1

¹ Karin king Toldang tuknangan ning Ginu inaus ne i Moises at ngana,

² Moises, sabian mu iti karing Israelita: Ing karapatdapat a iyain neng mamain kayu kanaku, ing Ginu, ya ing baka, tupa o kaya kambing.

³ Malyari yang kumang metung karing baka na a alang dipektu neng miyayain yang ain-a-durulukan ing ninuman kekayu. Idala ne iti king tulid na ning pasbul ning Toldang tuknangan ku ban maging karapatdapat ya kanaku.

⁴ Itumpak ne ing gamat na king buntuk na ning animal, at matanggap ya iti bilang panatbus king kasalanan na.

⁵ Karin ne paten ing baka at ding pari a anak nang Aaron ilang miyain king daya kanaku, ing Ginu, at kaybat isabug da iti king paligid na ning altar, lele nang pasbul ning Tolda.

⁶ Kaybat na nita, ilako ne balat ing animal at saka ne pamiraswan,

⁷ at ding lalaking anak nang Aaron a pari ilang miyayus king dutung a panangab king altar at saka ra patawan.

⁸ Ibili ra king api ing pemirasung karni at ing buntuk at taba ning animal.

⁹ Luglugan na pa mu ning miyayain ing laman lub at ding bitis ning animal bayu ibili king altar. Ing pari ya ing duluk kabilugan kaniting ain king altar. Babie tula kanaku, ing Ginu, ing bau na niting ain-a-pamangan.

¹⁰ Neng miyayain yang tupa o kambing a durulukan ing ninuman, kailangan ing lalaki ya at ala yang dipektu.

¹¹ Paten ne iti king dane nang norti ning altar at isabug da ring pari ing daya ning animal king paligid na ning altar.

¹² Pamiraswan ne at ibili na ning pari king api ning altar ing miyayaliwa nang dake ning animal at ing buntuk ampon taba ning animal.

¹³ Luglugan na ning miyayain ing laman lub ampon ding bitis ning animal, at ing pari ya ing miyain kareti king Ginu at dulukan na ngan king altar. Babie tula kanaku, ing Ginu, ing bau na niting ain-a-pamangan.

¹⁴ Nung miyayain yang ayup a dulukan ing ninuman, batu-batu o kaya pitsun ing idala na.

¹⁵ Ing pari ya ing miyain kaniti king altar; palipitan ne batal ing ayup at dulukan ne ing buntuk king altar. Patuluan na ing daya king paligid na ning altar.

¹⁶ Ilako ne bulbul ampon buksi at iyugse na iti king piyugsianan abu, karin king dane aslagan ning altar.

¹⁷ Kaybat na nita, talnan ne karing pakpak at saka ne pirasuan a katawan; ita sanang e la mikawani ding pakpak. Kaybat, dulukan neng kabilugan king altar. Babie tula kanaku, ing Ginu, ing bau na niting ain-a-pamangan.

2

¹ Neng miyayain yang ain-a-binutil ing ninuman para kanaku, ing Ginu, sukat na pa mung gilingan iti ban magawang arina. Tugtugan nang larung olibo at dinan nang insenso,

² at kaybat idala na karing pari a anak nang Aaron. Ing paring mangasiwa ya ing kumang kasakmal king arina at ing laru ampon ing sablang insenso a atyu babo na ning arina ban dulukan na king altar bilang tanda ning e na pamangalinguan at bilang mabanglung ain kanaku, ing Ginu.

³ Mangaintulid karing pari ing mitagan king ain-a-binutil. Iti sagradu uling dake na ning ain a miyain kanaku, ing Ginu.

⁴ Nung ing yayain tinape yang melutu king ornu, sukat ing ala yang sangkap a lebadura. Malyaring tinape lang makapal a megawa king arinang semutanan larung olibo o kaya tinape lang maimpis a kiskasanan larung olibo.

⁵ Nung ing yayain tinape yang melutu king sala-salang bakal, sukat ing megawa ya king mapinung arinang semutanan larung olibo, oneng ala yang lebadura.

⁶ Piraswan lang mangalati deti at tugtugan lang laru potang iyain la bilang ain kanaku, ing Ginu.

⁷ Nung ing yayain tinape yang melutu king kawali, sukat ing megawa ya king mapinung arina at larung olibo.

⁸ Idala iti king pari at ya ing miyain king altar bilang ain kanaku, ing Ginu.

⁹ Kuma yang kapirasu ing pari at dulukan ne iti king altar bilang tanda ning e pamangalinguan. Babie tula kanaku, ing Ginu, ing bau na niting ain-a-pamangan.

¹⁰ Mangaintulid king paring i Aaron at karing anak na ing mitagan king ain. Iti sagradu uling dake na ning ain a miyain kanaku, ing Ginu.

¹¹ E sukat misamutanan lebadura ing isanu pa man karing ain-a-binutil a yayain yu; e kayu misasamut lebadura ni pulut-panilan king yayain yu.

¹² Ing pamag-ain yu karing mumunang bunga na ning kekayung pupul balang banua sukat yang idala kanaku, ing Ginu; oneng e sukat dulukan iti king altar.

¹³ Dinan yung asin ing balang ain-a-binutil a yayain yu, uling pawaga na ning asin ing kasunduan a tenguanan yu king Dios. (Inya sukat yung sangkapan asin ing sablang ain.)

¹⁴ Neng ing yayain yu ibat king mumunang bunga na ning pupul yung binutil, sukat ing misingle na iti o kaya giniling na.

¹⁵ Tugtugan yung larung olibo at dinan insenso.

¹⁶ Kuanan na ning pari itang dake dulukan ampon ing laru at insenso bilang tanda ning e pamangalinguan. Iti ya ing ain-a-pamangan para kanaku, ing Ginu.

3

¹ Nung ing yayain ning ninuman metung yang ain-ning-pamisulusulu, iyain ne ing metung karing toro o baka na, at sukat ing ala yang dipektu.

² Itumpak ne ning miyayain ing gamat na king buntuk na ning animal at saka ne paten king tulid nang pasbul ning Toldang tuknangan ku, ing Ginu. Ding pari a anak nang Aaron ilang misabug king daya king paligid na ning altar.

³ Kaybat na nita, iyain da kanaku, ing Ginu, bilang ain-a-pamangan ing miyayaliwang dake na ning animal; ing sablang taba ning laman lub,

⁴ ding adua nang batu ampon ing taba ra, at ing masanting nang dake ning ate.

⁵ Ding pari ilang duluk ngan kaniti potang mibili na king altar kayabe ning aliwa pang ain-a-durulukan. Babie tula kanaku, ing Ginu, ing bau na niting ain-a-pamangan.

⁶ Nung tupa ya o kambing ing magamit bilang ain-ning-pamisulusulu, lalaki ya man o kaya babai, sukat ing ala yang dipektu.

⁷ Nung tupa ne man ing iyain, idala ne ning miyayain king arapan ku, ing Ginu.

⁸ Kaybat na nita, itumpak ne ing gamat na king buntuk ning tupa at paten ne karin king arap ning Tolda. Isabug da ring pari ing daya ning tupa king paligid na ning altar,

⁹ at iyain da la reting dake na ning animal bilang ain-a-pamangan a iyain kanaku, ing Ginu: ing taba at ing sablang taba a meyakua king iki ampon kaikut, ing sablang tabang pekabalut ning laman lub,

¹⁰ ding adua nang batu ampon ing taba ra at ing pemakasanting nang dake ning ate.

¹¹ Dulukan na ngan iti ning pari a mangasiwa karin king altar bilang ain-a-pamangan para kanaku, ing Ginu.

¹² Nung kambing ne man ing iyain,

¹³ itumpak ne ning miyayain ing gamat na king buntuk na ning kambing, at kaybat paten ne ing kambing king arap ning Tolda. Isabug da ring pari ing daya ning kambing king paligid na ning altar,

¹⁴ at iyain da la ring makatuking dake na ning kambing bilang ain-a-pamangan a iyain kanaku, ing Ginu: ing sablang taba ning laman lub,

¹⁵ ding adua nang batu ampon ing taba ra at ing masanting nang dake ning ate.

¹⁶ Dulukan na ngan iti ning pari karin king altar bilang ain-a-pamangan, at iti babie tula kanaku, ing Ginu. Mangaintulid ing sablang taba kanaku, ing Ginu.

¹⁷ Alang Israelita a malyaring mangan taba o daya; iti metung yang tuntunan a sukat matupad king kapilan pa man at nukarin la man manuknangan.

4

¹ Ngana ning Ginu kang Moises,

² Sabian mu karing memalen na ning Israel king ing ninumang mikasala king isanu pa man karing kautusan ku, ing Ginu, king e na sasarian, sukat yang pailalam karing makatuking tuntunan.

³ Nung ing mikasala ya ing Pamuntuk da ring Pari at uli na niti midame la ding tau king pamikasala na, sukat yang miyain biserung toro a alang dipektu, at iyain ne iti kanaku, ing Ginu, para king kasalanan na.

⁴ Idala ne ing toro king tulid nang pasbul ning Tolda; itumpak ne ing gamat na king buntuk na ning toro at paten ne karin king arapan ku, ing Ginu.

⁵ Kaybat na nita, ing Pamuntuk da ring Pari a mikasala kuma yang ditak king daya na ning toro at idala na kilub ning Tolda.

⁶ Itiltil ne ing taliri na king daya at ipisik na iting makatapitung besis king arap ning tabing.

⁷ Kaybat, ibili na ing ditak a daya karing sagung atyu karing suluk ning altar a pidurulukan king mabanglung insenso kilub ning Tolda. Itugtug na kanita ing dayang mitagan king talpakan na ning altar a pidurulukan karing ain a atyu king tulid nang pasbul ning Tolda.

⁸ Kuanan na ing sablang taba ning toro, ing taba ning laman lub,

⁹ ding adua nang batu ampon ing taba ra, ing taba ning balakang, at ing masanting nang diling dake ning ate.

¹⁰ Kuanan na ning pari iting taba at dulukan na king altar a magamit para king pamanduluk karing ain, antimo ing daraptan na king taba na ning animal a mepate para king ain-ning-pamisulusulu.

¹¹ Pero kuanan na ing balat, ing sabla nang laman, buntuk, bitis, laman lub, at pati na ing bituka.

¹² Idala na ngan iti king lual na ning kampu ketang lugal a malinis para piyugsianan king abu, at karin na ngan silaban.

¹³ Nung ing kabilugan a balen ning Israel ya ing mikasala at mekalabag ya king kautusan ku, ing Ginu, king e na sasarian,

¹⁴ kabud mebalu ing pamikasala, magdala yang biserung toro ing kapulungan bilang ain para king pangapatawaran ning kasalanan. Idala de iti arap na ning Toldang tuknangan ku, ing Ginu.

¹⁵ Itumpak da la ring gamat da ring manimuna na ning balen king buntuk ning toro, at kaybat paten de karin mu rin.

¹⁶ Kuma yang ditak king daya ing Pamuntuk da ring Pari at ilub na iti king Tolda.

¹⁷ Itiltil ne kanita ing taliri na king daya at ipisik nang makatapitung besis arap ning tabing.

¹⁸ Dinan na la namang daya ding sagung atyu makapaligid king altar ning pidurulukan insenso. Itugtug na ing dayang mitagan king talpakan na ning altar a pidurulukan ain a atyu king tulid nang pasbul ning Tolda.

¹⁹ Kaybat na nita, kuanan na ing taba at dulukan na iti king altar,

²⁰ antimo ing depatan na king taba ning torong miyain para king pangapatawaran ning kasalanan. Daptan na ning pari iti ban mipatawaran la kasalanan ding tau, at mipatawaran no man.

²¹ Kaybat na nita, ilual ne king kampu ing toro, at karin ne dulukan antimo nung makananu neng dilukan ing torong miyain para king sarili nang kasalanan. Iti ya ing ain para king pangapatawaran na kasalanan ning kapulungan. fig,,,,,Idala ne ing toro...,(4:4)fig*

²² Nung ing pamuntuk na ning kapulungan ya ing mikasala at mekalabag metung karing kautusan ku, ing Ginu, king e na sasarian,

²³ kabud meyaus ya pansin tungkul king pamikasala na, sukat yang magdalang metung a kambing a lalaki a alang dipektu bilang ain na.

²⁴ Itumpak ne ing gamat na king buntuk ning kambing, at saka ne paten karin king dane nang norti ning altar nung nu ra la papaten ding animal a miyayain bilang ain-a-durulukan. Iti ya ing ain a makalako king kasalanan na.

²⁵ Kuma yang ditak ing pari king daya na ning kambing at ibili na iti karing sagu na ning altar ning pidurulukan ain. Itugtug na ing dayang mitagan king talpakan na ning altar.

²⁶ Kaybat na nita, kuanan na ing sablang taba at idala na king altar ban dulukan bilang ain-ning-pamisulusulu. Iti ing daptan na ning pari king kasalanan na ning pamuntuk ning kapulungan, at mipatawaran ya.

²⁷ Nung karaniwan yang memalen ing mikasala at mekalabag yang metung karing kautusan ku, ing Ginu, king e na sasarian,

²⁸ kabud meyaus ya pansin king pamikasala na, sukat yang magdalang metung a babaing kambing a alang dipektu bilang ain na.

²⁹ Itumpak ne ing gamat na king buntuk ning kambing, at saka ne paten karin king dane nang norti ning altar nung nu ra la papaten ding animal a miyayain bilang ain-a-durulukan.

³⁰ Kuma yang ditak ing pari king daya na ning kambing at ibili na iti karing sagung atyu king altar. Itugtug na ing dayang mitagan king talpakan na ning altar.

³¹ Kaybat na nita, kuanan na ing sablang taba, antimo nung makananung lalako ing taba ning animal a pete para king ain-ning-pamisulusulu. Idala na iti king altar at karin na dulukan. Babie tula kanaku, ing Ginu, ing bau na niti. Iti ya ing daptan na ning pari ban mipatawaran ya kasalanan ing taung karaniwan, at mipatawaran ya.

³² Nung ing iyain na ning ninuman para king kasalanan na metung yang tupa, sukat ing babai ya ing tupa at ala yang dipektu.

³³ Itumpak ne ing gamat na king buntuk ning tupa, at saka ne paten karin king dane nang norti ning altar nung nu ra la papaten ding animal para karing ain-a-durulukan.

³⁴ Kuma yang ditak a daya ing pari at ibili na iti karing sagung atyu king paligid na ning altar. Kaybat na nita, itugtug na ing dayang mitagan king talpakan na ning altar.

³⁵ Kuanan na ning pari ing sablang taba, antimo nung makananu rang kakuanan ing taba ning tupang pete ra para karing ain-ning-pamisulusulu. Idala na iti king altar at dulukan na karin pati na ing pamangan a miyain kanaku, ing Ginu. King anti kaniting paralan ne iyain ning pari ing ain-a-kapamayaran-king-kasalanan ning mikasala, at mipatawaran ya.

5

¹ Nung mayawad king metung a tau ing magtestigu ya tungkul king bage mepalyari a ikit na o balu na, pero e ya bisang magsalita, mikasala ya at atin yang pakibatan.

² Nung ing ninuman mekatagkil yang nanumang bage a kikilalanan nang marinat ning kautusan a antimo ing bangke ning animal, midinatan ya at mikasala kabud akilala na ing depatan na.

³ Nung ing ninuman, king e na sasarian, mekatagkil yang bage marinat a ibat king tau, nanu ya pa man iti, mikasala ya kabud akilala na ing depatan na.

⁴ Nung mipatalusad ya dila ing ninuman king pamangawang pangaku, e mayap o mayap tungkul king nanu pa mang bage, mikasala ya kabud akilala na ing depatan na.

⁵ Nung mikasala ya ing ninuman karing bage mebanggit na sukat nang ipagtapat ing kasalanan na.

⁶ Ban mipatawaran ya, sukat yang miyain kanaku, ing Ginu, metung a babaing tupa o kaya babaing kambing. Iyain ne iti ning pari para king pangapatawaran na ning mikasala.

⁷ Nung e ne agyung iyain ning ninuman ing metung a tupa o kambing, miyain yang aduang pitsun kanaku, ing Ginu, o kaya aduang batu-batu bilang kapamayaran king depat nang kasalanan. Miyain ya ing metung karing ain-a-kapamayaran-king-kasalanan at ing metung bilang ain-a-durulukan.

⁸ Idala na la deti king pari, at iyain neng mumuna ing ayup a makatalaga para king ain-a-kapamayaran-king-kasalanan. Palipitan ne batal, pero e ne paburen matatanggal a buntuk.

⁹ Ipisik na kanita ing daya king lele na ning altar. Patiktikan na ngan ing mitagan king daya king talpakan na ning altar. Iti metung yang ain a makalako king kasalanan.

¹⁰ Kaybat na nita, iyain ne ing kaduang ayup bilang ain-a-durulukan, agpang karing tuntunan. Makanyan neng iyain ning pari para king pangapatawaran na kasalanan ning mikasala, at mipatawaran ya.

¹¹ Nung e na la pa mu rin agyung iyain ning ninuman ding aduang pitsun o ding aduang batu-batu, sukat yang magdalang atlu ampon kapitnang litrung mapinung arina bilang ain-a-kapamayaran-king-kasalanan. E na sasamutanan larung olibo o insenso, uling iti metung yang ain-a-kapamayaran-king-kasalanan.

¹² Idala na iti king pari a kumang kasakmal kaniti anting simbulu king ing kabilugan miyain na kanaku, ing Ginu, at dulukan na ning pari ing kinua nang kasakmal karin king altar bilang ain-a-pamangan. Metung ya iti karing ain a makalako king kasalanan.

¹³ King anti kaniting paralan na iyain ning pari ing ain-a-kapamayaran-king-kasalanan ning mikasala, at mipatawaran ne man. Mangaintulid king pari ing mitagan king ain, antimo ing mararapat king pamiyain ain-a-binutil.

¹⁴ Ngana ning Ginu kang Moises,

¹⁵ Nung ating mikasala king e na sasarian a antimo ing e na pamamie ketang bage sagradu a mangaintulid kanaku, ing Ginu, sukat yang magdalang metung a lalaking tupa o lalaking kambing a alang dipektu bilang ain-a-kapaglarinan-king-kasalanan kanaku. Makayagpang ing alaga na ning animal king timbangan ning santuaryu.

¹⁶ Sukat na namang bayaran itang alagang akalinguan nang beyaran, at sukat neng patunganan beinti por sientu ing mesabing alaga. Ibie na iti king pari, at iyain ne ning pari ing animal bilang ain-a-kapamayaran-king-kasalanan na, at mipatawaran ya.

¹⁷ Nung mekalabag ya ing ninuman king e na sasarian karing kautusan ku, mikasala ya at kailangan nang bayaran ing depat nang pamikasala.

¹⁸ Kailangan ing idala ne king pari ing metung a lalaking tupa o lalaking kambing a alang dipektu. Makayagpang ya ing alaga na ning animal king timbangan ning santuaryu. Iyain ne iti ning pari para king pangapatawaran na ning kasalanan na ning mikasala, at mipatawaran ya.

¹⁹ Ing ain a iti para king kasalanan ya, uling mikasala ya kanaku, ing Ginu.

6

¹ Ngana pa ning Ginu kang Moises,

² Mikasala ya ing ninuman nung ilingad ne ing bage a penilas da keya o e tinupad king kasunduan o menako ya o kaya migsamantala ya king kalupa nang tau

³ o payalian ne ing metung a bage a apulut na at sinumpa yang e ne ikit.

⁴ Bayaran ne ning mikasala itang penako na, ing bindian nang apulut o mipanilas keya a babandian na.

⁵ Isubli ne ing isanu man kareting mebanggit, at saka ne pa patunganan beinti por sientu ing alagang sukat bayaran na.

⁶ Kailangan ya namang miyain metung karing sese nang lalaking tupa o lalaking kambing a alang dipektu. Idala ne iti king pari bilang kapamayaran kanaku, ing Ginu. Makayagpang ya ing alaga na ning animal king timbangan ning santuaryu.

⁷ Iyain ne iti ning pari para king pangapatawaran ning kasalanan na ning mikasala, at mipatawaran ya.

⁸ Ngana pa ning Ginu kang Moises,

⁹ Sabian mu la kang Aaron at karing anak nang lalaki deting tuntunan tungkul karing ain-a-durulukan. Sukat yang manatiling kabukas ing metung a ain-a-durulukan king altar a ating aping e matatda.

¹⁰ Kaybat na nita, isulud ne ning pari ing barung makabang linen ampon salol a linen at saka na ilako ing abu. Ibili na iti king lele na ning altar.

¹¹ Kaybat na nita, manalili yang piblas ing pari, at idala na ing abu king lual na ning kampu; ketang lugal a malinis a mitalaga para kaniti.

¹² Sukat manatiling mitatau ing api king altar; tamban kabukas. Dagdagan na tangab ning pari balang abak; ayusan ne babo ning tangab ing ain-a-durulukan at dulukan na ing taba na ning ain-ning-pamisulusulu.

¹³ Sukat manatiling mitatau ing api king altar; e paburen matatda.

¹⁴ Ila naman deti ring tuntunan tungkul king ain-a-binutil. Ding pari a anak nang Aaron ilang malyaring miyain kaniti king altar ku, ing Ginu.

¹⁵ Kuma yang kasakmal ing metung karela king mapinung arinang semutanan laru at insenso. Kaybat, dulukan na iti king altar bilang tanda king ing kabilugan a ain miyain na kanaku, ing Ginu. Babie tula kanaku, ing Ginu, ing bau na niting ain.

¹⁶ Mangaintulid karing pari ing mitagan king ain.

¹⁷ Gawan dang tinape alang lebadura at kanan da iti king metung a lugal a banal; kilub na ning patyu ning Tolda. Binie ku na, ing Ginu, iti karing pari bilang dake ra karing ain-a-pamangan. Iti tune banal; kalupa re ding ain-a-kapamayaran-king-kasalanan at ding ain-a-kapaglarinan-king-kasalanan.

¹⁸ Malyari dang kanan king kapilan pa man ding sablang lalaki king lahi nang Aaron iting dake ra king pamangan a miyayain kanaku, ing Ginu. Manasakit ya ing ninumang tagkil king ain-a-pamangan, uli na ning kabanalan na niti.

¹⁹ Ngana pa ning Ginu kang Moises,

²⁰ Iti ya ing ain a idala na kanakung Aaron at anak nang lalaki king aldo na ning karelang ordinasyun: atlu at kapitnang litrung mapinung arina (anti ring karaniwan ain-a-binutil). Iyain neng abak ing kapitna kaniti at itang kapitna neng gatpanapun.

²¹ Samutanan tabang olibo at ilutu king sala-salang bakal. Kaybat na nita, pisian yang mangalati at iyain bilang ain-a-binutil. Babie tula kanaku, ing Ginu, ing bau na niti.

²² Karing panaun a daratang, iting pamiyain sukat neng gampanan ning balang lahi nang Aaron a susuyu bilang Pamuntuk da ring Pari.

²³ Iting ain-a-binutil a iyain ning pari sukat ngang dulukan kabilugan; e malyaring kanan iti.

²⁴ Ngana pa ning Ginu kang Moises,

²⁵ Sabian mu kang Aaron at karing anak nang lalaki king deti naman ila ring tuntunan tungkul karing ain-a-kapamayaran-king-kasalanan. Sukat yang paten ing animal a magamit king ain-a-kapamayaran-king-kasalanan king dane nang norti ning altar nung nu ra la papaten ding animal para karing ain-a-durulukan. Iti metung yang ain a tune banal.

²⁶ Kanan ne ning pari a miyayain kaniti ketang lugal a banal, ing patyu na ning Toldang tuknangan ku.

²⁷ Manasakit ya king upaya na ning kabanalan na niti ing ninumang makatagkil king laman na niting animal. Nung ating nanu pa mang imalan a mitalamsikan king daya na ning animal, pipian ya iti king lugal a banal.

²⁸ Sukat yang balbalan ing isanu mang kasangkapan a kapsa a megamit king pamipabukal king karni. Nung kasangkapan yang bakal ing megamit, sukat yang isisan at luglugan king danum.

²⁹ Malyari yang mangan kaniting ain ing ninumang lalaking miembru da ring pamilyang pari; iti metung a bage banal.

³⁰ Nung atin lang linub king Tolda king daya na niting animal at megamit iti king seremonia na ning pamaglako king kasalanan, e ya sukat kakanan ing animal; dulukan ya.

7

¹ Ila naman deti ring tuntunan tungkul karing ain-a-kapaglarinan-king-kasalanan a tune banal.

² Ing animal a iyain para bayaran ing kasalanan sukat yang paten king dane nang norti ning altar nung nu ra la papaten ding animal para karing ain-a-durulukan. Sukat isabug ing daya king paligid ning altar.

³ Ilako ing sablang taba na at iyain king altar; itang taba king iki, ing tabang babalut karing laman lub,

⁴ ding aduang batu at ing taba da reti, at ing masanting nang dake ning ate.

⁵ Dulukan na ngan ning pari iti king altar bilang ain-a-pamangan para kanaku, ing Ginu. Iti metung yang ain-a-kapaglarinan-king-kasalanan.

⁶ Malyari yang mangan king mitagan ing ninuman karing lalaking miembru da ring pamilyang pari, pero sukat kanan iti king lugal a banal, uling iti banal.

⁷ Ating metung a tuntunan tungkul karing ain-a-kapamayaran-king-kasalanan at king ain-a-kapaglarinan-king-kasalanan. Mangaintulid ing karni king paring mangasiwa.

⁸ Mangaintulid munaman ing balat ning animal a miyayain king pari a miyayain kaniti.

⁹ Ing balang ain-a-binutil a melutu king ornu o melutu king kawali o kaya king sala-salang bakal mangaintulid munaman king pari a miyayain kaniti king Dios.

¹⁰ Pero ing balang trigung e lutu, ating samut a taba o ala, mangaintulid ngan karing paring anak nang Aaron at sukat pirarakayan para king metung at metung.

¹¹ Ila naman deti ring tuntunan tungkul karing ain-ning-pamisulusulu a miyain para kanaku, ing Ginu.

¹² Nung gampanan ne ning ninuman ing anti kaniting kasuyuan bilang ain-a-kapasalamatan, iyabe na la ding tinape alang lebadura king animal a miyain. Malyari lang makapal deting tinape a megawa king arina at tabang olibo o kiskasanan king taba o kaya megawa king mapinung arina a semutanan king tabang olibo.

¹³ Karagdagan kaniti, miyain ya namang tinape ating lebadura.

¹⁴ Iyain ne ing balang uring tinape bilang metung a makapasubaling ain kanaku, ing Ginu; mangaintulid la reti king pari a kukua king daya ning animal. Kaybat na nita, isabug na king arap ning altar.

¹⁵ Sukat mapangan ing karni na ning animal king aldo mu rin a miyain ya; ala sanang mitatagan angga king kabukasan abak.

¹⁶ Nung miyain yang ain-ning-pamisulusulu bilang pamanupad king panata na o kaya ain yang kusa nang babie, e ya sukat pakigisanan ing anti kaniting ain itang aldo miyain ya, pero malyari yang kanan ing mitagan itang kabukasan.

¹⁷ Nung king katlung aldo atin pang mitagan king karni, iti sukat nang dulukan.

¹⁸ Nung ating mapangan kaniting tagan king katlung aldo, e ku na tanggapan ing ain a iti; ala nang ulaga. Maging makasumami ya at mika pakibatan ya pa ing ninumang mangan kaniti.

¹⁹ Nung mitagkil ya ing karning iyain king nanumang bage a kikilalanan nang e malinis ning kautusan, e sukat mapangan iti; sukat dulukan. Ing ninumang malinis, agpang king batas, malyari yang mangan king karning iti;

²⁰ oneng ing ninumang e malinis a mangan kaniti, mitiwalag ya king balen ku, ing Dios.

²¹ Antimu rin, ing ninumang mekatagkil king marinat a tau o animal o nanumang bage makasumami, at kaybat mangan ya kaniting karni, mitiwalag ya king balen ku, ing Dios.

²² Ngana pa ning Ginu kang Moises,

²³ Sabian mu karing memalen na ning Israel king e la mamangan taba ning baka o ning tupa at kambing.

²⁴ Ing taba ning animal a mete na kabud o kaya piglapak na ning kalupa nang animal malyari yang gamitan king nanumang pamangailangan, oneng e ya malyaring kanan.

²⁵ Inya ing ninumang mangan king taba na ning animal a miyain kanaku, ing Ginu, anting ain-a-pamangan itiwalag ya king balen ku, ing Dios.

²⁶ Nu man karin, e la malyaring mangan ding Israelita king daya na ning ayup o ning animal.

²⁷ Itiwalag ya king balen ku ing ninumang mangan king isanu pa mang daya.

²⁸ Tiglus na ning Ginu ing pamamie karing tuntunan kang Moises

²⁹ para karing memalen na ning Israel. Ngana, Ing ninumang miyain a ain-ning-pamisulusulu sukat neng iyain ing metung a dake bilang metung a makapasubaling regalu kanaku, ing Ginu.

³⁰ Ya mismu ing midala kaniti. Idala na king altar ing taba na ning animal ampon ing salu na at iyampang ne bilang metung a makapasubaling regalu kanaku, ing Ginu.

³¹ Dulukan na ning pari ing taba king altar; pero mangaintulid ya ing salu karing pari.

³² Miyabie ya ing bitis nang wanan king tauli bilang makapasubaling ambag para

³³ king pari a miyain king daya at king taba ning ain-ning-pamisulusulu.

³⁴ Ing salu na niting animal at ing bitis nang wanan king tauli makapasubali lang ambag a kakuanan ku, ing Ginu, king memalen na ning Israel para ibie karing pari. Iti ya ing sukat nang ibie ning balen Israel karing pari angga na king kapilan pa man.

³⁵ Iti ya ing dake na ning pamangan a miyain kanaku, ing Ginu, a minie kang Aaron at karing anak nang lalaki kanitang aldo a ila mitalaga lang sumuyu kanaku bilang pari.

³⁶ King aldong ita inutus ku karing memalen na ning Israel king ibie re karing pari ing anti kaniting dake ning ain. Iti metung yang tuntunan a sukat dang tuparan king kapilan pa man.

³⁷ Ila deti ring tuntunan para karing ain-a-durulukan, karing ain-a-binutil, para karing ain-a-kapamayaran-king-kasalanan, ain-a-kapaglarinan-king-kasalanan, ain-para-king-ordinasyun da ring pari, at karing ain-ning-pamisulusulu.

³⁸ King Bunduk ning Sinai, inyang atyu la king libutad na ning disyerto, karin na la binie ning Ginu deting tuntunan kang Moises; kanitang aldo a inutus na karing memalen na ning Israel a daptan da ing karelang pamanain.

8

¹ Ngana ning Ginu kang Moises,

² Ituki me i Aaron at ding anak nang lalaki karin king pasbul ning Toldang tuknangan ku. Idala mu ing imalan-pari, ing larung paglania, ing biserung toro para king ain-a-kapamayaran-king-kasalanan, ding aduang lalaking tupa, at ing basket a maki tinape alang lebadura.

³ Tipunan mu la karin ding memalen ning Israel.

⁴ Tiparan nang Moises itang inutus na ning Ginu. Inyang makatipun na la karin ding tau,

⁵ ngana karela, Ing daptan ku ngeni ya kabud itang inutus nang gampanan ku ning Ginu.

⁶ Pepalapitan neng Moises i Aaron at ding anak nang lalaki agpang king aduan nang pamaglinis ning kautusan, at saka na la pepandiluan.

⁷ Kaybat na nita, pepasulud ne ing barung ating takde makaba at ing balabal kang Aaron ampon ing paha king awakan na. Pepasulud nia naman ing efod at pinilmi ne iti king kapamilatan na ning mapinung babat.

⁸ Pepasulud ne ing takap-salu at saka na la binili kilub da ring Urim at Tumim.

⁹ Timpak nia naman ing turban king buntuk na at king kanuan na ing gintung lamina, ing banal a tanda ning ordinasyun na, agpang king inutus na ning Ginu.

¹⁰ Inyang merapat na ing sablang iti, kinua neng Moises ing larung paglania at saka ne pisikan kaniti ing Toldang tuknangan ning Ginu ampon ing sablang atyu karin. King anti kaniting paralan na telaga ing sabla-sabla para king Ginu.

¹¹ Kinangwa ya pang ditak king laru at saka ne pisikan pitung besis ing altar, ding kasangkapan, ing palanggana ampon ing talpakan na niti ban mitalaga la para king Ginu.

¹² Inordinan ne i Aaron king kapamilatan na ning pamitugtug ditak a larung paglania king buntuk na.

¹³ Kaybat na nita, pepalapitan na lang Moises ding anak nang lalaking Aaron at pepasuluran na lang barung ating makaba takde; bebat na la ding paha karing awakan da at saka na la binili ding malating kupia karing buntuk da, agpang king inutus na ning Ginu.

¹⁴ Kaybat na nita, pepakua neng Moises ing biserung toro para king ain-a-kapamayaran-king-kasalanan. Timpak neng Aaron at ding anak nang lalaki ding gamat da king buntuk na ning animal.

¹⁵ Pete neng Moises ing toro at saka ya kinangwang ditak a daya. At king taliri na kinangwa yang ditak a daya at kiskas na iti karing sagu a atyu king altar ban italaga ne. Kaybat, sinabug na ing mitagan king daya king talpakan na ning altar bilang pamitalaga kaniti at ing pangadalise na.

¹⁶ Kinua nang Moises ing sablang taba ning laman lub, ing masanting nang dake ning ate ampon ding aduang batu at pati na ing taba ra. Dilukan na ngan iti king altar.

¹⁷ Kinua na naman itang mitagan king toro at pati na ing balat, karni, at bituka. Dilukan na naman iti king lual na ning kampu, agpang king inutus na ning Ginu.

¹⁸ Kaybat na nita, kinua neng Moises ing lalaking tupa para king ain-a-durulukan. Timpak na la ring gamat nang Aaron at ding anak nang lalaki king buntuk na ning lalaking tupa.

¹⁹ Kaybat pete neng Moises ing tupa. Sinabug na ing daya king paligid na ning altar.

²⁰ Kinatat ne ing tupa at dilukan ne king altar ing buntuk ampon ing pirapirasung laman at taba, agpang king inutus na ning Ginu.

²¹ At kaybat nang meluglug ning laman lub at ding bitis, dilukan neng Moises ing kabilugan a lalaking tupa. Iting ain-a-durulukan metung yang ain-a-pamangan; babie tula kanaku, ing Ginu, ing bau na niti.

²² Kaybat na nita, kinua neng Moises ing kaduang lalaking tupa a makatalaga para king ordinasyun da ring pari. Timpak na la ring gamat nang Aaron at ding anak nang lalaki king buntuk na ning tupa.

²³ Pete neng Moises ing tupa at kinangwa yang ditak king daya at kiskas na iti king pingul ning balugbug nang wanan Aaron, king tindaragul na ning gamat nang wanan at king tindaragul ning bitis nang wanan.

²⁴ Inyang merapat na ita, pepalapitan na la ding anak nang lalaking Aaron, at saka na la kiskasan daya karing pingul dang balugbug a wanan, karing tindaragul da ring gamat dang wanan at karing tindaragul da ring bitis dang wanan. Sinabug nang Moises itang mitagan a daya king paligid na ning altar.

²⁵ Kaybat na nita, kinua na ing taba at ing taba king iki ampon ning laman lub at ing masanting nang dake ning ate, ding aduang batu ampon ing taba ra at ing bitis a wanan king tauli.

²⁶ Kinangwa yang metung a tinape alang lebadura king basket a makatalaga para king Ginu, metung a tinape linutu king taba, at metung a tinape maimpis. Binili na la reti king babo na ning taba at ning tauli nang bitis a wanan ning tupang mepate.

²⁷ Kaybat, timpak na ngan iting pamangan king gamat nang Aaron at karing anak nang lalaki, at inain da naman iti bilang makapasubaling regalu king Ginu.

²⁸ Kinua nang pepasibayung Moises karela iting pamangan at saka na dilukan king altar babo ning ain-a-durulukan bilang ain-para-king-ordinasyun. Iti metung yang ain-a-pamangan at babie tula kanaku, ing Ginu, ing bau na niti.

²⁹ Kaybat na nita, kinua neng Moises ing salu ning tupa, at inain ne bilang makapasubaling ain king Ginu. Iti ya ing meging dake nang Moises king lalaking tupang miyain para king ordinasyun. Tiparan na ngan Moises ing sabla, agpang king inutus na ning Ginu.

³⁰ Kinangwa yang ditak king larung paglania i Moises ampon ditak ketang daya a atyu king altar, at pisikan ne kaniti i Aaron ampon ding anak nang lalaki. Pisikan na naman itang susulud dang imalan. King makanyan a paralan na la telaga at pati na ing susulud dang imalan. fig,,,,,King makanyan a paralan na la telaga...,(8:30)fig*

³¹ Kaybat na nita, nganang Moises kang Aaron at karing anak nang lalaki, Idala yu ing karni king tulid nang pasbul ning Toldang tuknangan ning Ginu. Ilutu yu at kanan karin pati na ing tinape a makalulan king basket da ring ain-para-king-ordinasyun, agpang king inutus na ning Ginu.

³² Dulukan yu ing nanumang mitagan a karni o tinape.

³³ E kayu mamako king tulid na ning pasbul ning Tolda kilub ding pitung aldo anggang e meyari ing seremonia na ning kekayung ordinasyun.

³⁴ Inutus na ning Ginu ing gampanan tamu king aldong iti ing merapat ban milako ing kasalanan yu.

³⁵ Manatili kayu tulid na ning pasbul ning Tolda kilub ding pitung aldo at bengi. Iti ya ing utus na ning Ginu. Tuparan yu sa ing utus na ban e kayu mangamate.

³⁶ Inya tiparan nang Aaron ampon ding anak nang lalaki ing sablang inutus na ning Ginu king kapamilatan nang Moises.

9

¹ Inyang milabas na ing kawalung aldo, pepayaus neng Moises i Aaron ampon ding anak nang lalaki at ding manimuna na ning Israel.

² Nganang sinabi kang Aaron, Kuma kang metung a biserung toro at metung a lalaking tupa a parehung alang dipektu. Iyain me ing biserung toro bilang ain-a-kapamayaran-king-kasalanan at ing lalaking tupa bilang ain-a-durulukan.

³ Sabian mu munaman karing memalen na ning Israel ing magdala lang lalaking kambing a iyain da bilang ain-a-kapamayaran-king-kasalanan. Magdala la namang baka a pabanua tua at tupa a pabanua munaman a tua. Kailangan king deti ala lang dipektu para king ain-a-durulukan.

⁴ Pakuanan mu la namang toro at lalaking tupa para iyain da bilang ain-ning-pamisulusulu. Iyain da la ngan deti king Ginu at ing ain-a-binutil a singkapan taba. Kailangan ing tuparan da ngan iti, uling pakit ya karela ing Ginu ngening aldong iti.

⁵ Inya dela da la king arap ning Tolda ding sablang pepakua nang Moises karela, at mitipun ya ing mabilug a kapulungan karin ban samba king Ginu.

⁶ Ngana karelang Moises, Inutus na ning Ginu ing daptan yu ngan iti ban ing makasilo nang aslag ning Ginu mihayag kekayu.

⁷ Kaybat na nita, nganang sinabing Moises kang Aaron, Munta na ka king altar at iyuna meng iyain ing kekang ain-a-kapamayaran-king-kasalanan, at ing ain-a-durulukan ban mipatawaran ing kasalanan mu ampon ing kasalanan da ring tau. Daptan mu iti ban mipatawaran ing kasalanan ding tau. Iti utus na ning Ginu.

⁸ Linapit ya i Aaron king altar at saka ne pete ing biserung toro bilang ain-a-kapamayaran-king-kasalanan para king sarili nang kasalanan.

⁹ Kaybat na nita, diwang da ring anak nang lalaki ing daya. Tiniltil neng Aaron ing taliri na king daya at kiskasan na la kaniti ding sagu a makapaligid king altar. Tigtug na ing dayang mitagan king talpakan na ning altar;

¹⁰ pero dilukan na ing taba ning animal, ding batu ampon ing tabang meyakua king masanting nang dake ning ate, agpang king inutus na ning Ginu kang Moises.

¹¹ Dilukan na ing laman at ing balat king lual na ning kampu.

¹² Pete nia namang Aaron ing animal para king sarili nang ain-a-durulukan. Diwang de kang Aaron ding anak nang lalaki ing daya, at kaybat tigtug na king paligid na ning altar.

¹³ Diwang dia naman ing buntuk at ding aliwa nang dake ning pete animal. Dilukan na ngan iti king altar.

¹⁴ Liglugan na ing laman lub ampon ding bitis nang tauli ning animal, at timpak na iti babo na ning aliwa pang ain-a-durulukan.

¹⁵ Kaybat na nita, inain na ing ain da ring memalen. Kinua ne itang kambing para king ain-a-kapamayaran-karing-kasalanan da. Pete ne at saka ne inain kalupa ning minunang ain-a-kapamayaran-king-kasalanan.

¹⁶ Inain ne ing animal a dulukan, agpang king aduan na ning tuntunan.

¹⁷ Kinangwa yang kasakmal a arina king ain-a-binutil at dilukan na iti king altar. Karagdagan ya iti ketang ain-a-durulukan a miyayain aldo-aldo.

¹⁸ Katataulian, pete ne ing toro at ing lalaking tupa bilang ain-ning-pamisulusulu para karing tau. Linapit da kang Aaron ding anak nang lalaki itang daya ra deting animal at sinabug na iti king paligid na ning altar.

¹⁹ Binili nang Aaron ing taba ding batu na ning toro at ning lalaking tupa

²⁰ babo da ring salu ra ding animal, at dela na ngan king altar at karin na dilukan.

²¹ Inampang na la ding salu ampon ing tauli dang bitis a wanan bilang makapasubaling ain king Ginu para karing pari, agpang king inutus nang Moises.

²² Inyang ayari na ngan depatan Aaron ing sablang pamanain, tinas na la ding adua nang gamat at saka na la binendisyunan ding tau. Kaybat, meko ne king altar.

²³ Kaybat na nita, ya ampon i Moises linub la king Toldang tuknangan ning Ginu. Inyang linual na la, binendisyunan da la ring tau, at ikit da ring sablang memalen ing makasilo nang aslag ning Ginu.

²⁴ Kabud-abud peparatang yang api ing Ginu, at silaban na ngan niting api ing ain-a-durulukan ampon ding miyayaliwang dake a maki taba a atyu king altar. Inyang ikit da iti mengapakulisak la at migsakab ding tau.

10

¹ Kinua na lang Nadab at Abihu a anak nang lalaking Aaron ding karelang insensaryu; dininan da lang baya at saka ra biburan insenso ing baya. Kaybat, inain da iti arapan na ning Ginu. Oneng e makayagpang iting api king kautusan; ala yang kautusan ing Ginu tungkul kaniti.

² Kabud-abud peparatang yang api ing Ginu, at mesilab la ding mikapatad; mete la king arapan na ning Ginu.

³ Nganang migsalitang Moises kang Aaron, Oyan ing amanuan na ning Ginu kanitang sinabi nang Sukat dang kilalanan ding sablang lalapit kanaku king banal ku, at ihayag ku ing kamalan ku arapan da ring tau. Oneng menatili yang e bubulad i Aaron.

⁴ Kanita inaus neng Moises i Misael at i Elzafan, ding anak nang lalaking Uziel a bapa nang Aaron. Ngana karela, Meko keni at ilako yu la ding bangke ra ding pisan yu keting banal a Tolda at idala la lual ning kampu.

⁵ Linapit la at telan da la baru ding bangke; binwat da la at linual king kampu, antimo ing inutus nang Moises karela.

⁶ Ngana kanitang sinabing Moises kang Aaron at karing anak nang i Eleazar at Itamar, E yu gugutgutan ing buak yu at e yu pangabakan ing susulud yung imalan para pakit yu ing kalungkutan yu. Nung daptan yu yan, mate kayu naman at mimua ya ing Ginu king kabilugan a balen. Pero malyari nang pagpaldasan ning balen ing pangamate ra ding kamaganak yu a meging biktima na ning api a pepagpa na ning Ginu.

⁷ E kayu mamako king tulid na ning pasbul ning Tolda pota mate kayu, uling mitalaga na kayu king kapamilatan na ning larung paglania na ning Ginu. Inya e la meko karin, antimo ing inutus nang Moises karela.

⁸ Nganang migsalita ning Ginu kang Aaron,

⁹ Ika ampon ding anak mu, e kayu miminum alak o nanumang bage makalasing bayu kayu lungub king Toldang tuknangan ku, pota mate kayu. Iti tuntunan yang sukat ipatupad karing lahi yu king kapilan pa man.

¹⁰ Kailangan ing balu yu ing pamiyaliwa na ning banal at ing e banal; ing malinis at ing e malinis.

¹¹ Sukat yu lang ituru karing memalen na ning Israel ding sablang kautusan a binie ku kekayu king kapamilatan nang Moises.

¹² Ngana namang migsalitang Moises kang Aaron at karing adua nang anak a mitagan, i Eleazar at i Itamar, Kuanan yu itang arinang mitagan king ain-a-pamangan a miyain king Ginu. Gawan yu iting tinape alang lebadura at kanan yu king lele na ning altar uling iti binang banal.

¹³ Kanan yu iti king lugal a banal; iti ya ing dake mangaintulid kekayu at karing anak yung lalaki ketang pamangan a miyain king Ginu. Iti ya ing utus a tinggap ku king Ginu.

¹⁴ Ikayu ampon ding pamilya yu malyari kayung mangan king salu at king bitis a tauli a miyain bilang makapasubaling regalu king Ginu at bilang makapasubaling regalu munaman para karing pari. Kanan yu iti ketang lugal a malinis. Ila deti ring dake miyabie kekayu at karing anak yu karing ain-ning-pamisulusulu a inain da ring memalen na ning Israel.

¹⁵ Idala ya ing salu at ing bitis a tauli king altar at pati na ing taba a dulukan at iyain king Ginu. Ila deti ring dake a mangaintulid kekayu at karing anak yu king kapilan pa man, agpang king inutus na ning Ginu.

¹⁶ Kaybat na nita, kitang neng Moises ing kambing a sukat iyain bilang ain-a-kapamayaran-king-kasalanan, at abalu na king iti dilukan da ne pala. Inya mimua ya kari Eleazar at Itamar. Sebianan na la. Ngana,

¹⁷ Obat e ye pengan ing ain-a-kapamayaran-king-kasalanan ketang banal a lugal? Banal ya ita at binie ne ning Ginu kekayu para makalako king kasalanan na ning balen Israel.

¹⁸ Anti na ning e yu alub ing daya king banal a Tolda, sana pengan yu karin ing karni na ning animal a miyain, antimo ing inutus ku kekayu.

¹⁹ At mekibat ya i Aaron kang Moises, Agyang king aldong iti ding memalen inain da ing karelang ain-a-kapamayaran-king-kasalanan at ing ain-a-durulukan king arapan na ning Ginu, makanyan man deti ila pang mepalyari kanaku. O nu mong mengan ku king karni na ning ain-a-kapamayaran-king-kasalanan a miyain king aldong iti, ita kaya maging katanggap-tanggap king Ginu?

²⁰ Mipanatag ya lub i Moises inyang dimdam na iting sinabi nang Aaron.

11

¹ Nganang migsalita ning Ginu kari Moises at Aaron,

² Sabian yu karing memalen na ning Israel king malyari da lang kanan ding sablang animal a lalakad king gabun,

³ antimo ding animal a bangal a kuku at maglangut king kakanan da.

⁴ Oneng ing kamelyu, agyang lalangutan na ing kakanan na, e ya bangal a kuku; inya e ya sukat kanan uling e ya malinis.

⁵ Maglangut ya naman ing kuneho king kakanan na, oneng e ya bangal a kuku, inya e ya malinis.

⁶ Ing liebre, agyang maglangut ya king kakanan na, e ya naman bangal a kuku, inya e ya malinis.

⁷ E kayu naman mamangan babi. Bangal ya kuku, oneng e na lalangutan ing kakanan na. E ya malinis ing babi.

⁸ E yu kakanan ing karni da reting mesabing animal o tatagkilan man ding bangke ra, uling animal lang e malinis.

⁹ Malyari yu lang kanan ding miyayaliwang asan a ating palikpik at kaliskis,

¹⁰ oneng e yu la sukat kanan ding nanumang mabibie king danuman a alang kaliskis at palikpik.

¹¹ Ituring yu lang e malinis ding asan a anti kareti. E yu la kakanan o tatagkilan man pati na ding bangke ra.

¹² Sukat yang maging kasuklam-suklam kekayu ing nanumang mabibie king danuman a alang palikpik at kaliskis.

¹³ Oreni ding ayup a kasuklam-suklam a e yu malyaring kanan uling marinat la: ing agila, buitre, at ing agilang dagat;

¹⁴ ing balawe, ing lawin, at ding sablang kauri na;

¹⁵ ding awak at ding sablang kauri da,

¹⁶ ing ostrich, ing kulayung bengi at ning dagat, at ding sablang kauri da;

¹⁷ ing kulayu, ding ayup a manyisid asan;

¹⁸ ing kulayung ating sagu, ing pelikanu;

¹⁹ ding sablang tagak, bako, talibatab, at ding kabag.

²⁰ Kasuklaman yu la ding sablang ayup-ayupan, uling e la malinis,

²¹ subali mu detang lulundag kapamilatan da ring bitis dang mamaklung,

²² antimo ding durun, luktun, at lipaktung.

²³ Kasuklaman yu la ding sablang ayup-ayupan a susulapo at gagapang kapamilatan da ring apat dang bitis.

²⁴ Ing ninumang tagkil karing bangke da reti maging marinat ya angga king kabengian.

²⁵ Ing ninumang talan kareting mebanggit a lelangan ibilang yang e malinis angga itang kabengian, at kailangan ing pipian na ing imalan a susulud na.

²⁶ Ding sablang animal a bangal a kuku, oneng e ra naman lalangutan ing kakanan dang ibat king atian, e la malinis. Ituring yeng e malinis ing ninumang tagkil kareti.

²⁷ Ituring yu la namang e malinis ding sablang animal a tiapat a bitis a ating pangamus. Ing ninumang tagkil karing bangke da reti maging marinat ya angga king kabengian.

²⁸ Kailangan ing pipian na ing imalan a susulud na ning mekatagkil, at ituring yang marinat angga itang kabengian.

²⁹ Ding animal a galagala a ituring yung e malinis ila deti: ding dagis a bulilit, dagis pale at pasimundut; ding sablang barag;

³⁰ ing tuku, ing dapu, ing lupisak, ing timbabalak, at ing galakgak.

³¹ E la malinis deti at ing ninumang tagkil karing bangke ra ituring yang e malinis angga itang kabengian.

³² At nung ing bangke ning isanu pa man kareti atin yang digpanan a bage, maging marinat ya ita. Inya ing isanu mang kasangkapan a midagpanan karetikasangkapan ya o bage megawa king dutung, imalan, balat, silisyo o nanuman, sukat yang ibabad king danum, oneng manatili ya pamu ring e malinis angga itang kabengian.

³³ Nung dugpa la reti king kuran o balanga, maging e malinis ing sablang makaratuk karin. Sukat neng balbalan ing kasangkapan a midagpanan.

³⁴ At ing nanumang pamangan a mitugtugan king danum a makalulan kareting kasangkapan a digpanan da reting animal maging e malinis munaman. E munaman malinis ing inuman a makalulan kareting kasangkapan a midagpanan.

³⁵ Maging e malinis ing nanumang bage digpanan da ring bangke da reting animal; kasangkapan ya o kalang a kapsa, at sukat yang balbalan.

³⁶ Makanyan man, ing panibatan na ning danum o kaya ing talaga manatili yang malinis; pero ituring yang e malinis ing tagkil king bangke da reting animal.

³⁷ Nung dugpa la ding bangke da king bini a malapit nang itanam, manatiling malinis ing bini,

³⁸ nung makababad ing bini king danum at midagpanan king metung kareting mesabing mete animal, maging e malinis ing bini.

³⁹ Nung ing animal a malyaring kanan kabud nia mete, ing tagkil king bangke na niti maging e ya malinis angga king kabengian.

⁴⁰ At ing ninumang mangan king karni na ning animal a anti kaniti sukat nang pipian ing imalan a susulud na, at manatili yang e malinis angga king kabengian. Antimu rin, ing ninumang mibuat king bangke na ning mete animal sukat na namang pipian ing imalan a susulud na. Makanyan man, manatili yang e malinis angga king kabengian.

⁴¹ E kayu mamangan karing isanu man karing mangalating animal a gagapang king gabun,

⁴² agyang pang gagapang de reti ing atian da king gabun o lalakad la king kapamilatan da ring apat dang bitis o maygit apat a bitis.

⁴³ E yu la kakanan o tatagkilan man ing isanu man kareting mebanggit a e malinis a animal ban e kayu mituring e malinis.

⁴⁴ Aku ing Ginung kekayung Dios; inya ingatan yung malinis ing sarili yu, uling aku banal ku.

⁴⁵ Aku ing Ginu a milual kekayu ibat Ehipto ban aku ing maging Dios yu. Inya sukat kayung maging banal, uling aku banal ku.

⁴⁶ Ila deti ring tuntunan tungkul karing animal at ayup ampon karing kakawe lelangan at sablang gagapang king gabun.

⁴⁷ Kailangan ing balu yu ing pamiyaliwa na ning malinis ila ning e malinis; ing animal a malyaring kanan ila ning e malyaring kanan. fig,,,,,Ding animal a e malinis,(11)fig*

12

¹ Ngana ning Ginu kang Moises,

² Sabian mu karing memalen na ning Israel ing anti kaniti: Nung muktut ya ing ninumang babai at manganak yang lalaki, ituring yeng e malinis iting babai kilub ding pitung aldo, antimo nung makananu yang e malinis neng makaratang ing regla na.

³ Sukat yang masirkunsisyun king kawalung aldo ing anak.

⁴ Kaybat na nita, palabas ya pang atlung pulu't atlung aldo ing ima bayu ya ituring malinis. E ya sukat tatagkil king nanumang bage sagradu o lulub king banal a Tolda anggang e miras ing mitakdang panaun.

⁵ Nung babai ne man ing beit na, labing apat yang aldo ituring e malinis, antimo nung makananu yang e malinis neng makaratang ing regla na. Palabas ya pa munamang anam apulu't anam a aldo bayu ya ituring malinis.

⁶ Potang meganap na ing pangalinis na para king anak nang lalaki o babai, sukat yang magdalang metung a biserung tupa a pabanua tua bilang ain-a-durulukan ampon metung a patipati o kaya metung a batu-batu bilang ain-a-kapamayaran-king-kasalanan. Idala na la deti king pari tulid ning pasbul ning Toldang tuknangan ku, ing Ginu.

⁷ Ing pari ya ing miyain kareting ain na at gampanan ne ing seremonia na ning pangapatawaran a makalako king panga-dinatan na. Kaybat na nita, maging malinis ne. Iti ing tuntunan a sukat nang daptan ning babai kaybat nang menganak.

⁸ Nung e ne agyung iyain ing metung a biserung tupa, malyari yang magdalang kaparis a patipati o kaya kaparis a batu-batu; metung para king ain-a-durulukan at ing metung para king ain-a-kapamayaran-king-kasalanan. Gampanan ne ning pari ing seremonia na ning pangapatawaran a makalako king panga-dinatan na ning babaing ibat menganak. Kaybat na nita, maging malinis ne.

13

¹ Nganang migsalita ning Ginu kang Moises at Aaron,

² Nung kayaltawan yang baya ing ninuman king balat na o ating mangatdas o ating minaliwa kule king balat na at linto, atin yang sakit a lepra; sukat yang idala kang Aaron o king metung karing anak nang pari.

³ Siasatan ne ning pari ing sakit a linto king balat at nung ing buak-buakan king dake a ating sakit meputi at meyakit king ing sakit managlus lalam ning balat, iti lepra ya at ideklara neng e malinis ning pari ing anti kanitang taung ating sakit king balat.

⁴ Nung ing linto baya maputi ya at meyakit ing e makutkut a darasan king balat, at e maputi ing buak-buakan king dake a maki baya, ikalilua neng pitung aldo ning pari ing taung maki kapanamdaman.

⁵ King kapitung aldo siasatan neng pasibayu ning pari at nung king pamalak na ya naman a itsura ing baya at e ya mikalat, ikalilua neng pitu pang aldo.

⁶ Kaybat na ning kapitung aldo, siasatan neng pasibayu at nung kinayap ne ing baya at e ya mikalat, ideklara neng malinis na uling metung ya mung baya. Pipian na kanita ning mika baya ing susulud nang imalan at saka ya mandilu.

⁷ Nung ikua nang mikalat ning baya kaybat neng siniasat ning pari ampon dineklarang malinis, sukat yang makikit pasibayu king pari.

⁸ Siasatan neng pasibayu ning pari at nung mikalat ya ing baya, ideklara neng e malinis ing tau, uling ing sakit na lepra.

⁹ Nung mika lepra ya ing ninuman, kailangan yang idala king pari

¹⁰ ban siasatan ne sakit. At nung manakit yang makalbag a manimuti king balat na at meputi ing buak-buakan na at dakal ya nana,

¹¹ iti metung yang lepra a e kakayap. Ideklara neng e malinis ning pari; e na ne kailangan ikalilua pa, uling masala king e ya malinis.

¹² Nung ing sakit a ita mikalat na king katawan at nung laganas na manibat king buntuk angga na karing bitis,

¹³ siasatan neng pasibayu ning pari. Nung akit nang mikalat na king kabilugan nang katawan, ideklara na neng malinis ing taung ita. Nung meputi na ing heganagana nang balat, malinis ne pin.

¹⁴ Kabud ating linto sagiwang baya, e ya malinis.

¹⁵ Siasatan neng pasibayu ning pari at nung akit na king atin yang sagiwang laman, ideklara neng e malinis iting tau.

¹⁶ Nung kinayap ya ing sagiwang laman at muti yang pasibayu, kailangan yang makikit pasibayu king pari

¹⁷ ban palawe. At nung akit na ning pari ing meputi ya ing baya, malinis ne at ideklara na neng malinis ning pari.

¹⁸ Nung kayaltawan yang bukul ing ninuman king katawan na at kaybat kinayap ya,

¹⁹ oneng limbag yang pasibayu at meputi o melare, sukat yang makikit king pari ing taung ita.

²⁰ Siasatan ne ning pari at nung akit na ning pari king tataglus ya iti king laman at meputi ing buak-buakan na, ideklara ne kanitang e malinis. Uling ing linto lepra ya a megumpisa king tigsa.

²¹ Nung king pamaniasat na ning pari akit na king e meputi ing buak-buakan at e tataglus king laman nune maputla-putla ya mu, ikalilua neng pitung aldo ing taung ita.

²² Nung kinalat na king balat, ideklara neng e malinis, uling sakitan ya.

²³ Nung e ya magbayu itsura kilub ding pitung aldo at e ya kinalat metung ya mung bakas ning tigsa. Ideklara na neng malinis ning pari. fig,,,,,Siasatan ne ning pari...,(13:20)fig*

²⁴ Nung mepaltus ne man ing ninuman at ing mepaltus na melare ya o menamuti,

²⁵ siasatan ne ning pari. Nung ing buak-buakan king dake na ning mepaltus meging maputi at meyakit king malalam ya darasan kesa king makapaligid a balat, ita metung yang lepra a megumpisa king paltus. Ideklara neng e malinis ning pari ing taung ita.

²⁶ Nung akit na ning pari king ing buak-buakan king dake mepaltus e meputi at e tataglus king laman nune meputla mu, ikalilua neng pitung aldo.

²⁷ Siasatan neng pasibayu king kapitung aldo at nung kakalat ya, ideklara neng e malinis ning pari uling lepra ing kapanamdaman na.

²⁸ Nung ing dake mepaltus e migbayu ampon maputla ya mu kule at e mikalat, e ya lepra ita. Ideklara na neng malinis ning pari, uling ita biuk nia mu ning mepaltus.

²⁹ Nung ing metung a lalaki o babai keyaltawan yang baya king buntuk o king baba,

³⁰ siasatan ne ning pari. Nung ing kapanamdaman na tataglus king laman at ding buak-buakan na madilo-dilo la at mepinu, sakitan yang lepra. At ing taung keyaltawan kaniti ideklara neng e malinis ning pari.

³¹ Nung king pamaniasat na ning pari akit nang e malalam a tataglusan king balat at ala pang matuling a buak-buakan, ikalilua na nia mu kilub ding pitung aldo.

³² Kalabas na ning pitung aldo siasatan neng pasibayu ning pari, at nung ing sakit e mikalat at alang madilo-dilo buak-buakan karin at e tinaglus king laman,

³³ labahasan na na mu ning maki sakit ing buak-buakan a makapaligid king baya. Ikalilua ne pang pitung aldo ning pari.

³⁴ King kapitung aldo siasatan neng pasibayu ning pari ing baya, at nung e ya mikalat at e tinaglus malalam king laman, ideklara na neng malinis ning pari. Pipian na ning mika sakit ing susulud nang imalan at maging malinis ne.

³⁵ Nung kinalat ing baya kaybat nang mideklarang malinis,

³⁶ siasatan neng pasibayu ning pari. Nung kinalat ya ing baya, e na na kailangan manintun pang madilo-dilo buak-buakan; malino king e ya malinis ing tau.

³⁷ Nung king pamalak na ning pari e ya mikalat ing baya at tutubu na ing buak-buakan karin, kinayap ne ing baya. Ideklara na neng malinis ning pari.

³⁸ Nung ing ninuman kayaltawan yang maputla-putla king balat na,

³⁹ siasatan ne ning pari. Nung mamutla-mutla la, bakas la mu; malinis ya ing tau.

⁴⁰ Nung melugus ya buak ing metung a lalaki, e ya sukat ituring e malinis agyang mekalbu ya.

⁴¹ Nung melugus ing buak na king kanuan at malingmingan, kalbu ya; pero ituring yang malinis.

⁴² Nung lunto ya ing malare-lare baya king lugal a milako buak, lepra ya.

⁴³ Siasatan ne ning pari at nung ating malare-lare baya karin,

⁴⁴ ideklara neng e malinis, uling lepra ing sakit a linto king balat nang buntuk.

⁴⁵ Sukat yang misulud imalan a gabak-gabak ing taung mika lepra; paburen neng sabung-sabung ing buak na, takpan ne banda lalam ing lupa na at saka na ikulisak, Marinat ku, marinat ku!

⁴⁶ Anggang e mako ing sakit nang ita e ya malinis, at sukat yang lumaut karing tau. Manuknangan yang magdili-dili king lual na ning kampu.

⁴⁷ Nung kayakitanan yang kulapu ing imalan, lana ya man o linen o kaya

⁴⁸ kapirasung telang linen o lana o kaya king balat o nanumang gawa keng balat ning animal

⁴⁹ at ing linto kulapu mamerdi-merdi ya o kaya malare-lare, ita mikakalat yang sakit, inya sukat yang pasiasat king pari.

⁵⁰ Siasatan na iti ning pari at ilele nang pitung aldo.

⁵¹ Pangalabas na ning pitung aldo siasatan nang pasibayu at nung mikalat ing kulapu, ing imalan o ing nanumang susulud mideklarang e malinis.

⁵² Silaban na kanita ning pari, uling ita sakit a makayawa.

⁵³ Nung king pamaniasat na ning pari ikit nang e kinalat ing kulapu,

⁵⁴ iyutus na namu ing pipian da iti at ilele rang pitu pang aldo.

⁵⁵ Kaybat na nita, siasatan nang pasibayu ning pari at nung e menaliwa kule ing kulapu, agyang e mikalat, e pa mu rin malinis. Inya sukat silaban ita, maging ing sira a atyu king arap o king gulut.

⁵⁶ Nung king pamaniasat na, mewala na ing bakas na ning kulapu gupitan na itang king imalan o itang king kagamitan balat animal.

⁵⁷ Nung ating lunto pasibayung kulapu at kakalat, silaban na na ning makibandi.

⁵⁸ Nung pipian na at milako ing kulapu, pipian nang pasibayu at maging malinis na kanita.

⁵⁹ Iti ya ing tuntunan tungkul king kulapu a lunto king imalan, lana ya man o linen o king telang lana o nanu pa mang megawa king balat animal ban mayakit nung malinis ya o nung marinat ya.

14

¹ Ngana ning Ginu kang Moises,

² Iti ya ing tuntunan tungkul king pamaglinis king taung kinayap king sakit a lepra. King aldo a mideklara yang malinis, makikit ya king pari

³ at ituki ne ning pari king lual na ning kampu ban karin ne siasatan.

⁴ Nung kinayap na ing lepra na, iyutus na ning pari king magdala yang kaparis a ayup a mabie at malinis ampon kapirasung dutung a sedro, metung a malutung tali, at metung a kapakling sangang hisopo.

⁵ Kaybat, iyutus na ning pari ing paten ne ing metung karing ayup tulid na ning metung a banga a maki kasaklu-saklung danum.

⁶ Kaybat na nita, kuanan ne ing metung pang ayup at isoso ne iti king daya na ning mepate ayup at ing kapirasung dutung a sedro at ning taling malutu ampon ning kapakling sangang hisopo.

⁷ Pisikan neng pitung besis king daya ing taung bisang mideklarang melinis na king sakit na king balat. Kaybat na nita, ideklara na neng malinis. Ibulus ne king marangle itang ayup a makatagan.

⁸ Pipian na ning taung mideklarang malinis ing susulud nang imalan at pakalbu ne ing buntuk na at saka ya mandilu. Kanita malinis ne. Malyari neng lungub king kampu, pero sukat yang manuknangan pitu pang aldo lual na ning tolda na.

⁹ King kapitung aldo, pasibayu yang pakalbu, labahasan na ing balbas na, ing kile na, at ing heganaganang buak na king mabilug nang katawan; pipian na ing susulud nang imalan at saka ya mandilu. Maging malinis ne kanita.

¹⁰ King kawalung aldo magdala yang aduang biserung lalaking tupa at metung a biserung babaing tupa a pawang pabanua tua at alang dipektu, limang litrung arinang singkapan larung olibo, at kapitnang litrung larung olibo.

¹¹ Ituki ne ning pari ing tau pati na ing regalung darala na king pasbul ning Toldang tuknangan ku, ing Ginu.

¹² Kuanan ne ning pari ing metung karing biserung lalaking tupa at ing kapitnang litrung larung olibo iyain ne king Ginu bilang ain-a-kapaglarinan-king-kasalanan.

¹³ Paten ne kanita ing biserung tupa king banal a lugal nung nu ra la papaten ding animal a miyayain para king ain-a-kapamayaran-king-kasalanan ampon ding para karing ain-a-durulukan. Daptan na iti uling ing ain-a-kapaglarinan-king-kasalanan anti ya king ain-a-kapamayaran-king-kasalanan, mangaintulid ya king pari. Iti metung a bage sagradu.

¹⁴ Kuma yang ditak ing pari king daya na ning biserung tupang mepate at ikaskas na king pingul nang balugbug a wanan ning taung lilinisan at king tindaragul na ning gamat nang wanan ampon king tindaragul ning bitis nang wanan.

¹⁵ Kuma yang ditak king larung olibo ing pari at itugtug na king sarili nang kayling palad

¹⁶ at isoso ne kaniti ing metung a taliri ning gamat nang wanan at saka na ipisik pitung besis iting laru karin king arapan ku, ing Ginu.

¹⁷ Kaybat na nita, kuma yang ditak ketang larung atyu king palad na at ditak ketang daya ning biserung tupa, at ikaskas na iti king pingul nang balugbug a wanan ning taung lilinisan, antimu rin king tindaragul na ning gamat nang wanan at king tindaragul na ning bitis nang wanan.

¹⁸ Kaybat, ikaskas na ing larung makatagan king palad na king buntuk na ning tau bilang kapamayaran kasalanan kanaku, ing Ginu.

¹⁹ Kaybat na nita, iyain ne ning pari ing ain-a-kapamayaran-king-kasalanan ban mipatawaran ya ing taung bisang linisan. At kaybat, paten ne ing animal para king ain-a-durulukan

²⁰ at iyain ne iti pati na ing ain-a-binutil king altar. Makanyan nang gampanan ning pari ing seremonia na ning pamaglinis, at maging malinis ya ing tau.

²¹ Nung pakakalulu ne man ing tau at e na agyung ibie iti, malyari yang magdalang metung mung biserung lalaking tupa para king pangadeklara nang malinis bilang ain-a-kapaglarinan-king-kasalanan, adua mung litrung arina a singkapan larung olibo bilang ain-a-binutil at kapitnang litrung larung olibo.

²² Magdala ya namang aduang patipati o kaya aduang batu-batu; ing metung para king ain-a-kapamayaran-king-kasalanan at ing metung para king ain-a-durulukan.

²³ King kawalung aldo idala na la deti king pari karin king pasbul ning Toldang tuknangan ku, ing Ginu.

²⁴ Kuanan ne ning pari ing lalaking biserung tupa at ing larung olibo, at saka na la iyampang bilang makabukud a regalu kanaku, ing Ginu, para king pari.

²⁵ Paten ne ing biserung tupa at kuma yang ditak a daya at ikaskas na king pingul nang balugbug a wanan ning tau, at king tindaragul na ning gamat nang wanan ampon king tindaragul na ning bitis nang wanan.

²⁶ Mitugtug yang ditak a laru ing pari king palad nang kayli;

²⁷ at king metung nang taliri ning wanan nang gamat ipisik nang pitung besis iting laru karin king arapan ku, ing Ginu.

²⁸ Ikaskas na naman ing ditak a laru ketang pikaskasan na king daya ning biserung tupa king pingul ning balugbug nang wanan ning tau, king tindaragul na ning gamat nang wanan ampon king tindaragul na ning bitis nang wanan.

²⁹ Ing mitagan king laru king palad na ya ing ikaskas na king buntuk na ning tau bilang panatbus king arapan ku, ing Ginu.

³⁰ Kaybat, iyain ne ing metung karing pitsun a patipati o batu-batu

³¹ bilang ain-a-kapamayaran-king-kasalanan, at ing metung naman bilang ain-a-durulukan pati na ing ain-a-binutil. Iti ya ing seremoniang daptan na ning pari para linisan ya ing taung mika sakit.

³² Iti ya ing tuntunan para king taung misakitan king lepra king balat a e na agyung munie ketang karaniwan a ain a karapatdapat iyain para king pangalinis na.

³³ Ngana pang migsalita ning Ginu kang Moises at Aaron,

³⁴ Potang miras na kayu Canaan, ing gabun a ibabie ku kekayu, at mika sakit a kulapung makayawa karing bale tuknangan yu,

³⁵ agad nang ipabalu iti king pari ning mekatuklas.

³⁶ Iyutus na kanita ning pari ing ilual da king bale ing sablang laman na ning bale bayu ya datang karin ban siasatan ne ing linto kulapu; nung ali ing sablang dasnan na kilub na ning bale mideklarang e munaman malinis. Kaybat na nita, munta ne ing pari king bale.

³⁷ Lawan na ing kulapu. Nung ating dake a mamerdi-merdi o malare-lare a linto king pader ning bale,

³⁸ lumual ya king bale at ikandadu neng pitung aldo.

³⁹ Magbalik ya king kapitung aldo ban siasatan neng pasibayu. Nung mikalat ing kulapu,

⁴⁰ iyutus nang ilako da la ring batung keyakitan kulapu at ipayugse na la king basurahan a atyu king lual na ning balen. ...ilako da la ring batung keyakitan kulapu...(14:40)

⁴¹ Kaybat na nita, pabakbak na ngan ing palitada king kilub na ning bale at ipayugse na king basurahan lual na ning balen.

⁴² Kaybat, alilan lang bayu ding batung mebaklas at palitadanan yang pasibayu ing kilub na ning bale.

⁴³ Nung lunto pasibayu ing kulapu kilub na ning bale kaybat dang miyalilan ding batung apektadu ampon mepalitada na,

⁴⁴ munta yang pasibayu ing pari ban gawang pamaniasat. Nung mikalat ing sakit, e ya malinis ing bale;

⁴⁵ sukat yang lasakan at ding batu ampon dutung na, at idala lual ning balen ing heganaganang palitada na at iyugse king basurahan.

⁴⁶ Maging e ya malinis ing ninumang lungub king bale kabang makakandadu ya angga na king kabengian.

⁴⁷ Ninuman ing magkera karin o mangan kilub na ning bale sukat nang pipian ing susulud nang imalan.

⁴⁸ Potang magbalik ya ing pari king bale at ikit nang e na linto pasibayu ing kulapu kaybat nang mibayu palitada, ideklara na neng malinis na.

⁴⁹ Potang ideklara neng malinis na ing bale, kuma yang aduang malating ayup, metung a kapirasung dutung a sedro, taling malutu, at kapakling sangang hisopo.

⁵⁰ Paten ne ing metung karing ayup king tulid na ning metung a banga a ating kasaklu-saklung danum.

⁵¹ Kaybat, kuanan ne ing dutung a sedro, ing hisopo, ing taling malutu ampon ing ayup a mabie. Isoso na la deti king daya na ning ayup a mepate ampon king kasaklu-saklung danum. Pisikan ne kanitang pitung besis ing bale.

⁵² Makanyan neng linisan ing bale king kapamilatan na ning daya ning ayup, king kasaklu-saklung danum, king mabie ayup, king dutung a sedro, king kapakling sangang hisopo, at king taling malutu.

⁵³ Kaybat na nita, ibulus ne ing ayup a mabie king marangle lual ning siudad. King makanyan a seremonia ya luminis ing bale at maging malinis ya.

⁵⁴ Ila deti ring kautusan tungkul king sakit a lepra at king nanumang makatakut a sakit king balat

⁵⁵ at king kulapu karing imalan o karing bale,

⁵⁶ karing baya o nanumang sugat a tutubu king katawan.

⁵⁷ Deting kautusan ila ring pagbatayan nung malinis ya o e malinis ing tau o ing nanumang bage.

15

¹ Ngana ning Ginu kang Moises at Aaron,

² Sabian yu iti karing memalen ning Israel. Potang ating tutulu king kasangkapan ning metung a lalaki, e malinis ing tutulung ita.

³ Iti ya ing tuntunan a tukian na, tuknang man o ali ing tulu uling e ya pa mu rin malinis.

⁴ Maging e munaman malinis ing isanu mang pigkeran na o piluluklukan na.

⁵ Sukat nang pipian ing susulud nang imalan ning ninumang makatagkil king pagkeran na, at saka ya mandilu, at ituring yang e malinis angga king kabengian.

⁶ Makanyan munaman ing daptan na ning linukluk king luklukan na; pipian na ing susulud nang imalan, at saka ya mandilu. Ituring ya namang e malinis angga king kabengian.

⁷ Ing ninumang makatagkil king lalaking ating tulu sukat nang pipian ing susulud nang imalan at saka ya mandilu, oneng manatili yang e malinis angga king kabengian.

⁸ Nung aluran ne ning lalaking ating tulu ing taung malinis, sukat nang pipian ning taung miluran ing susulud nang imalan at saka ya mandilu, oneng manatili yang e malinis angga king kabengian.

⁹ Ituring yang e malinis ing isanu mang luklukan ning animal a liklukan na ning lalaking ating tulu.

¹⁰ Ituring yang e malinis ing ninumang makatagkil king nanumang apagkeran na ning lalaking ating tulu. At ing ninumang magdala ketang aluklukan na sukat nang pipian ing susulud nang imalan at saka ya mandilu, oneng manatili yang e malinis angga king kabengian.

¹¹ Nung e na la pa inos ding gamat na ning lalaking ating tulu at talnan ne ing metung a tau, sukat nang pipian ning taung atalan na ing susulud nang imalan at saka ya mandilu, oneng manatili yang e malinis angga king kabengian.

¹² Ing isanu mang kasangkapan a kapsa a tagkilan na ning taung ating tulu sukat yang balbalan, at sukat yang wasan ing isanu mang kasangkapan a megawa king dutung a atagkilan na.

¹³ Nung kumayap ya ing taung ating sakit king anti kaniti, manaya ya pa mung pitung aldo, at kaybat na nita pipian na ing susulud nang imalan at saka ya mandilu king kasaklu-saklung danum. Kanita ya pa mu maging malinis.

¹⁴ Karas ning kawalung aldo magdala yang aduang patipati o kaya aduang batu-batu king pasbul ning Toldang tuknangan ku, ing Ginu.

¹⁵ Iyain ne ning pari ing metung kareti bilang ain-a-kapamayaran-king-kasalanan at ing metung naman bilang ain-a-durulukan. King anti kaniting seremonia ne linisan ning pari ing lalaking ating tulu.

¹⁶ Nung kelualan yang bini ing metung a lalaki, sukat yang mandilu, oneng manatili yang e malinis angga king kabengian.

¹⁷ Sukat linisan ing isanu mang imalan o balat animal a mituluanan king bini, oneng manatiling e malinis angga king kabengian.

¹⁸ Kaybat dang misiping ning metung a lalaki at ning metung a babai, sukat lang parehung mandilu, oneng manatili lang e malinis angga king kabengian.

¹⁹ Neng makaratang ya regla ing ninumang babai, manatili yang e malinis kilub ding pitung aldo. Ing ninumang makatagkil keting babai manatili ya namang e malinis angga king kabengian.

²⁰ Maging e malinis ing isanu mang bage aluklukan na o apagkeran na kabang makaratang ing regla na.

²¹ Sukat yang mandilu ing ninumang makatagkil king pagkeran na; pipian na ing susulud nang imalan at saka ya mandilu, oneng manatili yang e malinis angga king kabengian.

²² Sukat yang mandilu ing ninumang makatagkil king nanumang aluklukan na niting babai; pipian na ing susulud nang imalan, oneng ituring yang e malinis angga king kabengian.

²³ Ituring yang e malinis angga king kabengian ing ninumang makatagkil king nanumang atyu king pagkeran na o luluklukan na niting babai.

²⁴ Ing ninumang lalaking sumiping king babaing atyu king panaun na ning pamagregla na miyawa ya king dinat na, at manatili yang e malinis kilub ding pitung aldo. Maging e malinis munaman ing nanumang pigkeran na.

²⁵ Nung dumaya ya ing ninumang babai king aldo a e na pamagregla o nung kumaba king sadia nang pamagregla, ituring yang e malinis kabang daraya ya, antimo nung makananu yang e malinis king panaun na ning pamagregla na.

²⁶ E munaman malinis ing nanumang pigkeran na o liklukan na kilub ding aldong deta.

²⁷ Maging e ya malinis ing ninumang tagkil kareti; sukat nang pipian ing susulud nang imalan at saka ya mandilu, oneng manatili yang e malinis angga king kabengian.

²⁸ Kaybat nang tinuknang ning pamandaya ning babai, manaya ya pang pitung aldo bayu ya maging malinis.

²⁹ King kawalung aldo magdala yang aduang pitsun a patipati o kaya aduang batu-batu king pari king pasbul ning Toldang tuknangan ku, ing Ginu.

³⁰ Iyain ne ning pari ing metung kareti bilang ain-a-kapamayaran-king-kasalanan at ing metung bilang ain-a-durulukan. King anti kaniting seremonia ne linisan ning pari ing babai king arapan ku, ing Ginu.

³¹ Makanyan yu lang ingatan ding memalen na ning Israel tungkul king karelang e pangamalinis, nung ali mate la arapan na ning altar ku, ing Ginu, a atyu libutad da, nung dinatan de.

³² Ila deti ring tuntunan tungkul king lalaking ating tutulu king kasangkapan na o kalulualan bini,

³³ at king babaing magregla ampon king lalaking makisiping king babaing e malinis.

16

¹ Migsalita ya ing Ginu kang Moises kaybat na ning pangamate da ring adua nang anak a lalaking Aaron uli na ning pamaglapit da king Ginu king paralan a e karapatdapat.

² Ngana ning Ginu kang Moises, Sabian mu kang Aaron a kapatad mu king e nia kabud lulub king tabing ning Kabanal-banalan a Lugal nune mu king mitakdang panaun, uling karin ku papakit libutad ning metung a biga tulid ning takap ning Kaban ning Kasunduan. Mate ya, nung e ya tupad kaniti.

³ Oneng malyari yang lungub king Kabanal-banalan a Lugal pota mung kaybat nang mekayain metung a biserung toro bilang ain-a-kapamayaran-king-kasalanan, at metung a lalaking tupa bilang ain-a-durulukan.

⁴ Sukat ya pa mung mandilu i Aaron bayu ya lungub king Kabanal-banalan a Lugal, at kaybat isulud na la ring imalan-pari; ing barung linen a makaba takde ampon ding salol a makuyad, ing paha at ing linen a turban.

⁵ Dinan ne ning balen Israel aduang kambing a lalaki i Aaron bilang ain-a-kapamayaran-king-kasalanan at metung a lalaking tupa bilang ain-a-durulukan.

⁶ Miyain ya namang metung a toro bilang ain-a-kapamayaran-king-kasalanan para king sarili nang kasalanan, at para karing kasalanan da ring pamilya na.

⁷ Kaybat na nita, idala na la ring aduang kambing king tulid nang pasbul ning Toldang tuknangan ku, ing Ginu.

⁸ King kapamilatan na ning bagutan abalu na nung isanu kareting aduang kambing ing mangaintulid kanaku, at nung isanu ing mangaintulid kang Azazel.

⁹ Paten ne ing kambing a para kanaku, at iyain neng Aaron bilang ain-a-kapamayaran-king-kasalanan.

¹⁰ Iyain neng mabie Aaron kanaku, ing Ginu, ing kambing para kang Azazel at saka ne ibulus king disyerto papunta kang Azazel ban ilako na niti ing kasalanan da ring tau.

¹¹ Paten neng Aaron ing toro at iyain ne bilang ain-a-kapamayaran-king-kasalanan para king kasalanan na at ning pamilya na.

¹² Kaybat, kuanan ne ing insensaryung mitmung mibabayang uling king altar. Kuma ya namang aduang kasakmal a mabanglung insensong mapinu at idala na iti kilub na ning Kabanal-banalan a Lugal.

¹³ Karin king arapan ku, ing Ginu, ibili na king uling a mibabaya ing insenso ban pampanan ne ning asuk ning insenso ing takap na ning Kaban ning Kasunduan ban e ne akuang akit at e ya mate.

¹⁴ Kuma yang ditak king daya na ning toro at king kapamilatan na ning taliri na ipisik na king tulid ning takap, at kaybat ipisik na namang pitung besis ing daya king arap na ning Kaban ning Kasunduan.

¹⁵ Kaybat na nita, paten ne ing kambing para king ain-a-kapamayaran-king-kasalanan da ring tau. Idala na ing daya na niti kilub na ning Kabanal-banalan a Lugal, at ipisik na king babo na ning takap, at kaybat king arap ning Kaban ning Kasunduan, antimo ing depatan na king daya ning toro.

¹⁶ King anti kaniting paralan na gampanan ing seremonia na ning pamaglinis na king Kabanal-banalan a Lugal ketang nanumang dinat a ibat karing memalen na ning Israel at king sabla rang kasalanan. Makanyan munaman ing sukat nang gawan king Tolda, anti na ning iti makatalakad ya libutad na ning kampu a karaniwan lugal a e malinis.

¹⁷ Alang aliwang taung lulub king Tolda king penandit a lungub ya i Aaron king Kabanal-banalan a Lugal ban gampanan na ing pamaglinis king kasalanan na, king pamilya na, at para king kasalanan na ning balen.

¹⁸ Kalual na munta ya king altar a pidurulukan karing ain at saka ne linisan iti. Kuma yang ditak king daya na ning toro at ditak king daya na ning kambing, at saka na ikaskas karing sagu a makapaligid king altar.

¹⁹ King kapamilatan na ning taliri na pisikan neng pitung besis king daya ing altar ban maging sagradu ya at luminis ya ketang sabla rang pamikasala ding memalen na ning Israel.

²⁰ Potang agampanan na nang Aaron ing pamanain para king pamaglinis king Kabanal-banalan a Lugal, king aliwa na pang dake ning Toldang tuknangan ku, ing Ginu, at para king altar, iyampang na ne kanita ing kambing a mabie a mepili para kang Azazel.

²¹ Itumpak na la ding adua nang gamat king buntuk na ning kambing at sabian na tulid na ning kambing ing sablang dapat dang e ustu at kasalanan ding memalen na ning Israel. King makanyan a paralan milipat king buntuk na ning kambing ing sablang iti. Kaybat na nita, itabi ne ning metung a lalaking mitulduan ganap kaniti ing kambing papunta king disyerto.

²² Idala na ngan mako ning kambing ing sabla rang kasalanan, at idala na king lugal a e na panuknanganan ning ninumang tau. fig,,,,,Idala na ngan mako ning kambing ing sabla rang kasalanan.,(16:22)fig*

²³ Kaybat na nita, lungub ya i Aaron king Tolda; ilukas na ing imalan nang pari a sinulud na bayu ya linub king Kabanal-banalan a Lugal at lakuan na karin.

²⁴ Mandilu ya king metung a lugal a sagradu at isulud na ing sarili nang imalan. Kaybat na nita, lumual ya at iyain ne ing ain-a-durulukan para king sarili nang kasalanan at para karing memalen.

²⁵ Dulukan na naman king altar ing taba na ning animal para king ain-a-kapamayaran-king-kasalanan.

²⁶ Ita namang lalaking mitabi king kambing papunta kang Azazel king disyerto, sukat yang mandilu at saka na pipian ing susulud nang imalan bayu ya magbalik lungub king kampu.

²⁷ Ing toro at ing kambing a magamit para king ain-a-kapamayaran-king-kasalanan a dela ra daya kilub ning Kabanal-banalan a Lugal ban makalako king kasalanan sukat lang idala lual na ning kampu at dulukan la karin. Sukat ngan silaban ing balat, ing karni, at ing bituka.

²⁸ Sukat nang pipian ing susulud nang imalan ning taung manyilab kaniti, at saka ya mandilu bayu ya magbalik lungub king kampu.

²⁹ Iti ya ing tuntunan a sukat tuparan king kapilan pa man. Balang kapulung aldo ning kapitung bulan, ding Israelita at ding dayuan a makipamalen karela sukat lang mag-ayunu at e bitasang magobra.

³⁰ King aldong ita marapat ing pamaglinis karela king sabla rang kasalanan ban maging malinis la arapan ku, ing Ginu.

³¹ Ing aldong ita sukat yang maging sagradu, uling aldo ne ning pamag-ayunu at ganap a pamagpaynawa king obra. Tuparan ye iting tuntunan king sablang panaun.

³² Ing Pamuntuk da ring Pari a miyordinan at mitalaga kayalili nang tata na, ya ing ganap king pamaglinis king kasalanan. Isulud na ing imalan-pari

³³ at gampanan na ing pamaglinis king kasalanan karin king Kabanal-banalan a Lugal ning Toldang tuknangan ku, ing Ginu, king altar para karing pari, at karing sablang memalen.

³⁴ Manatili ya iting tuntunan king sablang panaun; tuparan ya misan kilub ning pabanua ban mipatawaran ing sabla rang kasalanan. At tiparan nang Moises ing sablang inutus na ning Ginu.

17

¹ Ngana ning Ginu kang Moises,

² Sabian mu la deting tuntunan kang Aaron at karing anak nang lalaki ampon karing sablang memalen na ning Israel.

³ Ing ninumang Israelita a makamate toro o tupa o kambing para iyain, at pete ne iti king kilub o king lual na ning kampu

⁴ at e king tulid ning pasbul ning Toldang tuknangan ku, ing Ginu, mikasala ya at sukat yang itiwalag king balen ku.

⁵ Ing parasan na niting tuntunan ya itang idala la king arapan ku, ing Ginu, detang animal lugal king paten da la king marangle. Sukat da lang idala king pari karin king tulid nang pasbul ning Tolda at paten bilang ain-ning-pamisulusulu.

⁶ Ipisik na ning pari ing daya da reting animal king altar a atyu king lele nang pasbul ning Tolda. Dulukan na ing taba ban mika mabanglung bau a babie tula kanaku, ing Ginu.

⁷ Inya e na la sukat magtaksil king kapamilatan na ning pamakamate ra karing karelang animal para iyain da karing demonyung kambing a sasamban da. Iti ya ing tuntunan a sukat dang tuparan king kapilan pa man.

⁸ Ing ninumang Israelita o dayuan a kayabe ra a miyain ain-a-durulukan o nanumang sakripisyu

⁹ nu man karin subali mu king tulid ning pasbul ning Tolda, itiwalag ya king balen ku.

¹⁰ Maging kalaban ke ing ninumang mangan daya at itiwalag ya king kapulungan, Israelita ya man o dayuan.

¹¹ Uling ing bie atyu king daya at iti ya ing sangkan nung inya aku, ing Ginu, inutus ku king idala ing daya king altar ban panatbus king bie yu at king kasalanan da ring tau. Uling ing bie atyu king daya at ya ing makalako king kasalanan.

¹² Inya e sukat mangan daya ing ninuman, Israelita ya man o dayuan.

¹³ Nung ing ninumang Israelita o dayuan a kayabe yu, makarakap yang animal o ayup a apangan, sukat nang patulu king gabun ing daya na niti at kaybat takpan nang gabun.

¹⁴ Uling atyu ing bie ning balang lelangan king daya na, inya babawal ku ing mangan daya. Itiwalag ya ing ninumang labag kaniting tuntunan.

¹⁵ Ing ninumang mangan, Israelita ya man o dayuan, king karni na ning animal a mete na kabud o kaya piglapak da ring mabangis a animal, sukat nang pipian ing susulud nang imalan at mandilu ya, oneng ituring yang e malinis angga king kabengian.

¹⁶ Pagdusan na ing pamikasala na nung e na daptan ing anti kaniti.

18

¹ Ngana ning Ginu kang Moises,

² Sabian mu karing memalen na ning Israel king aku ing Ginung kekayung Dios.

³ E yu pakiapusan ing ugali da ring tau Ehipto nung nu kayu menuknangan king misan a panaun ni ding taung dasan yu Canaan nung nu ra kayu darala ngeni.

⁴ Pamintuan yu la ding utus ku at daptan yu itang parapat ku kekayu. Aku ing Ginung kekayung Dios.

⁵ Inya pamintuan yu la ding utus ku. Mika bie ya ing mamintu. Aku ing Ginu.

⁶ E kayu makipangatawan karing malapit yung kamaganak. Aku ing Ginu.

⁷ E me sisiran a dangalan i tata mu king kapamilatan na ning pamakipangatawan mu king mismung ima mu. E me sisiran a dangalan i ima mu.

⁸ E me sisiran a dangalan i tata mu king kapamilatan na ning pamakipangatawan mu king ninuman karing asawa na.

⁹ E ka makipangatawan king kapatad mung babai o king babaing kasing-ibpa mu o kasing-ima mu, maging iti meging kayabe meng meragul king metung a bale o ali me.

¹⁰ E ka makipangatawan king ninuman karing anak dang babai ding anak mu; iti makasirang puri keka.

¹¹ E ka makipangatawan king anak nang babai ning asawa nang tata mu, uling kapatad mia naman.

¹² E ka makipangatawan king kapatad nang babai ning tata mu, uling dara me.

¹³ E ka makipangatawan king kapatad nang babai ning ima mu, uling dara mia naman.

¹⁴ E ka makipangatawan king asawa nang bapa mu, uling dara mia naman.

¹⁵ E ka makipangatawan king manuyang mung babai, uling asawa ne ning anak mu.

¹⁶ E ka makipangatawan king bayo mung babai, uling asawa ne ning kapatad mu.

¹⁷ E ka makipangatawan king anak nang babai o apu ning babaing meging kasese mu, pota deti kamaganak mu la at iti e mayap.

¹⁸ E ka malyaring makiasawa king kapatad nang babai ning asawa mu kabang mabie ya pa ing asawa mu.

¹⁹ E ka makipangatawan king ninumang babai kabang atin yang regla, uling e ya malinis king kabilian nang anti kanita.

²⁰ E ka makipangatawan king asawa na ning kalupa mung tau, uling midinatan ka.

²¹ E me babie ing ninuman karing anak mung babai para magamit king pamanyamba king dios a i Molek, uling iti kalapastanganan king lagyu na ning kekang Dios. Aku ing Ginu.

²² E ya sukat makipangatawan ing ninumang lalaki king kalupa nang lalaki, uling ing anti kaniti makasumami.

²³ E ya sukat makipangatawan ing ninumang lalaki king kaisanu mang animal. E na naman dapat babie ning babai ing katawan na king metung a animal; ing anti kaniting dapat tune e mayap.

²⁴ E yu dirinatan ing pangatau yu king isanu man kareting dapat, uling makanyan ing depat da ring bansang minuna kekayu. Inya simpa ku la.

²⁵ Mirinatan ya ing bansa king uli na ning e mayap a piniapat da. Inya parusan ku la at isakuil.

²⁶ Ikayu ngan, Israelita ya man o dayuan, sukat kayung tupad karing kautusan ku at panabilin; e yu pakiapusan ing makasumaming depat da.

²⁷ Dinatan de ing gabun ding taung minunang menuknangan king lugal a iti king kapamilatan na ning makasumaming dapat da.

²⁸ Kabud mekiapus kayu king ugali ra, itabi ra kayu king lugal a iti nung makananu ku lang tinabi.

²⁹ Itiwalag ya king balen na ning Dios ing ninumang darapat king kaisanu pa man kareting makasumaming bage.

³⁰ Inya sukat yung tuparan ing inutus ku kekayu, at e yu pakiapusan ing makasumami rang ugali ban e kayu midinatan kareting dapat. Aku ing Ginung kekayung Dios.

19

¹ Ngana ning Ginu kang Moises,

² Sabian mu karing memalen na ning Israel: Magpakabanal kayu, uling aku, ing Ginung kekayung Dios, banal ku.

³ Igalang la ding pengari yu at ipangiling ya ing Aldo ning Sabbath. Aku ing Ginung kekayung Dios.

⁴ E kayu susuyu karing kikilalanan dang dios ni gagawang idolo ban samban. Aku ing Ginung kekayung Dios.

⁵ Nung miyayain kayung ain-ning-pamisulusulu kanaku, ing Ginu, tukian yu la ding tuntunan a binie ku kekayu ban tanggapan ku ing ain yu.

⁶ Kanan yu ing karni na ning animal a yayain yu king aldo mu rin a inain ye o itang kabukasan. Silaban yu itang mitagan.

⁷ E na karapatdapat kanan ita king katlung aldo, uling e ku ne tanggapan ing ain yu.

⁸ Mikasala ya ing ninumang mangan kaniti, uling kalapastanganan ita king metung a sagradung bage. Itiwalag ke king balen ku ing ninumang labag kaniti.

⁹ Neng papalut na kayu king kekayung marangle, e yu pakipalut itang atyu king lele nang angganan ning gabun yu, at e yu na babalikan pa itang melakuan.

¹⁰ E yu la ngan agtalan ding bunga da ring ubas yu o pupulutan ding menabu king gabun; lakuan yu na la para karing pakakalulu at dayuan. Aku ing Ginung kekayung Dios.

¹¹ E kayu manako o mamirait o maglaram.

¹² E kayu mangaku king kapamilatan na ning pamangamit king lagyu ku, nung e yu mu rin tuparan ing pangaku yu; kalapastanganan iti king lagyu ku. Aku ing Ginu.

¹³ E ye sasamantalanan o panakawanan ing ninuman ni ipagkait ding bayad ning taung kinua yung magobra; e yu ipagpaliban ing upa na kilub ning kabukas.

¹⁴ E ye panagkasanan ing taung maklak ni mibibiling sabagal king daralanan na ning bulag. Tumakut kayu king Dios. Aku ing Ginu.

¹⁵ Maging tapat kayu at makatuliran neng babie kayung kayatulan karing piamanuan arapan na ning piukuman; e kayu mangabiran karing pakakalulu ni tatakut karing mabandi.

¹⁶ E yu kakalat ing nanu pa mang e tutu tungkul king ninu pa man o magtestigu king e katutuan ban mipahamak ya. Aku ing Ginu.

¹⁷ E kayu tatanam mua laban kenu man nune makipagsalita kayung tapatan ban e kayu mikasala king uli na.

¹⁸ E kayu mamablas kaninu man ni tatanam samang lub. Luguran ye ing kalupa yung tau antimo ing pamaglugud yu king sarili yu. Aku ing Ginu. fig,,,,,E kayu tatanam mua...,(19:17)fig*

¹⁹ Tuparan yu la ding kanakung utus. E yu la papaglahian ding sese yung animal karing e ra kauri. E kayu sasalbag aduang klasing bini king metung mung kapirasung gabun. E kayu misusulud imalan a megawa king aduang uring material.

²⁰ Nung makipangatawan ya ing metung a lalaki king babaing ipus a makatakdang pakasal king aliwa, at e ya pa meyatbus o malaya, siasatan ing bage mepalyari; e la kailangan paten.

²¹ Makanyan man, sukat yang magdalang metung a lalaking tupa ing lalaki king tulid na ning pasbul ning Tolda, at iyampang ne bilang ain-a-kapaglarinan-king-kasalanan.

²² Gampanan na ning pari ing seremonia na ning pangapatawaran ban mipatawaran ya kasalanan ing lalaking mikasala. At aku, ing Ginu, patawaran ke.

²³ Potang ikua yu nang miras king lugal a babie ku kekayu at mananaman nang miyayaliwang tanaman a mamunga, ituring yu lang e karapatdapat kanan ding bunga ra kilub ding atlung banua.

²⁴ Karas na ning kapat a banua iyain yu la ring sablang bunga ra bilang ain a pakilala king kapasalamatan yu kanaku, ing Ginu.

²⁵ Pero king kalimang banua malyari na kayung mangan karing bunga ra. Nung tuparan yu iti, lalu lang mamungang dakal ding tanaman a tenam yu. Aku ing Ginung kekayung Dios.

²⁶ E kayu mamangan king isanu mang karning atin pang daya. E kayu gagawang nanumang pamagsalamangka o pamangkukulam.

²⁷ E yu ururan ing buak yu king malingmingan ni pupututan ding balbas yu.

²⁸ E kayu pabiling tatu karing katawan yu o paniugatan ing katawan yu para ipasiag yu ing kalungkutan yu karing mete. Aku ing Ginu.

²⁹ E yu la lalako dangalan ding anak yung babai king pamipaintulut yung magamit la bilang magtinda king karelang katawan kilub da ring templo. Ing dapat a anti kaniti metung yang pamaniuyu karing dios a e tutu, at maging dalan ne ning dakal a imoralidad king bansa.

³⁰ Pangilinan ye ing Aldo ning Sabbath at igalang ye ing lugal nung nu ra ku sasamban ding tau. Aku ing Ginu.

³¹ E kayu maniawad kausukan karing mamamanula o karing espiritista a makipagsalita karing mete. Midinatan kayu kabud sinangguni kayu karela. Aku ing Ginung kekayung Dios.

³² Galangan yu la ding makatua at mika takut kayu at kagalangan kanaku, ing Ginu. Galangan yu la ding makatua...(19:32)

³³ E yu la daraptanan e ustu ding dayuan a makipanuknangan king bansa yu.

³⁴ Pakiutusan yu lang antimo nung makananu yeng pakiutusan ing kalupa yung Israelita, at luguran yu la antimo ing pamaglugud yu king sarili yu. E yu sa kakalinguan king kanitang misan dayuan kayu naman karin king Ehipto. Aku ing Ginung kekayung Dios. fig,,,,,...luguran yu la antimo ing pamaglugud yu king sarili yu.,(19:34)fig*

³⁵ E ye pamiraitnan ing ninuman king kapamilatan na ning pamangamit yung e ustung paniukad o timbangan o kaya takal.

³⁶ Gumamit kayu karing ustung paniukad, timbangan, at panakal. Aku ing Ginung kekayung Dios a milual kekayu king Ehipto.

³⁷ Pamintuan yu la sa ding sabla kung kautusan at panabilin. Aku ing Ginu.

20

¹ Nganang sinabi ning Ginu kang Moises,

² Sabian mu karing memalen na ning Israel king ing ninuman karela o ing ninumang dayuan a makipamalen karela a miyain karing anak na ban magamit king pamanyamba kang Molek a kikilalanan dang dios paten ya king kapamilatan na ning basibas batu.

³ Aku mismu isakuil ke at itiwalag bilang miembru na ning balen Israel, nung ing ninuman munie yang anak kang Molek. Kalapastangan ing anti kaniting dapat king kanakung santuaryu at king banal kung lagyu.

⁴ Nung e ra pinsingan ding memalen ing depat nang pamaglapastangan at e re pepapate,

⁵ aku mismu isakuil ke at ing pamilya na ampon ding sablang katubale na. Itiwalag ke pati na detang mekiabe king pamanyamba kang Molek.

⁶ Nung ing ninuman linapit yang maniawad kausukan karing mamamanula at karing espiritistang makipagsalita karing mete, isakuil ke at itiwalag king pangamiembru na king balen Israel.

⁷ Italaga yu ing sarili yu kanaku at magpakabanal kayu, uling aku ing Ginung kekayung Dios.

⁸ Pamintuan yu la ding utus ku, uling aku ing Ginu at ing papagbanal kekayu.

⁹ Paten ya ing ninumang lapastangan kang tata na o ima na. Ya kabud ing pepasari king sarili nang kamatayan.

¹⁰ Potang makipangatawan ya ing ninumang lalaki king asawa na ning kalupa nang tau, paten ya pati ing babai.

¹¹ Ing lalaking makipangatawan king metung karing asawa nang tata na lepastangan ne i tata na; paten ya at ing babaing kayabe nang mikasala. Ila mismu ding pepasari king sarili dang kamatayan.

¹² Nung makipangatawan ya ing metung a lalaki king manuyang nang babai, paten la. Mikasala lang parehu. Ila mismu ding pepasari king sarili dang kamatayan.

¹³ Nung makipangatawan ya ing metung a lalaki king kalupa nang lalaki, dinapat lang bage makasumami, parehu lang paten. Ila mismu ding pepasari king sarili dang kamatayan.

¹⁴ Nung ing metung a lalaki gewa na lang asawa na ring mi-ima, paten la ilang atlu; silaban lang mabie uli na ning bage makasumaming depat da. Ing anti kaniting bage e sukat marapat libutad yu.

¹⁵ Nung makipangatawan ya ing metung a lalaki king metung a animal, paten ya at ing animal.

¹⁶ Nung lumapit ya ing metung a babai king metung a animal ban makipangatawan ya kaniti, paten ya at ing animal. Ilang pepasari king sarili dang kamatayan.

¹⁷ Nung makipangatawan ya ing metung a lalaki king kapatad nang babai o king kasing-ibpa na o kasing-ima na, sukat ibulalag king balen ing makarine depat da at itabi la. Sukat nang pagdusan ing kasalanan na ning lalaking mekipangatawan king kapatad nang babai.

¹⁸ Nung makipangatawan ya ing metung a lalaki king metung a babai kabang iting babai atyu ya king panaun na ning regla na, parehu lang itabi king balen.

¹⁹ Nung makipangatawan ya ing metung a lalaki king dara na kang tata na o kang ima na, parusan lang parehu uli na ning makarine depat da.

²⁰ Nung makipangatawan ya ing metung a lalaki king asawa nang bapa na, lepastangan ne i bapa na; parusan ya at ing babai. E sukat mikayanak ing ninuman karela.

²¹ Nung pakiabayan ne ning metung a lalaki ing asawa na ning kapatad nang lalaki, lepastangan ne ing kapatad na uli na ning depat nang makarine. Mate lang alang anak.

²² Ngana ning Ginu, Pamintuan yu la ngan ding utus ku at panabilin ban e na kayu tanggian ning bansang Canaan nung nu ra kayu darala.

²³ E kayu makiapus karing ugali da ring taung manuknangan karin. Tatabi ku la deting taung deti uli na ning dapat dang makasumami.

²⁴ Pengaku ku kekayu king ibie ke kekayu iting gabun a masanting at mataba ban maging bandi yu. Aku ing Ginung kekayung Dios at aku ing memili kekayu bilang memalen ku.

²⁵ Inya sukat yung balu ing pamiyaliwa da ring animal at ayup a malinis at ding e malinis. E kayu mamangan karing animal o ayup a e malinis ban e kayu miyawa king karinatan da. Aku ing sinabing e la malinis deti.

²⁶ Magpakabanal kayu at maging tapat kanaku, uling aku, ing kekayung Ginu, banal ku. Pinili ra kayu karing aliwang bansa ban maging bukud mung kanaku.

²⁷ Paten ya kapamilatan na ning basibas batu ing ninumang lalaki o babai a makisangguni karing espiritu ra ding mete. Ya ing pepasari king sarili nang kamatayan.

21

¹ Ngana ning Ginu kang Moises, Sabian mu karing pari a anak nang Aaron king e ra sa paburen ing midinatan la uli na ning pamaglapit da karing mete kamaganak da,

² subali mu nung iti ima re, tata, anak, kapatad deng lalaki

³ o kaya kapatad deng dalaga a e mekiasawa.

⁴ E ra paintulutan ing midinatan la king oras na ning kamatayan ning metung karing selagpian da.

⁵ E ra sukat ururan ing buak da o pupututan ing balbas da ni paniugatan ing katawan da para ipakit ing kalungkutan da.

⁶ Sukat lang maging banal arapan ku, ing Dios, at e lalapastangan king lagyu ku. Ila ring miyayain ain-a-pamangan kanaku, inya sukat lang maging banal.

⁷ E ya sukat makiasawa ing metung a pari king babaing magtinda king katawan na o mesira panga-dalaga o kaya diborsiada, uling banal ya ing pari.

⁸ Italaga ya king kabanalan ing pari, uling ya ing miyayain king tinape para kanaku, ing Dios. Sukat yang maging banal, uling aku, ing Ginu, ing papagbanal kekayu at banal ku.

⁹ Nung mekiabe ya karing babaing magtindang katawan ing anak nang babai ning ninumang pari, lepastangan ne ing pari a tata na. Inya silaban yang mabie.

¹⁰ Ing pari a pamuntuk da ring kalupa nang pari mitugtugan yang larung paglania king buntuk na at mitalaga ya king Dios para misulud karing imalan pari. Inya e ya sukat sabung-sabung a buak ni pangabakan ing susulud nang imalan para ipakilala ing pamagpaldas na.

¹¹ E na sukat dirinatan ing sarili na king pamamunta na king mete agyang pang ing mete ya i tata na o i ima na.

¹² Sukat yang manatili king tuknangan na ning Dios. Kabud meko ya karin ban lawen ing mete, lepastangan na ne ing tuknangan na ning Dios, uling tagle na ing larung paglania.

¹³ Nung makiasawa ya, tune ya sanang birhen ing babai.

¹⁴ E ya makiasawa king babaing mebalu o king metung a diborsiada o kaya king babaing medisgrasya o migtinda king katawan na king milabas a panaun. Makiasawa ya king dalagang ibat king sarili nang lahi

¹⁵ ban e la mapintas ding anak na king arapan da ring kabalen na. Aku ing Ginu a mibukud keting tau bilang Pamuntuk da ring Pari.

¹⁶ Ngana pang sinabi ning Ginu kang Moises,

¹⁷ Sabian mu kang Aaron king ala metung man karing lahi na a maki pinsala king katawan na ing sukat paintulutan miyain ain-a-pamangan arapan ku. Iti metung yang tuntunan a sukat ipatupad king kapilan pa man.

¹⁸ E ya paintulutan lumapit king altar ing ninumang ating pinsala king katawan na antimo ing bulag, pile, kibit o dispormadu lupa,

¹⁹ komang, sakang,

²⁰ kuba, unanu, ing ating kapansanan a mata o galisan a balat o bunian, at ing ninumang kapun.

²¹ E ya paintulutan sumuyu king altar ing ninuman karing lahi nang Aaron a maki pinsala king katawan na. E ya malyaring miyain ain uli na ning kapinsalan na.

²² Malyari yang mangan king kakanan a miyain kanaku, maging king sagradu o mas sagradung ain-a-pamangan.

²³ Makanyan man, e ya sukat lalapit king sagradung tabing o lalapit king altar uli na ning atin yang pinsala king katawan na. Kabud linapit ya lepastangan na la ding banal a bage, uling aku ing Ginu a papagbanal kareti.

²⁴ Makanyan yang migsalita i Moises kang Aaron, karing anak nang lalaki, at karing sablang memalen ning Israel.

22

¹ Ngana pang sinabi ning Ginu kang Moises,

² Sabian mu kang Aaron at karing anak nang lalaki king e ra paburen ing malapastangan ya ing banal kung lagyu. Inya sukat da lang tanggapan king mitmung kagalangan ding sagradung ain a yayampang da kanaku ding memalen na ning Israel. Aku ing Ginu.

³ Sabian mu karela king itiwalag ke ing ninuman karing lahi da a e malinis lalapit king altar. Tuntunan ya iting sukat ipairal king sablang panaun. Aku ing Ginu.

⁴ E ya malyaring mangan karing sagradung bage miyain ing ninuman karing lahi nang Aaron a ating sakit a lepra o ating tulu king katawan na. Makapangan ya potang kinayap ne. E ya malinis ing ninumang mekatagkil king bangke na ning mete tau o kaya king taung kelualan king sarili nang bini

⁵ o kaya ing ninumang mekatagkil karing animal a e malinis o king taung e malinis.

⁶ Ituring yang e malinis ing ninumang mekatagkil angga king kabengian, at e ya malyaring mangan king isanu pa man karing sagradung ain anggang e ya mendilu.

⁷ Potang limbug ne ing aldo kanita ya pa maging malinis at kanita ya pa mu malyaring makapangan karing sagradung ain a karapatan na.

⁸ E ya sukat mamangan king karni na ning isanu pa mang animal a kabud na mete o kaya piglapak da ring mabangis a animal; makadungis iti king pangatau na. Aku ing Ginu.

⁹ Sukat na lang tuparan Aaron at ding anak nang lalaki ding sablang tuntunan a binie ku karela. Mikasala la at mate nung sakaling e ra la tuparan. Aku ing Ginu at ing papagbanal karela.

¹⁰ E ya malyaring makapangan king bage sagradu ing ninumang e miembru king pamilya ning pari, at pati na detang makipanuknangan king pari o detang makipagobrang upahan na.

¹¹ Oneng ing ipus a seli na karing sarili nang salapi o mibait na king pibalebale na, malyari yang mangan king pamangan na ning pari.

¹² E ya naman malyaring mangan karing bage sagradu ing anak nang babai ning pari a mekapakiasawa king e naman pari.

¹³ Nung mabalu ya ing anak na o diborsiada ya at ala yang anak, kaybat minuli ya bale nang tata na, kanita ya pa malyaring makapangan king pamangan nang tata na a pari. Bukud mung ing miembru na ning pamilyang pari ya ing makapangan king pamangan a miyain.

¹⁴ Nung ing ninuman a e miembru na ning pamilyang pari makapangan yang e na sasarian karing sagradung ain, bayaran na king pari at patungan na pang beinti por sientu ing pengan na.

¹⁵ Sukat dang ingatan masalese ding pari ing sablang ain da ring Israelita kanaku, ing Ginu.

¹⁶ E ra sukat papakan iti karing e mangaintuliran. Kabud melabag ya iting tuntunan mikasala ya ing mengan at mikapakibatan ya. Aku ing Ginu at ing papagbanal kareti.

¹⁷ Ngana pa ning Ginu kang Moises,

¹⁸ Sabian mu kang Aaron at karing anak nang lalaki ampon karing memalen na ning Israel king nung ing metung a Israelita o dayuan miyayampang yang ain-a-durulukan bilang metung a panata o kusang lub a ain,

¹⁹ lalaking baka o tupa o kambing ing idala na. Sukat yang alang dipektu ban maging karapatdapat ya.

²⁰ E kayu mamain nanumang ating dipektu uling e ya matanggap.

²¹ Potang ing ninuman miyayampang yang ain-ning-pamisulusulu kanaku, ing Ginu, bilang pamanupad king panata na o kaya kusa yang lub a pamanain, sukat yang alang dipektu ing animal a yayain na ban maging katanggap-tanggap ya.

²² E ye yayain kanaku, ing Ginu, ing isanu mang animal a bulag o pile o ating pinsala king katawan o kaya ating sugat a nanaknak o baya o ing galisan. E kayu sukat miyayain kareting animal king altar.

²³ Malyari yang iyampang bilang ain a kusang lub ing toro o tupa a gutut o e timbang a katawan, oneng ing anti kaniti e ya karapatdapat bilang ain a pamanupad king metung a panata.

²⁴ E ye yayain kanaku, ing Ginu, ing isanu mang animal a kapun o mepitpit a ebun o mebalbal o mesugat o kaya mebitas. E mipaintulutan ing anti kaniti king bansa.

²⁵ E kayu naman miyayain animal a ibat king metung a dayuan. Atin lang dipektu ding sese rang animal, inya e la malyaring matanggap.

²⁶ Nganang tinaglus migsalita ning Ginu kang Moises,

²⁷ Potang mibait ya ing metung a biserung baka o tupa o kambing, e ya sukat kakawani king gaindu kilub ding pitung aldo, oneng kalabas da ring pitung aldo malyari neng maging ain-a-durulukan para kanaku, ing Ginu.

²⁸ E ye papaten ing gaindu king aldo a paten ya ing biseru na, baka ya man o tupa o kambing.

²⁹ Tukian yu la ding tuntunan potang miyayain kayung ain-a-kapasalamatan ban maging karapatdapat kayu.

³⁰ Gisanan yeng kanan king aldo mu ring ita; e kayu mitatagan nanuman para king aldo bukas. Aku ing Ginu.

³¹ Tandanan yu la ding kautusan ku at pamintuan; aku ing Ginu.

³² E ye lalapastanganan ing banal kung lagyu; galangan yu ku. Aku ing Ginu at ing papagbanal kekayu.

³³ Aku ing milual kekayu ibat Ehipto ban aku ing maging Dios yu. Aku ing Ginu.

23

¹ Ngana ning Ginu kang Moises,

² Sabian mu karing memalen na ning Israel king ding piestang karelang pagselebran bilang pamitipun king pamanyamba kanaku, ing Ginu, ila reti:

³ Atin kayung anam a aldo ban gawan ing obra yu, oneng ing kapitung aldo, ing Aldo ning Sabbath, ya ing aldo ning pamagpaynawa. E kayu magobra king aldong iti; mitipun kayu ban samba nu kayu man karin. Kanaku ya ing Aldo ning Sabbath; aku ing Ginu.

⁴ Ila deti ring piestang tikda ku a kekayung pagselebran.

⁵ Ing Piesta ning Pamaglagpus a magumpisa king sisilim ning kalabing apat a aldo na ning mumunang bulan.

⁶ Ing Piesta ning Tinape Alang Lebadura magumpisa ya king kabukasan, king kalabing limang aldo. E kayu mamangan nanumang tinape ating lebadura kilub ding pitung aldo.

⁷ Mitipun kayu king mumunang aldo ban samba, at e kayu bitasang magobra.

⁸ Iyain yu la ding ain-a-durulukan kilub da reting pitung aldo. King kapitung aldo mitipun kayung pasibayu ban samba; e kayu bitasang magobra.

⁹ Ngana pa ning Ginu kang Moises,

¹⁰ Sabian mu munaman karing memalen na ning Israel king potang manuknangan na la king gabun a babie ku karela ing ibie ra sa king pari balang mupul la ya ing mumunang kaptas a binutil na ning pupul da.

¹¹ Iyain ne iti ning pari bilang ain-a-makapasubali ban maging katanggap-tanggap kayu kanaku. At iyain ne ning pari kabukasan ning Aldo ning Sabbath.

¹² King aldo iyain ya iting binutil, magdala kayu namang metung a lalaking tupa a pabanua tua at alang dipektu bilang ain-a-durulukan.

¹³ Iyabe yu kaniti ing apat a litrung arina a semutanan larung olibo bilang ain-a-pamangan. Babie tula kanaku, ing Ginu, ing bau na niting ain. Magdala kayu namang metung a litrung alak bilang ain-a-inuman.

¹⁴ E kayu mamangan tinape o binutil, maging iti sagiwa o sinangle anggang e yu ayaring agampanan iting pamanain. Sukat deng tuparan ding sabla yung lahi iting tuntunan king kapilan pa man.

¹⁵ Mamilang kayung pitung paruminggu manibat king aldo kabukasan na ning Aldo ning Sabbath nung kapilan ye dela ing kaptas yung binutil para iyain kanaku.

¹⁶ King kalimang pulung aldo, ing aldo kabukasan ning kapitung Aldo ning Sabbath, iyampang ye kanaku ing metung pang ain-a-binutil.

¹⁷ Ing balang pamilya sukat yang magdalang aduang tinape a megawa king apat at kapitnang litrung arina a linutung maki lebadura. Iyain iti bilang ain tungkul king mumuna yung pupul.

¹⁸ Kayabe ning tinape magdala kayu namang pitung biserung tupa a pabanua tua, metung a toro, at aduang kambing. Sukat lang alang dipektu reti. Iyain la reti bilang ain-a-durulukan a kayabe ning ain-a-binutil at alak. Babie tula kanaku, ing Ginu, ing bau na niti.

¹⁹ Magdala kayu namang metung a kambing a lalaki bilang ain-a-kapamayaran-king-kasalanan, at aduang biserung tupa a pabanua tua bilang ain-ning-pamisulusulu.

²⁰ Iyain ne ning pari ing tinape a kayabe ding aduang biserung tupa bilang ain-a-makapasubali kanaku para karing pari. Sagradu la deting ain.

²¹ E kayu bitasang magobra king aldong ita, nune mitipun kayu ban samba. Tuparan ye iting tuntunan king kapilan pa man at nu man karin kayu manuknangan.

²² Potang palutan yu na ing tenam yu, e yu pakipalut ing binutil karing angganan na ning asikan yu, at e yu na babalikan pa itang melakuan a makibunga. Paburen yu na ita para karing taung pakakalulu at dayuan. Aku ing Ginung kekayung Dios. fig,,,,,Paburen yu na ita para karing taung pakakalulu...,(23:22)fig*

²³ Ngana pang sinabi ning Ginu kang Moises,

²⁴ Sabian mu karing memalen na ning Israel king pagselebran de ing mumuna nang aldo ning kapitung bulan bilang aldo na ning pamagpaynawa, at mitipun la para samba kabud tumiup ya ing trumpeta.

²⁵ E kayu bitasang magobra king aldong ita, nune magdala kayung ain-a-durulukan para kanaku, ing Ginu.

²⁶ Ngana ning Ginu kang Moises,

²⁷ Ing kapulung aldo na ning kapitung bulan aldo ne ning pamanisi at pangapatawaran ning kasalanan. E kayu bitasang mamangan nanuman king aldong ita; mitipun kayu para samba at miyain ain-a-pamangan kanaku, ing Ginu.

²⁸ E kayu bitasang magobra king aldong ita, uling aldo ya para daptan ing seremonia ning pangapatawaran arapan ku, ing Ginung kekayung Dios.

²⁹ Mitiwalag ya ing ninumang mangan nanuman king aldong ita.

³⁰ At paten ke ing ninumang magobra king aldong ita.

³¹ Inya e kayu magobra king aldong ita. Sukat yang ipatupad iting tuntunan karing sabla yung lahi king sablang panaun at nu la man karin.

³² Magumpisa king pamitakup na ning silim ning kasiam a aldo ning bulan angga na itang kabukasan a mitakup ing silim, pagselebran ye iti bilang makabukud a aldo ban magpaynawa king obra. E kayu mamangan nanuman king aldong ita.

³³ Ngana pang sinabi ning Ginu kang Moises,

³⁴ Sabian mu karing memalen na ning Israel king ing Piesta da ring Dalungdung magumpisa ya king kalabing limang aldo na ning kapitung bulan, at pagselebran ya kilub ding pitung aldo.

³⁵ Mitipun kayu ban samba king mumunang aldo da reting aldo; e kayu bitasang magobra king aldong ita.

³⁶ Pitung aldo kayung miyayain ain-a-pamangan. Mitipun kayung pasibayu king kawalung aldo ban samba at miyain ain-a-pamangan. Uling aldo yang pamanyamba, e kayu bitasang magobra king aldong ita. (

³⁷ Ila deti ring piestang tikda ku; aldo lang banal ban mitipun kayu at samba, miyain ain-a-pamangan, ain-a-durulukan, ain-a-binutil, ain-sakripisyu ampon ain-a-inuman, ing balang metung king makatakda nang aldo.

³⁸ Makayaliwa la deting aldo karing karaniwan a Aldo ning Sabbath at makayaliwa la ring ain karetang karaniwan yung ain, karing ain a pamanupad yu karing kekayung panata at karing ain a kusa yung babie kanaku, ing Ginu.)

³⁹ Potang meyari na ing kekayung pamamalut king kekayung tenam, gampanan ye iting piesta kilub ding pitung aldo. Pagumpisan ye king kalabing lima nang aldo ning kapitung bulan. Magpaynawa kayu king mumuna ampon king kawalung aldo.

⁴⁰ King mumunang aldo kuma kayu karing pekamasanting a bunga da ring kekayung tanaman, sangang palma, at sanga karing mangalabung a tanaman ampon timbu karing sapa. Kaybat na nita, pagumpisan yu na ing sagradung selebrasyun kilub ding pitung aldo bilang parangal kanaku, ing Ginung kekayung Dios.

⁴¹ Pagselebran ye iting mesabing piesta kilub ding pitung aldo ning kapitung bulan balang banua. Ikayu ampon ding maging lahi yu sukat yeng tuparan iting tuntunan king kapilan pa man.

⁴² Karing dalungdung la manuknangan ding sablang memalen na ning Israel kilub ding pitung aldo king kekaban na niting pamagpiesta,

⁴³ ban kanita abalu da ring anak yu king menuknangan la ding Israelita karing tolda inyang liwal ku la ibat Ehipto. Aku ing Ginu, ing kekayung Dios.

⁴⁴ Makanyan na lang sinabing Moises karing memalen na ning Israel ding piesta na ning pamiparangal king Ginu.

24

¹ Nganang migsalita ning Ginu kang Moises,

² Iyutus mu karing memalen na ning Israel king magdala lang larung olibo a alang samut para karing sulu ban manatili lang makaslag

³ king lual na ning kortina a atyu king arapan na ning Kaban ning Kasunduan kilub ning Tolda. Sindian na lang Aaron deting sulu neng daratang na ing bengi, at e na la paburen matatda angga itang kabukasan abak. Sukat yang tuparan iting tuntunan king kapilan pa man.

⁴ I Aaron ya ing lumingap karing sulu a makabili karing tumpakan-sulung megawa king gintung puru ban manatili lang makaslag arapan ku, ing Ginu.

⁵ Kuma kayung apat at kapitnang litrung mapinung arina at kaniti yu la gawan ding labing aduang tinape.

⁶ Ayusan yu la deting tinape king aduang hilera; tianam balang hilera, at ibili yu la king lamesang megawa king gintung puru.

⁷ Mibili kayung insenso a alang samut king balang hilera ban iyabe king tinape at silaban bilang e pamangalinguan kanaku, ing Ginu.

⁸ Ding anti kareting tinape ilang iyain kanaku balang Aldo ning Sabbath. Daptan yu iti bilang katungkulan ning Israel king sablang panaun.

⁹ Mangaintulid la deting tinape, kaybat dang miyain, kang Aaron at karing anak na. Kanan da la reti king lugal a sagradu uling iti metung yang sagradung dake ning ain a mitalaga kanaku, ing Ginu, para karing pari. Tuntunan ya iti a sukat ipatupad king sablang panaun.

¹⁰ Misan, ating taung anak na ning lalaking tau Ehipto at ning babaing taga Israel a milagyuan Selomit a anak nang Debri king tribu nang Dan. Linub ya iting lalaki king kampu da ring Israelita at mekipate ya king metung a tune Israelita.

¹¹ King pamipate ra mekapanagkas ya't layun lepastangan ing lagyu ning Ginu. Inya dela re kang Moises.

¹² Kilung de kabang panenayan da ing atul na ning Ginu tungkul king taung iti.

¹³ Ngana ning Ginu kang Moises,

¹⁴ Ilual ye king kampu ing lalaking ita. Ing balang metung karing mekaramdam king pamanagkas na laban kanaku, ing Ginu, itumpak da la ring gamat da king buntuk niting lalaki ban saksian da ing pamikasala na. Kaybat, paten ne ning mabilug a balen king kapamilatan na ning pamamasibas batu.

¹⁵ Sabian mu karing memalen na ning Israel king mikasala ya ing ninumang managkas at lapastangan king Dios.

¹⁶ Paten ya ing magsalitang e mayap king lagyu ku, ing Ginu, Israelita ya man o ali ya. Basibasan deng batu ring sabla angga king mate ya.

¹⁷ Paten ya naman ing mekamate king kalupa nang tau.

¹⁸ Nung animal ne man ing pete na ning ninuman, sukat neng alilan iti, uling nung bie ing inutang bie munaman ing pamayad.

¹⁹ Nung apanasakit ne ning ninuman ing kalupa nang tau, panasakitan ya namang kalupa na ning depat na.

²⁰ Nung apakli ne butul, paklian ya naman a butul; mata libe mata, at ipan libe ipan. Nung nanung pinsala ing depat na, makanyan munaman ing daptan keting tau.

²¹ Ing mekapate animal, alilan nia namang animal, oneng paten ya ing mekapate kalupa nang tau.

²² Bukud metung ya ing kautusan a ipairal kenu man, Israelita ya man o dayuan a makipamalen kekayu, uling aku ing Ginung kekayung Dios.

²³ Inyang ayari na nang Moises ing pamagsalita na, dela ra ne ing lalaking menagkas king lual na ning kampu, at besibas deng batu angga king mete ya. Makanyan dang tiparan ding memalen na ning Israel ing sablang inutus na ning Ginu king kapamilatan nang Moises.

25

¹ Migsalita ya ing Ginu kang Moises karin king Bunduk ning Sinai. Ngana,

² Sabian mu karing memalen na ning Israel king potang miras na la king gabun a babie ku karela king paynawan da sa ing gabun karas na ning balang kapitung banua.

³ Anam a banua yung tamnanan ing asikan yu at ubasan, at pupulan ing tanam yu.

⁴ Oneng tuknang kayung manasik king kapitung banua at e yu la kakaltasan ding tanaman yung ubas. Lubus yang paynawan ing gabun king banuang iti.

⁵ E yu kakuanan ing nanumang kabud na tinubu karin ni agtalan a bunga ding ubas a e yu kinaltas, uling iti banua yang lubus a pamagpaynawa para king gabun.

⁶ Agyang e matagin ing gabun king banuang ita makanyan man palto yang pagkabiayan yu at pamangan para karing kekayung ipus, karing upahan a talapagobra, karing dayuan a makipamalen kekayu,

⁷ at pati na karing sese yung kawan ampon aliwa pang animal.

⁸ Mamilang kayung pitung besis a tia pitung banua, heganagana, apat apulu't siam a banua.

⁹ Kaybat na nita, king kapulung aldo na ning kapitung bulan, ing Aldo ning Pamanisi at Pangapatawaran, mitubud kayung lalaking tumiup trumpeta king mabilug a balen.

¹⁰ Makanyan yeng ipasubali ing kalimang pulung banua at ipasiag ing kalayaan para karing sablang manuknangan king gabun yu. Banua ne iti ning kekayung pamaging malaya; muli ya ing ipus king sarili nang pibalebale at isubli ing sablang pibandian a mepisali king sadiang makibandi.

¹¹ E yu la tatamnanan ding kekayung marangle o papalutan man itang kabud na tinubu ni agtalan ding ubas a e yu naman kinaltas.

¹² Sukat yang maging sagradu para kekayu ing pabanuang ita. Mangabiayan kayu karing tanaman a kabud na tinubu karing kekayung marangle.

¹³ King banuang ita isubli ing sablang pibandian a mepisali king sadiang makibandi.

¹⁴ E kayu mamirait neng mamisali kayu o sasaling nanuman king kalupa yung tau.

¹⁵ Makayagpang ing bayaran yu king bilang da ring banua kaybat ning tauling Banua ning Pamanyubli, at mamisali kayu agpang karing bilang da naman ding banuang malyari yung pupulan king gabun kaybat ning Banua ning Pamanyubli.

¹⁶ Mas matas ing alaga nung dakal la pa ding banuang palabasan, pero nung ditak na la mu ding banuang palabasan, mas mababa ya ing alaga, uling ing batayan ya itang bilang na ning pupul a malyari nang palto ning gabun.

¹⁷ E ye pipiraitnan ing ninuman; tumakut kayu kanaku, uling aku ing Ginung kekayung Dios.

¹⁸ Inya ingatan yu la't tuparan ding sablang kautusan at panabilin ku ban mipanatag kayu lub king gabun a sakupan yu.

¹⁹ Palto na ning gabun ing sablang kailangan yung kabiayan, kumabsi kayu at mibiebie kayu king mitmung kapanatagan.

²⁰ Mekad ikutang yu nung nukarin ya kuanan ing pangabiayan yu karas na ning kapitung banua uling e kayu manasik o mamupul.

²¹ Aku, ing Ginu, bendisyunan ke ing gabun king kanam a banua ban mamungang sapat kilub ding atlung banua.

²² Potang manasik kayu king kawalung banua, kakanan yu pa ing pinupul yu inyang kanam a banua, at atin kayung sapat a kanan angga na itang pupulan yu ing tenam yu king kasiam a banua.

²³ E sukat mipisaling lubusan ing gabun yu, uling e naman talagang kekayu. Bandi ku at mengari kayu mung dayuan a mipaintulutan gumamit kaniti.

²⁴ Neng ating mamisaling gabun, sukat yung kilalanan ing matulid na ning sadiang makibandi ban mibalik ing bandi na.

²⁵ Nung mekalulu ya ing metung a Israelita at mepilitan yang pisali na ing gabun na, ing pekamalapit nang kamaganak ya ing manatbus king mepisali.

²⁶ Nung ala yang kamaganak a saling pasibayu, ya na mismu ing manatbus potang minawa ing bie na.

²⁷ Bayaran na ketang sinali ing alagang katumbas na ning pupul a malyaring mayakua king gabun bayu miras ing tutuking Banua ning Pamanyubli, nung kapilan malyaring mibalik king sadiang makibandi. King makanyan a paralan misubling pasibayu ing bandi na.

²⁸ Nung e na akuang ayatbus, manatiling bandi na ning sinali ing gabun angga na king tutuking Banua ning Pamanyubli. Isubli na ning mekasali king banuang ita ing gabun king sadiang makibandi.

²⁹ Nung ating mamisali king bale na a atyu kilub na ning siudad a makapadurut bakud pader, atin yang matulid saliwan neng pasibayu kilub na ning pabanua magumpisa king petsang mepisali ya ing bale.

³⁰ Nung king kilub na ning pabanua e ne ikuang ayatbus, milako na ing katuliran a saliwan neng pasibayu. Manatili na neng bandi ing bale ning sinali, at e ra na kailangan isubli ding lahi na king sadiang makibandi karas na ning Banua ning Pamanyubli.

³¹ Pero iyapus lang anting pibandian a gabun ding bale karing siudad a e mipadurutnan bakud pader. Atin yang matulid atbusan ne ning memisali. At sukat yang isubli king pisaliwan karas na ning Banua ning Pamanyubli.

³² Oneng atin lang matulid manatbus ding Levita king isanu mang aldo ing pibandian dang pisali a atyu karing siudad da.

³³ Nung pisali ne ning metung a Levita ing metung a bale a atyu karing siudad at e ne inatbus, sukat ya pa mu ring misubli ing bale karas na ning Banua ning Pamanyubli, uling ding pibalebale rang atyu karing siudad da ila ring pekamana ra king bansang Israel.

³⁴ E malyaring pisali ing gabun a pipagpastulan karing siudad da ring Levita; bandi ra iti king kapilan pa man.

³⁵ Nung mekalulu ya ing metung karing kekayung kabalen a kasiping yung bale at e na agyung biayan ing sarili na, sesen ya at tanggapan bilang metung a dayuan a makipamalen kekayu.

³⁶ E ye aduananan patubu o ablas king nanumang depat yu king kalupa yung tau, nune mika takut kayu king Dios at paburen yang manatiling kasiping yung bale.

³⁷ E ye aduananan patubu king nanumang alaga a peparam yu o pepakan king kalupa yung tau.

³⁸ Aku ing Ginung kekayung Dios a milual kekayu ibat Ehipto ban ibie kekayu ing gabun ning Canaan at ban aku ing maging Dios yu. fig,,,,,... sesen ya...,(25:35)fig*

³⁹ Nung mekalulu ya ing metung karing kekayung kabalen angga na king pisali na ing sarili na kekayu bilang ipus yu, e ye sa tuturing ipus.

⁴⁰ Ituring yeng upahan a kasaup king bale o dayuan a makipagobra kekayu angga king miras ing Banua ning Pamanyubli.

⁴¹ Potang miras na ing banuang ita paintulutan yu neng mako ya at ding anak na ban makapagbalik la king penibatan na at king gabun a pibandian da ring makatua na.

⁴² Talasuyu ku la ding sablang Israelita at aku ing Ginung milual karela ibat king Ehipto. Inya e la sukat ipisaling anting ipus.

⁴³ E yu la pagbagsikan; mika takut kayu sa kanaku.

⁴⁴ Nung mangailangan kayung ipus a lalaki o babai, sali kayu karing bansang makapadurut kekayu.

⁴⁵ Malyari kayu namang sali karing anak da ring dayuan a makipamalen kekayu. Malyari yu lang bandian ding anak a anti kareti a mibait na king tuknangan yu.

⁴⁶ Malyari yu lang lakuan anting mana karing anak yu a dapat dang pagsilbian anggang mabie la. Oneng e ye ipusan o pagbagsikan ing ninuman karing kalupa yung Israelita.

⁴⁷ Nung ing mekipamalen kekayu mibandi ya, kabang ing metung a kalupa yung Israelita mekalulu ya at saka na pisali ing sarili na king dayuan a ita o kaya king metung nang miembru ning pamilya ning dayuan a ita,

⁴⁸ atin ya pa mu ring matulid mayatbus ing memisali king sarili na. Malyari neng ayatbus ning kapatad na

⁴⁹ o kaya ning bapa na o pisan na o ning metung karing pekamalapit nang kamaganak o ya mismu, nung agyu na nang atbusan ing kalayaan na.

⁵⁰ Lapitan ne ing dayuan a sinali at kwentahan da la ring banuang milabas manibat kanitang pisali na ing sarili na angga king tutuking Banua ning Pamanyubli. Iti ya ing maging batayan ning pamamayad na para king kalayaan na a maging katumbas na ning sueldu na ning metung a ipus a upahan.

⁵¹ Nung maluat pa ing panaun ning kalayaan; maragul ing ibayad.

⁵² Ditak mu ing ibayad nung malapit na ing panaun ning kalayaan, uling ing batayan ya ing panaun a makatagan pa,

⁵³ anti ya waring ipus a susuelduhan banuahan. E ne sukat igpitan ning panginuan na.

⁵⁴ Nung e na akuang mayatbus, kaisanu man kareting paralan, ya ampon ing pamilya na sukat lang mirinan kalayaan karas na ning tutuking Banua ning Pamanyubli.

⁵⁵ Talasuyu ku la ring memalen na ning Israel, aku ing milual karela ibat Ehipto. E la sukat ma-ipus kabang-kaba. Aku ing Ginung kekayung Dios.

26

¹ Ngana ning Ginu, E kayu gagawang idolo ni manalakad mang estatua, asias a batu o larawan a dinukit king batu para kekayu yang samban, uling aku ing Ginung kekayung Dios.

² Tuparan yu la ring aldo pangilinan at igalang ing lugal nung nu ku misasamban. Aku ing Ginu.

³ Nung pamintuan yu la ding kautusan ku at nung tukian yu la ding tuntunan ku,

⁴ kanita parala kung uran king takdang panaun ban mamunga lang dakal ding tanaman yu.

⁵ Dakal ing kekayung pupul angga king mikit ing kekayung pamamalut ila ning pamanagtal yung ubas, at e kayu pa man meyaring menagtal ubas datang na ing panaun na ning pamanasik. Maglabis-labis ing kabiayan yu at mibiebie kayung panatag.

⁶ Ibie ku king kekayung bansa ing kapayapan at matudtud kayung maniaman neng bengi a alang takut kenu man. Ilako ku la king bansa yu ding mabagsik a animal at e na mika gera king kekayung bansa.

⁷ Mitakutan la kekayu ding kalaban yu at sambutan yu la king labanan.

⁸ Daigan da la ring lima katau kekayu ding dinalan a kalaban, at ding dinalan a katau kekayu sambutan da la ring apulung libung kalaban.

⁹ Bendisyunan da kayu at dinan dakal a anak. Tuparan ke itang dake ku king kasunduan a pikayari tamu.

¹⁰ Dakal at maglabis-labis ing pupul yu. Inya mapilitan kayung ilele ing laun a pupul ban dinan yung lugal ing bayu yung pupul.

¹¹ Manuknangan ku libutad yu at e ra kayu painggulutan kapilan man.

¹² Akayabe yu ku king pamibiebie yu. Aku ing maging Dios yu at ikayu ding maging memalen ku.

¹³ Aku ing Ginung kekayung Dios; aku ing milual kekayu ibat Ehipto ban e na kayu ma-ipus pang pasibayu karela. Pitlud ku la ding tanikalang bakal da kekayu; inya talakad kayung mitmung dangalan.

¹⁴ Ngana ning Ginu, Magdusa kayu nung e kayu makiramdam kanaku at e tupad karing kautusan ku.

¹⁵ Nung payalan yu lang ulaga ding utus ku at tuntunan at labagan ing kasunduan kung gewa kekayu,

¹⁶ parusan da kayu. Pag-arian na kayu ning takut; datang kekayu ing pesti at lagnat a makabulag at managitis tunggal ditak ing bie yu. Manasik kayu, oneng e yu pakinabangan uling kanan da ring kalaban yu.

¹⁷ Painggulutan da kayu ban masambut kayu karing kalaban yu; ding sumakup kekayu ila ring taung masama kekayu; mamulayi kayu king takut agyang pang alang tatagal kekayu.

¹⁸ Nung kaybat nang merapat niti kekayu, oneng e kayu pa mu rin bisang makiramdam kanaku, dagdagan kung pitung besis ing parusang ipagpa ku kekayu.

¹⁹ Sagapan da kayu uli na ning kesiasan yung buntuk; e muran at maging masias anting bakal ing gabun yu.

²⁰ Mayalang kabaldugan ing kapagalan yu, uling e palto pupul ing gabun at e la mamunga ding tanaman yu.

²¹ Nung isundu yu pa ing pamaglaban yu kanaku at ing pamaglabag karing utus ku, dagdagan ku na namang pitu pang besis ing kasakitan a ipagpa ku kekayu.

²² Paburen ku lang gumala ding mabangis a animal at paglaklakan da la ring anak yu at ding sese yung animal. Ditak na la ding mitagan kekayu at mag-ari ing kalungkutan king bansa yu.

²³ Nung kalabas da reting parusang deti e kayu pa mu rin makiramdam kaku at magmasias kayu pa mu rin a lub laban kanaku,

²⁴ dagdagan ku na namang pitung besis ing kasakitan a ipagpa ku kekayu.

²⁵ Lumusub la ding kalaban yu at dakal lang mate kekayu uli na ning e yu pamanupad king kasunduan tamu. At nung salikut kayu karing siudad yu, padala na ku mang salut karin at mapilit kayung sumuku karing kalaban yu.

²⁶ Mabawas ing pagkabiayan yu, inya maglutu na la mu ding apulung babai king metung mung kalang. Irasyun da pa ing pamangan; mangan kayu oneng e kayu kumabsi.

²⁷ Nung kaybat na niti e kayu pa mu rin tinuknang lalaban kanaku at e memintu,

²⁸ kanita na mibua ing mua ku kekayu at dagdagan ku na namang pitung besis kabagsik ing kasakitan a ipagpa ku kekayu

²⁹ angga king kanan yu la ding mismung sariling anak yu uli na ning danup yu.

³⁰ Idagsa ku la ding lugal a pisasamban yung atyu babo da ring bunduk-bundukan, lasakan ku la ding altar a pidurulukan yung insenso, at italaksan ku la ding bangke yu babo da ring idolo yung mengaragsa. Uli na ning pangasumami ku kekayu

³¹ lasakan ku la ngan ding siudad yu; ala kung itagan karing lugal a pisasamban yu at e ku la tanggapan ding ain yu.

³² Siran keng lubus ing lugal yu angga king mangasdan la ding kalaban a sumakup kekayu king akit dang kasiran.

³³ Paratangan ku la ding kalaban yu at isalbag da kayu karing aliwang bansa. Mitiwangwang ing gabun yu at malasak la ding siudad yu.

³⁴ Inya mipaynawa ya ing gabun yu king makabang panaun kabang bihag kayu karing kalaban yu.

³⁵ Tune kamtan na ning gabun ing kapaynawan a pigkaymut yu inyang manuknangan kayu karin.

³⁶ At katmuan ku lang takut detang mitagan a tau kekayu. Agyang kaluskus mu ning bulung a pinaid ning angin mamulayi na la king takut da agyang alang kalaban a tatagal karela.

³⁷ Mangasakab-sakab kayu king kekayung pamamulayi a balamu wari ating tatagal kekayu kabang ala naman. Milako kayu sikanan lumaban karing kalaban yu.

³⁸ Mate kayu kabang bihag kayu karing aliwang bansa at mipailalam kayu king upaya ra.

³⁹ Tunggal ditak lang mate king kasakitan ding mapilan a mitagan kekayu kabang bihag kayu karing bansa da ring kalaban yu uli na ning kasalanan yu at ning kasalanan da ring mangatua yu.

⁴⁰ Kanita ra tanggapan ding lahi yu king ila at ding makatua ra mikasala lang kataksilan kanaku,

⁴¹ inya paburen ku lang mebihag at miyugse king bansa da ring kalaban da. Nung magpakumbaba la at sumisi king kasalanan da,

⁴² aku, ing Ginu, ganakan ke itang kasunduan a pikayari mi ri Jacob, Isaac, at Abraham. E kia naman kalinguan itang pengaku kung gabun para karela.

⁴³ Pero bayu datang ing panaun a ita, sukat ya pa mung milikas a tau ing gabun ban lubus yang makapagpaynawa at ban takman da ing parusang ipagpa ku karela uli na ning e ra pamamintu karing kautusan at tuntunan ku.

⁴⁴ Makanyan man, e ku la lubus painggulutan o gisanan a lahi kabang atyu la king bansa da ring kalaban ban e ya miwakasan ing kasunduan a pikayari mi ding pipumpunan da. Aku ing Ginung karelang Dios.

⁴⁵ Wa, ganakan ku la alang-alang king kasunduan ku karing pipumpunan da a kanakung liwal Ehipto. Ikit da ring bansa ing depat kung ita ban aku ing maging Dios da. Aku ing Ginu.

⁴⁶ Ila deti ring kautusan at tuntunan a binie na ning Ginu kang Moises karin king Bunduk ning Sinai para karing memalen na ning Israel.

27

¹ Ngana pang sinabi ning Ginu kang Moises,

² Sabian mu karing memalen na ning Israel ing anti kaniti: Potang miyabie ya ing ninuman para kanaku, ing Ginu, bilang katuparan king metung a makabukud panata, malyari yang mayatbus ing taung ita king anti kaniting paralan.

³ Nung lalaki yang idad aduang pulung banua anggang anam apulung banua, limang pulung pirasung pilak ing ibayad na, agpang king timbangan na ning santuaryu.

⁴ Nung babai ne man, atlung pulung pirasung pilak ing ibayad na.

⁵ Ing atyu king idad a lima anggang aduang pulung banua, aduang pulung pirasung pilak, nung lalaki ya; apulu, nung babai ya.

⁶ Ing anak a pabulan a tua anggang limang banua, limang pirasung pilak, nung lalaki ya; at atlu mung pirasu, nung babai ya.

⁷ Nung ing tau idad neng anam apulung banua o maygit pa kanita, labing limang pirasung pilak, at nung babai ne man apulu mung pirasu.

⁸ Nung menata ya ing ninuman at ala yang panatbus uli na ning kakaluluan na, idala ya ing taung ita king pari, at ing pari ya ing bala nung magkanu ing agyu nang ipanatbus ning taung dela ra.

⁹ Nung ing penata a iyain metung yang animal para kanaku, ing Ginu, ita sagradu ya.

¹⁰ E ne malyaring alilan aliwang animal. Nung mapilit ya ing menata, ing animal a alilan at ing penalili na masanting ya man o ali ya, parehu lang maging sagradu kanaku, ing Ginu.

¹¹ Nung ing penata na metung yang animal a e malinis, e ya iti karapatdapat iyain kanaku, ing Ginu. Inya idala ya king pari iting animal a e malinis.

¹² Ing pari ya ing bala king alagang katumbas na ning nanu pa mang uring animal, masanting ya man o ali ya, at e malyaring tutulan ing pasya na ning pari.

¹³ Nung buri neng atbusan ning menata, bayaran ne ing mesabing alaga, at patunganan neng beinti por sientu king mipasyang alaga.

¹⁴ Potang italaga ne ning ninuman kanaku, ing Ginu, ing bale na, ing pari ya ing magpasya king alaga agpang king pangayari na ning bale. At ing sabian nang alaga ya ing maging batayan.

¹⁵ Nung buri neng atbusan ning mitalaga, bayaran na ing mesabing alaga, at patungananan ne pang beinti por sientu.

¹⁶ Potang italaga ne ning ninuman ing metung a dake ning gabun na para kanaku, ing Ginu, ing batayan ya ing alaga na agpang king kantidad ning bining sasalbag da karin; tia pulung salaping pilak king balang metung a tiklis a sebada.

¹⁷ Nung telaga ne ing gabun kaybat na ning Banua ning Pamanyubli, ing bayaran ya ing kabilugan a alaga na.

¹⁸ Nung telaga ne kaybat nang milabas malambat ning Banua ning Pamanyubli, ing pari ya ing tantia king alaga na king salapi, agpang king bilang da ring banuang makatagan bayu miras ing tutuking Banua ning Pamanyubli.

¹⁹ Nung buri neng atbusan ning taung menagulaling ing kapirasung gabun, bayaran na itang alagang mitakda at patunganan ne pang beinti por sientu.

²⁰ Nung e ne ayatbus at buri neng ipisali king aliwa, milako ne kanita ing matulid a atbusan ne.

²¹ King tutuking Banua ning Pamanyubli maging pibandian ku, ing Ginu, ing gabun king kapilan pa man lalam dang pamamahala ding pari.

²² Nung italaga ne ning ninuman kanaku, ing Ginu, ing kapirasung gabun a asali na a e na dake ning amana na,

²³ ing pari ya ing tantia king alaga na ning gabun, agpang karing banuang makatagan pa bayu miras ing tutuking Banua ning Pamanyubli. King aldong ita bayaran na ning taung menagulaling ing alagang mitakda. Mangaintulid la kanaku, ing Ginu, ding bayad.

²⁴ Karas na ning Banua ning Pamanyubli ibalik ya ing gabun king sadiang makibandi.

²⁵ Makabasi ya king timbangan na ning santuaryu ing alaga a mitakda. Katumbas ne ning labing limang gramo ing balang pirasung pilak.

²⁶ E na ne malyaring italaga pa ning ninuman ing anak a pangane na ning sese nang animal, uling ita bandi ke, ing Ginu, baka ya man o tupa o kambing.

²⁷ Oneng malyari yang atbusan pasibayu ing pangane biseru na ning isanu mang animal a e malinis, agpang ketang alagang mimiral at patunganan ne pang beinti por sientu ing alagang ita. Nung e ya mayatbus, malyari yang ipisali king aliwang tau, agpang king mipairal a alaga.

²⁸ E na malyaring pisali o atbusan pasibayu ing mitalaga na kanaku, ing Ginu, tau ya man o animal o gabun, uling iti mangaintulid na kanaku, ing Ginu.

²⁹ E ya malyaring atbusan pasibayu agyang tau ya pa ing mitalaga; sukat yang paten.

³⁰ Mangaintulid kanaku, ing Ginu, ing kapulung dake na ning sablang pupul king gabun, trigu ya man o bungang tanaman.

³¹ Nung buri nang atbusan ning ninuman ing kapulung dake, bayaran na ketang alagang mimiral at patunganan ne pang beinti por sientu.

³² Mangaintulid ya kanaku, ing Ginu, ing balang kapulu karing sese nang animal; para kanaku ya ing balang kapulu.

³³ E ya malyaring mamili ing makibandi para mo itang matsura ya ing mapiling kapulu. E ne malyaring palitan aliwang animal itang tune kapulu. Nung palitan neng aliwa, ing inalilan at ing penalili parehu lang maging kanaku, ing Ginu, at e na la malyari pang mayatbus.

³⁴ Ila deti ring tuntunan a binie na ning Ginu kang Moises karin king Bunduk ning Sinai para karing memalen na ning Israel.