1

¹ Inyang mete ne i Aring Ahab ning Israel, mig-rebeldi ya ing bansang Moab laban king Israel.

² Menakbag ya i Aring Ahazia ning Israel king balkun ning patag nang bubungan ning palasyu na king Samaria at megrabi ya. Inya mitubud yang tauan na ban ikutang na kang Baalzebub, ing kikilalanan nang dios ning Ekron, nung kumayap ya o ali king pinsalang bunga ning panganakbag na.

³ Oneng inutusan ne ning anghel ning Ginu i Elias, ing propeta na ning Tisbe, ban saganan ding tiburan nang Aring Ahazia at ikutang ing anti kaniti, Ala na waring dios king Israel inya kang Baalzebub, ing dios ning Ekron, kayu mangutang?

⁴ Iti ya ing pasabi na ning Ginu king ari: E na ka milako king pagkeran mu. Siguradu kang mate! Kaybat na nita, linakad ne i Elias.

⁵ Migbalik la king ari ding tubud. Ngana ning ari karela, Obat mibalik kayu?

⁶ Pekibat da, Akatagpu mi ya pu ing metung a lalaki at sinabi na kekami ing mibalik na kami at sabian kekayu ing anti kaniti: Iti ya ing pasabi na ning Ginu keka: Ala na waring dios king Israel inya kang Baalzebub, ing dios ning Ekron, kayu mangutang? E na ka milako king pagkeran mu. Siguradu kang mate!

⁷ Nganang kinutang ning ari, Nanu ya itsura ing taung akatagpu yu at migsalitang makanyan kekayu?

⁸ Ngarang mekibat, Makasulud yang imalan a megawa king bulbul da ring animal at ating babat balat king awakan na. Ngana ning ari, I Elias ning Tisbe ita!

⁹ Kanita mitubud yang metung a opisyal at limang pulung sundalus kang Elias. Ikit ne ning opisyal i Elias a makalukluk king metung nang dake ning bunduk-bundukan. Ngana, Hoy, talasuyu ning Dios, parakit na kayu ning ari.

¹⁰ Nganang mekibat Elias, Nung talasuyu na ku pin ning Dios, muran sanang api at masilab ka pati na ring limang pulung sundalus mu. Kanita mu rin minuran api at mesilab ya at mete ing opisyal at ding sundalus na.

¹¹ Inya pasibayu yang mitubud metung pang opisyal at limang pulung sundalus. Ngana ning opisyal kang Elias, Hoy, talasuyu ning Dios, pasabi na ning ari ing puntalan ye ngeni mu rin!

¹² Nganang mekibat Elias, Nung talasuyu na ku pin ning Dios, muran sanang api at masilab ka at ding limang pulung sundalus mu. At pepauran yang api ing Dios at mesilab ya at mete ing opisyal at ding sundalus na.

¹³ Pepasibayu ne namang mitubud aliwang opisyal at limang pulung sundalus. Siniklaud ya ing opisyal king arapan nang Elias at nganang mekisabing mayap, Talasuyu ning Dios, malunus kayu sana kanaku at karing limang pulung sundalus ku. E mu sa paintulut ing mate kami king api!

¹⁴ Mete la ring aduang kalupa kung opisyal at ding sundalus da uli na ning minuran api, inya malunus ka sana kanaku!

¹⁵ Ngana ning anghel ning Ginu kang Elias, Tuki ka king opisyal. E ka tatakut. Inya tinalakad ya i Elias at tinuki ya king opisyal ban puntalan ya ing ari.

¹⁶ Nganang Elias king ari, Oyni ing sasabian na keka ning Ginu, Ala na waring dios a akutnan mu king Israel at mitubud kang tauan mu ban mangutang kang Baalzebub, ing kikilalanan nang dios ning Ekron? Uli na ning gewa mung yan, e na ka milako king pagkeran mu. Siguradung mate ka!

¹⁷ Mete ya i Ahazia, antimo ing sinabi na ning Ginu kang Elias. Ala yang anak a lalaki i Ahazia, inya i Joram a kapatad na ya ing menalili kang Ahazia bilang ari kanitang kadua nang banua ning pamag-ari nang Jeoram a anak nang Jeosafat, ing ari na ning Juda.

¹⁸ Ing aliwa pang mepalyari king pamag-ari nang Ahazia makasulat king Istoria da ring Ari na ning Israel.

2

¹ Maglakad la kanitang ibat king Gilgal di Elias at Eliseo inyang dinatang ing oras a iyukiat na ne banua ning Ginu i Elias king kapamilatan ning alisus.

² Nganang Elias kang Eliseo, Malakuan na ka ken uling utusan na kung taglus ning Ginu king Betel. Pekibat nang Eliseo, Balu na ning mabie Ginu king e ra ka malyaring lakuan kabang mabie ka. Inya miyabe lang minta king Betel.

³ Sinalubung la karela ding propetang manuknangan king Betel at linapit la kang Eliseo at ngarang mengutang, Tutu pin king kuanan na ne ning Ginu ing kekang panginuan ngening aldong ite? Nganang mekibat Eliseo, Wa, at balu ku, inya e na kayu sana mainge.

⁴ Kaybat na nita, nganang Elias kang Eliseo, Malakuan na ka ken uling utusan na kung taglus ning Ginu king Jerico. Pekibat nang Eliseo, Balu na ning mabie Ginu king e ra ka malyaring lakuan kabang mabie ka. Inya miyabe lang minta king Jerico.

⁵ Sinalubung la karela ding propetang manuknangan karin at linapit la kang Eliseo at ngarang mengutang, Eliseo, tutu pin king kuanan na ne ning Ginu ing kekang panginuan ngening aldong ite? Wa, at balu ku, inya e na kayu sana mainge.

⁶ Kaybat na nita, nganang Elias kang Eliseo, Malakuan na ka ken uling utusan na kung taglus ning Ginu king Jordan. Pekibat nang Eliseo, Balu na ning mabie Ginu king e ra ka malyaring lakuan kabang mabie ka. Inya miyabe lang minta king Jordan,

⁷ at ding limang pulu karing propeta tikian da la king Jordan. Tinuknang la ri Elias at Eliseo king lele ning ilug; makarayu lang bagya karing limang pulung propeta.

⁸ Likas neng Elias ing balabal na at tiklip pabilug, kaybat pispas ne king danum. Mepitna king misusumangid ing danum at dinalakit la king malanging gabun.

⁹ Kadalakit da, nganang Elias kang Eliseo, Sabian mu na mo kanaku nung nanu ing asaup ku keka bayu ku mayakua. Pekibat nang Eliseo, Amana ku sana ing aduang dake na ning kekang upaya.

¹⁰ Nganang Elias, Mabayat ing kekang aduan. Oneng kabud akit mu kung mayakua, ing aduan mu mapalyari. Nung ali, e mu na tanggapan ing aduan mu.

¹¹ Kabang lalakad la at mipagsalita, ating karwaheng api at kabayung api a kabud na linto at pikawani na la ilang adua. Inukiat ne banua ning alisus i Elias.

¹² Ikit nang Eliseo ing milyari at nganang kinulisak, Tatang! Tatang ko! Ding karwahe at ding pakakabayu ning Israel! At manibat na kanita e na ne ikit i Elias. Uli na ning kalungkutan, ginabak neng Eliseo ing imalan na at meging adua ya.

¹³ Kaybat, dimput ne ing melaglag a balabal nang Elias. Mibalik ya at tinalakad lele na ning pampang ning Ilug ning Jordan.

¹⁴ Pispas na ing danum king balabal nang Elias at agnan nang sinabi, Nukarin ya ing Ginu, ing Dios nang Elias? Pasibayu nang pispas ing danum, at mepitna king misusumangid ing danum, at dinalakit ya king kangatba.

¹⁵ Ikit de ring limang pulung propeta a tau Jerico at sinabi ra, Miras kang Eliseo ing upaya nang Elias! Seganan de at dikuan bilang paggalang.

¹⁶ Kaybat, sinabi ra, Lima kaming pulung lalaking mangasikan. Paburen yung ikami ing manintun king kekayung panginuan. Mapalyaring dela nia mu ning espiritu ning Ginu at likuan king bunduk o king kapatagan. Pekibat nang Eliseo, E mu na la tutubud.

¹⁷ Oneng king kapipilit da ring propeta mengapakarine ya i Eliseo angga king mebisa ya. Ngana, Sulung, panintunan yu ne. Atlu lang aldo manintun ding limang pulu, oneng e re ikit i Elias.

¹⁸ Inya mibalik la kang Eliseo a manaya kanita king Jerico. Nganang Eliseo karetang limang pulung propeta, E wari sinabi ku na kekayung e yu ne panintunan?

¹⁹ Ngara ding taung manuknangan karin kang Eliseo, Makamal a Eliseo, antimo ing akakit yu, masanting ya ing balen, mu pin e mayap ing danum at dakal la ring makikikuan.

²⁰ Pekibat na, Dinan yu kung metung a bayung silyo at dinan yeng asin. Memintu la.

²¹ Inyang atyu ne king gamat na ing silyo at ing asin, minta ya king sibul ning danum at bilus na karin ing asin. Ngana, Oyni ing pasabi ning Ginu: Gawan kung puru ing danum a ini at e na kapilan man panibatan na ning sakit o ning kikuan.

²² At meging puru ing danum manibat na kanita, antimo ing sinabi nang Eliseo.

²³ Meko ya king Jordan i Eliseo at minta ya king Betel. Kabang maglakad ya seganan de ring mapilan a anak a lalaki a ibat king balen at gewa reng pikaylian. Ngarang kukulisak, Sulung, lakad lalaking kalbo! Sulung lumakad ka, lalaking kalbo!

²⁴ Belikdan na la reting anak at king lagyu ning Ginu sinumpa na la. Inya linto la ring aduang babaing oso a ibat king kagubatan at piglapak da la ring apat apulu't adua karing anak a lalaki.

²⁵ Manibat karin, tinaglus ya king Bunduk ning Carmel, at kaybat mibalik ya king Samaria.

3

¹ Kanitang kalabing walung banua ning pamag-ari nang Jeosafat king Juda kanita ya mig-ari king Israel i Joram a anak nang Ahab, at mig-ari ya king Samaria kilub ding labing aduang banua.

² Gewa na itang e katanggap-tanggap king akakit ning Ginu, oneng e re kasing karok ding pengari nang lalaki at babai, uling ya ing pepalako karing rebultu nang Baal a pepagawa nang tata na.

³ Tikian na at e na gilutan ing kasalanan a gewa nang Jeroboam a anak nang Nebat. Penimunan na ing pamikasala ning Israel, at e na tiknangan.

⁴ Kanitang panaun a ita, manese yang dakal a tupa i Aring Mesa ning Moab. Ila ring gagamitan nang pamayad king buis na king ari na ning Israel: dinalan a libung tupang pabanua tua at ing bulbul da ring dinalan a libung tupa.

⁵ Inyang mete ne i Aring Ahab, mig-rebeldi ya ing ari na ning Moab laban king ari na ning Israel.

⁶ Inya meko ya king Samaria i Aring Joram at tinipun na la ring sundalus na.

⁷ Kaybat, peparala yang amanu kang Aring Jeosafat ning Juda. Ngana, Mig-rebeldi yang laban kanaku ing ari na ning Moab. Saupan mu ku king pamakilaban king Moab? Pekibat nang Jeosafat, Saupan da ka. Kayabe mu ku; ing kayarian ku kayarian me, at ding kabayu ku kabayu mu la.

⁸ Nukarin kami dumalan? Pekibat nang Joram, King ilang ning Edom.

⁹ Inya miyabe-abe lang linakad ding ari na ning Israel, ning Juda, at ning Edom. Inyang miras na ing kapitung aldo ning karelang lakad, kegisanan lang danum para karing karelang sundalus at karing animal.

¹⁰ Nganang Aring Joram, Mate ta na kanyan! Piyabe-abe na katamu ning Ginu ban ipabihag karing tau na ning Moab!

¹¹ Nganang mengutang Aring Jeosafat, Ating propeta keti a malyaring makasaup kekatamu ban makapangutang tamu king Ginu? Pekibat na ning metung karing opisyal ning ari ning Israel, Atyu pu keni i Eliseo a anak nang Safat. Ya ing kayaduangan nang Elias.

¹² Nganang Aring Jeosafat, Nung makanyan, atyu kang Eliseo ing amanu na ning Ginu. Inya ding atlung ari pintalan de i Eliseo.

¹³ Nganang Eliseo king ari ning Israel, Ala kung pakialam kekayu! Ding lapitan yu ila ring propeta nang tata mu at ima mu. E makanyan, ngana ning ari ning Israel, uling piyabe-abe na kami ning Ginu ban mabihag ya ing Moab.

¹⁴ Nganang Eliseo, Daramdaman na ku ning mabie Ginu, ing mayupaya king sabla at kanakung susuyuan. Nung e mu kang Aring Jeosafat ning Juda a kanakung gagalangan e ra kayu pansinan man.

¹⁵ Dinan yu kung metung a biasang tigtig alpa. Kabang manigtigan ya ing lalaking ating alpa, dinatang ing upaya na ning Ginu kang Eliseo.

¹⁶ Ngana, Oyni ing sasabian na ning Ginu: Gawa kayung kulkul king melanging lugal a piagusan ning danum.

¹⁷ E na kayu manakit pang angin o uran, oneng ing lugal a iti kumatmu yang danum a ainum yu at ding sese yung animal.

¹⁸ Ngana pang Eliseo, Iti metung a bage a mayan nang gawan ning Ginu, at ibie na naman kekayu ing tagumpe laban karing Moabita.

¹⁹ Sakupan yu la ring siudad a makapaligid pader at kuturan yu la ding tanaman a mamunga, tambunan yu la ring sibul ning danum, at tambunan batu ring gabun a mataba.

²⁰ Kabukasan, king oras ning pamamie ning ain-a-durulukan, dinatang ing agus ning danum a menibatan king Edom, at mikatmuan ya king danum ing lugal a ita.

²¹ Abalitan da ring tau Moab ing paniatang da ring atlung ari ban lusuban da la. Inya tinipun da la ngan ding lalaki, matua at anak a malyari nang talan sandata, at pinuestu da la king angganan na ning bansa.

²² Inyang migising la itang kabukasan, tutud king danum ing aslag ning aldo. Ikit da ring tau Moab king malutu ya kule ing danum at balamu daya.

²³ Inya sinabi ra, Daya! Siguru mipatayan no ring aring deta. Inya ngeni, Moab, kuanan ta na ing pibandian da!

²⁴ Karatang da king kampu da ring Israelita, makasadia la ding Israelita at lebanan da la angga king mepilitan lang matras ding tau Moab. Lisuban de ring Israelita ing Moab at pete da la ngan ding tau karin.

²⁵ Lesak da la ring siudad da, at ing metung at metung menatsa yang batu karing marangle a mataba angga king mitambunan la reti. Timbunan da la naman ding sibul ning danum at kinutud ding tanaman a mamunga. Ing bukud mung siudad a e ra ninanan balang ya ing Kir Hareset. Oneng peligiran dia mu rin at lisuban ding Israelitang biasang maniradol.

²⁶ Inyang ikit ning ari ning Moab ing ala neng agawa, tinipun na la ring pitung dalan nang sundalus a paka-espada at migkapilit lang dinalan king dane da ring kalaban ban makatakas la. Oneng e la migtagumpe.

²⁷ Inya kinua ne ing pangane nang anak a lalaki, ing talapagmana king tronu na, at dela ne king pader ning siudad at inain ne bilang ain-a-durulukan. Mitakutan la ring Israelita inyang ikit da iti, inya minatras la at minuli king sarili dang bansa.

4

¹ Minta ya kang Eliseo ing babaing mebalu na ning metung a miembru king aguman da ring propeta at ngana, Mete ne ing asawa ku, at balu yu king siyuan ne ing Ginu king mitmung katapatan. Datang ya ngening aldong iti ing pikautangan na ban kuanan na la ring adua kung anak a lalaki at gawan na lang ipus.

² Nganang Eliseo, Nanu ing malyari kung asaup keka? Nanu ing atyu king bale mu? Pekibat ning babaing mebalu, Ala kung nanuman pibandian king bale subali mu ing metung a datukanan a ating laru.

³ Nganang Eliseo, Puntalan mu la reng kasiping mung bale at andaman mu la karela ding datukanan.

⁴ Kaybat, lungub ka at ding anak mu king bale yu at isara ye ing pasbul. Katmuan meng larung olibo ing balang datukanan at ilele potang mitmu ne.

⁵ Inya linub ya king bale ing babai at ding adua nang anak a lalaki. Sera ne ing pasbul, at kitmuan na lang laru ding datukanan a duduang da ring anak na.

⁶ E na balu king mirinan no ngang laman ding datukanan, inya mekiduang ya pa. Pekibat ning metung karing anak, Mirinan no ngan laman. Kanita mu rin tinuknang tutulu ing larung olibo.

⁷ Inya pintalan ne i Eliseo, ing propeta ning Dios. Nganang Eliseo king babai, Ipisali mu ing larung olibo at kaybat bayaran mu ing utang yu. Labis-labis la ring mitagan karing abli mu para king pagkabiayan ding anak mu.

⁸ Misan a aldo, minta ya i Eliseo king Sunem nung nu ya manuknangan ing metung a babaing mabandi. Kinumbira neng mangan i Eliseo king bale na. Manibat na kanita karin ne mamangan i Eliseo neng pupunta ya king Sunem.

⁹ Ngana ning babai king asawa na, Balu ku king ing lalaking maralas pupunta ken tau yang banal a talasuyu ning Dios.

¹⁰ Igawa ta neng malating kuartu king babo; dinan yang pagkeran, lamesa, luklukan, at sulu. Karin ya neng pupunta ya Sunem.

¹¹ Misan a aldo, minta ne naman karin i Eliseo at tinaglus ya king kuartu ban magpaynawa.

¹² Ngana king kasaup nang i Gehazi, Ausan mu ne mo ing babaing makibale. Inaus neng Gehazi ing babai. Inyang datang ne ing babai, nganang

¹³ Eliseo kang Gehazi, Sabian mu king maragul ing pangabalang pasari ta. Nanu ing malyaring iyablas ta para king pamilya na? Buri na kaya ing igawa keng rekomendasyun king ari o king pekapun da ring sundalus? Pekibat ning babai, Ala kung kailangan uling kayabe ku la ring kabalen ku.

¹⁴ Nganang Eliseo kang Gehazi, Nanu kaya ing malyari kung asuyu king babai? Nganang mekibat, Ala yang anak a lalaki, at matua ne ing asawa na.

¹⁵ Nganang Eliseo kang Gehazi, Ausan mu nia. Inaus ne at tinalakad ya lele ning pasbul.

¹⁶ Nganang Eliseo, Keng tutuking banua, king oras a anti kaniti, atin na kang kikilikan a anak a lalaki. Ngana ning babai, O! E yu ku pu sana payasahan, uling talasuyu na kayu ning Dios!

¹⁷ Antimo ing sinabi nang Eliseo, mebuktut ya ing babai, at menganak yang lalaki king anti kanita mu ring panaun.

¹⁸ Meragul ya ing anak. Misan a aldo, pintalan ne king marangle i tata na a kayabe da ring papalut.

¹⁹ Kabud-abud, nganang sinaingsing kang tata na, Masakit ku buntuk! Masakit ya ing buntuk ku! Ngana ning tata king kasaup na, Idala me ing anak kang ima na!

²⁰ Kinarga ne ning kasaup ing anak at dela ne king ima. Binten ne ning ima ing anak na anggang ugtung aldo, at mete ya ing anak king kandungan na.

²¹ Penik ne king babo at kinera ing anak ketang pagkeran nang propeta Eliseo. Sera ne ing pasbul, at kaybat meko ya.

²² Inaus ne ing asawa na at ngana, Patukian me kanaku ing metung karing kekang kasaup at ing metung a asno ban agad kung miras kang propeta Eliseo, at ban agad kung makapagbalik.

²³ Ngana ning asawang lalaki, Obat pupuntalan me; e naman Piesta ning Bayung Bulan ngeni o Aldo ning Sabbath? Pekibat ning babai, E na bala.

²⁴ Pepasadia ne ing asno at kaybat ngana king kasaup, Palakaran meng mabilis ing asno, at e ka bagal-bagal anggang e ku sabian keka.

²⁵ Inya linakad ne ing babai at minta ya king Bunduk ning Carmel ban pakikitan ne i propeta Eliseo. Marayu ya pa akakit na neng Eliseo ing babai. Ngana king kasaup nang i Gehazi, Aliwa ing babaing tau Sunem ing daratang?

²⁶ Malagua ka at saganan me. Ikutang mu ing kabilian na, ing asawa na, at ing anak na. Nganang mekibat ning babai kang Gehazi, Masalese ke ngan a kabilian.

²⁷ Oneng inyang miras ne kang Eliseo, dinuku ya at kinaul ne bitis. Linapit ya i Gehazi ban pigilan ne ing babai, oneng nganang propeta Eliseo, Paburen me. E mu wari apapansin king mabayat ing panamdaman na? At ala ya pang sinabi kanaku ing Ginu tungkul kaniti.

²⁸ Ngana ning babai, Makamal, meniawad ku waring anak a lalaki kekayo? E ku wari sinabi kekayu king e yu ku payasahan?

²⁹ Nganang Eliseo kang Gehazi, Gayak ka. Idala me ing tukud ku at agad na kang mako ban ipatung me ing tukud king lupa na ning mete anak. E mu ne atuan ing ninumang akasalubung mu keng dalan at e mu ne papansinan ing ninumang manatu keka.

³⁰ Ngana ning babai kang Eliseo, Daramdaman na ku ning mabie Dios. E ra kayu lakuan anggang mabie kayu. Inya tinalakad ya i Eliseo at tikian ne ing babai.

³¹ Minuna ya i Gehazi at pinatung ne ing tukud king lupa na ning mete a anak, oneng alang linto tanda a mabie ya. Inya mibalik ya at seganan ne i Eliseo. Ngana, E ya pa mebie ing anak.

³² Inyang miras ne king bale i Eliseo, ikit ne king pagkeran na ing anak a mete.

³³ Linub ya at sera ne ing pasbul. Ya mu at ing anak a mete ing atyu karin. Menalangin ya king Ginu.

³⁴ Kaybat na nita, sikban ne ing anak; tigkil ne ing asbuk na, ding mata na, at ding gamat na king asbuk, mata, at gamat ning anak. Kabang makasakab ya king anak a mete, dimdam neng mikakapali ing katawan na.

³⁵ Tinalakad ya i Eliseo at miglakad yang pabalikbalik king kuartu. Kalabas da ring mapilan a penandit sikban neng pasibayu ing anak a mete. Kaybat na nita, minatsing yang pitung besis ing anak at milagat na la ring mata na.

³⁶ Kanita inaus neng Eliseo i Gehazi at ngana, Ausan me ing ima na ning anak. Memintu ya i Gehazi. Nganang Eliseo inyang datang ne ing ima ning anak, Kuanan mu ne ing anak mu.

³⁷ Linub ya ing ima ning anak at siniklaud ya arapan nang Eliseo. Kaybat, kinilik ne ing anak at saka na la meko.

³⁸ Maragul ing danup king sakup ning Gilgal inyang mibalik ya karin i Eliseo. Kabang makalukluk yang kayabe da ring grupu da ring propeta, sinabi na king kasaup na, Isiang me ing maragul a kuran at maglutu kang apangan da ring propeta.

³⁹ Tinalakad ya ing metung at minta ya king marangle ban kumang gule. Menakit yang layas a wake at menagtal ya karing bunga na at kinandung na la. Inyang mibalik ya, pengili na la at bilug king kuran a pilulutuan agyang e na balu nung nanu la.

⁴⁰ Inyang melutu na, inapag da karing tau ban kanan da. Ngarang kinulisak inyang atakman da, Talasuyu ning Dios, lasun ini! Inya e ra buring kanan.

⁴¹ Kanita nganang Eliseo, Dinan yu kung ditak a pamangan. Bilug na king kuran at kaybat sinabi na, Iyapag yu na karing tau ban makapangan na la. Mewala ing lasun king kuran.

⁴² Misan munamang aldo, ating taung ibat king Baal Salisa a linapit kang Eliseo. Magdala yang aduang pulung pirasung tinape a megawa king mumunang pupul a sebada at ditak a binutil a bayung pupul. Nganang Eliseo king kasaup na, Iyapag yu la karing tau ban kanan da.

⁴³ Oneng ngana ning kasaup na, E la makagyu karing dinalan a tau. Nganang Eliseo, Iyapag mu ban makapangan la, uling ing Ginu sasabian na king makapangan la at atin pang mitagan.

⁴⁴ Inya inapag na la ning kasaup na karela, at antimo ing sinabi na ning Ginu, mengan la ngan at atin pang mitagan.

5

¹ I Naaman ya ing pekapun da ring sundalus ning Siria, marangal ya at kapuri-puring lalaki king akakit na ning ari ning Siria, uling king kapamilatan na pepagtagumpen na la ning Ginu ding sundalus ning Siria. Matapang ya, oneng atin yang sakit a lepra.

² Misan a aldo, mekilaban la ring sundalus ning Siria king Israel; mekabihag lang metung a dalagitang Israelita at meging ipus ne ning asawa nang Naaman.

³ Ngana ning dalagita king asawa nang Naaman, Nung makapunta ya mu ing kanakung panginuan king propeta na ning Samaria siguradu neng pakayapan king sakit nang lepra.

⁴ Inya pintalan neng Naaman ing ari at belita na ing sinabi na ning dalagitang Israelita.

⁵ Ngana ning ari, Sulung munta ka. Sulatanan ke ing ari ning Israel. Inya meko ya i Naaman at migdala yang atlung pulung libung pirasung pilak, anam a libung pirasung gintu, at apulung kapiblas a mangamal a imalan.

⁶ Ngana ning sulat ning ari a darala na para king ari ning Israel, King kapamilatan na ning sulat lalapit ke keka ing talasuyu kung i Naaman ban pakayapan me king sakit nang lepra.

⁷ Inyang abasa ne ning ari ning Israel ing sulat, ginabak ne ing imalan a susulud na uli ning lungkut at nganang sinabi, Dios ku wari a ating upayang makamate at munie bie? Obat tinubud ne kanaku ining taung sakitan lepra ban uluan ke? Pota galang bisa yang gawang sangkan ban mipate kame?

⁸ Inyang abalitan nang Eliseo ing gewa ning ari, nganang peparalang amanu, Obat ginabak ye ing susulud yung imalan? Papuntalan ye keni ing taung yan ban abalu na king ating propeta keti king Israel.

⁹ Inya minta ya i Naaman a kayabe ding tauan nang pakakabayu at karwahe. Tinuknang la tulid nang pasbul ning bale nang Eliseo.

¹⁰ Mitubud yang ipus i Eliseo ban sabian kang Naaman ing munta ya king Ilug ning Jordan at karin na wasan pitung besis ing sarili na, at kumayap ne kanita king sakit nang lepra.

¹¹ Inya meko yang mua i Naaman. Ngana, Bala ku mo lumual ya ban makikit kanaku ampon manalangin king Ginu Dios at iyatyat no ding gamat na tulid ning lepra ku ban kumayap ku.

¹² E la wari mas malinis ding ilug ning Abana at Farpar king Damasco kesa karing ilug ning Israel? E malyari wari ing karin na ku mu manos ban kumayap? Inya meko yang mua.

¹³ Lepitan de ring ipus na at ngara kang Naaman, Nung sinabi na pu ning propeta kekayu ing gawan yu ing metung a mabayat a bage, e yu wari gawan ita? Nu pa kasi anti ngening sinabi na kekayu ing manos kayu karin at kumayap kayu?

¹⁴ Inya dinulung ya i Naaman king Ilug ning Jordan at pitung besis yang migpalbug karin, antimo ing sinabi na ning propeta Eliseo. At kinayap ya. Meging malinis ing balat na anti ing balat na ning anak a malati.

¹⁵ Kayabe ding tauan na, belikan neng Naaman i Eliseo at ngana, Ngeni balu ku na king alang dios king yatu nune mu ing Dios ning Israel. Ipakisabi kung mayap, tanggapan mu sana ing kakung regalu.

¹⁶ Nganang propeta Eliseo, Daramdaman na ku ning mabie Ginu kakung susuyuan, e ku tanggap nanuman keka. Pinilit neng Naaman ban kuanan nang Eliseo ing babie na, oneng tinggian na.

¹⁷ Inya nganang Naaman, Anti na ning e ka bisang tanggap regalu kanaku, malyari na ku man kayang magdalang gabun a akarga da ring aduang asno? E na ku munie ain-a-durulukan o nanumang ain para karing aliwang dios nune mu king Ginu.

¹⁸ Sana patawaran na ku ning Ginu neng antabayanan ke ing kanakung ari neng sasamba ya king templo nang Rimmon, ing kikilalanan nang dios ning Siria. Patawaran na ku sana ning Ginu neng makatalan ya kanaku ing ari at sasamba ku king templo nang Rimmon.

¹⁹ Nganang Eliseo, Muli na kang payapa. At meko ne i Naaman. Inyang marayu neng bagya i Naaman,

²⁰ nganang Gehazi, ing kasaup nang Eliseo, Kaganaka na naman ning panginuan ku kang Naaman. E na tinggap ing babie na. Daramdaman na ku ning mabie Ginu, tagalan ke i Naaman at maniawad ku agyang nanu mu.

²¹ Inya tegalan neng Gehazi i Naaman. Inyang ikit nang Naaman ing ating tatagal, kinuldas ya king karwahe na at seganan ne. Ngana, Nanu, masalese ing heganagana?

²² Pekibat nang Gehazi, Wa, masalese ing heganagana. Pepatagal na ka kanaku ning panginuan ku ban sabian keka king ating dinatang a aduang propeta a miembru king aguman da ring propetang manuknangan king bulubundukan ning Efraim. Nung malyari kanu dinan meng atlung libung pirasung pilak at aduang kapiblas a imalan.

²³ Nganang Naaman, Tanggapan mu la ding anam a libung pirasung pilak. Pinilit na lang binie kang Gehazi at dinatuk na la karing aduang suput at mibalut ya pang aduang kapiblas a imalan. Pepadala na la karing adua nang ipus, at linakad lang makauna kang Gehazi.

²⁴ Inyang miras ne i Gehazi king bunduk-bundukan, kinua na ing darala da ring aduang ipus at selikut na king bale, at saka na na la pepalakuan at meko la.

²⁵ Kaybat, minta ya ketang lugal nung nu ya karin i Eliseo, ing panginuan na. Kitang nang Eliseo, Nukarin ka ibat, Gehazi? E na ku man meko, nganang mekibat Gehazi.

²⁶ Oneng nganang Eliseo, Gehazi, e wari atyu ku king espiritu inyang kinuldas ya ing taung ita king karwahe na ban saganan na ka? Ngeni wari ing pamananggap salapi, imalan, mulahan olibo, at ubas, tupa, at baka o ipus lalake at babae?

²⁷ Inya milipat keka ing lepra nang Naaman at karing maging lahi mu king kapilan man. Mikasakit yang lepra i Gehazi; maputi yang anting yelu ing balat na inyang meko ya king arapan nang Eliseo.

6

¹ Misan a aldo, linapit la kang Eliseo ding propetang pamahalan na. Ngara, Eliseo, maskup ne para kekatamu ing lugal a pitutuknangan tamu.

² Paintulutan yu kami sanang munta king Jordan; mangutud kaming dutung ban makagawa kaming apituknangan mi. Sulung ikayung bala, nganang mekibat Eliseo.

³ Ngana ning metung, Eliseo, nung malyari, tukian yu kami sana. Wa, nganang mekibat Eliseo.

⁴ At miyabe-abe lang minta king Jordan ban mangutud dutung.

⁵ Inyang mangutud na lang dutung, menakbag ya king danum ing taram ning palakul ning metung karela. Nganang kinulisak, Makamal a Eliseo, menakbag ya king danum ing taram ning palakul. Inandam kia mu!

⁶ Nganang kinutang Eliseo, Nukarin ya menakbag? Tiru ne ing lugal nung nu ya menakbag. Kinutud yang sanga i Eliseo at inatsa ne king danum, at pepagato ne ing taram ning palakul.

⁷ Kuanan me, nganang Eliseo. Inabut ne at kinua.

⁸ Kanitang panaun a ita, makigera ya ing ari ning Siria laban king Israel. Mengutang ya ing ari ning Siria karing opisyal na at kaybat sinabi na, Mibili kung kampu karin at karing lugal a anti kareta.

⁹ Nganang pepayatad amanung Eliseo king ari ning Israel, E kayu pupunta karetang lugal a deta uling atyu la karin manayang manambang ding sundalus ning Siria.

¹⁰ Inya pengilagan da la ring lugal a binggitan nang Eliseo. Ulit-ulit neng inaus pansin Eliseo ing ari ning Israel ban makapaningat ya tungkul king balak ning ari ning Siria.

¹¹ Inya megulu ya isip ing ari ning Siria at pepayaus na la ring opisyal na at ngana karela, Sabian yu kanaku ing tutu. Ninu kekayu ing kakampi na ning ari ning Israel?

¹² Pekibat ning metung karela, Ala metung man kekami, Makamal a Ari. I Eliseo a propeta ning Israel ya ing magsalita king ari ning Israel king heganaganang sasabian yu pati itang isipan yu neng atyu kayu king kuartu yu.

¹³ Nganang minutus ning ari, Sulung, panintunan ye ban aparakap ke. Ating sinabi king ari ning Siria king atyu ya king Dotan i Eliseo.

¹⁴ Inya peparala yang dakal a sundalus a pakakabayu at karwahe king Dotan. Bengi na inyang miras la karin at kibkuban de ing siudad.

¹⁵ Itang kabukasan, mibangun ya ing kasaup nang propeta Eliseo; ikit na la ding dakal a sundalus a makapadurut king siudad. Ngana kang Eliseo, Makamal a Eliseo, nanu ing gawan tamu?

¹⁶ Nganang Eliseo, E ka tatakut. Mas dakal la ring kakampi tamu kesa karela.

¹⁷ Kanita nganang menalangin Eliseo, O Ginu, ibuklat mu la ding mata na ban akit na. At biklat ne mata ning Ginu ing kasaup nang Eliseo. Inyang lumawe ya, ikit ne ing bulubundukan a mitmung kabayu at karwaheng api king paligid nang Eliseo.

¹⁸ Inyang lulusub na la ring sundalus ning Siria, nganang menalangin Eliseo, O Ginu, bulagan mu la sana deting sundalus. At binulag na la ning Ginu, antimo ing inawad nang Eliseo.

¹⁹ Kanita ngana karelang Eliseo, Aliwa iti ing dalan at ing siudad. Tuki ko kanaku at ituru ke ing taung panintunan yu. At dela na la Samaria.

²⁰ Inyang milub na la Samaria nganang menalangin Eliseo, O Ginu, ibuklat mu lang pasibayu ding mata ra ban manakit la. Biklat na la mata ning Ginu, at ikit da king atyu la pala Samaria.

²¹ Inyang ikit na la ning ari ning Israel ding sundalus ning Siria, nganang kinutang kang Eliseo, Paten ku la, makamal a propeta? Paten ku la?

²² Pekibat na, E mu la papaten. Paten mu la wari ding taung kekang abihag king kapamilatan na ning sarili mung espada at pana? Ipasadia mu lang pamangan at inuman, at kaybat papagbalikan mu na la king karelang ari.

²³ Inya pepasadia yang dakal a pamangan para karela. Inyang meyari na lang mengan at minum, pepalakuan na na la ban mibalik king karelang ari. Manibat na kanita, e ra ne lisuban ding sundalus ning Siria ing bansa ning Israel.

²⁴ Kalabas da ring mapilan a panaun, tinipun na lang Aring Benhadad ning Siria ding sundalus na at kibkuban de ing Samaria.

²⁵ Mika maragul a danup king siudad. Meluat ing pangakubkub na inya minabut yang walung pulung pirasung pilak ing alaga na ning buntuk ning asno, at limang pirasung pilak ne man ing kapitnang librang takla ning patipati.

²⁶ Misan a aldo, maglakad ya ing ari ning Israel king lele nang pader ning siudad. Ating metung a babaing minaus. Ngana, Makamal a Ari, saupan yu ku pu sana!

²⁷ Nganang mekibat, Nung e na ka saupan ning Ginu, e ra ka malyaring asaupan. Nukarin ku kumang trigu at katas ubas ban isaup ku keka?

²⁸ Ngana pang sinabi ning ari, Nanu wari ing problema mu? Nganang mekibat, Sinabi na kanaku ning babai ing kanan mi ya ing anak ku, at kabukasan ing anak na ya naman ing kanan mi.

²⁹ Inya linutu ke ing anak ku at pengan mi ya. Kabukasan, sinabi ku king ing anak na ya ing tutuki ming kanan, oneng selikut ne.

³⁰ Inyang dimdam ning ari ing sinabi na ning babai, ginabak ne ing imalan a susulud na uli na ning lungkut. Ikit da ring taung atyu karin king makaimalan ne palang saku uli na ning maragul nang kalungkutan.

³¹ Ngana, Mananu na sanang paten na ku ning Dios nung ngeni e ke pa pepatabtab a batal i Eliseo a anak nang Safat!

³² Atyu ya kanita king bale i Eliseo; kayabe na lang pakalukluk ding makatuang manimuna ning Israel. Papunta ne man kanita ing inutusan ning ari ban tabtaban ne batal i Eliseo. E ya pa miras karin ing inutusan ning ari sinabi na nang Eliseo, Itang makamate taung ita mitubud yang tau ban tabtaban na ku batal. Datang ya ing tubud at kayabe ne ing panginuan na kagulutan na. Isara ye ing pasbul potang datang ya ing tubud at e ye paluban.

³³ Magsalita ya pa i Eliseo inyang datang ya ing ari, at ngana kang Eliseo, Ing pepasari king kasakitan ya ing Ginu. Obat kailangan pang panayan keng maluat ing Ginu?

7

¹ Nganang mekibat Eliseo, Pakiramdaman mu ing sasabian na ning Ginu. Oyni ing pasabi na, Bukas, king anti kaniting oras, ketang pasbul dalan ning siudad ning Samaria makasali kang metung a takal a arina o aduang takal a sebada king alagang metung a pirasung pilak.

² Ngana ning lalaking mag-asikasu king ari, Talasuyu ning Dios, e mapalyari yan agyang pang ibuklat ne ning Ginu ing awang ning banua. Pekibat nang Eliseo, Akit mu mu rin bukas king iti mapalyari oneng e ka makapangan.

³ Atin kanitang apat a taung maki sakit lepra at atyu la king pasbul dalan ning siudad. Ngara king metung at metung, Obat keti tamu manenaya king kamatayan tamu?

⁴ Nung lungub tamu king siudad, mate tamu mu rin uling maragul ing danup. Nung e ta naman mako, mate tamu munaman. Masanting pa ing munta tamu king kampu da ring sundalus ning Siria. Mayap, nung e ra katamu paten. Nung paten da katamu, ita na ya ing kawakasan tamu.

⁵ Inyang daralumdum na, minta la king kampu da ring sundalus ning Siria. Ala metung mang taung ikit da karin inyang miras la,

⁶ uling kaburian na ning Ginu ing makaramdam lang inge da ring dakal a sundalus a pakakabayu at karung panggera. Inya ngara ding sundalus ning Siria, Beyaranan na la ning ari ning Israel ding ari da ring Hiteo at ding tau Ehipto ban lusuban da katamu.

⁷ Inya meko la inyang daralumdum na; likuan de ing kampu ra, ding kabayu ra at asno, at ing sabla-sabla, at tinakas la ban iligtas ing bie ra.

⁸ Inyang datang la ring apat a lalaking sakitan lepra, linub la king metung karing tolda. Mengan la at minum. Kaybat, kinua ra ing ikit dang gintu, pilak, at imalan at selikut da. Linub la naman karing aliwang tolda at kinua ing buri da at kaybat selikut da naman.

⁹ Ngara king metung at metung, E ustu ing gagawan tamu. Iti aldo ne ning mayap a balita, oneng sasarilinan ta ya. Nung manaya ta pang angga bukas, siguradu tamung miparusan. Tara, ipabalu tamu karing tauan ning ari.

¹⁰ Inya meko la at karas da king pasbul dalan ning siudad sinabi ra karing guardia da ring pasbul dalan, Minta kami king kampu da ring sundalus ning Siria at ala metung mang tau karin subali mu karing pakataling kabayu, asno, at ding tolda ra.

¹¹ Kilisak da ring guardia ning pasbul dalan ing balita angga king miras king palasyu.

¹² At king bengi mu ring ita mibangun ya ing ari at tinipun na la ngan ding opisyal na. Ngana karela, Sabian ku ngeni kekayu nung nanung gawan da kekatamu ding sundalus ning Siria. Balu ra king danupan tamu, inya meko la ban salikut king marangle. Dakpan da katamung mabie kabud linual tamu king kampu ra, at makalub na la kanita king siudad tamu.

¹³ Ngana ning metung karing opisyal, Makamal a Ari, mitubud kayu pung mapilan a lalaki at ipagamit yu la karela ding limang kabayung mitagan ban abalu tamu nung nanu ing milyari karin. Maging mayap a balita king mabilug a Israel nung makapagbalik lang mabie, at nung mate no man mangari na la mu kekatang makatagan king siudad a mate munaman.

¹⁴ Inya memili lang mapilan a lalaki; pepasaken da la karing aduang karwahe at tiburan da la at penabilinan king siasatan da nung nanu ing milyari karing sundalus ning Siria.

¹⁵ Miras la ding tubud angga king Ilug ning Jordan. Kabang maglakbe la ikit da ing imalan at ding kagamitan a likuan da ring sundalus ning Siria uli na ning pamamalagua rang makatakas. Mibalik la ring mituburan at belita ra king ari ing karelang ikit.

¹⁶ Minta la ring memalen na ning Israel king kampu da ring sundalus ning Siria, at kinua ra ngan ing bage likuan da. Inya metupad ing sinabi na ning Ginu king ing metung a pirasung pilak makasali yang metung a takal a mapinung arina o kaya aduang takal a sebada.

¹⁷ Ing mitutukan mag-guardia king pasbul dalan palub king siudad ya ing lalaking mag-asikasu king kailangan na ning ari. Antimo ing sinabi nang propeta Eliseo, medamusak ya at mete inyang delanan de ring dakal a tau.

¹⁸ Mipaltutu itang sinabi nang Eliseo king ariking itang kabukasan ing metung a pirasung pilak makasali yang metung a takal a mapinung arina o kaya aduang takal a sebada.

¹⁹ Oneng e ya meniwala ing lalaking mag-asikasu king ari agyang pang ibuklat ne kanu ning Ginu ing awang ning banua. Inya sinabi nang Eliseo, Akit mu mu rin bukas king mapalyari, oneng e ka makapangan.

²⁰ At iti pin ing mepalyari inyang apandamusak de ring taung daralan king pasbul dalan ning siudad, at mete ya.

8

¹ Nganang sinabing Eliseo king babaing tau Sunem a ima na ning anak a lalaking pepasublian nang mebie, Mako na kayu at ing pamilya mu at lumawe aliwang pituknangan yu uling tikda na ning Ginu ing mika maragul a danup king mabilug a bansa kilub ding pitung banua.

² Memintu ya ing babai king sinabi nang Eliseo a talasuyu ning Ginu. Meko ya at ing pamilya na, at menuknangan la king sakup ning Filistia kilub ding pitung banua.

³ Kalabas da ring pitung banua, mibalik ya king sadia rang tuknangan. Pintalan ne ing ari at pasaup ya ban mibalik yang pasibayu king bale na at gabun.

⁴ King oras namang ita, ing ari at i Gehazi, ing kasaup nang propeta Eliseo, mipagsalita la. Ngana ning ari kang Gehazi, Isalita mu no mo kanaku ding bage makapagmulala a gewa nang Eliseo.

⁵ Kabang istoria neng Gehazi itang mete a pepasublian nang mebie Eliseo, dinatang ya ing babaing ima na ning anak a pepasublian nang mebie Eliseo ban aduan ing saup ning ari a mibalik sana ing bale at ing gabun na. Nganang Gehazi king ari, Makamal a Ari, oyni ing babai at ing anak a pepasublian nang mebie Eliseo!

⁶ Kitnan ne ning ari ing babai nung tutu pin ing sinabi nang Gehazi, at pekibat na king iti katutuan. Inya inaus ne ning ari ing metung karing kayaduangan na at ngana, Gawa kang paralan ban mibalik king babai ing bandi na at pati na ing pupul king gabun na manibat na kanitang meko ya angga na king pamagbalik na ngeni.

⁷ Minta ya i Eliseo king Damasco. Masakit ya kanita i Aring Benhadad ning Siria. Abalitan na ning ari king atyu ya king Damasco i Eliseo, ing talasuyu ning Dios.

⁸ Inya inutusan ne ning ari i Hazael king magdala yang regalu at puntalan ne i Eliseo ban ikutang king Ginu, king kapamilatan nang Eliseo, nung kumayap ya pa.

⁹ Meko ya i Hazael ban makikit kang Eliseo. Migdala yang dakal at miyayaliwang regalu, ing masanting dili king Damasco, at seke na karing apat apulung kamelyu. Inyang akatagpu na ne, ngana kang Eliseo, Tiburan na ku pu ning talasuyu yung i Benhadad a ari ning Siria ban ikutang kekayu nung kumayap ya pa.

¹⁰ Nganang mekibat Eliseo, Mibalik na ka king ari at sabian mu king kumayap ya, oneng pepabalu na kanaku ning Ginu king mate ya mu rin.

¹¹ At linawe neng maratnang Eliseo i Hazael angga king e ya mipaindatun. Kaybat na nita, tinulu ing lua nang Eliseo.

¹² Kitnan neng Hazael, Obat kikiak kayu? Nganang mekibat Eliseo, Uling balu ku ing kasiran a gawan mu karing memalen na ning Israel. Panyilaban mu la ring lugal dang pakakuta, pamaten mu la ring karelang kayanakan a lalaki, ipaspas mu la king gabun ding anak dang mangalati at laslasan a atian ding babaing mabuktut.

¹³ Nganang Hazael, Makananu kung agawa yang bageng yan ngening e na ku man mayupaya? Pekibat nang Eliseo, Pepabalu na kanaku ning Ginu king maging ari na ka ning Siria.

¹⁴ Likuan neng Hazael i Eliseo at mibalik ya king panginuan nang i Aring Benhadad. Nganang mengutang ning ari, Nanu ing sinabi na kekang Eliseo? Pekibat na, Siguradu kayu kanung kumayap.

¹⁵ Kabukasan, kinangwa yang ulas i Hazael at sinoso ne king danum. Kaybat, tekap ne king lupa na ning ari at mete ya. I Hazael ya ing menalili kang Benhadad bilang ari na ning Siria.

¹⁶ Inyang lima neng banuang mag-ari king Israel i Joram a anak nang Ahab, i Jeoram a anak nang Jeosafat meging ari ya king Juda.

¹⁷ Atlu yang pulu't aduang banua kanita at mig-ari ya king Jerusalem kilub ding walung banua.

¹⁸ Pekiapusan na ing e mayap dang ugali ring meging ari ning Israel antimo i Ahab a katuangan na uling ayasawa ne ing anak na. Gewa na itang e mayap king akakit na ning Ginu.

¹⁹ Makanyan man, e ne bigsak ning Ginu ing Juda alang-alang king talasuyu nang i David, uling pengaku na king papanatilian neng mag-ari ing pamilya na kabang panaun.

²⁰ King panaun nang Jeoram kanita ya mig-rebeldi ing Edom laban king Israel at mibili yang sarili nang ari.

²¹ Inya minta ya i Jeoram king Zair a kayabe da ring karu nang panggera at ding pekapun da. Oneng ding Edomita peligiran da la, inya tinakas la itang kabengian at minuli la bale ring sundalus na.

²² Manibat na kanita mikawani ne ing Edom king Juda. King panaun mu ring ita ya mig-rebeldi ing Libna.

²³ Makasulat king Istoria da ring Ari ning Juda ing heganaganang depat nang Jeoram.

²⁴ Mete ya i Jeoram at mikutkut ya king kutkutan da ring ari king Siudad nang David. Ing anak nang i Ahazia ya ing menalili bilang ari.

²⁵ Inyang labing adua neng banuang mag-ari king Israel i Joram a anak nang Ahab, i Ahazia a anak nang Jeoram meging ari ya king Juda.

²⁶ Adua yang pulu't aduang banua kanita at mig-ari ya king Jerusalem kilub ning pabanua. I ima na ya i Atalia a anak nang Aring Ahab at ingkung ne i Aring Omri ning Israel.

²⁷ Pekiapusan na ing e mayap nang ugali ning pamilya nang Ahab a ingkung na. Gewa na itang e mayap king akakit na ning Ginu antimo ing gewa na ning pamilya nang Ahab a katuangan na uling ayasawa ne ing metung karing anak na.

²⁸ Mekisangga ya i Aring Ahazia kang Aring Joram ning Israel inyang lisuban de i Aring Hazael ning Siria. Milaban la king Ramot Gilead at asugat de ring sundalus ning Siria ing Aring Joram.

²⁹ Mibalik ya king Jezreel ban paulu ne ing sugat na. Delawan neng Ahazia a anak nang Jeoram inyang abalitan neng mika kapanamdaman ya.

9

¹ Inaus neng propeta Eliseo ing metung karing kayanakan a propeta at ngana, Abe, gayak ka at munta ka king Ramot Gilead. Dalan me ing lulanan a ating larung olibo.

² Potang miras na ka karin, panintunan me i Jehu a anak nang Jeosafat at apu nang Nimsi. Lapitan me at ilaut karing kayabe na at ituki me king metung a kuartu.

³ Kaybat, itugtug mu ing larung olibo king buntuk na at sabian mu, Oyni ing pasabi na ning Ginu: Lalanian da ka bilang ari ning Israel! Kaybat na nita, mako na kang agad.

⁴ At minta ya king Ramot Gilead ing kayanakan a propeta.

⁵ Karas na karin, ikit na lang magpulung ding pakalukluk a opisyal da ring sundalus. Ngana karela, Atin ku pung buring sabian king pekapun. Nganang mekibat Jehu, Ninu ing buri mung akasabi kekami? Ngana ning propeta, Ikayu pu.

⁶ Tinalakad ya i Jehu at linub la ilang adua king bale. Kanita tigtug na ning propeta ing larung olibo king buntuk nang Jehu at ngana, Oyni ing pasabi na keka ning Ginu, ing Dios ning Israel: Lalanian da ka bilang ari ning balen kung Israel.

⁷ Paten me ing pamilya nang Ahab a kekang panginuan ban makayablas ku kang Jezebel, ing pepapate karing propeta ku at karing talasuyu ku.

⁸ Matda ya ing mabilug nang pamilyang Ahab. Paten ku la ding lalaking ating pangataid kang Ahab, matua la man o anak.

⁹ Gawan ku king pamilya na itang depat ku king pamilya nang Jeroboam a anak nang Nebat ning Israel at king pamilya nang Baasa a anak nang Ahiya ning Israel.

¹⁰ King Jezreel de paglapakan at kanan ding asu i Jezebel, inya e ya milibing man. Kaybat nang asabi iti, biklat ne ing pasbul at memalagua yang meko.

¹¹ Inyang mibalik ya i Jehu karing kayabe nang opisyal, ngarang kinutang, Ating problema? Nanu ing buri na keka nitang sira buntuk a taung ita? Nganang mekibat, Balu ye ing taung ita at ing pamagsalita na.

¹² Ali mi, ngarang sinabi, sabian mu kekami ing sinabi na keka. Nganang Jehu, Ini ing sinabi na kanaku, Oyni ing pasabi ning Ginu: Lalanian da ka ban maging ari na ka ning Israel.

¹³ Inyang dimdam da iti agad da lang leko ding balabal da at lidlad da la king daralpakan nang Jehu. Tiniupan da la ring trumpeta at saka la kinulisak, Luid ya ing Aring i Jehu!

¹⁴ Migplanu ya i Jehu a anak nang Jeosafat at apu nang Nimsi laban kang Aring Joram a kayabe ra kanita ring Israelitang magdipensa king Ramot Gilead laban kang Aring Hazael ning Siria.

¹⁵ Atyu ya kanita i Aring Joram king Jezreel ban paulu ne ing sugat a bunga na ning pamakilaban na kang Aring Hazael ning Siria. Nganang Jehu, Nung tune ra kayung kapanalig, ala kayung paintulutan metung man a makalual king Ramot Gilead ban muntang mamalita king Jezreel.

¹⁶ Kaybat na nita, sinake ya king karwahe na at minta ya king Jezreel. Atyu ya pa kanita king Jezreel i Aring Joram at paymawi ya. Karin ne dinalo ning Aring Ahazia ning Juda.

¹⁷ Ikit neng daratang ning guardiang atyu king tore ning Jezreel i Jehu at ding tauan na. Nganang kinulisak ning guardia, Atin kung akakit mapilan a taung daratang! Pekibat nang Joram, Mitubud kang sundalus a sake king kabayu ban ikutang karela nung kapayapan ing saria ra.

¹⁸ Meko ya ing mituburan ban saganan na la. Ngana inyang akatagpu ne i Jehu, Pakutang ning ari nung kapayapan ing saria yu. Nganang mekibat Jehu, E ka makialam! Munta ka kagulutan ku. Ngana nitang guardiang atyu king tore, Akatagpu na na la ning tubud tamu oneng e ya pa magbalik keti!

¹⁹ Inya mitubud yang pasibayu at kitang nia naman ning tubud itang pakutang na ning ari. Oneng ing pekibat nang Jehu, E ka makialam! Munta ka kagulutan ku.

²⁰ Pasibayu yang kinulisak ing guardiang atyu king tore. Ngana, Akatagpu na na la ning tubud oneng e ya pa magbalik! Balamu sira ya buntuk ing manimuna karing taung daratang at mabilis yang papulaying kabayu a antimo i Jehu a anak nang Nimsi.

²¹ Kanita nganang Joram, Isadia ye ing karwahe ku. At inyang makasadia ne ing karwahe sinake ya i Aring Joram at sekian nia namang Aring Ahazia ing karwahe na ban saganan de i Jehu. Akatagpu re king marangle a bandi nang Nabot.

²² Nganang kinutang Joram kang Jehu, Kapayapan ing saria mo? Pekibat nang Jehu, Makananung mika kapayapan ngening angga ngeni atin pang pamanyamba karing idolo at pamangulam a panimunan nang ima mung i Jezebel?

²³ Inya binalik neng Joram ing karwahe ban tumakas at agnan nang kilisak, Ahazia, iti kataksilan!

²⁴ Kinua neng Jehu ing pana at ing paslu na at pinana ne king anggang sikanan na i Joram at mituran ya king gulut. Tinaglus ya ing paslu king pusu nang Joram at milugmuk ya king karwahe na.

²⁵ Nganang Jehu kang Bidkar a kayabe na king karwahe, Ibuat me at iyatsa king marangle nang Nabot ning Jezreel. Atatandanan mu inyang miyabe kata king gulut ning karwahe nang Ahab a tata na kanitang sinabi na ning Ginu ing anti kanyan laban kang Ahab:

²⁶ Napun, ikit ku ing pamakamate kang Nabot at karing anak nang lalaki. At king lugal a iti karin da ka singilan. Inya ibuat me ing bangke nang Joram at iyatsa king marangle nang Nabot ban matupad ing sinabi na ning Ginu.

²⁷ Inyang ikit nang Aring Ahazia ing milyari kang Aring Joram, tinakas yang papunta king Bet Hagan. Oneng tegal neng Jehu at nganang kinulisak, Paten ya naman! Asugat de ring tauan na at milugmuk ya i Ahazia king karwahe na a paukiat na king dalan ning Gur malapit king balen ning Ibleam. Ikua nang miras king siudad ning Megido at karin ya mete.

²⁸ Kinua re ding opisyal na ing bangke na at seke king karwahe ban iyuli king Jerusalem. Kitkut de king kutkutan da ring ari king Siudad nang David.

²⁹ Labing metung neng banuang mag-ari king Jerusalem i Joram a anak nang Ahab inyang mig-ari ya i Ahazia king Juda.

³⁰ Kaybat na nita, mibalik ya i Jehu king Jezreel. Inyang abalu na iting Jezebel, pinintahan na la ring pilatan da ring mata na, inayus ne ing buak na, at saka ya tinando king awang.

³¹ Kitnan ne i Jehu inyang lulub ne king pasbul dalan ning siudad. Ngana, Kapayapan ing saria mo Zimri a mekamate king aring kekang panginuan?

³² Tinalanga ya i Jehu at nganang kinulisak, Ninu ing kakampi ku? Ninu? Tinando la ring adua o atlung lalaking kapun.

³³ Ngana karelang Jehu, Inakbag ye ing babaing yan! At nikbag de i Jezebel. Tinalamsik ing daya na king pader at karing kabayu. Delanan de ring kabayu at karwahe na ning grupu nang Jehu ing katawan nang Jezebel.

³⁴ Linub ya i Jehu at mengan ampon minum. Kaybat sinabi na, Ikayu na ing bala king babaing yan a misumpa. Ikutkut ye uling anak yang ari.

³⁵ Inyang lual la ring miyutusan ban ikutkut i Jezebel, ala lang disnan nung e mu ing bungu na, ing bitis na, at ing gamat na.

³⁶ Mibalik la kang Jehu at sinabi ra ing ikit da. Kanita nganang Jehu, Iti ya ing sinabi nang matupad ning Ginu, inyang migsalita ya king kapamilatan na ning talasuyu nang i Elias: Kanan de ring asu king Jezreel ing katawan nang Jezebel.

³⁷ Misalbag yang anting dinat ning animal ing bangke na, inya ala metung mang makakilala king ya i Jezebel.

10

¹ Atin yang pitung pulung anak a lalaki i Ahab king Samaria. Ginawa yang sulat i Jehu at peparala yang kopia karing pamuntuk da ring siudad, karing pikabaluan a memalen, at karing manibala karing anak nang Ahab. Ngana ning sulat:

² Silatanan da kayu uling ikayu ing manibala karing anak na ning aring kekayung panginuan. At atin kayung kabayu, karwahe, at sandata subali pa king makabakud yang pader ing kekayung siudad.

³ Ngeni, pilinan ye ing pekamayap karing anak ning kekayung panginuan, at ya ing ilukluk yu king tronu bilang kayalili nang tata na. Kaybat na nita, idipensa ye nanuman ing malyari.

⁴ Oneng liban na la ning takut ding pamuntuk ning Samaria. Ngara, Nung e re malyaring sambutan ding aduang ari, itamu pa kaya?

⁵ Inya peparala yang amanu kang Jehu ing talapamahala ning palasyu, ing gobernador ning siudad, ding pikabaluan a memalen, at ding manibala. Ngana ning mensahi: Talasuyu yu kami at pamintuan mi ing nanumang iyutus yu. E mi ya tulutan maging ari ing ninuman, inya gawan yu itang minamayap yu.

⁶ Silatanan na lang pasibayung Jehu. Ngana ning kaduang sulat, Nung tune kayung makapanig kanaku at makasadiang mamintu king nanumang iyutus ku, tabtaban yu la batal ding anak nang Aring Ahab at idala yu la ding buntuk da kanaku bukas king Jezreel king anti kaniting oras. Atyu la king pamaningat da ring pikabaluan a memalen ning Samaria ding pitung pulung lalaking anak nang Aring Ahab.

⁷ Inyang tinggap de at abasa ing sulat nang Jehu, tibtab da la batal ding pitung pulung anak. Binili da la king basket ding buntuk da at pepadala da la kang Jehu a atyu kanita king Jezreel.

⁸ Dinatang ya ing tubud at ngana kang Jehu, Dela da na la ken ding buntuk da ring anak nang Aring Ahab. Kanita inutus nang Jehu, Salesen yu la king aduang tumpuk at ibili ketang pasbul dalan ning siudad; paburen yu la karin angga bukas abak.

⁹ Kabukasan, linual ya i Jehu; makatalakad ya arapan da ring tau. Ngana karela, Ala kayung kasalanan king milyari. Aku ing migtangka laban king Aring Joram at ing mekamate. Ninu ring mekamate karen?

¹⁰ Sukat yung abalu king ala yang sinabi ing Ginu laban karing lahi nang Ahab a e mo sa metupad. Tiparan na ning Ginu itang pengaku na king kapamilatan na ning talasuyu nang i Elias.

¹¹ Inya pete na lang Jehu ding kamaganak nang Ahab a manuknangan king Jezreel. Pete na la naman ding opisyal nang Ahab, ding kakaluguran na, at ding pari. Ala yang tigan mabie.

¹² Kaybat na nita, meko ya i Jehu at minta ya king Samaria. King paglakad na ketang lugal a ausan dang Kampu ding Pastul,

¹³ akasalubung na la ring mapilan karing kamaganak nang Aring Ahazia ning Juda. Nganang kinutang karela, Ninu ikayu? Pekibat da, Kamaganak na kaming Ahazia. Papunta kami king Jezreel ban ibie mi ing kagalangan karing anak ning ari at ing imang reyna.

¹⁴ Nganang minutus Jehu karing tauan na, Dakpan yu lang mabie! Dekap da la at pete ketang lele na ning kulkul ning Kampu ding Pastul. Apat lang pulu't adua ring pete ra; alang mitagan mabie.

¹⁵ Kalako nang Jehu karin, akasalubung ne i Jonadab a anak nang Rekab. Inatu neng Jehu at kaybat kitnan ne. Ngana, Kalupa da ka kaya kapanamdaman at makasadiang sumaup kanako? Pekibat nang Jonadab, Wa. Kanita nganang Jehu, Nung makanyan, iduang me ing gamat mu kanaku. Diwang ne ing gamat na at inalalayan neng Jehu ban makasake ya king karwahe.

¹⁶ Nganang Jehu, Tuki ka kanaku ban akit mu nung nu anti karagul ing katapatan ku king Ginu. At miyabe lang miglakbe makasake king karwahe na.

¹⁷ Inyang miras na la Samaria, pete na la ngan Jehu ding kamaganak nang Ahab; ala yang tigan mabie. Iti ya ing katuparan na ning sinabi na ning Ginu kang Elias.

¹⁸ Kaybat na nita, tinipun na lang Jehu ding memalen na ning Samaria at ngana karela, Ditak mung kasuyuan ing binie nang Ahab kang Baal, oneng aku maragul ing isuyu ku.

¹⁹ Ausan yu la ngan ding propeta nang Baal, ding pari na, at ding sasamba kang Baal. Ala kayung kakalinguan metung man karela uling miyain kung maragul a ain-sakripisyu kang Baal. Paten ya ing ninumang e datang. Iti paralan nia mung Jehu uling buri na la ngang paten ding sasamba kang Baal.

²⁰ Ngana pang minutus, Mitatag kayung metung a kapulungan para king kapanyamban kang Baal. At memintu la.

²¹ Pepabalu re ing utus nang Jehu king mabilug a Israel. Dinatang la ring sasamba kang Baal; ala metung man a e dinalo. Misisiksikan la king templo nang Baal; mitmu yang tau.

²² Nganang Jehu king talaingat imalan a susulud king templo, Dinan mu lang imalan a isulud ding sasamba kang Baal.

²³ Kaybat na nita, linub ya king templo nang Baal i Jehu at i Jonadab a anak nang Rekab, at nganang Jehu karing taung atyu karin, Siguraduan yung ala metung man a sasamba king Ginu ing atyu keti; bukud mung ding sasamba kang Baal ilang sukat atyu.

²⁴ Kaybat na nita, linub ya i Jehu at i Jonadab ban miyain ain-sakripisyu at ain-a-durulukan. Bayu iti, atin yang tilduan walung pulung guardia king lual ning templo. Nganang minie panabilin karela, Ala kayung paburen a makatakas karing taung pabante ku kekayu. Paten ke ing ninumang magpabaya kekayu.

²⁵ Inyang ayari na nang Jehu ing pamiyain karing ain, nganang sinabi karing guardia at opisyal, Lungub na kayu at gisanan yu lang paten. Ala kayung paburen makatakas! Inya linub la at pete do ngan king kapamilatan da ring espada ra, at inugse king lual ding bangke. Kaybat, minta la king kakilubkiluban ning templo nang Baal

²⁶ at liwal de ing sagradung asias at silaban de.

²⁷ Inya lesak de ing sagradung asias at ing templo nang Baal. Kaybat na nita, gewa reng kasilyas angga na ngening aldong iti.

²⁸ King anti kanitang paralan na leko Jehu ing pamanyamba kang Baal king Israel.

²⁹ Makanyan man, e na gilutan Jehu ing e mayap a gewa nang Jeroboam a anak nang Nebat a pepasari king pangababad na king pamikasala ning Israel king kapamilatan ning pamanyamba karing gintung biserung baka karin king Betel at Dan.

³⁰ Ngana ning Ginu kang Jehu, Uli na ning gewa mung masalese ing matulid king akakit ku at atuparan mu ing heganaganang buri kung malyari kang Ahab at king pamilya na, ding anak mu ila ring lukluk king tronu ning Israel angga king kapat a lahi.

³¹ Oneng e na pemintuan Jehu king mabilug nang pusu ing kautusan ning Ginu, ing Dios ning Israel. E na kewanian ing e ustung dapat nang Jeroboam a meging sangkan ning pangababad na ning Israel king pamikasala.

³² Karing dinatang a panaun, pegumpisan neng leti ning Ginu ing gabun a sasakupan ning Israel. Simbut na lang Aring Hazael ning Siria ding Israelita at sekupan ding lugal da

³³ manibat king aslagan ning Jordan angga king Aroer ning Ilug ning Arnoning mabilug a Gilead at Bashan nung nu la manuknangan ding tribu nang Gad, Ruben, at ning dane Aslagan ning Manase.

³⁴ Makasulat king Istoria da ring Ari ning Israel ing heganaganang depat nang Jehu.

³⁵ Mete ya at mikutkut king Samaria. Ing anak nang i Jeoahaz ya ing menalili bilang ari.

³⁶ Mig-ari ya i Jehu king Israel kilub ding aduang pulu't walung banua.

11

¹ Inyang abalitan nang Atalia ing pete re ing anak nang i Aring Ahazia, minie yang utus a paten la ngan ding kamaganak na ning pamilya ning ari ning Juda.

² Oneng kinua neng Jeoseba, ing anak nang Aring Jeoram at kasing-ibpa nang Ahazia, i Joas a anak nang Ahazia at sinese ne king metung nang kuartu ning Templo. Karin ne selikut ban e ne akit Atalia, inya e ya mepate i Joas.

³ Karin ya menatili i Joas at ing maningat nang i Jeoseba kilub ding anam a banua kabang i Atalia ya ing reynang mamahala king kayarian.

⁴ Inyang miras na ing kapitung banua, pepayaus na lang Jeoiada ding opisyal da ring sundalus a guardia ning ari at ding guardia ning palasyu. Sinabi na karela ing mitipun la king Templo nung nukarin na la ayagkat kayabe ning taimtim a pangaku king gewa nang planu. Kaybat na nita, pepakit ne karela i Joas, ing anak nang Aring Ahazia.

⁵ Nganang minie utus karela, Potang gampanan yu ing kekong katungkulan king Aldo ning Sabbath, banten ne ning katlung dake kekayu ing palasyu,

⁶ talakad yang magbante king pasbul dalan ning Shur ing tutuking katlung dake, at ing metung pang katlung dake kagulutan da ring aliwang guardia.

⁷ Ding aduang grupu a e makatutuk king Aldo ning Sabbath ila ring magbante king Templo ban ingatan ya ing ari.

⁸ Kayabe da ring makabagut yung espada banten ye i Aring Joas. E ye lalakuan; tukian ye nu ya man munta. Paten ya ing ninumang lumapit kekayu.

⁹ Memintu la ring opisyal king inutus nang Jeoiada. Inya tinipun na la ning metung at metung karela ding tauan nadetang makatutuk gusal neng Aldo ning Sabbath at detang ali.

¹⁰ Binie na lang Jeoiada karing opisyal ding tandus at kalasag a bandi nang Aring David. Makasikap la ring sandata king Templo.

¹¹ Kaybat na nita, pinuestu na la ring sundalus a pakasandata king makapadurut ning arap ning Templo ban ingatan ya ing ari.

¹² Linual neng Jeoiada ing anak ning ari at pinutung ne ing korona. Kaybat binie ne ing libru ning kautusan, tigtugan neng larung olibo at pisiag neng ari. Memalakpak la ring tau at ngarang kinulisak, Luid ya ing ari!

¹³ Inyang dimdam nang Atalia ing inge da ring guardia at ding tau, pintalan na la king Templo ning Ginu.

¹⁴ Miglalawe ya at ikit ne ing ari a makatalakad lele ning asias, antimo ing meging kaugalian. Atyu la lele ning ari ding opisyal at ding talatiup karing trumpeta. Magsaya la ring heganaganang memalen at tutiupan da la ring karelang trumpeta. Ginabak nang Atalia ing susulud nang imalan uli na ning sukal ning lub na at nganang kinulisak, Taksil! Taksil kayu ngan!

¹⁵ Nganang minutus ning paring i Jeoiada karing opisyal a ating tia dinalan a sundalus, Ilual ye ing babaing ita king pilatan da ring aduang hilera da ring guardia, at paten ya ing ninumang magtangkang magligtas kang Atalia. Sinabi nang Jeoiada ita uling e ne buring paten da i Atalia king kilub ning Templo.

¹⁶ Inya dekap de at dela king palasyu at pete re ketang lugal a ausan dang Pasbul dalan ding Kabayu.

¹⁷ Kaybat na nita, pepagawan neng kasunduan Jeoiada ing ari at ding memalen na king ila ngan maging memalen na la ning Ginu; ginawa ya namang kasunduan ing ari at ding memalen.

¹⁸ Kaybat, minta la ding memalen king templo nang Baal at lesak de at pemalbal ding rebultu. Pete re i Matan, ing pari nang Baal, king arap da ring altar. Mitalaga yang guardia i Jeoiada king Templo ning Ginu.

¹⁹ Tiki na la ring opisyal da ring grupu a ating tia dinalan a sundalus, ding guardia ning ari, at ding guardia ning palasyu, at miyabe-abe reng liwal ing ari king Templo ning Ginu at inatad de king palasyu. Dinalan ya i Joas ketang Pasbul dalan da ring Guardia at linukluk ya king tronu.

²⁰ Migsaya la ring heganaganang memalen king mitmung tula, at mipayapa ya ing siudad uling pete re king palasyu i Atalia.

²¹ Meging ari ne ning Juda i Joas inyang idad yang pitung banua.

12

¹ Pitu neng banuang mag-ari i Jehu ning Israel inyang meging ari ya i Joas king Juda. At mig-ari ya i Joas king Jerusalem kilub ding apat apulung banua. I ima na ya i Zibia a tau Beerseba.

² Katanggap-tanggap ngan king akakit na ning Ginu ing gewa nang Aring Joas uling tiruanan neng Jeoiada, ing pari.

³ Oneng e na la leko ding altar a atyu karing mangatas a lugal. Inya sindu ra karin ding tau ing pamiyain ain-sakripisyu at dinuluk lang insenso.

⁴ Inaus na lang Joas ding pari at ngana karela, Tipunan yu la ring salaping binie da ring tau bilang sagradung ain da king Templo ning Ginuding salaping ibat king buis a pansarili at ding kusang lub a inain da.

⁵ Tanggapan yu la at ila ring salaping gamitan yu king pangalarin na ning Templo ning Ginu.

⁶ Oneng ala la pang apalarin ding pari king Templo agyamang miras na ing aduang pulu't atlung banuang pamag-ari nang Joas.

⁷ Inya pepayaus neng Aring Joas i Jeoiada, ing pamuntuk da ring pari at ding aliwa pang pari. Nganang kinutang karela, Obat e yu pa apalarin ing sira king Templo? Inya manibat ngeni e na kayu malyaring tanggap at talan salapi. Intriga yu la ban magamit la king pangalarin na ning Templo.

⁸ Neyunan da iti ding pari king e da la tanggapan ding salaping babie da ring tau at ing e na la mangasiwa king pangalarin na ning Templo.

⁹ Kaybat na nita, kinangwa yang baul i Jeoiada at bisbusan ne ing takap na. Binili ne ing baul lele ning altar, ketang dane wanan palub king Templo. Ding paring makatutuk magbante karin king pasbul ila ring mibibili karing salaping darala da ring tau para king Templo ning Ginu.

¹⁰ Potang akit deng mitmu na ing baul, datang ne man ing kalihim ning ari at ing Pekapun ding Pari ban lasawan da la at timbangan ding salaping melikum para king Templo ning Ginu, at idatuk da la karing suput.

¹¹ Kaybat dang alista ing alaga ra ding salapi, ibie da la karing taung mangasiwa king pamaglarin ban pamayad karing kalpinteru, karing mangontrata,

¹² karing kanteru, karing manabas batu ampon manialing materialis para king pangalarin na ning Templo, at king aliwa pang gastus.

¹³ Alang megamit karing salapi para pamayad karing megawang palangganang pilak o sipit para karing sulu ning templo o silyo o kopa o trumpeta o nanumang kasangkapan a pilak o gintu.

¹⁴ Megamit la ngan ding salapi king pamamayad karing magobra at para king materialis a kailangan king pangalarin na ning Templo.

¹⁵ E la meniawad kwenta karing taung mengasiwa king pamamayad karing magobra uling megobra la king mitmung katapatan.

¹⁶ E da la bildug king baul ding ain tungkul king pamanatbus at ding ain-para-king-pangapatawaran-ning-kasalanan uling mangaintulid la karing pari.

¹⁷ King panaun a ita lisuban ne at sinakup ning Aring Hazael ning Siria ing Gat at kaybat ing Jerusalem naman.

¹⁸ Kinua na la ngang Aring Joas ding sagradung bage a telaga ra king Ginu ding makatua nang i Jeosafat, Jehoram, at Ahazia, ding ari na ning Juda ampon ding regalung ya mismu ing minie at ing heganaganang gintu king kaban ning Templo at ning palasyu. Pepabie na ngan kang Aring Hazael ning Siria at meko ne kanita king Jerusalem at ding sundalus na.

¹⁹ Makasulat king Istoria da ring Ari ning Juda ing heganaganang gewa nang Aring Joas.

²⁰ Misapakat la ring opisyal laban kang Aring Joas at pete re king Bet-milo, ketang dalan papunta Sila.

²¹ Ding opisyal a mekamate kang Aring Joas ila ri Jozacar a anak nang Simeat at i Jeozabad a anak nang Somer. Mikutkut ya i Joas king kutkutan da ring ari king Siudad nang David. Ing anak nang i Amazia ya ing menalili bilang ari.

13

¹ Inyang kaduang pulu't atlung banua na ning pamag-ari nang Joas a anak nang Ahazia king Juda, kanita ne man meging ari king Israel i Jeoahaz a anak nang Jehu, at mig-ari ya king Samaria kilub ding labing pitung banua.

² E mayap ing gewa na king akakit na ning Ginu uling tikian na ing e mayap nang ugaling Aring Jeroboam a anak nang Nebat. Inya tiki ne king pamikasala ing Israel. E ya kinawani king e mayap a dapat.

³ Inya mibua ing mua ning Ginu laban king Israel, at pepailalam na la kilub ning makabang panaun king upaya nang Aring Hazael ning Siria at kang Benhadad a anak na.

⁴ Menalangin ya i Jeoahaz king Ginu at pekiramdaman ne ning Ginu uling ikit na ing labis a pamanalipustang gagawan na ning ari ning Siria.

⁵ Mitubud yang metung a manimuna ing Ginu at mikabus la king bigsikan ning Siria. Inya antimo ing sadia pasibayu lang mibiebie king kapayapan ding Israelita.

⁶ Oneng e la ginulut karing kasalanan nung nu na la tiki ning Aring Jeroboam. Sindu ra ing e ustung gagawan da at menatili ya king Samaria ing rebultu ning diosang i Asera.

⁷ Ala yang mitagan a sundalus i Jeoahaz subali mu karetang limang pulung sundalus a pakakabayu, apulung karung panggera, at apulung libung sundalus, uling lesak na la ning ari ning Siria at demusak anting alikabuk.

⁸ Makasulat king Istoria da ring Ari ning Israel ing heganaganang gewa nang Jeoahaz at pati na ing katapangan na.

⁹ Mete ya at mikutkut king Samaria, at ing anak nang i Jeoas ya ing menalili bilang ari.

¹⁰ Inyang katlung pulu't pitung banua na ning pamag-ari nang Joas ning Juda, kanita ya meging ari king Israel i Jeoas a anak nang Jeoahaz, at mig-ari ya king Samaria kilub ding labing anam a banua.

¹¹ E munaman mayap ing depat na king akakit ning Ginu. Tikian na ing e mayap nang alimbawang Jeroboam, ing aring menimuna king pangababad na king kasalanan ning Israel.

¹² Makasulat king Istoria da ring Ari ning Israel ing heganaganang gewa nang Jeoas pati na ing katapangan a pepakit na king pamakilaban na kang Aring Amazia ning Juda.

¹³ Mete ya i Jeoas at mikutkut ya king kutkutan da ring ari ning Samaria, at ing anak nang i Jeroboam a Kadua ya ing menalili bilang ari.

¹⁴ King panaun a ita, mika sakit ya i propeta Eliseo at grabi ing kabilian na. Dinalo ne ning Aring Jeoas ning Israel. Tatang, tatang ko! nganang menangis ning ari. Ika ing mayupayang mimingat ning Israel!

¹⁵ Nganang Eliseo, Kuma kang pana at mapilan a paslu. Memintu ya ing Aring Jeoas.

¹⁶ Kaybat, nganang Eliseo, Talnan me ing pana. Memintu ya ing ari at timpak na lang Eliseo ding gamat na king gamat na ning ari.

¹⁷ Kanita nganang Eliseo, Ibuklat me ing awang bandang aslagan, king Siria. Memintu ya ing ari. Kaybat nganang Eliseo, Ibugnus me ing paslu. Memintu ya ing ari. Kanita nganang propeta Eliseo, Ita ing paslu ning tagumpe ning Ginu, ing paslu ning tagumpe laban king Siria. Lubus mu lang sambutan ding sundalus na ning Siria king Afek potang makilaban ka karela.

¹⁸ Kaybat, nganang Eliseo king ari, Kuanan mu la ring aliwang paslu at panan me ing gabun. Memintu ya ing ari; pinana neng atlung besis ing gabun at kaybat tinuknang ne.

¹⁹ Inya mimua ya i Eliseo at ngana king ari, Sukat lima o anam a besis mung pinana ing gabun ban lubus mu lang sambutan ding sundalus ning Siria, oneng ngeni atlung besis mu lang sambutan.

²⁰ Mete ya i Eliseo at kitkut de. Balang banua grupu-grupu lang Moabita ding lulusub king bansa ning Israel.

²¹ Misan a aldo, kabang mangutkut lang mete ding Israelita, ikit deng lulusub ing metung karing grupu da ring Moabita. Inya inatsa da nia mu ing bangke king kutkutan nang Eliseo, at kaybat milayi na la. Mebie ya at tinalakad inyang digpa ya ing bangke karing butul nang Eliseo.

²² Pepasakitan neng Aring Hazael ning Siria ing Israel king kekaban na ning pamag-ari nang Jeoahaz.

²³ Oneng meging malunusan ya at maganaka karela ing Ginu uli na ning kasunduan na kang Abraham, Isaac, at Jacob. E na peintulut ing magisan lang mate, inya sinaupan na la; e na la kelinguan angga ngeni.

²⁴ Inyang mete ne i Aring Hazael ning Siria, ing anak nang i Benhadad ing menalili.

²⁵ Mekilaban ya i Aring Jeoas ning Israel laban kang Benhadad at atlung besis neng simbut. Inya abawi na lang Jeoas ding siudad ning Israel a sekupan nang Hazael inyang panaun na ning pamag-ari nang Jeoahaz a tata nang Jeoas.

14

¹ King kadua nang banua ning pamag-ari nang Jeoas a anak nang Jeoahaz king Israel, kanita ne man mig-ari king Juda i Amazia a anak nang Joas.

² Adua yang pulu't limang banua inyang mag-ari ya, at mig-ari ya Jerusalem kilub ding aduang pulu't siam a banua. I ima na ya i Jeoadin ning Jerusalem.

³ Gewa na itang katanggap-tanggap king akakit na ning Ginu, agyang e na kalupa ning gewa na ning makatua nang i David. Tikian na itang gewa nang Joas a tata na.

⁴ E na la pepalako ding altar da ring paganu a atyu karing mangatas a lugal, inya sindu da ring tau ing pamiyain ain-sakripisyu at ing pamanduluk insenso.

⁵ Inyang matatag na ing pamag-ari na, pepapate na la ring opisyal a mekamate king ari a tata na.

⁶ Oneng e na la pepapate ding anak da uling tikian ne itang kautusan a atyu king Kautusan nang Moises. Anti ya kaniti: E la sukat papaten ding pengari uli da ring kasalanan ding anak ni papaten ding anak uli da ring kasalanan ding pengari. Ing paten ya mismu ing ginawa king kasalanan.

⁷ Mekapate yang apulung libung sundalus a Edomita i Amazia karin king Kapatagan ning Asin at abihag ne ing Sela. Inaus ne iting Jokteel, ing lagyu na angga ngeni.

⁸ Kanita peparala yang tubud i Amazia kang Aring Jeoas ning Israel ban amunan ne king labanan. Ngana, Ikata naman ing milaban ngeni.

⁹ Nganang peparalang pakibat Aring Jeoas ning Israel kang Amazia ning Juda, Peparala yang amanu king tanaman a sedro ing tanaman a suksuk king Bunduk ning Lebanon. Ngana, Ibie me ing anak mung dalaga king anak kung baintau ban maging asawa ne. Oneng ating malyap a animal a dinalan at demusak ne ing tanaman a suksuk.

¹⁰ Simbut mia mu ing Edom at ngeni meging palalu na ka. Sukat na kang tumula king tagumpe kimtan mu; e na ka sana lulual king bale mu. E na ka sana manintun pang basaggulu a maging sangkan na ning pangabagsak mu at ning Juda.

¹¹ Oneng e na pinsinan Amazia, inya linusub ya i Aring Jeoas at ding sundalus na. Milaban la king Bet Semes ning Juda.

¹² Mesambut la ring sundalus nang Aring Amazia ning Juda karing sundalus na ning Israel, inya minuli ya ing metung at metung karing sundalus king sarili nang tuknangan.

¹³ Abihag neng Aring Jeoas i Amazia at kaybat lisuban ne ing Jerusalem. Digsa ne ing pader na ning siudad manibat king Pasbul dalan ning Efraim angga na king Pasbul dalan ning Suluk a ating sukad aduang dalan a yarda.

¹⁴ Kinua na ngan ing heganaganang gintu at pilak, at ding kasangkapan king Templo ning Ginu at itang king kaban ning palasyu, at kaybat inuli na ngan king Samaria. Migdala ya namang bihag.

¹⁵ Makasulat king Istoria da ring Ari ning Israel ing heganaganang gewa nang Jeoas pati na ing katapangan a pepakit na inyang mekilaban ya kang Aring Amazia ning Juda.

¹⁶ Mete ya i Jeoas at mikutkut ya king kutkutan da ring ari king Samaria. Ing anak nang i Jeroboam a Kadua ya ing menalili bilang ari.

¹⁷ Inyang mete ya i Aring Jeoas ning Israel, mebie ya pang labing limang banua i Aring Amazia ning Juda.

¹⁸ Makasulat king Istoria da ring Ari ning Juda ing heganaganang gewa nang Amazia.

¹⁹ Ating misapakat king Jerusalem a paten ya i Amazia, inya tinakas yang minta king Lakis. Oneng tikian de karin at pete re.

²⁰ Seke re king kabayu ing bangke na ban ibalik king Jerusalem, at kitkut de king kutkutan da ring ari king Siudad nang David.

²¹ Labing anam yang banua kanita i Uzzia. Kinua de ring memalen na ning Juda at ya ing gewa rang ari bilang kayalili nang Amazia a tata na.

²² Ya ing pepatalakad pasibayu king Elat at binalik ne king Juda inyang mete ne i Amazia a tata na.

²³ King kalabing limang banua na ning pamag-ari nang Amazia a anak nang Joas ning Juda, kanita ya meging ari king Israel i Jeroboam a anak nang Jeoas, at mig-ari ya king Samaria kilub ding apat apulu't metung a banua.

²⁴ E mayap ing gewa na king akakit na ning Ginu; tikian na ing e mayap nang dapat Aring Jeroboam, ing anak nang Nebat a meging dalan ning pangababad na king kasalanan ning Israel.

²⁵ Ya ing makirapat king pangabalik da ring gabun a sadia nang sakup ning Israel, manibat king Pidadalanan ning Hamat angga king Dagat a Mete, agpang king sinabi na ning Ginu, ing Dios ning Israel, king kapamilatan na ning talasuyu nang i Jonas a anak nang Amitai, ing propeta a menibatan king Gat Hefer.

²⁶ Ikit na ning Ginu ing maragul a kasakitan a daralanan da ring Israelita, ipus la man o malaya. Ala metung mang sinaup karela.

²⁷ Inya linigtas na la king kapamilatan nang Aring Jeroboam a Kadua a anak nang Jeoas, uling e na naman sinabi ing buran ne lagyu ing Israel king yatu.

²⁸ Makasulat king Istoria da ring Ari ning Israel ing heganaganang gewa nang Jeroboam a Kadua pati ing katapangan a pepakit na king labanan at nung makananu neng binalik king Israel ing Damasco at ing Hamat.

²⁹ Mete ya at mikutkut i Jeroboam king kutkutan da ring ari. Ing anak nang i Zacarias ya ing menalili bilang ari.

15

¹ King kaduang pulu't pitung banua na ning pamag-ari nang Jeroboam a Kadua ning Israel kanita ya meging ari i Uzzia a anak nang Amazia king Juda.

² Labing anam yang banua kanita at mig-ari ya Jerusalem kilub ding limang pulu't aduang banua. I ima na ya i Jecolia ning Jerusalem.

³ Mayap ing gewa na king akakit na ning Ginu, antimo ing gewa nang Amazia a tata na.

⁴ Makanyan man, e na la pepalako ding paganung altar karing mangatas a lugal. Inya sindu da ring tau ing pamiyain ain-sakripisyu at pamanduluk insenso.

⁵ Pepasakit ne ning Ginu i Uzzia angga king mete ya. Lepra ing meging sakit na at king aliwang bale ya menuknangan. Ing anak nang i Jotam ya ing memahala king kayarian.

⁶ Makasulat king Istoria da ring Ari ning Juda ing heganaganang gewa nang Uzzia.

⁷ Mete ya i Uzzia at mikutkut ya king kutkutan da ring ari king Siudad nang David, at ing anak nang i Jotam ya ing menalili bilang ari.

⁸ King katlung pulu't walung banua na ning pamag-ari nang Uzzia king Juda kanita ya mig-ari king Israel i Zacarias a anak Jeroboam a Kadua. Mig-ari ya king Samaria kilub ding anam a bulan.

⁹ E mayap ing gewa na king akakit na ning Ginu, antimo ing gewa da ring makatua na. Tikian na ing gewa nang pamikasalang Jeroboam a anak nang Nebat a meging dalan na ning pangababad na ning Israel king kasalanan.

¹⁰ Mekisapakat ya i Sallum a anak nang Jabes laban kang Zacarias. Pete neng Sallum i Zacarias karin king Ibleam, at ya ing menalili bilang ari ning Israel.

¹¹ Makasulat king Istoria da ring Ari ning Israel ing heganaganang gewa nang Zacarias.

¹² Inya metupad ing sinabi na ning Ginu kang Jehu inyang sabian na: Ding anak mu angga king kapat a lahi ilang mag-ari king Israel.

¹³ King katlung pulu't siam a banua na ning pamag-ari nang Uzzia king Juda kanita ya mig-ari king Israel i Sallum a anak nang Jabes. Mig-ari ya king Samaria kilub na mu ning pabulan.

¹⁴ King panaun a ita, dinatang ya king Samaria i Menahem a anak nang Gadi; ibat ya king Tirza. Pete ne i Sallum at ya ing menalili bilang ari.

¹⁵ Makasulat king Istoria da ring Ari ning Israel ing heganaganang gewa nang Sallum at ing pamisapakatan a gewa na.

¹⁶ Inyang meko ya i Menahem king Tirza papunta king Samaria, lisuban ne ing Tapua. Lesak ne ing lugal at pete ding memalen uling e re buring padalanan ding taung manuknangan karin. Lesak ne ing Tapua at layun lislas a atian ding heganaganang babaing mabuktut.

¹⁷ King katlung pulu't siam a banua na ning pamag-ari nang Uzzia king Juda kanita ya meging ari king Israel i Menahem a anak nang Gadi. Mig-ari ya king Samaria kilub ding apulung banua.

¹⁸ E mayap ing gewa na king akakit na ning Ginu. King kekaban na ning pamag-ari na, tikian na ing e mayap a gewa nang Jeroboam a anak nang Nebat a meging dalan king pangababad na ning Israel king kasalanan.

¹⁹ King panaun a ita, lisuban neng Aring Pul ning Asiria ing Israel. Atlung pulu't walung toneladang pilak ing binie nang Menahem kang Aring Pul ban saupan neng manatiling ari king Israel.

²⁰ Alikum na lang Menahem ding pilak inyang pinilit na lang munie tia limang pulung pirasung pilak ding lalaking mabandi king Israel ban ibie king ari na ning Asiria. Inya meko ya at mibalik i Aring Pul king sarili nang bansa.

²¹ Makasulat king Istoria da ring Ari ning Israel ing heganaganang gewa nang Menahem.

²² Mete ya at mikutkut, at ing anak nang i Pekaya ya ing menalili bilang ari ning Israel.

²³ King kalimang pulung banua na ning pamag-ari nang Uzzia king Juda kanita ya meging ari king Israel i Pekaya a anak nang Menahem. Mig-ari ya king Samaria kilub ding aduang banua.

²⁴ E mayap ing gewa nang Pekaya king akakit na ning Ginu. Tikian na ing e mayap a gewa nang Jeroboam a anak nang Nebat a meging dalan na ning pangababad na ning Israel king kasalanan.

²⁵ I Peka, ing anak nang Remalia at metung karing opisyal na, mekisapakat ya laban kang Pekaya. Mituki yang limang pulung lalaking ibat king Gilead at pete re i Pekaya ketang kakilubkiluban nang kuta ning palasyu ning Samaria. Ya ing menalili bilang ari.

²⁶ Makasulat king Istoria da ring Ari ning Israel ing heganaganang gewa nang Pekaya.

²⁷ King kalimang pulu't aduang banua na ning pamag-ari nang Uzzia king Juda kanita ya meging ari king Israel i Peka a anak nang Remalia. Mig-ari ya king Samaria kilub ding aduang pulung banua.

²⁸ E mayap ing gewa na king akakit na ning Ginu. Tikian na ing e mayap a gewa nang Jeroboam a anak nang Nebat a meging dalan na ning pangababad na ning Israel king kasalanan.

²⁹ King panaun na ning pamag-ari nang Peka king Israel kanita ne sinakup Aring Tiglat Pileser ning Asiria ing Ijon, Abel Bet Maaca, Janoa, Kedes, ing Hazor, at ding lugal sakup ning Gilead, Galilea, at Neftali. Kaybat, dela na la king Asiria ding taung bihag na.

³⁰ King kaduang pulung banua na ning pamag-ari nang Jotam a anak nang Uzzia, mekisapakat ya i Hosea a anak nang Ela laban kang Aring Peka; pete ne at ya ing menalili bilang ari.

³¹ Makasulat king Istoria da ring Ari ning Israel ing heganaganang gewa nang Peka.

³² King kadua nang banua ning pamag-ari nang Peka a anak nang Remalia king Israel, kanita ya meging ari king Juda i Jotam a anak nang Uzzia.

³³ Meging ari ya inyang idad yang aduang pulu't limang banua, at mig-ari ya king Jerusalem kilub ding labing anam a banua. I ima na ya i Jerusa, ing anak nang Zadok.

³⁴ Mayap ing gewa na king akakit na ning Ginu, antimo ing gewa nang Uzzia a tata na.

³⁵ Makanyan man, e na la leko ding paganung altar a atyu karing mangatas a lugal. Inya sindu ra ding tau ing pamiyain ain-sakripisyu at pamanduluk insenso. Pepagawa neng Jotam ing Pasbul dalan dane Norti ning Templo ning Ginu.

³⁶ Makasulat king Istoria da ring Ari ning Juda ing heganaganang gewa nang Jotam.

³⁷ King panaun a ita ne tinubud ning Ginu i Aring Rezin ning Siria at i Aring Peka ning Israel ban lusuban ya ing Juda.

³⁸ Mete ya i Jotam at mikutkut ya king kutkutan da ring ari king Siudad nang David. Ing anak nang i Ahaz ya ing menalili bilang ari.

16

¹ King kalabing pitung banua na ning pamag-ari nang Peka a anak nang Remalia kanita ya mig-ari king Juda i Ahaz a anak nang Jotam.

² Idad neng aduang pulung banua kanita, at mig-ari ya king Jerusalem kilub ding labing anam a banua. E mayap ing gewa na king akakit na ning Ginu; e na kalupa ning gewa na ning makatua nang i David.

³ Ing tikian na ya ing e mayap dang alimbawa ding mapilan a meging ari na ning Israel. Dilukan ne ing metung nang anak a lalaki bilang ain-sakripisyu antimo ing ugali dang makasumami ding taung tinabi ning Ginu inyang palub na la ring Israelita king gabun a mipangaku.

⁴ Miyain yang ain-sakripisyu at dinuluk insenso karing altar a atyu karing mangatas a lugal, karing bunduk-bundukan, at karing balang lalam da ring tanaman.

⁵ Lisuban neng Aring Rezin ning Siria at Aring Peka ning Israel ing Jerusalem. Kibkuban de oneng e re simbut i Ahaz.

⁶ Kanita ne abawing Aring Rezin ning Siria ing Elat. Tinabi na la ring tau Juda a manuknangan karin. Manibat na kanita at angga na ngeni ding Edomita ila ring manuknangan karin.

⁷ Peparala yang tubud i Aring Ahaz kang Aring Tiglat Pileser ning Asiria ban sabian: Tapat mu kung talasuyu. Munta ka keni at iligtas mu ku king ari ning Israel at king ari ning Siria. Lulusuban da ku.

⁸ Kinua nang Ahaz ing pilak at gintu king Templo ning Ginu at ing king palasyu ban iregalu king ari ning Asiria.

⁹ Inya lisuban ne ning ari ning Asiria ing Damasco. Sekupan ne at pete ne i Aring Rezin, kaybat dela na la king Kir ding bihag.

¹⁰ Inyang minta ya king Damasco i Aring Ahaz ban makikit kang Aring Tiglat Pileser, ikit ne ing metung a altar karin. Pepakopia ne ing kabilugan nang planu ning altar at peparala ne kang Uria a pari.

¹¹ Inya pepagawa neng Uria ing metung a altar agpang ketang planung ibat king Damasco a peparala nang Aring Ahaz. Pepayari ne bayu ya mekapagbalik ing ari.

¹² Inyang mekapagbalik ne ing ari ibat king Damasco, ikit ne ing altar; lepitan ne at penikan ne,

¹³ at miyain yang ain-a-durulukan ampon ain-a-binutil. Subali pa karing ain, tigtug na ing ain-a-inuman at pisik na ing dayang ain-ning-pamisulusulu.

¹⁴ Pepalako ne ing altar a tangsu king arap ning Templo ning Ginu at pepabili king dane norti ning altar.

¹⁵ Kaybat, nganang minutus Aring Ahaz king paring i Uria, King bayu at maragul a altar mu la iyain ding ain-a-durulukan neng abak at ding ain-a-binutil neng bengi, ding ain da ring tau at ning ari. Ipisik mu king altar ing daya da ring animal a durulukan. Gamitan ke ing altar a tangsu king pamaniawad kausukan king Dios.

¹⁶ Tiparan na ngang Uria a pari ing inutus nang Aring Ahaz.

¹⁷ Kelag na lang Aring Ahaz ding patungang tangsu at leko na la ding palangganang pipanuasan. Leko nia naman ing maragul a kawang tangsu karing patungang bakang tangsu at binili na la king metung a patungang batu.

¹⁸ Pepalako nia naman ing makabukud a luklukan na ning ari king Templo at pepasara ne ing pidadalanan na ning ari neng pupunta ya king Templo ning Ginu. Gewa na ngan iti ban pamatulan ne ing ari na ning Asiria.

¹⁹ Makasulat king Istoria da ring Ari ning Juda ing heganaganang gewa nang Aring Ahaz.

²⁰ Mete ya i Ahaz at mikutkut ya king kutkutan da ring ari king Siudad nang David. Ing anak nang i Hezekia ya ing menalili bilang ari.

17

¹ King kalabing aduang banua na ning pamag-ari nang Ahaz king Juda kanita ya meging ari ning Israel i Hosea a anak nang Ela. Mig-ari ya king Samaria kilub ding siam a banua.

² E mayap ing gewa na king akakit na ning Ginu, oneng lalung e mayap ing gewa da ring aring minuna.

³ Lisuban neng Aring Salmaneser ning Asiria i Aring Hosea, at simbut ne. Inya memayad yang buis i Aring Hosea balang banua kang Aring Salmaneser.

⁴ Misan a aldo, atuklasan nang Aring Salmaneser king migtaksil ya i Aring Hosea, uling peparala yang tubud i Hosea king Aring So ning Ehipto. Tinuknang yang mamayad buis i Aring Hosea kang Aring Salmaneser. Inya peparakap ne at pepasukul i Aring Hosea.

⁵ Lisuban neng Aring Salmaneser ning Asiria ing Israel at kibkuban ne ing Samaria kilub ding atlung banua.

⁶ King kasiam nang banua ning pamag-ari nang Hosea sekupan ne ning ari ning Asiria ing Samaria, at binihag na la ampon dela ring Israelita king Asiria. Tiknang na la ding mapilan king siudad ning Hala, ding mapilan naman king lele na ning Ilug ning Habor sakup ning Gozan, at ding aliwa pa karing siudad ning Media.

⁷ Milyari iti karing Israelita uling mikasala la king Ginu karelang Dios, ing milual karela king upaya na ning ari ning Ehipto. Sinamba la karing aliwang kikilalanan dang dios,

⁸ tikian da ing kaugalian da ring taung tinabi na ning Ginu inyang palub na la ding memalen na king gabun a mipangaku, at tinggap da ing e ustung kaugalian a tinatag da ring ari na ning Israel.

⁹ Lihim la pang dinapat ding Israelita karing bage a labag king kaburian na ning Ginu karelang Dios. Ginawa lang lugal a pisasamban a kalupa da ring paganu karing karelang siudad, balen, at baryu.

¹⁰ Mitalakad lang asias a batu ampon larawan na ning diosang i Asera karing bunduk-bundukan at karing balang lalam da ring tanaman.

¹¹ Dinuluk la namang insenso karing paganung altar antimo ing gagawan da ring taung tinabi na ning Ginu. Pepamua re ing Ginu king kapamilatan na ning e mayap dang gagawan,

¹² at sinuyu la karing idolo agyang bawal, agpang king inutus na karela ning Ginu.

¹³ King kapamilatan da ring tubud at propeta, dininan neng babala ning Ginu ing Israel at ing Juda. Ngana, Lakuan yu na ing e mayap yung daraptan, at mamintu kayu karing utus ku a atyu king Kautusan a sinabi ku karing propetang talasuyu ku.

¹⁴ Oneng e la mekiramdam; masias la buntuk anti ding makatua dang e menalig king Ginu karelang Dios.

¹⁵ E ra la pinsinan ding kautusan na, e la tinupad king kasunduan a gewa na karing karelang makatua, at migmaklak-maklakan la karing babalang binie na. Sinamba la karing alang kabaldugan a idolo, inya meging ala lang kabaldugan. Mekiapus la karing e mayap dang kaugalian ding bansang makapatulug karela agyang binawal na la ning Ginu.

¹⁶ Lebagan da la ngan ding utus na ning Ginu karelang Dios, at ginawa lang aduang biserung bakal a baka. Ginawa la namang rebultu na ning diosang i Asera, simban da la ring batuin, at sinuyu la king kikilalanan dang dios a i Baal.

¹⁷ Dilukan da la ring anak dang lalaki at babai bilang ain-sakripisyu karing dios da ring paganu. Sinangguni la karing mamamanula ampon mangkukulam, at king akakit na ning Ginu pepakasangkapan da ing sarili da king pamangawang e mayap. Inya mimua ya karela ing Ginu.

¹⁸ King mua na king Israel, tinabi na la ding memalen king akakit na, oneng tinagan na la ring memalen na ning Juda.

¹⁹ Oneng e la naman memintu ding memalen na ning Juda karing utus na ning Ginu karelang Dios. Pekiapusan da ing meging e mayap dang ugali ding memalen na ning Israel.

²⁰ Inya sikuil na la ngan ning Ginu ding Israelita. Pepagdusan na la at binie karing gamat da ring karelang kalaban angga king limbug la king akakit na.

²¹ Inyang apikawani na ne ning Ginu ing Israel king Juda, pinili reng maging ari da ring Israelita i Jeroboam a anak nang Nebat. Penimunan na no mang Jeroboam ding Israelita king pamainggulut king Ginu at king pangababad da king maragul a kasalanan.

²² Pekiapusan da ing e mayap nang dapat Jeroboam; e la pepatugut

²³ angga king tinabi na la king akakit na ning Ginu, antimo ing asabi na nang gawan na king kapamilatan da ring propetang talasuyu na. Inya miyugse la ring Israelita king Asiria nung nu la manuknangan angga ngeni.

²⁴ Migdala yang tau ing ari na ning Asiria at ilang pepatuknangan na karing siudad na ning Samaria a sekupan na bilang kayalili da ring Israelita. Ibat la ding tau king Babilonia, Cut, Ava, Hamat, at Sefarvaim.

²⁵ E la sinamba king Ginu inyang megumpisa na lang manuknangan karin. Inya mitubud yang leon ing Ginu at pete da la ring mapilan a tau.

²⁶ Ngana ning balita a miras king ari: E re balu ding taung pepatuknangan mu king Samaria ing batas na ning dios ning kayarian a iti. Inya mitubud yang leon ban pamaten da la ring tau.

²⁷ Nganang minutus ning ari ning Asiria, Ibalik ya karin ing metung karing pari a binihag tamu. Patuknangan ye karin ban ituru na la ding tau tungkul king batas na ning dios ning bansang ita.

²⁸ Inya menuknangan ya king Betel ing metung karing Israelitang paring mebihag at tiru na la ding tau nung makananu reng samban ing Ginu.

²⁹ Makanyan man, ginawa ya pa mu ring dios nang sasamban ing metung at metung karing lahing manuknangan karin. Binili da la ring kikilalanan dang dios karing mangatas a lugal a gewa da ring tau Samaria.

³⁰ Gewa re ding lalaki na ning Babilonia i Sucot Benot, ding lalaki na ning Cut i Nergal, ding lalaki na ning Hamat i Asima,

³¹ ding lalaki na ning Ava i Nibhaz at i Tartak, ding lalaki na ning Sefarvaim i Adramelek at i Anamelek at silaban da la ring karelang anak bilang ain karing kikilalanan dang dios.

³² Sasamban dia naman ding tau ing Ginu at memili lang miyayaliwang tau ban maging pari da. Ding tau ila ring babie ain para karela karing altar a atyu karing mangatas a lugal.

³³ Tune sasamba la king Ginu, oneng sasamba la naman karing sarasarili dang kikilalanan a dios antimo ing kaugalian da ring bansang penibatan da.

³⁴ Makanyan ing gagawan da angga ngeni. E la tatakut king Ginu, at e ra la tutukian ding tuntunan o kautusan a miyabie karing anak nang Jacob a pemalagyuan nang Israel.

³⁵ Ginawa yang kasunduan karela ing Ginu at nganang minutus karela, E kayu sasamba karing aliwang dios o duruku karela o susuyu karela o babie ain karela.

³⁶ Aku ing samban yu, ing Ginu milual kekayu king Ehipto king kapamilatan na ning maragul kung kayupayan at makapagmulalang dapat. Bukud mung aku ing dukuan yu at dinan ain.

³⁷ Pamintuan yu lang mitmung kaingatan ding tuntunan at kautusan a sinulat ku para kekayu. E kayu sasambang aliwang dios,

³⁸ at e ye sukat kakalinguan ing kasunduan a gewa kung kayabe yu. E kayu sasambang aliwang dios.

³⁹ Bukud mung aku, ing Ginu kekayung Dios, ing samban yu at iligtas da kayu karing kalaban yu.

⁴⁰ Oneng e la mekiramdam karing tau at sindu rang gagawan ing matua rang kaugalian.

⁴¹ Sasamba la pin king Ginu, oneng susuyu la naman karing gewa rang idolo. Makanyan munaman ing gagawan da ring anak da ring anak da angga man ngeni.

18

¹ King katlung banua na ning pamag-ari na king Israel Hosea a anak nang Ela, kanita ya meging ari ning Juda i Hezekia a anak nang Ahaz.

² Adua yang pulu't limang banua i Hezekia inyang meging ari ya, at mig-ari ya king Jerusalem kilub ding aduang pulu't siam a banua. I ima na ya i Abiya, ing anak nang Zacarias.

³ Kalupa nang Aring David a penibatan na, gewa nang Hezekia itang katanggap-tanggap king akakit ning Ginu.

⁴ Pepalako na la ring paganung altar a atyu karing mangatas a lugal, lesak na la ring asias a batu, at sinira ding larawan na ning diosang i Asera. Pemirasu neng mangalati ing tangsung ubingan a gewa nang Moises, uling angga king panaun a ita duruluk lang insenso ding memalen na ning Israel king tangsung ubingan a inaus da namang Nehustan.

⁵ Menalig ya i Hezekia king Ginu, ing Dios ning Israel. E ne mika ari pa ing Juda a antimo ya, agyang king milabas a panaun bayu ya mig-ari o detang sinalisi.

⁶ Menatili yang tapat king Ginu at e sinalangsang karing utus na. Pemintuan na la ngan ding utus a binie ning Ginu kang Moises.

⁷ Pitnubayan ne ning Ginu at meging matagumpe ya king heganagana nang gewa. Selangsangan ne ing ari ning Asiria at e ya pepailalam king upaya na.

⁸ Simbut na la ring Filisteo a manuknangan king Gaza, at sekupan na la ring balen at baryung makapadurut king siudad ning Gaza.

⁹ King kapat nang banua ning pamag-ari nang Hezekia at king kapitung banua na ning pamag-ari nang Hosea king Israel, lisuban ne at kibkuban Aring Salmaneser ning Asiria ing Samaria.

¹⁰ Sekupan ne kalabas da ring atlung banua. Inya mebihag ya ing Samaria kanitang kanam nang banuang pamag-aring Hezekia at king kasiam nang banua ning pamag-ari nang Hosea king Israel.

¹¹ Pepayugse na la ning ari ning Asiria ding Israelita karin king Hala, ding aliwa king pampang na ning Ilug ning Habor sakup ning Gozan, at ding aliwa karing siudad ning Media.

¹² Mibagsak ya ing Samaria uling e re pemintuan ding memalen na ing Ginu karelang Dios; lebagan de ing kasunduan, at lebagan da la ring heganaganang utus a miyabie kang Moises. E la mekiramdam ni memintu.

¹³ King kalabing apat nang banua ning pamag-ari nang Hezekia king Juda, i Senakerib a ari ning Siria linusub ya karing makakuta nang siudad ning Juda at abihag na la.

¹⁴ Peparala yang mensahi i Hezekia kang Senakerib a atyu kanita king Lakis. Ngana, Mikasala ku, ituknang mu na sana ing pamaglusub mu kekami at ibie ku ing nanumang aduan mu. Meniawad yang apulung toneladang pilak at metung a toneladang gintu.

¹⁵ Inya peparala na ngan Hezekia ing heganaganang pilak a atyu king Templo ning Ginu at ning palasyu.

¹⁶ Pepabakbak na naman ing gintung pepatapal na karing pasbul at amba da ring pasbul ning Templo, at peparala na ngan kang Senakerib.

¹⁷ Peparala yang dakal a sundalus a ibat king Lakis ing ari ning Asiria ban lusuban ya i Hezekia ning Jerusalem. Atyu la ding sundalus king lalam dang pamanimuna ding atlung pekamatas a opisyal. Inyang miras na la Jerusalem, sekupan de ing dalan nung nu la magobra ding gagawang imalan lele ning paligi a pidadalanan na ning danum a manibat king sibul babo.

¹⁸ Pepayaus de ing Aring Hezekia at ding atlu karing opisyal na ilang meko ban makikit karela. Ding tauan nang Hezekia ila ri Eliakim a anak nang Hilkia; ya ing mamahala king palasyu; i Sebna a kalihim ning palasyu; at i Joa a anak nang Asaf a mamahala karing maulagang papelis.

¹⁹ Ngana ning metung karing opisyal da ring sundalus ning Asiria, Sabian yu kang Hezekia ing pasabi na ning ari ning Asiria: Ninu ing pagsandalan mu king kekang kapanaligan?

²⁰ Isipan mu galang king ding amanu malyari dang sambutan ing gelingan at ing dakal a bilang da ring sundalos? Ninu ing panaligan mung sumaup keka laban kanaku?

²¹ Ing Ehipto a mengaring balbal a timbu a tumusuk mu king gamat ning tau at sumugat king ninumang magsandal kanite? Makanyan ya ing ari na ning Ehipto karing manalig king kayarian na.

²² Nung sabian munaman king ing Ginu Dios ya ing panaligan mu, aliwa wari ya ing atyu karing altar at karing mangatas a lugal a pepalako nang Hezekia, at sinabi king Juda at Jerusalem king bukud lang samba king arap ning altar ning Jerusalem?

²³ Ngana pa ning opisyal ning Asiria, Me keni at makipagsalita ka king panginuan kung ari ning Asiria. Dinan da kang aduang libung kabayu, nung manakit kang tau a sake.

²⁴ Nung asahan mu la ring karung panggera at ding sundalus a pakakabayu ning Ehipto, makananu meng adaig agyang ing pekamainang opisyal ning ari?

²⁵ Pota galang isipan mu king e na balu ning Ginu ing pamunta ku keti ban lasakan ke iting lugal? Ing Ginu mismu ing minutus kanakung lusuban ke at lasakan ing lugal a iti.

²⁶ Ngarang mekibat di Eliakim, Sebna, at Joa, Nung malyari sana, magsalita kayu kekami king salitang Aramaico uling aintindian mi. E yu kami sana pakipagsalitan king salitang Hebreo king daramdaman da ring kabalen ming atyu karing pader.

²⁷ Nganang sinabi karela, Pepapuntan na ku ning kanakung panginuan ban sabian iti, e mu king panginuan mu nune pati karing taung atyu karing pader a kalupa yung mangan king sarili yung dinat at minum king sarili yung imi.

²⁸ Kaybat na nita, tinalakad ya ing opisyal a tubud at nganang migsalitang masikan king salitang Hebreo ning Juda. Pakiramdaman yu ing amanu na ning marangal a ari ning Asiria!

²⁹ Oyni ing pasabi na: E kayu pailinlang kang Hezekia. E na kayu malyaring iligtas karing gamat ku.

³⁰ E ye paniwalan agyang pang sabian nang iligtas na kayu ning Ginu o e na ipaintulut ning Ginu ing manabu ya karing gamat ku ing siudad yu.

³¹ E ye pakiramdaman i Hezekia. Pasabi na ning ari ning Asiria king lumual na kayu ken at sumuku na. Ipaintulut na naman ing makapangan kayu karing tanaman yung ubas at higera, at minum karing sarili yung talaga

³² angga na king idala na kayu king bansa a kalupa na ning kekayu ban karin na kayu manuknangan. Karin ating mulahan ubas at makainum kayung alak, at ating arina ban makapangan kayung tinape. Lugal de iti ring tanaman a olibo, larung olibo, at ning pulut-panilan. E kayu mate, nung makiramdam kayu kanaku. E ye pakiramdaman i Hezekia uling lilinlangan na kayu mu neng sasabian nang iligtas na kayu ning Ginu.

³³ Atin na waring dios karing aliwang bansa a mekapagligtas karing bansa ra king gamat na ning ari ning Asiria?

³⁴ Nu la karin ngeni ding dios ning Hamat at Arpad? Nu la karin ding dios ning Sefarvaim, Hena, at Iva? Ating metung mu man karela a mekapagligtas king Samaria king gamat na ning ari ning Asiria?

³⁵ Ninu karing dios ding bansa ing mekapagligtas karela? Inya ngeni, makananu neng iligtas ning Ginu ing Jerusalem karing gamat ku?

³⁶ Menatili lang tahimik ding tau; e la mekibat uling penabilinan na lang Aring Hezekia ing e la bitasang makibat.

³⁷ Kanita di Eliakim, Sebna, at Joa ginabak da ing susulud dang imalan uli na ning lungkut; mibalik la at minie ulat king ari tungkul king sinabi na ning opisyal a tau Asiria.

19

¹ Inyang dimdam nang Aring Hezekia ing ulat da, ginabak na ing susulud nang imalan uli na ning lungkut na, at kaybat misulud yang sakung imalan at minta ya king Templo na ning Ginu.

² Tinubud ne i Eliakim, ing opisyal a manibala king palasyu, i Sebna, ing kalihim ning palasyu, at ding makatua karing pari kang propeta Isaias a anak nang Amoz. Makasulud la namang sakung imalan.

³ Oyni ing mensahi a penabilin nang ipayabut da kang Isaias: Ing aldong iti aldo ne ning kaguluan; mipaparusan tamu at mibili king kamarinayan. Mengari tamu king babaing manganak, oneng e ne abait ing anak uli na ning maina ne.

⁴ Tinubud ne ning ari na ning Asiria ing pekamatas a opisyal na ban lapastanganan ne ing Dios a mabie. Mananu na sanang damdaman na la ning Ginu kekang Dios ding kalapastanganan at parusan na la detang migsalita. Inya ipanalangin mu la king Dios ding mitagan karing kekatamung memalen.

⁵ Inyang tinggap neng Isaias ing mensahi na ning Aring Hezekia,

⁶ pepayabut na ing pakibat: Sasabian na keka ning Ginu king e ka sukat mitatakutan king sasabian da ring tau Asiria king ing Ginu e na ka agyung iligtas.

⁷ Gawa yang paralan ing Ginu ban miras ing balita king ari ning Asiria at ita ing maging sangkan na ning pamagbalik na king sarili nang bansa. At paintulut na ning Ginu ing mate ya king sarili nang bansa king kapamilatan na ning espada.

⁸ Abalitan na ning opisyal a tau Asiria king meko ne king Lakis ing ari na at makilaban ya king makasiping a siudad na ning Libna. Inya tinaglus ya karin ban mangutang king ari.

⁹ Miras ing balita karing tau Asiria king ding sundalus na ning Ehipto a panimunan nang Aring Tirhaka ning Etiopia daratang la ban lumusub karela. Inyang dimdam na ning ari peparala yang sulat kang Aring Hezekia na ning Juda

¹⁰ ban sabian na: Sinabi na keka ning dios a kekayung panaligan king e kayu manabu karing gamat ku, oneng e ka sa pailinlang kaniti.

¹¹ Marahil abalitan mu na nung nanu ing gagawan na ning ari ning Asiria karing bansa a birian nang lasakan. Isipan mu galang king miligtas ka?

¹² Ding makatua ku ila ring minlasak karing siudad na ning Gozan, Haran, at Rezef, at ila ring mekamate karing memalen na ning Beteden a manuknangan king Telasar. Ala metung man karing dios da ing mekapagligtas karela.

¹³ Nu la karin ngeni ding ari da ring siudad na ning Hamat, Arpad, Sefarvaim, Hena, at Iva?

¹⁴ Kinua neng Aring Hezekia ing sulat karing tubud at binasa ne. Kaybat minta ya king Templo ning Ginu; binili ne ing sulat king arapan na ning Ginu,

¹⁵ at nganang menalangin, O Ginu Dios ning Israel a makalukluk king tronu babo da ring kerubin, ikang bukud ing Dios a sasakup karing kayarian. Ika ing linalang king yatu at king banua.

¹⁶ Ngeni, Ginu, pakiramdaman mu kami sana at lawan mu ing mangapalyari kekami. Pakiramdaman mu, O Dios a mabie, ing heganaganang kalapastanganan a sasabian na kekang Senakerib.

¹⁷ Ikami ngan, Ginu, balu mi king ding ari na ning Asiria ilang manyira karing dakal a bansa at likuan da lang makatiwangwang ing gabun,

¹⁸ at minyilab karing karelang dios a e naman tune dios, nune larawan la mung gewa da ring gamat ding tau king dutung at king batu.

¹⁹ Ngeni, O Ginu kekaming Dios, iligtas mu kami karing tau Asiria ban akilala da ring bansa king ika mung bukud ing Dios.

²⁰ Kanita peparala yang mensahi i Isaias kang Aring Hezekia; sasabian na ing pakibat na ning Ginu tungkul king panalangin na ning ari.

²¹ Nganang sinabi ning Ginu, Senakerib, kaylian na ka ning siudad ning Jerusalem at pisunusunu na ka.

²² Ninu ing isipan mung kekang lalapastanganan at insultuan? Meging ala kang galang kanaku, ing banal a Dios ning Israel.

²³ Tinubud mu la ring kekang talasuyu ban ipagmayabang mu kanaku king kayabe ding karu mung panggera ikua mu lang selakayan ding pekamatas a bunduk na ning Lebanon. Pigmayabang mu pa king kinutud mo ring pekamatas a tanaman a sedro at ding pekamasanting diling tanaman a sipres at king ikua mu lang disan ding pekasuluk dang diling dake da ring gubat.

²⁴ Pigmayabang mu pa king kinulkul kang talaga at minum king danum da ring aliwang bansa, at melangi ya ing Ilug ning Nilo uling dilpak de ring bitis ding sundalus mu.

²⁵ E mu pa wari abalitan king maluat ku nang tingka yan? At ngeni tiparan ku na. Aku ing minie upaya keka ban gawan mu lang tambak-tambak a balbal a batu ding siudad a mangatibe pader.

²⁶ Ala lang akarapat ding taung manuknangan karin; mitakutan la at e la mekabulad. Mengari la king dikut king marangle o king dikut a tutubu king bubungan na ning bale neng tutiupan na la ning mapaling angin a ibat king aslagan.

²⁷ Oneng balu ku ing heganaganang bage tungkul keka, nung nanu ing gagawan mu at nung nukarin ka munta. Balu ku nung makananu kang mimimua kanaku.

²⁸ Abalitan ku ing bigsikan mu at ing ketasan mung lub, at ngeni mibili kung taga king arung mu at paket king asbuk mu at ibalik da ka king mismung dalan nung nu ka menibatan.

²⁹ Kaybat nganang Isaias kang Aring Hezekia, Oyni ing tanda ning bage mapalyari kaniting banuang salukuyan at king tutuking banua. Ing bukud mung kanan ya ing kabud na tinubu, oneng king tutuking banua makatanam kang trigu at pupulan mu at makatanam ka namang ubas at makapangan ka karing bunga ra.

³⁰ Detang mitagan king bansang Juda lumabung lang anting tanaman a malalam a yamut king gabun at mamunga la.

³¹ Mika tau king Jerusalem at king Bunduk ning Zion uli da ring mitagan, uling ita ing buri nang mapalyari ning Ginu.

³² Ita ya naman ing sinabi na ning Ginu tungkul king ari na ning Asiria: E ne luban ing siudad ni makabugnus agyang metung mung paslu. Alang sundalus a pakakalasag a makalapit king siudad, at alang makagawang kambilan a pangubkub kaniti.

³³ Magbalik ya king mismung dalan a ibatan na at e ne bitasang aluban ing siudad. Aku, ing Ginu, ing migsalita.

³⁴ Idipensa ke at ingatan ing siudad para king sarili kung dangalan at uli na ning pangakung binie ku king talasuyu kung i David.

³⁵ King benging ita minta ya king kampu da ring tau Asiria ing metung a anghel ning Ginu, at mekamate yang dinalan walung pulu't limang libung sundalus. Itang kabukasan a abak a maranun, inyang migising la ring memalen, ikit da lang pakapase; mete la ngan!

³⁶ Kanita i Senakerib, ing ari ning Asiria, minatras ya at migbalik ya king Nineve.

³⁷ Misan a aldo, kabang sasamba ya king templo ning dios nang i Nisrok, ding adua karing anak nang lalaki, i Adramelek at i Sarezer, pete re karing karelang espada at kaybat tinakas lang minta king sakup ning Ararat. I Esarhadon, ing metung na pang anak, ya ing menalili bilang ari na ning Asiria.

20

¹ Kanita mu ring panaun a ita, mesakit ya i Aring Hezekia at digsu nia mete. Delawan neng propeta Isaias a anak nang Amoz at ngana, Sasabian na keka ning Ginu king ayusan mu na ing heganagana, uling e na ka kumayap. Isadia mu na ing sarili mu king kamatayan.

² Minarap ya i Hezekia king pader at menalangin ya.

³ Ngana, O Ginu, e mu sana kakalinguan king siyuan da kang mitmung katapatan at kalausan a lub, king parati kung magkapilit gawan itang buri mung pagawa kanaku. At menangis yang kapait-paitan.

⁴ Likuan neng Isaias ing ari, oneng bayu ya mekadalan king libutad na ning patyu ning palasyu, sinabi na ning Ginu

⁵ king magbalik ya kang Hezekia, ing pamuntuk da ring memalen na ning Ginu, at sabian na ing anti kaniti: Aku, ing Ginu, ing Dios na ning makatua mung i David, dimdam ku ing panalangin mu at ikit ku ing lua mung tinulu; pakayapan da ka at king katlung aldo lungub ka king Templo.

⁶ Paintulutan da ka pang mie kilub ding labing limang banua. Iligtas da ka at ing siudad ning Jerusalem king ari na ning Asiria. Isundu ku ing pamagdipensa king siudad alang-alang king sarili kung dangalan at uli na ning pangaku a binie ku king talasuyu kung i David.

⁷ Sinabi nang Isaias karing sarili nang talasuyu ning ari king tapalan deng dildak a bungang higera ing tigsa na at kumayap ya.

⁸ Kanita kitang nang Aring Hezekia, Nanung tanda a ing Ginu pakayapan na ku at kaybat ning atlung aldo malyari na kung munta king Templo?

⁹ Nganang mekibat Isaias, Dinan na kang tanda ning Ginu ban patutuan king tuparan na ing pangaku na. Buri mung ing anino king balitang ning eran ing sumulung yang apulung kalakbangan o matras yang apulung kalakbangan?

¹⁰ Nganang mekibat Hezekia, Mayan king anino ing sumulung yang apulung kalakbangan! Payatrasan meng apulung kalakbangan.

¹¹ Menalangin ya king Ginu i Isaias, at pepayatrasan neng apulung kalakbangan ning Ginu ing anino king eran a pepagawa nang Aring Ahaz.

¹² Halus king panaun mu ring ita, ing ari na ning Babilonia, i Merodak Baladan a anak nang Baladan, abalitan na king mesakit ya ing Aring Hezekia. Inya peparala yang sulat at regalu.

¹³ Matula na lang tinggap Hezekia ding tubud na ning ari ning Babilonia. Kaybat na nita, pepakit na karela ing pibandian nang pilak at gintu, ding paniangkap-pamangan at pabanglu. Pepakit na naman karela ing miyayaliwa nang kagamitan king pamakigera. Pepakit na ngan karela ing heganaganang pibandian na ning kayarian na.

¹⁴ Kanita minta ya ing propetang i Isaias king Aring Hezekia at nganang mengutang, Nukarin la ibat deting lalaki at nanu ing sinabi ra kekayu? Nganang mekibat Aring Hezekia, Ibat la king marayung bansa; ibat la Babilonia.

¹⁵ Ngana pang kinutang Isaias, Nanu ing ikit da king palasyu? Pekibat nang Aring Hezekia, Ikit da ngan ing heganagana. Pepakit ku ngan karela ing heganaganang atyu karing pisisinupan ku king palasyu.

¹⁶ Kanita nganang Isaias king ari, Pakiramdaman yu ing sasabian na ning Ginu Mayupaya. Sasabian na king

¹⁷ datang ing panaun potang ing heganaganang bage a atyu king palasyu, ing heganaganang tinipun da ring makatua yu masamsam at miras Babilonia. Alang bitasang mitagan.

¹⁸ Kuanan da la ring mapilan karing anak yung lalaki at idala Babilonia. Kapunan da la at gawan talapagsilbi king palasyu na ning ari.

¹⁹ Ing aintindian nang Hezekia king mika kapayapan at kapanatagan king Jerusalem king kekaban na ning bie na. Inya nganang mekibat, Mayap ing balitang dela mu kanaku a ibat king Ginu.

²⁰ Makasulat king Istoria da ring Ari ning Juda ing heganaganang gewa nang Aring Hezekia at itang depositung danum a pepagawa na, at ing gewa nang piagusan danum papunta king siudad.

²¹ Mete ya i Hezekia, at ing anak nang i Manase ya ing menalili bilang ari.

21

¹ Labi yang aduang banua i Manase inyang meging ari ya, at mig-ari ya king Jerusalem kilub ding limang pulu't limang banua. I ima na ya i Hefziba.

² E mayap ing gewa na king akakit na ning Ginu, uling tikian na ing makasumaming ugali da ring taung tinabi na ning Ginu kanitang lulub la ding Israelita king gabun a mipangaku.

³ Pepatalakad na lang pasibayu ding pisasamban da ring paganu a pepalasak nang Hezekia a tata na. Pepagawa na la ring altar para kang Baal at pepagawa ya namang larawan na ning diosang i Asera antimo ing gewa nang Aring Ahab ning Israel, at sinamba ya karing batuin.

⁴ Pepagawa yang altar a paganu king Templo ning Ginu, king lugal a sinabi na ning Ginu a karin ya samban king kapilan pa man.

⁵ Pepagawa ya namang aduang altar para karing aduang asias na ning patyu ning Templo ning Ginu ban samban la karin ding batuin.

⁶ Silaban ne ing anak nang lalaki bilang ain-sakripisyu. Mewili ya king pamangulam, king pamamanula, king pamanialamangka, at meniawad kausukan karing mamamag-espiritista. Milalu king e mayap ing gewa na king akakit na ning Ginu. Inya pepamua ne ing Ginu.

⁷ Binili ne king Templo ing larawan nang Asera a pepagawa na, king mismung Templo nung nu na sinabi ning Ginu kang David at king anak nang i Solomon: Keti king Jerusalem, ing Templo, ya ing lugal a pinili ku karing heganaganang sakup dang gabun ding labing aduang tribu ban ken ku misamban.

⁸ E ku la itabi ding Israelita keting gabun a binie ku karing makatua da, nung pamintuan da lang mitmung katapatan ding kautusan a binie ku king talasuyu kung i Moises.

⁹ Oneng e la mekiramdam kanaku ding memalen na ning Juda. Linili na lang Manase. Lalung e mayap ing gewa da kesa king gewa da karing taung tinabi na ning Ginu kanitang lulub na la king gabun a mipangaku.

¹⁰ Migsalita ya karela ing Ginu king kapamilatan da ring talasuyu nang propeta. Ngana,

¹¹ Gewa na lang Aring Manase ning Juda ding makasumaming bage. Lalung e mayap ing gewa na kesa king gewa da ring Cananeo, at tinake na la king pamikasala ding memalen na ning Juda king kapamilatan da ring idolo na.

¹² Inya aku, ing Ginu Dios ning Israel, parala kung kapahamakan king Jerusalem at king Juda, at mangilabut ya king takut ing ninumang makaramdam.

¹³ Nung makananu keng perusan ing Samaria, makanyan kia namang parusan ing Jerusalem, antimo ing gewa ku kang Aring Ahab ning Israel at karing lahi na. Ilako ke tau ing Jerusalem antimo nung makananu yang lalako dinat ing pinggan at kaybat isakub ya.

¹⁴ Lakuan ku la ding taung mitagan at ibie karing karelang kalaban. Sakupan da la at panakawanan

¹⁵ uling e mayap ing gagawan da king akakit ku, ing Ginu. Yan ing sangkan nung inya mimua ku manibat na karing makatua da inyang liwal ku la king Ehipto at angga na ngeni.

¹⁶ Subali pa kanyan, dakal ya pepapate taung alang kasalanan i Manase; minagus ing daya karing dalan na ning Jerusalem. E pa kayabe ing gewa nang pamanimuna king pangababad na king kasalanan ning Juda king kapamilatan na ning pamanyambang idolo.

¹⁷ Makasulat king Istoria da ring Ari ning Juda ing heganaganang gewa nang Manase at ing kasalanan a gewa na.

¹⁸ Mete ya i Manase at mikutkut ya king hardin ning palasyu, ing hardin nang Uza, at ing anak nang i Amon ya ing menalili bilang ari.

¹⁹ Adua yang pulu't aduang banua i Amon inyang meging ari ya king Juda, at mig-ari ya king Jerusalem kilub ding aduang banua. I ima na ya i Mesulemet, ing anak nang Haruz ning balen ning Jotba.

²⁰ E mayap ing gewa na king akakit na ning Ginu; tikian na ing e mayap nang gewang Manase a tata na.

²¹ Tikian ne bakas i tata na king heganaganang gewa na, at sinamba ya karing idolong simban nang tata na.

²² Sikuil ne ing Ginu, ing Dios da ring makatua na; e ya memintu karing utus na ning Ginu.

²³ Misasapakat la ring opisyal na at pete re king palasyu na.

²⁴ Kaybat na nita, ding memalen na ning Juda pete da la ring mekamate king Aring Amon, at kaybat gewa reng ari da ing anak nang i Josias.

²⁵ Makasulat king Istoria da ring Ari ning Juda ing heganaganang gewa nang Amon.

²⁶ Mikutkut ya i Amon king patyu ning hardin nang Uza, at ing anak nang i Josias ya ing menalili bilang ari.

22

¹ Walu yang banua i Josias inyang meging ari ya king Juda, at mig-ari ya king Jerusalem kilub ding atlung pulu't metung a banua. I ima na ya i Jedida a anak nang Adaia ning balen ning Bozkat.

² Gewa nang Josias itang katanggap-tanggap king Ginu. Tikian na ing mayap nang alimbawang Aring David a makatua na; e ya linisia king dalan a tiru na ning Ginu.

³ Inyang kalabing walung banua na ning pamag-ari nang Josias tinubud ne king Templo ning Ginu i Safan, ing kalihim ning palasyu a anak nang Azalia at apu nang Mesullam.

⁴ Ngana kang Safan, Munta ka kang Hilkia, ing Pekapun ding Pari. Sabian mu kang Hilkia king isadia na la ring salaping dela da ring tau king Templo ning Ginu a tinipun da ring guardia king pasbul ning Templo.

⁵ Ibie na la ring salapi karing lalaking mepili ban mamahala king pangalarin ning Templo ning Ginu. Ila ring mamayad karing maglarin king Templo ning Ginu antimo ring

⁶ kalpinteru, kanteru, karing manialing materialis, at batu.

⁷ E na kailangan ing maniawad lang kwenta uling tau lang tapat king obra da.

⁸ Nganang Hilkia inyang miras ne i Safan king Templo, Ikit ke king Templo ning Ginu ing libru ning Kautusan. Binie ne kang Safan at binasa ne.

⁹ Kaybat, minta ya king ari at ngana, Makamal a Ari, binie da la pu ring talasuyu yu ring salapi karing taung mamahala king pangalarin ning Templo ning Ginu.

¹⁰ At ngana pang sinabi, Atin ya pung binie libru kanaku i Hilkia. Binasa neng masikan king arapan na ning ari.

¹¹ Inyang dimdam na ning ari ing mababasa king kautusan, ginabak na ing susulud nang imalan uli na ning lungkut na.

¹² Inutus na kang Hilkia a pari, kang Ahikam a anak nang Safan, kang Akbor a anak nang Micaia, king kalihim a i Safan, at king mayordomong i Asaia

¹³ ing maniawad lang kausukan king Ginu para king ari at para king mabilug a Juda tungkul king turu na ning libru. Ngana pa karela, Maragul ing mua na kekatamu ning Ginu uling e ra gewa ding makatua tamu ing sukat marapat a sasabian na ning libru.

¹⁴ Inya meko ya ing paring i Hilkia, i Ahikam, i Akbor, i Safan, at i Asaia at minta la king babaing propetang i Hulda a manuknangan king bayung dake na ning Jerusalem. (Sallum ing lagyu ning asawa na, ing anak nang Tikva at apu nang Haras; ya ing talaingat imalan king Templo.) Belita ra kang Hulda ing milyari.

¹⁵ At ngana karela niting babaing propeta, Oyni ing pasabi na ning Ginu, ing Dios ning Israel, ketang mitubud kekayu kanaku:

¹⁶ Parala kung kapahamakan keting lugal at karing memalen agpang king makasulat king libru a binasa na ning ari ning Juda.

¹⁷ Sikuil da ku at minie lang ain-a-durulukan karing aliwang dios. Pepamua ra ku king gewa da, milalablab ing mua ku karela at e matda.

¹⁸ Oyni naman ing sabian yu king aring mitubud kekayu: Aku, ing Ginu Dios ning Israel, mekiramdam ka king makasulat king libru,

¹⁹ uling sinisi ka at migpakumbaba arap ku, ginabak mu ing susulud mung imalan, at menangis inyang dimdam mung belan keng kasiran ing Jerusalem at ding memalen na. Gawan keng lugal a makatakut, lugal a gamitan da ring tau bilang metung a sumpa. Dimdam ku ing panalangin mu,

²⁰ at e ku iparala ing kasiran a parala ku king Jerusalem kabang mabie ka. Paintulutan ku ing mate kang payapa. Mibalik la ring tubud kang Aring Josias a darala da ing mensahi.

23

¹ Pepayaus na la ngang Aring Josias ding manimuna na ning Juda at ning Jerusalem,

² at miyabe-abe lang minta king Templo ning Ginu a kayabe ding pari at propeta at ding heganaganang memalenkalulu at mabandi. Binasa ne karela ing mabilug a libru ning kasunduan a meyakit king Templo ning Ginu.

³ Tinalakad ya ketang paglugalan na ning ari at ginawa yang kasunduan king Ginuking tuparan na la king mabilug nang pusu at kaladua ding kautusan at tuntunan, antimo ing makasulat king libru. At mengaku la ring memalen king tuparan de ing kasunduan.

⁴ Kaybat, inutusan ne ning ari i Hilkia a matas dili katungkulan karing pari at ding paring kayaduangan na, at ding guardia king pasbul palub king Templo ning Ginu king ilual da la ngan ding bageng megamit king pamanyamba kang Baal, king diosang i Asera, at karing batuin. Pepasilab na la ngan ning ari king lual ning siudad lele ning Kapatagan ning Kidron, at kaybat peparala na king Betel ing abu.

⁵ Tinabi na la ding paring telaga da ring minunang ari ning Juda ban duluk insenso karing mangatas a lugal ning siudad ning Juda at ning makapadurut ning Jerusalemding paring miyain ain-sakripisyu kang Baal, king aldo, king bulan, karing planeta, at karing batuin.

⁶ Leko ne king Templo ning Ginu ing larawan na ning diosang i Asera; dela ne iti king siudad ning Kapatagan ning Kidron; silaban ne at linaso neng mapinung-mapinung anting alikabuk, at kaybat sinabug na karing kutkutan da ring taung karaniwan.

⁷ Pepalasak na la ring kuartu da ring lalaking patutut a manuknangan king Templo ning Ginu. (Ken la naman gagawang imalan ding babai para gamitan king pamanyamba kang Asera.)

⁸ Tinipun na la ngan king Jerusalem ding pari karing siudad ning Judea at pepalasak na la ding altar karing mangatas a lugal king mabilug a Juda, at pepalasak na la ding altar manibat king Geba angga king Beerseba. Pepalasak na la naman ding altar a megawa para karing kambing a demonyu a malapit king pasbul dalan a pepagawa ning gobernador Josue a atyu banda nang kayli ning pasbul dalan a palub king siudad.

⁹ E la mipaintulutan ding pari ban sumuyu king Templo, oneng malyari lang makapangan karing tinape alang lebadura a miyabie para karing kalupa dang pari.

¹⁰ Pepalasak nia naman ing Tofet king Kapatagan ning Hinom ban ala nang makaduluk pang anak da bilang ain da kang Molek.

¹¹ Pepalako na la ring kabayung telaga da ring meging ari ning Juda para king pamanyamba king aldo, at pepasilab na la ding karwaheng megamit king pamanyamba. (Makasikap la king patyu ning Templo ning Ginu, lele ning pasbul dalan at e marayu king tuknangan nang Natan Melek, ing metung a lalaking matas a katungkulan.)

¹² Pepalasak na lang Aring Josias ding altar a atyu king babo ning palasyu. Pepagawa da la reti ding meging ari ning Juda babo ning kuartu nang Aring Ahaz. Pepalasak na la naman ding altar a atyu pilatan da ring aduang patyu ning Templo ning Ginu, at pepalaso na la at inugse ing pulbus da king Kapatagan ning Kidron. Ing pepagawa kareng altar ya i Aring Manase.

¹³ Pepalasak na la naman ding altar a atyu king aslagan ning Jerusalem, dane mauli ning Bunduk da ring Olibo. Pepagawa na la deti ning Aring Solomon para king pamanyamba karing makasumaming idolo na ning diosang i Astarte ning Sidon, para kang Kemos, ing kikilalanan nang dios ning Moab, at para kang Molek, ing kikilalanan nang dios ning Ammon.

¹⁴ Pepalasak na la naman ding sagradung asias a batu at larawan nang Asera, at pepatambun na lang butul mete tau ring lugal nung nu la mitalakad.

¹⁵ Pepalasak na la namang Aring Josias ding altar king Betel a pepagawa nang Aring Jeroboam a anak nang Nebat at ing pepasari king pamikasala na ning Israel. Tibag na la ring batu at pepalaso angga king meging alikabuk la, at pepasilab ne ing larawan nang Asera.

¹⁶ King pamaglalawe na, ikit na la ding mapilan a pantiun karin king bunduk-bundukan. Pepakulkul na la ring butul at pepasilab na la king altar. King anti kaniting paralan ne lesakan ing altar, agpang king inula na ning propeta ning Dios king maluat nang panaun a milabas. King pamaglalawe na ikit nia namang Aring Josias ing pantiun na ning propetang minie king ula.

¹⁷ Nganang kinutang, Kaninu ya pantiun yan? Ngarang mekibat ding memalen na ning Betel, Yan ing pantiun na ning propetang dinatang ibat king Juda at minie ula karing bage gewa yu king altar.

¹⁸ Nganang Aring Josias, E ye tataginan; e yu la kikimutan ding butul na. Inya e da la teginan ding butul na pati na ring butul na ning propetang dinatang ibat king Samaria.

¹⁹ Pepalasak na la naman ding altar karing siudad ning Samaria a pepagawa da ring minunang ari na ning Israel a meging sangkan king pangabua na mua ning Ginu. Gewa nang Aring Josias itang gewa na king Betel.

²⁰ Pepapate na la ngan ding paring paganu karing mismung altar nung nu la susuyu, at pepasilab king balang altar ding butul mete tau. Kaybat na nita, mibalik ne king Jerusalem.

²¹ Nganang minie utus Aring Josias karing memalen, Pagselebran ye ing Pamaglagpus bilang pamamie parangal king Ginung kekatamung Dios, antimo ing makasulat king libru ning kasunduan.

²² Ala pang Piesta ning Pamaglagpus ing mipagselebran king Israel o king Juda manibat na kanitang kapanaunan da ring ukum.

²³ Ngeni, king kalabing walung banua na ning pamag-ari nang Josias, mipagselebran ya king Jerusalem ing Piesta ning Pamaglagpus.

²⁴ Ing metung pang gewa nang Josias ya ing pepalako na la ding espiritista, ding mamamanula, ding bage kikilalanan dang dios, at ing heganaganang dapat a makasumami king Juda at Jerusalem. Gewa na ita bilang pamanupad karing kautusan a mababasa king librung ikit nang Hilkia, ing Pekapun ding Pari, king Templo ning Ginu.

²⁵ Ala metung mang ari king milabas a panaun o karing meging ari kaybat na a kalupa nang Josias a sinuyu king Ginu king mabilug nang pusu, kaisipan, at sikanan. Pemintuan na la ngan ding kautusan king Batas nang Moises.

²⁶ Oneng mibubua angga ngeni ing mua ning Ginu laban king Juda uli na ning gewa nang Aring Manase.

²⁷ Ngana ning Ginu, Gawan ku king Juda itang gewa ku king Israel. Itabi ku la ding memalen na ning Juda at isakuil ing Jerusalem, ing siudad a pinili ku at ing Templo, ing lugal a pinili ku ban karin samban.

²⁸ Makasulat king Istoria da ring Ari ning Juda ing heganaganang gewa nang Aring Josias.

²⁹ King panaun na ning pamag-ari na, penimunan no ning Aring Neco ning Ehipto ding dakal a sundalung pakasandata king Ilug ning Eufrates ban saupan ne ing ari ning Asiria. Migkapilit yang sabatan na lang Aring Josias, oneng mete ya king pamakilaban karin king Megido.

³⁰ Binili de ring opisyal na ing bangke na king metung a karwahe at inuli king Jerusalem, at kitkut king kutkutan da ring ari. Ing anak nang i Joahaz ya ing pinili da ring memalen na ning Juda, at linian de bilang ari a kayalili nang tata na.

³¹ Adua yang pulu't atlung banua i Joahaz inyang meging ari ya king Juda, at mig-ari ya king Jerusalem kilub da mu ring atlung bulan. I ima na ya i Hamutal a anak nang Jeremias ning Libna.

³² Tikian na ing e mayap dang gewa ding makatua na, inya mikasala ya naman king Ginu.

³³ Miyangganan ing pamag-ari na inyang mebihag ya kang Aring Neco ning Ehipto karin king Ribla ning sakup ning Hamat. Kaybat pepabuisan neng pitung libu limang dalan a librang pilak at pitung pulu't limang librang gintu.

³⁴ I Eliakim a anak nang Josias ya ing gewa nang Aring Neco bilang kayalili nang Josias, at inalilan ne ing lagyu na king lagyung Jeoiakim. Dela neng Aring Neco i Joahaz king Ehipto at karin ya mete.

³⁵ Pepabuisan na lang Aring Jeoiakim ding memalen na ning Juda agpang king pibandian a atyu karela ban apalto ne ing alagang pakiduang na ning ari ning Ehipto.

³⁶ Adua yang pulu't limang banua i Jeoiakim inyang meging ari ya king Juda, at mig-ari ya king Jerusalem kilub ding labing metung a banua. I ima na ya i Zebida a anak nang Pedaia ning Ruma.

³⁷ Tikian na ing e mayap dang gewa ding makatau na, inya mikasala ya naman king Ginu.

24

¹ King panaun na ning pamag-ari nang Jeoiakim, lisuban neng Aring Nebucadenesar ning Babilonia ing Juda. Mipailalam ya king upaya na i Jeoiakim kilub ding atlung banua. Kaybat na nita, mig-rebeldi yang laban kang Aring Nebucadenesar.

² Mitubud yang lalaking pakasandata ing Ginu laban kang Jeoiakim. Menibatan la ding lalaki king Babilonia, king Siria, king Moab, at king Ammon. Mituburan la ban lasakan ya ing Juda, antimo ing sinabi na karing talasuyu nang propeta.

³ Iti mepalyari king utus na ning Ginu ban itabi la king panimanman na ring memalen na ning Juda, uli da ring dakal a kasalanan a gewa nang Aring Manase,

⁴ at uli da ring dakal a taung alang kasalanan a pepapate na. E ne apatawaran ning Ginu i Manase king gewa na.

⁵ Makasulat king Istoria da ring Ari ning Juda ing heganaganang gewa nang Jeoiakim.

⁶ Mete ya i Jeoiakim, at ing anak nang i Jeoiakin ya ing menalili bilang ari.

⁷ E ne bitasang linual pa ing ari ning Ehipto, uling ing ari ning Babilonia ikua na na la ngan asakup ding lugal a sakup na ning ari ning Ehipto manibat king Batis ning Ehipto angga na king Ilug ning Eufrates.

⁸ Labi yang walung banua i Jeoiakin inyang meging ari ya king Juda, at mig-ari ya king Jerusalem kilub da mu ring atlung bulan. I ima na ya i Neusta a anak nang Elnatan ning Jerusalem.

⁹ Tikian na ing heganaganang e mayap a gewa nang tata na, inya mikasala ya king akakit na ning Ginu.

¹⁰ King kapanaunan na kanita re lisuban ding sundalus nang Nebucadenesar ning Babilonia ing Jerusalem.

¹¹ Kabang lulusuban de, dinatang ya i Aring Nebucadenesar,

¹² at sinuku ya i Aring Jeoiakin at i ima na, ding anak nang lalaki, ding opisyal na, at ding talapamahala na king palasyu. King kawalung banua na ning pamag-ari na kanita ne binihag ning Aring Nebucadenesar,

¹³ at dela na naman king Babilonia ing heganaganang pibandian na ning Templo ning Ginu at ning palasyu. Antimo ing asabi na na ning Ginu, pepalaso na lang Nebucadenesar ding gintung kasangkapan a pepagawa nang Aring Solomon para gamitan king Templo ning Ginu.

¹⁴ Dela na la ngang Nebucadenesar ding bihag a memalen na ning Jerusalem, ding prinsipi, ding kalang-alangnan a tau; heganagana apulu lang libu. Tiki na la naman ding lalaking mangagaling a pangamat king obra at ding pande. Ala yang tigan nung e mu ding pakakalulu.

¹⁵ Dela ne Babilonia i Aring Jeoiakin, i ima na, ding asawa na, ding opisyal na, at ding manimuna ning bansa.

¹⁶ Dela na la naman Babilonia ding pitung libung sundalus a bihag, at ding mangagaling a pangamat king obra, at ding pande a pawang mangasikan at malyaring ilaban king gera.

¹⁷ I Matania, ing bapa nang Jeoiakin, ya ing gewa nang Nebucadenesar bilang ari ning Juda. Inalilan ne lagyu, at Zedekia ing binie nang lagyu.

¹⁸ Adua yang pulu't metung a banua i Zedekia inyang meging ari ya king Juda, at mig-ari ya king Jerusalem kilub ding labing metung a banua. I ima na ya i Hamutal a anak nang Jeremias ning Libna.

¹⁹ Tikian na ing e mayap nang gewang Aring Jeoiakim, inya mikasala ya king akakit na ning Ginu.

²⁰ Mimua yang e mu nanu ing Ginu karing memalen na ning Jerusalem at Juda, inya tinabi na la king akakit na.

25

¹ Mig-rebeldi ya i Zedekia laban kang Aring Nebucadenesar ning Babilonia. Inya dinatang ya i Nebucadenesar at ding heganagana nang sundalus a pakasandata, at kibkuban de ing Jerusalem kanitang kapulu nang aldo ning kapulung bulan ning kasiam nang banuang pamag-aring Zedekia. Ginawa lang kampu ra lual ning siudad at mitalakad lang pader a barikada king makapadurut ning siudad.

² E la pepatugut linusub angga na king kalabing metung a banua nang pamag-aring Zedekia.

³ King kasiam a aldo ning kapat a bulan ning banua mu ring ita meragul ing danup angga king ala na lang apangan ding tau.

⁴ Melasak la ring pader ning siudad, at agyang kibkuban de ring sundalus ning Babilonia ing siudad, mekatakas la mu rin ding sundalus ning Jerusalem inyang bengi na. Tinakas la king kapamilatan na ning pamandalan da king hardin ning ari, at linabas la king pasbul a makataid karing aduang pader. Milayi la papunta king Kapatagan ning Jordan.

⁵ Oneng ding sundalus na ning Babilonia tegalan de i Aring Zedekia, at abihag de karin king kapatagan lele ning Jerico, at likuan de ring sundalus na.

⁶ Dela re i Zedekia kang Aring Nebucadenesar a atyu kanita king siudad ning Ribla. Karin ne inatulan i Aring Zedekia.

⁷ Pete da la ring anak nang lalaki kabang makalawe ya. Kaybat na nita, pepadukit ne mata i Zedekia ampon pepatanikala, at kaybat pepadala ne king Babilonia.

⁸ King kapitung aldo na ning kalimang bulan ning kalabing siam nang banuang pamag-aring Nebucadenesar ning Babilonia, linub ya Jerusalem i Nebuzaradan, ing talausuk ning ari at pekapun da ring sundalus a pakasandata.

⁹ Silaban ne ing Templo ning Ginu, ing palasyu, at ding bale da ring maulagang tau na ning Jerusalem,

¹⁰ at ding sundalus na lesak da la ring pader ning siudad.

¹¹ Kaybat dela na lang Nebuzaradan king Babilonia ding taung mitagan king siudad, ding mitagan a taung mangagaling a pangamat king pamagobra, at detang mekikampi king Babilonia.

¹² Oneng likuan na la king Juda ding mapilan a pakakalulung taung alang pibandian nanuman, at pepagobran na la karing mulahan ubas at karing marangle.

¹³ Pemirasu da la ring sundalus na ning Babilonia ding tangsung asias at ding karwaheng atyu king Templo ning Ginu; antimu rin ing maragul a tangsung datukanan danum, at kinua da ngan ing heganaganang tangsu at dela ra king Babilonia.

¹⁴ Kinua da la naman ding pala at ding lulanan abu a gagamitan king pamaglinis king altar, ding kasangkapan a gagamitan karing sulu, ding palangganang gagamitan king pamanialud daya da ring ain-sakripisyu, ding silyo a gagamitan king pamanduluk insenso, at ding heganaganang tangsung kasangkapan a gagamitan king kasuyuan king Templo.

¹⁵ Kinua ra ngan ing bage megawa king gintu at pilak; ding malating silyo, ding kawaling gagamitan para king pamagdalang mibabayang uling,

¹⁶ ding tangsung kasangkapan a pepagawa nang Aring Solomon para king Templo ning Ginuding aduang asias, ding aduang karwahe, at ing maragul a datukanan danume mu la atimbang uling mabayat la.

¹⁷ Milulupa la ring aduang asias: adua yang pulu't pitung talampakan king katas ing balang metung at atin lang tangsung kapital king babo a apat at kapitnang talampakan king katas. At king makapadurut da ring kapital metung yang tangsung salasala a mipalamutian pomegranate at megawa la king tangsu.

¹⁸ Karagdagan kaniti, i Nebuzaradan a pekapun, dela neng bihag i Seraia, ing Pekapun ding Pari, i Zefania, ing kaduang matas a katungkulan karing pari, at ding atlu pang maulagang opisyal na ning Templo.

¹⁹ Ibat king siudad, kinua ne ing opisyal a manimuna karing sundalus, ding limang talausuk ning ari a atyu pa kanita king siudad, ing kasaup ning pekapun a mamahala karing listahan militar, at ding aliwa pang anam apulung maulagang lalaki.

²⁰ Dela na la ngan Nebuzaradan king ari ning Babilonia a atyu king siudad ning Ribla

²¹ king sakup ning Hamat. Karin na la pepabarug at pepapate ning ari. Inya mebihag la ding memalen na ning Juda king sarili dang bansa at miyugse la king aliwang bansa.

²² I Gedalias a anak nang Ahikam at apu nang Safan ya ing pinili nang Aring Nebucadenesar ban gawan gobernador ning Juda para karing taung e miyugse king Babilonia.

²³ Inyang abalitan da ring opisyal at ding sundalus ning Juda a e sinuku, pintalan de i Gedalias karin king Mizpa. Ding opisyal ila ri Ismael a anak nang Netania, Joanan a anak nang Karea, Seraia a anak nang Tanumet ning Netofa, at i Jezania ning Maaca.

²⁴ Ngana karelang Gedalias, E kayu sukat mitatakutan karing opisyal da ring Babilonia. Paniwalan yu ku sana. Ken na kayu manuknangan at sumuyu king ari na ning Babilonia, at e kayu numanu balang.

²⁵ Oneng king kapitung bulan na ning banuang ita, i Ismael a anak nang Netania at apu nang Elisama a miembru king pamilyang ari, at ding apulung lalaki minta la king Mizpa; liban de i Gedalias at pete re. Pete da la naman ding Israelita at ding tau Babiloniang kayabe nang Gedalias.

²⁶ Kaybat na nita, meko la at minta king Ehipto ding Israelita a mabandi at pakakalulu, kayabe da la ring opisyal da ring sundalus, uling tatakut la karing tau Babilonia.

²⁷ Kanitang banuang meging ari ya i Evilmerodak king Babilonia, pepakit yang ganaka kang Aring Jeoiakin ning Juda king kapamilatan na ning pamaglual na kang Jeoiakin king sukulan. Milyari ita kanitang kadua nang pulu't pitung aldo ning kalabing adua nang bulan ning katlu nang pulu't pitung banua nang pangabihag Jeoiakin.

²⁸ Meging maganaka ya i Evilmerodak; dininan neng katungkulan a mas marangal kesa karing aliwang aring kayabe nang miyugse king Babilonia.

²⁹ Inya mipaintulut kang Jeoiakin ing alilan na ing imalan nang presu at mangan king lamesa na ning ari kabang mabie ya.

³⁰ Mirinan yang sustentu aldo-aldo para king pamangailangan na kabang mabie ya.