1

¹ Mete ne kanita i Aring Saul inyang pauli ne i David ibat king matagumpe nang pamaglipul karing Amalekita. Menatili yang aduang aldo king Ziklag.

² King katlung aldo, dinatang yang ibat king kampu nang Saul ing metung a kayanakan a lalaking gabak-gabak a imalan at magabun a buntuk. Linapit ya kang David at migsakab bilang pamamie galang.

³ Nganang kinutang David, Nukarin ka menibatan? Pekibat na, Tinakas ku pu king kampu ding Israelita.

⁴ Nanu ing milyari? Sabian mu kanaku, nganang David. Pekibat ning lalaki, Memulayi la pu king labanan ding kekatamung sundalus at dakal la pu ring mete. Mete ya naman i Saul at ing anak nang i Jonatan.

⁵ Nganang kinutang David, Makananu mung balung mete ne i Saul at i Jonatan?

⁶ Kinwentu ning kayanakan a lalaki ing milyari. Ngana, Mipaintagun ing atyu ku pu kanita king Bunduk ning Gilboa, at ikit keng makasandal i Saul king tandus na. Ikit ku la naman king malapit na la mu ding kalaban a tatagal kang Saul; pakasake lang karung panggera at kabayu.

⁷ Inyang melikid ya i Saul ikit na ku at inaus na ku. Po, ngakung mekibat. Kitang na nung ninu aku.

⁸ Sinabi ku king metung kung Amalekita.

⁹ Ngana kanaku, Lumapit ka keni at paten mu ku! Grabi ya ing sugat ku at malapit na ku mung mate.

¹⁰ Inya linapit ku at pete ke uling balu ku king e lumuat mate ya mu rin kabud miragsa ya. Kaybat na nita, kinua ke ing korona king buntuk na at ing pulseras king takde na, at dela ku la keti, O makamal.

¹¹ Kanita ginabak nang David ing imalan na uli na ning lungkut. Makanyan munaman ing depat da ring sablang tauan na.

¹² Migpaldas la, menangis, at mig-ayunu angga na itang bengi para kang Saul at Jonatan, at para king Israel, ing balen ning Ginu, uling dakal la ring mete king labanan. fig,,,,,Ginabak nang David ing imalan na uli na ning lungkut.,(1:11)fig*

¹³ Kitnan neng David ing kayanakan a lalaking memalita. Ngana, Nu ka tau? Pekibat na, Anak na ku pu ning metung a Amalekitang dayuan a manuknangan king bansa yu.

¹⁴ Nganang David, Ba't e ka mikakunung paten me ing aring pinili ning Ginu?

¹⁵ Kanita inaus neng David ing metung karing tauan na at ngana, Paten me ing taung ini! Memintu ya, at pete ne.

¹⁶ Nganang David king maginghalung Amalekita, Ika ing pepasari king kamatayan mu. Ika ing minatul king sarili mu inyang pepatutuan mung ika ing mekamate king ari a pinili ning Ginu.

¹⁷ Menagulele ya i David kayabe niting kanta tungkul kang Saul at Jonatan,

¹⁸ at inutus na ing ituru ya karing memalen na ning Juda. (Misulat ya iti king Libru nang Jasar.)

¹⁹ Ngana niting tagulele: Ing ligaya mu, O Israel, miwakasan karing bunduk-bundukan! Matapang a sundalus karin la mibulang!

²⁰ Ilihim yu iti king Gat, e yu paniabian karing dalan ning Askelon. E yu paintulut ing tumula la ding kebabainan ning Filistia, ding kebabainan ding paganu.

²¹ Ala na sanang uran o ambun a dugpa king bunduk-bundukan ning Gilboa; langi la sana ding marangle na! Uling ding kalasag da ring matapang karin la milako dangalan; e ne mikukuskusan laru ing kalasag nang Saul.

²² Makamate ya ing pana nang Jonatan, ala yang patawad ing espada nang Saul, daragsa da lang masikan at pamaten karelang kalaban.

²³ Tune lang kalugud-lugud at pakamalan di Saul at Jonatan, miyabe la king bie at kamatayan; mabilis la kesa karing agila, masikan lang maygit karing leon.

²⁴ Ikong babai ning Israel, i Saul keko yang panangisan, uling ya ing minie kekong malagung imalan at karing iyas ampon gintu a kekong susulud.

²⁵ Mibulang na lang matapang a sundalus, mete la king pamakilaban. Pete re i Jonatan king bunduk-bundukan.

²⁶ Panangisan da ka, O kapatad kung Jonatan; tutu kang mal kaku, alang kalupa ing lugud mu; maygit king sinta da ring babai.

²⁷ Mibulang na lang matapang a sundalus, ala na lang ulaga ding sandatang karelang gagamitan king pamakilaban.

2

¹ Kaybat na nita, mengutang ya i David king Ginu. Ngana, Munta ku king metung karing siudad ning Juda o ali ku? Wa, munta ka, nganang mekibat ning Ginu. Isanu karing siudad? nganang kinutang David. Ing Hebron, ngana ning Ginu.

² Inya minta ya king Hebron i David; kayabe na la ding adua nang asawa: i Ahinoam a tau Jezreel at i Abigail a mebalu nang Nabal ning Carmel.

³ Tiki na la naman ding tauan na at ding pamilya ra, at menuknangan la karing balen a makapadurut king Hebron.

⁴ Dinatang la king Hebron ding lalaki na ning Juda, at linian deng laru i David bilang ari na ning Juda. Abalitan nang David king ding mengutkut kang Saul ila ring lalaking tau Jabes Gilead,

⁵ inya mitubud yang mapilan a tauan na ban ipayabut iting mensahi karela: Bendisyunan na kayu sana ning Ginu uli na ning pepakit yung katapatan king ari yung i Saul inyang kitkut ye.

⁶ At mananu na sanang maging maganaka ya at tapat kekayu ing Ginu. Makanyan munaman ing daptan ku kekayu uli na ning depat yung mayap.

⁷ Ala ne i Saul, inya magpakatatag kayu at e yu painan ing lub yu. Aku ngeni ing milanian ari da ring memalen na ning Juda.

⁸ I Abner a anak nang Ner, ing matas diling opisyal da ring sundalus nang Saul, tinakas yang kayabe nang Isboset a anak nang Saul. Lipatan de ing Jordan at minta la king Mahanaim.

⁹ Karin i Abner gewa neng ari i Isboset karing sakup nang gabun ning Gilead, Aser, Jezreel, Efraim, at Benjamin. Nanupata, king mabilug a Israel.

¹⁰ Apat yang pulung banua kanita i Isboset inyang meging ari ya king Israel, at mig-ari ya kilub ding aduang banua. Oneng tapat ya kang David ing tribu ning Juda,

¹¹ inya mig-ari ya king Juda kilub ding pitu at kapitnang banua kabang manuknangan ya king Hebron.

¹² Manibat king Mahanaim, minta la ring opisyal nang Isboset at i Abner king siudad ning Gibeon.

¹³ Pekitagpuan na la karin Joab a anak nang Zeruia, at ding opisyal nang David. Mikit-ikit la king metung a depositung danum. Miyarap-arapan la.

¹⁴ Nganang Abner kang Joab, Ilage yu la ring kayanakan yung lalaki at ilage mi la ring kekami at kaybat pilabanan la. Wa, nung makanyan, nganang mekibat Joab.

¹⁵ Inya linage la ring labing aduang lalaking pekakatawan nang Isboset ning tribu nang Benjamin, at lebanan da la ring labing aduang lalaking kayanakan nang David.

¹⁶ Inarapan ne ning balang metung ing katapat na, at mitalanan lang buntuk ampon mipapaniaksak espada king tagiliran. Mibulang la at mete la reting aduang pulu't apat a kayanakan a lalaki. Iti ing sangkan nung inya inaus deng Marangle ding Espada ing lugal a ita.

¹⁷ Kaybat na nita, meging mabagsik ing pamilaban at mesambut ya i Abner at ding Israelitang kayabe na karing tauan nang David.

¹⁸ Atyu la karin ding atlu nang anak a lalaking Zeruia: i Joab, Abisai, at Asael. I Asael a mabilis mamulaying anti ing usa,

¹⁹ tegal ne i Abner nu ya man munta.

²⁰ Melikid ya i Abner at kitnan ne. Ngana, Ika i Asael? Wa, nganang mekibat.

²¹ Nganang Abner, Tuknang na kang tatagal kanaku. Lumawe na ka mung aliwang tagalan mu at samsaman ing bandi na. Oneng sindu na mu ring Asael ing pamanagal kang Abner.

²² Pasibayu nang sinabing Abner, Sinabi ku na kekang tuknangan mu na kung tatagalan. E mu ku sana pipilitan paten da ka. Ala kung lupang makiarap king kapatad mung i Joab, nung apate ra ka.

²³ Oneng e ne pekiramdaman Asael, inya siksak neng Abner king atian king kapamilatan na ning pulu na ning tandus na at linsut ya king gulut na. Miragsa ya i Asael at mete ya. Tutuknang la ding sablang daralan king lugal nung nu ya mete.

²⁴ Tegal dia naman di Joab at Abisai i Abner. Limbug ne ing aldo inyang miras la king bunduk-bundukan ning Amma dane aslagan ning Gia papunta king dalan king ilang ning Gibeon.

²⁵ Mitipun la ring kelalakinan na ning tribu nang Benjamin king panig nang Abner at miyabe-abe lang migpuestu ketang taluktuk ning bunduk-bundukan.

²⁶ Kilait neng Abner i Joab. Ngana king masikan a siwala, Kailangan wari ing mipatayan tamu? Maging mapait mung sibukan ing kawakasan na niti. Mikakamaganak tamu, inya iyutus mu karing tauan mu ing tuknangan da na ing pamanagal da kekami.

²⁷ Pekibat nang Joab, Susumpa ku king mabie Dios, nung e ka migsalita e la tuknang tatagal kekayu angga bukas abak ding tauan ku.

²⁸ Kanita tiniupan neng Joab ing trumpeta ban tuknang na lang tatagal karing Israelita. Inya mituknang ing pamipate.

²⁹ Kaybat na nita, miglakad yang kabukas i Abner at ding tauan na king Kapatagan ning Jordan. Lipatan de ing Ilug ning Jordan at mekapagbalik la king Mahanaim kaybat dang miglakad itang tinuking abak.

³⁰ Migbalik nia naman i Joab uling mituknang na ing pamanagal na kang Abner. Inyang tipunan na la ring tauan na, ikit na king labing siam la ring mewala subali pa kang Asael.

³¹ Oneng mekapate lang atlung dalan anam apulu ding tauan nang David karing tauan nang Abner a ibat karing kelalakinan na ning tribu nang Benjamin.

³² Kinua neng Joab at ding tauan na ing bangke nang Asael at kitkut de king kutkutan ding pamilya na king Betlehem. Kaybat na nita, miglakad lang kabukas at inyang munag sumala na mekapagbalik la king Hebron.

3

¹ Mekabang panaun ing pamipate't pamipatayan da ring taung makapanig king pamilya nang Saul at ding makapanig kang David. Kabang sisikan ing puersa nang David, mimina no man ding kalaban na.

² Mikayanak yang lalaki i David inyang menuknangan ya king Hebron. Anam la; at iti ing pamidalan-dalan da: Amnon, ing anak na kang Ahinoam ning Jezreel;

³ Kileab, ing anak nang Abigail a mebalu nang Nabal ning Carmel; i Absalom a anak nang Maacang anak nang Aring Talmai ning Gesur;

⁴ i Adoniya a anak nang Hagit; i Sefatia a anak nang Abital;

⁵ i Itream a anak nang Egla. Mibait la ngan deti king Hebron.

⁶ Kabang milalaban la ring tauan nang David at ding taung makapanig king pamilya nang Saul, lalu yang meging mayupaya i Abner karing talatuki nang Saul.

⁷ Atin yang babaing kesese i Saul; Rizpa ya lagyu, anak neng Aiya. Misan a aldo sinuatan neng Isboset i Abner. Ngana, Obat sipingnan me i Rizpa, ing babaing meging kasese nang tata ku?

⁸ Mimua ya i Abner at nganang mekibat kang Isboset, Nanu ing palage mu kanaku, metung kung taksil? Isipan mu galang king ing susuyuan ku ya ing Juda? Kapilan man e ku meging taksil kang tata mung i Saul, king pamilya na, karing kapatad na, at karing kakaluguran na. At e ku peintulut ing masambut ka kang David. Obat sasangkanan mu kung sipingnan ke ing babaing ita?

⁹ Paten na ku ning Dios nung e ku maging kasangkapan king pangatuparan ning pengaku na kang David a

¹⁰ ilipat ne kang David ing kayarian nang Saul at gawan neng ari king Israel at king Juda, magumpisa king Dan angga Beerseba.

¹¹ E ya bitasang mekabulad i Isboset king sinabi nang Abner uling tatakut ya kang Abner.

¹² Kaybat na nita, peparala na lang Abner ding tubud na kang David a atyu kanita king Hebron. Ngara ding mituburan kang David, Kaninu ya mangaintulid ing kayarian? Makipagkasundu ka kanaku, at saupan da kang miyabie ya keka ing mabilug a Israel.

¹³ Nganang David, Masanting a balita yan! Makipagkasundu ku keka, nung idala me kanaku i Mikal, ing babaing anak nang Saul, potang datang ka ban makikit kanaku.

¹⁴ Peparala ya namang tubud i David kang Isboset ban sabian ing anti kaniti: Ibie me kanaku ing asawa kung i Mikal, ing babaing pekasalan ku king alagang dinalan a sepu ding balat ding Filisteong mesirkunsisyun.

¹⁵ Inya kewani neng Isboset i Mikal king asawa nang i Paltiel a anak nang Lais.

¹⁶ Tikian neng Paltiel i Mikal angga king balen ning Bahurim; kikiak ya kabang dalan. Kanita nganang Abner, Paltiel, muli na ka. At minuli ya.

¹⁷ Pintalan na lang Abner ding manimuna na ning Israel at sinabi na karela, Maluat yu neng buring maging ari yu i David.

¹⁸ Matupad na ngeni ing kekong kapagnasan, uling king misan a panaun sinabi na ning Ginu, King kapamilatan nang David iligtas ke ing bansang Israel karing gamat ding Filisteo at karing aliwa na pang kalaban.

¹⁹ Pekisabian na lang Abner ding taung miembru king tribu nang Benjamin, at kaybat minta ya king Hebron ban sabian kang David ing pikayari dang daptan ding tau ning Benjamin at ning Israel.

²⁰ Migtau yang maragul i David karin Hebron inyang datang ya i Abner at ding aduang pulung lalaking kayabe na.

²¹ Nganang Abner kang David, Lumakad na ku ngeni ban tipunan ke ing mabilug a Israel para king ginung kanakung Ari. Makipagkasundu la ding tau kekayu, at kaybat na nita, pamahalan yu la bilang ari agpang king kekayung kaburian. At peintulut nang David ing mako ne i Abner kambe ing kapayapan a e ya numanu balang king paglakad na.

²² Dinatang ya i Joab at ding aliwa pang opisyal nang David. Ibat la king pamaglusub at magdala lang dakal a pibandian a ikua ra king pamaglusub. Ala ne kanita i Abner king arap nang David karin Hebron uling pepalakuan na neng kambe ing kapayapan a e ya numanu balang king paglakad na.

²³ Inyang datang ne i Joab at ding tauan na, mibalita king pekikitan neng Abner i Aring David at king pepalakuan neng magdalang kapayapan a e ya numanu balang king paglakad na.

²⁴ Inya pintalan neng Joab ing ari at ngana, Dinatang ya pala i Abner, at kaybat pepalakuan ye. Obat depat yu ing makanyan?

²⁵ E yu wari balu king dinatang ya keti ban na kayu mung linlangan at ban ispian ing nanumang gagawan yu.

²⁶ Inyang meko ne i Joab king arap ning ari, mitubud yang tau i Joab ban tagalan de i Abner. Atagal de iti king Talaga ning Sira, at dela re kang Joab. Oneng ala yang kamalayan i David kaniti.

²⁷ Inyang adala da ne i Abner king Hebron, tiki neng Joab ketang lele ning pasbul dalan at kunwari neng lihim pakisabian. At siksak ne atian king pataram bilang pamanablas king pamakamate a depat nang Abner kang Asael a kapatad nang Joab. Mete ya i Abner.

²⁸ Nganang David inyang abalitan na iti, Aku at ing kayarian ku ala yang pakibatan king Ginu king pangamate nang Abner.

²⁹ Dugpa sana ing parusa kang Joab at king pamilya na! E milako karing lahi nang lalaki ing sakit a gonorrea o lepra o ing makapagobra mu king obrang babai o ing kamatayan king labanan o danup!

³⁰ Pete neng Joab at Abisai a kapatad na i Abner uling pete neng Abner ing kapatad dang i Asael king labanan king Gibeon.

³¹ Inutus nang David kang Joab at karing sablang kayabe na ing pangabakan da ing imalan a susulud da at misulud lang imalan saku bilang pamagmalun king pangamate nang Abner. Mekipaglibing ya naman i Aring David.

³² Kitkut de i Abner king Hebron. Menangis yang masikan i Aring David king kutkutan nang Abner. Menangis la naman ding tau.

³³ Nganang menaguleleng Aring David: Ba't mete yang anting mangmang i Abner?

³⁴ E la makagapus ding gamat na ni ding bitis na; mete yang kalupa ra ding pete ra ding kriminal! At pasibayu lang menangis ding mekipaglibing.

³⁵ King aldong ita pinilit de ring tau i David ban mangan, oneng nganang taimtim migsalita, Sinumpa ku king e ku mangan nanuman anggang e ya lumbug ing aldo.

³⁶ Apansinan da iti ring tau at metula la. Tune lang matutula king nanumang daraptan nang Aring David.

³⁷ Balu da ring tauan ning ari at ning mabilug a Israel king ala yang kasalanan king pangamate nang Abner a anak nang Ner.

³⁸ Nganang Aring David karing opisyal na, E yu wari balu king ngening aldong iti mete ya ing metung a maragul a manimuna na ning Israel?

³⁹ Atin kung keinan agyang pang aku ing aring pinili ning Dios. Tampalasan la reting anak nang lalaking Zeruia. Parusan na la sana ning Ginu king depat dang krimen.

4

¹ Mengalambut ya i Isboset a anak nang Saul inyang abalitan nang mete ya i Abner king Hebron, at mebalisa ya ing mabilug a Israel.

² Atin ya kanitang aduang tauan i Isboset. Ila ri Baana at Rekab; ila ring manimuna keng pamaglusub. Anak na lang Rimon a tau Beerot ning tribu nang Benjamin. (Dake ne kanita ning Benjamin ing Beerot.

³ Likuan de ring taung minunang manuknangan karin at minta la king Gittaim nung nu la menuknangan manibat na kanita.)

⁴ Ing metung na pang lahing Saul ya i Mefiboset a anak nang Jonatan. Lima yang banua i Mefiboset inyang mete ya king labanan i Saul at i Jonatan. Inyang miras ibat Jezreel ing balita ning kamatayan da, ing maningat nang Mefiboset kinilik ne at tinakas la. Oneng king pamamalagua na, atabili ne i Mefiboset, inya mepile ya.

⁵ Minta la ring mikapatad a Rekab at Baana king bale nang Isboset at miras la king kaugtuan ning aldo. Matudtud ya kanita i Isboset.

⁶ Mipatudtud ya ing babaing magbante king pasbul kabang tatatap yang trigu, inya mekalub la king bale di Rekab at Baana.

⁷ Taglus-taglus lang linub king silid nang Isboset at disnan deng matudtud king katri na. Siksak de at pete, kaybat tibtab de batal. Dela re ing buntuk na at kabukas lang miglakad king Kapatagan ning Jordan.

⁸ Miras la king Hebron at binie re kang Aring David ing buntuk nang Isboset. Ngara, Oyni pu ing buntuk nang Isboset a anak ning kalaban yung i Saul a migtangkang makamate kekayu. Birian na ning Ginu ing makayablas kayu ngening aldong iti kang Saul at karing lahi na.

⁹ Nganang David karela, Mabie ya ing Ginung migligtas kanaku king sablang panganib.

¹⁰ Inyang atyu ku king Ziklag ating metung a taung dinatang a isipan nang pagdala na kung mayap a balita. Belita na kanaku king mete ne i Saul. Peparakap ke at kaybat pepapate ke. Ita ya ing inablas ku king dela nang balita kanaku.

¹¹ Lalung maragul ing iyablas ku karing taung e mayap a mekamate king taung alang kasalanan a matudtud king sarili nang pibalebale. Ngeni, pakibatan yu ing pamakamate yu kang Isboset at gisanan da kayung paten ban mawala na kayu keti king yatu.

¹² Kaybat na nita, inutus nang Aring David karing tauan na ing paten da la ri Rekab at Baana. Pinutut da la ring gamat da ampon bitis, at binitin da la king lele ning depositung danum ning Hebron. Kaybat, kinua re ing buntuk nang Isboset at kitkut de king kutkutan nang Abner king Hebron.

5

¹ Kanita pintalan de ring sablang tribu ning Israel i David karin king Hebron at ngara, David, laman mu kami at daya.

² Ika ing menimuna king Israel king sabla nang pamakilaban kanitang i Saul ya ing kekaming ari. Ngana keka ning Dios, David, ika ing magpastul king balen kung Israel at ika ing manimuna karela.

³ Inya pintalan de ring sablang manimuna ning Israel i Aring David king Hebron at king arapan ning Ginu ginawa ne mang kasunduan karela i David. Linian deng laru i David at ya ing meging ari ning mabilug a Israel.

⁴ Atlu yang pulung banua inyang maging ari ya, at mig-ari ya kilub ding apat apulung banua.

⁵ Pitu at kapitnang banua yang mig-ari king Juda kabang atyu ya king Hebron. Linipat ya king Jerusalem at karin ne pemahalan ing mabilug a Israel at ing Juda kilub ding atlung pulu't atlung banua.

⁶ Minta ya i Aring David at ding tauan na king Jerusalem ban lusuban da la ring Jebuseong manuknangan karin. Ngara ding Jebuseo kang David, E ka malyaring lungub keti; agyu ra kang itabi agyang deng mung bulag at pile. (

⁷ Makanyan man, ikua neng abihag David ing kuta ning Zion, at iti ya ing meging pikabaluan a Siudad nang David.)

⁸ King aldo mu ring ita, nganang David karing tauan na, Kailangan yang mukiat king pidadalanan ning danum ing ninumang bisang maniambut karing Jebuseo ban alusuban la ring bulag at pile a tutu kung kasaman. (Iti ing sangkan nung inya masasabi: E la milub king bale ning Ginu ding bulag at pile.)

⁹ Inyang mebihag ne ing kuta, karin ne menuknangan i David at inaus neng Siudad nang David. Telakad ne ing siudad king paligid na niti magumpisa ketang lugal a mitambakan king dane aslagan ning bunduk-bundukan.

¹⁰ Lalu yang meging mayupaya i David uling patnubayan ne ning Ginung Dios a Mayupaya.

¹¹ Pepadala yang tubud kang David ing Aring Hiram ning Tiro. Magdala lang trosung sedro, kalpinteru, at kanteru ban gawan de ing palasyu nang David.

¹² At kanita na akilalang David king tune neng telaga ning Ginu bilang ari ning mabilug a Israel at paragulan ne ing kayarian na alang-alang karing memalen na ning Dios.

¹³ Inyang meko ya king Hebron ban lumipat king Jerusalem, kinangwa ya pang babaing maging asawa na at kasese, at mikayanak yang dakal a lalaki at babai.

¹⁴ Oreti ding anak nang mibait king Jerusalem: Samua, Sobab, Natan, Solomon,

¹⁵ Ibar, Elisua, Nefeg, Jafia,

¹⁶ Elisama, Eliada, at i Elifelet.

¹⁷ Inyang abalitan da ring Filisteo king i David ya ing mepiling ari ning mabilug a Israel, lege ra ing mabilug dang sikanan ba reng bihagan. Oneng abalitan nang David iti, inya meko ya ketang matas a lugal a ita at kinuldas yang minta king metung a matibe kuta.

¹⁸ Dinatang la ring Filisteo king Kapatagan ning Refaim at karin da kinalat king makapadurut ing sarili da.

¹⁹ Nganang mengutang David king Ginu, Lusuban ku la ring Filisteo? Papagtagumpen mu ku kaya karela? Nganang mekibat ning Ginu, Wa, lusuban mu la at papagtagumpen da ka karela.

²⁰ Inya minta ya i David king Baal Perazim at karin na la simbut ding Filisteo. Ngana, Keng panakit ku anti yang masikan a albug ing Ginu inyang liban na la ring kanakung kalaban. Iti ing sangkan nung inya meyaus yang Baal Perazim ing lugal a ita.

²¹ Alakuan da la ring idolo da ring Filisteo inyang tinakas la, at kinua na lang David at ding tauan na.

²² Kaybat na nita, mibalik la ring Filisteo king Kapatagan ning Refaim at sekupan deng pasibayu.

²³ Pasibayu neng kitnan David ing Ginu, at nganang mekibat ning Ginu, E yu la lulusuban keng lugal mung yan; nune lumigid kayu king kagulutan da at kanita yu la lusuban ketang lele da ring tanaman a balsamu.

²⁴ Potang damdaman yu na karing babo da ring tanaman a balsamu ing karelang pamagmartsa, kanita yu la biglang salakayan, uling kimut kung makauna kekayu ban sambutan la ring sundalus da ring Filisteo.

²⁵ Tiparan nang David itang inutus na ning Ginu, at ikua na lang lisuban manibat king Geba angga king Gezer.

6

¹ Pasibayu na lang tinipun David ding magaling dili karing sundalus na ning Israel; atlung pulung libu ing bilang da.

² Penimunan na la king pamunta ra king Baala ning Juda ban kuanan ya ing Kaban ning Dios a magdala king lagyu ning Ginung Mayupaya; atyu babo ding kerubin ing luklukan na.

³ Kinua re iti king bale nang Abinadab king bunduk-bundukan at seke re king bayung karitun. Ding pakulyut king karitun ila ri Uzza at Ahio, ding anak nang lalaking Abinadab.

⁴ Mumuna ya i Ahio king karitun.

⁵ Masaya yang masaya i David at ding sablang Israelita; magkanta la at teterak kayabe ding alpa, lira, tambul, pandereta, at pompiang bilang parangal king Ginu. fig,,,,,Ding sablang Israelita kakanta la at teterak.,(6:5)fig*

⁶ Inyang miras la king pidadaran nang Nakon, misakab la ding bakang kukulyut king karitun, inya telan neng Uzza ing Kaban ning Dios.

⁷ Mimua ya ing Ginu kang Uzza uling telan ne ing Kaban. Inya pete ne i Uzza uli na ning keyalan nang galang king Kaban ning Dios at mipase ya lele ning Kaban ning Dios.

⁸ Mikapali ya at mimua i David uli na ning depat nang Uzza a perusan ning Ginu. Ausan deng Perez Uzza ing lugal a ita manibat na kanita.

⁹ Mitakutan ya king Ginu i David king aldong ita. Ngana, Makananu ke ngening aingat ing Kaban ning Ginu?

¹⁰ E na ne buring idala king Siudad nang David ing Kaban ning Ginu. Ing depat na ya ing dela ne iti king bale nang Obed Edom a tau Gat.

¹¹ Atlu yang bulan menatili karin ing Kaban ning Ginu, at binendisyunan ne ning Ginu i Obed Edom at ing pamilya na.

¹² Abalitan nang Aring David king binendisyunan ne ning Ginu ing pamilya nang Obed Edom at ing sablang pibandian na uli na ning Kaban ning Dios. Inya minta ya karin at kinua ne ing Kaban ning Dios at delang masayang-masaya king Siudad nang David.

¹³ Inyang mekalakad na lang anam a lakbang ding magdala king Kaban ning Ginu, inutus nang David ing tuknang la at miyain yang metung a toro at metung a pepatabang biserung baka bilang ain-sakripisyu king Ginu.

¹⁴ Misulud yang linen a efod at masaya yang tinerak anggang binit na king arapan ning Ginu.

¹⁵ Kanita i David at ding sablang Israelita kukulisak la king tula, at tutiupan da la ring trumpeta da.

¹⁶ Kabang lulub la king siudad, makatando ne man ketang awang i Mikal a babaing anak nang Saul. Mesora ya inyang ikit neng lundag-lundag at terak-terak i David.

¹⁷ Linub de ing Kaban ning Ginu king toldang pepatalakad nang David at binili de ketang paglugalan na. Kaybat na nita, miyain yang ain-sakripisyu at ain-ning-pamisulusulu king Ginu i David.

¹⁸ Inyang meyari na ing pamiyain karing ain, binendisyunan na la ring memalen king lagyu ning Ginung Mayupaya

¹⁹ at dininan neng kapirasung tinape at karni ampon pasas ing balang metung at metung karing lalaki at babaing atyu karin. Kaybat na nita, minuli na la.

²⁰ Minuli ya naman i David ba neng komustan ing pamilya na. Linual ya i Mikal a anak nang Saul ba neng saganan i David at ngana, Meging pikabaluan ya king aldong iti i David, ing ari ning Israel, a balamu mangmang at lubas arapan da ring ipus dang babai ding opisyal na!

²¹ Nganang David, Depat ku ita arapan ning Ginu bilang pamagsaya, uling aku ing pinili na ban mamahala king Israel, ing balen ning Ginu. Aliwa i tata mu o ing ninuman king pamilya yu ing pinili na. Isundu ku ing pamagsaya ku arapan ning Ginu,

²² at maygit pa kanita ing gawan ku. Wa, mababa ing paglalawe mu kanaku, oneng matas ing paglalawe da kanaku detang babaing binggitan mu!

²³ E ya menganak i Mikal a anak nang Saul angga na king mete ya.

7

¹ Manuknangan neng payapa i David king palasyu na. E ra ne abalanan pa ding sablang kalaban na uling ing Ginu ya ing mimingat king bie na.

² Kanita nganang David kang propeta Natan, Lawan mu, manuknangan ku keting palasyung megawa king sedro kabang atyu ne man ing Kaban ning Dios king metung mung tolda.

³ Nganang Natan, Daptan yu itang nanumang mayap a isipan yu uling mamantabe ya kekayu ing Ginu.

⁴ King benging ita ngana ning Ginu kang Natan,

⁵ Puntalan me ing talasuyu kung i David at sabian mu king pasabi ku ing anti kaniti: Aliwa ika ing mitalakad king templong pituknangan ku.

⁶ E ku pa tinuknang king metung a templo manibat na kanitang liwal ku la king Ehipto ding Israelita. Angga man ngeni lipat-lipat kung makatuknang king tolda karing miyayaliwang lugal.

⁷ Nu ku man muntang kayabe ding Israelita, e ku kitang king ninumang manimuna a pinili ku nung inya angga ngeni ala la pang telakad metung a templo para kanaku a megawa king dutung a sedro.

⁸ Inya sabian mu king talasuyu kung i David king aku, ing Ginung Mayupaya, pasabi ku ing anti kaniti: Kinua ra ka king marangleng pipagpastulan tupa at gewa ra kang talapamahala ning balen kung Israel.

⁹ Kayabe mu ku nu ka man minta at ikit mu ing simbut ku la ding sabla mung kalaban. Ngeni, gawan keng lalung marangal ing lagyu mu kesa karing pikabaluan a manimuna ning yatu.

¹⁰ Dininan keng gabun ing balen kung Israel at karin ku la papanuknanganan, at ala nang menligalig pa karela manibat na kanitang dininan ku lang ukum. E na la ma-ipus pa karing e mayap a tau a antimo ing merapat karela king milabas a panaun.

¹¹ Iligtas da ka karing sablang kalaban mu. Dinan da kang anak a talapagmana king tronu mu.

¹² Potang mate na ka at mikutkut king kutkutan da ring makatua mu, gawan keng ari ing metung karing anak mung lalaki at gawan keng matatag ing kayarian na.

¹³ Ya ing mitalakad king templo para kanaku, at papanatilian ke king kapilan pa man ing tronu nang luklukan.

¹⁴ Aku ing maging tata na at ya naman ing maging anak ku. Nung mikasala ya parusan keng antimo ing pamamarusa na ning metung a tata king anak nang mikasala.

¹⁵ Oneng e ku bawian kang David ing lugud kung e kukupas, e na kalupa ning depat ku kang Saul a leko ku ban ika ing maging ari.

¹⁶ Manatili ya ing kekang pamilya at ing kekang kayarian. Manatili ya ing kekang tronu king kapilan pa man.

¹⁷ Sinabi na ngang Natan kang David ing sablang bage a pepabalu na ning Dios.

¹⁸ Kanita linub ya i Aring David king Toldang tuknangan ning Ginu at linukluk ya. Kaybat nganang migsalita, O Ginung Dios, ninu mo aku at ing pamilya ku ban pagmalasakitan mu?

¹⁹ At balamu malati pang bage iti king lawe mu, O Ginung Dios. Binggitan mu munaman ing tungkul king mayap nang paintungulan ning pamilya ku.

²⁰ Nanu pa ing sabian ku keka? Balu mu ku bilang talasuyu mu, O Ginung Dios.

²¹ Agpang king kekang pengaku at kaburian, pepabalu mu ngan iting sablang bage king kekang talasuyu.

²² Karangal mo, O Ginung Dios! Ala kang kalupa; alang Dios subali mu ika, antimo ing balu mi na.

²³ At ninu ing apakilimpi mu king balen mung Israel? Ya mung bukud ing bansa keti king yatu a inatbus mu king panga-ipus ban maging bandi mu. At mibantug ka king mabilug a yatu uli na ning maragul at makapagmulalang bage depat mu para karing memalen mu antimo ing pamanabi mu karing paganu at karing kikilalanan dang dios. Ikit da iti ring taung inatbus mu king Ehipto.

²⁴ Tinatag me ing bansang Israel ban maging bandi mu king kapilan pa man. At ika, O Ginu, ing meging Dios da.

²⁵ At ngeni, O Ginung Dios, daptan mu king kapilan pa man ing pangaku mu king kekang talasuyu at king pamilya na. Tuparan mu sana ing sinabi mu,

²⁶ at mirangal ya ing lagyu mu king kapilan pa man at ding tau sabian da, Ing Ginung Mayupaya ya ing Dios ning Israel. Kanita, maging matatag ya king arapan mu ing pamilya ku, ing talasuyu mu.

²⁷ O Ginung Mayupaya, Dios ning Israel, pisiag mu iti king kekang talasuyu. Antimo ing sinabi mu kanaku, Itatag ke ing pamilya mu. Iti ing sangkan nung inya mika sikanan kung lub manalangin keka.

²⁸ At ngeni, O Ginung Dios, ika ing Dios; katutuan la ding amanu mu at binie me ing metung a malagung pangaku kanaku, ing kekang talasuyu.

²⁹ Matula me sana ngening bendisyunan ing pamilya ning kekang talasuyu ban manatili ya king lawe mu king kapilan pa man. Uling ika, O Ginung Dios, migsalita ka, at mibendisyunan ya king kapilan pa man ing pamilya na ning talasuyu mu uli na ning bendisyun mu.

8

¹ Kalabas da ring mapilan a panaun simbut na lang David ding Filisteo at sekupan ne at leko karela ing Metegama.

² Simbut na la naman ding Moabita. Pepagkeran na la king gabun ding bihag at karing balang atlung bihag pepapate na la ring adua. Meging sakup na la ring Moabita at memayad lang buis.

³ Simbut nia namang David i Hadadezer, ing anak nang Rehob, ing ari ning Zoba, a lalakad kanita king pangabalik na ning kayarian na bandang babo ning Ilug ning Eufrates.

⁴ Abihag na lang David ding libu pitung dalan a sundalus nang pakasake kabayu at ding aduang pulung libung e pakasake kabayu, at pepapile na la ding sablang kabayu subali mu ring gamitan dang mangulyut karing dinalan a karung panggera.

⁵ Dinatang la ring sundalus na ning Siria a ibat Damasco ban saupan de i Aring Hadadezer, oneng lebanan na lang David at apate na la ding aduang pulu't aduang libu karela.

⁶ Kaybat na nita, mitalakad yang kampu karing karelang lugal; sekupan na la at memayad lang buis. Pepagtagumpen ne ning Ginu i David nu man karin ya makilaban.

⁷ Ikua na lang David ding gintung kalasag nang Hadadezer a pidaladala da ring talasuyu na, at dela na la king Jerusalem.

⁸ Kinua na naman ing dakal a tangsu ning Beta at Berotai, ding aduang siudad a sakup nang Hadadezer.

⁹ Inyang abalitan nang Aring Toi ning Hamat ing pamaniambut nang David karing sablang sundalus nang Hadadezer,

¹⁰ tinubud ne ing anak nang lalaking i Joram ba neng pagmananuan at dinan mayap a oras i Aring David uling simbut ne i Hadadezer. Malambat na nia namang kapate Aring Toi i Aring Hadadezer. Magdala yang dakal a regalu i Joram para kang David; kagamitan lang megawa king gintu, pilak, at tangsu.

¹¹ Telaga na lang Aring David deti king Ginu at ding aliwa pang gintu at pilak a ikua na karing bansang simbut na antimo

¹² ing Edom, Moab, Ammon, Filistia, at Amalek pati na itang ikua na kang Hadadezer.

¹³ Lalu yang meging pikabaluan a lagyu i David inyang mibalik ya kaybat na lang apate king Kapatagan ning Asin ding walung pulung libung Edomita.

¹⁴ Mitalakad yang kampu king mabilug a Edom, at meging sakup na la ring tau karin. Pepagtagumpen ne ning Ginu i David nu man karin ya munta.

¹⁵ Mig-ari ya i David king mabilug a Israel, at depat na ing sablang mayap at makatuliran para karing memalen.

¹⁶ I Joab a anak nang Zeruia ya ing pekapun da ring sablang sundalus; i Jeosafat a anak nang Ahilud ya ing mamahala karing maulagang kasulatan;

¹⁷ i Zadok a anak nang Ahitub at i Ahimelek a anak nang Abiatar ila ring pari; i Seraia ya ing kalihim;

¹⁸ i Benaia a anak nang Jeoiada ya ing memahala karing guardiang Kereteo at Peleteo; at pari la ding anak nang Aring David.

9

¹ Misan a aldo, nganang kinutang David, Atin pang mitagan king pamilya nang Saul a malyari kung asaupan ban apakit ku ing ganaka ku alang-alang kang Jonatan a kakung kakaluguran?

² Atin yang ipus i Saul a milagyuan Ziba. Inaus de ban makikit kang Aring David. Inyang mikit la nganang kinutang ning ari, Ika i Ziba? Nganang mekibat, Opu, aku ing talasuyu yu.

³ Pasibayu neng kitnan ning ari, Atin kang balung makatagan pa king pamilya nang Saul a malyari kung pakitanan ganaka antimo ing pengaku ku king Dios? Pekibat nang Ziba, Atin ya pung mitagan a anak a lalaki i Jonatan; pile ya pu bitis.

⁴ Nu ya karin? ngana ning ari. Pekibat nang Ziba, Atyu ya pu king bale nang Makir a anak nang Amiel ning Lodebar.

⁵ Inya peparakit neng David ing mesabing anak nang Jonatan.

⁶ Inyang dinatang ya i Mefiboset a anak nang Jonatan at apu nang Saul, dinuku ya kang Aring David bilang pamangalang. Nganang David, Ika i Mefiboset? Pekibat nang Mefiboset, Opu, ing kekayung talasuyu.

⁷ E ka tatakut, nganang David. Maging maganaka ku keka alang-alang kang Jonatan a tata mu. Ibalik ku keka ing sablang gabun nang Saul a ingkung mu at king bale ku karin na ka parating mamangan. fig,,,,,E ka tatakut. Maging maganaka ku keka.,(9:7)fig*

⁸ Dinuku yang pasibayu i Mefiboset at ngana, Ninu mo pu wari aku a anting asung mete a sukat yung pagmalasakitan?

⁹ Kanita pepayaus ne ning Aring David i Ziba, ing ipus nang Saul at ngana, Babie ku kang Mefiboset a apu nang Saul ing sablang pibandian nang ingkung na at ning pamilya na.

¹⁰ Ika, ding anak mu, at ding ipus mu ila ring manasik king gabun ning apu nang Saul, at ibie ing pupul para king pagkabiayan da. Oneng manatili yang bisita ku i Mefiboset king kakung lamesa. (Atin yang labing limang anak a lalaki i Ziba at adua lang pulu ding ipus na.)

¹¹ Nganang Ziba, Opu, pamintuan na ning talasuyu yu ing sablang iyutus yu. Inya manibat na kanita king lamesa na ne ning ari mamangan i Mefiboset; balamu tune neng anak ning ari.

¹² Atin yang anak a lalaki i Mefiboset, Mika ing lagyu na at kayanakan ya pa. Meging ipus neng Mefiboset ing mabilug nang pibalebaleng Ziba.

¹³ Menuknangan ya Jerusalem i Mefiboset a pile aduang bitis at parati yang mamangan king lamesa na ning ari.

10

¹ E melambat mete ya ing ari da ring Ammonita, at ing menalili ya ing anak nang i Hanun.

² Nganang David, Makipagkaluguran kung tapatan kang Hanun antimo nung makananu yang mekipagkaluguran i tata nang i Nahas kanaku. Inya mitubud yang pekakatawan na ban makirame king kamatayan nang tata nang Hanun. Inyang miras la ding tubud king sakup ning Ammon,

³ ding manimuna da ring Ammonita sinabi ra king Aring Hanun, Pota isipan yu ing tinubud na lang Aring David deting pekakatawan na ban makirame kekayu at parangalan ing meyangu-bie tata yo? Ali, tinubud na la den ban mag-ispia at pagaralan nung makananu deng ibagsak ing kayarian yu.

⁴ Inya peparakap na lang Hanun ding tubud nang David; lebahas da la ring balbas da king kapitna rang lupa, ginupit da ing imalan da angga king papaluan. Kaybat na nita, pepaulian da na la,

⁵ oneng marine lang muli. Inyang abalitan nang David ing milyari, pepasabi na karela ing manatili no pa king Jerico anggang e tumubu ing balbas da. Muli la potang tinubu na.

⁶ Abalitan da ring Ammonita ing tune yang mimua i David, inya menupa lang aduang pulung libung sundalung Arameo king Betrehob at Soba. Menupa la namang aliwa pang libu katau lalam nang pamanimuna ning ari ning Maaca at labing aduang libu karing tau ning Tob.

⁷ Abalu nang David iti inya inutusan ne i Joab at ding sablang sundalus na ban labanan da la.

⁸ Linual la ding Ammonita at migpuestu la ketang piluluban king siudad samantalang makapuestu no man king marangle ding sundalung Arameo ning Soba at Tob ampon Maaca.

⁹ Ikit nang Joab king ating makapuestung kalaban king arapan na at king kagulutan na. Inya pinili na la ding mayap diling sundalus ning Israel ban ila ding makiarap karing sundalus ning Siria.

¹⁰ Penibala na la ding aliwang sundalus king pamanimuna nang Abisai a kapatad na at ila ding sagupa karing Ammonita.

¹¹ Nganang Joab kang Abisai, Nung akit mung maygit la sikanan kesa kekami ding Amoreo, saupan yu kami, at nung ikayu naman ing masasambut, ikami naman ing sumaup kekayu.

¹² Magpakatatag kayu; e yu painan ing lub yu. Labanan ta la alang-alang karing kekatamung kabalen at karing siudad ning Dios. Mananu na sanang daptan ning Ginu ing kaburian nang mayap!

¹³ Sinugud ya i Joab at ding sundalus na laban karing sundalus ning Siria, at tinakas la ring sundalus ning Siria.

¹⁴ Inyang ikit da iti ding Ammonita, tinakas na la naman kang Abisai at linub la king siudad. E na na tiglus Joab ing pamanagal karing Ammonita at mibalik ya Jerusalem.

¹⁵ Inyang ikit da ring tau Siria king mesambut la karing Israelita, pasibayu da lang tinipun ding sundalus da.

¹⁶ Pepayaus na lang Hadadezer ding sundalus ning Siria a atyu king dane aslagan ning Ilug ning Eufrates, at minta la king Helam lalam nang pamanimunang Sobak.

¹⁷ Inyang abalitan nang David iti, tinipun na la ring sablang sundalus ning Israel, at lipatan de ing Ilug ning Jordan at tinaglus la king Helam. Migsadia la ring sundalus ning Siria ban labanan la ring sundalus nang David, at megumpisa ing labanan.

¹⁸ Oneng mesambut la at tinakas ding sundalus ning Siria karing sundalus ning Israel. Apate na lang David at ding sundalus na ring pitung dalan a pakasake karung panggera at ding apat apulung libung pakasake kabayu. Apate ria naman i Sobak, ing pekapun da.

¹⁹ Inyang abalitan da ring aring sakup nang Hadadezer king mesambut la karing sundalus ning Israel, mekipagpayapa la king Israel at pepasakup la karela. Manibat na kanita mitakutan na lang sumaup ding tau Siria karing Ammonita.

11

¹ Sisibut na la kanita ding bulung, ding tulud, at ding sampaga da ring tanaman at panaun na ning pamakigera da ring ari. Tinubud neng David i Joab at ding opisyal na ampon ding sablang sundalus ning Israel, at simbut da la ring Ammonita at kibkuban de ing Rabba. E ya meko king Jerusalem i David.

² Misan a gatpanapun, metudtud ya i David ban magpaynawa. Kagising na miglakad-lakad ya king babo ning palasyu. Karin ne ikit ing malagung babaing mandilu king bale ra.

³ Pengutang na nung ninu ing babaing ita. Sinabi ra king ita ya i Batseba, ing anak nang Eliam at asawa neng Uria a Hiteo.

⁴ Mitubud yang tauan na ba reng dakitan i Batseba a kayari-yari na pa kanitang miglinis king katawan na, agpang king aduan ning kautusan tungkul king pamag-regla. Sipingnan neng David at kaybat na nita minuli ne i Batseba.

⁵ Inya mebuktut ya i Batseba at pepabalu na iti kang David.

⁶ Kanita peparala yang amanu i David kang Joab at ngana, Joab, idala me kanaku i Uria a Hiteo. Inya tinubud neng Joab i Uria kang David.

⁷ Karas nang Uria kitang nang David ing kabilian nang Joab at ding sundalus a makilaban.

⁸ Kaybat nganang David, Muli na ka ban makapagpaynawa ka. Meko ya i Uria; at peparala neng David ing pasalubung na para king pibalebale nang Uria.

⁹ Oneng e ya minuli bale i Uria; metudtud yang kayabe ra ding guardia ning ari king pasbul dalan ning palasyu.

¹⁰ Abalitan nang David king e ya minuli bale i Uria inya kitang na, Maluat ka mu ring ala king pamilya mu, obat e ka minuli keta kekayu?

¹¹ Nganang Uria, Atyu la pu king marangle ning labanan ding sundalus ning Israel at Juda at kayabe re ing Kaban ning Kasunduan. Inya e ku pu atanggap ing muli ku bale ban mangan at minum ampon sumiping king asawa ku. Kabang mabie kayu, pangaku kung e ku gawan ing makanyan.

¹² Kanita sinabi nang David, Nung makanyan keti na ka pa, at bukas da na ka pabalikan king marangle ning labanan. Inya menatili ya king Jerusalem i Uria king aldong ita at ita pang kabukasan.

¹³ Kinumbira neng David makiapun i Uria at pepalasing ne. Oneng e ya mu rin minuli i Uria king bale na; kinua ne ing ulas na at metudtud yang kayabe ding guardia ning palasyu.

¹⁴ Kabukasan, sinulat ya i David kang Joab at peparala ne kang Uria.

¹⁵ Ngana ning sulat, I Uria ya ing isabak mu king pekamabagsik a labanan. Kaybat lakuan ye at paburen meng apate ra ding kalaban.

¹⁶ Inyang lulusuban da ne ing siudad da ring kalaban inutusan neng Joab i Uria ban ya ing makiarap karing kalaban a mas masikan kesa karela.

¹⁷ Linual la ring memalen na ning kalaban a siudad ban labanan da la ring sundalus a panimunan nang Joab; mete la ring mapilan karing opisyal nang David; metung ya karing mete i Uria a Hiteo.

¹⁸ Kaybat na nita, peparala yang balita i Joab kang David tungkul king labanan.

¹⁹ Nganang minie bilin king talapagdala king balita, Potang ayari mu nang minie balita king ari tungkul king labanan a milyari,

²⁰ malyaring mibua ya mua ing ari at sabian na, Obat pekalapit yu king siudad ban labanan la ring kalaban? E yu wari balu king malyari kayung mapana karing kalaban a mamanang atyu karing pader?

²¹ E yu wari balu nung makananu yang mete i Abimelek a anak nang Jerubeset? Bigsakanan neng gilingan a batu ning babaing atyu babo ning pader. Inya mete ya karin king Tebez. Obat pekalapit yu king pader? Nung yan ing sabian na keka, kanita sabian mu, Mete ya naman pu ing talasuyu yung i Uria a Hiteo.

²² Meko ya ing tubud at inyang miras ya kang David sinabi na ngan itang pasabi nang Joab.

²³ Ngana, Linual la pu ring kalaban at mas dakal la kesa kekami, oneng ikua mi lang atabi king amboka na ning pasbul dalan ning siudad.

²⁴ Detang kalaban tamung atyu karing pader pemana da la ring sundalus tamu, at mete la ring mapilan karing kekayung opisyal. Mete ya naman pu ing talasuyu yung i Uria a Hiteo.

²⁵ Nganang David, Sabian mu kang Joab king e na sukat pagkalungkutan ing milyari, uling makanyan talaga ing labanan; ating mamamate king pamakilaban. Sabian mu king isundu na ing pamaglusub at lasakan ya ing siudad.

²⁶ Migpaldas ya i Batseba inyang abalitan nang mete ya i Uria.

²⁷ Inyang meyari na ing pamagpaldas na, peparakit neng David at dela re king palasyu. Meging asawa neng David at menganak yang metung a lalaki. Oneng e ya matula ing Ginu king depat nang David.

12

¹ Tinubud ne ning Ginu i propeta Natan kang David. Inyang mikit la nganang Natan kang David, Ating aduang lalaki a manuknangan king metung a balen; mabandi ya ing metung at kalulu ya ing kadua.

² Dakal ya sese baka at tupa ing mabandi,

³ oneng ing kalulu metung ya mung biserung babaing tupa a seli na ing bukud nang bandi. Sinese ne iti ning kalulu at meragul yang kayabe da ring anak na king bale at pakanan ne king pamangan na at painuman ne king kopa na at patudturan king takde na. Anti yang anak nang babai iting mesabing tupa.

⁴ Misan a aldo, dinatang ya ing metung a bisita king bale na ning mabandi. E ne buring katatan ning mabandi ing metung karing sese nang animal. Ing gewa na ya ing kinua ne ing biserung tupa a bandi na ning kalulu at iti ing pepalutu na para king bisita nang dinatang. fig,,,,,Dakal ya sese baka at tupa ing mabandi.,(12:2)fig* fig,,,,,Oneng ing kalulu metung ya mung biserung babaing tupa...ing bukud nang bandi.,(12:3)fig* fig,,,,,Kinua ne ing biserung tupa a bandi na ning kalulu.,(12:4)fig*

⁵ Inyang dimdam nang David iti mibua ya king mua at ngana kang Natan, Sasabian kung matni king daramdaman na ning mabie Dios, sukat yang mate ing lalaking ita!

⁶ Sukat yang mamayaran apat a besis king depat na uling ala yang lunus.

⁷ Nganang Natan kang David, Ika ing lalaking ita! Oyni ing sasabian na ning Ginu, ing Dios ning Israel, Linanian da ka ban maging ari king mabilug a Israel at linigtas da ka karing gamat nang Saul.

⁸ Binie ke keka ing kayarian na at ding asawa na; binie ke keka ing kayarian ning Israel at Juda. Maygit pa kanyan ing ibie ku keka.

⁹ Obat lepastangan me ing Ginu? Obat depat mu ing e ustu king panimanman na? Pete me i Uria a Hiteo at kinua me ing asawa na ban maging asawa mu. Pete me king kapamilatan na ning espada da ring Ammonita.

¹⁰ Inya manibat ngeni e ne mako ing espada king pibalebale mu uling lepastangan me ing Ginu at kinua ing asawa nang Uria ban maging asawa mu.

¹¹ Ngana pang tinuglung ning Ginu, Gamitan ke ing metung king sarili mung pamilya ban guluan na ka. King mismung akakit mu kuanan ku la ring asawa mu at ibie ku la king aliwang lalaki, at sipingnan na la agyang aldo masala.

¹² Lihim kang dinapat kasalanan, oneng daptan ku king masalang aldo ing sinabi ku keka ban akit na ning mabilug a Israel.

¹³ Kanita nganang David kang Natan, Mikasala ku laban king Ginu. Nganang Natan, David, pepatawaran na na ka ning Ginu. E ka mate.

¹⁴ Makanyan man, uli na ning depat mung kalapastanganan king Ginu, mate ya ing mibait mung anak a lalaki.

¹⁵ Kaybat na nita, minuli ne bale na i Natan. At mika mabayat yang sakit ing anak nang David kang Batsebang asawa nang Uria.

¹⁶ Menalangin ya i David king Ginu ban kumayap ya ing anak. E ya bitasang mengan at inyang bengi na linub ya king kuartu na at king gabun ya migkera.

¹⁷ Pintalan de ring opisyal na at pekisabian deng mayap ing talakad ya, oneng e ya mebisang mangan kayabe ra.

¹⁸ King kapitung aldo mete ya ing anak. Mikakunu lang sabian da iti kang David uling api-isip-isip da king lalu na lang e pakiramdaman king sasabian da at pota daptan na itang e na sukat daptan king sarili na.

¹⁹ Apansinan na lang David ing mibubulungan la, inya aulata nang mete ne ing anak. Nganang mengutang karela, Mete ne ing anak? Pekibat da, Opu, mete ne ing anak yu.

²⁰ Kanita tinalakad ya i David; mindilu ya at miniblas ampon migpabanglu. Kaybat linub ya king bale ning Ginu at sinamba ya. Kaybat, minuli ya; meniawad yang pamangan at mengan ya inyang makayapag na.

²¹ Kanita ngara ding opisyal na, E mi pu aintindian ing ikit mi kekayu. E kayu mengan at menangis kayu inyang mabie ya ing anak yu, oneng ngening mete ne tinalakad kayu at mengan.

²² Wa, nganang David, mig-ayunu ku kanita at menangis ku inyang mabie ya ing anak. Atyu kanita king lub ku ing malunus ya kanaku ing Ginu at e na paintulut ing mate ya ing anak ku.

²³ Oneng ngening mete ne e na kailangan pa ing mag-ayunu ku pa. Abalik ku wari ing bie na? Aku ing munta king anak potang datang ing panaun, oneng e ne makapagbalik kanaku ing anak ku.

²⁴ Pematulan neng David ing asawa nang i Batseba; sipingnan ne at mebuktut ya. Menganak yang metung a lalaki at pemalagyuan neng Solomon. Kaluguran ne ning Ginu ing anak,

²⁵ inya tinubud ne i propeta Natan ban sabian king Jedidia ing ipamalagyu ra king anak pablasang kaluguran ne ning Ginu.

²⁶ At sindu nang Joab at ding tauan na ing pamakilaban karing Ammonita king Rabba, ing siudad ning ari da, at malapit da niang asakup.

²⁷ Peparala yang tubud i Joab kang David ban ibalita king lisuban da ne ing Rabba at ikua de ing pititipunan danum karin.

²⁸ Inya kailangan ing tipunan na la ning ari ding mitagan nang sundalus. At ngana pang Joab, Ya ing manimuna king pamanialake at ya na mismu ing sumakup king siudad, e ku buring aku ing miparangalan king tagumpe.

²⁹ Inya tinipun na lang David ding sablang sundalus na at penimunan na la king pamaglusub king Rabba at abihag de iti.

³⁰ Kinua neng David ing koronang gintu a titimbang apat apulu't siam a kilu. Makaputung ya iti king estatuang kikilalanan dang dios a ausan dang Molek. Atin ya iting mal a batung iyas at kinua neng David at kebit ne king korona na. Dakal ing ikua rang pibandian king siudad.

³¹ Binihag da la ring memalen karin at kaybat ila ring pepagobran da bilang kalpinteru, pande, at mangawang laryu. Makanyan munaman ing depat nang David karing aliwang balen da ring Ammonita. Kaybat na nita, minuli ne Jerusalem i David at ding sundalus na.

13

¹ Atin yang kapatad a dalaga i Absalom a anak nang David. Malagu ya at ing lagyu na Tamar. Milsinta ya kang Tamar i Amnon, ing aliwa na pang anak a lalaking David king aliwang babai.

² Mesakit ya uling milalu ing sinta na kang Tamar a kasing-ibpa na; birhen ya inya e ne malyaring alapitan. E na balu ing gawan na.

³ Atin yang kakaluguran a mautak i Amnon; i Jonadab. Pisan ne i Jonadab uling anak neng Simea a kapatad nang David.

⁴ Nganang Jonadab kang Amnon, O pisan kung prinsipi, apansinan ku king aldo-aldo malungkut ka. Nanu ing sangkan? Pekibat na, Malsinta ku kang Tamar a kapatad nang Absalom at kasing-ibpa ku.

⁵ Nganang Jonadab, Magkunwari kang masakit at magkera. At potang dalawan na kang tata mu ipakisabi mung mayap king i Tamar a kapatad mu ya ing buri mung akit maglutu at munie pamangan keka.

⁶ Inya migkunwari yang masakit i Amnon at migkera ya. Dinatang ya i David ba neng dalawan at nganang Amnon, Sabian yu sana kang Tamar a kapatad ku king ya na ing magbante at maglutu at munie pamangan kanaku.

⁷ Inya pepayaus ne king palasyu i Tamar at ngana, Tamar, puntalan me king bale na i Amnon a kapatad mu at paglutu meng pamangan na.

⁸ Inya minta ya i Tamar king bale na ning kapatad nang i Amnon; disan neng makakera. Kinangwa yang arina i Tamar at ginawa yang masa, at king akakit nang Amnon miglutu yang tinape.

⁹ Inyang lutu na la binili na la king pinggan at dela na la kang Amnon ba neng mangan. Oneng e ya bisang mangan. Sinabi na, Palakuan mu la ding sablang atyu keti. Inya meko la ding sabla.

¹⁰ Kaybat nganang Amnon kang Tamar, Idala mu la kening pagkeran ku ding tinape at subuanan mu ku. Kinua na lang Tamar ding tinape linutu na at dela na la king pagkeran nang Amnon.

¹¹ Inyang subuanan na neng Tamar, kinaul ne at ngana, Magkera ka siping ku, kapatad ko!

¹² Nganang Tamar, E ku bisa, kapatad ko. E mu ku sana pipilitan. E sukat marapat ing bage makanyan king Israel. E ustu yan!

¹³ Nanung lupa ku pang makiarap karing tau nung paintulutan da ka? Lumual kang makarine king mabilug a Israel. Pakisabian me ing ari at paniwalan ku king paintulut na ing maging asawa mu ku.

¹⁴ Oneng e ne pekiramdaman Amnon at uling mas masikan ya pinuersa ne at ikua na ing buri na kang Tamar.

¹⁵ Kaybat nang arapat Amnon ita, mimua yang e mu nanu kang Tamar. Mas matindi ing mua na kesa king pamalsinta na kang Tamar. Ngana, Mabating na ka!

¹⁶ Nganang Tamar, E ku bisa! Lalung e ustu ing pamanabi mu kanaku kesa king depat mu kanaku. Oneng e ne pekiramdaman Amnon;

¹⁷ inaus ne ing talasuyu nang ipus at sinabi na, Ilual me ing babaing yan at ikabat me ing pasbul. E ke buring akakit!

¹⁸ Linual ne ning ipus at kebat ne ing pasbul. Maka-imalan ya kanitang bata a ating makabang takde i Tamar; makanyan la susulud kanitang panaun a ita ding prinsesang e talasawa.

¹⁹ Mibili yang abu king buntuk na at ginabak ne ing susulud nang imalan at tikpan ne ing lupa na karing gamat na at kikiak yang masikan kabang lalakad ya.

²⁰ Kitnan neng Absalom inyang ikit ne. Ngana, Sipingnan na ka waring Amnon a kasing-ibpa mo? E na ka sana mag-iskandalu uling kasing-ibpa me. E mu na pakadibdiban yan. At king bale nang Absalom ne menuknangan i Tamar; magdili-dili ya at malungkut.

²¹ Mikasbu ya i Aring David inyang abalitan na ing milyari.

²² Ala yang binggitan nanuman i Absalom kang Amnon, oneng pikasaman ne uli na ning depat nang kalapastanganan kang Tamar a kapatad na.

²³ Kalabas da ring aduang banua, inagkat na lang Absalom ding sablang anak nang lalaki ning ari. King panaun a ita atyu la king Baal Hazor ding tupa nang Absalom at paurud na la ding tupa na. Malapit ya ing lugal a ita king balen ning Efraim at karin la mikit-ikit ding kumbiradu.

²⁴ Pintalan neng Absalom i Aring David at ngana, Makamal a Ari, paurud ku la pu karing tauan ku ding kanakung tupa. Malyari kayu pung tuki at ding opisyal yu king katatagan karin?

²⁵ Pekibat ning ari, E ku malyari, anak. Maragul a pangabala keka nung tumagun ke ngan. Pemilit neng Absalom, makanyan man e ya mu rin mebisa ing ari, oneng binendisyunan ne i Absalom.

²⁶ Nganang Absalom, Nung e kayu talagang malyari, ing kapatad kung i Amnon na mu pu ing patagunan yu. Ngana ning ari, Obat patagunan me?

²⁷ King kapipilit nang Absalom pepatukian ne i Amnon at ding aliwa pang anak nang lalaki ning ari. Migtau yang maragul i Absalom a karapatdapat king ari.

²⁸ At nganang minie panabilin Absalom karing ipus na, Banten ye i Amnon at potang malasing ne at binie ku ne ing senias, paten ye. E ko sukat mitatakutan; aku ing ating pakibatan king kamatayan na. E yu painan ing lub yu; magpakatatag kayu.

²⁹ Memintu la ring ipus king utus nang Absalom, at pete re i Amnon. Inya tinalakad la ring aliwang anak nang lalaking David; seken da la ring karelang mula at tinakas la.

³⁰ Kabang atyu la pa king dalan miras na kang David ing balita tungkul king milyari. Ngana ning mibalita: Pete no ngang Absalom ding sablang anak nang lalaking David; alang mitagan.

³¹ Tinalakad ya ing ari; ginabak na ing imalan na uli na ning sakit nang lub at migkasat ya king gabun. Ginabak da naman ing imalan da ring talasuyu nang atyu karin a pakatalakad.

³² Nganang Jonadab a pangunakan nang David, Makamal a Ari, e ro ngan pu pete ding anak yung lalaki; i Amnon mu pu ing pete ra. Misimpan yang mua i Absalom manibat na kanitang sinira ne puring Amnon ing kapatad nang i Tamar.

³³ Inya e yu pu isipan ing pete da la ngan ding anak yu; i Amnon mu pu ing pete ra.

³⁴ Samantala, tinakas ne man i Absalom.

³⁵ Kanita ing metung a mag-guardiang sundalus menakit yang dakal a taung daratang ibat king dalan ning Horonaim; kukuldas la king bunduk-bundukan. Linapit ya king ari iting guardia at belita na ing ikit na. Nganang migsalitang Jonadab kang Aring David, Antimo ing asabi ku na kekayu, ding anak yu pung lalaki ila ring daratang.

³⁶ Kayari nang migsalita, dinatang la ring anak nang lalaki ning ari; manangis la. Menangis ya naman ing ari at ding opisyal na.

³⁷ Tinakas ya i Absalom at minta ya kang Talmai, ing ari ning Gesur a anak nang Amiud, at menatili ya karin kilub ding atlung banua. Maluat nia mu ring penangisan David ing pangamate nang Amnon.

³⁸

³⁹ Akabiusan nang David ing pamagmalun na kang Amnon, at sabik ne ngening buring akit i Absalom.

14

¹ Apansinan nang Joab a anak nang Zeruia king tutu neng buring akit ning Aring David i Absalom.

² Inya peparakit neng Joab ing metung a biasang babaing manuknangan king Tekoa. Ngana inyang mikit na la, Magkunwari kang manangis at misulud imalan ning pamagpaldas; e mu ayusan ing sarili mu ban mayakit king makaba nang panaun ing kekang pamagpaldas.

³ Kaybat, puntalan me ing ari at sabian mu ing sabian ku keka. At sinabi nang Joab itang sukat nang sabian ning babai king ari.

⁴ Minta ya king ari iting babaing tau Tekoa; dinuku ya arapan ning ari bilang pamamie galang at ngana, Saupan yu ku sana, O Makamal a Ari!

⁵ Kitnan ne ning ari, Nanu wari ing liligalig keka? Pekibat ning babai, Metung ku pung babaing mebalu, mete ne pu ing asawa ku.

⁶ Atin ku pung aduang anak a lalaki at mipate la kabang atyu la king marangle. Ala lang kayabe a malyaring manawat karela; pete ne ning metung ing metung.

⁷ At ngeni, Makamal a Ari, mua la ngan kanaku ding kamaganak ku. Ngarang sasabi kanaku, Ibie me kekami ing anak mung mekamate king kapatad na at paten mi ya bilang kabayaran king depat na. Makamal a Ari, lubus kung magdili-dili nung ibie ku ing aduan da ring kamaganak ku. Siguradung kawalan kung manintunan kabiayan at mabura ne lagyu ing meyangu-bie asawa ku.

⁸ Ngana ning ari, Muli na ka; aku na ing bala.

⁹ Ngana ning babai, Makamal a Ari, aku at ing pamilya ku ing mika pakibatan king nanumang lakbang a gawan yu; aliwa ikayu at ing pamilya yu.

¹⁰ Ngana ning ari, Nung ating mamatakut keka, isumbung me kanaku ban e na na ka pangabalanan.

¹¹ Ngana ning babai, Makamal a Ari, iyabe yu ke sana king panalangin yu king Ginung kekong Dios ban e ne paten ning metung karing kamaganak kung magbenggansa ing anak kung makatagan. Ngana ning ari, Pangaku ku king lagyu na ning Ginu king e ya numanu balang ing anak mu.

¹² Ngana pa ning babai, Atin ku pa pung buring sabian kekayu, nung ipaintulut yu. Ngana ning ari, Nanu ita?

¹³ Pekibat ning babai, Obat depatan yu ing e ustu karing memalen na ning Dios? Inatulan yu ing sarili yu ngening e ye paintulutan makapagbalik ing sarili yung anak a tinakas.

¹⁴ Mate tamu ngan; mengari tamung danum a miyugse king gabun a e na malyaring tipunan pasibayu. E na la pasibayung babalik a bie ning Dios ding mete, oneng makagawa yang paralan ing ari ban abalik ne ing taung miyugse.

¹⁵ Dinatang ku pu keti, Makamal a Ari, ban sabian kekayu king babalan da ku ring tau. Inya asabi ku king sarili ku ing pakisabian da kayu kayabe ing kapanayan a ibie yu ing kayaduanan ku.

¹⁶ Balu ku ing pakiramdaman yu ku at iligtas king kamaganak kung makamate king anak ku at kanaku. Inya e kami mitabi king gabun a binie na ning Dios karing memalen na.

¹⁷ Ngaku king lub ku, Dinan na kung kapanatagan ning amanu na ning makamal a ari, uling mengari kayu king anghel ning Dios, at balu yu nung isanu ing mayap at ing e mayap. Mananu na sanang mantabe ya kekayu ing Ginung kekong Dios.

¹⁸ Ngana ning ari, Kutnan da ka, at ing ipakibat mu kanaku ya ing katutuan. Opu, Makamal a Ari, ngana ning babai.

¹⁹ Ngana ning ari, Atin yang kamalayan i Joab kaniting sasabian mo? E ku pu malyaring e magsalitang katutuan kekayu, O Makamal a Ari. Opu, i Joab a talasuyu yu ya pu ing tinuru kanaku king sabian ku kekayu.

²⁰ Depat na pung Joab iti ban mayaus kayu pansin king bage malilyari. Oneng ikayu, Makamal a Ari, biasa kayung anti ding anghel ning Dios at balu yu ing sablang bage malilyari keti king kayarian yu.

²¹ Kaybat na nita, pepayaus neng Aring David i Joab at ngana, Ngeni, Joab, ipaintulut ku keka ing ibalik me keti ing kayanakan a i Absalom.

²² At dinuku ya i Joab king ari bilang pamamie galang at kaybat sinabi na, Bendisyunan na kayu sana ning Dios. Tune abalu ku ngening aldong iti king katanggap-tanggap ku king kekong arapan, uling pekiramdaman yu ing kanakung kayaduanan.

²³ Inya minta ya king Gesur i Joab at dinakit ne i Absalom, at inuli ne Jerusalem.

²⁴ Sinabi na ning ari, Muli ya i Absalom keta king bale na; e ke buring akit. Inya king bale na karin ya menuknangan i Absalom at e ya pepakit king ari.

²⁵ King panaun a ita, kasasantingan yang e mu nanu ing mabilug a Israel kang Absalom. Ala lang apintas kang Absalom manibat king buntuk angga na king talampakan na.

²⁶ Makapal ya buak at paurud ya misan mu pabanua, pota mung tune neng malabung a malabung. Titimbang maygit aduang kilu ing buak na agpang king timbangan ning kayarian.

²⁷ Atin yang atlung anak a lalaki at metung a anak a babai a milagyuan Tamar; metung yang malagung dalaga.

²⁸ Adua yang banuang menuknangan king Jerusalem i Absalom, oneng e la mikit ning ari.

²⁹ Pepayaus neng Absalom i Joab ban saupan neng makikit king ari, oneng e ya mebisa. Pasibayu neng pepayaus, oneng e ne naman mebisa i Joab.

³⁰ Inya sinabi nang Absalom karing ipus na, Makiramdam kayu kanaku. Atin yang marangle sebada i Joab at kasiping nia mu ing kanaku. Munta kayu karin at silaban ye. Inya minta la karin at silaban de ing marangle nang Joab.

³¹ Kaybat na nita, pintalan neng Joab i Absalom at ngana, Ba't silaban de ring ipus mu ing kanakung marangle?

³² Pekibat nang Absalom, Aduang besis da kang pekisabian datang ban tuburan king ari at ikutang ing anti kaniti: Obat peparakit yu ku pa king Gesur? Mas masanting ing menatili ku karin kesa king atyu ku keti. Idala mu ku king ari ngeni mu rin, at nung mikasala ku, paburen mung paten na ku.

³³ Inya minta ya kang Aring David i Joab at sinabi na itang sinabi nang Absalom. Pepayaus ne ning ari i Absalom, at dinatang ya at dinuku ya arapan ning ari. Tinggap ne ning ari at inuma ne i Absalom.

15

¹ Kaybat na nita, mika karwahe ya at mapilan a kabayu i Absalom. Atin ya namang limang pulung tauan a abe na.

² Ugali nang Absalom ing migigising maranun neng abak at tatalakad ketang lele ning pasbul dalan palub king siudad. Neng ating taung daralan karin a magdalang pisasabian ban lutasan ning ari, ausan na lang Absalom at kukutnan nung nu la menibatan. At potang ing pakibat da: Ibat kami king metung nang tribu ning Israel,

³ sabian nang Absalom karela: Atin kang matulid makikit king ari, oneng ala yang pekakatawan ing ari ban lingun king lakad yu.

⁴ Ngana pang sumabi, Sana mitulduan kung ukum ning bansa ban asaupan ke ing ninumang lumapit a ating lakad o pisasabian at tanggap yang hustisia.

⁵ At neng ating lalapit kang Absalom ban munie galang, ing daptan na ya ing kaulan ne at uman.

⁶ Makanyan ing daraptan nang Absalom karing sablang Israelitang daratang maniawad hustisia king ari. Inya ikua na la kapanamdaman Absalom ding memalen na ning Israel.

⁷ Kalabas da ring apat a banua nganang Absalom king ari a tata na, Paintulutan yu ku sanang munta Hebron ban atuparan ku ing panata ku king Ginu.

⁸ Ginawa kung metung a panata inyang manuknangan ku king Gesur ning Siria. Ngaku, Nung ibalik na ku Jerusalem ning Ginu, samban ke king Hebron.

⁹ Kanita ngana ning ari, Sulung, munta ka.

¹⁰ Kaybat na nita, lihim yang mitubud mapilan a tau i Absalom karing sablang tribu ning Israel ban sabian ing anti kaniti: Potang damdaman yu na ing tiup ning trumpeta, ikulisak yu: I Absalom ya ing ari king Hebron!

¹¹ Ating aduang dalan a lalaki ning Jerusalem ding tinuki kang Absalom. Inagkat na la bilang bisita na, oneng ala lang kamalemale king balak na.

¹² Kabang babie na la ding ain-sakripisyu, pepayaus ne i Ahitofel a tau Gilo at tagapayu neng Aring David. Meragul ing pamakisabuatan laban king ari at merakal la ring tauan nang Absalom.

¹³ Ating tubud a dinatang kang David at nganang memalita, Mekisanmetung na la pu panamdam kang Absalom ding kelalakinan na ning Israel.

¹⁴ Kanita nganang David karing opisyal a kayabe na king Jerusalem, Tara, tumakas tamu; makapanganib ing bie tamu kang Absalom. Magmalagua tamu uling pota atagal na katamu at daptananan e mayap at panabakan ing metung at metung a tau ning siudad!

¹⁵ Ngara ding opisyal, Opu, Makamal a Ari. Makasadia kaming mamintu king nanumang sabian yu.

¹⁶ Inya meko ya ing ari at ing mabilug nang pamilya, oneng likuan na la ring apulung babaing kasese na ban ila ding mag-asikasu king palasyu.

¹⁷ Inyang meko na la at mitulid king katataulian a bale tinuknang ya ing ari at ding sablang kayabe na.

¹⁸ Migbanda la lele na ning ari ding opisyal na kabang lalabas la arapan na ding guardia nang Kereteo, Peleteo, at ding anam a ralan a Gititeo a tinuki ibat king Gat.

¹⁹ Ngana ning ari kang Ittai a Gititeo at manimuna karing kabalen na, Magbalik na ka; e na kayu tutuki kekami at ing bayung ari ing suyuan yu. E na ka man talagang tau keti; mipadpad ka mu keti.

²⁰ Kapilan ka pa dinatang keti, inya e ka sukat maglito-lito kayabe ku. E ku man balu nung nu ku munta. Sigi na, magbalik na ka at ituki mu la ring kabalen mu. Mananu na sanang ing Ginu pakitanan na kang lugud a e kukupas at maging tapat ya keka.

²¹ Nganang Ittai, Mabie ya ing Ginu at mabie kayu, Makamal a Ari, at tukian da kayu nu kayu man munta agyang king kamatayan pa. E ra kayu lakuan nanuman ing malyari.

²² Nung makanyan, nganang David, sumulung na kayu. Inya mekiabe ya kang David i Ittai a Gititeo, ding tauan na, at ding pamilya ra.

²³ Manangis ya ing mabilug a bansa kabang palako la ring taung tinuki kang Aring David. Lipatan ne ning ari at ding talatuki na ing Sapa ning Kidron, at tinaglus la king ilang.

²⁴ Kayabe re ing paring i Zadok at ding sablang Levitang talapagdala king Kaban ning Kasunduan. Beba re ing Kaban, at binuat de inyang mekalabas na la king siudad ding tau. Tinuki ya naman karela ing paring i Abiatar.

²⁵ Kanita nganang David kang Zadok, Ibalik yu ne king siudad ing Kaban ning Kasunduan. Nung katanggap-tanggap ku pa king Ginu, ibalik na ku at akit keng pasibayu ing Kaban at ing pagkabilian na.

²⁶ Nung e na ku man katanggap-tanggap ya na ing bala king buri nang daptan kanaku.

²⁷ Ngana pang Aring David kang Zadok, E wari ing manula ka? King mitmung kapayapan magbalik ka king siudad. Ituki me ing anak mung i Ahimaaz at i Jonatan a anak nang Abiatar.

²⁸ Manaya kung balita kekayu karin king lele ning ilug papunta king ilang.

²⁹ Inya binalik de Jerusalem di Zadok at Abiatar ing Kaban ning Kasunduan at menatili la karin.

³⁰ Manangis ya i David inyang mukiat ya king Bunduk ding Olibo; ala yang sapin a bitis at makatalukbung ya uling tune yang manamdaman king milyari king bie na. Makanyan munaman ing depat da ring tinuki.

³¹ Ating memalita kang David king mekiabe ya i Ahitofel king pamag-rebelding tinatag nang Absalom. Kanita nganang menalangin David, O Ginu, gawan mu sanang kamangmangan ing payu nang Ahitofel! fig,,,,,Manangis ya i David inyang mukiat ya king Bunduk ding Olibo.,(15:30)fig*

³² Inyang miras ne i David king taluktuk ning bunduk, ketang lugal nung nu ya misasamban ing Dios, seganan neng Husai a Arkiteo; gabak-gabak ya imalan at mayalikabuk ya buntuk.

³³ Nganang David, Maging pabayat ka mu kanaku nung tuki ka kanaku.

³⁴ Oneng asaupan mu ku nung mibalik ka king siudad at sabian kang Absalom king ya ngeni ing suyuan mung mitmung katapatan antimo nung makananu meng siyuan i tata na. At daptan mu ngan ing sablang agyu mu para kanaku ban salangsangan mu ing nanumang payu a ibie nang Ahitofel kang Absalom.

³⁵ Atyu la karin ding paring di Zadok at Abiatar. Sabian mu karela ing nanumang damdaman mu king palasyu.

³⁶ Atyu ya naman karin i Ahimaaz a anak nang Zadok, at i Jonatan a anak nang Abiatar. Karela mu ipadala ing nanumang balitang dimdam mu.

³⁷ Inya i Husai, ing kakaluguran nang David, minta ya king siudad, at lulub ne man kanita king Jerusalem i Absalom.

16

¹ Mekakuldas neng ditak kanita king bunduk i David inyang akatagpu ne i Ziba, ing ipus nang Mefiboset. I Ziba atin yang tatairan aduang asno a maki aduang dalan a tinape, dinalan a kapunggul a pasas, dinalan a kapunggul a prutas, at metung a balat a lulanan mitmung alak.

² Nganang kinutang David, Obat dela mu keti yan? Nganang mekibat Ziba, Babie ku la pu king pamilya yu deting aduang asno; deni namang pung tinape at prutas para karing tauan yu la, at iting alak para king kenu ya mang kumau king paglakad na king ilang.

³ Kitang ning ari, Nu ya karin i Mefiboset, ing apu ning panginuan mung i Saul? Pekibat nang Ziba, Atyu ya pu Jerusalem, uling ngana pu kanaku: Ngening aldong iti ne ibalik kanaku ning Israel ing kayarian nang ingkung ku.

⁴ Kanita ngana ning ari, Ziba, manibat ngeni keka na ing sablang pibandian nang Mefiboset. Nganang Ziba, Atyu ku pu lalam yung upaya. Mananu na sanang maging karapatdapat ku king kekayung panimanman, O Makamal a Ari.

⁵ Inyang miras ya king Bahurim i David, ating metung a lalaking sinalubung at panagkasan ne; ing lagyu na Simei a anak nang Gera at kamaganak neng Saul.

⁶ Besibas ne i David at ding kayabe nang opisyal at tauan a makapadurut king ari.

⁷ Nganang kukulisak, Mabating ka! Mabating ka keti! Metung kang kriminal at taung alang kabaldugan.

⁸ Minablas ya ngeni keka ing Ginu uli na ning pangamate nang Saul at ing pamilya na at pamaniamsam mu king tronu na. Binie ne ngeni ning Ginu ing kayarian kang Absalom a anak mu. Miras mu rin ing kayangganan mu, uling makamate kang kalupang tau!

⁹ Nganang Abisai a anak nang Zeruia, Makamal a Ari, obat paintulutan ye iting asung mete a panagkasan na kayu? Paintulutan yu ku pung puntalan ke at tabtaban a batal.

¹⁰ Ngana ning ari, E me pakialaman. Ala katang parehung matulid nung inutus ning Ginu kang Simei ing panagkasan na ku.

¹¹ Kanita sinabi na pang David kang Abisai at karing sablang kayabe na, Lawan yu, buri na kung paten ning sarili kung anak, e kasi lalu na iting i Simei a Benjaminita. Inya paburen yeng managkas nang managkas, uling inutusan ne ning Ginu.

¹² Pota malunus ya ing Ginu kaniting daralanan kung kasakitan at bendisyunan na ku king kapamilatan ning depat nang Simei.

¹³ Inya tiglus nang David at ding kayabe na ing paglakad da kabang i Simei naman tatagal ya king sumangid ning burul; managkas yang alang patugut at mamasibas batu at dinat karela.

¹⁴ Mapagal yang mapagal ing ari at ding kayabe nang tauan inyang miras la king pupuntalan da. At migpaynawa la karin.

¹⁵ Dinatang ya Jerusalem i Absalom; kayabe ne i Ahitofel at ding sablang kelalakinan na ning Israel.

¹⁶ Kinulisak ya i Husai, ing Arkiteong kakaluguran nang David, inyang akatagpu ne i Absalom. Ngana, Luid ya ing ari! Luid ya ing ari!

¹⁷ At ngana namang Absalom kang Husai, Iti ya ing kapasiagan mung katapatan king kakaluguran mo? Obat e ka mekiabe king kakaluguran mung ari?

¹⁸ Pekibat nang Husai, Ing bukud ku mung pakiabayan ya ing pinili ning Ginu, ning balen a iti, at ding kelalakinan na ning Israel.

¹⁹ Ninu ing suyuan ku? Agyang makananu ing anak ning panginuan ku. Nung makananu keng siyuan i tata mu, makanyan da ka namang suyuan.

²⁰ Kanita nganang Absalom kang Ahitofel, Magsalita na ka man. Nanu ngeni ing aturu mung daptan ta?

²¹ Pekibat nang Ahitofel, Puntalan mu la ring babaing kasese nang tata mung likuan na ban mag-asikasu king palasyu, at sipingnan mu la. Mibalita kanita king mabilug a Israel king tune na kang kalaban tata mu, at sikan la lub ding talatuki mu.

²² Inya mitalakad lang tolda king babo ning palasyu ban akit na ning mabilug a Israel ing pamanyiping nang Absalom karing babaing kasese nang David a tata na.

²³ King panaun a ita, mituturing a payu na ning Dios ing payu a babie nang Ahitofel. Tinggap nang David iti at antimu rin i Absalom.

17

¹ E miglambat sinabi na pang Ahitofel kang Absalom, Paintulut mung aku ing mamiling labing aduang libung lalaki at ngeni mu ring benging iti tagalan mi ya i David.

² Lusuban ke kabang mapagal ya at sira lub, at pamasdanan ke king takut. Kanita ra ne lakuan ding tauan na. Ing paten ku mu ya ing ari

³ at ibalik ku la keka ding tauan na nung makananu yang mumuli ing babaing kakasal king maging asawa na. Ya mu ing buri mung mate, at mipayapa na la kanita ding sablang memalen.

⁴ Metula ya i Absalom at ding sablang manimuna ning Israel.

⁵ Kanita nganang Absalom, Ausan ye i Husai, ing Arkiteo, at lawan tamu nung nanu naman ing sabian na.

⁶ Nganang sinabing Absalom inyang atyu ne, Migsalita ya kekami i Ahitofel; tukian mi ing payu na o ali mi? Nung ali mi, sabian mu ing sukat ming daptan.

⁷ Nganang Husai, E ya sukat tukian kaniting penandit ing payu nang Ahitofel.

⁸ Balu ye i tata yu at ding tauan na; matapang la king pamakilaban at mabagsik lang anti ing gaindung oso a kepanakawan karing anak nang pasusuan. Masibukan yang sundalus i tata mu at e ya makiabe karing tauan na neng matudtud ya neng bengi.

⁹ Siguru kaniting penandit makasalikut ya king metung a kueba o king aliwang lugal. Kabud lisuban na lang David ding sundalus yu at kaybat mibalita iti, kanita mikalat king mesambut la ring sundalus yu.

¹⁰ Inya mitakutan ya ing matapang dili karing sundalus a kasing tapang ning leon uling balu na ning mabilug a Israel king matapang yang sundalus i tata yu at matapang la naman ding sundalus a kayabe na.

¹¹ Iti ya ing asabi ku: tipunan yu la pa ring sablang Israelita manibat king Dan angga Beerseba a kasing dakal na ning balas king pasigan ning dagat. Kaybat na nita, ikayu mismu ing manimuna king pamakilaban.

¹² Lusuban ta ya i David nu man karin ta ya akit. Lusuban ta yang anting putakti. Alang mitagan kanita metung man karela; pati i David mate ya.

¹³ Nung murung ya at salikut king metung a siudad, kanita la magdalang lubid ding memalen tamu at abitan ta yang pababa ing siudad king kapatagan angga king ala nang mitagan agyang metung mung batu.

¹⁴ Nganang Absalom at ding sablang kelalakinan na ning Israel, Mas masanting ya ing sinabi nang Husai a Arkiteo kesa king kang Ahitofel. Iti milyari uling inari na king lub na ning Ginu ing sabatan ya ing payu nang Ahitofel ban kang Absalom dugpa ing kapahamakan.

¹⁵ Kanita nganang Husai karing paring di Zadok at Abiatar, Inusukan neng Ahitofel i Absalom at ding manimuna ning Israel king daptan de ing metung a planu ban arakap de i David, oneng makayaliwa naman ing binie kung payu karela.

¹⁶ Inya mitubud kayung tau at ipabalung agad kang David ing anti kaniti: E me palipasan ing bengi ketang ilug a lipatan papunta king ilang. Lipatan me ngeni mu rin ing Jordan ban ika at ding tauan mu e la marakap at e la mate.

¹⁷ Makapanaya ya kanita king sibul ning Enrogel i Jonatan a anak nang Abiatar at i Ahimaaz a anak nang Zadok. Atyu la king lual ning siudad uling e la dapat papakit lulub king siudad. Ating metung a babaing ipus a lual-lungub king siudad at ya ing manatad balita kari Jonatan at Ahimaaz, at kaybat ila naman ding manatad balita kang Aring David.

¹⁸ Oneng ating metung a anak a lalaki a menakit karela at sinumbung ya kang Absalom. Inya memalagua lang meko di Jonatan at Ahimaaz at sinalikut la king bale ning metung a tau king Bahurim. Ating talaga kilub ning bakuran na at karin la sinalikut.

¹⁹ Tikpan ne iti ning asawa na ning makibale at kaybat kinalat na ing trigu babo na niti ban alang makaulatang atin taung sasalikut king talaga.

²⁰ Dinatang la karin ding tauan nang Absalom at ngarang kinutang king asawa na ning makibale, Nukarin la ri Ahimaaz at Jonatan? Pekibat na, Lipatan da ne ing ilug. Penintun da la ring tauan nang Absalom di Ahimaaz at Jonatan, oneng e da la ikit. Inya mibalik la king Jerusalem.

²¹ Kalako da ring tatagal karela, linual la king talaga di Ahimaaz at Jonatan. Pintalan de i Aring David at inatad da ing balita. Ngara, Makamal a Ari, mako na kayu at lipatan ye ing ilug. Dakal ya sasabian i Ahitofel laban kekayu.

²² Inya memalagua yang meko i David at ding tauan na. Lipatan de ing Jordan at mekadalakit no ngan inyang sunlag ya ing aldo.

²³ Inyang abalu nang Ahitofel ing e mitukian ing binie nang payu, sinake ya king asno na at minuli ya king bale na king siudad nang tibuan. Migbigti ya kaybat nang ayayus ing sukat nang ayusan. Mete ya at kitkut de king kutkutan nang tata na.

²⁴ Miras ne Mahanaim i David inyang lilipatan neng Absalom at ding tauan nang Israelita ing Jordan.

²⁵ Lugal king i Joab ing tulduan nang pekapun da ring sablang sundalus, i Amasa ya ing tilduan nang Absalom. Anak neng Itra a Ismaelita i Amasa. I ima nang Amasa ya i Abigail a anak nang Nahas a kapatad nang Zeruia a ima nang Joab.

²⁶ Migkampu ya king sakup ning Gilead i Absalom at ding tauan nang Israelita.

²⁷ Inyang datang ya i David king Mahanaim seganan neng Sobi, ing lalaking anak nang Nahas ning siudad ning Rabba, Ammon. Sinagana ya naman i Makir a anak nang Amiel ning Lodebar. Sinagana ya naman i Barzilai ning Rogelim, Gilead.

²⁸ Magdala la ngang pagkeran at ulas, palanggana, silyo, at kuran, trigu, sebada, arina, sing-le binutil, miyayaliwang gule,

²⁹ pulut-panilan, kesu, at tupa. Binie da ngan iti kang David at karing tauan na ban mika pamangan la, uling balu ra king danupan la at mapagal ampon maung danum uling ibat la king ilang.

18

¹ Kanita tinipun na lang David ding sablang tauan na at inayus na lang tia libu at tia dinalan, at tinuldu yang opisyal a manimuna kareti.

² Kaybat, gewa na lang atlung grupu; panimunan neng Joab ing mumunang grupu, panimunan neng Abisai a kapatad nang Joab ing kadua, at panimunan neng Ittai a tau Gat ing katlu. At ngana karelang David, Makilaban ku namang kayabe yu.

³ Ngara ding tauan na, E kayu sukat tuki kekami king pamakilaban. E ra masiadung pansinan ding kalaban nung murung kami. E maulaga karela agyang pang mate la ding kapitna kekami, oneng ikayu, Makamal a Ari, katumbas kayung apulung libung sundalus. Masanting pu ing manatili na kayu mu keting siudad at parala na kayu mung saup kekami.

⁴ Ngana ning ari, Ikayung bala; daptan ku ing nanumang isipan yung mayap. Kaybat na nita, tinalakad ya ing ari lele ning pasbul dalan ning siudad kabang magmartsa lang palual king siudad ding tia dinalan at tia libung sundalus na.

⁵ Nganang minie utus ning ari kari Joab, Abisai, at Ittai, Alang-alang kanaku, e ye sana panasakitan ing kayanakan a i Absalom. Dimdam da ring sablang sundalus iting utus a binie na karing opisyal. fig,,,,,E ye sana panasakitan ing kayanakan a i Absalom.,(18:5)fig*

⁶ Meko la at mekilaban ding sundalus nang David karing Israelitang sundalus nang Absalom. Mitagpu la king Kagubatan ning Efraim at karin la milaban.

⁷ Mesambut la ring sundalung Israelita karing sundalus nang David. Adua lang pulung libu ding sundalung Israelita ding mete king aldong ita.

⁸ Miras ing labanan king kaparangan, at mas dakal la ring mete king kagubatan kesa karing mete king labanan.

⁹ King e na tinap-tinapan Absalom akatagpu na la ring sundalus nang David. Makasake ya king metung a animal a mula i Absalom at daralan ya lalam na ning malabung a tanaman a ensina, at misabit ya ing buntuk na king metung karing sanga. Mibitin ya i Absalom at milayi ya ing mula.

¹⁰ Ikit ne ning metung karing tauan nang David at sinabi ne kang Joab. Ngana, Ikit ke pu i Absalom a makabitin king tanaman a ensina! fig,,,,,Misabit ya ing buntuk na king metung karing sanga.,(18:9)fig*

¹¹ Nganang Joab, Nano? Ikit me i Absalom? Obat e me pete? Tanggap ka sanang apulung pirasung pilak kanaku at metung a sinturun nung pete me kanita mu rin.

¹² Ngana ning menakit, Agyang pa pung dinan yu kung libung pirasung pilak e ke panasakitan ing anak ning ari. Dimdam mi pung inutus na kekayu ning ari at kang Abisai at Ittai ing e ya panasakitan ing kayanakan a i Absalom.

¹³ Nung sakaling e ku memintu king utus ning ari at pete keng pataksil ing anak nang i Absalom, siguradung abalu na ning ari, at aku ing mika pakibatan at aliwa ikayu.

¹⁴ Nganang Joab, E ku sukat siran ing panaun ku keka. Kaybat, kinangwa yang atlung tandus at siksak na la king pusu nang Absalom a disnan nang mabie pang makabitin king tanaman a ensina.

¹⁵ Dinatang la ring apulung sundalus a talapagdala nang armas Joab at pedurutnan de i Absalom; penabak de angga king mete ya.

¹⁶ Pepatiup neng Joab ing trumpeta ban ituknang na ing pamakilaban at magbalik na ding sundalus na, inya tiknangan da lang tatagalan ding sundalus na ning Israel.

¹⁷ Kinua re di Joab ing bangke nang Absalom at kaybat bildug de king malalam a kulkul king kagubatan at saka re timbunan karing batu. Tinakas no man ding Israelita at minuli karing bale da.

¹⁸ Inyang mabie ya pa i Absalom, pepagawa yang metung a monumento king Kapatagan ning Ari, uling ala yang anak a lalaking papanatili king lagyu na. Pemalagyuan neng Monumento nang Absalom iting pepagawa na, at makanyan deng balu lagyu iting monumento angga ngeni.

¹⁹ Nganang Ahimaaz a anak nang Zadok kang Joab, Paintulutan yu ku sanang puntalan ke ing ari ban ibalita king linigtas na ne ning Ginu karing gamat da ring kalaban na.

²⁰ Nganang Joab, E mu daraptan yan ngeni. Ken nang aliwang aldo uling mete ya ing anak ning ari.

²¹ Inutusan neng Joab ing metung karing ipus a tau Cus ban ibalita kang David ing milyari. Dinuku ya ing ipus kang Joab, at kaybat meko neng pupulayi.

²² Mapilit ya i Ahimaaz at ngana kang Joab, Nanuman ing malyari paburen mu na ku sanang tukian ke ing ipus a tau Cus ban ibalita ku king ari ing milyari. Nganang Joab, Anak ko, obat kailangan ka pang mako? Ala na ka mang apala nung pabaluan me man ing ari.

²³ Nganang Ahimaaz, Mako ku mu rin nanuman ing malyari. Nung makanyan, nganang Joab, sulung mako na ka. Inya meko yang mamulayi i Ahimaaz; delanan ne ing Kapatagan ning Jordan at ligpusan ne ing ipus a tau Cus.

²⁴ Makalukluk ya kanita i David pilatan ning pasbul dalan king lual at ning pasbul dalan palub king siudad. Minukiat ya ing guardia king bantayan ning bubungan na ning pasbul dalan at karin ikit ne ing metung a lalaking mamulaying palapit king siudad.

²⁵ Pepabaluan ne ing ari tungkul king ikit na. Ngana ning ari, Nung magdili-dili ya ing taung ikit mu siguradung magdala yang balita. Palapit neng palapit king siudad ing lalaking mamulayi.

²⁶ Menakit ne namang aliwang lalaking pupulayi ing bante king bantayan. Inya inaus ne ing guardia king pasbul dalan ning siudad at ngana, Atin pang aliwang pupulaying papunta keti! Ngana ning ari, Magdala ya namang balita ing taung yan.

²⁷ Ngana ning bante king bantayan, King panakit ku ing mumuna kapamulayi neng Ahimaaz a anak nang Zadok. Nganang David, Mayap yang anak ing taung yan at magdala yang mayap a balita.

²⁸ Minaus ya ing dinatang a i Ahimaaz. Dinuku ya king arap ning ari at nganang migsalita, Masalese pu ing sabla-sabla. Purian ya ing Ginung kekong Dios uling dininan na kayung tagumpe karing taung mag-rebeldi laban kekayu, O Makamal a Ari.

²⁹ Komusta ya ing kayanakan a i Absalom? nganang kinutang ning ari. Pekibat nang Ahimaaz, Makamal a Ari, magugulu la pu inyang tinubud na kung Joab a talasuyu yu, oneng e ku pu balu nung nanu ita.

³⁰ Ngana ning ari, Keta na ka pa lumele. At miglele ya at migtahimik i Ahimaaz.

³¹ Datang ne man kanita ing ipus a Cusita at nganang sinabi, Makamal a Ari, magdala ku pung mayap a balita para kekayu. Linigtas na na kayu ning Ginu king upaya da ring sablang mag-rebeldi laban kekayu.

³² Ngana ning ari, Komusta ya ing kayanakan a i Absalom? Pekibat ning ipus a Cusita, Makamal a Ari, sana pu ing milyari ketang kayanakan a ita ya naman ing malyari karing sablang kalaban yu at mig-rebeldi laban kekayu.

³³ At bina yang melungkut ing ari. Menik ya at minta king silid a atyu babo ning pasbul dalan ning siudad at karin ya menangis. Nganang sinabi kabang papanik ya, O ing anak kong i Absalom! Ing anak ko, ing anak kong Absalom! Sana aku ing mete at aliwa ika. O Absalom, ing anak ko, ing anak ko!

19

¹ Ngana ning balitang miras kang Joab: Manangis ya at migpaldas i Aring David uling mete ya i Absalom.

² Inya ing tagumpe king aldong ita meging aldo ne ning kalungkutan, uling abalitan da ring tau king tune nang kelungkut ning ari ing pangamate nang Absalom a anak na.

³ Inya pasalikut lang minuli at linub ding sundalus king siudad. Marine lang mayakit uling balamu mo mesambut la king pamakilaban.

⁴ Tikpan ne ning ari ing lupa na at nganang menangis, O ing anak kong i Absalom! O Absalom, ing anak ko! fig,,,,,O ing anak kong i Absalom! O Absalom, ing anak ko!,(19:4)fig*

⁵ Pintalan neng Joab ing ari king bale na at ngana, Makamal a Ari, pemakarine yu la ngening aldong iti ding sabla yung tauan a migligtas kekayu at karing anak yung lalaki ampon babai, at migligtas munaman karing asawa yu at karing babaing kasese yu,

⁶ uling itang masama kekayu ya ing kaluguran yu at detang malugud kekayu ilang kasaman yu. Pepakit yu ngeni kekami king ikaming opisyal at talasuyu yu, ala keng kabaldugan kekayu. Ing akakit ku ngeni kekayu ya ing tumula kayu nung akit yeng mabie i Absalom at mete na ke man.

⁷ Lumual na kayu, Makamal a Ari, at pasiknangan yu la lub ding tauan tamu. Oyni daramdaman na ku ning Ginu, nung e yu daptan yan ngeni mu ring bengi ala nang manatili kekayu. Ing maging e mayap diling dugpa king bie yu ya ing lakuan da kayu kesa karing mabayat a problemang delanan yu inyang kayanakan kayu at angga na ngeni.

⁸ Inya tinalakad ya ing ari at linukluk lele ning pasbul dalan ning siudad. Lepitan de ring tauan na inyang abalitan dang atyu ya karin. Samantala, tinakas la at minuli ing metung at metung karing Israelita.

⁹ At mika pamipate karing sablang tribu ning Israel. Ngara, Linigtas na katamung Aring David karing gamat da ring kalaban tamu; ya munaman ing migligtas kekatamu karing gamat da ring Filisteo. Oneng ngeni, likuan ne ing bansa tamu uling tekasan ne i Absalom.

¹⁰ Oneng i Absalom, ing gewa tamung ari, mete ya king labanan. Ngeni, obat e tamu pikayarian ing papagbalikan ta ya i Aring David?

¹¹ Ing pisasabian a iti mikalat king mabilug a Israel at abalitan na namang David. Inya tinubud na la ring paring di Zadok at Abiatar ban ikutang karing manimuna ning Juda ing anti kaniti: Obat ikayu ing tauling diling mignasang ibalik ya ing ari king palasyu?

¹² Kamaganak da kayu, laman da kayu at daya; obat ikayu ing tauling diling mignasang ibalik yu ku?

¹³ Sinabi na namang David karing tubud king sabian da kang Amasa ing anti kaniti: Kamaganak da ka naman, Amasa. Manibat ngeni ika na ing pekapun da ring sablang sundalus at aliwa na i Joab. Paten na ku ning Dios, nung e tutu yan.

¹⁴ Ikua na la ngan pilubluban David ding sablang lalaki na ning Juda, at pepayabut da kang David ing anti kaniti: Mibalik na ka at ding sabla mung opisyal.

¹⁵ Inya mibalik ya i David. Inyang miras ne king Ilug ning Jordan seganan de ring lalaki na ning Juda a dinatang king Gilgal ban antabayanan de lipat ning ilug.

¹⁶ King oras mu ring ita memalagua yang minta king Jordan i Simei, ing Benjaminitang anak nang Gera ning Bahurim, ban sagana munaman kang Aring David;

¹⁷ kayabe na la ring metung a libung lalaki na ning tribu nang Benjamin. Dinatang ya naman i Ziba, ing ipus na ning pamilya nang Saul; kayabe na la ring labing limang anak nang lalaki at aduang pulung ipus. Atyu na la king Jordan bayu ya miras karin ing ari.

¹⁸ Lipatan de ing ilug ban antabayanan de ing ari at ding kayabe na, at tupad king nanumang iyutus na karela ning ari. Inyang malapit neng lumipat king ilug ing ari, migsakab ya arapan na i Simei a anak nang Gera

¹⁹ at nganang sinabi king ari, Makamal a Ari, kalinguan yu na pu sana ing e ustung gewa ku kekayu kanitang mamako kayu king Jerusalem. Ilako yu na pu sana king lub yu ing milyaring ita at e yu na bibilang pang kasalanan ku.

²⁰ Tatanggapan ku pu ing mikasala ku kekayu. Inya naman pu pekikuanan ku ing aku ing munang dili karing lahi nang Jose ban sagana kekayu.

²¹ Nganang Abisai a anak nang Zeruia, E ya wari sukat mate i Simei uling penagkasan ne ing linian na ning Ginu?

²² Pekibat nang David, Ikayung anak nang Zeruia, nanung matulid yu kaniting pisasabian? Ba't balu yu pa kanaku? Aku ing ari na ning Israel at alang sukat mate a Israelita king aldong iti.

²³ Kaybat ngana kang Simei, Pangaku ku keka king e ka mate.

²⁴ Sinagana ya naman kang Aring David i Mefiboset a apu nang Saul. Manibat na inyang meko ya ing ari angga na ngening mekapagbalik yang ligtas, e ya menos bitis o memalbas o menaliling piblas i Mefiboset.

²⁵ Inyang meko ya Jerusalem ban sagana king ari, kitnan ne. Nganang mengutang ning ari, Mefiboset, obat e ka tinuki kanaku?

²⁶ Nganang mekibat, Makamal a Ari, e makalingad ing pile ku. Pekisabian ke pu ing ipus ku ban isadia ne ing asnong saken ku ban atukian da kayu, oneng lininlang na ku.

²⁷ Sinira na ku pa pangatau kekayu. Mengari kayu king anghel ning Dios, inya ikayu pung bala king buri yung daptan kanaku.

²⁸ Karapatdapat ing paten la arapan yu ding miembru ning pamilya nang tata ku, makanyan man dininan yu kung oportunidad a maging kasulu yu king kekayung lamesa. Inya ala na ku pung matulid manigapu kekayu.

²⁹ Ngana ning ari, E na kailangan ing magsalita ka pa. Inari ku na king lub ku king pipitnan yu ikong aduang Ziba ing gabun nang Saul a ingkung mu.

³⁰ Nganang Mefiboset, Ibie yu na ngan pu kang Ziba. Makagyu na pu kanaku ing mekapagbalik kayung alang kasasagkulan.

³¹ Meko ya naman king Rogelim i Barzilai a tau Gilead ban saganan ne ing ari at antabayanan king pamandalakit na king Jordan.

³² Matua ne i Barzilai; walung pulung banua ne at dakal ya pibandian. Ya ing minie king sablang kailangan na ning ari inyang atyu ya Mahanaim.

³³ Ngana ning ari, Barzilai, tuki na ka kanaku king Jerusalem at e ra ka paburen karin.

³⁴ Nganang Barzilai, Matua na ku pu, Makamal a Ari, e na kailangan ing manuknangan ku Jerusalem.

³⁵ Walung pulung banua na ku; balu ku pa kaya ing mayap at ing e mayap? Apilasan ku pa kaya ing kakung kakanan ampon inuman? Damdaman ku pa kaya ing kanta da ring lalaki at babai? Maging pangabala ku mu pu kekayu, Makamal a Ari.

³⁶ Iyatad da na kayu mu pu angga king Jordan. E na kailangan ing ablasan yu ku pa.

³⁷ Paburen yu na ku mung muli ku keta kekami at karin na ku mate at mikutkut lele da ring kutkutan da ring pengari ku. Oyni pu ing anak kung i Kimham, ya pu ing sumuyu kekayu. Ya pu ing ituki yu, Makamal a Ari, at ikayu nang bala kang Kimham.

³⁸ Ngana ning ari, Nung makanyan, i Kimham ya ing ituki ku. E me pigaganakan, e ke paburen. Ibie ku ing nanumang aduan mu.

³⁹ Kanita dinalakit la king Jordan ding sabla at antimu rin ing ari. Kinaul ne i Barzilai at kaybat binendisyunan ne. At minuli ne keta karela i Barzilai.

⁴⁰ Dinalakit ya king Ilug ning Jordan ing ari at i Kimham. Kayabe na la namang dinalakit ding sundalus na ning Juda at ding kapitna karing sundalus na ning Israel. Tinaglus la king Gilgal.

⁴¹ Kaybat na nita, lepitan de ring sablang Israelita ing ari at ngara, Makamal a Ari, obat inunan da kami ring kamaganak ming taga Juda king pamanantabe king pamandalakit kekayu, karing tauan yu, at king pamilya yu king ilug?

⁴² Pekibat da ring tau Juda, Depat mi ita uling malapit kaming kamaganak ning ari. Ba't ikakamua yu ita? E na na ke man pakanan o upahan ning ari.

⁴³ Sinabi ra ding Israelita karing tau Juda, Maygit apulung besis ing karapatan mi king ari kesa kekayu. Obat maninsultu kayu ngeni kekami? Aliwa wari ikami ing minunang ginawang lakbang ban mibalik ya ing kekaming ari? Oneng maygit lang mataram magsalita ding tau Juda kesa karing tau Israel.

20

¹ Mipaintagun king atin kanitang alang kabaldugan a tau a milagyuan Seba. Anak neng Bikri king tribu nang Benjamin. Tiniupan ne ing trumpeta at kaybat nganang migsalitang masikan, Kabalen kung Israelita, ala tamung pangataid kang David! Ala tamung dake king anak nang Jese! Muli na kayu karing pibalebale yu!

² Inya likuan de ring lalaki na ning Israel i David, at i Seba a anak nang Bikri ya ing tikian da. Oneng menatili la kang David ding lalaki na ning Juda at inatad de angga king miras ya Jerusalem.

³ Inyang miras ne i David king palasyu na king Jerusalem, pekiduang na la ring apulung babaing kasese na a likuan na ban mag-asikasu king palasyu, at pepadala na la king metung a bale. Pepabante na la at at sinustentuan king kailangan da, oneng e na na la sipingnan. Karin la menatili angga king mete la deting apulung babai a mibiebieng anting mebalu.

⁴ Nganang Aring David kang Amasa, Ausan mu la ding lalaki na ning Juda at tipunan mu la arapan ku kilub ning atlung aldo. Sukat ka namang atyu kanita keti!

⁵ Inya meko ya i Amasa ban ausan na la ring lalaki na ning Juda, oneng e ya mekatupad ketang panaun a tikda ning ari.

⁶ Inya ngana ning ari kang Abisai, Mas maragul ing ibie nang problema kekatamung Seba kesa kang Absalom. Ituki mu la reng tauan ku at tagalan ye i Seba bayu na la asakup ding siudad tamung pakakuta o ing makatakas ya kekatamu.

⁷ Tinuki la kang Abisai ding tauan nang Joab, ding Kereteo, ding Peleteo, at ding aliwa pang sundalung melakuan king Jerusalem ban tagalan ya i Seba a anak nang Bikri.

⁸ Inyang miras na la ketang batung maragul ning Gibeon, seganan na lang Amasa. Susulud na kanitang Joab ing imalan a gagamitan na king pamakilaban, at atin yang makasabit a espada king babat na king awakan. Kabang lalapit ya menabu ya ing espada na.

⁹ Nganang Joab kang Amasa, Komusta ka kapatad? At telan ne balbas king wanan nang gamat ba neng uman i Amasa.

¹⁰ Oneng e ne apansinan Amasa ing espadang tatalnan nang Joab king metung nang gamat. Siksak neng Joab ing espada king atian nang Amasa at mibulus ing bituka na king gabun. E na ne pengaduan ing pamaniaksak na uling kanita mu rin mete ya i Amasa. Kanita i Joab at ing kapatad nang i Abisai sindu ra ing pamanagal da kang Seba a anak nang Bikri.

¹¹ Tinalakad ya siping ning bangke nang Amasa ing metung karing tauan nang Joab at ngana, Detang makapanig kang Joab at kang David tukian de i Joab!

¹² Atyu ing bangke nang Amasa king libutad ning dalan at mandilu ya king sarili nang daya. Tutuknang ya king paglakad na ing ninumang manakit king bangke. Apansinan na iti ning metung karing tauan nang Joab, inya ginuyud ne ing bangke at dela ne king marangle at tikpan neng imalan.

¹³ Inyang ala ne ing bangke king dalan, tikian da ne ring sabla i Joab king pamanagal kang Seba a anak nang Bikri.

¹⁴ Peindalanan na la ngang Seba ding sablang tribu na ning Israel at miras ya king Abel Bet Maaca, at mitipun la ngan ding sablang lahi nang Bikri at tikian de i Seba king paglub na king siudad.

¹⁵ Dinatang la ding tauan nang Joab at kibkuban de i Seba king siudad ning Abel Bet Maaca. Ginawa lang eran-eran a gabun ban miyukiat la king pader at penibag de ring aliwa ba yang mibagsak.

¹⁶ Kanita minaus ya ing metung a biasang babai karin at ngana, Pakiramdaman yu ku! Pakiramdaman yu ku! Sabian yu kang Joab king munta ya keni ba kaming makapipagsalita.

¹⁷ Minta ya i Joab at kitnan ne ning babai, Ika i Joab? Wa, aku i Joab, nganang mekibat. Ngana ning babai, Makiramdam ka king sabian ku. Makiramdam ku, nganang Joab.

¹⁸ Ngana ning babai, Masasabi kanitang minunang panaun ing anti kaniti: Paburen lang manintun payu king siudad nang Abel, at milunasan na kanita ing problema.

¹⁹ Metung ya karing payapa at tapat king Israel ing siudad ku. Mengari ya king metung a malugud a ima ning Israel. Obat buri meng lasakan ing mismung pibandian ning Ginu?

²⁰ Nganang Joab, E ku daptan ing anti kanyan. Ala kaming kapagnasan a lasakan ya ing siudad yu.

²¹ Magkamali ka king sinabi mu. Panintunan mi ya mu ing metung a taung manuknangan king bulubundukan ning Efraim. Ing lagyu na Seba, ing anak nang Bikri, at menimuna ya king pamag-rebeldi laban kang Aring David. Ibie ye kanaku ing lalaking iti, at kaybat mako na kami keting siudad. Ngana ning babai, Nung makanyan, iyatsa mi ya kekayu ing buntuk nang Seba lipat niting pader.

²² Kanita meko ya ing babai at pintalan na la ding kabalen na. Ginamit na ing kabiasnan na ban akua na la pilubluban. Inya tibtab de batal i Seba at kaybat inatsa re ing buntuk na kang Joab. Tiniupan ne ing trumpeta nang Joab ban lakuan da ne ring tauan na ing siudad, at kaybat minuli na la. Migbalik nia naman king Jerusalem at pintalan ne ing ari.

²³ I Joab ya ing matas dili katungkulan karing sablang sundalus ning Israel; i Benaia a anak nang Jeoiada ya ing mamahala karing grupu da ring Kereteo at Peleteo;

²⁴ i Adoniram ya ing mamahala king sapilitang pamagobra; i Jeosafat a anak nang Ahilud ya ing talatala;

²⁵ i Seba ya ing kalihim; i Zadok at i Abiatar ila ring pari;

²⁶ at i Ira a tau Jair ya ing pansarili nang pari ning Aring David.

21

¹ King panaun na ning pamag-ari nang David, mika maragul a danup king Israel kilub ding atlung banua. Inya sinanggunian ne ing Ginu. At ngana ning Ginu kang David, Mikasala yang pamakamate tau i Saul at ing pamilya na uling pepapate na la ring tau Gibeon. (

² E la Israelita ding memalen na ning Gibeon; ila ring mitagan karing Amoreo. Ila ring pengakuanan dang e ra paten ding Israelita, oneng buri na lang gisanan paten Saul uli na ning maragul nang katapatan karing memalen na ning Israel at Juda.)

³ Nganang kinutang Aring David karing memalen na ning Gibeon, Nanu ing buri yung daptan ku para kekayu? Nanu ing daptan ku ban mibayaran ing e ustung merapat kekayu at layun bendisyunan yu la ring memalen na ning Israel?

⁴ Pekibat da, E pu pilak o gintu ing makalunas king problema mi king meyangu-bie Saul at king pamilya na ni e mi nasa ing paten ya ing ninumang Israelita. Kitang nang David karela, Nung makanyan, nanu ing buri yung daptan ku para kekayu?

⁵ Pekibat da king ari, Buri na kami ngang paten ning lalaking i Saul at alang itagan metung man kekami ban lubus kaming mawala keti king Israel.

⁶ Paintulut yung miyabie la kekami ding pitung lalaking lahi nang Saul, at ibigti mi la king arapan na ning Ginu karin king Gibea, ing balen nang Saul a pinili nang ari ning Ginu. Ngana ning ari, Ibie ku la kekayu.

⁷ Oneng e ne binie karela i Mefiboset a apu nang Saul uli na ning pangakung pisiag da ri David at Jonatan king metung at metung.

⁸ Ding binie na ya ing metung a milagyuan munamang Mefiboset at i Armoni; mikapatad la reti at anak na lang Saul kang Rizpa a anak nang Aiya. Binie na la naman ding limang anak nang Adriel kang Merab. Anak neng Saul ing babaing i Merab at i Adriel naman anak neng Barzilai a tau Mehola.

⁹ Binie na lang David deting pitu karing tau Gibeon, at kaybat binitin da la king bunduk at mete la arapan na ning Ginu. Pete da la kanitang mumunang aldo na ning pamagumpisa ning pamamupul sebada.

¹⁰ Kanita i Rizpa a anak nang Aiya kinangwa yang saku ban gawan nang pagkambilan ketang batung maragul nung nu la karin ding bangke da ring anak na. Karin ya menatili angga na inyang mebaldug ing uran. Babanten na la aldo at bengi ding bangke ban e la mapangan karing ayup at karing animal a ganid.

¹¹ Mibalita kang David iting kabilian nang Rizpa a anak nang Aiya at babaing kasese ning meyangu-bie Saul.

¹² Inya meko ya i David at kinua no karing memalen na ning Jabes Gilead ding butul nang Saul at Jonatan a anak na. (Penako da la ring memalen na ning Jabes Gilead ding butul nang Saul at Jonatan karin Betsan nung nu da la binitin ding bangke ra inyang pete da la ring Filisteo king Gilboa.)

¹³ Kinua na la deting butul at ding butul da ring pitung pete ra king bunduk.

¹⁴ Kaybat kitkut da la ring butul nang Saul at ing anak nang i Jonatan king kutkutan nang Kis a makatua da karin king Zela sakup ning Benjamin. Metupad ing sablang inutus nang Aring David, at pekiramdaman na ning Dios ing panalangin da para king bansa.

¹⁵ Pasibayung mispak ing labanan pilatan da ring Filisteo ampon Israelita. Linage ya i David at ding tauan na ban arapan la ring Filisteo. Misan, penamdaman nang David ing pamangaina na ning katawan,

¹⁶ at ing higanting i Isbibenob migkapilit yang paten ne i David. Ibat ya i Isbibenob king lahi nang Refaim; atlu ya ampon kapitnang kilu ing tangsung tandus na at atin yang bayung espada.

¹⁷ Oneng seupan neng Abisai, ing anak nang Zeruia, i David, at pete ne ing higanting Filisteo. Inya pepangakuanan de ring tauan nang Aring David ing e ne sana tutuki karela king pamakilaban pota kawalan lang ari.

¹⁸ Kaybat na niting labanan, mika labanan na naman karing Filisteo karin king Gob. Keting labanan ne apateng Sebbacai a tau Husa ing higanting i Saf a lahing higanting Refaim.

¹⁹ Mika labanan na naman karing Filisteo karin king Gob. Keti ne apateng Elhanan, ing anak nang Jair ning Betlehem, ing higanting i Goliat a tau Gat. Kasing kapal ne ning pabakle na ning gagawang imalan ing pulu na ning tandus na.

²⁰ Kaybat na nita, mika labanan na naman king Gat. Ating higanti karing kalaban a ating anam a taliri karing gamat na at anam la naman ding karing bitis na. Inya adua lang pulu't apat heganagana ding taliri na. Ibat ya naman king lahing higanting Refaim.

²¹ Inamunan na la ding Israelita, at i Jonatan, ing anak nang Samma a kapatad nang Aring David, pete ne iting higanti.

²² Apate na lang David at ding tauan na deting apat a lahing higanti ning Gat.

22

¹ Kinta neng David iting kanta king Ginu inyang linigtas ne ning Ginu karing gamat nang Saul at karing aliwa na pang kalaban. Nganang migkanta:

² Kaku ing Ginu anti yang batung maragul a e mauugun; anti yang matibe pader a babie kaligtasan. Kaku ing Ginu anti yang batung maragul a e mauugun. (22:2)

³ Ing kakung Dios batu ya waring pagsantungan a mimingat kaku, at mengari yang kalasag kaku. Ya ing kakung talapagligtas; ingatan na ku at liligtas king karahasan.

⁴ Purian ya ing Ginu, at keya maus ku at miligtas ku karing sabla kung kalaban.

⁵ Kaku makapadurut na la ding alun ning kamatayan, lulumud da na ku king kalalaman.

⁶ Miras ku king bingit ning kamatayan; atyu na ku king oras ning kawakasan.

⁷ Kaniting gipit kung kabilian, ing Ginu ya ing kakung delungan; king templo na kakung siwala dimdam na, kakung saingsing miras king panamdam na.

⁸ Kanita ing yatu ginalgal ya, ding asias ning banua meugun la, at minayun uling mua ya.

⁹ King arung na asuk ing linual, at king asbuk na aping mikakalabkab; ya ing panibatan ning mibabayang uling.

¹⁰ Pepadukuan ne ing banua at saka ya tinipa, king makapal a ulap karin la makatuklu ding bitis na.

¹¹ Sinake ya ketang kerubin, at mabilis sinulapo makasake karing pakpak ning angin.

¹² Gewa neng pampan na ing dalumdum, at ing gewa nang tolda ya ing ulap a matuling a magdalang uran.

¹³ King salang maslag a atyu arap na bayang uling milalablab la.

¹⁴ Ibat banua duldul ing kalupa na inyang migsalita ya ing Dios a Mayupaya.

¹⁵ Bignus na lang paslu na, at kalaban mikalat la; king kislap ning kildap misambulat la.

¹⁶ Ing kalalaman ning dagat linto ya, at ding asias ning yatu meyakit la, inyang sebianan na lang kalaban na king mua na.

¹⁷ Ing Ginu tinando ya ibat banua, at saka na ku inabut, layun na kung sinaka ibat king kalalaman ning dagat.

¹⁸ Linigtas na ku king mayupaya kung kalaban; karing kalaban a mas masikan kaku.

¹⁹ Lisuban da ku king aldo ning kakung kabiguan; oneng iningat na ku ning Ginu.

²⁰ Liwal na ku't dela king malualas a lugal; linigtas na ku uling tutu na kung kaluguran.

²¹ Inablasan na ku ning Ginu uli ning kakung katuliran; dininan na kung galal uling malinis lang kakung gamat.

²² Ing utus ning Ginu kakung tiparan; e ke peinggulutan ing Dios.

²³ Kautusan na e ku la kelinguan, at kapilan man e ku la lebagan.

²⁴ Ala kung kapintasan king arapan na; apangilagan ku ing pamaniapat kasalanan.

²⁵ Inya ing Ginu inablasan na ku uli ning mayap kung dapat, uli ning malinis ku king arapan na.

²⁶ Ginu, tapat ka karetang tapat keka; karetang keka e magkulang, karela e ka naman magkulang;

²⁷ karing malinis, papakit mu ing kekang kalinisan, oneng karing e mayap, mabagsik na ka man.

²⁸ Liligtas mu la ding taung mapagpakumbaba, oneng ding palalu keka lang bababa.

²⁹ Ika, O Ginu, ing sulu ku, tatabi mung dalumdum king kakung daralanan.

³⁰ Uli mu sambutan ku lang kakung kalaban, at uli na ning kakung Dios pader kaku yang alundagan.

³¹ Iting Dios dapat na ganap la; ayasahan lang amanu na. Ing Ginu kalasag ya karetang magsantung keya.

³² Atin pa waring Dios nung e mu ing Ginu? Atin pa waring batung mabie nung e mu ya?

³³ Iting Dios ya ing matibe kung santungan; leko na ing panganib king kakung daralanan.

³⁴ Bitis ku gewa mong kasing bilis da ring king usa; tetagan mu kakung talakad karing lugal a matas.

³⁵ Gamat ku keka lang sinane king pamakilaban, at kaku yang ayabit agyang pana yang bakal.

³⁶ Kekang ingat kaku binie mu, at ing kekang saup degul na ku.

³⁷ Kakung daralanan keka yang pinatag, ban bitis ku e la mitalusad.

³⁸ Penagal ko ding kalaban, at simbut ku la ngan; e ku tinuknang anggang e ko agisan.

³⁹ Pete ku la ban e na la makabangun pa, at king kakung arapan miragsa la.

⁴⁰ Dirinan mu kung sikanan king kakung pamakilaban, at tagumpe karing kakung kalaban.

⁴¹ Kakung kalaban pepaurungan mo ngan; masama kaku, kaku la ngang gisan.

⁴² Linawe lang saup, oneng e la menakit; minaus la king Ginu, oneng e no pekibatan.

⁴³ Linaso ku la, at meging anti lang alikabuk; demusak ku lang anting burak karing dalan.

⁴⁴ Linigtas mu ku karing rebelding kakung tauan, at pepanatilian mung kaku lang pag-arian ding sablang balen; ding taung dayuan kaku la ngening sasakupan.

⁴⁵ Kabud damdaman da ku, agad lang mamintu; aliwang bansa gagalgal lang magsaria kaku.

⁴⁶ Dakal lang dayuan ding menimutla; gagalgal lang linual karing karelang kuta.

⁴⁷ Mabie ya ing Ginu! Purian ya ing mimingat kaku! Ipasiag ing kayapan ning mayupayang Dios a magligtas kaku!

⁴⁸ Ing Dios ya ing mablas karing kakung kalaban, at ding tau kaku na la pepailalam.

⁴⁹ Liligtas na ku karing kakung kalaban; karing kalaban pepagtagumpen na ku, segipan na ku karing tampalasan a tau.

⁵⁰ Inya libutad ding bansa, Ginu, ikang kakung purian, kekang lagyu kaku yang pagkanta.

⁵¹ Mangaragul a tagumpe ing babie na king ari na; papakitanan neng manatiling lugud ing pinili na, i David, at ding lahi na king kapilan pa man.

23

¹ Anak neng Jese i David, ing lalaking gewa nang marangal ning Dios, ing lalaking pinili na ning Dios nang Jacob ban maging ari. I David munaman ing sinulat karing mangalagung kanta para king Israel. Ila deti ring katataulian nang amanu:

² Magsalita ya ing espiritu ning Ginu king kapamilatan ku; atyu ya king dila ku ing amanu na.

³ Migsalita ya ing Dios ning Israel; ngana kaku ning mimingat king Israel, Ing ari a mamahalang alang pamangabiran, at ating takut king Dios,

⁴ kawangis ne ing sala ning munag sumala, kalupa ne ing aldo saslag neng panaun a alang ulap, anti ya king uran a patubu karing tanaman.

⁵ Makanyan neng bendisyunan ning Dios ing kakung pamilya, uling kaku ginawa yang kasunduan at iti manatili ya, inayus na ing heganagana at ing sabla pekatibe na. Ita ya ing kakung kapagnasan; kakung tagumpe king Dios manibatan.

⁶ Oneng ding taung alang dios anti lang suksuk a iyugse na kabud; e mo atalan king kekang gamat.

⁷ Ban keka lang atalan kailangan ing gumamit kang kasangkapan a bakal o sundang, kanita keka na lang silaban.

⁸ Oreti ding lagyu da ring pikabaluan a sundalus nang David: ing mumuna ya i Joseb Bassebet a tau Takemon; ya ing manimuna da ring Atlu. Misan, mekilaban ya karing walung dalan a kalaban, at apate no ngan kanita mu rin king kapamilatan na mu ning metung a tandus.

⁹ Ing kadua ya i Eleazar, ing anak nang Dodo at apu nang Ahohi. Ya ing kayabe nang David inyang inamunan na la ring Filisteong makasadia nang makilaban. Minatras la ring Israelita,

¹⁰ oneng ya ali ya at lebanan na la ring Filisteo angga king mepata ya ing gamat na, at e na ne abili ing espada na. King aldong ita ikua ning Ginu ing maragul a tagumpe. Mibalik la kanita ding Israelita nung nu ya karin i Eleazar at kinua ra ing nanumang akua ra karing kalaban a apate na.

¹¹ Ing katlu ya i Samma, ing anak nang Agee a tau Harar. Mitipun-tipun la kanita king Lehi ding Filisteo nung nukarin ating marangle a mitmung tanam a bule. Tinakas la ring Israelita karing Filisteo,

¹² oneng i Samma ali ya. Lebanan na la karin king libutad ning marangle, at apate na la ding Filisteo. King aldong ita ikua ning Ginu ing maragul a tagumpe.

¹³ Panaun na kanita ning pamamupul, ding atlu karing Atlung Pulu minta la kang David a atyu kanita king kueba ning Adulam. Makatipun ne man kanita ing tropa da ring Filisteo king Kapatagan ning Refaim.

¹⁴ Atyu ya kanita i David king kutang matibe kabang atyu no man makakampu king Betlehem ding Filisteo.

¹⁵ Uli na ning kasabikan nang makauli keta karela asabi nang David ing anti kaniti: Sana makainum ku king danum a ibat king talaga a atyu lele ning pasbul dalan ning Betlehem!

¹⁶ Inya ginawa lang paralan ding atlung matapang a lalaki ban alusutan da la ring Filisteong kalaban, at menikua lang danum ketang talaga a atyu lele ning pasbul dalan ning Betlehem. Binie ra iti kang David, oneng e na ininum, nune bilus na iti king gabun bilang ain king Ginu.

¹⁷ Nganang David, O Ginu, e ku ainum iti, uling nung inuman ku anti ku nang ininum ing daya da reting lalaki a teya ra ing bie ra! Inya e na ininum. Makanyan mekilala ing depat dang katapatan ding atlung matapang a sundalus nang David.

¹⁸ Ing tutuki ya i Abisai a kapatad neng Joab at i ima ra ya i Zeruia. Ya ing manimuna da ring Ding Atlung Pulung Pikabaluan a Sundalus. Lebanan na la ring atlung dalan a kalaban at apate na la king kapamilatan na mu ning tandus na. Meging pikabaluan ya karing Atlung Pulu a panimunan na.

¹⁹ Ya ing pikabaluan dili karing Atlung Pulu at ya ing meging manimuna ra. Mu pin e ya maygit pikabaluan karing Atlu.

²⁰ Pikabaluan ya namang sundalus i Benaia, ing anak nang Jeoiada ning Kabzeel. Dakal ya depat a katapangan. Ya ing mekapate karing aduang matapang nang sundalus ning Moab. Misan a aldo mumuran yelu, dinulung ya king metung a kulkul at pete ne ing leon.

²¹ Ya naman ing mekapate king metung a lalaking maragul a tau Ehipto. Makasandata yang tandus iting tau Ehipto, at lisuban neng Benaia agyang palupalu ya mu ing tatalnan na. Asamsam ne ing tatalnan nang tandus ning taung maragul, at ya ing ginamit nang Benaia king pamakamate keting tau.

²² Ila deti ring depat nang katapangan Benaia, ing metung karing pikabaluan a Atlung Pulu.

²³ Maygit ya karela ngan, mu pin e ya maygit pikabaluan karing Atlu. Ya ing gewa nang David a mamahala karing sundalung guguardia king ari.

²⁴ Ding aliwang kayabe king grupu da ring Atlung pulu ila reti: i Asael a kapatad nang Joab; i Elhanan a anak nang Dodo ning Betlehem;

²⁵ i Samma at i Elika a parehung tau Harod;

²⁶ i Helez, ing tau Pelet; i Ira, ing anak nang Ikes ning Tekoa;

²⁷ i Abiezer, ing tau Anatot; i Mebunai, ing tau Husa;

²⁸ i Zalmon, ing tau Aho; i Maharai, ing tau Netofa;

²⁹ i Heleb, ing anak nang Baana ning Netofa; i Ittai, ing anak nang Ribai ning Gibea ning Benjamin;

³⁰ i Benaia, ing tau Piraton; i Hidai, ing taung ibat karing kapatagan lele ning Gaas;

³¹ i Abialbon, ing tau Araba; i Azmavet, ing tau Bahurim;

³² i Eliaba, ing tau Saalbon; ding anak nang lalaking Jasen; i Jonatan;

³³ i Samma, ing tau Harar; i Ahiam, ing anak nang Sarar ning Harar;

³⁴ i Elifelet, ing anak nang Ahasbai ning Maaca; i Eliam, ing anak nang Ahitofel ning Gilo;

³⁵ i Hezro, ing tau Carmel; i Paarai, ing tau Arabia;

³⁶ i Igal, ing anak nang Natan ning Zoba; i Bani, ing tau Gad;

³⁷ i Selek, ing tau Ammon; i Naharai, ing talapagdala king baluti nang Joab a anak nang Zeruia; tau ya Beerot;

³⁸ i Ira at i Gareb, ding tau Jatir;

³⁹ at i Uria, ing Hiteo. Atlu lang pulu't pitu heganagana ing bilang da.

24

¹ Pasibayung mikaluku ing mua ning Ginu king Israel, at ginamit ne i David ban parusan na la ring memalen na. Ngana, Bilangan mu la at ilista bilang ding memalen na ning Israel at Juda.

² Inya inutusan neng Aring David i Joab at ding aliwa pang opisyal da ring sundalus. Ngana karela, Puntalan yu la ding sablang tribu na ning Israel manibat king Dan angga Beerseba at gawa kayung sensus ban abalu ku ing bilang da ring memalen.

³ Nganang Joab, Mananu na sanang lalu na lang parakalan ning Ginung kekong Dios ding memalen at akit da sa ding mata yu iti. Obat buri yung mabilang la ring memalen?

⁴ Oneng ing buri ning ari ya ing mepalyari, inya memintu ya at ding kalupa nang opisyal ban bilangan la ding memalen na ning Israel.

⁵ Lipatan de ing Ilug ning Jordan at migkampu la king dane mauli ning Aroer, ing siudad a atyu libutad ning kapatagan king sakup ning Gad. Manibat karin minta la king dane norti papunta king Jazer.

⁶ Kaybat da karin, minta la king Gilead at king Kades, ing gabun da ring Hiteo. Manibat karin minta la king Dan at kaybat minta la king albugan papunta Sidon.

⁷ Kaybat na nita, minta la king makakutang siudad ning Tiro dane mauli, at tinaglus la karing siudad da ring Heveo at Cananeo. Ing katataulian a lugal a pintalan da ya ing Beerseba, king dane mauli ning Juda.

⁸ Libutan de ing mabilug a bansa kilub ding siam a bulan at aduang pulung aldo, at kaybat mibalik na la king Jerusalem.

⁹ Minie yang ulat i Joab kang Aring David tungkul king bilang da ring memalen a mitala. Walu lang dalan a libu ding sundalus king Israel at makasadia lang makilaban; lima no mang dalan a libu ding king Juda.

¹⁰ Oneng meligalig ya i David kaybat neng abalu ing sensus da ring memalen. Nganang David king Ginu, Maragul ing depat kung kasalanan uli na ning merapat a pamagsensus. O Ginu, patawaran mu ku sana king depat kung kamangmangan.

¹¹ Inyang migising ne itang kabukasan, dinatang kang David ing mensahi na ning Ginu king kapamilatan na ning propetang i Gad, ing propeta nang David. Ngana kang David,

¹² Puntalan me i David at sabian mu ing anti kaniti: Atlung bage ing yapag ku keka. Mamili kang metung mu kareti at iti marapat keka.

¹³ Pintalan neng Gad i David at sinabi na itang pasabi na ning Ginu. Nganang mengutang, Danup king bansa kilub ding atlung banua o atlung bulan kang salasalikut karing kekang kalaban o atlung aldo salut king bansa mu? Pakaisipan yu iting bage nung isanu ing ibie kung pakibat king Ginung mitubud kanaku.

¹⁴ Nganang David, E ku balu ing daptan ku. Anti na ning malunusan ya ing Ginu, ya na ing balang mamarusa kekatamu kesa king ding memalen ilang mamarusa kanaku.

¹⁵ Inya peparala yang salut a makamate karing tau king mabilug a Israel a megumpisa king aldong ita angga ketang aldo a mitakda. Pitung pulung libu la ring taung mete.

¹⁶ Migbayu ya isip ing Ginu inyang malapit na na lang pamuksan a bie ning anghel ding memalen na ning Jerusalem. Ngana king anghel, Tuknang na ka. E mu na tataglus pa! Atyu kanita ing anghel king pidadaran nang Arauna a Jebuseo.

¹⁷ Nganang David king Ginu inyang ikit na lang pamaten na la ning anghel ding memalen, Aku ing mikasala. Tune e mayap ing depat ku. Ala lang kasalanan deting tau. Aku at ing pamilya ku ing parusan yu.

¹⁸ At king aldong ita pintalan neng Gad i David at sinabi na, David, munta ka king pidadaran nang Arauna at gawa kang altar para king Ginu.

¹⁹ Inya memintu ya i David king utus ning Ginu at minta ya kang Arauna, antimo ing sinabi nang Gad.

²⁰ Inyang matyo ya i Arauna ikit neng palapit i Aring David at ding opisyal na. Seganan na la at pekaduku na king ari bilang pamamie galang.

²¹ Nganang mengutang Arauna, Makamal a Ari, ba't mipasyal kayu keti? Pekibat nang David, Mipasyal ku keti ban saliwan ke ing lugal ning pidadaran mu ban pitalakaran keng altar para king Ginu. Kanita tuknang na ing makamate salut karing tau.

²² Nganang Arauna kang Aring David, Kuanan yu pu ing buri yu at iyain king Ginu itang isipan yung karapatdapat. Oren pu deng baka at dutung a gagamitan kung pamandara ampon ding paud a malyari yung gamitan panangab.

²³ Babie ku ngan pu yan kekayu, Makamal a Ari. Mananu na sanang tanggapan na ning Ginung kekayung Dios ing kekayung ain.

²⁴ Nganang Aring David, Bayaran ku ngan yan, Arauna. E ku mamain ain-a-durulukan king Ginung kanakung Dios a e ku ginastus. Inya beyaran neng David ing lugal a pidadaran at ding baka king alagang limang pulung pirasung pilak.

²⁵ Kaybat na nita, pepagawa yang altar para king Ginu, at karin na la inain ding ain-a-durulukan ampon ding ain-pamisulusulu. Inya pekiramdaman na ning Ginu ing panalangin na at mewala ing salut a makamate karing memalen na ning Israel.