1

¹ Kamate nang Moises, ing talasuyu ning Ginu, migsalita ya ing Ginu kang Josue. I Josue anak neng Nun at ya ing kasaup nang Moises.

² Ngana ning Ginu kang Josue, Mete ne ing talasuyu kung i Moises. Magsadia ka at pati na ding sablang memalen na ning Israel. Dalakitan ye ing Ilug ning Jordan papunta king gabun a babie ku kekayu.

³ Antimo ing asabi ku na kang Moises, babie ke kekayu ing kabilugan na ning gabun a dasnan da ring bitis yu.

⁴ Mamabut ya ing angganan na king disyerto king dane mauli at angga ya karing Bunduk ning Lebanon king dane norti; manibat ya king maragul a Ilug ning Eufrates king dane aslagan, dumalan ya karing gabun da ring Hiteo, at angga ya king Dagat ning Mediteraneo king dane albugan.

⁵ Alang taung malyaring maniambut keka kabang mabie ka. Kayabe mu ku antimo nung makananu na kung akayabe Moises. E ku magkulang keka; e ra ka lakuan.

⁶ Tatagan mu ing lub mu at magtiwala ka uling ika ing manimuna kareting taung deti kabang sasakupan de iting gabun a pengaku kung ibie karing makatua da.

⁷ Magpakatatag ka; magtiwala ka at pagkapilitan meng tuparan ing kabilugan na ning Batas a binie na keka ning talasuyu kung i Moises. E ka lilisia king isanu man karing kautusan at magtagumpe ka nu ka man munta.

⁸ Parati meng babasan ing libru na ning Batas; pagaralan me neng aldo at bengi at tuparan mu ing sablang makasulat. Kanita mibandi ka at magtagumpe.

⁹ E mu kakalinguan ing inutus ku keka; tatagan mu ing lub mu at magtiwala ka. E ka tatakut o paisira lub uling, aku, ing Ginung kekang Dios, kayabe mu ku nukarin ka man munta.

¹⁰ Kanita nganang minutus Josue karing manimuna,

¹¹ Munta kayu king kampu at sabian yu karing tau, Isadia yu ing pamangan a bakalan yu uling kilub da ring atlung aldo lipatan ye ing Ilug ning Jordan, at sakupan ye ing gabun a babie na kekayu ning Ginung kekayung Dios.

¹² Nganang Josue karing tribu nang Ruben at Gad at king kapitna ning tribu nang Manase,

¹³ E yu sa kakalinguan ing sinabi nang Moises kekayu a talasuyu ning Ginu king ibie ne ning Ginung kekayung Dios iting gabun dane nang aslagan ning Ilug ning Jordan ban maging tuknangan yu.

¹⁴ Manatili la keti ding asawa yu, ding anak yu, at ding baka yu, oneng lumipat lang mumuna karing kamaganak dang Israelita ding sundalus yung pakasandata ban sumaup la

¹⁵ anggang e re asakupan ing gabun dane nang albugan ning Jordan a binie na karela ning Ginung kekayung Dios. At potang aibie na na ning Ginu ing katahimikan karing sablang tribu ning Israel, muli na kayu at manuknangan keti king sarili yung gabun dane aslagan na ning Jordan a binie na kekayung Moises, ing talasuyu ning Ginu.

¹⁶ Ngarang mekibat kang Josue, Daptan mi ing sablang inutus mu kekami at munta kami nukarin mu ke man itubud.

¹⁷ Nung makananu mi yang pemintuan i Moises king sablang bage, makanyan da ka munamang pamintuan, at ing Ginung kekang Dios mantabe ya sa keka kalupa na ning pamanantabe na kang Moises!

¹⁸ Paten ya ing ninumang e kilala king upaya mu o e mamintu king isanu man karing kautusan mu. Tatagan mu ing lub mu at magtiwala ka!

2

¹ Tinubud na lang lihim Josue ding adua kataung menibat king Sitim at penabilinan na lang lihim magumasid king gabun na ning Canaan, lalung-lalu na ing siudad ning Jerico. Meko la deti at sinalangi la king bale nang Rahab, ing babaing magtinda king katawan na, at karin la mekituknang...lihim magumasid king gabun na ning Canaan, lalung-lalu na ing siudad ning Jerico.(2:1)

² Abalitan na ning ari ning Jerico king ating mapilan a Israelitang dinatang itang benging ita ban mag-ispia la king mabilug a kayarian.

³ Inya pepasabi na ini kang Rahab: Dinatang la ring lalaking atyu king bale mu ban mag-ispia la king mabilug a kayarian. Ilual mu la!

⁴ Nganang mekibat Rahab, Tutu pin king ating dinatang a lalaki kanaku, oneng e ku balu nung nu la ibat at inyang sisilim na at oras na ban isara ya ing pasbul dalan ning siudad linual la ding lalaki. E ku balu nung nu la minta; nung ngeni mu rin tagalan yu la atagal yu la pa. (Kanita dela na na lang Rahab ding aduang ispia king bubungan at selikut na la karing tangke da ring lienso a inayus na karin.)

⁵

⁶

⁷ Likuan de ring tubud na ning ari ing siudad at inyang makalual na la ding tatagal, sera de ing pasbul dalan. Ding tubud na ning ari tegal da lang penintun ding ispia angga na king lugal nung nu ya dadalakit ing dalan king Jordan.

⁸ Inyang bayu la matudtud pintalan na lang Rahab ding aduang ispia king bubungan

⁹ at ngana karela, Balu ku king binie ne kekayu ning Ginu iting kayarian. Tatakut la kekayu ding sabla keti king kayarian.

¹⁰ Abalitan mi nung makananu neng pepamala ning Ginu ing danum na ning Dagat da ring Timbu king arapan yu kanitang lulual kayu Ehipto, at nung makananu yu lang pete di Sihon at Og, ding aduang ari da ring Amoreo king dane aslagan na ning Jordan.

¹¹ Kabud abalitan mi iti, mengakarugan ke ngan a salu uli yu at milako kami sikanan lub uling ing Ginung kekayung Dios ya ing Dios ning banua at yatu.

¹² At ngeni isumpa yu king Ginung kekayung Dios ing maging maganaka kayu karing pamilya ku antimo nung makananu kung pepakit ganaka kekayu, at dinan yu kung metung a tanda king ayasahan da kayu.

¹³ Pangaku yu king iligtas ye i tata ku at ima ku, ding kapatad kung lalaki at babai at ding sablang pamilya ra! Iligtas yu kami king kamatayan!

¹⁴ Ngara ding lalaki, Paten na ke ning Dios nung e mi tuparan ing sasabian mi. Nung e mu paniabian ing gagawan mi, ipangaku mi keka king pakiutusan da kayung mayap potang ibie na ne kekami ning Ginu iting kayarian.

¹⁵ Atyu ing bale nang Rahab king pader ning siudad, inya pepakuldasan na la king awang king kapamilatan na ning lubid.

¹⁶ At ngana karela, Munta kayu karing bunduk-bundukan pota akit da kayu ding tatagal kekayu, at salikut kayung atlung aldo karin anggang e la mekapagbalik ding manintun kekayu. Kaybat na nita, malyari na kayung sumulung king lakad yu.

¹⁷ Ngara ding lalaki, Tuparan mi ing pangaku mi a inawad mu kekami.

¹⁸ Oyni ing gawan mu. Potang lungub na kami king kayarian yu, itali me ining malutung lubid king mismung awang nung nukarin mu kami pepakuldasan; tipunan mu la king pibalebale mu ding pengari mu, ding kapatad mu, at ding sablang katubale nang tata mu.

¹⁹ Nung lumual ya ing ninuman king bale, ya na ing maki kasalanan king kamatayan na at ala keng pakibatan, nung ing ninuman kekayung atyu kilub bale panasakitan de, ikami na ing makibat.

²⁰ Nung sakaling sabian mu kaninu man ing saria mi keti, kanita e na kailangan ing tuparan mi pa ing pangaku mi keka.

²¹ Nganang mekibat Rahab, Matupad ing buri yu. Ya na ita. Kanita pepalakuan na na la at tinali ne ing lubid a malutu king awang na.

²² Minta la ding ispia karing bunduk-bundukan at karin la sinalikut kilub ding atlung aldo. Panintunan da la ring sundalus na ning ari nu man karin, oneng e ra la ikit, inya mibalik la Jerico.

²³ Kinuldas lang pasibayu ding adua katau karing bunduk-bundukan; delakitan de ing Ilug ning Jordan at mibalik la kang Josue. Sinabi ra kang Josue ing sablang milyari.

²⁴ Kanita ngara kang Josue, Binie ne pin ning Ginu king gamat tamu ing mabilug a kayarian. Maragul ing takut da kekatamu ding manuknangan karin.

3

¹ Abak pang maranun migising ne i Josue at ding sablang memalen ning Israel; likuan de ing Sitim. Minta la king Ilug ning Jordan at migkampu la karin bayu de delakitan.

² Kalabas da ring atlung aldo libutan de ring manimuna ing kampu

³ at ngara karing memalen, Potang akit yeng darala de ring paring Levita ing Kaban ning Kasunduan ning Ginung kekayung Dios mako na kayu at tukian ye

⁴ ban abalu ye ing dalanan yu uling e kayu pa dinalan keti. Oneng e kayu lalapit king Kaban ning Kasunduan; dumayu kayung maygit kapitnang kilometru gulut na.

⁵ Nganang Josue karing memalen, Isadia yu ing sarili yu uling bukas gawa yang bage pagmumulalan ing Ginu libutad yu.

⁶ Ngana namang Josue karing pari, Ibuat ye ing Kaban ning Kasunduan at lumakad kayung makauna karing tau. Inya binuat de ing Kaban ning Kasunduan at linakad lang makauna karing tau.

⁷ Ngana ning Ginu kang Josue, Ngening aldong iti pagumpisan da na kang parangalan king akakit na ning Israel ban abalu ra nung makananu na kung akayabe Moises makanyan mu ku namang akayabe.

⁸ Iyutus mu karing paring magdala king Kaban ning Kasunduan king katuklu ra king danum ning Jordan talakad lang maratun malapit king pampang.

⁹ Kanita nganang Josue karing memalen na ning Israel, Lumapit kayu keni at pakiramdaman yu nung nanu ing sabian na ning Ginung kekayung Dios.

¹⁰ King kekayung panyulung, siguradung itabi na la ning Dios ding Cananeo, ding Hiteo, ding Heveo, ding Perezeo, ding Girgaseo, ding Amoreo, at ding Jebuseo. Akilala yu king ing mabie Dios atyu libutad yu

¹¹ potang ing Kaban ning Kasunduan ning Ginu ning mabilug a yatu dalakitan neng makauna kekayu ing Ilug ning Jordan.

¹² Ngeni, mamili kayung labing aduang lalaki, metung karing balang tribu na ning Israel.

¹³ Kabud mituklu la king danum ning Ilug ning Jordan ding bitis da ring paring magdala king Kaban ning Ginu ning mabilug a yatu, tuknang mamagus ing danum ning Jordan, at ing danum a mamagus pababa mitipun king metung a lugal king panibatan na.

¹⁴ Panaun na kanita ning pamamupul at maragul ya danum ing Ilug ning Jordan. Inyang likuan da ne ding memalen ing kampu ban dalakitan ing Ilug ning Jordan, mumuna la ding paring magdala king Kaban ning Kasunduan. Katuklu da ring pari king danum,

¹⁵

¹⁶ tinuknang mamagus ing danum at migtipun ketang marayung dake bandang babo nung nu ya manibatan ing ilug tulid ning Adam, ing siudad siping ning Zaretan. Lubus tinuknang ing danum a mamagus pababa papunta king Dagat a Mete, at mekadalakit la ding memalen malapit king Jerico.

¹⁷ Kabang lalakad la ring Israelita babo ning malanging gabun, ding pari namang magdala king Kaban ning Kasunduan ning Ginu makatalakad la king gabun a malangi libutad ning Jordan angga king mekadalakit la ngan ding tau.

4

¹ Inyang mekadalakit na la ring Israelita king Ilug ning Jordan, ngana ning Ginu kang Josue,

² Mamili kang labing aduang lalaki karing memalen; tunggal-tunggal balang tribu,

³ at iyutus mu karela ing kuma lang labing aduang batu king libutad na ning Ilug ning Jordan; ketang mismung lugal nung nu la tinalakad ding pari. Sabian mu karela ing dalan da la deting batu at ibili da la nung nu la magkampu pangabengi.

⁴ Kanita inaus na lang Josue ding pinili nang labing aduang lalaki

⁵ at ngana karela, Lumakad kayu arapan na ning Kaban ning Kasunduan ning Ginung kekayung Dios angga king libutad ning Ilug ning Jordan. Kuma yang metung a batu ing balang metung kekayu at pusanan ne, metung para karing balang tribu ning Israel.

⁶ Ipaganaka ra deting batu karing tau ing depat na ning Ginu. King daratang a panaun, potang mangutang la ding anak yu nung nanu ing buri dang sabian kekayu deting batu,

⁷ sabian yu karela king tinuknang mamagus ing danum na ning Ilug ning Jordan inyang ing Kaban ning Kasunduan ning Dios delakit de king ilug. Ipaganaka rang parati deting batu karing memalen ning Israel nung nanu ing milyari keti.

⁸ Tiparan da ring lalaki ing panabilin nang Josue. Antimo ing inutus na ning Ginu kang Josue, kinangwa lang labing aduang batu king libutad na ning Jordan, metung para karing balang tribu ning Israel. Dela da la nung nu la makakampu at karin da la binili.

⁹ Mitalakad ya namang labing aduang batu i Josue king libutad ning Jordan, nung nukarin la tinalakad ding paring magdala king Kaban ning Kasunduan. (Atyu la karin deting batu angga man ngeni.)

¹⁰ Tinalakad la ding pari king libutad na ning Jordan anggang e ra atuparan ding tau ing sablang inutus na ning Ginu kang Josue. Iti ya naman ing inutus nang Moises. Memalagua lang dinalakit king ilug ding tau.

¹¹ Sinulung lang makapauna karing tau ding paring magdala king Kaban ning Kasunduan inyang mekadalakit na la ding sabla king ilug.

¹² Dinalakit lang mumuna karing Israelita ding lalaking pakasandata karing tribu nang Ruben at Gad ampon ding kapitna karing tribu nang Manase, antimo ing sinabi nang Moises a karelang gawan.

¹³ Ating apat apulung libu kataung pakasandata karing linabas king arapan na ning Ginu at dinalakit papunta king kapatagan malapit Jerico.

¹⁴ Uli na ning depat ning Ginu kanitang aldong ita binilang deng maula ding Israelita i Josue. Ginalang de king kekaban ning bie na antimo nung makananu deng ginalang i Moises. fig,,,,,Mitalakad ya namang labing aduang batu i Josue king libutad ning Jordan.,(4:9)fig* fig,,,,,Memalagua lang dinalakit king ilug ding tau.,(4:10)fig*

¹⁵ Kanita sinabi na ning Ginu kang Josue

¹⁶ king yutus na la ding paring magdala king Kaban ning Kasunduan ing sumaka na la king Jordan.

¹⁷ Makanyan ing gewa nang Josue

¹⁸ at karas da ring pari king pampang, minagus yang pasibayu ing ilug at miglapo karing pampang na antimo ing sadia.

¹⁹ Kapulu nang aldo ning mumunang bulan inyang dalakitan de ring memalen ing Ilug ning Jordan, at migkampu la Gilgal king dane nang aslagan ning Jerico.

²⁰ Karin na la telakad Josue ding labing aduang batung meyakua king Jordan.

²¹ At nganang migsalita karing memalen na ning Israel, Keng daratang a panaun, potang ikutang da ring anak yu nung nanu ing buri dang sabian ding batung deni,

²² sabian yu karela itang panaun inyang delakitan de ring memalen na ning Israel ing Ilug ning Jordan keng malanging gabun.

²³ Sabian yu karela king pepamala ne ning Ginu ing danum na ning Jordan para kekayu anggang e kayu mekalipat, antimo nung makananu neng pepamalan ing Dagat da ring Timbu para kekatamu.

²⁴ Inya abalu da ring sabla keti king yatu ing degulan na ning upaya ning Ginu, at ikayu igalang ye ing Ginung kekayung Dios angga king alang kapupusan.

5

¹ Abalitan da ring sablang aring Amoreo dane albugan na ning Jordan at ding sablang aring Cananeo king bebe ning Dagat ning Mediteraneo king pepamala ne ning Ginu ing Ilug ning Jordan anggang e la mekadalakit ding memalen na ning Israel. Mitakutan la at mesira la lub arapan da ring Israelita.

² Ngana ning Ginu kang Josue, Gawa kang pataram karing batung pantingan at gamitan mu la king pamagsirkunsisyun mu karing lalaking Israelita.

³ Inya depatan nang Josue ing inutus ning Ginu, at sinirkunsisyunan na la ding Israelita ketang lugal a ausan dang Gibeat-haaralot.

⁴ Inyang lakuan da ne ring Israelita ing Ehipto, mesirkunsisyun na la ding sablang lalaki. Oneng ala nang mesirkunsisyun karing lalaking mengabait king keluatan na ning apat apulung banuang pamaglakbe ra king disyerto. Antimu rin, kapupus ning panaun a ita ding sablang lalaking atyu na king idad a talan sandata inyang lakuan de ing Ehipto mete na la ngan uli na ning e ra pamamintu king Ginu. Antimo ing sinumpa na ning Ginu, e la mipaintulutan akit de ing mayap at matabang gabun a pengaku na karing makatua da.

⁵

⁶

⁷ Ding anak da reti ilang birian nang kuma king lugal da at deti e la pa mesirkunsisyun. Ila deti ring sinirkunsisyunan nang Josue uling alang mesirkunsisyun karela king karelang pamaglakbe.

⁸ Inyang meyari na ing pamagsirkunsisyun karing sablang lalaki, karin la migkampu ding memalen anggang e la kinayap ding sugat da.

⁹ Ngana ning Ginu kang Josue, Leko ku na kekayu ngening aldong iti ing kamarinayan na ning panga-ipus yu Ehipto. Inya angga man ngeni mayayaus yang Gilgal ing lugal a ita.

¹⁰ Kabang makakampu la Gilgal king kapatagan ning Jerico pigselebran de ing Pamaglagpus king kabengian na ning kalabing apat na ning bulan.

¹¹ Kabukasan na nita ya ing kapupurmeruan dang mekapangan pamangan a pinupul da king Canaan, tinape alang lebadura at sing-le trigu.

¹² Tinuknang nang mananabu ing manna at manibat na kanita e na la mika atin pa. Manibat naman king panaun a ita mengan na la king pamangan a tutubu king gabun ning Canaan.

¹³ Inyang malapit nia Jerico i Josue, bigla neng ikit ing metung a lalaking makatalakad king arap na; atin yang tatalnan a espada. Lepitan neng Josue at nganang kinutang, Kakampi ka kekami o kakampi da ka ding kalaban mi?

¹⁴ Mekibat ya, E ku kakampi kenu man; atyu ku keti bilang pamuntuk da ring sundalus na ning Ginu. Migsakab ya i Josue king gabun bilang pamanyamba na at ngana, Talasuyu mu ku, ginu. Nanu ing buri mung daptan ku?

¹⁵ Nganang mekibat kang Josue ning pamuntuk da ring sundalus na ning Ginu, Ilukas mu la ding sandalyas mu, uling sagradu ing gabun nung nu ka makatalakad. At memintu ya i Josue.

6

¹ Menatili lang makasara ding pasbul dalan ning Jerico at babanten da la ban kanita alang Israelitang milub o milual king siudad.

² Ngana ning Ginu kang Josue, Ibie ke king gamat mu ing Jerico at ing ari na at ding matapang nang sundalus.

³ Ika at ding sundalus mu magmartsa kayung makapadurut king siudad misan king patingapun kilub ding anam a aldo.

⁴ Lumakad la arap ning Kaban ning Kasunduan ding pitung pari a magdalang tungga-tunggalan a trumpetang gewa king sagu ning lalaking tupa. King kapitung aldo ika at ding sundalus mu pitung besis yeng durutan magmartsa ing siudad kabang tutiupan da la ring pari ding karelang trumpeta.

⁵ Kaybat, tiupan da lang masikan at maluat. Kabud damdaman ye ita, kulisak lang masikan ding sablang lalaki at mibagsak ya ing pader na ning siudad. Kanita na la lungub ding sablang sundalus; taglus-taglus ya ing balang metung karela.

⁶ Inaus na lang Josue ding pari at ngana karela, Kuanan ye ing Kaban ning Kasunduan at magpuestu la ding pitu kekayu a magdalang tungga-tunggalan a trumpeta king arap ning Kaban ning Ginu.

⁷ At inutusan na la kanita ding tauan na ing lumakad na la at padurutnan de ing siudad at paunan la king arap ning Kaban ning Kasunduan na ning Ginu ding guardiang pangbungad.

⁸ Antimo ing inutus nang Josue karing memalen, ding pitung pari a magdalang pitung trumpeta a gewa karing sagu da ring lalaking tupa sinulung la king arap ning Ginu; tiniupan da la ring trumpeta ra at makatuki ya karela ing Kaban ning Ginu.

⁹ Mumuna la ring lalaking pakasandata karing paring tutiup karing karelang trumpeta, at atyu la gulut ning Kaban ding guardiang pangtauli. Alang tuknang ing tiup da ring trumpeta.

¹⁰ Oneng minie yang utus i Josue karing tauan na king alang kukulisak o magsalita karela anggang e na iyutus.

¹¹ Inya king utus nang Josue karing tauan na dinurut deng misan king siudad ing Kaban ning Ginu. Kaybat, mibalik la king kampu at karin la metudtud.

¹² Kabukasan, maranun yang migising i Josue at king kaduang besis migmartsa la ding pari at ding sundalus makapadurut king siudad kalupa na ning pamituki-tuki ra king mumunang aldo: mumuna, ding guardiang pangbungad; kadua, ding pitung pari a tutiup karing karelang trumpeta; katlu, ding paring magdala king Kaban ning Kasunduan na ning Ginu, at katataulian, ding guardiang pangtauli. Samantala, ala namang tuknang ing tiup karing trumpeta.

¹³

¹⁴ Keting kaduang aldo migmartsa la namang misan makapadurut king siudad at kaybat migbalik la king kampu. Depatan da iti kilub da ring anam a aldo.

¹⁵ King kapitung aldo, kabuklat na ning masala mibangun na la at migmartsa la antimo ing sadia. King mumunang pamikatagun dirutan deng pitung besis ing siudad.

¹⁶ King kapitung durut, inyang ding pari malapit da na lang tiupan ding trumpeta, inutus nang Josue ing kulisak la ding tauan na. Ngana, Binie ne kekayu ning Ginu ing siudad!

¹⁷ Ing siudad at ing sablang atyu kilub na kailangan ing malasak lang lubus bilang ain king Ginu. I Rahab, ing babaing magtinda king katawan na at ding katubale na ilang itagan uling selikut na la ding ispia tamu.

¹⁸ Oneng ala kayung kakuanan nanuman king mitalaga nang malasak uling nung kuma kayu, pasari kayung kaguluan at kasiran king kampu da ring Israelita.

¹⁹ Ikawani yu para king Ginu ing nanumang megawa king pilak, gintu, tangsu o bakal. Kailangan mibili iti king pisisinupan bandi king Templo ning Ginu.

²⁰ Kanita tiniupan da la ring pari ding trumpeta. Kabud dimdam da la ring tau kinulisak lang masikan, at melasak ya ing pader. Minukiat lang deretsu ding sablang sundalus king bunduk-bundukan at liban de ing siudad at binihag de.

²¹ Pete da la kapamilatan ding espada ra ding sablang atyu kilub na ning siudad, lalaki at babai, anak at matua. Pete da la munaman ding baka, tupa, at asno. fig,,,,,...kinulisak lang masikan, at melasak ya ing pader.,(6:20)fig*

²² Nganang sinabing Josue karing aduang lalaking mig-ispia, Munta kayu king bale na ning babaing magtinda king katawan na at ilual ye pati na ding katubale na antimo ing pengaku yu keting babai.

²³ Inya minta la at liwal de i Rahab ampon i tata na at ima na, ding kapatad nang lalaki, ding kamaganak na at ipus king ligtas a lugal malapit king kampu da ring Israelita.

²⁴ Silaban de ing siudad pati na ing sablang atyu kilub na. Ding bukud mung mitagan ila ding bage megawa king gintu, pilak, tangsu, at bakal a kinua ra at lilan king pisisinupan bandi king Templo ning Ginu.

²⁵ Oneng i Rahab, ing babaing magtinda king katawan na at ding sablang kamaganak na, linigtas na lang Josue uling selikut na la ding aduang ispia a tinubud na Jerico. (Angga man king aldong iti manuknangan la Israel ding lahi na.)

²⁶ At kanitang penandit a ita perala yang metung a matinding babala i Josue. Ngana, Ing ninumang magnasang italakad ne ing siudad na ning Jerico mibili ya lalam nang sumpa ning Ginu. Ing ninumang mitalakad king pundasyun na mawala ya ing anak nang pangane lalaki; Ing ninumang mitalakad king pasbul dalan mawala ya ing bungsu nang lalaki.

²⁷ Inya minantabe ya ing Ginu kang Josue at mibantug ya king mabilug a lugal a ita.

7

¹ E mipamintuan ing inutus na ning Ginu karing Israelita king ala lang kakuanan king bage a dapat siran a ibat Jerico. E ya memintu king utus na ning Ginu ing metung a taung milagyuan Acan, inya milablab ing mua ning Ginu karing memalen na ning Israel. (I Acan anak neng Carmi, apu neng Zabdi, apu ne king tud Zera ning tribu nang Juda.)

² Manibat Jerico mitubud yang tauan na i Josue. Pepapuntan na la Ai, ing metung a balen king dane aslagan na ning Betel malapit Betaven, at penabilinan king munta na la at manmanan de ing lugal a ita. Inyang agawa da na iti,

³ migbalik lang minie ulat kang Josue. Ngara, E na kailangan pa karing sabla ing munta lang lumusub king Ai. Padala kayu mung adua o atlung libu katau. Malati ya mu ing balen a ita; e yu na la tutubud ding sablang sundalung pakasandata ban muntang makilaban.

⁴ Inya atlu lang libung Israelita ding sinugud, oneng mepilitan lang minurung inyang miyarap la karing lalaki na ning Ai.

⁵ Ding tau Ai penagal da la manibat king pasbul dalan ning siudad angga na karing pikukuanan batu at pete da la ring atlung pulu't anam karela ketang pababa na ning bunduk-bundukan. Kanita la mengaina lub ding Israelita at mengatakutan la.

⁶ Linapit ya i Josue at ding manimuna na ning Israel king Kaban ning Kasunduan ning Ginu. Ginabak da ing imalan da at mikana lang alikabuk king buntuk da ban ipakit ing kalungkutan da. Migsakab la king gabun at menatili la karin angga itang bengi.

⁷ At nganang Josue, O Ginung Dios, obat delakit mu ke pa sumangid na ning Ilug ning Jordan? Ban paburen mu kaming manabu karing Amoreo? Ban mapuksa kame? Ba't e na kami mu menatili lipat na ning Jordan?

⁸ Nanu ing malyari kung sabian, O Ginu, ngening minurung ya ing Israel karing kalaban?

⁹ Miras karing Cananeo at karing sabla iting bage. Kubkuban da kami at paten de ing metung at metung kekami! At kaybat nanu ing daptan mu ban ingatan mu ing dangalan mu?

¹⁰ Ngana ning Ginu kang Josue, Talakad ka! Obat migsakab kang makanyan?

¹¹ Mikasala ya ing Israel! Lebagan de ing kasunduan da kanaku a inutus kung dapat dang tuparan. Kinangwa la karing bage sukat dang siran. Penako ra, lingad da, at inabe ra ing penako ra king karelang pibandian.

¹² Iti ya ing sangkan nung inya e la makayarap ding Israelita laban karing kalaban da. Murung la karing kalaban uling ila mismu miyatulan na la namang masintang. E yu na ku akayabe pa anggang e yu la siran detang bage mibawal kuanan yu.

¹³ Talakad ka! Papagsadian me ing balen at maglinis ban marap kanaku. Sabian mu karela king magsadia la bukas uling aku, ing Ginu, ing Dios ning Israel, kailangan kung sabian ini: Israel, atyu libutad mu ing bage a inutus kung pasira keka! E mu la ayarapan ding kalaban anggang e mu la ilako libutad mu deting bage!

¹⁴ Inya sabian mu karela king potang abak lumapit la agpang king karelang tribu. Lumapit ya ing tribung tulduan ku agpang king pamilya na. Lumapit ya ing pamilyang tulduan ku agpang king pamilya na, at lumapit ya ing balang pamilyang tulduan ku.

¹⁵ At ing kayakitanan karing bage makabawal, silaban ya at ing pamilya na, at ing sablang pibandian na uling pigdala neng maragul a kamarinayan ing Israel at lebagan ne ing kanakung kasunduan.

¹⁶ Itang tutuking abak, maranun yang mibangun i Josue at pepalapitan na lang tunggal-tunggal ding tribu na ning Israel, at mepili ya ing tribu nang Juda.

¹⁷ Pepalapitan na lang tunggal-tunggal ding pamilya na ning tribu nang Juda at mepili ya ing pamilya nang Zera. Kanita pepalapitan na lang tunggal-tunggal ding anak da ring pamilya nang Zera, at mepili ya ing pamilya nang Zabdi.

¹⁸ Kaybat pepalapitan na lang tunggal-tunggal ding pamilya nang Zabdi, at i Acan a anak nang Carmi at apu nang Zabdi, ya ing mepili.

¹⁹ Nganang Josue kang Acan, Anak ko, sabian mu ing katutuan keni king arap na ning Ginu, ing Dios ning Israel. Sabian mu ngeni kanaku nung nanu ing gewa mu. E mu na sana pagnasan ing ilingad mu pa kanaku.

²⁰ Tutu pin, nganang mekibat Acan, mikasala ku king Ginu, ing Dios ning Israel. Oyni ing gewa ku.

²¹ Karing bage ikua tamu, menakit kung metung a masanting a balabal a gewa Babilonia, manga limang librang pilak, at metung a barang gintu a titimbang maygit metung a libra. Tutu ku lang aburi inya kinua ku la. Akit yu lang makakutkut kilub ning tolda ku. Makalalam ya ing pilak.

²² Inya mitubud yang mapilan a lalaki i Josue, at memalagua lang minta king tolda at ikit da lang makakutkut ding makabawal a bage at makalalam ya pin ing pilak.

²³ Liwal da la reti king tolda; dela da la kang Josue at karing sablang Israelita, at binili da la king arap ning Ginu.

²⁴ I Josue at ding sablang memalen na ning Israel, kinua de i Acan, ing pilak, ing balabal, ing metung a barang gintu ampon ding anak nang lalaki at babai, ding baka na, asno ampon tupa, ing tolda na, at ing sablang bandi na at dela da la king Kapatagan ning Akor.

²⁵ At nganang Josue, Obat pepasari mu ing e mayap a ini kekami? Ngeni ing Ginu ya ing munie kapahamakan keka! At ding sablang tau kanita pemasibas deng batu i Acan angga king mete ya; pemasibas da la namang batu at silaban ding pamilya na at ing pibandian na.

²⁶ Timbunan deng dakal a batu a angga man ngeni atyu la. Inya angga ngeni ausan deng Kapatagan ning Akor ing lugal a ita. Kanita milako ing mikakalabkab nang mua ning Ginu.

8

¹ Ngana ning Ginu kang Josue, Ituki mu la ding sablang sundalus mu at munta kayu king Ai. E ka tatakut o paisira lub. Ibie ku keka ing tagumpe at ibie ke king gamat mu ing ari na ning Ai, ding memalen na, ing siudad, at maging bandi mu ing gabun na.

² Daptan mu king Ai at king ari na itang depat mu king Jerico at king ari na niti, oneng ngeni maging kekayu ing bandi ra pati na ding sese rang animal. Magsadia ka at bigla meng lusuban ing siudad king kagulutan na.

³ Inya migsadia ya i Josue at ding sablang sundalus na ban munta Ai. Memili yang atlung pulung libu karing matapang nang sundalus at tinubud na la busal ning kabengian.

⁴ At nganang minutus karela, Magkubli kayung e binang marayu king kagulutan na ning siudad, oneng makasadia kayung lumusub.

⁵ Aku at ding taung kayabe ku lapitan mi ya ing siudad. Potang ding lalaki na ning Ai lual lang lumaban kekami, gulutan mi la at mamulayi kami antimo ing king minuna.

⁶ Panagalan da kami kanita angga king akua mi lang alaut king siudad. Isipan da kanita ing pupulayi na ke na namang paurung kalupa na ning minuna.

⁷ Kanita na kayu man lual king pangakubli yu at lusuban ye ing siudad. Ibie ne kekayu ning Ginung kekayung Dios.

⁸ Kabud abihag ye ing siudad, silaban ye, antimo ing inutus na ning Ginu. Ila deti ring utus kekayu.

⁹ Inya pepalakuan na na lang Josue at minta lang migkubli at karin la menaya king dane albugan na ning Ai, pilatan na ning Ai at Betel. Linabas nang Josue ing kabukas king kampu.

¹⁰ Abak pang maranun mibangun ne i Josue at inaus na la ding sundalus na. Ya at ding manimuna na ning Israel ila ding menimuna king pamunta ra Ai.

¹¹ Kayabe na lang minta ding sundalus na king pasbul dalan ning siudad at karin la migkampu king dane norti. Metung yang libis ing mamilatan karela at ing siudad ning Ai.

¹² Memili yang limang libu katau at pepagkublian na la deti pilatan na ning Ai at Betel.

¹³ Makasadia na la ding sundalus para king labanan at ing mas maragul a kampu atyu dane norti na ning siudad at ding aliwa naman king dane albugan. Menatili ya i Josue king kapatagan itang kabukas a ita.

¹⁴ Inyang ikit na la ning ari ning Ai ding sundalus nang Josue, agad-agad yang kinimut. Inya ing ari at ding sablang sundalus na linual lang papunta king Kapatagan ning Jordan ban makilaban karing Israelita antimo king minuna; e na man aisip king lusuban de king kagulutan.

¹⁵ I Josue at ding sundalus na sangkan la mong minurung at memulayi lang papunta king ilang.

¹⁶ Meyaus la ding sablang lalaki na ning siudad ban tagalan da la, at kabang tatagalan de i Josue lalu na la namang milalaut king siudad.

¹⁷ Linual la ngang tatagal ding sablang lalaki na ning Ai karing Israelita; melakuan yang makabuklat ing siudad at alang mag-dipensa kaniti.

¹⁸ Ngana kanita ning Ginu kang Josue, Ituldu me ing tandus mu king Ai; uling ibie ke keka. Memintu ya i Josue.

¹⁹ Inyang tinas ne ing gamat na, mabilis lang tinalakad ding lalaking pakakubli, memulayi lang palub king siudad; abihag de at agad-agad deng silaban.

²⁰ Inyang melikid la ring tau ning Ai king kagulutan da, ikit da ing asuk a mumukiat banua. Ala na lang dalanan pa ban tumakas uling ding Israelita a memulayi papunta king ilang migbalik la ban ila naman ding tagal karing tatagal karela.

²¹ Inyang ikit nang Josue at ding tauan na king ding kayabe ra ikua ra ne ing siudad at masisilab ne belikan da la at pegumpisan da lang pete ding lalaki na ning Ai.

²² Linual la kanita ding Israelitang atyu na king siudad at mekiabe la king labanan. Ikit da na mu ding tau Ai ing makakubkub la karing Israelita. At ding Israelita pete da la ngan; ala metung mang mitakas at alang mitagan mabie karing memalen ning Ai

²³ subali mu king ari na ning Ai. Binihag de at dela kang Josue.

²⁴ Inyang apate da na la ring kalaban dang tinagal karela king ilang, mibalik la Ai at pete da la ngan ding atyu karin.

²⁵ Pepanatilian neng makatuldung Josue king Ai ing tandus na at e ne beba anggang e la mete ding sablang taung atyu karin. Ing kabilugan a bilang ding memalen ning Ai a pete da kanitang aldong ita labi lang aduang libung lalaki at babai.

²⁶

²⁷ Antimo ing sinabi na ning Ginu kang Josue, kinua da ring Israelita para karela ding sese rang animal at pibandian.

²⁸ Silaban neng Josue ing Ai at likuan neng lubus mesalanta. Makanyan ya kabilian angga ngeni.

²⁹ Binitin ne king tanaman ing ari at karin de likuan ing katawan na angga na inyang dalumdum. Inyang limbug ne ing aldo inutus nang Josue ing ikuldas da ne ing bangke na, at binili de king dalan a palub king pasbul dalan ning siudad. Timbunan deng batu at angga man ngeni atyu la karin ding kabuntun a batu.

³⁰ Kaybat na nita, mitalakad yang altar i Josue king Bunduk ning Ebal para king Ginu, ing Dios ning Israel.

³¹ Pepatalakad ne iti karing Israelita agpang king panabilin nang Moises, ing talasuyu ning Ginu. Antimo ing sasabian na ning Batas nang Moises: Metung a altar a e metabas karing kasangkapan a bakal. Babo na niti miyain lang ain-a-durulukan king Ginu, at miyain la naman ain-ning-kapayapan.

³² At karin, king arapan da ring Israelita, sinulat neng Josue karing batu ing kopia na ning Batas a sinulat nang Moises.

³³ Ding sablang Israelita, ding karelang makatua, ding pamuntuk, at ukum, antimu rin ding dayuan a kayabe ra, tinalakad la mingatba na ning Kaban ning Kasunduan ning Ginu, arapan da la ring paring Levita a magdala king Kaban. Makatalakad la ding kapitna karing tau; gugulutan de ing Bunduk ning Gerizim. Makatalakad la ding kapitna at gugulutan da ne man ing Bunduk ning Ebal. Makanyan ing inutus na karelang Moises, ing talasuyu ning Ginu, potang datang na ing oras ning pamananggap da king bendisyun.

³⁴ Binasa neng masikan kanitang Josue ing kabilugan na ning Batas, ding bendisyun at ding sumpa, antimo nung makananu lang misulat king libru na ning Batas.

³⁵ Binasa neng Josue ing balang metung karing kautusan nang Moises karing sablang makatipun; kabilang la kareti ding babai, ding anak, at ding dayuan a manuknangan kayabe ra.

9

¹ Meging pikabaluan la ring tagumpe da ring Israelita karing sablang ari dane albugan na ning Jordan: ding atyu karing bunduk-bundukan, karing kapatagan, karing lele ning Dagat ning Mediteraneo angga na Lebanon dane norti. Ila deti ring ari da ring Hiteo, ding Amoreo, ding Cananeo, ding Perezeo, ding Heveo, at ding Jebuseo.

² Mitipun la at mikakasundu lang pisanmetungan da ing sikanan da ban labanan de i Josue at ding Israelita.

³ Inyang abalitan da ring memalen na ning Gibeon, deti Heveo la, nung nanu ing depatan nang Josue king Jerico at Ai,

⁴ pikayari da ing linlangan de. Migsadia lang pamangan da at lilan da karing lumang saku at tagpi-tagping balat a lulanan alak at seke ra karing asno ra.

⁵ Sinulud da ing imalan dang laun at ding pudpud dang sandalyas a penagpian. Masias na la at mengulapu ding tinape a dela ra.

⁶ Pintalan de kanita i Josue king kampu karin Gilgal, at ngarang migsalita kang Josue at karing memalen na ning Israel, Menibatan kami king marayung bansa. Buri mi ing gawa kayung metung a kasunduan kekami.

⁷ Oneng ngarang mekibat ding memalen na ning Israel karing Heveo, Ba't mo gawa ke pa mung kasunduan kekayu? Marahil malapit ya mu ing tuknangan yu.

⁸ Ngara kang Josue, Makasadia kaming sumuyu kekayu. Nganang kinutang Josue karela, Ninu wari ikayu? Nukarin kayu menibatan?

⁹ Kanita ngarang mekibat, Menibatan la ring talasuyu yu king marayung bansa at karin mi ya abalitan ing Ginung kekayung Dios. Miras kekami ing sablang depat na Ehipto

¹⁰ at nung nanu ing depat na karing adua rang ari ding Amoreo king dane aslagan na ning Jordan: ing Aring Sihon na ning Hesbon at ing Aring Og na ning Bashan a manuknangan Astarot.

¹¹ Ding kekaming mamuntukan at ding sablang taung manuknangan king gabun mi sinabi ra kekami king magsadia kaming pamangan para king kekaming pamaglakbe at pakikitan da kayu. Sinabi ra kekami ing ibie mi ing sarili mi king pamanyuyu kekayu at aduan mi ing gawa kayung kasunduan kekami.

¹² Lawan yu la pu ding kekaming tinape. Mamali-mali la pa inyang lakuan mi la ding pibalebale mi para makikit kekayu. Lawan yu la ngeni. Mangasias na la pu at mengulapu.

¹³ Bayu la inyang katmuan mi la dening balat-lulanan alak. Lawan yu la. Mitdas na la! Dening imalan mi at sandalyas melaun la king kekaban na ning pamaglakbe mi. fig,,,,,...pero lawan yu la. Mitdas na la!,(9:13)fig*

¹⁴ Tinggap da ring lalaki na ning Israel ing pamangan a ibat karela, oneng e la meniawad payu king Ginu.

¹⁵ Mekikasundu ya karela i Josue at e na na la pepapate. Taimtim lang mengaku ding manimuna ning komunidad ning Israel king tuparan de iting kasunduan.

¹⁶ Katlung aldo kaybat nang milabas ning pamikasundu ra abalu da ring Israelita king detang taung deta malapit la pala penibatan.

¹⁷ Inya meko la ding Israelita at kaybat na ning atlung aldo miras la karing siudad a tuknangan da: ing Gibeon, ing Kefira, ing Beerot, at ing Kiriat Jearim.

¹⁸ Makanyan man e ra la pete, uling taimtim lang mengaku karela ding karelang manimuna king lagyu ning Ginu, ing Dios ning Israel. Migreklamu la ding sabla karing karelang manimuna tungkul kaniti,

¹⁹ oneng ngarang mekibat, Mengaku tamung taimtim karela king lagyu na ning Ginu, ing Dios ning Israel. Inya ngeni e ta la malyaring taginan.

²⁰ Paburen ta lang mie uli na ning pangaku tamu; nung ali parusan na katamu ning Dios.

²¹ Paburen yu lang mie, oneng ila ing maging talasibak dutung at saklung danum para kekatamu. Iti ya ing minungkahi da ring manimuna.

²² Inutus nang Josue king idala da la arap na ding tau Gibeon at nganang kinutang karela, Obat lininlang yu kami at sinabi yu king ibat kayu king marayung lugal samantalang keti kayu pala manuknangan?

²³ Uling depat yu iti, makasumpa kayu. Ikayu at ding kabalen yu manatili lang ipus, talasibak dutung, at talasaklung danum para king bale ning Dios.

²⁴ Ngarang mekibat, Depat mi iti uling abalu mi king tutu pin king ing Ginung kekayung Dios inutus na kang Moises, ing talasuyu na, ing ibie ne kekayu ing mabilug a gabun at paten la ding sablang taung manuknangan karin king kekayung panlub. Depat mi iti uli na ning takut mi kekayu; kinatmu keng takut uli na ning bie mi.

²⁵ Ngeni, atyu kami king lalam na ning kekayung upaya; gawan yu kekami ing isipan yung mayap at matulid.

²⁶ Inya oyni ing gewa nang Josue: iningat na la at e na la peintulutan ding Israelita ing paten da la.

²⁷ Manibat na king aldong ita gewa na lang ipus; meging talasibak lang dutung at talasaklung danum para karing memalen na ning Israel at para king altar ning Ginu. Angga man ngeni menatili la king obra dang iti karing lugal nung nukarin pinili na ning Ginu ing misamban ya.

10

¹ Abalitan nang Adonizedek, ing ari na ning Jerusalem, king simbut neng Josue at lubus neng linaso ing Ai at pete ing ari na antimo ing gewa na king Jerico at king ari na. Abalitan na naman king mekikasundu la ding tau Gibeon karing Israelita at mabibie la ngening kayabe ra.

² Mitakutan la ding tau Jerusalem uling kasing dagul ne ning Gibeon ing isanu pa mang siudad a maki ari; mas maragul ya kesa king Ai at mangagaling la ngan ding lalaki na king pamakilaban.

³ Inya peparala yang amanu i Adonizedek kang Aring Oham ning Hebron, kang Aring Piram ning Jarmut, kang Aring Jafia ning Lakis, at kang Aring Debir ning Eglon.

⁴ Ngana, Munta kayu keni at saupan yu kung lusuban ya ing Gibeon, uling mekikasundu la ding memalen na kang Josue at karing Israelita.

⁵ Deting limang aring Amoreo, ing ari ning Jerusalem, Hebron, Jarmut, Lakis, at Eglon, pisanmetung da ing sikanan da; kibkuban de ing Gibeon at lisuban de.

⁶ Peparala lang amanu ding tau Gibeon kang Josue king kampu na karin Gilgal at ngara, E yu ke paburen! Mamalagua kayu sanang munta keni at saupan yu kami! Iligtas yu kami! Misanmetung la ding sablang ari da ring Amoreo karing kabundukan at lisuban da kami!

⁷ Inya meko ya manibat Gilgal i Josue at ding sablang sundalus na, kayabe la ding magaling dili karing sundalus na.

⁸ Ngana ning Ginu kang Josue, E ka tatakut karela. Binie ku na keka ing tagumpe. Metung man kareti alang malyaring makalaban keka.

⁹ Uli na ning kabukas nang pamaglakbe Josue manibat Gilgal ikua na lang lisuban a alang kapiadian ding Amoreo.

¹⁰ Panakit da karing sundalus na ning Israel birian ning Ginu ing mataranta la ding Amoreo. Pete da la ring kalaban da ring Israelita karin king Gibeon, at tikian da la padulung king pidadalanan na ning bunduk karin Bet Horon. E da la pepatugutan angga na Azeka at Makeda.

¹¹ Kabang tatakas lang padulung ding Amoreo karing Israelita king pidadalanan paukiat king bunduk pepauran yang maragul a batu ing Ginu king daralanan da angga Azeka. Mas dakal la ring mete uli da ring maragul a batu kesa karing apate da ring Israelita.

¹² King aldo mu ring ita binie a ne ning Ginu ing tagumpe karing memalen na ning Israel laban karing Amoreo, mekipagsalita ya i Josue king Ginu. Ngana king daramdaman da ring memalen na ning Israel, Aldo, tuknang kang maratun tulid ning Gibeon; bulan, tuknang ka tulid ning Kapatagan ning Ayalon.

¹³ Tinuknang ya ing aldo at e ya kinimut ing bulan angga king e ne asambut ning bansang Israel ing kalaban na. Iti makasulat king Libru nang Jaser. Tinuknang yang maratun ing aldo king libutad ning banua at e ya minalis kilub ning patingapun.

¹⁴ Kapilan man e pa mika kalupa na nita, inyang mekiramdam ya ing Ginu king siwala na ning metung a tau; uling mekilaban ya ing Ginu king panig na ning Israel.

¹⁵ Kaybat na nita, mibalik ya i Josue at ding sundalus na king kampu karin Gilgal.

¹⁶ Mekatakas la ding limang ari at sinalikut la king kueba karin Makeda.

¹⁷ Ating mekatuklas karela at ing balita miras kang Josue nung nu la sasalikut.

¹⁸ Nganang Josue, Iparugang yu la ding maragul a batu king pasbul ning kueba. Mibili kayung guardia karin;

¹⁹ oneng e kayu magdatun karin. Tagalan yu la ding kalaban at lusuban yu la king kagulutan da at e yu la paburen makauli karing karelang siudad! Ing Ginu, ing kekayung Dios, binie ne kekayu ing tagumpe.

²⁰ I Josue at ding sundalus ning Israel pete da la subali mu detang mitagan a menakit salikutan kilub na ning bakud ning karelang siudad.

²¹ At kanita mibalik lang e ninanu balang ding sundalus kang Josue king kampu karin Makeda. Ala metung mu man king lugal a ita ing mengangas migsalitang laban karing Israelita.

²² Kanita nganang Josue, Ilako ye ing takap na ning kueba, at ilual yu la ding limang ari at idala yu la kanaku.

²³ Inya biklat de ing kueba at liwal da la ring ari na ning Jerusalem, Hebron, Jarmut, Lakis, at Eglon.

²⁴ Dela da la kang Josue deting ari. Inaus na lang Josue ding sablang lalaki ning Israel at inutus na karing pamuntuk a kayabe na king lumapit la at idalpak ding bitis da karing batal da ring ari. Linapit la at dilpak da la ring bitis da karing batal da ring ari.

²⁵ Kanita nganang Josue karing pamuntuk na, E kayu tatakut o paisira lub. Magpakatatag kayu at siknangan yu ing lub yu uling makanyan ing daptan na ning Ginu karing sablang kekayung kalaban.

²⁶ Kaybat na nita, pepapate na lang Josue ding ari at binitin na la karing limang tanaman, at menatili lang makabitin angga na inyang dalumdum.

²⁷ Inyang makalbug ne ing aldo minie yang utus i Josue at kildas da la ring makabitin, at inugse da la king kuebang pisalikutan da. Selansan da la ring maragul a batu king asbuk na ning kueba, at atyu la karin angga ngeni. fig,,,,,...ilual yu la ding limang ari at idala yu la kanaku.,(10:22)fig*

²⁸ Itang aldong ita lisuban neng Josue at simbut ne ing Makeda at ing ari na. Pepapate na la ding sabla; ala metung man a mitagan mabie. Depatan na king ari ning Makeda itang depatan na king ari na ning Jerico.

²⁹ Kaybat na nita, manibat Makeda i Josue at ding sundalus na sinulung la Libna at lisuban de.

³⁰ Binie na naman ning Ginu kang Josue ing tagumpe keting siudad at king ari na. Ala lang tinagan mabie; pete da la ngan ding tau karin. Depatan da king ari itang depatan da king ari na ning Jerico.

³¹ Kaybat na nita, manibat Libna sinulung ya i Josue at ding sablang sundalus na papuntang Lakis. Kibkuban de at lisuban.

³² Binie na ning Ginu ing tagumpe karing Israelita king kaduang aldo ning labanan. Ala lang tinagan mabie; pete da la ngan ding tau king siudad a ita antimo ing depat da karin Libna.

³³ Dinatang ya i Aring Horam ning Gezer ban sumaup karing tau Lakis, oneng simbut neng Josue iting ari at ding sundalus na. Ala yang tinagan mabie karela.

³⁴ Kaybat na nita, manibat king Lakis i Josue at ding sablang sundalus na sinulung la papunta Eglon. Kibkuban de at lisuban.

³⁵ Ita mu ring aldong ita sekupan de at pete da la ngan ding sablang atyu karin antimo ing depat da karin Lakis.

³⁶ Kaybat na nita, manibat Eglon minukiat ya i Josue at ding sundalus na karing bunduk-bundukan ning Hebron, at lisuban de

³⁷ at sekupan. Pete re ing ari at ding sablang atyu king siudad pati na ding tau karing makalapit a balen. Pepalaso neng Josue ing siudad antimo ing depat na karin Eglon. Ala lang tinagan mabie.

³⁸ At kaybat belikan na ne mang Josue at ding sundalus na ing Debir at lisuban de.

³⁹ Abihag ne pati na ing ari na at ding sablang kasiping nang balen. Pete da la ngan ding sablang tau karin. Depatan na king Debir ing depat nang Josue karin Hebron at Libna at king karelang ari.

⁴⁰ Abihag neng Josue ing mabilug a bansa, ding kabundukan at ing Negeb, ding kapatagan, ding makalibis, at ding sablang ari da. Ala yang tinagan mabie; pete na la ngan antimo ing inutus na ning Ginu, ing Dios ning Israel.

⁴¹ King pamakilaban nang Josue miras ya king Kades Barnea king dane mauli angga na Gaza king lele ning dagat, pati na ing sabla nang gabun ning Gosen at angga na Gibeon king dane norti.

⁴² Abihag na lang Josue deting sablang ari at ing sasakupan da king misan mung besis, uling ing Ginu, ing Dios ning Israel, mekilaban ya para king Israel.

⁴³ At kaybat na nita, mibalik ya i Josue at ding sundalus na king kampu karin Gilgal.

11

¹ Inyang ing balita karing tagumpe nang Josue miras kang Aring Jabin ning Hazor peparala yang amanu kang Aring Jobab ning Madon, karing ari na ning Simron at Acsaf,

² at karing ari da ring bulubundukan king dane norti, king Kapatagan ning Jordan dane nang mauli ning Dagat ning Galilea, karing atyu lele da ring bunduk, at king lele ning dagat malapit Dor.

³ Peparala ya namang amanu karing Cananeo misusumangid na ning Jordan, karing Amoreo, karing Hiteo, karing Perezeo, at karing Jebuseo a atyu karing bulubundukan, antimu rin karing Heveo a manuknangan king lele na ning Bunduk ning Hermon, king sakup ning Mizpa.

⁴ Dinatang la at ding sablang sundalus da; kasing dakal na la ning balas king pampang ning dagat. Dakal la naman ding kabayu ra at karung panggera.

⁵ Mikampi-kampi la deting ari at pisanmetung da ing karelang sikanan, at migkampu la king Sapa ning Merom ban labanan de ing Israel.

⁶ Ngana ning Ginu kang Josue, E mu la pitatakutan. Bukas king anti kaniting oras apate ku na la ngan deti para king Israel. Pamilayan mu la ding kabayu ra at panyilaban ding karelang karung panggera.

⁷ Inya i Josue at ding tauan na lisuban da lang alang kapiadian king Sapa ning Merom.

⁸ Binie na ning Ginu ing tagumpe karing Israelita; lisuban da la at penagal angga Misrefot Maim at Sidon king bandang norti at angga na king kapatagan ning Mizpa king dane aslagan. E tinuknang ing labanan anggang ating mabie karing kalaban.

⁹ Depat nang Josue ing parapat na ning Ginu; pemile na la ding kabayu at penyilab ding karelang karung panggera.

¹⁰ Kaybat na nita, belikan neng Josue at simbut ing Hazor at pete ne ing ari na. (Kanitang panaun a ita mayupaya yang dili ing Hazor karing sablang kayarian.)

¹¹ Pete da la ring sabla karin; alang mitagan mabie at silaban de ing siudad.

¹² Abihag na la ngan Josue deting sablang siudad at ding karelang ari; pete da la ngan ding sabla, antimo ing inutus nang Moises, ing talasuyu ning Ginu.

¹³ Makanyan man, ala lang silaban ding Israelita karing siudad a atyu karing matas a lugal, subali mu ing Hazor a silaban nang Josue.

¹⁴ Kinua da ring Israelita ing sablang pibandian da at sese rang animal kareting siudad. Oneng pete da la ring sabla; ala lang tigan mabie.

¹⁵ Binie na la ning Ginu ding utus king talasuyu nang i Moises; kaybat binie na lang Moises kang Josue at pemintuan na la. Tiparan nang Josue ing sablang inutus na ning Ginu king kapamilatan nang Moises.

¹⁶ Abihag neng Josue ing mabilug a gabun, ding kabundukan at bulubundukan, ing Negeb, ing sablang sakup ning Gosen, ing kapatagan dane mauli na niti, at ing Kapatagan ning Jordan.

¹⁷ Magumpisa ya king Bunduk ning Halak dane mauli malapit Edom ing lugal a sekupan na angga na Baalgad king norti, king kapatagan ning Lebanon dane mauli ning Bunduk ning Hermon. Malambat yang makigera i Josue karing ari da reting kayarian, at simbut na la ngan at pepapate na la.

¹⁸

¹⁹ Ing bukud mung siudad a mekikasundu karing Israelita ya ing Gibeon, nung nu la manuknangan ding mapilan a Heveo. Mebihag la ding sabla king labanan.

²⁰ Peintulut na karela ning Ginu ing mika sikanan lang lub lumaban maigpitan karing Israelita ban kanita lubus lang mawala at mate alang lunus, makayagpang king inutus na ning Ginu kang Moises.

²¹ King panaun mu ring ita pintalan na la at gisan Josue ding lahing higanti a ausan dang Anakim a manuknangan karing bulubundukan ning Hebron, Debir, Anab, at karing bulubundukan ning Judea at Israel. Gisan na la ngan Josue pati na ding siudad da.

²² Alang mitagan mabie karing Anakim king lugal ning Israel; oneng ating mapilan a mitagan karin king Gaza, Gat, at Asdod.

²³ Ikua neng abihag Josue ing mabilug a lugal antimo ing inutus na ning Ginu kang Moises. Binie neng Josue ing gabun karing Israelita bilang sarili dang bandi, at piparti-parti de ring balang tribu. At manibat na kanita mipaynawa na la ding memalen king pamakilaban.

12

¹ Simbut de at sekupan ding Israelita ing lugal dane aslagan na ning Jordan, manibat king Kapatagan ning Arnon angga na king Kapatagan ning Jordan at angga na king Bunduk ning Hermon king dane norti. Adua lang ari ding simbut da.

² Ing metung ya ing ari da ring Amoreo, i Sihon a manuknangan Hesbon. Sakup na ning kayarian na ing kapitna na ning Gilead: manibat Aroer (king gilid ning Kapatagan ning Arnon) at manibat king siudad king libutad na nitang kapatagan a ita angga na king Ilug ning Jabok, ing angganan na ning Ammon;

³ kayabe ya ing Kapatagan ning Jordan manibat king Dagat ning Galilea papuntang mauli angga Bet Jesimot (dane aslagan ning Dagat a Mete) at papunta king lele na ning Bunduk ning Pisga.

⁴ Ing aliwa pang ari a simbut da ya ing Aring Og ning Bashan, ing metung karing tauling dili karing Refaim; menungkulan ya karin king Astarot at Edrei.

⁵ Sakup ne ning kayarian na ing Bunduk ning Hermon, Saleca, at ing kabilugan ning Bashan angga na king angganan na ning Gesur at Maaca, antimu rin ing kapitna na ning Gilead angga na king sakup nang Aring Sihon ning Hesbon.

⁶ Simbut na lang Moises at ding memalen ning Israel deting aduang ari. I Moises, ing talasuyu ning Ginu, binie na ing karelang gabun karing tribu nang Ruben at Gad at king kapitna na ning tribu nang Manase ban maging bandi ra.

⁷ Simbut na lang Josue at ding memalen ning Israel ding sablang ari king kayarian dane albugan na ning Jordan, manibat Baalgad king Kapatagan ning Lebanon angga na king Bunduk ning Halak dane mauli malapit Edom. Piparti-parti neng Josue iting kayarian karing tribu at binie ne karela ban maging bandi rang sarili.

⁸ Kayabe la kaniting dake ding bulubundukan at ding talimunduk dane dang albugan, ing Kapatagan ning Jordan, ding talimunduk na, at ding ilang a lugal king dane mauli. Iting lugal ya ing meging tuknangan da ring Hiteo, ding Amoreo, ding Cananeo, ding Perezeo, Heveo, at Jebuseo.

⁹ Mesambut la karing memalen ning Israel ding ari da ring makatuking siudad: Jerico, Ai (siping ning Betel),

¹⁰ Jerusalem, Hebron,

¹¹ Jarmut, Lakis,

¹² Eglon, Gezer,

¹³ Debir, Geder,

¹⁴ Horma, Arad,

¹⁵ Libna, Adulam,

¹⁶ Makeda, Betel,

¹⁷ Tapua, Hefer,

¹⁸ Afek, Lasaron,

¹⁹ Madon, Hazor,

²⁰ Simron Meron, Acsaf,

²¹ Taanak, Megido,

²² Kedes, Jokneam (king Carmel),

²³ Dor (king pasigan), Goiim (king Galilea),

²⁴ at Tirza. Heganagana atlu lang pulu't metung a ari.

13

¹ Matua ne ngeni i Josue. Ngana ning Ginu kang Josue, Tutu na kang matua, oneng dakal la pang lugal ding kailangan mayakua:

² ing sablang lugal ning Filistia at Gesur,

³ antimu rin ing sablang lugal na ning Avim bandang mauli. (Ing gabun manibat king sapa ning Sihor, king angganan na ning Ehipto, angga na king dane norti king angganan na ning Ekron makikilalang sakup na ning Canaan. Manuknangan la Gaza, Asdod, Askelon, Gat, at Ekron ding ari da ring Filisteo.)

⁴ Atin pang makatagan a kailangan mayakua king gabun ning Canaan at king Meara (a bandi da ring Sidoniano) angga na Afek, king angganan da ring Amoreo;

⁵ ing gabun da ring Gebalita, ing kabilugan ning Lebanon king dane aslagan, manibat Baalgad a atyu mauli na ning Bunduk ning Hermon angga na king Pidadalanan paukiat king Hamat.

⁶ Kayabe ya kareti ing mabilug dang gabun ding Sidoniano, ding manuknangan karing bulubundukan pilatan da ring Bunduk ning Lebanon at Misrefot Maim. Itabi ku la deting sablang tau kabang susugud la ding memalen na ning Israel antimo ing inutus kung daptan mu. Pipartian-partian me ing gabun karing Israelita, nung makananu kung inutus keka.

⁷ Pipartian-partian mu na ngeni iting gabun karing aliwang siam a tribu at karing kapitna da ring tribu nang Manase ban maging sarili dang bandi.

⁸ Tinggap da na ding tribu nang Ruben at Gad at ding kapitna king tribu nang Manase ing lugal a binie na karelang Moises, ing talasuyu ning Ginu; atyu iti king dane nang aslagan ning Ilug ning Jordan.

⁹ Miraras ya Aroer (king gilid ning Kapatagan ning Arnon) ing gabun a sakup da at king siudad a atyu king libutad na ning kapatagan, at sakup na ing kabilugan ning makatas a kapatagan manibat Medeba angga na Dibon.

¹⁰ Miraras ya angga king angganan na ning Ammon at kayabe la ding sablang siudad a sekupan na ning Aring Sihon a Amoreo a menungkulan karin manibat Hesbon.

¹¹ Kayabe ya ing Gilead, ing gabun ning Gesur at Maaca, ing kabilugan a Bunduk ning Hermon, at ing kabilugan ning Bashan angga na Saleca.

¹² Kayabe ya naman ing kayarian nang Og, ing tauling dili karing Refaim a menungkulan karin Astarot at Edrei. Simbut na lang Moises ding taung deti at tinabi na la.

¹³ Makanyan man, ding Israelita e da la tinabi ding memalen na ning Gesur at Maaca; angga man ngeni manuknangan la king Israel.

¹⁴ E na la dininan gabun Moises ding tribu nang Levi. Antimo ing sinabi ning Ginu kang Moises, mangaintulid karela bilang bandi ra ing dake ra king ain-a-durulukan king altar na ning Ginu, ing Dios ning Israel.

¹⁵ Binie nang Moises ing metung nang dake ning gabun karing pamilya na ning tribu nang Ruben bilang bandi ra.

¹⁶ Miraras ya ing gabun da king Aroer (king gilid na ning Kapatagan ning Arnon) at ing siudad king libutad na niting kapatagan at kayabe ing sablang makatas a kapatagan makapadurut king Medeba.

¹⁷ Kayabe ya ing Hesbon at ding sablang siudad king kapatagan na ning bunduk: ing Dibon, Bamot Baal, Bet Baalmeon,

¹⁸ Jahaz, Kedemot, Mefaat,

¹⁹ Kiriataim, Sibma, Zeret Saar king bunduk-bundukan a atyu king kapatagan,

²⁰ Betpeor, ding libis ning Bunduk ning Pisga, at Bet Jesimot.

²¹ Kayabe la ring sablang siudad karing kapatagan da ring bunduk at ing mabilug a kayarian nang Sihon, ing ari da ring Amoreo a menungkulan Hesbon. Simbut neng Moises iti at antimu rin ding pamuntuk na ning Midian: i Evi, Rekem, Zur, Hur, at Reba. Meging pamuntuk la ngan deti para kang Aring Sihon.

²² Kabilang ya karing pete da ring memalen na ning Israel i Balaam, ing metung a mamamanula a anak nang Beor.

²³ Ing Jordan ya ing angganan da dane albugan ding tribu nang Ruben. Ila deti ring siudad at balen a miyabie karing pamilya da ring tribu nang Ruben bilang bandi ra.

²⁴ Dininan na la namang dake Moises king gabun bilang bandi ra ding pamilya na ning tribu nang Gad.

²⁵ Kayabe ya king gabun a tinggap da ing Jazer at ding sablang siudad na ning Gilead, ing kapitna king gabun ning Ammon angga Aroer a atyu dane aslagan ning Rabba.

²⁶ Miraras ya ing gabun da manibat Hesbon angga Ramat Mizpe at Betonim, at manibat Mahanaim angga na king angganan ning Lodebar.

²⁷ King Kapatagan ning Jordan at pati na ing Bet Haram, Betnimra, Sukot, at Zafon, ing aliwa na pang dake ning kayarian nang Aring Sihon ning Hesbon. Ing angganan na dane albugan ya ing Ilug ning Jordan angga king Dagat ning Galilea dane norti.

²⁸ Ila deti ring siudad at balen a miyabie karing pamilya da ring tribu nang Gad bilang bandi ra.

²⁹ Binie neng Moises king kapitna na ning tribu nang Manase ing metung a dake na ning gabun bilang sarili dang bandi.

³⁰ Miraras ya ing gabun a tinggap da king Mahanaim, at kayabe ya ing kabilugan na ning Bashan, ing kabilugan na ning kayarian nang Og, ing ari ning Bashan, antimu rin ding anam apulung baryu na ning Jair king Bashan.

³¹ Kayabe ya ing kapitna na ning Gilead, antimu rin ing Astarot at Edrei, ding kabiserang siudad na ning kayarian nang Og karin Bashan. Miyabie ing sablang iti king kapitna karing pamilyang lahi nang Makir a anak nang Manase.

³² Makanyan nang piparti-parting Moises ing gabun dane aslagan na ning Jerico at ning Jordan inyang atyu ya king kapatagan ning Moab.

³³ Oneng e ya minie gabun i Moises karing tribu nang Levi. Sinabi na karela king ing maging bandi ra ya ing dake ra karing ain da ring tau king Ginu, ing Dios ning Israel.

14

¹ Iti ya ing istoria nung makananung ing gabun ning Canaan dane albugan ning Jordan meparti ya para karing memalen na ning Israel. Piparti-parti de ri Eleazar, ing pari, Josue a anak nang Nun, at ding pamuntuk da ring pamilya da ring tribu na ning Israel ing gabun karing memalen.

² Antimo ing inutus na ning Ginu kang Moises, ing dake da ring siam at kapitnang tribu dane albugan ning Jordan peparalan de king kapamilatan na ning bagutan.

³ Telaga na nang Moises ing gabun dane aslagan ning Jordan para karing adua at kapitnang tribu. (Meparti la king aduang grupu ding lahi nang Jose: Manase at Efraim.) Makanyan man, e na la dininan Moises nanuman dake ning gabun ding Levita. Ing tinggap da ila ring siudad nung nu la manuknangan at marangle para pipagpastulan karing karelang baka at aliwa pang sese dang animal.

⁴

⁵ Piparti-parti da ring memalen na ning Israel ing gabun antimo ing inutus ning Ginu kang Moises.

⁶ Misan a aldo dinatang la kang Josue karin Gilgal ding mapilan a kataung ibat king tribu nang Juda. Ing metung kareti ya i Caleb, ing anak nang Jefune a Kenizeo. Ngana kang Josue, Balu mu ing sinabi na ning Ginu kang Moises, ing taung maka Dios, karin Kades Barnea tungkul keka at kaku.

⁷ Apat kung pulung banua inyang i Moises, ing talasuyu ning Ginu, tinubud na ku manibat Kades Barnea ban mag-ispia king lugal a iti. Binie ke kang Moises ing tune ulat.

⁸ Ding lalaking minta a kayabe ku pematakutan da la ring kabalen tamu. Oneng memintu ku king Ginu a kakung Dios king mitmung katapatan.

⁹ Uling depat ku ita, pengaku na kanakung Moises king ding anak ku ampon aku tanggapan ming siguradu, bilang sarili ming bandi, ing gabun a lekaran ku.

¹⁰ Oneng lawan mu, atin na ngening apat apulu't limang banua manibat inyang sabian ning Ginu kang Moises ita. Kanitang panaun a ita maglakbe ya ing Israel king disyerto at ing Ginu, antimo ing pengaku na, pepanatilian na kung mabie manibat na kanita. Lawan yu ku! Walu na kung pulu't limang banua

¹¹ at masikan ku pa angga man ngeni nung makananu kung masikan kanitang tinubud na kung mag-ispiang Moises. Masikan ku pa uling agyu ku pang makigera o maging king nanu pa mang bage.

¹² Inya ngeni, ibie me kanaku ing bulubundukan a pengaku na ning Ginu kanaku ketang aldo inyang aku at ding tauan ku minie keng ulat. Sinabi mi kekayu king ding lahing higanti a ausan dang Anakim atyu la karing mangaragul a siudad a makapader. Marahil matnube ya ing Ginu kanaku at itabi ku la, antimo ing pengaku na.

¹³ Binendisyunan neng Josue i Caleb a anak nang Jefune, at binie ne ing siudad na ning Hebron bilang bandi na.

¹⁴ Angga man ngeni ing Hebron bandi de ring lahi nang Caleb a anak nang Jefune, ing Kenizeo, uling tapat yang memintu king Ginu, ing Dios ning Israel.

¹⁵ Kanitang minunang panaun, ausan deng Arba ing siudad ning Hebron. (I Arba ya ing peka maulang dili karing Anakim.) Mika kapayapan na kanita king lugal a ita.

15

¹ Miyabie karing lahi na ning tribu nang Juda ing gabun king dane mauli. Miraras ya king angganan na ning Edom at angga ya king ilang ning Zin king sikoti na dane mauli.

² Iting angganan na king mauli manibat ya king sepu na ning Dagat a Mete, ketang dane ning dagat a makayarap king albugan

³ at manibat king Pidadalanan paukiat Akrabim munta yang papunta mauli angga na Zin. Tataglus ya king dane nang mauli ning Kades Barnea, dalanan ne ing Hezron at paukiat ya king Adar, salingku yang papunta Karka,

⁴ sumulung yang papunta Azmon at tukian ne ing sapa king angganan na ning Ehipto angga na king Dagat ning Mediteraneo nung nu ya mapupus ing angganan na. Iti ya ing angganan na ning Juda king dane mauli.

⁵ Ing angganan na king dane aslagan ya ing Dagat a Mete angga king lugal nung nu ya tutugtug ing Jordan. Karin ya magumpisa ing angganan na king bandang norti

⁶ at mamabut ya angga Bet Hogla, at tataglus ya king dane nang norti ning burul a durungdung king Kapatagan ning Jordan. Kaybat paitas ya king Batu nang Bohan (ing anak nang Ruben),

⁷ manibat king Kapatagan ning Akor angga Debir at kaybat marap ya dane norti papunta Gilgal a makayarap king Pidadalanan paukiat king Adumim king dane nang mauli ning kapatagan. Tataglus ya ing angganan karing sibul ning Ensemes; lumual yang papunta Enrogel

⁸ at mukiat ya king Kapatagan ning Hinom king dane nang mauli ning bunduk-bundukan nung nukarin mayakit ya ing siudad da ring Jebuseo, ing Jerusalem. Ing angganan kanita tataglus ya angga king taluktuk na ning bunduk-bundukan king dane albugan ning Kapatagan ning Hinom, king sepu nang dane norti ning Kapatagan ning Refaim.

⁹ Manibat karin taglus ya karing Sibul ning Neftoa at lumual yang papunta karing siudad a malapit king Bunduk ning Efron. Karin ya liku papunta Baala (o Kiriat Jearim),

¹⁰ nung nu ya dumurut dane albugan ning Baala papunta karing bunduk-bundukan ning Edom; sumulung ya king dane nang norti ning Bunduk ning Jearim (o Kesalon), magbaba ya angga Bet Semes at lagpusan ne ing Timna.

¹¹ Ing angganan kanita lumual yang papunta king bunduk-bundukan dane norti na ning Ekron, liku yang papunta Sikeron, lagpusan ne ing Bunduk ning Baala at sumulung ya angga Jamnia. Miyangganan ya king Dagat ning Mediteraneo,

¹² at iti ya ing meging angganan na king dane albugan. Kilub da reting angganan karin la mibiebie ding lahi da ring pamilya nang Juda.

¹³ Antimo ing inutus ning Ginu kang Josue, ating dake ning gabun ning Juda a miyabie kang Caleb a anak nang Jefune a ibat king tribu nang Juda. Tinggap ne ing Hebron, ing siudad a bandi nang Arba, ing tata nang Anak.

¹⁴ Tinabi na lang Caleb ding lahi nang Anak lual na ning siudad; ila deti ring pamilya nang Sesai, Ahiman, at Talmai.

¹⁵ Manibat karin meko ya ban lusuban na la ding taung manuknangan Debir. (Kanitang minuna mayayaus yang Kiriat Sefer iting siudad.)

¹⁶ Nganang Caleb, Ipakasal ke ing anak kung i Acsa king kaninu mang lalaking makabihag king Kiriat Sefer.

¹⁷ Abihag neng Otniel a anak nang Kenaz a kapatad nang Caleb ing siudad. Inya binie neng Caleb i Acsa kang Otniel ban maging asawa na.

¹⁸ King aldo na ning kasal da pekisabian neng Otniel ing asawa na ban maniawad yang metung a marangle kang tata na. Kinuldas ya king sasaken nang asno i Acsa at kitnan neng Caleb nung nanu ing buri na.

¹⁹ Nganang mekibat, Mangailangan kung kulkul a pikuanan danum. Ing gabun a binie mu kanaku lugal yang malangi. Inya binie na lang Caleb ding sibul a atyu king makamatas at makababang lugal.

²⁰ Iti ing gabun a tinggap da ring pamilya na ning tribu nang Juda ban maging bandi ra.

²¹ Ding siudad a atyu king marayung dili a bandi da na, ding atyu king angganan na ning Edom, antimo ing Kabzeel, Eder, Jagur,

²² Kina, Dimona, Adada,

²³ Kedes, Hazor, Itnan,

²⁴ Zif, Telem, Bealot,

²⁵ Hazor Hadata, Keriot Hezron (o Hazor),

²⁶ Amam, Sema, Molada,

²⁷ Hazar Gada, Hesmon, Betpelet,

²⁸ Hazar Sual, Beerseba, Biziotia,

²⁹ Baala, Iim, Ezem,

³⁰ Eltolad, Kesil, Horma,

³¹ Ziklag, Madmana, Sansana,

³² Lebaot, Silhim, Ain, at Rimon. Adua lang pulu't siam a siudad heganagana ampon ding balen a makapadurut kareti.

³³ Ding siudad a atyu king lele da ring bunduk ila ding Estaol, Zora, Asna,

³⁴ Zanoa, Enganim, Tapua, Enam,

³⁵ Jarmut, Adulam, Soco, Azeka,

³⁶ Saaraim, Aditaim, Gedera, at Gederotaim. Labi lang apat a siudad ampon ding balen a makapadurut kareti.

³⁷ Kayabe la munaman ding siudad ning Zenan, Hadasa, Migdalgad,

³⁸ Dilean, Mizpa, Jokteel,

³⁹ Lakis, Bozkat, Eglon,

⁴⁰ Cabon, Lamam, Kitlis,

⁴¹ Gederot, Bet-dagon, Naama, at Makeda. Labi lang anam a siudad ampon ding balen a makapadurut kareti.

⁴² Kayabe la munaman ding siudad ning Libna, Eter, Asan,

⁴³ Ifta, Asna, Nezib,

⁴⁴ Keila, Aczib, at Maresa. Siam lang siudad ampon ding balen a makapadurut kareti.

⁴⁵ Kayabe ya ing Ekron at ding balen at ding baryu na

⁴⁶ at ding sablang siudad at balen malapit Asdod, manibat Ekron angga na king Dagat ning Mediteraneo.

⁴⁷ Kayabe ya naman ing Asdod at ing Gaza ampon ding balen da at baryu ra a mamangga king sapa king angganan na ning Ehipto at ning bebe na ning Dagat ning Mediteraneo.

⁴⁸ Karing bulubundukan kayabe la naman ding siudad ning Samir, Jatir, Soco,

⁴⁹ Dana, Kiriat Sefer (o Debir),

⁵⁰ Anab, Estemoa, Anim,

⁵¹ Gosen, Holon, at Gilo. Labi lang metung a siudad ampon ding balen a makapadurut kareti.

⁵² Kayabe la munaman ding siudad ning Arab, Duma, Esan,

⁵³ Janim, Bet Tapua, Afeka,

⁵⁴ Humta, Hebron, at Zior. Siam lang siudad ampon ding balen a makapadurut kareti.

⁵⁵ Kayabe la munaman ding siudad ning Maon, Carmel, Zif, Juta,

⁵⁶ Jezreel, Jokdeam, Zanoa,

⁵⁷ Kain, Gibea, at Timna. Apulu lang siudad ampon ding balen a makapadurut kareti.

⁵⁸ Kayabe la munaman ding siudad ning Halhul, Bet-zur, Gedor,

⁵⁹ Maarat, Betanot, at Eltekon. Anam lang siudad ampon ding balen a makapadurut kareti.

⁶⁰ Kayabe la munaman ding siudad ning Kiriat Baal (o Kiriat Jearim) at Rabba. Adua lang siudad ampon ding balen a makapadurut kareti.

⁶¹ King disyerto naman kayabe la ding siudad ning Bet Araba, Midin, Secaca,

⁶² Nibsan, ing Siudad ning Asin at Engedi. Anam lang siudad ampon ding balen a makapadurut kareti.

⁶³ Oneng ding tau Juda e ra la atabi ding Jebuseo a manuknangan Jerusalem. Inya angga man ngeni manuknangan la pa karin ding Jebuseo.

16

¹ Magumpisa ya king Jordan malapit Jerico ing angganan king dane mauli ning gabun a miyabie karing lahi nang Jose ketang metung a lugal dane aslagan da ring sibul na ning Jerico at tataglus ya king disyerto. Manibat Jerico dumalan yang paukiat karing bulubundukan angga Betel.

² Manibat Betel taglus ya Luz at munta ya Atarot Adar nung nu la manuknangan ding Arkiteo.

³ Kaybat dumalan ya king albugan king lugal da ring Jafletita angga na king lugal ning Makababa ning Bet Horon. Manibat karin taglus ya Gezer at miyangganan ya king Dagat ning Mediteraneo.

⁴ Iti ing gabun a miyabie karing lahi nang Jose: ding tribu nang Efraim at Manase ning dane Albugan bilang bandi ra.

⁵ Iti ya ing gabun da ring pamilya nang Efraim: ing angganan da manibat ya Atarot Adar king bandang aslagan angga na king Makamatas ning Bet Horon,

⁶ at manibat karin angga ya king Dagat ning Mediteraneo. Atyu banda nang norti ing Micmetat. King dane aslagan na niti salingku ya ing angganan na papunta Taanat Silo at lagpusan ne iti king dane aslagan angga Janoa.

⁷ Manibat Janoa kuldas yang papunta Atarot at Naara angga king miras ya Jerico at mapupupus ya king Jordan.

⁸ Manibat ya Tapua ing angganan na at taglus ya king albugan angga king sapa ning Kana, at mapupus ya king Dagat ning Mediteraneo. Ya iti ing gabun a miyabie karing pamilya da ring tribu nang Efraim bilang bandi ra

⁹ pati ding mapilan a balen at baryung atyu kilub na ning angganan nang Manase, oneng miyabie karing Efraimita.

¹⁰ Makanyan man, e da la tinabi ding Cananeo a manuknangan Gezer. Inya mibiebie lang makalibutad ding Cananeo karing Efraimita angga man king panaun ngeni, oneng mepilitan lang magobra bilang ipus.

17

¹ Miyabie ya ing metung a dake ning gabun karing mapilan karing pamilya a lahi nang Manase, ing pangane nang anak Jose. I Makir, ing tata nang Gilead, ya ing pangane nang anak Manase. Metung yang bayaning sundalus. Miyabie ya kang Makir ing Gilead at Bashan king dane nang aslagan ning Jordan.

² Miyabie ya ing gabun banda nang albugan ning Jordan karing aliwang pamilya nang Manase; kari Abiezer, Helek, Asriel, Sikem, Hefer at Semida. Ila deti ring lalaking lahi nang Manase a anak nang Jose at ila ding pamuntuk da ring pamilya ra.

³ I Zelofehad, ing anak nang Hefer a anak nang Gilead a anak nang Makir a anak nang Manase, ala yang anak a lalaki; babai la ngan. Ing lagyu ra Mahla, Noa, Hogla, Milka, at Tirza.

⁴ Minta la kang Eleazar a pari at kang Josue a anak nang Nun at karing manimuna. Ngara, Inutusan ne ning Ginu i Moises ban dinan na kami, at ding kamaganak ming lalaki, metung a dake ning gabun ban maging bandi mi. Inya, agpang king inutus na ning Ginu, mirinan lang dake king gabun ampon ding kamaganak dang lalaki.

⁵ Iti ya ing sangkan nung inya i Manase tinanggap yang apulung dake karagdagan pa king Gilead at Bashan a atyu king dane nang aslagan ning Jordan,

⁶ anti na ning mirinan la namang gabun ding lahi nang babai at antimu rin ding lalaki. Miyabie ya ing gabun ning Gilead karing aliwang lahi nang Manase.

⁷ Ing gabun nang Manase manibat ya Aser angga ya Micmetat dane nang aslagan ning Sikem. Ing angganan na kanita tataglus yang papunta king mauli ban sakupan ding taung manuknangan Entapua.

⁸ Bandi nang Manase ing gabun a makapadurut king Tapua, oneng ing balen ning Tapua king angganan na bandi da ring lahi nang Efraim.

⁹ Ing angganan na pabaldug yang papunta king sapa ning Kana. Mangaintulid la kang Efraim ding siudad dane mauli na ning sapa agyamang atyu la king sakup nang Manase. Ing angganan nang Manase sinulung ya king dane nang norti ning sapa at miyangganan ya king Dagat ning Mediteraneo.

¹⁰ Atyu king dane mauli ing Efraim at ing Manase atyu king dane norti at ing angganan da dane albugan ya ing Dagat ning Mediteraneo; ayayabut ne king dane nang norti ing Aser at ing Isacar king dane nang aslagan.

¹¹ Kilub da ring sakup nang Isacar at Aser, bandi na lang Manase ing Bet-sean at Ibleam ampon ding balen a makapadurut, antimu rin ing Dor (itang atyu king lele ning dagat), ing Endor, Taanak, Megido ampon ding makapadurut a balen.

¹² Oneng ding memalen ning Manase e ra la atabi ding taung manuknangan kareting siudad, inya menatili lang makatuknang karin ding Cananeo.

¹³ Agyamang masikan na la ding Israelita, e da la ngan tinabi ding Cananeo, oneng pinilit da lang magobra para karela.

¹⁴ Ngara ding lahi nang Jose kang Josue, Obat metung yang dake ning gabun ing binie mu kekami ban maging bandi mi? Tutu kaming dakal uling binendisyunan na kami ning Ginu.

¹⁵ Nung tutu kayung dakal, nganang mekibat Josue karela, at ing bulubundukan na ning Efraim tutu yang malati para kekayu, munta kayu king kagubatan, king sakup da ring Perezeo at ding Refaim, at linisan ye ing lugal a ita para kekayu.

¹⁶ Ngarang mekibat, Malati ya para kekami ing bulubundukan at atin lang karung bakal ding sablang Cananeo king kapatagan, detang manuknangan king Bet-sean ampon ding makapadurut nang balen at detang manuknangan king Kapatagan ning Jezreel.

¹⁷ Nganang Josue karing tribu nang Efraim at Manase ning dane Albugan, Tutu ing dakal kayu at mayupaya. Mika dake kayung maygit keng metung.

¹⁸ Maging bandi ye ing bulubundukan; agyamang gubat ya, kabud alinis ye maging bandi ye manibat king metung nang punta angga na king sumangid nang punta. Agyu yu lang itabi ding Cananeo agyamang atin lang karung bakal at masikan la.

18

¹ Kaybat deng simbut ing lugal a ita, mitipun ya king Silo ing mabilug nang komunidad ning Israel at karin de telakad ing Toldang tuknangan ning Ginu.

² Atin pang pitung tribu karing Israelita a e tinanggap king karelang dake king gabun.

³ Inya nganang Josue karing memalen na ning Israel, Angga pa kapilan manaya kayu bayu ye luban at sakupan ing gabun a binie na kekayu ning Ginu, ing Dios da ring kekayung makatua?

⁴ Dinan yu kung atlu katau balang tribu. Itubud ku lang lumual king kabilugan na ning gabun ban igulis de ing lugal a buri dang maging bandi ra. Kaybat magbalik la kanaku.

⁵ Partian yang pitung dake ing gabun; manatili ya i Juda king lugal na king mauli, at i Jose king lugal na dane norti.

⁶ Ibie ye kanaku ing ginulis yung pamiparti king pitung dake. Pipagbagutan da kayu ban abalu ku ing kaburian na para kekayu ning Ginung kekatamung Dios.

⁷ Makanyan man, e la tanggap dake na ning gabun ding Levita uling ing dake ra ya ing sumuyu la bilang pari na ning Ginu. Midinan na lang dake ding tribu nang Gad, Ruben, at Manase ning dane Aslagan king dane aslagan ning Jordan a binie na karelang Moises, ing talasuyu ning Ginu.

⁸ Meko la ding lalaki ban igulis de ing lugal kaybat na lang binie Josue deting panabilin: Munta kayu king kabilugan na ning gabun at igulis yu ing pangaparti na at kaybat magbalik kayu kanaku. At pakibaluan yu keti king Silo ing kaburian na ning Ginu king kapamilatan na ning bagutan.

⁹ Inya minta la ding lalaki king kabilugan na ning gabun at ginulis de nung makananu deng pipartian-partian king pitung dake. Ginawa lang listahan da ring sablang balen, kaybat na nita mibalik la kang Josue king kampu karin Silo.

¹⁰ Pipagbagutan na lang Josue ban pakibaluan na nung nanu ing kaburian ning Ginu para karela, at tildu na karing makatagan pang tribu na ning Israel ing dake ra. fig,,,,,Munta kayu king kabilugan na ning gabun at igulis yu ing pangaparti na...,(18:8)fig*

¹¹ Para karing pamilya na ning tribu nang Benjamin ing minunang miyabie gabun. Atyu iting gabun pilatan da ring tribu nang Juda at Jose.

¹² Manibat ya king bandang norti ing angganan na king Jordan at mukiat ya king dane norti ning Jerico at munta ya bandang albugan karing bulubundukan angga king disyerto ning Betaven.

¹³ Magbaba ya ing angganan na king maka libis nang dane ning mauli ning Luz (ausan dia namang Betel), kaybat magbaba ya papunta Atarot Adar, king bunduk a atyu mauli na ning Makababa ning Bet Horon.

¹⁴ Minaliwa ya dalan kanita ing angganan na; salingku yang papunta mauli manibat king banda nang albugan niting bunduk, at taglus ya Kiriat Baal (o Kiriat Jearim) a bandi da ring tribu nang Juda. Iti ya ing angganan na king dane albugan.

¹⁵ Manibat ya ing angganan na king dane mauli king gilid na ning Kiriat Jearim at munta ya karing Sibul ning Neftoa.

¹⁶ Kaybat magbaba ya angga king lele na ning bunduk a durungdung king Kapatagan ning Hinom, king wakas na king norti ning Kapatagan ning Refaim. Kaybat taglus ya mauli at baltangan ne ing Kapatagan ning Hinom, maka mauli ning burul ning Jebuseo, papunta Enrogel.

¹⁷ Marap ya kanita papuntang norti king Ensemes at kaybat sumulung yang papunta Gelilot king sumangid ning Pidadalanan paukiat Adumim. Magbaba ya ing angganan na kanita papunta king Batu nang Bohan, (ing anak nang Ruben),

¹⁸ at dumalan ya norti na ning burul a durungdung king Kapatagan ning Jordan. Magbaba ya kanita king kapatagan;

¹⁹ dumalan ya banda nang norti ning burul ning Bet Hogla at miyangganan ya king bandang norti ning Dagat a Mete nung nu ya tutugtug ing Ilug ning Jordan. Iti ya ing angganan na king mauli.

²⁰ Ing Jordan ya ing angganan na king dane aslagan. Ila deti ring angganan na ning gabun a tinggap da ring pamilya da ring tribu nang Benjamin bilang sarili dang bandi.

²¹ Ding siudad a bandi da ring pamilya na ning tribu nang Benjamin ila reni: Jerico, Bet Hogla, Emek Keziz,

²² Bet Araba, Zemaraim, Betel,

²³ Avim, Para, Ofra,

²⁴ Kefaramoni, Ofni, at Geba. Labi lang aduang siudad ampon ding balen a makapadurut kareti.

²⁵ Kayabe la munaman ding siudad ning Gibeon, Rama, Beerot,

²⁶ Mizpa, Kefira, Moza,

²⁷ Rekem, Irpeel, Tarala,

²⁸ Zela, Haelef, Jebus (o Jerusalem), Gibea, at Kiriat Jearim. Labi lang apat a siudad ampon ding balen a makapadurut kareti. Iti ya ing gabun a tinggap da bilang bandi da ring pamilya ning tribu nang Benjamin.

19

¹ Ing kaduang mepili king bagutan ya ing para karing pamilya na ning tribu nang Simeon. Ing gabun a miyabie karela miraras ya angga king gabun a miyabie karing tribu nang Juda.

² Sakup ne ing Beerseba, Seba, Molada,

³ Hazar Sual, Bala, Ezem,

⁴ Eltolad, Betul, Horma,

⁵ Ziklag, Bet Marcabot, Hazar Susa,

⁶ Bet Lebaot, at Saruhen. Labi lang atlung siudad ampon ding balen a makapadurut kareti.

⁷ Kayabe la naman ding siudad ning Ain, Rimon, Eter, at Asan. Apat lang siudad ampon ding balen a makapadurut karela.

⁸ Kabilang la kareti ding sablang balen a makapadurut kareting siudad angga Baalat Beer (o Rama) king dane mauli. Iti ya ing gabun a miyabie karing pamilya na ning tribu nang Simeon a tinggap da bilang bandi ra.

⁹ Anti na ning ing miyabie kang Juda maragul ya kesa king pamangailangan da, ating dake na niti ing miyabie king tribu nang Simeon.

¹⁰ Miyabie ya ing katlung mepili karing pamilya na ning tribu nang Zebulun. Mamabut ya ing gabun a tinggap da angga Sarid.

¹¹ Manibat karin munta ya ing angganan na bandang albugan angga Mareal, darasan ne ing Dabeset, at ing sapa dane aslagan na ning Jokneam.

¹² King sumangid na ning Sarid taglus ya papuntang aslagan angga king angganan na ning Kislot Tabor, kaybat taglus ya Daberat at mukiat ya angga Jafia.

¹³ Manibat karin sumulung yang papunta king aslagan angga Gat Hefer at Etkazin, salingku yang papunta Nea angga Rimon.

¹⁴ Marap yang papunta Hanaton king dane norti ing angganan na at mapupus ya king Kapatagan ning Iftael.

¹⁵ Kabilang la ring siudad ning Kattat, Naalal, Simron, Idala, at Betlehem. Labi lang aduang siudad ampon ding balen a makapadurut kareti.

¹⁶ Kayabe la deting siudad at ding balen da king gabun a tinggap da ring pamilya na ning tribu nang Zebulun bilang bandi ra.

¹⁷ Miyabie ya ing kapat a mepili karing pamilya na ning tribu nang Isacar.

¹⁸ Kayabe ya king miyabie karela ing Jezreel, Kesulot, Sunem,

¹⁹ Hafaraim, Shion, Anaharat,

²⁰ Rabit, Kision, Ebez,

²¹ Remet, Enganim, Enhada, at Betpazez.

²² Miraras ya ing angganan na king Tabor, Sahasuma at Bet Semes at mapupus ya king Jordan. Kayabe la ding labing anam a siudad ampon ding balen a makapadurut kareti.

²³ Deting siudad at ding balen da ila ring tinggap da ring pamilya na ning tribu nang Isacar bilang bandi ra.

²⁴ Miyabie ya ing kalimang mepili karing pamilya na ning tribu nang Aser.

²⁵ Kayabe ya king gabun a sakup na ing Helkat, Hali, Beten, Acsaf,

²⁶ Alam Melec, Amad, at Misal. Miraras ya king Carmel at Sihor Libnat king dane albugan.

²⁷ King aslagan, miraras ya Bet-dagon ing angganan na, miraras ya king Zebulun at king Kapatagan ning Iftael king pamunta na king norti angga Betemek at Neiel. Tataglus ya king norti papunta Cabul,

²⁸ Ebron, Rehob, Hamon, at Kana angga na Sidon.

²⁹ Ing angganan na kanita salingku yang papunta Rama at miras ya king makakuta nang siudad ning Tiro; kaybat liku ya Hosa at mapupus ya king Dagat ning Mediteraneo. Kabilang la ring Mahalab, Akzib,

³⁰ Umma, Afek, at Rehob. Adua lang pulu't aduang siudad ampon ding balen a makapadurut kareti.

³¹ Deting siudad at ding balen da ila ring tinggap da ring pamilya na ning tribu nang Aser bilang bandi ra.

³² Miyabie ya ing kanam a mepili karing pamilya na ning tribu nang Neftali.

³³ Manibat ya Helef ing angganan na at tataglus ya ketang tanaman a ensina a atyu Zaananim, tataglus ya naman king Adaminekeb at Jamnia angga na Lacum, at mapupus ya king Jordan.

³⁴ Karin ya salingkung papuntang albugan angga Aznot Tabor; manibat karin angga ya Hukok, miraras ya Zebulun king dane mauli, ing Aser king dane albugan at ing Jordan king dane aslagan.

³⁵ Ding siudad a maki kuta ila ding Zidim, Zer, Hamat, Rakkat, Kineret,

³⁶ Adama, Rama, Hazor,

³⁷ Kedes, Edrei, Enhazor,

³⁸ Yiron, Migdalel, Horem, Betanat, at Bet Semes. Labi lang siam a siudad ampon ding balen a makapadurut kareti.

³⁹ Atyu la deting siudad at balen king gabun a tinggap da ring pamilya na ning tribu nang Neftali bilang bandi ra.

⁴⁰ Miyabie ya ing kapitung mepili karing pamilya na ning tribu nang Dan.

⁴¹ Kayabe ya king gabun na ing Zora, Estaol, Irsemes,

⁴² Saalbim, Ayalon, Itla,

⁴³ Elon, Timna, Ekron,

⁴⁴ Elteke, Gibeton, Baalat,

⁴⁵ Jehud, Beneberak, Gatrimon,

⁴⁶ Mejarkon, at Rakon, antimu rin ing gabun a makapadurut king Jopa.

⁴⁷ Inyang milako ya karing memalen na ning Dan ing karelang gabun, pintalan de at lisuban ing Lais. Binihag de iti at pete da la ring memalen na at bindian de. Menuknangan la karin at pelitan de ing lagyu na ning siudad ning Lais king lagyung Dan. Pemalagyu de king makatua dang i Dan.

⁴⁸ Atyu la ngan deting siudad at balen da king gabun a tinggap da ring pamilya na ning tribu nang Dan bilang bandi ra.

⁴⁹ Inyang ayari da na ding memalen na ning Israel ing pamiparti-parti ra king gabun, dininan deng dake i Josue a anak nang Nun.

⁵⁰ Antimo ing inutus ning Ginu, binie ra la kang Josue ding siudad a inawad na; ing Timnat Sera king bulubundukan na ning Efraim. Pepatalakad neng pasibayu ing siudad at karin ya menuknangan.

⁵¹ I Eleazar, ing pari, i Josue a anak nang Nun, at ding pekabuntuk da ring pamilya da ring tribu na ning Israel penutuk da la ring dake na ning gabun king kapamilatan ning bagutan ban pakibaluan ing kaburian na ning Ginu karin king Silo keta king arap ning Tolda nung nu ya manuknangan ing Ginu. King makanyan a paralan ya meyari ing pamiparti-parti ning gabun.

20

¹ Kanita sinabi na ning Ginu kang Josue

² king sabian na ing anti kaniti karing memalen na ning Israel, Pilinan la ding siudad a santungan a sinabi ku kapamilatan nang Moises.

³ Nung ing metung a tau, king e na sasarian, apate ne ing kalupa nang tau malyari yang munta karin ban makasalikut ya king taung bisang mablas king depat na.

⁴ Malyari yang salikut king isanu pa man kareting siudad; munta ya king lugal ning pamanatul arap ning pasbul dalan ning siudad at malinawan na karing pamuntuk nung nanung talaga ing milyari. At kanita paintulutan deng lungub king siudad at dinan deng paglugalan ban makapanatili yang kayabe ra.

⁵ Nung tukian ne karin ning taung bisang mablas, ding memalen ning siudad e re sukat isuku king mamablas uling e na seria ing pamakamate nang tau at uling ala ne mang sasalikut a mua king apate na.

⁶ Malyari yang manatili king siudad kabang e ya makayarap king metung a pamaglitis da ring malda, at kabang mabie ya ing ninumang pekapun da ring pari. Kaybat na nita, malyari neng magbalik ing tau king balen nung nu ya menibatan.

⁷ Inya, kewani re king dane albugan na ning Jordan ing Kedes karin Galilea, king bulubundukan na ning Neftali; ing Sikem, king bulubundukan na ning Efraim, at ing Hebron king bulubundukan na ning Juda.

⁸ King dane aslagan na ning Jordan, king disyerto na ning kapatagan ning bunduk dane nang aslagan ning Jerico, pinili re ing Bezer king gabun nang Ruben; ing Ramot king Gilead, king gabun nang Gad, at Golan king Bashan, king gabun nang Manase.

⁹ Ila deti ring siudad a mepiling santungan para karing sablang memalen na ning Israel at para king ninumang dayuan a manuknangan karin. Malyari yang magsantung karin ing ninuman a king e na sasarian mekapate yang tau ban e ne apate ning ninumang bisang mablas, anggang e ya melitis king arapan da ring memalen.

21

¹ Minta la ring pamilyang pamuntuk da ring Levita kang Eleazar, ing pari, kang Josue a anak nang Nun at karing pamuntuk ding pamilya da ring sablang tribu na ning Israel.

² Karin king Silo king Canaan ngarang migsalita karela, Inutus na ning Ginu king kapamilatan nang Moises king kailangan kaming midinan siudad ban atuknangan mi at gabun ban pipagpastulan karing sese ming animal.

³ Inya, agpang king inutus na ning Ginu, ding memalen na ning Israel binie da la reting siudad at gabun a pipagpastulan karing karelang sariling gabun.

⁴ Ding minunang midinan siudad king kapamilatan ning bagutan ila ring pamilya da ring anak nang Kohat. Miyabie la karing Levitang lahi nang Aaron a pari ding labing atlung siudad ibat karing gabun nang Juda, Simeon, at Benjamin.

⁵ Miyabie la karing aliwang pamilya nang Kohat ding apulung siudad a ibat king sakup nang Efraim, Dan, at Manase ning dane Albugan.

⁶ Miyabie la karing pamilya nang Gerson ding labing atlung siudad a ibat king gabun nang Isacar, Aser, Neftali, at Manase ning dane Aslagan.

⁷ Karing pamilya da ring anak nang Merari miyabie la para karela ding labing aduang siudad a ibat karing gabun da ri Ruben, Gad, at Zebulun.

⁸ King kapamilatan na ning bagutan, ding memalen na ning Israel binie da la reting siudad at ing pipagpastulan da reti para karing Levita, agpang king inutus na ning Ginu king kapamilatan nang Moises.

⁹ Ila deti ring lagyu da ring siudad a ibat king gabun nang Juda at Simeon a miyabie

¹⁰ karing lahi nang Aaron a pamilya nang Kohat a lahi nang Levi. Ing miyabie karela ya ing minunang diling merapat.

¹¹ Miyabie ya karela ing siudad ning Arba (i Arba ya ing tata nang Anak) a ngeni ausan dang Hebron, king bulubundukan na ning Juda ampon ding pipagpastulan a makapadurut kaniti.

¹² Oneng ding marangle na ning siudad, antimu rin ding balen da, miyabie na la kang Caleb a anak nang Jefune bilang bandi na.

¹³ Subali pa king Hebron (ing metung karing siudad a santungan) miyabie la deting makatuking siudad karing lahi nang Aaron a pari: Libna,

¹⁴ Jatir, Estemoa,

¹⁵ Holon, Debir,

¹⁶ Ain, Juta, at Bet Semes, kayabe la ding karelang pipagpastulan. Siam lang siudad karing tribu nang Juda at Simeon.

¹⁷ Ibat king gabun nang Benjamin mirinan lang apat a siudad: Gibeon, Geba,

¹⁸ Anatot, at Almon ampon ding pipagpastulan da.

¹⁹ Labi lang atlung siudad ampon ding pipagpastulan da ring miyabie karing pari a lahi nang Aaron.

²⁰ Miyabie munaman karing aliwang pamilya da ring Levita a anak nang Kohat ding mapilan a siudad a ibat king gabun nang Efraim.

²¹ Mirinan lang apat a siudad: ing Sikem ampon ing pipagpastulan na king bulubundukan na ning Efraim (metung ya karing siudad a santungan), Gezer,

²² Kibzaim, at Bet Horon ampon ding karelang pipagpastulan.

²³ Ibat king sakup nang Dan mirinan lang apat a siudad: Elteke, Gibeton,

²⁴ Ayalon, at Gatrimon ampon ding pipagpastulan da.

²⁵ Ibat king sakup nang Manase ning dane Albugan mirinan lang aduang siudad: ing Taanak at Gatrimon ampon ding karelang pipagpastulan.

²⁶ Tinggap da la ring pamilya na ning anak nang Kohat ding apulung siudad ampon ding karelang pipagpastulan.

²⁷ Ding aliwa namang pamilya da ring Levita a anak nang Gerson, tinggap da la king gabun nang Manase ning dane Aslagan ding aduang siudad: ing Golan a atyu Bashan (ing metung karing siudad a santungan) at Beestera ampon ding karelang pipagpastulan.

²⁸ Tinggap da la ibat king gabun nang Isacar ding apat a siudad: ing Kision, Daberat,

²⁹ Jarmut, at Enganim ampon ding karelang pipagpastulan.

³⁰ Tinggap da la ibat king gabun nang Aser ding apat a siudad: Misal, Abdon,

³¹ Helkat, at Rehob ampon ding karelang pipagpastulan.

³² Tinggap da la ibat king gabun nang Neftali ding atlung siudad: Kedes king Galilea (ing metung karing siudad a santungan) ampon ding pipagpastulan na, Hamot Dor, at Kartan ampon ding karelang pipagpastulan.

³³ Tinggap da la ring miyayaliwang anak da ring pamilya nang Gerson ding kabilugan a labing atlung siudad ampon ding karelang pipagpastulan.

³⁴ Ibat king gabun nang Zebulun ding aliwang Levita a anak nang Merari tinggap da la ring apat a siudad: Jokneam, Karta,

³⁵ Dimna, at Naalal ampon ding karelang pipagpastulan.

³⁶ Tinggap da la ibat king gabun nang Ruben ding apat a siudad: Bezer, Jahaz,

³⁷ Kedemot, at Mefaat ampon ding pipagpastulan da reti.

³⁸ Tinggap da la ibat king tribu nang Gad ding apat a siudad: Ramot ning Gilead (ing metung karing siudad a santungan) ampon ding pipagpastulan na niti, Mahanaim,

³⁹ Hesbon, at Jazer ampon ding pipagpastulan da reti.

⁴⁰ Inya miyabie la king pamilya nang Merari ding kabilugan a labing aduang siudad.

⁴¹ Heganagana, apat lang pulu't walu ding siudad da ring memalen na ning Israel ding miyabie karing Levita.

⁴² Atin yang sariling pipagpastulan na ing balang metung kareting siudad.

⁴³ Inya binie ne ning Ginu king Israel ing sablang gabun a taimtim nang pengakung ibie karing makatua da. Karin la menuknangan inyang sekupan da ne.

⁴⁴ Dininan na lang kapayapan ning Ginu king mabilug a lugal a ita antimo ing pengaku na karing makatua da. Ala metung man karing karelang kalaban ing mekalaban karela, uling binie na ning Ginu karing Israelita ing tagumpe laban karing sabla dang kalaban.

⁴⁵ Tiparan na la ning Ginu ding sablang pangakung binie na karing memalen na ning Israel.

22

¹ Kanita inaus na la at tinipun Josue ding memalen da ring tribu nang Ruben, Gad, at ning Manase ning dane Aslagan.

² Ngana karela, Tiparan yu ngan ing sablang parapat na kekayung Moises, ing talasuyu ning Ginu, at pemintuan yu ing sablang inutus ku.

³ King kekaban na ning panaun ni misan e yu la peinggulutan ding kalupa yung Israelita. Meging maingat kayu king pamamintu yu karing kautusan na ning Ginung kekayung Dios.

⁴ Ngeni, antimo ing pengaku na, binie na ning Ginung kekayung Dios ing kapayapan karing kalupa yung Israelita. Inya muli na kayu king gabun a katuliran yu, ing gabun dane nang aslagan ning Jordan a binie na kekayung Moises, ing talasuyu ning Ginu.

⁵ E yu la sana kakalinguan tutuparan ding kautusan a binie na kekayung Moises: luguran ye ing Ginung kekayung Dios, tuparan yu ing kaburian na, pamintuan yu la ding kautusan na, maging tapat kayu king Ginu, at suyuan ye king mabilug yung pusu at kaladua.

⁶ Pepaulian na lang Josue kaybat neng binie ing bendisyun na at deting amanu: Mabandi kayu king pamagbalik yu karing tuknangan yu, dakal kayu sese animal, pilak, gintu, tangsu, bakal, at dakal a imalan. Idake yu karing kalupa yung tribu ing kinua yu karing kalaban. Kanita meko na la ban muli. Binie nang Moises king kapitna ning tribu nang Manase ing gabun king dane aslagan ning Jordan, oneng binie nang Josue king kapitna ing gabun dane albugan na ning Jordan at karing kayabe rang aliwang tribu.

⁷

⁸

⁹ Inya minuli lang pasibayu ding memalen da ring tribu nang Ruben, Gad, at ning Manase ning dane Aslagan. Likuan da la ring aliwang Israelita karin Silo king Canaan, at meko la ban muli king sarili dang lugal, ing gabun ning Gilead a kinua ra antimo ing inutus na karela ning Ginu kapamilatan nang Moises.

¹⁰ Inyang ding tribu nang Ruben, Gad, at ning Manase ning dane Aslagan miras la Gelilot, atyu la pa mu rin kanita king dane albugan ning Jordan, mitalakad lang maragul at matas a altar karin king pampang ning ilug.

¹¹ Ngana ning miras a balita karing aliwang memalen na ning Israel, Makiramdam kayu! Ding memalen na ning tribu nang Ruben, Gad at ning Manase ning dane Aslagan mitalakad lang altar king Gelilot, king pampang a atyu king banda tamu ning Jordan!

¹² Inyang abalitan da ring memalen na ning Israel iti, mitipun ya king Silo ing mabilug a komunidad ban marap makilaban karing tribu ning aslagan.

¹³ Peparala de ring memalen na ning Israel i Fineas, ing anak nang Eleazar a pari, king sakup ning Gilead karing memalen da ring tribu nang Ruben, Gad, at ning Manase ning dane Aslagan.

¹⁴ Apulu lang talapanimuna ding mintang kayabe nang Fineas, metung karing balang tribu na ning albugan at ing balang metung karela pamuntuk de ring pamilya karing miyayaliwang pamilya.

¹⁵ Minta la king Gilead, karing memalen na ning Ruben, Gad, at ning Manase ning dane Aslagan

¹⁶ at migsalita la para king mabilug a komunidad ning Ginu. Ngara karela, Obat gewa yu iting kataksilan king Dios na ning Israel? Lebanan ye ing Ginu inyang telakad ye iting altar para kekayu! E yu ne tutukian kanyan!

¹⁷ Atatandanan yu pa ing kasalanan tamu king Peor, inyang perusan ne ning Ginu ing sarili nang balen kapamilatan na ning salut? Inya angga man ngeni misasakitan tamu. E pa wari sapat itang kasalanan a ita?

¹⁸ E na kayu bisang tuki ngene? Nung lumaban kayu king Ginu ngeni, bukas mimua ya karing sabla king Israel.

¹⁹ Ngeni, nung e ya karapatdapat ing gabun yu king pamanyamba king Ginu, lumipat kayu king gabun ning Ginu nung nukarin ya ing Tolda na. Mamili kayung lugal karing kekami. Oneng e kayu mag-rebeldi laban king Ginu o kaya gawan yu kaming kalaban na kapamilatan na ning pamanalakad yung altar a karagdagan pa king altar ning Ginung kekatamung Dios.

²⁰ Ganakan yu inyang i Acan a anak nang Zera e ya memintu king kautusan tungkul karing bage miyatulan dapat siran; miparusan ya ing mabilug a komunidad uli na ning kasalanan na. Aliwa mu i Acan ing mete uli na ning kasalanan na.

²¹ Ngarang mekibat ding memalen na ning tribu nang Ruben, Gad, at ning Manase ning dane Aslagan karing pamuntuk ding pamilya da ring tribu king dane albugan:

²² Ing Mayupaya ya ing Dios! Ya ing Ginu! Ing Mayupaya ya ing Dios! Ya ing Ginu! Balu na nung inya gewa mi iti at buri mi ing abalu yu munaman iti! Nung sinalangsang kami at e kami menatiling tapat king Ginu, e yu na kami papanatilian pang mabie!

²³ Nung e mi ya pemintuan ing Ginu at menalakad kaming sarili ming altar a piainan durulukan o gamitan para king ain-a-pamangan o ain-ning-pamisulusulu, paburen yung ing Ginu mismu ing mamarusa kekami.

²⁴ Oneng e makanyan! Gewa mi iti uling tatakut kami pota datang ing panaun a ding lahi yu sabian da kekami, Ala kayung nanumang dake king Ginu, ing Dios ning Israel?

²⁵ Gewa ne ing Jordan ban mamilatan kekami at kekayung memalen na ning Ruben at Gad. Ala kayung dake nanuman king Ginu. Kanita malyaring ding lahi yu patuknangan da lang sasamba king Ginu ding lahi mi.

²⁶ Inya telakad mi ya iting altar, e para pidinan ain-a-durulukan o gawang pamag-ain,

²⁷ nune, antimong tanda da ring kekaming memalen ampon ding kekayu, at para karing tutuking lahi kaybat tamu, king ikami pin tune sasamban mi ya ing Ginu king arap na ning banal a Tolda na at ding kekaming ain-a-durulukan at ding ain-sakripisyu at ain-ning-pamisulusulu. Iti depat mi ban ala karing kekayung lahi ing makasabi king ikami ala kaming dake king Ginu.

²⁸ Inisip mi ing nung sakaling malyari ing anti kanita, asabi da ring lahi mi ing anti kaniti: Lawan yu! Ding makatua mi ginawa lang altar kalupa na ning altar ning Ginu. E ya para karing ain-a-durulukan o para ain-sakripisyu nune ban maging tanda de ring memalen mi at ding kekayu.

²⁹ Ala kaming bitasang kapagnasan lumaban king Dios o tuknang tutuki kagulutan na kapamilatan na ning pamitalakad altar para pidulukan ain o ain-a-pamangan o ain-sakripisyu. E kami mitalakad nanumang altar a makayaliwa king altar na ning Ginung kekatamung Dios a makatalakad king arap ning Toldang tuknangan na!

³⁰ I Fineas a pari at ding apulung manimuna karing komunidad a kayabe na, ding pamuntuk da ring pamilya ding tribu na ning dane albugan, dimdam da ing sinabi da ring tribu nang Ruben, Gad, at ning Manase ning dane Aslagan at metula la.

³¹ Inya ngana karelang Fineas a anak nang Eleazar a pari, Ngeni balu mi na king ing Ginu atyu libutad tamu. E kayu mig-rebeldi laban king Ginu, nung inya linigtas ye ing memalen na ning Israel king parusa ning Ginu.

³² Kanita i Fineas at ding pamuntuk likuan da la ring memalen na ning Ruben at Gad king gabun ning Gilead at migbalik la Canaan, karing memalen na ning Israel at minie lang ulat karela.

³³ Metula la ding Israelita at pepasalamatan de ing Dios. E ra na pisabi pa ing munta king labanan ban magdalang kasiran king lugal nung nu la manuknangan ding memalen na ning Ruben at Gad.

³⁴ Ngara namang sinabi ding memalen na ning Ruben at Gad, Saksi ya kekatamu ngan iting altar king ing Ginu ya ing Dios. Inya inaus deng Saksi.

23

¹ Kaybat ning makabang panaun, binie na ning Ginu ing kapayapan king Israel. E na la mekigera ding Israelita karing karelang kalaban a makapadurut karela. Tutu neng matua kanita i Josue,

² inya pepayaus ne ing mabilug a Israel, ding makatua, ding manimuna, ding ukum, at ding opisyal da ring memalen. Ngana karela, Matua na ku.

³ Ikit yu ing sabla-sablang gewa na ning Ginu, ing kekayung Dios, kareting bansa king uli yu, uling ing Ginung kekayung Dios ya ing mekilaban para kekayu.

⁴ Piparti-parti ku na karing kekayung tribu anting mana yu ing sablang gabun ding bansang simbut ta na ampon ing lugal da retang bansang e ta pa simbut manibat king Ilug ning Jordan king aslagan angga king Dagat ning Mediteraneo king albugan.

⁵ Paurungan na la ning Ginung kekayung Dios king arapan yu at itabi na la kabang susulung kayu. Maging kekayu ya ing balen da antimo ing pengaku na kekayu ning Ginung kekayung Dios.

⁶ Inya tapat yung pamintuan at tuparan ing sablang makasulat king libru na ning Batas nang Moises. Ala kayung lalaktawan agyang metung mu mang dake na niti,

⁷ at e kayu makisalamuha karing taung melakuan libutad yu o babanggit man king lagyu da ring karelang dios o gagamit karing lagyu ra king kekayung pamangaku o sasamba kareting kikilalanan dang dios o duruku arapan da.

⁸ Nune maging tapat kayu king Ginu, antimo ing daraptan yu angga ngeni.

⁹ Penabi na la ning Ginu ding mangaragul at mayupayang bansa king paniulung yu at ala metung man ing miniambut laban kekayu.

¹⁰ Malyari na lang apayatrasan ning ninuman kekayu ding libung tau uling ing Ginung kekayung Dios ya ing makilaban para kekayu, antimo ing pengaku na.

¹¹ Inya mingat kayu, luguran ye ing Ginu, ing kekayung Dios.

¹² Nung magtaksil kayu at makiabe karing taung mitagan pa libutad yu at makiasawa karela,

¹³ asahan yu king e na na la itabi ning Ginung kekayung Dios deting tau king arapan yu king paniulung yu. Nune maging panganib la kekayu antimong silu o kulkul a makaumang at maging masakit la anting barug king gulut yu o anti lang suksuk a makatusuk karing mata yu. At iti manatili angga king ala nang mitagan kekayu keting mayap a gabun a binie na kekayu ning Ginung kekayung Dios.

¹⁴ Ngeni malapit na ing oras ning kanakung kamatayan. Balu na ning balang metung kekayu king ing Ginung kekayung Dios binie na kekayu ing sablang mayap a pengaku na. Metupad ing sablang pangaku na kekayu; ala metung mang mebigu.

¹⁵ Nung makananung tiparan na ning Ginung kekayung Dios ing balang pangakung binie na kekayu, makanyan na la namang tuparan ding balang babala na.

¹⁶ Nung e ye tuparan ing kasunduan a yutus na kekayu ning Ginung kekayung Dios at nung sumuyu kayu at samba karing aliwang dios, kanita king mua na parusan na kayu at ala metung mang mitagan kekayu keting mayap a gabun a binie na kekayu.

24

¹ Tinipun na lang Josue karin Sikem ding sablang tribu na ning Israel. Inaus na la ding makatua, ding manimuna, ding ukum, at ding opisyal ning Israel, at minta la king arapan na ning Dios.

² Nganang Josue karing sablang tau, Makanyan yang migsalita ing Ginu, ing Dios ning Israel: Kanitang panaun a minuna menuknangan la ding makatua yu king sumangid na ning Ilug ning Eufrates at sinamba lang aliwang dios. Ing metung kareting makatua ya i Tera, i tata nang Abraham at Nahor.

³ Kanita inaus ke i Abraham a makatua yu manibat king gabun sumangid ning Eufrates, at tinaid ke king kekaban ning Canaan. Dininan keng dakal a lahi. Binie ke kang Abraham i Isaac

⁴ at binie ke kang Isaac i Jacob at Esau. Binie ke kang Esau ing bulubundukan ning Edom bilang bandi na, pero ing makatua yung i Jacob at ding anak na dinulung la Ehipto.

⁵ Kaybat tinubud ke i Moises at Aaron at pigdala keng maragul a kaguluan ing Ehipto, oneng liwal da kayu.

⁶ Liwal ku la Ehipto ding makatua yu, at penagal da la ring tau Ehipto a pakakarung panggera at pakakabayu. Inyang miras la ding makatua yu king Dagat da ring Timbu

⁷ minaus lang meniawad saup kanaku at binili ku ing dalumdum pilatan da at ding tau Ehipto. Peparatang ku ing danum at linumud ku la ding tau Ehipto. Ikit yu nung nanu ing gewa ku king Ehipto. Menuknangan kayung maluat king disyerto.

⁸ Kaybat na nita, dela da kayu king gabun da ring Amoreo a manuknangan king dane nang aslagan ning Jordan. Linaban la kekayu oneng ikayu ing pepaniambutan ku. Linipul ku la at sekupan ye ing gabun da.

⁹ Kanita ing ari ning Moab, i Balak a anak nang Zipor, linaban ya kekayu. Peparala yang amanu kang Balaam a anak nang Beor at inawad na kang Balaam ing ipagpa na ing sumpa kekayu.

¹⁰ E ke pekiramdaman i Balaam, inya binendisyunan na kayu at king makanyan a paralan da kayu linigtas king gamat nang Balak.

¹¹ Delakitan ye ing Ilug ning Jordan at miras kayu Jerico. Lebanan da kayu ding memalen na ning Jerico at antimu rin ding Amoreo, ding Perezeo, ding Cananeo, ding Hiteo, ding Girgaseo, ding Heveo, at ding Jebuseo. Pero pepagtagumpen da kayu karela ngan.

¹² King kekayung paniulung, pepagpa ku la karela ding kambubuyug at tinabi da la reti ding adua rang ari ding Amoreo king arapan yu. Aliwa ding kekayung espada at pana ding makirapat kanita.

¹³ Binie ke kekayu ing gabun a e yu bitasang pegobran at ding siudad a e yu naman telakad. Ngeni mabibie kayu king gabun a binie ku. Mamangan kayu karing ubas a e yu tenam at karing olibo a e yu naman tenam.

¹⁴ Inya ngeni, nganang Josue, galangan ye ing Ginu, at suyuan king mitmung kataimtiman at katapatan. Ilako yu la ding aliwang dios a simban da ring makatua yu karin Mesopotamia at Ehipto, at ing bukud mung suyuan yu ya ing Ginu.

¹⁵ Nung e kayu bisang sumuyu king Ginu, mamili kayu ngening aldong iti nung kaninu kayu sumuyu: karing aliwang dios a simban da ring makatua yu karin Mesopotamia o ding kikilalanan dang dios ding Amoreo ning gabun a ngeni panuknanganan yu? Oneng aku at ing pamilya ku ing Ginu ya ing kekaming suyuan.

¹⁶ Ngarang mekibat ding tau, E mi ya kapilan man gulutan ing Ginu ban sumuyu karing aliwang dios!

¹⁷ Liwal na katamu at ding makatua tamu ning Ginung kekatamung Dios ibat king pangayalipan karin Ehipto, at ikit tamu ing bage pagmumulalan a depat na. Iningat na katamu nu ta man miras karing sakup da ring sablang bansa a delanan tamu.

¹⁸ King panlub tamu king gabun a iti, tinabi na la ning Ginu ding Amoreo a manuknangan keti. Inya suyuan mi ya ing Ginu, uling ya ing Dios mi.

¹⁹ Oneng nganang Josue karing memalen, E ye malyaring asuyuan ing Ginu, uling Dios yang banal at mapangalalu; e na la patawaran ding kekayung kasalanan

²⁰ at nung painggulutan ye at sumuyu karing kikilalanan dang dios ding aliwang bansa, parusan na kayu. Paten na kayu agyang meging mayap ya kekayu kanitang minuna.

²¹ Ngarang mekibat ding tau kang Josue, E makanyan. Ing Ginu ya ing suyuan mi.

²² Nganang Josue karela, Ing sarili yu ya na kabud ing saksi king pinili yeng suyuan ing Ginu. Wa, ikami saksi kami, ngarang sinabi.

²³ Nung makanyan, nganang minutus karela, ilako yu na la ding dios a dayuan a atyu kekayu at mangaku kayung katapatan king Ginu, ing Dios ning Israel.

²⁴ Ngara kang Josue ding memalen, Suyuan mi ya ing Ginu, ing kekaming Dios. Pamintuan mi la ding utus na.

²⁵ Inya ginawa yang kasunduan i Josue para karing memalen kanitang aldong ita at binie na la karela karin king Sikem ding batas at tuntunan a sukat dang tukian.

²⁶ Sinulat na lang Josue deting kautusan king libru na ning Batas ning Dios. Kaybat kinangwa yang maragul a batu at binili ne lalam na ning tanaman a ensina keta king santuaryu ning Ginu.

²⁷ Ngana karing memalen, Iting batu ya ing saksi tamu. Dimdam na la ding sablang amanung sinabi na ning Ginu kekatamu. Nung inya saksi ya laban kekayu ban e kayu mag-rebeldi laban king kekayung Dios.

²⁸ Kaybat na nita, pepalakuan na na lang Josue ding tau at mibalik ya ing metung at metung king sarili nang gabun.

²⁹ Kaybat dang mepalyari deting bage, i Josue, ing talasuyu ning Ginu a anak nang Nun, mete ya king idad a dinalan at apulung banua.

³⁰ Kitkut de king sarili nang gabun karin Timnat Sera, king bulubundukan na ning Efraim, king dane norti ning Bunduk ning Gaas.

³¹ Siyuan de ring memalen na ning Israel ing Ginu king kekaban ning bie nang Josue, at kamate na sindu ra iti anggang mabie la detang manimuna a makibalu king sablang depat ning Ginu para king Israel.

³² Dela da la ring memalen na ning Israel ding butul nang Jose manibat Ehipto. Kitkut da la Sikem ketang kapirasung gabun a seli nang Jacob karing anak nang Hamor, ing tata nang Sikem, king alagang dinalan a pirasung pilak. Miyabie ya ing gabun a iti karing lahi nang Jose anting pimamanan.

³³ Mete ya naman i Eleazar a anak nang Aaron, at mikutkut ya king Gibea, ing balen king bulubundukan ning Efraim a miyabie king anak nang i Fineas.