1

¹ Kamate nang Josue ngarang kinutang ding memalen na ning Israel king Ginu, Ninu karing kekaming tribu ing dapat munang lumusub laban karing Cananeo?

² Pekibat ning Ginu, Ing tribu nang Juda ya ing munang lumusub. Babie ke ing gabun karing gamat na.

³ Ngara ding memalen ning Juda karing memalen ning Simeon, Tuki kayu king gabun a binie ning Ginu para kekami at miyabe tamung lumaban karing Cananeo. Kaybat tuki kami kekayu king gabun a binie ning Ginu para kekayu. Inya miyabe lang minta ding tribu nang Simeon

⁴ at Juda king labanan. Binie ne ning Ginu karela ing tagumpe laban karing Cananeo at Perezeo, at simbut da la ring apulung libung katau karin king Bezek.

⁵ Karin de atagpuan i Adonibezek at lebanan de.

⁶ Tinakas ya i Adonibezek, oneng tegal de; arakap de at pinutut da la ring tindaragul da ring gamat na at bitis.

⁷ Nganang Adonibezek, Pitu lang pulu ding ari a putut a tindaragul a gamat at bitis ding memulut king pisimen lalam kung lamesa. Depat na ning Ginu kanaku itang depat ku karela. Dela re Jerusalem at karin ya mete.

⁸ Lisuban de ring lalaki na ning Juda ing Jerusalem at simbut de. Pete da la ring tau karin at silaban de ing siudad.

⁹ Kaybat na nita, pintalan da lang lebanan ding Cananeo a manuknangan karing bulubundukan, karing lele da ring bunduk-bundukan, at king gabun a malangi king mauli.

¹⁰ Kaybat, pintalan da lang lebanan ding Cananeo a manuknangan Hebron a sadiang mayayaus Kiriat Arba. Karin da la simbut ding pamilya nang Sesai, Ahiman, at Talmai.

¹¹ Manibat karin sinulung la ding lalaki na ning Juda laban king siudad ning Debir a kanita ausan dang Kiriat Sefer.

¹² Ngana ning metung karela a mayayaus Caleb, Ibie ke ing anak kung dalagang i Acsa ban maging asawa ne ning ninumang lalaking makabihag king Kiriat Sefer.

¹³ I Otniel, ing anak nang Kenaz a wali nang Caleb, abihag ne ing siudad nung inya pepakasal neng Caleb kang Otniel ing anak nang i Acsa.

¹⁴ King aldo ning kasal sitsutan neng Otniel i Acsa ban maniawad yang kapirasung gabun kang tata na. Kinuldas ya i Acsa king asnong sasaken na at kitnan neng Caleb nung nanu ing buri na.

¹⁵ Nganang mekibat, Anti na ning binie me kanaku ing malanging gabun, dinan mu ku namang sibul ban piyakuanan danum. At binie na lang Caleb kang Acsa ding sibul king makamatas at makababang lugal.

¹⁶ Ding Keniteo, ding lahi da ring katuangan nang Moises, tinuki la karing memalen na ning Juda a menibatan Jerico, ing ausan dang siudad ding palma. Linub la king malanging gabun karin Juda dane nang mauli ning Arad. At mekipanuknangan la karing Amalekita.

¹⁷ Kayabe da lang sinulung ding memalen na ning Juda ding memalen na ning Simeon at simbut da la ring Cananeo a manuknangan king siudad ning Zefat. Lesak de iting siudad at inaus deng Horma.

¹⁸ Sinaupan na la ning Ginu ding tau Juda at sekupan de ing bulubundukan. Oneng e re simbut ing Gaza, ing Askelon o ing Ekron at ding kayarian makapadurut karela. E da la atabi deting taung manuknangan king pampang ning dagat uling atin lang karung bakal.

¹⁹

²⁰ Antimo ing inutus nang Moises, miyabie ya kang Caleb ing Hebron, at tinabi na la ding atlung pamilya a lahi nang Anak.

²¹ Oneng ding memalen na ning tribu nang Benjamin e da la tinabi ding Jebuseo a manuknangan Jerusalem, at ding Jebuseo menatili lang mabibie kayabe da ring lahi nang Benjamin manibat na kanita.

²² Lisuban de ring tribu nang Efraim at Manase ing siudad ning Betel a kanita mayayaus Luz. Sinaupan na la ning Ginu. Peparala lang ispia king siudad.

²³

²⁴ Ikit deng lulual ding ispia ing metung a tau at ngara, Ituru me kekami ing lihim a dalan nung makananu kaming milub king siudad at e ra ka panasakitan.

²⁵ Inya tiru ne karela at ding memalen na ning Efraim at Manase; pete da la ngan ding atyu king siudad subali mu iting taung akutnan da at ding pamilya na.

²⁶ Bandang tauli, minta ya iting tau king sakup da ring Hiteo at karin ne telakad ing metung a siudad at pemalagyuan neng Luz, at ita ya ing menatili nang lagyu.

²⁷ E na la tinabi ning tribu nang Manase ding taung manuknangan karing siudad da ring Bet-sean, Taanak, Dor, Ibleam, Megido, at ding kasiping dang balen; menatili lang manuknangan karin ding Cananeo.

²⁸ Inyang ikua rang mesikan ding Israelita pinilit da lang magobra para karela ding Cananeo, makanyan man e ra la ngan tinabi.

²⁹ E na la tinabi ning tribu nang Efraim ding Cananeo a manuknangan king siudad ning Gezer, inya menatili lang manuknangan karin a kayabe ra ding Cananeo.

³⁰ E na la tinabi ning tribu nang Zebulun ding taung manuknangan karing siudad ning Kitron at Naalal, inya menatili lang manuknangan kayabe da ring Cananeo, oneng ding Isrealita pinilit da lang magobra para karela.

³¹ E na la tinabi ning tribu nang Aser ding taung manuknangan karing siudad ning Acco, Sidon, Ahlab, Aczib, Helba, Afek, at Rehob.

³² Anti na ning e ra no man tinabi ding memalen ning Aser mibiebie lang kayabe da ring Cananeo a sadia nang manuknangan karin.

³³ E na la tinabi ning tribu nang Neftali ding taung manuknangan karing siudad da ring Bet Semes at Betanat. Ding memalen ning Neftali manuknangan lang kayabe da ring Cananeo a menuknangan karin, oneng ding Israelita pinilit da lang magobra para karela.

³⁴ Ding Amoreo tinabi da la ring memalen na ning tribu nang Dan karing bulubundukan, at e ra la pepaintulutan kuldas king kapatagan.

³⁵ Menatili lang manuknangan ding Amoreo king Ayalon, Saalbim, at king Bunduk ning Heres, oneng ding Israelita pepanatilian da lang atyu lalam dang upaya ding tribu nang Efraim at Manase, at pinilit da lang magobra para karela.

³⁶ Magumpisa ya ing angganan da ring Edomita king Pidadalanan ning Akrabim at angga ya king dane norti ning Sela.

2

¹ Menibat king Gilgal minta ya ing anghel ning Ginu king Bokim. At ngana karing Israelita, Liwal da kayu manibat Ehipto at dela ra kayu king gabun a pengaku ku karing makatua yu. Sinabi ku, E ke labagan kapilan man ing kasunduan ku kekayu.

² E kayu gagawang kasunduan karing taung manuknangan king gabun a iti. Lasakan yu la ding karelang altar. Oneng e yu depatan ing inutus ku kekayu. Kabaligtaran ing gewa yu!

³ Inya sasabian ku ngeni kekayu king e ku la itabi deting tau king paniulung yu. Ila ding maging kalaban yu at maging anti lang bitag a makaumang kekayu ding kikilalanan dang dios.

⁴ Inyang asabi na ning anghel iti, menangis la ding sablang memalen na ning Israel

⁵ at meyaus yang Bokim ing lugal a ita. Karin la minie ain-sakripisyu king Ginu.

⁶ Pepalakuan na lang Josue ding memalen na ning Israel ban isundu ing karelang lakad, at minta ya ing balang metung ban kuanan ne ing dake na king gabun a mitutuk king pamilya na.

⁷ At sinuyu la ring memalen king Ginu king kekaban na ning bie nang Josue at king kekaban na ning bie da ring makatua a mabie pa kaybat nang Josue a mekasaksi king makapagmulalang dapat a gewa ning Ginu para king Israel.

⁸ I Josue, ing talasuyu ning Ginu at anak nang Nun, mete ya king idad a dinalan at apulung banua.

⁹ Kitkut de king gabun a dake na ning Efraim king dane norti ning Bunduk ning Gaas.

¹⁰ Inyang mete na la ding sabla ketang lahing ita, e na ne balu ning tinuking lahi ing Ginu at ing sablang dapat a gewa na para king Israel.

¹¹ Kaybat na nita, depat da na ring Israelita ing bage e mayap king akakit na ning Ginu at megumpisa lang sinuyu karing Baal a kikilalanan dang dios.

¹² Kelinguan de ing Ginu, ing Dios da ring makatua da, ing Dios a milual karela ibat Ehipto, at megumpisa lang sinuyu karing aliwang dios, ding dios da ring taung makapadurut karela. Diku da la ring buntuk da kareting dios at pepamua re ing Ginu.

¹³ Gilutan de ing Ginu at megumpisa lang sinuyu karing Baal at ding Astarte.

¹⁴ Inya meragul ing mua na ning Ginu king Israel, at peintulutan na ing luban da la ring manlub at panakawanan da la. Peintulut na ing masambut la karing kalaban dang makapadurut karela, at e ra na agyung idipensa ding Israelita ing sarili da.

¹⁵ Laban ya karela ing Ginu neng pupunta la king labanan, antimo ing sinabi na nang daptan na. Mibili la king maragul a kaligaligan.

¹⁶ Kaybat na nita, dininan na lang ukum ning Ginu a migligtas karela karing gamat da ring maminsala karela.

¹⁷ Oneng ding Israelita e da la pekiramdaman deting ukum. Pigtaksilan ne ning Israel ing Ginu at sinamba yang aliwang dios. Memintu la ding makatua da karing kautusan ning Ginu, oneng malalagua dang tiknang daraptan iti ding bayung lahi.

¹⁸ Sasaupan na la ning Ginu ding balang ukum a babie na king Israel, at liligtas na la ding memalen karing kalaban da king kekaban na ning bie na ning balang ukum. Malulunus ya ing Ginu karing Israelita uli na ning saingsing da king karelang pamagkasakit at pangalupig.

¹⁹ Oneng kamate na ning ukum, agad lang magbalik ding memalen karing matua rang panugali, at ligpusan da la pa karawak ding tikian dang lahi. Sinuyu la at sinamba karing aliwang dios at king kesiasan da buntuk sindu ra ing karelang e mayap a dapat.

²⁰ Kanita ya mimua ing Ginu king Israel at ngana, Lebagan ne niting bansa ing kasunduan a inutus kung tuparan da ring karelang makatua. Uli na ning e ra ku pemintuan,

²¹ e ku ne itabi ing ninuman karing bansa a atyu pa king gabun inyang mate ya i Josue.

²² Gamitan ku la ban abalu ku nung mamintu la o ali la deting Israelita karing paralan ku; antimo ing gewa da ring makatua da.

²³ Inya peintulutan na la ning Ginu deting bansa a manatili king gabun; e na binie kang Josue ing tagumpe laban karela ni e na na la tinabi kaybat nang mete Josue. fig,,,,,...sinamba yang aliwang dios.,(2:17)fig*

3

¹ Deti ngeni ila ring mapilan a taung tinagan na ning Ginu king bansa ban panyubukan ne ing Israel kapamilatan da. E la pa mika sibukan deting Israelita king pamakigera karin Canaan.

² Depat na mu iti ban dinan na lang lisyun ding balang lahi da ring Israelita tungkul king gera lalung-lalu na detang ala pang sibukan king gera.

³ Ding mitagan king bansa ila ding lima dang siudad ding Filisteo, ding Cananeo, ding Sidoniano, at ding Heveo a manuknangan karing kabundukan na ning Lebanon manibat king Bunduk ning Baal Hermon angga na king Pidadalanan ning Hamat.

⁴ Ila ding meging kasangkapan na ning pangasubuk ning Israel ban mabalu nung mamintu la o ali la ding Israelita karing kautusan a binie ning Ginu karing makatua da king kapamilatan nang Moises.

⁵ Inya menuknangan la ding Israelita libutad da ring Cananeo, ding Hiteo, ding Amoreo, ding Perezeo, ding Heveo, at ding Jebuseo;

⁶ at tinggap da la ring anak dang babai deti ban maging asawa ra, at peintulutan da la ring anak dang babai ding Israelita a makiasawa karing anak dang lalaki, at sinamba la karing kikilalanan dang dios.

⁷ Depat da ring Israelita ing e mayap king akakit na ning Ginu. Kelinguan de ing Ginung karelang Dios; mikasala la king Ginu at simban da la ring larawan nang Baal at Asera.

⁸ Inya mimua ya ing Ginu karing Israelita at pepaburen na lang menabu king gamat ning Aring Cusan Risataim ning Mesopotamia. Mipailalam la king upaya na kilub ding walung banua.

⁹ Kanita sinaingsing la ding Israelita king Ginu, at tinubud ne ning Ginu ing metung a lalaki a migligtas karela. Iti ya i Otniel a anak nang Kenaz at wali nang Caleb.

¹⁰ Dinatang ya kang Otniel ing upaya ning Ginu at ya ing meging ukum ning Israel. Minta ya king labanan at binie na ning Ginu ing tagumpe. Simbut ne ing ari ning Mesopotamia.

¹¹ Mika kapayapan king bansa kilub ding apat apulung banua. Kaybat na nita, mete ya i Otniel.

¹² Pasibayu no namang mikasala king akakit na ning Ginu ding memalen na ning Israel. Inya peintulutan neng maging mas masikan ning Ginu ing Aring Eglon ning Moab kesa king Israel.

¹³ Mekiabe ya i Eglon karing Ammonita at karing Amalekita; simbut de ing Israel at abihag de ing Jerico, ing siudad ding palma.

¹⁴ Mipailalam la ding Israelita king upaya nang Eglon kilub ding labing walung banua.

¹⁵ Kanita sinaingsing la king Ginu ding Israelita, at tinubud ne ning Ginu ing metung a lalaki ban iligtas na la. Ya i Ehud, ing kaliweti a anak nang Gera ning tribu nang Benjamin. Tinubud de ring Israelita i Ehud kang Aring Eglon ning Moab at pepagdalan deng regalu.

¹⁶ Ginawa yang espada a misusumangid a taram a maki metung at kapitnang talampakan king kaba. Tinali ne iti king wanan nang puad lalam ning imalan na.

¹⁷ Kaybat, dela na la ring regalu na kang Eglon; mataba yang lalaki i Eglon.

¹⁸ Kaybat na lang binie Ehud ding regalu na, sinabi na karing lalaking migdala kareti ing muli na la.

¹⁹ Oneng karas nang Ehud karing dinukit a batu malapit Gilgal, mibalik ya kang Eglon at ngana, Makamal a Ari, atin kung lihim a mensahi para keka. Inya ngana ning ari karing ipus na, Lakuan yu kami! At meko la ngan.

²⁰ Kanita, kabang makalukluk yang magdili-dili ketang marimla nang kuartu ning ari, linapit ya i Ehud at ngana, Atin kung mensahi para keka a ibat king Dios. At tinalakad ya ing ari.

²¹ Kinua neng Ehud king kayli nang gamat ing espada king banda nang wanan at siksak ne king atian na ning ari.

²² Linub ya ing mabilug a espada pati na ing pulu na at mitakpan ya iti king taba na ning ari. E ne begut Ehud king atian ning ari at linsut ya iti kagulutan na pilatan ding bitis na.

²³ Linual ya i Ehud; sera na la ding pasbul at kindadu na la.

²⁴ Kaybat meko ya. Dinatang la ding ipus at ikit da king makakandadu la ding pasbul, oneng inisip da king atyu kilub ing ari at magbawas ya mu.

²⁵ Menaya la angga king oras a isipan dang dapat lang manaya, oneng inyang e ne pa bubuklat ning ari ing pasbul, kinua de ing susi at biklat de. At ikit deng makapase ing panginuan da; mete ya!

²⁶ Kabang manaya la ding ipus, tinakas ya i Ehud. Delanan na la ding dinukit a batu at tinakas yang papunta Seira.

²⁷ Karas na karin king bulubundukan nang sakup ning Efraim, tiniupan ne ing tambuli ban ausan na la ding lalaki ning Israel ba lang makilaban; penimunan na lang kinuldas karing bunduk-bundukan.

²⁸ Ngana karela, Tukian yu ku! Binie ne ning Ginu kekayu ing tagumpe laban karing kalaban, ding tau Moab. Inya tinuki lang kinuldas kang Ehud, at ikua re ing lugal nung nu re daralakitan ding Moabita ing Jordan; ala lang peintulutan makadalakit metung mang katau.

²⁹ Itang aldong ita pete da la ring ating apulung libu katau karing mayap nang diling sundalus ning Moab; metung man karela alang mekatakas.

³⁰ King aldong ita simbut de ring Israelita ing Moab, at mika kapayapan king bansa kilub ding walung pulung banua.

³¹ Ing tutuking meging ukum ya i Samgar, ing anak nang Anat; linigtas nia naman ing Israel. King kapamilatan na ning pamarug baka pete na la ding anam a ralan a Filisteo.

4

¹ Kamate nang Ehud, pasibayu no namang mikasala king akakit na ning Ginu ding memalen na ning Israel.

² Inya peintulut na ing masambut la kang Jabin, ing ari na ning Canaan a mamuntukan king siudad ning Hazor. I Sisera ya ing pamuntuk da ring sundalus na a manuknangan king Haroset-da-ring-Paganu.

³ Atin yang siam a ralan a karung panggera i Jabin, at kilub ding aduang pulung banua gipitan na la ding tau Israel king mitmung bigsikan. Kanita sinaingsing lang meniawad saup king Ginu ding memalen na ning Israel.

⁴ Kanitang panaun a ita, ukum ya king Israel ing babaing i Debora a propeta at asawa nang Lapidot.

⁵ Ugali na ing lulukluk lalam na ning tanaman a palma pilatan ning Rama at Betel karing bulubundukan ning Efraim, at pupuntalan de karin ding memalen na ning Israel para king kayatulan na.

⁶ Misan a aldo penabilin ne i Barak a anak nang Abinoam ning siudad ning Kedes sakup ning Neftali at ngana, Barak, ing Ginu, ing Dios ning Israel, binie ne keka ining kautusan: Kuma kang apulung libung lalaki karing tribu nang Neftali at Zebulun, at idala mu la king Bunduk ning Tabor.

⁷ Ilual ke i Sisera, ing pekapun da ring sundalus nang Jabin, ban milaban kayu king Ilug ning Kison. Atin yang karung panggera at sundalus oneng sambutan me!

⁸ Nganang mekibat Barak kang Debora, Munta ku nung tuki ka kanaku, oneng e ku munta nung e ka tuki kanaku.

⁹ Nganang mekibat, Tuki ku keka, oneng e miyabie keka ing dangalan ning tagumpe uling paburen neng manabu ning Ginu i Sisera king metung a babai. Inya i Debora at i Barak meko lang papunta king Kedes.

¹⁰ Inaus na lang Barak ding tribu ning Zebulun at Neftali karin Kedes, at apulu lang libu ding lalaking tinuki. Kayabe neng meko i Debora.

¹¹ Ngeni i Heber, ing Keniteo, telakad ne ing tolda na malapit Kedes, siping na ning tanaman a ensina keta king Zananim. Linaut ya karing aliwang Keniteo a lahi nang Hobab a bayo nang Moises.

¹² Inyang abalitan nang Sisera king minta ne king Bunduk ning Tabor i Barak a anak nang Abinoam,

¹³ inaus na la ding siam nang dalan a karung panggera at ding sablang sundalus na, at tinubud na la manibat Haroset-da-ring-Paganu papunta king Ilug ning Kison.

¹⁴ Nganang Debora kang Barak, Lumakad na ka. Ing Ginu manimuna ya keka! Ngening aldong iti ibie ne keka ing tagumpe laban kang Sisera. Inya kinuldas ya i Barak manibat king Bunduk ning Tabor; kayabe na la ding apulu nang libung tauan.

¹⁵ Inyang linusub ya i Barak at ding sundalus na, king saup na ning Ginu mengagulugulu ya i Sisera at ding sablang karu na at sundalus. Kinuldas ya i Sisera king karu na at tinakas ya.

¹⁶ Tegalan na lang Barak ding karu dang panggera at ding sablang sundalus na angga king Haroset-da-ring-Paganu, at mete la ngan ding sundalus nang Sisera. Alang mitagan metung man.

¹⁷ Memulayi ya i Sisera king tolda nang Jael, ing asawa nang Heber a Keniteo, uling atin yang pamikasundu ing Aring Jabin ning Hazor king pamilya ra.

¹⁸ Linual ya i Jael ban saganan ne i Sisera at ngana, Lungub kayu; lungub kayu kening kanakung tolda. E kayu tatakut. Inya linub ya at selikut ne gulut na ning tabing.

¹⁹ Nganang Sisera, Dapat a mayap, dinan mu na ku mong ditak a inuman; mau ku. Biklat ne ing balat a lulanan gatas; pepainuman ne at kaybat selikut neng pasibayu.

²⁰ Kanita nganang Sisera, Talakad ka king pasbul ning tolda at nung ating kutang nung ating tau keti, sabian mu ala.

²¹ King pagal nang Sisera mipatudtud yang maniaman. Kanita kinangwa yang metung a masu at metung a tulus tolda i Jael; pakakalale neng lepitan i Sisera at apate ne inyang minasu ne ing tulus ning tolda king malingmingan na at tinaglus ya iti angga king gabun.

²² Inyang datang ne i Barak a tatagal kang Sisera, seganan neng Jael at ngana, Me keni! Ipakit ke keka ing taung panintunan mu. Inya tinuki yang linub king tolda na at karin ne ikit makapase ing mete; makatarak ya king malingmingan nang Sisera ing tulus ning tolda.

²³ Kanitang aldong ita ne binie ning Dios karing Israelita ing tagumpe laban kang Jabin, ing aring Cananeo.

²⁴ Alang tuknang ing pamaniugud da ring Israelita angga king abihag de i Jabin, ing ari na ning Canaan.

5

¹ Kanitang aldong ita kinta de ri Debora at Barak a anak nang Abinoam iting kanta:

² Ding pamuntuk ning Israel menimuna la, at kusang lub ding memalen binie da ing sarili ra; purian ya ing Ginu!

³ Makiramdam kayu, ikong ari; pakiramdaman yu, ikong manungkulan! King Ginu kanta ku; metung yang kanta ing ikanta ku king Ginu, ing Dios ning Israel.

⁴ Ginu, inyang likuan me ing bunduk ning Seir, inyang lakuan me ing sakup ning Edom, ginalgal ya ing yatu at ing uran mibagsak manibat king banua. Wa, manibat karing biga menabu ing uran.

⁵ Ginalgal lang bunduk arap ning Ginu ning Sinai, arap ning Ginu, ing Dios ning Israel.

⁶ Kanitang panaun nang Samgar a anak nang Anat, kanitang panaun nang Jael, ding biaheru tinuknang lang lulub king bansa, at menaliwa lang dalan ding maglakbe.

⁷ Ing obra karing marangle ning Israel tinuknang, ing gabun melakuan makatiwangwang, O Debora, anggang e ka dinatang, at linto anting metung a ima king Israel.

⁸ Kanita mika gera king bansa inyang memili lang aliwang dios ding Israelita. Karing apat apulung libung tau ning Israel menakit kang metung mu mang ating kalasag o tandus?

⁹ Ing pusu ku atyu ya karing pekapun ning Israel, at karing taung kusang lub mekiabe. Purian ya ing Ginu.

¹⁰ Pamalita yu, ikong pakasake karing maputing asno, ikong karing sia pakalukluk, at ikong lalakad nukarin kayu man munta.

¹¹ Pakiramdaman yu ing sunis ding manigtigan karing lugal ding pisasakluan danum, ulit-ulitan da lang gagale ding tagumpe ning Ginu, ding tagumpe da ring memalen ning Israel. Manibat karing pasbul ding dalan linusub lang memalen ning Ginu.

¹² Manimuna ka, manimuna ka, O Debora, manimuna ka, at magkanta ka. Talakad ka, Barak a anak nang Abinoam, at tairan mong kekang bihag.

¹³ Kanita ding bayani dinatang la karing karelang manimuna; ding memalen ning Ginu dinatang la, at makasadia lang makilaban.

¹⁴ Manibat Efraim dinatang la king kapatagan kagulutan ding tribu nang Benjamin at ding memalen na. Ding pekapun kinuldas la manibat Makir, at manibat Zebulun ding opisyal.

¹⁵ Ding manimuna ning Isacar dinatang lang kayabe nang Debora. Wa, i Isacar dinatang ya at i Barak antimu rin, at tikian de king kapatagan. Oneng karing pamilya nang Ruben mika maragul a alinlangan.

¹⁶ Ba't metigagal la karing kulungan da ring tupa? Ban pakiramdaman la ring pastul a mamaus karing tupa ra? Wa, karing pamilya nang Ruben mika maragul a alinlangan.

¹⁷ Ding tribu nang Gad menatili la dane aslagan na ning Jordan. Ba't ing tribu nang Dan e ne meko siping da ring barku? Ing tribu nang Aser naman menatili ya king lele ning dagat; menatili ya karing sadsaran na.

¹⁸ Oneng teya ding memalen ning Zebulun at Neftali ing bie ra king parang ning labanan.

¹⁹ Dinatang la ding ari at mekilaban la; lebanan da lang ari ning Canaan, karin king Taanak, siping ning danum ning Megido, oneng nanumang pilak ala lang simsam.

²⁰ Maging ding batuin king banua linaban la kang Sisera king paglakad da king dalan a tutuntunan da.

²¹ King mabilis nang agus ning Ilug ning Kison mitange la; tiki na la ning mabilis nang agus ning Ilug ning Kison. Sumulung ku, lumakad ku king mitmung sikanan.

²² Kanita meramdam ing masikan dang kalantug ding patus ding kabayung kukurakul alang tuknang.

²³ Isumpa me i Meroz, ngana ning anghel ning Ginu, isumpa mu lang alang kalupa ding karin manuknangan, uling e la dinatang sinaup king Ginu; e la sinaup king Ginu ban lumaban karing masikan a kalaban.

²⁴ Ing pekamapalad karing sablang babai ya pin i Jael, ing asawa nang Heber a Keniteo; ya ing mapalad dili karing babaing manuknangan karing tolda.

²⁵ Meniawad yang danum i Sisera, oneng gatas ing binie na; lilan na ing marayuput a gatas king malagung silyo.

²⁶ Kinua ne ing tulus ning tolda king metung nang gamat, king wanan naman ing masu yang telan na; pikpuk ne kang Sisera at buntuk na melaso ya, ing tiglusan ning tulus ya ing malingmingan na.

²⁷ Milugmuk ya, mibulang ya i Sisera; kabitisan nang Jael karin mikera ya; karing kabitisan na mibagsak ya, at karin mete neng digpa.

²⁸ Karing siwang ning awang itang ima nang Sisera makabatio ne man. Nganang kinutang, Obat kaya karwahi na alayu pa? Obat kabagal da ring kabayu king panuli ra?

²⁹ Ding pekamatalino karing babai mekibat la; pekibatan na ing sariling kutang na,

³⁰ Manintun lang pibandian a karelang samsaman at pipartian-partian, metung o aduang dalaga para karing balang sundalus da; malagung imalan a kilayan para kang Sisera, burdadung imalan a kilayan king batal ning reyna.

³¹ Makanyan la sanang magisan ding kalaban mu, O Ginu, oneng ding kakaluguran mu maging kawangis na la ning aldo king panaslag na. At mika kapayapan king bansa kilub ding apat apulung banua.

6

¹ Pasibayu no namang mikasala king akakit na ning Ginu ding memalen na ning Israel. Inya peintulut na ning Ginu ing manabu la king gamat da ring tau Midian kilub ding pitung banua.

² Uling mas masikan la ding tau Midian kesa karing tau Israel, sinalikut la ding memalen na ning Israel karing lukib, karing kueba da ring bunduk, at karing aliwang ligtas a lugal.

³ Kabud meyari lang tinanam ding Israelita kanita no man datang ding Midianita, ding Amalekita, at ding libut-libut a tribu ning aslagan at lusuban da la.

⁴ Magkampu la king lugal da at sisiran da ing sablang makatanam angga na king makapadurut a kayarian na ning Gaza. Ala lang tatagan a pagkabie, maging tupa o baka o asno.

⁵ Daratang lang kayabe da ring karelang baka at tolda. Anti la mong makapal a durun neng daratang la; at e mu la abilang-bilang ding kamelyu ra. Mesalanta ing sabla-sabla king gabun king paniatang da.

⁶ Misakitan yang alang kalupa ing Israel, inya sinaingsing yang meniawad saup king Ginu.

⁷ Inyang sinaingsing la ding memalen na ning Israel king Ginu uli da ring Midianita,

⁸ tinubud ne ning Ginu ing metung a propeta. At king kapamilatan na iti ing sinabi na karela ning Ginu, ing Dios ning Israel, Aku ing milual kekayu king panga-ipus yu king Ehipto.

⁹ Linigtas da kayu karing tau Ehipto at karing taung linaban kekayu king kayarian a iti. Tinabi ku la king kekayung paniulung at binie ke kekayu ing gabun da.

¹⁰ Sinabi ku kekayu king aku ing Ginu, ing kekayung Dios, at king e yu la sasamban ding kikilalanan dang dios da ring Amoreo a ing gabun da ya ngeni ing tuknangan yu. Oneng e kayu mekiramdam kanaku.

¹¹ Dinatang ya kanita ing anghel ning Ginu karin Ofra, at linukluk ya lalam ning metung a tanaman a ensina a bandi nang Joas, ing Abiezarita. Kanitang penandit a ita i Gideon a anak na makasalikut yang babalasbas trigu king pipamaslan ubas ban e ra akit ding Midianita.

¹² Karin ya pepakit ing anghel ning Ginu at ngana kang Gideon, Ing Ginu kayabe me, O lalaking masikan at matapang.

¹³ Kitang nang Gideon, Nung paintulut yu, ginu, buri kung abalu obat milyari ing sablang iti kekami, nung ing Ginu kayabe mi ya? Agpang king kwentu da ring makatua mi, dinapat yang bage pagmumulalan inyang liwal na la king Ehipto. Obat pepaburen na kami ngeni ning Ginu at pepaburen karing gamat da ring tau Midian?

¹⁴ Kanita nganang minutus ning Ginu, Mako na ka at iligtas me ing Israel king gamat da ring Midianita king kapamilatan ning sikanan a atyu keka. Aku ing mitutubud keka.

¹⁵ Nganang mekibat Gideon, Oneng, Ginu, makananu keng iligtas ing Israel? Ing pamilya ku ya ing mainang dili king tribu nang Manase, at aku naman ing mainang dili king pamilya mi.

¹⁶ Nganang mekibat ning Ginu, Arapat mu uling saupan da ka at mayan mu lang sambutan uling anti lang metung mung tau.

¹⁷ Mekibat ya i Gideon, Nung metula kayu kanaku, dinan yu kung palatandanan king ikayu pin ing Ginu a kasabi ku.

¹⁸ Ipakisabi kung mayap king e kayu pa mamako anggang e ku makapagbalik ban makapagsadiang pamangan kekayu. Nganang mekibat ning Ginu, E ku mako anggang e ka mekapagbalik.

¹⁹ Inya linub ya bale i Gideon at linutu ne ing metung a biserung kambing, at ginawa yang tinape alang lebadura king metung a takal a arina; lilan na ing karni king basket at ing sabo king balanga, at dela na la lalam na ning tanaman a ensina at inapag na king anghel.

²⁰ Ngana ning anghel ning Ginu, Gideon, ibili mu kening batu ing karni at ing tinape alang lebadura, at itugtug mu ing sabo babo ra. At memintu ya i Gideon.

²¹ Tigkilan na king punta ning tukud a tatalnan na ning anghel ning Ginu ing karni at ing tinape alang lebadura at kaybat biglang siniklab ing api manibat king batu, at gisan ning api ing karni at ding tinape, at mewala ya king akakit na ing anghel ning Ginu.

²² Kanita na penamdaman Gideon king ing ikit na ya ing anghel ning Ginu at ngana king takut na, O Ginung Dios, ikit ke ing anghel yu lupa't lupa!

²³ Ngana ning Ginu, Gideon, magpayapa ka; e ka tatakut, e ka mate.

²⁴ Inya mitalakad yang altar i Gideon karin para king Ginu at inaus ne iting Kapayapan ya ing Ginu. Atyu ya pa angga ngeni iting altar king Ofra a bandi da ring pamilya nang Abiezer.

²⁵ Itang benging ita ngana ning Ginu kang Gideon, Kuanan me ing toro nang tata mu at itang pitung banua na tua. Kaybat, lasakan me ing altar nang Baal a bandi nang tata mu at idagsa ing kikilalanan dang dios a i Asera a atyu siping na.

²⁶ Kaybat gawa kang metung a matibe altar para king Ginung kekang Dios king babo na niting burul. Kaybat kuanan me itang toro a pitung banua na tua at iyain me bilang ain-a-durulukan. Gamitan mung panangab ing dutung ning Asera a digsa mu.

²⁷ Inya kinangwa yang apulu karing ipus na i Gideon at gewa re ing pagawa na ning Ginu. Bengi inyang gewa re, uling maragul ing takut na karing pamilya na at karing kabalen na.

²⁸ Itang kabukasan, inyang mibangun na la ding memalen, ikit da king ing melasak ya ing altar nang Baal at ing Asera siping na at miyain ya ing pitung banuang toro king altar a bayung gawa.

²⁹ Ngara king metung at metung, Ninu ing makigawa kaniti? Ginawa lang pamaniasat, at abalu ra king i Gideon a anak nang Joas ya ing makirapat.

³⁰ Inya ngara kang Joas, Ilual me keni ing anak mu ba mi yang paten! Lesak ne ing altar nang Baal at kinutud ne ing Asera siping na.

³¹ Nganang Joas karing mekikit a kalaban na, Idipensa ye i Baal? Idipensa yu ing kasu na? Ninuman ing mag-dipensa sukat yang paten pangayabak. Nung metung yang dios i Baal paburen yeng idipensa na ing sarili na uling altar ne ing melasak!

³² Manibat na kanita pemalagyuan deng Jerubaal i Gideon, uling sinabi nang Joas, Paburen yeng idipensa nang Baal ing sarili na, uling altar ne ing melasak.

³³ Kanita mitipun la ding sablang Midianita, ding Amalekita, at ding tribu ning disyerto, lipatan de ing Ilug ning Jordan at migkampu la king Kapatagan ning Jezreel.

³⁴ Kitmuan ne ning upaya ning Ginu i Gideon, inya tiniupan ne ing trumpeta ban ausan na la ding lalaki na ning pamilya nang Abiezer ban tuki.

³⁵ Peparala ya namang tubud karing adua nang dake ning sakup ning Manase ban ausan na lang tuki. Peparala ya namang tubud karing tribu nang Aser, Zebulun, at Neftali, at dinatang la naman ban makiabe.

³⁶ Kaybat nganang Gideon king Dios, Sasabian yu ing inari yu na king lub yu ing gamitan yu ku ba yeng iligtas ing Israel.

³⁷ Nung makanyan mibili kung bulbul tupa king pidadaran trigu. Nung karas ning abak mebasa ya king ambun ing bulbul tupa at malangi ing gabun, kanita ku abalu ing gamitan yu ku king pangaligtas ning Israel.

³⁸ Mibangun ya itang kabukasan abak a maranun i Gideon at pelipit na ing bulbul tupa at mekasalud yang metung a silyo danum.

³⁹ Kaybat nganang Gideon king Dios, E kayu sa mimimua kanaku; paburen yung magsalita ku misan pa. Ipaintulut yu sana ing gawa ku pang metung a pamagsubuk king bulbul tupa. Ngeni naman sana langi ing bulbul tupa at mabasa king ambun ing gabun.

⁴⁰ At ita ya ing depat na ning Dios ketang benging ita. Kabukasan abak malangi ya ing bulbul tupa at mabasa ya ing gabun king ambun.

7

¹ Misan a aldo maranun yang mibangun i Jerubaal (ngana wari, i Gideon) at ding sablang tauan na, at migkampu la siping na ning Sibul ning Harod. Atyu ne man ing kampu da ring Midianita king kapatagan siping na ning Bunduk-bundukan ning More bandang norti karela.

² Ngana ning Ginu kang Gideon, Tutu lang dakal ding taung kayabe mu para papaniambutan ku la laban karing Midianita. Marahil isipan da pa king sinambut la uli namu ning sarili ra. Inya e ra man kilalanan ing saup ku karela.

³ Ipayabut mu kareting tau king ing ninumang duag at tatakut malyari neng muli at mako na keti king Bunduk ning Gilead! Minuli la ding aduang pulu't aduang libu, oneng melakuan la ding apulung libu.

⁴ Kaybat ngana ning Ginu kang Gideon, Dakal la pang tutu ding tauan mu. Ituki mu lang dulung keta king danuman at pilinan ku la para keka karin detang karapatdapat tuki keka. Nung sabian ku kekang Ing taung ita tuki ya keka, tuki ya. Nung sabian ku kekang Ing taung ita e ya dapat tuki keka, e ya tuki keka.

⁵ Tiki na lang dinulung Gideon ding tauan na king danuman at ngana ning Ginu, Gideon, ikawani mu la ding sablang dumilat king danum antimong asu karetang sablang siklaud king tud da ban makainum la.

⁶ Ating atlung dalan karing taung sinaluk da karing gamat da at dinilat ing danum; siniklaud la king tud da ring aliwa ba lang makainum.

⁷ Ngana ning Ginu kang Gideon, Kapamilatan da ring atlung dalan a dinilat king danum iligtas da kayu at ibie ke kekayu ing tagumpe king pamakilaban. Sabian mu karing aliwa ing muli na la.

⁸ Kaybat na lang kinua ring banga ra at trumpeta pepaulian na na lang Gideon ding sablang Israelita, subali mu karing atlung dalan. Durungdungan ne ing kampu da ring Midianita a atyu king kapatagan.

⁹ Kanitang bengi mu ring ita nganang minutus ning Ginu kang Gideon, Mibangun na ka at lusuban mu na la ding kalaban; ibie ku keka ing tagumpe.

¹⁰ Nung tatakut kang lusuban mu la ituki me ing ipus mung i Pura at munta kayu king kampu.

¹¹ Damdaman mu ing pisasabian da at mika tetagan kang lusuban mu la. Inya kinuldas ya i Gideon, kayabe ne ing ipus nang i Pura, king gilid na ning kampu da ring kalaban.

¹² Makakalat la king kapatagan ding Midianita, ding Amalekita ampon ding tribu ning disyerto. Anti lang durun king kakapal da, at ding kamelyu ra kasing dakal na la ning balas king pasigan ning dagat.

¹³ Karas nang Gideon, dimdam neng magkwentu ing metung a tau king kakaluguran na tungkul king apaninap na. Nganang sinabi, Apaninap ku king ing metung a tinape sebada dinulung ya king libutad ning kampu tamu at tiran ne ing metung a tolda. Mibagsak ya ing tolda at mipatag ya king gabun.

¹⁴ Nganang mekibat ning kaluguran na, Iti ya pin at alang aliwa nune ing espada nang Gideon a anak nang Joas, ing Israelita. Binili ne ning Dios king gamat na ing Midian at ding sablang sundalus na!

¹⁵ Inyang dimdam nang Gideon ing paninap na ning tau at ing buri nang sabian, siniklaud ya ban pasalamatan ne ing Dios. Kaybat, mibalik ya king kampu da ring Israelita at ngana, Mibangun na kayu! Babie ne ning Ginu ing tagumpe kekayu laban karing sundalus ning Midian.

¹⁶ Gewa na lang atlung grupu ding atlu nang dalan a sundalus at dininan neng trumpeta ing balang katau at metung banga a maki sulu kilub.

¹⁷ Ngana karela, Lawan yu ku karas ku king gilid ning kampu at pakiapusan yu ing nanumang gawan ku.

¹⁸ Potang ding kayabe ku at aku tiniupan mi la ding kekaming trumpeta, kanita ikayu ngang makapadurut king kampu tiupan yu la munaman ding trumpeta yu at ikulisak yu: Para king Ginu at para kang Gideon!

¹⁹ Linapit ya i Gideon at ding dinalan nang katau king gilid na ning kampu bayu itang kapitangan bengi, kaybat-aybat da pang mipanaliling guardia kanita. Tiniupan da la ring karelang trumpeta at bilbal ding tatalnan dang banga.

²⁰ Makanyan munaman ing depatan da ring aduang grupu. Tatalnan da la ring sulu ra karing kayli rang gamat, at ding trumpeta karing wanan dang gamat at kinulisak la. Ngara, Ing espada para king Ginu at para kang Gideon!

²¹ Makapuestu ya ing balang metung king lugal na king makapadurut king kampu, at memulayi lang kukulisak ding heganaganang kalaban da.

²² Kabang titiupan da la ring atlung dalan a trumpeta da ring tauan nang Gideon, pilaban-laban na la ning Ginu ding kalaban. Inarap ne ing espada na ning balang metung karela laban karing mismung kayabe na, at memulayi lang papunta Zaretan angga na Betsita at angga na king balen ning Abel Mehola malapit Tabat. fig,,,, ,Kabang titiupan da la ring atlung dalan a trumpeta da ring tauan nang Gideon, pilaban-laban na la ning Ginu ding kalaban.,(7:22)fig*

²³ Kanita meyaus la ding lalaki karing tribu nang Neftali, Aser, at ding aduang dake ning Manase at penagal da la ring Midianita.

²⁴ Peparala yang tubud i Gideon king kabilugan a bulubundukan ning Efraim ba rang sabian ing anti kaniti, Munta kayu keni at labanan yu la ding Midianita. Sabatan yu la king Ilug ning Jordan at karing sapa angga Betbara ban e la makadalakit ding Midianita. Meyaus la ding tau Efraim at sekupan da la ring sapa angga Betbara antimu rin ing Ilug ning Jordan.

²⁵ Abihag da la ring aduang pamuntuk da ring Midianita, i Oreb at Zeeb; pete re i Oreb king Batu nang Oreb at i Zeeb king pipamaslan ubas ning Zeeb. Penagal da la ring Midianita at dela da la ring buntuk nang Oreb at Zeeb kang Gideon a atyu na kanita king dane aslagan ning Jordan.

8

¹ Ngara ding tau Efraim kang Gideon, Ba't e mu kami inaus inyang minta kang mekilaban karing Midianita? Ba't makanyan ing depatan mu kekami? Peginakitan deng e mu nanu.

² Ngana karela, E malyaring ipakilupa ing nanumang depat ku king depatan yu. Agyang ita mung malating bage a gewa yu ikayung tau Efraim maygit yang e palak king gewa na ning mabilug ming pamilya.

³ E wari, king kapamilatan na ning upaya ning Ginu, pete yu la ding aduang pekapun da ring Midianita, i Oreb at Zeeb. Nanu mo ing agawa ku ban ipakilupa kanita? Inyang asabi na ita, milako ing mua ra.

⁴ Kanita namang penandit a ita mekadalakit ya i Gideon at ding atlu nang dalan a tauan king Ilug ning Jordan. Mapagal na la oneng susundu ra pa mu rin ing pamanagal karing kalaban.

⁵ Ngana karing memalen na ning Sukot inyang miras la karin, Ipakisabi kung mayap ing dinan yu lang mapilan a tinape ding tauan ku. Mapagal la at tatagalan ku la di Zeba at Zalmuna, ding aring Midianita.

⁶ Oneng ngara ding manimuna ning Sukot, Ba't mo dinan mi lang nanumang pamangan ding sundalus mu? E ye pa naman abihag i Zeba at i Zalmuna.

⁷ Inya nganang Gideon, O dale, potang binie na na la ning Ginu king gamat mi di Zeba at Zalmuna, pamalasbasan da kayu karing sangang masuksuk ning disyerto at sangang mataram a gilid.

⁸ Manibat karin minta ya king Penuel at makanyan ya namang migsalita karing tau karin, oneng kalupa ne ning pakibat da ring tau Sukot ing pakibat da ring tau Penuel.

⁹ At ngana karing tau Penuel, Potang magbalik na ku kaybat kung migtagumpe, lasakan ke iting tore.

¹⁰ Atyu la Karkor di Zeba at Zalmuna at ding makatagan da pang sundalus. Atin pang labing limang libu kareting sundalus ding tribu ning disyerto kaybat dang mete ding dinalan at aduang pulung libu.

¹¹ Dinalan ya i Gideon king gilid ning disyerto, dane nang aslagan ning Noba at Jogbeha; bigla na lang lisuban ding kalaban.

¹² Tinakas la ring aduang ari na ning Midian, i Zeba at i Zalmuna, oneng penagal na la at abihag na la, at inya melitu la ding sundalus ra.

¹³ Kaybat ning labanan dinalan ya i Gideon king Pidadalanan ning Heres.

¹⁴ Arakap ne ing metung a kayanakan a lalaking tau Sukot, at pengutnan ne. Sinulat na la niting kayanakan para kang Gideon ding pitung pulu't pitung opisyal at makatua na ning Sukot.

¹⁵ Pintalan na lang Gideon kanita ding tau Sukot at ngana karela, Atatandanan yu pa inyang e yu ku buring saupan? Sinabi yu king e yu la malyaring dinan pamangan ding mapagal kung sundalus uling e ku la pa abihag di Zeba at Zalmuna. Oreni ngeni!

¹⁶ Kanita kinangwa ya karing sangang masuksuk at sangang mataram a gilid ban parusan na la ding manimuna ning Sukot.

¹⁷ Lesak nia naman ing tore ning Penuel at pete na la ding lalaki ning siudad.

¹⁸ Kaybat nganang kinutang Gideon kari Zeba at Zalmuna, O detang lalaking pete yu king Tabor? Ngarang mekibat, Kawangis mu lakalupa yang anak ning ari ing balang metung karela.

¹⁹ Nganang sinabing Gideon, Kapatad ku la deta, anak na la ning mismung ima ku. Matni kung sasabian kekayu nung e yu la mu pete, e ra ko sana paten ngeni.

²⁰ Kanita ngana kang Jeter, ing pangane na, Sulung, paten mu la! Oneng e ne begut ning anak na ing espada na. Mikakunu ya uling anak ya pa mu.

²¹ Ngara kanitang migsalitang Zeba at Zalmuna kang Gideon, Sulung, ika na mismu ing makamate kekami. Mangailangan yang ganap a pangalalaki ing gawa king obrang lalaki. Inya pete na lang Gideon at kinua ding palamuti a makasabit karing batal da ring karelang kamelyu.

²² Kaybat na nita, ngara ding Israelita kang Gideon, Anti na ning linigtas mu kami king gamat da ring Midianita, ika na ing manimuna kekami, ika at ding lahi mu kaybat mu.

²³ Nganang mekibat Gideon, E ku malyaring maging manimuna kekayu ni ing anak ku; ing Ginu ya ing manimuna kekayu.

²⁴ Ngana pang Gideon karela, Atin kung buring aduan kekayu. Ibie ne kanaku ning balang metung kekayu ding tinggang asamsam na. (Ugali ra kanita ding tau Midian ing magtinggang gintu.)

²⁵ Ngarang mekibat, Matula mi lang ibie keka. Miladlad lang imalan at bildug na la ning balang metung karing lalaki ing tinggang asamsam na.

²⁶ Tinimbang lang maygit apat apulung libra ding tinggap nang gintung tinggang Gideon, at e la kayabe kareti ding aliwang alahas at kwintas ampon imalan a purpura a susulud da ring ari ning Midian ni ding palamuti a makasabit karing batal da ring karelang kamelyu.

²⁷ Pepagawa yang idolo king gintu at binili ne king Ofra, ing siudad na. Ginulut la ding Israelita king Dios king kapamilatan ning pamamunta ra karin at pamanyamba kaniting idolo. Meging bitag ya iting idolo kang Gideon at king pamilya na.

²⁸ Mesambut la ring Midianita karing Israelita at e ne sakit a buntuk karela. Mika kapayapan king bansa kilub ding apat apulung banuang kekaban na ning bie nang Gideon.

²⁹ Mibalik ya i Gideon king sarili nang pibalebale at karin ya menuknangan.

³⁰ Mika pitu yang pulung lalaking anak uling dakal ya asawa.

³¹ Atin ya pang babaing kasese king Sikem at mikayanak yang lalaki keting babai, at pemalagyuan neng Abimelek.

³² Tune neng matua i Gideon a anak nang Joas inyang mete ya. Mikutkut ya king kutkutan nang Joas a tata na karin king Ofra a tuknangan da ring Abiezera.

³³ Kamate nang Gideon, gilutan de ing Dios at sinamba lang pasibayu ding memalen ning Israel karing Baal na ning bansa. Gewa deng dios da i Baal-berit.

³⁴ Kelinguan de ing Ginung karelang Dios a migligtas karela karing kalaban dang makapadurut karela.

³⁵ E ra balung pepasalamatan king pamilya nang Gideon ing dakal a mayap a gewa na para king Israel.

9

¹ Kalabas da ring mapilan a panaun, minta ya king Sikem i Abimelek a anak nang Gideon. Karin la manuknangan ding kamaganak nang ima na. At ngana karela,

² Ikutang yu karing tau Sikem nung nanu ing buri da: ing mamuntukan la karela ding pitung pulung anak nang Gideon o sakupan na la mu ning katau? Ganakan yu king aku, i Abimelek, sarili yu kung laman at daya.

³ Inya ding kamaganak nang ima nang Abimelek pekisabian da la ding tau Sikem, at meyapan da ring tau Sikem ing tukian de i Abimelek uling kamaganak de.

⁴ Dininan deng pitung pulung pirasung pilak a ibat king templo nang Baal-berit at ginamit na la reti king pamanupa karing alang kabaldugan at barumbadung tau ban tuki la.

⁵ Minta ya king Ofra, ing balen nang tata na, at karin babo na ning metung a batu pete na la ding pitung pulung kasing-ibpa na kang Gideon. Oneng i Jotam, ing bungsung anak nang Gideon, e ne apate uling mekasalikut ya.

⁶ Kaybat na nita, ding sablang memalen na ning Sikem at Betmilo mitipun la king siping ning sagradung tanaman a ensina, at karin de gewang ari i Abimelek.

⁷ Inyang abalitan nang Jotam ing milyari, minukiat ya king Bunduk ning Gerizim at karin king taluktuk na niti nganang kinulisak karela, Makiramdam kayu kanaku ikayung memalen na ning Sikem, marahil makiramdam ya kekayu ing Dios.

⁸ Kanitang misan a panaun mitipun la ding tanaman ban pilinan de ing maging ari da. Ngara king tanaman a olibo, Ika ing mag-ari kekami.

⁹ Nganang mekibat ning olibo, Lakuan ku wari ing laru a paglania ra karing dios at karing tau ban manimuna ku kekayo?

¹⁰ At ngara ding tanaman king higera, Munta ka keni at ika na ing mag-ari kekami.

¹¹ Ngana ning tanaman a higera, Lakuan ku wari ing yumu ku at ding mayap kung bunga ban manimuna ku kekayo?

¹² Ngara ding tanaman king ubas, Munta ka keni at ika ing mag-ari kekami.

¹³ Ngana ning ubas karela, Lakuan ku wari ing kakung pamangawang alak a babie tula karing dios at karing tau ban manimuna ku kekayo?

¹⁴ Kanita ngara ding sablang tanaman king tanaman a masuksuk, Munta ka keni at ika na ing mag-ari kekami.

¹⁵ Nganang mekibat ning tanaman a masuksuk, Nung talagang buri yu kung maging ari yu, munta kayu keni at salilung king lalam ning anino ku; nung ali kayu, mikaluku la ring sanga ku at silaban na la ding tanaman nang sedro ning Lebanon.

¹⁶ Nganang tinuglung Jotam, Inya matulid wari at karapatdapat ing pamitalaga yu kang Abimelek bilang ari? Karapatdapat wari yan kang Gideon at king pamilya na? Depatan yu kaya kanyan itang bage katumbas ning depat na?

¹⁷ Ganakan yu king mekilaban ya i tata ku para kekayu. Teya na ing bie na ban iligtas na kayu king gamat da ring Midianita.

¹⁸ Ngening aldong iti likuan yu la ding pamilya nang tata ku at pete babo ning metung mung batu ding pitung pulu nang anak, at gewa yeng ari da ring memalen na ning Sikem i Abimelek, ing anak nang tata ku king ipus na, uli na mu ning kamaganak ye.

¹⁹ Nung tune tapat at marangal ing depat yu para kang Gideon at king pamilya na, kanita maging masaya kayung kayabe nang Abimelek, at maging masaya ya naman kayabe yu.

²⁰ Nung ali, mikaluku sana kang Abimelek ing api at gisanan na la ding lalaki ning Sikem at Betmilo. At manibat naman karing memalen na ning Sikem at Betmilo mikaluku sana ing api ban gisanan ne i Abimelek.

²¹ At uli na ning takut nang Jotam kang Abimelek a kapatad na, memulayi ya at tinakas papunta Beer. At karin ya menuknangan.

²² Atlu yang banuang menimuna king Israel i Abimelek.

²³ Kaybat na nita, ginawa yang paralan ing Dios ban e la mikakasundu ri Abimelek at ding lalaki na ning Sikem. Inya mig-rebeldi la laban kang Abimelek.

²⁴ Iti mepalyari ban kanita mamayaran la king pamikasala nang Abimelek at ding lalaki na ning Sikem a mitulak kang Abimelek ban paten na la ding pitung pulung anak nang Gideon.

²⁵ Mibili lang tauan da ring lalaki na ning Sikem ban tambangan de i Abimelek karing kabundukan at penakawanan da la ring sablang daralan karin. Peparas da iting bage kang Abimelek.

²⁶ Dinatang ya kanita king Sikem i Gaal, ing anak nang Ebed, ampon ding kapatad nang lalaki at mika tiwala la kang Gaal ding lalaki na ning Sikem.

²⁷ Minta la ngan king karelang ubasan at menagtal lang ubas; ginawa lang alak at migsaya la. Linub la king templo da ring karelang dios, at karin la mengan at minum ampon pituya-tuya i Abimelek.

²⁸ At nganang Gaal, Ninu wari i Abimelek? Ba't itamung tau Sikem kailangan ta yang suyuan? E ya wari sinuyu kang Hamor ing anak nang Gideon at ing talasuyu nang i Zebul? Obat mo suyuan ta ya i Abimelek? Maging tapat kayu king makatua yung i Hamor.

²⁹ Sana aku na ing manimuna kareting taung deti! Itabi ke i Abimelek. Sabian ku, Abimelek, dagdagan mu na la ring sundalus mu at lumaban ka!

³⁰ Mimua ya i Zebul, ing mamuntukan king siudad, inyang dimdam na ing sinabi nang Gaal a anak nang Ebed.

³¹ Mitubud yang tau kang Abimelek karin Aruma ban sabian, Dinatang ya Sikem i Gaal a anak nang Ebed at ding kapatad na, at papag-rebeldi da la ring tau laban keka.

³² Inya ika at ding tauan mu kimut kayu ngening bengi; salikut kayu at manaya king marangle.

³³ Karas ning abak, kaslag ning aldo, maranun kayung mibangun at bigla yeng lusuban ing siudad. At potang lumaban ya kekayu i Gaal at ding tauan na gawan yu ing heganaganang kagiwan yu laban karela.

³⁴ Inya itang benging ita i Abimelek at ding sablang kayabe na linakad la. Apat lang grupu ding menayang makasalikut lual ning siudad.

³⁵ Inyang ikit de ri Abimelek at ding kayabe na ing linual ya i Gaal at makatalakad king pasbul dalan ning siudad, linage la ketang pangasalikut da.

³⁶ Ikit na lang Gaal at ngana kang Zebul, Lawan mu! Kukuldas la ring tau king bunduk! E na la man tau ren, nganang mekibat Zebul. Anino da la mu ren ding bunduk.

³⁷ Pasibayu nganang Gaal, Lawan mu! Atin munamang taung manibatan king kalibudtan na ning bansa, at ing metung pang grupu manibat ya king dane na ning tanaman a ensina da ring mamamanula.

³⁸ Kanita nganang Zebul, Gaal, antayu ngeni ing kekang pamagmaragul? Ngamu, Ninu mo wari i Abimelek? Ba't mo suyuan ta ya? Ila den ding taung pikayli-kayli mu. Sulung, lage na ka ngeni at lumaban ka karela.

³⁹ Inya linual ya i Gaal at penimunan na la ding lalaki na ning Sikem, at linaban la kang Abimelek.

⁴⁰ Penagal neng Abimelek i Gaal, oneng mekatakas ya. Dakal la ring mesugat angga na king pasbul dalan ning siudad.

⁴¹ Menuknangan ya Aruma i Abimelek, at tinabi na ne mang Zebul i Gaal at ding kapatad na lual ning Sikem, inya e na la malyaring manuknangan pa karin.

⁴² Kabukasan, abalitan nang Abimelek king minta la king marangle ding lalaki na ning Sikem,

⁴³ inya tiki na la ding tauan na; gewa na lang atlung grupu, at menaya la king marangle. Inyang linawe ya, ikit na lang lulual king siudad ding lalaki na ning Sikem; lisuban na la at pete.

⁴⁴ Memalagua yang minta i Abimelek at ing grupu a kayabe na at sebatan de ing pasbul dalan ning siudad, kabang ding aduang grupu naman selakayan da la ring sablang atyu king marangle at pete da la.

⁴⁵ Pepatingapun yang mekilaban king siudad i Abimelek; binihag ne ing siudad at pete na la ding sablang taung atyu karin; digsa ne ing siudad at timbunan neng asin ing gabun.

⁴⁶ Inyang abalitan da iti meko la ring talapanimunang atyu king kuta ning Sikem at sinalikut la king matibe nang dake ning templo nang Baal-berit.

⁴⁷ Abalitan nang Abimelek king ding sablang tau na ning kuta ning Sikem abeabe lang makatipun karin.

⁴⁸ Inya i Abimelek at ding sablang kayabe na minukiat la king Bunduk ning Zalmon. Kinangwa yang palatso i Abimelek; memutut yang kaptas a sanga at pisanan ne. Ngana karing lalaking kayabe na, Magmalagua kayu! Nung nanu ing ikit yung gewa ku, ya naman ing gawan yu.

⁴⁹ Inya memutut yang sanga ing balang metung karela at tikian de i Abimelek. Binili da la ring sanga siping ning matibe nang dake ning templo at silaban da. Mete la ding sablang taung atyu kilub; ating libung lalaki at babai.

⁵⁰ Kaybat na nita, minta ya Tebez i Abimelek, kibkuban ne ing siudad at abihag ne.

⁵¹ Ating metung a matibe tore king kilub ning siudad, at pupulayi lang minta karin at migkulung ding sablang tau; minukiat la king bubung na niti.

⁵² Inyang datang ne i Abimelek ban lusuban ne ing tore, minta ya king pasbul na niti ban silaban ne ing tore.

⁵³ Oneng bildug ne ning metung a babai ing gilingan a batu king buntuk nang Abimelek at mebalbal ya buntuk.

⁵⁴ Agad-agad neng inaus ing kayanakan a lalaking talapagdala karing armas na. Ngana, Bagutan me ing espada mu at isaksak me kanaku, marahil sabian da pa reng tau kanaku king apate na ku ning metung a babai. Inya siksak ne king espada, at mete ya.

⁵⁵ Inyang ikit da ring Israelita ing mete ne i Abimelek, memanuli la karing karelang pibalebale.

⁵⁶ Makanyan neng pepamayaran ning Dios i Abimelek king e mayap a depat na laban kang tata na inyang pete na la ding pitung pulung kapatad na.

⁵⁷ Pepagpa na naman ning Dios karing lalaki na ning Sikem ing parusa a makayagpang ketang sinabi nang Jotam, ing anak nang Gideon, inyang simpa na la.

10

¹ Inyang mete ne i Abimelek, i Tola a anak nang Pua at apu nang Dodo, ya ing linto ban magligtas king Israel. Ibat ya king tribu nang Isacar at manuknangan ya Samir, king bulubundukan ning Efraim.

² Ya ing pamuntuk a menimuna king Israel kilub ding aduang pulu't atlung banua. Kaybat mete ya at mikutkut ya king Samir.

³ I Jair ning Gilead ya ing meging kayalili nang Tola. Ya ing pamuntuk a menimuna king Israel kilub ding aduang pulu't aduang banua.

⁴ Mikayanak yang atlung pulung lalaki a ating sarasariling sasaken a asno. Atin lang atlung pulung siudad a angga man ngeni ausan dang Havot-jair. Atyu la reti king sakup ning Gilead.

⁵ Kaybat mete ya i Jair at mikutkut ya king Kamon.

⁶ Pasibayu no namang mikasala king akakit na ning Ginu ding Israelita inyang simban da la ring Baal at ding Astarte, antimu rin ding kikilalanan dang dios ning Siria, ning Sidon, ning Moab, ning Ammon, at ning Filistia. Gilutan de ing Ginu at tiknangan deng sasamban.

⁷ Inya mimua ya ing Ginu karing Israelita at peintulutan na lang masakup karing Filisteo at karing Ammonita.

⁸ At kilub ding labing walung banua sinupil da la at ligaligan ding sablang Israelita a manuknangan king kayarian da ring Amoreo dane nang aslagan ning Ilug ning Jordan ning Gilead.

⁹ Delakitan de ring Ammonita ing Ilug ning Jordan ban labanan da la ring tribu nang Juda, Benjamin, at Efraim. Mibili ya king maragul a kaligaligan ing Israel.

¹⁰ Kanita sinaingsing la king Ginu ding Israelita. Ngara, Mikasala kami keka, O Dios, uling gilutan da ka at simban mi la ding Baal.

¹¹ Ngana ning Ginu karing Israelita, Sinaingsing kayu kanaku king milabas inyang ding tau Ehipto, ding Amoreo, ding Ammonita, ding Filisteo,

¹² ding Sidoniano, ding Amalekita, at ding Moanita linupig da kayu. At linigtas da kayu.

¹³ Makanyan man, gilutan yu ku at simban yu la ding aliwang dios. Inya e ra na kayu iligtas pa.

¹⁴ Sulung at maus kayu karing dios a pinili yu. Paburen yu lang iligtas da kayu king kekayung kaligaligan!

¹⁵ Ngara ding memalen ning Israel king Ginu, Mikasala kami. Daptan mu na kekami ing buri mu, iligtas mu kami mu sana ngeni.

¹⁶ Inya leko da la ring kikilalanan dang dios da ring aliwang bansa at simban de ing Ginu; at melunus ya king kabilian ning Israel.

¹⁷ Kanita migsadia la ding Ammonita ban makilaban at migkampu la Gilead. Mitipun no man at migkampu ding Israelita king Mizpa ning Gilead.

¹⁸ At karin ngarang mikukutnanan ding memalen at ding talapanimuna ning Israel, Ninu ing manimuna king labanan laban karing Ammonita? Ninu ya man, ya ing maging manimuna da ring sablang manuknangan Gilead.

11

¹ Metung yang matapang a sundalus i Jefta a tau Gilead. Anak ne ning babaing magtinda king katawan na. I tata na ya i Gilead.

² Atin ya pang aliwang anak a lalaki i Gilead king asawa na, at inyang dagul la reti, tinabi re i Jefta king tuknangan da. Ngara, Ala kang tanggapan a mana nanuman kang tata mi uling anak na ka king aliwang babai.

³ Kanita likuan na lang Jefta ding kapatad na at menuknangan ya king sakup ning Tob. Mekiabe la kang Jefta ding taung alang kabaldugan at ila deti ring meging kayabe na.

⁴ Kalabas da ring mapilan a panaun linusub la ring Ammonita king Israel.

⁵ Uli na ning milyari, pintalan de ring manimuna ning Gilead i Jefta king Tob at inagkat deng muli na.

⁶ Ngara, Jefta, muli na ka at panimunan mu kami king pamakilaban karing Ammonita.

⁷ Nganang Jefta, Kasaman yu ku at pinilit yu kung pepalakuan king bale nang tata ku. Obat detangan yu ku ngening atyu kayu king kaligaligan?

⁸ Ngarang mekibat kang Jefta, Inya ika ing lepitan mi uling buri mi ing tuki ka kekami, at ika ing manimuna kekami king pamakilaban karing Ammonita. Buri mi munamang ika ing maging manimuna da ring tau Gilead.

⁹ Nganang Jefta karela, Nung ituki yu kung muli ban labanan ding Ammonita at nung ibie na kanaku ning Ginu ing tagumpe, kanita aku ing maging pamuntuk yu.

¹⁰ Ngarang mekibat, Bisa kami. Ing Ginu ya ing kekaming saksi.

¹¹ Inya tinuki ya i Jefta karing manimuna ning Gilead, at gewa reng pamuntuk at manimuna da ring memalen. At karin Mizpa, king arapan ning Ginu pelad na lang Jefta ding kayaduanan na.

¹² Kaybat na nita, peparala yang tubud i Jefta king ari da ring Ammonita ban ikutang da: Nanu ing e mu buri kekami? Obat liban me ing bansa mi?

¹³ Pekibat ning ari da ring Ammonita karing tubud nang Jefta, Inyang dinatang la ring Israelitang ibat king Ehipto, sekupan da ing gabun mi manibat king Ilug ning Arnon angga na king Ilug ning Jabok at ning Ilug ning Jordan. Inya ngeni isubli yu iti king mitmung kapayapan.

¹⁴ Tinubud na lang pasibayung Jefta ding tubud king ari da ring Ammonita

¹⁵ ban sabian ing anti kaniti: E tutu king kinua ne ning Israel ing gabun ning Moab o ing gabun ning Ammon.

¹⁶ Oyni ing milyari: inyang likuan da ne ring Israelita ing Ehipto, delanan de ing disyerto angga na king Dagat da ring Timbu angga na king miras la Kades.

¹⁷ Kaybat, peparala lang tubud king ari na ning Edom ban maniawad kapaintulutan dumalan king gabun na. Oneng e ya mebisa ing ari ning Edom. Peparala la namang tubud king ari na ning Moab, oneng e na la naman peintulutan dumalan king kayarian na. Inya menatili la king Kades ding Israelita.

¹⁸ Kanita miglakbe la king disyerto; pengilagan de ing kayarian ning Edom at ing kayarian ning Moab angga king miras la dane nang aslagan ning Moab, sumangid na ning Ilug ning Arnon. At karin la migkampu, oneng e re delakitan ing Ilug ning Arnon uling ya na ing angganan na ning Moab.

¹⁹ Kanita peparala lang tubud ding Israelita kang Sihon, ing Amoreo a ari ning Hesbon, at meniawad lang kapaintulutan dumalan king karelang kayarian papunta king sarili dang gabun.

²⁰ Oneng e na la peintulutan Sihon a dumalan la karin ding Israelita. Tinipun na la ding sabla nang sundalus at migkampu la Jahaz at lisuban de ing Israel.

²¹ Oneng ing Ginu, ing Dios ning Israel, binie ne i Sihon at ing mabilug nang memalen king gamat na ning Israel, at mesambut la. Inya abandi na ning Israel ing mabilug a kayarian da ring Amoreo a manuknangan king gabun a ita

²² manibat king Arnon king mauli angga na karing Jabok king norti, at manibat king disyerto king aslagan angga na king Jordan king albugan.

²³ Inya ing Ginu, ing Dios ning Israel, ya ing mitabi karing Amoreo ban mika gabun la ring memalen nang Israelita. Nanung matulid mu ban kuanan pasibayu iti?

²⁴ Malyari mung bandian ing nanumang binie na keka ning kekang dios a i Kemos, oneng kekaming bandian ing sablang kinua na para kekami ning Ginu, ing kekaming Dios.

²⁵ Isipan mu galang ing mas mayap ka kesa kang Balak, ing anak nang Zipor a ari ning Moab? E na bitasang binalak ing gerahan ne ing Israel, e makanyan?

²⁶ Sekupan ne ning Israel kilub ding atlung dalan a banua ing Hesbon at Aroer, at ding balen a makapadurut kareti, at ding sablang siudad king pampang na ning Ilug ning Arnon. Obat e yu la pekikuanan pasibayu kilub da reting panaun?

²⁷ Ala kung gewang pamikasala keka. Ika ing gagawang e mayap ban gerahan mu ku. Ing Ginu ya ing balang matul ngening aldong iti karing memalen na ning Israel at karing memalen na ning Ammon.

²⁸ Oneng e ne bitasang pekiramdaman ning ari da ring Ammonita iting mensahi nang Jefta.

²⁹ Kanita dinatang ya ing upaya ning Ginu kang Jefta. Dinalan ya Gilead at Manase at mibalik Mizpa ning Gilead, at sinulung yang papunta Ammon.

³⁰ Nganang mengakung Jefta king Ginu: Nung papagtagumpen mu ku kareting Ammonita,

³¹ dulukan ke bilang ain king Ginu ing ninumang mumunang lumual king pibalebale ku ban sagana kanaku king paniatang kung ibat king tagumpe.

³² Inya delakitan neng Jefta ing ilug ban makilaban karing Ammonita, at binie na kang Jefta ning Ginu ing tagumpe.

³³ Lisuban na la manibat king Aroer angga king lugal a makapadurut king Minnit; heganagana adua lang pulung siudad at angga pa Abel Keramim. Tune lang dakal ding milako bie at mesambut la ring Ammonita king Israel.

³⁴ Inyang miras ne i Jefta king pibalebale na karin Mizpa, ing linual sinalubung ya ing anak nang babai; maki pandereta ya at teterak yang sinalubung. Ya mu ing kabubugtungan nang anak.

³⁵ Inyang ikit ne, ginabak na ing susulud nang imalan Jefta king kalungkutan na at ngana, O anak ko! Pepalungkut mu ku! Ika ing minie sindak kanaku. Ba't ika pa ing meging sangkan ning kanakung kalungkutan? Atin kung pengaku king Ginu at e ke malyaring labagan! fig,,,,,...maki pandereta ya at teterak yang sinalubung.,(11:34)fig*

³⁶ At ngana, Tatang, nung ginawa kang pangaku king Ginu, daptan mu kanaku ing pengaku mu uling pepagtagumpen na ka ning Ginu karing kekang kalaban a Ammonita.

³⁷ Oneng atin kung ipakisabing mayap keka, tatang. Dinan mu ku sanang aduang bulan ban akayabe ku la ring kakaluguran ku. Munta kami karing kabundukan at pagkalungkutan ku ing mate kung birhen.

³⁸ Mebisa ya ing tata at meko ya ing anak a kayabe ding kakaluguran na. Minta la karing kabundukan at karin na pigkalungkutan ing mate yang e mekapakiasawa at e mikayanak.

³⁹ Kalabas da ring aduang bulan mibalik ya kang tata na, at gewa nang tata na itang pengaku na king Ginu. At mete yang birhen.

⁴⁰ Manibat na kanita meging kaugalian king Israel ing mamako la banua-banua ding dalaga na ning Israel ban ganakan kilub ding apat a aldo ing pangamate nang dalaga ning anak nang Jefta ning Gilead.

12

¹ Migsadia la ding lalaki na ning Efraim para king labanan; delakitan de ing Ilug ning Jordan papunta Zafon. Ngara kang Jefta, Obat lipatan me ing angganan ban makilaban karing Ammonita at e mu kami inaus ban tuki keka? Uli na ning depat mu, silaban mi ya ing bale mu ampon ika.

² Nganang Jefta karela, Aku at ding kabalen ku mika mabayat kaming pamipate karing Ammonita. Meniawad kung saup kekayu, oneng e yu ku sinaupan.

³ Inyang ikit ku ing e yu ku saupan, teya ke ing bie ku at lipatan ing angganan ban labanan la, at binie na naman ning Ginu ing tagumpe kanaku. Ba't dinatang kayu ngening makipate kanaku?

⁴ Kanita tinipun na lang Jefta ding sablang lalaki na ning Gilead, at lebanan da la ring lalaki na ning Efraim, at simbut da la. (Ngara ding Efraimita, Ikayung Gileadita ning Efraim at Manase, takas kayu mung ibat Efraim!)

⁵ Ban alang makatakas karing Efraimita, ding Gileadita sekupan da la ring lugal nung nukarin ya malyaring dalakitan ing Jordan. Potang ing ninumang Efraimita a bisang tumakas maniawad yang kapaintulutan dalakit kutnan de ring lalaki na ning Gilead, Efraimita ka? Nung ing sabian na, Ali ku,

⁶ sabian da, Sabian mu Shibolet, oneng ing sabian na Sibolet, uling e ne ayagkas masalese. Dakpan de kanita at paten de king metung karing dalakitan ning Jordan. Apat lang pulu't aduang libung Efraimita ding apate ra king oras mu ring ita.

⁷ Penimunan neng Jefta ing Israel kilub ding anam a banua. Inyang mete ya mikutkut ya king mismung balen na king Gilead.

⁸ Kaybat nang Jefta, ing menimuna king Israel ya i Ibzan ning Betlehem.

⁹ Atin yang atlung pulung anak a lalaki at atlung pulung anak a babai. Pekiasawa na la ding anak nang babai karing e ra kalahi at kinangwa yang atlung pulung babaing e ra kalahi para maging asawa da ring anak nang lalaki. Penimunan neng Ibzan ing Israel kilub ding pitung banua.

¹⁰ Inyang mete ya mikutkut ya Betlehem.

¹¹ Kaybat nang Ibzan, ing menimuna king Israel kilub ding apulung banua ya i Elon ning Zebulun.

¹² Inyang mete ya mikutkut ya Ayalon king sakup ning Zebulun.

¹³ Kaybat nang Elon, ing menimuna king Israel ya i Abdon a anak nang Hillel a tau Piraton.

¹⁴ Mika apat yang pulung anak a lalaki at atlung pulung apung lalaki a ating sarasariling asno. Penimunan neng Abdon ing Israel kilub ding walung banua.

¹⁵ Inyang mete ya mikutkut ya Piraton sakup ning Efraim, king bulubundukan da ring Amalekita.

13

¹ Pasibayu lang mikasala king Ginu ding Israelita; inya peintulut na ning Ginu ing masakup la karing Filisteo kilub ding apat apulung banua.

² Kanitang panaun a ita, king balen ning Zora ating metung a taung milagyuan Manoa. Miembru ne ning tribu nang Dan. E ya bitasang mikayanak ing asawa na.

³ Misan a aldo, pepakit ya king asawa na ing anghel ning Ginu. Ngana, E ka pa bitasang mikayanak, oneng ngeni kumagli ka at manganak metung a lalaki.

⁴ Inya manibat ngeni e ka miminum alak o nanumang makalasing o mamangan king nanumang pamangan a makabawal.

⁵ Potang abait mu ne ing anak mu, e me paputut a buak uling kabait na makatalaga ne king Dios bilang Nazareo. Ya ing magumpisa king pamagligtas king Israel karing gamat da ring Filisteo.

⁶ Pintalan ne kanita ning babai ing asawa na at ngana, Detangan na ku ning metung a talasuyu ning Dios. Makatakut ya; lulupa yang anghel ning Dios. E ku ne man kitnan nung nu ya menibatan, at e na ne man sinabi kanaku ing lagyu na.

⁷ Oneng sinabi na kanaku ing kumagli ku at ibait ke kanu ing metung a anak a lalaki. Sinabi na naman kanaku ing e ku dapat miminum alak o nanumang makalasing, at e ku sukat mamangan king nanumang pamangan a makabawal, uling makatalaga ne kanu ing anak a ibait ku bilang Nazareo ning Dios manibat king kabait na angga na king mate ya.

⁸ Kanita nganang mekisabing mayap Manoa king Ginu, O Ginu, mamaus ku keka, itubud meng pasibayu kekami ing talasuyu na ning Dios a tinubud mu ban ituru na kekami nung nanu ing daptan mi king anak a mibait.

⁹ At pekiramdaman na ning Dios ing inawad nang Manoa, at pepakit yang pepasibayu king asawa na ing anghel na ning Dios kabang makalukluk ya king marangle; oneng e ne kayabe i Manoa a asawa na.

¹⁰ Inya agad neng pintalan ing asawa na at ngana, Lawan mu! Pepakit yang pasibayu kanaku itang taung dinatang kanaku nakadua na.

¹¹ Tinalakad ya i Manoa at tikian ne ing asawa na. Pintalan ne ing tau at ngana, Ika itang taung mekipagsalita king asawa ko? Wa, nganang mekibat.

¹² Nganang Manoa kanita, Nu mong matupad na la ding amanu mu, nanu ing gawan na ning anak? Nanung uring pamibiebie ing sukat nang tuntunan?

¹³ Pekibat ning anghel ning Ginu, Kailangan ing tukian na ngan ning asawa mu ing sablang sinabi ku.

¹⁴ E ya dapat mamangan king nanumang ibat karing tanaman a ubas. E ya dapat miminum alak o nanumang makalasing o mangan karing pamangan a makabawal. Kailangan nang tuparan ing sablang sinabi ku.

¹⁵ Ngana king anghel, uling e na balung Manoa king ya pala ing anghel ning Ginu, E ka pa sana mamako. Paburen mung ilutu mi ya para keka ing biserung kambing. Nganang mekibat ning anghel ning Ginu, Nung manatili ku man, e ku mangan king kekang pamangan. Nung buri meng isadia, dulukan me bilang ain king Ginu.

¹⁶

¹⁷ Nganang mekibat Manoa, Sabian me kekami ing lagyu mu ban aparangalan da ka potang matupad na la ding kekang amanu.

¹⁸ Nganang kinutang ning anghel, Obat buri yeng abalu ing lagyu ku? Metung yang lagyung pagmumulalan.

¹⁹ Inya kinangwa yang metung a biserung kambing i Manoa at mapilan a binutil, at inain da king babo ning altar a batu king Ginu a darapat bage pagmumulalan.

²⁰ Kabang mitatas ing aping manibatan king altar, ikit neng Manoa at ning asawa na mumukiat ya banua king api ing anghel ning Ginu. Kanita na abalung Manoa king ya pala ing anghel ning Ginu, at ya at ing asawa na migsakab la king gabun. E ra ne pasibayung ikit pa ing anghel. fig,,,, ,...ikit neng Manoa at ning asawa na mumukiat ya banua king api ing anghel ning Ginu.,(13:20-21)fig*

²¹

²² Nganang Manoa king asawa na, Siguradung mate kata, uling ikit te ing Dios!

²³ Ngana ning asawa, Nung buri na ning Ginu ing mate kata, e na sana tinggap ing ain ta; e na ne sana pepakit kekata ing sablang iti o e na na sana sinabi kekata ing miyayaliwang bage.

²⁴ Kaybat na nita, beit ne ning asawa nang Manoa ing metung a anak a lalaki at inaus neng Samson. Meragul ya ing anak at binendisyunan ne ning Ginu.

²⁵ At pegumpisan na neng pepasikan ning upaya na ning Ginu kabang atyu king kampu nang Dan pilatan na ning Zora at Estaol.

14

¹ Misan a aldo minta ya king Timna i Samson nung nukarin ne ikit ing metung a dalagang Filistea.

² Kaybat na nita, minuli ya at ngana kang tata na at ima na, Ating metung a dalagang Filistea karin king Timna. Kapad ke tabas. Gawa kayung paralan ban ya ing maging asawa ku.

³ Nganang tata na at ima na, Samson, ala na waring babai kareng anak da reng kamaganak tamu o kareng kabalen tamu, at kailangan ka pang munta kareng paganung Filisteo ban manintun maging asawa mu? Nganang sinabing Samson kang tata na, Ya ing buri kung maging asawa.

⁴ E ra kamalayan ding pengari na king iti kaburian na ning Ginu, uli na ning manintun yang pamikatagun ing Ginu ban labanan na la ding Filisteo. Ding sasakup king Israel kanitang panaun a ita ila ring Filisteo.

⁵ Inya ya at i tata na at ima na minta la king Timna. Kabang lalabas la king metung a mulahan ubas dimdam neng gagaleung ing metung a leon.

⁶ Bigla neng pepasikan ning upaya na ning Ginu i Samson, at anti ya mung biserung kambing a piglapak na karing gamat na ing leon. E na pepabalu iting milyari karing pengari na.

⁷ Kaybat na nita, pintalan ne at pekisabian ing babai at lalu yang mikalub i Samson.

⁸ Kaybat na ning mapilan a aldo mibalik ya ban pakasalan ne. Kabang papunta ya aisip na ing lawan ne ing pete nang leon, at mengapamulala ya inyang menakit yang dakal a panilan ampon pulut kilub ning katawan ning mete leon.

⁹ Kinayud na karing gamat na ing pulut-panilan at pengan na iti kabang lalakad ya; disnan ne i tata na at i ima na at dininan na la king pulut-panilan. Pengan da oneng e na sinabi karela king kinua na ing pulut-panilan king katawan na ning mete leon.

¹⁰ Minta ya i tata na king bale ning babai at karin migsadia yang pamangan i Samson. Iti ya ing kaugalian da ring kayanakan a lalaki.

¹¹ Inyang ikit de ring Filisteo tinubud da la ring atlung pulung lalaki ban akayabe na.

¹² Nganang Samson karela, Salitanan da kayung metung a bugtung. Labanan keng pustahan atlung pulung pirasung pinung linen at atlung pulung kapiblas a mal a imalan ing balang metung kekayu king e ye aibie kanaku ing buri nang sabian ning bugtung kilub ding pitung aldo ning piesta. Nung e ye turan aku ing dinan yu. Ngara, Sabian me kekami ing kekang bugtung. Pakiramdaman mi ya.

¹³

¹⁴ Ngana karela, Ibat king mamangan linual ya ing bage apangan; king masikan linual ne man ing bage mayumu. Kaybat ning atlung aldo e re pa turan ing buri nang sabian ning bugtung.

¹⁵ King kapat a aldo ngara king asawa nang Samson, Gawa kang paralan ban sabian ne kekami ning asawa mu ing buri nang sabian ning bugtung. Uling nung ali me, silaban mi ya ing bale nang tata mu at kayabe kang silaban mi. Ikayung adua, kinumbira yu kami ban panakawanan yu kami, e makanyan?

¹⁶ Maki luang tutulu king mata na inyang pintalan ne ning asawa na i Samson at ngana, E mu ku kaluguran! Mua ka kanaku! Binie me karing kakaluguran ku ing bugtung at e me sinabi kanaku ing buri nang sabian niti! Nganang Samson, Lawan mu, agyang kang tata ku at ima ku e ke sinabi ing pakibat; at ngeni sabian ke keka?

¹⁷ Tengisan na iti kilub ding pitung aldo ning pamagpiesta. Inya king kapitung aldo sinabi neng Samson king asawa na ing buri nang sabian ning bugtung, uling e ne tiknangan kukulitan. Kaybat sinabi ne ning babai karing Filisteo.

¹⁸ Inya king kapitung aldo, bayu ya limbug ing aldo, sinabi da ring lalaki ning siudad, Samson, nanu ing mas mayumu kesa king pulut-panilan? Nanu ing mas masikan kesa king leon? Nganang mekibat Samson, Nung e ye ginamit ing kanakung baka king pamaniarul yu, angga man ngeni e ye pa sana balu ing pakibat.

¹⁹ Bigla neng pepasikan ning upaya na ning Ginu i Samson at minta ya king Askelon nung nu na la pete ding atlung pulu katau karin; linubas na la at binie na ing mangamal dang imalan deti karing lalaking mekapakibat king bugtung. Kaybat na nita, minuli ya king bale nang tata na. Milalu ing mua na king milyari,

²⁰ at miyabie ya ing asawa na king lalaking meging kayabe na inyang kinasal ya.

15

¹ E melambat delawan neng Samson ing asawa na king panaun na ning pamamupul trigu; pigdala neng biserung kambing. Ngana king tata na ning babai, Lungub ku king kuartu ning asawa ku. Oneng e ne buring lungub ning tata.

² Ngana kang Samson, Sablang isip ku ing kasaman me, inya binie ke king kakaluguran mu. E wari mas malagu ne man ing wali na? Ya na ing kuanan mu king lugal nang atsi na.

³ Pekibat nang Samson, Ngeni aliwa na aku ing maki pakibatan king gawan kung kasiran karing Filisteo!

⁴ Inya meko ya at dinakap yang atlung dalan a asung-gubat. Tidua-tidua na lang pitaidtaid a iki at mibili yang sulu karing balang buknul da. Tidua-tidua na lang pitaidtaid a iki at mibili yang sulu karing balang buknul da.(15:4)

⁵ Sinindian na la ding sulu at saka na la binulus karing marangle pakatanam trigu da ring Filisteo. King makanyan a paralan nang silaban pati na itang mepalut na ampon ing makatalaksan. Mesilab la naman ding mulahan dang olibo.

⁶ Inyang ikutang da ring Filisteo nung ninu ing makirapat kaniti, abalu ra king i Samson ing makirapat uling ing katuangan nang tau Timna binie ne ing asawa nang Samson king kakaluguran na. Inya pintalan de ring Filisteo at silaban de ing babai at i tata na.

⁷ Nganang Samson karela, Ah, makanyan pala ing daraptan yu! Susumpa ku ing e ku patugut anggang e ku mekayablas kekayu!

⁸ At king mitmung bigsikan lisuban na la at dakal ya apate karela. Kaybat na nita, minta ya king metung nang kueba ning matarik a bunduk karin Etam.

⁹ Dinatang la ring Filisteo at migkampu la Juda, at lisuban de ing balen ning Lehi.

¹⁰ Kitang da ring memalen ning Juda karela, Obat lisuban yu kami? Pekibat da, Dinatang kami ba mi yang dakpan i Samson at daptan ing depat na kekami.

¹¹ Inya minta la deting atlung libung lalaki ning Juda king kueba king bunduk ning Etam at ngara kang Samson, E mu wari balu king makapailalam tamu king upaya da ring Filisteo? Nanu iting gewa mu kekami? Nganang mekibat, Nung nanu ing depat da kanaku ya naman ing depat ku karela.

¹² Ngara, Samson, dinatang kami keti ban igapus da ka at ibie karing Filisteo. Nganang Samson, Ipangaku yu kanaku ing e yu ku mu sana papaten.

¹³ Ngara, E ra ka paten; igapus da ka mu at ibie karela. Inya tinali re karing aduang bayung lubid at inuli reng ibat king matarik a bunduk.

¹⁴ Karas na Lehi, kukulisak lang sinalubung ding Filisteo. Bigla neng pepasikan ning upaya na ning Ginu i Samson at petad na la ding lubid a makatali karing takde na at gamat; anti la mung sinulad a pitlud na.

¹⁵ Kaybat na nita, ikit ne ing sikang na ning metung a bayu pa mung mete asno. Dinuku ya at dimput ne at iti ya ing ginamit nang pemakamate karing libu katau.

¹⁶ At nganang migkantang Samson, King sikang ning asno pete ku la ding libung tau; king sikang ning asno timbak ku la reting tau.

¹⁷ Kaybat na nita, inugse ne ing sikang. Inaus deng Ramat Lehi ing lugal nung nu milyari iti. fig,,,,,...petad na la ding lubid a makatali karing takde na.,(15:14)fig*

¹⁸ Dinatang kanita ing maragul a kau kang Samson, inya minaus ya king Ginu. Ngana, Binie me kanaku ing maragul a tagumpe; mamate na ku ngeni king kau at mabaldug na ku king gamat da reting paganung Filisteo?

¹⁹ Kanita biklat ne ning Dios ing metung a makakulkul a lugal king gabun at linual ing danum karin. Inya inaus deng Hakore ing sibul; at angga man ngeni atyu karin king Lehi.

²⁰ Penimunan neng Samson ing Israel kilub ding aduang pulung banua kabang makapailalam la king upaya da ring Filisteo.

16

¹ Misan a aldo minta ya i Samson king Gaza, ing metung karing siudad da ring Filisteo. Karin ne ikit ing metung a babaing magtinda king katawan na at sipingnan ne.

² Abalu da ring tau Gaza king atyu karin i Samson, inya kibkuban de ing lugal at kabukas deng penaya king pasbul dalan ning siudad. Tahimik la kabukas at nganang mimisip king sarili na ning metung at metung karela, Panayan mi na ing sumala at kanita mi ne paten.

³ Oneng migkera ya i Samson angga mu itang kapitangan bengi. Kaybat tinalakad ne at telan na lang matalik ding pasbul dalan ning siudad at bigla na lang biwat, at tinuki la ring aduang asias, ding kandadu, at ing sabla-sabla. Pisanan na la at dela na la ketang marayung taluktuk ning bunduk-bundukan arapan ning Hebron.

⁴ Kaybat na nita, milsinta ya i Samson king metung a babaing milagyuan Delila a manuknangan king Kapatagan ning Sorek.

⁵ Pintalan de ring limang aring Filisteo at ngara kang Delila, Gawa kang paralan ban sabian na kekang Samson nung ba't tutu yang masikan at nung makananu mi yang asugpuan, agapus, at e makalaban. Dinan na kang libu dinalan a pirasung pilak ning balang metung kekami, nung daptan mu iti.

⁶ Inya nganang Delila kang Samson, Ipakisabi kung mayap keka king sabian mu kaku ing lihim a panibatan na ning kekang sikanan. Nung ating bisang migapus keka, nanu ing gawan na ban e ka makalaban?

⁷ Nganang mekibat Samson, Nung itali ra ku karing pitung bagting pana a sagiwa maging maina kung kalupa da ring sabla.

⁸ Inya ding aring Filisteo pigdala reng pitung bayung bagting pana a sagiwa i Delila at ginapus ne i Samson.

⁹ Pepapanayan na la ding mapilan a lalaki king aliwang kuartu at kaybat kinulisak ya. Ngana, Samson! Daratang la ding Filisteo! Inya pematad na lang Samson ding bagting pana nung makananung mapapatad ing sinulad potang mitau iti keng api. Inya e ra mu rin atuklasan ing lihim na ning sikanan na.

¹⁰ Nganang Delila kang Samson, Linoku mu ku mu at e mu buring sabian kanaku ing katutuan. Sigi na, sabian mu kanaku nung makananu na kang agapus ning ninuman.

¹¹ Ngana, Nung igapus da ku karing bayung lubid a e pa megamit, maging maina kung kalupa da ring sabla.

¹² Inya kinangwa yang bayung lubid i Delila at ginapus ne. Kaybat nganang kinulisak, Samson! Daratang la ring Filisteo! Makapanaya la ding lalaki king aliwang kuartu. Anti lang sinulad a petad na ding lubid karing takde na.

¹³ Nganang Delila kang Samson, Linoku mu na ku na naman at e mu buring sabian kanaku ing katutuan. Sabian mu na kanaku nung makananu na kang agapus ning ninuman. Ngana, Nung ilala mu la ding pitu kung ikat a buak at itali mu lang matalik kapamilatan ning metung a tulus, maging maina kung kalupa da ring sabla.

¹⁴ Inya peparatangan ne tudtud Delila angga king metudtud ya, at linala na la ding ikat ning buak na at tinali na lang matigik king tulus at kaybat nganang kinulisak, Samson! Daratang la ring Filisteo! Migising ya at mabilis neng leko ing tulus at ing linala.

¹⁵ Inya ngana, Makananu mu ngening asabi kanaku ing kaluguran mu ku kabang e mu naman buring sabian kanaku ing katutuan? Mekatatlu mu na ku linoku, at e mu pa sinabi kanaku ing lihim a panibatan na ning kekang sikanan.

¹⁶ E ne tiknangan kukulitan aldo-aldo. Sinawa ya king kakakulit na,

¹⁷ inya king katataulian sinabi na ing katutuan. Ngana, E pa bitasang meputut ing buak ku. Mitalaga ku king Dios bilang Nazareo ning Ginu manibat na inyang mibait ku. Milako ing sikanan ku nung maurud ya ing buak ku at maging maina kung kalupa da ring sabla.

¹⁸ Inyang asiguradu nang Delila king katutuan ing sinabi nang Samson, peparala yang amanu karing aring Filisteo. Ngana karela, Magbalik kayung pasibayu. Sinabi na na kanaku ing katutuan. Kanita mibalik la at darala da la ring salapi ra.

¹⁹ Peparatang ne tudtud Delila i Samson king kandungan na, at kaybat inaus ne ing metung a lalaki at pepagupit na la ding pitu nang ikat ning buak nang Samson. Kaybat pegumpisan neng pinyubukan uling milako ne sikanan.

²⁰ At nganang kinulisak, Samson! Daratang la ring Filisteo! Migising ya at ngana king lub na, Magkalabius ku at mako antimo ing sadia. E na balu king likuan na ne ning Ginu.

²¹ Dikma de ring Filisteo at dinukit da la ring mata na. Dela re king Gaza at ginapus de king tanikalang tangsu at pepagobran de king gilingan trigu ning sukulan.

²² Oneng megumpisang tinubu ing buak na.

²³ Mitipun la ding aring Filisteo ban magsaya la at main metung a maragul a ain king dios dang i Dagon. Ngarang migkanta, Dininan na katamung tagumpe ning kekatamung dios laban king kalaban tamung i Samson!

²⁴ Magkusuelu la king sarili ra. Ngara, Ausan ye i Samson ban gawan ta yang libangan tamu.

²⁵ Inyang liwal da ne king sukulan i Samson, gewa reng pikaylian da at pepatalakaran de pilatan da ring maragul a asias. Inyang ikit de ring memalen migkanta lang kapurian king dios da. Ngara, Binie ne ning dios tamu ing tagumpe laban king kalaban tamu a minialanta king bansa tamu, at mekamate karing dakal kekatamu!

²⁶ Nganang Samson king anak a lalaking tataid king gamat na, Paburen mung atagkil ku la ding maragul a asias a magdala kaniting gusali ban makapagsandal ku kareti.

²⁷ Mitmu ya karing lalaki at babai ing gusali. Atyu la karin ding limang aring Filisteo at ating manga atlung libung lalaki at babai king bubungan a manalbe kang Samson.

²⁸ Kanita nganang menalangin Samson, O Ginung Dios, ipakisabi ku ing ganakan mu ku sana; makisabi kung mayap, O Dios ko. Ibalik mu kanaku ing sikanan ku agyang ngeni namu ban misan pa makayablas ku karing Filisteo king pamagdukit da karing adua kung mata.

²⁹ Kanita telan na lang Samson ding aduang makalibutad a maragul a asias a magdala king gusali; tinulak na la

³⁰ at nganang kinulisak, Paintulut mu ing mate kung kayabe da reting Filisteo! At tinulak na la king mabilug nang sikanan, at mibagsak ya ing gusali karing limang ari at karing balang metung a atyu karin. Mas dakal la ding taung pete nang Samson king kamatayan na kesa karing apate na inyang mabie ya. fig,,,,,At tinulak na la king mabilug nang sikanan.,(16:30)fig*

³¹ Minta la karin ding kapatad na at ding aliwang miembru na ning pamilya na ban kuanan de ing bangke na. Inuli re at kitkut de pilatan ning Zora at Estaol, king kutkutan nang tata nang i Manoa. Meging pamuntuk de ring Israelita i Samson kilub ding aduang pulung banua.

17

¹ Ating metung a tau king bulubundukan ning Efraim a milagyuan Mica.

² Ngana kang ima na, Simpa me ing taung menako karing kekang libu dinalan a pirasung salaping pilak. Dimdam ku inyang sinabi mu ita. Atyu la kanaku ding pirasung salaping pilak. Aku ing kinangwa. Nganang ima na, Anak, mananu na sanang bendisyunan na ka ning Dios.

³ Sibli na la kang ima na ding libu dinalan a pirasung salaping pilak at nganang ima na, Ban e dugpa king anak ku ing sumpa, aku mismu tatalaga ku la ding salaping pilak king Ginu. Magamit la king pangagawa na ning metung a idolong dutung a binalut king pilak. Inya ngeni susubli ku la keka ding pirasung salaping pilak.

⁴ Kanita sibli na la kang ima na. Kinangwa yang alagang aduang dalan a pirasung salaping pilak i ima na at binie na la king metung a plateru ban pagawa yang metung a idolo a dinukit king dutung at belutanan king pilak. Binili ne iti king bale nang Mica.

⁵ Atin yang sariling altar iting taung i Mica. Ginawa yang mapilan a idolo at metung a efod, at tilduan neng pari ing metung karing anak na.

⁶ Ala pang ari king Israel kanitang panaun a ita. Daraptan na ning balang metung at metung ing buri nang daptan.

⁷ Kanita munamang panaun a ita ating metung a kayanakan a Levita a malambat nang manuknangan king Betlehem ning Juda.

⁸ Likuan ne ing Betlehem ban manintun aliwang lugal a pituknangan na. Kabang maglakbe ya atagpuan ne ing bale nang Mica king bulubundukan ning Efraim.

⁹ Nganang kinutang Mica, Nu ka menibatan? Nganang mekibat, Metung kung Levita a ibat Betlehem ning Juda. Manintun kung lugal a apituknangan ku.

¹⁰ Nganang Mica, Malyari kang tuknang keni kanaku. Gawan da kang talaturu ku at pari, at dinan da kang apulung pirasung salaping pilak balang banua, imalan ampon pamangan.

¹¹ Mebisa yang manuknangan ing kayanakan a Levita kang Mica, at tinuring neng anting anak na.

¹² Tilduan neng Mica bilang pari na at menuknangan ya king pibalebale na.

¹³ Nganang Mica, Bendisyunan na ku ning Ginu ngening atin na kung Levita bilang pari.

18

¹ Ala pang ari king Israel kanitang panaun a ita. King panaun a ita, manintun yang paglugalan na ing tribu nang Dan a malyari nang pituknangan uling angga man kanita karing tribu na ning Israel ala ya pang tinggap a gabun bilang mana na.

² Inya ding memalen na ning Dan memili lang lima kataung karapatdapat ibat karing pamilya da ring karelang tribu, at tinubud da la manibat karing balen na ning Zora at Estaol at penabilin a siasatan de at ispiahan ing lugal. Inyang miras la king bulubundukan ning Efraim, menuknangan la king bale nang Mica.

³ Kabang atyu la karin, aulata re king pamagsalita na ing kayanakan a Levita, inya pintalan de at ngarang kinutang, Obat atyu ka keti? Nanu ing gagawan mu keti? Ninu ing midala keka keti?

⁴ Nganang mekibat, Atin kaming pikayaring Mica ing upahan na ku bilang pari na.

⁵ Ngara, Nung makanyan, ipakisabi ming mayap keka ing kutnan me ing Dios nung magtagumpe kami kening lakad mi.

⁶ Nganang mekibat ning pari, Ala kayung pigaganakan. Ingatan na kayu ning Ginu king paglakad yu.

⁷ Inya meko la ring limang lalaki at minta la king balen ning Lais. Ikit da ing panatag la pamibiebie ding tau karin antimo ding tau Sidon. Tau lang payapa, tahimik, at alang pamipate kaninu man; atyu ngan karela ing sablang kailangan da. Mabibie lang marayung tutu karing tau Sidon at ala lang pamakiugnayan king kaninu pa mang tau.

⁸ Inyang kauli ra Zora at Estaol ding lima katau, kitnan da la ring kabalen da nung nanu ing ikit da.

⁹ Ngarang mekibat, Tara, lusuban ta ya ing Lais. Ikit mi ya ing lugal at masanting ya. E kayu manatili keting alang gagawan. Magmalagua kayu; luban ye at sakupan ye!

¹⁰ Karas yu karin akit yu king e ra isipan man ding tau ing luban ye. Maragul yang lugal; atyu ngan ing sablang kailangan na ning tau at babie na ne kekayu iti ning Dios.

¹¹ Inya menulakan lang manibat Zora at Estaol ding anam a ralan a lalaki ning tribu nan Dan; makasadia lang makilaban.

¹² Minukiat la at migkampu dane nang albugan ning Kiriat Jearim ning Judea. Inya angga man ngeni ausan deng Kampu nang Dan ing lugal a ita.

¹³ Sinulung lang manibat karin at miras la king bale nang Mica king bulubundukan na ning balen ning Efraim.

¹⁴ Ngara ding lima kataung mig-ispia king lugal makapadurut king Lais karing abe ra, Balu yu king ing metung kareting bale atin yang metung a idolong dutung a belutanan pilak? Atin la pang aliwang idolo at metung a efod. Nanu mo ing isipan yung dapat tamung daptan?

¹⁵ Inya linub la king bale nang Mica nung nu ya manuknangan ing kayanakan a Levita at kinomustan de,

¹⁶ samantalang pakatalakad la ding anam a ralan a sundalus ning Dan a makasadia king labanan king lele ning pasbul dalan.

¹⁷ Katataglus dang linub king bale ding lima kataung ispia at kinua re ing dutung a idolong belutanan pilak, at ding aliwa pang idolo, at ing efod, kabang atyu kilual ing pari a kayabe ra ding anam a ralan a pakasandatang lalaki.

¹⁸ Linub la ding lalaki king bale nang Mica at kinua da la ring idolo. Nganang kinutang karela ning pari, Obat daraptan yu yan?

¹⁹ Pekibat da, E ka masigla. E ka magsalitang kataya mang amanu. E mu wari buri ing maging pari na ka ning metung a mabilug a tribu ning Israel kesa king pari na ka mu ning pamilya ning metung mung tau?

²⁰ Mekasayang tune iti king pari, inya kinua ne ing efod, at ding idolo king bale, at tinuki ya karela.

²¹ Inya meko la; binili da la king makauna ding anak da, ding sese rang animal, at ing pibandian da.

²² Marayu-rayu na la king bale inyang inaus na lang Mica ding kasiping nang bale ban makilaban. Atagal da la ring tau Dan

²³ at kilait da la. Ding tau ning Dan inarapan da la at ngarang kinutang kang Mica, Nanu ing malilyari? Nanu ing buri nang sabian ding dakal a taung deti?

²⁴ Nganang mekibat Mica, Ba't pikutang-kutang yu, Nanu ing malilyari? Dela ye ing pari ku at dela yu la ding dios a gewa ku! Nanu pa ngeni ing mitagan kanaku?

²⁵ Ngarang sinabi ding tau ning Dan, Mica, mayap pa ing ala na kang dakal a sasabian pota mimua la keka at lusuban da ka pa deting lalaki. Mate ka mung kayabe da ring mabilug mung pamilya.

²⁶ At sinulung la ding tau ning Dan. Ikit nang Mica king mas masikan la, inya migbalik ya at minuli bale na.

²⁷ Kaybat deng kinua ing pari at ding bage gewa nang Mica, tiglusan de at lisuban ing Lais, itang balen a tahimik at maki payapang memalen a atyu king kapatagan na naman ning Betreob. Pete da la ring memalen at silaban de ing balen.

²⁸ Alang malyaring sagip karela uling marayu ya ing Lais king Sidon, at ala lang pamakiugnayan karing aliwang tau. Telakad deng pasibayu ding tau ning Dan ing balen at karin na la menuknangan.

²⁹ Inalilan de ing lagyu na ning Lais king lagyung Dan. Pemalagyu re king makatua dang i Dan, ing anak nang Jacob.

³⁰ Telakad de ring tau ning Dan ing idolo ban karelang samban, at i Jonatan, ing anak nang Gersom at apu nang Moises, ya ing sinuyu bilang pari para karela. At sinuyu la naman karela ding lahi na bilang pari angga na inyang miyugse la karing aliwang bansa.

³¹ Menatili la karin ding idolo nang Mica kabang manatili ya king Silo ing Tolda nung nu re sasamban ing Dios.

19

¹ Ala pang ari king Israel kanitang panaun a ita. Ating metung a Levita a manuknangan king masulud nang dake ning bulubundukan ning Efraim. Kinangwa yang metung a babai king Betlehem ning Juda ban maging kasese na.

² Misan a aldo, mimua ya ing babai at mibalik ya king pibalebale nang tata na karin king Betlehem, at menuknangan yang apat a bulan karin.

³ Inya inari na king lub na ning lalaki ing puntalan ne at pakisabian neng mayap magbalik. Tiki ne ing ipus na at dela na la naman ding aduang asno. Tiki neng linub ning babai king bale at matula neng seganan ning tata inyang ikit ne.

⁴ Pinilit neng manatili karin ning tata, inya menatili ya pang atlung aldo. Karin la miinuman, mengan, at metudtud.

⁵ Inyang miras na ing kapat a aldo, maranun lang migising at migsadia na lang mako. Ngana ning tata ning babai king Levita, Mangan kayu pa mu ban e kayu dumanup king paglakad yu.

⁶ Inya miyabe lang linukluk deting aduang lalaki; mengan la at minum. Kaybat ngana ning tata na ning babai, Ipakisabi kung mayap king keti ka pa kabukas at magkusuelu ka pa.

⁷ Tinalakad ne ban mako ing Levita, oneng inawad na ning tata king manatili ya pa, inya menatili ya pang kabukas karin.

⁸ King kalimang aldo maranun yang ginayak ban mako, oneng ngana ning tata na ning babai, Mangan ka pa agyang ditak mu. Manaya kang bagya at pota na ka lumakad. Inya mengan la deting aduang lalaki.

⁹ Inyang mamako ne ing lalaki at ing babaing kasese na ampon ing ipus na pasibayu nang sinabi ning tata, Malapit nang mabengi; mayap pa keti na kayu matudtud ngening kabukas. Saguli na mu at dalumdum na; manatili na kayu keti at magkusuelu. Maranun na kayu mung mibangun bukas para muli na kayu.

¹⁰ Oneng e ne bisa pang magkabukas karin ing lalaki, inya ya at ing babaing kasese na linakad na la. Atin lang aduang asno a maki sia a luklukan gulut da reti.

¹¹ Gatpanapun na inyang miras la Jebus (ngana wari, Jerusalem) inya nganang migsalita ning ipus king panginuan na, Masanting pu ing palabasan tamu ing kabukas keting siudad da ring Jebuseo.

¹² Ngana ning panginuan na, E ta na tutuknang keting siudad; e la Israelita ding manuknangan keti. Dumalan ta namu at sumulung pang bagya, at matudtud tamu king Gibea o kaya king Rama.

¹³

¹⁴ Inya ligpusan de ing Jebus at sindu ra ing pamaglakad da. Lalbug ne ing aldo inyang miras la Gibea, king sakup da ring tribu nang Benjamin.

¹⁵ Tinuknang la king pamaglakad da ban karin la matudtud. Minta la king balen at migluklukan la king plasa, oneng metung man alang mengumbira ban karela na la makipanudtud.

¹⁶ Kabang atyu la karin, dinatang ya ing metung a matuang lalaking ibat king obra na king marangle. Tubu yang talaga king bulubundukan na ning Efraim, oneng manuknangan ne ngeni king Gibea. (Ibat la king tribu nang Benjamin ding aliwang tau karin.)

¹⁷ Apansinan ne ning matua iting maglakbe Levita a atyu king plasa. Nganang kinutang, Nukarin kayu ibat? Nukarin kayu munta?

¹⁸ Nganang mekibat ning Levita, Ibat kami Betlehem ning Juda, at pauli na kami ngeni king kabubusalan na ning bulubundukan na ning Efraim. Ala metung man a mengumbira kekaming makipanudtud king pibalebale na,

¹⁹ agyamang atin kaming pamangan at are para karing kekaming asno, tinape, at alak para kening babaing abe ku at kanaku at para king ipus ku. Atin kami king sablang kailangan mi.

²⁰ Ngana ning matua, Tara ketang pibalebale ku; e yu na dapat pang lalabas ing kabukas keti king plasa.

²¹ Inya tiki na lang minuli ning matua at pepakan na la ding asno ra. Menos lang bitis ding bisita na at mengan la.

²² Masaya lang misulusulu, oneng bigla lang dinatang menibatan king balen ding lalaking mahilig king katawan da ring kalupa rang lalaki. Pepadurutnan de ing bale at pegumpisan deng pengalampag ing pasbul. Ngarang migsalita king matuang lalaki, Ilual me yang lalaking yan a kayabe mung minuli! Bisa kaming makipangatawan king lalaking yan.

²³ Oneng linual ya ing matuang lalaki at ngana karela: E makanyan kakaluguran! Ipakisabi kung mayap king e yu gagawan iting e mayap at manawang! Bisita ke iting lalaki.

²⁴ Oyni ing babaing kasese na at ing sarili kung anak a dalagang birhen. Ilual ku la at kekayu na la. Gawan yu itang nanumang buri yung gawan karela. Oneng e yu gagawan ing bage makasumami keting lalaki!

²⁵ Oneng e re buring pakiramdaman. Inya liwal ne ning Levita ing babaing kasese na at binie ne karela. Semantalanan de at inabusu ing babai at e la tinuknang anggang abak.

²⁶ Karas ning ganingaldo mibalik ya ing babai at mibulang ya king pasbul ning bale ning matuang lalaki, nung nukarin atyu ing lalaking kasese na. Karin na ne disnan ning masala.

²⁷ Inyang mibangun ya ing lalaking kasese na itang abak at biklat ne ing pasbul ban sumulung na king lakad na ikit ne ing babaing kasese na; makakera ya arap na ning bale, makatas ya gamat at pakiabutan ne ing pasbul.

²⁸ Ngana, Talakad na ka. Lumakad ta na. Oneng ala yang dimdam a pakibat, inya seke neng makabakle king asno ing katawan na at sinulung neng pauli.

²⁹ Karas na keta karela, linub ya bale na at kinangwa yang panabak. Kinua ne ing katawan na ning babaing kasese na; pemirasu neng labing aduang dake at peparala yang kapirasu king balang metung karing labing adua nang tribu ning Israel.

³⁰ Ngara ding sablang menakit, Ala pang mibalitang anti kanyan! Kapilan man ala pang milyaring kalupa na niti manibat na inyang lakuan de ring Israelita ing Ehipto! Kailangan ing kimut tamu! Nanu ing masanting tamung daptan?

20

¹ Linage la ding sablang memalen na ning Israel, manibat Dan king dane norti angga na Beerseba king dane mauli, antimu rin manibat king sakup ning Gilead king aslagan bilang pakibat king aus. Mitipun la at misanmetung arap ning Ginu karin king Mizpa.

² Atyu la ring pamuntuk da ring sablang tribu na ning Israel keting pamitipun da ring memalen ning Dios, at ating apat a ralan a libung sundalus karela.

³ Abalitan da ring memalen na ning Benjamin ing pamitipun da ring aliwang Israelita karin Mizpa. Ngarang kinutang ding Israelita, Sabian yu na mo kekami nung makananung merapat iting e mayap?

⁴ Nganang mekibat ning Levita, ing asawa na ning babaing pete ra, Ing babaing kasese ku at aku miras kami Gibea king sakup nang Benjamin ban karin makitudtud.

⁵ Dinatang la ding lalaking tau Gibea ban kuanan da ku. Pepadurutnan de ing bale itang bengi at buri da kung paten, oneng ing milyari semantalanan de at inabusu ing babaing kasese ku at kaybat mete ya.

⁶ Kinua ke ing katawan na; pemirasu ke at peparala kung kapirasu karing balang metung at metung karing tribu ning Israel. Dinapat lang e mayap at manawang deting tau libutad tamu.

⁷ Ikayu ngan Israelita kayu. Nanu ing isipan yung daptan kaniting milyari?

⁸ Miyabe-abe lang tinalakad ding memalen at ngara, Ala metung man kekami a makatuknang king tolda o king pibalebale ing muli.

⁹ Oyni ing daptan mi: mibagutan kami ba lang mapili ding mapilan a kataung lumusub king Gibea.

¹⁰ Ding kapulung dake da ring lalaki king Israel ila ring magsadia king pamangan da ring sundalus, at lumakad na la ding aliwa ban parusan de ing Gibea keting karumaldumal a e ustu a gewa ra king Israel.

¹¹ Mitipun la ring sablang lalaki ning Israel a maki metung mung kapagnasan: ing lusuban de ing Gibea.

¹² Peparala lang tubud ding tribu ning Israel king kabilugan a sakup ning tribu ning Benjamin ban sabian da, Nanu iting e ustung gewa yu?

¹³ Isuku yu la detang lalaki ning Gibea a pepasari king e ustu ban paten mi la, at ban milako na iting e mayap king Israel. Oneng ding memalen na ning Benjamin e ra la dininan pansin deting aliwang Israelita.

¹⁴ Ibat karing miyayaliwang siudad ning Benjamin dinatang la Gibea ban makilaban karing aliwang Israelita.

¹⁵ Ibat karing miyayaliwa rang siudad mekayaus lang aduang pulu't anam a libung sundalus itang aldong ita. Subali pa kareti, mekatipun la naman ding memalen na ning Gibea pitung dalan a piling lalaki a pawang kaliweti. Ing balang metung karela agyu neng tiradulan alang mintis ing metung a buak.

¹⁶

¹⁷ Subali pa king tribu ning Benjamin, ding Israelita mekatipun lang apat a ralan a libung pakaespadang sundalus a makasane na king labanan.

¹⁸ Minta la ding Israelita king lugal ning pisasamban karin Betel, at karin ngarang mengutang king Dios, Ninu kekaming tribu ing mumunang lumusub karing tau ning Benjamin? Ngana ning Ginu, Ing tribu ning Juda.

¹⁹ Inya linage na la itang abak ding Israelita at migkampu la malapit king siudad ning Gibea.

²⁰ Minta la ban lusuban da la ring sundalus ning Benjamin. Migpuestu la ding sundalus at inarapan de ing siudad.

²¹ Linual la king siudad ding sundalus ning Benjamin, at bayu mebengi mekapate lang aduang pulu't aduang libung sundalus a Israelita.

²² Kaybat na nita, mibalik la ding Israelita king lugal ning pisasamban at anggang bengi lang menangis arapan na ning Ginu. Kitang da, Kailangan ke pang magbalik king labanan laban karing kapatad ming tau Benjamin? Wa, nganang mekibat ning Ginu. Mesikan la lub ding Israelita. Pinuestu da no na naman ding sundalus da nung nukarin la makapuestu itang aldo minuna kanita.

²³

²⁴ Linusub la king kaduang besis laban karing sundalus ning Benjamin.

²⁵ At king kaduang besis linual la king Gibea ding tau ning Benjamin, at king panaun a ita mekapate lang labing walung libu karing makasane sundalus na ning Israel.

²⁶ Kanita ding sablang memalen na ning Israel at ding sablang sundalus, minukiat la Betel at karin la menangis. Makalukluk la karin king arapan ning Ginu, at e la mengan itang aldong ita angga na itang bengi. Minain lang ain-a-durulukan at ain-ning-pamisulusulu king arapan na ning Ginu.

²⁷ Atyu Betel kanitang panaun a ita ing Kaban ning Kasunduan ning Dios.

²⁸ I Fineas, ing anak nang Eleazar at apu nang Aaron, ya kanita ing manibala kaniti. Kitnan de ring memalen ing Ginu, Kailangan ke pang lumual pasibayu ban makilaban karing kapatad ming tau Benjamin o ali na kami? Nganang mekibat ning Ginu, Lumaban kayu. Bukas ibie ku kekayu ing tagumpe.

²⁹ Inya mibili lang pakasalikut a sundalus a makapadurut king Gibea.

³⁰ Kaybat ning atlung aldo linakad no na naman ban labanan da la ring sundalus ning Benjamin, at antimo ing sadia pinuestu da na la king pamakilaban ding sundalus da makayarap king Gibea.

³¹ Linual la ring sundalus ning Benjamin ban makilaban, at ikua da lang alaut king siudad da. At antimo ing sadia, pegumpisan da na lang pemate ding mapilan a Israelita king marangle, king dalan a papunta Betel, at king dalan a papunta Gibea. Mekapate lang ating atlung pulung Israelita.

³² Ngara ding tau ning Benjamin, Antimo ing sadia, simbut ta no na naman. Oneng makaplanu ing murung la ding Israelita ban alaut da la king siudad at adala da la karing dalan.

³³ Inya kabang ing maragul dang grupu ding sundalus da ring Israelita minurung ya at migtipun la Baaltamar, bigla lang linusub ding lalaking pakasalikut karing mabatu nang dake ning gabun a makapadurut king Gibea.

³⁴ Lisuban de ring mepiling apulung libung lalaking ibat king kabilugan a Israel ing Gibea, at meging mabagsik ing labanan. E ra apibalak ding tau Benjamin ing malapit na lang mapate.

³⁵ Binie na ning Ginu ing tagumpe king Israel laban karing sundalus ning Benjamin. Mekapate lang aduang pulu't limang libu at dinalan ding Israelita karing kalaban da itang aldong ita.

³⁶ Kanita ra penamdaman ding tau Benjamin ing mesambut la. Ing maragul dang grupu ding sundalus ning Israel inurungan da la ring sundalus ning Benjamin uling asahan da la ring makapanaya rang sundalus a pinuestu rang pakasalikut makapadurut king Gibea.

³⁷ At bigla lang linage deting makapanaya at leganapan de ing siudad, at pete da la ngan ding atyu karin.

³⁸ Ing maragul dang grupu ding sundalus ning Israel at ding sundalus a pakasalikut atin lang pikasunduan a palatandanan. Kabud ikit de ing maragul a asuk mumukiat manibat king balen,

³⁹ magbalik la ding Israelitang atyu king parang ning labanan. Angga ketang penandit a ita mekapate na lang atlung pulung Israelita ding tau Benjamin. Ngara king sarili da, Antimo ing sadia, simbut ta no naman.

⁴⁰ Kaybat linto ya ing palatandanan; metung yang maragul a asuk ing minukiat manibat king balen. Melikid la kagulutan da ring tau Benjamin at mengapamulala la inyang akit deng masisilab ya ing siudad da.

⁴¹ Mibalik la kanita ding Israelita at mengataranta la ding tau Benjamin uling akilala ra king malapit na lang mapate.

⁴² Inurungan da la ring Israelita at memulayi lang papunta king ilang, oneng e la mekatakas; metukup la pilatan da retang maragul dang grupu ding sundalus ning Israel ampon ding linage pakasalikut a Israelita, at megisan lang mete.

⁴³ Atukup da la ring Israelita ding kalaban; tekikian da lang alang tuknang angga ketang metung a lugal a dane nang aslagan ning Gibea; pamaten da la kabang susulung la.

⁴⁴ Labi lang walung libung pekamayap a sundalus na ning Benjamin ding apate ra.

⁴⁵ Mekatakas la ding aliwa king ilang papunta king Batu ning Rimon. Apate da la karing dalan ding limang libu karela. Tekikian da la ring aliwa pa angga king Gidom. Mekapate lang aduang libu.

⁴⁶ Heganagana, adua lang pulu at limang libung tau Benjamin ding mete ketang aldong ita. Deti pawa lang matapang a sundalus.

⁴⁷ Oneng ating anam a ralan a katau a mekatakas king ilang papunta king Batu ning Rimon, at menatili la karin kilub ding apat a bulan.

⁴⁸ Belikan da la ring Israelita ding aliwa pang tau Benjamin, at pete da la ngan ding lalaki, babai, anak, at pati na ding animal. Silaban da la ngan ding makapadurut a balen ketang lugal a ita.

21

¹ Ginawa lang metung a taimtim a kapangakuan king Ginu inyang mitipun la ding lalaki na ning Israel karin king Mizpa. Ngara, Ala metung man kekami ing paintulutan ne ing anak nang babai ban makapakiasawa ya king metung a tau Benjamin.

² Inya minta na la Betel ding Israelita at karin la migluklukan king arapan na ning Dios angga itang bengi. King masikan a siwala ngarang kiniak kapaitpaitan:

³ O Ginung Dios ning Israel, obat makanyan ing milyari king Israel? Obat malapit niang matda king Israel ing tribu ning Benjamin?

⁴ Itang kabukasan abak, mibangun lang maranun ding memalen at mitalakad lang altar karin. Minie lang ain-a-durulukan at ain-ning-pamisulusulu.

⁵ Ngarang mengutang, Ating grupu karing tribu ning Israel ing e dinatang king pamitipun king arapan na ning Ginu karin king Mizpa? (Ginawa lang metung a pangaku king paten ya ing ninumang e datang Mizpa.)

⁶ Melunus la ding memalen na ning Israel karing kapatad dang tau Benjamin at ngara, Mewala ya ngening aldong iti ing metung karing tribu na ning Israel.

⁷ Nanu ing daptan tamu para adinan ta lang ayasawa ra ding lalaki ning Benjamin a mitagan? Mengaku tamung taimtim king Ginu king e ya makapakiasawa karela ing ninuman karing anak tamung babai.

⁸ Inyang ikutang da nung ating grupu karing tribu na ning Israel ing e minta king pamitipun karin Mizpa, ikit da king metung man alang dinatang karin a ibat Jabes ning Gilead.

⁹ Inyang mika bilangan na, ala metung man karing manuknangan Jabes karin Gilead ing atyu karin.

¹⁰ Inya peparala yang labing aduang libu ing balen karing peka matapang nang diling lalaki a maki panabilin: Munta kayu at paten yu la ding sablang tau king Jabes pati na ding babai ampon anak.

¹¹ Paten yu la ding sablang lalaki pati na ding sablang babai a e na birhen.

¹² Menakit lang apat a ralan a birhen pa karing memalen na ning Jabes, inya dela da la reti king kampu karin Silo a atyu king sakup na ning Canaan.

¹³ Kaybat peparala yang tubud ing mabilug a balen karing tau Benjamin a atyu king Batu ning Rimon at inawad da ing ituknang na ing labanan.

¹⁴ Migbalik la ding tau Benjamin at ding aliwang Israelita; binie da la karela ding babaing ibat Jabes a e ra pete. Oneng migkulang la reti.

¹⁵ Melunus la ring memalen karing tau Benjamin uling lesakan ne ning Ginu ing pangametung da ring tribu ning Israel.

¹⁶ Inya ngara ding talapanimuna ning balen, Ala nang babai king tribu ning Benjamin. Nanu ing gawan tamu ban adinan ta lang asawa ding lalaki ning Benjamin a makatagan?

¹⁷ E la dapat kababawasan agyang metung mu ding labing adua nang tribu ning Israel. Manintun tamung paralan ban makapanatili ya ing tribu na ning Benjamin,

¹⁸ oneng e ta na la man apaintulutan ing makapakiasawa la karing anak tamung babai, uli na ning ginawa tamung taimtim a pangaku king e ta ya paintulutan ing anak tamung babai ban makapakiasawa ya king metung a tau Benjamin.

¹⁹ Kanita ra aganaka king malapit na mu ing banuahan a piesta na ning Silo. (Atyu ya ing Silo king dane norti na ning Betel, banda mauli king Lebona at banda aslagan king dalan pilatan na ning Betel at ning Sikem.)

²⁰ Ngarang sinabi karing tau Benjamin, Munta kayu at salikut karing mulahan ubas

²¹ at lawan. Potang lumual na la para terak king piesta ding babai ning Silo, lage kayu ibat karing mulahan ubas. Ing balang metung kekayu sagmit yang metung a ayasawa na karing babai at ituki neng magbalik kayabe na king sakup ning Benjamin.

²² Nung datang la kekayu ding karelang tata o kapatad at magreklamu la, malyari yung sabian karela, Ipakisabi mi ing e yu na la kakuanan kekami, uling e mi no man simsam kekayu king labanan ban maging asawa mi. At anti na ning e yu na la man binie kekami, e kayu mikasala king pengaku yu.

²³ Gewa ra iti ding tau Benjamin; ing balang metung karela memili yang ayasawa na karing babaing teterak Silo at tinakas ne. Kaybat mibalik la king karelang sakup a lugal; telakad de ing balen da at karin na la menuknangan.

²⁴ Meko la at minuli ding keraklan karing Israelita karing sarasarili dang tribu at pamilya ampon pibandian.

²⁵ Ala pang ari king Israel kanitang panaun a ita. Daraptan na ning balang metung at metung itang buri nang daptan.