1

¹ Oreti ding lagyu da ring anak nang lalaking Jacob a minta karin Ehipto a kayabe na at ding pamilya ra:

² i Ruben, Simeon, Levi, Juda,

³ Isacar, Zebulun, Benjamin,

⁴ Dan, Neftali, Gad ampon i Aser.

⁵ Pitu lang pulu kabilangan ding heganaganang lahi nang Jacob. Atyu ne kanita i Jose karin Ehipto.

⁶ Kaybat na nita, mete ya i Jose at ding sabla nang kapatad ampon ding anak da ring anak da.

⁷ Oneng menganak la ding Israelita a lahi da at merakal na lang merakal; mabilis lang merakal at tutung masikan angga king milaganapan ya karela ing Ehipto.

⁸ Linabas ing panaun at ing Ehipto mika bayu yang ari a ala nang bitasang balu tungkul kang Jose.

⁹ Nganang sinabi karing sasakupan na, Lawan yu, mas dakal la at masikan kesa kekatamu deting Israelita.

¹⁰ Nung sakaling lusuban da katamu ding kalaban pota makikampi la pa karela at kaybat takasan de ing bansa tamu. Inya kailangan tamung lumawe paralan ban e na la dakal pa.

¹¹ Inya mibili lang kapatas karing Israelita ban pasakitan da la king kapamilatan na ning mabayat a obra. Makanyan lang mengapuersa ding Israelita king pamitalakad karing siudad ning Pitom at Rameses a pipagponduan nang kabiayan at kagamitan ning ari.

¹² Oneng kabang pasakitan da la ring Israelita kanita la lalung merakal at mikalat. Makanyan lang mitakutan ding tau Ehipto karing Israelita.

¹³ Inya lalu da la pang inalipusta.

¹⁴ At alang lunus da lang pepagawan laryu at binie da karela ing sablang mabayat a obra king marangle.

¹⁵ Misan a aldo, pekisabian na la ning ari na ning Ehipto di Sipra at Pua, ding aduang ilut a papanganak karing babaing Hebreo.

¹⁶ Ngana karela, Potang papanganak kayu, kabud akit yu king ing anak a mibait lalaki ya, paten ye. Nung babai ya paburen yeng mie.

¹⁷ Oneng ding ilut, uli na ning takut da king Dios, e ra pemintuan ing utus na ning ari. E da la pete ding anak a lalaking mibait.

¹⁸ Inya pepayaus na la ning ari ning Ehipto at ngana karela, Obat makanyan ing depat yu? Obat pepaburen yu lang mebie ding anak a lalaki?

¹⁹ Ngarang mekibat ding ilut king ari, Kasi pu deng babaing Hebreo e ra la pu kalupa ding babai tamu keti Ehipto; e la pu magkasakit manganak at akakua rang makapanganak bayu na akuang datang ning ninuman kekami.

²⁰ Metula ya ing Dios karing ilut at lalu lang merakal ampon mesikan ding Israelita.

²¹ Uling atin lang takut ding ilut king Dios, binendisyunan na la ning Dios at dininan sarasariling pamilya.

²² Kanita minie yang utus ing ari karing sasakupan na. Ngana karela, Iyugse ya king Ilug ning Nilo ing balang anak a lalaking mibait karing Hebreo, oneng paburen yu lang mie ding anak a babai.

2

¹ Ating metung a lalaking mibait king tribu nang Levi a mekapakiasawa king metung a babaing mibait munaman king tribung ita.

² Mikayanak lang metung a lalaki. Masanting ya ing anak, inya selikut ne ning ima kilub ding atlung bulan.

³ Inyang e na ne agyung isalikut, kinangwa yang maragul a takba a megawa king tangke ning timbu, at penapalan neng alketran ban e ne aluban ning danum. Lilan ne keting takba iting anak, at kaybat binili ne ing takba libutad ding timbu king pampang ning ilug.

⁴ Makabante ya ing atsi na ning anak king makarayung bagya ban lawan na nung nanu ing mapalyari king wali na.

⁵ Dinulung ya king ilug ing prinsesang anak ning ari ban mandilu kabang ding babaing mamantabe king prinsesa lakad-lakad la king pampang ning ilug. Ikit ne ning prinsesa ing takba a makalibutad karing timbu. Pepakua ne king metung karing babaing mamantabe.

⁶ Inyang biklat ne ning prinsesa ing takba ikit ne ing anak a lalaking kikiak. Melunus ya ing prinsesa king anak at ngana, Metung ya iti karing anak da ring Hebreo. fig,,,,,Ikit ne ning prinsesa ing takba...,(2:5)fig*

⁷ Kanita linapit ya ing atsi na ning anak king prinsesa at nganang kinutang, Bisa kayu pung panintun kung babaing Hebreo a maningat king anak para kekayo?

⁸ Wa, panintun mu ku, nganang mekibat ning prinsesa. Meko ya ing atsi na ning anak at ing inaus na ya mismu ing ima ning anak.

⁹ Nganang sinabi ning prinsesa king babai, Kuanan me ing anak a ini at sesen me para kanaku at bayaran da ka. Inya kinua ne ing anak at sinese ne.

¹⁰ Inyang meragul ne ing anak, dela ne king prinsesa at tinuring ne iting sarili nang anak. Pemalagyuan neng Moises uling agpang king prinsesa ya ing misaka king anak inyang atyu ya king danum.

¹¹ Inyang meragul ne i Moises linual ya ban dalawan na la ding kabalen na, at ikit na nung makananu lang mengapuersa ding Israelita king obrang mangabayat. Ikit nia naman nung makananu neng pete ning tau Ehipto ing metung a Hebreo.

¹² Miglalawe ya i Moises king makapadurut at inyang ikit nang alang aliwang manakit, pete ne ing tau Ehipto at kitkut ne ing bangke king balas.

¹³ Kabukasan migbalik ya i Moises at ikit na lang mipapate ding aduang Hebreo. Nganang Moises king maki kasalanan, Obat bubuatanan meng gamat ing kalupa mung Hebreo?

¹⁴ Mekibat ya ing taung kitnan na, Ninu ing minie upaya keka ban maging pamuntuk ka at ukum kekami? Buri mu ku munaman galang paten antimo nung makananu meng pete itang tau Ehipto? Mitakutan ya i Moises at ngana king lub na, Abalu da na pala deng tau ing depat ku.

¹⁵ Inyang abalitan na ning ari iting mepalyari buri neng ipapate i Moises. Oneng mekatakas ya at miras king Midian at karin ya menuknangan.

¹⁶ Atin yang pitung anak a babai i Jetro, ing pari ning Midian. Misan a aldo, makalukluk ya i Moises king lele ning talaga; dinatang la deting mikakapatad ban saklung danum para karing tupa at kambing nang tata ra.

¹⁷ Ating dinatang a pastul at penabi da la reting babai. Tinalakad ya i Moises ban saupan ding babai. Kaybat na nita, pepainum na lang Moises ding sese rang animal.

¹⁸ Inyang minuli na la, kitang nang Jetro a tata ra, Obat maranun kayung minuli ngeni?

¹⁹ Ngarang mekibat, Pemingua na kami ning metung a tau Ehipto karing lalaking magpastul, at saka na ke pa piniaklung danum, at ya ing minie inuman karing animal a dela mi karin.

²⁰ Antayu ing taung yan? nganang tata ra. Obat likuan yu nia mu kabud karin? Puntalan ye at agkatan makipangan kekatamu.

²¹ Mebisa ya i Moises ing karin ne manuknangan at binie neng Jetro kang Moises ing anak nang i Zipora ban maging asawa na.

²² Mikayanak lang metung a lalaki. At nganang Moises king lub na, Metung ku mung dayuan a miras keti. Inya pemalagyuan neng Gersom ing anak na.

²³ Mapilan pang banua kaybat na nita, mete ya ing ari ning Ehipto at ipus la pa mu rin ding Israelita. E la patugut sasaingsing at maniawad saup uli na ning kasakitan a daralanan da. Miras king Dios ing saingsing da.

²⁴ Dimdam na ing saingsing da at aganaka na ning Dios itang kasunduan na kari Abraham, Isaac, at Jacob.

²⁵ Ikit ning Dios ing kabilian da ring Israelita, at melunus ya karela.

3

¹ Misan a aldo, kabang papastulan na lang Moises ding tupa at kambing ning katuangan nang i Jetro, ing pari ning Midian, dela na la ding papastulan na lipat na ning disyerto at miras ya king Horeb, ing bunduk ning Dios.

² At karin pepakit ya kang Moises ing anghel ning Ginu antimong milalablab a api a manibatan libutad ning metung a tanaman a mababa. Apansin nang Moises king mitatau ya ing tanaman, oneng e ne man masisilab.

³ Makapagmulala iti, ngana king lub na. Obat e ya masisilab ing tanaman kabang mitatau ne man? Lumapit ku pa mo at lawan ku.

⁴ Inyang ikit na ning Ginu king lalapit ya i Moises, inaus ne ibat king milalablab a tanaman. Ngana, Moises, Moises! Nanu pu? nganang mekibat Moises.

⁵ Kanita ngana ning Dios, E ka lalapit. Ilukas mu la ding sandalyas mu uling sagradu ing gabun a tutukluan mu.

⁶ Aku ing Dios ding makatua mu, ing Dios nang Abraham, Isaac, at Jacob. Tikpan neng Moises ing lupa na uling tatakut neng lawan ing Dios.

⁷ Kanita ngana ning Ginu, Ikit ku nung makananu lang mipasakitan ding memalen kung Israelita karin Ehipto; dimdam ku ing saingsing da king gamat da ring babie kasakitan karela at balu ku ing kasakitan a daralanan da.

⁸ Inya tinipa ku ban iligtas ku la king gamat da ring tau Ehipto at idala ku lang lual Ehipto king gabun a malualas at mataba nung nukarin labis-labis ing kabiayan. Iti ya ing gabun da ring Cananeo, Hiteo, Amoreo, Perezeo, Heveo, at Jebuseo.

⁹ Dimdam ku ing saingsing da ring memalen ku at ikit ku nung makananu da lang alipitan ding tau Ehipto.

¹⁰ Me keni; tuburan da ka king ari ning Ehipto ban kanita ilual me king Ehipto ing balen kung Israel.

¹¹ Nganang mekibat Moises, Ninu mo pu aku a makiarap king ari ning Ehipto at ilual king Ehipto ing balen Israel?

¹² Ngana ning Dios, Patnubayan da ka at oyni ing tanda king aku ing mitubud keka. Potang ikua mu na lang alual Ehipto ding Israelita, samban yu ku keting bunduk.

¹³ Nganang Moises, Pota pung miras na ku karing Israelita at sabian ku karela king ikayu, ing Dios ding makatua da, ya ing mitubud kanaku at nung sakaling ikutang da kanaku, Nanu ing lagyu na? nanu mo pu ing ipakibat ku karela?

¹⁴ Ngana ning Dios kang Moises, Aku ing Aku. At ngana pa ning Dios, Sabian mu karela ini: Ing ausan dang i Aku tinubud na ku kekayu.

¹⁵ Sabian mu karing memalen ning Israel king aku, ing Ginu, ing Dios ding makatua da, ing Dios nang Abraham, Isaac, at Jacob ya ing mitubud keka karela. Iti ing lagyu ku king kapilan pa man; iti ya ing yaus dang lagyu kanaku ding sablang lahi king kapilan pa man.

¹⁶ Puntalan mu na la at tipunan ding manimuna ning Israel at sabian mu karela king aku, ing Ginu, ing Dios ding makatua da, ing Dios nang Abraham, Isaac, at Jacob, pepakit ku keka. At sabian mu karela king ikit ku ing pamipasakit a daraptan da karela ding tau Ehipto.

¹⁷ Inari ku king lub ku king ilual ku la king bansang babie kasakitan karela. Idala ku la king gabun nung nu labis-labis ing kabiayan, ing gabun a ngeni tutuknangan da ring Cananeo, Hiteo, Amoreo, Perezeo, Heveo, at Jebuseo. fig,,,,,Aku ing Aku...Iti ing lagyu ku king kapilan pa man.,(3:14-15)fig*

¹⁸ Makiramdam la ding memalen ku king sabian mu karela. Kaybat na nita, ika at ding manimuna ning Israel puntalan ye ing ari ning Ehipto at sabian yu ing anti kanini: Ing Ginu, ing Dios ding Hebreo, pepakit ya kekami. Ngeni ipakisabi ming mayap king paintulutan yu kami sanang maglakbe atlung aldo king disyerto ban makaibie kaming ain-sakripisyu king Ginung kekaming Dios!

¹⁹ Balu ku king e na kayu paintulutan mako ning ari ning Ehipto, nung e ya mangapuersa.

²⁰ Inya gamitan ku ing upaya ku at ipagpa ku king mabilug a Ehipto ing makapangilabut a parusa. Kaybat na nita, paintulutan na na kayung mako.

²¹ Paratangan ku la ganaka kekayu ding tau Ehipto ban kanita e ra kayu palakuan a alang bitbit a daralan.

²² Munta ya ing balang babai kekayu karing babaing tau Ehiptong kasiping nang bale at kenu pa mang babai a katubale na at maniawad yang imalan, alahas a gintu at pilak. Ipasulud yu la deti karing anak yu. Makanyan yung akua ing pibandian da ring tau Ehipto.

4

¹ Kanita nganang mekibat Moises, O nu mo pung e ra ku paniwalan ding Israelita at e la makiramdam king sabian ku karela? Nanu pu ing gawan ku potang sabian da king e ya tutung pepakit kanaku ing Ginu?

² Nanu ya ing tatalnan mu? nganang kinutang ning Ginu. Tukud ya pung pastul, nganang mekibat Moises.

³ Ngana ning Ginu, Moises, iyatsa me king gabun. Inatsa ne at meging ubingan ya ing tukud, at memulayi yang linaut king ubingan.

⁴ Kanita ngana ning Ginu kang Moises, Damputan me king iki ing ubingan. Inya dimput ne king iki at pasibayu yang meging tukud.

⁵ Ngana ning Ginu, Gawan mu ing anti kanyan ban patunayan mu karing Israelita king ing Ginu, ing Dios ding makatua da, ing Dios nang Abraham, Isaac, at Jacob pepakit ya keka. fig ,,,,Ban patunayan...king ing Ginu pepakit ya keka.,(4:5)fig*

⁶ Ngana pa ning Ginu kang Moises, Ipalub me ing gamat mu king baru mu tulid ning salu mu. Memintu ya, at inyang ilual ne ing gamat na ikit ne king atin yang sakit a ketung; maputi yang anting yelu.

⁷ Kanita ngana ning Ginu, Ipalub meng pasibayu ing gamat mu king baru mu tulid ning salu mu. Memintu ya i Moises, at inyang ilual neng pasibayu ala ne ing sakit a ketung; kalupa na ne ning sadia.

⁸ Nganang sinabi ning Dios, Nung e la bisang maniwala keka king mumunang bage pagmumulalan a gawan mu, mapalyaring maniwala na la king kadua.

⁹ Nung sakaling e la pa maniwala kareting aduang bage pagmumulalan at e la bisang makiramdam king sasabian mu, kuma kang ditak a danum king Ilug ning Nilo at ibulus mu king gabun. Maging daya ing danum.

¹⁰ Nganang Moises, Ginu, e ku pu talagang biasang magsalita manibat na king ibat at angga na ngening pakisabian yu ku. Makuyad ku pu dila; urut-urut ku pung magsalita.

¹¹ Ngana ning Ginu, Moises, ninu wari ing minie king asbuk ning tau? Ninu ing maki upayang gawan neng maklak o pipi? At ninu ing makaibie king panimanman na o makabulag king tau? Alang aliwa nune aku, ing Ginu.

¹² Sulung, lumakad na ka! Saupan da kang magsalita at ituru ku keka nung nanu ing sukat mung sabian.

¹³ Nganang tinutul Moises, Ginu, nung malyari pu sana mitubud na kayu mung aliwa.

¹⁴ Inya mimua ya ing Ginu kang Moises. Ngana, Atyu ne man ing kapatad mung i Aaron a Levita! Balu ku king biasa yang magsalita. King kamatutuanan papunta ne keti ban makikit keka; matula yang akit na ka.

¹⁵ Pakisabian me at sabian mu itang sukat nang sabian. Parehu da kayung saupan magsalita at ituru ku kekayu nung nanu ing sukat yung gawan.

¹⁶ I Aaron ya ing maging talapagsalita mu karing tau, at mangari ka mong Dios kang Aaron. Sabian mu ing sukat nang sabian.

¹⁷ Idala me ing kekang tukud-pastul a kekang gamitan ban makagawa kang bage pagmumulalan.

¹⁸ Mibalik ya i Moises kang Jetro, ing katuangan na, at ngana, Tatang, paintulutan yu ku sanang makapagbalik karing kamaganak ku karin Ehipto ban lawan ku nung mabie la pa. Mebisa ne man i Jetro at peintulutan neng mako i Moises.

¹⁹ Ngana ning Ginu kanitang atyu ya pa i Moises king Midian, Moises, magbalik na ka karin Ehipto, uling mete na la detang bisang makamate keka.

²⁰ Inya tiki neng Moises ing asawa na at ding anak nang lalaki. Seke na la king asno at meko na lang papunta Ehipto; pidala-dala ne itang tukud-pastul a inutus ning Dios a idala na.

²¹ Ngana ning Ginu, Moises, anti na ning magbalik na ka Ehipto, e mu la sana kakalinguan gagawan detang sablang bage pagmumulalan king arapan ning ari. Dininan da kang upayang makarapat kareti. Makanyan man, pasiasan ke lub ing ari at e na la paintulutan mako ding Israelita.

²² Kanita sabian mu king ari king aku, ing Ginu, sasabian ku, Ing Israel ya ing anak kung pangane.

²³ Sinabi ku na keka king paintulutan meng mako ing anak ku ban kanita asamban na ku, oneng e ka mebisa. Ngeni paten ke ing anak mung lalaking pangane.

²⁴ Kanitang papunta la Ehipto, kabang paynawa la pintalan ne ning Ginu i Moises at pignasan neng paten.

²⁵ Oneng i Zipora, ing asawa nang Moises, kinangwa yang metung a mataram a batu at ya ing ginamit na ban sirkunsisyunan ne ing anak nang lalaki. At kaybat, tigkil ne ing pipututan ketang atyu karing pilatan da ring puad nang Moises. Nganang Zipora kang Moises, Ngeni meging asawa da na ka king kapamilatan na niting daya.

²⁶ Inya e ne belaus pete ning Ginu. Kanita na sinabing Zipora king kesal ne i Moises uli na ning sirkunsisyun a merapat.

²⁷ Ngana ning Ginu kang Aaron, Munta ka karin king disyerto at saganan me i Moises. Memintu ya i Aaron at minta ya king bunduk ning Dios. Disnan ne i Moises karin at saka ne inuma.

²⁸ Sinabi na ngan Moises kang Aaron ing sablang sinabi na ning Ginu inyang sinabi nang magbalik ne Ehipto. Sinabi na la namang Moises kang Aaron detang bage pagmumulalan a parapat ning Ginu.

²⁹ Meko la ilang adua at minta Ehipto at saka ra la tinipun ding sablang manimuna na ning Israel.

³⁰ Sinabi nang Aaron karela ing sablang sinabi na ning Ginu kang Moises at kaybat gewa na lang Moises detang sablang bage pagmumulalan king akakit da ring tau.

³¹ Meniwala la ding tau at inyang dimdam da king ing Ginu ya ing dinalo karela at king ikit na ing kasakitan a daralanan da Ehipto, dinuku la ngan at simban de ing Ginu.

5

¹ Kaybat na nita, minta ya i Moises at i Aaron king ari ning Ehipto. Ngara, Ing Ginu, ing Dios ning Israel, pasabi na keka ing paintulutan mu lang mako ding memalen na ban malyari lang magpiesta king disyerto bilang parangal king Dios.

² Ngana karela ning ari, Ninu wari ing Ginung yan? Ba't mo kailangan keng pakiramdaman at paintulutan mako ding Israelita? E ke kakilala yang Ginung sasabian yu at e ku la malyaring paintulutan mako ding Israelita.

³ Pekibat da ri Moises at Aaron, Pepakit ya kekami ing Dios ding Hebreo. Paintulutan yu ke sanang maglakbe kilub ding atlung aldo papunta king disyerto ban makaibie kaming ain-sakripisyu king Ginung kekaming Dios. Nung ali, pamaten na ke ngan king kapamilatan na ning sakit a makapanawa o kaya king kapamilatan ning gera.

⁴ Ngana ning ari kang Moises at Aaron, Obat pangabalanan yu la king obra da ring tau? Sulung papagobran yu la pin ding ipus a ren!

⁵ Ngening mas dakal kayu kesa kekaming tau Ehipto buri yung tuknang kayung magobra?

⁶ King aldo mu ring ita inutus na ning ari karing tau Ehipto a manibala karing ipus at karing kapatas a Israelita ing anti kaniti:

⁷ Tuknang na kayung babie are karing taung mangawang laryu; paburen yu lang manintun dili ra.

⁸ Oneng e yu la babawasan a bilang ding laryu a sukat dang ayari. Matamad la mu inya e ra ku patugutan pakisabian ban paintulutan ku lang mako at miyain ain-sakripisyu king Dios da!

⁹ Dagdagan yu pa ing obra da at e yu la paintulutan makapagpaynawa ban kanita e la mika panaun makiramdam king nanu pa mang kalaraman.

¹⁰ Inya ding tau Ehipto a manibala karing ipus ampon ding Israelita a peka kapatas da linual la at ngara karela, Pasabi na ning ari king e ra na kayu dinan pang are.

¹¹ Ikayu na ing balang palto king are a kailangan yu, mu pin e yu la babawasan a bilang ding laryu a sukat yung ayari.

¹² Makanyan lang linibut mabilug a Ehipto ding Israelita ban manintun are.

¹³ Ding tau Ehipto a manibala karela pamiraplan da la. Ngara, Arian yu ing sukat yung gawan aldo-aldo a kalupa na kanitang dirinan da kayung are.

¹⁴ Nung sakaling kulang la king bilang ding ayari da, ding tau Ehipto pamugbugan da la ring kapatas a Israelita a mamahala karela. Ngarang sasabi, Obat e yu la ayari napun o ngeni ding laryu a sukat yung ayari antimo ing sadia yung gagawan?

¹⁵ Inya minta la ding kapatas a Israelita king ari ban magreklamu. Ngara, Obat pasakitan yu kaming makanyan-kanyan?

¹⁶ Buri yu ing palto keng laryu, oneng e yu na ke man dirinan are. Panasakitan da kami ding tauan yu; ikayu ing maki kakulangan.

¹⁷ Nganang mekibat ning ari, Mangatamad kayu ngan at e kayu mu bisang magobra, inya aduan yu kanaku ing paintulutan da kayung mako at miyain ain-sakripisyu king Ginu yu.

¹⁸ Sulung, magbalik kayu king obra yu! E kayu mirinan nanumang are, oneng palto yu la't palto ding laryu a kasing dakal da ring sadia yung gagawan.

¹⁹ Ikit da ring kapatas a Israelita ing masakit dang kabilian inyang dimdam dang kailangan lang palto laryu a kasing dakal da ring sadia rang gagawan.

²⁰ Inyang likuan da ne ing ari, asaganan de i Moises at i Aaron a manenaya karela.

²¹ Ngarang sinabi kang Moises at Aaron, Saksi ya ing Ginu king pepasari yu at parusan na kayu; king uli yu akasaman na kami ning ari ampon ding opisyal na. Anti yu na lang dininan matulid ban pamaten da kami.

²² Pasibayu yang linapit i Moises king Ginu at ngana, Ginu, obat paburen yu lang misasakitan ding taung pinili yu? Obat tiburan yu ku pa karela?

²³ Manibat na kanitang pekikitan ke ing ari ban sabian ku ing pasabi yu, e na na la pepatugutan pepasakitan. At ala kayu mang gewa ban iligtas la!

6

¹ Kanita ngana ning Ginu kang Moises, Akit mu mu rin nung nanu ing daptan ku king ari. Mapilit yang palakuan na la. Puersan keng itabi na la king kayarian na.

² Migsalita ya ing Dios kang Moises. Ngana, Aku ing Ginu.

³ Pepakit ku kang Abraham, kang Isaac, at kang Jacob bilang Dios a Mayupayang tutu, oneng e ke pepabalu karela king ing lagyu ku Ginu.

⁴ Ginawa ku namang kasunduan karela at pengaku ku karela king ibie ke ing Canaan, ing gabun nung nu la mekipamalen bilang dayuan.

⁵ Dimdam ku ing saingsing da ring Israelitang inipusan da ring tau Ehipto at aganaka ke ing kasunduan ku.

⁶ Inya sabian mu karing Israelita king iti ya ing sasabian ku karela, Aku ing Ginu, iligtas da kayu king kasakitan a daralanan yu karing gamat da ring tau Ehipto. Ilako da kayu king panga-ipus yu karela. Ipagpa ku karela ing bayat ning pamamarusa ku at sagipan da kayu.

⁷ Gawan da kayung sarili kung memalen, at aku ing maging Dios yu. Abalu yu kanita king aku ing Ginung kekayung Dios a migligtas kekayu king panga-ipus yu Ehipto.

⁸ Idala da kayu king gabun a tapat kung pengakung ibie kang Abraham, Isaac, at Jacob. Ibie ke kekayu iting gabun at maging bandi ye. Aku ing Ginu.

⁹ Sinabi nang Moises iti karing Israelita, oneng e la bisang makiramdam uling mengaina na la at tutung mabayat ing kasakitan a daralanan da.

¹⁰ Kanita ngana ning Ginu kang Moises,

¹¹ Sulung, sabian mu king ari ning Ehipto king paintulutan na lang mako ding Israelita king kayarian na.

¹² Pekibat nang Moises, Den mang pung Israelita e la mekiramdam kanaku, ing ari pa kaya? E ku pu talagang biasang magsalita.

¹³ Ngana ning Ginu kang Moises at Aaron, Sabian yu karing Israelita at king ari ning Ehipto king inutusan da kayu ban panimunan yu lang ilual Ehipto ding Israelita.

¹⁴ I Ruben, ing pangane nang Jacob, atin yang apat a anak a lalaki. Ila di Hanok, Pallu, Hezron, at Carmi. Ila ding penibatan da ring pamilyang magdala king lagyu ra.

¹⁵ Mikayanak ne mang anam a lalaki i Simeon. Ila deti: Jemuel, Jamin, Ohad, Jakin, Zohar, at i Saul a ayanak na king babaing tau Canaan. Ila deti ring penibatan da ring pamilyang magdala king lagyu ra.

¹⁶ Atlu la ding anak nang lalaking Levi: i Gerson, i Kohat, at i Merari. Ila deti ring penibatan da ring pamilyang magdala king lagyu ra. Miras yang dinalan atlung pulu't pitung banua i Levi.

¹⁷ Mikayanak yang aduang lalaki i Gerson: i Libni at i Simei at deti dakal la meging lahi.

¹⁸ Mika apat ne mang anak a lalaki i Kohat: i Amram, i Izar, i Hebron, at i Uziel. Mebie yang dinalan atlung pulu't atlung banua i Kohat.

¹⁹ Mikayanak yang aduang lalaki i Merari: i Mahli at i Musi. Ila deti ring pamilya nang Levi a lahi na.

²⁰ Ayasawa neng Amram i Jokebed, ing kapatad nang babaing tata na, at ayanak da la ri Aaron at Moises. Mebie yang dinalan atlung pulu't pitung banua i Amram.

²¹ Mikayanak yang atlung lalaki i Izar: i Kora, i Nefeg, at i Zikri.

²² Mikayanak ya namang atlung lalaki i Uziel: i Misael, i Elsafan, at i Sitri.

²³ Mekiasawa ya i Aaron kang Eliseba a kapatad nang Nason at anak nang Aminadab. Ayanak da la ri Nadab, Abihu, Eleazar, at i Itamar.

²⁴ Atin yang atlung anak a lalaki i Kora; ila di Asir, Elkana, at i Abiasaf. Ila deti ring meging bunga na ning pamilya nang Kora.

²⁵ Mekapakiasawa ya i Eleazar a anak nang Aaron king metung karing anak nang Futiel, at ayanak de i Fineas. Ila deti ring buntuk ding pamilya at pamilya na ning tribu nang Levi.

²⁶ I Aaron at i Moises ila kabud ding inutusan na ning Dios ban panimunan la at ilual Ehipto ding Israelita, agpang king tribu da.

²⁷ Ila naman ding sinabi king ari ning Ehipto king palakuan na na la Ehipto ding Israelita.

²⁸ Migsalita ya ing Ginu kang Moises kanitang atyu ya karin king bansa ning Ehipto.

²⁹ Ngana, Aku ing Ginu. Sabian mu king ari ning Ehipto ing sablang sabian ku keka.

³⁰ Nganang tinutul Moises, Makananu na ku pung pakiramdaman ning ari ning Ehipto ngening e na ku man biasang magsalita?

7

¹ Ngana ning Ginu, Moises, gawan da kang antimong Dios king arapan ning ari, at ing kapatad mung i Aaron ya ing magsalita king ari para keka bilang propeta.

² Sabian mu kang Aaron ing sablang yutus ku keka, at ya ing sumabi king ari king paintulutan na na lang mako ding Israelita king sasakupan na.

³ Oneng pasiasan ke pusu ing ari at e na ka pakiramdaman agyang nu pa anti karakal ing daptan kung miyayaliwang makapagmulalang bage karin Ehipto.

⁴ Kaybat na nita, ipagpa ku ing mangabayat a parusa king Ehipto at panimunan ku la ding taung pinili ku, ing balen ning Israel, king paglual da Ehipto.

⁵ Abalu da kanita ding tau Ehipto king aku ing Ginu potang ipagpa ku neng mitmung beyatan karela ing gamat ku, at ilual ku la ding Israelita king bansa da.

⁶ Gewa nang Moises at Aaron itang inutus na ning Ginu.

⁷ Walu yang pulung banua i Moises at walu yang pulu't atlung banua naman i Aaron kanitang migsalita la king ari.

⁸ Ngana ning Ginu kang Moises at Aaron,

⁹ Nung aduan ning ari ing patunayan yu ing kekong sarili king kapamilatan ning pamaniapat metung a bage pagmumulalan, sabian mu kang Aaron king kuanan ne ing tukud na at iyatsa ne king arapan ning ari at maging ubingan ya.

¹⁰ Inya minta la king ari di Moises at Aaron, at depat da itang inutus na karela ning Ginu. Inatsa neng Aaron ing tukud na king arapan ning ari, at karing opisyal na at meging ubingan ya.

¹¹ Pepayaus na la kanita ning ari ding pantas na ampon salamangkeru, at arapat da naman ing anti kanita king kapamilatan ning gelingan da.

¹² Inatsa da la naman ding tukud da, at meging ubingan la. Oneng inakmul na la ngan deti nitang kang Aaron.

¹³ Menatili ya pa mu ring masias a pusu ing ari, at e ya bisang makiramdam kari Moises at Aaron, antimo ing sinabi na ning Ginu.

¹⁴ Kanita ngana ning Ginu kang Moises, Tutu yang masias a pusu ing ari at e na la buring mako ding Israelita.

¹⁵ Sulung, makikit ka king ari potang abak; pakitagpuan me potang dulung ya king Ilug ning Nilo. Idala me itang tukud a meging ubingan, at panayan me keta king pampang ning ilug.

¹⁶ Anti kaniti ing sabian mu king ari, Ing Ginu, ing Dios ding Hebreo, tiburan na ku ban sabian ku keka king paburen mu na lang mako ding memalen na ban makasamba la king Dios keta king disyerto. Oneng angga ngeni e ka pa bisang makiramdam.

¹⁷ Ngeni, Makamal a Ari, pasabi na ning Ginu king akilala me nung ninu ya king kapamilatan ning daptan na. Lawan yu, ibarug ke ining tukud a ini king babo ning danum ning ilug at maging daya ing danum.

¹⁸ Mate la ding asan at mantut ya ing ilug angga king e na la malyaring makainum kaniti ding tau Ehipto.

¹⁹ Ngana ning Ginu kang Moises, Sabian mu kang Aaron king kuanan ne ing tukud na at itulid ne karing sablang ilug, karing paligi, at karing paranum king mabilug a Ehipto. Maging daya ing danum; mika daya karing barilis at tapayan king mabilug a Ehipto.

²⁰ Memintu la di Moises at Aaron antimo ing inutus na karela ning Ginu. King akakit na ning ari ampon ding opisyal na, tinas neng Aaron ing tukud na at berug ne ing danum, at meging daya ing danum ning ilug.

²¹ Mete la ding asan king ilug at mebantut ya ing ilug angga king e na la makainum kaniti ding tau Ehipto. Mika daya king mabilug a Ehipto.

²² Pikiapusan da naman iti ding salamangkeru na ning ari king kapamilatan ning gelingan da, at lalu yang mesias a pusu ing ari. Antimo ing asabi na na ning Ginu, e ya mebisang makiramdam kari Moises at Aaron.

²³ Bagkus, migbalik ya at minuli king palasyu na; e na pinsinan bitasa pati na iti.

²⁴ Kinulkul la ding sablang tau Ehipto king pampang na ning ilug ban manikuang danum a ainum da, uling e ra malyaring inuman ing danum ning Ilug ning Nilo.

²⁵ Linabas ing pitung aldo kaybat neng berug ning Ginu ing danum ning ilug.

8

¹ Kanita ngana ning Ginu kang Moises, Puntalan meng pasibayu ing ari at sabian mu king pasabi na ning Ginu ing anti kaniti: Paburen mu na lang mako ding memalen ku ban makasamba la kanaku.

² Nung e ka mabisa, katmuan keng tugak ing kayarian mu bilang parusa.

³ Kumatmu ya karing tugak ing Ilug ning Nilo angga king sumaka la deti at miras king palasyu mu, king kuartung pitutudturan mu, king katri mu, karing bale da ring opisyal at bale ding memalen mu, at angga na karing ornu ampon kasangkapan a pigagawan tinape.

⁴ Paglundagan da ka at ding sasakupan mu ampon ding sabla mung opisyal. fig,,,,,Paglundagan da ka.,(8:4)fig*

⁵ Ngana ning Ginu kang Moises, Sabian mu ngeni kang Aaron king itas ne ing tukud na tulid da ring ilug, paligi, at paranum at pasakan na la ding tugak at laganapanan de ing Ehipto.

⁶ Inya tinas neng Aaron ing tukud na tulid da ring sablang lugal a ating danum, at linage la ding dakal a tugak at kitmuan de ing mabilug a Ehipto.

⁷ Oneng ginamit da ring salamangkeru ing gelingan da at mekapalto la namang tugak.

⁸ Pepayaus na la ning ari di Moises at Aaron. Ngana karela, Pakisabi yu king Ginu king ilako na na la sana deting tugak at paburen ku na lang mako ding kalahi yu ban makaibie lang ain-sakripisyu king Ginu.

⁹ Nganang mekibat Moises, Matula kung manalangin para kekayu. Ituldu yu mu ing oras at aku manalangin ku para kekayu, para karing opisyal yu, at para karing memalen yu. Mabating na la kanita kekayu ding tugak at ala nang mitagan nune mu ding king Ilug ning Nilo.

¹⁰ Nganang mekibat ning ari, Ipanalangin mu ku bukas mu rin. Nganang Moises, Daptan ku ing aduan yu at kanita yu akilala king alang aliwang Dios a kalupa na ning Ginung kekaming Dios.

¹¹ Ikayu, ding opisyal yu, at ding memalen yu e yu na la akit pa ding tugak puera mu detang mitagan king Ilug ning Nilo.

¹² Meko la di Moises at Aaron king arapan na ning ari, at kaybat menalangin ya i Moises king Ginu king ilako na na la sana ding tugak.

¹³ Depatan na ning Ginu itang inawad nang Moises, at mete la ding tugak karing bale, karing mulahan, at marangle.

¹⁴ Tinipun da la reti ding tau Ehipto karing mangaragul a tumpuk angga king mikalat ing buluk da king mabilug a lugal a ita.

¹⁵ Inyang ikit na ning ari king mete na la ding tugak, mesias ne naman a pusu, antimo ing sinabi na na ning Ginu, at e ne naman mebisang makiramdam kari Moises at Aaron.

¹⁶ Ngana ning Ginu kang Moises, Sabian mu kang Aaron king ibarug ne king gabun ing tukud na at maging niknik ing alikabuk king mabilug a Ehipto.

¹⁷ Inya berug neng Aaron king gabun ing tukud na, at meging niknik ing heganaganang alikabuk ning Ehipto, at digpanan da la ngan ding tau ampon ding animal.

¹⁸ Buri dang gamitan ding salamangkeru ing gelingan da ban palto la namang niknik, oneng mebigu la. Atyu la ding niknik nukarin mang lugal.

¹⁹ Ngara ding salamangkeru king ari, Ing Dios ya ing makirapat kaniti! Oneng masias ya pa mu rin pusu ing ari, antimo ing sinabi na na ning Ginu, at e ya bisang makiramdam kari Moises at Aaron.

²⁰ Ngana ning Ginu kang Moises, Makikit ka bukas abak a maranun king ari potang dulung ya king ilug at sabian mu king ing Ginu pasabi na ing anti kaniti: Paburen mu na lang mako ding memalen ku ban makasamba la kanaku.

²¹ Nung e mu la paintulutan mako ding taung pinili ku, parusan da ka king kapamilatan na ning pamiparatang kung lango keka, karing opisyal mu, at karing taung sasakupan mu. Kumatmu lang lango ding pibalebale da ring tau Ehipto at mitakpan ya ing gabun kareti.

²² Oneng milisia ya kaniti ing sakup ning Gosen nung nu la manuknangan ding taung pinili ku; e mika lango karin ban akilala mu king aku, ing Ginu, ing maki upaya king bansang iti.

²³ Palto kung pamiyaliwa karing memalen ku ampon karing memalen mu. Marapat bukas iting bage pagmumulalan.

²⁴ Kabukasan, pepagpa yang pulupulutung a lango ing Ginu king palasyu ning ari at karing bale ra ding tauan na. Mesalanta ya ing kabilugan a Ehipto uli ra ding lango.

²⁵ Inya pepayaus na la ning ari di Moises at Aaron. Ngana karela, Sulung, miyain na kayung ain-sakripisyu king Dios yu, oneng keti Ehipto.

²⁶ Nganang Moises, E malyari keti, uling manamdaman la ding tau Ehipto uli da ring animal a iyain mi king Ginung kekaming Dios kasuklam-suklam la karela. Nung gumamit kaming animal a makatakid karing tau Ehipto king pamiyain mi ketang akakit da pamasibasan da keng batu angga king mangamate kami.

²⁷ Kailangan ing maglakad keng atlung aldo libutad ning disyerto ban makayain kaming ain-sakripisyu king Ginung kekaming Dios, antimo nung makananu nang inutus kekami.

²⁸ Ngana ning ari, Palakuan da kayu ban miyain ain-sakripisyu king Ginung kekayung Dios karin king disyerto, nung e yu masiadung pakalaut. Pakipanalangin yu ku naman.

²⁹ Mekibat ya i Moises, Kalako ku keti, ipanalangin ku king Ginu king bukas ilako na na la ding lango kekayu, karing opisyal yu, at karing taung sasakupan yu. Oneng e yu na ke sana lilinlangan pasibayu at e yu na la sana sasabatan ding Israelita king paglako ra ban miyain ain-sakripisyu king Ginu.

³⁰ Likuan na neng Moises ing ari at kaybat menalangin ya king Ginu.

³¹ Binie na ning Ginu itang inawad nang Moises. Likuan de ring lango ing ari, ding opisyal na, at ding memalen na; alang mitagan agyang metung mung lango.

³² Agyang king pamikatagun mu ring ita menatili ya pa mu ring masias a pusu ing ari, at pasibayu na lang e peintulutan mako ding Israelita.

9

¹ Ngana ning Ginu kang Moises, Munta ka king ari at sabian mu king ing Ginu, ing Dios ding Hebreo, pasabi na ing anti kaniti: Paburen mu na lang mako ding taung pinili ku ban makasamba la kanaku.

² Nung pasibayu mu lang e paintulutan,

³ parusan da ka king kapamilatan ning pamiparatang kung pesti karing sabla yung animal: karing kabayu yu, asno, kamelyu, baka, tupa, at kambing.

⁴ At palto kung pamiyaliwa ra ding animal da ring Israelita ampon ding karing tau Ehipto. Alang bitasang mate karing sese rang animal ding Israelita.

⁵ Aku, ing Ginu, tikda ke ing aldo bukas ban daptan ku iti.

⁶ Kabukasan, depatan ning Ginu itang sinabi na, at mete la ngan ding sablang animal da ring tau Ehipto, oneng alang mete metung man karing animal da ring Israelita.

⁷ Kitang ning ari nung nanu ing milyari, at pekibat da king alang mete metung man karing animal da ring Israelita. Oneng masias ya pa mu rin a pusu ing ari, at e na la peintulutan mako ding tau.

⁸ Kanita ngana ning Ginu kari Moises at Aaron, Kuma kayung mapilan a kasakmal a abu king pugun. Iyatsa nang matas Moises iti king arapan ning ari.

⁹ Mikalat anting alikabuk a mapinu iting abu king mabilug a sasakupan ning Ehipto at nukarin man iti makapasaring tigsang nanaknak karing tau ampon karing animal.

¹⁰ Inya kinangwa lang mapilan a kasakmal a abu at tinalakad la king arapan ning ari. Inatsa nang matas Moises iti at mekapasari king panga-tigsan da ring tau ampon ding animal. Nanaknak la deting tigsa.

¹¹ E ra ikuang miratang ding salamangkeru king arapan nang Moises uling mika tigsa la namang kalupa ra ding sablang tau Ehipto.

¹² Oneng pepasiasan ne pa mu rin a pusu ning Ginu ing ari, antimo ing sinabi na kanita, at e ya mu rin mebisang makiramdam ing ari kari Moises at Aaron.

¹³ Kanita ngana ning Ginu kang Moises, Bukas abak a maranun pakikitan me misan pa ing ari. Sabian mu king ing Ginu, ing Dios ding Hebreo, pasabi na ing anti kaniti: Paburen mu na lang mako ding taung pinili ku ban makasamba la kanaku.

¹⁴ Oneng ngeni ing parusan ku aliwa mu ding opisyal mu at ding taung sasakupan mu; pati ika parusan ku ban kanita akilala mu king ala kung kalupa king mabilug a yatu.

¹⁵ Nung pepagpa ke ing gamat ku keka at king balen mu at peparalang salut, pota magisan kayung lubus.

¹⁶ Oneng pekikuanan kung e ka mate ban apakit ku keka ing upaya ku at mikalat king mabilug a yatu ing kabantugan ku.

¹⁷ Makanyan man, masias ka pa mu rin a lub at e mo pa mu rin paintulutan mako ding taung pinili ku.

¹⁸ Bukas, king oras a anti kaniti, paratang kung masikan a uran-lipat a e na pa ikit kapilan man ning Ehipto king mabilug nang delanan a kasalesayan.

¹⁹ Ngeni pa iyutus mu na king isalilung da na la ding sese rang animal at ing nanu pa mang atyu king marangle. Dugpa ing uran-lipat karing tau at karing animal a mitagan a e makasalilung; magisan la ngang mate.

²⁰ Mitakutan la ding mapilan karing opisyal ning ari uling sinabi na ning Ginu, inya selilung da la at leko king marangle ding ipus da ampon sese animal.

²¹ Makanyan man, e ra pinsinan ding aliwa ing babala na ning Ginu, inya pepaburen da lang e makasalilung ding ipus da ampon sese animal king marangle.

²² Kanita ngana ning Ginu kang Moises, Itas me ing gamat mu at muran lipat king kabilugan a sakup na ning Ehipto; karing tau, karing animal, at karing sablang tanaman king marangle.

²³ Inya tinas neng Moises ing tukud na, at

²⁴ peparatang yang masikan a uran-lipat ing Ginu at mikit munaman ing kildap at ing duldul. Ita ing peka grabing diling uran-lipat a delanan na ning Ehipto king kabilugan nang kasalesayan.

²⁵ Digpa ing uran-lipat king mabilug a Ehipto, king sablang atyu king marangle pati na karing tau ampon animal. Sinira na ngan ing heganaganang bage tutubu at ding tanaman.

²⁶ Bukud mung ing sakup ning Gosen, nung nukarin la manuknangan ding Israelita, ing e na digpanan ning uran-lipat.

²⁷ Inya pepayaus na la ning ari di Moises at Aaron. Ngana karela, Wa, ngeni tatanggapan ku king mikasala ku; ing Ginu ya ing atyu king matulid at ing balen ku ampon aku ing atyu king pamagkamali.

²⁸ Manalangin kayu king Ginu king patuknangan na na sana iting duldul ampon uran-lipat. Pangaku ku king paintulutan da na kayung mako; e na kayu sukat magluat pa.

²⁹ Nganang Moises, Kabud ikua kung mekalual king siudad, itas ku la ding gamat ku at manalangin ku king Ginu. Tuknang ing duldul at mawala na ing uran-lipat ban kanita abalu yu king bandi ne ning Ginu ing yatu.

³⁰ Oneng balu ku king ikayu at ding opisyal yu e ye pa pitatakutan ing Ginung Dios.

³¹ Mesira la ding tanaman a lino at sebada uling tutua na ing sebada at mamuku na ing lino.

³² Oneng alang mesira king trigu uling iti tauling mamunga.

³³ Likuan neng Moises ing ari at linual ya king siudad. Kaybat, tinas na la ding gamat na at menalangin ya king Ginu. At tinuknang ing duldul, ing uran-lipat ampon ing uran.

³⁴ Inyang ikit ning ari ing milyari, pasibayu yang mikasala. Ya ampon ding opisyal na lakuas lang mesias a pusu,

³⁵ antimo ing sinabi na ning Ginu kang Moises kanita pa. E na la pa mu rin peintulutan ning ari ing mako la ding Israelita.

10

¹ Kanita ngana ning Ginu kang Moises, Pakikitan me pa ing ari. Pepasias ke pusu at ding opisyal na ban akua ku lang arapat deting bage pagmumulalan libutad da,

² at ban akua mung asabi karing anak yu at karing apu yu nung makananu ku lang pepalto mangmang ding tau Ehipto inyang gewa ku la deting bage pagmumulalan; ban akilala yu ngan king aku ing Ginu.

³ Inya minta lang pasibayu king ari di Moises at Aaron. Ngara king ari, Ing Ginu, ing Dios ding Hebreo, sasabian na, Angga kaya kapilan ing e ka bisang pailalam king kaburian ku? Paburen mu na lang mako ding taung pinili ku ban makasamba la kanaku.

⁴ Nung e ka pa mu rin mabisa, paratang kung durun bukas king kayarian mu.

⁵ Takpan de ing mabilug a Ehipto uli na ning keraklan da ring durun. Kanan da ngan ing sablang e na sinira ning uran-lipat at pati na ding tanaman a mitagan.

⁶ Katmuan de ing palasyu mu at ding bale da ring opisyal mu ampon ding sablang taung sasakupan mu. Igitan da ing nanu pa mang kasiran a ikit da ring pipumpunan mu. Inyang asabi na iti, meko ne.

⁷ Ngara ding opisyal na ning ari, Angga pa kapilan ing guguluan na katamu ning taung iti? Paburen yu na lang mako ding Israelita ban asamban da ne ing Ginung karelang Dios. E yu pu wari akakit king ala nang berding tanaman king mabilug a Ehipto?

⁸ Inya pepayaus na la ning ari di Moises at Aaron at ngana karela, Malyari na kayung mako at samba king Ginung kekayung Dios. Oneng ninu ding mako?

⁹ Mekibat ya i Moises, Ikami ngan at pati na ding anak mi ampon ding makatua mi. Ituki mi la ding anak mi, ding kekaming tupa, kambing, at ding kekaming baka, uling kailangan kaming magpiesta ban parangalan ya ing Ginu.

¹⁰ Ngana ning ari, Susumpa ku king Ginu king kapilan man e ra kayu paintulutan ituki yu la ding asawa yu at anak! Masalang masala king atin kayung balak mag-rebeldi.

¹¹ Ali! Den mung lalaki ilang malyaring mako at samba king Ginu, nung ita ing buri yu. Kasabi na nita, tinabi da lang pepalakuan king arapan na ning ari.

¹² Kanita ngana ning Ginu kang Moises, Itas me ing gamat mu babo ning bansa ning Ehipto ban datang na la ding durun. Datang la at kanan da ing sablang tutubu, ing sablang mitagan king uran-lipat.

¹³ Inya tinas neng Moises ing tukud na, at peparatang na ning Ginu ing angin ibat king aslagan; pepatiupan na banda king mamala kilub ning patingapun at kabukas. Inyang abak na migdala nang durun ing angin.

¹⁴ Dinatang lang pulupulutung at digpa la king kabilugan a kayarian. Ila na deta ring pekamarakal karing durun a meyakit angga king aldong ita a e malyaring mayakit pa king daratang a panaun.

¹⁵ Tikpan da ing gabun angga king metuling iti karela; pengan da ing mitagan king uran-lipat at pati na ding bungang tanaman. Alang mitagan a berdi karing dutung ampon tanaman king mabilug a Ehipto.

¹⁶ Agad-agad na lang pepayaus ning ari di Moises at Aaron. Ngana karela, Mikasala ku king Ginung kekayung Dios at kekayu.

¹⁷ Patawaran yu ku sana kaniting pamikasala ku, at ipanalangin yu king Ginung kekayung Dios ing ilako na na sana iting mabayat a parusa kanaku.

¹⁸ Likuan neng Moises ing ari at menalangin ya king Ginu.

¹⁹ At inalilan na ning Ginu ing angin a manibatan king aslagan king masikan a angin a ibat king albugan, at mipaid la ding durun king Dagat da ring Timbu. Alang mitagan metung man karing durun king mabilug a Ehipto.

²⁰ Oneng pepasiasan na ne naman a pusu ning Ginu ing ari, at e na la peintulutan mako ding Israelita.

²¹ Ngana ning Ginu kang Moises, Itas me ing gamat mu at ing dalumdum a tutung makapal, kulang na mu atagkil mu na, takpan ne ing mabilug a Ehipto.

²² Tinas neng Moises ing gamat na, at mika ganap a dalumdum king mabilug a Ehipto kilub ding atlung aldo.

²³ E la mikakit man ding tau Ehipto at alang mekalual king bale ra kilub ning panaun a ita. Oneng masala king lugal da ring Israelita.

²⁴ Pepayaus ne ning ari i Moises at ngana, Moises, malyari na kayung mako at samba king Ginu at ituki yu la pati na ring asawa yu at anak. Oneng sukat lang malakuan keti ding kekayung tupa, kambing, at baka.

²⁵ Nganang mekibat Moises, Nung makanyan kailangan dinan yu keng animal para karing ain-sakripisyu at ain-a-durulukan ban iyampang mi king Ginung kekaming Dios.

²⁶ Oneng e makanyan, kailangan ing ituki mi la ding sese ming animal; alang malakuan keti metung man kareti. Ikami ding sukat mamili karing animal a gamitan mi king pamanyamba mi king Ginu kekaming Dios. E mi balu nung isanu kareting animal ing iyain mi king Ginu anggang e ke miras karin.

²⁷ Pepasias na ne naman a pusu ning Ginu ing ari, at e na la peintulutan mako ding Israelita.

²⁸ Ngana kang Moises, Mabating ka keng arapan ku! E ra na ka buring akit pang pasibayu. Paten da ka kabud akit da ka!

²⁹ Nganang Moises, Ikayung bala. E yu na ku akit pang pasibayu.

11

¹ Ngana ning Ginu kang Moises, Parala na ku mung metung pang parusa king ari na ning Ehipto at karing memalen na. Kaybat na nita, mabisa neng palakuan na na kayu. Ya na mismu ing mitabi keko ngan.

² Magsalita ka ngeni karing memalen na ning Israel at sabian mu karela ngan king maniawad lang alahas a gintu at pilak karing kasiping dang bale.

³ Birian na ning Ginu ing maging maganaka la ding tau Ehipto karing Israelita. King kamatutuanan ding tau Ehipto at ding opisyal da kikilalanan deng taung marangal i Moises.

⁴ Kanita nganang Moises king ari, Ing Ginu sasabian na, Bandang kapitangan bengi dumalan ku libutad na ning Ehipto,

⁵ at mate ya ing balang anak a lalaking pangane keti Ehipto manibat king pangane nang lalaki ning ari a talapagmana na ning tronu na angga king anak ning babaing ipus a gigiling trigu. Mate la naman ding pangane ra ding sablang baka.

⁶ Mika masikan a pamanangis king mabilug a Ehipto a alang kalupa manibat king milabas a panaun angga na king daratang a panaun.

⁷ Maging ding asu e ra la kaungan ding Israelita o kaya ding sese rang animal. Kanita yu akilala king aku, ing Ginu, gagawa kung pamiyaliwa da ring tau Ehipto karing tau Israel.

⁸ Nganang memupus migsalitang Moises, Lumapit la kanaku ding sabla yung opisyal at duku la king arapan ku, at pakisabian da kung mayap king ilako ku na la ding kabalen ku at mako na kami. Kaybat na nita, mako na ku. Mikakaluku ing mua nang Moises inyang likuan ne ing ari.

⁹ Kanita ngana ning Ginu kang Moises, Tanggi yang pasibayung makiramdam keka ing ari ban aku makarapat kung lalung dakal a bage pagmumulalan king sasakupan na ning Ehipto.

¹⁰ Gewa da la ngan di Moises at Aaron deting sablang bage pagmumulalan king arapan na ning ari, oneng pepasiasan ne pusu ning Ginu, at e ya mebisang palakuan na la ding Israelita king bansang sasakupan na.

12

¹ Migsalita ya ing Ginu kang Moises at kang Aaron karin king bansang Ehipto. Ngana karela,

² Iti ya ing sukat maging mumunang diling bulan na ning pabanua para kekayu.

³ Ipayabut yu la deting panabilin king mabilug a balen ning Israel: King kapulung aldo na niting bulan ing balang lalaki mamili yang metung a biserung tupa o biserung kambing para karing katubale na.

⁴ Nung tutu yang malati ing pamilya na at e ne agyung gisanan ing kabilugan a animal, ya ampon ing kasiping nang bale malyari reng pirakayan ing metung a animal, agpang king bilang da ring tau ampon king agyu nang kanan ning balang katau.

⁵ Malyari kayung mamiling metung a tupa o kaya metung a kambing, oneng kailangan king lalaki ya at pabanua tua, at ala yang kapansanan.

⁶ Kaybat sesen yu la angga king sisilim na ning kalabing apat a aldo ning bulan at paten na la ning mabilug a balen ning Israel deting mesabing animal.

⁷ Kailangan lang kumang ditak king daya at ikaskas da karing amba at babo da ring pasbul da ring bale nung nu la mapangan deting animal.

⁸ King benging ita sukat minangnang ing laman at mapangan a kayabe ding mapait a gule at ning tinape alang lebadura.

⁹ E ye kakanan sagiwa o linaga; kanan yeng melitsun kabilugan pati na ing buntuk, ding bitis, at ing laman lub.

¹⁰ Ala kayung tatagan kaniti angga itang kabukasan abak; nung ating nanumang mitagan, sukat silaban.

¹¹ Malagua yeng kanan. Miblas kayu para king makabang lakaran, makasulud na la ding sandalyas yu at talnan ye king metung yung gamat ing tukud yu. Iti ing pamagselebra king Pamaglagpus bilang parangal kanaku, ing Ginu.

¹² King benging ita, lumabas ku king mabilug a Ehipto; paten ku la ding sablang anak dang pangane lalaki ding tau at animal; pagpa ku ing parusa karing dios na ning Ehipto. Aku ing Ginu.

¹³ Maging palatandanan ya karing pibalebale yu ing daya karing amba da ring pasbul. Lagpusan da kayu potang akit ku ing daya, at e kayu midame potang pagpa ku ing parusa king bansang Ehipto.

¹⁴ Sukat yeng pagselebran ing aldong iti bilang piestang parangal king Ginu ban e yu kalinguan ing depatan ku, ing Ginu. Pagselebran ye king kapilan pa man.

¹⁵ Ngana ning Ginu, Kilub ding pitung aldo e kayu sukat mamangan tinape nune mu itang alang lebadura. King mumunang aldo ilako yu karing pibalebale yu ing sablang lebadura, uling ing ninumang mangan tinape ating lebadura kilub ding pitung aldo reta, mitiwalag ya king balen ning Israel.

¹⁶ Mitipun-tipun kayu king mumunang aldo at pasibayu king kapitung aldo ban samba. Alang darapat nanumang obra kareting aldo; ing makapaintulut mu kekayu ya ing pamisadia king pamangan a kailangan yu.

¹⁷ Sukat yeng gampanan iting Piesta ning Tinape Alang Lebadura uling king aldong iti kanita ku la ngan liwal ibat Ehipto ding tribu yu. Pagselebran ye iting aldo bilang metung a piesta karing panaun a datang pa.

¹⁸ E kayu mamangan tinape ating lebadura manibat king sisilim ning kalabing apat a aldo ning mumunang bulan angga king sisilim ning kaduang pulu't metung a aldo.

¹⁹ Kilub ding pitung aldo alang lebadurang sukat mayakit kilub ding pibalebale yu, uling ing ninuman, dayuan ya man o tubu ya king kekayung lugal, a mangan tinape ating lebadura mitiwalag ya king balen ning Israel.

²⁰

²¹ Pepayaus na la ngan Moises ding sablang manimuna na ning Israel at ngana karela, Munta kayu karing kawan at mamili kayung biserung tupa o biserung kambing, at paten yu la ban apagselebran de ring pamilya yu ing Pamaglagpus.

²² Kuma kayu namang sangang hisopo at isoso ye king daya a makadatuk king palanggana, at kaskasanan ye ing babo at ding mingatbang amba da ring kekayung pasbul bale. Ala kayung palualan ninuman king bale angga itang abak.

²³ Potang lumabas ya ing Ginu king mabilug a Ehipto ban pamaten na la ding tau Ehipto, akit na ing daya babo at karing mingatba nang amba ning pasbul, lagpusan ne kanita ning Anghel ning Kamatayan ing bale yu at e na paintulut ning Ginu ing mate kayu.

²⁴ Ikayu at ding anak yu sukat yu lang tuparan deting tuntunan king kapilan pa man.

²⁵ Potang akua yu nang miras ketang lugal a pengaku nang ibie kekayu ning Ginu, tuparan ye pa mu rin at gampanan iting selebrasyun.

²⁶ At potang ikutang da kekayu ding anak yu, Nanu ing buri nang sabian niting selebrasyun?

²⁷ Ipakibat yu karela, Iti ya ing ain-sakripisyu ning Pamaglagpus; parangal ya king Ginu, uling ligpusan na la ding bale da ring Israelita karin king Ehipto. Pete na la ding tau Ehipto, oneng ali na katamu. Siniklaud la ding Israelita at sinamba la.

²⁸ Kaybat na nita, minuli na la at tiparan da itang inutus na ning Ginu kari Moises at Aaron.

²⁹ Inyang kapitangan nang bengi, pete na la ngan ning Ginu ding lalaking pangane king Ehipto, manibat king pangane talapagmana na ning ari angga na king pangane ning taung makasukul king bartolina at pati ding pangane da ring sablang animal.

³⁰ Ketang benging ita, mipagising ya ing ari, ding tauan na ampon ding sablang aliwang tau Ehipto, at mika masikan a tangisan king mabilug a Ehipto, uling alang pibalebale a e mo sa kematen anak a pangane lalaki.

³¹ Kanita mu ring benging ita, pepayaus na la ning ari di Moises at Aaron at ngana karela, Mabating na kayu, ikayu at ding kabalen yung Israelita! Lakuan ye ing kayarian ku; sulung munta na kayung samba king Ginu, antimo ing inawad yu.

³² Idala yu la pati na ding tupa yu, kambing, at baka. Mabating na kayu! Pakipaniawad yu na ku mung bendisyun king Dios yu.

³³ Pekisabi rang mayap ding tau Ehipto karing Israelita ing magmalagua la sanang mako king Ehipto. Ngara, Mangamate ke ngan nung e kayu pa mako!

³⁴ Inya lilan da ring Israelita karing datukanan ing masang alang lebadura; binalut da karing balabal da at saka ra na pisanan.

³⁵ Tiparan da ring Israelita itang inutus nang Moises karela, inya memaniawad lang alahas a gintu, pilak ampon baru karing tau Ehipto.

³⁶ At birian na naman ning Ginu ing maging maganaka la karela at binie da karela itang karelang aduan. Makanyan dang ikua ding Israelita ing pibandian da ring tau Ehipto. fig,,,,,Inya lilan da ring Israelita karing datukanan ing masang alang lebadura.,(12:34)fig*

³⁷ Miglakbe la ding Israelita ibat Rameses papunta Sucot. Anam a ralan a libu la ding lalaki subali pa karing babai at ding anak da.

³⁸ Kayabe da la namang meko ding dakal pang aliwang tau at tupa at kambing ampon baka.

³⁹ Miglutu lang tinape ketang masa a alang lebadura a darala dang linual Ehipto. Tutung piragli ing pangatabi ra king Ehipto, inya e la mika panaun pang magsadiang bakalan da o makapaglutung tinape ating lebadura.

⁴⁰ Menuknangan la karin Ehipto ding Israelita king kekaban da ring apat a ralan at atlung pulung banua.

⁴¹ Meko la Ehipto ding sablang memalen na ning Ginu king aldo a miyangganan la deting apat a ralan at atlung pulung banua.

⁴² Metung yang pamaglame na ning Ginu itang kabengian a ita ban ilual na la king sakup na ning Ehipto. Inya tatalaga de ring Israelita king Ginu ing anti kanitang kabengian king panaun pang daratang bilang metung a kabengian na ning pamaglame ra.

⁴³ Ngana ning Ginu kang Moises at Aaron, Oreni ding tuntunan para king Pamaglagpus. E ya malyaring makisulu kaniti ing ninumang dayuan,

⁴⁴ pero ing ninumang ipus a seli yu malyari yang makisulu kaniti, nung sirkunsisyunan ye pa.

⁴⁵ E ya naman malyaring makiabe kaniti ing aliwang taung makipanilas mu kekayu o kaya ing metung a talapagobrang upahan yu.

⁴⁶ Sukat yang mapangan ing kabilugan ning pamangan ning Pamaglagpus kilub ning pibalebale nung nu ya karin misadia at alang sukat milual agyang kagili mu man king pibalebaleng ita. Ala kayung paburen mapapakli agyang metung mu karing butul na.

⁴⁷ Sukat yang magselebra kaniting Pamaglagpus ing mabilug a balen ning Israel.

⁴⁸ Alang taung e mesirkunsisyun a malyaring makiabe kaniti. Nung ing metung a taung dayuan a mekipamalen kekayu bisa yang magselebra king Pamaglagpus ban parangalan ne ing Ginu, kailangan ing masirkunsisyun ya pa mu at ding sablang lalaking katubale na. Kanita ya pa mu dapat pakiutusan bilang metung a tubu Israel, at kaybat malyari neng makiabe mangan king Pamaglagpus.

⁴⁹ Ila mu rin deti ding tuntunan a sukat mipatupad karing Israelita a tubu libutad yu at karing dayuan a mekipamalen na kekayu.

⁵⁰ Memintu la ding sablang Israelita at depat da itang inutus na ning Ginu kari Moises at Aaron.

⁵¹ King aldong ita liwal na la Ehipto ning Ginu ding tribu na ning Israel.

13

¹ Ngana ning Ginu kang Moises,

² Italaga mu la ngan kanaku ding anak a pangane lalaki. Bandi ke ing balang anak a lalaking Israelitang pangane at ing balang pangane karing animal a lalaki.

³ Nganang sinabing Moises karing tau, Tandanan ye ing aldong iti, ing aldo pamaglako yu Ehipto, ing lugal nung nukarin kayu me-ipus. Iti ya ing aldo a liwal na kayu ning Ginu king kapamilatan na ning maragul nang upaya. Alang mapangan tinape ating lebadura.

⁴ Mamako kayu keti Ehipto king aldong iti ning mumunang bulan, ing bulan na ning Abib.

⁵ Tapat nang pengaku ning Ginu karing makatua yu king ibie ne kekayu ing bansa da ring Cananeo, Hiteo, Amoreo, Heveo, at Jebuseo. Gabun yang masanting at mataba. Potang ikua na na kayung adala king lugal a ita, sukat yeng pagselebran iting piesta king mumuna nang bulan ning balang banua.

⁶ Mangan kayung tinape alang lebadura kilub ding pitung aldo, at king kapitung aldo sukat mika pamagpiesta bilang parangal king Ginu.

⁷ E kayu mamangan tinape ating lebadura kilub ding pitung aldo; e sukat mika lebadura o tinape ating lebadura nukarin man king lugal yu.

⁸ Potang magumpisa na ing pamagpiesta, malinawan yu karing anak yu king iti ngan daraptan yu uli na nitang depatan na ning Ginu kekayu kanitang meko kayu Ehipto.

⁹ Maging kapigaganakan ya iting selebrasyun; mangari ya king metung a bage tinali yu king gamat yu o kaya king kanuan yu, at ipaganaka na kekayu king alang patugut yeng kikilalanan at pagaralan ing Batas ning Ginu, uling liwal na kayu ning Ginu ibat king Ehipto king kapamilatan na ning maragul nang upaya.

¹⁰ Pagselebran ye balang banua iting piesta king mitakdang panaun.

¹¹ Idala na kayu ning Ginu king bansa da ring Cananeo a tapat nang pengakung ibie kekayu at karing makatua yu. Potang ibie na ne kekayu,

¹² sukat yeng iyain king Ginu ing balang pangane anak yung lalaki. Mangaintulid ya naman king Ginu ing balang pangane lalaki karing sese yung animal,

¹³ oneng sukat yeng atbusan king Ginu ing balang pangane asnong lalaki king kapamilatan na ning pamiyain yung biserung tupa bilang kapalit na. Nung sakaling e yu ne buring atbusan ing asno, paklian ye batal. Sukat ya namang atbusan ing balang anak yung lalaking pangane.

¹⁴ King daratang a panaun, potang ikutang na ning anak yung lalaki nung nanu kabaldugan iting daraptan yu, ipakibat yu, King pamangamit na king maragul nang upaya, liwal na katamu ning Ginu king Ehipto, ing lugal nung nukarin tamu meging ipus.

¹⁵ Kanitang pepakit yang kesiasan a pusu ing ari ning Ehipto at e ya mebisang palakuan na katamu, pete na la ning Ginu ding balang pangane lalaki king kayarian na ning Ehiptotau at animal. Ita ing sangkan nung inya yayain ta ya ing balang anak a pangane lalaki para king Ginu, oneng atbusan lang pasibayu ding anak a lalaking pangane.

¹⁶ Metung yang pamigaganaka iting panugali; mengari ya king metung a bage tinali tamu king kekatamung gamat o kaya karing kanuan tamu ban ipaganaka na kekatamu king liwal na katamu ning Ginu king Ehipto uli na ning maragul nang upaya.

¹⁷ Kanitang pepaburen na na lang meko ning ari na ning Ehipto ding Israelita, e na la dinalan ning Dios ketang dalan a papunta Filistia, agyamang iti ya ing makuyad diling dalanan. Ngana ning Dios, E ku buring magbayu la isip ding Israelita at magbalik pa Ehipto potang akit da na ing kailangan lang makilaban.

¹⁸ Inya, dinalan na la king makaba at durut-durut a dalan libutad na ning disyerto papunta king Dagat da ring Timbu. Pakasandata la at makasadiang makilaban ding Israelita.

¹⁹ Dela na lang Moises ding butul nang Jose bilang kapamintuan king kapagnasan nang Jose karing Israelita ing idala da la ring butul na potang mako na la Ehipto. Nganang Jose kanitang panaun a ita, Potang iligtas na na kayu ning Dios, kailangan ing idala yu la ding butul ku king paglako yu.

²⁰ Meko la Sucot at migkampu la king Etam karin king gilid na ning disyerto.

²¹ Penimunan na la ning Ginu kabang dalan: neng aldo, king kapamilatan na ning metung a asias a biga ba neng ituru karela ing dalan; neng bengi naman king kapamilatan na ning metung a asias a api ba na lang dinan sala. King anti kanitang paralan da milyaring sindu ing pamaglakbe da neng aldo at bengi.

²² E ya mekong bitasa king arap da ing asias a biga neng aldo at ing asias a api neng bengi. fig ,,,, ,Penimunan na la ning Ginu.,(13:21)fig*

14

¹ Kanita ngana ning Ginu kang Moises,

² Sabian mu karing Israelita king magbalik la at magkampu king tulid na ning Pi Hairot, pilatan na ning Migdol ila ning Dagat da ring Timbu, lele na ning Baal Zefon.

³ Isipan na ning ari king mengalili kayu; e yu balu nung nu kayu marap uling makasaluput kayu king disyerto.

⁴ Pasiasan ke lub at tagalan na kayu, at aku naman tanggap kung dangalan uli na ning pamagtagumpe ku king ari ampon karing sundalus na. Abalu da kanita ding tau Ehipto king aku ing Ginu. Depatan da ring Israelita itang sinabi na karela.

⁵ Inyang abalitan na ning ari na ning Ehipto king ikua ra nang mekatakas ding Israelita, ya ampon ding tauan na migbayu la isip. Ngara, Nanu iting depatan tamu? Pepaburen ta lang mekatakas ding Israelita. Ngeni ala ta nang ipus a sumuyu kekatamu!

⁶ Pekiduang ne ning ari ing karu nang panggera at pepagsadian na la ding dakal nang sundalus.

⁷ Linual yang kayabe da ring sabla nang karung panggera at pati na ding anam a ralan a primera klasing sundalus a panimunan da ring opisyal da.

⁸ Pepasiasan ne pusu ning Ginu ing ari, inya tegalan na la ning ari ding Israelita a kanita kasalukuyan matagumpe tatakas.

⁹ Ding sundalus ning Ehipto at ding sabla nang kabayu, karung panggera, at sundalus a pakasake kareti tegalan da la ring Israelita at ikua da lang atagal ketang lugal nung nu la makakampu, king lele na ning Dagat da ring Timbu malapit Pi Hairot at Baal Zefon.

¹⁰ Inyang ikit da ring Israelita king ing ari at ding dakal nang sundalung daratang lang palusub karela, mitakutan lang e mu nanu, at kinulisak lang pasaup king Ginu.

¹¹ Ngara kang Moises, Ala waring kutkutan karin Ehipto? Obat dela mu ke pa mu keti king disyerto ban keti mangamate? Lawan mu ngeni ing pepasari mu king pamilual mu kekami karin Ehipto!

¹² Sinabi mi na keka kanita pang bayu tamu mako king mapalyari ing anti kaniti. Sinabi mi keka king e mu na kami pakialaman at paburen mu na kaming manatiling ipus da ring tau Ehipto. Mayap e palak ing ipus ke karin kesa king mangamate kami keti king disyerto.

¹³ Nganang mekibat Moises, E kayu tatakut! Tatagan yu ing lub yu at akit yu nung nanu ing daptan na ning Ginu ban iligtas na kayu king aldong iti. E yu na la kapilan man akit pang pasibayu deting tau Ehipto.

¹⁴ Ing Ginu ya ing makilaban para kekayu! Ala kayung aliwang gawan nune mu ing magpayapa kayu.

¹⁵ Ngana ning Ginu kang Moises, Obat ala kang patugut mamaus pasaup? Sabian mu karing tau king isulung da na ing lakad da!

¹⁶ Itas me ing tukud mu babo ning dagat at mepidua ing danum; malyari na la kanitang makadalan ding Israelita babo na ning gabun a malangi libutad ning dagat.

¹⁷ Pasiasan ku la lub ding tau Ehipto ban dulung la naman para tagal kekayu, at kaybat mirangal ku king kapamilatan na ning pamagtagumpe ku king ari, karing sundalus na, karing karung panggera na, at karing pakasake kareti.

¹⁸ Potang sambutan ku na la den, akilala da ring tau Ehipto king aku ing Ginu. fig ,,,, ,Akilala da ring tau Ehipto king aku ing Ginu.,(14:18)fig*

¹⁹ Minalis yang lugal ing anghel ning Ginu a makauna karing sundalus na ning Israel, at minta ya king kagulutan da. Minalis ya namang lugal ing asias a biga angga king

²⁰ miras ya pilatan da ring tau Ehipto ampon ding Israelita. Pepadalumdum ne ning biga ing daralanan da ring tau Ehipto, oneng minie ne mang sala karing memalen na ning Israel. Inya ding aduang grupu da ring sundalung pakasandata e ra ikuang mekapikanlapitan itang kabukas.

²¹ Inatiat neng Moises ing gamat na babo na ning dagat, at sepulan ne ning Ginu ing dagat king kapamilatan na ning masikan a angin ibat aslagan. Kabukas yang e pepatugut tutiup iting angin at mika malanging gabun king dagat.

²² Mepidua ing danum at mekadalakit la ding Israelita libutad na ning dagat king gabun a malangi, at mika pader a danum king misusumangid na.

²³ Tinagal la karela ding tau Ehipto angga king dagat a kayabe ding sabla rang kabayu, karung panggera at ding pakasake kareti.

²⁴ Inyang malapit nang ganingaldo linawe ya ing Ginu ibat king asias a api at biga at linawe na la ding sundalus na ning Ehipto, at e ra na balu ing paniaptan da.

²⁵ Pepaburen na lang mengabara-bara ding parugang da ring karelang karung panggera, inya migkakasakit lang sinulung. Ngarang mekasabi ding tau Ehipto, Ing makilaban kekatamu ya ing Ginu at aliwa ding Israelita. Tara, mako ta na keti!

²⁶ Ngana ning Ginu kang Moises, Iyatiat me ing gamat mu tulid na ning dagat at mitakup ing danum karing tau Ehipto at karing karelang karung panggera ampon karing pakasake kareti.

²⁷ Inya inatiat neng Moises ing gamat na tulid na ning dagat. Inyang sasala na migbalik ing danum king sadia nang katas. Migkapilit lang aligtasan da ring tau Ehipto ing danum, oneng tinulak na la ning Ginu king dagat.

²⁸ Migbalik ing danum at tikpan na la ding karung panggera, ding pakasake, at ding sablang sundalus da ring tau Ehipto a tinagal karing Israelita king dagat. Alang mitagan metung man karela.

²⁹ Sinulung da ring Israelita ing pamaglakad da king malanging gabun ning dagat kabang mengaring pader ing danum king mingatba karela.

³⁰ King aldong ita, linigtas ne ning Ginu ing balen Israel karing tau Ehipto, at ikit da lang pakapase ding mete king pampang.

³¹ Miyatdanan lang takut king Ginu ding Israelita inyang ikit da ing maragul nang upaya ning Ginu a ginamit na king pamagwagi na karing tau Ehipto; mika tiwala la king Ginu at king talasuyu nang i Moises.

15

¹ Kanita ne kintang Moises at ding Israelita iting kanta para king Ginu. Ngara: Pagkanta ke ing Ginu, uling king pamakilaban migkamit yang tagumpe; ding kabayu at ding karela pakasake king dagat na la inugse.

² Ing Ginu ya ing mayupaya kung talapaglualu, ya ing migligtas kaku. Ya ing kakung Dios, at kaku yang purian; ya ing Dios ding makatua ku, king degulan na pagkanta keng kapurian.

³ Mengari yang gerero ing Ginu, Ginu ing lagyu na.

⁴ Ding sundalus ning Ehipto at ding karung panggera na ampon ding mayap diling opisyal na melumud la inyang pepalbug na la ning Ginu king Dagat da ring Timbu.

⁵ Tikpan na la ning maragul a alun ning dagat; anting batu limbug lang agad king kalalalaman.

⁶ Ing gamat mung wanan, O Ginu, makasdan ing upaya na, sablang kalaban panaspakan na la.

⁷ King degulan mung alang kalupa kalaban keka lang digsa, kasbu mu karela kekang bignus, at silaban mu lang anting dikut.

⁸ Tiniupan me ing dagat, at ing danum mitas; anting pader matulid tinalakad; ing kalalalaman ning dagat meging masias.

⁹ Ngana ning kalaban, Tagalan ku la at dakpan, sablang karelang pibandian kakung samsaman, at sabla kung aburi kakung kuanan; kakung espada kaku yang bagutan, ba kung kuanan ing sabla rang pibandian.

¹⁰ Oneng, Ginu, king metung mung pangisnawa, dagat karela mitakup ya, at ding tau Ehipto melumud la; anting tinggaputi king danuman limbug la.

¹¹ Ginu, ninu karing aliwang dios ing anti ika? Ninung kekang kalupa king kabanalan mung alang kalupa? Ninu ing makarapat karing milagrung kekang daraptan a binang pagmumulalan?

¹² Inatiat me ing gamat mung wanan, at ing gabun kalaban inakmul na la ngan.

¹³ Kekang pengaku kekang tutuparan, inya ing balen a kekang segipan keka yang pitnubayan, at linub king bansa mung banal.

¹⁴ Inyang iti abalitan ding bansa, ginalgal la king takut da; mengatmu la king takut ding tau Filistia.

¹⁵ Mebalisa la ding manimuna ning Edom; pekapun ning Moab ginalgal la king takut, at meina la lub ding tau Canaan.

¹⁶ Ing takut at galgal karela ngan digpa. O Ginu, kekang sikanan ikit da, at e la makakimut king takut da; anggang ing balen mu e ra ikuang linabas king arapan da balen a kinabus mu king panga-ipus na.

¹⁷ Tiki mong linub at binili king kekang bunduk, king lugal, O Ginu, a pinili mung kekang tuknangan, king kabud Templong telakad da ring kekang gamat.

¹⁸ Ika, O Ginu, ing mag-ari king kapilan pa man.

¹⁹ Mekadalan la ding Israelita libutad na ning dagat, king gabun a malangi. Inyang ding karung panggera da ring tau Ehipto, at ding karelang kabayu at ding pakasake kareti, ilang dinulung king dagat, pepasakublian na ning Ginu ing danum at mitakup iti at mitambunan la.

²⁰ Ing propetang i Miriam a kapatad nang Aaron, kinua ne ing pandereta na at tikian de ring sablang babai; titigtig lang pandereta at teterak la.

²¹ Migkanta ya i Miriam para karela. Ngana: Pagkanta ye ing Ginu, uling mitmung dangal ing pamagtagumpe na; ding kabayu at ding karela pakasake king dagat na la inugse.

²² Kaybat na nita, penimunan na lang Moises ding memalen na ning Israel manibat ketang pampang na ning Dagat da ring Timbu, at minta la king disyerto na ning Shur. Kilub ding atlung aldo miglakad la libutad na ning disyerto, oneng e la menakit danum.

²³ Miras la king metung a lugal a meyaus Mara, oneng tutung mapait ing danum karin, inya e la mekainum kaniti. Iti ing sangkan nung inya meyaus yang Mara ing lugal a ita.

²⁴ Migreklamu la ding tau kang Moises at ngarang kinutang, Nanu ngeni ing inuman mi?

²⁵ Menalangin yang taimtim i Moises king Ginu, at tiru ne ning Ginu ing metung a kapirasung dutung. Inyang inatsa neng Moises king danum, milako pait ing danum. Karin na la binie ning Ginu ding utus a tuntunan da king pamibiebie ra at karin na la naman pinyubukan.

²⁶ Ngana karela, Nung mamintu kayung lubus kanaku at daptan yu itang karapatdapat at tuparan ding kautusan ku, e ra kayu paburen misakitan king isanu pa man karing sakit a pepagpa ku karing tau Ehipto. Aku, ing Ginu, ing babie kapaldanan kekayu.

²⁷ Kaybat, miras la Elim nung nu ating labing aduang sibul at pitung pulung pun a palma; migkampu la ketang lele na ning danum.

16

¹ Ibat Elim miglakbe la ring memalen na ning Israel, at king kalabing limang aldo ning kaduang bulan manibat kanitang meko la Ehipto miras la king disyerto ning Sin a atyu pilatan na ning Elim at ning Sinai.

² Karin king disyerto pawa la ngan migreklamu kari Moises at Aaron.

³ Ngara karela, Mayap pang gisan na na keng pete ning Ginu karin king Ehipto. Karin makalukluk kami at makapangan karni at aliwa pang pamangan anggang bisa kami. Oneng ikayu dela yu kami keti king libutad na ning disyerto ban paten yu kami mu palang danup.

⁴ Ngana ning Ginu kang Moises, Pauran kung tinape ibat banua para kekayu ngan. Sukat lang lage aldo-aldo ding tau, at tumipun ketang sapat para king balang aldo. King anti kaniting paralan ku la asubukan at akit nung balu rang tukian ing kanakung panabilin.

⁵ King kanam a aldo, sukat lang tumipun aduang besis karakal kesa king pupulutan da aldo-aldo at saka ra isadia iti.

⁶ Inya ngarang sinabing Moises at Aaron karing sablang Israelita, Akilala yu ngening bengi king ing Ginu ya ing milual kekayu ibat Ehipto,

⁷ at bukas abak akit yu ing kayupayan na. Dimdam na la ring reklamu yu. Wa, laban king Ginu, uling tutuparan mi mu ing pasabi na.

⁸ Ngana pang Moises, Ing Ginu ya ing munie karni kekayu neng sisilim at munie tinape kekayu neng abak anggang bisa kayu, uling dimdam na nung nu anti karagul ing pamagreklamu yu. Neng magreklamu kayu laban kekami, king Ginu kayu tune magreklamu at e kekami.

⁹ Nganang Moises kang Aaron, Sabian mu karing sablang memalen ning Israel king datang la at makiarap king Ginu, uling dimdam na ing reklamu da.

¹⁰ Kabang magsalita ya i Aaron karing sablang memalen ning Israel melikid la banda king disyerto at kabud-abud ing makasilo nang aslag ning panga-atyu ning Ginu meyakit libutad na ning biga.

¹¹ Ngana ning Ginu kang Moises,

¹² Dimdam ku ing reklamu da ring Israelita. Sabian mu karela king manikua lang karning apangan da potang sisilim na, at mika tinape anggang bisa la neng abak. Kanita ra akilala king aku, ing Ginu, ing Dios da.

¹³ Inyang sisilim na linto la ding dakal a pugu, at tikpan de ing kampu, at ating ambun king makapadurut king kampu neng abak.

¹⁴ Inyang mewala ing ambun, ating melakuan king babo ning gabun a mapinu at maimpis a balamu duman.

¹⁵ Inyang ikit da iti ring Israelita, e ra balung sabian nung nanu ita at ngara king metung at metung, Nanu iti? fig,,,,,Inyang sisilim na linto la ring dakal a pugu....,(16:13)fig* Nganang mekibat Moises karela, Iti ya ing pamangan a binie na kekayu ning Ginu.

¹⁶ Penabilin na ning Ginu king ing balang metung kekayu mamulut ya kaniti agpang ketang kailangan na; kapitnang salup balang katau. fig ,,,, ,Iti ya ing pamangan a binie na kekayu ning Ginu.,(16:15)fig*

¹⁷ Memulut la ding Israelita, oneng ating kinangwang dakal at ating kinangwang ditak.

¹⁸ Inyang tinakal da iti, e naman labis itang ikua ra detang kinangwang dakal, at e naman kulang itang ikua ra detang ditak mu kinua. Ikua na ning metung at metung itang sapat king kailangan na.

¹⁹ Ngana karelang Moises, Ala kayung tatagan kanyan para bukas.

²⁰ Oneng ating mapilan karela a e mekiramdam kang Moises, at misalikut lang ditak kaniti. Itang kabukasan a abak, mitmung ulad at mabangnas ing selikut da. Inya mimua ya i Moises karela.

²¹ Balang abak, mamulut ya ing balang katau agpang ketang kailangan na; potang mapali ne aslag ing aldo, malaso itang melakuan king gabun.

²² King kanam a aldo tinipun lang dobli ketang sadia rang pupulutan; metung a salup para king balang katau. Pintalan de ring sablang manimuna ning balen i Moises, at belita ra iti.

²³ Ngana karelang Moises, Inutus na ning Ginu king ing bukas aldo yang sagradu para paynawa, makatalaga ya para king Ginu. Ilutu yu na ngeni pa itang buri yung ilutu, at ipabukal yu na ngeni pa itang buri yung ipabukal. Sukat ilele at isinup para bukas ing nanumang mitagan.

²⁴ Antimo ing inutus nang Moises, sininup da itang mitagan para king kabukasan; e naman mebangnas at e miyularan.

²⁵ Nganang Moises karela, Kanan yu yan king aldong iti, uling ing aldong iti ya ing Sabbath, ing aldo ning pamagpaynawa a makatalaga king Ginu; e kayu malyaring manakit nanumang pamangan lual na ning kampu.

²⁶ Sukat kayung tumipun apangan yu kilub ding anam a aldo, oneng king kapitung aldo, ing aldo ning pamagpaynawa, ala kayung bitasang apulut.

²⁷ King kapitung aldo linual la ding mapilan karing tau ban mamulut pamangan, oneng ala lang bitasang ikua.

²⁸ Kanita ngana ning Ginu kang Moises, Angga pa kapilan ing e kayu mamintu karing utus ku?

²⁹ Tandanan yu king aku, ing Ginu, dininan da kayung metung a aldo magpaynawa, at ita ing sangkan nung inya king kanam a aldo dirinan da kayung pagkabie a sapat para aduang aldo. E ya sukat mamako ing ninuman king lugal a dasnan na ning kapitung aldo, at e ya mamako king bale na.

³⁰ Inya ala lang daraptan a obra ding tau neng kapitung aldo.

³¹ Pemalagyuan dang manna ding tau Israel ing pamangan a ita. Mengari yang metung a malati at maputing butul tanaman, at lalasa ne mang tinape maimpis a singkapan pulut-panilan.

³² Nganang migsalitang Moises, Inutus na kekatamu ning Ginu king katmuan ta ya king manna ing metung a datukanan at isinup tamu para karing kekatamung lahi ban akua rang akit ing pamangan a binie nang kanan tamu libutad ning disyerto kanitang liwal na katamu karin Ehipto.

³³ Nganang Moises kang Aaron, Kuma kang metung a banga, datukanan meng kapitnang salup a manna at ibili mu keta king arapan na ning Ginu; isinup tamu yan para karing lahi tamu.

³⁴ Antimo nung makananu nang inutus ning Ginu kang Moises, binili nang Aaron iti king arapan na ning Kaban ning Kasunduan ban karin manatiling makasinup.

³⁵ Mengabiayan la ding Israelita king manna kilub ding tinuking apat apulung banua angga king miras la king sasakupan ning Canaan nung nu la mibalebale. (

³⁶ Ing karaniwan a panakal king malanging bage kanita katumbas ne ning aduang pulung litru.)

17

¹ Meko ya ing mabilug a balen na ning Israel keta king disyerto ning Sin, at miglipat-lipat ya karing miyayaliwang lugal agpang ketang yuyutus na ning Ginu. Migkampu la karin Refidim, oneng alang danum a ainum da karin.

² Migreklamu la kang Moises. Ngara, Dinan mu keng danum a ainum mi. Nganang mekibat Moises, Obat magreklamu kayu? Obat pilit yeng panyubukan ing Ginu?

³ Oneng tutu na lang mau ding tau at e la tinuknang magreklamu kang Moises. Ngara, Obat liwal mu ke pa Ehipto? Leko mu ke karin ban paten mu kami mung kau at ding anak mi ampon ding sese ming animal?

⁴ Inya nganang menalangin taimtim Moises king Ginu, Nanu ing daptan ku karing taung deni? Buri da na kung pamasibasan.

⁵ Ngana ning Ginu kang Moises, Mituki kang mapilan karing manimuna na ning Israel at muna na kayu karing tau. Idala mia naman itang tukud a pemarug mu king Ilug ning Nilo.

⁶ Talakad ku arapan yu king metung a batung maragul karin king Bunduk ning Sinai. Pukpukan me ing batung ita, at sumibul karin ing danum a ainum da ring tau. Depatan nang Moises ita king akakit da ring manimuna na ning Israel.

⁷ Inaus deng Masa at Meriba ing lugal a ita, uling migreklamu la ding Israelita at pinyubukan de ing Ginu kanitang ngarang kinutang, Kayabe ta ya ing Ginu o ali ta ya?

⁸ Dinatang la ding Amalekita at lisuban da la ring Israelita karin king Refidim.

⁹ Nganang Moises kang Josue, Mamili kang mapilan karing lalaki at bukas puntalan yu la at labanan ding Amalekita. Talakad ku king taluktuk ning bunduk-bundukan kabang tatalnan ke ing tukud ning Dios.

¹⁰ Depat nang Josue itang inutus nang Moises, at meko yang mekilaban karing Amalekita kabang i Moises, i Aaron ampon i Hur minukiat no man king taluktuk ning bunduk-bundukan.

¹¹ Kabud itas na lang Moises ding gamat na, ding Israelita ila ding maniambut; potang ibaba na lang Moises ding gamat na, ding Amalekita ila naman ding maniambut.

¹² Inyang menikal la ding gamat nang Moises kinangwa lang batung maragul di Aaron at Hur a apiluklukan na. Kaybat tinalakad lang mingatba king siping na, at telan da la ring gamat na ba lang e magbaba. E da la pepaburen migbaba ding gamat na angga king limbug ne ing aldo.

¹³ At lubus na lang simbut Josue ding Amalekita. fig,,,,,E da la pepaburen migbaba ding gamat na angga king limbug ne ing aldo.,(17:12)fig*

¹⁴ Ngana kanita ning Ginu kang Moises, Isulat mu ing tagumpeng yan ban e makalinguan, at sabian mu kang Josue king lubus ku lang gisanan a lahi ding Amalekita.

¹⁵ Mitalakad yang altar i Moises at inaus neng Ing Ginu ya ing kanakung Bandera.

¹⁶ Ngana pa, Itas yeng matas ing bandera na ning Ginu! E ya patugut makilaban ing Ginu karing Amalekita king kapilan pa man!

18

¹ Abalitan nang Jetro, ing pari ning Midian at katuangan nang Moises, ing sablang depatan na ning Dios para kang Moises at karing memalen na ning Israel kanitang liwal na la king Ehipto.

² Inya pintalan ne i Moises, kayabe ne i Zipora a anak na at asawa nang Moises a likuan na inyang meko ya.

³ Tiki neng Zipora i Gersom at i Eliezer, ding adua nang anak a lalaki. (Asabi na kanitang misan Moises ing anti kaniti: Metung kung dayuan king makayaliwang balen a tibuan ku. Inya makanyan neng pemalagyuan Gersom ing metung karing anak na.

⁴ Asabi na naman, Seupan na ku ning Dios nang tata ku, at linigtas king espada na ning ari ning Ehipto. Makanyan neng pemalagyuan Eliezer ing kadua nang anak.)

⁵ Dinatang ya i Jetro, kayabe ne ing asawa nang Moises ampon ding adua nang anak, king disyerto nung nu ya makakampu i Moises, king lele na ning banal a bunduk.

⁶ Peparala yang amanu i Jetro kang Moises king daratang la.

⁷ Linual ya king tolda i Moises ban saganan na la; dinuku ya king arapan na at saka ne inuma i Jetro. Mipangomusta la tungkul king bie ra, at kaybat melaus la kilub na ning tolda nang Moises.

⁸ Sinabi nang Moises kang Jetro ing sablang depatan na ning Ginu king ari, at karing memalen na ning Ehipto ban iligtas na la ring Israelita. Belita na naman ing kasakitan a pekiarapan da kabang dalan at nung makananu na lang linigtas ning Ginu.

⁹ Masaya ya i Jetro inyang dimdam na iti.

¹⁰ Nganang sinabi, Purian ya ing Ginung migligtas kekayu king ari, at karing memalen na ning Ehipto! Purian ya ing Ginung migligtas king balen na king panga-ipus na!

¹¹ Ngeni ku akikilala king ing Ginu maula yang maygit karing sablang dios, uling depatan na iti kanitang ding tau Ehipto teratusan da lang mitmung bigsikan ding Israelita.

¹² Migdala ya kanita i Jetro metung a ain-a-durulukan mabilug at aliwa pang ain ban iyain king Dios. Tinuki ya i Aaron at ding sablang manimuna na ning Israel ban makisulu ketang banal a pamisulusulu bilang metung a dake na ning kapanyamban.

¹³ Itang kabukasan, linukluk ya i Moises ban lutasan ing pisasabian a linto king pamiyutus da ring tau; samal ya manibat king abak angga na itang bengi.

¹⁴ Inyang ikit nang Jetro ing sablang kailangan nang arapan Moises nganang kinutang, Nanu ngan iting kasamalan mu para karing tau? Obat ika mung dili ing magobra? Atin mung atin taung manenaya keka keti manibat king abak angga na king bengi para mu mangutang keka.

¹⁵ Nganang mekibat Moises, Kailangan kung daptan iti uling lalapitan da ku ding tau ban abalu ra ing kaburian na ning Dios.

¹⁶ Potang ating adua kataung mika pisasabian, pupunta la kanaku at aku ing mamatul nung ninu karelang adua ing atyu king matulid, at ipalino ku la karela ding utus na ning Dios at ing kaburian na.

¹⁷ Nganang Jetro, Moises, e ka tutud keng daraptan mung yan!

¹⁸ E ka maglambat keng obra mung yan at antimu rin ding taung deti. Masiadung dakal yan para king kataung anti ika.

¹⁹ Makiramdam ka sana keng iyusuk ku keka at mantabe ya keka ing Dios. Ustu ing talakaran mu la ding tau king arapan ning Dios at ilapit mu la king Dios ding piamanuan da.

²⁰ Wa, sukat mu lang ituru karela ding kautusan na ning Dios, at ipalino karela nung makananu lang mibiebie, at nung nanu ing sukat dang daptan.

²¹ Subali kanita sukat kang mamiling taung ating agyu at tulduan mu lang manimuna da ring tau; manimuna la para karing balang libu katau, karing balang dinalan, karing balang limang pulu, at karing balang apulu. Tau lang sukat ating takut king Dios deting manimuna, at malyari lang pagkatiwalan, at e malyaring suhulan.

²² Paburen mu lang magsilbing bilang ukum para karing tau kabang-kaba. Idala da na la keka ding mangabayat a problema, pero ding lati-lating problema ila nang dili rang matul. King anti kanyan a paralan maging mayan ing obra mu uling kasaup mu lang magkarga.

²³ Nung yan ing daptan mu, antimo ing kaburian na ning Dios keka, e ka masiadung misakitan; milunasan agad ing problema da ring tau at maranun la pang makauli bale ra.

²⁴ Mekiramdam ya i Moises king usuk nang Jetro, ing katuangan na.

²⁵ Memili yang taung ating agyu karing memalen na ning Israel, at tilduan na lang talapangasiwa ning balen: atin yang tilduan manimuna para karing libu-libu, karing dina-dinalan, karing tia limang pulu, at para karing tia pulu katau.

²⁶ Menungkulan la bilang ukum da ring tau kabang-kaba. Kang Moises da la darala ding mangabayat a kasu, pero karing lati-lating pisasabian ila na mung dili ra ding lilingun.

²⁷ Kaybat na nita, memun ya i Jetro kang Moises at minuli ya king sarili nang bansa.

19

¹ Miras la ding Israelita king disyerto ning Sinai kaybat ning atlung bulan ning paglako ra king Ehipto.

² Meko la king Refidim at migkampu la king lele na ning Bunduk ning Sinai.

³ Minukiat ya king bunduk i Moises ban makikit king Dios. Minaus ya kang Moises ing Ginu ibat king bunduk, at sinabi na king sabian na karing Israelita, ding lahi nang Jacob, ing anti kaniti:

⁴ Ikit yu nung nanu ing depat ku karing tau Ehipto at nung makananu da kayung dela keti, antimo nung makananu na lang darala ning agila karing bagius na ding malutub na, at inuli ra kayu keti kanaku.

⁵ Ngeni, nung makiramdam kayu kanaku at tupad king kanakung kasunduan, ikayu ing maging sarili kung balen. Kanaku ya ing mabilug a yatu, oneng ikayu mung bukud ding taung pinili ku,

⁶ ing balen a mitalaga mung bukud kanaku at sumuyu kanaku bilang pari.

⁷ Inya kinuldas ya i Moises king bunduk at pepayaus na lang mitipun ding manimuna da ring tau, at sinabi na ngan karela itang yuyutus na ning Ginu.

⁸ Kaybat na nita, ngarang agnan-agnan mekibat ding tau, Tuparan mi ngan ing inutus na ning Ginu. Migbalik ya i Moises king bunduk at binie na king Ginu ing pakibat da ring Israelita.

⁹ Ngana ning Ginu kang Moises, Datang ku keka libutad na ning makapal a biga ban damdaman da ring tau ing pamakipagsalita ku keka, at maniwala na la keka manibat ngeni. Sinabi nang Moises king Ginu itang pekibat da ring tau,

¹⁰ at ngana ning Ginu, Moises, puntalan mu la ding tau at sabian mu karela king gamitan de ing aldong iti ampon ing bukas king pamagsadia para king pamanyamba. Sukat dang pipian ing imalan da,

¹¹ at magsadia la king aldo kaybat ning bukas. King aldo a ita kuldas ku king Bunduk ning Sinai ban malyari da kung akit ding sablang tau.

¹² Mibili kang angganan king makapadurut king bunduk a e ra sukat lagpusan ding tau, at sabian mu karela king e la mumukiat king bunduk o lumapit man karin. Paten ya ing ninumang munta king bunduk;

¹³ sukat yang basibasan batu o kaya panaan; ala sanang tatagkil king bunduk, tau ya man o animal sukat yang mate. Kabud tiniup yang makaba ing trumpeta sukat na lang mukiat ding tau king bunduk.

¹⁴ Kaybat na nita, kinuldas ya i Moises king bunduk, at sinabi na karing tau king magsadia na la para king pamanyamba. Inya pinipi ra ing imalan da.

¹⁵ Ngana pang Moises karing Israelita, Magsadia kayu king aldo makadua, at e kayu pa sisiping king ninumang babai.

¹⁶ Kanitang abak ning katlung aldo menuldul at mengildap, at linto ya ing makapal a biga king bunduk. Meramdam ya ing matning tiup na ning trumpeta! Ginalgal la king takut ding sablang tau king kampu.

¹⁷ Penimunan na lang linual Moises king kampu ding tau ban makikit king Dios. Tinuknang la king angganan na ning bunduk.

¹⁸ Mitakpan ya king asuk ing kabilugan a Bunduk ning Sinai, uling kinuldas ya karin ing Ginu libutad na ning api. Minta babo ing asuk kalupa na ning asuk ning metung a ornu, at ginalgal lang e mu nanu ding tau.

¹⁹ Mesikan neng mesikan ing tiup na ning trumpeta. Migsalita ya i Moises, at pekibatan ne ning Dios king kapamilatan ning duldul!

²⁰ Tinipa ya ing Ginu babo na ning Bunduk ning Sinai, at inaus ne i Moises ban mukiat king taluktuk na ning bunduk. Minukiat ya i Moises

²¹ at ngana ning Ginu, Moises, kuldas ka at sabian mu karing tau king e la sa lalagpus king angganan ban lumapit at lawan da ku; nung lagpus la, dakal la ding mate karela.

²² Agyang ding pari a lalapit kanaku sukat lang maglinis king sarili da, nung ali la parusan ku la. fig,,,,,Pekibatan ne ning Dios king kapamilatan ning duldul.,(19:19)fig*

²³ Nganang Moises king Ginu, E la malyaring mukiat keti ding tau uling penabilin yu kekami king ibilang mi yang sagradu iting bunduk, at mibili kaming angganan king makapadurut keti.

²⁴ Nganang mekibat ning Ginu, Kuldas na ka at dakitan me i Aaron at ituki keti. Oneng e la sukat lalagpus ding pari at ding tau king angganan ban lumapit la kanaku, nung ali parusan ku la.

²⁵ Kinuldas ya i Moises king bunduk at pintalan na la ding tau, at belita na karela ing sablang sinabi na ning Ginu.

20

¹ Migsalita ya ing Dios at ila deti ring amanu na:

² Aku ing Ginung kekayung Dios a milual kekayu ibat Ehipto nung nukarin kayu meging ipus.

³ E kayu mikaka aliwang dios subali kanaku.

⁴ E kayu gagawang larawan para kekayu o nanumang kawangis ning nanumang atyu king banua, keti king yatu o king danuman king lalam ning yatu.

⁵ E kayu duruku karing idolo o sasamba kareti, uling aku, ing Ginung kekayung Dios, Dios kung mapangalalu. Parusan ku la detang masama kanaku, at pati na ding lahi ra angga na karing apu ra at apu king tud.

⁶ Oneng papakit ku ing lugud ku karing libu-libung lahi ra a malugud kanaku at mamintu karing utus ku.

⁷ E ye gagamitan ing lagyu ku king e mayap a kapagnasan, uling aku, ing Ginung kekayung Dios, parusan ke ing ninumang gagamit e ustu king lagyu ku.

⁸ Igalang ye ing Aldo ning Sabbath at ipangiling ye.

⁹ Atin kayung anam a aldo ban daptan ing obra yu,

¹⁰ oneng ing kapitung aldo metung yang aldo ning pamagpaynawa a makatalaga para kanaku. Ala metung man a malyaring magobra king aldong iti; e mu ikayu, nune pati na ding anak yu, ding ipus yu, ding sese yung animal o kaya ding dayuan a makipamalen kekayu.

¹¹ Kilub ding anam a aldo, aku, ing Ginung kekayung Dios, lelangan ke ing yatu, ing banua, ding dagat, at ing sablang atyu kareti, oneng pepaynawa ku king kapitung aldo. Iti ing sangkan nung inya aku, ing Ginu, binendisyunan ke ing Aldo ning Sabbath at gewa keng banal.

¹² Igalang ye i tata yu at i ima yu ban kumaba ing bie yu king gabun a babie ku kekayu.

¹³ E kayu makamate kalupang tau.

¹⁴ E kayu makipangalugud.

¹⁵ E kayu manako.

¹⁶ E kayu sasaksi king e katutuan laban king kenu man.

¹⁷ E ye angkaminan ing bale na ning kalupa yung tau. E ye angkaminan ing asawa na, ding ipus na, ding baka na, ding asno na o ing nanumang bandi na.

¹⁸ Ginalgal la king takut inyang dimdam da ring tau ing duldul, ing tiup na ning trumpeta, at ikit ing kildap ampon ing bunduk a mamasuk, at linaut la king bunduk.

¹⁹ Ngara kang Moises, Makiramdam kami nung ika ing magsalita kekami, oneng e ne sana magsalita kekami ing Dios, pota mate kami.

²⁰ Nganang Moises, E kayu tatakut; dinatang ya ing Dios ba na kayu mung subukan, at ban kanita e mako kapilan man king kaisipan yu ing pamamintu, at ban e kayu mikasala.

²¹ Menatili lang makatalakad king marayu ding tau at bukud mung i Moises ya ing linapit king makapal a biga nung nu ya atyu ing Dios.

²² Ngana pa ning Ginu kang Moises, Sabian mu iti karing memalen na ning Israel: Ikayu mismu ikit yu nung makananung aku, ing Ginu, migsalita ku kekayu ibat banua.

²³ E kayu gagawang dios a pilak o gintu a pakipante yu kanaku at para samban subali kanaku.

²⁴ Igawa yu kung altar a gabun at babo na niti iyain yu la kanaku bilang ain ding tupa yu ampon baka. Iyain yu la bilang ain-a-durulukan at ain-a-pisulusuluan. Datangan da kayu, at bendisyunan king balang lugal a ituldu ku para king pamanyamba yu kanaku.

²⁵ Nung sakaling igawa yu kung altar a batu, e kayu gagamit batung tinabas, uling e ne maging karapatdapat kanaku kabud gemitanan yeng pataram.

²⁶ E kayu naman mumukiat king altar a atin eran a matas, pota king pamanuklu yu karing balitang, mayakit king ala kayung salol.

21

¹ Ibie mu la karing Israelita deting tuntunan:

² Nung sali kang ipus a lalaking Hebreo, suyuan na ka niti king anam a banua. Malyari na na kang lakuan king kapitung banua; dinan meng kalayaan at ala yang bayaran nanuman.

³ Nung e ya talasawa kanitang miras ya keka bilang ipus, mako ya namang alang asawa; nung dinatang ya keka a talasawa na, tuki ya ing asawa na potang malaya ne.

⁴ Nung kabang ipus ya iting lalaki, pekiasawa ne ning panginuan na at mikayanak ya king ayasawa na, ing asawa na at ding anak maging bandi na la ning panginuan; mako yang dili na ing lalaking ipus.

⁵ Nung sabian na ning ipus king kaluguran ne ing panginuan na, ing asawa na, ding anak na, at e ya bisang maging malaya,

⁶ ituki ne kanita ning panginuan ing ipus king lugal a pisasamban king Dios. Karas da karin tairan ne king pasbul o kaya king amba na ning pasbul, at karin ne busbusan a balugbug. Maging ipus na ne kanita kabang bie.

⁷ Nung pisali ne bilang ipus ning metung a tata ing anak nang babai, e ne malyaring dinan kalayaan anti ding ipus a lalaki.

⁸ Nung ing sinali buri neng maging asawa na at kaybat e ne kaluguran, malyari neng payatbus king tata na ning babai. E ne malyaring pisali karing dayuan, uling e ya meging tapat ing sinali.

⁹ Nung telaga na ne man ning sinali ban ayasawa ne ning anak nang lalaki, ituring neng sarili nang anak.

¹⁰ Nung makiasawa yang kadua ing lalaki, e ne sukat babawasan a sustentu ing minuna nang ayasawa, maging king pamangan, imalan o ing katuliran bilang asawa na.

¹¹ Kabud pigkait na la king minuna nang ayasawa deting katungkulan na, ing asawa nang iti malaya yang mako; ala yang bayaran nanuman para king kalayaan na king panginuan na.

¹² Ninuman ing dugpa gamat king metung a tau at kemate na iti, sukat yang paten ing mekamate.

¹³ Nung e na sasarian at e ne seriang apate, malyari yang salikut ing mekapate ketang lugal a ituldu ku keka at e re ananu balang karin.

¹⁴ Nung ing ninuman, king mua na seria neng pete ing kalupa nang tau, sukat yang paten agyang pang mulayi yang salikut king kakung altar.

¹⁵ Paten ya ing ninumang dugpa gamat kang tata na o kang ima na.

¹⁶ Paten ya ing ninumang dumukut tau ban pisali ne o kaya gawan neng sarili nang ipus.

¹⁷ Paten ya ing ninumang lapastangan kang tata na o kang ima na.

¹⁸ Nung ating mipapate at ing metung apanasakit ne king metung a batu o king tumbuk, oneng e na ne man apate, ala yang pakibatan ing mekapanasakit. Nung ing taung menasakit e ya makalakad,

¹⁹ kaybat makabangun ya at makalakad makatukud, sukat neng bayaranan nitang mekapanasakit ketang panaun nang mesira at kailangan neng paulu angga king kumayap ya.

²⁰ Nung pelupalu ne ning panginuan ing ipus na, lalaki ya man o babai, at mete ya ing ipus, sukat yang parusan ing mekapate.

²¹ Nung ing ipus ikua na pang mebie metung o aduang aldo, ala yang pakibatan ing panginuan. Ing pangamate na ning ipus sapat nang kaparusan king panginuan.

²² Nung apanasakit de king pamipate ra ding lalaki ing metung a babaing mabuktut at mekikuan ya uli na nita, pero e ne man mepinsala king makananu mang paralan, sukat yang mamayaran ing taung mekatud king aduan ning asawa na ning babai at mamayaran ya agpang king desisyun da ring ukum.

²³ Nung mepinsala ya ing babai, bayaran bie ing bie,

²⁴ ing mata king mata, ing ipan king ipan, ing gamat king gamat, ing bitis king bitis,

²⁵ ing mepali king mepali, ing sugat king sugat, at ing galus king galus.

²⁶ Nung tiran ne mata ning ninuman ing ipus nang lalaki o babai at mebulag ya, sukat neng dinan kalayaan bilang kabayaran para king mata.

²⁷ Nung atanggal ne ipan ing ipus nang lalaki o babai, sukat neng dinan kalayaan ing ipus bilang kabayaran king ipan na.

²⁸ Nung asagu ne ning toro ing metung a tau at mete ya, sukat yang paten ing toro king basibas at e sukat kanan ing karni na; ala neng pakibatan ing makibandi king toro.

²⁹ Nung king milabas dakal ne segu at nung mirinan neng abiso ing makibandi at e ne pa kilung iti, nung wari't mekapate yang tau iting toro, paten ya king basibas at paten ya naman ing makibandi.

³⁰ Makanyan man, nung papamayaran dia mung multa ing makibandi bilang panatbus king bie na, bayaran na ing alaga a aduan da.

³¹ Nung mekasagu ya ing toro at mekapate anak a lalaki o babai, ing mesabing tuntunan ya mu rin ing tukian.

³² Nung ing segu na ning toro metung yang ipus a lalaki o babai, mamayaran yang atlung pulung pirasung pilak ing makibandi king makibandi king ipus at basibasan yang batu ing toro angga king mate ya.

³³ Nung lakuan neng alang takap ning ninuman ing talaga na o nung kaybat nang ginawang talaga e ne tikpan at mipaintagun ing metung a baka o kaya asno menabu ya karin,

³⁴ sukat yang mamayaran ing makibandi king talaga; bayaranan ne ing makibandi king animal at miyabie ya king maki bandi king talaga ing mete animal.

³⁵ Nung pete ne ning baka na ning metung a tau ing baka na ning aliwang tau, pisali de ring makibandi ing baka a mabie at pipitnan da la ring abli; pipitnan dia naman ing mete baka.

³⁶ Nung pikabaluan king dakal ne segu king milabas at e ne pa kilung ning makibandi, mamayaran yang mabie baka king apate na, pero miyabie ya ing bakang mete king makibandi.

22

¹ Nung menako yang baka o kaya tupa ing ninuman, at kaybat kinatat ne o kaya pisali neng mabie, sukat neng alilan limang baka ing bakang penako na; apat a tupa nung tupa ne man ing penako na.

² Sukat yang mamayaran king penako na. Nung ala yang bitasang pamayad, sukat yang mipisali bilang ipus ban abayaran na ing penako na. Nung ing animal a mepanako baka ya o asno o tupa, at mayakit yang mabie pang atyu king sakup na; sukat neng bayaran dobli ing balang animal a penako na. Nung mebante ya ing manlub neng bengi, at apate ne ning makibale, ala yang pakibatan ing mekapate. Nung iti merapat neng aldo, atin yang pakibatan ing mekapate king kasalanan pamakamate tau.

³

⁴

⁵ Nung king pamibulus nang animal ning metung a tau king metung a marangle o tamnanan ubas, at ikua rang miglub at minyira ding animal na king marangle ning aliwa, sukat yang mamayaran ketang dake pengan da ring animal na; alilan na king pupul na king sarili nang asikan o tamnanan ubas. fig

⁶

⁷ Nung ating ninumang menilas salapi o nanumang bage king aliwa at mepanako la reti king bale na ning pipanilasan, nung marakap ya ing menako, sukat yang mamayad dobli.

⁸ Nung e ya merakap ing menako, sukat yang ituki ing pipanilasan king lugal a pisasamban king Dios, at karin na patunayan king e na la teginan ding penilas da bilang kargu na.

⁹ Ing nanumang pisasabian tungkul king pibandian maging iti metung yang baka, asno, tupa, imalan o nanumang bage mebating, ding adua kataung parehung sasabing bandi re, sukat lang piyarapan king lugal a pisasamban king Dios; ninuman karela ing atulan nang mikasala ning Dios sukat yang mamayaran dobli king tune makibandi.

¹⁰ Nung ing ninuman atin yang penabilin a asno, baka, tupa o kaya aliwa pang animal king aliwa, at mete ya ing animal o kaya mepinsala ya o mepanako ya at alang menakit king milyari,

¹¹ sumpa ya ing penabilinan ketang lugal a pisasamban king Dios king ya e ne pigimbutan ing animal a mipanabilin bilang kargu na. Panaligan na na ning makibandi iting sumpa at ala yang bayaran nanuman ing penabilinan.

¹² Nung mepanako ya ing animal sukat yang mamayaran ing penabilinan king makibandi.

¹³ Nung pete de ring lasip ing animal, iyapag ne ning penabilinan bilang katunayan king mete ya ing animal; e ya sukat mamayaran kanita para king animal a pete da ring lasip.

¹⁴ Nung mindam yang metung a animal ing ninuman king aliwa, at mepinsala ya ing animal o kaya mete ya king e na akakit ning makibandi, sukat yang mamayaran ing menandam.

¹⁵ Nung atyu ya ing pipanandaman inyang mete ya o mepinsala ing animal, e ya sukat mamayaran ing mindam. Nung animal yang pakiupa na ning makibandi, ing upang tinggap na makagyu neng maging kabayaran.

¹⁶ Nung lininlang ne ning metung a lalaki ing metung a dalagang e na kakaburi at sipingnan ne, sukat nang bayaran ing duru na at pakasalan ne.

¹⁷ Nung tutul ya ing tata na ning dalaga king pamiyasawa ra, sukat yang mamayaran king tata ing miglinlang king alagang katumbas ning karaniwan a duru para king metung a dalagang makiasawa.

¹⁸ Paten ya ing ninumang babaing mangkukulam.

¹⁹ Paten ya ing ninumang lalaking mekipangatawan king metung a animal.

²⁰ Atulan yeng kamatayan ing ninumang miyain ain-sakripisyu karing aliwang dios, subali mu kanaku, ing Ginu.

²¹ E ye liligaligan o lulupigan ing ninumang dayuan; ganakan yu king meging dayuan kayu naman kanitang atyu kayu Ehipto.

²² E ye alipustan ing mebalu o ing ninumang ulila.

²³ Nung alipustan yu la, siguradu lang maus pasaup kanaku at aku, ing Ginu, pakibatan ku la;

²⁴ mibua ing mua ku at paten da kayu king kapamilatan ning gera. Mabalu la ring asawa yu at maging ulila la ring anak yu.

²⁵ Nung paparam na kayu mang salapi kenu man karing memalen kung kalulu, e kayu makiapus karing usurero at e ye sukat maniad patubu.

²⁶ Nung tanggapan yeng anting pekasangla ing balabal ning metung a tau, sukat yeng ibalik king miniangla bayu ya lumbug ing aldo,

²⁷ uling ing balabal ya mu kabud ing malyari nang panakap king katawan na ban e ya dimla. Nanu ing ulasan na potang matudtud ya? Nung maus yang pasaup kanaku, pakiramdaman ke uling aku tune kung mapaglunus.

²⁸ E kayu magsalitang e mayap laban king Dios o panagkasan ing manimuna na ning balen yu.

²⁹ E yu piluat-luat ing pamiyain yu kaku karing sukat yung iyain ibat king pupul yu, king alak a apalto yu karing ubas yu, at king laru a ibat karing tanaman yung olibo. Iyain ye kanaku ing pangane karing anak yung lalaki.

³⁰ Ibie yu la naman kanaku ding pangane karing baka yu at tupa. Papanatilian yeng pitung aldo king gaindu na ing biseru, at iyain yu ne kanaku king kawalung aldo.

³¹ Ikayu ing balen a pinili ku, inya e kayu mamangan king karni na ning animal a piglapak da ring lasip; pakan yu nia mu karing asu.

23

¹ E yu kakalat ing e tutung balita. E ye kakampian ing taung mikasala king kapamilatan ning pamagtestigu yung alang katutuan.

² E yu pakiapusan ing gagawan da ring dakal potang gagawa lang e ustu o potang papanig la king pisasabian a e makatuliran.

³ E kayu mangabiran potang miyarap ya ing kalulu king piukuman.

⁴ Nung melili ya ing baka na o asno na ning kalaban yu at ikit ye, ibalik ye king kalaban yu.

⁵ Nung akit yeng misakab ing asno na uli na ning beyatan ning daralan na, e ye lalagpusan, nune saupan ye ba neng abangun pasibayu ing asno na.

⁶ E ye pagkaitan ing ninumang pakakalulu king katuliran na arapan na ning ukuman.

⁷ E kayu gagawang maling paratang ni paburen miyatulan kamatayan ing taung alang kasalanan. Parusan ke ing ninumang darapat king anti kaniting e ustung dapat.

⁸ E kayu tatanggap nanumang suhul, uling bubulagan na la ning suhul ding tau ban e ra akit ing katuliran, at iti ing makapahamak king kasu na ning taung alang kasalanan.

⁹ E ye lulupigan ing ninumang dayuan; balu yu nung nanu ing panamdaman na ning metung a dayuan, uling meging dayuan kayu naman karin king Ehipto.

¹⁰ Kilub ding anam a banua tamnanan yu't pupulanan ing gabun yu,

¹¹ pero e ye tatamnanan karas ning kapitung banua. E yu naman pupupulan ing nanumang tumubu karin. Paburen yung ding pakakalulu ilang makinabang kaniti at paburen na karing animal itang e ra agisan. Makanyan munaman ing daptan yu karing tamnanan yung ubas at olibo.

¹² Daptan yu kilub ding anam a aldo ing obra yu, oneng tuknang kayung magobra king kapitung aldo ban mipaynawa kayu, at ban mibawi la sikanan ding ipus yu, ding dayuan a magobra para kekayu, at pati na ding animal a sese yu.

¹³ Pakatandanan yu ngan sana iting sinabi ku kekayu. E kayu manalangin karing aliwang dios o banggitan man a lagyu.

¹⁴ Magpiesta kayu makatatlung besis kilub ning pabanua bilang parangal kanaku.

¹⁵ King bulan ning Abib, ing bulan nung kapilan kayu linual Ehipto, pagselebran ye ing Piesta ning Tinape Alang Lebadura, antimo ing inutus ku na kekayu. E kayu mamangan tinape ating lebadura kilub ding pitung aldo a makatuldu para kaniting piesta. E ya mamarap king pamanyamba kanaku ing ninuman a ala yang daralang ain.

¹⁶ Pagselebran ye ing Piesta ning Pamamupul potang pagumpisan yu nang palutan ing tenam yu. Pagselebran ye ing Piesta da ring Dalungdung potang malapit na ing panaun ning dimla, potang agtalan yu na la ding bunga yung ubas at aliwa pang bungang tanaman.

¹⁷ Makatatlu kilub ning pabanua, king panaun da reting atlung piesta, sukat lang makiarap ding sabla yung lalaki ban samba kanaku, ing Ginung kekayung Dios.

¹⁸ E yu la abayanan karing tinape ating lebadura ding animal a iyain yu kanaku. E yu naman paburen mikakabukasan ing taba ra ding animal a inain yu kanaku kareting atlung selebrasyun.

¹⁹ Sukat yu lang idala balang banua king bale ning Ginung kekayung Dios ding mumunang diling bunga na ning pupul yu. E ye lulutu ing biserung kambing o biserung tupa king gatas na ning gaindu na.

²⁰ Itubud keng makauna kekayu ing metung a anghel ban ingatan na kayu king pamaglakbe yu, at isadsad ketang lugal a sidia ku para kekayu.

²¹ Pakiramdaman ye at tuparan ing sablang sabian na kekayu. E ye lalabanan uling aku ing mitubud keting anghel, at e na ipanupaya ing nanumang kapaglabanan.

²² Nung mamintu kayu king tubud kung anghel at daptan ing sablang utus ku, maging kalaban da ku ring kalaban yu.

²³ Muna ya kekayu ing kanakung anghel, at idala na kayu king gabun da ring Amoreo, Hiteo, Perezeo, Cananeo, Heveo, at Jebuseo a pawa kung paglipulan.

²⁴ E kayu duruku karing kikilalanan dang dios at e kayu sasamba karela, at e kayu makiapus king daraptan da. Lasakan yu lang lubus ding kikilalanan dang dios at durugan ding asias a batu a sasamban da.

²⁵ Nung samban yu ku, aku, ing Ginung kekayung Dios, bendisyunan da kayu; dinan da kayung pamangan, inuman, at ilako ku ing nanumang sakit libutad yu.

²⁶ E mika babaing baug king lugal yu at alang makikuan. Pakaban ku ing bie yu.

²⁷ Papagalgalan ku la ring taung lumaban kekayu, at mabalisa la ring sablang balen king paniatang yu; paurungan ku la at papulayan ding kalaban yu.

²⁸ Parala kung putakti at misambulat la ding kalaban yu; itabi ku la ding Heveo, Cananeo, at ding Hiteo.

²⁹ E ku la pa itabi kilub ning pabanua pota king pangalako na tau ning lugal, dakal na la man ding animal a mabagsik.

³⁰ Itabi ku lang tunggal ditak king paniatang yu angga king dakal kayu para sakupan ye, at bandian lubus ing lugal da.

³¹ Ing maging angganan na ning kekayung lugalan magumpisa ya king Dagat da ring Timbu angga king Ilug ning Eufrates, at magumpisa ya king Dagat ning Mediteraneo angga king disyerto. Paburen ku lang manabu karing gamat yu ding manuknangan king lugal a yan, at itabi yu la ding taung darasan yu.

³² E kayu mitatatag nanumang kasunduan karela o makisanmetung king pamanyamba ra karing kikilalanan dang dios.

³³ E yu la paintulutan manuknangan king sasakupan yu, pota ila pa ding mitake kekayu king pamikasala yu kanaku. Kabud samba kayu karing kikilalanan dang dios, king e yu kamalayan manabu kayu karing bitag da.

24

¹ Ngana ning Ginu kang Moises, Panikan mu ku king bunduk; ituki mu la ri Aaron, Nadab, Abihu, at ding pitung pulung manimuna na ning Israel. Kabang makarayu kayu pang bagya, duku kayu at samba.

² Ika mung bukud ing malyaring lumapit kanaku. E la sukat mumukiat king bunduk ding tau.

³ Inyang mibalik ya i Moises karing tau sinabi na ngan karela ing sablang yuyutus na't patupad ning Ginu. Ngara ngan mekibat king metung mung siwala, Tuparan mi la ngan ding sablang kautusan a binie na ning Ginu.

⁴ Binili na ngan Moises king metung a kasulatan ing sablang inutus na ning Ginu. Itang kabukasan abak a maranun mitalakad yang metung a altar king lele ning bunduk, at saka ya mitalakad labing aduang asias a batu; mangaintulid ya ing balang metung kareti king metung karing labing adua nang tribu ning Israel.

⁵ Kaybat mitubud yang mapilan a kayanakan a lalaki ban duluk karing ain para king Ginu at miyain mapilan a baka bilang ain-sakripisyung-pisulusuluan.

⁶ Kinua nang Moises ing kapitna king daya, at binili na karing mangaragul a datukanan. Sinabug na king altar ing mitagan.

⁷ Kaybat na nita, kinua ne ing libru ning kasunduan, at binasa neng masikan karing tau. Ngarang mekibat ding tau, Tuparan mi ngan at daptan ing sablang inutus na ning Ginu.

⁸ Kinua na kanitang Moises ing daya karing datukanan, at pisikanan na la kaniti ding tau. Ngana karela, Iti ya ing daya a tanda ning kasunduan a tinatag na ning Ginu at ikayu kanitang binie na la deting sablang kautusan.

⁹ Kaybat na nita, minta ya i Moises king bunduk; kayabe na la di Aaron, Nadab, Abihu, at ding pitung pulung manimunang makatua na ning Israel.

¹⁰ Ikit de karin ing Dios ning Israel. Anti ya ing suelong megawa king safiro a kasing asul na ning banua ing tutukluan na.

¹¹ Oneng e na la ninanan balang ning Dios deting lalaking peka manimunang makatua na ning Israel. Kaybat deng ikit ing Dios, mengan la at minum karin.

¹² Ngana ning Ginu kang Moises, Me keni, manik ka at panayan mu ku. Ibie ku la keka ding aduang tinabas a batu nung nu la ngan mayayakit ding sablang kautusan a sinulat ku para mituru la ding tau.

¹³ Migsadia ya i Moises at i Josue a kasaup na; minukiat ya i Moises king bunduk.

¹⁴ Nganang minie bilin karing manimunang makatua, Panayan yu kami keti king kampu anggang e ke magbalik. Kayabe yeng malakuan keti i Aaron at i Hur; ninuman ing mika problema kekayu, karela kayu lumapit.

¹⁵ Minukiat ne kanita i Moises king bunduk at tikpan ne ning biga ing bunduk.

¹⁶ Migdatun king babo ning bunduk ing makasilo nang aslag ning panga-atyu ning Ginu. Anam yang aldo makatakap king biga. King kapitung aldo, ibat king makapal a biga, inaus ne ning Ginu i Moises.

¹⁷ Ikit da naman ding Israelita ing makasilo nang aslag ning panga-atyu ning Ginu a balamu aping e matatda babo ning bunduk.

¹⁸ Minukiat ya i Moises king bunduk a mibalutan king biga. Menatili ya karin kilub ding apat apulung aldo at apat apulung bengi.

25

¹ Nganang migsalita ning Ginu kang Moises,

² Sabian mu karing memalen na ning Israel ing misadia lang ain para kanaku. Ika ing tanggap king ain na ning balang katau a laus lub nang ibie.

³ Oreti ding ain a tanggapan mu karela: gintu, pilak, tangsu;

⁴ mapinung telang linen; asul, muradu, at malutung lana; telang megawa king bulbul kambing;

⁵ balat lalaking tupa a kilulan malutu; balat a mapinu; tablang akasia;

⁶ laru para karing sulu; pabanglung paniangkap king larung paglania, at paniamut king mabanglung insenso;

⁷ batung onyx, at aliwa pang batung palamuti king efod at king takap-salu ning Pekapun a Pari.

⁸ Sukat da kung panalakad metung a Toldang pipanalanginan ban maging tuknangan ku libutad da.

⁹ Tukian me ing planung ipakit ku keka king pamitalakad mu kaniti at ing sablang kasangkapan a kailangan na.

¹⁰ Gawa kayung metung a Kaban king dutung a akasia; apat apulu't limang pulgada ya king kaba, aduang pulu't pitu ya pulgada king lapad, at aduang pulu't pitu ya pulgada king katas.

¹¹ Balutanan yeng gintung puru king lual at kilub, at dinan yeng listun a gintu king makapadurut.

¹² Miyubug kayung apat a telasingsing gintu bilang bitbitan na, at ikabit yu la karing apat nang bitis; aduang telasingsing misusumangid na at ning Kaban.

¹³ Gawa kayu namang aduang tambayuk king dutung a akasia, at balutanan yu la namang gintu,

¹⁴ at isulud yu la deting tambayuk karing telasingsing king katalindikingan na ning Kaban ban maging bitbitan kaniti.

¹⁵ Ipilmi la deting tambayuk karing telasingsing; e la sukat lalako.

¹⁶ Ilulan yu la kilub na ning Kaban ding aduang tinabas a batu a ibie ku, nung nukarin la makasulat ding kautusan.

¹⁷ Gawa kayung takap a puru gintu; apat apulu't lima ya pulgada king kaba at aduang pulu't pitu ya pulgada king lapad.

¹⁸ Gawa kayung aduang kerubin; pikpuk a gintu ing gamitan yu.

¹⁹ Pitunggalan yu la karing mingatba nang danggut niting takap. Gawan yu la ita sanang makatuglung la king takap.

²⁰ Piyarapan yu la; kailangan ing makaladlad la pakpak, at makatas, ita sanang sasalilungan de ing takap.

²¹ Ibili yu la kilub ning Kaban ding aduang tinabas a batu, at saka ye ibili ing takap babo na.

²² Karin da ka pakikitan at karin king babo na ning takap, pilatan da ring aduang kerubin, ibie ku la keka ding sablang kautusan ku para karing memalen na ning Israel.

²³ Gawa kayung metung a lamesa king dutung a akasia; atlung pulu't anam ya pulgada king kaba, labing walu ya pulgada king lapad, at aduang pulu't pitu ya pulgada king katas.

²⁴ Balutanan yeng gintung puru at palamutian gintung listun king makapadurut.

²⁵ Igawa yeng sanepa a atlung pulgada katas bilang kulung na babo, at dinan ya namang palamuting gintu king makapadurut.

²⁶ Igawa yeng apat a gintung telasingsing, at ikabit yu la deti karing apat nang suluk babo da ring apat nang bitis.

²⁷ Ikabit yu la ding telasingsing malapit king listun a peka kuadru na para pisuluran karing tambayuk a pamitbit da king lamesa.

²⁸ Gawa kayung tambayuk king dutung a akasia at balutanan yu la namang gintu. Ila deti ring pamitbit king lamesa.

²⁹ Gawa kayu namang pinggan, kopa, saru, at silyo para king alak a iyain da. Gintung puru ing gamitan yu.

³⁰ Ibili ye iting lamesa king arap ning Kaban ning Kasunduan, at king babo lamesa sukat mika tinape a miyain para kanaku king kapilan pa man.

³¹ Gawa kayung metung a tumpakan-sulu a puru gintu. Gumamit kayung pikpuk a gintu para king talpakan na angga karing sanga na. Ding palamuting bulaklak na pati na ding buku, at makabukadkad nang talulut niti sukat maging metung lang pirasu.

³² Dinan meng anam a sanga karing mingatba nang dane, titlung sanga king balang dane.

³³ Ing balang metung karing anam nang sanga mika atlu yang buku a kalupa da ring sampagang almendrong maki buku at talulut.

³⁴ Ing mismung sanga na ning tumpakan-sulu mika apat ya namang bukung kayubug da ring sampagang almendrong maki buku at talulut.

³⁵ Mika metung a buku lalam ning balang metung karing atlung paris a sanga.

³⁶ Sukat lang makatuglung ding buku at ding sanga king tumpakan-sulu. Kailangan ing gewa ya king metung mung piesang puru at pikpuk a gintu.

³⁷ Igawa yeng pitung sulu iting tumpakan-sulu at ibili yu la babo; ita sanang makatangad la aslag papunta arap na.

³⁸ Gawan yu la naman king gintung puru ding pamatdang sulu at pisaluran.

³⁹ Gumamit kayung pitung pulu't limang librang gintung puru para king pamangawa yu kaniting tumpakan-sulu at karing miyayaliwa nang kasangkapan.

⁴⁰ Pagkapilitan mung magawa la ngan deti agpang king planung pepakit ku keka king bunduk.

26

¹ Igawa yu kung Tolda, ing Toldang pituknanganan ku. Gamitanan yeng apulung kapiliegong linen a linala king asul, muradu, at malutung lana. Burdahan yu la karing larawan da ring kerubin.

² Piparaparehuan yu la sukad deting apulung kapiliego; labing apat a yarda la king kaba at aduang yarda king lapad.

³ Pisanibsaniban yu la ding limang piliego at makanyan munaman ding lima.

⁴ Dinan yeng telasingsing a gewa king asul a tela ing mumunang diling piliego king balang kapisaniban.

⁵ Mibili kayung limang pulung telasingsing king gilid na ning wakas diling piliego ning mumunang kapisaniban, at parisan yu lang limang pulung telasingsing king wakas nang piliego ning kaduang pisaniban.

⁶ Gawa kayu namang limang pulung sabitan a gintu para pitairan la ding adua ban maging metung la mu.

⁷ Gawa kayu namang peka bubung na ning Tolda. Gumamit kayung labing metung a kapiliegong imalan a gewa king bulbul kambing.

⁸ Piparaparehuan yu la sukad; labing limang yarda la king kaba at aduang yarda king lapad ing metung at metung.

⁹ Pisanibsaniban yu la gilid ding limang piliego, at pisanibsaniban yu la naman gilid ding anam a makatagan. Ing kanam dang piliego deti ya ing pagdobli yu bilang peka bubung na ning pasbul ning Tolda.

¹⁰ Mibili kayung limang pulung telasingsing king gilid na ning wakas diling piliego king metung a kapisaniban, at limang pulu munamang telasingsing king gilid na ning aliwa pang kapisaniban.

¹¹ Gawa kayung limang pulung sabitan a tangsu at isulud la karing telasingsing; ita sanang apituglung yu lang anting metung mung takap ding aduang kapisaniban.

¹² Isabit ye ing labis a piliego king kagulutan na ning Tolda.

¹³ Magbalag ya ing labis a mangapitnang yarda king balang gilid nang pakaba bilang kambil nang makapadurut ning Tolda.

¹⁴ Gawa kayung adua pang takap; metung a yari king balat lalaking tupa at kilulan malutu at metung a yari king balat a mapinu. Itakap yu la naman deti babo na ning Tolda.

¹⁵ Tumabas kayung tabla king dutung a akasia at gamitan yu la para gawan dalig king Tolda.

¹⁶ Labing limang talampakan ya king kaba ing balang kapirasu kareting tabla at aduang pulu't pitung pulgada ya king lapad,

¹⁷ at dinan yeng mipaparis a mitsa para apisukung-sukung yu la ding tabla. Dinan yu la ngan mitsa ding tabla.

¹⁸ Tumabas kayung aduang pulung kapirasung tabla para king dane mauli,

¹⁹ at apat apulung sulpakan a pilak a ibili yung tidua-tidua lalam ning balang tabla ban pisulpakan karing mitsa.

²⁰ Tumabas kayu namang aduang pulung tabla para king dane nang norti ning Tolda,

²¹ at apat apulung sulpakan a pilak; tidua lalam ning balang tabla.

²² Para king gulut na ning Tolda king dane nang albugan, tumabas kayung anam a tabla

²³ at aduang tabla para karing suluk.

²⁴ Pisagpangan la deting tablang paniuluk manibat king lalam angga babo. Makanyan yu lang gawan ding mingatbang tabla karing aduang paniuluk.

²⁵ Inya walu la heganagana ding tabla; labi lang anam ding sulpakan a pilak; tiduang sulpakan balang tabla.

²⁶ Gawa kayung labing limang barakilan king dutung a akasia, lima para karing tabla king metung nang dalig ning Tolda;

²⁷ lima para karing tabla king sumangid na, at lima para king dane albugan king gulut niti.

²⁸ Ing libutad a barakilan a dumalan king kalibudtan da ring tabla kailangan ing tataglus ya karing mingatba nang sepu ning dalig.

²⁹ Balutanan yu la king gintu ding tabla na ning dalig, at kabitanan lang telasingsing a gintu para pisuluran da ring barakilan a belutanan munamang gintu.

³⁰ Makanyan yeng italakad ing Tolda, agpang king planung pepakit ku keka king bunduk.

³¹ Gawa kayung tabing king telang purpura a kule asul, muradu, at malutu; paburda meng ating kerubin.

³² Isabit ya iti karing apat a asias a akasia a belutanan gintu at maki gintung sabitan, at makatuklu karing apat a talpakan a pilak.

³³ Isabit ye ing tabing karing makahilerang sabitan king bubungan na ning Tolda, at ilub ye kagulutan na ning tabing ing Kaban ning Kasunduan a datukanan da ring aduang tinabas a batu. Ing tabing atyu king pilatan da kanita ning Banal a Lugal ampon ning Kabanal-banalan a Lugal ya ing maging peka partisyun.

³⁴ Ibili ye ing takap king Kaban ning Kasunduan.

³⁵ King lual na ning Kabanal-banalan a Lugal karin ye ibili ing lamesa, king dane norti ning Tolda, at ibili ye ing tumpakan sulu king lele na ning dane mauli.

³⁶ Para king pasbul a palub king Tolda, gawa kayung metung a tabing king mapinung linen a linalang asul, muradu, at malutung lana a mipalamutian king miyayaliwang burda.

³⁷ Para pisabitan kaniting tabing, gawa kayung limang asias king dutung a akasia a belutanan gintu, at dinan yu lang sabitan a gintu; gawa kayung limang talpakan a tangsu para pitukluanan da reti.

27

¹ Gawa kayung altar king dutung a akasia. Kailangan ing kuadradu ya; pitu at kapitnang talampakan ya king kaba, pitu at kapitnang talampakan ya king lapad, at apat ampon kapitnang talampakan ya king katas.

² Mikabit kayung apat a sagu king babo da ring apat nang suluk, ita sanang makatuglung la mismu king altar, at balutanan yeng tangsu ing kabilugan.

³ Gawa kayu namang pilulanan king abung mituluanan taba. Gawa kayu namang pala, palanggana, maragul a tinedor, at pipatawan api. Tangsu ing gamitan yung materialis para kareti ngan.

⁴ Gawa kayu namang sala-salang tangsu at dinan yeng apat a pasingsing a tangsu karing apat nang suluk.

⁵ Ibili ye iting sala-salang tangsu king lele na ning altar; ita sanang mamabut ya king kapitna na ning katas ning altar.

⁶ Igawa yeng bitbitan ing altar king dutung a akasia; balutanan yeng tangsu.

⁷ Ipasulud yu la deting bitbitan karing telasingsing na ning altar; ita sanang mingatba la king altar potang bibitbitan de.

⁸ Gawan yeng kalubkuban ing altar at daligan yeng tabla; gawan ye agpang king planung pepakit ku keka king bunduk.

⁹ Igawa ya namang patyu ing Tolda. Padurutnan ye karing tabing a gewa king linen a mapinu. Gawan yu lang limang pulung yarda king kaba ding tabing king dane mauli, at

¹⁰ isabit karing aduang pulung asias a tangsu a makasulpak karing aduang pulung sulpakan a tangsu, at karing baras at sabitan a pilak.

¹¹ Makanyan munaman ing gawan yu king dane norti na ning patyu.

¹² Kailangan ing aduang pulu't limang yarda la king kaba ding tabing king dane albugan, at atin lang apulung asias a maki apulung sulpakan.

¹³ King dane aslagan, nung nu ya karin ing pasbul, ing peka tabing na karin, gawan ya namang aduang pulu't limang yarda king lapad.

¹⁴ Kailangan ing mika tabing a tia pitu at kapitnang yarda king misusumangid nang dane ning pasbul a maki titlung asias at titlung sulpakan.

¹⁵

¹⁶ Para king pasbul kailangan ing mika tabing a apulung yarda king kaba a gewa king linen a mapinu at maki kule asul, muradu, at malutung lana, at ating palamuting burda. Kailangan ing atin yang apat a asias, at apat a sulpakan iting tabing.

¹⁷ Pitaidtaid la ding sablang asias a makapadurut king patyu karing baras a pilak. Kailangan ing pilak la naman at tangsu ding sabitan da at ding sulpakan.

¹⁸ Kailangan ing lima yang pulung yarda king kaba ing sukad ning kabilugan a patyu; aduang pulu't limang yarda ya king lapad, at adua ampon kapitnang yarda ya king katas. Kailangan la ngang gewa king linen a mapinu ding tabing at pawa la ngan tangsu ding sulpakan da.

¹⁹ Kailangan la ngan tangsu ding sablang kasangkapan a magamit kilub ning Tolda at ding sablang tulus ning Tolda at ning patyu na.

²⁰ Iyutus mu karing memalen na ning Israel ing pagdala ra kang larung olibo a alang samut para karing sulu ban manatili lang milalablab.

²¹ I Aaron at ding anak nang lalaki ilang mibili king sulu kilub na ning kanakung Tolda nung nu ku atyu ketang lual na ning tabing a atyu king arapan na ning Kaban ning Kasunduan. Sukat lang milalablab ding sulu neng bengi angga itang kabukasan karin king arapan ku. Iti kautusan yang sukat dang tuparan king kapilan pa man ding Israelita ampon ding lahi ra.

28

¹ Payaus me ing kapatad mung i Aaron at ding anak nang lalaki, i Nadab, Abihu, i Eleazar, at i Itamar. Ikalilua mu la karing memalen na ning Israel ban sumuyu la kanaku bilang pari.

² Ipagawa meng imalan pari i Aaron a kapatad mu; imalan a munie dangal at sintingan king obra na.

³ Payaus mu la ding sablang talapagobrang dininan kung mangasanting a pangamat king pamanayi, at sabian mu karela king ila ding gawa king imalan nang Aaron ban akua na nang mitalaga bilang pari a sumuyu kanaku.

⁴ Sabian mu karela king gawa lang metung a takap-salu, metung a efod, metung a barung makaba, metung a kamisang birdahan, metung a turban, at metung a paha. Gawan da la reting imalan pari para kang Aaron at para karing anak nang lalaki ban makasuyu na la kanaku bilang pari.

⁵ Kailangan king deting manayi gumamit lang lanang asul, muradu, at malutu, sinulad a gintu, at mapinung linen.

⁶ Kailangan yang magawa ing efod king lanang asul, muradu, at malutu, sinulad a gintu, mapinung linen, at palamutian deng burda.

⁷ Dinan deng aduang tiranti king mingatba ban malyari yang isakbit karing pago.

⁸ Dinan dia namang metung a sinturun a mapinu ing mesabing efod; ita sanang makataid ya at maging dake ne ning efod.

⁹ Kuma kang aduang batung onyx at idukit mu la kareti ding lagyu da ring labi nang aduang anak Israel,

¹⁰ agpang king pamidalan-dalan da king idad, anam king metung a onyx at anam king kadua.

¹¹ Ipadukit mu la deting lagyu ra king metung a magaling a platero at kaybat ipatampuk mu la karing engasteng gintu.

¹² Ikabit mu la deti karing tiranti na ning efod bilang e pamangalinguan karing labing aduang tribu na ning Israel. King anti kaniting paralan, darala na lang parating Aaron karing pago na ding lagyu ra ban kanita naman, aku, ing Ginu, e ku la kalinguan kapilan man bilang kanakung balen.

¹³ Pagawa ka namang aduang engasteng gintu

¹⁴ at aduang kwintas a gintung puru a linubid anting panali, at ikabit mu la reti karing aduang engaste.

¹⁵ Pagawa ka namang metung a takap ning salu a isulud na ning Pekapun a Pari potang sabian na nung nanu ing kaburian ku, ing Ginu. Gamitan ing telang kalupa na ning megamit king efod, at palamutian ya naman ketang burdang kalupa na ning king efod.

¹⁶ Kailangan ing kuadradu ya at mitataklub ya; siam yang pulgada king kaba at siam yang pulgada king lapad.

¹⁷ Engastian meng apat a kahilerang mal a batu; king mumunang hilera, mikabit kang metung a rubi, metung a topasyo, at metung a garnet.

¹⁸ King kaduang hilera, mikabit kang metung a esmeralda, metung a safiro, at metung a diamante.

¹⁹ King katlung hilera, mikabit kang metung a turquoise, metung a agata, at metung a ametista.

²⁰ King kapat a hilera, mikabit kang metung a berilo, metung a onyx, at metung a haspe. Pawa la ngan sanang maka engasteng gintu deting batu.

²¹ Ing balang metung kareting mesabing batu sukat yang dukitanan metung karing lagyu da ring anak nang Jacob bilang kapigaganakan karing tribu na ning Israel.

²² Gawa ka namang aduang tali king gintung puru para kaniting takap-salu a linubid anting panali.

²³ Gawa ka namang aduang telasingsing a gintu at ibili mu la karing mingatba nang suluk babo ning takap-salu.

²⁴ Isulud mu la kareting telasingsing ding aduang taling gintu.

²⁵ Ikabit mu la ding mingatba rang danggut ding taling gintu karing aduang engasteng gintu ban mitaid la karing tiranti na ning efod banda king arap.

²⁶ Gawa kang aduang telasingsing a gintu at ikabit mu la karing adua nang suluk lalam ning takap-salu king lilip nang makalub a malapit king efod.

²⁷ Gawa ka pang aduang telasingsing a gintu at ikabit mu la king lalam king tulid da ring aduang tiranti na ning efod, malapit king pisuglungan a atyu babo ning sinturun a mapinu pangayabal a makatuglung king efod.

²⁸ Itali mu la ding telasingsing ning takap-salu karing telasingsing na ning efod king kapamilatan na ning taling asul ban manatili ya ing takap-salu babo na ning binurdahan a sinturun ning efod, at e na akuang mikawani king efod.

²⁹ Potang lulub ya i Aaron king Banal a Lugal, isulud ne iting takap-salu a midukitanan karing lagyu da ring tribu na ning Israel ban kanita, aku, ing Ginu, aganaka ke ing kanakung balen.

³⁰ Ibili mu ne man ing Urim at ing Tumim king takap-salu ban darala na lang Aaron potang lulub ya king banal kung arapan. Karing penandit a anti kareti sukat neng parating susulud iting takap-salu ban siguradu nang abalu nung nanu ing kaburian ku para karing memalen na ning Israel.

³¹ Kailangan yang magawa king asul a lana ing barung makaba a susulud babo ning efod.

³² Dinan yang busbus para pisuluran king buntuk, at sukat yang dinan uriang inabal iting busbus a kalupa na ning talab ban e ya magisi.

³³ Makapadurut king lele nang laylayan lalam, paburda meng granadang asul, muradu, at malutung lana; ibangkilas mu la karing kampaniliang gintu.

³⁴

³⁵ Isulud neng Aaron iting barung makaba potang gagampanan na ing katungkulan na bilang pari. Potang lulub ya king Banal a Lugal o kaya potang lulual ya maramdam la ding kampanilia. E ya mate king anti kaniting paralan.

³⁶ Gawa kang metung a palamuting tsapang gintung puru at idukit mu kaniti ing: Makatalaga king Ginu.

³⁷ Itali me iti king arap ning turban king kapamilatan na ning metung a lasung asul.

³⁸ Isulud neng Aaron iti king kanuan na ban aku, ing Ginu, kaku la ngan tanggapan ding ain a yayain da kanaku ding Israelita, agyang pang makarapat lang kamalian ding tau king pamiyain da kareti.

³⁹ Gawan ye king mapinung linen ing kamisa nang Aaron at gawa kayu namang turban king mapinung linen, at antimu rin metung a pahang mipalamutian burda.

⁴⁰ Pagawa ka namang kamisa, paha, at turban para karing anak nang Aaron ban mika dangal la at masanting lalawan.

⁴¹ Ipasulud mu la deting imalan kang Aaron a kapatad mu at karing anak nang lalaki. Kaybat, ordinan mu la at italaga king kapamilatan na ning pamitugtug mung larung olibo karela ban kanita makasuyu la kanaku bilang pari.

⁴² Ipagawa mu la naman salol a makuyad, linen munaman ing gamitan mu; ita sanang mitakpan la katawan manibat king awakan angga karing puad da.

⁴³ Kailangan ing isulud na lang Aaron deti at ding anak nang lalaki neng mamarap la kanaku kilub na ning Toldang tuknangan ku o neng lalapit la king altar ban gampanan da ing karelang pangapari kilub ning Banal a Lugal, at ban e la mangamate uli na ning kalubasan da. Maging metung ya iting tuntunan king kapilan pa man para kang Aaron at karing maging lahi na.

29

¹ Oyni ngeni ing sukat mung daptan kang Aaron at karing anak nang lalaki ban aitalaga mu la bilang paring sumuyu kanaku. Kuma kang metung a baintaung toro ampon aduang lalaking tupa a alang kapansanan.

² Gamitan mu ing pekamasanting a arinang trigu, pero alang lebadura at gawa kang tinape singkapan larung olibo. Gawa ka namang e singkapan larung olibo at mapilan pang tinape maimpis a kiskasanan laru.

³ Ibili mu la deti king basket at iyain mu la kanaku potang iyain me ing toro at ding aduang lalaking tupa.

⁴ Ituki me i Aaron at ding anak na king lele na ning pasbul ning Toldang tuknangan ku at karin mu parapat ing seremonia ning pamaglinis.

⁵ Kaybat na nita, piblasan me i Aaron karing imalan pari, ing kamisa, ing efod, ing barung makaba a makababo king efod, ing takap-salu, at ing sinturun.

⁶ Itumpak me king buntuk na ing turban at itali me kaniti itang sagradung simbulu na ning pangatalaga na nung nu makadukit ing Makatalaga king Ginu.

⁷ Kaybat, kuanan mu ing larung paglania at itugtug mu iti king buntuk na at lanian me.

⁸ Ilapit mu la kanita ding anak nang lalaki at pasuluran mu lang kamisa;

⁹ babatan mu la karing paha at itali mu la ring turban king buntuk da. Makanyan meng ordinan pari i Aaron at ding anak nang lalaki. Ila at ding maging lahi ra ilang sumuyu kanaku bilang pari king kapilan pa man.

¹⁰ Idala me ing toro arap ning Toldang tuknangan ku at sabian mu kang Aaron at karing anak na ing itumpak da la ring gamat da king buntuk ning toro.

¹¹ Paten me kanita mu rin king banal kung arapan ing toro king tulid nang pasbul ning Toldang tuknangan ku.

¹² Kuma kang ditak king daya ning toro at king metung mung taliri ikaskas mu iti karing sagu ning altar. Kaybat itugtug mu ing makatagan a daya king talpakan ning altar.

¹³ Kuanan mu ngan ing tabang makabalut karing laman lub, ing pekamasanting nang dake ning ate, at ding aduang batu ampon ing taba ra. Dulukan mu ngan iti king altar bilang ain kanaku.

¹⁴ Oneng dulukan mu king lual ning kampu ing laman ning toro, ing balat na, at ding bituka na. Iti maging ain para mipatawaran ing kasalanan.

¹⁵ Kuanan me ing metung karing aduang lalaking tupa at sabian mu kang Aaron at karing anak na ing itumpak da la ring gamat da king buntuk na ning tupa.

¹⁶ Paten me ing lalaking tupa; saluran mu ing daya at kaybat ipisik mu karing apat nang suluk ning altar.

¹⁷ Kaybat, pangilian me ing lalaking tupa; luglugan mu ing laman lub at pati na ding bitis at ibili mu iti babo nang buntuk, at karing aliwa pang dake a megili.

¹⁸ Dulukan me ing lalaking tupa king altar bilang ain-a-kakanan. Babie tula kanaku, ing Ginu, ing bau na niti.

¹⁹ Kuanan me ing metung pang lalaking tupa, itang megamit king pamitalaga. Kaybat, ipatung na la ding gamat nang Aaron at ding anak na king buntuk ning tupa.

²⁰ Paten me ing lalaking tupa at kuma kang ditak king daya na at ikaskas mu karing pingul nang balugbug a wanan Aaron at ding anak na, at karing tindaragul da ring gamat dang wanan ampon karing tindaragul da ring bitis dang wanan. Isabug mu ing mitagan a daya karing apat nang suluk ning altar.

²¹ Kuma kang ditak king dayang atyu king altar at ditak king larung paglania. Ipisik mu iti kang Aaron, king imalan na, karing anak nang lalaki, at karing imalan da. Mitalaga ne kanita kanaku i Aaron, ding anak na, at ing imalan da.

²² Kuanan mu ing taba ning lalaking tupa, ing taba na king iki at itang makabalut king laman lub, ing pekamasanting nang dake ning ate, ding adua nang batu, ing taba ra, at ing wanan nang puad.

²³ Kuma kang tunggalan karing atlung uring tinape karing makabasket a miyain kanaku: metung a tinape singkapan larung olibo, metung karetang e singkapan laru, at metung karing tinape maimpis.

²⁴ Ibili mu ngan iting pamangan king gamat nang Aaron ampon ding anak na, at iyutus mu karela ing iyain da iti kanaku bilang makabukud a ain.

²⁵ Kaybat kuanan mung pasibayu karela, at dulukan mu king altar, babo ning dilukan a ain, bilang ain-a-kakanan a makatalaga kanaku. Ing bau na niting ain babie tula kanaku.

²⁶ Kuanan me ing pitsu ning lalaking tupa a megamit king panga-ordinan nang Aaron, at iyain me kanaku bilang makabukud a ain. Ing dake nang iti ning animal ya ing para keka.

²⁷ Potang miyoyordinan ya ing metung a pari, ing pitsu na at puad ning lalaking tupa a magamit para king seremonia ning ordinasyun sukat lang miyain kanaku bilang makabukud a ain, at ya ing ilele bilang dake ra ding pari.

²⁸ Sukat mipatupad manibat ngeni at king kapilan pa man iti: potang ding taung pinili ku yayampang da la ring ain-ning-pamisulusulu, ing pitsu, at ing puad ning animal a yayain da mangaintulid ya karing pari. Iti ya ing peka regalu da ring tau para kanaku, ing Ginu.

²⁹ Sukat lang ipamana ding imalan pari a ginamit nang Aaron karing lahi na pangamate na ban isulud da naman potang miyordinan la.

³⁰ Ing anak nang Aaron a manalili mismu kang Aaron bilang pari at lulub king Toldang tuknangan ku ban sumuyu kilub ning Banal a Lugal, sukat na lang isulud deting imalan kilub ding pitung aldo.

³¹ Kuanan mu ing laman ning lalaking tupang megamit king ordinasyun nang Aaron at ding anak na, at ipabukal mu iti king metung a sagradung lugal.

³² King tulid nang pasbul ning Toldang tuknangan ku karin da kanan iti a kayabe da ring tinape mitagan king basket.

³³ Sukat dang kanan itang megamit king seremonia ning pangapatawaran kasalanan inyang miyordinan la. Bukud mung ding pari ilang mangan kaniti uling iti sagradu.

³⁴ Nung atin king karni o atin karing tinape a e mepangan karas na ning abak, iti sukat dulukan; e na sukat mapangan, uling iti sagradu.

³⁵ Gampanan mu ing seremonia ning ordinasyun nang Aaron at ding anak nang lalaki kilub ding pitung aldo antimo nung makananu kung penabilin keka.

³⁶ Miyain kang metung a toro balang aldo bilang ain para king pangapatawaran ning kasalanan. Iti ing makalinis king altar. Kaybat kuskusan me king larung olibo ban maging sagradu ya.

³⁷ Daptan mu iti balang aldo kilub ding pitung aldo. Kanita maging lubus yang banal ing altar, at ninuman o nanumang mitagkil kaniti manasakit ya king upaya na ning kabanalan na.

³⁸ King sablang panaun, mibili kayung ain king altar aldo-aldo, aduang biserung tupa a pabanua tua.

³⁹ Iyain ye ing metung neng abak at ing metung neng sisilim na.

⁴⁰ Kayabe ning mumunang biserung tupa kailangan kayung miyain aduang librang arinang primera klasi a singkapan kulang king metung a litrung larung olibo a alang samut. Mitugtug kayu namang kulang king metung a litrung alak bilang ain a tutugtug.

⁴¹ Iyain ye ing kaduang biserung tupa potang malapit nang datang ing bengi at kayabe na iyain yu naman ing arina, larung olibo, at alak a kasing dakal na nitang king abak. Iti maging ain yang kakanan a miyain kanaku, ing Ginu, at babie tula kanaku ing bau na niti.

⁴² Sukat gampanan alang patugut iti king sablang panaun bilang ain-a-durulukan king arapan ku keta king tulid ning pasbul ning Toldang tuknangan ku. Karin ke pakitagpuan ing balen ku at karin ku makipagsalita kekayu.

⁴³ Karin ke pakitagpuan ing balen Israel at ing masala nang aslag ning panga-atyu ku ya ing munie kabanalan king lugal a ita.

⁴⁴ Gawan keng banal ing Toldang tuknangan ku ampon ing altar, at ibukud ke i Aaron at ding anak nang lalaki ban sumuyu la kanaku bilang pari.

⁴⁵ Manuknangan ku libutad ning balen Israel, at aku ing maging Dios da.

⁴⁶ Abalu ra kanita king aku ing Ginung karelang Dios a milual karela karin Ehipto ban akua kung makapanuknangan kayabe ra. Aku ing Ginung karelang Dios.

30

¹ Gawa kang altar a pidulukan insenso; dutung a akasia ing gamitan mu.

² Gawan meng kuadradu; labing walung pulgada ya king kaba, labing walung pulgada ne man king lapad, at atlung pulu't anam a pulgada ya king katas. Kailangan ing makasukung la ding peka sagu na karing apat nang suluk niti anting dake na.

³ Ing peka mesa na at sanepa at ding sagu na balutanan mu la ngan gintu at dinan listun a gintu king makapadurut.

⁴ Karing mingatba nang dane, lalam ning listun, mikabit kang tiduang telasingsing a gintu para pisuluran karing tambayuk a peka bitbitan na.

⁵ Gawan mu la king dutung a akasia deting tambayuk, at balutanan mu la namang gintu.

⁶ Ibili me iting altar king lual ning tabing arapan na ning Kaban ning Kasunduan. Iti ing lugal nung nukarin ku makitagpu kekayu.

⁷ Balang abak, potang dirinan na lang laru ding sulu, kailangan ing duluk yang mabanglung insenso i Aaron keting altar.

⁸ Makanyan munaman ing daptan na potang sindian na la ding sulu karas ning bengi. E yu kakalinguan iting pamiyain insenso aldo-aldo at pati ding maging lahi yu.

⁹ E ye didinan iting altar king insensong e makapaintulut o king nanu pa mang animal a durulukan o nanu pa mang ain-a-kakanan; e ye tutugtuganan nanumang alak a yayain.

¹⁰ Misan king pabanua sukat neng gampanan Aaron ing seremonia ning pamaglinis keting altar king kapamilatan na ning pamangaskas na karing apat nang sagu king daya ning animal a miyain para king pangapatawaran na ning kasalanan. Sukat marapat iti misan king pabanua at king kapilan pa man. Sukat yang lubus banal iting altar a makatalaga para kanaku, ing Ginu.

¹¹ Ngana ning Ginu kang Moises,

¹² Potang kuma kang sensus da ring memalen na ning Israel, sukat na kung bayaran ning balang katau metung a alaga ban kanita alang salut a malyaring miras king bie na kabang mararapat ing pamagsensus.

¹³ Ing balang metung a miyabe king sensus sukat neng bayaran ing alagang mayayawad, agpang king timbangan na ning santuaryu. Kailangan nang bayaran iti ning balang metung at metung bilang ain para kanaku.

¹⁴ Ing balang kataung mabilang king sensus, ngana wari, ing balang lalaking atyu na king idad a aduang pulung banua o maygit kaniti, sukat nang bayaran kanaku ing anti kaniting alaga.

¹⁵ E ya kailangan mamayad maygit ing lalaking mabandi, at e ya kailangan mamayad kulang ing lalaking kalulu, potang ibie ra iting alaga a kalibe na ning bie ra.

¹⁶ Likuman mu la reting salapi karing memalen na ning Israel, at ya ing gastusan mu para king pamaniustentu king Tolda a kanakung tuknangan. Iting buis ya ing bayad a kalibe na ning bie ra at aku naman e ku la kalinguan.

¹⁷ Ngana pa ning Ginu kang Moises,

¹⁸ Pagawa kang metung a palangganang tangsu a ating talpakan munamang tangsu. Ibili me iti pilatan na ning Toldang tuknangan ku ila ning altar at dinan meng danum.

¹⁹ Iti ing danum a gamitan nang Aaron at ding anak nang lalaki para panos dang gamat at bitis

²⁰ bayu la lungub king Toldang tuknangan ku o kaya bayu la lumapit king altar ban miyain king ain-a-kakanan. E la mate nung daptan da iti.

²¹ Kailangan da lang wasan ding gamat da at bitis ban e la mate. Metung ya iting tuntunan a sukat dang tuparan at ding maging lahi ra king kapilan pa man.

²² Ngana pa ning Ginu kang Moises,

²³ Kuma ka karing pekamasanting a paniangkap: labing aduang librang mirang alang samut, anam a librang mabanglung kanela, anam a librang mabanglung kania,

²⁴ at labing aduang librang kasia (agpang king timbangan ning santuaryu). Idagdag mu kaniti ing metung a galun a larung olibo,

²⁵ at gawa kang larung paglania a singkapan bilang pabanglu.

²⁶ Gamitan mu iti para paglania king Toldang kanakung tuknangan, king Kaban ning Kasunduan,

²⁷ king lamesa, at para karing sablang kasangkapan, king tumpakan-sulu, at karing sablang kasangkapan na, king altar a pidurulukan insenso,

²⁸ king altar a pidurulukan karing ain at ding sabla nang kasangkapan, king palangganang pipanuasan at ing talpakan na.

²⁹ Makanyan mu lang italaga kanaku deting sablang bage ban maging lubus lang banal, at manasakit ya king upaya na ning karelang kabanalan ing ninumang tagkil kareti.

³⁰ Kaybat lanian mia naman kaniti i Aaron at ding anak nang lalaki, at italaga mu la bilang pari a sumuyu kanaku.

³¹ Sabian mu karing memalen na ning Israel, Manibat ngeni iting banal a larung paglania ya ing sukat magamit king pamaniuyu kanaku king sablang panaun.

³² E sukat mitugtug karing karaniwan a tau at e yu bitasang gagamitan ing pormularyu na niti. Iti banal at sukat yung tunggen banal.

³³ Ninumang gawang kalupa na sangkap niti at saka na gamitan iti kenu pa mang e pari, e ne malyaring mibilang pang miembru na ning kanakung balen.

³⁴ Nganang sinabi ning Ginu kang Moises, Kuma kang parehu takal at timbang king balang metung kareting makatuking mabanglung paniangkap: estakte, onika, galbano, at insensong puru.

³⁵ Ila deti ring gamitan mu para gawa kang insenso, antimo nung makananu kang gagawang pabanglu. Dinan mung asin ban maging puru at banal.

³⁶ Dikdikan mung mapinu ing metung nang dake niti, at ibili mu king arap ning Tolda nung nukarin da kayu pakitagpuan. Tunggen yung banal iting insenso.

³⁷ E yu pakiapusan para gamitan king sarili yu ing pamangawang insenso king anti kaniting paralan. Tunggen yung banal iti uling iti bukud mung para king Ginu.

³⁸ Itiwalag ya karing memalen ku ing ninumang gawang pabanglu king anti kaniting paralan.

31

¹ Nganang migsalita ning Ginu kang Moises,

² Pinili ke i Besalel a anak nang Uri at apu nang Hur ning tribu nang Juda.

³ Kitmuan ke king espiritu ku. Dininan keng kabiasnan, kagiwan, at gelingan para king miyayaliwang obrang maki arti.

⁴ Biasa yang gumulis at magobra king gintu, king pilak ampon tangsu;

⁵ king pamanabas karing batung itampuk, king pamandukit king dutung, at king miyayaliwa pang obrang maniawad masanting a pangamat.

⁶ Pinili kia namang maging kayaduangan na king obra i Oholiab a anak nang Ahisamac ning tribu nang Dan. Binie ku naman ing lalung maragul a gelingan karing sablang lalaking magaling a pangamat ban agawa ra ing isanu mang inutus kung magawa.

⁷ Ila ding gawa king Toldang tuknangan ku, king Kaban ning Kasunduan at ing takap na, ding sablang kasangkapan ning Tolda,

⁸ ing lamesa at ding gamit na, ing tumpakan-sulung megawa king gintung puru, at ding sabla nang kasangkapan; ing altar a pidulukan insenso;

⁹ ing altar para karing ain-a-durulukan at ding sabla nang kasangkapan, ing palangganang pipanuasan at ing talpakan na,

¹⁰ ding banal a burdadung imalan a isulud nang Aaron at ding anak nang lalaki king pamaniuyu ra bilang pari,

¹¹ ing larung paglania, at ing mabanglung insenso para king Banal a Lugal. Sukat dang tukian masalese ing sablang inutus ku kekang gawan da.

¹² Sinabi na ning Ginu kang Moises

¹³ king sabian na karing memalen na ning Israel ing anti kaniti: Ipangiling ye ing Sabbath, ing aldo a kanakung paynawa, uling metung yang palatandanan para kanaku at para kekayu angga na karing sablang lahi kaybat yu; pakilala na king aku, ing Ginu, ing memili kekayu bilang sarili kung balen.

¹⁴ Inya sukat yeng ipangiling ing Aldo ning Sabbath uling aldo yang sagradu. Paten ya ing ninumang taung labag king Aldo ning Sabbath at magobra kilub ning aldong ita.

¹⁵ Atin kayung anam a aldo ban daptan ing obra yu, oneng ing kapitung aldo metung yang masusing aldo ning pamagpaynawa, aldo yang makatalaga para kanaku. Paten ya ing ninumang magobra kilub ning Aldo ning Sabbath.

¹⁶ Ipangiling de ring memalen na ning Israel ing Sabbath bilang metung a palatandanan na ning kasunduan.

¹⁷ Maging palatandanan yang alang kapupusan para kanaku at karing memalen na ning Israel, uling aku, ing Ginu, lelang ke ing banua at ing yatu kilub ding anam a aldo, pero tinuknang kung megobra king kapitung aldo at migpaynawa ku.

¹⁸ Inyang meyari neng mekipagsalita ing Dios kang Moises king Bunduk ning Sinai, binie na la kang Moises ding aduang tinabas a batu nung nu na la sinulat ning Dios ding kautusan.

32

¹ Milupung la kang Aaron ding tau inyang apansinan dang e ya kukuldas king bunduk i Moises. Ngara, E tamu balu nung nanu na ing milyari kang Moises a milual kekatamu ibat Ehipto; inya gawa kang metung a dios a manimuna kekatamu.

² Nganang mekibat Aaron karela, Palukas yu la ding tinggang gintu a susulud da ring asawa yu, anak a lalaki at babai, at saka yu la idala deti kanaku.

³ Inya likas da la ngan ding tinggang gintu karing balugbug da at dela da la kang Aaron.

⁴ Tinggap na la ngan Aaron deti at linaso na la; tigtug na ing gintu king metung a moldi at ginawa yang metung a gintung toro. Ngarang sinabi ding tau, O Israel, oyan ing kekatamung dios a milual kekatamu king Ehipto!

⁵ Kaybat na nita, ginawa yang altar i Aaron king arap na ning gintung toro at nganang sinabi, Pagpiestan ta ya bukas ing Ginu.

⁶ Inyang kabukasan, maranun lang migdalang mapilan a animal ban dulukan da bilang ain-sakripisyu at mapilan a kanan da bilang ain-ning-pamisulusulu. Linukluk la ding tau; misulusulu lang mengan at mininum. Iti minuling metung a pamaglasing at pamagpasasa king pamitan na ning laman.

⁷ Kanita ngana ning Ginu kang Moises, Magmalagua ka at kuldas na ka, uling ding kabalen mu a liwal mu ibat Ehipto mikasala la at sikuil da ku.

⁸ Kalalagua da ne mang gilutan ing dalan a tildu kung tuntunan da; ginawa lang metung a toro king gintung linaso ra, simban de at dininan ain-sakripisyu. Sasabian da king ita kanu ing dios da a milual karela king Ehipto.

⁹ Balu ku nung nu la anti pangasias a buntuk ding taung deti.

¹⁰ Inya paburen mu ku ngeni. Mua ku karela at paten ku la. Pero ika at ding lahi mu gawan da kayung metung a marangal a bansa.

¹¹ Oneng menigapu ya i Moises king Ginung keyang Dios. Ngana, Ginu, obat mua ka kaniting sarili mung balen a liwal mu king Ehipto king kapamilatan na ning maragul mung sikanan at upaya?

¹² Obat dinan mu lang pamikatagun makasabi ding tau Ehipto king inya liwal mu la mu Ehipto ding memalen mu uling buri mu la palang paten at lubusan gisanan karing kabundukan? Kalinguan mu na ing mua mu; aplakan mu ing lub mu at e mu sa papagpa king balen mu ing anti kaniting kasiran.

¹³ Ganakan mu la ding talasuyu mung di Abraham, Isaac, at Jacob. Ganakan mu itang masusing pangakung binie mu karela king dinan mu lang lahing kasing dakal da ring batuin king banua, at king babie mu karing lahi da ing sablang gabun a pengaku mung pabandi karela king kapilan pa man.

¹⁴ Inya migbayu ya isip ing Ginu at e na na pepagpa karing memalen na ing kasiran a bela nang ipagpa karela.

¹⁵ Kinuldas ya at meko king bunduk i Moises; darala na la ding aduang tinabas a batu nung nu la makasulat misusumangid ding kautusan.

¹⁶ Gewa na la mismu ning Dios deting tinabas a batu; ya ing sinulat kareti at midukit la.

¹⁷ Inyang dimdam nang Josue ing inge da ring taung kukulisak, sinabi na kang Moises, Balamu ating labanan king kampu.

¹⁸ Nganang Moises, E kulisak ning tagumpe ing daramdaman ku o tangis ning pangasambut; king panamdam ku balamu kanta na ning kasayahan.

¹⁹ Inyang ikua ra nang milapit king kampu, ikit neng Moises ing gintung toro at ding taung terak-terak; mikasbu ya king mua na. Belabag na la karin king lele ning bunduk ding aduang tinabas a batu at mebalbal la.

²⁰ Kinua ne ing gintung toro a gewa ra at linaso ne iti king api. Kaybat, pindurug ne angga king meging mapinu yang mapinu at saka na sinamut iti king danum. Pepainum na iti karing memalen na ning Israel.

²¹ Kaybat, inarapan neng Moises i Aaron at kitang na, Aaron, nanu ing gewa ra keka ding taung deti? Obat sinubu mu la king anti kaniting mabayat a pamikasala? fig,,,,,... Belabag na la karin king lele ning bunduk ding aduang tinabas a batu at mebalbal la.,(32:19)fig*

²² Nganang mekibat Aaron, E ka sa mimimua kanaku, ika mismu balu mu king makayungyung la king e ustu ding taung deti.

²³ Ngara kanaku, E tamu balu nung nanu na ing milyari kang Moises a milual kekatamu ibat Ehipto; inya mayap pa ing gawa kang dios a manimuna kekatamu.

²⁴ Inya inawad ku naman karela king idala da la kanaku ding alahas dang gintu. Detang sablang atin likas da la at binie da la kanaku. Linaso ku la deti king api at ing linto ya ing torong yan!

²⁵ Ikit nang Moises king pepaburen na lang megulung Aaron ding tau, at pepaburen na lang menabu king kamarinayan king akakit da ring kalaban da.

²⁶ Inya tinalakad ya king lele nang pasbul dalan ning kampu at nganang migsalita, Ninu ding makapanig king Ginu? Lumapit la keni kanaku! Linapit la ding sablang Levita at migpadurut la kang Moises.

²⁷ Nganang migsalitang Moises karela, Ing Ginung Dios ning Israel yuyutus na king balang metung at metung kekayu king kuanan ne ing espada na, at laganasan yeng libutan ing kampu manibat king pasbul dalan a ini angga na king kasumangid a pasbul dalan, at paten yu la ngan ding kapatad yung lalaki, kakaluguran yu, at kasiping bale.

²⁸ Memintu la ding Levita at mekapate lang ating atlung libu katau king aldong ita.

²⁹ Kaybat nganang miniabing Moises karing Levita, King aldong iti telaga yu ing sarili yu bilang pari a susuyu king Ginu uli na ning pamakamate yu karing sarili yung anak a lalaki at kapatad a lalaki, inya kamtan yu naman king Ginu ing bendisyun na.

³⁰ Kabukasan, nganang Moises karing tau, Tutung maragul ing depatan yung pamikasala. Oneng ngeni mukiat kung pasibayu king bunduk at makikit king Ginu; pota apakisabi kung mayap ing patawaran na ing pamikasala yu.

³¹ Inya belikan neng Moises ing Ginu at ngana, Dinapat lang tutung maragul a pamikasala ding taung deti. Ginawa lang metung a dios king gintu at saka re simban.

³² Ipakisabi ku sanang mayap kekayu ing patawaran yu na ing pamikasala da; nung e malyari, masanting pa ing buran yu ne ing lagyu ku king librung pisulatanan yu karing lagyu da ring memalen yu.

³³ Nganang mekibat ning Ginu, Ding buran ku lagyu king libru ku ila ding taung mikasala kanaku.

³⁴ Sulung magbalik na ka at panimunan mu na la ding taung papunta ketang lugal a sinabi ku keka. Tandanan mu, ing anghel ku ya ing mantabe kekayu, oneng king aldo a buri ku lang parusan, parusan ku la uli na ning depat dang kasalanan.

³⁵ Makanyan yang peparalang sakit ing Ginu karing tau uli na ning pepagawan deng gintung toro i Aaron.

33

¹ Nganang sinabi ning Ginu kang Moises, Mako na kayu king lugal a iti; ilako mu na la keti ding memalen a liwal mu ibat king Ehipto at munta na kayu king gabun a pengaku kung ibie kari Abraham, Isaac, Jacob, at karing lahi ra.

² Itubud ke ing metung a anghel ban manimuna kekayu; itabi ku la ding Cananeo, Amoreo, Hiteo, Perezeo, Heveo, at ding Jebuseo.

³ Gabun yang mataba at masanting ing lugal a dasnan yu. Aku mismu e ra kayu tukian pota paten da kayu kabang dalan uling metung kayung balen a ating kesiasan a buntuk.

⁴ Melungkut la inyang dimdam da ring tau iting mataram a amanu at manibat na kanita e na la misulud nanu pa mang alahas.

⁵ Uling ngana ning Ginu kang Moises, Sabian mu kareting Israelita, Tau kayung masias a buntuk! Nung tukian da kayu agyang metung mung saglit, pota paten da kayu ngan. Ngeni mu rin ilukas yu la ding susulud yung alahas at saka ku na arian king lub ku nung nanu ing sukat kung daptan kekayu.

⁶ Inya manibat na kanitang meko la king Bunduk ning Sinai e na la misulud pang nanumang alahas ding memalen na ning Israel.

⁷ Meging ugali nang Moises ing italakad ne ing Toldang tuknangan ning Ginu marayung bagya king kampu. Pemalagyuan ne iting Ing Toldang tuknangan ning Ginu. Ninuman ing ating buring isangguni king Ginu pupunta ya keting lugal a atyu lual na ning kampu.

⁸ Neng lulual ya i Moises papunta karin, tatalakad la ding sablang tau lele dang pasbul at makalawe la kang Moises anggang e na akuang milub karin.

⁹ Kabud milub ya i Moises king Tolda, magbaba ya ing asias a biga at magdatun king tulid nang pasbul ning Tolda, at makipagsalita ya ing Ginu libutad ning biga.

¹⁰ Duruku la ngan ding tau potang akit da king ing asias a biga maratun ya king pasbul ning Tolda.

¹¹ Lupa't lupa yang makipagsalita ing Ginu kang Moises, antimo nung makananu yang makipagsalita ing metung a tau king kakaluguran na. Kaybat, magbalik ya king kampu i Moises, oneng i Josue, ing kayanakan a lalaking talasuyu na a anak nang Nun, pailakuan ya kilub ning Tolda. fig,,,,,Duruku la ngan ding tau.,(33:10)fig*

¹² Nganang Moises king Ginu, Ikayu ing sinabi kanaku king panimunan ku la ding taung deti king gabun a ita, oneng e yu naman sinabi kanaku nung ninung itubud yung akayabe ku. Sinabi yu naman kanaku king tune yu kung balu at king tutula kayu kanaku.

¹³ Nung tutu pin king matutula kayu kanaku, sabian yu kanaku ing babalakan yu ban asuyuan da kayu at asundu ra kayung pamatulan. Ganakan yu naman king iting bansa ya ing pinili yung maging sarili yung bandi.

¹⁴ Ngana ning Ginu, Aku ing mantabe keka at aku ing munie tagumpe keka.

¹⁵ Nganang Moises, Nung e kayu mantabe kekami, mayap pang e yu na ke palakuan pa king lugal a iti.

¹⁶ Makananu na mong abalu ning ninuman king tutula kayu pin karing memalen yu ampon kanaku, nung e kayu mantabe kekami? Ing pamanantabe yu kekami karin mayakit king makayaliwa kami pin karing sablang bansa keti king yatu.

¹⁷ Ngana ning Ginu kang Moises, Daptan ku itang nung nanu ing inawad mu uling tune ra kang balu at tutula ku keka.

¹⁸ Inya nganang mekisabing mayap Moises, Pakit ye sana kanaku ing makasilo nang aslag ning lupa yu.

¹⁹ Ngana ning Ginu, Palabasan ku ngan king arapan mu ing kabilugan kung kamalan at sabian ke king arapan mu ing banal kung lagyu: Ginu. Maging maganaka ku at malunusan karetang buri kung pakitanan kaniti.

²⁰ E ke malyaring ipakit keka ing lupa ku uling mate ya ing ninuman kabud akit ne ing lupa ku.

²¹ Oyan ing metung a lugal king siping ku; talakad ka babo ning batung maragul a atyu ken.

²² Potang lumabas king arapan mu ing makasilo nang aslag ning panga-atyu ku, ibili ra ka king metung a siwang na ning batung yan at pampanan da ka king gamat ku anggang e ku milabas.

²³ Kalabas ku ilako ke ing gamat ku at akit me ing gulut ku, oneng e me akit ing lupa ku.

34

¹ Ngana ning Ginu kang Moises, Tumabas kang aduang batu a kalupa ra detang minuna at isulat ku la kareti detang amanung misulat karetang minunang tinabas a bilbal mu.

² Magsadia ka bukas abak at mukiat ka king Bunduk ning Sinai ban makikit kanaku karin king taluktuk na.

³ Ala kang tutuki; e ya sukat mayakit ing ninuman karin king bunduk; ala kang paburen a tupa o baka a manyibsiban king lele na ning bunduk.

⁴ Inya tinabas yang adua pang batu i Moises at itang kabukasan abak a maranun minukiat ya king Bunduk ning Sinai; bibitbitan na la ding tinabas a batu, antimo ing inutus na ning Ginu.

⁵ Tinipa ya ing Ginu king biga at tinalakad ya siping nang Moises at sinabi ne ing lagyu na: Ginu.

⁶ Linabas ya kanita ing Ginu king arapan nang Moises at kilait na, Aku, ing Ginu, metung kung Dios a mapaglunus ampon maganaka, e agad mimimua, at papakit kung maragul a lugud a e kukupas, at katapatan.

⁷ Tutupad ku king pangaku ku karing libu-libung lahi at patawaran ku ing e ustu at kasalanan, oneng siguradu ku lang parusan ding anak da at apu at pati na ding king katlu at kapat a lahi da uli na ning pamikasala ra ding pengari da.

⁸ Dinuku ya kanita i Moises king gabun at saka ya sinamba.

⁹ Nganang migsalita, Ginu, nung tutu ping tutula kayu kanaku, aduan ku ing mantabe kayu sa kekami agyang masias la buntuk ding taung deti. Patawaran yu ing e ustung gewa mi at kasalanan at tanggapan yu ke sana bilang sarili yung balen.

¹⁰ Ngana ning Ginu kang Moises, Gawa ku ngening kasunduan karing memalen na ning Israel. King arapan da gawa kung miyayaliwang pagmumulalan a kapilan man e pa merapat nukarin man keti king yatu o king isanu pa mang bansa. Akit da kanita ding sablang taung makapadurut kekayu nung nanu ing agyu kung daptan, uling aku, ing Ginu, gawa kung makapangalgal a bage para kekayu.

¹¹ Pamintuan yu la ding utus a babie ku kekayu king aldo ngeni at itabi ku la ding taung darasan yu, ding Amoreo, ding Cananeo, ding Hiteo, ding Perezeo, ding Heveo, at ding Jebuseo.

¹² E kayu gagawang nanumang pamakikasundu karing manuknangan king lugal a malapit yu nang dasan, uling iti malyaring maging metung a bitag para kekayu.

¹³ Bagkus, paglasakan yu la ding altar da, itomba yu la ding sagradu rang asias a batu, at panguturan yu la ding sagradung simbulu ning diosang i Asera.

¹⁴ E kayu sasamba king isanu pa mang kikilalanan dang dios, uling aku, ing Ginu, Dios kung mapangalalu, at ing lagyu ku Mapangalalu.

¹⁵ E kayu gagawang nanumang kasunduan karing manuknangan king lugal a ita, uling potang sasamba la karing kikilalanan dang dios at babie ain-sakripisyu karela, kumbiran da kayung makiabe karela, at mayan kayung matuksung makisulung mangan king pamangan a yayain da karing kikilalanan dang dios.

¹⁶ E yu la paintulutan makiasawa ding anak yung lalaki karing karelang babai a manamuyut mu karela king pamanyamba karing kikilalanan dang dios, at uli na nita magtaksil la kanaku.

¹⁷ E kayu gagawang dios a bakal ban samban yu la.

¹⁸ Pagselebran ye ing Piesta ning Tinape Alang Lebadura. Antimo ing inutus ku na kekayu, tinape alang lebadura ing kanan yu karing pitung aldo a makatuldu king bulan ning Abib, uling king bulan a ita kanita kayu meko king Ehipto.

¹⁹ Mangaintulid ya kanaku ing balang anak a lalaking pangane at ing balang pangane lalaki karing animal a sese yu,

²⁰ oneng malyari yeng atbusan ing pangane da ring asno king pamiyain yung metung a biserung tupa. Nung e ye buring atbusan, sukat yeng paklian a batal. Kailangan yu la namang atbusan ding sablang anak yung lalaking pangane. E ya sukat lumapit kanaku ing ninuman a alang daralang ain.

²¹ Daptan yu kilub ding anam a aldo ing obra yu; paynawa kayu king kapitung aldo, agyang pang panaun na ning pamaniarul o panaun na ning pamamalut.

²² Pagselebran ye ing Piesta ning Pamamupul, potang pagumpisan yu nang palutan ing mumunang bunga na ning kekayung trigu, at pagselebran ya naman ing Piesta da ring Dalungdung king kapupusan na ning balang banua, potang pupulan yu la ding bunga yung tanaman.

²³ Sukat lang makiarap makatatlu kanaku, kilub ning pabanua ding sablang lalaki ban samba kanaku, ing Ginu, ing Dios ning Israel.

²⁴ Potang ikua ku na lang atabi ding taung darasan yu, at ikua yu neng aparagul ing bansa yu, ala nang mangangas pang salake king bansa yu king panaun da reting atlung pamagselebra.

²⁵ E kayu mamain tinape a ating lebadura neng miyayain kayung animal kanaku. E ye paburen miras mikabukasan ing isanu pa mang dake na ning animal a miyain king Piesta ning Pamaglagpus.

²⁶ Idala yu la balang banua king bale ning Ginu ing mumunang bunga na ning pupul yu. E ye lulutu ing biserung tupa o kambing king gatas ning gaindu na.

²⁷ Ngana pa ning Ginu kang Moises, Isulat mu la deting amanu king metung a kasulatan, uling kareting amanu ya makabasi ing kasunduan a tatatag ku king kayabe mu at ning Israel.

²⁸ Menatili ya karin i Moises a kayabe ning Ginu kilub ding apat apulung aldo at apat apulung bengi; e ya bitasang mengan at minum. Sinulat na la karing tinabas a batu ding amanu na ning kasunduan, ding Apulung Utus.

²⁹ Kinuldas ya king Bunduk ning Sinai i Moises; darala na la ding aduang tinabas a batu nung nu la makasulat ding kautusan. Meging maslag ya ing lupa na uli na ning pamakipagsalita na king Ginu; oneng e na balu iti.

³⁰ Inyang akit de ri Aaron at ding sablang tau, ikit da king maslag ya ing lupa na at e re buring lapitan uling tatakut la.

³¹ Oneng inaus na lang lumapit Moises, inya linapit ya i Aaron at ding sablang makatuang manimuna na ning balen at mekipagsalita ya karela i Moises.

³² Kaybat na nita, linapit lang migpadurut kang Moises ding sablang memalen na ning Israel, at sinabi na la ngang Moises karela ding sablang kautusan a binie na ning Ginu keta king Bunduk ning Sinai.

³³ Inyang meyari neng mekipagsalita karela, tikpan neng belu ing lupa na.

³⁴ Lalako neng Moises iting belu neng lulub ya king Toldang tuknangan ning Ginu ban makipagsalita king Ginu. King paglual na ibat king Tolda, sabian na karing memalen na ning Israel ing sablang pasabi na ning Ginu karela.

³⁵ Akit da kanita ding tau king maslag ya ing lupa nang Moises, inya pasibayu neng takpan king belu ing lupa na. E ne lalako iti anggang e ya pasibayung lungub king Tolda ban makipagsalita king Ginu.

35

¹ Inaus na lang mitipun Moises ding memalen na ning Israel. Kaybat, nganang migsalita, Ila deti ring miyayaliwang bage a inutus na ning Ginu ban daptan yu:

² Atin kayung anam a aldo ban daptan yu ing obra yu, pero sukat yang maging sagradung aldo ing kapitung aldo; metung yang aldo na ning pamagpaynawa a makatalaga para kanaku, ing Ginu. Paten ya ing ninumang magobra king Aldo ning Sabbath.

³ Agyang patau mung api kilub ding bale yu, e yu daraptan king Aldo ning Sabbath.

⁴ Nganang Moises karing sablang memalen na ning Israel, Oyni ing inutus na ning Ginu:

⁵ Munie kayung ain para king Ginu. Ing ninumang matulang tupad kaniti sukat yang magdalang ain a gintu, pilak o kaya tangsu;

⁶ linen a mapinu; lanang asul, muradu o kaya malutu; telang megawa king bulbul ning kambing,

⁷ balat lalaking tupa a kiltian malutu; balat a mangasanting; dutung a akasia;

⁸ laru para karing sulu; miyayaliwang paniangkap para king larung paglania at mabanglung insenso;

⁹ batung onyx at aliwa pang alahas a itampuk king efod at king takap-salu.

¹⁰ Ngana pang Moises, Kailangan lang datang magobra ding sablang mangagaling a pangamat kekayu at gawan da ing sablang bage a inutus nang magawa ning Ginu:

¹¹ ing Tolda, ing peka bubungan na at ding tabing na, ding sabitan na, ding dalig, ding barakilan na, ding asias, at ding sulpakan;

¹² ing Kaban ning Kasunduan at ding tambayuk na, ing Luklukan ning Lunus, at ing tabing na;

¹³ ing lamesa at bitis na ampon ding sablang kasangkapan, at ing piririnan tinape iyain king Dios;

¹⁴ ding sulu at pitumpakan ampon ding kasangkapan na't laru;

¹⁵ ing altar a pidurulukan insenso at ding tambayuk na; ing larung paglania; ing mabanglung insenso; ing tabing king pasbul ning Tolda;

¹⁶ ing altar a pidurulukan karing ain a kayabe ning sala-salang tangsu, ding tambayuk na at ding sabla nang kasangkapan; ing palangganang pipanuasan at ing talpakan na;

¹⁷ ding tabing para king patyu, ding asias, at ding sulpakan da reting asias; ing tabing para king pasbul a palub king patyu;

¹⁸ ding tulus na ning Tolda, at ding lubid para king Tolda ampon king patyu;

¹⁹ ding burdadung imalan a isulud da ring pari potang susuyu la kilub ning Banal a Lugal, ding imalan a sagradu para kang Aaron a pari at karing anak nang lalaki.

²⁰ Likuan de i Moises at minuli la ngan ding sablang memalen na ning Israel,

²¹ at ing balang metung a metagkil a pusu migdala yang ain king Ginu para king pangagawa na ning Toldang tuknangan ning Ginu. Dela ra ing sablang kailangan para king pamanyamba at para king pamangawa karing imalan a isulud da ring pari.

²² Dinatang la ngan ding lalaki at babai a matulang babie. Atin nang magdalang pendiente, tingga, singsing, pulseras, kwintas, at miyayaliwang uring alahas a gintu, at telaga da la ngan king Ginu.

²³ Minie no man detang ating telang mapinung linen, lanang asul, muradu, at malutu; telang megawa king bulbul ning kambing; balat lalaking tupa a kiltian malutu o mangapinung balat animal.

²⁴ Dela da naman ding ating pilak o tangsu ing karelang ain para king Ginu, at binie da naman detang sablang ating tablang akasia a malyaring magamit king nanu pa mang obrang mangailangan tabla.

²⁵ Ding sablang babaing maki gelingan a pangamat king pamanabal imalan, minie lang sinulad a linen at sinulad a lanang asul, muradu ampon malutu a ila mismu ding minabal.

²⁶ Ginawa la namang sinulad king bulbul ning kambing.

²⁷ Minie no mang batung onyx ding makatuang manimuna at miyayaliwang iyas a itampuk king efod at king takap-salu.

²⁸ Migdala la namang miyayaliwang paniangkap at laru para karing sulu, larung paglania, at para king mabanglung insenso.

²⁹ Inatad da ring sablang memalen na ning Israel a maki pusung maganaka ing babie da king Ginu para king obrang pagawa na kang Moises.

³⁰ Nganang Moises karing Israelita, Pinili ne ning Ginu i Besalel a anak nang Uri at apu nang Hur ning tribu nang Juda.

³¹ Kitmuan ne king espiritu na at dininan neng gelingan, kagiwan, at beluan tungkul king nanumang uring obrang ating arti,

³² para king pamangulis miyayaliwang disenyu, at pamagobra king gintu, pilak ampon tangsu;

³³ para king pamanabas karing batung sukat itampuk, para king pamandukit dutung, at para king miyayaliwa pang obrang ating arti.

³⁴ Binie na naman ning Ginu kang Besalel at kang Oholiab a anak nang Ahisamac ning tribu nang Dan ing ituru ing gelingan da karing aliwa.

³⁵ Dininan na lang gelingan a pangamat king pamagdibuhung bakal, king pamanabal linen a mapinu, pamamurda king lanang asul, muradu ampon malutu, at aliwa pang uring tela. Agyu ra ngan gawan ing miyayaliwang obra at magaling la ngan king pamagdisenyu.

36

¹ I Besalel, i Oholiab, at ding sablang mangagaling a pangamat a dininan nang gelingan at beluan ning Ginu, ila ring gawa king sagradung Tolda at king sabla, agpang king inutus na ning Ginu.

² Inaus ne kanitang Moises i Besalel, i Oholiab, at ding sablang mangagaling a pangamat king obra a dininan nang gelingan ning Ginu at maki pusung malam bisang sumaup; sinabi nang Moises karela king magumpisa na lang magobra.

³ Tinggap da ngan kang Moises ing sablang ambag a inatad da ring Israelita para king pangagawa na ning sagradung Tolda. Sindu ra ding memalen na ning Israel ing magdalang ambag kang Moises balang abak.

⁴ Inya likuan da ring mangagaling a pangamat ing obra da at minta la kang Moises.

⁵ Ngara kang Moises, Labis-labis na ing materialis a darala da ring tau para king obrang paobra na ning Ginu kekami.

⁶ Inya pepalual yang kautusan i Moises king kabilugan a kampu king tuknang na lang babie ambag para king sagradung Tolda. Inya tinuknang lang magdalang nanumang materialis.

⁷ Labis-labis na kesa king kailangan itang ayatad da.

⁸ Ding pekamayap a pangamat karing magobra ila ring ginawa king Toldang tuknangan ning Ginu. Ing ginamit da kaniti apulung piliegong linen a mapinu kaimalanan, lanang asul, muradu ampon malutu kule, at birdahan mapinu karing larawan da ring kerubin.

⁹ Paraparehu sukad ing apulung piliego, labing apat a yarda king kaba at aduang yarda king lapad.

¹⁰ Pisanib-sanib da ing lima kareti at makanyan munaman ing depatan da karing aliwang limang piliego.

¹¹ Mikabit lang telasingsing a gewa king imalan a asul king gilid ning makalual a dake ning balang kapisanib.

¹² Lima lang pulung telasingsing ding kebit da king mumunang piliego na ning mumunang kapisanib, at perisanan da la reti king wakas nang piliego ning kaduang kapisanib.

¹³ Ginawa lang limang pulung sabitan a gintu at ila deti ring ginamit da para pituglungan lang anting metung ding aduang kapisanib.

¹⁴ Kaybat na nita, ginawa lang peka bubungan na ning Tolda. Ginamit lang labing metung a piliegong tela a gewa king bulbul kambing.

¹⁵ Metung la mu sukad ding labing metung a piliego, labing limang yarda ya king kaba, at aduang yarda ya king lapad.

¹⁶ Pisanib-sanib da lang anting metung ding limang piliego, at ding mitagan a anam pisanib-sanib da la naman anting metung.

¹⁷ Mikabit lang limang pulung telasingsing king gilid ning wakas a piliego king metung a kapisanib, at limang pulu munaman king gilid na ning kaduang kapisanib.

¹⁸ Ginawa lang limang pulung sabitan a tangsu ban pituglungan da la ring aduang kapisanib para magawa yang anting metung mung bubungan.

¹⁹ Ginawa lang adua pang panakap, metung a gewa king balat lalaking tupang kiltian malutu, at gewa ya ing metung king balat animal a mapinu. Timpak da la reti king takap a gewa king balat kambing.

²⁰ Ginawa lang pekadingding na ning Tolda king dutung a akasia. Makatalakad lang kebit da reting tabla.

²¹ Labi yang limang talampakan king katas at adua yang pulu't pitung pulgada king lapad ing balang tabla,

²² at dininan deng tiduang mitsa ing balang metung kareting tabla ban apisukung-sukung da la. Atin la ngan kareting mitsa ring tabla.

²³ Ginawa lang aduang pulung tabla para king dane mauli,

²⁴ at apat apulung sulpakan a pilak para kareting tabla; tiduang sulpakan para karing aduang mitsa na ning balang tabla.

²⁵ Ginawa lang aduang pulung tabla para king dane nang norti ning Tolda,

²⁶ at apat apulung sulpakan a pilak; tidua king lalam ning balang metung a tabla.

²⁷ Para king dane gulut ning Tolda, king dane albugan, ginawa lang anam a pirasung tabla,

²⁸ at aduang tabla para karing aduang suluk.

²⁹ Makapisukung la deting tablang paniuluk manibat king lalam angga king babo. Makanyan la pangagawa deting aduang tabla a pekapaniuluk.

³⁰ Inya walu la heganagana ding tabla at labi lang anam ding sulpakan a pilak; tidua king lalam ning balang tabla.

³¹ Ginawa lang labing limang barakilan king dutung a akasia; lima lang barakilan a peka tungi da ring tablang maging dingding king metung nang dane ning Tolda,

³² lima lang barakilan para karing tabla king kangatbang dane at lima lang barakilan para king dane albugan, ing peka gulut na ning Tolda.

³³ Taglus-taglus ya ing libutad a barakilan a makabili king bandang kapitna da ring tabla, ibat king metung nang danggut ning Tolda angga king kasumangid nang danggut.

³⁴ Belutanan da lang gintu ding tabla at mikabit lang telasingsing a gintu kareting tabla para pisuluran karing barakilan a belutanan munamang gintu.

³⁵ Ginawa lang metung a tabing king linen a mapinu a pemaltakan king sinulad a lanang asul, muradu ampon malutu, at birdahan karing larawan da ring kerubin.

³⁶ Ginawa lang apat a asias king dutung a akasia ban pisabitan kaniting tabing; belutanan da lang gintu at kebitanan da lang gintung sabitan. Kaybat na nita, ginawa lang apat a sulpakan a pilak para pisulpakan kareting asias.

³⁷ Para king pasbul na ning Tolda, ginawa lang tabing king linen a mapinu kaimalanan a pemaltakan king sinulad a lanang asul, muradu ampon malutu, at pelamutian dang burda.

³⁸ Ginawa lang limang asias para kaniting tabing a kebitanan dang sabitan, at belutanan da la ngan gintu ding babo ra at tukud at ginawa lang limang sulpakan a tangsu para pisulpakan da kareti.

37

¹ Gewa neng Besalel ing Kaban ning Kasunduan king dutung a akasia; apat yang pulu't limang pulgada king kaba, adua yang pulu't pitung pulgada king lapad, at adua yang pulu't pitung pulgada king katas.

² Binalut ne lual at kilub king gintung puru at dininan neng gintung listun king makapadurut.

³ Ginawa yang apat a telasingsing a gintu para king Kaban, at kebit na la karing apat nang bitis; aduang telasingsing king metung a dane, at aduang telasingsing king kangatbang dane.

⁴ Ginawa yang tambayuk king dutung a akasia, at binalut na lang gintu.

⁵ Pepalub na la reti karing telasingsing karing mingatba nang dane ning Kaban.

⁶ Ginawa ya namang peka takap king gintung puru; apat apulu't limang pulgada ya king kaba, at adua yang pulu't pitung pulgada king lapad.

⁷ Ginawa yang aduang kerubin king pikpuk a gintu;

⁸ kebit ne ing metung kareti king metung nang danggut ning takap, at kebit ne ing kadua king kangatbang danggut. King pangakabit da king takap, sinukung na la angga king meging metung na la mu ning takap.

⁹ Miyarap la reting kerubin at makaladlad la ding pakpak da; tatakpan de ing Luklukan ning Lunus.

¹⁰ Gewa neng Besalel king dutung a akasia ing lamesa; atlu yang pulu't anam a pulgada king kaba, labi yang walung pulgada king lapad, at adua yang pulu't pitung pulgada king katas.

¹¹ Binalut ne king gintung puru at dininan listun a gintu king makapadurut.

¹² Dininan neng sanepa; atlung pulgada ya king lapad at pelamutian neng makapadurut king listun a gintu.

¹³ Ginawa yang apat a telasingsing a gintu bilang peka bitbitan na at kebit na la deti karing apat nang suluk king tulid da ring apat nang bitis.

¹⁴ Malapit la deting telasingsing king sanepa at ila ding pisuluranan karing tambayuk a pamitbit king lamesa.

¹⁵ Gewa na la ding tambayuk a pamitbit king lamesa king dutung a akasia at binalut na lang gintu.

¹⁶ Gewa na la ding kasangkapan a katernu ning lamesa king gintung puru: ding pinggan, ding kopa, ding banga, at ding silyo a magamit para king alak a miyain.

¹⁷ Gewa ne ing tumpakan-sulu king purung gintu. Megawa ya ing talpakan na at ing sanga king pikpuk a gintu; makatuglung la kaniti ding palamuting sampaga at ding buku at talulut bilang metung mung pirasu.

¹⁸ Anam la ding mingatbang sanga; titlu king balang dane.

¹⁹ Ing balang metung kareting sanga atin yang atlung sampaga a kayubug sampagang almendro a maki buku at talulut.

²⁰ Atin ya namang apat a sampagang kayubug sampagang almendro ing sanga na ning tumpakan-sulu, at maki buku ampon talulut.

²¹ Ating metung a buku king lalam ning balang kaparis a sangang lalsut karing mingatba nang dane.

²² Ding buku, ding sanga, at ding tangke na ning tumpakan-sulu metung yang piesang pikpuk a gintung puru.

²³ Ginawa yang pitung sulu para king tumpakan-sulu at pamatdang sulu at pisaluran a pawang gintung puru.

²⁴ Ginamit yang pitung pulu't limang librang gintu para king pangagawa na ning kabilugan a tumpakan-sulu at ding sablang kasangkapan na.

²⁵ Ginawa yang altar king dutung a akasia para pidulukan insenso. Kuadradu ya; labi yang walung pulgada king kaba, at labi yang walung pulgada king lapad, at atlu yang pulu't anam a pulgada king katas. Metung lang piesa ding balamu sagu king balang suluk na ning lamesa.

²⁶ Belutanan neng gintu ing babo na ning lamesa, ding apat nang sagu at ding gilid na, at saka ne pelamutian makapadurut king listun a gintu.

²⁷ Mikabit yang tiduang telasingsing a gintu para karing mingatba nang dane lalam na ning listun ban pisuluran karing tambayuk a gamitan neng bibitbitan ya.

²⁸ Gewa na la deting tambayuk king dutung a akasia at binalut na lang gintu.

²⁹ Ya naman ing ginawa king sagradung laru a paglania, at king mabanglung insenso a alang samut a singkapan antimo ing daraptan da reng mangawang pabanglu.

38

¹ Ginawa yang altar king dutung a akasia para king pidurulukan ain. Kuadradu ya; pitu ya't kapitnang talampakan king kaba, at pitu ya't kapitnang talampakan king lapad, at apat ya't kapitnang talampakan king katas.

² Gewa na la ding sagu na king babo ning balang metung karing apat a suluk; makatuglung la king altar. Binalut na la ngan king tangsu.

³ Gewa na la naman ding sablang kasangkapan a magamit king altar: ding piririnan abu, ding pala, ding palangganang gamitan para king pamamisik, ding tinedor, at ding pipatawan api. Tangsu ing ginamit na para kareting sablang kasangkapan.

⁴ Ginawa ya namang sala-salang bakal a tangsu, at binili ne king lalam na ning gilid ning altar; miraras ya bandang kapitna ning katas ning altar.

⁵ Miyubug yang apat a telasingsing at kebit na la karing apat a suluk para pisuluran karing tambayuk.

⁶ Gewa na la ding tambayuk king dutung a akasia; binalut na lang tangsu.

⁷ Pepalub na la reti karing telasingsing karing mingatba nang gilid ning altar. Kalubkuban ya ing altar at tabla la ding peka dalig na.

⁸ Gewa nia naman ing palangganang tangsu at ing talpakan nang tangsu. Ing ginamit na kareti ila ding salamin da ring babaing susuyu king pasbul ning Toldang tuknangan ning Ginu.

⁹ Ginawa yang tabing king linen a mapinu para king patyu ning Toldang tuknangan ning Ginu. Lima lang pulung yarda king kaba ding tabing king dane mauli.

¹⁰ Sasapnuan da la ring aduang pulung asias a tangsu a makasulpak karing aduang pulung talpakan a tangsu munaman. Pilak la ding sabitan ampon ding baras.

¹¹ Makanyan ya naman ing patyu king dane norti.

¹² Adua lang pulu't limang yarda king kaba ding tabing king dane albugan; atin lang apulung asias at apulung sulpakan ampon sabitan at baras a pilak.

¹³ Adua ya namang pulu't limang yarda king lapad ing king dane aslagan nung nu ya karin ing pasbul palub king patyu.

¹⁴ Karing mingatba nang dane ning pasbul, pitu la't kapitnang yarda king kaba ding tabing; atin lang titlung asias at titlung sulpakan.

¹⁵

¹⁶ Pawa la ngan linen a mapinu ding sablang tabing a megamit makapadurut king patyu.

¹⁷ Megawa la king tangsu ding talpakan a pisulpakan karing asias at ding sabitan, ding baras, at megawa ya king pilak ing takap babo da ring asias. Pawa la ngan makataid karing baras a pilak ding sablang asias a makapadurut king patyu.

¹⁸ Megawa ya ing tabing para king pasbul ning patyu king linen a mapinu kaimalanan a pemaltakan king sinulad a lanang asul, muradu, at malutu a mipalamutian king burda. Apulu yang yarda king kaba, at adua ya't kapitnang yarda king katas, kalupa da ring tabing a makapadurut king patyu.

¹⁹ Makasabit ya karing apat a asias a makasulpak karing apat a talpakan a tangsu. Pilak la ngan ding sabitan da at ding takap da babo ampon ding baras da.

²⁰ Megawa la ngan king tangsu ding sablang tulus para king Tolda at ding para king peka bakud na ning patyu.

²¹ Oyni ing listahan na ning bakal a megamit king Toldang tuknangan ning Ginu, ing lugal nung nu la makasinup ding aduang tinabas a batung kasusulatan da ring Apulung Utus. Pepagawa neng Moises iting listahan karing Levita lalam nang pamanibalang Itamar a anak nang lalaking Aaron a pari.

²² I Besalel a anak nang Uri at apu nang Hur ning tribu nang Juda, gewa na ngan ing sablang inutus na ning Ginu.

²³ Ing keyaduangan na king obra, i Oholiab a anak nang Ahisamac ning tribu nang Dan, metung yang mandukit, talagulis ya, at talapanabal king linen a mapinu at king lanang asul, muradu at malutu.

²⁴ Ing sablang gintung mitalaga king Ginu para king banal a Tolda titimbang aduang libu dinalan at siam apulu't limang libra, agpang king timbangan na ning santuaryu.

²⁵ Ing pilak a melikum kanitang gewa re ing sensus na ning balen titimbang pitung libu limang dalan at limang pulung libra, agpang king timbangan na ning santuaryu.

²⁶ Katumbas na niting kantidad ing kabilugan a binayad da ring sablang mitala king sensus; binie na ning metung at metung ing karapatdapat a alaga a metimbang, agpang king timbangan na ning santuaryu. Anam a ralan at atlung libu limang dalan at limang pulu kataung maki idad nang aduang pulung banua o maygit pa ding miyabe king listahan na ning sensus.

²⁷ Pitung libu at limang dalan a libra ing pilak a megamit para karing dinalan a sulpakan na ning Tolda at para karing tabing, tia pitung pulu't limang libra balang metung a sulpakan.

²⁸ Gewa na lang Besalel ding sabitan, ding baras, at ding takap da babo ring asias king mitagan a limang pulung librang pilak.

²⁹ Minabut limang libu atlung dalan at apulung libra ing tangsu a mitalaga king Ginu.

³⁰ Kaniti na la gewa ding sulpakan para king pasbul na at arap ning Toldang tuknangan ning Ginu, ing altar a tangsu, at ing sala-salang bakal a tangsu, ding sablang kasangkapan na ning altar,

³¹ ding sulpakan para king peka bakud ning patyu, ing pasbul ning patyu, ding sablang tulus a megamit king Tolda, at king patyu.

39

¹ Gewa ra king lanang asul, muradu, at malutu ing mangasanting a imalan a isulud da ring pari king pamaniuyu ra kilub ning Banal a Lugal. Gewa ra ing imalan pari para kang Aaron, agpang king inutus na ning Ginu kang Moises.

² Gewa re ing efod king linen a mapinu, king lanang asul, muradu ampon malutu, at king sinulad a gintu.

³ Pikpuk dang maimpis a maimpis ing dase-dase a gintu, at tinabas dang mangakitid, at iti ing linala da karing telang linen a mapinu at king lanang asul, muradu, at malutu.

⁴ Ginawa la namang aduang tiranti karing pago para king efod, at tiglung da la reti karing adua nang danggut ban mitali ya.

⁵ Tiglung de ing birdahan a paha king efod. At kalupa ne pangagawa niti: gewa ya naman king sinulad a gintu, king linen a mapinu at king lanang asul, muradu, at malutu, agpang king inutus na ning Ginu kang Moises.

⁶ Tinabas lang batung onyx at timpuk da la king engasteng gintu; dinukit da lang mapinu pangadukit ding lagyu da ring labing aduang anak nang lalaking Jacob.

⁷ Kebit da la reting batu karing tiranti nang pamago ning efod bilang metung a kapigaganakan karing labing aduang tribu ning Israel, agpang king inutus na ning Ginu kang Moises.

⁸ Birdahan yang mapinu ing takap-salu; kalupa ne panga-obra at materialis ning efod.

⁹ Kuadradu ya tabas at atin yang aporo; siam yang pulgada king lapad at siam yang pulgada king kaba.

¹⁰ Inengastian deng apat a kahilerang mangamal a batu. King mumunang hilera, inengastian deng metung a rubi, metung a topasyo, at metung a garnet;

¹¹ king kaduang hilera, inengastian deng metung a esmeralda, metung a safiro, at metung a diamante;

¹² king katlung hilera, inengastian deng metung a turquoise, metung a agata, at metung a ametista.

¹³ King kapat a hilera, inengastian deng metung a berilo, metung a onyx, at metung a haspe. Mitampuk la ngan deti king engasteng gintu.

¹⁴ Makadukit ya king balang metung kareting batu ing lagyu na ning metung karing labing aduang anak nang lalaking Jacob.

¹⁵ Ginawa lang aduang kwintas king gintung puru, inikat lang anting lubid para king takap-salu.

¹⁶ Ginawa la namang aduang kalupkup a balamu sampagang rosas, at kebit da la ring aduang telasingsing a gintu karing adua nang suluk babo ning takap-salu

¹⁷ at tinali da la ring aduang linubid a kwintas a gintu karing aduang telasingsing.

¹⁸ Tinaid da la ring adua rang aliwang danggut ding linubid a kwintas karing aduang kalupkup a balamu sampagang rosas, at makanyan da lang tinaid king arap da ring aduang tiranting pamago na ning efod.

¹⁹ Ginawa lang adua pang telasingsing a gintu, at tinaid da la karing adua nang suluk lalam ning takap-salu, king gilid a makalub malapit king efod.

²⁰ Ginawa la pang aduang telasingsing a gintu at kebit da la reti king banda nang lalam ning arap da ring adua nang tiranti ning efod, malapit king pisaniban at makatas bagya king birdahan a pahang makatuglung king efod.

²¹ Agpang king inutus na ning Ginu kang Moises, tinali da la ring telasingsing ning takap-salu karing telasingsing ning efod king metung a lasung kule asul ban magbili ya ing takap-salu king gilid na babo ning paha at ban e ya lugaluganggang king efod.

²² Gewa reng kabilugan ing balabal ning efod king lanang asul.

²³ Atin yang bitas king talab ban midalan ya ing buntuk at atin yang tutup ban e ya mabitas.

²⁴ Makapadurut king laylayan na lalam mibili lang balamu bungang tanaman ning granada; gewa king linen a mapinu at king lanang asul, muradu, at malutu; kabangkilas da la ring kampaniliang mangalati a megawa king gintung puru, agpang king inutus na ning Ginu kang Moises.

²⁵

²⁶

²⁷ Gewa da la reti para kang Aaron at karing anak nang lalaki.

²⁸ Ginawa la namang turban, kupia, salol a linen,

²⁹ at paha king linen a mapinu, at king lanang asul, muradu, at malutu. Pelamutian da la king mangasanting a burda, agpang king inutus na ning Ginu kang Moises.

³⁰ Gewa dia naman ing palamuti na ning banal a korona king gintung puru, ing sagradung palatandanan na ning pangatalaga, at dinukit da ing anti kaniti: Makatalaga king Ginu.

³¹ Tinali re iti king arap ning turban king kapamilatan ning metung a lasung kule asul, agpang king inutus na ning Ginu kang Moises.

³² Makanyan meyari ing sablang obra king Toldang tuknangan ning Ginu. Gewa ra ngan ding Israelita ing sablang sukat magawa, agpang king inutus na ning Ginu kang Moises.

³³ Pepakit da ngan kang Moises ing sablang meyari: ing Tolda at ding sabla nang kasangkapan, ding sabitan na, ding tablang peka dingding, ding barakilan, ding asias, at ding sulpakan,

³⁴ ding takap a peka bubungan a gewa king balat lalaking tupa at kiltian malutu; ing takap a gewa king balat a mapinu; ing tabing a pamampan;

³⁵ ing Kaban ning Kasunduan nung nu la makadatuk ding tinabas a batu, ding tambayuk na at ing takap na;

³⁶ ing lamesa at ding sablang kasangkapan na, at ing tinape a miyain king Dios;

³⁷ ing pitumpakan-sulu a gewa king gintung puru, ding sulu na, ing sabla nang kasangkapan, at ing laru para karing sulu;

³⁸ ing altar a gintu; ing larung paglania; ing mabanglung insenso; ing tabing king pasbul a palub king Tolda;

³⁹ ing altar a tangsu, at ing tangsu nang sala-salang bakal, ding tambayuk na, at sabla nang kasangkapan; ing palangganang pipanuasan at ing talpakan na;

⁴⁰ ding tabing para king peka bakud na ning patyu, at ding asias na at sulpakan; ing tabing king arap ning patyu, at ding lubid na; ding tulus ning Tolda; ing sablang gagamitan kilub ning Tolda;

⁴¹ ing mangasanting a imalan a isulud da ring pari king pamaniuyu da kilub ning Banal a Lugal, ding sagradung imalan para kang Aaron a pari at para karing anak nang lalaki.

⁴² Depatan da ngan ding Israelita ing sablang obra, agpang king inutus na ning Ginu kang Moises.

⁴³ Siniasat na ngan Moises at ikit na king gewa ra ngan, agpang king inutus na ning Ginu. At binendisyunan na lang Moises.

40

¹ Ngana ning Ginu kang Moises,

² Italakad mu ne king mumunang aldo ning mumunang bulan ing Toldang tuknangan ning Ginu.

³ Ibili me kilub na ing Kaban ning Kasunduan a datukanan karing Apulung Utus at pampanan me king tabing.

⁴ Ilub me ing lamesa at kaybat ibili mu la babo na ding kasangkapan na. Ilub mia naman karin ing pitutumpakan-sulu at saka mu la ibili ding sulu ra.

⁵ Ibili me ing altar a gintu para king pamanduluk insenso king arap ning Kaban ning Kasunduan at isabit me ing tabing king pasbul ning Tolda.

⁶ Ibili me king arap ning Tolda ing altar a pidurulukan ain.

⁷ Ibili mu ne man ing palangganang pipanuasan pilatan ning Tolda ila ning altar at saka me katmuan danum.

⁸ Italakad me ing peka bakud na ning patyu at isabit mu ne ing tabing king pasbul at king arap ning patyu.

⁹ Kaybat na nita, italaga mu ne ing Tolda at ing sablang kasangkapan na. Kuskusan me king larung paglania at maging sagradu ya.

¹⁰ Tutuki kanita, italaga me ing altar ning pidurulukan at ing sablang kasangkapan na; kuskusan me king larung paglania at maging lubus yang sagradu.

¹¹ King anti kaniting paralan mia naman italaga ing palangganang pipanuasan at ing talpakan na.

¹² Ituki me i Aaron at ding anak nang lalaki king pasbul ning Tolda at papandiluan mu la karin, agpang king aduan na ning seremonia ning pamaglinis.

¹³ Kaybat, piblasan me i Aaron karing imalan para pari; lanian me at king anti kanitang paralan italaga me ban asuyuan na ku bilang pari.

¹⁴ Ituki mu la naman ding anak nang lalaki at pasuluran mu la karing kamisa.

¹⁵ Kaybat, lanian mu la naman, antimo ing depatan mu kang tata ra ban asuyuan da ku bilang pari. Iting pamaglania ya ing makapalyari king pangapari ra angga king kapilan pa man.

¹⁶ Tiparan na ngan Moises ing sablang inutus na ning Ginu.

¹⁷ Inya king mumuna nang aldo ning mumunang bulan ning kaduang banua manibat king pangalako ra Ehipto, mitalakad ya ing Toldang tuknangan ning Ginu.

¹⁸ Binili na lang Moises ding sulpakan na; telakad na la ding dalig na; kebit na la ding barakilan at telakad na la ding asias.

¹⁹ Lidlad ne ing takap a peka bubungan na ning Tolda at saka ne timpak kaniti ing takap nang pambabo, agpang king inutus na ning Ginu.

²⁰ Kaybat na nita, kinua na la ding aduang tinabas a batu at binili na la kilub ning Kaban ning Kasunduan. Kebit na la ding tambayuk karing telasingsing na ning Kaban at saka ne binili babo na ing takap.

²¹ Kaybat, dela ne ing Kaban ning Kasunduan kilub ning Tolda at saka na pepasabit ing tabing a pamampan. Makanyan neng pimpanan ing Kaban ning Kasunduan, agpang king inutus na ning Ginu.

²² Linub ne king Tolda ing lamesa, king dane norti, lual na ning tabing,

²³ at saka ne binili babo na niti ing tinape a miyain king Ginu, agpang king inutus na ning Ginu.

²⁴ Linub nia naman ing pitutumpakan-sulu king dane mauli, tulid ning lamesa.

²⁵ Karin, king arapan ning Ginu sinindian na la ding sulu, agpang king inutus na ning Ginu.

²⁶ Linub ne king Tolda ing altar a gintu, king arap ning tabing,

²⁷ at saka ya dinuluk mabanglung insenso, agpang king inutus na ning Ginu.

²⁸ Sinabit ne ing tabing king pasbul ning Tolda,

²⁹ at karin king arap ning tabing binili ne ing altar a pidurulukan ain. Inain na king babo ning altar ing ain-a-durulukan, at ing ain-a-kakanan, agpang king inutus na ning Ginu.

³⁰ Binili ne ing palangganang pipanuasan pilatan ning Tolda ila ning altar at saka ne kitmuan danum.

³¹ Karin ya manos gamat at bitis i Moises, i Aaron, at ding anak nang lalaking Aaron

³² neng lulub la king Tolda o neng lalapit la king altar, agpang king inutus na ning Ginu kang Moises.

³³ Telakad nia naman Moises ing peka bakud a makapadurut king Tolda at king altar, at kebit ne ing tabing king pasbul na at arap ning patyu. Makanyan na ngang inari ing sablang sukat maobra.

³⁴ Kaybat na nita, tikpan ne ning biga ing Tolda at mikatmuan ya king makasilo nang aslag ning panga-atyu na ning Ginu.

³⁵ Inya e ya makalub i Moises king Tolda.

³⁶ Pota mung mitas ya ing bigang ita kanita ra mu daraptan ding Israelita ing pamiyalis da king kampu ra at pamitaglus da king pamaglakbe ra.

³⁷ E re yayalis ing karelang kampu kabang atyu ya karin ing biga.

³⁸ Akakit da, king kekaban ning pamaglakbe ra, ing pamanantabe ning Ginu karela king kapamilatan na ning bigang magdatun babo ning Tolda neng aldo, at ning aping masala babo na neng bengi. fig,,,, ,Kaybat na nita, tikpan ne ning biga ing Tolda at mikatmuan ya king makasilo nang aslag ning panga-atyu na ning Ginu.,(40:34)fig*.