1 Kalunga okwa lombwele nale ootate olwindji pamikalo odhindji momakana gaahunganeki.
2 Ihe pomasiku ngaka gahugunina ote tu popitha mOmwana, ngoka Kalunga e mu shititha uuyuni, niinima ayihe pehulilo otayi ka ninga ye.
3 Oye oku na eadhimo lyaKalunga nondjelo yaKalunga mwene. Oye ota humbata eshito alihe noonkondo dhohapu yomokana ke. Sho a yelitha aantu koondjo dhawo, okwa kuutumba kolulyo lwaKalunga, Omunankondoadhihe megulu.
4 Kalunga okwa lenge Omwana, a ninge omunene e vule aayengeli nokwe mu luku edhina li vule gawo.
5 Oshoka Kalunga ina tya nando olumwe kugumwe gwomaayengeli: “Ngoye omumwandje; nena ndjika nda ningi ho.” Kalunga ina lombwela wo nando ogumwe gwomaayengeli: “Otandi ka ninga ho, nenge oto ka ninga omumwandje.”
6 Oshoka Kalunga mokutuma Omwana, omutango gwe, muuyuni okwa ti wo: “Aayengeli yaKalunga ayehe oye na oku mu simaneka.”
7 Kombinga yaayengeli okwa ti: “Kalunga ota ningi aayengeli ye oombepo, naayakuli ye ote ya ningi omalaka gomulilo.”
8 Ihe kOmwana Kalunga okwa ti: “Ongoye Kalunga, oshipangelapundi shoye otashi kala aluheluhe. Oshilongo shoye oto shi lele nuuyuuki.
9 Ongoye ou hole shoka shu uka nou tonde shoka sha puka; onkee Omuwa Kalunga koye okwe ku lenge nokwe ku pe esimano e te ku nyanyudha nenyanyu enene li vule lyayalwe.”
10 Kombinga yOmwana okwa ti wo: “Omuwa, petameko ongoye wa shiti evi, ongoye wa shiti egulu niikaha yoye mwene.
11 Agehe otaga hulu po, ihe ngoye oto kala po. Agehe otaga kulupa ngoonguwo.
12 Ongoye to ke ga gonya ngonguwo, oto ke ga lundulula ngomizalo. Ihe ngoye oto kala ngaashi u li noito kulupa.”
13 Oshoka Kalunga ina lombwela nando olumwe gumwe gwoomaayengeli ye: “Kuutumba mpaka kolulyo lwandje, sigo tandi tula aatondi yoye kohi yoompadhi dhoye, ya ninge oshilyatelo shoye”
14 Aayengeli oolye ano? Oyo ayehe oombepo ndhoka tadhi yakula Kalunga. Ohaa tumwa kuye okukwatha aantu mboka taa ka hupithwa.
1 Onkee ano otu na okukanyatela koshili ndjoka twe yi uvu, opo twaa falafalwe kiifundja.
2 Nokuli elaka ndyoka aayengeli ye li eta, olyo lyoshili. Shaa ngoka inee li landula noina vulika kulyo, okwa geelwa ngaashi i ilongela.
3 Tse otatu vulu tuu okuya ontuku, ngele katu na ko nasha nehupitho li thike mpaka? Omuwa mwene okwe li tu uvithile tango, naamboka ye mu uvu ko, oye tu hokololele kutya osho lela.
4 Pethimbo tuu ndyoka Kalunga okwa gwedhele ko ehokololo lye kehempululo lyawo, sho a longo iilongankondo niikumithalonga nomandhindhiliko ogendji. Oye okwa gandja wo omagano gOmbepo Ondjapuki pahalo lye mwene.
5 Oshoka Kalunga ina lenga aayengeli, ya ninge aapangeli yuuyuni mboka a li poku u shita. Tashi ti uuyuni mbuka tatu popi.
6 Ihe okwa nyolwa wo peha limwe mOmanyolo: “Kalunga, omuntu omushike, sho ho mu dhiladhila? Sho ho sile omuntu gwanathangwa oshimpwiyu?”
7 Owa tile: “Na shonopekwe okathimbo kowala e vulike kaayengeli. Owe mu pe eadhimo ngaashi omukwaniilwa,
8 nowe mu ningi omupangeli gwaayihe.” Tashi ti, Kalunga okwa shiti omuntu omupangeli gwaayihe. Shika osha kwatelela mo iinima ayihe. Ihe katu wete natango kutya omuntu oye omupangeli gwaayihe.
9 Ihe otu wete Jesus oye a shonopekwa okathimbo okafupi e vulike kaayengeli, opo a sile aantu ayehe omolwesilohenda lyaKalunga. Otu mu wete nena a zalekwa eadhimo nesimano, molwaasho a sile ayehe.
10 Kalunga, omushiti nomuhumbati gweshito alihe, okwa hala okuthikitha aana ye oyendji meadhimo. Onkee okwe shi tala she mu opalela okulenga Jesus, a kale a pwa omolwomahepeko ge.
11 Jesus okwa yelitha aantu koondjo dhawo nokwa ningi omumwahe naamboka ya yelithwa koondjo. Onkee ano ite ya idhimbike oku ya ithana aamwayina.
12 Ngaashi ta ti: “Kalunga, otii ku hokolola paamwameme; Otii ku imbile omaimbilo montaneho yegongalo alihe.”
13 Oye ota ti wo: “Ondi inekela Kalunga.” Niishewe ota ti: “Ongame nguka naanona mboka Kalunga e ya pe ndje.”
14 Aanona mbaka oyo aantu yonyama nombinzi. Onkee Jesus okwa faathana nayo muukwatya wawo, opo a hanagule po neso lye mwene omuhindadhi, ngoka he eta eso.
15 Osho ngeyi okwa mangulula aantu muumbanda weso, moka ya li muupika okukalamwenyo kwawo akuhe.
16 Oshoka Jesus ine ya okukwatha aayengeli, ihe enyolo otali ti: “Ota kwatha oluvalo lwaAbraham.”
17 Omolwaashika okwa li e na okufaathana naamwayina miinima ayihe, opo a ninge omuyambi omukuluntu gwawo omunamutimahenda nomwiinekelwa meyakulo lye koshipala shaKalunga. Osho ngaaka oondjo dhaantu otadhi dhimwa po.
18 Onkee ano ye mwene sho a makelwa nokwa hepekwa, ota vulu okukwatha mboka taa makelwa.
1 Aamwameme ne aakriste, ne mbo mwi ithanwa kuKalunga. Taaleleni Jesus, ngoka a tumwa kuKalunga, a kale omuyambi omukuluntu gwehempululo lyeitaalo lyetu.
2 Oshoka Jesus okwa li omwiinekelwa koshipala shaKalunga, ngoka e mu hogolola okulonga iilonga mbika, ongaashi naanaa Moses a li omwiinekelwa melelo lyegumbo lyaKalunga.
3 Omutungi gwegumbo oku na esimano enene li vule lyegumbo lyo lyene. Onkee Jesus oku na esimano enene li vule lyaMoses.
4 Egumbo kehe oli na omutungi gwalyo, ihe ngoka a tungu ayihe, oKalunga.
5 Moses okwa li omwiinekelwa megumbo lyaKalunga. Oye okwa li omuyakuli nokwa popi iinima mbyoka Kalunga ta ka popya konakuyiwa.
6 Ihe Kristus, sho e li po Omuna gwaKalunga, oye omwiinekelwa miilonga yomegumbo lyaHe. Otse egumbo lyaKalunga, ngele tatu dhiginine nomukumo notu na einekelo okwiinekela shoka twe shi tegelela.
7 Oshoka ngaashi Ombepo Ondjapuki ta ti: “Onena tuu ndjika ngele tamu uvu ewi lyaKalunga,
8 inamu ikukutika, ngaashi mwa tsile ondumbo naKalunga, sho mwa li mwe mu hindi uuna ndwiyaka mombuga,
9 moka oohokulu ya makelele ndje e taa hindi ndje. Kalunga osho ta ti, nando oya monene shoka nda longo muule woomvula omilongo ne.
10 Onkee onda li nda geele aantu mbeyaka nonda ti: ‘Oyo oya puka aluhe momadhiladhilo gawo. Oyo inaa ilonga nando okutseya oondjila dhandje.’
11 Ngame onda li nda geya nonda gana kutya: ‘Kaye na mpoka naa ke ya, ya vululukwe pungame!’ ”
12 Aamwameme ne! Kotokeni, kwaa kale nando ogumwe gwomune e na omwenyo omwiinayi gwaa na eitaalo notagu iteka Kalunga omunamwenyo.
13 Kumagidhathaneni esiku kehe, manga taku tiwa “onena”, opo kwaa kale nando ogumwe ta fundjalekwa kuulunde e ti ikukutike.
14 Otse oyaKristus, ihe ongele tatu dhiginine sigo opehulilo einekelo ndyoka twa tameke nalyo.
15 Enyolo otali ti: “Onena ndjika nge tamu uvu ewi lyaKalunga, inamu ikukutika, ngaashi mwe shi ningile nale, uuna mwa tsile ondumbo naKalunga.”
16 Oolye ano yu uvu ewi lyaKalunga noya tsu ondumbo naye? Oyo tuu mboka ya tembudhwa kuMoses muEgipiti.
17 Oolye ano mboka Kalunga e ya geele uule woomvula omilongo ne? Oyo tuu mbeyaka ya yono e taa sile mombuga.
18 Kalunga okwa popi oolye, sho a tile: “Oyo kaye na mpoka naa ke ya, ya vululukwe pungame.” Oye okwa popi aantu mboka ya li ya tsu ondumbo naye.
19 Ano ngashingeyi otwa mono kutya, inaa vula okuya mo, oshoka oya li kaaye na eitaalo.
1 Ano ngashingeyi Kalunga okwe tu pe euvaneko, tu vule okuya mo, tu ka vululukwe puye. Tu kotokeni ano, opo kwaa kale nando ogumwe gwomutse ta puka ondjila yokuthika mo.
2 Oshoka elaka etoye otwe li uvu ngashika oyo. Elaka oye li uvu, ihe inali ya kwatha sha. Oshoka nando ye li uvu, inaye li taamba meitaalo.
3 Ihe tse mbaka twi itaala, otatu yi mo, tu ka vululukwe puKalunga. Ngaashi naye wo ta ti: “Ngame onda geya e te gana: ‘Oyo kaye na mpoka naa ke ya mo, ya vululukwe pungame.’ ” Kalunga nando ota popi ngeyi, iilonga ye oya li ya pwa, sho a shiti uuyuni.
4 Oshoka palwe mOmanyolo otamu popiwa esiku etiheyali taku tiwa: “Kalunga okwa vululukwa esiku etiheyali kiilonga ye ayihe.”
5 Ihe otaku tiwa wo: “Oyo kaye na mpoka naa ke ya mo, ya vululukwe pungame.”
6 Mbeyaka yu uvu tango elaka etoye, oyo inaa ya mo, ya ka vululukwe puKalunga, oshoka oya li inaa itaala. Ihe oku na yamwe ya pitikilwa okuya mo, ya vululukwe puKalunga.
7 Shika otashi hololwa, sho taku tiwa: “Kalunga oku utha esiku lilwe ndyoka hali tiwa: Onena.” Oye okwe li popya moomvula dhonale mokana kaDavid, sho ta ti: “Onena tuu ndjika nge tamu uvu ewi lyaKalunga, inamu ikukutika.”
8 Oshoka ando Josua okwa li a thikithile oshigwana mevululuko lyaKalunga, ando Kalunga ina ka popya we komeho evululuko ekwawo.
9 Onkee ano oku na natango evululuko lyaantu yaKalunga, ongaandyoka lyaKalunga, sho a vululukwa esiku etiheyali.
10 Oshoka shaa ngoka a yi mo, a vululukwe puKalunga, ota vululukwa, ngashika Kalunga a li a vululukwa kiilonga ye.
11 Onkee ano tu lalakaneni okuya mo, tu ka vululukwe puKalunga. Inapu kala nando ogumwe gwomutse itaa vulika ngashika mbeyaka, ndele inaa thika mo we.
12 Oshoka oohapu dhaKalunga odhi na omwenyo nodhi na oonkondo dhokulonga sha. Odho odhi na omayego dhi vule egongamwele lyoongenge mbali. Otadhi tete e tadhi adha sigo opuutsakaneno womwenyo nombepo, woongolo nomongo. Otadhi holola puuyelele omahalo nomadhiladhilo gomomitima dhaantu.
13 Oshoka kaku na nando oshinima shimwe sha holekwa Kalunga. Kehe shimwe shomeshito oshi li puuyelele montaneho yaKalunga, ngoka tu na oku ke mu hokololela ayihe mbyoka twa ninga.
14 Tu dhiginineni ano eitaalo ndyoka tatu li hempulula. Oshoka otu na omuyambi omukuluntu e vule ayehe, ngoka a thiki koshipala shaKalunga. Oye Jesus, Omuna gwaKalunga.
15 Omuyambimukuluntu gwetu ke shi ngoka ku uvitile uunkundi wetu olukeno, ihe oye ngoka a makelwa miinima ayihe ngashika tse, ihe ina yona.
16 Tu yeni koshipangelapundi shesilohenda ano tu na omukumo, hoka tatu ka silwa ohenda nolukeno. Esilohenda ndyoka otali tu kwatha pethimbo lyo opala.
1 Omuyambimukuluntu kehe oha hogololwa maantu nota yoololelwa okuyambela Kalunga peha lyawo. Oha gandja omagano nomayambo omolwoondjo.
2 Onkee ano ye mwene sho e li po omunkundi miinima ayihe, ota vulu okusila ohenda mboka yaa na owino nohaa puka.
3 Ano ye mwene sho e li po omunkundi, ke na okuyamba omayambo omolwoondjo dhaantu adhike, ihe nomolwoondjo dhe mwene wo.
4 Kape na nando ogumwe ti ikuthile esimano lyokuninga omuyambi omukuluntu. Okeithano lyaKalunga alike omuntu ta vulu okuninga omuyambi omukuluntu, ngaashi Aaron a li i ithanwa.
5 Osho tuu naKristus ini ikuthila esimano lyokuninga omuyambi omukuluntu, ihe okwa lombwelwa kuKalunga: “Ongoye omumwandje, onena ndjika nda ningi Ho.”
6 Okwa ti wo pehala lilwe: “Ngoye oto ka ninga omuyambi gwaaluhe palandulathano lyaMelkisedek.”
7 Jesus mokukalamwenyo kwe kombanda yevi okwa galikana nokwi indile Kalunga nokulila nokukugila pombanda Kalunga, ngoka ta vulu oku mu hupitha meso. Kalunga okwe mu uvu omolweifupipiko nevuliko lye.
8 Ihe oye nando okwa li Omuna gwaKalunga, omahepeko oge mu longo okuvulika.
9 Oye sho a gwanitha ayihe, okwa ningi oluthithiya lwehupitho lyaaluhe, olyaayehe mboka taa vulika kuye.
10 Onkee Kalunga okwe mu lenge, a ninge omuyambi omukuluntu palandulathano lyaMelkisedek.
11 Otu na odhindji oku mu lombwela moshinima shika, ihe otu na uudhigu oku mu fatululila, oshoka ihamu uvu ko nuupu.
12 Omwa li mu na ethimbo lya gwana, mu longwe e tamu ningi aalongi, ihe nani natango omwa pumbwa okulongwa iilongwa yopetameko yomoohapu dhaKalunga. Nani omu na okunwa owala omahini, nando omwa li mu na okulya iikulya ya kola.
13 Kehe ngoka ta nu omahini, oye omunona natango. Ke na nando owino okuyoolola shoka shu uka nenge sha puka.
14 Iikulya ya kola oyaakuluntu, mboka yi ilonga noyi igilila okuyoolola shoka shu uka nenge sha puka.
1 Tu etheni iilongwa yopetameko yomuukriste, tse tu lalakaneni uukuluntu. Onkee itatu popi we iinima mbyoka yetameko ngaashi iilonga yaa na oshilonga, eitaalo okwiitaala Kalunga,
2 omalongo gomashasho, omatenteko giikaha, eyumuko lyaasi nepangulo lyahugunina.
3 Tu humeni komeho! Eeno, osho twa hala okuninga, Kalunga ngele te shi tu pitikile.
4 Oshoka mboka ya shuna monima, otaa itedhululithwa we tuu? Oyo oya li muuyelele waKalunga. Oya makele iikulya yomegulu noya pelwe Ombepo Ondjapuki.
5 Oya li ya makele uutoye woohapu dhaKalunga noya li yu uvite oonkondo dhomuuyuni mboka tau ke ya.
6 Sho ya shuna monima, itaa vulu we okwiitedhululithwa, oshoka oyo otaa alele natango Omuna gwaKalunga komushigakano noku mu sitha ohoni montaneho yaayehe.
7 Kalunga ota yambeke epya ndyoka tali lokwa olwindji komvula notali meneke iimeno yo opalela aalongi yalyo.
8 Ihe ngele tali meneke oongwena noondjoho, otali thingwa e tali yonwa po nomulilo.
9 Ookuume aaholike, nando tatu popi ngeyi, otwe mu inekela natango. One omu na omayambeko omawanawa tage mu fala mehupitho.
10 Kalunga oku shi kwiinekelwa. Ita dhimbwa iilonga nohole yeni mokusimanekitha edhina lye, sho hamu yakula aakriste ooyakweni.
11 Otwa hala unene, kehe gumwe gwomune a dhiginine okukala ta lalakana sigo okehulilo, opo a adhe shoka a kala e shi tegamena.
12 Tse inatu hala, mu kale aananyalo, ihe holeleni mbeyaka yi itaale noyi idhidhimike, sigo ya pewa shoka Kalunga e shi uvaneka.
13 Kalunga sho u uvanekele Abraham euvaneko, okwa gana kutya ote li tsakanitha. Sho kaapwa li ngoka omunene e mu vule, oye okwa gana kedhina lye mwene.
14 Oye okwa ti: “Otandi ku uvanekele kutya otandi ke ku yambeka e tandi ku pe oluvalo olwindji.”
15 Abraham okwi idhidhimike e ta pewa shoka Kalunga e mu uvanekela.
16 Uuna omuntu ta gana, oha longitha edhina lyaangoka e mu vule, negano otali hulitha po omaludhi gawo.
17 Kalunga okwa li a hala okuyelithila nawa mboka ya pewa euvaneko lye kutya ita ka lundulula nando edhiladhilo lye. Onkee okwe li koleke negano.
18 Oku na iinima mbika iyali mbyoka tayi holola kutya Kalunga iha lundulula ye iha fundju. Onkee ano tse mboka twa mono egameno muye, otwa tsuwa omukumo omunene, opo tu tegamene shoka shi li komeho.
19 Etegameno ndika lyetu olya kwata lya dhiginina oomwenyo dhetu. Otatu yi nalyo, sigo twa piti metopolitho lyotempeli yomegulu e tatu yi muuyapukielela,
20 moka Jesus a tetekele okuya mo molwetu. Oye okwa ningi omuyambi omukuluntu sigo aluhe palandulathano lyaMelkisedek.
1 Melkisedek nguka okwa li omukwaniilwa gwaSalem nomuyambi gwaKalunga gwokombandambanda. Abraham sho a li ta zi kiita, hoka a sindi aakwaniilwa mbeyaka, Melkisedek okwe mu tsakaneke nokwe mu yambeke.
2 Abraham okwe mu pe oshitimulongo shomiinima mbyoka e yi kwata miita. Edhina ndika Melkisedek otali ti “Omukwaniilwa guuyuuki”, ihe molwaasho okwa li omukwaniilwa gwaSalem, edhina lye otali ti ishewe “Omukwaniilwa gwombili”.
3 Melkisedek nguka ke na he, ye ke na yina nenge ezimo; ko inaku tumbulwa wo evalo lye neso lye. Okwa yelekwa nOmuna gwaKalunga: Oye ota kala omuyambi sigo aluhe.
4 Ano mpaka omu wete kutya Melkisedek okwa li omuntu omunene. Onkee kuku Abraham okwe mu pe oshitimulongo shomiinima mbyoka e yi kwata miita.
5 Aayambi ayehe yomezimo lyaLevi oya lombwelwa kompango, ya pule mAaisraeli oshitimulongo. Oyo otaye shi pula maakwawo, nando nayo wo oyomoluvalo lwaAbraham.
6 Melkisedek ye mwene ka li gwomezimo lyaLevi, ihe okwa pewa oshitimulongo kuAbraham nokwa yambeke Abraham tuu ngoka a pewa omauvaneko kuKalunga.
7 Osha yela kutya ngoka a yambeke mukwawo, oku na esimano li vule lyaangoka a yambekwa.
8 Aayambi mboka taa pula iitimulongo, ohaa si, ihe Melkisedek ngoka a pula wo iitimulongo, ina sa, ongaashi enyolo tali ti.
9 Abraham sho a gandja oshitimulongo, aanezimo lyaLevi oye shi gandja wo.
10 Oshoka uuna ndwiyaka Abraham a tsakaneke Melkisedek, Levi ka li a valwa natango.
11 Pautho lyompango Aaisraeli oya li ye na okudhiginina uuyambi wopaLevi. Iilonga yaayambi Aalevi ando oya li ya gwana, ando kakwa li kwa pumbiwa we omuyambi gulwe, e ye palandulathano lyaMelkisedek, halyopaAron.
12 Oshoka muuyambi sho mwe ya elunduluko, nomompango wo omu na okulunduluka.
13 Oshoka Omuwa gwetu ngoka ta popiwa mpaka, ke shi gwomezimo lyaayambi, nokakwa li nando ogumwe gwomezimo lye a li moshilonga shuuyambi.
14 Omuwa gwetu okwa tseyika nawa kutya okwa zi mezimo lyaJuda, ndyoka Moses inee li tumbula nando, sho a popi aayambi.
15 Oshinima ngashingeyi oshe ya puuyelele: Opwe ya omuyambi gulwe a fa Melkisedek.
16 Nguka ina ningwa omuyambi kaantu nenge komalombwelo gaantu, ihe okwa ningi omuyambi koonkondo oonamwenyo ndhoka kaadhi na ehulilo.
17 Oshoka enyolo otali ti: “Ongoye to ka ninga omuyambi gwaaluhe ngaashi Melkisedek.”
18 Ano ompango onkulu oya dhimwa po, oshoka kayi na we oonkondo, oya kulupa.
19 Oshoka ompango yaMoses inayi vula okugwanitha sha. Onkee ano ngashingeyi opwa tulwa etegameno ewanawalela, mundyoka tatu hedha kuKalunga.
20 Okwa gwedhwa wo okugana kwaKalunga. Nale inaku ningwa egano lya tya ngeyi, uuna aayambi mbeyaka ya langekwa moshilonga.
21 Ihe Jesus okwa ningi omuyambi koonkondo dhegano, uuna Kalunga e mu lombwele a ti: “Omuwa okwa gana, ita lundulula we edhiladhilo lye: ‘Ongoye to ka ninga omuyambi gwaaluhe.’ ”
22 Ano eyooloko ndika otali ningi Jesus a kale omugameni gwehangano ewanawa li vule ndiyaka.
23 Ope na wo eyooloko ekwawo: Aayambi mbeyaka yalwe oya li oyendji, oshoka oya si noinaa vula okutsikila iilonga yawo.
24 Ihe Jesus oku na omwenyo sigo aluhe, onkee oshilonga she shuuyambi itashi kuthwa po kugulwe.
25 Onkee ota vulu aluhe okuhupitha mboka taye ya kuKalunga taa pitile muye. Oshoka oku na omwenyo aluhe note ya galikanene koshipala shaKalunga.
26 Ano Jesus oye omuyambi omukuluntu ngoka te tu gwanithile oompumbwe dhetu. Oye omuyapuki, ke na nando oshipo nenge oondjo. Oye okwa kuthwa maantu nokwa yeluthilwa kombandambanda megulu.
27 Oye ina fa aayambi yalwe mboka haa yamba esiku kehe, tango omolwoondjo dhawo yene, opo ihe dhaantu yalwe. Ihe Jesus okwa yamba eyambo lumwe aluke, sho i igandja ye mwene.
28 Aantu mboka ya hogololwa pampango yaMoses, ya ninge aayambi aakuluntu, oya li aankundi. Ihe okugana kwaKalunga hoka kwa ningwa hugunina yompango, okwa langeke Omwana ngoka ta kala a gwana a pwa sigo aluhe.
1 Ehuku lyaashoka tatu popi olyo ndika: Tse otu na omuyambi omukuluntu a tya ngaaka, ngoka a kuutumba kolulyo lwoshipangelapundi shOmunankondo megulu.
2 Oye ota longo oshilonga shuuyambi muuyapukielela kokutya, motempeli yoyene ndjoka ya tungwa kOmuwa, hakomuntu.
3 Omuyambimukuluntu kehe okwa langekwa, a kale ta yambele Kalunga omagano nomayambo giinamwenyo. Onkee ano nomuyambi gwetu omukuluntu Jesus okwa li e na okukala e na sha shoka ta yamba.
4 Ando okwa li kombanda yevi, ando ke shi nando omuyambi, oshoka aayambi mboka haa yamba omagano pampango yAajuda, oko ye li.
5 Iilonga yuuyambi mbyoka taa longo oyo efano nomuzizimba gwaashoka shi li megulu. Ngaashi naanaa Moses a li a lombwelwa kuKalunga pokutunga etsali, sho a ti: “Tala nawa, opo u longe ashihe palupe lwefano ndyoka u ulukilwa kondundu.”
6 Ihe Jesus okwa pewa oshilonga shuuyambi oshinene shi vule shawo, ngaashi wo ehangano ndyoka a longekidha pokati kaKalunga naantu, oli vule ndiyaka, oshoka olyi ikwatelela komauvaneko omawanawalela.
7 Oshoka ehangano lyotango ando olya li lya gwana, ando inaku pumbiwa we etiyali.
8 Onkee Kalunga ota gandja uusama kaantu ye, sho ta ti: “Omasiku otage ya, Omuwa osho ta ti, uuna tandi ka dhika ehangano epe pokati ketu nAaisraeli nonezimo lyaJuda.
9 Ndika itali yelekwa nehangano ndyoka nda ningile noohekulu, sho nda li nde ya hili mokwaako e tandi ya tembudha muEgipiti. Ihe inaa dhiginina ehangano lyetu nayo. Onkee onde ya etha, Omuwa osho ta ti.
10 Ndika olyo ehangano ndyoka tandi ka ninga nAaisraeli konima yomasiku ngoka, Omuwa sho ta ti: Ompango yandje otandi ke yi tula momadhiladhilo gawo, notandi ke yi nyolela momitima dhawo. Otandi ka ninga Kalunga kawo, nayo otaa ka ninga aantu yandje.
11 Kape na nando ogumwe ta ka longa omukwashigwana she, po pwaa na ngoka ta ka lombwela omungandjawo ta ti: ‘Tseya Omuwa,’ oshoka ayehe otaa ka tseya ndje okuza komudhinwa sigo okomunenentu.
12 Otandi ke ya sila ohenda e tandi dhimi po omayono gawo, noitandi ka dhimbulukwa we oondjo dhawo.”
13 Kalunga mokupopya ehangano epe, lyotango okwe li tala kutya olya kulupa; naashoka sha kulupa nosha mana ko ethimbo lyasho, otashi ka hula po mbala.
1 Ehangano lyotango olya li wo li na omautho gelongelokalunga notempeli ya tungwa kaantu.
2 Etsali olya li lya dhikwa ngeyi; moshinyanga shoka hashi thikilwa nosha li hashi ithanwa uuyapuki, omwa li mu na olamba, oshitaafula niikwiila mbyoka ya yambelwa Kalunga.
3 Konima yetopolitho etiyali okwa li ku na oshinyanga shoka hashi ithanwa Uuyapukilela.
4 Moshinyanga shika oshitiyali omwa li oshiyambelo shoshingoli shokufikila iitsinino, noshiketha shehangano shi na oshisha shoshingoli koombinga adhihe. Moshiketha shehangano omwa li mu na oshuma shoshingoli shi na omanna, nondhimbo yaAron ya li ya tutuma oonyapi oontalala, niipelende iyali yomamanya, moka mwa li mwa nyolelwa oohapu dhompango.
5 Kombanda yoshiketha okwa li ku na aakerubi ye na eadhimo, taa holola okukalapo kwaKalunga. Omawawa gawo oga li ga siikile ehala mpoka oondjo hadhi dhimwa po. Ihe ethimbo ndika halyo lyokufatulula iinima ayihe nawa.
6 Iinima mbika ayihe sho ya pwa okulongekidhwa, aayambi oya kala haa yi esiku kehe muuyapuki okulonga iilonga yuuyambi.
7 Ihe muuyapukielela ohamu yi omuyambi omukuluntu awike lumwe aluke momumvo. Oye oha yi mo nombinzi, e yi yambele Kalunga omolwoondjo dhe mwene nomolwoondjo ndhoka aantu ye dhi ninga mokwaashiwo.
8 Momalongekidho ngaka agehe Ombepo Ondjapuki otu ulukile lela aantu kutya ompito yokuya muuyapukielela itayi vulu okweeguluka, manga etsali lyotango li li po natango.
9 Ndika olyo efano tali ulike ethimbo lyongashingeyi. Shika otashi ti, omagano nomayambo giinamwenyo ngoka haga yambelwa Kalunga, itaga vulu okugundjilika omwenyo gwaangoka ta hedha kuKalunga.
10 Oge na sha owala nokulya nokunwa nomayelitho gi ili nogi ili gopalongelokalunga. Ogo agehe omautho gokombanda ge li po ashike okathimbo, sigo ethimbo ndyoka Kalunga ta ka shitulula iinima ayihe.
11 Ihe Kristus, omuyambi omukuluntu, okwe ya noku na uuwanawa auhe wiinima mbika tu wete. Etsali moka ta yakula, oli na esimano enene nolya gwana, kali shi oshinima shomeshito ndika.
12 Ano Kristus sho a pitile metsali, okwa yi lumwe aluke muuyapukielela. Ina ya mo okuyamba nombinzi yiikombo noyoontana, ihe okwa yi mo nombinzi ye mwene nokwe tu longele ekulilo lyaaluhe.
13 Ombinzi yiikombo noyoontsezi ohayi shashaminwa aantu mboka ya yono, nosho wo omutoko gwoontana ohagu gundwa kombanda yawo, notayi ya yelitha koonyata dhawo.
14 Ano unene ombinzi yaKristus otayi yelitha eiyuvo lyetu kiilonga iiwinayi, opo tu longele Kalunga omunamwenyo. Oshoka Kristus okwi igandja ye mwene kuKalunga koonkondo dhOmbepo yaaluhe, a ninge eyambo lya gwana lya pwa.
15 Osho ngeyi Kristus okwa longekidha ehangano epe, opo mboka yi ithanwa kuKalunga, ya vule okutaamba omayambeko gaaluhe ngoka Kalunga e ga uvaneka. Shika otashi vulika, oshoka eso lye olya mangulula aantu komayono gawo, manga ya li mehangano lyotango.
16 Mpoka pu na euvaneko lyuuthiga, otali kolekwa keso lyomuuvaneki.
17 Oshoka euvaneko lyuuthiga itali kwatha sha, manga omuuvaneki e na omwenyo, ihe otali longo owala ngele a si.
18 Onkee ano nehangano lyotango wo olya kolekwa ashike nokulongitha ombinzi.
19 Tango Moses okwa lombwele aantu iipango ayihe, ngaashi yi li membo lyompango. Opo ihe okwa kutha ombinzi yoontana noyiikombo nomeya e ta shashamine noshisopi nomafufu omatiligane embo lyompango nosho wo aantu ayehe.
20 Okwa ti: “Ombinzi ndjika otayi koleke ehangano ndyoka Kalunga e mu lombwele, mu vulike kulyo.”
21 Pamukalo nguka Moses okwa shashamine wo ombinzi kombanda yetsali nokiinima ayihe mbyoka hayi longithwa melongelokalunga.
22 Eeno, konyala ayihe yi yelithwe pampango kombinzi. Noondjo wo ohadhi dhimwa po owala, uuna pwa tika ombinzi.
23 Iinima mbika yokombanda yevi oyo efano lyaambiyaka yomegulu, onkee oyi na okuyelithwa pamukalo nguka. Ihe iinima yomegulu otayi yelithwa nomayambo ge vule ngaka.
24 Oshoka Kristus ina ya muuyapuki wa tungwa kaantu, mboka u li efano lyuuyapuki wo wene. Oye okwa yi megulu lyolyene, moka te tu popile koshipala shaKalunga.
25 Omuyambimukuluntu gwopaJuda oha yi omumvo kehe muuyapukielela nombinzi yiinamwenyo. Ihe Kristus ini igandja ye mwene olwindji.
26 Oshoka ando osho sha li ngawo, nena ando Kristus okwa li e na okuhepekwa olwindji okuza keshito lyuuyuni. Ihe okwa holoka lumwe aluke, pehulilo lyomathimbo, e ti igandja ye mwene, opo a kuthe po oondjo sigo aluhe.
27 Aantu ayehe oye na okusa lumwe aluke, e taku ya ihe epangulo lyaKalunga.
28 Pamukalo nguka Kristus okwa gandjwa wo, a ninge eyambo lumwe aluke, opo a kuthe po oondjo dhaantu. Oye ota ka holoka olutiyali, hakukutha po oondjo, ihe okuhupitha mboka ye mu tegelela.
1 Mompango yAajuda omu na owala efano lya dhimeya lyiinima iiwanawa tayi ke ya, ihe itali holola onkalo yoyene yiinima mbyoka. Onkee itayi vulu okuthikitha aantu megwano, nando taa hedha kuKalunga nomayambo gawo aluhe omumvo nomumvo.
2 Ando okwa li aantu mbeyaka ya li ya yelithwa lela koondjo dhawo, ando kaya li we ye na eiyuvo lyoondjo, nomayambo ando inaga pumbiwa we.
3 Ihe omayambo oge lile po okudhimbulutha aantu omumvo nomumvo oondjo dhawo.
4 Oshoka ombinzi yoontsezi noyiikombo kayi na mpoka nayi ka dhima po oondjo.
5 Onkee ano Kristus sho a li pokuya muuyuni, okwa ti kuKalunga: “Omagano nomayambo giinamwenyo ito ga pumbwa, ihe owa longekidhile ndje olutu.
6 Ongoye ito hokwa omayambo giinamwenyo haga lungunithilwa koshiyambelo, nenge omayambo gokukutha po oondjo.
7 Ongame nonda ti: ‘Ongame nguka, otandi ya okulonga ehalo lyoye, Kalunga, ongaashi sha nyolwa membo lyompango tashi popi ndje.’ ”
8 Tango Kristus okwa ti: “Omagano nomayambo giinamwenyo ito ga pumbwa, ngoye ito ga hokwa, osho wo omagano giinamwenyo haga lungunithilwa koshiyambelo nomayambo gokukutha po oondjo.” Okwa popi ngeyi, nando omayambo ngaka oga li haga yambwa pampango.
9 Opo ihe okwa ti ishewe: “Ongame nguka tandi ya okulonga ehalo lyoye, Kalunga.” Onkee ano Kalunga okwa kutha po omukalo omukulu gwokuyamba nokwa tula po eyambo lyaKristus peha lyagwo.
10 Onkee ano tse otwa yelithwa lumwe aluke koondjo molwaJesus Kristus, ngoka a gwanitha ehalo lyaKalunga, sho a yamba olutu lwe mwene.
11 Omuyambi kehe paShijuda oha longo a thikama mokulonga iilonga ye esiku kehe noha yamba omayambo ogo tuu ngoka olwindji. Ihe omayambo ngaka kage na mpoka naga ka kutha po oondjo.
12 Ihe Kristus sho a yamba omolwoondjo eyambo limwe lya gwanenena sigo aluhe, okwa kuutumba kolulyo lwaKalunga.
13 Ngashingeyi Kristus okwa tegelela, Kalunga a tule aatondi ye kohi yoompadhi dhe.
14 Neyambo limwe alike okwa yelitha sigo aluhe mboka ya yelithwa.
15 Ombepo Ondjapuki otayi tu hokololele kutya tango Kalunga okwa ti:
16 “Ndika olyo ehangano ndyoka tandi ke li ninga pokati ketu nayo, konima yomasiku ngoka, Omuwa osho ta ti: Ompango yandje otandi ke yi nyolela momitima dhawo, notandi ke yi tula momadhiladhilo gawo.”
17 Nokwa ti ishewe: “Itandi ka dhimbulukwa we oondjo niilonga yawo iiwinayi.”
18 Onkee ano inaku pumbiwa we omayambo gokukutha po oondjo, uuna ayihe mbika ya dhimwa po.
19 Aamwameme, ngashingeyi otu na ompito ya manguluka yokuthika muuyapukielela omolweso lyaJesus.
20 Oye okwe tu egululile osheelo oshipe shi na omwenyo, tashi pitile metopolitho, nokutya molutu lwe.
21 Ano otu wa omuyambi omunene nomuleli gwegumbo lyaKalunga.
22 Tu hedheni ano kuKalunga noomwenyo dha yela neinekelo lya kola, twa kuthwa eiyuvo lyoondjo notwa yogwa nomeya omayelele.
23 Tu dhiginineni okuhempulula nomukumo etegameno lyetu, oshoka Kalunga oku shi kwiinekelwa mokugwanitha omauvaneko ge.
24 Tu silathaneni oshimpwiyu, tu kwathathaneni mokuholathana nomokulongelathana uuwanawa.
25 Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.
26 Tse otwa tseyithilwa oshili. Opo ihe ngele otatu yono owina, nena kaku na we eyambo lyokudhima po oondjo.
27 Otu na owala okutegelela epangulo tali tilitha nomulilo gwa hanya tagu fike po aanandumbo naKalunga.
28 Omuntu ngoka itaa vulika kompango yaMoses, oha dhipagwa pwaa na ondjaalela, uuna eyono lye lya kolekwa koonzapo yaali nenge yatatu.
29 Otamu ti ngiini komuntu ngoka ta dhini Omuna gwaKalunga, ta tala ombinzi yehanganitho naKalunga ndjoka tayi mu yelitha ongoyaa na oshilonga, e ta sheke Ombepo yohenda? Egeelo oli thike peni ndyoka iilongela?
30 Oshoka otu mu shi ngoka a ti: “Ongame mwene tandi galulile omuntu uuwinayi we, ongame tandi mu geele;” nota ti ishewe: “Omuwa ota ka pangula aantu ye.”
31 Iihuna yowala okugwila miikaha yaKalunga omunamwenyo!
32 Dhimbulukweni ano okukala kweni kwonale. Pomasiku ngeyaka uuyelele waKalunga sho we mu minikile, omwa li mwa hepekwa kiinima oyindji, ihe inamu sindika.
33 Pomathimbo gamwe omwa popiwa nayi nomwa hepekwa montaneho yaayehe, ihe pomathimbo omakwawo omwa gama kumboka taa hepekwa pamukalo gwa tya ngaaka.
34 One omwa hepekwa pamwe noonkwatwa nomwi idhidhimike nenyanyu, uuna ndoka mwa yugwa omaliko geni. Oshoka omwa tseya kutya omu na sha shilwe oshiwanawa itashi hulu po.
35 Kaleni ano nokwiidhidhimika, oshoka eidhidhimiko oli na ondjambi onene.
36 Omu na okwiidhidhimika, opo mu gwanithe ehalo lyaKalunga ne mu pewe shoka e shi uvaneka.
37 Oshoka enyolo otali ti: “Oku na okathimbo okafupi kowala, ngoka e na okuya, ote ya ihe, ye ita kala ko.
38 Ihe aayuuki yandje otaa ki itaala ndje e taa kala ye na omwenyo. Naamboka taa shuna monima, itandi ya hokwa.”
39 Ihe tse katu lile po okushuna monima, tu ka kane, aawe, tse otatu itaale e tatu hupithwa.
1 Okukala tu na eitaalo otashi ti okukala tu na einekelo lya kola miinima mbyoka twa tegamena naambyoka itaatu vulu oku yi mona ngashingeyi.
2 Aantu mbeyaka yonale oya hokiwa kuKalunga omolwokwiitaala kwawo.
3 Okeitaalo alike tatu shi uvu ko kutya uuyuni owa shitwa nohapu yaKalunga, naashoka shi wetike osha ningwa mushoka shaa wetike.
4 Eitaalo olyo olya longitha Abel, a gandje omayambo omawanawa kuKalunga ge vule gaKain. Kalunga okwe mu hokwa omolweitaalo lye nokwe mu tala omuyuuki, sho a taamba omagano ge. Koonkondo dheitaalo Abel ota popi natango, nonando okwa sa.
5 Eitaalo olyo lya popile Enok, kaa se. Okwa kuthwa po kuKalunga ye ina monika nando okomuntu, oshoka Kalunga okwe mu fala megulu. Enyolo otali ti: Enok manga inaa kuthwa po, okwa li a hokiwa kuKalunga.
6 Kape na ngoka ta hokiwa kuKalunga, ngele ke na eitaalo. Oshoka ngoka te ya kuKalunga, oku na okukala i itaala kutya Kalunga oko e li nota futu ayehe mboka taye mu kongo.
7 Eitaalo olyo lya longitha Noa, a uve ko omalondodho gaKalunga taga popi iinima mbyoka tayi ke ya, ye ina vula oku yi mona. Noa okwa vulika kuKalunga e ta tungu onguluwato, moka a hupile pamwe naanegumbo lye. Osho ngeyi okwa pe uuyuni uusama nokwa pewa kuKalunga uuyuuki mboka tau zi mokwiitaala.
8 Eitaalo olyo lya longitha Abraham, a vulike, uuna ndoka Kalunga e mu ithana, nokwa tembukile koshilongo shoka Kalunga u uvaneke oku mu pa. Okwa tembuka mo moshilongo shaandjawo, ye ina tseya mpoka ta yi.
9 Koonkondo dheitaalo okwa kala a fa omukwiilongo moshilongo shoka Kalunga e mu uvanekela. Okwa kala momatsali gowala, nosho wo Isak naJakob, mboka Kalunga e ya uvanekela euvaneko tuu ndyoka.
10 Oshoka Abraham okwa li a tegelela oshilando shoka shi na omikanka dha kolelela, sha sindwa nosha tungwa kuKalunga mwene.
11 Eitaalo olyo lya ningi Abraham, a vule okuninga he yaIsak, nando okwa li a kulupa, naSara wo okwa li a adha ethimbo ndyoka itaa vulu we okumona okanona. Abraham okwi inekele Kalunga ngoka ha gwanitha shoka e shi uvaneka.
12 Nonando okwa li a kulupa, muye omwa ka za oluvalo olwindji lwa fa oonyothi dhokegulu nolwa nyengana okuyalula, ongomawe gehekevi lyopooha dhefuta.
13 Ootatekulu mbaka ayehe oya sile meitaalo. Oyo inaa mona iinima mbyoka Kalunga e yi ya uvanekela, ihe oye yi talele kokule noye yi nyanyukilwa. Oya dhimbulula kutya oyo oondjendi naakwiilongo kombanda yevi.
14 Mboka ya tumbula omatumbulo ga tya ngeyi, oye shi holola sha yela kutya inaya adha oshilongo shaandjawo.
15 Oyo inaa dhiladhila nando okushuna koshilongo hoka ya zile; nonando oya li ye na ompito oku shi ninga.
16 Ihe oya li ya yuulukwa koshilongo shoka oshiwanawa shomegulu. Onkee Kalunga ine ya idhimbika, sho taye mu ithana Kalunga kawo, oshoka okwe ya longekidhila oshilando.
17 Eitaalo olyo lya longitha Abraham, a gandje omwana Isak, a ninge eyambo, sho Kalunga a li e mu yeleke. Abraham oye tuu ngoka Kalunga e mu uvanekela euvaneko, ihe nando ongaaka, okwa li i ilongekidha okuyamba po epona lye.
18 Kalunga okwa li a lombwele Abraham a ti: “Oluvalo lwoye otalu ka za muIsak.”
19 Abraham okwa li u uvite kutya Kalunga ota vulu okuyumudha Isak nokuusi. Onkee otatu vulu okutya, Abraham okwa peululwa Isak a zi mokusa.
20 Eitaalo olyo lya longitha Isak, a tumbulile Jakob naEsau omayambeko ngoka tage ke ya.
21 Eitaalo olyo lya longitha Jakob, a yambeke aana yaJosef aamati, manga inaa sa. Oye okwi ikolelele kolwoondje lwe e ta galikana Kalunga.
22 Eitaalo olyo lya longitha Josef, a popye pokusa kwe etembu lyAaisraeli lyokuza muEgipiti nokwe ya lombwele kutya oye na okuninga ngiini omudhimba gwe.
23 Eitaalo olyo lya longitha aakuluntu yaMoses, ye mu holeke oomwedhi ndatu, sho a valwa. Oya mono kutya okanona okawanawa, yo inaa tila oshipango shomukwaniilwa.
24 Eitaalo olyo lya longitha Moses, sho a koko a vule okutinda kutya ke shi omuna gwomukadhona omuna gwaFarao.
25 Okwa hogolola po okuhepekwa pamwe naantu yaKalunga, ye ina zimina uutoye wuulunde wokathimbo kowala.
26 Oye okwa dhimbulula kutya okuhumbata ondhino omolwOmugwayekwa gwaKalunga oshi vule omauyamba agehe gomuEgipiti, oshoka okwa li e wete ondjambi ndjoka ta ka pewa konakuyiwa.
27 Eitaalo olyo lya longitha Moses, a thige po Egipiti inaa tila ondjahi yomukwaniilwa. Moses okwa li e na omukumo ongaangoka a mono Kalunga, nando iha monika.
28 Eitaalo olyo lya longitha Moses, opo a dhike Opaasa nokupopya kutya ombinzi oyi na okugwayekwa komiyelo dhomagumbo, opo omuyengeli gweso kaa vule okudhipaga po iisheeli yAaisraeli.
29 Eitaalo olyo lya kumike Aaisraeli, ya vule okutaaguluka Efuta etiligane ya fa taa ende puukukutu, Aayegipiti sho ya yelekele oku shi ninga, oya siikilwa komeya e taa si.
30 Eitaalo olyo lya teyitha po omakuma goshilando shaJeriko, Aaisraeli sho ye shi dhingoloka omasiku gaheyali.
31 Eitaalo olyo lya gamene ohonda Rahab, kaa dhipagwe pamwe naanandumbo naKalunga, oshoka okwa hupithitha oondaadhi.
32 Nandi tsikile ko natango? Kandi na ethimbo lya gwana okuhokolola Gideon, Barak, Simson, Jefta, David, Samuel naahunganeki.
33 Omolweitaalo oya kondjitha iilongo e taa yi sindi. Oya longo shoka shu uka noya gwanithilwa omauvaneko gaKalunga. Oya mutike omakana goonime,
34 oya dhimi omaziko gomililo dha hanya noya henuka omagongamwele. Oyo oya kala ya fa kaaye na oonkondo, ihe oya ningi oofule molugodhi noya sindi omatanga gaakwiita aakwiilongo.
35 Omolweitaalo aakiintu yamwe oya yumudhilwa oonakusa yawo. Yamwe oya si komahepeko, sho ya tindi okutaamba emangululo, oshoka oya li taa tegelele okufalwa momwenyo omupe.
36 Yamwe oya shekwa e taa dhengwa noongola, yamwe oya mangwa nomalyenge e taa tulwa mondholongo.
37 Yamwe oya dhipagwa nomamanya, yamwe oya tetwa pokati nayamwe oya dhipagwa negongamwele. Oye endagula ya zala iipa yoonzi noyiikombo, oya si oluhepo, oya tidhaganwa e taa monithwa iihuna.
38 Uuyuni kawa li nando uuwanawa kuyo. Oyo oya li taa alaala moombuga nomoondundu noya kala momakololo nomoombogo dhevi.
39 Aantu ayehe mboka oya pandulwa molweitaalo lyawo, ihe onkee tuu inaa mona egwanitho lyeuvaneko lyaKalunga.
40 Oshoka Kalunga okwa li e tu nine edhiladhilo lilwe ewanawa. Olyo ndika: oyo otaa ka mona owala egwano pamwe natse.
1 Ano sho tu na oshiholelwa shongundu onene yi thike mpoka yoonzapo dheitaalo ye tu kunkidha, nena natse wo tu etheni kehe shoka sha hala oku tu kata, nuulunde ihaau lwedha oku tu idhingila. Natu matukeni twa mana mo methigathano ndyoka li li komeho getu.
2 Tu taleni kuJesus hoka kwi ikwatelela eitaalo lyetu okuza petameko sigo opehulilo. Oye ina hulila ondjilakati, ihe omolwenyanyu ndyoka lya li lye mu tegelela okwi idhidhimikile esheko nokwa si eso lyokomushigakano. Ngashingeyi okwa kuutumba kolulyo lwoshipangelapundi shaKalunga.
3 Dhiladhileni, aantu aalunde nkee ya kondjitha Jesus. Inamu etha, mu kanithe omukumo nenge mu hulile ondjilakati.
4 Oshoka mokukondjitha uulunde natango inamu kondja sigo eso.
5 Aana yaKalunga, omwa dhimbwa oohapu dhaKalunga ndhoka tadhi mu tsu omukumo? “Mumwandje, ino dhina egeelo lyOmuwa, ino kanitha omukumo, uuna te ku nyenyetele.
6 Oshoka Omuwa oha geele kehe ngoka e holike kuye, noha dhenge omuntu kehe ngoka te mu taamba, a ninge omwana.”
7 Idhidhimikileni omageelo agehe ngaashi gaho, oshoka Kalunga ota kala nane ngaashi e li noyana. Oku na tuu omunona ngoka ihaa dhengwa kuhe?
8 Ngele itamu putudhilwa mumwe noyana, nena otashi ti kamu shi oyanalela, ihe aana yuulunde.
9 Ootate yokombanda yevi sho ye tu geele, otwe ya simaneke. Unene ano otu na okuvulika kuTate gwomegulu, opo tu kale tu na omwenyo.
10 Ootate yokombanda yevi oye tu geele okathimbo okafupi kowala, ngaashi ye shi tala sho opala. Ihe Kalunga ote shi ningi omoluuwanawa wetu yene, opo tu kale tu na sha shuuyapuki we.
11 Pethimbo ndyoka tatu geelwa, kombinga yetu kashi shi enyanyu, aawe, oluhodhi, ihe konima yethimbo mboka ya putudhwa kegeelo ndyoka, otaa ka mona ombili omolwokukalamwenyo kwawo kwo opalela Kalunga.
12 Yelutheni ano omaako geni ga vulwa ne mu koleke oongolo dheni dha loloka.
13 Tsikileni okweenda moondjila dhu ukilila, opo ompadhi ndjoka ya lemana yaa dhomoke, ihe yi vule okwaaludhwa.
14 Kambadhaleni okukala nombili naantu ayehe, ne mu lalakanene okukala aayapuki, oshoka kaku na nando ogumwe ta ka mona Omuwa, ngele ke li ngaaka.
15 Kotokeni, kwaa kale nando ogumwe ta pilamene esilohenda lyaKalunga. Kotokeni, kwaa kale nando ogumwe ta kala a fa oshimeno oshilulu tashi koko e tashi yono po oyendji nuuzigo washo.
16 Kotokeni, kwaa kale ngoka ta ningi omuholume nomulunde ngaashi Esau, ngoka a landitha po uuthemba we okukala omukuluntu kumukwawo omolwokulya kumwe akuke.
17 Ne omwa tseya, nkene a ka kala a hala eyambeko lyahe ye ina ziminwa, oshoka ina mona we ompito yokulundulula shoka a ningi, nonando okwe shi pula nomahodhi.
18 Oshoka ne inamu ya pondundu ya fa ndjoka mpoka pwa li Aaisraeli, ondundu yaSinai ndjoka to vulu oku yi guma, ondundu ya hwama omulilo, yi na omilema etsitsiya nombepo yoshikungulu,
19 ku na ehiko lyenkuma neigidho enene. Aaisraeli sho yu uvu eigidho ndyoka, oyi indile, ya thitike omakutsi gawo,
20 oshoka inaa vula okupulakena elombwelo ndyoka tali ti: “osho wo oshinamwenyo tashi gumu ondundu ndjika, oshi na okudhipagwa nomamanya.”
21 Emoniko ndyoka olya li etilithi, onkee Moses okwa ti: “Onda tila e te kakama.”
22 Ihe ne omwe ya kondundu yaSion nokuJerusalem shomegulu, oshilando shaKalunga omunamwenyo, shi na aayengeli yomayuvi ogendji.
23 Omwe ya kegongalo lyaanyanyukwi, lyaana aatango yaKalunga, oomboka omadhina gawo ga nyolelwa membo lyomegulu. Omwe ya kuKalunga, omupanguli gwaantu ayehe, nokoombepo dhaayuuki mboka ya thika kegwano.
24 Omwe ya kuJesus, omuyakuli mehangano epe, nokombinzi ya shashamenwa tayi popi ehokololo li vule ndyoka lyombinzi yaAbel.
25 Kotokeni, mwaa tinde okupulakena ngoka ta popi, oshoka mbeyaka sho ya tindi okupulakena oohapu dhaanguka gwomuuyuni, inaa vula okuya ontuku. Ano unene tse otatu vulu ngiini okuya ontuku, ngele tatu pilamene oohapu dhaKalunga, ngoka ta popi e li megulu?
26 Pethimbo ndiyaka oohapu dhe odha kakamithile evi, ihe ngashingeyi oku uvaneke ta ti: “Itandi ka kakamitha owala evi lumwe ishewe, ihe negulu wo.”
27 Iitya mbika “lumwe ishewe” otayi holola nawa kutya iishitwa ayihe otayi ka kakamithwa e tayi shitululwa, naambyoka itaayi ka kakamithwa, otayi ka kala yi li ngaashi yi li.
28 Tu hambeleleni, sho tu na oshilongo ihaashi kakama. Tu panduleni, tse tu longeleni Kalunga pamukalo ngoka gwe mu opalela, tu na esimaneko netilo;
29 oshoka Kalunga ketu oye omulilo hagu lungunitha.
1 Kaleni mu holathane, oshoka one aamwayinathana muKristus.
2 Inamu dhimbwa okutaamba aayenda momagumbo geni. Okwa li ku na mboka ye shi ningi e taa taamba aayengeli inaaye shi tseya.
3 Dhimbulukweni mboka ye li moondholongo, mu kale mwa fa mu li nayo. Dhimbulukweni mboka taa hepekwa, mu kale mwa fa tamu hepekwa pamwe nayo.
4 Oondjokana nadhi simanekwe kaantu ayehe, naanandjokana naa kale yi inekelathana. Kalunga ota ka pangula mboka ye hole oluhondelo nuuholume.
5 Mokukala kweni inamu mangwa kohole yeliko, ihe kaleni mwa gwana naashoka mu na. Oshoka Kalunga okwa ti: “Itandi ku etha nando; itandi ku thigi po.”
6 Onkee ano tu kaleni tu na omukumo, tse tu tye: “Omuwa oye omukwathi gwandje, itandi tila sha. Omuntu ota ningi ndje shike?”
7 Dhimbulukweni aawiliki yeni mboka ye mu uvithile oohapu dhaKalunga. Dhiladhileni, nkene ya li ya kala nonkene ya hulitha oondjenda dhawo, ne mu holele eitaalo lyawo.
8 Jesus Kristus iha lunduluka, oku li ngaashi a li ohela, nosho ta kala nena nosigo aluhe.
9 Inamu pukithwa komalongo galwe mwaa ga shi. Osho oshinima oshiwanawa, oomwenyo dheni ngele tadhi kolekwa kesilohenda lyaKalunga, hakokuvulika koompango dhokombinga yiikulya; mboka haa vulika koompango dha tya ngeyi, inadhi ya kwatha sha.
10 Aayambi Aajuda mboka haa yakula metsali, itaa vulu okulya omayambo gomoshiyambelo shika shetu.
11 Omuyambimukuluntu Omujuda ohe eta ombinzi yiinamwenyo muuyapukielela, opo e yi yambe molwoondjo; ihe omalutu giinamwenyo ohaga fikilwa kondje yontanda.
12 Onkee ano Jesus wo okwa sile kondje yeelo lyoshilando, opo a yelithe aantu koondjo dhawo nombinzi ye mwene.
13 Tu yeni ano kuye kondje yontanda, tu ka shekwe pamwe naye.
14 Oshoka kombanda yevi katu na ko oshilando tashi kalelele; tse otatu kongo oshilando shoka tashi ke ya.
15 Tu hambeleleni ano Kalunga aluhe, shi ninge eyambo lyetu molwaJesus nokutya, tu panduleni edhina lye noku mu imbila.
16 Inamu dhimbwa okulonga uuwanawa nokukwathathana, oshoka omayambo ga tya ngeyi oga hokiwa kuKalunga.
17 Vulikeni kaawiliki yeni, ne mu landule omalombwelo gawo. Ohaa tonatele oomwenyo dheni yaa na evululuko, oshoka otaa ke dhi pulwa kuKalunga. Ngele otamu vulika, nena otaa longo iilonga yawo nenyanyu, ihe ngele hasho, nena otaa longo neyeme, naashika itashi mu kwatha sha.
18 Dhiginineni oku tu galikanena. Tse otu na eiyuvo lya yela, oshoka otwa hala aluhe okulonga shoka shi li mondjila.
19 Unene otandi mu indile, mu galikanene ndje, opo Kalunga a tume ndje kune ishewe mbala.
20 Kalunga oye a yumudha Omuwa gwetu Jesus kuusi. Jesus, Omusita omukuluntu gwoonzi, okwa koleke neso lye ehangano lyaaluhe.
21 Ihe Kalunga kombili ne mu pe ayihe mbyoka mwa pumbwa, opo mu vule okugwanitha ehalo lye. Kalunga na longe mutse shoka sho opalela ehalo lye omolwaJesus Kristus, ngoka e na okusimanekwa aluhe sigo aluhe. Amen.
22 Aamwamene, otandi mu indile, mu taambe neidhidhimiko oohapu ndhika dhomakumagidho, oshoka ontumwafo ndjika nde mu nyolele, kayi shi onde unene.
23 Otandi mu tseyithile kutya omumwameme Timoteus okwa mangululwa mo mondholongo. Ngele okwe ya huka mbala, otatu ke ya naye, tu mu talele po.
24 Kundilii po aawiliki yeni ayehe nosho wo aantu yaKalunga ayehe. Aakriste ooyakweni yomuItalia otaye mu kundile po.
25 Esilohenda lyaKalunga nali kale nane amuhe.