader at ala nang pilatan a mitagan, agyang e mi la pa akabit ding pasbul nang dalan.

² Inya inagkat da ku ri Sanbalat at Gesem a makipagsalita karela king metung karing baryu ning Kapatagan ning Ono. Metung ya iting paralan ban panasakitan da ku.

³ Mitubud kung mapilan a tau ban sabian karela king ating kung maulagang pagobran a e ku malyaring lakuan; inya e ku malyaring makipagsalita karela. E ku apaintulutan tuknang ing obra ba ku mung munta at makipagsalita karela.

⁴ Apat a besis da kung inagkat at apat a besis ku munamang sinabi king e ku malyaring makipagsalita karela.

⁵ King kalimang besis mitubud ne namang tau kanaku i Sanbalat a magdalang sulat a e makasara.

⁶ Ngana ning sulat: Mikakalat ing balita karing siping-siping a bansa king ika ampon ding kalupa mung Judio magbalak kayung mag-rebeldi, inya tatalakad yeng pasibayu ing pader. Patutuan nang Gesem iting balitang miras kanaku. Sasabian na naman king bisa ka kanung maging ari.

⁷ Tinuldu na ka namang kanung propeta ban sabian king Jerusalem king atin nang ari king Juda. Pihung miras iting balita king Ari. Inya masanting ing mikit kata at pisabian iting bage.

⁸ Iti ya ing peparala kung pakibat kang Sanbalat: Alang bitasang katutuan ing sinabi mu. Ika mu ing makigawa king balitang yan.

⁹ Buri da ing pamatakutan da kami ban tuknang kaming magobra. Ngakung menalangin, O Dios ku, pasiknangan mu ku sana ngeni.

¹⁰ Kaybat na nita, dinalo ke i Semaia, ing anak nang Delaia at apu nang Mehetabel, uling e ya malyaring lumual king bale na. Ngana kanaku, Ika ampon aku kailangan ing salikut kata king Banal nang Lugal ning Templo at isara ta la ring pasbul. Datang la ngening bengi ban paten da ka.

¹¹ Sinabi ku, Kailangan waring mamulayi ya ing taung anti kanaku at salikut king Templo ban iligtas ne ing bie na? E ku daptan ing anti kanita.

¹² Api-isip-isip ku king e ne tinubud ning Dios i Semaia, nune inupahan de ri Sanbalat at Tobia ban sabian na iti kanaku.

¹³ Inupahan de ban pamatakutan na ku at inabu king pamikasala, at ban masira ku dangalan. Kanita mika matulid lang siran da ing pangatau ku at insultuan da ku.

¹⁴ Ngakung menalangin, O Dios ku, e mu la sana kakalinguan di Tobia at Sanbalat. Parusan mu la uli na ning depat da. Makanyan munaman ing daptan mu king babaing propetang i Noadia at ding aliwa pang propetang bisang mamatakut kanaku.

¹⁵ Meyari ya ing pader kalabas na ning limang pulu't aduang aldo pamagobra. Kaduang pulu't limang aldo ne kanita ning bulan na ning Elul.

¹⁶ Mengapamulala la at mengapakarine ding siping-siping a bansa inyang abalitan da iti ding kalaban. Ikit da king meyari ing obra uli na ning saup ning Dios.

¹⁷ King panaun a ita susulatanan de ring manimuna da ring Judio i Tobia.

¹⁸ Dakal la ding makapanig kang Tobia uling Judio ya ing katuangan nang lalaki, i Secania a anak nang Ara. Subali pa kaniti, ayasawa ne ning anak nang i Jeohanan, ing anak nang Mesullam a anak nang Berekias.

¹⁹ Pupurian de ring tau i Tobia king arapan ku uli na ning mangayap nang dapat, at babalita ra ing sablang sasabian ku. E ya pepatugut paralang sulat kanaku i Tobia ban pamatakutan na ku.

7

¹ Ngeni yari ne ing pader, mikabit na la ngan ding pasbul dalan king pagkabilian da, at balu da na ring guardia karing pasbul king Templo, ding talapagkanta, at ding Levita ing obrang mitutuk karela.

² Tilduan ku la ding aduang lalaki ban mamahala king siudad ning Jerusalem: i Hanani a kapatad ku at i Hanania a pamuntuk opisyal ning kuta, at tau yang tune apagkatiwalan at ating takut king Dios.

³ Sinabi ku karela king e ra la bubuklat ding pasbul dalan ning Jerusalem anggang e ya matas a aslag ing aldo, at isara la mu neng limbug ne at bayu la magretiru ding guardia. Sinabi ku naman karela king mamili lang guardia karing mismung memalen a manuknangan Jerusalem, at dinan da lang pilming lugal a guardian da at mag-ronda la ding aliwa karing lugal nung nu la karin ding bale ra.

⁴ Metung yang maragul at malualas a siudad ing Jerusalem, oneng ditak la mu ding manuknangan karin at mapilan la pa mu ring bale makatalakad.

⁵ Kanita tigkilan na ku panamdam ning Dios ban tipunan la ding memalen, ding manimuna, at pamuntuk da, at lawan la lagyu ding pamilyang penibatan da. Ikua ke ing listahan da retang minunang miyugse mibalik. Iti ing ikit ku:

⁶ Dakal la ding bihag a meko king probinsia ning Babilonia ban mibalik karing sarasarili dang tuknangan king Jerusalem at Juda. Menuknangan la ding pamilya ra Babilonia manibat na kanitang dela na la karin ning Aring Nebucadenesar bilang bihag na.

⁷ Ding manimuna karela ila di Zerubabel, Josue, Nehemias, Azaria, Raamia, Nahamani, Mordecai, Bilsan, Misperet, Bigvai, Nehum, at i Baana.

⁸ Iti ya ing listahan da ring pamilya ning Israel at ing bilang da ring balang pamilya a mibalik ibat king pangabihag: Paros adua lang libu at dinalan pitung pulu't adua; Sefatia atlu lang dalan pitung pulu't adua; Ara anam a ralan limang pulu't adua la; Pahat Moab (ding lahi da ri Jesua at Joab) adua lang libu at walung dalan labing walu; Elam libu at aduang dalan limang pulu't apat la; Zatu walu lang dalan apat apulu't lima; Zacai pitu lang dalan anam apulu; Binui anam a ralan apat apulu't walu la; Bebai anam a ralan aduang pulu't walu la; Azgad adua lang libu at atlung dalan aduang pulu't adua; Adonikam anam a ralan anam apulu't pitu la; Bigvai adua lang libu at anam apulu't pitu; Adin anam a ralan limang pulu't lima la; Ater (ausan dia namang Hezekia) siam apulu't walu la; Hasum atlu lang dalan aduang pulu't walu; Bezai atlu lang dalan aduang pulu't apat; Harif dinalan labing adua la; Gibeon siam apulu't lima la.

⁹

¹⁰

¹¹

¹²

¹³

¹⁴

¹⁵

¹⁶

¹⁷

¹⁸

²⁶ Ding mibalik agpang karing balen da ring pamilyang karelang penibatan: Betlehem at Netofa dinalan walung pulu't walu la; Anatot dinalan aduang pulu't walu la; Bet Azmavet apat apulu't adua la; Kiriat Jearim, Kefira, at Beerot pitu lang dalan apat apulu't atlu; Rama at Geba anam a ralan aduang pulu't metung la; Mikmas dinalan aduang pulu't adua la; Betel at Ai dinalan aduang pulu't atlu la; ing aliwang Nebo lima lang pulu't adua; ing aliwang Elam libu at aduang dalan limang pulu't apat la; Harim atlu lang dalan aduang pulu; Jerico atlu lang dalan apat apulu't lima; Lod, Hadid, at Ono pitu lang dalan aduang pulu't metung; Senaa atlu lang libu at siam a ralan atlung pulu.

²⁷

²⁸

²⁹

³⁰

³¹

³²

³³

³⁴

³⁵

³⁶

³⁹ Ding pamilya da ring pari a mibalik: Jedaia (ding lahi nang Jesua) siam a ralan pitung pulu't atlu la; Immer libu at limang pulu't adua la; Pasur libu at aduang dalan apat apulu't pitu la; Harim libu at labing pitu la.

⁴⁰

⁴¹

⁴²

⁴³ Ding pamilya da ring Levita: Jesua at Kadmiel (ding lahi nang Hodavia) pitung pulu't apat la; ding talapagkanta ning Templo (ding lahi nang Asaf) dinalan apat apulu't walu la; ding guardia ning Templo (ding lahi nang Sallum, Ater, Talmon, Akub, Hatita, at Sobai) dinalan atlung pulu't walu la.

⁴⁴

⁴⁵

⁴⁶ Ding pamilya da ring magobra ning Templo: Ziha, Hasufa, Tabaot, Keros, Sia, Padon, Lebana, Hagaba, Salmai, Hanan, Giddel, Gahar, Reaia, Rezin, Nekoda, Gazam, Uza, Pasea, Besai, Meunim, Nefusesim, Bakbuk, Hakufa, Harhur, Bazlit, Mehida, Harsa, Barkos, Sisera, Tema, Nezia, at Hatifa.

⁴⁷

⁴⁸

⁴⁹

⁵⁰

⁵¹

⁵²

⁵³

⁵⁴

⁵⁵

⁵⁶

⁵⁷ Ding pamilya da ring talasuyu nang Solomon: Sotai, Soferet, Perida, Jaala, Darkon, Giddel, Sefatia, Hatil, Pokeret, Hazebaim, at i Amon.

⁵⁸

⁵⁹

⁶⁰ Atlu lang dalan siam apulu't adua ding heganaganang lahi da ring magobra king Templo at talasuyu nang Solomon ding mibalik ibat king pangayugse.

⁶¹ Anam lang dalan apat apulu't adua ding pamilyang ibat kang Delaia, Tobia, at Nekoda. Ibat la karing balen ning Tel Mela, Tel Harsa, Kerub, Addon, at Immer. Oneng e ra apatunayan king lahi lang Israelita.

⁶²

⁶³ Ila naman deti ring pari a mekapagbalik, oneng ala lang apakit a katunayan tungkul karing pamilyang karelang penibatan: Hobaia, Hakoz, at i Barzilai. (Mekapakiasawa ya ing penibatan na ning pamilyang paring Barzilai king metung a babaing tau Gilead at tikian ne lagyu ing katuangan nang lalaki.) Manibat na kanita migkasakit na lang panintunan de ing pamilyang karelang penibatan. Inya e la metanggap bilang pari.

⁶⁴

⁶⁵ Sinabi na karela ning Judiong gobernador king e la malyaring makapangan king pamangan a miyain king Dios anggang alang paring makagamit king Urim at Tumim.

⁶⁶ Apat apulu't aduang libu la at atlung dalan anam apulu ding heganaganang mekapagbalik ibat king pangayugse.

⁶⁷ Pitu lang libu at atlung dalan atlung pulu't pitu ding ipus a lalaki at babai; adua lang dalan apat apulu't lima ding lalaki at babaing talapagkanta ning Templo.

⁶⁸ Pitu lang dalan at atlung pulu't anam ding kabayu, adua lang dalan at apat apulu't lima ding mula, apat lang dalan atlung pulu't lima ding kamelyu, anam lang libu pitung dalan aduang pulu ding asno.

⁶⁹

⁷⁰ Dakal la ding minie ambag ban mitalakad yang pasibayu ing Templo. Oreti ding minambag: ing gobernador aduang dalan pitung pulung onsang gintu, limang pulung silyo, at limang dalan atlung pulung imalan-pari; ding pamuntuk da ring pamilya atlung dalan atlung pulu't pitung librang gintu, atlung libu at aduang dalan labing limang librang pilak; ding aliwang memalen atlung dalan atlung pulu't pitung librang gintu, aduang libu at siam a ralan aduang pulu't atlung librang pilak, anam apulu't pitung imalan-pari.

⁷¹

⁷²

⁷³ Menuknangan la karing balen at siudad ning Juda ding pari, ding Levita, ding guardia ning Templo, ding talapagkanta, ding karaniwan a memalen, nanupata ing mabilug a balen ning Israel.

8

¹ Inyang miras ne ing kapitung bulan, panatag na lang manuknangan ding memalen na ning Israel karing karelang sarasariling balen. King mumunang aldo na ning bulan a ita mitipun la Jerusalem, karin king plasa lele ning Pasbul dalan ning Danum. Inawad da kang Ezra, ing pari at biasa king Kautasan a binie ning Dios king Israel king kapamilatan nang Moises, ing kuanan ne ing libru ning Kautusan.

² Inya dela neng Ezra ketang lugal nung nu la mititipun ding lalaki, babai, at anak a makaintindi na king pisasabian.

³ Binasa ne karela ing Kautusan ketang plasa nung nu la makatipun ding memalen manibat na itang abak anggang ugtung aldo. At mekiramdam lang masalese ding sabla.

⁴ Makatalakad ya i Ezra king entabladung dutung a gewa ra para king pamitipun a ita. Makatalakad la banda nang wanan di Matitia, Sema, Anaia, Uria, Hilkia, at i Maaseia. Makatalakad no man banda nang kayli di Pedaia, Misael, Malkija, Hasum, Hasbadana, Zacarias, at i Mesullam.

⁵ Makalawe la ngan a mata ding tau kang Ezra kabang makatalakad ya. Tinalakad la ngan ding tau inyang biklat ne ing libru.

⁶ Nganang Ezra, Purian ya ing Ginu, ing maragul a Dios! Tinas da la ring gamat da ring tau at ngarang mekibat, Amen! Amen! Diku do ring buntuk da at migsakab la king gabun king pamanyamba king Ginu.

⁷ Kaybat na nita, tinalakad la at ding Levitang di Jesua, Bani, Serebia, Jamin, Akub, Sabetai, Hodia, Maaseia, Kelita, Azaria, Jozabad, Hanan, at i Pelaia inisplika re ing Kautusan karela.

⁸ Binasa re karela ing Kautusan ning Dios at linikas de ampon binie kabaldugan ban aintindian de ring tau.

⁹ Inyang abalu da ring tau ing sukat dang daptan, agpang king aduan ning Kautusan, metagkil la kapanamdaman at mipakiak la. Inya i Nehemias, ing gobernador, i Ezra a pari at biasa king Kautusan, at ding Levitang manisplika king Kautusan sinabi ra karing tau, Banal ya ing aldong iti para king Ginung kekayung Dios, inya e kayu sukat malungkut o kikiak.

¹⁰ Muli na kayu at magsaya. Mangan kayu at minum at dinan yu la detang alang pamangan at inuman, uling banal ya iting aldo king kekatamung Ginu. Inya e kayu sukat malungkut. Ing tula a babie na ning Ginu kekayu ya ing kekayung sikanan.

¹¹ Inya ding Levita pepamayapan da la ring tau. Ngara, Magtahimik kayu uling aldo yang banal ing aldong iti; e kayu sukat malungkut.

¹² At minuli la ding tau ban mangan at minum ampon dinan detang alang pamangan at inuman. Masaya la ngan uling aintindian de ing Kautusan a mebasa karela.

¹³ Kabukasan, mitipun la ding pamuntuk da ring pamilya, at ding pari ampon Levita, pintalan de i Ezra ban magaral karing turu na ning Kautusan.

¹⁴ Atuklasan da king Kautusan a binie ning Ginu kang Moises, king makautus karing memalen na ning Israel ing manuknangan lang pansamantala karing dalungdung king kekaban na ning Piesta da ring Dalungdung.

¹⁵ Inya pepalual lang metung a kapabaluan para karing memalen na ning Jerusalem at karing aliwa pang siudad at balen: Munta kayu karing bunduk-bundukan at kumang sangang olibo, agusu, mirto, palma, at aliwa pang dutung ban gawan dalungdung, agpang king makasulat king Kautusan.

¹⁶ Inya memangua lang sanga at ginawa lang dalungdung karing karelang patag a bubungan, karing karelang mulahan, king patyu ning Templo, at king plasa lele ning Pasbul dalan ning Danum at ning Pasbul dalan ning Efraim.

¹⁷ Ginawa la ngang dalungdung ding sablang taung mibalik ibat king pangayugse at karin la menuknangan. Iti ya ing mumunang diling merapat manibat na kanitang panaun nang Josue a anak nang Nun. Masaya yang masaya ing balang metung at metung.

¹⁸ Babasan de aldo-aldo ing libru ning Kautusan ning Dios angga na king katataulian a aldo ning karelang selebrasyun. Migpiesta la kilub ding pitung aldo at mika masusi lang pamitipun king kawalung aldo, agpang king aduan ning Kautusan.

9

¹ Inyang kadua nang pulu't apat a aldo ning bulan a ita, mitipun la ding memalen na ning Israel ban mag-ayunu. Misulud lang imalan a magaspang at mibiling alikabuk karing buntuk da.

² Kewani ra ing sarili da karing dayuan; tinalakad la at pigtapat da ing kasalanan da at antimu rin ing depat dang pamikasala ding karelang makatua

³ Makatalakad la karing lugal da kilub ning atlung oras kabang mababasa ya ing Kautusan ning Ginung karelang Dios. At karing tutuking atlung oras pigtapat da ing depat dang pamikasala, at simban de ing Ginung karelang Dios.

⁴ Makatalakad la babo ning entabladu ding Levitang di Jesua, Bani, Kadmiel, Sebania, Bunni, Serebia, Bani, at i Kenani. King masikan a siwala, menalangin la king Ginung karelang Dios.

⁵ Kaybat na nita, sinabi da ri Jesua, Kadmiel, Bani, Hasabneia, Serebia, Hodia, Sebania, at i Petahia: Talakad tamu at purian ya ing Ginung kekatamung Dios, purian ya king kapilan pa man! Purian ya ing makaligaya nang lagyu agyang alang amanung kapurian at pamipanuan a malyaring karapatdapat.

⁶ Kanita miyabe-abe reng sinabi iting manalangin: Bukud mung ika Ginu, ing Ginu; ika ing linalang king meto sikluban at karing batuin. Ika ing linalang king yatu, king dagat, at karing karela manuknangan; ika ing minie bie karela. Ding sablang upaya king banua duruku la at sasamba keka.

⁷ Ika ing Ginung Dios, ing memili kang Abram at milual king Ur ning Babilonia; Abraham ing pemalagyu mu.

⁸ Ikit mu king tapat ya keka, inya kang Abraham ka ginawang kasunduan. Pengaku mung ibie mu la kang Abraham ding gabun da ring Cananeo, Heteo, Amoreo, Perezeo, Jebuseo, at Girgaseo, ban karin la manuknangan ding lahi na. Tiparan mu ing kekang pengaku uling tune kang tapat.

⁹ Ikit mu ing kasakitan a delanan da ring kekaming makatua karin Ehipto; ing karelang aus dimdam mu inyang atyu la king Dagat da ring Timbu.

¹⁰ Ginawa kang bage pagmumulalan laban king karelang ari, karing pamuntuk at memalen na, uling pigbagsikan da la ring kekaming makatua. At ing Lagyu mu angga ngeni pikabaluan ya.

¹¹ Pinitna me ing dagat king akakit da; king malanging gabun libutad ning dagat karin la linakad, at detang tatagal karela anti lang batung pepalbug mu king kalalaman na.

¹² Bukud kaniti, neng aldo pitnubayan mu la king kapamilatan ning asias a biga, at asias a api neng bengi ban suluan ing dalanan da king paglakbe ra.

¹³ Ibat banua king Bunduk ning Sinai karin ka minta; karing kekang memalen migsalita ka, at ding mayap mung tuntunan at kautusan karela binie mu la.

¹⁴ Pepabalu mu karela king ing Aldo ning Sabbath sukat deng pangilinan, at king kapamilatan ning talasuyu mung i Moises ding kekang tuntunan at kautusan karela binie mu la.

¹⁵ Inyang meranup la, peparala kang tinapeng ibat banua, at inyang mau lang danum king batung ating sibul karin mu la pepainum. Sinabi mu karela king bandian de ing gabun a pengaku mung ibie karela.

¹⁶ Oneng ding makatua mi migmaragul la, at pepasias da lang buntuk da, at e memintu karing utus mu.

¹⁷ Karing utus mu e la memintu; kelinguan da ing sablang bage pagmumulalan a depat mu; buntuk da pepasias da la, at memili lang karela manimuna ban king Ehipto maging ipus pasibayu. Oneng metung kang Dios a makasadiang mamatawad, maganaka, at malunusan, e agad mimua, at tune malugud. Inya e mu la pepaburen.

¹⁸ Ginawa lang rebultu a kawangis ning biserung baka, at sinabi ra king iti ya ing dios dang milual karela king Ehipto! Makanyan lang dinapat maragul a kalapastanganan keka.

¹⁹ Uli ning maragul mung lunus e mo pepaburen king ilang; e me leko ing asias a biga at api neng maglakbe la aldo't bengi.

²⁰ King kekang kayapan tiru me karela ing dalan a sukat dang dalanan; e mu pigkaymut karela ing pamangan a manna at ing danum a inuman da.

²¹ Apat apulung banua mong sinustentuan king ilang, at e la migkulangan king nanuman; e melaun ing karelang imalan, at bitis da e la mengalbag king karelang paglakad.

²² Dininan mu lang kayarian ampon taung sasakupan; dininan mong gabun, inya sekupan de ing Hesbon, ing gabun nang Aring Sihon, at ing gabun ning Bashan, ing gabun nang Aring Og.

²³ Peparakal mu la ding anak da, kasing dakal da la ring batuin ning banua, at dela mu la king gabun a pengaku mung ibie karing makatua da ban maging bandi ra.

²⁴ Inya sekupan de ing gabun ning Canaan, at simbut ding taung karin manuknangan. Karing gamat da ari at kalaban da binie mu la, ban daptan da ing buri dang gawan karela.

²⁵ Abihag da lang pakakutang siudad, matabang gabun, bale mitmung pibandian, depositung danum, mulahan olibo at ubas, at miyayaliwa pang tanaman a mamunga. Mengan la at kinabsi at metaba la. Meligaya la king mayap a binie mu karela.

²⁶ Oneng linaban la keka; e la memintu karing utus mu, linele re ing Kautusan mu. Pete da la ring propeta a babie babala karela ban mibalik lub keka. Dinapat lang maragul a kalapastanganan keka.

²⁷ Inya pepailalam mu la karing kalaban da, at pepasakitan da la. King karelang delanan a kasakitan minaus la keka, at ibat banua pekiramdaman mu la. Uli ning maragul mung lunus karela dininan mu lang manimuna ban karing kalaban iligtas da la.

²⁸ Inyang payapa na, dinapat no namang pamikasala laban keka, inya pasibayu mu lang pepailalam karing karelang kalaban. Inyang minaus la't sinaingsing keka, ibat banua pekiramdaman mu la, at king kekang maragul a lunus ulit-ulit mu lang kinabus.

²⁹ Belan mu la ban mibalik at tupad karing utus mu, oneng migmatas la at e la memintu karing utus mu agyang ing Kautusan mu ya ing babie bie karela. Mesias la buntuk at e la bisang mamintu.

³⁰ Pibata mu la kilub ding dakal a banua, inaus mu la pansin kapamilatan ding pepawaga mu karing propeta, oneng migmaklak-maklakan la. Inya karing gamat ding dayuan keka lang pepailalam.

³¹ Makanyan man, e mu la gilutan at gisan uli ning maragul mung kapakaluluan. Dios kang maganaka at malunusan.

³² Inya, ika, ing kekeng Dios, Dios kang marangal, mayupaya ka, at makapangilabut; tapat tutupad king kekang pangaku. E mu sana lalawan mayan ing digpang kasakitan karing kekeng ari, manimuna, pari, at propeta; karing kekeng makatua, at karing sablang kekang memalen memagkasakit la uli ning pamaniakup da ring ari ning Asiria.

³³ Atin kang matulid ing perusan mu kami; tapat ka kekami agyang mikasala ke keka.

³⁴ Ding kekeng makatua, ari, manimuna, at pari e re tiparan ing kekang kautusan. Ding kekang utus at babala e da la pekiramdaman.

³⁵ Kabang atilu king karelang kayarian at ning binie mung labis-labis a kayapan king malapad at matabang gabun a binie mu karela; e la rin tinuknang king dapat dang pamikasala ni keka sinuyung tapat.

³⁶ Inya meging ipus kami ngeni king mismung binie mung gabun, keting matabang lugal a babie king kabiayan mi.

³⁷ Ing dakal nang pupul karing ari mumuli, uli ning pamikasala mi karela pepailalam mu kami, pati animal a sese mi; alang kalupa ing kasakitan mi ngeni!

³⁸ Uli na niting sablang milyari, ikaming memalen na ning Israel, susulat mi ing masusi ming pangaku. At ding kekaming manimuna, ding kekaming Levita, at pari ayunan da at migpirma lang kayabe mi.

10

¹ Ing minunang migpirma ya i gobernador Nehemias a anak nang Hacalia, at kaybat i Zedekia.

² Sinalisi lang migpirma di Seraia, Azaria, Jeremias,

³ Pasur, Amaria, Malkija,

⁴ Hatus, Sebania, Malluk,

⁵ Harim, Meremot, Obadias,

⁶ Daniel, Gineton, Baruk,

⁷ Mesullam, Abiya, Mijamin,

⁸ Maazia, Bilgai, at i Semaia. Pari la ngan deti.

⁹ Ding Levitang migpirma ila deti: i Jesua, ing anak nang Azania; Binui ning pamilya nang Henadad; i Kadmiel,

¹⁰ at ding kapatad nang di Sebania, Hodia, Kelita, Pelaia, Hanan,

¹¹ Mica, Rehob, Hasabia,

¹² Zacur, Serebia, Sebania,

¹³ Hodia, Bani, at i Beninu.

¹⁴ Ding pamuntuk da ring memalen a migpirma: i Paros, Pahat Moab, Elam, Zatu, Bani,

¹⁵ Bunni, Azgad, Bebai,

¹⁶ Adonija, Bigvai, Adin,

¹⁷ Ater, Hezekia, Azzur,

¹⁸ Hodia, Hasum, Bezai,

¹⁹ Harif, Anatot, Nebai,

²⁰ Magpias, Mesullam, Hezir,

²¹ Mesezabel, Zadok, Jadua,

²² Pelatia, Hanan, Anaia,

²³ Osea, Hanania, Hasub,

²⁴ Halloes, Pilha, Sobek,

²⁵ Rehum, Hasabna, Maaseia,

²⁶ Ahia, Hanan, Anan,

²⁷ Malluk, Harim, at i Baana.

²⁸ Ikami, ding memalen na ning Israel, ding pari, ding Levita, ding guardia ning Templo, ding talapagkanta king Templo, ding magobra king Templo, at ikaming sablang kinawani karing dayuan a manuknangan king kekaming gabun uli na ning kekaming kapamintuan king Kautusan ning Dios, at ding asawa mi at anak a atyu na king idad at pamanalastas,

²⁹ makisanmetung kami karing kekaming kapatad at manimuna king taimtim a pangaku a tuparan mi la ding sablang tuntunan at Kautusan ning Dios a miyabie king kapamilatan nang Moises a talasuyu na. Nung labag kami, makasadia kaming tanggap parusa.

³⁰ E mi la paintulutan makiasawa ding anak ming lalaki at babai karing dayuan a manuknangan king kekaming lugal.

³¹ E ke sali nung ding dayuan magtinda lang binutil o nanumang paninda neng Aldo ning Sabbath o king isanu mang aldo pangilinan. E mi ya tamnanan ing asikan king kapitung banua, at e mi na la singilan detang ating utang kekami.

³² Ing kawalung dake na ning metung a onsang pilak ing ibie mi balang banua para king gastus ning Templo.

³³ Ibie mi la naman deting tuki-tuking bage para king pamanyamba king Bale ning Dios: ing sagradung tinape, ing aldo-aldo binutil a ain, ing animal para ain-a-durulukan, ding sagradung ain neng Aldo ning Sabbath, ding Piesta ning Bayung Bulan at aliwa pang piesta, ding aliwa pang sagradung ain, ding ain-a-kapamayaran-king-kasalanan na ning Israel, at nanumang bage a kailangan king Bale ning Dios.

³⁴ Ding pari, ding Levita, ding memalenikaming sabla, mibagutan kami balang banua ban abalu mi nung ninu ding pamilyang magdalang dutung a gamitan para karing ain-a-durulukan king altar ning Ginung kekaming Dios, agpang king aduan na ning Kautusan.

³⁵ Idala mi balang banua king Bale ning Ginu ing mumunang pupul ning asikan at bungang tanaman.

³⁶ Idala mi la naman karing pari a susuyu king Bale ning Dios ding anak ming lalaking pangane, ding baka, at aliwa pang sese animal, agpang king aduan na ning Kautusan, ban italaga la king Dios.

³⁷ Idala mi munaman karing paring susuyu king Bale ning Dios ing masa a megawa king trigung mumunang pupul balang banua at ing aliwa pang ain: bungang tanaman, alak, at larung olibo. Ibie mi la naman ding sikapulu da ring kekaming asikan. Ding lumikum kareti ila ding Levita at kaybat idala da la karing bodega ning Bale ning Dios.

³⁸ Kailangan ing atin lang kayabe metung a pari (a lahi nang Aaron) ding Levita neng lilikuman da la reng sikapulu. Ing kapulung dake da reti ya ing idala ra karing bodega na ning Bale ning Dios.

³⁹ Ding memalen na ning Israel at ding Levita ila ding magdala king melikum a binutil, alak, at larung olibo karing bodega na ning Bale ning Dios; karin la naman makasalikut ding kasangkapan na ning Bale ning Dios at karin manuknangan ding paring susuyu, ding guardia, at talapagkanta ning Bale ning Dios. E mi ya paburen ing Bale na ning kekaming Dios.

11

¹ Menuknangan la Jerusalem ding manimuna da ring memalen, at mibagutan la ding aliwa karing memalen ban pilinan ya ing metung a pamilya karing balang apulu ban manuknangan king banal a siudad ning Jerusalem, kabang ding siam naman karing apulu malyari lang manuknangan karing aliwang siudad.

² Pinuri da la retang laus lub migprisintang manuknangan king Jerusalem.

³ Menuknangan la Jerusalem ding pamuntuk na ning probinsia, oneng karing sarasariling balen na ning Juda ya menuknangan ing balang memalen, ding pari, ding Levita, ding magobra king Templo, at ding lahi da ring talasuyu nang Solomon.

⁴ Oreti ding lahi nang Juda a menuknangan Jerusalem: i Ataia, ing anak nang Uzzia at apu nang Zacarias. Ding aliwa pang pamilyang penibatan na ila di Amaria, Sefatia, at i Mahalalel. Lahi na la ngang Juda king anak nang i Perez.

⁵ I Maaseia, ing anak nang Baruk at apu nang Colhoze. Ding aliwa pang pamilyang penibatan na ila di Hazaia, Adaia, Joiarib, at i Zacarias. Lahi na la ngang Juda king anak nang i Sela.

⁶ Apat lang dalan anam apulu't walung mayagyung lalaki ding menuknangan king Jerusalem a lahi nang Perez.

⁷ Ding lahi nang Benjamin a menuknangan Jerusalem ila ding pamilya nang Sallu a anak nang Mesullam at apu nang Joed. Ding aliwa pang pamilyang penibatan na ila di Pedaia, Kolaia, Maaseia, Itiel, at i Jesaia;

⁸ i Gabai at i Salai, ding malapit nang kamaganak Sallu. Siam lang dalan aduang pulu't walu heganagana ding menuknangan Jerusalem a lahi nang Benjamin;

⁹ i Joel a anak nang Zikri ya ing karelang manimuna, at i Juda a anak nang Hasenua ya ing kaduang matas a katungkulan a pamuntuk ning siudad.

¹⁰ Ding pari: i Jedaia, ing anak nang Joiarib, at i Jakin.

¹¹ I Seraia, ing anak nang Hilkia at apu nang Mesullam. Ding aliwa pang pamilyang penibatan na ila di Zadok, Meraiot, at i Ahitub, ing Pekapun ding Pari.

¹² Walu lang dalan aduang pulu't adua heganagana ding pamilya da ring sinuyu king Bale ning Dios. I Adaia, ing anak nang Jeroam at apu nang Pelalia. Ding aliwa pang pamilyang penibatan na ila ri Amzi, Zacarias, Pasur, at i Malkija.

¹³ Adua lang dalan apat apulu't adua heganagana ding buntuk pamilya na niting pamilya. I Amasai, ing anak nang Azarel at apu nang Azai. Ding aliwa pang pamilyang penibatan na ila di Mesilemot at i Immer.

¹⁴ Ating dinalan aduang pulu't walung miembru na niting pamilya da ring pikabaluan a matapang a sundalus. I Zabdiel ya ing manimuna ra; ibat la king mayap a pamilya.

¹⁵ Ding Levita: i Semaia, ing anak nang Hasub at apu nang Azrikam. Ding aliwa pang pamilyang penibatan na ila di Hasabia at i Bunni.

¹⁶ I Sabetai at i Jozabad, ding aduang pikabaluan a Levita a memahala king obra lual ning Bale ning Dios.

¹⁷ I Matania, ing anak nang Mica at apu nang Zabdi a lahi nang Asaf. Ya ing menimuna karing talapagkanta ning Bale ning Dios king pamagkanta king panalangin na ning kapasalamatan. I Bakbukia, ing kasaup nang Matania. I Abda, ing anak nang Samua at apu nang Galal a lahi nang Jedutun.

¹⁸ Adua lang dalan walung pulu't apat heganagana ding Levitang menuknangan king banal nang siudad ning Jerusalem.

¹⁹ Ding guardia ning Bale ning Dios: i Akub, Talmon, at ding karelang kamaganak. Dinalan pitung pulu't adua la heganagana.

²⁰ Menuknangan la ding aliwang memalen na ning Israel at ding mitagan a pari at Levita karing sarili dang gabun a mana karing balen ning Juda.

²¹ Oneng menuknangan la king Ofel ding magobra king Templo, at megobra la lalam dang pamamahala di Ziha at Gispa.

²² I Uzzi, ing memahala karing Levitang manuknangan king Jerusalem, anak neng Bani at apu neng Hasabia. Ding aliwa pang pamilyang penibatan na ila ri Matania at Mica at dake na la ning pamilya nang Asaf, ing pamilya a ating pakibatan king musika neng ating kasuyuan king Bale ning Dios.

²³ Ating utus a ibat king ari tungkul king katungkulan da ring talapagkanta aldo-aldo.

²⁴ I Petahia, ing anak nang Mesezabel ning pamilya nang Zera at ning tribu nang Juda, ya ing pekakatawan ning memalen na ning Israel king korti na ning ari.

²⁵ Menuknangan la ding keraklan karing tau karing balen malapit karing marangle asikan da. Menuknangan la detang ibat king tribu nang Juda king Kiriat Arba, Dibon, Jekabzel, at karing baryu lele da reti.

²⁶ Menuknangan la naman karing balen ning Jesua, Molada, Betpelet,

²⁷ Hazarsual, Beerseba, at karing baryung makapaligid kareti.

²⁸ Menuknangan la karing balen ning Ziklag, Mecona, at karing baryu na.

²⁹ karin king Enrimon, Zora, Jarmut,

³⁰ Zanoa, Adullam, at karing baryu siping da reting balen. Menuknangan la naman king Lakis at karing marangle na, king Azeka at karing baryu na. Inya alaganapan deng sekupan manibat king Beerseba dane mauli angga king Kapatagan ning Hinom dane norti.

³¹ Menuknangan la ding pamilyang ibat king tribu nang Benjamin king Geba, Mikmas, Ai, Betel, at karing makalapit a baryu,

³² Anatot, Nob, Anania,

³³ Hazor, Rama, Gitaim,

³⁴ Hadid, Zeboim, Nebalat,

³⁵ Lod, Ono, at king Kapatagan ding Mangagaling a Pangamat.

³⁶ Miyabe la karing tau na ning tribu nang Benjamin ding aliwang grupu da ring Levita a menuknangan king sakup ning Juda.

12

¹ Iti ya ing listahan da ring pari at Levitang mibalik ibat king pangayugse a kayabe nang Zerubabel a anak nang Sealtiel at i Jesua: i Seraia, Jeremias, Ezra,

² Amaria, Malluk, Hatus,

³ Secania, Rehum, Meremot,

⁴ Iddo, Ginetoi, Abiya,

⁵ Mijamin, Maadia, Bilga,

⁶ Semaia, Joiarib, Jedaia,

⁷ Sallu, Amok, Hilkia, at i Jedaia. Ila deti ring manimuna da ring kalupa dang pari king panaun nang Jesua.

⁸ Ding Levita ila di Jesua, Binui, Kadmiel, Serebia, Juda, at i Matania at ding kapatad na ila ding ating pakibatan karing kantang kapasalamatan.

⁹ Ding grupu da ring talapagkanta karing pakibat a kanta ila di Bakbukia, Unno, at ding kapatad dang lalaki.

¹⁰ I Jesua ya i tata nang Joiakim a tata nang Eliasib. Anak na ne mang Eliasib i Joiada.

¹¹ I Joiada tata neng Jonatan at i Jonatan tata neng Jadua.

¹² Oreti ding paring pamuntuk da ring pamilyang pari inyang i Joiakim ya ing Pekapun ding Pari: i Meraia ning pamilya nang Seraia, i Hanania ning pamilya nang Jeremias,

¹³ i Mesullam ning pamilya nang Ezra, i Jeohanan ning pamilya nang Amaria,

¹⁴ i Jonatan ning pamilya nang Maluki, i Jose ning pamilya nang Sebania,

¹⁵ i Adna ning pamilya nang Harim, i Helkai ning pamilya nang Meraiot,

¹⁶ i Zacarias ning pamilya nang Iddo, i Mesullam ning pamilya nang Gineton,

¹⁷ i Zikri ning pamilya nang Abiya, ning pamilya nang Miniamin, i Piltai ning pamilya nang Moadia,

¹⁸ i Samua ning pamilya nang Bilga, i Jeonatan ning pamilya nang Semaia,

¹⁹ i Matenai ning pamilya nang Joiarib, i Uzzi ning pamilya ning Jedaia,

²⁰ i Kalai ning pamilya nang Salai, i Eber ning pamilya nang Amok,

²¹ i Hasabia ning pamilya nang Hilkia, at i Netanel ning pamilya nang Jedaia.

²² Kanitang kapanaunan da ring Pekapun ding Paring di Eliasib, Joiada, Joanan, at Jadua milista la lagyu ding buntuk da ring pamilya da ring Levita at ding pari. Meyari ing pamaglista inyang i Dario ya ing ari ning Persia.

²³ Mitala la king Libru ning Istoria ding lagyu da ring buntuk ding pamilya da ring Levita angga na king panaun nang Joanan a apu nang Eliasib.

²⁴ Lalam nang pamanibalang Hasabia, Serebia, Jesua, Binui, at Kadmiel, gewa da lang makagrupu ding Levita. Agpang king inutus nang David, ing talasuyu ning Dios, adua lang grupu ding magkantang kapurian at kapasalamatan king Dios.

²⁵ Di Matania, Bakbukia, Obadias, Mesullam, Talmon, at Akub ila ding guardia ning Bale ning Dios a magbante karing bodegang malapit karing pasbul dalan ning Templo.

²⁶ Mibiebie la ngan deti inyang kapanaunan nang Joiakim, ing anak nang Josue at apu nang Jeozadak, at inyang i Nehemias ya ing gobernador, at i Ezra ya naman ing pari a biasa king Kautusan.

²⁷ Inyang italaga da ne ing pader na ning Jerusalem inaus da la ngan ding sablang Levita a manuknangan karing miyayaliwang lugal ban makapakiabe la king pamitalaga at king kantang kapasalamatan, at pamagkantang babagayan da ring pompiang, alpa, at lira.

²⁸ Dinatang la ding pamilyang Levitang talapagkanta a manuknangan king paligid na ning Jerusalem at karing baryu ning Netopatites,

²⁹ Bet-gilgal at king sakup ning Geba at Azmavet.

³⁰ At depatan da ring pari at ding Levita ing pamaglinis king sarili da, agpang king aduan na ning Kautusan. Makanyan munaman ing depatan da ring memalen. Lininis da la naman ding pasbul dalan at ing pader.

³¹ Tinipun ku la ding manimuna na ning Juda king babo ning pader at tilduan mamahala karing aduang maragul a grupu a lumibut Jerusalem ban magpasalamat king Dios. Minta ya ing metung a grupu karela bandang wanan papunta king Pasbul dalan ning Basurahan.

³² Tinuki ya karela i Hosaia kagulutan da ring talapagkanta at tikian de ring kapitna karing pamuntuk na ning Juda.

³³ Kayabe na lang Hosaia di Azaria, Ezra, Mesullam,

³⁴ Juda, Benjamin, Semaia, Jeremias,

³⁵ at ding mapilan a anak da ring paring tutiup karing trumpeta. Ila deti: i Zacarias a anak nang Jonatan at apu nang Semaia. (Kabilang la karing makatua na di Matania, Micaia, at i Zacur ning pamilya nang Asaf.)

³⁶ Katuki na la ding aliwa nang miembru ning pamilya nai Semaia, Azarel, Milalai, Gilalai, Maai, Netanel, Juda, at i Hanani. Magdala la ngang musikang instrumento a kalupa da retang ginamit nang Aring David, ing talasuyu ning Dios. I Ezra, ing biasa king Kautusan, ya ing menimuna kaniting grupu.

³⁷ Karin king Pasbul dalan ning Sibul sindu ra ing pamaglakad paukiat king Siudad nang David, lagpus king palasyu nang David. Kaybat migbalik la king pader lele ning Pasbul dalan ning Danum papunta king dane aslagan ning siudad.

³⁸ Minta ya king bandang kayli na ning babo ning pader ing kaduang grupu da ring magkantang kapasalamatan. Tikian ku lang kayabe ding kapitna karing tau. Migmartsa kaming lagpus king Tore ding Pugun papunta king Malualas a Pader,

³⁹ at manibat karin miglakad kaming lagpus king Pasbul dalan ning Efraim, Pasbul dalan ning Jesana, Pasbul dalan ning Asan, Tore nang Hananel, at ing Tore ding Dinalan papunta king Pasbul dalan da ring Tupa. Tinuknang keng lalakad inyang miras kami king Pasbul dalan da ring Guardia lele ning Bale ning Dios. fig,,,,,Minta ya king bandang kayli...ing kaduang grupu...,(12:38)fig*

⁴⁰ Mitagpu la ding aduang grupu da ring talapagkanta tulid na ning Bale ning Dios. Subali pa karetang manimuna a kayabe ku,

⁴¹ kayabe ku la naman ding paring tutiup karing trumpeta. Ila di Eliakim, Maaseia, Miniamin, Micaia, Elioenai, Zacarias, at i Hanania.

⁴² Ding tutuki a atyu kagulutan da ila di Maaseia, Semaia, Eleazar, Uzzi, Jeohanan, Malkija, Elam, at i Ezer. Migkanta la ding talapagkantang panimunan nang Jezrahia.

⁴³ King aldong ita, dakal ing miyabie ain-sakripisyu at tune lang masaya ding tau, uling peligayan na la ning Dios. Kayabe la ding babai at anak kaniting kasayahan. Ing inge ning kasayahan da meramdam angga karing mangarayung lugal.

⁴⁴ King panaun a ita, tinuldu lang lalaki ban mamahala karing bodegang pibibilianan karing babie da ring tau antimo ring ambag, ding mumunang bungang binutil at prutas ampon ding sikapulu, agpang king aduan na ning Kautusan. Deting lalaki ila ding munta karing marangle at tipunan da itang babie da ring tau para karing pari at Levita a parehung susuyu king Bale ning Dios. Matula la ding memalen ning Juda karing pari at ding Levita uli ning karelang pamagsilbi.

⁴⁵ Gagampanan da ing aduan ning Dios tungkul king pamaglinis. Gagampanan da naman ding talapagkanta at ding guardia karing pasbul dalan ing karelang katungkulan agpang king inutus nang Aring David at Solomon a anak na.

⁴⁶ Manibat na inyang kapanaunan nang Aring David at i Asaf a manimuna da ring talapagkanta, menimuna na la deting talapagkanta king pamagkantang kapurian at kapasalamatan king Dios.

⁴⁷ King kapanaunan nang Zerubabel at Nehemias, babie lang saup aldo-aldo ding sablang memalen na ning Israel para king kailangan da ring talapagkanta at guardia ning Bale ning Dios. Babie lang ain karing Levita at babie da naman ding Levita itang dake a mangaintulid karing pari.

13

¹ Itang aldo a babasan de king publiku ing libru nang Moises, ikit de ing metung a bersikulu nung nu makabawal karing tau Ammon at Moab ing makiabe la karing memalen na ning Dios.

² Bawal iti uling e da la dininan pamangan at inuman ding Israelita inyang dinalan la king gabun da kanitang meko la Ehipto. Lugal king saupan da la ring Israelita, beyaranan de i Balaam ban isumpa na la. Mu pin, gewa neng bendisyun ning Dios ing sumpa para karing Israelita.

³ Inyang dimdam de ring Israelita iting Kautusan, kewani da la karela ding sablang e ra kalahi.

⁴ Bayu mepalyari ita, i Eliasib a pari at mamahala karing bodega na ning Bale ning kekatamung Dios, maluat neng ating pamakiugnayan kang Tobia.

⁵ Peintulutan ne i Tobia a gamitan ne ing metung a maragul a kuartu. Bukud yang magamit iting maragul a kuartu para pisinupan karing ain-a-binutil at insenso, karing kasangkapan, karing ain para karing pari, ding sikapulung trigu, alak, at larung olibo a miyabie karing Levita, karing talapagkanta, at karing guardia.

⁶ Ala ku kanita king Jerusalem inyang milyari iti uling katlung pulu't adua nang banuang Artaxerxes bilang ari na ning Babilonia minta ku karin ban munie ulat. Kaybat na nita, peintulutan na kung meko

⁷ at mibalik na ku Jerusalem. Kanita ku abalu ing kapaintulutan a binie nang Eliasib kang Tobia ban gamitan ne ing maragul a kuartu king Bale ning Dios.

⁸ Mibua ing mua ku at pemalugse ku ing sablang gamit nang Tobia.

⁹ Kaybat inutus ku king linisan de ing kuartu at ibalik lang pasibayu ding kasangkapan na ning Bale ning Dios, ding ain-a-binutil, at insenso.

¹⁰ Abalu ku munaman king ding Levita ampon ding talapagkanta a ating pakibatan at katungkulan meko la at minuli karing asikan da, uling e ra binie ding tau itang dake a mangaintulid king pagkabiayan da.

¹¹ Inya sebianan ku la ding talapamahala. Ngaku karela, Obat mipaburen ya ing Bale ning Dios? Pepayaus ku la ding Levita at ding talapagkanta at binalik ku la king obra da.

¹² Kaybat na nita, binie da ring sablang memalen na ning Juda ing sikapulu na ning karelang pupul a binutil, alak ampon larung olibo, at dela ra king bodega na ning Bale ning Dios.

¹³ Gewa ku lang talapamahala di Selemia a pari, i Zadok a biasa king Kautusan, at i Pedaia a Levita. I Hanan a anak nang Zacur at apu nang Matania ya ing karelang kayaduangan. Apagkatiwalan la ngan deti at balu ku king ibie ra itang kailangan a mangaintulid karing kalupa rang talapagobra.

¹⁴ E mu sana kakalinguan, O Dios ko, iting sablang bage a depatan ku king kekang Bale at king kapanyamban a mararapat karin.

¹⁵ King panaun a ita, ikit ku la ring lalaki na ning Juda a kakuang katas karing ubas king Aldo ning Sabbath. Titipunan da ring aliwa at kakarga karing asno ra ing karelang pupul a binutil, alak, ubas, bungang higera at miyayaliwa pa, at kaybat darala da king Jerusalem agyang king Aldo ning Sabbath. Belan ku la king e ra pisasali iti king Aldo ning Sabbath.

¹⁶ Ating tau Tiro a manuknangan Jerusalem a magdalang asan at miyayaliwa pang paninda, at pisasali ra iti karing memalen na ning Juda at ning Jerusalem king Aldo ning Sabbath.

¹⁷ Sebianan ku la ding pamuntuk na ning Juda. Ngaku karela, Lawan yu ing e ustung pepasari yu. Lalapastanganan ye ing Aldo ning Sabbath!

¹⁸ Iti mismu ing sangkan nung inya perusan na la ning Dios ding makatua tamu at bildug na ing kasiran keting siudad. Makanyan man, lalu yeng pamuan ing Dios king Israel uli na ning e yu pamangiling king Aldo ning Sabbath. fig,,,,,Lalapastanganan ye ing Aldo ning Sabbath!,(13:17)fig*

¹⁹ Inya inutus ku king isara la ding pasbul dalan na ning siudad kaumpisa ning balang Aldo ning Sabbath, potang lumbug ne ing aldo, at ibuklat la mu kaybat ning Aldo ning Sabbath. Tilduan ku la ding mapilan karing tauan ku ban guardian da la ring pasbul dalan at ala lang paintulutan nanumang bage a milub neng Aldo ning Sabbath.

²⁰ Misan o makatadua la migkampu lual ning pader ning Jerusalem ding negosianting magtindang miyayaliwang tinda.

²¹ Belan ku la king anti kaniting amanu: E kayu magkampu ken! Kabud inulit yung pasibayu yan, mapilitan kung gumamit puersa laban kekayu. Manibat na kanita e na la mibalik king Aldo ning Sabbath.

²² Inutus ku karing Levita king linisan da ing sarili da at kaybat ila ding mag-guardia karing pasbul dalan ban pihu yang manatiling sagradu ing Aldo ning Sabbath. E mu munaman sana kakalinguan, O Dios ko, iting depat ku, at iligtas mu ku uli na ning maragul a lugud mu.

²³ King panaun munamang ita, atuklasan ku king dakal la ding Judio a mekiasawa karing babaing tau Asdod, Ammon, at Moab.

²⁴ Magsalita la ding kapitna karing karelang anak king salitang Asdod o karing aliwang salita, at e la makapagsalita king salitang Judio.

²⁵ Inya sebianan ku la, belan, berug, at ginut a buak. Kaybat pepangakuanan ku la king lagyu na ning Dios king e da la paintulutan makiasawa ding anak dang lalaki o babai at ila man karing e ra kalahi.

²⁶ Ngaku pa karela, E ya wari mikasala i Aring Solomon ning Israel king kapamilatan na ning pamakiasawa na karing babaing anti karete? Ala metung man karing dakal a bansa a mika aring kalupa na; kaluguran ne ning Dios at gewa neng ari king mabilug a Israel. Makanyan man, mikasala ya i Aring Solomon uli da ring babaing dayuan.

²⁷ Ngeni, pakiapusan mi wari ing daraptan yung e ustu at pagtaksilan ing kekatamung Dios king kapamilatan na ning pamakiasawa karing babaing dayuan?

²⁸ Mekapakiasawa ya ing metung karing anak nang lalaking Jeoiada at apu nang Eliasib a Pekapun ding Pari, king anak nang babaing Sanbalat a tau Bet Horon. Uli na niti, tinabi ke Jerusalem.

²⁹ E mu la sana kakalinguan, O Dios ko, deting taung linapastangan king katungkulan da bilang pari at ing kasunduan a tinatag mu karing pari at Levita.

³⁰ Inya leko ku karela ing nanumang bage dayuan at ginawa kung tuntunan a tukian da at gampanan ding pari ampon Levita.

³¹ Binie ku ing dutung a panangab karing ain-a-durulukan king mitakdang oras, at ing kaayusan para karing ain tungkul karing mumunang pupul a binutil at prutas. E mu sana kakalinguan, O Dios ko, at kilalanan mu sa iting depat kung mayap.