1

¹ Embo ndika olyo ehokololo lyiiningwanima mbyoka Jesus Kristus e yi holola. Kalunga okwe mu pe ehololo ndika e li hololele aapiya yaKalunga shoka shi na okuningwa mbala. Kristus okwa tseyithile omupiya gwe Johannes iinima mbika, sho a tumu omuyengeli gwe kuye,

² Johannes nokwa hokolola ashihe shoka e shi mono. Ndika olyo ehokololo tali hokolola elaka lya za kuKalunga noshili ndjoka Jesus Kristus e yi holola.

³ Omunelago oongoka ta lesha embo ndika; eeno, aanelago oomboka taa pulakene oohapu dhomahunganeko gomembo ndika e taa vulika kushoka sha nyolelwa mo. Oshoka ethimbo olya thikana, uuna iinima mbika ayihe yi na oku ka gwanithwa.

⁴ Johannes ota kundu omagongalo gaheyali gomuAsia: Esilohenda nombili ya za kuKalunga, ngoka a li ko noku li ko note ya, nokoombepo heyali ndhoka dhi li poshipangelapundi she,

⁵ nokuJesus Kristus, omuhokololi omudhiginini, omutango mokuyumudhwa kuusi nomupangeli gwaakwaniilwa yokombanda yevi. Jesus oku tu hole nokwe tu mangulula mo moondjo dhetu omolweso lye,

⁶ e te tu ningi ombala yaayambi yokulongela Kalunga He. Jesus Kristus na simanekwe ye na pangele aluhe sigo aluhe! Amen.

⁷ Tala, oye te ya te ende miikogo yokegulu! Kehe gumwe oku na oku mu mona, naambaka ye mu ulula noomboha. Aantu ayehe yokombanda yevi otaa ka lila, sho taye mu mono. Eeno shili! Amen.

⁸ “Ongame Alfa naOmega,” Omuwa Kalunga, Omunankondoadhihe osho ta ti, oongoka e li ko nokwa li ko note ya.

⁹ Ongame Johannes omumwanyoko, nomokulandula Jesus, onda faathana nane mokuhumbata neidhidhimiko omahepeko ngoka tage ya kumboka yomOshilongo she. Onda tulwa kontuntu yaPatmos molwaasho ndu uvitha oohapu dhaKalunga nonda hokolola Jesus.

¹⁰ Mesiku lyOmuwa onda kwatwa kOmbepo nondu uvu ewi enene lya fa lyenkuma tali popi konima yandje

¹¹ tali ti: “Ayihe mbyoka to yi mono, yi nyolela membo e to li tumine komagongalo ngaka gaheyali: Efeso, Smirna, Pergamo, Tiatira, Sarde, Filadelfia naLaodikea.”

¹² Nena ongame onda pungulukile lwaanima, ndi tale ngoka ta popitha ndje nonda mono ko iihukikwanyeka iheyali yoshingoli.

¹³ Mokati kiihukikwanyeka mbyoka onda mono mo gumwe a fa Omuna gwOmuntu, a zala onguwo onde ya tsa koompadhi, nokwi imanga epaya lyoshingoli pontulo.

¹⁴ Omafufu gokomutse gwe omatokele ga fa goonzi nenge ngaashi omahegele gomongwa, omeho ge oga li ga fa oohandje dhomulilo.

¹⁵ Oompadhi dhe odha adhima dha fa osheela oshikushu sha hanyekwa nosha yelithwa meziko, newi lye olya fa epopomo lyomeya omanene.

¹⁶ Oye oku na oonyothi heyali moshikaha she shokolulyo, nomokana ke omwa zi egongamwele lyoongenge mbali lya tsa. Oshipala she osha adhima ngaashi etango lyopokati komutenya.

¹⁷ Sho nde mu mono, ondi ihata pevi nda fa nda sa. Nena oye okwa tenteke ndje oshikaha she shokolulyo e ta ti: “Ino tila! Ongame omutango nomuhugunini.

¹⁸ Onda li nda sa, ihe ngashingeyi ondi na omwenyo. Tala, otandi kala ndi na omwenyo sigo aluhe. Ondi na oonkondo okupangela eso noshaasi.

¹⁹ Nyola ano iinima mbyoka u yi wete ngashingeyi naambyoka tayi ka ningwa komeho.

²⁰ Efatululo lyoshiholekwa shoonyothi heyali ndhoka u dhi wete moshikaha shandje nolyiihukikwanyeka iheyali yoshingoli olyo ndika: oonyothi heyali odho aayengeli yomagongalo ngoka gaheyali, niihukikwanyeka iheyali oyo omagongalo gaheyali.”

2

¹ “Nyolela omuyengeli gwegongalo lyomuEfeso, u tye: “ ‘Ngoka e na oonyothi heyali moshikaha she shokolulyo note ende pokati kiihukikwanyeka iheyali yoshingoli, ota ti:

² “ ‘Iilonga yoye ondi yi shi; onda tseya, nkene wa longo nuudhiginini nowa kala nokwiidhidhimika. Onda tseya kutya iho mwenene aakolokoshi naamboka haa iti aayapostoli; owe ya konakona nowe ya dhimbulula kutya oyo aafundja.

³ Owa kala momaudhigu omolwandje, ihe owi idhidhimike noino vulwa.

⁴ Ihe natango ondi na oohapu nangoye: sho waa hole ndje we ngaashi wa li petameko.

⁵ Dhimbulukwa ano okushuna kwoye monima mpoka ku thike. Itedhulula, u longe ngaashi wa li petameko. Ihe ngele ito itedhulula, otandi ke ya kungoye e tandi kutha po oshihukikwanyeka shoye pehala lyasho.

⁶ Eeno, ou na po ngaa uuwanawa washa, sho ho tondo iilonga yAaniikolaiti ngaashi nangame wo osho ndi li.

⁷ “ ‘Ngoka e na omakutsi, nu uve ko shoka Ombepo te shi lombwele omagongalo! “ ‘Aasindani otandi ke ya pitika okulya iiyimati yokomuti gwomwenyo gwa kala mOshikunino shaKalunga.’ ”

⁸ “Nyolela omuyengeli gwegongalo lyomuSmirna, u tye: “ ‘Omutango nomuhugunini, ngoka a li a sa, ihe ngashingeyi oku na omwenyo, ota ti:

⁹ “ ‘Uudhigu woye ondi u shi; onda tseya oluhepo lwoye — ihe ongoye omuyamba. Onda tseya, nkene ho popilwa muuwinayi kwaamboka haa iti Aajuda, ihe hayo; paushili oyo aantu yaSatana.

¹⁰ Ino tila omahepeko ngoka tage ku adha. Kotoka! Omuhindadhi ote ke mu makela nokutulitha yamwe yomune mondholongo, ihe uudhigu mbuka otau ka kala owala omasiku omulongo. Idhidhimika ano sigo okusa, ongame otandi ku pe oshishani shomwenyo.

¹¹ “ ‘Ngoka e na omakutsi, nu uve ko shoka Ombepo te shi lombwele omagongalo. “ ‘Aasindani itaa ke ehamekwa keso etiyali.’ ”

¹² “Nyolela omuyengeli gwegongalo lyomuPergamo, u tye: “ ‘Ngoka e na egongamwele lyoongenge mbali lya tsa, ota ti:

¹³ “ ‘Onda tseya mpoka wa kala kutya opu na omutumba gwaSatana. Ngoye owa dhama ndje noino etha okwiinekela ndje nopethimbo ndyoka Antipas, omutumwa gwandje omwiinekelwa, a dhipagelwa pehala opo tuu mpoka pwa kala Satana.

¹⁴ Ihe oku na iinima yimwe ndi na oohapu nangoye, sho wa kala pamwe naamboka ya taamba elongo lyaBileam, ngoka a longo Balak, a pukithe Aaisraeli nokulya iikulya ya yambelwa iimenka nokuhondela.

¹⁵ Naasho wa kala pamwe naantu ya taamba elongo lyAaniikolaiti.

¹⁶ Itedhulula ano! Ngele ito shi ningi, otandi ke ya kungoye e tandi kondjitha aantu ayehe mboka negongamwele tali zi mokana kandje.

¹⁷ “ ‘Ngoka e na omakutsi, nu uve ko shoka Ombepo te shi lombwele omagongalo. “ ‘Aasindani otandi ke ya pa, ya lye omanna omaholekwa. Kehe gumwe gwomuyo ota ka pewa wo emanya etokele kwa nyolwa edhina epe itaali tseyika nando okulye, okomutaambi awike.’ ”

¹⁸ “Nyolela omuyengeli gwegongalo lyomuTiatira, u tye: “ ‘Omuna gwaKalunga, ngoka e na omeho ga fa oohandje dhomulilo noompadhi dha fa osheela oshikushu sha yelithwa, ota ti:

¹⁹ “ ‘Iilonga yoye ondi yi shi; ohole yoye, okwiinekelwa kwoye, eyakulo neidhidhimiko lyoye onde yi tseya. Onda tseya kutya ngashingeyi oto ningi oshindji shi vule petameko.

²⁰ Ihe ondi na oohapu nangoye, sho wi idhidhimikile Isebel, omukiintu ngoka hi iti omutumwa gwaKalunga. Oye ota longo nota pukitha aapiya yandje moku ya fala moluhondelo noku ya litha iikulya ya yambelwa iimenka.

²¹ Omukiintu nguka onde mu pe ethimbo lyokwiitedhulula, ihe ina hala, e ethe okuhondela kwe.

²² Ngame otandi mu langeke kombete yuuvu, naamboka haa hondele naye, otaa ka mona egeelo edhigu. Otandi shi ningi mbala, ngele itaa etha iilonga yuulunde mbyoka ya longo nomukiintu nguka.

²³ Otandi dhipaga po aalanduli ye, nomagongalo agehe otaga ka tseya kutya omadhiladhilo niiholekwa ayihe yaantu oyi li puuyelele koshipala shandje. Otandi ka futila kehe gumwe shi thike piilonga ye.

²⁴ “ ‘Ihe oku na yamwe yomune muTiatira inaa taamba elongo ndika lya puka, oomboka inaa taamba shoka haku tiwa “iiholekwa yaSatana”. Itandi mu tsike uudhigu ulwe.

²⁵ Ihe dhiginineni owala shoka mu shi na, sigo tandi ya.

²⁶ Aasindani mboka taa gwanitha ehalo lyandje sigo okehulilo, otandi ke ya pa oonkondo ndhoka nde dhi pewa kuTate: otandi ke ya pa oonkondo dhokupangela iigwana nondhimbo yosheela noku yi tatula, ngaashi omuntu ta tatula oshuma sheloya. Otandi ke ya pa wo onyothi yongula.

²⁷

²⁸

²⁹ “ ‘Ngoka e na omakutsi, nu uve ko shoka Ombepo te shi lombwele omagongalo.’ ”

3

¹ “Nyolela omuyengeli gwegongalo lyomuSarde, u tye: “ ‘Ngoka e na oombepo ndhoka heyali dhaKalunga noonyothi heyali, ota ti: “ ‘Iilonga yoye ondi yi shi; ou na esimano wa fa u na omwenyo, ihe owa sa.

² Onkee ano tonata, ngoye u koleke mboka ye li po natango, manga inaaya pwa po. Oshoka onda dhimbulula kutya iilonga yoye inayi gwana natango koshipala shaKalunga kandje.

³ Dhimbulukwa ano shoka wa longwa nankene we shi uvu. Vulika e to itedhulula, u ethe uulunde woye. Ngele ito tonata, nena ngame otandi ke ya kungoye ombaadhilila noito ka tseya nando ethimbo ndyoka tandi ya kungoye.

⁴ Ihe yamwe yomune, ne Aasarde, inaa nyateka oonguwo dhawo. Oyo otaa ka enda pamwe nangame ya zala oonguwo oontokele, oshoka oya gwana oku shi ninga.

⁵ Oomboka taa sindana, otaa ka zalekwa ngeyi oonguwo oontokele, nomadhina gawo itandi ke ga dhima mo membo lyaanamwenyo. Ongame otandi ka hempulula koshipala shaTate nomontaneho yaayengeli ye kutya oyo oyandje.

⁶ “ ‘Ngoka e na omakutsi, nu uve ko shoka Ombepo te shi lombwele omagongalo.’ ”

⁷ “Nyolela omuyengeli gwegongalo lyomuFiladelfia, u tye: “ ‘Omuyapuki nOmunashili, ngoka e na iipatululo yaDavid, oongoka he egulula nokaku na ngoka ta vulu okweedhila, nohe edhile nokaku na ngoka ta vulu okweegulula, ota ti:

⁸ “ ‘Iilonga yoye ondi yi shi; onda tseya kutya ou na owala uunkondo uushona, ihe owa dhiginine oohapu dhandje nowa li omwiinekelwa. Onde ku egululile osheelo nokaku na nando omuntu ta vulu oku shi edhila po.

⁹ Pulakena! Ongundu yaantu yaSatana, mboka haa fundju nohaa iti Aajuda, ihe hayo, otandi ke ye ku pa, ye ku tsile oongolo. Oyo otaa ka tseya kutya ondi ku hole.

¹⁰ Ano sho wa dhiginine oohapu dhandje nowi idhidhimike, nangame wo otandi ke ku hupitha mo momathimbo omadhigu ngoka tage ya muuyuni auhe okumakela aantu ayehe mboka ye li kombanda yevi.

¹¹ Ongame otandi ya mbala. Dhiginina shoka u shi na, opo waa yugwe nando okomuntu ondjambi yoye yesindano.

¹² Oongoka ta sindana, otandi ke mu ninga ongundhi motempeli yaKalunga kandje, oye noita ka za mo we. Ongame otandi ke mu nyola edhina lyaKalunga kandje nedhina lyoshilando shaKalunga kandje, Jerusalem oshipe, shoka tashi ka za megulu kuKalunga kandje. Otandi ke mu nyola edhina lyandje epe.

¹³ “ ‘Ngoka e na omakutsi, nu uve ko shoka Ombepo te shi lombwele omagongalo.’ ”

¹⁴ “Nyolela omuyengeli gwegongalo lyomuLaodikea, u tye: “ ‘Oongoka Amen, omwiinekelwa, omuhokololi omunashili nekota lyiishitwa ayihe yaKalunga ota ti:

¹⁵ “ ‘Iilonga yoye ondi yi shi; onda tseya kutya ku shi omutalala nenge omupyu. Ando wa kala omutalala nenge omupyu, ando hwepo.

¹⁶ Ihe sho u na owala okayenye okashona, waa shi omupyu nenge omutalala, otandi ku kungu mo mokana kandje.

¹⁷ Oto ti kutya ongoye omuyamba u li nawa noku na sho wa pumbwa. Ihe ino tseya nani kutya ongoye ohepelelela? Ongoye ohepele, u li olutu lwowala nomuposi.

¹⁸ Otandi ku tsu omayele, u ye kungame, u ilandele oshingoli, oshingolilela, u ninge omuyamba. Ilandela omuzalo omutokele, u siikile epenge lyoye. Ilandela wo omuti, u tule momeho goye, opo u mone ko.

¹⁹ Ayehe mboka ndi ya hole, ohandi ya geele nohandi ya dhenge. Itedhulula ano wa mana mo.

²⁰ Tala, onda thikama posheelo notandi konkola. Ngele ku na ngoka tu uvu ewi lyandje note egulula ndje, otandi ya maandjawo e tatu li uulalelo pamwe naye.

²¹ Oongoka ta sindana, otandi mu kuutumbike pungame koshipangelapundi shandje, naanaa ngaashi ngame nda sindana e te kuutumba puTate koshipangelapundi she.

²² “ ‘Ngoka e na omakutsi, nu uve ko shoka Ombepo te shi lombwele omagongalo.’ ”

4

¹ Ngame onda mono emoniko ekwawo, omweelo gwe eguluka megulu. Ngame nondu uvu ewi ndyoka lya popithile ndje nale, lya fa ewi lyenkuma lya ti: “Ila huka pombanda, ongame notandi ku ulukile shoka tashi ka landula konima yaashika.”

² Mbalambala onda kwatwa kOmbepo. Megulu onda mono mo oshipangelapundi nagumwe a kuutumba ko.

³ Oshipala she sha adhima ongomamanya ge na ondilo gajaspes nakarneli. Oshipangelapundi osha li sha dhingolokwa kuutamvula wolwaala lwa fa emanya lyasmaragdi,

⁴ nosha kundukidhwa kiipangelapundi iikwawo omilongo mbali niine, hoka kwa li kwa kuutumba aakuluntu omilongo mbali nayane ya zala oonguwo oontokele niishani yoshingoli komitse.

⁵ Moshipangelapundi omwa li tamu zi oombadhi, omawi nomundundumo. Komeho goshipangelapundi okwa li ku na oonyeka heyali dha tema, odho oombepo heyali dhaKalunga.

⁶ Okwa li wo ku na sha shoka tashi monika sha fa efuta tali tayima ngekende lyokristali. Koombinga adhihe dhoshipangelapundi okwa li ku na iinamwenyo ine yi na omeho ogendji komeho nokonima.

⁷ Oshinamwenyo shotango osha li sha fa onime, oshitiyali osha fa ontana, oshititatu osha li shi na oshipala sha fa shomuntu noshitine osha li sha fa ontsa tayi tuka.

⁸ Kehe shimwe shomiinamwenyo mbika ine osha li shi na omawawa gahamano ge na omeho ogendji meni nokombanda. Oyo ohayi imbi uusiku nomutenya, yaa na ezimbuko tayi ti: “Omuyapuki, omuyapuki, omuyapuki, Omuwa Kalunga Omunankondoadhihe, ngoka a li ko noku li ko note ya.”

⁹ Shaa tuu iinamwenyo mbyoka ine tayi eta ehambelelo, esimano nepandulo kungoka a kuutumba koshipangelapundi e na omwenyo sigo aluhe,

¹⁰ nena aakuluntu omilongo mbali nayane otaa tsile wo oongolo ngoka ta kala e na omwenyo sigo aluhe. Oyo ohaa umbile iishani yawo poshipangelapundi e taa ti:

¹¹ “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe, nokehalo lyoye oyi li po noyi na omwenyo!”

5

¹ Ngame onda mono embo enene li li moshikaha shokolulyo shaangoka a kuutumba koshipangelapundi, lya nyolwa meni nokombanda nolya patwa niipatitho iheyali.

² Opo ihe onda mono omuyengeli omunankondo ta popi newi enene ta ti: “Olye ngoka a gwana okupatulula iipatitho mbika nokupandja embo ndika?”

³ Ihe inaku monika nando ogumwe megulu nenge kombanda yevi nenge meni lyevi, ngoka ta vulu okupatulula embo ndika nokutala mo.

⁴ Ongame nonda lili noonkondo, oshoka inaku monika nando ogumwe ngoka a gwana okupatulula embo ndika nokutala mo.

⁵ Nena gumwe gwomaakuluntu okwa lombwele ndje ta ti: “Ino lila! Tala, Onime yomezimo lyaJuda, omuvalwa gwomuDavid, okwa sindana nokwa gwana okupatulula iipatitho mbika iheyali nokupandja embo ndika.”

⁶ Ngame onda mono Onzigona a thikama pokati koshipangelapundi, a kundukwa kiinamwenyo ine nokaakuluntu. Onzigona okwa li a fa a dhipagwa. Okwa li e na ooniga heyali nomeho gaheyali, ngoka ogo oombepo heyali dhaKalunga ndhoka dha tumwa nuuyuni auhe.

⁷ Opo Onzigona okwa yi nokwa kutha embo ndyoka moshikaha shokolulyo shaangoka a kuutumba koshipangelapundi.

⁸ Manga te shi ningi, iinamwenyo mbyoka ine naakuluntu omilongo mbali nayane oya tsu oongolo koshipala shOnzigona. Kehe gumwe okwa li e na okashandja niiyaha yoshingoli yi na iitsinino, oyo omagalikano gaantu yaKalunga.

⁹ Oyo oyi imbi eimbilo epe ya ti: “Ongoye wa gwana okutaamba embo ndika nokupatulula iipatitho yalyo, oshoka owa li wa dhipagwa. Nomolwokusa kwoye owe eta aantu kuKalunga, oomboka ya za momaludhi agehe, momalaka agehe, miigwana ayihe nomomihoko adhihe.

¹⁰ Ongoye owe ya ningi ombala yaayambi okulongela Kalunga ketu, oyo notaa ka pangela kombanda yevi.”

¹¹ Ongame onda tala ishewe nondu uvu aayengeli oyendjiyendji ya kundukidha oshipangelapundi pamwe niinamwenyo mbiyaka ine naakuluntu

¹² taa imbi newi enene taa ti: “Onzigona ngoka a li a dhipagwa, oye a gwana okutaamba epangelo, uuyamba, uunongo noonkondo, esimano, eadhimo nehambelelo!”

¹³ Nena ondu uvu iishitwa ayihe yomegulu, yokombanda yevi noyomeni lyevi naambiyaka ayihe yomefuta noyomewangandjo tayi imbi tayi ti: “Ehambelelo, esimano, eadhimo noonkondo kungoka a kuutumba koshipangelapundi nokOnzigona, aluhe sigo aluhe!”

¹⁴ Iinamwenyo mbiyaka ine oya yamukula ya ti: “Amen,” naakuluntu oyi isizimike e taa galikana.

6

¹ Nena onda mono Onzigona a matula nokwa suukulula shotango shomiihako mbyoka iheyali; nondu uvu shimwe shomiinamwenyo mbyoka ine sha popi newi lya fa lyomutyalakato sha ti: “Ila!”

² Ngame onda tala nonda mono ko okakambe okatokele. Omukayili gwako okwa li e na uutati nokwa pewa oshishani. Oye okwa yi, a ka sindane, oshoka oye omusindani.

³ Nena Onzigona okwa matula oshihako oshitiyali; nondu uvu oshinamwenyo oshitiyali sha ti: “Ila!”

⁴ Okakambe okakwawo okatiligane oka holoka. Omukayili gwako okwa pewa oonkondo dhokuhomonena evi alihe iita, aantu tameke okudhipagathana. Oye nokwa pewa egonga enene.

⁵ Nena Onzigona okwa matula oshihako oshititatu; nondu uvu oshinamwenyo oshititatu sha ti: “Ila!” Onda tala nonda mono ko okakambe okaluudhe. Omukayili gwako okwa li e na oshiviha moshikaha she.

⁶ Ngame ondu uvu ewi lya zi mokati kiinamwenyo mbyoka ine lya ti: “Okatungwa kiilyawala oke thike pondjambi yomesiku nosha wo uutungwa utatu womahangu. Ihe omagadhi nomaviinu ino ga etela oshiponga.”

⁷ Nena Onzigona okwa matula oshihako oshitine; nondu uvu oshinamwenyo oshitine sha ti: “Ila!”

⁸ Ngame onda mono ko okakambe okakwaya. Omukayili gwako oye ngoka e na edhina Eso, Oshaasi noshe mu landula. Mbika iyali oya pewa oonkondo dhokupangela oshitine shevi nokudhipagitha aantu kiita, kondjala, komalega nokiilikama.

⁹ Nena Onzigona okwa matula oshihako oshititano. Opo onda mono kohi yoshiyambelo oomwenyo dhaamboka ya dhipagwa omolwokuuvitha oohapu dhaKalunga noya kala aahokololi aainekelwa.

¹⁰ Oyo oya popi newi enene ya ti: “Omuwa Omunankondoadhihe, omuyapuki nomunashili! Uunake to ka pangula aantu yokombanda yevi nokugeela mboka ye tu dhipaga?”

¹¹ Kehe gumwe gwomaantu mbaka okwa zalekwa onguwo onde ontokele. Oyo oya lombwelwa, ya vululukwe natango okathimbo, sigo kwa monika omwaalu gu udha gwaayakuli nogwooitaali ooyakwawo mboka ye na okudhipagwa ngaashi yo.

¹² Ngame onda mono Onzigona a matula oshihako oshitihamano. Nena okwa ningi ekakamo edhigu lyevi, etango olya luudha lya fa onguwo yoluhodhi, nomwedhi ogwa tiligana gwa fa ombinzi.

¹³ Oonyothi odha gu ko kegulu e tadhi gwile kevi ongomagongwa gomukwiyu taga shikwa ko kepepo enene.

¹⁴ Opo eyalelo olya kana po lya fa ombapila tayi ningwa ongonga. Oondundu noontuntu adhihe odha kuthwa po pomahala gadho.

¹⁵ Nena aakwaniilwa yokombanda yevi, aapangeli naawiliki yaakwiita, aayamba naanankondo nosho wo aapika naavalwa oya ka holama momakololo nokohi yomamanya gokoondundu.

¹⁶ Oyo oyi ithana oondundu nomamanya ya ti: “Gwileni kombanda yetu, mu tu holeke, opo twaa monike kungoka a kuutumba koshipangelapundi notwaa adhike kondjahi yOnzigona!

¹⁷ Oshoka esiku enene lyondjahi yawo olyo ndika, nolye ta vulu oku li keelela?”

7

¹ Konima yaambika onda mono aayengeli yane ya thikama koombinga ne dhevi noya keelele oombepo dhokoombinga ndhoka ne, dhaa pepe we kevi, mefuta nenge komiti.

² Nonda mono omuyengeli omukwawo a ziilile kuuzilo e na oshihako shaKalunga omunamwenyo. Oye okwi igidha newi enene kaayengeli mbeyaka yane, oomboka Kalunga e ya pe oonkondo dhokuyona po evi nefuta

³ a ti: “Inamu yona po evi nenge omiti, manga inaatu tula iihako miipala yaapiya yaKalunga.”

⁴ Opo ihe onda lombwelwa omwaalu gwaamboka ya ndhindhilikwa oshihako shaKalunga miipala yawo; ogwo 144 000, ya za momazimo agehe gAaisraeli.

⁵ Mezimo lyaJuda omwa li mwa ndhindhilikwa noshihako aantu 12 000, mezimo lyaRuben 12 000, mezimo lyaGad 12 000,

⁶ mezimo lyaAser 12 000, mezimo lyaNaftali 12 000, mezimo lyaManasse 12 000,

⁷ mezimo lyaSimeon 12 000, mezimo lyaLevi 12 000, mezimo lyaIssaskar 12 000,

⁸ mezimo lyaSebulon 12 000, mezimo lyaJosef 12 000, nomezimo lyaBenjamin 12 000.

⁹ Konima yaambika onda mono ko engathithi lyaantu ya nyengana okuyalula. Oyo oya zi maantu yomomihoko adhihe, momaludhi agehe, miigwana ayihe nomomalaka agehe. Oyo oya thikama ya taalela oshipangelapundi nOnzigona ya zala oonguwo oonde oontokele noya li ye na iiyale miikaha yawo.

¹⁰ Oyo oyi igidha newi enene ya ti: “Ehupitho otali tu zile kuKalunga ketu ngoka a kuutumba koshipangelapundi, notali tu zile wo kOnzigona!”

¹¹ Aayengeli ayehe oya thikama ya kundukidha oshipangelapundi pamwe naakuluntu niinamwenyo mbyoka ine. Ayehe oya tsu oongolo yi inyongamena koshipangelapundi noya galikana Kalunga

¹² ya ti: “Amen! Ehambelelo, eadhimo, uunongo, epandulo, esimano, epangelo noonkondo oyaKalunga ketu aluhe sigo aluhe! Amen!”

¹³ Nena gumwe gwomaakuluntu okwa pula ndje nokwa ti: “Aantu mboka ya zala oonguwo oontokele, oyo oolye noya zi peni?”

¹⁴ Ngame onda yamukula nonda ti: “Ngame inandi ya tseya, ihe ngoye, Omuwa gwandje, ou ya shi.” Opo ihe okwa lombwele ndje a ti: “Aantu mbaka oomboka ya piti momahepeko ngoka omanene. Oyo oya yogo oonguwo dhawo noye dhi yelitha nombinzi yOnzigona.

¹⁵ Onkee oya thikama komeho goshipangelapundi shaKalunga notaye mu yakula uusiku nomutenya motempeli ye. Ngoka a kuutumba koshipangelapundi, ote ya gamene nokukalapo kwe.

¹⁶ Nena oyo itaa ka sa we nando ondjala nenge enota; osho wo etango nenge epupyu kehe itali ke ya fika.

¹⁷ Oshoka Onzigona, ngoka a kuutumba pokati koshipangelapundi, ota kala omusita gwawo note ke ya wilika noku ya fala koothithiya dhomeya omanamwenyo. Kalunga nota ka theta po omahodhi agehe momeho gawo.”

8

¹ Onzigona sho a matula oshihako oshitiheyali, megulu omwa mwena thilu ethimbo li thike lwopetata lyotundi.

² Nonda mono ko aayengeli yaheyali ya thikama koshipala shaKalunga. Oyo oya pewa omankuma gaheyali.

³ Omuyengeli mukwawo e na oshitsininitho shoshingoli okwe ya nokwa thikama poshiyambelo. Oye okwa pewa iitsinino oyindji, yi gwedhe komagalikano gaantu yaKalunga noyi tulwe koshiyambelo shoshingoli shi li mombamba yoshipangelapundi.

⁴ Olwithi lwiitsinino pamwe nomagalikano gaantu yaKalunga oya yeluka pombanda moshikaha shomuyengeli ngoka a thikama koshipala shaKalunga.

⁵ Omuyengeli okwa kutha oshitsininitho nokwe shi hwameke nomulilo gwokoshiyambelo e te shi umbile kombanda yevi. Oko okwa ningi omityalakato nomakudhilo noombadhi nekakamo lyevi.

⁶ Nena aayengeli mboka yaheyali oyi ilongekidha okuhika omankuma gawo gaheyali.

⁷ Omuyengeli gwotango okwa hiki enkuma lye. Oompawe nomulilo mumwe nombinzi oya koloka noya gwile kombanda yevi. Nena oshititatu shevi noshomiti osha lungunithwa po, nomwiidhi aguhe omutalala.

⁸ Omuyengeli omutiyali okwa hiki enkuma lye. Opo oshinima sha fa ondundu onene ya hwama omulilo, oshu umbilwa mefuta. Nena oshititatu shefuta osha shituka ombinzi,

⁹ noshititatu shiinamwenyo ayihe yomefuta osha si, noshititatu shoosikepa adhihe osha yonagulwa po.

¹⁰ Omuyengeli omutitatu okwa hiki enkuma lye. Onyothi onene ya tema ya fa onyeka, oya gu kegulu noya gwile koshititatu shomilonga dhomeya noshoothithiya.

¹¹ (Edhina lyonyothi ndjika Uululu). Nena oshititatu shomeya osha lulu, naantu oyendji oya si, sho ya nu omeya ngoka omalulu.

¹² Omuyengeli omutine okwa hiki enkuma lye. Nena oshititatu shetango, shomwedhi noshoonyothi osha dhengwa, oyo noya kanitha oshititatu shuuyelele wayo; nokwa kala kwaa na nando uuyelele ethimbo li thike poshititatu shesiku noshuusiku wo.

¹³ Opo ihe ondu uvu nonda mono ontsa tayi tuka mookathele noya lili newi enene ya ti: “Iihuna! Iihuna! Iihuna otayi ka kala yi thike peni kaantu ayehe yokombanda yevi, uuna omankuma gaayengeli ooyakwawo yatatu taga ka hika!”

9

¹ Omuyengeli omutitano okwa hiki enkuma lye. Ngame onda mono onyothi ndjiyaka ya li ya gwile kevi, ya pewa oshipatululo sholumbogo lwomuule.

² Onyothi oya patulula olumbogo, omo nomwa zi olwithi lwa fa lweziko enene nolwa kwidhidhike etango newangandjo.

³ Molwithi omwa zi oombahu nodha lambele kevi e tadhi pewa oonkondo dha fa ndhoka dhoondje.

⁴ Odho odha lombwelwa, dhaa yone po omwiidhi nenge omiti nenge iimeno iikwawo. Odha pitikwa owala okuhepeka aantu mboka kaaye na endhindhiliko lyaKalunga miipala yawo.

⁵ Oombahu ndhika inadhi pitikwa okudhipaga aantu mbaka, ihe oku ya hepeka owala uule wethimbo lyoomwedhi ntano. Uululume womahepeko gadho owa li wa fa mboka womuntu a lika kondje.

⁶ Methimbo lyoomwedhi ndhoka ntano aantu mboka otaa ki ihalela eso, ihe itaa li mono. Oyo otaa ka kala ya hala okusa, ihe eso otali ke ya fadhuka po.

⁷ Oombahu odha li dha fa uukambe wa longekidhilwa iita. Odha li dhi na iinima ya fa iishani yoshingoli komitse, niipala yadho oya li ya fa yaantu.

⁸ Omafufu gadho oga li ongomafufu gomukiintu gokomutse, nomayego gadho oga li ga fa omayego goonime.

⁹ Odha li dhi na iinima ya fa omahuuyanza giiyela poontulo. Oshihomo shomawawa gadho osha li sha fa ekolokoto lyomatemba ogendji guukambe gu uka kiita.

¹⁰ Odho odha li dhi na omishila noongona ongoondje, nomomishila dhadho omu na oonkondo dhokweehameka aantu ethimbo lyuule woomwedhi ntano.

¹¹ Omukwaniilwa gwadho oye omuyengeli ngoka ta pangele olumbogo lwomuule. Edhina lye mOshihebeli oAbbadon, mOshigreka oApollion (tali ti omuhanaguli).

¹² Oshiponga shotango osha pita po. Konima yaashika oku na natango iiponga iikwawo iyali tayi ke ya.

¹³ Nena omuyengeli omutihamano okwa hiki enkuma lye; nondu uvu ewi lya zi moombinga ne dhoshiyambelo shoshingoli shoka shi li koshipala shaKalunga.

¹⁴ Ewi olya popitha omuyengeli omutihamano e na enkuma lya ti: “Mangulula aayengeli mboka yane ya mangelwa pomulonga omunene gwaEufrat.”

¹⁵ Aayengeli mbeyaka yane oya mangululwa. Oyo oya longekidhilwa ethimbo ndika lyesiku ndika, lyomwedhi nguka nolyomumvo nguka okudhipaga po oshititatu shaantu ayehe.

¹⁶ Ngame onda lombwelwa omwaalu gwomatanga gaakwiita aakayili, oomiliyona omathele gaali.

¹⁷ Osho ngeyi onda mono memoniko uukambe naakayili yawo. Oyo oya li ye na poontulo omahuuyanza omatiligane ga fa omulilo, omambulau ga fa emanya lyosafire nomashunga ga fa osulufuli. Omitse dhuukambe mbuka odha li dha fa dhoonime, nomomakana gawo omwa zi omulilo, olwithi nosulufuli.

¹⁸ Oshititatu shaantu ayehe osha sile miiponga mbika itatu; omulilo, olwithi nosulufuli, mbyoka ya zi momakana guukambe.

¹⁹ Oshoka oonkondo dhuukambe mbuka odha li momakana nomomishila dhawo. Omishila dhawo odha fa omitse dhomayoka, ndhoka we dhi longitha okweehameka aantu.

²⁰ Ihe oshihupe shaantu mboka inaa sila miiponga mbika, inaa itedhulula nando, ye ethe okusimaneka iinima mbyoka ye yi hongo niikaha yawo. Inaa etha okusimaneka oombepo oombwinayi, iikalunga yoshingoli, yoshisiliveli, yosheela oshikushu, yomamanya noyiiti, mbyoka ihaayi mono ko, ihaayi uvu ko noihaayi ende.

²¹ Osho wo omadhipago, uumpulile, oluhondelo nuufuthi wawo.

10

¹ Ngame onda mono omuyengeli gulwe omunankondo a zi megulu. Oye okwa li a zalekwa oshikogo nuutamvula komutse gwe. Oshipala she osha li sha fa etango, nomagulu ge oga li ga fa oongudhi dha tema omulilo.

² Oye okwa li e na okambo okashona ka pandjwa moshikaha she. Okwa lyata ompadhi ye yokolulyo kombanda yefuta noyokolumoho okevi,

³ nokwi igidha newi enene lya fa lyonime tayi ndunduma. Ano sho i igidha ngeyi, okwa yamukulwa komityalakato heyali.

⁴ Mbalambala omityalakato ndhoka sho dha popi, onda li nda hala okunyola oohapu. Ihe ondu uvu ewi tali popi megulu tali ti: “Mwenena oohapu ndhoka dha popiwa komityalakato ndhoka heyali, ino dhi nyola!”

⁵ Nena omuyengeli ngwiyaka nda monene a thikama kefuta nokevi, okwa ganeke oshikaha she shokolulyo kegulu.

⁶ Oye okwa gana kuKalunga, ngoka ta kala e na omwenyo sigo aluhe, ngoka a shiti egulu nevi, efuta niinima ayihe yi li mo. Omuyengeli nokwa ti: “Kaku na we ethimbo!

⁷ Ano uuna omuyengeli omutiheyali ta hiki enkuma lye, Kalunga ota ka tsakanitha elalakano lye ndyoka lya kala lya holama, ngaashi e li tseyithile aapiya ye, nokutya aahunganeki.”

⁸ Nena ewi ndyoka ndu uvile tali popitha ndje megulu, olya lombwele ndje ishewe lya ti: “Inda e to kutha okambo ka pandjwa ke li moshikaha shomuyengeli ngoka a thikama kefuta nokevi.”

⁹ Ngame onda yi komuyengeli nonde mu indile, a pe ndje okambo hoka okashona. Oye okwa ti kungame: “Kutha okambo hoka, u ka lye. Oko otaka ningi okalulu mela lyoye, ihe mokana otaka ningi okatoye ka fa omagadhi goonyushi.”

¹⁰ Ngame onda kutha okambo hoka moshikaha she nonde ka li, e taka ningi okatoye ka fa omagadhi goonyushi mokana kandje. Ihe sho nde ka nina, oka ningi okalulu mela lyandje.

¹¹ Nena onda lombwelwa taku tiwa: “Ou na okulombwela natango iigwana oyindji, omihoko, omalaka naakwaniilwa elaka lyaKalunga.”

11

¹ Ngame onda pewa oshiti shokuyelekitha, sha fa olwoondje, nonda lombwelwa kwa tiwa: “Thikama, u yeleke otempeli yaKalunga noshiyambelo wo. Yalula aantu mboka taa galikana motempeli.

² Ihe ehale lyotempeli ino li yeleka, oshoka olya pewa aapagani, mboka taa ka lyatagula oshilando oshiyapuki ethimbo li thike poomwedhi omilongo ne nambali.

³ Ngame otandi ka tuma aahokololi yandje yaali ya zala omahahi. Oyo otaa ka popya elaka lyaKalunga momasiku ngoka geyovi limwe nomathele gaali nomilongo hamano.”

⁴ Aahokololi mbaka yaali oyo oomono mbali noolamba mbali dhi li koshipala shOmuwa, mwene gwevi.

⁵ Ngele oku na ngoka ta kambadhala oku ya ehameka, nena momakana gawo otamu zi omulilo e tagu lungunitha po aatondi yawo. Osho ngeyi kehe ngoka ta ka kambadhala oku ya ehameka, ota ka dhipagwa.

⁶ Oyo oye na oonkondo dhokupata egulu, opo omvula kaayi loke nando pethimbo ndyoka taa uvitha elaka lyaKalunga. Oyo oye na wo oonkondo okupangela oothithiya dhomeya nokushitukitha omeya gadho, ga ninge ombinzi, okugeela evi olwindji niiponga yoludhi kehe, ngaashi ya hala.

⁷ Ngele ya mana okupopya elaka ndyoka, nena oshilikama shoka tashi zi molumbogo lwomuule, otashi ke ya kondjitha. Osho otashi ke ya sinda e tashi ya dhipaga.

⁸ Omidhimba dhawo otadhi ka kala dha lala momapandaanda goshilando oshinene, moka mwa alelwa Omuwa gwawo komushigakano. Edhina lyoshilando shika pamayele oSodom nenge Egipiti.

⁹ Aantu yomiigwana ayihe yomomaludhi, yomomalaka noyomihoko adhihe otaa ka tala omidhimba ndhika uule womasiku gatatu netata noitaa ka pitika nando, dhi fumvikwe.

¹⁰ Aantu yokombanda yevi otaa ka kala ya nyanyukilwa eso lyaalumentu mbaka yaali. Oyo otaa ka ninga iituthi notaa ka tuminathana omagano, oshoka aahunganeki mbaka yaali oya li taa hepeke noonkondo aantu yokombanda yevi.

¹¹ Ihe konima yomasiku gatatu netata ombepo yomwenyo oya zi kuKalunga e tayi ya muyo, oyo noya yumuka e taa thikama. Aantu ayehe mboka ye ya mono, oya tila noonkondo.

¹² Nena aahunganeki mbaka yaali oyu uvu ewi enene tali ya popitha lya zi megulu lya ti: “Ileni huka pombanda!” Aatondi yawo oye ya tala, sho taa yi megulu taa ende moshikogo.

¹³ Pethimbo tuu ndyoka evi olya kakama noonkondo, oshitimulongo shoshilando osha hanagulwa po, naantu omayuvi gaheyali oya sile mekakamo lyevi. Aantu yalwe oya haluka noonkondo noya simaneke uunene waKalunga komegulu.

¹⁴ Oshiponga oshitiyali osha piti. Ihe tala, oshiponga oshititatu otashi ya mbala.

¹⁵ Nena omuyengeli omutiheyali okwa hiki enkuma lye. Opo mpoka megulu omwi igidhwa kwa tiwa: “Ngashingeyi oonkondo dhokupangela uuyuni odhOmuwa Kalunga ketu nodhaKristus gwe. Oye ota ka pangela aluhe sigo aluhe!”

¹⁶ Nena aakuluntu mbeyaka omilongo mbali nayane ya kuutumba kiipangelapundi yawo koshipala shaKalunga, oya tsu oongolo e taa galikana Kalunga

¹⁷ taa ti: “Omuwa Kalunga Omunankondoadhihe, ngoka u li ko nowa li ko! Otatu ku hambelele, sho wa holola oonkondo dhoye nowa tameke okupangela!

¹⁸ Aapagani oya geya noonkondo, oshoka ethimbo lyondjahi yoye nolyokupangula aasi olye ya, ethimbo lyokufuta aapiya yoye aahunganeki naantu yoye ayehe, oomboka haye ku tila, aanenentu naadhinwa. Ndika olyo ethimbo lyokuhanagula po mboka taa yonagula po evi!”

¹⁹ Otempeli yaKalunga megulu oye eguluka noshiketha moka mu na oohapu dhehangano, osha monika motempeli ye. Nena okwa ningi ihe oombadhi nomawi nomityalakato, ekakamo lyevi nomvula onene yoompawe.

12

¹ Endhindhiliko enene olya holoka kegulu: omukiintu a zala etango, nomwedhi gu li kohi yoompadhi dhe, noku na oshishani shoonyothi omulongo nambali komutse gwe.

² Oye okwa li metegelelo li li pokuvalwa, nokwa kugu omoluuwehame nomolwoshitheta shopokuvala.

³ Endhindhiliko ekwawo olya holoka kegulu. Okwa li ku na oshikoko oshinene oshitiligane shi na omitse heyali nooniga omulongo, nokomutse kehe gwasho oku na oshishani.

⁴ Osho osha kombo po nomushila gwasho oshititatu shoonyothi dhokegulu noshe dhi umbile kombanda yevi. Oshikoko shika osha thikama sha taalela omukiintu ngoka ta hala okuvala, shi lye po okanona, ngele ka valwa.

⁵ Nena omukiintu okwa vala okanona okamati, hoka ke na okupangela iigwana ayihe nondhimbo yosheela. Ihe okanona hoka oka fegulwa po noka falwa puKalunga noposhipangelapundi she.

⁶ Omukiintu okwa ka holama mombuga. Oko hoka Kalunga okwa li e mu longekidhila ehala noko ta kala ta silwa oshimpwiyu uule womasiku geyovi limwe nomathele gaali nomilongo hamano.

⁷ Opo ihe megulu omwa tukuluka olugodhi. Mikael naayengeli ye oya kondjitha oshikoko pamwe naayengeli yasho.

⁸ Oshikoko naayengeli yasho oya sindika yo inaa pitikwa we okukala megulu.

⁹ Oshikoko oshinene oshu umbwa mo megulu. Osho eyoka ndyoka hali ithanwa omuhindadhi nenge Satana, ngoka ta pukitha uuyuni auhe. Oshu umbilwa kombanda yevi pamwe naayengeli yasho ayehe.

¹⁰ Nena ondu uvu ewi enene megulu tali ti: “Ngashingeyi ehupitho lyaKalunga olye ya! Ngashingeyi Kalunga okwa holola oonkondo dhuukwaniilwa we. Ngashingeyi Kristus okwa holola oonkondo dhe dhokupangela. Oshoka omutamaneki gwaamwatate, ngoka ha thikama koshipala shaKalunga omutenya nuusiku, oku umbwa mo megulu.

¹¹ Aamwatate oye mu sindi koonkondo dhombinzi yOnzigona nodhoohapu dhoshili ndhoka ye dhi uvitha. Oyo oya li nokuli ya hala okuhupula oomwenyo dhawo, ya se.

¹² Onkee ano nyanyukweni, ne omagulu naantu amuhe mboka mu li mo! Ihe iihuna otayi ka kala yi thike peni kombanda yevi nomefuta! Oshoka omuhindadhi okwa kulukile kune u udha ondjahi, sho e shi shi kutya oku na ko ashike okathimbo okafupi kowala.”

¹³ Ano oshikoko sho sha mono kutya shu umbilwa kombanda yevi, osha tameke okutidha omukiintu ngoka a vala okanona okamati.

¹⁴ Omukiintu okwa pewa ihe omawawa gontsa onene, opo a tukile keha lye mombuga, hoka ta ka kala ta silwa oshimpwiyu nokwa gamenwa komapukitho geyoka uule woomvula ndatu netata.

¹⁵ Nena eyoka olya kungu omeya ga fa gomulonga, lya kungile omukiintu, opo ando a faalelwe kefundja lyomeya ngoka.

¹⁶ Ihe evi olya kwatha omukiintu, sho lya nina po omeya ngoka ga kungwa koshikoko.

¹⁷ Oshikoko osha sile omukiintu ondjahi nosha yi, shi ka kondjithe oyana mboka ya hupu ko, oomboka haa vulika kiipango yaKalunga nohaa dhiginine oshili ndjoka ya hololwa kuJesus.

¹⁸ Nena oshikoko osha thikama pooha dhefuta.

13

¹ Nena onda mono ko oshilikama tashi zi mefuta. Osho osha li shi na ooniga omulongo nomitse heyali. Koluniga kehe okwa li oshishani, komitse dhasho okwa li kwa nyolwa omadhina gomatukano.

² Oshilikama shoka nda mono, osha li sha fa etotono shi na omakaha ga fa gemwanka nokana ka fa konime. Oshikoko osha gandja koshilikama oonkondo dhasho, oshipangelapundi shasho nombinga onene yepangelo lyasho.

³ Gumwe gwomitse dhoshilikama ogwa li gwa fa oshilalo sheso, ihe oshilalo shika oshiwinayi osha polo. Evi alihe olya kumwa nolya landula oshilikama.

⁴ Aantu ayehe oya galikana oshikoko shika, sho sha gandja oonkondo dhasho dhokupangela koshilikama. Oya galikana wo oshilikama ya ti: “Olye ta yelekwa noshilikama? Olye ta vulu oku shi kondjitha?”

⁵ Oshilikama osha pitikwa okupopya oohapu oombwinayi dhomasheko, nosha pitikwa, shi pangele ethimbo li thike poomwedhi omilongo ne nambali.

⁶ Osho osha tameke okusheka Kalunga nedhina lye, okusheka ehala mpoka a kala, nosho wo ayehe mboka ye li megulu.

⁷ Oshilikama osha pitikwa okukondjitha aantu yaKalunga noku ya sinda. Osha pewa oonkondo okupangela omaludhi agehe gaantu, iigwana ayihe, omalaka agehe nomihoko adhihe dhaantu.

⁸ Aantu ayehe mboka ye li kombanda yevi, otaye ke shi galikana, ayehe mboka omadhina gawo inaaga nyolelwa okuza keshito lyuuyuni membo lyaanamwenyo lyOnzigona ngoka a dhipagwa.

⁹ Pulakeneni ano, ngele omu na tuu omakutsi gokuuva!

¹⁰ Kehe ngoka e na okukwatwa, one ke shi ningilwa. Ngoka e na ekudhipagwa negongamwele, ona ka dhipagwa. Shika otashi pula aantu yaKalunga, ya kale ye na eidhidhimiko neitaalo.

¹¹ Nena onda mono ko oshilikama oshikwawo tashi zi mevi. Osho osha li shi na ooniga mbali dha fa ooniga dhonzi, nosha popi newi lya fa lyoshikoko.

¹² Oshilikama shika osha longitha oonkondo dhoshilikama shotango montaneho yasho. Osha thiminike evi alihe naayehe mboka ye li ko okugalikana oshilikama shotango, shoka sha li shi na oshilalo, ndele tashi polo.

¹³ Oshilikama shika oshitiyali osha longo iikumithalonga iinene. Osho oshi ithana omulilo, gu ze megulu, gu gwile kombanda yevi, gwa talika kaantu ayehe.

¹⁴ Osho osha pukitha aantu ayehe yokombanda yevi nokulonga iikumithalonga mbyoka ye shi pitikilwa montaneho yoshilikama shotango. Oshilikama osha lombwele aantu ayehe yomuuyuni, ya honge oshiyelekela shoshilikama shoka sha yumuka, nando osha li sha tsuwa negongamwele.

¹⁵ Oshilikama oshitiyali osha pitikwa okufudhila ombepo yomwenyo moshiyelekela shoshilikama shotango, opo oshiyelekela shika shi vule okupopya nokudhipaga mboka inaa hala oku shi galikana.

¹⁶ Oshilikama osha thiminike aantu ayehe, aadhinwa naanenentu, aayamba noohepele, aapika naavalwa, ya kale ya ndhindhilikwa miikaha yawo yokolulyo nenge miipala yawo.

¹⁷ Aantu oyi indikwa okulanda nenge okulanditha, ngele kaye na endhindhiliko ndika, nokutya edhina lyoshilikama nenge onomola yedhina lyasho.

¹⁸ Shika otashi pula oondunge. Kehe ngoka e na omayele, ota vulu okufatulula onomola yoshilikama shika, oshoka onomola ndjika oyi lile po edhina lyomuntu. Onomola yoshilikama oyo 666.

14

¹ Nena onda mono ko Onzigona a thikama kondundu yaSion. Pamwe nOnzigona okwa li aantu 144 000 mboka ya ndhindhilikwa edhina lye nolyaHe miipala yawo.

² Ngame ondu uvu ewi lya zi megulu lya popoma lya fa egwo lyomeya omanene nolya fa edhengo lyomutyalakato. Ewi ndyoka ndu uvu, olya li lya fa ewi lyuuhumba, aahiki sho taa hiki uuhumba wawo.

³ Aantu mbaka oya thikama ya taalela oshipangelapundi niinamwenyo ine naakuluntu, noyi imbi eimbilo epe. Kaku na ngoka a vulu okwiilonga eimbilo ndika, ihe oyo mboka ayeke 144 000, mboka ya kulilwa ko kevi.

⁴ Aantu mbaka oyo aalumentu mboka inaa inyateka nokukalathana naakiintu; oomboka ya fa aakadhona aayogoki. Oyo ohaa landula Onzigona shaa mpoka ta yi. Oyo oya kulilwa mo maantu ooyakwawo noyo aatango okuyambelwa Kalunga nOnzigona.

⁵ Oyo inaa fundja nando olumwe nokaye na nando oshipo shasha.

⁶ Nena onda mono omuyengeli gulwe e na oohapu dhelaka etoye lyaaluhe, a tuka mombanda muule, a ka uvithile aantu yokombanda yevi, omihoko adhihe, omaludhi agehe, omalaka agehe niigwana ayihe.

⁷ Oye okwa popi newi enene a ti: “Tileni Kalunga, ne mu simaneke uunene we! Oshoka ethimbo lyokupangula aantu olya thikana. Galikaneni Kalunga, ngoka a shiti egulu, evi, efuta noothithiya dhomeya!”

⁸ Omuyengeli omutiyali okwa landula ngoka gwotango a ti: “Sha teka po! Babilon oshinankondo sha teka po! Osho sha hongolola nayi iigwana noku yi nwetha omaviinu omalulu goluhondelo lwasho!”

⁹ Omuyengeli omutitatu okwa landula mboka yaali yotango nokwa popi newi enene a ti: “Kehe ngoka ta galikana oshilikama noshiyelekela shasho nota taamba endhindhiliko lyasho moshipala nenge moshikaha,

¹⁰ oye ota ka adhika kondjahi yaKalunga, ndjoka e yi tile noonkondo adhihe moshitenga shondjahi ye. Ayehe mboka taa ningi ngeyi, otaa ke ehamekwa komulilo nokomuku gwosulufuli montaneho yaayengeli aayapuki noyOnzigona.

¹¹ Olwithi lwomulilo ngoka tagu ya ehameke, otalu kala nokulunda aluhe sigo aluhe. Itaku kala evululuko omutenya nuusiku kumboka ya galikana oshilikama noshiyelekela shasho, nokungoka a taamba endhindhiliko lyedhina lyasho.”

¹² Shika otashi pula aantu yaKalunga ya kale ye na eidhidhimiko, haa vulika kiipango yaKalunga noyi inekela Jesus.

¹³ Nena ondu uvu ewi lya zi megulu lya ti: “Nyola ngeyi: Okuza ngashingeyi aanelago aasi mboka taa sile moshilonga shOmuwa!” Ombepo okwa yamukula a ti: “Osho naanaa. Oyo otaa ka vululukwa kiilonga yawo iidhigu. Oshoka iiyimati yiilonga yawo otaa yi pamwe nayo.”

¹⁴ Ngame onda tala nonda mono oshikogo oshitokele, nokusho okwa kuutumba gumwe a fa Omuna gwOmuntu e na oshishani shoshingoli komutse gwe noshimwitho sha tsa moshikaha she.

¹⁵ Nena omuyengeli gulwe okwa zi motempeli nokwi igidha newi enene kungoka a kuutumba koshikogo a ti: “Longitha oshimwitho shoye, u teye, oshoka ethimbo lyokuteya olya thikana. Evi olya tiliganena eteyo!”

¹⁶ Nena ngoka a kuutumba koshikogo, okwa dhugadhuga oshimwitho she kombanda yevi, neteyo olya ningwa.

¹⁷ Ngame onda mono omuyengeli gulwe a zi motempeli yomegulu. Oye okwa li wo e na oshimwitho sha tsa.

¹⁸ Nena omuyengeli gulwe, ngoka e na oonkondo dhokupangela omulilo, okwa zi moshiyambelo nokwi igidha omuyengeli ngoka e na oshimwitho sha tsa, a ti: “Longitha oshimwitho shoye, u tete po omahila gomiviinu dhokombanda yevi, oshoka oomviinu dhadho odha tiligana.”

¹⁹ Nena omuyengeli okwa dhugadhuga oshimwitho she kombanda yevi nokwa tete ko omahila gomiviinu e te ga umbile moshikolelo oshinene shondjahi yaKalunga.

²⁰ Oomviinu odha kolelwa moshikolelo kondje yoshilando. Nena moshikolelo omwa zi omukungu gwombinzi gu na uule wookilometa omathele gatatu nuule wometa yimwe netata.

15

¹ Nena onda mono kegulu endhindhiliko ekwawo enene nekumithi. Aayengeli yaheyali ye na omageelo gaheyali. Ngoka ogo omageelo gahugunina, oshoka uuna taga mwena, nondjahi yaKalunga wo otayi kodha.

² Nena onda mono efuta tali tayima ngekende lya vongakanithwa mumwe nomulilo. Onda mono wo mboka ya sindi oshilikama noshiyelekela shasho naangoka gwedhina lyu ulikwa nonomola. Aasindani mbaka oya thikama pefuta tali tayima ngekende ye na uuhumba ye u pewa kuKalunga.

³ Oyo oyi imbi eimbilo lyaMoses, omumati gwaKalunga, nolyOnzigona ya ti: “Omuwa Kalunga Omunankondoadhihe, iilonga yoye iinene ngiini niikumithi! Omukwaniilwa ngoye gwiigwana ayihe, omautho goye ogu uka ngiini nogoshili!

⁴ Omuwa, olye ngoka itee ku tila? Olye ta tindi okuhokolola uunene woye? Oshoka ongoye awike omuyapuki. Iigwana ayihe otayi ke ya notayi ka tsa oongolo koshipala shoye e tayi ku galikana. Oshoka iilonga yuuyuuki woye oya tseyika kwaayehe.”

⁵ Konima yaambika onda mono otempeli ye eguluka megulu, netsali ndyoka tali holola okukalapo kwaKalunga, li li motempeli.

⁶ Motempeli omwa zi aayengeli yaheyali mboka ye na omageelo gaheyali. Oyo oya li ya zala oonguwo oontokele dholiina tadhi adhima nomapaya goshingoli poontulo dhawo.

⁷ Nena shimwe shomiinamwenyo ine osha pe aayengeli mboka yaheyali iiyaha iheyali yu udha ondjahi yaKalunga, ngoka e na omwenyo aluhe sigo aluhe.

⁸ Otempeli oyu udha olwithi talu zi meadhimo nomoonkondo dhaKalunga, nokakwa li nando oongoka a vulu okuya mo motempeli, sigo omageelo ngoka gaheyali ge etwa kaayengeli yaheyali, ga hulu po.

16

¹ Ngame ondu uvu ewi enene lya zi motempeli, lya lombwele aayengeli mbeyaka yaheyali lya ti: “Indeni, mu ka tilehi iiyaha mbyoka iheyali yondjahi yaKalunga kombanda yevi!”

² Omuyengeli gwotango okwa yi nokwa tilehi oshiyaha she kombanda yevi. Nena aantu ayehe mboka ya li ye na endhindhiliko lyoshilikama naayehe mboka ya li haa galikana oshiyelekela shasho, oya kwatwa kiitumbuka iiwinayi tayi ehama noonkondo.

³ Omuyengeli omutiyali okwa tilehi oshiyaha she mefuta, omeya noga shituka ga fa ombinzi yomusi, niinamwenyo ayihe yomefuta oya si.

⁴ Omuyengeli omutitatu okwa tilehi oshiyaha she momilonga nomoothithiya dhomeya, omeya noga shituka ombinzi.

⁵ Ongame nondu uvu omuyengeli ngoka ha pangele omeya ta popi ta ti: “Omuyapuki, ngoka u li ko nowa li ko, omapangulo goye oge na uuyuuki.

⁶ Oyo oya tilehi ombinzi yaantu yoye noyaahunganeki, onkee owe ya nwetha ombinzi. Oya pewa shoka ye shi ilongela.”

⁷ Nena ondu uvu ewi lya zi moshiyambelo lya ti: “Omuwa Kalunga Omunankondoadhihe, omapangulo goye ogu uka lela nogoshili.”

⁸ Omuyengeli omutine okwa tilehi oshiyaha she ketango, olyo nolya pewa oonkondo okufika aantu nuupyu walyo uunene.

⁹ Aantu oya fikwa kuupyu mbuka uunene noya tameke okusheka edhina lyaKalunga, ngoka e na oonkondo okupangela omageelo ngaka. Oyo inaa itedhulula nando, ye ethe uulunde wawo yo ya simaneke uunene we.

¹⁰ Omuyengeli omutitano okwa tilehi oshiyaha she koshipangelapundi shoshilikama. Nena omilema odha siikile oshilongo shoshilikama, aantu noya lumata omalaka gawo omoluuwehame

¹¹ noya tuku Kalunga komegulu omoluuwehame niitumbuka yawo, ihe inaa itedhulula.

¹² Omuyengeli omutihamano okwa tilehi oshiyaha she momulonga omunene gwaEufrat. Nena omulonga ogwa pwine nogwa ningi ondjila yokweendiwa kaakwaniilwa mboka taa zi kuuzilo.

¹³ Opo ihe onda mono oombepo ndatu dha nyata dha fa omafuma tadhi zi mokana koshikoko, koshilikama nokomuhunganeki omufundja.

¹⁴ Ndhika odho oombepo dhoompwidhuli ndhoka hadhi longo iikumithalonga. Oombepo ndhika ndatu otadhi yi kaakwaniilwa yokombanda yevi alihe oku ya hanganitha, ya ka hinge iita mesiku enene lyaKalunga Omunankondoadhihe.

¹⁵ “Tala, otandi ya ombaadhilila! Omunelago oongoka ta kala a tonata nota tonatele oonguwo dhe, opo kaa ende e li olutu lwowala ye a se ohoni montaneho yaantu ayehe.”

¹⁶ Nena oombepo odha gongele aakwaniilwa pehala ndyoka hali ithanwa mOshihebeli Armagedon.

¹⁷ Omuyengeli omutiheyali okwa tilehi oshiyaha she mombepo. Nena ewi enene olya zi moshipangelapundi motempeli lya ti: “Sha gwanithwa!”

¹⁸ Opo ihe okwa ningi oombadhi, omityalakato nekakamo edhigu lyevi. Inaku monika nando onale ekakamo lya tya ngaaka, omuntu sho a shitwa.

¹⁹ Oshilando shiyaka oshinene osha tende omusa nosha topolwa miitopolwa itatu, niilando yomiilongo ayihe oya hanagulwa po. Kalunga okwa dhimbulukwa oshilando oshinene shaBabilon nokwe shi nwetha omaviinu gondjahi ye onene.

²⁰ Nena oontuntu adhihe odha fadhuka po noondundu inadhi monika we.

²¹ Omamanya omanene goompawe, kehe limwe li na uudhigu u thike pookilograma omilongo ne, oga koloka kegulu noga gwile kombanda yaantu. Nena aantu oya tuku Kalunga omolwoshiponga shika shoompawe, oshoka osha li oshinene noonkondo.

17

¹ Nena gumwe gwomaayengeli yaheyali mboka ye na iiyaha iheyali, okwe ya kungame nokwa lombwele ndje a ti: “Ila huka, ndi ku ulukile, nkene ohonda kamana, oshilando shiyaka oshinene sha tungilwa popepi nomilonga odhindji, tashi geelwa.

² Aakwaniilwa yokombanda yevi oya hondele nohonda ndjika, naantu yokombanda yevi oya kolwa, sho ya nu omaviinu goluhondelo lwayo.”

³ Ongame onda kwatwa kombepo nonda falwa komuyengeli mombuga. Mwiyaka onda mono mo omukiintu a kuutumba koshilikama oshitiligane sha nyolwa omadhina gomatukano kolutu lwasho aluhe. Oshilikama shika osha li shi na omitse heyali nooniga omulongo.

⁴ Omukiintu okwa li a zala onguwo ontiligane ya hondjelwa uulenga woshingoli nuumanya wondilo nomawe. Moshikaha she okwa li e na oshitenga shoshingoli shu udha iihuna noonyata dholuhondelo lwe.

⁵ Moshipala shomukiintu omwa li mwa nyolwa edhina eholekwa: “Babilon oshinene, yina yoohonda adhihe noyiihuna ayihe yomuuyuni.”

⁶ Nena onda dhimbulula kutya omukiintu okwa li a kolwa kombinzi yaantu yaKalunga noyaamboka ya dhipagwa molwaasho yi inekela Jesus. Ano sho nde mu mono, onda kumwa noonkondo.

⁷ Nena omuyengeli okwa pula ndje a ti: “Omulwashike wa kumwa? Otandi ke ku tseyithila oshiholekwa shomukiintu nguka noshoshilikama shoka she mu humbata, oshilikama shoka shi na omitse heyali nooniga omulongo.

⁸ Oshilikama shoka wa mono, osha li shi na nale omwenyo, ihe ngashingeyi kashi ko we. Ihe oshi li pokwaanduka mo molumbogo lwomuule notashi ka hanagulwa po. Nena aantu ayehe yokombanda yevi okuza keshito lyuuyuni, oomboka omadhina gawo inaaga nyolelwa membo lyaanamwenyo, otaa ka kumwa, sho taa ka tala oshilikama shoka. Oshoka osha li shi na omwenyo, ihe ngashingeyi; kashi ko we, ihe otashi ka holoka natango.

⁹ “Shika otashi pula oondunge nomayele. Omitse heyali odho oondundu heyali hoka kwa kuutumba omukiintu. Oondundu ndhika otadhi thaneke aakwaniilwa yaheyali:

¹⁰ yatano yomuyo oya sa nale, gumwe ota pangele natango nomutiheyali ine ya. Ihe ngele te ke ya, ota ka pangela owala okathimbo okafupi.

¹¹ Nokuli oshilikama shoka sha li ko, ihe ngashingeyi kashi ko we, osho omukwaniilwa omutihetatu. Eeno, osho gumwe gwomaakwaniilwa mbeyaka yaheyali yotango notashi ka yonagulwa po.

¹² “Ooniga omulongo ndhoka wa mono, odho aakwaniilwa omulongo mboka inaa lala natango iilongo, ihe otaa ka pewa oonkondo dhokupangela ongaakwaniilwa uule wotundi yimwe pamwe noshilikama.

¹³ Ayehe mbaka omulongo oye na elalakano limwe alike notaa ka gandja epangelo lyawo noonkondo dhawo koshilikama.

¹⁴ Oyo otaa ka kondjitha Onzigona, ihe Onzigona pamwe naalanduli ye aayithanwa, aahogololwa naainekelwa, ote ke ya sinda, oshoka oye Omuwa gwaawa nOmukwaniilwa gwaakwaniilwa.”

¹⁵ Nena omuyengeli okwa lombwele ndje a ti: “Omeya ngeyaka wa mono hoka kwa kuutumba ohonda, ogo iigwana, oongundu, omihoko dhaantu nomalaka.

¹⁶ Ooniga omulongo we dhi mono, nosho wo oshilikama, otayi ka tonda ohonda ndjoka. Oyo otaa ke yi hula ashihe shoka yi na notaye ke yi thiga yi li olutu lwowala. Oyo otaa ka lya po onyama yayo notaa ke yi lungunitha po nomulilo.

¹⁷ Oshoka Kalunga okwa pendutha moomwenyo dhawo ehalo lye, ya tse ompango yimwe noya gandje oonkondo dhawo dhokupangela koshilikama, sigo oohapu dhaKalunga dha gwanithwa.

¹⁸ “Ano omukiintu ngoka we mu mono, oye oshilando oshinene shoka tashi pangele aakwaniilwa yokombanda yevi.”

18

¹ Konima yaambika onda mono omuyengeli gulwe a kuluka megulu. Okwa li e na oonkondo oonene dhokupangela, neadhimo lye olya minikile evi alihe.

² Okwi igidha newi enene a ti: “Sha teka po! Babilon, oshilando oshinene sha teka po! Ngashingeyi sha ningi ehala lyoompwidhuli nolyoombepo oombwinayi. Oondhila dhomaludhi agehe ndhoka dha nyata nodhi tondike, omo dha tungila.

³ Oshoka oshilando shika osha kolitha aantu ayehe yokombanda yevi, sho she ya nwetha omaviinu goluhondelo lwasho. Aakwaniilwa yokombanda yevi oya hondele naantu yasho, naahalithi yiipindi yomuuyuni oya likola uuyamba owindji omoluuholume washo.”

⁴ Nena ondu uvu ewi lilwe ekwawo lya zi megulu nolya ti: “Zii mo mokati kawo, one aantu yandje! Iyoololii mo muyo! Inamu kwatathana noondjo dhawo; inamu ihilila omageelo gawo!

⁵ Oshoka oondjo dhasho odha ndumbala nodha thiki sigo okegulu, nuulunde washo Kalunga okwe u dhimbulukwa.

⁶ Shi ningileni naanaa ngaashi she mu ningile. Shi futitheni lwaali shi thike pushoka e shi longa. Udheni oshitenga shasho noshinuwa oshilulu shi vule lwaali shoka she mu longekidhilile.

⁷ Shi peni omahepeko noluhodhi yi thike pesimano nopuukengeli mboka she u ikongela shoshene. Oshoka oshi li po tashi ilombwele tashi ti: ‘Ongame otandi kuutumba mpaka, omukwaniilwa omukuluntu. Kandi shi omuselekadhi noitandi ka adhika nando koluhodhi!’

⁸ Onkee ano iiponga ayihe otayi ke shi adha esiku limwe alike. Eeno, oluhodhi nondjala. Otashi ka fikwa po nomulilo, oshoka Omuwa Kalunga ngoka te shi pangula, oye omunankondo.”

⁹ Aakwaniilwa yokombanda yevi mboka ya li haa hondele naantu yasho noya kala muufukedhi pamwe nayo, otaa ka lila nokuyemata omolwoshilando shika, sho taa mono olwithi lwompile yasho.

¹⁰ Oyo otaa ka kala ya thikama kokule, oshoka oya tilithwa kokweehamekwa kwasho notaa ti: “Iihuna oyi thike peni! Oshilando ngoye oshinene, Babilon! Egeelo lyoye olye ku adha muule wotundi yimwe ayike.”

¹¹ Aahalithi yokombanda yevi nayo wo otaa lili nokunika oluhodhi omolwasho, oshoka kapu na we ngoka ta landa iinima yawo.

¹² Kape na we ngoka ta landa oshingoli, oshisiliveli, omamanya gondilo nomagwe gawo; iiyata yawo yoliina, yopurpuri, yotheyi naambyoka iitiligane; niizimba iiwanawa, iihongomwa mbyoka ya hongwa momayego goondjamba nomiiti yondilo, mosheela shoshikushu, mosheela oshiluudhe nomemanya lyamarimori;

¹³ omunkunzi, omugwayo gwomafufu, omugwayo gwezimba ewanawa neka lyokutsinina; omaviinu nomagadhi, uusila niilya, oongombe noonzi, oonkambe nomatemba, aapika noomwenyo dhaantu nokuli.

¹⁴ Aahalithi otaye shi lombwele taa ti: “Iinima ayihe iiwanawa mbyoka wa li wa hala okulikola, oya kana po, nuuyamba woye auhe neopalo lyoye lya pepuka po, noku na we mpoka to ke yi mona.”

¹⁵ Aahalithi mboka ya ningi aayamba, sho ya landitha moshilando shiyaka, otaa ka kala ya thikama kokule, oshoka oya tilithwa kokweehamekwa kwasho. Oyo otaa ka lila nokunika oluhodhi,

¹⁶ e taa ti: “Iihuna oyi thike peni! Iihuna oyi thike peni yoshilando oshinene! Okwa li hashi izaleke oonguwo dholiina noonguwo oontiligane noshi iyopalekitha uulenga woshingoli, nomamanya gondilo nomagwe.

¹⁷ Ihe uuyamba mbuka auhe she u kanitha muule wotundi yimwe ayike!” Aakuluntu yoosikepa ayehe, aayendi yomoosikepa, oonakulonga moosikepa naayendifuta ayehe oya thikama kokule

¹⁸ noyi igidha mokule, sho ya mono olwithi lwompile yasho ya ti: “Kaku na nando oshilando shimwe oshinene shi thike pushika!”

¹⁹ Oyo oyi ifundile omavi momitse noya lili nokunika oluhodhi ya ti “Iihuna oyi thike peni! Iihuna oyi thike peni ya adha oshilando shika oshinene! Aantu ayehe mboka haa ende momafuta noosikepa, oya mono uuyamba owindji omolwoshilando shika. Ihe uuyamba washo owa pepuka po muule wotundi yimwe ayike.

²⁰ “Nyanyukwa, ngoye egulu, omolwokuhanagulwa po kwasho! Nane aantu yaKalunga, aayapostoli naahunganeki, nyanyukweni! Oshoka Kalunga okwe shi geelele uuwinayi auhe mboka she mu ningile.”

²¹ Nena omuyengeli omunankondo okwa kutha emanya li thike pemanya enene lyokukweya uusila nokwe li umbile mefuta e ta ti: “Osho ngeyi oshilando shika oshinene Babilon tashi ka ekelwahi polumwe aluke noitashi ka monika we nando esiku limwe.

²² Olwiimbo lwaahiki yokashandja newi lyaayimbi nolyaahiki yohiya noyomankuma itali ka uvika we tali zi mungoye. Maantu yaandjeni itamu ka monika we onkulungu yoshilonga shasha. Osho wo itamu ka uvika we ekolokoto lyomamanya gokukweya uusila.

²³ Uuyelele wolamba itau ka monika we mungoye newi lyomufuko nolyombushiki itali ka uvika mo we. Aahalithi yaandjeni oya li aanankondo ye vule aahalithi yomuuyuni auhe, nuumpulile woye owa pukitha aantu ayehe yomuuyuni.”

²⁴ Babilon sha geelwa, oshoka musho omwa adhika ombinzi yaahunganeki noyaantu yaKalunga. Eeno, musho omwa monika ombinzi yaantu ayehe mboka ya dhipagwa kombanda yevi.

19

¹ Konima yaashika ondu uvu ewi lya fa ewi lyongundu onene yaantu megulu tali ti: “Simanekeni Kalunga! Ehupitho, esimano noonkondo odhaKalunga ketu.

² Omapangulo ge ogu uka nogoshili! Oshoka oye okwa pangula ohonda kamana ndjoka ya yono po evi alihe noluhondelo lwayo. Kalunga okwe yi geele molwaashoka ya dhipaga po aapiya ye.”

³ Ongundu oyi igidha ishewe ya ti: “Simanekeni Kalunga! Olwithi lwompile yoshilando shika oshinene ohalu itumbu pombanda aluhe sigo aluhe.”

⁴ Nena aakuluntu mbeyaka omilongo mbali nayane niinamwenyo mbiyaka ine oyi ihata pevi noya simaneke Kalunga ngoka a kuutumba koshipangelapundi noya ti: “Amen! Simanekeni Kalunga!”

⁵ Nena moshipangelapundi omwa zi ewi lya ti: “Simanekeni Kalunga ketu, aapiya ye amuhe naantu amuhe, aanenentu naadhinwa, mboka hamu mu tila!”

⁶ Opo ihe ondu uvu ewi lya fa lyongundu onenenene yaantu, ongepopomo lyegwo enene lyomeya nongendundumo enene lya ti: “Simanekeni Kalunga! Oshoka Omuwa Kalunga ketu, Omunankondoadhihe, oye Omukwaniilwa!

⁷ Tu nyanyukweni tse tu ligoleni, tu simanekeni uunene we! Oshoka ethimbo lyohango yOnzigona olya thikana nomufuko gwe okwi ilongekidha.

⁸ Oye okwa pewa, a zale oonguwo oontokele dholiina dha yela notadhi adhima. Oonguwo ndhika dholiina odho iilonga yuuyuuki yaantu yaKalunga.”

⁹ Omuyengeli okwa lombwele ndje a ti: “Nyola to ti: Aanelago oomboka ya hiywa koshituthi shohango yOnzigona.” Opo ihe okwa gwedha ko a ti: “Oohapu ndhika dhaKalunga odhoshili.”

¹⁰ Nena ondi ihata pevi poompadhi dhe, ndi mu galikane, ihe okwa lombwele ndje ta ti: “Ino shi yelekela nando! Oshoka ngame omupiya mukweni nogwomooyakweni ayehe mboka haa dhiginine oshili ndjoka ya hololwa kuJesus. Galikana Kalunga.” Oshoka oshili ndjoka Jesus e yi holola, oyo ndjoka tayi popitha aahunganeki.

¹¹ Nena onda mono egulu lye eguluka nomo mwa li mu na okakambe okatokele. Omukayili gwako ohi ithanwa Omwiinekelwa nOmunashili. Oye ota pangula nuuyuuki nota kondjo olugodhi.

¹² Omeho ge oga li ga fa oohandje dhomulilo nokwa li a zala iishani oyindji komutse gwe. Okwa nyolwa edhina, ihe kape na nando ogumwe ngoka e li tseya kakele ke mwene.

¹³ Onguwo ndjoka a zala oya li ya yaywa mombinzi, nedhina lye olyo “Ohapu yaKalunga”.

¹⁴ Omatanga gaakwiita yomegulu oge mu landula, ya londa kuukambe uutokele noya zala oonguwo oontokele dholiina.

¹⁵ Mokana ke omwa zi egongamwele lya tsa, ndyoka ta ka sinda nalyo iigwana. Oye ote ke yi pangela nondhimbo yosheela nota ka kola nokutsipulila moshikolelo shomaviinu gondjahi onene yaKalunga Omunankondoadhihe.

¹⁶ Konguwo ye noketundji lye okwa li kwa nyolwa edhina ndika: “Omukwaniilwa gwaakwaniilwa nOmuwa gwaawa”.

¹⁷ Nena onda mono omuyengeli a thikama ketango. Oye okwi igidha newi enene ta lombwele oondhila ndhoka hadhi tuka mombepo pokati kegulu, a ti: “Ileni, gongaleni amuhe koshituthi oshinene shaKalunga!

¹⁸ Ileni, mu lye onyama yaakwaniilwa, yoondjayi dhiita noyaakwiita, onyama yuukambe noyaakayili yawo, onyama yaantu ayehe, yaapika noyaavalwa, yaanenentu noyaadhinwa.”

¹⁹ Nena onda mono oshilikama naakwaniilwa yokombanda yevi nomatanga gaakwiita ya gongala, ya kondjithe ngoka a londa okakambe naakwiita ye.

²⁰ Oshilikama osha kwatwa, osho wo omuhunganeki omufundja ngoka a longo iikumithalonga montaneho yasho nokupukitha aantu mboka ye na endhindhiliko lyasho, naamboka ya li haa galikana oshiyelekela shasho. Oshilikama nomuhunganeki omufundja oyu umbilwa mefuta lyomulilo ye na omwenyo ngoka tagu hohelithwa osulufuli.

²¹ Aakwiita yawo oya dhipagwa po negongamwele ndyoka lya zi mokana kaangoka a londa okakambe; noondhila adhihe odha kuta onyama yawo.

20

¹ Nena onda mono omuyengeli ta kuluka e na oshipatululo sholumbogo lwomuule nelyenge enene.

² Oye okwa kwata oshikoko, eyoka ndyoka ekulu hali ithanwa omuhindadhi nenge Satana, nokwe mu manga, a kale a mangwa ngaaka uule woomvula eyovi limwe.

³ Omuyengeli oku umbile Satana molumbogo lwomuule nokwe lu pata noshipatitho, opo kaa vule we okupukitha aantu, sigo oomvula ndhoka eyovi limwe tadhi piti po. Konima yaashika ota ka mangululwa uule wokathimbo okafupi kowala.

⁴ Opo ihe onda mono iipangelapundi, naamboka ya kuutumba ko, oya pewa oonkondo dhokupangula. Ongame nonda mono oomwenyo dhaamboka ya dhipagwa molwaasho taa uvitha oshili yaJesus noohapu dhaKalunga. Oyo inaa galikana nando oshilikama nenge oshiyelekela shasho nongaashi inaa ndhindhilikwa noshihako shoshilikama miipala nomiikaha yawo. Oyo oya ningi omwenyo noya kala nokupangela pamwe naKristus uule woomvula eyovi limwe.

⁵ Ihe oshihupe shaasi mboka ya hupu ko, inaa ninga nando omwenyo, sigo oomvula ndhoka eyovi limwe dha pu ko. Ndika olyo eyumuko lyotango lyaasi.

⁶ Aanelago naalalekwa nuuyamba oomboka taa mono ompito yokuyumudhwa meyumuko ndika lyotango. Eso etiyali itali vulu nando oku ya pangela, ihe otaa ka ninga aayambi yaKalunga noyaKristus notaa ka pangela pamwe naKristus uule woomvula eyovi limwe.

⁷ Oomvula eyovi limwe ngele dha piti po, Satana ota ka piithwa mo mondholongo,

⁸ nota ka tsikila okupukitha aantu ayehe mboka ya kala kombanda yevi alihe, kokutya Gog naMagog. Eeno, Satana ote ke ya gongela ayehe, ya hinge iita, notaku ka kala aantu oyendji yaa shi okuyalulwa ya fa omawe gehekevi lyomooha dhefuta.

⁹ Oyo otaa ka halakanena evi alihe notaa ka kundukidha ontanda yaantu yaKalunga noshilando shoka Kalunga e shi hole. Ihe omulilo otagu ka za megulu e tagu ya lungunitha po.

¹⁰ Nena omuhindadhi ngoka a li he ya pukitha, otu umbilwa mefuta lyomulilo nosulufuli moka mwa adhika mu umbilwa nale oshilikama nomuhunganeki omufundja. Oyo otaa ka kala taa hepekwa omutenya nuusiku aluhe sigo aluhe.

¹¹ Nena onda mono oshipangelapundi oshinene oshitokele nagumwe a kuutumba ko. Evi negulu oya yi ontuku yoshipala shaangoka a kuutumba koshipangelapundi noinayi monika we.

¹² Opo ihe onda mono oonakusa, aanenentu naadhinwa ya thikama komeho goshipangelapundi. Omambo oga li ga pandjwa, nembo ekwawo, embo lyaanamwenyo, olya pandjwa. Oonakusa oya pangulwa noya tokolelwa shaa ngoka ngaashi e shi ilongela, ngashika sha nyolwa membo.

¹³ Nena efuta olya gandja aasi mboka ya sile mulyo. Eso noshaasi oya gandja wo aasi mboka ya li mo, naayehe oya pangulwa noya tokolelwa, ngaashi ye shi ilongela.

¹⁴ Opo ihe eso noshaasi oyu umbilwa mefuta lyomulilo. Efuta ndika lyomulilo olyo eso etiyali.

¹⁵ Kehe ngoka edhina lye inaali nyolelwa membo lyaanamwenyo, oku umbilwa mefuta lyomulilo.

21

¹ Ongame nonda mono egulu epe nevi epe. Oshoka egulu lyotango nevi lyotango oya hula po nefuta kali ko we.

² Opo ihe onda mono Oshilando oshiyapuki, Jerusalem oshipe, tashi kuluka megulu tashi zi kuKalunga, sho opalekwa nosha longekidhwa, ngashika omufuko a zalekelwa okutsakaneka omulumentu gwe.

³ Nena ondu uvu ewi enene lya popi mokule tali zi moshipangelapundi lya ti: “Ngashingeyi egumbo lyaKalunga oli li paantu! Oye ota ka kala pamwe nayo, notaa ka ninga aantu ye. Kalunga mwene ota ka kala pamwe nayo nota ka ninga Kalunga kawo.

⁴ Oye ota ka theta omahodhi agehe momeho gawo. Oko noitaku ka kala we eso, oluhodhi, eliko nenge uuwehame. Oshoka iikulu oya hula po.”

⁵ Nena ngoka a kuutumba koshipangelapundi, okwa popi a ti: “Tala, ngashingeyi iinima ayihe otandi yi ningi iipe!” Okwa lombwele ndje wo a ti: “Nyola oohapu ndhika, oshoka odhoshili nodhi shi okwiinekelwa.”

⁶ Opo ihe okwa popi a ti: “Sha gwanithwa! Ongame Alfa naOmega, etameko nehulilo. Kehe ngoka a sa enota, otandi ke mu pa, a nwe moluthithiya lwomeya gomwenyo omagano.

⁷ Shaa ngoka ta sindana, otandi ke mu pa iinima mbika ayihe. Ongame otandi ka ninga Kalunga ke, noye ota ka ninga omumwandje.

⁸ Ihe aambanda, aakaaneitaalo, aagoyokithi, aadhipagi, aahondeli, oompulile, aasimaneki yiimenka naafundja ayehe — eha lyawo oli li molumbogo lwa hwama omulilo nosulufuli. Ndika olyo eso etiyali.”

⁹ Nena gumwe gwomaayengeli yaheyali mboka ye na iiyaha iheyali yu udha omageelo gaheyali gahugunina, okwe ya kungame nokwa lombwele ndje a ti: “Ila huka, ndi ku ulukile omufuko, omukiintu gwOnzigona.”

¹⁰ Nena onda kwatwa kOmbepo, nomuyengeli okwa fala ndje kondungu yondundu ondeendeka. Oye noku ulukile ndje Oshilando oshiyapuki, Jerusalem, sha zi megulu kuKalunga,

¹¹ noshi na eadhimo lyaKalunga. Oshilando shiyaka osha li tashi adhima sha fa emanya lyondilo, ongojaspes, nosha yela sha fa okristali.

¹² Osha li shi na ekuma enene nele, li na omiyelo omulongo nambali dha langelwa kaayengeli omulongo nayaali. Komiyelo ndhika omulongo nambali okwa li kwa nyolwa omadhina gomazimo gAaisraeli omulongo nagaali.

¹³ Kombinga kehe okwa li ku na omiyelo ndatu: okuza kuuzilo ndatu, kuumbugantu ndatu, kuumbangalantu ndatu nokuuninginino ndatu.

¹⁴ Ekuma lyoshilando olya li lya tungilwa komamanya omulongo nagaali, nokugo okwa nyolwa omadhina gaayapostoli yOnzigona omulongo nayaali.

¹⁵ Omuyengeli ngoka a popi nangame, okwa li e na oshiyelekithoshiti shoshingoli shokuyeleka oshilando, omiyelo dhasho nekuma lyasho.

¹⁶ Oshilando osha li shi na ookolonela ne noshi thike pamwe muule nomomutamo gwasho. Omuyengeli okwa yeleke oshilando noshiyelekithoshiti she: osho osha li shi na uule wookilometa omayovi gaali nomathele gatatu, omutamo nomutumbo gwasho oya li yi thike pamwe nuule washo.

¹⁷ Omuyengeli okwa yeleke wo ekuma nolya li li na uule woometa omilongo hamano pashiyelekitho shoka omuyengeli e shi longitha.

¹⁸ Ekuma olya li lya tungwa nojaspes, noshilando sho shene osha li sha tungwa noshingolielela oshiyelele tashi tayima ngekende.

¹⁹ Omamanya gekankameno lyekuma lyoshilando oga li go opalekwa nuulenga womamanya gondilo gomaludhi agehe. Emanya lyotango lyekankameno olya li jaspes, etiyali osafire, etitatu oagate, etine osmaragdi,

²⁰ etitano oniks, etihamano okarnelia, etiheyali okrisoliti yoshunga, etihetatu oberili, etimugoyi otopasi, etimulongo okalesedon, etimulongo nolyotango oturkoisi, etimulongo netiyali oametisti.

²¹ Omiyelo ndhika omulongo nambali odho uuwe omulongo nuuyali, nokehe omweelo ogwo okawe kamwe. Epandaanda lyoshilando olya li lya tungwa noshingolielela sha yela ngekende.

²² Ongame inandi mona mo nando otempeli moshilando shiyaka, oshoka Omuwa Kalunga, Omunankondoadhihe, nOnzigona oyo otempeli yasho.

²³ Oshilando shika inashi pumbwa etango nenge omwedhi oku shi minikila, oshoka eadhimo lyaKalunga otali shi minikile, nOnzigona oye olamba yasho.

²⁴ Iigwana yokombanda yevi otayi ka enda muuyelele washo, naakwaniilwa yokombanda yevi otaa ke eta uuyamba wawo musho.

²⁵ Omiyelo dhoshilando shika ihadhi edhilwa po nando, oshoka uusiku itau ka kala ko we.

²⁶ Esimano nuuyamba wiigwana otayi ka etwa moshilando shika.

²⁷ Ihe shaa shoka sha nyatekwa kuulunde, itashi yi mo nando, nakehe ngoka ta longo iilonga tayi sitha ohoni, ita yi mo, nenge ha popi iifundja. Otamu yi owala mboka ye na omadhina ga nyolelwa membo lyaanamwenyo.

22

¹ Omuyengeli oku ulukile ndje wo omulonga gwomeya gomwenyo omuyelele, tagu tayima ngekende notagu fuluka tagu zi moshipangelapundi shaKalunga noshOnzigona,

² e tagu kunguluka tagu ende pokati kepandaanda lyoshilando. Handika nohandiyaka yomulonga oku na omuti gwomwenyo, ngoka hagu imi lwomulongo nalwaali momumvo, lumwe momwedhi kehe. Omafo gomuti nguka ogokwaaludha aantu.

³ Moshilando kamu na sha sha thingwa kuKalunga. Ihe otamu ka kala oshipangelapundi shaKalunga noshOnzigona, naapiya ye otaye mu yakula.

⁴ Otaa ka kala taa tala oshipala she, nedhina lye olya nyolwa miipala yawo.

⁵ Itaku ka kala we uusiku, noyo itaa ka pumbwa we uuyelele woolamba nenge wetango, oshoka Omuwa Kalunga ota ka kala uuyelele wawo, oyo notaa ka pangela ngaakwaniilwa aluhe sigo aluhe.

⁶ Nena omuyengeli okwa lombwele ndje a ti: “Oohapu ndhika odhoshili nodhi shi okwiinekelwa. Nokuli Omuwa Kalunga ngoka ha pe aahunganeki Ombepo ye, okwa tumu omuyengeli gwe, a tseyithile aapiya ye shoka tashi ka ningwa.”

⁷ Jesus ota ti: “Tala, otandi ya mbala! Aanelago oomboka taa vulika koohapu dhomahunganeko gomembo ndika!”

⁸ Ongame Johannes, ngoka ndu uvu nonda mono iinima mbika ayihe. Ano sho nde yi uvu nonde yi mono, onda tsu oongolo poompadhi dhomuyengeli ngoka u ulukile ndje iinima mbika, ndi mu galikane.

⁹ Ihe okwa lombwele ndje a ti: “Ino shi yelekela nando! Ngame omupiya omuyakuli pamwe nangoye nopamwe naamwaho aahunganeki naayehe mboka haa vulika koohapu dhomembo ndika. Galikana Kalunga!”

¹⁰ Oye nokwa lombwele ndje a ti: “Oohapu dhehunganeko lyomembo ndika ino dhi holeka, oshoka ethimbo olya thikana, uuna iinima mbika ayihe yi na oku ka gwanithwa.

¹¹ Onkee ano kehe ngoka ta longo uulunde, na tsikile natango okwiinyateka. Ihe ngoka ta longo uuwanawa, na tsikile natango okulonga uuwanawa; naangoka ti iyapula, na dhiginine natango okukala omuyapuki.”

¹² Jesus ota ti: “Tala, otandi ya mbala! Otandi ke ya ndi na ondjambi okupa kehe gumwe, ngaashi naanaa e shi ilongela.

¹³ Ongame Alfa naOmega, omutango nomuhugunini, etameko nehulilo.

¹⁴ “Aanelago oomboka taa yogo oonguwo dhawo, dhi kale dha yela, opo ya wape okulya iiyimati yomuti gwomwenyo nokuya moshilando taa pitile miiyelo.

¹⁵ Ihe kondje yoshilando otaku ka kala aagoyokithi, oompulile, aahondeli, aadhipagi, aasimaneki yiimenka naamboka aafundja moohapu nomiilonga yawo.

¹⁶ “Ongame Jesus, ngoka nda tumu omuyengeli gwandje, e mu tseyithile iinima mbika momagongalo. Ongame omuvalwa gwomezimo lyaDavid; onyothi ondjelele yongula.”

¹⁷ Ombepo nomuyalekwa otaa ti: “Ila!” Kehe ngoka tu uvu ko, na tye: “Ila!” Kehe ngoka a sa enota, ne ye; naangoka a hala, na taambe omeya gomwenyo omagano.

¹⁸ Ongame Johannes, otandi kumagidha noonkondo kehe ngoka tu uvu oohapu dhehunganeko lyomembo ndika: ngele oku na ngoka ta gwedhele ko sha kudho, Kalunga ote ke mu gwedhela ko kegeelo lye omageelo ngoka ga nyolwa membo ndika.

¹⁹ Nongele oku na gumwe ngoka ta dhimi mo sha moohapu dhehunganeko lyomembo ndika, Kalunga ite ke mu pitika okulya iiyimati yomuti gwomwenyo nokukala mOshilongo oshiyapuki, ngaashi sha nyolwa membo ndika.

²⁰ Oongoka ta hokolola iinima mbika ayihe, ota ti: “Eeno, shili! Ngame otandi ya mbala!” Eewa ano. Ila, Omuwa Jesus!

²¹ Esilohenda lyOmuwa Jesus nali kale nane amuhe. Amen.