1

¹ Tutu neng matua i Aring David at agyang nanan deng ulasan makapal marimla ya pa mu rin.

² Inya ngara kang Aring David ding pamuntuk na, Makamal a Ari, lumawe kami pung metung a dalaga ban keti tuknang at manese kekayu. Magkera ya siping yu ban e kayu marimla.

³ Inya linibut la king mabilug a Israel ban manintun metung a malagung dalaga, at karin king Sunem de ikit. Ing lagyu na Abisag, at dela re king ari.

⁴ Tune yang malagung babai at binten ne ampon sinese ing ari, oneng e ne sipingnan ning ari i Abisag.

⁵ Kanita na sinabing ating kapagmaragulan Adoniya king ya ing tutuking maging ari. I Adoniya anak neng Hagit; migsadia neng karung panggera, sundalung pakakabayu, at limang pulung lalaking guguardia neng maglakad ya.

⁶ E ne sebianan David a tata na tungkul king nanumang depat na. Masanting yang lalaki i Adoniya; koya ne i Absalom.

⁷ Mekipagsalita ya kang Joab, ing anak nang Zeruia, at kang Abiatar a pari, at pengaku rang saupan de.

⁸ Oneng e ya makapanig kang Adoniya i Zadok a pari, i Benaia a anak nang Jeoiada, i Natan a propeta, i Simei, i Rei, at ding pansariling guardia nang David.

⁹ Misan a aldo, i Adoniya minain yang dakal a tupa, toro, at pepatabang baka karin king Batu ning Ubingan lele ning sibul ning Enrogel. Kinumbira na la ring aliwa nang anak a lalaking Aring David at ding opisyal ning ari a tau Juda.

¹⁰ Oneng e na la kinumbira di propeta Natan, Benaia, ding pansariling guardia ning ari, at i Solomon a kasing-ibpa na.

¹¹ Inya pekisabian neng Natan i Batseba a ima nang Solomon. Ngana, Batseba, e mu pa abalitan king i Adoniya a anak nang Hagit tilduan nang ari ing sarili na at ala yang kabalubalu i Aring David?

¹² Makiramdam ka king sabian ku keka nung e ka bisang mate at nung buri meng sagipan a bie ing anak mung i Solomon.

¹³ Munta ka ngeni mu rin kang Aring David at sabian mu ing anti kaniti: Makamal a Ari at ginu ku, e yu wari pengaku kanaku king i Solomon a anak ku ya ing maging ari a kayalili yo? Obat i Adoniya ya ing meging ari?

¹⁴ Ngana pang Natan kang Batseba, Datang ku kanita kabang pakisabian me ing Aring David at patutuan ku king ari ing sinabi mu.

¹⁵ Inya pintalan neng Batseba ing ari king kuartu na. Tutu neng matua ing ari at i Abisag, ing dalagang tau Sunem, ya ing magbante.

¹⁶ Dinuku ya i Batseba at siniklaud arapan ning ari. Nganang Aring David, Nanu ing buri mu?

¹⁷ Pekibat nang Batseba, Makamal a Ari, pengaku yu kanaku king lagyu ning Ginung kekayung Dios king ing anak kung i Solomon ya ing maging kayalili yu bilang ari.

¹⁸ Oneng ngeni i Adoniya ya ing meging ari king e yu man kamalayan.

¹⁹ Miyain neng dakal a toro, tupa, at pepatabang baka, at kinumbira ding anak yung lalaki, at i Abiatar a pari ampon i Joab, ing pekapun da ring kekayung sundalus, oneng e ne kinumbira ing anak yung i Solomon.

²⁰ Makamal a Ari, manenaya la kekayu ding sablang tau ning Israel ban sabian karela nung ninu ing maging kayalili yu bilang ari.

²¹ Nung e yu dinan pansin iti, kabud kamate yu, aku ampon ing anak yung i Solomon mibilang kaming talapanialansang.

²² Kabang magsalita ya pa i Batseba, dinatang ne man i Natan king palasyu.

²³ Ating sinabi king ari king atyu ya i propeta Natan, inya pepaluban de. Dinuku ya king ari.

²⁴ Kaybat nganang migsalita, Makamal a Ari, pepalual na kayu pu waring amanu king i Adoniya ya ing manalili kekayu bilang ari?

²⁵ Ngening aldong iti minta ya at minain yang dakal a toro, tupa, at pepatabang baka. Kinumbira na la ngan ding anak yung lalaki, i Joab, ing pekapun da ring sundalus yu, at i Abiatar a pari. Ngening penandit a iti mamangan la at miminum kayabe na, at kukulisak da, Luid ya ing Aring Adoniya!

²⁶ Oneng e na ku kimbira; e nia naman kinumbira i Zadok a pari, i Benaia, at i Solomon.

²⁷ Utus yu pu ite? Nung utus yu, obat e la pu mipabaluan ding kekayung opisyal tungkul king ari a maging kayalili yu?

²⁸ Nganang Aring David, Ausan me i Batseba. Linapit ya i Batseba at tinalakad ya arap na ning ari.

²⁹ Ngana ning ari, Pengaku ku keka king lagyu ning mabie Ginu, ing migligtas king sabla kung kaguluan,

³⁰ king ngening aldong iti tuparan ke ing pangaku a gewa ku keka king lagyu na ning Ginu, ing Dios ning Israel, king ing anak mung i Solomon ya ing kayalili ku bilang ari.

³¹ Dinuku ya at siniklaud i Batseba arapan ning ari at kaybat ngana, Mananu na sanang ing ginung kanakung ari mie ya kapilan man!

³² Kaybat na nita, peparakit ne ning ari i Zadok a pari, i Natan a propeta, at i Benaia a anak nang Jeoiada. Dinatang la at mekikit king ari.

³³ Ngana karela ning ari, Ituki yu la ring kanakung opisyal; pasaken ye ing anak kung i Solomon king sarili kung mula, at patnubayan ye king pamunta na king Sibul ning Gihon.

³⁴ Karin de lanian di Zadok a pari at Natan a propeta bilang ari ning mabilug a Israel. Kaybat tiupan ye ing trumpeta at ikulisak masikan: Luid ya ing Aring Solomon!

³⁵ Patnubayan ye king pamunta na keti potang lukluk ne king tronu ku. Ya ing manalili kanaku bilang ari, uling ya ing pinili ku ban maging pamuntuk ning Israel at ning Juda.

³⁶ Nganang mekibat Benaia a anak nang Jeoiada, Matupad pu ing utus yu, at mananu na sanang patibayan na iti ning Ginung kekayung Dios!

³⁷ At nung makananu neng pitnubayan ning Ginu ing kanakung Makamal a Ari, makanyan nia naman sanang patnubayan i Solomon at maygit bendisyunan king pamag-ari yu.

³⁸ Inya mitnube ya i Zadok a pari, i Natan a propeta, i Benaia a anak nang Jeoiada, ding Kereteo, at Peleteo. Pepasaken de i Solomon king mula nang Aring David at tiki re king Sibul ning Gihon.

³⁹ Karin kinua nang Zadok, ing pari, ing larung olibo a makalulan king sagu a ibat king Tolda, at linian ne i Solomon bilang ari. Kaybat tiniupan da la ring trumpeta at kilisak dang masikan ding sablang tau: Luid ya ing Aring Solomon!

⁴⁰ At tikian deng mibalik; kukulisak la king tula ra at titigtigan da la ring plauta. Kukurug ing gabun uli na ning inge ra.

⁴¹ Mayayari neng mamangan kanita i Adoniya at ding bisita na inyang dimdam da ing inge. Nganang sinabing Joab inyang dimdam ne ing trumpeta, Nanu ita? Obat mainge king siudad?

⁴² Kabang magsalita ya pa dinatang ya i Jonatan, ing anak nang Abiatar a pari. Nganang Adoniya kang Jonatan, Me keni. Mayap kang tau, at siguradung atin kang daralang mayap a balita.

⁴³ Nganang Jonatan, E pu mayap a balita, uling ing makamal tamung i Aring David gewa neng ari i Solomon bilang kayalili na.

⁴⁴ Tinubud ne i Zadok a pari, i Natan a propeta, i Benaia a anak nang Jeoiada, ding Kereteo at Peleteo ban antabayanan de i Solomon at pepasaken de king mula na ning ari.

⁴⁵ At karin king Sibul ning Gihon di Zadok at Natan linian deng laru bilang ari. Kaybat mibalik la king siudad a kayabe na; kukulisak la king tula at mika maragul a kulisakan karing memalen. Ya pin iti ing inge a dimdam yu.

⁴⁶ Makalukluk ne king tronu i Solomon.

⁴⁷ E mu ila, dinatang la pati ring tagapayu ning ari ban dinan yang mayap a oras ing Makamal a Aring David. Ngara, Mananu na sanang ing Dios yu gawan neng maygit a pikabaluan i Solomon at mas mapalad kesa kekayu ing pamag-ari na. Kaybat na nita, dinuku ya king katri i Aring David

⁴⁸ at menalangin. Ngana, Purian ya ing Ginu, ing Dios ning Israel, uling birian na king ing metung karing anak ku ya ing lukluk king tronu ku at peintulut na ing akit keng ari!

⁴⁹ Mitakutan la ring sablang bisita nang Adoniya inyang dimdam da iti at tinalakad la at memalaguang minuli karing sarasarili rang lugal.

⁵⁰ King takut nang Adoniya kang Solomon, tinalakad ya naman at minta king Toldang tuknangan ning Ginu, at pekatalan na karing sagu na ning altar.

⁵¹ Belita ra kang Aring Solomon king tatakut ya i Adoniya. Iti ing sangkan nung inya minta ya i Adoniya king Tolda at telan ne ing metung karing sagu ning altar. Ngana kang Solomon, Buri kung ipangaku nang Aring Solomon king e na ku ipapate.

⁵² Nganang sinabing Solomon, Nung tapat ya, agyang metung mu king buak na e matagin; oneng paten ya nung e ya tapat.

⁵³ Inya peparakit neng Aring Solomon i Adoniya at liwal king altar. Kaybat na nita, linapit ya at migsakab i Adoniya arapan nang Aring Solomon. Nganang Solomon kang Adoniya, Muli na ka.

2

¹ Nganang minie bilin kang Solomon inyang malapit neng mate i David:

² E na lumuat mate na ku. Inya magpakatatag ka at magpakalalaki,

³ at daptan mu ing nanumang iyutus na keka ning Ginung kekang Dios. Tuparan mu la ding sabla nang utus at tuntunan, agpang king kautusan a sinulat nang Moises, ban mibendisyunan ka at magtagumpe king nanumang daptan mu,

⁴ at tuparan na ning Ginu itang pengaku na. Ngana, Nung ding anak mu at ding maging anak da manatili lang tapat kanaku at mamintu king kaburian ku king mabilug dang pusu at kaladua, kanita manatili lang mag-ari king Israel.

⁵ Balu mu munaman nung nanu ing depat na kanakung Joab a anak nang Zeruia; pete na la ding aduang pekapun da ring sundalus na ning Israel; i Abner a anak nang Ner, at i Amasa a anak nang Jeter. Pete na la reti at pigbengansan king panaun na ning kapayapan uli na ning dayang tinulu inyang panaun na ning gera. Pete na la ring taung alang kasalanan. Inya midinatan ya ing lagyu ku at aku ing miparsalanan.

⁶ Daptan mu na itang sukat mung gawan; e mu paintulut ing kumaba ya pa bie at mate king kapayapan.

⁷ Oneng pakit kang ganaka karing anak nang Barzilai ning Gilead at e mu la paburen, uling meging maganaka la kanaku kanitang tatakasan ke ing kapatad mung i Absalom.

⁸ E mia naman kakalinguan i Simei a anak nang Gera ning balen ning Bahurim ning tribu nang Benjamin. Piniumpa na kung e mu nanu kanitang aldo a minta ku king Mahanaim. Oneng inyang saganan na ku king Ilug ning Jordan, pengaku ku king lagyu na ning Ginu king e ke paten.

⁹ E mu sa paintulut ing e ya miparusan. Biasa ka at balu mu na ing gawan mu kang Simei. Siguraduan mung magdusa yang kamatayan.

¹⁰ Mete ya i David at mikutkut king balen nung nu ya mibait.

¹¹ Mig-ari ya king Israel kilub ding apat apulung banua; pitu yang banuang mig-ari king Hebron at atlung pulu't atlung banua king Jerusalem.

¹² I Solomon ya ing menalili kang tata nang i David bilang ari, at tune yang matatag ing kayarian na.

¹³ Misan a aldo, i Adoniya a anak nang Hagit pintalan ne i Batseba, ing ima nang Aring Solomon. Nganang Batseba kang Adoniya, Pagnasan mu ing kapayapan king pamunta mu kete? Pekibat nang Adoniya, Opu.

¹⁴ Ngana pa, Atin ku pung buring sabian kekayu. Nganang Batseba, Sulung, sabian mu.

¹⁵ Nganang Adoniya, Ikayu balu yu king aku ing sukat maging ari, at iti ya ing panenayan na ning mabilug a Israel. Oneng e makanyan ing milyari at ing kapatad ku ya ing meging ari, uling iti ing kaburian na ning Ginu.

¹⁶ Atin ku pung metung a kayaduanan kekayu at e yu ku sana tatanggian. Nganang Batseba, Sulung, sabian mu.

¹⁷ Nganang Adoniya, Balu ku king e na kayu tanggian Aring Solomon, inya ipakisabi yung mayap king ari king ibie ne kanaku i Abisag, ing dalagang tau Sunem, ban maging asawa ku.

¹⁸ Wa, nganang Batseba, pakisabian ke ing ari tungkul kaniting kayaduanan mu.

¹⁹ Inya pintalan neng Batseba i Aring Solomon ban ipayabut na ing kayaduanan nang Adoniya. Inyang ikit neng Solomon i Batseba tinalakad ya at selubungan ne. Dinuku ya kang ima na at linukluk yang pasibayu king tronu na. Kaybat pepakua yang luklukan; binili re banda nang wanan at karin ne pepaluklukan i ima na.

²⁰ Nganang Batseba, Ating malating bage a buri kung aduan keka, anak; e mu ku sana tatanggian. Ngana ning ari, Sabian mu, ima; e ra kayu tanggian.

²¹ Nganang Batsebang ima na, Paburen mu neng maging asawa nang Adoniya a kapatad mu i Abisag, ing dalagang tau Sunem.

²² Nganang Solomon, Ima, obat aduan mu kanaku ing ibie ke i Abisag kang Adoniya? Pota galang pati ing tronu ku aduan ye ban ibie kang Adoniya? Wa, makamatua ya kanaku at makapanig ya kang Adoniya i Abiatar a pari at i Joab a anak nang Zeruia.

²³ Kanita nganang sinumpa king lagyu na ning Ginu, Parusan na ku ning Ginu nung e ke papamayaran king bie na i Adoniya kaniting depat na.

²⁴ Pinilmi na ku ning Ginu king tronung luklukan nang tata kung i David, tiparan na ing pangaku na at binie ne ing kayarian kanaku at karing maging lahi ku. Susumpa ku king mabie Ginu king ngeni mu ring aldong iti paten ya i Adoniya!

²⁵ Inya inutusan neng Aring Solomon i Benaia, ing anak nang Jeoiada, at pete ne i Adoniya.

²⁶ Kaybat na nita, nganang Aring Solomon kang Abiatar a pari, Sulung, muli na ka keta kekayu king Anatot. Sukat kang mate, oneng e ra ka ipapate uling ika ing miningat king Kaban ning Kasunduan ning Ginung Dios inyang kapanaunan nang tata kung i David at kayabe na kang mibata king kasakitan a delanan na.

²⁷ Inya leko nang Solomon kang Abiatar ing katungkulan bilang pari na ning Ginu. Makanyan metupad itang sinabi na ning Ginu karin king Silo laban karing lahi nang Eli.

²⁸ Abalitan nang Joab ing sablang milyari. (Migpanig ya kang Adoniya oneng e kang Absalom.) Inya sinalikut ya king Toldang tuknangan ning Ginu at pekatalan na karing sagu na ning altar.

²⁹ Belita ra kang Aring Solomon king sinalikut ya i Joab king lele ning altar ning Toldang tuknangan ning Ginu. Kanita nganang Solomon kang Benaia a anak nang Jeoiada, Puntalan me at paten.

³⁰ Inya minta ya i Benaia king Toldang tuknangan na ning Ginu at ngana kang Joab, Lumual ka ken! Iti utus a ibat king ari. Nganang mekibat, E ku bisa. Keni na ku mate! Mibalik ya i Benaia king ari at sinabi na itang sinabi nang Joab.

³¹ Ngana ning ari kang Benaia, Sulung, gawan mu itang sinabi na. Paten me at kaybat ikutkut me. King anti kaniting paralan ya milako pakibatan ing pamilya mi karing taung alang kasalanan a pete nang Joab.

³² Ing Dios na mismu ing mamarusa kang Joab uli na ning pamakamate tau a depat na king e na kamalayan tata kung i David. Pete na la ding aduang taung alang kasalanan at mas mayap kesa kang Joab: i Abner a anak nang Ner at pekapun da ring sundalus na ning Israel, at i Amasa a anak nang Jeter at pekapun da naman ding sundalus na ning Juda.

³³ Ing mamayad king kamatayan da dugpa kang Joab at karing lahi na king kapilan pa man. Oneng dinan na lang tagumpe ning Ginu ding lahi nang David a lukluk king tronu na.

³⁴ Inya minta yang pasibayu i Benaia king Toldang tuknangan ning Ginu at pete ne i Joab, at kitkut de king tuknangan na karin king ilang.

³⁵ Kaybat na nita, i Benaia ya ing gewa nang pekapun da ring sundalus bilang kayalili nang Joab. I Zadok naman ya ing tilduan nang pari bilang kayalili nang Abiatar.

³⁶ Kanita pepayaus neng Aring Solomon i Simei at ngana, Simei, pagawa kang bale mu keti Jerusalem. E na ka mamako; keti na ka manuknangan.

³⁷ Mate ka kabud meko ka at dinalakit king Batis ning Kidron. Ika na kanita ing makikasalanan king kamatayan mu.

³⁸ Nganang Simei king ari, Mayap pu ing sinabi yu, Makamal a Ari. Ita pung buri yu ya ing daptan ku. Inya karin ya menuknangan kilub ning makabang panaun.

³⁹ Oneng kalabas da ring atlung banua tinakas la ding adua karing ipus nang Simei at minta la kang Aring Akis ning Gat a anak nang Maaca. Ating memalita kang Simei king atyu la king Gat ding adua nang ipus.

⁴⁰ Inya seken ne ing asno na at minta ya king Gat ban kuanan kang Aring Akis ding adua nang ipus. Ikit na la karin at kinua na la.

⁴¹ Belita ra kang Solomon king meko ya Jerusalem i Simei at kaybat-aybat na Gat.

⁴² Pepayaus ne ning ari at ngana kang Simei, E ra ka wari pepangakuanan king lagyu na ning Ginu at peka panabilinan king e ka mamako keti Jerusalem, at kabud meko ka mate ka? Pekibat mu king mayap ing sinabi ku keka at pengaku mung mamintu ka.

⁴³ Obat e mu tiparan ing sinumpa mu king Ginu at ing inutus ku keka?

⁴⁴ Ika mismu balu mu ing sablang e ustung depat mu king tata kung i David. Inya ngeni ing Ginu ya ing mamarusa keka.

⁴⁵ Oneng aku, i Aring Solomon, bendisyunan na ku at gawan neng matatag ing kayarian nang David king kapilan pa man.

⁴⁶ Kaybat na nita, inutusan ne i Benaia a anak nang Jeoiada. Linual ya i Jeoiada at pete ne i Simei. Ganap ne ngening matatag ing kayarian lalam nang pamag-aring Solomon.

3

¹ Mekisangga ya i Solomon king ari na ning Ehipto king kapamilatan na ning pamakiasawa na king anak nang dalaga. Inuli ne ing asawa na king Siudad nang David kabang e ya pa yari ing palasyung pagawa na at ing Templo ampon ing pader ning mabilug a Jerusalem.

² Miyayain lang ain-sakripisyu ding tau karing altar a atyu karing mangatas a lugal uling ala pang templong mitalakad.

³ Kaluguran neng Solomon ing Ginu, at tutuparan na la ding panabilin nang David a tata na. Mekamate ya namang animal at inain na la bilang ain-a-durulukan karing altar a atyu karing mangatas a lugal.

⁴ Misan a aldo, minta ya Gibeon i Aring Solomon ban miyain ain-sakripisyu uling atyu karin ing pikabaluan a altar. Karin ya miyain libung ain-a-durulukan.

⁵ Misan a bengi, kabang atyu ya karin pepakit ya ing Ginung Dios king kapamilatan na ning paninap. Ngana kang Solomon, Nanu ing buri mung ibie ku keka?

⁶ Pekibat nang Solomon, Pepakit kayung maragul at alang kupas a lugud king talasuyu yung i David a tata ku, uling menatili yang tapat kekayu, makatuliran, at malinis a pusu. At pepanatilian yu naman kang tata ku iting maragul at alang kupas yung lugud, at dininan ye pang metung a anak a menalili king tronu na.

⁷ O Ginung Dios, aku ing gewa yung ari bilang kayalili nang tata ku agyang anak ku pa mu at alang sibukan king pamanimuna.

⁸ Atyu ku ngeni libutad da ring taung kekayung pinili; milalu la king karakal at e mu la abilang-bilang.

⁹ Dinan yu ku sanang kabiasnan ban abalu ku ing mayap at ing e mayap ban kanita apamahalan ku lang alang pamangabiran deting kekayung memalen. Nung ali, makananu ku lang apamahalan?

¹⁰ Metula ya ing Ginu kang Solomon uli na ning inawad na.

¹¹ Inya ngana ning Ginu kang Solomon, Uli na ning iti ing inawad mu at e makabang bie o pibandian o kamatayan para karing kekang kalaban nune kabiasnan ban makapamahala ka king alang pamangabiran,

¹² ibie ku ing inawad mu. Dinan da kang kabiasnan at beluan a alang kalupa king milabas a panaun at king kapilan pa man.

¹³ Ibie ku la naman keka detang bage a e mu inawad: dakal a pibandian at dangalan a alang aring makaygit keka kabang bie mu.

¹⁴ At nung pailalam ka king kaburian ku at mamintu karing kautusan ku at tuntunan, antimo ing depat nang David a tata mu, dinan da kang makabang bie.

¹⁵ Migising ya i Solomon; akilala na ing pekipagsalitan ne ning Dios king kapamilatan na ning paninap. Mibalik ya Jerusalem at tinalakad ya arap na ning Kaban ning Kasunduan ning Ginu at miyain yang ain-a-durulukan at ain-ning-pamisulusulu king Ginu. Kaybat na nita, migtau yang maragul para karing tauan na.

¹⁶ Misan a aldo, ating aduang babaing magtinda king katawan da a mekikit kang Aring Solomon.

¹⁷ Ngana ning metung karela, Makamal a Ari, miyabe kami pung manuknangan ning babaing ini king metung a bale. Beit ke ing metung a anak a lalaki kabang atyu kami karin.

¹⁸ Ya man pu menganak yang lalaki kalabas ning atlung aldo kaybat kung menganak. Ikami mu pung adua karin; ala kami pung kayabe.

¹⁹ Misan a bengi, apatanan ne ning babaing ini ing anak na, at mete ya ing anak na.

²⁰ Mibangun ya king kapitangan na ning bengi, at kinua ne ing anak kung atyu siping ku kabang matudtud ku at dela ne king pagkeran na. Kaybat binili ne king siping ku ing anak nang mete.

²¹ Itang kabukasan a migising ku ban pasusuan ing anak ku, ikit ku king mete ya. Linawe keng masalese ing anak, at ikit ku king aliwa ya ing anak ku.

²² Oneng ngana ning kaduang babai, Ya pin ita ing anak mu; ing mabie anak ya ing kanaku! Ngana ning mumunang babai, Ali, ing mete anak ya ing keka, at ing mabie ya ing kaku! Makanyan lang mipakibatan arapan na ning ari.

²³ Kanita nganang Aring Solomon karela, Ing metung kekayu sasabian na king anak ne itang mabie, at ing mete anak ne ning metung. At kaybat ing metung pipilit na king ing mabie anak ya ing anak na.

²⁴ Kaybat na nita, mekiduang yang espada ing ari karing sundalus at dininan de.

²⁵ Kanita ngana ning ari, Pitnan ye ing anak a mabie; ibie ya ing kapitna king metung at ing kapitna king metung.

²⁶ Oneng migpakalunus ya king ari ing babaing tune maki anak a mabie at malugud king anak na. Ngana, Makamal a Ari, e yu ne pu pipitnan ing anak! Ibie yu ne pu king babaing ini! Ngana naman ning kaduang babai, Pitnan ya pin ing anak ban ala metung man kekami ing makinabang.

²⁷ Kanita nganang Aring Solomon, E ye pipitnan ing anak! Ibie ye king mumunang babai. Ya ing tune ima. fig,,,,,E ye pipitnan ing anak!,(3:27)fig*

²⁸ Abalitan da ring sablang memalen ning Israel ing binie nang kayatulan at mika maragul lang kagalangan king Aring Solomon. Kikilalanan da king dininan neng kabiasnan ning Dios ban ipairal na ing hustisia king alang pamangabiran.

4

¹ Ari ne ning mabilug a Israel i Solomon,

² at ila deti ring opisyal nang ating matas a katungkulan: i Azaria a anak nang Zadok, ya ing pari;

³ i Elihoref at i Aija a anak nang Sisha, ila ring kalihim ning konsehu; i Jeosafat a anak nang Ahilud, ya ing talaingat karing maulagang papelis;

⁴ i Benaia a anak nang Jeoiada, ya ing pekapun da ring sundalus; i Zadok at i Abiatar, ila ring pari;

⁵ i Azaria, ing anak nang Natan, ya ing pamuntuk ding gobernador da ring probinsia; i Zabud a pari at anak na namang Natan, ya ing babie payu king ari;

⁶ i Ahisar, ya ing talapanibala king palasyu; i Adoniram a anak nang Abda, ya ing talapanibala king sapilitang pamagobra king kayarian.

⁷ Memili ya namang labing aduang lalaki i Solomon at tilduan na lang gobernador karing probinsia na ning Israel. Ila ring maki pakibatan king pamangan a kailangan na ning ari at ding katubale na. Makatutuk ya ing balang metung karela metung a bulan kilub ning pabanua tungkul kaniting kabiayan.

⁸ Ila deti ring mepili at ding pamahalan dang lugal: i Benhur, ing bulubundukan ning Efraim;

⁹ i Bendeker, ing siudad ning Makaz, Saalbim, Bet Semes, Elon, at Bet Hanan;

¹⁰ i Benhesed, ing siudad ning Arubot at Soco ampon ding sablang lugal a sakup ning Hefer;

¹¹ i Benabinadab, ing asawa nang Tafat a anak nang Solomon, ing mabilug a matas nang lugal ning Dor;

¹² i Baana a anak nang Ahilud, ing siudad ning Taanak, Megido, at ing mabilug a Betsedan sumangid ning balen ning Zaretan, dane mauli na ning balen Jezreel at angga na king siudad ning Abel Mehola at ning siudad ning Jokmeam;

¹³ i Bengeber, ing siudad ning Ramot king Gilead, at karing baryu na ning Gilead a bandi ra ding pamilya nang Jair, ing lahi nang Manase, at ing mabilug na ning Argob king Bashan; heganagana anam lang pulung mangaragul a balen a makabakud pader at ating tangsung kabat karing pasbul dalan;

¹⁴ i Ahinadab a anak nang Iddo, ing Mahanaim;

¹⁵ i Ahimaz, ing mekapakiasawa kang Basemat a anak na namang Solomon, ing kabilugan a Neftali;

¹⁶ i Baana a anak nang Husai, ing Aser at ing balen ning Bealot;

¹⁷ i Jeosafat a anak nang Parua, ing kabilugan a Isacar;

¹⁸ i Simei a anak nang Ela, ing kabilugan a Benjamin;

¹⁹ i Geber a anak nang Uri, ing Gilead a king misan a panaun meging kayarian neng Aring Sihon da ring Amoreo at Aring Og ning Bashan. At atin pang metung a gobernador para king sakup na ning Juda.

²⁰ Mengari lang balas king pampang ning dagat ding memalen ning Israel at Juda uli na ning keraklan da. Labis-labis ing karelang kabiayan at masaya la.

²¹ Sakup na lang Solomon ding sablang kayarian manibat king Ilug ning Eufrates angga Filistia at king angganan na ning Ehipto. Mamayad lang buis at atyu la ngan lalam nang upaya king kekaban na ning bie na.

²² Ing aldo-aldo pamangan a kailangan nang Solomon ya iti: dinalan limang pulung kaban a mapinung arina; atlung dalan a kaban a karaniwan a arina;

²³ apulung pepatabang baka, aduang pulung bakang pistulan king marangle; dinalan a tupa; subali pa karing malati't maragul a usang lalaki at babai ampon pepatabang pabu at manuk.

²⁴ Sakup na namang Solomon ing sablang gabun a atyu dane nang albugan ning Ilug ning Eufrates manibat Tifsa angga king albugan king Gaza. Ya ing ari da ring ari kareting lugal, at kakasundu na la ngan ding sablang bansang makapadurut.

²⁵ King kekaban na ning bie nang Solomon, mibibie lang payapa ding memalen ning mabilug a Israel at Juda. Atin yang mulahan ubas at tanaman a higera ing balang pamilya manibat king Dan angga na Beerseba.

²⁶ Atin yang apat apulung libung kuadra para karing kabayung pangkarwahe at labing aduang libung kabayung saken da ring sundalus na.

²⁷ Paparala yang pamangan king bulan a mitakda ing balang metung at metung karing tilduan nang gobernador. Inya e ya kakukulangan at ding sablang pakanan na king sablang kailangan da.

²⁸ Ding magrasyun munamang sebada at are para karing kabayung sasaken na at pangkarwahe ila naman deting mesabing gobernador. Darala ra nu man karin mayawad idala ra.

²⁹ Dininan neng alang kalupang kabiasnan at beluan ning Dios i Solomon. Malapad anti ing dagat ing kabiasnan na.

³⁰ Ligpusan na la kabiasnan ding biasa na ning aslagan at ning Ehipto.

³¹ Mas biasa ya king kenu mang biasa; ligpusan ne kabiasnan i Etan a Ezrahite, i Heman, i Calcol, at i Darda, ding anak nang Mahol. Pikabaluan ing kabiasnan nang Solomon karing siping-siping a bansa.

³² Sinulat yang atlung libung kasebian, at libu at limang kanta.

³³ Makapagsalita ya tungkul karing tanaman at tanaman a mamunga, antimo ring tanaman a sedro ning Lebanon at ding hisopo a tutubu karing pader. Makapagsalita ya naman tungkul karing animal, ayup, ding gagapang a lelangan, at asan.

³⁴ Abalitan de ring ari ning mabilug a yatu ing kabiasnan na, at mitubud lang tau ban makiramdam kang Aring Solomon.

5

¹ Mikaluguran lang matalik di Aring Hiram ning Tiro at Aring David. Mitubud yang mapilan karing tauan na i Aring Hiram inyang abalitan nang i Solomon ya ing mepili bilang ari a kayalili nang tata na.

² Nganang peparalang pakibat Solomon kang Hiram,

³ E makalingad kekayu ing kapagnasan nang tata ku a patalakad templo para karin ya samban ing Ginung Dios na. E ne apatalakad uli na ning alang patugut a gerang inarapan na laban karing kalaban nang makapadurut anggang e na la simbut king saup ning Ginu.

⁴ Oneng ngeni dininan na kung kapayapan nu man karin ning Ginung kanakung Dios. Ala na kung kalaban at ala nang panganib a lumusub la ring kalaban.

⁵ Inya inari ku king lub ku ing italakad ke ing templo nung nu ya misamban ing Ginung kanakung Dios. Wa, nganang minie pangaku ning Ginu kang tatang ku: Ing anak mung ilukluk ku king tronu mu ya ing patalakad templo para kanaku.

⁶ Nung paintulut yu, iyutus yu ngeni karing tauan yu ing kuturan da la para kanaku ding tanaman a sedro karin king Lebanon, at sumaup lang mangutud dutung a sedro ding tauan ku. Bayaran ku ing nanumang alagang buri yu. E makalingad kekayu king ala lang sibukan ding tauan ku king pamangutud dutung, oneng sane la ding tauan yu.

⁷ Mesaya yang lubus i Aring Hiram king mensahing peparala nang Aring Solomon. Ngana, Purian ya ngeni ing Ginu a minie kang David metung a biasang anak ban manimuna king bansang marangal!

⁸ Inya nganang peparalang mensahi kang Solomon: Tinggap ke ing peparala mung mensahi, at matula kung ibie ing kayaduanan mung dutung a sedro at pinu.

⁹ Manibat king Lebanon idala ra la ding tauan ku ing dutung king dagat, at payagus da lang anting balsa king lugal a ituldu mu. Pikakawanian da la karas karin at ika na ing payakut. Ing pakibatan mu ya ing dinan mu lang pamangan ding tauan ku.

¹⁰ Inya pepadala nang Hiram ing sablang dutung a sedro at pinu a kailangan nang Solomon,

¹¹ at i Solomon naman balang banua babie yang dinalan a libung sakung trigu at dinalan apulung libung galun a alang samut a larung olibo para karing tauan nang Hiram. fig,,,,,Pepadala nang Hiram ing sablang dutung a sedro at pinu a kailangan nang Solomon.,(5:10)fig*

¹² Antimo ing pangaku na, dininan neng kabiasnan ning Ginu i Solomon. Masanting ing pamiyutus da ri Hiram at Solomon, at pikayari de ing metung a kasunduan.

¹³ Mepili la ring atlung pulung libung lalaki king mabilug a Israel para king obrang sapilitan.

¹⁴ Gewa na lang atlung grupu; apulung libu king balang grupu, at liwas-liwas na lang peparala bulan-bulan king Lebanon. Inya atin lang aduang bulan king karelang tuknangan. I Adoniram ya ing tilduan nang mamahala kareting tau king obrang sapilitan.

¹⁵ Atin ya namang walung pulung libung tau i Solomon a manabas batu karing bunduk-bundukan, at pitung pulung libung taung talayakut karing metabas a batu.

¹⁶ Memili yang atlung libu at atlung dalan a kapatas ban mamahala kareting taung magobra.

¹⁷ King utus nang Aring Solomon menabas lang batung mangaragul ban gamitan king pundasyun na ning Templo.

¹⁸ Ding magobra nang Solomon at ding kang Hiram at ding tau Gebal ila ring tinabas at misadia karing batu at dutung a gamitan king pangatalakad na ning Templo.

6

¹ Pegumpisan neng pepatalakad Solomon ing Templo kanitang bulan ning Ziv, king kaduang bulan na ning kapat nang banuang pamag-ari king Israel at king kapat a ralan walung pulung banua kaybat dang meko king Ehipto ding Israelita.

² Siam yang pulung talampakan king kaba ing Templo, atlu yang pulung talampakan king kalualas, at apat yang pulu't limang talampakan king katas.

³ Labi yang limang talampakan kalalam ing dake nang palub at atlu yang pulung talampakan king kalualas; kasing lualas ne ning santuaryu.

⁴ Atin lang awang ding pader na niti; mas makitid la bandang lual kesa king kilub.

⁵ Pepatalakad ya namang katuglung na a atlung palapag a tia pitu at kapitnang talampakan katas a makataid king pader misusumangid nang tagiliran at kagulutan ning Templo.

⁶ Sukad yang pitu ampon kapitnang talampakan kalualas ing balang kuartu king mumunang palapag, siam yang talampakan kalualas ing kadua, at apulu ya ampon kapitnang talampakan kalualas ing katlu. Mas maimpis ya ing pader na ning balang palapag kesa king pader ning makalalam a palapag, nung inya makapatung na la mu at e na la kailangan pang isanib ding barakilan karing dingding na ning Templo.

⁷ Metabas la king lugal a pititibagan batu ding batung megamit king pangagawa ning Templo, inya alang meramdam a inge ra ding mantilyu, palakul o nanumang kasangkapan a bakal kabang tatalakad de.

⁸ Atyu ya king dane mauli ing dalan palub king mumunang palapag na ning Templo; atin yang eran papunta king kadua at king katlung palapag.

⁹ Inya apayari neng Solomon ing Templo. Pepadinan neng kisami a megawa king makapal a tablang sedro.

¹⁰ Pitu at kapitnang talampakan la katas ding balang palapag a midagdag king paligid na ning Templo at makataid la king kabalenan na ning Templo king kapamilatan da ring barakilan a sedro.

¹¹ Nganang sinabi ning Ginu kang Solomon,

¹² Nung pamintuan mu la ding sabla kung kautusan at tuntunan at manatili kang tapat karing kakung kautusan, tuparan ku naman keka itang pengaku ku kang David a tata mu.

¹³ Manuknangan ku libutad da ring Israelita king kapamilatan na niting Templo at e ku la paburen kapilan man.

¹⁴ Inya pepagawa neng Solomon ing Templo angga king meyari ya iti.

¹⁵ Belutanan yang tablang sedro ing kilub nang pader ning Templo; tablang pinu ing kebit na manibat king suelo angga king kisami, at tablang sipres ing pepabili na king suelo.

¹⁶ King kakilubkiluban na ning Templo pepagawa yang kuartu a pemansagan nang Ing Kabanal-banalan a Lugal. Atin yang atlung pulung talampakan king kaba a maka partisyun king tablang sedro manibat king suelo angga na king kisami.

¹⁷ Itang megawang santuaryu arap ning Kabanal-banalan a Lugal atin yang anam apulung talampakan king kaba, at mipamansagan yang Ing Banal a Lugal.

¹⁸ Midukitan la ring dingding nang sedro karing miyayaliwang dinukit a bungang tanaman at sampaga. Ala kang akit nanumang batu, uling mipadurutnan ngan king tablang sedro.

¹⁹ King gulut na ning Templo karin ne pepagawa ing metung a kuartu ban karin ya isikap ing Kaban ning Kasunduan ning Ginu.

²⁰ Iting kuartu sukad yang atlung pulung talampakan king kaba, atlung pulung talampakan king lualas, at atlung pulung talampakan ya munaman king katas, at makabalut ya king gintung puru. Makabalut ne mang tablang sedro ing altar.

²¹ Pepabalut neng gintu ing kabilugan a kilub ning Templo, at ating misusumangid a tanikalang gintu king palub king kakilubkiluban a kuartu. Makabalut ya munamang gintu.

²² Makabalut yang gintu ing kabilugan nang kilub ning Templo, pati na ing Kabanal-banalan a Lugal.

²³ Pepagawa yang aduang kerubin king dutung a olibo a tia labing limang talampakan king katas. Pepabili na la reti king Kabanal-banalan a Lugal.

²⁴ Tidua la pakpak; pitu at kapitna yang talampakan a sukad ing balang pakpak da, at labing lima lang talampakan manibat king metung nang wakas ning pakpak angga king sumangid nang wakas.

²⁵ Parehu la dagul at anyu deting kerubin.

²⁶ Labing limang talampakan ya ing katas ning balang kerubin.

²⁷ Pepabili na la reting kerubin king Kabanal-banalan a Lugal. Makaladlad la ring karelang pakpak at halus mitatagkilan la ring karelang pakpak king libutad na ning kuartu, at tatagkil la karing pader ding sumangid dang pakpak.

²⁸ Makabalut lang gintu deting kerubin.

²⁹ Mipalamutian ya ing mabilug a kuartu karing dinukit a larawan da ring kerubin, tanaman a palma, at sampaga.

³⁰ Makabalut yang gintu pati ing suelo.

³¹ Pepadinan neng aduang pasbul a megawa king dutung a olibo ing Kabanal-banalan a Lugal; makapatilus la king libutad ding amba ra ding pasbul.

³² Mipalamutian la reting pasbul karing larawan da ring kerubin, tanaman a palma, at sampaga. Makabalut lang gintu ding pasbul, ding kerubin, at ding tanaman a palma.

³³ Makanyan ya namang pepagawang pasbul para king Banal a Lugal, kuadradu ya at megawa king dutung a olibo.

³⁴ Pepagawa ya namang aduang pasbul a tutuklip king dutung a pinu.

³⁵ Mipalamutian la karing medukit a larawan da ring kerubin, tanaman a palma at sampaga, at paraparehu ing pangabalut king gintu.

³⁶ Pepagawa yang patyu arap ning Templo, at pepabakud neng atlung hilera karing batung metabas ampon king metung a hilerang tanan a sedro balang atlung hilerang batu.

³⁷ King bulan ning Ziv ning kapat nang banuang pamag-aring Solomon kanita ya megawa ing pundasyun na ning Templo ning Ginu.

³⁸ Inyang bulan ning Bul, ing kawalung bulan, king kalabing metung nang banuang pamag-ari, kanita ya meyaring megawa ing Templo agpang king migulis a planu. Pitu neng banuang tatalakad ing Templo.

7

¹ Labing atlung banua ing milabas bayu ya meyari ing palasyung pepagawa nang Solomon.

² Pepagawa ne iting tuknangan na at mipamansagan yang Ing Bale king Gubat ning Lebanon. Dinalan limang pulung talampakan ya king kaba, pitu yang pulu't limang talampakan king lualas, at apat apulung talampakan ya king katas. Atin yang atlung hilerang asias a sedro a ating labing limang tanan a sedro balang metung.

³ Megawa ya king dutung a sedro ing bubungan na a makapatung karing apat apulu't limang asias a tia labing lima balang hilera.

⁴ Atlu lang hilera ding awang na at mitulid-tulid la.

⁵ Kuadradu la ring amba ra ding pasbul at awang a mitulid-tulid.

⁶ Pepagawa yang malualas a balkun; pitu yang pulu't limang talampakan king kaba at apat yang pulu't limang talampakan king lualas. Atin yang makabubung a balkun king arap pilatan da ring asias.

⁷ Pepagawa yang sala a mipamansagan Sala ning Hustisia, at karin ne pepabili ing tronung luklukan na neng babie yang kayatulan karing kasung pisasabian. Pepadinan neng tablang sedro ing suelo angga king bubung na.

⁸ Atyu la king gulut ding kuartu king tuknangan na at megawa lang kalupa da ring aliwang gusali. Makanyan ya naman a pangagawa ing bale a pepagawa na para king asawa na, ing anak ning ari ning Ehipto.

⁹ Megawa la ngan deting gusali karing e pangkaraniwan a batung mangaragul a metabas arap at gulut king kapamilatan na ning lagari.

¹⁰ Megawa la ring karelang pundasyun karing batung mangaragul a tia labing aduang talampakan king kaba, at ding aliwa naman labing limang talampakan la king kaba.

¹¹ Babo da reti, batu lang matas a uri a metabas ban milapat-lapat la at trosung sedro.

¹² Makapaligid ya ing malualas a patyu karing atlung hilerang batung tinabas, at makatumpak la babo da reti ding tanan a dutung a sedro. Makanyan ya naman kaayusan ing patyu na ning Templo ning Ginu at ing palasyu.

¹³ Pepayaus ne at peparakit Aring Solomon i Hiram a tau Tiro.

¹⁴ Ya ing anak nang lalaki ning babaing mebalu king tribu nang Neftali. Tau ya Tiro ing meyangu-bie tata na at pande yang tangsu. Biasa ya at magaling i Hiram king pamangawang kagamitan a tangsu. Dinatang ya inyang pepayaus neng Aring Solomon, at ya ing ating pakibatan king sablang megawa king tangsu.

¹⁵ Minoldi na lang tangsu ding aduang maragul a asias. Sukad yang aduang pulu't pitung talampakan king katas ing balang metung kareti at labing walung talampakan ya king makapabilug.

¹⁶ Ginawa ya namang aduang pasapnung tangsu. Sukad yang pitu at kapitnang talampakan king kaba ing balang metung kareti ban ikabit la babo ra ding maragul a asias.

¹⁷ Ginawa ya namang aduang palamuti a balamu tanikala ban pandekorasyun karing asias.

¹⁸ Minoldi na la naman ding aduang hilerang tangsung kaubug bungang pomegranate, at kebit na la reti king babo at lalam da ring pasapnu.

¹⁹ Kaubug lang sampagang liryu deting pasapnu at makapatung la karing maragul a asias babo na ning palamuting balamu tanikala; anam yang talampakan king katas ing balang metung. Ating aduang dalan a pomegranate a tangsu king makapaligid lalam da ring balang metung kareting pasapnu.

²⁰

²¹ Telakad na lang Hiram deting maragul a tangsung asias arapan na ning pidadalanan palub king Templo. Inaus neng Jakin, itang king dane mauli, at Boaz itang king dane norti.

²² Makapatung la ring tangsung makaubug liryung pasapnu babo ra ding asias a maragul. Makanyan meyari ing obra tungkul karing asias a maragul.

²³ Ginawa yang maragul a tangsung kawa i Hiram. Mabilug ya at maki sukad yang pitu at kapitnang talampakan king lalam, labing lima yang talampakan kalualas, at apat yang pulu't limang talampakan king makapadurut.

²⁴ King labi na niti ating aduang hilerang tela-kalabasang makapadurut; tia pulu at kapitnang talampakan ing makakabit king balang metung keting kawa.

²⁵ Makapatung ya iting kawa king gulut da ring labing aduang tangsung toro: makayarap la ring atlu king dane norti, ding atlu king dane albugan, ding atlu king dane mauli, at ding atlu king dane aslagan.

²⁶ Atlu yang pulgada king kapal ing kawa. Kalupa ne ning labi na ning silyo ing labi na, kaubug yang sampagang liryu. Mikakalaman yang apulung libung galun a danum.

²⁷ Ginawa ya namang apulung tangsung pitutumpakan pipanuasan i Hiram. Anam yang talampakan king kaba at lualas, at apat ya ampon kapitna king katas ning balang metung.

²⁸ Anti la kaniti pangagawa ding pitutumpakan: kuadradu la uling makasukung lang paitas ding karelang suluk.

²⁹ Atin lang medukit a larawan da ring leon, toro, at kerubin. King babo at lalam da ring leon at toro ating tela-tanikalang palamuti a makadukit.

³⁰ Ing balang pitutumpakan atin yang apat a parugang a tangsu at tangsung ehe. Atin lang apat a tangsung tukud karing apat nang suluk ning pitutumpakan panuasan. Atin lang palamuting tela-tanikala deting tukud.

³¹ Atin yang peka mabilug a makapatung babo ning kawa a maka-angat yang labing walung pulgada manibat babo ning pitutumpakan at pitung pulgada lalam na niti. Atin yang disenyung makadukit.

³² Adua lang pulu't limang pulgada king katas ding parugang at atyu la lalam da ring kulung a kuadru. Metung yang dake ing ehe at ing pitutumpakan.

³³ Kalupa ra la pangagawa ding parugang da ring karwahe. Megawa la ngan king tangsu ding ehe, yanta, rayus, at boha.

³⁴ Ating apat a tukud a peka sapnu lalam da ring balang apat a suluk ning pitutumpakan; at metung lang piesa king pitutumpakan.

³⁵ Ating metung a batibat a mabilug babo na ning balang metung karing pitutumpakan. Siam yang pulgada, at ding peka sapnu ra at kuadru metung lang piesa king pitutumpakan.

³⁶ Mipalamutian la ngan ding sapnu at kuadru karing dinukit a larawan da ring kerubin, leon, at tanaman a palma. Deti mipadurutnan lang palamuting tela-tanikala nung atin lang paglugalan.

³⁷ Makanyan la pangagawa ding pitutumpakan king kawa; paraparehu la ngan king sukad at itsura.

³⁸ Ginawa ya namang apulung tangsung pipanuasan i Hiram para karing apulung pitutumpakan. Anam yang talampakan king makapabilug at mikakalaman yang aduang dalan a galun ing balang metung.

³⁹ Binili na la ring lima kareting pitutumpakan king dane mauli na ning Templo, at ding lima naman king dane norti. Binili ne ing kawa king suluk dane mauli at aslagan.

⁴⁰ Gewa na la namang Hiram ding kalderang pididinan abu, ding pala, at silyo. Ayari na ngan ing sablang pagawa nang Aring Solomon para king Templo ning Ginu,

⁴¹ antimo ding aduang maragul a tangsung asias, ding pasapnu a kaubug sampagang liryu, at ding palamuting tanikala para kareti,

⁴² ding apat a ralan a tangsung kaubug bungang pomegranate para karing aduang pasapnu, adua lang hilera deti a tia dinalan balang hilera,

⁴³ ding apulung pitutumpakan, ding apulung pipanuasan,

⁴⁴ ing kawa, at ding apulung torong sasapu king kawa, ding pidatukanan abu, ding pala, at ding silyo.

⁴⁵ Gewa na la ngan Hiram king makintab a tangsu deting kasangkapan para kang Aring Solomon ban gamitan king Templo na ning Ginu.

⁴⁶ Pepaulma na lang Solomon deti king Kapatagan ning Jordan pilatan ning Sucot at ning Zaretan.

⁴⁷ E na la apatimbang Solomon deting kasangkapan uli na ning tutu lang dakal, inya alang makibalu king bayat da.

⁴⁸ Pepagawa na la ngang Solomon deting kasangkapan a gintu king Templo na ning Ginu: ing altar, ing lamesang pibibilianan king tinape a iyain,

⁴⁹ ding tumpakan-sulu king arap ning Kabanal-banalan a Lugal; makabili la ding lima kareti king dane albugan at ding lima king dane norti, ding sampaga, ding sulu, sipit,

⁵⁰ ding kopa, ding pamatda karing sulu, ding silyo, ding palanggana, ding datukanan para king insenso, ding kawaling pididinan baya, ding bisagra da ring pasbul para king Kabanal-banalan a Lugal, at ding pasbul palual king Templo. Pawa la ngang megawa king gintung puru deting sablang kasangkapan.

⁵¹ Inyang meyari na ing sabla nang pepaobrang Solomon para king Templo ning Ginu pepadala na la ngan karing lugal ning pisisinupan ning Templo ding kasangkapan a telaga nang David a tata na para king Ginu: ing pilak, ing gintu, at ding aliwang pang kasangkapan.

8

¹ Kaybat na nita, pepayaus na lang Aring Solomon ding sablang manimuna da ring tribu at pamilya na ning Israel ban mitipun la king Jerusalem at kaybat kuanan de ing Kaban ning Kasunduan king Zion, ing Siudad nang David, at idala de king Templo.

² Mitipun la ngan arapan nang Solomon deting lalaki na ning Israel king Piesta da ring Dalungdung. Bulan na kanita ning Etanim, ing kapitung bulan.

³ Inyang atyu na la ding manimuna na ning Israel, binuat de ring pari ing Kaban ning Kasunduan

⁴ at linub de king Templo. Sinaup la karela ding Levita king pamamuat king Toldang tuknangan ning Ginu at karing aliwa pang kasangkapan na niti.

⁵ Mitipun la arap na ning Kaban ning Kasunduan di Aring Solomon at ding sablang memalen ning Israel. Mekamate lang dakal at e abilang a tupa at baka ban iyain bilang ain-sakripisyu.

⁶ Kaybat na nita, linub de ring pari ing Kaban ning Kasunduan ning Ginu king Templo at binili de king Kabanal-banalan a Lugal lalam da ring pakpak da ring kerubin.

⁷ Makaladlad la pakpak ding kerubin, inya sasalilungan de ing Kaban ning Kasunduan at ding tambayuk a pibubuatan kaniti.

⁸ Makaba la ding tambayuk, inya mayayakit la manibat king Banal a Lugal a malapit arap ning kakilubkiluban a altar, oneng e la mayayakit king lual. (Atyu la angga ngeni deting tambayuk.)

⁹ Alang nanumang bage makalulan king Kaban nung e mu ding aduang tinabas a batung linulan nang Moises karin king Horeb. Deting tinabas a batu ila ding kasusulatan na ning kasunduan a gewa ning Ginu karing Israelita kaybat dang meko king bansang Ehipto.

¹⁰ Mikatmuan ya king biga ing Templo inyang linual la ding pari;

¹¹ e ra ayaring gimpanan ing katungkulan da uling kinatmu ya ing Templo king makasilo nang ligaya ning Ginu.

¹² Kanita nganang menalangin Solomon: O Ginu, ika ing mibili king aldo king banua, oneng pinili mu ing manuknangan ka king bigang makapal at king karalumduman.

¹³ Pepagawa kung maragul at malagung Templo para keka a maging kekang tuknangan king kapilan pa man.

¹⁴ Kaybat na nita, inarapan na la ding memalen a pakatalakad karin at binendisyunan na lang Aring Solomon.

¹⁵ Ngana, Purian ya ing Ginung Dios ning Israel a tinupad king pangakung binie na kang David a tata ku kanitang sinabi na,

¹⁶ Manibat na kanitang aldo a linual ku la Ehipto ding memalen kung Israelita ala kung piniling siudad karing sablang tribu ning Israel ban pitalakaran mo sa king Templo nung nukarin da ku samban. Oneng ika, David, pinili ra ka ban manimuna karing kakung memalen.

¹⁷ Ngana pang Solomon, Pignasan nang David a tata ku ing mitalakad Templo bilang parangal king lagyu na ning Ginu, ing Dios ning Israel,

¹⁸ oneng ngana ning Ginu kang tata ku, Mayap at ustu ing buri mung patalakad Templo para kanaku.

¹⁹ Makanyan man, e me apatalakad iti; ing sarili mung anak ya ing patalakad king Templo bilang parangal king lagyu ku.

²⁰ Metupad ngeni ing pengaku ning Ginu. Aku ing menalili kang David a tata ku bilang ari ning Israel, antimo ing pengaku na, at pepatalakad ke iting Templo ban keti ya samban ing Ginung Dios ning Israel.

²¹ Pepasadia ku munamang metung a lugal karin para king Kaban a pagbilian na ning kasunduan a gewa na ning Ginu karing kekatamung makatua kanitang liwal na la king Ehipto.

²² Kaybat na nita, king arapan da ring memalen tinalakad ya i Solomon king arap ning altar; tinas na la ding gamat na

²³ at nganang menalangin, O Ginung Dios ning Israel, alang dios a anti ika king banua o king yatu. Tutuparan mu ing kekang pangaku karing kekang memalen, at papakit mu karela ing lugud mung e kukupas neng mamintu la keka king mabilug dang pusu.

²⁴ Tiparan mu ing pengaku mu kang David a tata ku; itang sinabi mu kang tata ku kanitang kapanaunan na, tiparan mu ngan ngening aldong iti.

²⁵ Inya ngeni, O Ginung Dios ning Israel, isundu mu sanang tuparan itang pengaku mu king talasuyu mung i David a tata ku. King ating manatiling lahi na a mag-ari king Israel, nung maging mapamintu la keka a antimo ya.

²⁶ Inya, O Ginung Dios ning Israel, paburen mung mipatibayan ing sinabi mu king talasuyu mung i David a tata ku.

²⁷ Tune kayang malyari kang manuknangan, O Dios, keti king yato? E ka mipagyu agyang king kabilugan a banua; lalu kang e mipagyu keting Templong gewa ku!

²⁸ Makanyan man, pakiramdaman mu sa, O Ginung Dios, ing panalangin ku ngening aldong iti, ing aduan ning kekang talasuyu.

²⁹ Banten me sana aldo't bengi iting Templo, iting lugal a pinili mu ban keti ka samban. Pakiramdaman mu ku sana neng mamarap ku keti ban manalangin.

³⁰ Pakiramdaman mu sana ing panalangin ku, at ing panalangin da ring kekang memalen neng mamarap la keting lugal. Ken king banuang kekang tuknangan pakiramdaman mu kami at patawaran ing kasalanan mi.

³¹ Nung misangkanan yang dinapat e ustu ing metung a tau king kalupa nang tau, idala re keting altar mu at pasumpan nung ala ya ping kasalanan.

³² Ken king banua, makiramdam ka sana, O Ginu, at ika ing gawa at munie atul king karelang kasu. Parusan me itang mikasala at payalan sala ing e mikasala.

³³ Potang masambut la karing kalaban ding memalen mung Israelita uli na ning mikasala la keka, at kaybat sumisi la at datang keting Templo, at king mitmung kapakumbaban maus la keka,

³⁴ pakiramdaman mu la sana ken king banua at patawaran ing kasalanan da at ibalik pasibayu king lugal a binie mu karing makatua da.

³⁵ Potang e na ibaldug ning banua ing uran uli na ning mikasala la keka, at kaybat sumisi la at datang la keting Templo, at king mitmung kapakumbaban maus la keka,

³⁶ pakiramdaman mu la sana ken king banua. Patawaran mu ing kasalanan da ring taung pinili mu, ding memalen ning Israel, at ituru mu itang mayap a sukat dang daptan. Kaybat, ibaldug mu ing uran keting kekang gabun a kekang binie karing kekang memalen bilang mana ra.

³⁷ Nung mika maragul a danup king bansa o pesti o mika lawi o kulapu o gisanan da lang durun o ulad ding tanaman; nung kubkuban da lang kalaban ing isanu man karing karelang siudad o nung datang karela ing salut o sakit,

³⁸ pakiramdaman mu sana kanita ing karelang panalangin o ing nanumang aus na ning metung at metung karing memalen mung Israelita king penandit a panamdaman da king pusu ra king mikasala la, at itas da la ring gamat da makayarap keting Templo,

³⁹ pakiramdaman mu la sana kanita ken king banuang kekang tuknangan, at patawaran ing depat dang pamikasala, uling ikang bukud ing makibalu king pusu ning tau. Inya ika ing munie ablas agpang king depat da.

⁴⁰ King makanyan a paralan akua rang manatiling ating takut keka king kekaban na ning bie ra ketang gabun a binie mu karing kekaming makatua.

⁴¹ Manalangin ku naman para king dayuan a e kabilang karing memalen mung Israelita, ing taung ibat king marayung lugal

⁴² a dinatang uli na ning pikabaluan mung lagyu at uli da ring makapagmulalang bage depat mu para karing kekang memalen. Nung datang ya keting Templo iting dayuan ban samba keka at manalangin,

⁴³ pakiramdaman mu sa ing panalangin na ken king banuang tuknangan mu, at ibie ing kayaduanan na ban ding sablang tau ning yatu akilala ra ka at mamintu la keka antimo ding memalen mung Israelita. Kanita abalu ra king iting Templong telakad ku metung yang lugal nung nu ka dapat misamban.

⁴⁴ Potang mako lang makilaban ding kekang memalen karing karelang kalaban king lugal a ituldu mu karela, at kaybat marap la keting siudad a pinili mu at keting Templo a telakad ku bilang parangal king lagyu mu, ikang atyu ken king banua,

⁴⁵ pakiramdaman mu sana ing panalangin da at aus, at ibie mu karela ing tagumpe.

⁴⁶ Nung mikasala la keka ding kekang memalen, uling ala metung man a e mikasala, at uli ning mua mu pasambut mu la karing karelang kalaban at idala da lang bihag king bansa ra, marayu ya man o malapit,

⁴⁷ at nung king bansa nung nu la midala anting bihag apagaralan da king mikasala la keka at kaybat sabian da keka, Mikasala kami keka, dinapat kaming e ustu at e mayap,

⁴⁸ at kaybat mibalik la lub keka king mabilug dang pusu at kaladua karin king lugal da ring mekabihag karela, at kaybat manalangin la keka at marap banda king gabun a binie mu karing makatua mi at keting siudad a pinili mu at keting Templo a telakad ku bilang parangal king lagyu mu,

⁴⁹ kanita pakiramdaman mu la ken king banuang kekang tuknangan ing karelang panalangin at kapaniausan. Malunus ka sana karela

⁵⁰ at ipatawad mu ing kalapastanganan at kasalanan a depat da keka. Tagkilan mu la pusu ding mekabihag karela ban malunus la karela,

⁵¹ uling bandi mu la; ila ring taung liwal mu Ehipto, ing ornung pilalasawan king bakal.

⁵² Parati la sanang makalawe ding mata mu king aring pinili mu at karing kekang memalen Israel at manatiling makiramdam neng mamaus la keka.

⁵³ Karing sablang tau, ika mismu ing memili karela ban maging bandi mu, antimo ing sinabi mu karela king kapamilatan nang Moises a talasuyu mu, O Ginung Dios, kanitang liwal mu la ding makatua mi king Ehipto.

⁵⁴ Makasiklaud ya at makatas a gamat i Solomon arapan ning altar kabang manalangin ya. Inyang meyari ya king pamanalangin na

⁵⁵ tinalakad ya, at king masikan a siwala binendisyunan ne ing mabilug a katipunan ning balen Israel.

⁵⁶ Ngana, Purian ya ing Ginu a minie kapayapan king balen nang Israel; tiparan na ing pengaku na; metupad ngan ing sablang pengaku na king kapamilatan nang Moises a talasuyu na.

⁵⁷ Mananu na sanang ing Ginung kekatamung Dios mantabe ya kekatamu antimo nung makananu yang minantabe karing kekatamung makatua. Mananu na sanang e na katamu lakuan o paburen.

⁵⁸ Mananu na sanang tairan na katamu ban atuntunan ta ya ing dalan na at makapamintu karing sabla nang kautusan, antimo ing inutus na karing makatua tamu.

⁵⁹ Mananu na sanang ding panalangin ku king Ginung kekatamung Dios manatili lang mararamdam aldo at bengi man ban nung datang ing pamangailangan dinan neng hustisia ining aring pinili na at ing balen Israel.

⁶⁰ King anti kaniting paralan da abalu ding sablang tau ning yatu king ing Ginu ya ing Dios, at ala nang aliwa pa.

⁶¹ Inya manibat ngeni sukat kayung manatiling tapat king Ginung kekatamung Dios; mibiebie aldo-aldo agpang king paralan na at mapamintu karing kautusan na.

⁶² Kaybat na nita, ing Aring Solomon at ing mabilug a Israel miyain lang ain-sakripisyu para king Ginu.

⁶³ Miyain lang aduang pulu't aduang libung baka ampon dinalan aduang pulung libung tupa bilang ain-ning-pamisulusulu. Inya ing ari at ding sablang memalen telaga re ing Templo.

⁶⁴ King aldo mu ring ita telaga ne ning ari ing libutad nang dake ning patyu, itang lugal arap ning Templo. Kaybat na nita, miyain yang ain-a-durulukan, ain-a-binutil, at taba da ring animal para king ain-ning-pamisulusulu. Depatan na iti uling milalu ya kalati ing tangsung altar para kareting sablang ain.

⁶⁵ Inya i Solomon at ding sablang memalen ning Israel, pigselebran de ing Piesta da ring Dalungdung kilub ding pitung aldo. Maragul ya ing katipunan da ring mekipamiesta a menibatan pa king marayung Pidadalanan ning Hamat dane norti angga na king Pinak ning Ehipto king dane mauli.

⁶⁶ King kawalung aldo pepaulian na la ring tau, at binendisyunan de ring tau ing ari. Masaya lang masayang minuli karing sarasarili dang tuknangan uli na ning bendisyun a binie ning Ginu kang David a talasuyu na at karing memalen ning Israel.

9

¹ Inyang apayari na neng pepagawang Solomon ing Templo ning Ginu at ing palasyu, at ing sablang tingka nang ipatalakad,

² pepakit yang pasibayu ing Ginu, antimo inyang pepakit ya karin king Gibeon.

³ Ngana ning Ginu, Solomon, dimdam ku ing panalangin mu at aus kanaku. Telaga ke iting Templong kekang pepagawa bilang lugal nung nukarin da ku samban king kapilan pa man. Manatili ya ing panlalawe ku keti at ing pusu ku.

⁴ Nung manatili kang tapat at matulid king akakit ku, antimo i David a tata mu, at daptan ampon pamintuan ing sablang kautusan ku,

⁵ kanita ika, at ding maging anak da ring anak mu manatili lang makalukluk king tronu, antimo ing pengaku ku.

⁶ Nung e ka manatiling tapat kanaku at e mamintu karing kautusan ku at sumuyu ampon samba karing aliwang dios,

⁷ kanita itabi ku la ding memalen kung Israelita keting gabun a binie ku karela; paburen ke ing Templong telaga ku king lagyu ku, at maging kasebian ya ampon pikaylian ing Israel karing sablang tau ning yatu.

⁸ Mibagsak ya iting Templo at maging katumpuk yang batu. Mangasdan la at mangilabut ding sablang daralan at ikutang da, Obat makanyan ing depat na ning Ginu keting bansa at keting Templo?

⁹ Ipakibat da ring aliwa, Kasi ginulut la king Ginung karelang Dios a milual karing makatua da king bansa ning Ehipto, at sinamba la ampon sinuyu karing aliwang dios. Inya pepagpa na ning Ginu iting sablang kapahamakan karela.

¹⁰ Aduang pulung banua ing milabas bayu ne apayaring Solomon ing Templo ning Ginu at ing palasyu na.

¹¹ Pepadala nang Aring Hiram ning Tiro ing sablang kailangan nang dutung a sedro at pinu ampon gintu anggang bisa ya. Inya dininan neng Aring Solomon i Hiram aduang pulung siudad karin king Galilea.

¹² Oneng e ya metula i Hiram inyang dinatang yang ibat king Tiro ban lawan na la ring siudad a binie nang Solomon.

¹³ Inya ngana kang Solomon, Kapatad, obat makanyan la ring siudad a binie mu kanaku? Inya angga ngeni mayayaus la deting siudad Ing Gabun ning Cabul.

¹⁴ Peparala yang halus limang toneladang gintu i Hiram kang Solomon.

¹⁵ Iti ya ing istoria tungkul king sapilitang pamagobra a pepatupad nang Aring Solomon karing memalen ban apagawa ne ing Templo ning Ginu at ing palasyu na at tambakan ya ing Milo, at ban gawan la ring pader ning Jerusalem, ing Hazor, ing Megido, at ing Gezer. (

¹⁶ Lisuban ne ning ari ning Ehipto ing Gezer at abihag ne; pepapate na la ding sablang taung manuknangan karin, at pepasilab ne iting siudad. Kaybat na nita, binie ne bilang regalu king anak na inyang mekiasawa ya kang Solomon.

¹⁷ Pepatalakad na ne mang pasibayung Solomon ing Gezer.) Pepatalakad nia namang pasibayu ing Mababa ning Bet Horon,

¹⁸ ing Baalat, ing Tamar king ilang ning Juda,

¹⁹ ding siudad nung nukarin makasinup ing pagkabiayan, ding siudad para karing kabayu na ampon karwahe, at ing sablang buri nang ipagawa king Jerusalem, king Lebanon, at nu mang lugal ning kayarian na.

²⁰ Ding sablang mitagan karing Amoreo, Hiteo, Perezeo, Heveo, at Jebuseo a e Israelita,

²¹ oneng lahi da la ring mitagan a e ra pete ding Israelita kanitang lisuban de ing lugal, ginamit na la king sapilitan pamagobra bilang ipus at makanyan la kabilian angga man ngeni.

²² Oneng e na la pinilit magobrang Solomon ding Israelita; ila ring meging sundalus na, pamuntuk, pekapun, at kapitan da ring sundalus nang pakasake kabayu, at karing karung panggera.

²³ Limang dalan limang pulu katau la ding katiwalang pepamahalan nang Solomon king sapilitang paobra na.

²⁴ Meko ya king siudad nang David ing anak na ning ari ning Ehipto inyang apagawa na neng Solomon ing palasyu a pepagawa na para tuknangan na. Kaybat na nita, pepatambak neng Solomon ing Milo.

²⁵ Makatatlu pabanua i Solomon miyayain yang ain-a-durulukan at ain-ning-pamisulusulu king altar a pepagawa na para king Ginu. Duruluk ya namang insenso para king Ginu. Inya ikua nia mu ring apayari ing Templo.

²⁶ Pepagawa ya namang dakal a barku i Aring Solomon karin king Eziongeber. Malapit ya ing Eziongeber king Elat, king lele na ning Dagat da ring Timbu karin king bansang Edom.

²⁷ Peparala yang dakal a tauan na i Hiram a sane king pamaglayag king dagat ban saupan da la ring tauan nang Solomon.

²⁸ Miglayag la reti king Ofir, at ibat karin migdala lang halus labing anam a toneladang gintu para kang Aring Solomon.

10

¹ Abalitan na ning reyna ning Seba ing kabantugan nang Solomon, inya minta ya king Jerusalem ban pangutnan ne karing mangasakit a kutang.

² Dinatang yang kayabe ding dakal a abe a susuyu king reyna, at dakal a kamelyung magdalang miyayaliwang paniangkap at pabanglu, dakal a gintu, at batung iyas a mangamal. Inyang mikit la ilang aduang Solomon, kitang na ngan ing sablang buri nang ikutang.

³ At pekibatan na la ngang Solomon ding kutang na; ala metung man ing pigkasakitan nang melinawan.

⁴ Dimdam na mismu ning reyna ning Seba ing kabiasnan nang Solomon; ikit ne ing palasyung pepagawa na,

⁵ ing pamangan a yapag da king lamesa na, ing tuknangan da ring opisyal na, ing pamagsilbi da ring talasuyu na, ing susulud dang imalan, ding magsadiang alak para king ari, at ding ain-a-durulukan a yayain na king Templo ning Ginu. Tune yang mengapamulala ing reyna king dimdam na ampon ikit.

⁶ Inya ngana kang Aring Solomon, Tutu pin pala ing sablang balita a dimdam ku king kakung kayarian tungkul keka at ing kekang kabiasnan!

⁷ E ku bisang maniwala, oneng maniwala na ku ngeni, uling ikit da ring mismung mata ku. E man pala kapitna ing belita ra kanaku; mas marakal ing kekang kabiasnan at pibandian kesa ketang belita ra kanaku.

⁸ Kasuerti da ring kekang asawa! Kasuerti da ring kekang ipus uling parati lang atyu king kekang arapan at makaramdam la king kekang kabiasnan!

⁹ Purian ya ing Ginung kekang Dios a metula keka at milukluk keka king tronu na ning Israel. Uling alang kapupusan ing lugud na king Israel, gewa na kang ari ban ipatupad ing batas at ing hustisia. fig,,,,,Abalitan na ning reyna ning Seba ing kabantugan nang Solomon.,(10:1)fig*

¹⁰ Kaybat na nita, regaluan neng halus limang toneladang gintu ing ari, dakal a pabanglu at paniangkap pamangan ampon batung iyas a mangamal. Ala pang makanyan a karakal a pabanglu at paniangkap pamangan ing tinggap nang Aring Solomon kenu man subali mu ing binie na ning reyna ning Seba. (

¹¹ Subali pa kaniti, ding barku nang Hiram a migdalang gintung ibat king Ofir, migdala la namang dakal a batung iyas a mangamal at dutung a almug.

¹² Ginamit nang Solomon ing dutung a almug bilang sapnu ning Templo ning Ginu at ning palasyu. Pepagawa nang lira at alpa ing aliwa para karing manigtigan musika. Ala nang dinatang o meyakit pang dutung a almug manibat na kanita.)

¹³ Binie na ngang Aring Solomon ing sablang bage inawad na ning reyna ning Seba. Wa, ing sablang buri na subali pa ketang kusang lub a binie na king reyna. Kaybat na nita, minuli ne ing reyna at ding kayabe na king sarili dang bansa.

¹⁴ Balang banua, tatanggap yang maygit aduang pulu't limang toneladang gintu i Aring Solomon.

¹⁵ E la kabilang kareti ding bayad buis da ring negosianti, ing pakinabang king negosyu, at ing babie da ring ari ning Arabia, at ding gobernador da ring probinsia ning Israel.

¹⁶ Pepagawa yang aduang dalan a mangaragul a kalasag i Solomon; labing limang librang pikpuk a gintu ing megamit king balang metung.

¹⁷ Pepagawa ya namang mangalating kalasag; apat a librang pikpuk a gintu ing megamit king balang metung. Binili na la reti king Bale king Gubat ning Lebanon.

¹⁸ Pepagawa ya namang metung a maragul a tronu at ing metung nang dake niti mibalutanan yang garing at ing aliwa nang dake king gintung puru.

¹⁹ Atin yang anam a balitang paukiat king tronu, at atin yang dinukit a buntuk ning toro ing kabuntukan na, at atin lang tunggalan a dinukit a leon king lele ra ding aduang patungan gamat ning luklukan,

²⁰ at labi lang aduang leon a dinukit ding atyu king mingatba rang wakas ding balitang. Ala pang makanyan a megawang tronu nu mang kayarian.

²¹ Gintu la ngan ding sablang kopang piinuman nang Aring Solomon, at megawa la ngan king gintung puru ding sablang kasangkapan ning Bale king Gubat ning Lebanon. Alang kasangkapan a megawa king pilak uling ala yang ulaga ing pilak king kapanaunan nang Solomon.

²² Atin yang dakal a barku a maglayag a kayabe da ring barku nang Hiram. Misan king balang katlung banua magbalik lang magdalang dakal a gintu, pilak, garing, matsin, at pabo real.

²³ Mas mabandi ya at biasa i Aring Solomon kesa king ninumang ari king yatu,

²⁴ at pagnasan da ring dakal a tau ning yatu ing akatagpu re at damdaman ing kabiasnan a binie na ning Dios kang Solomon.

²⁵ Pagdala reng regalung megawa king pilak at gintu, imalan, sandata, pabanglu, kabayu, at mula. E tinuknang iting pamagregalu kang Solomon balang banua.

²⁶ Mitatag yang maragul a hukbung pakasandata i Solomon; bibilugan de ring labing aduang libung pakasake kabayu at libu apat a ralan a karung panggera. Dela na la ding aliwa king Jerusalem at ding aliwa naman karing miyayaliwang siudad ning kayarian.

²⁷ King panaun nang Solomon, anti yang karaniwan a batu ing pilak king Jerusalem, at ing dutung a sedro labis-labis anting tanaman a sikamoro karing bunduk-bundukan na ning Juda.

²⁸ Mesali la king Ehipto at Coa ding kabayu para kang Solomon. Ding ahenti na ilang mamahala king pamisaliwanan karing kabayu.

²⁹ Mesali no man king Ehipto ding karwahe, at pisasali da la ring ahenti nang Solomon king alagang anam a ralan a pirasung pilak ing balang kabayu. Pamisali da la reti karing ari da ring Hiteo at Amoreo.

11

¹ Mahilig ya i Solomon kareng babaing dayuan. E mu ing anak nang prinsesa ning ari ning Ehipto ing ayasawa na; mekiasawa ya naman karing babai na ning bansang Moab, Ammon, Edom, Sidon, at Hiteo,

² agyang binawal na ning Ginu karing Israelita ing e la makiasawa karing e ra kalahi. Nganang misan sinabi karela, E kayu makiasawa kareng e yu kalahi o paintulutan ing makapakiasawa la kekayu, uling agkatan da kayu reti ban samba at sumuyu karing karelang kikilalanan a dios.

³ Pitu lang dalan ding babaing anak ari ding kesal na, at atlu lang dalan naman ding kasese na. At linaut de king Dios i Solomon.

⁴ Inyang matua ne ikua reng ayagkat samba karing dios a kikilalanan da reting babaing dayuan. E ya meging tapat king Ginung Dios na; e ne kaugali i David a tata na.

⁵ Simban ne i Astarte, ing diosa ning Sidon at i Molek, ing makasumaming dios ning Ammon.

⁶ Inya mikasala ya i Solomon at e ya lubus meging tapat king Ginu agyamang tapat ya i David a tata na.

⁷ King bunduk dane aslagan na ning Jerusalem karin ya pepagawang altar ban karin ne samban i Kemos, ing makasumaming dios da ring Moabita, at antimu rin kang Molek, ing makasumaming dios da ring Ammonita.

⁸ Pepagawa ya namang altar para karing asawa nang dayuan ban makaduluk lang insenso at makayain ain-sakripisyu karing sarasarili dang dios.

⁹ Mimua ya ing Ginu uling kelinguan ne ing Ginung Dios ning Israel a pepakit kang Solomon makataduang besis

¹⁰ at minutus king e sukat samba karing dios da ring dayuan. E ya mekiramdam king utus na ning Ginu.

¹¹ Nganang sinabi ning Ginu kang Solomon, Anti na ning birian mung depat iti at e ka tinupad king kasunduan at e memintu karing utus ku, siguradu keng ilako keka ing kayarian at ibie ke king metung karing kekang pamuntuk.

¹² Oneng king uli nang David a tata mu e ku daptan iti king kekang kapanaunan. Marapat iti king kapanaunan na ning pamag-ari na ning anak mu.

¹³ E ke ilako king anak mu ing mabilug a kayarian; lakuananan keng metung a tribu alang-alang kang David a talasuyu ku at alang-alang king Jerusalem, ing siudad a pinili ku.

¹⁴ At pepalto yang metung a tau ing Ginu ban maging kalaban na. Hadad ing lagyu na; tau ya Edom at ibat ya king lahing ari.

¹⁵ Kanitang panaun a milabas simbut neng David ing bansang Edom at tinubud ne i Joab, ing pekapun da ring sundalus na, ban ikutkut la ring taung apate ra.

¹⁶ I Joab at ding tauan nang Israelita menatili la karin kilub ding anam a bulan; e la meko anggang e ra la agisan pete ding lalaki na ning Edom,

¹⁷ subali kang Hadad at ding ipus nang tata na a tinakas minta king Ehipto. (Anak ya pang malati kanita i Hadad.)

¹⁸ Meko la king Midian at minta la king Paran nung nu la menikuang tau ban mekiabe karela. Kaybat na nita, minta la king Ehipto at mekikit la king ari a minie karelang bale, pamangan, at gabun.

¹⁹ Meging maganaka ya ing ari karela at binie ne kang Hadad ing bayo nang babai, ing kapatad ning asawa nang i Reyna Tapenes, ban maging asawa na.

²⁰ I Hadad at ing kapatad ning Reyna Tapenes mikayanak lang lalaki. Pemalagyuan deng Genubat. Sinese ne at peparagul ning reyna king palasyu a kayabe ra ding anak na ning ari.

²¹ Inyang abalitan nang Hadad karin Ehipto king mete ne i David at i Joab a pekapun; nganang sinabi king ari, Paintulutan yu ku sanang muli na king sarili kung bansa.

²² Ngana ning ari, Hadad, migkulang ku wari kalingapan keka, inya bisa na kang muli keta kekayo? Ali naman pu, nganang mekibat Hadad, Mu pin, paintulutan yu na kung muli keta kekami. At minuli ya king sarili nang bansa. E mayap i Hadad bilang ari na ning Edom at meging mabagsik neng kalaban ning Israel.

²³ Pepalto ya pang aliwang tau ing Dios ban maging kalaban nang Solomon. Rezon ing lagyu na at anak neng Eliada. Tinakas ya i Rezon king panginuan nang i Aring Hadadezer ning Zoba.

²⁴ Tinipun yang tauan na at ya ing meging pamuntuk da ring tulisan. (Milyari iti kaybat neng simbut David i Hadadezer at pete ding tau ning Damasco a kakampi na.) Minta ya king Damasco i Rezon at ding tauan na at karin la menuknangan. Gewa reng ari ning Damasco i Rezon.

²⁵ Ya naman ing aliwang meging kalaban ning Israel king kapanaunan nang Solomon.

²⁶ Atin pang metung a lalaking linaban kang Solomon; metung ya karing pamuntuk na. Jeroboam ing lagyu na at anak ne ning Efrateong i Nebat ning Zereda. Zerua ya lagyu i ima na at mebalu ya.

²⁷ Iti ya ing istoria na ning pamag-rebeldi na laban king ari. Patambak ne kanitang Solomon ing Milo dane nang aslagan ning Jerusalem, at palarin ding pader na ning siudad ning Jerusalem.

²⁸ Metung yang kayanakan i Jeroboam a ating kagiwan. Apansinan nang Solomon ing kagiwan na at sipagan Jeroboam. Inya gewa neng talapamahala king sablang obrang sapilitan king sakup da ring tribu nang Manase at Efraim.

²⁹ Misan a aldo, linual ya i Jeroboam king Jerusalem at akasalubung ne i Ahiya, ing propetang tau Silo. Magdili-dili yang maglakad at bayu ya ing balabal a susulud na.

³⁰ Likas neng Ahiya ing balabal na at ginabak ne at gewang labing aduang pirasu.

³¹ Kaybat ngana kang Jeroboam, Kuanan mu la ding apulung pirasu uling ing Ginu, ing Dios ning Israel, sasabian na: E lumuat pamirasuan ku ne ing kayarian nang Solomon at ibie ku la keka ding apulung tribu.

³² Oneng mitagan ya kang Solomon ing metung a tribu alang-alang kang David a talasuyu ku at alang-alang king Jerusalem, ing siudad a pinili ku karing sablang siudad da ring tribu ning Israel.

³³ Depatan ku iti uling gilutan na kung Solomon; sinamba ya kang Astarte, ing diosa ning Sidon; kang Kemos, ing kikilalanan nang dios ning Moab; kang Molek, ing kikilalanan nang dios ning Ammon. E ya mibiebie agpang king kaburian ku. E ya meging mapamintu karing kautusan ku at tuntunan antimo i David a tata na.

³⁴ Makanyan man, e ke ilako ing kayarian kabang mabie ya i Solomon. Papanatilian keng ari kabang mabie ya alang-alang kang David a pinili kung talasuyu a memintu karing kakung kautusan.

³⁵ Oneng ilako ke ing kayarian king panaun na ning anak na, at ibie ku la keka ding apulung tribu.

³⁶ Metung ya ing tribung malakuan king anak nang Solomon ban ing talasuyu kung i David e ya kalakonan apu a magsilbing sulung makaslag para kanaku king Jerusalem, ing siudad a pinili ku nung nu ya misamban ing lagyu ku.

³⁷ Ika ing gawan kung ari king Israel, at pamahalan mu la ring sablang lugal a buri mu.

³⁸ E ra ka lakuan nung makiramdam ka karing sabla kung kautusan ampon mamintu, at dapat king kaburian ku antimo ing depat nang David a talasuyu ku. Papanatilian keng mag-ari ing maging lahi mu antimo ing depat ku king lahi nang David. Ibie ke keka ing Israel,

³⁹ at parusan ku la ring anak at apu nang David, agpang king mangaintulid karela, oneng e kabang panaun. fig,,,,,Kuanan mu la ring apulung pirasu.,(11:31)fig*

⁴⁰ Inya pigkapilitan neng paten Solomon i Jeroboam, oneng mekatakas ya iti at minta ya kang Aring Sisak ning Ehipto, at menatili ya karin angga na king mete ya i Solomon.

⁴¹ Makasulat king Istoria nang Solomon ing bie na, ing depat na, at ing kabiasnan na.

⁴² Mig-ari ya king mabilug a Israel kilub ding apat apulung banua.

⁴³ Mete ya at mikutkut king Siudad nang David. Ing anak nang i Rehoboam ya ing menalili bilang ari.

12

¹ Minta ya i Rehoboam king Sikem uling karin la mitipun ding memalen ning Israel ban gawan deng ari.

² Abalitan na iting Jeroboam a anak nang Nebat (atyu ya kanita king Ehipto uling tinakas ya kang Aring Solomon); mibalik yang ibat Ehipto.

³ Pepayaus de ring tribu na ning dane norti i Jeroboam, at miyabe-abe lang minta kang Rehoboam at ngara,

⁴ Rehoboam, pepasakitan na kaming Solomon a tata mu king obrang mangabayat. Nung gawan mung mayan ing obra mi at ing bie mi, kanita maging tapat kaming memalen a sakup mu.

⁵ Nganang mekibat Rehoboam, Magbalik kayu kaybat ning atlung aldo at kanita ku na ibie ing pakibat ku kekayu. Inya meko na la.

⁶ Kaybat na nita, kitnan na lang Rehoboam ding makatuang sinuyu bilang taga-payu nang Solomon a tata na. Ngana karela, Nanu ing masanting kung ibie pakibat karing taung deta?

⁷ Ngarang mekibat, Nung buri mu lang suyuan mitmung katapatan at pagbigyan king karelang kayaduanan, manatili lang susuyu keka king mitmung katapatan.

⁸ Oneng e na pekiramdaman ing payu da ring makatua. Kaybat minta ya karing kayanakan a akayabe nang meragul at ngeni taga-payu na.

⁹ Nganang mengutang karela, Nanu ing asaup yung ipakibat ku karetang taung makisabing gawan kung mayan ing pusan a pepapusan na karelang tata ku?

¹⁰ Ngarang mekibat, Oyni ing sabian mu karela: Mas maragul ya ing malati kung taliri kesa king awakan nang tata ku.

¹¹ Dininan na kayung mabayat a obrang tata ku; lalu keng gawan mabayat ing obrang papusan ku kekayu. Berug na kayu, oneng aku pamalupaluan da kayu.

¹² Kalabas da ring atlung aldo, mibalik ya kang Aring Rehoboam i Jeroboam at ding kayabe na uling ita ing sinabi na karela.

¹³ Magaspang yang minie pakibat karela i Rehoboam; e na tikian ing payu da ring makatua.

¹⁴ Ing tikian na ya ing payu da ring kayanakan, inya ngana kareting memalen, Dininan na kayung mabayat a obrang tata ku; lalu keng gawan mabayat ing obrang papusan ku kekayu. Berug na kayu, oneng aku pamalupaluan da kayu!

¹⁵ Tune e na pekiramdaman ing kayaduanan da ring memalen. Ing milyaring iti makayagpang king kaburian ning Ginu ban matupad itang sinabi na kang Jeroboam, ing anak nang Nebat, king kapamilatan nang propeta Ahiya ning Silo.

¹⁶ Inyang ikit da ring memalen ning Israel king e na buring pakiramdaman ning ari ing karelang kayaduanan, sinabi ra, Nanu pa ing kaugnayan tamu kang David? Ala ta nang pangataid king anak nang Jese. Balen Israel, tara, muli ta na karing balen tamu! Rehoboam, bahala na ka king sarili mu manibat ngeni! Inya minuli na la ring memalen ning Israel karing bale ra,

¹⁷ at i Rehoboam ya ing meging ari da ring Israelitang manuknangan karing sakup ning Juda.

¹⁸ Kaybat na nita, pepayaus neng Aring Rehoboam i Adoniram, ing talapamahala king sapilitang pamagobra, at tiburan ne karing memalen ning Israel, oneng pemasibas deng batu angga king mete ya. Inya memalagua yang sinake i Rehoboam king karwahe na at tinakas ya at minta Jerusalem.

¹⁹ Manibat na kanita menatili lang mag-rebeldi ding memalen ning Israel laban king pamilya nang David.

²⁰ Inyang abalitan da ring memalen ning Israel king dinatang neng ibat Ehipto i Jeroboam, inaus de para tumagun king metung a maragul a kapulungan, at kaybat ya ing gewa rang ari king Israel. Bukud mung ing tribu ning Juda ing menatiling tapat king lahi nang David.

²¹ Inyang miras ne Jerusalem i Rehoboam, tinipun na la ring mayap diling sundalus na ning tribu ning Juda at ning Benjamin ban lusuban na la ding tribu ning dane nang norti ning Israel at ban abawi ne ing kayarian na. Mekatipun yang dinalan walung pulung libu katau a pawang mangagaling.

²² Oneng ngana ning Dios kang propeta Semaia,

²³ Sabian mu kang Rehoboam a anak nang Solomon, at karing sablang memalen ning Juda at Benjamin, at karing aliwa pa:

²⁴ Ing Ginu sasabian na king e yu la lulusuban ding kapatad yung memalen ning Israel. Muli na kayu bale yu, uling kaburian ku ing milyari. Memintu ya ing metung at metung karela at minuli la uli na ning sinabi na karela ning Ginu.

²⁵ Kanita pepagawa na lang Jeroboam ding pader na ning siudad ning Sikem king bulubundukan na ning Efraim at karin ya menuknangan. Kaybat meko ya karin at pepapader ne ing siudad ning Penuel.

²⁶ Ngana king lub na, Pota mibalik ya ing kayarian king lahi nang David,

²⁷ nung munta la king Jerusalem ding tau ban miyain ain-sakripisyu king Templo ning Ginu. Pasibayu lang mangakung katapatan kang Aring Rehoboam. Inya paten da ku at mibalik la lub kang Rehoboam.

²⁸ Kaybat nang pegaralan iting bage, pepagawa yang aduang torong gintu, at kaybat ngana karing memalen, Memalen ning Israel, magkakasakit kayung pupunta Jerusalem. Oreni ding dios a milual kekayu king Ehipto.

²⁹ Binili ne king Betel ing metung karing torong gintu at ing metung king Dan.

³⁰ Inya meging kasalanan iti king Israel, uling minta la karin ding memalen ban samba kareting kikilalanan dang dios.

³¹ Pepagawa ya namang altar a pisasamban karing taluktuk da ring bunduk-bundukan at mibili yang pari karing pamilyang e ibat king tribu nang Levi.

³² Tinatag nia namang Jeroboam ing metung a piesta neng kalabing limang aldo ning kawalung bulan; kalupa ne niti ing piesta karin king Juda. Karin king Betel miyain yang ain-sakripisyu king gintung toro a pepagawa na. Mitutuk yang pari karing mangatas a lugal a pisasamban a pepagawa na.

³³ Inyang kalabing limang aldo na ning kawalung bulan a tikda na, minta ya king Betel at miyain yang ain-sakripisyu king altar bilang pamagselebra king piestang tinatag na para karing memalen.

13

¹ Ating metung a propeta na ning Dios a ibat Juda; dinatang ya king Betel uling tinubud neng munta karin. Makatalakad ya kanita i Jeroboam arap na ning altar ban duluk insenso.

² King utus na ning Ginu migsalita yang masikan iting propeta laban king altar. Ngana, Altar, altar! Oyni ing pasabi na keka ning Ginu: Mibait ya king pamilya nang David ing anak a mipamalagyuan Josias. Paten na la keti ding pari a miyayain ain-sakripisyu keka karing bunduk-bundukan, at silaban na la ding butul da ring tau babo mu.

³ Ngana pang sinabi king aldo mu ring ita, Iti ya ing tanda king migsalita ya ing Ginu: Malasak ya iting altar, at misambulat ing abu a atyu babo na.

⁴ Inyang dimdam nang Aring Jeroboam iting amanung laban king altar, tildu ne ing gamat na king propeta ning Dios at ngana, Dakpan ye ing taung yan! Kanita mu rin mengasias ya ing gamat a penuldu na at e ne akimut.

⁵ At bigla ya namang melasak ing altar at misambulat ing abung atyu babo na, antimo ing sinabi na ning Dios king kapamilatan na ning propeta na.

⁶ Kanita nganang Aring Jeroboam, Dapat a mayap, ipanalangin mu ku king Ginung kekang Dios king misubli ya sa king sadia ing gamat ku! Inya menalangin ya king Dios iting propeta, at misubli ya king sadia ing gamat na ning ari.

⁷ Kaybat na nita, ngana ning ari king propeta na ning Dios, Tara, tuki ka kanaku ketang bale ku at mangan. Atin kung ibie regalu keka uli na ning mayap a depat mu kanaku.

⁸ Nganang mekibat ning propeta na ning Dios, E ku tuki keka agyang pang ibie mu kaku ing kapitna ning kekang pibandian. E ku mangan o minum nanuman keti,

⁹ uling inutus na kanaku ning Ginu king e ku bitasang mamangan o miminum o daralan pasibayu ketang delanan ku inyang papunta ku keti.

¹⁰ Inya inyang muli ya, dinalan ya king aliwang dalan; e ya dinalan ketang delanan na inyang minta ya king Betel.

¹¹ Atin kanitang matuang propetang manuknangan king Betel. Dinatang la ding anak nang lalaki niti at belita ra kang tata ra ing sablang depatan na king aldong ita ning propeta na ning Dios a dinatang ibat Juda. Belita ra naman itang sinabi na niting propeta kang Aring Jeroboam.

¹² Nganang kinutang tata ra, Nukarin ya dinalan inyang minuli ya? Tiru de ring anak na itang dalan a delanan na ning propeta ning Dios.

¹³ Kanita ngana karela, Isadia ye ing asno ban saken ke. Sidia re ing asno, seken ne at meko ne.

¹⁴ Tegal ne ing propeta na ning Dios, at ikit neng makalukluk lalam ning tanaman a ensina. Nganang kinutang, Ika ing propetang menibat king Juda? Pekibat na, Wa, aku.

¹⁵ Tara, tuki ka kanaku king bale ku ban makapangan ka, nganang menagkat ning matuang propeta.

¹⁶ Nganang mekibat ning propetang ibat Juda, E ku malyaring tuki kekang mibalik o mangan o minum keting lugal a iti,

¹⁷ uling inutus na kanaku ning Ginu ing e ku mamangan at miminum at e daralan ketang delanan kung papunta keti.

¹⁸ Kanita ngana ning matuang propeta, Propeta ku munamang kalupa mu. Inutus na kanaku ning Dios king kapamilatan na ning anghel a tinubud na king ituki ra ka king bale ku ban makapangan ka at makainum. Oneng e tutu iting sinabi na.

¹⁹ Inya tinuki ya ing propeta na ning Juda king matuang propeta at mengan ya keta karela.

²⁰ Kabang makalukluk la arap na ning lamesa, dinatang ing amanu na ning Dios king matuang propetang menagkat king propetang ibat Juda,

²¹ at kaybat nganang masikan migsalita king propetang ibat Juda, Sasabian na ning Ginu king e mu tiparan ing inutus na keka.

²² Dinalan kang pasibayu ketang delanan mu, mengan at minum keting lugal a binawal ku keka. Inya mate ka at e ya mikutkut ing bangke mu king kutkutan da ring makatua mu.

²³ Inyang meyari neng mengan at minum, geyak ne at dininan sia ing asno na ning propetang tiki na bale na,

²⁴ at king pamaglakbe nang pauli asaganan ne ing metung a leon. Apate ne ning leon at mipase ya king gabun ing bangke na. Makatalakad la siping na ing leon at ing asno.

²⁵ Ikit de ring taung daralan karin ing makapase nang bangke at ing leon a makatalakad siping na. Miras la reti king siudad ning Betel nung nu ya manuknangan ing matuang propeta at pemalita ra ing milyari king propetang ibat Juda.

²⁶ Inyang abalitan na iti ning matuang propeta sinabi na, Ita ya ing propeta na ning Dios a e memintu king utus ning Ginu. Inya pepaburen neng piglapak at pete ning leon, antimo ing sinabi na king propeta ning Ginu.

²⁷ Kaybat inutus na karing anak nang lalaki ing isadia re ing asno para saken na. Memintu la ring anak.

²⁸ Meko ya at miras ketang lugal nung nu ya makapase ing bangke na ning propeta. Atyu ya pa mu rin ing asno na at itang leon siping ning bangke. E ne pengan ning leon at e ne ninanan balang ing asno.

²⁹ Binuat ne ing bangke na at seke ne king asno, at kaybat dela ne king Betel ban pagpaldasan at ikutkut.

³⁰ Kitkut ne ing bangke king kutkutan da ring pamilya na kaybat neng pigpaldasan a kayabe ding anak na. Ngarang kiniak, Ay, ing kapatad ko!

³¹ Kaybat deng kitkut, ngana ning propeta karing anak nang lalaki, Potang mate ku, ikutkut yu ku keting kutkutan a pikutkutan yu keting propetang ibat Juda; ibili yu la ding butul ku siping da ring butul niting propeta na ning Dios.

³² Uling siguradung matupad itang amanung sinabi na at inutus ning Ginu ban sabian na laban king altar na ning Betel at karing sablang lugal a pisasamban karing siudad ning Samaria.

³³ Agyamang mepalyari na iti, e ya pa mu rin tinuknang darapat e ustu i Jeroboam. Sindu na mu rin ing pamanutuk nang pari a e ibat king lahi nang Levi; maski ninu na mung bisa malyari neng tulduan para karing altar a pepagawa na karing bunduk-bundukan.

³⁴ Iting depat na ya ing meging kasalanan nang Jeroboam at meging dalan king lubus nang pangabagsak ning kayarian na.

14

¹ King panaun a ita, mesakit ya i Abiya, ing anak nang lalaking Jeroboam.

² Nganang sinabi king asawa na, Magsadia ka at magbalatkayu ka ban alang metung man a makakilalang ika ing asawa ku. Munta ka king Silo ban pakikitan me karin i Ahiya, ing propetang sinabi kanakung aku ing maging ari na ning Israel.

³ Pagdala meng apulung tinape at mapilan a bibingka, at metung a garapung pulut-panilan. Kutnan me at sabian na keka nung nanu ing mapalyari king anak ta.

⁴ Tiparan na ning asawa nang Jeroboam itang pagawa na, at kaybat minta ya king Silo ban pakikitan ne i Ahiya king bale na karin. E ne manakit i Ahiya; mapula la ring mata na uli na ning matua ne.

⁵ Sinabi na ning Ginu kang Ahiya king daratang ya ing asawa nang Jeroboam ban mangutang nung nanu ing mapalyari king anak nang masakit. At sinabi na naman ning Ginu nung nanu ing sukat nang ipakibat Ahiya. Inyang datang ne ing asawa nang Jeroboam, migkunwari yang aliwa yang babai.

⁶ Inyang daramdaman na neng daratang, nganang Ahiya, Malaus ka, asawa nang Jeroboam! Obat magkunwari ka pang e na asawang Jeroboam? Ating e mayap a balita para keka.

⁷ Muli na ka, at sabian mu kang Jeroboam ing anti kaniti: Ing Ginu, ing Dios ning Israel, pasabi na keka: Pinili da ka karing dakal a tau at gewang pamuntuk da ring memalen kung Israel.

⁸ Leko ke karing lahi nang David ing kayarian at kaybat binie ke keka. Oneng e ka meging anti i David a talasuyu ku. Meging tapat ya at mapamintu kanaku; depat na ita mung katanggap-tanggap kanaku.

⁹ Mas maragul ing kasalanan a depat mu kesa karetang minuna keka. Ginawa kang aliwang dios at dakal a larawan. Inya sikuil mu ku at pepamua mu ku.

¹⁰ Inya pagpa kung kasiran king kekang kayarian at paten ding sablang lalaking lahi mu, anak la man o matua. Silaban keng anting basura ing pamilya mu angga king magisan ya at alang mitagan metung man.

¹¹ Asu la ring mangan king ninumang mate king siudad a ating pamilya mu, at ayup no man ding mangan karing mangamate karing marangle. Aku, ing Ginu, ing migsalita.

¹² Ngana pang Ahiya, Inya muli na ka bale mu uling mate ya ing anak mu kalub mu king siudad.

¹³ Pigkalungkutan de ngan ding sablang memalen ning Israel at kaybat ikutkut de. Ya mung bukud ing miembru na ning pamilya nang Jeroboam a mikutkut uling ya mu ing katanggap-tanggap king Ginu, ing Dios ning Israel.

¹⁴ Dinan neng metung a ari ning Dios ing Israel ban wakasan ne ing lahi nang Jeroboam.

¹⁵ Parusan ne ning Ginu ing Israel, at mangari ya king timbu a sapul-sapulan na ning danum. Bagutan na la ding memalen king gabun a binie na karing makatua da, at isalbag lipat na ning Ilug ning Eufrates, uling pepamua re ing Ginu inyang ginawa lang larawan nang Asera.

¹⁶ Isuka na ne ning Ginu ing Israel uling mikasala ya i Jeroboam, at uling penimunan na la ring memalen king pamikasala.

¹⁷ Minuli ya king Tirza ing asawa nang Jeroboam, at karas na bale, mete ya ing anak na.

¹⁸ Pigkalungkutan de ring memalen ning Israel ing anak a mete at kaybat kitkut de, antimo ing sinabi na ning Ginu king kapamilatan na ning propetang talasuyu nang i Ahiya.

¹⁹ Makasulat ngan king librung Ing Istoria da ring Ari ning Israel ing sablang depatan nang Jeroboam, nung makananu yang mekigera karing aliwa, at nung makananu neng pemahalan ing kayarian.

²⁰ Meging ari ya kilub ding aduang pulu't aduang banua. Mete ya at mikutkut, at i Nadab a anak na ya ing menalili bilang ari.

²¹ Meging ari ne ning Juda i Rehoboam a anak nang Solomon inyang idad yang apat apulu't metung a banua. Labi yang pitung banuang mig-ari king Jerusalem, ing siudad a pinili na ning Ginu karing sablang lugal da ring tribu na ning Israel ban karin ya misamban. Naama ya lagyu i ima nang Rehoboam at tau ya Ammon.

²² Dinapat yang e ustu ing Juda king akakit na ning Ginu. Mas dakal ing depat dang pamikasala kesa karing karelang makatua. Inya pepamua re ing Ginu.

²³ Ginawa lang pisasamban karing mangatas a lugal, mitalakad lang asias a batu, at larawan nang Asera karing bunduk-bundukan, at karing lalam da ring tanaman.

²⁴ Karin atin munamang lalaki at babaing patutut ning pisasamban a babie ra ing karelang sarili bilang kasuyuan da. Memakiapus la ring Israelita king makasuklam a ugali da ring taung tinabi na ning Ginu king akakit da. fig,,,,,Ginawa lang pisasamban karing mangatas a lugal.,(14:23)fig*

²⁵ Inyang kalimang banua na ning pamag-ari nang Rehoboam lisuban ne ning Aring Sisak ning Ehipto ing Jerusalem.

²⁶ Kinua na ngan ing sablang pibandian na ning Templo ning Ginu at ning palasyu pati na ring gintung kalasag a pepagawa nang Solomon.

²⁷ Pelitan na la reti ning Aring Rehoboam karing tangsung kalasag a pepagawa na, at pigkatiwala na la karing opisyal da ring guardia na ning palasyu.

²⁸ Darala da la reti ding guardia neng pupunta ya ing ari king Templo ning Ginu, at kaybat babalik da la king silid-pisisinupan.

²⁹ Makasulat ngan king librung Ing Istoria da ring Ari ning Juda ing sablang depatan nang Aring Rehoboam.

³⁰ King panaun a ita, alang tuknang ing pamigera da ri Rehoboam at i Jeroboam.

³¹ Mete ya i Rehoboam at kitkut de king kutkutan da ring makatua na karin king Siudad nang David. Naama ya lagyu i ima na at tau ya Ammon. I Abiya a anak na ya ing menalili bilang ari.

15

¹ Inyang labi neng walung banuang mag-ari king Israel i Jeroboam, ing anak nang Nebat, kanita ne man meging ari ning Juda i Abiya.

² Mig-ari ya king Jerusalem kilub ding atlung banua. I ima na ya i Maaca a anak nang Abisalom.

³ Depatan nang Abiya ing sablang kasalanan a depat nang tata na; e na tikian ing mayap nang bakas David a ingkung na a tapat king Ginung Dios na.

⁴ Makanyan man, alang-alang kang David ing Ginung Dios na minie yang metung a anak a lalaki kang Abiya ban mag-ari kaybat na at ban mika kapanatagan ya ing Jerusalem.

⁵ Binie na iti ning Dios uling depatan nang David itang katanggap-tanggap king Dios; e ya linabag karing utus na ning Ginu king kekaban ning bie na, subali mu ketang pisasabian tungkul kang Uria a Hiteo.

⁶ King kekaban na ning bie nang Abiya e tinuknang ing gerang pegumpisan da ri Rehoboam at Jeroboam.

⁷ Makasulat ngan king librung Ing Istoria da ring Ari ning Juda ing depatan nang Abiya.

⁸ Mete ya at mikutkut king Siudad nang David, at i Asa, ing anak na, ya ing menalili bilang ari.

⁹ King kadua nang pulung banua na ning pamag-ari nang Jeroboam ning Israel kanita ya meging ari i Asa king Juda,

¹⁰ at mig-ari ya kilub ding apat apulu't metung a banua king Jerusalem. Maaca ya lagyu i apu nang babai, ing anak nang Abisalom.

¹¹ Antimo i David a makatua na depatan nang Asa itang katanggap-tanggap king Ginu.

¹² Tinabi na la ring lalaki at babaing magtinda king katawan da a babie ra ing karelang sarili bilang kasuyuan da karing pisasamban karin, at piglako na la ring idolong pepagawa da ring makatua na.

¹³ Pati i apu nang i Maaca leko ne panga-reynang-ima na uling pepagawa ya iting makasumaming larawan para king diosang i Asera. Pepalasak ne iting larawan at kaybat pepasilab ne karin king batis ning Kidron.

¹⁴ Agyang e na la ngan lesak Asa ding sablang lugal a pisasamban da ring dayuan king bansa, menatili ne mang tapat king Ginu kabang mabie ya.

¹⁵ Dela na la ngan king Templo ning Ginu ding sablang kasangkapan a telaga nang tata na pati na ring gintu at pilak a kasangkapan a ya mismu ing mitalaga.

¹⁶ E pepatugut ing pamigera da ri Asa ning Juda at Baasa ning Israel kabang mabie la.

¹⁷ Lisuban neng Aring Baasa ning Israel ing Juda, at pepagawa yang kuta king Rama ban alang milub o milual king palasyu nang Aring Asa ning Juda.

¹⁸ Inya kinua na la ngang Aring Asa ding pilak at gintung mitagan king Templo at king palasyu, at pigkatiwala na la karing opisyal na at pepadala na la kang Aring Benhadad ning Siria a manuknangan king Damasco. I Benhadad anak neng Tabrimon at i ingkung na ya i Hezion. Ngana ning mensahing pepadala nang Aring Baasa kang Benhadad,

¹⁹ Sana mikampi kata antimo ing pamikampi da ring tata ta. Tanggapan mu la reting regalu kung pilak at gintu. Pututan mu na sana ing pamakiabe mu kang Aring Baasa ning Israel ban tuknang neng manggulu king kayarian ku.

²⁰ Mebisa yang makikampi i Benhadad kang Aring Asa, inya tiburan na la ding heneral na at ding sundalus da ban lusuban da la ring siudad ning Israel. Abihag de ing Ijon, Dan, Abel Bet Maaca, ing lugal lele ning Dagat-dagatan ning Galilea, at ing mabilug a Neftali.

²¹ Inyang abalitan nang Baasa ing milyari, pepatuknang na ing pangabakud nang pader ning Rama at minta ya king Tirza.

²² Inya peparala yang utus king mabilug a Juda ban ing metung at metung, at alang pasubali karing memalen, sumaup yang ilako la ring batu at dutung a ginamit nang Baasa king pangagawa na ning kuta king Rama. Ginamit nang Aring Asa ing materialis king pangatibe na pader ning Mizpa ning Geba, ing siudad a sakup ning Benjamin.

²³ Makasulat ngan ing sablang depatan nang Aring Asa pati ing katapangan na at ding siudad a pepatalakad na, king librung Ing Istoria ding Ari ning Juda. Oneng inyang matua ne mikasakit ya king bitis.

²⁴ Mete ya i Asa at mikutkut king Siudad nang David a makatua na. I Jeosafat, ing anak nang lalaki, ya ing menalili bilang ari.

²⁵ King kadua nang banuang pamag-aring Asa ning Juda, kanita ya meging ari king Israel i Nadab a anak nang Jeroboam. Mig-ari ya king Israel kilub ding aduang banua.

²⁶ Dinapat yang e mayap king akakit na ning Ginu; tikian na ing e mayap nang bakas tata na, at penimunan ne ing Israel king pamikasala.

²⁷ I Baasa a anak nang Ahiya ning tribu nang Isacar mibalak yang laban kang Nadab, at pete ne king Gibeton a sakup da ring Filisteo kabang i Nadab at ding sundalus na lulusuban de iting siudad da ring Israelita.

²⁸ Katlung banua na na kanita ning pamag-ari nang Asa king Juda inyang pete neng Baasa i Nadab. At i Baasa ya ing menalili kang Nadab bilang ari ning Israel.

²⁹ Kalukluk na king tronu bilang ari, pegumpisan na lang pemate ding miembru na ning pamilya nang Jeroboam. Pete na la ngan, ala yang tigan. Iti makayagpang king sinabi na ning Ginu king kapamilatan ning talasuyu nang propetang i Ahiya ning Silo.

³⁰ Iti milyari uling pepamua neng Jeroboam ing Ginu, ing Dios ning Israel, king kapamilatan da ring kasalanan a depat na at layun tinake king pamikasala ing Israel.

³¹ Makasulat king librung Ing Istoria ding Ari ning Israel ing sablang depatan nang Nadab.

³² E la tinuknang migigera di Aring Asa at Baasa ning Israel kabang mabie la.

³³ King katlu nang banuang pamag-aring Asa king Juda, kanita ne man meging ari i Baasa, ing anak nang Ahiya, king mabilug a Israel. Menuknangan ya king Tirza at mig-ari ya kilub ding aduang pulu't apat a banua.

³⁴ Depatan na itang e mayap king akakit na ning Ginu, at tikian na ing e mayap nang alimbawang Jeroboam, at tinake ne king pamikasala ing Israel.

16

¹ Ngana ning miras nang amanu ning Ginu kang Jehu a anak nang Hanani laban kang Baasa,

² Ala kang ulaga, makanyan man gewa ra kang manimuna da ring memalen kung Israelita. Oneng tikian mu ing pamikasala nang Jeroboam at tinake me ing Israel king pamikasala. Inya pepamua mu ku.

³ Inya paburen da ka at ing pamilya mu, antimo ing depat ku kang Jeroboam.

⁴ Kanan de ring asu ing ninumang miembru na ning pamilya mu a mate king siudad, at itang mate king marangle kanan de ring ayup a buitre.

⁵ Ing depatan nang Baasa pati na ing depat nang katapangan makasulat ngan king librung Ing Istoria ding Ari ning Israel.

⁶ Mete ya i Baasa at kitkut de king Tirza. I Ela, ing anak na, ya ing menalili bilang ari.

⁷ Miras iting amanu na ning Ginu laban kang Baasa at king pamilya na king kapamilatan nang Jehu a anak nang Hanani uli na ning e ustung depat nang Baasa king akakit na ning Ginu. Depat na naman itang e ustung alimbawa nang Jeroboam. Inya pepamua ne ing Ginu at pete na la pa ring sablang miembru na ning pamilya nang Jeroboam.

⁸ King kaduang pulu't anam nang banua ning pamag-ari nang Asa king Juda, i Ela a anak nang Baasa ya ing meging ari na ning Israel. Mig-ari ya kilub ding aduang banua at menuknangan ya king Tirza.

⁹ I Zimri, ing metung karing opisyal na a mamahala karing kapitna karing karung panggera na ning ari, mitangka yang laban kang Ela. Malasing ya kanita i Aring Ela uli na ning miminum yang alak king bale nang Arza, ing talapamahala ning palasyu king Tirza.

¹⁰ Linub ya karin i Zimri at pete ne i Aring Ela at i Zimri ya ing menalili kang Ela bilang ari ning Israel. Adua neng pulu't pitung banuang mag-ari kanita i Asa king Juda.

¹¹ Kalukluk nang Zimri bilang ari, pepapate na la ngan ding sablang miembru na ning pamilya nang Baasa; ala yang tigan metung man a lalaki maging karing pamilya na o karing kakaluguran na.

¹² Makayagpang iting milyari king amanung sinabi na ning Ginu kang Baasa king kapamilatan nang propeta Jehu.

¹³ Milyari iti uli na ning mimua ya ing Ginu kang Baasa at Ela uli na ning pamanyamba ra karing idolo at uli na ning tinake da la ring memalen ning Israel king pamikasala.

¹⁴ Makasulat ing sablang depatan nang Ela king librung Ing Istoria ding Ari ning Israel.

¹⁵ King kaduang pulu't pitung banua ning pamag-ari nang Asa king Juda, kanita ne man meging ari i Zimri king Israel. Mig-ari ya kilub ding pitung aldo, at menuknangan ya karin king Tirza. Lulusuban de kanita ring sundalus na ning Israel ing Gibeton, ing lugal a sakup da ring Filisteo.

¹⁶ Abalitan da ing pataksil a pamakamate nang Zimri king ari ning Israel. Inya kanitang aldo mu ring ita, kayabe ding sablang memalen ning Israel, gewa deng ari da i Omri, ing pekapun da ring sundalus.

¹⁷ Kaybat na nita, i Omri at ding sablang sundalus na meko la king Gibeton at lisuban de ing Tirza.

¹⁸ Inyang ikit nang Zimri ing mibagsak ne ing siudad, minta ya king kakilubkiluban na ning palasyu at silaban ne ing palasyu. Mete ya king silab.

¹⁹ Iti milyari uli da ring kasalanan na king Ginu; dinapat yang e ustu king akakit na ning Ginu at kalupa nang Jeroboam tinake na la ring memalen ning Israel king pamikasala.

²⁰ Makasulat ngan ing depatan nang Zimri, pati ing kataksilan a depat na, king librung Ing Istoria ding Ari ning Israel.

²¹ Megawa lang aduang grupu ding memalen na ning Israel. Ing metung buri neng maging ari na i Tibni a anak nang Ginat, at ing metung naman i Omri.

²² Oneng mas dakal la ring panig kang Omri kesa kang Tibni. King katataulian, mete ya i Tibni, inya i Omri ya ing meging ari.

²³ King katlung pulu't metung a banua na ning pamag-ari nang Asa king Juda, kanita ya meging ari i Omri king Israel. Mig-ari ya kilub ding labing aduang banua. King Tirza na la ginamit ding mumunang anam a banua ning panga-ari na.

²⁴ Seli ne kang Semer ing bunduk-bundukan ning Samaria king alagang anam a libung pirasung pilak. Pepabakud neng matibe iting bunduk-bundukan at pemalagyuan neng Samaria, ing lagyu ning pisaluan na king bunduk-bundukan.

²⁵ Dinapat yang e mayap i Omri king akakit na ning Ginu; mas grabi ing gewa nang kasalanan kesa karing minunang ari.

²⁶ Tikian na ing e ustung alimbawa nang Jeroboam a anak nang Nebat, at tinake na la ring memalen king pamikasala king kapamilatan ning pamanyambang idolo. Inya pepamua re ing Ginu, ing Dios ning Israel.

²⁷ Makasulat ngan ing depatan nang Omri king librung Ing Istoria ding Ari ning Israel.

²⁸ Mete ya i Omri at kitkut de king Samaria. I Ahab a anak na ya ing menalili bilang ari.

²⁹ King katlung pulu't walung banua na ning pamag-ari nang Asa king Juda, kanita ya meging ari i Ahab a anak nang Omri king Israel. Menuknangan ya king Samaria at mig-ari ya kilub ding aduang pulu't aduang banua.

³⁰ Lalung e mayap ing depatan nang Ahab king akakit ning Ginu kesa karing minunang ari.

³¹ E mekagyu ing mekiapus yang dinapat kasalanan anti i Aring Jeroboam, nune pekasalan ne pa i Jezebel a anak ning Aring Etbaal ning Sidon. E mu ita, sinamba ya pa at sinuyu kang Baal.

³² Pepagawa ne pang templo at altar i Baal karin king Samaria.

³³ Pepagawa ya namang larawan na ning diosang i Asera. Inya lalu neng pepamua ing Ginu, ing Dios ning Israel, kesa karing minunang ari.

³⁴ King kapanaunan nang Ahab ne pepatalakad Hiel ning Betel ing Jerico. Oneng inyang gawan da la ring pundasyun na niti, mete ya i Abiram a anak nang pangane. At inyang italakad da la ring pasbul dalan mete ne man i Segub, ing bungsu nang anak. Iti milyari bilang katuparan king sinabi na ning Ginu king kapamilatan nang Josue a anak nang Nun.

17

¹ Ating metung a propeta a tau Tisbe, Gilead. Elias ing lagyu na. Nganang sinabi kang Aring Ahab, King lagyu na ning Ginu, ing mabie Dios ning Israel a kakung susuyuan, sasabian ku keka: e muran o mambun man kilub ding adua o atlung banua anggang e ku sabian.

² Kaybat, ngana ning Ginu kang Elias,

³ Lakuan mu ne ing lugal a yan at munta ka dane aslagan ning Jordan at salikut ka karin king Batis ning Kerit.

⁴ Minum ka king danum ning batis, at inutusan ku na la ring awak ban magdala lang pamangan para keka. fig,,,,,...inutusan ku na la ring awak ban magdala lang pamangan para keka.,(17:4)fig*

⁵ Memintu ya i Elias king sinabi na ning Ginu, at minta ya at menatili king Batis ning Kerit.

⁶ Daratang la reng awak neng abak at neng gatpanapun ban pagdala reng pamangan. At miminum ya king danum ning batis.

⁷ E miglambat, melangi ya ing batis uling e minuran.

⁸ Kanita ngana ning Ginu kang Elias,

⁹ Munta ka ngeni mu rin king Zarepat, malapit Sidon at karin ka manatili. Inutusan ku ne ing metung a babaing mebalu karin ban pakanan na ka.

¹⁰ Inya meko ya at minta ya i Elias king Zarepat. Inyang malapit nia mu king pasbul dalan ning siudad, ikit ne ing metung a babaing mebalu a mamulut dutung a panangab. Ngana king babaing mebalu, Malyari kung makainom?

¹¹ Inyang ume neng muli ing babai ban kumang inuman, tegal neng Elias at ngana, Nung malyari, pakipagdala mu na ku munamang apangan ku.

¹² Nganang mekibat ning babai, Balu na ning Ginung kekayung Dios ing ala ku agyamang tinape. Atin ku mung ditak a arina at ditak a tabang olibo king lulanan. Minta ku keti ban mamulut dutung a panangab a gamitan ku king pamaglutu para kanaku at king anak kung lalaki. Ita mu ing pamangan a makatagan at kaybat na nita mate na kami king danup.

¹³ Nganang Elias, E ka migaganaka. Sulung at maglutu na kang pamangan. Oneng maglutu ka pa mung ditak a tinape para kanaku at kaybat ilutu mu na itang para kekayu.

¹⁴ Uling anti kaniti ing sasabian na ning Ginu, ing Dios ning Israel: E ya kagisanan arina ing lulanan, at e ya munaman kagisanan taba ing datukanan anggang e na ibaldug ning Ginu ing uran king yatu.

¹⁵ Meko ya ing babai at tiparan na itang sinabi nang Elias. Ilang atlu, i Elias, ing babaing mebalu, at ing anak na mamangan la aldo-aldo,

¹⁶ oneng e ya kegisanan ing lulanan arina, at ing datukanan tabang olibo, antimo ing sinabi na ning Ginu king kapamilatan nang Elias.

¹⁷ E miglambat, mesakit ya ing anak na ning babaing mebalu. Melala ing sakit na angga king mete ya.

¹⁸ Ngana ning ima kang Elias, Talasuyu ning Dios, obat depatan mu iti kanaku? Dinatang ka wari keti ban ipaganaka mu la kanaku ding kasalanan ku king Ginu at paten ing anak ko?

¹⁹ Nganang Elias, Ibie me kanaku ing anak. Kinua ne ing anak king babaing mebalu at penik ne ketang kuartu babo nung nu ya manatili, at kinera ne king pagkeran.

²⁰ Kaybat nganang menalangin masikan, O Ginung kakung Dios, iti waring kamatayan ning anak ya ing ablas mu king babaing mebalung kinupkup kanako?

²¹ Kaybat sikban neng mekatatlung besis ing anak at nganang menalangin: Ginu kung Dios, paintulut mung mie yang pasibayu iting anak.

²² Pekibatan ne ning Ginu i Elias; mengisnawa yang pasibayu ing anak at mebie ya.

²³ Binuat neng Elias ing anak at tinipa ne ban ibie kang ima na. Nganang Elias kang ima na, Oyan ing anak mu, mabie ya!

²⁴ Ngana ning babai kang Elias, Ngeni ku apatunayan king ika tune na kang talasuyu ning Dios, at ing amanung sasabian yung ibat king Ginu pawang katutuan.

18

¹ Kalabas da ring dakal a aldo, kanitang katlung banua, migsalita ya ing Ginu kang Elias. Ngana, Elias, pakikitan me i Aring Ahab uling paratang na kung uran.

² Inya meko ya at mekikit i Elias kang Ahab. Ing danup king Samaria tutung maragul,

³ inya pepayaus neng Ahab i Obadias, ing talapamahala ning palasyu. (Tapat ya i Obadias king pamanyamba king Ginu.

⁴ Inyang pepapate na lang Jezebel ding propeta na ning Ginu, kinua na lang Obadias ding dinalan a propeta at selikut na la karing aduang kueba; tia limang pulu king balang kueba. Kaybat peparalan na lang pamangan at inuman.)

⁵ Nganang Ahab kang Obadias, Tara, lawan ta la ring sibul da ring danum at ding kapatagan, pota manakit katang agyang ditak mung dikut ban atin lang apangan ding kabayu at asno, at aligtas ta la ring sese tamung animal.

⁶ Inya pikayari da nung isanu king dake ning gabun a pipartian da ing karelang lawen, at mikawani na lang dalan.

⁷ Kabang lalakad ya i Obadias, akasalubung ne i Elias. Akilala ne at dikuan ne at ngana, Ikayu i Elias a kakung panginuan?

⁸ Pekibat nang Elias, Wa, aku ya. Sulung, sabian mu king panginuan mung ari king atyu na ku keti.

⁹ Kitang nang Obadias, Nanu wari ing depat kung kasalanan keka at buri mu kung ipapate kang Ahab?

¹⁰ Balu na ning Ginung kekang Dios, king karing bansa at kayarian mitutubud yang tau ing kakung ari ban panintunan da ka, at pasumpan na la ring mamuntukan ban patunayan king e ra ka pin ikit.

¹¹ At ngeni buri mu ing puntalan ke i Ahab at sabian king atyu ka kete?

¹² Kalako ku keti e ku na balu kanita nung nukarin na ka idala ning espiritu ning Ginu. At nung sabian ku kang Ahab king atyu ka keti at kaybat e na ka akit, kanita aku ing paten na. E mu sana kakalinguan king talasuyu na ku ning Ginu manibat na kanitang kayanakan ku.

¹³ E yu wari abalitan king inyang papapate na lang Jezebel ding propeta na ning Ginu selikut ku la ding dinalan a katau karela karing aduang kueba; tia limang pulu balang kueba? Kaybat peparalan ku lang pamangan at inuman?

¹⁴ At ngeni sasabian mu ing puntalan ke ban sabian king atyu ka kete? E malyari; paten na ku!

¹⁵ Nganang Elias, Obadias, king daramdaman na ning Ginung Mayupaya a kakung susuyuan, pangaku ku king pakit ku ngeni mu rin kang Aring Ahab.

¹⁶ Inya meko ya i Obadias at pintalan ne i Aring Ahab, at sinabi na ing pasabi nang Elias. Inya pintalan neng Ahab i Elias ban pakikitan ne.

¹⁷ Nganang Ahab inyang akatagpu ne, Ika pala ing mapanggulu king Israel!

¹⁸ Pekibat nang Elias, E ku mapanggulu. Ika at i tata mu ding mapanggulu, uling lalabagan mu la ding utus na ning Ginu at uling sasamban mu la ding idolo nang Baal.

¹⁹ Ngeni payaus mu la ngan ding memalen ning Israel ban pakikitan da ku karin king Bunduk ning Carmel. Papuntan mu la naman karin ding apat a ralan at limang pulung propeta nang Baal at ding apat a ralan nang propeta ning diosang i Asera a susustentuan nang Reyna Jezebel.

²⁰ Inya pepayaus na lang Ahab ding sablang memalen ning Israel at ding propeta nang Baal ban mitipun karin king Bunduk ning Carmel.

²¹ Lepitan na lang Elias ding memalen at ngana karela, Nu pa anti kaluat bayu kayu makagawang metung a kapasyahan? Nung ing Ginu ya ing Dios, samban ye; nung i Baal dios ya, ya ing samban yu! Oneng e la bitasang mekibat ding memalen.

²² Kanita nganang Elias, Aku na mung dili ku ing mitagan karing propeta na ning Ginu, oneng apat lang dalan limang pulu ding propeta nang Baal.

²³ Magdala kayu kening aduang toro; ibie ya ing metung karing propeta nang Baal ban paten de at pamirasuan, at itumpak de king dutung a panangab, oneng e ra patawan. Makanyan munaman ing daptan ku king metung pang toro.

²⁴ Kaybat, paburen lang manalangin ding propeta nang Baal king karelang kikilalanan a dios, at aku man manalangin ku king Ginu, at itang dios a makibat king kapamilatan na ning api ya ing Dios. Ngarang mekibat ding memalen, Nayun kami!

²⁵ Kanita nganang Elias karing propeta nang Baal, Anti na ning dakal kayu, ikayu ing munang mamili king toro a buri yu at isadia ye. Kaybat manalangin kayu king kikilalanan yung dios, oneng e yu patawan ing dutung.

²⁶ Kinua re ing torong miyabie karela; sidia re iti, at kaybat menalangin la kang Baal manibat king abak angga na itang kaugtuan aldo. Ngara, Pakibatan mu kami, O Baal!, at terak-terak la king paligid na ning altar a gewa ra. Oneng ala lang tinggap a pakibat.

²⁷ Itang gatpanapun na, pegumpisan na lang pigsisting Elias. Ngana karela, Isikan yu ing panalangin yu king dios yu! Pota samal ya o kaya magbawas ya king gulut o kaya miglakbe ya! O pota matudtud ya at kailangan yeng gisingan!

²⁸ Inya lalu rang pekasikan ing panalangin da at layun piniugat ing sarili da karing punyal at tandus antimo ing sadia rang daraptan, at tinulu ing daya karing katawan da.

²⁹ Milabas ing gatpanapun king karelang pamangulisak angga king dinatang ing oras ning pamanain, oneng ala mu ring bitasang meramdam a siwala o pakibat.

³⁰ Kanita nganang Elias karing taung atyu karin, Lumapit kayung malapit kanaku, at pekalapit da. Linarin ne ing melasak nang altar ning Ginu.

³¹ Kinangwa yang labing aduang batu agpang king bilang da ring tribung anak nang lalaking Jacob, ing lalaking pemalagyuan nang Israel ning Ginu.

³² King kapamilatan da ring batu linarin ne ing altar para king lagyu ning Ginu. Ginawa yang paligi king makapadurut ning altar a maglaman aduang tukung a danum.

³³ Kaybat na nita, inayus na ing dutung a panangab at pete ne ing toro, at timpak ne king makaayus a dutung. Kaybat sinabi na, Kuma kayung apat a tapayang danum at itugtug yu king ain at king dutung a panangab. Tiparan da ing sinabi na,

³⁴ at kaybat ngana karela, Pasibayuan yeng tugtugan. At memintu la. Tugtugan ye pa, ngana namang minutus karela. At memintu la.

³⁵ Minagus ing danum king paligid na ning altar at kitmuan ne ing paligi.

³⁶ Inyang miras ing oras ning pamiyain king ain, linapit ya i propeta Elias king altar at ngana, O Ginung Dios nang Abraham, Isaac, at Israel, patunayan mu ngening aldong iti king ika ing Dios king Israel, at king aku ing kekang talasuyu, at king depatan ku ngan iti uling iti utus mu.

³⁷ Pakibatan mu ku, O Ginu, pakiramdaman mu ku ban abalu da reting tau king ika, O Ginu, ing Dios, at ban mibalik la lub keka.

³⁸ Kanita ya pepatipang api ing Ginu, at silaban na ning api ing ain, ing dutung a panangab, ding batu, ing gabun, at pepalangi na ing danum king paligi.

³⁹ Inyang ikit da ring tau iti, migsakab la king gabun at ngarang migsalitang masikan, Ing Ginu Dios ya; bukud mung ing Ginu ya ing Dios! fig,,,, ,Kanita ya pepatipang api ing Ginu.,(18:38)fig*

⁴⁰ Kanita nganang minutus Elias, Dakpan yu la ring propeta nang Baal; ala kayung paburen makatakas metung man. Inya dekap da la ngan at kaybat dela na lang Elias king Batis ning Kison at pete na la ngan karin.

⁴¹ Kaybat na nita, nganang Elias kang Aring Ahab, Muli na kayu at mangan, uling daramdaman ku nang daratang lalagusgus ing uran.

⁴² Inya minuli ya i Ahab ban mangan kabang i Elias naman minukiat ya king taluktuk ning Bunduk ning Carmel. Dinuku ya angga king gabun at atyu ing buntuk na pilatan da ring tud na.

⁴³ Ngana king ipus na, Sulung at lumawe ka mu banda na ning dagat. Meko ya ing ipus at kaybat migbalik ya. Ngana kang Elias, Ala kung ikit nanuman. Pitung besis nang sinabing Elias king ipus na ing sumulung ya at maglalawe.

⁴⁴ King kapitung besis nang pamagbalik sinabi na kang Elias, Menakit kung biga a kasing dagul na ning gamat ning metung a lalaki; mitatas ya tulid ning dagat. Kanita nganang Elias, Mamalagua ka, puntalan me i Aring Ahab at sabian mu king isadia ne ing karwahe na at muli neng agad ban e ne dasnan ning uran.

⁴⁵ E miglambat mitakpan yang makapal a lulam ing banua, tiniup ing angin, at kaybat mebaldug ing masikan a uran. Sinake ya i Ahab king karwahe na at memalagua yang minuli king Jezreel.

⁴⁶ Dinatang ing upaya na ning Ginu kang Elias; bebat nang masalese ing imalan king awakan na, at memulayi yang makauna kang Ahab angga na inyang miras la Jezreel.

19

¹ Belita na ngang Ahab kang Jezebel a asawa na ing depatan nang Elias, at nung makananu na lang gisan pete king espada ding sablang propeta nang Baal.

² Inya peparala yang tubud i Jezebel kang Elias ban sabian ing anti kaniti: Makanyan at maygit ing parusang daptan da kanaku ding dios, nung anggang bukas king oras a anti kaniti, e ku daptan keka itang depatan mu karing propeta.

³ Mitakutan ya i Elias, inya tinakas yang kayabe na ing ipus na, at miras la king Beerseba ning Juda. Likuan ne ing ipus na karin,

⁴ at linakad yang dili na kilub ning metung a aldo pamaglakbe papunta king ilang. Tinuknang ya at linukluk lalam ning tanaman a retama at buri na ing mate ne sana. Nganang menalangin, O Ginu, mapagal na ku; kuanan mu na ing bie ku, mas mayap pa ing mete na ku!

⁵ Kaybat na nita, migkera ya at mipatudtud ya. Kabud-abud ating anghel at tigkilan ne at ngana, Migising na ka at mangan.

⁶ Inyang lumawe ya, ikit ne king kabuntukan na ing metung a tinape a melutu karing babo da ring mapaling batu at metung a bangang danum. Mengan ya at minum at kaybat migkera yang pasibayu.

⁷ Pasibayu yang dinatang ing anghel ning Ginu; tigkilan ne at ngana, Elias, mibangun ka at mangan, uling makaba pa ing lakaran mu.

⁸ Mibangun ya; mengan at minum. Inya mibawi ing sikanan na ban makalakad ya kilub ding apat apulung aldo papunta king Bunduk ning Horeb, ing sagradung bunduk.

⁹ Karin ating kueba; linub ya karin ban matudtud. Kabud-abud migsalita ya ing Ginu. Ngana, Elias, obat atyu ka keti?

¹⁰ Nganang mekibat, Mangatmu kung katapatan keka, O Ginung Dios a Mayupaya. E re tiparan ding memalen ning Israel ing kasunduan a gewa mu karela, lesak da la ring altar mu, at pete ding propeta mu king kapamilatan na ning espada. Aku na mu ing mitagan at panintunan da ku pa ban paten.

¹¹ Ngana ning Ginu, Elias, lumual ka ken at talakad king arapan ku king taluktuk ning bunduk. Kaybat na nita, linabas ya ing Ginu at tiniup ya ing maragul at masikan a angin, at inaspak na la ding bunduk at piglasilasi ding batu king arapan ning Ginu; oneng alayu ing Ginu king angin. Kalabas na ning angin, minayun; oneng alayu ing Ginu king ayun.

¹² Kalabas na ning ayun, api; oneng alayu ing Ginu king api. Kaybat ning api ating malating siwala.

¹³ Inyang dimdam nang Elias iti, tikpan ne ing lupa na king balabal at linual ya at menaya king arap ning kueba. Ngana ning siwala, Elias, nananu ka keti?

¹⁴ Pekibat na, Mangatmu kung katapatan keka, O Ginung Dios a Mayupaya. E re tiparan ding memalen ning Israel ing kasunduan a gewa mu karela, lesak da la ring altar mu, at pete ding propeta mu king kapamilatan na ning espada. Aku na mu ing mitagan at panintunan da ku pa ban paten.

¹⁵ Ngana ning Ginu kang Elias, Sulung, mibalik ka king ilang ning Damasco. Kaybat lungub ka king siudad at lanian meng laru i Hazael bilang ari na ning Siria,

¹⁶ at i Jehu a anak nang Nimsi bilang ari na ning Israel. Lanian mia namang laru i Eliseo a anak nang Safat ning Abel Mehola bilang propetang kayalili mu.

¹⁷ Ing ninumang makaligtas king espada nang Hazael paten na ne mang Jehu, at ing ninumang makaligtas king espada nang Jehu paten na ne mang Eliseo.

¹⁸ Oneng mitagan kung pitung libung taung mabie king Israelding sablang tud a e siniklaud arapan nang Baal, at ding sablang e minuma kang Baal.

¹⁹ Meko ya i Elias, at kaybat ikit ne i Eliseo, ing anak nang Safat, sasarul ya king marangle. Labi lang metung a paris a baka ding makauna arap na at ing kalabing aduang paris ya ing sasarul na. Dinalan ya siping na i Elias at siklub ne kang Eliseo ing balabal na.

²⁰ Likuan na la ring baka na at tegal ne i Elias at ngana, Mamun ku pa mu kang tata ku at ima ku, at kaybat tuki na ku keka. Pekibat nang Elias, Sige, muli na ka pa. E problema ita kanaku.

²¹ Inya belikan na lang Eliseo ding baka na at pete na la; linutu na ing karni at gewa na lang panangab ding paud. Pemie na ing karni karing tau at pengan da iti. Kaybat na nita, likuan na la at tinuki ya kang Elias bilang kasaup na.

20

¹ Tinipun na la ngang Aring Benhadad ning Siria ding sundalus na. King saup da ring atlung pulu't aduang ari at ding kabayu ra ampon karung panggera kibkuban ne at lisuban ing Samaria.

² Peparala yang tubud king siudad, kang Aring Ahab ning Israel, ban sabian da ing anti kaniti: Pasabi nang Benhadad keka king

³ isuku mu na la arap na ding kekang pilak, gintu, ding pekamalagu mung asawa, at ding pekamasikan karing kekang anak.

⁴ Nganang mekibat Aring Ahab ning Israel, Sabian mu king kanakung panginuan a Aring Benhadad king nayun ku king kayaduanan na; bandi na ku at pati ing nanumang atyu kaku.

⁵ E miglambat migbalik la ring tubud kang Ahab a magdalang aliwang kayaduanan. Ngara, Pasabi na ning Aring Benhadad keka king mitubud yang tau keka ban isuku mu la ding kekang pilak, gintu, ding kekang asawa, at anak.

⁶ Subali pa kareti, bukas, king anti kaniting oras, mitubud kung tauan ku ban siasatan de ing palasyu at ding bale ra ding tauan mu. Kuanan da at dalan ing nanumang bage aburi da.

⁷ Inya tinipun na lang Aring Ahab ning Israel ding kasaup na at ngana karela, Lawan yu, talagang manintun yang gulu ing Aring Benhadad. Aduan na ing isuku ku la ding asawa ku at anak, ing pilak ku ampon gintu. Mebisa na ku man king aduan na.

⁸ Ngara kang Ahab ding tau at ding kasaup na, E me papansinan; e ka mabibisa!

⁹ Inya nganang Ahab karing tubud nang Benhadad, Sabian mu king panginuan kung ari king nayun ku king mumuna nang aduan, oneng e ku nayun king kadua. Meko la ring tubud at kaybat mibalik no naman a ating makayaliwang mensahi ibat kang Benhadad para kang Ahab:

¹⁰ Mananu na sanang paten da ku ring dios ku nung bukas, king oras a anti kaniti, atin pang makatagan a kasakmal mu mang alikabuk ning siudad a e ra adala ding kakung sundalus. Inya mitubud kung dakal a sundalus ken ban lasakan de ing siudad mu.

¹¹ Pekibat nang Aring Ahab ning Israel, Sabian mu kang Aring Benhadad king magmayabang ya mu ing tune sundalus potang yari na ing labanan, e potang bayu ing labanan.

¹² Miras iting amanu kang Benhadad kabang ya at ding kayabe na miminum lang alak karing tolda ra. Inya minie yang utus karing tauan na ban magsadia nang lumusub king siudad. At migsadia la king pamakilaban.

¹³ Dinatang ne man ing metung a propeta at lepitan ne i Aring Ahab at ngana, Pasabi na ning Ginu keka, Aring Ahab, king e ka sukat mitatakutan karing akakit mung dakal a sundalus. Saupan da ka ban sambutan mu la ngening aldong iti at ban akilala mu king aku ing Ginu.

¹⁴ Nganang kinutang Ahab, Ninu ing manimuna king pamaglusub? Pekibat ning propeta, Ing Ginu sasabian na king ding kayanakan a sundalus lalam dang pamamahala ring gobernador da ring probinsia. Ngana pang kinutang Ahab, Ninu ing munang lumusub? Ika, nganang mekibat ning propeta.

¹⁵ Inya pepayaus na lang Ahab ding kayanakan a sundalus lalam dang pamamahala ding gobernador a ating aduang dalan atlung pulu't adua katau. Tinipun na la naman ding aliwa pang memalen ning Israel, at mekatipun yang pitung libu katau.

¹⁶ Linusub la itang kaugtuan aldo kabang maglasing ya i Benhadad at ding atlung pulu't aduang ari a kayabe na karing karelang tolda.

¹⁷ Ding minunang linusub ila ring kayanakan a lalaking sundalus lalam dang pamanimuna ding karelang gobernador. Belita da ring sundalung tinubud nang magumasid Benhadad king ating lalaking daratang a menibat king Samaria.

¹⁸ Nganang Benhadad karela, Nanuman ing pake dakapayapan o e kapayapandakpan yu lang mabie.

¹⁹ Ding minunang linusub ila ding kayanakan a sundalus, atyu la kagulutan da ring sundalus na ning Israel,

²⁰ at apate ne ning metung at metung karela ing akalaban na. Inya tinakas la ring sundalus na ning Siria, oneng ding Israelita penagal da la. Mekatakas ya mu rin i Benhadad a mekasake king kabayu a kayabe da ring mapilan a sundalus nang pakasake kabayu.

²¹ Kanita mekiabe ya i Aring Ahab king labanan. Gisan da lang pete ding sundalus ning Siria, at abihag da la ring dakal a kabayu ampon karung panggera.

²² Kaybat na nita, pintalan ne ning propeta i Aring Ahab at ngana, Muli na kayu at dagdagan mu la ring kekang sundalus, at magplanu kang masalese, uling kalabas na niting banua mibalik ya ing ari ning Siria ban lumusub pasibayu.

²³ Ngara ding pamuntuk kang Aring Benhadad, Ding dios da ring Israelita ila ding dios da ring bunduk. Iti ing sangkan nung inya mesambut tamu karela. Oneng siguradu ta lang sambutan nung karing patag a lugal ta la labanan.

²⁴ Oyni, Makamal a Ari ing gawan yu: ilako yu la ring atlung pulu't aduang ari karing karelang katungkulan at palitan yu la karing pekapun.

²⁵ Tumipun kayung pasibayung sundalus a kasing dakal da retang minuna, alilan la ring kabayu at karung panggera a mebihag, at kaybat labanan la king kapatagan. Kanita mas dakal tamu at masikan kesa karela. Pekiramdaman nang Aring Benhadad ing payu da at makanyan ing depat na.

²⁶ Kalabas na ning pabanua tinipun na la ding sundalus na at abe-abe lang minta king siudad ning Afek ban lusuban la ring Israelita.

²⁷ Mitipun la naman ding Israelita at miyabie karela itang kailangan da para king labanan. Meko la at migkampu la king aduang grupu arapan da ring sundalus ning Siria. Balamu malati lang kawan da ring kambing ding Israelita kabang ding sundalus ning Siria marakal lang makakalat king lugal a ita.

²⁸ Lepitan neng pasibayu ning propeta ing ari na ning Israel at ngana, Ing Ginu sasabian na king agpang karing tau Siria, dios ya kanu king kabundukan at e ya dios king kapatagan. Inya masambut la kekayu ding e mabilang-bilang dang sundalus, at kanita yu akilala king ya ing Ginu.

²⁹ Parehu lang pitung aldo migkampung miyayarapan. Milaban la inyang miras ing kapitung aldo, at ding Israelita mekapate lang dinalan a libung sundalus ning Siria.

³⁰ Mekatakas la ring mitagan karela, at minta la king siudad ning Afek. Oneng mibagsak ya ing pader ning siudad at mitambunan la ring aduang pulu't pitung libung sundalus ning Siria. Mekatakas ne naman i Benhadad king siudad at sinalikut ya king metung karing kuartu.

³¹ Ngara ding opisyal na, Makamal a Ari, abalitan mi king malunusan la ding ari ning Israel. Inya paintulutan yu kaming magbabat saku karing awakan mi at mitaling lubid karing buntuk mi, at kaybat lapitan mi ya ing ari ning Israel. Siguru e na ka papate, nung makanyan ing daptan mi.

³² Inya migbabat lang saku karing karelang awakan at mitaling lubid karing buntuk da; pintalan de ing ari ning Israel at ngara, Makamal a Ari, pakisabi nang mayap kekayu ning talasuyu yung i Benhadad king e ye sana papate. Ngana ning Aring Ahab, Mabie ya pa? Mengari kaming mikapatad Benhadad. fig,,,,,Inya migbabat lang saku... at mitaling lubid karing buntuk da.,(20:32)fig*

³³ Bala ra king ing amanung mikapatad a sinabi ning ari ya ing tanda ning mayap nang pilubluban, inya agad lang mekibat. Ngara, Opu, mabie ya pa ing kapatad yung i Benhadad! Dakitan ye at idala keti, ngana ning ari karela. Inyang dinatang ya i Benhadad, pepasaken neng Aring Ahab king karwahe na.

³⁴ Nganang Benhadad, Ibalik ku la keka ding siudad a kinua nang tata ku kang tata mu. Malyari kang gawang negosyu king Damasco antimo ing depat nang tatang ku karin king Samaria. Nganang Ahab, Uli na niting sinabi mu, ibulus da ka. Ginawa lang kasunduan at kaybat binulus neng Ahab i Benhadad.

³⁵ King utus ning Ginu, ing metung karing miembru ning aguman da ring propeta, miyutusan yang sabian na king kalupa nang propeta, Dapat a mayap, tabakan mu ku. Oneng e ya mebisa.

³⁶ Inya ngana, Uli na ning e mu pamamintu king utus ning Ginu, paten na ka ning leon kalako mu keti. Inyang meko ne, akasalubung ne ing leon at pete ne ning leon.

³⁷ Mekatagpu ne namang kalupa nang propeta at sinabi na, Dapat a mayap, tabakan mu ku. Inya ing pekisabian na tebak ne at mesugat ya.

³⁸ Binalut ne ning propeta ing lupa na ban e re akilala ding tau; meko ya at tinalakad king dalan. Panayan neng dumalan ing ari na ning Israel.

³⁹ Inyang daralan ne ing ari, ngana ning propeta, Makamal a Ari, minta ku at mipalibutad king labanan. Karin ating linapit kanaku a magdalang bihag. Ngana kanaku, Banten me ing taung iti. Nung makatakas ya, ing bie mu ya ing kapalit na o kaya mamayad kang atlung libung pirasung pilak.

⁴⁰ Oneng samal ku inya akalimbatawan ke at mekatakas ya ing bihag. Ngana ning ari, Ika mismu ing minatul king sarili mu, at sukat kang mamayaran.

⁴¹ Kanita ne biglang leko ning propeta ing makabalut a imalan king lupa na, at akilala ne ning ari king metung ya karing propeta.

⁴² Ngana ning propeta king ari, Anti kaniti ing pasabi na keka ning Ginu: Obat binulus me ing taung telaga kung paten? Inya ing kapalit na ning bie na ya ing bie mu, at mate la ring sundalus mu uling pepaburen mu lang mekatakas ding sundalus na.

⁴³ Minuli ya king palasyu na king Samaria i Aring Ahab a malungkut at masakit a lub.

21

¹ Karin king Jezreel ating metung a taung milagyuan Nabot. Atin yang mulahan ubas lele na ning palasyu ning Aring Ahab ning Samaria.

² Misan a aldo, nganang Ahab kang Nabot, Anti na ning malapit ya king palasyu ku ing mulahan mung ubas, e ka bisa palitan ke king mas masanting a mulahan ubas ban apitamnan keng gule? Nung e na ka man bisa, saliwan ke king alagang buri mu.

³ Nganang mekibat Nabot, Amana ke iting mulahan ubas karing makatua ku. E na sa paintulut ning Ginu ing mawala ya iting mulahan kanaku.

⁴ Minuli yang malungkut at mua i Aring Ahab uli na ning sinabi nang Nabot. Migkera ya king katri na; gulu ya isip at e bisang mangan uli na ning milyari.

⁵ Lepitan ne ning asawa nang i Jezebel at ngana, Obat malungkut ka at e bisang mangan?

⁶ Pekibat na, Pekisabian ke i Nabot a tau Jezreel at inalukan keng palitan ing mulahan nang ubas king mas masanting a mulahan ubas o kaya saliwan ke king alagang buri na, oneng e ya mebisa.

⁷ Nganang Jezebel, Aliwa wari ika ing ari? Mibangun na ka, mangan, at magsaya. E ka migaganaka; ibie ke keka ing mulahan nang Nabot a tau Jezreel!

⁸ Kaybat na nita, ginawa yang mapilan a sulat i Jezebel king lagyu na ning ari; tetakan na la king panatak na ning ari, at pepadala na la karing pamuntuk at karing kagalang-galang a makatua ning siudad a tuknangan nang Nabot.

⁹ Ngana ning makasulat: Mitatag kayung metung a aldo na ning pamag-ayunu at tipunan yu la ding memalen, at kaybat ibie ya kang Nabot ing lugal a pandangal.

¹⁰ Kaybat paluklukan la king mingatba na ring aduang malaram a magsaksi laban kang Nabot: king sinumpa neng Nabot ing Dios at ing ari. Kaybat, ilual ya at basibasan batu angga king mate ya.

¹¹ Makanyan ing depat da ring pamuntuk at ding kagalang-galang a makatua na ning siudad ning Jezreel agpang king sulat a peparala nang Jezebel karela.

¹² Mitatag lang aldo ning pamag-ayunu; tinipun da la ring tau at binie kang Nabot ing lugal a pandangal.

¹³ Dinatang la ring aduang taung malaram at linukluk la mingatba nang Nabot. Kaybat, king daramdaman da ring dakal a tau sinabi ra, I Nabot sinumpa ne ing Dios at ing ari! Inya kinua re ding tau i Nabot at dela re king lual ning siudad, at pemasibas deng batu angga king mete ya.

¹⁴ Kaybat na nita, pepabalita ra kang Jezebel king i Nabot mete ne king kapamilatan ning basibas batu.

¹⁵ Kabud abalitan nang Jezebel king mete ne i Nabot, sinabi na kang Ahab, Mete ne i Nabot ning Jezreel! Kuanan mu ne ngeni ing mulahan nang ubas a e na buring pisali keka.

¹⁶ Kanita mu rin linakad ya i Ahab ban bandian ne iti.

¹⁷ Oneng ngana ning Ginu kang Elias, ing propeta na ning Tisbe,

¹⁸ Gayak ka; puntalan me i Ahab a ari ning Israel a atyu king Samaria. Akit me king mulahan ubas nang Nabot at babandian ne iti.

¹⁹ Sabian mu king aku, ing Ginu, sasabian ku: Ahab, metung kang makamate tau at mapangamkam! Inya ketang lugal nung nu ra dinilat ding asu ing daya nang Nabot karin da munaman dilatan ding asu ing daya mu.

²⁰ Inyang ikit neng Ahab i Elias, sinabi na, A, atyu ne naman ing kakung kalaban! Ngana namang mekibat Elias, Wa, ikit da ka uling migbabad ka king dapat a e mayap king akakit na ning Ginu.

²¹ Inya pasabi na keka ning Ginu ing anti kaniti: Parala kung kasiran keka. Paburen da ka at ala kung itagan metung man karing lalaki king pamilya mu, anak ya man o matua.

²² Itulad ke ing pamilya mu king pamilya nang Aring Jeroboam a anak nang Nebat at anti ing pamilya nang Aring Baasa a anak nang Ahiya, uli na ning pepamua mu ku at tinake me ing Israel king pamikasala.

²³ Tungkul naman kang Jezebel, ing Ginu sinabi na king kanan de ring asu ing katawan na karin king siudad ning Jezreel.

²⁴ Kanan de ring asu ing ninumang taung mate king siudad a kamaganak nang Ahab, at kanan de ring ayup a buitre itang mate king marangle. (

²⁵ Ala pang kalupa nang Ahab a dinapat dakal a e ustu kesa king akakit na ning Ginu uli na ning pamanamuyut ning asawa nang i Jezebel.

²⁶ Depat na itang makasumaming dili king kapamilatan na ning pamanyamba karing idolo, antimo ing daraptan da ring Amoreo a tinabi na ning Ginu inyang lulub la ring Israelita king bansa da.)

²⁷ Inyang dimdam na lang Ahab deting amanu, ginabak na ing susulud nang imalan, at misulud yang imalan a magaspang E ya bitasang mengan at metudtud ya king imalan a magaspang. Tutu yang melungkut at mesakit a lub.

²⁸ Kanita ngana ning Ginu kang propeta Elias ning Tisbe,

²⁹ E me apansinan nung makananu yang migpakumbaba kanaku i Ahab? Anti na ning migpakumbaba ya, e ku ibalaus ing kasiran kabang mabie ya; datang mu ing kasiran king pamilya na king panaun na ning anak nang lalaki.

22

¹ Tinuknang lang migigera ing Israel at ing Siria kilub ding atlung banua.

² Oneng king katlung banua minta ya ing Aring Jeosafat ning Juda ban pakikitan ne i Aring Ahab ning Israel.

³ Nganang kinutang Aring Ahab karing opisyal na, E yu wari balu king ing Ramot ning Gilead kekatamu ya? Makanyan man ala tamung depat nanuman ban abawi ta ya king ari na ning Siria.

⁴ Kanita kitnan neng Ahab i Jeosafat, Malyari kang tuki kanaku king pamaglusub king Ramot ning Gilead? Pekibat nang Jeosafat, Bisa ku, ding sundalus ku sundalus mu la naman, at ding kabayu ku kabayu mu la naman.

⁵ Oneng bayu ta gawan yan kailangan pa ing kutnan ya ing Ginu.

⁶ Inya pepayaus na lang Aring Ahab ding apat a ralan a propeta at nganang mengutang karela, Kailangan kung lumusub king Ramot ning Gilead o ali? Ngarang mekibat ding propeta, Lumusub ka, uling papagtagumpen na ka ning Ginu.

⁷ Oneng nganang mengutang Jeosafat, Ala na waring aliwang propeta a malyari tamung akutnan tungkul king Ginu?

⁸ Nganang mekibat Ahab, Atin, i Micaia a anak nang Imla. Oneng kasaman ke, uling ala ya pang inula a mekakayap mo sa kanaku; puru e mayap ing pepasari na. E mu sukat sabian yan, Makamal a Ari, nganang sinabing Jeosafat kang Ahab.

⁹ Inya inaus neng Aring Ahab ning Israel ing metung karing pamuntuk at ngana, Magmalagua ka, dakitan me i Micaia a anak nang Imla.

¹⁰ Ing ari ning Israel at i Jeosafat a ari ning Juda makaimalan la king imalan ari at makalukluk la karing tronu lele na ning pidadaran lual ning pasbul dalan ning Samaria kabang ding sablang propeta magsalita lang ula king arapan da.

¹¹ I Zedekia a anak nang Kenaana, ing metung karing propeta, ginawa yang sagung bakal at ngana kang Ahab, Ing Ginu sasabian na: King kapamilatan da reti labanan mu la ding tau Siria at gisanan mu la ngan paten.

¹² Makanyan munaman ing sinabi da ring sablang propeta. Ngara pa, Sulung, lumusub ka king Ramot ning Gilead at maniambut ka. Magtagumpe ka, uling saupan na ka ning Ginu.

¹³ E miglambat miras ya ing opisyal a mituburan dumakit kang Micaia. Ngana niting tubud kang Micaia, Metung mu ing sasabian da ring propeta: magtagumpe ya ing ari. Kailangan ing makanyan munaman ing sabian mu.

¹⁴ Oneng nganang Micaia, King daramdaman na ning mabie Ginu sabian ku mu itang pasabi na kanaku!

¹⁵ Inyang makayarap ne kang Aring Ahab, kitnan ne ning ari, Micaia, kailangan pin king aku at i Aring Jeosafat ing munta kami at lumusub king Ramot ning Gilead o ali? Pekibat nang Micaia, Wa, at maniambut kayu uling papagtagumpen na kayu ning Ginu.

¹⁶ Oneng nganang Aring Ahab kang Micaia, Magsalita kang katutuan kanaku neng magsalita ka king lagyu na ning Ginu. Kailangan pa waring sabian kung ulit-ulit yan keka?

¹⁷ Pekibat nang Micaia, Akakit ku lang makakalat karing bunduk-bundukan ding sundalus na ning Israel; mengari lang tupang alang pastul. At sinabi na ning Ginu, Ala lang talapanimuna deting sundalus, inya paburen na lang muling payapa karing pibalebale ra.

¹⁸ Nganang Ahab kang Jeosafat, Ikit mu na! E ku wari sinabi na keka king ala yang inula ing taung yan a mayap para kanaku nune mu pawang e mayap?

¹⁹ Tiglus nang Micaia ing pamagsalita na. Ngana, Pakiramdaman mu sana ing sasabian na ning Ginu! Ikit ke ing Ginu, makalukluk ya king tronu na karin banua a abe ding sablang anghel na at makatalakad siping na.

²⁰ Kanita kitang na ning Ginu, Ninu ing managkat kang Ahab ban munta ya at mate karin king Ramot ning Gilead? Mekibat ya ing metung karing anghel; at aliwa no man a pekibat ding aliwa.

²¹ Kanita ating metung a espiritung linapit at sinabi na, Aku ing managkat kang Ahab.

²² Kitang ning Ginu, King makananung paralan? Pekibat ning espiritu, Aku ing munta at papagsalitan ku lang kalaraman ding propeta nang Ahab. Inya ngana ning Ginu, Sulung, ika ing munta at magtagumpe ka.

²³ Nganang memupus king pamagsalita nang Micaia, Inya naman ikit mu at dimdam nung makananu lang migsalitang kalaraman keka deting propeta mu. Oneng ing Ginu mismu ya ing sinabing miras keka ing kapahamakan!

²⁴ Kanita lepitan neng propeta Zedekia i Micaia at timpaling ne lupa. Ngana, King makananung paralan na ku likuan ning espiritu ning Ginu ban makapagsalita ya keka?

²⁵ Nganang mekibat Micaia, Akit mu potang datang ing aldo a salikut ka king metung a kuartu.

²⁶ Kaybat na nita, nganang minie utus ning Aring Ahab ning Israel karing opisyal na, Dakpan ye i Micaia at idala ye kang Amon, ing gobernador ning siudad, at kang Prinsipi Joas.

²⁷ Sabian yu karela king isukul de at dinan mung tinape ampon danum angga king ligtas kung makapagbalik.

²⁸ Nganang Micaia, Nung mibalik kang ligtas, kanita mipatunayan king e ya migsalita ing Ginu king kapamilatan ku. Ngana pa, Makiramdam kayu king sinabi ku!

²⁹ Kaybat na nita, i Aring Ahab ning Israel at i Aring Jeosafat ning Juda minta la king Ramot ning Gilead ban lusuban de.

³⁰ Nganang Ahab kang Jeosafat, Magbalatkayu ku at makiabe king pamakilaban, oneng e mu lulukas ing imalan mung ari. Inya migbalatkayu ya ing ari ning Israel at kaybat mekiabe ya king pamakilaban.

³¹ Oneng minie yang utus ing ari na ning Siria karing atlung pulu't adua nang pekapun da ring karung panggera king ala lang aliwang labanan nung e mu ing ari na ning Israel.

³² Inyang ikit de ing Aring Jeosafat, bala ra king ya ing ari na ning Israel, inya inarapan de at lisuban. Oneng kinulisak ya i Jeosafat,

³³ at abalu ra king aliwa ya ing ari na ning Israel, at tiknangan deng tatagalan.

³⁴ Oneng ing metung karing sundalus na ning Siria abugnus ne ing paslu ning pana na at king e na sasarian tiran ne ing ari na ning Israel. Tinusuk ya ing paslu king pilatan ding tiranti na ning baluti na king salu. Inya ngana ning ari king magmanehu na king karung panggera, Magbalik ka at ilako mu ku keting labanan uling mituran ku.

³⁵ Milalu kabagsik ing labanan king aldong ita, oneng menatili yang makasandal i Aring Ahab king karung panggera a makayarap karing sundalus na ning Siria. Tutulu ing daya na king suelo na ning karung panggera at mete ya inyang lalbug ne ing aldo.

³⁶ Inyang lalbug ne ing aldo, dimdam de ring sundalus na ning Israel ing anti kaniting kulisak: Muli na kayu karing sarasarili yung balen at siudad!

³⁷ Wa, mete ya ing Aring Ahab. Inuli de king Samaria ing bangke na at karin de kitkut.

³⁸ Lininis de ing karung panggera na king Batis ning Samaria (ing lugal nung nu la mendilu ding babaing magtinda king katawan da), at dinilat da karin ding asu ing daya na, antimo ing sinabi na ning Ginu.

³⁹ Ing sablang depatan nang Aring Ahab pati na ing garing a palasyung pepagawa na ampon ding siudad a tinatag na, makasulat ngan king librung Ing Istoria ding Ari ning Israel.

⁴⁰ Kamate nang Ahab, i Ahazia a anak na ya ing menalili bilang ari.

⁴¹ King kapat nang banua ning pamag-ari nang Ahab ning Israel, kanita ne man meging ari ning Juda i Jeosafat a anak nang Asa.

⁴² Atlu yang pulu't limang banua kanita, at mig-ari ya king Jerusalem kilub ding aduang pulu't limang banua. I ima na ya i Azuba a anak nang Silhi.

⁴³ Kalupa nang Asa a tata na, depatan nang Jeosafat itang katanggap-tanggap king akakit na ning Ginu, oneng e na la lesakan ding pisasamban a atyu karing bunduk-bundukan, at menatili la ding tau king pamiyain dang ain-sakripisyu at pamanduluk insenso.

⁴⁴ Mapayapa ing relasyun nang Jeosafat king ari na ning Israel.

⁴⁵ Ing sablang depatan nang Jeosafat, pati na ing pepakit nang katapangan at ding gerang leukan na, makasulat king librung Ing Istoria ding Ari ning Juda.

⁴⁶ Ya ing mekapalako karing mitagan a lalaki at babaing magtinda king katawan da karing pisasamban paganu kanita pang panaun nang Asa a tata na.

⁴⁷ Alang ari kanita king bansang Edom; itang tilduan nang Jeosafat ya ing mamahala karin.

⁴⁸ Pepagawa yang barku i Jeosafat karin king Tarsis ban maglayag mangalakal gintu king Ofir, oneng e la mekapaglayag uling lesak na la ning masikan a angin karin king Eziongeber.

⁴⁹ Inya minungkahi nang Aring Ahazia ning Israel ing paintulutan na lang maglayag ding tauan na karing tauan nang Jeosafat, oneng tinggian nang Jeosafat iting aluk.

⁵⁰ Mete ya i Jeosafat at kitkut de karing kutkutan da ring ari karin king Siudad nang David. Ing anak nang i Jeoram ya ing menalili bilang ari.

⁵¹ King kalabing pitung banua na ning pamag-ari nang Jeosafat ning Juda, kanita ya meging ari ning Israel i Ahazia a anak nang Ahab. Mig-ari ya kilub ding aduang banua, at menuknangan ya king Samaria.

⁵² Depatan na itang e ustu king akakit na ning Ginu; depat na itang e mayap a depat nang Ahab a tata na at i Jezebel a ima na at i Jeroboam a anak nang Nebat, ing mitake king pamikasala da ring memalen na ning Israel.

⁵³ Simban ne at siyuan Jeosafat i Baal. Kalupa nang tata na, pepamua ne ing Ginu, ing Dios ning Israel.