1

¹ Kanitang mumuna nang banua ning pamag-ari nang Ciro ning Persia, peintulut ning Ginu ing matupad ing sinabi na king kapamilatan na ning propeta Jeremias. Tigkil ne kapanamdaman ning Ginu i Aring Ciro ban ipabalu na king mabilug nang kayarian at isulat na ing anti kaniti:

² Aku i Ciro, ing Ari ning Persia, pabalu ku: Ing Ginu, ing Dios ning banua, ya ing minie kanaku karing sablang kayarian keti king yatu at inutus na kanaku ing mitalakad kung Templo karin king Jerusalem ning Juda.

³ Inya paintulutan keng munta karin Jerusalem ing ninuman kekayung kabilang karing memalen na. Patnubayan na kayu sana ning Ginung kekayung Dios. Italakad yeng pasibayu ing Templo ning Ginu, ing Dios ning Israel, ing Dios a atyu king Jerusalem.

⁴ Nung mangailangan yang saup king pamagbalik na Jerusalem ing ninuman karing memalen nang miyugse nu mang lugal, sukat deng saupan ding kasiping nang bale king kapamilatan na ning pamamie rang pilak at gintu ampon aliwa pang kailangan na antimo ding sese animal, subali pa king kusang lub a ain para king Templo ning Dios karin Jerusalem.

⁵ At migsadia la ding pamuntuk da ring pamilya da ring tribu nang Juda at Benjamin, ding pari at ding Levita, at ing metung at metung a tigkilan na pusu ning Dios ban mibalik Jerusalem at italakad deng pasibayu ing Templo ning Ginu karin Jerusalem.

⁶ Sinaup la ding kasiping dang bale; dininan da lang kasangkapan a pilak, gintu, kagamitan, sese animal, at mangamal a kasangkapan, subali pa karing kusang lub a ain para king Templo.

⁷ Sibli na la karelang Aring Ciro ding kasangkapan na ning Templo a kinua nang Nebucadenesar king Templo ning Jerusalem a dela na king templo ning kikilalanan nang dios.

⁸ Binie na la kang Mitredat, ing talaingat bandi, at inintriga na no man niti kang Sesbazar, ing gobernador ning Juda.

⁹ Oyni ing bilang da ring kasangkapan: atlung pulung palangganang gintu, libung palangganang pilak, aduang pulu at siam a insensaryu,

¹⁰ atlung pulung silyo a gintu, apat a ralan at apulung miyayaliwang pilak a datukanan, at libung miyayaliwang kasangkapan.

¹¹ Limang libu at apat a ralan ing heganaganang kasangkapan a pilak at gintu. Dela na la ngan Sesbazar deti inyang ya ampon ding aliwa pang Judiong miyugse king Babilonia mibalik la Jerusalem.

2

¹ Likuan de ring dakal karing Judiong mebihag ing probinsia ning Babilonia ban mibalik karing sarasarili dang tuknangan king Jerusalem at Juda. Deting Judiong bihag ila ding mitagan karing mebihag a dela nang Aring Nebucadenesar king Babilonia.

² Ngeni mumuli na la king pamanimuna nang Zerubabel, Jesua, Nehemias, Seraia, Reelaia, Mordecai, Bilsan, Mispar, Bigvai, Rehum, at Baana. fig,,,,,Likuan de ring dakal karing Judiong mebihag...,(2:1)fig* Iti ya ing listahan da ring lalaking memalen na ning Israel a minuli:

³ ding pamilya nang Paros, adua lang libu at dinalan pitung pulu't adua;

⁴ ding pamilya nang Sefatia, atlu lang dalan at pitung pulu't adua;

⁵ ding pamilya nang Ara, pitu lang dalan at pitung pulu't lima;

⁶ ding pamilya nang Pahat Moab a alang aliwa nune di Jesua at Joab, adua lang libu walung dalan at labing adua;

⁷ ding pamilya nang Elam, libu aduang dalan at limang pulu't apat la;

⁸ ding pamilya nang Zatu, siam a ralan at apat apulu't lima la;

⁹ ding pamilya nang Zacai, pitu lang dalan at anam apulu;

¹⁰ ding pamilya nang Bani, anam a ralan at apat apulu't adua la;

¹¹ ding pamilya nang Bebai, anam a ralan at aduang pulu't atlu la;

¹² ding pamilya nang Azgad, libu aduang dalan at aduang pulu't adua la;

¹³ ding pamilya nang Adonikam, anam a ralan at anam apulu't anam la;

¹⁴ ding pamilya nang Bigvai, adua lang libu at limang pulu't anam;

¹⁵ ding pamilya nang Adin, apat a ralan at limang pulu't apat la;

¹⁶ ding pamilya nang Ater a mayayaus munamang Hezekia, siam lang pulu't walu;

¹⁷ ding pamilya nang Bezai, atlu lang dalan at aduang pulu't atlu;

¹⁸ ding pamilya nang Jora, dinalan at labing adua la;

¹⁹ ding pamilya nang Hasum, adua lang dalan at aduang pulu't atlu;

²⁰ ding pamilya nang Gibar, siam lang pulu't lima;

²¹ ding lalaki na ning Betlehem, dinalan aduang pulu't atlu la;

²² ding lalaki na ning Netofa, lima lang pulu't anam;

²³ ding lalaki na ning Anatot, dinalan at aduang pulu't walu la;

²⁴ ding lalaki na ning Azmavet, apat apulu't adua la;

²⁵ ding lalaki na ning Kiriat Jearim, Kefira, at Beerot, pitu lang dalan apat apulu't atlu;

²⁶ ding lalaki na ning Rama at Geba, anam a ralan at aduang pulu't metung la;

²⁷ ding lalaki na ning Mikmas, dinalan at aduang pulu't adua la;

²⁸ ding lalaki na ning Betel at Ai, adua lang dalan at aduang pulu't atlu;

²⁹ ding lalaki na ning Nebo, lima lang pulu't adua;

³⁰ ding lalaki na ning Magbis, dinalan limang pulu't anam la;

³¹ ding aliwa pang lalaki na ning Elam, libu aduang dalan at limang pulu't apat la;

³² ding lalaki na ning Harim, atlu lang dalan at aduang pulu;

³³ ding lalaki na ning Lod, Hadid, at Ono, pitu lang dalan at aduang pulu't lima;

³⁴ ding lalaki na ning Jerico, atlu lang dalan at apat apulu't lima;

³⁵ ding lalaki na ning Senaa, atlu lang libu at anam a ralan atlung pulu.

³⁶ Ding paring Levita: karing pamilya nang Jedaia a lahi nang Jesua, siam a ralan at pitung pulu't atlu la;

³⁷ karing pamilya nang Immer, libu at limang pulu't adua la;

³⁸ karing pamilya nang Pasur, libu aduang dalan at apat apulu't pitu la;

³⁹ karing pamilya nang Harim, libu at labing pitu la.

⁴⁰ Ding Levita: karing pamilya da ri Jesua at Kadmiel, ding lahi nang Hodavia, pitu lang pulu't apat;

⁴¹ karing talapagkanta king Templo a lahi nang Asaf, dinalan at aduang pulu't walu la;

⁴² karing guardia karing pasbul dalan a lahi da ri Sallum, Ater, Talmon, Akub, Hatita, at Sobai, dinalan at atlung pulu't siam la.

⁴³ Ding kasaup king Templo ila deti: ding pamilya da ri Ziha, Hasufa, Tabaot,

⁴⁴ Keros, Siaha, Padon,

⁴⁵ Lebana, Hagaba, Akub,

⁴⁶ Hagab, Samlai, Hanan,

⁴⁷ Gidel, Gahar, Reaia,

⁴⁸ Rezin, Nekoda, Gazam,

⁴⁹ Uza, Pasea, Besai,

⁵⁰ Asna, Meunim, Nefisim,

⁵¹ Bakbuk, Hakufa, Harhur,

⁵² Bazlut, Mehida, Harsa,

⁵³ Barkos, Sisera, Tema,

⁵⁴ Nezia, at Hatifa.

⁵⁵ Ding pamilya at anak da ring kasaup nang Solomon ila deti: Sotai, Hasoferet, Peruda,

⁵⁶ Jaala, Darkon, Gidel,

⁵⁷ Sefatia, Hatil, Pokeret Hazebaim, at Ami.

⁵⁸ Heganagana, atlu lang dalan siam apulu't adua ring mibalik a pamilya at anak da ring kasaup na ning Templo at ding kasaup nang Solomon.

⁵⁹ Atin munamang aliwang menibatan Tel Mela, Tel Arsa, Kerub, Adan, at Immer a mibalik karin Jerusalem at Juda, oneng e ra la amasalese ding makatua da o nung Israelita la o ali la. Ila deti:

⁶⁰ ding pamilya da ri Delaia, Tobia, at Nekoda. Heganagana, anam lang dalan at limang pulu't adua.

⁶¹ Ding pamilya da ring pari: Habaia, Hakoz, at Barzilai. I Barzilai ya ing mekapakiasawa king metung karing anak nang Barzilai a tau Gilead at tikian ne lagyu ing katuangan nang lalaki.

⁶² Alalu ding lagyu ra king listahan da ring pari, inya mituring lang e malinis, at e la mibilang ibat king pamilyang pari.

⁶³ Sinabi na karela ning gobernador king e la malyaring mangan king pamangan a miyain king Dios anggang e na asangguni ning pari iting bage king kapamilatan na ning Urim at Tumim.

⁶⁴ Heganaganang bilang da ring miyugse a mibalik: apat lang pulu't aduang libu at atlung dalan anam apulu.

⁶⁵ E la kabilang ding lalaki ampon babaing ipus a pitung libu at atlung dalan atlung pulu't pitu, at ding aduang dalan a lalaki ampon babaing talapagkanta.

⁶⁶ Pitu lang dalan at atlung pulu't anam ding kabayu, adua lang dalan at apat apulu't lima ding mula,

⁶⁷ apat lang dalan at atlung pulu't lima ring kamelyu, at anam lang libu at pitung dalan aduang pulu ding asno.

⁶⁸ Inyang miras na la king Jerusalem, ding mapilan karing pamuntuk da ring pamilya miyain lang kusang lub a ain para king Templo ban mitalakad yang pasibayu iti king sadia nang lugal.

⁶⁹ Binie da itang sablang agyu ra para kaniting obra. Mekatipun lang libu at atlung pulung librang gintu, limang libu at pitung dalan apat apulung librang pilak, at dinalan a imalan-pari.

⁷⁰ King balen at paligid na ning Jerusalem la menuknangan ding pari, ding Levita, at ding mapilan karing taung mibalik. Karing makalapit a balen naman karin la menuknangan ding talapagkanta, ding guardia karing pasbul dalan, at ding magobra king Templo. Menuknangan la ding keraklan karing balen nung nu la menuknangan ding makatua da.

3

¹ Inyang miras ing kapitung bulan, panatag na la ngan manuknangan ding memalen na ning Israel karing sarasarili dang balen. Kaybat, mitipun la Jerusalem.

² Kanita i Jesua, ing anak nang Jozadak, at ding kayabe nang pari ampon i Zerubabel, ing anak nang Sealtiel, at ding kamaganak na mitipun la ban larinan ya ing altar ning Dios at karin da dulukan ing yayain dang ain, agpang king makasulat king Kautusan nang Moises, ing tau ning Dios.

³ Uli na ning takut da karing taung manuknangan karin, telakad de ing altar ketang sadia nang lugal. Kaybat na nita, aldo't bengi lang duruluk ain para king Ginu.

⁴ Pigselebran dia naman ing Piesta da ring Dalungdung at miyain lang ain-a-durulukan, agpang king aduan ning kautusan.

⁵ Karagdagan kaniti, inain da la ring aldo-aldo ain at kusang lub a ain para king Ginu. Gimpanan da la ngan ding piestang tikda ning Ginu antimo neng Piesta ning Bayung Bulan.

⁶ Agyang e pa mipagumpisan ing pamaglarin king Templo ning Ginu, miyain na lang ain-a-durulukan king mumunang aldo na ning kapitung bulan.

⁷ Minie lang salapi para karing kanteru at karing kalpinteru. Minie la naman pamangan, inuman ampon laru para karing tau Sidon at Tiro ban ipangutud da lang dutung a sedro karin king Lebanon at kaybat ilipat da la king dagat papunta Jopa. Paintulut na iti ning Aring Ciro ning Persia.

⁸ Inya king kadua nang bulan ning kadua nang banua ning pamagbalik da king Templo king Jerusalem lalam dang pamanimuna di Jesua a anak nang Jozadak at Zerubabel a anak nang Sealtiel ampon ding kabalen da, ding pari, at ding Levita pegumpisan da ing pangatalakad nang pasibayu ning Templo. Tilduan da la ring Levitang idad aduang pulung banua at patas ban panibalan da ing obra. Mekiabe la ngan king obra ding sablang miyugse at mibalik king Jerusalem.

⁹ I Jesua, ding anak nang lalaki, at ding kamaganak na ampon i Kadmiel at ding anak nang lalaki (ding pamilya nang Hodavia) miyabe-abe lang mig-asikasu king pangatalakad nang pasibayu ning Templo. Sinaup la karela ding Levitang ibat king pamilya nang Henadad.

¹⁰ Inyang agawa da ne ring manalakad ing pundasyun na ning Templo, sinulud da ring pari ing imalan-pari at migpuestu la ketang lugal a sukat dang paglugalan at tiniupan da la ring trumpeta. Ding Levita namang pamilya nang Asaf titigtigan da la ring karelang pompiang ban purian ya ing Ginu, agpang king panabilin nang Aring David.

¹¹ Ngarang mipakibatan magkanta ding tau bilang kapurian at kapasalamatan king Ginu: Ing Ginu mayap ya, ing lugud nang e kukupas king Israel manatili kapilan man. Ing metung at metung kukulisak yang anggang binit na, pupuri ya king Ginu, uling megawa ne ing pundasyun na ning Bale ning Ginu.

¹² Ding dakal karing pari, Levita, buntuk ding pamilya, at makatua a menakit ketang minunang Bale menangis lang masikan inyang akit deng tatalakad da ing pundasyun. Ding keraklan naman kukulisak lang anggang binit da king tula ra.

¹³ E na balu ning ninuman nung isanu ing inge ning tula at ning kiak, uling misamut ing kulisakan. At iti meramdam angga karing marayung lugal. fig,,,, ,...megawa ne ing pundasyun na ning Bale ning Ginu.,(3:11)fig*

4

¹ Abalitan da ring kalaban ding memalen na ning Juda at Benjamin king ding miyugse a mekapagbalik na lalarinan de ing Templo ning Ginu, ing Dios ning Israel.

² Pintalan de i Zerubabel at ding pamuntuk da ring pamilya at ngara karela, Saupan da kayung mitalakad king Templo uling sasamban mi ya naman ing Dios a kekayung sasamban at miyayain ain manibat na inyang dela na kami keti ning Aring Esarhadon ning Asiria.

³ Ngarang mekibat di Zerubabel, Jesua, at ding aliwang pamuntuk da ring pamilya ning Israel, Ala kayung pangataid king Templong tatalakad mi para king kekaming Dios. Agyu mi yang italakad iting Templo para king Ginu, ing Dios ning Israel, agpang king inutus na kekami ning Aring Ciro ning Persia.

⁴ Kanita ginawa lang paralan ding taung manuknangan karin ban siran la lub at pamatakutan ding Judio ban e re isundung pagobran ing Templo.

⁵ Sihulan da la ring pamuntuk na ning kapamahalan ning Persia ban kimut laban karela. Megumpisa iti king panaun nang Aring Ciro angga na inyang ari ne i Dario.

⁶ King pamagumpisa na ning kapamahalan nang Aring Asueru, mindalum la ring memalen ning lugal a ita laban karing tau Juda at Jerusalem.

⁷ Makanyan munaman ing depat da inyang panaun nang Aring Artaxerxes. Ding mindalum karela ila di Bislam, Mitredat, Tabel, at ding aliwa da pang kayabe. Sinulat de ing dalum da king salitang Aramaico, oneng linikas de iting sulat ban aintindian ne ning mamasa.

⁸ Kanita i Rehum, ing gobernador, at i Simsai, ing kalihim na ning probinsia, sinulat lang laban king Jerusalem at peparala de iting sulat king Aring Artaxerxes. Ngana ning sulat:

⁹ Ibat ya iting sulat kang Rehum, ing gobernador, at kang Simsai, ing kalihim, karing kayabe ra, karing ukum, at karing aliwa pang pamuntuk a tune tau Erec, Babilonia, at Susa ning bansang Elam,

¹⁰ kayabe da ring aliwa pang tau a linipat at pepanuknanganan na ning marangal at mayupayang Osnapar karing siudad ning Samaria at karing miyayaliwa na pang sakup ning probinsia dane Albugan ning Ilug ning Eufrates.

¹¹ Iti ya ing sasabian na ning sulat: Kang Aring Artaxerxes Ibat ya iting sulat karing talasuyu yu king dane Albugan ning Ilug ning Eufrates.

¹² Buri mi pung abalu yu, Kagalang-galang a Ari, king ding Judiong dinatang keni kekami a ibat karing miyayaliwa yung sakup a kayarian menuknangan la Jerusalem at tatalakad deng pasibayu iting e mayap at rebelding siudad. Pegumpisan da na la pung telakad ding pader ning siudad at e magluat mayari na la.

¹³ Kagalang-galang a Ari, buri mi pung ausan ing pansin yu, uling nung pasibayu ya pung mitalakad iting siudad at ding pader na, tuknang na la pung mamayad buis ding tau at mina ya panakitan ing kayarian yu.

¹⁴ Mangabiayan kami uli na ning pangataid mi kekayu, inya karapatdapat ing pagmalasakitan da kayu uling e mi buring akit ing malapastangan kayu. Iti pu ing sangkan ning pamaniulat mi.

¹⁵ Uli na pu nian, mumungkahi mi pu ing pasaliksik yu la ding kasulatan a sinikap da ring makatua yu at abalu yu king manibat na kanita pang minunang panaun rebeldi ya iting siudad at sakit deng buntuk ding ari at ding gobernador. Tutu la pung masakit pamahalan ding memalen na. Inya naman melasak ya iting siudad.

¹⁶ Buri mi pung abalu yu, Kagalang-galang a Ari, nung malarin ya iting siudad at antimu rin ding pader na, milako kayu upaya keting probinsia dane Albugan ning Ilug ning Eufrates.

¹⁷ Ngana ning pakibat a peparala na ning Ari: Kang Rehum, ing gobernador, kang Simsai, ing kalihim, at karing kayabe rang manuknangan king Samaria at king aliwa nang lugal dane Albugan ning probinsia ning Eufrates: Kukomustan da kayu ngan.

¹⁸ Malino yang binasa ra kanaku ing sulat a peparala yu kanaku.

¹⁹ Inya minie kung utus ban siasatan iting bage, at meyakit pin king manibat na king kapupurmeruan rebeldi ya ing siudad ning Jerusalem, at sinalangsang ya karing meging ari na.

²⁰ Abalu ku munaman king mika aring mayupaya a sinakup keting siudad at mig-ari king mabilug a probinsia dane Albugan ning Ilug ning Eufrates. At memayad lang miyayaliwang buis ding memalen karela.

²¹ Inya gawa kayung kautusan ban mituknang ing pangalarin na ning siudad ning Jerusalem kabang ala ku pang aliwang kautusan.

²² Kimut na kayu ngeni mu rin bayu la makagawang nanumang kasiran king kayarian.

²³ Inyang abasa re iting sulat ning Aring Artaxerxes kang Rehum, Simsai at ding kayabe ra memalagua lang minta Jerusalem at pinuersa da lang tuknang magobra ding Judio king pamaglarin king siudad.

²⁴ Mituknang ing pamaglarin king Templo ning Ginu karin king Jerusalem. Alang bitasang megobra angga na king kadua nang banuang panga-aring Dario ning Persia.

5

¹ King panaun a ita, ating aduang propeta; ila di Hageo at Zacarias a anak nang Iddo. King lagyu na ning Dios ning Israel sinabi da ing kaburian ning Dios karing Judio a manuknangan king Juda at Jerusalem.

² Inya i Zerubabel a anak nang Sealtiel, at i Jesua a anak nang Jozadak, penimunan dang pasibayu ing pangatalakad na ning Templo a atyu Jerusalem. Kayabe da la at kasaup deting aduang propeta na ning Dios.

³ Kanita mu rin minta ya Jerusalem i Tatenai, ing gobernador ning probinsia dane Albugan ning Ilug ning Eufrates, i Setar Bozenai at ding kayabe ra at ngarang kinutang, Ninu ing minie paintulut kekayu ban italakad yang pasibayu at arian ing Templong iti?

⁴ Pekiduang da la naman a lagyu ding sablang lalaking sasaup king pangatalakad na ning Templo.

⁵ Oneng makalawe ya ing Dios karing manimuna da ring Judio, inya ding tau Persiang pamuntuk e ra la pepatuknangan magobra anggang alang utus a manibat king Aring Dario.

⁶ Iti ya ing ulat a peparala da ri gobernador Tetanai, Setar Bozenai, at ding kayabe ra king ari:

⁷ Kang Aring Dario, dasan na kayu pu sana niting sulat king mitmung kapayapan.

⁸ Buri mi pung abalu yu, Kagalang-galang a Ari, king minta kami king probinsia na ning Juda, king Templo ning mayupayang Dios. Tatalakad da ne pu ngening salukuyan. Mangaragul lang tinabas a batu ding gagamitan da at tabla lang mangakapal ding gagamitan da para king dingding na. E la tutuknang magobra ding tau, inya e magluat mayari ya.

⁹ Kitang mi pu karing pamuntuk da ring tau karin nung ninu ing minie paintulut ban pagobran ya at arian ing Templo.

¹⁰ Pekiduang mi la naman karela ding lagyu da ring manimuna karela ban apabalu mi la kekayu.

¹¹ Oneng ing pakibat da pu anti ya kaniti: Talasuyu na kami ning Dios ning banua at yatu, at tatalakad mi yang pasibayu ing Templo na king sadia nang lugal nung nu ne pepatalakad karing dakal nang banuang milabas ning mayupayang ari ning Israel.

¹² Oneng pepamua re ding makatua mi ing Dios ning Banua, inya peintulut na ing mabihag la kang Aring Nebucadenesar ning Babilonia, ing Caldeo a linasak keting Templo, at dela na la ding memalen karin king Babilonia.

¹³ Makanyan man, king mumuna nang banuang pamaniakup Aring Ciro ning Persia, minie yang metung a utus ban iting Templo ning Dios mitalakad yang pasibayu.

¹⁴ At ding sablang gintu at pilak a kasangkapan ning Templo ning Jerusalem a kinua nang Nebucadenesar at dela na king templo na Babilonia sibli na lang Aring Ciro at inintriga king lalaking milagyuan Sesbazar, ing tilduan nang gobernador ning Juda.

¹⁵ Sinabi na ning ari king kuanan na la ding kasangkapan at isubli king Templo karin Jerusalem, at italakad yang pasibayu ing Templo ketang sadia nang lugal.

¹⁶ Inya minta ya i Sesbazar king Jerusalem at pepagawa na la ding pundasyun na ning Templo ning Dios, at manibat na kanita tatalakad da ne; angga man ngeni e pa meyari.

¹⁷ Inya Kagalang-galang a Ari, nung malyari pu sana, papaintun ye ing dokumento king pisisinupan ning kayarian ken king Babilonia ban abalu yu nung tutu o ali ing minie ya ping utus ing Aring Ciro tungkul king pangatalakad nang pasibayu ning Templo ning Dios karin Jerusalem. Kaybat, pabaluan yu kami pu king nanumang pasya yu tungkul kaniting pisasabian.

6

¹ Inya inutus nang Aring Dario ing saliksikan de ing dokumento king pisisinupan ning kayarian ning Babilonia.

² Karin king siudad ning Ecbatana ning probinsia ning Media karin ya meyakit ing dokumento. Mababasa ing anti kaniti:

³ King mumunang banua ning pamag-ari nang Ciro inutus na king italakad yang pasibayu ing Templo karin king Jerusalem nung nu la miyayain ding ain-a-durulukan. Kailangan ing siam yang pulung talampakan king katas at siam yang pulung talampakan munaman king lualas.

⁴ Atlu lang hilerang mangaragul a batu ding pader na at metung a hilerang dutung. Bayaran na ning palasyu ing sablang magastus.

⁵ Isubli la naman king sadia rang lugal king Templo karin Jerusalem ding gintu at pilak a kasangkapan a kinua nang Nebucadenesar at inuli na Babilonia.

⁶ Kaybat na nita, peparala neng Aring Dario ing pakibat na. Ngana: Kang Tatenai, ing gobernador ning probinsia dane Albugan ning Ilug ning Eufrates, at Setar Bozenai ampon ding kayabe yung pamuntuk. Lumaut kayu king Templo

⁷ at e yu sasabatan ing pangatalakad nang pasibayu ning Templo. Paburen ye ing gobernador na ning Juda at ding pamuntuk da ring Judio ing italakad deng pasibayu king sadia nang lugal.

⁸ Subali pa kaniti, utusan da kayung saupan yu la king obra at bayaran ing nanumang gastus da. Pamayad yu la ding buis a metipun king probinsia dane Albugan ning Ilug ning Eufrates ban e mayantala ing pangatalakad nang pasibayu ning Templo.

⁹ E yu kakalinguan babie aldo-aldo king alang kapilisian karing pari ing nanumang kailangan da antimo ding biserung toro, lalaking tupa, trigu, asin, alak o larung olibo para king ain dang durulukan king Dios ning Banua.

¹⁰ Saupan yu la ban makayain lang ain-sakripisyung katanggap-tanggap king Dios ning Banua at ipakipanalangin da ku at ing pamilya ku.

¹¹ Iyutus ku naman king ing ninuman ing e tupad kaniting utus ku, pakua ke ing metung karing trosu ning bale na at karin ya igapus makatalakad. Kaybat, gawan yang ugsianan basura ing bale na.

¹² Mananu na sanang ing Dios a memili king Jerusalem a maging lugal na nung nukarin ya misamban ibagsak ne ing ninumang ari o bansa a labag kaniting kautusan at mangangas lasak king Templo karin. Aku, i Dario, ing mumutus. Sukat matupad ganap ing utus ku.

¹³ Tiparan nang Tatenai, ing gobernador, at Setar Bozenai ampon ding kayabe ra ing sablang inutus na ning ari.

¹⁴ Inya sindu da ring Judio at ding pamuntuk da ing pangatalakad ning Templo at mebilis ing obra, antimo ing inula da ri Hageo at Zacarias a anak nang Iddo. Ayari da ing obra agpang king inutus na ning Dios ning Israel at king utus a peparala ding Aring Ciro, Dario, at i Artaxerxes ning Persia.

¹⁵ Meyari ya ing Templo king kaduang pulu't atlung aldo ning bulan na ning Adar ning kanam a banua nang pamag-aring Dario.

¹⁶ Kaybat, telaga re king mitmung tula ding memalen na ning Israel, ding pari, at ding Levita, at ding sablang mibalik a miyugse.

¹⁷ Para king pangatalaga na ning Templo ning Dios miyain lang dinalan a lalaking baka, aduang dalan a lalaking tupa, apat a ralan a biserung tupa, at labing aduang lalaking kambing para ain-a-kapatawaran-king-kasalanan da ring labing aduang tribu na ning Israel.

¹⁸ Inayus da lang paka-grupu ding pari at ding Levita tungkul king obrang gampanan da king Templo, agpang king makasulat king Kautusan nang Moises.

¹⁹ King kalabing apat nang aldo ning mumunang bulan pigselebran de ring mibalik a Judiong miyugse ing Pamaglagpus.

²⁰ Migpakalinis lang miyabe-abe ding pari at ding Levita; malinis la ngan agpang king aduan na ning Kautusan. Pete da la ring animal para king ain ning Pamaglagpus para karing sablang memalen a mibalik, karing pari, at para karing sarili ra.

²¹ Miyabe-abe lang mengan ding memalen na ning Israel a mibalik ibat king pangayugse, at ing metung at metung a mekiabe karelang meko na karing paganu at ngeni dinatang ban samba king Ginung Dios ning Israel.

²² At kaybat kilub ding pitung aldo pigselebran deng mitmung tula ing Piesta ning Tinape Alang Lebadura. Tutu lang masaya uling ing Ginu gewa neng maganaka karela ing ari ning Asiria ban saupan na la king pangatalakad nang pasibayu ning Templo ning Dios, ing Dios ning Israel.

7

¹ Kaybat na ning mapilan a panaun, inyang i Artaxerxes ya ing ari ning Persia, ating metung a lalaking milagyuan Ezra; anak neng Seraia a anak nang Azaria. I Azaria anak neng Hilkia at

² i Hilkia anak neng Sallum. I Sallum naman anak neng Zadok a anak nang Ahitub.

³ I Ahitub naman anak neng Amaria a anak nang Azaria. I Azaria anak neng Meraiot

⁴ a anak nang Zerahia a anak nang Uzzi a anak nang Buki.

⁵ I Buki naman anak neng Abisua a anak nang Fineas. I Fineas anak neng Eleazar a anak nang Aaron, ing pekapun da ring pari.

⁶ Dinatang ya iting i Ezra ibat Babilonia. Talasulat ya at tune biasa king Kautusan nang Moises a binie na ning Ginu, ing Dios ning Israel. Babie na ning ari ing nanumang aduan nang Ezra uling patnubayan ne ning Ginung Dios na.

⁷ Dinatang ya ibat Babilonia i Ezra kanitang kapitung banua nang panga-aring Artaxerxes. Kayabe na lang dinatang ding mapilan a Israelita, ding pari, at Levita, at ding talapagkanta ning Templo, at ding guardia karing pasbul dalan ning Templo, at ding kasaup king Templo.

⁸ Meko la Babilonia kanitang mumunang aldo ning mumunang bulan,

⁹ at king saup ning Dios miras la Jerusalem king mumuna nang aldo ning kalimang bulan, king kapitung banua nang panga-aring Artaxerxes.

¹⁰ Telaga nang Ezra ing mabilug nang pangatau king pamagaral king Kautusan ning Ginu, king tuparan ya iti at ituru karing Israelita.

¹¹ Iti ya ing kopia king sulat a binie nang Aring Artaxerxes kang Ezra a pari, ing talasulat, at ing biasa karing Kautusan ning Dios a binie na king Israel:

¹² Ibat ya iting sulat king Aring Artaxerxes, ing ari da ring ari, at miparala ya kang Ezra, ing pari, ing talasulat at biasa king Kautusan ning Dios ning Banua.

¹³ Iyutus ku king malyari yang tuki keka king Jerusalem ing ninumang bisa karing Israelita o pari o Levita ning kakung kayarian.

¹⁴ Aku at ding pitu kung tagapayu tutubud da ka ban lawan ing kabilian na ning Juda at ning Jerusalem agpang king Kautusan ning Dios mu a mipaniwala keka.

¹⁵ Idala mu la ding pilak at gintu a babie mi king Dios ning Israel king Templo nang tuknangan a atyu Jerusalem.

¹⁶ Idala mu munaman karin ing sablang pilak at gintu a akit mu king mabilug nang probinsia ning Babilonia, at ing kusang lub a ain da ring Israelita at pari a matula rang babie para king Templo ning karelang Dios karin king Jerusalem.

¹⁷ King mitmung kaingatan gamitan mu la deting salapi king pamanialing biserung toro, lalaking tupa, biserung tupa, binutil ampon alak at kaybat iyain mu la king altar na ning Templo ning kekang Dios karin Jerusalem.

¹⁸ Malyari mu lang gamitan ding mitagan a pilak at gintu para king nanumang isipan mung mayap, at ding kabalen mu, agpang king kaburian ning kekayung Dios.

¹⁹ Idala mu la naman king Templo ning kekayung Dios ding kasangkapan a miyabie kekayu para gamitan karing kasuyuan king Templo.

²⁰ At nung atin pang aliwang kailangan ning Templo ning Dios, malyari mung kuanan king talaingat-bandi na ning ari.

²¹ Karing talaingat-bandi na ning probinsia dane Albugan ning Ilug ning Eufrates, iyutus ku king ibie ra king malaguang panaun ing sablang aduan nang Ezra, ing pari, ing talasulat, at ing biasa king Kautusan ning Dios ning Banua.

²² Dinan yeng anggang pitung libu at limang dalan a librang pilak, limang dalan a takal a trigu, limang dalan at limang pulung galun a alak, limang dalan at limang pulung galun a larung olibo, at asin anggang bisa ya.

²³ Pamintuan yu king mitmung kataimtiman ing sablang iyutus na ning Dios ning Banua ban e ya mimua kanaku at karing anak kung lalaki.

²⁴ Buri ku namang ipabalu kekayu king bawal ing singil nanumang buis karing pari, karing Levita, karing talapagkanta, karing guardia karing pasbul dalan, at karing kasaup king Templo o king ninumang magobra king Templo ning Dios.

²⁵ At ika, Ezra, anti na ning dininan na kang kabiasnan ning kekang Dios, tuldu kang ukum a mamahala at matul karing sablang taung manuknangan king probinsia dane Albugan ning Ilug ning Eufrates. Sukat lang biasa deting ukum a mapili king Kautusan ning Dios, at ituru mu la detang e biasa.

²⁶ Ing ninumang e mamintu king utus ning kekang Dios at king utus ning ari agad ipatupad ing parusa, maging kamatayan o kaya iyugse ya king aliwang lugal o kuanan a pibandian o isukul.

²⁷ Nganang mekibat Ezra, Purian ya ing Ginu, ing Dios da ring makatua tamu, uling gewa neng maganaka ing ari ban gawan neng masanting ing Templo ning Ginu karin king Jerusalem.

²⁸ Sinaupan na ku ning Ginung kakung Dios ban maging malapit ya lub kanaku ing ari, at ding tagapayu na ampon ding aliwa na pang pamuntuk. Mesikan ku lub king uli na at ikua ku lang atipun ampon apanimunan mibalik ding pamuntuk da ring pamilya nang Israel. fig,,,,,...ikua ku lang atipun ampon apanimunan mibalik...,(7:28)fig*

8

¹ Iti ya ing listahan ding pamuntuk da ring pamilya a miyugse king Babilonia at mibalik Jerusalem kayabe nang Ezra inyang i Artaxerxes ya ing ari:

² i Gersom, king pamilya nang Fineas; i Daniel, king pamilya nang Itamar; i Hatus a anak nang Sekania, king pamilya nang David;

³ i Zacarias, king pamilya nang Paros at ding dinalan limang pulung lalaking kayabe na;

⁴ i Elieoenai a anak nang Zerahia, king pamilya nang Pahat Moab, at ding aduang dalan a lalaking kayabe na;

⁵ i Secania a anak nang Jahaziel, king pamilya nang Zatu, at ding atlung dalan a lalaking kayabe na;

⁶ i Ebed a anak nang Jonatan, king pamilya nang Adin, at ding limang pulung lalaking kayabe na;

⁷ i Jesaia a anak nang Atalia, king pamilya nang Elam, at ding pitung pulung lalaking kayabe na;

⁸ i Zebadia a anak nang Mikael, king pamilya nang Sefatia, at ding walung pulung lalaking kayabe na;

⁹ i Obadias a anak nang Jehiel, king pamilya nang Joab, at ding aduang dalan at labing walung lalaking kayabe na;

¹⁰ i Selomit a anak nang Josifia, king pamilya nang Bani, at ding dinalan at anam apulung lalaking kayabe na;

¹¹ i Zacarias a anak nang Bebai, king pamilya nang Bebai, at ding aduang pulu't walung lalaking kayabe na;

¹² i Joanan a anak nang Hakatan, king pamilya nang Azgad, at ding dinalan at apulung lalaking kayabe na;

¹³ i Elifelet, Jeuel, at Semaia, king pamilya nang Adonikam, at ding anam apulung lalaking kayabe ra a tauling mekapagbalik;

¹⁴ i Utai at i Zacur, king pamilya nang Bigvai, at ding pitung pulung lalaking kayabe ra.

¹⁵ Tinipun ku lang makapamisan lele ning ilug a mamagus papunta king balen ning Ahava at migkampu kami karin kilub ding atlung aldo. Kabang pagumasdan ku la ding tau at ding pari, apansinan ku king ala metung mang Levita karela.

¹⁶ Inya pepayaus ku la di Eliezer, Ariel, Semaia, Elnatan, Jarib, Elnatan, Natan, Zacarias, at i Mesullam. Pepayaus ku la naman di Joiarib at Elnatan, ding lalaking talaturu.

¹⁷ Tiburan ku la ngan kang Iddo, ing pamuntuk na ning lugal a ausan dang Casifia, ban pakisabi ra kang Iddo at karing kasaup nang magobra king parala yang taung akayabe ming sumuyu king Templo ning kekaming Dios.

¹⁸ At king saup ning malugud a Dios, peparala re kekami i Serebia; tau yang mayagyu at Levita yang ibat king pamilya nang Mahli. Kayabe na lang dinatang ding labing walung anak nang lalaki at ding kapatad nang lalaki.

¹⁹ Peparala ria munaman i Hasabia at i Jesaia na ning pamilya nang Merari a kayabe da ring aduang pulung kamaganak da.

²⁰ E la kayabe kareti ding dinatang a aduang dalan at aduang pulung talapagobra ning Templo, ding lahi da ring taung kelilua nang Aring David at ding pamuntuk na ban sumaup karing Levita. Makalista la ngan a lagyu.

²¹ Karin king lele ning Ilug ning Ahava inutus ku ing mag-ayunu ke ngan at magpakumbaba arapan na ning kekaming Dios, at aduan ing panimunan na kami king pamaglakbe at pagdipensa na kami ampon ding anak mi at ing sablang pibandian mi.

²² Marine na kung lumapit king ari ban maniawad sundalus a pakakabayu ban lumaban karing kalaban kabang maglakbe kami, uling sinabi ku king bendisyunan na la ning Dios detang manalig, oneng mimua ya karetang tatanggi king Dios.

²³ Inya mig-ayunu ke ngan at menalangin kami king Dios king ingatan na ke sana. Pekibatan na ing kekaming panalangin.

²⁴ Memili kung labing aduang pari karing pikabaluan karela; ila di Serebia, Hasabia, at ding apulu karing kayabe ra.

²⁵ Tinimbang ku king akakit da ing pilak at gintu at ding kasangkapan a peparala na ning ari at ding tagapayu na at ding pamuntuk na, at itang binie da ring Israelita para king Templo. Binie ku ngan iti karing pari.

²⁶ Titimbang aduang pulu't limang tonelada ing pilak, dinalan limang pulung libra ing timbang da ring pilak a kasangkapan, at pitung libu at limang dalan a libra ing gintu;

²⁷ aduang dalan at pitung pulung onsa ing timbang da ring aduang pulung gintung silyo, aduang mapinung tangsung silyo a kasing alaga da ring gintung silyo.

²⁸ Ngaku karela, Mitalaga kayu king Ginu, ing Dios da ring makatua yu, at antimu rin ding kasangkapan a pilak at gintu a miparala para king Ginu bilang kusang lub a ain.

²⁹ Ingatan yu lang masalese angga king miras kayu king Templo. Timbangan yu la karing kuartu da ring pari at kaybat intriga yu la karing pamuntuk da ring pari at Levita at karing manimuna karing memalen na ning Israel king Jerusalem.

³⁰ Inya ding pari at ding Levita tinggap da la ring mi-intrigang pilak, gintu, at ding kasangkapan. Kaybat dela da la king Templo na ning Dios karin king Jerusalem.

³¹ Meko kami king ilug ning Ahava kanitang kalabing aduang aldo ning mumunang bulan ban munta kami king Jerusalem. Pitnubayan na kami ning kekaming Dios at linigtas karing kalaban at karing taung bisang manambang kekami king dalan.

³² Miras kami Jerusalem at migpaynawa kami karin kilub ding atlung aldo.

³³ King kapat a aldo minta kami king Templo; tinimbang mi karin ing pilak at gintu at ding kasangkapan, at kaybat inintriga mi la kang Meremot, ing paring anak nang Uria. Kayabe na la di Eleazar a anak nang Fineas at ding adua pang Levita, i Jozabad a anak nang Jesua, at i Noadia a anak nang Binui.

³⁴ Mebilang at metimbang ing sablang inintriga mi. Kaybat milista.

³⁵ Migdala no mang ain-a-durulukan para king Dios ning Israel ding sablang mibalik a taung miyugse. Miyain lang labing aduang biserung toro para king Israel, siam apulu't siam a lalaking tupa, pitung pulu't pitung biserung tupa. Miyain la namang labing aduang lalaking kambing bilang ain-kapamayaran-king-kasalanan. Dilukan da la ngan deting animal bilang ain king Ginu.

³⁶ Binie ria naman ing dokumento ning utus ning ari karing embahador ning ari at karing gobernador at ding pamuntuk na ning probinsia dane Albugan ning Ilug ning Eufrates, at sinaup la karing Israelita at king Templo ning Dios.

9

¹ Kalabas da reting bage milyari, lepitan da ku ring mapilan karing pamuntuk da ring memalen na ning Israel at ngara kanaku, Ding memalen na ning Israel, ding pari, at ding Levita menugali lang makasumaming anti ding Cananeo, Hiteo, Perezeo, Jebuseo, Ammoneo, Moabita, Ehipto, at Amoreo.

² Mekiasawa la at pati na ding anak dang lalaki kareting taung deti. Inya misamutan yang aliwang lahi ing balen na ning Dios. Ding menimuna kaniting kataksilan ila kabud ding pamuntuk at talapamahala.

³ Inyang dimdam ku iti ginabak ku ing imalan a susulud ku, ginut ku ing buak ku at ing balbas ku, at linukluk mitmung lungkut.

⁴ Lepitan da ku at pepadurutnan ding sablang mitakutan king Amanu na ning Dios, uli na niting kataksilan da ring mibalik a miyugse. Menatili kung makalukluk mitmung lungkut angga king miras ing oras ning pamiyain ain para king gatpanapun.

⁵ Inyang oras ning pamiyain ain, tinalakad ku ketang lugal nung nu ku migmalun; gabak-gabak ku imalan at balabal. Kaybat siniklaud ku at tinas ding gamat ku ban manalangin king Ginung kanakung Dios.

⁶ Ngaku, O Dios ku, e ku makayatna keka uling marine ku, uli da ring kekaming dakal a kasalanan at susukdul la angga banua.

⁷ Manibat na king kapanaunan da ring makatua mi angga na ngeni menatili kami king maragul a pamikasala. Uli da ring kekaming kasalanan, mipailalam kami karing gamat ding ari da ring paganu, ikami, ding ari mi, at ding pari mi. Pete da kami, kinua pibandian, binihag, at mibili king alang kalupang kamarinayan.

⁸ Oneng king sinaguling panaun, O Ginung kekaming Dios, meging maganaka ka at peintulut mu ing makatakas la king pangabihag ding mapilan kekami at ngeni manuknangan payapa keting banal ming lugal. Dininan mu kaming pamikatagun ban milako king panga-ipus.

⁹ Ipus kami, oneng ika, O Dios, e mu ke peinggulutan king kekaming panga-ipus. Pepakit mu ing lugud mung e kukupas king kapamilatan da ring ari ning Persia, at peintulutan da kaming italakad yang pasibayu ing kekang Templo, larinan ding pader na, at manuknangan payapa king Juda at Jerusalem.

¹⁰ Oneng ngeni, O Dios, nanu ing malyari ming asabi? Ala, uling lebagan mi no naman ding kekang kautusan

¹¹ a binie mu kekami king kapamilatan da ring talasuyu mung propeta. Ngara deti kekami, Ing gabun a kekayung pupuntalan ban bandian lugal yang e malinis, uling e mayap at makasumami ing dapat da ring taung manuknangan karin.

¹² Inya e yu la paintulutan makapakiasawa ding anak yu karing anak da. E kayu gagawang kasunduan karela ni makiabiayan man karela. King anti kaniting paralan kayu sikan, mangabiayan labis-labis, at apamana ing gabun karing anak yu king kapilan pa man.

¹³ Kaybat mi lang pipulan ding depat ming kasalanan at dewakan, balu mi, O Dios, king mayan mu ing parusang pepagpa mu kekami, at peintulut mu ing ating mitagan kekami.

¹⁴ Ngeni lebagan mi no naman ding kekang kautusan at mekiasawa kami kareting taung makasumami dapat. E ka wari mimua kekami at pamaten mu kami ban ala nang mitagan kekame?

¹⁵ O Ginung Dios ning Israel, makatuliran ka; peintulut mu ing mitagan kami. Tatanggapan mi king mikasala kami keka; ala keng matulid talakad arapan mu.

10

¹ Manangis ya i Ezra at mangumpisal kabang makaruku yang manalangin king arap ning Templo ning Dios, uli na ning pamikasalang merapat. Lepitan de ring dakal a lalaki, babai, at anak; manangis la namang kapait-paitan.

² Nganang Secania, ing anak nang Jehiel ning pamilya nang Elam, kang Ezra, Sinira mi ing tiwala na ning kekatamung Dios at mekiasawa kami karing babaing e mi kalahi keting lugal a iti. Makanyan man, atin ya pa mu ring kapanayan ing Israel.

³ Gawan mi ngeni ing taimtim a pangaku king kekatamung Dios king kawanian la deting ayasawa ming babaing e tamu kalahi at ding ayanak mi karela. Daptan mi iti, nung iti ing mamayapan mu at ding aliwa pang makitakut king utus ning kekatamung Dios.

⁴ Talakad na ka; katungkulan mu ing gawa kang lakbang at atyu kami kagulutan mu. E mu painan ing lub mi; kimut na ka!

⁵ Tinalakad ya i Ezra at pepapangakuanan na lang taimtim ding manimuna da ring pari, ding Levita, at ding memalen king daptan da itang binie nang munikalang Secania.

⁶ Kaybat meko ya king arap ning Templo, at minta ya king kuartu nang Johanan a anak nang Eliasib, at karin na pepalabasan ing bengi. E ya bitasang mengan at minum uling tutu yang malungkut uli na ning kataksilan a depat da ring taung miyugse a mibalik.

⁷ Miparala ya ing metung a kapabaluan king mabilug a Jerusalem at Juda king mitipun-tipun la king Jerusalem ding sablang taung miyugse a mibalik.

⁸ Iti utus da ring pamuntuk at makatua da ring Israelita. Ing e datang kilub ding atlung aldo, mayakua ing pibandian na at mitiwalag ya king katipunan da ring taung mibalik a miyugse.

⁹ Inyang miras na ing katlung aldo, mitipun la Jerusalem ding sablang lalaki na ning Juda at Benjamin. Kaduang pulung aldo na kanita ning kasiam a bulan. Mitipun la ngan at linukluk arap ning patyu ning Templo ning Dios. Mumuran masikan kanita at gagalgal la uli na ning panaun at ning ulaga ning pisasabian.

¹⁰ Tinalakad ya i Ezra, ing pari, at nganang sinabi karela, Mikasala kayu at mekiasawa karing babaing e tamu kalahi. Inya meragul ing kasalanan na ning Israel.

¹¹ Ngeni ipagtapat yu king Ginu, ing Dios da ring kekayung makatua, ing depat yung pamikasala at daptan ing kaburian na. Kawani kayu karing tau na niting bansa at kawanian yu la munaman ding asawa yung e yu kalahi.

¹² King masikan a siwala nganang mekibat ning mabilug a katipunan, Daptan mi ing nanumang kekang sabian.

¹³ Oneng tutu keng dakal at mumuran pang masikan. E ke makapaglambat keti king lual. Mabayat iting pisasabian at e malyaring malutas iti kilub ning metung o aduang aldo, uling dakal la kekami ding mikasala keting bage.

¹⁴ Ding pamuntuk mi ila na ding malakuan at ipanibala mi na karela iting pisasabian. Kaybat detang ating asawang e ra kalahi ila nang datang keting siudad king mituldung aldo a kayabe da ring pamuntuk at ukum. Iti ing daptan tamu ban e mibagsak kekatamu ing mabagsik nang mua ning Dios.

¹⁵ Mebisa la ngan, oneng tinutul ya i Jonatan, ing anak nang Asahel at apu nang Tikva. Migpanig ya kang Jonatan i Mesullam at i Sabetai a Levita. fig,,,,,Oneng tutu keng dakal at mumuran pang masikan.,(10:13)fig*

¹⁶ Tinggap de ring taung miyugse a migbalik ing pikayari; inya i Ezra, ing pari, pinili na la ding pamuntuk da ring pamilya at linista da la lagyu. King mumunang aldo na ning kapulung bulan kanita ra pegumpisan siniasat ing pisasabian,

¹⁷ at king mumunang aldo na ning mumunang bulan ayari da lang siniasat ding sablang lalaking mekiasawang e ra kalahi.

¹⁸ Iti ya ing listahan da ring lalaking mekiasawa karing e ra kalahi: King grupu da ring pari: i Maaseia, Eliezer, Jarib, at i Gedalias. Pamilya na lang Jesua at ding kapatad na, at i tata ra ya i Jeozadak.

¹⁹ Pengaku ra king kawanian da la ring karelang asawa at miyain lang metung a lalaking tupa bilang ain-a-kapamayaran-king-kasalanan da.

²⁰ King pamilya nang Immer: i Hanani at i Zebadia;

²¹ king pamilya nang Harim: i Maaseia, Elias, Semaia, Jehiel, at i Uzzia;

²² king pamilya nang Pasur: i Elioenai, Maaseia, Ismael, Netanel, Jozabad, at i Elasa;

²³ karing Levita: i Jozabad, Simei, Kelaia (o Kelita), Petahia, Juda, at i Eliezer;

²⁴ karing talapagkanta ning Templo: i Eliasib. Karing guardia karing pasbul dalan ning Templo: i Sallum, Telem, at i Uri;

²⁵ karing memalen na ning Israel: king pamilya nang Paros: i Ramia, Izzia, Malkija, Mijamin, Eleazar, Malkija, at i Benaia;

²⁶ king pamilya nang Elam: i Matania, Zacarias, Jehiel, Abdi, Jeremot, at i Elias;

²⁷ king pamilya nang Zatu: Elioenai, Eliasib, Matania, Jeremot, Zabad, at i Aziza;

²⁸ king pamilya nang Bebai: i Jeohanan, Hanania, Zabbai, at i Atlai;

²⁹ king pamilya nang Bani: i Mesullam, Malluk, Adaia, Jasub, Seal, at i Jeremot;

³⁰ king pamilya nang Pahat Moab: i Adna, Kelal, Benaia, Maaseia, Matania, Bezalel, Binui, at i Manase;

³¹ king pamilya nang Harim: i Eliezer, Issija, Malkija, Semaia, Simeon,

³² Benjamin, Malluk, at i Semaria;

³³ king pamilya nang Hasum: i Matenai, Matata, Elifelet, Jeremai, Manase, at i Simei;

³⁴ king pamilya nang Bani: i Maadai, Amram, Uel,

³⁵ Benaia, Bedeia, Keluhi,

³⁶ Vania, Meremot, Eliasib,

³⁷ Matania, Matenai, at i Jaasu;

³⁸ king pamilya nang Binui: i Simei,

³⁹ Selemia, Natan, Adaia,

⁴⁰ Maknadebai, Sasai, Sarai,

⁴¹ Azarel, Selemia, Semaria,

⁴² Sallum, Amaria, at i Jose;

⁴³ king pamilya nang Nebo: i Jeiel, Matitia, Zabad, Zebina, Jadai, Joel, at i Benaia.

⁴⁴ Ila ngan deti ring lalaking ating asawang e ra kalahi. Kewanian da la at pepalakuan da la pati na ding ayanak da karela.