1

¹ King Ramataim-Zofim, karin king bulubundukan a sakup ning Efraim, ating metung a taung milagyuan Elkana. Anak neng Jeroham at ding makatua na ila di Elihu, Tohu, at ing Efrateong i Zuf.

² Adua ya asawa: Ana ya lagyu ing metung at i Penina ing kadua. Mikayanak ya kang Penina, oneng ali ya kang Ana.

³ Balang banua pupunta ya i Elkana king Silo ban samba at miyain ain-sakripisyu king Ginung Mayupaya. Ding adua nang anak Eli, di Ofni at Fineas, susuyu la karin bilang pari.

⁴ Potang miyain yang ain-sakripisyu i Elkana darakayanan ne i Penina at ding sabla nang anak a lalaki at babai;

⁵ oneng agyamang kaluguran ne i Ana metung ya mung dake ing babie na uling ala yang anak.

⁶ Parati neng pamakarine ning karibal nang i Penina.

⁷ Gagawan nang Penina iti balang banua neng pupunta la king bale ning Ginu. Inya manangis ya i Ana at e bisang mangan.

⁸ Nganang Elkana a asawa na, Ana, obat manangis ka at e mamangan? Obat malungkut ka? E ku wari maygit karing apulung anak a lalaki para keka?

⁹ Misan, kaybat dang mengan karin Silo, tinalakad ya i Ana. Ing paring i Eli naman makalukluk ya lele na ning pasbul ning bale ning Ginu.

¹⁰ Tutung mabayat ing panamdaman nang Ana. Menalangin ya king Ginu kabang manangis yang kapait-paitan.

¹¹ Nganang ginawang panata, O Ginung Mayupaya, nung pakiramdaman yu ku, nung saupan yu ku at dinan metung a anak a lalaki, italaga ke kekayu kabang bie na at e ke paputut a buak.

¹² Pagumasdan na ne man palang Eli i Ana kabang manalangin ya.

¹³ Gagalo ya labi oneng ala yang daramdaman i Eli king sasabian na uling manalangin ya king pilubluban na; inisip nang Eli king malasing ya.

¹⁴ Inya nganang Eli, Angga pa kapilan ing alben da kang malasing? Muli na ka ban milako ka lasing! fig,,,,,Angga pa kapilan ing alben da kang malasing?,(1:14)fig*

¹⁵ E ku pu malasing, nganang Ana. E ku miminum alak o nanumang inuman a makalasing.

¹⁶ E yu sa isipan ing ala kung kwentang babai; bubugnus ku mu king Ginu ing sakit ning lub ku.

¹⁷ Nganang Eli, Muli na kang payapa at sana ibie na keka ning Dios ning Israel ing aduan mu.

¹⁸ Pasalamatan ku pu ing ganaka yu kanaku, nganang Ana. Kaybat minuli ne. Mengan ya at mayan ne panamdaman.

¹⁹ Kabukasan, maranun yang migising i Elkana at ing pamilya na at sinamba la king Ginu; kaybat mibalik na la king bale ra karin Rama. Sipingnan neng Elkana ing asawa nang i Ana, at pekiramdaman na ning Ginu ing aduan na.

²⁰ Mebuktut ya i Ana at beit ne ing metung a anak a lalaki. Samuel ing lagyung binie na king anak uling ngana, Binie ne ning Ginu kanaku.

²¹ E ya tinuki i Ana inyang minta ya i Elkana at ing mabilug nang pamilya ban miyain king ain-sakripisyung yayain na balang banua at ban tupad king pangaku na. Ngana king asawa na, Ituki ke ing anak arapan ning Ginu potang miyawat ne, at karin ne manuknangan kabang bie na.

²²

²³ Nganang Elkana, Gawan mu ing nanumang isipan mung mayap daptan. Panayan mu neng miyawat ing anak. Saupan na ka sanang makatupad ning Ginu king pangaku mu. Makanyan yang e tinuki i Ana, at sinese ne ing anak na angga na king inawat ne.

²⁴ At inyang ayawat na ne, tiki ne king Silo. Migdala yang metung a torong atlung banua tua, atlung pulu't anam a litrung arina at metung a lulanan a ating alak; at dela ne ing anak na king bale na ning Ginu karin king Silo agyamang anak ya pa mu.

²⁵ Kaybat deng kinatat ing toro dela re ing anak kang Eli.

²⁶ Nganang Ana, Mayalang galang na ku mo pu, aku pu itang babaing makatalakad siping yu at menalangin king Ginu.

²⁷ Oyni pu ing anak a inawad ku king Ginu; pekiramdaman na pu ing inawad ku.

²⁸ Ngeni aku naman pu babie ke king Ginu; kabang mabie ya, suyuan ne pu ing Ginu. At simban de karin ing Ginu.

2

¹ Nganang menalangin Ana: Matula ku uli ning Ginu; uli na migtagumpe ku. Ngeni kaylian ku la ding kakung kalaban; matula ku uling linigtas na ku ning Ginu.

² Alang aliwang banal nune mu ing Ginu; alang aliwang batung santungan a kalupa na ning kekatamung Dios.

³ Tuknang na kong magsalitang kayabangan, e yu na paramdam pa ing kekong ketasan; ing Ginung Dios ya'ng makibalu king sabla, at ya ing manatul karing dapat ning tau.

⁴ Simbut na la ding mayupaya, oneng pasiknangan na la ding maina.

⁵ Detang mabsi ila naman ngening makiupa ba lang mangan kabang ding danupan ngeni mabsi no man. Pitu ya ayanak ing babaing baug, at magdusa ya ing babaing dakal a anak.

⁶ Ing Ginu ya ing kakua king bie, at babie bie; malyari na katamung paten at malyari na katamung biayan.

⁷ Malyari na kang gawan kalulu o mabandi; malyari na kang ibaba o itas.

⁸ Itatas na la kabilian ding kalulu, at liligtas na la ding atyu king pamangailangan; pakiluklukan na la karing marangal a tau, at babie ne karela ing marangal a tronu bilang karelang mana. Ding pundasyun ning yatu king Ginu la, at babo ra telakad ne ing yatu.

⁹ Ingatan no ning Ginu ding tapat, oneng ding e mayap mate la libutad ning karalumduman. E na sa pangara ning tau ing sikanan na.

¹⁰ Paten no ning Ginu ding kalaban na, karin banua duldul ya karela. Atulan ne ning Ginu ing mabilug a yatu; pasiknangan ne ing ari na, at papagtagumpen ne ing pinili na.

¹¹ Kaybat na nita, minuli ya i Elkana at ing mabilug nang pamilya karin Rama. Oneng likuan de i Samuel ban sumuyu king Ginu lalam nang pamanibalang Eli, ing pari.

¹² E la mayap ding anak nang Eli; ala lang galang king Ginu.

¹³ Oyni ing maralas dang gagawan ding pari karing tau: neng atin taung magdalang animal a iyain da, datang ya ing utus-utusan na ning pari kabang pabukal de ing karni. Magdaladala yang metung a tinidor a maki atlung panusuk.

¹⁴ Tutusuk ne iti kilub ning maragul a kaldera o king isanu mang pipaglutuan. Para king pari ing sablang atutusuk na ning tinidor. Makanyan ing daraptan da karin Silo neng pupunta la karin ding sablang Israelita.

¹⁵ Ing tutu na niti bayu pa meduluk ing taba, datang ne ing utus-utusan na ning pari at ngana king taung miyayain ain-sakripisyu, Ibie yu na ing dake nang karni ning pari ban inangnang na uling e na tanggapan kekayu ing karning mipabukal na; buri na itang sagiwa pa.

¹⁶ At nung sakaling makibat ya king sukat pa mung dulukan ing taba at kaybat malyari na nang kuanan itang buri da, sabian na ning utus-utusan na ning pari, Ali, ngeni mu na ibie; nung ali kuanan kung sapilitan iti.

¹⁷ Tutung maragul ing pamikasala ra deting kayanakan a anak nang Eli king arapan na ning Ginu; e ra no gelangan man ding ain king Ginu.

¹⁸ Susuyu ya i Samuel king bale ning Ginu; makabigkis ya king awakan na ing metung a imalan a linen.

¹⁹ Gagawa neng imalan ima na balang banua at babie ne kang Samuel neng pupunta la ilang miyasawa king bale ning Ginu ban miyain king panata rang ain-sakripisyu balang banua.

²⁰ Bibendisyunan na no mang Eli i Elkana at ing asawa na. Ngana, Dinan na ka pa sanang anak ning Ginu king babaing iti bilang kalibe ketang penata na king Ginu. Kaybat na nita muli na la.

²¹ Melunus ya ing Ginu kang Ana at mebuktut ya, at mikayanak ya pang atlung lalaki at aduang babai. Ing anak a Samuel naman meragul yang susuyu king Ginu. fig,,,,,Gagawa neng imalan ima na balang banua.,(2:19)fig*

²² Matua ne i Eli at dimdam na ing sablang daraptan da ring anak na karing sablang Israelita pati na ing pamakilaguyo ra karing babaing susuyu king pasbul palub king Toldang tuknangan ning Ginu.

²³ Nganang Eli karela, Obat gagawan yu ing makanyan? Belita da kanaku ding sablang tau ing e mayap yung pamamaniaptan.

²⁴ Tuknangan yu na ing gagawan yu, anak ko! Matsura ing babalita na ning balen ning Ginu tungkul kekayu.

²⁵ Nung mikasala ya ing metung a tau king kalupa nang tau, malyari yang mamilatan karela ing Ginu; nung ing metung a tau mikasala ya king Ginu, ninu ing mamilatan para king taung ita? Oneng e la rin mekiramdam kang tata ra; buri na ning Ginu ing mate la.

²⁶ Meragul ne mang pibuburian na ning Ginu at ding tau i Samuel.

²⁷ Misan a aldo lepitan ne ning metung a propeta i Eli. Ngana, Oyni ing sasabian na ning Ginu: Pepakilala ku ing sarili ku king pamilya na ning penibatan mu inyang atyu la pa karin Ehipto bilang ipus na ning ari ning Ehipto.

²⁸ Karing sabla nang tribu ning Israel pinili keng maging kanakung pari ban mangasiwa king kanakung altar, duluk insenso, at magdala king efod arapan ku; at king pamilya ning penibatan mu karin ku la tituk ding sablang ain-a-durulukan a idala da ring Israelita.

²⁹ Obat mangasungasub kayu karing animal a yayain da at aliwa pang ain a inutus kung iyain da kanaku? Papaygit mo pa yata kanaku ding anak mu? Lawan mu pataban yu ing sarili yu karetang pekapiling dake ra ding ain na ning balen kung Israel!

³⁰ Inya pakiramdaman mu ngeni ing pasabi na keka ning Ginu, ing Dios ning Israel: Kanitang milabas sinabi ku king ing pamilya mu at ing pamilya nang tata mu ilang sumuyu kanaku angga king alang angga, oneng ngeni e na makanyan. Ding parangalan ku ila mu detang parangal kanaku, at e ku la parangalan detang misasakuil kanaku.

³¹ Datang ing aldo ala kung itagan a kayanakan king pamilya mu at king pamilya nang tata mu; alang miras king ketuan king pamilya mu.

³² Akit yu king mitmung kapangaririan ding sablang mibie a bendisyun king Israel, oneng alang miras king ketuan king pamilya mu.

³³ Paintulutan ku lang sumuyu ding mapilan mung lahi king kanakung altar angga na king mangalual la mata king katakawan da; oneng gisanan no ngan paten ning espada ding aliwa.

³⁴ Ing malyari karing adua mung anak a i Ofni at i Fineas magsilbing sinial para keka: mate la kilub ning patingapun.

³⁵ Oneng mamili kung metung a tapat a pari; gawan na ing sablang buri ku. Dinan keng metung a pamilyang sumuyu arapan na ning kanakung pinili angga na king alang angga.

³⁶ At puntalan de ring sablang mitagan king pamilya mu at magpakumbaba la arap na ban kanita mika upa la at makapanintunan la. Sabian da: Pakisabi mi sanang mayap ing dakayanan yu kami king obra da ring pari ba kaming atin apangan.

3

¹ Susuyu ya king Ginu ing anak a Samuel lalam nang pamamahalang Eli. Malagad ya mung magsalita ing Ginu kanitang panaun a ita; malagad mu ing mika ating vision.

² Misan a bengi makakera ya i Eli ketang lugal na king bale ning Ginu nung nu ya matudtud; mapula ne mata at halus e ne manakit.

³ E ya pa mitda kanita ing sulu king bale ning Ginu, at matudtud ya naman i Samuel king bale ning Ginu ketang lugal nung nu ya atyu ing Kaban ning Dios.

⁴ Kanita nganang minaus ning Ginu kang Samuel, Samuel, Samuel! Nanu pu ita? nganang mekibat.

⁵ At saka ya milaying minta kang Eli at ngana, Ausan yu ku po? Nanu pung buri yu? Pekibat nang Eli, E ra ka inaus; sulung matudtud na kang pasibayu. Meko ya at migbalik king pagkeran na.

⁶ Nganang pasibayung minaus ning Ginu, Samuel! Mibangun ya i Samuel at minta ya kang Eli at ngana, Ausan yu ku po? Nanu pung buri yu? Pekibat nang Eli, E ra ka inaus, anak ko; sulung matudtud na kang pasibayu.

⁷ E ne pa kanita kakilalang Samuel ing Ginu, uling e ne pa akasabi ing Ginu.

⁸ King katlung besis inaus na ne naman ning Ginu i Samuel. Mibangun ya iti at minta ya kang Eli at ngana, Ausan yu ku po? Nanu pung buri yu? Kanita na aintindian Eli king ing Ginu ya ing mamaus king anak.

⁹ Inya nganang Eli kang Samuel, Sulung, matudtud na ka, at nung ausan na ka, oyni ing ipakibat mo, Magsalita kayu, Ginu, at makiramdam ya ing talasuyu yu. Meko ya i Samuel at saka ne metudtud.

¹⁰ Dinatang ya ing Ginu at lepitan ne i Samuel; inaus ne kalupa ning gewa na. Ngana, Samuel, Samuel! Magsalita kayu, Ginu, at makiramdam ya ing talasuyu yu, nganang mekibat Samuel. fig,,,, ,Magsalita kayu, Ginu, at makiramdam ya ing talasuyu yu.,(3:10)fig*

¹¹ Kanita ngana ning Ginu kang Samuel, Atin kung malapit nang daptan king Israel at tune lang mitakutan ding makaramdam kaniti.

¹² King aldong ita daptan ku ing sablang sinabi kung daptan laban king pamilya nang Eli.

¹³ Sabian mu kang Eli king atulan ke ngeni at king kapilan man ing pamilya na uli na niting kasalanan. Agyang balu na lang lalapastangan kanaku ding anak na, makanyan man e na la peniabianan.

¹⁴ Uli na niti, susumpa ke ing pamilya nang Eli at king ala nang ain-sakripisyu o nanumang ain a makapamayad king kasalanan na.

¹⁵ Metudtud yang pasibayu i Samuel angga na itang abak. Pangayabak biklat na la ding pasbul na ning bale ning Ginu. Tatakut neng sabian kang Eli ing ikit nang vision,

¹⁶ oneng pepayaus neng Eli i Samuel. Ngana, Samuel, anak ko! Nanu pu ita? nganang mekibat.

¹⁷ Nanung sinabi na keka ning Ginu? nganang mengutang Eli kang Samuel. Ala ka sanang sasalikut kanaku, ne! Parusan na ka sana ning Dios nung sakaling atin kang isalikut kanaku agyang metung mu mang amanu king sablang sinabi na keka!

¹⁸ Kanita sinabi na ngan Samuel ing sinabi na ning Ginu; ala yang linihim kang Eli. Nganang Eli, Ita mung matulid ya ing gawan na ning Ginu.

¹⁹ Meragul ya i Samuel; antabayanan ne ning Ginu at mipatutuan ing sablang sinabi na.

²⁰ At balu na ning mabilug a Israel manibat karin Dan angga Beerseba king propeta ne ning Ginu i Samuel.

²¹ Sindu na ning Ginu ing pamipakit na karin Silo; pepakilala na ing sarili na kang Samuel karin king kapamilatan na ning amanu na. Potang magsalita ya i Samuel, ing mabilug a Israel makiramdam ya.

4

¹ Misan mekilaban ya ing Israel karing Filisteo; migkampu la malapit Ebenezer samantalang migkampu no man Afek ding Filisteo.

² Kaybat selese da la ring Filisteo ding sundalus da para king labanan. Tutung mabagsik ing pamilaban da; mesambut ya ing Israel karing Filisteo at kematen lang apat a libu karing karelang sundalus.

³ Inyang mekayatras na la ding sundalus king karelang kampu, ngarang sinabi ding makatuang manimuna na ning Israel, Obat peintulutan na katamung mesambut ning Ginu karing Filisteo king aldong iti? Mayap pa kuanan ta ya ing Kaban ning Kasunduan ning Ginu king Silo ban akayabe ta ya king labanan, at iligtas na katamu king upaya ra ding kekatamung kalaban.

⁴ Makanyan lang mitubud tauan da king Silo, at kinua de reti ing Kaban ning Kasunduan ning Ginung Mayupaya a makatronu king babo da ring kerubin. Tinuki la king Kaban ning Dios ding adua nang anak Eli, i Ofni at i Fineas.

⁵ Inyang miras ne ing Kaban ning Ginu king kampu, kinulisak yang masikan king tula ing mabilug a Israel angga na king kinurug ya ing yatu.

⁶ Dimdam da ring Filisteo ing masikan dang kulisak at ngarang kinutang, Nanu kabaldugan ing dimdam tamung kulisak ibat king kampu ra ding Hebreo?

⁷ Mitakutan la ding Filisteo inyang abalu ra king miras ne king kampu ing Kaban ning Ginu. Ngara, Dinatang ya ing dios king kampu ra! Masambut ta na kanyan! Ala pang milyaring makanyan kekatamu.

⁸ Makalunus tamu! Ninung magligtas kekatamu king upaya na niting dios a mayupaya? Ya naman iti ing dios a pepagpang miyayaliwang salut karing tau Ehipto karin king disyerto!

⁹ E kayu masisira lub at magpakalalaki kayu, Filisteo! Nung ali maging ipus da kayu ding Hebreo nung makananu lang meging ipus yu. Magpakalalaki tamu at lumaban!

¹⁰ Mekilaban la ding Filisteo at mesambut la ding Israelita. Memanakas la king labanan at minuli ya bale na ing balang metung. Dakal lang tutu ding mete: atlu lang pulung libung sundalus na ning Israel.

¹¹ Abihag de ring Filisteo ing Kaban ning Dios; kayabe la karing mete ding adua nang anak Eli, i Ofni at i Fineas.

¹² Ketang aldong ita ating mekapulaying metung a taung tubu king lahi nang Benjamin a ibat king labanan at miras ya king Silo; gabak-gabak ya susulud at marinat ya.

¹³ Disnan neng makalukluk i Eli lele na ning dalan; manaya yang balita, uling pigaganakan ne ing Kaban ning Dios. At inyang mekalub ne ing tau king siudad at mekapamalita ne, kinulisak ya king takut ing mabilug a siudad.

¹⁴ Nganang mengutang Eli inyang dimdam na ing kulisak, Nanu ing kabaldugan na niting kulisak? Kanita agad neng belitanan niting tau.

¹⁵ Idad neng siam apulu't walung banua i Eli; halus e ne manakit.

¹⁶ Oyni ing belita na ning tau kang Eli, Aku pu itang karatang-datang pa mung ibat king labanan; ikua ku pung mekatakas. Nanung milyari, anak ku? nganang Eli.

¹⁷ Pekibat na ning memalita, Milayi ya pu ing Israel arapan da ring Filisteo at dakal lang mete karing tauan tamu; kabilang la kareti ding adua yung anak, i Ofni at i Fineas. At abihag de ring kalaban ing Kaban ning Dios.

¹⁸ Inyang dimdam nang Eli ing milyari king Kaban ning Dios, mituag ya king pangalukluk na lele na ning pasbul dalan ning siudad. Mepakli ya batal at mete ya uli na ning matua ne at mabayat ya. Meging ukum ne ning Israel i Samuel kilub ding apat apulung banua.

¹⁹ Miyaldo ne man kanita ing asawa nang Fineas. Mipanganak yang ala king oras inyang abalitan neng mebihag ing Kaban ning Dios at king mete ya naman ing katuangan nang i Eli at king mete ya king labanan ing asawa nang i Fineas.

²⁰ Inyang mamamate ya ngara ding babaing mamantabe, E ka tatakut; lalaki ya ing beit mung anak. Oneng e na la pekibatan; e ya bitasang bubulad.

²¹ Inaus neng Ikabod ing anak, ngana wari, Likuan na ne ning ligaya ning Dios ing Israel! uling mebihag ya ing Kaban ning Dios at uling mete ya ing asawa na at ing katuangan nang i Eli.

²² Ngana, Meko ne ing ligaya na ning Dios king Israel king pangabihag na ning Kaban ning Dios.

5

¹ Ibat king Ebenezer dela re ding Filisteo ing Kaban ning Dios karin Asdod.

² Linub de king templo ra at binili re siping na ning kikilalanan dang dios a i Dagon.

³ Kabukasan ning abak a maranun, ikit da ring memalen na ning Asdod king makaragsa ya at makasubsub i Dagon arapan ning Kaban ning Ginu. Telakad de at binalik king lugal na;

⁴ oneng kabukasan abak a maranun makaragsa ne naman at makasubsub i Dagon arapan ning Kaban ning Ginu. Putut ya buntuk at aduang gamat; pakakalat la lele na ning pasbul. Bukud mung ing katawan na ya ing mitagan.

⁵ Iti ya ing sangkan nung inya angga man ngeni ding pari nang Dagon at ding sablang lulub king templo nang Dagon e la tutuklu king lugal lele na ning pasbul ning templo nang Dagon karin Asdod.

⁶ Perusan na la ning Ginu ding memalen na ning Asdod at ding kasiping dang balen; mitubuanan lang tumor.

⁷ Ngara ding memalen na ning Asdod inyang akit da iti, E ya sukat manatili kekatamu ing Kaban ning Dios ning Israel uling mabayat ing parusa na kekatamu at king dios tamung i Dagon.

⁸ Atin lang tiburan a tau at pepatipun da la ring sablang ari da ring Filisteo at ngarang mengutang, Nanung gawan mi king Kaban ning Dios ning Israel? Ngarang mekibat, Padala ya ing Kaban ning Dios ning Israel karin Gat. Makanyan deng dela ing Kaban ning Dios ning Israel karin Gat.

⁹ Inyang miras ya karin, miparusan la naman ding tau karin at bina lang melingasngas. Mitubuanan lang tumor ding memalen karin; matua at anak.

¹⁰ Kaybat dela re ing Kaban ning Dios karin Ekron. Oneng ngara ding tau Ekron inyang miras ya karin ing Kaban ning Dios, Dela re ing Kaban ning Dios ning Israel kekatamu ban itamu naman ing papate ra king Dios ning Israel.

¹¹ Kanita ila man pepatubud la at tinipun ding sablang ari da ring Filisteo. Ngara, Ilako ye keni ing Kaban ning Dios ning Israel at ibalik ye king sarili nang lugal; nung ali mangamate ke ngan. Maragul ing takut da ring memalen king mabilug a siudad. Tatakut la king parusa na ning Dios;

¹² mengatadtad lang tumor detang e mete. Miras banua ing kulisak da.

6

¹ Pitu yang bulan atyu ing Kaban ning Ginu king bansa ding Filisteo.

² Kanita pepayaus da la ring Filisteo ding karelang pari at mamamanula at ngarang kinutang, Nanung gawan tamu king Kaban ning Ginu? Nanu ing parala tamu potang pabalik ta ya king sarili nang lugal?

³ Ngara, Nung pabalik ye ing Kaban ning Dios king Israel, papagdalan yeng regalu bilang bayad kasalanan. Kanita kumayap kayu, at akilala yu nung baket paparusan na kayu.

⁴ Nanu ne man ing regalu a padala tamu bilang bayad king kasalanan? ngarang kinutang ding tau. Pekibat da, Limang gintung tumor at limang gintung dagis agpang king kabilangan da ring ari da ring Filisteo, uling metung ya mu ing salut a digpa kekayu at karing ari yu.

⁵ Pakilupa yu la ding gintu karetang tumor at dagis a penibatan na ning salut yu; parangalan ye ing Dios ning Israel, pota ituknang na na ing parusa na kekayu, karing kikilalanan yung dios, at king bansa yu.

⁶ E yu apusan ing kesiasan dang buntuk ding tau Ehipto at ning ari da. E wari inyang parusan na nong e makanyan-kanyan pepaburen da lang meko ding Israelita?

⁷ Inya ngeni, magsadia kayung metung a bayung gareta at aduang bakang pasusu a e pa mirinan paud; ikulung yu la ding biserung pasusuan da at ding pakulyutan yu king gareta ila deting gaindung baka.

⁸ Kuanan ye ing Kaban ning Ginu at ibili ye king gareta, at ibili yu la lele na, kilub ning metung a baul, ding gintung bage a parala yu bilang pamayad king kasalanan yu. Kaybat palakaran yu lang dili ra ding baka; e yu la pataid kaninu man.

⁹ Kaybat magumasid kayu: nung taglus-taglus lang munta king Bet Semes a tuknangan da, kanita ing Ginu pin ing memarusa kekatamu; nung e la taglus-taglus karin, mipaintagun mu ita.

¹⁰ Makanyan ing gewa ra. Kinangwa lang aduang bakang pasusu ban mangulyut karing gareta, at saka ra la kilung ding karelang biseru.

¹¹ Binili re ing Kaban ning Ginu king gareta at itang baul nung nu la karin ding gintung tumor at dagis.

¹² Taglus-taglus lang minta Bet Semes ding baka. Tikian de ing matulid a dalan papunta karin, at e la man migliku-liku bandang wanan o kayli; gagaga la kabang dalan. Tikian da la ring ari da ring Filisteo angga king angganan na ning Bet Semes.

¹³ Papalutan da ring tau Bet Semes ing trigu ra king kapatagan. Inyang mipayatna la ikit de ing Kaban at metula la.

¹⁴ Miras ya ing gareta ketang asikan nang Josue ning Bet Semes. Ating metung a maragul a batu karin; pemakli ra ing dutung na ning gareta at inain da la bilang ain-a-durulukan ding baka king Ginu.

¹⁵ Kildas de ring Levita ing Kaban ning Ginu at ing baul a atyu siping na nung nu la karin ding gintung bage, at binili da la babo na ning maragul a batu. Minain lang ain-a-durulukan at aliwa pang ain-sakripisyu king Ginu ding memalen na ning Bet Semes king aldo mu ring ita.

¹⁶ Panakit da kaniti ding lima rang ari ding Filisteo, migbalik la king aldo mu ring ita karin Ekron.

¹⁷ Makanyan da lang pipartian ding gintung tumor a pepadala da ring Filisteo bilang bayad king Ginu tungkul king karelang kasalanan: ing metung para king Asdod ya, ing metung para king Gaza ya, ing metung para king Askelon ya, Gat, at Ekron.

¹⁸ Kasing dakal da la ring gintung dagis ding sablang siudad a sakup da ring limang ari a Filisteo; kayabe no kareti ding lugal a pakabakud pader at ding alang pader. Angga man king aldong iti atyu king asikan nang Josue karin Bet Semes itang batung maragul nung nu re timpak ing Kaban ning Ginu.

¹⁹ At pete no ning Ginu ding pitung pulung katau karing memalen na ning Bet Semes uling sinilip de ing Kaban ning Ginu. Menangis la ding tau panakit da king mete la ding kabalen da.

²⁰ Ngara ding memalen na ning Bet Semes, Ninu ing malyaring marap king Ginu, ing banal a Dios? Nukarin ta ya malyaring padala ing kaban ban milaut ya kekatamu?

²¹ Mitubud la king siudad na ning Kiriat Jearim. Pepasabi ra king binalik da ne ring Filisteo ing Kaban ning Ginu; inya malyari da neng kuanan.

7

¹ Dinatang la ding memalen na ning siudad ning Kiriat Jearim at kinua re ing Kaban ning Ginu, at dela re king bale nang Abinadab a atyu babo ning metung a bunduk-bundukan. Pinili re ing anak nang i Eleazar ban ya ing sikasu king Kaban ning Ginu.

² Malambat ya king Kiriat Jearim ing Kaban ning Ginu; manga adua yang pulung banua karin. Sinisi ya ing mabilug a Israel at mignasang migbalik lub king Ginu.

³ Nganang Samuel karing memalen na ning Israel, Nung talagang bisa kayung magbalik king Ginu king mabilug yung pusu, sukat yu lang ilako ding dios a dayuan at pati na i Astarte. Italaga yu ing sarili yu king Ginu at ya mung bukud ing suyuan yu. Kanita iligtas na kayu karing Filisteo.

⁴ Inya leko da la ring dios a dayuan at pati na i Astarte, at ing bukud da mung simban ya ing Ginu.

⁵ Kaybat nganang Samuel, Tipunan yu la ding sablang Israelita karin Mizpa at panalangin da kayu king Ginu.

⁶ Mitipun la karin Mizpa at sinaklu lang danum at saka ra bilus iti arapan na ning Ginu. Mig-ayunu la king aldong ita at sinabi ra, Mikasala kami king Ginu. (At i Samuel ya ing meging pamuntuk da ring Israelita karin Mizpa.)

⁷ Migsadia la ding ari da ring Filisteo ban makilaban king Israel inyang abalitan da king mitipun la ding Israelita karin Mizpa. Mitakutan la ding Israelita karing Filisteo inyang abalitan da iti,

⁸ at sinabi ra kang Samuel, E yu ke sana paburen. Maus kayung alang tuknang king Ginung kekatamung Dios ban iligtas na katamu karing Filisteo.

⁹ Kanita kinangwa yang metung a sususu pang tupa i Samuel at saka ne inain kabilugan bilang ain-a-durulukan king Ginu. Menalangin ya i Samuel king Ginu para king Israel at pekibatan na ne man ning Ginu.

¹⁰ Kabang yayain neng Samuel ing ain-a-durulukan dinatang la ring Filisteo ban lusuban de ing Israel, oneng menuldul masikan at makanyan na lang beligon ning Ginu ding Filisteo king aldong ita. E ra balu ing daptan da at memulayi la king akakit da ring Israelita.

¹¹ Linual la Mizpa ding sundalus na ning Israel at saka ra la tegal ding Filisteo angga king Betcar at pete da la.

¹² Kaybat na nita, kinangwa yang metung a batu i Samuel at binili ne iti pilatan na ning Mizpa at Sen at inaus neng Ebenezer. Ngana wari: Angga ngeni seupan na katamu ning Ginu.

¹³ Makanyan lang mesambut ding Filisteo, at manibat na kanita e ra ne liban pa ing bansang sakup na ning Israel. Kabang mabie ya i Samuel pepakit na ning Ginu ing laban ya karing Filisteo.

¹⁴ Ikua ra lang abalik king Israel detang balen a sekupan da ring Filisteo manibat king Ekron angga Gat; ikua na ning Israel ing sablang gabun a kimkam da ring Filisteo. Mekipagkasundu la ding Amoreo king Israel.

¹⁵ Meging pamuntuk ne ning Israel i Samuel kabang mabie ya.

¹⁶ Balang banua lipat-lipat ya king Betel, Gilgal, at Mizpa ban ayusan na ing problema da ring tau kareting lugal.

¹⁷ Kaybat magbalik ya Rama, uling karin ya manuknangan at manungkulan bilang ukum na ning Israel. Karin ya naman mitalakad metung a altar para king Ginu.

8

¹ Inyang matua ne i Samuel gewa na lang ukum ding anak na king Israel.

² Joel ya lagyu ing anak nang lalaking pangane at Abiya ne man a lagyu ing kadua; gagampanan da ing katungkulan da karin king Beerseba.

³ Oneng e la memuli kang tata ra nune meging matako la king pikualtan; tinanggap lang suhul at babaluktut da ing katuliran.

⁴ Uli na niti, migsaria la ding sablang manimuna na ning Israel kang Samuel karin Rama.

⁵ Ngara, Samuel, matua na kayu at e no man memuli kekayu ding anak yu; tuldu kayung ari ban mamuntukan kekami antimo ing mararapat karing aliwang bansa.

⁶ Oneng e ya matula i Samuel kaniting karelang kayaduanan. Inya menalangin ya king Ginu.

⁷ Nganang mekibat ning Ginu kang Samuel, Pakiramdaman mu ing sabla rang sasabian keka ding memalen, uling aliwa naman ika ing sasakuil da nune aku ing sasakuil dang ari da.

⁸ Nung makananu ra kung peinggulutan at sinambang aliwang dios manibat na kanitang liwal ku la Ehipto angga na ngeni, makanyan munaman ing gawan da keka.

⁹ Pakiramdaman mu ing aduan da; oneng maigpit mu lang balan tungkul king gawan na karela ning maging ari da.

¹⁰ Sinabi nang Samuel karing taung maniawad ari ing sablang sinabi na ning Ginu.

¹¹ Ngana karela, Anti kanini ing gawan na ning maging ari yu: Gawan na lang sundalus na ding anak yu. Ding aliwa kareti sake la karing karung panggera, ding aliwa naman sake la karing kabayu, at ding aliwa gawan na lang sundalus a maglakad para king pamakilaban;

¹² gawan na lang opisyal da ring libung sundalus ding aliwa, at gawan na lang opisyal da ring limang pulung sundalus ding aliwa. Papanyarulan na la at papamupulan na la ding aliwa yung anak, at pagawan na lang sandata para king pamakilaban at para karing karung panggera na ding aliwa pa.

¹³ Pagawan na lang pabanglu ding anak yung babai, papaglutuan na la, at gawan na lang panadero.

¹⁴ Kuanan na ing pekamasanting dang diling pupul ding kekayung asikan at ubasan at pitatamnan olibo, at ibie na iti karing talasuyu na.

¹⁵ Kuanan na ing sikapulu king kekayung trigu at karing kekayung ubasan, at ibie na iti karing opisyal na at karing talasuyu na.

¹⁶ Kuanan na la ding ipus yung lalaki at babai at ding masanting dili karing baka yu at asno, at kaybat gamitan na la king paobra na.

¹⁷ Kuanan na naman ing kapulung dake karing kekayung kawan at maging ipus na kayu.

¹⁸ Kanita e na kayu pakiramdaman ning Ginu king aldo saingsing kayu uli na ning aring pinili yu.

¹⁹ Oneng e re mu rin pekiramdaman ding tau i Samuel. Ngara, Nanu pa man ing sabian mu buri mi pa mu rin ing mika ari kaming mamuntukan kekami

²⁰ ban maging kalupa da kami ding aliwang bansa. Panimunan na kami ning ari mi at ya ing atyu king mumuna neng makilaban kami.

²¹ Pekiramdaman na ngang Samuel ing sablang sinabi ra ding tau, at kaybat belita na iti king Ginu.

²² Ngana ning Ginu kang Samuel, Ibie mu ing aduan da at tuldu kang maging ari da. Kanita nganang Samuel karing lalaki ning Israel, Sulung, muli na kayu.

9

¹ Ating metung a taung milagyuan Kis king lahi nang Benjamin; anak neng Abiel at apu neng Zeror a anak nang Becorat at apu na namang Afia.

² Atin yang anak a masanting; Saul ya lagyu iting kayanakan. Alang aliwang migit king santing kang Saul karing tau Israel; matas yang dili karing sablang Israelita.

³ Misan, mewala la ding asno nang Kis a tata nang Saul. Inya nganang Kis king anak nang i Saul, Mituki kang metung karing ipus at panintunan mu la ding asno.

⁴ Minta ya king bulubundukan nang lugal ning Efraim. Lipatan ne pa ing sakup ning Salisa, oneng e ra la ikit ding asno. Dinalan la naman karin Saalim, oneng e ra la pa mu rin ikit. Lipatan de ing mabilug nang sakup ning Benjamin, oneng e ra la munaman ikit ding asno.

⁵ Karas da king Zuf, nganang Saul king ipus a kayabe na, Mibalik ta na; nung ali ikata ing pigaganakan nang tata ku at aliwa ding asno.

⁶ Ngana ning ipus, Ating propeta keti a gagalangan da ring sabla uling ing heganaganang sasabian na mipapaltutu. Puntalan te; pota asaupan na kata king panintunan ta.

⁷ Nung munta kata, nganang Saul king ipus, nanu ing ibie ta king propeta? Megisan na ngan ing pamangan ta at ala katang adala anting regalu para king propeta. Nanu ing mitagan king darala ta?

⁸ Nganang mekibat ning ipus kang Saul, Atin kung pera a kapat nang dake ning salaping pilak. Malyari keng ibie iti king propeta at ituru na la kekata ding panintunan ta. (

⁹ Kanitang panaun a ita lalapit ya ing ninuman king manula ning Israel neng atin yang buring ikutang king Dios, uling manula ing aus da king ausan dang propeta ngeni.)

¹⁰ Nganang Saul king ipus na, Masanting ya ing aisip mu, abe; tara na. At migsaria la ketang balen nung nu ya manuknangan ing propeta.

¹¹ Kabang paukiat la king dalan papunta king balen, asaganan da la ring babaing lulual ban saklung danum. Ngarang kinutang karela, Atyu ya ing manula king balen?

¹² Atyu ya, ngarang mekibat. Mipauna ya kekayu. Mamalagua kayu; atyu ya king balen uling minain lang ain-sakripisyu ngeni ding memalen king lugal a pisasamban.

¹³ Akit ye kalub yu king balen bayu ya munta king lugal a pisasamban ban mangan. E la mangan ding tau anggang e ya datang uling kailangan ne pa mung bendisyunan ing ain-sakripisyu; kaybat kanita la pa mu mangan detang mekumbira. Lumakad na kayu ban agad yeng akit.

¹⁴ Inya minta la king balen. Kabang lulub la king siudad, ikit de i Samuel; lalabas yang papunta king lugal a pisasamban.

¹⁵ Itang aldong ita bayu ya dinatang i Saul, pepabalu na ning Ginu ing makatuki kang Samuel:

¹⁶ Bukas king oras a anti kaniti, atin kung papuntalan a tau keka; ibat ya king sakup ning Benjamin at lanian me bilang ari ning balen kung Israel. Iligtas ne ing balen ku king gamat da ring Filisteo, uling ikit ku ing kasakitan na ning kanakung balen at miras na kanaku ing saingsing da.

¹⁷ Panakit nang Samuel kang Saul, ngana ning Ginu, Samuel, oyan ing taung sasabian ku kekang mamahala king balen ku.

¹⁸ Lepitan neng Saul i Samuel lele na ning pasbul dalan ning siudad at ngana, Sabian yu na mo kanako nung nu ya karin ing bale na ning manula?

¹⁹ Pekibat nang Samuel kang Saul, Aku ing manula. Tuki ka kanaku king lugal ning pisasamban uling makisulu ka kanaku king aldong iti, at pangaras na ning abak palakuan da ka kaybat kung inula nung nanu ing isipan mu.

²⁰ Tungkul naman karetang asno mung atlu nang aldo mewala, e mu na la pigaganakan uling meyakit na la. Oneng ninu ing pagkapilitan nang panintunan ning Israel nune ika at ing kekang pamilya? fig,,,,,Aku ing manula.,(9:19)fig*

²¹ Pekibat nang Saul, Lahi na ku mung Benjamin; ibat ku king malating dili karing tribu na ning Israel, at ing pamilya ku ya ing malating dili karing pamilya na ning tribu nang Benjamin! Obat makanyan kayu sasabian kanaku?

²² Tiki neng Samuel i Saul at ing ipus na, at dela na la king kilub at pepaluklukan na la ketang kabisera. Manga atlu lang pulu katau ding kumbiradu.

²³ Nganang Samuel king talapaglutu, Idala me kanaku itang dake na ning pamangan a binie ku keka at pepakalilua ku.

²⁴ Kinua ne ning talapaglutu ing pata at binili ne arapan nang Saul. Nganang Samuel, Makatalaga ya para keka ing mikalilua. Mangan ka; kelilua mi ya iti angga king kekang paniatang. Talagang pigsadia ra ka. Mengan yang kasulu nang Samuel i Saul ketang aldong ita.

²⁵ Kaybat meko la king lugal ning pisasamban at minta la king balen. Pigsadia reng tudturan i Saul babo na ning bale at migkera ne ban matudtud.

²⁶ Kabukasan, inyang malapit neng sunlag ing aldo, lepitan neng Samuel i Saul at ginising ne. Ngana, Saul, talakad na ka ba na kayung makalako. Mibangun ya i Saul at minta la king dalan.

²⁷ Nganang Samuel kang Saul kabang papunta la king angganan na ning balen, Sabian mu king ipus mu ing muna neng mako, oneng e ka pa mu mamako ban asabi ku keka ing pasabi na ning Dios.

10

¹ Kinua neng Samuel ing lulanan laru at tigtugan neng laru ing buntuk nang Saul, at kaybat inuma ne. Ngana, Lalanian na ka ning Ginu bilang ari na ning sarili nang balen. Ika ing pamuntuk king balen na ning Ginu at iligtas mu la ring memalen karing sabla dang kalaban. Oyni ing tanda king ika pin ing pinili nang pamuntuk ning Ginu king balen na.

² Potang mikawani kata ngeni, atin kang akasalubung a adua kataung malapit king kutkutan nang Raquel karin king Selsa a sakup na ning tribu nang Benjamin. Sabian da keka king meyakit na la ding asnong panintunan mu at king ika ngeni ing agaganaka na ning kekang tata at parating kukutang.

³ Kaybat sumulung ka pa at miras ka king tanaman a ensina na ning Tabor. Saganan da ka karin ding atlu kataung papunta king Betel ban samba king Dios. Magdala yang atlung biserung kambing ing metung kareti, ing metung naman magdala yang atlung maragul a tinape, at magdala ne mang metung a lulanan a mitmung alak ing katlu.

⁴ Pugayan da ka at ibie da la keka ding adua karing atlung darala dang tinape. Kuanan mu la potang ibie da la keka.

⁵ Kaybat na nita, munta na ka man king Gibeat Elohim (ngana wari ing Bunduk-bundukan ning Dios); karin atin lang kampu ding Filisteo. At kabang papunta ka king siudad akasalubung me ing metung a grupu da ring propeta a kukuldas ibat king matas a lugal; manigtigan lang alpa, pandereta, plauta, at lira; mistula lang ala king sarili da.

⁶ Luban na ka ning espiritu na ning Ginu at makiabe ka naman karela at maging mistula kang aliwang tau.

⁷ Potang akit mu lang matupad deting tanda, gawan mu itang isipan mung mayap at antabayanan na ka ning Dios.

⁸ Kaybat na nita, muna kang munta kanaku karin Gilgal at puntalan da ka ban miyain ain-a-durulukan at ain-ning-pamisulusulu. Panayan mu ku karin kilub ding pitung aldo at sabian ku keka ing sukat mung daptan. fig,,,, ,Lalanian na ka ning Ginu bilang ari na ning sarili nang balen.,,,, ,(10:1)fig*

⁹ Aliwa na ing penamdaman nang Saul inyang mikawani lang Samuel; meganap la ngan ding sablang wagang deti kilub ning patingapun.

¹⁰ Inyang minta ya karin king Gibea, akasalubung ne ing metung a grupu da ring propeta at linub ya king katawan na ing espiritu na ning Dios at mekiabe ya karela.

¹¹ Ngarang misabisabi inyang ikit da iti detang sadia nang makakilala kang Saul, Nanung milyari king anak nang Kis? Metung nia naman waring propeta i Saul?

¹² At ngana pang kinutang ning metung a tau karin, Ninu wari ding tata ra? Makanyan yang megumpisa ing kasebian, Propeta ya naman i Saul!

¹³ Inyang meyari na iti, melaus neng minta king altar a atyu king matas a bunduk-bundukan.

¹⁴ Kauli ra keta karela, nganang kinutang ning bapa nang Saul keya at king ipus, Nukarin kayu minta? Penintun mi la ding asno, ngana, at inyang e mi la akit, pintalan mi ya i Samuel.

¹⁵ Nanu naman ing sinabi nang Samuel keka? ngana ning bapa na.

¹⁶ Pekibat nang Saul, Sinabi na king meyakit no kanu ding asno. Oneng ala yang belita nanuman tungkul ketang kayarian a simbitla nang Samuel.

¹⁷ Kaybat na nita, pepatipun neng Samuel ing mabilug a balen karin king banal a lugal ning Ginu king Mizpa.

¹⁸ Ngana karing tau, Anti kaniti ing pasabi na ning Ginu: Liwal da kayu Ehipto. Linigtas da kayu karing tau Ehipto at karing sablang kayarian a lulupig kekayu.

¹⁹ Oneng king aldong iti sikuil ye ing Dios yu a magligtas kekayu karing sabla yung kaligaligan at kasakitan. Sinabi yu pa, Ali! Buri mi ing tuldu kang maging ari mi. Uli na niti, lumapit kayu ngeni king Ginu, ing balang metung agpang king tribu na at pamilya.

²⁰ Pepalapitan na la ngan Samuel ding sablang tribu na ning Israel at king kapamilatan ning bagutan mepili ya ing tribu nang Benjamin.

²¹ Kaybat pepalapitan ne ing tribu nang Benjamin agpang karing pamilya na, at ing pamilya nang Matri ya ing mepili. Kanita linapit la ring kelalakinan na ning pamilya nang Matri at i Saul a anak nang Kis ya ing mepiling ari. Penintun de, oneng e re akit.

²² Inya pasibayu reng kitnan ing Ginu, Dinatang ya kaya keti? Pekibat na ning Ginu, Sasalikut ya i Saul king pipagponduan pamangan.

²³ Milayi la at dinakit de. At inyang makatalakad ne libutad da ring tau, ya ing meyakit matas dili.

²⁴ Nganang Samuel king mabilug a balen, Oyni ing taung pinili na ning Dios! Ala yang kalupa. Ngara ngang kinulisak, Luid ya ing ari! Luid ya!

²⁵ Kaybat melinawan na lang Samuel karing tau ding katuliran na at katungkulan ning ari. Sinulat na la king metung a libru at binili ne iti arapan na ning Ginu. Kaybat pepaulian na na lang Samuel ding sablang tau, ing balang metung king sarili nang pibalebale.

²⁶ Minuli ya naman i Saul king pibalebale na karin Gibea; kayabe na la ding taung matapang a tigkilan na pusu ning Ginu.

²⁷ Oneng ating taung magsisti. Ngara, Makananu na katamung aligtas ning taung iti? Kesaman de at e re pigdalang regalu. Oneng e na pinsingan Saul iti.

11

¹ Kaybat na nita, lisuban neng Nahas a ari da ring Ammonita ing Jabes Gilead. Ngara kang Nahas ding memalen na ning Jabes Gilead, Makikasundu ka kekami at sumuyu ke keka.

² Oneng nganang Nahas karing Ammonita, Makikasundu ku mu kekayu nung tanguanan yung padukit ke wanan a mata ing balang metung kekayu ban kanita mipakarine ya ing mabilug a Israel.

³ Pekibat da ring makatuang manimuna na ning Jabes, Dinan yu kaming pitung aldo palugit ban makatubud kaming tau king mabilug a Israel. Sumuku kami kekayu nung alang magligtas kekami.

⁴ Inyang miras la ding tubud king Gibea a lugal nang Saul, belitanan da la ring memalen karin king milyari. Menangis la ngan masikan ding sabla.

⁵ Daratang ya kanitang ibat king marangle i Saul; atyu ya kagulutan da ring baka na. Nganang mengutang, Obat manangis la ding memalen? At sinabi ra kang Saul itang belita ra ding tau Jabes.

⁶ Kabang makiramdam ya king balita, liban ne ning espiritu na ning Dios at mimua yang e makanyan-kanyan i Saul.

⁷ Kinangwa yang kaparis a baka at saka na la pete. Pemirasu na la at pepadala karing sablang lugal a sakup na ning Israel at iting amanu: Ninuman ing e makiabe makilaban para kang Saul at Samuel, makanyan munaman ing malyari karing baka na! Tiblan na la ning maragul a takut king Ginu ding tau, at linage la ngan.

⁸ Inyang tinipun na la karin Bezek atlu lang dalan a libu ding ibat king Israel at atlu lang pulung libu ding ibat king Juda.

⁹ Ngara karing tubud a dinatang, Oyni ing sabian yu karing memalen na ning Jabes Gilead, Bukas ugtung-aldo ating datang magligtas kekayu. Inyang minuli la ding tubud belita ra iti karing tau Jabes at metula la ring memalen.

¹⁰ Inya sinabi ra karing Ammonita, Bukas mu rin sumuku na kami kekayu at ikayu nang bala nung nanung buri yung gawan kekami!

¹¹ Kabukasan, gewa na lang atlung grupung Saul ding kayabe nang makilaban. Inyang mayayabak na lisuban de ing kampu ra ding Ammonita. Pete da la ring Ammonita bayu miras ing ugtung-aldo. Misambulat la ngan detang mekaligtas. Alang mitagan aduang miyayabe.

¹² Kanita ngara ding tau kang Samuel, Ninu ring sinabing e ya malyaring maging ari tamu i Saul? Ituru yu la at paten mi la.

¹³ Oneng nganang Saul, Metung man alang sukat mate king aldong iti uling king aldong iti ne dininan tagumpe ning Ginu ing Israel.

¹⁴ Nganang Samuel karing tau, Tara, munta tamu Gilgal at pasibayu ta yang ipasiag ari tamu i Saul.

¹⁵ Inya minta la ding tau king Gilgal, at karin de pinroklamang ari i Saul king arapan na ning Ginu. Kaybat miyain lang ain-ning-pamisulusulu king Ginu. Mika maragul lang pamagsaya karin di Saul at ding sablang memalen na ning Israel.

12

¹ Nganang Samuel karing memalen na ning Israel, Ngeni, penusignan ku na ing buri yu; dininan da na kayung ari.

² Atin na kayung ari at ya na ing pamuntuk yu. Matua na ku at kayabe yu la ding anak ku. Karame yu ku manibat na inyang anak ku at angga na ngeni.

³ Atyu ku keni. Nung atin kayung e buri kanaku, sabian yu arapan na ning Ginu at king aring pinili na. Atin kung penako baka o kaya asno kekayo? Atin kung pirait o penakawanan kekayo? Atin nang sinuhul kanaku ban kanita maging bulag ku king katuliran? Nung atin, mamayaran ku.

⁴ Pekibat da, E mu kami pemiraitnan o penakawanan. Ala kang nanumang kinua kekami.

⁵ At ngana karela, Nung makanyan ing Ginu at ing pinili na ila ding saksi ku king ala kayung abintang nanumang laban kanaku. Pekibat da, Wa, ing Ginu ya ing saksi!

⁶ Ngana pang Samuel karing tau, Ing Ginu ya ing saksi; ya ing memili kang Moises at Aaron at milual karing makatua yu king Ehipto.

⁷ Inya talakad kayu arapan na ning Ginu at sabian ku lang tunggal-tunggal ding depat nang ganaka para kekayu at karing makatua yu.

⁸ Inalipusta de ring tau Ehipto i Jacob at ing pamilya na inyang minta ya karin Ehipto. Kanita minaus la king Ginu, at tinubud ne karela i Moises at i Aaron ban milual karela Ehipto, at binie ne karela iting lugal a iti bilang karelang tuknangan.

⁹ Oneng kelinguan de ing Ginung karelang Dios. Uli na nita, pepaburen na lang menabu king gamat nang Sisera a pekapun da ring sundalus nang Jabin a ari ning Hazor, antimu rin karing gamat da ring Filisteo at ning ari ning Moab.

¹⁰ Kanita ngarang minaus king Ginu, Mikasala kami; ginulut ke keka, O Ginu, at simban mi la ding Baal at ding Astarte. Iligtas mu kami sana karing kalaban mi at ika ing samban mi.

¹¹ Tiburan na la naman ning Ginu di Jerubaal, Bedan, Jefta, at aku; linigtas da kayu karing kalaban yu at mibiebie kayung alang panganib.

¹² Oneng inyang ikit yeng palapit kekayu i Nahas a ari da ring Ammonita ban makilaban, sinabi yu kanaku, Ali, kailangan kaming mika ari agyamang ing Ginung kekayung Dios ya ing ari yu.

¹³ Oyni ing aring inawad yo; binie ne kekayu ning Ginu.

¹⁴ Salese kayu bie kabang ing Ginu pitatakutan ne ning ari at ikayu at sasamban ampon pamintuan, at e lalabag king kautusan na.

¹⁵ Kabud e kayu mekiramdam king Ginu at labag king kautusan na, parusan na kayu ning Ginu nung makananu na lang perusan ding makatua yu.

¹⁶ Inya ngeni saksian yu ing makapagmulalang dapat a gawan na ning Ginu.

¹⁷ Panaun na ngeni ning pamamupul trigu. Makanyan man aduan ku king Ginu ing manuldul sana at muran. Kanita yu akit at aisip nung makananu karawak arapan ning Ginu ing pamaniawad yung ari.

¹⁸ Menalangin ya i Samuel king Ginu at peparala yang duldul at uran king aldong ita. At mitakutan la ding tau king Ginu at kang Samuel.

¹⁹ Kanita ngara ding tau kang Samuel, Maus ka king Ginung kekang Dios para karing kekang talasuyu ban e kami mate, uling digdag mi ya pa karing kekaming kasalanan ing pamaniawad ming ari.

²⁰ Oneng nganang Samuel karing tau, E kayu tatakut. Depat yu la pin deting e mayap a bage. Makanyan man e kayu painggulut king Ginung kekayung Dios nune suyuan ye king mabilug yung pusu.

²¹ E yu la sisikasuan ding bage alang ulaga uling ala kayung nabangnan kareti at e la makapagligtas pablasang ala lang ulaga.

²² Uli na ning marangal nang lagyu e ne lakuan ning Ginu ing balen na, uling ing Ginu mismu ya ing memili kekayu ban maging memalen na kayu.

²³ Nung aku naman ing kutnan yu, e na sana paintulut ning Ginu ing mikasala ku at tuknang manalangin para kekayu; isundu ku ing pamanuru kekayu king mayap at matulid.

²⁴ Maygit king sabla sukat yeng pitakutan ing Ginu at suyuan yeng mitmung katapatan king mabilug yung pusu. Ganakan yu ing kayapan a depat na kekayu.

²⁵ Mate kayu at ing ari yu, nung isundu yu ing pamaniapat yung e ustu.

13

¹ Lima yang pulung banua i Saul inyang meging ari ya, at mig-ari ya king Israel kilub ding aduang pulu't aduang banua.

² Memili yang atlung libung lalaki ning Israel i Saul; kayabe na la ding aduang libu karin king Mikmas at king bunduk-bundukan nang lugal ning Betel; samantalang ding libu naman kayabe na lang Jonatan karin king Gibea a sakup ning Benjamin. Pepaulian na lang Saul ding aliwang lalaki.

³ Ikua neng Jonatan ing lugal a pipagkampuan da ring Filisteo karin king Gibea; abalitan da iti ding Filisteo. Pepatiup neng Saul ing trumpeta ban ipamalita iti king mabilug a bansa.

⁴ Abalitan da ring Israelita king lisuban na neng Saul ing pipagkampuan da ring Filisteo at king mua la ding Filisteo king mabilug a Israel. Pintalan de ring sablang tau i Saul karin king Gilgal ba reng pakiabayan.

⁵ Migsadia lang makilaban ding Filisteo king Israel: atlung pulung libung karung panggera at anam a libung sundalus a pakasake kabayu ampon sundalus a kasing dakal ning balas king pampang ning dagat. Linakad la at migkampu karin Mikmas a atyu king dane nang aslagan ning Betaven.

⁶ Inyang ikit da ring Israelita king ala lang agyudaig la king labanansinalikut la karing kueba, karing kulkul, karing batu, at pati na karing talaga.

⁷ Lipatan da ne man ding aliwa ing Ilug ning Jordan, at minta la king sakup na ning Gad at Gilead. Atyu ya pa i Saul karin Gilgal; tutukian de ring tau a gagalgal king takut.

⁸ Pitu yang aldo manaya karin agpang king sinabi nang Samuel. Oneng inyang e ya dinatang i Samuel karin Gilgal megumpisa na lang mikakawani ding tau.

⁹ Inya nganang Saul, Idala ye ing ain-a-durulukan kanaku at ding ain-ning-pamisulusulu. Inain ne ing ain-a-durulukan.

¹⁰ Kabud ayari neng inain ing ain-a-durulukan, dinatang ya i Samuel. Linual ya i Saul ba neng saganan at pugayan.

¹¹ Nanung gewa mu? nganang kinutang Samuel. Nganang mekibat Saul, Inyang akakit kung lalakuan da na ku ding tau at uling e ka dinatang karing aldo a tikda mu at uling makatipun na la ban lumusub ding Filisteo karin king Mikmas,

¹² ngakung sinabi, Malapit da na kaming lusuban ding Filisteo keti king Gilgal at e ku pa meka ain king Ginu. Makanyan kung mepilit miyain king ain-a-durulukan.

¹³ Nganang Samuel kang Saul, E ustu ing depat mu. E mu tiparan ing utus na ning Ginung kekang Dios. Nung e mu gewa ita, papanatilian na sanang alang angga ing pamag-ari mu king Israel.

¹⁴ Ngeni e la manibatan king pamilya mu ding mag-ari king Israel. Atin neng piniling metung a kayalili mu; tau yang babie tula king Ginu. Pinili ne ning Ginu ban maging ari na ning balen na uling e ka memintu king inutus na keka ning Ginu.

¹⁵ Meko ya i Samuel king Gilgal at minta ya king Gibea a sakup ning Benjamin. Binilang na lang Saul ding sundalus a menatiling kayabe na; manga anam lang dalan a katau.

¹⁶ I Saul at ing anak nang i Jonatan at ding sundalus a menatiling kayabe ra maka-kampu la karin Geba na ning Benjamin samantalang maka-kampu no man king Mikmas ding Filisteo.

¹⁷ Atlu lang grupu ding sundalung sinalake ibat king kampu da ring Filisteo. Minta ya ing metung king dalan na ning Ofra a sakup na ning Sual,

¹⁸ migbanda ya ing metung king Bet Horon, at ing metung naman minta ya king angganan a makaparungdung king Kapatagan ning Zeboim lele ning disyerto.

¹⁹ Ala pang pande kanita king mabilug a sakup na ning Israel uling e ra buri ding Filisteo ing gawa lang espada o tandus ding Hebreo. (

²⁰ Potang atin lang patais a sudsud, sarul, palakul o lait, pupunta la pa mu ding Israelita karing Filisteo.

²¹ Katlung dake na ning perang ausan dang sekel ing bayad neng patais da la ring karelang sarul at sudsud; maygit yang kapitnang dake na ning sekel naman ing bayad neng patais da la ring palakul o lait.)

²² Ding maki espada mu inyang miras ing aldo na ning labanan ya i Saul at i Jonatan. Alang maki espada o tandus karing Israelita.

²³ Makabante la ding Filisteo king dalan papuntang Mikmas.

14

¹ Misan a aldo nganang Jonatan a anak nang Saul king talapagdala na karing armas na, Tara, lumipat kata at munta king kampu da ring Filisteo. E na pepabalu iti kang tata na.

² Atyu kanita i Saul lual na ning Gibea lalam na ning tanaman a pomegranate karin king Migron; kayabe na la ding manga anam a ralan karing sundalus na.

³ (Atyu naman karin ing paring i Ahiya a anak nang Ahitob; kapatad neng Ahitob i Ikabod at apu neng Fineas a anak na namang Eli a pari ning Ginu karin king Silo.) Susulud neng Ahiya ing efod. E ra balu ding tau nung nu ya minta i Jonatan at ing abe na.

⁴ Pilatan de ring matas a batu ing lugal a delanan nang Jonatan at ing abe na ban makadalakit la king kampu da ring Filisteo. Mayayaus yang Boses ing metung a dane samantalang itang metung naman mayayaus yang Sene.

⁵ Atyu ing metung king dane norti king arapan na ning Mikmas at ita namang metung atyu king dane mauli arapan na ning Geba.

⁶ Nganang Jonatan king talapagdala nang armas, Tara, munta kata king kampu da reting Filisteo; siguru naman saupan na katamu ning Ginu. Malyari yang magligtas ing Ginu king kapamilatan da ring dakal o ding ditak.

⁷ Ngana ning talapagdala karing armas na, Gawan yu itang buri yu. Muna kayu at tukian da kayu nanuman itang burian yung daptan.

⁸ Nganang Jonatan, Nung makanyan, puntalan ta la ding Filisteo at pakit kata karela.

⁹ Nung sakaling sabian da, Panayan yung ikami ing lumapit kekayu, kanita talakad katang matulid king lugal ta at e kata pupunta karela.

¹⁰ Nung sabian da, Munta kayu keni, kanita lumapit kata; uling tanda ya iti king binie na na la ning Ginu kekata.

¹¹ Makanyan lang pepakit ilang adua karing Filisteo. Ngara naman deti, Oyan lulual na la ring mapilan karing Hebreo karing lungga ra.

¹² Kinulait la ding sundalus king kampu kang Jonatan at king talapagdala nang armas. Ngara, Meko keni at atin kaming ipakit kekayu. Nganang Jonatan king talapagdala nang armas, Tukian mu ku, uling binie na na la ning Ginu king gamat na ning Israel.

¹³ Kanita minukiat yang pagapang karing gamat na at bitis i Jonatan at tikian ne ning talapagdala nang armas. Miragsa la ding balang ayarapan na ning talapagdala nang armas at pete na la.

¹⁴ Mekapate yang aduang pulu katau i Jonatan at ing talapagdala nang armas ketang mumuna rang pamanialakeng ita kilub ning sukad a kapitnang hektarya.

¹⁵ Megulu yang e mu nanu ing kampu da ring Filisteo at pati na ding atyu king marangle at ding sablang tau; mitakutan lang e mu nanu ding bante at pati na ding karelang talasalake. Minayun munaman at tutung maragul ing kaguluan da.

¹⁶ Ikit da ring guardia nang Saul karin Gibea a sakup ning Benjamin king ating labanan.

¹⁷ Kanita nganang Saul, Lawan yu nung ninung ala karing sundalus tamu. Memilang la at atuklasan da king alayu i Jonatan at ing talapagdala nang armas.

¹⁸ Kanita nganang Saul kang Ahiya, Idala me keni ing efod. (Darala neng Ahiya king oras a ita ing efod.)

¹⁹ Kabang pakisabian neng Saul ing pari, lalung daragul ing gulu king kampu da ring Filisteo. Ilako mu ne ing gamat mu king efod, nganang Saul king pari.

²⁰ Kanita linusub ne i Saul at ding sundalus na; disnan da lang milabulabu ding Filisteo.

²¹ Mekiabe na la naman detang Hebreong kayabe da ring Filisteo king karelang kampu karing Israelitang kayabe ra di Saul at Jonatan.

²² Tinagal na la naman ding sablang Israelitang sinalikut karing kabundukan ning Efraim inyang dimdam da king memulayi la ding Filisteo.

²³ Makanyan neng linigtas ning Ginu ing Israel king aldong ita. Misundu ing labanan lagpus na pa ning Betaven.

²⁴ Kanitang aldong ita meranup la ding sundalus na ning Israel uling sinabi nang Saul king misumpa ya ing taung mangan bayu miras ing bengi at bayu ya mekayablas karing kalaban na. Makanyan lang e mengan ding sundalus na.

²⁵ Miras la king gubat nung nu ra atagpuan ing dakal a pulut-panilan.

²⁶ Alang mengan kaniti agyang mananabu na king gabun ing pulut-panilan uling tutu lang mitakutan king sumpa nang Saul.

²⁷ Oneng e na dimdam Jonatan ing sinabi nang tata na, inya tiniltil ne king pulut-panilan itang punta na ning tukud na at pengan na. At mesala ya panimanman.

²⁸ Oneng ngana ning metung karing sundalus, Maigpit nang penabilin tata mu karing sundalus king ala metung mang mangan king aldong iti. Tutu na lang maranup ding sundalus.

²⁹ Nganang Jonatan, Pasakitan na lang tata ku ding tau. Lawan mu na ko. Mesalese ku akakit uling mengan kung ditak kaniting pulut-panilan.

³⁰ Nung pepaburen ta lang mengan ding sundalus king ikua da karing kalaban da, e kasi lalu lang dakal ding apate dang Filisteo!

³¹ King aldong ita apate da la ring Filisteo king labanan manibat king Mikmas angga na king Ahilon, oneng tutu lang meranup ding Israelita.

³² E no mekapanaguanta ding sundalus. Mengasubsub la king banding ikua ra. Dinakap lang tupa, baka, at biserung baka at saka ra la kinatat. Pengan da la; e ra no peparayan man.

³³ Kanita ating sinumbung kang Saul. Ngana, Lawan yu, mikakasala la ding tau laban king Ginu; mamangan lang karning ating daya. Nganang Saul, Karagul na ning kataksilan a gewa yo! Idala ye kanaku at iparugang kening lele ku ing metung a maragul a batu.

³⁴ Sabian yu karing tau ing magdala lang baka o tupa at keti da la katatan at kanan ban e la mikakasala king Ginu. E la sukat mamangan karning ating daya. Ketang benging ita migdala lang baka ding tau at karin da la kinatat.

³⁵ Mitalakad yang altar i Saul para king Ginu; iti ya ing minunang diling altar a telakad na para king Ginu.

³⁶ Kaybat, nganang Saul, Lusuban ta la ngening bengi ding Filisteo at kabukas tamung kuanan ing bandi ra. Ala tamung lalakuan metung mang mabie karela. Ing kaburian yu pu ya ing matupad, ngarang mekibat. Oneng ngana ning pari, Mangutang ta pa mu king Dios.

³⁷ Oyni ing kitang nang Saul king Dios, Lusuban mi na la ding Filisteo? Pasambut yu ke kaya? Oneng king aldong ita e ne pekibatan ning Dios.

³⁸ Inya nganang Saul, Mitipun ko keni, ikayung sablang manimuna da ring tau; pakibaluan yu nung makananu at nung ninu ing makipasari king kasalanan a yan king aldong iti.

³⁹ Ing Ginu a babie tagumpe king Israel ya ing saksi ku: ninu ya man, maging ya ing anak kung i Jonatan, siguradung paten ta ya! Oneng e re pekibatan ding tau.

⁴⁰ Kanita nganang Saul king mabilug a Israel, Munta kayu king kasumangid at ikaming Jonatan king kasumangid na ke man. Pekibat da ring tau kang Saul, Ing kaburian yu pu ya ing matupad.

⁴¹ Nganang Saul, Ginu, Dios ning Israel, obat e mu ku pekibatan king aldong iti? Nung aku ing mikasala o ing anak kung i Jonatan, pabagut me kekaming Jonatan ing Urim; oneng nung ing balen yung Israel ya ing mikasala, pabagut ye ing Tumim. Inyang meyari ing bagutan linto king atyu kari Saul at Jonatan ing mikasala; alayu karing tau.

⁴² Kanita nganang Saul, Pibagutan yu kami ning anak kung i Jonatan. Linto king i Jonatan ya ing mikasala.

⁴³ Kanita kitnan neng Saul i Jonatan, Sabian mu kanaku nung nanu ing depat mu? Pekibat nang Jonatan, Tiniltil ke ing punta na ning tukud ku king pulut-panilan at saka ku tikman. Makasadia kung mate uli ning gewa ku.

⁴⁴ At nganang Saul, Parusan na kata ning Dios; sukat kang mate, Jonatan.

⁴⁵ Oneng ngara ding tau, Sukat ne man waring mate i Jonatan a migtagumpe para king Israel. E malyari iti! King daramdaman na ning Ginu, alang manabu king gabun metung mang buak king buntuk na uling migtagumpe tamu king aldong iti king saup na ning Dios. Makanyan deng linigtas ding tau i Jonatan king kamatayan.

⁴⁶ Kaybat na nita, e na no tegal Saul ding Filisteo at minuli no man deti keta karela.

⁴⁷ Manibat inyang meging ari ya king mabilug a Israel i Saul mekilaban ya karing sablang kalaban a makapadurut king Israel; antimo ding tau Moab, Ammon, Edom, ing ari na ning Soba, at ding Filisteo. Magtagumpe ya king ninumang akalaban na.

⁴⁸ King mitmung tepangan simbut na la ding Amalekita, at linigtas ne ing Israel karing sablang kalaban na.

⁴⁹ Oreni ding anak nang Saul: ding anak nang lalaki ila di Jonatan, Isvi, at Melkishua; ding anak nang babai ila di Merab at Mikal.

⁵⁰ Ahinoam ne man lagyu ing asawa na; anak neng Ahimaaz. Ing pekapun da ring sundalus na ya i Abner a anak nang Ner a bapa na.

⁵¹ I Ner a tata nang Abner anak neng Abiel, at i tata na namang Saul ya i Kis.

⁵² Kabang ari ya i Saul parati yang makilaban karing Filisteo; yayabe ne karing sundalus na ing ninumang akit nang taung masikan o matapang.

15

¹ Nganang Samuel kang Saul, Tiburan na ku ning Ginu ban lanian da kang ari na ning balen nang Israel.

² Inya makiramdam ka king pasabi na: Papamayaran ku la ding Amalekita king depat da karing Israelita uling sebat da la kanitang maglakbe lang ibat Ehipto.

³ Uli na niti, lusuban mu la ring Amalekita at ala kang tatagan king pibandian da. Ala kang tatagan a mabie: lalaki't babai, anak at pati na ding sususu, baka at tupa, kamelyu at asno.

⁴ Pepayaus na lang Saul ding sundalus na at tinipun na la karin king Telaim; adua lang dalan a libu bilang subali pa karetang apulung libung sundalus a ibat king Juda.

⁵ Kanita minta ya king siudad ning Amalek i Saul at menaya ya king lugal pilatan da ring bunduk.

⁶ Nganang Saul karing tau Keniteo, Mako kayu ken at lakuan yu la ding Amalekita ba ra kayung e paten kayabe ra; alang-alang ketang ganaka a pepakit yu karing sablang Israelita inyang meko la Ehipto. Inya likuan da la ring Keniteo ding Amalekita.

⁷ Lisuban na lang Saul ding Amalekita manibat Habila angga karin Shur a atyu king banda nang aslagan ning Ehipto.

⁸ Binihag neng mabie i Agag a ari da ring Amalekita; ala yang tinagan metung mang mabie karing tau.

⁹ Oneng tinagan neng Saul at ding sundalus na i Agag at ding masanting diling tupa at baka at miyayaliwang animal a mataba at ing sablang bage ating ulaga. Bukud mung ing bage alang ulaga ing sinira da o pete.

¹⁰ Ngana ning Ginu kang Samuel,

¹¹ Malungkut ku uling gewa keng ari i Saul; selangsangan na ku at e na la tiparan ding kautusan ku. Mimua ya i Samuel at kabukas yang menalangin king Ginu.

¹² Kabukasan, maranun yang mibangun ban pakikitan ne i Saul. Ngara ding sundalus kang Samuel, Minta ya pu Carmel i Saul; pepatalakad yang monumento ning tagumpe na at saka ya tinaglus Gilgal.

¹³ At inyang ikit neng Samuel i Saul sinabi na, Bendisyunan na ka sana ning Ginu, Samuel. Tiparan ku ing inutus na kanaku ning Ginu.

¹⁴ Oneng kitang nang Samuel, Nung makanyan, nanu ing buri nang sabian ning daramdaman kung inge da ring tupa at baka?

¹⁵ Pekibat nang Saul, Ibat la deti karing Amalekita. Tinagan da la ring sundalus ding masanting dili karing tupa at baka ban atin lang iyain king Ginung kekang Dios; subali kareti ala na keng tinagan pa.

¹⁶ Nganang Samuel kang Saul, Patugut ka! Makiramdam ka king sinabi na kanaku nabengi ning Ginu. Sabian yu, nganang Saul.

¹⁷ Kanita nganang Samuel, Agyamang malati mu ing paglalawe mu king kekang sarili, makanyan man gewa na kang manimuna da ring tribu na ning Israel. Ing Ginu linian na kang ari na ning Israel

¹⁸ at atin yang peparapat keka. Papapate na la ngan keka ding Amalekita ban alang metung mang mitagan karela.

¹⁹ Obat selangsangan mu ing sinabi na ning Ginu? Obat mengasungasub ka king banding ikua yu at dinapat makarine arapan ning Ginu?

²⁰ Pekibat nang Saul kang Samuel, Pemintuan ku ne man ing Ginu. Tiparan ku itang parapat na kanaku. Binihag ke i Agag a ari na ning Amalek at ala kung tinagan karing Amalekita.

²¹ Oneng kinua ra ding sundalus ku ing banding simsam da, tupa at baka, ing sablang bage maulaga a e na buring mitagan ning Ginu ban atin lang iyain king Ginu a kekang Dios karin king Gilgal.

²² Nganang Samuel, Isanu wari ing babie tula king Ginu: ding ain at animal a durulukan o ing tupad king kautusan na? Mas mayap ing pamintuan ya kesa king miyain metung a animal; mas mayap ing pakiramdaman ya kesa king taba ding tupang sasakripisyu ra.

²³ Uling kasing dawak ne ning pamangulam ing pamaglaban king Ginu, at ing kesiasan buntuk kalupa ne ning pamanyamba karing idolo. Uling e mu pemintuan ing utus ning Ginu, sikuil na ing panga-ari mu.

²⁴ Kanita nganang Saul kang Samuel, Mikasala ku; e ku memintu king utus ning Ginu at king payu mu kanaku uling pepaisaul ku king takut karing sundalus ku at tinuki ku king kaburian da.

²⁵ Ngeni, patawaran mu sana ing depat kung kasalanan at tuki kang magbalik kanaku ban makasamba ku king Ginu.

²⁶ Nganang Samuel kang Saul, E ra ka tukian uling e mu tiparan ing utus na ning Ginu, at leko na na ka king panga-ari mu king Israel.

²⁷ Inyang palako ne i Samuel, telanan neng Saul itang punta na ning balabal na at megisi ya.

²⁸ Nganang Samuel, Saul, king aldong iti anti ne waring ginisi ning Ginu ing kayarian na ning Israel keka at binie ne iti king metung a mas karapatdapat kesa keka.

²⁹ E ya maglaram o magbayu isip ing Dios ning Israel uling e ne man tau a kailangan magbayu isip. fig,,,, ,Saul, king aldong iti anti ne waring ginisi ning Ginu ing kayarian na ning Israel keka.,(15:28)fig*

³⁰ Kanita nganang Saul, Mikasala ku; makanyan man pakisabi kung mayap king e mu ku sana pakarine arapan da ring manimuna na ning Israel at tuki kang magbalik kanaku ban makasamba ku king Ginung kekang Dios.

³¹ Tikian na ne mang Samuel i Saul at sinamba ya i Saul king Ginu.

³² Kanita nganang Samuel, Idala ye kanaku keni i Agag a ari da ring Amalekita. Gagalgal yang linapit kang Samuel i Agag. Nganang Agag, Mapait a kamatayan ing kanakung arapan.

³³ Pekibat nang Samuel, Dakal lang babaing e na manganak uli na ning espada mu. Ngeni ing sarili mung ima ya ing kawalan anak! Kasabi na niti pete ne i Agag at pemirasu arapan na ning Ginu karin king Gilgal.

³⁴ Kaybat na nita, minta ya Rama i Samuel; minta ne man i Saul king bale na karin king Gibea.

³⁵ At angga na king mete ya i Saul e no mikit Samuel. Makanyan pa man pigkalungkutan neng Samuel i Saul. Melungkut ya ing Ginu uling gewa neng ari na ning Israel i Saul.

16

¹ Ngana ning Ginu kang Samuel, Angga kapilan me tangisan i Saul ngening ikit mung leko ku na ing panga-ari na king Israel? Katmuan meng laru ing kekang lulanan at puntalan me i Jese ning Betlehem uling pinili ke ing metung karing anak na ban maging ari.

² Nganang Samuel, Makananu kung munta? Paten na kung Saul nung abalitan na iti. Ngana ning Ginu, Magdala kang metung a dumalagang baka at sabian mu, Dinatang ku ban iyain ing ain-sakripisyu king Ginu.

³ Kumbiran me i Jese king ain-sakripisyung iyain mu at ituru ku ing daptan mu. Lanian me bilang ari itang ituru ku keka.

⁴ Tiparan nang Samuel itang parapat na ning Ginu at minta ya Betlehem. Inyang miras ya Betlehem seganan de ring makatua na ning siudad. Mitakutan la deti at ngarang kinutang, Mayap namu dinatang kayu?

⁵ Nganang mekibat, Dinatang ku ban iyain ke ing ain-sakripisyu king Ginu; magsadia kayu at miyabe-abe tamung miyain ain-sakripisyu. Inutus na naman kang Jese at karing anak na ing magsadia la ban makapakiabe la king pamiyain king ain-sakripisyu.

⁶ Inyang miras la, ikit ne i Eliab. Nganang Samuel king lub na, Iti ya siguru ing pinili nang maging ari ning Ginu.

⁷ Oneng ngana ning Ginu kang Samuel, E ka lalawe king sintingan o king katas na uling aliwa ya ing pinili ku. E na kalupa ning pamaglalawe na ning tau ing pamaglalawe ku. Lalawe ya mu ing tau ketang makalual king tau, oneng aku, ing Ginu, lalawe ku king pusu.

⁸ Kaybat inaus neng Jese i Abinadab at dela ne arapan nang Samuel. Nganang Samuel, Aliwa munaman ya ing pinili na ning Ginu.

⁹ Kanita inaus neng Jese i Samma, oneng sinabi na namang Samuel king aliwa ya ing pinili na ning Ginu.

¹⁰ Dela na la ngan Jese ding pitu karing anak na arapan nang Samuel. Oneng nganang Samuel, Alayu kareti ing pinili na ning Ginu.

¹¹ Kanita nganang Samuel kang Jese, Ala na kang aliwa pang anak? Pekibat nang Jese, Atin pa; itang bungsu. Oneng alayu uling magpastul ya. Nganang Samuel kang Jese, Patubud ka at parakit me; e kata mangan anggang e ya datang.

¹² Pepatubud ya i Jese at dinakit de. Masanting ya pamikakatawan ing bungsu, mapundat ya mata, at masanting ya. Ngana ning Ginu kang Samuel, Talakad ka at lanian me uling ya ing pinili ku.

¹³ Kanita kinua neng Samuel ing lulanan nang laru at linian ne i David kabang makapadurut la arap na ding kapatad na. Linub ya kang David ing espiritu na ning Ginu manibat na king aldong ita. Meko ya i Samuel at migbalik ya king Rama.

¹⁴ Likuan ne ning espiritu na ning Ginu i Saul, at lingasngasan ne ning metung a marawak a espiritung tinubud ning Ginu.

¹⁵ Ngara ding talapagsilbi nang Saul, Lilingasngasan na kayu ning metung a marawak a espiritung tinubud ning Ginu.

¹⁶ Nung iyutus yu mu, ikaming talasuyu yung atyu arapan yu, panintun da kayung metung a taung biasang manigtigan alpa; manigtigan ya neng daratang ya iting marawak a espiritu, at mipaldan kayu.

¹⁷ Inya nganang Saul karing talapagsilbi na, Panintun yu kung taung biasang manigtigan at idala ye kanaku.

¹⁸ Ngana ning metung a baintau, Atin kung kakilalang metung a biasang manigtigan; anak neng Jese a tau Betlehem. Matapang ya at sane king pamakilaban; biasa yang magsalita at masanting yang lalaki. Maygit king sabla, kalugud-lugud ya arapan na ning Ginu.

¹⁹ Inya pepatubud ya kang Jese i Saul at pepasabi na ing anti kaniti: Papuntalan me kanaku ing anak mung i David a magpastul tupa.

²⁰ Inya i Jese misadia yang metung a asno, tinape, metung a datukanan mitmung alak, at metung a biserung kambing. Pepadala na iti kang David at pepabie na kang Saul.

²¹ Makanyan yang miras kang Saul i David at meging talasuyu ne. Tutu neng aluguran Saul at meging talapamahala ya karing armas na.

²² Kanita nganang Saul kang Jese, Paburen mu neng manatiling magsilbi kanaku i David uling meging kalugud-lugud ya kanaku.

²³ Kakuanan neng David ing alpa at titigtigan ne para kang Saul neng lilingasngasan ne ning marawak a espiritu. Lakuan ne kanita ning marawak a espiritu i Saul at salese ya pakiramdam. fig,,,,,Kakuanan neng David ing alpa at titigtigan ne.,(16:23)fig*

17

¹ Tinipun da la ring Filisteo ding karelang sundalus karin Soco ning Juda para king labanan. Migkampu la pilatan na ning Soco at Azeka karin king Efes Damim.

² Mitipun la naman di Saul at ding Israelita at migkampu la king Kapatagan ning Ela ban makilaban karing Filisteo.

³ Miyarapan la ding aduang pangkat: atyu la king metung a bunduk-bundukan ding Filisteo at atyu no naman king kasumangid a bunduk-bundukan ding Israelita. Metung yang kapatagan ing mamilatan karela.

⁴ Atin lang pagmaragul a sundalus ding Filisteo; Goliat ya lagyu at tubu ya Gat; siam yang talampakan king katas.

⁵ Tangsu ya ing helmet na at titimbang yang dinalan anam apulu't anam a libra ing baluti nang tangsu.

⁶ Tangsu ya naman ing baluti karing bitis na; tangsu ya naman itang tandus nang makasakbit karing pago na.

⁷ Kasing dagul ne ning dutung da ring gagawang imalan ing asta na ning tandus na, at adua yang pulung libra bayat ing taram na at lalakad yang makauna ing talapagdala nang paniagka.

⁸ Tinalakad ya i Goliat at nganang migsalitang masikan karing Israelita: Obat makilaban ko pa? Filisteo ku at ikayu talasuyu na kayung Saul. Mamili na kayu mung metung karing tauan yu at iyarap ye kanaku.

⁹ Nung sambutan na ku at apate, maging ipus yu kami; nung sakali namang sambutan ke at apate, kanita maging ipus da kayu at ikami ing suyuan yu.

¹⁰ Tiglung na pa ning Filisteong i Goliat, Amunan da kayu, ikayung Israelita! Mamili kayung pakilaban yu kanaku.

¹¹ Mesira ya lub at mitakutan i Saul at ding sablang sundalus na ning Israel inyang dimdam da iti. fig,,,,,Mamili kayung pakilaban yu kanaku.,(17:10)fig*

¹² Anak ne ning metung a lahi nang Efratite ning Betlehem ning Juda i David. Jese ya lagyu i tata na at walu lang lalaki ding kapatad nang David. Matua ne i Jese kanitang kapanaunan nang Saul.

¹³ Kayabe na lang makilaban Saul ding atlu karing pekamatua karing anak na. Ila deti: i Eliab, ing pangane, i Abinadab, ing katuki na, at i Samma, ing pangatlu.

¹⁴ I David ya ing bungsu; kabang ding atlu nang koya kayabe de i Saul,

¹⁵ palipat-lipat ne man i David; ngananang kayabe neng Saul at ngananang magpastul karing tupa nang tata na karin king Betlehem.

¹⁶ Kilub ding apat apulung aldo lalage ya ing Filisteong i Goliat at manamun ya abak at bengi.

¹⁷ Misan a aldo, nganang sinabing Jese king anak nang i David, Dalan mu ining sing-le mais at apulung tinape karing kapatad mu at magmalagua ka ban miras agad king kampu ra.

¹⁸ Dalan mu la naman deting apulung kesu at ibie mu la king pekapun da. Komustan mu la ding kapatad mu at saka mu ku pagdalang nanumang bage ibat karela.

¹⁹ Atyu ya king Kapatagan ning Ela i Saul, ding kapatad mu, at ding sablang sundalus ning Israel.

²⁰ Kabukasan, maranun yang migising i David; atin yang pekisabian magbante karing tupa na. Meko ya at dela na ing pamangan antimo ing inutus nang tata na. Miras ya king pipagkampuan da ring sundalus ning Israel inyang papunta na la king lugal ning labanan kabang kukulisak de ing kulisak ning pamakilaban.

²¹ Miyarapan la ding Israelita at ding Filisteo king labanan.

²² Penibala nang David ing darala na king mamahala king karga at saka ya milayi papunta karing sundalus ning Israel, at kinomusta na la ding kapatad na.

²³ Kabang makipagsalita ya karela kanita ne man minta king mumuna da ring sundalus a Filisteo ing mayap dang sundalus a tubu Gat, i Goliat. Sinabi na ing parati nang sasabian. Dimdam nang David iti.

²⁴ Panakit da kang Goliat memulayi la king takut ding sundalus na ning Israel.

²⁵ Ngara kang David ding sundalus na ning Israel, Akakit me ing taung ita? Amunan ne ing Israel. Dinan neng dakal a pibandian ning ari ing taung makapate kang Goliat; ibie ne pa ing anak nang dalaga ban maging asawa na, at e na ne sapilitan pang kuanan buis ing pamilya na king mabilug a Israel.

²⁶ Kitang nang David karing kasiping na, Nanu kanung malyari ketang taung makamate king Filisteong yan ban milako ya king kamarinayan ing Israel? Ninu ya ta ing Filisteong yan a manamun karing sundalus na ning Dios a mabie?

²⁷ Sinabi rang pepasibayu kang David ing gantimpala a miabie king taung makapate king Filisteong ita.

²⁸ Inyang dimdam neng makipagsalitang Eliab, ing kapatad nang pangane David, karing sundalus kemuanan ne. Ngana, Obat minta ka keti? Kaninu mu la penibala ding tupa tamu king ilang? Balu ku ing ketasan mu at e masanting ing isipan mu; bisa kang manalbe king labanan!

²⁹ Pekibat nang David, Ala na ku mang depat a e ustu. Makipagsalita ku mu!

³⁰ E ne pinsingan i koya na at mengutang ne naman karing aliwa pang tau; makanyan munaman ing pekibat da.

³¹ Ating mekaramdam kang David at belita ra iti kang Saul. Pepayaus ne i David.

³² Kanita nganang David kang Saul, E kayu pu paisira lub, Makamal a Ari. Aku a talasuyu yu ing makiarap at makilaban king Filisteong yan!

³³ Nganang Saul kang David, E me agyung labanan ing Filisteong yan uling tutu ka pang anak. Makilaban ne manibat na inyang anak ya!

³⁴ Oneng nganang David kang Saul, Pastul yang tupa para kang tata na ing talasuyu yu; nung ating leon o kaya oso at sasagmit yang biserung tupa king kawan,

³⁵ panagalan ke at lalabanan, at saka ke sasamsaman king asbuk na. Nung sakaling balikan na ku, sagmitan ke panga at pamatbat ke angga king apate ke.

³⁶ Mekamate neng leon at oso ing talasuyu yu. Maging kalupa re kararasan ing Filisteong yan ngening inamunan na la ding sundalus na ning Dios a mabie.

³⁷ Ngana pang David, Linigtas na ku ning Ginu karing mataram dang kuku ding leon at oso; ya mu rin ing magligtas kanaku king Filisteong yan! Nganang Saul kang David, Sulung, labanan me! Mantabe ya sana keka ing Ginu!

³⁸ Kanita pepasulud neng Saul kang David ing susulud na neng makilaban ya. Pepasulud nia naman ing helmet a tangsu king buntuk na at antimu rin ding aliwang tangsung susulud na king katawan na neng makilaban ya.

³⁹ Kaybat sikbit neng David babo na ning susulud nang baluti ing espada nang Saul saka na sibukan lumakad. Oneng nganang David kang Saul, E ku pu yata malyari kanini. Kimo ku pu king susulud ku. Uli na niti, likas na la.

⁴⁰ Kaybat telanan ne ing tukud nang pastul at saka ya memiling limang malinatnat a batu king sapa, at binili na la king suput nang pidaladala neng magpastul ya. Atyu karing gamat na ing tiradol na at lepitan ne ing Filisteo.

⁴¹ Palapit neng palapit kang David ing Filisteo; mumuna ya ing talapagdala nang kalasag.

⁴² Inyang ikit ne ning Filisteo i David, inamak ne uling anak ya mu; malarelare ya at masanting i David.

⁴³ Ngana ning Filisteo kang David, Asu ku waring pamatakutan mu king kekang palupalu? At sinumpa ne i David king lagyu ra ding dios na.

⁴⁴ Ngana pa ning Filisteo kang David, Lumapit ka kanaku at pakan ku ing laman mu karing ayup at karing animal king marangle.

⁴⁵ Pekibat nang David king Filisteo, Lalapit ka kanaku a magdalang espada at tandus; oneng lalapit ku keka king lagyu na ning Ginung Mayupaya, ing Dios da ring sundalus ning Israel a kekang inamunan.

⁴⁶ King aldong iti ibie na ka ning Ginu kanaku, at iragsa ra ka at tabtaban a batal. Kaybat pakan ku la ding bangke ra ding sundalus a Filisteo karing ayup at karing animal a mabangis. Makanyan dang abalu ding sablang tau king yatu king atin yang Dios ing Israel,

⁴⁷ at ban abalu ra ding sablang makatipun keti king e ya magligtas ing Ginu king kapamilatan na ning espada at tandus. Manibat king Ginu ing tagumpe king labanan, at ipasambut na ka kekami.

⁴⁸ Kanita linapit ya ing Filisteong i Goliat kang David, at memalagua ne mang milayi i David ban makiarap king Filisteo king lugal ning labanan.

⁴⁹ Ginauk ya i David king suput a daralan na at saka ya kinangwang metung a batu. Tiradol ne ing Filisteo at tiran ne kanuan. Kinutkut ya ing batu king kanuan na at misubsub ya king gabun.

⁵⁰ Makanyan neng simbut David ing Filisteo king kapamilatan na ning tiradol at batu; apate ne ing Filisteo. E ya man ginamit espada.

⁵¹ Kaybat milayi ya i David at saka ya tinalakad babo ning bangke nang Goliat at begut ne king kaluban na ing espada nang Goliat, at ya ing ginamit nang penabtab king batal na. fig,,,,,Apate ne ing Filisteo.,(17:50)fig* Memulayi la ring Filisteo inyang ikit deng mete ya ing karelang bayani.

⁵² Kanita kayabe ning masikan a kulisak ding sundalus na ning Israel at Juda penagal da la ring Filisteo angga na king papunta king Ekron. Miragsa la ring sugatan a Filisteo king dalan manibat Saaraim angga king Gat at Ekron.

⁵³ Kabalik da, kaybat da lang penagal ding Filisteo, kinua ra ding Israelita king kampu ra ding Filisteo ing sablang buri da.

⁵⁴ Kinua neng David ing buntuk nang Goliat at dela ne Jerusalem, oneng sininup na la king tolda na ding sandata nang Goliat.

⁵⁵ Panakit nang Saul kang David a ume nang makiarap king Filisteong i Goliat, kitang na king heneral nang i Abner, Abner, kaninu ya anak ing kayanakan a yan? Pekibat nang Abner, E ku pu balu, Makamal a Ari!

⁵⁶ Inya ngana ning ari, Pangutang mu nung kenu ya anak!

⁵⁷ Migbalik ya king kampu ra ding Israelita i David kaybat neng apate ing Filisteong i Goliat. Dinakit neng Abner at saka ne dela kang Saul; darala ne pang David ing buntuk na ning Filisteong i Goliat.

⁵⁸ Nganang Saul kang David, Kayanakan, kenu ka anak? Pekibat nang David, Anak na ku pu ning talasuyu yung i Jese ning Betlehem.

18

¹ Inyang meyari lang mipagsalita di David at Saul, tiblan ne ning lugud i Jonatan kang David. Ing lugud a penamdaman na kalupa na ning lugud na para king sarili na.

² Manibat na kanita e na ne pepaulian Saul i David.

³ Uling tune neng kaluguran Jonatan i David, sinumpa na king manatili lang mikaluguran.

⁴ Likas neng Jonatan ing balabal na at ing susulud nang imalan neng makilaban ya, at binie na iti kang David at pati na ing espada, pana, at ing sinturun na.

⁵ Magtagumpe ya i David nukarin mang labanan a papuntalan neng Saul; makanyan neng gewang pekapun da ring sundalus na. Ketula ra iti ding sablang sundalus at pati na ding opisyal nang Saul.

⁶ Minuli ne i Saul at i David, kaybat neng pete niti ing Filisteo, kayabe ra ding sundalus. Lulual la ding babai king balang siudad ning Israel a daralanan da ban sagana kang Aring Saul; magkanta la at teterak. Manigtigan lang pandereta, magkanta lang masaya at babagayan dang alpa.

⁷ Menigtigan la ding babai at ngarang magkanta: Libu-libu la ding pete nang Saul, oneng laksa-laksa la ring pete nang David.

⁸ E ya matula i Saul kaniting dimdam na, inya mimua ya. Ngana king lub na, Laksa-laksa la ring sasabian dang pete nang David samantalang aku libu-libu la mu. Kulang na mu ing ya na ing kilalanan dang ari.

⁹ Meriria ya i Saul kang David manibat na kanita.

¹⁰ Tinuking aldo ing marawak a espiritung ibat king Dios liban ne i Saul king bale na, at balamu murit ya. Manigtigan yang lira i David antimo ing gagawan na aldo-aldo at tatalnan na ne mang Saul ing tandus na.

¹¹ At sibatan neng mekatadua i David king tandus na uling isipan nang atarak ne i David king pader. Oneng apangilagan neng David.

¹² Manibat na kanita ketakutan na neng Saul i David, at aliwa na ya ing antabayanan na ning Ginu.

¹³ Ban midayu ya i David king arapan na gewa neng pamuntuk da ring libung sundalus at pepadala ne king lugal ning labanan. Penimunan na no man David ding sundalus king pamakilaban da.

¹⁴ Parati yang magtagumpe i David king nanumang gagawan na uling mamantabe ya kang David ing Ginu.

¹⁵ Inyang ikit nang Saul iti, lalu neng ketakutan i David.

¹⁶ Lalu ra ne mang aluguran i David king mabilug a Israel at king Juda uling ya ing manimuna king pamakilaban da. fig,,,,,At sibatan neng mekatadua i David king tandus na uling isipan nang atarak ne i David king pader.,(18:11)fig*

¹⁷ Kanita nganang Saul kang David, Ipakasal ke keka i Merab a pangane karing anak kung babai. Ing aduan ku mu keka ya ing tapat ka sanang sumuyu kanaku at manimuna ka karing pamakilaban ning Ginu. Inisip nang Saul king aliwa ya ing makamate kang David nune ding Filisteo.

¹⁸ Nganang David kang Saul, Ninu wari aku? Ninu ring kamaganak ku at pamilya nang tata ku? E ku karapatdapat maging manuyang na ning ari!

¹⁹ Oneng inyang malapit na nia mung ikasal David i Merab, pepakasal neng Saul i Merab kang Adriel a tau Meholat.

²⁰ Milsinta ya i Mikal a anak nang Saul kang David. Mibalita iti kang Saul. Matula ne mang mekabalita

²¹ uling inisip na king gawan neng patibung ban kanita apate re ding Filisteo i David. Inya ngana kang David, Talagang ngeni maging manuyang da na ka.

²² Kanita inutus nang Saul karing tauan na king sarilinan de i David at sabian da king kaluguran ne ning ari at ding tauan na; nung inya sukat neng mabisang maging manuyang na.

²³ Sinabi ra iti ding tauan nang Saul kang David. Nganang David, Malyari ku waring maging manuyang na ning ari ngening kalulu ku mu at ala kung sasabian?

²⁴ Belita ra kang Saul ing sinabi nang David.

²⁵ Kanita nganang Saul, Sabian yu kang David king ala kung buring nanumang duru nune mu ring dinalan a sepu ding balat a pipagsirkunsisyunan da ring Filisteo anting ablas karing kalaban. Inisip nang Saul iti ban paten de ring Filisteo i David.

²⁶ Inyang sinabi ra iti ding tauan ning ari kang David, metula yang maging manuyang ne ning ari. Bayu dinatang ing mituldung aldo,

²⁷ lisuban na lang David at ding sundalus na ding Filisteo, at mekapate yang aduang dalan a katau karela. Dela na lang David ding pipagsirkunsisyunan da at pepabie na lang alang bawas king ari ban kanita maging manuyang na ne ning ari. Kanita pepakasal na neng Saul kang David ing anak nang i Mikal.

²⁸ Lakuas neng ketakutan at kesaman i David inyang ikit nang Saul king antabayanan ne ning Ginu i David at king kaluguran ne ning anak nang i Mikal.

²⁹

³⁰ Parati yang magtagumpe i David neng makilaban ya karing Filisteo. Dakal ya labanan a simbut kesa karing aliwa nang opisyal Saul. Inya lalu yang mibantug.

19

¹ Misan sinabi nang Saul kang Jonatan a anak na at karing opisyal na king buri neng paten i David. Oneng kaluguran neng Jonatan i David.

² Nganang Jonatan kang David, Buri na kang paten tata ku; mingat ka bukas abak. Munta ka king metung a lugal a alang makibalu at karin ka salikut.

³ Munta ke karin tata ku at pakisabian ke tungkul keka. Sabian ku keka nung atin yang sabian kanaku.

⁴ Mayap ing sinabi nang Jonatan kang Saul a tata na tungkul kang David. Ngana, Tatang, e me sana daraptanan e ustu ing talasuyu mung i David uling ala ne mang gewang e ustu keka. King kamatutuanan, pekinabangan yu ing sabla nang depatan.

⁵ Teya na pati ing bie na at pete ne ing Filisteong i Goliat, at dininan neng maragul a tagumpe ning Ginu ing mabilug a Israel. Ikit yu iti at ketula yu. Nung sakaling paten ye i David king alang matulid a kasangkanan, patuluan yu kanita ing daya na ning taung ala namang kasalanan.

⁶ Pekiramdaman neng Saul i Jonatan. Nganang sinumpang Saul, King daramdaman na ning Ginu, susumpa kung e ku ne paten i David.

⁷ Inya inaus neng Jonatan i David at belita na ing milyari. Kaybat tiki neng Jonatan i David kang Saul, at antimo ing sadia sinuyu ya i David kang Aring Saul.

⁸ Misan milaban la ding Israelita at ding Filisteo. Sinugud ya king labanan i David at dakal la ding apate na karela. Tinakas la detang mitagan.

⁹ Misan liban ne ning marawak a espiritung ibat king Ginu i Saul kabang atyu ya king bale na at tatalnan ne ing sibat na. Manigtigan yang lira kanita i David.

¹⁰ Sibatan ne i David, oneng mekapangilag ya iti. Mitarak ya ing sibat king pader. Mikapulayi yang tinakas i David.

¹¹ Ketang benging ita mitubud yang tauan na i Saul king bale nang David ba reng banten at paten tutuking abak. Inya nganang Mikal a asawa nang David, Nung e ka pa tumakas ngening bengi, bukas paten da ka ren.

¹² Pepadalanan ne i David king awang at memulayi yang tinakas.

¹³ Kaybat kinua neng Mikal ing dios-diosan a pangbale at kinera ne iti king pagkeran at saka ne inulasan. Mibili yang ulunan a bulbul kambing king buntuk na niti.

¹⁴ Inyang datang la ring tubud nang Saul ban dakpan de i David, sinabi nang Mikal king masakit ya.

¹⁵ Pepagbalikan na lang Saul ding tiburan na kang David. Ngana, Ibuat ye pati pagkeran na at idala ye kanaku. Aku ing makamate kang David.

¹⁶ Inyang magbalik la ding tiburan na, atyu ing dios-diosan king pagkeran at atyu ing ulunan a bulbul kambing king buntuk na.

¹⁷ Nganang kinutang Saul kang Mikal, Obat lininlang mu ku at pepaburen meng mekatakas ing kanakung kalaban? Pekibat nang Mikal kang Saul, Kasi sinabi na kanaku king paten na ku, nung e ke paburen makatakas!

¹⁸ Tinakas ya pin i David at sinalikut ya kang Samuel karin Rama. Belita na kang Samuel ing sablang depat nang Saul. Minta ya i Samuel at i David king Nayot at karin la migdatun.

¹⁹ Atin mekasumbung kang Saul king i David atyu Nayot karin Rama.

²⁰ Inya mitubud yang tauan na ban dakpan de i David. Ikit da la ring tiburan nang Saul ding propeta; panimunan na lang Samuel. Kukulisak la reti at teterak. Liban na la ning espiritu na ning Dios ding tiburan nang Saul at mekiabe la kareting propeta.

²¹ Inyang mibalita iti kang Saul, mitubud yang aliwa. Makanyan munaman ing gewa ra: mekiabe la karing propeta. Pasibayu yang mitubud tauan na, oneng mekiabe la naman deti karing propeta.

²² Kanita ya na mismu ing minta king Rama, at miras ya king metung a maragul a talaga karin king Seku. Karin ya mengutang. Ngana, Nukarin ya i Samuel at i David? Ngana ning mekibat, Atyu la king Nayot karin Rama.

²³ Meko ya Seku i Saul at minta ya Nayot karin Rama. Liban nia naman ning espiritu ning Dios; kinulisak ya naman at tinerak kalupa ra ding propeta angga king miras ya Nayot karin Rama.

²⁴ Miglubas ya naman at saka ya kinulisak at tinerak arapan nang Samuel. Patingapun at kabukas yang lubas. Makanyan ya pegumpisan ing kutang: Mekiabe nia naman wari i Saul karing propeta?

20

¹ Kanita tinakas ya Nayot karin Rama i David at pintalan ne i Jonatan. Nganang David, Jonatan, nanu wari ing depat ku? Nanu ing gewa kung kasalanan? Obat buri na kung paten tata mu?

² Pekibat nang Jonatan, Marayu ing mate ka. Ala yang bage gagawan malati o maragul i tata ku a lilihim na kanaku. Ba't ilingad na kanaku ing buri nang gawan keka? E ku paniwalan ing gawan na ita.

³ Oneng pekibat nang David, Balu nang tata mu ing mikaluguran kata. Inari na king lub na ing e na pabalu iti keka uling ikalungkut mu. Oneng ing tutu na niti, saksi ya ing Ginu at saksi ka naman, king makatibi ku king kamatayan.

⁴ Kanita nganang Jonatan kang David, Gawan ku para keka ing nanumang sabian mu.

⁵ Nganang David kang Jonatan, Bukas bayu ne ing bulan at makisulu kung mangan king ari. Paburen mu na kung mako ban salikut ku king marangle angga king bengi na ning katlung aldo.

⁶ Nung panintunan na kung tata mu, kanita sabian mu king mekisabi kung mayap muli king Betlehem a balen mi. Karin balang banua mamain yang ain-sakripisyu ing mabilug ming pamilya.

⁷ Nung sakaling e ya mimua, kanita e ku numanu balang; nung sakali namang mimua ya, kanita abalu mu king buri na kung panasakitan.

⁸ Inya pakitanan mu kung ganaka alang-alang ketang pikasundu ta. Nung sakaling atin kung kasalanan, ika na ing makamate kanaku; obat sukat mu ku pang idala kang tata mu?

⁹ Nganang Jonatan, Marayung malyari iti! Nung balu ku mung e mayap ing buri nang gawan tata ku laban keka, e ku wari sabian keka?

¹⁰ Kanita nganang David kang Jonatan, Makananu kung abalu ing pakibat na?

¹¹ Pekibat nang Jonatan, Tara, munta kata king marangle. Inya minta la king marangle.

¹² Nganang Jonatan kang David, Saksi ya ing Ginung Dios ning Israel! Potang akasabi ku ne i tata ku, king oras a anti kaniti bukas o king katlung aldo, at nung abalu kung ala ne mang e mayap a tatangka laban keka, patubud ku at sabian ku iti keka.

¹³ Nung buri na na ka mang panasakitan tata ku, parusan na ku ning Dios, nung e ku sabian keka iti at palakuan da ka ban e na ka ananu balang. Antabayanan na ka sana ning Ginu nung makananu neng antabayanan i tata ku.

¹⁴ Nung sakaling mabie ku pa, patutuan mu kanaku ing tapat mung sinumpa kanaku; nung sakaling mete na ku

¹⁵ pakit mu ing ganaka mu king kanakung pamilya agyamang agisan na no ning Ginu at kelisan king lupa na ning yatu ding sablang kalaban mu.

¹⁶ E ya sana makakalinguan king pamilya mu ing lagyu nang Jonatan. Parusan na la sana ning Ginu ding kalaban mu!

¹⁷ Uling kaluguran neng Jonatan i David antimo ing lugud na king sarili na, pasibayu yang sinumpa.

¹⁸ Kanita nganang Jonatan kang David, Bukas, Piesta ning Bayung Bulan; panintunan da ka uling alang makalukluk king lugal mu.

¹⁹ King katlung aldo lalu rang apansinan ing ala ka; kanita munta ka king lugal nung nu ka sinalikut; salikut ka karetang batung makabuntun.

²⁰ Magkunwari kung magsane king pamamana; makatatlu ku mamana ketang lele ra ding makabuntun a batu,

²¹ at iyutus ku king kayabe ku king panintunan na la at kuanan ding paslu. Nung sakaling sabian ku king kayabe ku ing atyu la king lele na ding paslu, malyari na kang lumual kanita uling alang panganib. Saksi ke ing Ginu kaniting sinabi ku.

²² Nung sabian ku king atyu la ding paslu king makalagpus, kanita tumakas ka uling iti ya ing kaburian na ning Ginu.

²³ Tungkul ketang pisumpanan ta, ing Ginu ya ing saksi kaniti angga king alang angga.

²⁴ Inya sinalikut ya i David king marangle. Inyang mibayu ya ing bulan, linukluk ya ing Aring Saul ban mangan.

²⁵ Linukluk ya king luklukan na antimo ing sadia ketang luklukan malapit king pader; makalukluk ya arapan na i Jonatan, i Abner keta ne mang metung nang dane Saul, oneng ala king luklukan nang David.

²⁶ Makanyan man ala yang sinabi ketang aldong ita tungkul kang David uling inisip na king ating milyari o kaya naman e ya malinis inya e ya tinagun king piesta.

²⁷ Oneng king kaduang aldo, itang aldo kabukasan na ning bayung bulan, ala pa mu ring makalukluk king lugal nang David. Kanita kitang na ning ari kang Jonatan a anak na, Obat e ya mekisulung mengan napun at ngeni i David a anak nang Jese?

²⁸ Pekibat nang Jonatan kang Saul, Pekisabi nang mayap David kanaku ing munta ya Betlehem.

²⁹ Pekisabi nang mayap kanaku ing tulutan keng muli uling balang banua miyayain yang ain-sakripisyu king balen ing pamilya na. Pepaulian ne ning kapatad na. Yan ing sangkan nung inya e ta ya kasulu.

³⁰ Mimua ya kang Jonatan i Saul at nganang kinulisak, Anak na ka pin ning babaing taksil at mapaglaban! Balu ku king kampi ka kang David a anak nang Jese. Sukat kang dumine king sarili mu at kang ima mu!

³¹ Uling anggang mabie ya i David a anak nang Jese, e ka malyaring maging ari. Uli na niti, patubud ka at idala me kanaku uling sukat neng mate!

³² Kanita nganang Jonatan kang tata na, Obat sukat yang mate? Nanu wari ing depat nang kasalanan?

³³ Oneng pinukul neng Saul ing tandus kang Jonatan. Makanyan nang abalu nang Jonatan king talagang buri neng paten Saul i David.

³⁴ Tinalakad yang mibubua mua i Jonatan at e ya mengan kanitang kaduang aldo na ning bulan uling maliligalig ya tungkul kang David at uling pemakarine neng tata na.

³⁵ Inyang miras ing abak, agpang king pikayari da, minta ya i Jonatan king marangle ban makikit kang David. Kayabe ne ing metung a anak a lalaki.

³⁶ Sinabi na king anak a kayabe na king panintunan na la ding paslu na. Kabang mamulayi ya ing anak, memana ya at linagpus ya ing paslu king anak a lalaki.

³⁷ Inyang miras ya ing anak ketang lugal nung nu ya digpa ing paslung pemana nang Jonatan, kilait ne ing anak at ngana, E ya makalagpus keka ing paslo?

³⁸ Malagua ka; e ka magpalat ken! Tinipun na la ning anak ding paslu at saka ne linapit king panginuan na.

³⁹ Oneng ala yang balu ing anak king kabaldugan ning milyari; bukud mung di Jonatan at David ilang makibalu.

⁴⁰ Binie na lang Jonatan ding sandata na king anak at ngana, Sulung, muli na ka at idala mu la reti king siudad.

⁴¹ Kalako na ning anak, tinalakad ya i David lele da retang makabuntun a batu at siniklaud ya at saka ya dinukung makatatlung besis. Mipangaul la at mipanangis. Mas maluat yang menangis i David.

⁴² Kanita nganang Jonatan kang David, Mako na kang payapa; saupan na kata sana ning Ginu ban e masira ing pisumpanan ta. Mantabe ya sana kekata ing Ginu at karing kekatang lahi angga king alang angga. Tinalakad ya i David at saka ne meko; mibalik ne man i Jonatan king siudad. fig,,,, ,Mantabe ya sana kekata ing Ginu.,(20:42)fig*

21

¹ Kanita minta ya Nob i David at pekikitan ne i Ahimelek a pari. Gagalgal yang sinalubung kang David i Ahimelek at nganang mengutang, Obat ikang dili mu? Ala kang kayabe?

² Pekibat nang David, Atin yang inutus kanaku ing ari at penabilin na ing e ku paniabian kaninu man ing parapat na kanaku. Pepapanaya na ku mu karing kayabe ku king metung a lugal.

³ Nanu ing pamangan yu ken? Dinan yu kung limang tinape o kaya nanumang pamangan a atyu keti.

⁴ Ngana ning pari, Alang aliwang tinapeng atyu keni subali mu ing sagradung tinape. Nung sakaling e la siniping ding kekang sundalus karing babai malyari lang mangan kaniting tinape.

⁵ Nganang David king pari, Ing tutu na niti, malaut la kekami ding babai neng atin keng lakad agyamang pangkaraniwan yang lakad. O ngeni pa mong maselan ing lakad mi!

⁶ Uli na niti, dininan ne ning pari king sagradung tinape; uling alang tinape karin nune mu itang tinape a miyain king altar na ning Ginu. Lalako re iting tinape king altar ning Ginu at alilan deng tinape kakid-akid potang miras ne ing aldo a sukat deng alilan.

⁷ Mipaintagun ing atyu ya kanita karin i Doeg a tau Edom, ing metung karing tauan nang Saul at pekapun da ring pastul na. Atyu ya karin ban samba king Ginu.

⁸ Nganang David kang Ahimelek, Atin kayung tandus o kaya espada? E ke dela ing espada ku o nanumang sandata uling pamalaguanan na ku ning ari tungkul king utus na kanaku.

⁹ Pekibat na ning pari, Atyu ya keni ing espada nang Goliat, ing Filisteo a pete mu karin king Kapatagan ning Ela; atyu keta king kagulutan na ning efod; makabalut yang imalan. Nung buri me, kuanan me; alang aliwang sandata keti nune mu ita. Nganang David, Ala yang kalupa ing sandatang ita; ibie ye kanaku.

¹⁰ King aldong ita meko ya i David ban takasan ne i Saul. Minta ya kang Akis a ari ning Gat.

¹¹ Ngara ding tauan nang Akis, Aliwa i David a ari na ning Israel ine? Ya ing pagkanta da ring babai kabang teterak la, Libu-libu la ding pete nang Saul, oneng laksa-laksa la ring pete nang David.

¹² Meligalig ya i David king sinabi ra at mitakutan ya kang Aring Akis ning Gat.

¹³ Inya king akakit da migkunwari yang murit; memanyulat ya karing pasbul dalan na ning siudad at pepaburen nang tinaluntun ing wawa na king balbas na.

¹⁴ Kanita nganang Akis karing tauan na, Murit ya ing tau; obat dela ye pa kanaku?

¹⁵ Dakal na la ring taung murit keti. Buri yung asaksian ku ing kamuritan na? Pabalausnan ke kaya king pibalebale ko?

22

¹ Ibat Gat tinakas ya i David at sinalikut ya king kueba ning Adulam. Inyang abalitan da iti pintalan de ring kapatad na at ding sabla nang kamaganak.

² Mekiabe la kang David ding sablang taung daralan maragul a kasakitan at makakutkut king utang; antimu rin detang e masaya king malilyari king bansa. Meging pamuntuk de ring e maygit o kumulang a apat a ralan a lalaki.

³ Manibat karin minta ya i David king Mizpa ning Moab. Ngana king ari na ning Moab, Ipakisabi ku sanang mayap kekayu king tulutan yu lang manatiling kayabe yu i tata ku at ima ku anggang e ku pa balu ing kaburian na ning Dios para kanaku.

⁴ Likuan na la king ari na ning Moab at menatili lang kayabe na kabang atyu ya i David king kuta king bunduk.

⁵ Kanita sinabi na ning propetang i Gad kang David, E ka manatili king kuta mu king bunduk; mako ka ken at munta ka king sakup ning Juda. Makanyan yang meko i David at minta ya king gubat na ning Heret.

⁶ Abalitan nang Saul nung nu ya sasalikut i David at ding tauan na. Makalukluk ya i Saul king Gibea lalam ning tanaman a tamarisko a atyu king metung a bunduk-bundukan. Tatalnan ne ing tandus na king metung a gamat at abe na la ngan ding tauan na.

⁷ Nganang Saul karing tauan na, Makiramdam kayu, ikayung lahi nang Benjamin; dinan na kayu waring marangle at gabun pitatamnan ubas David a anak nang Jese? Gawan na kayu waring pamuntuk da ring libu-libu o dina-dinalan a sundalus?

⁸ Obat makisapakat kayu kang David laban kanaku? Obat metung man alang memalita kanaku king mekikasundu ya pala ing anak ku kang David a anak nang Jese? Metung man alang migmalasakit kanaku at mekasabi king ing anak ku silsulan ne pang lumaban kanaku ing talasuyu kung i David a ngeni manaya ba na kung tambangan.

⁹ Kanita pekibat nang Doeg a tau Edom a makatalakad kayabe ding tauan nang Saul, Ikit keng papunta Nob i David a anak nang Jese; pintalan ne i Ahimelek a anak nang Ahitub karin Nob.

¹⁰ Mengutang ya pa i Ahimelek king Ginu para kang David. Dininan ne pang pamangan at saka ne binie kang David itang espada na ning Filisteong i Goliat.

¹¹ Kanita pepayaus ne ning ari i Ahimelek, ing pari a anak nang Ahitub, at ding sabla nang pamilya a pari karin king Nob. Minta la ngan deti king ari.

¹² Nganang Saul, Makiramdam ka, anak nang Ahitub. Pekibat na, Makiramdam ku pu, Makamal a Ari!

¹³ Nganang Saul, Ahimelek, obat mekisabuatan ka laban kanaku? Obat mekisapakat ka kang David a anak nang Jese? Dininan mu neng tinape, dininan me pang espada. Mengutang ka pa king Dios para kang David, inya mig-rebeldi ya laban kanaku at manaya ya ngeni ba na kung tambangan.

¹⁴ Kanita pekibat nang Ahimelek king ari, Ninu mo pu karing sabla yung tauan ing kasing tapat nang David a manuyang yu at pekapun da ring bante-sundalus yu, at gagalang da king mabilug yung kayarian?

¹⁵ Ngeni ku pa wari mengutang king Dios para kang David? Ali! E yu ku sana bibintanganan nanumang kasalanan at ing mabilug ming pamilya. Ala ku pung balu ditak man o dakal tungkul king bage a iti.

¹⁶ Kanita ngana ning ari, Mate ka ngeni, Ahimelek, at pati na ing mabilug mung pamilya!

¹⁷ Nganang minie utus ning ari karing guardia na, Paten yu la ding pari na ning Ginu uling kasabuat na lang David. Balu rang tinakas ya i David oneng e ra pepabalu iti kanaku. Oneng mikakunu la ding guardia a buatananan da lang gamat ding pari na ning Ginu.

¹⁸ Kanita ngana ning ari kang Doeg, Ika nang makamate karing pari na ning Ginu. At pete na lang Doeg a tau Edom ding pari; walu lang pulu't lima ding pete nang pakasulud efod.

¹⁹ Pepapate na la naman ding sablang makatuknang king Nob a siudad da ring pari; lalaki't babai, anak at pati na ding pasusuan, baka, asno, at tupa.

²⁰ Oneng i Abiatar, ing metung karing anak nang Ahimelek at apu nang Ahitub, mekatakas ya at pintalan ne i David.

²¹ Belita nang Abiatar kang David king pepapate na lang Saul ding pari na ning Ginu.

²² Nganang David kang Abiatar, Balu ku na kanitang atyu ya i Doeg a tau Edom ing sumbung ya kang Saul. Aku ing maki pakibatan king pangamate na ning mabilug mung pamilya.

²³ Manatili kang kayabe ku; e ka tatakut. Ing bisang makamate keka ya naman ing bisang makamate kanaku. Ligtas ka ngening kayabe mu ku.

23

¹ Abalitan nang David king lulusuban de ring Filisteo ing Keila at kakuanan da ing pupul karing pidadaran.

² Inya kitang nang David king Ginu, Buri yung labanan ku la deting Filisteo? Pekibat na ning Ginu kang David, Wa, lusuban mu la at iligtas me ing Keila.

³ Oneng ngara ding tauan nang David, Ngening keti ta pa king Juda mangatakutan na kami, e kasi lalu na potang labanan ta la karin Keila ding sundalus da ring Filisteo?

⁴ Mengutang yang pasibayu i David king Ginu. Nganang mekibat ning Ginu, Mako ka at munta karin Keila uling pasambut ku la keka ding Filisteo.

⁵ Minta ya i David at ding tauan na karin Keila at mekilaban la karing Filisteo. Kinua da la ring sese rang animal at dakal la pete karing Filisteo. Makanyan na lang linigtas David ding memalen na ning Keila.

⁶ Inyang tinakas ya i Abiatar a anak nang Ahimelek at minta kang David karin Keila, dinatang yang magdalang efod.

⁷ Mibalita kang Saul king minta ya Keila i David. Nganang Saul, Bildug nia mu rin ning Dios karing gamat ku; anti na ning kilung nang David ing sarili na ngening linub ya king metung a balen a maki pasbul at pader.

⁸ Pepayaus na lang Saul ding tauan na ban makilaban at munta karin Keila, at saka lumusub kang David at karing tauan na.

⁹ Inyang abalitan nang David king magtangka yang lumusub i Saul, sinabi na king paring i Abiatar, Idala me keni ing efod.

¹⁰ Kanita nganang David, Ginu, Dios ning Israel, dimdam ning kekang talasuyu king bisa yang munta Keila i Saul ban lasakan ne ing siudad king uli ku.

¹¹ Isuku ra ku kaya ding memalen na ning Keila? Datang ya pin kaya i Saul antimo ing abalitan ku? Ginu, Dios ning Israel, pakisabi kung mayap, sabian yu kanaku. Pekibat na ning Ginu, Datang ya pin.

¹² Kanita kitang nang David, Isuku ra ku kaya at ding tauan ku kang Saul ding memalen ning Keila? Pekibat na ning Ginu, Isuku ra kayu.

¹³ Kanita mu rin meko ne Keila i David at ding tauan na a ating anam a ralan a kabilangan. Miglipat-lipat la pipagkampuan. Kabud abalitan nang Saul king mekatakas ya Keila i David, kelinguan na na ing balak nang lumusub king Keila.

¹⁴ Menatili ne man i David karing kuta king bulubundukan at king ilang nang lugal ning Zif. Aldo-aldo neng panintunan Saul, oneng e na peintulut ning Dios ing arakap ne.

¹⁵ Mitakutan ya i David uling pilit neng panintunan Saul ban paten ne. Atyu i David karin king Hores ning ilang ning Zif.

¹⁶ Meko ya i Jonatan a anak nang Saul at pintalan ne i David karin Hores, at pepasiknangan ne lub king lagyu ning Ginu.

¹⁷ Nganang Jonatan kang David, E ka tatakut. E na ka ananu balang tata ku. Maging ari na ka ning mabilug a Israel at aku naman maging kadua ku keka king upaya. Balu na naman ning tata kung i Saul iti.

¹⁸ Mikasundu la ilang adua arapan na ning Ginu; menatili ya Hores i David samantalang minuli ne man i Jonatan.

¹⁹ Kanita pintalan de ring mapilan a tau ning Zif i Saul a atyu kanita king Gibea. Ngara, Makamal a Ari, sasalikut ya i David karing kuta ning Hores, king bunduk na ning Hakila a atyu king banda nang mauli ning Jesimon.

²⁰ Inya tuki kayu kekami, Makamal a Ari. Balu mi king tutu yu neng buring arakap i David. Makasadia kaming sumaup ban marakap ya.

²¹ Nganang Saul karela, Bendisyunan na kayu sana ning Ginu uli na ning malasakit yu kanaku.

²² Muli na kayu at siguraduan yu mu nung nu ya sasalikut at nung ninung menakit kang David karin. Tutu yang malyap ing taung yan at masakit yang dakpan.

²³ Inya siguraduan yu la ding lugal a pisasalikutan na at kaybat ituru yu la kanaku. Kanita tuki ku kekayu. At nung atyu ya pa, panintunan ke king mabilug a Juda.

²⁴ Meko na la at migbalik la Zif. Minuna no kang Saul. Atyu ne man i David at ding tauan na king ilang ning Maon karin king Araba a atyu king banda nang mauli ning Jesimon.

²⁵ Penintun na lang Saul at ding tauan na. Belita ra iti kang David. Inya minta ya king kutang batu a atyu king ilang na ning Maon. At inyang abalitan nang Saul ita, tegal ne i David king ilang ning Maon.

²⁶ Samantalang atyu ya i Saul at ding tauan na king metung nang dane ning bunduk-bundukan, atyu ne man i David at ding tauan na king kasumangid. Memirapal yang linaut i David kang Saul uling palapit ne i Saul at ding tauan na at karing tauan na ba reng dakpan.

²⁷ Kanita ne man dinatang ing metung a tubud kang Saul. Ngana, Magmalagua kayu uling lisuban da katamu ding Filisteo!

²⁸ Makanyan nang tiknang Saul ing pamanagal kang David, at ding Filisteo ila ring inarapan na. Inya meyaus yang Bunduk-bundukan ning Pamanakas ing lugal a ita.

²⁹ Ibat karin meko ya i David at menatili ya karing kuta ning Engedi.

24

¹ Inyang mibalik ya i Saul ibat king pamanagal karing Filisteo, belita ra king atyu ya i David king ilang ning Engedi.

² Mituki yang atlung libu kataung mayap dili king mabilug a Israel at penintun ne i David at ding taung kayabe na banda king lugal a mabatung tuknangan da ring kambing a malyap.

³ Mipatulid ya king kulungan tupa lele ning dalan; ating kueba karin. Linub ya i Saul ban magbawas karin. Atyu ne man kanita i David at ding tauan na kilub ning kueba; makalukluk la king kakilubkiluban na.

⁴ Ngara ding tauan nang David, David, miras na ing aldo tildu ning Ginu a sinabi, Ngeni, ibie ke ing kalaban mu king gamat mu at gawan mu ing nanumang buri mu king kekang kalaban. Kanita tinalakad ya i David at king e na kamalayan Saul pagulung neng pinutut ing laylayan na ning balabal na.

⁵ Oneng e ya mipaindatun uling pinutut ne laylayan ing balabal nang Saul.

⁶ Ngana karing tauan na, E na sa paintulut ning Ginu ing gawan ku iti king kanakung panginuan a linian na ning Ginu: ing lapastanganan ke ing pinili na ning Ginu.

⁷ Makanyan na lang pengamanuan David ding tauan na at e na peintulut ing lusuban de. fig,,,,,Kanita tinalakad ya i David, at king e na kamalayan Saul pagulung neng pinutut ing laylayan na ning balabal na.,(24:4)fig* Tinalakad ya i Saul at linual ya king kueba at sindu na ing pamaglakbe na.

⁸ Tinalakad ya naman i David at linual king kueba at nganang kinulait kang Saul, Makamal a Ari! Inyang malikid ya i Saul, dinuku yang angga king gabun i David at pigayan ne.

⁹ Nganang David kang Saul, Obat pakiramdaman yu la ding taung sasabi king buri da kayung paten?

¹⁰ Ngening aldong iti masala yung ikit nung makananu na kayung bildug ning Ginu karing gamat ku kilub ning kueba; buri da ring kanakung tauan king paten da kayu, oneng e ku gewa iti. Sinabi kung e ke malyaring lapastanganan ing panginuan ku, uling ya ing pinili na ning Ginu.

¹¹ Lawan ye, O Makamal a Ari, ing laylayan ning balabal yu. Pinutut ke ing laylayan ning balabal yu; e ra na ko man ninanan ban abalu yu at akit king ala kung depat a e ustu o kataksilan a isipan laban kekayu. E ku mikasala kekayu agyamang panintunan yu ku ba yu kung paten. E ra na ko man ninanan.(24:11)

¹² Ing Ginu ya ing matul kekatang adua; ya na mung bala kekayu. Oneng e ra kayu malyaring lapastanganan.

¹³ Ngana ning matuang kasebian, E mayap ing dapat da ring taung e mayap! Oneng aku e ra kayu panasakitan.

¹⁴ Ninu ing panintunan na ning ari ning Israel ban paten na? Ninu ing tatagalan na? Mistula ku mung metung a asung mete o kaya metung a pulgas.

¹⁵ Ing Ginu ya nang matul kekatamung adua; balu na ing bage iti at iligtas na ku sana king gamat yu.

¹⁶ Nganang Saul inyang asabi na lang David deting amanu, Ika pin yan, O anak kung David? At menangis yang masikan.

¹⁷ Ngana kang David, Maygit ka pang makatuliran kesa kanaku; mayap ing inablas mu kanaku samantalang e mayap ing inablas ku keka.

¹⁸ Pepatunayan mu pa mu iti ngeni: e mu ku pete agyamang binie na na ku ning Ginu karing gamat mu.

¹⁹ Uling ninu mong tau ing paintulut king makatakas ya pa ing kalaban nung arakap na ne? Inya ya nang bala keka ing Ginu uli na ning gewa mung mayap kanaku king aldong iti.

²⁰ Ngeni balu ku king maging ari ka pin at milipat ya keka ing panga-ari ku king mabilug a Israel.

²¹ Isumpa mu kanaku king arapan na ning Ginu king e mo sana papaten ding lahi ku at e me sana kakalisan ing lagyu ku king pamilya nang tata ku.

²² Mengaku ne man i David kang Saul. Kaybat na nita, minuli ne i Saul; oneng minta ya i David at ding tauan na king lugal a pisasalikutan da.

25

¹ Mete ya i Samuel. Mitipun ya ing mabilug a Israel at pigpaldasan ne. Kitkut de king bale na karin king Rama. Kaybat na nita, minta ne man i David king ilang ning Paran.

² Ating metung a taung mabandi karin Maon; atyu king Carmel ing pibandian na. Atlu lang libu ding tupa na at libu no man ding kambing na. Ururan na la ding tupa na karin Carmel.

³ Nabal ya lagyu ing tau at i Abigail ya ing asawa na. Biasa ya at malagu ing babai, oneng masungit ya at matsura ugali iting lalaking lahi nang Caleb.

⁴ Abalitan nang David a atyu king ilang king ururan na lang Nabal ding tupa na.

⁵ Inya mitubud yang apulung kayanakan kang Nabal at nganang minie bilin David kareti, Munta kayu Carmel at puntalan ye i Nabal; pugayan ye king lagyu ku.

⁶ Makanyan yeng pugayan, Kapayapan keka, kapayapan king kekang pibalebale; kapayapan king sablang atyu keka.

⁷ Abalitan kung ururan mu la ding tupa mu; kayabe mi la ding magpastul mu at e mi la ninanan at ala lang keilanganan kabang atyu la king Carmel.

⁸ Pangutnan mu la at patunayan da iti keka. Inya matula mo sanang tanggapan ding kanakung tubud. Ipakisabi ku sana nung malyari ngeni mu mang piesta yu, dinan mu ke sanang apangan mi, deting talasuyu mu at ing kaluguran mung i David.

⁹ Inyang miras na la ding kayanakan a tiburan nang David, sinabi ra kang Nabal itang pasabi nang David, at menenaya lang pakibat.

¹⁰ Nganang Nabal karing tubud nang David, Ninu wari i David? Ninu ya wari ing anak nang Jese? Dakal la ngeni ding ipus a tatakas karing panginuan da!

¹¹ Kuanan ku naman wari ing tinape ampon inuman at karning sidia ku para karing manurud kung tupa, at kaybat ibie ku mu karing taung e ku man balu penibatan?

¹² Meko la ding kayanakan a tubud nang David, at mibalik la at belita ra iti kang David.

¹³ Kanita nganang David karing tauan na, Dalan yu la ding espada yu! Dela ne ning balang metung at metung ing espada na. Dela nia namang David ing espada na. Ating apat a ralan a katau karing tinuki kang David kabang melakuan lang magbante king karelang karga ding aduang dalan.

¹⁴ Oneng minta ya ing metung karing magobra nang Nabal kang Abigail at nganang sinabi, Pepatubud ya pu ibat king ilang i David ban pugayan ne ing kekaming panginuan, oneng kemuanan na la pu ding tubud.

¹⁵ Maganaka no man kekami ding taung deta. E ra ke ninanan at ala lang kinua nanuman kekami kabang kayabe mi la king marangle.

¹⁶ Binten da kami aldo at bengi kabang kayabe mi la king pamagpastul mi.

¹⁷ Isipan yu pung masalese nung nanung agawa yu, uling mibili ya king panganib ing panginuan mi at antimu rin ing mabilug nang pibalebale. Masiadu yang masungit, inya alang mangangas makipagsalita king asawa yu.

¹⁸ Kanita i Abigail memalagua yang migsadiang aduang dalan a tinape, alak karing aduang lulanan, limang tupang mekatat na, at limang takal a trigung sing-le, dinalan a kasapunggul a pasas, at aduang dalan a bibingkang higera, at pepasake na iti karing asno.

¹⁹ Ngana karing ipus, Sulung; muna na kayu kanaku; tuki ku kagulutan yu. Linihim na iting bage kang Nabal a asawa na.

²⁰ Kabang maglakbe yang makasake king asno at tutuntun king metung a gasgas king bunduk-bundukan, kanita ne man datang i David at ding kayabe na. Ikua rang misalubung.

²¹ Nganang David king lub na, Sayang mu pala ing depat ming pamagbante king pibandian na ning taung i Nabal king ilang; e ya kebatingan nanuman king uli mi. Oyni pa ing apala mi.

²² Parusan na ku sana ning Dios nung sakaling bukas atin kung itagan mabie metung mu man karing lalaki king pibalebale na.

²³ Panakit nang Abigail kang David agad-agad yang kinuldas king asno na at dinuku ya angga king gabun arapan nang David.

²⁴ Migsakab ya lele nang bitis at ngana, Kanaku yu na pu ipagpa ing mua yu, oneng ipakisabi kung mayap king pakiramdaman yu pa mu ing sabian ku.

²⁵ E ye sana papansinan ing asawa kung i Nabal. Ala yang kwentang tau. Bage ne pin ing lagyu na: luse ya. At luse ya pin. E ku la pu ikit ding kayanakan a tiburan yu kekami.

²⁶ Ngeni pu, makamal, ing Ginu at ikayu na ing saksi ngening e na peintulut ning Ginu ing patulu kayung daya at mablas karing sarili yung gamat. Mananu na sanang miras karing kalaban yu at karing bisang manampalasan kekayu ing miras kang Nabal.

²⁷ At ngeni paintulut yung ing dela ku kekayu tanggapan da ring kayanakan a kayabe yu.

²⁸ Patawaran yu sana ing nanumang kasalanan ning talasuyu yu; siguradung gawan na kayung ari ning Ginu uling para king Ginu kayu makilaban at alang nanumang dewakan kekayu.

²⁹ Nung sakaling atin taung bisang makamate kekayu, e na paintulut ning Ginu ing milako kayu karing taung ingatan na bie. Nune ing bie ra ding kekayung kalaban maging kalupa lang batung paniradol.

³⁰ Keng tuparan na ning Ginu ing sablang sinabi nang mayap tungkul kekayu at tilduan na na kayung maging pamuntuk ning Israel,

³¹ ala kayung sukat ganakan. Ala kayung sukat ikabalisa uling e na ko man pepatulung daya king alang sangkan at migbengansa karing kekayung kalaban. Nung sakaling dinan na na kayung masanting a kabilian ning Ginu, e yu ku sana kakalinguan. fig,,,,,Panakit nang Abigail kang David...,(25:23)fig*

³² Kanita nganang David kang Abigail, Purian ya ing Ginu, ing Dios ning Israel, ing mitubud keka kanaku king aldong iti!

³³ Mayap a oras king masanting mung pamisip; mayap a oras keka uling e mu peintulut ing patulu kung daya king aldong iti at mablas king kapamilatan da ring gamat ku!

³⁴ Saksi ya ing Ginung Dios ning Israel; e na peintulut ing apanasakit da ka. Nung e ka memalaguang migsaria kanaku tabalu ta nung itang kabukasan atin pang metung mang lalaki a mitagan king pibalebale nang Nabal.

³⁵ Kanita tinggap nang David itang dela nang Abigail. Ngana, Abigail, muli na kang payapa; lawan mu, pekiramdaman da ka at binie ku ing aduan mu.

³⁶ Migbalik ne kang Nabal i Abigail; lipat ne pa ning piestang sidia ra para king metung a ari ing pepasadia nang Nabal king bale na. Masaya yang e mu nanu i Nabal uling tutu neng malasing. Inya ala yang sinabi nanuman i Abigail kang Nabal angga na inyang miras na ing abak.

³⁷ Pangayabak e ne malasing i Nabal at belita na la ning asawa na deting bage. Meyataki ya at e ne makagalo.

³⁸ Kaybat da ring apulung aldo lakuas yang melala kabilian at melaus yang mete.

³⁹ Nganang David inyang abalitan nang mete ne i Nabal, Purian ya ing Dios uling ya ing minablas king insultu a tinggap ku kang Nabal at e na peintulut kanaku ing gawang e ustu; pepagpa na ning Ginu kang Nabal itang e mayap nang dapat. Kanita mitubud ya i David kang Abigail at pepasabi na king buri neng maging asawa na.

⁴⁰ Miras la ding tiburan nang David kang Abigail karin Carmel. Ngara, Tiburan na kaming David keka ban ituki ra ka at ban maging asawa na ka.

⁴¹ Tinalakad ya i Abigail at dinuku ya angga king gabun. Ngana, Talasuyu na ku at makasadia kung manos karing bitis da ring talasuyu na ning kanakung panginuan.

⁴² Memalagua yang tinalakad i Abigail at sinake ya king metung a asno. Kayabe na la ding limang babaing katulung na at tikian da la ring tubud, at meging asawa neng David.

⁴³ Asawa na nia namang David kanita i Ahinoam ning Jezreel; ilang adua ding meging asawa na.

⁴⁴ Binie na ne mang Saul ing anak nang i Mikal a asawa nang David kang Palti a anak nang Lais a tau Galim.

26

¹ Kanita pigsarian de ring mapilan a tau Zif i Saul; belita ra king sasalikut ya i David king Bunduk ning Hakila a atyu king dane nang aslagan ning Jesimon.

² Agad-agad yang minta i Saul king ilang ning Zif; kayabe na la ding atlung libung piling sundalus ning Israel ban panintunan de i David.

³ Migkampu ya i Saul king lele ning dalan ning Bunduk ning Hakila king banda nang aslagan ning Jesimon. Oneng menatili ya king ilang i David inyang abalitan nang panintunan neng Saul.

⁴ Mitubud yang ispia at abalu nang panintunan ne pin Saul.

⁵ Kanita minta ya i David king lugal nung nu ya migkampu i Saul. Miras ya king lugal nung nu ya matudtud i Saul; matudtud ya lele nang Abner a anak nang Ner at pekapun da ring sundalus na at makapadurut la karela ding sundalus na.

⁶ Kanita nganang David kang Ahimelek a Hiteo at kang Abisai a kapatad nang Joab at anak nang Zeruia, Munta ku king kampu nang Saul! Ninung tuki kanaku? Mekibat ya i Abisai, Aku, tukian da kayu!

⁷ Inyang benging ita pagulung yang linapit i David at i Abisai karing sundalus at ikit deng matudtud i Saul kilub ning kampu. Makatasak ya king gabun lele nang kabuntukan ing tandus nang Saul; matudtud ya lele nang Abner at makapadurut la ding sundalus na.

⁸ Kanita nganang Abisai kang David, King aldong iti binie ne ning Dios karing gamat yu ing kekayung kalaban. Paintulut yung tandusan kiang misan at saka ke itasak king gabun. E ke man kailangan tandusan makatadua.

⁹ Oneng nganang David kang Abisai, E me nananan! Alang ninumang lapastangan king pinili na ning Ginu a e mo sana mamayaran.

¹⁰ Ngana pang migsalitang David, Ing Ginu ya ing saksi at ya na ing bala kang Saul; mate ya mu rin; malyaring makilaban ya at kanita ya mate.

¹¹ Oneng e na sana paintulut ning Ginu ing lapastanganan ke ing pinili na! Kuanan nia mu ing tandus na at itang lulanan danum a atyu king kabuntukan na at kaybat mako ta na.

¹² Inya kinua neng David ing tandus at itang lulanan danum a atyu king kabuntukan nang Saul at saka na la meko. Alang metung mang menakit o makibalu o migising; menatili lang matudtud uling pepatudturan na lang maniaman ning Ginu.

¹³ Linipat ya kasumangid i David at tinalakad ya king babo ning bunduk-bundukan. Malaut-laut ne kanita karela.

¹⁴ Kaybat kinulait ya i David karing sundalus at kang Abner a anak nang Ner, Abner, daramdaman mu ko? Ninu ikang lilingasngas king ari? nganang mekibat Abner.

¹⁵ Pekibat nang David kang Abner, Bala ku sanang matapang ka at ala kang kalupa king mabilug a Israel? Obat e me binten masalese ing panginuan mung ari? Milub ya ing metung karing kanakung sundalus; pigtangkan neng paten ing ari oneng e mu balu iti!

¹⁶ E ustu ing depat mu. Sukat mung pakibatan iti. Saksi ya ing Ginu, sukat kang mate uling e me binten masalese ing ari a pinili na ning Ginu. Ngeni nukarin ya ing tandus na ning ari at itang lulanan danum a atyu lele nang kabuntukan?

¹⁷ Akilala neng Saul ing siwala nang David. Inya ngana, Ika pin yan, O anak kung David? Pekibat nang David, Aku pin pu, Makamal kung Ari.

¹⁸ Obat pakirakpan ne ning makamal a ari ing talasuyu na? Nanu pu wari ing gewa ku o pamikasala ku?

¹⁹ Nung dapat na ning Ginu ing pikasaman yu ku, sana milako ing mua yu kapamilatan na ning metung a ain. Nung sakali namang tau la ding makirapat kaniti, isumpa na la sana ning Ginu. Uli ra mepilitan kung mako king balen na ning Ginu ban sumuyu karing aliwang dios.

²⁰ Ngeni e na sana paintulut ning Ginu ing mawala ku bie king aliwang lugal uling pakirakpan yu ku, O Makamal a Ari, samantalang metung ku mung mistulang pulgas; anti kung ayup a buri yung dakpan!

²¹ Kanita sinabi nang Saul, Mikasala ku. Mibalik na ka, O anak kung David. Pangaku kung e ra na ka nanan pa uling pepakit mung mal ya keka ing bie ku king aldong iti. Meging mistula kung mangmang at maragul ing depat kung kasalanan.

²² Pekibat nang David, Oyni ing tandus, Makamal a Ari! Tuburan ye ing metung karing kayanakan yu ba neng kuanan.

²³ Ablasanan neng mayap ning Ginu ing balang taung makatuliran at tapat. King aldong iti binie na kayu kanaku ning Ginu, oneng e ke ninanan ing pinili ning Ginu.

²⁴ Sana nung makananu keng pepakamalan ing bie yu makanyan ya naman sanang maging mal ing bie ku arapan ning Ginu, at ikabus na ku sana king sablang kaligaligan ku!

²⁵ Kanita nganang Saul kang David, Bendisyunan na ka sana ning Dios, O anak kung David! Dakal ka pa gawan at magtagumpe ka. Meko ne i David at minuli nia naman i Saul.

27

¹ Nganang David king lub na, Datang mu rin ing aldo a apate na kung Saul. Mayap pa tumakas ku at munta king bansa da ring Filisteo. Kanita tuknangan na na kung panintunan Saul king mabilug a bansa ning Israel; mekad makanyan ku mung miligtas karing gamat na.

² Inya minta ya kang Akis i David at ding abe nang anam a ralan a tauan. Anak neng Maok i Akis at ari ne ning Gat.

³ Mekipanuknangan ya kang Akis karin Gat i David; kayabe na la ding adua nang asawa, i Ahinoam ning Jezreel at i Abigail a mebalu nang Nabal ning Carmel. Kayabe da la ring tauan na ding karelang pamilya.

⁴ Tiknangan na neng panintunan Saul i David inyang abalitan nang tinakas ne at minta Gat.

⁵ Nganang David kang Akis, Nung kaluguran yu ku, dinan yu kung metung a balen king probinsia ban karin ku manuknangan. E yata karapatdapat ing makituknang ku kekayu king siudad yu!

⁶ Inya binie neng Akis kang David ing balen ning Ziklag; makanyan yang menatiling bandi ra ding ari ning Juda ing Ziklag angga man ngeni.

⁷ Menuknangan yang pabanua at apat a bulan i David king bansa da ring Filisteo.

⁸ King panaun a ita, linusub ya i David at ding tauan na karing Gesureo, Girzita, at Amalekita. Ila deti ring makatuknang kanita pa king bansa angga na king Shur at Ehipto.

⁹ Ala yang likuan lalaki o babaing mabie nukarin ya man linusub i David; pengua no ngan ding tupa ra, ding baka, ding asno, ding kamelyu ampon imalan, at kaybat magbalik ya kang Akis.

¹⁰ Potang kutnan neng Akis nung nu ya linusub i David, ipakibat na king ibat ya king Negeb ning Juda o kaya king Negeb ding Jerameel o kaya king Negeb da ring Keniteo.

¹¹ Ala yang tinagan mabie lalaki o babai i David ban kanita alang sumbung kang Gat king depat na. Makanyan nang makanyan ing depat na kabang makipanuknangan ya king bansa da ring Filisteo.

¹² Tiwala ya i Akis kang David at ngana king lub na, Lakuas deng pikasaman ding kabalen nang Israelita king dapat na. Inya manatili yang talasuyu ku kabang mabie ya.

28

¹ Karing aldo deta mitipun la ding Filisteo ban makilaban king Israel. Nganang Akis kang David, Asahan ku ing ika at ding tauan mu ing tuki kayu kanaku king pamakilaban.

² Pekibat nang David, Agyang makananu; akit yu mu rin nung nanu ing daptan ku. Nganang Akis kang David, Masalese! Gawan da kang sarili kung talapagbante angga king kapilan pa man.

³ Mete ne i Samuel at penangisan ne ning mabilug a Israel at kitkut karin Rama a sarili nang siudad. Tinabi na lang Saul ding sablang mamamanula at makikisabi karing mete.

⁴ Mitipun la ding Filisteo at migkampu la king Sunem; tinipun neng Saul ing mabilug a Israel at migkampu no man king Gilboa.

⁵ Mitakutan ya at ginalgal i Saul inyang ikit na la ding sundalus da ring Filisteo.

⁶ Inyang singguni na iti king Ginu, e ne pekibatan ni king kapamilatan na ning paninap o ning Urim at Tumim o ding propeta.

⁷ Kanita nganang Saul karing opisyal na, Panintun yu kung metung a babaing biasang makipagsalita karing mete ban puntalan ke at makapangutang ku. Pekibat da ring opisyal na, Atin pung biasang makipagsalita karing mete karin Endor.

⁸ Inya migbalatkayu ya i Saul at inaliwa na ing piblas na at saka ne menulakan; kayabe na la ding adua katau. Bengi na inyang miras la king babai. Nganang Saul, Manula na ka mo kapamilatan na ning espiritung sabian ku keka!

⁹ Pekibat na ning babaing mamamanula, Siguradung balu mu ing depat nang Saul: pepatabi na la ding sablang mamamanula at makikisabi karing espiritu da ring mete king Israel. Obat buri mu kung siluan? Buri mu kung ipapate ne?

¹⁰ Kanita sinumpa ya i Saul king babai king lagyu ning Ginu. Ngana, Ing Ginu ya ing saksi, alang parusang miras keka king kekang daptan.

¹¹ Kanita ngana ning babai, Ninu ing espiritung buri mung ausan ku? I Samuel, nganang mekibat Saul.

¹² Inyang ikit ne ning babai i Samuel, mipakulisak yang masikan at saka na sinabi kang Saul, Obat lininlang yu ku? Ikayu i Aring Saul!

¹³ Ngana ning ari, E ka tatakut; nanung akakit mu? Pekibat na ning babai, Atin kung akakit a balamu metung a espiritu; lalto yang ibat king gabun.

¹⁴ Nanu ya itsura? ngana pang mengutang Saul. Matua ya ing lalto ibat king gabun; makabalut yang balabal! nganang mekibat ning babai. Balu nang Saul king iti ya i Samuel at dinuku ya angga king gabun bilang kagalangan kang Samuel.

¹⁵ Kanita nganang Samuel kang Saul, Obat pangabalanan mu ku king kanakung pamagpaynawa? Mekibat ya i Saul, Maragul ku problema; datang lang makigera kanaku ding Filisteo at likuan na ku ning Dios at e na na ku pakibatan king kapamilatan da ring propeta o karing paninap; inya pepayaus da ka ban sabian kanaku ing sukat kung daptan.

¹⁶ Nganang Samuel, Obat pangutnan mu ku ngening likuan na na ka ning Ginu at meging kalaban me?

¹⁷ Depat na ning Ginu keka ing sinabi na king kapamilatan ku; leko ne ning Ginu ing pamag-ari king gamat mu at binie ne kang David,

¹⁸ uling e mu pemintuan ing sinabi na at e mu pepagpa karing Amalekita ing mibabua nang mua. Inya iti ing depat na keka ning Ginu king aldong iti.

¹⁹ Metung pa, paburen neng masambut kayabe mu ing mabilug a Israel karing Filisteo; bukas akayabe ra na ka at ding anak mu. Pasambut na la ning Ginu ding sundalus ning Israel karing Filisteo.

²⁰ Kanita mibulang ya i Saul; tune yang mitakutan king sinabi nang Samuel. Ala yang mitagan a sikanan uling ala yang pengan kilub ning patingapun at kabukas.

²¹ Lepitan ne ning babai i Saul at ngana inyang ikit nang mitakutan ya king sinabi nang Samuel, Lawan yu: penusignan ku na pu ing inawad yu agyamang anti ku ne mong teya king kamatayan ing bie ku. Pekiramdaman ku ing sinabi yu kanaku.

²² Ngeni, aduan kung pakiramdaman yu ku sana; paburen yung dinan da kayung kapirasung tinape; mangan kayu ban sikan kayung pasibayu at asundu yu ing lakad yu.

²³ Tinanggi ya at ngana, E ku mangan! Oneng pekisabian deng mayap ding opisyal na at ning babai. Mekiramdam ne man king sinabi ra. Mibangun ya at linukluk king pagkeran.

²⁴ Atin yang pataban a biserung baka ing babai king bale na; agad-agad neng kinatat at saka ya kinangwang arina. Singkapan na at saka ya miglutung tinape a alang lebadura.

²⁵ Inapag na iti arapan nang Saul at karing opisyal na; mengan la deti. Kaybat meko la king benging ita.

29

¹ Tinipun da la ring Filisteo ding sabla rang sundalus karin king Afek at migkampu no man ding Israelita king lele ning sibul karin king Kapatagan ning Jezreel.

² Atin lang tia dinalan o kaya tia libung sundalus ding balang ari da ring Filisteo. Makatauli ya i David at ding tauan na; kayantabe na lang Akis.

³ Ngarang mengutang ding pamuntuk da ring Filisteo, Nanu ing daraptan da keti reting Hebreo? Pekibat nang Akis, I David ini; talasuyu neng Saul a ari ning Israel; malambat ku neng kayabe at ala kung apintas manibat na inyang mekiabe ya kanaku angga na ngeni.

⁴ Oneng kemuan de ring pamuntuk da ring Filisteo i Akis at ngara, Pabalikan mu ne king lugal a binie mu; e ta ya tutuki king labanan pota itamu pa ing kalabanan na. Makananu yang makapakikasundu king panginuan na nune mu king kapamilatan na ning pamakamate na karing kekatamung sundalus?

⁵ Aliwa wari iti i David a pagkanta da ring babai king karelang pamanerak? Ngara, Libu-libu la ding pete nang Saul, oneng i David laksa-laksa la.

⁶ Kanita inaus neng Akis i David at ngana, David, ing mabie Ginu ya ing saksi, tapat kang tau; para kanaku matulid mu ing akayabe ra ka king labanan; ala kung nanumang asabing kakulangan mu manibat na kanitang dinatang ka angga na ngeni. Oneng e ra ka kapad a tabas ding aliwang pamuntuk.

⁷ Sulung mibalik na ka keta kekayu; payapa na kang mako ba mu na la mung e apamua ding pamuntuk da ring Filisteo.

⁸ Oneng nganang David kang Akis, Nanu wari pung depat ku? Nanu wari pung e yu buri kanaku manibat na kanitang sinuyu ku kekayu angga na ngeni nung inya e yu ku buring ituki ban makilaban karing kalaban yu?

⁹ Pekibat nang Akis kang David, Balu ku king ala kang kakulangan kanaku, anti kang metung a anghel ning Dios; oneng sinabi da ring aliwang ari ding Filisteo king e ka kanu sukat tutuki kekami king labanan.

¹⁰ Inya mibangun kang maranun bukas at ding kayabe mung dinatang; mako kayung maranun, potang saslag ne ing aldo.

¹¹ Inya meko ya i David at ding tauan na itang abak a maranun ban magbalik king bansa da ring Filisteo. At minta la Jezreel ding Filisteo.

30

¹ King katlung aldo ya mekapagbalik Ziklag i David at ding tauan na. Linusub la ding Amalekita king Negeb at king Ziklag. Ikua re ing Ziklag at saka re silaban,

² at binihag da la ring babai, ding matua at anak; ala lang pete metung man oneng dela da la at saka na la meko.

³ Inyang dinatang ya i David at ding tauan na king siudad, ikit da king mesilab ya iti at mebihag la ring asawa ra at anak a lalaki at babai.

⁴ Kanita kinulisak ya at menangis i David at ding tauan na angga king ala nang tutulung lua karela.

⁵ Mebihag la ding adua nang asawang David, i Ahinoam ning Jezreel at i Abigail a mebalu nang Nabal a tau Carmel.

⁶ Meligalig yang e mu nanu i David; buri deng pamasibasan batu ding tauan na uling tutu rang penamdaman ing pangabihag da ring karelang anak a lalaki at babai. Oneng pesiknangan ne ning Ginung Dios na.

⁷ Nganang David king paring i Abiatar a anak nang Ahimelek, Idala me kanaku ing efod. At dela neng Abiatar ing efod kang David.

⁸ Kaybat nganang David king Ginu, Panagalan ku la o ali ku la ding linusub a reta? Akua ku la kayang atagal at aligtas ding mebihag? Pekibat na ning Ginu, Tagalan mu la at aligtas mu la ding taung binihag da.

⁹ Inya meko ya i David; kayabe na la ding anam a ralan a tauan na at miras la king Batis ning Besor nung nu la pepailakuan ding sukat malakuan.

¹⁰ Sindu nang David at ding apat a ralan a tauan na ing pamanagal. King pangapagal da e na la milipat king Batis ning Besor ding aduang dalan karing tauan na. Inya melakuan la.

¹¹ Atagpuan de ring tauan nang David ing metung a tau Ehipto at dela re arap na. Dininan deng pamangan at inuman.

¹² Dininan dia namang kapirasung bibingkang higera at aduang kasapunggul a pasas. At inyang mekapangan ya, mika animu ya; uling atlu neng aldo at atlung benging e mamangan at miminum.

¹³ Nganang kinutang David, Ninung panginuan mu at nu ka tau? Kayanakan kung tubu Ehipto, nganang mekibat, ipus na ku ning metung a Amalekita; likuan na ku ning panginuan ku atlung aldo na ing milabas uling mesakit ku.

¹⁴ Lisuban mi ya ing Negeb ding Kereteo at ing Negeb ning Juda at ing Negeb ning Caleb at saka mi ya silaban ing Ziklag.

¹⁵ Nganang David, Malyari mu kung saupan ban akit ku la reting linusub? Pekibat na, Wa, nung isumpa mu king Dios king e mu ku paten o kaya e ibalik king panginuan ku.

¹⁶ At tiki na la nung nu la karin ding Amalekita. Disnan da lang pakakalat ketang lugal da; ating mamangan, miminum, at teterak, uling tutung dakal ing ikua rang pibandian king bansa da ring Filisteo at king sakup ning Juda.

¹⁷ Lisuban na lang David at pete inyang sisilim na angga na king bengi ning tutuking aldo. Alang mekaligtas metung mang lalaki subali mu karing apat a ralan a kayanakan a sinake kamelyu ban makatakas.

¹⁸ Ikua nang David ing sablang kinua ra ding Amalekita, at aligtas na la ding bihag pati na ring adua nang asawa.

¹⁹ Alang mewalang matua o anak, anak a lalaki at babai, pibandian a meyakua o nanumang ikua ra ding Amalekita. Ikua na ngan abalik David iti.

²⁰ Ikua na la namang pasibayung David ding sablang tupa at baka; pepatabi na la deti karing tauan na. Ngara deti, Iti pibandian nang David!

²¹ Kanita mibalik ya i David karing aduang dalan a kataung mapagal na, inya e la mekatuki kang David nune melakuan na la mu karin king Batis ning Besor. Seganan de i David at ding tauan na. Inyang mipalapit ne i David, kinomusta na la.

²² Oneng migsalita la detang matsura ugali at maimut karing kayabe nang David. Ngara, E ta na la man kayabe ren king labanan, inya e ta la darakayan king banding ikua tamu. Paburen ta nia mung akua ne ning balang metung ing asawa na at ding anak na at kaybat muli ne.

²³ Oneng nganang David, E makanyan, kapatad, ing gawan yu king binie na ning Ginu kekatamu. Linigtas na katamu at birian na ing asambut ta la ding linusub.

²⁴ Ninu mong nayun kekayu king bage anti kanyan? Pante-pante ing dake ning balang metung: abe ta ya mang linusub o melakuan yang migbante king karga tamu.

²⁵ Manibat na kanita at angga na ngeni gewa neng patakaran at tuntunan iti para king Israel.

²⁶ Inyang mekapagbalik ne i David king Ziklag, peparalan na la king pibandian a ikua na ding kakaluguran na, ding manimuna ning Juda. Ngana, Tanggapan ye ing metung a regalu ibat karing pibandian a meyakua karing kalaban ning Ginu.

²⁷ Peparala ya karin king Betel, king Ramot ning Negeb, king Jatir,

²⁸ Aroer, Sifmot, Estemoa,

²⁹ at Racal. Makanyan munaman ing binie na karing tau Jerameel, karing siudad da ring Keniteo,

³⁰ karin Horma, Borasan, Atak,

³¹ Hebron, at karing sablang lugal a pintalan nang David at ding tauan na king karelang pamaglibut.

31

¹ Mekilaban la ring Filisteo karing Israelitang atyu king Bunduk ning Gilboa. Dakal la ding mete karing Israelita. Tinakas la ring mitagan at pati i Aring Saul at ding anak na.

² Oneng tinagal la ring Filisteo at atagal da la at pete ding anak nang Saul: i Jonatan, Abinadab, at i Malkisua.

³ Makalibutad ya i Saul king mabagsik a labanan; asaluput de ring mamana. Mepana ya at grabi ya ing sugat na.

⁴ Kanita nganang Saul king talapagdala nang armas, Bagutan me ing espada mu at isaksak me kanaku pota arakap da ku pang mabie ding Filisteong den at gawan da ku mung pikaylian da. Oneng e ya mebisa uli na ning maragul nang kagalangan king ari. Inya kinua neng Saul ing sarili nang espada at sikban ne iti.

⁵ Inyang ikit na ning talapagdala nang armas king mete ya i Saul, sikban nia naman ing sarili nang espada at mete yang kayabe nang Saul.

⁶ Makanyan yang mete i Saul at ding atlu nang anak, ing talapagdala nang armas, at ding tauan na. Mete la king aldong ita.

⁷ Inyang ikit da iti ding Israelitang atyu king kasumangid ning kapatagan at detang atyu king lipat ning Ilug ning Jordan king tinakas la ding sundalus ning Israel at king mete ne i Saul at ding atlu nang anak, likuan da la ring balen da at tinakas na la naman. Dinatang la ding Filisteo at ila ding sinakup kareting balen.

⁸ Kabukasan, inyang dinatang la ding Filisteo ban lubasan da la ring mete, atagpuan de i Saul at ding atlu nang anak a mete king Bunduk ning Gilboa.

⁹ Tibtab de batal i Saul; likas de ing baluti na at pepatubud la king mabilug a bansa da ring Filisteo ban yatad ing mayap a balita karing templo ra ding kikilalanan dang dios at karing sablang tau.

¹⁰ Binili re ing baluti nang Saul king templo nang Astarte; tinasak de king pader ning Bet San ing bangke na.

¹¹ Inyang abalitan da ring memalen na ning Jabes Gilead ing depat ding Filisteo kang Saul,

¹² mig-rebeldi la ding taung matapang at miglakad lang kabukas papunta king Bet San, at saka re kildas ing bangke nang Saul at ding bangke ra ding anak na king pader ning Bet San. Dela da la reti king Jabes at karin da la silaban.

¹³ Kaybat kinua ra la ding butul at kitkut da la lalam ning tanaman a tamarisko karin king Jabes, at saka la mig-ayunu kilub ding pitung aldo.